ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠠᠷᠪᠠᠨ ᠨᠢᠭᠡ> Хан мунын сүүрс < дээд > – Мөнх зохиоов ᠂ Дэд бодь – Хоёрдугаар бүлэг <11>
266 ᠠᠷᠪᠠᠨ ᠨᠢᠭᠡ
ᠤᠯᠠᠭᠴᠢᠨ ᠦᠬᠡᠷ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠰᠡᠭᠦᠯᠴᠢ ᠰᠠᠷᠠ ᠶ᠋ᠢᠨ ᠡᠭᠡᠯᠢᠲᠡᠢ ᠨᠢᠭᠡ ᠡᠳᠦᠷ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ ᠪᠤᠷᠬᠠᠨ ᠳ᠋ᠤ᠌ ᠵᠤᠯᠠ ᠪᠠᠷᠢᠵᠤ ᠶᠡᠬᠡᠳᠡ ᠰᠦᠵᠢᠭᠯᠡᠨ ᠮᠥᠷᠭᠥᠴᠢᠬᠡᠭᠡᠳ ᠪᠠᠭᠠ ᠬᠠᠲᠤᠨ ᠤ᠋ ᠡᠷᠭᠦᠮᠡᠯ ᠡᠬᠡ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍《 ᠥᠨᠥᠳᠥᠷ ᠬᠥᠬᠡ ᠮᠣᠷᠢᠨ ᠡᠳᠦᠷ᠃ ᠥᠯᠵᠡᠢ ᠪᠡᠯᠭᠡ ᠲᠡᠢ ᠢᠪᠡᠭᠡᠯ ᠰᠠᠢᠨ ᠡᠳᠦᠷ ᠪᠣᠯᠬᠣᠷ ᠥᠨᠥ ᠰᠥᠨᠢ ᠶ᠋ᠢᠨ ᠬᠤᠯᠤᠭᠠᠨᠠ ᠴᠠᠭ ᠲᠤ ᠪᠠᠭᠠ ᠬᠠᠲᠤᠨ ᠢ᠋ ᠰᠠᠭᠤᠯᠭᠠᠬᠤ ᠠᠵᠢᠯ ᠢ᠋ ᠪᠦᠲᠦᠭᠡᠶᠡ᠃＜ᠠᠯᠲᠠᠨ ᠣᠷᠳᠣᠨ＞① ᠤ᠋ ᠢᠪᠡᠭᠡᠯ ᠲᠡᠢ ᠴᠠᠭ ᠲᠤ ᠯᠠ ᠠᠮᠵᠢᠭᠤᠯᠤᠶᠠ! ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠪᠦᠬᠦ ᠶᠠᠭᠤᠮᠠ ᠪᠡᠯᠡᠨ ᠪᠣᠯᠪᠠ᠁》 ᠭᠡᠵᠦ ᠰᠢᠪᠡᠨᠡᠪᠡ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠪᠣᠳᠣᠯ ᠰᠠᠨᠠᠭᠠ ᠪᠠᠨ ᠲᠡᠭᠦᠨ ᠳ᠋ᠦ᠍ ᠪᠢᠲᠡᠭᠦᠬᠡᠨ ᠵᠠᠬᠢᠮᠵᠢᠯᠠᠴᠢᠬᠠᠭᠠᠳ ᠱᠠᠯᠠᠪᠬᠠᠨ ᠭᠠᠷᠴᠤ ᠶᠠᠪᠤᠪᠠ᠃
ᠪᠠᠭᠠ ᠬᠠᠲᠤᠨ ᠤ᠋ ᠬᠡᠪᠡᠯᠢ ᠨᠢ ᠭᠡᠨᠡᠳᠲᠡ ᠡᠪᠡᠳᠴᠦ ᠳᠤᠷᠠᠳᠴᠤ ᠡᠬᠢᠯᠡᠪᠡ᠃ ᠨᠢᠭᠡ ᠬᠡᠰᠡᠭ ᠡᠪᠡᠳᠬᠦ ᠰᠢᠭ ᠪᠣᠯᠤᠭᠠᠳ ᠭᠠᠢᠭᠤᠢ ᠪᠣᠯᠵᠤ ᠳᠠᠬᠢᠭᠠᠳ ᠡᠪᠡᠳᠦᠨᠡ᠂ ᠲᠠᠢᠪᠤᠰᠢᠷᠠᠨᠠ᠁ ᠢᠩᠭᠢᠵᠦ ᠣᠷᠣᠨ ᠭᠠᠷᠤᠨ᠂ ᠪᠣᠰᠤᠨ ᠰᠠᠭᠤᠨ ᠰᠢᠨᠠᠯᠤᠭᠠᠳ ᠨᠢᠭᠡ ᠡᠳᠦᠷ ᠢ᠋ ᠡᠯᠡᠭᠡᠯᠡ᠃ ᠬᠣᠶᠠᠷ ᠢᠨᠵᠢ ᠥᠬᠢᠨ ᠴᠦ᠍ ᠪᠠᠭᠠ ᠬᠠᠲᠤᠨ ᠤ᠋ ᠬᠦᠦ ᠲᠥᠷᠥᠬᠦ ᠶ᠋ᠢ ᠬᠦᠰᠡᠨ ᠪᠡᠯᠭᠡᠳᠡᠵᠦ᠂ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠦ᠌ ᠳᠣᠳᠣᠮᠳᠠᠯᠭᠠ ᠪᠠᠷ ᠬᠤᠴᠢᠯᠭᠠ ᠳᠡᠪᠢᠰᠬᠡᠷ ᠣᠶᠣᠵᠤ᠂ ᠬᠤᠪᠴᠠᠰᠤ ᠬᠤᠨᠠᠷ ᠪᠡᠯᠡᠳᠬᠡᠨ ᠭᠡᠷ ᠲᠡᠷᠭᠡ ᠴᠡᠪᠡᠷᠯᠡᠵᠦ ᠪᠣᠷᠪᠢ ᠪᠣᠬᠢᠰᠬᠢᠬᠦ ᠵᠠᠪ ᠦᠭᠡᠢ ᠶᠠᠭᠠᠷᠠᠨᠠ᠃
ᠪᠠᠭᠠ ᠬᠠᠲᠤᠨ ᠡᠷᠭᠦᠮᠡᠯ ᠡᠬᠡ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠴᠦ ᠮᠥᠷᠭᠥᠨ《 ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠬᠦ ᠪᠣᠯᠲᠤᠭᠠᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠬᠦᠰᠡᠨ ᠵᠠᠯᠪᠠᠷᠢᠨᠠ᠃
ᠪᠠᠭᠠ ᠬᠠᠲᠤᠨ ᠢ᠋ ᠪᠡᠶᠡ ᠪᠡᠨ ᠳᠤᠷᠠᠳᠴᠤ ᠡᠬᠢᠯᠡᠯᠡ ᠭᠡᠰᠡᠨ ᠴᠢᠮᠡᠭᠡ ᠪᠡᠷ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠱᠠᠭᠳᠠᠷᠰᠦ᠋ᠷᠦᠩ᠂ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ᠂ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠷᠠᠰᠢ᠂ ᠵᠣᠳᠪᠠ ᠮᠡᠢᠷᠡᠨ ᠨᠠᠷ ᠴᠤ᠌ ᠴᠤᠭᠯᠠᠷᠠᠵᠤ ᠢᠷᠡᠭᠰᠡᠨ ᠪᠠᠢᠯᠠ᠃ ᠬᠦᠩ ᠨᠣᠶᠠᠨ ᠤ᠋ ᠪᠤᠭᠤᠲᠤ ᠳ᠋ᠠᠬᠢ ᠬᠥᠬᠡ ᠲᠣᠭᠣᠰᠬᠠᠨ ᠬᠦᠷᠢᠶᠡ ᠲᠡᠢ ᠭᠦᠨ ᠣᠷᠳᠣᠨ ᠳ᠋ᠤ᠌ ᠬᠥᠯ ᠬᠥᠭᠡᠷᠴᠦᠭ ᠪᠣᠯᠤᠯᠠ᠃ ᠴᠡᠷᠢᠭ ᠬᠠᠷᠠᠭᠤᠯ ᠴᠢᠩᠭᠠᠷᠠᠵᠤ᠂ ᠴᠠᠭᠠᠰᠢ ᠨᠠᠭᠠᠰᠢ ᠰᠦᠯᠵᠢᠬᠦ ᠬᠥᠮᠦᠰ ᠦ᠋ᠨ ᠬᠥᠯ ᠢ᠋ ᠴᠡᠭᠡᠷᠯᠡᠨᠡ᠃
《ᠪᠠᠭᠠ ᠬᠠᠲᠤᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠬᠦ ᠨᠢ ᠠ᠋!》 ᠭᠡᠵᠦ ᠰᠢᠳᠤᠷᠭᠤ ᠨᠢᠭᠡ ᠨᠢ ᠰᠢᠯᠤᠭᠤᠬᠠᠨ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠬᠤ ᠳ᠋ᠤ᠌《 ᠪᠠᠭᠠ ᠬᠠᠲᠤᠨ ᠴᠣᠬᠣᠮ ᠶᠠᠭᠠᠬᠢᠵᠤ ᠬᠦᠦ ᠲᠥᠷᠥᠳᠡᠭ ᠦ᠋ᠨ ᠪᠠᠰᠢᠷ ᠢ᠋ ᠨᠢ ᠨᠢᠭᠡ ᠦᠵᠡᠨᠡ ᠳᠡ!》 ᠭᠡᠵᠦ ᠰᠡᠵᠢᠭ ᠲᠡᠢ ᠨᠢᠭᠡ ᠨᠢ ᠰᠡᠮᠬᠡᠨ ᠠᠵᠢᠭᠯᠠᠨᠠ᠃《 ᠵᠠ᠂ ᠲᠡᠭᠡᠭᠡᠳ ᠵᠠᠶᠠᠭᠠ ᠨᠢ ᠬᠠᠵᠠᠢᠵᠤ ᠬᠦᠦ ᠪᠢᠰᠢ᠂ ᠬᠡᠦᠬᠡᠨ ᠲᠥᠷᠥᠪᠡᠯ ᠴᠦ᠍ ᠫᠠᠯᠠᠭ ᠢ᠋ᠶ᠋ᠠᠨ ᠬᠠᠶᠠᠨᠠ ᠳᠠ!》 ᠭᠡᠰᠡᠨ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠪᠣᠳᠣᠯ ᠲᠠᠢ ᠬᠥᠮᠦᠰ ᠪᠠᠭᠠ ᠬᠠᠲᠤᠨ ᠤ᠋《 ᠬᠦᠦ ᠲᠥᠷᠥᠬᠦ》 ᠵᠠᠩᠭᠢᠯᠠᠭᠠ ᠶ᠋ᠢᠨ ᠮᠥᠴᠡ ᠳ᠋ᠦ᠍ ᠵᠢᠷᠦᠬᠡ ᠪᠡᠨ ᠳᠠᠷᠤᠨ ᠠᠩᠬᠠᠷᠴᠤ ᠪᠠᠢᠯᠠ᠃
ᠬᠦᠷᠢᠶᠡᠨ ᠦ᠌ ᠠᠮᠠ᠂ ᠬᠦᠷᠢᠶᠡᠨ ᠦ᠌ ᠳᠥᠷᠪᠡᠨ ᠥᠨᠴᠥᠭ᠂ ᠳᠤᠮᠳᠠ ᠡᠭᠦᠳᠡ᠂ ᠴᠢᠬᠢᠨ ᠭᠡᠷ ᠦ᠋ᠨ ᠡᠭᠦᠳᠡ᠂ ᠭᠣᠣᠯ ᠭᠡᠷ ᠦ᠋ᠨ ᠳᠣᠲᠣᠷᠠ ᠭᠠᠳᠠᠨᠠ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠪᠦᠷ ᠬᠠᠷᠠᠭᠤᠯ ᠮᠠᠨᠠᠭᠠ ᠲᠠᠯᠪᠢᠵᠤ᠂ ᠪᠠᠭᠠ ᠬᠠᠲᠤᠨ ᠤ᠋ ᠬᠥᠩᠭᠡᠵᠢᠬᠦ ᠭᠡᠷ( ᠳᠣᠲᠣᠷᠠ ᠥᠷᠥᠭᠡ) ᠶ᠋ᠢᠨ ᠬᠢᠨᠢ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠬᠠᠷᠠᠭᠤᠯ ᠲᠠᠯᠪᠢᠬᠤ ᠯᠠ ᠳᠤᠲᠠᠵᠤ ᠪᠠᠢᠪᠠ᠃
ᠪᠠᠭᠠ ᠬᠠᠲᠤᠨ ᠤ᠋ ᠬᠥᠩᠭᠡᠵᠢᠬᠦ ᠶᠠᠪᠤᠳᠠᠯ ᠳ᠋ᠤ᠌ ᠬᠥᠮᠦᠨ ᠪᠦᠭᠦᠳᠡ ᠵᠦᠭ ᠵᠦᠭ ᠲᠡᠭᠡᠨ ᠶᠠᠭᠠᠷᠠᠯᠳᠤᠵᠤ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠬᠠᠮᠤᠭ ᠠ᠋ᠴᠠ ᠢᠯᠡᠭᠦᠦ ᠶᠠᠭᠠᠷᠠᠵᠤ ᠪᠠᠢᠯᠠ᠃
ᠳᠣᠲᠣᠷᠠ ᠥᠷᠥᠭᠡᠨ ᠡᠴᠡ ᠪᠠᠭᠠ ᠬᠠᠲᠤᠨ ᠤ᠋ ᠡᠨᠡᠯᠦᠨ ᠰᠢᠨᠠᠯᠬᠤ ᠭᠠᠰᠠᠯᠠᠩᠲᠠᠢ ᠳᠠᠭᠤ ᠪᠠᠢᠨ ᠪᠠᠢᠨ ᠭᠠᠳᠠᠭᠰᠢ ᠳᠠᠭᠤᠷᠢᠰᠴᠤ ᠬᠦᠦ ᠲᠥᠷᠥᠬᠦ ᠳ᠋ᠦ᠍ ᠬᠦᠴᠢᠷᠳᠡᠵᠦ ᠪᠠᠢᠭᠠ ᠨᠢ ᠢᠯᠡᠬᠡᠨ᠁
ᠦᠷᠦ ᠵᠥᠭᠡᠯᠡᠨ ᠨᠢᠭᠡ ᠨᠢ ᠡᠢᠨ ᠬᠦ᠌ ᠵᠣᠪᠠᠭᠤᠷᠢᠯᠠᠨ ᠰᠢᠨᠠᠯᠬᠤ ᠳᠠᠭᠤᠨ ᠳ᠋ᠤ᠌ ᠰᠡᠳᠬᠢᠯ ᠵᠣᠪᠠᠵᠤ ᠪᠣᠯᠳᠠᠭ ᠰᠠᠨ ᠪᠣᠯ ᠡᠪᠡᠳᠬᠦ ᠡᠪᠡᠷᠰᠢᠯ ᠢ᠋ ᠨᠢ ᠬᠤᠪᠢᠶᠠᠯᠴᠠᠮᠠᠷ ᠴᠦ᠍ ᠰᠠᠨᠠᠭᠳᠠᠨᠠ᠃ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠣᠷᠢᠭᠤᠳᠠ᠄
— ᠪᠠᠭᠠ ᠬᠠᠲᠤᠨ ᠰᠦᠷᠡᠬᠡᠢ ᠵᠣᠪᠠᠵᠤ ᠪᠠᠢᠨᠠ᠁ ᠭᠣᠷᠢ ᠦᠭᠡᠢ ᠪᠣᠯ ᠪᠢ ᠶᠠᠪᠤᠵᠤ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠶ᠋ᠢ ᠵᠠᠯᠠᠶᠠ! ᠭᠡᠳ ᠭᠠᠷᠪᠠ᠃ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠡᠭᠦᠳᠡᠨ ᠦ᠌ ᠬᠠᠷᠠᠭᠤᠯ ᠤ᠋ᠳ ᠲᠤ᠌《ᠲᠠ ᠨᠠᠷ ᠰᠠᠢᠨ ᠰᠡᠷᠡᠮᠵᠢᠯᠡᠵᠦ ᠪᠠᠢᠭᠠᠷᠠᠢ! ᠬᠡᠨ ᠬᠥᠮᠦᠨ ᠢ᠋ ᠴᠦ᠍ ᠳᠣᠲᠣᠷᠠ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠪᠣᠯᠬᠤ ᠦᠭᠡᠢ! ᠪᠠᠭᠠ ᠬᠠᠲᠤᠨ ᠤ᠋ ᠬᠦᠦ ᠲᠥᠷᠥᠬᠦ ᠳ᠋ᠦ᠍ ᠡᠢᠮᠦ ᠲᠡᠢᠮᠦ ᠶᠠᠷᠰᠢᠭ ᠲᠦᠪᠡᠭ ᠭᠠᠷᠪᠠᠯ ᠥᠪᠡᠷ ᠦ᠋ᠨ ᠬᠠᠷᠢᠭᠤᠴᠠᠯᠭᠠ ᠶᠠᠭᠤ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠰᠠᠨᠠᠵᠤ ᠪᠠᠢᠭᠠᠷᠠᠢ!》 ᠭᠡᠵᠦ ᠬᠠᠲᠠᠭᠤᠬᠠᠨ ᠵᠠᠬᠢᠭᠠᠳ ᠡᠬᠡ ᠪᠠᠷᠢᠶᠠᠴᠢ ᠳ᠋ᠤ᠌ ᠭᠦᠶᠦᠪᠡ᠃
ᠥᠯᠵᠡᠢ ᠬᠤᠲᠤᠭᠲᠤ ᠭᠤᠳᠤᠮᠵᠢᠨ ᠤ᠋ ᠠᠢᠯ ᠤ᠋ᠳ ᠤ᠋ᠨ ᠴᠠᠭᠠᠰᠤᠨ ᠳ᠋ᠧᠩᠯᠦ ᠡᠯᠭᠦᠭᠰᠡᠨ ᠪᠦᠳᠡᠭᠢ ᠭᠡᠷᠡᠯ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠬᠡᠷᠡᠮ ᠮᠤᠰᠬᠢᠨ ᠮᠤᠷᠤᠢᠵᠤ ᠪᠠᠷᠤᠭ ᠲᠦᠷᠦᠭᠦᠯᠡᠭᠡ ᠪᠡᠨ ᠦᠢᠴᠢᠮᠡ ᠭᠦᠶᠦᠨ ᠭᠦᠶᠦᠭᠰᠡᠭᠡᠷ ᠳ᠋ᠧᠦᠹᠦ᠋ ᠬᠤᠳᠠᠯᠳᠤᠳᠠᠭ ᠲᠢᠶᠠᠨ ᠣᠪᠣᠭᠲᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠣᠴᠢᠪᠠ᠃
ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠬᠥᠭᠰᠢᠨ ᠨᠢᠯᠬᠠ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠦᠢᠰᠦ ᠶ᠋ᠢ ᠨᠢ ᠢᠯᠢᠵᠦ ᠲᠠᠢᠪᠤᠰᠢᠷᠠᠭᠤᠯᠤᠨ ᠰᠡᠷᠢᠰᠦ ᠪᠣᠯᠤᠭᠰᠠᠨ ᠬᠠᠲᠠᠩᠬᠠᠢ ᠬᠥᠬᠥ ᠪᠡᠨ ᠠᠮᠠᠨ ᠳ᠋ᠤᠨᠢ ᠡᠮᠬᠦᠭᠦᠯᠵᠦ ᠰᠠᠭᠠᠳᠠᠭᠤᠯᠤᠨ ᠪᠠᠢᠯᠠ᠃
— ᠪᠡᠯᠡᠨ ᠪᠣᠯᠴᠢᠬᠠᠪᠠ ᠤᠤ?
— ᠪᠡᠯᠡᠨ ᠠ᠋! ᠪᠡᠯᠡᠨ!
— ᠨᠢᠯᠬᠠ ᠬᠦᠦ ᠤᠨᠲᠠᠴᠢᠬᠠᠪᠠ ᠤᠤ?
— ᠤᠨᠲᠠᠴᠢᠬᠠᠯᠠ ᠪᠣᠢ! ᠬᠥᠬᠥᠨ ᠡᠴᠡ ᠰᠠᠯᠭᠠᠭᠰᠠᠭᠠᠷ ᠪᠠᠰᠠ ᠰᠡᠷᠡᠵᠦ ᠮᠡᠳᠡᠨᠡ᠃
— ᠣᠳᠣ ᠶᠠᠭᠠᠬᠢᠳᠠᠭ ᠪᠢᠯᠡ?
— ᠵᠠ᠂ ᠪᠠᠢᠵᠠ! ᠮᠥᠨ ᠢᠩᠭᠢᠭᠡᠳ ᠨᠢᠯᠬᠠ ᠬᠦᠦ ᠶ᠋ᠢᠨ ᠬᠣᠰᠢᠭᠤ ᠶ᠋ᠢ ᠬᠥᠬᠥᠨ ᠡᠴᠡ ᠰᠠᠯᠭᠠᠬᠤ ᠦᠭᠡᠢ ᠯᠡ ᠡᠪᠦᠷᠲᠦᠯᠡᠶᠡ!
— ᠪᠣᠯᠤᠨᠠ ᠪᠣᠯᠤᠨᠠ! ᠶᠠᠭ ᠪᠣᠯᠤᠨᠠ!
— ᠦᠭᠡᠢ᠂ ᠪᠢ ᠨᠢᠭᠡ ᠳᠠᠪᠬᠤᠷ ᠪᠦᠰᠡᠭᠦᠢ ᠰᠢᠭ ᠴᠡᠭᠡᠵᠢ ᠬᠡᠪᠡᠯᠢ ᠲᠦᠩᠬᠦᠢᠭᠡᠳ᠁
— ᠪᠠᠢᠵᠠ᠂ ᠪᠠᠢᠵᠠ! ᠲᠠ ᠲᠡᠷᠡ ᠱᠤᠤᠮᠠᠰᠠ ᠳ᠋ᠠᠭᠠᠨ ᠡᠨᠡ ᠲᠡᠷᠡ ᠡᠳ᠋ᠯᠡᠬᠦᠨ ᠬᠡᠷᠡᠭᠰᠡᠯ ᠢ᠋ᠶ᠋ᠡᠨ ᠬᠢᠴᠢᠬᠡᠭᠡᠳ ᠮᠥᠷᠥᠪᠴᠢᠯᠡᠭᠡᠳ ᠡᠭᠦᠷᠴᠢᠬᠡ!
— ᠵᠠᠮ ᠳ᠋ᠤ᠌ ᠬᠥᠯ ᠦ᠋ᠨ ᠲᠣᠩᠰᠢᠭᠠ ᠪᠠᠷ ᠬᠦᠦ ᠰᠡᠷᠡᠭᠡᠳ ᠤᠬᠢᠯᠠᠭ ᠠᠯᠳᠠᠪᠠᠯ ᠴᠦ᠍ ᠪᠠᠯᠠᠭ ᠲᠠᠷᠢᠨᠠ ᠰᠢᠦ!
— ᠬᠠᠮᠢᠶᠠ ᠦᠭᠡᠢ᠂ ᠬᠡᠷᠰᠡᠦᠬᠡᠨ ᠪᠠᠢ᠂ ᠲᠡᠭᠡᠪᠡᠯ ᠬᠦᠦ ᠶ᠋ᠢᠨ ᠨᠢᠯᠬᠠ ᠬᠣᠰᠢᠭᠤ ᠶ᠋ᠢ ᠬᠥᠬᠥ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠰᠬᠢᠨ ᠲᠠᠭᠯᠠᠭᠠᠳ᠁ ᠡᠪ ᠢ᠋ ᠨᠢ ᠦᠵᠡᠬᠦ ᠶ᠋ᠢ ᠪᠣᠳᠣ! ᠡᠯᠪᠡᠭᠬᠡᠨ ᠠᠭᠤᠵᠢᠮ ᠳᠡᠪᠡᠯ ᠡᠮᠦᠰᠴᠢᠬᠡᠪᠡᠯ ᠭᠠᠢᠭᠤᠢ ᠪᠣᠢ᠃
— ᠵᠠ! ᠭᠡᠳ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠮᠠᠨᠤᠨᠪᠠᠳᠮᠠ ᠬᠣᠶᠠᠷ ᠬᠥᠭᠰᠢᠨ ᠲᠢᠶᠠᠨ ᠣᠪᠣᠭᠲᠠᠨ ᠤ᠋ ᠳ᠋ᠧᠦᠹᠦ᠋ ᠶ᠋ᠢᠨ ᠭᠡᠷ ᠡᠴᠡ ᠭᠠᠷᠴᠤ ᠬᠥᠬᠡ ᠲᠣᠭᠣᠰᠬᠠᠨ ᠬᠦᠷᠢᠶᠡ ᠶ᠋ᠢ ᠴᠢᠭᠯᠡᠵᠦ ᠶᠠᠭᠠᠷᠠᠪᠴᠢᠯᠠᠪᠠ᠃
ᠵᠠᠮ ᠲᠤᠷᠰᠢ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠨᠠᠰᠤᠲᠠᠨ ᠥᠨᠥᠬᠢ ᠡᠪᠦᠷ ᠳᠣᠲᠣᠷᠠᠬᠢ ᠨᠢᠯᠬᠠ ᠬᠦᠦ ᠶ᠋ᠢ ᠰᠡᠷᠡᠭᠦᠵᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠳᠣᠲᠣᠷᠠ ᠨᠢ ᠰᠠᠪᠠᠭᠠᠨᠠᠵᠤ ᠶᠣᠰᠣᠲᠠᠢ ᠯᠠ ᠵᠢᠷᠦᠬᠡ ᠪᠡᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠶᠠᠪᠤᠪᠠ᠃
ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨ ᠦ᠌ ᠬᠠᠷᠠᠭᠤᠯ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠨᠠᠰᠤᠲᠠᠨ ᠢ᠋ ᠬᠣᠷᠢᠵᠤ᠄
— ᠲᠠ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠵᠣᠭᠰᠣ! ᠭᠡᠬᠦ ᠶ᠋ᠢ ᠰᠣᠨᠣᠰᠤᠭᠰᠠᠨ ᠮᠠᠨᠤᠨᠪᠠᠳᠮᠠ᠄
— ᠪᠠᠢᠵᠠ᠂ ᠨᠠᠭᠠᠳᠤᠬᠢ ᠴᠢᠨᠢ ᠪᠠᠭᠠ ᠬᠠᠲᠤᠨ ᠢ᠋ ᠰᠠᠭᠤᠯᠭᠠᠬᠤ ᠡᠬᠡ ᠪᠠᠷᠢᠶᠠᠴᠢ ᠪᠠᠢᠨᠠ᠃ ᠲᠠ ᠨᠠᠷ ᠢᠩᠭᠢᠵᠦ ᠮᠠᠶᠢᠭᠯᠠᠭᠠᠳ ᠪᠠᠭᠠ ᠬᠠᠲᠤᠨ ᠤ᠋ ᠬᠦᠦ ᠲᠥᠷᠥᠬᠦ ᠳ᠋ᠦ᠍ ᠰᠠᠭᠠᠳ ᠪᠣᠯᠵᠤ ᠡᠢᠮᠦ ᠲᠡᠢᠮᠦ ᠪᠣᠯᠪᠠᠯ᠁ ᠭᠡᠵᠦ ᠴᠢᠩᠭᠠ ᠳᠤᠤᠭᠠᠷᠪᠠ᠃
ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠴᠦ᠍ ᠦᠨᠡᠮᠰᠢᠵᠦ《 ᠨᠠᠰᠤᠲᠠᠢ ᠬᠥᠮᠦᠨ ᠪᠠᠢᠨᠠ᠂ ᠡᠬᠡ ᠪᠠᠷᠢᠶᠠᠴᠢ ᠮᠥᠨ ᠪᠠᠢᠬᠠ ᠳᠠ》 ᠭᠡᠵᠦ ᠶᠠᠮᠠᠷ ᠴᠦ᠍ ᠰᠡᠵᠢᠭ ᠳᠠᠭᠠᠪᠤᠷᠢ ᠦᠭᠡᠢ ᠥᠩᠭᠡᠷᠡᠭᠡᠪᠡ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠡᠬᠡ ᠪᠠᠷᠢᠶᠠᠴᠢ ᠶ᠋ᠢ ᠳᠠᠭᠠᠭᠤᠯᠤᠨ ᠬᠣᠶᠠᠷ ᠠᠯᠬᠤᠮ ᠢ᠋ ᠨᠢᠭᠡ ᠠᠯᠴᠠᠮ ᠳ᠋ᠤ᠌ ᠲᠣᠪᠴᠢᠯᠠᠨ《 ᠪᠣᠯᠳᠠᠭ ᠰᠠᠨ ᠪᠣᠯ ᠪᠣᠯᠵᠣᠮᠣᠷ ᠴᠦ᠍ ᠪᠣᠯᠤᠭᠠᠰᠠᠢ ᠫᠦᠷᠳ᠋ᠬᠢᠨ ᠨᠢᠰᠦᠭᠡᠳ ᠣᠷᠴᠢᠬᠤ ᠶᠤᠮ》 ᠭᠡᠵᠦ ᠮᠠᠢᠵᠢᠭᠢ ᠳᠠᠢᠵᠢᠬᠢ ᠭᠡᠭᠰᠡᠭᠡᠷ ᠡᠭᠦᠳᠡ ᠪᠣᠯᠭᠠᠨ ᠤ᠋ ᠬᠠᠷᠠᠭᠤᠯ ᠮᠠᠨᠠᠭᠠ ᠶ᠋ᠢ ᠮᠥᠨ ᠳᠡᠭᠡᠷᠡᠬᠢ ᠠᠷᠭᠠ ᠪᠠᠷ ᠬᠠᠭᠤᠷᠤᠨ ᠶᠠᠪᠤᠨᠠ᠃ ᠶᠠᠭ ᠭᠣᠣᠯ ᠭᠡᠷ ᠦ᠋ᠨ ᠡᠭᠦᠳᠡᠨ ᠦ᠌ ᠨᠠᠢ᠍ᠮᠠᠨ ᠳᠡᠭᠲᠡᠷ ᠴᠢᠯᠠᠭᠤᠨ ᠶᠡᠨᠳᠡᠷ ᠢ᠋ ᠳᠠᠪᠠᠬᠤ ᠭᠡᠬᠦ ᠳ᠋ᠦ᠍ ᠣᠳᠬᠣᠨᠮᠠ ᠬᠥᠭᠰᠢᠨ ᠪᠦᠳᠦᠷᠢᠵᠦ ᠡᠯᠢᠭᠡ ᠲᠦᠷᠦᠭᠦᠯᠡᠨ ᠣᠢᠴᠢᠪᠠ᠃ ᠡᠪᠦᠷ ᠳᠣᠲᠣᠷᠠᠬᠢ ᠨᠢᠯᠬᠠ ᠬᠦᠦ ᠡᠨᠡ ᠬᠦ᠌ ᠪᠦᠳᠦᠷᠢᠭᠰᠡᠨ ᠶᠡᠬᠡ ᠳᠣᠩᠰᠣᠯᠭᠠᠨ ᠳ᠋ᠤ᠌ ᠰᠣᠴᠢᠨ ᠰᠡᠷᠡᠵᠦ ᠴᠢᠰ ᠬᠢᠨ ᠤᠬᠢᠯᠠᠪᠠ᠃
ᠡᠪᠦᠷ ᠳᠣᠲᠣᠷᠠᠬᠢ ᠨᠢᠯᠬᠠ ᠬᠦᠦ ᠶ᠋ᠢᠨ ᠪᠢᠲᠡᠭᠦᠬᠡᠨ ᠳᠠᠭᠤ ᠭᠠᠷᠤᠭᠰᠠᠨ ᠢ᠋ ᠰᠠᠷᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠡᠬᠡ ᠪᠠᠷᠢᠶᠠᠴᠢ ᠰᠠᠨᠳᠤᠷᠬᠤ ᠳ᠋ᠠᠭᠠᠨ《ᠥᠴᠢᠷᠡᠢ ᠬᠠᠯᠠᠭ! ᠠᠯᠠᠬᠤ ᠶᠤᠮ ᠪᠠᠢᠨᠠ᠁ ᠶᠣ ᠶᠣ᠁》 ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠴᠢᠵᠤ ᠨᠢᠯᠬᠠ ᠬᠦᠦ ᠶ᠋ᠢᠨ ᠤᠬᠢᠯᠠᠭᠰᠠᠨ ᠳᠠᠭᠤ ᠶ᠋ᠢ ᠳᠠᠷᠤᠪᠠ᠃ ᠲᠡᠭᠡᠭᠡᠳ ᠮᠥᠯᠬᠥᠵᠦ ᠪᠣᠰᠤᠨ ᠡᠩᠭᠡᠷ ᠡᠪᠴᠢᠭᠦᠦ ᠪᠡᠨ ᠳᠠᠷᠤᠵᠤ ᠮᠠᠶᠢᠭ ᠭᠠᠷᠭᠠᠨ ᠰᠠᠷᠢᠰᠤᠨ ᠬᠥᠬᠥ ᠪᠡᠷ ᠢ᠋ᠶ᠋ᠡᠨ ᠨᠢᠯᠬᠠ ᠬᠦᠦ ᠶ᠋ᠢᠨ ᠬᠣᠰᠢᠭᠤ ᠶ᠋ᠢ ᠨᠢᠯᠠᠪ ᠳᠠᠷᠤᠵᠤ ᠪᠢᠯᠡ᠃ ᠠᠷᠤ ᠳ᠋ᠤᠨᠢ ᠶᠠᠪᠤᠭᠠ ᠡᠬᠡ ᠪᠠᠷᠢᠶᠠᠴᠢ ᠶᠡᠨᠳᠡᠷ ᠳᠠᠪᠠᠬᠤ ᠳ᠋ᠠᠭᠠᠨ ᠣᠢᠴᠢᠭᠰᠠᠨ ᠳ᠋ᠤ᠌ ᠮᠠᠨᠤᠨᠪᠠᠳᠮᠠ ᠰᠠᠨᠳᠤᠷᠴᠤ᠂ ᠪᠦᠬᠦ ᠪᠡᠶᠡ ᠳ᠋ᠦ᠍ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠠᠰᠬᠠᠷᠠᠨ《 ᠴᠢᠭᠢᠶᠡᠲᠦᠷᠦᠦ᠂ ᠮᠠᠭᠤ ᠳᠠᠮᠰᠢᠭ! ᠶᠠᠪᠤᠵᠤ ᠶᠠᠪᠤᠵᠤ ᠢᠮᠠᠭᠠᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠶᠠᠭᠳᠠᠵᠤ᠂ ᠪᠣᠯᠬᠤ ᠪᠣᠯᠬᠤ ᠦᠭᠡᠢ ᠳ᠋ᠡᠭᠡᠨ ᠪᠤᠬᠠᠨ ᠤ᠋ ᠰᠡᠭᠦᠯ ᠳᠡᠭᠡᠷᠡ ᠬᠢᠲᠤᠭᠠ ᠬᠤᠭᠤᠯᠬᠤ ᠨᠢ ᠤᠤ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠡᠬᠡ ᠪᠠᠷᠢᠶᠠᠴᠢ ᠶ᠋ᠢ ᠳᠥᠰᠢᠨ ᠡᠯᠢᠭᠡ ᠡᠪᠴᠢᠭᠦᠦ ᠶ᠋ᠢ ᠨᠢ ᠢᠯᠢᠬᠦ ᠶᠠᠩᠵᠤ ᠭᠠᠷᠭᠠᠨ《 ᠡᠪᠡᠳᠪᠡ ᠤᠤ? ᠭᠠᠢᠭᠤᠢ ᠤᠤ?》 ᠭᠡᠰᠡᠨ ᠢ᠋ᠶ᠋ᠡᠨ《 ᠨᠢᠯᠬᠠ ᠬᠦᠦ ᠭᠠᠢᠭᠤᠢ ᠪᠢᠵᠡ?》 ᠭᠡᠰᠡᠨ ᠴᠣᠷᠭᠢᠭᠰᠠᠨ ᠠᠰᠠᠭᠤᠯᠲᠠ ᠨᠢᠳᠦ ᠪᠡᠷ ᠲᠡᠭᠦᠨ ᠢ᠋ ᠰᠢᠷᠳᠡᠵᠦ《 ᠬᠢᠴᠢᠶᠡᠳᠡᠭ ᠦᠭᠡᠢ ᠶᠠᠭᠠᠬᠢᠪᠠ? ᠬᠡᠷᠡᠭ ᠪᠢᠰᠢᠳᠡᠭᠰᠡᠭᠡᠷ ᠴᠦ᠍ ᠮᠠᠭᠤ ᠬᠥᠭᠰᠢᠨ ᠵᠣᠪᠠᠯᠭᠠ ᠪᠠᠨ ᠬᠠᠶᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠨᠠ ᠳᠠ》 ᠭᠡᠵᠦ ᠵᠢᠮᠡᠯᠡᠩᠭᠦᠢ ᠬᠠᠷᠠᠵᠤ ᠪᠠᠢᠯᠠ᠃
ᠡᠬᠡ ᠪᠠᠷᠢᠶᠠᠴᠢ ᠴᠦ᠍ ᠨᠢᠭᠡᠮᠦᠰᠦᠨ ᠰᠠᠨᠳᠤᠷᠴᠤ ᠪᠠᠯᠠᠳᠠᠬᠤ ᠳ᠋ᠠᠭᠠᠨ ᠡᠯᠢᠭᠡ ᠡᠪᠴᠢᠭᠦᠦ ᠪᠡᠨ ᠳᠠᠷᠤᠨ《 ᠶᠣ᠁ ᠶᠣ᠁》 ᠭᠡᠵᠦ ᠶᠣᠣᠯᠠᠨ ᠬᠠᠢᠯᠠᠨ ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠰᠠᠯᠤᠯ ᠦᠭᠡᠢ ᠪᠣᠷᠪᠢᠳᠠᠨᠠ᠁
ᠳᠣᠲᠣᠷᠠ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠬᠣᠶᠠᠷ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠡᠭᠦᠨ ᠢ᠋ ᠬᠠᠰᠢᠨ᠄
— ᠵᠣᠭᠰᠣ! ᠲᠡᠷᠡ ᠱᠤᠤᠮᠠᠰᠠ ᠳ᠋ᠤ᠌ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠬᠣᠷᠢᠪᠠ᠃ ᠡᠬᠡ ᠪᠠᠷᠢᠶᠠᠴᠢ ᠱᠤᠤᠮᠠᠰᠠ ᠪᠠᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ ᠥᠭᠬᠦ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠰᠠᠨᠳᠤᠷᠤᠨ᠄《 ᠵᠠ᠂ ᠬᠤᠷᠳᠤᠯᠠ᠂ ᠬᠤᠷᠳᠤᠯᠠ! ᠪᠠᠭᠠ ᠬᠠᠲᠤᠨ ᠰᠦᠷᠡᠬᠡᠢ ᠰᠢᠨᠡᠯᠡᠵᠦ ᠪᠠᠢᠭᠠ᠁》 ᠭᠡᠳ ᠡᠬᠡ ᠪᠠᠷᠢᠶᠠᠴᠢ ᠶ᠋ᠢᠨ ᠬᠠᠨᠴᠤᠢ ᠠ᠋ᠴᠠ ᠴᠢᠩᠭᠠᠭᠠᠵᠤ ᠳᠣᠲᠣᠷᠠ ᠭᠡᠷ ᠤᠷᠤᠭᠤ ᠤᠨᠠᠨ ᠪᠦᠳᠦᠴᠢᠨ ᠣᠷᠣᠯᠠ᠁
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ《 ᠶᠣ᠂ ᠶᠣᠬᠣ ᠠ᠋!》 ᠭᠡᠵᠦ ᠰᠠᠨᠠᠭᠠ ᠨᠢ ᠠᠭᠤᠵᠢᠷᠠᠭᠰᠠᠨ ᠴᠦ᠍ ᠶᠤᠮ ᠤᠤ? ᠳᠡᠩᠳᠡᠭᠦᠦ ᠰᠡᠳᠬᠢᠯ ᠵᠣᠪᠠᠭᠰᠠᠨ ᠤ᠋ ᠴᠦ᠍ ᠶᠤᠮ ᠤᠤ ᠤᠷᠲᠤᠬᠠᠨ ᠭᠡᠭᠴᠢ ᠰᠠᠨᠠᠭᠠ ᠠᠯᠲᠠᠨ ᠪᠠᠭᠠ ᠬᠠᠲᠤᠨ ᠤᠷᠤᠭᠤ ᠨᠢᠳᠦ ᠢᠷᠮᠡᠪᠡ᠃ ᠪᠠᠭᠠ ᠬᠠᠲᠤᠨ ᠰᠠᠨᠠᠭᠠ ᠶ᠋ᠢ ᠨᠢ ᠣᠢᠯᠠᠭᠠᠵᠤ ᠨᠢᠭᠡ ᠬᠡᠰᠡᠭ ᠰᠦᠷᠡᠬᠡᠢ ᠰᠢᠨᠠᠯᠤᠨ ᠶᠣᠣᠯᠠᠨᠠ᠃
ᠡᠬᠡ ᠪᠠᠷᠢᠶᠠᠴᠢ ᠥᠨᠥᠬᠢ ᠡᠪᠦᠷ ᠳᠣᠲᠣᠷᠠᠬᠢ ᠨᠢᠯᠬᠠ ᠬᠦᠦ ᠶ᠋ᠢ ᠬᠠᠨᠵᠤᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠳ᠋ᠤ᠌ ᠠᠮᠢᠰᠬᠤᠭᠠ ᠨᠢ ᠪᠥᠭᠯᠡᠷᠡᠨ ᠤᠷᠤᠭᠤᠯ ᠨᠢ ᠴᠢᠯᠳᠡᠩ ᠬᠥᠬᠡ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠮᠠᠨᠤᠨᠪᠠᠳᠮᠠ᠂ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ᠂ ᠪᠠᠭᠠ ᠬᠠᠲᠤᠨ ᠤ᠋ ᠡᠷᠭᠦᠮᠡᠯ ᠡᠬᠡ ᠭᠤᠷᠪᠠᠨ ᠬᠥᠭᠰᠢᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠮᠡᠯᠡᠷᠡᠨᠡ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠨᠢᠯᠬᠠ ᠬᠦᠦ ᠶ᠋ᠢᠨ ᠬᠣᠰᠢᠭᠤ ᠳ᠋ᠤ᠌ ᠤᠷᠤᠭᠤᠯ ᠢ᠋ᠶ᠋ᠠᠨ ᠨᠠᠭᠠᠵᠤ ᠬᠦᠴᠦᠲᠡᠢ ᠰᠣᠷᠣᠨ ᠠᠮᠢᠰᠬᠤᠭᠠ ᠳᠡᠮᠵᠢᠬᠦ ᠳ᠋ᠦ᠍ ᠡᠬᠡ ᠪᠠᠷᠢᠶᠠᠴᠢ ᠣᠳᠬᠣᠨᠮᠠ ᠨᠢᠯᠬᠠ ᠬᠦᠦ ᠶ᠋ᠢᠨ ᠬᠥᠯ ᠭᠠᠷ ᠤ᠋ᠨ ᠬᠢᠨᠢ ᠠᠷᠪᠠᠨ ᠬᠤᠷᠤᠭᠤ ᠶ᠋ᠢ ᠴᠢᠩᠭᠠᠬᠠᠨ ᠠᠳᠬᠤᠵᠤ ᠠᠪᠤᠭᠠᠳ ᠬᠠᠳᠬᠤᠨᠠ᠃ ᠲᠡᠭᠡᠭᠡᠳ ᠥᠰᠥᠭᠡᠢ ᠪᠣᠯᠤᠨ ᠨᠢᠯᠬᠠ ᠶ᠋ᠢᠨ ᠬᠥᠮᠦᠨ( ᠬᠣᠩᠬᠣᠷ) ᠢ᠋ ᠬᠢᠮᠤᠰᠤᠯᠠᠨ ᠬᠠᠳᠬᠤᠪᠠᠯ ᠬᠥᠬᠡᠷᠡᠭᠰᠡᠨ ᠤᠷᠤᠭᠤᠯ ᠨᠢ ᠶᠠᠭᠠᠨ ᠥᠩᠭᠡ ᠣᠷᠣᠵᠤ ᠤᠬᠢᠯᠠᠬᠤ ᠭᠡᠳ ᠳᠠᠭᠤ ᠭᠠᠷᠬᠤ ᠦᠭᠡᠢ ᠠᠮᠠ ᠪᠠᠨ ᠠᠩᠭᠠᠯᠵᠠᠨ ᠡᠭᠡᠷᠡᠨᠡ᠃ ᠠᠮᠢᠳᠤᠷᠠᠯ ᠤ᠋ᠨ ᠪᠡᠷᠬᠡ ᠶ᠋ᠢ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠬᠠᠰᠢᠷ ᠬᠥᠮᠦᠨ ᠦ᠌ ᠨᠢᠭᠡ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠥᠨᠥᠬᠢ ᠨᠢᠯᠬᠠ ᠬᠦᠦ ᠶ᠋ᠢᠨ ᠬᠣᠶᠠᠷ ᠬᠥᠯ ᠡᠴᠡ ᠪᠠᠷᠢᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠳᠣᠷᠣᠭᠰᠢ ᠬᠠᠨᠳᠤᠭᠤᠯᠤᠨ ᠪᠤᠬᠤᠷ ᠳᠡᠭᠡᠷᠡ ᠨᠢ ᠨᠢᠭᠡ ᠠᠯᠠᠭᠠᠳᠠᠵᠤ᠂ ᠨᠢᠷᠤᠭᠤᠨ ᠭᠣᠣᠯ ᠤᠷᠤᠭᠤ ᠨᠢ ᠠᠷᠢᠬᠢ ᠦᠯᠢᠶᠡᠨ ᠵᠤᠵᠠᠭᠠᠨ ᠮᠢᠬᠠ ᠶ᠋ᠢ ᠨᠢ ᠴᠢᠮᠬᠢᠭᠰᠡᠨ ᠳ᠋ᠦ᠍ ᠨᠢᠯᠬᠠ ᠬᠦᠦ《 ᠸᠠ᠁》 ᠭᠡᠵᠦ ᠳᠠᠭᠤ ᠲᠠᠯᠪᠢᠨ ᠤᠬᠢᠯᠠᠪᠠ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ《 ᠠᠯᠢ ᠨᠠᠳᠠ ᠨᠢᠭᠡ ᠣᠭᠣᠴᠢ ᠤᠰᠤ!》 ᠭᠡᠬᠦ ᠳ᠋ᠦ᠍ ᠴᠠᠭᠠᠨᠠ ᠠ᠋ᠴᠠ ᠤᠰᠤ ᠳᠠᠮᠵᠢᠭᠤᠯᠵᠤ ᠥᠭᠪᠡ᠃ ᠨᠢᠭᠡ ᠣᠭᠣᠴᠢ ᠤᠰᠤ ᠣᠭᠣᠴᠢᠭᠠᠳ ᠪᠠᠭᠠ ᠬᠠᠲᠤᠨ ᠢ᠋《 ᠨᠢᠳᠦ ᠪᠡᠨ ᠠᠨᠢ》 ᠭᠡᠵᠦ ᠰᠡᠮᠬᠡᠨ ᠳᠣᠬᠢᠶᠠ ᠥᠭᠴᠦ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠬᠥᠨᠳᠡᠢᠬᠡᠨ ᠦᠯᠢᠶᠡᠵᠦ᠂ ᠪᠠᠭᠠ ᠬᠠᠲᠤᠨ ᠰᠥᠨᠢᠵᠢᠨ ᠵᠣᠪᠠᠭᠰᠠᠨ ᠠ᠋ᠴᠠ ᠮᠠᠩᠨᠠᠢ ᠳ᠋ᠤᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠳᠠᠭᠠᠭᠠᠪᠤᠷᠢᠯᠠᠭᠰᠠᠨ ᠬᠠᠭᠤᠷᠮᠠᠭ ᠪᠠᠢᠳᠠᠯ ᠢ᠋ ᠠᠷᠭᠠ ᠦᠭᠡᠢ ᠢᠩᠭᠢᠵᠦ ᠬᠢᠵᠡᠢ᠃ ᠪᠠᠭᠠ ᠬᠠᠲᠤᠨ᠄
— ᠬᠦᠦ ᠶᠦᠮ ᠤᠤ? ᠬᠡᠦᠬᠡᠨ ᠶᠦᠮ ᠤᠤ? ᠭᠡᠬᠦ ᠳᠣᠷᠣᠢ ᠳᠠᠭᠤ ᠪᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠮᠠᠨᠤᠨᠪᠠᠳᠮᠠ᠄
— ᠪᠠᠭᠠ ᠬᠠᠲᠤᠨ ᠠ᠋! ᠮᠠᠨᠲᠤᠭᠤᠷ ᠴᠠᠭᠠᠨ ᠬᠦᠦ ᠲᠥᠷᠥᠴᠢᠬᠡᠯᠡ ᠭᠡᠳ ᠬᠠᠳ ᠬᠠᠳ ᠬᠢᠨ ᠢᠨᠢᠶᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠬᠣᠶᠠᠷ ᠬᠥᠭᠰᠢᠨ ᠴᠦ᠍ ᠳᠠᠭᠠᠯᠳᠤᠨ ᠢᠨᠢᠶᠡᠯᠳᠦᠪᠡ᠃
— ᠪᠠᠭᠠ ᠬᠠᠲᠤᠨ ᠬᠦᠦ ᠲᠡᠢ ᠪᠣᠯᠤᠯᠠ ᠠ᠋! ᠭᠡᠰᠡᠨ ᠴᠢᠮᠡᠭᠡ ᠬᠡᠰᠡᠭᠬᠡᠨ ᠵᠠᠭᠤᠷᠠ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠴᠠᠭᠠᠰᠢ ᠤᠯᠠᠮᠵᠢᠯᠠᠨ ᠲᠠᠷᠬᠠᠪᠠ᠃
– – – –
① ᠠᠷᠪᠠᠨ ᠬᠣᠶᠠᠷ ᠵᠢᠯ ᠦ᠋ᠨ ᠵᠢᠰᠦᠮ ᠢ᠋ᠶ᠋ᠡᠷ ᠲᠣᠭᠠᠯᠠᠬᠤ ᠴᠠᠭ ᠤ᠋ᠨ ᠦᠵᠡᠯᠭᠡ ᠳ᠋ᠦ᠍《 ᠲᠩᠷᠢ ᠶ᠋ᠢᠨ ᠢᠪᠡᠭᠡᠯ᠂ ᠬᠥᠬᠡ ᠯᠤᠤ᠂ ᠡᠷᠳᠡᠨᠢ ᠶ᠋ᠢᠨ ᠣᠭ᠌ᠶᠤ᠂ ᠭᠡᠭᠡᠨ ᠣᠷᠳᠣᠨ᠂ ᠠᠯᠲᠠᠨ ᠣᠷᠳᠣᠨ᠂ ᠠᠮᠢᠨ ᠰᠠᠬᠢᠬᠤ》 ᠵᠡᠷᠭᠡ 6 ᠴᠠᠭ ᠨᠢ ᠰᠠᠢᠨ ᠭᠡᠳᠡᠭ᠃
ᠪᠠᠭᠠ ᠬᠠᠲᠤᠨ ᠬᠦᠦ ᠲᠡᠢ ᠪᠣᠯᠤᠯᠠ ᠭᠡᠰᠡᠨ ᠴᠢᠮᠡᠭᠡ ᠪᠡᠷ ᠪᠠᠶᠠᠷᠯᠠᠭᠰᠠᠨ ᠨᠢᠭᠡ ᠨᠢ ᠮᠠᠩᠨᠠᠢ ᠨᠢ ᠬᠠᠭᠠᠷᠠᠵᠤ᠂ ᠬᠠᠷᠠᠮᠰᠠᠭᠰᠠᠨ ᠨᠢᠭᠡ ᠨᠢ ᠬᠠᠮᠠᠷ ᠨᠢ ᠮᠤᠰᠢᠢᠪᠠ᠃ ᠢᠩᠭᠢᠭᠡᠳ ᠵᠣᠭᠰᠣᠭᠰᠠᠨ ᠦᠭᠡᠢ ᠰᠡᠵᠢᠭ ᠳᠠᠭᠠᠪᠤᠷᠢ ᠡᠪᠦᠷᠯᠡᠭᠰᠡᠨ ᠡᠯᠳᠡᠩᠭᠡ ᠨᠠᠷ ᠳᠣᠣᠷᠠᠬᠢ ᠬᠥᠮᠦᠰ ᠲᠡᠭᠡᠨ᠄《 ᠵᠠ᠂ ᠡᠳᠡᠨᠥᠰ ᠣᠳᠣ ᠪᠠᠭᠠ ᠬᠠᠲᠤᠨ ᠤ᠋ ᠬᠣᠢᠲᠤᠬᠢ ᠶ᠋ᠢ ᠬᠠᠮᠢᠭᠠ ᠬᠠᠶᠠᠳᠠᠭ ᠪᠣᠯ ᠠ᠋? ᠴᠢᠰᠤ ᠰᠠᠯᠢᠶᠠ ᠴᠦ᠍ ᠪᠠᠢᠳᠠᠭ ᠦᠭᠡᠢ ᠬᠣᠢᠲᠤᠬᠢ ᠨᠢ ᠤᠨᠠᠳᠠᠭ ᠦᠭᠡᠢ ᠬᠦᠦ ᠲᠥᠷᠥᠳᠡᠭ ᠪᠠᠢᠵᠤ ᠠ᠋!》 ᠭᠡᠵᠦ ᠰᠡᠵᠢᠭᠯᠡᠨ ᠬᠣᠭ ᠨᠣᠪᠰᠢ ᠶ᠋ᠢᠨ ᠣᠪᠣᠭᠠ᠂ ᠵᠣᠷᠯᠣᠩ ᠤ᠋ᠨ ᠠᠮᠠ ᠶ᠋ᠢ ᠴᠦ᠍ ᠠᠯᠳᠠᠯ ᠦᠭᠡᠢ ᠠᠵᠢᠭᠯᠠᠵᠤ ᠪᠠᠢᠪᠠ᠃
ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠬᠤ ᠳ᠋ᠤ᠌ ᠬᠡᠯᠡ ᠪᠡᠨ ᠬᠠᠭᠠᠷᠢᠭᠤᠯᠳᠠᠭ ᠦᠭᠡᠢ ᠮᠡᠷᠭᠡᠨ ᠬᠥᠭᠰᠢᠨ ᠮᠠᠨᠤᠨᠪᠠᠳᠮᠠ ᠡᠨᠡᠭᠦᠬᠡᠨ ᠵᠢᠭᠠᠬᠠᠨ ᠤᠬᠠᠭᠠᠨ ᠳ᠋ᠤ᠌ ᠥ ᠰᠡᠪ ᠦᠯᠡᠳᠡᠭᠡᠵᠦ ᠤᠷᠠᠬᠠᠨ ᠳ᠋ᠤ᠌ ᠣᠷᠣᠬᠤ ᠨᠣᠮᠣᠬᠠᠨ ᠭᠥᠷᠥᠭᠡᠰᠦ ᠪᠢᠰᠢ ᠪᠠᠢᠵᠠᠢ᠃
ᠪᠠᠭᠠ ᠬᠠᠲᠤᠨ ᠰᠠᠭᠤᠭᠰᠠᠨ ᠦᠶᠡ ᠨᠢ ᠶᠠᠭ ᠰᠠᠢᠬᠠᠨ ᠬᠠᠪᠤᠷ ᠴᠠᠭ ᠪᠣᠯᠬᠣᠷ ᠢᠮᠠᠭᠠ ᠢᠰᠢᠭᠡᠯᠡᠵᠦ ᠪᠠᠢᠭᠰᠠᠨ ᠰᠠᠨᠵᠠᠢ᠃ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠡᠯᠡᠳᠬᠡᠯ ᠲᠡᠢ ᠪᠠᠢᠭᠰᠠᠨ ᠳ᠋ᠠᠭᠠᠨ ᠬᠥᠳᠡᠭᠡ ᠡᠴᠡ ᠮᠠᠯ ᠤ᠋ᠨ ᠭᠡᠭᠡᠰᠢ ᠣᠯᠵᠤ ᠠᠪᠴᠢᠷᠠᠨ ᠬᠥᠮᠦᠨ ᠦ᠌ ᠨᠢᠳᠦ ᠶ᠋ᠢ ᠬᠠᠯᠬᠠᠯᠠᠬᠤ ᠤᠬᠠᠭᠠᠨ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠳ᠋ᠦ᠍ ᠮᠤᠩᠳᠠᠭᠰᠠᠨ ᠦᠭᠡᠢ ᠠ᠋!
ᠡᠪᠦᠷᠲᠦᠯᠡᠵᠦ ᠠᠪᠴᠢᠷᠠᠭᠰᠠᠨ ᠮᠠᠯ ᠤ᠋ᠨ ᠭᠡᠭᠡᠰᠢ ᠪᠠ ᠴᠢᠰᠤ ᠨᠥᠵᠢ ᠶ᠋ᠢ ᠤᠰᠤᠨ ᠳ᠋ᠤ᠌ ᠳᠡᠪᠲᠦᠭᠡᠵᠦ ᠲᠦᠮᠫᠡᠨ ᠳ᠋ᠦ᠍ ᠬᠢᠭᠡᠳ ᠳᠡᠭᠡᠷᠡ ᠡᠴᠡ ᠨᠢ ᠭᠦᠨ ᠤᠯᠠᠭᠠᠨ ᠪᠣᠳᠣᠭ ᠲᠤ ᠪᠤᠵᠠᠷᠲᠤᠭᠰᠠᠨ ᠮᠣᠣᠲᠤᠤ ᠴᠠᠭᠠᠰᠤ ᠪᠠ ᠵᠤᠵᠠᠭᠠᠯᠢᠭ ᠬᠦᠵᠢ ᠰᠢᠷᠠ ᠴᠠᠭᠠᠰᠤ ᠵᠡᠷᠭᠡ ᠬᠢᠭᠰᠡᠨ ᠯᠠᠭ ᠨᠣᠪᠰᠢ ᠶ᠋ᠢ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠠᠪᠴᠤ ᠭᠠᠷᠤᠨ ᠡᠭᠦᠳᠡᠨ ᠦ᠌ ᠬᠠᠷᠠᠭᠤᠯ ᠤ᠋ᠨ ᠨᠢᠭᠡ ᠴᠡᠷᠢᠭ ᠲᠦ᠍ ᠥᠭᠴᠦ᠄
— ᠡᠭᠦᠨ ᠢ᠋ ᠠᠪᠠᠴᠢᠵᠤ ᠠᠰᠬᠠ! ᠣᠳᠣ ᠲᠠ ᠨᠠᠷ ᠮᠠᠨᠠᠭᠤᠯ ᠵᠣᠭᠰᠣᠬᠤ ᠬᠡᠷᠡᠭ ᠦᠭᠡᠢ ᠠ᠋! ᠬᠠᠲᠤᠨ ᠬᠦᠦ ᠲᠡᠢ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠭᠡᠪᠡ᠃
ᠥᠨᠥᠬᠢ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ《 ᠲᠥᠷᠥᠭᠰᠡᠨ ᠡᠮᠡ ᠶ᠋ᠢᠨ ᠴᠢᠰᠤ ᠨᠥᠵᠢ ᠶ᠋ᠢ ᠨᠠᠳᠠ ᠪᠠᠷ ᠠᠰᠬᠠᠭᠤᠯᠤᠯᠠ》 ᠭᠡᠵᠦ ᠳᠤᠷᠠ ᠦᠭᠡᠢᠴᠡᠬᠦ ᠪᠣᠯᠪᠠᠴᠤ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠥᠭᠰᠢᠨ ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠡᠨ ᠬᠥᠮᠦᠨ ᠤᠷᠲᠤ ᠠ᠋ᠴᠠ ᠨᠢ ᠠᠶᠤᠮᠰᠢᠭ ᠦᠭᠡᠢ《ᠦᠭᠡᠢ ᠠ᠋》 ᠭᠡᠵᠦ ᠬᠠᠷᠢᠭᠤᠴᠠᠵᠤ ᠴᠢᠳᠠᠬᠤ ᠪᠢᠯᠡ? ᠲᠡᠷᠡ ᠮᠥᠷᠲᠡᠭᠡᠨ ᠵᠢᠯᠢᠢᠭᠴᠢ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠤ᠋ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠭᠰᠡᠨ ᠬᠣᠢᠲᠤᠬᠢ ᠶ᠋ᠢ ᠨᠢ ᠠᠪᠠᠴᠢᠵᠤ ᠠᠰᠬᠠᠬᠤ ᠨᠢ ᠪᠠᠰᠠ ᠨᠢᠭᠡ ᠠᠵᠠ ᠵᠣᠯ ᠴᠦ᠍ ᠶᠤᠮ ᠤᠤ ᠭᠡᠵᠦ ᠰᠡᠳᠬᠢᠨ᠄
— ᠵᠠ! ᠮᠡᠳᠡᠯᠡ ᠭᠡᠳ ᠭᠠᠳᠠᠭᠰᠢ ᠠᠪᠴᠤ ᠶᠠᠪᠤᠵᠢ᠃
ᠵᠠᠮ ᠲᠤᠷᠰᠢ ᠰᠣᠨᠢᠭᠤᠴᠢ ᠬᠥᠮᠦᠰ《 ᠬᠥᠶᠢ᠂ ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠴᠢ ᠶᠠᠭᠤ ᠠᠪᠤᠭᠠᠳ ᠭᠦᠶᠦᠵᠦ ᠪᠠᠢᠭᠠ ᠶᠤᠮ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ《 ᠪᠠᠭᠠ ᠬᠠᠲᠤᠨ ᠤ᠋ ᠬᠣᠢᠲᠤᠬᠢ》 ᠭᠡᠪᠡᠯ ᠵᠠᠷᠢᠮ ᠨᠢ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠨ ᠪᠥᠭᠯᠡᠵᠦ ᠢᠷᠪᠠᠢᠨᠠ᠃ ᠵᠠᠷᠢᠮ ᠨᠢ ᠤᠷᠪᠠᠭᠤᠯᠵᠤ ᠦᠵᠡᠮᠡᠷ ᠥᠩᠭᠡᠢᠵᠦ ᠪᠠᠢᠪᠠ᠃
ᠮᠠᠷᠭᠠᠲᠤᠷ ᠠ᠋ᠴᠠ ᠨᠢ ᠬᠥᠬᠡ ᠲᠣᠭᠣᠰᠬᠠᠨ ᠬᠦᠷᠢᠶᠡ ᠲᠡᠢ ᠭᠦᠨ ᠣᠷᠳᠣᠨ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠰᠠᠨᠠᠭᠠ ᠨᠢ ᠠᠮᠠᠷᠠᠨ ᠵᠦᠭ ᠵᠦᠭ ᠲᠡᠭᠡᠨ ᠲᠠᠷᠬᠠᠵᠠᠭᠠᠪᠠ᠃ ᠥᠩᠭᠡᠷᠡᠬᠦ ᠰᠥᠨᠢ ᠶ᠋ᠢᠨ ᠬᠠᠷᠠᠭᠤᠯ ᠮᠠᠨᠠᠭᠠ ᠴᠦ᠍ ᠲᠠᠲᠠᠷᠠᠵᠤ᠂ ᠪᠠᠭᠠ ᠬᠠᠲᠤᠨ ᠤ᠋ ᠤᠷᠲᠤ ᠶ᠋ᠢ ᠰᠠᠬᠢᠵᠤ ᠮᠠᠨᠠᠭᠰᠠᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠳᠡᠭᠡᠷᠡ ᠡᠬᠡ ᠨᠢᠯᠬᠠ ᠶ᠋ᠢᠨ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠪᠠᠲᠤᠯᠠᠬᠤ ᠭᠡᠵᠦ ᠠᠷᠪᠠᠨ ᠴᠡᠷᠢᠭ ᠦ᠋ᠨ ᠡᠭᠡᠯᠵᠢ ᠵᠠᠰᠢᠶᠠᠨ ᠤ᠋ ᠴᠡᠷᠢᠭ ᠨᠡᠮᠡᠭᠰᠡᠨ ᠡᠴᠡ ᠪᠤᠰᠤᠳ ᠢ᠋ ᠨᠢ ᠴᠥᠮ ᠪᠤᠴᠠᠭᠠᠪᠠ᠃
ᠪᠠᠭᠠ ᠬᠠᠲᠤᠨ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠡᠢ ᠪᠣᠯᠤᠯᠠ ᠭᠡᠳᠡᠭ ᠰᠤᠷᠠᠭ ᠴᠢᠮᠡᠭᠡ ᠨᠢᠭᠡ ᠡᠴᠡ ᠠᠷᠪᠠ᠂ ᠠᠷᠪᠠ ᠠ᠋ᠴᠠ ᠵᠠᠭᠤ ᠳ᠋ᠤ᠌ ᠳᠠᠮ ᠳᠠᠮ ᠳᠠᠮᠵᠢᠨ ᠬᠣᠰᠢᠭᠤ ᠳᠠᠶᠠᠭᠠᠷ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ ᠪᠣᠯᠪᠠ᠃ ᠬᠠᠶᠠ ᠵᠠᠷᠢᠮ ᠨᠢ ᠪᠠᠰᠠ《 ᠨᠢᠭᠡ ᠨᠠᠰᠤᠨ ᠳ᠋ᠠᠭᠠᠨ ᠦᠷᠡ ᠬᠡᠦᠬᠡᠳ ᠦᠭᠡᠢ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠦᠬᠦᠬᠦ ᠶ᠋ᠢᠨ ᠡᠮᠦᠨᠡ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠪᠠᠢᠲᠠᠯᠠ ᠪᠠᠨ ᠬᠦᠦ ᠳᠦᠷᠦᠭᠦᠯᠴᠢᠬᠡᠯᠡ ᠭᠡᠵᠦ ᠤᠤ ᠲᠥᠷᠥᠬᠦ ᠪᠡᠷ ᠪᠣᠳᠣᠬᠤ ᠳ᠋ᠤ᠌ ᠠᠯᠳᠠᠭᠤᠯ ᠬᠦᠦ! ᠨᠢᠭᠡ ᠪᠣᠯ ᠥᠨᠥᠬᠢ ᠪᠠᠭᠠ ᠬᠠᠲᠤᠨ ᠤ᠋ ᠠᠩᠬᠠᠨ ᠤ᠋ ᠠᠮᠠᠷᠠᠭ ᠨᠢ ᠨᠢᠭᠤᠴᠠ ᠪᠠᠷ ᠬᠢᠵᠦ ᠣᠷᠬᠢᠭᠰᠠᠨ ᠪᠢᠵᠡ⁈》 ᠭᠡᠰᠡᠨ ᠴᠤᠤᠷᠬᠠᠯ ᠶᠠᠷᠢᠶᠠ ᠴᠦ᠍ ᠦᠨᠡᠨ ᠶᠦᠮ ᠰᠢᠭ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠶᠠᠷᠢᠭᠳᠠᠵᠤ ᠪᠠᠢᠯᠠ᠃
ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠶᠠᠭᠤ ᠴᠦ᠍ ᠭᠡᠰᠡᠨ ᠪᠠᠭᠠ ᠬᠠᠲᠤᠨ ᠢ᠋ ᠠᠮᠤᠷ ᠮᠡᠨᠳᠦ《ᠰᠠᠭᠤᠯᠭᠠᠵᠤ》 ᠡᠬᠡ ᠨᠢᠯᠬᠠ ᠶ᠋ᠢ ᠡᠷᠡᠭᠦᠯ ᠮᠡᠨᠳᠦ ᠪᠠᠲᠤᠯᠠᠭᠰᠠᠨ ᠳ᠋ᠠᠭᠠᠨ ᠳᠣᠲᠣᠷᠠ ᠨᠢ ᠣᠩᠭᠣᠢᠵᠤ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠠᠢᠪᠠ᠃ ᠳᠡᠷᠭᠡᠳᠡᠬᠢ ᠬᠥᠮᠦᠰ ᠨᠢ ᠴᠦ᠍ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠢ᠋ ᠪᠢᠰᠢᠷᠡᠨ ᠬᠦᠨᠳᠦᠯᠡᠵᠦ《 ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠭᠦᠯᠦᠭᠰᠡᠨ》 ᠶᠠᠪᠤᠳᠠᠯ ᠳ᠋ᠤ᠌ ᠠᠴᠢ ᠭᠠᠪᠢᠶᠠ ᠲᠠᠢ ᠭᠡᠵᠦ ᠢᠯᠡ ᠳᠠᠯᠳᠠ ᠮᠠᠭᠲᠠᠵᠤ ᠪᠠᠢᠯᠠ᠃ ᠭᠡᠬᠦ ᠳ᠋ᠦ᠍ ᠡᠭᠦᠨ ᠦ᠌ ᠳᠣᠲᠣᠷᠠ ᠤᠴᠢᠷ ᠪᠣᠢ᠃《 ᠦᠯᠢᠭᠡᠷ ᠦ᠋ᠨ ᠳᠣᠲᠣᠷᠠ ᠦᠯᠢᠭᠡᠷ ᠲᠡᠢ᠂ ᠦᠨᠢᠶᠡᠨ ᠳᠣᠲᠣᠷᠠ ᠲᠤᠭᠤᠯ ᠲᠠᠢ》 ᠭᠡᠳᠡᠭ ᠢ᠋ᠶ᠋ᠡᠷ ᠪᠠᠭᠠ ᠬᠠᠲᠤᠨ ᠢ᠋ ᠳᠠᠪᠬᠤᠷ ᠪᠣᠯᠤᠭᠰᠠᠨ ᠠ᠋ᠴᠠ ᠠᠪᠤᠭᠠᠳ ᠬᠥᠩᠭᠡᠵᠢᠬᠦ ᠬᠦᠷᠲᠡᠯᠡ ᠨᠠᠷᠢᠨ ᠤᠬᠠᠭᠠᠨ ᠬᠡᠷᠬᠢᠨ ᠭᠠᠷᠭᠠᠭᠰᠠᠨ ᠢ᠋ ᠴᠥᠭᠡᠪᠦᠷ ᠡᠷᠬᠢᠮ ᠬᠥᠮᠦᠰ ᠡᠴᠡ ᠥᠭᠡᠷᠡ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ ᠢᠯᠠᠩᠭᠤᠶᠠ ᠲᠢᠶᠠᠨ ᠣᠪᠣᠭᠲᠤ ᠳ᠋ᠧᠦᠹᠦ᠋ ᠬᠢᠳᠡᠭ ᠬᠢᠲᠠᠳ ᠠ᠋ᠴᠠ ᠡᠷᠭᠦᠭᠰᠡᠨ ᠬᠦᠦ ᠶ᠋ᠢᠨ ᠲᠤᠬᠠᠢ ᠨᠠᠷᠢᠨ ᠨᠢᠭᠤᠴᠠ ᠤᠴᠢᠷ ᠢ᠋ ᠨᠡᠩ ᠴᠦ᠍ ᠮᠡᠳᠡᠬᠦ ᠬᠥᠮᠦᠨ ᠠᠯᠠᠭᠠ᠃
ᠮᠠᠨᠤᠨᠪᠠᠳᠮᠠ ᠶ᠋ᠢᠨ ᠬᠦᠦ ᠴᠣᠭᠪᠠᠭᠠᠲᠤᠷ ᠪᠤᠭᠤᠲᠤ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠬᠠᠭᠤᠷᠠᠢ ᠬᠡᠦᠬᠡᠨ ᠲᠡᠢ ᠰᠠᠮᠠᠭᠤᠷᠠᠵᠤ ᠪᠠᠢᠭᠰᠠᠭᠠᠷ ᠥᠨᠥᠬᠢ ᠬᠡᠦᠬᠡᠨ ᠢ᠋ ᠳᠠᠪᠬᠤᠷ ᠪᠣᠯᠭᠠᠪᠠ᠃ ᠢᠩᠭᠢᠬᠦᠯᠡᠷ ᠥᠨᠥᠬᠢ ᠬᠡᠦᠬᠡᠨ ᠵᠠᠪᠠᠯ ᠴᠣᠭᠪᠠᠭᠠᠲᠤᠷ ᠲᠠᠢ ᠰᠠᠭᠤᠨᠠ ᠭᠡᠳ ᠵᠢᠭᠤᠷᠠᠯᠳᠤᠭᠠᠳ ᠲᠠᠯᠪᠢᠬᠤ ᠦᠭᠡᠢ᠃ ᠰᠠᠨᠠᠭᠠ ᠪᠠᠷ ᠨᠢ ᠶᠠᠪᠤᠬᠤ ᠦᠭᠡᠢ ᠪᠣᠯ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠳ᠋ᠤ᠌ ᠵᠠᠭᠠᠯᠳᠤᠵᠤ ᠴᠢᠮᠠᠶ᠋ᠢ ᠰᠤᠷᠭᠠᠭᠤᠯᠢ ᠠ᠋ᠴᠠ ᠬᠥᠭᠡᠭᠡᠵᠦ ᠱᠣᠷᠣᠩ ᠳ᠋ᠤ᠌ ᠬᠣᠷᠢᠵᠤ ᠮᠥᠩᠭᠥ ᠲᠥᠯᠥᠭᠦᠯᠦᠨᠡ᠁ ᠭᠡᠵᠦ ᠪᠠᠢᠨ ᠰᠠᠭᠤᠨ ᠠᠶᠤᠯᠭᠠᠳᠠᠭ ᠪᠠᠢᠯᠠ᠃ ᠡᠭᠦᠨ ᠢ᠋ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠰᠣᠨᠣᠰᠤᠭᠠᠳ ᠠᠭᠤᠷᠯᠠᠭᠰᠠᠨ ᠪᠣᠯᠪᠠᠴᠤ ᠦᠷᠡ ᠶ᠋ᠢᠨ ᠭᠠᠭᠴᠠ ᠡᠷᠬᠡ ᠳᠤᠷᠠ ᠪᠠᠷ ᠰᠤᠷᠤᠭᠰᠠᠨ ᠬᠦᠦ ᠪᠡᠨ ᠪᠤᠷᠤᠭᠤᠳᠬᠠᠭᠰᠠᠨ ᠦᠭᠡᠢ᠃ ᠨᠥᠭᠦᠭᠡ ᠬᠡᠦᠬᠡᠨ ᠳ᠋ᠦ᠍ ᠭᠤᠷᠪᠠᠨ ᠠᠭᠲᠠ᠂ ᠲᠠᠪᠤᠨ ᠦᠬᠡᠷ᠂ ᠬᠣᠶᠠᠷ ᠵᠠᠭᠤᠨ ᠯᠠᠩ ᠮᠥᠩᠭᠥ ᠲᠥᠯᠥᠵᠦ ᠲᠥᠷᠥᠭᠰᠡᠨ ᠬᠦᠦ ᠶ᠋ᠢ ᠨᠢ ᠡᠷᠭᠦᠵᠦ ᠠᠪᠤᠭᠠᠳ ᠠᠷᠠᠴᠢᠯᠠᠨ ᠥᠰᠬᠡᠨᠡ ᠭᠡᠵᠦ ᠠᠮᠠᠯᠳᠠᠪᠠ᠃ ᠢᠩᠭᠢᠭᠡᠳ ᠡᠢᠮᠦ ᠶᠡᠬᠡ ᠭᠠᠷᠤᠵᠠ ᠭᠠᠷᠭᠠᠨ ᠬᠡᠦᠬᠡᠳ ᠦᠷᠡᠴᠢᠯᠡᠬᠦ ᠭᠡᠳᠡᠭ ᠨᠢ ᠭᠡᠳ ᠲᠣᠯᠣᠭᠠᠢ ᠡᠪᠡᠳᠴᠦ ᠪᠠᠢᠵᠠᠢ᠃ ᠶᠠᠭᠤ ᠪᠠᠷ ᠶᠠᠳᠠᠭᠤᠷᠠᠭᠰᠠᠨ ᠴᠦ᠍ ᠤᠬᠠᠭᠠᠨ ᠰᠠᠮᠪᠠᠭᠠ ᠪᠠᠷ ᠶᠠᠳᠠᠭᠤᠷᠠᠵᠤ ᠦᠵᠡᠭᠡ ᠦᠭᠡᠢ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠬᠦᠩ ᠨᠣᠶᠠᠨ ᠡᠪᠡᠳᠴᠢᠯᠡᠵᠦ᠂ ᠪᠠᠭᠠ ᠬᠠᠲᠤᠨ ᠤᠷᠤᠭᠤ ᠴᠢᠷᠠᠢᠯᠠᠭᠰᠠᠨ ᠪᠠᠢᠳᠠᠯ ᠢ᠋ ᠰᠠᠨᠠᠵᠤ ᠣᠯᠤᠨ ᠪᠠᠭᠠ ᠬᠠᠲᠤᠨ ᠤ᠋ ᠬᠡᠪᠡᠯᠢ ᠶ᠋ᠢ ᠬᠥᠪᠥᠩ ᠢ᠋ᠶ᠋ᠡᠷ ᠪᠣᠭᠣᠵᠤ《 ᠬᠦᠦ ᠲᠥᠷᠥᠭᠦᠯᠬᠦ ᠤᠬᠠᠭᠠᠨ》 ᠢ᠋ ᠰᠤᠪᠢᠵᠤ ᠪᠢᠯᠡ᠃ ᠡᠢᠨ ᠬᠦ᠌ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠬᠠᠭᠤᠷᠠᠢ ᠬᠡᠦᠬᠡᠨ ᠦ᠌ ᠬᠥᠯ ᠬᠦᠨᠳᠦ ᠪᠣᠯᠤᠭᠰᠠᠨ ᠰᠠᠷᠠ ᠬᠣᠨᠣᠭ ᠢ᠋ ᠲᠣᠭᠠᠯᠠᠨ ᠮᠡᠳᠡᠵᠦ᠂ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠤᠬᠠᠭᠠᠯᠠᠭᠰᠠᠨ ᠨᠢ ᠡᠨᠡ ᠠᠵᠤᠭᠤ᠃ ᠪᠠᠭᠠ ᠬᠠᠲᠤᠨ ᠢ᠋ ᠬᠦᠦ ᠲᠥᠷᠥᠭᠦᠯᠬᠦ ᠶ᠋ᠢᠨ ᠴᠠᠭᠠᠨᠠᠬᠢ ᠤᠪᠠᠳᠢᠰ ᠨᠢ ᠪᠣᠯ ᠨᠡᠷᠡ ᠶ᠋ᠢ ᠨᠢ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠪᠡᠶᠡ ᠳᠡᠭᠡᠷᠡ ᠲᠣᠬᠣᠵᠤ ᠨᠢᠳᠡᠷ ᠢ᠋ ᠥᠪᠡᠷ ᠦ᠋ᠨ ᠤᠳᠤᠮ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠩᠬᠢᠨᠢ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢ ᠰᠠᠨᠠᠭᠰᠠᠨ ᠬᠣᠯᠠ ᠶ᠋ᠢᠨ ᠪᠣᠳᠣᠯ ᠳ᠋ᠤ᠌ ᠪᠠᠢᠵᠠᠢ᠃ ᠢᠩᠭᠢᠬᠦ ᠨᠢ ᠶᠣᠰᠣᠲᠠᠢ ᠯᠠ ᠨᠢᠭᠡ ᠬᠤᠷᠤᠭᠤ ᠪᠠᠷ ᠭᠤᠷᠪᠠᠨ ᠨᠣᠬᠠᠢ ᠶ᠋ᠢᠨ ᠪᠥᠭᠡᠰᠦ ᠳᠠᠷᠤᠭᠰᠠᠨ ᠭᠣᠢᠳᠠ ᠤᠬᠠᠭᠠᠨ ᠪᠠᠢᠪᠠ᠃ ᠲᠡᠭᠡᠭᠡᠳ ᠨᠠᠭᠠᠲᠠᠢ ᠴᠠᠭᠠᠲᠠᠢ ᠨᠠᠷᠢᠨ ᠶᠠᠪᠤᠳᠠᠯ ᠢ᠋ ᠬᠢᠯᠭᠠᠰᠤᠨ ᠲᠡᠳᠦᠢ ᠥ ᠰᠡᠪ ᠦᠭᠡᠢ ᠵᠣᠬᠢᠴᠠᠭᠤᠯᠵᠤ ᠰᠡᠳᠦᠭᠡᠳ᠂ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠬᠠᠭᠤᠷᠠᠢ ᠬᠡᠦᠬᠡᠨ ᠡᠴᠡ ᠲᠥᠷᠥᠭᠰᠡᠨ ᠬᠦᠦ ᠶ᠋ᠢ ᠲᠢᠶᠠᠨ ᠣᠪᠣᠭᠲᠠᠢ ᠳ᠋ᠧᠦᠹᠦ᠋ ᠬᠢᠳᠡᠭ ᠬᠢᠲᠠᠳ ᠤ᠋ᠨ ᠳ᠋ᠤ᠌ ᠲᠦᠷ ᠲᠡᠵᠢᠭᠡᠯᠭᠡᠵᠡᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠠᠨᠤᠨᠪᠠᠳᠮᠠ ᠬᠥᠭᠰᠢᠨ ᠴᠦ᠍ ᠡᠨᠡ ᠬᠡᠦᠬᠡᠨ ᠢ᠋ ᠬᠦᠦ ᠲᠦᠷᠦᠲᠦᠭᠡᠢ ᠭᠡᠵᠦ ᠵᠠᠯᠪᠠᠷᠢᠨ ᠪᠤᠷᠬᠠᠨ ᠭᠦᠩᠭᠠᠷᠠᠪᠠ ᠳ᠋ᠠᠭᠠᠨ ᠨᠢᠭᠡ ᠪᠢᠰᠢ ᠤᠳᠠᠭᠠ ᠮᠥᠷᠭᠥᠨ ᠭᠤᠶᠤᠪᠠ᠃ ᠠᠵᠠ ᠪᠤᠰᠤᠳᠠᠵᠤ ᠬᠡᠦᠬᠡᠨ ᠳᠦᠷᠦᠴᠢᠬᠡᠪᠡᠯ ᠥᠭᠡᠷᠡ ᠲᠣᠬᠢᠲᠠᠢ ᠠᠷᠭᠠ ᠪᠣᠳᠣᠬᠤ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃
ᠲᠡᠭᠦᠨ ᠦ᠌ ᠰᠠᠨᠠᠭᠰᠠᠨ ᠨᠢ ᠰᠠᠭᠠᠷ ᠦᠭᠡᠢ ᠪᠦᠲᠦᠭᠰᠡᠨ ᠳ᠋ᠦ᠍ ᠰᠠᠮᠠᠭᠠᠨ ᠤ᠋ ᠮᠠᠩᠨᠠᠢ ᠳ᠋ᠤ᠌ ᠪᠠᠶᠠᠷ ᠪᠠᠶᠠᠰᠤᠯ ᠪᠢᠯᠬᠠᠵᠤ《 ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ ᠶ᠋ᠢᠨ ᠪᠦᠲᠦᠭᠡᠬᠦ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ ᠲᠣᠮᠣ ᠶᠠᠪᠤᠳᠠᠯ ᠢ᠋ ᠵᠠᠪᠳᠤᠵᠤ ᠪᠦᠲᠦᠭᠡᠭᠰᠡᠨ᠁》 ᠭᠡᠵᠦ ᠰᠠᠨᠠᠨ ᠠᠯᠤᠰ ᠢ᠋ ᠰᠢᠷᠲᠡᠭᠰᠡᠨ ᠪᠣᠷᠣ ᠨᠢᠳᠦ ᠨᠢ ᠶᠡᠷᠦ ᠪᠤᠰᠤ ᠪᠠᠷ ᠭᠢᠯᠠᠯᠵᠠᠵᠤ ᠪᠠᠢᠪᠠ᠃