ᠰᠤᠷᠬᠠᠭᠲᠠᠨᠢ ᠪᠡᠬᠢ ᠬᠠᠲᠤᠨ-ᠪᠢᠮᠪᠠ ᠶ᠋ᠢᠨ ᠰᠠᠷᠠᠨᠲᠤᠶᠠᠭᠠ-ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ ᠣᠷᠣᠭᠠ ᠪᠤᠰᠬᠠᠭᠠ ᠣᠨ ᠵᠢᠯ ᠦ᠋ᠳ ᠦ᠋ᠨ ᠲᠥᠭᠡᠷᠭᠡСорхугтани бэх хатан-Бямбын Сарантуяа
2614ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ ᠣᠷᠣᠭᠠ ᠪᠤᠰᠬᠠᠭᠠ ᠣᠨ ᠵᠢᠯ ᠦ᠋ᠳ ᠦ᠋ᠨ ᠲᠥᠭᠡᠷᠭᠡ
ᠨᠢᠭᠡᠨ ᠴᠠᠭ ᠤ᠋ᠨ ᠥᠷᠥᠰᠢᠶᠡᠯᠲᠦ ᠶᠡᠬᠡ ᠬᠠᠭᠠᠨ ᠥᠭᠡᠳᠡᠢ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠳᠠᠭᠤᠳᠠᠯᠭᠠ ᠪᠠᠷ
ᠪᠤᠴᠠᠨ ᠣᠳᠤᠭᠰᠠᠨ ᠲᠤᠯᠠ ᠳᠠᠷᠠᠭᠠ ᠶ᠋ᠢᠨ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠡᠭᠡᠨ ᠵᠠᠯᠠᠷᠠᠬᠤ ᠬᠦᠷᠲᠡᠯᠡ ᠵᠠᠩᠰᠢᠯ ᠶᠣᠰᠣᠭᠠᠷ ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠶᠠᠪᠤᠭᠤᠯᠵᠤ ᠡᠵᠡᠨᠲᠦ ᠤᠯᠤᠰ ᠢ᠋ᠶ᠋ᠠᠨ ᠵᠠᠬᠢᠷᠤᠨ ᠰᠠᠭᠤᠬᠤ ᠪᠣᠯᠤᠯᠠ᠃ ᠬᠠᠭᠠᠨ ᠡᠵᠡᠨ ᠢ᠋ ᠲᠥᠷᠥᠵᠦ ᠥᠰᠦᠭᠰᠡᠨ ᠨᠤᠲᠤᠭ ᠤ᠋ᠨ ᠬᠢᠨᠢ ᠭᠠᠵᠠᠷ ᠰᠢᠷᠣᠢ ᠳ᠋ᠤ᠌ ᠡᠭᠦᠷᠢᠳᠡ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠨᠣᠢᠷᠰᠤᠭᠤᠯᠬᠤ ᠶᠡᠬᠡ ᠶᠣᠰᠣᠯᠠᠯ ᠢ᠋ ᠦᠢᠯᠡᠳᠦᠭᠡᠳ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠭᠤᠷᠪᠠᠨ ᠭᠣᠣᠯ ᠤ᠋ᠨ ᠰᠠᠪᠠ ᠭᠠᠵᠠᠷ ᠶᠡᠬᠡ ᠠᠭᠤᠷᠠᠭ ᠲᠠᠭᠠᠨ ᠦᠯᠡᠳᠡᠪᠡ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠵᠡᠭᠦᠢ ᠳ᠋ᠦ᠍ ᠦᠷᠡ ᠬᠡᠦᠬᠡᠳ ᠦ᠋ᠳ ᠨᠢ ᠭᠠᠯ ᠭᠣᠯᠣᠮᠲᠠ ᠪᠠᠨ ᠡᠵᠡᠨ ᠦ᠌ ᠶᠣᠰᠣ ᠪᠠᠷ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ᠂ ᠠᠷᠠᠳ ᠣᠯᠠᠨ ᠨᠢ ᠲᠦᠪᠰᠢᠨ ᠠᠮᠤᠭᠤᠯᠠᠩ ᠰᠠᠭᠤᠵᠤ ᠪᠠᠢᠵᠠᠢ᠃
ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠤ᠋ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠰᠡᠨ ᠬᠤᠳᠠᠯᠳᠤᠭᠠᠴᠢᠨ ᠢᠨᠢᠯᠢ ᠶ᠋ᠢᠨ ᠦᠨᠡᠨᠴᠢ ᠵᠢᠳᠬᠦᠯ ᠢ᠋ᠶ᠋ᠡᠷ ᠶᠡᠬᠡ ᠠᠭᠤᠷᠠᠭ ᠲᠤ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠬᠥᠭᠵᠢᠵᠦ᠂ ᠬᠥᠮᠦᠨ ᠵᠤᠨ ᠤ᠋ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠵᠦ ᠪᠣᠢ ᠪᠦᠬᠦᠨ ᠳ᠋ᠦ᠍ ᠰᠢᠨᠡ ᠰᠠᠢᠬᠠᠨ ᠢ᠋ ᠠᠪᠴᠤ ᠢᠷᠡᠭᠰᠡᠨ ᠢ᠋ ᠨᠢᠳᠦ ᠪᠡᠷ ᠦᠵᠡᠵᠦ ᠪᠠᠬᠠᠳᠤᠨ ᠪᠠᠢᠭᠰᠠᠨ ᠴᠤ᠌ ᠰᠡᠳᠬᠢᠯ ᠳ᠋ᠦ᠍ ᠳᠣᠲᠣᠨᠣ ᠡᠨᠡ ᠭᠠᠵᠠᠷ ᠲᠤ ᠡᠷᠭᠢᠨ ᠢᠷᠡᠬᠦ ᠳ᠋ᠦ᠍ ᠴᠠᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠭᠡ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨ᠂ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠴᠤᠪᠤᠷᠠᠨ ᠢᠷᠡᠭᠰᠡᠨ ᠬᠦᠨᠳᠦᠬᠡᠨ ᠡᠳᠦᠷ ᠦ᠋ᠳ ᠦ᠋ᠨ ᠮᠠᠨᠠᠨ ᠪᠤᠳᠠᠩ ᠬᠠᠭᠠᠨᠲᠤ ᠲᠥᠷᠥ ᠶ᠋ᠢᠨ ᠢᠷᠡᠭᠡᠳᠦᠢ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠵᠢᠷᠦᠬᠡ ᠶ᠋ᠢ ᠳᠡᠩᠰᠡᠯᠡᠭᠦᠯᠵᠦ ᠪᠠᠢᠯᠠ᠃
ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠤᠯᠤᠰ ᠤ᠋ᠨ ᠢᠷᠡᠭᠡᠳᠦᠢ ᠴᠠᠭᠠᠰᠢ ᠬᠡᠷᠬᠢᠬᠦ ᠨᠢ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠳᠤᠮᠳᠠ ᠴᠤ᠌ ᠠᠰᠠᠭᠤᠯᠲᠠ ᠪᠠᠷ ᠦᠷᠭᠦᠯᠵᠢᠯᠡᠵᠦ ᠪᠠᠢᠪᠠ᠃ ᠣᠯᠠᠨ ᠬᠥᠯᠬᠢᠭᠰᠡᠨ ᠬᠠᠷᠠᠬᠣᠷᠣᠮ ᠤ᠋ᠨ ᠴᠢᠯᠠᠭᠤᠨ ᠬᠠᠨᠠᠨ ᠳᠤᠮᠳᠠ ᠡᠢᠰᠢ ᠲᠡᠢᠰᠢ ᠣᠢᠨ ᠪᠠᠭᠤᠬᠤ ᠡᠵᠡᠨ ᠦᠭᠡᠢ ᠰᠤᠮᠤ ᠮᠡᠲᠦ ᠬᠡᠷᠡᠭᠦᠯ᠂ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠪᠠᠷᠢᠬᠤ ᠪᠠᠷ ᠤᠯᠠᠢᠷᠠᠨ ᠪᠠᠢᠭᠠ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠳᠠᠯᠳᠠ ᠲᠡᠮᠡᠴᠡᠯ ᠦ᠋ᠨ ᠳᠤᠮᠳᠠ ᠪᠠᠢᠬᠤ ᠬᠦᠰᠡᠯ ᠬᠠᠲᠤᠨ ᠳ᠋ᠤ᠌ ᠪᠠᠢᠭᠠ ᠦᠭᠡᠢ ᠲᠤᠯᠠ ᠠᠭᠤᠷᠠᠭ ᠤᠷᠲᠤ ᠳ᠋ᠠᠭᠠᠨ ᠦᠯᠡᠳᠡᠭᠰᠡᠨ ᠪᠢᠯᠡ᠃ ᠭᠡᠪᠡᠴᠦ ᠰᠡᠳᠬᠢᠯ ᠴᠢᠯᠡᠭᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠡᠨᠡ ᠴᠠᠭ ᠲᠤ ᠵᠦᠭᠡᠷ ᠰᠠᠭᠤᠵᠤ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ ᠶ᠋ᠢ ᠲᠡᠷᠡ ᠪᠡᠷ ᠤᠬᠠᠭᠠᠷᠠᠵᠤ ᠪᠠᠢᠯᠠ᠃
ᠬᠠᠲᠤᠨ ᠢ᠋ ᠪᠣᠳᠣᠯ ᠪᠣᠯᠤᠭᠰᠠᠭᠠᠷ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠳ᠋ᠤ᠌ ᠬᠣᠢᠨᠠ ᠨᠢ ᠳᠠᠭᠠᠯᠳᠤᠨ ᠶᠠᠪᠤᠭᠰᠠᠨ ᠠᠵᠢᠨ ᠡᠭᠦᠳᠡ ᠬᠠᠪᠴᠢᠭᠰᠠᠭᠠᠷ ᠦᠯᠡᠳᠡᠪᠡ᠃ ᠲᠡᠷᠡ ᠪᠡᠷ ᠠᠵᠢᠨ
— ᠲᠡᠮᠦᠬᠡᠨ ᠪᠡᠬᠢ ᠶ᠋ᠢ ᠳᠠᠭᠤᠳᠠᠨ ᠢᠷᠡᠭᠦᠯ ᠭᠡᠵᠦ ᠬᠡᠯᠡᠯᠡ᠃
ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠦᠵᠡᠭᠳᠡᠬᠦ ᠪᠦᠬᠦᠢ ᠯᠡ ᠶᠠᠭᠤᠮᠠᠰ ᠢ᠋ ᠵᠠᠰᠠᠵᠤ ᠰᠡᠯᠪᠢᠨ ᠰᠢᠨᠡᠴᠢᠯᠡᠬᠦ᠂ ᠰᠤᠳᠤᠷ ᠨᠣᠮ ᠤ᠋ᠨ ᠲᠣᠭᠣᠰᠣ ᠰᠢᠷᠣᠢ ᠶ᠋ᠢ ᠭᠦᠪᠢᠨ ᠴᠡᠪᠡᠷ ᠴᠡᠮᠴᠡᠭᠡᠷ ᠪᠠᠢᠯᠭᠠᠬᠤ ᠠᠵᠢᠯ ᠢ᠋ ᠥᠬᠢᠨ ᠲᠡᠮᠦᠬᠡᠨ ᠪᠡᠬᠢ ᠴᠢᠳᠠᠪᠤᠷᠢᠯᠢᠬ ᠢ᠋ᠶ᠋ᠠᠷ ᠬᠢᠵᠦ ᠢᠷᠡᠭᠰᠡᠨ ᠨᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃《ᠲᠥᠷᠥ ᠶ᠋ᠢᠨ ᠠᠯᠲᠠᠨ ᠵᠢᠯᠣᠭᠣ ᠬᠡᠨ ᠦ᠌ ᠴᠦ᠍ ᠭᠠᠷ ᠲᠤ᠌ ᠠᠳᠬᠤᠭᠳᠠᠭᠰᠠᠨ ᠲᠥᠷᠥ ᠪᠠᠷᠢᠬᠤ ᠶ᠋ᠢᠨ ᠤᠬᠠᠭᠠᠨ ᠢ᠋ ᠮᠡᠳᠡᠬᠦ ᠬᠥᠮᠦᠨ ᠬᠠᠭᠠᠨᠲᠤ ᠲᠥᠷᠥ ᠳ᠋ᠦ᠍ ᠬᠡᠷᠡᠭ ᠲᠡᠢ》 ᠭᠡᠵᠦ ᠳᠣᠲᠣᠷᠠ ᠬᠥᠮᠦᠨ ᠨᠢ ᠬᠡᠯᠡᠬᠦ ᠰᠢᠭ ᠪᠣᠯᠤᠨᠠ᠃ ᠬᠠᠲᠤᠨ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠬᠤᠷᠢᠶᠠᠯᠲᠠ ᠲᠠᠢ ᠣᠯᠠᠨ ᠰᠤᠳᠤᠷ ᠠ᠋ᠴᠠ ᠬᠡᠳᠦ ᠬᠡᠳᠦ ᠶ᠋ᠢ ᠰᠤᠭᠤᠯᠤᠨ ᠠᠪᠴᠤ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠳᠡᠯᠭᠡᠨ ᠨᠢᠮᠪᠠᠢᠯᠠᠨ ᠦᠵᠡᠵᠦ ᠪᠠᠢᠬᠤ ᠵᠠᠭᠤᠷᠠ ᠭᠠᠳᠠᠨᠠ ᠠ᠋ᠴᠠ ᠥᠬᠢᠨ ᠨᠢ ᠣᠷᠣᠵᠤ ᠢᠷᠡᠯᠡ᠃
ᠲᠡᠮᠦᠬᠢᠨ ᠪᠡᠬᠢ᠂ ᠡᠴᠢᠭᠡ ᠡᠬᠡ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠯᠢ ᠶ᠋ᠢ ᠴᠦ᠍ ᠳᠠᠭᠤᠷᠢᠶᠠᠭᠠ ᠦᠭᠡᠢ ᠮᠡᠲᠦ ᠬᠠᠷᠢᠨ ᠰᠤᠷᠬᠠᠭᠲᠠᠨᠢ ᠶ᠋ᠢᠨ ᠲᠩᠷᠢ ᠪᠣᠯᠤᠭᠰᠠᠨ ᠡᠵᠢ ᠲᠡᠢ ᠲᠤᠩ ᠴᠤ᠌ ᠠᠳᠠᠯᠢᠬᠠᠨ ᠠᠵᠢ᠃ ᠥᠬᠢᠨ ᠦ᠌ ᠪᠡᠨ ᠥᠭᠡᠳᠡ ᠡᠴᠡ ᠦᠷᠦ ᠡᠪᠡᠳᠦᠩᠭᠦᠢ ᠬᠠᠷᠠᠵᠤ ᠰᠠᠭᠤᠳᠠᠭ ᠡᠬᠡ ᠶ᠋ᠢᠨ ᠬᠢᠨᠢ ᠤᠬᠠᠭᠠᠯᠢᠭ ᠳᠥᠯᠭᠡᠬᠡᠨ ᠨᠢᠳᠦ ᠥᠨᠥ ᠴᠦ᠍ ᠬᠠᠲᠤᠨ ᠤ᠋ ᠥᠭᠡᠳᠡ ᠡᠴᠡ ᠬᠠᠷᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠪᠥᠯᠥᠭᠡ᠃
— ᠥᠬᠢᠨ ᠮᠢᠨᠢ᠂ ᠡᠷᠲᠡᠨ ᠦ᠌ ᠮᠡᠷᠭᠡᠳ ᠦ᠋ᠨ ᠰᠤᠳᠤᠷ ᠳᠣᠲᠣᠷᠠ ᠠ᠋ᠴᠠ ᠲᠥᠷᠥ ᠵᠠᠰᠠᠬᠤ ᠶ᠋ᠢᠨ ᠲᠤᠬᠠᠢ ᠥᠭᠦᠯᠡᠭᠰᠡᠨ ᠰᠤᠳᠤᠷ ᠤ᠋ᠳ ᠢ᠋ ᠢᠯᠭᠠᠭᠤᠯᠤᠨ ᠥᠭ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠲᠡᠮᠦᠬᠡᠨ ᠪᠡᠬᠢ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳᠣᠲᠣᠷᠠᠬᠢ ᠣᠯᠠᠨ ᠰᠤᠳᠤᠷ ᠤ᠋ᠳ ᠠ᠋ᠴᠠ ᠲᠦᠳᠡ ᠤᠳᠠᠯ ᠦᠭᠡᠢ ᠬᠡᠳᠦ ᠬᠡᠳᠦᠨ ᠰᠤᠳᠤᠷ ᠭᠠᠷᠭᠠᠵᠤ ᠢᠷᠡᠵᠦ᠂ ᠬᠠᠲᠤᠨ ᠤ᠋ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠯᠠ᠃
— ᠲᠥᠷᠥ ᠪᠠᠷᠢᠬᠤ ᠶ᠋ᠢᠨ ᠦᠨᠡᠨ ᠢ᠋ ᠥᠭᠦᠯᠡᠭᠰᠡᠨ ᠬᠡᠰᠡᠭ ᠦ᠋ᠳ ᠢ᠋ ᠰᠢᠭᠦᠭᠡᠷᠡᠢ ᠭᠡᠰᠡᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠮᠦᠭᠡ ᠪᠡᠬᠢ ᠡᠬᠡ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣ ᠪᠠᠷ ᠲᠡᠳᠡᠭᠡᠷ ᠣᠯᠠᠨ ᠰᠤᠳᠤᠷ ᠳᠣᠲᠣᠷᠠ ᠠ᠋ᠴᠠ ᠲᠥᠷᠥ ᠪᠠᠷᠢᠬᠤ ᠦᠨᠡᠨ ᠦ᠌ ᠲᠤᠬᠠᠢ ᠡᠰᠢᠯᠡᠯ ᠲᠠᠲᠠᠭᠰᠠᠨ ᠬᠡᠰᠡᠭ ᠦ᠋ᠳ ᠢ᠋ ᠨᠡᠭᠡᠭᠡᠨ ᠲᠤᠰ ᠲᠤᠰ ᠲᠤᠨᠢ ᠲᠠᠯᠪᠢᠯᠠ᠃ ᠰᠤᠷᠬᠠᠭᠲᠠᠨᠢ ᠲᠡᠳᠡᠨ ᠢ᠋ ᠨᠢᠭᠡ ᠪᠥᠷᠢᠴᠢᠯᠡᠨ ᠬᠠᠷᠠᠭᠠᠳ ᠲᠡᠮᠦᠬᠡᠨ ᠪᠡᠬᠢ ᠳ᠋ᠦ᠍᠄
— ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠲᠠᠨᠢ ᠮᠡᠷᠭᠡᠨ ᠤᠬᠠᠭᠠᠨ᠂ ᠲᠥᠷᠥ ᠵᠠᠰᠠᠬᠤ ᠪᠣᠳᠣᠯᠭᠠ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠥᠷᠥᠰᠢᠶᠡᠯᠲᠦ ᠵᠠᠰᠠᠭ᠂ ᠣᠯᠠᠨ ᠤᠯᠤᠰ ᠭᠦᠷᠦᠨ ᠨᠦ᠍ᠭᠦᠳ ᠦ᠋ᠨ ᠨᠢᠭᠡᠳᠦᠨ ᠪᠣᠰᠴᠤ ᠡᠷᠭᠢᠨ ᠵᠠᠳᠠᠷᠠᠵᠤ ᠪᠠᠢᠭᠰᠠᠨ ᠲᠡᠦᠬᠡ ᠨᠦ᠍ᠭᠦᠳ ᠢ᠋ ᠰᠡᠬᠦᠨ᠂ ᠡᠨᠳᠡ ᠡᠴᠡ ᠲᠥᠷᠥ ᠪᠠᠷᠢᠬᠤ ᠶ᠋ᠢᠨ ᠦᠨᠡᠨ ᠢ᠋ ᠭᠠᠷᠭᠠᠨ ᠪᠢᠴᠢᠵᠦ᠂ ᠬᠣᠵᠢᠮ ᠤ᠋ᠨ ᠬᠥᠮᠦᠰ ᠲᠦ᠍ ᠦᠯᠡᠳᠡᠭᠡᠪᠡᠯ ᠶᠠᠮᠠᠷ ᠪᠣᠢ ᠭᠡᠵᠦ ᠠᠰᠠᠭᠤᠯᠠ᠃ ᠥᠬᠢᠨ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ ᠳᠠᠮᠵᠢᠨ ᠲᠣᠯᠣᠭᠠᠢ ᠳᠣᠬᠢᠭᠠᠳ᠂
— ᠬᠠᠲᠤᠨ ᠡᠬᠡ ᠮᠢᠨᠢ ᠲᠠ ᠬᠠᠭᠠᠨ ᠡᠪᠦᠭᠡ ᠶ᠋ᠢᠨ ᠦᠶᠡ ᠡᠴᠡ ᠡᠬᠢᠯᠡᠨ ᠥᠨᠥ ᠬᠦᠷᠲᠡᠯᠡ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠠᠢᠭᠰᠨ ᠬᠥᠮᠦᠨ᠂ ᠡᠨᠡ ᠦᠨᠡᠨ ᠢ᠋ ᠮᠡᠳᠡᠬᠦ ᠲᠤᠯᠠ ᠥᠬᠢᠨ ᠲᠠᠨᠢ ᠡᠬᠡ ᠶ᠋ᠢᠨ ᠦᠭᠡ ᠶ᠋ᠢ ᠳᠡᠮᠵᠢᠵᠦ ᠪᠠᠢᠨᠠ᠃ ᠪᠢ ᠬᠠᠷᠢᠨ ᠲᠠᠨ ᠳ᠋ᠤ᠌ ᠬᠡᠷᠬᠢᠨ ᠲᠤᠰᠠᠯᠠᠬᠤ ᠪᠣᠢ ᠭᠡᠵᠦ ᠠᠰᠠᠭᠤᠯᠠ᠁《ᠬᠠᠭᠠᠨ ᠡᠪᠦᠭᠡ ᠶ᠋ᠢᠨ ᠦᠶᠡ ᠡᠴᠡ ᠥᠨᠥ ᠬᠦᠷᠲᠡᠯᠡᠬᠢ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠬᠡᠷᠬᠢᠨ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠮᠡᠳᠡᠬᠦ ᠬᠥᠮᠦᠨ ᠪᠣᠯ ᠨᠠᠳᠠ ᠠ᠋ᠴᠠ ᠥᠭᠡᠷᠡ ᠶᠸᠯᠢᠤᠢ ᠴᠦᠼᠠᠢ ᠪᠣᠢ》ᠭᠡᠵᠦ ᠪᠣᠳᠣᠮᠠᠭᠴᠠ᠄
— ᠥᠬᠢᠨ ᠮᠢᠨᠢ ᠬᠠᠷᠠᠬᠣᠷᠣᠮ ᠤᠷᠤᠭᠤ ᠬᠡᠯᠡ ᠬᠦᠷᠭᠡᠵᠦ ᠶᠸᠯᠢᠤᠢ ᠴᠦᠼᠠᠢ ᠶ᠋ᠢ ᠳᠠᠭᠤᠳᠠᠨ ᠢᠷᠡᠭᠦᠯ ᠭᠡᠵᠦ ᠬᠡᠯᠡᠭᠦᠯᠦᠯᠡ᠃
<>
ᠬᠠᠷᠠᠬᠣᠷᠣᠮ ᠤ᠋ᠨ ᠶᠡᠬᠡᠰ ᠳᠡᠭᠡᠳᠦᠰ ᠬᠥᠨᠵᠢᠯᠡ ᠳᠣᠲᠣᠷᠠ ᠪᠠᠨ ᠬᠥᠯ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ ᠵᠢᠭᠤᠷᠠᠯᠳᠤᠨ ᠪᠠᠢᠯᠠ᠃ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠠᠭᠠᠨ ᠬᠥᠪᠡᠭᠦᠳ ᠥᠭᠡᠳᠡᠢ ᠶᠡᠬᠡ ᠬᠠᠭᠠᠨ ᠲᠩᠷᠢ ᠳ᠋ᠦ᠍ ᠬᠠᠯᠢᠭᠰᠠᠨ ᠮᠡᠳᠡᠭᠡ ᠶ᠋ᠢ ᠠᠪᠤᠭᠰᠠᠨ ᠳᠠᠷᠤᠢ ᠠᠶᠠᠨ ᠲᠡᠢᠨ ᠢ᠋ᠶ᠋ᠡᠨ ᠳᠠᠭᠤᠰᠬᠠᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠡᠳ ᠪᠠᠢᠪᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠪᠠᠲᠤ ᠥᠪᠡᠷ ᠦ᠋ᠨ ᠤᠯᠤᠰ ᠢ᠋ ᠪᠠᠢᠭᠤᠯᠵᠤ᠂ ᠠᠯᠲᠠᠨ ᠣᠷᠳᠣᠨ ᠤ᠋ ᠤᠯᠤᠰ ᠭᠡᠮᠡᠨ ᠨᠡᠷᠡᠯᠡᠭᠡᠳ ᠲᠡᠨᠳᠡ ᠪᠡᠨ ᠦᠯᠡᠳᠡᠵᠡᠢ᠃
ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣ ᠰᠠᠭᠤᠬᠤ ᠬᠥᠮᠦᠨ ᠴᠣᠬᠣᠮ ᠬᠡᠨ ᠪᠠᠢᠬᠤ ᠪᠣᠢ ᠭᠡᠰᠡᠨ ᠲᠣᠯᠣᠭᠠᠢ ᠭᠠᠰᠢᠯᠭᠠᠭᠰᠠᠨ ᠠᠰᠠᠭᠤᠯᠲᠠ ᠨᠤᠭᠤᠳ ᠬᠥᠮᠦᠨ ᠪᠦᠬᠦᠨ ᠦ᠌ ᠪᠣᠳᠣᠯ ᠤᠬᠠᠭᠠᠨ ᠳ᠋ᠤ᠌ ᠰᠡᠭᠦᠳᠡᠷ ᠰᠢᠭ ᠲᠡᠭᠡᠨ᠂ ᠨᠢᠭᠡᠨᠲᠡ ᠣᠷᠣ ᠵᠠᠯᠭᠠᠬᠤ ᠬᠠᠭᠠᠨ ᠡᠵᠡᠨ ᠦ᠌ ᠨᠡᠷᠡ ᠶ᠋ᠢ ᠳᠤᠷᠠᠳᠤᠭᠠ ᠦᠭᠡᠢ ᠲᠩᠷᠢ ᠪᠣᠯᠤᠭᠰᠠᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠦᠯᠡᠳᠡᠭᠡᠭᠰᠡᠨ ᠦᠭᠡ ᠦᠭᠡᠢ ᠤᠴᠢᠷ ᠳᠣᠣᠷᠠ ᠪᠦᠷᠢᠨᠡ ᠯᠡ ᠶᠡᠬᠡ ᠡᠵᠡᠨ ᠦ᠌ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠨᠠᠭᠠᠷᠬᠠᠨ ᠪᠠᠢᠭᠰᠨ ᠴᠠᠭ᠃ ᠬᠠᠷᠢᠨ ᠡᠨᠡ ᠦᠶᠡ ᠪᠡᠷ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠨᠢᠭᠡᠨ ᠶᠡᠬᠡ ᠬᠡᠷᠡᠭ ᠮᠠᠨᠳᠤᠭᠰᠠᠨ ᠨᠢ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠰᠢᠭᠦᠭᠴᠢ ᠮᠠᠬᠠᠮᠦ᠌ᠳ᠋ ᠶᠠᠯᠠᠸᠠᠴᠢ ᠬᠤᠳᠠᠯᠳᠤᠭᠠᠴᠢᠨ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠮᠥᠷᠳᠡᠨ ᠪᠠᠢᠴᠠᠭᠠᠭᠰᠠᠨ ᠬᠡᠷᠡᠭ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠᠬᠠᠨ ᠶᠡᠬᠡ ᠬᠠᠲᠤᠨ ᠲᠦᠷᠭᠡᠨᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠮᠠᠬᠠᠮᠦ᠌ᠳ᠋ ᠶᠠᠯᠠᠸᠠᠴᠢ ᠳᠠᠭᠤᠳᠠᠭᠳᠠᠵᠠᠢ᠃ ᠬᠠᠲᠤᠨ ᠶᠡᠬᠡᠳᠡ ᠠᠭᠤᠷᠰᠠᠭᠰᠠᠨ ᠪᠠᠢᠪᠠ᠃ ᠢᠲᠡᠭᠡᠯᠲᠦ ᠬᠥᠮᠦᠨ ᠨᠢ ᠪᠣᠯᠤᠭᠰᠠᠨ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠢᠢᠨ ᠰᠢᠭᠦᠨ ᠪᠠᠢᠴᠠᠭᠠᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠨᠢ ᠬᠠᠲᠤᠨ ᠤ᠋ ᠳᠤᠷᠠ ᠦᠭᠡᠢ ᠶ᠋ᠢ ᠬᠦᠷᠭᠡᠭᠰᠡᠨ ᠨᠢ ᠢᠯᠡᠳᠲᠡ᠂ ᠲᠡᠷᠡ ᠪᠡᠷ ᠲᠣᠯᠣᠭᠠᠢ ᠬᠠᠶᠠᠯᠠᠨ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠰᠢᠯᠪᠢᠭᠦᠷᠳᠡᠬᠦ ᠳ᠋ᠦ᠍ ᠬᠠᠴᠠᠷ ᠳᠠᠭᠠᠨ ᠤᠨᠠᠭᠰᠠᠨ ᠰᠢᠵᠢᠷ ᠠᠯᠲᠠᠨ ᠤᠨᠵᠢᠯᠭᠠ ᠨᠢ ᠱᠠᠷᠬᠢᠨ ᠪᠠᠢᠯᠠ᠃
— ᠠᠪᠲᠤᠯ ᠷᠠᠬᠠᠮᠠᠨ ᠪᠣᠯ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠭᠰᠡᠨ ᠢᠯᠡᠳᠲᠡ ᠭᠠᠪᠢᠶᠠ ᠲᠠᠢ ᠨᠢᠭᠡᠨ ᠠᠲᠠᠯᠠ ᠴᠢ ᠲᠡᠭᠦᠨ ᠢ᠋ ᠶᠠᠭᠤᠨ ᠤ᠋ ᠤᠴᠢᠷ ᠮᠥᠷᠳᠡᠨ ᠰᠢᠯᠭᠠᠨᠠ ᠪᠣᠢ?
— ᠬᠠᠲᠤᠨᠲᠠᠨ ᠮᠢᠨᠢ᠂ ᠥᠷᠥᠰᠢᠶᠡᠨ ᠰᠣᠶᠣᠷᠬᠠ᠃ ᠭᠡᠨᠡᠳᠲᠡ ᠲᠩᠷᠢ ᠪᠣᠯᠤᠭᠰᠠᠨ ᠬᠠᠭᠠᠨ ᠡᠵᠡᠨ ᠦ᠌ ᠥᠭᠡᠳᠡ ᠪᠣᠯᠤᠭᠰᠠᠨ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠲᠣᠳᠣᠷᠠᠭᠤᠯᠬᠤ ᠪᠠᠷ ᠰᠢᠯᠭᠠᠭᠰᠠᠨ ᠪᠢᠯᠡ᠃
— ᠬᠠᠭᠠᠨ ᠡᠵᠡᠨ ᠰᠠᠷᠬᠤᠳ ᠬᠡᠲᠦᠷᠡᠭᠦᠯᠦᠨ ᠬᠦᠷᠲᠡᠵᠦ ᠪᠠᠢᠭᠠᠳ ᠥᠭᠡᠳᠡ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠬᠡᠨ ᠬᠥᠮᠦᠨ ᠦᠭᠡᠢ ᠮᠡᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠮᠥᠩᠬᠡ ᠲᠩᠷᠢ ᠶ᠋ᠢ ᠬᠢᠯᠢᠩᠨᠡᠭᠦᠯᠦᠨ ᠡᠨᠡ ᠬᠡᠷᠡᠭ ᠢ᠋ ᠳᠠᠬᠢᠨ ᠰᠡᠬᠦᠵᠦ᠂ ᠬᠤᠳᠠᠷᠭᠠ ᠦᠭᠡᠢ ᠶᠠᠷᠢᠶᠠ ᠶ᠋ᠢ ᠮᠢᠨᠦ ᠦᠷᠭᠦᠭᠡᠨ ᠳ᠋ᠦ᠍ ᠳᠠᠬᠢᠨ ᠰᠣᠨᠣᠰᠬᠠᠬᠤ ᠶ᠋ᠢᠨ ᠤᠴᠢᠷ ᠶᠠᠭᠤ ᠪᠣᠢ?
— ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠰᠢᠭᠦᠭᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠨᠠᠳᠠ ᠳ᠋ᠤ᠌ ᠠᠰᠠᠭᠤᠵᠤ ᠲᠣᠳᠣᠷᠠᠭᠤᠯᠬᠤ ᠵᠦᠢᠯ ᠪᠠᠢᠭᠠ ᠲᠤᠯᠠ ᠢᠩᠭᠢᠭᠰᠡᠨ ᠪᠢᠯᠡ᠃ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠬᠠᠲᠤᠨ ᠤ᠋ ᠡᠮᠦᠨᠡ ᠪᠤᠷᠤᠭᠤ ᠪᠠᠨ ᠬᠦᠯᠢᠶᠡᠬᠦ ᠰᠢᠨᠵᠢ ᠦᠭᠡᠢ ᠵᠣᠭᠰᠣᠬᠤ ᠨᠢ ᠳᠦᠷᠭᠡᠨᠡ ᠶ᠋ᠢᠨ ᠳᠤᠷᠠ ᠦᠭᠡᠢ ᠶ᠋ᠢ ᠤᠯᠠᠮ ᠪᠦᠷ ᠬᠦᠷᠭᠡᠵᠦ ᠪᠠᠢᠯᠠ᠃
— ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠲᠤᠨ ᠮᠢᠨᠦ ᠦᠭᠡ ᠶ᠋ᠢ ᠰᠥᠷᠦᠨ ᠵᠣᠭᠰᠣᠬᠤ ᠰᠢᠭᠦᠭᠴᠢ ᠲᠠ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠡᠷᠬᠡ ᠮᠠᠲᠠᠯ ᠲᠠᠢ ᠬᠥᠮᠦᠨ ᠪᠣᠢ?
— ᠥᠷᠥᠰᠢᠶᠡᠨ ᠪᠣᠯᠭᠣᠭᠠᠮᠤ? ᠨᠢᠭᠡᠨᠲᠡ ᠪᠠᠷᠢᠭᠰᠠᠨ ᠤᠴᠢᠭ ᠢ᠋ ᠴᠢᠭᠲᠠᠯᠠᠬᠤ ᠬᠦᠰᠡᠯ ᠲᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠲᠡᠭᠦᠨ ᠦ᠌ ᠦᠭᠡᠨ ᠡᠴᠡ ᠳᠦᠷᠭᠡᠨᠡ ᠶᠠᠯᠠᠸᠠᠴᠢ ᠬᠡᠷᠡᠭ ᠦ᠋ᠨ ᠰᠡᠵᠢᠭᠦᠷ ᠢ᠋ ᠣᠷᠬᠢᠬᠤ ᠦᠭᠡᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ ᠪᠣᠯᠪᠠ᠃
— ᠶᠠᠭᠤ ᠴᠤ᠌ ᠭᠡᠵᠦ ᠵᠠᠷᠯᠢᠭᠳᠠᠭᠠᠳ ᠬᠥᠳᠡᠯᠬᠦ ᠦᠭᠡᠢ᠂ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠨᠢ ᠦᠯᠦ ᠲᠣᠭᠣᠨ ᠪᠠᠢᠭᠠ ᠡᠨᠡ ᠡᠷᠬᠢᠮ ᠢ᠋ ᠤᠳᠠᠭᠠᠨ ᠲᠡᠪᠴᠢᠬᠦ ᠬᠦᠰᠡᠯ ᠬᠠᠲᠤᠨ ᠳ᠋ᠤ᠌ ᠪᠠᠢᠭᠰᠠᠨ ᠦᠭᠡᠢ᠃
— ᠪᠢ ᠴᠢᠮᠠᠶ᠋ᠢ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠰᠢᠭᠦᠭᠴᠢ ᠡᠴᠡ ᠪᠠᠭᠤᠯᠭᠠᠵᠤ ᠪᠠᠢᠨᠠ᠃ ᠨᠢᠭᠡᠨᠲᠡ ᠥᠭᠡᠳᠡᠢ ᠬᠠᠭᠠᠨ ᠡᠵᠡᠨ ᠲᠩᠷᠢ ᠪᠣᠯᠵᠤ᠂ ᠬᠠᠲᠤᠨ ᠮᠢᠨᠦ ᠮᠠᠲᠠᠯ ᠳ᠋ᠤ᠌ ᠤᠯᠤᠰ ᠤ᠋ᠨ ᠬᠡᠷᠡᠭ ᠢᠷᠡᠭᠰᠡᠨ ᠲᠤᠯᠠ ᠪᠢ ᠡᠢᠮᠦ ᠰᠢᠢᠳᠪᠦᠷᠢ ᠭᠠᠷᠭᠠᠯᠠ᠃ ᠭᠠᠷᠴᠤ ᠪᠣᠯᠤᠨᠠ ᠭᠡᠵᠦ ᠬᠠᠲᠤᠨ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠬᠡᠯᠡᠯᠡ᠃
ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠬᠠᠲᠤᠨ ᠤ᠋ ᠰᠢᠢᠳᠪᠦᠷᠢ ᠶ᠋ᠢ ᠬᠡᠷᠬᠢᠬᠦ ᠪᠢᠯᠡ᠃ ᠨᠢᠭᠡᠨᠲᠡ ᠤᠯᠤᠰ ᠤ᠋ᠨ ᠶᠡᠬᠡ ᠬᠠᠲᠤᠨ ᠡᠢᠮᠦ ᠰᠢᠢᠳᠪᠦᠷᠢ ᠭᠠᠷᠭᠠᠵᠤ ᠪᠣᠢ ᠬᠣᠢᠨᠠ ᠵᠥᠪᠰᠢᠶᠡᠷᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ᠃ ᠬᠠᠷᠢᠨ ᠠᠳᠬᠤᠭᠰᠠᠨ ᠰᠡᠵᠢᠭᠦᠷ ᠢ᠋ᠶ᠋ᠡᠨ ᠤᠯᠠᠮ ᠯᠠᠪᠰᠢᠷᠠᠭᠤᠯᠬᠤ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠡᠢᠮᠦ ᠶᠠᠪᠤᠳᠠᠯ ᠪᠣᠯᠵᠠᠢ᠃
ᠲᠡᠷᠡ ᠪᠡᠷ 《ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠦᠨᠡᠨᠴᠢ ᠠᠯᠪᠠᠲᠤ ᠶ᠋ᠢᠨ ᠬᠤᠪᠢ ᠪᠠᠷ ᠡᠴᠦᠰ ᠦ᠋ᠨ ᠮᠥᠴᠡ ᠬᠦᠷᠲᠡᠯᠡ ᠦᠨᠡᠨ ᠮᠥᠨ ᠢ᠋ ᠬᠠᠢᠭᠰᠠᠨ ᠢ᠋ ᠮᠥᠩᠬᠡ ᠲᠩᠷᠢ ᠮᠡᠳᠡᠬᠦ ᠪᠢᠯᠡ》 ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠭᠠᠷᠴᠤ ᠶᠠᠪᠤᠯᠠ᠃ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠶ᠋ᠢ ᠭᠠᠷᠴᠤ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠲᠤᠨ ᠤ᠋ ᠰᠢᠪᠡᠭᠴᠢᠨ ᠹᠠᠲ᠋ᠢᠮᠠ᠄
— ᠬᠠᠲᠤᠨ ᠲᠠ ᠥᠨᠥ ᠨᠢᠭᠡᠨᠲᠡ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠮᠡᠳᠡᠵᠦ ᠪᠠᠢᠭᠠ ᠲᠤᠯᠠ ᠡᠨᠡ ᠮᠡᠲᠦ ᠶ᠋ᠢᠨ ᠥᠭᠡᠳᠡᠢ ᠬᠠᠭᠠᠨ ᠡᠵᠡᠨ ᠦ᠌ ᠦᠶᠡ ᠶ᠋ᠢᠨ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠳᠤᠮᠳᠠ ᠴᠠᠭᠠᠰᠢᠳᠠ ᠲᠥᠷᠥ ᠤᠯᠤᠰ ᠢ᠋ ᠤᠳᠤᠷᠢᠳᠤᠨ ᠶᠠᠪᠤᠬᠤ ᠲᠠᠨᠢ ᠤᠯᠠᠮ ᠪᠦᠷ ᠬᠡᠴᠡᠭᠦᠦ ᠪᠣᠯᠬᠤ ᠪᠤᠰᠤ ᠤᠤ᠂ ᠲᠡᠢᠮᠦ ᠡᠴᠡ ᠨᠢᠭᠡᠨᠲᠡ ᠲᠠ ᠰᠢᠢᠳᠪᠦᠷᠢ ᠪᠡᠨ ᠭᠠᠷᠭᠠᠵᠤ ᠬᠠᠭᠠᠨ ᠡᠵᠡᠨ ᠦ᠌ ᠦᠶᠡ ᠶ᠋ᠢᠨ ᠰᠠᠢᠳ ᠲᠦᠰᠢᠮᠡᠳ ᠢ᠋ ᠰᠣᠯᠢᠬᠤ ᠬᠡᠷᠡᠭᠲᠡᠢ ᠰᠠᠨᠠᠭᠳᠠᠨᠠ ᠭᠡᠯᠡ᠃
ᠠᠭᠤᠷ ᠲᠠᠭᠠᠨ ᠪᠠᠭᠲᠠᠷᠠᠵᠤ ᠪᠠᠢᠭᠰᠠᠨ ᠲᠦᠷᠭᠡᠨᠡ ᠬᠠᠲᠤᠨ ᠤ᠋ ᠲᠠᠭᠠᠯᠠᠯ ᠳ᠋ᠤ᠌ ᠹᠠᠲ᠋ᠢᠮᠠ ᠶ᠋ᠢᠨ ᠬᠡᠷᠡᠭᠲᠡᠢ ᠴᠠᠭ ᠲᠤ᠌ ᠥᠭᠭᠦᠭᠰᠡᠨ ᠵᠥᠪᠯᠡᠮᠵᠢ ᠦᠨᠡᠬᠡᠷ ᠨᠡᠢᠴᠡᠮᠡ ᠪᠣᠳᠣᠭᠳᠠᠯᠠ᠃
— ᠴᠢᠨᠦ ᠦᠭᠡ ᠵᠥᠪ ᠪᠠᠢᠨᠠ᠃ ᠥᠨᠥ ᠮᠢᠨᠦ ᠬᠡᠷᠡᠭ ᠲᠦ᠍ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠯᠴᠠᠨ ᠥᠪᠡᠷ ᠥᠪᠡᠷ ᠦ᠋ᠨ ᠰᠠᠭᠤᠳᠠᠯ ᠳ᠋ᠤ᠌ ᠯᠠᠪ ᠰᠢᠭᠢᠳᠦᠨ᠂ ᠬᠠᠲᠤᠨ ᠮᠢᠨᠦ ᠬᠡᠯᠡᠬᠦ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠭᠠ ᠡᠨᠡ ᠲᠥᠷᠥ ᠶ᠋ᠢᠨ ᠰᠠᠢᠳ ᠲᠦᠰᠢᠮᠡᠳ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠰᠣᠯᠢᠬᠤ ᠴᠠᠭ ᠪᠣᠯᠵᠠᠢ ᠭᠡᠪᠡ᠃
ᠬᠠᠲᠤᠨ ᠡᠨᠡ ᠦᠭᠡ ᠶ᠋ᠢ ᠬᠡᠯᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠲᠦᠷᠦᠭᠦᠨ ᠥᠷᠥᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠳ᠋ᠤ᠌ ᠠᠭᠤᠷᠰᠠᠭᠰᠠᠨ ᠠᠭᠤᠷ ᠨᠢ ᠨᠠᠮᠳᠠᠭᠠ ᠦᠭᠡᠢ ᠪᠣᠯᠤᠯᠲᠠᠢ ᠬᠠᠮᠠᠷ ᠨᠢ ᠰᠡᠷᠲᠡᠯᠵᠡᠵᠦ᠂ ᠠᠮᠢᠰᠬᠤᠭᠠ ᠨᠢ ᠣᠪᠣᠯᠵᠠᠨ ᠪᠠᠢᠯᠠ᠃ ᠡᠨᠡ ᠡᠳᠦᠷ ᠦ᠋ᠨ ᠳᠠᠷᠠᠭᠠᠬᠠᠨ ᠲᠥᠷᠥ ᠶ᠋ᠢᠨ ᠪᠦᠬᠦ ᠰᠠᠢᠳ ᠲᠦᠰᠢᠮᠡᠳ ᠠᠵᠢᠯ ᠢ᠋ᠶ᠋ᠠᠨ ᠥᠭᠪᠡ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠠᠢᠳ ᠪᠠᠢᠭᠰᠠᠨ ᠶᠸᠯᠢᠦᠢ ᠴᠦᠼᠠᠢ ᠬᠦᠷᠲᠡᠯᠡ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠬᠠᠷᠠᠬᠣᠷᠣᠮ ᠳ᠋ᠠᠬᠢ ᠥᠪᠡᠷ ᠦ᠋ᠨ ᠭᠡᠷ ᠲᠡᠭᠡᠨ ᠪᠢᠰᠢᠯᠭᠠᠨ ᠰᠠᠭᠤᠬᠤ ᠪᠣᠯᠵᠠᠢ᠃
ᠳᠦᠷᠭᠡᠨᠡ ᠬᠠᠲᠤᠨ ᠲᠡᠳᠡᠨ ᠦ᠌ ᠣᠷᠣᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠬᠥᠮᠦᠰ ᠢ᠋ᠶ᠋ᠡᠨ ᠲᠣᠮᠢᠯᠠᠯᠠ᠃ ᠬᠡᠳᠦᠢᠪᠡᠷ ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠳ᠋ᠤ᠌ ᠲᠠᠪᠤᠨ ᠬᠥᠪᠡᠭᠦᠨ ᠪᠠᠢᠭᠰᠠᠨ ᠴᠤ ᠲᠡᠳᠡᠨ ᠦ᠌ ᠬᠡᠨ ᠢ᠋ᠶ᠋ᠡᠷ ᠨᠢ ᠴᠦ᠍ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠤᠳᠤᠷᠢᠳᠤᠭᠤᠯᠬᠤ ᠰᠠᠢᠳ ᠪᠣᠯᠭᠠᠨ ᠲᠣᠮᠢᠯᠠᠭᠰᠠᠨ ᠦᠭᠡᠢ᠃ ᠬᠠᠲᠤᠨ ᠴᠠᠭᠠᠨᠠ ᠪᠠᠨ ᠶᠠᠮᠠᠷ ᠤᠬᠠᠭᠠᠨ ᠰᠠᠳᠤᠨ ᠥᠪᠡᠷ ᠦ᠋ᠨ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠲᠥᠷᠥ ᠤᠯᠤᠰ ᠤ᠋ᠨ ᠬᠡᠷᠡᠭ ᠡᠴᠡ ᠬᠣᠯᠠ ᠪᠠᠢᠯᠭᠠᠬᠤ ᠪᠣᠯᠤᠭᠰᠠᠨ ᠢ᠋ ᠬᠥᠮᠦᠰ ᠤᠬᠠᠵᠤ ᠶᠠᠳᠠᠨ ᠪᠠᠢᠭᠰᠠᠨ ᠪᠣᠯ ᠡᠨᠡ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠦᠨᠡᠨ ᠢ᠋ ᠭᠠᠭᠴᠠᠬᠠᠨ ᠹᠲ᠋ᠢᠮᠠ ᠯᠠ ᠮᠡᠳᠡᠵᠦ ᠪᠠᠢᠯᠠ᠃ ᠲᠡᠷᠡ ᠬᠠᠲᠤᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠩᠭᠤ ᠪᠠᠢᠵᠤ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠵᠥᠪᠰᠢᠶᠡᠷᠡᠭᠦᠯᠬᠦ ᠪᠣᠯᠵᠠᠢ᠃ ᠡᠵᠡᠨ᠂ ᠵᠠᠷᠤᠴᠠ ᠬᠣᠶᠠᠷ ᠡᠮᠡᠭᠲᠡᠢ ᠢᠩᠭᠢᠵᠦ ᠣᠢᠷᠠᠳᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠳᠦᠷᠭᠡᠨᠡ᠂ ᠰᠤᠷᠬᠠᠭᠲᠠᠨᠢ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠵᠠᠢ ᠤᠯᠠᠮ ᠪᠦᠷ ᠠᠯᠤᠰᠷᠠᠨ ᠬᠣᠯᠠᠳᠤᠨᠠ᠃
ᠡᠨᠡ ᠬᠣᠶᠠᠷ ᠬᠥᠮᠦᠨ ᠤᠭ ᠨᠢ ᠬᠣᠶᠠᠭᠤᠯᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠬᠠᠭᠠᠨᠲᠤ ᠪᠡᠷᠢ ᠨᠦ᠍ᠭᠦᠳ ᠭᠡᠮᠡᠨ ᠨᠡᠷᠡᠯᠡᠭᠳᠡᠳᠡᠭ᠃ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠰᠤᠷᠬᠠᠭᠲᠠᠨᠢ ᠠ᠋ᠴᠠ ᠢᠯᠭᠠᠭᠠ ᠲᠠᠢ ᠨᠢ ᠡᠨᠡ ᠮᠥᠴᠡ ᠳ᠋ᠦ᠍ ᠡᠬᠡ ᠬᠥᠮᠦᠨ ᠦ᠌ ᠡᠭᠦᠷᠭᠡ ᠪᠡᠨ ᠤᠮᠠᠷᠲᠠᠭᠰᠠᠨ ᠮᠡᠲᠦ ᠠᠭᠠᠰᠢᠯᠠᠵᠤ ᠪᠠᠢᠭᠠ ᠳ᠋ᠤ᠌ ᠬᠡᠷᠡᠭ ᠦ᠋ᠨ ᠤᠴᠢᠷ ᠪᠠᠢᠪᠠ᠃ ᠲᠥᠷᠥᠭᠦᠯᠦᠭᠰᠡᠨ ᠬᠥᠪᠡᠭᠦᠳ ᠦ᠋ᠨ ᠢ᠋ᠶ᠋ᠡᠨ ᠬᠡᠨ ᠳ᠋ᠦ᠍ᠨᠢ ᠴᠦ᠍ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠤᠳᠤᠷᠢᠳᠤᠨ ᠶᠠᠪᠤᠭᠤᠯᠬᠤ ᠡᠷᠬᠡ ᠣᠯᠭᠣᠭᠠ ᠦᠭᠡᠢ ᠨᠢ ᠡᠭᠦᠨ ᠢ᠋ ᠪᠠᠲᠤᠯᠠᠬᠤ ᠠᠵᠢ᠃
ᠡᠴᠦᠰ ᠲᠡᠭᠦᠰᠬᠡᠯ ᠦᠭᠡᠢ ᠠᠭᠠᠰᠢᠯᠠᠬᠤ ᠪᠣᠯᠤᠭᠰᠠᠨ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠳᠡᠷᠭᠡᠳᠡ ᠦᠨᠡᠨ ᠳ᠋ᠡᠭᠡᠨ ᠮᠣᠩᠭᠣᠯ ᠬᠥᠮᠦᠨ ᠬᠣᠪᠣᠷ ᠪᠣᠯᠪᠠ᠃ ᠬᠠᠲᠤᠨ ᠡᠬᠡ ᠥᠪᠡᠷ ᠦ᠋ᠨ ᠰᠢᠪᠡᠭᠴᠢᠨ ᠹᠠᠲ᠋ᠢᠮᠠ ᠳ᠋ᠤ᠌ ᠲᠥᠷᠥ ᠶ᠋ᠢᠨ ᠵᠠᠷᠢᠮ ᠬᠡᠷᠡᠭ ᠤᠳᠤᠷᠢᠳᠤᠨ ᠶᠠᠪᠤᠭᠤᠯᠬᠤ ᠡᠷᠬᠡ ᠣᠯᠭᠣᠵᠤ᠂ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠳᠠᠭᠠ ᠦᠭᠡᠢ ᠪᠠᠢᠬᠤ ᠦᠶᠡ ᠳ᠋ᠡᠭᠡᠨ ᠵᠢᠷᠭᠠᠯ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠭᠠᠭᠴᠠᠬᠠᠨ ᠲᠡᠭᠦᠨ ᠲᠠᠢ ᠯᠠ ᠬᠤᠪᠢᠶᠠᠯᠴᠠᠬᠤ ᠪᠣᠯᠵᠠᠢ᠃ ᠬᠠᠲᠤᠨ ᠥᠪᠡᠷ ᠦ᠋ᠨ ᠡᠷᠬᠡ ᠮᠠᠲᠠᠯ ᠢ᠋ ᠤᠯᠠᠮ ᠪᠦᠷ ᠯᠠᠪᠰᠢᠷᠠᠭᠤᠯᠬᠤ ᠨᠢ ᠵᠦᠢ ᠲᠡᠢ ᠭᠡᠮᠡᠨ ᠦᠵᠡᠵᠦ᠂ ᠡᠵᠡᠯᠡᠨ ᠠᠪᠤᠭᠰᠠᠨ ᠤᠯᠤᠰ ᠣᠷᠣᠨ ᠨᠤᠭᠤᠳ ᠤ᠋ᠨ ᠤᠳᠤᠷᠢᠳᠤᠭᠴᠢ ᠶ᠋ᠢ ᠴᠦ᠍ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠢ᠋ᠶ᠋ᠡᠷ ᠲᠣᠮᠢᠯᠠᠵᠤ ᠡᠬᠢᠯᠡᠯᠡ᠃
<>
ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠣᠶᠠᠷ ᠴᠤ᠌ ᠠᠭᠤᠤ ᠬᠠᠭᠠᠨ ᠤ᠋ ᠲᠥᠷᠥ ᠳ᠋ᠦ᠍ ᠦᠨᠡᠨᠴᠢ ᠪᠡᠷ ᠵᠢᠳᠬᠦᠵᠦ ᠢᠷᠡᠭᠰᠡᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠠᠢᠳ ᠶᠸᠯᠢᠤᠢ ᠴᠦᠼᠠᠢ᠂ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠤ᠋ ᠳᠠᠭᠤᠳᠠᠭᠤᠯᠤᠭᠰᠠᠨ ᠶᠣᠰᠣ ᠪᠠᠷ ᠶᠡᠬᠡ ᠠᠭᠤᠷᠠᠭ ᠲᠤ᠌ ᠢᠷᠡᠵᠡᠢ᠃ ᠡᠳᠦᠭᠡ ᠨᠠᠰᠤ ᠰᠡᠭᠦᠳᠡᠷ ᠬᠡᠪᠡᠢᠭᠰᠡᠨ ᠶᠸᠯᠢᠤᠢ ᠴᠦᠼᠠᠢ ᠬᠠᠲᠤᠨ ᠳ᠋ᠤ᠌ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠭᠡᠳ᠂ ᠠᠮᠤᠷ ᠮᠡᠨᠳᠦ ᠮᠡᠳᠡᠭᠡᠳ᠂
— ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠪᠠᠢᠬᠤ ᠠᠮᠤᠭᠤᠯᠠᠩ ᠴᠠᠭ ᠡᠳᠦᠷ ᠡᠳᠦᠷ ᠢ᠋ᠶ᠋ᠡᠷ ᠦᠭᠡᠢ ᠪᠣᠯᠵᠤ ᠪᠠᠢᠨᠠ᠃ ᠲᠥᠷᠥ ᠶ᠋ᠢᠨ ᠰᠠᠢᠳ ᠤ᠋ᠳ ᠤᠭᠴᠠᠷᠠᠵᠤ᠂ ᠡᠵᠡᠨᠲᠦ ᠭᠦᠷᠦᠨ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠮᠠᠲᠠᠯ ᠳ᠋ᠤ᠌ ᠣᠴᠢᠯᠠ᠃ ᠤᠬᠠᠭᠠᠨ ᠦᠭᠡᠢ ᠮᠡᠲᠦ ᠠᠭᠠᠰᠢᠯᠠᠬᠤ ᠡᠨᠡ ᠬᠠᠲᠤᠨ ᠢ᠋ ᠬᠠᠷᠠᠨ ᠰᠠᠭᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠴᠢᠯᠡᠬᠦ ᠶᠦᠮ ᠭᠡᠵᠦ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠯᠡ᠃ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠪᠢᠯᠢᠭ ᠤᠬᠠᠭᠠᠨ ᠤ᠋ ᠢᠯᠡᠭᠡᠯᠲᠡ ᠰᠢᠭ ᠮᠣᠩᠭᠣᠯ ᠲᠥᠷᠥ ᠶ᠋ᠢᠨ ᠦᠨᠡᠨᠴᠢ ᠠᠯᠪᠠᠲᠤ ᠥᠨᠥ ᠬᠠᠲᠤᠨ ᠤ᠋ ᠡᠮᠦᠨᠡ ᠰᠢᠨᠠᠯᠤᠨ ᠰᠠᠭᠤᠵᠤ ᠪᠣᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠡᠮᠲᠡᠷᠡᠮᠡ ᠠᠵᠤᠭᠤ᠃ ᠰᠤᠷᠬᠠᠭᠲᠠᠨᠢ ᠳ᠋ᠤ᠌ ᠶᠸᠯᠢᠤᠢ ᠴᠦᠼᠠᠢ ᠶ᠋ᠢ ᠲᠠᠢᠪᠤᠰᠢᠷᠠᠭᠤᠯᠬᠤ ᠦᠭᠡ ᠪᠠᠢᠭᠰᠠᠨ ᠦᠭᠡᠢ᠃
— ᠦᠷᠭᠦᠯᠵᠢ ᠶ᠋ᠢᠨ ᠰᠠᠨᠠᠭᠠ ᠠᠮᠤᠷ ᠪᠠᠢᠳᠠᠯ ᠦᠨᠡᠨᠳᠡᠭᠡᠨ ᠳᠠᠷᠠᠭᠠ ᠶ᠋ᠢᠨ ᠶᠡᠬᠡ ᠤᠢᠳᠬᠠᠷ ᠭᠤᠨᠢᠭ ᠢ᠋ ᠠᠪᠴᠤ ᠢᠷᠡᠳᠡᠭ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠬᠠᠲᠤᠨ ᠮᠢᠨᠦ ᠲᠠᠨ ᠢ᠋ ᠳᠠᠭᠤᠳᠠᠭᠤᠯᠤᠭᠰᠠᠨ ᠰᠠᠨᠠᠭᠠ ᠪᠣᠯ ᠢᠷᠣᠭᠠᠷ ᠦᠭᠡᠢ ᠮᠡᠲᠦ ᠦᠷᠭᠦᠯᠵᠢᠯᠡᠬᠦ ᠡᠨᠡ ᠬᠦᠨᠳᠦ ᠡᠳᠦᠷ ᠦ᠋ᠳ ᠲᠦ᠍ ᠴᠤ ᠲᠥᠷᠥ ᠶ᠋ᠢᠨ ᠦᠨᠡᠨ ᠢ᠋ ᠮᠠᠷᠲᠠᠬᠤ ᠦᠭᠡᠢ ᠰᠠᠭᠤᠬᠤ ᠭᠡᠰᠡᠨ ᠬᠡᠷᠡᠭ ᠪᠢᠯᠡ᠃ ᠲᠥᠷᠥ ᠭᠡᠵᠦ ᠪᠠᠢᠬᠤᠢ ᠳ᠋ᠤᠷ ᠲᠡᠭᠦᠨ ᠢ᠋ ᠵᠠᠰᠠᠨ ᠶᠠᠪᠤᠬᠤ ᠤᠬᠠᠭᠠᠨ ᠭᠡᠵᠦ ᠪᠠᠢᠬᠤ ᠶᠣᠰᠣᠲᠠᠢ ᠶ᠋ᠢ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠦᠶᠡ ᠡᠴᠡ ᠪᠢᠳᠡ ᠮᠡᠳᠡᠬᠦ ᠪᠣᠯᠤᠭᠰᠠᠨ᠃ ᠬᠠᠷᠢᠨ ᠡᠨᠡ ᠦᠨᠡᠨ ᠢ᠋ ᠬᠠᠭᠠᠨ ᠡᠵᠡᠨ ᠦ᠌ ᠳᠡᠷᠭᠡᠳᠡ ᠡᠴᠡ ᠲᠤᠭᠤᠯᠵᠤ ᠰᠣᠨᠣᠰᠤᠨ ᠪᠠᠢᠭᠰᠠᠨ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠲᠠᠨ ᠢ᠋ ᠳᠠᠭᠤᠳᠠᠭᠤᠯᠪᠠ ᠭᠡᠬᠦ ᠳ᠋ᠦ᠍᠂
— ᠬᠠᠲᠤᠨ ᠤ᠋ ᠬᠡᠯᠡᠳᠡᠭ ᠵᠦᠢ ᠲᠡᠢ ᠰᠠᠨᠠᠭᠠ᠂ ᠨᠠᠰᠤ ᠥᠨᠳᠥᠷ ᠪᠣᠯᠵᠤ᠂ ᠣᠢᠷᠠ ᠬᠣᠯᠠ ᠶ᠋ᠢ ᠬᠠᠷᠠᠬᠤ ᠨᠢ ᠴᠠᠭ ᠤ᠋ᠨ ᠡᠷᠬᠡ ᠪᠡᠷ ᠴᠠᠭᠠᠰᠢᠯᠠᠨ ᠪᠣᠢ ᠨᠠᠳᠠ ᠳ᠋ᠤ᠌ ᠨᠡᠮᠡᠷᠢ ᠪᠣᠯᠬᠤ ᠵᠦᠢᠯ ᠪᠠᠭᠠ ᠴᠤ ᠭᠡᠰᠡᠨ ᠰᠣᠨᠣᠰᠴᠤ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠬᠤᠪᠢᠶᠠᠯᠴᠠᠬᠤ ᠳ᠋ᠤ᠌ ᠪᠣᠯᠬᠤ ᠦᠭᠡᠢ ᠨᠢ ᠶᠠᠭᠤ ᠪᠢᠯᠡ?
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠶᠡᠬᠡ ᠵᠠᠰᠠᠭ ᠬᠠᠤᠯᠢ ᠮᠠᠷᠲᠠᠭᠳᠠᠬᠤ ᠰᠢᠬᠠᠵᠤ᠂ ᠬᠠᠭᠠᠳ ᠨᠣᠶᠠᠳ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠠᠭᠠᠰᠢᠯᠠᠬᠤ ᠪᠣᠯᠤᠯᠠ᠃ ᠬᠠᠷᠢᠨ ᠲᠥᠷᠥ ᠪᠠᠷᠢᠬᠤ ᠦᠨᠡᠨ ᠢ᠋ ᠨᠡᠭᠡᠭᠡᠨ ᠬᠡᠯᠡᠵᠦ ᠥᠭᠪᠡᠯ ᠥᠨᠥ ᠪᠢᠰᠢ ᠴᠤ᠌ ᠬᠣᠵᠢᠮ ᠤ᠋ᠨ ᠦᠷᠡ ᠰᠠᠲᠤ ᠳ᠋ᠤ᠌ ᠬᠡᠷᠡᠭᠲᠡᠢ ᠪᠤᠶᠤ ᠭᠡᠵᠦ ᠰᠡᠳᠬᠢᠨᠡ ᠭᠡᠵᠦ ᠬᠠᠲᠤᠨ ᠬᠡᠯᠡᠯᠡ᠃
ᠡᠨᠡ ᠡᠳᠦᠷ ᠡᠴᠡ ᠬᠣᠢᠰᠢ ᠶᠸᠯᠢᠤᠢ ᠴᠦᠼᠠᠢ ᠠᠭᠤᠷᠠᠭ ᠲᠤ ᠬᠡᠳᠦᠨ ᠰᠠᠷᠠ ᠶ᠋ᠢ ᠦᠳᠡᠪᠡ᠃ ᠭᠠᠵᠠᠷ ᠭᠠᠵᠠᠷ ᠠ᠋ᠴᠠ ᠵᠠᠯᠠᠨ ᠢᠷᠡᠭᠰᠡᠨ ᠨᠣᠮ ᠤ᠋ᠨ ᠶᠡᠬᠡ ᠪᠠᠭᠰᠢ ᠨᠠᠷ ᠪᠣᠯᠤᠨ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ᠂ ᠶᠸᠯᠢᠦᠢ ᠴᠦᠼᠠᠢ ᠭᠡᠳ ᠡᠷᠳᠡᠮ ᠨᠣᠮ ᠳ᠋ᠤ᠌ ᠨᠡᠪᠲᠡᠷᠡᠭᠰᠡᠨ ᠬᠥᠮᠦᠰ ᠲᠥᠷᠥ ᠶ᠋ᠢᠨ ᠮᠠᠨᠳᠤᠯ ᠪᠠᠳᠠᠷᠠᠯ ᠬᠢᠭᠡᠳ ᠤᠨᠠᠯᠲᠠ ᠳᠣᠷᠣᠢᠲᠠᠯ ᠤ᠋ᠨ ᠰᠢᠯᠲᠠᠭᠠᠨ ᠢ᠋ ᠰᠢᠭᠦᠨ ᠲᠤᠩᠭᠠᠵᠤ᠂ ᠪᠢᠴᠢᠵᠦ ᠰᠡᠢᠷᠡᠭᠦᠯᠬᠦ ᠶᠡᠬᠡ ᠠᠵᠢᠯ ᠤᠨᠳᠤᠷᠤᠨ ᠪᠠᠢᠪᠠ᠃ ᠲᠥᠷᠥ ᠶ᠋ᠢ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠵᠠᠯᠠᠵᠤ ᠪᠠᠢᠭᠰᠠᠨ ᠪᠣᠳᠣᠯᠭᠠ ᠨᠢᠭᠡᠨᠲᠡ ᠠᠯᠳᠠᠭᠳᠠᠬᠤ ᠳ᠋ᠤ᠌ ᠬᠦᠷᠦᠭᠡᠳ ᠪᠠᠢᠯᠠ᠃ ᠮᠣᠩᠭᠣᠯ ᠲᠥᠷᠥ ᠶ᠋ᠢᠨ ᠡᠵᠡᠨ᠂ ᠬᠠᠭᠠᠨ ᠤ᠋ ᠥᠨᠳᠥᠷ ᠰᠡᠨᠳᠡᠢ ᠳ᠋ᠦ᠍ ᠰᠠᠭᠤᠬᠤ ᠬᠥᠮᠦᠨ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠡᠴᠡ ᠴᠣᠬᠣᠮ ᠬᠡᠨ ᠨᠢ ᠪᠠᠢᠬᠤ ᠪᠣᠢ?
ᠥᠨᠥ ᠬᠦᠷᠲᠡᠯᠡ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠡᠷᠬᠡ ᠶ᠋ᠢ ᠪᠠᠷᠢᠵᠤ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠭᠠᠷ ᠪᠠᠢᠭᠠ ᠳᠦᠷᠭᠡᠨᠡ ᠬᠠᠲᠤᠨ ᠦᠨᠡᠨ ᠬᠡᠷᠡᠭ ᠲᠡᠭᠡᠨ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠪᠤᠰᠤ ᠬᠠᠷᠢ ᠬᠥᠮᠦᠰ ᠦ᠋ᠨ ᠲᠣᠯᠣᠭᠠᠢ ᠪᠠᠷ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠵᠠᠯᠠᠨ ᠤᠳᠤᠷᠢᠳᠴᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠩᠭᠤ ᠪᠠᠢᠬᠤ ᠹᠠᠲ᠋ᠢᠮᠠ᠂ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠴᠢᠯᠥᠭᠡᠲᠡᠢ ᠨᠡᠪᠲᠡᠷᠡᠵᠦ᠂ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠬᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠷᠠᠭᠠ ᠦᠭᠡᠢ ᠶᠡᠬᠡᠰ ᠳᠡᠭᠡᠳᠦᠰ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠢ᠋ᠶ᠋ᠡᠨ ᠲᠣᠮᠢᠯᠠᠭᠤᠯᠤᠨ ᠪᠠᠢᠬᠤ ᠳ᠋ᠤ᠌ ᠠᠪᠲᠤᠯ ᠷᠠᠬᠠᠮᠠᠨ ᠬᠠᠲᠤᠨ ᠤ᠋ ᠰᠦᠷ ᠳᠣᠣᠷᠠ ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠡᠴᠡ ᠠᠯᠪᠠ ᠭᠤᠪᠴᠢᠭᠤᠷ ᠬᠤᠷᠢᠶᠠᠵᠤ᠂ ᠠᠷᠠᠳ ᠲᠦᠮᠡᠨ ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠬᠦᠨᠳᠦᠬᠡᠨ ᠠᠴᠢᠶᠠ ᠣᠪᠣᠭᠠᠯᠠᠨ ᠪᠠᠢᠪᠠ᠃
ᠥᠭᠡᠳᠡᠢ ᠬᠠᠭᠠᠨ ᠬᠠᠷᠠᠬᠣᠷᠣᠮ ᠤ᠋ᠨ ᠰᠢᠪᠠ ᠶ᠋ᠢ ᠲᠠᠯᠪᠢᠵᠤ ᠮᠣᠩᠭᠣᠯ ᠤ᠋ᠨ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠡᠢᠰᠯᠡᠯ ᠪᠣᠯᠭᠠᠭᠰᠠᠨ ᠴᠤ᠌ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠠᠬᠣᠷᠣᠮ ᠠ᠋ᠴᠠ ᠵᠠᠢᠳᠠᠭᠤ ᠪᠠᠭᠤᠳᠠᠯᠯᠠᠨ ᠨᠡᠭᠦᠳᠡᠯ ᠦ᠋ᠨ ᠣᠷᠳᠣᠨ ᠳ᠋ᠠᠭᠠᠨ ᠠᠮᠢᠳᠤᠷᠠᠨ᠂ ᠵᠢᠯ ᠳᠦ ᠳᠥᠷᠪᠡᠨ ᠤᠳᠠᠭᠠ ᠨᠡᠭᠦᠳᠡᠯᠯᠡᠨ ᠲᠥᠷᠥ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ ᠶᠠᠪᠤᠭᠤᠯᠳᠠᠭ ᠪᠠᠢᠭᠰᠠᠨ ᠵᠢᠱ᠌ᠢᠶᠡ ᠶ᠋ᠢᠨ ᠳᠠᠭᠠᠤ ᠳᠦᠷᠭᠡᠨᠡ ᠬᠠᠲᠤᠨ ᠴᠤ ᠲᠥᠷᠥ ᠶ᠋ᠢᠨ ᠶᠡᠬᠡ ᠡᠷᠬᠡ ᠶ᠋ᠢ ᠨᠡᠭᠦᠳᠡᠯ ᠦ᠋ᠨ ᠣᠷᠳᠣᠨ ᠠ᠋ᠴᠠ ᠪᠠᠨ ᠶᠠᠪᠤᠭᠤᠯᠵᠤ ᠪᠠᠢᠪᠠ᠃ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠹᠠᠲ᠋ᠢᠮᠠ ᠪᠣᠯᠤᠨ ᠠᠪᠳᠤᠯ ᠷᠠᠬᠠᠮᠠᠨ ᠨᠠᠷ ᠪᠠᠢᠯᠠ᠃ᠬᠠᠲᠤᠨ ᠡᠬᠡ ᠬᠢᠯᠢᠩ ᠲᠡᠢ ᠬᠠᠷᠠᠭᠳᠠᠨᠠ᠃ ᠹᠠᠲ᠋ᠢᠮᠠ ᠡᠵᠡᠨ ᠬᠠᠲᠤᠨ ᠤ᠋ ᠪᠠᠨ ᠰᠡᠳᠬᠢᠯ ᠢ᠋ ᠲᠠᠢᠪᠤᠰᠢᠷᠠᠭᠤᠯᠬᠤ ᠭᠡᠵᠦ ᠨᠠᠢᠷ ᠲᠠᠯᠪᠢᠨ ᠪᠣᠢ ᠨᠢ ᠢᠯᠡᠳᠲᠡ᠂ ᠨᠠᠭᠠᠯᠢᠩᠬᠠᠢ ᠥᠩᠭᠡ ᠪᠡᠷ ᠂
— ᠬᠠᠲᠤᠨᠲᠠᠨ ᠮᠢᠨᠢ ᠨᠢᠭᠡᠨᠲᠡ ᠶᠡᠬᠡ ᠬᠠᠲᠤᠨ ᠢ᠋ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠰᠡᠭᠡᠷ ᠪᠠᠢᠬᠤ ᠳ᠋ᠤ᠌ ᠢᠩᠭᠢᠵᠦ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠠᠪᠤᠷᠢᠯᠠᠨ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠬᠣᠰᠢᠭᠤ ᠲᠥᠷᠥᠵᠦ᠂ ᠠᠷᠠᠳ ᠤ᠋ᠨ ᠳᠤᠮᠳᠠ ᠪᠣᠰᠤᠯᠭᠠ ᠬᠥᠳᠡᠯᠭᠡᠭᠡᠨ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠰ ᠢ᠋ ᠬᠠᠷᠭᠢᠰ ᠢ᠋ᠶ᠋ᠠᠷ ᠰᠢᠭᠦᠨ ᠴᠡᠭᠡᠷᠯᠡᠭᠦᠯᠵᠦ᠂ ᠣᠯᠠᠨ ᠲᠦᠮᠡᠨ ᠦ᠌ ᠨᠢᠳᠦᠨ ᠳᠡᠭᠡᠷᠡ ᠭᠡᠰᠬᠡᠪᠡᠯ ᠳᠡᠭᠡᠷᠡ ᠦᠭᠡᠢ ᠤᠤ ᠭᠡᠬᠦ ᠳᠦ ᠠᠪᠲᠤᠯ ᠷᠠᠬᠠᠮᠠᠨ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠨ᠂
— ᠶᠡᠬᠡ ᠬᠠᠲᠤᠨ ᠲᠠᠨ ᠤ᠋ ᠪᠣᠳᠣᠯᠭᠠ ᠶ᠋ᠢ ᠡᠰᠡᠷᠭᠦᠴᠡᠵᠦ ᠪᠠᠢᠭᠠ ᠬᠥᠮᠦᠰ ᠢ᠋ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ ᠬᠣᠷᠣᠭᠠᠪᠠᠯ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠬᠢᠯᠢᠩ ᠶᠡᠬᠡᠰᠴᠦ᠂ᠥᠷᠥᠰᠢᠶᠡᠯᠲᠦ ᠬᠠᠭᠠᠨ ᠥᠭᠡᠳᠡᠢ ᠶ᠋ᠢᠨ ᠵᠠᠰᠠᠭ ᠦᠭᠡᠢ ᠪᠣᠯᠵᠠᠢ ᠭᠡᠮᠡᠨ ᠳᠠᠷᠠᠭᠠ ᠶ᠋ᠢᠨ ᠬᠠᠭᠠᠨ ᠢ᠋ ᠵᠠᠯᠠᠬᠤ ᠠᠵᠢᠯ ᠢ᠋ ᠲᠦᠷᠭᠡᠳᠬᠡᠬᠦ ᠲᠤᠯᠠ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ ᠴᠠᠭᠠᠵᠠᠯᠠᠨ ᠬᠣᠷᠣᠭᠠᠬᠤ ᠠ᠋ᠴᠠ ᠢᠯᠡᠭᠦᠦ ᠪᠡᠷ ᠳᠠᠯᠳᠠᠭᠤᠷ ᠭᠦᠢᠴᠡᠳᠬᠡᠪᠡᠯ ᠶᠠᠮᠠᠷ ᠪᠣᠢ ᠭᠡᠯᠡ᠃
ᠳᠦᠷᠭᠡᠨᠡ ᠬᠠᠲᠤᠨ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠰᠠᠢᠰᠢᠶᠠᠨ ᠬᠠᠷᠠᠵᠤ᠂
— ᠴᠢᠨᠦ ᠵᠥᠪ᠃ ᠪᠢ ᠴᠦ᠍ ᠲᠡᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠬᠠᠲᠤᠨ ᠮᠢᠨᠦ ᠵᠠᠷᠯᠢᠭ ᠢ᠋ ᠡᠰᠡᠷᠭᠦᠴᠡᠨ ᠪᠣᠰᠤᠭᠴᠢ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠰᠠᠭᠤᠭᠠ ᠴᠢᠩᠭᠠᠢ ᠴᠢᠩᠰᠠᠩ ᠪᠣᠯᠤᠨ ᠵᠡᠭᠦᠨᠲᠡᠢ ᠳ᠋ᠦ᠍ ᠰᠠᠭᠤᠭᠠ ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠡᠴᠢ ᠶ᠋ᠢ ᠬᠥᠮᠦᠨ ᠶᠠᠪᠤᠭᠤᠯᠤᠨ ᠰᠡᠮᠡᠬᠡᠷ ᠬᠣᠷᠣᠭᠠᠬᠤ ᠨᠢ ᠵᠦᠢ ᠳ᠋ᠦ᠍ ᠨᠡᠢᠴᠡᠨᠡ᠃ ᠬᠠᠷᠢᠨ ᠬᠠᠨ ᠬᠦᠦ ᠶ᠋ᠢ ᠬᠡᠷᠬᠢᠬᠦ ᠪᠢᠯᠡ᠃ ᠪᠢ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠲᠥᠷᠥᠭᠦᠯᠦᠭᠰᠡᠨ ᠡᠴᠡ ᠤᠬᠠᠭᠠᠨ ᠢ᠋ ᠨᠢ ᠲᠥᠷᠥᠭᠦᠯᠦᠭᠡ ᠦᠭᠡᠢ᠂ ᠡᠬᠡ ᠶ᠋ᠢᠨ ᠥᠭᠡᠳᠡ ᠡᠴᠡ ᠪᠣᠰᠴᠤ ᠪᠠᠢᠭᠠ ᠭᠣᠳᠠᠨ ᠢ᠋ ᠠᠵᠢᠭᠯᠠᠨ ᠰᠠᠭᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠭᠡᠮᠡᠨ ᠪᠣᠳᠣᠯᠭᠠᠰᠢᠷᠠᠯᠠ᠃
ᠲᠦᠷᠭᠡᠨᠡ ᠬᠠᠲᠤᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠡᠢᠨ ᠶᠠᠷᠢᠶᠠ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠴᠥᠪ ᠦ᠋ᠨ ᠴᠠᠭ ᠢᠷᠡᠭᠰᠡᠨ ᠦ᠌ ᠰᠢᠨᠵᠢ ᠬᠡᠳᠦᠢᠨ ᠦ᠌ ᠪᠦᠷᠢᠳᠴᠦ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠵᠠᠰᠠᠭ ᠲᠤ᠌ ᠦᠨᠡᠨᠴᠢ ᠪᠡᠷ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠰᠠᠢᠳ ᠲᠦᠰᠢᠮᠡᠳ ᠭᠡᠷ ᠵᠠᠭᠤᠷᠠ ᠪᠠᠨ ᠬᠣᠣᠷᠯᠠᠭᠳᠠᠭᠰᠠᠨ ᠰᠤᠷᠠᠭ ᠮᠡᠷ ᠰᠡᠷ ᠭᠠᠷᠴᠤ ᠡᠬᠢᠯᠡᠪᠡ᠃ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠰᠠᠭᠤᠭᠠ ᠴᠢᠩᠭᠠᠢ ᠴᠢᠩᠰᠠᠩ ᠪᠣᠯᠤᠨ ᠵᠡᠭᠦᠨᠲᠡᠢ ᠳ᠋ᠦ᠍ ᠰᠠᠭᠤᠭᠠ ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠡᠴᠢ᠂ ᠳᠣᠷᠣᠨᠠᠲᠤ ᠢᠷᠡᠨ ᠦ᠌ ᠬᠡᠷᠡᠭ ᠢ᠋ ᠲᠦᠷ ᠬᠠᠮᠢᠶᠠᠷᠴᠤ ᠪᠠᠢᠭᠰᠠᠨ ᠤᠢᠭᠤᠷ ᠭᠠᠷᠤᠯ ᠲᠠᠢ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠺᠣᠷᠭᠣᠽ ᠪᠣᠯᠤᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠬᠦᠦ ᠭᠣᠳᠠᠨ ᠨᠠᠷ ᠲᠦᠷᠭᠡᠨᠡ ᠬᠠᠲᠤᠨ ᠤ᠋ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠭᠠᠷ ᠲᠠᠭᠠᠨ ᠠᠪᠴᠤ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠵᠤ ᠪᠠᠢᠭᠠ ᠳ᠋ᠤ᠌ ᠡᠰᠡᠷᠭᠦᠴᠡᠯ ᠢ᠋ ᠢᠯᠡᠷᠬᠡᠢᠯᠡᠨ᠂ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠳᠡᠮᠵᠢᠯᠭᠡ ᠶ᠋ᠢ ᠠᠪᠴᠤ᠂ ᠪᠣᠰᠤᠯᠭᠠ ᠲᠡᠮᠡᠴᠡᠯ ᠥᠷᠨᠢᠭᠦᠯᠬᠦ ᠪᠡᠷ ᠵᠡᠬᠡᠵᠦ ᠪᠠᠢᠪᠠ᠃
※
ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠡᠢᠰᠯᠡᠯ ᠬᠠᠷᠠᠬᠣᠷᠣᠮ ᠤᠷᠢᠳᠤ ᠶ᠋ᠢᠨ ᠰᠠᠢᠬᠠᠨ ᠴᠠᠭ ᠢ᠋ ᠦᠭᠡᠢᠯᠡᠬᠦ ᠳ᠋ᠡᠭᠡᠨ ᠰᠠᠯᠬᠢᠨ ᠬᠦᠷᠲᠡᠯᠡ ᠳᠤᠲᠠᠭᠤ ᠢᠰᠬᠡᠷᠴᠦ ᠪᠠᠢᠬᠤ ᠰᠢᠭ᠋ ᠴᠠᠭᠠᠨᠠ ᠪᠠᠨ ᠯᠠ ᠣᠢ ᠲᠠᠢ᠃ ᠡᠭᠡᠯ ᠠᠷᠠᠳ ᠠ᠋ᠴᠠ ᠡᠬᠢᠯᠡᠭᠡᠳ ᠶᠡᠬᠡᠰ ᠳᠡᠭᠡᠳᠦᠰ ᠬᠦᠷᠲᠡᠯᠡ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠲᠦ᠍ ᠣᠷᠣᠴᠢᠬᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠬᠡᠯᠡᠬᠦ ᠦᠭᠡ ᠪᠡᠨ ᠬᠢᠨᠠᠵᠤ᠂ ᠥᠪᠡᠷ ᠵᠠᠭᠤᠷᠠ ᠪᠠᠨ ᠰᠠᠮ ᠶᠠᠷᠢᠬᠤ ᠪᠣᠯᠤᠯᠠ᠃ ᠦᠭᠡ ᠶᠠᠷᠢᠶᠠ ᠪᠠᠨ ᠴᠡᠨᠡᠬᠦ ᠦᠭᠡᠢ ᠠᠪᠠᠰᠤ ᠬᠡᠯᠡᠭᠰᠡᠨ ᠦᠭᠡ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠠ᠋ᠴᠠ ᠬᠤᠷᠳᠤᠨ ᠢ᠋ᠶ᠋ᠠᠷ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠬᠢᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠬᠦᠷᠴᠦ ᠲᠥᠷᠥ ᠶ᠋ᠢᠨ ᠭᠡᠮᠲᠦ ᠬᠡᠷᠡᠭᠲᠡᠨ᠂ ᠲᠡᠷᠰᠯᠡᠨ ᠲᠡᠮᠡᠴᠡᠭᠴᠢ ᠪᠣᠯᠤᠨ ᠬᠤᠪᠢᠷᠠᠬᠤ ᠬᠠᠲᠠᠭᠤᠬᠠᠨ ᠰᠢᠢᠳᠬᠡᠯ ᠬᠦᠯᠢᠶᠡᠵᠦ ᠪᠠᠢᠬᠤ ᠲᠤᠯᠠ ᠬᠥᠮᠦᠨ ᠪᠦᠷᠢ ᠳᠣᠣᠷᠠ ᠪᠦᠷᠢᠨᠡ ᠲᠦᠭᠰᠢᠭᠦᠷᠢ ᠲᠡᠭᠡᠭᠡᠨ ᠶᠠᠪᠤᠬᠤ ᠪᠣᠯᠵᠠᠢ᠃ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠡᠢᠰᠯᠡᠯ ᠳ᠋ᠦ᠍ ᠡᠨᠡ ᠮᠡᠲᠦ ᠬᠣᠪ ᠵᠢᠪ ᠦ᠋ᠨ ᠰᠠᠯᠬᠢ ᠬᠤᠤᠭᠢᠨ ᠪᠠᠢᠬᠤ ᠳ᠋ᠤ᠌ ᠶᠡᠬᠡ ᠠᠭᠤᠷᠠᠭ ᠲᠤ᠌ ᠰᠤᠳᠤᠷ ᠪᠦᠲᠦᠭᠡᠬᠦ ᠠᠵᠢᠯ ᠢᠳᠡ ᠥᠷᠨᠢᠵᠦ ᠪᠠᠢᠯᠠ᠃
ᠨᠣᠮ ᠤᠨ ᠥᠷᠭᠦᠭᠡᠨ ᠦ᠌ ᠣᠢᠷᠠᠯᠴᠠᠭᠠ ᠶᠡᠬᠡ ᠠᠰᠠᠷ ᠢ᠋ ᠪᠠᠷᠢᠵᠤ᠂ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠬᠣᠶᠠᠷ ᠡᠩᠨᠡᠭᠡ ᠤᠷᠲᠤ ᠰᠠᠭᠤᠳᠠᠯ ᠵᠠᠰᠠᠵᠤ᠂ ᠰᠠᠭᠤᠳᠠᠯ ᠪᠦᠷᠢ ᠶ᠋ᠢᠨ ᠡᠮᠦᠨᠡ ᠶᠠᠪᠠᠭᠠᠨ ᠰᠢᠷᠡᠭᠡ ᠲᠠᠯᠪᠢᠵᠠᠢ᠃ ᠡᠨᠳᠡ ᠣᠢᠷᠠᠯᠴᠠᠭᠠ ᠪᠠᠷ ᠵᠠᠭᠤ ᠭᠠᠷᠤᠢ ᠬᠥᠮᠦᠨ ᠡᠯᠪᠡᠭ ᠪᠠᠭᠲᠠᠬᠤ ᠪᠠᠷ ᠠᠭᠤᠵᠢᠭᠤ ᠲᠣᠮᠣ ᠠᠵᠢ᠃ ᠡᠩᠨᠡᠨ ᠰᠠᠭᠤᠭᠰᠠᠨ ᠬᠥᠮᠦᠰ ᠢ᠋ ᠠᠵᠢᠭᠯᠠᠨ ᠬᠠᠷᠠᠪᠠᠯ ᠭᠠᠵᠠᠷ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠪᠣᠯᠤᠯᠲᠠᠢ᠂ ᠥᠪᠡᠷ ᠥᠪᠡᠷ ᠦ᠋ᠨ ᠶᠣᠰᠣ ᠵᠠᠩᠰᠢᠯ ᠪᠦᠬᠦᠢ ᠬᠤᠪᠴᠠᠰᠤ ᠡᠮᠦᠰᠬᠡᠯ ᠲᠡᠢ᠃ ᠲᠡᠳᠡ ᠪᠦᠭᠦᠳᠡ ᠭᠠᠷ ᠲᠠᠭᠠᠨ ᠪᠢᠷ ᠶᠠᠨᠲᠠᠢ ᠪᠠᠷᠢᠵᠤ᠂ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠨ ᠵᠥᠪᠯᠡᠯᠳᠦᠵᠦ᠂ ᠰᠤᠳᠤᠷ ᠨᠣᠮ ᠤ᠋ᠨ ᠬᠠᠭᠤᠳᠠᠰᠤ ᠡᠷᠭᠢᠭᠦᠯᠦᠨ ᠪᠠᠢᠨᠠ᠃ ᠠᠰᠠᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ᠂ ᠶᠸᠯᠢᠦᠢ ᠴᠦᠼᠡᠢ ᠶ᠋ᠢᠨ ᠬᠠᠮᠲᠤ ᠰᠠᠭᠤᠬᠤ ᠠᠵᠢ᠃ ᠶᠸᠯᠢᠦᠢ ᠴᠦᠼᠡᠢ ᠶᠡᠬᠡ ᠪᠠᠶᠠᠷᠲᠠᠢ ᠪᠠᠢᠭᠠ ᠪᠣᠯᠤᠯᠲᠠᠢ᠂ ᠤᠷᠲᠤ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠨ᠂
— ᠤᠷᠢᠳᠤ ᠶ᠋ᠢᠨ ᠰᠠᠢᠬᠠᠨ ᠴᠠᠭ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠪᠠᠢᠨᠠ᠂ ᠡᠢᠮᠦ ᠪᠠᠶᠠᠷᠲᠠᠢ ᠡᠳᠦᠷ ᠦ᠋ᠳ ᠲᠣᠬᠢᠶᠠᠭᠠ ᠦᠭᠡᠢ ᠤᠳᠠᠵᠠᠢ᠃ ᠬᠠᠲᠤᠨ ᠤ᠋ ᠵᠢᠳᠬᠦᠯ ᠢ᠋ᠶ᠋ᠡᠷ ᠪᠢᠳᠡᠨ ᠦ᠌ ᠰᠠᠨᠠᠭᠰᠠᠨ ᠬᠡᠷᠡᠭ ᠰᠠᠢᠬᠠᠨ ᠪᠦᠲᠦᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠠᠲᠤᠨ᠄
— ᠪᠢᠳᠡ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠡᠵᠡᠨ ᠨᠢ ᠪᠠᠢᠭᠠ ᠴᠠᠭ ᠲᠤ ᠪᠢᠳᠡᠨ ᠦ᠌ ᠲᠥᠷᠥ ᠣᠷᠣᠰᠢᠬᠤ ᠨᠢ ᠦᠨᠡᠨ ᠲᠤᠯᠠ ᠲᠡᠭᠦᠨ ᠢ᠋ ᠵᠠᠰᠠᠬᠤᠢ ᠶ᠋ᠢᠨ ᠤᠬᠠᠭᠠᠨ ᠪᠠᠰᠠ ᠪᠠᠢᠬᠤ ᠪᠢᠵᠡ ᠭᠡᠮᠡᠨ ᠰᠡᠳᠬᠢᠭᠰᠡᠨ ᠶᠦᠮ᠃ ᠬᠠᠷᠢᠨ ᠶᠸᠯᠢᠦᠢ ᠴᠦᠼᠡᠢ ᠲᠠ ᠪᠢᠳᠡᠨ ᠳ᠋ᠦ᠍ ᠲᠤᠩ ᠴᠤ᠌ ᠶᠡᠬᠡ ᠲᠤᠰᠠ ᠪᠣᠯᠤᠯᠠ ᠭᠡᠮᠡᠨ ᠲᠠᠯᠠᠷᠬᠠᠪᠠ᠃
ᠶᠡᠬᠡ ᠠᠭᠤᠷᠠᠭ ᠲᠤ ᠥᠷᠨᠢᠭᠰᠡᠨ ᠠᠵᠢᠯ ᠢᠳᠡ ᠳᠤᠮᠳᠠ ᠪᠠᠨ ᠣᠷᠣᠵᠤ ᠪᠠᠢᠬᠤ ᠳ᠋ᠤ᠌ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠦᠶᠡ ᠡᠴᠡ ᠤᠬᠠᠭᠠᠨ ᠪᠢᠯᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠳᠠᠷᠰᠢᠭᠰᠠᠨ ᠡᠨᠡ ᠬᠣᠶᠠᠷ ᠬᠥᠮᠦᠨ ᠬᠣᠶᠠᠭᠤᠯᠠ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠢᠷᠡᠭᠰᠡᠨ ᠬᠦᠨᠳᠦᠬᠡᠨ ᠡᠳᠦᠷ ᠦ᠋ᠳ ᠲᠦ᠍ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠳᠤᠮᠳᠠ ᠲᠣᠩ ᠴᠤ ᠶᠡᠬᠡ ᠦᠭᠡᠢᠯᠡᠭᠳᠡᠵᠦ ᠪᠠᠢᠯᠠ᠃
ᠥᠪᠡᠷ ᠦᠨ ᠭᠠᠵᠠᠷ ᠣᠷᠣᠨ ᠢ᠋ᠶ᠋ᠠᠨ ᠵᠠᠰᠠᠨ ᠲᠣᠬᠣᠨᠢᠭᠤᠯᠵᠤ ᠰᠠᠭᠤᠭᠠ ᠬᠤᠪᠢᠯᠠᠢ ᠡᠬᠡ ᠶ᠋ᠢᠨ ᠦᠢᠯᠡ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠬᠤ ᠪᠠᠷ ᠨᠤᠲᠤᠭ ᠲᠠᠭᠠᠨ ᠢᠷᠡᠵᠡᠢ᠃ ᠰᠤᠳᠤᠷ ᠨᠣᠮ ᠪᠢᠴᠢᠬᠦ ᠶᠡᠬᠡ ᠠᠵᠢᠯ ᠤ᠋ᠨ ᠵᠠᠪᠰᠠᠷᠯᠠᠭᠠ ᠪᠣᠯᠵᠤ᠂ ᠬᠤᠷᠠᠭᠰᠠᠨ ᠣᠯᠠᠨ ᠴᠠᠢᠯᠠᠨ ᠪᠠᠢᠬᠤ ᠵᠠᠭᠤᠷᠠ ᠲᠡᠷᠡ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠪᠠ᠃
— ᠥᠨᠥ ᠬᠦᠷᠲᠡᠯᠡ ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠳ᠋ᠤ᠌ ᠡᠵᠡᠨ ᠦᠭᠡᠢ ᠪᠠᠢᠨᠠ᠃ ᠥᠭᠡᠳᠡᠢ ᠬᠠᠭᠠᠨ ᠠᠮᠢᠳᠤ ᠰᠡᠷᠡᠭᠦᠨ ᠠᠬᠤᠢ ᠳ᠋ᠠᠭᠠᠨ ᠳᠠᠷᠠᠭᠠ ᠶ᠋ᠢᠨ ᠬᠠᠭᠠᠨ ᠣᠷᠣ ᠰᠠᠭᠤᠬᠤ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠬᠡᠯᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠬᠦᠦ ᠶ᠋ᠢᠨ ᠬᠠᠮᠲᠤ ᠮᠥᠩᠬᠡ ᠠᠬᠠ ᠶ᠋ᠢ ᠳᠤᠷᠠᠳᠴᠤ ᠪᠠᠢᠭᠰᠠᠨ᠃ ᠥᠨᠥ ᠬᠠᠲᠤᠨ ᠡᠬᠡ ᠲᠥᠷᠥ ᠵᠠᠰᠠᠬᠤ ᠶ᠋ᠢᠨ
ᠦᠨᠡᠨ ᠢ᠋ ᠬᠠᠢᠨ᠂ ᠵᠠᠪᠳᠤᠯ ᠦᠭᠡᠢ ᠪᠠᠢᠭᠠ
ᠬᠡᠳᠦᠢ ᠴᠦ᠍ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠬᠤ ᠦᠭᠡᠢ ᠠᠯᠭᠤᠷᠯᠠᠬᠤ ᠨᠢ ᠶᠠᠭᠤᠨ ᠤ᠋ ᠤᠴᠢᠷ ᠪᠣᠢ ᠭᠡᠵᠦ ᠠᠰᠠᠭᠤᠯᠠ᠃ ᠵᠥᠪᠬᠡᠨ ᠬᠤᠪᠢᠯᠠᠢ ᠴᠤ᠌ ᠪᠢᠰᠢ᠂ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠡᠴᠡ ᠡᠨᠡ ᠠᠰᠠᠭᠤᠯᠲᠠ ᠶ᠋ᠢ ᠠᠰᠠᠭᠤᠮᠠᠷ ᠪᠠᠢᠭᠰᠠᠨ ᠪᠢᠵᠡ᠃ ᠬᠠᠷᠢᠨ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ᠄
— ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠴᠠᠭ ᠭᠡᠵᠦ ᠪᠣᠢ᠂ ᠬᠥᠪᠡᠭᠦᠳ ᠮᠢᠨᠢ ᠪᠤᠤ ᠠᠳᠬᠠ᠃ ᠲᠡᠷᠡ ᠴᠠᠭ ᠪᠢᠳᠡᠨ ᠳ᠋ᠦ᠍ ᠢᠷᠡᠬᠦ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠯᠡ᠃《ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠴᠠᠭ》 ᠭᠡᠰᠡᠨ ᠦᠭᠡ ᠶ᠋ᠢ ᠬᠤᠪᠢᠯᠠᠢ ᠤᠬᠠᠨ ᠪᠣᠳᠣᠬᠤ ᠵᠠᠭᠤᠷᠠ ᠳ᠋ᠤ᠌ ᠡᠵᠢ ᠨᠢ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠬᠡᠷᠡᠭ ᠲᠡᠢ ᠴᠠᠭ ᠭᠠᠷᠪᠠᠯ ᠬᠤᠷᠳᠤᠨ ᠳᠣᠪᠲᠣᠯᠵᠤ᠂ ᠬᠡᠷᠡᠭ ᠦᠭᠡᠢ ᠴᠠᠭ ᠠᠪᠠᠰᠤ ᠬᠤᠷᠳᠤᠨ ᠤᠬᠤᠷᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠨᠠ᠃ ᠣᠳᠣ ᠪᠣᠯ ᠪᠢᠳᠡᠨ ᠦ᠌ ᠳᠣᠪᠲᠣᠯᠬᠤ ᠴᠠᠭ ᠪᠢᠰᠢ᠂ ᠤᠬᠤᠷᠢᠨᠠ ᠭᠡᠳᠡᠭ ᠢᠯᠠᠭᠳᠠᠬᠤ ᠶ᠋ᠢᠨ ᠨᠡᠷᠡ ᠪᠢᠰᠢ᠂ ᠬᠠᠭᠠᠨ ᠡᠪᠦᠭᠡ ᠴᠢᠨᠢ ᠴᠦ᠍ ᠳᠣᠯᠣᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ᠌ ᠳᠠᠢᠳᠤᠬᠤ ᠳ᠋ᠠᠭᠠᠨ ᠮᠠᠰᠢ ᠬᠤᠷᠳᠤᠨ ᠳᠣᠪᠲᠣᠯᠤᠭᠠᠳ ᠳᠠᠷᠠᠭᠠ ᠨᠢ ᠬᠤᠷᠳᠤᠨ ᠤᠬᠤᠷᠢᠳᠠᠭ ᠪᠠᠢᠭᠰᠠᠨ ᠃ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠲᠠᠯᠠᠪᠤᠷ ᠪᠢᠰᠢ᠂ ᠡᠩᠬᠡ ᠶ᠋ᠢᠨ ᠴᠠᠭ ᠭᠡᠯᠡ ᠴᠦ᠍ ᠡᠨᠡ ᠪᠣᠳᠣᠯᠭᠠ ᠥᠨᠥ ᠪᠠᠰᠠ ᠬᠡᠷᠡᠭ ᠲᠡᠢ ᠰᠠᠨᠠᠭᠳᠠᠨᠠ ᠭᠡᠵᠦ ᠰᠤᠷᠬᠠᠭᠲᠠᠨᠢ ᠬᠡᠯᠡᠯᠡ᠃
— ᠭᠡᠬᠦ ᠳ᠋ᠡᠭᠡᠨ ᠶᠠᠭᠤᠨ ᠤ᠋ ᠤᠴᠢᠷ ᠤᠬᠤᠷᠢᠵᠤ ᠪᠣᠢ ᠭᠡᠵᠦ?
— ᠪᠢᠳᠡᠨ ᠳ᠋ᠦ᠍ ᠤᠬᠤᠷᠢᠬᠤ ᠰᠢᠯᠲᠠᠭᠠᠨ ᠪᠣᠢ᠃ ᠣᠯᠠᠨ ᠰᠢᠯᠲᠠᠭ ᠪᠠᠢᠭᠠ ᠴᠤ᠌ ᠬᠠᠮᠤᠭ ᠤ᠋ᠨ ᠲᠣᠮᠣ ᠰᠢᠯᠲᠠᠭᠠᠨ ᠪᠣᠯ ᠮᠢᠨᠦ ᠬᠡᠦᠬᠡᠳ ᠦ᠋ᠳ ᠬᠠᠭᠠᠨ ᠰᠡᠨᠳᠡᠢ ᠳ᠋ᠦ᠍ ᠵᠠᠯᠠᠷᠠᠬᠤ ᠬᠠᠳᠠ ᠤᠬᠠᠭᠠᠨ ᠰᠠᠭᠤᠭᠠ ᠦᠭᠡᠢ ᠪᠠᠢᠭᠠ ᠬᠡᠷᠡᠭ᠃
— ᠬᠠᠲᠤᠨ ᠡᠵᠢ ᠮᠢᠨᠢ ᠲᠠ ᠪᠢᠳᠡᠨ ᠳ᠋ᠦ᠍ ᠮᠡᠳᠡᠭᠡ ᠣᠷᠣᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠡᠷᠳᠡᠮ ᠣᠶᠤᠨ ᠢ᠋ ᠰᠤᠷᠭᠠᠨ ᠢᠷᠡᠭᠰᠡᠨ ᠠᠲᠠᠯᠠ ᠪᠢᠳᠡᠨ ᠦ᠌ ᠮᠡᠳᠡᠯᠭᠡ ᠥᠨᠥ ᠬᠢᠷᠢᠨᠡ ᠳᠤᠲᠠᠵᠤ ᠪᠠᠢᠭᠠ ᠬᠡᠷᠡᠭ ᠦᠦ?
— ᠬᠥᠪᠡᠭᠦᠳ ᠲᠠ ᠨᠠᠷ ᠡᠷᠳᠡᠮ ᠣᠶᠤᠨ ᠢ᠋ ᠬᠠᠩᠭᠠᠯᠲᠠ ᠲᠠᠢ ᠰᠤᠷᠤᠭᠰᠠᠨ ᠴᠤ᠌ ᠨᠢᠭᠡ ᠵᠦᠢᠯ ᠢ᠋ ᠰᠤᠷᠤᠭᠠ ᠦᠭᠡᠢ ᠪᠠᠢᠨᠠ᠃ ᠲᠡᠷᠡ ᠨᠢ ᠬᠥᠮᠦᠨ ᠢ᠋ ᠲᠠᠨᠢᠵᠤ ᠰᠤᠷᠬᠤ ᠡᠷᠳᠡᠮ ᠶᠦᠮ᠃ ᠬᠥᠮᠦᠨ ᠢ᠋ ᠲᠠᠨᠢᠵᠤ ᠰᠤᠷᠤᠭᠠ ᠦᠭᠡᠢ ᠬᠥᠮᠦᠨ ᠤᠯᠤᠰ ᠢ᠋ ᠤᠳᠤᠷᠢᠳᠴᠤ ᠴᠢᠳᠠᠬᠤ ᠦᠭᠡᠢ᠃ ᠡᠭᠡᠯ ᠠᠷᠠᠳ᠂ ᠡᠷᠬᠢᠮ ᠳᠡᠭᠡᠳᠦᠰ ᠬᠡᠨ ᠢ᠋ ᠴᠦ᠍ ᠪᠠᠢ᠂ ᠰᠡᠳᠬᠢᠯ ᠢ᠋ ᠣᠢᠯᠠᠭᠠᠵᠤ ᠰᠤᠷᠬᠤ ᠨᠢ ᠴᠢᠬᠤᠯᠠ᠃ ᠬᠥᠮᠦᠨ ᠢ᠋ ᠲᠠᠨᠢᠵᠤ ᠰᠡᠳᠬᠢᠯ ᠢ᠋ ᠣᠢᠯᠠᠭᠠᠭᠠ ᠦᠭᠡᠢ ᠴᠠᠭ ᠲᠤ᠌ ᠦᠨᠡᠨ ᠢ᠋ ᠣᠯᠵᠤ ᠬᠠᠷᠠᠬᠤ ᠦᠭᠡᠢ᠃ ᠦᠨᠡᠨ ᠢ᠋ ᠣᠯᠵᠤ ᠬᠠᠷᠠᠬᠤ ᠦᠭᠡᠢ ᠬᠥᠮᠦᠨ ᠲᠦᠳᠡᠭᠡᠨᠡ ᠬᠣᠪ ᠵᠢᠪ ᠲᠦ᠍ ᠡᠵᠡᠯᠡᠭᠳᠡᠨ ᠮᠥᠬᠥᠳᠡᠭ ᠵᠢᠮᠡ ᠲᠡᠢ ᠭᠡᠪᠡ᠃
ᠥᠭᠡᠳᠡᠢ ᠬᠠᠭᠠᠨ ᠤ᠋ ᠥᠭᠡᠳᠡ ᠪᠣᠯᠤᠭᠰᠠᠨ ᠰᠢᠯᠲᠠᠭᠠᠨ ᠢ᠋ ᠲᠣᠳᠣᠷᠠᠭᠤᠯᠬᠤ ᠭᠡᠵᠦ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠮᠥᠷᠳᠡᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠷ ᠠᠵᠢᠯ ᠠ᠋ᠴᠠ ᠪᠠᠨ ᠪᠠᠭᠤᠭᠰᠠᠨ ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠡᠴᠢ ᠬᠠᠷᠠᠬᠣᠷᠣᠮ ᠠ᠋ᠴᠠ ᠶᠠᠪᠤᠵᠤ᠂ ᠤᠷᠢᠳᠤ ᠵᠠᠬᠢᠷᠤᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠥᠩᠲᠡᠢ ᠳ᠋ᠦ᠍ ᠣᠴᠢᠵᠤ ᠰᠠᠭᠤᠷᠢᠰᠢᠭᠰᠠᠨ ᠪᠠᠢᠯᠠ᠃ ᠨᠢᠭᠡᠨ ᠡᠳᠦᠷ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠠᠯᠲᠠ ᠳ᠋ᠤ᠌ ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠠᠴᠢ ᠶ᠋ᠢᠨ ᠥᠷᠥᠭᠡ ᠶ᠋ᠢ ᠵᠦᠭᠯᠡᠨ ᠭᠤᠷᠪᠠᠨ ᠮᠣᠷᠢᠲᠠᠨ ᠢᠷᠡᠵᠦ ᠶᠠᠪᠤᠬᠤ ᠪᠠᠷᠠ ᠬᠠᠷᠠᠭᠳᠠᠯᠠ᠃ ᠲᠦᠳᠡ ᠤᠳᠠᠯ ᠦᠭᠡᠢ ᠢᠷᠡᠭᠰᠡᠨ ᠬᠥᠮᠦᠰ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠨ᠂ ᠮᠣᠷᠢ ᠪᠠᠨ ᠤᠶᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠪᠠᠯ ᠲᠦᠷᠭᠡᠨᠡ ᠬᠠᠲᠤᠨ ᠤ᠋ ᠠᠯᠪᠠᠲᠤ ᠠᠪᠲᠤᠯ ᠷᠠᠬᠠᠮᠠᠨ ᠬᠣᠶᠠᠷ ᠬᠥᠮᠦᠨ ᠦ᠌ ᠬᠠᠮᠲᠤ ᠢᠷᠡᠵᠡᠢ᠃ ᠠᠮᠤᠷ ᠠᠮᠤᠭᠤᠯᠠᠩ ᠡᠳᠦᠷ ᠦ᠋ᠳ ᠦᠭᠡᠢ ᠪᠣᠯᠵᠤ᠂ ᠥᠨᠥ ᠡᠷᠯᠢᠭ ᠦ᠋ᠨ ᠡᠯᠴᠢ ᠭᠠᠭᠴᠠᠭᠠᠷ ᠪᠢᠰᠢ᠂ ᠬᠣᠶᠠᠭᠤᠯᠠ ᠭᠤᠷᠪᠠᠭᠤᠯᠠ ᠢᠷᠡᠵᠦ ᠪᠠᠢᠬᠤ ᠰᠢᠭ᠋ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠳᠠᠪᠠ᠃
ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠠᠴᠢ ᠲᠡᠳᠡᠨ ᠢ᠋ ᠨᠠᠢᠷ ᠲᠠᠯᠪᠢᠨ ᠤᠭᠲᠤᠵᠤ ᠭᠡᠷ ᠲᠡᠭᠡᠨ ᠤᠷᠢᠨ ᠵᠠᠯᠠᠯᠠ᠃ ᠮᠥᠩᠬᠡ ᠲᠩᠷᠢ ᠪᠦᠭᠦᠳᠡ ᠶ᠋ᠢ ᠪᠣᠯᠭᠣᠭᠠᠵᠤ ᠪᠠᠢᠭᠠ᠃ ᠡᠨᠡ ᠡᠪᠦᠭᠡᠨ ᠲᠦᠰᠢᠮᠡᠯ ᠥᠷᠥᠰᠢᠶᠡᠯᠲᠦ ᠬᠠᠭᠠᠨ ᠥᠭᠡᠳᠡᠢ ᠶ᠋ᠢᠨ ᠰᠦᠷ ᠬᠦᠴᠦᠨ ᠳᠣᠣᠷᠠ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠦᠨᠡᠨ ᠢ᠋ ᠮᠡᠳᠡᠬᠦ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠪᠠᠷ ᠥᠨᠥ ᠮᠥᠩᠬᠡ ᠲᠩᠷᠢ ᠳ᠋ᠦ᠍ ᠵᠠᠯᠪᠠᠷᠢᠳᠠᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠨᠠᠮᠤᠷ ᠤ᠋ᠨ ᠰᠢᠷᠠ ᠨᠠᠪᠴᠢᠰ ᠬᠥᠯ ᠦ᠋ᠨ ᠳᠣᠣᠭᠤᠷ ᠣᠷᠢᠶᠠᠴᠠᠯᠳᠤᠨ ᠪᠠᠭᠤᠭᠰᠠᠨ ᠲᠡᠷᠡ ᠡᠳᠦᠷ ᠬᠠᠷᠢᠬᠤ ᠴᠠᠭ ᠤ᠋ᠨ ᠥᠩᠭᠡ ᠶ᠋ᠢ ᠬᠠᠷᠠᠭᠤᠯᠵᠤ᠂ ᠭᠠᠵᠠᠷ ᠳᠡᠯᠡᠬᠡᠢ ᠭᠠᠯ ᠰᠢᠷᠠ ᠥᠩᠭᠡ ᠪᠡᠨ ᠳᠡᠪᠢᠰᠦᠭᠡᠳ ᠰᠢᠷᠭᠠᠯᠲᠤᠨ ᠪᠠᠢᠯᠠ᠃ ᠭᠡᠷ ᠲᠦ᠍ ᠴᠡᠬᠡ ᠵᠠᠯᠭᠢᠯᠠᠨ ᠰᠠᠭᠤᠬᠤ ᠭᠤᠷᠪᠠᠨ ᠬᠥᠮᠦᠨ ᠡᠭᠡᠯ ᠬᠥᠮᠦᠨ ᠦ᠌ ᠳᠦᠷᠢ ᠪᠡᠷ ᠢᠷᠡᠭᠰᠡᠨ ᠴᠦ᠍ ᠡᠷᠯᠢᠭ ᠦ᠋ᠨ ᠡᠯᠴᠢ ᠶ᠋ᠢᠨ ᠲᠥᠯᠥᠭᠡᠯᠡᠭᠴᠢᠳ ᠭᠡᠳᠡᠭ ᠨᠢ ᠬᠡᠨ ᠳ᠋ᠦ᠍ ᠴᠦ᠍ ᠠᠩᠵᠠᠭᠠᠷᠳᠠᠭᠳᠠᠮᠠ ᠰᠡᠳᠬᠢᠯ ᠰᠡᠷᠲᠡᠬᠢᠯᠭᠡᠨᠡ᠃
— ᠠᠯᠯᠠᠾ ᠲᠩᠷᠢ ᠪᠢᠳᠡᠨ ᠢ᠋ ᠢᠪᠡᠭᠡᠨ ᠰᠣᠶᠣᠷᠬᠠᠭ᠃ ᠠᠪᠲᠤᠯ ᠷᠠᠬᠠᠮᠠᠨ ᠲᠠ ᠵᠠᠮ ᠤ᠋ᠨ ᠠᠯᠵᠢᠶᠠᠯ ᠶᠠᠳᠠᠷᠠᠯ ᠢ᠋ᠶ᠋ᠠᠨ ᠲᠠᠢᠯᠤᠨ ᠰᠠᠢᠲᠤᠷ ᠠᠮᠠᠷᠠᠵᠤ ᠲᠤᠬᠠᠯᠠᠭᠲᠤᠨ᠂ ᠭᠠᠵᠠᠷ ᠬᠣᠯᠠ ᠶ᠋ᠢ ᠲᠤᠭᠤᠯᠵᠤ ᠠᠯᠵᠢᠶᠠᠭᠰᠠᠨ ᠪᠢᠵᠡ ᠬᠡᠮᠡᠪᠡ᠃
ᠬᠣᠯᠠ ᠶ᠋ᠢᠨ ᠭᠡᠢᠴᠢᠨ ᠢ᠋ ᠠᠯᠠᠭᠠ ᠳᠡᠯᠭᠡᠨ ᠤᠭᠲᠤᠬᠤ ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠦ᠌ ᠵᠠᠩᠰᠢᠯ ᠲᠡᠭᠦᠨ ᠡᠴᠡ ᠬᠠᠩᠬᠤᠯᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠮᠠᠬᠠᠮᠦ᠋ᠳ᠋ ᠶᠡᠯᠡᠸᠠᠴᠢ ᠶ᠋ᠢ ᠬᠠᠷᠠᠨ ᠰᠠᠭᠤᠭᠰᠠᠨ ᠠᠪᠲᠤᠯ ᠷᠠᠬᠠᠮᠠᠨ《ᠠᠯᠯᠠᠾ ᠲᠩᠷᠢ ᠴᠢᠨᠢ ᠴᠢᠮᠠᠢ᠍ᠢ ᠲᠠᠭᠠᠯᠠᠵᠤ᠂ ᠪᠤᠴᠠᠬᠤ ᠵᠠᠮ ᠢ᠋ ᠴᠢᠨᠢ ᠪᠢᠳᠡᠨ ᠢ᠋ᠶ᠋ᠡᠷ ᠵᠢᠭᠠᠯᠭᠠᠬᠤ ᠪᠠᠷ ᠢᠷᠡᠭᠦᠯᠦᠭᠰᠡᠨ ᠪᠤᠰᠤ ᠤᠤ》 ᠭᠡᠮᠡᠨ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠯᠠ᠃ ᠨᠢᠭᠡᠨ ᠴᠠᠭ ᠤ᠋ᠨ ᠶᠡᠬᠡ ᠲᠦᠰᠢᠮᠡᠯ᠂ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠲᠠᠭᠠᠯᠠᠯ ᠢ᠋ ᠬᠦᠷᠲᠡᠭᠰᠡᠨ ᠭᠡᠵᠦ ᠶᠠᠷᠢᠭᠳᠠᠳᠠᠭ᠃ ᠥᠪᠡᠷ ᠦ᠋ᠨ ᠢᠵᠢᠯᠢ ᠰᠢᠲᠦᠯᠭᠡᠲᠡᠨ ᠡᠨᠡ ᠡᠪᠦᠭᠡᠨ ᠳ᠋ᠦ᠍ ᠠᠷᠠᠢ ᠴᠤ᠌ ᠲᠡᠭᠡᠵᠦ ᠰᠢᠭᠤᠳ ᠬᠡᠯᠡᠴᠢᠬᠡᠬᠦ ᠵᠢᠷᠦᠬᠡ ᠬᠦᠷᠦᠭᠰᠡᠨ ᠦᠭᠡᠢ᠂ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠶᠠᠪᠤᠭᠤᠯᠤᠭᠰᠠᠨ ᠬᠣᠣᠷ ᠲᠠᠢ ᠦᠷᠢᠯ ᠡᠪᠦᠷ ᠲᠤᠨᠢ ᠲᠡᠢᠴᠢᠭᠢᠨᠡᠨ ᠡᠭᠡᠵᠡᠭ ᠲᠡᠢ ᠴᠠᠭ ᠢ᠋ ᠲᠠᠭᠠᠷᠠᠭᠤᠯᠤᠨ ᠤᠮᠳᠠᠭᠠᠨ ᠳ᠋ᠤᠨᠢ ᠬᠢᠵᠦ ᠤᠤᠭᠤᠯᠭᠠᠬᠤ ᠪᠠᠷ ᠵᠡᠬᠡᠵᠦ ᠰᠠᠭᠤᠯᠠ᠃
— ᠮᠠᠬᠠᠮᠥ᠋ᠳ᠋ ᠶᠡᠯᠡᠸᠠᠴᠢ ᠲᠠᠨ ᠲᠠᠢ ᠤᠳᠠᠭᠠᠨ ᠠᠭᠤᠯᠵᠠᠭᠰᠠᠨ ᠦᠭᠡᠢ᠂ ᠪᠢᠳᠡᠨ ᠳ᠋ᠦ᠍ ᠰᠠᠯᠬᠤ ᠴᠠᠭ ᠪᠠᠢᠪᠠᠴᠤ ᠳᠠᠬᠢᠨ ᠠᠭᠤᠯᠵᠠᠬᠤ ᠴᠠᠭ ᠪᠠᠰᠠ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠃ ᠲᠠᠨ ᠤ᠋ ᠡᠭᠦᠪᠡᠷ ᠠᠯᠪᠠᠨ ᠠᠵᠢᠯ ᠲᠠᠢ ᠶᠠᠪᠤᠵᠤ ᠪᠠᠢᠭᠠᠳ ᠡᠪᠦᠭᠡᠨ ᠲᠦᠰᠢᠮᠡᠯ ᠢ᠋ ᠡᠨᠳᠡ ᠨᠠᠮᠤᠷᠵᠢᠵᠤ ᠪᠠᠢᠭᠠ ᠶ᠋ᠢ ᠳᠤᠭᠤᠯᠤᠭᠠᠳ ᠠᠮᠤᠷ ᠮᠡᠨᠳᠦ ᠶ᠋ᠢ ᠲᠠᠨᠢ ᠮᠡᠳᠡᠬᠦ ᠪᠡᠷ ᠢᠷᠡᠯᠡ᠃ ᠢᠳᠡᠭᠡ ᠡᠵᠡᠨ ᠢ᠋ᠶ᠋ᠡᠨ ᠲᠠᠨᠢᠳᠠᠭ ᠦᠭᠡᠢ ᠶᠦᠮ ᠭᠡᠰᠡᠨ᠃ ᠬᠠᠮᠲᠤ ᠬᠦᠷᠲᠡᠭᠲᠦᠨ ᠭᠡᠮᠡᠨ ᠴᠢᠯᠠᠭᠤᠨ ᠬᠤᠨᠳᠠᠭᠠ ᠲᠠᠢ ᠳᠠᠷᠠᠰᠤ ᠶ᠋ᠢ ᠮᠠᠬᠠᠮᠥ᠋ᠳ᠋ ᠶᠡᠯᠡᠸᠡᠴᠢ ᠳ᠋ᠦ᠍ ᠪᠠᠷᠢᠯᠠ᠃ ᠮᠠᠬᠠᠮᠥ᠋ᠳ᠋ ᠶᠡᠯᠡᠸᠡᠴᠢ ᠳᠠᠷᠠᠰᠤ ᠶ᠋ᠢ ᠠᠪᠴᠤ ᠠᠯᠯᠠᠾ ᠲᠩᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠨ ᠬᠥᠨᠲᠥᠷᠬᠦ ᠵᠠᠭᠤᠷᠠ ᠳ᠋ᠤ᠌ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠳᠡᠷᠡᠰᠦᠨ ᠦ᠌ ᠠᠮᠲᠠ ᠬᠠᠲᠠᠭᠤ ᠴᠤ ᠣᠷᠣᠭᠰᠠᠨ ᠬᠣᠢᠨᠠ ᠪᠠᠨ ᠰᠡᠳᠬᠢᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠬᠥᠳᠡᠯᠭᠡᠬᠦ ᠤᠪᠠᠳᠢᠰ ᠲᠠᠢ ᠲᠤᠯᠠ ᠲᠠ ᠪᠦᠬᠦᠨ ᠳᠤᠷᠠ ᠪᠠᠷ ᠬᠦᠷᠲᠡᠨ ᠪᠣᠯᠭᠣᠭᠠᠭᠲᠤᠨ ᠬᠡᠮᠡᠯᠡ᠃
ᠴᠢᠯᠠᠭᠤᠨ ᠬᠤᠨᠳᠠᠭᠠ ᠠᠪᠲᠤᠯ ᠷᠠᠬᠠᠮᠠᠨ ᠤ᠋ ᠭᠠᠷ ᠳᠡᠭᠡᠷᠡ ᠪᠤᠴᠠᠨ ᠢᠷᠡᠬᠦ ᠳ᠋ᠦ᠍ ᠮᠠᠬᠠᠮᠥ᠋ᠳ᠋ ᠶᠡᠯᠡᠸᠡᠴᠢ᠄
— ᠪᠢ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠰᠥᠩ ᠲᠦᠰᠢᠵᠦ᠂ ᠡᠷᠬᠢᠮ ᠳᠡᠭᠦᠦ ᠳ᠋ᠦ᠍ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠶᠡ ᠭᠡᠵᠦ ᠬᠡᠯᠡᠭᠡᠳ ᠠᠪᠲᠤᠯ ᠷᠠᠬᠠᠮᠠᠨ ᠳ᠋ᠤ᠌ ᠰᠠᠷᠬᠤᠳ ᠬᠤᠨᠳᠠᠭᠠᠯᠠᠯᠠ᠃ ᠡᠨᠡ ᠮᠡᠲᠦ ᠬᠠᠷᠢᠭᠤ ᠦᠢᠯᠡᠳᠴᠦ ᠪᠠᠢᠭᠠ ᠳ᠋ᠤ᠌ ᠠᠪᠲᠤᠯ ᠷᠠᠬᠠᠮᠠᠨ ᠤ᠋ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠴᠦ᠂
— ᠭᠠᠤᠯᠢ ᠤᠯᠤᠰ ᠤ᠋ᠨ ᠡᠮᠡᠰ ᠬᠠᠲᠤᠳ ᠲᠠᠢ ᠰᠠᠷᠬᠤᠳ ᠤᠤᠭᠤᠬᠤ ᠳ᠋ᠤ᠌ ᠨᠢᠭᠡ ᠡᠢᠮᠦᠷᠬᠦᠦ ᠪᠠᠢᠳᠠᠭ ᠰᠠᠨ᠃ ᠣᠳᠣ ᠪᠢ᠂ ᠣᠳᠣ ᠴᠢ ᠭᠡᠳ ᠡᠭᠡᠯᠵᠢᠯᠡᠨ ᠭᠥᠷᠳᠡᠭᠰᠡᠭᠡᠷ ᠰᠣᠭᠲᠣᠵᠤ ᠣᠷᠬᠢᠳᠠᠭ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠴᠢᠬᠠᠯᠠ᠃ ᠡᠪᠦᠭᠡᠨ ᠲᠦᠰᠢᠮᠡᠯ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠪᠠᠷ ᠪᠠᠰᠠ ᠨᠢᠭᠡᠨ ᠶᠣᠰᠣ ᠶ᠋ᠢ ᠪᠣᠢ ᠪᠣᠯᠭᠠᠪᠠ ᠤᠤ᠂ ᠠᠯᠢ ᠡᠰᠡᠪᠡᠯ ᠭᠠᠤᠯᠢ ᠤᠯᠤᠰ ᠤ᠋ᠨ ᠥᠬᠢᠳ ᠲᠡᠢ ᠰᠠᠷᠬᠤᠳ ᠬᠦᠷᠲᠡᠳᠡᠭ ᠪᠣᠯᠤᠭᠠ ᠤᠤ ᠭᠡᠮᠡᠨ ᠡᠭ ᠮᠠᠭ ᠦᠭᠡᠢ ᠢᠨᠢᠶᠡᠨ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠᠯ᠂ ᠨᠡᠯᠢᠶᠡᠳ ᠬᠠᠯᠠᠮᠴᠠᠴᠢᠬᠠᠵᠠᠢ᠃
ᠠᠪᠲᠤᠯ ᠷᠠᠬᠠᠮᠠᠨ ᠬᠠᠮᠲᠤ ᠢᠷᠡᠭᠰᠡᠨ ᠬᠥᠮᠦᠰ ᠲᠡᠢ ᠪᠡᠨ ᠢᠩᠭᠢᠵᠦ ᠬᠡᠯᠡ ᠠᠮᠠ ᠪᠠᠨ ᠰᠤᠭᠤᠯᠴᠢᠬᠠᠬᠤ ᠰᠢᠬᠠᠮ ᠠᠯᠢᠶᠠ ᠬᠣᠱᠣᠩ ᠶᠠᠭᠤᠮᠠ ᠶᠠᠷᠢᠵᠤ ᠮᠠᠭᠠᠰᠠᠩᠨᠠᠵᠤ ᠪᠠᠢᠭᠠᠳ ᠣᠷᠣᠢ ᠪᠣᠯᠬᠤ ᠶ᠋ᠢᠨ ᠠᠯᠲᠠ ᠳ᠋ᠤ᠌ ᠨᠡᠯᠢᠶᠡᠳ ᠰᠣᠭᠲᠣᠭᠰᠠᠨ ᠪᠠᠢᠯᠠ᠃ ᠢᠷᠡᠭᠰᠡᠨ ᠬᠥᠮᠦᠰ ᠦ᠋ᠨ ᠰᠠᠷᠬᠤᠳ ᠲᠤ᠌ ᠬᠥᠯᠴᠥᠭᠦᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠮᠠᠬᠠᠮᠥ᠋ᠳ᠋ ᠶᠡᠯᠡᠸᠡᠴᠢ ᠰᠠᠮᠪᠠᠭᠠᠴᠢᠯᠠᠨ ᠲᠡᠳᠡᠨ ᠦ᠌ ᠡᠪᠦᠷ ᠲᠦ᠍ ᠨᠢᠭᠡ ᠨᠢᠭᠡ ᠡᠮᠡᠭᠲᠡᠢ ᠰᠢᠷᠭᠤᠭᠤᠯᠤᠨ ᠦᠯᠡᠳᠡᠭᠡᠭᠡᠳ ᠲᠦᠳᠡ ᠤᠳᠠᠯ ᠦᠭᠡᠢ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠭᠦᠯᠦᠨ᠂
ᠭᠡᠷ ᠦᠷᠭᠦᠭᠡᠨ ᠡᠴᠡ ᠪᠡᠨ ᠳᠠᠢᠵᠢᠨ ᠶᠠᠪᠤᠯᠠ᠃ ᠠᠮᠢ ᠨᠠᠭᠠᠨᠠ᠂ ᠲᠠᠮᠤ ᠴᠠᠭᠠᠨᠠ ᠢᠷᠡᠬᠦ ᠶ᠋ᠢᠨ ᠴᠠᠭ ᠲᠤ ᠬᠥᠮᠦᠨ ᠭᠡᠭᠴᠢ ᠶᠠᠭᠤ ᠴᠤ ᠰᠦᠪᠡᠭᠴᠢᠯᠡᠵᠦ ᠴᠢᠳᠠᠳᠠᠭ ᠪᠣᠯᠤᠯᠲᠠᠢ᠂ ᠢᠩᠭᠢᠵᠦ ᠴᠣ ᠶᠠᠪᠤᠬᠤ ᠭᠡᠵᠦ ᠭᠡᠮᠡᠨ ᠲᠡᠷᠡ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠪᠣᠳᠣᠯᠠ᠃
ᠳᠠᠪᠬᠢᠲᠠᠯᠠ ᠳᠠᠪᠬᠤᠷᠯᠠᠨ ᠦᠷᠦᠭᠰᠡᠨ ᠰᠤᠳᠤᠷ ᠤ᠋ᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠤᠷᠠᠨ ᠪᠢᠷ ᠢ᠋ᠶ᠋ᠡᠷ ᠤᠭᠠᠯᠵᠠᠯᠠᠭᠤᠯᠤᠨ ᠲᠠᠲᠠᠭᠰᠠᠨ ᠪᠢᠴᠢᠭᠡᠰᠦ ᠬᠠᠷᠠᠭᠳᠠᠨᠠ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠰᠤᠳᠤᠷ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠵᠤ᠂
—ᠲᠥᠷᠥ ᠪᠠᠷᠢᠬᠤ ᠶ᠋ᠢᠨ ᠦᠨᠡᠨ ᠡᠭᠦᠨ ᠳ᠋ᠦ᠍ ᠰᠢᠩᠭᠡᠯᠡ ᠭᠡᠮᠡᠨ ᠥᠭᠦᠯᠡᠬᠦ ᠳ᠋ᠦ᠍ ᠨᠢᠳᠦᠨ ᠳ᠋ᠦ᠍ ᠦᠯᠦ ᠮᠡᠳᠡᠩᠬᠡᠨ ᠪᠠᠶᠠᠷ ᠭᠡᠢᠨᠡ᠃ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠦ᠌ ᠭᠠᠳᠠᠨᠠ ᠪᠠᠷᠢᠭᠰᠠᠨ ᠠᠰᠠᠷ ᠤ᠋ᠨ ᠳᠣᠣᠷᠠ ᠴᠤᠭᠯᠠᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠶᠸᠯᠢᠤᠢ ᠴᠦᠼᠠᠢ᠂ ᠮᠥᠩᠬᠡ᠂ ᠬᠤᠪᠢᠯᠠᠢ ᠨᠠᠷ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠴᠤ ᠨᠡᠩ ᠪᠠᠶᠠᠷ ᠪᠠᠬᠠᠳᠤᠯ ᠲᠣᠳᠣᠷᠠᠨ ᠪᠠᠢᠭᠠ ᠨᠢ ᠡᠨᠡ ᠬᠥᠮᠦᠰ ᠦ᠋ᠨ ᠡᠬᠢᠯᠡᠭᠦᠯᠦᠭᠰᠡᠨ ᠨᠥᠷᠢ ᠶᠡᠬᠡ ᠠᠵᠢᠯ ᠥᠨᠳᠥᠷᠯᠡᠭᠰᠡᠨ ᠪᠣᠯᠬᠤ ᠶ᠋ᠢ ᠬᠠᠷᠠᠭᠤᠯᠤᠨᠠ᠃ ᠲᠦᠳᠡ ᠤᠳᠠᠯ ᠦᠭᠡᠢ ᠳᠠᠪᠬᠤᠷᠯᠠᠨ ᠦᠷᠦᠭᠰᠡᠨ ᠬᠠᠭᠤᠳᠠᠰᠤ ᠨᠤᠭᠤᠳ ᠢ᠋ ᠭᠤᠷᠪᠠᠨ ᠬᠡᠰᠡᠭ ᠪᠣᠯᠭᠠᠨ ᠬᠣᠷᠭᠣᠢ ᠡᠮᠵᠢᠶᠡᠷᠢ ᠲᠡᠢ ᠰᠢᠷᠠ ᠥᠩᠭᠡ ᠶ᠋ᠢᠨ ᠪᠥᠰ ᠢ᠋ᠶ᠋ᠡᠷ ᠨᠢᠮᠪᠠᠢᠯᠠᠨ ᠪᠠᠷᠢᠨᠲᠠᠭᠯᠠᠵᠤ ᠳᠠᠭᠤᠰᠤᠯᠠ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠰᠤᠳᠤᠷ ᠢ᠋ ᠳᠡᠭᠡᠭᠰᠢ ᠡᠷᠭᠦᠵᠦ᠂
—ᠡᠨᠡ ᠰᠤᠳᠤᠷ ᠬᠣᠵᠢᠮ ᠤ᠋ᠨ ᠬᠠᠭᠠᠳ ᠲᠤ ᠲᠥᠷᠥ ᠪᠠᠷᠢᠬᠤ ᠦᠨᠡᠨ ᠬᠢᠭᠡᠳ ᠲᠦᠮᠡᠨ ᠣᠯᠠᠨ ᠢ᠋ ᠵᠠᠯᠠᠬᠤ ᠤᠬᠠᠭᠠᠨ ᠢ᠋ ᠥᠭᠬᠦ ᠪᠣᠢ ᠵᠠ᠃
《ᠬᠠᠲᠤᠨ ᠡᠬᠡ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠡᠨᠡ ᠪᠠᠶᠠᠷ ᠪᠠᠶᠠᠰᠤᠯ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢᠲᠠ ᠲᠣᠳᠣᠷᠠᠭᠠ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨᠠ》 ᠭᠡᠮᠡᠨ ᠪᠣᠳᠣᠵᠤ ᠵᠣᠭᠰᠣᠭᠰᠠᠨ ᠬᠦᠦ ᠬᠤᠪᠢᠯᠠᠢ᠄
— ᠡᠵᠢ ᠮᠢᠨᠢ᠂ ᠪᠢ ᠥᠪᠡᠷ ᠦ᠋ᠨ ᠭᠠᠵᠠᠷ ᠨᠤᠲᠤᠭ ᠤᠷᠤᠭᠤ ᠡᠨᠡ ᠬᠦ᠌ ᠰᠤᠳᠤᠷ ᠢ᠋ ᠠᠪᠴᠤ ᠶᠠᠪᠤᠵᠤ ᠣᠯᠠᠰᠢᠷᠠᠭᠤᠯᠤᠨ ᠬᠥᠷᠪᠡᠭᠦᠯᠬᠦ ᠬᠦᠰᠡᠯ ᠲᠡᠢ ᠪᠠᠢᠨᠠ ᠭᠡᠬᠦ ᠳ᠋ᠦ᠍᠂
— ᠬᠡᠷᠬᠢᠬᠦ ᠨᠢ ᠴᠢᠨᠦ ᠬᠡᠷᠡᠭ ᠪᠣᠯᠪᠠᠴᠤ ᠥᠨᠥᠬᠡᠨ ᠳ᠋ᠡᠭᠡᠨ ᠪᠣᠯᠤᠭᠠ ᠦᠭᠡᠢ᠃ ᠡᠨᠡ ᠰᠤᠳᠤᠷ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠭᠠᠯ ᠭᠣᠯᠣᠮᠲᠠ ᠪᠣᠯᠤᠭᠰᠠᠨ ᠠᠭᠤᠷᠠᠭ ᠲᠤ ᠵᠠᠯᠠᠭᠳᠠᠬᠤ ᠤᠴᠢᠷ ᠲᠠᠢ᠃ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠪᠣᠳᠣᠵᠤ ᠡᠨᠡ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠵᠠᠯᠠᠶᠠ᠂ ᠬᠡᠰᠡᠭ ᠲᠡᠭᠡᠨ ᠡᠨᠳᠡ ᠪᠠᠢᠭ ᠭᠡᠪᠡ᠃
— ᠡᠵᠢ ᠲᠠᠨ ᠤ᠋ ᠲᠠᠭᠠᠯᠠᠯ ᠮᠡᠳᠡᠲᠦᠭᠡᠢ ᠭᠡᠵᠦ ᠬᠤᠪᠢᠯᠠᠢ ᠬᠡᠯᠡᠬᠦ ᠳ᠋ᠦ᠍ ᠬᠠᠲᠤᠨ ᠭᠤᠷᠪᠠᠨ ᠳᠠᠪᠬᠤᠷ ᠪᠠᠷᠢᠨᠲᠠᠭᠯᠠᠭᠰᠠᠨ ᠰᠤᠳᠤᠷ ᠢ᠋ᠶ᠋ᠠᠨ ᠳᠠᠬᠢᠨ ᠪᠠᠶᠠᠷ ᠲᠠᠢ ᠪᠠᠷ ᠬᠠᠷᠠᠵᠤ᠂
— ᠬᠠᠷᠢᠨ ᠡᠭᠦᠨ ᠳ᠋ᠦ᠍ ᠶᠠᠮᠠᠷ ᠨᠡᠷᠡ ᠥᠭᠬᠦ ᠪᠢᠯᠡ ᠭᠡᠵᠦ ᠠᠰᠠᠭᠤᠯᠠ᠃ ᠶᠸᠯᠢᠦᠢ ᠴᠥ᠋ᠼᠠᠢ᠄
—《ᠲᠥᠷᠥ ᠪᠠᠷᠢᠬᠤ ᠶ᠋ᠢᠨ ᠦᠨᠡᠨ》 ᠭᠡᠪᠡᠯ ᠶᠠᠮᠠᠷ ᠪᠣᠢ ᠬᠡᠮᠡᠬᠦ ᠳ᠋ᠦ᠍ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠶᠸᠯᠢᠦᠢ ᠴᠥᠼᠡᠢ ᠶ᠋ᠢᠨ ᠥᠭᠭᠦᠭᠰᠡᠨ ᠨᠡᠷᠡ ᠶ᠋ᠢ ᠲᠤᠩᠭᠠᠨ ᠬᠡᠰᠡᠭ ᠪᠣᠳᠣᠭᠠᠳ᠂
—《ᠲᠥᠷᠥ ᠪᠠᠷᠢᠬᠤ ᠦᠨᠡᠨ》 ᠭᠡᠳᠡᠭ ᠰᠠᠢᠬᠠᠨ ᠨᠡᠷᠡ ᠪᠠᠢᠨᠠ᠃ ᠭᠡᠪᠡᠴᠦ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠬᠤᠯᠠᠩ ᠲᠠᠢ ᠪᠠᠢᠬᠤ ᠶ᠋ᠢ ᠪᠣᠳᠣᠭᠠᠳ《ᠠᠯᠲᠠᠨ ᠰᠤᠳᠤᠷ》 ᠭᠡᠪᠡᠯ ᠶᠠᠮᠠᠷ ᠪᠣᠢ? ᠬᠠᠲᠤᠨ ᠤ᠋ ᠥᠭᠭᠦᠭᠰᠡᠨ ᠨᠡᠷᠡ ᠲᠡᠳᠡᠨ ᠳ᠋ᠦ᠍ ᠲᠠᠭᠠᠯᠠᠭᠳᠠᠭᠰᠠᠨ ᠪᠣᠯᠤᠯᠲᠠᠢ᠂《ᠠᠯᠲᠠᠨ ᠰᠤᠳᠤᠷ》 ᠭᠡᠮᠡᠨ ᠠᠮᠠ ᠠᠮᠠ ᠳ᠋ᠠᠭᠠᠨ ᠬᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠡᠳᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠮᠥᠩᠬᠡ ᠬᠦᠦ ᠨᠢ᠄
—《ᠠᠯᠲᠠᠨ ᠰᠤᠳᠤᠷ》᠃ ᠰᠣᠨᠣᠰᠬᠤᠯᠠᠩ ᠲᠠᠢ ᠬᠢᠷᠢᠨᠡ ᠰᠠᠢᠬᠠᠨ ᠰᠣᠨᠣᠰᠤᠭᠳᠠᠵᠤ ᠪᠠᠢᠨᠠ ᠬᠡᠮᠡᠯᠡ᠃
※
ᠠᠭᠤᠷᠠᠭ ᠲᠤ《ᠠᠯᠲᠠᠨ ᠰᠤᠳᠤᠷ》 ᠪᠦᠲᠦᠵᠦ ᠪᠠᠢᠬᠤ ᠳ᠋ᠤ᠌ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠬᠤᠳᠠᠯ ᠬᠠᠭᠤᠷᠮᠠᠭ ᠤ᠋ᠨ ᠰᠠᠯᠬᠢ ᠬᠤᠢᠯᠠᠷᠠᠨ ᠪᠠᠢᠯᠠ᠃ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠶ᠋ᠢ ᠬᠣᠷᠣᠭᠠᠵᠤ ᠴᠢᠳᠠᠯ ᠦᠭᠡᠢ ᠠᠯᠳᠠᠵᠤ᠂ ᠲᠣᠯᠣᠭᠠᠢ ᠪᠠᠨ ᠭᠠᠨᠵᠤᠭᠠᠯᠠᠨ ᠢᠷᠡᠭᠰᠡᠨ ᠠᠪᠲᠤᠯ ᠷᠠᠬᠠᠮᠠᠨ᠂ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠭᠣᠳᠣᠢᠯᠭᠠᠨ ᠰᠠᠭᠤᠵᠠᠢ᠃
— ᠠᠷᠠᠴᠢᠭᠠ ᠦᠭᠡᠢ ᠠᠮᠢᠲᠠᠨ᠂ ᠨᠢᠭᠡ ᠮᠠᠭᠤ ᠡᠪᠦᠭᠡᠨ ᠢ᠋ ᠴᠠᠭᠠᠰᠢ ᠪᠠᠨ ᠬᠠᠷᠠᠭᠤᠯᠵᠤ ᠴᠢᠳᠠᠯ ᠦᠭᠡᠢ ᠠᠯᠳᠠᠴᠢᠬᠠᠳᠠᠭ ᠴᠢᠮᠠᠶ᠋ᠢ ᠲᠥᠷᠥ ᠶ᠋ᠢᠨ ᠰᠠᠢᠳ ᠭᠡᠬᠦ ᠡᠴᠡ ᠪᠡᠨ ᠢᠯᠡᠭᠦᠦ ᠲᠥᠯᠥᠭᠡᠨ ᠡᠴᠡ ᠳᠣᠣᠷᠠ ᠠᠮᠢᠲᠠᠨ ᠪᠣᠯᠬᠤ ᠶ᠋ᠢ ᠴᠢᠨᠢ ᠪᠢ ᠬᠠᠷᠠᠯᠠ᠃᠃ ᠡᠢᠮᠦ ᠬᠥᠮᠦᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠠᠢᠳᠠᠭ᠃ ᠳᠦᠷᠭᠡᠨᠠ ᠬᠠᠲᠤᠨ ᠤ᠋ ᠬᠠᠯᠬᠠᠯᠠᠨ ᠠᠭᠤᠷᠰᠠᠬᠤ ᠳᠠᠭᠤ ᠦᠷᠭᠦᠭᠡᠨ ᠦ᠌ ᠭᠠᠳᠠᠨᠠ ᠪᠠᠢᠭᠠ ᠬᠡᠪᠲᠡᠭᠦᠯ ᠦ᠋ᠳ ᠴᠦ᠍ ᠳᠤᠭᠤᠯᠳᠠᠬᠤ ᠪᠠᠷ ᠴᠢᠩᠭᠠᠷᠠᠨ ᠪᠠᠢᠯᠠ᠃ ᠠᠪᠲᠤᠯ ᠷᠠᠬᠠᠮᠠᠨ ᠯᠠᠪ ᠡᠨᠳᠡ ᠡᠴᠡ ᠠᠮᠢᠳᠤ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠭᠡᠵᠦ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠮᠥᠷᠥᠢᠴᠡᠵᠦ ᠪᠠᠢᠪᠠ᠃ ᠲᠦᠷᠦᠭᠦᠨ ᠡᠴᠡ ᠬᠣᠢᠰᠢ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠠᠪᠲᠤᠯ ᠷᠠᠬᠠᠮᠠᠨ᠄
— ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠵᠢᠭᠤᠲᠠᠭᠰᠠᠭᠠᠷ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠭᠣᠳᠠᠨ ᠬᠠᠨ ᠬᠦᠦ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠨᠢᠭᠤᠭᠳᠠᠵᠠᠢ᠃ ᠨᠢᠭᠡᠨᠲᠡ ᠶᠡᠬᠡ ᠬᠠᠭᠠᠨ ᠤ᠋ ᠬᠦᠦ ᠲᠤᠯᠠ ᠪᠢᠳᠡ ᠬᠠᠯᠳᠠᠨ ᠨᠡᠩᠵᠢᠬᠦ ᠡᠷᠬᠡ ᠦᠭᠡᠢ ᠤᠴᠢᠷ ᠠᠷᠭᠠ ᠪᠤᠶᠤ ᠪᠤᠴᠠᠵᠤ ᠢᠷᠡᠯᠡ᠂ ᠥᠷᠥᠰᠢᠶᠡᠭᠲᠦᠨ ᠭᠡᠬᠦ ᠳ᠋ᠦ᠍᠂
— ᠮᠥᠨ ᠴᠦ ᠲᠠᠭᠠᠷᠠᠭᠰᠠᠨ ᠬᠥᠮᠦᠰ ᠭᠡᠬᠦ ᠪᠡᠷ ᠢ᠋ᠶ᠋ᠡᠨ ᠡᠢᠮᠦ ᠪᠠᠢᠳᠠᠭ ᠪᠠᠢᠬᠤ ᠳᠠ᠃ ᠡᠮᠡ ᠡᠪᠦᠷᠲᠦᠯᠡᠵᠦ ᠬᠡᠪᠲᠡᠬᠦ ᠪᠡᠷ ᠡᠬᠢᠯᠡᠭᠰᠡᠨ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠬᠠᠬᠤ ᠦᠭᠡᠢ ᠨᠢ ᠶᠠᠭᠠᠬᠢᠭᠰᠠᠨ ᠲᠡᠨᠡᠭ ᠦ᠋ᠳ ᠪᠣᠢ᠂ ᠣᠳᠣ ᠬᠡᠷᠬᠢᠬᠦ ᠪᠢᠯᠡ᠃ ᠲᠥᠷᠥᠭᠰᠡᠨ ᠬᠦᠦ ᠮᠢᠨᠢ ᠨᠠᠳᠠ ᠠ᠋ᠴᠠ ᠤᠷᠪᠠᠵᠤ᠂ ᠭᠠᠭᠴᠠ ᠮᠠᠭᠤ ᠰᠠᠢᠳ ᠢ᠋ ᠡᠬᠡ ᠡᠴᠡ ᠪᠡᠨ ᠢᠯᠡᠭᠦᠦ ᠦᠵᠡᠵᠦ ᠰᠠᠭᠤᠨᠠ᠃
ᠠᠪᠲᠤᠯ ᠷᠠᠬᠠᠮᠠᠨ ᠳᠡᠭᠡᠭᠰᠢ ᠪᠣᠰᠤᠨ ᠬᠠᠲᠤᠨ ᠤ᠋ ᠥᠭᠡᠳᠡ ᠡᠴᠡ ᠣᠴᠢᠵᠤ᠂ ᠶᠡᠬᠡ ᠯᠡ ᠴᠢᠬᠤᠯᠠ ᠪᠠᠷ᠂
— ᠲᠡᠭᠦᠨ ᠡᠴᠡ ᠴᠦ᠍ ᠬᠡᠴᠡᠭᠦᠦ ᠬᠡᠷᠡᠭ ᠮᠠᠨᠳᠤᠭᠠᠳ ᠪᠠᠢᠨᠠ᠂ ᠶᠡᠬᠡ ᠬᠠᠲᠤᠨ ᠮᠢᠨᠢ ᠭᠡᠪᠡ᠃
— ᠶᠠᠭᠤᠨ ᠬᠡᠷᠡᠭ ᠮᠠᠨᠳᠤᠭᠠ ᠪᠣᠢ?
— ᠭᠤᠳᠠᠨ ᠬᠠᠨ ᠬᠦᠦ ᠬᠠᠲᠤᠨ ᠲᠠᠨ ᠤ᠋ ᠡᠰᠡᠷᠭᠦ ᠬᠥᠳᠡᠯᠦᠨ ᠪᠣᠰᠬᠤ ᠭᠡᠵᠦ ᠪᠠᠢᠨᠠ ᠭᠡᠵᠦ ᠳᠤᠭᠤᠯᠲᠠᠯᠠ᠃ ᠲᠡᠷᠡ ᠥᠪᠡᠷ ᠦ᠋ᠨ ᠬᠥᠮᠦᠰ ᠢ᠋ᠶ᠋ᠡᠨ ᠬᠡᠳᠦᠢᠨ ᠪᠡᠯᠡᠨ ᠪᠣᠯᠭᠠᠨ ᠬᠠᠲᠤᠨ ᠡᠬᠡ ᠡᠴᠡ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠠᠪᠬᠤ ᠪᠠᠷ ᠵᠣᠷᠢᠭ ᠰᠢᠯᠤᠭᠤᠳᠴᠠᠢ᠃ ᠭᠤᠳᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠤᠳᠠᠬᠤ ᠦᠭᠡᠢ ᠨᠠᠭᠠᠰᠢ ᠭᠠᠷᠬᠤ ᠰᠤᠷᠠᠭ ᠲᠠᠢ ᠭᠡᠬᠦ ᠳ᠋ᠦ᠍ ᠳᠦᠷᠭᠡᠨᠡ ᠬᠠᠲᠤᠨ ᠰᠠᠨᠠᠭᠠ ᠠᠯᠲᠠᠨ᠂ ᠬᠥᠮᠥᠬᠡᠢ ᠪᠡᠨ ᠵᠠᠭᠤᠯᠠ᠃ ᠬᠠᠲᠤᠨ ᠤ᠋ ᠡᠨᠡ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠪᠠᠢᠳᠠᠯ ᠢ᠋ ᠣᠪᠵᠢᠨ ᠠᠰᠢᠭᠯᠠᠬᠤ ᠪᠠᠨ ᠬᠡᠵᠢᠶᠡᠨ ᠡᠴᠡ ᠮᠡᠳᠡᠳᠡᠭ ᠹᠠᠲ᠋ᠢᠮᠠ᠂ ᠬᠠᠲᠤᠨ ᠤ᠋ ᠥᠭᠡᠳᠡ ᠡᠴᠡ ᠨᠢᠯᠤᠭᠤᠨ ᠳᠠᠭᠤ ᠪᠠᠷ᠂
— ᠬᠠᠲᠤᠨᠲᠠᠨ ᠮᠢᠨᠢ᠂ ᠤᠬᠠᠭᠠᠨ ᠢ᠋ ᠨᠢ ᠲᠥᠷᠥᠭᠦᠯᠬᠦ ᠡᠴᠡ ᠰᠡᠳᠬᠢᠯ ᠢ᠋ ᠨᠢ ᠲᠥᠷᠥᠭᠦᠯᠦᠭᠡ ᠦᠭᠡᠢ ᠨᠢ ᠦᠨᠡᠨ ᠪᠢᠯᠡ᠃ ᠲᠥᠷᠥᠭᠦᠯᠦᠭᠰᠡᠨ ᠡᠬᠡ ᠳ᠋ᠡᠭᠡᠨ ᠦᠨᠡᠨ ᠪᠤᠰᠤ ᠬᠠᠨᠳᠤᠵᠤ ᠪᠣᠢ ᠬᠥᠮᠦᠨ ᠡᠬᠡ ᠪᠣᠯᠤᠭᠰᠠᠨ ᠮᠣᠩᠭᠣᠯ ᠳ᠋ᠠᠭᠠᠨ ᠬᠢᠷᠢ ᠦᠨᠡᠨᠴᠢ ᠬᠠᠨᠳᠤᠬᠤ ᠪᠣᠢ? ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠬᠡᠷᠡᠭ ᠪᠢᠯᠡ ᠬᠡᠮᠡᠭᠡᠳ ᠦᠨᠡᠨ ᠬᠤᠳᠠᠯ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠤᠬᠢᠯᠠᠵᠤ ᠡᠬᠢᠯᠡᠯᠡ᠃
— ᠦᠨᠡᠨ ᠳ᠋ᠡᠭᠡᠨ ᠪᠢ ᠬᠦᠦ ᠳ᠋ᠡᠭᠡᠨ ᠭᠣᠮᠣᠳᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠭᠣᠮᠣᠳᠠᠵᠤ ᠪᠠᠢᠨᠠ᠃ ᠪᠢ ᠲᠡᠭᠦᠨ ᠳ᠋ᠦ᠍ ᠡᠨᠡ ᠬᠣᠷᠸᠠ ᠳ᠋ᠤ᠌ ᠠᠮᠢᠰᠬᠤᠯᠯᠠᠬᠤ ᠠᠮᠢ ᠥᠭᠭᠦᠭᠰᠡᠨ ᠪᠢᠯᠡ᠃ ᠨᠢᠭᠡᠨᠲᠡ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠪᠤᠴᠠᠭᠠᠨ ᠠᠪᠴᠤ ᠪᠠᠰᠠ ᠪᠣᠯᠳᠠᠭ ᠶᠣᠰᠣᠨ ᠪᠣᠢ᠃ ᠭᠡᠪᠡᠴᠦ ᠪᠢ ᠬᠦᠦ ᠲᠡᠢ ᠪᠡᠨ ᠨᠢᠭᠤᠷ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠᠯᠴᠠᠨ ᠪᠠᠢᠵᠤ᠂ ᠦᠨᠡᠨ ᠮᠥᠨ ᠢ᠋ᠶ᠋ᠡᠨ ᠣᠯᠤᠯᠴᠠᠬᠤ ᠬᠦᠰᠡᠯ ᠲᠡᠢ ᠲᠤᠯᠠ ᠲᠡᠭᠦᠨ ᠳ᠋ᠦ᠍ ᠵᠠᠬᠢᠳᠠᠯ ᠢᠯᠡᠭᠡᠶᠡ ᠭᠡᠵᠦ ᠬᠡᠯᠡᠭᠡᠳ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠯᠠ᠃ ᠣᠷᠳᠣᠨ ᠤ᠋ ᠠᠯᠪᠠᠲᠤ ᠨᠤᠭᠤᠳ ᠲᠦᠳᠡ ᠤᠳᠠᠯ ᠦᠭᠡᠢ ᠬᠠᠲᠤᠨ ᠤ᠋ ᠭᠠᠷ ᠲᠤ᠌ ᠪᠢᠷ ᠶᠠᠨᠲᠠᠢ ᠪᠠᠷᠢᠭᠤᠯᠤᠨ ᠡᠮᠦᠨᠡ ᠨᠢ ᠴᠠᠭᠠᠰᠤ ᠠᠪᠴᠢᠷᠠᠵᠤ᠂ ᠳᠡᠯᠭᠡᠨ ᠲᠠᠯᠪᠢᠯᠠ᠃ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠭᠠᠷ ᠲᠤ ᠠᠳᠬᠤᠭᠠᠰᠤ ᠲᠠᠢ ᠪᠢᠷ ᠦ᠋ᠨ ᠡᠰᠢ ᠴᠡᠴᠡᠷᠡᠨ ᠬᠥᠳᠡᠯᠵᠦ ᠪᠠᠢᠭᠠ ᠨᠢ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠢᠴᠢᠶᠡᠩᠭᠦᠢᠯᠡᠨ ᠪᠢᠴᠢᠯᠡ᠃
—《ᠡᠬᠡ ᠴᠢᠨᠢ ᠴᠢᠮᠠᠶ᠋ᠢ ᠲᠥᠷᠥᠵᠦ ᠪᠠᠢᠭᠰᠠᠨ ᠲᠡᠷᠡ ᠴᠠᠭ ᠲᠤ ᠲᠩᠷᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠰᠠᠨ ᠮᠡᠲᠦ ᠵᠢᠷᠭᠠᠯ ᠲᠠᠢ ᠪᠠᠢᠯᠠ᠃ ᠥᠭᠡᠳᠡ ᠡᠴᠡ ᠮᠢᠨᠢ ᠦᠨᠡᠭᠡᠴᠢᠯᠡᠬᠦ ᠪᠢᠴᠢᠬᠠᠨ ᠦᠷᠡ ᠴᠢ ᠡᠪᠦᠷ ᠳᠡᠭᠡᠷᠡ ᠮᠢᠨᠢ ᠮᠠᠨᠳᠤᠬᠤ ᠨᠠᠷᠠ ᠰᠢᠭ ᠰᠡᠳᠬᠢᠯ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠭᠡᠷᠡᠯ ᠢ᠋ᠶ᠋ᠡᠨ ᠠᠰᠠᠭᠠᠵᠤ ᠪᠠᠢᠭᠰᠠᠨ᠃ ᠲᠡᠷᠡ ᠭᠡᠷᠡᠯ ᠥᠨᠥ ᠬᠢᠷᠢᠨᠡ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ ᠪᠠᠢᠬᠤ ᠠᠪᠠᠴᠤ ᠡᠪᠦᠷ ᠳᠡᠭᠡᠷᠡ ᠮᠢᠨᠢ ᠮᠠᠨᠳᠤᠵᠤ ᠪᠠᠢᠭᠰᠠᠨ ᠨᠠᠷᠠ ᠵᠢᠷᠭᠠᠬᠤ ᠪᠠᠷ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠣᠷᠣᠭᠰᠠᠨ ᠮᠡᠲᠦ ᠳᠣᠲᠣᠷᠠ ᠬᠠᠷᠠᠩᠭᠤᠢᠯᠠᠨᠠ᠃ ᠥᠨᠥ ᠬᠠᠭᠤᠴᠢᠨ ᠰᠠᠢᠳ ᠨᠠᠷ ᠢ᠋ ᠬᠠᠭᠠᠴᠠᠢᠯᠠᠨ ᠪᠠᠢᠬᠤ ᠴᠢᠨᠢ ᠶᠠᠮᠠᠷ ᠰᠠᠨᠠᠭᠠ ᠠᠭᠤᠯᠵᠤ ᠪᠣᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠲᠤᠯᠠ ᠮᠢᠨᠦ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ᠃ ᠡᠬᠡ ᠡᠴᠡ ᠪᠡᠨ ᠴᠢ ᠶᠠᠭᠤᠨ ᠤ᠋ ᠤᠴᠢᠷ ᠬᠣᠯᠠᠳᠠᠨᠠ ᠪᠣᠢ? ᠬᠡᠷᠪᠡ ᠶᠠᠮᠠᠷ ᠨᠢᠭᠡᠨ ᠰᠠᠨᠠᠭᠠ ᠦᠭᠡᠢ ᠪᠣᠯᠪᠠᠰᠤ ᠦᠳᠲᠡᠷ ᠢᠷᠡᠵᠦ ᠠᠭᠤᠯᠵᠠᠨᠠ ᠤᠤ》 ᠭᠡᠮᠡᠨ ᠪᠢᠴᠢᠵᠦ ᠳᠠᠭᠤᠰᠬᠠᠯᠠ᠃ ᠲᠡᠷᠡ ᠵᠠᠬᠢᠶᠠ ᠪᠠᠨ ᠪᠢᠴᠢᠵᠦ ᠳᠠᠭᠤᠰᠬᠠᠭᠠᠳ᠂
— ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠵᠢᠷᠦᠬᠡ ᠪᠡᠨ ᠵᠣᠷᠢᠭᠤᠯᠤᠨ᠂ ᠤᠨᠲᠠᠬᠤ ᠨᠣᠢᠷ ᠤᠤᠭᠤᠵᠤ ᠢᠳᠡᠬᠦ ᠪᠡᠨ ᠤᠮᠠᠷᠲᠠᠨ ᠪᠠᠢᠬᠤ ᠳ᠋ᠤ᠌ ᠮᠢᠨᠦ ᠬᠥᠪᠡᠭᠦᠳ ᠨᠠᠮᠠᠶ᠋ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠬᠤ ᠨᠢ ᠶᠠᠭᠤᠲᠠᠢ ᠭᠠᠰᠠᠯᠠᠩᠲᠠᠢ ᠭᠡᠮᠡᠨ ᠬᠡᠯᠡᠭᠡᠳ ᠵᠠᠬᠢᠳᠠᠯ ᠢ᠋ ᠬᠤᠢᠯᠠᠨ ᠠᠪᠲᠤᠯ ᠷᠠᠬᠠᠮᠠᠨ ᠳ᠋ᠤ᠌ ᠭᠠᠷ ᠰᠤᠩᠭᠠᠨ ᠥᠭᠭᠦᠯᠡ
ᠠᠪᠲᠤᠯ ᠷᠠᠬᠠᠮᠠᠨ ᠬᠠᠮᠤᠭ ᠬᠥᠯᠥᠰᠥ ᠨᠢ ᠪᠤᠷᠵᠠᠢᠴᠢᠬᠠᠭᠰᠠᠨ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠠᠮᠢᠲᠠᠨ᠂ ᠨᠢᠭᠤᠷ ᠨᠢ ᠦᠯᠦ ᠶᠠᠯᠢᠭ ᠲᠠᠲᠠᠪᠠᠭᠠᠨᠠᠨ ᠴᠡᠴᠡᠷᠡᠭᠰᠡᠭᠡᠷ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠡᠴᠡ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠦᠷᠭᠦᠭᠡᠨ ᠦ᠌ ᠬᠡᠪᠲᠡᠭᠦᠯ ᠦ᠋ᠨ ᠨᠢᠭᠡᠨ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠥᠭᠦᠭᠡ ᠪᠡᠨ ᠨᠢᠳᠤᠷᠴᠤ᠂
— ᠮᠥᠷᠥᠢ ᠪᠡᠨ ᠪᠢ ᠠᠪᠤᠭᠰᠠᠨ ᠰᠢᠦ ᠭᠡᠮᠡᠨ ᠬᠡᠯᠡᠭᠡᠳ ᠨᠢᠳᠦ ᠪᠡᠨ ᠢᠷᠮᠡᠪᠡ᠃
ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠳᠦᠷᠭᠡᠨᠡ ᠬᠠᠲᠤᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠠᠪᠤᠭᠠᠳ ᠬᠢᠭᠰᠡᠨ ᠠᠵᠢᠯ ᠣᠯᠠᠨ ᠪᠠᠢᠯᠠ᠃ ᠲᠡᠷᠡ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠰᠢᠨᠡ ᠰᠢᠨᠡ ᠪᠠᠷᠢᠯᠭᠠ ᠪᠠᠷᠢᠭᠤᠯᠬᠤ ᠠᠵᠢᠯ ᠢ᠋ ᠡᠬᠢᠯᠡᠭᠦᠯᠵᠦ᠂ ᠨᠢᠭᠡᠨ ᠴᠠᠭ ᠲᠤ ᠥᠭᠡᠳᠡᠢ ᠡᠵᠡᠨ ᠬᠠᠭᠠᠨ ᠤ᠋ ᠰᠠᠭᠤᠷᠢ ᠶ᠋ᠢ ᠨᠢ ᠲᠠᠯᠪᠢᠭᠰᠠᠨ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠡᠢᠰᠯᠡᠯ ᠢ᠋ ᠤᠯᠠᠮ ᠥᠩᠭᠡ ᠲᠡᠢ ᠪᠣᠯᠭᠠᠬᠤ ᠬᠦᠰᠡᠯ ᠲᠡᠢ ᠪᠠᠢᠭᠰᠠᠨ ᠲᠤᠯᠠ ᠬᠠᠷᠠᠬᠣᠷᠣᠮ ᠢ᠋ ᠲᠡᠯᠡᠬᠦ ᠪᠣᠳᠣᠯᠭᠠ ᠶᠠᠪᠤᠭᠤᠯᠵᠤ ᠡᠬᠢᠯᠡᠭᠡᠳ ᠪᠠᠢᠪᠠ᠃
ᠥᠭᠡᠳᠡᠢ ᠬᠠᠭᠠᠨ ᠤ᠋ ᠠᠮᠢᠳᠤ ᠰᠡᠷᠡᠭᠦᠨ ᠠᠬᠤᠢ ᠳ᠋ᠠᠭᠠᠨ ᠳᠥᠰᠢᠨ ᠲᠤᠯᠵᠤ ᠪᠠᠢᠭᠰᠠᠨ ᠨᠣᠮᠴᠢ ᠮᠡᠷᠭᠡᠳ ᠰᠠᠢᠳ ᠲᠦᠰᠢᠮᠡᠳ ᠢ᠋ ᠬᠠᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠵᠡᠯᠡᠭᠳᠡᠭᠰᠡᠨ ᠤᠯᠤᠰ ᠣᠷᠣᠨ ᠬᠢᠭᠡᠳ ᠠᠷᠠᠳ ᠲᠦᠮᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠠᠪᠬᠤ ᠲᠠᠲᠠᠪᠤᠷᠢ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠶᠡᠬᠡᠰᠬᠡᠭᠰᠡᠨ ᠨᠢ ᠲᠥᠷᠥ ᠶ᠋ᠢ ᠬᠦᠴᠦᠷᠬᠡᠭᠵᠢᠭᠦᠯᠬᠦ ᠪᠣᠳᠣᠯᠭᠠ ᠲᠠᠢ ᠪᠠᠨ ᠵᠣᠬᠢᠴᠠᠵᠤ ᠥᠭᠬᠦ ᠦᠭᠡᠢ ᠪᠠᠢᠪᠠ᠃
※
ᠡᠨᠡ ᠦᠶᠡ ᠳ᠋ᠦ᠍ ᠮᠥᠩᠬᠡ᠂ ᠶᠸᠯᠢᠦᠢ ᠴᠦᠼᠡᠢ ᠶ᠋ᠢᠨ ᠬᠠᠮᠲᠤ《ᠠᠯᠲᠠᠨ ᠰᠤᠳᠤᠷ》 ᠪᠢᠴᠢᠬᠦ ᠨᠥᠷᠢ ᠶᠡᠬᠡ ᠠᠵᠢᠯ ᠢ᠋ ᠳᠠᠭᠤᠰᠬᠠᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠢᠷᠡᠯᠡ᠃
ᠮᠥᠩᠬᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠰᠥᠨᠢ ᠳᠦᠯᠢ ᠪᠡᠷ ᠨᠢᠭᠡᠨ ᠬᠥᠮᠦᠨ ᠢᠷᠡᠭᠰᠡᠨ ᠨᠢ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠬᠦᠦ ᠬᠥᠶᠦᠭ ᠪᠠᠢᠪᠠ᠃ ᠲᠡᠷᠡ ᠰᠠᠷᠬᠤᠳ ᠬᠦᠷᠲᠡᠭᠡᠳ ᠨᠡᠯᠢᠶᠡᠳ ᠬᠠᠯᠠᠮᠴᠠᠭᠰᠠᠨ ᠨᠢ ᠬᠠᠷᠠᠭᠳᠠᠨᠠ᠃ ᠶᠠᠮᠠᠷ ᠰᠠᠨᠠᠭᠠ ᠲᠡᠭᠡᠭᠡᠨ ᠢᠷᠡᠭᠰᠡᠨ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠭᠦᠶᠦᠭ᠂ ᠮᠥᠩᠬᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠩᠭᠦᠲᠡ ᠪᠡᠨ᠂
— ᠰᠠᠷᠬᠤᠳ ᠠᠯᠢ ᠭᠡᠵᠦ ᠠᠮᠤᠷ ᠮᠡᠨᠳᠦ ᠪᠡᠨ ᠠᠰᠠᠭᠤᠵᠤ ᠵᠠᠪᠳᠤᠯ ᠦᠭᠡᠢ ᠠᠶᠠᠭᠠᠴᠢᠨ᠂ ᠰᠢᠪᠡᠭᠴᠢᠳ ᠢ᠋ ᠳᠠᠭᠤᠳᠠᠭᠤᠯᠤᠨ ᠠᠭᠰᠤᠮᠨᠠᠬᠤ᠂ ᠵᠠᠷᠯᠢᠭ ᠪᠠᠭᠤᠯᠭᠠᠬᠤ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠡᠯᠡᠵᠦ᠂ ᠲᠦᠳᠡ ᠤᠳᠠᠯ ᠦᠭᠡᠢ ᠭᠦᠶᠦᠭ ᠦ᠋ᠨ ᠡᠮᠦᠨᠡᠬᠢ ᠶᠠᠪᠠᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠮᠦᠨᠡᠲᠦ ᠭᠠᠵᠠᠷ ᠠ᠋ᠴᠠ ᠠᠪᠴᠢᠷᠠᠭᠤᠯᠤᠭᠰᠠᠨ ᠬᠠᠲᠠᠭᠤ ᠳᠠᠷᠠᠰᠤ᠂ ᠴᠢᠨᠠᠭᠰᠠᠨ ᠮᠢᠬᠠ ᠲᠠᠯᠪᠢᠭᠳᠠᠪᠠ᠃ ᠰᠥᠨᠢ ᠳᠦᠯᠢ ᠪᠡᠷ ᠬᠠᠯᠠᠮᠴᠠᠭᠤᠬᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠬᠠᠨ ᠬᠦᠦ ᠬᠥᠶᠦᠭ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠢᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠮᠥᠩᠬᠡ ᠲᠡᠢ ᠨᠡᠩ ᠳᠣᠲᠣᠨᠣ ᠨᠢᠭᠡᠨ᠃ ᠲᠡᠳᠡ ᠥᠪᠡᠷ ᠥᠪᠡᠷ ᠦ᠋ᠨ ᠡᠴᠢᠭᠡ ᠲᠡᠢ ᠴᠦ᠍ ᠨᠢᠭᠡᠨ ᠬᠠᠭᠠᠨ ᠤ᠋ ᠠᠴᠢ ᠬᠦᠦ ᠪᠢᠯᠡ᠃ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠡᠷᠭᠦᠭᠰᠡᠨ ᠠᠬᠠ ᠳᠡᠭᠦᠦ ᠶ᠋ᠢᠨ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠡᠨᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠳᠤᠮᠳᠠ ᠪᠣᠢ᠃ ᠬᠣᠵᠢᠮ ᠪᠠᠷᠠᠭᠤᠨ ᠵᠦᠭ ᠲᠦ᠍ ᠬᠢᠭᠰᠡᠨ ᠬᠠᠨ ᠬᠥᠪᠡᠭᠦᠳ ᠦ᠋ᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠬᠠᠮᠲᠤ ᠣᠷᠣᠯᠴᠠᠨ ᠭᠠᠷᠮᠠᠭᠠᠢ ᠭᠠᠪᠢᠶᠠ ᠪᠠᠢᠭᠤᠯᠵᠤ᠂ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠵᠠᠬᠠ ᠬᠠᠶᠠᠭᠠ ᠶ᠋ᠢ ᠲᠡᠯᠡᠵᠦ᠂ ᠡᠪᠦᠭᠡ ᠡᠴᠢᠭᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠨ ᠪᠣᠳᠣᠯᠭᠠ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠨ ᠭᠡᠳᠡᠭ ᠲᠦ᠍ ᠪᠡᠨ ᠪᠠᠬᠠᠷᠬᠠᠯ ᠲᠠᠢ ᠶᠠᠪᠤᠳᠠᠭ ᠪᠥᠯᠥᠭᠡ᠃
ᠰᠥᠨᠢ ᠳᠦᠯᠢ ᠪᠣᠯᠤᠭᠰᠠᠨ ᠪᠠᠢᠨᠠ᠂ ᠬᠠᠮᠢᠭᠠ ᠨᠢ ᠢᠩᠭᠢᠵᠦ ᠰᠠᠷᠬᠤᠳ ᠳᠠᠭᠠᠯᠠᠭᠠ ᠪᠣᠢ? ᠭᠡᠵᠦ ᠮᠥᠩᠬᠡ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌᠂
— ᠬᠠᠲᠤᠨ ᠡᠬᠡ ᠲᠡᠢ ᠠᠭᠤᠯᠵᠠᠵᠤ ᠠᠭᠤᠷ ᠰᠠᠭᠭᠠᠬᠤ ᠲᠤᠯᠠ ᠰᠠᠷᠬᠤᠳ ᠲᠠᠭᠠᠯᠠᠮᠠᠷ ᠰᠠᠨᠠᠭᠳᠠᠨ᠂ ᠰᠥᠨᠢ ᠪᠣᠯᠲᠠᠯᠠ ᠵᠤᠭᠠᠴᠠᠯᠠ ᠭᠡᠮᠡᠨ ᠠᠵᠢᠭ ᠦᠭᠡᠢ ᠴᠢᠷᠠᠢᠯᠠᠨ ᠬᠡᠯᠡᠬᠦ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠦᠯᠦ ᠮᠡᠳᠡᠭ ᠴᠢᠢᠯᠡᠭᠡᠨᠡᠬᠦ ᠨᠢᠯᠪᠤᠰᠤ ᠲᠦᠳᠡ ᠤᠳᠠᠯ ᠦᠭᠡᠢ ᠤᠬᠤᠷᠬᠠᠢ ᠤᠷᠤᠭᠤ ᠪᠠᠨ ᠰᠢᠩᠭᠡᠨ ᠣᠷᠣᠯᠠ᠃ ᠡᠨᠡ ᠬᠥᠮᠦᠨ ᠬᠠᠲᠤᠨ ᠡᠬᠡ ᠡᠴᠡ ᠪᠡᠨ ᠶᠠᠭᠠᠬᠢᠪᠠᠴᠤ ᠲᠠᠭᠠᠲᠠᠢ ᠦᠭᠡ ᠰᠣᠨᠣᠰᠤᠭᠠ ᠦᠭᠡᠢ ᠨᠢ ᠬᠠᠷᠠᠪᠠᠴᠤ ᠢᠯᠡᠳᠲᠡ ᠠᠵᠢ᠃
—ᠨᠢᠭᠡᠨ ᠴᠠᠭ ᠲᠤ᠌ ᠡᠴᠢᠭᠡ ᠮᠢᠨᠢ ᠨᠠᠮᠠᠶ᠋ᠢ ᠡᠷᠡ ᠬᠥᠮᠦᠨ ᠰᠢᠭ ᠪᠠᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠬᠦ ᠳ᠋ᠦ᠍ ᠢᠴᠢᠬᠦ ᠳ᠋ᠡᠭᠡᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠡᠴᠡ ᠭᠠᠷᠤᠭᠠᠳ ᠰᠠᠷᠬᠤᠳ ᠲᠠᠭᠠᠯᠠᠵᠤ ᠪᠠᠢᠭᠰᠠᠨ᠃ ᠬᠠᠷᠢᠨ ᠥᠨᠥᠳᠥᠷ ᠬᠠᠲᠤᠨ ᠡᠬᠡ ᠮᠢᠨᠢ ᠨᠠᠮᠠᠶ᠋ᠢ《ᠬᠠᠭᠠᠨ ᠪᠣᠯᠬᠤ ᠬᠤᠪᠢ ᠦᠭᠡᠢ》 ᠭᠡᠵᠦ ᠬᠡᠯᠡᠭᠰᠡᠨ ᠦ᠌ ᠤᠴᠢᠷ ᠠᠭᠤᠷᠰᠠᠬᠤ ᠳ᠋ᠠᠭᠠᠨ ᠢᠩᠭᠢᠵᠦ ᠰᠠᠷᠬᠤᠳ ᠲᠠᠭᠠᠯᠠᠯᠠ᠃
ᠮᠥᠩᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠩᠷᠢ ᠪᠣᠯᠤᠭᠰᠠᠨ ᠥᠭᠡᠳᠡᠢ ᠬᠠᠭᠠᠨ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠪᠠ᠃ ᠬᠥᠶᠦᠭ ᠰᠢᠭ ᠪᠠᠭᠠ ᠪᠠᠭᠠ ᠪᠠᠷ ᠰᠠᠷᠬᠤᠳ ᠳᠠᠭᠠᠯᠠᠭᠰᠠᠭᠠᠷ᠂ ᠠᠭᠠᠵᠢᠮ ᠳ᠋ᠠᠭᠠᠨ ᠤᠯᠠᠮ ᠳᠤᠷᠠᠯᠠᠬᠤ ᠪᠣᠯᠤᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠬᠥᠶᠦᠭ ᠡᠴᠢᠭᠡ ᠶ᠋ᠢ ᠪᠡᠨ ᠪᠣᠳᠣᠪᠠᠯ ᠥᠨᠳᠥᠷ ᠨᠢᠷᠤᠭᠤ ᠲᠠᠢ᠂ ᠬᠠᠩᠬᠠᠷ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠨᠢᠭᠡᠨ ᠴᠦ᠍ ᠡᠨᠡ ᠤᠳᠠᠭᠠ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ ᠮᠥᠩᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠡᠴᠢᠭᠡ ᠬᠠᠭᠠᠨ ᠲᠠᠢ ᠪᠠᠨ ᠲᠤᠩ ᠴᠤ᠌ ᠢᠵᠢᠯᠬᠡᠨ ᠬᠠᠷᠠᠭᠳᠠᠯᠠ᠃
— ᠠᠮᠠᠨ ᠳ᠋ᠤ᠌ ᠣᠷᠣᠬᠤ ᠳ᠋ᠠᠭᠠᠨ ᠠᠯᠲᠠᠨ ᠮᠥᠩᠭᠥᠨ ᠵᠢᠷᠠᠭᠠᠬᠠᠢ᠂ ᠠᠮᠠᠨ ᠠ᠋ᠴᠠ ᠭᠠᠷᠬᠤ ᠳ᠋ᠠᠭᠠᠨ ᠠᠷᠰᠯᠠᠨ ᠵᠠᠭᠠᠨ ᠯᠤᠭᠠ ᠠᠳᠠᠯᠢ ᠭᠡᠵᠦ ᠪᠣᠷᠣ ᠳᠠᠷᠠᠰᠤ ᠶ᠋ᠢ ᠬᠡᠯᠡᠳᠡᠭ ᠨᠢ ᠦᠨᠡᠨ ᠦᠭᠡ ᠰᠢᠦ ᠬᠡᠮᠡᠬᠦ ᠳ᠋ᠦ᠍ ᠬᠥᠶᠦᠭ ᠮᠥᠩᠬᠡ ᠶ᠋ᠢᠨ ᠦᠭᠡ ᠶ᠋ᠢ ᠲᠠᠰᠤᠯᠤᠨ᠂
— ᠪᠢ ᠴᠢᠮᠠ ᠳ᠋ᠤ᠌ ᠠᠲᠠᠭᠠᠷᠬᠠᠬᠤ ᠶᠤᠮ ᠭᠡᠵᠦ ᠴᠢᠩᠭᠠ ᠳᠠᠭᠤ ᠪᠠᠷ ᠬᠡᠯᠡᠯᠡ᠃ ᠬᠠᠯᠠᠮᠴᠠᠭᠤ ᠳ᠋ᠠᠭᠠᠨ ᠬᠡᠯᠡᠵᠦ ᠪᠠᠢᠭᠠ ᠴᠤ᠌ ᠰᠡᠳᠬᠢᠯ ᠦ᠋ᠨ ᠤᠭ ᠠ᠋ᠴᠠ ᠥᠭᠦᠯᠡᠵᠦ ᠪᠣᠢ ᠨᠢ ᠳᠠᠭᠤᠨ ᠤ᠋ ᠬᠢᠨᠢ ᠥᠩᠭᠡᠨ ᠡᠴᠡ ᠲᠣᠳᠣᠬᠠᠨ᠃
— ᠶᠠᠭᠤᠨ ᠳ᠋ᠤ᠌ ᠲᠡᠭᠡᠲᠡᠯᠡ ᠠᠲᠠᠭᠠᠷᠬᠠᠳᠠᠭ ᠪᠢᠯᠡ? ᠬᠠᠷᠢᠨ ᠴᠤ᠌ ᠴᠢ ᠠᠲᠠᠭᠠᠷᠬᠠᠮᠠᠷ ᠪᠤᠰᠤ ᠤᠤ? ᠡᠴᠢᠭᠡ ᠬᠠᠭᠠᠨ ᠴᠢᠨᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠵᠤ᠂ ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠬᠦ ᠶ᠋ᠢ ᠴᠢᠨᠢ ᠨᠢᠳᠦ ᠪᠡᠷ ᠦᠵᠡᠵᠦ᠂ ᠴᠢ ᠬᠠᠨ ᠬᠦᠦ ᠶ᠋ᠢᠨ ᠨᠡᠷᠡ ᠠᠯᠳᠠᠷ ᠢ᠋ᠶ᠋ᠠᠨ ᠳᠠᠭᠤᠳᠠᠭᠤᠯᠤᠨ᠂ ᠬᠦᠨᠳᠦ ᠲᠡᠢ ᠭᠠᠪᠢᠶᠠ ᠣᠯᠠᠨ ᠢ᠋ ᠪᠠᠢᠭᠤᠯᠤᠭᠰᠠᠨ ᠠᠲᠠᠯᠠ ᠨᠠᠳᠠ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠠᠲᠠᠭᠠᠷᠬᠠᠨ ᠶᠠᠪᠤᠳᠠᠭ ᠪᠢᠯᠡ᠃ ᠰᠡᠳᠬᠢᠯ ᠳᠣᠲᠣᠷᠠᠬᠢ ᠦᠨᠡᠨ ᠢ᠋ᠶ᠋ᠡᠨ ᠬᠠᠷᠠ ᠬᠣᠣᠷ ᠦᠭᠡᠢ ᠪᠡᠷ ᠨᠢᠭᠤᠯ ᠦᠭᠡᠢ ᠬᠡᠯᠡᠵᠦ ᠪᠠᠢᠭᠠ ᠭᠦᠶᠦᠭ ᠦ᠋ᠨ ᠡᠨᠡ ᠦᠭᠡ ᠲᠡᠭᠦᠨ ᠡᠴᠡ ᠵᠥᠪᠬᠡᠨ ᠰᠣᠭᠲᠣᠭᠤ ᠳ᠋ᠠᠭᠠᠨ ᠭᠠᠷᠤᠭᠰᠠᠨ ᠦᠭᠡ ᠪᠢᠰᠢ ᠪᠣᠯᠤᠯᠲᠠᠢ᠃
— ᠴᠢ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠬᠣᠶᠠᠷ ᠡᠬᠡ ᠶ᠋ᠢᠨ ᠬᠡᠪᠡᠯᠢ ᠡᠴᠡ ᠤᠨᠠᠭᠰᠠᠨ ᠡᠭᠡᠯ ᠪᠡᠶᠡᠲᠦ ᠬᠥᠮᠦᠰ ᠠᠲᠠᠯᠠ ᠴᠢ ᠡᠬᠡ ᠶ᠋ᠢᠨ ᠬᠠᠢᠷᠠ ᠶ᠋ᠢ ᠬᠠᠨᠲᠠᠯᠠ ᠬᠦᠷᠲᠡᠵᠦ᠂ ᠬᠠᠷᠢᠨ ᠪᠢ ᠡᠬᠡ ᠶ᠋ᠢᠨ ᠬᠠᠢᠷᠠ ᠶ᠋ᠢ ᠬᠠᠢᠨ ᠬᠦᠰᠡᠮᠵᠢᠯᠡᠵᠦ ᠥᠰᠴᠡᠢ ᠭᠡᠪᠡ᠃ ᠲᠡᠷᠡ ᠥᠪᠡᠷ ᠦ᠋ᠨ ᠡᠬᠡ ᠲᠡᠢ ᠪᠡᠨ ᠦᠭᠡ ᠵᠥᠷᠢᠭᠰᠡᠨ ᠦ᠌ ᠤᠯᠠᠮ ᠠ᠋ᠴᠠ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠪᠣᠳᠣᠨ ᠪᠠᠶ᠋ᠢᠬᠰᠠᠨ ᠡᠷᠲᠡᠨ ᠦ᠌ ᠭᠣᠮᠣᠳᠠᠯ ᠢᠩᠭᠢᠵᠦ ᠰᠡᠲᠡᠷᠡᠭᠰᠡᠨ ᠬᠡᠷᠡᠭ ᠪᠠᠢᠪᠠ᠃ ᠬᠥᠶᠦᠭ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠭᠡᠪᠡᠴᠦ ᠪᠢ ᠡᠨᠡ ᠦᠭᠡᠨ ᠳ᠋ᠦ᠍ ᠭᠣᠮᠣᠳᠠᠭᠰᠠᠨ ᠬᠡᠷᠡᠭ ᠪᠢᠰᠢ᠂ ᠬᠠᠷᠢᠨ ᠬᠠᠲᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠤ ᠰᠡᠳᠦᠭᠡᠳ ᠪᠠᠢᠭᠠ ᠶ᠋ᠢ ᠤᠬᠠᠵᠤ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠪᠡ᠃ ᠮᠥᠩᠬᠡ ᠴᠦ᠍ ᠭᠦᠶᠦᠭ ᠦ᠋ᠨ ᠠᠳᠠᠯᠢ ᠳᠦᠷᠭᠡᠨᠠ ᠬᠠᠲᠤᠨ ᠤ᠋ ᠶᠠᠭᠤ ᠰᠠᠳᠤᠨ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠬᠡᠰᠡᠭ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠵᠠᠭᠠᠯᠠ᠃ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠡᠬᠡ ᠳ᠋ᠡᠭᠡᠨ ᠭᠣᠮᠣᠳᠠᠭᠰᠠᠨ ᠬᠠᠨ ᠬᠦᠦ ᠳᠣᠲᠣᠷᠠ ᠪᠠᠨ ᠪᠣᠯ ᠬᠠᠲᠤᠨ ᠡᠬᠡ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠪᠤᠬᠢᠨᠢᠳᠤᠵᠤ ᠪᠠᠢᠯᠠ᠃
ᠭᠦᠶᠦᠭ ᠦᠨᠡᠨ ᠳ᠋ᠡᠭᠡᠨ ᠡᠬᠡ ᠶ᠋ᠢᠨ ᠬᠠᠢᠷᠠ ᠪᠠᠷ ᠳᠤᠲᠠᠭᠤ ᠥᠰᠦᠭᠰᠡᠨ ᠭᠡᠵᠦ ᠥᠪᠡᠷ ᠢ᠋ ᠪᠡᠨ ᠪᠣᠳᠣᠵᠤ ᠶᠠᠪᠤᠳᠠᠭ ᠨᠢ ᠠᠷᠭᠠ ᠦᠭᠡᠢ ᠦᠨᠡᠨ ᠦᠭᠡ ᠪᠢᠵᠡ᠃ ᠬᠥᠨᠵᠢᠯᠡ ᠳ᠋ᠡᠭᠡᠨ ᠣᠷᠣᠬᠤ ᠵᠠᠪ ᠦᠭᠡᠢ ᠳᠠᠢᠳᠤᠨ ᠶᠠᠪᠤᠭᠰᠠᠨ ᠬᠠᠭᠠᠨ ᠡᠵᠡᠨ ᠦ᠌ ᠡᠵᠡᠯᠡᠨ ᠲᠦᠷᠢᠮᠡᠬᠡᠢᠯᠡᠯᠲᠡ ᠬᠥᠶᠦᠭ ᠢ᠋ ᠬᠠᠲᠤᠨ ᠡᠬᠡ ᠡᠴᠡ ᠪᠡᠨ ᠬᠣᠯᠠ ᠥᠰᠬᠦ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠴᠦ᠍ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠬᠥᠶᠦᠭ ᠢ᠋ ᠲᠥᠷᠥᠭᠰᠡᠨ ᠳᠠᠷᠤᠢ ᠳ᠋ᠤ᠌ ᠬᠥᠬᠥᠭᠦᠯ ᠡᠬᠡ ᠶ᠋ᠢᠨ ᠭᠠᠷ ᠳᠡᠭᠡᠷᠡ ᠦᠯᠡᠳᠡᠭᠡᠨ᠂ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠭᠠᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠠᠳ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠢᠷᠡᠬᠦ ᠳ᠋ᠦ᠍ ᠬᠦᠦ ᠨᠢ ᠥᠰᠴᠦ ᠲᠣᠮᠣ ᠪᠣᠯᠤᠭᠰᠠᠨ ᠪᠠᠢᠭᠰᠠᠨ ᠲᠤᠯᠠ ᠡᠬᠡ ᠬᠦᠦ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠲᠡᠳᠦᠢ ᠯᠡ ᠣᠢᠷᠠ ᠳᠣᠲᠣᠨᠣ ᠪᠠᠢᠬᠤ ᠴᠠᠭ ᠬᠤᠭᠤᠴᠠᠭᠠ ᠪᠠᠢᠭᠠ ᠦᠭᠡᠢ ᠶ᠋ᠢᠨ ᠳᠡᠭᠡᠷᠡ᠂ ᠬᠡᠳᠦᠢ ᠬᠠᠮᠲᠤ ᠪᠠᠢᠭᠰᠠᠨ ᠴᠤ ᠡᠳᠦᠷ ᠡᠴᠡ ᠡᠳᠦᠷ ᠠᠯᠤᠰᠷᠠᠭᠰᠠᠭᠠᠷ ᠪᠠᠢᠭᠰᠠᠨ ᠡᠬᠡ ᠦᠷᠡ ᠬᠣᠶᠠᠷ ᠤ᠋ᠨ ᠬᠠᠷᠢᠴᠠᠭᠠ ᠨᠢᠭᠡ ᠯᠡ ᠮᠡᠳᠡᠬᠦ ᠳ᠋ᠦ᠍ ᠪᠡᠶᠡ ᠪᠠᠶᠠᠨ ᠢ᠋ᠶ᠋ᠠᠨ ᠦᠯᠦ ᠣᠢᠯᠠᠭᠠᠯᠴᠠᠬᠤ ᠳ᠋ᠤ᠌ ᠬᠦᠷᠭᠡᠵᠡᠢ᠃
ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠤ᠋ ᠬᠤᠪᠢ ᠳ᠋ᠤ᠌ ᠬᠥᠬᠡ ᠮᠣᠩᠭᠣᠯ ᠬᠥᠨᠵᠢᠯᠡ ᠳ᠋ᠡᠭᠡᠨ ᠣᠷᠣᠬᠤ ᠵᠠᠪ ᠦᠭᠡᠢ ᠳᠠᠢᠳᠤᠨ ᠶᠠᠪᠤᠬᠤ ᠲᠡᠷᠡ ᠴᠠᠭ ᠲᠤ᠌ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠳ᠋ᠡᠭᠡᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠵᠤ᠂ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠰᠠᠷᠠᠭᠴᠢ ᠡᠬᠡ ᠶ᠋ᠢᠨ ᠭᠠᠷ ᠬᠠᠷᠠᠭᠤᠯᠤᠯ ᠦᠭᠡᠢ ᠥᠰᠬᠡᠭᠰᠡᠨ ᠨᠢ ᠦᠨᠡᠨ᠃ ᠲᠡᠷᠡ ᠬᠥᠬᠥᠭᠦᠯ ᠡᠬᠡ ᠴᠦ᠍ ᠠᠪᠤᠯ ᠦᠭᠡᠢ ᠪᠡᠷ ᠥᠪᠡᠷ ᠦ᠋ᠨ ᠬᠥᠬᠥ ᠶ᠋ᠢ ᠬᠥᠬᠥᠭᠦᠯᠵᠦ᠂ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠥᠰᠬᠡᠨᠡ ᠭᠡᠮᠡᠨ ᠰᠡᠳᠬᠢᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠳᠤᠮᠳᠠ ᠤᠯᠠᠮᠵᠢᠯᠠᠭᠳᠠᠨ ᠢᠷᠡᠭᠰᠡᠨ ᠬᠥᠬᠥᠭᠦᠯ ᠡᠬᠡ ᠬᠢᠭᠡᠳ ᠠᠰᠠᠷᠠᠨ ᠬᠥᠮᠦᠵᠢᠭᠦᠯᠦᠭᠴᠢ ᠶ᠋ᠢ ᠲᠤᠯᠤᠢ ᠶ᠋ᠢᠨ ᠭᠡᠷ ᠤᠷᠤᠭᠤ ᠶᠠᠪᠤᠭᠤᠯᠬᠤ ᠬᠡᠷᠡᠭ ᠪᠥᠷᠲᠡ ᠬᠠᠲᠤᠨ ᠡᠬᠡ ᠬᠢᠭᠡᠳ ᠥᠭᠡᠯᠦᠨ ᠡᠬᠡ ᠳ᠋ᠦ᠍ ᠲᠤᠯᠭᠠᠷᠠᠵᠤ ᠪᠠᠢᠭᠰᠠᠨ ᠦᠭᠡᠢ᠃ ᠬᠡᠳᠦᠢ ᠰᠣᠷᠬᠠᠭᠲᠠᠨᠢ᠂ ᠳᠦᠷᠭᠡᠨᠡ ᠬᠣᠶᠠᠭᠤᠯᠠ ᠡᠵᠡᠨ ᠬᠠᠭᠠᠨ ᠤ᠋ ᠪᠡᠷᠢ᠂ ᠡᠬᠡ ᠬᠠᠲᠤᠳ ᠬᠡᠳᠦᠢ ᠴᠦ᠍ ᠡᠨᠡ ᠬᠣᠶᠠᠷ ᠡᠬᠡ ᠶ᠋ᠢᠨ ᠮᠥᠨ ᠴᠢᠨᠠᠷ ᠥᠨᠥ ᠦᠷᠡ ᠬᠡᠦᠬᠡᠳ ᠦ᠋ᠳ ᠢ᠋ ᠨᠢ ᠢᠩᠭᠢᠵᠦ ᠠᠭᠤᠯᠵᠠᠭᠤᠯᠬᠤ ᠳ᠋ᠤ᠌ ᠬᠦᠷᠭᠡᠬᠦ ᠶᠦᠮ ᠭᠡᠵᠦ ᠬᠡᠨ ᠰᠠᠨᠠᠬᠤ ᠪᠢᠯᠡ᠃
ᠬᠡᠳᠦᠢ ᠲᠣᠮᠣ ᠡᠷᠡ ᠪᠣᠯᠤᠭᠰᠠᠨ ᠴᠤ ᠬᠥᠮᠦᠨ ᠦ᠌ ᠯᠡ ᠦᠷᠡ ᠶᠦᠮ ᠪᠣᠯᠬᠣᠷ ᠡᠬᠡ ᠶ᠋ᠢᠨ ᠬᠠᠢᠷᠠ ᠶ᠋ᠢ ᠬᠦᠰᠡᠮᠵᠢᠯᠡᠬᠦ ᠬᠥᠶᠦᠭ ᠢᠩᠭᠢᠵᠦ ᠮᠥᠩᠬᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍
ᠠᠭᠤᠷᠰᠠᠬᠤ ᠴᠤ ᠪᠢᠰᠢ᠂ ᠭᠣᠮᠣᠳᠠᠬᠤ ᠴᠤ ᠪᠢᠰᠢ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠳᠦᠷᠭᠡᠨᠡ ᠬᠠᠲᠤᠨ ᠦᠷᠭᠦᠭᠡᠨ ᠳ᠋ᠡᠭᠡᠨ ᠭᠠᠭᠴᠠᠭᠠᠷ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠪᠠᠢᠯᠠ᠃ ᠥᠨᠥ ᠬᠢᠷᠢ ᠤᠬᠠᠭᠠᠨ ᠰᠠᠭᠤᠵᠤ ᠭᠦᠢᠴᠡᠭᠡ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠬᠤ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ《ᠪᠡᠶᠡ ᠶ᠋ᠢ ᠨᠢ ᠲᠥᠷᠥᠭᠦᠯᠬᠦ ᠡᠴᠡ᠂ ᠰᠡᠳᠬᠢᠯ ᠢ᠋ ᠨᠢ ᠲᠥᠷᠥᠭᠦᠯᠬᠦ ᠦᠭᠡᠢ ᠭᠡᠵᠦ ᠶᠠᠷᠢᠳᠠᠭ ᠦᠨᠡᠨ ᠪᠣᠯᠤᠯᠲᠠᠢ》 ᠭᠡᠮᠡᠨ ᠪᠣᠳᠣᠪᠠ᠃ ᠬᠡᠳᠦᠬᠡᠨ ᠴᠠᠭ ᠤ᠋ᠨ ᠡᠮᠦᠨᠡ ᠡᠨᠡ ᠦᠷᠭᠦᠭᠡᠨ ᠳ᠋ᠦ᠍ ᠬᠦᠦ ᠬᠥᠶᠦᠭ ᠨᠢ ᠶᠡᠬᠡᠳᠡ ᠠᠭᠤᠷᠰᠠᠨ ᠪᠠᠢᠭᠰᠠᠨ ᠪᠢᠯᠡ᠃ ᠴᠣᠬᠣᠮ ᠳ᠋ᠠᠭᠠᠨ ᠪᠣᠯ ᠬᠥᠶᠦᠭ᠂ ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ ᠪᠠᠷᠠᠯᠬᠠᠬᠤ ᠪᠠᠷ ᠣᠷᠣᠵᠤ ᠢᠷᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠪᠣᠳᠣᠯ ᠰᠠᠨᠠᠭᠠ ᠶ᠋ᠢ ᠥᠭᠦᠯᠡᠬᠦ ᠰᠠᠨᠠᠭᠠ ᠲᠠᠢ ᠪᠠᠢᠵᠠᠢ᠃
— ᠡᠴᠢᠭᠡ ᠬᠠᠭᠠᠨ ᠮᠥᠩᠬᠡ ᠲᠩᠷᠢ ᠳ᠋ᠡᠭᠡᠨ ᠣᠲᠣᠭᠠᠳ ᠬᠡᠳᠦᠨ ᠵᠢᠯ ᠪᠣᠯᠤᠯᠠ᠃ ᠬᠠᠲᠤᠨ ᠡᠬᠡ ᠲᠠ ᠣᠢᠷᠠ ᠬᠣᠯᠠ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠤ᠂ ᠳᠠᠷᠠᠭᠠ ᠶ᠋ᠢᠨ ᠬᠠᠭᠠᠨ ᠣᠷᠣ ᠵᠠᠯᠭᠠᠬᠤ ᠬᠥᠮᠦᠨ ᠢ᠋ ᠰᠣᠩᠭᠣᠬᠤ ᠴᠠᠭ ᠪᠣᠯᠤᠭᠰᠠᠨ ᠪᠢᠰᠢ ᠤᠤ ᠭᠡᠮᠡᠨ ᠬᠡᠯᠡᠭᠰᠡᠨ ᠦᠭᠡ ᠳᠦᠷᠭᠡᠨᠡ ᠬᠠᠲᠤᠨ ᠳ᠋ᠤ᠌《ᠨᠠᠮᠠᠶ᠋ᠢ ᠬᠠᠭᠠᠨ ᠪᠣᠯᠭᠠ》 ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠲᠠᠢ ᠠᠳᠠᠯᠢ ᠤᠳᠬᠠ ᠲᠠᠢ ᠰᠣᠨᠣᠰᠤᠭᠳᠠᠵᠠᠢ᠃ ᠬᠥᠶᠦᠭ ᠢ᠋ ᠣᠷᠣᠵᠤ ᠢᠷᠡᠬᠦ ᠡᠴᠡ ᠡᠮᠦᠨᠡ ᠲᠡᠷᠡ ᠪᠡᠷ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠶ᠋ᠢ ᠨᠢᠭᠤᠵᠤ ᠪᠠᠢᠭᠠ ᠭᠤᠳᠠᠨ ᠬᠦᠦ ᠪᠡᠨ ᠬᠡᠷᠬᠢᠨ ᠠᠷᠭᠠᠳᠠᠬᠤ ᠲᠤᠬᠠᠢ ᠪᠣᠳᠣᠯ ᠪᠣᠯᠤᠨ ᠲᠣᠯᠣᠭᠠᠢ ᠪᠠᠨ ᠭᠠᠰᠢᠯᠭᠠᠨ ᠪᠠᠢᠭᠰᠠᠨ ᠪᠢᠯᠡ᠃ ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠠᠪᠤᠭᠰᠠᠨ ᠨᠢ ᠲᠥᠷᠥᠭᠰᠡᠨ ᠬᠦᠦ ᠭᠤᠳᠠᠨ ᠳ᠋ᠤ᠌ ᠬᠦᠷᠲᠡᠯᠡ ᠳᠠᠭᠠ ᠲᠠᠢ ᠰᠠᠨᠠᠭᠳᠠᠬᠤ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠬᠢᠵᠦ ᠪᠠᠢᠭᠠ ᠠᠵᠢᠯ᠂ ᠬᠡᠷᠡᠭᠵᠢᠭᠦᠯᠵᠦ ᠪᠠᠢᠭᠠ ᠪᠣᠳᠣᠯᠭᠠ ᠶ᠋ᠢ ᠨᠢ ᠡᠰᠡᠷᠭᠦᠴᠡᠵᠦ ᠪᠠᠢᠨᠠ ᠭᠡᠵᠦ ᠪᠤᠳᠤᠭᠳᠠᠬᠤᠢ ᠳ᠋ᠤ᠌ ᠴᠢᠬᠤᠯ ᠨᠢ ᠬᠥᠳᠡᠯᠦᠨ ᠪᠠᠢᠲᠠᠯᠠ ᠬᠥᠶᠦᠭ ᠦ᠋ᠨ ᠡᠢᠮᠦ ᠦᠭᠡ ᠬᠡᠯᠡᠭᠰᠡᠨ ᠨᠢ ᠬᠠᠲᠤᠨ ᠤ᠋ ᠠᠭᠤᠷ ᠢ᠋ ᠳᠡᠪᠡᠷᠡᠭᠡᠵᠡᠢ᠃ ᠭᠦᠶᠦᠭ ᠡᠬᠡ ᠶ᠋ᠢᠨ ᠡᠮᠦᠨᠡ ᠬᠡᠳᠦᠨ ᠦᠭᠡ ᠬᠡᠯᠡᠭᠰᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠬᠢᠯᠢᠩ ᠢ᠋ ᠨᠢ ᠲᠥᠷᠥᠭᠦᠯᠵᠦ᠂ ᠲᠡᠷᠡ ᠴᠦ᠍ ᠪᠦᠦ ᠬᠡᠯᠡ᠂
— ᠬᠠᠭᠠᠨᠲᠤ ᠲᠥᠷᠥ ᠳ᠋ᠦ᠍ ᠴᠢ ᠪᠦᠦ ᠰᠠᠨᠠᠭᠠᠷᠬᠠ᠃ ᠴᠢ ᠬᠠᠭᠠᠨ ᠪᠣᠯᠬᠤ ᠬᠤᠪᠢ ᠦᠭᠡᠢ ᠭᠡᠰᠡᠨ ᠦᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠬᠦᠷᠭᠡᠭᠰᠡᠨ ᠴᠠᠭᠠᠳᠤ ᠰᠢᠯᠲᠠᠭᠠᠨ ᠨᠢ ᠬᠥᠶᠦᠭ ᠲᠦ᠍ ᠪᠠᠢᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠲᠡᠷᠡ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃
ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠤᠬᠠᠭᠠᠨ ᠪᠣᠳᠣᠯ ᠳ᠋ᠤ᠌ ᠬᠢᠷᠢ ᠡᠴᠡ ᠬᠡᠲᠦᠷᠡᠭᠰᠡᠨ ᠶᠡᠬᠡ ᠠᠵᠢᠯ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠡᠮᠦᠨᠡ ᠡᠴᠡ ᠭᠠᠷᠭᠠᠬᠤ ᠬᠦᠨᠳᠦᠬᠡᠨ ᠰᠢᠢᠳᠪᠦᠷᠢ ᠨᠦ᠍ᠭᠦᠳ ᠡᠭᠡᠯᠵᠢᠯᠡᠨ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠠᠮᠤᠭ ᠤ᠋ᠨ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠪᠣᠯᠬᠤ᠂ ᠬᠠᠢᠷᠠᠲᠠᠢ ᠬᠡᠦᠬᠡᠳ ᠦ᠋ᠳ ᠨᠢ ᠳᠡᠷᠭᠡᠳᠡ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠷᠢ ᠡᠯᠢᠭᠡ ᠶ᠋ᠢᠨ ᠬᠥᠮᠦᠰ ᠬᠠᠮᠤᠭ ᠠᠵᠢᠯ ᠢ᠋ ᠭᠦᠢᠴᠡᠳᠬᠡᠨ ᠪᠠᠢᠭᠠ ᠳ᠋ᠤ᠌ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠭᠣᠮᠣᠳᠠᠯ ᠲᠠᠢ ᠪᠠᠢᠪᠠ᠃ ᠲᠥᠷᠥᠭᠦᠯᠦᠭᠰᠡᠨ ᠬᠡᠦᠬᠡᠳ ᠦ᠋ᠳ ᠨᠢ ᠬᠦᠷᠲᠡᠯᠡ ᠥᠪᠡᠷ ᠡᠴᠡ ᠨᠢ ᠤᠷᠪᠠᠵᠤ ᠣᠳᠤᠭᠰᠠᠨ ᠮᠡᠲᠦ ᠬᠦᠨᠳᠦᠬᠡᠨ ᠰᠡᠳᠬᠢᠭᠳᠡᠯ ᠲᠡᠭᠦᠨ ᠦ᠌ ᠲᠠᠷᠢᠬᠢ ᠲᠣᠯᠣᠭᠠᠢ ᠶ᠋ᠢ ᠡᠷᠭᠢᠭᠦᠯᠦᠨ᠂ ᠡᠨᠡ ᠪᠣᠳᠣᠯ ᠯᠠᠪᠰᠢᠷᠠᠬᠤ ᠪᠦᠷᠢ ᠳ᠋ᠦ᠍ ᠪᠠᠭᠠᠯᠵᠠᠭᠤᠷ ᠠ᠋ᠴᠠ ᠨᠢ ᠵᠢᠭᠤᠷᠠᠨ ᠠᠪᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠬᠦᠨᠳᠦ ᠡᠳᠦᠷ ᠪᠠᠢᠯᠠ᠃
ᠲᠠᠩᠭᠤᠳ ᠤ᠋ᠨ ᠣᠢᠷᠠᠯᠴᠠᠭᠠ ᠭᠠᠨᠰᠦ ᠶ᠋ᠢᠨ ᠬᠡᠷᠡᠭ ᠢ᠋ ᠵᠠᠰᠠᠨ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠬᠦᠦ᠂ ᠭᠤᠳᠠᠨ ᠤ᠋ ᠦᠷᠭᠦᠭᠡᠨᠡ ᠬᠡᠳᠦᠨ ᠬᠥᠮᠦᠨ ᠪᠠᠷᠠᠯᠬᠠᠨ ᠢᠷᠡᠵᠡᠢ᠃ ᠲᠡᠳᠡᠨ ᠦ᠌ ᠵᠢᠰᠦ ᠴᠢᠷᠠᠢ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠢ ᠡᠴᠡ ᠣᠭᠲᠣ ᠥᠭᠡᠷᠡ᠂ ᠲᠣᠷᠭᠠᠨ ᠤ᠋ ᠵᠠᠮ ᠳ᠋ᠠᠭᠠᠨ ᠶᠠᠪᠤᠬᠤ ᠬᠤᠳᠠᠯᠳᠤᠭᠠᠴᠢᠳ ᠲᠠᠢ ᠠᠳᠠᠯᠢ᠂ ᠰᠠᠷᠲᠠᠭᠤᠯ ᠵᠦᠭ ᠦ᠋ᠨ ᠬᠥᠮᠦᠰ ᠪᠠᠢᠯᠠ᠃ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠬᠦᠦ ᠭᠣᠲᠠᠨ ᠤ᠋ ᠡᠨᠡ ᠭᠠᠵᠠᠷ ᠤᠷᠢᠳᠤ ᠶᠢᠰᠦᠢ ᠬᠠᠲᠤᠨ ᠤ᠋ ᠡᠵᠡᠮᠰᠢᠯ ᠨᠤᠲᠤᠭ ᠪᠠᠢᠭᠰᠠᠨ ᠶᠤᠮ᠃ ᠬᠠᠭᠠᠨ ᠬᠦᠦ ᠭᠣᠲᠠᠨ ᠥᠪᠡᠷ ᠦ᠋ᠨ ᠭᠠᠵᠠᠷ ᠣᠷᠣᠨ ᠤ᠋ ᠬᠡᠷᠡᠭ ᠢ᠋ ᠴᠢᠳᠠᠮᠠᠭᠠᠢ ᠤᠳᠤᠷᠢᠳᠤᠨ ᠶᠠᠪᠤᠭᠤᠯᠵᠤ ᠪᠠᠢᠯᠠ᠃ ᠤᠴᠢᠷ ᠨᠢ ᠡᠨᠡ ᠭᠠᠵᠠᠷ ᠪᠣᠯ ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠠᠤ ᠳ᠋ᠠᠬᠢ ᠨᠤᠲᠤᠭ ᠲᠤᠯᠠ ᠮᠠᠢᠮᠠᠢ ᠠᠷᠠᠯᠵᠢᠶᠠ ᠬᠢᠬᠦ ᠳ᠋ᠦ᠍ ᠲᠠᠭᠠᠲᠠᠢ ᠪᠦᠰᠡ ᠠᠵᠤᠭᠤ᠃
ᠭᠤᠳᠠᠨ ᠡᠨᠡ ᠭᠠᠵᠠᠷ ᠢ᠋ ᠰᠠᠬᠢᠨ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠳᠠᠷᠤᠢ ᠳ᠋ᠠᠭᠠᠨ ᠣᠯᠠᠨ ᠠᠵᠢᠯ ᠢ᠋ ᠡᠬᠢᠯᠡᠭᠦᠯᠦᠭᠰᠡᠨ ᠦ᠌ ᠳᠡᠭᠡᠷᠡ ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠠᠤ ᠶᠠᠪᠤᠬᠤ ᠬᠡᠷᠦᠮᠡᠯ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠠᠶᠤᠯ ᠦᠭᠡᠢ ᠪᠠᠢᠳᠠᠯ ᠳ᠋ᠤ᠌ ᠶᠡᠬᠡᠳᠡ ᠠᠩᠬᠠᠷᠬᠤ ᠪᠣᠳᠣᠯᠭᠠ ᠶᠠᠪᠤᠭᠤᠯᠵᠠᠢ᠃ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠶᠠᠪᠤᠬᠤ ᠵᠠᠮ ᠳᠠᠭᠠᠤ ᠬᠤᠳᠳᠤᠭ ᠤᠰᠤ ᠭᠠᠷᠭᠠᠵᠤ᠂ ᠵᠤᠨ ᠤ᠋ ᠬᠠᠯᠠᠭᠤᠨ ᠨᠠᠷᠠ ᠲᠠᠢ ᠡᠳᠦᠷ ᠢ᠋ᠶ᠋ᠡᠷ ᠰᠠᠭᠤᠵᠤ ᠠᠮᠠᠷᠠᠨ᠂ ᠰᠡᠭᠦᠳᠡᠷ ᠲᠦ᠋ᠨᠢ ᠰᠠᠭᠠᠲᠠᠬᠤ ᠮᠣᠳᠣ ᠬᠦᠷᠲᠡᠯᠡ ᠲᠠᠷᠢᠵᠤ᠂ ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠠᠤ ᠭᠡᠷᠦᠨ ᠶᠠᠪᠤᠬᠤ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠠᠶᠤᠯ ᠦᠭᠡᠢ ᠪᠠᠢᠳᠠᠯ ᠢ᠋ ᠥᠪᠡᠷ ᠦ᠋ᠨ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠴᠢᠩᠭᠠ ᠰᠠᠬᠢᠭᠤᠯᠤᠨ ᠬᠠᠮᠠᠭᠠᠯᠠᠪᠠ᠃ ᠭᠣᠲᠠᠨ᠂ ᠳᠦᠷᠭᠡᠨᠡ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠬᠡᠳᠦᠢ ᠴᠦ᠍ ᠡᠬᠡ ᠶ᠋ᠢᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠤᠷᠠ ᠪᠠᠷ ᠠᠪᠤᠷᠢᠯᠠᠨ ᠰᠠᠭᠤᠭᠠ ᠲᠠᠢ ᠡᠪᠯᠡᠷᠡᠬᠦ ᠬᠦᠰᠡᠯ ᠦᠭᠡᠢ ᠪᠠᠢᠯᠠ᠃
ᠦᠦᠷ ᠴᠦᠦᠷ ᠢ᠋ᠶ᠋ᠡᠷ ᠠᠪᠤᠷᠠᠯ ᠡᠷᠢᠨ ᠢᠷᠡᠭᠰᠡᠨ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠡᠪᠦᠭᠡᠨ ᠲᠦᠰᠢᠮᠡᠯ ᠮᠠᠬᠠᠮᠥ᠋ᠳ᠋ ᠶᠠᠯᠠᠸᠠᠴᠢ ᠶ᠋ᠢ ᠲᠡᠷᠡ ᠥᠪᠡᠷ ᠦ᠋ᠨ ᠢᠪᠡᠭᠡᠯ ᠳᠣᠣᠷᠠ ᠠᠪᠤᠨ ᠬᠠᠲᠤᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠤᠷᠲᠤ ᠭᠠᠷ ᠠ᠋ᠴᠠ ᠬᠠᠭᠠᠴᠠᠢᠯᠠᠨ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠦᠦᠷ ᠲᠡᠮᠳᠡᠭᠷᠡᠬᠦ ᠲᠡᠢ ᠵᠡᠷᠭᠡᠴᠡᠨ ᠢᠷᠡᠭᠰᠡᠨ᠂ ᠬᠠᠭᠠᠨ ᠠᠪᠤ ᠶ᠋ᠢᠨ ᠬᠢᠨᠢ ᠢᠲᠡᠭᠡᠯᠲᠦ ᠲᠦᠰᠢᠮᠡᠯ ᠤᠷᠢᠳᠤ ᠶ᠋ᠢᠨ ᠰᠠᠢᠬᠠᠨ ᠴᠠᠭ ᠢ᠋ ᠳᠤᠷᠠᠰᠤᠨ ᠶᠠᠷᠢᠭᠠᠳ᠂ ᠠᠪᠤᠷᠠᠯ ᠡᠨᠡᠷᠢᠯ ᠳ᠋ᠡᠭᠡᠨ ᠪᠠᠭᠲᠠᠭᠠᠨ ᠠᠪᠬᠤ ᠶ᠋ᠢ ᠭᠤᠶᠤᠭᠰᠠᠨ ᠢ᠋ ᠶᠣᠰᠣ ᠪᠠᠷ ᠪᠣᠯᠭᠠᠵᠠᠢ᠃ ᠥᠨᠥ ᠭᠣᠲᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠭᠰᠡᠨ ᠬᠥᠮᠦᠰ ᠳᠦᠷᠭᠡᠨᠡ ᠬᠠᠲᠤᠨ ᠡᠬᠡ ᠡᠴᠡ ᠨᠢ ᠵᠠᠬᠢᠳᠠᠯ ᠠᠪᠴᠢᠷᠠᠭᠰᠠᠨ ᠪᠠᠢᠯᠠ᠃ ᠡᠪᠬᠡᠭᠡᠰᠦ ᠲᠡᠢ ᠴᠠᠭᠠᠰᠤ ᠶ᠋ᠢ ᠨᠡᠭᠡᠭᠡᠨ ᠦᠵᠡᠪᠡᠯ ᠲᠠᠨᠢᠯ ᠪᠢᠴᠢᠭ ᠬᠠᠷᠠᠭᠳᠠᠨᠠ᠃ ᠭᠣᠲᠠᠨ ᠵᠠᠬᠢᠳᠠᠯ ᠢ᠋ ᠠᠪᠴᠤ ᠨᠢᠭᠡ ᠪᠥᠷᠢᠴᠢᠯᠡᠨ ᠤᠩᠰᠢᠵᠤ ᠳᠠᠭᠤᠰᠤᠭᠠᠳ᠂
— ᠡᠬᠡ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠪᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠣᠴᠢᠵᠤ ᠠᠭᠤᠯᠵᠠᠬᠤ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠯᠡ᠃ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠭᠰᠡᠨ ᠬᠥᠮᠦᠰ ᠭᠣᠳᠠᠨ ᠤ᠋ ᠬᠠᠷᠢᠭᠤ ᠶ᠋ᠢ ᠰᠣᠨᠣᠰᠬᠤ ᠵᠠᠭᠤᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠠᠮ ᠳᠣᠬᠢᠯᠴᠠᠨ ᠪᠠᠢᠪᠠ᠃
※
ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠥᠷᠥᠭᠡᠨ ᠳ᠋ᠡᠭᠡᠨ ᠬᠦᠦ ᠬᠥᠯᠡᠬᠦ ᠶ᠋ᠢᠨ ᠬᠠᠮᠲᠤ ᠪᠠᠢᠪᠠ᠃ ᠬᠦᠦ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠷᠢ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠨ ᠬᠠᠷᠠᠭᠠᠳ᠂
— ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠡᠢᠮᠦ ᠰᠠᠢᠬᠠᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠ ᠦᠭᠡᠢ ᠤᠳᠠᠵᠠᠢ᠃《ᠠᠯᠲᠠᠨ ᠰᠤᠳᠤᠷ》 ᠲᠠᠨ ᠤ᠋ ᠰᠡᠳᠬᠢᠯ ᠢ᠋ ᠬᠥᠭᠯᠡᠵᠡᠢ᠁ ᠬᠦᠦ ᠲᠠᠨᠢ ᠨᠢᠭᠡ ᠵᠦᠢᠯ ᠠᠰᠠᠭᠤᠶᠠ ᠬᠡᠮᠡᠪᠡ᠃
— ᠶᠠᠭᠤ ᠲᠡᠷᠡ ᠪᠣᠢ᠂ ᠠᠰᠠᠭᠤ᠂ ᠮᠢᠨᠦ ᠬᠦᠦ ᠭᠡᠬᠦ ᠳ᠋ᠦ᠍᠂
ᠲᠥᠷᠥ ᠤᠯᠤᠰ ᠦᠢᠮᠡᠭᠰᠡᠨ ᠬᠡᠴᠡᠭᠦᠦ ᠴᠠᠭ ᠢᠷᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠲᠠ ᠥᠨᠥ ᠬᠢᠷᠢ ᠥᠪᠡᠷ ᠦ᠋ᠨ ᠪᠢᠴᠢᠭᠰᠡᠨ《ᠠᠯᠲᠠᠨ ᠰᠤᠳᠤᠷ》 ᠢ᠋ᠶ᠋ᠠᠨ ᠳᠡᠯᠭᠡᠨ᠂ ᠲᠠᠯᠪᠢᠬᠤ ᠪᠣᠳᠣᠯ ᠦᠭᠡᠢ ᠶᠠᠪᠤᠬᠤ ᠶᠠᠭᠤᠨ ᠤ᠋ ᠤᠴᠢᠷ ᠪᠣᠢ? ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠤᠬᠠᠭᠠᠯᠢᠭ ᠠᠰᠠᠭᠤᠯᠲᠠ ᠶ᠋ᠢ ᠳᠣᠲᠣᠷᠠ ᠪᠠᠨ ᠰᠠᠢᠰᠢᠶᠠᠨ ᠪᠠᠢᠭᠰᠠᠨ ᠴᠤ᠂
— ᠴᠠᠭ ᠨᠢ ᠢᠷᠡᠭᠡ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠪᠡ᠃
— ᠲᠠ ᠶᠠᠭᠤᠮᠠ ᠯᠠ ᠪᠣᠯ ᠴᠠᠭ ᠨᠢ ᠢᠷᠡᠭᠡ ᠦᠭᠡᠢ ᠭᠡᠵᠦ ᠬᠡᠯᠡᠬᠦ ᠶᠦᠮ᠃ ᠢᠩᠭᠢᠵᠦ ᠠᠮᠤᠭᠤᠯᠠᠩ ᠪᠠᠢᠬᠤ ᠶ᠋ᠢ ᠲᠠᠨᠢ ᠬᠠᠷᠠᠭᠠᠳ ᠦᠨᠡᠨ ᠳ᠋ᠡᠭᠡᠨ ᠡᠰᠢ ᠬᠠᠲᠤᠨ ᠤ᠋ ᠳᠦᠷᠢ ᠡᠢᠮᠦ ᠪᠤᠶᠤ ᠭᠡᠵᠦ ᠰᠡᠳᠬᠢᠬᠦ ᠶᠦᠮ᠂ ᠡᠵᠢ ᠮᠢᠨᠢ ᠭᠡᠵᠦ ᠬᠦᠦ ᠨᠢ ᠥᠴᠢᠯᠡ᠃
— ᠬᠦᠦ ᠮᠢᠨᠢ᠂ ᠡᠰᠢ ᠬᠠᠲᠤᠨ ᠭᠡᠳᠡᠭ ᠴᠢᠨᠢ ᠥᠪᠡᠷ ᠦ᠋ᠨ ᠴᠢᠨᠠᠷ ᠢ᠋ ᠴᠠᠭ ᠦᠷᠭᠦᠯᠵᠢᠳᠡ ᠦᠵᠡᠭᠦᠯᠬᠦ ᠳ᠋ᠦ᠍ ᠪᠠᠢᠳᠠᠭ ᠶᠠᠭᠤᠮᠠ ᠪᠢᠰᠢ᠂ ᠬᠠᠷᠢᠨ ᠤᠳᠠᠯ ᠦᠭᠡᠢ ᠬᠣᠶᠠᠭᠤᠯᠠ ᠪᠤᠬᠠᠷ ᠬᠣᠲᠠ ᠶ᠋ᠢ ᠵᠣᠷᠢᠶᠠ᠃ ᠥᠭᠡᠳᠡᠢ ᠬᠠᠭᠠᠨ ᠡᠵᠡᠨ ᠦ᠌ ᠪᠢᠳᠡᠨ ᠳ᠋ᠦ᠍ ᠰᠣᠶᠣᠷᠬᠠᠭᠰᠠᠨ ᠭᠠᠵᠠᠷ ᠨᠤᠲᠤᠭ ᠲᠤ᠌ ᠴᠢ ᠥᠪᠡᠷ ᠦ᠋ᠨ ᠬᠡᠷᠡᠭ ᠢ᠋ ᠶᠠᠪᠤᠭᠤᠯᠤᠨᠠ᠃ ᠲᠡᠨᠳᠡᠬᠢ ᠶ᠋ᠢᠨ ᠬᠡᠯᠡ ᠰᠣᠶᠣᠯ᠂ ᠬᠥᠮᠦᠰ ᠦ᠋ᠨ ᠠᠮᠢᠳᠤᠷᠠᠯ ᠠᠬᠤᠢ ᠶ᠋ᠢ ᠰᠤᠳᠤᠯᠵᠤ᠂ ᠦᠵᠡᠭᠰᠡᠨ ᠲᠤᠭᠤᠯᠤᠭᠰᠠᠨ ᠴᠢᠨᠢ ᠬᠠᠩᠭᠠᠯᠲᠠ ᠲᠠᠢ ᠭᠡᠵᠦ ᠦᠵᠡᠵᠦ ᠪᠠᠢᠨᠠ ᠤᠤ ᠭᠡᠵᠦ ᠠᠰᠠᠭᠤᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠠᠲᠤᠨ ᠤ᠋ ᠳᠠᠭᠠᠭᠤᠯ ᠠᠵᠢᠨ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠪᠠᠷᠤᠭᠠᠷ ᠬᠠᠷᠠᠭᠳᠠᠨᠠ᠃
— ᠶᠠᠭᠤ ᠪᠣᠯᠤᠭᠠᠳ ᠴᠢᠷᠠᠢ ᠴᠢᠨᠢ ᠵᠡᠪᠡᠬᠡᠢᠴᠢᠬᠡᠭᠰᠡᠨ ᠶᠠᠪᠤᠨᠠ ᠪᠣᠢ?
— ᠨᠠᠰᠤᠨ ᠥᠨᠳᠥᠷ ᠶᠸᠯᠢᠤᠢ ᠴᠦᠼᠡᠢ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠣᠷᠣᠨᠠ ᠣᠳᠤᠯᠠ ᠬᠡᠮᠡᠭᠰᠡᠨ ᠮᠡᠳᠡᠭᠡ ᠢᠷᠡᠯᠡ᠃
— ᠠ᠋ ᠮᠥᠩᠬᠡ ᠲᠩᠷᠢ᠁
ᠲᠡᠷᠡ ᠨᠢᠭᠡᠨ ᠡᠳᠦᠷ《ᠠᠯᠲᠠᠨ ᠰᠤᠳᠤᠷ》 ᠢ᠋ ᠪᠢᠴᠢᠵᠦ ᠳᠠᠭᠤᠰᠤᠭᠠᠳ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ《ᠮᠥᠩᠬᠡᠳᠡ ᠮᠠᠨᠳᠤᠬᠤ ᠮᠣᠩᠭᠣᠯ ᠲᠥᠷᠥ ᠶ᠋ᠢᠨ ᠦᠨᠡᠨ ᠢ᠋ ᠪᠢᠳᠡ ᠦᠯᠡᠳᠡᠭᠡᠯᠡ》 ᠭᠡᠮᠡᠨ ᠪᠠᠶᠠᠷ ᠲᠠᠢ ᠪᠠᠷ ᠥᠭᠦᠯᠡᠨ ᠪᠠᠢᠭᠰᠠᠨ ᠶᠡᠬᠡ ᠬᠥᠮᠦᠨ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠣᠷᠣᠨᠠ ᠣᠳᠴᠠᠢ᠃
《ᠤᠷᠲᠤ ᠰᠢᠷᠠ ᠬᠥᠮᠦᠨ ᠢᠷᠡᠯᠡ》 ᠭᠡᠮᠡᠨ ᠶᠠᠷᠢᠯᠴᠠᠬᠤ ᠬᠠᠪᠤᠷ ᠴᠠᠭ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠲᠤ ᠦᠷᠭᠦᠯᠵᠢᠯᠡᠵᠦ ᠪᠠᠢᠪᠠ᠃ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠢᠷᠭᠤᠢ ᠲᠥᠷᠥᠨ ᠰᠢᠨᠡ ᠴᠠᠭ ᠢᠷᠡᠵᠦ ᠪᠣᠢ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠢᠯᠡᠳᠬᠡᠵᠦ᠂ ᠨᠥᠮᠥᠷᠦᠭᠰᠡᠨ ᠴᠠᠰᠤ ᠪᠠᠨ ᠢᠷᠡᠨ ᠤᠷᠭᠤᠬᠤ ᠭᠡᠵᠦ ᠲᠡᠮᠡᠦᠯᠦᠨ ᠪᠠᠢᠬᠤ ᠳ᠋ᠤ᠌ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠯᠡ ᠬᠠᠷᠢᠨ ᠨᠥᠮᠥᠷᠦᠨ ᠢᠷᠡᠭᠰᠡᠨ ᠬᠦᠨᠳᠦᠬᠡᠨ ᠠᠴᠢᠶᠠ ᠪᠠᠨ ᠢᠷᠡᠨ ᠪᠣᠰᠬᠤ ᠵᠣᠷᠢᠭᠲᠠᠨ ᠢ᠋ᠶ᠋ᠠᠷ ᠡᠨᠡ ᠤᠳᠠᠭᠠ ᠳ᠋ᠤ᠌ ᠳᠤᠲᠠᠵᠤ ᠪᠠᠢᠯᠠ᠃
ᠤᠷᠲᠤ ᠰᠢᠷᠠ ᠬᠥᠮᠦᠨ ᠭᠡᠵᠦ ᠬᠠᠪᠤᠷ ᠴᠠᠭ ᠢ᠋ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠢᠨ ᠵᠦᠭᠡᠷ ᠴᠦ᠍ ᠨᠢᠭᠡ ᠬᠡᠯᠡᠳᠡᠭ ᠦᠭᠡᠢ ᠪᠢᠯᠡ᠃ ᠡᠨᠡ ᠯᠡ ᠴᠠᠭ ᠲᠤ ᠶᠠᠭᠤᠮᠠ ᠶᠠᠭᠤᠮᠠ ᠬᠣᠮᠰᠠᠳᠠᠵᠤ ᠬᠥᠮᠦᠰ ᠦ᠋ᠨ ᠢᠳᠡᠵᠦ ᠤᠤᠭᠤᠬᠤ ᠨᠢ ᠲᠣᠭᠠ ᠲᠠᠢ ᠪᠣᠯᠵᠤ᠂ ᠰᠠᠢᠬᠠᠨ ᠴᠠᠭ ᠲᠤ ᠵᠡᠬᠡᠨ ᠪᠡᠯᠡᠳᠦᠭᠰᠡᠨ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠨ ᠪᠠᠷᠠᠳᠠᠭ ᠪᠠᠢᠭᠰᠠᠨ ᠠ᠋ᠴᠠ ᠡᠭᠡᠯ ᠠᠷᠠᠳ ᠪᠣᠯ ᠡᠳᠦᠷ ᠦ᠋ᠨ ᠤᠷᠲᠤ ᠶ᠋ᠢ ᠥᠯᠥᠨ ᠵᠡᠯᠮᠡᠭᠦᠨ ᠥᠩᠭᠡᠷᠡᠭᠦᠯᠬᠦ ᠨᠢ ᠣᠯᠠᠨ᠃ ᠬᠠᠷᠢᠨ ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠭᠡᠷ ᠲᠦ᠍ ᠬᠠᠪᠤᠷ ᠤ᠋ᠨ ᠤᠷᠲᠤ ᠰᠢᠷᠠ ᠬᠥᠮᠦᠨ ᠣᠭᠲᠣ ᠥᠭᠡᠷᠡ ᠪᠡᠷ ᠠᠢᠯᠴᠢᠯᠠᠨ ᠢᠷᠡᠳᠡᠭ᠃ ᠡᠨᠡ ᠪᠣᠯ ᠬᠠᠭᠠᠨ᠂ ᠬᠠᠷᠠᠴᠤ ᠬᠣᠶᠠᠷ ᠲᠤ ᠢᠯᠡᠭᠡᠭᠰᠡᠨ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠥᠭᠡᠷᠡ ᠥᠭᠡᠷᠡ ᠢᠯᠡᠭᠡᠯᠲᠡ ᠴᠤ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠴᠠᠭ ᠨᠠᠭᠠᠰᠢᠯᠠᠵᠤ᠂ ᠡᠳᠦᠷ ᠤᠷᠲᠤᠰᠬᠤ ᠡᠨᠡᠬᠡᠨ ᠦᠶᠡ ᠪᠡᠷ ᠶᠸᠯᠢᠦᠢ ᠴᠦᠼᠡᠢ ᠮᠥᠩᠬᠡ ᠲᠩᠷᠢ ᠳ᠋ᠡᠭᠡᠨ ᠣᠳᠴᠠᠢ᠃ ᠠᠭᠤᠷᠠᠭ ᠠ᠋ᠴᠠ ᠬᠥᠯᠡᠬᠦ ᠶ᠋ᠢᠨ ᠬᠠᠮᠲᠤ ᠶᠠᠭᠠᠷᠠᠪᠴᠢᠯᠠᠨ ᠭᠠᠷᠤᠭᠰᠠᠨ ᠰᠣᠷᠬᠠᠭᠲᠠᠨᠢ ᠬᠠᠲᠤᠨ ᠢ᠋ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠥᠳᠡᠭᠡᠯᠡᠭᠦᠯᠬᠦ ᠠᠵᠢᠯ ᠳᠠᠭᠤᠰᠤᠭᠰᠠᠨ ᠪᠠᠢᠯᠠ᠃ ᠭᠡᠪᠡᠴᠦ ᠡᠨᠡ ᠦᠶᠡ ᠳ᠋ᠦ᠍ ᠰᠣᠷᠬᠠᠭᠲᠠᠨᠢ ᠬᠠᠲᠤᠨ ᠴᠢᠬᠢᠨ ᠳ᠋ᠡᠭᠡᠨ ᠴᠤ ᠢᠲᠡᠭᠡᠮᠡ ᠦᠭᠡᠢ ᠠᠢᠳᠠᠰᠲᠤ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠪᠠ᠃
— ᠶᠸᠯᠢᠦᠢ ᠴᠦᠼᠡᠢ ᠶ᠋ᠢᠨ ᠭᠡᠷ ᠲᠦ᠍ ᠨᠡᠩᠵᠢᠯᠭᠡ ᠬᠢᠭᠰᠡᠨ ᠪᠠᠢᠨᠠ᠃ ᠡᠨᠡ ᠪᠠᠢᠳᠠᠯ ᠳ᠋ᠤ᠌ ᠶᠡᠬᠡᠳᠡ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠭᠰᠠᠨ ᠶᠸᠯᠢᠦᠢ ᠴᠦᠼᠡᠢ ᠬᠡᠳᠦ ᠬᠣᠨᠣᠭ ᠰᠢᠨᠠᠯᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠮᠥᠩᠬᠡ ᠲᠩᠷᠢ ᠳ᠋ᠡᠭᠡᠨ ᠣᠳᠴᠠᠢ᠃ ᠶᠠᠭᠤᠨ ᠤ᠋ ᠤᠴᠢᠷ ᠨᠡᠩᠵᠢᠯᠭᠡ ᠬᠢᠭᠰᠡᠨ ᠢ᠋ ᠪᠢᠳᠡ ᠮᠡᠳᠡᠬᠦ ᠦᠭᠡᠢ ᠴᠤ ᠬᠠᠲᠤᠨ ᠤ᠋ ᠠᠯᠪᠠᠲᠤ ᠶᠸᠯᠢᠦᠢ ᠴᠦᠼᠠᠢ ᠶ᠋ᠢᠨ ᠭᠡᠷ ᠲᠦ᠍ ᠨᠡᠩᠵᠢᠯᠭᠡ ᠬᠢᠵᠦ ᠪᠠᠢᠬᠤ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠡᠷᠡᠭᠦᠳᠡᠭᠰᠡᠨ ᠪᠠᠢᠨᠠ ᠭᠡᠵᠦ ᠠᠵᠢᠨ ᠬᠡᠯᠡᠪᠡ᠃
— ᠡᠷᠡᠭᠦᠳᠡᠨ ᠰᠢᠭᠦᠭᠰᠡᠨ ᠭᠡᠨᠡ᠃ ᠨᠠᠰᠤ ᠥᠨᠳᠥᠷ ᠪᠣᠯᠤᠭᠰᠠᠨ ᠶᠯᠢᠦᠢ ᠴᠦᠼᠡᠢ ᠶ᠋ᠢ ᠢᠩᠭᠢᠵᠦ ᠡᠷᠡᠭᠦᠳᠡᠨ ᠰᠢᠭᠦᠬᠦ ᠡᠷᠬᠡ ᠶ᠋ᠢ ᠳᠦᠷᠭᠡᠨᠡ ᠬᠠᠲᠤᠨ ᠯᠠᠪ ᠣᠯᠭᠣᠭᠠ ᠦᠭᠡᠢ ᠪᠣᠯᠪᠠ ᠤᠤ᠂ ᠬᠠᠲᠤᠨ ᠤ᠋ ᠨᠡᠷᠡ ᠰᠦᠷ ᠢ᠋ ᠠᠰᠢᠭᠯᠠᠨ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠭᠰᠠᠨ ᠲᠡᠷᠡ ᠡᠷᠬᠢᠮ ᠨᠦ᠍ᠭᠦᠳ ᠢ᠋ ᠬᠠᠲᠤᠨ ᠡᠬᠡ ᠮᠡᠳᠡᠵᠦ ᠪᠠᠢᠭᠠ ᠤᠤ?
— ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠶᠤᠮ ᠠ᠋᠂ ᠬᠠᠲᠤᠨᠲᠠᠨ ᠮᠢᠨᠢ᠃
ᠶᠠᠮᠠᠷ ᠴᠤ ᠭᠡᠰᠡᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠪᠣᠯᠤᠭᠰᠠᠨ ᠡᠨᠡ ᠡᠮᠭᠡᠨᠢᠯᠲᠦ ᠶᠠᠪᠤᠳᠠᠯ ᠢ᠋ ᠨᠢᠳᠦ ᠪᠡᠷ ᠦᠵᠡᠭᠰᠡᠨ ᠬᠥᠮᠦᠰ ᠶᠠᠷᠢᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠠᠵᠢᠨ ᠤ᠋ ᠶᠠᠷᠢᠶᠠ ᠬᠤᠳᠠᠯ ᠮᠡᠲᠦ ᠰᠠᠨᠠᠭᠳᠠᠬᠤ ᠠᠪᠠᠴᠤ ᠬᠠᠲᠤᠨ ᠤ᠋ ᠦᠨᠡᠨᠴᠢ ᠳᠠᠭᠠᠭᠤᠯ ᠠᠵᠢᠨ ᠰᠠᠢᠲᠤᠷ ᠨᠢᠭᠲᠠᠯᠠᠨ ᠦᠵᠡᠵᠦ ᠪᠠᠢᠵᠤ ᠰᠠᠶᠢ ᠬᠠᠲᠤᠨᠲᠠᠨ ᠳ᠋ᠤ᠌ ᠬᠡᠯᠡ ᠮᠡᠳᠡᠭᠡ ᠳᠣᠭᠣᠯᠭᠠᠳᠠᠭ ᠲᠤᠯᠠ ᠦᠨᠡᠮᠰᠢᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠯᠠ᠃
※
ᠤᠷᠢᠨ ᠴᠠᠭ ᠤ᠋ᠨ ᠳᠣᠬᠢᠶᠠ ᠢᠷᠡᠬᠦ ᠳ᠋ᠦ᠍ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠶ᠋ᠢᠨ ᠥᠩᠭᠡ ᠳᠡᠯᠭᠡᠷᠡᠵᠦ ᠨᠢᠳᠦᠨᠡ ᠢᠷᠠᠭᠤ ᠰᠠᠢᠬᠠᠨ ᠢ᠋ ᠨᠡᠭᠡᠭᠡᠨ᠂ ᠬᠡᠦᠬᠡᠳ ᠦ᠋ᠨ ᠱᠤᠤᠭᠢᠶᠠᠨ ᠰᠢᠪᠠᠭᠤᠳ ᠤ᠋ᠨ ᠴᠢᠮᠡᠭᠡ ᠲᠡᠢ ᠬᠣᠣᠰᠯᠠᠬᠤ ᠠᠶᠠᠯᠭᠤ ᠴᠢᠬᠢᠨᠡ ᠭᠠᠢᠬᠠᠮᠠ ᠤᠶᠠᠩᠭᠠ ᠶ᠋ᠢ ᠲᠣᠭᠯᠠᠨ ᠪᠠᠢᠳᠠᠭ ᠰᠢᠭ᠋ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠴᠦ᠍ ᠡᠨᠡ ᠴᠠᠭ ᠲᠤ ᠥᠪᠡᠷ ᠦ᠋ᠨ ᠥᠩᠭᠡ ᠠᠶᠠᠯᠭᠤ ᠪᠠᠷ ᠡᠭᠡᠰᠢᠭᠯᠡᠨ ᠪᠠᠢᠳᠠᠭ ᠪᠢᠯᠡ᠃ ᠳᠦᠷᠭᠡᠨᠡ ᠬᠠᠲᠤᠨ ᠡᠬᠡ ᠡᠴᠡ ᠵᠠᠬᠢᠳᠠᠯ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠭᠣᠳᠠᠨ ᠥᠪᠡᠷ ᠦ᠋ᠨ ᠬᠡᠳᠦᠨ ᠬᠥᠮᠦᠨ ᠢ᠋ᠶ᠋ᠡᠨ ᠠᠪᠴᠤ ᠬᠠᠷᠠᠬᠣᠷᠣᠮ ᠤ᠋ᠨ ᠵᠦᠭ ᠭᠠᠷᠬᠤ ᠪᠠᠷ ᠶᠠᠭᠠᠷᠠᠪᠴᠢᠯᠠᠨ ᠮᠣᠷᠳᠠᠯᠠ᠃
ᠭᠤᠳᠠᠨ ᠳᠤ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠨ ᠶᠠᠷᠢᠬᠤ᠂ ᠰᠡᠳᠬᠢᠯ ᠢ᠋ᠶ᠋ᠡᠨ ᠨᠡᠭᠡᠭᠡᠨ ᠣᠢᠯᠠᠭᠠᠯᠴᠠᠬᠤ ᠵᠦᠢᠯ ᠣᠯᠠᠨ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠵᠠᠮ ᠤ᠋ᠨ ᠲᠤᠷᠰᠢᠲᠠ ᠡᠬᠡ ᠳ᠋ᠡᠭᠡᠨ ᠣᠴᠢᠭᠠᠳ ᠬᠡᠷᠬᠢᠨ ᠠᠭᠤᠯᠵᠠᠬᠤ᠂ ᠠᠮᠠ ᠨᠡᠭᠡᠭᠡᠵᠦ ᠠᠩᠬᠠ ᠶᠠᠷᠢᠬᠤ ᠵᠦᠢᠯ ᠨᠢ ᠶᠠᠭᠤᠨ ᠠ᠋ᠴᠠ ᠡᠬᠢᠯᠡᠬᠦ᠂ ᠴᠠᠭᠠᠰᠢ ᠬᠡᠷᠬᠢᠨ ᠦᠷᠭᠦᠯᠵᠢᠯᠡᠭᠦᠯᠬᠦ᠂ ᠡᠬᠡ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠭᠠ ᠲᠡᠷᠡ ᠬᠠᠷᠢ ᠬᠥᠮᠦᠰ ᠬᠡᠨ ᠪᠣᠯᠬᠤ ᠶ᠋ᠢ ᠶᠠᠭᠠᠬᠢᠵᠤ ᠤᠴᠢᠷᠯᠠᠨ ᠣᠢᠯᠠᠭᠠᠭᠤᠯᠬᠤ ᠲᠤᠬᠠᠢ ᠪᠣᠳᠣᠨ᠂ ᠪᠣᠳᠣᠯ ᠣᠶᠤᠨ ᠢ᠋ᠶ᠋ᠠᠨ ᠭᠠᠰᠢᠯᠭᠠᠵᠤ ᠶᠠᠪᠤᠪᠠ᠃ ᠬᠠᠭᠠᠨ ᠡᠴᠢᠭᠡ ᠪᠡᠨ ᠲᠩᠷᠢ ᠳ᠋ᠦ᠍ ᠣᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠬᠣᠪᠣᠷᠬᠠᠨ ᠣᠴᠢᠭᠰᠠᠨ ᠡᠨᠡ ᠵᠠᠯᠠᠭᠤ ᠡᠬᠡ ᠲᠡᠢ ᠪᠡᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠲᠡᠢᠮᠦ ᠴᠦ᠍ ᠰᠠᠢᠬᠠᠨ ᠢ᠋ᠶ᠋ᠠᠷ ᠰᠠᠯᠤᠭᠠ ᠦᠭᠡᠢ ᠨᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠪᠠᠢᠬᠤ ᠬᠠᠷᠢ ᠶ᠋ᠢᠨ ᠬᠥᠮᠦᠰ ᠢ᠋ ᠰᠠᠢᠰᠢᠶᠠᠭᠠ ᠦᠭᠡᠢ ᠡᠴᠡ ᠡᠭᠦᠳᠦᠭᠰᠡᠨ ᠪᠠᠢᠪᠠ᠃
ᠡᠬᠡ ᠦᠷᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢ ᠰᠢᠭ᠋ ᠬᠡᠢᠰᠦᠨ ᠪᠠᠢᠭᠠ ᠬᠣᠪ ᠵᠢᠪ ᠣᠳᠣ ᠨᠢᠭᠡᠮᠦᠰᠦᠨ ᠠᠷᠢᠯᠵᠤ᠂ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠣᠰᠤᠭᠰᠠᠨ ᠦᠯᠦ ᠣᠢᠯᠠᠭᠠᠯᠴᠠᠯ ᠤ᠋ᠨ ᠬᠠᠨᠠ ᠨᠤᠷᠠᠨ ᠤᠨᠠᠬᠤ ᠴᠠᠭ ᠪᠣᠯᠤᠭᠰᠠᠨ ᠭᠡᠳᠡᠭ ᠲᠦ᠍ ᠭᠤᠳᠠᠨ ᠢᠲᠡᠭᠡᠵᠦ ᠪᠠᠢᠯᠠ᠃ ᠬᠣᠯᠠ ᠵᠠᠮ ᠤ᠋ᠨ ᠤᠷᠲᠤ ᠳ᠋ᠤ᠌ ᠰᠥᠨᠢ ᠰᠠᠢᠨ ᠤᠨᠲᠠᠵᠤ ᠠᠮᠠᠷᠠᠨ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠠᠷᠠᠨ ᠤ᠋ ᠡᠷᠲᠡ ᠳ᠋ᠦ᠍ ᠪᠣᠰᠴᠤ ᠭᠠᠵᠠᠷ ᠬᠣᠷᠣᠭᠠᠬᠤ ᠨᠢ ᠴᠢᠬᠤᠯᠠ᠂ ᠲᠡᠷᠡ ᠥᠪᠡᠷ ᠦ᠋ᠨ ᠬᠥᠮᠦᠰ ᠢ᠋ ᠳᠠᠭᠠᠭᠤᠯᠤᠨ ᠵᠠᠮ ᠳ᠋ᠤ᠌ ᠲᠠᠭᠠᠷᠠᠬᠤ ᠨᠢᠭᠡᠨ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠪᠠᠯ ᠢ᠋ ᠪᠠᠷᠠᠳᠠᠨ ᠪᠠᠭᠤᠳᠠᠯᠯᠠᠯᠠ᠃
ᠴᠠᠭ ᠤᠨ ᠥᠩᠭᠡ ᠨᠠᠭᠠᠰᠢᠯᠠᠵᠤ ᠪᠠᠢᠭᠠ ᠴᠤ᠌ ᠲᠠᠯᠠ ᠨᠤᠲᠤᠭ ᠲᠤ᠌ ᠵᠤᠨ ᠴᠠᠭ ᠬᠠᠷᠠᠬᠠᠨ ᠢᠷᠡᠭᠡ ᠦᠭᠡᠢ ᠲᠤᠯᠠ ᠰᠥᠨᠢ ᠳ᠋ᠡᠭᠡᠨ ᠬᠦᠢᠲᠡᠨ ᠵᠢᠪᠡᠷᠡᠭᠦᠨ ᠬᠣᠨᠣᠨᠠ᠃ ᠲᠡᠳᠡ ᠨᠢᠳᠦᠨ ᠦ᠌ ᠬᠣᠣᠷ ᠭᠠᠷᠭᠠᠨ ᠠᠮᠠᠷᠠᠬᠤ ᠪᠠᠷ ᠬᠡᠪᠲᠡᠵᠡᠭᠡᠯᠡ᠃ ᠦᠦᠷ ᠦ᠋ᠨ ᠭᠡᠭᠡ ᠳᠥᠩᠭᠡᠵᠦ ᠴᠤᠬᠤᠢᠬᠤ ᠶ᠋ᠢᠨ ᠠᠯᠲᠠ ᠳ᠋ᠤ᠌ ᠲᠡᠳᠡ ᠴᠥᠮ ᠨᠣᠢᠷᠰᠤᠵᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠬᠠᠮᠢᠭᠠ ᠠ᠋ᠴᠠ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠣᠯᠠᠨ ᠴᠡᠷᠢᠭ ᠦ᠋ᠳ ᠪᠦᠴᠢᠨ ᠠᠪᠤᠪᠠ᠃ ᠴᠢᠮᠡᠭᠡ ᠠᠨᠢᠷ ᠡᠰᠡ ᠭᠠᠷᠭᠠᠬᠤ ᠲᠤᠯᠠ ᠬᠡᠨ ᠴᠦ᠍ ᠰᠡᠷᠡᠭᠰᠡᠨ ᠦᠭᠡᠢ᠃ ᠴᠡᠷᠢᠭ ᠦ᠋ᠳ ᠤᠨᠲᠠᠵᠤ ᠪᠠᠢᠭᠠ ᠬᠥᠮᠦᠰ ᠢ᠋ ᠵᠠᠬᠠ ᠠ᠋ᠴᠠ ᠨᠢ ᠴᠠᠭᠠᠰᠢ ᠬᠠᠷᠠᠭᠤᠯᠤᠨ ᠶᠠᠪᠤᠭᠰᠠᠭᠠᠷ ᠭᠤᠳᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠣᠴᠢᠯᠠ᠃ ᠡᠨᠡ ᠪᠦᠬᠦᠨ ᠲᠤᠭ ᠨᠣᠢᠷ ᠤ᠋ᠨ ᠴᠠᠭ ᠢ᠋ᠶ᠋ᠠᠷ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠲᠤᠯᠠ ᠪᠥᠬᠡ ᠨᠣᠢᠷᠰᠤᠭᠰᠠᠨ ᠭᠤᠳᠠᠨ ᠬᠠᠲᠤᠨ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠨ᠂ ᠤᠴᠢᠷ ᠢ᠋ᠶ᠋ᠠᠨ ᠶᠠᠷᠢᠯᠴᠠᠵᠤ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠨ ᠵᠢᠷᠭᠠᠯ ᠲᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠨᠡ᠃
*
ᠬᠠᠪᠤᠷ ᠤᠨ ᠰᠢᠷᠠ ᠨᠠᠷᠠ ᠵᠤᠯᠠᠢ ᠳᠡᠭᠡᠷᠡ ᠡᠴᠡ ᠲᠥᠭᠡᠨᠡᠨ ᠪᠠᠢᠭᠠ ᠴᠤ᠌ ᠴᠠᠭᠠᠨᠠ ᠪᠠᠨ ᠯᠠ ᠤᠷᠢᠨ ᠴᠠᠭ ᠨᠠᠭᠠᠰᠢᠯᠠᠬᠤ ᠪᠣᠯᠤᠭᠠ ᠦᠭᠡᠢ ᠶ᠋ᠢ ᠢᠯᠡᠳᠬᠡᠬᠦ ᠮᠡᠲᠦ ᠰᠠᠯᠬᠢ ᠵᠢᠩᠳᠡᠭᠦᠯᠦᠨ ᠪᠠᠢᠯᠠ᠃ ᠬᠠᠷᠠᠬᠣᠷᠣᠮ ᠤ᠋ᠨ ᠳᠡᠨᠵᠢ ᠳᠡᠭᠡᠷᠡ ᠡᠴᠡ ᠨᠢᠭᠡᠨ ᠶᠡᠬᠡ ᠨᠡᠭᠦᠳᠡᠯ ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠭᠠᠷᠴᠤ ᠶᠠᠪᠤᠯᠠ᠃ ᠡᠨᠡ ᠨᠡᠭᠦᠳᠡᠯ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠮᠡᠲᠦ ᠦᠷᠭᠦᠯᠵᠢᠯᠡᠨ ᠬᠠᠷᠠᠭᠠ ᠴᠣᠴᠢᠭᠠᠨᠠ᠃ ᠨᠡᠭᠦᠳᠡᠯ ᠦ᠋ᠨ ᠳᠤᠮᠳᠠ ᠠᠰᠤᠷᠤ ᠲᠣᠮᠣ ᠭᠡᠷ ᠲᠡᠷᠭᠡ᠂ ᠠᠷᠤ ᠠ᠋ᠴᠠ ᠨᠢ ᠨᠠᠢ᠍ᠮᠠᠨ ᠵᠢᠵᠢᠭ ᠭᠡᠷ ᠲᠡᠷᠭᠡ ᠳᠠᠭᠠᠯᠳᠤᠨ ᠶᠠᠪᠤᠬᠤ ᠠᠵᠢ᠃ ᠡᠬᠢᠨ ᠦ᠌ ᠭᠡᠷ ᠲᠦ᠍ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠬᠦᠦ ᠬᠦᠯᠡᠬᠦ ᠶ᠋ᠢᠨ ᠬᠠᠮᠲᠤ ᠵᠠᠯᠠᠷᠠᠵᠤ ᠶᠠᠪᠤᠯᠠ᠃ ᠳᠠᠷᠠᠭᠠ ᠶ᠋ᠢᠨ ᠭᠡᠷ ᠦ᠋ᠳ ᠲᠦ᠍ ᠬᠠᠲᠤᠨ ᠡᠬᠡ ᠶ᠋ᠢᠨ ᠠᠯᠪᠠᠲᠤ ᠨᠤᠭᠤᠳ᠂ ᠲᠡᠳᠡᠨ ᠦ᠌ ᠲᠣᠭᠣᠭᠠᠴᠢ ᠪᠠᠭᠤᠷᠴᠢᠳ ᠳᠠᠭᠠᠯᠳᠤᠨ ᠶᠠᠪᠤᠨᠠ᠃ ᠠᠷᠤ ᠠ᠋ᠴᠠ ᠨᠢ ᠴᠤᠪᠤᠬᠤ ᠨᠡᠭᠦᠳᠡᠯ ᠦ᠋ᠨ ᠬᠥᠰᠬᠡ ᠶ᠋ᠢᠨ ᠶᠡᠬᠡᠩᠬᠢ ᠨᠢ ᠭᠣᠣᠯᠳᠠᠭᠤ ᠲᠡᠮᠡᠭᠡ ᠠᠵᠢ᠃ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠲᠡᠰᠪᠦᠷᠢ ᠲᠡᠢ᠂ ᠡᠵᠡᠨ ᠢ᠋ᠶ᠋ᠡᠨ ᠶᠠᠪᠠᠭᠠᠯᠠᠬᠤ ᠦᠭᠡᠢ ᠢᠲᠡᠭᠡᠯᠲᠦ ᠤᠨᠤᠭᠠ ᠪᠣᠯ ᠲᠡᠮᠡᠭᠡ ᠭᠡᠳᠡᠭ ᠢ᠋ ᠮᠣᠩᠭᠣᠯᠴᠤᠳ ᠰᠠᠢᠨ ᠮᠡᠳᠡᠨᠡ᠃
ᠡᠴᠦᠰ ᠲᠡᠭᠦᠰᠬᠡᠯ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠮᠡᠲᠦ ᠡᠨᠡ ᠵᠠᠮ᠂ ᠥᠭᠰᠥᠵᠦ ᠳᠠᠪᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠤᠷᠭᠤᠵᠤ ᠪᠣᠰᠤᠭᠠᠳ ᠪᠠᠢᠭᠠ ᠮᠡᠲᠦ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠠᠭᠤᠯᠠ ᠤᠰᠤ ᠶ᠋ᠢ ᠳᠠᠪᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠪᠠ᠃ ᠢᠰᠯᠠᠮ ᠱᠠᠰᠢᠨᠲᠠᠨ ᠨᠤᠭᠤᠳ ᠤ᠋ᠨ ᠠᠷᠠᠯᠵᠢᠶᠠ ᠮᠠᠢᠮᠠᠢ᠂ ᠡᠷᠳᠡᠮ ᠪᠣᠯᠪᠠᠰᠤᠷᠠᠯ ᠤ᠋ᠨ ᠥᠯᠥᠭᠡᠢ ᠪᠣᠯᠤᠭᠰᠠᠨ ᠪᠤᠬᠠᠷ ᠬᠣᠲᠠ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠵᠠᠢ ᠳ᠋ᠤ᠌ ᠢᠷᠡᠭᠡᠳᠦᠢ ᠶ᠋ᠢᠨ ᠡᠵᠡᠨ ᠢ᠋ᠶ᠋ᠡᠨ ᠬᠦᠯᠢᠶᠡᠨ ᠪᠣᠢ ᠶ᠋ᠢ ᠡᠨᠡ ᠴᠣᠪᠣᠭᠠᠨ ᠳ᠋ᠤ᠌ ᠶᠠᠪᠤᠭᠠ ᠬᠥᠮᠦᠰ ᠯᠡ ᠮᠡᠳᠡᠵᠦ ᠪᠠᠢᠭᠠ᠃
ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠤᠲᠤᠭ ᠡᠴᠦᠰ ᠲᠡᠭᠦᠰᠬᠡᠯ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠵᠠᠮ ᠵᠠᠭᠤᠷᠠ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠠᠯᠪᠠᠲᠤ ᠨᠤᠭᠤᠳ ᠠᠯᠲᠠᠨ ᠤᠷᠤᠭ ᠤ᠋ᠨ ᠬᠠᠲᠤᠨ ᠵᠠᠯᠠᠷᠠᠨ ᠶᠠᠪᠤᠭᠠ ᠶ᠋ᠢ ᠮᠡᠳᠡᠵᠦ᠂ ᠳᠣᠣᠷᠠ ᠪᠦᠷᠢᠨᠡ ᠬᠦᠨᠳᠦᠳᠬᠡᠨ ᠤᠭᠲᠤᠵᠤ᠂ ᠪᠠᠰᠠ ᠬᠦ᠌ ᠦᠳᠡᠨ ᠪᠠᠢᠭᠠ ᠨᠢ ᠬᠠᠷᠠᠭᠳᠠᠨᠠ᠃
ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠣᠯᠠᠳᠬᠤ ᠲᠣᠰᠤᠮ ᠬᠥᠮᠦᠰ ᠦ᠋ᠨ ᠵᠢᠰᠦ ᠴᠢᠷᠠᠢ᠂ ᠦᠭᠡ ᠬᠡᠯᠡ᠂ ᠵᠠᠩ ᠵᠠᠩᠰᠢᠯ᠂ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠭᠡᠷ ᠣᠷᠣᠨ ᠥᠭᠡᠷᠡᠴᠢᠯᠡᠭᠳᠡᠭᠰᠡᠭᠡᠷ᠂ ᠲᠦᠮᠡᠨ ᠣᠯᠠᠨ ᠬᠥᠯᠬᠢᠭᠰᠡᠨ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶ᠋ᠢᠨ ᠭᠠᠵᠠᠷ ᠪᠤᠬᠠᠷ ᠲᠤ᠌ ᠬᠥᠯ ᠲᠠᠯᠪᠢᠯᠠ᠃ ᠥᠭᠡᠳᠡᠢ ᠬᠠᠭᠠᠨ ᠠᠮᠢᠳᠤ ᠰᠡᠷᠡᠭᠦᠨ ᠠᠬᠤᠢ ᠳ᠋ᠠᠭᠠᠨ ᠡᠨᠡ ᠭᠠᠵᠠᠷ ᠢ᠋ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠪᠣᠯᠤᠨ ᠲᠡᠭᠦᠨ ᠦ᠌ ᠬᠡᠦᠬᠡᠳ ᠦ᠋ᠳ ᠲᠦ᠍ ᠬᠦᠯᠢᠶᠡᠯᠭᠡᠨ ᠥᠭᠭᠦᠭᠰᠡᠨ ᠬᠡᠳᠦᠢ ᠴᠦ᠍ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠡᠷᠡᠭ ᠶᠡᠬᠡ ᠪᠠᠢᠭᠰᠠᠨ ᠲᠤᠯᠠ ᠨᠠᠭᠠᠰᠢ ᠭᠠᠷᠴᠤ ᠵᠠᠪᠳᠤᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠪᠠᠷᠠᠯᠬᠠᠨ ᠢᠷᠡᠵᠦ ᠪᠣᠢ ᠨᠢ ᠡᠨᠡ ᠶᠦᠮ᠃ ᠨᠢᠭᠡᠨ ᠴᠠᠭ ᠲᠤ᠌ ᠬᠦᠦ ᠬᠤᠪᠢᠯᠠᠢ ᠪᠠᠨ ᠣᠭᠲᠣ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠣᠷᠬᠢᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠰᠢᠭ᠋ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠡᠨᠡ ᠭᠠᠵᠠᠷ ᠤ᠋ᠨ ᠬᠡᠷᠡᠭ ᠢ᠋ ᠬᠦᠦ ᠬᠥᠯᠡᠬᠦ ᠳ᠋ᠡᠭᠡᠨ ᠬᠦᠯᠢᠶᠡᠯᠭᠡᠨ ᠥᠭᠭᠦᠭᠡᠳ ᠪᠤᠴᠠᠬᠤ ᠵᠣᠷᠢᠯᠭᠠ ᠲᠠᠢ ᠪᠠᠢᠪᠠ᠃
ᠬᠠᠲᠤᠨ ᠢ᠋ ᠲᠣᠰᠣᠨ ᠠᠪᠴᠤ ᠠᠭᠤᠯᠵᠠᠭᠰᠠᠨ ᠠᠩᠬᠠᠨ ᠤ᠋ ᠬᠥᠮᠦᠨ ᠪᠣᠯ ᠰᠤᠷᠬᠠᠭᠲᠠᠨᠢ ᠶ᠋ᠢ ᠪᠤᠬᠠᠷ ᠬᠣᠲᠠ ᠳ᠋ᠤ᠌ ᠤᠭᠲᠤᠨ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠳᠣᠷᠣᠨᠠᠲᠤ ᠢᠷᠡᠨ ᠦ᠌ ᠬᠡᠷᠡᠭ ᠢ᠋ ᠵᠠᠰᠠᠭᠴᠢ ᠡᠷᠬᠢᠮ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠪᠠᠢᠯᠠ᠃ ᠠᠯᠯᠠᠾ ᠲᠩᠷᠢ ᠶ᠋ᠢᠨ ᠨᠡᠷᠡ ᠪᠡᠷ ᠮᠡᠨᠳᠦ ᠮᠡᠳᠡᠨ ᠠᠭᠤᠯᠵᠠᠭᠰᠠᠨ ᠡᠨᠡ ᠡᠷᠬᠢᠮ᠂
— ᠬᠠᠲᠤᠨ ᠲᠠᠨ ᠤ᠋ ᠲᠤᠬᠠᠢ ᠳᠣᠮᠣᠭ ᠮᠡᠲᠦ ᠶᠠᠷᠢᠶᠠ ᠶ᠋ᠢ ᠲᠠᠯᠠ ᠨᠤᠲᠤᠭ ᠠ᠋ᠴᠠ ᠢᠷᠡᠭᠰᠡᠨ ᠯᠠᠯᠤ ᠶ᠋ᠢᠨ ᠮᠥᠷᠭᠥᠯᠴᠢᠳ ᠠᠮᠠ ᠪᠤᠯᠢᠶᠠᠯᠳᠤᠨ ᠶᠠᠷᠢᠯᠴᠠᠬᠤ ᠲᠤᠯᠠ ᠡᠷᠬᠢᠮ ᠬᠠᠲᠤᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠡᠨᠳᠡ ᠠᠭᠤᠯᠵᠠᠬᠤ ᠵᠠᠪᠰᠢᠶᠠᠨ ᠭᠠᠷᠤᠯᠠ ᠭᠡᠮᠡᠨ ᠢᠷᠡᠭᠡᠳ ᠬᠦᠯᠢᠶᠡᠵᠦ ᠪᠠᠢᠯᠠ ᠭᠡᠬᠦ ᠳ᠋ᠦ᠍᠂
— ᠺᠣᠷᠭᠤᠽ ᠨᠣᠶᠠᠨᠲᠠᠨ ᠲᠠᠨ ᠤ᠋ ᠠᠯᠳᠠᠷ ᠨᠡᠷᠡ ᠶ᠋ᠢ ᠴᠦ᠍ ᠲᠠᠯᠠ ᠨᠤᠲᠤᠭ ᠳᠠᠶᠠᠭᠠᠷ ᠰᠣᠨᠣᠰᠤᠨ ᠪᠠᠬᠠᠳᠤᠵᠤ ᠪᠠᠢᠳᠠᠭ ᠲᠤᠯᠠ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠨ᠂ ᠰᠣᠶᠣᠷᠬᠠᠬᠤ ᠬᠡᠷᠡᠭ ᠶᠠᠭᠤ ᠪᠢᠯᠡ᠃ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠦᠶᠡ ᠡᠴᠡ ᠶᠡᠬᠡ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠳ᠋ᠦ᠍ ᠦᠨᠡᠨᠴᠢ ᠪᠡᠷ ᠵᠢᠳᠬᠦᠭᠰᠡᠨ ᠡᠷᠬᠢᠮ ᠭᠠᠪᠢᠶᠠ ᠲᠠᠢ ᠬᠥᠮᠦᠨ ᠪᠢᠯᠡ ᠲᠠ ᠭᠡᠮᠡᠨ ᠥᠪᠡᠷ ᠡᠴᠡ ᠠᠬᠠᠮᠠᠳ ᠨᠠᠰᠤ ᠲᠠᠢ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠳ᠋ᠤ᠌ ᠬᠡᠯᠡᠵᠦ ᠰᠣᠶᠣᠷᠬᠠᠬᠤ ᠬᠡᠷᠡᠭ ᠦᠭᠡᠢ ᠶ᠋ᠢ ᠰᠠᠨᠠᠭᠤᠯᠤᠨ ᠬᠡᠯᠡᠬᠦ ᠳ᠋ᠦ᠍ ᠺᠤᠷᠭᠤᠽ ᠨᠣᠶᠠᠨᠲᠠᠨ᠂ ᠬᠠᠲᠤᠨᠲᠠᠨ ᠢ᠋ ᠤᠭᠲᠤᠨ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠲᠡᠭᠦᠨ ᠳ᠋ᠦ᠍ ᠲᠠᠨᠢᠯᠴᠠᠭᠤᠯᠤᠯᠠ᠃
— ᠬᠠᠲᠤᠨᠲᠠᠨ ᠪᠣᠯᠭᠣᠭᠠᠨᠠ ᠤᠤ᠃ ᠡᠨᠡ ᠬᠥᠮᠦᠰ ᠪᠣᠯ ᠪᠠᠬᠠᠷᠽ ᠨᠤᠲᠤᠭ ᠤ᠋ᠨ ᠰᠢᠳᠤᠷᠭᠤ ᠵᠢᠷᠤᠮ ᠱᠸᠢᠾ ᠥᠯᠢ ᠢᠰᠯᠠᠮ᠂ ᠮᠥᠨ ᠪᠤᠬᠠᠷ ᠬᠣᠲᠠ ᠶ᠋ᠢᠨ ᠬᠡᠷᠡᠭ ᠢ᠋ ᠲᠦᠷ ᠬᠠᠮᠢᠶᠠᠷᠴᠤ ᠪᠣᠢ ᠰᠠᠶ᠋ᠢᠹ ᠠᠳ᠋ ᠳ᠋ᠢᠨ ᠨᠠᠷ ᠶᠤᠮ᠃ ᠲᠡᠳᠡ ᠬᠠᠲᠤᠨ ᠲᠠᠨ ᠳ᠋ᠤ᠌ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠦᠨ ᠤᠭᠲᠤᠨ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠪᠠᠢᠨᠠ ᠭᠡᠪᠡ᠃
ᠰᠤᠷᠬᠠᠭᠲᠠᠨᠢ ᠶ᠋ᠢ ᠤᠭᠲᠤᠨ ᠠᠪᠤᠭᠰᠠᠨ ᠬᠥᠮᠦᠰ ᠬᠠᠲᠤᠨᠲᠠᠨ ᠳ᠋ᠤ᠌ ᠭᠦᠨ ᠬᠦᠨᠳᠦᠳᠬᠡᠯ ᠢᠯᠡᠷᠬᠡᠢᠯᠡᠭᠡᠳ᠂ ᠤᠷᠲᠤ ᠦᠷᠭᠦᠭᠡᠨ ᠳ᠋ᠡᠭᠡᠨ ᠪᠠᠷᠠᠯᠬᠠᠬᠤ ᠶ᠋ᠢ ᠬᠦᠰᠡᠪᠡ᠃
ᠬᠠᠲᠤᠨ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠮᠠᠭᠴᠠ ᠲᠠᠯᠠ ᠨᠤᠲᠤᠭ ᠲᠤ᠌ ᠰᠠᠷᠲᠠᠭᠤᠯ᠂ ᠫᠧᠷᠰ ᠡᠴᠡ ᠢᠷᠡᠳᠡᠭ ᠡᠷᠢᠶᠡᠨ ᠠᠯᠠᠭ ᠬᠡ ᠲᠡᠢ ᠬᠡᠪᠢᠰᠦᠨ ᠳᠡᠭᠡᠭᠦᠷ ᠠᠯᠬᠤᠨ᠂ ᠦᠷᠭᠦᠭᠡᠨ ᠦ᠌ ᠬᠣᠢᠮᠣᠷ ᠲᠤ᠌ ᠣᠴᠢᠵᠤ ᠲᠤᠬᠠᠯᠠᠯᠠ᠃ ᠦᠷᠭᠦᠭᠡᠨ ᠦ᠌ ᠭᠣᠣᠯ ᠳ᠋ᠤ᠌ ᠬᠣᠶᠠᠷ ᠶᠡᠬᠡ ᠪᠠᠭᠠᠨᠠ ᠪᠠᠢᠬᠤ ᠠᠭᠠᠳ ᠲᠡᠭᠦᠨ ᠳᠡᠭᠡᠷᠡ ᠠᠷᠠᠪ ᠦᠰᠦᠭ ᠢ᠋ ᠠᠯᠲᠠᠨ ᠰᠢᠷᠠ ᠥᠩᠭᠡ ᠪᠡᠷ ᠤᠭᠠᠯᠵᠠᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠬᠠᠷᠠᠭᠳᠠᠨᠠ᠃ ᠬᠠᠲᠤᠨ ᠡᠬᠡ ᠣᠷᠴᠢᠨ ᠤ᠋ ᠪᠠᠢᠳᠠᠯ ᠢ᠋ ᠠᠩᠵᠠᠭᠠᠷᠠᠨ ᠬᠠᠷᠠᠭᠠᠳ᠂
— ᠡᠷᠳᠡᠮ ᠦ᠋ᠨ ᠬᠣᠲᠠ ᠪᠤᠬᠠᠷ ᠭᠡᠵᠦ ᠡᠵᠡᠨ ᠬᠠᠭᠠᠨ ᠤ᠋ ᠦᠶᠡ ᠡᠴᠡ ᠬᠡᠯᠡᠯᠴᠡᠬᠦ ᠪᠣᠯᠤᠭᠰᠠᠨ ᠡᠨᠡ ᠭᠠᠵᠠᠷ ᠲᠤ᠌ ᠬᠥᠯ ᠲᠠᠯᠪᠢᠵᠤ ᠦᠵᠡᠬᠦ ᠰᠠᠨ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠬᠠᠷᠢᠨ ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠬᠥᠮᠦᠰ ᠦ᠋ᠨ ᠪᠠᠢᠷᠢ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠨ ᠬᠠᠷᠠᠪᠠᠯ ᠡᠷᠳᠡᠮ ᠨᠣᠮ ᠤ᠋ᠨ ᠬᠣᠲᠠ ᠭᠡᠬᠦ ᠡᠴᠡ ᠢᠯᠡᠭᠦᠦ ᠲᠡᠢ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶ᠋ᠢᠨ ᠭᠠᠵᠠᠷ ᠰᠢᠭ᠋ ᠰᠠᠨᠠᠭᠳᠠᠯᠠ᠃
ᠦᠯᠢ ᠢᠰᠯᠠᠮ ᠨᠠᠷ ᠭᠡᠷᠡᠯᠲᠦᠭᠰᠡᠨ ᠬᠦᠷᠡᠩ ᠥᠩᠭᠡ ᠲᠡᠢ ᠨᠢᠳᠦ ᠪᠡᠨ ᠣᠨᠢᠢᠯᠭᠠᠨ ᠬᠠᠲᠤᠨ ᠡᠬᠡ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
— ᠥᠨᠥ ᠴᠠᠭ ᠲᠤ᠌ ᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠡᠷᠳᠡᠮ ᠨᠣᠮ ᠠ᠋ᠴᠠ ᠢᠯᠡᠭᠦᠦ ᠲᠡᠢ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠵᠦ᠂ ᠠᠮᠢᠳᠤᠷᠠᠯ ᠠᠬᠤᠢ ᠪᠠᠨ ᠵᠠᠯᠭᠠᠭᠤᠯᠬᠤ ᠪᠣᠯᠤᠭᠰᠠᠨ᠃ ᠨᠢᠭᠡᠨ ᠴᠠᠭ ᠤ᠋ᠨ ᠡᠷᠳᠡᠮ ᠦ᠋ᠨ ᠬᠣᠲᠠ ᠥᠨᠥ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠪᠠᠭᠠ ᠪᠠᠭᠠ ᠪᠠᠷ ᠠᠯᠳᠠᠭᠰᠠᠭᠠᠷ ᠯᠠ ᠪᠠᠢᠨᠠ᠃ ᠬᠠᠭᠠᠨᠲᠤ ᠲᠥᠷᠥ ᠡᠴᠡ ᠠᠪᠬᠤ ᠲᠠᠲᠠᠪᠤᠷᠢ ᠡᠳᠦᠷ ᠡᠳᠦᠷ ᠢ᠋ᠶ᠋ᠡᠷ ᠨᠡᠮᠡᠭᠳᠡᠭᠰᠡᠭᠡᠷ ᠪᠠᠢᠬᠤ ᠲᠤᠯᠠ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠡᠷᠳᠡᠮ ᠨᠣᠮ ᠵᠢᠭᠠᠵᠤ ᠰᠠᠭᠤᠬᠤ ᠴᠠᠭ ᠵᠠᠪ ᠪᠢᠳᠡᠨ ᠳ᠋ᠦ᠍ ᠦᠭᠡᠢ ᠪᠣᠯᠤᠭᠠᠳ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠳ ᠰᠠᠨᠠᠭᠠ ᠠᠯᠳᠠᠬᠤ ᠨᠢ ᠲᠡᠳᠡᠨ ᠳ᠋ᠦ᠍ ᠴᠦ᠍ ᠮᠥᠨ ᠬᠡᠴᠡᠭᠦᠬᠡᠨ ᠴᠠᠭ ᠢᠷᠡᠭᠡᠳ ᠪᠠᠢᠭᠠ ᠶ᠋ᠢ ᠬᠠᠷᠠᠭᠤᠯᠤᠨᠠ᠃ ᠦᠯᠢ ᠢᠰᠯᠠᠮ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠯᠠᠯᠤ ᠶ᠋ᠢᠨ ᠱᠠᠰᠢᠨᠲᠤ ᠪᠤᠰᠤᠳ ᠬᠣᠲᠠ ᠨᠤᠭᠤᠳ ᠢ᠋ ᠪᠣᠳᠣᠪᠠᠯ ᠮᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠭᠠᠷ ᠤ᠋ᠨ ᠤᠷᠠ ᠳᠦᠢᠲᠡᠢ ᠬᠥᠮᠦᠰ ᠣᠯᠠᠨ ᠪᠣᠯᠬᠣᠷ ᠭᠠᠷ ᠤᠷᠠᠯᠠᠯ ᠤ᠋ᠨ ᠵᠦᠢᠯ᠂ ᠡᠯᠳᠡᠪ ᠴᠠᠮᠢᠨ ᠡᠳ᠋ ᠬᠡᠷᠡᠭᠯᠡᠯ ᠬᠢᠵᠦ ᠬᠤᠳᠠᠯᠳᠤᠭᠠᠴᠢᠳ ᠲᠤ ᠨᠡᠢᠯᠡᠭᠦᠯᠳᠡᠭ ᠶᠦ᠍ᠮ᠃ ᠭᠡᠰᠡᠨ ᠬᠡᠳᠦᠢ ᠴᠦ᠍ ᠪᠢᠳᠡᠨ ᠦ᠌ ᠠᠷᠠᠯᠵᠢᠬᠤ ᠵᠦᠢᠯ ᠢ᠋ ᠬᠤᠳᠠᠯᠳᠤᠭᠠᠴᠢᠳ ᠦᠯᠡᠮᠵᠢ ᠬᠢᠮᠳᠠ ᠦᠨᠡ ᠪᠡᠷ ᠠᠪᠴᠤ ᠪᠠᠢᠭᠠ ᠲᠤᠯᠠ ᠥᠨᠥ ᠮᠠᠷᠭᠠᠰᠢ ᠪᠠᠨ ᠯᠠ ᠵᠠᠯᠭᠠᠭᠤᠯᠵᠤ ᠰᠠᠭᠤᠨᠠ ᠭᠡᠮᠡᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠲᠣᠭᠠᠴᠢᠨᠠ᠃ ᠰᠢᠨᠡ ᠡᠵᠡᠳ ᠢ᠋ᠶ᠋ᠡᠨ ᠤᠭᠲᠤᠵᠤ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠ ᠶ᠋ᠢ ᠰᠣᠷᠬᠠᠭᠲᠠᠨᠢ ᠬᠠᠲᠤᠨ ᠰᠣᠨᠣᠰᠤᠩᠭᠠᠨ ᠪᠠᠰᠠ ᠯᠠ ᠲᠣᠯᠣᠭᠠᠢ ᠡᠪᠡᠳᠬᠡᠭᠰᠡᠨ ᠶᠡᠬᠡ ᠠᠵᠢᠯ ᠬᠦᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠯᠠ᠃
—ᠨᠢᠭᠡᠨᠲᠡ ᠥᠪᠡᠷ ᠦ᠋ᠨ ᠭᠠᠵᠠᠷ ᠢ᠋ ᠵᠠᠰᠠᠨ ᠰᠠᠭᠤᠬᠤ ᠪᠠᠷ ᠢᠷᠡᠭᠰᠡᠨ ᠲᠤᠯᠠ ᠡᠨᠡ ᠭᠠᠵᠠᠷ ᠤ᠋ᠨ ᠬᠡᠷᠡᠭ ᠢ᠋ ᠬᠡᠷᠬᠢᠨ ᠶᠠᠪᠤᠭᠤᠯᠵᠤ᠂ ᠶᠠᠭᠠᠬᠢᠪᠠᠯ ᠲᠠᠭᠠᠲᠠᠢ ᠠᠮᠢᠳᠤᠷᠠᠵᠤ ᠪᠣᠯᠬᠤ ᠪᠣᠯᠤᠮᠵᠢ ᠲᠠᠢ ᠶ᠋ᠢ ᠠᠷᠠᠳ ᠲᠦᠮᠡᠨ ᠦ᠌ ᠡᠮᠦᠨᠡ ᠨᠡᠭᠡᠭᠡᠨ ᠥᠭᠬᠦ ᠨᠢ ᠪᠢᠳᠡᠨ ᠦ᠌ ᠡᠭᠦᠷᠭᠡ᠃ ᠡᠨᠡ ᠭᠠᠵᠠᠷ ᠢ᠋ ᠵᠠᠰᠠᠭᠠᠳ ᠪᠢ ᠥᠪᠡᠷ ᠦ᠋ᠨ ᠬᠦᠦ ᠬᠦᠯᠡᠬᠦ ᠶ᠋ᠢ ᠦᠯᠡᠳᠡᠭᠡᠨ ᠲᠠᠯᠠ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠤᠴᠢᠷ ᠲᠠᠢ ᠭᠡᠪᠡ᠃ ᠺᠣᠷᠭᠤᠽ ᠨᠣᠶᠠᠨ ᠶᠠᠩᠬᠢᠭᠠᠷ ᠴᠡᠭᠡᠵᠢᠨ ᠳᠡᠭᠡᠷᠡ ᠪᠡᠨ ᠭᠠᠷ ᠢ᠋ᠶ᠋ᠠᠨ ᠳᠠᠷᠤᠭᠠᠳ᠄
— ᠠᠯᠯᠠᠾ ᠲᠡᠭᠷᠢ᠃ ᠳᠣᠷᠣᠨᠠᠲᠤ ᠢᠷᠡᠨ ᠳ᠋ᠦ᠍ ᠴᠤ ᠪᠠᠢᠳᠠᠯ ᠡᠢᠮᠦ ᠪᠠᠢᠨᠠ᠃ᠠᠷᠠᠳ ᠣᠯᠠᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠢᠷᠡᠬᠦ ᠠᠯᠪᠠ ᠲᠠᠲᠠᠪᠤᠷᠢ ᠶ᠋ᠢᠨ ᠠᠴᠢᠶᠠ ᠬᠢᠷᠢ ᠡᠴᠡ ᠬᠡᠲᠦᠷᠡᠵᠦ ᠪᠠᠢᠨᠠ᠃ᠵᠠᠨᠳᠠᠯᠴᠢᠨ ᠮᠡᠲᠦ ᠠᠭᠠᠰᠢᠯᠠᠬᠤ ᠲᠠᠲᠠᠪᠤᠷᠢ ᠬᠤᠷᠢᠶᠠᠭᠴᠢᠳ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠤᠲᠤᠭ ᠠ᠋ᠴᠠ ᠢᠷᠡᠵᠦ ᠬᠤᠷᠢᠶᠠᠵᠤ ᠴᠤᠭᠯᠠᠭᠤᠯᠤᠭᠰᠠᠨ ᠪᠦᠬᠦᠨ ᠢ᠋ ᠴᠥᠯᠪᠡᠨ ᠣᠳᠬᠤ ᠲᠤᠯᠠ ᠡᠨᠳᠡ ᠪᠠᠢᠭᠠ ᠢᠷᠭᠡᠳ ᠬᠡᠷᠬᠢᠨ ᠠᠵᠤ ᠲᠥᠷᠥᠬᠦ ᠪᠢᠯᠡ᠃ ᠲᠠᠯᠠ ᠨᠤᠲᠤᠭ ᠠ᠋ᠴᠠ ᠳᠣᠷᠣᠨᠠᠲᠤ ᠢᠷᠡᠨ ᠦ᠌ ᠬᠡᠷᠡᠭ ᠢ᠋ ᠵᠠᠰᠠᠵᠤ ᠪᠠᠢᠭᠠ ᠨᠠᠮᠠᠶ᠋ᠢ ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠳᠠᠭᠤᠳᠠᠭᠤᠯᠤᠭᠰᠠᠨ ᠤᠴᠢᠷ ᠢ᠋ ᠲᠠᠨ ᠠ᠋ᠴᠠ ᠯᠠᠪᠯᠠᠨ ᠠᠰᠠᠭᠤᠬᠤ ᠪᠠᠷ ᠬᠦᠯᠢᠶᠡᠵᠦ ᠪᠠᠢᠯᠠ ᠭᠡᠪᠡ᠃
— ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠳᠠᠭᠤᠳᠠᠭᠤᠯᠤᠭᠰᠠᠨ ᠬᠡᠷᠡᠭ ᠤᠤ᠃ᠨᠠᠭᠠᠰᠢ ᠭᠠᠷᠬᠤ ᠳ᠋ᠤ᠌ ᠡᠢᠮᠦ ᠵᠦᠢᠯ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠲᠤᠯᠠ ᠨᠡᠭᠦᠳᠡᠯᠯᠡᠵᠦ ᠶᠠᠪᠤᠬᠤ ᠳ᠋ᠤ᠌ ᠥᠷᠲᠡᠭᠡᠯᠡᠭᠰᠡᠨ ᠬᠡᠯᠡ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠭᠰᠡᠨ ᠪᠣᠯᠤᠯᠲᠠᠢ᠃ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠰᠠᠭᠤᠨᠠ᠃
—ᠶᠠᠮᠠᠷ ᠲᠠᠢ ᠴᠤ᠌ ᠭᠡᠰᠡᠨ ᠬᠠᠲᠤᠨ ᠳ᠋ᠤ᠌ ᠪᠠᠷᠠᠯᠬᠠᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ᠃ᠤᠷᠲᠤ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠪᠡᠯᠡᠳᠬᠦ ᠴᠠᠭ ᠪᠣᠯᠵᠠᠢ ᠭᠡᠮᠡᠨ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠭᠠᠳ ᠪᠠᠢᠭᠠ᠂ ᠬᠠᠲᠤᠨ ᠳ᠋ᠤ᠌ ᠬᠡᠯᠡᠭᠡᠳ ᠪᠠᠢᠭᠠ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠥᠭᠦᠯᠡᠯᠡ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠺᠣᠷᠭᠤᠽ ᠨᠣᠶᠠᠨ ᠢ᠋ ᠲᠠᠯᠠ ᠨᠤᠲᠤᠭ ᠲᠤ ᠳᠠᠭᠤᠳᠠᠭᠤᠯᠤᠭᠰᠠᠨ ᠤ᠋ ᠤᠴᠢᠷ ᠢ᠋ ᠭᠠᠢᠬᠠᠰᠢᠷᠠᠨ ᠪᠠᠢᠯᠠ᠃《ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠡᠨᠡ ᠪᠦᠬᠦᠨ ᠢ᠋ ᠬᠢᠭᠡᠳ ᠪᠠᠢᠨᠠ ᠤᠤ᠂ ᠠᠯᠢ ᠡᠰᠡᠪᠡᠯ ᠲᠡᠭᠦᠨ ᠦ᠌ ᠨᠡᠷᠡ ᠶ᠋ᠢ ᠪᠠᠷᠢᠭᠰᠠᠨ ᠥᠭᠡᠷᠡ ᠬᠥᠮᠦᠰ ᠦ᠋ᠨ ᠶᠠᠪᠤᠭᠤᠯᠭᠠ ᠤᠤ᠃ᠬᠠᠮᠢᠭᠠ ᠨᠢ ᠴᠦ᠍ ᠣᠴᠢᠭᠰᠠᠨ ᠠᠳᠠᠯᠢᠬᠠᠨ ᠦᠭᠡ ᠰᠣᠨᠣᠰᠴᠤ ᠪᠠᠢᠭᠠ ᠨᠢ ᠬᠠᠭᠠᠨᠲᠤ ᠲᠥᠷᠥ ᠶ᠋ᠢᠨ ᠳᠠᠷᠤᠮᠲᠠ ᠡᠵᠡᠨᠲᠦ ᠭᠦᠷᠦᠨ ᠢ᠋ ᠪᠦᠬᠦᠯᠢ ᠳ᠋ᠦ᠍ ᠨᠢ ᠨᠥᠮᠥᠷᠴᠡᠢ》ᠭᠡᠮᠡᠨ ᠪᠣᠳᠣᠵᠤ ᠰᠠᠭᠤᠯᠠ᠃ ᠰᠠᠢᠹ ᠠᠳ᠋ ᠳ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠨ᠂
— ᠺᠣᠷᠭᠤᠽ ᠨᠣᠶᠠᠨᠲᠠᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠢᠲᠡᠭᠡᠮᠵᠢᠲᠦ ᠬᠥᠮᠦᠨ ᠦ᠌ ᠬᠤᠪᠢ ᠪᠠᠷ ᠥᠪᠡᠷ ᠦ᠋ᠨ ᠭᠠᠵᠠᠷ ᠣᠷᠣᠨ ᠢ᠋ ᠵᠠᠰᠠᠵᠤ ᠪᠠᠢᠭᠠ ᠪᠢᠯᠡ᠃ᠡᠨᠡ ᠬᠥᠮᠦᠨ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠵᠦᠭ ᠡᠴᠡ ᠢᠷᠡᠭᠰᠡᠨ ᠠᠯᠪᠠ ᠲᠠᠲᠠᠪᠤᠷᠢ ᠬᠤᠷᠢᠶᠠᠭᠴᠢ ᠶ᠋ᠢ《ᠥᠪᠡᠷ ᠦ᠋ᠨ ᠭᠠᠵᠠᠷ ᠤ᠋ᠨ ᠬᠡᠷᠡᠭ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠢᠢᠳᠦᠨ ᠶᠠᠪᠤᠭᠤᠯᠬᠤ ᠲᠤᠯᠠ ᠰᠠᠨᠠᠭᠠ ᠠᠮᠤᠷ ᠪᠤᠴᠠ》 ᠭᠡᠮᠡᠨ ᠶᠠᠪᠤᠭᠤᠯᠤᠭᠰᠠᠨ ᠲᠤᠯᠠ ᠵᠠᠷᠭᠤ ᠠᠰᠠᠭᠤᠬᠤ ᠪᠠᠷ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠢᠳᠡ ᠰᠡᠳᠬᠢᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠰᠣᠷᠬᠠᠭᠲᠠᠨᠢ ᠬᠠᠲᠤᠨ᠄
— ᠡᠨᠡ ᠪᠠᠢᠳᠠᠯ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠬᠦ ᠦᠭᠡᠢ᠂ ᠲᠤᠩ ᠤᠳᠠᠬᠤ ᠦᠭᠡᠢ ᠶᠡᠬᠡ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠡᠵᠡᠨ ᠰᠡᠨᠳᠡᠢ ᠳ᠋ᠡᠭᠡᠨ ᠵᠠᠯᠠᠷᠠᠵᠤ ᠲᠥᠷᠥ ᠲᠦᠪᠰᠢᠨ ᠂ᠲᠦᠮᠡᠨ ᠣᠯᠠᠨ ᠠᠮᠤᠭᠤᠯᠠᠩ ᠪᠣᠯᠬᠤ ᠪᠢᠵᠡ᠃ ᠬᠠᠷᠢᠨ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠡᠨᠡ ᠬᠦᠨᠳᠦ ᠴᠠᠭ ᠲᠤ ᠲᠠᠯᠠ ᠨᠤᠲᠤᠭ ᠲᠤ ᠶᠡᠬᠡ ᠵᠠᠮ ᠢ᠋ ᠲᠤᠭᠤᠯᠤᠨ ᠣᠴᠢᠬᠤ ᠲᠤᠬᠠᠢ ᠪᠠᠨ ᠳᠠᠬᠢᠨ ᠨᠢᠭᠡ ᠪᠣᠳᠣᠵᠤ ᠦᠵᠡᠭᠡᠷᠡᠢ ᠭᠡᠮᠡᠨ ᠬᠡᠯᠡᠯᠡ᠃ ᠤᠳᠠᠲᠠᠯᠠ ᠶᠠᠷᠢᠯᠴᠠᠨ ᠰᠠᠭᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠰᠣᠷᠬᠠᠭᠲᠠᠨᠢ ᠬᠠᠲᠤᠨ ᠪᠤᠬᠠᠷ ᠬᠣᠲᠠ ᠶ᠋ᠢᠨ ᠳᠤᠮᠳᠠ ᠪᠣᠰᠤᠭᠰᠠᠨ ᠥᠪᠡᠷ ᠦ᠋ᠨ ᠤᠷᠲᠤ ᠦᠷᠭᠦᠭᠡᠨ ᠳ᠋ᠡᠭᠡᠨ ᠪᠠᠷᠠᠯᠬᠠᠪᠠ᠃ᠲᠠᠯᠠ ᠨᠤᠲᠤᠭ ᠤ᠋ᠨ ᠨᠡᠭᠦᠳᠡᠯᠴᠢᠨ ᠣᠯᠠᠨ ᠢ᠋ ᠠᠪᠴᠤ ᠶᠠᠪᠤᠬᠤ᠂ ᠠᠴᠢᠶᠠ ᠲᠡᠭᠡᠭᠡᠪᠦᠷᠢᠯᠡᠬᠦ ᠂ᠪᠠᠷᠢᠵᠤ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠡᠪᠲᠡᠢ ᠮᠣᠩᠭᠣᠯ ᠭᠡᠷ ᠡᠨᠡ ᠬᠣᠲᠠ ᠶ᠋ᠢᠨ ᠳᠤᠮᠳᠠ ᠰᠦᠨᠳᠡᠷᠯᠡᠨ ᠪᠣᠰᠤᠭᠰᠠᠨ ᠨᠢ ᠬᠥᠮᠦᠨ ᠪᠦᠬᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠤᠰᠬᠤ ᠪᠠᠷ ᠨᠢᠭᠡᠨ ᠦᠵᠡᠮᠦᠷᠢ ᠰᠢᠭ ᠰᠣᠨᠢᠨ ᠰᠣᠳᠣᠨ ᠬᠠᠷᠠᠭᠳᠠᠬᠤ ᠠᠪᠠᠴᠤ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠬᠥᠮᠦᠰ ᠲᠦ᠍ ᠣᠢᠷᠠᠲᠤᠨ ᠦᠵᠡᠬᠦ ᠪᠣᠯᠤᠮᠵᠢ ᠶ᠋ᠢ ᠬᠠᠲᠤᠨ ᠤ᠋ ᠬᠠᠮᠠᠭᠠᠯᠠᠭᠴᠢᠳ ᠣᠯᠭᠣᠬᠤ ᠦᠭᠡᠢ ᠪᠠᠢᠭᠠ ᠨᠢ ᠭᠠᠴᠢᠯᠠᠩ ᠲᠠᠢ᠃
ᠬᠠᠲᠤᠨ ᠢ ᠪᠤᠬᠠᠷ ᠲᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠᠬᠠᠨ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠲᠠᠯᠠ ᠨᠤᠲᠤᠭ ᠤᠷᠤᠭᠤ ᠠᠶᠠᠨ ᠤ᠋ ᠵᠢᠯᠣᠭᠣ ᠵᠠᠯᠠᠵᠠᠢ ᠃ ᠡᠵᠡᠨ ᠳ᠋ᠡᠭᠡᠨ ᠦᠨᠡᠨᠴᠢ ᠠᠯᠪᠠᠲᠤ ᠶ᠋ᠢᠨ ᠶᠣᠰᠣ ᠪᠠᠷ ᠡᠨᠡ ᠬᠥᠮᠦᠨ ᠬᠠᠷᠠᠬᠣᠷᠣᠮ ᠳ᠋ᠤ᠌ ᠰᠠᠭᠤᠬᠤ ᠶᠡᠬᠡ ᠬᠠᠲᠤᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠠᠭᠤᠳᠠᠯᠤᠨ ᠬᠡᠯᠡᠯᠴᠡᠬᠦ ᠪᠡᠷ ᠶᠠᠪᠤᠭᠰᠠᠨ ᠪᠠᠢᠪᠠ᠃ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠥᠪᠡᠷ ᠲᠡᠭᠡᠨ ᠬᠡᠳᠦ ᠢᠲᠡᠭᠡᠯ ᠲᠡᠢ ᠪᠠᠢᠭᠰᠠᠨ ᠲᠤᠯᠠ ᠬᠠᠲᠤᠨ ᠲᠡᠭᠦᠨ ᠳ᠋ᠦ᠍ ᠰᠠᠭᠠᠳ ᠬᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ᠬᠠᠷᠢᠨ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ 《ᠮᠥᠩᠬᠡ ᠲᠡᠭᠷᠢ ᠬᠠᠭᠠᠨ ᠤ᠋ ᠦᠨᠡᠨᠴᠢ ᠠᠯᠪᠠᠲᠤ ᠪᠠᠨ ᠬᠠᠷᠠᠵᠤ ᠪᠣᠯᠭᠣᠭᠠᠭᠲᠤᠨ 》ᠭᠡᠮᠡᠨ ᠰᠦᠰᠦᠭᠯᠡᠨ ᠵᠠᠯᠪᠠᠷᠢᠯᠠ᠃ ᠬᠠᠲᠤᠨ ᠤ᠋ ᠵᠦᠩ ᠰᠤᠪᠢᠨ ᠳ᠋ᠤ᠌ ᠪᠠᠭᠤᠭᠰᠠᠨ ᠳᠠᠭᠠ ᠦᠭᠡᠢ ᠲᠡᠷᠡ ᠮᠡᠳᠡᠷᠡᠮᠵᠢ ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ᠋ ᠳᠠᠷᠠᠭᠠ ᠲᠠᠯᠠ ᠨᠤᠲᠤᠭ ᠲᠤ ᠪᠡᠶᠡᠯᠡᠯ ᠢ᠋ᠶ᠋ᠡᠨ ᠣᠯᠬᠤ ᠮᠡᠲᠦ᠂ ᠨᠢᠭᠡ ᠯᠡ ᠲᠦᠭᠰᠢᠭᠦᠷᠢ ᠲᠡᠢ ᠪᠣᠳᠣᠭᠳᠠᠨᠠ᠃ ᠰᠢᠨᠡ ᠪᠡᠷ ᠵᠠᠰᠠᠬᠤ ᠭᠠᠵᠠᠷ ᠲᠠᠢ ᠪᠠᠨ ᠲᠠᠨᠢᠯᠴᠠᠵᠤ᠂ ᠲᠡᠳᠡᠨ ᠦ᠌ ᠠᠮᠢᠳᠤᠷᠠᠯ ᠠᠬᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠣᠷᠣᠬᠤ ᠨᠢ ᠡᠬᠢᠨ ᠦ᠌ ᠠᠵᠢᠯ ᠭᠡᠮᠡᠨ ᠰᠡᠳᠬᠢᠵᠦ᠂ ᠬᠥᠯᠡᠬᠦ ᠬᠣᠲᠠ ᠶ᠋ᠢᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ᠂ ᠬᠥᠮᠦᠰ ᠲᠡᠢ ᠠᠭᠤᠯᠵᠠᠨ ᠵᠠᠷᠢᠮ ᠨᠢᠭᠡ ᠨᠣᠶᠠᠳ ᠤ᠋ᠨ ᠭᠡᠷ ᠲᠦ᠍ ᠵᠣᠴᠢᠯᠠᠯᠠ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠴᠤ ᠬᠤᠪᠢᠯᠠᠢ ᠶ᠋ᠢᠨ ᠬᠠᠮᠲᠤ ᠾᠧᠪᠧᠢ ᠮᠣᠵᠢ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠰᠢᠭ᠋ ᠡᠨᠡ ᠤᠳᠠᠭᠠ ᠳ᠋ᠤ᠌ ᠬᠦᠦ ᠪᠡᠨ ᠠᠵᠢᠭᠯᠠᠨ ᠪᠠᠢᠪᠠ᠃ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠬᠦᠦ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠷᠠᠯᠬᠠᠨ ᠣᠷᠣᠵᠤ ᠢᠷᠡᠬᠦ ᠳ᠋ᠡᠭᠡᠨ᠂
— ᠪᠤᠬᠠᠷ ᠬᠣᠲᠠ ᠥᠨᠥ ᠨᠣᠶᠠᠳ ᠤ᠋ᠨ ᠬᠡᠯᠡᠭᠰᠡᠨᠴᠢᠯᠡᠨ ᠭᠠᠷ ᠤ᠋ᠨ ᠤᠷᠠ ᠳᠦᠢᠲᠡᠢ ᠬᠥᠮᠦᠰ ᠣᠯᠠᠨ ᠲᠠᠢ᠂ ᠭᠠᠷ ᠤᠷᠠᠯᠠᠯ ᠴᠡᠴᠡᠭᠯᠡᠨ ᠬᠥᠭᠵᠢᠭᠰᠡᠨ ᠭᠠᠵᠠᠷ ᠶᠤᠮ᠃ ᠡᠷᠳᠡᠮ ᠦ᠋ᠨ ᠬᠣᠲᠠ ᠶ᠋ᠢᠨ ᠤᠷᠢᠳᠤ ᠶ᠋ᠢᠨ ᠰᠠᠢᠬᠠᠨ ᠴᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠴᠤ ᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠨᠣᠮ ᠡᠷᠳᠡᠮ ᠢ᠋ ᠡᠳ᠋ ᠭᠦᠷᠦᠩᠭᠡᠨ ᠡᠴᠡ ᠢᠯᠡᠭᠦᠦ ᠴᠢᠬᠤᠯᠠᠴᠢᠯᠠᠨ ᠦᠵᠡᠳᠡᠭ ᠨᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠨᠠ᠃ ᠠᠢᠯ ᠪᠦᠷᠢ ᠶ᠋ᠢᠨ ᠭᠡᠷ ᠲᠦ᠍ ᠨᠣᠮ ᠰᠤᠳᠤᠷ ᠵᠠᠯᠠᠭᠠᠰᠤᠲᠠᠢ ᠪᠠᠢᠳᠠᠭ ᠴᠤ ᠥᠨᠥ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠪᠢᠴᠢᠭ ᠦᠰᠦᠭ ᠵᠢᠭᠠᠨ ᠰᠤᠷᠭᠠᠬᠤ ᠪᠣᠯᠤᠮᠵᠢ ᠬᠣᠮᠰᠠ ᠪᠣᠯᠤᠭᠰᠠᠨ ᠨᠢ ᠦᠨᠡᠨ ᠠᠵᠢ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠰᠤᠷᠬᠠᠭᠲᠠᠨᠢ᠄
— ᠡᠷᠳᠡᠮ ᠨᠣᠮ ᠲᠠᠢ ᠬᠥᠮᠦᠨ᠂ ᠠᠰᠢᠭ ᠬᠣᠨᠵᠢᠶᠠ ᠬᠠᠢᠭᠰᠠᠨ ᠬᠥᠮᠦᠨ ᠦ᠌ ᠨᠢᠳᠦ ᠬᠣᠭᠣᠷᠣᠨᠳᠣ ᠪᠠᠨ ᠣᠭᠲᠣ ᠠᠳᠠᠯᠢ ᠦᠭᠡᠢ ᠪᠠᠢᠳᠠᠭ᠃ ᠡᠨᠡ ᠬᠣᠲᠠ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠨᠢᠳᠦᠨ ᠡᠴᠡ ᠮᠠᠢᠮᠠᠢᠴᠢᠨ ᠬᠥᠮᠦᠨ ᠦ᠌ ᠰᠢᠨᠤᠯ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠬᠤ ᠶᠤᠮ᠃ ᠬᠦᠦ ᠮᠢᠨᠢ ᠴᠢ ᠵᠥᠪ ᠲᠠᠨᠢᠵᠠᠢ ᠭᠡᠪᠡ᠃
— ᠳᠠᠢᠨ ᠰᠠᠮᠠᠭᠤᠨ ᠤ᠋ ᠬᠥᠯ ᠳ᠋ᠦ᠍ ᠦᠢᠮᠡᠨ ᠰᠠᠨᠳᠤᠷᠤᠭᠰᠠᠨ ᠵᠤᠨ ᠣᠯᠠᠨ ᠤᠩᠰᠢᠵᠤ ᠰᠤᠷᠬᠤ ᠠ᠋ᠴᠠ ᠢᠯᠡᠭᠦᠦ ᠲᠡᠢ ᠠᠮᠤᠷ ᠠᠮᠤᠭᠤᠯᠠᠩ ᠠᠮᠢᠳᠤᠷᠠᠯ ᠬᠠᠢᠨ ᠲᠡᠮᠡᠦᠯᠬᠦ ᠪᠣᠯᠵᠤ ᠪᠤᠬᠠᠷ ᠲᠤ ᠰᠠᠢᠬᠠᠨ ᠴᠠᠭ ᠲᠤ ᠬᠥᠮᠦᠰ ᠦᠷᠡ ᠬᠡᠦᠬᠡᠳ ᠲᠡᠭᠡᠨ ᠪᠢᠴᠢᠭ ᠦᠰᠦᠭ ᠵᠢᠭᠠᠨ ᠰᠤᠷᠭᠠᠳᠠᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠠᠵᠢᠯ ᠬᠢᠬᠦ ᠶ᠋ᠢ ᠯᠡ ᠰᠤᠷᠭᠠᠬᠤ ᠪᠣᠯᠤᠭᠰᠠᠨ ᠪᠠᠢᠨᠠ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠭᠰᠡᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠬᠠᠲᠤᠨ ᠡᠬᠡ《ᠦᠨᠡᠬᠡᠷ ᠲᠡᠢᠨ ᠰᠠᠮᠠᠭᠤᠨ ᠭᠡᠳᠡᠭ ᠬᠡᠴᠢᠨᠡᠭᠡᠨ ᠬᠡᠴᠡᠭᠦᠦ ᠪᠢᠯᠡ᠃ ᠪᠢᠳᠡ ᠡᠨᠡ ᠭᠦᠷᠦᠨ ᠦ᠌ ᠡᠵᠡᠳ ᠲᠤᠯᠠ ᠡᠵᠡᠯᠡᠨ ᠠᠪᠤᠭᠰᠠᠨ ᠭᠠᠵᠠᠷ ᠨᠤᠲᠤᠭ ᠲᠠᠭᠠᠨ ᠰᠠᠨᠠᠭᠠ ᠠᠮᠤᠷ ᠠᠮᠢᠳᠤᠷᠠᠯ ᠢ᠋ ᠡᠬᠢᠯᠡᠭᠦᠯᠦᠯᠡ ᠭᠡᠮᠡᠨ ᠡᠬᠡ ᠨᠤᠲᠤᠭ ᠤ᠋ᠨ ᠵᠦᠭ ᠵᠢᠯᠣᠭᠣ ᠵᠠᠯᠠᠳᠠᠭ ᠪᠠᠢᠬᠤ ᠳ᠋ᠤ᠌ ᠬᠠᠭᠠᠨᠲᠤ ᠲᠥᠷᠥ ᠶ᠋ᠢᠨ ᠬᠠᠶᠠᠭᠠ ᠬᠣᠯᠠ ᠶ᠋ᠢ ᠳᠠᠯᠢᠮᠳᠠᠭᠤᠯᠤᠨ ᠲᠥᠷᠥ ᠶ᠋ᠢᠨ ᠨᠡᠷᠡ ᠪᠠᠷᠢᠬᠤ ᠳᠡᠭᠡᠷᠡᠮᠴᠢᠳ ᠴᠦ᠍ ᠣᠯᠠᠰᠢᠷᠠᠭᠰᠠᠭᠠᠷ ᠪᠠᠢᠬᠤ ᠶᠤᠮ ᠳᠠ》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠯᠠ᠃
ᠭᠠᠷ ᠲᠠᠭᠠᠨ ᠮᠥᠩᠭᠥᠨ ᠵᠣᠭᠣᠰ ᠪᠠᠷᠢᠨ ᠲᠣᠭᠣᠨᠣ ᠪᠠᠷ ᠲᠤᠰᠤᠭᠰᠠᠨ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠣᠢᠷᠠᠲᠤᠭᠤᠯᠬᠤᠢ ᠳ᠋ᠤ᠌ ᠮᠥᠩᠭᠥᠨ ᠵᠣᠭᠣᠰᠤᠨ ᠳᠡᠭᠡᠷᠡ ᠨᠠᠷᠠᠨ ᠤ᠋ ᠰᠢᠵᠢᠷ ᠰᠠᠴᠤᠷᠠᠭ ᠪᠠᠭᠤᠵᠤ᠂ ᠨᠢᠳᠦ ᠭᠢᠯᠪᠠᠭᠤᠯᠤᠨ ᠭᠡᠷᠡᠯᠲᠦᠨᠡ᠃
— ᠡᠨᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠤᠲᠤᠭ ᠲᠤ ᠡᠨᠡ ᠵᠣᠭᠣᠰ ᠢ᠋ ᠲᠠᠷᠬᠠᠭᠠᠨ ᠶᠠᠪᠤᠭᠤᠯ᠂ ᠠᠷᠠᠯᠵᠢᠶᠠ ᠪᠦᠬᠦᠨ ᠡᠭᠦᠪᠡᠷ ᠬᠢᠭᠳᠡᠵᠦ᠂ ᠠᠯᠲᠠ ᠡᠷᠳᠡᠨᠢᠰ ᠢ᠋ ᠴᠤ᠌ ᠡᠭᠦᠪᠡᠷ ᠰᠣᠯᠢᠯᠴᠠᠭ ᠭᠡᠮᠡᠨ ᠰᠡᠳᠬᠢᠯ ᠬᠥᠳᠡᠯᠦᠩᠭᠦᠢ ᠬᠡᠯᠡᠵᠦ ᠪᠠᠢᠭᠠ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠭᠠᠷ ᠲᠤ ᠰᠠᠶᠢᠬᠠᠨ ᠴᠢᠳᠬᠤᠭᠰᠠᠨ ᠮᠥᠩᠭᠥᠨ ᠵᠣᠭᠣᠰ ᠠᠳᠬᠤᠭᠠᠲᠠᠢ ᠪᠠᠢᠯᠠ᠃ ᠳᠦᠷᠭᠡᠨᠡ ᠬᠠᠲᠤᠨ ᠵᠣᠭᠣᠰᠤᠨ ᠳᠡᠭᠡᠷᠡᠬᠢ ᠪᠢᠴᠢᠭᠡᠰᠦ ᠶ᠋ᠢ ᠤᠩᠰᠢᠨ᠂
— ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠨ ᠬᠦᠦ ᠭᠡᠮᠡᠨ ᠤᠩᠰᠢᠬᠤ ᠳ᠋ᠤ᠌ ᠬᠠᠷᠠᠴᠠᠨ ᠳ᠋ᠤᠨᠢ ᠪᠠᠶᠠᠷ ᠤ᠋ᠨ ᠣᠴᠢ ᠰᠠᠴᠤᠷᠠᠰᠬᠢᠭᠠᠳ ᠲᠦᠳᠡᠭᠡᠨᠡ ᠨᠠᠮᠳᠠᠪᠠ ᠪᠣᠯᠤᠯᠲᠠᠢ ᠦᠵᠡᠭᠳᠡᠬᠦ ᠨᠢ ᠡᠭᠦᠳᠡ ᠪᠡᠷ ᠣᠷᠣᠵᠤ ᠢᠷᠡᠭᠰᠡᠨ ᠺᠣᠷᠭᠣᠼ ᠨᠣᠶᠠᠨᠲᠠᠨ ᠢ᠋ ᠬᠠᠷᠠᠭᠰᠠᠨ ᠳᠠᠷᠤᠢ ᠪᠠᠶᠠᠷ ᠬᠥᠷ ᠨᠢ ᠲᠡᠷᠡ ᠳᠣᠣᠷᠠ ᠪᠠᠨ ᠦᠭᠡᠢ ᠪᠣᠯᠤᠨ ᠵᠠᠮᠠᠭᠷᠠᠭᠰᠠᠨ ᠬᠡᠷᠡᠭ ᠪᠠᠢᠯᠠ᠃ ᠺᠣᠷᠭᠣᠼ ᠨᠣᠶᠠᠨᠲᠠᠨ ᠬᠠᠲᠤᠨ ᠤ᠋ ᠠᠮᠤᠷ ᠮᠡᠨᠳᠦ ᠶ᠋ᠢ ᠡᠷᠢᠭᠡᠳ ᠢᠰᠯᠠᠮ ᠱᠠᠰᠢᠨᠲᠤ ᠬᠥᠮᠦᠨ ᠦ᠌ ᠶᠣᠰᠣ ᠪᠠᠷ ᠮᠡᠨᠳᠦᠯᠡᠪᠡ᠃ ᠳᠦᠷᠭᠡᠨᠡ ᠬᠠᠲᠤᠨ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠬᠤ ᠨᠢ ᠴᠡᠭᠡᠵᠢᠨ ᠳᠣᠲᠣᠷᠠᠬᠢ ᠠᠭᠤᠷ ᠴᠢᠬᠤᠯ ᠢ᠋ᠶ᠋ᠠᠨ ᠨᠢᠭᠤᠵᠤ ᠪᠠᠢᠭᠠ ᠨᠢ ᠢᠯᠡᠳᠲᠡ᠂
— ᠥᠷᠭᠦᠭᠡᠨ ᠳᠦ ᠪᠠᠢᠭᠠ ᠬᠥᠮᠦᠰ ᠭᠠᠷᠴᠤ ᠪᠠᠢ ᠬᠡᠮᠡᠭᠡᠳ ᠠᠪᠲᠣᠯ ᠷᠠᠬᠠᠮᠠᠨ ᠢ᠋ ᠦᠯᠡᠳᠡᠬᠦ ᠶ᠋ᠢ ᠬᠦᠰᠡᠯᠡ᠃ ᠬᠠᠲᠤᠨ ᠤ᠋ ᠭᠠᠷ ᠲᠤ ᠮᠥᠨᠥᠬᠢ ᠮᠥᠩᠭᠥᠨ ᠵᠣᠭᠣᠰ ᠠᠳᠬᠤᠭᠠᠰᠤᠲᠠᠢ ᠬᠡᠪ ᠢ᠋ᠶ᠋ᠡᠷ᠃ ᠳᠦᠷᠭᠡᠨᠡ ᠬᠠᠲᠤᠨ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠢᠭᠠ ᠬᠥᠮᠦᠰ ᠢ᠋ ᠭᠠᠷᠴᠤ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ᠂
— ᠺᠣᠷᠭᠤᠼ ᠨᠣᠶᠠᠨ᠂ ᠲᠠᠨ ᠢ᠋ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠦᠶᠡ ᠡᠴᠡ ᠦᠨᠡᠨᠴᠢ ᠠᠯᠪᠠᠲᠤ ᠪᠠᠢᠭᠰᠠᠨ ᠢ᠋ ᠴᠢᠨᠢ ᠮᠡᠳᠡᠬᠦ ᠠᠪᠠᠴᠤ ᠥᠨᠥ ᠶ᠋ᠢ ᠬᠦᠷᠲᠡᠯᠡ ᠬᠠᠲᠤᠨ ᠤ᠋ ᠵᠠᠬᠢᠷᠭᠠ ᠶ᠋ᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠦᠭᠡᠢ ᠳᠣᠷᠣᠨᠠᠲᠤ ᠢᠷᠡᠨ ᠦ᠌ ᠨᠤᠲᠤᠭ ᠲᠤ ᠢᠷᠡᠭᠰᠡᠨ ᠠᠯᠪᠠ ᠲᠠᠲᠠᠪᠤᠷᠢ ᠬᠤᠷᠢᠶᠠᠭᠴᠢᠳ ᠢ᠋ ᠪᠠᠰᠤᠨ ᠳᠣᠷᠣᠮᠵᠢᠯᠠᠵᠤ ᠶᠠᠪᠤᠭᠤᠯᠤᠭᠰᠠᠨ ᠤᠴᠢᠷ ᠢ᠋ ᠰᠣᠨᠣᠰᠬᠤ ᠪᠠᠷ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠢᠯᠡ ᠭᠡᠪᠡ᠃ ᠺᠤᠷᠭᠤᠼ ᠨᠣᠶᠠᠨ᠄
— ᠬᠠᠲᠤᠨᠲᠠᠨ ᠮᠢᠨᠢ᠂ ᠪᠠᠰᠤᠨ ᠳᠣᠷᠣᠮᠵᠢᠯᠠᠭᠰᠠᠨ ᠬᠡᠷᠡᠭ ᠣᠭᠲᠣᠬᠠᠨ ᠴᠤ ᠪᠢᠰᠢ ᠪᠠᠢᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠬᠠᠲᠤᠨ ᠤ᠋ ᠨᠡᠷᠡ ᠪᠡᠷ ᠲᠦᠷᠡᠢ ᠪᠠᠷᠢᠨ ᠥᠪᠡᠷ ᠵᠠᠭᠤᠷᠠ ᠪᠠᠨ ᠠᠰᠢᠭ ᠬᠣᠨᠵᠢᠶᠠ ᠬᠠᠢᠭᠰᠠᠳ ᠣᠯᠠᠰᠢᠷᠠᠭᠰᠠᠨ ᠲᠤᠯᠠ ᠠᠷᠠᠳ ᠲᠦᠮᠡᠨ ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠢᠷᠡᠭᠰᠡᠨ ᠠᠴᠢᠶᠠ ᠤᠯᠠᠮ ᠪᠦᠷ ᠬᠦᠨᠳᠦᠷᠡᠭᠰᠡᠭᠡᠷ ᠪᠠᠢᠭᠠ ᠶ᠋ᠢ ᠬᠠᠲᠠᠨᠲᠠᠨ ᠲᠠᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠮᠡᠳᠡᠭᠳᠡᠬᠦ ᠪᠡᠷ ᠢᠷᠡᠯᠡ ᠭᠡᠵᠦ ᠬᠡᠯᠡᠭᠡᠳ ᠮᠡᠬᠦᠢᠯᠡ᠃
ᠠᠪᠲᠤᠯ ᠷᠠᠬᠠᠮᠠᠨ ᠭᠡᠨᠡᠳᠲᠡ ᠬᠠᠵᠠᠭᠤ ᠠ᠋ᠴᠠ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠵᠤ᠂
— ᠶᠡᠬᠡ ᠬᠠᠲᠤᠨ ᠤ᠋ ᠨᠡᠷᠡ ᠶ᠋ᠢ ᠪᠠᠷᠢᠨᠠ ᠭᠡᠨᠡ ᠠ᠋᠂ ᠶᠡᠬᠡ ᠵᠠᠰᠠᠭ ᠬᠠᠤᠯᠢ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠨᠤᠲᠤᠭ ᠲᠤ᠌ ᠬᠡᠪ ᠢ᠋ᠶ᠋ᠡᠷ ᠪᠠᠢᠬᠤ ᠳ᠋ᠤ᠌ ᠢᠩᠭᠢᠵᠦ ᠬᠤᠳᠠᠯ ᠮᠡᠳᠡᠭᠦᠯᠬᠦ ᠬᠡᠷᠡᠭ ᠶᠠᠭᠤᠨ ᠪᠢᠯᠡ ᠭᠡᠪᠡ᠃
ᠳᠦᠷᠭᠡᠨᠡᠡ ᠬᠠᠲᠤᠨ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠬᠠᠷᠠᠨ᠂
— ᠠᠪᠲᠤᠯ ᠷᠠᠬᠠᠮᠠᠨ ᠴᠢ ᠡᠭᠦᠨ ᠢ᠋ ᠮᠡᠳᠡᠵᠦ ᠪᠠᠢᠬᠤ ᠤᠴᠢᠷ ᠲᠠᠢ ᠭᠡᠬᠦ ᠳ᠋ᠦ᠍᠂
— ᠬᠠᠲᠤᠨᠲᠠᠨ ᠮᠢᠨᠢ ᠪᠢ ᠮᠡᠳᠡᠵᠦ ᠪᠠᠢᠭᠠ᠃ ᠬᠠᠷᠢᠨ ᠺᠣᠷᠭᠣᠽ ᠨᠣᠶᠠᠨᠲᠠᠨ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠠᠭᠠᠰᠢᠯᠠᠵᠤ ᠬᠠᠷᠢᠶᠠᠲᠤ ᠭᠠᠵᠠᠷ ᠨᠤᠲᠤᠭ ᠲᠠᠭᠠᠨ ᠥᠪᠡᠷ ᠦ᠋ᠨ ᠵᠠᠰᠠᠭᠯᠠᠯ ᠢ᠋ ᠲᠣᠭᠲᠠᠭᠠᠭᠠᠳ ᠪᠠᠢᠭᠠ ᠪᠢᠯᠡ ᠭᠡᠵᠦ ᠬᠡᠯᠡᠪᠡ᠃
ᠺᠣᠷᠭᠤᠼ ᠨᠤᠶᠠᠨᠲᠠᠨ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠲᠠᠨᠢᠬᠤ ᠪᠢᠯᠡ᠃ ᠡᠨᠡ ᠡᠷᠬᠢᠮ ᠢ᠋ ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠠᠨ ᠬᠤᠳᠠᠯᠳᠤᠭᠠ ᠠᠷᠠᠯᠵᠢᠶᠠ ᠬᠢᠵᠦ᠂ ᠠᠮᠢᠳᠤᠷᠠᠯ ᠠᠬᠤᠢ ᠨᠢ ᠰᠠᠢᠵᠢᠷᠠᠨ ᠬᠠᠲᠤᠨ ᠤ᠋ ᠢᠪᠡᠭᠡᠯ ᠳ᠋ᠦ᠍ ᠣᠷᠣᠬᠤ ᠠ᠋ᠴᠠ ᠡᠮᠦᠨᠡᠬᠢ ᠠᠮᠢᠳᠤᠷᠠᠯ ᠢ᠋ ᠺᠣᠷᠭᠣᠽ ᠨᠣᠶᠠᠨ ᠰᠠᠢᠨ ᠮᠡᠳᠡᠬᠦ ᠤᠴᠢᠷ᠄
— ᠶᠠᠳᠠᠭᠤ ᠭᠤᠲᠤᠯᠴᠢᠨ ᠬᠦᠦ ᠴᠢᠨᠦ ᠪᠠᠭᠠ ᠨᠠᠰᠤ ᠶ᠋ᠢ ᠪᠢᠳᠡ ᠮᠡᠳᠡᠬᠦ ᠪᠢᠯᠡ᠃ ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠠᠪᠤᠷᠠᠯ ᠡᠷᠢᠨ ᠬᠣᠲᠠ ᠪᠠᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠮᠠᠨ ᠤ᠋ ᠬᠣᠲᠠ ᠶ᠋ᠢᠨ ᠬᠢᠨ ᠴᠢᠮᠠᠶ᠋ᠢ
ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠣᠷᠣᠭᠤᠯᠤᠨ ᠳᠤᠯᠠᠭᠠᠴᠠᠭᠤᠯᠵᠤ᠂ ᠬᠣᠭᠣᠯᠠᠯᠠᠨ ᠤᠮᠳᠠᠯᠠᠳᠠᠭ ᠪᠠᠢᠭᠰᠠᠨ ᠢ᠋ ᠮᠠᠷᠲᠠᠭᠠ ᠤᠤ᠃ ᠲᠥᠷᠥᠭᠰᠡᠨ ᠬᠣᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠭᠡᠳ ᠢ᠋ ᠬᠦᠷᠲᠡᠯᠡ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠨᠡᠷᠡ ᠰᠦᠷ ᠢ᠋ᠶ᠋ᠡᠷ ᠵᠠᠩᠳᠤᠷᠤᠨ ᠠᠯᠪᠠ ᠲᠠᠲᠠᠪᠤᠷᠢ ᠨᠡᠬᠡᠨ᠂ ᠵᠣᠳᠣᠵᠤ ᠵᠠᠨᠴᠢᠭᠰᠠᠨ ᠴᠢᠨᠢ ᠬᠤᠳᠠᠯ ᠬᠡᠷᠡᠭ ᠤᠤ᠃ ᠤᠷᠢᠳᠤ ᠨᠢ ᠪᠢᠳᠡ ᠣᠯᠤᠭᠰᠠᠨ ᠪᠦᠬᠦ ᠣᠷᠣᠯᠭᠠ ᠠ᠋ᠴᠠ ᠪᠠᠨ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠲᠠᠲᠠᠪᠤᠷᠢ ᠬᠠᠭᠠᠨ ᠤ᠋ ᠠᠯᠪᠠᠨ ᠳ᠋ᠤ᠌ ᠥᠭᠳᠡᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠬᠣᠷᠢᠨ ᠬᠤᠪᠢ ᠶ᠋ᠢᠨ ᠲᠠᠲᠠᠪᠤᠷᠢ ᠲᠥᠯᠥᠬᠦ ᠪᠣᠯᠤᠯᠠ᠃ ᠠᠷᠠᠳ ᠲᠦᠮᠡᠨ ᠬᠡᠷᠬᠢᠬᠦ ᠪᠢᠯᠡ᠃ ᠡᠨᠡ ᠰᠢᠢᠳᠪᠦᠷᠢ ᠶ᠋ᠢ ᠵᠥᠪᠬᠡᠨ ᠪᠢ ᠡᠰᠡᠷᠭᠦᠴᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠬᠡᠮᠡᠪᠡ᠃ ᠳᠦᠷᠭᠡᠨᠡ ᠬᠠᠲᠤᠨ ᠺᠣᠷᠭᠣᠽ ᠨᠣᠶᠠᠨ ᠤ᠋ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠵᠠᠭᠤᠷᠠ ᠠᠪᠲᠤᠯ ᠷᠠᠬᠠᠮᠠᠨ ᠢ᠋ ᠬᠠᠷᠠᠵᠤ᠂
— ᠠᠪᠲᠤᠯ ᠷᠠᠬᠠᠮᠠᠨ ᠡᠨᠡ ᠦᠨᠡᠨ ᠤᠤ ᠭᠡᠵᠦ ᠠᠰᠠᠭᠤᠯᠠ᠃ ᠠᠪᠲᠤᠯ ᠷᠠᠬᠠᠮᠠᠨ ᠬᠠᠲᠤᠨ ᠤ᠋ ᠡᠮᠦᠨᠡ ᠲᠦᠭᠳᠡᠴᠢᠨ ᠵᠣᠭᠰᠣᠬᠤ ᠳ᠋ᠤ᠌ ᠺᠣᠷᠭᠣᠽ ᠨᠣᠶᠠᠨᠲᠠᠨ ᠡᠪᠦᠷ ᠡᠴᠡ
ᠪᠠᠨ ᠬᠤᠢᠯᠠᠭᠰᠠᠨ ᠪᠢᠴᠢᠭ ᠭᠠᠷᠭᠠᠨ ᠢᠷᠡᠯᠡ᠃ᠲᠡᠷᠡ ᠪᠡᠷ ᠴᠠᠭᠠᠰᠤ ᠶ᠋ᠢ ᠳᠡᠯᠭᠡᠨ ᠬᠠᠲᠤᠨ ᠡᠬᠡ ᠳ᠋ᠦ᠍ ᠡᠷᠭᠦᠪᠡ᠃ᠬᠠᠲᠤᠨ ᠡᠬᠡ ᠴᠠᠭᠠᠰᠤᠨ ᠳᠡᠭᠡᠷᠡᠬᠢ ᠪᠢᠴᠢᠭᠡᠰᠦ ᠶ᠋ᠢ ᠠᠮᠠᠨ ᠳ᠋ᠠᠭᠠᠨ ᠤᠩᠰᠢᠯᠠ᠃
— ᠳᠣᠷᠣᠨᠠᠲᠤ ᠢᠷᠡᠨ ᠦ᠌ ᠭᠠᠵᠠᠷ ᠨᠤᠲᠤᠭ ᠲᠤ᠌ ᠰᠠᠭᠤᠭᠠ ᠠᠷᠠᠳ ᠢᠷᠭᠡᠳ ᠦ᠋ᠨ ᠬᠠᠭᠠᠨ ᠤ᠋ ᠠᠯᠪᠠᠨ ᠳ᠋ᠤ᠌ ᠲᠥᠯᠥᠬᠦ ᠶᠣᠰᠣᠲᠠᠢ ᠲᠠᠲᠠᠪᠤᠷᠢ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠬᠣᠷᠢᠨ ᠬᠤᠪᠢ ᠪᠣᠯᠭᠠᠨ ᠥᠭᠡᠷᠡᠴᠢᠯᠡᠰᠦᠭᠡᠢ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠬᠠᠲᠤᠨ ᠳᠦᠷᠭᠡᠨᠡ ᠭᠡᠮᠡᠨ ᠤᠩᠰᠢᠵᠤ ᠳᠠᠭᠤᠰᠤᠭᠠᠳ ᠴᠠᠭᠠᠰᠤᠨ ᠳᠡᠭᠡᠷᠡᠬᠢ ᠲᠠᠮᠠᠭᠠ ᠶ᠋ᠢ ᠬᠠᠷᠠᠪᠠ᠃
— ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠮᠥᠨ ᠪᠠᠢᠨᠠ᠃ᠪᠢ ᠡᠨᠡ ᠵᠠᠷᠯᠢᠭ ᠢ᠋ ᠪᠢᠴᠢᠭᠡ ᠦᠭᠡᠢ ᠠᠲᠠᠯᠠ ᠶᠠᠭᠠᠬᠢᠬᠤ ᠪᠠᠷ ᠡᠨᠡ ᠮᠢᠨᠦ ᠭᠠᠷ ᠳᠡᠭᠡᠷᠡ ᠪᠠᠢᠵᠤ ᠪᠠᠢᠳᠠᠭ ᠪᠢᠯᠡ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠠᠪᠲᠤᠯ ᠷᠠᠬᠠᠮᠠᠨ ᠬᠡᠯᠡᠬᠦ ᠦᠭᠡ ᠦᠭᠡᠢ ᠡᠭᠡᠷᠡᠨ ᠵᠣᠭᠰᠣᠨᠠ᠃
ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠳᠦᠷᠭᠡᠨᠡ ᠶᠡᠬᠡ ᠬᠠᠲᠤᠨ ᠠᠪᠲᠤᠯ ᠷᠠᠬᠠᠮᠠᠨ ᠳ᠋ᠤ᠌ ᠪᠦᠷᠢᠨ ᠢᠲᠡᠭᠡᠳᠡᠭ ᠪᠠᠢᠭᠰᠠᠨ ᠨᠢ ᠲᠡᠭᠦᠨ ᠢ᠋ ᠥᠨᠥᠳᠥᠷ ᠬᠠᠲᠤᠨ ᠤ᠋ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠲᠠᠢ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠦᠢᠯᠡᠳᠦᠭᠦᠯᠬᠦ ᠳ᠋ᠦ᠍ ᠬᠦᠷᠭᠡᠵᠡᠢ᠃ᠡᠨᠡ ᠦᠶᠡ ᠳ᠋ᠦ᠍ ᠬᠠᠲᠤᠨ ᠤ᠋ ᠰᠠᠨᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠡᠳᠦᠷ ᠦ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠲᠣᠳᠣᠷᠠᠨ ᠢᠷᠡᠯᠡ᠃
ᠠᠪᠲᠤᠯ ᠷᠠᠬᠠᠮᠠᠨ ᠨᠡᠩ ᠪᠠᠶᠠᠷ ᠲᠠᠢ ᠪᠠᠷ ᠣᠷᠣᠵᠤ ᠢᠷᠡᠨ ᠬᠠᠭᠠᠨ ᠤ᠋ ᠰᠠᠩ ᠬᠥᠮᠥᠷᠭᠡ ᠠᠷᠪᠢᠵᠢᠨ ᠪᠣᠢ ᠨᠢ ᠬᠠᠲᠤᠨ ᠡᠬᠡ ᠶ᠋ᠢᠨ ᠤᠬᠠᠭᠠᠨᠲᠤ ᠪᠣᠳᠣᠯᠭᠠ ᠲᠠᠢ ᠬᠣᠯᠪᠣᠭᠠ ᠲᠠᠢ ᠭᠡᠵᠦ ᠮᠠᠭᠲᠠᠨ ᠶᠠᠷᠢᠬᠤ ᠵᠠᠭᠤᠷᠠ ᠳ᠋ᠤ᠌ ᠨᠡᠯᠢᠶᠡᠳ ᠬᠡᠳᠦᠨ ᠬᠣᠭᠣᠰᠣᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠠᠭᠠᠨ ᠤ᠋ ᠲᠠᠮᠠᠭᠠ ᠶ᠋ᠢ ᠳᠠᠷᠤᠭᠤᠯᠤᠨ ᠠᠪᠤᠭᠠᠳ ᠭᠠᠷᠤᠭᠰᠠᠨ ᠪᠢᠯᠡ᠃ᠬᠠᠭᠠᠨᠲᠤ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠶ᠋ᠢ ᠬᠣᠭᠣᠰᠣᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠳᠠᠷᠤᠵᠤ ᠥᠭᠬᠦ ᠬᠦᠷᠲᠡᠯᠡ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠢ᠋ ᠣᠯᠵᠤ ᠴᠢᠳᠠᠨᠠ ᠭᠡᠳᠡᠭ ᠦᠨᠡᠬᠡᠷ ᠭᠠᠢᠬᠠᠮᠰᠢᠭ ᠠᠵᠢ᠃ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠰᠠᠯᠭᠠᠨᠠᠭᠰᠠᠨ ᠭᠠᠷ ᠲᠤ᠌ ᠲᠠᠮᠠᠭᠠ ᠲᠠᠢ ᠴᠠᠭᠠᠰᠤ ᠴᠢᠴᠢᠭᠡᠨᠡᠨᠡ᠃
— ᠴᠢ ᠡᠨᠡ ᠮᠡᠲᠦ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠲᠠᠢ ᠴᠠᠭᠠᠰᠤ ᠠᠰᠢᠭᠯᠠᠨ ᠬᠡᠨ ᠳ᠋ᠦ᠍ ᠬᠡᠴᠢᠨᠡᠭᠡᠨ ᠵᠠᠷᠯᠢᠭ ᠭᠠᠷᠭᠠᠵᠤ᠂ ᠬᠠᠭᠠᠨᠲᠤ ᠲᠥᠷᠥ ᠶ᠋ᠢᠨ ᠨᠡᠷᠡ ᠶ᠋ᠢᠨᠡᠮᠦᠨᠡ ᠡᠴᠡ ᠶᠠᠭᠤ ᠦᠢᠯᠡᠳᠦᠭᠰᠡᠨ ᠪᠣᠢ? ᠭᠡᠮᠡᠨ ᠴᠢᠩᠭᠠ ᠪᠠᠷ ᠠᠰᠠᠭᠤᠯᠠ᠃ᠦᠷᠭᠦᠭᠡᠨ ᠳ᠋ᠦ᠍ ᠨᠠᠮ ᠭᠦᠮ᠂ ᠬᠠᠲᠤᠨ ᠤ᠋ ᠭᠠᠷ ᠠ᠋ᠴᠠ ᠤᠨᠠᠭᠰᠠᠨ ᠮᠥᠩᠭᠥᠨ ᠵᠣᠭᠣᠰ ᠭᠠᠵᠠᠷ ᠲᠤ᠌ ᠡᠷᠭᠢᠯᠳᠦᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠣᠣᠷᠠ ᠪᠠᠨ ᠵᠣᠭᠰᠣᠵᠤ᠂ ᠬᠠᠵᠠᠭᠤ ᠲᠠᠢᠰᠢ ᠥᠩᠬᠥᠷᠢᠨ ᠤᠨᠠᠯᠠ᠃
ᠪᠤᠬᠠᠷ ᠬᠣᠲᠠ ᠳ᠋ᠤ᠌ ᠰᠠᠭᠠᠲᠠᠨ ᠡᠨᠡ ᠭᠠᠵᠠᠷ ᠤ᠋ᠨ ᠬᠡᠷᠡᠭ ᠢ᠋ ᠵᠠᠰᠠᠬᠤ ᠪᠠᠷ ᠢᠷᠡᠭᠰᠡᠨ ᠮᠣᠩᠭᠣᠯ ᠬᠠᠲᠤᠨ ᠤ᠋ ᠥᠷᠭᠥᠭᠡ ᠨᠡᠩ ᠰᠦᠷ ᠲᠡᠢ ᠬᠢᠭᠡᠳ ᠭᠣᠶᠣᠮᠰᠣᠭ ᠬᠠᠷᠠᠭᠳᠠᠨᠠ᠃ ᠡᠨᠡ ᠬᠣᠲᠠ ᠪᠦᠬᠦᠯᠢ ᠳ᠋ᠡᠭᠡᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯᠴᠤᠳ ᠤ᠋ᠨ ᠮᠣᠷᠢᠨ ᠤ᠋ ᠲᠣᠭᠣᠰᠣᠨ ᠳ᠋ᠤ᠌ ᠬᠤᠴᠢᠭᠳᠠᠨ ᠂ ᠲᠡᠳᠡᠨ ᠦ᠌ ᠬᠠᠷᠢᠶᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠣᠯᠠᠨ ᠵᠢᠯ ᠥᠩᠭᠡᠷᠡᠵᠡᠢ᠃ ᠭᠡᠪᠡᠴᠦ ᠥᠨᠥ ᠶ᠋ᠢ ᠬᠦᠷᠲᠡᠯᠡ ᠬᠣᠲᠠ ᠶ᠋ᠢᠨ ᠲᠥᠪ ᠲᠤᠨᠢ ᠡᠢᠮᠦ ᠰᠦᠷᠯᠢᠭ ᠮᠣᠩᠭᠣᠯ ᠭᠡᠷ ᠪᠣᠰᠴᠤ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ ᠲᠤᠯᠠ ᠨᠡᠩ ᠰᠣᠨᠢᠨ ᠠᠵᠤᠭᠤ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠦᠷᠭᠦᠭᠡᠨ ᠳ᠋ᠡᠭᠡᠨ ᠬᠦᠦ ᠬᠦᠯᠡᠬᠦ ᠶ᠋ᠢᠨ ᠬᠠᠮᠲᠤ ᠪᠠᠢᠨᠠ᠃
— ᠬᠠᠲᠤᠨ ᠡᠬᠡ ᠮᠢᠨᠢ᠂ ᠲᠠ ᠨᠢᠭᠡ ᠶᠡᠬᠡ ᠰᠠᠨᠠᠭᠠ ᠠᠯᠳᠠᠭᠠᠳ ᠪᠠᠢᠬᠤ ᠶᠤᠮ᠂ ᠰᠡᠳᠬᠢᠯ ᠰᠠᠨᠠᠭᠠ ᠴᠢᠨᠢ ᠲᠠᠪᠠ ᠦᠭᠡᠢ ᠪᠠᠢᠨᠠ ᠤᠤ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄
— ᠴᠢᠨᠦ ᠡᠴᠢᠭᠡ ᠲᠤᠯᠤᠢ᠂ ᠡᠪᠦᠭᠡ ᠡᠴᠢᠭᠡ ᠴᠢᠩᠭᠢᠰ ᠬᠠᠭᠠᠨ ᠨᠠᠷ ᠬᠣᠷᠢ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠦᠨᠡ ᠡᠨᠡ ᠭᠠᠵᠠᠷ ᠢ᠋ ᠥᠪᠡᠷ ᠦ᠋ᠨ ᠬᠠᠷᠢᠶᠠᠨ ᠳ᠋ᠤ᠌ ᠣᠷᠣᠭᠤᠯᠵᠤ ᠪᠠᠢᠭᠰᠠᠨ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠣᠯᠠᠨ ᠴᠤ᠌ ᠵᠢᠯ ᠥᠩᠭᠡᠷᠡᠵᠡᠢ ᠳᠡ ᠭᠡᠵᠦ ᠬᠡᠯᠡᠭᠡᠳ ᠲᠩᠷᠢ ᠪᠣᠯᠤᠭᠰᠠᠨ ᠬᠥᠮᠦᠰ ᠢ᠋ᠶ᠋ᠡᠨ ᠳᠤᠷᠠᠰᠤᠨ ᠪᠣᠢ ᠮᠡᠲᠦ ᠴᠢᠮᠡᠭᠡ ᠦᠭᠡᠢ ᠰᠠᠭᠤᠪᠠ᠃ ᠬᠥᠯᠡᠬᠦ᠄
— ᠡᠷᠳᠡᠮ ᠦ᠋ᠨ ᠬᠣᠲᠠ ᠶ᠋ᠢᠨ ᠡᠵᠡᠳ ᠪᠣᠯᠤᠭᠰᠠᠨ ᠡᠨᠡ ᠬᠥᠮᠦᠰ ᠦ᠋ᠨ ᠡᠮᠦᠨᠡ ᠡᠴᠡ ᠶᠠᠮᠠᠷ ᠨᠢᠭᠡᠨ ᠰᠠᠢᠨ ᠰᠠᠢᠬᠠᠨ ᠵᠦᠢᠯ ᠬᠢᠬᠦ ᠶᠦᠮ ᠰᠠᠨ ᠭᠡᠰᠡᠨ ᠪᠣᠳᠣᠯ ᠲᠥᠷᠥᠬᠦ ᠶᠦᠮ᠃ ᠤᠭ ᠠ᠋ᠴᠠ ᠭᠠᠷ ᠤ᠋ᠨ ᠤᠷᠠ ᠲᠦᠢ ᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠭᠰᠡᠨ ᠡᠨᠡ ᠭᠠᠵᠠᠷ ᠰᠣᠶᠣᠯ ᠤᠷᠠᠯᠢᠭ᠂ ᠡᠷᠳᠡᠮ ᠨᠣᠮ ᠠᠯᠢ ᠠᠯᠢ ᠨᠢ ᠴᠡᠴᠡᠭᠯᠡᠨ ᠬᠥᠭᠵᠢᠬᠦ ᠬᠢᠷᠢ ᠨᠢ ᠮᠠᠢᠮᠠᠢ ᠠᠷᠠᠯᠵᠢᠶᠠ ᠴᠤ᠌ ᠲᠠᠰᠤᠷᠠᠬᠤ ᠦᠭᠡᠢ ᠦᠷᠭᠦᠯᠵᠢᠯᠡᠬᠦ ᠶᠦᠮ᠃ ᠮᠠᠢᠮᠠᠢ ᠠᠷᠠᠯᠵᠢᠶᠠᠨ ᠳ᠋ᠤ᠌ ᠬᠥᠯᠵᠢᠭᠰᠡᠨ ᠠᠷᠠᠳ ᠣᠯᠠᠨ ᠰᠣᠶᠣᠯ ᠤᠷᠠᠯᠢᠭ᠂ ᠰᠤᠷᠬᠤ ᠪᠣᠯᠪᠠᠰᠤᠷᠠᠬᠤ ᠪᠠᠨ ᠣᠷᠬᠢᠭᠳᠠᠭᠤᠯᠳᠠᠭ ᠪᠠᠢᠬᠤ ᠳ᠋ᠤ᠌ ᠡᠨᠡ ᠬᠥᠮᠦᠰ ᠲᠡᠢᠮᠦ ᠪᠢᠰᠢ ᠨᠢ ᠨᠠᠳᠠ ᠳ᠋ᠤ᠌ ᠪᠠᠬᠠᠳᠤᠯ ᠲᠠᠢ ᠰᠠᠨᠠᠭᠳᠠᠵᠤ ᠪᠠᠢᠨᠠ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠯᠡ᠃ ᠬᠦᠦ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠦᠨᠡᠨ ᠪᠣᠯᠬᠤ ᠶ᠋ᠢ ᠬᠠᠲᠤᠨ ᠡᠬᠡ ᠳᠣᠲᠣᠷᠠ ᠪᠠᠨ ᠡᠷᠭᠢᠴᠡᠭᠦᠯᠦᠨ᠂
— ᠡᠵᠢ ᠨᠢ ᠡᠨᠳᠡ ᠢᠷᠡᠭᠡᠳ ᠫᠧᠷᠰ ᠬᠡᠯᠡ ᠳᠡᠭᠡᠷᠡ ᠪᠢᠴᠢᠭᠳᠡᠭᠰᠡᠨ ᠡᠷᠲᠡᠨ ᠦ᠌ ᠣᠯᠠᠨ ᠰᠤᠳᠤᠷ ᠤ᠋ᠳ ᠢ᠋ ᠰᠡᠬᠦᠨ ᠬᠠᠷᠠᠵᠤ ᠰᠠᠭᠤᠯᠠ᠃ ᠬᠠᠷᠢᠨ ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠲᠠᠬᠠᠯᠠᠭᠳᠠᠭᠰᠠᠨ ᠡᠨᠡ ᠭᠠᠵᠠᠷ ᠲᠤ᠌ ᠰᠢᠨᠡ ᠪᠡᠷ ᠲᠥᠷᠥᠵᠦ ᠪᠠᠢᠭᠠ ᠬᠡᠦᠬᠡᠳ ᠦ᠋ᠳ ᠴᠠᠭ ᠢᠷᠡᠬᠦ ᠲᠣᠰᠤᠮ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ ᠠ᠋ᠴᠠ ᠬᠣᠯᠠᠳᠬᠤ ᠶᠤᠮ ᠰᠢᠭ᠋ ᠠᠢᠳᠠᠰ ᠲᠥᠷᠥᠬᠦ ᠪᠣᠯᠤᠯᠠ᠃ ᠨᠢᠭᠡᠨᠲᠡ ᠥᠪᠡᠷ ᠦ᠋ᠨ ᠭᠠᠵᠠᠷ ᠪᠣᠯᠤᠭᠰᠠᠨ ᠲᠤᠯᠠ ᠡᠨᠳᠡᠬᠢ ᠶ᠋ᠢᠨ ᠬᠡᠷᠡᠭ ᠢ᠋ ᠪᠢᠳᠡ ᠵᠠᠰᠠᠨ ᠶᠠᠪᠤᠭᠤᠯᠵᠤ᠂ ᠢᠷᠡᠭᠡᠳᠦᠢ ᠬᠣᠢᠴᠢ ᠶ᠋ᠢ ᠨᠢ ᠬᠥᠲᠥᠯᠬᠦ ᠡᠭᠦᠷᠭᠡ ᠲᠡᠢ ᠲᠤᠯᠠ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠪᠠᠯ ᠶᠠᠮᠠᠷ ᠪᠣᠢ ᠭᠡᠮᠡᠨ ᠠᠰᠠᠭᠤᠪᠠ᠃
— ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠤᠨᠠ ᠭᠡᠪᠡ ᠤᠤ?
— ᠲᠡᠢᠮᠦ ᠠ᠋᠃
— ᠡᠨᠡ ᠠᠵᠢᠯ ᠳ᠋ᠤ᠌ ᠶᠡᠬᠡ ᠮᠥᠩᠭᠥ ᠬᠡᠷᠡᠭ ᠪᠣᠯᠤᠨᠠ᠃ ᠠᠷᠠᠳ ᠲᠦᠮᠡᠨ ᠦ᠌ ᠠᠮᠢᠳᠤᠷᠠᠯ ᠳᠣᠷᠣᠢ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠮᠥᠩᠭᠥ ᠶ᠋ᠢ ᠬᠠᠲᠤᠨ ᠡᠬᠡ ᠲᠠ ᠬᠠᠮᠢᠭᠠ ᠠ᠋ᠴᠠ ᠪᠣᠢ ᠪᠣᠯᠭᠠᠬᠤ ᠭᠡᠵᠦ ᠪᠠᠢᠨᠠ ᠳᠠ᠃ ᠬᠠᠭᠠᠨ ᠤ᠋ ᠰᠠᠩ ᠠ᠋ᠴᠠ ᠪᠣᠯ ᠬᠡᠴᠡᠭᠦᠬᠡᠨ ᠯᠡ ᠪᠠᠢᠬᠤ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠦ᠍ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ᠄
— ᠥᠪᠡᠷ ᠦ᠋ᠨ ᠪᠠᠢᠭᠠ ᠬᠥᠷᠥᠩᠭᠡ ᠶ᠋ᠢ ᠵᠣᠷᠢᠭᠤᠯᠤᠶᠠ ᠭᠡᠯᠡ᠃
ᠬᠠᠲᠤᠨ ᠡᠬᠡ ᠨᠢ ᠬᠠᠮᠢᠭᠠ ᠪᠠᠢᠭᠰᠠᠨ ᠪᠤᠬᠠᠷ ᠬᠣᠲᠠ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠢ᠋ ᠰᠤᠷᠭᠠᠬᠤ ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠬᠤ ᠰᠠᠨᠠᠯ ᠬᠡᠯᠡᠵᠦ᠂ ᠵᠠᠷᠤᠳᠠᠯ ᠮᠥᠩᠭᠥ ᠶ᠋ᠢ ᠨᠢ ᠥᠪᠡᠷ ᠦ᠋ᠨ ᠰᠠᠩ ᠠ᠋ᠴᠠ ᠭᠠᠷᠭᠠᠬᠤ ᠰᠢᠢᠳᠪᠦᠷᠢ ᠭᠠᠷᠭᠠᠵᠤ ᠪᠠᠢᠭᠠ ᠳ᠋ᠤ᠌ ᠬᠦᠯᠡᠬᠦ ᠭᠠᠢᠬᠠᠬᠤ᠂ ᠪᠠᠰᠠ ᠬᠦ᠌ ᠪᠠᠬᠠᠷᠬᠠᠬᠤ ᠰᠡᠳᠬᠢᠯ ᠲᠥᠷᠥᠵᠦ ᠪᠠᠢᠪᠠ᠃ ᠬᠠᠲᠤᠨ ᠶᠠᠷᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠡᠵᠡᠯᠡᠨ ᠠᠪᠤᠭᠰᠠᠨ ᠴᠤ᠌ ᠪᠠᠢ᠂ ᠲᠥᠷᠥᠵᠦ ᠥᠰᠦᠭᠰᠡᠨ ᠴᠤ᠌ ᠪᠠᠢ ᠡᠨᠡ ᠭᠠᠵᠠᠷ ᠨᠤᠲᠤᠭ ᠪᠣᠯ ᠪᠢᠳᠡᠨ ᠦ᠌ ᠬᠢ᠃ ᠪᠢᠳᠡᠨ ᠦ᠌ ᠶᠠᠮᠠᠷ ᠪᠣᠳᠣᠯᠭᠠ ᠶᠠᠪᠤᠭᠤᠯᠬᠤ ᠠ᠋ᠴᠠ ᠰᠢᠯᠲᠠᠭᠠᠯᠠᠵᠤ᠂ ᠢᠷᠡᠭᠡᠳᠦᠢ ᠬᠣᠢᠴᠢ ᠶ᠋ᠢᠨ ᠵᠠᠮ ᠮᠥᠷ ᠨᠡᠭᠡᠭᠡᠭᠳᠡᠬᠦ ᠤᠴᠢᠷ ᠲᠠᠢ᠃ ᠠᠩᠵᠠᠭᠠᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠡᠨᠡ ᠭᠠᠵᠠᠷ ᠤ᠋ᠨ ᠣᠨᠴᠠᠯᠢᠭ᠂ ᠬᠥᠮᠦᠨ ᠵᠤᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠴᠡᠬᠦ ᠠᠵᠢᠯ ᠪᠣᠯ ᠡᠬᠢᠨ ᠦ᠌ ᠡᠭᠡᠯᠵᠢᠨ ᠳ᠋ᠦ᠍ ᠡᠨᠡ ᠪᠣᠯᠪᠠ ᠤᠤ᠃
ᠬᠠᠲᠤᠨ ᠡᠬᠡ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠡᠢᠨ ᠶᠠᠷᠢᠶᠠ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠥᠯᠢ ᠢᠰᠯᠠᠮ ᠪᠣᠯᠤᠨ ᠪᠤᠬᠠᠷ ᠬᠣᠲᠠ ᠶ᠋ᠢᠨ ᠬᠡᠷᠡᠭ ᠢ᠋ ᠲᠦᠷ ᠬᠠᠮᠢᠶᠠᠷᠤᠭᠴᠢ ᠰᠠᠢᠹ ᠠᠳ᠋ ᠳ᠋ᠢᠨ ᠨᠠᠷ ᠬᠦᠷᠦᠯᠴᠡᠨ ᠢᠷᠡᠵᠦ᠂
— ᠬᠠᠲᠤᠨ ᠡᠬᠡ ᠶ᠋ᠢᠨ ᠠᠢᠯᠠᠳᠪᠤᠷᠢ ᠶ᠋ᠢ ᠰᠣᠨᠣᠰᠤᠨ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ ᠲᠡᠷᠡ ᠳᠣᠣᠷᠠ ᠪᠠᠨ ᠭᠦᠶᠦᠭᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠴᠦ ᠢᠷᠡᠯᠡ ᠭᠡᠵᠦ ᠲᠠᠯᠠᠷᠬᠠᠨ ᠬᠡᠯᠡᠯᠡ᠃ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠷᠥᠭᠡᠰᠦᠲᠡᠢ ᠮᠥᠩᠭᠥᠨ ᠭᠤᠯᠤᠤᠵᠠ( ᠬᠤᠢᠯᠠᠭᠰᠠᠨ ᠮᠥᠩᠭᠥᠨ ᠵᠣᠭᠣᠰ) ᠢ᠋ ᠵᠢᠭᠠᠭᠠᠳ᠄
— ᠡᠨᠳᠡ ᠮᠢᠩᠭᠠᠨ ᠮᠥᠩᠭᠥᠨ ᠭᠤᠯᠤᠤᠵᠠ ᠪᠠᠢᠭᠠ᠂ ᠡᠨᠡ ᠮᠥᠩᠭᠥ ᠪᠡᠷ ᠬᠡᠳᠦᠨ ᠬᠡᠦᠬᠡᠳ ᠦ᠋ᠨ ᠰᠤᠷᠭᠠᠭᠤᠯᠢ ᠪᠠᠷᠢᠵᠤ ᠪᠣᠯᠬᠤ ᠪᠣᠢ ᠭᠡᠵᠦ ᠠᠰᠠᠭᠤᠯᠠ᠃ ᠲᠡᠳᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠭᠠ ᠲᠡᠷᠡ ᠶᠡᠬᠡ ᠮᠥᠩᠭᠥ ᠶ᠋ᠢ ᠬᠠᠷᠠᠭᠠᠳ᠂
—ᠬᠠᠲᠤᠨ ᠡᠬᠡ ᠮᠢᠨᠢ ᠲᠠᠨ ᠤ᠋ ᠠᠴᠢᠯᠠᠯ ᠡᠨᠡᠷᠢᠯ ᠲᠩᠷᠢ ᠮᠡᠲᠦ ᠥᠨᠳᠥᠷ᠂ ᠲᠠᠩᠭᠢᠰ ᠳᠠᠯᠠᠢ ᠮᠡᠲᠦ ᠭᠦᠨ ᠭᠦᠨᠵᠡᠭᠡᠢ ᠶ᠋ᠢ ᠬᠠᠷᠠᠵᠤ ᠪᠠᠢᠨᠠ᠃ ᠡᠨᠡ ᠮᠥᠩᠭᠥ ᠪᠡᠷ ᠮᠢᠩᠭᠠᠨ ᠬᠡᠦᠬᠡᠳ ᠢ᠋ ᠴᠦ᠍ ᠪᠠᠭᠲᠠᠭᠠᠬᠤ ᠰᠤᠷᠭᠠᠭᠤᠯᠢ ᠪᠠᠷᠢᠬᠤ ᠪᠣᠯᠤᠮᠵᠢ ᠲᠠᠢ ᠭᠡᠵᠦ ᠬᠡᠯᠡᠯᠡ᠃
— ᠲᠡᠢᠮᠦ ᠪᠣᠯ ᠰᠤᠷᠭᠠᠭᠤᠯᠢ ᠪᠠᠷᠢᠬᠤ ᠠᠵᠢᠯ ᠢ᠋ ᠶᠠᠭᠠᠷᠠᠪᠴᠢᠯᠠᠨ ᠡᠬᠢᠯᠡᠭᠦᠯ᠂ ᠬᠠᠷᠢᠨ ᠬᠡᠦᠬᠡᠳ ᠦ᠋ᠳ ᠪᠣᠯᠤᠨ ᠪᠠᠭᠰᠢ ᠠᠵᠢᠯᠴᠢᠳ ᠢ᠋ ᠪᠠᠢᠯᠭᠠᠬᠤ ᠰᠠᠭᠤᠴᠠ ᠶ᠋ᠢ ᠬᠠᠮᠲᠤ ᠪᠠᠷᠢᠪᠠᠯ ᠰᠠᠢᠨ ᠰᠠᠨᠠᠭᠳᠠᠨᠠ ᠭᠡᠪᠡ᠃
ᠰᠠᠶ᠋ᠢᠹ ᠠᠳ᠋ ᠳ᠋ᠢᠨ ᠭᠠᠳᠠᠨᠠ ᠠ᠋ᠴᠠ ᠬᠥᠮᠦᠨ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂ ᠮᠢᠩᠭᠠᠨ ᠮᠥᠩᠭᠥᠨ ᠭᠤᠯᠤᠤᠵᠠ ᠶ᠋ᠢ ᠳᠠᠭᠠᠭᠠᠵᠤ ᠶᠠᠳᠠᠨ ᠵᠥᠭᠡᠭᠡᠵᠦ᠂ ᠬᠠᠲᠤᠨ ᠤ᠋ ᠠᠪᠤᠷᠠᠯ ᠡᠨᠡᠷᠢᠯ ᠳ᠋ᠦ᠍ ᠲᠠᠯᠠᠷᠬᠠᠨ ᠬᠣᠢᠰᠢ ᠤᠬᠤᠷᠢᠭᠰᠠᠭᠠᠷ ᠭᠠᠷᠴᠤ ᠣᠳᠪᠠ᠃ ᠡᠨᠡ ᠡᠳᠦᠷ ᠡᠴᠡ ᠬᠣᠢᠰᠢ ᠪᠤᠬᠠᠷ ᠬᠣᠲᠠ ᠳ᠋ᠤ᠌ ᠰᠢᠪᠡ ᠨᠢ ᠲᠠᠯᠪᠢᠭᠳᠠᠵᠤ ᠡᠬᠢᠯᠡᠭᠰᠡᠨ ᠮᠢᠩᠭᠠᠨ ᠬᠡᠦᠬᠡᠳ ᠦ᠋ᠨ ᠰᠤᠷᠭᠠᠭᠤᠯᠢ ᠪᠠᠷᠢᠬᠤ ᠠᠵᠢᠯ ᠡᠬᠢᠯᠡᠯᠡ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠠᠯᠳᠠᠷ ᠰᠤᠤ ᠶ᠋ᠢ ᠮᠥᠩᠬᠡᠯᠡᠨ ᠠᠷᠠᠳ ᠢᠷᠭᠡᠳ ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠠᠭᠤᠷᠢ ᠠᠩᠬᠠ ᠲᠠᠯᠪᠢᠭᠳᠠᠵᠤ ᠡᠬᠢᠯᠡᠭᠰᠡᠨ ᠡᠴᠡ ᠯᠡ 《ᠬᠠᠲᠤᠨ ᠤ᠋ ᠰᠤᠷᠭᠠᠭᠤᠯᠢ》 ᠭᠡᠮᠡᠨ ᠨᠡᠷᠡᠯᠡᠬᠦ ᠪᠣᠯᠵᠠᠢ᠃
*
ᠰᠥᠨᠢ ᠶ᠋ᠢᠨ ᠠᠨᠢᠷ ᠦᠭᠡᠢ ᠶ᠋ᠢ ᠡᠪᠳᠡᠨ ᠴᠠᠳ ᠫᠠᠳ ᠬᠢᠨ ᠳᠤᠤᠭᠠᠷᠬᠤ ᠴᠢᠮᠡᠭᠡ ᠭᠠᠷᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠦᠳᠡ ᠤᠳᠠᠯ ᠦᠭᠡᠢ ᠪᠠᠳᠮᠠᠯᠠᠨ ᠠᠰᠠᠭᠰᠠᠨ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠣᠷᠴᠢᠨ ᠤ᠋ ᠶᠠᠭᠤ ᠪᠦᠬᠦᠨ ᠲᠣᠳᠣᠬᠠᠨ ᠬᠠᠷᠠᠭᠳᠠᠬᠤ ᠪᠠᠷ ᠪᠣᠯᠤᠯᠠ᠃ᠤᠯᠠᠭᠠᠨ ᠭᠠᠯ ᠳᠦᠷᠡᠯᠵᠡᠨ ᠠᠰᠠᠵᠤ ᠭᠠᠯᠵᠠᠭᠤᠷᠠᠭᠰᠠᠨ ᠮᠡᠲᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ᠶ᠋ᠠᠨ ᠬᠠᠢᠯᠤᠭᠤᠯᠤᠨ ᠤᠷᠤᠰᠬᠠᠵᠤ ᠡᠬᠢᠯᠡᠯᠡ᠃ ᠡᠨᠡ ᠵᠠᠭᠤᠷᠠ ᠳ᠋ᠤ᠌ ᠨᠢᠭᠡᠨ ᠮᠣᠷᠢᠲᠠᠨ ᠰᠡᠩᠳᠡ ᠮᠡᠩᠳᠡ ᠬᠠᠵᠠᠭᠤ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠢ᠋ ᠳᠠᠪᠠᠨ ᠳᠠᠯᠳᠠ ᠣᠷᠣᠵᠤ ᠪᠣᠢ ᠪᠦᠳᠡᠭᠢ ᠪᠡᠲᠡᠭᠢ ᠳᠦᠷᠰᠦ ᠬᠠᠷᠠᠭᠳᠠᠬᠤ ᠲᠠᠢ ᠦᠭᠡᠢ ᠲᠡᠢ ᠪᠣᠯᠤᠭᠠᠳ ᠠᠯᠠᠭᠠ ᠪᠣᠯᠤᠯᠠ᠃ ᠣᠢᠷᠠᠯᠴᠠᠭᠠ ᠭᠡᠷ ᠡᠴᠡ ᠨᠢᠭᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠨᠣᠢᠷᠮᠤᠭᠯᠠᠨ ᠭᠠᠷᠴᠤ ᠢᠷᠡᠵᠦ᠂ ᠬᠠᠵᠠᠭᠠᠢ ᠭᠢᠰᠬᠢᠨ ᠶᠠᠪᠤᠵᠤ ᠪᠠᠢᠭᠠᠳ ᠳᠣᠣᠷᠠ ᠪᠠᠨ ᠵᠣᠭᠰᠣᠵᠤ ᠮᠣᠷᠢ ᠬᠠᠷᠠᠬᠤ ᠵᠠᠭᠤᠷᠠ ᠳ᠋ᠤ᠌ ᠰᠠᠶᠢ ᠳᠦᠷᠡᠯᠵᠡᠨ ᠠᠰᠠᠭᠰᠠᠨ ᠭᠠᠯ ᠢ᠋ ᠬᠠᠷᠠᠨ ᠬᠡᠢ ᠳᠡᠮᠡᠢ ᠯᠡ ᠠᠮᠠ ᠨᠢ ᠠᠩᠭᠠᠯᠵᠠᠨ ᠬᠡᠰᠡᠭ ᠪᠣᠯᠤᠭᠠᠳ᠂
— ᠭᠠᠯ᠁ ᠭᠠᠯ ᠭᠠᠷᠤᠯᠠ ᠭᠡᠮᠡᠨ ᠬᠠᠰᠬᠢᠷᠬᠤ ᠲᠡᠳᠦᠢ ᠳ᠋ᠦ᠍ ᠠᠢᠯ ᠤ᠋ᠳ ᠤ᠋ᠨ ᠭᠡᠷ ᠡᠴᠡ ᠬᠥᠮᠦᠰ ᠰᠠᠨᠳᠤᠴᠢᠨ ᠭᠠᠷᠴᠤ ᠣᠷᠣᠬᠤ ᠨᠢ ᠦᠵᠡᠭᠳᠡᠭᠡᠳ᠂ ᠤᠰᠤ ᠲᠠᠢ ᠰᠠᠪᠠ ᠵᠥᠭᠡᠭᠡᠨ ᠳᠦᠷᠡᠯᠵᠡᠨ ᠪᠣᠢ ᠭᠠᠯ ᠤᠷᠤᠭᠤ ᠰᠠᠴᠤᠭᠰᠠᠭᠠᠷ ᠪᠠᠢᠬᠤ ᠠᠪᠠᠴᠤ ᠨᠢᠭᠡᠨᠲᠡ ᠠᠰᠠᠭᠰᠠᠨ ᠭᠠᠯ ᠬᠦᠴᠦᠷᠡᠭᠳᠡᠬᠦ ᠪᠡᠨ ᠥᠩᠭᠡᠷᠡᠵᠡᠢ᠃
— ᠬᠠᠲᠤᠨ ᠡᠬᠡ ᠮᠢᠨᠢ᠃ ᠬᠠᠲᠤᠨ ᠡᠬᠡ ᠮᠢᠨᠢ ᠬᠡᠷᠬᠢᠬᠦ ᠪᠢᠯᠡ ᠭᠡᠵᠦ ᠬᠡᠯᠡᠭᠡᠳ ᠠᠰᠠᠭᠰᠠᠨ ᠭᠠᠯ ᠤ᠋ᠨ ᠳᠤᠮᠳᠠ ᠠ᠋ᠴᠠ ᠭᠠᠷᠴᠤ ᠢᠷᠡᠵᠦ ᠪᠣᠢ ᠬᠥᠮᠦᠨ ᠢ᠋ ᠬᠠᠷᠠᠪᠠᠯ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠤ᠋ ᠥᠬᠢᠨ ᠲᠡᠮᠦᠬᠡᠨ ᠪᠡᠬᠢ ᠪᠠᠢᠬᠤ ᠪᠥᠭᠡᠳ ᠬᠠᠴᠠᠷ ᠲᠤᠨᠢ ᠦᠨᠡᠰᠦ ᠨᠣᠷᠮᠠ ᠨᠠᠭᠠᠯᠳᠤᠨ ᠰᠢᠷᠣᠢ ᠪᠣᠯᠤᠭᠰᠠᠨ ᠬᠠᠷᠠᠭᠳᠠᠨᠠ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠨᠣᠮ ᠤ᠋ᠨ ᠥᠷᠭᠥᠭᠡ ᠬᠠᠢᠯᠵᠠᠢ᠃ ᠲᠡᠷᠡ ᠭᠠᠯ ᠳᠤᠮᠳᠠᠭᠤᠷ ᠭᠦᠶᠦᠨ ᠣᠷᠣᠵᠤ《ᠠᠯᠲᠠᠨ ᠰᠤᠳᠤᠷ》 ᠢ᠋ ᠲᠡᠪᠡᠷᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠠᠢᠯᠠ᠃ ᠰᠤᠳᠤᠷ ᠤ᠋ᠨ ᠲᠠᠯᠠ ᠨᠢ ᠰᠢᠳᠡᠵᠡᠢ᠃ ᠲᠡᠭ ᠳᠤᠮᠳᠠ ᠪᠠᠨ ᠬᠦᠷᠲᠡᠯᠡ ᠰᠢᠲᠠᠵᠤ ᠦᠨᠡᠰᠦ ᠪᠣᠯᠤᠭᠰᠠᠨ ᠰᠤᠳᠤᠷ ᠢ᠋ᠶ᠋ᠠᠨ ᠲᠡᠪᠡᠷᠢᠭᠰᠡᠨ ᠴᠢᠭ ᠲᠡᠭᠡᠨ ᠬᠥᠰᠢᠭᠰᠡᠨ ᠮᠡᠲᠦ ᠵᠣᠭᠰᠣᠬᠤ ᠲᠡᠮᠦᠬᠡᠨ ᠪᠡᠬᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠪᠦᠷᠬᠦᠭᠰᠡᠨ ᠨᠢᠯᠪᠤᠰᠤ ᠨᠢ ᠬᠦᠷᠲᠡᠯᠡ ᠤᠨᠠᠵᠤ ᠴᠢᠳᠠᠬᠤ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠲᠣᠭᠲᠠᠭᠰᠠᠨ ᠪᠠᠢᠪᠠ᠃ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠳ᠋ᠦ᠍ ᠭᠠᠷᠤᠭᠰᠠᠨ ᠭᠠᠯ ᠲᠦᠳᠡ ᠤᠳᠠᠯ ᠦᠭᠡᠢ ᠳᠣᠲᠣᠷᠠᠬᠢ ᠶᠠᠭᠤᠮᠠᠰ ᠢ᠋ ᠬᠠᠢᠯᠤᠭᠤᠯᠤᠨ ᠤᠷᠤᠰᠬᠠᠯᠠ᠃
— ᠡᠴᠢᠭᠡ ᠲᠩᠷᠢ ᠮᠢᠨᠢ᠂ ᠶᠠᠭᠤ ᠪᠣᠯᠬᠤ ᠨᠢ ᠡᠨᠡ ᠪᠣᠢ?
— ᠣᠢᠷᠠ ᠳ᠋ᠤ᠌ ᠬᠥᠮᠦᠨ ᠣᠷᠣᠵᠤ ᠭᠡᠷᠡᠯ ᠭᠠᠷᠭᠠᠭᠠ ᠦᠭᠡᠢ ᠪᠠᠢᠲᠠᠯᠠ ᠨᠣᠮ ᠤ᠋ᠨ ᠥᠷᠭᠥᠭᠡ ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠰᠥᠨᠢ ᠳᠦᠯᠢ ᠪᠡᠷ ᠬᠠᠢᠯᠤᠨ ᠤᠷᠤᠰᠪᠠ?
— ᠤᠷᠢᠳ ᠰᠥᠨᠢ ᠬᠡᠨ ᠨᠢᠭᠡᠨ ᠡᠨᠡ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠯᠠ ᠪᠠᠢᠨᠠ ᠳᠠ᠃ ᠲᠡᠭᠡᠭᠡᠳ ᠳ᠋ᠧᠩ ᠢ᠋ᠶ᠋ᠡᠨ ᠳᠤᠲᠠᠭᠤ ᠤᠨᠲᠠᠷᠠᠭᠠᠭᠰᠠᠨ ᠠ᠋ᠴᠠ ᠡᠨᠡ ᠬᠡᠷᠡᠭ ᠪᠣᠯᠤᠭᠰᠠᠨ ᠪᠣᠯᠪᠠ ᠤᠤ?
— ᠠᠢ ᠬᠠᠯᠠᠭ ᠭᠡᠵᠦ ᠣᠳᠣ ᠶᠠᠭᠠᠬᠢᠬᠤ ᠪᠢᠯᠡ᠃ ᠬᠠᠲᠤᠨ ᠡᠬᠡ ᠶ᠋ᠢ ᠢᠷᠡᠬᠦ ᠪᠡᠷ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠢᠯᠡ ᠭᠡᠮᠡᠨ ᠠᠭᠤᠷᠠᠭ ᠤ᠋ᠨ ᠭᠠᠳᠠᠭᠠ ᠬᠥᠮᠦᠰ ᠬᠡᠷᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠭᠠᠰᠠᠯᠤᠨ ᠪᠠᠢᠬᠤ ᠵᠠᠭᠤᠷᠠ ᠪᠤᠬᠠᠷ ᠬᠣᠲᠠ ᠳ᠋ᠤ᠌ ᠤᠨᠲᠠᠵᠤ ᠠᠮᠠᠷᠠᠬᠤ ᠪᠠᠷ ᠣᠷᠣᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠳᠠᠷᠤᠢ ᠳ᠋ᠠᠭᠠᠨ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠨᠢᠭᠡᠨ ᠵᠡᠭᠦᠳᠦ ᠶ᠋ᠢ ᠦᠵᠡᠪᠡ᠃
ᠨᠣᠢᠷ ᠤ᠋ᠨ ᠳᠤᠮᠳᠠ ᠨᠢ ᠬᠡᠨ ᠨᠢᠭᠡᠨ ᠦ᠌ ᠵᠥᠭᠡᠯᠡᠬᠡᠨ ᠭᠠᠷ ᠬᠠᠴᠠᠷ ᠲᠤᠨᠢ ᠬᠦᠷᠬᠦ ᠳ᠋ᠦ᠍ ᠲᠡᠷᠡ ᠰᠡᠷᠡᠯᠡ᠃ ᠬᠠᠵᠠᠭᠤ ᠳ᠋ᠤᠨᠢ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠣᠷᠣᠨᠠ ᠣᠳᠤᠭᠰᠠᠨ ᠥᠭᠡᠯᠦᠨ ᠡᠬᠡ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠭᠠᠢᠬᠠᠨ ᠪᠠᠶᠠᠷᠯᠠᠵᠤ᠂ ᠪᠣᠰᠤᠨ ᠥᠨᠳᠡᠢᠲᠡᠯᠡ ᠲᠡᠷᠡ ᠴᠢᠮᠡᠭᠡ ᠦᠭᠡᠢ ᠪᠠᠢᠬᠤ ᠶ᠋ᠢ ᠳᠣᠬᠢᠨ ᠬᠤᠷᠤᠭᠤ ᠪᠠᠨ ᠠᠮᠠᠨ ᠳ᠋ᠠᠭᠠᠨ ᠬᠦᠷᠭᠡᠭᠡᠳ ᠭᠠᠷ ᠠ᠋ᠴᠠ ᠨᠢ ᠬᠥᠲᠥᠯᠵᠦ ᠲᠡᠳᠡ ᠭᠠᠳᠠᠭᠰᠢ ᠭᠠᠷᠪᠠ᠃ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠣᠷᠣᠨᠠ ᠵᠠᠯᠠᠷᠠᠭᠰᠠᠨ ᠴᠠᠭ ᠠ᠋ᠴᠠ ᠨᠢ ᠬᠣᠢᠰᠢ ᠰᠠᠨᠠᠨ ᠭᠠᠰᠢᠭᠤᠳᠠᠵᠤ ᠤᠳᠠᠭᠰᠠᠨ ᠥᠭᠡᠯᠦᠨ ᠡᠬᠡ ᠳ᠋ᠡᠭᠡᠨ ᠰᠤᠷᠬᠠᠭᠲᠠᠨᠢ ᠵᠠᠮ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶᠠᠷᠢᠮᠠᠷ᠂ ᠪᠦᠷ ᠶᠡᠬᠡ ᠶᠠᠭᠤᠮᠠ ᠬᠦᠦᠷᠨᠢᠮᠡᠷ ᠪᠠᠢᠪᠠᠴᠤ ᠠᠮᠠᠨ ᠠ᠋ᠴᠠ ᠨᠢ ᠦᠭᠡ ᠡᠰᠡ ᠭᠠᠷᠤᠨᠠ᠃ ᠤᠭ ᠨᠢ ᠮᠠᠰᠢ ᠶᠡᠬᠡ ᠵᠦᠢᠯ ᠢ᠋ ᠶᠠᠷᠢᠬᠤ ᠶ᠋ᠢ ᠬᠦᠰᠡᠪᠡᠴᠦ ᠲᠡᠷᠡ ᠶᠡᠬᠡ ᠵᠦᠢᠯ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠬᠠᠲᠤᠨ ᠤ᠋ ᠠᠮᠠᠨ ᠠ᠋ᠴᠠ ᠭᠠᠷᠴᠤ ᠥᠭᠬᠦ ᠦᠭᠡᠢ ᠪᠠᠢᠬᠤ ᠰᠢᠭ᠋ ᠰᠣᠨᠢᠨ ᠬᠥᠨᠳᠡᠭᠦᠷ᠃ ᠥᠭᠡᠯᠦᠨ ᠡᠬᠡ ᠶᠠᠪᠤᠭᠰᠠᠭᠠᠷ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠣᠴᠢᠭᠠᠳ ᠰᠤᠷᠬᠠᠭᠲᠠᠨᠢ ᠶ᠋ᠢᠨ ᠪᠤᠭᠤᠷᠤᠯ ᠰᠠᠭᠤᠵᠤ ᠪᠣᠢ ᠦᠰᠦ ᠶ᠋ᠢ ᠢᠯᠪᠢᠨ᠂
— ᠣᠳᠣ ᠲᠠᠯᠠ ᠨᠤᠲᠤᠭ ᠤ᠋ᠨ ᠦᠨᠡᠨ ᠢ᠋ ᠣᠯᠵᠤ ᠬᠠᠷᠠ ᠭᠡᠯᠡ᠃
— ᠲᠠᠯᠠ ᠨᠤᠲᠤᠭ ᠤ᠋ᠨ ᠦᠨᠡᠨ ᠭᠡᠵᠦ ᠶᠠᠭᠤ ᠰᠠᠨ ᠪᠢᠯᠡ᠂ ᠥᠭᠡᠯᠦᠨ ᠡᠬᠡ ᠮᠢᠨᠢ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠂
— ᠲᠠᠯᠠ ᠨᠤᠲᠤᠭ ᠤ᠋ᠨ ᠦᠨᠡᠨ ᠪᠣᠯ ᠶᠡᠬᠡ ᠮᠣᠩᠭᠣᠯ ᠤ᠋ᠨ ᠦᠨᠡᠨ ᠤᠷᠤᠰᠴᠤ ᠪᠣᠢ ᠴᠢᠰᠤᠨ ᠳᠤᠮᠳᠠ᠂ ᠰᠢᠳᠡᠵᠦ ᠪᠣᠢ ᠭᠠᠯ ᠳᠤᠮᠳᠠ ᠦᠨᠡᠨ ᠪᠣᠢ᠃ ᠲᠡᠭᠦᠨ ᠢ᠋ ᠣᠯ ᠭᠡᠵᠦ ᠬᠡᠯᠡᠯᠡ᠃ ᠤᠴᠢᠷ ᠢ᠋ ᠣᠯᠵᠤ ᠶᠠᠳᠠᠨ ᠪᠠᠢᠲᠠᠯᠠ ᠥᠭᠡᠯᠦᠨ ᠡᠬᠡ ᠨᠢᠭᠡ ᠬᠠᠷᠠᠬᠤᠨᠡ ᠰᠦᠮᠡᠯᠵᠡᠨ ᠦᠵᠡᠭᠳᠡᠬᠦ ᠵᠡᠷᠭᠡᠯᠭᠡᠨᠲᠦ ᠠᠯᠤᠰ ᠤᠷᠤᠭᠤ ᠠᠭᠤᠰᠤᠨ ᠣᠳᠤᠯᠠ᠃
— ᠥᠭᠡᠯᠦᠨ ᠡᠬᠡ ᠠ᠋᠃ ᠥᠭᠡᠯᠦᠨ ᠡᠬᠡ ᠮᠢᠨᠢ᠃ ᠬᠦᠯᠢᠶᠡ᠃ ᠬᠦᠯᠢᠶᠡᠭᠡᠴᠢ ᠳᠡ᠃ ᠡᠨᠡ ᠦᠭᠡ ᠶ᠋ᠢ ᠳᠠᠪᠲᠠᠭᠰᠠᠭᠠᠷ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠪᠤᠬᠠᠷ ᠬᠣᠲᠠ ᠳ᠋ᠤ᠌ ᠪᠠᠢᠬᠤ ᠥᠪᠡᠷ ᠦ᠋ᠨ ᠤᠷᠲᠤ ᠦᠷᠭᠦᠭᠡᠨ ᠦ᠌ ᠪᠡᠨ ᠣᠨᠢ ᠲᠣᠭᠣᠨᠣ ᠶ᠋ᠢ ᠬᠠᠷᠠᠨ ᠰᠠᠶᠢ ᠨᠣᠢᠷ ᠠ᠋ᠴᠠ ᠰᠡᠷᠡᠯᠡ᠃
— ᠶᠠᠮᠠᠷ ᠬᠠᠴᠢᠨ ᠵᠡᠭᠦᠳᠦ ᠪᠣᠢ? ᠥᠭᠡᠯᠦᠨ ᠡᠬᠡ ᠨᠠᠳᠠ ᠳ᠋ᠤ᠌ ᠲᠠᠯᠠ ᠨᠤᠲᠤᠭ ᠤ᠋ᠨ ᠦᠨᠡᠨ ᠢ᠋ ᠣᠯᠵᠤ ᠬᠠᠷᠠ ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠯᠠ᠃ ᠤᠷᠤᠰᠴᠤ ᠪᠣᠢ ᠴᠢᠰᠤᠨ ᠳᠤᠮᠳᠠ ᠦᠨᠡᠨ ᠪᠣᠢ᠂ ᠰᠢᠲᠠᠵᠤ ᠪᠣᠢ ᠭᠠᠯ ᠳᠤᠮᠳᠠ ᠦᠨᠡᠨ ᠪᠣᠢ ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠶᠠᠭᠤ ᠪᠢᠯᠡ᠃ ᠬᠠᠲᠤᠨ ᠡᠢᠨ ᠪᠣᠳᠣᠵᠤ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠨᠣᠢᠷ ᠮᠠᠭᠤᠲᠠᠢ ᠬᠣᠨᠣᠭᠠᠳ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠷᠲᠡᠯᠡᠨ ᠬᠦᠦ ᠬᠦᠯᠡᠬᠦ ᠪᠡᠨ ᠳᠠᠭᠤᠳᠠᠭᠤᠯᠤᠯᠠ᠃
— ᠡᠵᠢ ᠨᠢ ᠶᠠᠭᠠᠷᠠᠪᠴᠢᠯᠠᠨ ᠪᠤᠴᠠᠶᠠ ᠳᠠ᠂ ᠤᠷᠢᠳ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ ᠳ᠋ᠦ᠍ ᠥᠭᠡᠯᠦᠨ ᠡᠬᠡ ᠢᠷᠡᠵᠦ᠂ ᠨᠠᠳᠠ ᠳ᠋ᠤ᠌ ᠨᠢᠭᠡᠨ ᠳᠣᠬᠢᠶᠠ ᠥᠭᠭᠦᠭᠡᠳ ᠶᠠᠪᠤᠯᠠ᠃ ᠲᠠᠯᠠ ᠨᠤᠲᠤᠭ ᠲᠤ᠌ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠪᠣᠯᠤᠭᠰᠠᠨ ᠪᠢᠵᠡ᠃
— ᠬᠠᠲᠤᠨ ᠡᠬᠡ ᠮᠢᠨᠢ ᠲᠠ ᠵᠦᠭᠡᠷ ᠢᠷᠡᠬᠦ ᠵᠡᠭᠦᠳᠦᠨ ᠦ᠌ ᠠᠶᠠᠰ ᠢ᠋ᠶ᠋ᠠᠷ ᠬᠥᠲᠥᠯᠦᠭᠳᠡᠨ ᠶᠠᠭᠠᠷᠠᠨ ᠪᠤᠴᠠᠬᠤ ᠭᠡᠵᠦ ᠪᠣᠢ ᠲᠠᠨᠢ ᠳᠡᠮᠡᠢ ᠬᠡᠷᠡᠭ ᠮᠡᠲᠦ ᠰᠠᠨᠠᠭᠳᠠᠬᠤ ᠶᠤᠮ ᠭᠡᠵᠦ ᠬᠦᠦ ᠪᠡᠨ ᠢᠨᠢᠶᠡᠪᠬᠢᠯᠡᠨ ᠬᠡᠯᠡᠬᠦ ᠳ᠋ᠦ᠍᠂
— ᠦᠷᠡ ᠮᠢᠨᠢ᠂ ᠡᠨᠡ ᠳᠡᠮᠡᠢ ᠬᠡᠷᠡᠭ ᠪᠢᠰᠢ᠂ ᠪᠢ ᠢᠮᠠᠭᠲᠠ ᠵᠡᠭᠦᠳᠦᠨ ᠡᠴᠡ ᠪᠡᠨ ᠦᠨᠡᠨ ᠢ᠋ ᠬᠠᠷᠠᠳᠠᠭ᠂ ᠤᠷᠢᠳ ᠨᠢ ᠴᠦ᠍ ᠲᠡᠢᠮᠦ ᠪᠠᠢᠭᠰᠠᠨ᠂ ᠣᠳᠣ ᠴᠤ ᠲᠡᠢᠮᠦ ᠯᠡ ᠪᠠᠢᠨᠠ᠃ ᠬᠦᠦ ᠮᠢᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠣᠷᠣ ᠭᠡᠵᠦ ᠬᠡᠯᠡᠯᠡ᠃ ᠡᠬᠡ ᠶ᠋ᠢᠨ ᠬᠡᠯᠡᠭᠰᠡᠨ ᠡᠴᠡ ᠵᠥᠷᠢᠵᠦ ᠦᠵᠡᠭᠡ ᠦᠭᠡᠢ ᠬᠥᠯᠡᠬᠦ ᠬᠠᠲᠤᠨ ᠡᠬᠡ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠲᠠᠯᠠ ᠨᠤᠲᠤᠭ ᠤᠷᠤᠭᠤ ᠬᠥᠳᠡᠯᠬᠦ ᠶᠡᠬᠡ ᠨᠡᠭᠦᠳᠡᠯ ᠢ᠋ ᠪᠡᠯᠡᠳᠬᠡᠵᠦ ᠡᠬᠢᠯᠡᠯᠡ᠃
※
— ᠠᠭᠤᠷᠠᠭ ᠲᠤ᠌ ᠰᠤᠷᠬᠠᠭᠲᠠᠨᠢ ᠬᠠᠲᠤᠨ ᠤ᠋ ᠨᠣᠮ ᠤ᠋ᠨ ᠥᠷᠭᠥᠭᠡ ᠬᠠᠢᠯᠵᠠᠢ ᠭᠡᠬᠦ ᠶᠠᠷᠢᠶᠠ ᠳᠦᠷᠭᠡᠨᠡ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠳᠤᠭᠤᠯᠳᠠᠬᠤ ᠳ᠋ᠤ᠌ ᠦᠷᠭᠦᠭᠡᠨ ᠦ᠌ ᠳᠣᠲᠣᠷᠠ ᠭᠦᠶᠦᠭ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠠᠢᠪᠠ᠃ ᠨᠥᠭᠦᠭᠡ ᠬᠥᠮᠦᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠦᠷ ᠰᠥᠨᠢ ᠶᠢᠨ ᠵᠠᠪᠰᠠᠷ ᠲᠤ ᠠᠰᠠᠭᠰᠠᠨ ᠲᠡᠷᠡ ᠶᠡᠬᠡ ᠭᠠᠯ ᠬᠠᠲᠤᠨ ᠤ᠋ ᠨᠣᠮ ᠤ᠋ᠨ ᠦᠷᠭᠦᠭᠡᠨ ᠡᠴᠡ ᠶᠠᠭᠤ ᠶ᠋ᠢ ᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠬᠠᠢᠯᠤᠭᠤᠯᠤᠨ ᠣᠳᠴᠠᠢ ᠭᠡᠪᠡ᠃ ᠳᠦᠷᠭᠡᠨᠡ ᠬᠠᠲᠤᠨ ᠭᠡᠨᠡᠳᠲᠡ ᠶ᠋ᠢᠨ ᠡᠨᠡ ᠮᠡᠳᠡᠭᠡᠨ ᠳ᠋ᠦ᠍ ᠰᠣᠴᠢᠷᠲᠠᠨ᠂
— ᠮᠥᠩᠬᠡ ᠲᠩᠷᠢ᠁ ᠶᠠᠭᠤᠨ ᠠ᠋ᠴᠠ ᠪᠣᠯᠵᠤ ᠬᠠᠢᠯᠤᠨ ᠤᠷᠤᠰᠤᠭᠰᠠᠨ ᠪᠣᠯᠬᠤ ᠶ᠋ᠢ ᠮᠡᠳᠡᠪᠡ ᠤᠤ?
— ᠦᠭᠡᠢ᠂ ᠬᠠᠲᠤᠨᠲᠠᠨ ᠮᠢᠨᠢ᠂ ᠭᠡᠪᠡᠴᠦ ᠦᠷ ᠢ᠋ᠶ᠋ᠡᠷ ᠰᠡᠷᠡᠵᠦ᠂ ᠮᠣᠷᠢ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠬᠡᠪᠲᠡᠭᠦᠯ ᠦ᠋ᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠣᠯ ᠭᠠᠯ ᠭᠠᠷᠤᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠮᠣᠷᠢ ᠲᠠᠢ ᠬᠥᠮᠦᠨ ᠠᠭᠤᠯᠠ ᠳᠠᠪᠠᠨ ᠣᠳᠤᠭᠰᠠᠨ ᠭᠡᠬᠦ ᠦᠨᠡᠨ ᠬᠤᠳᠠᠯ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠶᠠᠷᠢᠶᠠ ᠪᠠᠢᠨᠠ ᠭᠡᠪᠡ᠃
ᠭᠦᠶᠦᠭ ᠡᠬᠡ ᠳ᠋ᠡᠭᠡᠨ ᠣᠢᠷᠠᠲᠤᠨ ᠢᠷᠡᠵᠦ᠂
— ᠦᠨᠡᠬᠡᠷ ᠬᠠᠲᠤᠨ ᠡᠬᠡ ᠲᠠ ᠮᠡᠳᠡᠭᠡ ᠦᠭᠡᠢ ᠬᠡᠷᠡᠭ ᠭᠡᠵᠦ ᠤᠤ ᠭᠡᠮᠡᠨ ᠠᠰᠠᠭᠤᠪᠠ᠃ ᠳᠦᠷᠭᠡᠨᠡ ᠬᠠᠲᠤᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠴᠣᠷᠭᠢᠭᠰᠠᠨ ᠬᠠᠷᠠᠴᠠᠨ ᠠ᠋ᠴᠠ ᠳᠠᠯᠳᠠᠴᠢᠨ ᠪᠠᠢᠭᠰᠠᠨ ᠬᠡᠳᠦᠢ ᠴᠦ᠍᠂
ᠮᠥᠩᠬᠡ ᠲᠩᠷᠢ ᠮᠡᠳᠡᠨᠡ᠃ ᠲᠡᠷᠡ ᠥᠷᠭᠥᠭᠡ ᠶ᠋ᠢ ᠥᠭᠡᠯᠦᠨ ᠡᠬᠡ ᠪᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠪᠢ ᠳᠡᠷᠭᠡᠳᠡ ᠨᠢ ᠬᠠᠷᠠᠵᠤ ᠪᠠᠢᠭᠰᠠᠨ᠃ ᠰᠤᠷᠬᠠᠭᠲᠠᠨᠢ ᠪᠢᠳᠡ ᠬᠣᠶᠠᠷ ᠬᠠᠮᠲᠤ ᠰᠠᠭᠤᠵᠤ ᠰᠤᠳᠤᠷ ᠨᠣᠮ ᠤᠩᠰᠢᠳᠠᠭ ᠪᠠᠢᠪᠠ᠃ ᠴᠢ ᠡᠬᠡ ᠶ᠋ᠢ ᠪᠡᠨ ᠠᠷᠠᠢ ᠳᠡᠩᠳᠡᠭᠦᠦ ᠭᠣᠮᠣᠳᠠᠭᠠᠵᠤ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠤᠤ ᠭᠡᠮᠡᠨ ᠭᠦᠶᠦᠭ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠬᠠᠲᠤᠨ ᠡᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠬᠤᠷᠠᠭᠰᠠᠨ ᠪᠠᠢᠯᠠ᠃
ᠡᠬᠡ ᠶᠢᠨ ᠨᠢᠳᠦᠨ ᠳ᠋ᠦ᠍ ᠪᠠᠢᠬᠤ ᠨᠢᠯᠪᠤᠰᠤ ᠶ᠋ᠢ ᠬᠥᠶᠦᠭ ᠪᠠᠷᠤᠭ ᠬᠠᠷᠠᠭᠠ ᠦᠭᠡᠢ ᠶᠦᠮ᠃ ᠬᠠᠷᠢᠨ ᠡᠨᠡ ᠤᠳᠠᠭᠠ ᠲᠡᠷᠡ ᠡᠬᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠳᠥᠭᠥᠷᠦᠨ ᠢᠷᠡᠭᠰᠡᠨ ᠨᠢᠯᠪᠤᠰᠤ ᠶ᠋ᠢ ᠠᠩᠬᠠ ᠬᠠᠷᠠᠭᠠᠳ ᠰᠡᠳᠬᠢᠯ ᠳᠣᠲᠣᠷᠠ ᠨᠢ ᠭᠦᠨ ᠬᠦᠨᠳᠦᠭᠦᠷ ᠪᠣᠯᠵᠤ᠂ ᠡᠬᠡ ᠶ᠋ᠢᠨ ᠦᠨᠡᠨ ᠢ᠋ ᠠᠩᠬᠠ ᠤᠳᠠᠭᠠ ᠣᠯᠵᠤ ᠬᠠᠷᠠᠵᠤ ᠪᠠᠢᠭᠠ ᠮᠡᠲᠦ ᠰᠠᠨᠠᠭᠳᠠᠯᠠ᠃ ᠭᠦᠶᠦᠭ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠬᠠᠲᠤᠨ ᠡᠵᠢ ᠮᠢᠨᠢ᠂ ᠪᠢ ᠲᠠᠨ ᠳ᠋ᠤ᠌ ᠢᠲᠡᠭᠡᠵᠦ ᠪᠠᠢᠨᠠ᠃ ᠡᠨᠡ ᠤᠳᠠᠭᠠ ᠳ᠋ᠤ᠌ ᠪᠢ ᠲᠠᠨ ᠠ᠋ᠴᠠ ᠣᠯᠠᠨ ᠬᠡᠷᠡᠭ ᠦ᠋ᠨ ᠤᠴᠢᠷ ᠢ᠋ ᠠᠰᠠᠭᠤᠬᠤ ᠪᠠᠷ ᠣᠷᠣᠵᠤ ᠢᠷᠡᠭᠡᠳ ᠪᠠᠢᠲᠠᠯᠠ ᠡᠢᠮᠦ ᠶᠠᠭᠤᠮᠠ ᠪᠣᠯᠤᠯᠠ ᠭᠡᠮᠡᠨ ᠦᠭᠡ ᠪᠡᠨ ᠬᠥᠢᠴᠡᠭᠡᠯ ᠦᠭᠡᠢ ᠣᠷᠬᠢᠪᠠ᠃
— ᠶᠠᠮᠠᠷ ᠬᠡᠷᠡᠭ ᠪᠠᠢᠳᠠᠭ ᠪᠢᠯᠡ?
— ᠭᠤᠳᠠᠨ ᠢ᠋ ᠨᠠᠭᠠᠰᠢ ᠢᠷᠡᠬᠦ ᠵᠠᠮ ᠳ᠋ᠤᠨᠢ ᠬᠣᠣᠷᠯᠠᠭᠰᠠᠨ ᠪᠣᠯᠤᠯᠲᠠᠢ᠃
— ᠲᠩᠷᠢ ᠮᠢᠨᠢ ᠶᠠᠭᠤ ᠭᠡᠪᠡ ᠠ᠋?
ᠲᠦᠷᠭᠡᠨᠡ ᠬᠠᠲᠤᠨ ᠡᠨᠡ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠳᠠᠷᠤᠢ ᠤᠬᠠᠭᠠᠨ ᠨᠢ ᠪᠠᠯᠠᠷᠳᠠᠬᠤ ᠰᠢᠭ᠋ ᠪᠣᠯᠤᠯᠠ᠃ ᠲᠡᠷᠡ ᠠᠷᠠᠢᠬᠢᠨ ᠠᠮᠠ ᠨᠡᠭᠡᠭᠡᠵᠦ᠂
— ᠪᠢ ᠠᠪᠳᠤᠯ ᠷᠠᠬᠠᠮᠠᠨ ᠢ᠋ᠶ᠋ᠠᠷ ᠵᠠᠬᠢᠶᠠ ᠳᠠᠢᠯᠭᠠᠨ ᠭᠤᠳᠠᠨ ᠤᠷᠤᠭᠤ ᠶᠠᠪᠤᠭᠤᠯᠤᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠲᠡᠷᠡ ᠴᠠᠭᠠᠰᠢ ᠳᠤᠲᠠᠭᠠᠨ ᠶᠠᠪᠤᠭᠰᠠᠨ ᠲᠤᠯᠠ ᠠᠭᠤᠯᠵᠠᠵᠤ ᠴᠢᠳᠠᠯ ᠦᠭᠡᠢ ᠢᠷᠡᠭᠰᠡᠨ ᠪᠤᠰᠤ ᠤᠤ?
— ᠭᠤᠲᠠᠨ ᠬᠠᠲᠤᠨ ᠡᠬᠡ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ ᠠᠪᠤᠭᠠᠳ ᠨᠠᠭᠠᠰᠢ ᠭᠠᠷᠤᠭᠰᠠᠨ ᠪᠣᠯᠬᠤ ᠶ᠋ᠢ ᠠᠯᠪᠠᠲᠤ ᠨᠤᠭᠤᠳ ᠨᠢ ᠪᠠᠲᠤᠯᠠᠵᠤ ᠪᠠᠢᠨᠠ ᠭᠡᠪᠡ᠃ ᠲᠦᠷᠭᠡᠨᠡ ᠶ᠋ᠢᠨ ᠴᠢᠷᠠᠢ ᠬᠤᠪᠠᠬᠠᠢ ᠴᠠᠢᠭᠰᠠᠨ ᠪᠠᠢᠯᠠ᠃
— ᠮᠥᠩᠬᠡ ᠲᠩᠷᠢ ᠮᠢᠨᠢ᠁ ᠮᠢᠨᠦ ᠬᠦᠦ ᠶ᠋ᠢ ᠬᠣᠷᠣᠭᠠᠴᠢᠬᠠᠭᠰᠠᠨ ᠬᠡᠷᠡᠭ ᠤᠤ ᠭᠡᠮᠡᠨ ᠬᠡᠯᠡᠭᠡᠳ ᠴᠤᠷᠬᠢᠷᠠᠯᠠ᠃ ᠡᠩᠭᠡᠷ ᠴᠡᠭᠡᠵᠢ ᠨᠢ ᠤᠷᠠᠭᠳᠠᠨ ᠲᠠᠰᠤᠷᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠡᠨᠡ ᠠᠶᠤᠮᠰᠢᠭᠲᠤ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠲᠦᠷᠭᠡᠨᠡ ᠶ᠋ᠢᠨ ᠤᠬᠠᠭᠠᠨ ᠰᠠᠨᠠᠭᠠ ᠪᠠᠯᠠᠷᠳᠠᠨ ᠪᠠᠢᠬᠤ ᠳ᠋ᠤ᠌ ᠭᠦᠶᠦᠭ ᠦᠷᠭᠦᠯᠵᠢᠯᠡᠭᠦᠯᠦᠨ᠂
— ᠲᠥᠷᠥ ᠶ᠋ᠢᠨ ᠶᠡᠬᠡ ᠬᠥᠮᠦᠨ ᠶᠸᠯᠢᠤᠢ ᠴᠦᠼᠠᠢ ᠶ᠋ᠢ ᠲᠩᠷᠢ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠭᠡᠷ ᠲᠦ᠋ᠨᠢ ᠨᠡᠩᠵᠢᠯᠭᠡ ᠬᠢᠵᠦ ᠡᠷᠡᠭᠦᠳᠡᠨ ᠰᠢᠭᠦᠭᠰᠡᠨ ᠪᠠᠢᠨᠠ᠃ ᠳᠠᠷᠠᠭᠠᠬᠠᠨ ᠬᠠᠲᠤᠨ ᠡᠬᠡ ᠲᠠᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠢᠷᠡᠭᠰᠡᠨ ᠺᠣᠷᠭᠤᠽ ᠨᠣᠶᠠᠨᠲᠠᠨ ᠢ᠋ ᠠᠮᠠ ᠤᠷᠤᠭᠤ ᠨᠢ ᠴᠢᠯᠠᠭᠤ ᠴᠢᠬᠢᠵᠦ ᠠᠯᠠᠭᠰᠠᠨ ᠪᠠᠢᠪᠠ᠃ ᠡᠨᠡ ᠮᠡᠲᠦ ᠤᠴᠢᠷ ᠨᠢ ᠦᠯᠦ ᠣᠯᠳᠠᠬᠤ ᠬᠡᠷᠡᠭ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠣᠢᠷᠠ ᠣᠷᠴᠢᠮ ᠭᠠᠷᠴᠤ ᠪᠠᠢᠭᠰᠠᠨ ᠪᠣᠯ ᠣᠳᠣ ᠪᠦᠷ ᠬᠢᠷᠢ ᠡᠴᠡ ᠬᠡᠲᠦᠷᠡᠵᠦ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠣᠩᠭᠣᠨ ᠰᠢᠲᠦᠭᠡᠨ ᠪᠠᠢᠷᠢᠯᠠᠬᠤ ᠲᠥᠷᠥᠵᠦ ᠥᠰᠦᠭᠰᠡᠨ ᠨᠤᠲᠤᠭ ᠶᠡᠬᠡ ᠠᠭᠤᠷᠠᠭ ᠲᠤᠨᠢ ᠬᠦᠷᠲᠡᠯᠡ ᠭᠠᠷᠤᠯᠠ᠃ ᠮᠥᠩᠬᠡ ᠲᠩᠷᠢ ᠬᠠᠷᠠᠵᠤ ᠪᠠᠢᠭᠠ ᠭᠡᠮᠡᠨ ᠨᠡᠮᠡᠵᠦ ᠬᠡᠯᠡᠯᠡ᠃
ᠳᠦᠷᠭᠡᠨᠡ ᠬᠠᠲᠤᠨ ᠠᠩᠬᠠ ᠤᠳᠠᠭᠠ ᠪᠠᠨ ᠡᠢᠮᠦ ᠠᠷᠠᠴᠢᠭᠠ ᠦᠭᠡᠢ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠵᠤ ᠪᠠᠢᠭᠠ ᠪᠣᠯᠪᠠ ᠤᠤ ᠭᠡᠮᠡᠷ ᠬᠥᠶᠦᠭ ᠦ᠋ᠨ ᠥᠭᠡᠳᠡ ᠡᠴᠡ ᠭᠠᠰᠠᠯᠠᠩᠲᠤ ᠨᠢᠳᠦ ᠪᠡᠷ ᠬᠠᠷᠠᠵᠤ ᠰᠠᠭᠤᠯᠠ᠃ ᠶᠡᠬᠡᠮᠰᠦᠭ ᠪᠠᠷᠳᠠᠮ ᠬᠠᠲᠤᠨ ᠡᠬᠡ ᠶ᠋ᠢᠨ ᠳᠦᠷᠢ ᠲᠥᠷᠬᠦ ᠡᠨᠡ ᠦᠶᠡ ᠳ᠋ᠦ᠍ ᠠᠯᠠᠭᠠ ᠪᠣᠯᠤᠭᠰᠠᠨ ᠰᠢᠭ᠋ ᠬᠠᠷᠠᠭᠳᠠᠨᠠ᠃ ᠳᠦᠷᠭᠡᠨᠡ ᠴᠠᠭᠠᠰᠢ ᠶᠠᠭᠤ ᠴᠤ ᠬᠡᠯᠡᠭᠰᠡᠨ ᠦᠭᠡᠢ《ᠡᠨᠡᠯᠦᠨ ᠭᠠᠰᠢᠭᠤᠳᠠᠬᠤ ᠠ᠋ᠴᠠ ᠡᠮᠦᠨᠡ ᠪᠣᠳᠣᠵᠤ ᠲᠤᠩᠭᠠᠬᠤ ᠨᠢ ᠵᠥᠪ》 ᠭᠡᠰᠡᠨ ᠪᠣᠳᠣᠯ ᠲᠡᠭᠦᠨ ᠳ᠋ᠦ᠍ ᠲᠥᠷᠥᠵᠡᠢ᠃ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠨᠠᠮ ᠭᠦᠮ ᠨᠣᠶᠠᠷᠬᠠᠵᠤ᠂ ᠡᠬᠡ ᠦᠷᠡ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠨ ᠰᠠᠭᠤᠨᠠ᠃ ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ᠋ ᠳᠠᠷᠠᠭᠠ ᠳᠦᠷᠭᠡᠨᠡ ᠬᠠᠲᠤᠨ ᠰᠠᠶᠢ ᠠᠮᠠ ᠨᠡᠭᠡᠭᠡᠯᠡ᠃
— ᠬᠠᠭᠠᠨ ᠣᠷᠣ ᠰᠠᠭᠤᠬᠤ ᠳᠠᠷᠠᠭᠠ ᠶ᠋ᠢᠨ ᠬᠥᠮᠦᠨ ᠢ᠋ ᠰᠣᠩᠭᠣᠬᠤ ᠴᠠᠭ ᠨᠢ ᠪᠣᠯᠵᠠᠢ᠃ ᠪᠢ ᠬᠦᠦ ᠴᠢᠮᠠᠶ᠋ᠢ ᠪᠠᠨ ᠤᠬᠠᠭᠠᠨ ᠰᠠᠭᠤᠵᠤ᠂ ᠲᠥᠷᠥ ᠤᠯᠤᠰ ᠢ᠋ ᠤᠳᠤᠷᠢᠳᠤᠨ ᠠᠪᠴᠤ ᠶᠠᠪᠤᠬᠤ ᠲᠡᠩᠬᠡᠭᠡ ᠲᠡᠢ ᠪᠣᠯᠬᠤ ᠬᠦᠷᠲᠡᠯᠡ ᠡᠨᠡ ᠰᠠᠭᠤᠳᠠᠯ ᠢ᠋ ᠬᠠᠮᠠᠭᠠᠯᠠᠵᠤ ᠪᠠᠢᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠢᠯᠡ᠃ ᠬᠡᠨ ᠢ᠋ ᠳᠠᠭᠠᠬᠤ᠂ ᠬᠡᠨ ᠢ᠋ ᠳᠠᠭᠠᠬᠤ ᠦᠭᠡᠢ ᠪᠠᠢᠬᠤ ᠪᠠᠨ ᠮᠡᠳᠡᠭᠰᠡᠨ ᠦᠭᠡᠢ ᠨᠢ ᠮᠢᠨᠦ ᠠᠯᠳᠠᠭᠠ ᠪᠣᠯᠵᠠᠢ᠃ ᠴᠢ ᠡᠬᠡ ᠶ᠋ᠢᠨ ᠠᠯᠳᠠᠭᠠᠨ ᠠ᠋ᠴᠠ ᠬᠠᠩᠭᠠᠯᠲᠠ ᠲᠠᠢ ᠰᠤᠷᠤᠭᠰᠠᠨ ᠪᠢᠵᠡ ᠠ᠋ ᠭᠡᠵᠦ ᠬᠡᠯᠡᠯᠡ᠃
ᠡᠨᠡ ᠪᠣᠯ ᠳᠦᠷᠭᠡᠨᠡ ᠬᠠᠲᠤᠨ ᠭᠦᠶᠦᠭ ᠢ᠋ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠨ ᠪᠣᠢ ᠬᠡᠷᠡᠭ ᠶᠦᠮ᠃ ᠬᠤᠪᠢ ᠵᠠᠶᠠᠭᠠ ᠶᠠᠭᠠᠬᠢᠭᠰᠠᠨ ᠡᠭᠡᠳᠡᠷᠡᠭᠡᠨ ᠲᠡᠢ ᠪᠣᠢ᠃ ᠲᠡᠷᠡ ᠨᠢᠭᠡᠨ ᠰᠥᠨᠢ ᠬᠠᠲᠤᠨ ᠡᠬᠡ ᠡᠴᠡ ᠪᠡᠨ《ᠴᠢ ᠬᠠᠭᠠᠨ ᠪᠣᠯᠬᠤ ᠬᠤᠪᠢ ᠦᠭᠡᠢ》 ᠭᠡᠰᠡᠨ ᠦᠭᠡ ᠳᠤᠭᠤᠯᠤᠭᠠᠳ ᠤᠨᠠᠲᠠᠯᠠ ᠤᠤᠭᠤᠵᠤ ᠰᠣᠭᠲᠣᠨ᠂ ᠮᠥᠩᠬᠡ ᠶ᠋ᠢᠨ ᠭᠡᠷ ᠲᠦ᠍ ᠣᠴᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠯᠠ᠃ ᠬᠠᠷᠢᠨ ᠡᠨᠡ ᠤᠳᠠᠭᠠ᠂ ᠵᠥᠪᠬᠡᠨ ᠡᠨᠡ ᠤᠳᠠᠭᠠ ᠯᠠ《ᠪᠢ ᠡᠬᠡ ᠲᠡᠢ ᠬᠥᠮᠦᠨ ᠶᠤᠮ》 ᠭᠡᠰᠡᠨ ᠪᠣᠳᠣᠯ ᠲᠦᠷᠦᠬᠦᠢ ᠳ᠋ᠦ᠍ ᠬᠥᠶᠦᠭ ᠦ᠋ᠨ ᠵᠢᠷᠦᠬᠡ ᠡᠮᠦᠨᠡ ᠨᠢ ᠮᠡᠳᠡᠷᠡᠵᠦ ᠪᠠᠢᠭᠠ ᠦᠭᠡᠢ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠢ᠋ ᠮᠡᠳᠡᠷᠡᠬᠦ ᠰᠢᠭ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠡᠭᠦᠳᠡᠯ ᠂ ᠭᠡᠷᠡᠯ ᠳᠡᠭᠦᠦᠵᠠᠶᠠᠭᠠ᠂ ᠵᠢᠩᠯᠢᠬᠤᠸᠠᠷ ᠂ ᠨᠠᠷᠠᠨ᠂ ᠪᠠᠶᠠᠨᠴᠡᠴᠡᠭ᠂ ᠨᠠᠷᠠᠨᠲᠤᠶᠠᠭᠠ᠂ ᠤᠷᠠᠨᠴᠢᠮᠡᠭ ᠂ ᠱᠠᠭᠰᠠᠯ᠂ ᠪᠤᠯᠠᠭᠬᠦᠥ ᠂ ᠰᠡᠴᠡᠨᠴᠢᠮᠡᠭ᠂ ᠬᠡᠷᠡᠢᠳ ᠨᠠᠷᠠᠰᠤ ᠂ ᠬᠡᠯᠡᠰᠤᠶᠤᠯ ᠂ ᠫᠠ᠊· ᠴᠢᠯᠠᠭᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ ᠂ ᠱᠠᠭᠰᠠᠯ᠂ ᠰᠡᠬᠡᠭᠡᠷᠡᠯ᠂ ᠭᠠᠷᠮᠠ᠂ ᠨᠠᠷᠠᠨ᠂ ᠤᠷᠠᠨᠴᠢᠮᠡᠭ᠂ ᠭᠡᠷᠡᠯ ᠨᠡᠭᠦᠳᠡᠯ᠂ ᠨᠠᠷᠠᠨ᠂ ᠂ ᠰᠡᠴᠡᠨᠴᠢᠮᠡᠭ