ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <3>
328ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ>
ᠳᠠᠸᠠᠨᠢᠮᠠ ᠥᠨᠥᠬᠢ ᠬᠡᠦᠬᠡᠳ ᠦ᠋ᠨ ᠥᠭᠭᠦᠭᠰᠡᠨ ᠥᠨᠥᠴᠢᠨ ᠴᠠᠭᠠᠨ ᠵᠣᠭᠣᠰ ᠢ᠋ ᠴᠢᠩᠭᠠᠬᠠᠨ ᠪᠠᠵᠠᠯᠠᠵᠤ ᠰᠦᠨᠡᠰᠦ ᠦᠭᠡᠢ ᠬᠥᠮᠦᠨ ᠰᠢᠭ ᠭᠡᠯᠳᠦᠷᠢᠭᠰᠡᠭᠡᠷ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠮᠣᠳᠣᠨ ᠲᠠᠭᠲᠤ ᠶ᠋ᠢᠨ ᠥᠭᠰᠥᠭᠦᠷ ᠱᠠᠲᠤ ᠪᠠᠷ ᠮᠥᠯᠬᠥᠨ ᠮᠠᠴᠤᠨᠠ᠃
ᠫᠤᠤ ᠪᠠᠨ ᠵᠢᠰᠢᠭᠦᠦ ᠡᠭᠡᠯᠳᠦᠷᠭᠡᠯᠡᠭᠰᠡᠨ ᠡᠭᠦᠳᠡᠨ ᠦ᠌ ᠮᠠᠨᠠᠭᠠ ᠳᠠᠸᠠᠨᠢᠮᠠ ᠶ᠋ᠢ ᠬᠠᠷᠠᠭᠠᠳ᠄
— ᠮᠠᠭᠤ ᠭᠤᠢᠷᠠᠨᠴᠢ! ᠴᠠᠭᠠᠰᠢ ᠪᠠᠨ ᠲᠣᠨᠢᠯ᠂ ᠣᠳᠣ ᠴᠢᠮᠠ ᠳ᠋ᠤ᠌ ᠱᠣᠷᠣ ᠳᠣᠯᠢᠶᠠᠯᠭᠠᠬᠤ ᠦᠭᠡᠢ ᠠ᠋! ᠭᠡᠵᠦ ᠮᠣᠳᠣᠨ ᠲᠠᠭᠲᠤᠨ ᠤ᠋ ᠳᠡᠭᠡᠷᠡ ᠡᠴᠡ ᠬᠠᠬᠢᠷ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠴᠠᠭᠠᠨᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ᠄
— ᠲᠡᠭᠦᠨ ᠢ᠋ ᠨᠠᠭᠠᠰᠢ ᠤᠷᠤᠭᠤᠯ! ᠴᠠᠭᠠᠨ ᠵᠣᠭᠣᠰᠤᠨ ᠤ᠋ ᠬᠦᠴᠦ ᠲᠡᠭᠦᠨ ᠢ᠋ ᠨᠠᠭᠠᠰᠢ ᠱᠣᠭᠰᠢᠭᠤᠯᠤᠭᠰᠠᠨ ᠪᠠᠢᠯᠬᠦᠢ! ᠭᠡᠵᠦ ᠴᠢᠩᠭᠠ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠡᠭᠦᠳᠡᠨ ᠦ᠌ ᠮᠠᠨᠠᠭᠠ᠄
— ᠵᠠ! ᠭᠡᠵᠦ ᠮᠡᠬᠦᠯᠵᠡᠭᠡᠳ ᠳᠠᠸᠠᠨᠢᠮᠠ ᠶ᠋ᠢ《ᠬᠤᠷᠳᠤᠯᠠᠭᠠᠴᠢ ᠳᠠ᠂ ᠨᠠᠭᠠᠰᠢ ᠪᠠᠨ! ᠵᠠᠩᠭᠤᠢᠳᠠ ᠴᠢᠮᠠᠶ᠋ᠢ ᠣᠷᠣ ᠭᠡᠵᠦ ᠪᠣᠢ》 ᠭᠡᠬᠦ ᠳ᠋ᠦ᠍ᠨᠢ ᠳᠠᠸᠠᠨᠢᠮᠠ ᠰᠣᠴᠢᠵᠤ ᠠᠪᠤᠨ ᠥᠭᠰᠥᠬᠦᠢ ᠱᠠᠲᠤ ᠶ᠋ᠢ ᠲᠦᠷᠭᠡᠬᠡᠨ ᠮᠠᠴᠤᠨᠠ᠃
ᠬᠠᠷᠠᠬᠤᠯᠠ ᠳᠠᠸᠠᠨᠢᠮᠠ ᠶ᠋ᠢᠨ ᠳᠦᠷᠢ ᠦᠨᠡᠬᠡᠷ ᠬᠥᠭᠡᠷᠦᠬᠦᠢᠯᠡᠯᠲᠡᠢ᠃ ᠨᠢᠰᠦ ᠰᠢᠯᠦᠰᠦ ᠨᠢ ᠭᠣᠭᠣᠵᠢᠵᠤ᠂ ᠶᠠᠮᠠᠷ ᠨᠢᠭᠡ ᠱᠦᠯᠬᠦᠭᠡ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠬᠥᠮᠦᠨ ᠰᠢᠭ ᠠᠷᠠᠰᠤ ᠶᠠᠰᠤ ᠪᠣᠯᠵᠤ ᠦᠷᠴᠢᠢᠨ ᠬᠣᠷᠴᠢᠢᠭᠰᠠᠨ ᠡᠪᠦᠭᠡᠨ ᠳᠦᠷᠢ ᠣᠷᠣᠵᠠᠢ᠃
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠬᠡᠪᠲᠡᠯᠭᠡᠲᠦ ᠢᠰᠡᠷᠢ ᠳᠡᠭᠡᠷᠡ ᠪᠡᠨ ᠬᠠᠷᠠ ᠲᠠᠮᠠᠬᠢ ᠴᠣᠷᠭᠢᠵᠤ ᠬᠡᠪᠲᠡᠭᠰᠡᠨ ᠨᠢ ᠡᠲᠡᠭᠡᠳ ᠶᠠᠮᠪᠠ ᠲᠠᠢ ᠬᠠᠷᠠᠭᠳᠠᠵᠤ᠂ ᠲᠠᠸᠠᠨᠢᠮᠠ ᠶ᠋ᠢᠨ ᠰᠢᠯᠦᠰᠦ ᠶ᠋ᠢ ᠬᠣᠭᠣᠰᠣᠨ ᠵᠠᠯᠭᠢᠭᠤᠯᠤᠨ《ᠶᠠᠮᠠᠷ ᠬᠥᠮᠦᠨ ᠨᠢ ᠡᠢᠮᠦ ᠬᠤᠪᠢ ᠵᠠᠶᠠᠭᠠ ᠲᠠᠢ ᠲᠥᠷᠥᠳᠡᠭ ᠪᠣᠢ? ᠳ᠋ᠸᠪᠠᠵᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠪᠠᠢᠬᠤ ᠰᠢᠭ᠋ ᠶᠦᠮ ᠠ᠋!》 ᠭᠡᠵᠦ ᠡᠷᠬᠡ ᠦᠭᠡᠢ ᠳᠦᠳᠦᠨᠡᠨᠡ᠃
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠵᠠᠩ ᠣᠪᠣᠭ ᠲᠠᠢ᠃ ᠸᠠᠩ ᠰᠣᠬᠣᠷ ᠤ᠋ᠨ ᠬᠤᠷᠤᠭᠤ ᠬᠢᠮᠤᠰᠤᠨ ᠤ᠋ ᠬᠢᠨᠢ ᠳᠣᠲᠣᠷᠠ ᠬᠠᠮᠤᠭ ᠰᠢᠳᠤᠷᠭᠤ ᠶ᠋ᠢᠨ ᠬᠢᠨᠢ ᠨᠢᠭᠡ᠃ ᠸᠠᠩ ᠰᠣᠬᠣᠷ ᠤ᠋ᠨ ᠵᠤᠰᠠᠯᠠᠩ ᠳ᠋ᠠᠭᠠᠨ ᠡᠵᠡᠭᠦᠢ ᠳ᠋ᠦ᠍ ᠲᠡᠷᠡ ᠪᠡᠷ ᠪᠦᠬᠦᠢ ᠶᠠᠭᠤᠮᠠᠨ ᠤ᠋ ᠡᠵᠡᠨ ᠮᠡᠳᠡᠳᠡᠭ ᠡᠴᠡ ᠬᠥᠮᠦᠰ ᠵᠠᠩ ᠵᠠᠩᠭᠤᠢᠳᠠ ᠭᠡᠵᠦ ᠳᠠᠭᠤᠳᠠᠳᠠᠭ ᠠᠵᠢ᠃
— ᠵᠠᠩ ᠵᠠᠩᠭᠤᠢᠳᠠ ᠠ᠋᠂ ᠨᠠᠳᠠ ᠴᠢᠮᠬᠢ ᠶᠠᠭᠤᠮᠠ ᠬᠠᠢᠷᠠᠯᠠᠭᠠᠴᠢ ᠳᠠ᠂ ᠭᠡᠳ ᠤᠬᠢᠯᠠᠩᠨᠠᠬᠤ ᠴᠢᠷᠠᠢ ᠦᠵᠡᠭᠦᠯᠦᠨ ᠭᠤᠩᠰᠢᠬᠤ ᠳ᠋ᠤ᠌ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ᠄
— ᠮᠥᠩᠭᠥ ᠪᠠᠢᠨᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠁ ᠡᠨᠡ᠁ ᠭᠡᠵᠦ ᠲᠠᠸᠠᠨᠢᠮᠠ ᠭᠠᠷ ᠳᠠᠬᠢ ᠭᠠᠭᠴᠠᠬᠠᠨ ᠴᠠᠭᠠᠨ ᠵᠣᠭᠣᠰ ᠢ᠋ᠶ᠋ᠠᠨ《ᠮᠠᠢ ᠵᠠᠩᠭᠤᠢᠳᠠ ᠠ᠋》 ᠭᠡᠵᠦ ᠥᠭᠬᠦ ᠳ᠋ᠦ᠍ ᠬᠠᠵᠠᠭᠤ ᠠ᠋ᠴᠠ ᠲᠡᠭᠦᠨ ᠤ ᠰᠢᠳᠠᠷ ᠴᠡᠷᠢᠭ ᠴᠠᠭᠠᠨ ᠵᠣᠭᠣᠰ ᠢ᠋ ᠪᠤᠯᠢᠶᠠᠬᠤ ᠵᠠᠪᠳᠤᠭᠤ ᠱᠠᠯᠠᠪ ᠠᠪᠴᠤ᠂ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠳ᠋ᠠᠭᠠᠨ ᠠᠪᠠᠴᠢᠵᠤ ᠥᠭᠪᠡᠯ᠂
— ᠡᠨᠡᠬᠡᠨ ᠭᠠᠭᠴᠠ ᠮᠥᠩᠭᠥ ᠤᠤ? ᠭᠡᠳ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠴᠠᠭᠠᠨ ᠵᠣᠭᠣᠰ ᠢ᠋ ᠰᠢᠲᠠᠪᠠ᠃
ᠥᠨᠥᠴᠢᠨ ᠴᠠᠭᠠᠨ ᠵᠣᠭᠣᠰ ᠮᠣᠳᠣᠨ ᠱᠠᠯᠠᠨ ᠳᠡᠭᠡᠷᠡ ᠬᠥᠯ ᠤᠷᠭᠤᠭᠰᠠᠨ ᠮᠡᠲᠦ ᠬᠦᠷᠳᠦᠯᠡᠨ ᠪᠥᠮᠪᠥᠷᠢᠨᠡ᠃ ᠲᠠᠸᠠᠨᠢᠮᠠ ᠲᠡᠷᠡ ᠪᠥᠮᠪᠥᠷᠢᠭᠰᠡᠨ ᠴᠠᠭᠠᠨ ᠵᠣᠭᠣᠰᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠥᠯᠥᠨ ᠨᠢᠳᠦ ᠪᠡᠷ ᠬᠡᠰᠡᠭ ᠮᠡᠯᠡᠷᠡᠭᠰᠡᠨ ᠢ᠋ᠶ᠋ᠡᠨ ᠴᠠᠭᠠᠨ ᠵᠣᠭᠣᠰ ᠢ᠋ ᠪᠠᠷᠢᠬᠤ ᠭᠡᠵᠦ ᠭᠡᠨᠡᠳᠲᠡ ᠮᠥᠯᠬᠥᠪᠡ᠃ ᠨᠥᠭᠦᠭᠡ ᠴᠠᠭᠠᠨ ᠵᠣᠭᠣᠰ ᠲᠡᠭᠦᠨ ᠢ᠋ᠶ᠋ᠡᠷ ᠲᠣᠭᠯᠠᠭᠠᠮ ᠬᠢᠭᠡ ᠰᠢᠭ ᠮᠣᠳᠣᠨ ᠱᠠᠯᠠ ᠳᠡᠭᠡᠭᠦᠷ ᠲᠡᠷᠴᠢᠭᠢᠨᠡᠨ ᠪᠥᠮᠪᠥᠷᠢᠭᠰᠡᠭᠡᠷ ᠡᠷᠭᠢᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠬᠥᠯ ᠳᠣᠣᠷᠠ ᠬᠦᠷᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠫᠠᠯᠳ᠋ ᠬᠢᠲᠠᠯᠠ ᠭᠢᠰᠬᠢᠪᠡ᠃
《ᠰᠣᠬᠣᠷ ᠵᠣᠭᠣᠰ ᠪᠠᠰᠠ ᠶᠠᠳᠠᠭᠤ ᠬᠥᠮᠦᠨ ᠢ᠋ ᠭᠣᠯᠣᠵᠤ᠂ ᠪᠠᠶᠠᠨ ᠬᠥᠮᠦᠨ ᠢ᠋ ᠡᠷᠢᠳᠡᠭ ᠪᠠᠢᠵᠠᠢ! ᠴᠢᠭᠢᠶᠡᠲᠦᠷᠦᠦ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠬᠣᠷᠣᠰᠤᠨ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
— ᠵᠠᠩ ᠵᠠᠩᠭᠤᠢᠳᠠ ᠠ᠋᠂ ᠨᠠᠳᠠ ᠨᠢᠭᠡ ᠴᠢᠮᠬᠢ ᠶᠠᠭᠤᠮᠠ ᠦᠨᠦᠷᠲᠦᠭᠦᠯᠦᠭᠡᠴᠢ ᠳᠡ! ᠦᠬᠦᠬᠦ ᠶᠦᠮ ᠪᠠᠢᠨᠠ᠁
— ᠭᠠᠭᠴᠠᠬᠠᠨ ᠰᠣᠬᠣᠷ ᠵᠣᠭᠣᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠬᠦᠬᠦ ᠳᠥᠭᠥᠭᠰᠡᠨ ᠠᠮᠢ ᠪᠠᠨ ᠠᠪᠤᠷᠠᠬᠤ ᠰᠠᠨᠠᠭᠠ ᠲᠠᠢ ᠭᠡᠵᠦ ᠤᠤ?
— ᠁
— ᠬᠤᠷᠤᠭᠤᠨ ᠳ᠋ᠤ᠌ ᠡᠯᠭᠦᠭᠳᠡᠬᠦ ᠮᠥᠩᠭᠥ ᠥᠭᠬᠦ ᠲᠡᠢ ᠪᠠᠢᠨᠠ ᠤᠤ ᠴᠢᠮᠠ ᠳ᠋ᠤ᠌? ᠮᠥᠩᠭᠥ ᠲᠡᠢ ᠪᠣᠯ ᠨᠢᠭᠡ ᠴᠢᠮᠬᠢ᠂ ᠨᠢᠭᠡ ᠪᠣᠭᠣᠳᠠᠯ᠁ ᠰᠢᠭᠤᠳᠠᠢ ᠪᠠᠷ ᠴᠤ᠌ ᠥᠭᠬᠦ ᠶᠠᠭᠤᠮᠠ ᠪᠠᠢᠨᠠ ᠰᠢᠦ!
— ᠵᠠᠩᠭᠤᠢᠳᠠ ᠠ᠋᠂ ᠨᠠᠳᠠ ᠨᠢᠭᠡ ᠯᠡ ᠴᠢᠮᠬᠢ ᠶᠠᠭᠤᠮᠠ ᠥᠭᠴᠦ᠂ ᠨᠢᠳᠦ ᠣᠩᠭᠣᠢᠯᠭᠠᠭᠠᠳ ᠠᠯᠢ! ᠪᠢ ᠲᠠᠨ ᠳ᠋ᠤ᠌ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠪᠠᠢᠬᠤ ᠭᠠᠵᠠᠷ ᠢ᠋ ᠵᠢᠭᠠᠵᠤ ᠥᠭᠭᠦᠶᠡ! ᠭᠡᠵᠦ ᠲᠠᠸᠠᠨᠢᠮᠠ ᠰᠢᠩᠭᠡᠨ ᠨᠢᠰᠦ ᠪᠡᠨ ᠲᠠᠲᠠᠩᠭᠠᠨ ᠥᠴᠢᠪᠡ᠃
— ᠶᠠᠭᠤ? ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠲᠡᠢ ᠭᠠᠵᠠᠷ⁈ ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠭᠡᠪᠲᠡᠯᠭᠡᠲᠦ ᠢᠰᠡᠷᠢ ᠡᠴᠡ ᠪᠡᠨ ᠥᠨᠳᠡᠢᠪᠡ᠃
— ᠲᠡᠢᠮᠦ ᠠ᠋᠂ ᠳᠠᠯᠠᠨ ᠠᠴᠢᠶᠠ ᠮᠥᠩᠭᠥ ᠨᠢᠭᠤᠵᠤ ᠲᠠᠯᠪᠢᠭᠰᠠᠨ ᠭᠠᠵᠠᠷ ᠢ᠋ ᠪᠢ ᠮᠡᠳᠡᠨᠡ᠃
— ᠳᠠᠯᠠᠨ ᠠᠴᠢᠶᠠ ᠮᠥᠩᠭᠥ ᠭᠡᠨᠡ ᠤᠤ? ᠲᠣᠩᠭᠣᠰ ᠴᠢ! ᠲᠡᠭᠡᠭᠡᠳ ᠴᠢ᠁
— ᠦᠨᠡᠬᠡᠷ! ᠬᠡᠵᠢᠶᠡ ᠶᠦᠮ ᠪᠣᠯ ᠪᠦᠦ ᠮᠡᠳᠡ᠂ ᠶᠡᠬᠡ ᠡᠷᠲᠡ ᠦᠶᠡ ᠳ᠋ᠦ᠍ ᠨᠢᠭᠡ ᠵᠠᠩᠵᠤᠨ ᠳᠠᠯᠠᠨ ᠠᠴᠢᠶᠠ ᠠᠯᠲᠠ ᠮᠥᠩᠭᠥ ᠠᠴᠢᠵᠤ ᠠᠪᠴᠢᠷᠠᠨ ᠮᠤᠨᠠ ᠠᠭᠤᠯᠠᠨ ᠤ᠋ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠳ᠋ᠤ᠌ ᠬᠠᠳᠠᠭᠠᠯᠠᠯᠠ ᠭᠡᠳᠡᠭ᠃ ᠲᠡᠭᠡᠭᠡᠳ ᠬᠡᠨ ᠴᠤ᠌ ᠲᠡᠭᠦᠨ ᠢ᠋ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠥᠨᠥ ᠪᠣᠯᠵᠠᠢ᠃
— ᠲᠡᠭᠡᠭᠡᠳ ᠬᠠᠮᠢᠭᠠ ᠬᠠᠳᠠᠭᠠᠯᠠᠵᠤ ᠲᠠᠯᠪᠢᠭᠰᠠᠨ ᠢ᠋ ᠴᠢ ᠮᠡᠳᠡᠬᠦ ᠤᠤ?
— ᠮᠡᠳᠡᠨᠡ᠃
— ᠯᠠᠪ ᠮᠡᠳᠡᠨᠡ ᠤᠤ?
— ᠮᠡᠳᠡᠨᠡ᠂ ᠮᠡᠳᠡᠨᠡ᠃ ᠲᠠ ᠨᠠᠳᠠ ᠨᠢᠭᠡ ᠴᠢᠮᠬᠢ ᠶᠠᠭᠤᠮᠠ ᠥᠭᠴᠢᠬᠡ ᠳᠡ᠂ ᠲᠡᠭᠡᠪᠡᠯ ᠪᠢ ᠲᠠᠨ ᠳ᠋ᠤ᠌ ᠵᠠᠮᠴᠢᠯᠠᠵᠤ ᠥᠭᠭᠦᠶᠡ ᠭᠡᠰᠡᠨ ᠳ᠋ᠦ᠍ ᠮᠥᠩᠭᠥ ᠴᠠᠭᠠᠨ ᠨᠢᠳᠦ ᠤᠯᠠᠭᠠᠨ ᠭᠡᠳᠡᠭ ᠦᠭᠡ ᠦᠨᠡᠨ᠃ ᠵᠠᠩ ᠵᠠᠩᠭᠤᠢᠳᠠ ᠨᠢᠭᠡ ᠵᠢᠵᠢᠭ ᠪᠣᠭᠣᠳᠠᠯ ᠬᠠᠷᠠ ᠲᠠᠮᠠᠬᠢ ᠰᠢᠲᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠠᠸᠠᠨᠢᠮᠠ ᠶ᠋ᠢᠨ ᠨᠢᠳᠦ ᠨᠢ ᠰᠡᠷᠭᠦᠵᠦ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠪᠣᠯᠤᠭᠰᠠᠨ ᠰᠢᠭ᠋ ᠰᠡᠷᠪᠡᠯᠵᠡᠭᠡᠳ ᠢᠷᠡᠯᠡ᠃
ᠬᠠᠷᠠ ᠲᠠᠮᠠᠬᠢᠨ ᠤ᠋ ᠰᠢᠷᠠ ᠤᠲᠤᠭᠠ ᠮᠠᠨᠠᠷᠠᠵᠤ᠂ ᠲᠠᠸᠠᠨᠢᠮᠠ ᠶ᠋ᠢᠨ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠶ᠋ᠢ ᠮᠠᠨᠠᠨ ᠴᠠᠭᠠᠨ ᠠᠯᠴᠢᠭᠤᠷ ᠰᠢᠭ᠋ ᠣᠷᠢᠶᠠᠯᠳᠤᠨ ᠬᠤᠢᠯᠠᠷᠠᠨᠠ᠃ ᠲᠠᠸᠠᠨᠢᠮᠠ ᠲᠡᠷᠡ ᠬᠡᠩᠰᠢᠭᠦᠦ ᠲᠡᠢ ᠪᠣᠷᠣ ᠤᠲᠤᠭᠠᠨ ᠳ᠋ᠤ᠌ ᠮᠠᠩᠰᠢᠭᠤᠷᠠᠨ ᠰᠣᠭᠲᠣᠵᠤ᠂ ᠡᠭᠦᠯᠡ ᠬᠥᠯᠭᠡᠯᠡᠨ ᠬᠡᠢ ᠳᠡᠭᠡᠷᠡ ᠳᠡᠭᠳᠡᠭᠰᠡᠨ ᠮᠡᠲᠦ᠁ ᠴᠢᠳᠬᠤᠯᠠᠩ ᠲᠠᠢ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠠᠯᠲᠠ ᠶ᠋ᠢ ᠲᠡᠪᠡᠷᠢ ᠲᠡᠪᠡᠷᠢ ᠪᠡᠷ ᠣᠪᠣᠭᠠᠯᠠᠵᠤ ᠲᠠᠯᠪᠢᠭᠠᠳ ᠨᠢᠭᠡ ᠶᠤᠸᠠᠮᠪᠤᠤ᠂ ᠬᠣᠶᠠᠷ ᠶᠤᠸᠠᠮᠪᠤᠤ ᠁ ᠭᠡᠵᠦ ᠮᠥᠩᠭᠥ ᠲᠣᠭᠠᠯᠠᠨ ᠵᠢᠷᠭᠠᠵᠤ ᠪᠠᠢᠭᠠ ᠰᠢᠭ᠋ ᠮᠠᠷᠰᠠᠢᠨ ᠢᠨᠢᠶᠡᠨᠡ᠃
ᠳᠡᠮᠡᠢ ᠬᠡᠳᠦ ᠬᠣᠨᠣᠭᠰᠠᠨ ᠦᠭᠡᠢ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠲᠠᠸᠠᠨᠢᠮᠠ ᠪᠠᠷ ᠵᠠᠮᠴᠢᠯᠠᠭᠤᠯᠵᠤ ᠠᠭᠤᠯᠠᠨ ᠳ᠋ᠤ᠌ ᠮᠥᠩᠭᠥ ᠬᠠᠢᠬᠤ ᠪᠠᠷ ᠶᠠᠪᠤᠯᠠ᠃
ᠦᠳᠡ ᠬᠡᠯᠪᠡᠢᠬᠦ ᠳ᠋ᠦ᠍ ᠲᠠᠸᠠᠨᠢᠮᠠ ᠶ᠋ᠢᠨ ᠳᠠᠭᠠᠭᠤᠯᠤᠭᠰᠠᠨ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠲᠦᠷᠦᠭᠦᠲᠠᠢ ᠳᠣᠯᠣᠭᠠ ᠨᠠᠢ᠍ᠮᠠᠨ ᠬᠠᠷᠠ ᠴᠡᠷᠢᠭ ᠠᠷᠠᠢ ᠭᠡᠵᠦ ᠥᠯᠥᠩᠲᠦ ᠶ᠋ᠢᠨ ᠪᠠᠷᠠᠭᠤᠨ ᠬᠢᠷᠠ ᠳᠡᠭᠡᠷᠡ ᠭᠠᠷᠴᠤ ᠣᠴᠢᠪᠠ᠃
— ᠶᠠᠪᠤᠭᠠᠳ ᠶᠠᠪᠤᠭᠠᠳ ᠬᠦᠷᠳᠡᠭ ᠦᠭᠡᠢ ᠶᠠᠮᠠᠷ ᠭᠠᠵᠠᠷ ᠪᠣᠢ? ᠣᠳᠣ ᠣᠢᠷᠠᠳᠴᠤ ᠪᠠᠢᠨᠠ ᠤᠤ? ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠠᠰᠠᠭᠤᠪᠠᠯ ᠲᠠᠸᠠᠨᠢᠮᠠ᠄
— ᠲᠠ᠊ – ᠷᠡ! ᠬᠦᠷᠡᠩ ᠬᠠᠳᠠ ᠲᠠᠢ ᠪᠠᠷᠲᠠᠭᠠᠲᠤ ᠡᠩᠭᠡᠷ ᠢ᠋ ᠳᠠᠪᠠᠵᠤ ᠪᠠᠰᠠ ᠵᠢᠭᠠᠬᠠᠨ ᠴᠠᠭᠠᠰᠢ ᠶᠠᠪᠤᠪᠠᠯ ᠬᠦᠷᠴᠢᠬᠡᠨᠡ ᠭᠡᠰᠡᠨ ᠳ᠋ᠦ᠍ ᠳᠠᠭᠠᠯᠳᠤᠭᠰᠠᠨ ᠬᠡᠳᠦᠨ ᠬᠠᠷᠠ ᠴᠡᠷᠢᠭ ᠠᠮᠠ ᠨᠢ ᠢᠷᠪᠠᠢᠵᠤ《ᠲᠡᠷᠡ ᠪᠠᠷᠲᠠᠭᠠᠲᠤ ᠡᠩᠭᠡᠷ ᠢ᠋ ᠶᠠᠭᠠᠬᠢᠵᠤ ᠳᠠᠪᠠᠵᠤ ᠭᠠᠷᠤᠨᠠ ᠪᠣᠢ⁈》 ᠭᠡᠵᠡᠭᠡᠨᠡ᠃ ᠲᠠᠸᠠᠨᠢᠮᠠ᠄
— ᠬᠡᠴᠡᠭᠦᠦ ᠳᠡ! ᠵᠠᠩᠭᠤᠢᠳᠠ ᠠ᠋᠂ ᠨᠠᠳᠠ ᠥᠨᠥᠬᠢ ᠡᠴᠡ ᠪᠡᠨ ᠪᠠᠰᠠ ᠵᠢᠭᠠᠬᠠᠨ ᠥᠭᠭᠦᠨᠡ ᠤᠤ? ᠲᠠᠮᠢᠷ ᠲᠡᠩᠬᠡᠭᠡ ᠮᠠᠭᠤᠳᠠᠵᠤ ᠪᠡᠶᠡ ᠰᠤᠯᠳᠠᠢᠭᠠᠳ ᠪᠠᠢᠨᠠ ᠭᠡᠵᠦ ᠲᠠᠮᠢᠷᠳᠠᠩᠭᠤᠢ ᠰᠤᠯᠠᠬᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠥᠴᠢᠬᠦ ᠳ᠋ᠦ᠍᠄
— ᠮᠠᠢ! ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠨᠢᠭᠡ ᠰᠣᠷᠣᠬᠤ ᠪᠠᠷ ᠬᠣᠨᠢᠨ ᠤ᠋ ᠬᠣᠷᠭᠣᠯ ᠰᠢᠭ᠋ ᠬᠠᠷᠠ ᠷᠢᠯᠦ ᠭᠠᠷᠭᠠᠵᠤ ᠲᠠᠸᠠᠨᠢᠮᠠ ᠳ᠋ᠤ᠌ ᠥᠭᠭᠦᠯᠡ᠃
— ᠤᠤᠬᠠᠢ ᠳᠣᠷᠢᠭᠤᠨ ᠪᠣᠯᠤᠯᠠ᠃ ᠡᠨᠡ ᠴᠤ᠌ ᠰᠠᠢᠨ ᠡᠳ᠋ ᠪᠠᠢᠨᠠ ᠭᠡᠵᠦ ᠲᠠᠸᠠᠨᠢᠮᠠ ᠬᠡᠯᠡᠭᠡᠳ ᠲᠦᠳᠡᠬᠡᠨ ᠤᠲᠤᠭᠠ ᠮᠠᠨᠠᠷᠠᠭᠤᠯᠴᠢᠬᠠᠭᠠᠳ ᠴᠠᠭᠠᠰᠢ ᠬᠥᠳᠡᠯᠪᠡ᠃
ᠴᠠᠭᠠᠳᠤ ᠬᠦᠷᠡᠩ ᠬᠠᠳᠠ ᠲᠠᠢ ᠪᠠᠷᠲᠠᠭᠠᠲᠤ ᠡᠩᠭᠡᠷ ᠢ᠋ ᠳᠠᠪᠠᠬᠤ ᠳ᠋ᠤ᠌ ᠲᠠᠸᠠᠨᠢᠮᠠ ᠶ᠋ᠢᠨ ᠬᠥᠯ ᠳ᠋ᠦ᠍ᠨᠢ ᠵᠢᠭᠦᠷ ᠤᠷᠭᠤᠭᠰᠠᠨ ᠰᠢᠭ᠋ ᠰᠠᠯᠬᠢᠳᠠᠵᠤ ᠶᠠᠪᠤᠨᠠ᠃ ᠨᠥᠭᠦᠭᠡ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠭᠤᠯᠠ ᠬᠠᠳᠠᠨ ᠳ᠋ᠤ᠌ ᠮᠠᠭᠤ ᠪᠣᠯᠬᠣᠷ ᠪᠠᠭᠠᠴᠠᠭᠠᠨᠠᠭᠠᠳ ᠶᠠᠪᠤᠭᠤᠷᠢ ᠮᠠᠭᠤ ᠲᠠᠢ ᠪᠠᠢᠯᠠ᠃ ᠶᠠᠭᠳᠠᠭᠰᠠᠨ ᠬᠣᠶᠠᠷ ᠨᠢ ᠥᠨᠳᠥᠷ ᠬᠠᠳᠠᠨ ᠳ᠋ᠤ᠌ ᠲᠣᠯᠣᠭᠠᠢ ᠨᠢ ᠡᠷᠭᠢᠯᠡ ᠭᠡᠳ ᠵᠠᠮ ᠳ᠋ᠤ᠌ ᠬᠣᠴᠣᠷᠪᠠ᠃ ᠲᠠᠸᠠᠨᠢᠮᠠ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠬᠡᠳᠦᠭᠦᠯᠡ ᠬᠤᠷᠳᠤᠯᠠᠨ ᠶᠠᠪᠤᠭᠰᠠᠭᠠᠷ ᠥᠨᠳᠥᠷ ᠬᠠᠳᠠᠨ ᠭᠠᠴᠠᠭᠠᠨ ᠠ᠋ᠴᠠ ᠬᠦᠷᠬᠢᠷᠡᠭᠰᠡᠨ ᠴᠢᠳᠬᠤᠯᠠᠩ ᠲᠠᠢ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠣᠴᠢᠪᠠ᠃
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠳᠣᠲᠣᠷᠠ ᠪᠠᠨ《ᠡᠢᠨ ᠬᠦ᠌ ᠰᠠᠢᠬᠠᠨ ᠭᠠᠵᠠᠷ ᠪᠠᠰᠠ ᠪᠠᠢᠳᠠᠭ ᠶᠤᠮ ᠪᠠᠢᠨᠠ!》 ᠭᠡᠵᠦ ᠡᠢᠰᠢ ᠲᠠᠢᠰᠢ ᠰᠣᠨᠢᠭᠤᠴᠢᠯᠠᠨ ᠭᠠᠢᠬᠠᠨᠠ᠁
ᠵᠢᠷᠤᠭ ᠰᠢᠭ᠋ ᠰᠠᠢᠬᠠᠨ ᠠᠭᠠᠷᠤ ᠮᠣᠳᠣ ᠲᠠᠢ ᠬᠦᠷᠡᠩ ᠬᠠᠳᠠ ᠲᠠᠢ ᠥᠨᠳᠥᠷ ᠬᠠᠪᠴᠢᠯ ᠠ᠋ᠴᠠ ᠴᠢᠳᠬᠤᠯᠠᠩ ᠤᠰᠤ ᠤᠷᠤᠰᠴᠤ᠂ ᠳᠣᠣᠷᠠ ᠪᠠᠨ ᠵᠠᠮᠤᠭ ᠨᠣᠭᠣᠭᠠᠨ ᠬᠥᠪᠡᠭᠡ ᠲᠡᠢ ᠴᠡᠩᠬᠡᠷ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠳ᠋ᠤᠨᠢ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠴᠣᠯᠭᠢᠨ ᠨᠠᠭᠠᠳᠴᠤ ᠦᠨᠡᠬᠡᠷ ᠬᠠᠷᠠᠭᠰᠠᠨ ᠪᠦᠬᠦᠨ ᠦ᠌ ᠴᠢᠯᠡᠭᠡ ᠶ᠋ᠢ ᠠᠯᠳᠠᠷᠠᠭᠠᠬᠤ ᠤᠷᠮᠠ ᠶ᠋ᠢ ᠰᠡᠷᠭᠦᠭᠡᠮᠡ ᠪᠠᠢᠯᠠ᠃
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠡᠨᠡ ᠬᠦ᠌ ᠭᠠᠩᠭᠠᠩ ᠪᠠᠢᠭᠠᠯᠢ ᠶ᠋ᠢᠨ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠵᠤ ᠶᠡᠬᠡᠳᠡ ᠰᠣᠭᠲᠣᠭᠤᠷᠠᠭᠰᠠᠨ ᠢ᠋ᠶ᠋ᠠᠨ《ᠸᠠᠩ ᠵᠠᠩᠭᠤᠢᠳᠠ ᠳ᠋ᠠᠭᠠᠨ ᠴᠢᠬᠢᠨ ᠳ᠋ᠦ᠍ᠨᠢ ᠴᠢᠮᠡᠭ ᠪᠣᠯᠭᠠᠵᠤ ᠬᠡᠯᠡᠪᠡᠯ ᠴᠤ᠌ ᠬᠦᠨᠳᠦ ᠱᠠᠩ ᠬᠦᠷᠲᠡᠨᠡ ᠰᠢᠦ! ᠡᠨᠡ ᠭᠠᠵᠠᠷ ᠢᠷᠡᠵᠦ ᠰᠡᠳᠬᠢᠯ ᠰᠡᠷᠭᠦᠭᠡᠬᠦ ᠵᠤᠰᠠᠯᠠᠩ ᠪᠣᠯᠭᠠᠬᠤ ᠶᠤᠮ ᠪᠣᠯ ᠴᠤ᠌ ᠦᠨᠡᠬᠡᠷ ᠲᠠᠭᠠᠲᠠᠢ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠨᠢ ᠬᠦᠷᠴᠦ᠄
— ᠬᠥᠶᠢ᠂ ᠳᠠᠸᠠ ᠠ᠋! ᠮᠠᠢ ᠣᠳᠣ ᠨᠢᠭᠡ ᠰᠤᠷᠣᠴᠢᠬᠠ! ᠭᠡᠵᠦ ᠳᠣᠲᠣᠷᠠ ᠬᠠᠷᠮᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠬᠣᠷᠭᠣᠯ ᠬᠢᠷᠢᠲᠡᠢ ᠶᠠᠭᠤᠮᠠ ᠭᠠᠷᠭᠠᠵᠤ《ᠡᠭᠦᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢᠯᠡᠭᠦᠯᠴᠢᠬᠡᠭᠡᠳ ᠥᠨᠥᠬᠢ ᠮᠥᠩᠭᠥ ᠳᠠᠯᠳᠠᠯᠠᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠵᠢᠭᠠᠭᠠᠳ ᠠᠯᠢ!》 ᠭᠡᠵᠦ ᠮᠠᠷᠰᠠᠢᠨ ᠢᠨᠢᠶᠡᠨᠡ᠃
ᠳᠠᠸᠠᠨᠢᠮᠠ᠂ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶᠢ ᠰᠣᠨᠢᠷᠬᠠᠨ ᠬᠠᠷᠠᠭᠰᠠᠨ ᠢᠶᠠᠨ᠄
— ᠵᠠ᠂ ᠲᠡᠭᠡ ! ᠵᠠᠩᠭᠤᠢᠳᠠ ᠳ᠋ᠤ᠌ ᠭᠢᠯᠠᠢᠯᠠ ᠭᠡᠵᠦ ᠥᠨᠥᠬᠢ ᠬᠠᠷᠠ ᠲᠠᠮᠠᠬᠢ ᠶ᠋ᠢ ᠲᠣᠰᠴᠤ ᠠᠪᠤᠭᠠᠳ 《ᠡᠨᠡ ᠬᠠᠷᠠᠮᠴᠢ ᠰᠠᠮᠵᠠᠨ ᠤ᠋ ᠪᠤᠬᠤᠷ ᠠ᠋ᠴᠠ ᠴᠢᠪᠠᠭᠠ ᠥᠪᠡᠷ ᠢ᠋ᠶ᠋ᠡᠨ ᠤᠨᠠᠬᠤ ᠭᠡᠭᠴᠢ ᠨᠠᠷᠠ ᠪᠠᠷᠠᠭᠤᠨᠲᠠᠢ ᠠ᠋ᠴᠠ ᠭᠠᠷᠤᠯᠠ ᠭᠡᠰᠡᠨ ᠦᠭᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠠᠨᠠᠭᠠᠳ ᠥᠨᠥᠬᠢ ᠬᠣᠷᠭᠣᠯ ᠬᠢᠷᠢᠲᠡᠢ ᠶᠠᠭᠤᠮᠠ ᠶ᠋ᠢ ᠱᠠᠵᠢᠭᠢᠨᠠᠭᠤᠯᠤᠨ ᠰᠣᠷᠣᠬᠤ ᠳ᠋ᠤ᠌ ᠨᠢᠳᠦ ᠨᠢ ᠣᠩᠭᠣᠢᠵᠤ᠂ ᠨᠢᠭᠡ ᠡᠳᠦᠷ ᠦ᠋ᠨ ᠴᠢᠯᠡᠭᠡ ᠲᠠᠢᠯᠤᠭᠳᠠᠬᠤ ᠰᠢᠭ᠋ ᠲᠠᠪᠠᠲᠠᠢ ᠪᠣᠯᠪᠠ᠃
— ᠵᠠ᠂ ᠥᠨᠥᠬᠢ ᠳᠠᠯᠠᠨ ᠠᠴᠢᠶᠠ ᠮᠥᠩᠭᠥ ᠬᠠᠮᠢᠭᠠ ᠪᠠᠢᠨᠠ ᠪᠣᠢ ?
— ᠲᠡᠷᠡ ᠴᠣᠩᠬᠢᠶᠠᠯ ᠤ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠳᠡᠭᠡᠷᠡᠬᠢ ᠰᠠᠷᠠᠪᠴᠢᠨ ᠬᠠᠳᠠᠨ ᠳᠡᠭᠡᠷᠡ ᠭᠠᠷᠪᠠᠯ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠪᠠᠢᠬᠤ ᠨᠢ ᠬᠠᠷᠠᠭᠳᠠᠳᠠᠭ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ ᠶᠦᠮ ᠭᠡᠳ ᠬᠡᠳᠦᠭᠦᠯᠡ ᠴᠣᠩᠬᠢᠶᠠᠯ ᠤ᠋ᠨ ᠪᠠᠷᠠᠭᠤᠨ ᠬᠥᠪᠡᠭᠡ ᠪᠡᠷ ᠳᠡᠭᠡᠭᠰᠢ ᠮᠠᠴᠤᠵᠤ ᠲᠡᠷᠡ ᠰᠠᠷᠠᠪᠴᠢᠨ ᠬᠠᠳᠠ ᠶ᠋ᠢ ᠠᠪᠠᠷᠢᠨᠠ᠃
ᠲᠠᠸᠠᠨᠢᠮᠠ᠂ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠪᠠ ᠲᠡᠭᠦᠨ ᠦ᠌ ᠰᠢᠳᠠᠷ ᠳᠠᠭᠠᠯᠲᠠ ᠲᠠᠢ ᠭᠤᠷᠪᠠᠭᠤᠯᠠ ᠲᠡᠷᠡ ᠰᠠᠷᠠᠪᠴᠢᠨ ᠬᠠᠳᠠᠨ ᠳᠡᠭᠡᠷᠡ ᠭᠠᠷᠴᠤ ᠣᠴᠢᠪᠠ᠃ ᠳᠠᠭᠠᠯᠳᠤᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠨᠥᠭᠦᠭᠡ ᠭᠤᠷᠪᠠ ᠨᠢ ᠪᠠᠰᠠ ᠰᠠᠷᠠᠪᠴᠢᠨ ᠬᠠᠳᠠ ᠶ᠋ᠢ ᠮᠠᠴᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳᠣᠣᠷᠠ ᠬᠤᠴᠣᠷᠪᠠ᠃
— ᠬᠠᠮᠢᠭᠠ ᠪᠣᠢ ᠥᠨᠥ ᠮᠥᠩᠭᠥ ᠴᠢᠨᠢ ⁈ ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠲᠠᠸᠠᠨᠢᠮᠠ ᠶ᠋ᠢ ᠱᠠᠯᠠᠵᠤ ᠠᠰᠠᠭᠤᠪᠠᠯ ᠲᠠᠸᠠᠨᠢᠮᠠ ᠳᠣᠲᠣᠷᠠ ᠪᠠᠨ 《 ᠡᠨᠡ ᠮᠠᠭᠤ ᠮᠥᠩᠭᠥᠨ ᠦ᠌ ᠬᠣᠷᠣᠬᠠᠢ ᠴᠢᠮᠠᠶ᠋ᠢ! ᠪᠢ ᠭᠠᠭᠴᠠ ᠴᠢᠮᠠ ᠲᠠᠢ ᠪᠠᠢᠭᠰᠠᠨ ᠪᠣᠯ <ᠲᠡᠷᠡ᠂ ᠲᠡ – ᠷᠡ ᠮᠥᠩᠭᠥ> ᠭᠡᠵᠦ ᠴᠣᠩᠬᠢᠶᠠᠯ ᠤ᠋ᠨ ᠭᠦᠨ ᠲᠠᠢᠰᠢ ᠱᠠᠭᠠᠢᠯᠭᠠᠴᠢᠬᠠᠭᠠᠳ ᠠᠷᠤ ᠠ᠋ᠴᠠ ᠨᠢ ᠨᠢᠭᠡ ᠱᠤᠳᠤᠷᠪᠠᠯ ᠭᠦᠨ ᠴᠣᠩᠬᠢᠶᠠᠯ ᠳ᠋ᠤ᠌ ᠨᠢᠭᠡ ᠨᠠᠰᠤ ᠠᠷᠪᠠᠨ ᠭᠤᠷᠪᠠ ᠶ᠋ᠢ ᠴᠢᠨᠢ ᠳᠠᠭᠤᠰᠬᠠᠭᠴᠢᠬᠠᠬᠤ ᠨᠢ ᠲᠡᠷᠡ! ᠴᠢᠭᠢᠶᠡᠲᠦᠷᠦᠦ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠠᠨᠤᠭᠠᠳ᠄
— ᠵᠠᠩ ᠵᠠᠩᠭᠤᠢᠳᠠ ᠭᠤᠸᠠᠢ ᠠ᠋᠂ ᠲᠠ ᠲᠡᠷᠡ ᠭᠦᠨ ᠴᠣᠩᠬᠢᠶᠠᠯ ᠤ᠋ᠨ ᠬᠠᠳᠠ ᠲᠠᠢ ᠢᠷᠣᠭᠠᠷ ᠤᠷᠤᠭᠤ ᠰᠠᠢᠨ ᠬᠠᠷᠠ᠂ ᠣᠪᠣᠭᠠ ᠲᠣᠪᠣᠭᠠ ᠠᠯᠲᠠ ᠮᠥᠩᠭᠥ ᠣᠪᠣᠭᠠᠯᠠᠭᠠᠰᠤᠲᠠᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠢᠨᠠ ᠤᠤ ? ᠭᠡᠰᠡᠨ ᠳ᠋ᠦ᠍ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ᠄
— ᠬᠠᠮᠢᠭᠠ ᠪᠣᠢ ? ᠶᠠᠭ ᠬᠠᠷᠠᠭᠳᠠᠬᠤ ᠦᠭᠡᠢ ᠰᠢᠲᠠ! ᠭᠡᠨᠡ᠃
— ᠲᠡᠷᠡ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠢ᠋ ᠳᠠᠭᠠᠵᠤ ᠰᠢᠯᠤᠭᠤᠬᠠᠨ ᠬᠠᠷᠠ!
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠲᠠᠸᠠᠨᠢᠮᠠ ᠶ᠋ᠢᠨ ᠵᠢᠭᠠᠭᠰᠠᠨ ᠵᠦᠭ ᠲᠦ᠍ ᠨᠢᠳᠦ ᠪᠡᠨ ᠴᠢᠯᠡᠲᠡᠯᠡ ᠱᠠᠭᠠᠢᠭᠰᠠᠨ ᠴᠤ᠌ ᠶᠠᠭᠤᠮᠠ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠤᠴᠠᠭᠠᠷᠳᠠᠵᠤ᠄
— ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠦᠭᠡᠢ ᠰᠢᠲᠠ᠂ ᠲᠠᠸᠠᠨᠢᠮᠠ ᠴᠢ ᠨᠠᠳᠠ ᠪᠠᠷ ᠨᠠᠭᠠᠳᠤᠮ ᠬᠢᠭᠰᠡᠭᠡᠷ ᠰᠠᠢᠨ ᠢ᠋ᠶ᠋ᠠᠨ ᠣᠯᠵᠤ ᠦᠵᠡᠬᠦ ᠦᠭᠡᠢ ᠰᠢᠦ! ᠭᠡᠰᠡᠨ ᠳ᠋ᠦ᠍ ᠳᠠᠸᠠᠨᠢᠮᠠ᠄
— ᠲᠠᠨ ᠤ ᠨᠢᠳᠦ ᠴᠢᠨᠢ ᠰᠣᠬᠣᠷ ᠪᠢᠰᠢ ᠪᠢᠵᠡ⁈ ᠶᠠᠭᠠᠬᠢᠭᠠᠳ ᠪᠦᠯᠲᠡᠢᠵᠦ ᠪᠠᠢᠭᠠᠳ ᠶᠠᠭᠤᠮᠠ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠶᠤᠮ? ᠭᠡᠵᠦ ᠨᠥᠭᠥᠭᠡ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶᠢᠨ ᠰᠢᠲᠠᠷ ᠳᠠᠭᠠᠯᠲᠠ ᠵᠦᠭ 《ᠴᠢ ᠣᠯᠵᠤ ᠦᠵᠡᠪᠡ ᠤᠤ?》 ᠭᠡᠰᠡᠨ ᠳᠦ ᠨᠥᠭᠥᠭᠡ ᠡᠷᠡ᠄
— ᠴᠢᠯᠠᠭᠤ ᠴᠤ᠌ ᠶᠤᠮ ᠰᠢᠭ᠋᠂ ᠮᠥᠩᠭᠦ ᠴᠤ᠌ ᠶᠤᠮ ᠰᠢᠭ ᠣᠪᠣᠭᠠ ᠲᠣᠪᠣᠢᠭᠠ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠨᠢ ᠴᠤ᠌ ᠬᠠᠷᠠᠭᠳᠠᠵᠠᠢ ᠭᠡᠨᠡ ᠭᠡᠰᠡᠨ ᠳᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠨᠥᠭᠥᠭᠡ ᠰᠢᠲᠠᠷ ᠳᠠᠭᠠᠯᠲᠠ ᠪᠠᠨ ᠬᠠᠷᠠᠵᠤ᠄
— ᠦᠨᠡᠨ ᠤᠤ? ᠭᠡᠪᠡ᠃
— ᠦᠨᠡᠨ᠃ ᠣᠪᠣᠭᠠ ᠲᠣᠪᠣᠭᠠ ᠶᠠᠭᠤᠮᠠ ᠪᠥᠷᠲᠥᠯᠵᠡᠵᠦ ᠬᠠᠷᠠᠭᠳᠠᠨᠠ ᠭᠡᠵᠦ ᠶᠠᠭᠤ ᠴᠤ᠌ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦ᠌ ᠠᠮᠠ ᠳᠠᠭᠠᠭᠤᠯᠵᠤ ᠭᠦᠨ ᠴᠣᠩᠬᠢᠶᠠᠯ ᠳᠣᠲᠣᠷᠠ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠭᠰᠠᠨ ᠰᠠᠢᠨ ᠨᠢᠳᠦ ᠲᠡᠢ ᠪᠣᠯᠤᠨ ᠨᠡᠷᠡᠯᠬᠡᠵᠦ ᠡᠵᠡᠨ ᠢ᠋ᠶ᠋ᠡᠨ ᠱᠠᠯ ᠬᠤᠳᠠᠯ ᠲᠠᠯᠪᠢᠪᠠ᠃
— ᠦ᠂ ᠲᠡᠭᠡᠪᠡᠯ ᠦᠨᠡᠬᠡᠷ ᠮᠥᠩᠭᠥ ᠪᠠᠢᠨᠠ ᠭᠡᠰᠡᠨ ᠦᠭᠡ ᠤᠤ? ᠦᠭᠡᠢ ᠪᠢ ᠶᠠᠭᠠᠬᠢᠭᠠᠳ ᠣᠯᠵᠤ ᠬᠠᠷᠠᠬᠤ ᠦᠭᠡᠢ ᠪᠠᠢᠨᠠ⁈
— ᠲᠠᠨ ᠤ᠋ ᠨᠢᠳᠦ ᠰᠡᠳᠬᠢᠯ ᠬᠣᠶᠠᠷ ᠲᠤ ᠲᠠᠩᠳᠠ ᠮᠥᠩᠭᠥ《ᠥᠬᠡᠭᠦᠯᠡᠴᠢᠭᠰᠡᠨ》 ᠪᠣᠯᠬᠣᠷ ᠪᠠᠷᠤᠭ ᠤ᠋ᠨ ᠪᠠᠭᠠ ᠰᠠᠭᠠ ᠮᠥᠩᠭᠥ ᠶ᠋ᠢ ᠴᠢᠮᠠᠯᠠᠭᠠᠳ ᠪᠠᠢᠳᠠᠭ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠬᠠ ᠭᠡᠵᠦ ᠳᠠᠸᠠᠨᠢᠮᠠ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶᠢ ᠬᠠᠷᠢᠶᠠᠵᠤ ᠮᠠᠭᠲᠠᠬᠤ ᠨᠤᠬᠤᠴᠠᠲᠠᠢ ᠬᠡᠯᠡᠭᠰᠡᠨ ᠦᠭᠡ ᠶᠢ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠮᠠᠭᠲᠠᠭᠠᠯ ᠤᠨ ᠥᠷᠥᠭᠡᠰᠦᠨ ᠢᠶᠡᠷ ᠣᠢᠯᠠᠭᠠᠵᠤ ᠬᠠ ᠬᠠ ᠭᠡᠵᠦ ᠬᠠᠳᠠᠭᠠᠨᠠᠨ ᠢᠨᠢᠶᠡᠵᠦ᠄
— ᠲᠡᠭᠡᠭᠡᠳ ᠡᠨᠡ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠶ᠋ᠢ ᠴᠢ ᠶᠠᠭᠠᠬᠢᠭᠠᠳ ᠠᠪᠳᠠᠭ ᠦᠭᠡᠢ ᠪᠣᠢ? ᠦᠭᠡᠢ ᠬᠥᠮᠦᠰ ᠲᠡᠭᠡᠭᠡᠳ ᠡᠨᠡ ᠮᠥᠩᠭᠥ ᠶ᠋ᠢ ᠠᠪᠬᠤ ᠪᠠᠷ ᠭᠤᠷᠢᠯᠠᠳᠠᠭ ᠦᠭᠡᠢ ᠤᠤ? ᠭᠡᠯᠡ᠃
— ᠡᠨᠡ ᠴᠣᠩᠬᠢᠶᠠᠯ ᠳᠣᠲᠣᠷᠠᠬᠢ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠶ᠋ᠢ ᠬᠡᠨ ᠠᠪᠤᠨᠠ ᠭᠡᠪᠡᠯ ᠠᠪᠴᠢᠬᠠᠳᠠᠭ ᠶᠠᠭᠤᠮᠠ ᠪᠢᠰᠢ᠃ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠳᠡᠭ ᠦᠭᠡᠢ《ᠮᠥᠩᠭᠥᠨ ᠦ᠌ ᠰᠠᠬᠢᠭᠤᠯ》 ᠪᠠᠢᠳᠠᠭ ᠭᠡᠵᠦ ᠬᠠᠭᠤᠴᠢᠨ ᠤ᠋ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ᠃
— ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠳᠡᠭ ᠦᠭᠡᠢ《 ᠮᠥᠩᠭᠥᠨ ᠦ᠌ ᠰᠠᠬᠢᠭᠤᠯ》 ᠭᠡᠨᠡ ᠠ᠋? ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠪᠣᠯᠤᠨ ᠨᠥᠭᠦᠭᠡ ᠡᠷᠡ ᠬᠣᠶᠠᠭᠤᠯᠠ ᠵᠡᠷᠭᠡ ᠪᠡᠷ ᠬᠠᠴᠢᠷᠬᠠᠨ ᠠᠰᠠᠭᠤᠨᠠ᠃
— ᠤᠤᠬᠠᠢ ᠳᠠ! ᠡᠷᠲᠡ ᠦᠶᠡ ᠡᠴᠡ ᠠᠪᠤᠭᠠᠳ ᠮᠥᠩᠭᠥᠨ ᠳ᠋ᠦ᠍ ᠬᠣᠷᠣᠬᠠᠢᠲᠠᠢ ᠬᠥᠮᠦᠰ ᠡᠨᠡ ᠴᠣᠩᠬᠢᠶᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠥᠨᠥ ᠮᠥᠩᠭᠥ ᠬᠤᠯᠠᠭᠠᠢᠯᠠᠬᠤ ᠪᠠᠷ ᠶᠠᠩᠵᠤ ᠶ᠋ᠢᠨ ᠠᠷᠭᠠ ᠪᠠᠷ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠴᠢᠳᠠᠳᠠᠭ ᠦᠭᠡᠢ ᠭᠡᠨᠡ᠃ ᠰᠡᠭᠦᠯ ᠳ᠋ᠦ᠍ᠨᠢ ᠬᠥᠮᠦᠰ ᠵᠤᠨ ᠤ᠋ ᠴᠠᠭ ᠰᠠᠶᠢᠬᠠᠨ ᠨᠢᠳᠦᠯᠡᠭᠰᠡᠨ ᠪᠦᠬᠦᠯᠢ ᠬᠣᠨᠢᠨ ᠤ᠋ ᠮᠢᠬᠠ ᠶ᠋ᠢ ᠳᠡᠭᠡᠰᠦᠨ ᠳ᠋ᠦ᠍ ᠤᠶᠠᠵᠤ ᠭᠦᠨ ᠴᠣᠩᠬᠢᠶᠠᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠰᠤᠪᠤᠭᠤᠯᠵᠤ ᠣᠷᠣᠭᠤᠯᠤᠭᠠᠳ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥᠨ ᠳ᠋ᠦ᠍ ᠣᠢᠷᠠᠲᠤᠭᠤᠯᠪᠠᠯ ᠲᠡᠷᠡ ᠪᠦᠬᠦᠯᠢ ᠬᠣᠨᠢᠨ ᠤ᠋ ᠮᠢᠬᠠᠨ ᠳ᠋ᠤ᠌ ᠠᠯᠲᠠ ᠮᠥᠩᠭᠥᠨ ᠶᠤᠸᠠᠮᠪᠤᠤ ᠨᠤᠭᠤᠳ ᠨᠢ ᠠᠷᠵᠠᠢᠲᠠᠯᠠ ᠨᠠᠭᠠᠯᠳᠤᠴᠢᠬᠠᠳᠠᠭ ᠭᠡᠨᠡ᠃ ᠲᠡᠭᠡᠬᠦᠯᠡᠷ ᠳᠡᠭᠡᠷᠡᠬᠢ ᠬᠥᠮᠦᠰ ᠥᠨᠥᠬᠢ ᠤᠷᠲᠤ ᠳᠡᠭᠡᠰᠦ ᠪᠡᠨ ᠠᠶᠠᠷᠬᠠᠨ ᠳᠡᠭᠡᠭᠰᠢ ᠲᠠᠲᠠᠵᠤ ᠴᠣᠩᠬᠢᠶᠠᠯ ᠤ᠋ᠨ ᠬᠠᠳᠠᠨ ᠤ᠋ ᠡᠷᠭᠢ ᠥᠭᠡᠳᠡ ᠠᠪᠴᠢᠷᠠᠳᠠᠭ᠃ ᠨᠣᠢᠲᠠᠨ ᠮᠢᠬᠠᠨ ᠳ᠋ᠤ᠌ ᠠᠷᠵᠠᠢᠲᠠᠯᠠ ᠨᠠᠭᠠᠯᠳᠤᠭᠰᠠᠨ ᠮᠥᠩᠭᠥ ᠬᠥᠮᠦᠨ ᠦ᠌ ᠬᠣᠷᠣᠬᠠᠢ ᠶ᠋ᠢ ᠬᠥᠳᠡᠯᠭᠡᠬᠦ ᠭᠡᠭᠴᠢ ᠬᠡᠴᠡᠭᠦᠦ! ᠣᠳᠣ ᠯᠠ ᠪᠥᠭᠡᠮ ᠮᠥᠩᠭᠥ ᠡᠪᠦᠷᠯᠡᠬᠦ ᠨᠢ ᠠ᠋ ᠭᠡᠵᠦ ᠬᠥᠭᠰᠡᠬᠦ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠬᠠᠮᠢᠭᠠ ᠠ᠋ᠴᠠ ᠶᠤᠮ ᠪᠦᠦ ᠮᠡᠳᠡ《ᠮᠥᠩᠭᠥᠨ ᠳ᠋ᠦ᠍ ᠬᠤᠯᠠᠭᠠᠢ ᠣᠷᠣᠯᠠ ᠠ᠋!》 ᠭᠡᠵᠦ ᠮᠠᠰᠢ ᠬᠣᠯᠠ ᠶᠤᠮ ᠰᠢᠭ᠋ ᠪᠢᠲᠡᠭᠦᠬᠡᠨ ᠬᠠᠰᠬᠢᠷᠬᠤ ᠳᠠᠭᠤᠨ ᠰᠣᠨᠣᠰᠳᠠᠳᠠᠭ ᠭᠡᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠴᠣᠩᠬᠢᠶᠠᠯ ᠤ᠋ᠨ ᠬᠠᠳᠠᠨ ᠤ᠋ ᠡᠷᠭᠢ ᠳᠠᠪᠠᠮᠠ ᠪᠣᠯᠵᠤ ᠬᠥᠮᠦᠨ ᠦ᠌ ᠭᠠᠷ ᠲᠤ ᠪᠠᠷᠢᠭᠳᠠᠮᠠ ᠪᠠᠢᠭᠰᠠᠨ ᠠᠯᠲᠠ ᠮᠥᠩᠭᠥ ᠨᠦ᠍ᠭᠦᠳ ᠨᠢ ᠨᠣᠢᠲᠠᠨ ᠮᠢᠬᠠᠨ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠦᠳᠲᠡᠷ ᠰᠠᠯᠤᠨ ᠪᠤᠲᠠᠷᠠᠵᠤ ᠲᠠᠷᠠᠩ᠂ ᠲᠠᠷᠠᠩ! ᠭᠡᠵᠦ ᠠᠯᠲᠠ ᠮᠥᠩᠭᠥ ᠬᠠᠪᠢᠷᠤᠯᠳᠤᠭᠰᠠᠨ ᠳᠠᠭᠤᠨ ᠬᠣᠴᠣᠷᠭᠠᠭᠠᠳ ᠠᠯᠠᠭᠠ ᠪᠣᠯᠴᠢᠬᠠᠳᠠᠭ᠃ ᠰᠢᠨᠤᠯ ᠳ᠋ᠠᠭᠠᠨ ᠮᠥᠬᠥᠳᠡᠭ ᠦᠭᠡᠢ ᠮᠥᠩᠭᠥᠨ ᠦ᠌ ᠬᠣᠷᠣᠬᠠᠢᠴᠤᠳ ᠡᠢᠨ ᠬᠦ᠌ ᠠᠷᠭᠠ ᠪᠠᠷ ᠳᠠᠬᠢᠨ ᠳᠠᠪᠲᠠᠨ ᠦᠢᠯᠡᠳᠪᠡᠴᠦ ᠭᠣᠷᠢ ᠦᠭᠡᠢ᠃ ᠲᠡᠷᠡ ᠣᠪᠣᠭᠠ ᠲᠣᠪᠣᠭᠠ ᠮᠥᠩᠭᠥ ᠶ᠋ᠢ ᠬᠡᠨ ᠴᠤ᠌ ᠠᠪᠴᠤ ᠴᠢᠳᠠᠳᠠᠭ ᠦᠭᠡᠢ ᠭᠡᠨᠡ ᠭᠡᠵᠦ ᠲᠠᠸᠠᠨᠢᠮᠠ ᠶ᠋ᠢᠨ ᠳᠣᠮᠣᠭᠯᠠᠵᠤ ᠶᠠᠷᠢᠭᠰᠠᠨ ᠢ᠋ ᠪᠠᠬᠠᠳᠤᠨ ᠰᠣᠨᠣᠰᠤᠭᠰᠠᠨ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠵᠤ᠄
— ᠠ ᠢᠯᠡᠢ! ᠲᠡᠷᠡ ᠪᠦᠬᠦᠯᠢ ᠬᠣᠨᠢᠨ ᠮᠢᠬᠠᠨ ᠤ᠋ ᠳᠣᠣᠷᠠ ᠲᠣᠣᠷ ᠤᠶᠠᠳᠠᠭ ᠶᠤᠮ ᠰᠢᠦ! ᠲᠡᠭᠡᠪᠡᠯ ᠮᠢᠬᠠᠨ ᠳ᠋ᠤ᠌ ᠨᠠᠭᠠᠯᠳᠤᠭᠰᠠᠨ ᠠᠯᠲᠠ ᠮᠥᠩᠭᠥ ᠴᠣᠩᠬᠢᠶᠠᠯ ᠤ᠋ᠨ ᠢᠷᠣᠭᠠᠷ ᠤᠷᠤᠭᠤ ᠤᠨᠠᠵᠤ ᠲᠡᠢᠯᠬᠦ ᠦᠭᠡᠢ᠃ ᠪᠦᠭᠦᠳᠡ ᠶ᠋ᠢ ᠲᠣᠣᠷᠯᠠᠴᠢᠬᠠᠨᠠ ᠰᠢᠦ ᠳᠡ! ᠭᠡᠵᠦ ᠬᠡᠯᠡᠪᠡ᠃
— ᠠ ᠡᠨᠡ ᠠᠷᠭᠠ ᠦᠨᠡᠬᠡᠷ ᠰᠠᠢᠨ! ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠰᠢᠳᠠᠷ ᠳᠠᠭᠠᠯᠲᠠ ᠨᠢ ᠡᠷᠡᠬᠡᠢ ᠭᠣᠵᠣᠢᠯᠭᠠᠨ ᠮᠠᠭᠲᠠᠭᠰᠠᠨ ᠳ᠋ᠤ᠌ ᠲᠠᠸᠠᠨᠢᠮᠠ᠄
— ᠵᠠᠩ ᠵᠠᠩᠭᠤᠢᠳᠠ ᠶ᠋ᠢᠨ ᠤᠬᠠᠭᠠᠨ ᠭᠡᠵᠦ ᠠ᠋᠂ ᠲᠡᠷᠡ ᠲᠡᠷᠡ ᠤᠬᠠᠭᠠᠨ ᠢ᠋ ᠶᠠᠭᠠᠬᠢᠵᠤ ᠪᠣᠳᠣᠵᠤ ᠣᠯᠳᠠᠭ ᠶᠤᠮ ᠪᠦᠦ ᠮᠡᠳᠡ! ᠵᠣᠷᠢᠭ ᠲᠠᠢ ᠬᠥᠮᠦᠨ ᠵᠣᠭᠣᠰ ᠲᠠᠢ ᠭᠡᠳᠡᠭ ᠦᠨᠡᠨ ᠪᠠᠢᠵᠤ ᠰᠢᠦ! ᠭᠡᠪᠡ᠃
ᠬᠠᠵᠠᠭᠤᠳᠠᠬᠢ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠭᠲᠠᠭᠤᠯᠤᠭᠰᠠᠨ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠣᠮᠣᠭᠰᠢᠯ ᠤ᠋ᠨ ᠢᠨᠢᠶᠡᠳᠦ ᠲᠣᠳᠣᠷᠠᠵᠤ《ᠡᠨᠡ ᠴᠣᠩᠬᠢᠶᠠᠯ ᠤ᠋ᠨ ᠳᠣᠣᠷᠠᠬᠢ ᠳᠠᠯᠠᠨ ᠠᠴᠢᠶᠠ ᠠᠯᠲᠠ ᠮᠥᠩᠭᠥ ᠴᠦ᠍ ᠮᠢᠨᠦ ᠭᠠᠷ ᠲᠤ ᠣᠷᠣᠴᠢᠬᠠᠯᠠ》 ᠭᠡᠰᠡᠨ ᠪᠠᠬᠠᠳᠤᠯ ᠪᠢᠯᠬᠠᠭᠰᠠᠨ ᠦᠰᠦᠭ ᠦ᠋ᠳ ᠦᠰᠦᠷᠬᠢᠯᠡᠵᠦ ᠬᠠᠷᠠᠭᠳᠠᠬᠤ ᠰᠢᠤᠬᠠᠨ ᠪᠣᠯᠪᠠ᠃
ᠭᠡᠨᠡᠳᠲᠡ ᠲᠡᠷᠲᠡᠭᠡ ᠬᠠᠳᠠᠨ ᠠᠴᠠ ᠴᠢᠨᠣᠠ ᠣᠯᠢᠬᠤ ᠳᠠᠭᠤᠨ ᠰᠣᠨᠣᠰᠳᠠᠪᠠ᠃
— ᠠ᠂ ᠡᠨᠳᠡ ᠴᠢᠨᠣᠠ ᠪᠠᠢᠳᠠᠭ ᠤᠤ? ᠭᠡᠵᠦ ᠪᠠᠬᠠᠨ ᠠᠶᠤᠭᠰᠠᠨ ᠰᠢᠭ᠋ ᠳᠤᠤᠭᠠᠷᠤᠭᠰᠠᠨ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠴᠢᠷᠠᠢ ᠨᠢ ᠪᠠᠷᠤᠢᠪᠠ᠃
— ᠪᠠᠢᠨᠠ ᠰᠢᠦ! ᠥᠯᠥᠩᠲᠦ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠴᠢᠨᠣᠠ ᠶ᠋ᠢᠨ ᠡᠭᠦᠷ ᠪᠠᠢᠳᠠᠭ᠃ ᠡᠨᠡ ᠴᠢᠨᠣᠠ ᠴᠠᠭᠠᠳᠤᠭᠤᠯᠠ ᠳ᠋ᠠᠭᠠᠨ《ᠮᠥᠩᠭᠥᠨ ᠳ᠋ᠦ᠍ ᠬᠤᠯᠠᠭᠠᠢ ᠣᠷᠣᠯᠠ》 ᠭᠡᠵᠦ ᠴᠢᠮᠡᠭᠡ ᠥᠭᠬᠦ ᠰᠢᠭ ᠰᠣᠨᠣᠰᠳᠠᠨᠠ ᠳᠠ! ᠭᠡᠵᠦ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠵᠣᠷᠢᠭᠤᠳᠠ ᠠᠶᠤᠯᠭᠠᠭᠰᠠᠨ ᠳ᠋ᠤ᠌ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ᠄
— ᠲᠡᠷᠡ ᠨᠢ ᠥᠨᠥᠬᠢ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠳᠡᠭ ᠦᠭᠡᠢ《ᠮᠥᠩᠭᠥᠨ ᠦ᠌ ᠰᠠᠬᠢᠭᠤᠯ》 ᠭᠡᠰᠡᠨ ᠦᠭᠡ ᠤᠤ⁈ ᠭᠡᠪᠡ᠃
— ᠮᠥᠨ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠲᠠᠸᠠᠨᠢᠮᠠ ᠰᠢᠳᠢᠴᠢᠯᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠨᠥᠭᠦᠭᠡ ᠰᠢᠳᠠᠷ ᠳᠠᠭᠠᠯᠲᠠ᠄
— ᠡᠨᠡ ᠴᠢᠨᠣᠠ ᠶ᠋ᠢ ᠤᠨᠠᠭᠠᠴᠢᠬᠠᠶᠤ ᠵᠠᠩᠭᠤᠢᠳᠠ ᠠ᠋! ᠭᠡᠵᠦ ᠫᠤᠤ ᠪᠠᠨ ᠱᠠᠯᠠᠪ ᠵᠠᠮᠤᠭᠯᠠᠭᠰᠠᠨ ᠳ᠋ᠤ᠌ ᠲᠠᠸᠠᠨᠢᠮᠠ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠠ᠋ᠴᠠ ᠵᠠᠪᠳᠤᠵᠤ᠄
— ᠬᠥᠶᠢ᠂ ᠪᠢᠳᠡᠬᠢ ᠫᠤᠤᠳᠠ! ᠲᠡᠷᠡ ᠴᠢᠨᠢ ᠲᠩᠷᠢ ᠶ᠋ᠢᠨ ᠨᠣᠬᠠᠢ ᠰᠢᠦ! ᠨᠢᠭᠦᠯ ᠠ᠋᠂ ᠭᠡᠵᠦ ᠥᠨᠥᠬᠢ ᠰᠢᠳᠠᠷ ᠳᠠᠭᠠᠯᠲᠠ ᠶ᠋ᠢ ᠬᠣᠷᠢᠭᠰᠠᠨ ᠳ᠋ᠤ᠌ ᠲᠡᠷᠡ᠄
— ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠲᠩᠷᠢ ᠶ᠋ᠢᠨ ᠨᠣᠬᠠᠢ! ᠲᠡᠷᠡ ᠴᠢᠨᠢ ᠴᠢᠨᠣᠠ ᠪᠢᠰᠢ ᠤᠤ! ᠭᠡᠯᠡ᠃
— ᠪᠠᠢᠭ᠂ ᠴᠠᠭᠠᠰᠢ! ᠲᠩᠷᠢ ᠶ᠋ᠢᠨ ᠨᠣᠬᠠᠢ ᠪᠢᠰᠢ ᠴᠤ᠌ ᠪᠣᠣᠬᠠᠢ ᠶ᠋ᠢ ᠫᠤᠤᠳᠠᠵᠤ ᠠᠭᠤᠷ ᠥᠰᠢᠶᠡ ᠶ᠋ᠢ ᠨᠢ ᠬᠦᠷᠭᠡᠭᠰᠡᠭᠡᠷ ᠭᠡᠨᠡᠨ ᠰᠢᠦ! ᠠᠯᠢ ᠨᠢᠭᠡ ᠡᠳᠦᠷ ᠴᠢᠮᠠ ᠠ᠋ᠴᠠ ᠥᠰᠢᠶᠡ ᠠᠪᠤᠨᠠ ᠳᠠ!
— ᠦᠭᠡᠢ ᠠ᠋! ᠴᠢ ᠰᠠᠶᠢ《ᠮᠥᠩᠭᠥᠨ ᠦ᠌ ᠰᠠᠬᠢᠭᠤᠯ》 ᠭᠡᠵᠦ ᠬᠡᠯᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ? ᠲᠡᠢᠮᠦ ᠪᠣᠯ ᠲᠡᠷᠡ ᠴᠢᠨᠣᠠ ᠶ᠋ᠢ ᠫᠤᠤ᠁ ᠫᠤᠤᠳᠠᠵᠤ ᠠᠯᠠᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠲᠡᠷᠡ ᠡᠷᠡ ᠮᠠᠰᠢ ᠠᠭᠤᠷᠲᠠᠢ ᠬᠡᠯᠡᠪᠡ᠃
ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢᠨ ᠰᠢᠳᠠᠷ ᠳᠠᠭᠠᠯᠲᠠ ᠡᠨᠡ ᠡᠷᠡ ᠫᠤᠤ ᠳ᠋ᠠᠭᠠᠨ ᠰᠠᠢᠨ᠂ ᠠᠷᠪᠠᠨ ᠰᠤᠮᠤᠨ ᠤ᠋ ᠨᠠᠢ᠍ᠮᠠ ᠨᠢ ᠬᠣᠭᠣᠰᠣᠨ ᠦᠭᠡᠢ ᠪᠠᠢᠳᠠᠭ ᠤᠴᠢᠷ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠲᠡᠭᠦᠨ ᠢ᠋ ᠪᠡᠶᠡ ᠡᠴᠡ ᠪᠡᠨ ᠲᠥᠭᠡ ᠰᠠᠯᠭᠠᠳᠠᠭ ᠦᠭᠡᠢ ᠶᠦᠮ᠃
— ᠨᠢᠭᠡ ᠯᠡ ᠰᠤᠮᠤᠨ ᠳ᠋ᠤ᠌ ᠡᠯᠭᠦᠴᠢᠬᠡᠬᠦ ᠤᠤ? ᠭᠡᠬᠦ ᠲᠡᠢ ᠵᠡᠷᠭᠡ ᠫᠠᠩ! ᠭᠡᠵᠦ ᠫᠤᠤ ᠳᠤᠤᠭᠠᠷᠪᠠ᠃ ᠥᠨᠥᠬᠢ ᠬᠠᠳᠠᠨ ᠳᠡᠭᠡᠷᠡ ᠱᠣᠩᠨᠣᠢᠨ ᠲᠩᠷᠢ ᠬᠠᠨᠳᠤᠨ ᠤᠯᠢᠭᠰᠠᠨ ᠴᠢᠨᠣᠠ ᠳᠣᠷᠣᠭᠰᠢ ᠪᠠᠨ ᠪᠥᠮᠪᠥᠷᠢᠪᠡ᠁
— ᠵᠠ᠂ ᠪᠦᠦ ᠦᠵᠡᠭᠳᠡ ᠠ᠋! ᠣᠳᠣ ᠴᠤ᠌ ᠲᠩᠷᠢ ᠶ᠋ᠢᠨ ᠪᠤᠬᠤᠷ ᠲᠤ ᠭᠠᠯ ᠲᠠᠯᠪᠢᠴᠢᠬᠠᠭᠰᠠᠨ ᠠ᠋! ᠭᠡᠵᠦ ᠲᠠᠸᠠᠨᠢᠮᠠ ᠨᠢᠳᠦ ᠪᠡᠨ ᠠᠨᠢᠨ ᠵᠠᠯᠪᠠᠷᠢᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠰᠢᠳᠠᠷ ᠳᠠᠭᠠᠯᠲᠠ ᠬᠠ᠂ ᠬᠠ᠂ ᠬᠠ᠁ ᠭᠡᠵᠦ ᠬᠠᠳᠠᠭᠠᠨᠠᠨ ᠢᠨᠢᠶᠡᠵᠦ《ᠨᠢᠭᠡ ᠯᠡ ᠰᠤᠮᠤᠨ ᠳ᠋ᠤ᠌ ᠥᠨᠥᠬᠢ (ᠮᠥᠩᠭᠥᠨ ᠦ᠌ ᠰᠠᠬᠢᠭᠤᠯ) ᠢ᠋ ᠲᠣᠩᠭᠣᠷᠠᠭᠤᠯᠴᠢᠬᠠᠯᠠ!》 ᠭᠡᠵᠦ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠶ᠋ᠢ ᠰᠢᠷᠲᠡᠨ《ᠮᠢᠨᠦ ᠬᠠᠷᠠᠭᠠ ᠶᠠᠮᠠᠷ ᠪᠠᠢᠨᠠ?》 ᠭᠡᠰᠡᠨ ᠲᠥᠯᠥᠪᠲᠡᠢ ᠶᠡᠬᠡᠷᠬᠡ ᠳᠤᠤᠭᠠᠷᠪᠠ᠃ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ᠄
— ᠰᠠᠢᠨ ᠡᠷᠡ᠂ ᠰᠠᠢᠨ ᠡᠷᠡ! ᠭᠡᠵᠦ ᠡᠷᠡᠬᠡᠢ ᠭᠣᠵᠣᠢᠯᠭᠠᠨ ᠱᠠᠭᠰᠢᠭᠰᠠᠨ ᠳ᠋ᠤ᠌ ᠲᠠᠸᠠᠨᠢᠮᠠ᠄
— ᠴᠠᠭᠠᠳᠤᠬᠢ ᠪᠠᠨ ᠨᠢᠭᠡ ᠯᠡ ᠴᠠᠭᠠᠰᠢ ᠪᠠᠨ ᠬᠠᠨᠳᠤᠭᠤᠯᠴᠢᠬᠠᠭᠰᠠᠨ ᠴᠤ᠌ ᠪᠣᠯ ᠶᠠᠭᠠᠬᠢᠬᠤ ᠪᠣᠢ? ᠬᠠᠷᠢᠨ ᠳᠤᠲᠠᠭᠤ ᠵᠡᠮᠳᠡᠭ᠂ ᠰᠢᠷᠠᠭᠳᠤᠭᠤᠯᠤᠭᠰᠠᠨ ᠪᠣᠯ ᠴᠤ᠌ ᠭᠡᠨᠡᠨ ᠶᠦᠮ ᠠ᠋! ᠭᠡᠪᠡ᠃
ᠭᠠᠰᠢᠭᠤᠨ ᠳᠠᠷᠢ ᠦᠨᠦᠷᠲᠦᠭᠦᠯᠦᠨ ᠭᠠᠯ ᠱᠤᠤᠭᠢᠭᠤᠯᠤᠭᠰᠠᠨ ᠰᠤᠮᠤ ᠲᠡᠷᠲᠡᠭᠡ ᠬᠠᠳᠠᠨ ᠤ᠋ ᠬᠠᠯᠬᠠᠪᠴᠢ ᠳ᠋ᠠᠬᠢ ᠨᠥᠭᠥᠭᠡᠳᠦᠭᠦᠯᠡ ᠳ᠋ᠡᠭᠡᠨ ᠴᠢᠮᠡᠭᠡ ᠥᠭᠭᠦᠭᠰᠡᠨ ᠴᠢᠨᠣᠠ ᠶ᠋ᠢᠨ ᠡᠮᠦᠨᠡ ᠬᠣᠶᠠᠷ ᠰᠢᠭᠢᠷᠡ ᠶ᠋ᠢ ᠨᠢ ᠲᠠᠰᠤ ᠳᠠᠭᠠᠷᠢᠭᠰᠠᠨ ᠪᠠᠢᠵᠠᠢ᠃
ᠬᠥᠮᠥᠨ ᠳᠦ ᠪᠠᠢᠮᠠ ᠦᠭᠡᠢ ᠰᠡᠷᠭᠡᠭ ᠤᠬᠠᠭᠠᠨ ᠲᠠᠢ ᠬᠠᠰᠢᠷ ᠴᠢᠨᠸᠠ ᠲᠠᠬᠢᠭᠠᠳ ᠬᠠᠯᠳᠠᠵᠤ ᠮᠡᠳᠡᠬᠦ ᠠᠶᠤᠯ ᠠᠴᠠ ᠵᠠᠢᠯᠠᠬᠤ ᠶᠢ ᠪᠣᠳᠣᠨ ᠠᠮᠢᠨ ᠭᠣᠣᠯ ᠢᠶᠠᠨ ᠰᠦᠪᠡᠯᠡᠭᠦᠯᠦᠭ᠍ᠰᠡᠨ ᠰᠢᠭ ᠳᠣᠷᠣᠭ᠌ᠰᠢ ᠪᠥᠮᠪᠥᠷᠢᠭ᠍ᠰᠡᠨ ᠨᠢ ᠲᠡᠷᠡ ᠪᠠᠢᠵᠠᠢ᠃
ᠪᠢᠲᠡᠭᠦᠦ ᠰᠢᠭᠤᠢ ᠳᠣᠲᠣᠷᠠ ᠨᠢᠭᠤᠭᠳᠠᠭᠰᠠᠨ ᠬᠠᠰᠢᠷ ᠴᠢᠨᠣᠠ ᠰᠢᠷᠠᠭᠳᠠᠭᠰᠠᠨ ᠰᠢᠭᠢᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠰᠤ ᠶ᠋ᠢ ᠳᠣᠯᠢᠶᠠᠪᠠᠯ ᠡᠬᠡᠭᠦᠨ ᠮᠠᠭᠤᠬᠠᠢ ᠳᠠᠷᠢ ᠠᠮᠲᠠᠯᠠᠭᠳᠠᠭᠰᠠᠨ ᠳ᠋ᠤ᠌ ᠬᠣᠷᠣᠰᠤᠯ ᠨᠢ ᠪᠤᠴᠠᠯᠵᠤ《ᠡᠲᠡᠭᠡᠳ ᠮᠠᠭᠤᠬᠠᠢ ᠭᠠᠰᠢᠭᠤᠨ ᠦᠨᠦᠷ ᠲᠡᠢ ᠭᠠᠨᠳᠠᠭᠤᠨ ᠳᠠᠭᠤ ᠲᠠᠢ ᠢᠷᠣᠠ ᠶ᠋ᠢᠨ ᠶᠠᠭᠤᠮᠠ ᠢᠷᠡᠴᠢᠬᠡᠵᠡᠢ! ᠲᠠ ᠨᠠᠷ ᠬᠡᠷᠰᠡᠦᠯᠡᠭᠡᠴᠢ! ᠪᠣᠯᠤᠮᠵᠢ ᠪᠠᠢᠪᠠᠯ ᠠᠴᠠ ᠬᠥᠯ ᠲᠡᠢ ᠠᠷᠵᠠᠭᠠᠷ ᠬᠠᠷᠠ ᠲᠣᠯᠣᠭᠠᠢ ᠲᠠᠢ ᠬᠦᠢᠲᠡᠨ ᠠᠮᠢᠰᠬᠤᠯ ᠲᠠᠢ ᠠ᠋ᠴᠠ ᠨᠢ ᠪᠠᠭᠠᠯᠵᠠᠭᠤᠷᠳᠠᠵᠤ ᠬᠣᠭᠣᠯᠠ ᠪᠠᠵᠠᠭᠠ!》 ᠭᠡᠵᠦ ᠲᠩᠷᠢ ᠬᠠᠨᠳᠤᠨ ᠬᠣᠷᠣᠰᠤᠯᠲᠠᠢ ᠣᠯᠢᠨᠠ᠁
ᠭᠣᠣᠯ ᠤ᠋ᠨ ᠰᠡᠭᠦᠳᠡᠷ ᠤᠨᠠᠬᠤ ᠳ᠋ᠤ᠌ ᠲᠠᠸᠠᠨᠢᠮᠠ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠬᠡᠳᠦᠭᠦᠯᠡ ᠰᠠᠷᠠᠪᠴᠢᠨ ᠬᠠᠳᠠᠨ ᠤ᠋ ᠡᠩᠭᠡᠷ ᠡᠴᠡ ᠠᠶᠠᠷᠬᠠᠨ ᠪᠠᠭᠤᠵᠤ ᠣᠴᠢᠬᠤ ᠳ᠋ᠤ᠌ ᠨᠥᠭᠦᠭᠡ ᠬᠠᠳᠠ ᠳᠠᠪᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠴᠣᠷᠤᠭᠰᠠᠨ ᠭᠤᠷᠪᠠ ᠶ᠋ᠢᠨ ᠬᠣᠶᠠᠷ ᠨᠢ ᠴᠢᠨᠣᠠ ᠳᠤ ᠰᠡᠭᠴᠢᠭᠦᠯᠵᠦ ᠨᠥᠭᠦᠭᠡ ᠨᠢ ᠮᠣᠳᠣᠨ ᠤ᠋ ᠣᠷᠣᠢ ᠳ᠋ᠤ᠌ ᠮᠠᠴᠤᠵᠤ ᠠᠮᠢ ᠭᠠᠷᠤᠭᠰᠠᠨ ᠪᠠᠢᠵᠠᠢ᠃ ᠠᠮᠢ ᠲᠠᠢ ᠦᠯᠡᠳᠡᠭᠰᠡᠨ ᠨᠥᠭᠦᠭᠡ ᠬᠠᠷᠠ ᠴᠡᠷᠢᠭ ᠬᠠᠨᠢᠲᠠᠨ ᠢ᠋ᠶ᠋ᠠᠨ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠠᠮᠠ ᠨᠢ ᠠᠩᠭᠠᠯᠵᠠᠭᠠᠳ ᠦᠭᠡ ᠬᠡᠯᠡᠵᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠫᠠᠭ ᠦᠮᠡᠬᠡᠢ ᠦᠨᠦᠷᠲᠦᠬᠦᠯᠡᠷ ᠥᠮᠥᠳᠦᠨ ᠳ᠋ᠡᠭᠡᠨ ᠥᠳᠬᠡᠨ ᠰᠢᠩᠭᠡᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠡᠭᠷᠢ ᠡᠵᠢ