ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠢᠭᠡ> Хан мунын сүүрс < дээд > – Мөнх зохиоов ᠂ Дэд бодь – Гуравдугаар бүлэг <1>
445ᠳᠡᠳ᠋ ᠪᠣᠲᠢ – ᠭᠤᠷᠪᠠᠳᠤᠭᠠᠷ ᠪᠦᠯᠦᠭ <ᠨᠢᠭᠡ>
ᠸᠠᠩ ᠰᠣᠬᠣᠷ ᠭᠡᠭᠴᠢ ᠦᠨᠡᠬᠡᠷ ᠰᠠᠭᠠᠭ ᠤ᠋ᠨ ᠬᠠᠯᠢᠰᠤ ᠶ᠋ᠢ ᠲᠡᠰᠢᠵᠦ ᠲᠣᠰᠣ ᠰᠢᠷᠭᠠᠭᠠᠵᠤ᠂ ᠵᠠᠪᠰᠠᠷ ᠵᠠᠢ ᠶ᠋ᠢ ᠠᠯᠳᠠᠯ ᠦᠭᠡᠢ ᠵᠠᠪᠰᠢᠨ ᠰᠢᠷᠭᠤᠳᠠᠭ ᠵᠠᠯᠢᠬᠠᠢ ᠶ᠋ᠢᠨ ᠨᠢᠭᠡ ᠪᠢᠯᠡ᠃ ᠲᠡᠷᠡ ᠪᠡᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠳᠣᠲᠣᠷᠠ ᠪᠠᠨ ᠬᠢᠮᠤᠷᠠᠯᠳᠤᠭᠰᠠᠨ ᠵᠠᠪᠰᠠᠷ ᠲᠦ ᠡᠪᠲᠡᠢᠬᠡᠨ ᠰᠢᠷᠭᠤᠵᠤ ᠡᠷᠬᠡᠲᠡᠢ ᠰᠦᠷᠲᠡᠢ ᠬᠦᠩ ᠨᠣᠶᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠭᠠᠷᠴᠤ ᠲᠠᠭᠠᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠳᠠᠬᠤ ᠬᠦᠷᠭᠡᠪᠡ ᠭᠡᠭᠴᠢ ᠪᠡᠷ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠲᠤᠰᠠᠯᠠᠮᠵᠢ ᠭᠤᠶᠤᠭᠰᠠᠨ ᠳ᠋ᠤ᠌ ᠬᠠᠷᠠ ᠴᠡᠷᠢᠭ ᠢ᠋ᠶ᠋ᠡᠨ ᠬᠠᠷᠠᠮ ᠦᠭᠡᠢ ᠭᠠᠷᠭᠠᠵᠤ ᠲᠤᠰᠠᠯᠠᠭᠰᠠᠨ ᠭᠡᠨᠡ᠃ ᠡᠨᠡ ᠨᠢ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠡᠯᠡᠭᠰᠡᠨ ᠮᠡᠲᠦ᠄《 ᠬᠠᠷᠢᠭᠤ ᠪᠠᠢᠪᠠᠯ ᠪᠢᠷᠠᠭᠤ ᠭᠡᠳᠡᠭ ᠢ᠋ᠶ᠋ᠡᠷ ᠸᠠᠩ ᠰᠣᠬᠣᠷ ᠤᠷᠢᠳ ᠢ᠋ᠶ᠋ᠠᠷ ᠲᠤᠰᠠ ᠬᠦᠷᠭᠡᠴᠢᠬᠡᠭᠡᠳ ᠠᠷᠤ ᠠ᠋ᠴᠠ ᠴᠢᠨᠢ ᠠᠰᠢᠭ ᠥᠩᠭᠡᠢᠬᠦ ᠶᠠᠳᠠᠬᠤ ᠦᠭᠡᠢ ᠠ᠋᠁ 》 ᠭᠡᠰᠡᠨ ᠢ᠋ ᠰᠠᠨᠠᠯᠲᠠᠢ! ᠥᠨᠥᠳᠥᠷ᠂ ᠲᠡᠭᠦᠨ ᠦ᠌ ᠬᠡᠯᠡᠭᠰᠡᠨ ᠡᠴᠡ ᠬᠢᠯᠭᠠᠰᠤᠨ ᠲᠡᠳᠦᠢ ᠵᠥᠷᠢᠭᠰᠡᠨ ᠦᠭᠡᠢ᠃
ᠸᠠᠩ ᠰᠣᠬᠣᠷ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠦᠬᠦᠵᠦ ᠰᠡᠬᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠠᠷᠠ ᠴᠡᠷᠢᠭ ᠭᠠᠷᠭᠠᠵᠤ ᠲᠤᠰᠠᠯᠠᠭᠰᠠᠨ ᠤ᠋ ᠪᠠᠨ ᠬᠠᠷᠢᠭᠤ ᠳ᠋ᠤ᠌ ᠳᠡᠪᠰᠡᠭ ᠦ᠋ᠨ ᠠᠭᠤᠯᠠᠨ ᠤ᠋ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠴᠡ ᠬᠡᠰᠢᠭ ᠬᠦᠷᠲᠡᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠭᠰᠠᠨ ᠢ᠋ ᠬᠡᠯᠡᠬᠦ ᠶᠠᠭᠤᠨ⁈
ᠨᠠᠢᠷ ᠠ᠋ᠴᠠ ᠪᠤᠴᠠᠮᠠᠭᠴᠠ ᠬᠤᠷᠤᠭᠤᠪᠴᠢᠨ ᠴᠢᠷᠠᠢᠲᠤ ᠪᠠᠨ ᠭᠦᠶᠦᠯᠭᠡᠨ ᠭᠠᠵᠠᠷ ᠨᠤᠲᠤᠭ ᠳᠡᠭᠡᠰᠦᠯᠡᠬᠦ ᠭᠠᠷᠳᠠᠮ ᠢ᠋ ᠬᠣᠰᠢᠭᠤ ᠶᠠᠮᠤᠨ ᠢ᠋ᠶ᠋ᠠᠷ ᠬᠢᠯᠭᠡᠵᠦ ᠠᠪᠤᠭᠠᠳ ᠵᠠᠰᠠᠭ ᠲᠠᠮᠠᠭᠠ ᠳᠠᠷᠤᠭᠤᠯᠤᠨ ᠬᠦᠩ ᠨᠣᠶᠠᠨ᠂ ᠵᠠᠬᠢᠷᠤᠭᠴᠢ ᠶ᠋ᠢᠨ ᠭᠠᠷ ᠤ᠋ᠨ ᠦᠰᠦᠭ ᠢ᠋ ᠵᠢᠷᠤᠭᠤᠯᠪᠠ᠃
ᠳᠡᠪᠰᠡᠭ ᠦ᠋ᠨ ᠠᠭᠤᠯᠠ ᠭᠡᠵᠦ ᠳᠥᠷᠪᠡᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠥᠨᠳᠥᠷ ᠠᠭᠤᠯᠠ ᠲᠤᠯᠤᠭᠠᠳ ᠤ᠋ᠨ ᠬᠠᠯᠬᠠᠪᠴᠢ ᠲᠠᠢ᠂ ᠤᠰᠤ ᠴᠢᠭᠢᠭ ᠲᠡᠩᠴᠡᠭᠦᠬᠡᠨ᠂ ᠤᠴᠢᠷ ᠲᠠᠢ ᠰᠠᠢᠬᠠᠨ ᠭᠠᠵᠠᠷ ᠶᠤᠮᠰᠠᠨ᠃ ᠳᠡᠪᠰᠡᠭ ᠦ᠋ᠨ ᠦᠵᠦᠭᠦᠷ ᠪᠠᠷᠢᠵᠤ ᠬᠣᠶᠠᠷ ᠭᠣᠣᠯ ᠤ᠋ᠨ ᠠᠭᠤᠯᠵᠠᠭᠤᠷ ᠲᠤ《ᠥᠯᠵᠡᠢ ᠪᠠᠶᠠᠰᠬᠤᠯᠠᠩᠲᠤ ᠰᠦᠮᠡ》 ᠭᠡᠭᠴᠢ ᠰᠦᠮᠡ ᠪᠠᠢᠷᠢᠯᠠᠵᠤ ᠯᠠᠮᠠ ᠬᠤᠸᠠᠷᠠᠭ ᠲᠠᠪᠢᠭᠠᠳ᠂ ᠱᠠᠪᠷᠤᠩ ᠨᠢᠭᠡ᠂ ᠤᠮᠵᠠᠳ᠂ ᠭᠡᠪᠬᠦᠢ ᠬᠣᠶᠠᠷ᠃ ᠯᠠᠮᠠ ᠨᠠᠷ ᠨᠢ ᠨᠣᠮ ᠤᠩᠰᠢᠨ ᠰᠦᠵᠢᠭ ᠪᠢᠰᠢᠯᠭᠠᠵᠤ ᠬᠡᠪ ᠢ᠋ᠶ᠋ᠡᠨ ᠰᠠᠬᠢᠨ ᠣᠨᠳᠣᠷᠣᠳᠠᠭ᠃
ᠵᠡᠭᠦᠨ ᠭᠣᠣᠯ ᠳ᠋ᠤᠨᠢ ᠳᠠᠸᠠᠨᠢᠮᠠ ᠲᠠᠢᠵᠢ ᠶ᠋ᠢᠨ ᠬᠢ ᠭᠡᠳᠡᠭ ᠪᠠᠶᠠᠨ ᠠᠢᠯ ᠰᠠᠭᠤᠵᠤ᠂ ᠭᠣᠣᠯ ᠳ᠋ᠤᠨᠢ ᠰᠡᠷᠡᠩᠫᠣᠩᠰᠣᠭ ᠤ᠋ᠨ ᠬᠢ ᠭᠡᠵᠦ ᠵᠢᠷᠠ ᠳᠠᠯᠠᠭᠠᠳ ᠢᠮᠠᠭᠠ᠂ ᠬᠡᠳᠦᠨ ᠰᠠᠭᠠᠯᠢ ᠶ᠋ᠢᠨ ᠦᠨᠢᠶᠡ᠂ ᠤᠨᠤᠭᠠᠷᠢ ᠶ᠋ᠢᠨ ᠬᠣᠶᠷ ᠮᠣᠷᠢ ᠲᠠᠢ ᠲᠠᠭᠠᠷᠠᠤᠬᠠᠨ ᠠᠮᠢᠳᠤᠷᠠᠯ ᠲᠠᠢ ᠣᠯᠠᠨ ᠬᠡᠦᠬᠡᠳ ᠲᠡᠢ ᠠᠢᠯ ᠰᠠᠭᠤᠳᠠᠭ ᠭᠡᠨᠡ᠃
ᠡᠷᠲᠡ ᠳᠡᠭᠡᠳᠦ ᠡᠴᠡ ᠪᠡᠨ ᠠᠪᠤᠭᠠᠳ ᠤᠷᠠᠳ ᠬᠠᠩᠭᠠᠢ ᠨᠤᠲᠤᠭ ᠲᠠᠭᠠᠨ ᠡᠴᠢᠭᠡ ᠲᠩᠷᠢ᠂ ᠡᠬᠡ ᠳᠡᠯᠡᠬᠡᠢ᠂ ᠬᠠᠨ ᠮᠤᠨᠠ᠂ ᠠᠭᠤᠯᠠ ᠬᠠᠢᠷᠬᠠᠨ ᠤ᠋ ᠰᠠᠬᠢᠭᠤᠰᠤ᠂ ᠣᠪᠣᠭᠠ ᠰᠠᠪᠳᠠᠭ ᠢ᠋ᠶ᠋ᠠᠨ ᠰᠦᠵᠢᠭᠯᠡᠨ ᠳᠠᠬᠢᠵᠤ᠂ ᠰᠦᠮᠡ ᠬᠡᠢᠳ ᠲᠡᠭᠡᠨ ᠰᠢᠳᠦᠨ ᠮᠥᠷᠭᠥᠳᠡᠭ ᠡᠴᠡ ᠬᠡᠳᠦᠨ ᠤᠩᠭᠠᠰᠤ ᠬᠢᠯᠭᠠᠰᠤᠨ ᠤ᠋ ᠪᠠᠨ ᠠᠰᠢᠭ ᠰᠢᠮᠡ ᠶ᠋ᠢ ᠲᠦᠰᠢᠨ ᠢᠳᠡᠬᠦ ᠳ᠋ᠡᠭᠡᠨ ᠵᠥᠪ ᠡᠮᠦᠰᠬᠦ ᠳ᠋ᠡᠭᠡᠨ ᠴᠦ᠍ ᠪᠡᠯᠡᠨ ᠤᠨᠳᠤᠷᠤᠭᠰᠠᠭᠠᠷ ᠢᠷᠡᠵᠡᠢ᠃ ᠡᠭᠦᠨ ᠢ᠋ᠶ᠋ᠡᠨ ᠲᠡᠳᠡ ᠡᠩ ᠦᠭᠡᠢ ᠶᠡᠬᠡ ᠵᠢᠷᠭᠠᠯ ᠭᠡᠵᠦ ᠰᠠᠨᠠᠳᠠᠭ ᠨᠢ ᠳᠡᠭᠡᠷᠡ ᠪᠡᠨ ᠮᠥᠯᠵᠢᠯ ᠦᠭᠡᠢ ᠳᠡᠷᠭᠡᠳᠡ ᠪᠡᠨ ᠳᠠᠢᠰᠤᠨ ᠦᠭᠡᠢ ᠶ᠋ᠢᠨ ᠤᠴᠢᠷ᠃ ᠬᠡᠵᠢᠶᠡ ᠡᠴᠡ ᠴᠦ᠍ ᠶᠦᠮ ᠪᠤᠤ ᠮᠡᠳᠡ᠂ ᠤᠷᠠᠳ ᠨᠤᠲᠤᠭ ᠲᠤ ᠣᠭᠣᠲᠣᠷ ᠬᠤᠪᠴᠠᠰᠤ ᠲᠠᠢ ᠬᠡᠰᠦᠭᠦᠯ ᠬᠥᠮᠦᠨ ᠦ᠌ ᠪᠠᠷᠠ ᠣᠯᠠᠰᠢᠷᠠᠵᠤ᠂ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠰᠠᠪᠠ ᠲᠣᠬᠣᠢ ᠪᠠᠷ ᠰᠢᠪᠡᠷ ᠪᠠᠢᠰᠢᠩ ᠲᠠᠢ ᠣᠲᠣᠭ ᠲᠣᠰᠬᠣᠨ ᠪᠣᠢ ᠪᠣᠯᠪᠠ᠃ ᠢᠩᠭᠢᠵᠦ ᠪᠥᠭᠡᠮᠨᠡᠷᠡᠵᠦ ᠰᠠᠭᠤᠳᠠᠭ ᠬᠥᠮᠦᠰ ᠭᠠᠵᠠᠷ ᠨᠤᠲᠤᠭ ᠬᠠᠭᠠᠯᠵᠤ᠂ ᠪᠡᠯᠴᠢᠭᠡᠷ ᠤᠰᠤ ᠡᠪᠳᠡᠳᠡᠭ ᠡᠯᠳᠡᠪ ᠦ᠋ᠨ ᠵᠠᠩ ᠠᠷᠠᠨᠰᠢᠨ ᠲᠠᠢ ᠨᠢ ᠰᠣᠨᠢᠨ᠃ ᠡᠨᠳᠡᠬᠢ ᠮᠣᠩᠭᠣᠯᠴᠤᠳ ᠡᠢᠮᠦ ᠬᠥᠮᠦᠰ ᠲᠡᠢ ᠪᠠᠢᠨ ᠪᠠᠢᠨ ᠪᠡᠯᠴᠢᠭᠡᠷ ᠤᠰᠤᠨ ᠤ᠋ ᠮᠥᠷᠭᠥᠯᠳᠦᠭᠡᠨ ᠪᠣᠯᠤᠭᠰᠠᠨ ᠠ᠋ᠴᠠ ᠠᠷᠭᠠ ᠪᠤᠰᠤ ᠠᠭᠤᠯᠠ ᠬᠠᠪᠢᠳᠠᠵᠤ ᠰᠠᠭᠤᠬᠤ ᠪᠣᠯᠪᠠ᠃ ᠰᠡᠭᠦᠯ ᠳ᠋ᠦ᠍ᠨᠢ ᠬᠠᠷᠠ ᠴᠡᠷᠢᠭ ᠡᠭᠦᠰᠴᠦ᠂ ᠳᠡᠭᠡᠷᠡᠮ ᠲᠣᠨᠣᠭᠠ ᠪᠣᠰᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠳᠣᠲᠣᠭᠰᠢ ᠪᠠᠨ ᠠᠭᠤᠯᠠᠨ ᠳ᠋ᠤ᠌ ᠰᠠᠭᠤᠷᠢᠰᠢᠭᠰᠠᠨ ᠨᠢ ᠡᠨᠡ ᠠᠵᠤᠭᠤ᠃
ᠢᠩᠭᠢᠭᠡᠳ ᠴᠢᠬᠢᠨ ᠳ᠋ᠦ᠍ ᠴᠡᠭᠡᠷ ᠦᠭᠡᠢ᠂ ᠰᠡᠳᠬᠢᠯ ᠳ᠋ᠦ᠍ ᠭᠬᠢᠷ ᠦᠭᠡᠢ ᠠᠮᠤᠭᠤᠯᠠᠩ ᠬᠡᠳᠦᠨ ᠵᠢᠯ ᠰᠠᠭᠤᠷᠢᠰᠢᠭᠰᠠᠨ ᠢ᠋ ᠬᠡᠯᠡᠬᠦ ᠦᠭᠡᠢ᠃ ᠭᠡᠨᠡᠳᠲᠡ ᠨᠢᠭᠡᠨ ᠡᠳᠦᠷ ᠰᠡᠷᠡᠩᠫᠣᠩᠰᠣᠭ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠲᠠᠬᠠᠷ ᠢᠷᠡᠵᠦ᠄《ᠵᠠ᠂ ᠥᠨᠥᠳᠥᠷ ᠡᠴᠡ ᠲᠠ ᠡᠨᠳᠡ ᠡᠴᠡ ᠱᠠᠯᠠᠪ ᠵᠠᠢᠯᠠᠵᠤ ᠣᠲᠣᠷᠯᠠᠭᠠᠷᠠᠢ! ᠳᠡᠪᠰᠡᠭ ᠦ᠋ᠨ ᠠᠭᠤᠯᠠ ᠶ᠋ᠢ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠸᠠᠩ ᠵᠠᠩᠭᠤᠢᠳᠠ ᠳ᠋ᠤ᠌ ᠳᠡᠭᠡᠰᠦᠯᠡᠵᠦ ᠥᠭᠭᠦᠭᠰᠡᠨ᠁ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠲᠤ ᠨᠡᠭᠦᠬᠦ ᠦᠭᠡᠢ ᠪᠣᠯ ᠸᠠᠩ ᠵᠠᠩᠭᠤᠢᠳᠠ᠂ ᠬᠠᠷᠠ ᠴᠡᠷᠢᠭ ᠦ᠋ᠨ ᠴᠦᠯᠪᠡᠯ ᠳ᠋ᠦ᠍ ᠥᠷᠲᠥᠬᠦ ᠪᠡᠨ ᠥᠪᠡᠰᠦᠪᠡᠨ ᠮᠡᠳᠡᠭᠡᠷᠡᠢ! ᠸᠠᠩ ᠵᠠᠩᠭᠤᠢᠳᠠ ᠶ᠋ᠢᠨ ᠥᠷᠥᠭᠡᠰᠦᠨ ᠨᠢᠳᠦ ᠨᠢ ᠰᠣᠬᠣᠷ ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠨᠢ ᠬᠠᠷᠠᠭᠠ ᠲᠠᠢ ᠪᠣᠯᠪᠠᠴᠤ ᠰᠤᠮᠤ ᠨᠢ ᠨᠢᠳᠦ ᠦᠭᠡᠢ ᠰᠢᠦ ᠳᠡ!》 ᠭᠡᠰᠡᠨ ᠦᠭᠡ ᠬᠡᠯᠡᠴᠢᠬᠡᠭᠡᠳ ᠠᠳᠠᠭ ᠨᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠴᠤ᠌ ᠪᠠᠭᠤᠭᠰᠠᠨ ᠦᠭᠡᠢ ᠱᠣᠩ ᠢ᠋ ᠨᠢ ᠬᠣᠭᠣᠰᠣᠨ ᠡᠷᠭᠢᠵᠦ ᠶᠠᠪᠤᠭᠠᠳ ᠠᠷᠢᠯᠪᠠ᠃
ᠶᠠᠮᠤᠨ ᠤ᠋ ᠲᠠᠬᠠᠷ ᠤ᠋ᠨ《᠁ ᠡᠨᠳᠡ ᠡᠴᠡ ᠱᠠᠯᠠᠪ ᠵᠠᠢᠯᠠᠵᠤ ᠣᠲᠣᠷᠯᠠᠭᠠᠷᠠᠢ᠁》 ᠭᠡᠰᠡᠨ ᠦᠭᠡ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠮᠠᠨᠴᠤᠷᠭᠠᠳᠠᠭᠰᠠᠨ ᠮᠡᠲᠦ ᠪᠣᠯᠵᠤ ᠲᠠᠷᠢᠬᠢ ᠨᠢ ᠳᠦᠩᠭᠢᠨᠡᠨ ᠨᠢᠳᠦ ᠨᠢ ᠬᠠᠷᠠᠯᠠᠵᠤ ᠣᠷᠣᠨ ᠳ᠋ᠠᠭᠠᠨ ᠳᠠᠭᠤ ᠦᠭᠡᠢ ᠬᠡᠰᠡᠭ ᠮᠡᠯᠡᠷᠡᠨ ᠵᠣᠭᠰᠣᠪᠠ᠃ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠠ᠋ᠴᠠ ᠪᠣᠰᠤᠭᠰᠠᠨ ᠲᠣᠭᠣᠰᠣᠨ ᠳᠤᠮᠳᠠ ᠪᠦᠷᠦᠯᠵᠡᠨ ᠬᠠᠷᠠᠭᠳᠠᠬᠤ ᠲᠠᠬᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠰᠡᠷᠡᠩᠫᠣᠩᠰᠣᠭ᠄
— ᠴᠢᠭᠢᠶᠡᠲᠦᠷᠦᠦ! ᠮᠠᠭᠤ ᠴᠢᠮᠡᠭᠡ ᠵᠥᠭᠡᠭᠡᠵᠦ ᠢᠷᠡᠭᠰᠡᠨ ᠮᠣᠳᠣᠨ ᠬᠤᠳᠠᠷᠭᠠᠲᠤ ᠠ᠋! ᠴᠠᠭᠠᠳᠤ ᠮᠠᠨᠠᠭᠤᠯ ᠬᠦᠩ ᠨᠣᠶᠠᠨ ᠳ᠋ᠠᠭᠠᠨ ᠣᠴᠢᠵᠤ ᠬᠡᠯᠡ! ᠪᠢ ᠡᠨᠳᠡ ᠡᠴᠡ ᠨᠡᠭᠦᠬᠦ ᠦᠭᠡᠢ ᠠ᠋! ᠶᠠᠭᠠᠬᠢᠳᠠᠭ ᠶᠤᠮ⁈᠁ ᠭᠡᠵᠦ ᠭᠡᠨᠡᠳᠲᠡ ᠠᠷᠬᠢᠷᠠᠨ ᠬᠠᠰᠬᠢᠷᠤᠭᠰᠠᠨ ᠳ᠋ᠤ᠌ ᠬᠡᠦᠬᠡᠳ ᠨᠢ《ᠠᠪᠤ ᠶᠠᠭᠠᠬᠢᠭᠠ ᠪᠣᠢ?》 ᠭᠡᠵᠦ ᠭᠦᠶᠦᠯᠳᠦᠨ ᠭᠠᠷᠴᠤ ᠢᠷᠡᠭᠡᠳ ᠬᠠᠴᠢᠷᠬᠠᠯᠲᠠᠢ ᠨᠢᠳᠦ ᠪᠡᠷ ᠡᠴᠢᠭᠡ ᠪᠡᠨ ᠪᠦᠯᠲᠡᠩ ᠪᠦᠯᠲᠡᠩ ᠰᠢᠷᠳᠡᠵᠦ ᠵᠣᠭᠰᠣᠵᠠᠭᠠᠨᠠ᠃
— ᠪᠣᠯᠢ! ᠲᠠ ᠮᠢᠨᠢ᠂ ᠶᠠᠭᠤ ᠬᠢᠨᠡ ᠪᠣᠢ? ᠶᠠᠭᠠᠬᠢᠯᠠ ᠭᠡᠵᠦ ᠬᠦᠩ ᠨᠣᠶᠠᠨ ᠢ᠋ᠶ᠋ᠠᠨ ᠬᠠᠷᠢᠶᠠᠪᠠ? ᠨᠢᠭᠦᠯ᠂ ᠨᠢᠭᠦᠯ! ᠭᠡᠵᠦ ᠡᠬᠡᠨᠡᠷ ᠮᠢᠳᠤᠭ ᠨᠢ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠤᠭᠠᠷ ᠴᠢᠷᠠᠢ ᠶ᠋ᠢ ᠴᠢᠷᠠᠢᠳᠠᠵᠤ ᠠᠷᠭᠠᠳᠠᠭᠰᠠᠨ ᠳ᠋ᠤ᠌ ᠰᠡᠷᠡᠩᠫᠣᠩᠰᠣᠭ ᠤᠯᠠᠮ ᠤᠴᠠᠭᠠᠷᠳᠠᠵᠤ᠄
— ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠨᠢᠭᠦᠯ! ᠲᠡᠷᠡ ᠮᠠᠨᠠᠭᠤᠯ ᠵᠠᠰᠠᠭ ᠬᠦᠩ ᠡᠴᠢᠭᠡ ᠴᠢᠨᠢ ᠡᠮᠡ ᠶ᠋ᠢᠨ ᠪᠥᠭᠰᠡᠨ ᠳ᠋ᠦ᠍ ᠲᠣᠯᠣᠭᠠᠢ ᠪᠠᠨ ᠰᠢᠭᠠᠴᠢᠬᠠᠭᠠᠳ ᠡᠷᠭᠢᠭᠦᠳᠡᠵᠦ᠂ ᠭᠠᠵᠠᠷ ᠨᠤᠲᠤᠭ᠂ ᠪᠡᠯᠴᠢᠭᠡᠷ ᠤᠰᠤ ᠪᠠᠨ ᠳᠡᠭᠡᠰᠦᠯᠡᠨ ᠬᠤᠳᠠᠯᠳᠤᠵᠤ᠂ ᠴᠢᠮᠠᠶ᠋ᠢ ᠣᠷᠣᠬᠤ ᠭᠡᠷ ᠣᠭᠣᠴᠢᠬᠤ ᠠᠶᠠᠭᠠ ᠦᠭᠡᠢ ᠪᠣᠯᠭᠠᠴᠢᠬᠠᠭᠰᠠᠨ ᠪᠠᠢᠬᠤ ᠳ᠋ᠤ᠌ ᠴᠢ ᠪᠠᠰᠠ《ᠨᠢᠭᠦᠯ᠂ ᠨᠢᠭᠦᠯ》 ᠭᠡᠨᠡ? ᠮᠠᠨᠠᠭᠤᠯ ᠬᠦᠩ ᠨᠣᠶᠠᠨ ᠢ᠋ ᠥᠮᠥᠭᠡᠷᠡᠳᠡᠭ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠰᠠᠮᠠᠭᠠᠨ ᠳ᠋ᠠᠭᠠᠨ ᠠᠭᠰᠤᠷᠪᠠ᠃
— ᠫᠥᠬᠥ! ᠨᠣᠬᠠᠢ ᠳᠣᠯᠢᠶᠠ! ᠲᠠ ᠨᠠᠳᠠ ᠳ᠋ᠠᠭᠠᠨ ᠡᠴᠢᠭᠡ ᠣᠷᠬᠢᠬᠤ ᠳ᠋ᠠᠭᠠᠨ ᠰᠠᠢᠨ᠃ ᠴᠢᠳᠠᠯ ᠪᠠᠢᠪᠠᠯ ᠴᠠᠭᠠᠳᠤ ᠬᠦᠩ ᠨᠣᠶᠠᠨ ᠳ᠋ᠠᠭᠠᠨ ᠣᠴᠢᠵᠤ ᠣᠮᠣᠭᠳᠠ! ᠠᠳᠠᠭ ᠨᠢ ᠰᠠᠶᠢ ᠶ᠋ᠢᠨ ᠲᠠᠬᠠᠷ ᠤ᠋ᠨ ᠥᠭᠡᠳᠡ ᠡᠴᠡ ᠣᠮᠣᠭᠳᠠᠬᠤ ᠪᠠᠨ ᠶᠠᠭᠠᠬᠢᠯᠠ⁈ ᠬᠡᠵᠢᠶᠡ ᠶᠠᠪᠤᠭᠠᠳ ᠪᠠᠷᠠ ᠲᠠᠰᠤᠷᠠᠭᠰᠠᠨ ᠬᠣᠢᠨᠠ ᠪᠠᠷᠰ ᠤ᠋ᠨ ᠠᠭᠤᠷ ᠭᠠᠷᠭᠠᠭᠠᠳ ᠶᠠᠮᠠᠷ ᠲᠤᠰᠠ ᠲᠠᠢ ᠪᠣᠢ! ᠲᠠᠨ ᠤ᠋ ᠲᠡᠷᠡ ᠣᠭᠵᠣᠮ ᠠᠷᠭᠢᠶᠠ ᠵᠠᠩ ᠢ᠋ ᠪᠢ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ᠃ ᠬᠡᠷᠡᠭ ᠦᠭᠡᠢ ᠭᠠᠵᠠᠷ ᠬᠡᠢ ᠬᠣᠭᠣᠰᠣᠨ ᠳᠠᠩᠭᠢᠨᠠᠭᠠᠳ ᠪᠡᠶᠡ ᠪᠡᠨ ᠵᠣᠪᠠᠭᠠᠬᠤ ᠶ᠋ᠢᠨ ᠨᠡᠮᠡᠷᠢ ᠁
— ᠴᠢ ᠲᠡᠷᠡ ᠬᠥᠨᠳᠡᠯᠡᠨ ᠢ᠋ᠶ᠋ᠡᠨ ᠬᠠᠪᠴᠢ! ᠡᠮᠡ ᠬᠥᠮᠦᠨ ᠪᠠᠢᠵᠤ ᠪᠠᠢᠭᠠᠳ ᠡᠷᠡᠰ ᠦ᠋ᠨ ᠤᠴᠢᠷ ᠲᠤ ᠴᠣᠪ ᠴᠣᠪ ᠭᠡᠵᠦ ᠬᠣᠰᠢᠭᠤ ᠲᠥᠷᠥᠳᠡᠭ ᠲᠡᠭᠡᠨ᠃
— ᠫᠥᠬᠥ! ᠨᠣᠬᠠᠢ ᠳᠣᠯᠢᠶᠠᠵᠤ ᠦᠬᠦ ᠴᠠᠭᠠᠰᠢ ᠪᠠᠨ! ᠲᠠ ᠡᠷᠡ ᠬᠥᠮᠦᠨ ᠭᠡᠵᠦ ᠡᠭᠰᠡᠢᠭᠡᠳ ᠬᠡᠢ ᠬᠣᠭᠣᠰᠣᠨ ᠣᠭᠳᠣᠭᠣᠨᠠᠵᠤ ᠵᠠᠰᠠᠭ ᠶᠠᠮᠤᠨ ᠤ᠋ ᠴᠠᠭᠠᠨᠠ ᠭᠠᠷᠤᠨᠠ ᠤᠤ? ᠴᠠᠭᠠᠳᠤ ᠡᠴᠢᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠦᠵᠡᠭᠰᠡᠭᠡᠷ ᠭᠠᠯ ᠦᠵᠡᠭᠰᠡᠨ ᠬᠥᠲᠥᠰᠦ ᠰᠢᠭ ᠣᠮᠣᠢᠭᠠᠳ ᠠᠲᠤᠷᠢᠯᠳᠤᠳᠠᠭ ᠢ᠋ᠶ᠋ᠠᠨ ᠮᠠᠷᠲᠠᠪᠠ ᠤᠤ? ᠲᠡᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠥᠭᠰᠡ ᠪᠡᠨ ᠬᠠᠪᠴᠢᠭᠠᠳ ᠳᠤᠭᠤᠢ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ᠁
— ᠦᠭᠡᠢ ᠠ᠋᠂ ᠶᠡᠷᠦ ᠨᠢ ᠡᠳᠡᠨᠥᠰ ᠳᠠᠩᠴᠤ ᠬᠥᠮᠦᠨ ᠮᠠᠭᠤᠴᠢᠯᠠᠵᠤ ᠪᠠᠢᠨᠠ ᠭᠡᠵᠦ ᠰᠠᠮᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠭᠳᠡᠵᠦ ᠮᠤᠬᠤᠭᠰᠨ ᠰᠡᠷᠡᠩᠫᠣᠩᠰᠣᠭ ᠥᠭᠡᠳᠡ ᠡᠴᠡ ᠨᠢ ᠥᠭᠡᠷᠡ ᠣᠯᠢᠭᠲᠠᠢ ᠦᠭᠡ ᠣᠯᠵᠤ ᠬᠡᠯᠡᠭᠰᠡᠨ ᠦᠭᠡᠢ ᠭᠡᠷ ᠲᠡᠭᠡᠨ ᠰᠢᠷᠭᠤᠵᠤ ᠤᠳᠠᠲᠠᠯᠠ ᠲᠠᠮᠠᠬᠢᠯᠠᠵᠤ ᠰᠠᠭᠤᠪᠠ᠃
ᠮᠠᠷᠭᠠᠲᠤᠷ ᠨᠢ ᠰᠡᠷᠡᠩᠫᠣᠩᠰᠣᠭ ᠡᠷᠲᠡ ᠪᠣᠰᠴᠤ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠵᠦ ᠤᠨᠤᠭᠠᠳ ᠳᠡᠪᠰᠡᠭ ᠦ᠋ᠨ ᠵᠡᠭᠦᠨ ᠭᠣᠣᠯ ᠤ᠋ᠨ ᠳᠠᠸᠠᠨᠢᠮᠠ ᠭᠤᠸᠠᠢ ᠶ᠋ᠢᠨ ᠬᠢ ᠵᠣᠷᠢᠨ ᠳᠣᠪᠲᠣᠯᠭᠠᠪᠠ᠃ ᠬᠣᠰᠢᠭᠤ ᠶᠠᠮᠤᠨ ᠠ᠋ᠴᠠ ᠳᠠᠸᠠᠨᠢᠮᠠ ᠭᠤᠸᠠᠢ ᠶ᠋ᠢᠨ ᠬᠢ ᠶ᠋ᠢ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦ! ᠭᠡᠰᠡᠨ ᠪᠣᠯ? ᠴᠣᠬᠣᠮ ᠨᠡᠭᠦᠬᠦ ᠨᠢ ᠤᠤ? ᠪᠠᠢᠬᠤ ᠨᠢ ᠤᠤ? ᠲᠡᠳᠡ ᠭᠤᠸᠠᠢ ᠲᠠᠢ ᠵᠥᠪᠳᠡᠵᠦ ᠦᠵᠡᠶᠡ ᠭᠡᠵᠦ ᠪᠣᠳᠣᠵᠤ ᠬᠦᠷᠪᠡ᠃
ᠳᠠᠸᠠᠨᠢᠮᠠ ᠭᠤᠸᠠᠢ ᠶ᠋ᠢᠨ ᠱᠣᠩ ᠳᠡᠭᠡᠷᠡ ᠬᠡᠳᠦ ᠬᠡᠳᠦᠨ ᠡᠮᠡᠭᠡᠯᠲᠡᠢ ᠮᠣᠷᠢ ᠤᠶᠠᠭᠠᠲᠠᠢ ᠬᠠᠷᠠᠭᠳᠠᠵᠤ᠂ ᠭᠡᠷ ᠦ᠋ᠨ ᠬᠢᠨᠢ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠬᠥᠮᠦᠨ ᠬᠠᠷᠠ ᠬᠣᠯᠬᠢᠵᠤ ᠶᠠᠮᠠᠷ ᠨᠢᠭᠡ ᠨᠠᠢᠷ ᠬᠤᠷᠢᠮ ᠪᠣᠯᠵᠤ ᠪᠠᠢᠭᠠ ᠰᠢᠭ᠋ ᠪᠠᠢᠪᠠ᠃
ᠰᠡᠷᠡᠩᠫᠣᠩᠰᠣᠭ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠡᠨᠳᠡ ᠴᠤᠭᠯᠠᠷᠠᠭᠰᠠᠨ ᠲᠠᠨᠢᠬᠤ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠰ ᠲᠡᠢ《ᠰᠠᠢᠨ ᠤᠤ᠂ ᠮᠡᠨᠳᠦ ᠤᠤ?》 ᠪᠠᠨ ᠠᠰᠠᠭᠤᠯᠴᠠᠵᠤ ᠭᠡᠷ ᠲᠦ᠍ ᠣᠷᠣᠨ ᠳᠠᠸᠠᠨᠢᠮᠠ ᠭᠤᠸᠠᠢ ᠲᠠᠢ ᠬᠥᠬᠦᠦᠷ ᠰᠣᠯᠢᠯᠴᠠᠨ ᠮᠡᠨᠳᠦᠯᠡᠭᠡᠳ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠶ᠋ᠢ ᠲᠣᠰᠴᠤ ᠠᠪᠤᠪᠠ᠃
— ᠰᠡᠷᠡᠩᠫᠣᠩᠰᠣᠭ ᠳᠣᠷᠢᠭᠤᠨ ᠰᠠᠨᠠᠭᠠ ᠪᠠᠷ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠰᠠᠢᠨ ᠪᠣᠯᠤᠯᠠ! ᠵᠠᠯᠠᠭᠤ ᠬᠥᠮᠦᠨ ᠢᠷᠡᠪᠡᠯ ᠬᠦᠴᠦ ᠨᠡᠮᠡᠨᠡ ᠭᠡᠳᠡᠭ ᠶᠦᠮ ᠳᠡ! ᠵᠠ᠂ ᠲᠡᠭᠡᠭᠡᠳ ᠮᠠᠯ ᠬᠤᠢ ᠵᠠᠰᠠᠵᠤ᠂ ᠭᠠᠯ ᠲᠣᠭᠣᠭᠠᠨ ᠳᠡᠭᠡᠷᠡ ᠬᠠᠮᠵᠢᠭᠠᠳ ᠠᠯᠢ ᠳᠠ ᠬᠥᠭᠡᠷᠦᠬᠦᠢ! ᠭᠡᠵᠦ ᠳᠠᠸᠠᠨᠢᠮᠠ ᠭᠤᠸᠠᠢ ᠬᠥᠷᠰᠢ ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠡᠨᠡ ᠵᠠᠯᠠᠭᠤ ᠳ᠋ᠤ᠌ ᠳᠣᠲᠣᠨᠣᠰᠢᠨ ᠠᠵᠢ ᠬᠢᠳᠡᠯ ᠲᠣᠬᠢᠷᠠᠭᠤᠯᠪᠠ᠃
— ᠵᠠ᠂ ᠶᠠᠭᠠᠬᠢᠬᠤ ᠪᠣᠢ᠂ ᠪᠣᠯᠤᠯ ᠦᠭᠡᠢ ᠳᠡ! ᠭᠡᠵᠦ ᠰᠡᠷᠡᠩᠫᠣᠩᠰᠣᠭ ᠳᠠᠸᠠᠨᠢᠮᠠ ᠳ᠋ᠤ᠌ ᠲᠠᠯᠠ ᠬᠠᠷᠠᠵᠤ ᠳᠤᠤᠭᠠᠷᠤᠭᠰᠠᠨ ᠴᠤ᠌ ᠲᠡᠭᠦᠨ ᠦ᠌ ᠴᠢᠷᠠᠢ ᠳ᠋ᠤ᠌《ᠬᠠᠮᠢᠭᠠ ᠠ᠋ᠴᠠ? ᠶᠠᠮᠠᠷ ᠬᠦᠨᠳᠦᠲᠦ ᠵᠣᠴᠢᠨ ᠮᠣᠷᠢᠯᠠᠵᠤ ᠪᠠᠭᠤᠬᠤ ᠭᠡᠵᠦ ᠪᠠᠢᠭᠠ ᠪᠣᠢ?》 ᠭᠡᠰᠡᠨ ᠢ᠋ ᠨᠢ ᠳᠠᠸᠠᠨᠢᠮᠠ ᠪᠠᠷᠤᠭᠯᠠᠵᠤ᠄
— ᠬᠠᠩᠬᠠᠳᠠᠢ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠶᠡᠬᠡ ᠨᠣᠶᠠᠨ ᠸᠠᠩ ᠵᠠᠩᠭᠤᠢᠳᠠ᠂ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠷᠠᠰᠢ ᠵᠠᠬᠢᠷᠤᠭᠴᠢ ᠨᠠᠷ ᠮᠠᠨ ᠤ᠋ ᠳ᠋ᠤ᠌ ᠮᠣᠷᠢᠯᠠᠵᠤ ᠰᠠᠭᠠᠲᠠᠬᠤ ᠪᠠᠷ ᠪᠠᠢᠨᠠ᠁ ᠭᠡᠰᠡᠨ ᠳ᠋ᠦ᠍ ᠰᠡᠷᠡᠩᠫᠣᠩᠰᠣᠭ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠲᠠᠰᠤᠯᠵᠤ᠄
— ᠥᠨᠥᠬᠢ ᠨᠡᠷᠡ ᠴᠤᠤ ᠭᠠᠷᠤᠭᠠᠳ ᠪᠠᠢᠳᠠᠭ ᠸᠠᠩ ᠰᠣᠬᠣᠷ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠥᠶᠢ! ᠴᠢ ᠴᠢᠨᠢ ᠶᠠᠮᠠᠷ ᠢᠷᠣᠠ ᠶ᠋ᠢᠨ ᠠᠮᠢᠲᠠᠨ ᠪᠣᠢ? ᠰᠠᠨᠠᠭᠠ ᠠᠮᠠᠷᠠᠴᠢᠬᠠᠭᠰᠠᠨ ᠦᠭᠡ ᠬᠡᠯᠡᠵᠦ ᠪᠠᠢᠳᠠᠭ᠃ ᠲᠡᠭᠡᠵᠦ ᠬᠡᠯᠡᠳᠡᠭ ᠦᠭᠡᠢ ᠶᠦᠮ ᠰᠢᠦ! ᠬᠥᠮᠦᠨ ᠬᠠᠷᠠ ᠰᠣᠨᠣᠰᠴᠢᠬᠠᠪᠠᠯ⁈᠁ ᠭᠡᠳ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢᠨ ᠡᠨᠡ ᠲᠡᠷᠡ ᠬᠥᠮᠦᠨ ᠢ᠋ ᠬᠢᠯᠠᠪᠬᠢᠵᠤ᠂ ᠶᠠᠭᠤᠨ ᠨᠢᠭᠡ ᠡᠴᠡ ᠠᠶᠤᠭᠰᠠᠨ ᠶᠤᠮ ᠰᠢᠭ᠋ ᠴᠢᠷᠠᠢ ᠨᠢ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠬᠤᠵᠢᠢᠵᠤ ᠠᠪᠤᠭᠠᠳ ᠬᠡᠪ ᠲᠡᠭᠡᠨ ᠣᠷᠣᠪᠠ᠃
— ᠰᠣᠬᠣᠷ ᠶᠤᠮ ᠴᠢᠨᠢ᠂ ᠰᠣᠬᠣᠷ ᠭᠡᠬᠦ ᠳ᠋ᠦ᠍ ᠶᠠᠭᠠᠬᠢᠳᠠᠭ ᠶᠤᠮ?
— ᠵᠠ᠂ ᠪᠢᠲᠡᠭᠡᠢ ᠮᠢᠨᠦ ᠡᠨᠳᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠳᠣᠩᠭᠣᠰᠤᠭᠠᠳ ᠪᠠᠢ! ᠴᠠᠭᠠᠳᠤ ᠸᠠᠩ ᠵᠠᠩᠭᠤᠢᠳᠠ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠣᠷᠣᠪᠠᠯ ᠬᠡᠷᠡᠭ ᠪᠢᠰᠢᠳᠡᠨᠡ ᠰᠢᠦ! ᠭᠡᠵᠦ ᠳᠠᠸᠠᠨᠢᠮᠠ ᠴᠢᠷᠠᠢ ᠨᠢ ᠪᠠᠷᠤᠢᠵᠤ ᠠᠭᠤᠷᠯᠠᠬᠤ ᠲᠥᠯᠥᠪᠲᠡᠢ ᠰᠡᠷᠡᠩᠫᠣᠩᠰᠣᠭ ᠢ᠋ ᠵᠢᠮᠡᠯᠡᠵᠦ ᠬᠡᠯᠡᠪᠡᠯ ᠲᠡᠷᠡ ᠪᠡᠷ ᠴᠠᠭᠠᠨᠠ ᠤᠬᠠᠭᠠᠨ ᠢ᠋ ᠣᠢᠯᠠᠭᠠᠵᠤ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠨᠥᠬᠥᠵᠦ ᠬᠡᠯᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠭᠠᠳ᠄
— ᠵᠠᠰᠠᠬᠤ ᠬᠣᠨᠢ ᠴᠢᠨᠢ ᠬᠠᠮᠢᠭᠠ ᠪᠣᠢ? ᠭᠡᠳ ᠭᠠᠷᠴᠤ ᠳᠠᠸᠠᠨᠢᠮᠠ ᠶ᠋ᠢᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠬᠠᠷᠠ ᠲᠣᠯᠣᠭᠠᠢ ᠲᠠᠢ ᠪᠦᠳᠦᠭᠦᠨ ᠢᠷᠭᠡ ᠶ᠋ᠢ ᠰᠢᠭᠢᠷᠡᠳᠡᠵᠦ ᠲᠡᠷᠡ ᠳᠣᠣᠷᠠ ᠨᠢ ᠡᠳ᠋ ᠪᠤᠲᠠ ᠬᠢᠵᠦ ᠤᠭᠤᠴᠠ ᠰᠢᠭᠦᠰᠦ ᠪᠣᠷᠣᠯᠠᠭᠤᠯᠬᠤ ᠶᠣᠰᠣᠭᠠᠷ ᠲᠥᠪᠬᠢᠨᠡᠭᠦᠯᠵᠦ ᠣᠷᠬᠢᠪᠠ᠃ ᠴᠠᠭᠠᠨᠠ ᠨᠢ ᠪᠦᠰᠡᠭᠦᠢᠴᠦᠦᠯ ᠭᠡᠳᠡᠰᠦ ᠳᠣᠲᠣᠷ ᠴᠡᠪᠡᠷᠯᠡᠵᠦ᠂ ᠰᠠᠭᠠᠭ ᠤ᠋ᠨ ᠭᠤᠯᠢᠷ᠂ ᠰᠣᠩᠭᠢᠨᠠ ᠵᠡᠷᠭᠡ ᠪᠡᠷ ᠠᠮᠲᠠᠯᠠᠭᠰᠠᠨ ᠴᠢᠰᠤ ᠴᠢᠳᠬᠤᠵᠤ ᠶᠠᠭᠠᠷᠠᠨᠠ᠁
ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠡᠬᠢ ᠪᠠᠭᠯᠠᠭᠠᠷ ᠪᠦᠳᠦᠭᠦᠨ ᠪᠤᠷᠭᠠᠰᠤᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠤᠶᠠᠭᠠᠲᠠᠢ ᠵᠢᠷᠦᠬᠡ ᠴᠠᠭᠠᠨ ᠨᠣᠬᠠᠢ ᠬᠥᠪ ᠬᠥᠪ ᠬᠣᠷᠭᠣᠭᠣᠬᠤ ᠳᠠᠭᠤᠨ ᠳ᠋ᠤ᠌ ᠮᠣᠷᠢᠲᠠᠢ ᠬᠥᠮᠦᠨ ᠬᠣᠰᠢᠭᠤ ᠳᠤᠭᠤᠢᠯᠠᠵᠤ ᠠᠢᠰᠤᠢ! ᠶᠠᠮᠤᠨ ᠤ᠋ ᠲᠠᠬᠠᠷ ᠱᠣᠩ ᠳᠡᠭᠡᠷᠡ ᠪᠠᠭᠤᠵᠤ᠄
— ᠳᠠᠸᠠᠨᠢᠮᠠ ᠭᠤᠸᠠᠢ ᠠ᠋! ᠵᠣᠴᠢᠨ ᠴᠢᠨᠢ ᠢᠷᠡᠯᠡ ᠰᠢᠦ!《ᠤᠭᠲᠤᠯᠭᠠ ᠶ᠋ᠢᠨ ᠰᠢᠷᠡᠭᠡ᠂ ᠢᠰᠡᠭᠡᠢ ᠰᠢᠷᠢᠳᠡᠭ ᠢᠶᠡᠨ ᠳᠡᠪᠢᠰᠴᠦ ᠪᠠᠵᠠᠭᠠ!》ᠭᠡᠰᠡᠨ ᠷᠠᠰᠢ ᠵᠠᠬᠢᠷᠤᠭᠴᠢ ᠶᠢᠨ ᠵᠠᠬᠢᠶᠠ ᠶᠢ ᠤᠯᠠᠮᠵᠢᠯᠠᠪᠠ᠃
ᠱᠤᠩ ᠠᠴᠠ ᠵᠠᠢᠰᠬᠠᠨ ᠭᠠᠵᠠᠷ ᠲᠤ ᠰᠢᠷᠡᠭᠡ ᠵᠠᠰᠠᠵᠤ ᠳᠡᠭᠡᠷᠡ ᠨᠢ ᠪᠣᠣᠪᠣ ᠪᠣᠭᠣᠷᠰᠣᠭ᠂ ᠴᠢᠪᠠᠭᠠ ᠰᠢᠬᠢᠷ ᠡᠨᠡ ᠲᠡᠷᠡ ᠠᠮᠲᠠᠲᠠᠨ ᠢ᠋ ᠥᠷᠥᠵᠦ᠂ ᠪᠣᠳᠣᠩ ᠲᠠᠢ ᠠᠷᠢᠬᠢᠨ ᠠ᠋ᠴᠠ ᠮᠥᠩᠭᠥᠨ ᠴᠥᠭᠦᠴᠡᠨ ᠳ᠋ᠦ᠍ ᠮᠡᠯᠮᠡᠯᠵᠡᠭᠦᠯᠦᠨ ᠪᠠᠵᠠᠭᠠᠪᠠ᠃ ᠤᠭᠲᠤᠯᠭᠠ ᠶ᠋ᠢᠨ ᠰᠢᠷᠡᠭᠡᠨ ᠡᠴᠡ ᠭᠣᠣᠯ ᠭᠡᠷ ᠦ᠋ᠨ ᠡᠭᠦᠳᠡ ᠬᠦᠷᠲᠡᠯᠡ ᠶᠢᠰᠦᠨ ᠰᠤᠮᠤᠨ ᠰᠢᠷᠢᠳᠡᠭ ᠠᠯᠳᠠᠯᠠᠨ ᠳᠡᠪᠢᠰᠴᠦ᠂ ᠬᠦᠨᠳᠦᠲᠡᠢ ᠵᠣᠴᠢᠨ ᠢ᠋ᠶ᠋ᠠᠨ ᠬᠥᠯ ᠳ᠋ᠦ᠍ᠨᠢ ᠰᠢᠷᠣᠢ ᠬᠦᠷᠭᠡᠯ ᠦᠭᠡᠢ ᠬᠣᠢᠮᠣᠷ ᠲᠠᠭᠠᠨ ᠵᠠᠯᠠᠬᠤ ᠭᠡᠰᠡᠨ ᠳᠠᠸᠠᠨᠢᠮᠠ ᠶ᠋ᠢᠨ ᠨᠠᠷᠢᠨ ᠪᠠᠢᠷᠢᠯᠠᠭᠤᠯᠤᠯ ᠡᠨᠡ ᠪᠤᠶᠤ᠃
ᠳᠠᠸᠠᠨᠢᠮᠠ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠬᠥᠮᠦᠨ ᠬᠠᠷᠠ ᠱᠤᠤᠭᠢᠯᠳᠤᠨ ᠬᠡᠦᠬᠡᠨ ᠮᠣᠷᠳᠠᠭᠤᠯᠵᠤ᠂ ᠪᠡᠷᠢ ᠪᠠᠭᠤᠯᠭᠠᠬᠤ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠳᠡᠪᠵᠢᠶᠡᠷᠡᠨᠡ᠃ ᠤᠭᠲᠤᠯᠭᠠ ᠶ᠋ᠢᠨ ᠰᠢᠷᠡᠭᠡ᠂ ᠤᠷᠲᠤ ᠰᠢᠷᠢᠳᠡᠭ ᠢ᠋ ᠲᠣᠭᠣᠷᠢᠭᠠᠳ ᠬᠡᠦᠬᠡᠳ ᠰᠢᠤᠬᠠᠳ᠂ ᠬᠥᠭᠰᠢᠳ ᠨᠠᠰᠤᠲᠠᠳ ᠬᠦᠷᠲᠡᠯᠡ ᠬᠥᠭᠰᠡᠵᠦ ᠬᠥᠭᠡᠷᠴᠡᠭᠡᠨᠡ᠃
ᠶᠠᠮᠤᠨ ᠤ᠋ ᠷᠠᠰᠢ ᠵᠠᠬᠢᠷᠤᠭᠴᠢ ᠲᠦᠷᠦᠭᠦᠯᠡᠵᠦ ᠬᠡᠳᠦᠨ ᠮᠣᠷᠢᠲᠠᠨ ᠱᠣᠩ ᠳᠡᠭᠡᠷᠡ ᠪᠠᠭᠤᠭᠠᠳ ᠭᠡᠷ ᠦ᠋ᠨ ᠡᠵᠡᠨ ᠲᠡᠢ ᠮᠡᠨᠳᠦ ᠮᠡᠳᠡᠨ᠂ ᠤᠭᠲᠤᠯᠭᠠ ᠳ᠋ᠤ᠌ ᠪᠠᠵᠠᠭᠠᠭᠰᠠᠨ ᠶᠠᠭᠤᠮᠠᠰ ᠢ᠋ ᠨᠢᠳᠦ ᠬᠠᠶᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠᠨ ᠳ᠋ᠤᠨᠢ ᠵᠣᠬᠢᠴᠠᠭᠰᠠᠨ ᠪᠣᠯᠤᠯᠲᠠᠢ ᠳᠠᠸᠠᠨᠢᠮᠠ ᠳ᠋ᠤ᠌ ᠬᠠᠨᠳᠤᠵᠤ᠄
— ᠵᠠ᠂ ᠶᠠᠭᠠᠬᠢᠬᠤ ᠪᠣᠢ! ᠵᠡᠭᠡᠭᠡᠭᠰᠡᠨ ᠪᠡᠯᠡᠳᠬᠡᠭᠰᠡᠨ ᠪᠠᠢᠨᠠ! ᠭᠡᠵᠦ ᠮᠠᠭᠲᠠᠨ ᠡᠷᠡᠬᠡᠢ ᠭᠣᠵᠣᠢᠯᠭᠠᠨᠠ᠃
— ᠵᠠ᠂ ᠭᠢᠯᠠᠢᠯᠠ! ᠭᠡᠵᠦ ᠳᠠᠸᠠᠨᠢᠮᠠ ᠳᠤᠤᠭᠠᠷᠤᠭᠠᠳ ᠳᠣᠲᠣᠷᠠ ᠪᠠᠨ《ᠶᠠᠮᠤᠨ ᠤ᠋ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠲᠠᠭᠠᠯᠠᠭᠳᠠᠭᠰᠠᠨ ᠪᠣᠯ ᠴᠤ᠌ ᠶᠠᠭᠠᠮᠠᠢ! ᠷᠠᠰᠢ ᠵᠠᠬᠢᠷᠤᠭᠴᠢ ᠭᠡᠭᠴᠢ ᠶᠠᠭᠤᠮᠠ ᠦᠵᠡᠵᠦ ᠨᠢᠳᠦ ᠲᠠᠢᠯᠤᠭᠰᠠᠨ ᠳᠣᠬᠢ ᠲᠣᠯᠣᠭᠠᠢ! ᠶᠣᠰᠣᠲᠠᠢ ᠯᠠ ᠥᠨᠳᠡᠭᠡᠨ ᠡᠴᠡ ᠦ ᠡᠷᠢᠵᠦ ᠥᠭᠡᠬᠦᠨ ᠡᠴᠡ ᠰᠢᠷᠪᠥᠰᠥ ᠡᠷᠢᠳᠡᠭ ᠬᠥᠮᠦᠨ ᠦ᠌ ᠨᠢᠭᠡ ᠳᠡ! ᠳᠠᠸᠠᠨᠢᠮᠠ ᠶ᠋ᠢᠨ ᠲᠠᠷ ᠲᠡᠩᠬᠡᠭᠡ ᠮᠥᠨ ᠡᠳᠦᠢᠬᠡᠨ! ᠬᠢᠷᠢ ᠳ᠋ᠡᠭᠡᠨ ᠵᠢᠳᠬᠦᠭᠰᠡᠨ ᠢ᠋ ᠮᠢᠨᠢ ᠣᠢᠯᠠᠭᠠᠭᠰᠠᠨ ᠨᠢ ᠪᠤᠷᠬᠠᠨ ᠲᠩᠷᠢ ᠥᠷᠥᠰᠢᠶᠡᠵᠡᠢ!》 ᠭᠡᠵᠦ ᠪᠣᠳᠣᠭᠰᠠᠨ ᠳᠠᠸᠠᠨᠢᠮᠠ ᠶ᠋ᠢᠨ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠠᠢᠪᠠ᠃
ᠬᠣᠶᠠᠷ ᠭᠠᠩᠰᠠ ᠲᠠᠮᠠᠬᠢᠯᠠᠬᠤ ᠬᠢᠷᠢ ᠪᠣᠯᠬᠤ ᠳ᠋ᠤ᠌ ᠨᠣᠬᠠᠢ ᠬᠣᠷᠭᠣᠭᠣᠯᠠ᠁
— ᠵᠠ᠂ ᠣᠳᠣ ᠢᠷᠡᠯᠡ! ᠭᠡᠵᠦ ᠬᠥᠮᠦᠰ ᠢ᠋ ᠱᠤᠤᠭᠢᠯᠳᠤᠬᠤ ᠳ᠋ᠤ᠌ ᠷᠠᠰᠢ ᠵᠠᠬᠢᠷᠤᠭᠴᠢ᠂ ᠳᠠᠸᠠᠨᠢᠮᠠ ᠲᠦᠷᠦᠭᠦᠳᠡᠨ ᠬᠥᠮᠦᠰ ᠬᠠᠨᠴᠤᠢ ᠪᠠᠨ ᠰᠡᠭᠰᠦᠷᠦᠨ ᠵᠠᠭᠠᠮᠠ ᠵᠠᠬᠠ ᠪᠠᠨ ᠵᠠᠰᠠᠵᠤ ᠵᠣᠴᠢᠨ ᠤᠭᠲᠤᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃
ᠨᠣᠬᠠᠢ ᠰᠦᠷᠡᠬᠡᠢ ᠬᠣᠷᠭᠣᠭᠣᠭᠰᠠᠨ ᠲᠡᠷᠡ ᠵᠦᠭ ᠲᠦ᠍ ᠰᠢᠷᠳᠡᠪᠡᠯ᠂ ᠬᠣᠰᠢᠭᠤ ᠳᠤᠭᠤᠢᠯᠠᠨ ᠭᠡᠰᠡᠷ ᠰᠦᠮᠡ ᠶ᠋ᠢᠨ ᠣᠷᠣᠢ ᠲᠠᠢ᠂ ᠬᠠᠵᠠᠭᠤ ᠲᠠᠯᠠ ᠳ᠋ᠠᠭᠠᠨ ᠵᠢᠵᠢᠭ ᠳᠥᠷᠪᠡᠯᠵᠢᠨ ᠴᠣᠩᠬᠣᠪᠴᠢ ᠲᠠᠢ᠂ ᠥᠨᠴᠥᠭ ᠰᠡᠵᠢᠭᠦᠷ ᠲᠦ᠍ ᠨᠢ ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠲᠣᠷᠭᠠᠨ ᠰᠠᠭᠰᠠᠭ ᠲᠠᠢ ᠰᠡᠦᠬᠡ ᠳᠠᠮᠨᠠᠭᠰᠠᠨ ᠬᠥᠮᠦᠰ ᠪᠥᠭᠡᠮᠨᠡᠷᠡᠵᠦ ᠠᠢᠰᠤᠢ᠃ ᠬᠣᠶᠠᠷ ᠨᠠᠢ᠍ᠮᠠ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠠᠷᠠ ᠴᠡᠷᠢᠭ ᠡᠭᠡᠯᠵᠢ ᠵᠢᠰᠢᠶᠠ ᠪᠠᠷ ᠰᠡᠦᠬᠡ ᠳᠠᠮᠨᠠᠵᠤ ᠱᠣᠭᠰᠢᠨᠠ᠃ ᠬᠠᠯᠪᠠᠭᠠᠨᠠᠭᠰᠠᠨ ᠬᠠᠷᠠ ᠲᠣᠷᠭᠠᠨ ᠥᠮᠦᠳᠦᠨ ᠦ᠌ ᠰᠢᠷᠬᠤᠨᠠᠭ ᠢ᠋ ᠪᠣᠭᠣᠵᠤ ᠰᠡᠦᠬᠡ ᠳᠠᠮᠨᠠᠨ ᠵᠢᠷᠪᠢᠯᠵᠡᠲᠡᠯᠡ ᠵᠢᠷᠣᠭᠠᠯᠠᠬᠤ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠯ ᠦ᠋ᠨ ᠠᠢᠵᠠᠮ ᠵᠢᠷᠤᠮ ᠲᠠᠢ ᠠᠯᠬᠤᠭᠠᠨ ᠳ᠋ᠤ᠌ ᠰᠦᠮᠡ ᠶ᠋ᠢᠨ ᠣᠷᠣᠢ ᠲᠠᠢ ᠰᠡᠦᠬᠡ ᠨᠠᠬᠢᠯᠵᠠᠬᠤ ᠳ᠋ᠤ᠌᠂ ᠳᠡᠭᠡᠷᠡ ᠨᠢ ᠬᠠᠵᠠᠭᠤᠯᠠᠨ ᠬᠡᠪᠲᠡᠭᠰᠡᠨ ᠨᠣᠶᠠᠨᠲᠠᠨ ᠤ᠋ ᠬᠠᠪᠤ ᠵᠢᠷᠭᠠᠯ ᠢ᠋ ᠥᠭᠦᠯᠡᠬᠦ ᠶᠠᠭᠤᠨ⁈
ᠰᠡᠦᠬᠡᠲᠡᠳ ᠤᠭᠲᠤᠯᠭᠠ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ ᠵᠣᠭᠰᠣᠪᠠ᠃ ᠲᠡᠭᠡᠲᠡᠯᠡ ᠰᠡᠦᠬᠡ ᠤᠳᠤᠷᠢᠳᠤᠭᠰᠠᠨ ᠠᠬᠠᠯᠠᠭᠴᠢ ᠬᠥᠮᠦᠨ ᠨᠢ ᠪᠣᠯᠤᠯᠲᠠᠢ ᠤᠷᠲᠤ ᠨᠠᠷᠢᠨ ᠬᠦᠵᠦᠭᠦᠦ ᠲᠡᠢ ᠨᠢᠭᠡ ᠬᠠᠷᠠ ᠴᠡᠷᠢᠭ᠄
— ᠸᠠᠩ ᠵᠠᠩᠭᠤᠢᠳᠠ ᠮᠣᠷᠢᠯᠠᠨ ᠰᠠᠭᠠᠳᠠᠯᠤᠭᠠ! ᠭᠡᠵᠦ ᠤᠶᠠᠩᠭᠠᠯᠠᠭᠤᠯᠤᠨ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠬᠡᠳᠦᠨ ᠬᠠᠷᠠ ᠴᠡᠷᠢᠭ ᠥᠭᠭᠦᠭᠰᠡᠨ ᠳᠣᠬᠢᠶᠠ ᠪᠠᠷ ᠪᠤᠵᠢᠭᠢᠨᠠᠯᠳᠤᠵᠤ ᠬᠣᠶᠠᠷ ᠨᠢ ᠰᠡᠦᠬᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠢᠰᠡᠭᠡᠢ ᠳᠡᠪᠢᠰᠴᠦ ᠨᠥᠭᠦᠭᠡ ᠬᠣᠶᠠᠷ ᠨᠢ ᠰᠡᠦᠬᠡᠨ ᠦ᠌ ᠣᠷᠬᠢᠭᠤᠯ ᠢ᠋ ᠬᠥᠨᠳᠡᠢᠬᠡᠨ ᠢᠷᠡᠵᠦ᠄《 ᠸᠠᠩ ᠯᠣᠣᠶᠧ ᠠ᠋! ᠲᠠ ᠠᠶᠠᠷᠬᠠᠨ ᠮᠣᠷᠢᠯᠠ!》 ᠭᠡᠵᠦ ᠲᠡᠭᠦᠨ ᠢ᠋ ᠬᠣᠶᠠᠷ ᠰᠤᠭᠤᠨ ᠠ᠋ᠴᠠ ᠨᠢ ᠡᠷᠭᠦᠨ ᠳᠣᠯᠳᠣᠭᠣᠨᠠᠨᠠ᠃
ᠰᠡᠦᠬᠡᠨ ᠡᠴᠡ ᠨᠡᠭᠡᠷᠡᠨ ᠰᠣᠷᠲᠣᠭᠣᠲᠠᠢ ᠡᠷᠡ ᠪᠠᠭᠤᠵᠤ ᠢᠷᠡᠯᠡ᠃ ᠲᠡᠷᠡ ᠪᠡᠷ ᠫᠠᠯᠠᠭᠠᠷ ᠥᠷᠭᠡᠨ ᠴᠢᠷᠠᠢ᠂ ᠤᠷᠤᠭᠤᠯ ᠬᠠᠯᠵᠠᠨ ᠪᠥᠭᠡᠳ ᠨᠢᠭᠡ ᠨᠢᠳᠦ ᠨᠢ ᠰᠣᠬᠣᠷ᠂ ᠡᠷᠡᠦ ᠳᠣᠣᠭᠤᠷ ᠢ᠋ᠶ᠋ᠠᠨ ᠰᠢᠩᠭᠡᠪᠲᠦᠷ ᠰᠢᠷᠠ ᠰᠠᠬᠠᠯ ᠲᠠᠢ᠂ ᠬᠠᠯᠵᠠᠷᠠᠭᠰᠠᠨ ᠱᠠᠯᠳᠠᠩ ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠬᠥᠮᠥᠷᠢᠭᠰᠡᠨ ᠬᠠᠷᠠ ᠲᠣᠭᠣᠷᠴᠣᠭ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠭᠠᠬᠠᠢ ᠶ᠋ᠢᠨ ᠰᠡᠭᠦᠯ ᠰᠢᠭ ᠭᠣᠳᠣᠩ ᠭᠡᠵᠢᠭᠡ ᠤᠨᠵᠢᠭᠤᠯᠵᠤ᠂ ᠵᠣᠭᠣᠰᠤᠨ ᠬᠡ ᠲᠡᠢ ᠰᠢᠷᠭᠠᠯ ᠴᠠᠭᠠᠨ ᠬᠠᠨᠲᠠᠭᠠᠰᠤ ᠡᠮᠦᠰᠴᠦ᠂ ᠴᠡᠷᠢᠭ ᠦᠮᠦᠳᠦᠨ ᠦ᠌ ᠪᠡᠨ ᠵᠥᠪ ᠲᠠᠰᠢᠶᠠᠨ ᠳ᠋ᠤ᠌ ᠪᠠᠶᠠᠨᠽᠢ ᠵᠡᠭᠦᠵᠦ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠬᠠᠷᠠ ᠬᠢᠯᠭᠠᠰᠤᠨ ᠶᠢᠩᠱᠤᠸᠠᠰᠠ ᠰᠠᠵᠢᠯᠠᠨ ᠪᠠᠭᠤᠵᠤ ᠷᠠᠰᠢ ᠵᠠᠬᠢᠷᠤᠭᠴᠢ᠂ ᠳᠠᠸᠠᠨᠢᠮᠠ ᠶ᠋ᠢᠨ ᠳᠡᠭᠡᠵᠢᠯᠡᠭᠰᠡᠨ ᠮᠥᠩᠭᠥᠨ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠠᠪᠤᠨ ᠲᠩᠷᠢ ᠥᠭᠡᠳᠡ ᠰᠢᠷᠳᠡᠨ ᠬᠡᠨ ᠳ᠋ᠦ᠍ ᠴᠦ᠍ ᠰᠣᠨᠣᠰᠳᠠᠮᠠ ᠦᠭᠡᠢ ᠠᠮᠠᠨ ᠳ᠋ᠠᠭᠠᠨ ᠨᠢᠭᠡ ᠶᠠᠭᠤᠮᠠ ᠪᠤᠪᠠᠲᠤᠨᠠᠨ ᠳᠦᠳᠦᠨᠡᠵᠦ ᠥᠨᠥᠬᠢ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠬᠡᠢ ᠣᠭᠲᠠᠷᠭᠤᠢ ᠵᠦᠭ ᠰᠠᠴᠤᠪᠠ᠃ ᠳᠠᠷᠠᠭᠠ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠠᠭᠠᠯᠲᠠ ᠳ᠋ᠠᠭᠠᠨ ᠥᠭᠬᠦ ᠳ᠋ᠦ᠍ ᠭᠤᠪᠴᠢᠢᠭᠰᠠᠨ ᠬᠤᠷᠤᠭᠤᠪᠴᠢᠨ ᠴᠢᠷᠠᠢ ᠲᠠᠢ ᠡᠷᠡ ᠴᠥᠭᠥᠴᠡ ᠶ᠋ᠢ ᠲᠣᠰᠴᠤ ᠠᠪᠤᠭᠠᠳ ᠬᠣᠭᠣᠰᠣᠯᠠᠵᠤ ᠣᠷᠬᠢᠪᠠ᠃ ᠭᠤᠷᠪᠠᠳᠠᠬᠢ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠵᠡᠭᠦᠨ ᠭᠠᠷ ᠤ᠋ᠨ ᠳᠠᠭᠠᠯᠲᠠ ᠳ᠋ᠠᠭᠠᠨ ᠳᠠᠮᠵᠢᠭᠤᠯᠤᠭᠰᠠᠨ ᠳ᠋ᠤ᠌ ᠰᠡᠷᠪᠡᠢᠭᠰᠡᠨ ᠰᠠᠬᠠᠯ ᠲᠠᠢ ᠶᠠᠷᠭᠠᠴᠢᠨ ᠰᠢᠭ᠋ ᠲᠣᠭᠰᠢᠨ ᠪᠠᠢᠷᠢ ᠶ᠋ᠢᠨ ᠡᠷᠡ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠠᠷᠠᠢ ᠡᠰᠡ ᠴᠥᠭᠥᠴᠡ ᠲᠡᠢ ᠨᠢ ᠵᠠᠯᠭᠢᠴᠢᠬᠠᠭᠰᠠᠨ ᠦᠭᠡᠢ ᠬᠥᠨᠲᠥᠷᠴᠦ ᠣᠷᠬᠢᠪᠠ᠃
ᠤᠭᠲᠤᠯᠭᠠ ᠶ᠋ᠢᠨ ᠭᠤᠷᠪᠠᠨ ᠭᠡᠮ ᠠᠷᠢᠬᠢ ᠶ᠋ᠢ ᠸᠠᠩ ᠵᠠᠩᠭᠤᠢᠳᠠ ᠡᠢᠨ ᠬᠦ᠌ ᠰᠣᠷᠲᠣᠭᠣᠲᠠᠢ ᠠᠪᠴᠢᠬᠠᠭᠠᠳ ᠰᠤᠪᠤᠭᠤᠯᠤᠨ ᠳᠡᠪᠢᠰᠦᠭᠰᠡᠨ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠭᠦᠷ ᠳᠥᠷᠪᠡᠯᠵᠢᠯᠡᠨ ᠠᠯᠬᠤᠬᠤ ᠳ᠋ᠠᠭᠠᠨ《ᠨᠡᠭᠡᠷᠡᠨ ᠰᠠᠢᠬᠠᠨ ᠨᠤᠲᠤᠭ ᠠ᠋! ᠡᠨᠳᠡ ᠵᠤᠰᠠᠯᠠᠩ ᠪᠠᠢᠭᠤᠯᠵᠤ ᠪᠣᠯᠬᠤ ᠶᠤᠮ ᠪᠠᠢᠨᠠ》 ᠭᠡᠵᠦ ᠷᠠᠰᠢ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠦᠭᠡ ᠰᠣᠨᠣᠰᠬᠠᠭᠰᠠᠨ ᠳ᠋ᠤ᠌《ᠲᠡᠢᠮᠦ ᠠ᠋᠂ ᠲᠡᠢᠮᠦ!》 ᠭᠡᠵᠦ ᠷᠠᠰᠢ ᠵᠠᠬᠢᠷᠤᠭᠴᠢ ᠮᠡᠬᠦᠯᠵᠡᠨᠡ᠃
ᠸᠠᠩ ᠰᠣᠬᠣᠷ ᠤ᠋ᠨ ᠲᠡᠵᠢᠭᠡᠭᠰᠡᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠵᠠᠬᠠ᠂ ᠬᠠᠲᠤᠨ ᠲᠣᠬᠣᠢ᠂ ᠬᠠᠩᠬᠠᠳᠠᠢ ᠶ᠋ᠢᠨ ᠵᠣ ᠶ᠋ᠢ ᠡᠵᠡᠯᠡᠵᠦ ᠥᠮᠴᠢᠷᠬᠡᠭᠰᠡᠨ ᠢ᠋ ᠥᠭᠦᠯᠡᠬᠦ ᠦᠭᠡᠢ᠃ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠰᠤ ᠶ᠋ᠢ ᠡᠢᠰᠢ ᠲᠠᠢᠰᠢ ᠰᠤᠪᠠᠭ ᠮᠠᠯᠲᠠᠵᠤ ᠠᠰᠢᠭᠯᠠᠨ ᠪᠦᠬᠦᠢ ᠪᠣᠷᠣᠲᠣᠬᠣᠢ ᠶ᠋ᠢᠨ ᠣᠷᠣᠨ ᠤ᠋ ᠰᠢᠮᠡᠯᠢᠭ ᠭᠠᠵᠠᠷ ᠤ᠋ᠨ ᠠᠮᠤ ᠲᠣᠰᠣᠨ ᠤ᠋ ᠰᠢᠮᠡ ᠶ᠋ᠢ ᠭᠠᠭᠴᠠᠭᠠᠷ ᠡᠵᠡᠷᠬᠡᠭᠴᠢ ᠪᠣᠯᠵᠤ᠂ ᠬᠠᠶᠠᠭᠠᠨ ᠠ᠋ᠴᠠ ᠨᠢ ᠬᠠᠳᠤᠷᠬᠤ ᠶᠠᠭᠤᠮᠠ ᠦᠭᠡᠢ᠂ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠯᠳᠠᠬᠤ ᠳᠠᠢᠰᠤᠨ ᠦᠭᠡᠢ ᠬᠥᠨᠳᠡᠯᠡᠨ ᠠᠯᠬᠤᠵᠤ᠂ ᠶᠣᠰᠣᠲᠠᠢ ᠥᠭᠡᠬᠦ ᠪᠡᠷ ᠨᠤᠯᠮᠤᠵᠤ ᠦᠮᠡᠬᠡᠢ ᠪᠡᠷ ᠭᠡᠭᠡᠷᠡᠭᠦᠯᠪᠡ ᠭᠡᠭᠴᠢ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠨᠠᠭᠠᠨᠠ ᠴᠠᠭᠠᠨᠠᠬᠢ ᠤᠷᠠᠳ ᠣᠷᠳᠣᠰ ᠭᠡᠰᠡᠨ ᠦᠭᠡᠢ ᠪᠠᠶᠠᠳ ᠨᠣᠶᠠᠳ᠂ ᠬᠦᠩ ᠢᠵᠠᠭᠤᠷᠲᠠᠳ ᠤ᠋ᠨ ᠳᠤᠷᠠᠰᠢᠯ ᠤ᠋ᠨ ᠤᠷᠤᠭᠤᠯ ᠢ᠋ ᠳᠤᠰᠤᠯᠠᠵᠤ ᠤᠰᠤᠨ ᠵᠢᠷᠣᠭᠠ ᠪᠣᠯᠭᠠᠵᠤ ᠴᠢᠳᠠᠳᠠᠭ ᠨᠢ ᠰᠢᠯᠢ ᠶ᠋ᠢ ᠨᠢ ᠮᠠᠭᠠᠵᠢᠵᠤ ᠪᠠᠢᠭᠠᠳ ᠰᠢᠮᠡ ᠶ᠋ᠢ ᠨᠢ ᠰᠣᠷᠣᠬᠤ ᠭᠡᠳᠡᠭ ᠪᠣᠯ᠂ ᠬᠠᠷᠢᠨ ᠬᠠᠷᠠᠴᠤ ᠴᠠᠭᠠᠴᠢ ᠨᠤᠭᠤᠳ ᠤ᠋ᠨ ᠬᠢᠨᠢ ᠴᠢᠮᠥᠭᠡ ᠶ᠋ᠢ ᠨᠢ ᠲᠡᠰᠢᠮᠡᠷ ᠬᠢᠬᠠᠨ ᠮᠥᠯᠵᠢᠵᠦ᠂ ᠭᠠᠢᠯᠢ ᠭᠤᠪᠴᠢᠭᠤᠷ ᠢ᠋ᠶ᠋ᠠᠷ ᠭᠠᠴᠢᠳᠠᠭ ᠨᠢ ᠲᠡᠭᠦᠨ ᠦ᠌ ᠴᠣᠷ ᠤ᠋ᠨ ᠭᠠᠭᠴᠠ ᠬᠠᠬᠢᠷ ᠵᠣᠷ ᠮᠥᠨ᠃
ᠮᠤᠨᠠ ᠠᠭᠤᠯᠠᠨ ᠳ᠋ᠤ᠌ ᠠᠭᠤᠳᠠᠯᠤᠭᠠᠳ ᠪᠠᠷᠠᠰᠢ ᠦᠭᠡᠢ ᠮᠣᠯᠣᠷ ᠡᠷᠳᠡᠨᠢ ᠪᠠᠢᠨᠠ ᠭᠡᠳᠡᠭ ᠢ᠋ ᠠᠯᠢ ᠤᠵᠠᠭᠤᠷ ᠠ᠋ᠴᠠ ᠪᠣᠳᠣᠯ ᠳ᠋ᠠᠭᠠᠨ ᠮᠠᠨᠠᠵᠤ ᠪᠠᠢᠭᠰᠠᠨ ᠸᠠᠩ ᠰᠣᠬᠣᠷ ᠳᠣᠲᠣᠷᠠ ᠪᠠᠨ《ᠳᠡᠪᠰᠡᠭ ᠦ᠋ᠨ ᠠᠭᠤᠯᠠᠨ ᠤ᠋ ᠬᠣᠩᠬᠣᠷ ᠢ᠋ ᠡᠵᠡᠯᠡᠵᠦ ᠵᠤᠰᠠᠯᠠᠩ ᠤ᠋ᠨ ᠨᠡᠷᠡ ᠵᠢᠭᠠᠵᠤ ᠬᠠᠷᠠ ᠲᠠᠮᠠᠬᠢ ᠲᠠᠷᠢᠵᠤ᠂ ᠬᠠᠳᠠ ᠴᠢᠯᠠᠭᠤ ᠠ᠋ᠴᠠ ᠨᠢ ᠠᠯᠲᠠ ᠲᠤᠩᠭᠠᠵᠤ ᠴᠦᠩᠬᠦ ᠪᠡᠨ ᠮᠥᠩᠭᠥ ᠪᠡᠷ ᠳᠦᠭᠦᠷᠭᠡᠬᠦ ᠶ᠋ᠢ ᠬᠡᠨ ᠪᠠᠢᠭ ᠭᠡᠬᠦ ᠪᠣᠢ⁈》 ᠭᠡᠵᠦ ᠪᠣᠳᠣᠭᠰᠠᠨ ᠳ᠋ᠠᠭᠠᠨ ᠤᠷᠮᠠᠰᠢᠵᠤ ᠬᠠᠷᠠ ᠴᠡᠷᠢᠭ ᠢ᠋ᠶ᠋ᠡᠨ ᠲᠣᠮᠢᠯᠠᠵᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠠᠯᠠᠨ᠂ ᠡᠯᠳᠡᠩᠭᠡ ᠶ᠋ᠢᠨ ᠣᠮᠣᠭ ᠰᠦᠷ ᠢ᠋ ᠳᠠᠷᠤᠭᠰᠠᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠨᠠᠳᠠ ᠬᠠᠢᠷᠠᠯᠠᠭᠰᠠᠨ ᠬᠡᠰᠢᠭ ᠪᠤᠶᠤ᠃ ᠠ᠂ ᠰᠠᠢᠬᠠᠨ ᠨᠤᠲᠤᠭ ᠶᠤᠮ ᠠ᠋! ᠭᠡᠵᠦ ᠡᠷᠬᠡ ᠦᠭᠡᠢ ᠲᠠᠩᠨᠠᠢ ᠪᠠᠨ ᠲᠠᠭᠰᠢᠨᠠ᠃
ᠸᠠᠩ ᠵᠠᠩᠭᠤᠢᠳᠠ ᠭᠡᠷ ᠲᠦ᠍ ᠰᠠᠭᠠᠲᠠᠨ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠠ᠋ᠴᠠ ᠣᠭᠣᠴᠢᠪᠠ ᠤᠤ᠂ ᠦᠭᠡᠢ ᠤᠤ᠂ ᠬᠣᠢᠮᠣᠷ ᠬᠠᠵᠠᠭᠤᠯᠠᠨ ᠬᠠᠷᠠ ᠲᠠᠮᠠᠬᠢ ᠱᠠᠵᠢᠭᠢᠨᠠᠭᠤᠯᠵᠤ ᠡᠬᠢᠯᠡᠪᠡ᠃ ᠨᠥᠭᠦᠭᠡ ᠲᠠᠯᠠ ᠳ᠋ᠤᠨᠢ ᠷᠠᠰᠢ ᠵᠠᠬᠢᠷᠤᠭᠴᠢ ᠬᠡᠩᠰᠢᠭᠦᠦ ᠣᠷᠭᠢᠭᠤᠯᠵᠤ ᠲᠠᠮᠠᠬᠢᠯᠠᠨᠠ᠃ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠳᠠᠸᠠᠨᠢᠮᠠ ᠬᠣᠷᠣᠬᠠᠢ ᠨᠢ ᠬᠥᠳᠡᠯᠵᠦ ᠰᠢᠯᠦᠰᠦ ᠪᠡᠨ ᠭᠦᠳ ᠭᠦᠳ ᠵᠠᠯᠭᠢᠨ《ᠦᠨᠡᠬᠡᠷ ᠲᠣᠰᠣᠯᠢᠭ ᠬᠡᠩᠰᠢᠭᠦᠦ ᠲᠡᠢ ᠣᠬᠢ ᠲᠠᠮᠠᠬᠢ ᠪᠠᠢᠨᠠ ᠳᠠ! ᠮᠠᠨᠤᠰ ᠰᠢᠭ᠋ ᠲᠣᠭᠣᠭᠠ ᠬᠤᠰᠤᠮᠳᠠᠭᠰᠠᠨ ᠰᠢᠭᠠᠷᠤ ᠲᠠᠮᠠᠬᠢ ᠤᠭᠤᠭᠢᠭᠤᠯᠳᠠᠭ ᠢ᠋ ᠪᠣᠳᠣᠪᠠᠯ ᠵᠢᠩᠬᠢᠨᠢ ᠬᠠᠷᠠ ᠲᠠᠮᠠᠬᠢ ᠭᠡᠵᠦ ᠡᠨᠡ ᠳᠡ!》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠨ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠬᠠᠷᠠ ᠲᠠᠮᠠᠬᠢᠨ ᠳ᠋ᠤ᠌ ᠬᠣᠪᠳᠣᠭ ᠨᠢ ᠬᠥᠳᠡᠯᠵᠦ《ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠲᠡᠷᠡ ᠶᠠᠭᠤᠮᠠᠨ ᠳ᠋ᠤ᠌ ᠨᠢᠭᠡ ᠮᠠᠩᠰᠢᠭᠤᠷᠠᠲᠠᠯᠠ ᠰᠣᠭᠲᠣᠪᠠᠯ ᠠ᠋᠁》 ᠭᠡᠵᠦ ᠪᠣᠳᠣᠪᠠ᠃
ᠳᠠᠸᠠᠨᠢᠮᠠ ᠶ᠋ᠢᠨ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠭᠠᠳ ᠰᠢᠨᠤᠭ ᠬᠠᠷᠠᠭᠰᠠᠨ ᠬᠠᠷᠠᠴᠠ ᠶ᠋ᠢ ᠠᠵᠢᠭᠯᠠᠭᠰᠠᠨ ᠸᠠᠩ ᠵᠠᠩᠭᠤᠢᠳᠠ ᠨᠢᠭᠡ ᠵᠢᠵᠢᠭ ᠪᠣᠭᠣᠳᠠᠯ ᠲᠠᠢ ᠬᠠᠷᠠ ᠲᠠᠮᠠᠬᠢ ᠰᠢᠳᠡᠵᠦ ᠥᠭᠭᠦᠭᠰᠡᠨ ᠢ᠋ ᠳᠠᠸᠠᠨᠢᠮᠠ ᠭᠠᠵᠠᠷ ᠤᠨᠠᠭᠠᠯ ᠦᠭᠡᠢ ᠲᠣᠰᠴᠤ ᠠᠪᠤᠭᠠᠳ ᠬᠠᠮᠠᠷ ᠲᠠᠭᠠᠨ ᠣᠢᠷᠠᠲᠤᠭᠤᠯᠤᠨ ᠦᠨᠦᠷᠲᠦᠭᠰᠡᠨ ᠢ᠋ᠶ᠋ᠡᠨ《ᠠᠶᠠ᠂ ᠶᠠᠮᠠᠷ ᠰᠠᠢᠬᠠᠨ ᠡᠳ᠋ ᠪᠣᠢ!》 ᠭᠡᠵᠦ ᠡᠷᠬᠡ ᠦᠭᠡᠢ ᠥᠭᠦᠯᠡᠨ ᠡᠪᠦᠷᠲᠦᠯᠡᠬᠦ ᠳ᠋ᠡᠭᠡᠨ ᠡᠪᠦᠳᠦᠭ ᠨᠢ ᠨᠤᠭᠤᠷᠠᠭᠠᠳ ᠤᠨᠠᠴᠢᠬᠠᠮᠠᠷ ᠰᠠᠨᠠᠭᠳᠠᠭᠰᠠᠨ ᠢ᠋ ᠶᠠᠭᠠᠬᠢᠨᠠ᠃
ᠤᠷᠢᠳ ᠢ᠋ᠶ᠋ᠠᠷ ᠴᠢᠳᠬᠤᠭᠰᠠᠨ ᠭᠡᠳᠡᠰᠦ ᠳᠣᠲᠣᠷ ᠭᠠᠷᠭᠠᠵᠤ᠂ ᠳᠠᠷᠠᠭᠠ ᠪᠠᠷ ᠨᠢ ᠤᠭᠤᠴᠠ ᠰᠢᠭᠦᠰᠦ ᠲᠠᠪᠠᠭᠯᠠᠵᠤ ᠲᠠᠯᠪᠢᠨ ᠶᠣᠰᠣᠲᠠᠢ ᠯᠠ ᠬᠤᠨᠳᠠᠭᠠ ᠰᠡᠯᠭᠦᠯ ᠦᠭᠡᠢ ᠠᠷᠢᠬᠢ ᠤᠤᠭᠤᠵᠤ᠂ ᠬᠢᠲᠤᠭᠠ ᠲᠠᠯᠪᠢᠯ ᠦᠭᠡᠢ ᠮᠢᠬᠠ ᠢᠳᠡᠨᠡ ᠭᠡᠭᠴᠢ ᠪᠣᠯᠵᠤ ᠨᠠᠷᠭᠢᠵᠠᠭᠠᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠲᠠᠷᠭᠤᠨ ᠬᠣᠨᠢᠨ ᠤ᠋ ᠰᠡᠭᠦᠯ ᠵᠦᠰᠦᠵᠦ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠳᠡᠯᠭᠡᠵᠦ ᠸᠠᠩ ᠵᠠᠩᠭᠤᠢᠳᠠ ᠳ᠋ᠤ᠌ ᠥᠭᠭᠦᠭᠡᠳ᠄
— ᠸᠠᠩ ᠵᠠᠩᠭᠤᠢᠳᠠ ᠰᠡᠭᠦᠯ ᠨᠢᠭᠡ ᠰᠣᠷᠣᠴᠢᠬᠠ! ᠭᠡᠪᠡ᠃
— ᠠᠶᠠ᠂ ᠲᠠᠷᠭᠤᠨ ᠪᠠᠢᠨᠠ᠂ ᠪᠠᠢᠶᠠ ᠪᠠᠢᠶᠠ! ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠡᠵᠢᠨᠡ᠃
— ᠬᠠᠮᠢᠶᠠ ᠦᠭᠡᠢ ᠠ᠋! ᠨᠢᠳᠦ ᠪᠡᠨ ᠠᠨᠢᠵᠤ ᠪᠠᠢᠭᠠᠳ ᠨᠢᠭᠡ ᠯᠡ ᠰᠣᠷᠣᠴᠢᠬᠠ! ᠬᠣᠨᠢᠨ ᠤ᠋ ᠲᠠᠷᠭᠤᠨ ᠤᠭᠤᠴᠠᠨ ᠳ᠋ᠤ᠌ ᠰᠠᠭᠤᠵᠤ ᠬᠣᠶᠠᠷ ᠵᠦᠰᠦᠮ ᠰᠡᠭᠦᠯ ᠰᠣᠷᠣᠬᠤ ᠦᠭᠡᠢ ᠪᠣᠯ ᠬᠣᠪᠳᠣᠭ ᠲᠠᠢᠯᠬᠤ ᠦᠭᠡᠢ! ᠭᠡᠳ ᠷᠠᠰᠢ ᠵᠠᠬᠢᠷᠤᠭᠴᠢ ᠸᠠᠩ ᠵᠠᠩᠭᠤᠢᠳᠠ ᠶ᠋ᠢ ᠱᠠᠯᠠᠪᠠᠯ ᠲᠡᠷᠡ ᠬᠢᠲᠠᠳ ᠠᠷᠭᠠ ᠦᠭᠡᠢ ᠲᠣᠰᠴᠤ ᠠᠪᠤᠭᠠᠳ ᠰᠣᠷᠣᠬᠤ ᠭᠡᠳ ᠰᠣᠷᠣᠵᠤ ᠴᠢᠳᠠᠳᠠᠭ ᠦᠭᠡᠢ ᠬᠣᠶᠠᠷ ᠵᠠᠪᠠᠵᠢ ᠪᠠᠷ ᠢ᠋ᠶ᠋ᠠᠨ ᠲᠣᠰᠣ ᠭᠣᠭᠣᠵᠢᠲᠠᠯᠠ ᠱᠠᠯᠴᠢᠭᠢᠨᠠᠭᠤᠯᠤᠨ ᠵᠠᠵᠢᠯᠵᠤ ᠢᠳᠡᠪᠡ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠪᠠᠰᠠ ᠨᠢᠭᠡ ᠵᠦᠰᠦᠮ ᠰᠡᠭᠦᠯ ᠵᠦᠰᠦᠵᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠵᠢᠵᠢᠭ ᠫᠢᠯᠠ ᠲᠠᠢ ᠰᠢᠷᠠ ᠲᠣᠰᠣᠨ ᠳ᠋ᠤ᠌ ᠪᠥᠮᠪᠥᠷᠢᠭᠦᠯᠵᠦ ᠠᠪᠤᠭᠠᠳ ᠥᠪᠡᠰᠦᠪᠡᠨ ᠱᠣᠷᠳ᠋ ᠬᠢᠲᠡᠯᠡ ᠰᠢᠯᠤᠭᠤᠬᠠᠨ ᠰᠣᠷᠣᠵᠤ ᠣᠷᠬᠢᠪᠠ᠃
ᠲᠠᠷᠭᠤᠨ ᠬᠣᠨᠢᠨ ᠤ᠋ ᠰᠡᠭᠦᠯ ᠵᠠᠵᠢᠯᠵᠤ ᠢᠳᠡᠭᠡᠳ ᠠᠮᠲᠠ ᠶ᠋ᠢ ᠨᠢ ᠣᠯᠤᠭᠰᠠᠨ ᠸᠠᠩ ᠵᠠᠩᠭᠤᠢᠳᠠ《ᠨᠠᠭᠠᠰᠢ ᠪᠠᠨ ᠣᠳᠣ ᠨᠢᠭᠡ ᠵᠦᠰᠦᠮ ᠰᠡᠭᠦᠯ ᠥᠭᠭᠦᠭᠡᠴᠢ》 ᠭᠡᠬᠦ ᠳ᠋ᠦ᠍ ᠷᠠᠰᠢ ᠵᠠᠬᠢᠷᠤᠭᠴᠢ ᠵᠦᠰᠦᠵᠦ ᠥᠭᠪᠡᠯ ᠸᠠᠩ ᠵᠠᠩᠭᠤᠢᠳᠠ ᠵᠠᠵᠢᠯᠬᠤ ᠲᠠᠢ ᠰᠣᠷᠣᠬᠤ ᠲᠠᠢ ᠵᠠᠯᠭᠢᠵᠤ ᠣᠷᠣᠭᠤᠯᠤᠭᠠᠳ᠄
— ᠡᠨᠡ ᠬᠣᠨᠢᠨ ᠤ᠋ ᠮᠢᠬᠠ ᠨᠡᠭᠡᠷᠡᠨ ᠠᠮᠲᠠᠲᠠᠢ ᠶᠤᠮ ᠠ᠋! ᠭᠡᠵᠦ ᠲᠠᠮᠰᠢᠶᠠᠯᠠᠭᠰᠠᠨ ᠳ᠋ᠤ᠌ ᠷᠠᠰᠢ ᠵᠠᠬᠢᠷᠤᠭᠴᠢ᠄
— ᠲᠡᠢᠮᠦ ᠰᠢᠦ! ᠡᠨᠡ ᠠᠭᠤᠯᠠ ᠶ᠋ᠢᠨ ᠪᠡᠯᠴᠢᠭᠡᠷ ᠳᠠᠭᠠᠭᠰᠠᠨ ᠮᠠᠯ ᠤ᠋ᠨ ᠮᠢᠬᠠ ᠠᠮᠲᠠᠲᠠᠢ ᠮᠥᠷᠲᠡᠭᠡᠨ ᠰᠢᠮᠡᠲᠡᠢ᠃ ᠭᠣᠣᠯ ᠤ᠋ᠨ ᠴᠠᠭᠠᠨᠠᠬᠢ ᠢᠷᠭᠡᠴᠤᠳ ᠮᠠᠨ ᠤ᠋ ᠠᠭᠤᠯᠠᠨ ᠤ᠋ ᠮᠠᠯ ᠤ᠋ᠨ ᠮᠢᠬᠠ ᠶ᠋ᠢ ᠢᠳᠡᠮᠡᠭᠴᠡ ᠪᠡᠨ ᠭᠣᠳᠣᠭᠣᠨᠠᠳᠠᠭ ᠶᠠᠭᠤᠮᠠ ᠨᠢ ᠭᠣᠳᠣᠭᠣᠨᠠᠵᠤ᠂ ᠨᠣᠢᠲᠠᠩᠨᠠᠳᠠᠭ ᠭᠠᠵᠠᠷ ᠨᠢ ᠨᠣᠢᠲᠠᠩᠨᠠᠳᠠᠭ ᠰᠢᠦ! ᠭᠡᠰᠡᠨ ᠳ᠋ᠦ᠍ ᠰᠢᠷᠡᠭᠡ ᠰᠢᠪᠠᠯᠴᠠᠵᠤ ᠰᠠᠭᠤᠭᠰᠠᠨ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠬᠠ ᠬᠠ ᠬᠠ᠁ ᠭᠡᠵᠦ ᠢᠨᠢᠶᠡᠯᠴᠡᠨᠡ᠃
— ᠵᠠᠬᠢᠷᠤᠭᠴᠢ ᠭᠤᠸᠠᠢ ᠠ᠋᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠪᠣᠯᠤᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠬᠡᠯᠡᠯᠴᠡᠵᠦ ᠲᠣᠭᠲᠠᠭᠰᠠᠨ ᠭᠡᠷᠡ ᠶᠣᠰᠣᠭᠠᠷ ᠡᠨᠡ ᠳᠡᠪᠰᠡᠭ ᠦ᠋ᠨ ᠠᠭᠤᠯᠠᠨ ᠤ᠋ ᠳᠡᠨᠵᠢᠷᠬᠡᠭ ᠭᠠᠵᠠᠷ ᠢ᠋ᠶ᠋ᠠᠷ ᠬᠠᠷᠠ ᠲᠠᠮᠠᠬᠢ ᠲᠠᠷᠢᠨᠠ᠂ ᠰᠦᠮᠡ ᠶ᠋ᠢᠨ ᠠᠷᠤᠬᠠᠨ ᠳᠡᠨᠵᠢ ᠳᠡᠭᠡᠷᠡ ᠵᠤᠰᠠᠯᠠᠩ ᠪᠠᠢᠭᠤᠯᠤᠨᠠ ᠳᠠ!
— ᠲᠡᠭᠡ᠂ ᠲᠡᠭᠡ! ᠴᠠᠭᠠᠨ ᠴᠠᠭᠠᠰᠤ᠂ ᠬᠠᠷᠠ ᠪᠡᠬᠡ᠂ ᠤᠯᠠᠭᠠᠨ ᠲᠠᠮᠠᠭᠠ ᠭᠤᠷᠪᠠ ᠶ᠋ᠢᠨ ᠨᠤᠬᠤᠴᠠᠲᠠᠢ ᠬᠠᠲᠠᠭᠤ ᠭᠡᠷᠡ ᠶ᠋ᠢ ᠬᠡᠨ ᠲᠡᠷᠰᠯᠡᠵᠦ ᠴᠢᠳᠠᠬᠤ ᠪᠣᠢ? ᠭᠡᠵᠦ ᠷᠠᠰᠢ ᠵᠠᠬᠢᠷᠤᠭᠴᠢ ᠵᠥᠪᠰᠢᠶᠡᠷᠡᠭᠰᠡᠨ ᠳ᠋ᠦ᠍ ᠸᠠᠩ ᠵᠠᠩᠭᠤᠢᠳᠠ᠄
— ᠶᠠᠭ ᠳᠠ! ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠲᠣᠬᠢᠨᠠ᠃
— ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠲᠠᠢ᠂ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠲᠠᠮᠠᠭᠠ ᠲᠠᠢ ᠪᠢᠴᠢᠭ ᠬᠣᠶᠠᠷ ᠠ᠋ᠴᠠ ᠴᠠᠭᠠᠰᠢ ᠬᠠᠲᠠᠭᠤ ᠶᠠᠭᠤᠮᠠ ᠶᠠᠭᠤ ᠪᠠᠢᠳᠠᠭ ᠢ᠋ ᠪᠢ ᠯᠡ ᠯᠠᠪ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠸᠠᠩ ᠵᠠᠩᠭᠤᠢᠳᠠ᠄
— ᠡᠨᠡ ᠠᠢᠯ ᠤ᠋ᠨ ᠬᠢᠨ ᠦ᠌ ᠭᠤᠶᠤᠴᠢᠯᠠᠭᠰᠠᠨ ᠶᠣᠰᠣᠭᠠᠷ ᠴᠠᠭᠠᠰᠢ ᠪᠠᠨ ᠨᠡᠭᠦᠬᠦ ᠬᠡᠷᠡᠭ ᠦᠭᠡᠢ᠂ ᠡᠨᠳᠡ ᠪᠡᠨ ᠰᠠᠭᠤᠵᠤ ᠪᠠᠢᠭ ᠯᠠ ᠳᠠ! ᠪᠢ ᠳᠠᠸᠠᠨᠢᠮᠠ ᠶ᠋ᠢ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠠ᠋! ᠬᠠᠷᠠ ᠲᠠᠮᠠᠬᠢ ᠪᠠᠷ ᠪᠦᠷᠢᠨ ᠬᠠᠩᠭᠠᠵᠤ ᠴᠢᠳᠠᠨᠠ ᠭᠡᠰᠡᠨ ᠳ᠋ᠦ᠍ ᠳᠠᠸᠠᠨᠢᠮᠠ ᠪᠠᠶᠠᠷᠯᠠᠵᠤ᠄
— ᠸᠠᠩ ᠵᠠᠩᠭᠤᠢᠳᠠ ᠳ᠋ᠤ᠌ ᠪᠢ ᠨᠢᠭᠡ ᠮᠣᠩᠭᠣᠯ ᠶᠣᠰᠣ ᠪᠠᠷ ᠢ᠋ᠶ᠋ᠠᠨ ᠠᠷᠢᠬᠢ ᠬᠡᠮᠨᠡᠶᠡ! ᠭᠡᠳ《ᠪᠠᠩᠵᠢᠨ ᠳ᠋ᠠᠭᠠᠨ ᠬᠢᠭᠡᠳ ᠥᠭᠭᠦᠭᠰᠡᠨ ᠪᠠᠷᠵᠠ ᠯᠠ ᠶᠤᠮ ᠠ᠋! ᠳᠠᠩᠵᠢᠶᠠᠳ ᠠ᠋ ᠬᠦ᠂ ᠪᠠᠶᠠᠷ ᠢ᠋ᠶ᠋ᠠᠷ ᠢᠷᠡᠭᠰᠡᠨ ᠸᠠᠩ ᠵᠠᠩᠭᠤᠢᠳᠠ ᠲᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠪᠠᠢᠨᠠ ᠬᠦ! ᠵᠦᠩᠰᠨᠨ ᠳ᠋ᠡᠭᠡᠨ ᠬᠢᠭᠡᠳ ᠥᠭᠭᠦᠭᠰᠡᠨ ᠵᠦᠷᠵᠢ ᠯᠡ ᠶᠦᠮ ᠳᠡ ᠠ᠋ ᠬᠦ ᠳᠠᠩᠵᠢᠶᠠᠳ ᠠ᠋᠁!》 ᠭᠡᠵᠦ ᠪᠤᠷᠤᠭᠤ ᠰᠣᠯᠣᠭᠠᠢ ᠬᠣᠭᠣᠯᠠᠢ ᠪᠠᠷ ᠳᠠᠭᠤᠯᠠᠵᠤ ᠪᠠᠶᠠᠷᠯᠠᠭᠰᠠᠨ ᠬᠡᠷᠢᠶᠡ ᠪᠠᠷᠬᠢᠷᠠᠭᠠ ᠭᠡᠭᠴᠢ ᠪᠣᠯᠵᠤ ᠬᠣᠶᠠᠷ ᠠᠯᠠᠭᠠ ᠪᠠᠨ ᠳᠡᠯᠭᠡᠨ ᠨᠠᠬᠢᠯᠵᠠᠭᠤᠯᠤᠨᠠ᠃
ᠸᠠᠩ ᠵᠠᠩᠭᠤᠢᠳᠠ ᠳᠠᠸᠠᠨᠢᠮᠠ ᠶ᠋ᠢᠨ ᠱᠠᠯᠠᠯᠭᠠ ᠪᠠᠷ ᠭᠤᠷᠪᠠᠨ ᠭᠡᠮ ᠠᠷᠢᠬᠢ ᠤᠤᠭᠤᠵᠤ᠄
— ᠡᠳᠡᠨ ᠦ᠌ ᠬᠢ ᠡᠴᠡ ᠪᠤᠰᠤᠳ ᠠᠢᠯ ᠡᠷᠦᠬᠡ᠂ ᠣᠲᠣᠷ ᠤ᠋ᠨ ᠠᠢᠯ ᠤ᠋ᠳ ᠢ᠋ ᠮᠢᠨᠦ ᠳᠡᠭᠡᠰᠦᠯᠡᠵᠦ ᠠᠪᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠬᠣᠯᠠᠬᠠᠨ ᠨᠡᠭᠦᠯᠭᠡᠬᠦ ᠬᠡᠷᠡᠭᠲᠡᠢ᠃ ᠮᠡᠳᠡᠪᠡ ᠤᠤ? ᠷᠠ᠊ ᠵᠠᠬᠢᠷᠤᠭᠴᠢ ᠭᠤᠸᠠᠢ ᠠ᠋! ᠭᠡᠵᠦ ᠪᠦᠭᠦᠳᠡ ᠳ᠋ᠦ᠍ ᠵᠠᠷᠯᠠᠵᠤ ᠪᠠᠢᠭᠠ ᠰᠢᠭ᠋ ᠳᠡᠭᠡᠷᠡ ᠳᠡᠭᠡᠷᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠭᠰᠡᠨ ᠢ᠋ ᠰᠡᠷᠡᠩᠫᠣᠩᠰᠣᠭ ᠭᠠᠳᠠᠨᠠ ᠠ᠋ᠴᠠ ᠣᠯᠵᠤ ᠰᠣᠨᠣᠰᠤᠭᠠᠳ ᠪᠥᠭᠰᠡᠨ ᠡᠴᠡ ᠨᠢ ᠥᠷᠭᠡᠰᠦ ᠬᠠᠳᠬᠤᠭᠰᠠᠨ ᠰᠢᠭ᠋ ᠰᠠᠭᠤᠵᠤ ᠲᠣᠭᠲᠠᠬᠤ ᠦᠭᠡᠢ ᠪᠣᠰᠴᠤ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ ᠴᠠᠭᠠᠰᠢ ᠬᠡᠯᠲᠦᠷᠢᠪᠡ᠁
《ᠶᠠᠮᠤᠨ ᠤ᠋ ᠵᠠᠷᠯᠢᠭ ᠭᠡᠳᠡᠭ ᠴᠢᠨᠢ ᠶᠠᠳᠠᠭᠤ ᠬᠥᠮᠦᠨ ᠳ᠋ᠡᠭᠡᠨ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠠᠲᠠᠭᠤ ᠵᠠᠷᠯᠢᠭ ᠪᠠᠢᠨᠠ᠃ ᠪᠠᠶᠠᠨ ᠬᠥᠮᠦᠨ ᠦ᠌ ᠡᠳ᠋ ᠠᠭᠤᠷᠠᠰᠤᠨ ᠳ᠋ᠤ᠌ ᠰᠢᠪᠠᠷᠳᠠᠭᠠᠳ ᠪᠠᠢᠳᠠᠭ ᠶᠠᠪᠤᠭᠤᠷᠢ ᠦᠭᠡᠢ ᠢᠷᠣᠠ ᠶ᠋ᠢᠨ ᠵᠠᠷᠯᠢᠭ ᠪᠠᠢᠨᠠ!》 ᠭᠡᠵᠦ ᠰᠡᠷᠡᠩᠫᠣᠩᠰᠣᠭ ᠳᠣᠲᠣᠷᠠ ᠪᠠᠨ ᠨᠢᠭᠡ ᠶᠠᠭᠤᠮᠠ ᠪᠢᠰᠢᠯᠭᠠᠵᠤ ᠲᠡᠨᠳᠡ ᠡᠴᠡ ᠪᠡᠨ ᠴᠠᠭᠠᠰᠢ ᠨᠡᠭᠦᠵᠦ ᠶᠠᠪᠤᠯᠠ᠃
ᠡᠢᠨ ᠬᠦ᠌ ᠳᠡᠪᠰᠡᠭ ᠦ᠋ᠨ ᠠᠭᠤᠯᠠᠨ ᠤ᠋《ᠥᠯᠵᠡᠢ ᠪᠠᠶᠠᠰᠬᠤᠯᠠᠩᠲᠤ ᠰᠦᠮᠡ》 ᠶ᠋ᠢᠨ ᠠᠷᠤ ᠳ᠋ᠠᠬᠢ ᠵᠡᠭᠦᠨ ᠪᠠᠷᠠᠭᠤᠨ ᠭᠣᠣᠯ ᠤ᠋ᠨ ᠬᠣᠶᠠᠷ ᠠᠢᠯ ᠨᠢᠭᠡ ᠨᠢ ᠥᠪ ᠬᠣᠭᠰᠢᠯ ᠳ᠋ᠠᠭᠠᠨ ᠪᠠᠷᠳᠠᠵᠤ᠂ ᠥᠭᠳᠡᠭ ᠡᠷᠭᠦᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠢᠯᠢᠶᠠᠵᠤ ᠴᠢᠳᠠᠭᠠᠳ ᠥᠭᠡᠬᠦ ᠨᠤᠯᠮᠤᠨ ᠦᠮᠡᠬᠡᠢ ᠪᠡᠷ ᠭᠡᠭᠡᠷᠡᠭᠦᠯᠦᠭᠰᠡᠭᠡᠷ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠵᠦ ᠰᠠᠭᠤᠪᠠ᠃ ᠨᠥᠭᠦᠭᠡ ᠨᠢ ᠦᠭᠡᠢ ᠬᠣᠭᠣᠰᠣᠨ ᠳ᠋ᠠᠭᠠᠨ ᠭᠣᠮᠣᠳᠠᠵᠤ᠂ ᠲᠣᠭᠠ ᠲᠠᠢ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠨ ᠭᠡᠯᠢᠭᠡᠳ ᠥᠯᠮᠡᠢ ᠪᠡᠨ ᠱᠠᠭᠠᠢᠵᠤ ᠦᠭᠡ ᠳᠠᠭᠤᠨ ᠦᠭᠡᠢ ᠨᠤᠲᠤᠭ ᠪᠡᠯᠴᠢᠭᠡᠷ ᠰᠢᠯᠵᠢᠬᠦ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠤ᠌ ᠠᠷᠭᠠᠴᠠᠭᠠᠯ ᠪᠠᠢᠭᠰᠠᠨ ᠦᠭᠡᠢ᠃
ᠰᠡᠷᠡᠩᠫᠣᠩᠰᠣᠭ ᠵᠡᠷᠭᠡ ᠶ᠋ᠢᠨ ᠬᠡᠳᠦᠨ ᠠᠢᠯ ᠸᠠᠩ ᠰᠣᠬᠣᠷ᠂ ᠶᠠᠮᠤᠨ ᠤ᠋ ᠬᠠᠲᠠᠭᠤ ᠰᠢᠬᠠᠮᠳᠠᠯᠭᠠ ᠪᠠᠷ ᠳᠡᠪᠰᠡᠭ ᠦ᠋ᠨ ᠠᠭᠤᠯᠠᠨ ᠠ᠋ᠴᠠ ᠴᠠᠭᠠᠰᠢ ᠨᠡᠭᠦᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳᠠᠪᠰᠢᠯᠲᠦ