ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠲᠠᠪᠤ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бөлөг <5>
307ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠲᠠᠪᠤ>
ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠬᠠᠳᠠ ᠲᠠᠢ ᠡᠩᠭᠡᠷ ᠦ᠋ᠨ ᠪᠠᠷᠠᠭᠤᠨ ᠵᠢᠯᠠᠭᠠ ᠶ᠋ᠢ ᠥᠭᠡᠳᠡᠯᠡᠵᠦ ᠡᠯᠢᠶᠡ ᠰᠢᠪᠠᠭᠤ ᠡᠷᠭᠢᠭᠰᠡᠨ ᠵᠦᠭ ᠢ᠋ ᠵᠣᠷᠢᠵᠤ ᠮᠠᠴᠤᠪᠠ᠃
ᠡᠯᠢᠶᠡ ᠡᠷᠭᠢᠵᠦ᠂ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠴᠤᠭᠯᠠᠭᠰᠠᠨ ᠭᠠᠵᠠᠷ ᠤᠯᠠᠢ ᠭᠠᠷᠤᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠡᠳᠦᠢ ᠬᠠᠷᠠ ᠬᠡᠷᠢᠶᠡ ᠶ᠋ᠢ ᠠᠳᠠ ᠶ᠋ᠢᠨ ᠮᠠᠭᠤ ᠰᠢᠪᠠᠭᠤ᠂ ᠮᠠᠭᠤ ᠢᠷᠣᠠ ᠭᠡᠵᠦ ᠬᠥᠮᠦᠰ ᠬᠡᠯᠡᠳᠡᠭ ᠪᠣᠯᠪᠠᠴᠤ ᠲᠡᠷᠡ ᠥᠯᠥᠰᠬᠦᠯᠡᠩ ᠦ᠋ᠨ ᠡᠷᠬᠡ ᠪᠡᠷ ᠥᠨᠥᠳᠥᠷ ᠵᠠᠪᠠᠯ ᠲᠡᠨᠳᠡ ᠣᠴᠢᠳᠠᠭ ᠠᠯᠪᠠ ᠲᠠᠢ ᠪᠣᠯᠪᠠ᠃
ᠨᠠᠯᠠᠤᠬᠠᠨ ᠰᠢᠷᠢᠩᠭᠢ ᠲᠡᠢ ᠡᠩᠭᠡᠷ ᠲᠦ᠍ ᠭᠤᠷᠠ ᠦᠬᠦᠭᠰᠡᠨ ᠪᠠᠢᠪᠠ᠃ ᠭᠤᠷᠠ ᠶ᠋ᠢᠨ ᠵᠣᠪᠠᠯᠭᠠ ᠳᠡᠭᠡᠷᠡ ᠣᠯᠠᠨ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠴᠤᠭᠯᠠᠵᠤ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠴᠥᠮᠥᠵᠦ ᠤᠷᠠᠵᠤ ᠲᠠᠰᠤᠳᠠᠮᠠᠷ ᠪᠤᠵᠢᠭᠢᠨᠠᠨᠠ᠃ ᠬᠥᠮᠦᠨ ᠦ᠌ ᠪᠠᠷᠠ ᠪᠠᠷ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠨᠤᠭᠤᠳ ᠦᠷᠭᠦᠨ ᠨᠢᠰᠴᠦ ᠣᠢᠷᠠ ᠬᠠᠪᠢ ᠶ᠋ᠢᠨ ᠮᠣᠳᠣᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠪᠠᠷᠠ ᠬᠠᠷᠠᠨᠠ᠃
ᠬᠡᠷᠢᠶᠡ ᠲᠣᠩᠰᠢᠭᠰᠠᠨ ᠭᠤᠷᠠ ᠶ᠋ᠢᠨ ᠬᠣᠶᠠᠷ ᠨᠢᠳᠦᠨ ᠦ᠌ ᠤᠬᠤᠷᠬᠠᠢ ᠨᠢ ᠬᠣᠩᠬᠣᠢᠵᠤ᠂ ᠮᠢᠬᠠᠴᠢᠨ ᠰᠢᠪᠠᠭᠤᠳ ᠨᠢᠮᠭᠡᠨ ᠴᠠᠪᠢ ᠶ᠋ᠢ ᠨᠢ ᠰᠠᠨᠳᠠᠯᠠᠵᠤ ᠤᠷᠠᠭᠰᠠᠨ ᠠ᠋ᠴᠠ ᠤᠯᠠᠢ ᠠᠰᠬᠠᠭᠰᠠᠨ ᠲᠡᠳᠦᠢ ᠦᠭᠡᠢ ᠭᠡᠳᠡᠰᠦ ᠳᠣᠲᠣᠷ ᠨᠢ ᠭᠣᠭᠣᠵᠢᠵᠤ ᠰᠡᠪᠡᠰᠦ ᠪᠠᠭᠠᠰᠤ ᠨᠢ ᠬᠠᠳᠬᠤᠵᠠᠢ᠃
ᠭᠣᠩᠴᠣᠭᠷᠠᠬᠤᠠ ᠭᠤᠷᠠ ᠶ᠋ᠢᠨ ᠡᠪᠴᠢᠭᠦᠦ ᠶ᠋ᠢ ᠢᠷᠡᠵᠦ ᠨᠢᠮᠭᠡᠨ ᠵᠠᠯᠪᠠᠢ ᠶ᠋ᠢ ᠨᠢ ᠴᠣᠭᠣᠯᠤᠨ ᠳᠣᠲᠣᠷᠠ ᠴᠣᠷᠣᠢ ᠶ᠋ᠢ ᠨᠢ ᠬᠣᠨᠢ ᠵᠠᠰᠠᠳᠠᠭ ᠢ᠋ᠶ᠋ᠠᠨ ᠰᠢᠭ᠋ ᠡᠪᠲᠡᠢ ᠰᠠᠢᠬᠠᠨ ᠣᠭᠲᠣᠯᠵᠤ ᠨᠢᠭᠡ ᠲᠡᠢᠰᠢ ᠨᠢ ᠭᠠᠷᠭᠠᠪᠠ᠃ ᠥᠯᠥᠰᠬᠦ ᠳ᠋ᠡᠭᠡᠨ ᠭᠦᠵᠡᠭᠡᠨ ᠦ᠌ ᠬᠢᠨᠢ ᠰᠡᠪᠡᠰᠦ ᠲᠡᠢ ᠥᠩᠭᠥᠷ ᠢ᠋ ᠬᠠᠭᠤᠯᠵᠤ ᠬᠠᠶᠠᠴᠢᠬᠠᠭᠠᠳ ᠳᠣᠲᠣᠷᠠ ᠲᠣᠷᠭᠠᠨ ᠬᠠᠯᠢᠰᠤ ᠶ᠋ᠢ ᠤᠷᠠᠵᠤ ᠲᠦᠭᠦᠬᠡᠢ ᠪᠡᠷ ᠨᠢ ᠢᠳᠡᠪᠡ᠃ ᠡᠯᠢᠭᠡᠨ ᠡᠴᠡ ᠨᠢ ᠪᠠᠰᠠ ᠨᠢᠭᠡ ᠡᠮᠬᠦ ᠢᠳᠡᠭᠰᠡᠨ ᠳ᠋ᠦ᠍ ᠥᠯᠪᠡᠷᠦᠭᠡᠳ ᠳᠣᠲᠣᠷᠠ ᠨᠢ ᠬᠠᠷᠠᠯᠠᠵᠤ ᠪᠠᠢᠭᠰᠠᠨ ᠨᠢ ᠠᠷᠠᠢ ᠬᠢᠵᠦ ᠨᠠᠮᠳᠠᠪᠠ᠃
ᠮᠣᠳᠣᠨ ᠤ᠋ ᠮᠥᠴᠢᠷ ᠢ᠋ ᠨᠠᠮᠢᠯᠵᠠᠲᠠᠯᠠ ᠰᠠᠭᠤᠭᠰᠠᠨ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠵᠠᠳᠠᠭᠠᠢ ᠤᠯᠠᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠭᠤᠸᠠᠳ ᠭᠤᠸᠠᠳ᠂ ᠱᠠᠭ ᠱᠠᠭ ᠭᠡᠵᠦ ᠬᠣᠭᠣᠷᠣᠨᠳᠣ ᠪᠠᠨ᠂ ᠬᠡᠷᠡᠯᠳᠦᠵᠦ ᠪᠠᠢᠬᠤ ᠮᠡᠲᠦ ᠤᠯᠠᠮ ᠴᠦ᠍ ᠬᠡᠴᠡᠭᠦᠦ ᠪᠤᠵᠢᠭᠢᠨᠠᠪᠠ᠃《ᠭᠣᠩᠴᠣᠭᠷᠠᠬᠤᠠ ᠠ᠋᠂ ᠴᠢ ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠬᠠᠷᠠᠮᠴᠢ ᠪᠣᠢ? ᠭᠣᠯᠣᠳᠠᠭ ᠢ᠋ᠶ᠋ᠠᠨ ᠨᠠᠭᠠᠰᠢ ᠪᠠᠨ ᠬᠠᠶᠠ᠂ ᠪᠢᠳᠡ ᠪᠠᠰᠠ ᠬᠤᠪᠢᠶᠠᠯᠴᠠᠶᠠ ᠪᠠᠢᠵᠠ!》 ᠭᠡᠬᠦ ᠰᠢᠭ ᠮᠣᠳᠣᠨ ᠤ᠋ ᠱᠠᠭᠠᠵᠠᠭᠠᠢ ᠨᠤᠭᠤᠳ ᠱᠠᠭ ᠱᠠᠭ ᠬᠢᠨ ᠳᠡᠭᠡᠭᠦᠷ ᠳᠣᠣᠭᠤᠷ ᠨᠢ ᠵᠥᠷᠢᠯᠳᠦᠨ ᠨᠢᠰᠦᠨᠡ᠃ ᠮᠣᠳᠣᠨ ᠤ᠋ ᠥᠨᠳᠥᠷ ᠲᠦ᠍ ᠬᠡᠷᠰᠡᠦᠬᠡᠨ ᠠᠪᠤᠷᠢ ᠲᠠᠢ ᠪᠠᠷᠠ ᠬᠠᠷᠠᠭᠰᠠᠨ ᠬᠠᠷᠠ ᠬᠡᠷᠢᠶᠡ ᠬᠠᠶᠠ ᠨᠢᠭᠡ ᠭᠤᠸᠠᠳ ᠭᠤᠸᠠᠳ ᠭᠡᠬᠦ ᠨᠢ《ᠴᠢ ᠬᠠᠮᠢᠭᠠᠬᠢ ᠭᠤᠢᠷᠠᠨᠴᠢ ᠪᠣᠢ? ᠮᠠᠨ ᠤ᠋ ᠠᠭᠤᠯᠠ ᠶ᠋ᠢᠨ ᠬᠡᠰᠢᠭ ᠲᠦ᠍ ᠬᠣᠰᠢᠭᠤ ᠲᠥᠷᠥᠭᠡᠳ ᠭᠠᠭᠴᠠᠭᠠᠷ ᠡᠵᠡᠷᠬᠡᠳᠡᠭ ᠨᠢ ᠶᠠᠭᠤ ᠪᠣᠢ⁈》 ᠭᠡᠵᠦ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠭᠠᠳᠠᠨᠠᠰᠢᠶᠠᠭᠰᠠᠨ ᠰᠢᠭ᠋ ᠵᠦᠬᠡᠨᠡ᠃
ᠨᠢᠭᠡ ᠬᠠᠷᠠᠪᠠᠯ ᠵᠡᠭᠦᠨ ᠪᠠᠷᠠᠭᠤᠨ ᠬᠠᠵᠠᠭᠤ ᠶ᠋ᠢᠨ ᠡᠩᠭᠡᠷ ᠲᠦ᠍ ᠬᠣᠰᠢᠶᠠᠳ ᠴᠢᠨᠣᠠ ᠥᠪᠡᠷ ᠤᠷᠤᠭᠤ ᠨᠢ ᠥᠩᠭᠡᠯᠵᠡᠵᠦ ᠪᠠᠢᠪᠠ᠃ ᠭᠤᠷᠠ ᠶ᠋ᠢᠨ ᠦᠬᠦᠭᠰᠡᠨ ᠵᠣᠪᠠᠯᠭᠠ ᠳ᠋ᠤ᠌ ᠰᠠᠨᠠᠭᠠᠷᠬᠠᠵᠤ ᠪᠠᠢᠨᠠ ᠤᠤ᠂ ᠭᠣᠩᠴᠣᠭᠷᠠᠬᠤᠠ ᠮᠢᠨᠦ ᠠᠮᠢᠳᠤ ᠵᠣᠪᠠᠯᠭᠠ ᠳ᠋ᠤ᠌ ᠭᠣᠷᠢᠳᠠᠵᠤ ᠪᠠᠢᠨᠠ ᠤᠤ ᠭᠡᠰᠡᠨ ᠪᠣᠳᠣᠯ ᠣᠷᠣᠵᠤ ᠴᠢᠨᠣᠠ ᠠ᠋ᠴᠠ ᠰᠢᠷᠬᠡᠢᠬᠦ ᠳ᠋ᠡᠭᠡᠨ ᠬᠤᠢᠬᠠ ᠨᠢ ᠠᠷᠵᠠᠢᠬᠤ ᠰᠢᠭ᠋ ᠪᠣᠯᠪᠠ᠃
ᠭᠣᠩᠴᠣᠭᠷᠠᠬᠤᠠ ᠴᠢᠨᠣᠠ᠂ ᠬᠡᠷᠢᠶᠡ᠂ ᠱᠠᠭᠠᠵᠠᠭᠠᠢ ᠶ᠋ᠢ ᠬᠠᠷᠠᠭᠠᠳ《ᠪᠢ ᠴᠢᠨᠢ ᠦᠨᠡᠬᠡᠷ ᠬᠥᠮᠦᠨ ᠦ᠌ ᠪᠡᠯᠡᠳᠦᠭᠰᠡᠨ ᠪᠡᠯᠡᠨ ᠬᠣᠭᠣᠯᠠᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠰᠢᠭ᠋ ᠪᠣᠯᠴᠢᠬᠠᠯᠠ! ᠵᠠ᠂ ᠪᠠᠢᠵᠠ! ᠪᠤᠷᠬᠠᠨ ᠲᠩᠷᠢ ᠮᠢᠨᠢ!》 ᠭᠡᠳ ᠭᠤᠷᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠴᠣᠷᠣᠢ ᠶ᠋ᠢᠨ ᠮᠢᠬᠠᠨ ᠠ᠋ᠴᠠ ᠳᠥᠷᠪᠡᠨ ᠬᠡᠰᠡᠭ ᠣᠭᠲᠣᠯᠵᠤ ᠳᠥᠷᠪᠡᠨ ᠵᠦᠭ ᠦ᠋ᠨ ᠨᠠᠪᠳᠠᠭ ᠰᠠᠪᠳᠠᠭ ᠲᠤ ᠡᠷᠭᠦᠵᠦ《ᠬᠤᠷᠤᠢ ᠬᠤᠷᠤᠢ! ᠤᠸᠮ ᠠ ᠬᠣᠩ!》 ᠭᠡᠵᠦ ᠡᠷᠭᠦᠴᠡ ᠥᠭᠪᠡ᠃ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡ ᠬᠡᠰᠡᠭ ᠡᠷᠭᠦᠭᠰᠡᠨ ᠮᠢᠬᠠ ᠶ᠋ᠢ ᠬᠥᠰᠡᠷ ᠤᠨᠠᠬᠤ ᠠ᠋ᠴᠠ ᠡᠮᠦᠨᠡ ᠥᠨᠳᠥᠷ ᠮᠣᠳᠣᠨ ᠳᠡᠭᠡᠷᠡ ᠡᠴᠡ ᠪᠠᠷᠠ ᠬᠠᠷᠠᠵᠤ ᠪᠠᠢᠭᠰᠠᠨ ᠬᠠᠷᠠ ᠬᠡᠷᠢᠶᠡ ᠱᠤᠩᠭᠤᠨ ᠨᠢᠰᠴᠦ ᠰᠢᠭᠦᠷᠡᠨ ᠥᠨᠳᠥᠷ ᠲᠦ᠍ ᠬᠠᠯᠢᠪᠠ᠃
ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠬᠠᠷᠠ ᠬᠡᠷᠢᠶᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠠᠷᠠᠭᠠᠳ ᠭᠠᠢᠬᠠᠵᠤ᠄
— ᠠ᠂ ᠪᠠᠰᠠ ᠬᠡᠴᠡᠭᠦᠦ ᠶᠦᠮ ᠠ᠋! ᠭᠠᠵᠠᠷ ᠳᠤᠰᠤᠭᠠᠬᠤ ᠦᠭᠡᠢ ᠴᠡᠪᠡᠷᠬᠡᠨ ᠰᠢᠭᠦᠷᠡᠳᠡᠭ ᠠᠢᠬᠤᠪᠲᠤᠷ ᠵᠣᠯᠢᠭ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠨᠡ ᠬᠡᠳᠦᠨ ᠴᠢᠨᠣᠠ ᠳ᠋ᠤ᠌《ᠡᠨᠳᠡ ᠰᠡᠭ ᠤᠯᠠᠢ ᠭᠠᠷᠴᠠᠢ》 ᠭᠡᠵᠦ ᠠᠩᠬᠠ ᠮᠡᠳᠡᠭᠡᠯᠡᠭᠰᠡᠨ ᠨᠢ ᠮᠥᠨ ᠴᠢ ᠯᠡ ᠪᠠᠢᠬᠤ ᠠ᠋! ᠴᠠᠪᠠᠰᠤ ᠭᠡᠵᠦ ᠮᠠᠭᠤ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠ ᠬᠡᠷᠢᠶᠡ ᠳ᠋ᠦ᠍ ᠴᠢᠭᠯᠡᠭᠦᠯᠦᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠦᠯᠦ ᠰᠣᠨᠣᠰᠳᠠᠮᠠ ᠨᠢᠭᠡ ᠶᠠᠭᠤᠮᠠ ᠳᠦᠳᠦᠨᠡᠭᠡᠳ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠡᠩᠭᠡᠷ ᠲᠦ᠍ ᠱᠣᠩᠨᠣᠢᠭᠰᠠᠨ ᠴᠢᠨᠣᠠ ᠶ᠋ᠢ ᠡᠭᠡᠯᠵᠢᠯᠡᠨ ᠬᠠᠷᠠᠬᠤ ᠳ᠋ᠤ᠌ ᠥᠪᠡᠷ ᠲᠦ᠋ᠨᠢ ᠬᠣᠣᠷ ᠬᠦᠷᠭᠡᠮᠡᠷ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ᠃ ᠶᠡᠷᠦ ᠨᠢ ᠲᠡᠷᠡ ᠨᠣᠶᠠᠨ ᠰᠠᠩ ᠤ᠋ᠨ ᠠᠳᠤᠭᠤ ᠮᠠᠨᠠᠵᠤ ᠬᠣᠨᠣᠬᠤ ᠳ᠋ᠠᠭᠠᠨ ᠬᠣᠯᠠ ᠠ᠋ᠴᠠ ᠴᠢᠨᠣᠠ ᠣᠯᠢᠬᠤ ᠳᠠᠭᠤᠨ ᠢ᠋ ᠰᠣᠨᠣᠰᠤᠭᠰᠠᠨ ᠠ᠋ᠴᠠ ᠪᠢᠰᠢ ᠠᠳᠤᠭᠤᠨ ᠳ᠋ᠠᠭᠠᠨ ᠴᠢᠨᠣᠠ ᠬᠠᠪᠢᠳᠠᠭᠤᠯᠵᠤ ᠦᠵᠡᠭᠡ ᠦᠭᠡᠢ᠃ ᠴᠢᠨᠣᠠ ᠨᠤᠭᠤᠳ ᠴᠦ᠍ ᠲᠡᠭᠦᠨ ᠦ᠌ ᠠᠳᠤᠭᠤᠨ ᠠ᠋ᠴᠠ ᠶᠡᠷᠦ ᠬᠣᠷᠣᠭᠠᠭᠰᠠᠨ ᠦᠭᠡᠢ᠃ ᠢᠩᠭᠢᠬᠦᠯᠡᠷ ᠳᠥᠷᠪᠡᠨ ᠬᠥᠯ ᠲᠡᠢ ᠬᠡᠭᠡᠷᠡ ᠶ᠋ᠢᠨ ᠴᠢᠨᠣᠠ ᠠ᠋ᠴᠠ ᠲᠡᠷᠡ ᠠᠶᠤᠵᠤ ᠦᠵᠡᠭᠡ ᠦᠭᠡᠢ ᠬᠠᠷᠢᠨ ᠬᠣᠶᠠᠷ ᠬᠥᠯ ᠲᠡᠢ《ᠴᠢᠨᠣᠠ》 ᠠ᠋ᠴᠠ ᠯᠠ ᠠᠶᠤᠵᠤ ᠰᠡᠷᠭᠡᠢᠯᠡᠵᠦ ᠶᠠᠪᠤᠭᠰᠠᠨ ᠰᠠᠨ᠃ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠳᠡᠭᠲᠡᠷ ᠳᠣᠣᠷᠠ ᠬᠠᠶᠠᠭᠠ ᠰᠠᠬᠢᠭᠰᠠᠨ《ᠴᠢᠨᠣᠠ》 ᠨᠤᠭᠤᠳ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠶᠡᠬᠡ ᠨᠡᠭᠦᠳᠡᠯ ᠦ᠋ᠨ ᠮᠣᠩᠭᠣᠯ ᠤ᠋ᠨ ᠰᠦᠷ - ᠲᠩᠷᠢ ᠶ᠋ᠢᠨ ᠨᠣᠬᠠᠢ ᠰᠢᠭ᠋ ᠡᠭᠡᠯᠢᠲᠡᠢ ᠬᠠᠷᠠᠭᠳᠠᠭᠰᠠᠨ ᠢ᠋ ᠶᠠᠭᠠᠬᠢᠶᠠ ᠳᠠ⁈ ᠢᠩᠭᠢᠵᠦ ᠪᠣᠳᠣᠬᠤ ᠲᠣᠰᠤᠮ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠣᠶᠤᠨ ᠤ᠋ ᠵᠣᠯᠢ ᠵᠣᠯᠪᠣᠭᠠ ᠳ᠋ᠠᠭᠠᠨ ᠡᠷᠡᠮᠰᠢᠨ ᠵᠣᠷᠢᠭ ᠣᠷᠣᠵᠤ《ᠴᠢᠨᠣᠠ ᠮᠣᠩᠭᠣᠯ ᠨᠤᠲᠤᠭ᠂ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠬᠠᠮᠠᠭᠠᠯᠠᠳᠠᠭ ᠠ᠋ᠴᠠ ᠪᠢᠰᠢ ᠬᠥᠨᠥᠭᠡᠳᠡᠭ ᠦᠭᠡᠢ》 ᠭᠡᠵᠦ ᠠᠩᠬᠠ ᠴᠢᠨᠣᠠ ᠶ᠋ᠢ ᠬᠠᠷᠠᠩᠭᠠᠨ ᠰᠢᠷᠬᠡᠢᠭᠰᠡᠨ ᠠᠢᠩᠭᠤᠷᠢ ᠪᠠᠨ ᠣᠷᠣ ᠲᠠᠰᠤ ᠦᠯᠳᠡᠪᠡ᠃
ᠭᠤᠷᠠ ᠶ᠋ᠢᠨ ᠳᠣᠲᠣᠷ ᠲᠠᠪᠤᠨ ᠴᠤᠯᠤ ᠶ᠋ᠢ ᠠᠪᠴᠤ ᠨᠢᠭᠡ ᠲᠡᠢᠰᠢ ᠨᠢ ᠵᠠᠢᠯᠠᠭᠤᠯᠵᠤ ᠬᠠᠶᠠᠭᠰᠠᠨ ᠳ᠋ᠤ᠌ ᠥᠭᠶᠥᠭᠡ ᠰᠠᠬᠢᠭᠰᠠᠨ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠳ᠋ᠤ᠌ ᠨᠢᠭᠡ ᠴᠠᠭ ᠤ᠋ᠨ ᠠᠮᠲᠠᠲᠤ ᠬᠣᠭᠣᠯᠠ ᠪᠣᠯᠵᠠᠢ᠃
ᠲᠡᠷᠡ ᠭᠤᠷᠠ ᠶ᠋ᠢ ᠡᠪᠲᠡᠢᠬᠡᠨ ᠭᠠᠵᠠᠷ ᠰᠢᠯᠵᠢᠭᠦᠯᠦᠨ ᠥᠪᠴᠢᠵᠦ ᠮᠢᠬᠠ ᠶ᠋ᠢ ᠨᠢ ᠪᠣᠷᠴᠠᠯᠠᠨ ᠡᠪᠡᠷᠡᠭᠡᠵᠦ ᠠᠪᠬᠤ ᠶᠤᠮᠰᠠᠨ ᠭᠡᠳ ᠡᠷᠭᠦᠬᠦ ᠳ᠋ᠦ᠍ ᠮᠠᠰᠢ ᠬᠦᠨᠳᠦ ᠰᠠᠨᠠᠭᠳᠠᠨ ᠨᠢᠭᠡ ᠶᠠᠭᠤᠮᠠᠨ ᠳ᠋ᠤ᠌ ᠲᠣᠷᠤᠭᠠᠳ ᠰᠠᠯᠳᠠᠭ ᠶᠠᠭᠤᠮᠠ ᠪᠢᠰᠢ᠃ ᠠᠷᠵᠠᠢᠭᠰᠠᠨ ᠲᠠᠪᠤᠨ ᠰᠠᠯᠠᠭᠠ ᠲᠠᠢ ᠡᠪᠡᠷ ᠨᠢ ᠣᠷᠢᠶᠠᠩᠭᠤ ᠰᠢᠷᠢᠩᠭᠢ ᠳ᠋ᠦ᠍ ᠲᠡᠭᠡᠭᠯᠡᠵᠦ ᠪᠠᠢᠯᠭᠦᠢ ᠭᠡᠳ ᠬᠦᠵᠦᠭᠦᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠣᠷᠣᠯᠳᠣᠬᠤ ᠳ᠋ᠤ᠌ ᠲᠡᠷᠡ ᠭᠤᠷᠠ ᠶ᠋ᠢᠨ ᠪᠠᠭᠠᠯᠵᠠᠭᠤᠷ ᠲᠤ ᠨᠠᠷᠢᠬᠠᠨ ᠲᠠᠮᠤᠭᠰᠠᠨ ᠰᠤᠷ ᠳᠡᠭᠡᠰᠦ ᠰᠢᠭᠢᠳᠴᠦ ᠪᠣᠭᠣᠮᠢᠯᠠᠭᠰᠠᠨ ᠪᠠᠢᠵᠠᠢ᠃
— ᠡᠨᠳᠡ ᠭᠦᠷᠦᠭᠡᠴᠢ ᠤᠷᠠᠬᠠ ᠲᠠᠯᠪᠢᠭᠰᠠᠨ ᠶᠤᠮ ᠪᠠᠢᠨᠠ᠃ ᠵᠢᠭᠲᠡᠢ ᠶᠦᠮ ᠠ᠋᠂ ᠡᠨᠡ ᠪᠣᠢᠳᠠ ᠭᠠᠵᠠᠷ ᠪᠠᠰᠠ ᠬᠦᠷᠦᠭᠡ ᠬᠢᠳᠡᠭ ᠬᠥᠮᠦᠨ ᠢᠷᠡᠳᠡᠭ ᠪᠠᠢᠵᠢ ᠳᠠ! ᠭᠡᠳ ᠭᠤᠷᠠ ᠶ᠋ᠢᠨ ᠬᠦᠵᠦᠭᠦᠦ ᠶ᠋ᠢ ᠪᠣᠭᠣᠮᠢᠯᠠᠭᠰᠠᠨ ᠨᠠᠷᠢᠬᠠᠨ ᠡᠷᠴᠢᠮᠲᠦ ᠰᠤᠷ ᠳᠡᠭᠡᠰᠦ ᠶ᠋ᠢ ᠠᠯᠳᠠᠷᠠᠭᠠᠨ ᠰᠢᠨᠵᠢᠪᠡᠯ ᠭᠤᠷᠠ ᠶ᠋ᠢᠨ ᠰᠢᠯᠢᠨ ᠬᠦᠵᠦᠭᠦᠦ᠂ ᠵᠣ ᠬᠣᠨᠳᠣᠯᠠᠢ ᠶ᠋ᠢᠨ ᠲᠦᠭᠦᠬᠡᠢ ᠰᠢᠷᠢ ᠶ᠋ᠢ ᠪᠤᠷᠤᠭᠤ ᠡᠷᠴᠢᠮ ᠢ᠋ᠶ᠋ᠡᠷ ᠭᠤᠷᠮᠤᠰᠤᠯᠠᠨ ᠲᠠᠮᠤᠭᠰᠠᠨ ᠪᠣᠭᠣᠮᠢ ᠪᠠᠢᠯᠠ᠃ ᠪᠣᠭᠣᠮᠢ ᠶ᠋ᠢᠨ ᠡᠷᠴᠢᠮ ᠳ᠋ᠦ᠍ ᠵᠠᠭᠤᠭᠳᠠᠭᠰᠠᠨ ᠭᠤᠷᠠ ᠶ᠋ᠢᠨ ᠦᠰᠦ ᠨᠢ ᠬᠦᠷᠲᠡᠯᠡ ᠠᠯᠠᠭᠯᠠᠵᠤ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠠᠯᠲᠠ ᠤᠷᠲᠤ ᠪᠣᠭᠣᠮᠢ ᠶ᠋ᠢᠨ ᠡᠷᠴᠢᠮ ᠳᠤᠮᠳᠠ ᠪᠠᠨ ᠵᠠᠩᠭᠢᠷᠠᠭᠠ ᠦᠭᠡᠢ ᠰᠢᠯᠤᠭᠤᠨ ᠲᠠᠮᠤᠭᠰᠠᠨ ᠪᠠ ᠪᠣᠭᠣᠮᠢ ᠶ᠋ᠢᠨ ᠭᠣᠭᠴᠣᠭᠠ ᠦᠵᠦᠭᠦᠷ ᠦ᠋ᠨ ᠵᠠᠩᠭᠢᠳᠤᠭᠠ ᠶ᠋ᠢ ᠤᠷᠠᠯᠢᠭ ᠵᠠᠩᠭᠢᠳᠤᠭᠰᠠᠨ ᠨᠢ ᠨᠡᠭᠡᠷᠡᠨ ᠭᠠᠢᠬᠠᠯᠲᠠᠢ᠃ ᠬᠠᠰᠢᠷ ᠠᠳᠤᠭᠤᠴᠢ ᠶ᠋ᠢᠨ ᠤᠷᠠᠨ ᠭᠠᠷ ᠢ᠋ᠶ᠋ᠠᠷ ᠲᠠᠮᠤᠭᠳᠠᠭᠰᠠᠨ ᠪᠣᠯᠬᠤ ᠨᠢ ᠰᠡᠵᠢᠭᠯᠡᠰᠢ ᠦᠭᠡᠢ᠃ ᠲᠡᠷᠡ ᠰᠡᠷᠪᠡᠭᠡ ᠦᠭᠡᠢ ᠲᠣᠭᠣᠨᠣᠴᠢᠯᠠᠯ ᠵᠠᠩᠭᠢᠳᠤᠭᠠ ᠪᠣᠯᠤᠨ ᠪᠤᠷᠤᠭᠤ ᠡᠷᠴᠢᠮ ᠢ᠋ᠶ᠋ᠡᠷ ᠲᠠᠮᠤᠭᠰᠠᠨ ᠪᠣᠭᠣᠮᠢ ᠨᠢ ᠶᠠᠭ ᠯᠠ ᠲᠡᠭᠦᠨ ᠦ᠌ ᠥᠪᠡᠷ ᠦ᠋ᠨ ᠬᠢᠨᠢ ᠡᠳ᠋ᠯᠡᠬᠦᠨ ᠰᠢᠭ ᠳᠣᠲᠣᠨᠣ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠠᠬᠢᠨᠠ᠃ ᠲᠡᠭᠦᠨ ᠦ᠌ ᠨᠣᠶᠠᠨ ᠰᠠᠩ ᠤ᠋ᠨ ᠠᠳᠤᠭᠤ ᠤᠷᠭᠠᠯᠠᠳᠠᠭ ᠪᠤᠷᠤᠭᠤ ᠡᠷᠴᠢᠮ ᠲᠡᠢ ᠬᠤᠢᠪᠢ ᠶ᠋ᠢ ᠬᠥᠮᠦᠰ ᠱᠠᠭᠰᠢᠵᠤ ᠳᠠᠭᠤᠷᠢᠶᠠᠬᠤ ᠭᠡᠳ ᠴᠢᠳᠠᠳᠠᠭ ᠦᠭᠡᠢ ᠪᠢᠯᠡ᠃ ᠶᠠᠮᠠᠷ ᠨᠢᠭᠡ ᠨᠢ ᠮᠢᠨᠦ ᠤᠷᠭᠠᠨ ᠤ᠋ ᠬᠤᠢᠪᠢ ᠶ᠋ᠢ ᠬᠤᠯᠠᠭᠠᠢᠯᠠᠵᠤ ᠠᠪᠴᠢᠷᠠᠭᠠᠳ ᠡᠨᠳᠡ ᠤᠷᠠᠬᠠ ᠲᠠᠯᠪᠢᠭᠰᠠᠨ ᠶᠤᠮ ᠪᠣᠯ ᠠ᠋? ᠭᠡᠵᠦ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠬᠠᠷᠢᠨ《ᠭᠤᠷᠠ ᠶ᠋ᠢᠨ ᠰᠢᠷᠢ ᠪᠡᠷ ᠴᠢ ᠬᠡᠵᠢᠶᠡ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠲᠠᠮᠤᠵᠤ ᠪᠠᠢᠪᠠ?》 ᠭᠡᠰᠡᠨ ᠬᠠᠷᠢᠭᠤᠯᠲᠠ ᠣᠯᠤᠭᠠᠳ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠤᠬᠠᠭᠠᠨ ᠬᠥᠯ ᠢ᠋ ᠨᠢ ᠣᠯᠬᠤ ᠦᠭᠡᠢ ᠪᠣᠯᠪᠠ᠃
ᠳᠤᠲᠠᠭᠤ ᠢᠳᠡᠭᠡᠯᠡᠭᠰᠡᠨ ᠪᠤᠬᠠᠨ ᠤ᠋ ᠰᠢᠷᠢ ᠶ᠋ᠢ ᠵᠢᠭᠳᠡᠬᠡᠨ ᠵᠦᠰᠦᠬᠦ ᠳ᠋ᠦ᠍ ᠰᠤᠷ ᠤ᠋ᠨ ᠦᠵᠦᠭᠦᠷ ᠡᠴᠡ ᠳᠠᠮ ᠥᠭᠴᠦ ᠴᠢᠳᠠᠳᠠᠭ ᠨᠣᠮᠢᠨ ᠨᠢ ᠲᠣᠳᠣᠷᠠᠵᠤ ᠪᠤᠷᠤᠭᠤ ᠡᠷᠴᠢᠮ ᠲᠡᠢ ᠤᠷᠭᠠ ᠶ᠋ᠢᠨ ᠬᠤᠢᠪᠢ ᠲᠠᠮᠤᠳᠠᠭ ᠤᠷᠠ ᠳᠠᠮ ᠢ᠋ ᠭᠠᠭᠴᠠ ᠨᠣᠮᠢᠨ ᠰᠠᠢᠨ ᠮᠡᠳᠡᠳᠡᠭ᠃ ᠲᠡᠭᠦᠨ ᠡᠴᠡ ᠥᠭᠡᠷᠡ ᠬᠥᠮᠦᠨ ᠪᠠᠢᠵᠤ ᠪᠣᠯᠣᠰᠢ ᠦᠭᠡᠢ᠃ ᠡᠨᠡ ᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠶᠠᠭᠠᠬᠢᠯᠠ ᠭᠡᠵᠦ ᠨᠣᠮᠢᠨ ᠪᠠᠢᠬᠤ ᠪᠢᠯᠡ⁈ ᠪᠦᠰᠡᠭᠦᠢ ᠬᠥᠮᠦᠨ ᠡᠯᠳᠡᠪ ᠠᠷᠢᠶᠠᠲᠠᠨ ᠲᠠᠢ ᠡᠨᠡ ᠪᠣᠢᠳᠠ ᠭᠠᠵᠠᠷ ᠦᠨᠡᠬᠡᠷ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠪᠦᠰᠡᠭᠦᠢ ᠬᠥᠮᠦᠨ ᠪᠠᠢᠲᠤᠭᠠᠢ ᠡᠷᠡ ᠳᠡᠭᠦᠵᠢᠯᠡᠭᠰᠡᠨ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠬᠦᠷᠲᠡᠯᠡ ᠵᠢᠷᠦᠬᠡ ᠪᠡᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠲᠦᠭ ᠲᠠᠭ ᠲᠠᠢ ᠶᠠᠪᠤᠨ ᠠᠲᠠᠯᠠ ᠨᠣᠮᠣᠢ ᠪᠦᠰᠡᠭᠦᠢ ᠬᠥᠮᠦᠨ ᠨᠡᠩ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠣᠢ⁈ ᠲᠡᠭᠡᠬᠦ ᠳ᠋ᠡᠭᠡᠨ ᠤᠯᠠᠭᠠᠨ ᠬᠠᠳᠠᠨ ᠠ᠋ᠴᠠ ᠴᠢᠳᠬᠤᠭᠰᠠᠨ ᠴᠢᠳᠬᠤᠯᠠᠩ ᠤ᠋ᠨ ᠭᠦᠨ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠱᠠᠯᠳᠠᠩ ᠪᠦᠰᠡᠭᠦᠢ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠠᠶᠤᠵᠤ ᠢᠴᠢᠬᠦ ᠪᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠠᠨᠢᠷ ᠴᠦ᠍ ᠦᠭᠡᠢ ᠠᠯᠴᠠᠢᠨ ᠬᠡᠪᠲᠡᠳᠡᠭ ᠨᠢ ᠶᠠᠭᠠᠬᠢᠵᠤ ᠲᠠᠢᠯᠳᠠᠭ ᠣᠨᠢᠰᠣᠭᠠ ᠪᠣᠢ⁈ ᠭᠣᠩᠴᠣᠭᠷᠠᠬᠤᠠ ᠠ᠋᠁ ᠡᠨᠡ ᠬᠣᠷᠸᠠ ᠳ᠋ᠤ᠌ ᠬᠤᠪᠢᠲᠠᠢ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠪᠡᠶᠡ ᠶ᠋ᠢ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠡᠷᠡ ᠬᠥᠮᠦᠨ ᠡᠳ᠋ᠯᠡᠬᠦ ᠡᠷᠬᠡ ᠦᠭᠡᠢ ᠭᠡᠬᠦ ᠰᠢᠦ ᠪᠠᠷᠳᠠᠮ ᠬᠠᠰᠬᠢᠷᠤᠭᠰᠠᠨ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢ ᠡᠮᠵᠡᠭᠯᠡᠨ ᠰᠠᠨᠠᠵᠤ᠂ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠠᠮᠠᠷᠠᠭ ᠨᠣᠮᠢᠨ ᠮᠢᠨᠢ ᠮᠥᠨ ᠴᠦ᠍ ᠶᠦᠮ ᠤᠤ ᠳᠠ⁈ ᠮᠥᠨ ᠭᠡᠬᠦ ᠳ᠋ᠦ᠍ ᠲᠡᠷᠡ ᠶᠠᠭᠤ ᠰᠠᠨᠠᠵᠤ᠂ ᠶᠠᠭᠠᠬᠢᠯᠠ ᠭᠡᠵᠦ ᠡᠨᠡ ᠬᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠡᠨᠦᠬᠦ ᠪᠢᠯᠡ?᠁ ᠭᠡᠬᠦ ᠮᠡᠲᠦ ᠶ᠋ᠢᠨ ᠠᠰᠠᠭᠤᠯᠲᠠ ᠳ᠋ᠤ᠌ ᠣᠨᠣᠪᠴᠢᠲᠠᠢ ᠬᠠᠷᠢᠭᠤᠯᠲᠠ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢ《ᠨᠣᠮᠢᠨ ᠪᠢᠰᠢ!》 ᠭᠡᠵᠦ ᠨᠣᠮᠢᠨ ᠢ᠋ ᠪᠣᠳᠣᠯ ᠠ᠋ᠴᠠ ᠪᠠᠨ ᠲᠦᠯᠬᠢᠵᠦ ᠵᠠᠢᠯᠠᠭᠤᠯᠤᠨᠠ᠁
ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠭᠤᠷᠠ ᠶ᠋ᠢ ᠲᠦᠳᠡᠬᠡᠨ ᠥᠪᠴᠢᠵᠦ ᠮᠢᠬᠠ ᠶ᠋ᠢ ᠨᠢ ᠪᠣᠷᠴᠠᠯᠠᠵᠤ ᠬᠠᠭᠤᠷᠠᠢ ᠮᠣᠳᠣᠨ ᠤ᠋ ᠮᠥᠴᠢᠷ ᠲᠦ᠍ ᠵᠡᠷᠭᠡᠯᠡᠨ ᠡᠯᠭᠦᠵᠦ ᠡᠪᠡᠷᠡᠭᠡᠪᠡ᠃
— ᠪᠤᠷᠬᠠᠨ ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠣᠳᠣ ᠨᠢᠭᠡ ᠥᠯᠪᠡᠷᠬᠦ ᠡᠴᠡ ᠪᠡᠨ ᠥᠩᠭᠡᠷᠡᠯᠡ ᠭᠡᠳ ᠲᠦᠳᠡᠭ ᠦ᠋ᠨ ᠰᠢᠷᠠᠭᠰᠠᠨ ᠭᠤᠷᠠ ᠶ᠋ᠢᠨ ᠠᠯᠠᠭ ᠪᠣᠷᠴᠠ ᠶ᠋ᠢ ᠠᠮᠲᠠᠷᠬᠠᠨ ᠢᠳᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠲᠡᠨᠢᠭᠦᠨ ᠪᠣᠯᠪᠠ᠃
ᠰᠢᠷᠠᠭᠰᠠᠨ ᠮᠢᠬᠠᠨ ᠤ᠋ ᠬᠡᠩᠰᠢᠭᠦᠦ ᠬᠢᠷᠪᠤᠰᠤ ᠶ᠋ᠢᠨ ᠦᠨᠦᠷ ᠢ᠋ᠶ᠋ᠡᠷ ᠪᠣᠯᠪᠠ ᠤᠤ᠂ ᠦᠭᠡᠢ ᠪᠣᠯ ᠬᠠᠮᠢᠭᠠ ᠭᠠᠵᠠᠷ ᠠ᠋ᠴᠠ ᠨᠢᠭᠡ ᠠᠳᠠᠢᠷ ᠦᠨᠦᠷ ᠲᠡᠢ ᠠᠮᠢᠲᠠᠨ ᠢᠷᠡᠪᠡ ᠭᠡᠵᠦ ᠮᠠᠩᠭᠢᠰᠤ᠂ ᠰᠢᠯᠦᠭᠦᠰᠦ᠂ ᠰᠣᠬᠣᠷ ᠨᠣᠮᠣᠨ ᠮᠡᠲᠦ ᠶ᠋ᠢᠨ ᠠᠮᠢᠲᠠᠨ ᠪᠠᠢᠨ ᠪᠠᠢᠨ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠦᠨᠦᠷᠯᠡᠨ ᠬᠠᠶᠠ ᠲᠩᠷᠢ ᠬᠠᠷᠠᠨ ᠠᠭᠠᠷ ᠰᠢᠩᠰᠢᠬᠦ ᠰᠢᠭ ᠡᠨᠡ ᠲᠡᠷᠡ ᠶ᠋ᠢ ᠰᠣᠨᠢᠭᠤᠴᠢᠯᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠵᠤ᠂ ᠭᠣᠩᠴᠣᠭᠷᠠᠬᠤᠠ ᠶ᠋ᠢᠨ ᠡᠪᠦᠷ ᠳᠡᠭᠡᠷᠡ ᠭᠠᠷᠬᠤ ᠨᠢ ᠯᠡ ᠳᠤᠲᠠᠵᠤ ᠪᠠᠢᠪᠠ᠃ ᠬᠥᠮᠦᠨ ᠬᠠᠷᠠ ᠦᠭᠡᠢ ᠵᠡᠯᠢᠭᠦᠳ ᠠᠭᠤᠯᠠᠨ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠩᠭᠢᠵᠦ ᠰᠢᠪᠠᠭᠤ ᠰᠢᠭ᠋ ᠱᠣᠪᠣᠢᠨ ᠰᠠᠭᠤᠭᠠᠳ ᠬᠡᠯᠡᠯᠴᠡᠬᠦ ᠬᠥᠮᠦᠨ ᠦᠭᠡᠢ ᠬᠢᠬᠦ ᠠᠵᠢ ᠦᠭᠡᠢ ᠴᠦ᠍ ᠥᠨᠥᠴᠢᠷᠡᠨ ᠤᠢᠳᠬᠤ ᠲᠥᠷᠥᠭᠳᠡᠯ ᠡᠰᠡ ᠲᠥᠷᠥᠭᠳᠡᠨᠡ᠃
ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠡᠷᠭᠢᠨ ᠵᠢᠯᠠᠭᠠᠨ ᠳ᠋ᠤ᠌ ᠰᠢᠷᠠ ᠪᠦᠷᠦᠢ ᠪᠠᠭᠤᠵᠤ ᠤᠯᠠᠢ ᠡᠷᠭᠢᠭᠰᠡᠨ ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠨᠤᠭᠤᠳ ᠴᠦ᠍ ᠵᠦᠭ ᠵᠦᠭ ᠲᠡᠭᠡᠨ ᠨᠢᠰᠦᠨ ᠣᠳᠪᠠ᠃
ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠬᠤ ᠳᠥᠭᠥᠵᠦ ᠭᠣᠩᠴᠣᠭᠷᠠᠬᠤᠠ ᠶ᠋ᠢᠨ ᠳᠣᠲᠣᠷᠠ ᠲᠦᠩᠰᠦᠢᠵᠦ᠂ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠬᠠᠵᠠᠭᠤ ᠶ᠋ᠢᠨ ᠮᠣᠳᠣᠳ ᠰᠦᠭᠯᠡᠢᠵᠦ᠂ ᠲᠦᠨᠲᠦᠭᠡ ᠪᠥᠨᠳᠦᠭᠡ ᠬᠠᠳᠠ ᠴᠢᠯᠠᠭᠤᠳ ᠲᠡᠭᠦᠨ ᠢ᠋ ᠮᠢᠷᠢᠶᠠᠭᠰᠠᠨ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠰᠢᠭ᠋ ᠠᠢᠳᠠᠰ ᠲᠥᠷᠥᠭᠦᠯᠵᠦ ᠡᠬᠢᠯᠡᠪᠡ᠃
ᠬᠠᠳᠠᠨ ᠤ᠋ ᠨᠥᠮᠥᠷᠢ ᠲᠦᠰᠢᠵᠦ ᠨᠢᠭᠡ ᠰᠥᠨᠢ ᠶᠠᠰᠤ ᠠᠮᠠᠷᠠᠭᠠᠨ ᠮᠠᠷᠭᠠᠲᠤᠷ ᠵᠠᠮ ᠢ᠋ᠶ᠋ᠠᠨ ᠡᠯᠭᠦᠶᠡ ᠭᠡᠵᠦ ᠶᠠᠪᠤᠨ ᠬᠥᠩᠬᠥᠢᠭᠰᠡᠨ ᠰᠠᠷᠠᠪᠴᠢᠲᠤ ᠵᠠᠳᠠᠭᠠᠢ ᠬᠣᠩᠭᠢᠯ ᠤ᠋ᠨ ᠠᠮᠠᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡ᠃ ᠵᠠ᠂ ᠡᠨᠳᠡ ᠯᠡ ᠨᠥᠮᠥᠷᠢᠳᠡᠵᠦ ᠨᠢᠳᠦ ᠠᠨᠢᠶᠠ ᠪᠠᠢᠵᠠ! ᠭᠡᠵᠦ ᠪᠣᠳᠣᠪᠠᠴᠤ ᠴᠢᠨᠣᠠ᠂ ᠢᠷᠪᠢᠰ᠂ ᠬᠥᠮᠦᠨ ᠬᠠᠷᠠ ᠭᠥᠷᠥᠭᠡᠰᠦ ᠵᠡᠷᠭᠡ ᠲᠣᠭᠰᠢᠨ ᠠᠷᠢᠶᠠᠲᠠᠨ ᠤ᠋ ᠡᠭᠦᠷ ᠲᠦ᠍ ᠲᠠᠯᠪᠢᠭᠠᠳ ᠣᠷᠣᠴᠢᠬᠠᠬᠤ ᠶᠤᠮ ᠪᠢᠵᠡ ᠭᠡᠵᠦ ᠬᠡᠷᠰᠡᠦᠬᠡᠨ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠳᠥᠭᠥᠪᠡᠯ ᠦᠨᠡᠰᠦ ᠤᠲᠤᠭᠠ᠂ ᠬᠢᠷᠪᠤᠰᠤ ᠬᠡᠩᠰᠢᠭᠦᠦ ᠦᠨᠦᠷᠲᠦᠬᠦ ᠰᠢᠭ ᠰᠠᠨᠠᠭᠳᠠᠵᠤ《ᠡᠨᠳᠡ ᠭᠥᠷᠥᠭᠡᠴᠢᠨ ᠨᠦ᠍ᠭᠦᠳ ᠦ᠋ᠨ ᠬᠣᠨᠣᠭ ᠤ᠋ᠨ ᠭᠠᠵᠠᠷ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ》 ᠭᠡᠵᠦ ᠪᠡᠶᠡ ᠳ᠋ᠡᠭᠡᠨ ᠵᠣᠷᠢᠭ ᠥᠭᠴᠦ ᠬᠠᠳᠠ ᠮᠠᠴᠤᠨ ᠬᠥᠩᠬᠥᠢᠭᠰᠡᠨ ᠰᠠᠷᠠᠪᠴᠢᠲᠤ ᠬᠠᠳᠠᠨ ᠠᠭᠤᠢ ᠳ᠋ᠤ᠌ ᠣᠷᠣᠪᠠ᠃
ᠬᠠᠳᠠᠨ ᠤ᠋ ᠨᠥᠮᠥᠷᠢ᠂ ᠨᠠᠷᠢᠨ ᠰᠠᠢᠷ᠂ ᠬᠤᠮᠠᠭ ᠲᠣᠭᠲᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠬᠥᠯ ᠨᠢᠴᠦᠭᠦᠨ ᠬᠥᠮᠦᠨ ᠦ᠌ ᠨᠠᠭᠠᠰᠢ ᠴᠠᠭᠠᠰᠢ ᠬᠣᠯᠬᠢᠭᠰᠠᠨ ᠰᠢᠨᠡ ᠬᠠᠭᠤᠴᠢᠨ ᠮᠥᠷ ᠳᠥᠩᠭᠡᠵᠦ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠪᠠᠰᠠ ᠬᠠᠶᠠ ᠦᠨᠡᠭᠡ ᠴᠢᠨᠣᠠ ᠶ᠋ᠢᠨ ᠰᠢᠩᠰᠢᠯᠡᠵᠦ ᠥᠩᠭᠡᠷᠡᠭᠰᠡᠨ ᠮᠥᠷ ᠴᠦ᠍ ᠬᠠᠷᠠᠭᠳᠠᠨᠠ᠃
ᠵᠢᠭᠠᠬᠠᠨ ᠳᠣᠲᠣᠭᠰᠢ ᠪᠠᠨ ᠶᠠᠪᠤᠪᠠᠯ ᠪᠠᠷᠠᠭᠤᠨᠰᠢ ᠬᠠᠨᠠ ᠳᠠᠭᠠᠤ ᠠᠶᠠᠳᠠᠭᠤᠬᠠᠨ ᠳᠡᠪᠬᠡᠷᠭᠡ ᠲᠡᠢ᠃ ᠲᠡᠷᠡ ᠳᠡᠪᠬᠡᠷᠭᠡ ᠳᠡᠭᠡᠷᠡ ᠭᠤᠷᠠ ᠵᠦᠷ ᠦ᠋ᠨ ᠠᠷᠠᠰᠤ᠂ ᠪᠤᠭᠤ ᠬᠠᠯᠢᠭᠤ᠂ ᠬᠥᠬᠡ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠳᠡᠪᠢᠰᠦᠭᠰᠡᠨ ᠨᠢᠭᠡ ᠬᠥᠮᠦᠨ ᠤᠨᠲᠠᠵᠤ ᠪᠣᠯᠤᠮᠠ ᠭᠠᠵᠠᠷ ᠬᠠᠷᠠᠭᠳᠠᠪᠠ᠃《ᠵᠠ᠂ ᠶᠠᠳᠠᠷᠠᠭᠰᠠᠨ ᠪᠠᠢᠯᠭᠦᠢ ᠳᠡ! ᠴᠢ ᠡᠨᠳᠡ ᠤᠨᠲᠠᠭᠠᠷᠠᠢ! ᠴᠢᠮᠠ ᠳ᠋ᠤ᠌ ᠯᠠ ᠪᠠᠢᠵᠠᠭᠠᠭᠰᠠᠨ ᠣᠷᠣ ᠰᠢᠷᠢᠳᠡᠭ ᠶᠦᠮ ᠠ᠋!》 ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠭᠡᠳ ᠠᠪᠬᠤ ᠰᠢᠭ᠋᠃ ᠰᠢᠷᠠᠭᠰᠠᠨ ᠭᠤᠷᠠ ᠶ᠋ᠢᠨ ᠪᠣᠷᠴᠠ ᠢᠳᠡᠵᠦ ᠪᠤᠯᠠᠭ ᠤ᠋ᠨ ᠤᠰᠤ ᠤᠤᠭᠤᠵᠤ ᠭᠡᠳᠡᠰᠦ ᠭᠠᠷᠤᠭᠰᠠᠨ ᠠ᠋ᠴᠠ ᠣᠳᠣ ᠭᠠᠭᠴᠠ ᠬᠠᠪᠲᠠᠢᠬᠤ ᠯᠠ ᠳᠤᠲᠠᠵᠤ ᠪᠠᠢᠭᠠ ᠲᠤᠯᠠ ᠳᠡᠷᠡ ᠦᠵᠡᠭᠰᠡᠨ ᠬᠥᠮᠦᠨ ᠨᠣᠢᠷ ᠬᠦᠷᠪᠡ ᠭᠡᠭᠴᠢ ᠪᠡᠷ ᠭᠣᠩᠴᠣᠭᠷᠠᠬᠤᠠ ᠣᠯᠠᠨ ᠲᠠᠪᠤᠨ ᠶᠠᠭᠤᠮᠠ ᠪᠣᠳᠣᠬᠤ ᠶ᠋ᠢᠨ ᠴᠦ᠍ ᠵᠠᠪ ᠭᠠᠷᠤᠭᠰᠠᠨ ᠦᠭᠡᠢ᠂ ᠲᠡᠷᠡ ᠬᠠᠳᠠᠨ ᠳᠡᠪᠬᠡᠷᠭᠡ ᠳᠡᠭᠡᠷᠡ ᠭᠠᠷᠴᠤ ᠤᠨᠲᠠᠮᠠᠷ ᠰᠠᠨᠠᠭᠳᠠᠯᠠ᠁
ᠭᠥᠷᠦᠭᠡᠰᠦᠨ ᠦ᠌ ᠰᠢᠪᠲᠦᠷ ᠰᠢᠩᠭᠡᠭ᠂ ᠲᠦᠭᠦᠬᠡᠢ ᠠᠷᠠᠰᠤᠨ ᠤ᠋ ᠬᠣᠷᠰᠢᠭᠰᠠᠨ ᠵᠤᠩᠭᠠᠭ ᠦᠨᠦᠷ ᠲᠦ᠍ ᠬᠣᠯᠢᠯᠳᠤᠭᠰᠠᠨ ᠡᠮᠡ ᠬᠥᠮᠦᠨ ᠦ᠌ ᠰᠣᠳᠣᠨ ᠰᠠᠢᠬᠠᠨ ᠦᠨᠦᠷ ᠲᠡᠭᠦᠨ ᠦ᠌ ᠡᠷᠡ ᠴᠡᠨᠡᠭ ᠢ᠋ ᠭᠣᠳᠣᠭᠣᠨᠠᠭᠤᠯᠵᠤ ᠥᠰᠥᠭᠡᠢ ᠰᠢᠭᠦᠷᠡᠭᠰᠡᠨ ᠠᠵᠢᠷᠭᠠᠨ ᠬᠤᠷ ᠳᠡᠯ ᠰᠢᠭ᠋ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠲᠡᠢ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢ ᠳᠠᠬᠢᠨ ᠰᠠᠨᠠᠵᠤ ᠪᠡᠯᠬᠡᠭᠦᠰᠦ ᠪᠡᠷ ᠨᠢ ᠦᠬᠦᠨ ᠲᠡᠪᠡᠷᠢᠵᠦ ᠬᠤᠵᠢᠷᠰᠢᠭᠰᠠᠨ ᠪᠤᠤᠷᠠ ᠰᠢᠭ᠋ ᠳᠠᠪᠤᠰᠤᠯᠢᠭ ᠲᠤᠯᠤᠮ ᠢ᠋ ᠰᠢᠨᠤᠭ ᠳᠣᠯᠢᠶᠠᠨ ᠭᠡᠨᠡᠳᠲᠡ ᠣᠷᠣᠭᠠ ᠠᠵᠢᠷᠭᠠ ᠰᠢᠭ᠋ ᠦᠦᠷᠰᠡᠨ ᠦᠦᠷᠰᠡᠨ ᠳᠣᠪᠲᠣᠯᠳᠠᠭ ᠲᠠᠢ ᠠᠳᠠᠯᠢᠬᠠᠨ ᠰᠠᠨᠠᠭᠳᠠᠪᠠ᠃ ᠲᠡᠭᠡᠭᠰᠡᠭᠡᠷ ᠪᠠᠢᠵᠤ ᠤᠨᠲᠠᠵᠤ ᠣᠷᠬᠢᠪᠠ᠃
ᠲᠣᠭᠣᠭᠠᠨ ᠤ᠋ ᠬᠠᠲᠠᠭᠠᠭᠰᠠᠨ ᠥᠷᠥᠮᠡ ᠰᠢᠭ ᠡᠮᠲᠡᠷᠬᠡᠢ ᠲᠠᠯᠠ ᠰᠠᠷᠠ ᠥᠨᠳᠥᠷ ᠮᠤᠨᠠ ᠶ᠋ᠢᠨ ᠵᠤᠯᠠᠢ ᠳᠡᠭᠡᠭᠦᠷ ᠰᠦ ᠠᠰᠬᠠᠨ ᠬᠥᠭᠡᠷᠴᠦ ᠳᠡᠭᠡᠷᠡ ᠳᠡᠭᠳᠡᠪᠡ᠃
ᠦᠷᠦᠮᠡᠨ ᠰᠠᠷᠠᠨ ᠤ᠋ ᠰᠦᠨ ᠴᠠᠭᠠᠨ ᠭᠡᠷᠡᠯ ᠬᠠᠳᠠᠨ ᠬᠣᠩᠭᠢᠯ ᠢ᠋ ᠴᠠᠢᠲᠠᠯᠠ ᠰᠦᠯᠡᠵᠦ᠂ ᠬᠡᠦᠬᠡᠨ ᠰᠠᠷᠠᠨ ᠤ᠋ ᠨᠠᠮᠤᠭᠤᠬᠠᠨ ᠪᠦᠪᠡᠢᠯᠡᠯ ᠳ᠋ᠦ᠍ ᠭᠣᠩᠴᠣᠬᠷᠠᠬᠤᠠ ᠵᠡᠭᠦᠳᠦ ᠪᠡᠨ ᠲᠠᠮᠰᠢᠶᠠᠯᠠᠨ ᠵᠢᠷᠭᠠᠨ ᠪᠠᠢᠯᠠ᠁
᠁
ᠬᠡᠢ ᠬᠦᠰᠡᠯ ᠦ᠋ᠨ ᠢ᠋ᠶ᠋ᠡᠨ ᠶᠡᠬᠡ ᠴᠡᠩᠭᠡᠯ ᠳ᠋ᠦ᠍ ᠪᠡᠶᠡ ᠶᠡᠭᠦᠷᠡᠭᠰᠡᠨ ᠱᠠᠯᠳᠠᠩ ᠪᠦᠰᠡᠭᠦᠢ ᠨᠠᠷᠠᠨ ᠤ᠋ ᠡᠭᠡᠭᠡᠯᠲᠡ ᠳ᠋ᠦ᠍ ᠰᠤᠪᠢᠯᠠᠯᠲᠠ ᠵᠣᠬᠢᠷᠠᠭᠰᠠᠨ ᠢ᠋ᠶ᠋ᠠᠨ ᠳᠤᠭᠵᠢᠷᠠᠪᠠ᠃
ᠣᠯᠠᠩᠬᠢ ᠶ᠋ᠢ ᠨᠢ ᠨᠡᠷᠡ ᠥᠭᠴᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠲᠣᠭᠠ ᠲᠣᠮᠰᠢ ᠦᠭᠡᠢ ᠡᠪᠡᠰᠦ ᠤᠷᠭᠤᠮᠠᠯ᠂ ᠠᠮᠢᠲᠠᠨ ᠠᠷᠢᠶᠠᠲᠠᠨ ᠨᠤᠭᠤᠳ ᠤᠳᠠᠭᠠᠨ ᠣᠨ ᠵᠢᠯ ᠢ᠋ᠶ᠋ᠡᠷ ᠵᠣᠬᠢᠴᠠᠯ ᠢ᠋ᠶ᠋ᠠᠨ ᠣᠯᠵᠤ ᠵᠦᠢᠲᠡᠢ ᠣᠷᠣᠰᠢᠭᠰᠠᠭᠠᠷ ᠢᠷᠡᠭᠰᠡᠨ ᠭᠠᠩᠭᠠᠩ ᠪᠠᠢᠭᠠᠯᠢ ᠲᠠᠢ ᠠᠭᠤᠯᠠ ᠤᠰᠤᠨ ᠤ᠋ ᠡᠯᠢᠭᠡᠨ ᠳ᠋ᠦ᠍ ᠡᠩᠬᠦᠷᠡᠢᠯᠡᠭᠳᠡᠵᠦ᠂ ᠴᠡᠪᠡᠷ ᠠᠭᠠᠷ ᠠ᠋ᠴᠠ ᠴᠢᠯᠥᠭᠡᠲᠡᠢ ᠠᠮᠢᠰᠬᠤᠯᠯᠠᠭᠰᠠᠨ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠬᠤᠪᠢ ᠲᠠᠪᠢᠯᠠᠩ ᠭᠣᠩᠴᠣᠭᠷᠠᠬᠤᠠ ᠳ᠋ᠤ᠌ ᠲᠠᠢᠯᠤᠭᠳᠠᠭᠰᠠᠨ ᠦᠭᠡᠢ ᠣᠨᠢᠰᠣᠭᠠ ᠰᠢᠭ᠋ ᠪᠠᠢᠯᠠ᠃
ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠳᠡᠰ ᠬᠠᠷᠠ ᠭᠡᠵᠢᠭᠡ ᠨᠢ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠭᠠᠷᠠᠨ ᠲᠠᠯᠠ ᠨᠢᠭᠤᠷ᠂ ᠥᠷᠥᠭᠡᠰᠦᠨ ᠬᠥᠬᠥ ᠶ᠋ᠢ ᠨᠢ ᠬᠤᠴᠢᠵᠠᠢ᠃ ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠲᠣᠷᠭᠠᠨ ᠪᠡᠶᠡ ᠳᠡᠭᠡᠭᠦᠷ ᠨᠠᠭᠠᠰᠢ ᠴᠠᠭᠠᠰᠢ ᠵᠣᠷᠴᠢᠨ ᠳᠠᠪᠬᠢᠵᠤ ᠭᠠᠵᠠᠷ ᠤᠰᠤ᠂ ᠠᠭᠤᠷᠬᠠᠢ ᠨᠢᠭᠤᠭᠳᠠᠴᠠ ᠶ᠋ᠢ ᠨᠢ ᠬᠠᠢᠨ ᠰᠢᠨᠵᠢᠯᠡᠭᠡ ᠬᠢᠭᠡᠳ ᠮᠠᠰᠢ ᠶᠠᠭᠠᠷᠠᠤ! ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠰᠡᠷᠪᠡᠩ ᠦ᠋ᠨ ᠬᠣᠶᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠡᠭᠡᠯᠵᠢ ᠪᠡᠷ ᠭᠠᠷᠴᠤ《ᠠᠶᠠ᠂ ᠡᠨᠡ ᠳᠣᠪᠣᠷᠴᠠᠭ ᠳᠣᠲᠣᠷᠠ ᠠᠭᠤᠳᠠᠯᠤᠭᠤᠰᠢᠲᠠᠢ ᠠᠭᠤᠷᠬᠠᠢ ᠶ᠋ᠢᠨ ᠪᠠᠶᠠᠯᠢᠭ ᠪᠤᠯᠠᠭᠳᠠᠵᠤ ᠪᠠᠢᠬᠤ ᠶᠠᠳᠠᠬᠤ ᠦᠭᠡᠢ᠂ ᠶᠣᠰᠣᠲᠠᠢ ᠡᠷᠳᠡᠨᠢ ᠶ᠋ᠢᠨ ᠬᠣᠶᠠᠷ ᠢᠬᠡᠷᠡ ᠠᠭᠤᠯᠠ ᠪᠠᠢᠨᠠ ᠳᠠ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠨᠠ᠃ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠬᠠᠷᠠ ᠭᠡᠵᠢᠭᠡ ᠳᠡᠭᠡᠭᠦᠷ ᠴᠠᠭᠠᠰᠢ ᠮᠠᠴᠤᠬᠤ ᠭᠡᠰᠡᠨ ᠳ᠋ᠦ᠍ ᠬᠠᠯᠲᠤᠷᠢᠭᠠᠲᠠᠢ ᠪᠣᠯᠬᠣᠷ ᠭᠤᠯᠭᠤᠷᠢᠨ ᠣᠢᠴᠢᠵᠤ ᠨᠢᠭᠡ ᠬᠠᠷᠠᠬᠤᠯᠠ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠬᠦᠢᠰᠦᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠯᠠ᠃ 《ᠡᠨᠡ ᠶᠠᠭᠤᠨ ᠤ᠋ ᠬᠠᠭᠤᠷᠠᠢ ᠬᠤᠳᠳᠤᠭ ᠪᠣᠯᠴᠢᠬᠠᠪᠠ?》 ᠭᠡᠳ ᠬᠤᠳᠳᠤᠭ ᠭᠡᠬᠦᠯᠡᠷ ᠭᠡᠨᠡᠳᠲᠡ ᠰᠠᠷᠬᠢᠨᠠᠭ ᠨᠢ ᠬᠠᠲᠠᠵᠤ ᠤᠰᠤ ᠤᠤᠭᠤᠶᠠ ᠭᠡᠵᠦ ᠰᠦᠷᠡᠬᠡᠢ ᠬᠦᠰᠡᠨᠡ᠃ ᠴᠢᠭᠢᠭ ᠦ᠋ᠨ ᠰᠡᠩᠭᠢᠨᠡᠭᠰᠡᠨ ᠦᠨᠦᠷ ᠲᠦ᠍ ᠰᠣᠷᠣᠭᠳᠠᠵᠤ ᠥᠨᠥᠬᠢ ᠬᠠᠭᠤᠷᠠᠢ ᠬᠤᠳᠳᠤᠭ ᠤ᠋ᠨ ᠳᠡᠨᠵᠢᠨ ᠳᠡᠭᠡᠭᠦᠷ ᠨᠠᠭᠠᠰᠢ ᠴᠠᠭᠠᠰᠢ ᠲᠡᠨᠦᠵᠦ ᠶᠠᠪᠤᠨ ᠪᠤᠲᠠ ᠪᠤᠷᠭᠠᠰᠤ ᠲᠠᠢ ᠰᠢᠭᠤᠢ ᠳᠣᠲᠣᠷᠠ ᠣᠷᠣᠵᠤ ᠣᠴᠢᠪᠠ᠃ ᠵᠠᠬᠠ ᠪᠠᠷ ᠢ᠋ᠶ᠋ᠠᠨ ᠰᠡᠢᠷᠡᠭ ᠪᠣᠯᠪᠠᠴᠤ ᠵᠠᠮ ᠦᠭᠡᠢ ᠪᠣᠯᠬᠣᠷ ᠬᠥᠯ ᠭᠠᠷ ᠨᠢ ᠮᠣᠳᠣ ᠰᠢᠷᠢᠩᠭᠢ ᠳ᠋ᠦ᠍ ᠲᠣᠷᠣᠯᠳᠤᠭᠠᠳ ᠵᠠᠮ ᠳᠥᠭᠥᠬᠦ ᠦᠭᠡᠢ᠃ ᠴᠢᠭᠢᠭ ᠦ᠋ᠨ ᠦᠨᠦᠷ ᠢ᠋ᠶ᠋ᠡᠷ ᠰᠢᠷᠭᠤᠯᠵᠢ ᠨᠤᠭᠤᠳ ᠤᠯᠠᠮ ᠴᠦ᠍ ᠤᠮᠳᠠᠭᠠᠰᠴᠤ ᠲᠡᠰᠬᠦ ᠠᠯᠳᠠᠷᠠᠨᠠ᠃ ᠴᠢᠭᠢᠭ ᠬᠠᠩᠬᠤᠯᠤᠭᠰᠠᠨ ᠰᠡᠷᠮᠡᠭᠦᠨ ᠪᠤᠯᠠᠭ ᠤ᠋ᠨ ᠦᠨᠦᠷ ᠲᠠᠨᠢᠷ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠶ᠋ᠢᠨ ᠰᠠᠮᠰᠠ ᠶ᠋ᠢ ᠨᠢ ᠰᠦᠷᠡᠬᠡᠢ ᠭᠣᠪᠣᠭᠣᠨᠠᠭᠤᠯᠵᠤ᠂ ᠤᠮᠳᠠᠭᠠᠰᠬᠤ ᠶ᠋ᠢᠨ ᠡᠷᠬᠡ ᠪᠡᠷ ᠪᠤᠲᠠ ᠪᠤᠷᠭᠠᠰᠤᠨ ᠤ᠋ ᠳᠤᠮᠳᠠᠭᠤᠷ ᠦᠬᠦᠨ ᠲᠡᠯᠴᠢᠯᠡᠨ ᠲᠡᠭᠦᠨ ᠲᠠᠢᠰᠢ ᠵᠢᠳᠬᠦᠯᠡᠨᠡ᠃ ᠠᠮᠢ ᠲᠡᠮᠡᠴᠡᠨ ᠵᠢᠳᠬᠦᠭᠰᠡᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠪᠤᠲᠠ ᠪᠤᠷᠭᠠᠰᠤ ᠲᠠᠢ ᠰᠢᠭᠤᠢ ᠠ᠋ᠴᠠ ᠭᠠᠷᠴᠤ ᠭᠦᠨ ᠵᠢᠯᠠᠭᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠲᠤᠯᠤᠭᠠᠳ ᠠᠵᠢᠭᠯᠠᠪᠠᠯ᠄ ᠠᠶᠠ ᠬᠣᠬᠣᠢ! ᠶᠢᠷᠲᠢᠨᠴᠦ ᠳ᠋ᠦ᠍ ᠡᠢᠮᠦ ᠰᠠᠢᠬᠠᠨ ᠭᠠᠩᠭᠠᠩ ᠪᠠᠢᠭᠠᠯᠢ ᠪᠠᠰᠠ ᠪᠠᠢᠳᠠᠭ ᠪᠠᠢᠵᠠᠢ᠃ ᠥᠨᠳᠥᠷ ᠬᠦᠷᠡᠩ ᠬᠠᠳᠠ ᠲᠠᠢ ᠡᠩᠭᠡᠷ ᠦ᠋ᠨ ᠬᠠᠪᠴᠢᠭ ᠠᠭᠤᠢ ᠠ᠋ᠴᠠ ᠰᠡᠷᠮᠡᠭᠦᠨ ᠲᠤᠩᠭᠠᠯᠠᠭ ᠪᠤᠯᠠᠭ ᠤ᠋ᠨ ᠬᠠᠯᠢᠶᠠ ᠭᠢᠯᠲᠠᠭᠠᠨᠠᠨ ᠤᠷᠤᠰᠤᠨᠠ᠃ ᠲᠡᠷᠡ ᠪᠤᠯᠠᠭ ᠤ᠋ᠨ ᠳᠣᠣᠷᠠ ᠭᠦᠨ ᠴᠦᠩᠬᠦᠯ ᠡᠭᠦᠰᠴᠦ ᠬᠠᠪᠴᠢᠭ ᠠᠭᠤᠢ ᠶ᠋ᠢᠨ ᠠᠮᠠᠰᠠᠷ ᠨᠣᠢᠲᠠᠨ ᠴᠢᠭᠢᠭ ᠲᠦ᠍ ᠬᠠᠭᠠᠷᠢᠭᠳᠠᠭᠠᠳ ᠵᠠᠮᠠᠭ ᠰᠠᠯᠠᠢ ᠲᠠᠢ ᠨᠢᠯᠬᠠ ᠡᠪᠡᠰᠦ ᠪᠠᠷᠵᠠᠢᠨ ᠨᠣᠭᠣᠭᠠᠷᠠᠨᠠ᠃ ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠬᠠᠪᠴᠢᠭ ᠠᠭᠤᠢ ᠶ᠋ᠢᠨ ᠪᠤᠯᠠᠭ ᠤ᠋ᠨ ᠤᠰᠤᠨ ᠠ᠋ᠴᠠ ᠬᠡᠭᠡᠯ ᠭᠠᠷᠲᠠᠯᠠ ᠤᠤᠭᠤᠵᠤ ᠭᠦᠨ ᠠᠮᠢᠰᠬᠤᠬᠤ ᠳ᠋ᠤ᠌ ᠨᠢᠳᠦ ᠨᠢ ᠣᠩᠭᠣᠢᠵᠤ ᠪᠤᠯᠴᠢᠩ ᠰᠢᠷᠪᠥᠰᠥ ᠨᠢ ᠴᠢᠩᠭᠠᠷᠠᠬᠤ ᠰᠢᠭ᠋ ᠪᠣᠯᠪᠠ᠃ ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ《ᠥᠨᠥᠳᠥᠷ ᠪᠢ ᠨᠢᠭᠡ ᠷᠠᠰᠢᠶᠠᠨ ᠣᠯᠤᠭᠠᠳ ᠤᠤᠭᠤᠴᠢᠬᠠᠯᠠ᠂ ᠬᠤᠷᠳᠤᠨ ᠶᠠᠪᠤᠵᠤ᠂ ᠬᠠᠨᠢ ᠬᠠᠮᠰᠠᠭᠠᠲᠠᠨ ᠳ᠋ᠠᠭᠠᠨ ᠴᠢᠮᠡᠭᠡ ᠥᠭᠭᠦᠶᠡ! ᠡᠨᠡ ᠰᠠᠢᠬᠠᠨ ᠠᠭᠤᠯᠠ ᠲᠠᠢ ᠤᠰᠤ ᠲᠠᠢ ᠨᠤᠲᠤᠭ ᠲᠤ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠥᠲᠡᠯᠥᠰᠢ ᠦᠭᠡᠢ ᠮᠥᠩᠬᠡᠷᠡᠬᠦ ᠶᠦᠮ ᠪᠠᠢᠨᠠ᠁》 ᠭᠡᠵᠦ ᠬᠣᠯᠠ ᠶ᠋ᠢᠨ ᠰᠠᠢᠬᠠᠨ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠭᠰᠠᠭᠠᠷ ᠥᠨᠳᠥᠷ ᠰᠢᠭ ᠳᠡᠨᠵᠢᠨ ᠳᠡᠭᠡᠷᠡ ᠭᠠᠷᠴᠤ᠄
— ᠬᠥᠶᠢ! ᠲᠠᠨᠤᠰ ᠠ᠋᠂ ᠪᠤᠰᠢᠭᠤᠬᠠᠨ᠃ ᠡᠨᠳᠡ ᠷᠠᠰᠢᠶᠠᠨ ᠪᠠᠢᠨᠠ ᠃ ᠢᠷᠡᠵᠦ ᠤᠤᠭᠤᠵᠠᠭᠠ! ᠭᠡᠵᠦ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠨᠠ᠃
ᠶᠠᠮᠠᠷ ᠴᠦ᠍ ᠠᠮᠢᠲᠠᠨ ᠭᠡᠳ ᠥᠪᠡᠷ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠣᠢᠯᠠᠭᠠᠯᠴᠠᠬᠤ ᠬᠡᠯᠡ ᠳᠣᠬᠢᠶᠠ ᠲᠠᠢ ᠪᠠᠢᠳᠠᠭ ᠬᠣᠢᠨᠠ ᠲᠦᠳᠡᠯ ᠦᠭᠡᠢ ᠣᠯᠠᠨ ᠰᠢᠷᠭᠤᠯᠵᠢ ᠵᠦᠭ ᠵᠦᠭ ᠡᠴᠡ ᠡᠷᠪᠡᠭᠡᠨᠡᠵᠦ ᠠᠢᠰᠤᠢ᠃ ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠶ᠋ᠢᠨ ᠠᠢᠮᠠᠭ᠂ ᠮᠣᠳᠣᠨ ᠤ᠋ ᠲᠡᠮᠦᠷ ᠬᠦᠷᠡᠩ ᠰᠢᠷᠭᠤᠯᠵᠢ ᠶ᠋ᠢᠨ ᠠᠢᠮᠠᠭ᠂ ᠭᠠᠵᠠᠷ ᠤ᠋ᠨ ᠬᠠᠷᠠ ᠰᠢᠷᠭᠤᠯᠵᠢ ᠶ᠋ᠢᠨ ᠠᠢᠮᠠᠭ ᠤ᠋ᠳ ᠴᠤᠪᠤᠯᠳᠤᠵᠤ ᠡᠨᠡ ᠭᠠᠩᠭᠠᠩ ᠰᠠᠢᠬᠠᠨ ᠠᠭᠤᠯᠠ ᠶ᠋ᠢ ᠴᠥᠯᠪᠡᠵᠦ ᠡᠬᠢᠯᠡᠪᠡ᠃ ᠭᠠᠵᠠᠷ ᠤ᠋ᠨ ᠬᠠᠷᠠ ᠰᠢᠷᠭᠤᠯᠵᠢ ᠨᠤᠭᠤᠳ ᠰᠡᠷᠪᠡᠩ ᠦ᠋ᠨ ᠬᠣᠶᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠤᠭᠯᠠᠷᠠᠵᠤ《ᠡᠨᠡ ᠳᠣᠣᠷᠠ ᠡᠷᠳᠡᠨᠢ ᠪᠤᠯᠠᠭᠳᠠᠵᠤ ᠪᠣᠢ 》ᠭᠡᠳ ᠵᠠᠷᠢᠮ ᠨᠢ ᠮᠣᠨᠴᠣᠭ ᠱᠣᠷᠣᠩ ᠣᠷᠣᠢ ᠳᠡᠭᠡᠷᠡ ᠨᠢ ᠭᠠᠷᠤᠭᠠᠳ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ ᠮᠡᠷᠡᠨᠡ᠃ ᠵᠠᠷᠢᠮ ᠨᠢ ᠳᠣᠪᠣᠴᠠᠭ ᠤ᠋ᠨ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ《ᠬᠦᠷᠵᠡ ᠵᠡᠭᠡᠲᠦᠦ》 ᠡᠷᠭᠢᠭᠦᠯᠦᠨ ᠮᠠᠯᠲᠠᠨᠠ᠁
ᠮᠣᠳᠣᠨ ᠤ᠋ ᠲᠡᠮᠦᠷ ᠰᠢᠷᠭᠤᠯᠵᠢ ᠨᠤᠭᠤᠳ ᠪᠤᠲᠠ ᠪᠤᠷᠭᠠᠰᠤ ᠲᠠᠢ ᠰᠢᠭᠤᠢ ᠪᠠ ᠬᠠᠭᠤᠷᠠᠢ ᠬᠤᠳᠳᠤᠭ ᠤ᠋ᠨ ᠳᠡᠨᠵᠢᠨ ᠳᠡᠭᠡᠭᠦᠷ ᠬᠠᠢᠨ ᠰᠢᠨᠵᠢᠯᠡᠵᠦ ᠰᠢᠮᠡ ᠬᠥᠭᠡᠭᠡᠴᠡᠯᠳᠦᠵᠡᠭᠡᠨᠡ᠃
ᠬᠠᠳᠠᠨ ᠤ᠋ ᠤᠯᠠᠭᠠᠨ ᠰᠢᠷᠭᠤᠯᠵᠢ ᠨᠤᠭᠤᠳ ᠠᠢᠮᠠᠭ ᠲᠥᠷᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠢ ᠰᠠᠢᠨ ᠭᠠᠵᠠᠷ ᠢ᠋ ᠨᠢ ᠣᠯᠵᠤ᠂ ᠬᠠᠪᠴᠢᠭ ᠠᠭᠤᠢ ᠠ᠋ᠴᠠ ᠣᠨᠳᠣᠷᠣᠭᠰᠠᠨ ᠷᠠᠰᠢᠶᠠᠨ ᠠ᠋ᠴᠠ ᠨᠢ ᠠᠮᠰᠠᠨ ᠲᠠᠮᠰᠢᠶᠠᠯᠠᠵᠤ᠂ ᠵᠠᠮᠠᠭᠲᠤ ᠨᠣᠭᠣᠭᠠᠨ ᠢᠷᠮᠡᠭ ᠢ᠋ᠶ᠋ᠡᠷ ᠨᠢ ᠵᠣᠷᠴᠢᠵᠤ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠣᠯᠵᠤ ᠮᠠᠷᠠᠮᠠᠷ ᠰᠠᠨᠠᠭᠳᠠᠬᠤ ᠳ᠋ᠠᠭᠠᠨ ᠪᠠᠰᠠ ᠴᠠᠭᠠᠰᠢ ᠰᠢᠨᠵᠢᠯᠡᠨ ᠬᠠᠢᠵᠤ ᠶᠠᠪᠤᠪᠠ᠃ ᠨᠢᠭᠡ ᠬᠡᠳᠦ ᠨᠢ ᠠᠭᠤᠢ ᠶ᠋ᠢᠨ ᠳᠣᠲᠣᠷᠠᠬᠢ ᠶ᠋ᠢ ᠥᠩᠭᠡᠢᠵᠦ ᠦᠵᠡᠴᠢᠬᠡᠭᠡᠳ ᠬᠡᠯᠡ ᠰᠢᠭ ᠪᠤᠯᠲᠠᠢᠭᠰᠠᠨ ᠱ᠌ᠢᠷᠦᠨ ᠤᠯᠠᠭᠠᠨ ᠴᠢᠯᠠᠭᠤ ᠶ᠋ᠢ ᠨᠢ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠮᠡᠷᠡᠵᠦ ᠡᠬᠢᠯᠡᠪᠡ᠁
᠁ ᠱᠠᠯᠳᠠᠩ ᠪᠦᠰᠡᠭᠦᠢ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠨᠢ ᠡᠷᠪᠡᠭᠡᠨᠡᠨ ᠵᠠᠭᠠᠲᠤᠨᠠᠬᠤᠯᠠ ᠲᠡᠭᠦᠨ ᠳ᠋ᠦ᠍ ᠰᠣᠭᠲᠣᠭᠤᠷᠠᠨ ᠢᠷᠠᠭᠯᠠᠵᠤ᠂ ᠪᠡᠯᠬᠡᠭᠦᠰᠦ ᠪᠡᠷ ᠢ᠋ᠶ᠋ᠡᠨ ᠬᠣᠲᠣᠯᠵᠠᠬᠤ ᠳ᠋ᠤ᠌ ᠪᠠᠷᠢᠴᠠ ᠮᠠᠭᠤᠲᠠᠢ ᠪᠠᠢᠭᠰᠠᠨ ᠰᠢᠷᠭᠤᠯᠵᠢ ᠨᠤᠭᠤᠳ ᠠᠭᠤᠯᠠ ᠬᠠᠳᠠᠨ ᠳᠡᠭᠡᠷᠡ ᠡᠴᠡ ᠬᠠᠯᠲᠤᠷᠢᠵᠤ ᠣᠢᠴᠢᠨᠠ᠃
ᠱᠠᠯᠳᠠᠩ ᠪᠦᠰᠡᠭᠦᠢ ᠨᠢᠭᠡ ᠬᠡᠰᠡᠭ ᠢᠷᠠᠭᠯᠠᠭᠠᠳ ᠬᠥᠪᠥᠩ ᠳᠡᠭᠡᠭᠦᠷ ᠬᠥᠪᠦᠯᠵᠡᠬᠦ ᠰᠢᠭ ᠲᠠᠰᠢᠭᠤᠷᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠪᠦᠬᠦ ᠪᠡᠶᠡ ᠨᠢ ᠵᠢᠮᠵᠢᠭᠢᠨᠡᠨ ᠡᠪᠡᠳᠪᠡ᠃
ᠨᠢᠭᠡᠨ ᠡᠳᠦᠷ ᠬᠠᠮᠢᠭᠠ ᠭᠠᠵᠠᠷ ᠠ᠋ᠴᠠ ᠣᠭᠣᠲᠣᠷ ᠣᠭᠣᠲᠣᠷ ᠬᠠᠷᠠ ᠡᠮᠦᠰᠬᠡᠯ ᠲᠡᠢ᠂ ᠰᠢᠷᠬᠤᠨᠠᠭ ᠢ᠋ᠶ᠋ᠠᠨ ᠪᠣᠭᠣᠭᠰᠠᠨ ᠬᠥᠮᠦᠰ ᠴᠢᠭᠢᠭ ᠦ᠋ᠨ ᠰᠢᠷᠭᠤᠯᠵᠢ ᠰᠢᠭ᠋ ᠠᠭᠤᠯᠠ ᠪᠦᠷᠬᠦᠨ ᠪᠡᠯᠴᠢᠨᠡ᠁ ᠵᠠᠷᠢᠮ ᠨᠢ ᠰᠦᠬᠡ ᠴᠠᠪᠴᠢᠭᠤᠷ ᠰᠦᠢᠷᠡᠵᠦ᠂ ᠵᠠᠷᠢᠮ ᠨᠢ ᠬᠦᠷᠵᠡ ᠵᠡᠭᠡᠲᠦᠦ ᠮᠥᠷᠥᠯᠡᠵᠦ᠂ ᠵᠠᠷᠢᠮ ᠨᠢ ᠬᠡᠦᠳᠡᠢ ᠰᠢᠭᠤᠳᠠᠢ ᠡᠭᠦᠷᠦᠨ ᠥᠨᠳᠥᠷ ᠮᠤᠨᠠ ᠶ᠋ᠢᠨ ᠬᠣᠷᠮᠣᠢ ᠠ᠋ᠴᠠ ᠵᠦᠯᠭᠡ ᠲᠡᠢ ᠨᠤᠭᠤ᠂ ᠮᠣᠳᠣ ᠲᠠᠢ ᠡᠩᠭᠡᠷ᠂ ᠬᠠᠳᠠ ᠲᠠᠢ ᠠᠭᠤᠯᠠ ᠤᠷᠤᠭᠤ ᠴᠡᠷᠢᠭᠯᠡᠨ ᠠᠢᠰᠤᠢ᠁
ᠲᠡᠳᠡᠭᠡᠷ ᠰᠢᠷᠭᠤᠯᠵᠢ ᠰᠢᠭ᠋ ᠬᠠᠷᠠ ᠴᠡᠷᠢᠭ ᠦ᠋ᠳ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠮᠣᠳᠣ ᠲᠦᠯᠡᠭᠡ ᠶ᠋ᠢ ᠣᠭᠲᠣᠯᠵᠤ ᠡᠭᠦᠷᠳᠡᠭ ᠨᠢ ᠡᠭᠦᠷᠴᠦ᠂ ᠴᠢᠷᠳᠡᠭ ᠨᠢ ᠴᠢᠷᠴᠦ ᠡᠯᠵᠢᠭᠡᠨ ᠬᠠᠰᠠᠭ ᠠᠴᠢᠶᠠ ᠬᠥᠰᠬᠡ ᠪᠡᠷ ᠬᠡᠷᠡᠭᠴᠡᠭᠡᠲᠡᠢ ᠭᠠᠵᠠᠷ ᠤᠷᠤᠭᠤ ᠪᠠᠨ ᠮᠤᠨᠠ ᠶ᠋ᠢᠨ ᠬᠡᠰᠢᠭ ᠢ᠋ ᠵᠥᠭᠡᠭᠡᠵᠦ ᠶᠠᠭᠠᠷᠠᠯᠳᠤᠨᠠ᠃ ᠵᠠᠷᠢᠮᠠᠳ ᠨᠢ ᠲᠡᠮᠦᠷ ᠴᠠᠷᠢᠯ᠂ ᠯᠠᠩᠲᠤᠤ ᠵᠡᠭᠡᠲᠦᠦ ᠪᠡᠷ ᠬᠠᠳᠠ ᠴᠢᠯᠠᠭᠤ ᠶ᠋ᠢ ᠨᠢ ᠬᠠᠭᠠᠯᠵᠤ ᠪᠠᠯᠪᠠᠴᠢᠨᠠ᠃ ᠪᠠᠷᠵᠠᠢᠭᠰᠠᠨ ᠬᠠᠯᠢᠰᠤᠯᠢᠭ ᠬᠠᠳᠠᠨ ᠤ᠋ ᠭᠠᠳᠠᠷᠭᠤ ᠶ᠋ᠢ ᠨᠢ ᠬᠠᠭᠤᠯᠵᠤ ᠬᠠᠶᠠᠴᠢᠬᠠᠭᠠᠳ ᠳᠣᠲᠣᠷᠠ ᠠ᠋ᠴᠠ ᠨᠢ ᠪᠢᠳᠤᠷᠢᠶᠠᠨ ᠬᠥᠬᠡ ᠪᠤᠶᠤ ᠨᠣᠭᠣᠭᠠᠪᠲᠣᠷ ᠭᠢᠯᠲᠠᠭᠠᠨᠠᠮᠠ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠬᠡᠰᠡᠭᠯᠡᠵᠦ ᠠᠪᠤᠭᠠᠳ ᠬᠡᠳᠦ ᠬᠡᠳᠦᠭᠦᠯᠡ ᠪᠡᠨ ᠳᠠᠮᠨᠠᠵᠤ ᠬᠢ ᠬᠢ ᠬᠠ ᠬᠠ ᠢᠨᠢᠶᠡᠯᠴᠡᠵᠡᠭᠡᠨᠠ᠁ ᠲᠡᠭᠡᠭᠡᠳ ᠥᠨᠥᠬᠢ ᠨᠦ᠍ᠭᠦᠳ ᠨᠢ ᠠᠮᠲᠠᠰᠢᠭᠰᠠᠨ ᠬᠡᠷᠢᠶᠡ ᠠᠷᠪᠠ ᠳᠠᠭᠢᠪᠠ ᠭᠡᠭᠴᠢ ᠪᠡᠷ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠬᠠᠵᠠᠭᠤ᠂ ᠬᠥᠲᠥᠯ ᠳᠠᠪᠠᠭᠠ᠂ ᠭᠠᠩᠭᠠ ᠵᠢᠯᠠᠭᠠ ᠪᠦᠭᠦᠳᠡ ᠶ᠋ᠢ ᠬᠢᠷᠭᠠᠨ ᠪᠠᠢᠴᠠᠭᠠᠵᠤ ᠰᠢᠷᠠ ᠠᠯᠲᠠ᠂ ᠬᠠᠷᠠ ᠨᠡᠭᠦᠷᠡᠰᠦ᠂ ᠵᠡᠰ ᠭᠠᠤᠯᠢ᠂ ᠲᠡᠮᠦᠷ ᠴᠠᠢᠷ᠂ ᠭᠢᠯᠲᠠᠭᠠᠨᠠᠭᠤᠷ᠁ ᠵᠡᠷᠭᠡ ᠡᠷᠳᠡᠨᠢᠰ ᠦ᠋ᠨ ᠪᠤᠯᠠᠭᠳᠠᠴᠠ ᠶ᠋ᠢ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠡᠦᠬᠡᠨ ᠴᠠᠭᠠᠨ ᠪᠡᠶᠡ ᠡᠴᠡ ᠨᠢ ᠰᠣᠴᠢᠭᠠᠨ ᠴᠥᠯᠪᠡᠵᠦ ᠡᠬᠢᠯᠡᠪᠡ᠃ ᠪᠠᠰᠠ ᠵᠠᠷᠢᠮᠠᠳ ᠨᠢ ᠪᠤᠭᠤ ᠰᠤᠭᠤ᠂ ᠭᠤᠷᠠ ᠵᠦᠷ᠂ ᠢᠷᠪᠢᠰ ᠴᠢᠨᠣᠠ᠂ ᠦᠨᠡᠭᠡ ᠬᠢᠷᠰᠠ᠂ ᠲᠠᠤᠯᠠᠢ ᠲᠠᠷᠪᠠᠭᠠ᠂ ᠪᠤᠯᠠᠭᠠ ᠬᠡᠷᠡᠮᠦ ᠶ᠋ᠢ ᠬᠦᠷᠲᠡᠯᠡ ᠠᠩᠨᠠᠵᠤ᠂ ᠡᠮᠲᠦ ᠡᠪᠡᠰᠦ ᠤᠷᠭᠤᠮᠠᠯ ᠢ᠋ ᠨᠢ ᠦᠨᠳᠦᠰᠦ ᠪᠡᠷ ᠨᠢ ᠮᠠᠯᠲᠠᠵᠤ᠂ ᠴᠡᠩᠭᠡᠭ ᠲᠤᠩᠭᠠᠯᠠᠭ ᠪᠤᠯᠠᠭ ᠤ᠋ᠨ ᠤᠰᠤ ᠶ᠋ᠢ ᠨᠢ ᠬᠦᠷᠲᠡᠯᠡ ᠰᠢᠪᠬᠠᠵᠤ ᠰᠢᠪᠠᠷ ᠪᠠᠯᠴᠢᠭ ᠪᠣᠯᠭᠠᠨ ᠪᠤᠷᠵᠠᠩᠲᠤᠭᠤᠯᠳᠠᠭ ᠨᠢ ᠵᠠᠨᠤᠯᠲᠠᠢ᠃
ᠰᠢᠷᠭᠤᠯᠵᠢ ᠭᠡᠳᠡᠭ ᠠᠮᠢᠲᠠᠨ ᠬᠡᠴᠡᠭᠦᠦ ᠶᠦᠮ ᠠ᠋! ᠰᠦᠷᠦᠭᠯᠡᠵᠦ ᠢᠷᠡᠭᠡᠳ ᠨᠢᠭᠡ ᠶᠠᠭᠤᠮᠠ ᠤᠷᠤᠭᠤ ᠰᠢᠪᠠᠯᠴᠠᠭᠰᠠᠭᠠᠷ ᠳᠣᠣᠷᠠ ᠨᠢ ᠤᠯᠠᠭᠠᠨ ᠴᠠᠭᠠᠨ ᠢ᠋ ᠨᠢ ᠢᠯᠭᠠᠷᠠᠭᠤᠯᠴᠢᠬᠠᠨᠠ᠃
ᠮᠤᠨᠠ ᠬᠠᠨ ᠤ᠋ ᠬᠡᠰᠢᠭ ᠢ᠋ ᠢᠩᠭᠢᠵᠦ ᠦᠷᠡᠬᠡᠵᠦ ᠰᠦᠢᠳᠬᠡᠯᠡ᠁
ᠥᠨᠳᠥᠷ ᠮᠤᠨᠠ ᠶ᠋ᠢᠨ ᠲᠣᠯᠣᠭᠠᠢ ᠣᠷᠣᠢ ᠠ᠋ᠴᠠ ᠪᠠᠨ ᠬᠠᠯᠵᠠᠷᠠᠵᠤ᠂ ᠬᠠᠷᠠ ᠰᠢᠷᠭᠤᠯᠵᠢ ᠶ᠋ᠢᠨ ᠲᠠᠯᠬᠢᠳᠠᠯ ᠢ᠋ᠶ᠋ᠠᠷ ᠬᠠᠮᠠᠷ ᠬᠠᠳᠬᠤᠬᠤ ᠡᠪᠡᠰᠦ ᠦᠭᠡᠢ ᠪᠣᠯᠵᠤ᠂ ᠬᠠᠨᠳᠠᠭᠠᠢ ᠪᠤᠭᠤ᠂ ᠬᠠᠮᠤᠭ ᠠᠮᠢᠲᠠᠨ ᠭᠥᠷᠥᠭᠡᠰᠦ ᠨᠦ᠍ᠭᠦᠳ ᠭᠠᠵᠠᠷ ᠤ᠋ᠨ ᠠᠩ ᠰᠢᠷᠭᠤᠴᠢᠬᠠᠭᠰᠠᠨ ᠰᠢᠭ᠋ ᠣᠷᠣ ᠲᠠᠰᠤ ᠠᠯᠠᠭᠠ ᠪᠣᠯᠵᠤ᠂ ᠵᠤᠷᠠᠮᠠ ᠬᠤᠯᠤᠭᠠᠨᠠ ᠠ᠋ᠴᠠ ᠥᠭᠡᠷᠡ ᠠᠮᠢᠲᠠᠨ ᠤ᠋ ᠪᠠᠷᠠ ᠦᠭᠡᠢ ᠪᠣᠯᠵᠠᠢ᠃
ᠤᠯᠠᠭᠠᠨ ᠬᠦᠷᠡᠩ ᠬᠠᠳᠠᠨ ᠤ᠋ ᠴᠢᠳᠬᠤᠯᠠᠩ ᠤ᠋ᠨ ᠤᠰᠤ ᠲᠠᠲᠠᠷᠠᠵᠤ ᠴᠣᠩᠬᠢᠶᠠᠯ ᠤ᠋ᠨ ᠴᠡᠩᠬᠡᠷ ᠤᠰᠤ ᠴᠦ᠍ ᠰᠢᠷᠭᠢᠨ ᠬᠠᠲᠠᠪᠠ᠁
ᠱᠠᠯᠳᠠᠩ ᠪᠦᠰᠡᠭᠦᠢ ᠭᠡᠨᠡᠳᠲᠡ ᠬᠣᠭᠣᠯᠠᠢ ᠨᠢ ᠬᠠᠲᠠᠵᠤ ᠤᠮᠳᠠᠭᠠᠰᠬᠤ ᠳ᠋ᠠᠭᠠᠨ ᠪᠣᠰᠴᠤ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠠ᠋ᠴᠠ ᠨᠢᠭᠡ ᠣᠭᠣᠴᠢ ᠴᠦ᠍ ᠤᠤᠭᠤᠵᠤ ᠤᠲᠤᠭᠠ ᠤᠭᠤᠭᠢᠭᠰᠠᠨ ᠬᠣᠭᠣᠯᠠᠢ ᠪᠠᠨ ᠨᠢᠭᠡ ᠨᠣᠷᠭᠠᠵᠤ ᠠᠪᠤᠶᠠ ᠭᠡᠬᠦᠯᠡᠷ ᠳᠥᠷᠪᠡᠨ ᠮᠥᠴᠢ ᠨᠢ ᠬᠦᠯᠢᠶᠡᠰᠦᠲᠡᠢ᠂ ᠶᠠᠭᠠᠬᠢᠪᠠᠴᠤ ᠪᠣᠰᠴᠤ ᠳᠡᠢᠯᠬᠦ ᠦᠭᠡᠢ᠃ ᠪᠣᠰᠤᠶᠠ ᠭᠡᠵᠦ ᠲᠡᠯᠴᠢᠯᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠬᠥᠳᠡᠯᠵᠦ ᠡᠰᠡ ᠴᠢᠳᠠᠨᠠ᠃ ᠪᠦᠬᠦ ᠪᠡᠶᠡ ᠶ᠋ᠢ ᠨᠢ ᠬᠠᠪᠲᠠᠭᠠᠢ ᠬᠠᠳᠠᠨ ᠳᠡᠭᠡᠷᠡ ᠬᠠᠲᠠᠴᠢᠬᠠᠭᠰᠠᠨ ᠮᠡᠲᠦ ᠪᠠᠢᠪᠠ᠃ ᠪᠠᠰᠠ ᠮᠢᠩᠭᠠ ᠲᠦᠮᠡᠨ ᠵᠡᠭᠦᠦ ᠪᠡᠷ ᠰᠢᠪᠡᠬᠦ ᠰᠢᠭ ᠵᠢᠮᠵᠢᠭᠢᠨᠡᠨ ᠡᠪᠡᠳᠦᠨᠡ᠃ ᠬᠠᠮᠢᠭᠠ ᠨᠢᠭᠡ ᠨᠢᠭᠤᠴᠠᠭᠠᠢ ᠡᠮᠵᠡᠭ ᠭᠠᠵᠠᠷ ᠨᠢ ᠵᠥᠭᠡᠢ ᠬᠠᠳᠬᠤᠬᠤ ᠰᠢᠭ᠋ ᠵᠢᠷᠳ᠋ ᠬᠢᠨ《ᠶᠣ᠁》 ᠭᠡᠵᠦ ᠱᠠᠯᠳᠠᠩ ᠪᠦᠰᠡᠭᠦᠢ ᠰᠣᠴᠢᠨ ᠰᠡᠷᠡᠪᠡ᠃
ᠪᠦᠬᠦ ᠪᠡᠶᠡ ᠳᠡᠭᠡᠭᠦᠷ ᠨᠢ ᠰᠢᠷᠭᠤᠯᠵᠢ ᠪᠦᠷᠬᠦᠵᠦ ᠡᠭᠡᠭᠡ ᠯᠡ ᠲᠣᠣᠷ ᠤ᠋ᠨ ᠬᠠᠷᠠ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠮᠡᠲᠦ ᠡᠷᠢᠶᠡᠨ ᠴᠣᠬᠣᠷ ᠪᠡᠶᠡ ᠪᠡᠨ ᠬᠠᠷᠠᠭᠠᠳ《ᠢᠯᠡᠢ ᠠ᠋! ᠪᠦᠦ ᠦᠵᠡᠭᠳᠡᠭᠡᠰᠡᠢ! ᠮᠠᠭᠤ ᠰᠠᠢᠨ ᠰᠢᠷᠭᠤᠯᠵᠢ ᠨᠤᠭᠤᠳ ᠢ᠋ ᠬᠣᠬᠣᠢ》 ᠭᠡᠳ ᠰᠢᠷᠭᠤᠯᠵᠢ ᠨᠤᠭᠤᠳ ᠢ᠋ ᠤᠨᠠᠭᠠᠬᠤ ᠭᠡᠳ ᠰᠡᠭᠰᠦᠷᠦᠭᠰᠡᠨ ᠳ᠋ᠦ᠍ ᠰᠢᠪᠦᠭᠡᠨ ᠬᠣᠰᠢᠭᠤ ᠪᠠᠨ ᠬᠡᠦᠬᠡᠨ ᠴᠠᠭᠠᠨ ᠪᠡᠶᠡ ᠳ᠋ᠦ᠍ᠨᠢ ᠰᠢᠭᠢᠳᠬᠡᠭᠰᠡᠨ ᠰᠢᠷᠭᠤᠯᠵᠢ ᠨᠤᠭᠤᠳ ᠤᠨᠠᠳᠠᠭ ᠶᠠᠭᠤᠮᠠ ᠪᠢᠰᠢ᠃
— ᠬᠠᠮᠢᠭᠠ ᠠ᠋ᠴᠠ ᠡᠢᠮᠦ ᠣᠯᠠᠨ ᠢᠷᠣᠠ ᠶ᠋ᠢᠨ ᠰᠢᠷᠭᠤᠯᠵᠢ ᠪᠡᠶᠡ ᠳᠡᠭᠡᠷᠡ ᠰᠢᠪᠠᠴᠢᠬᠠᠪᠠ⁈ ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠭᠰᠠᠨ ᠳ᠋ᠤ᠌᠂
— ᠰᠠᠶᠢᠬᠠᠨ ᠴᠢ ᠶᠠᠭᠤ ᠭᠡᠵᠦ ᠵᠡᠭᠦᠳᠦᠯᠡᠪᠡ? ᠭᠡᠵᠦ ᠬᠡᠢ ᠠᠭᠠᠷ ᠳᠡᠭᠡᠷᠡ ᠡᠴᠡ ᠨᠢᠭᠡ ᠬᠥᠮᠦᠨ ᠢᠩᠭᠢᠵᠦ ᠠᠰᠠᠭᠤᠪᠠ᠃
— ᠬᠠᠷᠠ ᠰᠢᠷᠭᠤᠯᠵᠢ ᠶ᠋ᠢᠨ ᠰᠦᠷᠦᠭ ᠴᠦ᠍ ᠰᠢᠭ᠂ ᠬᠥᠮᠦᠨ ᠴᠦ᠍ ᠰᠢᠭ ᠶᠠᠭᠤᠮᠠᠰ ᠠᠷᠵᠠᠭᠠᠨᠠᠨ ᠮᠤᠨᠠ ᠠᠭᠤᠯᠠ ᠶ᠋ᠢ ᠪᠦᠷᠬᠦᠨ ᠴᠥᠯᠪᠡᠵᠦ ᠪᠣᠢ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ᠁
— ᠶᠠᠭ ᠮᠥᠨ! ᠲᠤᠩ ᠮᠠᠭᠤ ᠢᠷᠣᠠ ᠶ᠋ᠢᠨ ᠵᠡᠭᠦᠳᠦ ᠪᠤᠶᠤ! ᠬᠡᠳᠦᠨ ᠠᠷᠪᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠴᠢᠨᠦ ᠡᠨᠡ ᠵᠡᠭᠦᠳᠦ ᠴᠢᠨᠢ ᠮᠥᠨ ᠲᠡᠭᠡᠵᠦ ᠢᠷᠣᠠ ᠶ᠋ᠢᠨ ᠮᠠᠭᠤ ᠶᠠᠭᠤᠮᠠ ᠪᠣᠯᠵᠤ ᠭᠦᠢᠴᠡᠨᠡ ᠠ᠋! ᠲᠡᠷᠡ ᠬᠠᠷᠠ ᠰᠢᠷᠭᠤᠯᠵᠢ ᠨᠤᠭᠤᠳ ᠬᠡᠳᠦᠨ ᠰᠠᠶᠠ ᠪᠤᠮ ᠢ᠋ᠶ᠋ᠠᠷ ᠦᠷᠡᠵᠢᠨ ᠪᠤᠵᠠᠭᠠᠢᠷᠠᠵᠤ ᠦᠶᠡᠷ ᠦ᠋ᠨ ᠪᠤᠷᠵᠠᠩ ᠲᠠᠢ ᠤᠰᠤ ᠰᠢᠭ᠋ ᠮᠤᠨᠠ ᠠᠭᠤᠯᠠ ᠶ᠋ᠢ ᠴᠢᠨᠢ ᠪᠦᠬᠦᠯᠢ ᠪᠡᠷ ᠵᠠᠯᠭᠢᠨᠠ᠃ ᠲᠠᠯᠠ ᠨᠢ ᠮᠠᠩᠬᠠᠷᠠᠵᠤ᠂ ᠤᠰᠤ ᠨᠢ ᠬᠠᠲᠠᠵᠤ᠂ ᠠᠭᠤᠯᠠ ᠨᠢ ᠬᠤᠪᠠᠬᠠᠢᠷᠠᠨ᠂ ᠡᠪᠡᠰᠦ ᠤᠷᠭᠤᠮᠠᠯ ᠨᠢ ᠦᠨᠳᠦᠰᠦ ᠪᠡᠷ ᠢ᠋ᠶ᠋ᠡᠨ ᠦᠵᠢᠷᠡᠵᠦ᠂ ᠬᠠᠳᠠ᠂ ᠴᠢᠯᠠᠭᠤ ᠨᠢ ᠬᠣᠯᠲᠣᠷᠠᠵᠤ ᠤᠨᠠᠭᠰᠠᠭᠠᠷ ᠪᠠᠢᠵᠤ ᠡᠯᠡᠰᠦᠨ ᠳᠣᠪᠣᠴᠠᠭ ᠪᠣᠯᠵᠤ ᠥᠨᠥᠴᠢᠷᠡᠨᠡ᠃ ᠠᠶᠠ ᠦᠭᠡᠢᠳᠡᠪᠡᠯ ᠨᠠᠷᠠᠨ ᠤ᠋ ᠣᠢᠯᠲᠠ ᠳ᠋ᠤ᠌ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠡᠴᠡ ᠭᠠᠯ ᠤᠭᠤᠭᠢᠵᠤ ᠬᠠᠷᠠ ᠰᠢᠷᠭᠤᠯᠵᠢ ᠣᠷᠣᠩᠨᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠵᠤ ᠥᠪᠡᠷ ᠦ᠋ᠨ ᠮᠠᠭᠤ ᠳ᠋ᠠᠭᠠᠨ ᠰᠢᠳᠡᠵᠦ ᠦᠬᠦᠨᠡ᠁ ᠬᠤᠷᠮᠤᠰᠲᠠ ᠲᠩᠷᠢ᠂ ᠬᠠᠨ ᠮᠤᠨᠠ ᠶ᠋ᠢᠨ ᠡᠵᠡᠨ ᠴᠦ᠍ ᠬᠠᠷᠠᠮᠰᠠᠭᠠᠳ ᠬᠣᠴᠣᠷᠤᠨᠠ᠃ ᠳᠡᠮᠡᠢ ᠯᠡ ᠬᠣᠭᠣᠰᠣᠨ ᠰᠡᠭᠦᠷᠡᠰᠦ ᠠᠯᠳᠠᠨᠠ᠃ ᠯᠤᠤᠰ ᠤ᠋ᠨ ᠬᠠᠭᠠᠨ ᠤ᠋ ᠪᠦᠷᠢᠯᠸᠠ ᠴᠦ᠍ ᠤᠬᠢᠯᠠᠬᠤ ᠨᠢᠯᠪᠤᠰᠤ ᠦᠭᠡᠢ ᠡᠯᠡᠰᠦ ᠮᠠᠩᠬᠠ ᠪᠠᠷ ᠪᠣᠷᠣᠭᠠᠯᠠᠵᠤ᠂ ᠡᠷᠭᠢᠭᠦᠦ ᠬᠠᠷᠠ ᠲᠡᠷᠢᠭᠦᠲᠡᠨ᠂ ᠰᠢᠷᠭᠤᠯᠵᠢ ᠨᠤᠭᠤᠳ ᠢ᠋ ᠪᠤᠯᠠᠰᠢᠯᠠᠵᠤ ᠬᠠᠶᠠᠨᠠ᠁ ᠡᠨᠡ ᠪᠣᠯ ᠪᠠᠢᠭᠠᠯᠢ ᠶ᠋ᠢᠨ ᠵᠢᠮᠡ ᠶ᠋ᠢ ᠲᠡᠷᠰᠯᠡᠵᠦ ᠡᠷᠭᠢᠭᠦᠲᠦᠭᠰᠡᠨ ᠬᠥᠮᠦᠨ ᠲᠡᠷᠢᠭᠦᠲᠡᠨ ᠦ᠌ ᠵᠣᠷᠢᠭᠰᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠲᠡᠭᠦᠰᠬᠡᠯ ᠮᠥᠨ! ᠭᠡᠵᠦ ᠬᠡᠢ ᠠᠭᠠᠷ ᠤ᠋ᠨ ᠳᠣᠯᠭᠢᠶᠠᠨ ᠠ᠋ᠴᠠ ᠲᠤᠷᠭᠢᠭᠰᠠᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠱᠠᠯᠳᠠᠩ ᠪᠦᠰᠡᠭᠦᠢ ᠭᠡᠯᠮᠡᠵᠦ᠄
— ᠣᠳᠣ ᠶᠠᠭᠠᠬᠢᠨᠠ ᠪᠣᠢ? ᠭᠡᠰᠡᠨ ᠳ᠋ᠦ᠍᠂
— ᠴᠢᠨᠦ ᠣᠷᠴᠢᠯ ᠠᠮᠢᠳᠤᠷᠠᠯ ᠤ᠋ᠨ ᠬᠥᠭ ᠲᠦ᠍ ᠴᠢᠨᠢ ᠭᠠᠢᠭᠤᠢ ᠪᠠᠢᠬᠠ! ᠬᠠᠷᠢᠨ ᠬᠤᠷᠳᠤᠨ ᠶᠠᠪᠤᠵᠤ ᠴᠣᠩᠬᠢᠶᠠᠯ ᠤ᠋ᠨ ᠴᠡᠩᠬᠡᠷ ᠤᠰᠤᠨ ᠳ᠋ᠠᠭᠠᠨ ᠤᠮᠪᠠᠵᠤ ᠪᠡᠶᠡ ᠳᠡᠭᠡᠷᠡᠬᠢ ᠰᠢᠷᠭᠤᠯᠵᠢ ᠨᠤᠭᠤᠳ ᠢ᠋ᠶ᠋ᠠᠨ ᠦᠭᠡᠢ ᠬᠢᠵᠦ ᠣᠷᠭᠢ! ᠶᠠᠪᠤ᠂ ᠶᠠᠪᠤ! ᠪᠤᠰᠢᠭᠤᠬᠠᠨ᠁ ᠴᠢᠨᠦ ᠬᠡᠦᠬᠡᠨ ᠪᠡᠶᠡ ᠶ᠋ᠢᠨ ᠴᠢᠨᠢ ᠴᠢᠰᠤ ᠰᠢᠮᠡ ᠶ᠋ᠢ ᠰᠣᠷᠣᠵᠤ ᠪᠠᠷᠠᠬᠤ ᠨᠢ ᠠ᠋! ᠭᠡᠳ ᠲᠡᠷᠡ ᠪᠠᠷᠠ ᠨᠢ ᠦᠵᠡᠭᠳᠡᠳᠡᠭ ᠦᠭᠡᠢ ᠠᠪᠤᠷᠭᠤ ᠲᠣᠮᠣ ᠬᠥᠮᠦᠨ ᠦ᠌ ᠳᠠᠭᠤ ᠠᠭᠤᠯᠠ ᠬᠠᠳᠠ ᠶ᠋ᠢ ᠴᠤᠤᠷᠢᠶᠠᠲᠤᠭᠤᠯᠤᠭᠰᠠᠭᠠᠷ ᠵᠠᠮᠬᠠᠷᠠᠨᠠ᠃
ᠫᠥᠯᠥᠷᠡᠩ! ᠭᠡᠲᠡᠯᠡ ᠴᠣᠩᠬᠢᠶᠠᠯ ᠤ᠋ᠨ ᠴᠡᠩᠬᠡᠷ ᠤᠰᠤᠨ ᠳ᠋ᠤ᠌ ᠦᠰᠦᠷᠦᠨ ᠣᠷᠣᠪᠠᠯ ᠮᠠᠭᠤ ᠰᠠᠢᠨ ᠰᠢᠷᠭᠤᠯᠵᠢ ᠨᠤᠭᠤᠳ ᠤᠰᠤᠨ ᠤ᠋ ᠮᠡᠯᠮᠡᠢ ᠳᠡᠭᠡᠭᠦᠷ ᠬᠠᠷᠠᠯᠠᠲᠠᠯᠠ ᠬᠥᠪᠴᠦ《ᠠᠶᠠ᠂ ᠮᠥᠮᠥ ᠠ᠋! ᠪᠠᠢᠶᠠ ᠳᠠ᠂ ᠳᠠᠬᠢᠵᠤ ᠴᠢᠨᠦ ᠪᠡᠶᠡ ᠶ᠋ᠢ ᠴᠢᠨᠢ ᠣᠩᠭᠢᠯᠬᠤ ᠪᠠᠨ ᠪᠣᠯᠢᠶᠠ!》 ᠭᠡᠵᠦ ᠤᠬᠢᠯᠠᠨ ᠬᠠᠢᠯᠠᠨ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠣᠨᠬᠤᠸᠠᠷ