ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг < 10>
425ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ>
ᠬᠠᠷᠠ ᠨᠢᠳᠦᠲᠦ ᠮᠠᠨᠴᠤᠷᠭᠠ ᠶ᠋ᠢ ᠤᠷᠢᠵᠤ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠳ᠋ᠤ᠌ ᠱᠣᠣᠮᠠᠢ ᠢᠳᠡᠬᠦ ᠪᠡᠷ ᠪᠣᠯᠪᠠ᠃
《ᠨᠠᠷᠠ ᠰᠢᠩᠭᠡᠭᠰᠡᠭᠡᠷ ᠲᠠᠬᠢᠶᠠ ᠴᠠᠭ᠂ ᠨᠣᠬᠠᠢ ᠴᠠᠭ ᠤ᠋ᠨ ᠵᠠᠪᠰᠠᠷ ᠵᠠᠪᠳᠤᠵᠤ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠴᠠᠭ ᠲᠠᠭᠠᠨ ᠮᠣᠷᠢᠯᠠᠭᠠᠷᠠᠢ》 ᠭᠡᠰᠡᠨ ᠢ᠋ᠶ᠋ᠡᠷ ᠮᠠᠨᠴᠤᠷᠭᠠ ᠲᠡᠷᠡ ᠨᠣᠬᠠᠢ ᠴᠠᠭ ᠢ᠋ ᠪᠠᠷᠢᠨ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤᠨ ᠤ᠋ ᠮᠣᠳᠣᠨ ᠳᠡᠭᠲᠡᠷ ᠢ᠋ᠶ᠋ᠡᠷ ᠳᠡᠭᠡᠭᠰᠢ ᠮᠠᠴᠤᠪᠠ᠃ ᠨᠠᠷᠠ ᠰᠢᠩᠭᠡᠭᠰᠡᠨ ᠪᠣᠯᠬᠣᠷ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠶ᠋ᠢᠨ ᠬᠣᠩᠭᠢᠯ ᠳᠣᠲᠣᠷᠠ ᠪᠦᠷᠦᠭ ᠬᠠᠷᠠᠩᠭᠤᠢ ᠪᠠᠢᠪᠠ᠃ ᠡᠨᠳᠡ ᠲᠡᠨᠳᠡ ᠠᠰᠠᠭᠰᠠᠨ ᠯᠠ ᠶ᠋ᠢᠨ ᠭᠡᠷᠡᠯ ᠰᠦᠮᠡᠯᠵᠡᠪᠡᠴᠦ ᠬᠣᠩᠭᠢᠯ ᠳᠣᠲᠣᠷᠠ ᠨᠠᠭᠠᠰᠢ ᠴᠠᠭᠠᠰᠢ ᠵᠥᠷᠢᠯᠳᠦᠬᠦ ᠬᠥᠮᠦᠰ ᠦ᠋ᠨ ᠵᠢᠰᠦ ᠴᠢᠷᠠᠢ ᠲᠡᠳᠦᠢ ᠯᠡ ᠲᠣᠳᠣ ᠬᠠᠷᠠᠭᠳᠠᠬᠤ ᠦᠭᠡᠢ᠃ ᠲᠡᠭᠦᠨ ᠲᠡᠢ ᠲᠠᠭᠲᠤ ᠶ᠋ᠢᠨ ᠥᠭᠰᠥᠭᠦᠷ ᠢ᠋ᠶ᠋ᠡᠷ ᠢᠰᠡᠭᠡᠢ ᠪᠦᠷᠭᠦ ᠶ᠋ᠢ ᠬᠡᠯᠲᠡᠭᠡᠢ ᠳᠠᠷᠤᠭᠰᠠᠨ ᠨᠢᠭᠡ ᠬᠥᠮᠦᠨ ᠵᠥᠷᠢᠵᠦ ᠪᠠᠭᠤᠬᠤ ᠶ᠋ᠢ ᠬᠠᠯᠲᠤ ᠬᠠᠷᠠᠪᠠᠯ ᠲᠠᠨᠢᠮᠠᠷ ᠬᠥᠮᠦᠨ ᠰᠢᠭ ᠵᠢᠲᠡᠪ ᠬᠠᠷᠠᠭᠳᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠮᠠᠨᠴᠤᠷᠭᠠ ᠶ᠋ᠢᠨ ᠳᠣᠲᠣᠷᠠ《ᠥᠯᠵᠡᠢᠰᠠᠩ? 》 ᠭᠡᠰᠡᠨ ᠨᠡᠷᠡ ᠵᠢᠷᠦᠰ ᠬᠢᠨ ᠣᠷᠣᠵᠤ ᠢᠷᠡᠪᠡ᠃ 《ᠡᠨᠡ ᠮᠠᠭᠤ ᠳᠣᠯᠣᠭᠠᠨ ᠭᠣᠣᠯ ᠲᠠᠢ ᠵᠣᠯᠢᠭ ᠶᠠᠪᠤᠵᠤ ᠶᠠᠪᠤᠵᠤ ᠠᠩᠴᠢᠨᠵᠠᠪ ᠤ᠋ᠨ ᠭᠠᠷ ᠢ᠋ᠶ᠋ᠠᠷ ᠠᠮᠢ ᠮᠤᠯᠲᠤᠷᠠᠵᠠᠢ᠃ ᠲᠡᠢᠮᠦ ᠪᠢᠰᠢ ᠪᠣᠯ ᠥᠯᠥᠩᠲᠦ ᠶ᠋ᠢᠨ ᠡᠬᠢ ᠳ᠋ᠦ᠍ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠬᠤ ᠪᠠᠢᠭᠰᠠᠨ ᠳᠠ᠁ ᠮᠠᠭᠤ ᠴᠢᠰᠤ ᠶ᠋ᠢ!ᠡᠨᠡ ᠵᠣᠷᠢᠵᠤ ᠪᠠᠭᠤᠭᠰᠠᠨ ᠬᠥᠮᠦᠨ ᠠᠷᠠᠢ ᠥᠯᠵᠡᠢᠰᠠᠩ ᠪᠢᠰᠢ ᠪᠢᠵᠡ! ᠢᠰᠡᠭᠡᠢ ᠪᠦᠷᠭᠦ ᠶ᠋ᠢ ᠥᠷᠥᠭᠡᠰᠦᠨ ᠨᠢᠳᠦ ᠪᠡᠨ ᠳᠠᠷᠤᠮᠠ ᠬᠡᠯᠲᠡᠷᠬᠡᠢ ᠳᠠᠷᠤᠵᠤ ᠬᠡᠩᠬᠦᠯᠵᠡᠳᠡᠭ ᠪᠣᠯᠴᠢᠬᠠᠭᠰᠠᠨ ᠭᠡᠵᠢ ᠤᠤ? ᠠᠷᠠᠢ ᠪᠢᠰᠢ ᠪᠠᠢᠬᠠ᠃ ᠮᠥᠨ ᠪᠠᠢᠭᠰᠠᠨ ᠪᠣᠯ ᠵᠣᠯᠢᠭ ᠢ᠋ ᠴᠢᠰᠤ ᠶ᠋ᠢ ᠨᠢ ᠬᠣᠯᠢᠬᠤ ᠶᠤᠮ᠁ ᠥᠯᠵᠡᠢᠰᠠᠩ ᠪᠢᠰᠢ!》 ᠭᠡᠵᠦ ᠲᠠᠰᠤ ᠪᠣᠳᠣᠭᠠᠳ ᠲᠠᠭᠲᠤ ᠶ᠋ᠢᠨ ᠳᠡᠭᠡᠷᠡ ᠳᠠᠪᠬᠤᠷᠭᠠ ᠳ᠋ᠤ᠌ ᠭᠠᠷᠴᠤ ᠣᠴᠢᠪᠠ᠃ ᠴᠠᠭᠠᠨ ᠲᠣᠭᠣᠷᠴᠣᠭ᠂ ᠬᠥᠬᠡ ᠬᠣᠷᠮᠣᠢᠪᠴᠢ ᠲᠠᠢ ᠬᠣᠭᠣᠯᠠ ᠵᠠᠭᠤᠰᠢ ᠡᠨᠡ ᠲᠡᠷᠡ ᠵᠠᠬᠢᠶᠠᠯᠠᠭᠠ ᠶ᠋ᠢᠨ ᠵᠠᠷᠤᠳᠠᠰᠤ ᠨᠤᠭᠤᠳ ᠤᠰᠤᠨ ᠵᠢᠷᠣᠭᠠ ᠭᠦᠶᠦᠳᠡᠯ ᠢ᠋ᠶ᠋ᠡᠷ ᠨᠠᠭᠠᠰᠢ ᠴᠠᠭᠠᠰᠢ ᠵᠢᠷᠪᠢᠯᠵᠡᠵᠦ 《ᠬᠣᠶᠠᠷ ᠯᠠᠩ ᠱᠣᠣᠮᠠᠢ》 《ᠨᠢᠭᠡ ᠬᠣᠣ ᠠᠷᠢᠬᠢ》《ᠨᠢᠭᠡ ᠲᠠᠪᠠᠭ ᠪᠤᠷᠴᠠᠭ᠂ ᠦᠬᠡᠷ ᠦ᠋ᠨ ᠮᠢᠬᠠ᠂ ᠳᠠᠪᠤᠰᠤᠲᠠᠢ ᠮᠠᠨᠵᠢᠨ᠁》 ᠭᠡᠬᠦ ᠮᠡᠲᠦ ᠠᠶᠠ ᠳᠠᠩ ᠲᠠᠲᠠᠭᠤᠯᠤᠨ ᠠᠯᠴᠢᠭᠤᠷ ᠪᠦᠵᠢᠭᠯᠡᠭᠦᠯᠵᠦ ᠠᠶᠠᠭᠠ ᠲᠠᠪᠠ ᠶᠠᠩᠭᠢᠨᠠᠭᠤᠯᠤᠨᠠ᠁
ᠮᠠᠨᠴᠤᠷᠭᠠ ᠡᠨᠡ ᠪᠦᠬᠦᠨ ᠢ᠋ ᠪᠠᠬᠠᠷᠬᠠᠨ ᠬᠠᠷᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡᠯᠡ ᠲᠠᠭᠠᠲᠠᠢ᠃ ᠱᠣᠣᠮᠠᠢ ᠶ᠋ᠢᠨ ᠬᠠᠩᠬᠤᠯᠤᠮᠠ ᠦᠨᠦᠷ ᠳᠤ ᠰᠣᠭᠲᠣᠭᠤᠷᠠᠨ᠂ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠣᠴᠢᠪᠠ᠃
ᠬᠣᠶᠠᠷ ᠳᠠᠭᠤᠴᠢ ᠱᠣᠢᠱᠣᠭ ᠤ᠋ᠨ ᠳᠤᠮᠳᠠ ᠱᠠᠯᠢᠭᠯᠠᠨ ᠢᠨᠢᠶᠡᠵᠦ ᠪᠠᠢᠭᠰᠠᠨ ᠬᠠᠷᠠ ᠨᠢᠳᠦᠲᠦ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠣᠷᠣᠵᠤ ᠢᠷᠡᠭᠰᠡᠨ ᠳ᠋ᠦ᠍ ᠰᠠᠨᠳᠤᠷᠤᠨ ᠪᠣᠰᠴᠤ:
— ᠮᠠᠨᠴᠤ ᠠᠬᠠ! ᠳᠡᠭᠡᠭᠰᠢ ᠪᠡᠨ ᠳᠡᠭᠡᠭᠰᠢ ᠪᠡᠨ ᠭᠡᠵᠦ ᠰᠢᠷᠡᠭᠡᠨ ᠦ᠌ ᠬᠣᠢᠮᠣᠷ ᠰᠠᠭᠤᠳᠠᠯ ᠤᠷᠤᠭᠤ ᠵᠠᠯᠠᠵᠤ ᠰᠠᠭᠤᠯᠭᠠᠪᠠ᠃
ᠶᠠᠩᠵᠤ ᠪᠣᠯᠭᠠᠨ ᠤ᠋ ᠵᠠᠭᠤᠰᠢ ᠵᠠᠰᠠᠭᠳᠠᠭᠰᠠᠨ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤ ᠠ᠋ᠴᠠ ᠦᠰᠦ ᠪᠡᠨ ᠱᠠᠩᠬᠤᠯᠠᠨ ᠪᠣᠭᠣᠵᠤ᠂ ᠨᠢᠳᠦ ᠬᠥᠮᠥᠰᠬᠡ ᠪᠡᠨ ᠪᠣᠳᠣᠭᠰᠠᠨ ᠬᠣᠶᠠᠷ ᠳᠠᠭᠤᠴᠢ ᠱᠣᠢᠱᠣᠭ ᠡᠮᠡ ᠮᠠᠨᠴᠤᠷᠭᠠ᠂ ᠬᠠᠷᠠ ᠨᠢᠳᠦᠲᠦ ᠶ᠋ᠢᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠬᠡᠮᠨᠡᠵᠦ ᠥᠭᠭᠦᠯᠡ᠃
— ᠮᠠᠨᠴᠤ ᠠᠬᠠ ᠠ᠋᠂ ᠥᠨᠥᠳᠥᠷ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠᠨ ᠰᠣᠭᠲᠣᠲᠠᠯᠠ ᠤᠤᠭᠤᠵᠤ ᠰᠠᠢᠬᠠᠨ ᠨᠢᠭᠡ ᠨᠢ ᠨᠠᠭᠠᠳᠴᠤ ᠬᠣᠨᠣᠶᠠ! ᠭᠡᠵᠦ ᠬᠤᠨᠳᠠᠭᠠ ᠪᠠᠨ ᠡᠷᠭᠦᠬᠦ ᠳ᠋ᠦ᠍ ᠮᠠᠨᠴᠤᠷᠭᠠ ᠴᠤ᠌《ᠵᠠ᠂ ᠲᠡᠭᠡᠬᠦ ᠤᠤ 》 ᠭᠡᠰᠡᠨ ᠰᠢᠭ ᠬᠤᠨᠳᠠᠭᠠ ᠪᠠᠨ ᠴᠢᠴᠠᠤᠯᠠᠨ ᠡᠷᠭᠦᠵᠦ ᠵᠡᠷᠭᠡ ᠪᠡᠷ ᠬᠦᠨᠳᠦᠷᠡᠪᠡ᠃
— ᠲᠡᠭᠡᠶᠡ ᠳᠡ! ᠳᠡᠭᠦᠦ ᠶ᠋ᠢᠨ ᠬᠡᠰᠢᠭ ᠣᠯᠳᠠᠰᠢ ᠦᠭᠡᠢ ᠭᠡᠳᠡᠭ ᠶᠦ᠍ᠮ! ᠭᠡᠵᠦ《ᠬᠠᠷᠠ ᠨᠢᠳᠦᠲᠦ ᠴᠢ ᠶᠠᠭᠤ ᠶᠠᠭᠠᠬᠢᠯᠠ ᠭᠡᠵᠦ ᠡᠢᠨ ᠬᠦ᠌ ᠲᠠᠩᠰᠤᠭ ᠰᠢᠷᠡᠭᠡ ᠵᠠᠰᠠᠵᠤ ᠶᠠᠭᠤᠮᠠ ᠥᠷᠡᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠬᠣᠶᠠᠭᠤᠯᠠ ᠠᠯᠢ ᠳᠤᠷᠠᠲᠠᠢ ᠠ᠋ᠴᠠ ᠪᠠᠨ ᠬᠡᠳᠦ ᠰᠣᠩᠭᠣᠵᠤ᠂ ᠬᠡᠳᠦᠨ ᠬᠤᠨᠳᠠᠭᠠ ᠰᠢᠮᠡᠴᠢᠬᠡᠪᠡᠯ ᠪᠣᠯᠬᠤ ᠪᠠᠢᠭᠰᠠᠨ ᠶᠤᠮ 》 ᠭᠡᠰᠡᠨ ᠲᠥᠯᠥᠪᠲᠡᠢ ᠬᠡᠯᠡᠪᠡᠯ ᠬᠠᠷᠠ ᠨᠢᠳᠦᠲᠦ ᠪᠦᠷᠢᠨ ᠤᠬᠠᠪᠤᠷᠢᠯᠠᠵᠤ᠄
— ᠬᠠᠮᠢᠶᠠ ᠦᠭᠡᠢ᠂ ᠬᠠᠮᠢᠶᠠ ᠦᠭᠡᠢ ᠪᠢᠳᠡ ᠠᠬᠠ ᠳᠡᠭᠦᠦ ᠬᠣᠶᠠᠷ ᠠᠪᠳᠠᠷᠠ ᠳ᠋ᠠᠬᠢ ᠪᠠᠨ ᠠᠳᠠᠯᠢᠬᠠᠨ ᠵᠠᠷᠤᠵᠤ᠂ ᠠᠶᠠᠭᠠ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠬᠤᠪᠢᠶᠠᠯᠴᠠᠵᠤ ᠢᠳᠡᠬᠦ ᠲᠠᠪᠢᠯᠠᠩ ᠲᠠᠢ ᠳ᠋ᠠᠭᠠᠨ ᠪᠢᠵᠡ! ᠮᠠᠭᠤ ᠳᠡᠭᠦᠦ ᠴᠢᠨᠢ ᠣᠢᠷᠠ ᠳ᠋ᠤ᠌ ᠬᠠᠩᠭᠢ ᠭᠠᠨᠵᠤᠭᠠ ᠲᠠᠢ᠂ ᠣᠪᠣᠭᠠ ᠮᠥᠩᠭᠥ ᠡᠪᠦᠷᠲᠦᠯᠡᠴᠢᠬᠡᠯᠡ᠃ ᠲᠡᠭᠡᠭᠡᠳ ᠠᠬᠠ ᠲᠠᠢ ᠪᠠᠨ ᠬᠣᠶᠠᠭᠤᠯᠠ᠁ ᠭᠡᠵᠦ ᠬᠡᠯᠡᠲᠡᠯᠡ ᠮᠠᠨᠴᠤᠷᠭᠠ᠄
— ᠪᠠᠰᠠ ᠬᠠᠮᠢᠭᠠᠭᠤᠷ ᠲᠡᠨᠦᠵᠦ ᠶᠠᠪᠤᠭᠠᠳ ᠠᠯᠢ ᠶ᠋ᠢ ᠨᠢ ᠬᠠᠷᠠᠯᠠᠭᠤᠯᠪᠠ⁈ ᠠᠢ ᠳᠠ! ᠴᠢ ᠮᠠᠭᠤ ᠵᠣᠯᠢᠭ! ᠭᠡᠰᠡᠨ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ᠄
— ᠦᠭᠡᠢ ᠦᠭᠡᠢ! ᠲᠣᠨᠣᠭᠠ ᠳᠡᠭᠡᠷᠡᠮ ᠬᠢᠭᠰᠡᠨ ᠪᠢᠰᠢ! ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠭᠠᠵᠠᠷᠴᠢᠯᠠᠵᠤ ᠶᠠᠪᠤᠭᠠᠳ ᠣᠯᠤᠭᠰᠠᠨ ᠮᠥᠩᠭᠥ ᠰᠢᠦ! ᠭᠡᠪᠡ᠃
— ᠰᠢᠷᠠ ᠴᠡᠷᠢᠭ ?
— ᠤᠤᠬᠠᠢ ᠳᠠ᠂ ᠰᠢᠷᠠ ᠴᠡᠷᠢᠭ᠃ ᠬᠡᠯᠡ ᠤᠯᠠ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠡ ᠵᠣᠯᠢᠭ ᠤ᠋ᠳ ᠵᠣᠷᠢᠭ ᠲᠠᠢ᠂ ᠵᠣᠭᠣᠰ ᠲᠠᠢ ᠴᠤ᠌ ᠶᠤᠮ ᠠ᠋!
— ᠦᠭᠡᠢ᠂ ᠬᠠᠷᠠ ᠴᠡᠷᠢᠭ ᠦ᠋ᠳ ᠭᠠᠵᠠᠷ ᠠᠪᠴᠤ ᠪᠠᠢᠭᠰᠠᠨ ᠯᠠ ᠰᠢᠲᠠ᠃ ᠰᠢᠷᠠ ᠴᠡᠷᠢᠭ᠂ ᠰᠢᠷᠠ ᠴᠡᠷᠢᠭ ᠭᠡᠳ ᠦᠢᠮᠡᠵᠦ ᠪᠠᠢᠭᠰᠠᠨ ᠨᠢ ᠡᠦᠲᠦ ᠲᠡᠭᠡᠭᠡᠳ ᠰᠢᠷᠠ ᠴᠡᠷᠢᠭ ᠦ᠋ᠨ ᠲᠡᠭᠷᠢ ᠪᠣᠯᠴᠢᠬᠠᠪᠠ ᠤᠤ⁈
— ᠶᠠᠭᠤᠮᠠ ᠶ᠋ᠢ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ᠃ ᠡᠦᠲᠦ ᠴᠢᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠲᠡᠭᠷᠢ ᠭᠡᠰᠡᠨ ᠦᠭᠡ᠃ ᠮᠠᠭᠤ ᠰᠠᠢᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠰᠢᠷᠠ ᠴᠡᠷᠢᠭ ᠡᠴᠡ ᠰᠦᠷᠳᠡᠵᠦ ᠪᠦᠷ ᠪᠠᠷᠠᠭᠤᠨᠰᠢ ᠪᠠᠨ ᠵᠢᠯᠢᠢᠵᠦ ᠪᠣᠷᠣᠲᠣᠬᠣᠢ ᠶ᠋ᠢᠨ ᠲᠠᠢᠰᠢ ᠪᠠᠨ ᠤᠬᠤᠷᠢᠴᠢᠬᠠᠭᠰᠠᠨ! ᠬᠠᠷᠠ ᠴᠡᠷᠢᠭ ᠪᠠᠢᠬᠤ ᠳ᠋ᠤ᠌ ᠬᠥᠮᠦᠨ ᠢ᠋ ᠵᠦᠭᠡᠷ ᠬᠣᠯᠬᠢᠵᠤ ᠬᠡᠯᠲᠦᠰᠬᠢᠪᠡᠯ ᠴᠢᠮᠠᠶ᠋ᠢ ᠬᠠᠷᠭᠢᠰᠯᠠᠵᠤ ᠬᠢᠬᠠᠬᠤ ᠳ᠋ᠠᠭᠠᠨ ᠰᠠᠢᠨ ᠶᠤᠮ᠂ ᠵᠠ᠂ ᠤᠤᠭᠤᠶᠠ ᠭᠡᠳ ᠬᠤᠨᠳᠠᠭᠠ ᠪᠠᠨ ᠬᠣᠭᠣᠰᠣᠯᠠᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠱᠣᠢᠱᠣᠭ ᠡᠮᠡ ᠴᠢᠯᠥᠭᠡ ᠵᠠᠪ ᠦᠭᠡᠢ ᠠᠷᠢᠬᠢ ᠬᠡᠮᠨᠡᠵᠦ᠂ ᠴᠠᠢ ᠤᠰᠤ ᠣᠢᠷᠠᠲᠤᠭᠤᠯᠬᠤ ᠶ᠋ᠢᠨ ᠳᠠᠭᠠᠤ ᠮᠠᠨᠴᠤᠷᠭᠠ ᠬᠠᠷᠠ ᠨᠢᠳᠦᠲᠦ ᠬᠣᠶᠠᠷ ᠲᠤ᠌ ᠨᠠᠯᠢᠭᠯᠠ ᠡᠷᠬᠡᠯᠡᠵᠦ᠂ ᠤᠳᠠᠬᠤ ᠦᠭᠡᠢ ᠬᠦᠵᠦᠭᠦᠳᠡᠵᠦ ᠥᠬᠥᠭᠡᠷᠳᠡᠨ ᠳᠠᠭᠠᠯᠠᠬᠤ ᠴᠡᠨᠡ ᠰᠢᠭ ᠪᠠᠰᠠ ᠡᠪᠦᠷ ᠲᠤᠨᠢ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠵᠤ᠂ ᠡᠨᠡ ᠲᠡᠷᠡ ᠶ᠋ᠢ ᠨᠢ ᠲᠡᠮᠲᠡᠷᠢᠨ ᠠᠷᠭᠠ ᠦᠭᠡᠢ ᠨᠠᠭᠠᠯᠢᠩᠬᠠᠢᠲᠤᠨᠠ᠃ ᠥᠨᠳᠥᠷ ᠰᠢᠭ ᠪᠡᠶᠡ ᠲᠡᠢ ᠱᠣᠢᠱᠣᠭ ᠡᠮᠡ ᠮᠠᠨᠴᠤᠷᠭᠠ ᠶ᠋ᠢᠨ ᠡᠪᠴᠢᠭᠦᠨ ᠦ᠌ ᠦᠰᠦ ᠶ᠋ᠢ ᠢᠯᠢᠵᠦ 《ᠡᠨᠡ ᠠᠬᠠ ᠶ᠋ᠢᠨ ᠪᠡᠶᠡ ᠦᠨᠡᠬᠡᠷ ᠳᠠᠷᠳᠠᠢ᠃ ᠶᠣᠰᠣᠲᠠᠢ ᠡᠷᠡ ᠬᠥᠮᠦᠨ᠁》 ᠭᠡᠳ ᠮᠠᠨᠴᠤᠷᠭᠠ ᠶ᠋ᠢᠨ ᠡᠷᠡᠦ ᠶ᠋ᠢ ᠬᠤᠮᠢᠵᠤ ᠠᠪᠤᠭᠠᠳ ᠤᠷᠤᠭᠤᠯ ᠢ᠋ ᠨᠢ ᠰᠢᠨᠤᠭ ᠦᠨᠦᠰᠪᠡ᠃
— ᠤᠤᠬᠠᠢ᠂ ᠡᠨᠡ ᠠᠬᠠ ᠴᠢᠨᠢ ᠵᠡᠪᠰᠡᠭ ᠰᠠᠢᠲᠠᠢ᠂ ᠰᠠᠢᠨ ᠡᠷᠡ ᠰᠢᠦ! ᠥᠨᠥ᠍ ᠰᠥᠨᠢ ᠨᠢᠭᠡ ᠵᠠᠢᠳᠠᠯᠠᠭᠤᠯᠵᠤ ᠦᠵᠡ! ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠱᠠᠯᠢᠭᠯᠠᠨ ᠢᠨᠢᠶᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠱᠣᠢᠱᠣᠭ᠄
— ᠶᠠᠮᠠᠷ ᠡᠭᠳᠡᠭᠦᠲᠡᠢ ᠶᠦᠮ ᠭᠡᠳ ᠢᠴᠢᠩᠭᠦᠷᠡᠭᠰᠡᠨ ᠰᠢᠨᠵᠢ ᠭᠠᠷᠭᠠᠨᠠ᠃
ᠮᠠᠨᠴᠤᠷᠭᠠ ᠴᠤ᠌ ᠨᠡᠯᠢᠶᠡᠳ ᠬᠠᠯᠠᠮᠰᠠᠭᠰᠠᠨ ᠪᠣᠯᠬᠣᠷ ᠥᠨᠥᠬᠢ ᠱᠣᠢᠱᠣᠭ ᠤ᠋ᠨ ᠬᠥᠬᠥ ᠶ᠋ᠢ ᠨᠢ ᠲᠡᠮᠲᠡᠷᠢᠵᠦ ᠪᠠᠵᠠᠭᠳᠠᠨ ᠤᠷᠢᠯᠠᠭᠤᠯᠤᠨᠠ ᠁
ᠬᠠᠷᠠ ᠨᠢᠳᠦᠲᠦ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠤᠷᠮᠠ ᠬᠥᠭᠵᠢᠭᠰᠡᠨ ᠢ᠋ ᠬᠠᠷᠠᠭᠠᠳ᠄
— ᠮᠠᠨᠴᠤ ᠠᠬᠠ ᠠ᠋᠂ ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠨᠠᠳᠠ ᠪᠠᠰᠠ ᠨᠢᠭᠡ ᠭᠠᠵᠠᠷᠴᠢᠯᠠᠬᠤ ᠡᠭᠦᠷᠭᠡ ᠦᠭᠭᠦᠭᠰᠡᠨ ᠶᠦᠮ᠃ ᠬᠣᠶᠠᠭᠤᠯᠠ ᠪᠠᠨ ᠬᠠᠮᠵᠢᠯᠴᠠᠶᠠ᠂ ᠪᠣᠯᠬᠤ ᠤᠤ? ᠦᠨᠡᠨ ᠳ᠋ᠡᠭᠡᠨ ᠪᠢ ᠥᠨᠥᠳᠥᠷ ᠲᠠᠨ ᠲᠠᠢ ᠠᠷᠢᠬᠢᠳᠠᠵᠤ ᠪᠠᠢᠭᠠ ᠨᠢ ᠬᠣᠶᠠᠷᠬᠠᠨ ᠵᠣᠷᠢᠯᠭᠠ ᠲᠠᠢ᠃ ᠨᠢᠭᠡ ᠨᠢ ᠮᠠᠭᠤ ᠳᠡᠭᠦᠦ ᠴᠢᠨᠢ ᠪᠠᠭᠠ ᠰᠠᠭᠠ ᠮᠥᠩᠭᠥ ᠡᠪᠦᠷᠯᠡᠴᠢᠬᠡᠯᠡ ᠭᠡᠳ ᠴᠠᠭᠠᠰᠢ ᠪᠠᠨ ᠨᠥᠭᠡᠬᠦ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠲᠡᠨᠡᠭ ᠠᠮᠢᠲᠠᠨ᠃ ᠲᠡᠭᠡᠭᠡᠳ ᠯᠡ ᠠᠬᠠ ᠲᠠᠢ ᠪᠠᠨ ᠬᠣᠶᠠᠭᠤᠯᠠ ᠢᠩᠭᠢᠵᠦ ᠵᠢᠷᠭᠠᠭᠰᠠᠨ ᠨᠢ ᠳᠡᠭᠡᠷᠡ ᠴᠦ᠍ ᠶᠦᠮ ᠤᠤ ᠭᠡᠵᠦ ᠪᠣᠳᠣᠯᠠ᠃ ᠨᠥᠭᠦᠭᠡ ᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠶᠠᠮᠠᠷ ᠨᠢᠭᠡ ᠴᠢᠬᠤᠯᠠ ᠭᠠᠵᠠᠷ ᠣᠴᠢᠬᠤ ᠭᠡᠵᠦ ᠨᠠᠳᠠ ᠳ᠋ᠤ᠌ ᠭᠠᠵᠠᠷᠴᠢᠯᠠᠬᠤ ᠡᠭᠦᠷᠭᠡ ᠦᠭᠭᠦᠭᠰᠡᠨ ᠪᠣᠯᠬᠣᠷ ᠬᠠᠮᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠪᠢ ᠲᠠᠨ ᠢ᠋ ᠰᠠᠨᠠᠵᠤ ᠣᠯᠪᠠ᠃ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠳᠤᠷᠠᠲᠠᠢ ᠪᠣᠯ ᠲᠡᠷᠡ ᠮᠥᠩᠭᠥ ᠶ᠋ᠢ ᠲᠠ ᠯᠠ ᠡᠪᠦᠷᠲᠦᠯᠡᠵᠦ ᠴᠢᠳᠠᠬᠤ ᠠ᠋ᠴᠠ ᠳᠠ᠂ ᠥᠭᠡᠷᠡ ᠬᠥᠮᠦᠨ ᠴᠢᠳᠠᠬᠤ ᠦᠭᠡᠢ ᠠ᠋ ! ᠭᠡᠵᠦ ᠪᠠᠷᠳᠠᠮ ᠦᠭᠡ ᠬᠡᠯᠡᠨᠡ᠃
— ᠰᠢᠷᠠ ᠴᠡᠷᠢᠭ ᠪᠠᠰᠠ ᠬᠠᠮᠢᠭᠠ ᠣᠴᠢᠬᠤ ᠭᠡᠵᠦ ᠴᠢᠮᠠ ᠳ᠋ᠤ᠌ ᠶᠠᠮᠠᠷ ᠡᠭᠦᠷᠭᠡ ᠥᠭᠪᠡ ?
— ᠶᠠᠮᠠᠷ ᠡᠭᠦᠷᠭᠡ? ᠲᠠ ᠣᠴᠢᠨᠠ ᠤᠤ? ᠲᠡᠷᠡ ᠮᠥᠩᠭᠥ ᠶ᠋ᠢ ᠡᠪᠦᠷᠲᠦᠯᠡᠬᠦ ᠵᠣᠷᠢᠭ ᠪᠠᠢᠨᠠ ᠤᠤ?
— ᠴᠢ ᠬᠡᠯᠡᠵᠦ ᠦᠵᠡ! ᠶᠠᠮᠠᠷ ᠡᠭᠦᠷᠭᠡ ᠶᠦᠮ ?
— ᠲᠠᠨ ᠳ᠋ᠤ᠌ ᠴᠤ᠌ ᠪᠣᠯ ᠭᠠᠷ ᠤ᠋ᠨ ᠠᠯᠠᠭᠠ ᠤᠷᠪᠠᠭᠤᠯᠬᠤ ᠰᠢᠭ᠋ ᠬᠢᠯᠪᠠᠷᠬᠠᠨ ᠶᠠᠪᠤᠳᠠᠯ᠃ ᠨᠠᠳᠠ ᠳ᠋ᠠᠭᠠᠨ ᠪᠣᠯ ᠲᠡᠭᠷᠢ ᠳ᠋ᠦ᠍ ᠭᠠᠷᠬᠤ ᠠ᠋ᠴᠠ ᠴᠤ᠌ ᠪᠡᠷᠬᠡ!
— ᠨᠢᠯᠠᠭᠤᠨ ᠠ᠋ᠴᠠ ᠰᠢᠯᠤᠭᠤᠨ ᠭᠡᠳᠡᠭ᠃ ᠴᠢ ᠬᠤᠷᠳᠤᠨ ᠶᠠᠷᠢ!
— ᠮᠤᠨᠠ ᠶ᠋ᠢᠨ ᠰᠢᠪᠠᠭᠤᠲᠤ ᠶ᠋ᠢᠨ ᠭᠠᠴᠠᠭᠠᠨ ᠤ᠋ ᠬᠠᠮᠢᠭᠠᠭᠤᠷ ᠪᠠᠢᠳᠠᠭ ᠢ᠋ ᠪᠤᠤ ᠮᠡᠳᠡ! ᠨᠢᠭᠡ ᠶᠡᠬᠡ ᠴᠢᠳᠬᠤᠯᠠᠩ ᠭᠠᠴᠠᠭᠠ ᠲᠠᠢ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠪᠠᠢᠳᠠᠭ ᠭᠡᠨᠡ᠃ ᠲᠡᠷᠡ ᠴᠣᠩᠬᠢᠶᠠᠯ ᠤᠰᠤᠨ ᠳ᠋ᠤ᠌ ᠠᠪᠤᠭᠠᠳ ᠪᠠᠷᠠᠰᠢ ᠦᠭᠡᠢ ᠶᠡᠬᠡ ᠮᠥᠩᠭᠥ᠂ ᠱᠢᠷᠦ ᠰᠤᠪᠤᠳ ᠡᠷᠳᠡᠨᠢᠰ ᠦ᠋ᠨ ᠵᠦᠢᠯ ᠬᠠᠳᠠᠭᠠᠯᠠᠵᠤ ᠪᠠᠢᠳᠠᠭ ᠭᠡᠨᠡ᠁ ᠲᠡᠭᠦᠨ ᠢ᠋ ᠯᠡ ᠠᠪᠬᠤ ᠭᠡᠵᠦ ᠰᠢᠷᠠ ᠴᠡᠷᠢᠭ ᠶᠡᠬᠡ ᠰᠣᠨᠢᠷᠬᠠᠭᠠᠳ ᠪᠠᠢᠨᠠ᠃
— ᠵᠠ᠂ ᠪᠠᠢᠴᠢᠬᠠᠭᠰᠠᠨ ᠨᠢ ᠳᠡᠭᠡᠷᠡ ! ᠲᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠪᠢ ᠯᠡ ᠶᠠᠪᠤᠬᠤ ᠦᠭᠡᠢ!
— ᠦᠭᠡᠢ᠂ ᠲᠡᠢᠮᠦ ᠶᠡᠬᠡ ᠮᠥᠩᠭᠥ ᠲᠡᠢ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤ ᠪᠠᠢᠳᠠᠭ ᠭᠡᠰᠡᠨ ᠦᠨᠡᠨ ᠤᠤ?
— ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠬᠥᠮᠦᠰ ᠪᠠᠢᠨᠠ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠡᠴᠡ ᠪᠢᠰᠢ ᠲᠡᠷᠡ ᠮᠥᠩᠭᠥ ᠡᠷᠳᠡᠨᠢᠰ ᠢ᠋ ᠬᠡᠨ ᠴᠦ᠍ ᠠᠪᠴᠤ ᠴᠢᠳᠠᠳᠠᠭ ᠦᠭᠡᠢ ᠭᠡᠳᠡᠭ᠃
— ᠮᠠᠨᠴᠤ ᠠᠬᠠ ᠠ᠋! ᠬᠠᠮᠢᠶᠠ ᠦᠭᠡᠢ᠂ ᠲᠡᠢᠮᠦ ᠶᠡᠬᠡ ᠮᠥᠩᠭᠥ ᠲᠡᠢ ᠭᠠᠵᠠᠷ ᠦᠨᠡᠨ ᠪᠠᠢᠪᠠᠯ ᠶᠠᠭᠠᠬᠢᠬᠤ ᠪᠣᠢ? ᠰᠢᠷᠠ ᠴᠡᠷᠢᠭ ᠠᠷᠭᠠ ᠲᠠᠢ ᠭᠡᠨᠡ᠃
— ᠲᠡᠭᠡᠪᠡᠯ ᠰᠢᠷᠠ ᠴᠡᠷᠢᠭ ᠦ᠋ᠨ ᠴᠢᠳᠠᠯ ᠮᠡᠳᠡᠨᠡ ᠳᠠ! ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠬᠡᠳᠦ ᠳᠠᠬᠢᠨ ᠣᠷᠣᠯᠳᠣᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ᠂ ᠴᠡᠷᠢᠭ ᠬᠤᠶᠠᠭ ᠢ᠋ᠶ᠋ᠠᠨ ᠳᠡᠮᠡᠢ ᠬᠣᠬᠢᠷᠠᠭᠠᠵᠤ ᠭᠡᠨᠡ ᠪᠢᠯᠡ!
— ᠸᠠᠩ ᠰᠣᠬᠣᠷ? ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠶᠠᠭᠤ ᠪᠠᠢᠬᠤ ᠪᠣᠢ? ᠤᠯᠠᠭᠠᠨ ᠬᠠᠲᠤᠨ ᠢ᠋ ᠰᠠᠬᠢᠵᠤ᠂ ᠰᠤᠪᠠᠭ ᠮᠠᠯᠲᠠᠵᠤ᠂ ᠭᠠᠵᠠᠷ ᠲᠠᠷᠢᠶᠠ ᠡᠵᠡᠮᠳᠡᠬᠦ ᠡᠴᠡ ᠴᠠᠭᠠᠰᠢ ᠶᠠᠭᠤ ᠪᠠᠢᠨᠠ ᠳᠠ? ᠰᠢᠷᠠ ᠴᠡᠷᠢᠭ ᠡᠴᠡ ᠰᠦᠨᠡᠰᠦ ᠪᠡᠨ ᠭᠠᠷᠲᠠᠯᠠ ᠠᠶᠤᠬᠤ ᠳ᠋ᠠᠭᠠᠨ ᠪᠣᠷᠣᠳᠣᠬᠣᠢ ᠲᠠᠢᠰᠢ ᠪᠠᠨ ᠭᠤᠳᠤᠢᠴᠢᠬᠠᠭᠰᠠᠨ ᠪᠢᠰᠢ ᠤᠤ!
— ᠵᠠ ᠮᠡᠳᠡᠬᠦ ᠦᠭᠡᠢ ᠠ᠋ ! ᠬᠡᠨ ᠨᠢ ᠴᠢᠳᠠᠯᠲᠠᠢ ᠪᠣᠯ ᠲᠡᠭᠡᠭᠡᠳ ᠲᠡᠷᠡ ᠶᠡᠬᠡ ᠮᠥᠩᠭᠥ ᠶ᠋ᠢ ᠠᠪᠤᠨᠠ ᠪᠢᠵᠡ! ᠨᠠᠳᠠ ᠬᠠᠮᠢᠶᠠ ᠦᠭᠡᠢ᠃
— ᠦᠭᠡᠢ᠂ ᠲᠠ ᠵᠦᠭᠡᠷ ᠵᠦᠭ ᠴᠢᠭ ᠢ᠋ ᠨᠢ ᠵᠢᠭᠠᠵᠤ᠂ ᠵᠠᠮ ᠵᠢᠯᠣᠭᠣ ᠶ᠋ᠢ ᠨᠢ ᠣᠯᠭᠣᠭᠠᠳ ᠥᠭᠴᠢᠬᠡᠪᠡᠯ ᠪᠣᠯᠴᠢᠬᠠᠳᠠᠭ ᠶᠠᠪᠤᠳᠠᠯ᠃ ᠡᠢᠮᠦ ᠠᠮᠠᠷᠬᠠᠨ ᠵᠢᠷᠣᠭᠠᠯᠠᠵᠤ ᠢᠷᠡᠬᠦ ᠵᠣᠭᠣᠰ ᠢ᠋ ᠣᠯᠬᠤ ᠦᠭᠡᠢ ᠤᠤ ᠲᠠ? ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠮᠠᠨᠴᠤᠷᠭᠠ ᠶ᠋ᠢ ᠰᠢᠬᠠᠨ ᠠᠯᠪᠠᠳᠠᠬᠤ ᠮᠠᠶᠢᠭᠲᠠᠢ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ᠄
— ᠵᠠ᠂ ᠠᠮᠠᠷᠬᠠᠨ ᠵᠣᠭᠣᠰ ᠣᠯᠳᠠᠭ ᠵᠠᠮ ᠢ᠋ ᠣᠯᠴᠢᠬᠠᠭᠰᠠᠨ ᠪᠣᠯ ᠲᠡᠷᠡ ᠵᠣᠭᠣᠰ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠣᠯ! ᠪᠢ ᠴᠦ᠍ ᠲᠡᠭᠡᠵᠦ ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠦᠶᠡ ᠡᠴᠡ ᠣᠩᠭᠣᠳ ᠰᠠᠬᠢᠭᠤᠰᠤ ᠣᠷᠣᠰᠢᠭᠰᠠᠨ ᠨᠤᠲᠤᠭ ᠤᠰᠤ ᠶ᠋ᠢ ᠪᠤᠵᠠᠷᠳᠠᠭᠤᠯᠤᠨ ᠪᠤᠰᠠᠨᠢᠭᠤᠯᠬᠤ ᠪᠤᠷᠤᠭᠤ ᠨᠣᠮ ᠤ᠋ᠨ ᠠᠵᠢᠯ ᠢ᠋ ᠬᠢᠬᠦ ᠦᠭᠡᠢ ᠠ᠋! ᠭᠡᠵᠦ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠬᠥᠨᠲᠥᠷᠴᠦ ᠣᠷᠬᠢᠨ᠂ ᠬᠣᠭᠣᠰᠣᠨ ᠬᠤᠨᠳᠠᠭᠠ ᠶ᠋ᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠫᠠᠰ ᠬᠢᠲᠡᠯᠡ ᠰᠢᠪᠠᠭᠰᠠᠨ ᠳ᠋ᠤ᠌ ᠱᠠᠭᠠᠵᠠᠩ ᠬᠤᠨᠳᠠᠭᠠ ᠬᠡᠳᠦᠨ ᠠᠩᠭᠢ ᠪᠣᠯᠤᠨ ᠪᠢᠴᠠᠷᠠᠪᠠ᠃
ᠥᠨᠥᠬᠢ ᠬᠣᠶᠠᠷ ᠱᠣᠢᠱᠣᠭ《ᠠᠶᠠ᠂ ᠮᠥᠮᠥ ᠠ᠋!》 ᠴᠢᠬᠠᠷᠠᠨ ᠣᠷᠢᠯᠠᠵᠤ ᠳᠣᠣᠷᠠ ᠪᠠᠨ ᠴᠣᠮᠴᠣᠢᠨᠠ᠁
ᠮᠠᠨᠴᠤᠷᠭᠠ ᠠᠭᠤᠷ ᠲᠠᠭᠠᠨ ᠪᠣᠰᠴᠤ ᠶᠠᠪᠤᠬᠤ ᠭᠡᠪᠡᠯ᠄
— ᠮᠠᠨᠴᠤ ᠠᠬᠠ ᠶᠠᠭᠠᠬᠢᠪᠠ? ᠰᠣᠭᠲᠣᠵᠤ ᠪᠠᠢᠨᠠ ᠤᠤ? ᠦᠭᠡᠢ ᠪᠢᠵᠡ? ᠲᠠ ᠣᠴᠢᠬᠤ ᠦᠭᠡᠢ ᠪᠣᠯ ᠪᠠᠢᠯᠠ ᠰᠢᠳᠡ! ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠠᠭᠤᠷᠯᠠᠨᠠ ᠪᠣᠢ? ᠰᠠᠭᠤ᠂ ᠰᠠᠭᠤ᠂ ᠮᠠᠨᠴᠤ ᠠᠬᠠ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤ! ᠣᠳᠣ ᠲᠡᠷᠡ ᠲᠡᠷᠡ ᠶ᠋ᠢ ᠶᠠᠷᠢᠬᠤ ᠦᠭᠡᠢ! ᠡᠨᠡ ᠬᠣᠶᠠᠷ ᠢ᠋ᠶ᠋ᠠᠷ ᠳᠠᠭᠤᠯᠠᠭᠤᠯᠵᠤ ᠪᠠᠢᠭᠠᠳ ᠰᠠᠢᠬᠠᠨ ᠨᠠᠢᠷᠯᠠᠵᠤ ᠨᠠᠭᠠᠳᠤᠶᠠ᠁ ᠭᠡᠵᠦ ᠬᠠᠷᠠ ᠨᠢᠳᠦᠲᠦ ᠮᠠᠨᠴᠤᠷᠭᠠ ᠨᠢ ᠠᠷᠭᠠᠳᠠᠵᠤ ᠣᠷᠣᠨ ᠳ᠋ᠤᠨᠢ ᠰᠠᠭᠤᠯᠭᠠᠪᠠ᠃ ᠮᠠᠨᠴᠤᠷᠭᠠ ᠳᠣᠲᠣᠷᠠ ᠪᠠᠨ 《ᠬᠠᠷᠠ ᠨᠢᠳᠦᠲᠦ ᠥᠨᠥᠳᠥᠷ ᠢᠩᠭᠢᠳᠡᠭ ᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠲᠦᠰᠢᠭᠲᠡᠢ ᠭᠡᠳ ᠨᠠᠮᠠᠶ᠋ᠢ ᠬᠥᠯᠯᠡᠬᠦ ᠪᠡᠷ ᠪᠠᠢᠭᠠ ᠶᠤᠮ ᠪᠠᠢᠨᠠ᠃ ᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠰᠢᠷᠦᠭᠦᠨ ᠣᠷᠣᠪᠠᠯ ᠲᠦᠰᠢᠭ ᠲᠡᠭᠡᠨ ᠡᠷᠳᠦᠵᠦ ᠶᠠᠭᠤ ᠬᠢᠬᠦ ᠡᠴᠡ ᠴᠤ᠌ ᠪᠤᠴᠠᠬᠤ ᠦᠭᠡᠢ ᠵᠣᠯᠢᠭ ᠳᠠ!》 ᠭᠡᠵᠦ ᠰᠠᠶᠢ ᠶ᠋ᠢᠨ ᠠᠭᠤᠷ ᠬᠢᠯᠢᠩ ᠳ᠋ᠡᠭᠡᠨ ᠬᠠᠷᠠᠬᠠᠨ ᠭᠡᠮᠰᠢᠵᠦ᠄
— ᠵᠠ᠂ ᠳᠡᠭᠦᠦ ᠮᠢᠨᠢ ᠠᠭᠤᠴᠢᠯᠠᠭᠠᠷᠠᠢ! ᠠᠬᠠ ᠨᠢ ᠰᠣᠭᠲᠣᠵᠤ ᠪᠠᠢᠨᠠ᠃ ᠴᠡᠴᠡᠭ ᠬᠠᠲᠤᠨ ᠠ᠋ᠴᠠ ᠬᠣᠢᠰᠢ ᠰᠡᠳᠬᠢᠯ ᠶᠡᠬᠡ ᠵᠣᠪᠠᠭᠤᠷᠢᠯᠠᠭᠰᠠᠨ ᠤ᠋ ᠴᠤ᠌ ᠶᠤᠮ ᠤᠤ᠂ ᠳᠠᠩᠴᠤ ᠠᠷᠢᠬᠢ ᠳᠠᠭᠠᠭᠠᠬᠤ ᠥᠬᠡᠢ ᠲᠡᠭᠡᠭᠡᠳ ᠪᠠᠰᠠ ᠠᠮᠠᠷᠬᠠᠨ ᠠᠭᠤᠷᠯᠠᠳᠠᠭ ᠪᠣᠯᠤᠭᠰᠠᠨ᠂ ᠶᠣ᠂ ᠶᠣᠬᠣ ᠲᠣᠯᠣᠭᠠᠢ ᠬᠡᠴᠡᠭᠦᠦ ᠡᠪᠡᠳᠳᠡᠭ ᠨᠢ ᠶᠠᠭᠤ ᠪᠣᠢ?᠁ ᠭᠡᠵᠦ ᠳᠣᠷᠣᠭᠰᠢ ᠬᠠᠷᠠᠨ ᠴᠢᠮᠠᠷᠬᠠᠢ ᠪᠠᠨ ᠨᠤᠬᠤᠯᠠᠨᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠬᠠᠷᠠ ᠨᠢᠳᠦᠲᠦ 《ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠬᠠᠳᠠᠨ ᠭᠠᠴᠠᠭᠠᠲᠤ ᠴᠣᠩᠬᠢᠶᠠᠯ ᠤ᠋ᠨ ᠮᠥᠩᠭᠥ ᠬᠠᠢᠬᠤ ᠪᠠᠷ ᠶᠠᠪᠤᠬᠤ ᠦᠭᠡᠢ ᠭᠡᠪᠡᠯ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠ! ᠶᠠᠪᠤᠬᠤ ᠰᠠᠨᠠᠭᠠᠲᠠᠢ ᠪᠣᠯ ᠬᠠᠳᠠᠨ ᠤ᠋ ᠮᠥᠩᠭᠥ ᠶ᠋ᠢ ᠠᠷᠭᠠᠯᠠᠵᠤ ᠠᠪᠴᠢᠷᠠᠭᠠᠳ ᠮᠡᠳᠡᠶᠡ᠁》 ᠭᠡᠵᠦ ᠥᠯᠵᠡᠢᠰᠠᠩ ᠤ᠋ᠨ ᠬᠡᠯᠡᠭᠰᠡᠨ ᠢ᠋ ᠰᠠᠨᠠᠵᠤ᠂ ᠨᠥᠭᠦᠭᠡ ᠥᠨᠳᠥᠷ ᠰᠢᠭ ᠱᠣᠢᠱᠣᠭ ᠲᠤ ᠨᠢᠳᠦ ᠵᠠᠷᠤᠵᠤ 《ᠮᠠᠨᠴᠤᠷᠭᠠ ᠶ᠋ᠢᠨ ᠪᠢᠴᠠᠷᠠᠭᠰᠠᠨ ᠬᠤᠨᠳᠠᠭᠠ ᠶ᠋ᠢ ᠰᠣᠯᠢᠬᠤ ᠳ᠋ᠠᠭᠠᠨ ᠳᠣᠲᠣᠷᠠ ᠨᠢ ᠬᠣᠣᠷᠲᠤ ᠡᠮ ᠬᠢᠵᠦ ᠣᠷᠭᠢ》 ᠭᠡᠵᠦ ᠪᠢᠲᠡᠭᠦᠬᠡᠨ ᠵᠠᠷᠯᠢᠭ ᠥᠭᠭᠦᠭᠰᠡᠨ ᠢ᠋ ᠲᠡᠷᠡ ᠱᠣᠢᠱᠣᠭ ᠡᠮᠡ ᠣᠢᠯᠠᠭᠠᠵᠤ ᠤᠷᠢᠳ ᠠ᠋ᠴᠠ ᠪᠡᠯᠡᠳᠬᠡᠯ ᠲᠡᠢ ᠪᠠᠢᠭᠰᠠᠨ ᠳ᠋ᠠᠭᠠᠨ ᠰᠡᠪ ᠮᠡᠳᠡᠭᠳᠡᠯ ᠦᠭᠡᠢ ᠲᠡᠭᠡᠵᠦ ᠬᠢᠵᠡᠢ᠃ ᠬᠣᠶᠠᠷ ᠱᠣᠢᠱᠣᠭ ᠬᠡᠳᠦ ᠬᠡᠳᠦᠨ ᠬᠢᠲᠠᠳ ᠰᠢ ᠶ᠋ᠢᠨ ᠳᠠᠭᠤᠤ ᠳᠠᠭᠤᠯᠠᠭᠰᠠᠨ ᠳ᠋ᠤ᠌᠂ ᠬᠠᠷᠠ ᠨᠢᠳᠦᠲᠦ ᠰᠢ ᠶ᠋ᠢᠨ ᠳᠠᠭᠤᠤ ᠶ᠋ᠢᠨ ᠠᠶᠠ ᠳ᠋ᠤ᠌ ᠰᠣᠭᠲᠣᠭᠤᠷᠠᠨ ᠠᠶᠠ ᠠᠢᠵᠠᠮ ᠳ᠋ᠤᠨᠢ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠯᠵᠠᠭᠤᠯᠵᠤ᠂ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠥᠯᠮᠡᠢ ᠪᠡᠨ ᠠᠢᠵᠠᠮ ᠳ᠋ᠤᠨᠢ ᠲᠠᠭᠠᠷᠠᠭᠤᠯᠤᠨ ᠲᠠᠪᠰᠢᠨᠠ᠃ ᠮᠠᠨᠴᠤᠷᠭᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠡᠨᠡ ᠬᠢᠲᠠᠳ ᠰᠢ ᠶ᠋ᠢᠨ ᠳᠠᠭᠤᠤ ᠲᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠴᠤ᠌ ᠤᠷᠮᠠ ᠬᠥᠭ ᠪᠣᠯᠵᠤ ᠥᠭᠳᠡᠭ ᠦᠭᠡᠢ ᠳ᠋ᠦ᠍᠄
— ᠲᠠ ᠨᠠᠷ ᠶᠠᠩᠰᠢᠬᠤ ᠪᠠᠨ ᠪᠣᠯᠢ᠃ ᠪᠠᠢᠵᠠ! ᠪᠢ ᠨᠢᠭᠡ ᠠᠶᠠ ᠪᠠᠷᠢᠶᠠ ᠭᠡᠳ《ᠮᠤᠨᠠ ᠬᠠᠨ ᠤ᠋ ᠣᠷᠣᠨ 》 ᠭᠡᠰᠡᠨ ᠳᠠᠭᠤᠤ ᠶ᠋ᠢ᠄
ᠮᠤᠨᠠ ᠬᠠᠨ ᠤ᠋ ᠣᠷᠣᠨ ᠳ᠋ᠤ᠌
ᠮᠣᠳᠣ ᠴᠡᠴᠡᠭ ᠵᠢᠮᠢᠰ ᠲᠡᠢ
ᠮᠤᠩᠳᠠᠯ ᠦᠭᠡᠢ ᠠᠬᠤᠢ ᠳ᠋ᠤ᠌
ᠮᠣᠩᠭᠣᠯ ᠪᠢᠳᠡ ᠵᠢᠷᠭᠠᠶᠠ!
ᠠᠷᠢᠭᠤᠨ ᠰᠠᠢᠬᠠᠨ ᠤᠰᠤ ᠨᠢ
ᠠᠮᠲᠠ ᠴᠢᠳᠠᠯ ᠰᠢᠮᠡ ᠲᠡᠢ
ᠠᠮᠢᠲᠠᠨ ᠤ᠋ ᠲᠡᠵᠢᠭᠡᠯ ᠨᠢ
ᠷᠠᠰᠢᠶᠠᠨ ᠤ᠋ ᠴᠢᠨᠠᠷ ᠲᠠᠢ᠁ ᠭᠡᠵᠦ ᠳᠠᠭᠤᠯᠠᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠬᠡᠳᠦᠭᠦᠯᠡ ᠵᠡᠷᠭᠡ ᠪᠡᠷ《ᠮᠠᠨᠴᠤ ᠠᠬᠠ ᠰᠠᠢᠬᠠᠨ ᠳᠠᠭᠤᠯᠠᠯᠠ》 ᠭᠡᠳ ᠡᠷᠭᠦᠨ ᠮᠠᠭᠲᠠᠵᠤ᠂ ᠥᠨᠥᠬᠢ ᠥᠨᠳᠥᠷ ᠰᠢᠭ ᠪᠡᠶᠡ ᠲᠡᠢ ᠱᠣᠢᠱᠣᠭ ᠡᠮᠡ ᠮᠠᠨᠴᠤᠷᠭᠠ ᠳ᠋ᠤ᠌ ᠨᠠᠭᠠᠯᠳᠤᠨ ᠡᠪᠦᠷ ᠳᠡᠭᠡᠷᠡ ᠨᠢ ᠡᠷᠬᠡᠯᠡᠨ ᠪᠥᠮᠪᠥᠷᠢᠬᠦ ᠳ᠋ᠦ᠍᠂ ᠮᠠᠨᠴᠤᠷᠭᠠ ᠴᠤ᠌ ᠲᠡᠷᠡ ᠡᠮᠡ ᠶ᠋ᠢᠨ ᠨᠠᠭᠠᠯᠢᠩᠬᠠᠢ ᠵᠠᠩ ᠳ᠋ᠤ᠌ ᠤᠶᠠᠰᠤᠨ ᠬᠠᠢᠯᠵᠤ ᠬᠥᠬᠥ ᠳᠠᠯᠠᠩ᠂ ᠭᠤᠶᠠ ᠬᠠᠰᠠ ᠶ᠋ᠢ ᠨᠢ ᠭᠡᠳᠡᠭᠡᠯᠡᠨ ᠲᠡᠮᠲᠡᠷᠢᠭᠰᠡᠨ ᠳ᠋ᠦ᠍ ᠱᠣᠢᠱᠣᠭ ᠡᠮᠡ ᠢᠷᠠᠭᠯᠠᠨ ᠵᠢᠷᠭᠠᠵᠤ᠂ ᠪᠡᠶᠡ ᠨᠢ ᠨᠠᠢᠯᠵᠠᠭᠤᠷ ᠪᠤᠷᠭᠠᠰᠤ ᠰᠢᠭ᠋ ᠨᠠᠬᠢᠯᠵᠠᠨ ᠨᠤᠭᠤᠷᠠᠨᠠ᠁
ᠠᠷᠢᠬᠢᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠨᠣᠵᠣᠭᠣᠷᠠᠭᠰᠠᠨ ᠬᠠᠷᠠ ᠨᠢᠳᠦᠲᠦ᠂ ᠮᠠᠨᠴᠤᠷᠭᠠ ᠨᠠᠷ ᠠᠷᠠᠢ ᠬᠢᠵᠦ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠲᠠᠭᠲᠤ ᠠ᠋ᠴᠠ ᠠᠶᠠᠷᠯᠠᠵᠤ ᠶᠠᠪᠤᠨ ᠭᠣᠣᠯ ᠵᠡᠭᠡᠯᠢ ᠶ᠋ᠢᠨ ᠪᠠᠷᠠᠭᠤᠨ ᠭᠤᠳᠤᠮᠵᠢᠨ ᠳ᠋ᠠᠬᠢ 《ᠤᠷᠠᠨ ᠬᠠᠵᠢᠨ ᠳᠡᠷᠡ》 ᠭᠡᠬᠦ ᠪᠠᠭᠤᠳᠠᠯ ᠳ᠋ᠤ᠌ ᠣᠴᠢᠵᠠᠭᠠᠪᠠ᠃ ᠡᠨᠡ ᠪᠠᠭᠤᠳᠠᠯ ᠳ᠋ᠤ᠌ ᠢᠯᠢᠵᠦ ᠨᠤᠬᠤᠯᠠᠬᠤ᠂ ᠰᠢ ᠳᠠᠭᠤᠯᠠᠬᠤ᠂ ᠨᠠᠯᠢᠭᠯᠠᠵᠤ ᠶᠠᠩᠬᠠᠯᠠᠬᠤ ᠵᠡᠷᠭᠡ ᠶᠠᠩᠵᠤ ᠪᠣᠯᠭᠠᠨ ᠤ᠋ ᠦᠢᠯᠡᠴᠢᠯᠡᠭᠡ ᠲᠡᠢ ᠮᠥᠷᠲᠡᠭᠡᠨ ᠦᠨᠡ ᠳᠡᠰ ᠦ᠋ᠨ ᠢᠯᠭᠠᠭᠠ ᠲᠠᠢ ᠭᠡᠳᠡᠭ᠃ ᠬᠥᠮᠦᠰ ᠦ᠋ᠨ ᠬᠡᠯᠡᠬᠦ ᠪᠡᠷ《ᠤᠷᠠᠨ ᠬᠠᠵᠢᠨ ᠳᠡᠷᠡ》 ᠪᠠᠭᠤᠳᠠᠯ ᠨᠢ ᠴᠢᠩ ᠦ᠋ᠨ ᠦᠶᠡ ᠡᠴᠡ ᠨᠡᠷᠡ ᠴᠤᠤ ᠭᠠᠷᠴᠤ᠂ ᠭᠠᠮᠢᠩ᠂ ᠬᠠᠷᠠ ᠴᠡᠷᠢᠭ ᠦ᠋ᠨ ᠨᠣᠶᠠᠷᠬᠠᠯ ᠳ᠋ᠤ᠌ ᠴᠤ᠌ ᠣᠯᠵᠠ ᠰᠠᠢᠲᠠᠢ ᠪᠦᠷᠢᠨ ᠦᠢᠯᠡᠴᠢᠯᠡᠭᠡ ᠪᠡᠷ ᠢ᠋ᠶ᠋ᠡᠨ ᠴᠢᠯᠥᠭᠡᠲᠡᠢ ᠪᠠᠢᠵᠠᠢ᠃ ᠣᠳᠣ ᠬᠠᠷᠢᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠵᠡᠮᠳᠡᠯ ᠳ᠋ᠦ᠍ ᠣᠷᠣᠵᠤ᠂ ᠲᠡᠷᠡ ᠪᠣᠯᠭᠠᠨ ᠮᠥᠩᠭᠥ ᠲᠠᠢ ᠯᠠ ᠪᠣᠯ ᠳᠤᠷᠠ ᠪᠠᠷ ᠣᠷᠣᠵᠤ ᠭᠠᠷᠴᠤ ᠪᠣᠯᠳᠠᠭ ᠦᠭᠡᠢ ᠬᠣᠷᠢᠭᠠᠲᠠᠢ ᠪᠣᠯᠵᠤ᠂ ᠭᠠᠭᠴᠠ ᠰᠢᠷᠠ ᠴᠡᠷᠢᠭ ᠲᠦ᠍ ᠯᠡ ᠦᠢᠯᠡᠴᠢᠯᠡᠭᠡ ᠬᠢᠳᠡᠭ ᠪᠣᠯᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠷᠠ ᠨᠢᠳᠦᠲᠦ ᠬᠠᠷᠢᠨ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠠᠷᠠᠭᠤᠯ ᠮᠠᠨᠠᠭᠠ ᠶ᠋ᠢ ᠣᠭᠲᠣ ᠬᠠᠢᠬᠤᠷᠬᠤ ᠦᠭᠡᠢ ᠮᠠᠨᠴᠤᠷᠭᠠ ᠶ᠋ᠢ ᠳᠠᠭᠠᠭᠤᠯᠵᠤ᠂ ᠲᠡᠷᠡ ᠪᠠᠭᠤᠳᠠᠯ ᠳ᠋ᠤ᠌ ᠬᠥᠨᠳᠡᠯᠡᠨ ᠠᠯᠬᠤᠵᠤ ᠣᠷᠣᠭᠰᠠᠨ ᠢ᠋ ᠦᠵᠡᠭᠡᠳ ᠮᠠᠯ ᠭᠠᠢᠬᠠᠵᠠᠢ᠃
ᠰᠦᠮᠡᠭᠢ ᠤᠯᠠᠪᠤᠷ ᠭᠡᠷᠡᠯ ᠰᠡᠭᠦᠳᠡᠭᠡᠨᠡᠭᠰᠡᠨ ᠴᠠᠢᠪᠠᠭᠠᠷ ᠰᠡᠢᠮᠡᠬᠡᠢ ᠪᠦᠷᠬᠦᠪᠴᠢ ᠲᠡᠢ ᠪᠢᠴᠢᠬᠠᠨ ᠥᠷᠥᠭᠡᠨ ᠳ᠋ᠦ᠍ ᠮᠠᠨᠴᠤᠷᠭᠠ ᠣᠷᠣᠵᠤ ᠣᠴᠢᠪᠠᠯ᠂ ᠥᠭᠡᠳᠡ ᠡᠴᠡ ᠡᠯᠳᠡᠪ ᠣ ᠡᠩᠭᠡᠰᠬᠡ᠂ ᠰᠠᠪᠤᠩ ᠲᠣᠰᠣ᠂ ᠦᠨᠦᠷᠲᠦ ᠤᠰᠤ ᠶ᠋ᠢᠨ ᠠᠯᠢ ᠨᠢ ᠢᠯᠭᠠᠭᠳᠠᠮᠠ ᠦᠭᠡᠢ ᠦᠨᠦᠷ ᠬᠠᠩᠬᠤᠯᠵᠤ᠂ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢᠨ ᠠᠯᠢ ᠨᠢᠭᠤᠴᠠ ᠳᠠᠯᠳᠠ ᠪᠠᠢᠭᠠ ᠨᠣᠴᠣᠮᠠᠬᠠᠢ ᠡᠰ ᠢ᠋ ᠡᠷᠪᠡᠭᠡᠨᠡᠭᠦᠯᠬᠦ ᠮᠡᠲᠦ ᠬᠠᠴᠢᠨ ᠲᠥᠷᠥᠭᠳᠡᠯ ᠥᠭᠪᠡ᠃
ᠮᠠᠨᠴᠤᠷᠭᠠ ᠰᠡᠮᠪᠡᠭᠡᠷ ᠵᠥᠭᠡᠯᠡᠨ ᠣᠷᠣᠨ ᠳᠡᠭᠡᠷᠡ ᠬᠡᠪᠲᠡᠭᠡᠳ ᠬᠠᠷᠠ ᠲᠠᠮᠠᠬᠢ ᠱᠠᠷᠴᠢᠭᠢᠨᠠᠭᠤᠯᠤᠨ ᠰᠣᠷᠣᠬᠤ ᠳ᠋ᠤ᠌ ᠡᠭᠦᠯᠡᠨ ᠳ᠋ᠦ᠍ ᠬᠥᠪᠦᠭᠰᠡᠨ ᠮᠡᠲᠦ ᠠᠶᠠᠲᠠᠢᠬᠠᠨ ᠰᠠᠨᠠᠭᠳᠠᠨᠠ᠃《ᠠ᠂ ᠮᠥᠨ ᠵᠢᠷᠭᠠᠯ ᠶᠤᠮ ᠠ᠋!》 ᠭᠡᠵᠦ ᠨᠢᠳᠦ ᠪᠡᠨ ᠠᠨᠢᠬᠤ ᠳ᠋ᠤ᠌ ᠬᠠᠮᠢᠭᠠ ᠬᠣᠯᠠ ᠴᠡᠩᠬᠡᠷ ᠡᠭᠦᠯᠡ ᠪᠤᠭᠤᠷᠤᠯ ᠮᠠᠨᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠴᠡᠴᠡᠭ ᠬᠠᠲᠤᠨ《ᠰᠠᠷᠠᠨ ᠳᠠᠭᠢᠨᠢ》 ᠶ᠋ᠢᠨ ᠠᠭᠤᠵᠢᠭᠤ ᠬᠠᠨᠴᠤᠢᠲᠤ ᠡᠯᠪᠡᠭ ᠴᠠᠢᠪᠠᠭᠠᠷ ᠲᠡᠷᠯᠢᠭ ᠢ᠋ ᠬᠡᠳᠦᠷᠴᠦ ᠢᠨᠢᠶᠡᠪᠬᠢᠯᠡᠨ ᠠᠢᠰᠤᠢ᠃
— ᠮᠠᠨᠴᠤᠷᠭᠠ ᠠᠪᠤᠭᠠᠢ ᠠ᠋! ᠭᠡᠬᠦ ᠨᠠᠮᠬᠠᠨ ᠨᠣᠮᠣᠢ ᠳᠠᠭᠤᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠨᠢᠳᠦ ᠪᠡᠨ ᠨᠡᠭᠡᠭᠡᠪᠡᠯ᠂ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠦᠨᠡᠬᠡᠷ ᠨᠢᠮᠭᠡᠨ ᠴᠠᠭᠠᠨ ᠨᠥᠮᠥᠷᠥᠪᠴᠢ ᠨᠥᠮᠥᠷᠦᠭᠰᠡᠨ ᠭᠣᠶᠣ ᠥᠬᠢᠨ ᠮᠢᠰᠢᠶᠡᠨ ᠵᠣᠭᠰᠣᠬᠤ ᠬᠠᠷᠠᠭᠳᠠᠪᠠ᠃
— ᠴᠡᠴᠡᠭ ᠠ᠋᠁ ᠭᠡᠵᠦ ᠮᠠᠨᠴᠤᠷᠭᠠ ᠥᠨᠳᠡᠢᠭᠰᠡᠨ ᠳ᠋ᠦ᠍᠂ ᠲᠡᠷᠡ ᠥᠬᠢᠨ ᠦ᠌ ᠴᠠᠭᠠᠨ ᠨᠥᠮᠥᠷᠥᠪᠴᠢ ᠬᠤᠷᠴᠠ ᠨᠠᠷᠠᠨ ᠤ᠋ ᠢᠯᠴᠢᠨ ᠳ᠋ᠦ᠍ ᠬᠠᠢᠯᠤᠭᠰᠠᠨ ᠴᠠᠰᠤ ᠰᠢᠭ᠋ ᠮᠥᠷᠦᠨ ᠡᠴᠡ ᠨᠢ ᠳᠣᠷᠣᠭᠰᠢ ᠠᠶᠠᠷᠬᠠᠨ ᠰᠢᠪᠲᠤᠷᠠᠨ ᠤᠨᠠᠪᠠ᠃
ᠣᠷᠣᠢ ᠳᠡᠭᠡᠷᠡ ᠪᠡᠨ ᠤᠯᠠᠭᠠᠨ ᠳᠤᠰᠤᠯ ᠲᠠᠢ ᠴᠠᠪ ᠴᠠᠭᠠᠨ ᠮᠠᠨᠲᠠᠤ ᠰᠢᠭ᠋ ᠬᠣᠶᠠᠷ ᠰᠠᠢᠬᠠᠨ ᠪᠣᠮᠪᠣᠭᠣᠷ ᠬᠥᠬᠥ᠂ ᠨᠠᠷᠢᠬᠠᠨ ᠭᠤᠪᠠᠢ ᠪᠡᠯᠬᠡᠭᠦᠰᠦ᠁ ᠶᠣᠰᠣᠲᠠᠢ ᠯᠠ ᠠᠷᠢᠯᠭᠠᠭᠰᠠᠨ ᠰᠣᠩᠭᠢᠨᠠ ᠰᠢᠭ᠋ ᠬᠠᠷᠠᠭᠳᠠᠭᠰᠠᠨ ᠳ᠋ᠤ᠌ ᠮᠠᠨᠴᠤᠷᠭᠠ ᠨᠢᠭᠡᠮᠦᠰᠦᠨ᠁
ᠮᠠᠨᠴᠤᠷᠭᠠ ᠶ᠋ᠢᠨ ᠳᠣᠲᠣᠷᠠ ᠭᠡᠨᠡᠳᠲᠡ ᠳᠤᠷᠠ ᠪᠤᠯᠭᠢᠨ ᠣᠭᠰᠢᠭᠤᠯᠵᠤ ᠣᠢᠳ᠋᠂ ᠣᠢᠳ᠋ ᠬᠢᠨ ᠪᠤᠬᠠ ᠰᠢᠭ᠋ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠣᠭᠣᠯᠵᠠᠭᠤᠷ ᠢ᠋ᠶ᠋ᠠᠨ ᠬᠦᠴᠦᠲᠡᠢ ᠬᠤᠰᠤᠨ ᠪᠥᠭᠡᠯᠵᠢᠪᠡ᠃ ᠥᠨᠥᠬᠢ ᠶᠠᠭᠠᠨ ᠲᠣᠷᠭᠠᠨ ᠣᠷᠣ ᠳᠡᠪᠢᠰᠬᠡᠷ᠂ ᠤᠷᠠᠨ ᠬᠠᠵᠢᠨ ᠬᠠᠳᠬᠤᠮᠠᠯᠯᠠᠭᠰᠠᠨ ᠤᠯᠠᠭᠠᠨ ᠬᠣᠷᠭᠣᠢ ᠳᠡᠷᠡ ᠡᠨᠡ ᠲᠡᠷᠡ ᠳᠡᠭᠡᠷᠡ ᠣᠪᠣᠭᠠ ᠳᠣᠪᠣᠭᠠ ᠪᠥᠭᠡᠯᠵᠢᠵᠦ᠂ ᠤᠯᠠᠪᠤᠷ ᠭᠡᠷᠡᠯ ᠰᠡᠭᠦᠳᠡᠭᠡᠨᠡᠭᠰᠡᠨ ᠪᠢᠴᠢᠬᠠᠨ ᠥᠷᠥᠭᠡᠨ ᠳ᠋ᠦ᠍ ᠠᠷᠢᠬᠢ ᠱᠣᠣᠮᠠᠢ ᠶ᠋ᠢᠨ ᠬᠣᠯᠢᠯᠳᠤᠭᠰᠠᠨ ᠢᠰᠬᠦᠯᠡᠩ ᠦᠨᠦᠷ ᠢ᠋ᠶ᠋ᠡᠷ ᠳᠦᠭᠦᠷᠪᠡ᠃
ᠮᠠᠨᠴᠤᠷᠭᠠ ᠶ᠋ᠢᠨ ᠳᠡᠷᠭᠡᠳᠡ ᠱᠠᠯᠳᠠᠩ ᠵᠣᠭᠰᠣᠭᠰᠠᠨ ᠱᠣᠢᠱᠣᠭ ᠡᠮᠡ ᠮᠠᠨᠴᠤᠷᠭᠠ ᠶ᠋ᠢᠨ ᠪᠤᠬᠠ ᠰᠢᠭ᠋ ᠮᠥᠭᠡᠷᠡᠨ ᠣᠭᠰᠢᠭᠤᠯᠤᠭᠰᠠᠨ ᠠ᠋ᠴᠠ ᠠᠶᠤᠭᠰᠠᠨ ᠢ᠋ ᠬᠡᠯᠡᠬᠦ ᠤᠤ ᠪᠥᠭᠡᠯᠵᠢᠰᠦᠨ ᠡᠴᠡ ᠨᠢ ᠵᠢᠭᠰᠢᠭᠰᠡᠨ ᠢ᠋ ᠬᠡᠯᠡᠬᠦ ᠤᠤ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠨ ᠪᠥᠭᠯᠡᠨ ᠡᠭᠦᠳᠡᠨ ᠦ᠌ ᠪᠤᠯᠤᠩ ᠳ᠋ᠤ᠌ ᠳᠠᠭᠵᠢᠨ ᠵᠣᠭᠰᠣᠭᠰᠠᠨ ᠢ᠋ ᠮᠠᠨᠴᠤᠷᠭᠠ ᠬᠠᠷᠠᠭᠠᠳ᠄
— ᠴᠡᠴᠡᠭ ᠠ᠋᠂ ᠨᠠᠭᠠᠰᠢ ᠪᠠᠨ ᠢᠷᠡ ! ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠡᠮᠡ ᠨᠢ《ᠦᠭᠡᠢ᠂ ᠦᠭᠡᠢ ᠠ᠋》 ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨᠡ᠃ ᠮᠠᠨᠴᠤᠷᠭᠠ᠄
— ᠮᠠᠭᠤ ᠶᠠᠩᠬᠠᠨ! ᠭᠠᠷ! ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠳ᠋ᠤ᠌ ᠱᠠᠯᠳᠠᠩ ᠱᠣᠢᠱᠣᠭ ᠡᠭᠦᠳᠡ ᠳᠠᠮᠵᠢᠨ ᠱᠠᠯᠳᠠᠩ ᠨᠢᠴᠦᠭᠦᠨ ᠢ᠋ᠶ᠋ᠡᠷ ᠭᠦᠶᠦᠨ ᠭᠠᠷᠪᠠ᠃
— ᠴᠢᠭᠢᠶᠡᠲᠦᠷᠦᠦ! ᠬᠠᠷᠠ ᠨᠢᠳᠦᠲᠦ ᠠ᠋᠂ ᠡᠨᠡ ᠮᠠᠭᠤ ᠴᠢᠰᠤ᠂ ᠴᠢ ᠨᠠᠳᠠ ᠶᠠᠮᠠᠷ ᠠᠷᠢᠬᠢ ᠤᠤᠭᠤᠯᠭᠠᠪᠠ⁈ ᠡᠴᠢᠭᠡ ᠴᠢᠨᠢ ᠬᠡᠴᠢᠨᠡᠭᠡᠨ ᠵᠢᠯ ᠠᠷᠢᠬᠢ ᠳᠠᠷᠠᠰᠤ ᠡᠳ᠋ᠯᠡᠬᠦ ᠳ᠋ᠡᠭᠡᠨ ᠢᠩᠭᠢᠵᠦ ᠪᠥᠭᠡᠯᠵᠢᠬᠦ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ᠁ ᠶᠣ᠂ ᠶᠣᠬᠣ!《ᠴᠡᠴᠡᠭ ᠠ᠋᠂ ᠴᠢ ᠨᠠᠳᠠ ᠨᠢᠭᠡ ᠣᠭᠣᠴᠢ ᠶᠠᠭᠤᠮᠠ ᠥᠭᠭᠦᠭᠡᠳᠡᠬᠡ᠂ ᠠᠮᠠ ᠬᠠᠲᠠᠵᠤ ᠦᠬᠦᠯᠡ!》 ᠭᠡᠵᠦ ᠳᠡᠭᠡᠷᠡ ᠳᠣᠣᠷᠠ ᠪᠠᠷᠬᠢᠷᠠᠵᠤ ᠪᠠᠷᠬᠢᠷᠠᠵᠤ ᠴᠢᠮᠡᠭᠡ ᠠᠯᠳᠠᠷᠠᠨ ᠳᠤᠭᠵᠢᠷᠠᠪᠠ᠃
ᠬᠠᠷᠠ ᠨᠢᠳᠦᠲᠦ ᠭᠠᠳᠠᠨᠠ ᠠ᠋ᠴᠠ ᠮᠠᠨᠴᠤᠷᠭᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠭᠡᠲᠡᠨ ᠴᠢᠩᠨᠠᠬᠤ ᠳ᠋ᠠᠭᠠᠨ《ᠡᠨᠡ ᠭᠠᠢᠬᠠᠯ ᠠᠮᠢ ᠪᠥᠬᠡᠲᠡᠢ ᠵᠣᠯᠢᠭ ᠶᠤᠮ ᠠ᠋!ᠣᠳᠣ ᠪᠣᠯᠲᠠᠯᠠ ᠭᠣᠣᠯ ᠨᠢ ᠲᠠᠰᠤᠷᠠᠳᠠᠭ ᠦᠭᠡᠢ ᠨᠢ》 ᠭᠡᠵᠦ ᠪᠣᠳᠣᠪᠠᠴᠤ ᠡᠷᠦᠬᠡ ᠳᠣᠲᠣᠷᠠ ᠣᠷᠣᠬᠤ ᠠ᠋ᠴᠠ ᠤᠬᠠᠭᠠᠨ ᠦᠭᠡᠢ ᠠᠶᠤᠵᠤ ᠵᠣᠭᠰᠣᠨᠠ᠃
ᠨᠢᠭᠡ ᠬᠡᠰᠡᠭ ᠤᠳᠠᠭᠠᠳ ᠥᠷᠥᠭᠡᠨ ᠳᠣᠲᠣᠷᠠ ᠳᠠᠭᠤ ᠴᠢᠮᠡᠭᠡ ᠠᠯᠳᠠᠷᠠᠭᠰᠠᠨ ᠳ᠋ᠤ᠌ ᠬᠠᠷᠠ ᠨᠢᠳᠦᠲᠦ《ᠦᠦᠷ ᠬᠠᠶᠠᠭᠠᠷᠠᠬᠤ ᠳ᠋ᠤ᠌ ᠦᠬᠦᠳᠡᠯ ᠢ᠋ ᠴᠢᠨᠢ ᠴᠢᠷᠬᠦ ᠬᠥᠮᠦᠨ ᠢᠷᠡᠬᠦ ᠪᠣᠢ ᠳᠠ!》ᠭᠡᠵᠦ ᠳᠦᠳᠦᠨᠡᠨ ᠲᠡᠨᠳᠡ ᠡᠴᠡ ᠱᠠᠯᠠᠪᠬᠠᠨ ᠵᠠᠢᠯᠠᠵᠤ᠂《ᠨᠠᠷᠠ ᠰᠤᠪᠤᠷᠠᠬᠤ ᠳ᠋ᠤ᠌ ᠮᠠᠭᠠᠵᠢ ᠶ᠋ᠢᠨ ᠴᠣᠬᠣᠷ ᠤ᠋ᠨ ᠱᠣᠣᠮᠠᠢ ᠶ᠋ᠢᠨ ᠲᠠᠭᠲᠤ ᠠ᠋ᠴᠠ ᠱᠠᠩ ᠢ᠋ᠶ᠋ᠠᠨ ᠠᠪᠤᠨᠠ ᠳᠠ ᠬᠥᠶᠢ!》ᠭᠡᠵᠦ ᠱᠠᠯᠢᠭ ᠳᠠᠭᠤᠤ ᠶ᠋ᠢᠨ ᠠᠶᠠ ᠶ᠋ᠢ ᠭᠢᠰᠬᠢᠭᠦᠷᠳᠡᠭᠰᠡᠭᠡᠷ ᠬᠠᠷᠠᠩᠭᠤᠢ ᠳ᠋ᠤ᠌ ᠳᠠᠯᠳᠠᠷᠠᠪᠠ᠃
ᠰᠥᠨᠢ ᠳᠦᠯᠢ ᠥᠩᠭᠡᠷᠡᠪᠡ᠃
ᠪᠤᠭᠤᠲᠤ ᠶ᠋ᠢᠨ ᠭᠣᠣᠯ ᠵᠡᠭᠡᠯᠢ ᠶ᠋ᠢᠨ ᠭᠤᠳᠤᠮᠵᠢᠨ ᠤ᠋ ᠴᠥᠭᠡᠪᠲᠦᠷ ᠬᠡᠳᠦᠨ ᠵᠠᠮ ᠤ᠋ᠨ ᠡᠯᠭᠦᠭᠦᠷ ᠳ᠋ᠧᠩ ᠴᠤ᠌ ᠤᠨᠲᠠᠷᠠᠵᠤ ᠲᠦᠰ ᠬᠠᠷᠠᠩᠭᠤᠢ ᠪᠣᠯᠵᠠᠢ᠃ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠱᠤᠤᠭᠢᠯᠳᠤᠨ ᠨᠠᠷᠭᠢᠳᠠᠭ《ᠤᠷᠠᠨ ᠬᠠᠵᠢᠨ ᠳᠡᠷᠡ 》 ᠪᠠᠭᠤᠳᠠᠯ ᠴᠤ᠌ ᠬᠥᠭ ᠨᠢ ᠲᠠᠲᠠᠷᠠᠭᠰᠠᠨ ᠪᠣᠯᠤᠯᠲᠠᠢ᠃ ᠭᠠᠭᠴᠠ ᠬᠣᠶᠠᠷ ᠥᠷᠥᠭᠡᠨ ᠦ᠌ ᠰᠦᠮᠡᠭᠢ ᠭᠡᠷᠡᠯ ᠯᠡ ᠭᠡᠭᠡᠪᠴᠢ ᠪᠡᠷ ᠰᠡᠭᠦᠳᠡᠭᠡᠨᠡᠬᠦ ᠡᠴᠡ ᠴᠠᠭᠠᠰᠢ ᠠᠨᠢᠷ ᠴᠢᠮᠡᠭᠡ ᠠᠯᠠᠭᠠ᠃
ᠢᠯᠢᠮ ᠵᠢᠯᠢᠮ ᠬᠠᠷᠠᠩᠭᠤᠢ ᠳ᠋ᠤ᠌ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ᠂ ᠵᠢᠰᠦ ᠴᠢᠷᠠᠢ ᠨᠢ ᠲᠠᠨᠢᠭᠳᠠᠮᠠ ᠬᠡᠳᠦᠨ ᠬᠥᠮᠦᠨ ᠮᠠᠨᠴᠤᠷᠭᠠ ᠶ᠋ᠢᠨ ᠪᠠᠭᠤᠭᠰᠠᠨ ᠥᠷᠥᠭᠡᠨ ᠦ᠌ ᠴᠣᠩᠬᠣᠨ ᠳᠣᠣᠷᠠ ᠣᠴᠢᠵᠤ ᠪᠥᠭᠡᠮᠨᠡᠷᠡᠯᠳᠦᠨᠡ᠁
ᠡᠨᠡ ᠬᠡᠳᠦᠨ ᠪᠠᠷᠠᠭᠠᠨ ᠬᠤᠪᠴᠠᠰᠤᠲᠠᠨ ᠤ᠋ ᠨᠢᠭᠡ ᠨᠢ ᠥᠯᠵᠡᠢᠰᠠᠩ ᠪᠠᠢᠯᠠ᠃ ᠥᠯᠵᠡᠢᠰᠠᠩ᠂ ᠮᠠᠨᠴᠤᠷᠭᠠ ᠶ᠋ᠢᠨ ᠦᠬᠦᠭᠰᠡᠨ ᠵᠣᠪᠠᠯᠭᠠ ᠶ᠋ᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠵᠤ ᠲᠠᠪᠠ ᠨᠢ ᠬᠠᠩᠬᠤ ᠶᠤᠮᠰᠠᠨ ᠭᠡᠵᠦ ᠵᠡᠭᠡᠯᠢ ᠶ᠋ᠢᠨ ᠬᠡᠳᠦᠨ ᠦᠯᠦ ᠲᠠᠨᠢᠬᠤ ᠵᠣᠯᠪᠢᠩ ᠡᠷᠡ ᠶ᠋ᠢ ᠬᠥᠯᠥᠰᠥᠯᠡᠵᠦ᠂ ᠭᠡᠭᠡᠷᠡᠬᠦ ᠡᠴᠡ ᠡᠮᠦᠨᠡ ᠵᠠᠪᠳᠤᠵᠤ ᠮᠠᠨᠴᠤᠷᠭᠠ ᠶ᠋ᠢᠨ ᠦᠬᠦᠳᠡᠯ ᠢ᠋ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠠᠪᠠᠴᠢᠵᠤ ᠬᠠᠶᠠᠬᠤ ᠪᠠᠷ ᠬᠠᠷᠠᠩᠭᠤᠢ ᠳ᠋ᠤ᠌ ᠱᠠᠯᠠᠪᠳᠠᠵᠤ ᠶᠠᠪᠤᠭᠠ ᠨᠢ ᠡᠨᠡ!
ᠭᠡᠷ ᠳᠣᠲᠣᠷᠠ ᠠ᠋ᠴᠠ ᠮᠠᠨᠴᠤᠷᠭᠠ ᠶ᠋ᠢᠨ ᠬᠤᠷᠬᠢᠷᠠᠬᠤ ᠳᠠᠭᠤᠨ ᠴᠣᠩᠬᠣᠨ ᠤ᠋ ᠬᠣᠪᠬᠣᠷᠠᠭᠰᠠᠨ ᠮᠣᠣᠲᠤᠤ ᠴᠠᠭᠠᠰᠤ ᠶ᠋ᠢ ᠱᠠᠷᠴᠢᠭᠢᠨᠠᠭᠤᠯᠤᠨᠠ᠃
— ᠬᠥᠶᠢ᠂ ᠡᠨᠡ ᠭᠠᠢᠬᠠᠯ ᠴᠢᠨᠢ ᠦᠬᠦᠭᠡ ᠦᠭᠡᠢ ᠪᠠᠢᠨᠠ ᠰᠢᠲᠠ! ᠭᠡᠵᠦ ᠨᠢᠭᠡ ᠨᠢ ᠬᠡᠯᠡᠭᠰᠡᠨ ᠳ᠋ᠦ᠍᠂
— ᠮᠠᠭᠤ ᠬᠠᠷᠠ ᠨᠢᠳᠦᠲᠦ ᠴᠢ ᠶᠣᠰᠣᠲᠠᠢ ᠣᠯᠢᠭ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ ᠠᠮᠢᠲᠠᠨ!ᠬᠡᠵᠢᠶᠡᠳᠡ ᠪᠡᠨ ᠪᠤᠬᠤᠷ ᠲᠠᠭᠠᠨ ᠪᠠᠭᠠᠰᠤ ᠲᠠᠢ ᠠᠵᠢ ᠭᠡᠬᠦ ᠶᠦ᠍ᠮ! ᠭᠡᠵᠦ ᠥᠯᠵᠡᠢᠰᠠᠩ ᠬᠠᠷᠠ ᠨᠢᠳᠦᠲᠦ ᠳ᠋ᠦ᠍ ᠬᠠᠷᠢᠶᠠᠯ ᠲᠠᠯᠪᠢᠨ ᠬᠠᠵᠠᠭᠤ ᠳ᠋ᠠᠬᠢ ᠨᠢᠭᠡ ᠳ᠋ᠡᠭᠡᠨ ᠠᠬᠤᠷ ᠫᠤᠤ ᠪᠠᠨ ᠥᠭᠴᠦ《ᠴᠢ ᠡᠨᠡ ᠭᠡᠷ ᠲᠦ᠍ ᠰᠡᠮᠡᠭᠡᠷᠬᠡᠨ ᠣᠷᠣᠵᠤ᠂ ᠡᠨᠡ ᠬᠤᠷᠬᠢᠷᠠᠭᠰᠠᠨ ᠡᠷᠡ ᠶ᠋ᠢ ᠨᠢᠭᠡ ᠯᠡ ᠰᠤᠮᠤ ᠪᠠᠷ ᠴᠠᠭᠠᠰᠢ ᠨᠢ ᠬᠠᠨᠳᠤᠭᠤᠯᠴᠢᠬᠠ! 》 ᠭᠡᠵᠦ ᠵᠠᠬᠢᠭᠰᠠᠨ ᠳ᠋ᠤ᠌ ᠨᠥᠭᠥᠭᠡᠳᠡᠬᠢ ᠠᠯᠠᠭᠤᠷᠴᠢᠨ ᠡᠷᠡ《ᠵᠠ! 》 ᠭᠡᠵᠦ ᠪᠢᠲᠡᠭᠦᠬᠡᠨ ᠳᠤᠤᠭᠠᠷᠪᠠ᠃
— ᠬᠡᠷᠰᠡᠦᠬᠡᠨ! ᠮᠠᠢ! ᠭᠡᠳ ᠥᠯᠵᠡᠢᠰᠠᠩ ᠲᠡᠭᠦᠨ ᠳ᠋ᠦ᠍ ᠬᠣᠷᠢᠨ ᠮᠥᠩᠭᠥᠨ ᠵᠣᠭᠣᠰ ᠭᠠᠷᠳᠠᠭᠤᠯᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠤᠯᠠᠮ ᠵᠢᠷᠦᠬᠡ ᠪᠦᠳᠦᠭᠦᠷᠡᠵᠦ᠄
— ᠰᠠᠨᠠᠭᠠ ᠠᠮᠤᠷ ᠪᠠᠢ! ᠭᠡᠳ ᠮᠥᠩᠭᠥᠨ ᠵᠣᠭᠣᠰ ᠢ᠋ ᠳᠡᠭᠡᠭᠰᠢ ᠰᠢᠳᠡᠭᠰᠡᠨ ᠢ᠋ᠶ᠋ᠡᠨ ᠲᠣᠰᠴᠤ ᠠᠪᠤᠭᠠᠳ ᠡᠪᠦᠷᠲᠦᠯᠡᠪᠡ᠃
ᠥᠯᠵᠡᠢᠰᠠᠩ ᠨᠥᠭᠦᠭᠡ ᠬᠡᠳᠦᠭᠦᠯᠡ ᠶ᠋ᠢ ᠳᠣᠬᠢᠵᠤ ᠲᠡᠨᠳᠡ ᠡᠴᠡ ᠪᠤᠰᠢᠭᠤᠬᠠᠨ ᠵᠠᠢᠯᠠᠵᠤ ᠶᠠᠪᠤᠪᠠ᠃
ᠲᠡᠷᠡ ᠠᠯᠠᠭᠤᠷᠴᠢᠨ ᠡᠷᠡ ᠴᠣᠩᠬᠣᠨ ᠤ᠋ ᠮᠣᠣᠲᠤᠤ ᠴᠠᠭᠠᠰᠤ ᠶ᠋ᠢ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠥᠴᠦᠬᠡᠨ ᠨᠤᠷᠠᠭᠠᠵᠤ ᠨᠦᠬᠡ ᠭᠠᠷᠭᠠᠭᠠᠳ ᠳᠣᠲᠣᠭᠰᠢ ᠪᠠᠨ ᠱᠠᠭᠠᠢᠭᠰᠠᠨ ᠳ᠋ᠤ᠌ ᠴᠡᠭᠡᠵᠢᠨ ᠳ᠋ᠦ᠍ ᠪᠡᠨ ᠪᠢᠲᠡᠭᠦᠦ ᠬᠠᠷᠠ ᠦᠰᠦ ᠲᠡᠢ ᠨᠢᠴᠦᠭᠦᠨ ᠪᠦᠳᠦᠭᠦᠨ ᠬᠠᠷᠠ ᠡᠷᠡ ᠨᠢᠳᠦ ᠨᠢ ᠪᠦᠯᠲᠡᠢᠬᠦ ᠮᠥᠷᠲᠡᠭᠡᠨ ᠬᠤᠷ ᠬᠠᠷ ᠬᠢᠨ ᠬᠤᠷᠬᠢᠷᠠᠬᠤ ᠳ᠋ᠠᠭᠠᠨ ᠫᠥᠥᠳ᠋ ᠬᠢᠨ ᠦᠯᠢᠶᠡᠬᠦ ᠶ᠋ᠢ ᠬᠠᠷᠠᠭᠠᠳ ᠥᠨᠥᠬᠢ ᠠᠯᠠᠭᠤᠷᠴᠢᠨ ᠡᠷᠡ ᠡᠷᠬᠡ ᠦᠭᠡᠢ ᠠᠢᠳᠠᠰ ᠬᠦᠷᠪᠡ᠃ ᠪᠦᠯᠲᠡᠢᠭᠰᠡᠨ ᠲᠣᠮᠣ ᠨᠢᠳᠦ ᠨᠢ ᠶᠠᠭ ᠯᠠ ᠲᠡᠭᠦᠨ ᠢ᠋ ᠬᠠᠷᠠᠵᠤ ᠦᠵᠡᠴᠢᠬᠡᠭᠡᠳ《ᠴᠢ ᠦᠨᠡᠬᠡᠷ ᠰᠠᠢᠨ ᠡᠷᠡ ᠪᠣᠯ ᠨᠠᠭᠠᠰᠢ ᠪᠠᠨ ᠫᠤᠤᠳᠠ! ᠡᠰᠡ ᠲᠡᠢᠮᠦ ᠪᠣᠯ᠁》ᠭᠡᠵᠦ ᠬᠡᠯᠡᠬᠦ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠠᠯᠠᠭᠤᠷᠴᠢᠨ ᠡᠷᠡ ᠶ᠋ᠢᠨ ᠵᠢᠷᠦᠬᠡ ᠨᠢ ᠳᠠᠭᠵᠢᠵᠤ ᠭᠠᠷ ᠳᠠᠬᠢ ᠠᠬᠤᠷ ᠫᠤᠤ ᠪᠠᠨ ᠭᠠᠵᠠᠷ ᠠᠯᠳᠠᠪᠠ᠃
ᠭᠠᠳᠠᠨᠠ ᠴᠣᠩᠬᠣᠨ ᠤ᠋ ᠶᠡᠨᠳᠡᠷ ᠲᠦ᠍ ᠲᠦᠱ ᠭᠡᠵᠦ ᠲᠡᠮᠦᠷ ᠤᠨᠠᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠨᠴᠤᠷᠭᠠ ᠰᠣᠴᠢᠨ ᠰᠡᠷᠡᠵᠦ ᠳᠠᠪ ᠬᠢᠨ ᠦᠰᠦᠷᠦᠨ ᠪᠣᠰᠤᠭᠠᠳ᠄
— ᠬᠡᠨ ᠪᠣᠢ? ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠭᠡᠵᠦ ᠭᠡᠷ ᠳᠣᠷᠭᠢᠲᠠᠯᠠ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠴᠣᠩᠬᠣᠨ ᠤ᠋ ᠭᠠᠳᠠᠨᠠᠬᠢ ᠠᠯᠠᠭᠤᠷᠴᠢᠨ ᠡᠷᠡ ᠠᠶᠤᠨ ᠪᠠᠯᠠᠳᠠᠬᠤ ᠳ᠋ᠠᠭᠠᠨ ᠥᠮᠥᠳᠥᠨ ᠳ᠋ᠡᠭᠡᠨ ᠰᠢᠭᠡᠰᠦ ᠠᠯᠳᠠᠵᠤ ᠭᠣᠳ ᠳᠤᠲᠠᠭᠠᠪᠠ᠃
ᠭᠠᠳᠠᠨᠠ ᠲᠦᠰ ᠲᠦᠰ ᠬᠢᠨ ᠴᠠᠭᠠᠰᠢ ᠭᠦᠶᠦᠭᠰᠡᠨ ᠬᠥᠮᠦᠨ ᠦ᠌ ᠬᠥᠯ ᠦ᠋ᠨ ᠴᠢᠮᠡᠭᠡ ᠪᠡᠷ ᠮᠠᠨᠴᠤᠷᠭᠠ ᠡᠭᠦᠳᠡ ᠵᠠᠪᠰᠠᠷᠯᠠᠨ《ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ?》 ᠭᠡᠵᠦ ᠬᠠᠷᠠᠪᠠᠯ ᠭᠠᠳᠠᠨᠠ ᠫᠠᠳ ᠬᠠᠷᠠᠩᠭᠤᠢ ᠶᠠᠭᠤ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠢᠯᠠ᠃
— ᠦᠭᠡᠢ᠂ ᠪᠢ ᠴᠢᠨᠢ ᠬᠠᠮᠢᠭᠠ ᠶᠠᠮᠠᠷ ᠭᠠᠵᠠᠷ ᠢᠷᠡᠭᠡᠳ ᠤᠨᠲᠠᠴᠢᠬᠠᠭᠰᠠᠨ ᠪᠣᠢ? ᠭᠡᠵᠦ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤᠭᠰᠠᠨ ᠴᠤ᠌ ᠬᠠᠷᠢᠭᠤᠯᠲᠠ ᠣᠯᠤᠭᠰᠠᠨ ᠦᠭᠡᠢ᠃ 《ᠶᠠᠪᠤᠵᠤ ᠭᠣᠣᠯ ᠢ᠋ᠶ᠋ᠠᠨ ᠨᠣᠷᠭᠠᠬᠤ ᠪᠠᠷ ᠨᠢᠭᠡ ᠣᠭᠣᠴᠢ ᠶᠠᠭᠤᠮᠠ ᠣᠯᠵᠤ ᠤᠤᠭᠤᠶᠠ! ᠭᠣᠣᠯ ᠬᠠᠲᠠᠵᠤ ᠦᠬᠦᠯᠡ! 》 ᠭᠡᠵᠦ ᠳᠦᠳᠦᠨᠡᠭᠰᠡᠭᠡᠷ ᠲᠡᠨᠳᠡ ᠡᠴᠡ ᠭᠠᠷᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ