ᠦᠷ ᠦᠨ ᠲᠤᠶᠠᠭᠠ II – ᠪ᠂ ᠷᠢᠨᠴᠢᠨ - ᠬᠣᠶᠠᠳᠤᠭᠠᠷ ᠲᠡᠪᠲᠡᠷ <ᠭᠠᠯ ᠤᠰᠤᠨ ᠤ ᠭᠠᠰᠢᠭᠤᠨ ᠵᠣᠪᠠᠯᠠᠩ>- ᠬᠣᠶᠠᠷ Үүрийн туяа II – Б ᠂ Ренчин Хоёрдугаар дэвтэр "Гал усны гашуун зовлон"-2
346ᠬᠣᠶᠠᠷ᠂ ᠬᠠᠭᠠᠨ ᠤ ᠬᠡᠰᠢᠭ
Шевченко *
Виж таки люди не собаки.
На щ，о здалися вам пасрi!
На ш，оздалися вам цасрi!
О，люди люди небораки！
ᠣᠯᠠᠨ ᠵᠢᠩᠬᠢᠨᠢ᠂ ᠲᠠᠯᠠ ᠪᠢᠴᠢᠭᠡᠴᠢ ᠨᠠᠷ᠂ ᠲᠦᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠪᠣᠯᠤᠭᠰᠠᠨ ᠪᠦᠭᠦᠳᠡ ᠶᠡᠷᠦᠩᠬᠡᠢᠯᠡᠨ ᠰᠢᠢᠳᠬᠡᠬᠦ ᠭᠠᠵᠠᠷ ᠤ᠋ᠨ ᠠᠯᠪᠠᠨ ᠦ᠌ ᠭᠡᠷ ᠲᠦ᠍ ᠡᠳᠦᠷ ᠰᠥᠨᠢ ᠦᠭᠡᠢ ᠨᠢᠳᠦ ᠪᠡᠨ ᠤᠯᠠᠢᠲᠠᠯᠠ ᠰᠠᠭᠤᠵᠤ᠂ ᠠᠷᠤ ᠮᠣᠩᠭᠣᠯ ᠤ᠋ᠨ ᠳᠥᠷᠪᠡᠨ ᠠᠢᠮᠠᠭ ᠤ᠋ᠨ ᠵᠠᠩᠵᠤᠨ᠂ ᠣᠯᠠᠨ ᠵᠠᠰᠠᠭ ᠨᠣᠶᠠᠳ᠂ ᠮᠥᠨ ᠥᠪᠥᠷ ᠵᠢᠷᠭᠤᠭᠠᠨ ᠴᠢᠭᠤᠯᠭᠠᠨ ᠳ᠋ᠤ᠌ ᠶᠡᠷᠦᠩᠬᠡᠢᠯᠡᠨ ᠰᠢᠢᠳᠬᠡᠬᠦ ᠭᠠᠵᠠᠷ ᠠ᠋ᠴᠠ ᠵᠠᠷᠯᠠᠨ ᠶᠠᠪᠤᠭᠤᠯᠬᠤ ᠠᠯᠪᠠᠨ ᠪᠢᠴᠢᠭ ᠵᠠᠷᠯᠠᠯ᠂ ᠲᠤᠰᠢᠶᠠᠯ᠂ ᠲᠤᠩᠬᠠᠭ ᠵᠡᠷᠭᠡ ᠶ᠋ᠢ ᠰᠡᠢᠷᠡᠭᠦᠯᠦᠨ ᠪᠢᠴᠢᠵᠦ᠂ ᠮᠢᠬᠠ ᠪᠠᠨ ᠢᠳᠡᠵᠦ ᠪᠠᠢᠪᠠ᠃ ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠲᠡᠷᠡ ᠡᠪᠦᠯ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠠ᠋ᠴᠠ ᠬᠦᠷᠢᠶᠡ ᠣᠷᠣᠬᠤ ᠣᠯᠠᠨ ᠵᠠᠮ᠂ ᠰᠢᠷᠦᠭᠦᠨ ᠡᠯᠴᠢ ᠶ᠋ᠢᠨ ᠭᠠᠷ ᠢ᠋ ᠳᠠᠭᠠᠭᠠᠯ ᠦᠭᠡᠢ ᠦᠬᠦᠭᠰᠡᠨ ᠠᠭᠲᠠ ᠮᠣᠷᠢᠨ ᠤ᠋ ᠶᠠᠰᠤᠨ᠂ ᠲᠡᠮᠳᠡᠭᠲᠡᠢ ᠠᠨᠳᠤᠰᠢ ᠦᠭᠡᠢ ᠪᠣᠯᠪᠠ᠃ ᠬᠦᠷᠢᠶᠡᠨ ᠡᠴᠡ ᠡᠯᠴᠢ ᠨᠠᠷ ᠨᠢᠰ ᠨᠢᠰ! ᠭᠡᠰᠡᠨ ᠦᠰᠦᠭᠲᠡᠢ ᠨᠢᠰᠴᠦ ᠶᠠᠪᠤᠭᠠ ᠰᠢᠪᠠᠭᠤ ᠵᠢᠷᠤᠭᠰᠠᠨ ᠲᠣᠭᠳᠣᠢ ᠲᠠᠢ ᠪᠢᠴᠢᠭ ᠲᠤᠰᠢᠶᠠᠯ ᠸᠠᠳᠠᠩᠨᠠᠨ ᠠᠪᠴᠤ᠂ ᠡᠳᠦᠷ ᠰᠥᠨᠢ ᠦᠭᠡᠢ ᠳᠣᠪᠲᠣᠯᠤᠨ ᠳᠠᠪᠬᠢᠵᠠᠭᠠᠪᠠ᠃ ᠥᠭᠡᠳᠡ ᠡᠴᠡ ᠨᠢ ᠲᠦᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠵᠥᠪᠯᠡᠬᠦ ᠭᠡᠵᠦ ᠳᠠᠭᠤᠳᠠᠭᠤᠯᠤᠭᠠᠳ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠰᠠᠭᠤᠬᠤ ᠭᠡᠵᠦ ᠪᠠᠢᠭᠠ ᠬᠦᠷᠢᠶᠡᠨ ᠦ᠌ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ ᠶ᠋ᠢᠨ ᠳᠡᠷᠭᠡᠳᠡ ᠰᠢᠨᠡ ᠬᠡᠰᠢᠭ᠂ ᠴᠣᠯᠠ ᠬᠡᠷᠬᠢᠮ ᠬᠦᠷᠲᠡᠬᠦ ᠶᠠᠭᠤᠨ ᠤ᠋ ᠮᠠᠭᠠᠳ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠵᠠᠰᠠᠭ ᠨᠣᠶᠠᠳ᠂ ᠱᠠᠪᠢ ᠪᠦᠬᠦᠢ ᠬᠤᠲᠤᠭᠲᠤ ᠨᠠᠷ ᠡᠳᠦᠢ ᠲᠡᠳᠦᠢ ᠪᠠᠷᠠᠭᠠ ᠪᠣᠯᠤᠭᠴᠢᠳ ᠢ᠋ ᠳᠠᠭᠠᠭᠤᠯᠤᠨ ᠴᠤᠪᠤᠵᠠᠢ᠃
ᠨᠣᠶᠠᠳ ᠬᠤᠲᠤᠭᠲᠤ ᠨᠠᠷ ᠤ᠋ᠨ ᠡᠮᠦᠨᠡ ᠨᠢ ᠪᠣᠣᠬᠠᠢ ᠶ᠋ᠢᠨ ᠡᠮᠦᠨᠡ ᠬᠡᠷᠢᠶᠡ᠂ ᠪᠣᠷᠣᠭᠠᠨ ᠤ᠋ ᠡᠮᠦᠨᠡ ᠰᠠᠯᠬᠢ᠂ ᠪᠣᠭᠳᠠ ᠶ᠋ᠢᠨ ᠡᠮᠦᠨᠡ ᠡᠯᠴᠢ ᠭᠡᠭᠴᠢ ᠪᠡᠷ᠂ ᠰᠢᠷᠦᠭᠦᠨ ᠡᠯᠴᠢ ᠳᠠᠪᠬᠢᠵᠠᠭᠠᠵᠤ᠂ ᠡᠢᠮᠦ ᠨᠣᠶᠠᠨ ᠲᠡᠢᠮᠦ ᠬᠤᠲᠤᠭᠲᠤ ᠮᠣᠷᠢᠯᠠᠵᠤ ᠠᠢᠰᠤᠢ᠂ ᠭᠣᠶᠣᠮᠰᠣᠭ ᠬᠡᠪᠢᠰ ᠲᠡᠢ ᠤᠯᠠᠭᠠᠨ ᠬᠠᠯᠵᠠᠨ ᠥᠷᠭᠥᠭᠡ᠂ ᠶᠡᠬᠡᠰ ᠦ᠋ᠨ ᠬᠡᠷᠡᠭᠯᠡᠬᠦ ᠵᠣᠭᠣᠰ ᠰᠢᠭᠦᠰᠦ ᠪᠡᠯᠡᠨ ᠵᠠᠯᠠᠨ ᠪᠠᠢᠯᠭᠠ ᠭᠡᠵᠦ ᠱᠠᠪᠳᠠᠨ ᠳᠠᠪᠬᠢᠵᠠᠭᠠᠵᠤ᠂ ᠨᠣᠶᠠᠳ ᠯᠠᠮᠠ ᠨᠠᠷ ᠤ᠋ᠨ ᠬᠣᠨᠣᠬᠤ ᠦᠳᠡᠯᠡᠬᠦ ᠦᠷᠭᠦᠭᠡᠨ ᠳ᠋ᠦ᠍ ᠰᠥᠨᠢᠵᠢᠨ ᠭᠠᠯ ᠥᠷᠳᠡᠵᠦ᠂ ᠶᠡᠬᠡᠰ ᠦ᠋ᠨ ᠨᠣᠢᠷᠰᠤᠬᠤ ᠳ᠋ᠤ᠌ ᠳᠤᠯᠠᠭᠠᠨ ᠪᠠᠢᠯᠭᠠᠬᠤ ᠭᠡᠵᠦ ᠵᠦᠳᠡᠷᠡᠭᠰᠡᠨ ᠡᠪᠦᠭᠡᠳ ᠡᠮᠡᠭᠡᠳ᠂ ᠬᠠᠯᠠᠭᠤᠨ ᠬᠠᠷᠠ ᠴᠠᠢ ᠤᠤᠭᠤᠵᠤ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠳᠤᠯᠠᠭᠠᠴᠠᠨ ᠱᠤᠤᠭᠢᠯᠳᠤᠬᠤ ᠴᠡᠷᠢᠭ ᠦ᠋ᠨ ᠡᠷᠡᠴᠦᠳ ᠳᠦᠭᠦᠷᠦᠭᠰᠡᠨ ᠥᠷᠲᠡᠭᠡ ᠶ᠋ᠢᠨ ᠨᠣᠣᠷᠠᠩᠬᠠᠢ ᠬᠠᠷᠠ ᠭᠡᠷ ᠲᠦ᠍ ᠡᠳᠦᠷ ᠨᠢ ᠨᠢᠳᠦᠨ ᠦ᠌ ᠬᠣᠣᠷ ᠢ᠋ ᠭᠠᠷᠭᠠᠵᠤ ᠤᠨᠲᠠᠳᠠᠭ ᠪᠠᠢᠵᠠᠢ᠃ ᠬᠦᠷᠢᠶᠡᠨ ᠦ᠌ ᠬᠥᠭᠡᠭᠡᠭᠳᠡᠭᠰᠡᠨ ᠮᠠᠨᠵᠤ ᠠᠮᠪᠠᠨ ᠳ᠋ᠤ᠌ ᠤᠷᠢᠳᠤ ᠬᠠᠷᠢᠶᠠᠯᠠᠭᠳᠠᠵᠤ ᠪᠠᠢᠭᠰᠠᠨ ᠲᠦᠰᠢᠶᠡᠲᠦ᠂ ᠰᠡᠴᠡᠨ ᠬᠠᠨ ᠵᠡᠭᠦᠨ ᠬᠣᠶᠠᠷ ᠠᠢᠮᠠᠭ ᠠ᠋ᠴᠠ ᠤᠷᠠᠩᠬᠠᠢ ᠨᠣᠣᠷᠠᠩᠬᠠᠢ ᠬᠤᠪᠴᠠᠰᠤ ᠲᠠᠢ ᠬᠣᠭᠣᠰᠣᠨ ᠨᠣᠢᠲᠠᠨ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠡᠷᠡ᠂ ᠬᠦᠷᠢᠶᠡᠨ ᠦ᠌ ᠵᠦᠭ ᠡᠳᠦᠷ ᠰᠥᠨᠢ ᠦᠭᠡᠢ ᠦᠷᠭᠦᠯᠵᠢᠯᠡᠨ ᠴᠤᠪᠤᠵᠤ᠂ ᠬᠣᠨᠣᠭ ᠲᠤ᠌ ᠣᠨᠣᠭᠳᠠᠬᠤ ᠢᠮᠠᠭᠠᠨ ᠤ᠋ ᠮᠢᠬᠠ ᠶ᠋ᠢ ᠣᠷᠣᠢ ᠶ᠋ᠢᠨ ᠪᠠᠭᠤᠳᠠᠯ ᠳᠡᠭᠡᠷᠡ ᠡᠳᠦᠷ ᠲᠦ᠍ ᠭᠠᠭᠴᠠ ᠤᠳᠠᠭᠠ ᠬᠣᠭᠣᠯᠠ ᠢᠳᠡᠬᠦᠴᠡ ᠪᠡᠨ ᠪᠣᠯᠵᠤ ᠶᠠᠪᠤᠬᠤ ᠳ᠋ᠤᠨᠢ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠬᠠᠰᠢᠵᠤ ᠪᠠᠢᠭᠰᠠᠨ ᠠᠷᠠᠳ ᠤ᠋ᠳ᠂ ᠴᠡᠷᠢᠭ ᠲᠦ᠍ ᠲᠠᠲᠠᠭᠳᠠᠭᠰᠠᠨ ᠲᠡᠷᠡ ᠡᠷᠡᠴᠦᠳ ᠲᠦ᠍ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠵᠤ᠂
— ᠪᠢᠳᠡ ᠥᠷᠲᠡᠭᠡ ᠠᠯᠪᠠ ᠬᠠᠭᠠᠵᠤ᠂ ᠦᠢᠯᠡ ᠲᠠᠮᠤ ᠪᠠᠨ ᠦᠵᠡᠵᠦ ᠪᠠᠢᠨᠠ᠃ ᠬᠥᠮᠦᠨ ᠦ᠌ ᠥᠪᠡᠷ ᠦ᠋ᠨ ᠨᠣᠶᠠᠳ ᠴᠤᠪᠤᠵᠤ ᠶᠠᠪᠤᠭᠠ ᠶ᠋ᠢ ᠬᠡᠯᠡᠭᠡᠳ ᠪᠠᠷᠠᠬᠤ ᠤᠤ? ᠵᠢᠯ ᠳ᠋ᠦ᠍ ᠪᠤᠷᠬᠠᠨ ᠳ᠋ᠠᠭᠠᠨ ᠮᠥᠷᠭᠥᠳᠡᠭ ᠦᠭᠡᠢ ᠪᠡᠨ ᠡᠨᠳᠡ ᠡᠳᠦᠷ ᠲᠦ᠍ ᠣᠯᠠᠨ ᠨᠣᠶᠠᠳ ᠲᠤ᠌ ᠮᠥᠷᠭᠥᠵᠦ ᠪᠠᠢᠨᠠ ᠳᠠ᠃ ᠣᠯᠢᠭᠲᠠᠢ ᠢᠷᠭᠡ ᠪᠠᠷᠢᠵᠤ ᠭᠦᠢᠴᠡᠯᠡ᠃ ᠮᠠᠭᠤ ᠢᠮᠠᠭᠠ ᠶ᠋ᠢ ᠴᠦ᠍ ᠭᠡᠰᠡᠨ᠂ ᠲᠠ ᠪᠦᠬᠦᠨ ᠦ᠌ ᠬᠣᠭᠣᠯᠠ ᠬᠦᠨᠡᠰᠦ ᠵᠠᠯᠭᠠᠭᠤᠯᠤᠭᠰᠠᠭᠠᠷ ᠳᠠᠭᠤᠰᠤᠯᠠ᠃ ᠴᠢᠨᠣᠠ ᠨᠣᠬᠠᠢ ᠠ᠋ᠴᠠ ᠢᠯᠡᠭᠦᠦ ᠠᠶᠤᠯᠲᠠᠢ ᠪᠣᠯᠤᠭᠠᠳ ᠪᠠᠢᠨᠠ ᠰᠢᠦ! ᠡᠨᠡ ᠥᠷᠲᠡᠭᠡ ᠪᠡᠷ ᠶᠠᠪᠤᠭᠠᠴᠢᠨ ᠨᠤᠭᠤᠳ᠂ ᠡᠢᠮᠦ ᠣᠯᠠᠨ ᠠᠮᠢᠲᠠᠨ᠂ ᠨᠡᠰᠢ ᠴᠠᠰᠢ ᠴᠣᠬᠣᠮ ᠶᠠᠭᠤ ᠪᠠᠨ ᠬᠢᠵᠦ ᠶᠠᠪᠤᠳᠠᠭ ᠶᠤᠮ ᠪᠣᠯ ᠳᠠ? ᠠᠭᠲᠠ ᠪᠠᠨ ᠴᠤ᠌ ᠪᠠᠷᠠᠵᠤ᠂ ᠶᠠᠪᠠᠭᠠᠨ ᠪᠣᠯᠵᠤ ᠭᠦᠢᠴᠡᠯᠡ ᠭᠡᠵᠦ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠬᠤ ᠳ᠋ᠤᠨᠢ᠂
— ᠪᠢᠳᠡ ᠴᠦ᠍ ᠭᠡᠰᠡᠨ ᠲᠠᠨ ᠠ᠋ᠴᠠ ᠳᠡᠭᠡᠷᠡ ᠦᠭᠡᠢ᠂ ᠮᠥᠨ ᠯᠡ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠶᠠᠪᠤᠨᠠ ᠳᠠ᠃ ᠡᠳᠦᠷᠵᠢᠨ ᠢ᠋ᠶ᠋ᠡᠨ ᠬᠠᠷᠠ ᠴᠠᠢ ᠭᠦᠵᠡᠭᠡᠯᠡᠵᠦ ᠭᠦᠵᠡᠭᠡᠯᠡᠵᠦ᠂ ᠠᠷᠠᠢ ᠭᠡᠵᠦ ᠰᠥᠨᠢ ᠶ᠋ᠢᠨ ᠬᠣᠨᠣᠭ ᠲᠤ᠌ ᠮᠠᠭᠤ ᠢᠮᠠᠭᠠᠨ ᠤ᠋ ᠮᠢᠬᠠ ᠠᠮᠰᠠᠬᠤᠢᠴᠠ ᠪᠣᠯᠵᠤ ᠥᠯ ᠵᠠᠯᠭᠠᠵᠤ ᠶᠠᠪᠤᠨᠠ ᠰᠢᠦ ᠪᠢᠳᠡ ᠴᠢᠨᠢ᠂ ᠬᠠᠷᠭᠢᠰ ᠮᠠᠨᠵᠤ ᠶ᠋ᠢᠨ ᠲᠥᠯᠥᠭᠡ ᠪᠢᠰᠢ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠵᠢᠳᠬᠦᠵᠦ ᠶᠠᠪᠤᠨᠠ ᠭᠡᠵᠦ ᠯᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠲᠠᠮᠵᠢᠯᠠᠵᠤ ᠶᠠᠪᠤᠨᠠ ᠰᠢᠦ᠃ ᠤᠷᠢᠳᠤ ᠶ᠋ᠢᠨ ᠯᠠᠮᠠ ᠪᠠᠭᠰᠢ ᠨᠠᠷ᠂ ᠡᠨᠡ ᠨᠠᠢ᠍ᠮᠠᠳᠤᠭᠠᠷ ᠳᠦᠷᠢ ᠶ᠋ᠢ ᠰᠡᠭᠦᠯᠴᠢ ᠶ᠋ᠢᠨ ᠳᠦᠷᠢ ᠪᠣᠯᠬᠤ ᠶᠤᠮᠠ᠃ ᠡᠨᠡ ᠨᠠᠢ᠍ᠮᠠᠳᠤᠭᠠᠷ ᠤ᠋ᠨ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤᠯᠤᠰ ᠡᠷᠬᠡ ᠴᠢᠯᠥᠭᠡᠲᠡᠢ ᠤᠯᠤᠰ ᠪᠣᠯᠵᠤ᠂ ᠮᠠᠨᠵᠤ ᠬᠢᠲᠠᠳ ᠠ᠋ᠴᠠ ᠰᠠᠯᠤᠭᠠᠳ᠂ ᠨᠠᠢ᠍ᠮᠠᠳᠤᠭᠠᠷ ᠳᠦᠷᠢ ᠶ᠋ᠢᠨ ᠭᠡᠭᠡᠬᠡᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠵᠤ᠂ ᠵᠠᠭᠤ ᠬᠣᠷᠢᠨ ᠨᠠᠰᠤᠨ ᠤ᠋ ᠰᠡᠭᠦᠳᠡᠷ ᠵᠣᠭᠣᠭᠯᠠᠵᠤ᠂ ᠤᠯᠤᠰ ᠠᠮᠢᠲᠠᠨ ᠢ᠋ᠶ᠋ᠠᠨ ᠡᠩᠬᠡ ᠵᠢᠷᠭᠠᠯ ᠡᠳ᠋ᠯᠡᠭᠦᠯᠬᠦ ᠶᠦᠮ ᠭᠡᠵᠦ ᠠᠢᠯᠠᠳᠤᠭᠰᠠᠨ᠃ ᠲᠡᠷᠡ ᠨᠢ᠂ ᠣᠳᠣ ᠶᠣᠰᠣᠭᠠᠷ ᠪᠣᠯᠬᠤ ᠨᠢ ᠰᠢᠪ ᠳᠡ᠃ ᠨᠠᠢ᠍ᠮᠠᠳᠤᠭᠠᠷ ᠳᠦᠷᠢ ᠶ᠋ᠢᠨ ᠭᠡᠭᠡᠬᠡᠨ(ᠭᠡᠭᠡᠨ) ᠦ᠌ ᠦᠶᠡ ᠳ᠋ᠦ᠍ ᠪᠢᠳᠡ ᠣᠳᠣ ᠮᠠᠨᠵᠤ ᠬᠢᠲᠠᠳ ᠠ᠋ᠴᠠ ᠰᠠᠯᠵᠤ᠂ ᠮᠥᠳᠳᠥ ᠪᠣᠭᠳᠠ ᠭᠡᠭᠡᠬᠡᠨ(ᠭᠡᠭᠡᠨ) ᠢ᠋ᠶ᠋ᠡᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠬᠤ ᠶ᠋ᠢ ᠦᠵᠡᠬᠦ ᠨᠢ ᠠ᠋ ᠳᠠ᠄ ᠪᠢᠳᠡ ᠣᠳᠣ ᠬᠢᠲᠠᠳ ᠤ᠋ᠨ ᠰᠢᠨᠤᠬᠠᠢ ᠮᠠᠢᠮᠠᠢ᠂ ᠮᠥᠩᠭᠥ ᠬᠦᠦᠯᠡᠵᠦ ᠮᠥᠯᠵᠢᠭᠴᠢ ᠨᠠᠷ ᠢ᠋᠂ ᠠᠮᠪᠠᠨ ᠲᠦᠰᠢᠮᠡᠯ ᠴᠡᠷᠢᠭ ᠢ᠋ ᠭᠠᠵᠠᠷ ᠣᠷᠣᠨ ᠠ᠋ᠴᠠ ᠪᠠᠨ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠵᠤ ᠴᠣᠢᠵᠣᠩ ᠨᠣᠮ ᠤ᠋ᠨ ᠰᠠᠬᠢᠭᠤᠯᠰᠤᠨ᠂ ᠱᠠᠪᠢ ᠨᠠᠷ ᠪᠣᠯᠤᠭᠰᠠᠨ ᠪᠢᠳᠡᠨ ᠢ᠋ᠶ᠋ᠡᠨ ᠭᠠᠢ ᠵᠡᠳᠬᠡᠷ ᠡᠴᠡ ᠬᠠᠮᠠᠭᠠᠯᠠᠵᠤ᠂ ᠤᠷᠢᠳᠤ ᠶ᠋ᠢᠨ ᠰᠠᠢᠬᠠᠨ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠰᠢᠭ᠋ ᠠᠷᠪᠢᠨ ᠳᠡᠯᠭᠡᠷ ᠵᠢᠷᠭᠠᠯᠠᠩ ᠢ᠋ᠶ᠋ᠠᠨ ᠡᠳ᠋ᠯᠡᠨ ᠰᠠᠭᠤᠬᠤ ᠴᠠᠭ ᠣᠢᠷᠠᠲᠤᠵᠤ ᠪᠠᠢᠭᠠ ᠶᠤᠮ ᠪᠠᠢᠯ ᠦᠭᠡᠢ(ᠪᠠᠢᠯᠭᠦᠢ) ᠳᠡ ᠭᠡᠵᠦ ᠴᠡᠷᠢᠭ ᠦ᠋ᠨ ᠡᠷᠡᠴᠦᠳ᠂ ᠥᠷᠲᠡᠭᠡᠨ ᠦ᠌ ᠤᠲᠤᠭᠠ ᠲᠠᠢ ᠭᠡᠷ ᠲᠦ᠍ ᠳᠤᠯᠠᠭᠠᠴᠠᠬᠤ ᠵᠠᠭᠤᠷᠠ ᠪᠠᠨ ᠶᠠᠷᠢᠯᠴᠠᠳᠠᠭ ᠪᠠᠢᠵᠠᠢ᠃
ᠢᠷᠡᠭᠡᠳᠦᠢ ᠳ᠋ᠦ᠍ ᠰᠠᠢᠬᠠᠨ ᠵᠢᠷᠭᠠᠯ ᠢ᠋ᠶ᠋ᠠᠨ ᠡᠳ᠋ᠯᠡᠨᠡ ᠭᠡᠵᠦ ᠬᠦᠰᠡᠨ ᠡᠷᠡᠮᠡᠯᠵᠡᠵᠦ ᠪᠠᠢᠭᠰᠠᠨ ᠠᠷᠠᠳ ᠣᠯᠠᠨ ᠤ᠋᠂ ᠪᠣᠯᠪᠠᠰᠤᠷᠠᠯ ᠠ᠋ᠴᠠ ᠬᠣᠴᠣᠷᠤᠭᠳᠠᠵᠤ᠂ ᠮᠤᠬᠤᠷ ᠰᠦᠰᠦᠭ ᠲᠦ᠍ ᠪᠠᠷᠢᠭᠳᠠᠨ᠂ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠦᠳᠦᠭᠦᠯᠢᠭ ᠬᠠᠷᠠᠩᠭᠤᠢ ᠪᠠᠢᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠡᠨᠡ ᠮᠡᠲᠦ ᠶ᠋ᠢᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠠᠴᠢᠨ ᠴᠤᠤ ᠦᠭᠡ ᠳᠡᠭᠳᠡᠵᠦ᠂ ᠬᠥᠳᠡᠭᠡ ᠨᠤᠲᠤᠭ ᠢ᠋ᠶ᠋ᠠᠷ ᠠᠮᠢᠲᠠᠨ ᠶᠠᠩᠵᠤ ᠪᠦᠷᠢ ᠪᠡᠷ ᠬᠡᠯᠡᠯᠴᠡᠵᠦ ᠪᠠᠢᠭᠰᠠᠨ ᠴᠠᠭ ᠪᠠᠢᠵᠠᠢ᠃
ⅹ ⅹ ⅹ ⅹ
ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠣᠭᠳᠠ ᠭᠡᠭᠡᠬᠡᠨ (ᠭᠡᠭᠡᠨ) ᠢ᠋ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠬᠤ ᠶᠡᠬᠡ ᠶᠣᠰᠣᠯᠠᠯ ᠢ᠋ ᠦᠵᠡᠬᠦ ᠭᠡᠵᠦ ᠵᠦᠭ ᠵᠦᠭ ᠡᠴᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠮᠢᠲᠠᠨ ᠬᠦᠷᠴᠦ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠬᠦᠷᠢᠶᠡ ᠬᠣᠷᠢᠶᠠᠨ ᠤ᠋ ᠭᠤᠳᠤᠮᠵᠢ ᠵᠡᠭᠡᠯᠢ᠂ ᠵᠠᠬᠠ ᠱᠣᠣᠱᠣᠷ ᠶᠡᠬᠡᠯᠡ(ᠶᠡᠬᠡ ᠯᠡ) ᠬᠥᠯ ᠲᠡᠢ ᠦᠢᠮᠡᠭᠡᠨ ᠲᠡᠢ ᠪᠣᠯᠵᠤ᠂ ᠬᠦᠷᠢᠶᠡᠨ ᠦ᠌ ᠬᠠᠪᠢ ᠪᠠᠷ᠂ ᠮᠥᠨ ᠵᠠᠬᠠ ᠳᠡᠭᠡᠭᠦᠷ ᠥᠷᠯᠥᠭᠡ ᠡᠴᠡ ᠦᠳᠡᠰᠢ ᠪᠣᠯᠲᠠᠯᠠ ᠬᠡᠷᠦᠮᠡᠯ ᠬᠤᠭᠤᠷᠴᠢ᠂ ᠭᠣᠩᠰᠢᠶᠠ ᠳᠠᠭᠤᠲᠠᠢ ᠳᠣᠯᠳᠣᠢᠴᠢ᠂ ᠲᠡᠨᠦᠮᠡᠯ ᠪᠠᠳᠢᠷᠴᠢ᠂ ᠲᠥᠯᠭᠡᠴᠢ᠂ ᠦᠵᠡᠮᠡᠷᠴᠢ᠂ ᠶᠢᠯᠸᠢᠴᠢᠨ᠂ ᠭᠤᠢᠯᠢᠨᠴᠢᠨ᠂ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠭᠳᠠᠨ ᠢᠷᠡᠭᠰᠡᠨ ᠡᠷᠡᠰ᠂ ᠶᠠᠭᠠᠷᠠᠯ ᠦᠭᠡᠢ ᠠᠭᠠᠵᠢᠭᠤ ᠲᠠᠯᠪᠢᠭᠤ ᠪᠠᠷ ᠦᠭᠡ ᠠᠰᠠᠭᠤᠬᠤ ᠳ᠋ᠤᠨᠢ ᠥᠭᠡᠳᠡ ᠡᠴᠡ ᠨᠢ ᠪᠠᠳᠠᠭ ᠪᠠᠳᠠᠭ ᠢ᠋ᠶ᠋ᠠᠷ ᠰᠢᠯᠦᠭᠯᠡᠨ ᠬᠠᠷᠢᠭᠤ ᠬᠡᠯᠡᠳᠡᠭ ᠲᠦᠷᠭᠡᠨ ᠬᠡᠯᠡ ᠲᠡᠢ ᠬᠦᠷᠢᠶᠡᠨ ᠦ᠌ ᠬᠠᠢᠷᠴᠠᠭ ᠤ᠋ᠨ ᠬᠤᠳᠠᠯᠳᠤᠭᠠ ᠬᠢᠳᠡᠭ ᠠᠪᠤᠭᠠᠢ ᠨᠠᠷ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ ᠶᠠᠪᠤᠭᠠ ᠲᠥᠭᠥᠷᠢᠭ ᠴᠢᠷᠠᠢ ᠲᠠᠢ ᠪᠠᠷᠭᠤ ᠨᠠᠷ᠂ ᠴᠢᠷᠠᠢ ᠪᠠᠢᠳᠠᠯ᠂ ᠬᠥᠳᠡᠯᠬᠦ ᠠᠭᠠᠰᠢᠯᠠᠬᠤ ᠳᠦᠷᠢᠮ ᠨᠢ ᠬᠢᠲᠠᠳ ᠲᠠᠢ ᠶᠡᠬᠡ ᠲᠥᠰᠲᠡᠢ ᠱᠠᠯᠠᠮᠠᠭᠠᠢ ᠭᠠᠪᠰᠢᠭᠠᠢ ᠬᠠᠷᠴᠢᠨ ᠴᠠᠬᠠᠷ ᠤ᠋ᠨ ᠵᠡᠭᠦᠭᠰᠡᠨ ᠮᠥᠩᠭᠥᠨ ᠲᠣᠨᠣᠭᠲᠠᠢ ᠮᠣᠳᠣᠨ ᠬᠤᠢ ᠲᠠᠢ ᠮᠣᠣᠽᠧᠷ᠂ ᠺᠡᠷᠡᠪᠢᠨ ᠫᠤᠤ ᠶ᠋ᠢ ᠬᠣᠷᠣᠬᠠᠢ ᠬᠦᠷᠴᠦ ᠨᠢᠳᠦ ᠰᠢᠯᠵᠢᠯ ᠦᠭᠡᠢ ᠬᠠᠷᠠᠭᠴᠢ ᠳᠠᠢᠴᠢᠨ ᠵᠡᠭᠦᠨ ᠭᠠᠷ ᠤ᠋ᠨ ᠦᠷᠡ ᠤᠭᠰᠠᠭᠠ᠂ ᠴᠠᠰᠤᠲᠤ ᠲᠠᠷᠪᠠᠭᠠᠲᠠᠢ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠪᠠᠷ ᠨᠤᠲᠤᠭ ᠲᠠᠢ᠂ ᠮᠣᠩᠬᠣᠷ ᠬᠠᠮᠠᠷ ᠲᠠᠢ ᠥᠷᠭᠡᠨ ᠮᠥᠷᠥ ᠲᠡᠢ ᠲᠣᠷᠭᠤᠳ᠂ ᠰᠦᠷᠡᠬᠡᠢ ᠭᠡᠭᠴᠢ ᠪᠡᠷ ᠬᠦᠬᠡᠷᠡᠬᠡᠵᠦ ᠪᠦᠰᠡᠯᠡᠭᠰᠡᠨ ᠡᠪ ᠬᠠᠪ ᠦᠭᠡᠢ ᠳᠡᠪᠡᠯ ᠲᠡᠢ᠂ ᠪᠥᠰᠡᠨ ᠳ᠋ᠡᠭᠡᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠲᠠᠩᠭᠤᠳ ᠢᠯᠳᠦ ᠬᠠᠪᠴᠢᠭᠤᠯᠠᠰᠤᠲᠠᠢ(ᠬᠠᠪᠴᠢᠭᠤᠯᠤᠭᠠᠰᠤᠲᠠᠢ)᠂ ᠬᠡᠳᠦᠨ ᠰᠠᠷᠠ ᠰᠠᠮᠨᠠᠭᠠ ᠦᠭᠡᠢ ᠰᠢᠷᠢᠯᠳᠦᠭᠰᠡᠨ ᠰᠠᠭᠰᠠᠭᠠᠷ ᠦᠰᠦ ᠲᠡᠢ᠂ ᠵᠡᠷᠯᠢᠭ ᠮᠠᠷᠠᠭᠠ ᠬᠥᠬᠡ ᠴᠢᠷᠠᠢ ᠪᠠᠷ ᠬᠦᠷᠢᠶᠡᠨ ᠦ᠌ ᠭᠠᠩᠭᠠᠩ ᠭᠣᠶᠣᠴᠤᠤᠯ ᠢ᠋ ᠭᠠᠢᠬᠠᠭᠤᠯᠤᠭᠰᠠᠨ ᠬᠥᠬᠡ ᠨᠠᠭᠤᠷ ᠴᠠᠢᠳᠠᠮ ᠤ᠋ᠨ ᠳᠡᠭᠡᠳᠦ ᠮᠣᠩᠭᠣᠯ᠂ ᠲᠠᠩᠭᠤᠳ ᠲᠥᠪᠡᠳ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠠᠮᠢᠲᠠᠨ ᠬᠦᠷᠢᠶᠡ ᠪᠡᠷ ᠳᠦᠭᠦᠷᠦᠭᠰᠡᠨ ᠪᠢᠯᠡ᠃
ᠭᠠᠨᠳᠠᠩ ᠬᠦᠷᠢᠶᠡᠨ ᠦ᠌ ᠨᠡᠷᠡᠲᠦ ᠰᠠᠢᠨ ᠵᠢᠷᠤᠬᠠᠢᠴᠢ ᠨᠠᠷ ᠤ᠋ᠨ ᠦᠵᠡᠵᠦ ᠰᠠᠢᠨ ᠭᠡᠵᠦ ᠰᠣᠩᠭᠣᠨ ᠲᠣᠭᠲᠠᠭᠠᠭᠰᠠᠨ᠂ ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠶᠢᠰᠦᠨ ᠦ᠌ ᠡᠳᠦᠷ᠂ ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠰᠢᠷᠠ ᠣᠷᠳᠣᠨ ᠤ᠋ ᠡᠮᠦᠨᠡᠬᠢ ᠶᠡᠬᠡ ᠲᠠᠯᠠᠪᠤᠷ ᠲᠤ᠌ ᠥᠷᠯᠥᠭᠡ ᠡᠴᠡ ᠬᠥᠮᠦᠨ ᠠᠮᠢᠲᠠᠨ ᠳᠦᠭᠦᠷᠴᠦ ᠡᠬᠢᠯᠡᠭᠰᠡᠨ ᠪᠢᠯᠡ᠃
ᠡᠪᠦᠭᠡᠳ ᠡᠮᠡᠭᠡᠳ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ᠂ ᠬᠦᠷᠢᠶᠡ ᠡᠯᠳᠡᠭᠦᠷᠢ ᠶ᠋ᠢᠨ ᠴᠠᠰᠤᠨ ᠴᠠᠭᠠᠨ ᠬᠤᠷᠠᠭᠠᠨ ᠳᠣᠲᠣᠷᠲᠠᠢ ᠭᠣᠶᠣ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠲᠠᠢ᠂ ᠴᠢᠭᠢᠷᠠᠭ ᠰᠠᠢᠬᠠᠨ ᠪᠡᠶᠡ ᠲᠡᠢ ᠭᠣᠶᠣ ᠵᠠᠯᠠᠭᠤ ᠬᠡᠦᠬᠡᠨ ᠨᠦ᠍ᠭᠦᠳ ᠬᠦᠷᠢᠶᠡ ᠶ᠋ᠢ ᠨᠠᠷᠠ ᠵᠥᠪ ᠡᠷᠭᠢᠭᠡᠳ ᠰᠢᠷᠠ ᠣᠷᠳᠣᠨ ᠤ᠋ ᠡᠮᠦᠨᠡᠬᠢ ᠤᠯᠠᠭᠠᠨ ᠱᠥᠷᠭᠡ ᠶ᠋ᠢᠨ ᠬᠠᠪᠢ ᠳ᠋ᠤ᠌ ᠴᠤᠭᠯᠠᠵᠠᠭᠠᠨ᠂ ᠮᠥᠰᠥᠨ ᠰᠢᠬᠢᠷ᠂ ᠬᠥᠯᠳᠡᠭᠦᠦ ᠬᠠᠷᠠ ᠯᠢᠷ᠂ ᠡᠯᠵᠢᠭᠡᠨ ᠴᠢᠬᠢ ᠭᠡᠳᠡᠭ ᠵᠢᠮᠢᠰ᠂ ᠨᠠᠨᠵᠢᠩ ᠴᠢᠪᠠᠭᠠ᠂ ᠤᠯᠠᠭᠠᠨ ᠴᠢᠪᠠᠭᠠ᠂ ᠬᠠᠳᠠ᠂ ᠸᠴᠢᠷ ᠲᠡᠢ ᠮᠥᠩᠭᠥᠨ ᠪᠦᠯᠡᠵᠡᠭ ᠬᠤᠳᠠᠯᠳᠤᠭᠴᠢ ᠬᠠᠢᠷᠴᠠᠭ ᠤ᠋ᠨ ᠮᠠᠢᠮᠠᠢᠴᠢᠨ ᠭᠠᠵᠠᠷ ᠤ᠋ᠨ ᠭᠠᠪᠠ ᠠ᠋ᠴᠠ ᠭᠠᠷᠤᠭᠰᠠᠨ ᠶᠤᠮ ᠰᠢᠭ᠋ ᠡᠭᠦᠪᠡᠷ ᠲᠡᠭᠦᠪᠡᠷ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠰᠡᠯᠭᠦᠴᠡᠪᠡ᠃
ᠮᠣᠭᠠᠢ ᠴᠠᠭ ᠲᠤ᠌ ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡ ᠳ᠋ᠡᠬᠢ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠲᠡᠨᠳᠡ ᠪᠦᠷᠢᠶᠡ ᠳᠤᠤᠭᠠᠷᠴᠤ᠂ ᠪᠣᠭᠳᠠ ᠶ᠋ᠢᠨ ᠲᠣᠷᠭᠠᠨ ᠴᠡᠷᠢᠭ ᠵᠡᠭᠦᠨ ᠬᠦᠷᠢᠶᠡᠨ ᠳ᠋ᠡᠬᠢ ᠰᠢᠷᠠ ᠣᠷᠳᠣᠨ ᠤ᠋ ᠵᠦᠭ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠮᠣᠭᠠᠢ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠴᠤᠪᠤᠵᠤ᠂ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ᠂ ᠠᠷᠪᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠤ᠋ᠨ ᠵᠡᠷᠭᠡ ᠣᠯᠠᠨ ᠰᠢᠷᠠ᠂ ᠬᠥᠬᠡ᠂ ᠴᠠᠭᠠᠨ᠂ ᠨᠣᠭᠣᠭᠠᠨ ᠲᠤᠭ ᠳᠠᠯᠪᠠᠭᠠ᠂ ᠬᠢᠭᠢᠷᠢ ᠰᠠᠯᠬᠢᠨ ᠳ᠋ᠤ᠌ ᠦᠵᠰᠭᠦᠯᠡᠩᠳᠡᠶᠡ ᠨᠠᠮᠢᠯᠵᠠᠨ᠂ ᠬᠠᠷᠠ ᠬᠤᠷᠠᠭᠠᠨ ᠴᠢᠬᠢᠪᠴᠢᠲᠡᠢ᠂ ᠤᠯᠠᠭᠠᠨ ᠡᠮᠵᠢᠶᠡᠷ(ᠡᠮᠵᠢᠶᠡᠷᠢ) ᠲᠡᠢ᠂ ᠬᠥᠬᠡ ᠴᠡᠩᠮᠡ ᠲᠣᠪᠢ ᠮᠠᠯᠠᠭᠠᠢ ᠲᠠᠢ᠂ ᠮᠥᠩᠭᠥᠨ ᠰᠠ ᠬᠣᠷᠭᠣᠢ ᠡᠮᠵᠢᠶᠡᠷ (ᠡᠮᠵᠢᠶᠡᠷᠢ) ᠲᠡᠢ᠂ ᠬᠣᠷᠮᠣᠭᠴᠢ ᠬᠠᠨᠳᠠᠰᠤ ᠲᠠᠢ᠂ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠴᠡᠷᠢᠭ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠵᠡᠪᠰᠡᠭ ᠦ᠋ᠨ ᠮᠥᠩᠭᠥᠨ ᠴᠢᠮᠡᠭ ᠭᠢᠯᠠᠯᠵᠠᠭᠤᠯᠤᠨ᠂ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ ᠶ᠋ᠢᠨ ᠤᠴᠢᠷ ᠤᠷᠢᠳᠤ ᠮᠠᠨᠵᠤ ᠬᠠᠭᠠᠨ ᠠ᠋ᠴᠠ ᠪᠤᠰᠬᠠᠭᠰᠠᠨ ᠶᠠᠩᠪᠠ ᠶᠣᠰᠣᠯᠠᠯ ᠤ᠋ᠨ ᠬᠠᠭᠠᠯᠭᠠᠨᠠ ᠬᠠᠲᠠᠷᠢᠨ ᠬᠦᠷᠴᠦ ᠢᠷᠡᠭᠡᠳ᠂ ᠪᠦᠷᠢᠶᠡ ᠵᠠᠯᠭᠠ ᠵᠠᠯᠭᠠ ᠪᠠᠷ ᠳᠤᠤᠭᠠᠷᠴᠤ ᠳᠣᠬᠢᠶᠠ ᠥᠭᠭᠦᠮᠡᠭᠴᠡ ᠨᠢᠭᠡᠨ ᠵᠡᠷᠭᠡ ᠡᠷᠭᠢᠵᠦ᠂ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠪᠡᠶᠡ ᠪᠡᠶᠡ ᠥᠭᠡᠳᠡ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠳ᠋ᠤ᠌᠂ ᠴᠤᠭᠯᠠᠭᠰᠠᠨ(ᠴᠤᠭᠯᠠᠷᠠᠭᠰᠠᠨ) ᠣᠯᠠᠨ ᠬᠥᠮᠦᠨ ᠲᠡᠢᠮᠦ ᠣᠯᠠᠨ ᠢᠳᠡᠷ ᠴᠡᠷᠢᠭ ᠦ᠋ᠨ ᠭᠣᠣᠯ ᠤ᠋ᠨ ᠨᠣᠭᠣᠭᠠᠨ ᠣᠷᠳᠣᠨ ᠠ᠋ᠴᠠ ᠰᠢᠷᠠ ᠬᠦᠷᠢᠶᠡᠨ ᠦ᠌ ᠱᠥᠷᠭᠡ ᠬᠦᠷᠲᠡᠯᠡᠬᠢ ᠲᠡᠷᠡ ᠬᠣᠯᠠ ᠭᠠᠵᠠᠷ ᠨᠢᠭᠡᠨ ᠵᠡᠷᠭᠡ ᠡᠷᠭᠢᠭᠰᠡᠨ ᠢ᠋ ᠲᠡᠰᠬᠡᠯ ᠦᠭᠡᠢ ᠪᠠᠬᠠᠳᠤᠨ ᠱᠠᠭᠰᠢᠪᠠ᠃
ᠮᠠᠨᠵᠤ ᠨᠠᠷ ᠢ᠋ ᠬᠥᠭᠡᠭᠡᠭᠰᠡᠨ ᠡᠴᠡ ᠬᠣᠢᠰᠢ᠂ ᠰᠠᠢ᠍ᠢ(ᠰᠠᠶ᠋ᠢ) ᠥᠪᠡᠷᠰᠡᠳ ᠦ᠋ᠨ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠡᠢᠮᠦ ᠰᠦᠷ ᠲᠡᠢ ᠵᠢᠪᠬᠤᠯᠠᠩ ᠲᠠᠢ ᠶ᠋ᠢ ᠦᠵᠡᠵᠦ ᠪᠠᠢᠭᠠ ᠠᠷᠠᠳ ᠤ᠋ᠳ᠂ ᠬᠦᠴᠦ ᠲᠠᠷᠭᠤ ᠰᠠᠢᠲᠠᠢ ᠬᠦᠯᠦᠭ ᠰᠠᠢᠨ ᠮᠣᠷᠢ ᠲᠠᠢ ᠬᠦᠳᠡᠷ ᠴᠢᠭᠢᠷᠠᠭ ᠴᠡᠷᠢᠭ ᠡᠷᠡ ᠶ᠋ᠢ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠨᠢ ᠲᠣᠭᠣᠷᠢᠨ᠂ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠪᠠᠬᠠᠳᠤᠵᠤ ᠦᠵᠡᠪᠡ᠃
ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠴᠤᠪᠤᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠨ ᠮᠠᠩᠯᠠᠢ ᠳ᠋ᠤ᠌ ᠶᠠᠪᠤᠭᠰᠠᠨ ᠬᠣᠶᠠᠷ ᠳᠠᠷᠤᠭᠠ᠂ ᠬᠠᠳᠠᠭ ᠵᠡᠭᠦᠭᠰᠡᠨ ᠮᠥᠩᠭᠥᠨ ᠴᠢᠮᠡᠭ ᠲᠡᠢ ᠲᠤᠩ ᠴᠠᠭᠠᠨ ᠪᠦᠷᠢᠶᠡ ᠪᠠᠷᠢᠭᠰᠠᠨ ᠬᠣᠶᠠᠷ ᠪᠦᠷᠢᠶᠡᠴᠢ ᠶ᠋ᠢ ᠳᠠᠭᠠᠭᠤᠯᠤᠨ᠂ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠴᠢᠯᠠᠭᠤᠨ ᠬᠥᠮᠦᠨ ᠦ᠌ ᠠᠳᠠᠯᠢ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠭᠰᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠳᠤᠮᠳᠠᠭᠤᠷ ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠵᠦᠭ ᠵᠤᠤᠵᠠᠢ ᠬᠣᠯᠪᠣᠨ ᠳᠠᠪᠬᠢᠵᠤ ᠣᠷᠳᠣᠨ ᠤ᠋ ᠬᠠᠭᠠᠯᠭᠠᠨᠠ ᠬᠦᠷᠦᠮᠡᠭᠴᠡ᠂ ᠫᠤᠤ ᠲᠠᠯᠪᠢᠬᠤ ᠴᠢᠮᠡᠭᠡ ᠲᠦᠩ ᠬᠢᠵᠦ ᠰᠣᠨᠣᠰᠳᠠᠭᠠᠳ᠂ ᠮᠣᠷᠢᠲᠠᠨ ᠴᠡᠷᠢᠭ ᠲᠡᠷᠡ ᠴᠢᠮᠡᠭᠡ ᠪᠡᠷ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠ᠃ ᠤᠳᠠᠯ ᠦᠭᠡᠢ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠶ᠋ᠢᠨ ᠫᠤᠤ ᠲᠠᠯᠪᠢᠵᠤ᠂ ᠪᠠᠬᠠᠨ ᠪᠠᠢᠰᠬᠢᠭᠡᠳ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠫᠤᠤ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠣᠯᠠᠨ᠂ ᠵᠠ᠂ ᠣᠳᠣ ᠪᠣᠭᠳᠠ ᠵᠠᠯᠠᠷᠠᠪᠠ ᠭᠡᠵᠦ ᠱᠤᠤᠭᠢᠯᠳᠤᠪᠠ᠃ ᠪᠣᠭᠳᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠣᠷᠳᠣᠨ ᠤ᠋ ᠵᠦᠭ ᠡᠴᠡ ᠬᠦᠢᠲᠡᠨ ᠵᠢᠬᠡᠭᠦᠨ ᠠᠭᠠᠷ ᠲᠤ᠌ ᠮᠥᠩᠭᠥᠨ ᠴᠢᠮᠡᠭ ᠲᠡᠢ ᠠᠭᠠᠷᠤ ᠽᠠᠨᠳᠠᠨ ᠪᠢᠰᠬᠢᠭᠦᠷ ᠦ᠋ᠨ ᠢᠷᠠᠭᠤ ᠰᠠᠢᠬᠠᠨ ᠡᠬᠡᠰᠢᠭ ᠰᠣᠨᠣᠰᠳᠠᠵᠤ᠂ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠲᠤᠭ ᠳᠠᠯᠪᠠᠭᠠ ᠰᠢᠭᠦᠷ ᠨᠠᠮᠢᠷᠠᠨ ᠦᠵᠡᠭᠳᠡᠪᠡ᠃
ᠲᠥᠷᠥ ᠶ᠋ᠢᠨ ᠶᠡᠬᠡ ᠵᠢᠭᠰᠠᠭᠠᠯ ᠤ᠋ᠨ ᠡᠮᠦᠨᠡ ᠲᠤᠩ ᠴᠠᠭᠠᠨ ᠵᠢᠷᠣᠭᠠ ᠮᠣᠷᠢ ᠤᠨᠤᠭᠰᠠᠨ᠂ ᠭᠣᠶᠣ ᠰᠢᠷᠠ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠨᠢᠭᠡᠨ ᠶᠡᠬᠡᠮᠰᠦᠭ ᠯᠠᠮᠠ ᠦᠵᠡᠭᠳᠡᠭᠰᠡᠨ ᠨᠢ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ ᠶ᠋ᠢᠨ ᠲᠥᠷᠥ ᠶ᠋ᠢᠨ ᠵᠢᠭᠰᠠᠭᠠᠯ ᠢ᠋ ᠤᠳᠤᠷᠢᠳᠬᠤ ᠳᠣᠨᠢᠷ ᠠᠵᠢ᠃ ᠲᠡᠭᠦᠨ ᠦ᠌ ᠬᠣᠢᠨᠠᠴᠠ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠨᠢᠭᠡᠨ ᠯᠠᠮᠠ᠂ ᠠᠯᠲᠠᠨ ᠭᠣᠣ ᠲᠠᠢ ᠪᠤᠨᠳᠤᠬᠣᠷᠯᠤ ᠶ᠋ᠢ ᠵᠣᠷᠭᠤᠮᠠᠯ ᠮᠣᠳᠣᠨ ᠡᠰᠢ ᠡᠴᠡ ᠪᠠᠷᠢᠵᠤ ᠶᠠᠪᠤᠪᠠ᠃ ᠪᠤᠨᠳᠤᠬᠣᠷᠯᠤ ᠪᠣᠯ ᠠᠶᠠᠨ ᠵᠠᠮ ᠳ᠋ᠤ᠌ ᠶᠠᠪᠤᠭᠰᠠᠳ ᠢ᠋ ᠠᠯᠢᠪᠠ ᠮᠠᠭᠤ ᠵᠦᠭ ᠦ᠋ᠨ ᠰᠠᠭᠠᠳ ᠬᠣᠣᠷᠯᠠᠯ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠨᠢᠭᠡᠨ ᠵᠦᠢᠯ ᠦ᠋ᠨ ᠬᠥᠷᠥᠭ ᠪᠢᠯᠡ᠃ ᠲᠡᠭᠦᠨ ᠦ᠌ ᠪᠠᠢᠳᠠᠯ ᠢ᠋ ᠥᠭᠦᠯᠡᠪᠡᠯ᠂ ᠲᠥᠪ ᠳᠤᠮᠳᠠᠳᠤ ᠨᠢ ᠳᠡᠭᠡᠷᠡ ᠡᠴᠡ ᠳᠣᠷᠣᠭᠰᠢ᠂ ᠮᠥᠨ ᠬᠥᠨᠳᠡᠯᠡᠨ ᠪᠤᠶᠤ ᠳᠥᠷᠪᠡᠨ ᠥᠨᠴᠥᠭ ᠡᠴᠡ ᠬᠣᠰᠢᠭᠤᠯᠳᠠᠨ ᠪᠣᠳᠣᠬᠤ ᠳ᠋ᠤ᠌᠂ ᠴᠥᠮ ᠠᠷᠪᠠᠨ ᠲᠠᠪᠤ ᠪᠣᠯᠬᠤ ᠲᠣᠭᠠ ᠶ᠋ᠢ ᠭᠤᠷᠪᠠ ᠭᠤᠷᠪᠠ ᠪᠠᠷ ᠭᠤᠷᠪᠠᠨ ᠮᠥᠷ ᠪᠣᠯᠭᠠᠨ ᠪᠢᠴᠢᠭᠰᠡᠨ᠂ ᠲᠣᠭᠠᠨ ᠤ᠋ ᠳᠥᠷᠪᠡᠯᠵᠢᠨ ᠬᠦᠷᠳᠦ ᠲᠡᠢ ᠶ᠋ᠢ ᠥᠭᠦᠯᠡᠪᠡᠯ᠄
492 357 816
ᠡᠢᠮᠦ ᠬᠡᠳᠦᠨ ᠲᠣᠭᠠ ᠶ᠋ᠢ ᠪᠢᠴᠢᠬᠠᠨ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠡᠯᠢᠭᠡᠨ ᠳᠡᠭᠡᠷᠡ ᠪᠣᠢ ᠬᠦᠷᠳᠦᠨ ᠳ᠋ᠦ᠍ ᠵᠢᠷᠤᠵᠠᠢ᠃ ᠲᠡᠷᠡ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠬᠤᠯᠤᠭᠠᠨᠠ᠂ ᠦᠬᠡᠷ᠂ ᠪᠠᠷᠰ᠂ ᠲᠠᠤᠯᠠᠢ᠂ ᠯᠤᠤ᠂ ᠮᠣᠭᠠᠢ᠂ ᠮᠣᠷᠢ᠂ ᠬᠣᠨᠢ᠂ ᠪᠡᠴᠢ᠂ ᠲᠠᠬᠢᠶᠠ᠂ ᠨᠣᠬᠠᠢ᠂ ᠭᠠᠬᠠᠢ ᠭᠡᠳᠡᠭ ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠠᠮᠢᠲᠠᠨ ᠢ᠋ ᠵᠢᠷᠤᠵᠤ᠂ ᠲᠩᠷᠢ ᠭᠠᠵᠠᠷ᠂ ᠠᠶᠤᠩᠭᠠ ᠠᠭᠤᠯᠠ᠂ ᠰᠠᠯᠬᠢᠨ᠂ ᠭᠠᠯ᠂ ᠤᠰᠤ ᠲᠡᠷᠢᠭᠦᠲᠡᠨ ᠢ᠋ ᠳᠦᠷᠰᠦᠯᠡᠭᠰᠡᠨ ᠨᠠᠢ᠍ᠮᠠᠨ ᠬᠦᠯᠢᠯ ᠢ᠋ ᠵᠢᠷᠤᠵᠤ᠂ ᠵᠠᠪᠰᠠᠷ ᠥᠨᠴᠥᠭ ᠲᠤᠨᠢ ᠬᠠᠰ ᠲᠠᠮᠠᠭᠠ ᠳᠦᠷᠰᠦᠯᠡᠭᠰᠡᠨ ᠨᠢ ᠶᠡᠬᠡ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠡᠯᠢᠭᠡᠨ ᠳᠡᠭᠡᠷᠡ ᠪᠡᠨ ᠪᠠᠷᠢᠵᠤ ᠪᠠᠢᠭᠠ ᠬᠦᠷᠳᠦ ᠶ᠋ᠢᠨ ᠳᠦᠷᠰᠦ ᠲᠡᠢ ᠠᠵᠢ᠃
ᠪᠤᠨᠳᠤᠬᠣᠷᠯᠤ ᠪᠠᠷᠢᠭᠰᠠᠨ ᠯᠠᠮᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠳᠡᠰ ᠬᠠᠷᠠ ᠮᠣᠷᠢ ᠤᠨᠤᠭᠰᠠᠨ᠂ ᠪᠠᠷᠠᠭᠠᠨ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠨᠢᠭᠡ ᠯᠠᠮᠠ ᠭᠦᠷᠢᠮ ᠦ᠋ᠨ ᠭᠤᠷᠪᠠᠯᠵᠢᠨ ᠰᠢᠷᠠ ᠲᠤᠭ ᠪᠠᠷᠢᠵᠤ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠳᠡᠷᠭᠡᠳᠡ ᠨᠢ ᠶᠡᠬᠡ ᠰᠢᠷᠠ ᠲᠤᠭ᠂ ᠳᠠᠷᠠᠭᠠ ᠪᠠᠷ ᠪᠠᠭᠠ ᠲᠤᠭ ᠬᠣᠶᠠᠷ ᠢ᠋ ᠵᠠᠯᠠᠵᠤ᠂ ᠳᠠᠷᠠᠭᠠ ᠪᠠᠷ ᠲᠣᠮᠣ ᠴᠠᠭᠠᠨ ᠮᠣᠷᠢ ᠤᠨᠤᠭᠰᠠᠨ᠂ ᠦᠨᠡᠭᠡᠨ ᠮᠠᠯᠠᠭᠠᠢ ᠲᠠᠢ᠂ ᠶᠡᠬᠡ ᠲᠣᠮᠣ ᠪᠡᠶᠡ ᠲᠡᠢ ᠨᠢᠭᠡᠨ ᠬᠥᠮᠦᠨ ᠭᠠᠯ ᠤ᠋ᠨ ᠳᠥᠯᠥ ᠲᠣᠷᠣᠢᠯᠭᠠᠨ ᠬᠥᠪᠡᠭᠡᠯᠡᠭᠰᠡᠨ ᠭᠤᠷᠪᠠᠯᠵᠢᠨ ᠲᠣᠮᠣ ᠴᠠᠭᠠᠨ ᠬᠢᠭᠢᠷᠢ ᠪᠠᠷᠢᠵᠤ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠣᠶᠠᠷ ᠲᠥᠪᠡᠳ ᠴᠡᠩᠬᠡᠷ ᠬᠢᠭᠢᠷᠢ ᠪᠠᠷᠢᠭᠰᠠᠨ ᠬᠣᠶᠠᠷ ᠮᠣᠷᠢᠲᠠᠢ ᠬᠥᠮᠦᠨ᠂ ᠳᠠᠷᠠᠭᠠ ᠪᠠᠷ ᠨᠢᠭᠡᠨ ᠭᠣᠶᠣᠮᠰᠣᠭ ᠳᠡᠪᠡᠯ ᠲᠡᠢ ᠬᠥᠮᠦᠨ᠂ ᠶᠡᠬᠡᠯᠡ ᠰᠠᠢᠬᠠᠨ ᠤᠭᠠᠯᠵᠠᠲᠠᠢ ᠰᠦᠯᠳᠡ ᠰᠠᠠᠭᠠᠳᠠᠭ ᠠᠷᠤ ᠳ᠋ᠠᠭᠠᠨ ᠡᠭᠦᠷᠴᠦ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳ᠋ᠠᠬᠢ ᠡᠷᠪᠡᠭᠡᠯᠵᠢ ᠳ᠋ᠦ᠍ ᠠᠴᠢᠭᠰᠠᠨ ᠨᠢᠭᠡ ᠫᠤᠤ᠂ ᠳᠠᠷᠠᠭᠠ ᠪᠠᠷ ᠨᠢ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠲᠣᠭᠰᠢᠨ ᠨᠡᠢᠴᠦᠩ ᠰᠠᠬᠢᠭᠤᠯᠰᠤᠨ ᠤ᠋ ᠲᠤᠭ ᠵᠠᠯᠠᠭᠰᠠᠨ ᠬᠥᠬᠡ ᠴᠢᠷᠠᠢᠲᠠᠢ ᠯᠠᠮᠠ᠂ ᠮᠣᠷᠢᠨ ᠤ᠋ ᠠᠯᠬᠤᠬᠤ ᠪᠠᠢᠳᠠᠯ ᠳ᠋ᠤ᠌ ᠨᠡᠢᠯᠡᠭᠦᠯᠦᠨ ᠥᠨᠳᠡᠢᠰ ᠦᠨᠳᠡᠢᠰ ᠭᠡᠵᠦ ᠶᠠᠪᠤᠪᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠨᠢ ᠪᠠᠭᠠ ᠪᠤᠷᠬᠠᠨ ᠵᠠᠯᠠᠭᠰᠠᠨ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠶᠡᠬᠡ ᠪᠤᠷᠬᠠᠨ ᠵᠠᠯᠠᠭᠰᠠᠨ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠡᠮ ᠦ᠋ᠨ ᠰᠠᠪᠠ ᠪᠠᠷᠢᠭᠰᠠᠨ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠲᠥᠪᠡᠳ ᠲᠤᠪᠤᠷᠭᠠ ᠬᠤᠰᠢᠭᠤᠳ ᠢ᠋ ᠪᠠᠷᠢᠭᠰᠠᠨ ᠬᠣᠶᠠᠷ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠴᠠᠷᠳᠠᠮᠠᠯ ᠨᠢᠭᠡ ᠶ᠋ᠢ ᠪᠠᠷᠢᠭᠰᠠᠨ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠰᠠᠢᠨ ᠲᠣᠷᠭᠠᠨ ᠣᠯᠪᠣᠭ ᠪᠠᠷᠢᠭᠰᠠᠨ ᠯᠠᠮᠠ ᠶᠠᠪᠤᠵᠤ᠂ ᠲᠥᠷᠥ ᠶ᠋ᠢᠨ ᠰᠠᠢᠳ ᠤ᠋ᠳ ᠡᠷᠳᠡᠨᠢ ᠶ᠋ᠢᠨ ᠰᠡᠯᠡᠮᠡ ᠵᠡᠭᠦᠵᠦ᠂ ᠵᠤᠤᠵᠠᠢ ᠬᠣᠯᠪᠣᠨ ᠶᠠᠪᠤᠵᠠᠢ᠃ ᠠᠷᠪᠠᠨ ᠬᠣᠶᠠᠷ ᠲᠦᠰᠢᠮᠡᠯ᠂ ᠯᠠᠮᠠ ᠵᠠᠢᠰᠠᠩ᠂ ᠰᠠᠢᠬᠠᠨ ᠬᠡᠵᠢᠮ ᠭᠥᠯᠢᠮ ᠲᠡᠢ ᠡᠷᠪᠡᠭᠡᠯᠵᠢᠲᠤ ᠮᠣᠷᠢ ᠬᠥᠲᠥᠯᠵᠦ᠂ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠢᠶᠡ ᠯᠠᠮᠠ᠂ ᠬᠤᠲᠤᠭᠲᠤ ᠶ᠋ᠢᠨ ᠠᠯᠲᠠᠨ ᠰᠡᠦᠬᠡ ᠶ᠋ᠢ ᠳᠥᠷᠪᠡ ᠳᠥᠷᠪᠡ ᠪᠡᠷ ᠳᠠᠮᠨᠠᠨ ᠶᠠᠪᠤᠵᠠᠢ᠃ ᠰᠡᠦᠬᠡᠨ ᠳ᠋ᠦ᠍ ᠪᠣᠭᠳᠠ ᠪᠤᠯᠠᠭᠠᠨ ᠳᠣᠲᠣᠷ ᠲᠠᠢ ᠠᠯᠲᠠᠨ ᠬᠠᠳᠬᠤᠮᠠᠯ ᠲᠠᠵᠢ ᠮᠠᠩᠨᠤᠭ ᠳᠡᠪᠡᠯ᠂ ᠮᠢᠨᠵᠢᠨ ᠮᠠᠯᠠᠭᠠᠢ ᠡᠮᠦᠰᠴᠦ᠂ ᠪᠠᠯᠠᠢᠷᠠᠨ ᠪᠠᠢᠭᠠ ᠪᠦᠲᠦᠭ ᠨᠢᠳᠦᠨ ᠳ᠋ᠡᠭᠡᠨ ᠬᠠᠷᠠ ᠰᠢᠯ ᠵᠡᠭᠦᠵᠡᠢ᠃ ᠰᠡᠦᠬᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠣᠶᠠᠷ ᠯᠠᠮᠠ ᠶᠢᠰᠦᠨ ᠯᠤᠤᠲᠤ ᠬᠣᠬᠢᠭᠠᠷ ᠡᠰᠢᠲᠦ ᠶᠡᠬᠡ ᠰᠢᠷᠠ ᠰᠢᠬᠦᠷ ᠪᠠᠷᠢᠵᠤ᠂ ᠪᠠᠰᠠ ᠬᠣᠶᠠᠷ ᠯᠠᠮᠠ ᠲᠣᠭᠣᠰ ᠤ᠋ᠨ ᠥᠲᠥᠨ ᠰᠢᠭᠦᠷ ᠪᠠᠷᠢᠵᠤ᠂ ᠬᠣᠶᠠᠷ ᠯᠠᠮᠠ ᠰᠢᠷᠠ ᠯᠤᠳᠠᠩ ᠲᠣᠷᠭᠠᠨ ᠤ᠋ ᠰᠢᠭᠦᠷ ᠨᠢᠭᠡ ᠶ᠋ᠢ ᠪᠠᠷᠢᠵᠤ᠂ ᠰᠡᠦᠬᠡ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠵᠢᠷᠭᠤᠭᠠᠨ ᠲᠤᠭᠴᠢᠨ ᠲᠥᠪᠡᠳ ᠬᠢᠭᠢᠷᠢ ᠪᠠᠷᠢᠵᠠᠭᠠᠨ᠂ ᠳᠥᠷᠪᠡᠨ ᠶᠡᠬᠡᠷᠬᠡᠭ ᠴᠢᠭᠢᠷᠠᠭ ᠯᠠᠮᠠ ᠪᠦᠳᠦᠭᠦᠨ ᠪᠠᠷᠰ ᠲᠠᠰᠢᠭᠤᠷ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨ ᠶᠠᠪᠤᠵᠤ᠂ ᠬᠣᠶᠠᠷ ᠪᠢᠰᠬᠢᠭᠦᠷᠴᠢᠨ ᠢ᠋ ᠳᠠᠭᠠᠭᠤᠯᠵᠠᠢ᠃ ᠪᠣᠭᠳᠠ ᠶ᠋ᠢᠨ ᠰᠡᠦᠬᠡ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠠᠢ᠍ᠮᠠᠨ ᠬᠢᠶᠡ ᠨᠠᠷ᠂ ᠬᠠᠭᠠᠨ ᠤ᠋ ᠬᠠᠲᠤᠨ ᠡᠷᠭᠦᠮᠵᠢᠯᠡᠭᠦᠯᠬᠦ ᠭᠡᠵᠦ ᠶᠠᠪᠤᠭᠠ ᠴᠠᠭᠠᠨ ᠳ᠋ᠠᠷᠠ ᠡᠬᠡ ᠶ᠋ᠢᠨ ᠰᠡᠦᠬᠡ ᠳᠠᠮᠨᠠᠨ ᠶᠠᠪᠤᠵᠠᠢ᠃ ᠴᠠᠭᠠᠨ ᠨᠢᠭᠤᠷ ᠲᠠᠢ᠂ ᠤᠯᠠᠭᠠᠨ ᠬᠠᠴᠢᠷ ᠲᠠᠢ᠂ ᠶᠡᠬᠡᠯᠡ ᠮᠠᠷᠢᠶᠠᠵᠢᠭᠰᠠᠨ ᠴᠠᠭᠠᠨ ᠳᠠᠷᠠ ᠰᠤᠪᠤᠳ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠪᠠᠷ ᠪᠡᠶᠡ ᠶ᠋ᠢ ᠴᠢᠮᠡᠭᠯᠡᠭᠡᠳ᠂ ᠴᠢᠷᠠᠢ ᠶ᠋ᠢ ᠲᠥᠪ ᠪᠣᠯᠭᠠᠬᠤ ᠰᠠᠨᠠᠭᠠ ᠬᠡᠳᠦᠢ ᠪᠣᠢ ᠪᠣᠯᠪᠠᠴᠤ᠂ ᠲᠣᠷᠮᠣᠭᠣᠷ ᠬᠠᠷᠠ ᠨᠢᠳᠦᠨ ᠳ᠋ᠦ᠍ᠨᠢ ᠬᠦᠰᠡᠯ ᠬᠠᠨᠤᠨ ᠪᠦᠲᠦᠭᠰᠡᠨ ᠦ᠌ ᠪᠠᠶᠠᠷ ᠲᠣᠳᠣᠷᠬᠠᠢ ᠪᠢᠯᠡ᠃ ᠰᠡᠦᠬᠡ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠠᠷᠪᠠᠨ ᠲᠠᠢᠵᠢ ᠴᠤᠪᠤᠷᠢᠨ(ᠴᠤᠪᠤᠷᠠᠨ) ᠳᠠᠭᠠᠵᠤ ᠮᠣᠷᠢᠨ ᠤ᠋ ᠰᠠᠢᠨ ᠢ᠋ ᠤᠨᠤᠵᠤ᠂ ᠬᠤᠪᠴᠠᠰᠤᠨ ᠤ᠋ ᠰᠠᠢᠨ ᠢ᠋ ᠡᠮᠦᠰᠦᠭᠰᠡᠨ ᠨᠢ᠂ ᠡᠮᠡᠭᠡᠯ᠂ ᠬᠠᠵᠠᠭᠠᠷ᠂ ᠬᠣᠲᠣᠷᠭᠠ ᠬᠥᠮᠥᠯᠳᠥᠷᠭᠡ ᠴᠥᠮ ᠠᠯᠲᠠ᠂ ᠮᠥᠩᠭᠥ᠂ ᠱ᠌ᠢᠷᠦ ᠭᠢᠯᠠᠯᠵᠠᠨ᠂ ᠮᠣᠷᠢᠨ ᠤ᠋ ᠣᠮᠣᠷᠤᠤ ᠳ᠋ᠤ᠌ ᠭᠤᠸᠠ ᠰᠠᠢᠬᠠᠨ ᠮᠣᠨᠴᠣᠭ ᠵᠡᠭᠦᠵᠡᠢ᠃ ᠲᠡᠷᠡ ᠲᠠᠢᠵᠢ ᠨᠠᠷ ᠤ᠋ᠨ ᠵᠠᠷᠢᠮ ᠨᠢ ᠡᠷᠲᠡᠨ ᠦ᠌ ᠳᠠᠩ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠠᠯᠲᠠᠨ ᠮᠥᠩᠭᠥᠨ ᠵᠢᠵᠢᠦ ᠲᠡᠢ ᠬᠦᠷᠡᠯ ᠳᠥᠷᠥᠭᠡ ᠳᠥᠷᠥᠭᠡᠯᠡᠵᠦ ᠶᠠᠪᠤᠭᠰᠠᠨ ᠨᠢ ᠡᠢᠮᠦ ᠬᠦᠷᠡᠯ ᠳᠥᠷᠥᠭᠡ ᠶ᠋ᠢ ᠮᠣᠩᠭᠣᠯᠴᠤᠳ᠂ ᠲᠩᠷᠢ ᠡᠴᠡ ᠪᠠᠭᠤᠭᠰᠠᠨ ᠬᠡᠰᠢᠭ ᠲᠡᠢ ᠳᠥᠷᠥᠭᠡ ᠭᠡᠵᠦ ᠦᠵᠡᠳᠡᠭ ᠪᠠᠢᠵᠠᠢ᠃
ᠲᠠᠢᠵᠢ ᠨᠠᠷ ᠰᠣᠯᠣᠭᠠᠢ ᠲᠠᠯᠠ ᠳ᠋ᠠᠭᠠᠨ ᠤᠭᠠᠯᠵᠠᠲᠠᠢ ᠭᠤᠸᠠ ᠰᠠᠭᠠᠳᠠᠭ ᠲᠠᠢ ᠡᠷᠢᠶᠡᠨ ᠨᠤᠮᠤ᠂ ᠢᠴᠢ* ᠲᠠᠯᠠ ᠳ᠋ᠠᠭᠠᠨ ᠵᠢᠵᠢᠦ ᠮᠥᠩᠭᠥᠨ ᠲᠠᠪᠲᠠᠢ ᠬᠣᠷᠣᠮᠰᠠᠭᠠ ᠳ᠋ᠤ᠌ ᠳᠡᠰ ᠦ᠋ᠨ ᠥᠳᠥᠲᠦ ᠰᠤᠮᠤ ᠢᠷᠠᠢᠲᠠᠯᠠ ᠳᠦᠭᠦᠷᠡᠩ ᠠᠭᠰᠠᠵᠠᠢ᠃
ᠯᠤᠤᠬᠠ ᠪᠣᠯᠤᠭᠰᠠᠨ ᠨᠢᠳᠦ ᠲᠡᠢ ᠨᠢᠭᠡᠨ ᠡᠪᠦᠭᠡᠨ ᠭᠤᠢᠯᠢᠨᠴᠢ ᠲᠡᠷᠡ ᠰᠦᠷᠲᠦ ᠵᠢᠭᠰᠠᠭᠠᠯ ᠢ᠋ ᠬᠠᠷᠠᠵᠤ ᠬᠠᠷᠠᠵᠤ᠂ ᠳᠡᠷᠭᠡᠳᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠨᠥᠬᠥᠳ ᠲᠡᠭᠡᠨ᠂
— ᠨᠣᠭᠣᠭᠠᠨ ᠣᠷᠳᠣᠨ ᠤ᠋ ᠬᠢᠨ ᠡᠳᠦᠷ ᠲᠦ᠍ ᠲᠠᠪᠤᠨ ᠤᠳᠠᠭᠠ ᠬᠣᠭᠣᠯᠠ ᠢᠳᠡᠳᠡᠭ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠨᠢ ᠲᠦᠮᠡᠨ ᠦᠨᠡᠨ ᠶᠦᠮ ᠪᠠᠢᠨᠠ ᠰᠢᠦ᠃ ᠬᠥᠪᠴᠢ ᠶ᠋ᠢᠨ ᠵᠣᠨᠤᠩ ᠤ᠋ᠨ ᠡᠨᠡ ᠰᠢᠷᠠ ᠬᠡᠦᠬᠡᠨ ᠦ᠌ ᠭᠣᠣᠯ ᠤ᠋ᠨ ᠬᠥᠬᠡ ᠲᠠᠩᠭᠤᠳ ᠤ᠋ᠨ ᠬᠣᠭᠣᠯᠠᠨ ᠳ᠋ᠤ᠌ ᠪᠥᠭᠡᠷᠡ ᠪᠡᠨ ᠥᠭᠡᠬᠦᠯᠡᠲᠡᠯᠡ ᠴᠠᠳᠤᠭᠰᠠᠨ ᠢ᠋ ᠬᠠᠷᠠᠪᠠᠤ᠂ ᠴᠢ ᠮᠢᠨᠢ? ᠡᠳᠡᠨ ᠦ᠌ ᠡᠳᠦᠷ ᠪᠦᠷᠢ ᠴᠢᠬᠢᠳᠡᠭ ᠡᠴᠡ ᠨᠢ ᠴᠢ ᠪᠢᠳᠡ ᠬᠣᠶᠠᠷ ᠨᠢᠭᠡ ᠤᠳᠠᠭᠠ ᠴᠤ᠌ ᠭᠡᠰᠡᠨ ᠴᠠᠳᠲᠠᠯᠠ ᠢᠳᠡᠵᠦ ᠦᠵᠡᠳᠡᠭ ᠪᠣᠯᠪᠠᠯ ᠶᠠᠭᠤᠲᠠᠢ ᠪᠢᠯᠡ? ᠭᠡᠵᠦ᠃
ᠲᠡᠭᠡᠬᠦ ᠳ᠋ᠦ᠍ᠨᠢ᠂ ᠬᠠᠯᠴᠠᠭᠠᠷ ᠮᠠᠭᠤ ᠯᠣᠣᠪᠣᠤᠵᠠ ᠲᠠᠢ᠂ ᠬᠢᠭᠤᠷᠰᠤ ᠳᠦᠭᠦᠷᠦᠭᠰᠡᠨ ᠱᠣᠳᠣᠩ ᠪᠤᠭᠤᠷᠤᠯ ᠭᠡᠵᠢᠭᠡ ᠲᠡᠢ ᠪᠠᠯᠲᠠᠭᠠᠷ ᠡᠪᠦᠭᠡᠨ ᠨᠠᠢᠷᠠᠮᠳᠠᠬᠤ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠥᠭᠦᠯᠡᠷᠦᠨ᠂
— ᠥᠨᠥᠳᠥᠷ ᠴᠢ ᠪᠢᠳᠡ ᠬᠣᠶᠠᠷ ᠴᠤ᠌ ᠭᠡᠰᠡᠨ ᠨᠢᠭᠡ ᠴᠠᠳᠬᠤ ᠪᠠᠢᠯ ᠦᠭᠡᠢ ᠳᠡ᠃ ᠪᠣᠭᠳᠠ ᠭᠡᠭᠡᠬᠡᠨ(ᠭᠡᠭᠡᠨ) ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠯᠠ ᠭᠡᠵᠦ ᠬᠦᠷᠢᠶᠡᠨ ᠦ᠌ ᠬᠢᠨ ᠵᠢᠷ ᠦ᠋ᠨ ᠡᠳᠦᠷ ᠡᠴᠡ ᠠᠷᠠᠢ ᠥᠭᠯᠢᠭᠡᠴᠢ ᠪᠠᠢᠬᠤ ᠶᠤᠮ ᠪᠠᠢᠯ ᠦᠭᠡᠢ ᠳᠡ᠃
— ᠴᠢ ᠬᠠᠷᠠᠭᠠᠴᠢ᠂ ᠡᠨᠡ ᠵᠢᠭᠰᠠᠭᠠᠯ ᠶᠠᠭᠤᠲᠠᠢ ᠰᠦᠷ ᠲᠡᠢ ᠰᠠᠢᠬᠠᠨ ᠪᠣᠢ? ᠬᠡᠴᠢᠨᠡᠨ ᠰᠠᠢᠬᠠᠨ ᠭᠣᠶᠣ ᠲᠤᠭ ᠳᠠᠯᠪᠠᠭᠠ ᠭᠢᠯᠠᠯᠵᠠᠨ ᠨᠠᠮᠢᠯᠵᠠᠵᠤ᠂ ᠬᠡᠴᠢᠨᠡᠨ ᠣᠯᠠᠨ ᠭᠣᠶᠣ ᠰᠢᠷᠠ ᠴᠠᠢᠪᠤᠷ ᠯᠠᠮᠠ ᠬᠤᠸᠠᠷᠠᠭ᠂ ᠨᠣᠶᠠᠳ ᠳᠡᠭᠡᠳᠦᠰ ᠵᠠᠯᠠᠷᠠᠵᠤ ᠶᠠᠪᠤᠨᠠ ᠭᠡᠬᠦ ᠳ᠋ᠦ᠍ᠨᠢ᠂
— ᠵᠠᠯᠠᠷᠠᠬᠤ ᠪᠠᠨ ᠴᠤ᠌ ᠠᠯᠳᠠᠭ ᠳᠠ! ᠲᠡᠷᠡ ᠰᠠᠢᠬᠠᠨ ᠠ᠋ᠴᠠ ᠴᠢᠨᠢ ᠪᠣᠯᠵᠤ᠂ ᠨᠠᠭᠠᠳᠤ ᠵᠠᠬᠠ ᠨᠢ ᠴᠢ ᠪᠢᠳᠡ ᠬᠣᠶᠠᠷ ᠪᠠᠯᠠᠷᠠᠵᠤ ᠶᠠᠪᠤᠭᠠ ᠶᠤᠮ ᠪᠢᠰᠢ ᠤᠤ? ᠬᠠᠷᠠᠪᠠᠤ ᠲᠡᠷᠡ᠂ ᠮᠠᠨᠠᠢ ᠨᠣᠶᠠᠨ᠂ ᠪᠤᠯᠠᠭᠠ ᠲᠣᠷᠭᠠ ᠪᠠᠷ ᠣᠷᠢᠶᠠᠭᠰᠠᠨ ᠥᠭᠡᠬᠦ ᠰᠢᠭ ᠣᠪᠣᠯᠵᠠᠵᠤ ᠶᠠᠪᠤᠭᠠ ᠪᠠᠢᠳᠠᠯ ᠨᠢ······ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠮᠠᠯ ᠰᠦᠷᠦᠭ ᠮᠠᠨᠢ ᠴᠠᠭᠠᠳᠤᠬᠢ ᠶ᠋ᠢᠨ ᠴᠢᠨᠢ ᠣᠷᠢᠶᠠᠭᠰᠠᠨ ᠪᠤᠯᠠᠭᠠ ᠲᠣᠷᠭᠠ ᠪᠣᠯᠤᠭᠠᠳ᠂ ᠬᠥᠭᠡᠷᠦᠬᠦᠢ ᠪᠣᠯᠤᠭᠰᠠᠨ ᠪᠢᠳᠡ ᠬᠣᠶᠠᠷ ᠵᠣᠯᠪᠢᠨ ᠨᠣᠬᠠᠢ ᠰᠢᠭ᠋ ᠬᠦᠷᠢᠶᠡᠨ ᠦ᠌ ᠬᠦᠷᠳᠦᠨ ᠳᠣᠣᠷᠠ ᠬᠣᠨᠣᠳᠠᠭ ᠪᠣᠯᠤᠭᠰᠠᠨ ᠪᠢᠰᠢ ᠤᠤ? ᠡᠳᠡᠨ ᠦ᠌ ᠨᠢᠭᠦᠯ ᠦ᠋ᠨ ᠰᠠᠪᠠ ᠳᠦᠭᠦᠷᠳᠡᠭ ᠨᠢᠭᠡ ᠴᠠᠭ ᠪᠠᠢᠳᠠᠭ ᠪᠢᠯᠢᠤ? ᠭᠡᠵᠦ ᠬᠣᠷᠣᠰᠤᠨ ᠬᠡᠯᠡᠬᠦ ᠳ᠋ᠦ᠍ᠨᠢ ᠪᠠᠯᠲᠠᠭᠠᠷ ᠡᠪᠦᠭᠡᠨ ᠰᠠᠨᠳᠤᠨ ᠡᠮᠢᠶᠡᠵᠦ ᠶᠠᠭᠠᠷᠠᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠨᠴᠤ(ᠬᠠᠨᠴᠤᠢ) ᠠ᠋ᠴᠠ ᠴᠢᠩᠭᠠᠭᠠᠳ᠂
— ᠪᠣᠯᠢ ᠪᠣᠯᠢ! ᠨᠠᠮᠳᠠᠵᠤ ᠬᠠᠢᠷᠠᠯᠠ! ᠴᠠᠭᠠᠳᠤᠭᠤᠯ(ᠴᠠᠭᠠᠳᠤᠭᠤᠯᠠ) ᠴᠢᠨᠢ ᠰᠣᠨᠣᠰᠪᠠᠯ᠂ ᠴᠢ ᠪᠢᠳᠡ ᠬᠣᠶᠠᠷ ᠲᠤ᠌ ᠬᠠᠯᠳᠠᠬᠤ ᠵᠣᠪᠠᠯᠠᠩ ᠪᠠᠭᠠ ᠦᠭᠡᠢ ᠭᠡᠵᠦ ᠮᠡᠳᠡᠭᠡᠷᠡᠢ ᠭᠡᠬᠦ ᠳ᠋ᠦ᠍ᠨᠢ(ᠳ᠋ᠦ᠍ ᠨᠢ) ᠨᠥᠭᠦᠭᠡ ᠡᠪᠦᠭᠡᠨ ᠭᠤᠢᠯᠢᠨᠴᠢᠨ᠂ ᠣᠮᠣᠭᠣᠯᠳᠠᠭᠰᠠᠨ(ᠣᠮᠣᠭᠣᠯᠲᠤᠭᠰᠠᠨ) ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠨ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ ᠶᠠᠭᠤᠮᠠ ᠰᠢᠪᠡᠨᠡᠨ᠂ ᠲᠦᠮᠡᠨ ᠬᠣᠷᠣᠰᠤᠯ ᠵᠠᠩᠭᠢᠷᠠᠭᠰᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠪᠣᠭᠳᠠ ᠶ᠋ᠢᠨ ᠭᠣᠶᠣ ᠵᠢᠭᠰᠠᠭᠠᠯ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠬᠦᠢᠲᠡᠨ ᠢ᠋ᠶ᠋ᠡᠷ ᠰᠢᠷᠳᠡᠨ ᠵᠣᠭᠰᠣᠵᠤ ᠪᠢᠯᠡ᠃
ᠶᠡᠬᠡ ᠵᠢᠭᠰᠠᠭᠠᠯ ᠢ᠋ ᠠᠢᠰᠤᠢ ᠢᠷᠡᠬᠦ ᠳ᠋ᠦ᠍᠂ ᠵᠠᠮ ᠤ᠋ᠨ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ᠂ ᠲᠡᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠵᠣᠭᠰᠣᠭᠰᠠᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠰᠥᠭᠥᠳᠴᠦ ᠮᠥᠷᠭᠥᠨ ᠥᠩᠭᠡᠷᠡᠭᠦᠯᠦᠭᠰᠡᠭᠡᠷ ᠵᠢᠭᠰᠠᠭᠠᠯ ᠢ᠋ ᠰᠢᠷᠠ ᠣᠷᠳᠣᠨ ᠤ᠋ ᠣᠢᠷᠠ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍᠂ ᠠᠮᠢᠲᠠᠨ ᠴᠢᠬᠢᠯᠴᠡᠨ ᠤᠯᠠᠭᠠᠨ ᠬᠦᠷᠡᠩ ᠱᠥᠷᠭᠡ ᠶ᠋ᠢᠨ ᠵᠦᠭ ᠲᠡᠮᠡᠴᠡᠨ ᠳᠠᠭᠠᠷᠢᠵᠤ᠂《ᠠᠮᠢᠳᠤ ᠪᠤᠷᠬᠠᠨ》 ᠤ᠋ ᠵᠠᠯᠠᠷᠠᠵᠤ ᠶᠠᠪᠤᠬᠤ ᠶ᠋ᠢ ᠬᠠᠷᠠᠬᠤ ᠶᠤᠮᠰᠠᠨ ᠭᠡᠵᠦ ᠵᠢᠳᠬᠦᠪᠡ᠃ ᠭᠡᠰᠬᠦᠢ ᠨᠠᠷ ᠤ᠋ᠨ ᠵᠢᠭᠰᠠᠭᠠᠭᠰᠠᠨ ᠴᠢᠭᠢᠷᠠᠭ ᠴᠢᠭᠢᠷᠠᠭ ᠪᠦᠳᠦᠭᠦᠨ ᠯᠠᠮᠠ ᠨᠠᠷ ᠬᠥᠭᠰᠢᠨ ᠵᠠᠯᠠᠭᠤ᠂ ᠡᠷᠡ ᠡᠮᠡ ᠶ᠋ᠢ ᠢᠯᠭᠠᠯ ᠦᠭᠡᠢ᠂ ᠨᠢᠭᠤᠷ ᠨᠢᠳᠦ ᠦᠭᠡᠢ ᠲᠠᠰᠢᠭᠤᠷᠳᠠᠵᠤ᠂ ᠲᠡᠷᠡ ᠬᠡᠲᠦᠷᠬᠡᠢ ᠬᠠᠷᠭᠢᠰ ᠯᠠᠮᠠ ᠨᠠᠷ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠲᠣᠮᠣ ᠯᠠᠮᠠ ᠣᠨᠴᠠ ᠳᠣᠭᠰᠢᠨ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠭᠠᠷ ᠬᠥᠳᠡᠯᠵᠦ᠂ ᠣᠯᠠᠨ ᠤ᠋ ᠵᠦᠭ ᠳᠠᠭᠠᠷᠢᠨ ᠣᠷᠣᠬᠤ ᠨᠢ ᠠᠵᠢᠷᠭᠠᠨ ᠴᠢᠨᠣᠠ᠂ ᠰᠦᠷᠦᠭ ᠬᠣᠨᠢᠨ ᠳ᠋ᠤ᠌ ᠳᠠᠭᠠᠷᠢᠨ ᠣᠷᠣᠬᠤ ᠠᠳᠠᠯᠢ ᠦᠵᠡᠭᠳᠡᠪᠡ᠃ ᠶᠡᠬᠡ ᠶᠣᠰᠣᠯᠠᠯ ᠤ᠋ᠨ ᠤᠷᠢᠳᠠ(ᠤᠷᠢᠳ) ᠡᠳᠦᠷ᠂ ᠴᠠᠬᠠᠷ ᠨᠤᠲᠤᠭ ᠠ᠋ᠴᠠ ᠲᠠᠷᠭᠠᠢ ᠰᠠᠢᠨᠪᠢᠯᠢᠭ᠌ ᠬᠣᠶᠠᠷ᠂ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠢᠷᠡᠭᠡᠳ᠂ ᠬᠤᠲᠤᠭᠲᠤ ᠶ᠋ᠢ ᠦᠵᠡᠰᠦᠭᠡᠢ ᠭᠡᠵᠦ ᠣᠯᠠᠨ ᠤ᠋ ᠡᠮᠦᠨᠡ ᠵᠠᠬᠠ ᠳ᠋ᠤ᠌ ᠲᠦᠯᠬᠢᠯᠴᠡᠭᠰᠡᠭᠡᠷ ᠭᠠᠷᠴᠤ ᠢᠷᠡᠭᠰᠡᠨ ᠠᠯᠲᠠᠨᠬᠤᠶᠠᠭ᠂ ᠰᠠᠢᠨᠪᠢᠯᠢᠭ᠌ ᠢ᠋ ᠲᠦᠯᠬᠢᠨ᠄
— ᠡᠨᠡ ᠡᠪᠡᠷ ᠦᠭᠡᠢ ᠦᠬᠡᠷ ᠦ᠋ᠨ ᠭᠠᠯᠵᠠᠭᠤᠷᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠪᠠᠤ(ᠬᠠᠷᠠᠪᠠ ᠤᠤ) ᠭᠡᠵᠦ ᠶᠡᠬᠡᠯᠡ(ᠶᠡᠬᠡ ᠯᠡ) ᠵᠢᠪᠡᠭᠦᠴᠡᠵᠦ ᠡᠨᠡ ᠬᠡᠳᠦᠨ ᠪᠠᠯᠠᠮᠠᠳ ᠯᠠᠮᠠ ᠨᠠᠷ᠂ ᠬᠥᠮᠦᠨ ᠢ᠋ ᠳᠠᠩᠴᠢ(ᠳᠠᠩᠴᠤ) ᠳᠡᠩᠳᠡᠭᠦᠦ ᠳᠠᠷᠤᠯᠠᠵᠤ ᠪᠠᠢᠨᠠ᠁ ᠠᠯᠢ ᠠ᠋᠂ ᠪᠢ ᠲᠡᠷᠡ ᠮᠠᠭᠤ ᠳ᠋ᠤ᠌ ᠨᠢᠭᠡ ᠠᠳᠢᠰ ᠪᠠᠭᠤᠯᠭᠠᠵᠤ᠂ ᠬᠥᠭᠡᠷᠦᠬᠦᠢ ᠡᠪᠦᠭᠡᠳ ᠡᠮᠡᠭᠲᠡᠢᠴᠦᠳ ᠲᠦ᠍ ᠡᠷᠡᠯᠭᠡᠨ ᠪᠠᠭᠠᠲᠤᠷᠯᠠᠵᠤ ᠪᠠᠢᠭᠠ ᠶ᠋ᠢᠨ ᠱᠠᠩ ᠥᠭᠭᠦᠶᠡ᠃ ᠪᠤᠶᠠᠨᠲᠠᠨ ᠠᠬᠠ ᠨᠠᠷ ᠮᠢᠨᠢ᠂ ᠵᠠᠢ ᠳᠡᠯᠪᠢ᠂ ᠪᠢ ᠲᠡᠷᠡ ᠦᠬᠡᠷ ᠢ᠋ ᠳᠥᠷᠥᠯᠡᠭᠡᠳ ᠦᠵᠡᠶᠡ ᠭᠡᠵᠦ ᠠᠯᠲᠠᠨᠬᠤᠶᠠᠭ ᠪᠥᠬᠡ᠂ ᠨᠠᠭᠤᠷ ᠤ᠋ᠨ ᠤᠰᠤᠨ ᠤ᠋ ᠳᠣᠯᠭᠢᠶᠠ ᠶ᠋ᠢ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠭᠠ ᠵᠦᠰᠦᠨ ᠬᠤᠷᠳᠤᠯᠠᠵᠤ ᠶᠠᠪᠤᠭᠠ ᠬᠤᠨ ᠰᠢᠪᠠᠭᠤ ᠰᠢᠭ᠋᠂ ᠦᠢᠮᠡᠯᠳᠦᠨ ᠴᠢᠬᠢᠯᠳᠦᠨ ᠪᠠᠢᠭᠠ ᠣᠯᠠᠨ ᠢ᠋ ᠬᠣᠶᠠᠷ ᠲᠡᠰᠢ(ᠲᠡᠢᠰᠢ) ᠨᠢ ᠬᠠᠭᠠᠯᠵᠤ᠂ ᠵᠢᠭᠰᠠᠭᠠᠯ ᠤ᠋ᠨ ᠵᠦᠭ ᠲᠠᠪᠰᠢᠬᠤ ᠳ᠋ᠤ᠌ ᠰᠠᠢᠨᠪᠢᠯᠢᠭ᠌ ᠲᠠᠷᠭᠠᠢ ᠬᠣᠶᠠᠷ᠂ ᠳᠡᠷᠭᠡᠳᠡ ᠨᠢ ᠪᠠᠭᠤᠷᠠᠢ ᠬᠥᠮᠦᠨ ᠢ᠋ ᠳᠠᠷᠤᠯᠠᠬᠤ ᠳ᠋ᠤ᠌ ᠲᠡᠰᠴᠦ ᠴᠢᠳᠠᠬᠤ ᠦᠭᠡᠢ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠩ ᠢ᠋ ᠠᠨᠳᠤᠬᠤ(ᠠᠨᠳᠠᠬᠤ) ᠦᠭᠡᠢ ᠲᠤᠯᠠ᠂ ᠡᠬᠡ ᠶ᠋ᠢ ᠳᠠᠭᠠᠭᠰᠠᠨ ᠳᠡᠭᠳᠡᠭᠡᠬᠡᠢ ᠰᠢᠭ ᠠᠯᠲᠠᠨᠬᠤᠶᠠᠭ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠲᠠᠯᠠ ᠲᠡᠷᠡ ᠴᠢᠭᠢᠷᠠᠭ ᠪᠥᠬᠡ ᠡᠷᠡ ᠬᠡᠳᠦᠢᠨᠡᠢ(ᠬᠡᠳᠦᠢᠨ ᠦ᠌) ᠥᠨᠥᠬᠢ ᠯᠠᠮᠠ ᠶ᠋ᠢᠨ ᠵᠦᠭ ᠣᠢᠷᠠᠲᠤᠵᠤ(ᠣᠢᠷᠠᠳᠴᠤ) ᠣᠴᠢᠭᠠᠳ ᠲᠡᠷᠡ ᠯᠠᠮᠠ ᠶ᠋ᠢ ᠨᠢᠭᠡᠨ ᠵᠠᠯᠠᠭᠤ ᠡᠬᠡᠨᠡᠷ ᠦ᠋ᠨ ᠭᠡᠳᠡᠰᠦ ᠤᠷᠤᠭᠤ ᠬᠦᠴᠦᠯᠡᠨ ᠴᠣᠬᠢᠵᠤ᠂ ᠬᠥᠯ ᠳᠣᠣᠷᠠ ᠪᠠᠨ ᠤᠨᠠᠭᠠᠭᠰᠠᠨ ᠦᠶᠡᠰ ᠢ᠋ᠶ᠋ᠡᠷ ᠳᠠᠭᠠᠷᠢᠯᠳᠤᠪᠠ᠃
— — — —
* ᠠᠶᠠ᠂ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠰ᠂ ᠬᠠᠭᠠᠨ ᠢ᠋ᠶ᠋ᠠᠷ ᠲᠠ ᠨᠠᠷ ᠶᠠᠭᠤ ᠬᠢᠬᠦ ᠨᠢ ᠪᠣᠢ? ᠨᠣᠬᠠᠢᠴᠢᠨ ᠢ᠋ᠶ᠋ᠠᠷ ᠲᠠ ᠨᠠᠷ ᠶᠠᠭᠤ ᠬᠢᠬᠤᠪ? ᠲᠠ ᠨᠠᠷ ᠨᠣᠬᠠᠢ ᠪᠢᠰᠢ᠂ ᠬᠥᠮᠦᠨ ᠶᠦᠮ ᠪᠢᠰᠢ ᠤᠤ? ᠭᠡᠵᠦ ᠦᠺᠷᠠᠢᠨᠠ ᠶ᠋ᠢᠨ ᠠᠯᠳᠠᠷᠲᠤ ᠵᠣᠬᠢᠶᠠᠯᠴᠢ ᠱᠧᠪᠴᠧᠨᠺᠦ ᠶ᠋ᠢᠨ ᠪᠢᠴᠢᠭᠰᠡᠨ ᠰᠢᠯᠦᠭ ᠢ᠋ᠶ᠋ᠡᠷ ᠪᠦᠯᠦᠭ ᠦ᠋ᠨ ᠤᠳᠤᠷᠢᠳᠬᠠᠯ ᠪᠣᠯᠭᠠᠪᠠ᠃
* ᠢᠴᠢ — ᠭᠡᠵᠦ ᠵᠥᠪ ᠲᠠᠯᠠ ᠭᠡᠰᠡᠨ ᠦᠭᠡ᠃
ᠥᠨᠥᠬᠢ ᠯᠠᠮᠠ ᠳ᠋ᠤ᠌ ᠴᠣᠬᠢᠭᠤᠯᠵᠤ᠂ ᠲᠡᠷᠡ ᠬᠥᠭᠡᠷᠦᠬᠦᠢ ᠡᠮᠡᠭᠲᠡᠢ ᠶ᠋ᠢ ᠣᠢᠴᠢᠬᠤ ᠳ᠋ᠤ᠌᠂ ᠨᠢᠭᠡᠨ ᠡᠴᠡᠩᠬᠡᠷ(ᠡᠴᠡᠩᠭᠢᠷ)ᠡᠮᠡᠭᠡᠨ᠂
— ᠠᠢ ᠬᠠᠯᠠᠭ᠂ ᠬᠡᠦᠬᠡᠨ ᠢ᠋ ᠮᠢᠨᠢ ᠠᠯᠠᠯᠠ! ᠭᠡᠵᠦ ᠪᠠᠷᠬᠢᠷᠠᠭᠠᠳ᠂ ᠲᠡᠷᠡ ᠣᠢᠴᠢᠭᠰᠠᠨ ᠡᠮᠡᠭᠲᠡᠢ ᠶ᠋ᠢ ᠪᠡᠶᠡ ᠪᠡᠷ ᠬᠠᠯᠬᠠᠯᠠᠨ ᠣᠷᠣᠭᠰᠢ ᠲᠠᠪᠰᠢᠮᠠᠭᠴᠠ ᠥᠨᠥᠬᠢ ᠯᠠᠮᠠ᠂ ᠲᠡᠷᠡ ᠡᠮᠡᠭᠡᠨ ᠢ᠋ ᠮᠢᠭᠤᠢ ᠶ᠋ᠢᠨ ᠵᠤᠯᠵᠠᠭᠠ ᠢᠰᠬᠦᠯᠬᠦ ᠮᠡᠲᠦ ᠢᠰᠬᠦᠯᠦᠨ ᠥᠰᠥᠷᠬᠡᠪᠡ᠃ ᠲᠡᠷᠡ ᠬᠠᠪᠢ ᠶ᠋ᠢᠨ ᠣᠯᠠᠨ᠂ ᠥᠨᠥᠬᠢ ᠯᠠᠮᠠ ᠶ᠋ᠢ ᠶᠡᠬᠡᠯᠡ (ᠶᠡᠬᠡ ᠯᠡ)ᠵᠢᠭᠰᠢᠨ ᠱᠤᠤᠭᠢᠲᠠᠯᠠ᠂ ᠠᠯᠲᠠᠨᠬᠤᠶᠠᠭ ᠤ᠋ᠨ ᠬᠢᠯᠢᠩ ᠭᠠᠯ ᠮᠡᠲᠦ ᠪᠠᠳᠠᠷᠠᠵᠤ᠂ ᠤᠷᠤᠭᠰᠢ ᠭᠠᠯᠵᠠᠭᠤ ᠵᠠᠭᠠᠨ ᠮᠡᠲᠦ ᠤᠬᠤᠰᠬᠢᠨ ᠳᠠᠪᠬᠢᠵᠤ᠂ ᠳᠡᠰ ᠬᠢᠲᠡᠯᠡ ᠱᠠᠭᠠᠬᠤ(ᠰᠢᠭᠠᠬᠤ) ᠴᠢᠮᠡᠭᠡ ᠰᠣᠨᠣᠰᠳᠠᠨ᠂ ᠲᠡᠷᠡ ᠬᠡᠷᠴᠡᠭᠡᠢ ᠯᠠᠮᠠ᠂ ᠴᠢᠭᠢᠷᠠᠭ ᠪᠥᠬᠡ ᠶ᠋ᠢᠨ ᠬᠠᠲᠠᠭᠤ ᠭᠠᠷ ᠲᠤ᠌ ᠴᠣᠬᠢᠭᠳᠠᠨ᠂ ᠪᠣᠭᠳᠠ ᠶ᠋ᠢᠨ ᠰᠡᠦᠬᠡ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠪᠠᠷᠠᠭᠠ(ᠪᠠᠷᠠ) ᠪᠣᠯᠵᠤ ᠶᠠᠪᠤᠭᠰᠠᠨ ᠨᠤᠮᠤ ᠰᠤᠮᠤ ᠠᠭᠰᠠᠭᠰᠠᠨ ᠨᠢᠭᠡ ᠲᠠᠢᠵᠢ ᠶ᠋ᠢᠨ ᠮᠣᠷᠢᠨ ᠤ᠋ ᠬᠣᠨᠳᠣᠯᠠᠢ ᠳᠡᠭᠡᠷᠡ ᠫᠠᠳ ᠬᠢᠲᠡᠯᠡ ᠠᠯᠳᠠᠯᠠᠨ ᠣᠢᠴᠢᠵᠤ᠂ ᠮᠣᠷᠢ᠂ ᠲᠠᠢᠵᠢ᠂ ᠯᠠᠮᠠ ᠭᠤᠷᠪᠠ᠂ ᠲᠤᠭᠴᠢᠨ ᠤ᠋ ᠮᠣᠷᠢᠨ ᠤ᠋ ᠬᠥᠯ ᠦ᠋ᠨ ᠳᠣᠣᠷᠠ ᠫᠢᠵᠢᠭᠢᠨᠡᠨ ᠣᠢᠴᠢᠪᠠ᠃ ᠲᠤᠭᠴᠢᠨ ᠰᠣᠴᠢᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ (ᠳ᠋ᠤ᠌ ᠪᠠᠨ)᠂ ᠲᠤᠭ ᠤ᠋ᠨ ᠡᠰᠢ ᠶ᠋ᠢ ᠠᠯᠳᠠᠵᠠᠢ᠃
ᠠᠮᠢᠲᠠᠨ ᠦᠢᠮᠡᠯᠳᠦᠨ ᠰᠦᠢᠳ ᠪᠣᠯᠬᠤ ᠵᠠᠪᠰᠠᠷ᠂ ᠮᠠᠨᠠᠢ (ᠮᠠᠨ ᠤ᠋ )ᠭᠤᠷᠪᠠᠨ ᠨᠥᠬᠥᠳ᠂ ᠣᠯᠠᠨ ᠤ᠋ ᠳᠤᠮᠳᠠ ᠰᠢᠷᠭᠤᠯᠠᠨ ᠬᠤᠳᠬᠤᠯᠳᠤᠵᠤ᠂ ᠪᠠᠷᠠᠭᠠ(ᠪᠠᠷᠠ) ᠳᠣᠷᠣ ᠦᠭᠡᠢ ᠪᠣᠯᠵᠠᠢ᠃ ᠲᠡᠷᠡ ᠵᠠᠪᠰᠠᠷ᠂ ᠴᠡᠷᠢᠭ ᠦ᠋ᠳ᠂ ᠥᠨᠥᠬᠢ ᠯᠠᠮᠠ ᠶ᠋ᠢ ᠤᠩᠭᠠᠰᠤᠲᠠᠢ ᠲᠤᠯᠤᠮ ᠰᠢᠭ᠋ ᠴᠢᠷᠴᠦ᠂ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠭᠠᠷᠭᠠᠵᠤ ᠬᠠᠶᠠᠭᠠᠳ᠂ ᠲᠠᠢᠵᠢ ᠠᠪᠤᠭᠠᠢ ᠪᠣᠰᠴᠤ ᠳᠡᠪᠡᠯ ᠬᠤᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠴᠠᠰᠤ ᠰᠢᠷᠣᠢ ᠶ᠋ᠢ ᠠᠷᠢᠯᠭᠠᠭᠠᠳ ᠮᠣᠷᠢ ᠪᠠᠨ ᠤᠨᠤᠵᠤ᠂ ᠰᠢᠷᠠ ᠣᠷᠳᠣᠨ ᠤ᠋ ᠡᠮᠦᠨᠡᠬᠢ ᠱᠥᠷᠭᠡ ᠳ᠋ᠦ᠍ ᠬᠦᠷᠦᠭᠰᠡᠨ ᠵᠢᠭᠰᠠᠭᠠᠯ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠣᠳᠪᠠ᠃
ᠰᠡᠦᠬᠡ ᠶ᠋ᠢ ᠣᠢᠷᠠᠲᠤᠨ ᠢᠷᠡᠮᠡᠭᠴᠡ᠂ ᠰᠢᠷᠠ ᠣᠷᠳᠣᠨ ᠤ᠋ ᠡᠮᠦᠨᠡᠬᠢ ᠬᠠᠭᠠᠯᠭᠠᠨ ᠤ᠋ ᠲᠤᠰ ᠡᠳᠡᠭᠡᠣ᠌ᠠ ᠳ᠋ᠤ᠌ ᠵᠢᠭᠰᠠᠭᠠᠭᠰᠠᠨ ᠪᠢᠰᠬᠢᠭᠦᠷᠴᠢᠨ ᠡᠬᠡᠰᠢᠭ ᠬᠥᠭᠵᠢᠮ ᠡᠷᠭᠦᠨ᠂ ᠬᠣᠰᠢᠭᠤ ᠴᠢᠭᠤᠯᠭᠠᠨ ᠠ᠋ᠴᠠ ᠶᠢᠰᠦᠨ ᠴᠠᠭᠠᠨ ᠤ᠋ ᠪᠡᠯᠡᠭ ᠶᠣᠰᠣᠯᠠᠯ ᠪᠠᠷᠢᠬᠤ ᠳ᠋ᠤ᠌᠂ ᠴᠠᠭᠠᠨ ᠮᠣᠷᠢ ᠲᠡᠮᠡᠭᠡᠨ ᠦ᠌ ᠬᠦᠵᠦᠭᠦᠨ ᠳ᠋ᠦ᠍ ᠤᠯᠠᠭᠠᠨ᠂ ᠰᠢᠷᠠ᠂ ᠴᠠᠭᠠᠨ᠂ ᠬᠥᠬᠡ ᠬᠠᠳᠠᠭ ᠪᠤᠯᠠᠭᠠ ᠵᠡᠷᠭᠡ ᠶ᠋ᠢ ᠮᠣᠯᠴᠣᠭᠯᠠᠨ ᠵᠡᠭᠦᠭᠰᠡᠨ ᠲᠦᠰᠢᠮᠡᠳ ᠰᠥᠭᠥᠳᠦᠨ ᠮᠥᠷᠭᠥᠪᠡ᠃
ᠰᠢᠷᠠ ᠣᠷᠳᠣᠨ ᠤ᠋ ᠶᠡᠬᠡ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠮᠥᠷᠭᠥᠨ ᠰᠥᠭᠥᠳᠴᠦ ᠪᠠᠢᠭᠠ ᠸᠠᠩ᠂ ᠬᠦᠩ᠂ ᠬᠠᠮᠪᠤ᠂ ᠴᠣᠷᠵᠢ ᠶᠠᠩᠪᠠᠲᠠᠨ ᠯᠠᠮᠠ ᠨᠠᠷ ᠤ᠋ᠨ ᠳᠤᠮᠳᠠ ᠤᠲᠤᠭᠠ ᠵᠢᠩᠰᠡ᠂ ᠡᠷᠢᠭᠡ ᠹᠦᠰᠠ ᠦᠭᠡᠢ * ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠤᠰᠤᠳ ᠠ᠋ᠴᠠ ᠬᠣᠶᠠᠷ ᠬᠢᠲᠠᠳ᠂ ᠯᠤᠳᠤᠢ ᠪᠠᠶᠠᠨ ᠡᠨᠡ ᠭᠤᠷᠪᠠ ᠡᠳᠡᠭᠡᠣ᠌ᠠ ᠦᠵᠡᠭᠳᠡᠵᠦ ᠪᠠᠢᠪᠠ᠃
ᠲᠡᠷᠡ ᠬᠣᠶᠠᠷ ᠬᠢᠲᠠᠳ ᠪᠣᠯ ᠮᠥᠩᠭᠥ ᠬᠦᠦᠯᠡᠳᠡᠭ᠂ ᠮᠥᠨ ᠪᠣᠭᠳᠠ ᠶ᠋ᠢᠨ ᠰᠠᠩ ᠳ᠋ᠤ᠌ ᠡᠯᠳᠡᠪ ᠬᠡᠷᠡᠭᠰᠡᠯ ᠨᠡᠢᠯᠡᠭᠦᠯᠳᠡᠭ ᠬᠦᠷᠢᠶᠡᠨ ᠦ᠌ ᠬᠣᠶᠠᠷ ᠲᠣᠮᠣ ᠫᠦᠰᠡ ᠶ᠋ᠢᠨ ᠳ᠋ᠠᠩᠵᠢᠶᠠᠳᠠ ᠠᠵᠢ᠃ ᠯᠣᠲᠤᠢ ᠪᠠᠶᠠᠨ ᠪᠣᠯ ᠠᠰᠢᠭ ᠵᠠᠪᠰᠢᠶᠠᠨ ᠢ᠋ ᠪᠣᠳᠣᠵᠤ ᠣᠯᠬᠤ ᠳ᠋ᠠᠭᠠᠨ ᠶᠡᠬᠡ ᠴᠢᠳᠠᠮᠠᠭᠠᠢ ᠬᠥᠮᠦᠨ ᠲᠤᠯᠠ᠂ ᠪᠣᠭᠳᠠ ᠳ᠋ᠤ᠌ ᠶᠢᠰᠦᠨ ᠴᠠᠭᠠᠨ ᠤ᠋ ᠪᠡᠯᠡᠭ ᠡᠷᠭᠦᠬᠦ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠴᠠᠭᠠᠨ ᠲᠡᠮᠡᠭᠡ ᠶ᠋ᠢ ᠰᠠᠢᠨ ᠨᠣᠶᠠᠨ ᠬᠠᠨ ᠰᠤᠷᠬᠠᠯᠠᠠ ᠡᠷᠢᠵᠦ ᠪᠠᠢᠭᠠ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠᠳ᠂ ᠠᠢᠮᠠᠭ ᠲᠤ᠌ ᠲᠡᠷᠢᠭᠦᠨ ᠵᠡᠷᠭᠡ ᠲᠣᠮᠣ ᠴᠠᠭᠠᠨ ᠠᠲᠠᠨ ᠲᠡᠮᠡᠭᠡᠨ ᠳ᠋ᠦ᠍ ᠮᠥᠩᠭᠥᠨ ᠪᠤᠢᠯᠠ ᠵᠡᠭᠦᠵᠦ ᠶᠠᠭᠠᠷᠠᠨ ᠡᠷᠭᠦᠭᠰᠡᠨ ᠳ᠋ᠦ᠍᠂ ᠬᠠᠨ ᠪᠠᠶᠠᠷᠯᠠᠵᠤ᠂ ᠯᠤᠳᠤᠢ ᠪᠠᠶᠠᠨ ᠤ᠋ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠴᠢᠷ ᠬᠦᠴᠦᠨ ᠵᠢᠳᠬᠦᠭᠰᠡᠨ ᠢ᠋ ᠰᠠᠢᠰᠢᠶᠠᠨ᠂ ᠠᠢᠮᠠᠭ ᠣᠯᠠᠨ ᠤ᠋ ᠡᠮᠦᠨᠡ ᠡᠴᠡ ᠶᠣᠰᠣᠯᠠᠬᠤ ᠪᠠᠷᠠᠭᠠᠯᠠᠬᠤ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃
ᠪᠣᠭᠳᠠ ᠶ᠋ᠢ᠂ ᠭᠠᠳᠠᠨᠠ ᠠ᠋ᠴᠠ ᠰᠢᠷᠠ ᠲᠣᠷᠭᠠ ᠪᠠᠷ ᠪᠦᠷᠢᠭᠰᠡᠨ᠂ ᠭᠤᠴᠢᠨ ᠬᠠᠨᠠ ᠲᠠᠢ ᠲᠥᠷᠥ ᠶ᠋ᠢᠨ ᠳᠠᠯᠠᠢ ᠰᠢᠷᠠ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠳ᠋ᠤᠨᠢ ᠰᠠᠢᠳ ᠶᠡᠬᠡᠰ ᠦ᠋ᠨ ᠬᠠᠮᠲᠤ ᠰᠥᠭᠥᠳᠦᠨ ᠮᠥᠷᠭᠥᠬᠦ ᠵᠠᠭᠤᠷᠠ᠂ ᠯᠣᠳᠣᠢ ᠪᠠᠶᠠᠨ ᠠᠶᠠ ᠤᠷᠢᠳᠤ ᠶ᠋ᠢᠨ ᠰᠠᠢᠨ ᠪᠤᠶᠠᠨ ᠤ᠋ ᠬᠦᠴᠦ ᠪᠡᠷ ᠥᠨᠥᠳᠥᠷ ᠪᠣᠭᠳᠠ ᠭᠡᠭᠡᠬᠡᠨ ᠦ᠌ ᠳᠦᠷᠢ ᠶ᠋ᠢ ᠦᠵᠡᠪᠡ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠨ ᠮᠥᠷᠭᠥᠪᠡ᠃
ᠲᠡᠭᠡᠵᠦ ᠪᠠᠢᠲᠠᠯᠠ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠢᠪᠽᠥ᠋ᠨᠳᠠᠮᠪᠠ ᠬᠤᠲᠤᠭᠲᠤ ᠶ᠋ᠢ ᠵᠠᠯᠠᠬᠤ ᠰᠠᠢᠨ ᠴᠠᠭ ᠢ᠋ ᠬᠦᠷᠢᠶᠡᠨ ᠦ᠌ ᠨᠡᠷᠡ ᠲᠡᠢ ᠵᠢᠷᠤᠬᠠᠢᠴᠢ ᠨᠠᠷ ᠤ᠋ᠨ ᠰᠣᠩᠭᠣᠨ ᠣᠯᠤᠭᠰᠠᠨ ᠨᠢ ᠶᠠᠭ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠳᠡᠨ᠂ ᠦᠬᠡᠷ ᠫᠤᠤ ᠲᠠᠯᠪᠢᠪᠠ᠃
ᠲᠥᠷᠥ ᠶ᠋ᠢᠨ ᠳᠠᠯᠠᠢ ᠰᠢᠷᠠ ᠦᠷᠭᠦᠭᠡᠨ ᠦ᠌ ᠡᠭᠦᠳᠡᠨ ᠦ᠌ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠠᠭᠠᠯᠭᠠᠴᠢ ᠨᠠᠷ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠬᠣᠶᠠᠷ ᠬᠢᠲᠠᠳ ᠳ᠋ᠠᠩᠵᠠᠶᠠᠲᠠ ᠯᠣᠳᠣᠢ ᠭᠤᠷᠪᠠ ᠶ᠋ᠢ ᠣᠷᠣᠭᠤᠯᠪᠠ᠃ ᠬᠥᠳᠡᠭᠡ ᠶ᠋ᠢᠨ ᠲᠡᠷᠡ ᠪᠠᠶᠠᠨ᠂ ᠥᠨᠥᠬᠢ ᠬᠣᠶᠠᠷ ᠬᠢᠲᠠᠳ ᠤ᠋ᠨ ᠬᠠᠮᠲᠤ ᠪᠠᠷ ᠳᠣᠲᠣᠭᠰᠢ ᠣᠷᠣᠭᠠᠳ᠂ ᠬᠠᠭᠠᠯᠭᠠᠴᠢ ᠶ᠋ᠢᠨ ᠵᠢᠭᠠᠭᠰᠠᠨ ᠭᠠᠵᠠᠷ ᠵᠣᠭᠰᠣᠵᠤ᠂ ᠳᠠᠯᠠᠢ ᠰᠢᠷᠠ ᠦᠷᠭᠦᠭᠡᠨ ᠦ᠌ ᠳᠣᠲᠣᠷᠠᠬᠢ ᠮᠠᠰᠢ ᠭᠣᠶᠣᠮᠰᠣᠭ ᠪᠠᠢᠳᠠᠯ ᠢ᠋ ᠶᠡᠬᠡᠯᠡ ᠭᠠᠢᠬᠠᠪᠠ᠃
ᠬᠠᠭᠠᠳ ᠨᠣᠶᠠᠳ᠂ ᠶᠡᠬᠡ ᠯᠠᠮᠠ ᠨᠠᠷ᠂ ᠬᠤᠲᠤᠭᠲᠤ ᠴᠠᠭᠠᠨ ᠳ᠋ᠠᠷᠠ ᠬᠣᠶᠠᠷ ᠤ᠋ᠨ ᠰᠠᠭᠤᠳᠠᠯ ᠵᠠᠰᠠᠭᠰᠠᠨ᠂ ᠭᠠᠢᠬᠠᠮᠰᠢᠭᠲᠤ ᠰᠠᠢᠬᠠᠨ ᠢ᠋ᠶ᠋ᠠᠷ ᠮᠣᠩᠭᠣᠯ ᠤᠷᠠᠴᠤᠳ ᠤ᠋ᠨ ᠰᠡᠢᠯᠦᠭᠰᠡᠨ ᠮᠣᠳᠣᠨ ᠰᠠᠨᠳᠢ ᠶ᠋ᠢᠨ ᠬᠣᠶᠠᠷ ᠡᠲᠡᠭᠡᠳ ᠵᠢᠭᠰᠠᠵᠤ᠂ ᠶᠣᠰᠣᠯᠠᠯ ᠢ᠋ ᠤᠳᠤᠷᠢᠳᠬᠤ ᠳᠣᠨᠢᠷ ᠯᠠᠮᠠ ᠶ᠋ᠢᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠶᠣᠰᠣᠯᠠᠯ ᠢ᠋ ᠵᠢᠭᠠᠨ ᠳᠠᠭᠤᠳᠠᠮᠠᠭᠴᠠ᠂ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠬᠠᠭᠠᠳ ᠤ᠋ᠨ ᠡᠷᠲᠡᠨ ᠦ᠌ ᠶᠣᠰᠣᠯᠠᠯ ᠢ᠋ ᠳᠠᠭᠠᠵᠤ ᠰᠥᠭᠥᠳᠦᠨ ᠮᠥᠷᠭᠥᠭᠡᠳ᠂ ᠰᠠᠢᠨ ᠨᠣᠶᠠᠨ ᠬᠠᠨ ᠨᠠᠮᠨᠠᠨᠰᠦ᠋ᠷᠦᠩ᠂ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠲᠤ᠌ ᠡᠷᠲᠡᠨ ᠦ᠌ ᠵᠠᠩᠰᠢᠯ ᠢ᠋ᠶ᠋ᠠᠷ ᠳᠡᠪᠰᠢᠭᠦᠯᠬᠦ ᠶ᠋ᠢᠨ ᠢᠷᠦᠭᠡᠯ ᠢ᠋ ᠭᠢᠩᠰᠢᠨ ᠤᠩᠰᠢᠭᠰᠠᠨ ᠨᠢ᠄
《ᠤᠸᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ!
《ᠮᠣᠩᠭᠣᠯ ᠤ᠋ᠨ ᠬᠠᠨ ᠸᠠᠩ᠂ ᠪᠡᠢᠯᠡ ᠪᠠᠢᠰᠠ᠂ ᠬᠦᠩ ᠵᠠᠰᠠᠭ᠂ ᠬᠠᠮᠪᠤ
《ᠴᠣᠷᠵᠢ᠂ ᠬᠤᠲᠤᠭᠲᠤ ᠬᠤᠪᠢᠯᠭᠠᠨ ᠯᠠᠮᠠ ᠨᠠᠷ ᠠ᠋ᠴᠠ ᠳᠠᠷᠠᠭᠠᠯᠠᠨ ᠠᠷᠠᠳ ᠲᠤ᠌
《ᠬᠦᠷᠲᠡᠯᠡ ᠰᠢᠷᠠ ᠬᠠᠷᠠ ᠣᠯᠠᠨ ᠨᠡᠢᠲᠡ ᠪᠡᠷ ᠭᠤᠷᠪᠠᠨ᠂
《ᠡᠭᠦᠳᠡᠨ ᠦ᠌ ᠴᠢᠩ ᠪᠢᠰᠢᠷᠡᠯ ᠢ᠋ᠶ᠋ᠡᠷ ᠬᠢᠴᠢᠶᠡᠩᠭᠦᠢᠯᠡᠨ ᠮᠥᠷᠭᠥᠵᠦ ᠥᠴᠢᠨ᠂
《ᠠᠢᠯᠠᠳᠬᠠᠬᠤ ᠠᠨᠤ ᠪᠢᠳᠡᠨ ᠦ᠌ ᠣᠯᠠᠨ ᠮᠣᠩᠭᠣᠯ ᠱᠠᠪᠢ ᠪᠣᠭᠣᠯᠴᠤᠳ᠂
《ᠴᠥᠮ ᠡᠷᠲᠡᠨ ᠦ᠌ ᠢᠷᠦᠭᠡᠯ ᠪᠠᠷᠢᠯᠳᠤᠯᠭᠠ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠷ ᠡᠳᠦᠭᠡ
《ᠴᠠᠭ ᠤ᠋ᠨ ᠪᠡᠷᠬᠡ ᠳ᠋ᠦ᠍
《ᠲᠡᠩᠴᠡᠯ ᠦᠭᠡᠢ ᠭᠠᠢᠬᠠᠮᠰᠢᠭᠲᠤ᠂
《ᠸᠴᠢᠷ ᠳ᠋ᠠᠷᠠ᠂ ᠪᠣᠭᠳᠠ ᠪᠠᠭᠰᠢ ᠯᠠᠮᠠ ᠬᠢᠭᠡᠳ
《ᠡᠬᠡ ᠳᠠᠭᠢᠨᠢ ᠶᠤᠭᠠᠨ ᠣᠢᠷᠠ ᠳᠠᠭᠠᠯᠳᠤᠨ ᠲᠥᠷᠥᠵᠦ᠂ ᠵᠦᠢᠯ
《ᠵᠦᠢᠯ ᠦ᠋ᠨ ᠵᠢᠯᠣᠭᠣᠳᠤᠨ ᠰᠤᠷᠭᠠᠬᠤ ᠰᠣᠶᠣᠯ ᠢ᠋ ᠬᠦᠯᠢᠶᠡᠨ ᠬᠦᠷᠲᠡᠵᠦ᠂
《ᠰᠦᠰᠦᠭᠯᠡᠨ ᠰᠢᠲᠦᠭᠰᠡᠭᠡᠷ᠂ ᠬᠠᠷᠰᠢ
《ᠳᠠᠢᠰᠤᠨ ᠤ᠋ ᠡᠲᠡᠭᠡᠳ ᠡᠴᠡ ᠠᠩᠭᠢᠵᠢᠷᠠᠭᠰᠠᠨ ᠡᠭᠦᠨ ᠳ᠋ᠦ᠍᠂ ᠪᠦᠭᠦᠳᠡᠭᠡᠷ ᠲᠡᠰᠬᠡᠯ ᠦᠭᠡᠢ
《ᠪᠠᠶᠠᠷᠯᠠᠨ᠂ ᠨᠢᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠥᠪᠯᠡᠭᠡᠳ᠂ ᠥᠯᠵᠡᠢ ᠤᠴᠠᠷᠠᠯ
《ᠪᠦᠷᠢᠳᠦᠭᠰᠡᠨ ᠡᠨᠡᠬᠦ ᠰᠠᠢᠨ ᠡᠳᠦᠷ ᠢ᠋ ᠰᠣᠩᠭᠣᠨ
《ᠲᠣᠬᠢᠶᠠᠯᠳᠤᠭᠤᠯᠵᠤ᠂ ᠮᠠᠨ ᠤ᠋ ᠮᠣᠩᠭᠣᠯ
《ᠤᠯᠤᠰ ᠤ᠋ᠨ ᠡᠷᠲᠡᠨ ᠦ᠌
《ᠶᠡᠬᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠷᠡ ᠲᠦᠰᠢᠶᠡᠲᠦ ᠬᠠᠨ ᠤ᠋ ᠬᠥᠪᠡᠭᠦᠨ ᠡᠴᠡ
《ᠦᠶᠡ ᠳᠠᠷᠠᠭᠠᠯᠠᠨ ᠰᠢᠨᠵᠢ ᠲᠡᠮᠳᠡᠭ ᠣᠨᠴᠠ ᠲᠣᠳᠣᠷᠬᠠᠢ ᠪᠠᠷ
《ᠬᠤᠪᠢᠯᠵᠤ᠂ ᠭᠤᠷᠪᠠᠨ ᠴᠠᠭ ᠢ᠋ ᠢᠯᠡᠷᠬᠡᠢ ᠪᠡᠷ ᠵᠢᠭᠠᠭᠰᠠᠭᠠᠷ ᠥᠴᠢᠨᠡᠨ
《ᠵᠠᠭᠤᠨ ᠵᠢᠯ ᠳ᠋ᠦ᠍᠂
《ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ
《ᠱᠠᠰᠢᠨ ᠢ᠋ ᠮᠠᠨᠳᠤᠭᠤᠯᠬᠤ᠂ ᠠᠮᠢᠲᠠᠨ ᠢ᠋ ᠵᠢᠷᠭᠠᠭᠤᠯᠤᠭᠴᠢ
《ᠠᠪᠤᠷᠠᠯ ᠢᠲᠡᠭᠡᠯ᠂ ᠬᠠᠮᠤᠭ ᠢ᠋ ᠠᠢᠯᠠᠳᠤᠭᠴᠢ᠂ ᠣᠷᠣᠢ ᠶ᠋ᠢᠨ ᠴᠢᠨᠳᠠᠮᠠᠨᠢ
《ᠡᠷᠳᠡᠨᠢ᠂ ᠠᠷᠭᠠ ᠪᠢᠯᠢᠭ ᠢ᠋ ᠬᠣᠣᠰᠯᠠᠨ ᠲᠠᠭᠠᠯᠠᠵᠤ ᠵᠣᠬᠢᠶᠠᠭᠰᠠᠨ᠂
《ᠸᠴᠢᠷ ᠳᠠᠷᠠ ᠭᠡᠲᠦᠯᠭᠡᠭᠴᠢ ᠪᠣᠭᠳᠠ ᠭᠡᠭᠡᠬᠡᠨ (ᠭᠡᠭᠡᠨ)ᠲᠠᠨᠠ᠂
《ᠮᠣᠩᠭᠣᠯ ᠤᠯᠤᠰ ᠤ᠋ᠨ
《ᠡᠵᠡᠨ᠂ ᠱᠠᠰᠢᠨ ᠲᠥᠷᠥ ᠶ᠋ᠢ ᠬᠣᠣᠰᠯᠠᠨ ᠪᠠᠷᠢᠭᠴᠢ᠂
《ᠨᠠᠷᠠᠨ ᠭᠡᠷᠡᠯᠲᠦ᠂ ᠲᠦᠮᠡᠨ ᠨᠠᠰᠤᠲᠤ ᠪᠣᠭᠳᠠ ᠬᠠᠭᠠᠨ ᠳ᠋ᠤ᠌
《ᠡᠷᠭᠦᠮᠵᠢᠯᠡᠨ᠂ ᠪᠠᠰᠠ᠂
《ᠡᠷᠳᠡᠨᠢ ᠰᠡᠴᠡᠨ᠂ ᠱᠠᠰᠢᠨ ᠢ᠋ ᠥᠷᠨᠢᠭᠦᠯᠦᠭᠴᠢ᠂ ᠴᠢᠩ ᠦᠨᠡᠨ
《ᠰᠦᠰᠦᠭᠲᠦ ᠲᠤᠰ ᠠᠴᠢᠯᠠᠯᠲᠤ᠂ ᠲᠤᠩᠭᠠᠯᠠᠭ ᠴᠢᠨᠳᠠᠮᠠᠨᠢ᠂ ᠳᠠᠯᠠᠢ
《ᠳᠠᠢᠴᠢᠨ ᠢᠯᠠᠭᠤᠭᠰᠠᠨ ᠳᠠᠭᠢᠨᠢ ᠡᠷᠬᠡ ᠴᠠᠭᠠᠨ ᠳ᠋ᠠᠷᠠ ᠨᠣᠶᠠᠨ᠂
《ᠠᠢᠯᠠᠳᠬᠠᠯ ᠡᠨᠡᠷᠢᠯ ᠦ᠋ᠨ ᠡᠵᠡᠨ ᠭᠤᠷᠪᠠᠨ ᠣᠷᠣᠨ ᠤ᠋ ᠳᠠᠭᠢᠨᠢᠰ ᠤ᠋ᠨ
《ᠡᠷᠬᠢᠮ ᠲᠠᠨ ᠢ᠋
《ᠤᠯᠤᠰ ᠤ᠋ᠨ ᠡᠬᠡ ᠳᠠᠭᠢᠨᠢ ᠳ᠋ᠤ᠌ ᠡᠷᠭᠦᠮᠵᠢᠯᠡᠵᠦ᠂ ᠥᠪᠡᠷ ᠥᠪᠡᠷ ᠦ᠋ᠨ᠂
《ᠡᠷᠳᠡᠨᠢ ᠶ᠋ᠢᠨ ᠰᠠᠭᠤᠷᠢᠨ ᠳ᠋ᠤ᠌ ᠵᠠᠯᠠᠭᠠᠳ᠂ ᠥᠯᠵᠡᠢᠲᠦ ᠰᠤᠷᠤᠭ ᠤ᠋ᠨ
《ᠲᠡᠮᠳᠡᠭᠲᠦ ᠬᠠᠰ ᠡᠷᠳᠡᠨᠢ ᠶ᠋ᠢᠨ ᠲᠠᠮᠠᠭᠠ ᠪᠠ ᠪᠠᠰᠠ ᠪᠤᠰᠤ
《ᠡᠷᠳᠡᠨᠢᠰ ᠢ᠋ᠶ᠋ᠡᠷ ᠪᠢᠴᠢᠭᠰᠡᠨ ᠡᠷᠭᠦᠮᠵᠢᠯᠡᠯ ᠦ᠋ᠳ ᠰᠡᠯᠲᠡ ᠶ᠋ᠢ ᠣᠷᠣᠢ ᠶ᠋ᠢᠨ
《ᠳᠡᠭᠡᠷᠡ ᠡᠷᠭᠦᠵᠦ᠂
《ᠠᠯᠲᠠᠨ ᠮᠣᠳᠣᠷ ᠤ᠋ᠳ ᠲᠤ᠌ ᠶᠣᠰᠣᠯᠠᠨ ᠳᠡᠪᠰᠢᠭᠦᠯᠵᠦ ᠮᠥᠷᠭᠥᠭᠡᠳ᠂
《ᠬᠢᠴᠢᠶᠡᠩᠭᠦᠢᠯᠡᠨ ᠬᠤᠲᠤᠭ ᠭᠤᠶᠤᠬᠤ ᠠᠨᠤ》 ᠭᠡᠵᠦ ᠢᠷᠦᠭᠡᠯ ᠢ᠋ ᠤᠩᠰᠢᠬᠤ ᠦᠶᠡᠰ᠂ ᠯᠣᠳᠣᠢ ᠪᠠᠶᠠᠨ᠂ ᠣᠯᠠᠨ ᠨᠣᠶᠠᠳ᠂ ᠠᠯᠲᠠᠨ ᠮᠠᠩᠨᠤᠭ ᠬᠤᠪᠴᠠᠰᠤ ᠲᠠᠢ ᠳᠡᠭᠡᠳᠦ ᠯᠠᠮᠠ ᠨᠠᠷ ᠤ᠋ᠨ ᠶᠡᠬᠡᠷᠬᠡᠭ ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠶ᠋ᠢ ᠠᠶᠤᠨ ᠡᠮᠢᠶᠡᠨ ᠶᠡᠬᠡᠯᠡ(ᠶᠡᠬᠡ ᠯᠡ) ᠪᠢᠰᠢᠷᠡᠵᠦ ᠬᠠᠷᠠᠬᠤ ᠳ᠋ᠠᠭᠠᠨ᠂ ᠲᠩᠷᠢ ᠢᠵᠠᠭᠤᠷᠲᠤ ᠶᠡᠬᠡᠰ ᠨᠣᠶᠠᠳ ᠬᠠᠭᠠᠳ᠂ ᠳᠡᠭᠡᠳᠦ ᠪᠠᠭᠰᠢ ᠯᠠᠮᠠ ᠨᠠᠷ ᠤ᠋ᠨ ᠳᠡᠷᠭᠡᠳᠡ ᠡᠢᠮᠦ ᠣᠢᠷᠠᠬᠠᠨ ᠪᠠᠷᠠᠭᠠ (ᠪᠠᠷᠠ)ᠪᠣᠯᠵᠤ ᠪᠠᠢᠬᠤ ᠵᠠᠪᠰᠢᠶᠠᠨ ᠡᠳᠦᠷ ᠪᠦᠷᠢ ᠲᠣᠬᠢᠶᠠᠯᠳᠤᠬᠤ ᠬᠡᠷᠡᠭ ᠪᠢᠰᠢ᠃ ᠵᠢᠰᠦ ᠴᠢᠷᠠᠢ ᠶ᠋ᠢ ᠰᠠᠢᠬᠠᠨ ᠲᠣᠭᠲᠠᠭᠠᠵᠤ ᠠᠪᠤᠶᠠ ᠭᠡᠵᠦ ᠬᠢᠴᠢᠶᠡᠨ ᠠᠵᠢᠭᠯᠠᠵᠤ᠂ ᠤᠷᠢᠳᠤ ᠶ᠋ᠢᠨ ᠶᠠᠮᠠᠷ ᠰᠠᠢᠨ ᠪᠤᠶᠠᠨ ᠤ᠋ ᠬᠦᠴᠦ ᠪᠡᠷ ᠢᠩᠭᠢᠵᠦ ᠪᠣᠭᠳᠠ ᠭᠡᠭᠡᠬᠡᠨ (ᠭᠡᠭᠡᠨ) ᠢ᠋ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠷᠠᠬᠤ ᠶᠡᠬᠡ ᠶᠣᠰᠣᠯᠠᠯ ᠢ᠋ ᠦᠵᠡᠬᠦ ᠬᠤᠪᠢ ᠲᠡᠭᠦᠰ ᠪᠣᠯᠪᠠ᠃ ᠡᠢᠮᠦ ᠵᠣᠯ ᠵᠠᠪᠰᠢᠶᠠᠨ ᠡᠭᠡᠯ ᠬᠥᠮᠦᠨ ᠦ᠌ ᠵᠡᠭᠦᠳᠦᠨ ᠳ᠋ᠦ᠍ ᠴᠦ᠍ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠬᠡᠷᠡᠭ ᠭᠡᠵᠦ ᠤᠶᠠᠷᠠᠨ ᠪᠣᠳᠣᠭᠠᠳ᠂ ᠪᠠᠶᠠᠨ ᠯᠣᠳᠣᠢ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠯᠠᠭᠠ ᠬᠠᠪᠰᠤᠷᠤᠨ ᠬᠠᠷᠠᠵᠤ᠂ ᠲᠥᠷᠥ ᠶ᠋ᠢᠨ ᠳᠠᠯᠠᠢ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠭᠣᠯᠣᠮᠲᠠ ᠳ᠋ᠤ᠌ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠲᠥᠭᠥᠷᠢᠭ ᠲᠤᠯᠭᠠᠨ ᠳ᠋ᠤ᠌ ᠭᠠᠯ ᠠᠰᠠᠭᠠᠵᠤ᠂ ᠬᠠᠭᠠᠨ ᠤ᠋ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠵᠠᠰᠠᠯ ᠴᠢᠮᠡᠭ᠂ ᠤᠷᠢᠳᠤ ᠡᠮᠦᠨᠡ ᠦᠵᠡᠭᠳᠡᠭᠡᠳᠦᠢ ᠮᠠᠰᠢ ᠭᠤᠸᠠ ᠰᠠᠢᠬᠠᠨ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ᠂ ᠨᠢᠳᠦᠨ ᠳ᠋ᠡᠭᠡᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠬᠠᠷᠠ ᠰᠢᠯ ᠵᠡᠭᠦᠭᠰᠡᠨ ᠪᠣᠭᠳᠠ ᠶ᠋ᠢᠨ ᠣᠭᠲᠣ ᠦᠯᠦ ᠬᠥᠳᠡᠯᠬᠦ᠂ ᠣᠶᠤᠨ ᠮᠣᠬᠣᠳᠠᠭ ᠤ᠋ᠨ ᠰᠢᠨᠵᠢ ᠪᠦᠷᠢᠨ ᠲᠣᠳᠣᠷᠬᠠᠢ᠂ ᠤᠯᠴᠠᠭᠠᠷ ᠪᠣᠬᠢᠶᠠ ᠴᠢᠷᠠᠢ᠂ ᠬᠢᠮᠳᠠ ᠦᠨᠡ ᠲᠡᠢ᠂ ᠪᠦᠳᠦᠭᠦᠯᠢᠭ ᠬᠢᠴᠡᠲᠡᠢ᠂ ᠪᠠᠷᠢᠮᠠᠯ ᠵᠢᠷᠤᠮᠠᠯ ᠪᠤᠷᠬᠠᠨ ᠤ᠋ ᠡᠪ ᠬᠠᠪᠤ ᠦᠭᠡᠢ ᠨᠢᠭᠤᠷ ᠲᠠᠢ ᠲᠦᠰᠦᠭᠯᠡᠮᠡᠷ ᠨᠢᠭᠤᠷ ᠢ᠋ ᠨᠢ ᠤᠴᠢᠷ ᠦᠭᠡᠢ ᠰᠠᠢᠬᠠᠨ ᠴᠣᠭ ᠵᠢᠪᠬᠤᠯᠠᠩ ᠪᠦᠷᠢᠳᠦᠭᠰᠡᠨ ᠲᠩᠷᠢ ᠶ᠋ᠢᠨ ᠦᠵᠡᠰᠬᠦᠯᠡᠩᠲᠦ ᠨᠢᠭᠤᠷ ᠭᠡᠵᠦ ᠪᠢᠰᠢᠷᠡᠨ ᠤᠶᠠᠷᠠᠵᠤ ᠵᠠᠯᠪᠠᠷᠢᠨ ᠬᠠᠷᠠᠵᠤ᠂ ᠳ᠋ᠦᠰᠢᠳ ᠦ᠋ᠨ ᠣᠷᠣᠨ ᠳ᠋ᠤ᠌* ᠭᠠᠷᠤᠭᠠᠳ ᠪᠠᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠪᠠ᠃
ᠰᠠᠩ ᠤᠳᠤᠯᠭᠠ ᠶ᠋ᠢᠨ ᠤᠲᠤᠭᠠᠨ ᠳ᠋ᠤ᠌᠂ ᠠᠯᠲᠠᠨ ᠪᠣᠳᠣᠭ ᠭᠢᠯᠠᠯᠵᠠᠭᠰᠠᠨ ᠰᠠᠨᠳᠢ(ᠰᠠᠨᠳᠠᠯᠢ) ᠰᠢᠷᠡᠭᠡᠨ ᠳᠡᠭᠡᠷᠡ ᠬᠥᠷᠥᠭ ᠪᠤᠷᠬᠠᠨ ᠮᠡᠲᠦ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠭᠳᠠ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠢ᠋ ᠤᠶᠠᠷᠠᠨ ᠤᠶᠠᠷᠠᠨ ᠬᠠᠷᠠᠵᠤ᠂ ᠲᠥᠷᠥ ᠶ᠋ᠢᠨ ᠳᠠᠯᠠᠢ ᠶᠡᠬᠡ ᠦᠷᠭᠦᠭᠡᠨ ᠳ᠋ᠦ᠍ ᠬᠤᠷᠠᠨ ᠴᠢᠭᠤᠯᠤᠭᠰᠠᠨ ᠣᠯᠠᠨ ᠤ᠋ ᠬᠠᠮᠲᠤ ᠪᠠᠷ ᠰᠥᠭᠥᠳᠬᠦ ᠳ᠋ᠦ᠍ᠨᠢ ᠰᠥᠭᠥᠳᠴᠦ᠂ ᠮᠥᠷᠭᠥᠬᠦ ᠳ᠋ᠦ᠍ᠨᠢ ᠮᠥᠷᠭᠥᠵᠦ ᠪᠠᠢᠬᠤ ᠳ᠋ᠠᠭᠠᠨ᠂ ᠲᠡᠷᠡ ᠭᠣᠶᠣ ᠦᠭᠡ ᠲᠡᠢ ᠢᠷᠦᠭᠡᠯ ᠦ᠋ᠨ ᠦᠭᠡ ᠶ᠋ᠢ ᠣᠭᠲᠣ ᠰᠣᠨᠣᠰᠤᠨ ᠠᠩᠬᠠᠷᠬᠤ ᠪᠠᠨ ᠪᠠᠢᠵᠠᠢ᠃
ᠶᠣᠰᠣᠯᠠᠯ ᠢ᠋ ᠤᠳᠤᠷᠢᠳᠤᠭᠴᠢ ᠳᠣᠨᠢᠷ ᠯᠠᠮᠠ᠂ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠳᠠᠭᠤᠳᠠᠨ ᠥᠭᠦᠯᠡᠷᠦᠨ᠂
— ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ᠂ ᠱᠠᠰᠢᠨ ᠢ᠋ ᠮᠠᠨᠳᠤᠭᠤᠯᠬᠤ᠂ ᠠᠮᠢᠲᠠᠨ ᠢ᠋ ᠵᠢᠷᠭᠠᠭᠤᠯᠤᠭᠴᠢ ᠠᠪᠤᠷᠠᠯ ᠢᠲᠡᠭᠡᠯ᠂ ᠬᠠᠮᠤᠭ ᠢ᠋ ᠠᠢᠯᠠᠳᠤᠭᠴᠢ ᠣᠷᠣᠢ ᠶ᠋ᠢᠨ ᠴᠢᠨᠳᠠᠮᠠᠨᠢ(ᠴᠢᠨᠳᠠᠮᠤᠨᠢ )ᠡᠷᠳᠡᠨᠢ᠂ ᠠᠷᠭᠠ ᠪᠢᠯᠢᠭ ᠢ᠋ ᠬᠣᠣᠰᠯᠠᠨ ᠲᠠᠭᠠᠯᠠᠵᠤ ᠵᠣᠬᠢᠶᠠᠭᠰᠠᠨ ᠸᠴᠢᠷ ᠳᠠᠷᠠ᠂ ᠱᠠᠰᠢᠨ ᠲᠥᠷᠥ ᠶ᠋ᠢ ᠬᠣᠣᠰᠯᠠᠨ ᠪᠠᠷᠢᠭᠴᠢ᠂ ᠨᠠᠷᠠᠨ ᠭᠡᠷᠡᠯᠲᠦ ᠲᠦᠮᠡᠨ ᠨᠠᠰᠤᠲᠤ ᠪᠣᠭᠳᠠ ᠬᠠᠭᠠᠨ ᠤ᠋ ᠥᠷᠥᠰᠢᠶᠡᠯᠲᠦ ᠵᠠᠷᠯᠢᠭ ᠢ᠋ ᠰᠥᠭᠥᠳᠦᠨ ᠰᠣᠨᠣᠰᠤᠭᠲᠤᠨ! ᠭᠡᠬᠦ ᠳ᠋ᠦ᠍ ᠳᠡ ᠯᠠᠮᠠ ᠴᠠᠷᠠᠨᠴᠢᠮᠡᠳ᠂ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠰᠥᠭᠥᠳᠦᠨ ᠬᠦᠯᠢᠶᠡᠨ ᠠᠪᠴᠤ᠂ ᠠᠳᠢᠰ ᠠᠪᠤᠭᠠᠳ᠂ ᠲᠥᠷᠥ ᠶ᠋ᠢᠨ ᠣᠯᠠᠨ ᠰᠠᠢᠳ ᠢ᠋ ᠲᠣᠬᠣᠭᠠᠨ ᠲᠠᠯᠪᠢᠵᠤ᠂ ᠨᠣᠶᠠᠳ ᠲᠦᠰᠢᠮᠡᠳ ᠲᠦ᠍ ᠬᠡᠰᠢᠭ ᠬᠦᠷᠲᠡᠭᠡᠭᠰᠡᠨ ᠰᠢᠨᠡ ᠬᠠᠭᠠᠨ ᠤ᠋ ᠠᠩᠬᠠᠳᠤᠭᠠᠷ ᠵᠠᠷᠯᠢᠭ ᠢ᠋ ᠤᠩᠰᠢᠭᠰᠠᠨ ᠤ᠋ ᠳᠣᠲᠣᠷᠠ᠂ ᠪᠣᠭᠳᠠ ᠶ᠋ᠢ ᠬᠠᠭᠠᠨ ᠰᠢᠷᠡᠭᠡᠨᠡ ᠡᠷᠭᠦᠮᠵᠢᠯᠡᠬᠦ ᠲᠡᠷᠡ ᠶᠣᠰᠣᠯᠠᠯ ᠳ᠋ᠤ᠌ ᠲᠥᠷᠥ ᠶ᠋ᠢᠨ ᠦᠷᠭᠦᠭᠡᠨᠡ ᠪᠤᠰᠤᠳ ᠤ᠋ᠨ ᠬᠠᠮᠲᠤ ᠪᠠᠢᠭᠰᠠᠨ ᠪᠥᠭᠡᠳ ᠬᠤᠲᠤᠭᠲᠤ ᠶ᠋ᠢᠨ ᠰᠠᠩ ᠳ᠋ᠤ᠌ ᠬᠦᠰᠡᠬᠦ ᠵᠦᠢᠯ ᠢ᠋ ᠨᠡᠢᠯᠡᠭᠦᠯᠵᠦ ᠳᠣᠲᠣᠨᠣ ᠪᠣᠯᠤᠭᠰᠠᠨ᠂ ᠮᠥᠩᠭᠥ ᠬᠦᠦᠯᠡᠬᠦ ᠬᠢᠲᠠᠳ ᠫᠦᠰᠡ ᠶ᠋ᠢᠨ ᠨᠡᠷᠡᠲᠦ ᠳ᠋ᠠᠩᠵᠢᠶᠠᠳᠠ᠂ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠯᠡᠭᠦᠯᠵᠦ ᠴᠢᠳᠠᠭᠰᠠᠨ ᠪᠤᠶᠠᠨᠲᠤ ᠬᠡᠰᠢᠭᠲᠦ ᠬᠣᠶᠠᠷ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠲᠠᠪᠤᠳᠤᠭᠠᠷ ᠵᠡᠷᠭᠡ ᠶ᠋ᠢᠨ ᠲᠦᠰᠢᠮᠡᠯ ᠦ᠋ᠨ ᠵᠢᠩᠰᠡ᠂ ᠬᠥᠬᠡ ᠤᠲᠤᠭᠠ ᠪᠠᠷ ᠱᠠᠩᠨᠠᠨ ᠬᠥᠬᠢᠭᠦᠯᠦᠭᠰᠡᠨ ᠢ᠋ ᠮᠥᠨ ᠤᠩᠰᠢᠨ ᠰᠣᠨᠣᠰᠬᠠᠵᠠᠢ᠃
ᠮᠥᠨᠬᠦ ᠲᠠᠪᠤᠳᠤᠭᠠᠷ ᠵᠡᠷᠭᠡ ᠶ᠋ᠢᠨ ᠵᠢᠩᠰᠡ᠂ ᠬᠥᠬᠡ ᠤᠲᠤᠭᠠ ᠪᠠᠷ ᠱᠠᠩᠨᠠᠭᠤᠯᠤᠭᠴᠢᠳ ᠤ᠋ᠨ ᠳᠤᠮᠳᠠ ᠨᠡᠷᠡ ᠪᠡᠨ ᠭᠠᠷᠤᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠯᠣᠳᠣᠢ ᠪᠠᠶᠠᠨ ᠤ᠋ ᠨᠢᠭᠤᠷ ᠬᠠᠯᠠᠭᠤᠨ ᠣᠷᠬᠢᠵᠤ᠂ ᠴᠢᠬᠢ ᠱᠤᠤᠬᠢᠨᠠᠨ ᠯᠣᠭ ᠯᠣᠭ ᠯᠤᠭᠰᠢᠪᠠ᠃
ᠣᠯᠠᠨ ᠨᠣᠶᠠᠳ᠂ ᠯᠠᠮᠠ ᠲᠦᠰᠢᠮᠡᠳ ᠢ᠋ ᠱᠠᠩᠨᠠᠨ ᠬᠥᠬᠢᠭᠦᠯᠦᠭᠰᠡᠨ ᠡᠳᠦᠢ ᠲᠡᠳᠦᠢ ᠨᠡᠷᠡ ᠶ᠋ᠢ ᠤᠩᠰᠢᠵᠤ ᠭᠦᠢᠴᠡᠭᠡᠳ᠂ ᠭᠢᠨᠳᠠᠨ ᠳ᠋ᠤ᠌ ᠬᠣᠷᠢᠬᠳᠠᠭᠴᠢᠳ ᠲᠤ᠌ ᠶᠠᠯᠠ ᠶ᠋ᠢ ᠦᠷᠡᠵᠦ ᠬᠡᠯᠲᠦᠷᠢᠭᠦᠯᠬᠦ ᠬᠡᠰᠢᠭ ᠬᠦᠷᠲᠡᠭᠡᠭᠰᠡᠨ ᠢ᠋ ᠤᠩᠰᠢᠭᠰᠠᠨ ᠨᠢ᠂ ᠭᠢᠨᠳᠠᠨᠠ ᠬᠣᠷᠢᠭᠳᠠᠨ ᠪᠠᠢᠭᠠ ᠨᠠᠰᠤ ᠥᠲᠡᠯᠦᠭᠰᠡᠨ ᠶᠠᠯᠠᠲᠠᠨ ᠢ᠋ ᠰᠤᠯᠠᠯᠠᠵᠤ᠂ ᠪᠡᠶᠡ ᠴᠢᠭᠢᠷᠠᠭ᠂ ᠨᠠᠰᠤ ᠵᠠᠯᠠᠭᠤ ᠶ᠋ᠢ ᠨᠢ ᠶᠠᠯᠠ ᠶ᠋ᠢ ᠵᠣᠯᠢᠵᠤ ᠴᠡᠷᠢᠭ ᠪᠣᠯᠭᠠᠲᠤᠭᠠᠢ ᠭᠡᠵᠦ ᠵᠠᠷᠯᠢᠭ ᠢ᠋ ᠤᠩᠰᠢᠨ ᠰᠣᠨᠣᠰᠬᠠᠬᠤ ᠳ᠋ᠤ᠌᠂ ᠲᠥᠷᠥ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠢᠭᠠ ᠰᠢᠳᠠᠷ ᠬᠠᠭᠠᠯᠭᠠᠴᠢᠨ ᠯᠠᠮᠠ ᠨᠠᠷ ᠤ᠋ᠨ ᠭᠠᠷ ᠤ᠋ᠨ ᠳᠣᠣᠷᠠ ᠵᠠᠷᠤᠭᠳᠠᠵᠤ ᠪᠠᠢᠭᠰᠠᠨ ᠬᠥᠩᠭᠡᠨ ᠱᠠᠯᠠᠮᠠᠭᠠᠢ ᠪᠠᠭᠠᠴᠤᠳ ᠪᠠᠨᠳᠢ ᠨᠠᠷ᠂ ᠬᠠᠭᠠᠨ ᠤ᠋ ᠲᠥᠷᠥ ᠶ᠋ᠢᠨ ᠦᠷᠭᠦᠭᠡᠨᠡ ᠴᠣᠬᠣᠮ ᠶᠠᠭᠤ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠰᠢᠷᠠ ᠣᠷᠳᠣᠨ ᠤ᠋ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠴᠤᠭᠯᠠᠭᠰᠠᠨ ᠣᠯᠠᠨ ᠳ᠋ᠤ᠌ ᠨᠡᠪᠲᠡᠷᠡᠭᠦᠯᠦᠨ ᠤᠯᠠᠮᠵᠢᠯᠠᠵᠤ᠂
— ᠣᠳᠣ ᠨᠣᠶᠠᠳ ᠢ᠋ ᠱᠠᠩᠨᠠᠪᠠ᠃ ᠬᠠᠨᠳᠠ ᠴᠢᠨ ᠸᠠᠩ ᠳ᠋ᠤ᠌ ᠬᠠᠭᠠᠨ ᠤ᠋ ᠶᠠᠩᠪᠠ ᠳᠠᠪᠬᠤᠷ ᠹᠦᠩᠯᠦ᠂ ᠳᠡ ᠯᠠᠮᠠ ᠶ᠋ᠢ ᠠᠯᠢᠪᠠ ᠠᠯᠪᠠᠨ ᠭᠤᠪᠴᠢᠭᠤᠷ ᠠ᠋ᠴᠠ ᠡᠭᠦᠷᠢᠳᠡ ᠴᠢᠯᠥᠭᠡᠯᠡᠪᠡ ᠭᠡᠵᠦ ᠨᠢᠭᠡᠨ ᠪᠢᠴᠢᠬᠠᠨ ᠪᠠᠨᠳᠢ ᠣᠯᠠᠨ ᠳ᠋ᠤ᠌ ᠰᠣᠨᠢᠨ ᠢ᠋ ᠬᠡᠯᠡᠵᠦ ᠥᠭᠪᠡ᠃ ᠲᠡᠭᠡᠬᠦ ᠳ᠋ᠦ᠍᠂ ᠬᠥᠳᠡᠭᠡ ᠶ᠋ᠢᠨ ᠨᠢᠭᠡᠨ ᠥᠲᠡᠭᠦᠰ ᠠᠰᠠᠭᠤᠷᠤᠨ᠂
— ᠬᠡᠦᠬᠡ᠂ ᠬᠠᠭᠠᠨ ᠤ᠋ ᠥᠷᠥᠰᠢᠶᠡᠯᠲᠦ ᠵᠠᠷᠯᠢᠭ ᠲᠤ᠌᠂ ᠬᠠᠷᠠᠴᠤ ᠠᠷᠠᠳ᠂ ᠠᠯᠪᠠᠲᠤ ᠬᠠᠮᠵᠢᠯᠭᠠ ᠪᠢᠳᠡᠨ ᠳ᠋ᠦ᠍ ᠴᠣᠬᠣᠮ ᠶᠠᠮᠠᠷ ᠰᠠᠢᠬᠠᠨ ᠬᠡᠰᠢᠭ ᠬᠦᠷᠲᠡᠭᠡᠪᠡ᠃ ᠶᠠᠭᠤᠮᠠ ᠣᠯᠵᠤ ᠰᠣᠨᠣᠰᠪᠠᠤ? ᠠᠯᠪᠠᠨ ᠲᠠᠲᠠᠪᠤᠷᠢ ᠶ᠋ᠢ ᠬᠥᠩᠭᠡᠨ ᠪᠣᠯᠭᠠᠬᠤ ᠲᠤᠬᠠᠢ ᠶᠠᠭᠤᠮᠠ ᠰᠣᠨᠣᠰᠤᠭᠠ ᠦᠭᠡᠢ ᠪᠢᠵᠡ? ᠠᠪᠤᠷᠠᠯ ᠢᠲᠡᠭᠡᠯ᠂ ᠠᠷᠭᠠ ᠪᠢᠯᠢᠭ ᠢ᠋ ᠬᠣᠣᠰᠯᠠᠨ ᠲᠠᠭᠠᠯᠠᠵᠤ ᠵᠣᠬᠢᠶᠠᠭᠰᠠᠨ ᠪᠣᠭᠳᠠ ᠬᠠᠭᠠᠨᠲᠠᠨ᠂ ᠠᠷᠠᠳ ᠠᠯᠪᠠᠲᠤ ᠪᠢᠳᠡᠨ ᠢ᠋ᠶ᠋ᠡᠨ ᠨᠢᠭᠦᠯᠡᠰᠴᠦ᠂ ᠬᠢᠲᠠᠳ ᠤ᠋ᠨ ᠮᠥᠩᠭᠥ ᠬᠦᠦᠯᠡᠭᠴᠢ ᠫᠦᠰᠡᠨ ᠳ᠋ᠦ᠍ ᠨᠣᠶᠠᠳ ᠤ᠋ᠨ ᠥᠷᠢ ᠲᠥᠯᠥᠭᠡᠰᠦ ᠡᠴᠡ ᠴᠢᠯᠥᠭᠡᠯᠡᠭᠰᠡᠨ ᠦᠭᠡᠢ ᠤᠤ ᠬᠦᠦ ᠮᠢᠨᠢ ᠭᠡᠵᠦ ᠠᠰᠠᠭᠤᠪᠠ᠃
— ᠦᠭᠡᠢ᠃ ᠡᠪᠦᠭᠡᠨ ᠭᠤᠸᠠᠢ᠂ ᠲᠡᠢᠮᠦ ᠶᠠᠭᠤᠮᠠ ᠶᠡᠷᠦ ᠰᠣᠨᠣᠰᠤᠭᠰᠠᠨ ᠦᠭᠡᠢ᠂ ᠳᠠᠭᠤᠯᠠᠭᠰᠠᠨ ᠠ᠋ᠴᠠ ᠬᠠᠷᠢᠨ ᠮᠥᠩᠭᠥ ᠬᠦᠦᠯᠡᠬᠦ ᠫᠦᠰᠡ ᠶ᠋ᠢᠨ ᠪᠤᠶᠠᠨᠲᠤ ᠬᠡᠰᠢᠭᠲᠦ ᠭᠡᠳᠡᠭ ᠬᠣᠶᠠᠷ ᠳ᠋ᠠᠩᠵᠢᠶᠠᠳᠠ ᠶ᠋ᠢ᠂ ᠪᠠᠰᠠ ᠯᡁᠠ ᠪᠠᠢᠰᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠨᠢᠭᠡ ᠯᠣᠳᠣᠢ ᠪᠠᠶᠠᠨ ᠭᠡᠳᠡᠭ ᠢ᠋ ᠬᠥᠬᠡ ᠤᠲᠤᠭᠠ᠂ ᠭᠡᠭᠡᠬᠡᠨ ᠪᠣᠯᠣᠷ ᠵᠢᠩᠰᠡ ᠪᠡᠷ ᠱᠠᠩᠨᠠᠵᠤ ᠭᠡᠨᠡ ᠭᠡᠬᠦ ᠳ᠋ᠦ᠍᠂
— ᠲᠡᠷᠡ ᠪᠠᠶᠠᠨ ᠴᠢᠨᠢ᠂ ᠬᠣᠶᠠᠷ ᠳ᠋ᠠᠩᠵᠢᠶᠠᠳᠠ (ᠳᠠᠩᠵᠢᠶᠠᠳᠠ) ᠲᠠᠢᠭᠠᠨ ᠬᠠᠭᠠ ᠪᠠᠭᠤᠭ! ᠭᠡᠵᠦ ᠡᠪᠦᠭᠡᠨ ᠮᠠᠯᠴᠢᠨ ᠨᠤᠯᠮᠤᠵᠠᠢ᠃
ᠠᠯᠲᠠᠨᠬᠤᠶᠠᠭ᠂ ᠲᠡᠷᠡ ᠴᠣᠪᠣᠭᠣ ᠰᠡᠷᠭᠦᠯᠡᠩ ᠵᠢᠭᠠᠬᠠᠨ ᠬᠦᠦ ᠶ᠋ᠢᠨ ᠨᠡᠪᠲᠡᠷᠡᠭᠦᠯᠦᠨ ᠤᠯᠠᠮᠵᠢᠯᠠᠵᠤ ᠪᠠᠢᠭᠠ ᠰᠣᠨᠢᠨ ᠢ᠋ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠴᠤ᠂ ᠲᠡᠷᠡ ᠵᠠᠷᠯᠢᠭ ᠲᠤ᠌ ᠠᠯᠪᠠᠲᠤ ᠠᠷᠠᠳ ᠪᠢᠳᠡᠨ ᠦ᠌ ᠲᠤᠬᠠᠢ ᠪᠠᠰᠠ ᠶᠠᠭᠤ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠪᠠᠯ᠂
— ᠶᠠᠯᠠᠲᠠᠨ ᠤ᠋ ᠶᠠᠯᠠ ᠶ᠋ᠢ ᠵᠣᠯᠢᠵᠤ ᠴᠡᠷᠢᠭ ᠪᠣᠯᠭᠠᠬᠤ ᠶᠤᠮ ᠭᠡᠨᠡ ᠭᠡᠬᠦ ᠳ᠋ᠦ᠍ᠨᠢ ᠠᠯᠲᠠᠨᠬᠤᠶᠠᠭ᠂ ᠰᠠᠢ᠍ᠢ(ᠰᠠᠶᠢ) ᠶ᠋ᠢᠨ ᠡᠪᠦᠭᠡᠨ ᠲᠡᠰᠢ ᠬᠠᠨᠳᠤᠵᠤ
— ᠠᠢ ᠴᠠᠪᠠᠰᠤ ᠳᠠ᠂ ᠠᠷᠠᠳ ᠠᠮᠢᠲᠠᠨ ᠳ᠋ᠤ᠌ ᠬᠦᠷᠲᠡᠭᠡᠭᠰᠡᠨ ᠬᠠᠭᠠᠨ ᠤ᠋ ᠬᠡᠰᠢᠭ ᠨᠢ ᠡᠨᠡ ᠪᠣᠯᠵᠤ ᠳᠠ ᠡᠪᠦᠭᠡᠨ ᠭᠤᠸᠠᠢ ᠮᠢᠨᠢ! ᠪᠢᠳᠡ ᠬᠥᠮᠦᠨ ᠦ᠌ ᠭᠠᠵᠠᠷ ᠪᠤᠰᠤᠳ ᠤ᠋ᠨ ᠬᠤᠰᠢᠭᠤᠨ ᠠ᠋ᠴᠠ ᠭᠡᠷ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ᠂ ᠤᠯᠤᠰ ᠲᠥᠷᠥ ᠳ᠋ᠡᠭᠡᠨ ᠬᠦᠷᠴᠦ ᠢᠷᠡᠭᠡᠳ᠂ ᠠᠷᠠᠳ ᠣᠯᠠᠨ ᠳ᠋ᠤ᠌ ᠠᠵᠤ ᠲᠥᠷᠥᠬᠦ ᠳ᠋ᠦ᠍ᠨᠢ ᠬᠥᠩᠭᠡᠨ ᠳᠥᠭᠥᠮ ᠪᠣᠯᠭᠠᠬᠤ ᠵᠠᠷᠯᠢᠭ ᠣᠯᠵᠤ ᠰᠣᠨᠣᠰᠤᠨᠠ ᠭᠡᠵᠦ ᠵᠢᠳᠬᠦᠭᠰᠡᠨ ᠮᠠᠨᠢ ᠲᠠᠯᠠᠭᠠᠷ ᠪᠣᠯᠵᠠᠢ᠃ ᠣᠳᠣ ᠡᠨᠡ ᠣᠯᠠᠨ ᠱᠠᠩᠨᠠᠭᠤᠯᠤᠭᠰᠠᠨ ᠨᠣᠶᠠᠳ ᠲᠦᠰᠢᠮᠡᠯ ᠪᠦᠭᠦᠳᠡ᠂ ᠰᠢᠨᠡ ᠤᠲᠤᠭᠠ ᠵᠢᠩᠰᠡ ᠪᠡᠨ ᠮᠢᠯᠢᠶᠠᠵᠤ᠂ ᠬᠢᠲᠤᠭᠠ ᠲᠠᠯᠪᠢᠯ ᠦᠭᠡᠢ ᠮᠢᠬᠠ ᠢᠳᠡᠵᠦ᠂ ᠬᠤᠨᠳᠠᠭᠠ ᠲᠠᠯᠪᠢᠯ ᠦᠭᠡᠢ ᠠᠷᠢᠬᠢ ᠤᠤᠭᠤᠵᠤ ᠨᠠᠷᠭᠢᠬᠤ ᠶᠤᠮ ᠪᠢᠵᠡ ᠳᠡ᠃ ᠡᠨᠡ ᠣᠯᠠᠨ ᠨᠣᠶᠠᠳ ᠲᠤ᠌ ᠳᠠᠪᠬᠤᠷ ᠹᠦᠩᠯᠦ ᠱᠠᠩᠨᠠᠭᠰᠠᠨ ᠨᠢ ᠶᠠᠮᠠᠷ᠂ ᠳᠡᠭᠡᠷᠡ ᠥᠨᠳᠥᠷ ᠬᠥᠬᠡ ᠲᠩᠷᠢ ᠡᠴᠡ ᠪᠠᠭᠤᠵᠤ᠂ ᠲᠡᠭᠨᠡᠭᠦᠯ ᠳᠡᠭᠡᠷᠡ ᠲᠣᠭᠲᠠᠬᠤ ᠡᠷᠭᠢ ᠡᠴᠡ ᠨᠤᠷᠠᠵᠤ ᠴᠡᠴᠡᠭ ᠡᠴᠡ ᠳᠡᠯᠪᠡᠷᠡᠬᠦ ᠶᠦᠮ ᠪᠢᠰᠢ᠂ ᠥᠨᠥᠬᠢ ᠯᠡ ᠵᠣᠪᠠᠯᠠᠩᠲᠤ ᠪᠢᠳᠡᠨ ᠡᠴᠡ ᠭᠤᠪᠴᠢᠬᠤ ᠶᠤᠮ ᠪᠠᠢᠯ ᠦᠭᠡᠢ ᠳᠡ᠃ ᠡᠨᠡ ᠭᠣᠣᠯ ᠤ᠋ᠨ ᠠᠷᠢᠬᠢᠴᠢ ᠬᠥᠬᠡ ᠲᠠᠩᠭᠤᠳ ᠪᠢᠳᠡᠨ ᠳ᠋ᠡᠭᠡᠨ ᠡᠢᠮᠦ ᠬᠡᠰᠢᠭ ᠬᠦᠷᠲᠡᠭᠡᠳᠡᠭ ᠪᠠᠢᠵᠠᠢ ᠭᠡᠵᠦ ᠭᠠᠰᠠᠯᠠᠪᠠ᠃
— — — —
* ᠳ᠋ᠦᠰᠢᠳ ᠦ᠋ᠨ ᠣᠷᠣᠨ ᠭᠡᠵᠦ ᠲᠩᠷᠢ ᠨᠠᠷ ᠤ᠋ᠨ ᠣᠯᠠᠨ ᠣᠷᠣᠨ ᠤ᠋ ᠨᠢᠭᠡᠨ ᠭᠡᠳᠡᠭ ᠦ᠋ᠨ ᠨᠡᠷᠡ᠂ ᠣᠷᠣᠰ ᠬᠡᠯᠡᠨ ᠳ᠋ᠦ᠍ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ ᠲᠩᠷᠢ ᠶ᠋ᠢᠨ ᠳᠣᠯᠣᠳᠤᠭᠠᠷ ᠣᠷᠣᠨ ᠳ᠋ᠤ᠌ ᠭᠠᠷᠪᠠ ᠭᠡᠳᠡᠭ ᠲᠡᠢ ᠣᠢᠷᠠᠯᠴᠠᠭᠠ ᠤᠳᠬᠠ ᠪᠠᠷ ᠡᠭᠦᠨ ᠳ᠋ᠦ᠍ ᠬᠡᠷᠡᠭᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ᠂ ᠪᠠᠳᠮᠠᠰᠡᠴᠡᠨ᠂ ᠣᠶᠤᠨᠪᠢᠯᠢᠭ᠌᠂ ᠪᠠᠯ᠂
ᠰᠠᠷᠠᠨᠲᠤᠶᠠᠭᠠ᠂ ᠤᠢᠭᠤᠷᠵᠢᠨ·ᠣᠳᠬᠣᠨᠪᠠᠪᠠ
ᠬᠢᠨᠠᠭᠴᠢ᠄ ᠣᠶᠤᠨᠪᠠᠲᠤ᠂ ᠪᠠᠳᠮᠠᠰᠡᠴᠡᠨ᠂ ᠣᠳᠬᠣᠨᠴᠡᠴᠡᠭ᠂ ᠣᠶᠤᠨᠪᠠᠲᠤ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ
ᠤᠩᠰᠢᠭᠴᠢ ᠄ ᠨᠠᠰᠤᠨ᠌ᠦ᠌ᠯᠵᠡᠢ