ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠᠨ ᠨᠢᠭᠡ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <11>
632ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠᠨ ᠨᠢᠭᠡ>
ᠥᠷᠯᠥᠭᠡ ᠡᠷᠲᠡᠭᠡᠭᠦᠷ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠡᠭᠦᠳᠡ ᠣᠩᠭᠣᠢᠮᠠᠭᠴᠠ ᠢᠰᠡᠭᠡᠢ ᠪᠦᠷᠬᠦ ᠶ᠋ᠢ ᠬᠡᠯᠲᠡᠭᠡᠢ ᠳᠠᠷᠤᠭᠰᠠᠨ ᠲᠠᠷᠴᠢᠩᠬᠠᠢ ᠬᠥᠮᠦᠨ ᠡᠩ ᠲᠦᠷᠦᠭᠦᠨ ᠳ᠋ᠦ᠍ ᠣᠷᠣᠵᠤ ᠣᠴᠢᠨ ᠳᠡᠭᠡᠷᠡ ᠲᠠᠭᠲᠤ ᠶ᠋ᠢᠨ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠰᠠᠭᠠᠳᠠᠪᠠ᠃
ᠡᠨᠡ ᠬᠥᠮᠦᠨ ᠪᠣᠯ ᠥᠯᠵᠡᠢᠰᠠᠩ ᠪᠠᠢᠯᠠ᠃
ᠥᠯᠵᠡᠢᠰᠠᠩ ᠢ᠋ ᠳᠥᠩᠭᠡᠵᠦ ᠰᠠᠨᠳᠠᠯᠢ ᠲᠠᠲᠠᠵᠤ ᠰᠠᠭᠤᠬᠤ ᠭᠡᠲᠡᠯᠡ ᠴᠠᠭᠠᠨ ᠲᠣᠭᠣᠷᠴᠣᠭᠲᠤ ᠵᠠᠭᠤᠰᠢ ᠵᠠᠬᠢᠶᠠᠯᠠᠭᠠ ᠶ᠋ᠢᠨ ᠵᠠᠷᠤᠳᠠᠰᠤ ᠥᠷᠥᠭᠡᠨ ᠦ᠌ ᠡᠯᠭᠦᠪᠴᠢ ᠶ᠋ᠢ ᠰᠡᠬᠦᠨ ᠨᠠᠪᠲᠠᠰᠬᠢᠨ ᠣᠷᠣᠵᠤ ᠢᠷᠡᠭᠡᠳ᠄
— ᠡᠷᠭᠢᠨ ᠠᠪᠤᠭᠠᠢ ᠲᠠ ᠥᠨᠥᠳᠥᠷ ᠮᠠᠨ ᠤ᠋ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠮᠠᠢᠮᠠᠢ ᠶ᠋ᠢᠨ ᠬᠡᠢ ᠮᠣᠷᠢ ᠶ᠋ᠢ ᠮᠢᠯᠢᠶᠠᠭᠰᠠᠨ ① ᠠᠩᠬᠠᠨ ᠤ᠋ ᠵᠣᠴᠢᠨ ᠪᠣᠯᠬᠣᠷ ᠡᠷᠲᠡ ᠶ᠋ᠢᠨ ᠮᠡᠨᠳᠦ ᠪᠠᠷᠢᠵᠤ᠂ ᠬᠣᠶᠠᠷ ᠯᠠᠩ ᠱᠣᠣᠮᠠᠢ ᠲᠥᠯᠥᠪᠦᠷᠢ ᠦᠭᠡᠢ ᠱᠠᠩᠨᠠᠵᠤ ᠥᠭᠭᠦᠶᠡ! ᠭᠡᠵᠦ ᠶᠡᠬᠡᠳᠡ ᠶᠠᠩ ᠲᠡᠳᠡᠨ ᠤᠷᠲᠤᠯᠠᠭᠤᠯᠤᠨ ᠶᠠᠷᠢᠪᠠᠯ᠂ ᠥᠯᠵᠡᠢᠰᠠᠩ᠄
— ᠵᠠ᠂ ᠵᠠ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ! ᠮᠠᠢᠮᠠᠢ ᠱᠣᠣᠮᠠᠢ ᠶ᠋ᠢᠨ ᠴᠢᠨᠢ ᠣᠷᠣᠯᠭᠠ ᠨᠡᠮᠡᠭᠳᠡᠲᠦᠭᠡᠢ᠃ ᠬᠣᠶᠠᠷ ᠯᠠᠩ ᠤ᠋ᠨ ᠳᠡᠭᠡᠷᠡ ᠭᠤᠷᠪᠠᠨ ᠯᠠᠩ ᠱᠣᠣᠮᠠᠢ ᠨᠡᠮᠡᠵᠦ᠂ ᠡᠨᠡ ᠲᠡᠷᠡ ᠵᠠᠭᠤᠰᠢ᠂ ᠨᠢᠭᠡ ᠬᠤᠯᠤ ᠠᠷᠢᠬᠢ ᠬᠠᠯᠠᠭᠠᠭᠠᠷᠠᠢ! ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠴᠠᠭᠠᠨ ᠲᠣᠭᠣᠷᠴᠣᠭᠲᠤ《ᠵᠠ᠂ ᠲᠡᠭᠡᠶᠡ》 ᠭᠡᠳ ᠭᠠᠷᠬᠤ ᠭᠡᠲᠡᠯᠡ ᠥᠯᠵᠡᠢᠰᠠᠩ᠄
— ᠪᠠᠢᠵᠠ! ᠮᠠᠢ ᠭᠡᠳ ᠨᠢᠭᠡ ᠮᠥᠩᠭᠥᠨ ᠵᠣᠭᠣᠰ ᠱᠠᠩᠨᠠᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠴᠠᠭᠠᠨ ᠲᠣᠭᠣᠷᠴᠣᠭᠲᠤ ᠵᠠᠷᠤᠳᠠᠰᠤ ᠮᠡᠬᠦᠢᠨ《ᠭᠢᠯᠠᠢᠯᠠ》 ᠭᠡᠰᠡᠨ ᠮᠠᠶᠢᠭᠲᠠᠢ ᠶᠣᠰᠣ ᠬᠢᠭᠡᠳ ᠤᠯᠠᠮ ᠬᠥᠯ ᠨᠢ ᠬᠥᠩᠭᠡᠷᠡᠵᠦ《ᠡᠨᠡ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠴᠢᠨᠢ ᠭᠬᠢᠷ ᠬᠠᠯᠳᠠᠭᠠᠬᠤ ᠦᠭᠡᠢ》 ᠭᠡᠳ ᠴᠢᠨᠠᠭᠰᠢ ᠵᠢᠷᠣᠭᠠᠯᠠᠵᠠᠢ᠃
ᠥᠯᠵᠡᠢᠰᠠᠩ ᠠᠯᠢ ᠡᠷᠲᠡ ᠡᠴᠡ ᠮᠠᠨᠴᠤᠷᠭᠠ ᠲᠠᠢ ᠠᠲᠠᠭᠠ ᠵᠢᠲᠥᠭᠡ ᠲᠡᠢ ᠪᠣᠯᠵᠤ᠂ ᠠᠯᠢ ᠨᠢᠭᠡ ᠡᠳᠦᠷ ᠴᠢᠮᠠᠶ᠋ᠢ ᠶᠠᠭᠠᠬᠢᠶᠠ ᠳᠠ ᠪᠠᠢᠵᠠ ᠭᠡᠵᠦ ᠠᠲᠠᠭᠠ ᠬᠣᠷᠣ ᠮᠠᠨᠠᠵᠤ ᠠᠭᠰᠠᠨ ᠢ᠋ ᠬᠡᠯᠡᠬᠦ ᠦᠭᠡᠢ᠂ ᠮᠠᠨᠴᠤᠷᠭᠠ ᠴᠡᠴᠡᠭ ᠬᠠᠲᠤᠨ ᠲᠠᠢ ᠬᠥᠯ ᠲᠡᠢ ᠪᠣᠯᠤᠭᠰᠠᠨ ᠤᠴᠢᠷ ᠢ᠋ ᠠᠵᠢᠭ ᠮᠡᠳᠡᠵᠦ ᠰᠡᠭᠦᠯ ᠳ᠋ᠦ᠍ᠨᠢ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠯᠡᠪᠡᠷᠡᠭᠦᠯᠦᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠶᠡᠬᠡ ᠭᠠᠢ ᠲᠠᠷᠢᠭᠰᠠᠨ ᠤᠷᠰᠢᠭ ᠤ᠋ᠨ ᠦᠨᠳᠦᠰᠦ ᠪᠤᠶᠤ᠃ ᠲᠡᠢᠨ ᠬᠦ᠌ ᠮᠠᠨᠴᠤᠷᠭᠠ ᠲᠠᠢ ᠥᠰᠢᠯᠳᠦᠵᠦ ᠥᠪᠡᠷ ᠢ᠋ ᠪᠡᠨ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠭᠠᠴᠢᠬᠠᠬᠤ ᠳᠡᠭᠡᠷᠡ ᠬᠦᠷᠦᠭᠰᠡᠨ ᠢ᠋ ᠰᠠᠨᠠᠮᠰᠠᠷ ᠦᠭᠡᠢ ᠵᠠᠮ ᠲᠠᠭᠠᠷᠠᠭᠰᠠᠨ ᠠᠩᠴᠢᠨᠵᠠᠪ ᠠᠪᠤᠷᠠᠭᠰᠠᠨ ᠰᠠᠨᠵᠠᠢ᠃ ᠲᠡᠭᠡᠭᠰᠡᠭᠡᠷ ᠤᠯᠠᠮ ᠮᠠᠨᠴᠤᠷᠭᠠ ᠶ᠋ᠢ ᠶᠠᠰᠤᠨ ᠳ᠋ᠠᠭᠠᠨ ᠣᠷᠣᠲᠠᠯᠠ ᠬᠣᠷᠣᠰᠤᠨ《ᠮᠠᠨᠴᠤᠷᠭᠠ ᠴᠢᠮᠠᠶ᠋ᠢ ᠡᠨᠡ ᠬᠣᠷᠸᠠ ᠶ᠋ᠢᠨ ᠲᠠᠪᠴᠠᠩ ᠠ᠋ᠴᠠ ᠨᠡᠷᠡ ᠶ᠋ᠢ ᠴᠢᠨᠢ ᠬᠤᠰᠤᠵᠤ ᠬᠠᠶᠠᠬᠤ ᠦᠭᠡᠢ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠪᠢ ᠦᠬᠦᠬᠦ ᠶ᠋ᠢᠨ ᠮᠠᠭᠤ ᠪᠠᠷ ᠦᠬᠦ!》 ᠭᠡᠵᠦ ᠠᠨᠳᠠᠭᠠᠢ ᠲᠠᠯᠪᠢᠨ ᠰᠡᠮᠡᠬᠡᠷ ᠲᠣᠬᠢᠶᠠᠯ ᠬᠦᠯᠢᠶᠡᠵᠦ ᠰᠠᠭᠤᠵᠠᠢ᠃ ᠰᠢᠷᠠ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠰᠡᠨ ᠨᠢ ᠦᠯᠵᠡᠢᠰᠠᠩ ᠤ᠋ᠨ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠪᠠᠨ ᠭᠠᠢᠬᠠᠭᠤᠯᠬᠤ ᠰᠠᠢᠨ ᠲᠣᠬᠢᠶᠠᠯ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠰᠢᠷᠠ ᠴᠡᠷᠢᠭ ᠲᠦ᠍ ᠬᠡᠯᠡᠮᠦᠷᠴᠢ᠂ ᠭᠠᠵᠠᠷᠴᠢ ᠪᠣᠯᠤᠭᠰᠠᠨ ᠪᠠᠭ ᠵᠡᠭᠦᠵᠦ᠂ ᠶᠡᠬᠡ ᠯᠡ ᠰᠦᠷ ᠮᠠᠨᠳᠤᠭᠤᠯᠳᠠᠭ ᠪᠣᠯᠪᠠ᠃ ᠦᠯᠵᠡᠢᠰᠠᠩ ᠰᠢᠷᠠ ᠴᠡᠷᠢᠭ ᠦ᠋ᠨ ᠥᠮᠥᠭ ᠲᠦᠰᠢᠭ ᠢ᠋ ᠠᠰᠢᠭᠯᠠᠵᠤ ᠮᠠᠨᠴᠤᠷᠭᠠ ᠶ᠋ᠢ ᠦᠭᠡᠢ ᠬᠢᠬᠦ ᠦᠭᠡᠢ ᠪᠣᠯ ᠡᠯᠳᠡᠩᠭᠡ ᠨᠣᠶᠠᠨ ᠲᠣᠯᠣᠭᠠᠢ ᠨᠢ ᠥᠨᠳᠡᠢᠭᠰᠡᠭᠡᠷ ᠴᠦ᠍ ᠬᠡᠷᠡᠭ ᠪᠢᠰᠢᠳᠡᠵᠦ᠂ ᠮᠠᠨᠴᠤᠷᠭᠠ ᠴᠦ᠍ ᠶᠠᠭᠤ ᠪᠣᠯᠵᠤ ᠰᠠᠭᠰᠠᠯᠵᠠᠬᠤ ᠶ᠋ᠢ ᠪᠦᠦ ᠮᠡᠳᠡ! ᠡᠷᠲᠡᠬᠡᠨ ᠭᠠᠷ ᠬᠥᠳᠡᠯᠬᠦ ᠦᠭᠡᠢ ᠪᠣᠯ ᠪᠡᠶᠡ ᠳ᠋ᠦ᠍ᠨᠢ ᠠᠰᠢᠭ ᠦᠭᠡᠢ ᠮᠥᠷᠲᠡᠭᠡᠨ ᠡᠷᠭᠢᠭᠡᠳ ᠬᠣᠣᠷ ᠠᠮᠰᠠᠵᠤ ᠮᠡᠳᠡᠨᠡ ᠭᠡᠳᠡᠭ ᠢ᠋ ᠤᠳᠠᠭᠠᠨ ᠪᠢᠰᠢᠯᠭᠠᠵᠤ ᠶᠠᠪᠤᠲᠠᠯᠠ᠂ ᠰᠢᠷᠠ ᠴᠡᠷᠢᠭ ᠦ᠋ᠨ ᠠᠭᠸᠠᠩ ᠨᠣᠶᠠᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠴᠡᠷᠢᠭ ᠵᠠᠬᠢᠷᠬᠤ ᠲᠤᠸᠠᠨᠵᠠᠩ ᠢ᠋ᠶ᠋ᠠᠷ ᠥᠪᠡᠷ ᠢ᠋ ᠨᠢ ᠲᠠᠯᠪᠢᠬᠤ ᠪᠠᠷ ᠵᠢᠱ᠌ᠢᠵᠦ ᠠᠭᠰᠠᠨ ᠳ᠋ᠤ᠌ ᠡᠮᠦᠨᠡᠭᠦᠷ ᠨᠢ ᠦᠬᠦᠳᠡᠭ ᠦᠭᠡᠢ ᠮᠠᠭᠤ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠬᠥᠨᠳᠡᠯᠡᠨ ᠬᠥᠰᠢᠭᠡᠰᠦ ᠪᠣᠯᠵᠤ᠂ ᠬᠦᠦ ᠮᠠᠨᠴᠤᠷᠭᠠ ᠪᠠᠨ ᠴᠡᠷᠢᠭ ᠵᠠᠬᠢᠷᠬᠤ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠤᠸᠠᠨᠵᠠᠩ ᠪᠣᠯᠭᠠᠬᠤ ᠭᠡᠰᠡᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠰᠣᠨᠣᠰᠬᠠᠯ ᠮᠣᠳᠣᠨ ᠬᠤᠳᠠᠷᠭᠠ ᠲᠠᠢ ᠶᠤᠮ ᠰᠢᠭ᠋ ᠴᠢᠬᠢ ᠶ᠋ᠢ ᠨᠢ ᠳᠡᠯᠡᠳᠴᠡᠢ᠃ ᠥᠯᠵᠡᠢᠰᠠᠩ ᠤ᠋ᠨ ᠳᠣᠲᠣᠷᠠ ᠰᠢᠲᠠᠵᠤ《ᠡᠨᠡ ᠮᠠᠨᠴᠤᠷᠭᠠ ᠶ᠋ᠢ ᠡᠷᠲᠡᠬᠡᠨ ᠤᠬᠠᠭᠠᠨ ᠬᠢᠬᠦ ᠦᠭᠡᠢ ᠪᠣᠯ ᠥᠪᠡᠷ ᠦ᠋ᠨ ᠬᠢᠨᠢ ᠨᠢᠭᠡ ᠨᠠᠰᠤᠨ ᠤ᠋ ᠭᠠᠢ ᠲᠣᠳᠬᠠᠷ!》 ᠭᠡᠳ ᠨᠠᠷᠢᠨ ᠲᠤᠩᠭᠠᠵᠤ ᠪᠣᠳᠣᠭᠠᠳ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠪᠠᠰᠠ ᠨᠢᠭᠡ ᠠᠰᠢᠭᠯᠠᠬᠤ ᠶ᠋ᠢ ᠰᠠᠨᠠᠪᠠ᠃
ᠥᠯᠵᠡᠢᠰᠠᠩ᠂ ᠰᠠᠭᠠᠯᠢᠴᠢᠨ ᠰᠢᠶᠠᠨ ᠳ᠋ᠤ᠌ ᠪᠠᠢᠳᠠᠭ ᠵᠠᠩ ᠣᠪᠣᠭ ᠲᠠᠢ ᠰᠠᠢᠨ ᠲᠠᠨᠢᠯ᠂ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠴᠢᠳᠬᠥᠷ ᠢ᠋ ᠡᠷᠢᠵᠦ ᠣᠴᠢᠨ ᠪᠠᠭᠠ ᠰᠠᠭᠠ ᠰᠠᠢᠨ ᠬᠠᠷᠠ ᠲᠠᠮᠠᠬᠢ ᠥᠭᠴᠦ ᠬᠡᠳᠦᠨ ᠮᠥᠩᠭᠥᠨ ᠵᠣᠭᠣᠰ ᠬᠠᠨᠴᠤᠢᠯᠠᠭᠤᠯᠤᠭᠠᠳ᠄
— ᠴᠢ ᠥᠨᠥᠬᠢ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠣᠯᠤᠭᠠᠳ ᠨᠠᠳᠠ ᠠᠭᠤᠯᠵᠠᠭᠤᠯ! ᠶᠡᠬᠡ ᠠᠰᠢᠭ ᠪᠣᠢ ᠭᠡᠵᠦ ᠶᠠᠷᠢ! ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠵᠠᠩ ᠣᠪᠣᠭᠲᠤ ᠭᠠᠷ ᠳᠠᠬᠢ ᠨᠡᠯᠢᠶᠡᠳ ᠣᠯᠵᠠ ᠪᠠᠨ ᠬᠠᠷᠠᠵᠤ ᠣᠮᠣᠭᠰᠢᠨ᠄
— ᠪᠣᠯᠤᠨᠠ᠂ ᠪᠣᠯᠤᠨᠠ᠁ ᠲᠡᠭᠡᠯᠡ ᠭᠡᠳ᠁ ᠡᠷᠡᠭᠡᠯᠵᠡᠭᠰᠡᠨ ᠳᠦᠷᠢ ᠦᠵᠡᠭᠦᠯᠪᠡ᠃
— ᠶᠠᠭᠠᠬᠢᠪᠠ? ᠶᠠᠭᠤᠨ ᠳ᠋ᠤ᠌ ᠲᠠᠲᠠᠭᠠᠯᠵᠠᠪᠠ?
— ᠪᠠᠰᠠ ᠰᠠᠶᠢᠬᠢ ᠮᠠᠨᠴᠤᠷᠭᠠ ᠶ᠋ᠢ᠁ ᠬᠠᠷᠠ ᠨᠢᠳᠦᠲᠦ ᠪᠡᠷ ᠬᠢᠯᠭᠡᠬᠦ ᠭᠡᠵᠦ ᠤᠤ? ᠭᠡᠵᠦ ᠥᠯᠵᠡᠢᠰᠠᠩ ᠢ᠋ ᠴᠢᠷᠠᠢᠳᠠᠪᠠᠯ ᠦᠯᠵᠡᠢᠰᠠᠩ᠄
— ᠶᠠᠭ ᠳᠠ! ᠴᠢ ᠶᠠᠭᠠᠬᠢᠵᠤ ᠰᠠᠢᠬᠠᠨ ᠣᠨᠣᠭᠠᠵᠤ ᠬᠡᠯᠡᠪᠡ⁈ ᠭᠡᠪᠡ᠃
— ᠣᠳᠣ ᠴᠦ᠍ ᠪᠣᠯᠬᠤ ᠦᠭᠡᠢ ᠪᠠᠢᠬᠠ! ᠤᠴᠢᠷ ᠶᠠᠪᠤᠳᠠᠯ ᠭᠡᠭᠴᠢ ᠰᠣᠨᠢᠨ ᠠ᠋᠂ ᠲᠡᠷᠡ ᠵᠢᠯ ᠬᠠᠷᠠ ᠨᠢᠳᠦᠲᠦ᠂ ᠮᠠᠨᠴᠤᠷᠭᠠ ᠶ᠋ᠢ ᠠᠯᠠᠬᠤ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠠᠷᠠ ᠨᠢᠳᠦᠲᠦ ᠡᠷᠭᠢᠭᠡᠳ ᠲᠡᠭᠦᠨ ᠲᠡᠢ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠭᠰᠡᠨ ᠠᠬᠠ ᠳᠡᠭᠦᠦ ᠪᠣᠯᠤᠯᠴᠠᠭᠰᠠᠨ᠁ ᠭᠡᠵᠦ ᠥᠨᠥᠬᠢ ᠵᠠᠩ ᠣᠪᠣᠭᠲᠤ ᠭᠠᠷ ᠲᠠᠬᠢ ᠪᠠᠨ ᠴᠦᠩᠬᠦᠯᠡᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠪᠤᠴᠠᠭᠠᠬᠤ ᠴᠦ᠍ ᠵᠣᠷᠢᠭ ᠬᠦᠷᠬᠦ ᠦᠭᠡᠢ ᠬᠣᠶᠠᠷ ᠭᠠᠷ ᠨᠢ ᠦᠯᠦ ᠮᠡᠳᠡᠭ ᠰᠠᠯᠭᠠᠨᠠᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠥᠯᠵᠡᠢᠰᠠᠩ ᠬᠢᠵᠠᠭᠠᠯᠠᠩ ᠢᠮᠠᠭᠠ ᠮᠠᠢᠯᠠᠬᠤ ᠰᠢᠭ᠋ ᠢᠨᠢᠶᠡᠵᠦ᠄
— ᠮᠠᠭᠤ ᠲᠡᠨᠡᠭ! ᠲᠡᠷᠡ ᠬᠣᠶᠠᠷ ᠲᠩᠷᠢ ᠳ᠋ᠦ᠍ ᠮᠥᠷᠭᠥᠭᠰᠡᠨ ᠠᠬᠠ ᠳᠡᠭᠦᠦ ᠪᠣᠯᠤᠯᠴᠠᠭᠰᠠᠨ ᠪᠣᠯ ᠪᠦᠷ ᠰᠠᠢᠨ᠃ ᠮᠣᠳᠣᠨ ᠤ᠋ ᠳᠠᠢᠰᠤᠨ ᠰᠦᠬᠡ ᠪᠣᠯᠪᠠᠴᠤ᠂ ᠰᠦᠬᠡᠨ ᠦ᠌ ᠡᠰᠢ ᠨᠢ ᠮᠣᠳᠣ ᠭᠡᠳᠡᠭ ᠮᠡᠷᠭᠡᠨ ᠦᠭᠡ ᠪᠠᠢᠳᠠᠭ ᠰᠢᠲᠠ! ᠭᠡᠵᠡᠢ᠃
— ᠁
— ᠴᠢ ᠴᠠᠭᠠᠨᠠ ᠨᠠᠭᠠᠨᠠ᠂ ᠪᠣᠯᠬᠤ ᠪᠣᠯᠬᠤ ᠦᠭᠡᠢ ᠤᠴᠢᠷ ᠢ᠋ ᠬᠠᠮᠢᠶᠠᠷᠬᠤ ᠬᠡᠷᠡᠭ ᠦᠭᠡᠢ᠃ ᠥᠨᠥᠳᠥᠷ ᠵᠥᠪᠬᠡᠨ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠪᠤᠭᠤᠲᠤ ᠶ᠋ᠢᠨ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠣᠴᠢ ᠭᠡᠳ ᠪᠠᠲᠤᠲᠠᠢ ᠬᠡᠯᠡ ᠬᠦᠷᠭᠡᠴᠡᠭᠡᠪᠡᠯ ᠴᠢᠨᠦ ᠡᠭᠦᠷᠭᠡ ᠭᠦᠢᠴᠡᠭᠰᠡᠨ ᠨᠢ ᠲᠡᠷᠡ! ᠡᠭᠦᠨ ᠡᠴᠡ ᠣᠨᠳᠣᠣ ᠶᠡᠬᠡ ᠶᠠᠪᠤᠳᠠᠯ ᠢ᠋ ᠪᠦᠲᠦᠭᠡᠵᠦ ᠶᠡᠬᠡ ᠮᠥᠩᠭᠥ ᠡᠪᠦᠷᠲᠦᠯᠡᠬᠦ ᠲᠡᠩᠬᠡᠭᠡ ᠴᠢᠮᠠ ᠳ᠋ᠤ᠌ ᠠᠯᠠᠭᠠ᠃
— ᠶᠠᠭᠠᠬᠢᠭᠠᠳ?
— ᠴᠢ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤ᠃ ᠲᠡᠷᠡ ᠵᠢᠯ ᠬᠠᠷᠠ ᠨᠢᠳᠦᠲᠦ ᠪᠡᠷ ᠮᠠᠨᠴᠤᠷᠭᠠ ᠶ᠋ᠢ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠬᠤ ᠡᠭᠦᠷᠭᠡ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠶᠠᠭᠠᠬᠢᠪᠠ? ᠤᠴᠢᠷ ᠴᠣ ᠪᠦᠲᠦᠭᠡᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠶᠡᠬᠡ ᠮᠥᠩᠭᠥ ᠭᠠᠷᠤᠵᠠᠳᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ⁈ ᠭᠡᠰᠡᠨ ᠳ᠋ᠦ᠍ ᠵᠠᠩ ᠣᠪᠣᠭᠲᠤ ᠮᠡᠯᠡᠷᠡᠪᠡ᠃
᠁
ᠬᠠᠷᠠ ᠨᠢᠳᠦᠲᠦ ᠪᠣᠯᠵᠣᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠢᠷᠡᠵᠦ ᠥᠯᠵᠡᠢᠰᠠᠩ ᠲᠠᠢ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠵᠠᠢ᠃
ᠬᠠᠷᠠ ᠨᠢᠳᠦᠲᠦ ᠭᠡᠳᠡᠭ ᠡᠷᠡ ᠪᠣᠯᠪᠠᠰᠤ ᠪᠠᠯᠠᠮᠠᠳ ᠵᠠᠩᠲᠠᠢ ᠬᠠᠬᠢᠷ ᠬᠥᠮᠦᠨ ᠦ᠌ ᠨᠢᠭᠡᠨ᠃ ᠣᠯᠵᠠ ᠠᠰᠢᠭ ᠲᠤ ᠡᠴᠢᠭᠡ ᠡᠬᠡ ᠪᠡᠨ ᠬᠤᠳᠠᠯᠳᠤᠬᠤ ᠠ᠋ᠴᠠ ᠪᠤᠴᠠᠬᠤ ᠦᠭᠡᠢ ᠰᠢᠨᠤᠭ ᠠᠮᠢᠲᠠᠨ᠃ ᠲᠡᠷᠡ ᠰᠠᠭᠠᠯᠢᠴᠢᠨ᠂ ᠲᠣᠭᠲᠠᠬᠤ᠂ ᠵᠦᠩᠭᠠᠷ᠂ ᠳᠠᠯᠠᠳ ᠬᠣᠰᠢᠭᠤ᠂ ᠮᠤᠨᠠ ᠶ᠋ᠢᠨ ᠠᠷᠤ ᠥᠪᠥᠷ ᠦᠭᠡᠢ ᠲᠣᠨᠣᠭᠠ ᠳᠡᠭᠡᠷᠡᠮ ᠬᠢᠵᠦ ᠰᠢᠨᠤᠭ ᠢ᠋ᠶ᠋ᠠᠨ ᠬᠠᠩᠭᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠶᠠᠭᠤ ᠡᠰᠡ ᠦᠢᠯᠡᠳᠦᠭᠰᠡᠨ ᠠᠵᠢ᠃
ᠲᠡᠢᠨ ᠬᠦ᠌ ᠥᠯᠵᠡᠢᠰᠠᠩ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠡᠳ᠋ ᠠᠰᠢᠭ᠂ ᠡᠮᠡᠰ ᠥᠬᠢᠳ ᠲᠦ᠍ ᠳᠤᠷᠠᠲᠠᠢ ᠵᠠᠩ ᠢ᠋ ᠠᠰᠢᠭᠯᠠᠵᠤ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠡᠯᠪᠡᠭ ᠰᠢᠷᠡᠭᠡ ᠵᠠᠰᠠᠨ᠂ ᠠᠷᠢᠬᠢ ᠳᠠᠷᠠᠰᠤ᠂ ᠬᠠᠷᠠ ᠲᠠᠮᠠᠬᠢ᠂ ᠳᠠᠭᠤᠴᠢ ᠡᠮᠡ ᠶ᠋ᠢᠨ ᠠᠯᠢᠨ ᠢ᠋ ᠴᠦ᠍ ᠳᠤᠲᠠᠬᠤ ᠦᠭᠡᠢ ᠬᠠᠩᠭᠠᠯᠲᠠ ᠲᠠᠢ ᠵᠣᠴᠢᠯᠠᠭᠰᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠣᠯᠵᠤ ᠢᠲᠡᠭᠡᠯ ᠢ᠋ ᠨᠢ ᠬᠣᠨᠵᠢᠪᠠ᠃
ᠮᠥᠨ ᠡᠢᠨ ᠬᠦ᠌ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠣᠷᠣᠨ ᠭᠠᠷᠤᠨ ᠣᠯᠠᠨ ᠤᠳᠠᠭᠠ ᠢᠷᠡᠵᠦ ᠣᠴᠢᠨ ᠶᠠᠪᠤᠯᠴᠠᠬᠤ ᠳ᠋ᠠᠭᠠᠨ ᠬᠠᠷᠠ ᠨᠢᠳᠦᠲᠦ᠂ ᠥᠯᠵᠡᠢᠰᠠᠩ ᠢ᠋ ᠮᠥᠩᠭᠥ ᠶᠡᠬᠡᠲᠡᠢ᠂ ᠭᠠᠷ ᠪᠠᠷᠳᠠᠮ ᠭᠡᠵᠦ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠪᠢᠰᠢᠷᠡᠭᠰᠡᠨ ᠢ᠋ ᠬᠡᠯᠡᠬᠦ ᠦᠭᠡᠢ᠂ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠶᠡᠬᠡ ᠯᠡ ᠣᠮᠣᠭᠲᠠᠢ ᠶᠠᠪᠤᠭᠠ ᠳ᠋ᠤ᠌ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠪᠠᠬᠠᠷᠠᠬᠤ ᠰᠡᠳᠬᠢᠯ ᠲᠥᠷᠥᠵᠦ ᠪᠠᠢᠯᠠ᠃ ᠥᠩᠭᠡ ᠮᠥᠩᠭᠥ ᠠᠰᠢᠭ ᠬᠣᠨᠵᠢᠶᠠᠨ ᠳ᠋ᠤ᠌ ᠰᠦᠨᠡᠰᠦ ᠪᠡᠨ ᠣᠭᠣᠰᠣᠷᠯᠠᠭᠤᠯᠤᠭᠰᠠᠨ ᠬᠠᠷᠠ ᠨᠢᠳᠦᠲᠦ ᠨᠢᠭᠡ ᠤᠳᠠᠭᠠᠨ ᠤ᠋ ᠳᠠᠢᠯᠠᠯᠭᠠ ᠶ᠋ᠢᠨ ᠠᠷᠢᠬᠢᠨ ᠳ᠋ᠤ᠌ ᠶᠡᠬᠡᠳᠡ ᠬᠠᠯᠠᠮᠰᠠᠵᠤ ᠥᠯᠵᠡᠢᠰᠠᠩ ᠤ᠋ᠨ ᠡᠮᠦᠨᠡ ᠲᠦᠰᠬᠢᠲᠡᠯᠡ ᠰᠥᠭᠥᠳᠦᠭᠡᠳ᠄
— ᠡᠷᠭᠢᠨ ᠨᠣᠶᠠᠨ ᠠᠬᠠ ᠠ᠋᠂ ᠲᠠ ᠬᠡᠯᠡ! ᠣᠯᠳᠣᠢ ᠳᠡᠭᠦᠦ ᠪᠡᠷ ᠢ᠋ᠶ᠋ᠡᠨ ᠶᠠᠭᠤ ᠪᠦᠲᠦᠭᠡᠯᠭᠡᠬᠦ ᠰᠠᠨᠠᠭᠠ ᠲᠠᠢ ᠶᠤᠮ? ᠨᠠᠮᠠᠶ᠋ᠢ ᠢᠲᠡᠭᠡᠭᠰᠡᠨ ᠪᠣᠯ ᠡᠷᠡᠭᠡ ᠦᠭᠡᠢ ᠬᠡᠯᠡᠭᠡᠷᠡᠢ! ᠣᠯᠳᠣᠢ ᠳᠡᠭᠦᠦ ᠴᠢᠨᠢ ᠪᠢ ᠲᠠᠨ ᠤ᠋ ᠡᠮᠦᠨᠡ ᠡᠴᠡ ᠶᠠᠭᠤ ᠬᠢᠬᠦ ᠡᠴᠡ ᠴᠦ᠍ ᠪᠤᠴᠠᠬᠤ ᠦᠭᠡᠢ! ᠭᠡᠰᠡᠨ ᠳ᠋ᠦ᠍ ᠥᠯᠵᠡᠢᠰᠠᠩ ᠲᠡᠭᠦᠨ ᠢ᠋ ᠡᠷᠭᠦᠨ ᠪᠤᠰᠬᠠᠵᠤ᠄
— ᠴᠢ ᠦᠨᠡᠬᠡᠷ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠡᠵᠡᠨ ᠰᠠᠭᠤᠵᠤ ᠴᠢᠳᠠᠨᠠ ᠤᠤ? ᠭᠡᠵᠡᠢ᠃
— ᠪᠢ ᠡᠷᠡ ᠬᠥᠮᠦᠨ ᠰᠢᠦ! ᠭᠡᠳ ᠬᠡᠯᠡᠪᠡᠯ ᠦᠭᠡ᠂ ᠭᠢᠰᠬᠢᠪᠡᠯ ᠭᠠᠵᠠᠷ ᠭᠡᠳᠡᠭ ᠡᠷᠡᠮᠡᠬᠡᠢ ᠰᠠᠨᠠᠭᠠ ᠪᠠᠨ ᠭᠠᠢᠬᠠᠭᠤᠯᠵᠤ᠂ ᠰᠠᠢᠨ ᠡᠷᠡ ᠰᠠᠭᠠᠳᠠᠭ ᠨᠤᠮᠤ ᠶ᠋ᠢᠨ ᠲᠥᠯᠥᠭᠡ ᠶᠠᠭᠤ ᠴᠦ᠍ ᠬᠢᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠨᠡᠷᠡᠯᠬᠡᠬᠦ ᠶ᠋ᠢᠨ ᠲᠥᠯᠥᠭᠡ ᠬᠢᠲᠤᠭᠠ ᠰᠤᠭᠤᠯᠤᠨ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠶ᠋ᠢ ᠡᠰᠬᠡᠵᠦ᠂ ᠬᠦᠷᠡᠩ ᠤᠯᠠᠭᠠᠨ ᠴᠢᠰᠤ ᠳᠤᠰᠤᠯᠠᠭᠤᠯᠤᠨ ᠠᠮᠠᠨ ᠳ᠋ᠠᠭᠠᠨ ᠰᠣᠷᠣᠪᠠ᠁
— ᠴᠢ ᠠᠷᠢᠬᠢᠨ ᠤ᠋ ᠬᠦᠴᠦᠨ ᠳ᠋ᠦ᠍ ᠬᠠᠯᠠᠮᠰᠠᠵᠤ ᠶᠡᠬᠡ ᠦᠭᠡ ᠬᠡᠯᠡᠭᠰᠡᠨ ᠪᠢᠰᠢ ᠪᠢᠵᠡ?
— ᠦᠭᠡᠢ᠂ ᠦᠭᠡᠢ! ᠠᠷᠢᠬᠢ ᠬᠥᠮᠦᠨ ᠢ᠋ ᠵᠣᠷᠢᠭ ᠣᠷᠣᠭᠤᠯᠵᠤ ᠤᠯᠠᠮ ᠦᠨᠡᠨ ᠦᠭᠡ ᠬᠡᠯᠡᠭᠦᠯᠬᠦ ᠡᠴᠡ ᠪᠢᠰᠢ᠂ ᠬᠠᠷᠢᠨ ᠬᠤᠳᠠᠯ ᠬᠡᠯᠡᠭᠦᠯᠳᠡᠭ ᠦᠭᠡᠢ ᠶᠦᠮ᠃
— ᠠ᠂ ᠶᠠᠭ ᠮᠥᠨ᠃ ᠴᠢ ᠮᠠᠨᠴᠤᠷᠭᠠ ᠶ᠋ᠢ ᠤᠬᠠᠭᠠᠨ ᠬᠢᠵᠦ ᠴᠢᠳᠠᠨᠠ ᠤᠤ?
— ᠮᠠᠨᠴᠤᠷᠭᠠ ᠶᠢ ᠁ ᠭᠡᠵᠦ ᠡᠭ ᠮᠡᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ᠄
— ᠮᠠᠨᠴᠤᠷᠭᠠ ᠭᠡᠰᠡᠨ ᠳ᠋ᠦ᠍ ᠵᠣᠷᠢᠭ ᠴᠢᠨᠢ ᠮᠣᠬᠣᠴᠢᠬᠠᠯᠠ ᠪᠢᠵᠡ⁈ ᠭᠡᠪᠡ᠃
— ᠦᠭᠡᠢ᠂ ᠦᠭᠡᠢ! ᠮᠠᠨᠴᠤᠷᠭᠠ ᠶ᠋ᠢ ᠤᠬᠠᠭᠠᠯᠠᠬᠤ ᠳ᠋ᠤ᠌ ᠡᠪᠲᠡᠢ ᠣᠷᠣᠬᠤ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠰᠠᠨᠳᠤᠷᠤᠨᠠ᠃
ᠥᠯᠵᠡᠢᠰᠠᠩ᠂ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠮᠠᠨᠴᠤᠷᠭᠠ ᠭᠡᠬᠦ ᠳ᠋ᠦ᠍ ᠪᠠᠬᠠᠨ ᠲᠦᠳᠡᠭᠡᠯᠵᠡᠵᠦ ᠠᠪᠤᠭᠰᠠᠨ ᠢ᠋ ᠠᠵᠢᠭᠯᠠᠵᠤ ᠮᠡᠳᠡᠭᠡᠳ᠂ ᠬᠣᠶᠠᠷ ᠴᠣᠬᠣᠷ ᠶᠤᠸᠠᠮᠪᠤᠤ᠂ ᠵᠠᠭᠤᠨ ᠴᠠᠭᠠᠨ ᠵᠣᠭᠣᠰ᠂ ᠬᠣᠶᠠᠷ ᠪᠣᠭᠣᠳᠠᠯ ᠬᠠᠷᠠ ᠲᠠᠮᠠᠬᠢ ᠵᠡᠷᠭᠡ ᠶ᠋ᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠠᠷᠴᠢᠭᠢᠨᠠᠲᠠᠯᠠ ᠭᠠᠷᠭᠠᠵᠤ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠣᠯᠵᠠ ᠰᠢᠨᠤᠯ ᠨᠢ ᠦᠷᠪᠢᠰᠦᠨ᠄
— ᠡᠷᠭᠢᠨ ᠨᠣᠶᠠᠨ ᠠ᠋! ᠪᠢ ᠮᠠᠨᠴᠤᠷᠭᠠ ᠶ᠋ᠢ ᠯᠠᠪ ᠴᠢᠳᠠᠨᠠ᠃ ᠡᠬᠡ ᠶ᠋ᠢᠨ ᠬᠢᠨᠢ ᠤᠩᠬᠤᠷ ᠭᠡᠵᠦ ᠬᠠᠲᠠᠭᠤᠬᠠᠨ ᠳᠤᠤᠭᠠᠷᠪᠠ᠃
— ᠴᠢ ᠮᠠᠨᠴᠤᠷᠭᠠ ᠶ᠋ᠢ ᠡᠨᠡ ᠤᠳᠠᠭᠠ ᠡᠷᠬᠡᠪᠰᠢ ᠴᠡᠪᠡᠷᠬᠡᠨ ᠬᠢᠬᠦ ᠬᠡᠷᠡᠭᠲᠡᠢ!
— ᠲᠡᠷᠡ ᠯᠠᠪ! ᠭᠡᠰᠡᠨ ᠳ᠋ᠦ᠍ ᠥᠯᠵᠡᠢᠰᠠᠩ᠄
— ᠬᠡᠩ! ᠪᠢᠲᠡᠭᠡᠢ ᠲᠦᠷᠦᠭᠦᠦ ᠤᠳᠠᠭᠠ ᠰᠢᠭ᠋ ᠬᠥᠮᠦᠨ ᠢ᠋ ᠬᠢᠬᠦ ᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠬᠢᠭᠳᠡᠴᠢᠬᠡᠬᠦ ᠰᠢᠬᠠᠭᠠᠳ ᠡᠷᠭᠢᠭᠡᠳ ᠲᠥᠷᠥᠭᠰᠡᠨ ᠠᠬᠠ ᠳᠡᠭᠦᠦ ᠰᠢᠭ ᠠᠬᠠ ᠳᠡᠭᠦᠦ ᠪᠠᠷᠢᠯᠳᠤᠳᠠᠭ ᠬᠤᠳᠠᠷᠭᠠ ᠦᠭᠡᠢ ᠠᠵᠢᠯ ᠬᠢᠴᠡᠭᠡ ᠳᠡ! ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠳᠣᠲᠣᠷᠠ ᠬᠠᠴᠢᠨ ᠡᠪ ᠦᠭᠡᠢ ᠶᠠᠭᠤᠮᠠ ᠰᠠᠨᠠᠭᠳᠠᠪᠠ᠃
ᠲᠡᠷᠡ ᠵᠢᠯ ᠦ᠋ᠨ ᠡᠪᠦᠯ ᠴᠠᠰᠤ ᠶᠡᠬᠡᠲᠡᠢ᠃ ᠮᠠᠨᠴᠤᠷᠭᠠ ᠵᠡᠷᠭᠡ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠮᠤᠨᠠ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ᠂ ᠮᠢᠩᠭᠠᠨ ᠬᠣᠰᠢᠭᠤ ᠶ᠋ᠢ ᠵᠣᠷᠢᠭᠰᠠᠨ ᠵᠠᠮ ᠢ᠋ ᠲᠣᠰᠴᠤ᠂ ᠮᠠᠨᠴᠤᠷᠭᠠ ᠶ᠋ᠢ ᠫᠤᠤᠳᠠᠵᠤ ᠠᠯᠠᠬᠤ ᠪᠠᠷ ᠵᠠᠩ ᠣᠪᠣᠭᠲᠤ ᠶ᠋ᠢᠨ ᠪᠤᠵᠠᠷ ᠵᠣᠯᠢᠶᠠᠨ ᠤ᠋ ᠮᠥᠩᠭᠥ ᠶ᠋ᠢ ᠡᠪᠦᠷᠯᠡᠵᠦ ᠶᠠᠪᠤᠭᠠᠳ᠂ ᠠᠷᠠᠢ ᠯᠠ ᠥᠪᠡᠷ ᠦ᠋ᠨ ᠠᠮᠢ ᠪᠠᠨ ᠥᠭᠴᠢᠬᠡᠭᠰᠡᠨ ᠦᠭᠡᠢ ᠶ᠋ᠢ ᠰᠠᠨᠠᠵᠤ ᠠᠢᠳᠠᠰ ᠬᠦᠷᠪᠡ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ᠂ ᠬᠠᠷᠠ ᠨᠢᠳᠦᠲᠦ ᠮᠠᠨᠴᠤᠷᠭᠠ ᠭᠡᠭᠰᠡᠭᠡᠷ ᠵᠢᠷᠦᠬᠡ ᠨᠢ ᠴᠡᠴᠡᠷᠡᠳᠡᠭ ᠪᠣᠯᠵᠠᠢ᠃ ᠠᠷᠭᠠ ᠴᠦ᠍ ᠦᠭᠡᠢ ᠳᠡ᠂ ᠠᠮᠢ ᠶ᠋ᠢ ᠨᠢ ᠠᠪᠬᠤ ᠭᠡᠰᠡᠨ ᠠᠯᠠᠭᠤᠷᠴᠢᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠠᠮᠠᠨ ᠥᠴᠢᠭ ᠢ᠋ ᠨᠢ ᠠᠪᠴᠤ᠂ ᠠᠮᠢ ᠶ᠋ᠢ ᠨᠢ ᠬᠡᠯᠲᠦᠷᠢᠭᠦᠯᠦᠨ ᠠᠬᠠ ᠳᠡᠭᠦᠦ ᠪᠠᠷᠢᠯᠳᠤᠵᠤ ᠴᠢᠳᠠᠳᠠᠭ ᠠᠭᠤᠵᠢᠭᠤ ᠪᠣᠳᠣᠯ ᠲᠠᠢ ᠮᠠᠨᠴᠤᠷᠭᠠ ᠠ᠋ᠴᠠ ᠪᠤᠰᠤ ᠬᠡᠨ ᠲᠡᠭᠡᠬᠦ ᠪᠢᠯᠡ᠃ ᠬᠠᠷᠠ ᠨᠢᠳᠦᠲᠦ ᠮᠠᠨᠴᠤᠷᠭᠠ ᠶ᠋ᠢᠨ ᠶᠡᠬᠡ ᠵᠢᠷᠤᠮ ᠢ᠋ ᠰᠠᠨᠠᠵᠤ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠬᠣᠶᠠᠷ ᠦᠭᠡᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠢᠳᠬᠦᠵᠦ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠣᠯᠵᠠ ᠠᠰᠢᠭ ᠤ᠋ᠨ ᠲᠥᠯᠥᠭᠡ ᠦᠬᠦᠯᠳᠡᠳᠡᠭ ᠵᠠᠩ ᠢ᠋ᠶ᠋ᠠᠨ ᠬᠠᠶᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠯᠦᠳ᠋ ᠦ᠋ᠨ ᠨᠢᠭᠡᠨ ᠪᠠᠢᠭᠰᠠᠨ ᠢ᠋ ᠶᠠᠭᠠᠬᠢᠨᠠᠮ⁈ ᠡᠢᠨ ᠬᠦ᠌ ᠬᠡᠳᠦᠢ ᠪᠢᠰᠢᠷᠡᠵᠦ᠂ ᠠᠶᠤᠨ᠂ ᠰᠦᠷᠳᠡᠳᠡᠭ ᠬᠥᠮᠦᠨ ᠢ᠋ᠶ᠋ᠡᠨ ᠴᠦ᠍ ᠭᠡᠰᠡᠨ ᠠᠲᠠᠭᠠᠷᠬᠠᠨ ᠮᠠᠭᠤ ᠰᠠᠨᠠᠵᠤ ᠶᠠᠪᠤᠬᠤ ᠪᠣᠳᠣᠯ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠᠶᠠᠨᠳᠠᠭᠠᠨ ᠤᠷᠭᠤᠵᠤ᠂ ᠠᠰᠢᠭ ᠤ᠋ᠨ ᠲᠥᠯᠥᠭᠡ ᠬᠡᠯᠪᠡᠢᠳᠡᠭ ᠢ᠋ ᠨᠢ ᠮᠠᠨᠴᠤᠷᠭᠠ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ⁈ ᠢᠩᠭᠢᠬᠦ ᠳ᠋ᠦ᠍ ᠣᠳᠣ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠭᠰᠠᠨ ᠬᠠᠷᠠ ᠨᠢᠳᠦᠲᠦ᠄
— ᠦᠭᠡᠢ᠂ ᠮᠠᠨᠴᠤᠷᠭᠠ ᠶ᠋ᠢ ᠤᠬᠠᠭᠠᠯᠠᠬᠤ ᠳ᠋ᠤ᠌ ᠡᠪ ᠳᠠᠮ ᠮᠠᠰᠢ ᠬᠡᠷᠡᠭ ᠲᠡᠢ ᠪᠠᠢᠨᠠ᠃ ᠬᠥᠳᠡᠭᠡ ᠬᠡᠭᠡᠷᠡ ᠮᠣᠷᠢᠨ ᠳᠡᠭᠡᠷᠡ ᠲᠡᠭᠦᠨ ᠲᠡᠢ ᠠᠪᠤᠯᠴᠠᠬᠤ ᠶᠤᠮ ᠪᠣᠯ ᠮᠠᠨᠴᠤᠷᠭᠠ ᠲᠠᠢ ᠪᠠᠷᠤᠭ ᠤ᠋ᠨ ᠡᠷᠡ ᠬᠠᠪᠢᠳᠠᠬᠤ ᠦᠭᠡᠢ᠃ ᠬᠡᠴᠡᠭᠦᠦ ᠶᠦᠮ ᠠ᠋᠂ ᠮᠣᠩᠭᠣᠯ ᠬᠥᠮᠦᠨ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠭᠠᠷᠤᠭᠰᠠᠭᠠᠷ ᠰᠢᠳᠢ ᠣᠷᠣᠰᠢᠴᠢᠬᠠᠭᠰᠠᠨ ᠰᠢᠭ᠋ ᠯᠡ᠁ ᠬᠡᠴᠡᠭᠦᠦ! ᠭᠡᠪᠡ᠃
— ᠡᠨᠡ ᠤᠳᠠᠭᠠ ᠵᠠᠮ ᠲᠣᠰᠴᠤ ᠵᠠᠳᠠᠭᠠᠢ ᠤᠤᠯᠭᠠᠯᠠᠭᠠ ᠬᠢᠬᠦ ᠦᠭᠡᠢ᠃ ᠲᠡᠢᠮᠦ ᠪᠣᠯᠤᠮᠵᠢ ᠴᠦ᠍ ᠠᠯᠠᠭᠠ᠃ ᠴᠢᠨᠦ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠮᠣᠷᠢᠨ ᠳᠡᠭᠡᠷᠡ ᠪᠤᠶᠤ ᠫᠤᠤ ᠵᠡᠪᠰᠡᠭ ᠬᠥᠳᠡᠯᠭᠡᠬᠦ ᠳ᠋ᠦ᠍ ᠴᠢ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠶᠠᠭᠤ ᠴᠦ᠍ ᠪᠢᠰᠢ ᠠ᠋! ᠬᠣᠭᠣᠰᠣᠨ ᠠᠮᠢ ᠪᠠᠨ ᠬᠦᠷᠭᠡᠬᠦ ᠶ᠋ᠢᠨ ᠨᠡᠮᠡᠷᠢ᠃ ᠬᠠᠷᠢᠨ ᠰᠢᠯᠢ ᠶ᠋ᠢ ᠨᠢ ᠮᠠᠭᠠᠵᠢᠵᠤ ᠪᠠᠢᠭᠠᠳ ᠰᠢᠷᠪᠥᠰᠥ ᠶ᠋ᠢ ᠨᠢ ᠰᠤᠭᠤᠯᠬᠤ ᠬᠡᠷᠡᠭᠲᠡᠢ᠃
— ᠁
— ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠢᠳᠡᠵᠦ ᠤᠤᠭᠤᠵᠤ᠂ ᠴᠡᠩᠭᠡᠵᠦ ᠨᠠᠭᠠᠳᠴᠤ ᠪᠠᠢᠭᠠᠳ ᠴᠢᠨᠠᠭᠰᠢ ᠨᠢ ᠬᠠᠨᠳᠤᠭᠤᠯᠤᠨᠠ ᠰᠢᠦ ᠳᠡ! ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ᠄
— ᠪᠣᠯᠤᠨᠠ᠂ ᠪᠣᠯᠤᠨᠠ᠃ ᠡᠨᠡ ᠠᠮᠠᠷᠬᠠᠨ ᠠ᠋! ᠮᠠᠨᠴᠤᠷᠭᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠳᠤᠷᠠᠲᠠᠢ ᠨᠢ ᠠᠷᠢᠬᠢ᠂ ᠡᠮᠡ ᠬᠣᠶᠠᠷ ᠶᠤᠮ ᠴᠢᠨᠢ᠂ ᠢᠩᠭᠢᠵᠦ ᠤᠬᠠᠭᠠᠯᠠᠬᠤ ᠨᠢ ᠬᠠᠷᠢᠨ ᠪᠣᠯᠤᠨᠠ᠃ ᠡᠬᠡ ᠶ᠋ᠢᠨ ᠬᠢᠨᠢ ᠤᠩᠬᠤᠷ᠁ ᠭᠡᠰᠡᠨ ᠳ᠋ᠦ᠍ ᠥᠯᠵᠡᠢᠰᠠᠩ᠄
— ᠶᠠᠮᠠᠷ ᠴᠦ᠍ ᠰᠢᠯᠲᠠᠭ ᠦᠭᠡᠢ ᠪᠡᠷ ᠲᠡᠭᠦᠨ ᠳ᠋ᠦ᠍ ᠠᠷᠢᠬᠢ ᠤᠤᠭᠤᠯᠭᠠᠵᠤ᠂ ᠡᠮᠡ ᠨᠠᠭᠠᠳᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠰᠢᠦ! ᠭᠡᠯᠡ᠃
— ᠁
— ᠲᠡᠭᠦᠨ ᠢ᠋ ᠪᠠᠰᠠ ᠠᠰᠢᠭᠯᠠᠬᠤ ᠬᠡᠷᠡᠭᠲᠡᠢ᠃ ᠴᠢ ᠮᠠᠨᠴᠤᠷᠭᠠ ᠳ᠋ᠤ᠌ ᠬᠡᠳᠦᠢ ᠬᠡᠳᠦᠢ ᠮᠥᠩᠭᠥ ᠥᠭᠭᠦᠶᠡ! ᠰᠢᠷᠠ ᠴᠡᠷᠢᠭ ᠲᠦ᠍ ᠭᠠᠵᠠᠷᠴᠢᠯᠠᠵᠤ ᠮᠤᠨᠠ ᠶ᠋ᠢᠨ ᠬᠠᠳᠠᠨ ᠤ᠋ ᠴᠠᠳᠬᠤᠯᠠᠩ ᠤ᠋ᠨ ᠴᠣᠩᠬᠢᠶᠠᠯ ᠳ᠋ᠠᠬᠢ ᠮᠥᠩᠭᠥ ᠶ᠋ᠢ ᠬᠠᠢᠯᠭᠠᠬᠤ ᠪᠠᠷ ᠵᠥᠪᠳᠡᠵᠦ ᠦᠵᠡ! ᠲᠡᠷᠡ ᠳᠤᠷᠠᠲᠠᠢ ᠪᠣᠯ ᠶᠠᠪᠤᠳᠠᠯ ᠪᠦᠲᠦᠭᠰᠡᠨ ᠬᠣᠢᠨᠠ ᠠᠭᠠᠵᠢᠮ ᠳ᠋ᠠᠭᠠᠨ ᠪᠣᠯᠤᠶᠠ᠃ ᠳᠤᠷᠠ ᠦᠭᠡᠢ ᠣᠭᠰᠣᠯᠵᠠᠪᠠᠯ ᠮᠥᠨ ᠲᠡᠷᠡ ᠳᠣᠣᠷᠠ ᠨᠢ ᠠᠷᠭᠠ ᠬᠢᠴᠡᠭᠡ! ᠭᠡᠳ ᠥᠮᠥᠳᠥᠨ ᠦ᠌ ᠪᠡᠨ ᠴᠥᠩᠬᠥᠨ ᠡᠴᠡ ᠵᠢᠵᠢᠭᠬᠡᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ《ᠡᠨᠡ ᠪᠣᠯ ᠰᠢᠷᠠ ᠴᠡᠷᠢᠭ ᠦ᠋ᠨ ᠥᠭᠭᠦᠭᠰᠡᠨ ᠤᠳᠠᠭᠠᠨ ᠴᠢᠨᠠᠷᠲᠠᠢ ᠡᠳ᠋᠁》 ᠭᠡᠵᠦ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠪᠡ᠁
— ᠵᠠ᠂ ᠵᠠ᠁ ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠲᠣᠯᠣᠭᠠᠢ ᠳᠣᠬᠢᠨ ᠮᠡᠬᠦᠯᠵᠡᠨᠡ᠃
— ᠬᠡᠷᠰᠡᠦ ᠣᠷᠣᠭᠠᠷᠠᠢ! ᠴᠡᠪᠡᠷᠬᠡᠨ ᠬᠢᠴᠢᠬᠡᠪᠡᠯ᠂ ᠮᠠᠷᠭᠠᠲᠤᠷ ᠥᠷᠯᠥᠭᠡ ᠮᠥᠨ ᠡᠨᠳᠡ《ᠱᠠᠩ ᠤ᠋ᠨ ᠮᠥᠩᠭᠥ》 ᠪᠡᠨ ᠠᠪᠤᠭᠠᠷᠠᠢ! ᠬᠡᠷᠪᠡ ᠲᠡᠢᠮᠦ ᠪᠢᠰᠢ᠂《ᠱᠠᠩ ᠤ᠋ᠨ ᠮᠥᠩᠭᠥ》 ᠪᠡᠨ ᠠᠪᠴᠤ ᠴᠢᠳᠠᠳᠠᠭ ᠦᠭᠡᠢ ᠪᠣᠯ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠭᠡᠷᠡᠢ᠁ ᠭᠡᠳ ᠥᠯᠵᠡᠢᠰᠠᠩ ᠭᠠᠷᠴᠤ ᠶᠠᠪᠤᠪᠠ᠃
᠁
《᠁ ᠴᠡᠪᠡᠷᠬᠡᠨ ᠬᠢᠴᠢᠬᠡᠪᠡᠯ ᠮᠠᠷᠭᠠᠲᠤᠷ ᠥᠷᠯᠥᠭᠡ ᠮᠥᠨ ᠡᠨᠳᠡ<ᠱᠠᠩ ᠤ᠋ᠨ ᠮᠥᠩᠭᠥ> ᠪᠡᠨ ᠠᠪᠤᠭᠠᠷᠠᠢ!》 ᠭᠡᠰᠡᠨ ᠢ᠋ ᠬᠠᠷᠠ ᠨᠢᠳᠦᠲᠦ ᠮᠠᠷᠲᠠᠬᠤ ᠦᠭᠡᠢ ᠰᠠᠨᠠᠵᠤ᠂ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠱᠠᠲᠤ ᠪᠠᠷ ᠲᠦᠱ ᠲᠦᠱ ᠬᠢᠨ ᠭᠦᠶᠦᠮᠡ ᠵᠠᠪᠳᠤᠨ ᠮᠠᠴᠤᠨᠠ᠁
ᠵᠡᠭᠦᠨ ᠮᠥᠷᠦᠨ ᠳ᠋ᠡᠭᠡᠨ ᠬᠭᠢᠷ ᠵᠠᠭᠤᠭᠰᠠᠨ ᠠᠯᠴᠢᠭᠤᠷ ᠬᠠᠶᠠᠭᠰᠠᠨ ᠬᠥᠬᠡ ᠬᠣᠷᠮᠣᠢᠪᠴᠢ ᠴᠠᠭᠠᠨ ᠲᠣᠭᠣᠷᠴᠣᠭᠲᠤ ᠵᠠᠷᠤᠳᠠᠰᠤ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠦᠵᠡᠮᠡᠭᠴᠡ᠄
— ᠡᠷᠭᠢᠨ ᠠᠪᠤᠭᠠᠢ᠂ ᠡᠢᠰᠢ ᠪᠡᠨ! ᠭᠡᠵᠦ ᠳᠣᠲᠣᠷᠠ ᠥᠷᠥᠭᠡ ᠤᠷᠤᠭᠤ ᠲᠡᠭᠦᠨ ᠢ᠋ ᠵᠠᠯᠠᠵᠤ ᠣᠷᠣᠭᠤᠯᠪᠠ᠃
ᠬᠠᠷᠠ ᠨᠢᠳᠦᠲᠦ ᠳᠣᠲᠣᠷᠠ ᠪᠠᠨ《ᠡᠨᠡ ᠢᠮᠠᠭᠠᠨ ᠳᠠᠭᠤᠲᠤ ᠨᠣᠶᠠᠨ ᠨᠠᠳᠠ ᠨᠢᠭᠡ ᠪᠥᠭᠡᠮ ᠶᠠᠭᠤᠮᠠ ᠥᠭᠴᠦ ᠬᠠᠩᠭᠢ ᠰᠢᠭ᠋ ᠭᠠᠷ ᠴᠠᠢᠯᠭᠠᠳᠠᠭ ᠪᠣᠯᠪᠠ ᠤᠤ⁈》 ᠭᠡᠵᠦ ᠰᠠᠢᠬᠠᠨ ᠶᠠᠭᠤᠮᠠ ᠰᠠᠨᠠᠵᠤ᠂ ᠳᠣᠲᠣᠷᠠ ᠤᠷᠤᠭᠤ ᠳᠥᠷᠪᠡᠯᠵᠢᠨ ᠠᠯᠬᠤᠭᠠ ᠪᠠᠷ ᠣᠷᠣᠵᠤ ᠣᠴᠢᠪᠠᠯ᠂ ᠳᠥᠷᠪᠡᠯᠵᠢᠨ ᠰᠢᠷᠡᠭᠡᠨ ᠦ᠌ ᠬᠣᠶᠠᠷ ᠰᠡᠵᠢᠭᠦᠷ ᠢ᠋ ᠠᠪᠴᠤ ᠰᠠᠭᠤᠭᠰᠠᠨ ᠬᠣᠶᠠᠷ ᠦᠯᠦ ᠲᠠᠨᠢᠬᠤ᠂ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠦᠭᠡ ᠳᠠᠭᠤᠨ ᠦᠭᠡᠢ ᠰᠦᠪᠡᠭᠡ ᠲᠤᠯᠵᠤ ᠰᠠᠭᠤᠭᠠ ᠬᠠᠷᠠᠭᠳᠠᠪᠠ᠃ ᠬᠠᠷᠠ ᠨᠢᠳᠦᠲᠦ ᠤᠬᠠᠭᠠ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠤᠭᠰᠠᠨ ᠦᠭᠡᠢ ᠪᠤᠷᠤᠭᠤ ᠭᠡᠷ ᠲᠦ᠍ ᠣᠷᠣᠴᠢᠬᠠᠯᠠ ᠭᠡᠵᠦ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠠᠳ ᠭᠦᠶᠦᠶᠡ ᠭᠡᠰᠡᠨ ᠳ᠋ᠦ᠍᠂ ᠴᠠᠭᠠᠳᠤ ᠡᠭᠦᠳᠡᠨ ᠦ᠌ ᠬᠣᠶᠠᠷ ᠬᠠᠵᠠᠭᠤ ᠠ᠋ᠴᠠ ᠪᠠᠰᠠ ᠬᠣᠶᠠᠷ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠨ《ᠪᠠᠢᠵᠠ!》 ᠭᠡᠵᠦ ᠲᠡᠭᠦᠨ ᠦ᠌ ᠭᠠᠷ ᠢ᠋ ᠠᠷᠤ ᠳ᠋ᠤᠨᠢ ᠮᠤᠰᠬᠢᠵᠦ ᠤᠶᠠᠪᠠ᠃
— ᠬᠥᠶᠢ᠂ ᠪᠠᠢᠵᠠ᠂ ᠪᠠᠢᠵᠠ! ᠲᠠ ᠁ ᠲᠠ ᠨᠠᠷ ᠡᠨᠡ ᠡᠴᠢᠭᠡ ᠪᠡᠨ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠪᠣᠢ? ᠠ⁈ ᠡᠬᠡ ᠶ᠋ᠢᠨ ᠬᠢᠨᠢ ᠤᠩᠬᠤᠷ᠁ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠪᠠᠷᠠᠭᠠᠨ ᠬᠤᠪᠴᠠᠰᠤᠲᠠᠨ ᠤ᠋ ᠨᠢᠭᠡ ᠨᠢ᠄
— ᠪᠦᠲᠦᠯ ᠦᠭᠡᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠰᠠ ᠲᠠᠭᠠᠲᠠᠢ ᠠᠮᠠ ᠨᠢ ᠬᠠᠲᠠᠭᠤ ᠠᠳᠤᠭᠤᠰᠤ ᠪᠠᠢᠨᠠ! ᠭᠡᠳ ᠨᠢᠳᠦ ᠤᠷᠤᠭᠤ ᠨᠢ ᠨᠢᠭᠡ ᠯᠡ ᠨᠢᠳᠤᠷᠭᠠᠳᠠᠪᠠ᠃
ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠪᠦᠯᠲᠡᠭᠡᠷ ᠨᠢᠳᠦᠨ ᠡᠴᠡ ᠭᠠᠯ ᠪᠠᠳᠠᠷᠠᠵᠤ ᠨᠢᠯ ᠬᠢᠨ ᠬᠠᠯᠠᠭᠤ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠪᠠ᠃
— ᠦᠭᠡᠢ᠂ ᠲᠠ ᠨᠠᠷ ᠶᠠᠭᠠᠬᠢᠴᠢᠬᠠᠯᠠ ᠭᠡᠵᠦ ᠨᠠᠮᠠᠶ᠋ᠢ ᠢᠩᠭᠢᠵᠦ ᠬᠠᠷᠠᠳᠠᠵᠤ ᠪᠠᠢᠭᠠ ᠶᠤᠮ? ᠭᠡᠵᠦ ᠬᠡᠳᠦᠨ ᠪᠠᠷᠠᠭᠠᠨ ᠬᠤᠪᠴᠠᠰᠤᠲᠠᠨ ᠤ᠋ ᠥᠭᠡᠳᠡ ᠡᠴᠡ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ《ᠪᠢ ᠲᠠᠨᠤᠰ ᠤ᠋ᠨ ᠬᠡᠨ ᠢ᠋ ᠴᠣ ᠲᠠᠨᠢᠬᠤ ᠦᠭᠡᠢ ᠪᠠᠢᠲᠠᠯᠠ᠁》 ᠭᠡᠰᠡᠨ ᠰᠢᠦᠬᠡᠨ ᠬᠢᠯᠢᠰ ᠨᠥᠮᠥᠷᠦᠭᠰᠡᠨ ᠮᠡᠲᠦ ᠬᠥᠭᠡᠷᠦᠬᠦᠢ ᠴᠢᠷᠠᠢ ᠦᠵᠡᠭᠦᠯᠦᠨ ᠭᠠᠢᠬᠠᠰᠢᠷᠠᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ ᠡᠭᠦᠳᠡ ᠪᠡᠷ ᠣᠷᠣᠵᠤ ᠢᠷᠡᠨ᠄
— ᠬᠠᠷᠠ ᠨᠢᠳᠦᠲᠦ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠤ ᠶᠠᠭᠠᠬᠢᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠤᠤ? ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠥᠯᠵᠡᠢᠰᠠᠩ ᠢ᠋ ᠤᠯᠠᠮ ᠭᠠᠢᠬᠠᠵᠤ᠄
— ᠠᠶᠠ᠂ ᠨᠣᠶᠠᠨ ᠭᠤᠸᠠᠢ ᠠ᠋᠂ ᠠᠮᠢ ᠥᠷᠥᠰᠢᠶᠡ! ᠡᠳᠡᠨᠥᠰ ᠨᠠᠮᠠᠶ᠋ᠢ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠭᠡᠵᠦ ᠥᠯᠵᠡᠢᠰᠠᠩ ᠠ᠋ᠴᠠ ᠠᠪᠤᠷᠠᠯ ᠭᠤᠶᠤᠭᠰᠠᠨ ᠴᠢᠷᠠᠢ ᠦᠵᠡᠭᠦᠯᠪᠡᠯ ᠥᠯᠵᠡᠢᠰᠠᠩ᠄
— ᠮᠠᠨᠴᠤᠷᠭᠠ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠭᠡᠯᠡ᠃
— ᠮᠠᠨᠴᠤᠷᠭᠠ ᠦᠬᠦᠴᠢᠬᠡᠭᠰᠡᠨ!
— ᠮᠠᠨᠴᠤᠷᠭᠠ ᠶ᠋ᠢᠨ ᠦᠬᠦᠳᠡᠯ ᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?
—《ᠤᠷᠠᠨ ᠬᠠᠴᠢᠨ ᠳᠡᠷᠡ》 ᠪᠠᠭᠤᠳᠠᠯ ᠳ᠋ᠤ᠌᠃
—《ᠤᠷᠠᠨ ᠬᠠᠴᠢᠨ ᠳᠡᠷᠡ》 ᠪᠠᠭᠤᠳᠠᠯ ᠳ᠋ᠤ᠌ ᠭᠡᠨᠡ? ᠴᠢ ᠶᠠᠪᠤᠵᠤ ᠲᠡᠨᠳᠡ ᠡᠴᠡ ᠮᠠᠨᠴᠤᠷᠭᠠ ᠶ᠋ᠢᠨ ᠦᠬᠦᠳᠡᠯ ᠢ᠋ ᠣᠯᠵᠤ ᠠᠪᠤᠭᠠᠳ ᠢᠷᠡ! ᠲᠡᠭᠡᠪᠡᠯ ᠪᠢ ᠴᠢᠮᠠ ᠳ᠋ᠤ᠌ ᠪᠠᠰᠠ ᠡᠳᠦᠢ ᠮᠥᠩᠭᠥ ᠥᠭᠭᠦᠶᠡ! ᠭᠡᠵᠦ ᠲᠠᠪᠤᠨ ᠬᠤᠷᠤᠭᠤ ᠪᠠᠨ ᠭᠠᠷᠭᠠᠵᠤ ᠠᠯᠠᠭᠠᠳᠠᠬᠤ ᠳᠦᠷᠢ ᠦᠵᠡᠭᠦᠯᠦᠨᠡ᠃
—᠁ ᠮᠠᠨᠴᠤᠷᠭᠠ ᠶ᠋ᠢ ᠠᠮᠢᠰᠤᠭᠠ ᠲᠠᠰᠤᠷᠠᠭᠰᠠᠨ ᠬᠣᠢᠨᠠ ᠪᠢ ᠰᠠᠶᠢ ᠲᠡᠨᠳᠡ ᠡᠴᠡ ᠶᠠᠪᠤᠭᠰᠠᠨ ᠶᠤᠮ ᠴᠢᠨᠢ? ᠶᠠᠭᠠᠬᠢᠭᠠᠳ ᠦᠬᠦᠳᠡᠯ ᠨᠢ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ ᠪᠠᠢᠨᠠ? ᠡᠨᠡ ᠳᠣᠲᠣᠷᠠ ᠯᠠᠪ ᠨᠢᠭᠡ ᠤᠴᠢᠷ ᠪᠣᠢ! ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠪᠡᠶᠡ ᠪᠡᠨ ᠥᠮᠥᠭᠯᠡᠨ ᠨᠢᠭᠡ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ᠄
— ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠲᠣᠯᠣᠭᠠᠢ! ᠮᠠᠨᠴᠤᠷᠭᠠ ᠠᠮᠢᠰᠤᠭᠠ ᠲᠠᠰᠤᠷᠠᠴᠢᠬᠠᠭᠰᠠᠨ ᠬᠣᠢᠨᠠ ᠴᠢ ᠶᠠᠭᠠᠬᠢᠯᠠ᠂ ᠡᠢᠯᠡ ᠭᠡᠵᠦ ᠬᠤᠳᠠᠯ ᠬᠡᠯᠡᠬᠦ ᠤᠤ⁈ ᠲᠡᠷᠡ ᠡᠴᠢᠭᠡ ᠴᠢᠨᠢ ᠦᠬᠦᠭᠰᠡᠨ ᠦᠭᠡᠢ ᠠᠮᠢᠳᠤ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠨᠠ᠃ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠴᠢ ᠪᠥᠨᠲᠥᠭᠡᠷ ᠢ᠋ᠶ᠋ᠡᠨ ᠮᠠᠨᠴᠤᠷᠭᠠ ᠪᠠᠷ ᠨᠠᠭᠠᠳᠤᠭᠤᠯᠴᠢᠬᠠᠭᠰᠠᠨ ᠦᠭᠡᠢ ᠪᠣᠢ! ᠪᠦᠲᠦᠯ ᠦᠭᠡᠢ ᠳᠠᠮᠰᠢᠭ ᠴᠢ ᠮᠢᠨᠦ ᠮᠥᠩᠭᠥ ᠶ᠋ᠢ ᠦᠷᠡᠭᠡᠵᠦ ᠮᠠᠨᠴᠤᠷᠭᠠ ᠲᠠᠢ ᠬᠣᠶᠠᠭᠤᠯᠠ ᠰᠥᠨᠢᠵᠢᠨ ᠶᠠᠩᠬᠠᠨ ᠳ᠋ᠤ᠌ ᠪᠠᠭᠤᠵᠤ᠂ ᠱᠠᠯᠢᠭ ᠤ᠋ᠨ ᠪᠠᠬᠠ ᠪᠠᠨ ᠬᠠᠩᠭᠠᠭᠠᠴᠢᠬᠠᠭᠠᠳ ᠴᠠᠭᠠᠳᠤ ᠵᠢᠷᠤᠮ ᠤ᠋ᠨ ᠠᠬᠠ ᠪᠠᠨ ᠰᠡᠮᠡᠬᠡᠷ ᠲᠠᠯᠪᠢᠵᠤ ᠶᠠᠪᠤᠭᠤᠯᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠴᠢ ᠤᠷᠢᠳ ᠢ᠋ᠶ᠋ᠠᠷ ᠶᠠᠪᠤᠵᠤ ᠡᠷᠯᠢᠭ ᠲᠦ᠍ ᠨᠡᠷᠡ ᠪᠡᠨ ᠮᠡᠳᠡᠭᠦᠯ! ᠭᠡᠵᠦ ᠰᠢᠩᠭᠡᠨ ᠳᠠᠭᠤ ᠪᠠᠷ ᠠᠭᠤᠷᠲᠠᠢᠬᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠰᠠᠨᠳᠤᠷᠤᠨ᠄
— ᠲᠡᠢᠮᠦ ᠪᠢᠰᠢ! ᠨᠣᠶᠠᠨ ᠠ᠋᠂ ᠲᠠ ᠮᠢᠨᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰ! ᠪᠢ ᠲᠠᠨ ᠤ᠋ ᠵᠠᠬᠢᠭᠰᠠᠨ ᠠ᠋ᠴᠠ ᠬᠢᠯᠭᠠᠰᠤᠨ ᠲᠡᠳᠦᠢ ᠵᠥᠷᠢᠭᠰᠡᠨ ᠦᠭᠡᠢ ᠬᠢᠭᠰᠡᠨ᠃ ᠮᠠᠨᠴᠤᠷᠭᠠ ᠦᠬᠦᠭᠰᠡᠨ ᠦᠭᠡᠢ ᠦᠨᠡᠬᠡᠷ ᠳᠤᠲᠠᠭᠠᠴᠢᠬᠠᠯᠠ ᠭᠡᠬᠦ ᠶᠦᠮ ᠪᠣᠯ ᠡᠨᠡ ᠳᠣᠲᠣᠷᠠ ᠯᠠᠪ ᠨᠢᠭᠡ ᠤᠴᠢᠷ ᠪᠠᠢᠨᠠ᠁ ᠭᠡᠰᠡᠨ ᠳ᠋ᠦ᠍ ᠥᠯᠵᠡᠢᠰᠠᠩ ᠲᠣᠰᠴᠤ᠄
— ᠶᠠᠮᠠᠷ ᠤᠴᠢᠷ ? ᠭᠡᠪᠡ᠃
— ᠲᠡᠷᠡ ᠬᠣᠣᠷᠲᠤ ᠡᠮ ᠦ᠋ᠨ ᠴᠢᠳᠠᠯ ᠮᠠᠭᠤ ᠠ᠋ᠴᠠ ᠥᠨᠥᠬᠢ ᠴᠢᠮᠬᠢ ᠬᠢᠷᠢᠲᠡᠢ ᠨᠤᠨᠲᠠᠭ ᠡᠮ ᠪᠤᠬᠠ ᠰᠢᠭ᠋ ᠪᠦᠳᠦᠭᠦᠨ ᠬᠠᠳᠤᠭᠤᠨ ᠪᠡᠶᠡ ᠳ᠋ᠦ᠍ ᠶᠠᠭᠤ ᠴᠦ᠍ ᠪᠢᠰᠢ ᠪᠠᠢᠵᠤ ᠲᠠᠭᠠᠷᠠᠭᠰᠠᠨ᠁ ᠨᠢᠭᠡ ᠪᠣᠯ ᠮᠠᠨᠴᠤᠷᠭᠠ ᠪᠡᠶᠡ ᠨᠢ ᠵᠣᠪᠠᠬᠤ ᠳ᠋ᠠᠭᠠᠨ ᠭᠠᠷᠴᠤ ᠶᠠᠪᠤᠨ ᠭᠠᠳᠠᠭᠠ ᠬᠥᠳᠡᠭᠡ ᠦᠬᠦᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ᠃
— ᠴᠢ ᠪᠢᠲᠡᠭᠡᠢ ᠨᠢᠭᠡ ᠴᠢᠬᠢᠨ ᠳ᠋ᠦ᠍ ᠨᠠᠭᠠᠯᠳᠤᠬᠤ ᠥᠬᠡᠢ ᠶᠠᠭᠤᠮᠠ ᠳᠣᠩᠭᠣᠰᠤᠭᠠᠳ ᠪᠠᠢ᠃ ᠲᠡᠷᠡ ᠡᠴᠢᠭᠡ ᠴᠢᠨᠢ ᠬᠤᠷᠬᠢᠷᠠᠲᠠᠯᠠ ᠤᠨᠲᠠᠵᠤ ᠠᠮᠠᠷᠠᠭᠠᠳ ᠬᠥᠮᠦᠨ ᠬᠠᠷᠠ ᠠᠶᠤᠯᠭᠠᠵᠤ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠭᠰᠠᠨ ᠳ᠋ᠤ᠌᠁ ᠭᠡᠵᠦ ᠥᠯᠵᠡᠢᠰᠠᠩ᠂ ᠬᠠᠷᠠ ᠨᠢᠳᠦᠲᠦ ᠳ᠋ᠦ᠍ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠬᠡᠯᠡᠬᠦ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ《ᠡᠨᠡ ᠠᠮᠢᠲᠠᠨ ᠤ᠋ ᠳᠣᠩᠭᠣᠰᠴᠤ ᠪᠠᠢᠬᠤ ᠪᠠᠷ ᠪᠠᠰᠠ ᠲᠡᠢᠮᠦ ᠪᠣᠯᠤᠯᠴᠠᠭᠠ ᠪᠠᠢᠵᠤ ᠮᠡᠳᠡᠨᠡ》 ᠭᠡᠵᠦ ᠪᠣᠳᠣᠭᠠᠳ ᠵᠣᠷᠢᠭᠤᠳᠠ᠄
— ᠡᠨᠡ ᠮᠠᠭᠤ ᠵᠣᠯᠢᠭ ᠢ᠋ ᠠᠪᠠᠴᠢᠵᠤ ᠠᠯᠠᠭᠠᠳᠠᠭᠤᠷ ᠠᠮᠲᠠᠯᠠᠭᠤᠯᠤᠭᠠᠳ ᠠᠮᠠᠨ ᠥᠴᠥᠭ ᠢ᠋ ᠨᠢ ᠠᠪ! ᠴᠢᠭᠢᠶᠡᠲᠦᠷᠦᠦ! ᠭᠡᠵᠦ ᠵᠠᠩᠭᠢᠨᠠᠨ ᠬᠠᠷᠢᠶᠠᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠬᠡᠳᠦᠨ ᠪᠠᠷᠠᠭᠠᠨ ᠬᠤᠪᠴᠠᠰᠤᠲᠠᠨ ᠬᠠᠷᠠ ᠨᠢᠳᠦᠲᠦ ᠶ᠋ᠢ ᠲᠡᠭᠳᠡᠢᠲᠡᠯᠡ ᠠᠪᠴᠤ ᠭᠠᠷᠬᠤ ᠳ᠋ᠤ᠌ ᠬᠠᠷᠠ ᠨᠢᠳᠦᠲᠦ᠄
— ᠪᠠᠢᠵᠠ᠂ ᠲᠠ ᠨᠠᠷ ᠡᠷᠡ ᠬᠥᠮᠦᠨ ᠶᠦᠮ ᠪᠣᠯ ᠪᠢᠲᠡᠭᠡᠢ ᠢᠩᠭᠢᠵᠦ ᠬᠢᠯᠢᠰ ᠲᠠᠮᠤᠯᠠᠭᠠᠳ ᠪᠠᠢ᠃ ᠨᠠᠮᠠᠶ᠋ᠢ ᠬᠢᠯᠢᠰᠳᠡᠭᠦᠯᠵᠦ ᠪᠠᠢᠨᠠ᠁ ᠭᠡᠪᠡ᠃
— ᠴᠢᠮᠠ ᠳ᠋ᠤ᠌ ᠬᠢᠯᠢᠰ ᠲᠣᠬᠤᠴᠢᠬᠠᠯᠠ ᠭᠡᠨᠡ⁈
— ᠬᠢᠯᠢᠰ ᠠ᠋! ᠬᠢᠯᠢᠰ! ᠨᠣᠶᠠᠨ ᠠ᠋᠂ ᠲᠠ ᠨᠠᠳᠠ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠵᠠᠢ ᠥᠭᠴᠦ ᠦᠵᠡ! ᠪᠢ ᠮᠠᠨᠴᠤᠷᠭᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠢᠷᠡᠬᠦ ᠦᠭᠡᠢ ᠪᠣᠯ ᠲᠠ ᠨᠠᠷ ᠨᠠᠮᠠᠶ᠋ᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯ!
— ᠵᠠ ᠪᠠᠢᠵᠠ᠂ ᠡᠭᠦᠨ ᠢ᠋ ᠰᠤᠯᠠᠯᠠ! ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠬᠡᠳᠦ ᠨᠢ ᠥᠯᠵᠡᠢᠰᠠᠩ ᠤ᠋ᠨ ᠦᠭᠡ ᠪᠡᠷ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠤᠶᠠᠭᠠᠰᠤ ᠶ᠋ᠢ ᠠᠯᠳᠠᠷᠠᠭᠠᠪᠠ᠃ ᠬᠠᠷᠠ ᠨᠢᠳᠦᠲᠦ ᠮᠥᠷᠥ ᠳᠠᠯᠤ ᠪᠠᠨ ᠰᠢᠯᠭᠡᠭᠡᠵᠦ ᠠᠪᠤᠨ ᠨᠥᠭᠦᠭᠡ ᠬᠡᠳᠦᠨ ᠪᠠᠷᠠᠭᠠᠨ ᠬᠤᠪᠴᠠᠰᠤᠲᠠᠨ ᠢ᠋ ᠪᠠᠰᠤᠮᠵᠢᠯᠠᠨ ᠰᠢᠷᠲᠡᠵᠦ᠄
— ᠵᠠ᠂ ᠨᠣᠶᠠᠨ ᠲᠠ ᠡᠨᠡ ᠬᠡᠳᠦᠨ ᠠᠯᠠᠭᠤᠷᠴᠢᠨ ᠢ᠋ᠶ᠋ᠠᠨ ᠭᠤᠷᠪᠠᠨ ᠡᠳᠦᠷ ᠵᠠᠬᠢᠷᠤᠭᠤᠯ᠃ ᠪᠢ ᠮᠠᠨᠴᠤᠷᠭᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ᠁ ᠭᠡᠪᠡ᠃
— ᠵᠠ ᠪᠠᠢᠵᠠ! ᠪᠣᠯᠤᠨᠠ᠃ ᠬᠠᠷᠠ ᠨᠢᠳᠦᠲᠦ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠬᠢᠬᠦ ᠪᠡᠨ ᠮᠡᠳᠡ! ᠪᠢ ᠥᠨᠥᠳᠥᠷ ᠴᠢᠮᠠ ᠳ᠋ᠤ᠌ ᠨᠢᠭᠡ᠂ ᠬᠣᠶᠠᠷ ᠭᠡᠵᠦ ᠵᠢᠭᠠᠬᠤ ᠦᠭᠡᠢ᠃《ᠵᠠ᠂ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠬᠥᠳᠡᠯ!》 ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠨᠥᠭᠦᠭᠡ ᠬᠡᠳᠦᠨ ᠬᠠᠷᠠ ᠬᠤᠪᠴᠠᠰᠤᠲᠠᠨ ᠢ᠋ ᠡᠷᠡᠦ ᠪᠡᠷ ᠢ᠋ᠶ᠋ᠡᠨ ᠳᠣᠬᠢᠵᠤ ᠮᠠᠭᠠᠵᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠮᠣᠳᠣᠨ ᠱᠠᠲᠤ ᠪᠠᠷ ᠲᠦᠷᠴᠢᠭᠢᠨᠡᠨ ᠪᠠᠭᠤᠪᠠ᠁
— — — —
① ᠮᠠᠢᠮᠠᠢ ᠱᠣᠣᠮᠠᠢ ᠡᠷᠭᠢᠭᠦᠯᠳᠡᠭ ᠬᠢᠲᠠᠳ ᠬᠥᠮᠥᠰ ᠥᠷᠯᠥᠭᠡ ᠡᠷᠲᠡ ᠠᠩᠬᠠᠨ ᠤ ᠵᠣᠴᠢᠨ ᠨᠢ ᠡᠷᠡᠭ᠍ᠲᠡᠢ ᠬᠥᠮᠥᠨ ᠲᠣᠬᠢᠶᠠᠪᠠᠯ ᠮᠠᠢᠮᠠᠢ ᠶᠢ ᠬᠡᠢ ᠮᠣᠷᠢ ᠠᠵᠠᠲᠠᠢ ᠭᠡᠳ ᠵᠣᠴᠢᠯᠠᠳᠠᠭ᠂ ᠡᠮᠡᠭ᠍ᠲᠡᠢ ᠬᠥᠮᠥᠨ ᠲᠠᠭᠠᠷᠠᠪᠠᠯ ᠠᠵᠠ ᠮᠠᠭᠤᠲᠠᠢ ᠭᠡᠵᠦ ᠶᠠᠭᠤᠮᠠ ᠪᠠᠨ ᠬᠤᠳᠠᠯᠳᠤᠵᠤ ᠥᠭ᠍ᠳᠡᠭ ᠦᠭᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ