ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠᠨ ᠬᠣᠶᠠᠷ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <12>
270ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠᠨ ᠬᠣᠶᠠᠷ>
ᠮᠠᠨᠴᠤᠷᠭᠠ ᠬᠣᠳᠳᠤᠭ ᠳᠡᠭᠡᠷᠡ ᠣᠴᠢᠵᠤ ᠳᠤᠨᠳᠠᠭᠤᠷ ᠬᠣᠪᠣᠭᠣ ᠬᠦᠢᠲᠡᠨ ᠤᠰᠤ ᠭᠦᠳ ᠭᠦᠳ ᠵᠠᠯᠭᠢᠯᠠᠨ ᠬᠣᠳᠳᠤᠭ ᠤ᠋ᠨ ᠬᠦᠢᠲᠡᠨ ᠤᠰᠤ ᠪᠡᠷ ᠲᠣᠯᠣᠭᠠᠢ ᠪᠠᠨ ᠱᠠᠪᠰᠢᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠭᠰᠠᠨ ᠳ᠋ᠤ᠌᠂ ᠳᠣᠲᠣᠷᠠ ᠨᠢ ᠶᠡᠬᠡ ᠯᠡ ᠰᠠᠷᠠᠭᠤᠯᠵᠢᠨ ᠨᠢᠳᠦ ᠨᠢ ᠣᠩᠭᠣᠢᠬᠤ ᠰᠢᠭ᠋ ᠪᠣᠯᠪᠠ᠃
ᠨᠠᠷᠠ ᠰᠤᠪᠤᠷᠠᠬᠤ ᠶ᠋ᠢᠨ ᠠᠯᠲᠠ ᠪᠠᠷ ᠪᠤᠭᠤᠲᠤ ᠪᠠᠯᠭᠠᠰᠤᠨ ᠤ᠋ ᠠᠷᠤ ᠵᠣ ᠪᠠᠷ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠨᠠ᠃
ᠬᠣᠶᠠᠷ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠤᠯᠠᠭᠠᠨ ᠴᠢᠯᠠᠭᠤᠲᠤ ᠨᠠᠮᠬᠠᠨ ᠬᠠᠮᠠᠷ ᠲᠠᠢ ᠳᠡᠪᠢᠭᠦᠷ ᠰᠢᠭ ᠨᠥᠮᠦᠷᠢᠯᠢᠭ ᠠᠯᠠᠭᠠᠢ ᠳᠣᠲᠣᠷᠠ ᠬᠣᠶᠠᠷ ᠠᠢᠯ ᠵᠡᠷᠭᠡᠴᠡᠨ ᠪᠠᠭᠤᠵᠤ᠂ ᠵᠢᠭᠳᠡ ᠪᠠᠷᠢᠭᠰᠠᠨ ᠰᠢᠪᠡᠭᠡᠨ ᠬᠣᠷᠢᠶᠠᠨ ᠤ᠋ ᠬᠠᠶᠠᠭᠠ ᠪᠠᠷ ᠬᠣᠨᠢ ᠢᠮᠠᠭᠠᠳ ᠴᠠᠢᠷᠠᠵᠣ᠂ ᠠᠷᠪᠠᠭᠠᠳ ᠰᠠᠭᠠᠯᠢ ᠶ᠋ᠢᠨ ᠦᠨᠢᠶᠡ ᠵᠡᠯᠡ ᠴᠢᠮᠡᠵᠦ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠮᠠᠨᠴᠤᠷᠭᠠ᠄
— ᠨᠠᠨ ᠠᠢᠯ ᠠ᠋ᠴᠠ ᠵᠢᠭᠠᠯ ᠵᠢᠭᠤᠯ ᠠᠢᠷᠠᠭ ᠣᠯᠵᠤ ᠤᠤᠭᠤᠭᠠᠳ ᠭᠠᠷᠤᠶᠠ! ᠥᠴᠥᠭᠡᠳᠥᠷ ᠣᠷᠣᠢ ᠳᠠᠩᠴᠤ ᠮᠠᠭᠤ ᠠᠷᠢᠬᠢ ᠤᠤᠭᠤᠵᠢ᠃ ᠡᠯᠢᠭᠡ ᠵᠢᠷᠦᠬᠡ ᠬᠠᠭᠠᠷᠢᠭᠳᠠᠬᠤ ᠰᠢᠭ᠋ ᠪᠡᠶᠡ ᠬᠠᠴᠢᠨ ᠡᠪ ᠦᠭᠡᠢ! ᠴᠢᠭᠢᠶᠡᠲᠦᠷᠦᠦ᠂ ᠮᠠᠭᠤ ᠬᠠᠷᠠ ᠨᠢᠳᠦᠲᠦ ᠬᠠᠮᠢᠭᠠ ᠪᠠᠢᠨᠠ⁈ ᠶᠠᠮᠠᠷ ᠠᠷᠢᠬᠢ ᠶᠤᠮ ᠪᠣᠢ? ᠭᠡᠳ ᠬᠠᠵᠠᠭᠤᠳᠠᠬᠢ ᠠ᠋ᠴᠠ ᠪᠠᠨ ᠠᠰᠠᠭᠤᠩᠭᠠᠨ ᠮᠠᠩᠨᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠢᠲᠡᠨ ᠬᠥᠯᠥᠰᠥ ᠶ᠋ᠢ ᠵᠦᠯᠭᠦᠨᠡ᠃
— ᠬᠠᠷᠠ ᠨᠢᠳᠦᠳᠦ ᠥᠴᠥᠭᠡᠳᠦᠷ ᠠᠴᠠ ᠬᠣᠢᠰᠢ ᠪᠠᠷᠠ ᠨᠢ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ! ᠭᠡᠵᠦ ᠮᠠᠨᠴᠤᠷᠭᠠ ᠶᠢ ᠳᠠᠭᠠᠭᠰᠠᠨ ᠭᠣᠢᠳᠣᠪ ᠬᠠᠷᠢᠭᠤᠯᠤᠨᠠ᠃
— ᠡᠨᠡ ᠵᠣᠯᠢᠭ ᠬᠠᠮᠢᠭᠠ ᠵᠣᠯᠪᠢᠩᠳᠠᠵᠤ ᠪᠠᠢᠭᠠ ᠶᠤᠮ ᠪᠣᠯ?
— ᠮᠡᠳᠡᠬᠦ ᠦᠭᠡᠢ ᠶᠤᠮ ᠡ!
— ᠥᠴᠥᠭᠡᠳᠦᠷ ᠣᠷᠣᠢ ᠰᠢᠷᠠ ᠴᠡᠷᠢᠭ ᠰᠢᠷᠠ ᠴᠡᠷᠢᠭ ᠭᠡᠳ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠭᠠᠳ ᠯᠠ ᠪᠠᠢᠬᠤ ᠪᠣᠯᠣᠭᠰᠠᠨ ᠁
— ᠰᠢᠷᠠ ᠴᠡᠷᠢᠭ ᠦᠨ ᠬᠢᠨ ᠠᠴᠠ ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠠᠮᠲᠠᠯᠠᠵᠤ ᠰᠣᠷᠣᠭᠰᠠᠨ ᠶᠠᠳᠠᠬᠤ ᠦᠭᠡᠢ ᠳ᠋ᠠ!
— ᠦᠨᠡᠭᠡᠷ ᠲᠡᠢᠮᠦ ᠪᠣᠯ ᠭᠠᠨᠵᠤᠭᠠ ᠨᠢ ᠭᠠᠳᠠᠭᠰᠢ ᠪᠠᠨ ᠬᠠᠵᠠᠢᠵᠤ᠂ ᠭᠠᠢ ᠨᠢ ᠲᠣᠲᠤᠭᠰᠢ ᠪᠠᠨ ᠮᠠᠢᠵᠠᠢᠨᠠ ᠳ᠋ᠠ! ᠭᠡᠵᠦ ᠮᠠᠨᠴᠤᠷᠭᠠ ᠶᠢᠨ ᠪᠤᠷᠤᠭᠤ ᠲᠠᠯᠠ ᠠᠴᠠ ᠱᠤᠩᠭᠤᠭᠤᠯᠵᠤ ᠢᠷᠡᠭᠰᠡᠨ ᠰᠣᠳᠨᠠᠮ ᠢᠩᠬᠢᠵᠦ ᠶᠠᠷᠢᠭᠰᠠᠨ ᠳᠤ ᠮᠠᠨᠴᠤᠷᠭᠠ᠄
— ᠶᠡᠷᠦ ᠨᠢ ᠡᠨᠳᠡ ᠡᠴᠡ ᠡᠷᠲᠡᠬᠡᠨ ᠰᠢᠭ ᠵᠠᠢᠯᠠᠭᠰᠠᠨ ᠳᠡᠭᠡᠷᠡ ᠶᠤᠮ ᠁ ᠭᠡᠵᠦ ᠬᠡᠳᠦᠭᠦᠯᠡ ᠨᠠᠷᠭᠢᠯᠳᠤᠭᠰᠠᠭᠠᠷ ᠠᠢᠯ ᠤᠨ ᠭᠠᠳᠠᠭᠠ ᠪᠠᠭᠤᠪᠠ᠃
ᠮᠠᠨᠴᠤᠷᠭᠠ ᠮᠣᠷᠢ ᠪᠠᠨ ᠱᠣᠩ ᠳᠡᠭᠡᠷᠡ ᠲᠣᠭᠣᠨᠣᠴᠢᠯᠠᠵᠤ ᠤᠨᠠᠴᠢᠬᠠᠭᠠᠳ ᠭᠡᠷ ᠵᠦᠭ ᠬᠡᠩᠭᠦᠯᠵᠠᠨ ᠠᠯᠬᠤᠬᠤ ᠳ᠋ᠤ᠌᠂ ᠪᠢᠷᠠᠭᠤ ᠰᠢᠭ᠋ ᠪᠦᠳᠦᠭᠦᠨ ᠬᠣᠶᠠᠷ ᠬᠠᠯᠲᠠᠷ ᠨᠣᠬᠠᠢ ᠲᠤᠯᠵᠤ ᠢᠷᠡᠨ ᠬᠣᠷᠭᠣᠭᠣᠨᠠ᠃
— ᠨᠣᠬᠠᠢ ᠪᠠᠨ! ᠭᠡᠵᠦ ᠪᠠᠷᠭᠢᠯ ᠳᠠᠭᠤᠨ ᠢ᠋ᠶ᠋ᠠᠷ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠵᠠᠯᠠᠨ ᠳᠡᠭᠡᠷᠡ ᠦᠨᠢᠶᠡ ᠰᠠᠭᠠᠵᠤ ᠪᠠᠢᠭᠰᠠᠨ ᠪᠦᠰᠡᠭᠦᠢ ᠰᠠᠨᠳᠤᠷᠤᠨ ᠪᠣᠰᠤᠭᠠᠳ᠄
— ᠵᠣᠪ! ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠬᠠᠯᠲᠠᠷ ᠨᠣᠬᠠᠢ ᠶ᠋ᠢᠨ ᠠᠷᠬᠢᠷᠠᠬᠤ ᠨᠢ ᠠᠶᠠᠳᠴᠤ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠢᠨ ᠴᠠᠭᠠᠰᠢᠯᠠᠭᠰᠠᠨ ᠴᠤ᠌ ᠲᠣᠭᠰᠢᠨ ᠨᠢᠳᠦ ᠨᠢ ᠦᠯᠦ ᠲᠠᠨᠢᠬᠤ ᠡᠨᠡ ᠬᠥᠮᠦᠰ ᠢ᠋ ᠵᠦᠭᠡᠷ ᠲᠠᠯᠪᠢᠬᠤ ᠦᠭᠡᠢ ᠭᠡᠰᠡᠨ ᠰᠢᠭ ᠰᠢᠷᠦᠭᠦᠨ ᠡᠷᠭᠢᠯᠳᠦᠨᠡ᠃
ᠭᠣᠢᠳᠤᠪ ᠤ᠋ᠨ ᠤᠨᠤᠭᠰᠠᠨ ᠮᠣᠷᠢ ᠨᠢ ᠱᠣᠩ ᠪᠤᠯᠭᠤᠯᠳᠠᠭ ᠮᠠᠭᠤ ᠵᠠᠩ ᠲᠠᠢ ᠪᠣᠯᠬᠣᠷ ᠤᠶᠠᠭᠠᠨ ᠤ᠋ ᠮᠣᠷᠢᠳ ᠠ᠋ᠴᠠ ᠵᠠᠢᠰᠬᠠᠨ ᠴᠢᠳᠥᠷᠯᠡᠵᠦ᠂ ᠰᠣᠳᠨᠠᠮ ᠨᠣᠮᠣᠬᠠᠨ ᠪᠣᠷᠣ ᠪᠠᠨ ᠣᠯᠣᠩ ᠢ᠋ ᠨᠢ ᠰᠤᠯᠠᠯᠠᠨ᠂ ᠴᠣᠮᠣᠵᠤ ᠲᠠᠯᠪᠢᠪᠠ᠃
— ᠵᠠ᠂ ᠰᠠᠢᠨ ᠪᠠᠢᠨᠠ ᠤᠤ?
— ᠰᠠᠢᠨ᠂ ᠲᠠ ᠨᠠᠷ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠭᠡᠵᠦ ᠠᠢᠯ ᠤ᠋ᠨ ᠪᠣᠷᠣ ᠪᠦᠰᠡᠭᠦᠢ ᠡᠨᠡ ᠬᠦ᠌ ᠪᠠᠷᠵᠠᠭᠠᠷ ᠰᠢᠷᠦᠭᠦᠨ ᠡᠷᠡᠰ ᠡᠴᠡ ᠰᠦᠷᠳᠡᠵᠦ᠂ ᠡᠪᠦᠳᠦᠭ ᠰᠥᠬᠥᠷᠡᠨ ᠬᠠᠷᠢᠭᠤ ᠮᠡᠨᠳᠦᠯᠡᠬᠦ ᠳ᠋ᠡᠭᠡᠨ ᠳᠣᠲᠣᠷᠠ ᠨᠢ ᠲᠦᠭ ᠲᠠᠭ ᠪᠣᠯᠵᠤ《ᠵᠠ᠂ ᠪᠠᠢᠵᠠ? ᠡᠨᠡ ᠪᠠᠰᠠ ᠶᠠᠭᠤᠨ ᠤ᠋ ᠤᠯᠤᠰ ᠪᠣᠯᠴᠢᠬᠠᠪᠠ? ᠲᠡᠭᠡᠭᠡᠳ ᠬᠠᠷᠠ ᠁ ᠬᠠᠷᠠ ᠥᠷᠯᠥᠭᠡᠭᠦᠷ ᠁ ᠥᠨᠥᠬᠢ ᠳᠡᠭᠡᠷᠡᠮ ᠲᠤᠨᠤᠭᠠᠨ ᠤ᠋ ᠮᠠᠭᠤ ᠰᠠᠢᠨ ᠡᠷᠡᠰ ᠦ᠋ᠳ ᠪᠢᠰᠢ ᠯᠡ ᠪᠢᠵᠡ⁈ ᠠᠷᠠᠢ ᠪᠢᠰᠢ᠃ ᠪᠦᠷ ᠯᠡ ᠮᠣᠩᠭᠣᠯ ᠲᠠᠨᠢᠯ ᠴᠢᠷᠠᠢ ᠬᠠᠷᠠᠭᠳᠠᠭᠠᠳ ᠪᠠᠢᠨᠠ! ᠶᠠᠭᠤ ᠴᠤ᠌ ᠭᠡᠰᠡᠨ ᠳᠡᠭᠡᠷᠡᠮ ᠲᠤᠨᠤᠭᠠᠨ ᠤ᠋ ᠨᠣᠪᠰᠢ ᠨᠤᠭᠤᠳ ᠪᠢᠰᠢ ᠯᠡ ᠪᠠᠢᠭᠠᠰᠠᠢ! ᠪᠤᠷᠬᠠᠨ ᠲᠡᠭᠷᠢ ᠮᠢᠨᠢ᠂ ᠣᠮ ᠠ ᠬᠣᠩ! ᠭᠣᠩᠴᠣᠭᠰᠤᠮ ᠁》ᠭᠡᠵᠦ ᠳᠣᠲᠣᠷᠠ ᠪᠠᠨ ᠨᠠᠮᠠᠨᠴᠢᠯᠠᠨ ᠳᠠᠭᠠᠳᠬᠠᠨᠠ᠃
ᠮᠠᠨᠴᠤᠷᠭᠠ᠂ ᠡᠨᠡ ᠬᠦ᠌ ᠬᠣᠶᠠᠷ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠤᠯᠠᠭᠠᠨ ᠴᠢᠯᠠᠭᠤ ᠲᠠᠢ ᠨᠠᠮᠬᠠᠨ ᠬᠠᠮᠠᠷ ᠤ᠋ᠨ ᠨᠥᠮᠥᠷᠢ ᠠᠯᠠᠭᠠᠢ ᠳ᠋ᠤ᠌ ᠡᠪᠯᠢᠭ ᠪᠠᠭᠤᠭᠰᠠᠨ ᠠᠢᠯ ᠤ᠋ᠨ ᠬᠠᠶᠠᠭᠠ ᠶ᠋ᠢ ᠠᠵᠢᠭ ᠲᠠᠯᠪᠢᠨ ᠠᠯᠬᠤᠬᠤ ᠳ᠋ᠤ᠌᠂ ᠬᠠᠲᠠᠪᠴᠢᠨ ᠤ᠋ ᠵᠡᠭᠦᠨ ᠲᠤᠰᠢᠶᠠ ᠠᠢᠷᠠᠭ ᠪᠦᠯᠢᠵᠦ ᠵᠣᠭᠰᠣᠭᠰᠠᠨ ᠠᠷᠪᠠᠨ ᠲᠠᠪᠤ ᠵᠢᠷᠭᠤᠭᠠᠲᠠᠢ ᠥᠬᠢᠨ ᠪᠢᠰᠢᠭᠦᠷᠬᠡᠨ ᠰᠠᠨᠳᠤᠷᠴᠤ᠄
— ᠠᠮᠤᠷ? ᠰᠠᠢᠨ ᠪᠠᠢᠨᠠ ᠦᠤ? ᠭᠡᠳ ᠴᠢᠷᠠᠢ ᠨᠢ ᠤᠯᠠᠪᠠᠯᠵᠠᠬᠤ ᠳ᠋ᠤ᠌᠂ ᠮᠠᠨᠴᠤᠷᠭᠠ ᠶ᠋ᠢᠨ ᠳᠣᠲᠣᠷᠠ ᠠᠭᠱᠠᠨᠠ ᠤᠶᠠᠷᠠᠵᠤ《ᠬᠡᠴᠢᠨᠡᠭᠡᠨ ᠤᠳᠠᠭᠠᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠭᠰᠠᠨ ᠦᠭᠡᠢ᠃ ᠮᠢᠨᠦ ᠮᠠᠭᠤ ᠥᠬᠢᠨ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠥᠨ ᠶᠦᠮ ᠰᠢᠭ ᠬᠥᠭᠡᠷᠦᠬᠦᠨ ᠬᠠᠷᠠᠭᠳᠠᠨᠠ ! 》 ᠭᠡᠵᠦ ᠠᠢᠷᠠᠭ ᠪᠦᠯᠢᠭᠰᠡᠨ ᠦᠭᠢᠨ ᠦ᠌ ᠰᠠᠩᠨᠠᠢ ᠶ᠋ᠢ ᠥᠬᠥᠭᠡᠷᠳᠡᠨ ᠦᠨᠦᠰᠴᠦ᠂
— ᠤ᠂ ᠬᠥᠭᠡᠷᠦᠬᠦᠢ ᠳᠡ! ᠥᠬᠢᠨ ᠮᠢᠨᠢ᠂ ᠪᠦᠯᠢᠯᠭᠡ ᠶ᠋ᠢᠨ ᠠᠢᠷᠠᠭ ᠴᠢᠨᠢ ᠱᠤᠤᠭᠢᠨ ᠱᠤᠤᠭᠢᠨ ᠢᠰᠴᠦ᠂ ᠪᠦᠷᠢᠭᠰᠡᠨ ᠥᠷᠥᠮᠡ ᠨᠢ ᠬᠥᠭᠡᠰᠦᠷᠡᠨ ᠬᠥᠭᠡᠰᠦᠷᠡᠨ ᠪᠠᠭᠤᠭᠠᠴᠢ! ᠭᠡᠵᠦ ᠢᠷᠦᠭᠡᠭᠡᠳ ᠭᠡᠷ ᠲᠤ ᠣᠷᠣᠪᠠ᠃
ᠡᠨᠡ ᠠᠢᠯ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠬᠣᠨᠢᠨ ᠤ᠋ ᠣᠲᠣᠷ ᠤ᠋ᠨ ᠪᠠᠭᠤᠴᠠ ᠪᠠᠢᠵᠠᠢ᠃ ᠡᠨᠡ ᠠᠢᠯ ᠤ᠋ᠨ ᠪᠦᠰᠡᠭᠦᠢ ᠶ᠋ᠢ ᠨᠤᠭᠤᠭᠠᠨᠳᠠᠷᠬᠢ ᠭᠡᠳᠡᠭ᠃
ᠵᠤᠳᠪᠠ ᠮᠡᠢᠷᠡᠨ ᠦ᠌ ᠳ᠋ᠦ᠍ ᠳᠣᠭᠣᠯᠠᠩ ᠳᠣᠷᠵᠢ ᠭᠡᠳᠡᠭ ᠮᠥᠩᠭᠥᠨ ᠦ᠌ ᠳᠠᠷᠬᠠᠨ ᠡᠪᠦᠭᠡᠨ᠂ ᠭᠠᠭᠴᠠ ᠰᠠᠢᠬᠠᠨ ᠥᠬᠢᠨ ᠨᠤᠭᠤᠭᠠᠨᠳᠠᠷᠬᠢ ᠲᠠᠢ ᠪᠠᠨ ᠶᠡᠬᠡ ᠭᠡᠷ ᠦ᠋ᠨ ᠴᠢᠷᠠᠢ ᠬᠠᠷᠠᠵᠤ᠂ ᠳᠣᠭᠣᠯᠠᠩ ᠳᠣᠷᠵᠢ ᠭᠤᠸᠠᠢ ᠠᠯᠲᠠ ᠮᠥᠩᠭᠥ᠂ ᠭᠠᠤᠯᠢ ᠵᠡᠰ ᠦ᠋ᠨ ᠤᠷᠠ ᠳᠠᠷᠬᠠ ᠪᠠᠷ ᠢ᠋ᠶ᠋ᠠᠨ᠂ ᠥᠬᠢᠨ ᠦ᠌ ᠬᠣᠨᠢᠨ ᠳ᠋ᠤ᠌ ᠶᠠᠪᠤᠵᠤ ᠡᠴᠢᠭᠡ ᠥᠬᠢᠨ ᠬᠣᠶᠠᠭᠤᠯᠠ ᠡᠢᠨ ᠬᠥ᠋ ᠠᠮᠢ ᠵᠢᠭᠤᠳᠠᠭ ᠪᠠᠢᠵᠠᠢ᠃
ᠡᠳᠦᠷ ᠦ᠋ᠨ ᠤᠳᠠᠭᠠᠨ ᠳ᠋ᠤ᠌ ᠵᠤᠳᠪᠠ ᠮᠡᠢᠷᠡᠨ ᠡᠷᠬᠡ ᠰᠦᠷ᠂ ᠡᠳ᠋ ᠮᠥᠩᠭᠥᠨ ᠦ᠌ ᠰᠣᠷᠲᠣᠭᠣ ᠪᠠᠷ ᠨᠤᠭᠤᠭᠠᠨᠳᠠᠷᠬᠢ ᠥᠬᠢᠨ ᠳ᠋ᠦ᠍ ᠳᠤᠷᠠ ᠰᠢᠨᠤᠵᠤ ᠬᠥᠮᠦᠨ ᠦ᠌ ᠥᠬᠢᠨ ᠢ᠋ ᠥᠬᠢᠨ ᠲᠡᠢ ᠪᠣᠯᠭᠠᠪᠠ᠃ ᠲᠡᠭᠡᠭᠰᠡᠨ ᠡᠴᠡ ᠪᠣᠯᠵᠤ ᠵᠤᠳᠪᠠ ᠮᠡᠢᠷᠡᠨ ᠨᠤᠭᠤᠭᠠᠨᠳᠠᠷᠬᠢ ᠶ᠋ᠢ ᠬᠠᠷᠠ ᠬᠥᠮᠦᠨ ᠲᠦᠰᠢᠭᠦᠯᠵᠦ ᠬᠠᠷᠢᠯᠠᠭᠤᠯᠬᠤ ᠪᠠᠢᠲᠤᠭᠠᠢ᠂ ᠬᠠᠶᠠᠭᠠᠨ ᠠ᠋ᠴᠠ ᠪᠠᠨ ᠳᠡᠮᠡᠢ ᠬᠣᠯᠠ ᠬᠤᠯᠠᠳᠤᠭᠤᠯᠳᠠᠭ ᠦᠭᠡᠢ ᠬᠠᠮᠪᠠᠭᠠᠷᠬᠠᠵᠤ ᠡᠵᠡᠮᠳᠡᠳᠡᠭ ᠴᠤ᠌᠂ ᠨᠢᠭᠡ ᠶᠡᠬᠡ ᠨᠡᠷᠡᠯᠬᠡᠵᠦ ᠲᠠᠲᠠᠪᠤᠷᠢ ᠪᠠᠨ ᠪᠣᠯᠭᠠᠬᠤ ᠵᠣᠷᠢᠭ ᠪᠠᠢᠳᠠᠭ ᠦᠭᠡᠢ ᠳ᠋ᠡᠭᠡᠨ ᠵᠤᠳᠪᠠ ᠮᠡᠢᠷᠡᠨ ᠵᠣᠪᠠᠯᠠᠩ ᠲᠠᠢ᠃ ᠠᠷᠭᠠ ᠪᠤᠶᠤ ᠬᠣᠨᠢᠨ ᠤ᠋ ᠣᠲᠣᠷ ᠭᠡᠵᠦ ᠨᠡᠷᠡ ᠵᠢᠭᠠᠨ ᠡᠬᠡ ᠥᠬᠢᠨ ᠬᠣᠶᠠᠷ ᠢ᠋ ᠡᠨᠳᠡ ᠠᠮᠢ ᠵᠢᠭᠤᠯᠭᠠᠳᠠᠭ ᠨᠢ ᠡᠨᠡ᠃
ᠮᠠᠨᠴᠤᠷᠭᠠ᠂ ᠨᠤᠭᠤᠭᠠᠨᠳᠠᠷᠬᠢ ᠪᠦᠰᠡᠭᠦᠢ ᠶ᠋ᠢᠨ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠠ᠋ᠴᠠ ᠣᠭᠣᠴᠢᠬᠤᠢᠴᠠ ᠪᠣᠯᠵᠤ ᠠᠶᠠᠭᠠ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠨ᠄
— ᠵᠠ᠂ ᠪᠠᠢᠵᠠ! ᠨᠠᠭᠠᠳᠤ ᠱᠤᠤᠭᠢᠲᠠᠯᠠ ᠢᠰᠤᠭ᠍ᠰᠡᠨ ᠠᠢᠷᠠᠭ ᠠ᠋ᠴᠠ ᠪᠠᠨ ᠨᠠᠭᠠᠰᠢ ᠥᠭᠭᠦᠭᠡᠴᠢ! ᠭᠡᠳ ᠪᠣᠳᠣᠩ ᠲᠠᠢ ᠬᠦᠴᠢᠯᠢᠭ ᠠᠢᠷᠠᠭ ᠠ᠋ᠴᠠ ᠬᠡᠳᠦ ᠬᠡᠳᠦᠨ ᠠᠶᠠᠭᠠ ᠤᠤᠭᠤᠭᠰᠠᠨ ᠳ᠋ᠤ᠌ ᠳᠣᠲᠣᠷᠠ ᠨᠢ ᠣᠩᠭᠣᠢᠭᠠᠳ ᠶᠠᠪᠤᠴᠢᠬᠠᠪᠠ᠃
ᠬᠦᠴᠢᠲᠡᠢ ᠠᠢᠷᠠᠭ ᠪᠡᠶᠡ ᠶ᠋ᠢᠨ ᠬᠣᠣᠷ ᠪᠠ ᠠᠷᠢᠬᠢᠨ ᠤ᠋ ᠰᠢᠷᠠ ᠲᠠᠢᠯᠳᠠᠭ ᠭᠡᠰᠡᠨ ᠨᠢ ᠦᠨᠡᠨ ᠪᠠᠢᠵᠤ ᠲᠠᠭᠠᠷᠠᠨᠠ᠃ ᠲᠠᠮᠠᠬᠢᠯᠠᠬᠤ ᠵᠠᠭᠤᠷᠠ ᠮᠠᠨᠴᠤᠷᠭᠠ ᠬᠥᠯᠥᠷᠡᠵᠦ ᠮᠠᠩᠨᠠᠢ ᠳ᠋ᠤᠨᠢ ᠢᠨᠵᠠᠭᠠᠨ ᠬᠣᠷᠭᠣᠯ ᠭᠡᠮᠡᠷ ᠬᠦᠢᠲᠡᠨ ᠬᠥᠯᠥᠰᠥ ᠪᠠᠷᠵᠠᠢᠵᠤ᠂ ᠨᠢᠷᠤᠭᠤᠨ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠬᠥᠯᠥᠰᠥ ᠴᠢᠭᠢᠭᠯᠡᠪᠡ᠃
ᠨᠤᠭᠤᠭᠠᠨᠳᠠᠷᠬᠢ ᠪᠦᠰᠡᠭᠦᠢ ᠮᠠᠨᠴᠤᠷᠭᠠ ᠶ᠋ᠢ ᠨᠢᠭᠡ ᠯᠡ ᠲᠠᠨᠢᠮᠠᠭᠠᠢᠷᠬᠠᠵᠤ《ᠢᠳᠡ ᠤᠤᠭᠤ᠂ ᠢᠩᠭᠢ ᠴᠢᠩᠭᠢ》 ᠭᠡᠵᠦ ᠦᠭᠡ ᠬᠠᠮᠠᠷ ᠡᠯᠭᠦᠬᠦ ᠭᠡᠬᠦ ᠳ᠋ᠦ᠍ ᠮᠠᠨᠴᠤᠷᠭᠠ ᠦᠭᠡ ᠶ᠋ᠢᠨ ᠰᠡᠳᠦᠪ ᠥᠭᠡᠷᠡᠲᠦᠭᠦᠯᠵᠦ ᠪᠡᠶᠡ ᠪᠡᠨ ᠵᠠᠢᠯᠠᠭᠤᠯᠤᠨᠠ᠃ ᠠᠢᠯ ᠤ᠋ᠨ ᠲᠡᠷᠡ ᠪᠦᠰᠡᠭᠦᠢ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠶᠡᠬᠡ ᠠᠭᠡ ᠭᠡᠷ ᠲᠦ᠋ᠨᠢ ᠪᠠᠭᠤᠵᠤ ᠢᠷᠡᠯᠡ ᠭᠡᠵᠦ ᠰᠠᠳᠤᠨᠴᠢᠯᠠᠵᠤ ᠪᠣᠳᠣᠭᠰᠠᠨ ᠤ᠋ ᠤᠤ ᠳᠠ᠂ ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠡᠮᠳᠡᠷᠢᠨ᠂ ᠰᠢᠷᠠ ᠲᠣᠰᠣ ᠪᠠᠷ ᠵᠠᠪᠰᠠᠷᠯᠠᠭᠰᠠᠨ ᠳᠤᠭᠤᠢ ᠪᠣᠭᠣᠷᠰᠣᠭ ᠬᠠᠭᠠᠷᠢᠵᠤ᠂ ᠪᠦᠯᠢᠯᠭᠡ ᠶ᠋ᠢᠨ ᠥᠷᠥᠮᠡ᠂ ᠠᠭᠠᠷᠤᠤᠯ᠂ ᠰᠢᠷᠠ ᠲᠣᠰᠣ᠂ ᠬᠠᠲᠠᠭᠠᠭᠰᠠᠨ ᠥᠷᠥᠮᠡ ᠵᠡᠷᠭᠡ ᠢᠳᠡᠭᠡᠨ ᠢ᠋ ᠰᠢᠷᠡᠭᠡ ᠳᠦᠭᠦᠷᠡᠩ ᠵᠡᠷᠭᠡᠯᠡᠭᠰᠡᠨ ᠳ᠋ᠦ᠍᠂ ᠢᠷᠡᠭᠰᠡᠨ ᠬᠥᠮᠦᠰ ᠡᠨᠡ ᠪᠦᠰᠡᠭᠦᠢ ᠶ᠋ᠢᠨ ᠵᠣᠴᠢᠨᠰᠠᠭ ᠥᠭᠭᠢᠶᠡᠮᠦᠷᠴᠢ ᠰᠡᠳᠬᠢᠯ ᠢ ᠨᠢ ᠭᠣᠮᠣᠳᠠᠭᠠᠭᠰᠠᠨ ᠦᠭᠡᠢ ᠡᠷᠡᠭᠡ ᠵᠢᠷᠣᠭᠠ ᠦᠭᠡᠢ ᠢᠳᠡᠵᠦ ᠤᠤᠭᠤᠵᠠᠭᠠᠪᠠ᠃
ᠰᠢᠷᠡᠭᠡᠨ ᠳᠡᠭᠡᠷᠡ ᠪᠣᠣᠪᠣ ᠪᠣᠭᠣᠷᠰᠣᠭ᠂ ᠥᠷᠥᠮᠡ ᠲᠣᠰᠣᠨ ᠤ᠋ ᠬᠠᠪᠴᠢᠭ ᠮᠡᠳᠡᠭᠳᠡᠬᠦᠢᠴᠡ ᠬᠣᠲᠣᠢᠨ᠂ ᠠᠶᠠᠭᠠ ᠰᠠᠪᠬᠠ ᠤᠨᠳᠤᠢ ᠰᠤᠨᠳᠤᠢ᠃ ᠢᠳᠡᠵᠦ ᠤᠤᠭᠤᠵᠤ ᠬᠠᠨᠤᠭᠰᠠᠨ ᠬᠡᠳᠦᠨ ᠡᠷᠡ ᠤᠷᠲᠤ ᠤᠷᠲᠤ ᠭᠡᠭᠡᠷᠡᠭᠦᠯᠦᠨ ᠭᠡᠳᠡᠷᠭᠦᠯᠡᠵᠦ ᠰᠠᠭᠤᠨ᠂ ᠳ᠋ᠠᠢ ᠲᠠᠮᠠᠬᠢ ᠲᠠᠢ ᠪᠠᠨ ᠨᠣᠴᠣᠯᠳᠤᠬᠤ ᠳ᠋ᠤ᠌ ᠬᠠᠶᠠ ᠨᠢᠭᠡ ᠨᠢ ᠬᠠᠷᠠ ᠲᠠᠮᠠᠬᠢ ᠴᠣᠷᠭᠢᠭᠤᠯᠵᠤ ᠤᠲᠤᠭᠠ ᠪᠠᠭᠠᠭᠢᠭᠤᠯᠤᠨᠠ᠁
ᠬᠥᠪ ᠬᠥᠪ᠁ ᠨᠣᠬᠠᠢ ᠬᠣᠷᠭᠣᠭᠣᠬᠤ ᠳᠠᠭᠤᠨ ᠢ᠋ᠶ᠋ᠠᠷ ᠮᠣᠷᠢᠳ ᠬᠤᠤᠭᠢᠷᠤᠨ ᠦᠦᠷᠰᠡᠨᠡ᠃
— ᠮᠠᠨᠴᠤ ᠠᠬᠠ ᠠ᠋! ᠵᠤᠳᠪᠠ ᠮᠡᠢᠷᠡᠨ ᠪᠠᠭᠤᠵᠤ ᠪᠠᠢᠨᠠ! ᠭᠡᠵᠦ ᠭᠤᠢᠳᠤᠪ ᠭᠠᠳᠠᠨᠠ ᠠ᠋ᠴᠠ ᠬᠡᠯᠡ ᠬᠦᠷᠭᠡᠵᠦ ᠣᠷᠣᠵᠤ ᠢᠷᠡᠪᠡᠯ ᠮᠠᠨᠴᠤᠷᠭᠠ᠄
— ᠣᠯᠠᠭᠤᠯᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠦᠭᠡᠢ᠂ ᠭᠤᠷᠪᠠᠭᠤᠯᠠ ᠶᠠᠪᠤᠭᠠ᠃
ᠮᠠᠨᠴᠤᠷᠭᠠ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ ᠵᠤᠳᠪᠠ ᠮᠡᠢᠷᠡᠨ ᠢ᠋ ᠤᠭᠲᠤᠷᠠ ᠭᠠᠷᠪᠠ᠃
ᠵᠤᠳᠪᠠ ᠮᠡᠢᠷᠡᠨ ᠬᠣᠶᠠᠷ ᠳᠠᠭᠠᠯᠲᠠ ᠴᠡᠷᠢᠭ ᠲᠡᠢ ᠱᠣᠩ ᠳᠡᠭᠡᠷᠡ ᠪᠠᠭᠤᠵᠤ ᠪᠠᠢᠨᠠ᠃
ᠮᠠᠨᠴᠤᠷᠭᠠ ᠵᠤᠳᠪᠠ ᠮᠡᠢᠷᠡᠨ ᠢ᠋ ᠤᠭᠲᠤᠵᠤ ᠣᠴᠢᠨ᠄
— ᠵᠤᠳᠪᠠ ᠭᠤᠸᠠᠢ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠭᠡᠵᠦ ᠮᠡᠨᠳᠦᠯᠡᠭᠰᠡᠨ ᠳ᠋ᠦ᠍᠂ ᠮᠠᠨᠴᠤᠷᠭᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠳᠠᠭᠠᠯᠳᠤᠭᠰᠠᠨ ᠬᠡᠳᠦᠨ ᠡᠷᠡ《ᠵᠤᠳᠪᠠ ᠭᠤᠸᠠᠢ ᠰᠠᠢᠨ ᠤᠤ?》 ᠭᠡᠵᠦ ᠵᠡᠷᠭᠡ ᠪᠡᠷ ᠮᠡᠨᠳᠦᠯᠡᠪᠡ᠃
— ᠵᠠ᠂ ᠰᠠᠢᠨ ᠰᠠᠢᠨ᠂ ᠲᠠ ᠨᠠᠷ ᠰᠠᠢᠨ ᠶᠠᠪᠤᠵᠠᠭᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠢᠨᠢᠶᠡᠬᠦ ᠳ᠋ᠦ᠍᠂ ᠡᠯᠪᠡᠭ ᠬᠦᠷᠡᠩ ᠴᠢᠷᠠᠢ ᠨᠢ ᠲᠡᠨᠢᠢᠵᠦ ᠮᠣᠷᠢᠨ ᠴᠠᠭᠠᠨ ᠰᠢᠲᠦ ᠨᠢ ᠢᠷᠡᠰᠬᠢᠨ ᠠᠯᠲᠠᠨ ᠰᠣᠶᠣᠭᠠ ᠠ᠋ᠴᠠ ᠨᠢ ᠭᠡᠷᠡᠯ ᠰᠠᠴᠤᠷᠠᠬᠤ ᠰᠢᠭ᠋ ᠪᠣᠯᠪᠠ᠃
ᠵᠤᠳᠪᠠ ᠮᠡᠢᠷᠡᠨ ᠦ᠌ ᠡᠮᠦᠰᠬᠡᠯ ᠴᠢᠮᠡᠭᠯᠡᠯ ᠦ᠋ᠨ ᠵᠦᠢᠯ ᠨᠢ ᠳᠡᠮᠡᠢ ᠬᠤᠪᠢᠷᠠᠭᠰᠠᠨ ᠶᠠᠩᠵᠤ ᠦᠭᠡᠢ᠃ ᠬᠠᠷᠠ ᠬᠥᠬᠡ ᠲᠡᠷᠯᠢᠭ ᠳᠡᠭᠡᠷᠡ ᠠᠶᠠᠭᠠᠨ ᠴᠢᠨᠡᠭᠡᠨ ᠵᠣᠭᠣᠰᠤᠨ ᠬᠡ ᠲᠡᠢ ᠬᠦᠷᠡᠩ ᠲᠣᠷᠭᠠᠨ ᠬᠠᠨᠵᠢᠶᠠᠷ ᠡᠮᠦᠰᠦᠨ᠂ ᠨᠣᠭᠣᠭᠠᠨ ᠲᠠᠰᠠᠮᠠ ᠲᠠᠢ ᠡᠭᠡᠲᠡᠨ ᠭᠤᠲᠤᠯ ᠢᠰᠬᠦᠯᠵᠦ ᠰᠣᠷᠲᠣᠭᠣᠲᠠᠢ ᠠᠯᠬᠤᠬᠤ ᠨᠢ ᠶᠣᠰᠣᠲᠠᠢ ᠯᠠ ᠪᠥᠬᠡ ᠰᠢᠭ ᠪᠠᠢᠪᠠ᠃ ᠭᠠᠭᠴᠠ ᠪᠠᠷᠠᠭᠤᠨ ᠲᠠᠰᠢᠶᠠ ᠳ᠋ᠠᠭᠠᠨ ᠪᠠᠢᠩᠭᠤ ᠵᠡᠭᠦᠵᠦ ᠶᠠᠪᠤᠳᠠᠭ ᠱ᠌ᠢᠷᠦ ᠰᠢᠭᠢᠳᠬᠡᠭᠰᠡᠨ ᠮᠥᠩᠭᠥᠨ ᠪᠠᠯ ᠲᠠᠢ ᠬᠢᠲᠤᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣᠨ ᠳ᠋ᠤ᠌ ᠰᠢᠷᠢᠨ ᠬᠤᠢ ᠲᠠᠢ ᠠᠬᠤᠷ ᠫᠤᠤ ᠣᠷᠣᠭᠤᠯᠤᠭᠰᠠᠨ ᠨᠢ ᠪᠡᠶᠡ ᠳ᠋ᠦ᠍ᠨᠢ ᠦᠯᠦ ᠵᠣᠬᠢᠴᠠᠨ ᠡᠲᠡᠭᠡᠳ ᠬᠠᠷᠠᠭᠳᠠᠨᠠ᠃
— ᠲᠠ ᠳᠣᠲᠣᠭᠰᠢ ᠪᠠᠨ ᠰᠠᠭᠠᠳᠠ ᠭᠡᠵᠦ ᠬᠥᠮᠦᠰ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠨᠠᠢᠷ ᠲᠠᠯᠪᠢᠨ ᠵᠤᠳᠪᠠ ᠮᠡᠢᠷᠡᠨ ᠢ᠋ ᠬᠦᠨᠳᠦᠯᠡᠨ᠂ ᠬᠣᠢᠮᠣᠷ ᠲᠤ᠌ ᠰᠠᠭᠤᠯᠭᠠᠪᠠ᠃
ᠰᠢᠷᠡᠭᠡ ᠳᠠᠬᠢᠭᠠᠳ ᠡᠯᠪᠡᠭ ᠵᠠᠰᠠᠭᠳᠠᠵᠤ ᠴᠠᠢ ᠴᠤᠤ ᠣᠢᠷᠠᠲᠤᠭᠤᠯᠬᠤ ᠵᠠᠭᠤᠷᠠ ᠵᠤᠳᠪᠠ ᠮᠡᠢᠷᠡᠨ ᠮᠠᠨᠴᠤᠷᠭᠠ ᠲᠠᠢ ᠬᠥᠬᠦᠦᠷ ᠰᠣᠯᠢᠯᠴᠠᠨ ᠮᠡᠨᠳᠦᠯᠡᠪᠡ᠃
— ᠵᠠ ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤ ᠪᠠᠢᠨᠠ ?
— ᠰᠣᠨᠢᠨ ᠴᠤ᠌ ᠶᠠᠭᠤᠮᠠ ᠠᠯᠠᠭᠠ ᠳᠠ ! ᠪᠠᠭᠠ ᠬᠠᠲᠤᠨ ᠤ᠋ ᠵᠠᠰᠠᠭ ᠨᠤᠷᠠᠵᠤ᠂ ᠪᠠᠷᠠᠭᠤᠨᠰᠢ ᠪᠠᠨ ᠵᠢᠯᠢᠴᠢᠬᠡᠯᠡ ᠭᠡᠵᠦ ᠰᠣᠨᠣᠰᠤᠭᠠᠳ ᠭᠡᠷ ᠦ᠋ᠨ ᠪᠠᠷᠠ ᠨᠢᠭᠡᠨ ᠬᠠᠷᠠᠬᠤ ᠴᠤ᠌ ᠶᠤᠮ ᠤᠤ ᠭᠡᠵᠦ ᠶᠠᠪᠤᠨᠠ ᠳᠠ!
— ᠶᠠᠭ ᠳᠠ! ᠲᠡᠷᠡ ᠡᠮᠡ ᠶ᠋ᠢᠨ ᠪᠠᠷᠠ ᠴᠦ᠍ ᠡᠷᠭᠢᠰᠢ ᠦᠭᠡᠢ ᠲᠤᠨᠢᠯᠤᠭᠰᠠᠨ ᠠ᠋! ᠦᠭᠡᠢ᠂ ᠶᠡᠷᠦ ᠨᠢ ᠡᠪᠦᠭᠡᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠶᠡᠬᠡ ᠠᠭᠡ ᠶ᠋ᠢ ᠰᠤᠷᠠᠭᠯᠠᠵᠤ᠂ ᠶᠠᠮᠤᠨ ᠳ᠋ᠠᠭᠠᠨ ᠠᠪᠠᠴᠢᠬᠤ ᠪᠠᠷ ᠶᠠᠮᠤᠨ ᠤ᠋ ᠲᠠᠬᠠᠷ ᠭᠦᠶᠦᠯᠭᠡᠵᠦ᠂ ᠳᠠᠭᠤᠳᠠᠯᠭᠠ ᠶ᠋ᠢᠨ ᠪᠢᠴᠢᠭ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠲᠣᠭᠣᠯᠤᠭᠠ ᠦᠭᠡᠢ ᠤᠤ?
— ᠦᠭᠡᠢ᠃ ᠳᠠᠭᠤᠳᠠᠯᠭᠠ ᠶ᠋ᠢᠨ ᠪᠢᠴᠢᠭ ᠢ᠋ ᠣᠯᠤᠭᠠ ᠦᠭᠡᠢ᠃
— ᠠ᠂ ᠬᠠᠷᠢᠨ ᠤᠤ ! ᠵᠠ ᠲᠡᠢᠮᠦ ᠪᠣᠯ ᠪᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠡᠮᠦᠨᠡ ᠡᠴᠡ ᠴᠢᠮᠠᠶ᠋ᠢ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠬᠦᠨᠳᠦ ᠪᠡᠷ ᠳᠠᠭᠤᠳᠠᠵᠤ ᠪᠠᠢᠭᠠ ᠶ᠋ᠢ ᠵᠢᠩᠬᠢᠨᠢ ᠪᠡᠷ ᠮᠡᠳᠡᠭᠳᠡᠶᠡ!
— ᠵᠠ᠂ ᠭᠢᠯᠠᠢᠯᠠ !
— ᠵᠦᠭᠡᠷ ᠵᠦᠭᠡᠷ! ᠴᠢ ᠶᠡᠷᠦ ᠬᠠᠮᠢᠭᠠ ᠬᠠᠮᠢᠭᠠᠭᠤᠷ ᠶᠠᠪᠤᠭᠠᠳ ᠪᠠᠢᠪᠠ ? ᠶᠡᠬᠡ ᠤᠳᠠᠭᠠᠨ ᠴᠤ᠌ ᠰᠤᠷᠠᠭ ᠲᠠᠰᠤᠷᠠᠯᠠ ᠰᠢᠦ ! ᠭᠡᠵᠦ ᠬᠣᠶᠠᠭᠤᠯᠠ ᠶᠡᠬᠡ ᠯᠡ ᠬᠠᠭᠤᠴᠢ ᠳᠡᠯᠭᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ᠂ ᠪᠠᠭᠠ ᠬᠠᠲᠤᠨ᠂ ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ᠂ ᠬᠠᠷᠠ ᠴᠡᠷᠢᠭ᠂ ᠰᠢᠷᠠ ᠴᠡᠷᠢᠭ ᠶᠠᠭᠠᠬᠢᠯᠠ ᠡᠢᠯᠡ ᠭᠡᠵᠦ ᠬᠦᠦᠷᠨᠢᠨ ᠶᠠᠷᠢᠯᠴᠠᠪᠠ᠃
ᠨᠣᠭᠣᠭᠠᠨᠳᠠᠷᠬᠢ ᠪᠦᠰᠡᠭᠦᠢ ᠠᠯᠲᠠᠨ ᠬᠡ ᠲᠡᠢ ᠮᠣᠳᠣᠨ ᠫᠢᠯᠠᠨ ᠳᠣᠲᠣᠷᠠ ᠴᠢᠳᠬᠤᠭᠰᠠᠨ ᠬᠣᠳᠣᠭᠣᠳᠣ ᠭᠡᠳᠡᠰᠦ᠂ ᠴᠢᠭᠢᠭᠰᠠᠨ ᠠᠪᠢᠰᠤ᠂ ᠪᠣᠷᠣᠯᠠᠭᠤᠯᠤᠭᠰᠠᠨ ᠭᠦᠵᠡᠭᠡ᠂ ᠡᠯᠢᠭᠡ᠂ ᠪᠥᠭᠡᠷᠡ ᠠᠪᠴᠢᠷᠠᠭᠰᠠᠨ ᠳ᠋ᠤ᠌ ᠭᠡᠷ ᠳᠣᠲᠣᠷᠠ ᠴᠣᠷᠣᠢ ᠶ᠋ᠢᠨ ᠱᠥᠯᠦᠨ ᠦ᠌ ᠦᠨᠦᠷ ᠬᠠᠩᠬᠤᠯᠤᠨᠠ᠃
ᠮᠠᠨᠴᠤᠷᠭᠠ ᠬᠣᠨᠢᠨ ᠤ᠋ ᠪᠥᠭᠡᠷᠡ ᠶ᠋ᠢ ᠪᠦᠷᠢᠭᠰᠡᠨ ᠥᠭᠡᠬᠦ ᠶ᠋ᠢ ᠬᠠᠭᠤᠯᠵᠤ ᠡᠮᠬᠦᠭᠰᠡᠨ ᠳ᠋ᠦ᠍ ᠬᠣᠶᠠᠷ ᠵᠠᠪᠠᠵᠢᠨ ᠠ᠋ᠴᠠ ᠨᠢ ᠲᠣᠰᠣ ᠳᠤᠰᠤᠯᠭᠠ᠃ ᠬᠥᠮᠦᠰ ᠴᠢᠳᠬᠤᠭᠰᠠᠨ ᠭᠡᠳᠡᠰᠦ ᠳᠣᠲᠣᠷ ᠠᠮᠲᠠᠷᠬᠠᠨ ᠢᠳᠡᠵᠦ᠂ ᠬᠣᠭᠣᠷᠣᠨᠳᠣᠭᠤᠷ ᠨᠢ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠠᠷᠢᠬᠢ ᠰᠢᠮᠡᠵᠦ ᠰᠠᠭᠤᠬᠤ ᠨᠢ ᠲᠡᠳᠡᠨ ᠳ᠋ᠦ᠍ ᠨᠢᠭᠡᠨ ᠴᠠᠭ ᠤ᠋ᠨ ᠵᠢᠷᠭᠠᠯ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠᠬᠠᠨ᠂ ᠬᠣᠨᠢᠨ ᠤ᠋ ᠮᠥᠴᠢ᠂ ᠰᠢᠭᠦᠰᠦ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠭᠣᠢᠳᠦᠪ ᠲᠠᠷᠭᠤᠨ ᠰᠡᠭᠦᠯ ᠵᠦᠰᠦᠵᠦ ᠬᠥᠮᠦᠨ ᠪᠦᠭᠦᠳᠡ ᠳ᠋ᠦ᠍ ᠰᠡᠭᠦᠯ ᠰᠣᠷᠣᠭᠤᠯᠪᠠ᠃ ᠲᠠᠷᠭᠤᠨ ᠮᠢᠬᠠᠨ ᠳ᠋ᠤ᠌ ᠮᠠᠭᠤ ᠨᠢᠭᠡ ᠶ᠋ᠢ ᠪᠡᠨ ᠨᠢᠭᠡ ᠭᠡᠮ ᠠᠷᠢᠬᠢ ᠪᠠᠷ ᠲᠣᠷᠭᠠᠵᠤ᠂ ᠨᠢᠭᠡ ᠬᠡᠷᠴᠢᠮ ᠡᠯᠢᠭᠡ ᠵᠠᠵᠢᠯᠤᠭᠤᠯᠵᠤ ᠦᠢᠯᠡ ᠶ᠋ᠢ ᠨᠢ ᠪᠠᠷᠠᠨᠠ ᠁
ᠮᠠᠨᠴᠤᠷᠭᠠ ᠲᠠᠷᠭᠤᠨ ᠡᠪᠴᠢᠭᠦᠨ ᠦ᠌ ᠠᠯᠠᠭ ᠬᠡᠷᠰᠡᠩ ᠡᠴᠡ ᠨᠢᠭᠡ ᠵᠦᠰᠦᠮ ᠣᠭᠲᠣᠯᠵᠤ ᠡᠮᠬᠦᠨ ᠱᠠᠵᠢᠭᠢᠨᠠᠲᠠᠯᠠ ᠵᠠᠵᠢᠯᠵᠤ ᠢᠳᠡᠭᠡᠳ᠂ ᠳᠠᠬᠢᠨ ᠬᠣᠶᠠᠷ ᠬᠤᠷᠤᠭᠤ ᠥᠭᠡᠬᠦ ᠲᠡᠢ ᠳᠥᠷᠪᠡᠨ ᠥᠨᠳᠥᠷ ᠢ᠋ ᠢᠳᠡᠵᠦ᠂ ᠶᠠᠰᠤ ᠶ᠋ᠢ ᠨᠢ ᠴᠡᠪᠡᠷᠬᠡᠨ ᠴᠠᠭᠠᠯᠵᠤ ᠮᠥᠯᠵᠢᠴᠢᠬᠡᠭᠡᠳ ᠨᠢᠭᠡ ᠠᠶᠠᠭᠠ ᠱᠦᠯᠤ ᠤᠤᠭᠤᠭᠰᠠᠨ ᠳ᠋ᠤ᠌ ᠶᠡᠬᠡᠳᠡ ᠵᠣᠬᠢᠷᠠᠨ ᠬᠡᠭᠡᠷᠡᠭᠦᠯᠪᠡ᠃
ᠨᠠᠷᠠ ᠪᠠᠷᠠᠭᠤᠨᠰᠢ ᠬᠡᠯᠪᠡᠢᠵᠦ᠂ ᠰᠡᠷᠢᠭᠦᠦ ᠣᠷᠣᠵᠠᠢ᠃ ᠮᠠᠨᠴᠤᠷᠭᠠ ᠭᠣᠢᠳᠦᠪ ᠨᠠᠷ ᠮᠣᠷᠢ ᠪᠠᠨ ᠪᠠᠷᠢᠯᠠᠨ ᠲᠡᠨᠳᠡ ᠡᠴᠡ ᠬᠥᠳᠡᠯᠪᠡ᠃
ᠠᠢᠷᠠᠭ ᠤᠤᠭᠤᠵᠤ᠂ ᠲᠠᠷᠭᠤᠨ ᠮᠢᠬᠠ ᠬᠦᠯᠬᠦᠨ᠂ ᠬᠠᠨᠳᠠ ᠱᠦᠯᠤ ᠤᠤᠭᠤᠭᠰᠠᠨ ᠤ᠋ ᠴᠤ᠌ ᠶᠤᠮ ᠤᠤ᠂ ᠬᠡᠢ ᠬᠣᠶᠠᠩ ᠲᠠᠷᠬᠠᠵᠤ ᠪᠡᠶᠡ ᠬᠥᠩᠭᠡᠷᠡᠨ᠂ ᠰᠡᠷ ᠰᠡᠷ ᠰᠡᠷᠴᠢᠭᠢᠨᠡᠬᠦ ᠰᠡᠷᠢᠭᠦᠨ ᠵᠢᠪᠠᠷ ᠲᠤ᠌ ᠮᠣᠷᠢᠨ ᠳᠡᠭᠡᠷᠡ ᠪᠠᠨ ᠶᠥᠷᠭᠡᠭᠦᠯᠵᠦ ᠶᠠᠪᠤᠬᠤ ᠶᠠᠭᠤᠲᠠᠢ ᠵᠢᠷᠭᠠᠯ ᠠᠵᠢ! ᠭᠡᠵᠦ ᠵᠢᠷᠭᠠᠯ ᠳ᠋ᠤ᠌ ᠲᠠᠰᠢᠭᠤᠷᠠᠭᠰᠠᠨ ᠮᠠᠨᠴᠤᠷᠭᠠ ᠭᠡᠳᠡᠷᠭᠦ ᠪᠡᠨ ᠬᠠᠷᠠᠪᠠᠯ ᠨᠥᠭᠦᠭᠡ ᠬᠡᠳᠦ ᠨᠢ ᠲᠡᠭᠦᠨ ᠦ᠌ ᠮᠣᠷᠢᠨ ᠤ᠋ ᠲᠣᠭᠣᠰᠣᠨ ᠳ᠋ᠤ᠌ ᠪᠠᠭᠯᠠᠷᠠᠵᠤ ᠬᠠᠷᠠᠭᠳᠠᠬᠤ ᠳ᠋ᠤ᠌《ᠠᠬᠠ ᠳᠡᠭᠦᠦ ᠶ᠋ᠢᠨ ᠪᠠᠷᠢᠯᠳᠤᠯᠭᠠ ᠳ᠋ᠤ᠌ ᠵᠢᠷᠦᠬᠡ ᠪᠡᠨ ᠰᠤᠭᠤᠯᠵᠤ ᠶᠠᠪᠤᠭᠠ ᠶᠤᠮ ᠳᠠ ! ᠬᠥᠭᠡᠷᠦᠬᠦᠢ ! 》 ᠭᠡᠵᠦ ᠪᠣᠳᠣᠬᠤ ᠡᠡᠴᠠ ᠡᠳᠡᠨᠥᠰ ᠦ᠋ᠨ ᠢ᠋ᠶ᠋ᠡᠨ ᠬᠠᠨᠢ ᠲᠦᠰᠢᠭ ᠲᠦ᠍ ᠰᠡᠳᠬᠢᠯ ᠨᠢᠭᠡ ᠯᠡ ᠴᠠᠳᠬᠤᠯᠠᠩ᠃
ᠡᠳᠡᠨᠦᠰ ᠤᠯᠠᠭᠠᠨ ᠴᠢᠯᠠᠭᠤᠲᠤ ᠶ᠋ᠢᠨ ᠬᠣᠰᠢᠭᠤ ᠶ᠋ᠢ ᠳᠤᠭᠤᠢᠯᠠᠵᠤ ᠨᠢᠭᠡ ᠬᠡᠰᠡᠭ ᠳᠣᠪᠲᠣᠯᠭᠠᠭᠰᠠᠨ ᠢ᠋ᠶ᠋ᠠᠨ ᠳᠣᠷᠣᠭᠰᠢ ᠪᠠᠨ ᠰᠢᠷᠠ ᠵᠠᠮ ᠤᠷᠤᠭᠤ ᠣᠷᠣᠪᠠ᠃
ᠵᠢᠷᠭᠠᠬᠤ ᠨᠠᠷᠠᠨ ᠤ᠋ ᠤᠯᠠᠪᠤᠷ ᠲᠤᠶᠠᠭᠠ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠡᠯᠢᠭᠡᠨ ᠬᠦᠷᠡᠩ ᠬᠠᠳᠠ ᠶ᠋ᠢ ᠤᠯᠠᠮ ᠤᠯᠠᠢᠯᠭᠠᠨ ᠪᠤᠳᠤᠭᠯᠠᠬᠤ ᠳ᠋ᠤ᠌᠂ ᠶᠠᠭᠠᠨ ᠤᠯᠠᠭᠠᠨ ᠱ᠌ᠢᠷᠤ ᠰᠢᠭ ᠬᠣᠯᠠ ᠠ᠋ᠴᠠ ᠭᠢᠯᠠᠯᠵᠠᠵᠤ ᠬᠠᠷᠠᠭᠳᠠᠨᠠ᠃ ᠬᠠᠳᠠ ᠲᠠᠢ ᠡᠩᠭᠡᠷ ᠬᠠᠵᠠᠭᠤ ᠶ᠋ᠢ ᠡᠮᠵᠢᠵᠦ ᠪᠦᠷᠢᠭᠰᠡᠨ ᠠᠷᠴᠠ ᠠᠭᠠᠷᠤ ᠮᠣᠳᠣᠳ ᠨᠢ ᠢᠯᠳᠠᠮᠬᠠᠨ ᠲᠤᠰᠤᠭᠰᠠᠨ ᠨᠠᠷᠠᠨ ᠤ᠋ ᠤᠯᠠᠪᠤᠷ ᠲᠤᠶᠠᠭᠠᠨ ᠳ᠋ᠤ᠌ ᠨᠣᠮᠢᠨ ᠤᠭᠶᠤ ᠰᠢᠭ᠋ ᠴᠡᠯᠭᠡᠷᠡᠬᠦ ᠠᠵᠢ᠃
ᠲᠡᠷᠲᠡᠭᠡ ᠬᠠᠨ ᠮᠤᠠ ᠶ᠋ᠢᠨ ᠠᠭᠤᠯᠠ ᠲᠤᠯᠤᠭᠠᠳ ᠤ᠋ᠨ ᠳᠣᠲᠣᠷᠠ ᠣᠨᠴᠠ ᠱᠤᠷᠤᠯᠵᠠᠨ ᠬᠠᠷᠠᠭᠳᠠᠬᠤ᠂ ᠮᠤᠨᠠ ᠶ᠋ᠢᠨ ᠰᠢᠷᠠ ᠣᠷᠣᠢ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠶ᠋ᠢ ᠪᠡᠶᠡ ᠳ᠋ᠡᠭᠡᠨ ᠨᠥᠮᠥᠷᠴᠦ ᠪᠤᠮᠠᠨ ᠰᠠᠶᠠ ᠠᠯᠲᠠ ᠮᠥᠩᠭᠥᠨ ᠴᠥᠪᠥᠳᠡᠯ ᠰᠠᠴᠤᠷᠠᠭ ᠢ᠋ᠶ᠋ᠠᠨ ᠤᠷᠠᠳ ᠨᠤᠲᠤᠭ ᠲᠠᠭᠠᠨ ᠰᠠᠴᠤᠯᠠᠨ ᠢᠪᠡᠭᠡᠬᠦ ᠮᠡᠲᠦ ᠭᠢᠯᠠᠯᠵᠠᠬᠤ ᠨᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠰᠦᠷ ᠰᠦᠯᠳᠡ ᠪᠣᠯᠵᠤ ᠬᠠᠨᠠᠢᠨ ᠰᠦᠨᠳᠡᠷᠯᠡᠨᠡ᠃
ᠮᠣᠷᠢᠨ ᠤ᠋ ᠳᠡᠪᠬᠢᠶᠠᠨ ᠳ᠋ᠤ᠌ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠪᠤᠲᠠ ᠪᠣᠷᠣᠯᠵᠠᠢ ᠳᠠᠷᠠᠰᠤ ᠰᠣᠨᠳᠤᠤᠯᠠ᠂ ᠥᠨᠳᠥᠷ ᠤᠷᠭᠤᠭᠰᠠᠨ ᠯᠤᠤᠯᠢ᠂ ᠬᠠᠯᠠᠭᠠᠢ ᠲᠤᠩᠭᠤ ᠳᠤᠩᠭᠤ ᠴᠠᠬᠢᠯᠠᠨ ᠣᠢᠴᠢᠬᠤ ᠮᠡᠲᠦ᠃ ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠬᠦᠯᠦᠭ ᠦ᠋ᠨ ᠲᠤᠭᠤᠷᠠᠢ ᠳᠣᠣᠭᠤᠷ ᠤᠷᠤᠰᠤᠨ ᠣᠳᠬᠤ ᠰᠢᠭ᠋ ᠵᠢᠷᠪᠢᠯᠵᠡᠨᠡ᠃ ᠮᠣᠷᠢᠳ ᠤ᠋ᠨ ᠲᠦᠪᠡᠷᠭᠡᠨ ᠳ᠋ᠦ᠍ ᠬᠠᠶᠠ ᠪᠢᠲᠡᠭᠦᠦ ᠳᠡᠷᠡᠰᠦᠨ ᠡᠴᠡ ᠵᠡᠭᠡᠷᠡ ᠨᠦ᠋ᠭᠦᠳ ᠦᠷᠭᠦᠵᠤ᠂ ᠳᠡᠷᠡᠰᠦᠨ ᠦ᠌ ᠴᠠᠭᠠᠨᠠᠬᠢ ᠨᠠᠮᠤᠭ ᠭᠠᠵᠠᠷ ᠪᠥᠭᠡᠮᠨᠡᠷᠡᠯᠳᠦᠵᠦ ᠵᠣᠭᠰᠣᠨ᠂ ᠬᠠᠵᠠᠭᠤ ᠪᠠᠷ ᠨᠢ ᠱᠤᠩᠭᠤᠯᠠᠨ ᠳᠠᠪᠬᠢᠯᠳᠤᠬᠤ ᠮᠤᠷᠢᠳᠠᠳ ᠢ᠋ ᠡᠷᠭᠢᠵᠦ ᠬᠠᠷᠠᠭᠠᠳ ᠭᠠᠢᠬᠠᠯᠳᠤᠨᠠ᠃
ᠢᠩ ᠦ᠋ᠨ ᠴᠢᠯᠠᠭᠤᠲᠤ① ᠶ᠋ᠢᠨ ᠣᠪᠣᠭᠠ ᠬᠦᠷᠬᠦ ᠳ᠋ᠦ᠍᠂《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠴᠢᠨᠳᠠᠮᠤᠨᠢ ᠶᠢᠨ ᠣᠪᠣᠭᠠ ᠠᠯᠤᠰ ᠠ᠋ᠴᠠ ᠬᠥᠬᠡᠷᠡᠵᠦ ᠬᠠᠷᠠᠭᠳᠠᠬᠤ ᠳ᠋ᠤ᠌᠂ ᠮᠠᠨᠴᠤᠷᠭᠠ ᠶᠢᠨ ᠳᠣᠲᠣᠷᠠ ᠨᠤᠲᠤᠭ ᠤᠰᠤ ᠨᠢ ᠶᠡᠷᠦ ᠪᠤᠰᠤ ᠶᠢᠨ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ᠂ ᠡᠵᠢ ᠠᠪᠤ᠂ ᠡᠬᠡᠨᠡᠷ ᠬᠡᠦᠬᠡᠳ ᠨᠢ ᠡᠷᠢᠭᠳᠡᠨᠡ᠁ ᠴᠢᠨᠳᠠᠮᠤᠨᠢ ᠶᠢᠨ ᠣᠪᠣᠭᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠬᠠᠰ ᠴᠠᠭᠠᠨ ᠰᠤᠪᠤᠷᠭᠠ ᠲᠠᠰᠢᠬᠤ ᠨᠠᠷᠠᠨ ᠤ᠋ ᠤᠯᠠᠪᠤᠷ ᠲᠤᠶᠠᠭᠠᠨ ᠳ᠋ᠤ᠌ ᠭᠢᠯᠠᠰᠬᠤ ᠳ᠋ᠤ᠌᠂ ᠮᠠᠨᠴᠤᠷᠭᠠ ᠳᠣᠲᠣᠷᠠ ᠪᠠᠨ《ᠱ᠌ᠢᠷᠦᠨ ᠤᠯᠠᠭᠠᠨ ᠬᠠᠳᠠ᠂ ᠣᠭᠶᠣᠠ ᠨᠣᠭᠣᠭᠠᠨ ᠠᠷᠴᠠ᠂ ᠬᠠᠰ ᠴᠠᠭᠠᠨ ᠰᠤᠪᠤᠷᠭᠠ᠂ ᠮᠠᠩᠨᠤᠭ ᠨᠣᠮᠢᠨ ᠲᠠᠯᠠ ᠲᠠᠢ ᠵᠢᠷᠤᠭ ᠰᠢᠭ᠋ ᠰᠠᠢᠬᠠᠨ ᠨᠤᠲᠤᠭ ᠲᠠᠭᠠᠨ ᠡᠵᠡᠨ ᠪᠣᠯᠵᠤ ᠶᠠᠪᠤᠬᠤ ᠰᠢᠭ᠋ ᠵᠢᠷᠭᠠᠯ ᠬᠠᠮᠢᠭᠠ ᠪᠠᠢᠬᠤ ᠪᠣᠢ? ᠬᠥᠮᠦᠨ ᠦ᠌ ᠬᠤᠪᠢ ᠲᠠᠪᠢᠯᠠᠩ ᠳ᠋ᠤ᠌ ᠤᠷᠤᠭᠤᠳᠠᠵᠤ ᠶᠠᠪᠤᠭᠰᠠᠨ ᠴᠠᠭ ᠪᠠᠢᠬᠤ ᠳ᠋ᠤ᠌ ᠥᠭᠡᠳᠡᠯᠡᠳᠡᠭ ᠴᠠᠭ ᠪᠠᠰᠠ ᠢᠷᠡᠳᠡᠭ ᠪᠠᠢᠨᠠ ᠰᠢᠦ! ᠡᠢᠮᠦ ᠰᠠᠢᠬᠠᠨ ᠨᠤᠲᠤᠭ ᠤᠰᠤ ᠪᠠᠨ ᠠᠯᠢ ᠨᠢᠭᠡᠨ ᠬᠠᠷᠢ ᠶ᠋ᠢᠨ ᠬᠦᠢᠲᠡᠨ ᠠᠮᠢᠰᠬᠤᠯ ᠲᠠᠢ ᠬᠥᠮᠦᠰ ᠦ᠋ᠨ ᠬᠠᠷᠠ ᠰᠠᠪᠠᠷ ᠲᠤ ᠲᠠᠯᠬᠢᠭᠤᠯᠵᠤ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ᠁ ᠲᠤᠰᠠᠯᠠᠭᠴᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠬᠡ ᠥᠮᠥᠭ ᠲᠤ ᠮᠠᠨᠴᠤᠷᠭᠠ ᠬᠦᠦ ᠪᠠᠰᠠ ᠭᠢᠯᠠᠷᠠᠵᠤ ᠶᠠᠪᠤᠨᠠ ᠳᠠ! ᠮᠠᠷᠭᠠᠰᠢ ᠨᠠᠷᠠ ᠭᠠᠷᠬᠤ ᠳ᠋ᠤ᠌ ᠵᠠᠪᠳᠤᠵᠤ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠪᠠᠭᠤᠵᠤ ᠣᠴᠢᠬᠤ ᠳ᠋ᠤ᠌ ᠶᠠᠮᠠᠷᠬᠠᠨ ᠰᠢᠤᠬᠠᠨ ᠰᠠᠨᠠᠭᠳᠠᠳᠠᠭ ᠪᠣᠯ? ᠭᠡᠵᠦ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠣᠳᠣᠬᠤ ᠳ᠋ᠠᠭᠠᠨ᠄
ᠱᠠᠭᠠᠵᠢᠩᠳᠣ ᠶᠢᠨ ᠳᠠᠪᠠᠭᠠ ᠶ᠋ᠢ
ᠰᠠᠭᠠᠷᠠᠯ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠳᠤᠭᠤᠯᠤᠶᠠ ᠳᠠ
ᠱᠠᠵᠢᠨ ᠪᠤᠷᠬᠠᠨ ᠬᠣᠶᠠᠷ ᠢ᠋ ᠪᠡᠨ
ᠣᠷᠣᠢ ᠳᠡᠭᠡᠷᠡ ᠪᠡᠨ ᠰᠢᠲᠦᠶᠡ ᠳᠡ!
ᠪᠤᠷᠭᠠᠰᠤᠲᠤ ᠶᠢᠨ ᠳᠠᠪᠠᠭᠠ ᠶ᠋ᠢ
ᠪᠤᠭᠤᠷᠤᠯ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠳᠣᠭᠣᠯᠤᠶᠠ ᠳᠠ!
ᠪᠤᠷᠬᠠᠨ ᠪᠠᠭᠰᠢ ᠬᠣᠶᠠᠷ ᠢ᠋ ᠪᠡᠨ
ᠣᠷᠣᠢ ᠳᠡᠭᠡᠷᠡ ᠪᠡᠨ ᠰᠢᠲᠦᠶᠡ ᠳᠡ!
ᠡᠯᠡᠰᠦᠲᠡᠢ ᠳᠠᠪᠠᠭᠠ ᠶ᠋ᠢ
ᠡᠮᠨᠢᠭ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠲᠤᠭᠤᠯᠤᠶᠠ ᠳᠠ !
ᠡᠵᠢ ᠠᠪᠤ ᠬᠣᠶᠠᠷ ᠢ᠋ ᠪᠡᠨ
ᠣᠷᠣᠢ ᠳᠡᠭᠡᠷᠡ ᠪᠡᠨ ᠰᠢᠲᠦᠶᠡ ᠳᠡ ! ᠭᠡᠵᠦ ᠮᠠᠨᠴᠤᠷᠭᠠ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠲᠠᠰᠢᠶᠠᠯᠳᠠᠨ ᠰᠠᠭᠤᠵᠤ ᠰᠢᠷᠤᠨᠩᠬᠠᠢᠯᠠᠬᠤ ᠳ᠋ᠤ᠌᠂ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠭᠣᠢᠳᠤᠪ ᠰᠣᠳᠨᠠᠮ ᠨᠠᠷ ᠴᠤ᠌ ᠠᠶᠠ ᠬᠠᠪᠰᠤᠷᠭᠠᠨᠠ ᠁
ᠬᠠᠷᠠ ᠪᠤᠳᠠᠭᠠᠲᠤ ᠶ᠋ᠢᠨ ᠵᠤ ᠬᠦᠷᠬᠦ ᠳ᠋ᠦ᠍ ᠫᠠᠳ ᠬᠠᠷᠠᠩᠭᠤᠢ ᠪᠣᠯᠵᠠᠢ᠃
— ᠭᠣᠢᠳᠤᠪ ᠠ᠋! ᠰᠣᠳᠨᠠᠮ ᠠ᠋ ! ᠮᠠᠨᠤᠰ ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠳᠦᠭᠵᠢᠷᠵᠠᠪ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠣᠷᠣᠭᠠᠳ ᠭᠠᠷᠤᠶᠠ! ᠮᠣᠷᠢᠳ ᠢ᠋ᠶ᠋ᠠᠨ ᠵᠢᠭᠠᠯ ᠵᠢᠭᠤᠯ ᠡᠪᠡᠰᠦ ᠬᠠᠵᠠᠯᠠᠭᠤᠯᠵᠤ ᠠᠪᠤᠭᠠᠳ᠂ ᠵᠢᠭᠠᠬᠠᠨ ᠲᠤᠭ ᠬᠢᠭᠡᠳ ᠭᠠᠷᠬᠤ ᠤᠤ ᠳᠡ ? ᠭᠡᠵᠦ ᠮᠠᠨᠴᠤᠷᠭᠠ ᠬᠡᠯᠡᠭᠰᠡᠨ ᠳ᠋ᠦ᠍ ᠭᠣᠢᠳᠤᠪ᠄
— ᠵᠠ᠂ ᠲᠡᠭᠡᠶᠡ! ᠭᠡᠵᠦ ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠲᠦᠭᠵᠢᠷᠵᠡᠪ ᠭᠤᠸᠠᠢ ᠶ᠋ᠢᠨ ᠬᠢ ᠤᠷᠤᠭᠤ ᠳᠥᠭᠥᠪᠡ᠃
ᠲᠦᠭᠵᠢᠷᠵᠡᠪ ᠭᠤᠸᠠᠢ ᠭᠡᠭᠴᠢ ᠭᠠᠭᠴᠠ ᠪᠡᠶᠡ ᠡᠪᠦᠭᠡᠨ᠃ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢᠨ ᠲᠡᠮᠡᠭᠡᠴᠢᠨ᠃ ᠠᠯᠢᠭ ᠱᠠᠯᠢᠭ ᠦᠯᠢᠭᠡᠷ ᠶᠠᠷᠢᠬᠤ ᠳᠤᠷᠠᠲᠠᠢ᠂ ᠬᠥᠮᠦᠨ ᠬᠠᠷᠠ ᠶ᠋ᠢᠨ ᠡᠮᠵᠡᠭ ᠰᠢᠨᠵᠢ ᠶ᠋ᠢ ᠨᠢ ᠪᠠᠷᠢᠵᠤ ᠱᠣᠣᠯᠠᠵᠤ ᠠᠳᠠᠯᠢᠬᠠᠨ ᠳᠠᠭᠤᠷᠢᠶᠠᠭᠠᠳ ᠬᠥᠮᠦᠨ ᠢᠨᠢᠶᠡᠯᠭᠡᠵᠦ ᠶᠠᠪᠤᠳᠠᠭ ᠱᠣᠭ ᠤ᠋ᠨ ᠡᠪᠦᠭᠡᠨ ᠠᠵᠢ᠃ ᠮᠠᠨᠴᠤᠷᠭᠠ ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠲᠡᠢ ᠨᠠᠢᠷ ᠵᠤᠵᠠᠭᠠᠨ ᠪᠠᠢᠳᠠᠭ᠃ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠵᠠᠮ ᠳᠠᠭᠠᠷᠢᠵᠤ ᠭᠠᠷᠬᠤ ᠪᠣᠯᠭᠠᠨ ᠵᠠᠪᠠᠯ ᠡᠨᠡᠭᠦᠷ ᠣᠷᠣᠵᠤ᠂ ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠳ᠋ᠦ᠍ ᠬᠣᠶᠠᠷ ᠪᠣᠳᠣᠩ ᠭᠠᠰᠢᠭᠤᠨ ᠬᠠᠷᠠ ᠥᠭᠴᠦ ᠢᠨᠢᠶᠡᠳᠦ ᠲᠡᠢ ᠬᠠᠨᠢᠶᠠᠳᠤ ᠲᠠᠢ ᠵᠣᠭᠣᠭ ᠢ᠋ ᠨᠢ ᠰᠣᠨᠣᠰᠤᠨ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠵᠦ ᠰᠠᠭᠤᠬᠤ ᠳᠤᠷᠠᠲᠠᠢ᠃
ᠮᠠᠨᠴᠤᠷᠭᠠ ᠡᠳᠡᠨᠦᠰ ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠦ᠌ ᠬᠠᠶᠠᠭᠠᠨ ᠳ᠋ᠤ᠌ ᠪᠠᠭᠤᠬᠤ ᠳ᠋ᠤ᠌᠂ ᠨᠣᠬᠠᠢ ᠨᠢ ᠬᠣᠯᠠ ᠲᠡᠷᠲᠡᠭᠡ ᠭᠠᠰᠠᠯᠤᠨ ᠭᠠᠰᠠᠯᠤᠨ ᠬᠣᠷᠭᠣᠭᠣᠬᠤ ᠠ᠋ᠴᠠ ᠪᠢᠰᠢ᠂ ᠭᠡᠷ ᠢ᠋ᠶ᠋ᠡᠨ ᠬᠠᠪᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠡᠨᠡ ᠠᠢᠯ ᠳ᠋ᠤ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠤᠴᠢᠷ ᠪᠣᠯᠵᠠᠢ ᠭᠡᠳᠡᠭ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃ ᠮᠠᠢᠵᠢᠭᠢ ᠪᠣᠷᠣ ᠭᠡᠷ ᠦ᠋ᠨ ᠡᠭᠦᠳᠡ ᠨᠢ ᠵᠠᠳᠠᠭᠠᠢ ᠣᠩᠭᠣᠢᠵᠤ ᠪᠠᠢᠪᠠ᠃ ᠴᠢᠮᠡᠭᠡ ᠠᠨᠢᠷ ᠠᠯᠠᠭᠠ᠃
— ᠲᠦᠭᠵᠢᠷ ᠭᠤᠸᠠᠢ ᠠ᠋! ᠭᠡᠵᠦ ᠮᠠᠨᠴᠤᠷᠭᠠ ᠲᠦᠭᠵᠢᠷᠵᠡᠪ ᠭᠤᠸᠠᠢ ᠶ᠋ᠢ ᠦᠭᠡᠢᠯᠡᠨ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠬᠠᠷᠢᠭᠤ ᠳᠠᠭᠤ ᠦᠭᠡᠢ᠃
ᠭᠣᠢᠳᠤᠪ ᠮᠠᠭᠤ ᠭᠡᠷ ᠦ᠋ᠨ ᠣᠩᠭᠣᠷᠬᠠᠢ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠬᠦ ᠳ᠋ᠦ᠍᠂ ᠭᠡᠷ ᠳᠣᠲᠣᠷᠠ ᠬᠣᠨᠤᠩ ᠬᠣᠨᠤᠩ ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠱᠤᠤᠬᠢᠲᠤᠨᠠᠨ ᠳᠤᠤᠭᠠᠷᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠳ᠋ᠤ᠌ ᠴᠦᠳᠡᠩ ᠵᠢᠷᠤᠨ ᠱᠠᠭᠠᠢᠪᠠᠯ᠂ ᠡᠪᠦᠭᠡᠨ ᠲᠤᠯᠭᠠᠨ ᠤ᠋ ᠪᠠᠨ ᠠᠷᠤ ᠳ᠋ᠤ᠌ ᠬᠦᠯᠢᠶᠡᠰᠦᠲᠡᠢ ᠬᠡᠪᠲᠡᠨᠡ᠃ ᠪᠥᠰᠡᠨ ᠦ᠌ ᠬᠢᠨᠢ ᠦᠵᠦᠭᠦᠷ ᠢ᠋ ᠠᠮᠠᠨ ᠳ᠋ᠤᠨᠢ ᠴᠢᠬᠢᠵᠦ ᠣᠷᠬᠢᠭᠰᠠᠨ ᠠ᠋ᠴᠠ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠬᠦ ᠬᠥᠯ ᠦᠨ ᠴᠢᠮᠡᠭᠡ ᠪᠡᠷ《ᠠᠮᠢ ᠠᠪᠤᠷᠠᠭᠠᠴᠢ ᠠ᠋!》 ᠭᠡᠵᠦ ᠪᠠᠷᠬᠢᠷᠠᠬᠤ ᠳ᠋ᠦ᠍ᠨᠢ ᠵᠥᠪ ᠠᠪᠢᠶᠠ ᠰᠣᠨᠣᠰᠳᠠᠳᠠᠭ ᠦᠭᠡᠢ ᠬᠣᠨᠣᠩ ᠬᠣᠨᠣᠩ ᠭᠡᠵᠦ ᠳᠠᠷᠤᠭᠳᠠᠭᠰᠠᠨ ᠰᠢᠳᠦᠯᠡᠩ ᠰᠢᠭ ᠪᠢᠲᠡᠭᠦᠬᠡᠨ ᠮᠠᠭᠤ ᠳᠠᠭᠤ ᠭᠠᠷᠤᠭᠰᠠᠨ ᠨᠢ ᠲᠡᠷᠡ!
ᠭᠣᠢᠳᠤᠪ᠂ ᠡᠪᠦᠭᠡᠨ ᠦ᠌ ᠬᠦᠯᠢᠶᠡᠰᠦ ᠪᠥᠭᠯᠡᠭᠡᠰᠦ ᠶ᠋ᠢ ᠠᠯᠳᠠᠷᠠᠭᠠᠨ ᠠᠪᠴᠤ ᠡᠪᠦᠭᠡᠨ ᠢ᠋ ᠡᠷᠭᠦᠨ ᠪᠤᠰᠬᠠᠪᠠᠯ᠄
— ᠶᠣ᠂ ᠶᠣᠬᠣ! ᠭᠡᠵᠦ ᠤᠷᠲᠤᠬᠠᠨ ᠠᠮᠢᠰᠬᠤᠪᠠ᠃
— ᠳᠦᠭᠵᠢᠷ ᠭᠤᠸᠠᠢ᠁ ᠲᠠ ᠴᠢᠨᠢ ᠶᠠᠭᠠᠬᠢᠴᠢᠬᠠᠪᠠ? ᠭᠡᠵᠦ ᠮᠠᠨᠴᠤᠷᠭᠠ ᠭᠠᠢᠬᠠᠰᠢᠷᠠᠨ《ᠰᠠᠢᠨ ᠤᠤ ᠲᠠ?》 ᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠩᠭᠢᠵᠦ ᠯᠡ ᠮᠡᠨᠳᠦ ᠠᠰᠠᠭᠤᠪᠠ᠃
— ᠣ᠂ ᠬᠥᠭᠡᠷᠦᠬᠦᠢ! ᠮᠠᠨᠴᠤᠷᠭᠠ ᠮᠢᠨᠢ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠳ᠋ᠡᠭᠡᠨ ᠮᠠᠭᠤ ᠦᠬᠦᠳᠡᠭ ᠦᠭᠡᠢ ᠵᠣᠪᠠᠯᠭᠠ ᠰᠡᠷᠪᠡᠢᠭᠡᠳ ᠪᠣᠰᠤᠯᠠ᠁ ᠵᠠ᠂ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠮᠠᠨᠴᠤᠷᠭᠠ ᠠ᠋! ᠨᠠᠭᠠᠰᠢ ᠪᠠᠨ ᠰᠠᠭᠤ᠂ ᠰᠠᠭᠤ! ᠭᠡᠵᠦ ᠣᠷᠣ ᠰᠢᠷᠢᠳᠡᠭ᠂ ᠰᠢᠷᠡᠭᠡ ᠱᠠᠲᠤ᠂ ᠠᠶᠠᠭᠠ ᠱᠠᠭᠠᠵᠠᠩ ᠵᠡᠷᠭᠡ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠵᠦᠢᠯ ᠢ᠋ᠶ᠋ᠡᠨ ᠲᠢᠭᠯᠡᠬᠦ ᠭᠡᠵᠦ ᠮᠤᠩᠭᠠᠨᠢᠪᠠ᠃
— ᠦᠭᠡᠢ᠂ ᠶᠠᠭᠠᠬᠢᠴᠢᠬᠠᠭᠠ ᠨᠢ ᠡᠨᠡ ᠪᠣᠢ?
— ᠮᠠᠭᠤ ᠰᠠᠢᠨ ᠵᠠᠨᠠᠭ ᠤ᠋ᠳ ᠴᠢᠭᠢᠶᠡᠲᠦᠷᠦᠦ! ᠡᠷᠡ ᠰᠤᠪᠠᠢ ᠲᠡᠮᠡᠭᠡᠳ ᠢ᠋ ᠮᠢᠨᠢ ᠰᠠᠯᠭᠠᠵᠤ ᠬᠥᠭᠡᠭᠡᠭᠡᠳ ᠠᠷᠢᠯᠴᠢᠬᠠᠬᠤ ᠰᠢᠦ ᠪᠣᠯᠤᠯᠠ᠁
— ᠶᠠᠮᠠᠷᠬᠠᠨ ᠰᠢᠦ ᠵᠠᠨᠠᠭ ᠤ᠋ᠳ ᠪᠣᠢ?
— ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ! ᠫᠤᠤ ᠵᠡᠪᠰᠡᠭ ᠲᠠᠢ ᠯᠠ ᠤᠬᠠᠭᠠᠨ ᠲᠠᠢ᠃ ᠵᠢᠰᠦ ᠴᠢᠷᠠᠢ ᠨᠢ ᠶᠡᠷᠦ ᠲᠣᠳᠣ ᠲᠠᠨᠢᠭᠳᠠᠭᠰᠠᠨ ᠦᠭᠡᠢ᠃
— ᠣᠯᠠᠭᠤᠯᠠ ᠤᠤ?
— ᠲᠠᠪᠤ ᠵᠢᠷᠭᠤᠭᠠᠨ ᠬᠥᠮᠦᠨ ᠪᠣᠯᠤᠯᠲᠠᠢ᠃ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠯᠴᠠᠬᠤ ᠶ᠋ᠢ ᠪᠢ ᠶᠡᠷᠦ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠲᠦᠷᠦᠭᠦᠦ ᠨᠢ ᠪᠣᠯᠤᠯᠲᠠᠢ ᠰᠦᠪᠡᠭᠡ ᠲᠤᠯᠤᠭᠰᠠᠨ ᠵᠠᠨᠠᠭ ᠤ᠋ᠨ《ᠡᠬᠡ ᠶ᠋ᠢᠨ ᠬᠢᠨᠢ ᠤᠩᠬᠤᠷ᠁》 ᠭᠡᠵᠦ ᠭᠤᠷᠪᠠᠨ ᠦᠭᠡ ᠬᠡᠯᠡᠬᠦ ᠦᠭᠡᠢ ᠢᠩᠭᠢᠵᠦ ᠨᠢᠭᠡ ᠳᠠᠪᠤᠰᠤᠯᠠᠨ ᠬᠠᠷᠢᠶᠠᠳᠠᠭ ᠢ᠋ ᠨᠢ ᠣᠢᠯᠠᠭᠠᠯᠠ ᠭᠡᠰᠡᠨ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠬᠠᠷᠠ ᠨᠢᠳᠦᠲᠦ! ᠴᠢᠭᠢᠶᠡᠲᠦᠷᠦᠦ ᠬᠤᠢ! ᠡᠳᠡᠨᠥᠰ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠪᠠ? ᠭᠡᠵᠦ ᠠᠰᠠᠭᠤᠯᠠ᠃
— ᠬᠠᠢ᠂ ᠬᠦᠢ! ᠭᠡᠳ ᠲᠡᠮᠡᠭᠡ ᠬᠥᠭᠡᠭᠡᠬᠦ ᠳᠠᠭᠤᠨ ᠵᠡᠭᠦᠨ ᠡᠮᠦᠨᠡᠰᠢ ᠬᠠᠨᠳᠤᠭᠰᠠᠨ ᠲᠥᠯᠥᠪᠲᠡᠢ᠃ ᠲᠡᠭᠡᠭᠡᠳ ᠴᠣᠬᠣᠮ ᠬᠠᠮᠢᠭᠠᠰᠢ ᠪᠠᠨ ᠵᠢᠯᠢᠢᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ ᠠ᠋! ᠪᠢ ᠴᠢᠨᠢ ᠤᠶᠠᠭᠠ ᠬᠦᠯᠢᠶᠡᠰᠦᠲᠡᠢ᠂ ᠪᠠᠰᠠ ᠲᠡᠭᠡᠭᠡᠳ ᠠᠮᠠᠨ ᠳ᠋ᠠᠭᠠᠨ ᠲᠠᠭᠯᠠᠭᠠ ᠪᠥᠭᠯᠡᠭᠡᠰᠦᠲᠡᠢ ᠶᠦᠮ ᠴᠢᠨᠢ᠁
— ᠶᠠᠪᠤᠭᠠᠳ ᠤᠳᠠᠪᠠ ᠤᠤ?
— ᠨᠢᠭᠡ ᠴᠠᠢ ᠴᠢᠨᠠᠬᠤ ᠵᠠᠢ ᠪᠣᠯᠤᠭᠰᠠᠨ ᠳᠠ! ᠶᠠᠪᠤᠭᠰᠠᠨ ᠬᠥᠮᠦᠨ ᠶᠠᠭᠤᠨ ᠤᠳᠠᠨᠠ ᠪᠣᠢ?! ᠨᠡᠯᠢᠶᠡᠳ ᠵᠠᠮ ᠬᠣᠷᠣᠭᠠᠭᠰᠠᠨ ᠪᠠᠢᠯᠭᠦᠢ!
— ᠡᠨᠡ ᠬᠠᠷᠠ ᠨᠢᠳᠦᠲᠦ ᠭᠡᠭᠴᠢ᠂ ᠪᠥᠨᠲᠥᠭᠡᠷ ᠨᠢ ᠮᠥᠷᠦᠨ ᠡᠴᠡ ᠪᠡᠨ ᠤᠢᠳᠤᠭᠰᠠᠨ ᠵᠣᠯᠢᠭ᠃ ᠶᠠᠪᠤᠵᠤ ᠶᠠᠪᠤᠵᠤ ᠶᠠᠭᠳᠠᠭᠰᠠᠨ ᠮᠠᠭᠤ ᠡᠪᠦᠭᠡᠨ ᠢ᠋ ᠲᠣᠨᠣᠳᠠᠭ ᠨᠢ ᠶᠠᠭᠤ ᠪᠣᠢ? ᠴᠢᠭᠢᠶᠡᠲᠦᠷᠦᠦ! ᠡᠨᠡ ᠮᠠᠭᠤ ᠨᠣᠬᠠᠢ ᠶ᠋ᠢᠨ ᠰᠠᠭᠠᠷᠢ ᠶ᠋ᠢᠨ ᠬᠠᠮᠠᠷ ᠲᠤᠨᠢ ᠵᠢᠭᠠᠬᠠᠨ ᠤᠲᠤᠭᠠ ᠣᠷᠣᠭᠤᠯᠵᠤ ᠥᠭᠭᠦᠶᠡ! ᠪᠤᠰᠢᠭᠤᠬᠠᠨ ᠬᠥᠳᠡᠯᠦᠶᠡ᠂ ᠭᠣᠢᠳᠣᠪ ᠠ᠋! ᠭᠡᠰᠡᠨ ᠳ᠋ᠦ᠍ ᠲᠡᠮᠡᠭᠡᠨ ᠦ᠌ ᠲᠦᠭᠵᠢᠷ ᠡᠪᠦᠭᠡᠨ᠄
— ᠬᠥᠶᠢ᠂ ᠴᠠᠢ ᠴᠤᠤ ᠤᠤᠭᠤᠭᠠᠳ ᠶᠠᠪᠤᠨᠠ ᠪᠢᠵᠡ! ᠭᠡᠪᠡ᠃
— ᠲᠡᠮᠡᠭᠡᠳ ᠢ᠋ ᠴᠢᠨᠢ ᠠᠪᠤᠭᠠᠳ ᠪᠤᠴᠠᠯᠭᠠᠨ ᠳ᠋ᠠᠭᠠᠨ ᠢᠷᠡᠵᠦ ᠴᠠᠢ ᠤᠤᠭᠤᠶᠠ! ᠭᠡᠳ ᠮᠠᠨᠴᠤᠷᠭᠠ ᠬᠡᠳᠦᠭᠦᠯᠡ ᠲᠡᠨᠳᠡ ᠡᠴᠡ ᠱᠠᠯᠠᠪ ᠬᠥᠳᠡᠯᠪᠡ᠃
ᠮᠠᠨᠴᠤᠷᠭᠠ᠂ ᠭᠣᠢᠳᠣᠪ ᠨᠠᠷ ᠲᠦᠭᠵᠢᠷᠵᠠᠪ ᠡᠪᠦᠭᠡᠨ ᠦ᠌ ᠬᠠᠶᠠᠭᠠᠨ ᠠ᠋ᠴᠠ ᠨᠡᠯᠢᠶᠡᠳ ᠵᠠᠢᠰ ᠶᠠᠪᠤᠵᠤ᠂ ᠬᠡᠲᠡ ᠴᠠᠬᠢᠭᠤᠷ ᠬᠠᠪᠢᠷᠤᠨ ᠭᠡᠷᠡᠯ ᠭᠠᠷᠭᠠᠨ ᠮᠣᠷᠢ ᠲᠡᠮᠡᠭᠡᠳ ᠦ᠋ᠨ ᠵᠡᠭᠦᠨ ᠡᠮᠦᠨᠡᠰᠢᠯᠡᠭᠰᠡᠨ ᠮᠥᠷ ᠢ᠋ ᠣᠯᠵᠤ ᠬᠠᠢᠨ ᠮᠥᠰᠬᠢᠪᠡ᠃
ᠡᠨᠡ ᠵᠦᠭ ᠢ᠋ ᠪᠠᠷᠢᠵᠤ ᠬᠣᠷᠢᠭᠠᠳ ᠭᠠᠵᠠᠷ ᠶᠠᠪᠤᠲᠠᠯᠠ ᠨᠣᠣᠷᠬᠠᠢ ᠴᠠᠮᠪᠠᠨ ᠬᠡᠷᠡᠮ ᠦ᠋ᠨ ᠬᠦᠷᠢᠶᠡ ᠲᠡᠢ᠂ ᠬᠣᠶᠠᠷ ᠲᠠᠰᠤᠯᠭᠠ ᠰᠢᠪᠠᠷ ᠪᠠᠢᠰᠢᠩ ᠪᠦᠦᠷ ᠲᠦᠦᠷ ᠦᠵᠡᠭᠳᠡᠪᠡ᠃ ᠬᠠᠶᠠᠭᠠᠨ ᠳ᠋ᠤᠨᠢ ᠬᠡᠳᠦᠨ ᠮᠣᠷᠢᠳ ᠤᠶᠠᠭᠠᠲᠠᠢ᠃ ᠴᠠᠭᠠᠨᠠ ᠲᠡᠮᠡᠭᠡ ᠪᠤᠢᠯᠠᠬᠤ ᠳᠠᠭᠤᠨ ᠭᠠᠷᠤᠨᠠ᠃
— ᠬᠠᠷᠠ ᠨᠢᠳᠦᠲᠦ ᠡᠨᠳᠡ ᠪᠠᠭᠤᠭᠰᠠᠨ ᠶᠠᠩᠵᠤᠲᠠᠢ! ᠭᠡᠵᠦ ᠭᠣᠢᠳᠣᠪ ᠬᠡᠯᠡᠬᠦ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠶᠠᠭ ᠲᠡᠢᠮᠦ ᠪᠠᠢᠨᠠ᠃ ᠮᠥᠨ ᠡᠨᠳᠡ ᠨᠢ ᠶᠠᠭᠤ ᠬᠠᠢ ᠦᠭᠡᠢ ᠳᠠᠷᠤᠵᠤ ᠤᠷᠭᠢᠶᠠ! ᠭᠡᠪᠡ᠃
— ᠦᠭᠡᠢ᠂ ᠤᠷᠢᠳ ᠢ᠋ᠶ᠋ᠠᠷ ᠮᠣᠷᠢᠳ ᠢ᠋ ᠨᠢ ᠲᠠᠰᠤᠯᠵᠤ ᠬᠥᠭᠡᠭᠡᠶᠡ! ᠭᠡᠵᠦ ᠰᠣᠳᠨᠠᠮ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠭᠣᠢᠳᠣᠪ ᠲᠣᠰᠴᠤ᠄
— ᠰᠣᠳᠨᠠᠮ ᠠᠬᠠ ᠶ᠋ᠢᠨ ᠬᠡᠯᠡᠬᠦ ᠵᠥᠪ! ᠭᠠᠬᠠᠢ ᠶᠠᠪᠠᠭᠠᠨ ᠪᠣᠯᠭᠠᠴᠢᠬᠠᠪᠠᠯ ᠲᠡᠳᠡᠨᠦᠰ ᠦᠰᠦᠷᠦᠭᠡᠳ ᠬᠠᠮᠢᠭᠠ ᠬᠦᠷᠬᠦ ᠪᠣᠢ?! ᠭᠡᠰᠡᠨ ᠳ᠋ᠦ᠍ ᠮᠠᠨᠴᠤᠷᠭᠠ᠄
— ᠵᠥᠪ᠂ ᠵᠥᠪ! ᠭᠡᠵᠦ ᠪᠢᠲᠡᠭᠦᠬᠡᠨ ᠢᠨᠢᠶᠡᠬᠦ ᠳ᠋ᠦ᠍᠂ ᠰᠣᠳᠨᠠᠮ ᠲᠡᠷᠡ ᠵᠠᠪ ᠦᠭᠡᠢ ᠥᠨᠥᠬᠢ ᠮᠣᠷᠢᠳ ᠤ᠋ᠨ ᠬᠢᠨᠢ ᠳᠡᠷᠭᠡᠳᠡ ᠬᠦᠷᠪᠡ᠃
ᠰᠣᠳᠨᠠᠮ ᠮᠣᠷᠢᠳ ᠤ᠋ᠨ ᠬᠢᠨᠢ ᠲᠤᠰᠢᠶᠠ ᠴᠤᠯᠪᠤᠭᠤᠷ ᠢ᠋ ᠲᠠᠰᠤᠳᠠᠬᠤ ᠭᠡᠵᠦ ᠲᠠᠰᠢᠶᠠᠨ ᠠ᠋ᠴᠠ ᠪᠠᠨ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠵᠠᠪᠳᠤᠪᠠ ᠤᠤ ᠦᠭᠡᠢ ᠤᠤ? ᠭᠡᠨᠡᠳᠲᠡ ᠫᠠᠩ ᠭᠡᠬᠦ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠰᠣᠳᠨᠠᠮ ᠮᠣᠭᠵᠣᠢᠨ ᠣᠢᠴᠢᠪᠠ᠃
ᠴᠣᠴᠢᠮᠠᠭ ᠳᠤᠤᠭᠠᠷᠤᠭᠰᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠨᠴᠤᠷᠭᠠ ᠨᠠᠷ ᠰᠣᠴᠢᠰᠬᠢᠨ ᠬᠡᠳᠦᠨ ᠲᠠᠢᠰᠢ ᠪᠤᠲᠠᠷᠠᠨ ᠵᠠᠢᠯᠠᠬᠤ ᠭᠡᠲᠡᠯᠡ ᠴᠠᠮᠪᠠᠨ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠲᠤ ᠪᠦᠭᠭᠦᠨ ᠬᠡᠪᠲᠡᠵᠦ ᠠᠭᠰᠠᠨ ᠬᠡᠳᠦᠨ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠡᠷᠡ ᠵᠠᠷᠢᠮ ᠤ᠋ᠨ ᠬᠢᠨᠢ ᠮᠣᠷᠢᠳ ᠤ᠋ᠨ ᠵᠢᠯᠣᠭᠣ ᠶ᠋ᠢ ᠰᠢᠭᠦᠷᠡᠵᠦ ᠠᠪᠤᠭᠰᠠᠨ ᠪᠠᠢᠵᠠᠢ᠃ ᠭᠣᠢᠳᠤᠪ ᠤ᠋ᠨ ᠤᠨᠤᠭᠰᠠᠨ ᠬᠠᠷᠠ ᠬᠡᠭᠡᠷ ᠮᠣᠷᠢ ᠬᠠᠵᠠᠭᠤ ᠠ᠋ᠴᠠ ᠨᠢ ᠨᠠᠪᠲᠠᠰᠬᠢᠨ ᠪᠣᠰᠤᠭᠰᠠᠨ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠡᠴᠡ ᠦᠷᠭᠦᠵᠦ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠪᠠ᠃ ᠵᠢᠯᠣᠭᠣ ᠠ᠋ᠴᠠ ᠨᠢ ᠰᠢᠭᠦᠷᠡᠵᠦ ᠵᠠᠪᠳᠤᠭᠰᠠᠨ ᠦᠭᠡᠢ ᠲᠡᠷᠡ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠭᠣᠢᠳᠤᠪ ᠤ᠋ᠨ ᠳᠠᠪᠬᠢᠵᠤ ᠣᠳᠤᠭᠰᠠᠨ ᠲᠡᠷᠡ ᠵᠦᠭ ᠤᠭᠰᠠᠷᠠᠭᠠ ᠪᠠᠷ ᠬᠡᠳᠦ ᠫᠤᠤᠳᠠᠵᠤ ᠠᠮᠵᠢᠪᠠ᠃ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠱᠤᠤᠭᠢᠭᠰᠠᠨ ᠰᠤᠮᠤ ᠰᠢᠪ᠂ ᠰᠢᠪ ᠭᠡᠵᠦ ᠴᠢᠬᠢ ᠱᠤᠤᠭᠢᠭᠤᠯᠤᠨ ᠢᠰᠬᠡᠷᠬᠦ ᠳ᠋ᠦ᠍ ᠦᠷᠭᠦᠮᠡᠲᠡᠭᠡᠢ ᠬᠠᠷᠠ ᠬᠡᠭᠡᠷ ᠦ᠋ᠨ ᠲᠠᠰᠢᠶᠠᠨ ᠳ᠋ᠤ᠌ ᠲᠠᠰᠢᠭᠤᠷ ᠨᠡᠮᠡᠭᠰᠡᠨ ᠰᠢᠭ ᠨᠢᠳᠦ ᠮᠠᠳ ᠦᠭᠡᠢ ᠳᠣᠪᠲᠣᠯᠤᠨᠠ᠁
ᠨᠠᠨ ᠭᠡᠨᠡᠳᠲᠡ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠪᠣᠯᠤᠭᠰᠠᠨ ᠰᠣᠴᠢᠭᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠮᠣᠷᠢᠨ ᠤ᠋ ᠪᠠᠨ ᠪᠦᠭᠦᠷᠭᠡ ᠡᠴᠡ ᠡᠯᠭᠦᠭᠳᠡᠵᠦ ᠪᠡᠶᠡ ᠪᠡᠨ ᠬᠠᠯᠬᠠᠯᠠᠭᠠᠳ᠄
— ᠬᠠᠷᠠ ᠨᠢᠳᠦᠲᠦ ᠠ᠋! ᠴᠢ ᠠᠬᠠ ᠳᠡᠭᠦᠦ ᠨᠠᠷ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ⁈ ᠠᠩ? ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌᠂ ᠬᠠᠷᠠ ᠨᠢᠳᠦᠲᠦ ᠴᠠᠭᠠᠨᠠ ᠠ᠋ᠴᠠ ᠮᠠᠨᠴᠤᠷᠭᠠ ᠶ᠋ᠢ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠠᠮᠢᠶᠠ ᠪᠠᠢᠬᠤ ᠵᠦᠭ ᠲᠥᠯᠥᠪ ᠢ᠋ ᠨᠢ ᠮᠡᠳᠡᠵᠦ᠄
— ᠣ! ᠮᠠᠨᠴᠤ ᠠᠬᠠ ᠤᠤ? ᠡᠨᠳᠡᠭᠦᠷᠡᠯ! ᠠᠬᠠ ᠳᠡᠭᠦᠦ ᠨᠠᠷ ᠠ᠋᠂ ᠫᠤᠤ ᠪᠠᠨ ᠬᠤᠢᠯᠠ! ᠭᠡᠵᠦ ᠨᠥᠭᠥᠭᠡᠳᠦᠭᠦᠯᠡ ᠳ᠋ᠡᠭᠡᠨ ᠵᠠᠷᠯᠢᠭ ᠪᠣᠯᠪᠠ᠃
ᠮᠠᠨᠴᠤᠷᠭᠠ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠡᠨᠳᠡ ᠪᠠᠢᠭᠠ ᠳ᠋ᠤ᠌ ᠦᠬᠦᠨ ᠢᠲᠡᠭᠡᠵᠦ《ᠵᠢᠷᠤᠮ ᠤ᠋ᠨ ᠠᠬᠠ ᠶ᠋ᠢᠨ ᠣᠮᠣᠭ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠣᠮᠣᠭᠳᠠᠵᠤ ᠰᠠᠢᠨ ᠨᠢᠭᠡ ᠵᠠᠩᠨᠠᠶᠠ ᠪᠠᠢᠵᠠ! ᠶᠠᠪᠤᠵᠤ ᠶᠠᠪᠤᠵᠤ ᠶᠠᠭᠳᠠᠭᠰᠠᠨ ᠮᠠᠭᠤ ᠭᠣᠣᠨᠢ ᠡᠪᠦᠭᠡᠨ ᠢ᠋ ᠲᠤᠨᠤᠬᠤ ᠳᠡᠭᠡᠷᠡ ᠲᠤᠯᠪᠠ ᠤᠤ? ᠴᠢᠭᠢᠶᠡᠲᠦᠷᠦᠦ!》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠠᠭᠤᠷ ᠨᠢ ᠬᠦᠷᠴᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠰᠠᠨ ᠳ᠋ᠤ᠌ ᠬᠠᠷᠠ ᠨᠢᠳᠦᠲᠦ᠄
— ᠮᠠᠨᠴᠤ ᠠᠬᠠ ᠶ᠋ᠢᠨ ᠮᠣᠷᠢ ᠶ᠋ᠢ ᠱᠣᠩ ᠳᠡᠭᠡᠷᠡ ᠠᠪᠠᠴᠢᠵᠤ ᠤᠶᠠ! ᠭᠡᠵᠦ ᠬᠠᠵᠠᠭᠤᠳᠠᠬᠢ ᠳ᠋ᠠᠭᠠᠨ ᠵᠠᠬᠢᠵᠤ《ᠵᠠ᠂ ᠮᠠᠨᠴᠤ ᠠᠬᠠ ᠭᠡᠷ ᠲᠦ᠍ ᠣᠷᠣ! ᠬᠡᠳᠦᠨ ᠬᠤᠨᠳᠠᠭᠠ ᠳᠣᠭᠰᠢᠨ ᠰᠠᠷᠬᠤᠳ ᠪᠠᠯᠭᠤᠵᠤ ᠰᠣᠴᠢᠶᠠ ᠪᠠᠨ ᠳᠠᠷᠤ!》 ᠭᠡᠵᠦ ᠲᠡᠭᠦᠨ ᠢ᠋ ᠶᠡᠬᠡᠳᠡ ᠬᠦᠨᠳᠦᠯᠦᠨ ᠮᠠᠨᠴᠤᠷᠭᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠪᠣᠷᠪᠢᠳᠡᠨ ᠳᠠᠭᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠨᠥᠭᠥᠭᠡᠳᠦᠭᠦᠯᠡ ᠳ᠋ᠡᠭᠡᠨ《ᠭᠠᠷ ᠲᠤ ᠥᠭᠲᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠲᠣᠨᠢᠯᠭᠠ!》 ᠭᠡᠰᠡᠨ ᠳᠠᠯᠳᠠ ᠳᠣᠬᠢᠶᠠ ᠥᠭᠴᠦ᠂ ᠮᠠᠨᠴᠤᠷᠭᠠ ᠶ᠋ᠢ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠬᠠᠲᠠᠪᠴᠢ ᠠᠯᠬᠤᠬᠤ ᠲᠠᠢ ᠵᠡᠷᠭᠡ ᠫᠠᠩ ᠬᠢᠨ ᠠᠷᠤ ᠠ᠋ᠴᠠ ᠨᠢ ᠭᠠᠪᠠᠯᠠ ᠤᠷᠤᠭᠤ ᠨᠢ ᠭᠠᠭᠴᠠᠬᠠᠨ ᠫᠤᠤᠳᠠᠪᠠ᠃
ᠪᠥᠬᠡ ᠰᠢᠭ ᠪᠦᠳᠦᠭᠦᠨ ᠡᠷᠡ ᠬᠢᠮᠤᠰᠤᠨ ᠴᠢᠨᠡᠭᠡ ᠵᠢᠵᠢᠭ ᠰᠤᠮᠤᠨ ᠳ᠋ᠤ᠌ ᠲᠠᠢᠯᠳᠠᠵᠤ᠂ ᠮᠠᠭᠤ ᠰᠢᠪᠠᠷ ᠪᠠᠢᠰᠢᠩ ᠤ᠋ᠨ ᠬᠠᠲᠠᠪᠴᠢᠨ ᠳ᠋ᠤ᠌ ᠬᠦᠱ ᠬᠢᠨ ᠬᠦᠴᠦᠲᠡᠢ ᠣᠢᠴᠢᠪᠠ᠃
ᠮᠠᠨᠴᠤᠷᠭᠠ ᠶ᠋ᠢ ᠣᠢᠴᠢᠬᠤ ᠲᠠᠢ ᠵᠡᠷᠭᠡ ᠭᠠᠳᠠᠨᠠ ᠫᠢᠩ᠂ ᠫᠠᠩ ᠭᠡᠵᠦ ᠫᠤᠤ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠳᠤᠲᠠᠭᠠᠵᠤ ᠵᠠᠪᠳᠤᠭᠰᠠᠨ ᠦᠭᠡᠢ ᠬᠡᠳᠦ ᠨᠢ ᠠᠮᠢ ᠪᠠᠨ ᠠᠯᠳᠠᠵᠠᠢ᠃
ᠦᠦᠷ ᠬᠠᠶᠠᠭᠠᠷᠠᠬᠤ ᠳ᠋ᠤ᠌ ᠭᠣᠢᠳᠤᠪ ᠲᠡᠮᠡᠭᠡᠨ ᠦ᠌ ᠡᠷᠢᠯ ᠦ᠋ᠨ ᠬᠥᠮᠦᠨ ᠢ᠋ᠶ᠋ᠡᠷ ᠶᠠᠩᠵᠤᠯᠠᠵᠤ ᠲᠡᠷᠡ ᠰᠢᠪᠡᠷ ᠪᠠᠢᠰᠢᠩ ᠲᠠᠢ ᠠᠢᠯ ᠤ᠋ᠨ ᠬᠠᠶᠠᠭᠠᠨ ᠳ᠋ᠤ᠌ ᠣᠴᠢᠪᠠᠯ᠂ ᠡᠨᠳᠡ ᠶᠠᠮᠠᠷ ᠴᠤ᠌ ᠤᠴᠢᠷ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ ᠰᠢᠭ ᠨᠠᠮ ᠵᠢᠮ ᠪᠠᠢᠯᠠ᠃
ᠡᠨᠳᠡ ᠲᠡᠨᠳᠡ ᠲᠣᠯᠣᠭᠠᠢ ᠦᠭᠡᠢ ᠬᠡᠳᠦᠨ ᠮᠣᠩᠭᠣᠯ ᠲᠡᠷᠯᠢᠭ ᠲᠡᠢ ᠦᠬᠦᠳᠡᠯ ᠬᠡᠭᠦᠷ ᠤᠨᠳᠤᠢ ᠰᠤᠨᠳᠤᠢ ᠭᠤᠯᠳᠤᠢᠨᠠ᠃
ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠬᠠᠲᠠᠪᠴᠢ ᠪᠠᠷ ᠪᠤᠯᠢᠭᠠᠷᠢ ᠭᠤᠲᠤᠯ ᠤ᠋ᠨ ᠲᠦᠷᠡᠢ ᠬᠠᠷᠠᠭᠳᠠᠬᠤ ᠪᠠᠷ ᠭᠦᠶᠦᠨ ᠣᠴᠢᠪᠠᠯ ᠮᠠᠨᠴᠤᠷᠭᠠ ᠡᠯᠢᠭᠡ ᠲᠦᠷᠦᠭᠦᠰᠢ ᠪᠡᠨ ᠣᠢᠴᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ᠁ ᠮᠥᠨ ᠯᠡ ᠲᠣᠯᠣᠭᠠᠢ ᠶ᠋ᠢ ᠨᠢ ᠬᠢᠷᠥᠭᠡᠳᠡᠭᠰᠡᠨ ᠡᠴᠡ ᠬᠥᠰᠡᠷ ᠤᠷᠤᠰᠤᠭᠰᠠᠨ ᠬᠦᠷᠡᠩ ᠬᠠᠷᠠ ᠴᠢᠰᠤ ᠲᠤᠯᠭᠠᠨ ᠤ᠋ ᠠᠮᠠᠰᠠᠷ ᠢ᠋ ᠪᠣᠳᠣᠵᠤ ᠡᠯᠢᠭᠡᠷᠡᠨ ᠲᠤᠨᠵᠠᠢ᠃
ᠡᠨᠡ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠡᠵᠡᠨ ᠨᠢ ᠴᠦ᠍ ᠪᠠᠷᠠ ᠳᠣᠷᠣ ᠦᠭᠡᠢ ᠬᠠᠮᠢᠭᠠᠰᠢ ᠠᠷᠢᠯᠤᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ᠃
ᠭᠣᠢᠳᠤᠪ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠱ᠌ᠢᠷᠦᠨ ᠵᠢᠩᠰᠡ ᠲᠡᠢ ᠬᠥᠬᠦᠦᠷ᠂ ᠬᠢᠲᠤᠭᠠ᠂ ᠫᠤᠤ ᠵᠠᠪᠰᠠᠩ ᠵᠡᠷᠭᠡ ᠪᠡᠶᠡ ᠳ᠋ᠡᠭᠡᠨ ᠦᠷᠬᠦᠢ ᠠᠪᠴᠤ ᠶᠠᠪᠤᠳᠠᠭ ᠵᠦᠢᠯ ᠡᠴᠡ ᠨᠢ ᠣᠯᠵᠤ ᠠᠪᠤᠨ ᠭᠡᠷ ᠲᠦ᠋ᠨᠢ ᠦᠭᠬᠦ ᠶᠤᠮᠰᠠᠨ ᠭᠡᠵᠦ ᠡᠪᠦᠷ ᠳᠠᠯᠢᠶᠠᠷ ᠢ᠋ ᠨᠢ ᠲᠡᠮᠲᠡᠷᠢᠪᠡᠯ ᠶᠠᠭᠤ ᠴᠤ᠌ ᠣᠯᠳᠠᠭᠰᠠᠨ ᠦᠭᠡᠢ᠃ ᠠᠳᠠᠭ ᠨᠢ ᠬᠤᠷᠤᠭᠤᠨ ᠳ᠋ᠠᠬᠢ ᠸᠴᠢᠷ ᠬᠡ ᠲᠡᠢ ᠮᠥᠩᠭᠥᠨ ᠪᠦᠯᠡᠵᠢᠩ ᠢ᠋ ᠨᠢ ᠬᠦᠷᠲᠡᠯᠡ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ ᠮᠤᠯᠲᠤᠯᠵᠠᠢ᠃
ᠭᠣᠢᠳᠤᠪ ᠡᠮᠨᠢᠭ ᠠᠭᠲᠠ ᠤᠨᠤᠭᠰᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠠᠮᠢ ᠭᠠᠷᠤᠭᠰᠠᠨ ᠭᠡᠵᠦ ᠲᠡᠳᠦᠢ ᠶᠡᠬᠡ ᠪᠣᠳᠣᠯ ᠥᠮᠴᠢᠷᠬᠡᠭᠰᠡᠨ ᠦᠭᠡᠢ ᠬᠠᠷᠢᠨ ᠬᠠᠨᠢ ᠠᠬᠠ ᠳᠡᠭᠦᠦ ᠪᠠᠨ ᠢᠩᠭᠢᠵᠦ ᠬᠠᠷᠠᠰᠠᠯᠲᠠᠢ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠵᠤ ᠨᠢᠯᠪᠤᠰᠤ ᠤᠨᠠᠭᠠᠪᠠ᠃
ᠲᠡᠮᠡᠭᠡᠨ ᠦ᠌ ᠡᠪᠦᠭᠡᠨ ᠲᠦᠭᠵᠢᠷᠵᠠᠪ ᠭᠤᠸᠠᠢ ᠴᠠᠢ ᠪᠠᠨ ᠪᠤᠴᠠᠯᠭᠠᠨ ᠪᠤᠴᠠᠯᠭᠠᠨ ᠵᠡᠭᠦᠨ ᠡᠮᠦᠨᠡᠰᠢ ᠰᠠᠷᠠᠪᠴᠢᠯᠠᠵᠤ《ᠮᠠᠨᠴᠤᠷᠭᠠ ᠵᠠᠪᠠᠯ ᠢᠷᠡᠬᠦ ᠤᠬᠠᠭᠠᠨ ᠲᠠᠢ ᠶᠤᠮ ᠠ᠋!》 ᠭᠡᠵᠦ ᠳᠦᠳᠦᠨᠡᠨ ᠭᠠᠳᠠᠨᠠ ᠨᠢᠭᠡ ᠭᠠᠷᠴᠤ᠂ ᠭᠡᠷ ᠲᠤ ᠨᠢᠭᠡ ᠣᠷᠣᠵᠤ ᠲᠣᠭᠲᠠᠪᠤᠷᠢ ᠠᠯᠳᠠᠨᠠ᠃
ᠲᠡᠭᠷᠢ ᠶ᠋ᠢᠨ ᠠᠯᠤᠰ ᠬᠢᠵᠠᠭᠠᠷ ᠮᠠᠨᠠᠳᠤᠭᠰᠠᠨ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ ᠨᠠᠷᠠ ᠰᠤᠪᠤᠷᠠᠨ ᠳᠡᠭᠳᠡᠵᠦ ᠤᠷᠭᠤᠭᠠ ᠪᠥᠮᠪᠥᠭᠡ ᠰᠢᠭ ᠤᠳᠠᠯ ᠦᠭᠡᠢ ᠤᠷᠭᠠ ᠪᠠᠷᠢᠮᠠ ᠥᠨᠳᠥᠷ ᠬᠦᠬᠷᠪᠡ᠃
ᠲᠡᠭᠡᠬᠦ ᠳ᠋ᠦ᠍ ᠵᠡᠭᠦᠨ ᠡᠮᠦᠨᠡ ᠡᠴᠡ ᠰᠢᠷᠡᠭᠡ ᠪᠦᠬᠦ ᠲᠡᠢ ᠲᠡᠮᠡᠭᠡᠳ ᠨᠢ ᠤᠨᠢᠶᠠᠷ ᠬᠦᠳᠡᠩ ᠢ᠋ ᠤᠢᠮᠤᠵᠤ ᠨᠢᠭᠡ᠁ ᠬᠣᠶᠠᠷ᠁ ᠭᠡᠮᠡᠨ ᠲᠠᠢᠪᠤᠭᠤᠬᠠᠨ ᠨᠠᠭᠠᠰᠢᠯᠠᠬᠤ ᠶᠢ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠲᠦᠭᠵᠢᠷᠵᠠᠪ ᠤᠨ ᠬᠥᠬᠡ ᠪᠣᠷᠣ ᠨᠢᠳᠦᠨ ᠳᠦ ᠨᠢᠯᠪᠤᠰᠤ ᠬᠤᠷᠠᠵᠠᠢ ᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ