ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠳᠥᠷᠪᠡ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <4>
307ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠳᠥᠷᠪᠡ>
ᠮᠥᠯᠬᠥᠭᠡ ᠬᠥᠭᠰᠢᠨ ᠭᠢᠴᠢᠢ ᠤᠶᠠᠷᠠᠯᠲᠠᠢᠬᠠᠨ ᠤᠯᠢᠪᠠ᠃ ᠬᠥᠭᠰᠢᠨ ᠭᠢᠴᠢᠢ ᠲᠡᠷᠡ ᠵᠢᠯ ᠬᠥᠨᠳᠡᠯᠡᠨ ᠬᠥᠬᠡ ᠲᠡᠮᠦᠷ ᠡᠭᠦᠷᠦᠭᠰᠡᠨ ᠵᠠᠨᠠᠭ ᠲᠤ ᠡᠮᠦᠨᠡ ᠬᠣᠶᠠᠷ ᠰᠢᠭᠢᠷᠡ ᠪᠡᠨ ᠲᠠᠰᠤ ᠫᠤᠤᠳᠠᠭᠤᠯᠤᠭᠰᠠᠨ ᠠ᠋ᠴᠠ ᠮᠥᠯᠬᠥᠭᠡ ᠪᠣᠯᠵᠤ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠬᠠᠳᠠᠨ ᠬᠣᠩᠭᠢᠯ ᠠ᠋ᠴᠠ ᠳᠡᠮᠡᠢ ᠬᠣᠯᠠᠳᠴᠤ ᠴᠢᠳᠠᠬᠤ ᠦᠭᠡᠢ᠃ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠢ᠋ᠶ᠋ᠠᠨ ᠳᠡᠪᠬᠡᠷᠭᠡ ᠶ᠋ᠢ ᠯᠡ ᠰᠠᠬᠢᠳᠠᠭ ᠪᠣᠯᠪᠠ᠃
ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ《ᠶᠠᠭᠤ ᠪᠣᠯᠴᠢᠬᠠᠪᠠ?》 ᠭᠡᠵᠦ ᠬᠣᠩᠭᠢᠯ ᠠ᠋ᠴᠠ ᠪᠠᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠮᠥᠯᠬᠥᠭᠡ ᠬᠥᠭᠰᠢᠨ ᠭᠢᠴᠢᠢ ᠲᠡᠭᠦᠨ ᠦ᠌ ᠬᠥᠯ ᠳᠣᠣᠷᠠ ᠮᠥᠯᠬᠥᠵᠦ ᠢᠷᠡᠭᠡᠳ ᠲᠩᠷᠢ ᠬᠠᠨᠳᠤᠨ ᠰᠥᠭᠡᠩᠭᠢᠲᠦᠨ ᠤᠯᠢᠭᠰᠠᠨ ᠳ᠋ᠤ᠌《ᠳᠣᠣᠷᠠ ᠴᠠᠭᠠᠨ ᠳᠠᠪᠠᠭᠠ ᠳᠡᠭᠡᠷᠡ ᠵᠠᠭᠤᠷᠮᠠᠭ ᠦᠬᠦᠭᠰᠡᠨ ᠬᠥᠮᠦᠨ ᠪᠠᠢᠨᠠ᠁》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠢ᠋ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠣᠢᠯᠠᠭᠠᠵᠤ《ᠠ ᠳᠠ᠂ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠵᠣᠯᠢᠭ ᠲᠤ＜ᠮᠣᠷᠳᠠᠭᠰᠠᠨ＞ ᠬᠥᠮᠦᠨ ᠪᠠᠢᠨᠠ᠃ ᠪᠢᠲᠡᠭᠡᠢ ᠴᠣᠴᠢᠭᠠ!》 ᠭᠡᠰᠡᠨ ᠳ᠋ᠦ᠍ ᠮᠥᠯᠬᠥᠭᠡ ᠬᠥᠭᠰᠢᠨ ᠭᠢᠴᠢᠢ ᠳᠠᠬᠢᠨᠲᠠ ᠰᠥᠭᠡᠩᠭᠢᠲᠦᠨ ᠤᠯᠢᠪᠠᠯ ᠴᠠᠭᠠᠨᠠ ᠠ᠋ᠴᠠ《ᠵᠠ᠂ ᠮᠡᠳᠡᠯᠡ᠁》 ᠭᠡᠰᠡᠨ ᠰᠢᠭ ᠴᠢᠨᠣᠠ ᠬᠠᠷᠢᠭᠤ ᠤᠯᠢᠨᠠ᠃
᠁
ᠮᠥᠯᠬᠥᠭᠡ ᠬᠥᠭᠰᠢᠨ ᠭᠢᠴᠢᠢ ᠲᠡᠷᠡ ᠬᠥᠮᠦᠨ ᠢ᠋ ᠦᠨᠦᠷᠯᠡᠵᠦ ᠦᠨᠦᠷᠯᠡᠵᠦ ᠬᠠᠮᠠᠷ ᠢ᠋ᠶ᠋ᠠᠨ ᠰᠢᠨᠲᠠᠢᠯᠭᠠᠨ ᠲᠩᠷᠢ ᠥᠭᠡᠳᠡ ᠬᠠᠨᠳᠤᠨ ᠣᠯᠢᠪᠠ᠃《ᠡᠨᠡ ᠬᠥᠮᠦᠨ ᠰᠣᠭᠲᠣᠵᠠᠢ᠃ ᠦᠬᠦᠬᠦ ᠬᠥᠮᠦᠨ ᠪᠢᠰᠢ ᠠ᠋! ᠬᠥᠯᠴᠥᠭᠦᠦ ᠪᠡᠷ ᠢ᠋ᠶ᠋ᠡᠨ ᠪᠡᠶᠡ ᠨᠢ ᠪᠠᠯᠠᠷᠠᠵᠤ ᠤᠨᠲᠠᠵᠠᠢ》 ᠭᠡᠰᠡᠨ ᠰᠠᠨᠠᠭᠠ ᠲᠠᠢ ᠪᠠᠢᠯᠠ᠃
ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠲᠡᠷᠡ ᠰᠣᠭᠲᠣᠭᠤ ᠶ᠋ᠢ ᠬᠣᠩᠭᠢᠯ ᠤ᠋ᠨ ᠢ᠋ᠶ᠋ᠠᠨ ᠨᠥᠮᠥᠷᠢ ᠳ᠋ᠦ᠍ ᠬᠡᠪᠲᠡᠭᠦᠯᠦᠭᠡᠳ ᠴᠠᠭᠠᠳᠤ ᠬᠠᠳᠠᠨ ᠤ᠋ ᠵᠠᠪᠰᠠᠷ ᠲᠤ ᠬᠠᠪᠴᠢᠭᠤᠯᠤᠭᠠᠰᠤᠲᠠᠢ ᠶᠠᠩᠵᠤ ᠪᠣᠯᠭᠠᠨ ᠤ᠋ ᠡᠮ ᠦ᠋ᠨ ᠪᠣᠭᠣᠳᠠᠯ ᠢ᠋ᠶ᠋ᠠᠨ ᠠᠭᠤᠳᠠᠯᠵᠤ ᠡᠮ ᠡᠷᠢᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ ᠨᠢᠭᠡ ᠶᠠᠭᠤᠮᠠ ᠣᠷᠣᠯᠳᠣᠨᠠ᠃
ᠲᠡᠷᠡ ᠬᠦ᠌ ᠨᠢᠭᠡ ᠵᠦᠢᠯ ᠦ᠋ᠨ ᠤᠯᠠᠪᠤᠷ ᠰᠢᠷᠠᠩᠭᠤᠢ ᠥᠩᠭᠡ ᠲᠡᠢ ᠨᠤᠨᠲᠠᠭ ᠡᠮ ᠢ᠋ ᠡᠷᠢᠵᠦ ᠭᠠᠷᠭᠠᠭᠠᠳ ᠣᠭᠣᠴᠢ ᠤᠰᠤᠨ ᠳ᠋ᠤ᠌ ᠵᠢᠭᠤᠷᠠᠵᠤ ᠨᠢᠭᠡ ᠣᠭᠣᠴᠢᠭᠰᠠᠨ ᠢ᠋ᠶ᠋ᠠᠨ ᠲᠡᠷᠡ ᠰᠣᠭᠲᠣᠭᠤ ᠶ᠋ᠢᠨ ᠨᠢᠭᠤᠷ ᠥᠭᠡᠳᠡ ᠫᠦᠳ ᠬᠢᠲᠡᠯᠡ ᠦᠯᠢᠶᠡᠭᠡᠳ《 ᠡᠷᠯᠢᠭ ᠦ᠋ᠨ ᠡᠯᠴᠢ ᠴᠢᠮᠠᠶ᠋ᠢ ᠠᠪᠠᠴᠢᠬᠤ ᠦᠭᠡᠢ᠂ ᠪᠣᠰ ᠠ᠋ ᠪᠣᠰ! ᠴᠠᠭᠠᠳᠤ ᠡᠳᠦᠷ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢ ᠣᠭᠣᠰᠣᠷᠯᠠᠵᠤ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃ ᠴᠢᠮᠠ ᠳ᠋ᠤ᠌ ᠳᠠᠯᠵᠢ ᠦᠭᠡᠢ》 ᠭᠡᠵᠦ ᠳᠦᠳᠦᠨᠡᠨᠡ᠃
ᠭᠣᠩᠴᠣᠭᠷᠠᠬᠤᠠ ᠦᠬᠦᠭᠰᠡᠨ ᠦᠭᠡᠢ᠂ ᠠᠷᠢᠬᠢ ᠨᠣᠢᠷ ᠬᠣᠶᠠᠷ ᠠ᠋ᠴᠠ ᠪᠠᠨ ᠰᠡᠷᠭᠦᠬᠦ ᠳ᠋ᠦ᠍ ᠨᠢᠭᠡᠨ ᠬᠠᠳᠠᠨ ᠤ᠋ ᠳᠡᠭᠲᠡᠷ ᠦ᠋ᠨ ᠬᠣᠩᠭᠢᠯ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠢᠪᠠ᠃ ᠡᠮᠦᠨᠡ ᠡᠴᠡ ᠨᠢ ᠨᠢᠭᠡᠨ ᠴᠠᠭᠠᠨ ᠰᠠᠬᠠᠯᠲᠤ ᠡᠪᠦᠭᠡᠨ ᠯᠠᠮᠠᠬᠠᠢ ᠢᠨᠢᠶᠡᠮᠰᠦᠭᠯᠡᠨ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ᠄《 ᠪᠢ ᠴᠢᠨᠢ ᠨᠡᠭᠡᠷᠡᠨ ᠰᠠᠬᠢᠭᠤᠰᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠷᠡᠴᠢᠬᠡᠭᠰᠡᠨ ᠴᠦ᠍ ᠶᠦᠮ ᠤᠤ ᠳᠠ⁈》 ᠭᠡᠵᠦ ᠪᠣᠳᠣᠨ ᠨᠢᠳᠦ ᠨᠢ ᠨᠡᠭᠡᠭᠡᠵᠦ ᠠᠨᠢᠵᠤ ᠪᠠᠢᠭᠠ ᠨᠢ ᠦᠯᠦ ᠮᠡᠳᠡᠭᠳᠡᠮᠡ ᠬᠠᠪᠢᠷᠭᠠᠨ ᠰᠠᠷᠠᠨ ᠠᠨᠢᠰᠬᠠ᠂ ᠤᠷᠲᠤ ᠴᠠᠭᠠᠨ ᠬᠥᠮᠥᠰᠬᠡ᠂ ᠡᠪᠦᠳᠦᠭ ᠰᠢᠭᠦᠷᠡᠮᠡ ᠴᠠᠭᠠᠨ ᠰᠠᠬᠠᠯ᠂ ᠮᠢᠷᠠᠯᠵᠠᠭᠰᠠᠨ ᠴᠠᠭᠠᠨ ᠰᠢᠲᠦ ᠲᠡᠢ ᠡᠪᠦᠭᠡᠨ ᠢ᠋ ᠨᠠᠷᠢᠨ ᠠᠵᠢᠪᠠ᠃ ᠲᠡᠭᠡᠭᠡᠳ《 ᠪᠢ ᠶᠠᠭᠠᠬᠢᠭᠠᠳ ᠡᠢᠮᠦ ᠭᠠᠵᠠᠷ᠁ ᠪᠠᠢᠵᠠ ᠠ᠋᠂ ᠡᠨᠡ ᠴᠢᠨᠢ ᠬᠠᠮᠢᠭᠠ ᠪᠣᠢ⁈》 ᠭᠡᠵᠦ ᠭᠠᠢᠬᠠᠨ ᠡᠨᠡ ᠲᠡᠷᠡ ᠶ᠋ᠢ ᠬᠠᠷᠠᠪᠠᠯ ᠬᠣᠩᠭᠢᠯ ᠳ᠋ᠤ᠌ ᠥᠨᠳᠥᠷ ᠴᠡᠭᠡᠯ ᠦ᠋ᠨ ᠡᠭᠦᠯᠡᠨ ᠤᠭᠠᠯᠵᠠ ᠬᠤᠨᠢᠶᠠᠷᠠᠨ ᠪᠠᠭᠤᠵᠤ ᠴᠠᠭᠠᠨ ᠡᠪᠦᠭᠡᠨ ᠦ᠌ ᠪᠡᠶᠡ ᠶ᠋ᠢ ᠣᠷᠢᠶᠠᠨ ᠠᠭᠱᠠᠨᠠ ᠵᠠᠮᠬᠠᠷᠠᠪᠠ᠃ ᠬᠣᠩᠭᠢᠯ ᠤ᠋ᠨ ᠠᠮᠠᠨ ᠠ᠋ᠴᠠ ᠱᠠᠲᠤᠯᠠᠭᠰᠠᠨ ᠴᠢᠯᠠᠭᠤᠨ ᠳᠡᠭᠲᠡᠷ ᠦ᠋ᠨ ᠳᠣᠣᠷᠠ ᠬᠡᠳᠦ ᠬᠡᠳᠦᠨ ᠳᠡᠯᠲᠦ ᠴᠢᠨᠣᠠ ᠱᠣᠩᠨᠣᠢᠵᠤ ᠳᠣᠮᠣᠭ ᠲᠤ ᠭᠠᠷᠳᠠᠭ ᠲᠩᠷᠢ ᠶ᠋ᠢᠨ ᠨᠣᠬᠠᠢ ᠰᠢᠭ᠋ ᠰᠣᠨᠢᠬᠠᠨ ᠬᠠᠷᠠᠭᠳᠠᠬᠤ ᠨᠢ ᠵᠢᠭᠲᠡᠢ᠃ ᠬᠠᠳᠠᠨ ᠬᠣᠩᠭᠢᠯ ᠳᠣᠲᠣᠷᠠᠬᠢ ᠡᠳ᠋ᠯᠡᠬᠦᠨ ᠬᠡᠷᠡᠭᠰᠡᠯ ᠭᠡᠵᠦ ᠰᠣᠨᠢᠷᠬᠠᠯᠲᠠᠢ ᠶᠠᠭᠤᠮᠠ ᠠᠯᠠᠭᠠ᠃ ᠡᠩ ᠦ᠋ᠨ ᠣᠲᠣᠷ ᠨᠡᠭᠦᠳᠡᠯ ᠦ᠋ᠨ ᠠᠢᠯ ᠤ᠋ᠨ ᠰᠠᠭᠤᠯᠠᠭᠠ ᠰᠠᠪᠠ᠂ ᠬᠡᠦᠳᠡᠢ ᠰᠢᠭᠤᠳᠠᠢ᠂ ᠲᠤᠯᠤᠮ ᠮᠠᠩᠬᠠᠭ ᠠ᠋ᠴᠠ ᠴᠠᠭᠠᠰᠢ ᠶᠠᠭᠤᠮᠠ ᠦᠭᠡᠢ᠃ ᠵᠢᠵᠢᠭ ᠵᠢᠵᠢᠭ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠᠰ ᠨᠢ ᠭᠠᠵᠠᠷ ᠰᠠᠢ ᠦᠭᠡᠢ ᠵᠠᠢ ᠡᠵᠡᠯᠡᠵᠡᠢ᠃ ᠬᠠᠨᠠᠨ ᠳ᠋ᠤᠨᠢ ᠮᠤᠨᠠ ᠬᠠᠨ ᠤ᠋ ᠬᠥᠷᠥᠭ ᠢ᠋ ᠲᠠᠬᠢᠬᠰᠠᠨ ᠢ᠋ ᠬᠠᠷᠠᠭᠠᠳ《ᠡᠨᠡ ᠴᠠᠭᠠᠨ ᠡᠪᠦᠭᠡᠨ ᠪᠣᠯ ᠬᠥᠮᠦᠰ ᠦ᠋ᠨ ᠬᠡᠯᠡᠳᠡᠭ ᠰᠢᠳᠢ ᠣᠷᠣᠰᠢᠭᠰᠠᠨ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠭᠡᠳᠡᠭ ᠨᠢ ᠮᠥᠨ ᠶᠦᠮ ᠪᠠᠢᠨᠠ》 ᠭᠡᠵᠦ ᠲᠡᠭᠦᠨ ᠢ᠋ ᠯᠠᠪ ᠲᠠᠨᠢᠭᠠᠳ ᠪᠣᠰᠴᠤ ᠲᠡᠭᠦᠨ ᠦ᠌ ᠡᠪᠦᠳᠦᠭ ᠲᠦ᠍ ᠰᠦᠵᠢᠭᠯᠡᠨ ᠮᠥᠷᠭᠥᠬᠦ ᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ᠄
— ᠪᠠᠢᠵᠠ! ᠴᠢ ᠮᠤᠨᠠ ᠬᠠᠨ ᠤ᠋ ᠬᠥᠷᠥᠭ ᠲᠦ᠍ ᠨᠢᠭᠡ ᠲᠠᠬᠢᠯ ᠡᠷᠭᠦᠴᠢᠬᠡᠭᠡᠳ ᠮᠥᠷᠭᠥ! ᠭᠡᠰᠡᠨ ᠳ᠋ᠦ᠍ ᠭᠣᠩᠴᠣᠭᠷᠠᠬᠤᠠ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᠨᠢ ᠭᠦᠢᠴᠡᠳᠬᠡᠪᠡ᠃
— ᠵᠠ᠂《 ᠬᠦᠩ ᠨᠣᠶᠠᠨ》 ᠭᠤᠸᠠᠢ ᠠ᠋! ᠲᠠ ᠡᠭᠦᠨ ᠢ᠋ ᠤᠤᠭᠤᠴᠢᠬᠠ! ᠴᠣᠴᠢᠭᠠ ᠪᠡᠷᠲᠡᠭ ᠢ᠋ ᠴᠢᠨᠢ ᠭᠠᠷᠭᠠᠵᠤ᠂ ᠪᠡᠶᠡ ᠰᠡᠳᠬᠢᠯ ᠢ᠋ ᠴᠢᠨᠢ ᠲᠡᠭᠰᠢᠯᠡᠬᠦ ᠶᠦᠮ ᠠ᠋! ᠭᠡᠳ ᠲᠡᠷᠡ ᠴᠠᠭᠠᠨ ᠡᠪᠦᠭᠡᠨ ᠯᠠᠮᠠᠬᠠᠢ ᠲᠡᠭᠦᠨ ᠢ᠋ ᠱᠣᠭᠯᠠᠨ ᠢᠨᠢᠶᠡᠭᠡᠳ ᠨᠢᠭᠡ ᠪᠣᠭᠣᠳᠠᠯ ᠡᠮ ᠥᠭᠪᠡ᠃
ᠤᠤᠯ ᠨᠢ ᠭᠣᠩᠴᠣᠭᠷᠠᠬᠤᠠ ᠬᠢᠷᠠ ᠳᠡᠭᠡᠷᠡ ᠭᠠᠷᠤᠭᠠᠳ ᠭᠡᠨᠡᠳᠲᠡ ᠬᠠᠷᠢᠨ ᠪᠡᠶᠡ ᠨᠢ ᠪᠠᠯᠠᠷᠠᠨ ᠰᠤᠯᠳᠠᠢᠭᠰᠠᠨ ᠳ᠋ᠤ᠌ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠤᠨᠲᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠡᠳᠦᠨ ᠴᠢᠨᠣᠠ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠠᠮᠢ ᠶ᠋ᠢ ᠨᠢ ᠠᠪᠤᠷᠠᠭᠰᠠᠨ ᠪᠠᠢᠪᠠ᠃
ᠵᠣᠯᠢᠭ ᠲᠤ ᠶᠠᠪᠤᠭᠰᠠᠨ ᠭᠣᠩᠴᠣᠭᠷᠠᠬᠤᠠ ᠦᠬᠦᠬᠦ ᠲᠠᠪᠢᠯᠠᠩ ᠦᠭᠡᠢ ᠪᠠᠢᠵᠠᠢ᠃ ᠲᠡᠨᠳᠡ ᠡᠴᠡ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠶ᠋ᠢᠨ ᠠᠳᠢᠰ ᠬᠦᠷᠲᠡᠵᠦ《ᠬᠦᠦ ᠮᠢᠨᠢ! ᠴᠢ ᠣᠳᠣ ᠵᠣᠯᠢᠭ ᠲᠤ ᠭᠠᠷᠤᠭᠰᠠᠨ ᠬᠥᠮᠦᠨ ᠪᠣᠯᠬᠣᠷ ᠨᠤᠲᠤᠭ ᠰᠠᠨᠠᠵᠤ ᠪᠤᠴᠠᠨᠠ ᠭᠡᠵᠦ ᠪᠠᠢᠬᠤ ᠦᠭᠡᠢ᠂ ᠨᠢᠭᠡ ᠪᠣᠯ ᠴᠢ ᠬᠣᠯᠠ ᠶᠠᠪᠤ ᠠ᠋! ᠨᠢᠭᠡ ᠪᠣᠯ ᠡᠨᠡ ᠠᠭᠤᠯᠠᠨ ᠳ᠋ᠤ᠌ ᠬᠣᠷᠭᠣᠳᠠ! ᠬᠦᠩ ᠨᠣᠶᠠᠨ ᠤ᠋＜ᠬᠡᠰᠢᠭ＞ ᠬᠦᠷᠲᠡᠭᠰᠡᠨ ᠬᠥᠮᠦᠨ ᠤᠷᠲᠤ ᠨᠠᠰᠤᠯᠠᠬᠤ ᠶᠤᠮ》 ᠭᠡᠰᠡᠨ ᠳ᠋ᠦ᠍ ᠭᠣᠩᠴᠣᠭᠷᠠᠬᠤᠠ ᠠᠮᠢᠳᠤ ᠶᠠᠪᠤᠵᠤ ᠠᠯᠲᠠᠨ ᠠᠶᠠᠭᠠᠨ ᠠ᠋ᠴᠠ ᠤᠰᠤ ᠤᠤᠭᠤᠬᠤ ᠬᠤᠪᠢ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠴᠠᠭᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠨᠠ᠃
ᠭᠣᠩᠴᠣᠭᠷᠡᠬᠤᠠ᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠠ᠋ᠴᠠ ᠠᠳᠢᠰ ᠬᠦᠷᠲᠡᠵᠦ ᠲᠡᠷᠡ ᠬᠦ᠌ ᠬᠠᠳᠠᠨ ᠳᠡᠭᠲᠡᠷ ᠲᠡᠢ ᠬᠣᠩᠭᠢᠯ ᠠ᠋ᠴᠠ ᠭᠠᠷᠴᠤ ᠶᠠᠪᠤᠭᠠᠳ《ᠣᠳᠣ ᠪᠢ ᠴᠢᠨᠢ ᠭᠠᠬᠠᠢ ᠶᠠᠪᠠᠭᠠᠨ ᠪᠣᠯᠴᠢᠬᠠᠭᠠᠳ ᠡᠨᠡ ᠪᠠᠷᠵᠠᠭᠠᠷ ᠬᠠᠳᠠ ᠲᠠᠢ ᠠᠭᠤᠯᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠬᠤ ᠪᠢᠯᠡ⁈ ᠶᠠᠪᠤᠶᠠ᠂ ᠡᠨᠡ ᠪᠠᠷᠲᠠᠭᠠᠲᠤ ᠠᠭᠤᠯᠠᠨ ᠠ᠋ᠴᠠ ᠭᠠᠷᠴᠤ ᠠᠳᠤᠭᠤᠨ ᠤ᠋ ᠪᠠᠷᠠ ᠬᠠᠷᠠᠪᠠᠯ ᠲᠡᠭᠡᠭᠡᠳ ᠯᠡ ᠵᠢᠭᠦᠷ ᠤᠷᠭᠤᠯᠠ ᠭᠡᠰᠡᠨ ᠦᠭᠡ᠃ ᠵᠠ ᠪᠠᠢᠵᠠ᠂ ᠲᠡᠭᠡᠭᠡᠳ ᠬᠠᠩᠭᠢ ᠰᠢᠨᠳᠠᠰᠤ ᠲᠠᠢ ᠶ᠋ᠢ ᠶᠡᠭᠦᠯᠡᠵᠦ ᠤᠨᠤᠭᠠᠳ ᠶᠠᠪᠤᠪᠠᠯ ᠨᠢᠭᠡ ᠤᠴᠢᠷ ᠨᠢ ᠣᠯᠳᠠᠬᠤ ᠪᠠᠢᠬᠠ》 ᠭᠡᠳ ᠵᠣᠷᠢᠭᠰᠠᠨ ᠵᠣᠷᠢᠯᠭᠠ ᠦᠭᠡᠢ ᠴᠢᠭᠯᠡᠭᠰᠡᠨ ᠴᠢᠭᠯᠡᠯ ᠴᠦ᠍ ᠦᠭᠡᠢ ᠡᠩᠬᠦᠯ ᠳᠤᠩᠬᠤᠯ ᠠᠭᠤᠯᠠᠨ ᠵᠥᠷᠢᠭ ᠢ᠋ᠶ᠋ᠡᠷ ᠬᠢᠷᠠ ᠳᠠᠪᠠᠵᠤ ᠡᠩ ᠥᠷᠭᠡᠨ ᠮᠤᠨᠠ ᠠᠭᠤᠯᠠ ᠶ᠋ᠢ ᠲᠤᠭᠤᠯᠵᠤ ᠭᠠᠷᠬᠤ ᠪᠠᠷ ᠵᠢᠳᠬᠦᠨᠡ᠃ ᠪᠠᠷᠲᠠᠭᠠ ᠶᠡᠬᠡᠲᠡᠢ ᠬᠠᠳᠠᠨ ᠠ᠋ᠴᠠ ᠬᠠᠶᠠ ᠴᠢᠯᠠᠭᠤ ᠬᠠᠳᠠ ᠪᠥᠮᠪᠥᠷᠢᠵᠦ ᠤᠨᠠᠨᠠ᠃ ᠬᠠᠷᠠᠬᠤᠯᠠ ᠬᠥᠬᠡ ᠢᠮᠠᠭᠠ ᠲᠠᠪᠤ ᠭᠤᠷᠪᠠ᠂ ᠲᠠᠪᠤ ᠭᠤᠷᠪᠠ ᠪᠠᠷ ᠬᠠᠳᠠ ᠳᠠᠮᠵᠢᠨ ᠪᠡᠯᠴᠢᠬᠦ ᠬᠠᠷᠠᠭᠳᠠᠨᠠ᠃ ᠵᠦᠯᠭᠡ ᠨᠠᠮᠤᠭ ᠭᠠᠵᠠᠷ ᠢ᠋ᠶ᠋ᠠᠷ ᠭᠤᠷᠠ ᠵᠦᠷ ᠦ᠋ᠳ ᠲᠠᠢᠪᠤᠩ ᠪᠡᠯᠴᠢᠭᠰᠡᠨ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠪᠠᠷᠠ ᠪᠠᠷ ᠦᠷᠭᠦᠵᠦ ᠫᠢᠳ ᠫᠢᠳ ᠳᠣᠷᠭᠢᠨᠠ᠃ ᠲᠡᠳᠡᠭᠡᠷ ᠭᠥᠷᠥᠭᠡᠰᠦ ᠨᠦ᠍ᠭᠦᠳ《ᠡᠨᠡ ᠶᠠᠭᠤᠨ ᠤ᠋ ᠠᠴᠠ ᠬᠥᠯ ᠲᠡᠢ ᠠᠮᠢᠲᠠᠨ ᠪᠣᠯᠴᠢᠬᠠᠪᠠ⁈》 ᠭᠡᠰᠡᠨ ᠰᠢᠭ ᠭᠠᠢᠬᠠᠯᠳᠤᠨᠠ᠃ ᠮᠣᠳᠣᠨ ᠤ᠋ ᠮᠥᠴᠢᠷ ᠰᠦᠯᠵᠢᠵᠦ ᠨᠢᠰᠦᠭᠰᠡᠨ ᠳᠠᠯᠠᠨ ᠬᠡᠯᠡᠲᠦ ᠰᠢᠪᠠᠭᠤ ᠨᠤᠭᠤᠳ ᠵᠢᠷ ᠵᠣᠷ ᠵᠢᠷᠵᠢᠬᠢᠨᠡᠨ ᠱᠤᠯᠤᠭᠠᠨᠠᠯᠳᠤᠬᠤ ᠨᠢ ᠪᠠᠢᠭᠠᠯᠢ ᠶ᠋ᠢᠨ ᠪᠠᠶᠠᠨ ᠲᠠᠩᠰᠤᠭ ᠢ᠋ ᠱᠠᠭᠰᠢᠵᠤ ᠪᠠᠢᠭᠠ ᠰᠢᠭ᠋ ᠠᠵᠢ᠃ ᠭᠣᠣᠯ ᠤ᠋ᠨ ᠪᠤᠷᠭᠠᠰᠤᠨ ᠤ᠋ ᠨᠠᠢᠯᠵᠠᠭᠤᠷ ᠲᠤ ᠨᠡᠷᠡ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠤᠯᠠᠭᠠᠨ ᠬᠦᠵᠦᠭᠦᠦ᠂ ᠨᠣᠭᠣᠭᠠᠨ ᠳᠠᠯᠠᠪᠴᠢ᠂ ᠴᠠᠭᠠᠨ ᠡᠯᠢᠭᠡ ᠲᠡᠢ ᠢᠵᠢᠯᠢᠬᠡᠨ ᠰᠢᠪᠠᠭᠤᠬᠠᠢ ᠥᠳᠥ ᠰᠥᠳᠥ ᠪᠡᠨ ᠳᠢᠭᠯᠡᠨ ᠳᠡᠪᠳᠡᠷᠢᠵᠦ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠡ ᠯᠡ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠯᠴᠠᠵᠤ ᠬᠥᠭᠡᠷᠦᠨ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠭᠠᠷᠴᠤ ᠰᠦᠷᠡᠬᠡᠢ ᠠᠮᠠᠷᠠᠭᠯᠠᠭᠰᠠᠨ ᠢ᠋ᠶ᠋ᠠᠨ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠬᠠᠷᠠᠭᠠᠳ《ᠠᠮᠠᠷᠠᠭ ᠬᠣᠩᠭᠣᠷ ᠪᠠᠢᠳᠠᠭ ᠤᠤ ᠴᠢᠮᠠ ᠳ᠋ᠤ᠌? ᠲᠡᠭᠦᠨ ᠢ᠋ᠶ᠋ᠡᠨ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠭᠠᠭᠴᠠ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢᠯᠠᠭᠠᠳ ᠡᠨᠡ ᠬᠠᠷᠠ ᠠᠭᠤᠯᠠᠨ ᠳ᠋ᠤ᠌ ᠵᠠᠮ ᠴᠦ᠍ ᠦᠭᠡᠢ ᠵᠣᠷᠢᠯᠭᠠ ᠴᠦ᠍ ᠦᠭᠡᠢ ᠶᠠᠭᠤ ᠬᠢᠬᠦ ᠪᠡᠷ ᠶᠠᠪᠤᠭᠠ ᠠᠮᠢᠲᠠᠨ ᠪᠣᠢ?》 ᠭᠡᠰᠡᠨ ᠰᠢᠭ ᠪᠠᠬᠠᠨ ᠣᠯᠠᠨ ᠶᠠᠭᠤᠮᠠ ᠱᠤᠯᠤᠭᠠᠨᠠᠨᠠ᠃ ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤᠨ ᠤ᠋ ᠶᠠᠭᠤ ᠱᠤᠯᠤᠭᠠᠨᠠᠬᠤ ᠶ᠋ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠴᠦ᠍ ᠥᠪᠡᠷ ᠢ᠋ ᠨᠢ ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠳᠠᠭ ᠦᠭᠡᠢ᠂ ᠭᠠᠭᠴᠠ ᠬᠥᠮᠦᠨ ᠠᠢᠯ ᠪᠣᠯᠳᠠᠭ ᠦᠭᠡᠢ ᠭᠡᠵᠦ ᠱᠣᠣᠯᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠲᠡᠷᠡ ᠪᠡᠷ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠮᠠᠷᠠᠭ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤᠨ ᠤ᠋ ᠢᠨᠠᠭᠯᠠᠬᠤ ᠶ᠋ᠢ ᠬᠠᠷᠠᠭᠠᠳ ᠠᠲᠠᠭᠠ ᠬᠥᠳᠡᠯᠵᠦ《ᠬᠠᠴᠢᠨ ᠱᠣᠣᠯᠠᠭᠳᠠᠯᠠ》 ᠭᠡᠵᠦ ᠪᠡᠶᠡ ᠳ᠋ᠡᠭᠡᠨ ᠮᠠᠭᠤ ᠰᠡᠵᠢᠭ ᠲᠥᠷᠥᠨ ᠢᠴᠢᠩᠭᠦᠷᠡᠬᠦ ᠳ᠋ᠡᠭᠡᠨ《ᠴᠢᠭᠢᠶᠡᠲᠦᠷᠦᠦ! ᠲᠠ ᠬᠣᠶᠠᠭᠤᠯᠠ ᠪᠠᠨ ᠶᠠᠭᠠᠬᠢᠵᠤ ᠬᠠᠯᠠᠭᠤᠷᠠᠨ ᠢᠨᠠᠭᠯᠠᠬᠤ ᠨᠢ ᠨᠠᠳᠠ ᠶᠠᠮᠠᠷ ᠰᠠᠪᠠᠭᠠ ᠲᠠᠢ ᠶᠤᠮ᠃ ᠨᠠᠮᠠᠶ᠋ᠢ ᠱᠣᠣᠯᠠᠳᠠᠭ ᠨᠢ ᠶᠠᠭᠠᠬᠢᠪᠠ⁈》 ᠭᠡᠳ ᠪᠤᠷᠭᠠᠰᠤᠨ ᠤ᠋ ᠬᠠᠭᠤᠷᠠᠢ ᠮᠥᠴᠢᠷ ᠬᠤᠭᠤᠯᠵᠤ《ᠭᠦᠦᠰᠢ!》 ᠭᠡᠵᠦ ᠰᠢᠪᠠᠭᠤ ᠶ᠋ᠢ ᠦᠷᠭᠦᠭᠡᠨ ᠰᠢᠲᠠᠪᠠᠯ ᠤᠯᠠᠭᠠᠨ ᠬᠦᠵᠦᠭᠦᠦ ᠲᠡᠢ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤ ᠫᠦᠷᠳ᠌ᠬᠢᠨ ᠨᠢᠰᠪᠡ᠃《ᠠᠮᠠᠷᠠᠭ ᠴᠢᠨᠢ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠬᠡᠯᠡᠵᠦ ᠥᠭᠭᠦᠶᠡ ᠭᠡᠰᠡᠨ ᠴᠢᠨᠢ ᠪᠢᠳᠡᠨᠦᠰ ᠢ᠋ ᠬᠣᠣᠷᠯᠠᠬᠤ ᠰᠠᠨᠠᠭᠠ ᠲᠠᠢ᠃ ᠭᠣᠩᠴᠣᠭᠷᠠᠬᠤᠠ ᠴᠢ ᠭᠣᠩ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠳ᠋ᠠᠭᠠᠨ ᠬᠣᠬᠢ ᠨᠢ ᠠ᠋》 ᠭᠡᠵᠦ ᠵᠢᠷ ᠵᠣᠷ᠂ ᠵᠢᠷ ᠵᠣᠷ ᠭᠡᠵᠦ ᠱᠤᠯᠤᠭᠠᠨᠠᠭᠰᠠᠭᠠᠷ ᠣᠳᠪᠠ᠃
ᠤᠯᠠᠭᠠᠨ ᠬᠦᠵᠦᠭᠦᠦ ᠲᠡᠢ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠱᠣᠣᠯᠠᠩᠬᠠᠨ ᠨᠢᠰᠦᠭᠰᠡᠨ ᠪᠣᠯᠪᠠᠴᠤ ᠳᠡᠮᠡᠢ ᠬᠣᠯᠠᠳᠤᠭᠠ ᠦᠭᠡᠢ᠃ ᠲᠡᠷᠲᠡᠭᠡ ᠭᠣᠣᠯ ᠤ᠋ᠨ ᠴᠠᠭᠠᠨᠠ ᠪᠢᠲᠡᠭᠦᠦ ᠣᠢ ᠳᠣᠲᠣᠷᠠ ᠣᠷᠣᠭᠠᠳ《ᠵᠢᠷ ᠵᠣᠷ᠂ ᠵᠢᠷ ᠵᠣᠷ᠁》 ᠭᠡᠳ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠵᠢᠷᠭᠢᠬᠦ ᠨᠢ《ᠨᠠᠭᠠᠰᠢ ᠪᠠᠨ᠂ ᠨᠠᠭᠠᠰᠢ ᠪᠢᠳᠡᠨ ᠢ᠋ ᠳᠠᠭᠠᠭᠠᠳ ᠢᠷᠡ!》 ᠭᠡᠵᠦ ᠲᠡᠭᠦᠨ ᠢ᠋ ᠳᠠᠭᠤᠳᠠᠬᠤ ᠰᠢᠭ᠋ ᠪᠠᠢᠯᠠ᠃
ᠭᠣᠩᠴᠣᠭᠷᠠᠬᠤᠠ ᠤᠯᠠᠭᠠᠨ ᠬᠦᠵᠦᠭᠦᠦ ᠲᠡᠢ ᠠᠯᠠᠭ ᠰᠢᠪᠠᠭᠤᠨ ᠳ᠋ᠤ᠌ ᠠᠲᠠᠭᠠᠷᠬᠠᠬᠤ ᠳ᠋ᠠᠭᠠᠨ ᠠᠮᠠᠷᠠᠭ ᠬᠣᠩᠭᠣᠷ ᠨᠣᠮᠢᠨ ᠢ᠋ᠶ᠋ᠠᠨ ᠡᠷᠬᠡ ᠦᠭᠡᠢ ᠰᠠᠨᠠᠭᠠᠯᠵᠠᠪᠠ᠁
ᠴᠡᠴᠡᠭ ᠬᠠᠲᠤᠨ ᠠ᠋ᠴᠠ ᠬᠣᠢᠰᠢ ᠨᠣᠮᠢᠨ ᠨᠣᠶᠠᠨ ᠰᠠᠩ ᠳ᠋ᠤ᠌ ᠲᠣᠯᠣᠭᠠᠢ ᠥᠨᠳᠡᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠠᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠤ᠋ ᠬᠤᠷᠤᠭᠤᠨ ᠳ᠋ᠠᠬᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠬᠤᠯᠠᠭᠠᠢᠯᠠᠵᠤ᠂ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠤᠷᠤᠭᠤ ᠲᠠᠲᠠᠵᠤ ᠳᠤᠲᠠᠭᠠᠭᠠᠳ ᠬᠣᠰᠢᠭᠤ ᠶᠠᠮᠤᠨ᠂ ᠨᠣᠶᠠᠨ ᠰᠠᠩ ᠢ᠋ ᠪᠤᠵᠠᠷᠲᠤᠭᠤᠯᠪᠠ᠂ ᠬᠦᠩ ᠨᠣᠶᠠᠨ ᠤ᠋ ᠨᠡᠷᠡ ᠲᠥᠷᠥ ᠳ᠋ᠦ᠍ ᠬᠦ ᠲᠦᠷᠬᠢᠯᠡ ᠭᠡᠵᠦ ᠶᠠᠮᠤᠨ ᠤ᠋ ᠬᠢᠨ ᠲᠡᠭᠦᠨ ᠳ᠋ᠦ᠍ ᠡᠯᠳᠡᠪ ᠲᠠᠮᠤ ᠦᠵᠡᠭᠦᠯᠦᠨ ᠭᠠᠯᠵᠠᠭᠤ ᠰᠣᠯᠢᠶᠠᠲᠠᠢ ᠪᠣᠯᠭᠠᠪᠠ᠃ ᠲᠡᠭᠡᠭᠡᠳ ᠬᠥᠮᠦᠨ ᠬᠠᠷᠠ ᠴᠦ᠍ ᠲᠠᠨᠢᠳᠠᠭ ᠦᠭᠡᠢ ᠰᠣᠯᠢᠶᠠ ᠪᠠᠯᠠᠢ ᠶᠠᠷᠢᠨ ᠱᠠᠯᠳᠠᠩ ᠨᠢᠴᠦᠭᠦᠨ ᠭᠦᠶᠦᠳᠡᠭ ᠪᠣᠯᠤᠭᠠᠳ᠁ ᠭᠣᠩᠴᠣᠭᠷᠠᠬᠤᠠ ᠶ᠋ᠢ ᠴᠦ᠍ ᠪᠡᠶᠡ ᠳ᠋ᠡᠭᠡᠨ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ《᠁ ᠴᠢ ᠬᠥᠮᠦᠨ ᠪᠢᠰᠢ! ᠵᠠᠬᠢᠷᠤᠭᠴᠢ ᠴᠢ ᠪᠢᠲᠡᠭᠡᠢ ᠨᠠᠮᠠᠶ᠋ᠢ ᠮᠠᠭᠤᠴᠢᠯᠠᠬᠤ ᠭᠡᠳ ᠪᠠᠢ! ᠮᠠᠢ᠂ ᠶᠤᠸᠠᠮᠪᠤᠤ ᠠᠪᠤᠨᠠ ᠤᠤ?》 ᠭᠡᠳ ᠬᠣᠶᠠᠷ ᠬᠥᠬᠥ ᠪᠡᠨ ᠭᠠᠷᠭᠠᠳᠠᠭ ᠵᠣᠵᠢᠭ ᠠᠷᠠᠨᠰᠢ ᠲᠠᠢ ᠪᠣᠯᠪᠠ᠃ ᠲᠡᠭᠡᠭᠰᠡᠭᠡᠷ ᠪᠠᠢᠭᠠᠳ ᠭᠡᠨᠡᠳᠲᠡ ᠨᠢᠭᠡ ᠰᠥᠨᠢ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠣᠯᠵᠠᠢ᠃ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢᠴᠢᠬᠠᠭᠰᠠᠨ ᠴᠦ᠍ ᠶᠤᠮ ᠤᠤ ᠭᠡᠵᠦ ᠭᠣᠩᠴᠣᠭᠷᠠᠬᠤᠠ ᠠᠳᠤᠭᠤᠨ ᠳ᠋ᠠᠭᠠᠨ ᠶᠠᠪᠤᠬᠤ ᠲᠠᠰᠢᠷᠠᠮ ᠳ᠋ᠤ᠌ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠡᠷ ᠤᠷᠤᠰᠬᠠᠯ ᠳᠠᠭᠠᠵᠤ ᠡᠷᠢᠭᠰᠡᠨ ᠴᠦ᠍᠁ ᠶᠠᠭᠤᠮᠠ ᠠᠯᠠᠭᠠ᠃ ᠣᠢᠷᠠ ᠣᠷᠴᠢᠨ ᠤ᠋ ᠲᠥᠷᠥᠯ ᠲᠥᠷᠥᠭᠰᠡᠳ ᠲᠤᠨᠢ ᠰᠤᠷᠠᠭ ᠲᠠᠯᠪᠢᠭᠰᠠᠨ ᠴᠦ᠍ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ ᠪᠠᠢᠯᠠ᠃ ᠮᠣᠩᠭᠣᠯ ᠠᠢᠯ ᠳ᠋ᠤ᠌ ᠬᠤᠷᠠᠭᠠ ᠲᠤᠭᠤᠯ ᠠᠯᠳᠠᠵᠤ ᠭᠡᠭᠡᠭᠳᠡᠬᠦ ᠳ᠋ᠦ᠍ ᠬᠦᠷᠲᠡᠯᠡ ᠡᠷᠢᠯ ᠲᠠᠯᠪᠢᠳᠠᠭ ᠪᠠᠢᠲᠠᠯᠠ ᠨᠣᠮᠢᠨ ᠢ᠋ ᠦᠷᠦ ᠡᠪᠡᠳᠦᠭᠰᠡᠨ ᠠᠮᠢᠲᠠᠨ ᠴᠥᠭᠡᠬᠡᠨ ᠪᠠᠢᠪᠠ᠃ ᠦᠬᠡᠷ ᠬᠣᠨᠢᠨ ᠤ᠋ ᠵᠠᠷᠤᠳᠠᠰᠤ ᠬᠠᠷᠠᠴᠤ ᠨᠠᠷ《ᠬᠥᠭᠡᠷᠦᠬᠦᠢ ᠳᠡ᠂ ᠬᠠᠢᠷᠠᠨ ᠥᠬᠢᠨ ᠶᠦᠮ ᠠ᠋! ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢᠴᠢᠬᠠᠯᠠ ᠪᠣᠢ᠃ ᠡᠰᠡᠪᠡᠰᠦ ᠭᠦᠵᠡᠭᠡᠨ ᠠᠯᠴᠢᠭᠤᠷᠲᠤ ᠬᠠᠷᠠ ᠴᠡᠷᠢᠭ ᠦ᠋ᠳ ᠡᠮᠦᠰᠬᠡᠯ ᠵᠡᠭᠦᠪᠴᠢ ᠦᠭᠡᠢ ᠡᠮᠡ ᠪᠡᠯᠬᠡᠭᠦᠰᠦᠲᠡᠨ ᠢ᠋ ᠨᠢᠭᠡ ᠨᠢ ᠪᠤᠵᠠᠷᠯᠠᠭᠠᠳ ᠦᠭᠡᠢ ᠬᠢᠴᠢᠬᠡᠭᠰᠡᠨ ᠪᠠᠢᠬᠠ!》 ᠭᠡᠵᠦ ᠲᠣᠭᠠ ᠲᠠᠢ ᠬᠡᠳᠦᠬᠡᠨ ᠬᠥᠮᠦᠨ ᠲᠡᠭᠦᠨ ᠢ᠋ ᠪᠦᠯᠢᠶᠡᠨ ᠠᠮᠢᠰᠬᠤᠯ ᠲᠠᠢ ᠦᠭᠡ ᠪᠡᠷ ᠡᠨᠡᠷᠢᠭᠡᠳ ᠬᠡᠷᠡᠭ ᠥᠩᠭᠡᠷᠡᠪᠡ᠃ ᠨᠣᠶᠠᠨ ᠰᠠᠩ ᠠ᠋ᠴᠠ ᠲᠡᠭᠦᠨ ᠦ᠌ ᠨᠡᠷᠡ ᠬᠤᠰᠤᠭᠳᠠᠵᠤ ᠴᠢᠮᠡᠭᠡ ᠠᠯᠳᠠᠷᠠᠪᠠ᠁
᠁ ᠬᠡᠪᠲᠡᠷᠢ ᠶ᠋ᠢᠨ ᠬᠣᠨᠢ ᠮᠠᠯ ᠬᠡᠪᠢᠯᠭᠡ ᠪᠡᠨ ᠪᠦᠪᠡᠢᠯᠡᠵᠦ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠬᠤᠷᠢᠶᠠᠭᠳᠠᠨ ᠳᠣᠯᠣᠭᠠᠨ ᠪᠤᠷᠬᠠᠨ ᠳᠡᠭᠡᠷᠡ ᠳᠡᠭᠳᠡᠴᠢᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠪᠠᠷᠠᠭᠠᠨ ᠤ᠋ ᠬᠠᠰᠠᠭ ᠲᠡᠷᠭᠡᠨ ᠦ᠌ ᠠᠷᠠᠯ ᠳᠣᠣᠭᠤᠷ ᠪᠤᠶᠤ ᠬᠤᠰᠠᠷᠠᠩ ᠬᠦᠷᠡᠭᠴᠢ ᠦᠨᠢᠶᠡ ᠪᠡᠨ ᠨᠥᠮᠥᠷᠢᠳᠡᠵᠦ ᠡᠯᠪᠡᠭ ᠳᠡᠪᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢᠮᠠ ᠪᠠᠨ ᠬᠤᠴᠢᠭᠠᠳ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠵᠦ ᠥᠬᠥᠭᠡᠷᠳᠡᠳᠡᠭ ᠪᠠᠢᠯᠠ ᠳᠠ᠁ ᠪᠢ ᠶᠠᠭᠠᠬᠢᠭᠰᠠᠨ ᠵᠠᠶᠠᠭᠠ ᠨᠢᠮᠭᠡᠨ ᠬᠥᠮᠦᠨ ᠪᠣᠢ⁈ ᠡᠬᠡ ᠡᠴᠢᠭᠡ ᠶ᠋ᠢᠨ ᠪᠤᠶᠠᠨᠲᠤ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠡᠨᠡᠷᠢᠯ ᠬᠠᠢᠷᠠ ᠶ᠋ᠢ ᠬᠦᠷᠲᠡᠬᠦ ᠬᠤᠪᠢ ᠵᠠᠶᠠᠭᠠ ᠴᠦ᠍ ᠦᠭᠡᠢ ᠥᠨᠥᠴᠢᠷᠡᠵᠦ᠂ ᠬᠠᠷᠠᠬᠠᠨ ᠪᠠᠭᠠ ᠠ᠋ᠴᠠ ᠪᠠᠨ ᠪᠠᠶᠠᠨ ᠠᠢᠯ ᠤ᠋ᠨ ᠬᠤᠷᠠᠭᠠ ᠲᠤᠭᠤᠯ ᠪᠤᠴᠠᠭᠠᠵᠤ᠂ ᠠᠢᠯ ᠤ᠋ᠨ ᠲᠣᠭᠣᠭᠠ ᠬᠠᠷᠠᠵᠤ ᠠᠶᠠᠭᠠᠨ ᠤ᠋ ᠰᠢᠪᠬᠠᠷᠤᠤ ᠴᠥᠮᠥᠵᠦ ᠥᠰᠬᠦ ᠳ᠋ᠡᠭᠡᠨ᠂ ᠡᠷᠡ ᠥᠰᠴᠦ ᠢᠰᠡᠭᠡᠢ ᠰᠤᠨᠳᠠᠭ ᠭᠡᠳᠡᠭ ᠢ᠋ᠶ᠋ᠡᠷ ᠡᠷᠡ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠳᠥᠩᠭᠡᠵᠦ ᠬᠦᠷᠦᠭᠡᠳ ᠨᠣᠶᠠᠨ ᠰᠠᠩ ᠤ᠋ᠨ ᠠᠳᠤᠭᠤᠴᠢᠨ ᠪᠣᠯᠤᠯᠠ ᠴᠦ᠍ ᠭᠡᠰᠡᠨ ᠵᠠᠶᠠᠭᠠᠨ ᠤ᠋ ᠠᠮᠠᠷᠠᠭ ᠮᠢᠨᠢ ᠰᠣᠯᠢᠶᠠ ᠪᠠᠯᠠᠢ ᠲᠣᠰᠴᠤ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ᠃ ᠲᠡᠭᠡᠭᠡᠳ ᠡᠭᠦᠨ ᠢ᠋ᠶ᠋ᠡᠷ ᠵᠣᠭᠰᠣᠬᠤ ᠦᠭᠡᠢ ᠠᠮᠢᠲᠠᠨ ᠪᠦᠭᠦᠳᠡ ᠳ᠋ᠦ᠍ ᠠᠳᠠ ᠪᠣᠯᠵᠤ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠵᠣᠯᠢᠭ ᠲᠤ ᠭᠠᠷᠪᠠ᠃ ᠵᠣᠯᠢᠭ ᠲᠤ ᠶᠠᠪᠤᠬᠤ ᠬᠥᠮᠦᠨ ᠢ᠋ ᠭᠦᠷᠲᠡᠮᠴᠢ ᠲᠣᠮ ᠰᠢᠪᠰᠢᠯᠭᠡ ᠶ᠋ᠢᠨ ᠲᠠᠷᠨᠢ ᠤᠩᠰᠢᠵᠤ ᠡᠨᠡ ᠶᠢᠷᠲᠢᠨᠴᠦ ᠡᠴᠡ ᠬᠥᠭᠡᠭᠡᠳᠡᠭ ᠪᠣᠯᠬᠣᠷ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠠᠮᠢᠳᠤ ᠭᠠᠷᠬᠤ ᠶ᠋ᠢᠨ ᠰᠤᠪᠢᠨ ᠪᠠᠢᠳᠠᠭ ᠦᠭᠡᠢ ᠪᠠᠢᠵᠠᠢ᠃ ᠲᠡᠢᠨ ᠬᠦ᠌ ᠨᠡᠷᠡ ᠰᠦᠨᠡᠰᠦ ᠶ᠋ᠢ ᠮᠢᠨᠢ ᠨᠡᠷᠡᠲᠦ ᠶᠢᠷᠲᠢᠨᠴᠦ ᠡᠴᠡ ᠭᠠᠷᠭᠠᠵᠤ᠂ ᠡᠷᠯᠢᠭ ᠦ᠋ᠨ ᠭᠠᠷ ᠲᠤ ᠲᠤᠰᠢᠶᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠦᠬᠦᠬᠦ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ⁈
《ᠪᠤᠷᠬᠠᠨ ᠲᠩᠷᠢ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠪᠣᠭᠣᠯ ᠨᠠᠮᠠᠶ᠋ᠢ ᠢᠩᠭᠢᠵᠦ ᠪᠤᠷᠤᠭᠤ ᠦᠵᠡᠳᠡᠭ ᠶᠦᠮ ᠪᠣᠢ⁈》 ᠭᠡᠰᠡᠨ ᠪᠣᠳᠣᠯ ᠢᠮᠠᠭᠲᠠ ᠲᠡᠭᠦᠨ ᠦ᠌ ᠲᠠᠷᠢᠬᠢᠨ ᠳ᠋ᠤ᠌ ᠡᠷᠭᠢᠯᠳᠦᠵᠦ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠮᠢᠭᠠ ᠨᠢᠭᠡ ᠬᠠᠳᠠᠨ ᠤ᠋ ᠴᠤᠤᠷᠠᠢ ᠱᠤᠤᠭᠢᠬᠤ ᠰᠢᠭ᠋ ᠴᠢᠮᠡᠭᠡ ᠭᠠᠷᠴᠤ《ᠪᠤᠷᠬᠠᠨ ᠲᠩᠷᠢ ᠴᠢᠮᠠᠶ᠋ᠢ ᠪᠤᠷᠤᠭᠤ ᠦᠵᠡᠭᠡ ᠦᠭᠡᠢ᠃ ᠢᠩᠭᠢᠵᠦ ᠪᠣᠳᠣᠭᠰᠠᠭᠠᠷ ᠠᠭᠤᠯᠠ ᠤᠰᠤᠨ ᠤ᠋ ᠨᠠᠪᠳᠠᠭ ᠰᠠᠪᠳᠠᠭ ᠭᠣᠮᠣᠳᠠᠨᠠ ᠰᠢᠦ᠂ ᠨᠢᠭᠦᠯ ᠠ᠋! ᠴᠢᠮᠠᠶ᠋ᠢ ᠡᠷᠯᠢᠭ ᠦ᠋ᠨ ᠲᠡᠨᠳᠡ ᠡᠴᠡ ᠬᠥᠲᠥᠯᠵᠦ ᠠᠪᠴᠢᠷᠠᠨ ᠡᠨᠡ ᠠᠭᠤᠯᠠᠨ ᠳ᠋ᠤ᠌ ᠲᠠᠯᠪᠢᠯᠠ᠁ ᠡᠨᠡ ᠲᠠᠩᠰᠤᠭ ᠰᠠᠢᠬᠠᠨ ᠠᠭᠤᠯᠠ ᠶ᠋ᠢᠨ ᠪᠤᠶᠠᠨ ᠢ᠋ ᠡᠳ᠋ᠯᠡᠭᠡᠳ ᠪᠠᠷᠠᠨᠠ ᠤᠤ ᠳᠠ⁈ ᠬᠠᠨ ᠮᠤᠨᠠ ᠶ᠋ᠢᠨ ᠰᠠᠬᠢᠭᠤᠰᠤ ᠴᠢᠮᠠᠶ᠋ᠢ ᠥᠷᠥᠰᠢᠶᠡᠵᠡᠢ᠃ ᠡᠨᠡ ᠮᠤᠨᠠ ᠠᠭᠤᠯᠠ ᠴᠢᠮᠠ ᠳ᠋ᠤ᠌ ᠬᠦᠰᠡᠬᠦ ᠬᠡᠷᠡᠭᠰᠡᠬᠦ ᠵᠦᠢᠯ ᠢ᠋ ᠴᠢᠨᠢ ᠬᠠᠩᠭᠠᠵᠤ᠂ ᠳᠡᠭᠡᠷᠡ ᠡᠴᠡ ᠴᠢᠨᠢ ᠳᠠᠷᠤᠯᠠᠯ ᠦᠭᠡᠢ ᠳᠡᠷᠭᠡᠳᠡ ᠡᠴᠡ ᠴᠢᠨᠢ ᠭᠠᠴᠢᠯᠠᠯ ᠦᠭᠡᠢ ᠵᠢᠷᠭᠠᠯᠠᠩ ᠲᠠᠢ ᠠᠮᠢᠳᠤᠷᠠᠭᠤᠯᠤᠨᠠ ᠳᠠ ᠬᠥᠭᠡᠷᠦᠬᠦᠢ!》 ᠭᠡᠵᠦ ᠨᠢᠭᠡ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠦ᠌ ᠳᠠᠭᠤ ᠲᠡᠭᠦᠨ ᠢ᠋ ᠪᠤᠳᠤᠩᠭᠤᠢ ᠲᠥᠭᠡᠷᠢᠯ ᠡᠴᠡ ᠳᠠᠭᠤᠳᠠᠨ ᠰᠡᠷᠡᠭᠡᠪᠡ᠃
ᠲᠡᠷᠡ ᠪᠡᠷ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤ ᠵᠢᠷᠭᠢᠭᠰᠡᠨ ᠲᠡᠷᠲᠡᠭᠡ ᠣᠢ ᠳ᠋ᠤ᠌ ᠬᠦᠷᠴᠦ ᠣᠴᠢᠪᠠᠯ ᠥᠨᠥ ᠬᠣᠶᠠᠷ ᠰᠢᠪᠠᠭᠤ《ᠨᠠᠭᠠᠰᠢ ᠪᠠᠨ᠂ ᠨᠠᠭᠠᠰᠢ ᠪᠠᠨ ᠢᠷᠡ! ᠠᠮᠠᠷᠠᠭ ᠴᠢᠨᠢ ᠡᠨᠳᠡ ᠪᠣᠢ᠁》 ᠭᠡᠬᠦ ᠰᠢᠭ ᠵᠢᠷᠭᠢᠭᠡᠳ ᠴᠠᠭᠠᠰᠢ ᠪᠠᠨ ᠨᠢᠰᠪᠡ᠃ ᠡᠢᠨ ᠬᠦ᠌ ᠭᠣᠩᠴᠣᠭᠷᠠᠬᠤᠠ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤᠨ ᠳ᠋ᠤ᠌ ᠰᠦᠨᠡᠰᠦ ᠪᠡᠨ ᠬᠥᠲᠥᠯᠦᠭᠦᠯᠦᠭᠰᠡᠨ ᠰᠢᠭ ᠰᠢᠪᠠᠭᠤ ᠬᠠᠮᠢᠭᠠᠰᠢ ᠪᠠᠨ ᠨᠢᠰᠪᠡᠯ ᠲᠠᠢᠰᠢ ᠪᠠᠨ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠥᠨᠳᠥᠷ ᠤᠯᠠᠭᠠᠨ ᠬᠠᠳᠠᠨ ᠠ᠋ᠴᠠ ᠤᠷᠤᠰᠤᠭᠰᠠᠨ ᠴᠢᠳᠬᠤᠯᠠᠩ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠣᠴᠢᠪᠠ᠃ ᠲᠡᠷᠡ ᠴᠢᠳᠬᠤᠯᠠᠩ ᠤ᠋ᠨ ᠳᠣᠣᠷᠠ ᠨᠣᠮᠢᠨ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠭᠦᠨ ᠤᠰᠤ ᠲᠤᠨᠤᠷᠠᠵᠤ ᠬᠠᠷᠠᠭᠳᠠᠬᠤ ᠨᠢ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠭᠡᠭᠴᠢ ᠪᠣᠢ! ᠲᠡᠷᠡ ᠡᠨᠡ ᠬᠦ᠌ ᠲᠠᠩᠰᠤᠭ ᠪᠠᠢᠭᠠᠯᠢ ᠶ᠋ᠢᠨ ᠰᠠᠢᠬᠠᠨ ᠳ᠋ᠤ᠌ ᠰᠣᠭᠲᠣᠭᠤᠷᠠᠵᠤ ᠰᠡᠳᠬᠢᠯ ᠬᠥᠭᠰᠡᠨᠡ᠃
ᠤᠯᠠᠭᠠᠨ ᠬᠦᠵᠦᠭᠦᠲᠦ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤ ᠤᠯᠠᠮ ᠱᠠᠭᠰᠢᠷᠠᠨ ᠬᠥᠭᠡᠷᠬᠦ ᠰᠢᠭ ᠵᠢᠷᠭᠢᠨ ᠱᠤᠯᠤᠭᠠᠨᠠᠵᠤ《ᠵᠠ᠂ ᠡᠨᠡ ᠳ᠋ᠧᠪᠠᠵᠠᠨ ᠰᠢᠭ᠋ ᠰᠠᠢᠬᠠᠨ ᠣᠷᠣᠨ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠭᠡᠭᠴᠢ ᠶᠠᠭᠤᠲᠠᠢ ᠭᠣᠶᠣ! ᠡᠨᠡ ᠴᠣᠩᠬᠢᠶᠠᠯ ᠳ᠋ᠤ᠌ ᠤᠭ ᠨᠢ ᠦᠳᠡ ᠪᠣᠯᠭᠠᠨ ᠳ᠋ᠤ᠌ ᠨᠢᠭᠡ ᠪᠦᠰᠡᠭᠦᠢ ᠢᠷᠡᠵᠦ ᠤᠬᠢᠶᠠᠨ ᠨᠠᠷᠠᠨ ᠳ᠋ᠤ᠌ ᠪᠡᠶᠡ ᠪᠡᠨ ᠡᠭᠡᠭᠡᠳᠡᠭ ᠰᠠᠨ᠃ ᠴᠢ ᠴᠠᠭᠠᠨᠠ ᠪᠠᠨ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠪᠣᠯ ᠲᠡᠷᠡ ᠭᠣᠶᠣ ᠪᠦᠰᠡᠭᠦᠢ ᠶ᠋ᠢ ᠢᠵᠢᠯᠢ ᠪᠡᠨ ᠪᠣᠯᠭᠠᠵᠤ ᠢᠨᠠᠭᠯᠠ!》 ᠭᠡᠵᠦ ᠣᠯᠠᠨ ᠲᠠᠪᠤᠨ ᠶᠠᠭᠤᠮᠠ ᠵᠠᠬᠢᠭᠰᠠᠨ ᠢ᠋ ᠠᠩᠬᠠ ᠭᠣᠩᠴᠣᠭᠷᠠᠬᠤᠠ ᠨᠢᠭᠡ ᠴᠦ᠍ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃
ᠠᠭᠤᠯᠠ ᠬᠠᠳᠠ᠂ ᠤᠰᠤ ᠬᠦᠷᠬᠢᠷᠡ᠂ ᠪᠤᠭᠤ ᠰᠤᠭᠤ ᠵᠡᠷᠭᠡ ᠠᠮᠢᠳᠤ ᠵᠢᠷᠤᠭ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠰᠣᠭᠲᠣᠭᠤᠷᠠᠭᠰᠠᠨ ᠭᠣᠩᠴᠣᠭᠷᠠᠬᠤᠠ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤ ᠶ᠋ᠢ ᠠᠯᠢ ᠬᠡᠳᠦᠢᠨ ᠮᠠᠷᠲᠠᠵᠤ ᠣᠷᠬᠢᠪᠠ᠃ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠬᠣᠶᠠᠷ ᠠᠯᠠᠭ ᠰᠢᠪᠠᠭᠤ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠣᠯᠠᠨ ᠶᠠᠭᠤᠮᠠ ᠱᠤᠯᠤᠭᠠᠨᠠᠨ ᠶᠠᠷᠢᠵᠤ ᠶᠠᠷᠢᠭᠠᠳ《ᠵᠠ᠂ ᠪᠢᠳᠡ ᠬᠣᠶᠠᠷ ᠶᠠᠪᠤᠯᠠ᠁》 ᠭᠡᠳ ᠨᠢᠰᠴᠦ ᠣᠳᠤᠭᠰᠠᠨ ᠢ᠋ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃
ᠭᠣᠩᠴᠣᠭᠷᠠᠬᠤᠠ ᠳᠡᠮᠡᠢ ᠯᠡ ᠰᠢᠪᠠᠭᠤ ᠵᠢᠷᠭᠢᠬᠦ ᠶ᠋ᠢ ᠰᠣᠨᠢᠷᠬᠠᠵᠤ ᠭᠦᠶᠦᠭᠡᠳ ᠶᠡᠬᠡᠳᠡ ᠶᠠᠳᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠠᠷᠠᠨ ᠳ᠋ᠤ᠌ ᠬᠠᠯᠠᠭᠰᠠᠨ ᠬᠠᠳᠠᠨ ᠳᠡᠭᠡᠷᠡ ᠨᠢᠷᠤᠭᠤ ᠲᠡᠨᠢᠢᠨ ᠬᠡᠪᠲᠡᠪᠡ᠃ ᠳᠣᠣᠷᠠ ᠠ᠋ᠴᠠ ᠨᠢ ᠬᠠᠯᠠᠭᠤᠨ ᠬᠠᠨᠵᠤ ᠰᠢᠭ᠋ ᠬᠠᠯᠠᠭᠠᠵᠤ᠂ ᠳᠡᠭᠡᠷᠡ ᠡᠴᠡ ᠨᠢ ᠰᠢᠷᠠᠬᠤ ᠨᠠᠷᠠᠨ ᠤ᠋ ᠲᠥᠭᠡᠨᠡᠯ ᠲᠡᠭᠦᠨ ᠢ᠋ ᠤᠳᠠᠯ ᠦᠭᠡᠢ ᠨᠣᠢᠷ ᠤ᠋ᠨ ᠳᠠᠯᠠᠯᠭᠠ ᠠᠪᠤᠭᠤᠯᠪᠠ᠁
ᠨᠢᠭᠡ ᠡᠳᠦᠷ ᠭᠣᠩᠴᠣᠭᠷᠠᠬᠤᠠ ᠠᠳᠤᠭᠤ ᠪᠠᠨ ᠪᠤᠴᠠᠭᠠᠴᠢᠬᠠᠭᠠᠳ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠥᠪᠡᠭᠡ ᠪᠡᠷ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠭᠡᠶᠦᠷᠡᠵᠦ ᠶᠠᠪᠤᠲᠠᠯᠠ ᠨᠢᠭᠡ ᠬᠥᠮᠦᠨ ᠦ᠌ ᠬᠡᠭᠦᠷ ᠬᠠᠲᠤᠨ ᠤ᠋ ᠤᠰᠤᠨ ᠳ᠋ᠤ᠌ ᠬᠥᠪᠴᠦ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠨᠢ ᠵᠠᠳᠠᠷᠠᠨ ᠲᠡᠯᠡᠷᠡᠵᠦ ᠤᠷᠤᠰᠬᠠᠯ ᠤ᠋ᠨ ᠳᠡᠭᠡᠷᠡ ᠡᠴᠡ ᠤᠰᠤᠨ ᠤ᠋ ᠳᠠᠪᠠᠯᠭᠠᠨ ᠳ᠋ᠤ᠌ ᠴᠣᠬᠢᠭᠤᠯᠤᠭᠰᠠᠭᠠᠷ ᠠᠢᠰᠤᠢ ᠬᠠᠷᠠᠭᠳᠠᠪᠠ᠃ ᠯᠠᠪ ᠨᠣᠮᠢᠨ! ᠭᠡᠳ《ᠨᠣᠮᠢᠨ ᠠ᠋! ᠨᠣᠮᠢᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢᠴᠢᠬᠠᠯᠠ! ᠬᠤᠷᠳᠤᠨ᠁ ᠴᠢ ᠪᠢᠲᠡᠭᠡᠢ ᠨᠠᠮᠠᠶ᠋ᠢ ᠬᠠᠶᠠᠴᠢᠬᠠᠭᠠᠳ ᠶᠠᠪᠤ!》 ᠭᠡᠳ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠦᠰᠦᠷᠦᠨ ᠣᠷᠣᠵᠤ ᠲᠡᠷᠡ ᠬᠥᠮᠦᠨ ᠢ᠋ ᠲᠡᠪᠡᠷᠢᠨ ᠭᠠᠷᠭᠠᠪᠠᠯ ᠨᠡᠭᠡᠷᠡᠨ ᠨᠣᠮᠢᠨ ᠤ᠋ ᠬᠡᠭᠦᠷ ᠮᠥᠨ ᠪᠠᠢᠯᠠ᠃ ᠭᠣᠩᠴᠣᠭᠷᠠᠬᠤᠠ ᠨᠣᠮᠢᠨ ᠤ᠋ ᠬᠡᠭᠦᠷ ᠢ᠋ ᠲᠡᠪᠡᠷᠢᠨ《ᠨᠣᠮᠢᠨ ᠠ᠋! ᠰᠡᠷᠡᠭᠡᠴᠢ᠂ ᠪᠢ ᠭᠣᠩᠴᠣᠭ ᠪᠠᠢᠨᠠ᠁》 ᠭᠡᠵᠦ ᠬᠡᠴᠢᠨᠡᠭᠡᠨ ᠳᠠᠭᠤᠳᠠᠪᠠᠴᠤ ᠰᠡᠷᠡᠭᠰᠡᠨ ᠦᠭᠡᠢ᠃ ᠭᠣᠩᠴᠣᠭᠷᠠᠬᠤᠠ ᠨᠣᠮᠢᠨ ᠤ᠋ ᠬᠡᠭᠦᠷ ᠢ᠋ ᠲᠡᠪᠡᠷᠢᠨ ᠱᠣᠭᠰᠢᠷᠠᠲᠠᠯᠠ ᠤᠬᠢᠯᠠᠪᠠ᠁
ᠤᠨᠲᠠᠭᠠ ᠪᠠᠷ ᠢ᠋ᠶ᠋ᠠᠨ ᠤᠬᠢᠯᠠᠭᠰᠠᠨ ᠲᠡᠭᠦᠨ ᠦ᠌ ᠨᠢᠯᠪᠤᠰᠤ ᠵᠣᠪᠬᠢᠨ ᠤ᠋ ᠬᠢᠨᠢ ᠪᠤᠯᠤᠩ ᠳ᠋ᠤ᠌ ᠪᠤᠯᠠᠭ ᠰᠢᠭ᠋ ᠮᠡᠯᠮᠡᠷᠡᠨ ᠲᠤᠨᠤᠷᠠᠵᠤ ᠬᠣᠶᠠᠷ ᠰᠠᠨᠴᠢᠭ ᠤᠷᠤᠭᠤ ᠨᠢ ᠤᠷᠤᠰᠤᠨᠠ᠃
ᠨᠢᠭᠡᠨ ᠲᠤᠩ ᠴᠠᠭᠠᠨ ᠡᠷᠪᠡᠬᠡᠢ ᠭᠣᠩᠴᠣᠭᠷᠠᠬᠤᠠ ᠶ᠋ᠢᠨ ᠰᠣᠷᠮᠤᠤᠰᠤᠨ ᠳᠡᠭᠡᠷᠡ ᠰᠠᠭᠤᠵᠤ ᠵᠣᠪᠬᠢᠨ ᠤ᠋ ᠪᠤᠯᠠᠭ ᠤ᠋ᠨ ᠤᠰᠤᠨ ᠠ᠋ᠴᠠ ᠤᠮᠳᠠᠯᠠᠬᠤ ᠭᠡᠰᠡᠨ ᠤᠤ? ᠡᠰᠡᠪᠡᠯ ᠨᠢᠯᠪᠤᠰᠤ ᠶ᠋ᠢ ᠨᠢ ᠠᠷᠴᠢᠬᠤ ᠭᠡᠰᠡᠨ ᠭᠡᠰᠡᠨ ᠤᠤ? ᠲᠣᠷᠭᠠᠨ ᠳᠠᠯᠠᠪᠴᠢ ᠪᠠᠨ ᠳᠡᠪᠳᠡᠷᠢᠵᠦ ᠲᠡᠭᠦᠨ ᠦ᠌ ᠨᠢᠳᠦ ᠶ᠋ᠢ ᠡᠷᠪᠡᠭᠡᠨᠡᠭᠦᠯᠦᠨᠡ᠃
ᠨᠢᠳᠦ ᠨᠢ ᠪᠠᠯᠠᠷᠬᠠᠢᠲᠤᠵᠤ ᠨᠣᠮᠢᠨ ᠤ᠋ ᠵᠢᠰᠦ ᠴᠦ᠍ ᠲᠣᠳᠣ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠭᠣᠩᠴᠣᠬᠷᠠᠬᠤᠠ ᠨᠣᠮᠢᠨ ᠢ᠋ᠶ᠋ᠠᠨ ᠳᠠᠬᠢᠨᠲᠠ ᠨᠢᠭᠡ ᠰᠠᠢᠬᠠᠨ ᠬᠠᠷᠠᠵᠤ ᠦᠵᠡᠶᠡ ᠭᠡᠳ ᠡᠷᠪᠡᠭᠡᠨᠡᠬᠦ ᠨᠢᠳᠦ ᠪᠡᠨ ᠨᠤᠬᠤᠯᠠᠪᠠᠯ ᠲᠤᠩ ᠴᠠᠭᠠᠨ ᠡᠷᠪᠡᠬᠡᠢ ᠦᠷᠭᠦᠨ ᠨᠢᠰᠪᠡ᠃
ᠭᠣᠩᠴᠤᠭᠷᠠᠬᠤᠠ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠡᠯᠡ᠃ ᠨᠣᠮᠢᠨ ᠠᠯᠠᠭᠠ᠃ ᠰᠠᠶᠢᠬᠠᠨ ᠡᠪᠦᠷ ᠳᠡᠭᠡᠷᠡ ᠮᠢᠨᠢ᠁ ᠪᠤᠲᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠭᠰᠠᠨ ᠰᠢᠳᠡ! ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ《ᠶᠠᠮᠠᠷ ᠮᠠᠭᠤᠬᠠᠢ ᠵᠡᠭᠦᠳᠦ ᠪᠣᠢ? ᠨᠣᠮᠢᠨ ᠢ᠋ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠬᠠᠷᠠᠢᠭᠠᠳ ᠦᠬᠦᠴᠢᠬᠡᠯᠡ ᠭᠡᠳᠡᠭ ᠴᠢᠨᠢ᠁ ᠭᠡᠬᠦ ᠳ᠋ᠡᠭᠡᠨ ᠵᠡᠭᠦᠳᠦ ᠡᠰᠡᠷᠭᠦ ᠪᠠᠢᠳᠠᠭ ᠭᠡᠵᠦ ᠨᠠᠰᠤᠲᠠᠢᠴᠤᠤᠯ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠬᠥᠮᠦᠨ ᠦᠬᠦᠴᠢᠬᠡᠯᠡ ᠭᠡᠵᠦ ᠵᠡᠭᠦᠳᠦᠯᠡᠪᠡᠯ ᠬᠠᠷᠢᠨ ᠦᠬᠦᠭᠡ ᠦᠭᠡᠢ ᠪᠠᠢᠳᠠᠭ ᠮᠥᠷᠲᠡᠭᠡᠨ ᠲᠡᠷᠡ ᠬᠥᠮᠦᠨ ᠨᠢ ᠤᠷᠲᠤ ᠨᠠᠰᠤᠯᠠᠳᠠᠭ ᠴᠦ᠍ ᠭᠡᠳᠡᠭ!》 ᠭᠡᠵᠦ ᠪᠡᠶᠡ ᠪᠡᠨ ᠲᠠᠢᠳᠬᠤᠷᠠᠭᠤᠯᠤᠨᠠ᠃
ᠪᠡᠶᠡ ᠶ᠋ᠢᠨ ᠴᠢᠯᠡᠭᠡ ᠲᠠᠢᠯᠬᠤ ᠭᠡᠵᠦ ᠭᠣᠩᠴᠣᠭᠷᠠᠬᠤᠠ ᠡᠪᠰᠢᠶᠡᠯᠭᠡᠨ ᠰᠤᠨᠢᠶᠠᠵᠤ ᠠᠪᠤᠭᠠᠳ《ᠵᠠ᠂ ᠪᠠᠢᠵᠠ! ᠣᠳᠣ ᠬᠠᠮᠢᠭᠠᠰᠢ ᠪᠠᠨ ᠵᠦᠭᠯᠡᠳᠡᠭ ᠪᠢᠯᠡ?》 ᠭᠡᠵᠦ ᠪᠣᠳᠣᠲᠠᠯᠠ ᠴᠠᠭᠠᠳᠤ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠫᠦᠯᠦᠷᠡᠩ ᠭᠡᠬᠦ ᠳᠠᠭᠤ ᠭᠠᠷᠴᠤ ᠲᠡᠷᠡ ᠳᠠᠭᠤᠨ ᠢ᠋ᠶ᠋ᠠᠷ ᠴᠣᠩᠬᠢᠶᠠᠯ ᠤ᠋ᠨ ᠨᠣᠮᠢᠨ ᠴᠡᠩᠬᠡᠷ ᠤᠰᠤ ᠠᠷ ᠲᠡᠳᠡᠨ ᠦᠶᠡᠯᠵᠡᠨᠡ᠃ ᠭᠦᠨ ᠤᠰᠤᠨ ᠳᠣᠲᠣᠷᠠ ᠨᠢᠭᠡᠨ ᠬᠤᠸᠠ ᠴᠠᠭᠠᠨ ᠲᠣᠮᠣ ᠵᠢᠭᠠᠰᠤ ᠴᠦ᠍ ᠶᠤᠮ ᠤᠤ? ᠮᠡᠯᠡᠬᠡᠢ ᠴᠦ᠍ ᠶᠦᠮ ᠤᠤ ᠭᠡᠮᠡᠷ ᠨᠢᠭᠡ ᠠᠮᠢᠲᠠᠨ ᠱᠤᠮᠪᠠᠵᠤ ᠪᠠᠢᠨᠠ᠃ ᠰᠤᠮᠤ ᠰᠢᠭ᠋ ᠰᠤᠮᠤᠳᠠᠭᠠᠳ ᠮᠤᠷᠤᠯᠵᠠᠬᠤ ᠨᠢ ᠵᠢᠭᠠᠰᠤ ᠰᠢᠭ᠋᠃ ᠳᠥᠷᠪᠡᠨ ᠮᠥᠴᠢᠯᠡᠭᠡᠳ ᠬᠣᠶᠠᠷ ᠲᠠᠬᠢᠮ ᠨᠢ ᠨᠤᠭᠤᠷᠠᠨ ᠲᠡᠢᠷᠬᠦ ᠨᠢ ᠮᠡᠯᠡᠬᠡᠢ ᠴᠦ᠍ ᠶᠦᠮ ᠰᠢᠭ ᠪᠠᠢᠪᠠ᠃《ᠡᠨᠡ ᠴᠣᠬᠣᠮ ᠶᠠᠭᠤ ᠪᠣᠯᠴᠢᠬᠠᠪᠠ?》 ᠭᠡᠵᠦ ᠬᠠᠴᠢᠷᠬᠠᠭᠰᠠᠨ ᠭᠣᠩᠴᠣᠭᠷᠠᠬᠤᠠ ᠶᠡᠬᠡᠳᠡ ᠭᠡᠯᠮᠡᠵᠦ ᠰᠡᠩᠳᠡ ᠮᠡᠩᠳᠡ ᠮᠣᠳᠣᠨ ᠤ᠋ ᠳᠠᠯᠳᠠ ᠨᠢᠭᠤᠭᠳᠠᠵᠤ ᠴᠣᠬᠣᠮ ᠵᠢᠭᠠᠰᠤ ᠤᠤ ᠮᠡᠯᠡᠬᠡᠢ ᠤᠤ ᠭᠡᠳᠡᠭ ᠢ᠋ ᠳᠠᠬᠢᠨ ᠰᠣᠨᠢᠷᠬᠠᠨ ᠬᠠᠷᠠᠯᠠ᠃ ᠤᠳᠠᠭᠰᠠᠨ ᠦᠭᠡᠢ ᠲᠡᠷᠡ ᠠᠮᠢᠲᠠᠨ ᠬᠠᠷᠠᠯᠠᠵᠤ ᠬᠠᠷᠠᠭᠳᠠᠨ ᠤᠰᠤ ᠴᠣᠭᠣᠯᠤᠨ ᠪᠤᠯᠲᠠᠢᠪᠠ᠃《ᠬᠥᠮᠦᠨ ᠵᠢᠭᠠᠰᠤ》 ᠭᠡᠵᠦ ᠭᠣᠩᠴᠣᠭᠷᠠᠬᠤᠠ ᠳᠦᠳᠦᠨᠡᠭᠰᠡᠨ ᠢ᠋ᠶ᠋ᠡᠨ ᠬᠢᠷᠳ᠋ᠬᠢᠨ ᠠᠶᠤᠵᠤ《ᠶᠠᠮᠠᠷ ᠬᠠᠮᠢᠭᠠᠰᠢ ᠪᠠᠨ ᠬᠠᠴᠢᠨ ᠠᠮᠢᠲᠠᠨ ᠪᠣᠢ? ᠬᠥᠮᠦᠨ ᠲᠣᠯᠣᠭᠠᠢ ᠲᠠᠢ ᠵᠢᠭᠠᠰᠤ᠂ ᠡᠰᠡᠪᠡᠰᠦ ᠬᠥᠮᠦᠨ ᠲᠣᠯᠣᠭᠠᠢ ᠲᠠᠢ ᠯᠠᠭ ᠮᠡᠯᠡᠬᠡᠢ ᠤᠤ?》 ᠭᠡᠵᠦ ᠡᠯᠳᠡᠪ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠥᠪᠴᠢ ᠪᠡᠶᠡ ᠳ᠋ᠦ᠍ᠨᠢ ᠬᠥᠯᠥᠰᠥ ᠪᠠᠳᠬᠤᠪᠠ᠃
ᠲᠡᠷᠡ ᠬᠥᠮᠦᠨ ᠲᠣᠯᠣᠭᠠᠢ ᠲᠠᠢ ᠰᠣᠨᠢᠨ ᠠᠮᠢᠲᠠᠨ ᠤᠰᠤᠨ ᠳᠣᠲᠣᠷᠠ ᠨᠠᠭᠠᠰᠢ ᠴᠠᠭᠠᠰᠢ ᠬᠡᠳᠦᠨᠲᠡ ᠤᠮᠪᠠᠨ ᠴᠣᠯᠭᠢᠭᠰᠠᠨ ᠢ᠋ᠶ᠋ᠠᠨ ᠴᠣᠩᠬᠢᠶᠠᠯ ᠤ᠋ᠨ ᠬᠥᠪᠡᠭᠡ ᠳᠠᠭᠠᠤ ᠭᠦᠢᠬᠡᠨ ᠭᠠᠵᠠᠷ ᠤᠰᠤᠨ ᠠ᠋ᠴᠠ ᠨᠢᠭᠡᠮᠦᠰᠦᠨ ᠴᠣᠷᠣᠢᠨ ᠪᠣᠰᠪᠠ᠃ ᠤᠰᠤᠨ ᠠ᠋ᠴᠠ ᠪᠤᠯᠲᠠᠢᠭᠰᠠᠨ ᠠᠮᠢᠲᠠᠨ ᠪᠦᠬᠦᠨ ᠪᠡᠶᠡ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠳᠡᠭ ᠰᠢᠭ ᠢ᠋ᠶ᠋ᠡᠷ ᠲᠡᠷᠡ ᠰᠣᠨᠢᠨ ᠠᠮᠢᠲᠠᠨ ᠴᠦ᠍ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠬᠦ ᠳ᠋ᠦ᠍ ᠨᠢᠷᠤᠭᠤ ᠶ᠋ᠢ ᠨᠢ ᠨᠠᠯᠠᠨ ᠤᠷᠤᠰᠤᠭᠰᠠᠨ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠨᠢ ᠤᠰᠤᠨ ᠰᠤᠪᠤᠳ ᠲᠥᠰᠦᠷᠭᠡᠨ ᠪᠤᠲᠠᠷᠠᠨᠠ᠃
ᠨᠢᠭᠡ ᠱᠠᠯᠳᠠᠩ ᠬᠥᠮᠦᠨ! ᠲᠡᠷᠡ ᠮᠥᠷᠲᠡᠭᠡᠨ ᠪᠦᠰᠡᠭᠦᠢ ᠬᠥᠮᠦᠨ᠃
ᠭᠣᠩᠴᠣᠭᠷᠠᠬᠤᠠ ᠨᠢᠳᠦ ᠪᠡᠨ ᠢᠲᠡᠭᠡᠬᠦ ᠦᠭᠡᠢ ᠨᠤᠬᠤᠯᠠᠵᠤ ᠨᠤᠬᠤᠯᠠᠵᠤ ᠳᠠᠬᠢᠨ ᠬᠠᠷᠠᠪᠠ᠃ ᠨᠢᠭᠤᠭᠳᠠᠭᠰᠠᠨ ᠮᠣᠳᠣᠨ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠡᠷᠬᠡ ᠦᠭᠡᠢ ᠥᠨᠳᠡᠢᠨ ᠪᠣᠰᠴᠤ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢ ᠨᠠᠷᠢᠨ ᠠᠵᠢᠭᠯᠠᠪᠠᠯ ᠨᠡᠭᠡᠷᠡᠨ ᠬᠥᠮᠦᠨ ᠪᠠᠢᠯᠠ᠃
ᠱᠠᠯᠳᠠᠩ ᠪᠦᠰᠡᠭᠦᠢ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠪᠠᠢᠨᠠ᠃ ᠲᠠᠰᠤ ᠬᠠᠷᠠ ᠤᠷᠲᠤ ᠭᠡᠵᠢᠭᠡ ᠨᠢ ᠡᠭᠡᠭᠡ ᠯᠡ ᠬᠦᠷᠡᠩ ᠤᠯᠠᠭᠠᠨ ᠬᠠᠳᠠᠨ ᠠ᠋ᠴᠠ ᠴᠢᠳᠬᠤᠭᠰᠠᠨ ᠴᠢᠳᠬᠤᠯᠠᠩ ᠰᠢᠭ᠋ ᠢ᠋ᠶ᠋ᠡᠷ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠬᠤᠸᠠ ᠴᠠᠭᠠᠨ ᠨᠢᠷᠤᠭᠤ ᠶ᠋ᠢ ᠨᠡᠢᠳᠡᠮ ᠪᠦᠷᠬᠦᠵᠦ ᠲᠠᠬᠢᠮ ᠳᠠᠪᠠᠲᠠᠯᠠ ᠪᠠᠭᠤᠵᠠᠢ᠃ ᠲᠡᠷᠡ ᠪᠦᠰᠡᠭᠦᠢ ᠡᠨᠳᠡ ᠲᠡᠨᠳᠡᠬᠢ ᠨᠢᠭᠤᠴᠠᠭᠠᠢ ᠲᠣᠷᠭᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠬᠦᠴᠦᠲᠡᠢ ᠬᠦᠴᠦᠲᠡᠢ ᠱᠦᠷᠭᠦᠭᠡᠨ ᠵᠦᠯᠭᠦᠵᠦ ᠤᠰᠤ ᠴᠠᠷᠳᠠᠨ ᠤᠬᠢᠶᠠᠵᠤ ᠪᠠᠷᠠᠭᠠᠳ ᠮᠥᠨ ᠱᠠᠯᠳᠠᠩ ᠢ᠋ᠶ᠋ᠠᠷ ᠶᠠᠪᠤᠵᠤ ᠴᠠᠭᠠᠳᠤ ᠡᠩᠭᠡᠷ ᠦ᠋ᠨ ᠭᠥᠯᠢᠭᠡᠷ ᠬᠦᠷᠡᠩ ᠬᠠᠳᠠᠨ ᠳᠡᠭᠡᠷᠡ ᠭᠠᠷᠴᠤ ᠣᠴᠣᠢᠨ ᠰᠠᠭᠤᠪᠠ᠃
ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠵᠠᠢᠳᠠᠩ ᠠᠯᠴᠠᠢᠴᠢᠬᠠᠭᠠᠳ ᠪᠥᠬᠥᠢᠵᠦ ᠶᠠᠭᠤ ᠨᠢᠭᠡ ᠪᠡᠨ ᠣᠷᠣᠯᠳᠣᠨᠠ᠃ ᠲᠡᠭᠦᠨ ᠢ᠋ ᠪᠥᠬᠥᠢᠬᠦᠯᠡᠷ ᠤᠷᠲᠤ ᠭᠡᠵᠢᠭᠡ ᠨᠢ ᠶᠡᠭᠦᠷᠡᠨ ᠪᠠᠭᠤᠵᠤ ᠡᠮᠦᠨᠡ ᠪᠡᠶᠡ ᠶ᠋ᠢ ᠨᠢ ᠬᠠᠯᠬᠠᠯᠠᠵᠤ ᠶᠠᠭᠤ ᠴᠦ᠍ ᠣᠯᠵᠤ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠪᠠ᠃
ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢ ᠬᠠᠷᠠᠭᠠᠳ ᠰᠢᠪᠡᠷ ᠪᠠᠯᠢᠩ ᠰᠢᠭ᠋ ᠬᠥᠳᠡᠯᠦᠯ ᠦᠭᠡᠢ ᠪᠦᠯᠲᠡᠢᠵᠦ ᠬᠣᠶᠠᠷ ᠨᠢᠳᠦ ᠨᠢ ᠤᠬᠤᠷᠬᠠᠢ ᠠ᠋ᠴᠠ ᠪᠦᠯᠲᠡᠷᠡᠮᠡᠷ ᠪᠣᠯᠵᠤ ᠪᠡᠶᠡ ᠨᠢ ᠬᠠᠴᠢᠨ ᠪᠣᠯᠪᠠ᠃ ᠬᠡᠰᠡᠭ ᠤᠳᠠᠭᠠᠳ ᠱᠠᠯᠳᠠᠩ ᠪᠦᠰᠡᠭᠦᠢ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠪᠡᠨ ᠳᠢᠭᠯᠡᠨ ᠨᠢᠷᠤᠭᠤᠨ ᠤ᠋ ᠪᠠᠨ ᠠᠷᠤ ᠲᠠᠢᠰᠢ ᠬᠠᠶᠠᠭᠠᠳ ᠬᠣᠶᠠᠷ ᠬᠥᠬᠥ ᠪᠡᠨ ᠳᠣᠣᠷᠠ ᠠ᠋ᠴᠠ ᠨᠢ ᠡᠪᠯᠢᠭᠬᠡᠨ ᠬᠤᠮᠢᠵᠤ ᠬᠥᠬᠥᠨ ᠦ᠌ ᠪᠡᠨ ᠴᠡᠴᠡᠭ ᠢ᠋ ᠬᠥᠨᠳᠡᠢᠬᠡᠨ ᠲᠡᠮᠲᠡᠷᠢᠵᠦ ᠴᠢᠮᠬᠢᠯᠡᠭᠡᠳ ᠳᠠᠬᠢᠨ ᠬᠣᠶᠠᠷ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ ᠳᠡᠮᠲᠡᠢᠬᠡᠨ ᠥᠷᠥᠨᠡ᠃
《ᠪᠢ ᠴᠣᠬᠣᠮ ᠬᠠᠮᠢᠭᠠ ᠢᠷᠡᠴᠢᠬᠡᠪᠡ? ᠥᠭᠡᠷᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠢᠷᠡᠴᠢᠬᠡᠯᠡ ᠭᠡᠵᠦ ᠤᠤ?》 ᠭᠡᠵᠦ ᠪᠡᠶᠡ ᠪᠡᠨ ᠢᠲᠡᠭᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠪᠡᠶᠡ ᠡᠴᠡ ᠪᠡᠨ ᠢᠩᠭᠢᠵᠦ ᠠᠰᠠᠭᠤᠪᠠ᠃ ᠵᠥᠪ ᠬᠠᠷᠢᠭᠤᠯᠲᠠ ᠣᠯᠵᠤ ᠴᠢᠳᠠᠭᠠ ᠦᠭᠡᠢ᠃《ᠪᠢ ᠴᠣᠬᠣᠮ ᠦᠬᠦᠴᠢᠬᠡᠭᠰᠡᠨ ᠤᠤ? ᠠᠮᠢᠳᠤ ᠪᠠᠢᠭᠠ ᠶᠤᠮ ᠤᠤ?》 ᠭᠡᠵᠦ ᠵᠠᠮᠤᠷ ① ᠤ᠋ᠨ ᠥᠷᠭᠡᠰᠦ ᠪᠡᠷ ᠬᠤᠷᠤᠭᠤ ᠪᠠᠨ ᠬᠠᠳᠬᠤᠵᠤ ᠦᠵᠡᠪᠡ᠃ ᠵᠢᠮ ᠬᠢᠨ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠲᠠᠯᠠ ᠡᠪᠡᠳᠦᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤᠨ ᠤ᠋ ᠥᠨᠳᠡᠭᠡᠨ ᠡᠴᠡ ᠨᠢ ᠤᠯᠠᠭᠠᠨ ᠴᠢᠰᠤ ᠮᠡᠯᠬᠢᠪᠡ᠃《ᠪᠢ ᠦᠬᠦᠭᠡ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠴᠢᠰᠤ ᠪᠠᠨ ᠦᠵᠡᠵᠦ ᠮᠡᠳᠡᠭᠡᠳ ᠭᠣᠩᠴᠣᠭᠷᠠᠬᠤᠠ ᠤᠷᠠᠨ ᠬᠡᠯᠡ ᠲᠡᠢ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤᠨ ᠠ᠋ᠴᠠ ᠠᠰᠠᠭᠤᠶᠠ《ᠴᠢ ᠨᠠᠮᠠᠶ᠋ᠢ ᠬᠠᠮᠢᠭᠠ ᠶᠠᠮᠠᠷ ᠭᠠᠵᠠᠷ ᠳᠠᠭᠠᠭᠤᠯᠤᠭᠠᠳ ᠢᠷᠡᠴᠢᠬᠡᠪᠡ?》 ᠭᠡᠬᠦ ᠳ᠋ᠦ᠍ ᠰᠢᠭᠤᠢ ᠳᠣᠲᠣᠷᠠ ᠱᠤᠯᠤᠭᠠᠨᠠᠭᠰᠠᠨ ᠣᠯᠠᠨ ᠰᠢᠪᠠᠭᠤ ᠳᠣᠲᠣᠷᠠ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤ ᠠᠯᠠᠭᠠ ᠪᠠᠢᠪᠠ᠃
ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠬᠣᠶᠠᠷ ᠬᠥᠬᠥ ᠪᠡᠨ ᠳᠡᠮᠲᠡᠢᠬᠡᠨ ᠥᠷᠥᠵᠦ ᠥᠷᠥᠭᠡᠳ ᠲᠡᠷᠡ ᠭᠥᠯᠢᠭᠡᠷ ᠬᠠᠳᠠᠨ ᠳᠡᠭᠡᠷᠡ ᠲᠩᠷᠢ ᠬᠠᠨᠳᠤᠨ ᠬᠡᠪᠲᠡᠪᠡ᠃
ᠭᠠᠩ ᠤ᠋ᠨ ᠲᠩᠷᠢ ᠶ᠋ᠢᠨ ᠶᠠᠪᠠᠭᠠᠨ ᠰᠢᠭᠤᠷᠭᠠ ᠬᠠᠮᠠᠷ ᠬᠠᠳᠬᠤᠬᠤ ᠡᠪᠡᠰᠦ ᠦᠭᠡᠢ ᠮᠠᠩᠬᠠ ᠶ᠋ᠢ ᠱᠦᠭᠦᠷᠳᠡᠵᠦ ᠲᠠᠯᠠ ᠶ᠋ᠢᠨ ᠬᠠᠭᠤᠷᠠᠢ ᠬᠤᠳᠳᠤᠭ ᠲᠤ ᠲᠠᠭᠯᠠᠷᠠᠵᠤ ᠠᠪᠤᠭᠠᠳ ᠳᠠᠬᠢᠨ ᠰᠢᠷᠦᠭᠦᠰᠦᠨ ᠳᠣᠭᠰᠢᠷᠠᠵᠤ ᠭᠠᠭᠴᠠᠬᠠᠨ ᠪᠤᠲᠠ ᠲᠠᠢ ᠨᠠᠮᠬᠠᠨ ᠬᠥᠲᠥᠯ ᠦ᠋ᠨ ᠪᠤᠲᠠ ᠶ᠋ᠢ ᠦᠨᠳᠦᠰᠦ ᠪᠡᠷ ᠨᠢ ᠡᠷᠭᠢᠭᠦᠯᠴᠢᠬᠡᠮᠡᠷ ᠬᠠᠤᠭᠢᠵᠤ ᠵᠢᠯᠠᠭᠠ ᠤᠷᠤᠭᠤᠳᠠᠨ ᠬᠤᠢᠰᠠᠭᠠᠨᠠᠨᠠ᠃ ᠭᠠᠩ ᠤ᠋ᠨ ᠲᠩᠷᠢ ᠶ᠋ᠢᠨ ᠭᠠᠯᠵᠠᠭᠤ ᠲᠠᠢ ᠰᠠᠯᠬᠢ ᠨᠠᠮᠬᠠᠨ ᠬᠥᠲᠥᠯ ᠦ᠋ᠨ ᠳᠣᠣᠷᠠᠬᠢ ᠬᠠᠷᠠᠵᠠ ᠶ᠋ᠢᠨ ᠬᠠᠪᠬᠠᠭᠠᠰᠤ ᠶ᠋ᠢ ᠬᠠᠭᠤᠯᠴᠢᠬᠠᠮᠠᠷ ᠪᠣᠯᠬᠤ ᠴᠦ᠍ ᠰᠢᠭ᠋᠂ ᠬᠠᠷᠢᠨ ᠪᠠᠰᠠ ᠬᠠᠷᠠᠵᠠ ᠶ᠋ᠢᠨ ᠮᠡᠯᠲᠡᠯᠵᠡᠭᠰᠡᠨ ᠬᠥᠭᠡᠷᠦᠬᠦᠨ ᠠᠨᠢᠰᠬᠠ ᠶ᠋ᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠪᠠᠷ ᠲᠠᠭᠯᠠᠴᠢᠬᠠᠮᠠᠷ ᠪᠣᠯᠬᠤ ᠨᠢ ᠰᠣᠨᠢᠨ ᠠ᠋!
ᠭᠡᠨᠡᠳᠲᠡ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠴᠢᠨᠡᠭᠡ ᠮᠡᠳᠡᠨ ᠬᠠᠰᠬᠢᠷᠤᠨᠠ᠁
— ᠭᠣᠩᠴᠣᠭᠷᠠᠬᠤᠠ ᠠ᠋᠂ ᠴᠢ ᠠᠮᠢᠳᠤ ᠪᠠᠢᠪᠠᠯ ᠨᠠᠭᠠᠰᠢ ᠪᠠᠨ ᠢᠷᠡ! ᠡᠨᠡ ᠬᠣᠷᠸᠠ ᠳ᠋ᠤ᠌ ᠬᠤᠪᠢ ᠲᠠᠢ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠪᠡᠶᠡ ᠶ᠋ᠢ ᠮᠢᠨᠢ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠡᠷᠡ ᠬᠥᠮᠦᠨ ᠡᠳ᠋ᠯᠡᠬᠦ ᠡᠷᠬᠡ ᠦᠭᠡᠢ᠃ ᠨᠠᠭᠠᠰᠢ ᠪᠠᠨ ᠢᠷᠡ᠁ ᠲᠠᠮᠢᠷ ᠢ᠋ ᠴᠢᠨᠢ ᠲᠡᠩᠰᠡᠶᠡ᠁ ᠭᠡᠵᠦ ᠬᠡᠯᠡᠬᠦ ᠰᠢᠭ ᠭᠣᠩᠴᠣᠭᠷᠠᠬᠤᠠ ᠳ᠋ᠤ᠌ ᠰᠣᠨᠣᠰᠳᠠᠪᠠ᠃
ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠬᠠᠳᠠ ᠴᠤᠤᠷᠢᠶᠠᠲᠤᠲᠠᠯᠠ ᠬᠠᠰᠬᠢᠷᠤᠭᠰᠠᠨ ᠳᠠᠭᠤᠨ ᠳ᠋ᠤ᠌ ᠣᠢ ᠶ᠋ᠢᠨ ᠰᠢᠪᠠᠭᠤᠳ ᠦᠷᠭᠦᠵᠦ ᠫᠦᠷ ᠫᠦᠷ ᠬᠢᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠳᠠᠮᠵᠢᠨ ᠨᠢᠰᠦᠨᠡ᠃
ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠪᠡᠯᠬᠡᠭᠦᠰᠦ ᠪᠡᠷ ᠢ᠋ᠶ᠋ᠡᠨ ᠨᠠᠢᠭᠤᠨ ᠬᠣᠲᠣᠯᠵᠠᠬᠤ ᠳ᠋ᠤ᠌ ᠬᠣᠶᠠᠷ ᠬᠥᠬᠥ ᠨᠢ ᠴᠡᠴᠡᠷᠭᠡᠨᠡᠨᠡ᠃ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠰᠠᠨ ᠭᠣᠩᠴᠣᠭᠷᠠᠬᠤᠠ ᠶ᠋ᠢᠨ ᠳᠣᠲᠣᠷᠠ ᠦᠯᠦ ᠮᠡᠳᠡᠭ ᠨᠢᠭᠡ ᠵᠦᠢᠯ ᠦ᠋ᠨ ᠣᠢᠯ ᠡᠭᠦᠰᠴᠦ ᠲᠡᠪᠴᠢᠶᠡᠷᠢ ᠠᠯᠳᠠᠭᠤᠯᠤᠨᠠ᠃《ᠡᠮᠡ ᠪᠦᠬᠦᠨ ᠢᠩᠭᠢᠳᠡᠭ ᠴᠦ᠍ ᠪᠢᠯᠡ ᠤᠤ⁈》 ᠭᠡᠵᠦ ᠡᠷᠡ ᠪᠤᠯᠴᠢᠩ ᠨᠢ ᠴᠢᠩᠭᠠᠷᠠᠭᠰᠠᠨ ᠳ᠋ᠠᠭᠠᠨ ᠵᠣᠷᠢᠭ ᠨᠢ ᠪᠦᠳᠦᠭᠦᠷᠡᠨ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠳᠡᠭᠡᠷᠡ ᠮᠣᠷᠳᠠᠴᠢᠬᠠᠮᠠᠷ ᠲᠠᠴᠢᠶᠠᠯ ᠤ᠋ᠨ ᠭᠠᠯ ᠨᠢ ᠳᠦᠷᠡᠯᠵᠡᠨᠡ᠃
ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠬᠡᠳᠦᠨᠲᠡ ᠭᠠᠯᠵᠠᠭᠤᠲᠠᠢ ᠬᠠᠰᠬᠢᠷᠤᠭᠠᠳ ᠪᠡᠶᠡ ᠨᠢ ᠲᠠᠢᠪᠤᠰᠢᠷᠠᠨ ᠰᠤᠯᠠᠷᠠᠵᠤ᠂ ᠦᠬᠦᠭᠰᠡᠨ ᠰᠢᠭ ᠬᠥᠳᠡᠯᠦᠯ ᠦᠭᠡᠢ ᠰᠤᠯᠳᠠᠢᠨ ᠬᠡᠪᠲᠡᠨᠡ᠃
ᠭᠣᠩᠴᠣᠭᠷᠠᠬᠤᠠ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠶ᠋ᠢᠨ ᠨᠠᠮ ᠤᠨᠲᠠᠭᠰᠠᠨ ᠢ᠋ ᠬᠠᠷᠠᠭᠠᠳ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠶᠤᠮᠰᠠᠨ ᠭᠡᠳᠡᠭ ᠪᠣᠳᠣᠯ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ《ᠵᠠ᠂ ᠪᠣᠯᠢᠶᠠ ᠳᠠ᠂ ᠡᠨᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠴᠣᠬᠣᠮ ᠬᠥᠮᠦᠨ ᠤᠤ? ᠴᠢᠳᠬᠥᠷ ᠤᠤ? ᠠᠯᠢ ᠡᠰᠡᠪᠡᠰᠦ ᠪᠤᠷᠬᠠᠨ ᠤᠤ?》 ᠭᠡᠵᠦ ᠪᠣᠳᠣᠭᠠᠳ ᠡᠨᠳᠡ ᠡᠴᠡ ᠬᠤᠷᠳᠤᠨ ᠵᠠᠢᠯᠠᠵᠤ ᠶᠠᠪᠤᠶᠠ᠃ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠠᠯᠠᠭ ᠰᠢᠪᠠᠭᠤ ᠡᠩ ᠦ᠋ᠨ ᠰᠢᠪᠠᠭᠤ ᠪᠢᠰᠢ᠃ ᠴᠠᠭᠠᠨᠠ ᠪᠠᠨ ᠨᠢᠭᠡ ᠯᠡ ᠣᠨᠳᠣᠣ ᠶᠤᠮ! ᠳᠡᠭᠡᠳᠦ ᠲᠩᠷᠢ ᠡᠰᠡᠬᠦᠯᠡ ᠮᠤᠨᠠ ᠬᠠᠨ᠂ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠨᠠᠮᠠᠶ᠋ᠢ ᠰᠢᠯᠭᠠᠵᠤ᠂ ᠡᠷᠡ ᠰᠢᠨᠳᠠᠰᠤ᠂ ᠬᠥᠮᠦᠨ ᠮᠥᠰᠥ ᠶ᠋ᠢ ᠮᠢᠨᠢ ᠲᠡᠩᠰᠡᠵᠦ ᠪᠠᠢᠭᠠ ᠴᠦ᠍ ᠶᠠᠳᠠᠬᠤ ᠦᠭᠡᠢ᠃ ᠪᠣᠯᠢᠶᠠ᠂ ᠡᠨᠳᠡ ᠡᠴᠡ ᠬᠤᠷᠳᠤᠬᠠᠨ ᠵᠠᠢᠯᠠᠵᠤ ᠶᠠᠪᠤᠶᠠ! ᠭᠡᠳ ᠪᠣᠰᠲᠠᠯᠠ᠄
— ᠭᠣᠩᠴᠣᠭᠷᠠᠬᠤᠠ ᠠ᠋᠂ ᠴᠢ ᠶᠠᠮᠠᠷ ᠴᠦ᠍ ᠨᠢᠭᠦᠯ ᠬᠢᠭᠡ ᠦᠭᠡᠢ ᠪᠣᠯᠪᠠᠴᠤ᠂ ᠡᠷᠡ ᠬᠥᠮᠦᠨ ᠦ᠌ ᠰᠥᠰᠥ ᠵᠣᠷᠢᠭ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠪᠣᠯ ᠴᠢᠨᠦ ᠬᠠᠢᠷᠠᠯᠠᠵᠤ ᠥᠩᠭᠡᠷᠡᠭᠰᠡᠨ ᠨᠣᠮᠢᠨ ᠴᠢᠨᠢ ᠮᠥᠨ! ᠴᠢ ᠲᠡᠷᠡ ᠱᠠᠯᠳᠠᠩ ᠪᠦᠰᠡᠭᠦᠢ ᠳᠡᠭᠡᠷᠡ ᠣᠴᠢᠳᠠᠭ ᠶᠤᠮ ᠰᠢᠦ! ᠪᠤᠷᠬᠠᠨ ᠲᠩᠷᠢ ᠦᠨᠡᠬᠡᠷ ᠴᠢᠮᠠᠶ᠋ᠢ ᠢᠪᠡᠭᠡᠨ ᠬᠠᠢᠷᠠᠯᠠᠵᠤ ᠪᠠᠢᠭᠠ᠁ ᠭᠡᠵᠦ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠴᠦ᠍ ᠲᠡᠷᠡ ᠪᠣᠳᠣᠯ ᠳ᠋ᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ᠃
ᠰᠢᠷᠦᠭᠦᠨ ᠬᠠᠳᠠ ᠲᠠᠢ ᠡᠩᠭᠡᠷ ᠦ᠋ᠨ ᠪᠠᠷᠠᠭᠤᠨ ᠵᠢᠯᠠᠭᠠᠨ ᠳ᠋ᠤ᠌ ᠡᠯᠢᠶᠡ ᠰᠢᠪᠠᠭᠤ ᠡᠷᠭᠢᠵᠦ ᠬᠠᠷᠠ ᠬᠡᠷᠢᠶᠡ ᠭᠤᠸᠠᠭᠯᠠᠬᠤ ᠳᠠᠭᠤᠨ ᠲᠡᠭᠦᠨ ᠢ᠋ ᠬᠥᠲᠥᠯᠵᠦ ᠲᠡᠷᠡ ᠵᠦᠭ ᠢ᠋ ᠵᠣᠷᠢᠪᠠ᠃
ᠭᠣᠩᠴᠣᠭᠷᠠᠬᠤᠠ ᠭᠡᠳᠡᠰᠦ ᠨᠢ ᠬᠣᠷᠴᠢᠭᠢᠨᠠᠬᠤᠯᠠᠷ ᠰᠠᠶᠢ ᠥᠯᠥᠰᠦᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠡᠢ᠃
– – – –
① ᠨᠢᠭᠡ ᠵᠦᠢᠯ ᠦ᠋ᠨ ᠰᠢᠷᠠ ᠴᠡᠴᠡᠭ ᠳᠡᠯᠭᠡᠷᠡᠳᠡᠭ ᠥᠷᠭᠡᠰᠦᠲᠦ ᠪᠤᠲᠠᠯᠢᠭ ᠮᠣᠳᠣ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠠᠷᠮᠠ