ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ < ᠵᠢᠷᠭᠤᠭᠠ> Хан мунын сүүрс < дээд > – Мөнх зохиоов ᠂ Дэд бодь – Хоёрдугаар бүлэг <6>
237ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ < ᠵᠢᠷᠭᠤᠭᠠ>
ᠤᠯᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠡᠷᠭᠢ ᠡᠴᠡ ᠪᠡᠨ ᠵᠠᠢᠷᠮᠠᠭᠯᠠᠨ ᠮᠡᠯᠮᠡᠯᠵᠡᠵᠦ ᠤᠷᠤᠰᠬᠠᠯ ᠰᠢᠷᠦᠭᠦᠨ ᠪᠠᠢᠳᠠᠭ ᠳᠣᠯᠭᠢᠶᠠ ᠨᠢ ᠲᠣᠭᠲᠠᠭᠤᠨ ᠠᠪᠤᠷᠢᠲᠠᠢ ᠲᠤᠨᠤᠷᠠᠵᠤ ᠬᠠᠷᠠᠭᠳᠠᠨ ᠪᠡᠶᠡ ᠬᠦᠨᠳᠦᠷᠡᠭᠰᠡᠨ ᠵᠢᠷᠮᠦᠰᠦᠨ ᠪᠦᠰᠡᠭᠦᠢ ᠶ᠋ᠢᠨ ᠴᠢᠷᠠᠢ ᠰᠢᠭ᠋ ᠡᠨᠡᠷᠢᠩᠭᠦᠢ ᠮᠦᠰᠢᠶᠡᠨᠡ᠃
ᠲᠡᠷᠲᠡᠭᠡ ᠦᠷᠭᠦᠯᠵᠢᠯᠡᠭᠰᠡᠨ ᠮᠤᠨᠠ ᠠᠭᠤᠯᠠ ᠬᠠᠯᠢᠮᠠᠭ ᠠ᠋ᠴᠠ ᠪᠠᠨ ᠪᠤᠭᠤᠷᠤᠯᠲᠤᠭᠰᠠᠨ ᠡᠪᠦᠭᠡᠨ ᠰᠢᠭ ᠬᠠᠷᠠᠭᠳᠠᠵᠤ᠂ ᠲᠡᠷᠡ ᠣᠯᠠᠨ ᠣᠷᠣᠢᠳ ᠤ᠋ᠨ ᠢ᠋ᠶ᠋ᠠᠨ ᠳᠤᠮᠳᠠ ᠣᠨᠴᠠᠭᠠᠢ ᠱᠣᠷᠣᠯᠵᠠᠭᠰᠠᠨ ᠰᠢᠷᠠ ᠣᠷᠣᠢ ᠶ᠋ᠢᠨ ᠱᠣᠪᠬᠣ ᠰᠠᠷᠢᠳᠠᠭ ᠮᠥᠩᠭᠥᠨ ᠳᠤᠭᠤᠯᠠᠭᠠ ᠲᠠᠢ ᠪᠠᠭᠠᠲᠤᠷ ᠵᠠᠩᠵᠤᠨ ᠰᠢᠭ᠋ ᠡᠪᠦᠯ ᠦ᠋ᠨ ᠡᠪᠦᠭᠡᠨ ᠨᠠᠷᠠᠨ ᠤ᠋ ᠵᠢᠯᠠᠭᠠ ᠮᠠᠭᠤᠲᠠᠢ ᠭᠡᠷᠡᠯ ᠳ᠋ᠦ᠍ ᠴᠦ᠍ ᠴᠣᠭ ᠲᠠᠢ ᠭᠢᠯᠠᠯᠵᠠᠬᠤ ᠨᠢ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠪᠦᠯ ᠦ᠋ᠨ ᠭᠠᠢᠬᠠᠮᠰᠢᠭ ᠢ᠋ ᠦᠵᠡᠭᠦᠯᠦᠨᠡ᠃
ᠤᠷᠠᠳ ᠤ᠋ᠨ ᠲᠠᠯᠠ᠂ ᠬᠠᠲᠤᠨ ᠲᠣᠬᠣᠢ ᠨᠡᠢᠳᠡᠮ ᠴᠠᠰᠤᠨ ᠳ᠋ᠤ᠌ ᠬᠤᠴᠢᠭᠳᠠᠵᠤ ᠴᠠᠭᠠᠨ ᠢᠰᠡᠭᠡᠢ ᠳᠡᠪᠢᠰᠦᠭᠰᠡᠨ ᠰᠢᠭ ᠨᠡᠯᠦᠭᠡᠷ ᠬᠠᠷᠠᠭᠳᠠᠵᠤ᠂ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠰᠬᠤ ᠴᠠᠰᠤᠨ ᠳ᠋ᠤ᠌ ᠬᠤᠷᠴᠠ ᠭᠡᠷᠡᠯ ᠨᠢᠳᠦ ᠬᠣᠷᠣᠰᠬᠠᠨ ᠬᠣᠯᠠ ᠶ᠋ᠢ ᠬᠠᠷᠠᠬᠤ ᠬᠠᠷᠠᠴᠠ ᠶ᠋ᠢ ᠮᠣᠬᠣᠭᠠᠬᠤ ᠠᠵᠢ᠃
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠣᠢᠲᠤ ᠵᠠᠬᠠ ᠪᠠᠷ ᠮᠠᠭᠤᠬᠠᠨ ᠬᠠᠷᠠᠤ ᠭᠠᠷᠴᠤ᠂ ᠮᠤᠷᠤᠢ ᠰᠠᠷᠤᠢ ᠲᠠᠬᠢᠷᠯᠠᠨ ᠰᠣᠩᠬᠤ ᠮᠣᠳᠣᠨ ᠬᠠᠰᠠᠭ ᠤ᠋ᠨ ᠡᠩᠬᠦᠯ ᠳᠤᠩᠬᠤᠯ ᠬᠠᠷᠭᠤᠢ ᠨᠣᠶᠠᠨ ᠰᠠᠩ ᠤ᠋ᠨ ᠲᠡᠨᠳᠡ ᠡᠴᠡ ᠡᠬᠢ ᠠᠪᠴᠤ ᠦᠵᠦᠭᠦᠷ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠷᠠᠭᠤᠨᠰᠢ ᠰᠤᠮᠤᠳᠠᠵᠠᠢ᠃ ᠡᠩᠬᠦᠯ ᠳᠤᠩᠬᠤᠯ ᠡᠨᠡ ᠬᠠᠷᠭᠤᠢ ᠪᠠᠷ ᠬᠠᠯᠲᠠᠷ ᠯᠠᠭᠤᠰᠠ ᠬᠥᠯᠦᠭᠰᠡᠨ ᠰᠡᠦᠬᠡ ᠲᠡᠷᠭᠡ᠂ ᠨᠡᠬᠡᠢ ᠳᠡᠪᠡᠯ ᠵᠤᠵᠠᠭᠠᠯᠠᠭᠰᠠᠨ ᠬᠣᠶᠠᠷ ᠮᠣᠷᠢᠲᠠᠨ ᠤ᠋ ᠬᠠᠮᠲᠤ ᠴᠠᠰᠤ ᠬᠢᠬᠤᠨᠠᠭᠤᠯᠤᠨ ᠵᠠᠮ ᠲᠣᠪᠴᠢᠯᠠᠨᠠ᠃ ᠡᠨᠡ ᠬᠣᠶᠠᠷ ᠤ᠋ᠨ ᠤᠨᠤᠭᠰᠠᠨ ᠪᠠᠷᠠᠭᠠᠨ ᠵᠢᠰᠦᠮ ᠦ᠋ᠨ ᠮᠣᠷᠢᠳ᠂ ᠬᠠᠰᠠᠭ ᠤ᠋ᠨ ᠠᠷᠠᠯ ᠳ᠋ᠠᠬᠢ ᠬᠠᠯᠲᠠᠷ ᠯᠠᠭᠤᠰᠠᠨ ᠤ᠋ ᠵᠢᠰᠦᠮ ᠬᠥᠯᠥᠰᠥᠨ ᠦ᠌ ᠠᠭᠤᠷ ᠴᠠᠩ ᠳ᠋ᠤ᠌ ᠴᠠᠭᠠᠨ ᠪᠤᠭᠤᠷᠤᠯ ᠪᠣᠯᠵᠤ ᠬᠤᠪᠢᠷᠠᠵᠠᠢ᠃ ᠡᠨᠡ ᠪᠣᠯ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠡᠴᠡ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠠᠬᠢᠶᠠ ᠪᠠᠷ ᠬᠠᠩᠬᠠᠲᠠᠢ ᠠ᠋ᠴᠠ ᠪᠠᠭᠠ ᠬᠠᠲᠤᠨ ᠢ᠋ ᠲᠤᠰᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠭᠠ ᠤᠨᠤᠭᠠ ᠬᠥᠰᠬᠡ ᠪᠢᠯᠡ᠃ ᠡᠪᠦᠯ ᠦ᠋ᠨ ᠴᠠᠷᠴᠠᠭᠰᠠᠨ ᠬᠦᠢᠲᠡᠨ ᠳ᠋ᠦ᠍ ᠵᠠᠮ ᠴᠠᠰᠤ ᠮᠥᠰᠥᠨ ᠬᠠᠯᠲᠤᠷᠢᠭᠠᠲᠠᠢ ᠪᠣᠯᠬᠣᠷ ᠥᠨᠵᠢᠭᠦᠲᠡ ᠶᠠᠪᠤᠬᠤ ᠵᠠᠮ ᠢ᠋ ᠭᠤᠷᠪᠠ ᠬᠣᠨᠣᠭ ᠠᠶᠠᠯᠠᠵᠤ ᠰᠠᠶᠢ ᠬᠦᠷᠴᠡᠢ᠃
ᠬᠣᠰᠢᠭᠤ ᠶᠠᠮᠤᠨ᠂ ᠨᠣᠶᠠᠨ ᠰᠠᠩ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠣᠲᠣᠷᠠ ᠪᠠᠨ ᠡᠪᠳᠡᠷᠡᠯᠴᠡᠵᠦ᠂ ᠬᠣᠭᠣᠷᠣᠨᠳᠣ ᠪᠠᠨ ᠫᠤᠤ ᠵᠡᠪᠰᠡᠭ ᠬᠥᠳᠡᠯᠭᠡᠨ ᠴᠢᠰᠤ ᠪᠠᠨ ᠦᠵᠡᠨ ᠠᠯᠠᠯᠴᠠᠵᠤ ᠤᠷᠠᠯᠴᠠᠭᠰᠠᠨ ᠦᠢᠮᠡᠭᠡᠨ ᠳᠡᠪᠵᠢᠶᠡᠨ ᠢ᠋ ᠦᠵᠡᠨ ᠶᠠᠳᠠᠭᠰᠠᠨ ᠪᠠᠭᠠ ᠬᠠᠲᠤᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠬᠠᠩᠬᠠᠲᠠᠢ ᠳ᠋ᠠᠭᠠᠨ ᠲᠥᠷᠬᠥᠮᠴᠢᠯᠡᠬᠦ ᠨᠡᠷᠡ ᠪᠡᠷ ᠲᠡᠢᠨ ᠦ᠌ ᠬᠥᠯ ᠡᠴᠡ ᠵᠠᠢᠯᠠᠵᠤ ᠬᠡᠳᠦᠨ ᠰᠠᠷᠠ ᠪᠣᠯᠵᠠᠢ᠃
ᠬᠥᠮᠦᠨ ᠠᠮᠢᠲᠠᠨ ᠤ᠋ ᠳᠡᠪᠵᠢᠶᠡᠨ ᠡᠴᠡ ᠵᠠᠢᠰᠬᠠᠨ ᠪᠠᠢᠭᠠ ᠬᠠᠩᠬᠠᠲᠠᠢ ᠶ᠋ᠢᠨ ᠪᠠᠷᠠᠭᠤᠨ ᠰᠢᠯᠢ ᠳ᠋ᠦ᠍ ᠲᠥᠷᠬᠥᠮᠴᠢᠯᠡᠵᠦ ᠰᠠᠭᠤᠭᠰᠠᠨ ᠪᠠᠭᠠ ᠬᠠᠲᠤᠨ ᠨᠢᠳᠦ ᠪᠠᠯᠠᠢ᠂ ᠴᠢᠬᠢ ᠳᠦᠯᠢ᠂ ᠰᠡᠳᠬᠢᠯ ᠡᠯᠡᠢ ᠪᠣᠯᠬᠣᠷ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠶᠠᠭᠤ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ! ᠦᠨᠡᠨ ᠳ᠋ᠡᠭᠡᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠣᠲᠣᠷᠠ ᠪᠠᠨ ᠮᠠᠭᠤᠳᠠᠯᠴᠠᠵᠤ᠂《 ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠭᠡᠭᠡᠨ ᠯᠠᠮᠠ᠂ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ᠁ ᠵᠡᠷᠭᠡ ᠬᠠᠷᠠ ᠰᠢᠷᠠ ᠶ᠋ᠢᠨ ᠬᠠᠲᠠᠭᠤ ᠵᠥᠭᠡᠯᠡᠨ ᠳᠠᠭᠠᠷᠢᠯᠲᠠ ᠥᠷᠨᠢᠨ ᠳᠡᠭᠳᠡᠵᠦ ᠣᠪᠣᠭᠠᠯᠠᠭᠠᠰᠤᠲᠠᠢ ᠠᠭᠠᠷᠤᠨ ᠲᠦᠯᠡᠭᠡᠨ ᠳ᠋ᠦ᠍ ᠭᠠᠯ ᠠᠪᠤᠯᠴᠠᠮᠠᠷ ᠪᠣᠯᠤᠭᠰᠠᠨ ᠵᠠᠩᠭᠢᠯᠠᠭᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠡᠷᠡ ᠨᠥᠬᠥᠷ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢ《 ᠳᠣᠲᠣᠷᠠ ᠵᠠᠭᠤᠷᠠ ᠪᠠᠨ ᠮᠠᠭᠤᠳᠠᠯᠴᠠᠬᠤ ᠶᠠᠭᠤ ᠬᠢᠬᠦ ᠪᠣᠢ! ᠡᠪ ᠵᠦᠢ ᠲᠡᠢ ᠡᠩᠬᠡ ᠠᠮᠤᠷ ᠣᠷᠣᠰᠢᠪᠠᠯ ᠵᠦᠢᠲᠡᠢ ᠪᠢᠵᠡ?》 ᠭᠡᠮᠡᠨ ᠢᠳᠬᠠᠭᠰᠠᠨ ᠪᠥᠭᠡᠳ ᠭᠠᠳᠠᠨᠠ ᠶ᠋ᠢᠨ ᠬᠠᠷᠠ ᠴᠡᠷᠢᠭ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠵᠤ ᠬᠠᠷᠢ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠷ ᠬᠠᠶᠠᠭᠠ ᠨᠢᠭᠡᠲᠡᠨ ᠢ᠋ᠶ᠋ᠡᠨ ᠤᠮᠠᠯᠬᠤ ᠭᠡᠬᠦ ᠳ᠋ᠦ᠍ᠨᠢ ᠬᠡᠴᠢᠨᠡᠭᠡᠨ ᠤᠳᠠᠭᠠ ᠦᠨᠡᠨ ᠰᠡᠳᠬᠢᠯ ᠡᠴᠡ ᠪᠡᠨ ᠲᠡᠭᠦᠨ ᠢ᠋《 ᠪᠠᠢᠴᠢᠬᠠ》 ᠭᠡᠵᠦ ᠭᠤᠶᠤᠪᠠ ᠳᠠ⁈ ᠲᠡᠭᠡᠬᠦ ᠳ᠋ᠦ᠍ ᠠᠭᠤᠷ ᠬᠣᠷᠣᠨ ᠳ᠋ᠠᠭᠠᠨ ᠡᠯᠢᠭᠡ ᠨᠢ ᠰᠢᠲᠠᠵᠤ ᠨᠢᠳᠦ ᠨᠢ ᠣᠯᠢᠢᠭᠰᠠᠨ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠠᠵᠢ ᠳᠣᠲᠣᠷᠠ ᠪᠠᠨ《 ᠡᠮᠡ ᠶ᠋ᠢᠨ ᠦᠭᠡ ᠵᠠᠢ ᠡᠵᠡᠯᠡᠪᠡᠯ ᠢᠩᠭᠡᠨ ᠤᠷᠤᠭᠤᠯ ᠳ᠋ᠤᠨᠢ ᠰᠠᠬᠠᠯ ᠤᠷᠭᠤᠵᠤ᠂ ᠡᠯᠵᠢᠭᠡᠨ ᠦ᠌ ᠳᠤᠬᠤᠨ ᠳ᠋ᠤ᠌ ᠡᠪᠡᠷ ᠤᠷᠭᠤᠪᠠᠯ ᠡᠨᠡ ᠬᠣᠷᠸᠠ ᠳ᠋ᠤ᠌ ᠢᠨᠢᠶᠡᠳᠦᠮ ᠱᠣᠭ ᠡᠭᠦᠰᠦᠶᠦ》 ᠭᠡᠳᠡᠭ ᠪᠣᠯᠪᠠᠴᠤ ᠭᠠᠳᠠᠨᠠ ᠪᠠᠨ ᠲᠡᠭᠡᠵᠦ ᠦᠯᠦ ᠬᠡᠯᠡᠨᠡ᠃ ᠪᠠᠭᠠ ᠬᠠᠲᠤᠨ ᠤ᠋ ᠢᠳᠬᠠᠭᠰᠠᠨ ᠦᠭᠡ ᠲᠡᠭᠦᠨ ᠦ᠌ ᠵᠡᠭᠦᠨ ᠴᠢᠬᠢ ᠪᠡᠷ ᠣᠷᠣᠭᠠᠳ ᠪᠠᠷᠠᠭᠤᠨ ᠴᠢᠬᠢ ᠪᠡᠷ ᠰᠠᠯᠬᠢᠳᠠᠵᠤ ᠠᠷᠢᠯᠤᠨᠠ᠃ ᠢᠩᠭᠢᠬᠦᠯᠡᠷ ᠪᠠᠭᠠ ᠬᠠᠲᠤᠨ ᠬᠦᠩ ᠨᠣᠶᠠᠨ ᠢ᠋ ᠰᠠᠢᠨ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠰᠠᠨᠠᠮᠵᠢ ᠠᠪᠳᠠᠭ ᠦᠭᠡᠢ᠂ ᠬᠠᠷᠢᠨ ᠰᠠᠪᠠᠭᠠ ᠦᠭᠡᠢ ᠬᠤᠴᠠᠳᠠᠭ ᠨᠣᠬᠠᠢ ᠶ᠋ᠢᠨ ᠳᠠᠭᠤ ᠶ᠋ᠢ ᠠᠨᠳᠠᠬᠤ ᠦᠭᠡᠢ ᠴᠢᠩᠨᠠᠳᠠᠭ ᠰᠣᠨᠢᠨ ᠶᠤᠮ ᠠ᠋! ᠭᠡᠵᠦ ᠪᠣᠳᠣᠳᠠᠭ ᠪᠣᠯᠵᠠᠢ᠃ ᠢᠩᠭᠢᠳᠡᠭ ᠦ᠋ᠨ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠳᠣᠣᠷᠠ ᠬᠤᠷᠤᠭᠤ ᠬᠢᠮᠤᠰᠤᠨ ᠤ᠋ ᠣᠷᠣᠨ ᠳ᠋ᠤ᠌ ᠵᠢᠷᠣᠭᠠᠯᠠᠳᠠᠭ ᠬᠥᠮᠦᠰ ᠢ᠋ ᠲᠠᠩᠳᠠ ᠠᠮᠠᠨ ᠳ᠋ᠠᠭᠠᠨ ᠳᠠᠷᠢ ᠡᠮᠬᠦᠵᠦ᠂ ᠰᠤᠭᠤᠨ ᠳ᠋ᠠᠭᠠᠨ ᠬᠢᠲᠤᠭᠠ ᠬᠠᠪᠴᠢᠭᠤᠯᠤᠭᠰᠠᠨ ᠥᠳᠥᠭᠡᠭᠴᠢ ᠬᠣᠩᠰᠢᠶᠠᠷ ᠲᠠᠢ ᠪᠣᠯᠬᠣᠷ ᠬᠦᠩ ᠨᠣᠶᠠᠨ ᠤ᠋ ᠴᠢᠬᠢᠨ ᠬᠤᠯᠤᠭᠤ ᠳ᠋ᠤ᠌ ᠬᠠᠮᠪᠤ ᠯᠠᠮᠠ ᠶ᠋ᠢᠨ ᠭᠠᠤᠯᠢᠨ ᠬᠣᠩᠬᠣ ᠵᠡᠭᠦᠯᠭᠡᠨ ᠴᠢᠯᠥᠭᠡ ᠵᠠᠪ ᠦᠭᠡᠢ ᠭᠣᠩᠰᠢᠳᠠᠭ ᠤ᠋ᠨ ᠭᠠᠢ᠃ ᠲᠡᠭᠦᠨ ᠦ᠌ ᠤᠯᠠᠮ ᠳ᠋ᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳᠣᠲᠣᠷᠠ ᠪᠠᠨ ᠥᠰᠢᠶᠡ ᠵᠠᠩᠭᠢᠳᠴᠤ᠂ ᠬᠦᠩ ᠨᠣᠶᠠᠨ᠂ ᠠᠪᠠᠭᠠ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠭᠤᠷᠪᠠᠨ ᠦᠶᠡ ᠶ᠋ᠢ ᠬᠦᠢᠰᠦ ᠲᠡᠮᠲᠡᠷᠢᠭᠰᠡᠨ ᠭᠤᠨᠢᠭᠲᠤ ᠵᠦᠴᠦᠭᠡ ᠲᠣᠭᠯᠠᠪᠠ᠃ ᠲᠡᠢᠨ ᠦ᠌ ᠬᠥᠯ᠂ ᠳᠡᠭᠡᠷᠡᠮ ᠦ᠋ᠨ ᠰᠠᠪᠠᠷ ᠲᠤ ᠰᠦᠮᠡ ᠬᠡᠢᠳ ᠭᠠᠯᠳᠠᠭᠳᠠᠨ ᠰᠦᠢᠳᠴᠦ᠂ ᠮᠠᠯᠴᠢᠨ ᠠᠷᠠᠳ ᠲᠣᠨᠣᠭᠳᠠᠨ ᠬᠢᠬᠠᠭᠳᠠᠵᠤ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠪᠳᠡᠭᠳᠡᠨ ᠲᠠᠯᠬᠢᠭᠳᠠᠵᠤ᠂ ᠤᠷᠠᠳ ᠨᠤᠲᠤᠭ ᠶᠠᠭ ᠯᠠ ᠡᠬᠡ ᠪᠡᠨ ᠬᠢᠲᠤᠭᠠᠯᠠᠭᠤᠯᠵᠤ᠂ ᠡᠷᠡ ᠪᠡᠨ ᠠᠯᠠᠭᠤᠯᠤᠨ ᠦᠷᠡ ᠪᠡᠨ ᠠᠯᠳᠠᠭᠰᠠᠨ ᠥᠨᠥᠴᠢᠨ ᠪᠡᠯᠪᠡᠰᠦᠨ ᠪᠦᠰᠡᠭᠦᠢ ᠰᠢᠭ ᠵᠣᠪᠠᠨᠢᠯᠲᠠᠢ ᠬᠣᠴᠣᠷᠵᠠᠢ᠃
ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠬᠠᠢᠷᠠᠲᠠᠢ ᠴᠡᠴᠡᠭ ᠬᠠᠲᠤᠨ ᠢ᠋ᠶ᠋ᠠᠨ ᠠᠯᠳᠠᠵᠤ᠂ ᠭᠤᠨᠢᠷᠠᠨ ᠭᠤᠳᠤᠷᠠᠭᠰᠠᠨ ᠢ᠋ ᠶᠠᠷᠢᠬᠤ ᠦᠭᠡᠢ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ ᠮᠡᠳᠡᠷᠡᠯ ᠨᠢ ᠭᠡᠮᠲᠦᠵᠦ ᠬᠦᠨᠳᠦ ᠡᠪᠡᠳᠴᠢᠯᠡᠭᠡᠳ ᠵᠠᠰᠠᠭ ᠮᠡᠳᠡᠵᠦ ᠴᠢᠳᠠᠯ ᠦᠭᠡᠢ ᠪᠣᠯᠵᠠᠢ᠃
ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠬᠦᠩ ᠨᠣᠶᠠᠨ ᠤ᠋ ᠪᠠᠳᠮᠠᠷᠠᠭᠠ ᠤᠯᠠᠭᠠᠨ ᠵᠢᠩᠰᠡᠨ ᠳ᠋ᠦ᠍ ᠭᠣᠷᠢᠯᠠᠭᠰᠠᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠵᠢᠴᠢ ᠲᠡᠭᠦᠨ ᠦ᠌ ᠠᠴᠢ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠠᠯᠠᠭᠳᠠᠵᠤ᠂ ᠳᠣᠲᠣᠭᠠᠳᠤ ᠶ᠋ᠢᠨ ᠰᠠᠮᠠᠭᠤᠷᠠᠯ ᠤ᠋ᠨ ᠳᠠᠷᠢ ᠠᠳᠬᠤᠭᠰᠠᠨ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠡᠯᠳᠡᠩᠭᠡ ᠪᠠ ᠵᠣᠳᠪᠠ ᠮᠡᠢᠷᠡᠨ ᠨᠠᠷ ᠠᠭᠤᠯᠠ ᠶ᠋ᠢᠨ ᠠᠷᠤ ᠲᠡᠢᠰᠢ ᠳᠤᠲᠠᠭᠠᠨ ᠵᠢᠯᠢᠢᠵᠦ᠂ ᠬᠦᠩ ᠨᠣᠶᠠᠨ ᠤ᠋ ᠬᠠᠢᠷᠠᠲᠠᠢ ᠬᠠᠲᠤᠨ ᠤ᠋ ᠰᠡᠳᠬᠢᠯ ᠢ᠋ ᠭᠡᠵᠢᠭᠡᠳᠡᠵᠦ ᠪᠠᠢᠭᠰᠠᠨ ᠮᠠᠨᠴᠤᠷᠭᠠ ᠴᠤ᠌ ᠵᠠᠪᠰᠢᠨ ᠳᠤᠲᠠᠭᠠᠭᠰᠠᠨ ᠪᠣᠯᠬᠣᠷ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠳᠣᠲᠣᠷᠠ ᠵᠠᠭᠤᠷᠠ ᠶ᠋ᠢᠨ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠲᠦᠷ ᠨᠠᠮᠳᠠᠵᠤ᠂ ᠠᠮᠤᠷ ᠵᠢᠮᠦᠷ ᠪᠣᠯᠪᠠ᠃
ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠣᠷᠣᠮᠠᠭᠴᠠ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠪᠤᠭᠤᠲᠤ ᠳ᠋ᠠᠬᠢ ᠬᠥᠬᠡ ᠲᠣᠭᠣᠰᠬᠠᠨ ᠭᠦᠨ ᠤᠷᠲᠤ ᠳ᠋ᠠᠭᠠᠨ ᠰᠠᠭᠤᠵᠤ ᠨᠢᠭᠡ ᠲᠠᠯᠠ ᠪᠠᠷ ᠡᠮᠴᠢ ᠳᠣᠮᠴᠢ ᠵᠠᠯᠠᠨ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠰᠤᠪᠢᠯᠠᠵᠤ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ《 ᠠᠯᠲᠠᠨᠭᠡᠷᠡᠯ》 ᠤᠩᠰᠢᠵᠤ ᠠᠳᠠ ᠴᠢᠳᠬᠥᠷ ᠢ᠋ ᠠᠷᠢᠯᠭᠠᠨ ᠠᠮᠢ ᠰᠦᠨᠡᠰᠦ ᠪᠡᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠡᠯᠳᠡᠪ ᠠᠷᠭᠠ ᠶ᠋ᠢ ᠠᠪᠴᠤ ᠪᠠᠢᠪᠠ᠃
ᠪᠠᠭᠠ ᠬᠠᠲᠤᠨ ᠢ᠋ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠰᠠᠢᠬᠠᠨ ᠤᠭᠲᠤᠭᠰᠠᠨ ᠤ᠋ ᠲᠡᠳᠦᠢᠬᠡᠨ ᠤᠷᠮᠠ ᠮᠠᠭᠤᠲᠠᠢ ᠪᠠᠢᠯᠠ᠃ ᠳᠡᠮᠡᠢ ᠯᠡ ᠨᠣᠮ ᠰᠤᠳᠤᠷ ᠤᠷᠪᠠᠭᠤᠯᠬᠤ ᠰᠢᠤᠬᠠᠨ ᠶᠠᠩᠵᠤᠯᠠᠵᠤ ᠡᠰᠡᠪᠡᠰᠦ ᠭᠠᠷ ᠰᠠᠯᠠᠭᠠᠪᠴᠢᠯᠠᠨ ᠬᠡᠪᠲᠡᠬᠦ ᠰᠢᠦᠬᠡᠨ ᠡᠲᠡᠭᠡᠳ ᠵᠠᠩ ᠲᠠᠢ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠬᠦᠩ ᠨᠣᠶᠠᠨ᠂ ᠨᠢᠳᠦ ᠨᠢ ᠰᠢᠷᠭᠢᠨ ᠬᠣᠩᠬᠣᠢᠵᠤ᠂ ᠴᠢᠷᠠᠢ ᠨᠢ ᠬᠤᠵᠢᠢᠨ ᠰᠢᠷᠠᠯᠠᠭᠠᠳ ᠪᠦᠳᠦᠭᠦᠨ ᠡᠪᠡᠰᠦᠨ ᠳ᠋ᠦ᠍ ᠪᠦᠳᠦᠷᠢᠵᠦ ᠨᠠᠷᠢᠨ ᠡᠪᠡᠰᠦᠨ ᠳ᠋ᠦ᠍ ᠨᠠᠢᠭᠤᠬᠤ ᠡᠪᠡᠳᠴᠢᠲᠡᠢ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠢ᠋ ᠬᠠᠷᠠᠭᠠᠳ ᠪᠠᠭᠠ ᠬᠠᠲᠤᠨ ᠵᠣᠪᠠᠨᠢᠯᠲᠠᠢ ᠪᠠᠷ ᠰᠡᠭᠦᠷᠡᠰᠦ ᠠᠯᠳᠠᠪᠠ᠃ ᠲᠡᠭᠡᠬᠦ ᠳ᠋ᠦ᠍《 ᠮᠥᠨ ᠢᠩᠭᠢᠭᠡᠳ ᠭᠤᠲᠤᠯ ᠤ᠋ᠨ ᠤᠯᠠ ᠳᠡᠭᠡᠷᠡ ᠪᠡᠨ ᠲᠡᠭᠰᠢᠬᠡᠨ ᠵᠣᠭᠰᠣᠵᠤ ᠴᠢᠳᠠᠬᠤ ᠦᠭᠡᠢ ᠬᠠᠵᠠᠢᠵᠤ ᠤᠨᠠᠭᠰᠠᠭᠠᠷ ᠴᠤ᠌ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠳ᠋ᠦ᠍ ᠪᠠᠰᠠ ᠨᠢᠭᠡ ᠵᠠᠰᠠᠭ ᠬᠦᠩ ᠦ᠋ᠨ ᠡᠷᠬᠡ ᠶ᠋ᠢᠨ ᠲᠡᠮᠡᠴᠡᠭᠡᠨ ᠡᠭᠦᠰᠴᠦ ᠮᠡᠳᠡᠨᠡ᠁ ᠭᠡᠰᠡᠨ ᠪᠣᠳᠣᠯ ᠲᠥᠷᠥᠭᠳᠡᠵᠡᠢ᠃ ᠡᠷᠬᠡ ᠮᠠᠲᠠᠯ ᠤ᠋ᠨ ᠲᠠᠮᠪᠠᠷᠠᠯ᠂ ᠡᠪᠳᠡᠷᠬᠡᠢ ᠴᠤᠴᠠᠷᠬᠠᠢ ᠬᠣᠰᠢᠭᠤ ᠶᠠᠮᠤᠨ᠂ ᠡᠯᠳᠡᠩ ᠴᠢᠯᠳᠡᠩ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠬᠦᠢᠲᠡᠨ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠣᠨᠳᠦᠷᠢᠬᠤ ᠡᠮᠡ ᠬᠥᠮᠦᠨ ᠦ᠌ ᠬᠤᠪᠢ ᠲᠠᠪᠢᠯᠠᠩ ᠶᠠᠭᠤᠲᠠᠢ ᠭᠤᠨᠢᠶᠠᠯᠲᠠᠢ ᠠᠵᠢ᠃ ᠡᠯᠳᠡᠪ ᠪᠣᠳᠣᠯ ᠤ᠋ᠨ ᠮᠠᠨᠠᠨ ᠳ᠋ᠤ᠌ ᠵᠦᠭ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ ᠲᠠᠮᠤᠯᠠᠭᠳᠠᠵᠤ ᠰᠥᠨᠢ ᠰᠥᠨᠢ ᠨᠣᠢᠷ ᠦᠭᠡᠢ ᠬᠡᠪᠲᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠳ᠋ᠤᠨᠢ ᠤᠨᠲᠠᠭᠠ ᠬᠦᠩ ᠨᠣᠶᠠᠨ ᠬᠠᠷᠠ ᠳᠠᠷᠤᠵᠤ᠄《 ᠬᠤᠷᠳᠤᠨ ᠠ᠋! ᠬᠥᠮᠦᠨ ᠪᠠᠢᠨᠠ ᠤᠤ? ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠨᠠᠮᠠᠶ᠋ᠢ ᠭᠢᠨᠵᠢᠯᠡᠬᠦ ᠪᠡᠷ ᠢᠷᠡᠯᠡ᠁》 ᠭᠡᠵᠦ ᠪᠠᠢᠨ ᠪᠠᠢᠨ ᠨᠣᠢᠷ ᠠ᠋ᠴᠠ ᠪᠠᠨ ᠰᠣᠴᠢᠨ ᠰᠡᠷᠡᠵᠦ ᠡᠷᠦᠢ ᠬᠤᠷᠤᠢ ᠦᠭᠡᠢ ᠣᠷᠢᠯᠠᠬᠤ ᠨᠢ ᠳᠠᠩᠴᠤ ᠠᠢᠳᠠᠰ ᠳᠦᠷᠦᠭᠦᠯᠦᠮᠡ ᠪᠠᠢᠯᠠ! ᠡᠢᠮᠦ ᠶᠠᠩᠵᠤ ᠪᠠᠷ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠯ ᠦᠭᠡᠢ ᠥᠪᠡᠷ ᠦ᠋ᠨ ᠬᠢᠨᠢ ᠪᠡᠶᠡ ᠮᠠᠬᠠᠪᠣᠳ ᠴᠤ᠌ ᠰᠤᠯᠳᠠᠢᠵᠤ᠂ ᠮᠢᠬᠠ ᠮᠠᠷᠢᠶᠠ ᠨᠢ ᠰᠢᠭᠤᠷᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠪᠠ᠃
ᠣᠢᠷᠠ ᠵᠠᠭᠤᠷᠠ ᠣᠷᠳᠣᠰ᠂ ᠠᠯᠠᠱᠠ᠂ ᠴᠠᠬᠠᠷ ᠤ᠋ᠨ ᠨᠡᠷᠡ ᠲᠡᠢ ᠯᠠᠮᠠ ᠬᠠᠷᠠ᠂ ᠡᠮᠴᠢ ᠳᠣᠮᠴᠢ ᠵᠠᠯᠠᠵᠤ ᠡᠮ ᠳᠠᠩ ᠤᠤᠭᠤᠯᠭᠠᠨ ᠡᠯᠳᠡᠪ ᠠᠷᠭᠠ ᠰᠢᠷᠬᠡ ᠠᠪᠤᠨ ᠰᠡᠭᠦᠯ ᠳ᠋ᠦ᠍ᠨᠢ ᠬᠥᠬᠡᠨᠠᠭᠤᠷ ᠲᠠᠩᠭᠤᠳ ᠲᠤ ᠬᠥᠮᠦᠨ ᠲᠣᠮᠢᠯᠠᠵᠤ ᠡᠮ ᠲᠣᠮ ᠵᠠᠯᠠᠷᠠ ᠶᠠᠪᠤᠭᠤᠯᠤᠭᠰᠠᠨ ᠴᠤ᠌ ᠳᠡᠮᠡᠢ ᠢᠯᠠᠷᠢᠰᠢᠬᠤ ᠰᠢᠨᠵᠢ ᠦᠭᠡᠢ ᠪᠠᠢᠯᠠ᠃ ᠡᠭᠦᠨ ᠦ᠌ ᠬᠣᠭᠣᠷᠣᠨᠳᠣᠭᠤᠷ ᠰᠠᠢᠨ ᠰᠠᠨᠠᠭᠠ ᠲᠠᠢ ᠮᠠᠨᠤᠪᠠᠳᠮᠠ ᠬᠥᠭᠰᠢᠨ ᠠᠭᠤᠯᠠᠨ ᠠᠭᠤᠢ ᠶ᠋ᠢᠨ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠳ᠋ᠤ᠌ ᠬᠥᠮᠦᠨ ᠣᠴᠢᠭᠤᠯᠵᠤ ᠮᠡᠷᠭᠡᠯᠡᠭᠦᠯᠦᠭᠰᠡᠨ ᠳ᠋ᠦ᠍ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ᠄《ᠲᠤᠰᠠ ᠦᠭᠡᠢ ᠠ᠋᠂ ᠲᠤᠰᠠ ᠦᠭᠡᠢ᠃ ᠶᠠᠪᠤ᠂ ᠶᠠᠪᠤᠵᠠᠭᠠ! ᠰᠢᠷᠠᠪᠳᠣᠷᠵᠢ ᠤᠳᠠᠬᠤ ᠦᠭᠡᠢ ᠪᠤᠷᠬᠠᠨ ᠪᠣᠯᠤᠨᠠ᠃ ᠲᠡᠷᠡ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠰᠦᠨᠡᠰᠦ ᠨᠢ ᠣᠷᠢᠶᠠᠭᠰᠠᠨ ᠬᠡᠴᠡᠭᠦᠦ ᠲᠣᠯᠣᠭᠠᠢ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ ᠰᠣᠴᠢᠩᠭᠤᠲᠠ ᠰᠦᠨᠡᠰᠦ ᠨᠢ ᠶᠠᠪᠤᠵᠠᠢ᠃ ᠰᠦᠨᠡᠰᠦ ᠶ᠋ᠢ ᠨᠢ ᠬᠤᠷᠳᠤᠨ ᠳᠠᠭᠤᠳᠠᠭᠤᠯ! ᠥᠨᠳᠥᠷ ᠨᠠᠰᠤᠲᠠᠢ ᠪᠤᠶᠠᠨ ᠲᠠᠢ ᠭᠡᠯᠦᠩ ᠯᠠᠮᠠ ᠪᠠᠷ ᠰᠠᠢᠨ ᠭᠤᠶᠤᠵᠤ ᠡᠪᠲᠡᠢ ᠬᠠᠭᠤᠷᠠᠢᠯᠠᠵᠤ ᠳᠠᠭᠤᠳᠠᠬᠤ ᠦᠭᠡᠢ ᠪᠣᠯ ᠰᠦᠨᠡᠰᠦ ᠨᠢ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠬᠦᠴᠢᠷᠳᠡᠨᠡ ᠪᠣᠢ᠁ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠭᠤᠳᠠᠵᠤ ᠢᠷᠡᠬᠦ ᠦᠭᠡᠢ ᠪᠣᠯ ᠨᠢᠭᠡ ᠨᠠᠰᠤ ᠠᠷᠪᠠᠨ ᠭᠤᠷᠪᠠ ᠲᠡᠭᠡᠭᠡᠳ ᠲᠠᠢᠯᠬᠤ ᠨᠢ ᠲᠡᠷᠡ ᠠ᠋!》 ᠭᠡᠵᠦ ᠭᠡᠨᠡ᠃ ᠮᠡᠷᠭᠡᠨ ᠴᠠᠭᠠᠨ ᠯᠠᠮᠠᠬᠠᠢ ᠢᠩᠭᠢᠵᠦ ᠮᠡᠷᠭᠡᠯᠡᠭᠰᠡᠨ ᠢ᠋ ᠦᠨᠡᠨ ᠮᠥᠨ ᠢ᠋ᠶ᠋ᠡᠷ ᠨᠢ ᠶᠠᠭᠠᠬᠢᠵᠤ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠤ ᠪᠣᠯᠬᠤ ᠪᠢᠯᠡ? ᠵᠥᠪᠬᠡᠨ《 ᠰᠦᠨᠡᠰᠦ ᠨᠢ ᠵᠠᠢᠯᠠᠴᠢᠬᠠᠵᠠᠢ ᠠ᠋᠂ ᠰᠦᠨᠡᠰᠦ ᠪᠡᠨ ᠳᠠᠭᠤᠳᠠᠭᠤᠯ ᠭᠡᠵᠦ ᠪᠠᠢᠨᠠ ᠭᠡᠵᠦ ᠡᠶᠡᠷᠡᠭᠦᠯᠦᠨ ᠬᠡᠯᠡᠵᠦ ᠪᠠᠭᠠ ᠬᠠᠲᠤᠨ ᠪᠣᠯᠤᠨ ᠬᠦᠩ ᠨᠣᠶᠠᠨ ᠤ᠋ ᠵᠥᠪᠰᠢᠶᠡᠷᠡᠯ ᠢ᠋ ᠣᠯᠵᠤ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠭᠤᠳᠠᠬᠤ ᠪᠠᠷ ᠪᠣᠯᠪᠠ᠃
ᠪᠠᠳᠭᠡᠷ ᠰᠦᠮᠡ ᠶ᠋ᠢᠨ ᠨᠠᠶᠠᠨ ᠭᠤᠷᠪᠠᠲᠠᠢ ᠯᠤᠪᠰᠠᠩᠴᠣᠢᠷᠣᠭ ᠭᠡᠯᠦᠩ ᠢ᠋ ᠵᠠᠯᠠᠵᠤ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠳᠠᠭᠤᠳᠠᠬᠤ ᠪᠠᠷ ᠶᠠᠭᠤᠮᠠ ᠬᠡᠦᠮᠡ ᠲᠥᠪᠬᠢᠨᠡᠭᠦᠯᠪᠡ᠃ ᠦᠵᠦᠮ᠂ ᠰᠢᠬᠢᠷ᠂ ᠪᠤᠷᠠᠮ᠂ ᠪᠣᠣᠪᠣ ᠵᠡᠷᠭᠡ ᠲᠠᠪᠤᠨ ᠠᠮᠲᠠᠲᠠᠨ ᠪᠠ ᠣᠭ᠌ᠶᠤ ᠱ᠌ᠢᠷᠦ᠂ ᠰᠤᠪᠤᠳ ᠲᠠᠨᠠ᠂ ᠠᠯᠲᠠ ᠮᠥᠩᠭᠥᠨ ᠪᠦᠯᠡᠵᠡᠭ ᠵᠡᠷᠭᠡ ᠶ᠋ᠢ ᠮᠣᠳᠣᠨ ᠫᠢᠯᠠ ᠳ᠋ᠤ᠌ ᠲᠠᠯᠪᠢᠵᠤ ᠵᠠᠯᠠᠭᠰᠠᠨ ᠰᠦᠨᠡᠰᠦ ᠰᠠᠭᠠᠲᠠᠭᠤᠯᠤᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠪᠡᠯᠡᠳᠵᠡᠢ᠃ ᠲᠠᠪᠤᠨ ᠠᠮᠲᠠᠲᠠᠨ ᠢ᠋ᠶ᠋ᠠᠨ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ ᠲᠠᠢ ᠲᠠᠯᠬᠠᠯᠠᠨ ᠪᠠᠯᠪᠠᠵᠤ ᠰᠢᠷᠠ ᠲᠣᠰᠣᠨ ᠳ᠋ᠤ᠌ ᠨᠤᠬᠤᠵᠤ ᠰᠦᠨᠡᠰᠦ ᠪᠡᠨ ᠭᠡᠭᠡᠭᠰᠡᠨ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠳ᠋ᠤ᠌ ᠥᠷᠯᠥᠭᠡ ᠡᠷᠲᠡ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠭᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠢᠭᠠᠯ ᠵᠢᠭᠠᠯ ᠢᠳᠡᠭᠦᠯᠬᠦ ᠶᠦᠮ ᠭᠡᠨᠡ᠃ ᠭᠡᠯᠦᠩ ᠯᠠᠮᠠ ᠬᠦᠩ ᠨᠣᠶᠠᠨ ᠤ᠋ ᠢᠪᠡᠭᠡᠯ ᠡᠳᠦᠷ ᠢ᠋ ᠰᠣᠩᠭᠣᠵᠤ ᠤᠷᠢᠳ ᠢ᠋ᠶ᠋ᠠᠷ ᠠᠯᠲᠠ ᠮᠥᠩᠭᠥᠨ ᠪᠦᠯᠡᠵᠡᠭ ᠢ᠋ ᠴᠡᠩᠨᠡᠭᠦᠷ ᠲᠦ᠍ ᠲᠠᠯᠪᠢᠨ ᠴᠡᠩᠨᠡᠵᠦ ᠬᠡᠳᠦᠢ ᠴᠢᠨ ᠪᠠᠢᠬᠤ ᠶ᠋ᠢ ᠮᠡᠳᠡᠭᠡᠳ ᠥᠷᠯᠥᠭᠡ ᠡᠷᠲᠡ ᠲᠠᠤᠯᠠᠢ ᠴᠠᠭ ᠲᠤ ᠡᠭᠦᠳᠡ ᠵᠠᠪᠰᠠᠷᠯᠠᠨ《ᠰᠢᠷᠠᠪᠳᠣᠷᠵᠢ ᠠ᠋! ᠢᠷᠡ ᠠ᠋! ᠢᠷᠡ! ᠬᠠᠷᠢᠵᠤ ᠢᠷᠡ᠁》 ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠡᠩᠬᠦᠷᠡᠢᠯᠡᠨ ᠳᠠᠭᠤᠳᠠᠵᠤ《ᠬᠤᠷᠤᠢ᠂ ᠬᠤᠷᠤᠢ!》 ᠭᠡᠵᠦ ᠡᠷᠳᠡᠨᠢᠰ ᠦ᠋ᠨ ᠵᠦᠢᠯ ᠲᠠᠯᠪᠢᠭᠰᠠᠨ ᠫᠢᠯᠠ ᠪᠠᠷ ᠢ᠋ᠶ᠋ᠠᠨ ᠬᠤᠷᠤᠢᠯᠠᠵᠤ ᠲᠥᠭᠡᠷᠢᠭᠰᠡᠨ ᠰᠦᠨᠡᠰᠦ ᠶ᠋ᠢ ᠳᠠᠯᠠᠯᠤᠨ ᠳᠠᠭᠤᠳᠠᠨᠠ᠃ ᠲᠡᠭᠡᠭᠡᠳ ᠲᠠᠪᠤᠨ ᠠᠮᠲᠠᠲᠠᠨ ᠬᠣᠯᠢᠭᠰᠠᠨ ᠢᠳᠡᠭᠡᠨ ᠢ᠋ ᠬᠦᠩ ᠨᠣᠶᠠᠨ ᠳ᠋ᠤ᠌ ᠠᠮᠰᠠᠭᠤᠯᠵᠤ ᠰᠦᠨᠡᠰᠦ ᠶ᠋ᠢ ᠨᠢ ᠬᠠᠭᠤᠷᠴᠤ ᠪᠡᠶᠡ ᠳ᠋ᠦ᠍ᠨᠢ ᠣᠷᠣᠰᠢᠭᠤᠯᠬᠤ ᠭᠡᠨᠡ᠃ ᠢᠩᠭᠢᠭᠡᠳ ᠥᠨᠥᠬᠢ ᠰᠦᠨᠡᠰᠦ ᠳᠠᠭᠤᠳᠠᠬᠤ ᠠ᠋ᠴᠠ ᠡᠮᠦᠨᠡ ᠴᠡᠩᠨᠡᠭᠰᠡᠨ ᠠᠯᠲᠠ ᠮᠥᠩᠭᠥᠨ ᠪᠦᠯᠡᠵᠡᠭ ᠢ᠋ᠶ᠋ᠡᠨ ᠳᠠᠬᠢᠨᠲᠠ ᠴᠡᠩᠨᠡᠵᠦ ᠠᠩᠬᠠᠨ ᠤ᠋ ᠴᠡᠩᠨᠡᠭᠰᠡᠨ ᠬᠡᠮᠵᠢᠶᠡ ᠲᠡᠢ ᠰᠠᠴᠠᠭᠤ ᠡᠰᠡᠬᠦ ᠶ᠋ᠢ ᠢᠯᠭᠠᠵᠤ᠂ ᠰᠠᠴᠠᠭᠤ ᠪᠣᠯᠪᠠᠯ ᠰᠦᠨᠡᠰᠦ ᠨᠢ ᠢᠷᠡᠴᠢᠬᠡᠭᠰᠡᠨ ᠦ᠌ ᠲᠡᠮᠳᠡᠭ᠂ ᠬᠠᠷᠢᠨ ᠠᠯᠢ ᠲᠠᠢᠰᠢ ᠪᠠᠨ ᠬᠠᠵᠠᠢᠵᠤ ᠪᠠᠢᠪᠠᠯ ᠰᠦᠨᠡᠰᠦ ᠨᠢ ᠢᠷᠡᠭᠡ ᠦᠭᠡᠢ ᠶ᠋ᠢᠨ ᠲᠡᠮᠳᠡᠭ ᠪᠣᠯᠵᠤ ᠳᠠᠬᠢᠨᠲᠠ ᠡᠨᠡ ᠮᠡᠲᠦ ᠪᠡᠷ ᠭᠤᠷᠪᠠᠨ ᠥᠷᠯᠥᠭᠡ ᠰᠦᠨᠡᠰᠦ ᠶ᠋ᠢ ᠡᠨᠡᠷᠢᠨ ᠳᠠᠭᠤᠳᠠᠨᠠ᠃
ᠡᠢᠨ ᠬᠦ᠌ ᠭᠤᠷᠪᠠᠨ ᠥᠷᠯᠥᠭᠡ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠭᠤᠳᠠᠵᠤ ᠥᠨᠥᠬᠢ ᠡᠷᠳᠡᠨᠢᠰ ᠦ᠋ᠨ ᠵᠦᠢᠯ ᠢ᠋ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠤ᠋ ᠪᠡᠶᠡ ᠳ᠋ᠦ᠍ ᠵᠡᠭᠦᠯᠭᠡᠵᠦ ᠭᠤᠷᠪᠠᠨ ᠡᠳᠦᠷ ᠭᠡᠷ ᠡᠴᠡ ᠭᠠᠷᠬᠤ ᠶ᠋ᠢ ᠲᠠᠰᠤ ᠬᠣᠷᠢᠨᠠ᠃ ᠨᠡᠩ ᠴᠤ᠌ ᠭᠣᠣ ᠭᠠᠩᠭᠠ ᠲᠤᠭᠤᠯᠤᠨ ᠶᠠᠪᠤᠬᠤ ᠶ᠋ᠢ ᠲᠠᠰᠤ ᠴᠡᠭᠡᠷᠯᠡ! ᠭᠡᠵᠦ ᠭᠡᠯᠦᠩ ᠯᠠᠮᠠ ᠨᠣᠮᠯᠠᠨ ᠵᠡᠬᠢᠵᠡᠢ᠃ ᠰᠠᠨᠠᠭᠠᠨ ᠤ᠋ ᠴᠤ᠌ ᠶᠤᠮ ᠤᠤ ᠰᠡᠵᠢᠭ ᠦ᠋ᠨ ᠴᠤ᠌ ᠶᠤᠮ ᠤᠤ᠂ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠬᠡᠳᠦᠨ ᠡᠳᠦᠷ ᠢᠳᠡᠵᠦ ᠤᠤᠭᠤᠬᠤ ᠨᠢ ᠰᠠᠢᠵᠢᠷᠠᠨ ᠤᠨᠲᠠᠬᠤ ᠨᠢ ᠴᠦ᠍ ᠬᠠᠩᠭᠢ ᠪᠣᠯᠵᠤ ᠰᠥᠨᠢ ᠳ᠋ᠡᠭᠡᠨ ᠬᠠᠷᠠ ᠳᠠᠷᠤᠵᠤ ᠰᠣᠴᠢᠨ ᠪᠠᠷᠬᠢᠷᠠᠳᠠᠭ ᠨᠢ ᠠᠶᠠᠳᠠᠭᠰᠠᠨ ᠰᠢᠭ᠋ ᠪᠣᠯᠪᠠ᠃
ᠦᠨᠡᠨ ᠳ᠋ᠡᠭᠡᠨ ᠪᠠᠳᠭᠡᠷ ᠦ᠋ᠨ ᠭᠡᠯᠦᠩ ᠯᠠᠮᠠ ᠯᠤᠪᠰᠠᠩᠴᠣᠢᠷᠣᠭ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠴᠡᠩᠨᠡᠭᠦᠷ ᠦ᠋ᠨ ᠠᠯᠲᠠ ᠮᠥᠩᠭᠥᠨ ᠪᠦᠯᠡᠵᠡᠭ ᠦ᠋ᠨ ᠴᠢᠨ ᠦ᠌ ᠲᠣᠭᠠ ᠨᠢ ᠴᠢᠮᠠᠯᠠᠩᠬᠠᠢ ᠪᠠᠢᠭᠰᠠᠨ ᠢ᠋ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃ ᠡᠨᠡ ᠨᠢ ᠮᠠᠭᠤ ᠶᠣᠷᠣ ᠶ᠋ᠢᠨ ᠪᠡᠯᠭᠡ ᠪᠠᠢᠵᠠᠢ᠃ ᠲᠡᠷᠡ ᠪᠡᠷ ᠪᠠᠷᠢᠴᠠ ᠪᠡᠯᠡᠭ ᠢ᠋ᠶ᠋ᠡᠨ ᠠᠪᠳᠠᠭ ᠢ᠋ᠶ᠋ᠠᠨ ᠠᠪᠴᠤ ᠪᠠᠳᠭᠡᠷ ᠰᠦᠮᠡ ᠳ᠋ᠡᠭᠡᠨ ᠪᠤᠴᠠᠵᠠᠢ᠃
ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠪᠥᠭᠰᠡ ᠶ᠋ᠢ ᠲᠣᠭᠣᠷᠢᠭᠠᠳ ᠭᠣᠳᠣᠭᠣᠨᠠᠳᠠᠭ ᠬᠥᠮᠦᠰ ᠵᠦᠭ ᠵᠦᠭ ᠲᠡᠭᠡᠨ ᠶᠠᠭᠠᠷᠠᠯᠳᠤᠵᠤ ᠠᠯᠢ ᠨᠢᠭᠡ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠬᠦᠩ ᠨᠣᠶᠠᠨ ᠳ᠋ᠤ᠌ ᠨᠢᠭᠡ ᠲᠤᠰᠠ ᠳᠠᠮ ᠪᠣᠯᠬᠤ ᠰᠠᠨ ᠭᠡᠵᠦ ᠶᠠᠪᠤᠳᠠᠯ ᠬᠢᠳᠡᠯ ᠢ᠋ᠶ᠋ᠡᠨ ᠬᠢᠴᠢᠶᠡᠨ ᠪᠣᠯᠭᠣᠮᠵᠢᠯᠠᠨᠠ᠃
ᠢᠩᠭᠢ ᠴᠢᠩᠭᠢᠭᠰᠡᠭᠡᠷ ᠪᠠᠢᠭᠠᠳ ᠬᠥᠬᠥᠭᠡ ᠰᠠᠷᠠ ᠰᠢᠪᠲᠤᠷᠠᠵᠤ ᠪᠤᠭᠤᠲᠤ ᠪᠠᠯᠭᠠᠰᠤᠨ ᠳ᠋ᠤ᠌ ᠴᠠᠭᠠᠯᠠᠬᠤ ᠥᠩᠭᠡ ᠮᠡᠳᠡᠭᠳᠡᠪᠡ᠃ ᠭᠤᠳᠤᠮᠵᠢᠨ ᠤ᠋ ᠪᠠᠭᠯᠠᠭᠠ ᠮᠠᠢᠮᠠᠢ ᠬᠦᠢᠲᠡᠨ ᠡᠴᠡ ᠬᠠᠯᠠᠰᠢᠷᠠᠬᠤ ᠦᠭᠡᠢ ᠶᠠᠩ ᠳ᠋ᠠᠩ ᠲᠠᠢ ᠬᠠᠰᠬᠢᠷᠤᠯᠳᠤᠨᠠ᠃ ᠶᠣᠣᠲᠠᠩ ᠰᠢᠬᠢᠷ᠂ ᠤᠯᠠᠭᠠᠨ ᠴᠢᠪᠠᠭᠠ᠂ ᠵᠠᠭᠠᠷ ᠴᠢᠪᠠᠭᠠ᠂ ᠬᠤᠰᠢᠭᠠ᠂ ᠬᠣᠷᠭᠣᠯ ᠴᠢᠪᠠᠭᠠ᠂ ᠦᠵᠦᠮ᠂ ᠨᠠᠷᠢᠨ ᠪᠣᠭᠣᠷᠰᠣᠭ ᠵᠡᠷᠭᠡ ᠪᠠᠷᠠᠭᠠ ᠨᠢᠳᠦ ᠰᠡᠳᠬᠢᠯ ᠢ᠋ ᠬᠣᠷᠣᠬᠠᠢᠲᠤᠭᠤᠯᠤᠮᠠ ᠡᠩᠨᠡᠷᠡᠵᠦ ᠬᠣᠪᠳᠣᠭ ᠨᠢᠭᠡ ᠶ᠋ᠢᠨ ᠬᠢᠨᠢ ᠰᠢᠯᠦᠰᠦ ᠶ᠋ᠢ ᠨᠢ ᠵᠠᠯᠭᠢᠭᠤᠯᠵᠤ ᠪᠠᠢᠯᠠ᠃ ᠴᠠᠭᠠᠭᠤᠷ ᠨᠢ ᠪᠠᠰᠠ ᠴᠠᠭᠠᠰᠤᠨ ᠫᠤᠤᠵᠢᠩ᠂ ᠵᠡᠯᠡ ᠫᠤᠤᠵᠢᠩ᠂ ᠮᠣᠣᠲᠤᠤ ᠴᠠᠭᠠᠰᠤ᠂ ᠴᠣᠩᠬᠣᠨ ᠤ᠋ ᠬᠠᠢᠴᠢᠯᠠᠭᠤᠷ ᠴᠡᠴᠡᠭ᠂ ᠤᠯᠠᠭᠠᠨ ᠨᠣᠭᠣᠭᠠᠨ ᠰᠢᠷᠠ ᠥᠩᠭᠡ ᠶ᠋ᠢᠨ ᠴᠠᠭᠠᠰᠤ ᠪᠤᠶᠤ ᠭᠡᠷ ᠪᠠᠢᠰᠢᠩ ᠤ᠋ᠨ ᠳᠣᠲᠣᠷᠠ ᠬᠡᠷᠡᠮ ᠬᠠᠨᠠ ᠴᠠᠢᠯᠭᠠᠨ ᠱᠤᠸᠠᠰᠠᠳᠠᠬᠤ ᠨᠢᠳᠤᠷᠭᠠᠨ ᠴᠢᠨᠡᠭᠡ ᠪᠥᠭᠡᠮ ᠪᠥᠭᠡᠮ ᠴᠠᠭᠠᠨ ᠰᠢᠷᠣᠢ ᠵᠡᠷᠭᠡ ᠪᠠᠷᠠᠭᠠ ᠨᠤᠭᠤᠳ ᠪᠣᠷᠣᠯᠠᠭᠤᠯᠭᠠ ᠰᠠᠢᠲᠠᠢ ᠪᠠᠢᠯᠠ᠃ ᠪᠤᠭᠤᠲᠤ ᠶ᠋ᠢᠨ ᠵᠠᠳᠠᠭᠠᠢ ᠵᠠᠬᠠ ᠳᠡᠭᠡᠷᠡ ᠲᠠᠤᠯᠠᠢ ᠶ᠋ᠢᠨ ᠴᠢᠰᠤᠨ ᠡᠪᠡᠷ᠂ ᠲᠠᠷᠪᠠᠭᠠ ᠶ᠋ᠢᠨ ᠪᠢᠲᠡᠭᠦᠦ ᠲᠤᠭᠤᠷᠠᠢ ᠠ᠋ᠴᠠ ᠣᠨᠳᠣᠣ ᠶᠠᠭᠤᠮᠠ ᠪᠦᠬᠦᠨ ᠨᠢᠳᠦ ᠡᠷᠢᠶᠡᠯᠵᠡᠨ ᠳᠡᠯᠭᠡᠭᠳᠡᠵᠦ ᠨᠠᠷᠢᠨ ᠴᠠᠬᠢᠷ ᠳᠠᠭᠤ ᠲᠠᠢ ᠮᠠᠢᠮᠠᠢ ᠶ᠋ᠢᠨ ᠵᠠᠩᠭᠤᠢᠳᠠ ᠶ᠋ᠢᠨ ᠴᠢᠷᠠᠢ ᠭᠠᠤᠯᠢᠨ ᠵᠣᠭᠣᠰ ᠢ᠋ᠶ᠋ᠠᠷ ᠢᠨᠢᠶᠡᠵᠦ᠂ ᠮᠥᠩᠭᠥᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠬᠠᠨᠢᠶᠠᠯᠭᠠᠵᠤ ᠪᠠᠢᠯᠠ᠁
ᠵᠡᠭᠡᠯᠢ ᠭᠤᠲᠤᠮᠵᠢ ᠶᠢᠨ ᠬᠠᠮᠢᠭᠠ ᠨᠢᠭᠡ ᠭᠠᠵᠠᠷ ᠠᠴᠠ ᠴᠤ᠌ ᠬᠠᠭᠠᠷᠢᠮᠠᠯ ᠪᠣᠣᠪᠣ᠂ ᠪᠤᠷᠴᠠᠭ ᠬᠠᠪᠴᠢᠭᠤᠯᠤᠭᠰᠠᠨ ᠰᠢᠯᠦᠬᠡᠢ ᠪᠣᠭᠣᠷᠰᠣᠭ᠂ ᠤᠯᠠᠭᠠᠨ ᠲᠣᠯᠪᠣᠲᠤ ᠴᠠᠪ ᠴᠠᠭᠠᠨ ᠮᠠᠨᠲᠠᠤ ᠁ ᠵᠡᠷᠭᠡ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠶᠠᠩᠵᠣ ᠶᠢᠨ ᠬᠡᠩᠰᠢᠭᠦᠦ ᠬᠠᠩᠬᠤᠯᠵᠤ ᠬᠥᠮᠥᠨ ᠢ ᠬᠣᠪᠳᠣᠭ ᠬᠦᠷᠦᠭᠦᠯᠦᠮᠡ ᠠᠵᠢ᠃
ᠬᠦᠩ ᠨᠣᠶᠠᠨ ᠤ᠋ ᠬᠥᠬᠡ ᠲᠣᠭᠣᠰᠬᠠᠨ ᠭᠦᠨ ᠤᠷᠲᠤ ᠶ᠋ᠢᠨ ᠳᠥᠷᠪᠡᠯᠵᠢᠨ ᠬᠠᠰᠢᠶᠠᠲᠦ ᠬᠦᠷᠢᠶᠡᠨ ᠦ᠌ ᠥᠩᠭᠡ ᠴᠦ᠍ ᠣᠨᠳᠣᠣ ᠪᠣᠯᠵᠤ ᠭᠣᠣᠯ ᠭᠡᠷ᠂ ᠭᠡᠷ ᠦ᠋ᠨ ᠴᠣᠩᠬᠣᠨ ᠤ᠋ ᠨᠢᠳᠦ ᠴᠤ᠌ ᠥᠩᠭᠡ ᠶ᠋ᠢᠨ ᠴᠠᠭᠠᠰᠤ ᠪᠠᠷ ᠴᠢᠮᠡᠭᠯᠡᠭᠳᠡᠵᠦ᠂ ᠳᠣᠲᠣᠨᠠ ᠭᠠᠳᠠᠨᠠ ᠭᠦᠶᠦᠯᠳᠦᠭᠰᠡᠨ ᠭᠠᠯ ᠲᠣᠭᠣᠭᠠᠨ ᠤ᠋ ᠬᠥᠮᠦᠰ ᠴᠤ᠌ ᠪᠡᠶᠡ ᠡᠴᠡ ᠪᠡᠨ ᠱᠠᠩᠳᠠᠭᠤᠨ ᠦᠨᠦᠷᠲᠦᠭᠦᠯᠦᠨ ᠵᠢᠯ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠶᠠᠭᠤᠮᠠ ᠬᠡᠦᠮᠡ ᠪᠡᠯᠡᠳᠬᠡᠵᠦ ᠬᠥᠯ ᠪᠣᠯᠤᠨᠠ᠃
ᠡᠳᠦᠷ ᠡᠳᠦᠷ ᠴᠠᠳᠬᠤ ᠦᠭᠡᠢ᠂ ᠦᠬᠡᠷ ᠠᠯᠠᠪᠠᠯ ᠨᠢᠭᠡ ᠴᠠᠳᠳᠠᠭ᠂ ᠴᠠᠭ ᠴᠠᠭ ᠴᠠᠳᠬᠤ ᠦᠭᠡᠢ᠂ ᠴᠠᠭᠠᠨ ᠰᠠᠷᠠ ᠪᠣᠯᠪᠠᠯ ᠴᠠᠳᠳᠠᠭ ᠠᠯᠪᠠᠲᠤ ᠪᠣᠭᠣᠯ᠂ ᠵᠠᠷᠤᠴᠠ ᠰᠢᠪᠡᠭᠴᠢᠨ ᠭᠡᠬᠦ ᠮᠡᠲᠦ ᠶ᠋ᠢᠨ ᠬᠥᠮᠦᠰ ᠴᠤ᠌ ᠵᠢᠯ ᠳ᠋ᠦ᠍ ᠭᠠᠭᠴᠠᠬᠠᠨ ᠡᠭᠡᠯᠵᠢᠯᠡᠵᠦ ᠢᠷᠡᠬᠦ ᠴᠠᠳᠬᠤᠯᠠᠩ ᠪᠤᠶᠠᠨᠲᠤ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠶ᠋ᠢ ᠬᠥᠭᠰᠡᠨ ᠬᠦᠯᠢᠶᠡᠵᠦ ᠬᠣᠷᠮᠣᠢ ᠳ᠋ᠤᠨᠢ ᠬᠡᠢ ᠣᠷᠣᠵᠤ ᠰᠤᠭᠤᠨ ᠳ᠋ᠤᠨᠢ ᠵᠢᠭᠦᠷ ᠤᠷᠭᠤᠭᠰᠠᠨ ᠰᠢᠭ᠋ ᠬᠥᠯ ᠭᠠᠷ ᠨᠢ ᠬᠥᠩᠭᠡᠷᠡᠨ ᠬᠢᠳᠡᠯ ᠪᠠᠷᠢᠳᠠᠯ ᠢ᠋ᠶ᠋ᠠᠨ ᠱᠠᠯᠠᠪᠳᠠᠵᠤ ᠴᠢᠷᠠᠢ ᠳ᠋ᠠᠭᠠᠨ ᠢᠨᠢᠶᠡᠳᠦ ᠲᠣᠭᠯᠠᠭᠤᠯᠤᠨ ᠮᠤᠩᠭᠠᠨᠢᠵᠠᠭᠠᠨᠠ᠃
ᠢᠷᠡᠬᠦ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠶᠠ ᠬᠥᠭᠵᠢᠮ ᠪᠣᠯᠵᠤ ᠴᠢᠪᠬᠠᠳᠠᠭᠰᠠᠨ ᠡᠨᠡ ᠪᠦᠬᠦᠨ ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠲᠠᠭᠠᠯᠠᠭᠳᠠᠭᠠ ᠦᠭᠡᠢ᠃ ᠨᠠᠷᠠ ᠤᠷᠭᠤᠬᠤ ᠠ᠋ᠴᠠ ᠨᠠᠷᠠ ᠤᠨᠠᠲᠠᠯᠠ ᠭᠠᠷᠴᠤ ᠣᠷᠣᠬᠤ᠂ ᠢᠳᠡᠵᠦ ᠤᠤᠭᠤᠬᠤ ᠬᠡᠪᠲᠡᠬᠦ᠁ ᠡᠭᠡᠯᠵᠢᠯᠡᠨ ᠡᠷᠭᠢᠬᠦ ᠣᠷᠴᠢᠯ ᠳ᠋ᠤ᠌ ᠪᠡᠶᠡ ᠰᠡᠳᠬᠢᠯ ᠠᠶᠠᠯᠳᠠᠨ ᠳᠠᠭᠠᠳᠠᠭ ᠪᠣᠯᠪᠠᠴᠤ ᠡᠭᠦᠨ ᠳᠣᠲᠣᠷᠠ ᠠ᠋ᠴᠠ ᠠᠮᠲᠠ ᠰᠢᠮᠳᠠ᠂ ᠵᠢᠷᠭᠠᠯ ᠴᠡᠩᠭᠡᠯ ᠢ᠋ ᠰᠢᠷᠭᠠᠭᠠᠬᠤ ᠰᠡᠳᠬᠢᠯ ᠦᠭᠡᠢ᠂ ᠬᠠᠷᠠᠩᠭᠤᠢ ᠬᠥᠰᠢᠭᠡ ᠬᠠᠭᠠᠭᠳᠠᠪᠠᠯ ᠵᠣᠪᠬᠢ ᠪᠠᠨ ᠬᠠᠮᠬᠢᠵᠤ ᠬᠡᠪᠲᠡᠨ ᠭᠡᠭᠡᠨ ᠬᠥᠰᠢᠭᠡ ᠢᠷᠠᠭᠳᠠᠪᠠᠯ ᠨᠢᠳᠦ ᠪᠡᠨ ᠨᠡᠭᠡᠭᠡᠭᠡᠳ ᠪᠣᠰᠬᠤ ᠪᠠᠢᠭᠠᠯᠢ ᠶ᠋ᠢᠨ ᠡᠨᠡ ᠬᠦ᠌ ᠵᠢᠮᠡ ᠶ᠋ᠢ ᠬᠡᠨ ᠴᠤ᠌ ᠡᠪᠳᠡᠵᠦ ᠦᠯᠦ ᠴᠢᠳᠠᠬᠤ ᠬᠠᠲᠠᠭᠤ ᠶᠣᠰᠣᠨ ᠳ᠋ᠤ᠌ ᠠᠷᠭᠠ ᠦᠭᠡᠢ ᠪᠡᠶᠡ ᠪᠡᠨ ᠬᠠᠭᠤᠷᠠᠢᠯᠠᠬᠤ ᠲᠡᠳᠦᠢ ᠡᠳᠦᠷ ᠬᠣᠨᠣᠭ ᠢ᠋ ᠡᠯᠡᠭᠡᠵᠦ ᠪᠠᠢᠯᠠ᠃ ᠡᠨᠡ ᠬᠦ᠌ ᠴᠢᠮᠪᠠᠢ ᠠᠪᠤᠷᠢᠲᠠᠢ ᠪᠠᠭᠠ ᠬᠠᠲᠤᠨ ᠤ᠋ ᠴᠢᠷᠠᠢ ᠥᠭᠡᠳᠡ ᠪᠠᠷᠤᠭ ᠤ᠋ᠨ ᠬᠥᠮᠦᠰ ᠠᠰ ᠬᠠᠷᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠳᠠᠯᠳᠢᠷᠠᠳᠠᠭ ᠠ᠋ᠴᠠ ᠬᠣᠨᠣᠭ ᠢ᠋ ᠰᠡᠳᠬᠢᠯ ᠦ᠋ᠨ ᠰᠢᠨᠠᠯᠤᠯ ᠢ᠋ ᠬᠡᠨ ᠬᠥᠮᠦᠨ ᠴᠤ᠌ ᠦᠯᠦ ᠮᠡᠳᠡᠨᠡ᠃
ᠦᠵᠡᠲᠡᠯᠡ ᠬᠦᠩ ᠨᠣᠶᠠᠨ ᠤ᠋ ᠪᠡᠶᠡ ᠯᠠᠭᠱᠠᠨ ᠡᠳᠦᠷ ᠡᠴᠡ ᠡᠳᠦᠷ ᠮᠠᠭᠤᠳᠠᠵᠤ᠂ ᠰᠦᠭ ᠰᠦᠯᠳᠡ ᠨᠢ ᠳᠣᠷᠣᠢᠲᠠᠨ ᠲᠠᠮᠢᠷ ᠲᠡᠩᠬᠡᠭᠡ ᠠᠯᠳᠠᠭᠰᠠᠨ ᠠ᠋ᠴᠠ ᠲᠡᠭᠦᠨ ᠦ᠌ ᠨᠠᠰᠤᠨ ᠲᠣᠭᠠ ᠭᠦᠢᠴᠡᠵᠦ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠮᠠᠭᠤ ᠢᠷᠣᠠ ᠶ᠋ᠢᠨ ᠰᠤᠪᠢᠨ ᠦᠯᠦ ᠮᠡᠳᠡᠭ ᠢ᠋ᠶ᠋ᠡᠷ ᠬᠥᠮᠥᠷᠢᠵᠦ ᠠᠢᠰᠤᠢ!
《ᠬᠦᠩ ᠨᠣᠶᠠᠨ ᠤ᠋ ᠣᠵᠢᠭ ᠡᠪᠡᠳᠴᠢᠨ ᠨᠢ ᠢᠯᠠᠷᠢᠰᠢᠳᠡᠭ ᠪᠢᠯᠡ ᠤᠤ ᠳᠠ? ᠡᠭᠦᠨ ᠦ᠌ ᠡᠰᠡᠷᠭᠦ ᠪᠡᠷ ᠲᠠᠭᠠᠯᠠᠯ ᠲᠡᠭᠦᠰᠪᠡᠯ ᠬᠡᠨ ᠬᠥᠮᠦᠨ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠵᠤ ᠲᠥᠷᠥ ᠪᠠᠷᠢᠳᠠᠭ ᠪᠢᠯᠡ? ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠳᠡᠭ ᠦᠭᠡᠢ ᠶ᠋ᠢᠨ ᠤᠷᠰᠢᠭ ᠭᠡᠵᠦ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠤᠨ ᠬᠥᠮᠦᠨ ᠦ᠌ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ ᠳ᠋ᠡᠭᠡᠨ ᠣᠰᠣᠯ ᠲᠠᠢ᠁ ᠡᠮᠡ ᠪᠦᠰᠡᠭᠦᠢ ᠬᠥᠮᠦᠨ ᠡᠨᠡ ᠬᠦ᠌ ᠵᠠᠭᠤᠨ ᠵᠠᠳᠠᠭᠠᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠵᠢᠯᠣᠭᠣ ᠶ᠋ᠢ ᠶᠠᠭᠠᠬᠢᠵᠤ᠁ ᠦᠭᠡᠢ ᠠ᠋᠂ ᠮᠠᠨᠳᠤᠭᠤᠯᠢ ᠬᠠᠭᠠᠨ ᠠ᠋ᠴᠠ ᠬᠣᠢᠰᠢ ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠲᠤᠨ ᠬᠡᠷᠬᠢᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠵᠤ᠂ ᠵᠠᠳᠠᠷᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠨᠢᠭᠡᠳᠬᠡᠵᠦ ᠴᠢᠳᠠᠪᠠ⁈ ᠨᠠᠳᠠ ᠲᠡᠢᠮᠦ ᠰᠥᠰᠥ ᠵᠣᠷᠢᠭ ᠵᠠᠶᠠᠭᠠᠭᠠ ᠦᠭᠡᠢ ᠭᠡᠵᠦ ᠤᠤ? ᠮᠠᠨᠳᠤᠬᠠᠢ ᠰᠡᠴᠡᠨ ᠬᠠᠲᠤᠨ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠠᠲᠤᠮᠥ᠋ᠩᠬᠡ ᠲᠢᠶᠠᠨ ᠬᠠᠭᠠᠨ ᠲᠠᠢ ᠲᠣᠯᠣᠭᠠᠢ ᠬᠣᠯᠪᠣᠵᠤ ᠮᠨᠨᠳᠤᠭᠤᠯᠢ ᠬᠠᠭᠠᠨ ᠤ᠋ ᠰᠠᠭᠤᠷᠢᠨ ᠢ᠋ ᠴᠣᠴᠠᠷᠠᠭᠤᠯᠤᠯ ᠦᠭᠡᠢ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠮᠣᠩᠭᠣᠯ ᠲᠡᠦᠬᠡ ᠶ᠋ᠢᠨ ᠦᠯᠢᠭᠡᠷ ᠵᠢᠱ᠌ᠢᠶᠡ ᠪᠠᠢᠭᠠ ᠪᠢᠰᠢ ᠤᠤ⁈ ᠭᠡᠬᠦ ᠳ᠋ᠦ᠍ ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠴᠢᠰᠤᠨ ᠰᠦᠯᠪᠡᠭᠡ ᠳ᠋ᠦ᠍ ᠬᠤᠪᠢᠶᠠᠵᠤ ᠨᠠᠭᠠᠯᠳᠤᠬᠤ ᠦᠶᠡ ᠠᠴᠢᠷ ᠪᠠᠢᠲᠤᠭᠠᠢ ᠣᠭᠣᠲᠣᠨᠠ ᠴᠤ᠌ ᠪᠠᠢᠬᠤ ᠦᠭᠡᠢ᠁ ᠬᠢᠴᠢᠶᠡᠬᠦ ᠦᠭᠡᠢ ᠪᠣᠯ ᠬᠡᠷᠡᠮ ᠥᠩᠭᠡᠢᠭᠰᠡᠨ ᠤᠯᠠᠢ ᠶ᠋ᠢᠨ ᠬᠡᠷᠢᠶᠡ ᠬᠡᠩᠬᠦᠳᠡᠭ ᠳᠡᠭᠡᠷᠡ ᠴᠢᠨᠢ ᠰᠠᠭᠤᠵᠤ ᠮᠠᠭᠤ ᠢᠷᠣᠠ ᠪᠠᠷ ᠭᠤᠸᠠᠭᠯᠠᠵᠤ ᠨᠢᠳᠦ ᠶ᠋ᠢ ᠴᠢᠨᠢ ᠳᠤᠩᠰᠢᠵᠤ ᠤᠬᠤᠷᠬᠠᠢ ᠶ᠋ᠢ ᠴᠢᠨᠢ ᠤᠬᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠭᠡᠳᠡᠭ ᠠᠢᠩᠭᠤᠷᠢ ᠣᠷᠢᠶᠠᠵᠤ ᠪᠠᠢᠬᠠ᠁》 ᠭᠡᠮᠡᠨ ᠲᠠᠷᠴᠢᠯᠠᠭᠠᠯ ᠭᠠᠴᠠᠶᠠᠯᠲᠦ ᠦᠰᠦᠭ ᠦ᠋ᠳ ᠢ᠋ ᠪᠠᠭᠠ ᠬᠠᠲᠤᠨ ᠤ᠋ ᠴᠣᠩᠬᠢᠭᠠᠷ ᠴᠠᠭᠠᠨ ᠵᠣᠪᠠᠭᠤᠷᠢᠲᠠᠢ ᠴᠢᠷᠠᠢ ᠳᠡᠭᠡᠷᠡ ᠡᠴᠡ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠣᠯᠵᠤ ᠤᠩᠰᠢᠵᠠᠢ᠃ ᠲᠡᠷᠡ ᠪᠣᠯ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠰᠠᠮᠠᠭᠠᠨ ᠮᠠᠨᠤᠪᠠᠳᠮᠠ ᠬᠥᠭᠰᠢᠨ ᠪᠠᠢᠯᠠ᠃