ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠲᠠᠪᠤ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-5
420ᠲᠠᠪᠤ᠂ ᠴᠡᠷᠢᠭ ᠦᠨ ᠬᠦᠷᠢᠶᠡᠨᠡ
ᠠᠮᠠ ᠶᠤᠭᠠᠨ ᠬᠡᠷᠪᠡᠭᠡ ᠦᠭᠡᠢ ᠰᠢᠷᠦᠭᠦᠨ ᠰᠠᠬᠠᠯ ᠢ᠋ᠶ᠋ᠠᠷ ᠪᠥᠭᠯᠡᠵᠡᠢ᠃
ᠵᠡᠭᠦᠨ ᠬᠠᠴᠠᠷ ᠲᠤ᠌ ᠴᠢᠨᠢ ᠮᠠᠭᠤ᠂ ᠪᠠᠷᠠᠭᠤᠨ ᠬᠠᠴᠠᠷ ᠲᠤ᠌ ᠴᠢᠨᠢ ᠰᠠᠢᠨ᠃
ᠦᠨᠡᠨ ᠨᠢ ᠠᠯᠢ ᠪᠣᠢ? ᠤᠬᠠᠭᠠᠨ ᠴᠢᠨᠢ ᠲᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ ᠨᠢ ᠠ᠋᠃
ᠠᠪᠠᠢ*᠃
— ᠱᠠᠮᠪᠠ! ᠪᠠᠢᠨᠠᠤ ᠴᠢ? ᠰᠢᠨᠡ ᠴᠡᠷᠢᠭ ᠬᠦᠯᠢᠶᠡᠵᠦ ᠠᠪ!
— ᠠ?
ᠬᠤᠷᠠᠩᠳᠠ᠂ ᠴᠢᠨᠦ ᠠᠷᠪᠠᠨ ᠳ᠋ᠤ᠌ ᠰᠢᠨᠡ ᠴᠡᠷᠢᠭ ᠶᠠᠪᠤᠭᠤᠯᠤᠭᠰᠠᠨ!
ᠤᠲᠤᠭᠠ ᠢᠰᠦ ᠪᠣᠯᠤᠭᠰᠠᠨ ᠬᠠᠷᠠ ᠮᠠᠢᠬᠠᠨ ᠠ᠋ᠴᠠ ᠨᠡᠬᠡᠢ ᠬᠦᠳᠡᠰᠦᠨ ᠳᠡᠪᠡᠯ ᠲᠡᠢ᠂ ᠨᠣᠢᠷᠮᠠᠭ ᠴᠢᠷᠠᠢ ᠲᠠᠢ ᠨᠢᠭᠡ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ ᠠᠯᠢ ᠪᠣᠢ? ᠭᠡᠵᠦ ᠰᠢᠷᠴᠢᠨ ᠥᠭᠡᠳᠡ ᠬᠠᠷᠠᠭᠠᠳ ᠬᠥᠲᠥᠴᠢ ᠡᠴᠡ ᠵᠠᠮᠰᠦ᠋ᠷᠦᠩᠵᠠᠪ ᠬᠤᠷᠠᠩᠳᠠ ᠶ᠋ᠢᠨ ᠪᠢᠴᠢᠭ ᠪᠠᠢᠨᠠᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠮᠠᠢ᠂ ᠠᠶᠤᠮᠬᠠᠢ(ᠠᠶᠤᠮᠠᠬᠠᠢ)ᠠᠷᠪᠠᠨ ᠳ᠋ᠠᠭᠠᠨ ᠠᠢᠬᠤᠪᠲᠤᠷ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠠᠪ ᠭᠡᠵᠦ ᠰᠢᠷᠴᠢᠨ ᠢ᠋ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠬᠥᠲᠥᠴᠢ ᠨᠢᠭᠡ ᠪᠢᠴᠢᠭ ᠱᠠᠮᠪᠠ ᠳ᠋ᠤ᠌ ᠥᠭᠪᠡ᠃
— ᠠᠯᠢ ᠪᠣᠢ ᠲᠡᠷᠡ ᠠᠢᠬᠤᠪᠲᠤᠷ ᠪᠠᠭᠠᠲᠤᠷ ᠴᠢᠨᠢ? ᠭᠡᠵᠦ ᠮᠠᠢᠬᠠᠨ ᠳᠣᠲᠣᠷᠠ ᠠ᠋ᠴᠠ ᠤᠷᠠᠩᠬᠠᠢ ᠳᠡᠪᠡᠯ ᠲᠡᠢ ᠲᠠᠪᠤᠨ ᠥᠨᠳᠥᠷ ᠴᠢᠭᠢᠷᠠᠭ ᠬᠠᠷᠠ ᠬᠥᠮᠦᠨ ᠪᠤᠯᠲᠠᠢᠵᠤ ᠦᠵᠡᠭᠳᠡᠭᠡᠳ᠂
— ᠬᠠ᠂ ᠬᠠ! ᠠᠢᠬᠤᠪᠲᠤᠷ ᠰᠦᠷᠡᠬᠡᠢ ᠪᠠᠭᠠᠲᠤᠷ ᠡᠷᠡ ᠪᠠᠢᠨᠠ ᠳᠠ!
— ᠬᠣ᠂ ᠬᠣ ᠬᠣ! ᠵᠠ ᠨᠥᠬᠥᠳ ᠮᠢᠨᠢ᠃ ᠣᠳᠣ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠵᠠᠩᠵᠤᠨ ᠳᠦᠭᠦᠷᠴᠡᠢ᠃ ᠬᠠᠷᠠᠬᠤ ᠦᠭᠡᠢ ᠤᠤ᠂ ᠡᠢᠮᠦ ᠰᠦᠷᠡᠬᠡᠢ ᠪᠠᠭᠠᠲᠤᠷ ᠢ᠋ ᠶᠠᠪᠤᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠠᠬᠢᠵᠤ ᠲᠡᠰᠬᠦ ᠪᠣᠢ?
— ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠵᠢᠯᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠠᠮᠠ ᠲᠠᠢ᠂ ᠵᠠᠭᠠᠷ ᠮᠢᠵᠢᠳ ᠬᠠᠭᠠᠨ ᠰᠢᠭ᠋᠂
《ᠦᠬᠦᠨ ᠪᠠᠢᠯᠳᠤᠬᠤ ᠳᠠᠢᠰᠤᠨ ᠬᠠᠮᠢᠭᠠ ᠪᠠᠢᠨᠠ?
《ᠦᠵᠡᠯᠴᠡᠨ ᠲᠤᠯᠬᠤ ᠰᠠᠢᠨ ᠡᠷᠡ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ
《ᠰᠢᠲᠦ ᠪᠡᠨ ᠬᠠᠪᠢᠷᠴᠤ᠂ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠵᠤ》 ᠪᠠᠢᠨᠠᠤ ᠳᠠ᠂
ᠡᠨᠡ ᠰᠠᠢᠨ ᠡᠷᠡ ᠪᠠᠭᠠᠲᠤᠷ ᠮᠢᠨᠢ ᠭᠡᠵᠦ ᠨᠢᠭᠡ ᠲᠣᠮᠣ ᠴᠢᠭᠢᠷᠠᠭ ᠡᠷᠡ᠂ ᠦᠯᠢᠭᠡᠷ ᠬᠦᠦᠷᠨᠢᠨ ᠬᠡᠯᠡᠬᠦ ᠶ᠋ᠢ ᠳᠠᠭᠤᠷᠢᠶᠠᠨ ᠡᠭᠡᠰᠢᠭᠯᠡᠭᠡᠳ ᠤᠷᠤᠭᠰᠢ ᠳᠠᠪᠰᠢᠵᠤ᠂ ᠰᠢᠷᠴᠢᠨ ᠢ᠋ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠡᠬᠢ ᠰᠢᠭ ᠪᠠᠲᠤ ᠴᠢᠭᠢᠷᠠᠭ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠰᠤ ᠠᠳᠬᠤᠨ᠂ ᠮᠣᠷᠢ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠨᠢ ᠭᠱᠠᠨ ᠵᠠᠭᠤᠷᠠ ᠬᠣᠣ ᠲᠠᠲᠠᠭᠠᠳ ᠣᠷᠬᠢᠵᠠᠢ᠃ ᠰᠢᠷᠴᠢᠨ ᠦ᠌ ᠠᠭᠤᠷ ᠬᠢᠯᠢᠩ ᠰᠢᠷᠠ ᠰᠢᠯᠮᠦᠭᠦᠰᠦᠨ ᠳ᠋ᠦ᠍ ᠭᠠᠯ ᠰᠢᠲᠠᠭᠰᠠᠨ ᠰᠢᠭ᠋ ᠪᠠᠳᠠᠷᠠᠵᠤ᠂ ᠤᠷᠢᠳᠠ ᠪᠠᠲᠤᠪᠠᠶᠠᠷ ᠡᠪᠦᠭᠡᠨ ᠦ᠌ ᠵᠢᠭᠠᠵᠤ ᠦᠭᠭᠦᠭᠰᠡᠨ ᠪᠥᠬᠡ ᠶ᠋ᠢᠨ ᠠᠷᠭᠠ ᠬᠡᠷᠡᠭᠯᠡᠵᠦ᠂ ᠲᠡᠷᠡ ᠴᠢᠭᠢᠷᠠᠭ ᠡᠷᠡ ᠶ᠋ᠢ ᠨᠢᠳᠦ ᠠᠨᠢᠬᠤ ᠵᠠᠭᠤᠷᠠ ᠤᠨᠠᠭᠠᠵᠤ ᠳᠡᠭᠡᠷᠡ ᠡᠴᠡ ᠨᠢ ᠮᠣᠷᠳᠠᠭᠠᠳ ᠣᠷᠬᠢᠭᠰᠠᠨ ᠴᠢᠨᠢ ᠥᠨᠥᠬᠢ ᠮᠠᠢᠬᠠᠨ ᠤ᠋ ᠬᠡᠳᠦᠨ ᠴᠡᠷᠢᠭ ᠰᠢᠷᠴᠢᠨ ᠢ᠋ ᠪᠠᠬᠠᠳᠤᠨ ᠱᠤᠤᠭᠢᠯᠳᠤᠪᠠ᠃
ᠰᠢᠷᠴᠢᠨ ᠳ᠋ᠦ᠍ ᠮᠣᠷᠳᠠᠭᠤᠯᠤᠭᠰᠠᠨ ᠲᠡᠷᠡ ᠴᠢᠭᠢᠷᠠᠭ ᠲᠣᠮᠣ ᠴᠡᠷᠢᠭ ᠬᠥᠯ ᠢ᠋ᠶ᠋ᠡᠨ ᠠᠷᠪᠠᠭᠠᠨᠠᠨ᠂ ᠲᠤᠩ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠵᠠᠢᠨ ᠢᠨᠢᠶᠡᠵᠦ᠂ ᠵᠠ᠂ ᠪᠠᠭᠤᠵᠤ ᠥᠭᠭᠦᠶᠡ! ᠭᠡᠵᠦ ᠬᠠᠰᠬᠢᠷᠤᠨ᠂ ᠳᠦᠭᠦᠷᠡᠩ(ᠲᠥᠭᠥᠷᠢᠭ) ᠬᠦᠷᠡᠩ ᠴᠢᠷᠠᠢ ᠨᠢ᠂ ᠲᠤᠩ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠦ᠌ ᠰᠢᠨᠵᠢᠲᠡᠢ ᠲᠤᠯᠠ᠂ ᠰᠢᠷᠴᠢᠨ ᠦ᠌ ᠠᠭᠤᠷ ᠨᠢ ᠭᠱᠠᠨ ᠵᠠᠭᠤᠷᠠ ᠨᠠᠮᠳᠠᠵᠤ ᠪᠣᠰᠪᠠ᠃
— ᠬᠠᠷᠠᠭᠠᠴᠢ᠂ ᠵᠠᠯᠠᠭᠤ ᠨᠣᠬᠠᠢ ᠰᠢᠳᠦᠷᠬᠡᠭ᠂ ᠵᠠᠯᠠᠭᠤ ᠬᠥᠮᠦᠨ ᠢᠳᠡᠷᠬᠡᠭ ᠭᠡᠵᠦ ᠤᠴᠢᠷ ᠲᠠᠢ ᠦᠭᠡ ᠪᠠᠢᠨᠠ ᠰᠢᠦ᠃ ᠡᠨᠡ ᠰᠠᠢᠨ ᠡᠷᠡ ᠶ᠋ᠢ ᠲᠠᠨ ᠤ᠋ ᠵᠤᠭᠭ᠋ᠠᠷ ᠲᠤ᠌ ᠣᠷᠣᠭᠤᠯᠤᠶᠠ᠃ ᠵᠠᠢ ᠪᠣᠢ ᠪᠠᠢᠬᠤ ᠭᠡᠵᠦ ᠱᠠᠮᠪᠠ ᠵᠣᠴᠢ ᠨᠠᠷ ᠤ᠋ᠨ ᠬᠡᠷᠡᠭᠯᠡᠳᠡᠭ ᠵᠣᠳᠬᠠᠷ ᠠ᠋ᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠨᠢᠭᠡᠨ ᠪᠤᠭᠤᠷᠤᠯ ᠴᠡᠷᠢᠭ ᠲᠦ᠍ ᠬᠡᠯᠡᠪᠡ᠃
— ᠵᠠ᠂ ᠵᠠᠢ ᠴᠤ᠌ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠪᠠ᠃ ᠬᠦᠦ ᠮᠢᠨᠢ᠂ ᠴᠢ ᠡᠨᠡ ᠪᠠᠭᠠᠴᠤᠳ ᠲᠤ᠌ ᠪᠢᠲᠡᠭᠡᠢ ᠮᠠᠭᠤ ᠰᠠᠨᠠᠵᠤ ᠠᠭᠤᠷᠯᠠᠭᠠᠷᠠᠢ᠃ ᠡᠳᠡ ᠴᠢᠨᠢ ᠬᠢᠬᠦ ᠶᠠᠭᠤᠮᠠ ᠦᠭᠡᠢ᠂ ᠣᠢᠰᠠᠵᠤ(ᠤᠢᠰᠴᠤ) ᠦᠬᠦᠵᠦ ᠪᠠᠢᠭᠠ ᠶᠤᠮ ᠰᠢᠦ᠃ ᠵᠠ ᠮᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠴᠠᠢ ᠤᠤᠭᠤ᠂ ᠭᠠᠭᠴᠠᠬᠦ (ᠭᠠᠭᠴᠠ ᠬᠦ᠌) ᠮᠠᠨᠠᠢ(ᠮᠠᠨ ᠤ᠋) ᠬᠣᠭᠣᠯᠠ ᠴᠠᠢ ᠪᠠᠷᠤᠭᠲᠠᠢ ᠭᠡᠵᠦ ᠮᠡᠳᠡᠭᠡᠷᠡᠢ᠃ ᠤᠯᠢᠶᠠᠰᠤᠲᠠᠢ ᠶ᠋ᠢ ᠪᠠᠢᠯᠳᠤᠵᠤ ᠠᠪᠤᠪᠠᠯ᠂ ᠨᠢᠭᠡ ᠤᠬᠠᠭᠠᠨ ᠪᠣᠢ ᠳᠠ᠃ ᠡᠢᠮᠦ ᠪᠠᠭᠠ ᠵᠠᠯᠠᠭᠤ ᠪᠠᠷ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ ᠢ᠋ ᠴᠢᠨᠢ ᠦᠵᠡᠪᠡᠯ᠂ ᠴᠢ ᠥᠨᠥᠴᠢᠨ ᠬᠥᠮᠦᠨ ᠶᠦᠮ ᠤᠤ ᠳᠠ? ᠭᠡᠵᠦ ᠦᠭᠡᠨ ᠳ᠋ᠦ᠍ ᠳᠤᠷᠠᠲᠠᠢ ᠲᠡᠷᠡ ᠡᠪᠦᠭᠡᠨ ᠴᠡᠷᠢᠭ ᠰᠢᠷᠴᠢᠨ ᠲᠡᠢ ᠶᠠᠭᠤᠮᠠ ᠶᠠᠷᠢᠭᠰᠠᠭᠠᠷ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠤ᠋ ᠪᠠᠢᠳᠠᠯ ᠲᠣᠢᠮᠣ ᠶ᠋ᠢ ᠶᠠᠷᠢᠵᠤ ᠥᠭᠭᠦᠭᠡᠳ᠂ ᠱᠠᠮᠪᠠ ᠪᠥᠬᠡ ᠭᠡᠳᠡᠭ ᠠᠷᠪᠠᠨ ᠤ᠋ ᠳᠠᠷᠤᠭᠠ ᠲᠠᠢ᠂ ᠠᠷᠪᠠᠨ ᠤ᠋ ᠪᠠᠭ ᠴᠡᠷᠢᠭ ᠢ᠋ ᠲᠡᠢᠮᠦ ᠲᠡᠢᠮᠦ ᠨᠡᠷᠡ ᠲᠡᠢ᠂ ᠲᠡᠢᠮᠦ ᠲᠡᠢᠮᠦ ᠬᠥᠮᠦᠨ ᠪᠣᠢ ᠭᠡᠵᠦ ᠶᠠᠷᠢᠵᠤ ᠥᠭᠪᠡ᠃
ᠰᠢᠷᠴᠢᠨ᠂ ᠲᠡᠷᠡ ᠡᠪᠦᠭᠡᠨ ᠡᠴᠡ ᠪᠠᠰᠠ ᠲᠤᠰ ᠴᠡᠷᠢᠭ ᠦ᠋ᠨ ᠪᠠᠭ᠂ ᠤᠯᠢᠶᠠᠰᠤᠲᠠᠢ ᠶ᠋ᠢ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠬᠤ ᠰᠠᠢᠨ ᠡᠳᠦᠷ ᠢ᠋ ᠵᠢᠷᠤᠬᠠᠢᠴᠢ ᠨᠠᠷ ᠢ᠋ᠶ᠋ᠠᠷ ᠦᠵᠡᠭᠦᠯᠵᠦ᠂ ᠲᠡᠷᠡ ᠡᠳᠦᠷ ᠢ᠋ᠶ᠋ᠡᠨ ᠰᠠᠭᠠᠳᠠᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠶ᠋ᠢ ᠨᠢ ᠣᠯᠵᠤ ᠮᠡᠳᠡᠪᠡ᠃
ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍᠂ ᠶᠡᠷᠦ ᠰᠤᠷᠭᠠᠭᠤᠯᠢ ᠭᠡᠵᠦ ᠶᠠᠭᠤᠮᠠ ᠬᠢᠳᠡᠭ ᠦᠭᠡᠢ᠂ ᠵᠡᠪᠰᠡᠭ ᠭᠡᠪᠡᠯ᠂ ᠵᠠᠮᠰᠥ᠋ᠷᠦᠩᠵᠠᠪ ᠬᠤᠷᠠᠩᠳᠠ ᠮᠥᠩᠭᠥᠨ ᠲᠣᠨᠣᠭᠲᠠᠢ ᠮᠣᠳᠣᠨ ᠬᠤᠢ ᠲᠠᠢ ᠰᠢᠨᠡᠬᠡᠨ ᠮᠠᠦ᠋ᠽᠧᠷ ᠢ᠋ ᠪᠡᠶᠡ ᠡᠴᠡ ᠪᠡᠨ ᠰᠠᠯᠭᠠᠬᠤ ᠦᠭᠡᠢ ᠵᠡᠭᠦᠵᠦ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠠᠷᠪᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠰᠡᠯᠡᠮᠡ᠂ ᠬᠢᠲᠠᠳ ᠢᠯᠳᠦ᠂ ᠭᠧᠷᠮᠠᠨ ᠫᠤᠤ ᠶ᠋ᠢᠨ ᠬᠢᠲᠤᠭᠠᠨ ᠵᠢᠳᠠ ᠵᠡᠭᠦᠵᠦ ᠶᠠᠪᠤᠬᠤ ᠨᠢ ᠦᠵᠡᠭᠳᠡᠵᠦ᠂ ᠵᠠᠷᠢᠮ ᠴᠡᠷᠢᠭ ᠴᠠᠬᠢᠭᠤᠷ ᠫᠤᠤ ᠲᠠᠢ᠂ ᠵᠠᠷᠢᠮ ᠨᠢ ᠤᠰᠤᠨ ᠪᠡᠮᠢᠯᠢ᠂ ᠰᠢᠰᠡᠩᠯᠢ ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠫᠤᠤ ᠲᠠᠢ᠂ ᠨᠢᠭᠡ ᠵᠠᠷᠢᠮ ᠨᠢ ᠣᠷᠣᠰ ᠪᠢᠷᠳᠠᠨ ᠲᠠᠢ᠂ ᠣᠯᠠᠩᠬᠢ ᠨᠢ ᠬᠢᠲᠤᠭᠠ ᠲᠠᠰᠢᠭᠤᠷ ᠠ᠋ᠴᠠ ᠥᠭᠡᠷᠡ ᠵᠠᠷ ᠵᠡᠪᠰᠡᠭ ᠦᠭᠡᠢ ᠪᠠᠢᠵᠠᠢ᠃
ᠵᠢᠷᠤᠬᠠᠢᠴᠢ ᠨᠠᠷ ᠤ᠋ᠨ ᠦᠵᠡᠭᠰᠡᠨ ᠰᠠᠢᠨ ᠡᠳᠦᠷ ᠨᠢ ᠨᠥᠭᠥᠭᠡᠳᠦᠷ ᠪᠣᠯᠬᠤ ᠪᠠᠢᠵᠠᠢ᠃ ᠲᠡᠷᠡ ᠡᠳᠦᠷ ᠢ᠋ ᠥᠨᠵᠢᠨ ᠰᠠᠭᠠᠲᠠᠨ ᠬᠦᠯᠢᠶᠡᠬᠦ ᠳ᠋ᠡᠭᠡᠨ ᠡᠳᠦᠷ ᠴᠠᠭ ᠢ᠋ ᠬᠥᠮᠦᠨ ᠬᠥᠮᠦᠨ ᠥᠪᠡᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠤᠷᠠᠪᠡᠷ ᠥᠩᠭᠡᠷᠡᠭᠡᠨ᠂ ᠵᠠᠷᠢᠮ ᠨᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠣᠢᠷᠠ ᠬᠠᠪᠢ ᠶ᠋ᠢᠨ ᠠᠢᠯ ᠢ᠋ᠶ᠋ᠠᠷ ᠥᠨᠵᠢᠨ᠂ ᠵᠠᠷᠢᠮ ᠨᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠣᠯᠠᠨ ᠮᠠᠢᠬᠠᠨ ᠢ᠋ᠶ᠋ᠠᠷ ᠬᠡᠰᠦᠵᠦ᠂ ᠵᠠᠷᠢᠮ ᠨᠢ ᠡᠳᠦᠷ ᠤᠨᠲᠠᠭᠠᠳ ᠰᠥᠨᠢ ᠰᠠᠮ ᠠᠯᠠᠭᠠ ᠪᠣᠯᠳᠠᠭ ᠪᠠᠢᠪᠠ᠃
ᠰᠢᠷᠴᠢᠨ᠂ ᠡᠢᠮᠦ ᠣᠯᠠᠨ ᠠᠪᠤ ᠶ᠋ᠢᠨ ᠬᠦᠦ᠂ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠬᠥᠮᠦᠨ ᠠᠮᠢᠲᠠᠨ ᠴᠤᠭᠯᠠᠭᠰᠠᠨ ᠭᠠᠵᠠᠷ ᠢ᠋ ᠠᠩᠬᠠ ᠤᠳᠠᠭᠠ ᠦᠵᠡᠵᠦ ᠪᠠᠢᠭᠠ ᠲᠤᠯᠠ ᠦᠵᠡᠭᠰᠡᠨ ᠰᠣᠨᠣᠰᠤᠭᠰᠠᠨ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠶᠡᠬᠡᠯᠡ ᠰᠣᠨᠢᠷᠬᠠᠨ ᠭᠠᠢᠬᠠᠳᠠᠭ ᠪᠠᠢᠵᠠᠢ᠃ ᠠᠷᠪᠠᠨ ᠤ᠋ ᠳᠠᠷᠤᠭᠠ ᠱᠠᠮᠪᠠ᠂ ᠨᠢᠭᠡ ᠬᠥᠮᠦᠨ ᠲᠡᠢ ᠡᠮᠡᠭᠡᠯ ᠢ᠋ᠶ᠋ᠡᠨ ᠰᠣᠯᠢᠭᠠᠳ᠂ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠭᠠᠨᠵᠤᠭᠠ ᠳᠠᠬᠢᠵᠤ ᠮᠠᠢᠬᠠᠨ ᠤ᠋ ᠬᠣᠢᠮᠣᠷ ᠲᠤ᠌ ᠡᠮᠡᠭᠡᠯ ᠢ᠋ᠶ᠋ᠡᠨ ᠲᠠᠯᠪᠢᠭᠠᠳ᠂ ᠭᠤᠯᠢᠷ ᠢ᠋ᠶ᠋ᠠᠷ ᠳᠥᠷᠪᠡᠨ ᠪᠢᠴᠢᠬᠠᠨ ᠴᠥᠭᠥᠴᠡ ᠬᠢᠵᠦ ᠵᠤᠯᠠ ᠪᠠᠷᠢᠭᠠᠳ᠂ ᠳᠥᠷᠪᠡᠨ ᠬᠦᠵᠢ ᠠᠰᠠᠭᠠᠵᠤ᠂ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠠᠳᠬᠤᠭᠠᠳ᠂ ᠰᠥᠬᠥᠷᠦᠨ ᠰᠠᠭᠤᠵᠤ᠂ ᠪᠢᠴᠢᠬᠠᠨ ᠰᠤᠳᠤᠷ ᠳᠡᠯᠭᠡᠵᠦ᠂ ᠱᠠᠭᠠᠲᠤ ᠴᠥᠮᠥᠭᠡ ᠭᠠᠨᠵᠤᠭᠠᠯᠠᠭᠠᠳ ᠭᠠᠨᠵᠤᠭᠠ ᠶ᠋ᠢᠨ ᠰᠠᠩ ᠢ᠋ ᠭᠢᠩᠰᠢᠨ ᠤᠩᠰᠢᠭᠰᠠᠨ ᠨᠢ᠂
《ᠭᠡᠭᠡᠨ ᠣᠳᠣᠨ ᠤ᠋ ᠡᠳᠦᠷ ᠲᠦ᠍
《ᠬᠡᠷᠡᠭᠲᠦ ᠶᠠᠪᠤᠳᠠᠯ ᠤ᠋ᠨ ᠲᠤᠯᠠ᠂
《ᠭᠡᠮᠲᠦ ᠪᠤᠵᠠᠷ ᠪᠤᠳᠤᠩᠭᠤᠢ ᠶ᠋ᠢ ᠠᠷᠢᠯᠭᠠᠵᠤ᠂
《ᠬᠡᠲᠦᠷᠡᠬᠡᠶᠡ ᠡᠨᠡ ᠡᠮᠡᠭᠡᠯ ᠦ᠋ᠨ ᠬᠡᠷᠡᠭᠲᠦ
《ᠨᠠᠢ᠍ᠮᠠᠨ ᠭᠠᠨᠵᠤᠭᠠ ᠶ᠋ᠢ ᠠᠷᠢᠭᠤᠯᠤᠨ(ᠠᠷᠢᠭᠤᠯᠠᠨ) ᠲᠠᠬᠢᠮᠤ ᠪᠢ᠃
《ᠭᠡᠮᠲᠦ ᠪᠤᠵᠠᠷ ᠪᠤᠳᠤᠩᠭᠤᠢ ᠶ᠋ᠢ ᠨᠢ ᠠᠷᠢᠯᠭᠠᠲᠤᠭᠠᠢ᠃
《ᠲᠤᠷᠠᠭ(ᠲᠤᠷᠤᠭ) ᠵᠤᠯᠠ ᠬᠦᠵᠢ᠂ ᠠᠷᠴᠠ ᠠᠭᠢ ᠰᠢᠲᠠᠭᠠᠵᠤ᠂
《ᠲᠤᠰᠠᠲᠤ ᠦᠭᠡ ᠶ᠋ᠢ ᠴᠢᠨᠢ ᠬᠡᠯᠡᠨᠡᠮ ᠪᠢ᠃
《ᠳᠤᠲᠠᠭᠠᠭᠰᠠᠨ ᠭᠠᠨᠵᠤᠭᠠ ᠴᠢᠨᠢ ᠢᠷᠡᠲᠦᠭᠡᠢ᠃
《ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠵᠠ᠂ ᠱᠣᠷᠯᠤᠭᠠ (ᠱᠣᠷᠣᠯᠠᠭᠠ) ᠳ᠋ᠤ᠌ ᠤᠴᠠᠷᠠᠬᠤ ᠪᠣᠯᠲᠤᠭᠠᠢ
《ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ!
《ᠠᠶᠠᠨ ᠠᠪᠠ ᠳ᠋ᠤ᠌ ᠣᠯᠵᠠ ᠱᠣᠷᠯᠤᠭᠠ(ᠱᠣᠷᠣᠯᠠᠭᠠ) ᠵᠠᠶᠠᠭᠠᠭᠴᠢ
《ᠠᠯᠲᠠᠲᠤ ᠬᠤᠶᠠᠭ ᠢ᠋ ᠪᠠᠲᠤ ᠪᠣᠯᠭᠠᠭᠴᠢ
《ᠠᠭᠲᠠ ᠮᠣᠷᠢ ᠶ᠋ᠢ ᠳᠣᠪᠣᠴᠠᠭ ᠪᠣᠯᠭᠠᠭᠴᠢ
《ᠠᠷᠪᠢᠨ ᠶᠡᠬᠡ ᠣᠩᠭᠣᠨ ᠭᠠᠨᠵᠤᠭᠠ ᠮᠢᠨᠢ!
《ᠠᠷᠢᠭᠤᠨ ᠰᠠᠩ ᠤ᠋ᠨ ᠲᠠᠬᠢᠯᠭᠠ ᠪᠠᠷ ᠳᠠᠬᠢᠨᠠᠮ᠃
《ᠠᠷᠪᠢᠨ ᠶᠡᠬᠡ ᠬᠡᠰᠢᠭ ᠬᠤᠲᠤᠭ ᠢ᠋ ᠴᠢᠨᠢ ᠭᠤᠶᠤᠨᠠᠮ ᠪᠢ᠂
《ᠠᠰᠠᠷᠠᠵᠤ᠂ ᠥᠭᠭᠦᠨ ᠰᠣᠶᠣᠷᠬᠠ᠂
《ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ!
《ᠬᠠᠷᠪᠤᠬᠤ ᠳ᠋ᠤ᠌᠂ ᠬᠠᠷᠠ ᠳᠡᠭᠡᠷᠡ ᠪᠣᠯᠭᠠᠨ ᠤᠨᠤᠭᠤᠯ!
《ᠴᠠᠪᠴᠢᠬᠤ ᠳ᠋ᠤ᠌ ᠴᠢᠷᠠᠢ ᠳᠡᠭᠡᠷᠡ ᠪᠣᠯᠭᠠᠨ ᠣᠨᠣᠭᠤᠯ
《ᠤᠷᠢᠳᠠ ᠬᠥᠮᠦᠨ ᠦ᠌ ᠤᠯᠠ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ
《ᠬᠣᠢᠲᠤ ᠬᠥᠮᠦᠨ ᠦ᠌ ᠬᠣᠷᠮᠣᠢ ᠳᠣᠣᠷᠠ ᠠ᠋ᠴᠠ
《ᠳᠠᠪᠠᠭᠤ ᠶᠡᠬᠡ ᠣᠯᠵᠠ ᠣᠮᠣᠭ ᠱᠣᠷᠯᠤᠭᠠ ᠤᠴᠠᠷᠠᠭᠤᠯ!
《ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ!》 ᠭᠡᠵᠦ ᠭᠢᠩᠰᠢᠨ ᠭᠠᠨᠵᠤᠭᠠ ᠶ᠋ᠢᠨ ᠰᠠᠩ ᠲᠠᠯᠪᠢᠪᠠ᠃
ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠮᠠᠢᠬᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠴᠡᠷᠢᠭ᠂ ᠬᠣᠪᠣᠩ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠨᠥᠬᠥᠳ ᠲᠡᠭᠡᠨ᠂ ᠬᠡᠦᠬᠡᠨ ᠬᠤᠲᠤᠭᠲᠤ ᠶ᠋ᠢᠨ ᠳ᠋ᠦ᠍ ᠬᠣᠶᠠᠷ ᠠᠪᠳᠠᠷᠠ ᠲᠡᠮᠦᠷ ᠵᠡᠭᠦᠦ ᠪᠣᠢ᠃ ᠲᠡᠷᠡ ᠨᠢ᠂ ᠢᠯᠠᠭᠳᠠᠰᠢ ᠦᠭᠡᠢ ᠲᠡᠮᠦᠷ ᠴᠡᠷᠢᠭ ᠪᠣᠯᠳᠠᠭ ᠶᠤᠮ ᠭᠡᠵᠦ ᠶᠠᠷᠢᠵᠤ᠂
— ᠲᠡᠷᠡ ᠬᠡᠦᠬᠡᠨ ᠬᠤᠲᠤᠭᠲᠤ ᠶ᠋ᠢᠨ ᠠᠪᠳᠠᠷᠠ ᠳ᠋ᠠᠬᠢ ᠵᠡᠭᠦᠦ ᠨᠢ ᠰᠥᠨᠢ ᠬᠠᠩᠭᠢᠷ ᠵᠢᠩᠭᠢᠷ ᠬᠢᠵᠦ᠂ ᠣᠳᠣ ᠭᠡᠭᠡᠭᠡᠨᠲᠡᠨ ᠪᠢᠳᠡᠨ ᠢ᠋ ᠮᠦᠣ᠌ᠨᠳᠤ ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠭᠠᠷᠭᠠᠵᠤ᠂ ᠳᠠᠢᠰᠤᠨ ᠬᠢᠲᠠᠳ ᠤ᠋ᠨ ᠬᠠᠷᠠ ᠴᠡᠷᠢᠭ ᠢ᠋ ᠳᠠᠷᠤᠨ ᠳᠠᠢᠲᠤᠭᠤᠯᠤᠨᠠ ᠭᠡᠵᠦ ᠨᠠᠷᠢᠬᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠵᠢᠩᠭᠢᠨᠡᠨ ᠬᠡᠯᠡᠯᠴᠡᠳᠡᠭ ᠶᠦᠮ ᠭᠡᠨᠡ ᠯᠡ ᠭᠡᠵᠦ ᠶᠠᠷᠢᠪᠠ᠃ ᠰᠢᠷᠴᠢᠨ᠂ ᠲᠡᠷᠡ ᠡᠪᠦᠭᠡᠨ ᠦ᠌ ᠶᠠᠷᠢᠬᠤ ᠶ᠋ᠢ ᠴᠢᠩᠨᠠᠵᠤ ᠪᠠᠢᠭᠠᠳ᠂
— ᠲᠡᠷᠡ ᠵᠡᠭᠦᠦ ᠶ᠋ᠢᠨ ᠲᠡᠭᠡᠵᠦ ᠶᠠᠷᠢᠬᠤ ᠶ᠋ᠢ ᠬᠡᠨ ᠰᠣᠨᠣᠰᠤᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠵᠠᠢ᠃
— ᠬᠡᠨ ᠰᠣᠨᠣᠰᠬᠤ ᠪᠣᠢ? ᠬᠥᠮᠦᠨ ᠯᠡ ᠰᠣᠨᠣᠰᠤᠭᠠ ᠪᠢᠵᠡ᠃ ᠲᠡᠢᠮᠦ ᠲᠡᠮᠦᠷ ᠴᠡᠷᠢᠭ ᠲᠡᠢ ᠠᠪᠳᠠᠷᠠ ᠪᠠᠰᠠ ᠶᠦᠬᠦᠸᠽᠠᠷ ᠬᠤᠲᠤᠭᠲᠤ ᠶ᠋ᠢᠨ ᠳ᠋ᠦ᠍ ᠪᠠᠢᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠪᠠᠰᠠ ᠯᠠ ᠴᠠᠭ ᠢ᠋ᠶ᠋ᠠᠨ ᠢᠷᠡᠬᠦ ᠳ᠋ᠦ᠍᠂ ᠮᠠᠨ ᠤ᠋ ᠭᠠᠵᠠᠷ ᠤᠰᠤ ᠶ᠋ᠢ ᠳᠠᠢᠰᠤᠨ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠭᠡᠵᠦ ᠭᠠᠷᠴᠤ ᠢᠷᠡᠬᠦ ᠶᠦᠮ ᠭᠡᠨᠡ ᠪᠢᠯᠡ ᠭᠡᠵᠦ ᠤᠷᠢᠳᠤ ᠯᠠᠮᠠ ᠶᠠᠪᠤᠭᠰᠠᠨ ᠨᠢᠭᠡ ᠴᠣᠬᠣᠷ ᠴᠡᠷᠢᠭ᠂ ᠲᠡᠷᠡ ᠡᠪᠦᠭᠡᠨ ᠦ᠌ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠭᠠᠳ ᠪᠠᠰᠠ ᠨᠡᠮᠡᠷᠢᠯᠡᠵᠦ᠂ ᠶᠦᠬᠦᠸᠽᠠᠷ ᠬᠤᠲᠤᠭᠲᠤ ᠶ᠋ᠢᠨ ᠨᠢᠭᠡ ᠱᠠᠪᠢ ᠨᠢ ᠪᠠᠭᠰᠢ ᠶᠤᠭᠠᠨ ᠦᠷᠭᠦᠭᠡᠨ ᠡᠴᠡ ᠭᠠᠳᠠᠭᠰᠢ ᠭᠠᠷᠬᠤ ᠰᠠᠮᠪᠠᠭᠠᠨ ᠳ᠋ᠤ᠌᠂ ᠨᠢᠭᠡ ᠠᠪᠳᠠᠷᠠ ᠨᠡᠬᠡᠭᠡᠳ ᠣᠷᠬᠢᠵᠠᠢ᠃ ᠠᠪᠳᠠᠷᠠ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠵᠡᠭᠦᠦ ᠣᠢᠴᠢᠵᠤ᠂ ᠭᠠᠵᠠᠷ ᠬᠦᠷᠦᠮᠡᠭᠴᠡ ᠪᠢᠴᠢᠬᠠᠨ ᠲᠡᠮᠦᠷ ᠴᠡᠷᠢᠭ ᠪᠣᠯᠤᠭᠠᠳ᠂ ᠵᠠ᠂ ᠬᠠᠰᠢ ᠶᠠᠪᠤᠵᠤ᠂ ᠬᠡᠨ ᠢ᠋ ᠳᠠᠢᠯᠠᠬᠤ ᠪᠣᠢ? ᠭᠡᠵᠦ ᠨᠠᠷᠢᠨ ᠬᠣᠭᠣᠯᠠᠢ ᠪᠠᠷ ᠳᠤᠤᠭᠠᠷᠴᠠᠭᠠᠵᠤ᠂ ᠥᠨᠥᠬᠢ ᠠᠶᠤᠨ ᠰᠠᠨᠳᠤᠷᠤᠭᠰᠠᠨ ᠪᠠᠨᠳᠢ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠲᠣᠮᠣ ᠪᠣᠯᠵᠤ ᠢᠷᠡᠪᠡ ᠭᠡᠨᠡ᠃ ᠪᠠᠨᠳᠢ ᠨᠢ ᠠᠶᠤᠬᠤ ᠳ᠋ᠠᠭᠠᠨ ᠦᠢ᠂ ᠲᠠ ᠨᠠᠷ᠂ ᠠᠪᠳᠠᠷᠠ ᠰᠠᠪᠠᠨ ᠳ᠋ᠠᠭᠠᠨ ᠣᠷᠣ ᠭᠡᠵᠦ ᠬᠠᠰᠬᠢᠷᠴᠠᠢ᠃ ᠴᠢᠩᠭᠢᠲᠡᠯᠡ ᠥᠨᠥᠬᠢ ᠵᠡᠭᠦᠦ ᠨᠢ ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠭᠠᠷᠴᠤ ᠣᠢᠴᠢᠭᠠᠳ ᠯᠠ ᠪᠢᠴᠢᠬᠠᠨ ᠲᠡᠮᠦᠷ ᠴᠡᠷᠢᠭ ᠪᠣᠯᠵᠤ᠂ ᠪᠠᠭ ᠪᠠᠭ ᠢ᠋ᠶ᠋ᠠᠷ ᠵᠢᠭᠰᠠᠵᠤ᠂ ᠲᠣᠮᠣ ᠪᠣᠯᠵᠤ ᠭᠡᠨᠡ᠃ ᠠᠰᠢᠭᠦᠢ ᠬᠠᠷᠢᠨ ᠪᠠᠭᠰᠢ ᠨᠢ ᠢᠷᠡᠵᠦ ᠥᠨᠥᠬᠢ ᠲᠡᠮᠦᠷ ᠴᠡᠷᠢᠭ ᠢ᠋ ᠳᠠᠬᠢᠨ ᠠᠪᠳᠠᠷᠠ ᠳ᠋ᠤᠨᠢ ᠣᠷᠣᠭᠤᠯᠵᠠᠢ᠃ ᠡᠰᠡ ᠲᠡᠭᠡᠪᠡᠯ ᠠᠶᠤᠯᠲᠠᠢ ᠶᠤᠮ(ᠶᠠᠭᠤᠮᠠ) ᠪᠣᠯᠬᠤ ᠪᠠᠢᠵᠠᠢ ᠭᠡᠬᠦ ᠳ᠋ᠦ᠍ᠨᠢ᠂
— ᠪᠣᠭᠳᠠ ᠭᠡᠭᠡᠬᠡᠨ (ᠭᠡᠭᠡᠨ) ᠦ᠌ ᠠᠪᠤᠷᠠᠯ ᠢ᠋ᠶ᠋ᠠᠷ ᠲᠩᠷᠢ ᠪᠤᠷᠬᠠᠨ᠂ ᠰᠠᠬᠢᠭᠤᠯᠰᠤ ᠰᠠᠪᠳᠠᠭ᠂ ᠮᠠᠨ ᠤ᠋ ᠭᠠᠵᠠᠷ ᠤᠰᠤ ᠶ᠋ᠢ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠱᠠᠮᠪᠠ ᠪᠥᠬᠡ᠂ ᠲᠡᠷᠡ ᠶᠠᠷᠢᠶᠠ ᠪᠣᠯᠵᠤ ᠪᠠᠢᠬᠤ ᠵᠠᠭᠤᠷᠠ ᠬᠦᠷᠴᠦ ᠢᠷᠡᠭᠡᠳ᠂ ᠯᠠᠮᠠ ᠶ᠋ᠢᠨ ᠭᠡᠭᠡᠬᠡᠨ(ᠭᠡᠭᠡᠨ) ᠦ᠌ ᠬᠡᠢᠳ ᠡᠴᠡ ᠡᠭᠦᠪᠡᠷ ᠥᠩᠭᠡᠷᠡᠭᠰᠡᠨ ᠨᠢᠭᠡᠨ ᠡᠯᠴᠢ ᠡᠴᠡ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡ ᠭᠡᠵᠦ ᠶᠠᠷᠢᠭᠰᠠᠨ ᠨᠢ᠂ ᠬᠢᠲᠠᠳ ᠤ᠋ᠨ ᠬᠠᠷᠠ ᠴᠡᠷᠢᠭ᠂ ᠮᠠᠨᠠᠢ ᠮᠣᠩᠭᠣᠯ ᠢ᠋ ᠳᠠᠬᠢᠨ ᠮᠠᠨᠵᠤ ᠬᠠᠭᠠᠨ ᠤ᠋ ᠬᠣᠷᠮᠣᠢ ᠳᠣᠣᠷᠠ ᠣᠷᠣᠭᠤᠯᠬᠤ ᠭᠡᠵᠦ᠂ ᠮᠠᠨᠠᠢ ᠨᠤᠲᠤᠭ ᠤ᠋ᠨ ᠵᠠᠬᠠ ᠶ᠋ᠢ ᠴᠢᠭᠯᠡᠵᠦ᠂ ᠣᠯᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠠᠶᠠᠨ ᠬᠢᠵᠦ ᠶᠠᠪᠤᠭᠠ ᠭᠡᠨᠡ᠂ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠡᠵᠡᠨ᠂ ᠯᠤᠤᠰ ᠰᠠᠪᠳᠠᠭ ᠪᠢᠳᠡᠨ ᠢ᠋ ᠰᠠᠬᠢᠨ ᠢᠪᠡᠭᠡᠵᠦ᠂ ᠬᠢᠲᠠᠳ ᠤ᠋ᠨ ᠬᠠᠷᠠ ᠴᠡᠷᠢᠭ ᠮᠠᠨᠠᠢ ᠬᠢᠯᠢ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠭᠡᠳ᠂ ᠰᠥᠨᠢ ᠶ᠋ᠢᠨ ᠬᠣᠨᠣᠭ ᠲᠤ᠌ ᠬᠦᠷᠢᠶᠡᠯᠡᠨ ᠪᠠᠭᠤᠵᠤ ᠬᠣᠢᠲᠤ ᠥᠷᠯᠥᠭᠡ ᠪᠣᠰᠬᠤ ᠳ᠋ᠤᠨᠢ ᠮᠠᠨᠠᠢ ᠬᠢᠯᠢ ᠡᠴᠡ ᠨᠢᠭᠡ ᠬᠣᠨᠣᠭᠴᠢ ᠶ᠋ᠢᠨ ᠭᠠᠵᠠᠷ ᠤᠬᠤᠷᠢᠭᠠᠳ ᠪᠠᠢᠳᠠᠭ ᠭᠡᠨᠡ᠃ ᠡᠳᠦᠷᠵᠢᠨ ᠶᠠᠪᠤᠭᠠᠳ᠂ ᠳᠠᠬᠢᠨ ᠬᠢᠯᠢ ᠳᠡᠭᠡᠷᠡ ᠬᠦᠷᠴᠦ ᠬᠣᠨᠣᠬᠤ ᠳ᠋ᠤᠨᠢ ᠮᠥᠨ ᠠᠨᠠᠢ ᠰᠥᠨᠢ ᠨᠢ ᠤᠬᠤᠷᠢᠴᠢᠬᠰᠠᠨ (ᠤᠬᠤᠷᠢᠴᠢᠬᠠᠭᠰᠠᠨ)ᠪᠠᠢᠳᠠᠭ ᠭᠡᠨᠡ᠃ ᠲᠡᠭᠡᠭᠡᠳ ᠯᠡ᠂ ᠡᠳᠦᠷ ᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠨᠢᠭᠡ ᠠᠬᠢᠭᠠᠳ᠂ ᠰᠥᠨᠢ ᠯᠤᠤᠰ ᠰᠠᠪᠳᠠᠭ ᠤ᠋ᠨ ᠬᠦᠴᠦ ᠪᠡᠷ ᠨᠢᠭᠡ ᠤᠬᠤᠷᠢᠭᠠᠳ᠂ ᠴᠠᠰᠢ(ᠴᠠᠭᠠᠰᠢ) ᠨᠠᠰᠢ(ᠨᠠᠭᠠᠰᠢ) ᠪᠠᠨ ᠬᠣᠯᠬᠢᠭᠰᠠᠭᠠᠷ ᠶᠡᠬᠡᠯᠡ(ᠶᠡᠬᠡ ᠯᠡ) ᠤᠳᠠᠵᠤ ᠪᠠᠢᠨᠠ ᠭᠡᠨᠡ᠃ ᠯᠠᠮᠠ ᠪᠠᠭᠰᠢ ᠨᠠᠷ ᠪᠢᠳᠡᠨ ᠢ᠋ ᠠᠪᠤᠷᠠᠨ ᠲᠡᠳᠬᠦᠵᠦ ᠪᠠᠢᠭᠠ ᠴᠠᠭ ᠲᠤ᠌ ᠬᠢᠲᠠᠳ ᠤ᠋ᠨ ᠬᠠᠷᠠ ᠴᠡᠷᠢᠭ᠂ ᠶᠡᠷᠦ ᠮᠠᠨᠠᠢ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠬᠠᠯᠳᠠᠬᠤ ᠶᠣᠰᠣ ᠦᠭᠡᠢ ᠶᠦᠮ ᠭᠡᠨᠡ ᠭᠡᠵᠦ ᠱᠠᠮᠪᠠ ᠪᠥᠬᠡ ᠶ᠋ᠢᠨ ᠶᠠᠷᠢᠵᠤ ᠭᠦᠢᠴᠡᠬᠦ ᠳ᠋ᠦ᠍ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠰᠣᠨᠣᠰᠤᠭᠴᠢᠳ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠢᠰᠢᠷᠡᠨ ᠭᠠᠢᠬᠠᠵᠤ ᠪᠢᠯᠡ᠃ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠣᠶᠠᠷ ᠬᠣᠨᠣᠬᠤ ᠵᠠᠭᠤᠷᠠ ᠰᠢᠷᠴᠢᠨ᠂ ᠡᠢᠮᠦ ᠴᠢᠳᠬᠥᠷ᠂ ᠲᠡᠢᠮᠦ ᠪᠤᠭ᠂ ᠡᠢᠮᠦ ᠪᠥᠬᠡ᠂ ᠲᠡᠢᠮᠦ ᠰᠢᠳᠢᠲᠡᠨ ᠯᠠᠮᠠ ᠭᠡᠵᠦ ᠤᠷᠢᠳᠤ ᠨᠢᠭᠡ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠰᠣᠨᠣᠰᠤᠭᠠᠳᠤᠢ ᠬᠠᠴᠢᠨ ᠶᠠᠷᠢᠶᠠ ᠥᠭᠦᠯᠡᠯ ᠰᠣᠨᠣᠰᠪᠠ᠃ ᠭᠡᠪᠡᠴᠦ ᠬᠣᠰᠢᠭᠤᠳ ᠠ᠋ᠴᠠ ᠲᠠᠲᠠᠭᠰᠠᠨ ᠲᠡᠷᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍᠂ ᠰᠣᠨᠣᠰᠴᠤ ᠪᠠᠢᠭᠠ ᠶᠠᠷᠢᠵᠤ ᠪᠠᠢᠭᠠ ᠬᠥᠮᠦᠨ ᠦ᠌ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠦᠨᠡᠨ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠳᠠᠭ ᠲᠤᠩ ᠬᠠᠴᠢᠨ ᠡᠲᠡᠭᠡᠳ ᠵᠢᠭᠲᠡᠢ ᠶᠠᠭᠤᠮᠠ ᠶ᠋ᠢ ᠲᠡᠭᠡᠵᠦ ᠶᠠᠷᠢᠬᠤ ᠠ᠋ᠴᠠ ᠭᠠᠳᠠᠨᠠ᠂ ᠪᠠᠰᠠ ᠠᠷᠠᠳ ᠣᠯᠠᠨ ᠤ᠋ ᠲᠤᠢᠯ ᠤ᠋ᠨ ᠭᠠᠰᠢᠭᠤᠨ ᠵᠣᠪᠠᠯᠠᠩᠲᠤ ᠠᠮᠢᠳᠤᠷᠠᠯ᠂ ᠨᠣᠶᠠᠳ ᠬᠤᠲᠤᠭᠲᠤ ᠨᠠᠷ ᠤ᠋ᠨ ᠬᠠᠷᠭᠢᠰ ᠢᠳᠡᠮᠡᠬᠡᠢ᠂ ᠰᠢᠳᠤᠷᠭᠤ ᠦᠭᠡᠢ ᠬᠡᠷᠴᠡᠭᠡᠢ ᠶ᠋ᠢ᠂ ᠮᠥᠨ ᠠᠪᠯᠢᠭᠠᠴᠢ ᠬᠣᠪᠳᠣᠭ ᠲᠦᠰᠢᠮᠡᠳ ᠦ᠋ᠨ ᠲᠠᠯᠠ ᠲᠣᠬᠣᠢ ᠲᠠᠲᠠᠳᠠᠭ ᠥᠩᠭᠡ ᠴᠢᠷᠠᠢ ᠬᠠᠷᠠᠳᠠᠭ᠂ ᠬᠢᠲᠠᠳ ᠤ᠋ᠨ ᠮᠥᠩᠭᠥ ᠬᠦᠦᠯᠡᠬᠦ ᠫᠦᠰᠡ ᠶ᠋ᠢᠨ ᠰᠢᠨᠤᠬᠠᠢ ᠮᠥᠯᠵᠢᠮᠡᠲᠡᠭᠡᠢ ᠶ᠋ᠢ ᠪᠠᠰᠠ ᠶᠠᠷᠢᠳᠠᠭ ᠪᠠᠢᠵᠠᠢ᠃
ᠲᠡᠭᠡᠭᠡᠳ ᠪᠣᠳᠣᠭᠠᠳ ᠢᠷᠡᠬᠦ ᠳ᠋ᠦ᠍᠂ ᠬᠢᠲᠠᠳ ᠬᠥᠮᠦᠨ ᠪᠦᠷᠢ ᠶ᠋ᠢ᠂ ᠡᠳ᠋ ᠬᠥᠷᠥᠩᠭᠡ ᠲᠡᠢ ᠪᠠᠢᠪᠠᠯ ᠲᠣᠨᠣᠵᠤ᠂ ᠡᠰᠡᠷᠭᠦᠴᠡᠪᠡᠯ ᠨᠢ ᠠᠯᠠᠵᠤ ᠪᠠᠢᠪᠠᠯ ᠵᠣᠬᠢᠮᠠᠷ ᠰᠠᠨᠠᠭᠳᠠᠳᠠᠭ ᠪᠠᠢᠵᠠᠢ᠃ ᠬᠢᠲᠠᠳ ᠬᠥᠮᠦᠨ ᠢ᠋ ᠳᠡᠭᠡᠷᠡᠮᠳᠡᠬᠦ ᠲᠤᠨᠤᠬᠤ ᠳ᠋ᠤ᠌ ᠴᠡᠭᠡᠷ ᠬᠣᠷᠢᠭᠠ᠂ ᠨᠢᠭᠦᠯ ᠨᠦᠬᠡ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠮᠣᠩᠭᠣᠯ ᠳ᠋ᠠᠭᠠᠨ ᠭᠠᠷ ᠬᠦᠷᠴᠦ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠵᠦ ᠰᠢᠷᠴᠢᠨ ᠲᠡᠢ ᠨᠢᠭᠡᠨ ᠠᠷᠪᠠᠨ ᠳ᠋ᠤ᠌ ᠪᠠᠢᠳᠠᠭ ᠡᠪᠦᠭᠡᠨ ᠴᠡᠷᠢᠭ ᠶᠠᠷᠢᠳᠠᠭ ᠪᠠᠢᠵᠠᠢ᠃ ᠲᠡᠭᠡᠵᠦ ᠪᠣᠳᠣᠳᠠᠭ ᠬᠥᠮᠦᠨ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠭᠠᠭᠴᠠ ᠲᠡᠷᠡ ᠡᠪᠦᠭᠡᠨ ᠪᠢᠰᠢ ᠣᠯᠠᠨ ᠪᠠᠢᠵᠠᠢ᠃
ᠥᠭᠡᠳᠡᠯᠡᠬᠦ ᠶ᠋ᠢᠨ ᠭᠣᠷᠢ ᠲᠠᠰᠤᠷᠠᠭᠰᠠᠨ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠳ᠋ᠤ᠌ ᠬᠣᠷᠣᠰᠤᠯ ᠵᠠᠩᠭᠢᠷᠠᠵᠤ᠂ ᠥᠰᠢᠯ ᠡᠪᠦᠷᠯᠡᠭᠰᠡᠨ ᠤᠴᠢᠷ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠠᠩᠭᠤᠢ ᠪᠦᠳᠦᠭᠦᠯᠢᠭ ᠤᠯᠤᠰ᠂ ᠡᠨᠡ ᠨᠠᠰᠤᠨ ᠤ᠋ ᠬᠠᠮᠤᠭ ᠮᠠᠭᠤ ᠵᠣᠪᠠᠯᠠᠩ ᠭᠠᠭᠴᠠᠬᠦ(ᠭᠠᠭᠴᠠ ᠬᠦ᠌) ᠨᠣᠶᠠᠳ ᠢ᠋ ᠵᠡᠷᠭᠡ ᠬᠡᠷᠬᠢᠮ ᠣᠯᠬᠤ ᠭᠡᠵᠦ ᠪᠡᠭᠡᠵᠢᠩ ᠣᠷᠣᠳᠠᠭ ᠠ᠋ᠴᠠ ᠪᠣᠯᠵᠤ ᠪᠠᠢᠭᠠ ᠶᠤᠮ᠃ ᠪᠠᠰᠠ ᠨᠣᠶᠠᠳ ᠤ᠋ᠨ ᠲᠡᠭᠡᠵᠦ ᠪᠡᠭᠡᠵᠢᠩ ᠣᠷᠣᠬᠤ ᠳ᠋ᠤᠨᠢ ᠮᠥᠩᠭᠥ ᠵᠢᠭᠡᠯᠡᠳᠦᠭᠦᠯᠵᠦ ᠥᠭᠭᠦᠭᠡᠳ᠂ ᠲᠡᠭᠦᠨ ᠦ᠌ ᠬᠦᠦ ᠶ᠋ᠢ ᠨᠢ ᠬᠣᠰᠢᠭᠤ ᠣᠯᠠᠨ ᠠ᠋ᠴᠠ ᠭᠠᠷᠭᠠᠭᠤᠯᠵᠤ ᠮᠥᠯᠵᠢᠨ ᠳᠠᠷᠤᠯᠠᠳᠠᠭ ᠬᠢᠲᠠᠳ ᠳ᠋ᠠᠩᠵᠢᠶᠠᠳᠠ(ᠳᠠᠩᠵᠢᠶᠠᠳ) ᠨᠠᠷ ᠠ᠋ᠴᠠ ᠪᠣᠯᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠰᠠᠨᠠᠳᠠᠭ ᠪᠠᠢᠵᠠᠢ᠃
ᠮᠠᠨᠠᠢ(ᠮᠠᠨ ᠤ᠋) ᠨᠣᠶᠠᠳ᠂ ᠮᠠᠨᠵᠤ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠬᠠᠵᠤ(ᠪᠠᠷᠠᠯᠬᠠᠵᠤ)᠂ ᠵᠡᠷᠭᠡ ᠬᠡᠷᠬᠢᠮ ᠣᠯᠬᠤ ᠵᠠᠯᠭᠠᠮᠵᠢᠯᠠᠬᠤ ᠭᠡᠵᠦ ᠪᠡᠭᠡᠵᠢᠩ ᠣᠷᠣᠬᠤ ᠪᠠᠨ ᠪᠠᠢᠭᠠᠳ᠂ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠪᠣᠭᠳᠠ ᠭᠡᠭᠡᠬᠡᠨ(ᠭᠡᠭᠡᠨ) ᠰᠠᠭᠤᠵᠤ᠂ ᠪᠤᠷᠬᠠᠨ ᠱᠠᠰᠢᠨ ᠳ᠋ᠤ᠌᠂ ᠲᠩᠷᠢ ᠢᠵᠠᠭᠤᠷ ᠲᠤ᠌᠂ ᠮᠠᠨᠠᠢ(ᠮᠠᠨ ᠤ᠋) ᠨᠣᠶᠠᠳ ᠲᠤ᠌ ᠬᠡᠰᠢᠭ ᠬᠡᠷᠬᠢᠮ ᠬᠦᠷᠲᠡᠭᠡᠵᠦ᠂ ᠮᠠᠨᠵᠤ ᠬᠢᠲᠠᠳ ᠲᠦᠰᠢᠮᠡᠯ ᠴᠡᠷᠢᠭ ᠢ᠋ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠪᠠᠯ᠂ ᠲᠠ ᠪᠦᠬᠦᠨ ᠡᠩᠬᠡ ᠠᠮᠤᠷ ᠵᠢᠷᠭᠠᠯ ᠡᠳ᠋ᠯᠡᠨᠡ ᠭᠡᠵᠦ ᠯᠠᠮᠠ ᠪᠠᠭᠰᠢ ᠨᠠᠷ ᠰᠤᠷᠭᠠᠨ ᠰᠡᠩᠬᠡᠷᠡᠭᠦᠯᠳᠡᠭ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠦ᠍᠂ ᠲᠡᠷᠡ ᠣᠯᠠᠨ ᠴᠡᠷᠢᠭ ᠡᠷᠡ ᠶ᠋ᠢᠨ ᠳᠣᠲᠣᠷᠠ᠂ ᠯᠠᠮᠠ ᠪᠠᠭᠰᠢ ᠦᠭᠡᠢ ᠬᠥᠮᠦᠨ᠂ ᠲᠡᠷᠡ ᠴᠠᠭ ᠲᠤ᠌ ᠬᠠᠮᠢᠭᠠ ᠠ᠋ᠴᠠ ᠪᠠᠢᠬᠤ ᠠᠵᠢ᠃ ᠬᠥᠮᠦᠨ ᠪᠦᠬᠦᠨ ᠪᠠᠭᠰᠢ ᠲᠠᠢ᠂ ᠲᠡᠭᠦᠨ ᠢ᠋ ᠮᠠᠭᠤ ᠵᠦᠭ ᠦ᠋ᠨ ᠬᠣᠣᠷ ᠬᠥᠨᠥᠭᠡᠯ ᠡᠴᠡ ᠠᠪᠤᠷᠠᠳᠠᠭ᠂ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠠ᠋ᠴᠠ ᠰᠠᠯᠭᠠᠳᠠᠭ ᠠᠴᠢᠲᠤ ᠪᠠᠭᠰᠢ ᠭᠡᠵᠦ ᠦᠵᠡᠳᠡᠭ ᠴᠠᠭ ᠪᠠᠢᠵᠠᠢ᠃
ᠯᠤᠤᠰ ᠰᠠᠪᠳᠠᠭ ᠢ᠋ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠪᠤᠷᠬᠠᠨ ᠲᠩᠷᠢ ᠶ᠋ᠢᠨ ᠳᠣᠣᠷᠠᠲᠤ ᠲᠤᠰᠠᠯᠠᠬᠤ ᠭᠡᠵᠦ ᠦᠵᠡᠳᠡᠭ ᠲᠡᠢ ᠠᠳᠠᠯᠢ᠂ ᠰᠢᠷᠠ ᠶ᠋ᠢᠨ ᠪᠥᠬᠡ ᠭᠡᠭᠴᠢ ᠶ᠋ᠢ ᠽᠥᠩᠺᠡᠸ᠋ᠠ ᠶ᠋ᠢᠨ ᠱᠠᠰᠢᠨ ᠤ᠋ ᠯᠠᠮᠠ ᠨᠠᠷ ᠤ᠋ᠨ ᠳᠣᠣᠷᠠᠲᠤ ᠲᠤᠰᠠᠯᠠᠭᠴᠢ ᠨᠠᠷ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠢᠷᠡᠬᠦ ᠳ᠋ᠦ᠍᠂ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠳᠠᠷᠤᠯᠠᠭᠳᠠᠨ ᠬᠣᠴᠣᠷᠤᠭᠳᠠᠭᠰᠠᠨ ᠬᠥᠭᠡᠷᠦᠬᠦᠢ ᠬᠥᠮᠦᠰ ᠪᠢᠴᠢᠭ ᠦᠰᠦᠭ ᠮᠡᠳᠡᠬᠦ ᠶ᠋ᠢ ᠬᠤᠪᠢ ᠲᠠᠢ ᠬᠡᠰᠢᠭ ᠲᠡᠢ ᠴᠥᠭᠡᠨ ᠬᠥᠮᠦᠨ ᠦ᠌ ᠣᠯᠵᠤ ᠰᠤᠷᠬᠤ ᠳᠡᠭᠡᠳᠦ ᠡᠷᠳᠡᠮ ᠭᠡᠵᠦ ᠦᠰᠦᠭ ᠢ᠋ ᠦᠭᠡ ᠪᠦᠲᠦᠭᠡᠬᠦ ᠵᠡᠷᠭᠡ ᠰᠢᠳᠢ ᠶ᠋ᠢᠨ ᠬᠦᠴᠦ ᠲᠡᠢ ᠶᠠᠭᠤᠮᠠ ᠭᠡᠵᠦ ᠪᠢᠰᠢᠷᠡᠨ ᠪᠣᠳᠣᠭᠠᠳ ᠱᠠᠰᠢᠨ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ᠂ ᠲᠥᠷᠥᠯ ᠳᠣᠳᠣᠮ ᠳ᠋ᠤ᠌ ᠲᠣᠳᠣᠷᠠᠨ ᠪᠠᠢᠭᠠ ᠠᠮᠢᠳᠤ ᠪᠤᠷᠬᠠᠨ᠂ ᠪᠣᠭᠳᠠ ᠭᠡᠭᠡᠬᠡᠨ(ᠭᠡᠭᠡᠨ) ᠦ᠌ ᠱᠠᠰᠢᠨ ᠲᠥᠷᠥ ᠶ᠋ᠢ ᠬᠣᠣᠰᠯᠠᠨ ᠪᠠᠷᠢᠬᠤ ᠤᠯᠤᠰ ᠲᠥᠷᠥ᠂ ᠰᠢᠷᠠ ᠶ᠋ᠢᠨ ᠱᠠᠰᠢᠨ᠂ ᠪᠣᠭᠳᠠᠰ ᠤ᠋ᠨ ᠨᠣᠮ ᠪᠣᠯᠪᠠᠯ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠭᠡᠵᠦ ᠦᠵᠡᠳᠡᠭ ᠯᠠᠮᠠ ᠪᠠᠭᠰᠢ ᠨᠠᠷ ᠤ᠋ᠨ ᠲᠠᠭᠠᠯᠠᠯ ᠢ᠋ ᠳᠠᠭᠠᠵᠤ᠂ ᠲᠡᠳᠡᠨ ᠦ᠌ ᠪᠣᠳᠣᠭᠰᠠᠨ ᠶᠣᠰᠣᠭᠠᠷ ᠶᠠᠭᠤᠮᠠ ᠬᠢᠬᠦ ᠶ᠋ᠢ ᠪᠣᠳᠣᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠭᠰᠠᠨ ᠤᠯᠤᠰ ᠠᠵᠢ᠃
— — — —
* ᠠᠪᠠᠢ ᠺᠣᠨᠡᠩᠪᠡᠶᠧᠹ(1845—1904) ᠺᠠᠽᠠᠭ ᠤ᠋ᠨ ᠺᠯᠠᠰᠰᠢᠭ ᠤᠳᠬᠠ ᠵᠣᠬᠢᠶᠠᠯ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠯᠪᠢᠭᠴᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ᠂ ᠴᠡᠩᠬᠡᠯᠴᠡᠴᠡᠭ᠂ ᠣᠶᠤᠨᠪᠢᠯᠢᠭ᠌᠂ ᠪᠠᠯ
ᠬᠢᠨᠠᠭᠴᠢ᠄ ᠪᠠᠳᠮᠠᠰᠡᠴᠡᠨ᠂ ᠣᠳᠬᠣᠨᠴᠡᠴᠡᠭ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ᠂ ᠮᠥᠩᠭᠥᠨᠭᠣᠸᠠ᠂ ᠪᠠᠯ
ᠤᠩᠰᠢᠭᠴᠢ᠄ ᠨᠠᠰᠤᠨ᠌ᠦ᠌ᠯᠵᠡᠢ