ᠪᠠᠲᠤ ᠬᠠᠭᠠᠨ 2-16ᠠᠶᠤᠯᠲᠤ ᠰᠥᠨᠢ-ᠪᠠᠲᠤ ᠬᠠᠭᠠᠨ ᠥᠷᠥᠨᠡ ᠵᠦᠭ ᠲᠦ᠍ ᠬᠥᠳᠡᠯᠦᠯᠡ-Bat khaan Бат хаан-ᠷᠣᠮᠠᠨ
253ᠠᠷᠪᠠᠨ ᠵᠢᠷᠭᠤᠭᠠ ᠠᠶᠤᠯᠲᠤ ᠰᠥᠨᠢ
ᠦᠳᠡᠰᠢ ᠪᠣᠯᠬᠤ ᠳ᠋ᠤ᠌ ᠲᠡᠭᠷᠢ ᠤᠯᠠᠮ ᠮᠠᠭᠤᠳᠠᠭᠰᠠᠭᠠᠷ ᠢᠵᠢᠯ ᠮᠥᠷᠡᠨ ᠣᠪᠣᠯᠵᠠᠵᠤ ᠳᠠᠪᠠᠯᠭᠠᠨ ᠨᠢ ᠡᠷᠭᠢ ᠪᠡᠨ ᠡᠪᠳᠡᠯᠡᠨ ᠴᠣᠬᠢᠬᠤ ᠳ᠋ᠤ᠌ ᠰᠠᠯᠬᠢ ᠠᠰᠠᠷ ᠤ᠋ᠳ ᠢ᠋ ᠰᠡᠭᠰᠡᠴᠢᠨ ᠤᠰᠤᠨ ᠳ᠋ᠤ᠌ ᠬᠠᠶᠠᠬᠤ ᠶ᠋ᠢ ᠣᠷᠣᠯᠳᠣᠬᠤ ᠰᠢᠭ᠋ ᠪᠠᠢᠯᠠ᠃ ᠪᠣᠷᠣᠭᠠᠨ ᠤ᠋ ᠤᠰᠤ ᠲᠠᠲ᠋ᠠᠷ ᠤ᠋ᠨ ᠯᠠᠭ᠌ᠸᠷ ᠢ᠋ ᠠᠪᠴᠠᠢ᠃ ᠬᠥᠨᠥᠭᠡᠯᠲᠦ ᠣᠷᠣᠰ ᠤ᠋ᠨ ᠮᠠᠩᠭᠤᠰ ᠨᠠᠷ ᠢ᠋ ᠴᠡᠷᠢᠭ ᠦ᠋ᠳ ᠬᠠᠷᠢᠶᠠᠵᠤ ᠰᠢᠭᠤᠷᠭᠠ ᠰᠢᠭᠤᠷᠭᠠᠯᠠᠵᠤ ᠪᠢᠳᠡᠨ ᠢ᠋ ᠤᠭᠲᠤᠪᠠ ᠭᠡᠵᠦ ᠵᠠᠨᠤᠵᠠᠭᠠᠵᠤ ᠪᠠᠢᠯᠠ᠃ ᠠᠰᠠᠷ ᠤ᠋ᠨ ᠳᠣᠲᠣᠷᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ
ᠬᠦᠢᠲᠡᠨ ᠨᠣᠢᠲᠠᠨ ᠪᠣᠯᠤᠭᠠᠳ ᠤᠢᠳᠬᠠᠷᠲᠠᠢ᠂ ᠳᠡᠭᠡᠷᠡᠬᠢ ᠣᠩᠭᠣᠷᠬᠠᠢ ᠶ᠋ᠢ ᠢᠰᠡᠭᠡᠢ ᠪᠡᠷ ᠪᠢᠲᠡᠭᠦᠯᠡᠪᠡᠴᠦ ᠭᠡᠷᠡᠯᠲᠦᠭᠦᠯᠬᠦ ᠵᠤᠯᠠ ᠶ᠋ᠢᠨ ᠲᠠᠯᠪᠢᠭᠤᠷ ᠤ᠋ᠳ ᠰᠠᠯᠬᠢᠨ ᠤ᠋ ᠦᠯᠢᠶᠡᠬᠦ ᠲᠣᠭᠠ ᠪᠠᠷ ᠭᠠᠩᠬᠤᠯᠵᠠᠭᠠᠳ ᠴᠡᠴᠡᠷᠡᠭᠰᠡᠨ ᠤᠷᠲᠤ ᠰᠡᠭᠦᠳᠡᠷ ᠬᠠᠨᠠ ᠳ᠋ᠤ᠌ ᠳᠤᠰᠤᠭᠰᠠᠭᠠᠷ ᠪᠠᠢᠯᠠ᠃ ᠠᠷᠠᠫᠱᠠ ᠠᠰᠠᠷ ᠤ᠋ᠨ ᠳᠡᠷᠭᠡᠳᠡᠭᠦᠷ ᠮᠠᠨᠠᠭᠠ ᠶ᠋ᠢ ᠰᠢᠯᠭᠠᠵᠤ ᠦᠵᠡᠬᠦ ᠪᠡᠷ ᠶᠠᠪᠤᠵᠠᠢ᠃ ᠶᠠᠪᠤᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠣᠯᠤᠨ ᠬᠠᠷᠠᠩᠭᠤᠢ᠂ ᠬᠣᠶᠠᠷ ᠠᠯᠬᠤᠮ ᠤ᠋ᠨ ᠴᠠᠭᠠᠨᠠ ᠶᠠᠭᠤ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠠᠳ ᠰᠠᠯᠬᠢ ᠬᠥᠯ ᠢ᠋ ᠨᠢ ᠲᠤᠢᠪᠠᠭᠤᠯᠤᠨᠠ᠃
— ᠲᠣᠭᠰᠢᠨ ᠰᠥᠨᠢ ᠪᠣᠯᠭᠣᠮᠵᠢᠯᠠᠬᠤ ᠬᠡᠷᠡᠭᠲᠡᠢ᠃ ᠡᠢᠮᠦ ᠰᠥᠨᠢ ᠳ᠋ᠦ᠍ ᠳᠠᠢᠰᠤᠨ ᠳᠤᠷᠠᠲᠠᠢ ᠭᠡᠲᠡᠬᠦ ᠶ᠋ᠢ ᠠᠷᠠᠫᠱᠠ ᠴᠡᠷᠢᠭ ᠦ᠋ᠳ ᠲᠦ᠍ ᠬᠡᠯᠡᠭᠡᠳ ᠪᠠᠲᠤ ᠬᠠᠭᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠪᠠ᠃
ᠪᠠᠲᠤ ᠬᠠᠭᠠᠨ ᠦᠰᠦᠯᠢᠭ ᠠᠷᠠᠰᠤᠨ ᠳᠡᠭᠡᠷᠡ ᠰᠠᠭᠤᠵᠤ ᠥᠪᠡᠷ ᠦ᠋ᠨ ᠦᠨᠡᠨᠴᠢ ᠵᠥᠪᠯᠡᠬᠦ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠠᠢ ᠵᠥᠪᠯᠡᠬᠦ ᠲᠤᠯᠠ ᠠᠷᠠᠫᠱᠠ ᠬᠦᠨᠳᠦᠳᠬᠡᠯ ᠦ᠋ᠨ ᠵᠢᠷᠤᠮ ᠢ᠋ᠶ᠋ᠠᠷ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠵᠠᠢ᠃
— ᠣᠷᠣᠰ ᠤ᠋ᠨ ᠲᠣᠭᠰᠢᠨ ᠲᠩᠷᠢ ᠮᠠᠨ ᠤ᠋ ᠪᠠᠶᠠᠷ ᠢ᠋ ᠳᠣᠬᠢ ᠦᠭᠡᠢ ᠪᠣᠯᠭᠠᠪᠠ ᠭᠡᠬᠦ ᠵᠡᠷᠭᠡ ᠪᠡᠷ ᠪᠠᠲᠤ ᠬᠠᠭᠠᠨ ᠬᠦᠦᠷᠨᠢᠨ ᠶᠠᠷᠢᠵᠤ ᠪᠠᠢᠯᠠ᠃
—ᠲᠡᠳᠡ ᠨᠠᠷ ᠰᠢᠭᠤᠷᠭᠠ ᠰᠢᠮᠠᠷᠭᠠ ᠬᠥᠳᠡᠯᠭᠡᠨ ᠮᠢᠨᠦ ᠵᠣᠷᠢᠭᠲᠤ ᠪᠠᠢᠯᠳᠤᠭᠴᠢᠳ ᠪᠣᠯᠤᠨ ᠪᠢᠳᠡ ᠨᠠᠷ ᠢ᠋ ᠠᠶᠤᠯᠭᠠᠬᠤ ᠭᠡᠰᠡᠨ ᠪᠣᠯᠤᠯᠲᠠᠢ᠃ ᠪᠢᠳᠡ ᠨᠠᠷ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠵᠠᠷ ᠳᠡᠭᠡᠷᠡ ᠪᠡᠨ ᠣᠷᠣᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠦᠴᠦᠲᠡᠢ ᠰᠠᠯᠬᠢ ᠠᠰᠠᠷ ᠤ᠋ᠨ ᠬᠠᠨᠠ ᠶ᠋ᠢ ᠰᠡᠭᠰᠦᠷᠦᠭᠰᠡᠨ ᠳ᠋ᠦ᠍ ᠪᠠᠲᠤ ᠬᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ
— ᠡᠨᠡ ᠢᠵᠢᠯ ᠮᠥᠷᠡᠨ ᠦ᠌ ᠱᠤᠤᠭᠢᠵᠤ ᠪᠠᠢᠬᠤ ᠶ᠋ᠢ ᠰᠣᠨᠣᠰᠴᠤ ᠪᠠᠢᠨᠠ ᠤᠤ? ᠭᠡᠰᠡᠨ ᠴᠦ᠍ ᠪᠢᠳᠡ ᠲᠡᠭᠦᠨ ᠢ᠋ ᠭᠠᠲᠤᠯᠤᠭᠰᠠᠨ ᠶᠤᠮ ᠭᠠᠵᠠᠷ ᠳ᠋ᠠ᠃ ᠲᠡᠭᠡᠭᠡᠳ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ ᠲᠣᠳᠣᠬᠠᠨ ᠰᠣᠨᠣᠰᠳᠠᠬᠤ ᠳᠠᠪᠠᠯᠭᠠᠨ ᠤ᠋ ᠱᠤᠤᠭᠢᠶᠠᠨ ᠢ᠋ ᠴᠢᠩᠨᠠᠪᠠ᠃ ᠱᠤᠤᠭᠢᠶᠠᠨ ᠴᠢᠮᠡᠭᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠦ᠌ ᠮᠠᠷᠭᠤᠬᠤ ᠳᠠᠭᠤᠨ ᠰᠣᠨᠣᠰᠤᠭᠳᠠᠭᠰᠠᠨ ᠳ᠋ᠤ᠌ ᠠᠷᠠᠫᠱᠠ ᠠᠰᠠᠷ ᠠ᠋ᠴᠠ ᠭᠠᠷᠤᠭᠠᠳ ᠲᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠵᠤ ᠢᠷᠡᠪᠡ᠃
— ᠶᠠᠮᠠᠷ ᠨᠢᠭᠡᠨ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠲᠠᠨ ᠲᠠᠢ ᠠᠭᠤᠯᠵᠠᠶᠠ ᠭᠡᠨᠡ᠃ ᠭᠡᠷᠡᠯᠲᠦ ᠮᠢᠨᠢ᠂ ᠲᠡᠷᠡ ᠴᠢᠬᠤᠯᠠ ᠶᠠᠭᠤᠮᠠ ᠮᠡᠳᠡᠨᠡ ᠭᠡᠨᠡ ᠭᠡᠪᠡ᠃
— ᠤᠷᠤᠭᠤᠯ ᠭᠡᠵᠦ ᠪᠠᠲᠤ ᠬᠠᠭᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠠᠷᠠᠫ᠊ᠱᠠ ᠡᠭᠦᠳᠡ ᠨᠡᠭᠡᠭᠡᠵᠦ ᠥᠭᠭᠦᠯᠡ᠃ ᠰᠠᠯᠬᠢ ᠢᠰᠬᠡᠷᠴᠦ ᠨᠥᠭᠥᠭᠡᠬᠢ ᠬᠥᠮᠦᠨ ᠢ᠋ ᠭᠤᠶᠠᠳᠠᠨ ᠣᠷᠣᠭᠤᠯᠤᠭᠠᠳ ᠭᠡᠷ ᠦ᠋ᠨ ᠡᠭᠦᠳᠡᠨ ᠦ᠌ ᠬᠥᠰᠢᠭᠡᠨ ᠳ᠋ᠦ᠍ ᠣᠷᠢᠶᠠᠴᠠᠯᠳᠤᠭᠤᠯᠪᠠ᠃ ᠰᠢᠮᠠᠷᠭᠠ ᠬᠦᠢᠲᠡᠨ ᠬᠣᠶᠠᠷ ᠬᠣᠣᠰᠯᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠲᠤᠯᠠ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠢ᠋ ᠴᠣᠬᠢᠵᠤ ᠬᠠᠷᠠᠩᠭᠤᠢ ᠪᠣᠯᠭᠠᠯᠠ᠃ ᠪᠦᠳᠡᠭᠢ ᠭᠠᠯ ᠭᠡᠷ ᠢ᠋ ᠳᠠᠬᠢᠨ ᠬᠡᠷᠡᠯᠳᠦᠭᠦᠯᠦᠭᠰᠡᠨ ᠳ᠋ᠦ᠍ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠥᠨᠳᠥᠷ ᠲᠤᠷᠠᠩᠬᠠᠢ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠯᠠ᠃
ᠦᠯᠦ ᠲᠠᠨᠢᠭᠳᠠᠬᠤ ᠬᠥᠮᠦᠨ ᠮᠢᠨᠵᠢ ᠶ᠋ᠢᠨ ᠦᠰᠦᠲᠡᠢ ᠬᠠᠷᠠ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠰᠡᠭᠰᠦᠷᠦᠭᠡᠳ ᠣᠷᠣᠭᠰᠢ ᠠᠯᠬᠤᠯᠠᠵᠤ ᠬᠡᠪᠢᠰ ᠦ᠋ᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠡᠯᠡᠭᠰᠡᠨ ᠨᠢ᠄
— ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠨ ᠲᠠᠨ ᠤ᠋ ᠠᠯᠳᠠᠷ᠂ ᠲᠠᠨ ᠤ᠋ ᠴᠡᠷᠢᠭ ᠢ᠋ ᠢᠷᠡᠬᠦ ᠡᠴᠡ ᠡᠮᠦᠨᠡ ᠳᠡᠯᠭᠡᠷᠡᠵᠦ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠪᠠᠲᠤ ᠬᠠᠭᠠᠨ᠄
— ᠮᠣᠷᠢᠯᠠᠵᠤ ᠰᠠᠭᠤᠭᠲᠤᠨ ᠭᠡᠵᠦ ᠤᠷᠢᠭᠠᠳ
— ᠡᠢᠮᠦ ᠲᠩᠷᠢ ᠮᠠᠭᠤᠬᠠᠢ ᠪᠠᠢᠬᠤ ᠳ᠋ᠤ᠌ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠢᠷᠡᠪᠡ? ᠭᠡᠵᠦ ᠠᠰᠠᠭᠤᠭᠠᠳ ᠮᠣᠩᠭᠣᠯᠴᠤᠳ ᠰᠥᠨᠢ ᠶ᠋ᠢᠨ ᠠᠢᠯᠴᠢᠨ ᠢ᠋ ᠰᠣᠨᠢᠷᠬᠠᠨ ᠠᠵᠢᠭᠯᠠᠵᠤ ᠪᠠᠢᠯᠠ᠃ ᠲᠡᠷᠡ ᠬᠥᠮᠦᠨ ᠲᠠᠲ᠋ᠠᠷ ᠬᠡᠯᠡ ᠪᠡᠷ ᠶᠠᠷᠢᠬᠤ ᠶ᠋ᠢᠨ ᠳᠡᠭᠡᠷᠡ ᠬᠠᠴᠠᠷ ᠤ᠋ᠨ ᠶᠠᠰᠤ ᠨᠢ ᠣᠪᠣᠭᠣᠷ ᠦᠭᠡᠢ ᠶ᠋ᠢᠨ ᠲᠤᠯᠠ ᠺᠦᠮᠠᠨ ᠨᠠᠷ ᠲᠠᠢ ᠠᠳᠠᠯᠢ ᠦᠭᠡᠢ ᠥᠨᠳᠥᠷ ᠮᠣᠩᠬᠣᠷ ᠬᠠᠮᠠᠷ ᠨᠢ ᠲᠡᠭᠦᠨ ᠦ᠌ ᠲᠤᠷᠠᠩᠬᠠᠢ ᠴᠢᠷᠠᠢ ᠳ᠋ᠤ᠌ ᠮᠢᠬᠠᠴᠢᠨ ᠠᠮᠢᠲᠠᠨ ᠤ᠋ ᠰᠢᠨᠵᠢ ᠶ᠋ᠢ ᠲᠣᠳᠣᠷᠠᠭᠤᠯᠤᠨᠠ᠃ ᠤᠨᠵᠢᠭᠤ ᠥᠳᠬᠡᠨ ᠬᠥᠮᠥᠰᠬᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠬᠦᠩᠬᠦᠬᠡᠷ ᠬᠠᠷᠠ ᠨᠢᠳᠦ ᠨᠢ ᠭᠢᠯᠠᠯᠵᠠᠵᠤ ᠤᠷᠲᠤ ᠬᠠᠷᠠ ᠰᠢᠷᠢᠯᠳᠦᠭᠰᠡᠨ ᠰᠠᠬᠠᠯ ᠢ᠋ᠶ᠋ᠠᠨ ᠮᠣᠢᠨᠣᠭ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠪᠢᠨᠡ᠃
— ᠶᠡᠬᠡ ᠬᠠᠭᠠᠨᠲᠠᠨ ᠮᠢᠨᠢ᠂ ᠪᠢ ᠪᠣᠯ ᠡᠭᠡᠯ ᠨᠢᠭᠡᠨ ᠵᠠᠮᠴᠢᠨ ᠪᠤᠰᠤ᠂ ᠡᠩ ᠦ᠋ᠨ ᠬᠥᠮᠦᠨ ᠴᠤ᠌ ᠪᠤᠰᠤ᠂ ᠲᠥᠷᠥᠯᠬᠢ ᠶ᠋ᠢᠨ ᠪᠠᠶᠠᠨ ᠪᠥᠭᠡᠳ ᠬᠦᠴᠦᠷᠬᠡᠭ ᠸᠠᠩ ᠭ᠌ᠯᠸᠪ ᠸᠯᠠᠳᠢᠮᠢᠷᠦᠸᠢ᠍ᠴ ᠷᠠᠶᠠᠽᠨᠠᠰᠺᠢ ᠭᠡᠭᠴᠢ ᠪᠠᠢᠨᠠ᠃
ᠪᠠᠲᠤ ᠬᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠪᠬᠢᠵᠤ ᠬᠠᠢᠬᠤᠷᠤᠮᠵᠢ ᠦᠭᠡᠢ ᠮᠡᠲᠦ ᠪᠡᠷ᠂
— ᠴᠢ ᠷᠶᠠᠽᠠᠨ ᠤ᠋ ᠸᠠᠩ ᠭ᠌ᠯᠸᠪ ᠡᠴᠡ ᠵᠠᠷᠤᠭᠳᠠᠭᠰᠠᠨ ᠡᠯᠴᠢ ᠤᠤ? ᠶᠠᠭᠠᠬᠢᠭᠠᠳ ᠴᠢ ᠭᠠᠭᠴᠠᠭᠠᠷ ᠢᠷᠡᠪᠡ? ᠭᠡᠵᠦ ᠠᠰᠠᠭᠤᠯᠠ᠃
ᠲᠡᠳᠦᠢ ᠭ᠌ᠯᠸᠪ ᠸᠠᠩ ᠶᠠᠷᠪᠠᠢᠵᠤ᠂
— ᠦᠭᠡᠢ᠂ ᠶᠡᠬᠡ ᠬᠠᠭᠠᠨᠲᠠᠨ ᠪᠢ ᠲᠠᠨ ᠳ᠋ᠤ᠌ ᠡᠯᠴᠢ ᠪᠡᠷ ᠢᠷᠡᠭᠰᠡᠨ ᠦᠭᠡᠢ᠂ ᠪᠢ ᠲᠠᠨ ᠲᠠᠢ ᠨᠢᠭᠡᠳᠦᠯ ᠬᠣᠯᠪᠣᠭᠠ ᠪᠠᠢᠭᠤᠯᠤᠶᠠ ᠭᠡᠵᠦ ᠢᠷᠡᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠬᠠᠭᠠᠨ᠂
— ᠡᠨᠡ ᠴᠢᠨᠢ ᠶᠠᠭᠤ ᠭᠡᠵᠦ ᠪᠠᠢᠭᠠ ᠦᠭᠡ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠢ ᠠᠭᠤᠤ ᠶᠡᠬᠡ ᠣᠷᠣᠰ ᠤ᠋ᠨ ᠭᠠᠵᠠᠷ ᠣᠷᠣᠨ ᠤ᠋ ᠵᠠᠮ ᠤ᠋ᠳ ᠪᠣᠯᠤᠨ ᠬᠣᠲᠠᠳ ᠢ᠋ ᠮᠡᠳᠡᠨᠡ᠃ ᠪᠢ ᠲᠠᠨ ᠳ᠋ᠤ᠌ ᠲᠤᠰᠠᠲᠠᠢ ᠬᠡᠷᠡᠭ ᠢ᠋ ᠬᠢᠵᠦ ᠴᠢᠳᠠᠨᠠ ᠭᠡᠵᠦ ᠭᠯᠧᠪ ᠸᠠᠩ ᠬᠡᠯᠡᠪᠡ᠃
ᠪᠠᠲᠤ ᠬᠠᠭᠠᠨ ᠥᠭᠦᠯᠡᠷᠦᠨ᠂
— ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠣᠷᠣᠰ ᠤ᠋ᠨ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠢ᠋ ᠡᠨᠡ ᠸᠠᠩ ᠳ᠋ᠤ᠌ ᠦᠵᠡᠭᠦᠯ ᠭᠡᠪᠡ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠡᠷᠭᠢᠬᠦ ᠳ᠋ᠦ᠍ ᠬᠡᠪᠢᠰᠦᠨ ᠳᠡᠭᠡᠷᠡ ᠨᠢᠭᠡᠨ ᠬᠠᠭᠤᠳᠠᠰᠤ ᠬᠠᠲᠠᠭᠤ ᠴᠠᠭᠠᠰᠤ ᠪᠠᠢᠯᠠ᠃
— ᠵᠠ᠂ ᠸᠠᠩ ᠡᠨᠡ ᠢᠵᠢᠯ ᠮᠥᠷᠡᠨ ᠴᠢᠨᠢ ᠷᠶᠠᠽᠠᠨ ᠨᠤᠲᠤᠭ᠂ ᠡᠨᠡ ᠦᠯᠢᠳᠧᠮᠢᠷ (ᠸᠯᠠᠳ᠋ᠢᠮᠢᠷ) ᠡᠨᠳᠡ ᠴᠥᠮ ᠣᠷᠣᠰ ᠤ᠋ᠨ ᠬᠣᠲᠠᠳ᠂ ᠭᠣᠣᠯ ᠤ᠋ᠳ᠂ ᠵᠠᠮ ᠤ᠋ᠳ ᠪᠠᠢᠨᠠ ᠭᠡᠬᠦ ᠳ᠋ᠦ᠍ᠨᠢ᠄
— ᠣᠷᠣᠰ ᠤ᠋ᠨ ᠭᠠᠵᠠᠷ ᠵᠢᠷᠤᠭ ᠪᠠᠢᠳᠠᠭ ᠪᠠᠢᠨᠠ ᠰᠢᠦ᠃ ᠡᠭᠦᠨ ᠢ᠋ ᠬᠠᠮᠢᠭᠠ ᠠ᠋ᠴᠠ ᠣᠯᠬᠤ ᠨᠢ ᠲᠡᠷᠡ ᠪᠣᠢ? ᠡᠢᠮᠦ ᠶᠠᠭᠤᠮᠠ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠨᠢ ᠭᠠᠢᠬᠠᠯᠲᠠᠢ ᠪᠠᠢᠨᠠ᠃
— ᠪᠢ ᠪᠦᠬᠦᠨ ᠢ᠋ ᠴᠢᠳᠠᠳᠠᠭ ᠶᠤᠮ ᠭᠠᠵᠠᠷ ᠳ᠋ᠠ ᠭᠡᠳ ᠪᠠᠲᠤ ᠬᠠᠭᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠬᠤ ᠳ᠋ᠠᠭᠠᠨ
—ᠵᠠ᠂ ᠢᠩᠭᠢᠭᠡᠳ ᠣᠷᠣᠰ ᠤ᠋ᠨ ᠭᠠᠵᠠᠷ ᠮᠢᠨᠦ ᠭᠠᠷ ᠳᠣᠣᠷᠠ ᠣᠷᠣᠨᠠ᠃ ᠪᠢ ᠪᠦᠭᠦᠳᠡ ᠶ᠋ᠢ ᠨᠠᠳᠠᠳᠤ ᠵᠠᠬᠢᠷᠤᠭᠳᠠᠬᠤ ᠪᠣᠯᠭᠠᠨᠠ᠃ ᠣᠷᠣᠰ ᠤ᠋ᠨ ᠸᠠᠩ ᠴᠢ ᠡᠭᠦᠨ ᠦ᠌ ᠲᠥᠯᠥᠭᠡᠨᠡ ᠢᠷᠡᠭᠰᠡᠨ ᠪᠢᠰᠢ ᠤᠤ? ᠭᠡᠬᠦ ᠳ᠋ᠦ᠍ ᠭᠯᠧᠪ ᠭᠡᠯᠮᠡᠭᠳᠡᠭᠰᠡᠨ ᠳ᠋ᠡᠭᠡᠨ ᠳᠠᠭᠤ ᠦᠭᠡᠢ ᠪᠠᠢᠯᠠ᠃
ᠪᠠᠲᠤ ᠴᠢᠨᠠᠭᠰᠢ ᠨᠢ ᠤᠯᠠᠮ ᠳᠣᠭᠣᠭᠢᠯᠠᠵᠤ ᠶᠠᠪᠤᠭᠤᠯᠤᠨ ᠬᠡᠯᠡᠭᠰᠡᠨ ᠨᠢ᠄
— ᠴᠢᠨᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠨᠥᠬᠥᠳ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ᠂ ᠴᠢᠨᠦ ᠤᠯᠤᠰ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ᠂ ᠴᠢᠨᠦ ᠠᠪᠴᠢᠷᠠᠭᠰᠠᠨ ᠪᠡᠯᠡᠭ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ? ᠶᠡᠬᠡ ᠸᠠᠩ ᠭᠤᠸᠠᠢ ᠭᠡᠬᠦ ᠳ᠋ᠦ᠍ᠨᠢ ᠭ᠌ᠯᠸᠪ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ᠂
—ᠨᠠᠳᠠᠳᠤ ᠤᠯᠤᠰ ᠢᠷᠭᠡᠨ ᠨᠠᠢᠷᠠᠮᠳᠠᠯᠲᠤ ᠨᠥᠬᠥᠳ ᠬᠥᠷᠥᠩᠭᠡ ᠠᠯᠢ ᠨᠢ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠳᠠᠢᠰᠤᠨ ᠨᠠᠳᠠ ᠠ᠋ᠴᠠ ᠴᠥᠮ ᠢ᠋ ᠪᠤᠯᠢᠶᠠᠵᠤ ᠠᠪᠤᠭᠰᠠᠨ᠂ ᠲᠡᠭᠡᠭᠡᠳ ᠪᠢ ᠵᠢᠭᠤᠲᠠᠵᠤ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠫᠤᠯᠤᠸᠸᠼ ᠲᠤ᠌ ᠬᠣᠷᠭᠣᠳᠠᠵᠤ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠬᠠᠭᠠᠨ ᠠᠭᠤᠷᠰᠠᠵᠤ᠂
— ᠲᠡᠭᠡᠭᠡᠳ ᠴᠢ ᠨᠠᠳᠠ ᠠ᠋ᠴᠠ ᠶᠠᠭᠤ ᠬᠦᠰᠡᠭᠰᠡᠨ ᠶᠤᠮ ᠪᠣᠢ? ᠭᠡᠪᠡ᠃
— ᠪᠢ ᠲᠠᠨ ᠳ᠋ᠤ᠌ ᠲᠤᠰᠠᠯᠠᠵᠤ ᠥᠪᠡᠷ ᠦ᠋ᠨ ᠳᠠᠢᠰᠤᠨ ᠨᠤᠭᠤᠳ ᠢ᠋ᠶ᠋ᠠᠨ ᠱᠦᠭᠦᠷᠳᠡᠨ ᠠᠷᠢᠯᠭᠠᠶᠠ ᠭᠡᠰᠡᠨ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ
—ᠴᠢᠨᠦ ᠳᠠᠢᠰᠤᠨ ᠬᠡᠨ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠣᠳᠣ ᠷᠶᠠᠽᠠᠨ ᠢ᠋ ᠵᠠᠬᠢᠷᠴᠤ ᠪᠠᠢᠭᠠ ᠸᠠᠩ ᠮᠥᠨ ᠭᠡᠬᠦ ᠳ᠋ᠦ᠍ᠨᠢ᠂
— ᠪᠢ ᠥᠪᠡᠷ ᠢ᠋ᠶ᠋ᠡᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠴᠡᠭᠡᠷᠯᠡᠭᠦᠯᠳᠡᠭ ᠶᠤᠮ᠂ ᠪᠢᠳᠡᠨ ᠦ᠌ ᠢᠷᠡᠭᠰᠡᠨ ᠴᠠᠭ ᠲᠤ᠌ ᠵᠥᠪᠬᠡᠨ ᠸᠠᠩ ᠲᠡᠳᠦᠢ ᠪᠤᠰᠤ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠥᠨᠥᠬᠦ ᠪᠣᠯᠤᠨᠠ ᠭᠡᠪᠡ᠃
— ᠷᠶᠡᠽᠡᠨ ᠦ᠌ ᠤᠯᠤᠰ ᠢ᠋ ᠪᠢ ᠴᠥᠮ ᠵᠢᠭᠰᠢᠵᠦ ᠦᠵᠡᠨᠡ᠃ ᠷᠶᠡᠽᠡᠨ ᠦ᠌ ᠶᠡᠬᠡ ᠬᠤᠷᠠᠯ ᠨᠠᠮᠠᠶ᠋ᠢ ᠬᠥᠭᠡᠭᠡᠵᠦ ᠭᠠᠷᠭᠠᠭᠰᠠᠨ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠬᠠᠭᠠᠨ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠭᠠ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠢ᠋ ᠬᠠᠷᠠᠵᠤ᠂
—ᠮᠢᠨᠦ ᠰᠡᠴᠡᠨ ᠵᠥᠪᠯᠡᠬᠦ ᠴᠢ ᠬᠡᠯᠡᠨᠡ ᠪᠣᠢ ᠭᠡᠵᠦ ᠠᠰᠠᠭᠤᠪᠠ᠃
— ᠮᠥᠩᠬᠡ ᠶ᠋ᠢᠨ ᠳᠠᠢᠨᠴᠢ ᠴᠢᠨᠦ ᠠᠭᠤᠤ ᠶᠡᠬᠡ ᠡᠪᠦᠭᠡ᠂ ᠦᠷᠡ ᠠᠴᠢ ᠨᠠᠷ ᠲᠠᠭᠠᠨ ᠳᠠᠭᠠᠵᠤ ᠰᠢᠢ᠍ᠳᠬᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠵᠠᠰᠠᠭ ᠭᠡᠳᠡᠭ ᠮᠡᠷᠭᠡᠨ ᠬᠠᠤᠯᠢ ᠪᠠᠨ ᠦᠯᠡᠳᠡᠭᠡᠭᠰᠡᠨ ᠰᠢᠦ ᠳ᠋ᠠ᠃ ᠲᠡᠷᠡ ᠬᠠᠤᠯᠢ ᠳ᠋ᠤ᠌ ᠳᠤᠷᠠᠳᠤᠭᠰᠠᠨ ᠶᠣᠰᠣᠭᠠᠷ ᠢᠴᠢᠭᠦᠷᠢᠲᠦ ᠶᠠᠪᠤᠳᠠᠯᠲᠠᠨ᠂ ᠲᠠᠩᠨᠠᠭᠤᠯᠴᠢᠨ᠂ ᠤᠷᠪᠠᠭᠴᠢᠳ᠂ ᠪᠥᠬᠡ ᠨᠠᠷ ᠢ᠋ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠬᠤ ᠶᠠᠯᠠ ᠶ᠋ᠢ ᠵᠢᠭᠠᠭᠰᠠᠨ ᠪᠤᠰᠤ ᠤᠤ? ᠭᠡᠬᠦ ᠳ᠋ᠦ᠍ᠨᠢ ᠸᠠᠩ ᠭᠯᠧᠪ ᠴᠣᠴᠢᠭᠰᠠᠨ ᠳ᠋ᠠᠭᠠᠨ ᠪᠣᠯᠵᠤ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠠᠷᠠᠢᠬᠠᠨ ᠭᠡᠳᠡᠷᠭᠦ ᠣᠴᠢᠭᠰᠠᠨ ᠦᠭᠡᠢ᠃ ᠪᠠᠲᠤ ᠬᠠᠭᠠᠨ ᠲᠡᠭᠦᠨ ᠢ᠋ ᠠᠨᠢᠪᠬᠢᠨ ᠬᠠᠷᠠᠵᠤ
— ᠸᠠᠩ ᠭᠯᠧᠪ ᠴᠢ ᠮᠢᠨᠦ ᠬᠣᠯᠪᠣᠭᠠᠲᠠᠨ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠳᠤᠭᠤᠯᠭᠠᠪᠤᠷᠢᠲᠠᠢ ᠨᠥᠬᠥᠷ ᠪᠣᠯᠬᠤ ᠬᠡᠷᠡᠭᠲᠡᠢ᠃ ᠴᠢ ᠨᠠᠮᠠᠶ᠋ᠢ ᠮᠡᠬᠡᠯᠡᠬᠦ ᠭᠡᠵᠦ ᠣᠷᠣᠯᠳᠣᠪᠠᠯ ᠲᠣᠯᠣᠭᠠᠢ ᠪᠠᠨ ᠠᠯᠳᠠᠬᠤ ᠪᠣᠯᠤᠨᠠ᠂ ᠶᠠᠪᠤᠵᠤ ᠪᠣᠯᠤᠨᠠ᠃ ᠠᠷᠠᠫᠱᠠ ᠴᠢ ᠡᠭᠦᠨ ᠦ᠌ ᠲᠥᠯᠥᠭᠡ ᠰᠠᠨᠠᠭᠠ ᠲᠠᠯᠪᠢᠬᠤ ᠬᠡᠷᠡᠭᠲᠡᠢ᠃
ᠸᠠᠩ ᠭᠯᠧᠪ ᠭᠠᠵᠠᠷ ᠬᠦᠷᠲᠡᠯᠡ ᠪᠥᠬᠥᠢᠰᠬᠢᠨ ᠡᠪᠲᠡᠢᠬᠡᠨ ᠦᠭᠡ ᠬᠡᠯᠡᠬᠦ ᠪᠣᠯ ᠤᠤ ᠭᠡᠵᠦ ᠭᠣᠷᠢᠯᠠᠭᠰᠠᠨ ᠪᠣᠯᠪᠠᠴᠤ ᠪᠠᠲᠤ ᠬᠠᠭᠠᠨ ᠥᠭᠡᠷᠡ ᠳᠠᠰᠢ ᠪᠠᠨ ᠬᠠᠷᠠᠵᠤ᠂ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠴᠢᠩᠭᠠ ᠡᠮᠦᠨᠡ ᠪᠡᠨ ᠬᠠᠷᠠᠨ ᠭᠥᠯᠢᠷᠡᠵᠡᠢ᠃ ᠴᠢᠯᠠᠭᠤ ᠮᠡᠲᠦ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠴᠢᠷᠠᠢ ᠲᠠᠢ ᠪᠣᠯᠤᠭᠰᠠᠨ ᠠᠷᠠᠫᠱᠠ ᠭᠡᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ ᠸᠠᠩ ᠤ᠋ᠨ ᠬᠠᠷᠠ ᠨᠢᠳᠦ ᠠᠭᠤᠷᠲᠠᠢ ᠪᠠᠷ ᠭᠢᠯᠠᠯᠵᠠᠭᠠᠳ ᠲᠡᠭᠦᠪᠡᠷ ᠬᠠᠨᠤᠰᠢ ᠦᠭᠡᠢ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠠᠯᠬᠤᠯᠠᠨ ᠣᠷᠣᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠪᠠᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠶᠠᠨᠴᠡᠴᠡᠭ