ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠣᠣᠷᠠᠳᠤ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ> Хан мунын сүүрс < доорд > – Мөнх зохиоов ᠂ Гутгаар бодь – Нэгдүгээр бүлэг <9>
321ᠭᠤᠲᠠᠭᠠᠷ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ>
— ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋! ᠥᠯᠵᠡᠢᠰᠠᠩ ᠢ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠵᠠᠬᠢᠷᠬᠤ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠤᠸᠠᠨᠵᠠᠩ ᠪᠣᠯᠭᠠᠴᠢᠬᠠᠪᠠᠯ ᠶᠠᠮᠠᠷ ᠪᠣᠢ?
— ᠥᠯᠵᠡᠢᠰᠡᠩ⁈
— ᠲᠡᠢᠮᠦ ! ᠥᠯᠵᠡᠢᠰᠡᠩ !
— ᠪᠣᠯᠤᠯ ᠦᠭᠡᠢ! ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠪᠦᠬᠦ ᠮᠠᠲᠠᠯ ᠲᠠᠨ ᠤ᠋ ᠭᠠᠷ ᠲᠤ ᠡᠷᠭᠢᠵᠦ ᠪᠠᠢᠬᠤ ᠶᠤᠮ ᠴᠢᠨᠢ ᠬᠡᠯᠡᠪᠡᠯ ᠲᠠᠨ ᠤ᠋ ᠳᠤᠷᠠ᠂ ᠬᠡᠢᠰᠬᠡᠪᠡᠯ ᠲᠩᠷᠢ ᠶ᠋ᠢᠨ ᠳᠤᠷᠠ ᠪᠢᠰᠢ ᠤᠤ!
— ᠬᠠᠮᠢᠭᠠ ᠠ᠋ᠴᠠ ᠳᠠ⁈
— ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠥᠭᠬᠦ ᠶ᠋ᠢ ᠪᠠᠢᠭ᠂ ᠮᠢᠨᠦ ᠲᠤᠰᠠᠯᠠᠭᠴᠢ ᠶ᠋ᠢᠨ ᠵᠢᠩᠰᠡ ᠶ᠋ᠢ ᠬᠤᠰᠤᠵᠤ ᠥᠯᠵᠡᠢᠰᠡᠩ ᠳ᠋ᠦ᠍ ᠵᠡᠭᠦᠯᠭᠡᠴᠢᠬᠡᠬᠦ ᠳ᠋ᠦ᠍ ᠬᠡᠨ ᠪᠠᠢᠭ ᠭᠡᠵᠦ ᠬᠡᠯᠡᠬᠦ ᠪᠣᠢ? ᠭᠡᠵᠦ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠥᠯᠵᠡᠢᠰᠡᠩ ᠢ᠋ ᠪᠠᠰᠤᠩᠭᠤᠢ ᠶᠠᠷᠢᠬᠤ ᠳ᠋ᠤ᠌ ᠠᠭᠸᠠᠩ ᠨᠣᠶᠠᠨ ᠰᠠᠨᠳᠤᠷᠴᠤ᠄
— ᠲᠡᠭᠡᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠪᠣᠢ! ᠪᠢ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠲᠠᠢ ᠵᠥᠪᠳᠡᠵᠦ ᠪᠠᠢᠨᠠ ᠰᠢᠳᠡ! ᠭᠡᠵᠦ ᠬᠠᠭ ᠬᠠᠭ ᠢᠨᠢᠶᠡᠨ ᠬᠡᠯᠡᠪᠡ᠃
— ᠲᠠᠨ ᠤ᠋ ᠦᠵᠡᠬᠦ ᠪᠡᠷ ᠥᠯᠵᠡᠢᠰᠡᠩ ᠦ᠋ᠨ ᠲᠡᠷᠡ ᠢᠷᠣᠠ ᠶ᠋ᠢᠨ ᠰᠢᠨᠵᠢ ᠪᠡᠷ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠵᠡᠪᠰᠡᠭ ᠢ᠋ ᠵᠠᠬᠢᠷᠴᠤ ᠳᠡᠢᠯᠦᠨᠡ ᠤᠤ?
— ᠲᠡᠭᠡᠪᠡᠯ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠲᠠᠨ ᠤ᠋ ᠦᠵᠡᠬᠦ ᠪᠡᠷ ᠬᠡᠨ ᠢ᠋ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠤᠸᠠᠨᠵᠠᠩ ᠲᠠᠯᠪᠢᠪᠠᠯ ᠳᠡᠭᠡᠷᠡ ᠪᠣᠢ? ᠲᠠ ᠴᠢᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠤᠳᠠᠭᠠᠨ ᠵᠢᠯ ᠠᠯᠪᠠ ᠬᠠᠭᠠᠭᠰᠠᠨ ᠬᠥᠮᠦᠨ᠂ ᠬᠡᠨ ᠬᠡᠨ ᠨᠢ ᠶᠠᠮᠠᠷ ᠭᠡᠳᠡᠭ ᠢ᠋ ᠠᠯᠠᠭᠠᠨ ᠤ᠋ ᠪᠠᠨ ᠵᠢᠷᠤᠭᠠᠰᠤ ᠰᠢᠭ᠋ ᠲᠣᠳᠣᠬᠠᠨ ᠮᠡᠳᠡᠬᠦ ᠪᠠᠢᠯᠭᠦᠢ!
— ᠲᠡᠷᠡ ᠴᠦ᠍ ᠶᠠᠷᠢᠶᠠᠨ ᠦᠭᠡᠢ᠃ ᠶᠠᠭᠤ ᠴᠦ᠍ ᠭᠡᠰᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠤᠸᠠᠨᠵᠠᠩ ᠰᠢᠯᠢᠬᠦ ᠳ᠋ᠦ᠍ ᠵᠡᠭᠦᠨ ᠭᠠᠷ ᠤ᠋ᠨ ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠲᠠᠢ ᠬᠠᠪᠢᠯᠳᠤᠭᠤ ᠬᠥᠮᠦᠨ ᠢ᠋ ᠰᠢᠯᠢᠬᠦ ᠦᠭᠡᠢ ᠪᠣᠯ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠪᠣᠢ⁈
— ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠳᠠ! ᠥᠯᠵᠡᠢᠰᠡᠩ ᠴᠦ᠍ ᠬᠠᠩᠭᠢ ᠲᠠᠷᠢᠬᠢ ᠬᠥᠩᠭᠡᠨ ᠬᠥᠮᠦᠨ ᠡᠷᠡ ᠰᠢᠦ!
— ᠥᠯᠵᠡᠢᠰᠡᠩ ᠤᠤ? ᠸᠴᠢᠷᠪᠠᠲᠤ ᠶ᠋ᠢᠨ ᠪᠣᠷᠪᠢᠨ ᠤ᠋ ᠬᠢᠨᠢ ᠲᠣᠭᠣᠰᠣᠨ ᠳ᠋ᠤ᠌ ᠬᠠᠬᠠᠵᠤ ᠦᠬᠦᠬᠦ ᠬᠥᠮᠦᠨ ᠭᠡᠪᠡᠯ ᠲᠡᠷᠡ ᠦᠨᠡᠨ ᠪᠠᠢᠬᠠ!
— ᠬᠡᠩ! ᠲᠤᠰᠠᠯᠠᠭᠴᠢ ᠭᠤᠸᠠᠢ ᠥᠯᠵᠡᠢᠰᠡᠩ ᠢ᠋ ᠱᠠᠯ ᠵᠢᠭᠰᠢᠳᠡᠭ ᠢ᠋ ᠪᠢ ᠣᠢᠯᠠᠭᠠᠨᠠ᠃ ᠲᠠᠨ ᠤ᠋ ᠶᠡᠬᠡ ᠠᠭᠡ ᠮᠠᠨᠴᠤᠷᠭᠠ ᠪᠣᠯᠤᠨ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠴᠡᠴᠡᠭ ᠬᠠᠲᠤᠨ ᠤ᠋ ᠤᠴᠢᠷ ᠢ᠋ ᠪᠢ ᠨᠠᠷᠢᠨ ᠰᠣᠨᠣᠰᠤᠭᠰᠠᠨ᠃
— ᠶᠠᠭ ᠳᠠ! ᠮᠥᠨ ᠡᠨᠡ ᠥᠯᠵᠡᠢᠰᠡᠩ ᠦ᠋ᠨ ᠮᠠᠭᠤ ᠢᠷᠣᠠ ᠪᠠᠷ ᠪᠦᠬᠦ ᠶᠠᠭᠤᠮᠠ ᠪᠤᠷᠤᠭᠤ ᠪᠠᠷ ᠡᠷᠭᠢᠵᠦ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠡᠪᠳᠡᠷᠡᠯᠴᠡᠭᠰᠡᠨ᠃ ᠠᠭᠸᠠᠩ ᠨᠣᠶᠠᠨ ᠲᠠ ᠥᠯᠵᠡᠢᠰᠡᠩ ᠢ᠋ ᠢᠩᠭᠢᠵᠦ ᠬᠦᠨᠳᠦ ᠪᠡᠷ ᠬᠡᠷᠡᠭᠯᠡᠪᠡᠯ ᠵᠠᠰᠠᠭ ᠬᠦᠩ ᠦ᠋ᠨ ᠳᠣᠲᠣᠷᠠ ᠪᠠᠰᠠ ᠯᠠ ᠭᠤᠨᠢᠭᠲᠤ ᠵᠦᠴᠦᠭᠡ ᠲᠣᠭᠯᠠᠨᠠ ᠭᠡᠰᠡᠨ ᠬᠡᠷᠡᠭ᠃
— ᠲᠤᠰᠠᠯᠠᠭᠴᠢ ᠭᠤᠸᠠᠢ ᠲᠠ ᠬᠤᠪᠢ ᠶ᠋ᠢᠨ ᠦᠰ ᠬᠣᠨᠵᠢᠩ ᠢ᠋ ᠳᠡᠩᠳᠡᠭᠦᠦ ᠪᠣᠳᠣᠵᠤ᠂ ᠵᠠᠰᠠᠭ ᠬᠦᠩ ᠦ᠋ᠨ ᠶᠡᠬᠡ ᠶᠠᠪᠤᠳᠠᠯ ᠳ᠋ᠤ᠌ ᠬᠣᠬᠢᠷᠠᠯ ᠪᠣᠯᠵᠤ ᠮᠡᠳᠡᠬᠦ ᠠᠶᠤᠯ ᠢ᠋ ᠤᠮᠠᠷᠲᠠᠵᠤ ᠦᠯᠦ ᠪᠣᠯᠤᠨᠠ᠃ ᠵᠠᠰᠠᠭ ᠶᠠᠮᠤᠨ ᠤ᠋ ᠴᠠᠭᠠᠨᠠᠬᠢ ᠭᠦᠨ ᠳᠠᠯᠳᠠ ᠤᠴᠢᠷ ᠢ᠋ ᠨᠠᠳᠠ ᠪᠠᠷ ᠵᠢᠭᠠᠯᠭᠠᠬᠤ ᠬᠡᠷᠡᠭ ᠦᠭᠡᠢ ᠪᠠᠢᠯᠭᠦᠢ! ᠥᠯᠵᠡᠢᠰᠡᠩ ᠰᠢᠭ ᠬᠥᠮᠦᠨ ᠵᠠᠰᠠᠭ ᠶᠠᠮᠤᠨ ᠳ᠋ᠤ᠌ ᠪᠠᠰᠠ ᠴᠢᠬᠤᠯᠠᠲᠠᠢ ᠰᠢᠦ᠁
— ᠲᠡᠭᠡᠪᠡᠴᠦ ᠲᠠ ᠥᠯᠵᠡᠢᠰᠡᠩ ᠰᠢᠭ ᠭᠠᠪᠢᠬᠤ ᠦᠭᠡᠢ ᠬᠥᠮᠦᠨ ᠢ᠋ ᠬᠠᠵᠠᠭᠤ ᠳ᠋ᠠᠭᠠᠨ ᠪᠠᠢᠯᠭᠠᠬᠤ ᠳ᠋ᠠᠭᠠᠨ ᠬᠡᠷᠰᠡᠦᠯᠡ! ᠮᠣᠷᠢᠨ ᠠ᠋ᠴᠠ ᠪᠠᠨ ᠬᠠᠶᠠᠭᠳᠠᠵᠤ ᠮᠡᠳᠡᠨᠡ!
— ᠵᠠ᠂ ᠵᠠ! ᠬᠣᠶᠠᠭᠤᠯᠠ ᠢᠩᠭᠢᠵᠦ ᠦᠭᠡ ᠬᠡᠷᠡᠬᠦ ᠪᠡᠨ ᠪᠠᠢᠶᠠ! ᠢᠩᠭᠢᠭᠡᠳ ᠪᠢ ᠲᠠᠨ ᠤ᠋ ᠰᠠᠨᠠᠭᠠ ᠶ᠋ᠢ ᠠᠯᠢ ᠡᠷᠲᠡ ᠡᠴᠡ ᠪᠠᠷᠤᠭᠯᠠᠭᠰᠠᠨ ᠶᠤᠮ ᠠ᠋! ᠮᠠᠨᠴᠤᠷᠭᠠ ᠶ᠋ᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠣᠸᠠᠨᠵᠠᠩ ᠢ᠋ᠶ᠋ᠠᠷ ᠲᠠᠯᠪᠢᠴᠢᠬᠠᠬᠤ ᠤᠤ ᠲᠠ⁈ ᠭᠡᠳ ᠠᠭᠸᠠᠩ ᠨᠣᠶᠠᠨ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢ ᠴᠢᠷᠠᠢᠳᠠᠵᠤ ᠂ ᠲᠡᠭᠦᠨ ᠦ᠌ ᠠᠮᠠᠨ ᠠ᠋ᠴᠠ《ᠪᠣᠯᠬᠤ ᠦᠭᠡᠢ᠂ ᠲᠡᠷᠡ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ?》 ᠭᠡᠰᠡᠨ ᠦᠭᠡ ᠤᠨᠠᠬᠤ ᠶ᠋ᠢ ᠭᠣᠷᠢᠳᠠᠨᠠ᠃
— ᠮᠠᠨᠴᠤᠷᠭᠠ ᠴᠦ᠍ ᠪᠣᠯᠤᠨᠠ᠃ ᠪᠢ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠬᠦᠦ ᠪᠡᠨ ᠭᠡᠵᠦ ᠳᠡᠭᠡᠷᠡ ᠦᠨᠡᠯᠡᠬᠦ ᠪᠢᠰᠢ! ᠮᠠᠨᠴᠤᠷᠭᠠ ᠤᠤᠯ ᠨᠢ ᠶᠠᠮᠤᠨ ᠤ᠋ ᠴᠡᠷᠢᠭ ᠵᠠᠬᠢᠷᠴᠤ ᠪᠠᠢᠭᠰᠠᠨ ᠶᠤᠮ᠃ ᠴᠡᠷᠢᠭ ᠵᠡᠪᠰᠡᠭ ᠦ᠋ᠨ ᠡᠷᠳᠡᠮ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠠ᠋ᠴᠠ ᠳᠡᠮᠡᠢ ᠬᠣᠯᠠ ᠬᠣᠴᠣᠷᠬᠤ ᠦᠭᠡᠢ ᠨᠢ ᠯᠠᠪ!
— ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠴᠦ᠍ ᠪᠣᠯ ᠶᠠᠷᠢᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠲᠠᠨ ᠤ᠋ ᠤᠷᠠᠳ ᠶᠠᠰᠤᠲᠠᠨ ᠤ᠋ ᠪᠠᠨ ᠳᠣᠲᠣᠷᠠ ᠡᠷᠡᠬᠡᠢ ᠭᠣᠵᠣᠢᠯᠭᠠᠴᠢᠬᠠᠮᠠᠷ ᠡᠷᠡ ᠶ᠋ᠢᠨ ᠨᠢᠭᠡ ᠶᠦᠮ ᠠ᠋᠃ ᠰᠠᠷᠠᠩᠸᠠᠩᠴᠤᠭ ᠤ᠋ᠨ ᠠᠯᠠᠭᠳᠠᠭᠰᠠᠨ ᠤᠴᠢᠷ ᠢ᠋ ᠰᠠᠢᠬᠠᠨ ᠰᠢᠢᠳᠪᠦᠷᠢᠯᠡᠵᠦ᠂ ᠮᠠᠭᠤ ᠬᠠᠷᠠ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠢ᠋ ᠲᠣᠨᠢᠯᠭᠠᠭᠰᠠᠨ ᠨᠢ ᠦᠨᠡᠬᠡᠷ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯ ᠤ᠋ᠨ ᠬᠣᠷᠣᠰᠤᠯ ᠢ᠋ ᠲᠠᠢᠯᠤᠭᠰᠠᠨ ᠳᠠ! ᠭᠡᠵᠦ ᠠᠭᠸᠠᠩ ᠨᠣᠶᠠᠨ《ᠸᠴᠢᠷᠪᠠᠲᠤ ᠶᠣᠰᠣᠲᠠᠢ ᠡᠢᠮᠦ》 ᠭᠡᠵᠦ ᠡᠷᠡᠬᠡᠢ ᠪᠡᠨ ᠭᠣᠵᠣᠢᠯᠭᠠᠨᠠ᠃
ᠡᠯᠳᠡᠩᠭᠡ᠂ ᠠᠭᠸᠠᠩ ᠨᠣᠶᠠᠨ ᠤ᠋ ᠠᠮᠠᠨ ᠠ᠋ᠴᠠ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠰᠠᠷᠠᠩᠸᠠᠩᠴᠤᠭ ᠭᠤᠸᠠᠢ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠳᠡᠭᠡᠷᠡᠮ ᠳ᠋ᠦ᠍ ᠬᠣᠣᠷᠯᠠᠭᠳᠠᠭᠰᠠᠨ ᠤᠴᠢᠷ ᠢ᠋ ᠳᠤᠷᠠᠳᠤᠭᠰᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠬᠢᠯᠢᠩ ᠪᠠᠳᠠᠷᠠᠵᠤ《ᠡᠨᠡ ᠮᠠᠭᠤ ᠰᠠᠢᠨ ᠬᠠᠷᠠ ᠰᠢᠷᠠ ᠴᠡᠷᠢᠭ ᠦ᠋ᠳ ᠨᠤᠲᠤᠭ ᠴᠥᠯᠪᠡᠵᠦ ᠰᠠᠮᠠᠭᠤᠷᠠᠭᠰᠠᠨ ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠳᠡᠭᠡᠷᠡᠮ ᠲᠣᠨᠣᠭᠠ ᠨᠤᠭᠤᠳ ᠮᠠᠯᠴᠢᠨ ᠠᠷᠠᠳ ᠢ᠋ ᠲᠣᠨᠣᠨ ᠳᠡᠭᠡᠷᠡᠮᠳᠡᠵᠦ᠂ ᠬᠡᠯᠲᠦᠰᠬᠢᠪᠡᠯ ᠬᠥᠮᠦᠨ ᠬᠠᠷᠠ ᠠᠯᠠᠵᠤ ᠭᠠᠢ ᠲᠠᠷᠢᠳᠠᠭ ᠪᠣᠯᠤᠯᠠ᠁ ᠮᠠᠨ ᠤ᠋ ᠤᠷᠠᠳ ᠨᠤᠲᠤᠭ ᠲᠤ ᠵᠠᠩᠴᠣᠪ᠂ ᠸᠴᠢᠷᠪᠠᠲᠤ᠂ ᠮᠠᠨᠴᠤᠷᠭᠠ᠂ ᠰᠣᠯᠣᠭᠠᠢ ᠨᠠᠮᠵᠢᠯ᠂ ᠠᠩᠴᠢᠨᠵᠠᠪ᠁ ᠰᠢᠭ᠋ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠠᠢᠬᠤ ᠯᠠ ᠳᠠ! ᠭᠡᠬᠦ ᠳ᠋ᠦ᠍ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠡᠳᠡᠭᠡᠷ ᠰᠠᠢᠨ ᠡᠷᠡ ᠶ᠋ᠢ ᠡᠪ ᠵᠦᠢᠲᠡᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠭᠠᠳᠠᠭᠤᠷᠴᠢᠯᠠᠵᠤ᠂ ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠡᠪᠳᠡᠷᠡᠯᠴᠡᠬᠦ ᠡᠴᠡ ᠪᠢᠰᠢ᠂ ᠬᠣᠰᠢᠭᠤ ᠬᠦᠩ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠵᠠᠰᠠᠵᠤ ᠠᠪᠬᠤ ᠶ᠋ᠢ ᠰᠠᠨᠠᠭᠠᠴᠢᠯᠠᠳᠠᠭ ᠬᠥᠮᠦᠨ ᠬᠣᠪᠣᠷᠳᠠᠵᠠᠢ᠃ ᠪᠠᠭᠠ ᠬᠠᠲᠤᠨ ᠭᠡᠭᠴᠢ ᠪᠡᠯᠪᠠᠰᠤᠨ ᠥᠷᠥᠭᠡᠰᠦᠨ ᠬᠥᠮᠦᠨ ᠦ᠌ ᠨᠢᠭᠡ ᠭᠠᠵᠠᠷ᠂ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠬᠡᠯᠡᠬᠦ ᠪᠡᠨ ᠪᠠᠢᠴᠢᠬᠠ᠂ ᠠᠮᠢᠳᠤᠷᠠᠯ ᠳ᠋ᠤᠨᠢ ᠲᠤᠯᠭᠠᠷᠠᠬᠤ ᠬᠠᠲᠠᠭᠤ ᠬᠠᠯᠠ ᠶ᠋ᠢ ᠳᠠᠭᠠᠭᠠᠬᠤ ᠠᠷᠭᠠ ᠦᠭᠡᠢ ᠠ᠋ ! ᠲᠡᠭᠡᠬᠦ ᠳ᠋ᠦ᠍ ᠡᠦᠲᠦ ᠨᠢᠭᠡ ᠶᠣᠰᠣᠲᠠᠢ ᠰᠢᠨᠳᠠᠰᠤᠲᠠᠢ ᠰᠠᠢᠨ ᠡᠷᠡ ᠰᠣᠩᠭᠣᠵᠤ ᠵᠠᠰᠠᠭ ᠪᠠᠷᠢᠳᠠᠭ ᠰᠠᠨ ᠪᠣᠯ⁈ ᠭᠡᠵᠦ ᠪᠣᠳᠣᠵᠤ ᠠᠮᠵᠢᠪᠠ᠃
— ᠠᠭᠸᠠᠩ ᠨᠣᠶᠠᠨ ᠤ᠋ ᠬᠡᠯᠡᠬᠦ ᠵᠥᠪ! ᠸᠴᠢᠷᠪᠠᠲᠤ ᠮᠠᠭᠤ ᠬᠠᠷᠠ ᠴᠡᠷᠢᠭ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠭᠠᠪᠠᠯᠠ ᠶ᠋ᠢ ᠭᠠᠭᠴᠠᠬᠠᠨ ᠰᠤᠮᠤ ᠪᠠᠷ ᠰᠡᠬᠦᠭᠰᠡᠨ ᠨᠢ ᠦᠨᠡᠬᠡᠷ ᠬᠣᠷᠣᠰᠤᠯ ᠲᠠᠢᠯᠤᠭᠰᠠᠨ ᠶᠤᠮ᠃ ᠬᠣᠣᠷ ᠢ᠋ ᠬᠣᠣᠷ ᠢ᠋ᠶ᠋ᠠᠷ ᠳᠡᠢᠯᠦᠨᠡ ᠭᠡᠳᠡᠭ ᠨᠢ ᠡᠨᠡ ᠳᠡ! ᠭᠡᠵᠦ ᠡᠯᠳᠡᠩᠭᠡ ᠬᠡᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠰᠠᠷᠠᠩᠸᠠᠩᠴᠣᠭ ᠤ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠪᠠ ᠸᠴᠢᠷᠪᠠᠲᠤ ᠶᠠᠮᠤᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠵᠠᠷᠭᠤ ᠰᠢᠭᠦᠬᠦ ᠳ᠋ᠡᠭᠡᠨ ᠶᠡᠬᠡᠳᠡ ᠰᠠᠭᠰᠠᠭᠤᠷᠠᠭᠰᠠᠨ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠭᠠᠪᠠᠯᠠ ᠶ᠋ᠢ ᠰᠡᠬᠦᠵᠦ ᠬᠠᠶᠠᠭᠰᠠᠨ ᠦᠵᠡᠭᠳᠡᠯ ᠲᠣᠳᠣᠷᠠᠬᠤ ᠰᠢᠭ᠋ ᠪᠣᠯᠪᠠ᠁
ᠲᠡᠷᠡ ᠵᠢᠯ ᠦ᠋ᠨ ᠡᠪᠦᠯ ᠦ᠋ᠨ ᠡᠬᠢ ᠪᠡᠷ ᠶᠤᠮᠰᠠᠨ᠃ ᠶᠢᠰᠦ ᠲᠣᠭᠠᠯᠠᠭᠠ ᠦᠭᠡᠢ ᠪᠠᠢᠲᠠᠯᠠ ᠭᠣᠣᠯ ᠤ᠋ᠨ ᠮᠥᠰᠥ ᠬᠥᠯᠳᠡᠵᠦ᠂ ᠴᠢᠮᠥᠭᠡ ᠴᠠᠷᠴᠠᠮᠠ ᠬᠦᠢᠲᠡᠨ ᠪᠠᠢᠯᠠ᠃
ᠰᠠᠷᠠᠩᠸᠠᠩᠴᠣᠭ ᠳᠡᠭᠦᠦ ᠣᠳᠬᠣᠨ ᠤ᠋ ᠳ᠋ᠠᠭᠠᠨ ᠪᠣᠭᠲᠣᠭᠣᠰᠣ ᠮᠥᠯᠵᠢᠵᠦ ᠪᠣᠷᠣ ᠱᠥᠯᠥ ᠤᠤᠭᠤᠨ ᠬᠡᠳᠦᠨ ᠬᠤᠨᠳᠠᠭᠠ ᠭᠠᠰᠢᠭᠤᠨ ᠬᠠᠷᠠ ᠰᠢᠮᠡᠵᠦ ᠰᠠᠭᠤᠬᠤ ᠳ᠋ᠠᠭᠠᠨ ᠴᠦ᠍ ᠰᠢᠨᠡ ᠬᠠᠨ ᠯᠢᠩ ᠴᠦᠨ① ᠫᠤᠤ ᠪᠠᠨ ᠵᠦᠯᠭᠦᠵᠦ᠄
— ᠮᠠᠷᠭᠠᠲᠤᠷ ᠵᠢᠷᠭᠠᠯᠲᠤ ᠶ᠋ᠢᠨ ᠴᠠᠮ ᠤ᠋ᠨ ᠬᠤᠷᠠᠯ ᠳ᠋ᠤ᠌ ᠣᠴᠢᠨᠠ ᠤᠤ ᠴᠢ? ᠭᠡᠪᠡ᠃
— ᠣᠴᠢᠨᠠ᠃ ᠲᠠ ᠣᠴᠢᠬᠤ ᠶᠤᠮ ᠤᠤ?
— ᠣᠴᠢᠨᠠ᠂ ᠣᠴᠢᠨᠠ! ᠭᠡᠳ ᠥᠨᠥᠬᠢ ᠫᠤᠤ ᠪᠠᠨ ᠠᠳᠠ ᠲᠡᠨᠳᠡᠬᠢ ᠶ᠋ᠢ ᠨᠢ ᠰᠢᠨᠵᠢᠨ ᠠᠷᠴᠢᠵᠤ ᠵᠦᠯᠭᠦᠬᠦ ᠶ᠋ᠢ ᠳᠡᠭᠦᠦ ᠣᠳᠬᠣᠨ ᠨᠢ ᠰᠣᠨᠢᠷᠬᠠᠵᠤ᠄
— ᠲᠠᠨ ᠤ᠋ ᠡᠨᠡ ᠴᠢᠨᠢ ᠴᠣ ᠰᠢᠨᠡ ᠫᠤᠤ ᠶᠤᠮ ᠪᠢᠵᠡ? ᠭᠡᠵᠡᠢ᠃
— ᠲᠡᠭᠡᠯᠭᠦᠢ ᠳᠡ! ᠠᠷᠭᠠ ᠦᠭᠡᠢ ᠰᠠᠢᠨ ᠲᠣᠰᠳᠠᠭ ᠫᠤᠤ ᠪᠠᠢᠭᠠ ᠶᠤᠮ ᠭᠡᠳ ᠰᠠᠷᠠᠩᠸᠠᠩᠴᠣᠭ ᠫᠤᠤ ᠶ᠋ᠢᠨ ᠣᠨᠢ ᠶ᠋ᠢ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠶᠠᠭᠤᠮᠠ ᠣᠨᠢᠯᠠᠵᠤ ᠦᠵᠡᠨᠡ᠃
ᠣᠳᠬᠣᠨ ᠠᠬᠠ ᠳ᠋ᠠᠭᠠᠨ ᠠᠷᠢᠬᠢ ᠬᠤᠨᠳᠠᠭᠠᠯᠠᠵᠤ᠄
— ᠡᠦᠲᠦ ᠨᠢᠭᠡ ᠬᠤᠨᠳᠠᠭᠠ ᠤᠤᠭᠤᠴᠢᠬᠠ! ᠭᠡᠰᠡᠨ ᠳ᠋ᠦ᠍ ᠰᠠᠷᠠᠩᠸᠠᠩᠴᠣᠭ᠄
— ᠵᠠ᠂ ᠢᠩᠭᠢᠭᠡᠳ ᠪᠣᠯᠤᠭᠰᠠᠨ ᠠ᠋! ᠡᠨᠡ ᠮᠥᠰᠥ ᠴᠠᠰᠤ ᠲᠠᠢ ᠳ᠋ᠤ᠌ ᠡᠷᠲᠡᠬᠡᠨ ᠶᠠᠪᠤᠶᠠ᠂ ᠣᠷᠣᠢ ᠪᠣᠯᠵᠤ ᠪᠠᠢᠨᠠ᠁ ᠭᠡᠳ ᠬᠤᠨᠳᠠᠭᠠ ᠲᠠᠢ ᠪᠠᠨ ᠨᠢᠭᠡ ᠯᠡ ᠬᠥᠨᠲᠥᠷᠴᠦ ᠭᠠᠷᠬᠤ ᠳ᠋ᠠᠭᠠᠨ 《ᠮᠠᠷᠭᠠᠲᠤᠷ ᠴᠠᠮ ᠤ᠋ᠨ ᠬᠤᠷᠠᠯ ᠳ᠋ᠤ᠌ ᠠᠭᠤᠯᠵᠠᠶᠠ》 ᠭᠡᠵᠦ ᠵᠠᠬᠢᠴᠢᠬᠠᠭᠠᠳ ᠶᠠᠪᠤᠪᠠ᠃
ᠳᠠᠷᠠᠭᠠ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠡᠷᠲᠡ ᠰᠠᠷᠠᠩᠸᠠᠩᠴᠣᠭ ᠴᠣ ᠰᠢᠨᠡ ᠫᠤᠤ ᠪᠠᠨ ᠡᠭᠦᠷᠴᠦ ᠵᠣ ᠶ᠋ᠢᠨ ᠪᠡᠯᠴᠢᠭᠡᠷ ᠳᠠᠬᠢ ᠴᠥᠭᠡᠪᠲᠦᠷ ᠦᠬᠡᠷ ᠢ᠋ᠶ᠋ᠡᠨ ᠤᠰᠤᠯᠠᠵᠤ ᠲᠠᠭᠤᠴᠢᠬᠠᠭᠠᠳ《ᠠᠵᠠᠲᠠᠢ ᠰᠠᠨ ᠪᠣᠯ ᠠᠩ ᠤ᠋ᠨ ᠣᠯᠵᠠ ᠭᠠᠨᠵᠤᠭᠠᠯᠠᠴᠢᠬᠠᠶᠠ ᠪᠠᠢᠵᠠ!》 ᠭᠡᠳ ᠬᠢᠷᠮᠠᠭᠬᠠᠨ ᠴᠠᠰᠤᠨ ᠳᠡᠭᠡᠷᠡ ᠲᠠᠮᠠᠭᠠᠯᠠᠭᠳᠠᠭᠰᠠᠨ ᠦᠨᠡᠭᠡ ᠲᠠᠤᠯᠠᠢ ᠶ᠋ᠢᠨ ᠮᠥᠷ ᠬᠥᠭᠡᠭᠡᠵᠦ ᠶᠠᠪᠤᠲᠠᠯᠠ ᠬᠠᠷᠠ ᠴᠡᠷᠢᠭ ᠦ᠋ᠨ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠲᠠᠷᠢᠶᠠᠨ ᠤ᠋ ᠭᠠᠵᠠᠷ ᠤ᠋ᠨ ᠠᠷᠤ ᠰᠤᠵᠠᠭ ᠲᠤ᠌ ᠭᠣᠣ ᠡᠯ ᠳ᠋ᠠᠨ᠂ ᠳ᠋ᠦᠩ ᠱᠧᠩ ᠽᠢ ᠭᠡᠳᠡᠭ ᠬᠣᠶᠠᠷ ᠭᠠᠢᠬᠠᠯ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
ᠯᠢ ᠲᠤᠸᠠᠨᠵᠠᠩ ᠭᠡᠳᠡᠭ ᠨᠢ ᠯᠢ ᠴᠦᠨ ᠱᠧᠩ ᠭᠡᠳᠡᠭ᠃ ᠸᠠᠩ ᠰᠣᠬᠣᠷ ᠤ᠋ᠨ ᠬᠣᠯᠪᠣᠭᠠᠲᠤ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ᠃ ᠡᠨᠡ ᠯᠢ ᠲᠤᠸᠠᠨᠵᠠᠩ ᠮᠠᠰᠢ ᠬᠠᠷᠭᠢᠰ ᠵᠠᠩ ᠲᠠᠢ ᠬᠡᠷᠴᠡᠭᠡᠢ ᠠᠮᠢᠲᠠᠨ᠃ ᠸᠠᠩ ᠰᠣᠬᠣᠷ ᠤ᠋ᠨ ᠨᠥᠮᠥᠷᠢ ᠳ᠋ᠦ᠍ ᠡᠷᠬᠡ ᠰᠦᠷ ᠲᠡᠭᠡᠨ ᠡᠷᠳᠦᠵᠦ ᠮᠠᠯᠴᠢᠳ ᠤ᠋ᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ ᠰᠢᠬᠠᠵᠤ᠂ ᠲᠠᠷᠢᠶᠠ ᠲᠥᠮᠥᠰᠥ ᠲᠠᠷᠢᠬᠤ ᠪᠠᠷ ᠲᠤᠰᠬᠠᠢ ᠭᠠᠵᠠᠷ ᠭᠠᠷᠭᠠᠵᠤ᠂ ᠵᠠᠩ ᠣᠪᠣᠭ ᠲᠠᠢ ᠮᠣᠳᠣᠨ ᠳᠠᠷᠬᠠᠨ ᠢ᠋ᠶ᠋ᠠᠷ ᠲᠠᠷᠢᠶᠠ ᠲᠠᠷᠢᠭᠤᠯᠵᠤ ᠪᠠᠢᠵᠠᠢ᠃ ᠡᠨᠡ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠯᠢ ᠲᠤᠸᠠᠨᠵᠠᠩ ᠲᠠᠢ ᠮᠠᠰᠢ ᠵᠤᠵᠠᠭᠠᠨ ᠨᠠᠢᠷ ᠲᠠᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠲᠡᠭᠦᠨ ᠥᠮᠥᠭ ᠲᠦ᠍ ᠬᠥᠨᠳᠡᠯᠡᠨ ᠭᠤᠯᠳᠤ ᠠᠭᠠᠰᠢᠯᠠᠳᠠᠭ ᠠᠵᠤᠭᠤ᠃ ᠡᠢᠨ ᠬᠦ᠌ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯᠴᠤᠳ ᠯᠢ ᠲᠤᠸᠠᠨᠵᠠᠩ ᠪᠣᠯᠤᠨ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠢ᠋ ᠦᠬᠦᠨ ᠬᠣᠷᠣᠰᠳᠠᠭ ᠪᠣᠯᠪᠠ᠃
ᠭᠣᠣ᠂ ᠳ᠋ᠦᠩ ᠬᠣᠶᠠᠷ ᠭᠠᠢᠬᠠᠯ ᠰᠠᠷᠠᠩᠸᠠᠩᠴᠤᠭ ᠤ᠋ᠨ ᠡᠮᠡᠭᠡᠯ ᠲᠣᠨᠣᠭᠲᠠᠢ ᠮᠣᠷᠢ ᠬᠥᠲᠥᠯᠵᠦ᠂ ᠴᠣ ᠰᠢᠨᠡ ᠲᠦᠷᠭᠡᠨ ᠫᠤᠤ ᠡᠭᠦᠷ ᠶᠠᠪᠤᠭᠠ ᠶ᠋ᠢ ᠦᠵᠡᠭᠡᠳ ᠮᠠᠭᠤ ᠰᠠᠨᠠᠭᠠ ᠲᠥᠷᠥᠵᠦ᠂ ᠨᠢᠭᠡ ᠨᠢ ᠡᠮᠡᠭᠡᠯ ᠲᠣᠨᠣᠭᠲᠤ ᠮᠣᠷᠢᠨ ᠳ᠋ᠤᠨᠢ ᠳᠤᠷᠠᠯᠠᠵᠤ᠂ ᠨᠥᠭᠦᠭᠡ ᠨᠢ ᠴᠣ ᠰᠢᠨᠡ ᠫᠤᠤ ᠳ᠋ᠤᠨᠢ ᠭᠣᠷᠢᠯᠠᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠳᠠᠯᠳᠠ ᠳᠣᠬᠢᠶᠠ ᠥᠭᠴᠦ᠄
— ᠬᠥᠶᠢ᠂ ᠮᠣᠩᠭᠣᠯ ᠠᠬᠠ ᠳᠡᠭᠦᠦ ᠠ᠋! ᠠᠨᠵᠢᠰᠤᠨ ᠤ᠋ ᠬᠣᠶᠠᠷ ᠱᠠᠷ ᠠᠯᠳᠠᠴᠢᠬᠠᠯᠠ᠃ ᠲᠠᠨ ᠤ᠋ ᠦᠬᠡᠷ ᠦ᠋ᠨ ᠰᠦᠷᠦᠭ ᠲᠦ᠍ ᠬᠠᠷᠠᠭᠳᠠᠪᠠ ᠤᠤ? ᠭᠡᠵᠦ ᠭᠣᠣ ᠡᠯ ᠳ᠋ᠠᠨ ᠭᠡᠳᠡᠭ ᠨᠢ ᠦᠭᠡ ᠰᠡᠯᠲᠡᠭᠦᠯᠦᠨ᠂ ᠰᠠᠷᠠᠩᠸᠠᠩᠴᠤᠭ ᠲᠤ᠌ ᠨᠢᠭᠡ ᠭᠣᠳᠣᠯᠢ ᠶᠠᠨᠵᠣᠣᠷ ᠥᠭᠴᠦ ᠪᠡᠶᠡ ᠳ᠋ᠡᠭᠡᠨ ᠣᠷᠣᠢᠲᠠᠭᠤᠯᠤᠨ᠂ ᠲᠠᠮᠠᠬᠢ ᠨᠡᠷᠡᠬᠦ ᠳᠡᠯᠢᠮ ᠳ᠋ᠦ᠍ ᠨᠥᠭᠦᠭᠡ ᠳ᠋ᠦᠩ ᠱᠧᠩ ᠽᠢ ᠭᠡᠳᠡᠭ ᠭᠠᠢᠬᠠᠯ ᠡᠭᠦᠷᠦᠭᠰᠡᠨ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠥᠭᠰᠡ ᠪᠡᠷ ᠰᠠᠷᠠᠩᠸᠠᠩᠴᠤᠭ ᠤ᠋ᠨ ᠭᠠᠪᠠᠯᠠ ᠤᠷᠤᠭᠤ ᠨᠢᠭᠡ ᠯᠡ ᠨᠦᠳᠦᠵᠦ ᠮᠠᠨᠠᠷᠠᠭᠤᠯᠤᠭᠠᠳ᠂ ᠮᠥᠰᠥᠨ ᠦ᠌ ᠬᠥᠨᠳᠡᠢ ᠳ᠋ᠦ᠍ ᠴᠢᠬᠢᠵᠦ ᠬᠠᠶᠠᠪᠠ᠃ ᠢᠩᠭᠢᠭᠡᠳ ᠥᠨᠥᠬᠢ ᠬᠣᠶᠠᠷ ᠭᠠᠢᠬᠠᠯ ᠡᠮᠡᠭᠡᠯᠲᠦ ᠮᠣᠷᠢ᠂ ᠴᠡᠨᠡᠭᠲᠦ ᠫᠤᠤ ᠶ᠋ᠢ ᠨᠢ ᠠᠪᠴᠤ ᠭᠣᠳ ᠳᠤᠲᠠᠭᠠᠪᠠ᠃
ᠳᠡᠭᠦᠦ ᠤᠳᠬᠤᠨ ᠨᠢ ᠪᠣᠯᠵᠣᠭᠰᠠᠨ ᠶᠣᠰᠣᠭᠠᠷ ᠵᠢᠷᠭᠠᠯᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠴᠠᠮ ᠤ᠋ᠨ ᠬᠤᠷᠠᠯ ᠳ᠋ᠤ᠌ ᠣᠴᠢᠵᠠᠢ᠃ ᠠᠬᠠ ᠨᠢ ᠬᠠᠷᠠᠭᠳᠠᠳᠠᠭ ᠦᠭᠡᠢ᠃ ᠦᠳᠡ ᠥᠩᠭᠡᠷᠡᠴᠢᠬᠡᠯᠡ᠁ ᠨᠠᠷᠠ ᠪᠠᠷᠠᠭᠤᠨᠰᠢ ᠬᠡᠯᠪᠡᠢᠯᠡ᠁ ᠠᠬᠠ ᠨᠢ ᠪᠠᠰᠠ ᠪᠠᠢᠳᠠᠭ ᠦᠭᠡᠢ᠃ ᠤᠳᠬᠤᠨ ᠰᠠᠨᠳᠤᠷᠴᠤ ᠡᠨᠡ ᠲᠡᠷᠡ ᠬᠥᠮᠦᠨ ᠡᠴᠡ ᠠᠰᠠᠭᠤᠵᠤ ᠰᠤᠷᠠᠭᠯᠠᠭᠰᠠᠨ ᠴᠦ᠍《ᠦᠵᠡᠭᠰᠡᠨ ᠦᠭᠡᠢ ᠠ᠋!》 《ᠬᠠᠷᠠᠭᠳᠠᠭᠰᠠᠨ ᠦᠭᠡᠢ ᠠ᠋!》 ᠭᠡᠬᠦ ᠡᠴᠡ ᠥᠭᠡᠷᠡ ᠨᠠᠭᠠᠰᠢᠲᠠᠢ ᠬᠠᠷᠢᠭᠤᠯᠲᠠ ᠣᠯᠤᠭᠰᠠᠨ ᠦᠭᠡᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠣᠳᠬᠣᠨ ᠶᠡᠬᠡᠳᠡ ᠪᠠᠴᠢᠮᠳᠠᠵᠤ 《ᠠᠬᠠ ᠶ᠋ᠢᠨ ᠪᠡᠶᠡ ᠨᠢ ᠠᠶᠠ ᠦᠭᠡᠢ ᠶᠦᠮ ᠪᠣᠯᠪᠠ ᠤᠤ? ᠶᠠᠭᠠᠬᠢᠭᠰᠠᠨ ᠪᠣᠯ ᠠ᠋?》 ᠭᠡᠵᠦ ᠵᠡᠭᠦᠨ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠪᠠᠢᠳᠠᠭ ᠭᠡᠷ ᠲᠦ᠋ᠨᠢ ᠳᠠᠪᠬᠢᠵᠤ ᠣᠴᠢᠭᠰᠠᠨ ᠴᠦ᠍ ᠠᠯᠠᠭᠠ᠃《ᠥᠷᠯᠥᠭᠡ ᠡᠷᠲᠡ ᠶᠠᠪᠤᠭᠰᠠᠨ ᠳᠠ᠃ ᠦᠬᠡᠷ ᠢ᠋ᠶ᠋ᠡᠨ ᠤᠰᠤᠯᠠᠴᠢᠬᠠᠭᠠᠳ ᠴᠠᠮ ᠤ᠋ᠨ ᠬᠤᠷᠠᠯ ᠳ᠋ᠤ᠌ ᠣᠴᠢᠨᠠ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ᠁》 ᠭᠡᠬᠦ ᠬᠠᠷᠢᠭᠤᠯᠲᠠ ᠣᠯᠤᠭᠰᠠᠨ ᠳ᠋ᠤ᠌ ᠣᠳᠬᠣᠨ ᠤᠯᠠᠮ ᠰᠠᠨᠳᠤᠷᠴᠤ 《ᠶᠠᠪᠤᠳᠠᠯ ᠤᠴᠢᠷ ᠮᠠᠭᠤ ᠲᠠᠢᠰᠢ ᠬᠠᠨᠳᠤᠭᠰᠠᠨ ᠶᠠᠭᠤᠮᠠ ᠪᠣᠯᠴᠢᠬᠠᠬᠤ ᠰᠢᠭ᠋ ᠪᠣᠯᠤᠯᠠ 》 ᠭᠡᠵᠦ ᠰᠡᠵᠢᠭ ᠡᠪᠦᠷᠯᠡᠨ ᠪᠤᠴᠠᠭᠠᠳ ᠳᠣᠪᠲᠣᠯᠭᠠᠪᠠ᠃
ᠤᠳᠬᠤᠨ᠂ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠷ ᠡᠴᠡ ᠭᠠᠷᠴᠤ᠂ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢ ᠨᠠᠰᠤᠨ ᠤ᠋ ᠠᠶᠤᠯ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠮᠠᠭᠤ ᠰᠤᠪᠢᠨ ᠢ᠋ ᠡᠭᠦᠷᠴᠦ᠂ ᠪᠣᠭᠣᠨᠢ ᠵᠢᠯᠣᠭᠣ ᠪᠣᠰᠤᠭᠠ ᠳᠥᠷᠥᠭᠡ ᠪᠡᠷ ᠳᠠᠪᠬᠢᠭᠤᠯᠵᠤ ᠶᠠᠪᠤᠨ ᠦᠬᠡᠷ ᠦ᠋ᠨ ᠪᠡᠯᠴᠢᠭᠡᠷ᠂ ᠭᠣᠣᠯ ᠰᠤᠵᠠᠭ ᠤ᠋ᠨ ᠬᠥᠪᠡᠭᠡ ᠡᠨᠡ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠷ ᠮᠥᠷ ᠰᠤᠷᠠᠭ ᠬᠠᠢᠵᠤ ᠶᠠᠪᠤᠭᠰᠠᠨ ᠴᠦ᠍ ᠣᠯᠤᠭᠰᠠᠨ ᠦᠭᠡᠢ᠃ 《ᠴᠢᠭᠢᠶᠡᠲᠦᠷᠦᠦ᠂ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠮᠠᠭᠤ ᠰᠠᠢᠨ ᠲᠡᠨᠦᠭᠦᠯ ᠯᠤᠢᠪᠠᠷᠴᠢᠨ ᠨᠤᠭᠤᠳ ᠯᠠ ᠬᠠᠷᠠ ᠬᠢᠴᠢᠬᠡᠬᠦ ᠰᠢᠭ ᠪᠣᠯᠤᠯᠠ》 ᠭᠡᠵᠦ ᠰᠡᠵᠢᠭᠯᠡᠨ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠲᠠᠷᠢᠶᠠᠨ ᠭᠠᠵᠠᠷ ᠤᠷᠤᠭᠤ ᠰᠢᠭᠤᠳ ᠳᠠᠪᠬᠢᠨ ᠬᠦᠷᠴᠦ᠂ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠠ᠋ᠴᠠ᠄
— ᠠᠬᠠ ᠡᠨᠡᠭᠦᠷ ᠢᠷᠡᠪᠡ ᠤᠤ? ᠭᠡᠰᠡᠨ ᠳ᠋ᠦ᠍ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠰᠠᠨᠳᠤᠷᠴᠤ᠄
— ᠠᠶᠠ᠂ ᠡᠨᠡ ᠴᠢᠨᠢ ᠣᠳᠬᠣᠨ ᠳᠡᠭᠦᠦ ᠪᠠᠢᠨᠠ ᠰᠢᠳᠡ! ᠬᠠᠮᠢᠭᠠ ᠠ᠋ᠴᠠ ᠠᠵᠠ ᠶ᠋ᠢᠨ ᠵᠢᠪᠠᠷ ᠵᠢᠪᠠᠷᠯᠠᠵᠤ ᠴᠢᠮᠠᠶ᠋ᠢ ᠠᠳᠠ ᠵᠠᠯᠠᠵᠤ ᠢᠷᠡᠭᠦᠯᠪᠡ? ᠳᠣᠲᠣᠭᠰᠢ ᠪᠠᠨ᠂ ᠳᠣᠲᠣᠭᠰᠢ ᠪᠠᠨ! ᠭᠡᠷ ᠲᠦ᠍ ᠣᠷᠣ! ᠭᠡᠵᠦ ᠬᠤᠯᠮᠠᠯᠵᠠᠵᠤ ᠪᠠᠢᠯᠠ᠃
— ᠦᠭᠡᠢ᠂ ᠠᠬᠠ ᠡᠨᠡᠭᠦᠷ ᠢᠷᠡᠪᠡ ᠤᠤ? ᠭᠡᠵᠦ ᠠᠰᠠᠭᠤᠵᠤ ᠪᠠᠢᠲᠠᠯᠠ ᠭᠡᠵᠦ ᠤᠴᠠᠭᠠᠷᠳᠠᠭᠰᠠᠨ ᠳ᠋ᠤ᠌ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ᠄
— ᠦᠭᠡᠢ᠂ ᠦᠭᠡᠢ ᠠ᠋! ᠰᠡᠷᠡᠩ ᠠᠬᠠ ᠡᠨᠡᠭᠦᠷ ᠢᠷᠡᠭᠰᠡᠨ ᠦᠭᠡᠢ ᠁ ᠭᠡᠵᠡᠢ᠃
— ᠶᠠᠭᠤ ᠭᠡᠨᠡ ᠠ᠋⁈ ᠦᠨᠡᠨ ᠢ᠋ᠶ᠋ᠡᠷ ᠨᠢ ᠬᠡᠯᠡ᠂ ᠥᠴᠦᠬᠡᠨ ᠬᠤᠳᠠᠯ ᠬᠡᠯᠡᠭᠰᠡᠭᠡᠷ ᠴᠢᠮᠠᠶ᠋ᠢ ᠁ ᠭᠡᠰᠡᠨ ᠳ᠋ᠦ᠍ ᠵᠠᠩ ᠣᠪᠣᠭᠲᠤ ᠪᠠᠯᠠᠭ ᠠᠯᠳᠠᠵᠤ᠄
— ᠦ᠊᠁ ᠦᠨᠡᠨ! ᠪᠢ᠂ ᠪᠢ ᠁ ᠮᠡᠳᠡᠬᠦ ᠦᠭᠡᠢ ᠁ ᠦᠵ᠊᠁ ᠦᠵᠡᠭᠰᠡᠨ ᠦᠭᠡᠢ ᠭᠡᠵᠦ ᠦᠭᠡ ᠪᠡᠨ ᠣᠯᠢᠭᠲᠠᠢ ᠣᠯᠵᠤ ᠬᠡᠯᠡᠬᠦ ᠦᠭᠡᠢ ᠡᠭ ᠮᠡᠭ ᠭᠡᠬᠦ ᠳ᠋ᠦ᠍ ᠤᠳᠬᠤᠨ ᠰᠡᠵᠢᠭ ᠲᠥᠷᠥᠵᠦ ᠲᠡᠭᠦᠨ ᠢ᠋ ᠵᠠᠭᠠᠮᠠᠳᠠᠨ᠄
— ᠠᠬᠠ ᠲᠠᠨ ᠤ᠋ ᠡᠨᠡᠭᠦᠷ ᠢᠷᠡᠭᠡᠳ ᠮᠥᠷ ᠰᠤᠷᠠᠭ ᠲᠠᠰᠤᠷᠠᠴᠢᠬᠠᠯᠠ᠃ ᠠᠬᠠ ᠶ᠋ᠢ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢ ᠬᠡᠯᠡᠵᠦ᠂ ᠦᠨᠡᠨ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ ᠦᠭᠡᠢ ᠪᠣᠯ ᠴᠢᠮᠠ ᠮᠠᠭᠤ ᠶ᠋ᠢ ᠪᠢ ᠴᠢᠰᠤᠯᠠᠵᠤ ᠨᠣᠬᠠᠢ ᠲᠡᠵᠢᠭᠡᠨᠡ ! ᠴᠢᠭᠢᠶᠡᠲᠦᠷᠦᠦ! ᠭᠡᠵᠦ ᠵᠠᠭᠠᠮᠠ ᠠ᠋ᠴᠠ ᠨᠢ ᠳᠤᠭᠲᠤᠷᠤᠨ ᠡᠷᠭᠦᠬᠦ ᠳ᠋ᠦ᠍᠂ ᠬᠣᠶᠠᠷ ᠬᠥᠯ ᠨᠢ ᠭᠠᠵᠠᠷ ᠠ᠋ᠴᠠ ᠲᠣᠬᠣᠢ ᠥᠨᠳᠥᠷ ᠡᠷᠭᠦᠭᠳᠡᠵᠦ ᠴᠢᠷᠠᠢ ᠳ᠋ᠤᠨᠢ ᠴᠢᠰᠤ ᠴᠢᠨᠦᠷᠡᠨ ᠮᠢᠨᠴᠢᠢᠪᠡ᠃ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠠᠶᠤᠨ ᠪᠠᠯᠠᠳᠠᠵᠤ 《ᠡᠨᠡ ᠮᠣᠩᠭᠣᠯ ᠡᠷᠡ ᠶ᠋ᠢᠨ ᠳᠣᠯᠭᠢᠨ ᠵᠠᠩ ᠳ᠋ᠤ᠌ ᠬᠢᠴᠢᠶᠡᠬᠦ ᠦᠭᠡᠢ ᠪᠣᠯ ᠠᠮᠢ ᠪᠠᠨ ᠳᠡᠮᠡᠢ ᠦᠷᠡᠭᠡᠴᠢᠭᠡᠬᠦ ᠶᠠᠳᠠᠬᠤ ᠦᠭᠡᠢ》ᠭᠡᠵᠦ ᠦᠬᠦᠲᠡᠯᠡ ᠠᠶᠤᠵᠤ᠄
— ᠪᠢ᠂ ᠬᠡᠯᠡᠶᠡ! ᠪᠢ ᠬᠡᠯᠡᠶᠡ ! ᠶᠠᠪᠤᠳᠠᠯ ᠤᠴᠢᠷ ᠮᠠᠭᠤ ᠪᠣᠯᠬᠤ ᠨᠢ ᠪᠣᠯᠤᠭᠰᠠᠨ ᠳᠠ! ᠨᠠᠷᠢᠨ ᠤᠴᠢᠷ ᠢ᠋ ᠬᠠᠷᠢᠨ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ! ᠭᠡᠵᠦ ᠨᠢᠭᠡ ᠪᠥᠭᠡᠷᠡᠩᠬᠡᠢ ᠶᠠᠭᠤᠮᠠ ᠶᠠᠷᠢᠪᠠ᠃
ᠤᠳᠬᠤᠨ᠂ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠤ᠋ ᠠᠮᠠᠨ ᠠ᠋ᠴᠠ ᠰᠡᠵᠢᠭᠲᠡᠢ ᠶᠠᠭᠤᠮᠠ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠵᠣᠯᠢᠭ ᠠᠮᠠᠨ ᠥᠴᠢᠭ ᠢ᠋ᠶ᠋ᠡᠨ ᠣᠯᠢᠭᠲᠠᠢ ᠥᠭᠬᠦ ᠦᠭᠡᠢ ᠪᠣᠯᠬᠣᠷ ᠥᠨᠥᠬᠢ ᠶ᠋ᠢ ᠠᠲᠤᠷᠢᠲᠠᠯᠠ ᠬᠦᠯᠢᠵᠦ《ᠴᠢ ᠮᠠᠭᠤ ᠴᠢᠰᠤ ᠨᠠᠳᠠ ᠠᠮᠠᠨ ᠥᠴᠢᠭ ᠢ᠋ᠶ᠋ᠡᠨ ᠥᠭᠬᠦ ᠦᠭᠡᠢ ᠪᠣᠯ ᠪᠠᠢᠭ! ᠠᠮᠠᠨ ᠥᠴᠢᠭ ᠢ᠋ ᠴᠢᠨᠢ ᠠᠪᠳᠠᠭ ᠡᠷᠯᠢᠭ ᠦ᠋ᠨ ᠭᠠᠵᠠᠷ ᠠᠪᠠᠴᠢᠵᠤ ᠥᠭᠪᠡᠯ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠨᠡ ᠪᠣᠢ!》 ᠭᠡᠵᠦ ᠬᠦᠩ ᠦ᠋ᠨ ᠶᠠᠮᠤᠨ ᠵᠦᠭ ᠬᠥᠲᠥᠯᠦᠭᠰᠡᠨ ᠳ᠋ᠦ᠍ ᠥᠨᠥᠬᠢ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠠᠮᠢ ᠶ᠋ᠢ ᠨᠢ ᠬᠣᠷᠣᠭᠠᠴᠢᠬᠠᠬᠤ ᠠ᠋ᠴᠠ ᠠᠶᠤᠭᠰᠠᠨ ᠳ᠋ᠠᠭᠠᠨ ᠪᠢᠵᠡ᠂ ᠥᠮᠥᠳᠥᠨ ᠳ᠋ᠡᠭᠡᠨ ᠰᠢᠭᠡᠰᠦ ᠠᠯᠲᠠᠨ 《ᠠᠶᠠ! ᠠᠮᠢ ᠶ᠋ᠢ ᠮᠢᠨᠢ ᠦᠯᠡᠳᠡᠴᠢᠬᠡ》᠂ 《ᠪᠢ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠶᠡ!᠁》 ᠭᠡᠵᠦ ᠵᠠᠮ ᠤ᠋ᠨ ᠲᠤᠭᠤᠰᠢ ᠣᠷᠢᠯᠠᠨ ᠴᠢᠷᠠᠯᠠᠨ ᠶᠠᠪᠤᠪᠠ᠃
ᠬᠡᠳᠦ ᠬᠣᠨᠣᠭ ᠤ᠋ᠨ ᠬᠢᠨᠢ ᠳᠠᠷᠠᠭᠠ᠂ ᠯᠢ ᠲᠤᠸᠠᠨᠵᠠᠩ ᠬᠡᠳᠦ ᠬᠡᠳᠦᠨ ᠫᠤᠤ ᠵᠡᠪᠰᠡᠭ ᠲᠡᠢ ᠳᠠᠭᠠᠯᠲᠠ ᠴᠡᠷᠢᠭ ᠳᠠᠭᠠᠭᠤᠯᠵᠤ᠂ ᠶᠡᠬᠡ ᠯᠡ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠬᠣᠰᠢᠭᠤ ᠬᠦᠩ ᠦ᠋ᠨ ᠶᠠᠮᠤᠨ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠪᠡ᠃ ᠲᠡᠷᠡ ᠡᠳᠦᠷ ᠬᠦᠩ ᠦ᠋ᠨ ᠶᠠᠮᠤᠨ ᠳ᠋ᠤ᠌ ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠶᠠᠮᠤᠨ ᠤ᠋ ᠵᠢᠰᠢᠶᠡᠨ ᠳ᠋ᠦ᠍ ᠰᠠᠭᠤᠵᠤ ᠬᠡᠷᠡᠭ ᠵᠠᠷᠭᠤ ᠰᠢᠢᠳᠬᠡᠵᠦ ᠪᠠᠢᠵᠠᠢ᠃ ᠬᠦᠩ ᠦ᠋ᠨ ᠶᠠᠮᠤᠨ ᠴᠥᠭᠡᠪᠲᠦᠷ ᠴᠡᠷᠢᠭ ᠲᠡᠢ ᠠᠭᠰᠠᠨ ᠴᠦ᠍ ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠡᠨᠡ ᠬᠦ᠌ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠢᠷᠡᠭᠰᠡᠨ ᠯᠢ ᠲᠤᠸᠠᠨᠵᠠᠩ ᠠ᠋ᠴᠠ ᠥᠴᠦᠬᠡᠨ ᠴᠦ᠍ ᠠᠶᠤᠨ ᠭᠡᠯᠮᠡᠭᠳᠡᠭᠰᠡᠨ ᠦᠭᠡᠢ᠂ ᠳᠣᠣᠷᠠᠬᠢ ᠬᠥᠮᠦᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠢ ᠲᠤᠸᠠᠨᠵᠠᠩ ᠢ᠋ ᠤᠭᠲᠤᠭᠣᠯᠵᠤ᠂ ᠵᠡᠭᠦᠨ ᠤᠷᠲᠤ ᠳ᠋ᠠᠭᠠᠨ ᠣᠷᠣᠭᠤᠯᠵᠤ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠢ᠋ ᠭᠠᠷᠭᠠᠵᠤ ᠥᠭᠬᠦ ᠪᠠ ᠡᠰᠡᠬᠦ ᠲᠤᠬᠠᠢ ᠬᠡᠯᠡᠯᠴᠡᠭᠡᠷ ᠬᠢᠯᠭᠡᠪᠡ᠃
ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠳᠣᠣᠷᠠᠬᠢ ᠬᠥᠮᠦᠰ ᠲᠡᠭᠡᠨ《ᠰᠠᠷᠠᠩᠸᠠᠩᠴᠣᠭ ᠤ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠲᠣᠳᠣᠯᠠᠬᠤ ᠠ᠋ᠴᠠ ᠡᠮᠦᠨᠡ ᠵᠠᠩ ᠣᠪᠣᠭᠲᠤ ᠮᠣᠳᠣᠨ ᠳᠠᠷᠬᠠᠨ ᠢ᠋ ᠯᠢ ᠲᠤᠸᠠᠨᠵᠠᠩ ᠳ᠋ᠤ᠌ ᠥᠭᠴᠦ ᠶᠠᠪᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠴᠢᠩᠭᠠ ᠲᠤᠰᠢᠶᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠭᠣᠣᠯ ᠤᠷᠲᠤ ᠳ᠋ᠠᠭᠠᠨ ᠠᠷᠢᠬᠢ ᠤᠤᠭᠤᠵᠤ ᠪᠠᠢᠳᠠᠯ ᠢ᠋ ᠴᠢᠩᠨᠠᠵᠤ ᠰᠠᠭᠤᠪᠠ᠃
᠁
ᠬᠡᠰᠡᠭ ᠮᠠᠷᠭᠤᠯᠳᠤᠪᠠ᠃ ᠭᠡᠨᠡᠳᠲᠡ ᠯᠢ ᠲᠤᠸᠠᠨᠵᠠᠩ᠄
— ᠲᠠ ᠨᠠᠷ ᠮᠢᠨᠦ ᠲᠠᠷᠢᠶᠠᠨ ᠤ᠋ ᠬᠥᠮᠦᠨ ᠢ᠋ ᠶᠠᠭᠤ ᠭᠡᠵᠦ ᠳᠤᠷᠠ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠤᠤᠯᠭᠠᠯᠠᠳᠠᠭ ᠪᠣᠢ?ᠬᠤᠷᠳᠤᠨ ᠳᠡᠯᠪᠢ! ᠭᠡᠵᠦ ᠠᠭᠰᠤᠮᠨᠠᠨᠠ᠃
— ᠮᠠᠨ ᠤ᠋ ᠬᠥᠮᠦᠨ ᠢ᠋ ᠡᠰᠡᠨ ᠮᠡᠨᠳᠦ ᠠᠪᠴᠢᠷᠠᠪᠠᠯ᠂ ᠲᠠᠨ ᠤ᠋ ᠬᠥᠮᠦᠨ ᠢ᠋ ᠴᠢᠨᠢ ᠥᠭᠭᠦᠶᠡ!
— ᠮᠠᠨ ᠤ᠋ ᠬᠥᠮᠦᠨ ᠢ᠋ ᠡᠰᠡᠨ ᠮᠡᠨᠳᠦ᠁ ᠠᠪᠴᠢᠷᠠᠪᠠᠯ ᠭᠡᠨᠡ? ᠶᠠᠭᠤᠨ ᠤ᠋ ᠬᠥᠮᠦᠨ⁈ ᠭᠡᠵᠦ ᠯᠢ ᠲᠤᠸᠠᠨᠵᠠᠩ ᠡᠰᠡ ᠮᠡᠳᠡᠭᠰᠡᠨ ᠲᠣᠯᠣᠭᠠᠢᠯᠠᠵᠤ ᠪᠠᠭᠠᠰᠢᠯᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ《ᠬᠠ᠁ ᠬᠠ》 ᠭᠡᠵᠦ ᠬᠠᠳᠠᠭᠠᠨᠠᠨ ᠢᠨᠢᠶᠡᠨᠡ᠃
— ᠪᠢᠲᠡᠭᠡᠢ ᠪᠠᠰᠢᠷᠯᠠᠭᠠᠳ ᠪᠠᠢ! ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠡᠭᠦᠨ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠰᠠᠷᠠᠩᠸᠠᠩᠴᠤᠭ ᠭᠤᠸᠠᠢ ᠶ᠋ᠢ ᠲᠠ ᠨᠠᠷ ᠬᠣᠣᠷᠯᠠᠭᠰᠠᠨ!
— ᠪᠢᠲᠡᠭᠡᠢ ᠣᠩᠭᠣᠰᠤ ᠠᠯᠲᠠ! ᠭᠡᠵᠦ ᠯᠢ ᠲᠤᠸᠠᠨᠵᠠᠩ ᠭᠡᠨᠡᠳᠲᠡ ᠫᠠᠰ ᠬᠢᠲᠡᠯᠡ ᠰᠢᠷᠡᠭᠡ ᠠᠯᠠᠭᠠᠳᠠᠨᠠ᠃
— ᠬᠡᠩ! ᠬᠡᠨ ᠨᠢ ᠴᠣᠬᠣᠮ ᠬᠡᠢ ᠭᠠᠵᠠᠷ ᠤᠩᠭᠤᠰᠤ ᠠᠯᠳᠠᠪᠠ? ᠲᠠ ᠨᠠᠷ ᠮᠠᠨ ᠤ᠋ ᠬᠦᠩ ᠦ᠋ᠨ ᠮᠠᠯᠴᠢᠨ ᠰᠠᠷᠠᠩᠸᠠᠩᠴᠤᠭ ᠤ᠋ᠨ ᠬᠣᠣᠷᠯᠠᠭᠳᠠᠭᠰᠠᠨ ᠤᠴᠢᠷ ᠢ᠋ ᠲᠣᠳᠣᠯᠠᠬᠤ ᠦᠭᠡᠢ ᠪᠣᠯ ᠥᠪᠡᠷ ᠦ᠋ᠨ ᠬᠥᠮᠦᠨ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠠᠪᠠᠴᠢᠶᠠ ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠬᠤᠷᠢᠶᠠᠴᠢᠬᠠ! ᠶᠠᠭᠠᠬᠢᠨᠠ ᠭᠡᠪᠡᠯ ᠶᠠᠭᠠᠬᠢᠴᠢᠬᠠᠳᠠᠭ ᠭᠡᠵᠦ ᠪᠢᠲᠡᠭᠡᠢ ᠬᠣᠭᠣᠰᠣᠨ ᠭᠣᠷᠢᠳᠠ! ᠭᠡᠵᠦ ᠬᠦᠩ ᠦ᠋ᠨ ᠶᠠᠮᠤᠨ ᠤ᠋ ᠲᠠᠯᠠ ᠶ᠋ᠢᠨ ᠬᠡᠯᠡᠯᠴᠡᠭᠡᠷ ᠦ᠋ᠨ ᠵᠠᠩᠭᠢ ᠭᠡᠵᠦ ᠯᠢ ᠲᠤᠸᠠᠨᠵᠠᠩ ᠳ᠋ᠤ᠌ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠭᠡᠵᠦ ᠮᠠᠷᠭᠤᠭᠰᠠᠨ ᠳ᠋ᠤ᠌᠂ ᠯᠢ ᠲᠤᠸᠠᠨᠵᠠᠩ ᠠᠭᠤᠷᠯᠠᠵᠤ《ᠮᠠᠭᠤᠰᠠᠢᠨ ᠦᠬᠡᠷ ᠲᠡᠨᠡᠭ ᠦ᠋ᠳ᠁》 ᠶᠠᠭᠠᠬᠢᠯᠠ ᠢᠢᠯᠡ ᠭᠡᠵᠦ ᠡᠯᠳᠡᠪ ᠡᠰᠡᠨ ᠢ᠋ᠶ᠋ᠡᠷ ᠬᠠᠷᠢᠶᠠᠯ ᠲᠠᠯᠪᠢᠨᠠ᠃
ᠸᠴᠢᠷᠪᠠᠲᠤ ᠡᠨᠡ ᠪᠦᠬᠦᠨ ᠢ᠋ ᠭᠣᠣᠯ ᠤᠷᠲᠤ ᠠ᠋ᠴᠠ ᠲᠣᠳᠣᠷᠬᠠᠢ ᠰᠣᠨᠣᠰᠴᠤ᠂ ᠡᠭᠳᠡᠭᠦᠦ ᠨᠢ ᠬᠥᠳᠡᠯᠬᠦ ᠳ᠋ᠡᠭᠡᠨ ᠪᠡᠬᠡ ᠵᠢᠭᠤᠷᠠᠨ ᠪᠢᠷ ᠢᠳᠡᠭᠦᠯᠵᠦ ᠨᠢᠭᠡ ᠬᠡᠰᠡᠭ ᠮᠣᠣᠲᠤᠤ ᠴᠠᠭᠠᠰᠤᠨ ᠳᠡᠭᠡᠷᠡ《ᠯᠢ ᠶ᠋ᠢ ᠲᠣᠨᠢᠯᠭᠠ!》 ᠭᠡᠵᠦ ᠪᠢᠴᠢᠪᠡ᠃《ᠮᠠᠭᠤ ᠯᠢ ᠲᠤᠸᠠᠨᠵᠠᠩ ᠴᠢ ᠪᠠᠷᠤᠭᠲᠠᠢᠬᠠᠨ ᠶᠠᠩ ᠶᠠᠩ ᠭᠡᠵᠦ ᠳᠡᠮᠡᠢ ᠬᠤᠴᠠᠭᠠᠳ ᠪᠠᠢ᠃ ᠴᠢ ᠨᠠᠳᠠ ᠪᠠᠭᠠ ᠯᠠ ᠰᠡᠪ ᠭᠠᠷᠭᠠᠭᠠᠳ ᠠᠯᠢ! ᠡᠨᠡ ᠡᠴᠢᠭᠡ ᠴᠢᠨᠢ ᠴᠢᠮᠠᠶ᠋ᠢ ᠭᠠᠭᠴᠠᠬᠠᠨ ᠰᠤᠮᠤᠨ ᠳᠡᠭᠡᠷᠡ ᠭᠠᠪᠠᠯᠠ ᠶ᠋ᠢ ᠴᠢᠨᠢ ᠰᠡᠬᠦᠨᠡ ᠰᠢᠦ!》 ᠭᠡᠵᠦ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠨ ᠲᠡᠪᠴᠢᠨ ᠶᠠᠳᠠᠵᠤ ᠠᠲᠠᠯᠠ ᠭᠠᠳᠠᠨᠠ᠄
— ᠲᠠ ᠨᠠᠷ ᠵᠠᠩ ᠮᠣᠳᠣᠨ ᠳᠠᠷᠬᠠᠨ ᠢ᠋ ᠮᠢᠨᠢ ᠨᠠᠳᠠ ᠭᠠᠷᠭᠠᠵᠤ ᠥᠭᠬᠦ ᠦᠭᠡᠢ ᠪᠣᠯ ᠥᠨᠥᠳᠥᠷ ᠡᠨᠡ ᠡᠴᠢᠭᠡ ᠴᠢᠨᠢ ᠬᠠᠷᠢᠨ ᠨᠢᠭᠡ《ᠦᠬᠡᠷ ᠦᠨ ᠱᠥᠯᠥ ᠤᠤᠭᠤᠴᠢᠬᠠᠶᠠ!》 ᠭᠡᠵᠦ ᠬᠡᠯᠡᠩᠭᠡᠨ ᠫᠤᠤ ᠪᠠᠨ ᠰᠤᠭᠤᠯᠵᠤ ᠬᠦᠩ ᠦ᠋ᠨ ᠬᠡᠯᠡᠯᠴᠡᠭᠡᠷ ᠦ᠋ᠨ ᠵᠠᠩᠭᠢ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠫᠠᠩ ᠭᠡᠲᠡᠯᠡ ᠫᠤᠤᠳᠠᠪᠠ᠃
ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠭᠣᠰ ᠦᠰᠦᠷᠦᠨ ᠪᠣᠰᠴᠤ《ᠴᠢᠭᠢᠶᠡᠲᠦᠷᠦᠦ᠂ ᠬᠡᠲᠦᠷᠡᠭᠰᠡᠨ ᠮᠠᠭᠤ ᠰᠠᠢᠨ ᠵᠠᠨᠠᠭ ᠤ᠋ᠳ ᠢ᠋ ᠬᠤᠢ!(ᠦᠬᠡᠷ ᠦ᠋ᠨ ᠱᠥᠯᠥ) ᠤᠤᠭᠤᠨᠠ ᠭᠡᠨᠡ ᠤᠤ⁈ ᠲᠠ ᠨᠠᠷ ᠤ᠋ᠨ ᠶᠠᠭᠠᠬᠢᠵᠤ (ᠦᠬᠡᠷ ᠦ᠋ᠨ ᠱᠥᠯᠥ) ᠤᠤᠭᠤᠳᠠᠭ ᠢ᠋ ᠴᠢᠨᠢ ᠦᠵᠡᠶᠡ! ᠡᠨᠡ ᠡᠴᠢᠭᠡ ᠴᠢᠨᠢ ᠡᠯᠵᠢᠭᠡᠨ ᠰᠢᠷᠪᠥᠰᠥ ᠶ᠋ᠢ ᠴᠢᠨᠢ ᠰᠤᠭᠤᠯᠤᠶᠠ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ!》 ᠭᠡᠵᠦ ᠭᠣᠣᠯ ᠤᠷᠲᠤ ᠠ᠋ᠴᠠ ᠪᠠᠨ ᠭᠦᠶᠦᠨ ᠭᠠᠷᠴᠤ᠂ ᠱᠣᠩ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠮᠠᠨᠠᠭᠠ ᠵᠣᠭᠰᠣᠭᠰᠠᠨ ᠨᠢᠭᠡ ᠶ᠋ᠢ ᠨᠢ ᠫᠤᠤᠳᠠᠵᠤ ᠤᠨᠠᠭᠠᠪᠠ᠃
ᠭᠠᠳᠠᠨᠠ ᠫᠤᠤ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠵᠡᠭᠦᠨ ᠤᠷᠲᠤ ᠠ᠋ᠴᠠ ᠯᠢ ᠲᠤᠸᠠᠨᠵᠠᠩ《ᠶᠠᠭᠤ ᠪᠣᠯᠴᠢᠬᠠᠪᠠ?》 ᠭᠡᠵᠦ ᠰᠠᠨᠳᠤᠷᠤᠨ ᠭᠠᠷᠴᠤ ᠢᠷᠡᠩᠭᠦᠲᠡ᠂ ᠸᠴᠢᠷᠪᠠᠲᠤ ᠲᠡᠭᠦᠨ ᠢ᠋《ᠶᠠᠭᠤ᠁》 ᠭᠡᠵᠦ ᠤᠬᠠᠭᠠᠨ ᠬᠥᠯ ᠢ᠋ ᠨᠢ ᠣᠯᠬᠤ ᠠ᠋ᠴᠠ ᠡᠮᠦᠨᠡ ᠫᠠᠩ ᠭᠡᠵᠦ ᠫᠤᠤᠳᠠᠭᠰᠠᠨ ᠳ᠋ᠤ᠌ ᠯᠢ ᠲᠤᠸᠠᠨᠵᠠᠩ ᠤ᠋ᠨ ᠲᠠᠷᠢᠬᠢ ᠨᠢ ᠰᠠᠴᠤᠭᠳᠠᠵᠠᠢ᠁
— ᠠᠷᠠᠰᠤᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠬᠤᠴᠠᠳᠠᠭ ᠮᠠᠭᠤ ᠰᠠᠢᠨ ᠵᠠᠨᠠᠭ ᠤ᠋ᠳ᠁ᠢᠩᠭᠢᠵᠦ(ᠦᠬᠡᠷ ᠦ᠋ᠨ ᠱᠥᠯᠥ) ᠤᠤᠭᠤᠳᠠᠭ ᠶᠤᠮ ᠪᠠᠢᠨᠠ ᠭᠡᠵᠦ ᠸᠴᠢᠷᠪᠠᠲᠤ ᠲᠤᠸᠠᠨᠵᠠᠩ ᠬᠠᠷᠢᠶᠠᠯ ᠲᠠᠯᠪᠢᠨ ᠨᠥᠭᠦᠭᠡ ᠬᠡᠳᠦᠨ ᠳᠠᠭᠠᠯᠳᠤᠭᠰᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠫᠤᠤ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠱᠣᠷᠣᠩ ᠳ᠋ᠤ᠌ ᠴᠢᠬᠢᠪᠡ᠃
᠁
— ᠠ᠂ ᠲᠡᠭᠡᠪᠡᠯ ᠮᠠᠨᠴᠤᠷᠭᠠ ᠶ᠋ᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠲᠤᠸᠠᠨᠵᠠᠩ ᠢ᠋ᠶ᠋ᠠᠷ᠁ ᠭᠡᠵᠦ ᠬᠡᠯᠡᠲᠡᠯᠡ ᠭᠠᠳᠠᠨᠠ ᠠ᠋ᠴᠠ ᠥᠯᠵᠡᠢᠰᠡᠩ ᠣᠷᠣᠵᠤ ᠢᠷᠡᠨ᠂ ᠠᠭᠸᠠᠩ ᠨᠣᠶᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠭᠡᠳ ᠭᠠᠷᠴᠤ ᠶᠠᠪᠤᠪᠠ᠃
ᠡᠯᠳᠡᠩᠭᠡ᠂ ᠥᠯᠵᠡᠢᠰᠡᠩ ᠦ᠋ᠨ ᠠᠷᠤ ᠠ᠋ᠴᠠ ᠵᠠᠨᠤᠯᠲᠠᠢᠬᠠᠨ ᠰᠢᠷᠲᠡᠵᠦ《ᠡᠨᠡ ᠮᠠᠭᠤ ᠬᠦᠢᠲᠡᠨ ᠴᠢᠷᠠᠢ ᠲᠠᠢ ᠠᠮᠢᠲᠠᠨ ᠪᠠᠰᠠ ᠬᠦᠩ ᠦ᠋ᠨ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠳ᠋ᠤ᠌ ᠰᠠᠨᠠᠭᠠᠷᠬᠠᠵᠤ᠂ ᠪᠥᠭᠰᠡᠨ ᠳ᠋ᠡᠭᠡᠨ ᠬᠦᠷᠬᠦ ᠦᠭᠡᠢ ᠭᠠᠷ ᠢ᠋ᠶ᠋ᠠᠨ ᠲᠩᠷᠢ ᠥᠭᠡᠳᠡ ᠰᠠᠷᠪᠠᠢᠳᠠᠭ ᠮᠠᠭᠤ ᠵᠣᠯᠢᠭ ᠶᠤᠮ ᠠ᠋!》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠦᠬᠡᠪᠡ᠃
— ᠲᠤᠰᠠᠯᠠᠭᠴᠢ ᠶ᠋ᠢᠨ ᠶᠡᠬᠡ ᠠᠭᠡ ᠮᠠᠨᠴᠤᠷᠭᠠ ᠲᠠᠢ ᠪᠢ ᠶᠡᠷᠦ ᠨᠢᠭᠤᠷ ᠤᠴᠠᠷᠠᠭᠠ ᠦᠭᠡᠢ ᠶᠦᠮ ᠳᠡ! ᠭᠡᠵᠦ ᠠᠭᠸᠠᠩ ᠨᠣᠶᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠠᠭᠸᠠᠩ ᠨᠣᠶᠠᠨ ᠮᠠᠨᠴᠤᠷᠭᠠ ᠲᠠᠢ ᠠᠭᠤᠯᠵᠠᠬᠤ ᠰᠠᠨ ᠪᠣᠯ ᠶᠠᠮᠤᠨ ᠤ᠋ ᠲᠠᠬᠠᠷ ᠭᠦᠶᠦᠯᠭᠡᠵᠦ ᠲᠡᠭᠦᠨ ᠢ᠋ ᠳᠠᠭᠤᠳᠠᠭᠤᠯᠤᠶᠠ! ᠭᠡᠵᠡᠢ᠃
— ᠮᠠᠨᠴᠤᠷᠭᠠ ᠣᠳᠣ ᠬᠠᠮᠢᠭᠠ ᠪᠠᠢᠬᠤ ᠶᠤᠮ⁈
— ᠮᠡᠳᠡᠬᠦ ᠦᠭᠡᠢ᠂ ᠴᠣᠬᠣᠮ ᠬᠠᠮᠢᠭᠠᠭᠤᠷ ᠪᠠᠢᠳᠠᠭ ᠪᠣᠯ?
ᠭᠡᠷ ᠦ᠋ᠨ ᠪᠠᠷᠠᠭᠠ ᠬᠠᠷᠠᠭᠰᠠᠨ ᠦᠭᠡᠢ ᠤᠳᠠᠯᠠ᠃
— ᠪᠣᠳᠣᠪᠠᠯ ᠴᠦ᠍ ᠪᠠᠰᠠ ᠡᠴᠢᠭᠡ ᠶ᠋ᠢᠨ ᠵᠢᠰᠦ ᠲᠥᠯᠥᠪ᠂ ᠤᠬᠠᠭᠠᠨ ᠰᠠᠨᠠᠭᠠ ᠶ᠋ᠢ ᠥᠪᠴᠢᠵᠦ ᠲᠥᠷᠥᠭᠰᠡᠨ ᠰᠠᠢᠨ ᠡᠷᠡ ᠶ᠋ᠢᠨ ᠨᠢᠭᠡ ᠪᠠᠢᠬᠠ! ᠭᠡᠵᠦ ᠠᠭᠸᠠᠩ ᠨᠣᠶᠠᠨ ᠡᠯᠳᠡᠩᠭᠡ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠵᠣᠬᠢᠴᠠᠭᠤᠯᠤᠭᠰᠠᠨ ᠶᠠᠭᠤᠮᠠ ᠶᠠᠷᠢᠵᠤ ᠢᠨᠢᠶᠡᠪᠬᠢᠯᠡᠭᠰᠡᠨ ᠳ᠋ᠦ᠍ ᠡᠯᠳᠡᠩᠭᠡ᠄
— ᠠᠭᠸᠠᠩ ᠨᠣᠶᠠᠨ ᠲᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠪᠠᠯ ᠮᠡᠳᠡᠨᠡ ᠳᠠ! ᠭᠡᠵᠦ ᠭᠡᠭ ᠭᠡᠭ ᠬᠢᠨ ᠢᠨᠢᠶᠡᠪᠡ᠁
— — — —
① ᠨᠢᠭᠡ ᠵᠦᠢᠯ ᠦ᠋ᠨ ᠲᠦᠷᠭᠡᠨ ᠫᠤᠤ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ