ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠳᠥᠷᠪᠡ> Хан мунын сүүрс < дээд > – Мөнх зохиоов ᠂ Дэд бодь – Хоёрдугаар бүлэг <4>
630ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠳᠥᠷᠪᠡ>
ᠭᠥᠯᠥᠭᠡ ᠭᠠᠰᠠᠯᠲᠠᠯᠠ ᠰᠢᠷᠠᠬᠤ ᠵᠤᠨ ᠤ᠋ ᠭᠣᠣᠯ ᠤ᠋ᠨ ᠬᠠᠯᠠᠭᠤᠨ ᠨᠠᠷᠠᠨ ᠤ᠋ ᠬᠣᠣᠷ ᠰᠦᠷᠡᠬᠡᠢ᠃ ᠮᠣᠳᠣᠳ ᠤ᠋ᠨ ᠨᠠᠪᠴᠢᠰ ᠢ᠋ ᠲᠥᠭᠡᠨᠡᠵᠦ ᠮᠠᠭᠤ ᠬᠤᠷᠠᠭᠠᠨ ᠤ᠋ ᠴᠢᠬᠢ ᠰᠢᠭ ᠬᠣᠮᠢᠢᠲᠠᠯᠠ ᠨᠠᠪᠲᠠᠭᠠᠨᠠᠭᠤᠯᠤᠭᠰᠠᠨ ᠪᠠᠢᠯᠠ᠃ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠡᠴᠡ ᠭᠠᠯ ᠤᠭᠤᠭᠢᠮᠠ ᠬᠠᠯᠠᠭᠤᠨ ᠵᠡᠷᠭᠡᠯᠭᠡᠨ ᠪᠣᠰᠴᠤ᠂ ᠳᠠᠯᠤ ᠮᠥᠷᠦᠨ ᠡᠴᠡ ᠬᠡᠦᠷᠰᠢᠭᠰᠡᠨ ᠶᠣᠷᠣᠭ ᠤ᠋ᠨ ᠦᠨᠦᠷ ᠦᠨᠦᠷᠲᠦᠨᠡ᠃ ᠠᠩᠴᠢᠨᠵᠠᠪ ᠶᠠᠪᠤᠵᠤ ᠪᠤᠯᠠᠭ ᠤ᠋ᠨ ᠬᠦᠢᠲᠡᠨ ᠤᠰᠤ ᠪᠠᠷ ᠲᠣᠯᠣᠭᠠᠢ ᠪᠠᠨ ᠱᠠᠪᠰᠢᠭᠠᠳ ᠭᠤᠷᠴᠢᠭᠢᠨᠠᠨ ᠤᠷᠤᠰᠤᠭᠰᠠᠨ ᠭᠣᠣᠯ ᠤ᠋ᠨ ᠡᠷᠭᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠠᠬᠢ ᠮᠣᠳᠣᠨ ᠤ᠋ ᠴᠣᠬᠣᠷ ᠰᠡᠭᠦᠳᠡᠷ ᠲᠡᠢ ᠬᠠᠨᠵᠤ ᠰᠢᠭ᠋ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠰᠡᠷᠢᠭᠦᠴᠡᠵᠦ ᠰᠠᠭᠤᠬᠤ ᠳ᠋ᠠᠭᠠᠨ ᠤᠢᠰᠤᠨ ᠬᠠᠪᠴᠢᠭ ᠲᠠᠢ ᠱᠤᠤᠭᠢᠭᠰᠠᠨ ᠠᠢᠷᠠᠭ ᠵᠠᠯᠭᠢᠯᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠴᠠᠭᠠᠳᠤᠬᠢ ᠨᠠᠷᠢᠨ ᠵᠦᠯᠭᠡᠨ ᠳᠡᠭᠡᠷᠡ ᠭᠣᠣᠯ ᠦᠳᠡ ᠶ᠋ᠢᠨ ᠠᠭᠠᠭᠢᠮᠠ ᠬᠠᠯᠠᠭᠤᠨ ᠳ᠋ᠤ᠌ ᠪᠢᠷᠠᠭᠤᠨ ᠤ᠋ ᠲᠤᠯᠤᠮ ᠳ᠋ᠤ᠌ ᠴᠦᠨᠳᠦᠢᠲᠡᠯᠡ ᠬᠠᠢᠷ ᠰᠠᠪᠠᠯᠠᠭᠰᠠᠨ ᠰᠢᠷᠢᠨ ᠮᠠᠨᠠᠭᠤᠯ ᠢ᠋ ᠡᠷᠭᠢᠭᠦᠯᠦᠨ ᠤᠷᠪᠠᠭᠤᠯᠤᠨ ᠮᠠᠨᠠᠷᠠᠲᠠᠯᠠ ᠡᠭᠦᠷᠦᠨ ᠰᠠᠪᠠᠵᠤ᠂ ᠤᠰᠤᠨ ᠬᠤᠯᠤᠭᠠᠨᠠ ᠪᠣᠯᠲᠠᠯᠠ ᠪᠠᠨ ᠲᠣᠩᠭᠣᠷᠠᠵᠤ ᠪᠠᠢᠭᠠ ᠵᠢᠭᠠᠯ ᠬᠦᠦ ᠶ᠋ᠢ ᠬᠠᠷᠠᠭᠠᠳ《 ᠣ᠂ ᠬᠦᠦ ᠴᠦ᠍ ᠳᠣᠷᠢᠭᠤᠨ ᠪᠣᠯᠴᠢᠬᠠᠵᠠᠢ᠃ ᠪᠠᠷᠠᠭᠤᠨ ᠬᠦᠩ ᠢ᠋ ᠳᠣᠷᠭᠢᠲᠠᠯᠠ ᠱᠤᠤᠭᠢᠭᠤᠯᠬᠤ ᠪᠢᠷᠠ ᠲᠠᠢ ᠪᠥᠬᠡ ᠭᠠᠷᠤᠨᠠ ᠳᠠ》 ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠦᠳᠦᠨᠡᠨ ᠵᠡᠰ ᠰᠣᠶᠣᠭᠠ᠂ ᠭᠠᠤᠯᠢᠨ ᠴᠠᠬᠢᠯᠠᠭᠤᠷ ᠲᠠᠢ ᠳ᠋ᠠᠢ ᠪᠠᠨ ᠭᠠᠷᠭᠠᠨ ᠲᠠᠮᠠᠬᠢᠯᠠᠭᠠᠳ ᠠᠷᠤᠨᠰᠢ ᠪᠠᠨ ᠭᠤᠯᠠᠰᠤᠨ ᠬᠡᠪᠲᠡᠪᠡ᠃
ᠢᠩᠭᠢᠵᠦ ᠨᠢᠭᠡ ᠬᠢᠳᠡᠯ ᠠᠯᠲᠠᠨ ᠬᠡᠪᠲᠡᠵᠦ ᠠᠮᠠᠷᠠᠬᠤ ᠪᠣᠯᠭᠠᠨ ᠪᠤᠭᠤᠷᠤᠯ ᠡᠵᠢ ᠪᠡᠨ ᠰᠠᠨᠠᠭᠠᠯᠵᠠᠵᠤ ᠡᠵᠢ ᠲᠡᠢ ᠪᠡᠨ ᠠᠭᠤᠯᠵᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠠᠩᠴᠢᠨ ᠠ᠋ᠴᠠ ᠦᠷᠭᠦᠭᠰᠡᠨ ᠪᠤᠲᠠᠨ ᠤ᠋ ᠪᠣᠷᠣ ᠲᠠᠤᠯᠠᠢ ᠰᠢᠭ᠋ ᠠᠮᠢᠳᠤᠷᠠᠬᠤ ᠶ᠋ᠢᠨ ᠬᠦᠴᠢᠷ ᠵᠣᠪᠠᠭᠤᠷᠢ ᠶ᠋ᠢ ᠠᠮᠰᠠᠵᠤ ᠶᠠᠪᠤᠬᠤ ᠮᠠᠨᠢ ᠶᠠᠭᠠᠬᠢᠭᠰᠠᠨ ᠦᠢᠯᠡ ᠦᠷᠡ ᠲᠡᠢ ᠪᠣᠢ ᠭᠡᠵᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠪᠴᠢᠯᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠳᠡᠷᠡᠯᠡᠨ ᠬᠥᠯ ᠨᠢᠴᠦᠭᠦᠨ ᠴᠡᠭᠡᠵᠢ ᠱᠠᠯᠳᠠᠩ ᠳᠡᠭᠡᠭᠰᠢ ᠲᠩᠷᠢ ᠬᠠᠷᠠᠨ ᠬᠡᠪᠲᠡᠨᠡ᠃
ᠠᠩᠴᠢᠨᠵᠠᠪ ᠡᠨᠡ ᠬᠦ᠌ ᠪᠣᠢᠳᠠ ᠪᠥᠭᠯᠡᠭᠦᠦ ᠠᠭᠤᠯᠠ ᠶ᠋ᠢᠨ ᠭᠦᠨ ᠳ᠋ᠦ᠍ ᠪᠣᠭᠣᠭᠳᠠᠯᠲᠠᠢ ᠠᠮᠢᠳᠤᠷᠠᠬᠤ ᠳ᠋ᠠᠭᠠᠨ ᠬᠠᠶᠠ ᠳ᠋ᠠᠭᠠᠨ ᠥᠭᠡᠷᠡᠯᠬᠡᠵᠦ ᠭᠣᠪᠢ ᠨᠤᠲᠤᠭ ᠵᠦᠭ ᠢ᠋ᠶ᠋ᠡᠨ ᠪᠠᠢᠨ ᠪᠠᠢᠨ ᠰᠡᠳᠬᠢᠯ ᠣᠲᠣᠷᠯᠠᠵᠤ ᠪᠣᠷᠣ ᠭᠡᠷ ᠦ᠋ᠨ ᠪᠣᠭᠣᠨᠢ ᠰᠠᠷᠠᠪᠴᠢ ᠪᠠᠷ ᠪᠤᠭᠤᠷᠤᠯ ᠡᠵᠢ ᠳ᠋ᠡᠭᠡᠨ ᠣᠴᠢᠳᠠᠭ ᠪᠠᠢᠯᠠ᠃ ᠵᠡᠷᠭᠡᠯᠭᠡᠨ ᠲᠣᠭᠯᠠᠭᠤᠯᠤᠭᠰᠠᠨ ᠭᠣᠪᠢ ᠨᠤᠲᠤᠭ ᠲᠠᠭᠠᠨ ᠠᠷᠳᠠᠭ ᠡᠮᠨᠢᠭ ᠰᠢᠭ ᠴᠢᠯᠥᠭᠡᠲᠡᠢ ᠳᠣᠪᠲᠣᠯᠵᠤ᠂ ᠪᠠᠶᠠᠴᠤᠳ ᠤ᠋ᠨ ᠠᠳᠤᠭᠤ ᠪᠠ ᠰᠣᠯᠢ ᠶ᠋ᠢᠨ ᠬᠢᠷᠠ ᠶ᠋ᠢᠨ ᠳᠠᠬᠢ ᠶ᠋ᠢᠨ ᠠᠵᠢᠷᠭᠠᠲᠤ ᠠ᠋ᠴᠠ ᠡᠮᠨᠢᠭ ᠰᠢᠯᠭᠠᠵᠤ ᠬᠥᠭᠡᠭᠡᠭᠰᠡᠨ ᠡᠷᠡ ᠬᠥᠮᠦᠨ ᠦ᠌ ᠬᠡᠢ ᠮᠣᠷᠢ ᠯᠦᠩᠳᠡ ᠲᠡᠢ ᠬᠡᠢᠰᠬᠡᠭᠦᠯᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠡᠢᠷᠬᠡᠨ ᠰᠠᠨᠠᠬᠤ ᠶ᠋ᠢ ᠬᠡᠨ ᠪᠠᠢᠭ ᠭᠡᠵᠦ ᠴᠢᠳᠠᠬᠤ ᠪᠣᠢ!
ᠠᠩᠴᠢᠨᠵᠠᠪ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠭᠣᠪᠢ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠪᠠᠷᠠ ᠶ᠋ᠢ ᠨᠢᠭᠡ ᠪᠢᠰᠢ ᠤᠳᠠᠭᠠ ᠬᠠᠷᠠᠵᠤ ᠪᠤᠭᠤᠷᠤᠯ ᠡᠵᠢ ᠳᠡᠭᠡᠷᠡ ᠪᠡᠨ ᠶᠠᠪᠤᠵᠤ ᠣᠴᠢᠭᠰᠠᠨ᠁ ᠡᠵᠢ ᠲᠡᠢ ᠪᠡᠨ ᠪᠦᠷ ᠣᠯᠵᠤ ᠠᠭᠤᠯᠵᠠᠭᠰᠠᠨ ᠦᠭᠡᠢ᠃ ᠠᠩᠬᠠ ᠶᠠᠪᠤᠵᠤ ᠣᠴᠢᠬᠤ ᠳ᠋ᠤ᠌ ᠨᠤᠲᠤᠭ᠂ ᠭᠡᠷ ᠦ᠋ᠨ ᠪᠠᠷᠠ ᠳᠥᠭᠥᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠰᠡᠳᠬᠢᠯ ᠤᠶᠠᠷᠠᠵᠤ᠂ ᠭᠡᠨᠡᠳᠲᠡ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌ ᠬᠥᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠶᠠᠭᠠᠬᠢᠵᠤ ᠴᠤ᠌ ᠪᠠᠶᠠᠷᠯᠠᠳᠠᠭ ᠪᠣᠯ ᠠ᠋⁈ ᠳᠣᠭᠣᠯᠠᠩ ᠨᠢᠯᠪᠤᠰᠤ ᠪᠠᠨ ᠭᠣᠭᠣᠵᠢᠭᠤᠯᠴᠢᠬᠠᠬᠤ ᠪᠠᠢᠬᠠ ᠳᠠ᠂ ᠮᠠᠩᠨᠠᠢ ᠳᠡᠭᠡᠷᠡ ᠮᠢᠨᠢ ᠦᠨᠦᠰᠴᠦ《 ᠮᠠᠭᠤ ᠴᠢᠴᠠᠬᠠ᠁》 ᠭᠡᠳ ᠪᠤᠬᠤᠷ ᠳᠡᠭᠡᠷᠡ ᠮᠢᠨᠢ ᠥᠬᠥᠭᠡᠷᠳᠡᠨ ᠠᠯᠠᠭᠠᠳᠠᠬᠤ ᠶᠤᠮ᠁ ᠭᠡᠵᠦ ᠬᠡᠦᠬᠡᠳᠯᠢᠭ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠨ ᠨᠢᠭᠡ ᠯᠡ ᠰᠡᠳᠬᠢᠯ ᠥᠨᠳᠥᠷ᠃ ᠵᠠ ᠪᠠᠢᠵᠠ᠂ ᠲᠣᠭᠤᠷᠢᠭᠤᠬᠠᠨ ᠶᠠᠪᠤᠵᠤ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠳᠣᠪᠣᠴᠠᠭ ᠠ᠋ᠴᠠ ᠨᠢ ᠭᠡᠨᠡᠳᠲᠡ ᠪᠠᠭᠤᠵᠤ ᠣᠴᠢᠶᠠ! ᠪᠤᠭᠤᠷᠤᠯ ᠡᠵᠢ ᠪᠡᠨ ᠰᠣᠴᠢᠮᠠᠭ ᠪᠠᠶᠠᠷᠯᠠᠭᠤᠯᠬᠤ ᠨᠢ ᠠ᠋! ᠭᠡᠳ ᠳᠠᠷᠠᠰᠤᠲᠠᠢ ᠶ᠋ᠢᠨ ᠬᠣᠲᠣᠭᠣᠷ ᠤ᠋ᠨ ᠵᠡᠭᠦᠬᠡᠨ ᠲᠠᠯᠠ ᠪᠠᠷ ᠠᠷᠤ ᠲᠠᠢᠰᠢ ᠪᠠᠨ ᠭᠠᠷᠪᠠ᠃ ᠬᠡᠳᠦᠢ ᠡᠷᠡ ᠰᠢᠨᠳᠠᠰᠤ ᠢᠳᠡᠭᠡᠰᠢᠨ ᠴᠢᠩᠭᠠᠷᠠᠵᠤ ᠶᠠᠪᠤᠭᠠ ᠪᠣᠰᠤᠭᠠ ᠡᠷᠡ ᠬᠥᠮᠦᠨ ᠪᠣᠯᠪᠠᠴᠤ ᠡᠵᠢ᠂ ᠭᠡᠷ ᠬᠣᠶᠠᠷ ᠢ᠋ᠶ᠋ᠠᠨ ᠭᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠤᠶᠠᠰᠤᠨ ᠬᠤᠭᠤᠷᠠᠳᠠᠭ ᠠᠵᠢ᠃ ᠠᠩᠴᠢᠨᠵᠪ ᠪᠣᠷᠣ ᠭᠡᠷ ᠢ᠋ᠶ᠋ᠡᠨ᠂ ᠪᠤᠭᠤᠷᠤᠯ ᠡᠵᠢ ᠪᠡᠨ ᠭᠡᠵᠦ ᠪᠤᠰᠢᠭᠤᠬᠠᠨ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠬᠤ ᠶ᠋ᠢ ᠶᠠᠭᠠᠷᠠᠵᠤ ᠨᠢᠭᠡ ᠯᠡ ᠥᠨᠳᠡᠢᠯᠭᠡᠨ ᠳ᠋ᠦ᠍ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠳᠣᠪᠣᠴᠠᠭ ᠳᠡᠭᠡᠷᠡ ᠳᠠᠪᠬᠢᠵᠤ ᠭᠠᠷᠪᠠ᠃
ᠬᠡᠴᠢᠨᠡᠨ ᠵᠢᠯ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠤᠨᠠᠭᠠᠨ ᠨᠤᠲᠤᠭ ᠤ᠋ᠨ ᠬᠢᠨᠢ ᠰᠢᠷᠬᠡᠭ ᠡᠪᠡᠰᠦ ᠴᠢᠮᠬᠢ ᠰᠢᠷᠣᠢ ᠬᠦᠷᠲᠡᠯᠡ ᠡᠯᠢᠭᠡᠰᠡᠭ ᠰᠠᠨᠠᠭᠳᠠᠬᠤ ᠶ᠋ᠢ ᠶᠠᠭᠠᠬᠢᠨᠠ᠃ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠡᠴᠡ ᠤᠷᠭᠤᠭᠰᠠᠨ ᠮᠥᠭᠥ ᠬᠠᠳᠠ ᠰᠢᠭ᠋ ᠪᠠᠲᠤ ᠲᠣᠭᠲᠠᠪᠤᠷᠢᠲᠠᠢ ᠪᠣᠷᠣ ᠭᠡᠷ ᠦ᠋ᠨ ᠭᠣᠪᠢ ᠲᠠᠯᠠ ᠶ᠋ᠢᠨ ᠬᠦᠢᠰᠦᠨ ᠡᠴᠡ ᠡᠩᠨᠡᠭᠦᠯᠦᠨ ᠬᠠᠢᠯᠠ᠁ ᠠᠯᠠᠭᠠ᠃ ᠪᠣᠷᠣ ᠭᠡᠷ ᠪᠤᠭᠤᠷᠤᠯ ᠡᠵᠢ ᠬᠣᠶᠠᠷ ᠪᠦᠷ ᠠᠯᠠᠭᠠ᠃ ᠵᠥᠪᠬᠡᠨ ᠬᠠᠷᠠ ᠰᠡᠭᠦᠯᠲᠡᠳ ᠭᠡᠷ ᠦ᠋ᠨ ᠬᠠᠶᠠᠭᠠ ᠪᠠᠷ ᠪᠡᠯᠴᠢᠨᠡ᠃ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦᠪᠡ⁈ ᠡᠰᠡᠪᠡᠰᠦ᠁ ᠭᠡᠵᠦ ᠡᠯᠳᠡᠪ ᠢ᠋ ᠵᠦᠢᠵᠦ ᠪᠣᠳᠣᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠠᠷᠤ ᠳᠣᠪᠣᠴᠠᠭ ᠠ᠋ᠴᠠ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠲᠠᠢᠪᠤᠭᠤᠬᠠᠨ ᠪᠠᠭᠤᠵᠤ ᠣᠴᠢᠪᠠ᠃ ᠥᠨᠳᠥᠷ ᠤᠷᠭᠤᠭᠰᠠᠨ ᠥᠯᠥᠩ ᠡᠪᠡᠰᠦ᠂ ᠯᠤᠤᠯᠢ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠭᠡᠷ ᠦ᠋ᠨ ᠪᠠᠭᠤᠷᠢ ᠨᠢ ᠲᠣᠭᠣᠷᠢᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠯᠴᠠᠭᠠᠢᠷᠠᠭᠰᠠᠨ ᠭᠠᠵᠠᠷ ᠲᠤ᠌ ᠨᠢ ᠡᠪᠡᠰᠦ ᠤᠷᠭᠤᠭᠰᠠᠨ ᠦᠭᠡᠢ᠃ ᠡᠨᠡ ᠬᠠᠯᠴᠠᠭᠠᠢ ᠲᠣᠭᠣᠷᠢᠭ ᠲᠤ᠌ ᠪᠢ ᠬᠥᠮᠦᠨ ᠪᠣᠯᠵᠤ ᠠᠮᠢᠰᠬᠤᠭᠰᠠᠨ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠨᠡᠷᠢᠬᠦ ᠪᠡᠷ ᠡᠷᠡ ᠪᠣᠯᠵᠤ ᠲᠣᠷᠨᠢᠭᠰᠠᠨ ᠶᠤᠮ ᠠ᠋᠂ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠪᠣᠷᠣ ᠭᠡᠷ ᠨᠢ ᠪᠥᠨᠲᠥᠯᠵᠡᠵᠦ᠂ ᠪᠤᠭᠤᠷᠤᠯ ᠡᠵᠢ ᠨᠢ ᠪᠥᠷᠲᠥᠯᠵᠡᠬᠦ ᠰᠢᠭ ᠪᠣᠯᠵᠤ ᠨᠢᠯᠪᠤᠰᠤ ᠬᠤᠷᠠᠭᠰᠠᠨ ᠨᠢᠳᠦ ᠨᠢ ᠪᠥᠷᠬᠥᠯᠵᠡᠨ ᠬᠠᠮᠠᠷ ᠨᠢ ᠱᠠᠷᠬᠢᠷᠠᠪᠠ᠁
ᠠᠩᠴᠢᠨᠵᠠᠪ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠬᠤᠳᠳᠤᠭ ᠤᠷᠤᠭᠤ ᠪᠠᠨ ᠳᠥᠭᠥᠬᠦ ᠳ᠋ᠦ᠍ ᠴᠢᠭᠢᠭ ᠦ᠋ᠨ ᠦᠨᠦᠷ ᠢ᠋ᠶ᠋ᠡᠷ ᠬᠤᠳᠳᠤᠭ ᠰᠠᠬᠢᠭᠰᠠᠨ ᠬᠠᠷᠠ ᠰᠡᠭᠦᠯᠲᠦ ᠵᠡᠭᠡᠷᠡ ᠨᠦ᠍ᠭᠦᠳ ᠠᠩᠴᠢᠨᠵᠠᠪ ᠢ᠋ ᠬᠦᠨᠡᠢᠷᠬᠡᠨ ᠦᠷᠭᠦᠪᠡ᠃
ᠠᠩᠴᠢᠨᠵᠠᠪ ᠡᠵᠢ ᠲᠡᠢ ᠪᠡᠨ ᠣᠯᠵᠤ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠰᠡᠳᠬᠢᠯ ᠭᠤᠨᠢᠵᠤ ᠮᠣᠷᠢᠨ ᠤ᠋ ᠪᠠᠨ ᠲᠠᠪᠠ ᠪᠠᠷ ᠭᠠᠯᠭᠢᠭᠤᠯᠵᠤ ᠶᠠᠪᠤᠨ ᠬᠠᠷᠭᠠᠨᠠᠲᠠᠢ ᠶ᠋ᠢᠨ ᠰᠢᠯᠢ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠨᠢᠭᠡ ᠠᠢᠯ ᠳ᠋ᠤ᠌ ᠣᠷᠣᠪᠠ᠃
ᠭᠡᠷ ᠳᠦᠭᠦᠷᠡᠩ ᠲᠣᠯᠣᠭᠠᠢ ᠰᠢᠭᠢᠷᠡ ᠶ᠋ᠢᠨ ᠲᠣᠰᠣ ᠦᠨᠦᠷᠲᠦᠭᠦᠯᠵᠦ ᠲᠠᠰᠤᠷᠬᠠᠢ ᠴᠢᠳᠥᠷ ᠰᠡᠯᠪᠢᠵᠦ ᠰᠠᠭᠤᠭᠰᠠᠨ ᠪᠣᠷᠣ ᠡᠪᠦᠭᠡᠨ ᠢ᠋ ᠠᠩᠴᠢᠨᠵᠠᠪ ᠨᠤᠲᠤᠭ ᠤ᠋ᠨ ᠬᠢᠨᠢ ᠲᠥᠷᠥᠯᠰᠡᠭ ᠬᠡᠳᠡᠷ ᠪᠣᠷᠣ ᠭᠡᠳᠡᠭ ᠡᠪᠦᠭᠡᠨ ᠮᠥᠨ ᠪᠣᠯᠬᠤ ᠶ᠋ᠢ ᠬᠠᠷᠠᠮᠠᠭᠴᠠ ᠲᠠᠨᠢᠪᠠ᠃
– ᠲᠠ ᠰᠠᠢᠨ ᠪᠠᠢᠨᠠ ᠊ᠤᠤ?
– ᠵᠠ᠂ ᠰᠠᠢᠨ! ᠴᠢ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠊ᠦᠦ?
– ᠰᠠᠢᠨ᠂ ᠪᠣᠷᠣᠭᠠᠨ ᠬᠤᠷᠠ ᠰᠠᠢᠨ?
– ᠶᠠᠭᠠᠬᠢᠬᠤ ᠪᠣᠢ᠂ ᠵᠦᠭᠡᠷ᠂ ᠵᠦᠭᠡᠷ! ᠵᠠ᠂ ᠪᠠᠢᠵᠠ ᠳᠠ ᠥᠪᠡᠷ ᠢ᠋ᠶ᠋ᠡᠨ ᠴᠢ ᠬᠡᠨ ᠪᠢᠯᠡ? ᠬᠥᠮᠦᠨ ᠥᠲᠡᠯᠪᠡᠯ ᠬᠡᠷᠡᠭ ᠡᠴᠡ ᠪᠡᠨ ᠭᠠᠷᠴᠢᠬᠠᠬᠤ ᠨᠢ ᠲᠡᠷᠡ! ᠬᠥᠮᠦᠨ ᠲᠠᠨᠢᠬᠤ ᠦᠭᠡᠢ ᠨᠢ ᠦᠢᠯᠡ! ᠭᠡᠵᠦ ᠨᠠᠰᠤᠲᠠᠨ ᠪᠡᠶᠡ ᠳ᠋ᠡᠭᠡᠨ ᠠᠬᠠᠷᠴᠢᠯᠠᠨ ᠠᠩᠴᠢᠨᠵᠠᠪ ᠢ᠋ ᠵᠢᠰᠦᠯᠡᠬᠦ ᠭᠡᠵᠦ ᠬᠥᠬᠡ ᠨᠢᠳᠦ ᠪᠡᠨ ᠰᠡᠢᠮᠡᠢᠨ ᠰᠠᠷᠠᠪᠴᠢᠯᠠᠨᠠ᠃
– ᠪᠢ ᠠᠩᠴᠢᠨᠵᠠᠪ ᠪᠠᠢᠨᠠ᠃
– ᠬᠡᠨ? ᠪᠠᠢᠵᠠ᠂ ᠬᠡᠨ ᠭᠡᠪᠡ ᠊ᠦᠦ?
– ᠠᠩᠴᠢᠨᠵᠠᠪ! ᠬᠣᠪᠢᠯᠴᠡᠴᠡᠭ ᠦ᠋ᠨ ᠬᠦᠦ ᠠᠩᠴᠢᠨᠵᠠᠪ ᠭᠡᠵᠦ ᠳᠠᠭᠤ ᠪᠠᠨ ᠥᠨᠳᠥᠷᠳᠦᠭᠦᠯᠦᠨ ᠬᠡᠯᠡᠪᠡᠯ ᠡᠪᠦᠭᠡᠨ᠄
– ᠣ ᠳᠠ᠂ ᠬᠥᠭᠡᠷᠦᠬᠦᠢ ᠠᠩᠴᠢᠨᠵᠠᠪ ᠮᠢᠨᠢ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠪᠠᠢᠬᠤ ᠰᠢᠪ! ᠭᠡᠳ ᠵᠠᠪᠢᠯᠠᠵᠤ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠬᠤ ᠭᠡᠬᠦ ᠳ᠋ᠦ᠍ ᠬᠥᠯ ᠨᠢ ᠡᠪᠦᠳᠦᠭ ᠢ᠋ᠶ᠋ᠡᠷ ᠪᠠᠳᠠᠢᠷᠠᠵᠤ ᠠᠶᠠ ᠪᠠᠷ ᠨᠢ ᠪᠣᠯᠵᠤ ᠥᠭᠬᠦ ᠦᠭᠡᠢ ᠳ᠋ᠦ᠍《 ᠬᠥᠮᠦᠨ ᠥᠲᠡᠯᠴᠢᠬᠡᠭᠰᠡᠭᠡᠷ ᠴᠦ᠍ ᠶᠠᠭ ᠭᠠᠨᠵᠢᠩ ᠪᠣᠯᠴᠢᠬᠠᠬᠤ ᠨᠢ ᠲᠡᠷᠡ ᠦᠵᠡᠬᠦ ᠦᠭᠡᠢ ᠊ᠤᠤ᠂ ᠡᠨᠡ ᠲᠤᠯᠭᠠᠭᠤᠷ ᠨᠢ ᠪᠡᠶᠡ ᠪᠡᠨ ᠳᠠᠭᠠᠭᠠᠬᠤ ᠦᠭᠡᠢ ᠦᠵᠢᠷᠡᠴᠢᠬᠡᠬᠦ ᠶᠦᠮ ᠠ᠋!》 ᠭᠡᠵᠦ ᠬᠡᠳᠡᠷᠯᠡᠨ ᠥᠨᠳᠡᠢᠬᠦ ᠳ᠋ᠦ᠍ᠨᠢ ᠠᠩᠴᠢᠨᠵᠠᠪ ᠡᠪᠦᠭᠡᠨ ᠢ᠋ ᠲᠦᠰᠢᠵᠦ᠄
– ᠲᠠ ᠰᠠᠭᠤᠵᠤ ᠪᠠᠢ ᠭᠡᠯᠡ᠃
– ᠶᠠᠭᠠᠬᠢᠬᠤ ᠪᠣᠢ? ᠴᠠᠢ ᠤᠰᠤ ᠣᠢᠷᠠᠲᠤᠭᠤᠯᠤᠶᠠ!
– ᠪᠢ ᠥᠪᠡᠷ ᠢ᠋ᠶ᠋ᠡᠨ ᠦᠵᠡᠶᠡ!
– ᠦᠭᠡᠢ᠂ ᠬᠦᠦ ᠮᠢᠨᠢ ᠡᠳᠦᠢᠴᠢᠨᠡᠭᠡᠨ ᠵᠢᠯ ᠢ᠋ᠶ᠋ᠡᠷ ᠬᠠᠮᠢᠭᠠᠭᠤᠷ ᠲᠡᠨᠦᠵᠦ ᠶᠠᠪᠤᠭᠠ᠁ ᠮᠠᠭᠤ ᠴᠢᠴᠠᠭᠠ! ᠭᠡᠵᠦ ᠠᠩᠴᠢᠨᠵᠠᠪ ᠢ᠋ ᠥᠬᠥᠭᠡᠷᠳᠡᠨ ᠥᠭᠦᠯᠡᠨᠡ᠃
ᠡᠪᠦᠭᠡᠨ ᠠᠮᠠᠨ ᠳ᠋ᠠᠭᠠᠨ ᠶᠠᠭᠤ ᠨᠢᠭᠡ ᠶ᠋ᠢ ᠬᠡᠳᠡᠷᠯᠡᠨ ᠥᠭᠦᠯᠡᠵᠦ ᠶᠠᠪᠤᠨ ᠠᠷᠭᠠᠯ ᠠᠪᠴᠢᠷᠠᠵᠤ ᠬᠤᠪᠢᠩ ᠳ᠋ᠠᠭᠠᠨ ᠨᠡᠮᠡᠭᠡᠳ ᠴᠠᠢ ᠴᠢᠨᠠᠪᠠ᠃
ᠴᠠᠢ ᠪᠤᠴᠠᠯᠵᠤ ᠠᠩᠴᠢᠨᠵᠠᠪ ᠪᠣᠷᠣ ᠡᠪᠦᠭᠡᠨ ᠦ᠌ ᠠᠶᠠᠭᠠᠯᠠᠭᠰᠠᠨ ᠴᠠᠢ ᠠ᠋ᠴᠠ ᠣᠭᠣᠴᠢᠯᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ《ᠡᠵᠢ ᠶᠠᠭᠠᠬᠢᠭᠰᠠᠨ ᠪᠣᠯ?》 ᠭᠡᠵᠦ ᠡᠪᠦᠭᠡᠨ ᠡᠴᠡ ᠡᠷᠲᠡᠬᠡᠨ ᠠᠰᠠᠭᠤᠵᠤ ᠡᠪᠲᠡᠢ ᠰᠤᠷᠠᠭ ᠰᠣᠨᠣᠰᠤᠶᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠡᠭᠰᠢ ᠠᠯᠳᠠᠪᠠᠴᠤ ① ᠰᠢᠭᠤᠳ ᠡᠯᠭᠦᠵᠦ ᠠᠰᠠᠭᠤᠬᠤ ᠠ᠋ᠴᠠ ᠰᠡᠳᠬᠢᠯ ᠬᠠᠯᠢᠷᠠᠨ《ᠠ᠂ ᠬᠥᠭᠡᠷᠦᠬᠦᠢ ᠡᠵᠢ ᠴᠢᠨᠢ ᠰᠢᠷᠣᠢ ᠦᠨᠦᠷᠲᠦᠴᠢᠬᠡᠯᠡ》 ᠭᠡᠰᠡᠨ ᠲᠡᠪᠴᠢᠶᠡᠷᠢ ᠮᠠᠭᠤᠲᠠᠢ ᠬᠠᠷᠢᠭᠤ ᠰᠣᠨᠣᠰᠬᠤ ᠠ᠋ᠴᠠ ᠵᠢᠷᠦᠬᠡᠰᠢᠶᠡᠵᠦ ᠪᠠᠢᠯᠠ᠃
ᠬᠡᠳᠡᠷ ᠪᠣᠷᠣ ᠡᠪᠦᠭᠡᠨ ᠴᠦ᠍ ᠠᠩᠴᠢᠨᠵᠠᠪ ᠤ᠋ᠨ ᠰᠡᠳᠬᠢᠯ ᠢ᠋ ᠳᠣᠲᠣᠷᠯᠠᠵᠤ ᠮᠡᠳᠡᠭᠡᠳ ᠬᠠᠨᠠ ᠲᠦᠰᠢᠭᠯᠡᠵᠦ ᠲᠠᠯᠪᠢᠭᠰᠠᠨ ᠬᠡ ᠰᠢᠷ ᠨᠢ ᠬᠣᠭᠵᠢᠷᠠᠵᠤ ᠭᠬᠢᠷ ᠲᠠᠭ ᠲᠤ᠌ ᠣᠣᠷ ᠥᠩᠭᠡ ᠪᠡᠨ ᠠᠯᠳᠠᠭᠰᠠᠨ ᠬᠠᠭᠤᠴᠢᠨ ᠬᠦᠷᠡᠩ ᠬᠣᠷᠭᠣ ᠠ᠋ᠴᠠ ᠬᠠᠳᠠᠭ ᠲᠤ᠌ ᠪᠠᠭᠯᠠᠭᠰᠠᠨ ᠶᠠᠭᠤᠮᠠ ᠭᠠᠷᠭᠠᠵᠤ᠄
– ᠮᠠᠢ᠂ ᠬᠡᠦᠬᠡ! ᠡᠭᠦᠨ ᠢ᠋ᠶ᠋ᠡᠨ ᠨᠢᠮᠪᠠᠢ ᠠᠪᠴᠤ ᠶᠠᠪᠤ᠃ ᠡᠵᠢ ᠴᠢᠨᠢ ᠥᠭᠭᠦᠭᠰᠡᠨ ᠶᠦᠮ! ᠭᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠤ᠋ᠨ ᠭᠠᠷ ᠰᠠᠯᠭᠠᠨᠠᠨ《ᠡᠵᠢ ᠮᠢᠨᠢ᠂ ᠪᠤᠷᠬᠠᠨ ᠪᠣᠯᠴᠢᠬᠠᠪᠠ ᠊ᠤᠤ?》 ᠭᠡᠵᠦ ᠠᠭᠱᠠᠨᠠ ᠪᠣᠳᠣᠬᠤ ᠳ᠋ᠤ᠌ ᠬᠣᠷᠢᠭᠳᠠᠰᠢ ᠦᠭᠡᠢ ᠠᠰᠬᠠᠷᠠᠬᠤ ᠨᠢᠯᠪᠤᠰᠤ ᠬᠠᠮᠠᠷ ᠢ᠋ ᠨᠢ ᠬᠠᠪᠴᠢᠭᠠᠳ ᠤᠷᠤᠰᠪᠠ᠃
ᠠᠩᠴᠢᠨᠵᠠᠪ ᠬᠠᠳᠠᠭ ᠢ᠋ ᠠᠶᠠᠷᠬᠠᠨ ᠵᠠᠳᠠᠯᠪᠠᠯ ᠤᠯᠠᠭᠠᠨ ᠱ᠌ᠢᠷᠦᠨ ᠵᠢᠩᠰᠡ ᠲᠡᠢ ᠮᠠᠨᠤᠨ ᠬᠥᠬᠦᠦᠷ ᠪᠠᠢᠯᠠ᠃
–《ᠬᠦᠦ ᠮᠢᠨᠢ ᠬᠠᠷᠢᠭᠠᠳ ᠢᠷᠡᠬᠦ ᠮᠠᠭᠠᠳ᠁ ᠡᠨᠡ ᠬᠥᠬᠦᠦᠷ ᠢ᠋ ᠥᠭᠴᠦ ᠬᠠᠢᠷᠠᠯᠠ! ᠠᠮᠢᠨ ᠰᠠᠬᠢᠶᠠ ᠰᠢᠭ᠋ ᠪᠡᠶᠡ ᠳ᠋ᠡᠭᠡᠨ ᠡᠷᠬᠢᠮᠯᠡᠵᠦ ᠶᠠᠪᠤ᠃ ᠶᠣᠳᠠᠷ ᠴᠢᠷᠦᠭᠡᠳ ᠶᠠᠭᠳᠠᠵᠤ᠂ ᠶᠣᠷᠣᠭ ᠡᠮᠦᠰᠦᠭᠡᠳ ᠲᠠᠭᠳᠠᠪᠠᠴᠤ ᠲᠡᠭᠦᠨ ᠢ᠋ ᠵᠠᠷᠤᠵᠤ ᠦᠯᠦ ᠪᠣᠯᠤᠨᠠ᠃ ᠡᠴᠢᠭᠡ ᠳᠡᠭᠡᠳᠦᠭᠦᠯᠡ ᠶ᠋ᠢᠨ ᠬᠢᠨᠢ ᠤᠳᠤᠮ ᠳᠠᠮᠵᠢᠭᠰᠠᠨ ᠥᠪ ᠶᠦᠮ》 ᠭᠡᠳ ᠨᠠᠳᠠ ᠭᠠᠢᠭᠤᠢ ᠵᠠᠬᠢᠭᠰᠠᠨ ᠶᠤᠮ ᠠ᠋᠂ ᠬᠥᠭᠡᠷᠦᠬᠦᠢ! ᠬᠦᠦ ᠮᠢᠨᠢ ᠲᠡᠭᠡᠭᠡᠳ ᠡᠷᠲᠡ ᠢᠷᠡᠳᠡᠭ ᠪᠠᠢᠵᠢ ᠳᠠ! ᠭᠡᠪᠡ᠃
– ᠡᠵᠢ ᠶᠠᠭᠠᠬᠢᠴᠢᠬᠠᠪᠠ? ᠭᠡᠵᠦ ᠠᠩᠴᠢᠨᠵᠠᠪ ᠰᠠᠨᠳᠤᠷᠤᠨ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠡᠳᠡᠷ ᠪᠣᠷᠣ ᠡᠪᠦᠭᠡᠨ᠄
– ᠠᠢ ᠳᠠ᠂ ᠶᠠᠭᠠᠬᠢᠬᠤ ᠪᠣᠢ! ᠵᠠᠰᠠᠭᠲᠤ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠵᠢᠩᠴᠢᠨ ᠢ᠋ ᠳᠠᠭᠠᠵᠤ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠡᠮᠦᠨᠡᠰᠢᠯᠡᠭᠰᠡᠨ᠁ ᠭᠡᠬᠦ ᠳ᠋ᠦ᠍ ᠠᠩᠴᠢᠨᠵᠠᠪ ᠪᠣᠷᠣ ᠡᠪᠦᠭᠡᠨ ᠦ᠌ ᠦᠭᠡ ᠶ᠋ᠢ ᠲᠠᠰᠤᠯᠵᠤ᠄
– ᠮᠢᠨᠦ ᠬᠣᠢᠨᠠ ᠠ᠋ᠴᠠ⁈ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠰᠡᠳᠬᠢᠯ ᠳ᠋ᠦ᠍ ᠳᠡᠭᠦᠵᠢᠯᠡᠭᠰᠡᠨ ᠬᠦᠨᠳᠦ ᠴᠢᠯᠠᠭᠤ ᠬᠥᠰᠡᠷ ᠤᠨᠠᠵᠤ ᠠᠭᠤᠵᠢᠷᠠᠭᠰᠠᠨ ᠳ᠋ᠠᠭᠠᠨ ᠳᠠᠭᠤ ᠨᠢ ᠥᠨᠳᠥᠷᠵᠢᠪᠡ᠃
– ᠲᠡᠭᠡᠭ᠍ᠰᠡᠨ᠃ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠯᠠ ᠲᠠᠩᠰᠢᠵᠤ ᠶᠠᠪᠤᠭᠰᠠᠨ᠃ ᠡᠬᠡ ᠪᠡᠨ ᠶᠠᠭᠠᠬᠢᠭᠰᠠᠨ ᠴᠢᠴᠠᠭᠠ ᠶ᠋ᠢ ᠬᠣᠬᠣᠢ᠁《ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠦᠷᠡ ᠳ᠋ᠦ᠍》 ᠭᠡᠳᠡᠭ ᠬᠣᠢᠨᠠ ᠳᠠ! ᠠᠷᠭᠠ ᠪᠠᠢᠨᠠ ᠊ᠤᠤ?
ᠠᠩᠴᠢᠨᠵᠠᠪ ᠦᠭᠡ ᠳᠠᠭᠤᠨ ᠦᠭᠡᠢ ᠪᠣᠳᠣᠯᠭᠠ ᠪᠣᠯᠪᠠ᠃ ᠡᠪᠦᠭᠡᠨ᠄
– ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠵᠠᠰᠠᠭᠲᠤ ᠶ᠋ᠢᠨ ᠵᠢᠩᠴᠢᠳ ᠠᠴᠢᠶᠠ ᠬᠥᠰᠬᠡ ᠪᠠᠷᠠᠭᠠ ᠳᠦᠭᠦᠷᠡᠩ ᠪᠤᠴᠠᠵᠤ ᠢᠷᠡᠬᠦ ᠳ᠋ᠦ᠍ ᠡᠵᠢ ᠴᠢᠨᠢ ᠬᠠᠷᠢᠨ ᠭᠠᠩᠰᠠᠨ ᠤ᠋ ᠪᠠᠨ ᠰᠣᠷᠣᠭᠤᠯ ᠢ᠋ ᠰᠢᠮᠡᠵᠦ ᠵᠡᠭᠦᠨ ᠡᠮᠦᠨᠡᠰᠢ ᠲᠠᠬᠢᠷᠯᠠᠨ ᠣᠳᠤᠭᠰᠠᠨ ᠬᠠᠷᠭᠤᠢ ᠶ᠋ᠢ ᠰᠢᠷᠲᠡᠬᠦ ᠡᠭᠦᠯᠡᠨ ᠬᠥᠬᠡ ᠨᠢᠳᠦ ᠨᠢ《ᠲᠡᠷᠡ ᠵᠦᠭ ᠲᠦ᠍ ᠯᠡ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠶᠠᠪᠤᠭᠰᠠᠨ ᠠ᠋᠃ ᠴᠣᠬᠣᠮ ᠶᠠᠭᠠᠬᠢᠭᠰᠠᠨ ᠪᠣᠯ? ᠬᠡᠵᠢᠶᠡ ᠪᠤᠴᠠᠵᠤ ᠢᠷᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠠᠩᠴᠢᠨᠵᠠᠪ ᠲᠤ᠌ ᠬᠡᠯᠡᠵᠦ ᠪᠠᠢᠭᠠ ᠮᠡᠲᠦ᠃
ᠠᠩᠴᠢᠨᠵᠠᠪ᠂ ᠨᠤᠲᠤᠭ ᠤ᠋ᠨ ᠡᠨᠡ ᠬᠦ᠌ ᠲᠥᠷᠥᠯᠰᠡᠭ ᠪᠣᠷᠣ ᠡᠪᠦᠭᠡᠨ ᠦ᠌ ᠰᠠᠨᠠᠭᠠ ᠶ᠋ᠢ ᠬᠠᠭᠤᠷᠬᠤ ᠬᠦᠷᠡᠩ ᠴᠢᠪᠠᠭᠠ᠂ ᠬᠠᠷᠠ ᠪᠤᠷᠠᠮ᠂ ᠪᠠᠷᠢᠭᠤᠯ ᠴᠠᠢ ② ᠵᠡᠷᠭᠡ ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠪᠠᠷ ᠭᠠᠷ ᠴᠠᠭᠠᠯᠠᠵᠤ《ᠤᠯᠠᠭᠠᠨ ᠱ᠌ᠢᠷᠦᠨ ᠵᠢᠩᠰᠡᠲᠦ ᠬᠥᠬᠦᠦᠷ》 ᠦ᠋ᠨ ᠳᠣᠮᠣᠭ ᠢ᠋ ᠡᠪᠦᠷᠯᠡᠵᠦ ᠠᠯᠤᠰ ᠢ᠋ ᠵᠣᠷᠢᠯᠠ᠁
ᠪᠣᠳᠣᠯ ᠤ᠋ᠨ ᠴᠢᠯᠥᠭᠡ ᠪᠡᠷ ᠢᠷᠭᠤᠢ ᠴᠡᠴᠡᠭ ᠰᠢᠭ ᠢᠨᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠠᠯᠠᠭᠤᠨ ᠰᠢᠪᠡᠨᠡᠭᠡ ᠶ᠋ᠢ ᠰᠠᠨᠠᠵᠤ᠂ ᠪᠣᠯᠳᠠᠭ ᠦᠭᠡᠢ ᠶᠠᠭᠤᠮᠠᠨ ᠤ᠋ ᠠᠷᠤ ᠠ᠋ᠴᠠ ᠪᠣᠳᠣᠯ ᠤ᠋ᠨ ᠬᠦᠯᠦᠭ ᠢ᠋ᠶ᠋ᠡᠨ ᠠᠯᠳᠠᠵᠤ ᠶᠠᠪᠤᠭᠤᠯᠤᠭᠠᠳ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠠᠩᠴᠢᠨᠵᠠᠪ《ᠶᠠᠭᠠᠬᠢᠬᠤ ᠪᠣᠢ᠃ ᠪᠠᠢᠶᠠ ᠪᠠᠢᠶᠠ! ᠲᠡᠷᠡ ᠶᠠᠮᠠᠷ ᠲᠠᠭᠠᠨ ᠨᠠᠳᠠ ᠰᠢᠭ᠋ ᠭᠡᠷ ᠣᠷᠣᠨ ᠦᠭᠡᠢ ᠲᠡᠨᠦᠵᠦ᠂ ᠨᠢᠭᠡ ᠴᠠᠳᠬᠤᠯᠠᠩ ᠨᠢᠭᠡ ᠥᠯᠥᠰᠬᠦᠯᠡᠩ ᠶᠠᠪᠤᠭᠠ ᠴᠤ᠌ ᠪᠢᠰᠢ ᠳᠡ᠃ ᠭᠡᠭᠡᠨ ᠴᠠᠭᠠᠨ ᠣᠷᠳᠣᠨ ᠳ᠋ᠤ᠌ ᠭᠡᠲᠡᠬᠡᠷ ᠴᠠᠳᠬᠤᠯᠠᠩ ᠪᠠᠢᠭᠠ ᠪᠠᠢᠯᠭᠦᠢ! ᠨᠣᠶᠠᠨ ᠬᠥᠮᠦᠨ ᠦ᠌ ᠲᠠᠷᠭᠤᠨ ᠡᠪᠦᠷ ᠲᠦ᠍ ᠨᠣᠵᠣᠭᠣᠷᠠᠵᠤ ᠬᠡᠪᠲᠡᠭᠰᠡᠨ ᠬᠥᠮᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠢ ᠥᠯᠥᠨ ᠰᠢᠯᠦᠰᠦ ᠰᠠᠪᠢᠷᠠᠭᠤᠯᠵᠤ ᠶᠠᠭᠤ ᠬᠢᠨᠡᠮ!》 ᠭᠡᠳ ᠰᠡᠷᠭᠦᠮᠡ ᠶ᠋ᠢᠨ ᠲᠤᠬᠠᠢ ᠣᠲᠣᠷᠯᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ᠂ ᠨᠢᠳᠦ ᠪᠡᠨ ᠠᠨᠢᠨ ᠪᠡᠶᠡ ᠪᠡᠨ ᠪᠦᠪᠡᠢᠯᠡᠲᠡᠯᠡ᠁ ᠰᠢᠷᠭᠠ ᠮᠣᠷᠢᠲᠤ ᠶ᠋ᠢᠨ ᠠᠷᠤ ᠡᠩᠭᠡᠷ ᠦ᠋ᠨ ᠪᠢᠲᠡᠭᠦᠦ ᠰᠢᠭᠤᠢ ᠳᠣᠲᠣᠷᠠ ᠠ᠋ᠴᠠ《 ᠬᠦ 一 ᠬᠦ᠂ ᠬᠦ ᠬᠦ 一 ᠠ᠋ 一 ᠶ᠋ᠢ ᠰᠢᠷᠠ ᠲᠣᠰᠣ᠂ ᠬᠦ 一 ᠬᠦ᠂ ᠬᠦ ᠬᠦ 一 ᠪᠡᠷ 一 ᠬᠡᠨ ᠬᠠᠷᠠ ᠬᠤᠰᠤᠮ》 ᠭᠡᠵᠦ ᠲᠠᠰᠤᠷᠠᠭᠠ ᠦᠭᠡᠢ ᠳᠣᠩᠭᠣᠳᠬᠤ ᠬᠥᠬᠥᠭᠡ ᠰᠢᠪᠠᠭᠤᠨ ᠤ᠋ ᠳᠠᠭᠤᠨ ᠲᠡᠭᠦᠨ ᠦ᠌ ᠡᠵᠢ ᠪᠡᠨ ᠮᠥᠷᠥᠭᠡᠳᠬᠦ ᠰᠡᠳᠬᠢᠯ ᠢ᠋ ᠤᠯᠠᠮ ᠤᠶᠠᠷᠠᠭᠤᠯᠬᠤ ᠠᠵᠢ!
ᠬᠥᠬᠥᠭᠡ ᠰᠢᠪᠠᠭᠤᠨ ᠤ᠋《ᠡᠵᠢ ᠰᠢᠷᠠ ᠲᠣᠰᠣ᠂ ᠪᠡᠷᠭᠡᠨ ᠬᠠᠷᠠ ᠬᠤᠰᠤᠮ》 ᠭᠡᠵᠦ ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠳᠣᠩᠭᠣᠳᠴᠤ ᠴᠢᠳᠠᠳᠠᠭ ᠭᠡᠳᠡᠭ ᠦ᠋ᠨ ᠲᠤᠬᠠᠢ ᠣᠢᠷᠠᠳ ᠠᠷᠠᠳ ᠤ᠋ᠨ ᠳᠤᠮᠳᠠ ᠡᠢᠮᠦ ᠨᠢᠭᠡ ᠳᠣᠮᠣᠭ ᠦᠯᠢᠭᠡᠷ ᠪᠠᠢᠳᠠᠭ᠄ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠨᠢᠭᠡ ᠨᠠᠰᠤᠲᠠᠢ ᠡᠵᠢ ᠬᠣᠶᠠᠷ ᠬᠦᠦ ᠲᠡᠢ ᠪᠡᠨ ᠭᠠᠭᠴᠠ ᠨᠢᠭᠡ ᠰᠠᠭᠠᠯᠢ ᠶ᠋ᠢᠨ ᠦᠨᠢᠶᠡ ᠲᠡᠢ ᠶᠠᠳᠠᠭᠤᠬᠠᠨ ᠠᠮᠢᠳᠤᠷᠠᠯ ᠲᠠᠢ ᠣᠨᠳᠣᠷᠣᠵᠤ ᠪᠠᠢᠵᠢ ᠭᠡᠨᠡ᠃ ᠡᠵᠢ ᠨᠢ ᠥᠷᠯᠥᠭᠡ ᠥᠷᠯᠥᠭᠡ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠰᠦ ᠰᠠᠭᠠᠯᠢ ᠴᠤᠭᠯᠠᠭᠤᠯᠤᠭᠠᠳ ᠬᠡᠳᠦ ᠬᠣᠨᠣᠭᠠᠳ ᠨᠢᠭᠡ ᠪᠦᠯᠢᠳᠡᠭ ᠪᠠᠢᠵᠠᠢ᠃ ᠡᠵᠢ ᠬᠥᠮᠦᠨ ᠦ᠌ ᠦᠷᠡ ᠪᠡᠨ ᠡᠨᠡᠷᠢᠬᠦ ᠰᠡᠳᠬᠢᠯ ᠢ᠋ ᠶᠠᠭᠤ ᠲᠠᠢ ᠵᠦᠢᠷᠯᠡᠬᠦ ᠠᠵᠢ ᠠ᠋᠂ ᠥᠪᠡᠷ ᠢ᠋ᠶ᠋ᠡᠨ ᠰᠢᠩᠭᠡᠨ ᠰᠦ ᠰᠢᠷᠠᠰᠤ ᠤᠤᠭᠤᠵᠤ ᠬᠣᠶᠠᠷ ᠬᠦᠦ ᠳ᠋ᠡᠭᠡᠨ ᠥᠳᠬᠡᠨ ᠥᠷᠥᠮᠡ᠂ ᠰᠢᠷᠠ ᠲᠣᠰᠣ ᠶ᠋ᠢ ᠨᠢ ᠢᠳᠡᠭᠦᠯᠳᠡᠭ ᠶᠦᠮ ᠭᠡᠨᠡ᠃ ᠮᠥᠨ ᠡᠢᠨ ᠬᠦ᠌ ᠨᠠᠰᠤᠲᠠᠢ ᠡᠵᠢ ᠶ᠋ᠢᠨ ᠡᠨᠡᠷᠢᠯ ᠬᠠᠢᠷᠠ ᠳ᠋ᠤ᠌ ᠡᠷᠡ ᠥᠰᠴᠦ ᠢᠰᠡᠭᠡᠢ ᠰᠤᠨᠳᠠᠭ ᠭᠡᠳᠡᠭ ᠢ᠋ᠶ᠋ᠡᠷ ᠬᠣᠶᠠᠷ ᠬᠦᠦ ᠪᠣᠰᠤᠭᠠ ᠡᠷᠡ ᠪᠣᠯᠵᠠᠢ᠃ ᠡᠵᠢ ᠨᠢ ᠶᠢᠷᠲᠢᠨᠴᠦ ᠶ᠋ᠢᠨ ᠡᠷᠢᠶᠡᠨ ᠠᠯᠠᠭ ᠵᠣᠪᠠᠯᠠᠩ ᠢ᠋ ᠡᠯᠡᠭᠡᠵᠦ ᠭᠦᠢᠴᠡᠭᠡᠭᠡᠳ ᠮᠥᠩᠬᠡ ᠶᠢᠷᠲᠢᠨᠴᠦ ᠶ᠋ᠢᠨ ᠲᠡᠷᠰᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠵᠢᠮᠡ ᠪᠡᠷ ᠪᠤᠷᠬᠠᠨ ᠪᠣᠯᠵᠢ ᠠ᠋᠃ ᠡᠵᠢ ᠡᠴᠡ ᠪᠡᠨ ᠬᠣᠢᠰᠢ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠠᠨ ᠬᠣᠴᠣᠷᠤᠭᠰᠠᠨ ᠪᠣᠯᠬᠤᠢ ᠭᠠᠰᠢᠭᠤᠨ ᠵᠣᠪᠠᠭᠤᠷᠢ ᠪᠠᠨ ᠬᠤᠪᠢᠶᠠᠯᠴᠠᠵᠤ ᠡᠳ᠋ᠯᠡᠨ ᠭᠠᠭᠴᠠ ᠨᠢᠭᠡ ᠪᠡᠨ ᠬᠠᠭᠠᠰᠯᠠᠵᠤ ᠢᠳᠡᠳᠡᠭ ᠪᠠᠢᠵᠠᠢ᠃ ᠢᠩᠭᠢᠭᠰᠡᠭᠡᠷ ᠪᠠᠢᠵᠤ ᠠᠬᠠ ᠨᠢ ᠪᠦᠰᠡᠭᠦᠢ ᠠᠪᠴᠤ ᠠᠢᠯ ᠭᠡᠷ ᠪᠣᠯᠪᠠ᠃ ᠳᠡᠭᠦᠦ ᠨᠢ ᠴᠦ᠍ ᠪᠡᠷᠭᠡᠨ ᠲᠡᠢ ᠪᠣᠯᠤᠯᠠ ᠭᠡᠵᠦ ᠪᠠᠶᠠᠷᠯᠠᠨ ᠬᠥᠭᠰᠡᠬᠦ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ᠃ ᠪᠡᠷᠬᠡ ᠬᠠᠲᠠᠭᠤ ᠶ᠋ᠢ ᠨᠢ ᠬᠢᠳᠡᠭ ᠪᠣᠯᠪᠠᠴᠤ ᠪᠦᠯᠢᠶᠡᠨ ᠬᠠᠯᠠᠭᠤᠨ ᠢ᠋ ᠢᠳᠡᠬᠦ ᠪᠠᠢᠯᠭᠦᠢ ᠭᠡᠵᠦ ᠵᠢᠷᠭᠠᠯ ᠰᠠᠨᠠᠳᠠᠭ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠡᠳᠦᠷ ᠦ᠋ᠨ ᠮᠠᠷᠭᠠᠲᠤᠷ ᠠᠬᠠ ᠨᠢ ᠬᠡᠯᠡᠪᠡᠯ ᠳᠡᠭᠦᠦ ᠨᠢ ᠰᠣᠨᠣᠰᠴᠤ᠂ ᠠᠮᠠ ᠨᠢ ᠢᠳᠡᠪᠡᠯ ᠰᠡᠭᠦᠯ ᠨᠢ ᠲᠠᠷᠭᠤᠯᠠᠳᠠᠭ ᠭᠡᠭᠴᠢ ᠪᠡᠷ ᠳᠡᠭᠦᠦ ᠨᠢ ᠠᠬᠠ ᠪᠡᠷᠭᠡᠨ ᠦ᠌ ᠪᠡᠨ ᠵᠠᠬᠢᠶᠠ ᠪᠠᠷ ᠦᠨᠢᠶᠡ ᠲᠤᠭᠤᠯ ᠡᠷᠭᠢᠭᠦᠯᠵᠦ᠂ ᠲᠦᠯᠡᠭᠡ ᠮᠣᠳᠣ ᠡᠭᠦᠷᠦᠨᠡ᠃ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠪᠡᠷᠭᠡᠨ ᠨᠢ ᠦᠨᠢᠶᠡ ᠰᠠᠭᠠᠬᠤ ᠳ᠋ᠤ᠌ ᠳᠡᠭᠦᠦ ᠨᠢ ᠲᠤᠭᠤᠯ ᠲᠠᠲᠠᠵᠤ ᠥᠭᠳᠡᠭ᠃ ᠠᠬᠠ ᠨᠢ ᠵᠠᠯᠬᠠᠭᠤᠷᠠᠵᠤ ᠤᠨᠲᠠᠳᠠᠭ ᠭᠡᠨᠡ᠃ ᠲᠡᠭᠡᠭᠡᠳ ᠳᠡᠭᠦᠦ ᠨᠢ ᠦᠨᠢᠶᠡ ᠪᠡᠨ ᠲᠠᠭᠤᠵᠤ ᠪᠡᠯᠴᠢᠭᠡᠷ ᠲᠦ᠍ ᠭᠠᠷᠭᠠᠨ ᠪᠤᠴᠠᠬᠤ ᠳ᠋ᠠᠭᠠᠨ ᠲᠦᠯᠡᠭᠡ ᠡᠭᠦᠷᠳᠡᠭ ᠪᠠᠢᠵᠠᠢ᠃ ᠬᠠᠷᠢᠵᠤ ᠢᠷᠡᠭᠡᠳ ᠢᠳᠡᠳᠡᠭ ᠨᠢ ᠬᠥᠭᠡᠷᠦᠭᠦᠯᠦᠭᠰᠡᠨ ᠰᠦᠨ ᠦ᠌ ᠬᠠᠷᠠ ᠬᠤᠰᠤᠮ ᠪᠤᠶᠤ ᠪᠦᠯᠢᠯᠭᠡ ᠶ᠋ᠢᠨ ᠰᠦᠨ ᠦ᠌ ᠰᠢᠷᠠᠰᠤ ᠤᠤᠭᠤᠳᠠᠭ ᠪᠣᠯᠵᠠᠢ᠃ ᠠᠬᠠ ᠪᠡᠷᠭᠡᠨ ᠨᠢ ᠥᠷᠥᠮᠡ ᠲᠣᠰᠣ ᠶ᠋ᠢ ᠨᠢ ᠬᠠᠭᠤᠷᠠᠢᠯᠠᠵᠤ ᠢᠳᠡᠭᠡᠳ ᠳᠡᠭᠦᠦ ᠲᠡᠢ ᠬᠥᠮᠦᠨ ᠳᠥᠷᠥᠭᠡ ᠢᠰᠭᠦᠯᠦᠨᠡ ᠭᠡᠴᠢᠬᠡᠭᠰᠡᠨ ᠠᠩᠭᠠᠢᠵᠤ ᠢᠳᠡᠭᠡᠳ ᠲᠠᠩᠭᠠᠢᠵᠤ ᠬᠡᠪᠲᠡᠨᠡ᠃ ᠨᠢᠭᠡ ᠡᠳᠦᠷ ᠳᠡᠭᠦᠦ ᠨᠢ ᠲᠦᠯᠡᠭᠡ ᠡᠭᠦᠷᠴᠦ ᠬᠦᠷᠡᠭᠴᠢ ᠦᠨᠢᠶᠡ ᠪᠡᠨ ᠲᠠᠭᠤᠭᠠᠳ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠬᠦᠷᠡᠭᠴᠢ ᠦᠨᠢᠶᠡ ᠨᠢ ᠥᠴᠦᠬᠡᠨ ᠡᠷᠭᠢ ᠳ᠋ᠦ᠍ ᠪᠦᠳᠦᠷᠢᠵᠦ ᠤᠨᠠᠭᠠᠳ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠢᠪᠠ᠃ ᠢᠩᠭᠢᠭᠡᠳ ᠬᠦᠷᠡᠭᠴᠢ ᠦᠨᠢᠶᠡ ᠪᠡᠨ ᠡᠷᠭᠦᠵᠦ ᠪᠤᠰᠬᠠᠬᠤ ᠭᠡᠵᠦ ᠬᠡᠴᠢᠨᠡᠭᠡᠨ ᠨᠣᠴᠣᠯᠳᠤᠭᠰᠠᠨ ᠴᠤ᠌ ᠪᠤᠰᠬᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠬᠦᠷᠡᠭᠴᠢ ᠦᠨᠢᠶᠡ ᠤᠷᠲᠤᠬᠠᠨ ᠭᠡᠭᠴᠢ ᠰᠡᠭᠦᠷᠡᠰᠦ ᠠᠯᠲᠠᠨ᠄《 ᠪᠢ ᠣᠳᠣ ᠪᠣᠰᠴᠤ ᠳᠡᠢᠯᠬᠦ ᠪᠡᠨ ᠪᠣᠯᠢᠭᠰᠠᠨ ᠠ᠋! ᠮᠥᠨ ᠡᠨᠡ ᠡᠷᠭᠢ ᠳᠣᠣᠷᠠ ᠶᠠᠰᠤ ᠪᠠᠨ ᠬᠠᠶᠠᠬᠤ ᠪᠣᠯᠤᠨᠠ᠃ ᠮᠠᠷᠭᠠᠲᠤᠷ ᠦᠦᠷ ᠢ᠋ᠶ᠋ᠡᠷ ᠪᠢ ᠨᠠᠰᠤᠲᠠᠢ ᠡᠵᠢ ᠶ᠋ᠢᠨ ᠴᠢᠨᠢ ᠬᠣᠢᠨᠠ ᠠ᠋ᠴᠠ ᠶᠠᠪᠤᠨᠠ᠁ ᠨᠠᠰᠤᠲᠠᠢ ᠡᠵᠢ ᠪᠡᠨ ᠪᠠᠢᠬᠤ ᠳ᠋ᠤ᠌ ᠴᠢ ᠥᠳᠬᠡᠨ ᠥᠷᠥᠮᠡ᠂ ᠰᠢᠷᠠ ᠲᠣᠰᠣ ᠲᠠᠢ ᠪᠤᠳᠠᠭᠠ ᠢᠳᠡᠵᠦ ᠪᠠᠢᠭᠰᠠᠨ ᠪᠢᠰᠢ ᠊ᠦᠦ? ᠨᠠᠰᠤᠲᠠᠢ ᠡᠵᠢ ᠡᠴᠡ ᠪᠡᠨ ᠬᠣᠢᠰᠢ ᠪᠡᠷᠭᠡᠨ ᠦ᠌ ᠪᠡᠨ ᠭᠠᠷ ᠳᠣᠣᠷᠠ ᠬᠠᠷᠠ ᠠᠵᠢᠯ ᠢ᠋ ᠨᠢ ᠬᠢᠴᠢᠬᠡᠭᠡᠳ ᠬᠠᠷᠠ ᠬᠤᠰᠤᠮ ᠯᠠ ᠣᠯᠵᠤ ᠢᠳᠡᠬᠦ ᠪᠣᠯᠤᠭᠰᠠᠨ᠃ ᠮᠠᠷᠭᠠᠲᠤᠷ ᠠ᠋ᠴᠠ ᠡᠬᠢᠯᠡᠵᠦ ᠴᠢ ᠠᠬᠠ ᠪᠡᠷᠭᠡᠨ ᠲᠡᠢ ᠪᠡᠨ ᠰᠠᠯᠵᠤ ᠠᠰ ᠲᠠᠭᠠᠨ ᠡᠷᠦᠬᠡ ᠣᠩᠭᠣᠢᠯᠭᠠᠵᠤ ᠰᠠᠭᠤ! ᠮᠢᠨᠦ ᠦᠭᠡ ᠪᠡᠷ ᠶᠠᠪᠤᠭᠠᠷᠠᠢ ᠴᠢ᠂ ᠮᠢᠨᠦ ᠦᠭᠡ ᠪᠡᠷ ᠶᠠᠪᠤᠬᠤ ᠦᠭᠡᠢ ᠪᠣᠯ ᠠᠳᠠᠭ ᠨᠢ ᠬᠠᠷᠠ ᠬᠤᠰᠤᠮ ᠴᠤ᠌ ᠣᠯᠵᠤ ᠢᠳᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠪᠣᠯᠤᠨᠠ᠃ ᠮᠢᠨᠦ ᠰᠦᠨᠡᠰᠦ ᠡᠨᠳᠡ ᠡᠴᠡ ᠶᠠᠪᠤᠭᠠᠳ ᠴᠠᠭᠠᠳᠤ ᠣᠷᠴᠢᠯᠠᠩ ᠤ᠋ᠨ ᠨᠢᠭᠡ ᠰᠢᠪᠠᠭᠤ ᠪᠣᠯᠵᠤ ᠬᠤᠪᠢᠷᠠᠨᠠ᠃ ᠲᠡᠷᠡ ᠰᠢᠪᠠᠭᠤ ᠴᠢᠮᠠ ᠳ᠋ᠤ᠌ ᠶᠢᠰᠦ ᠶᠢᠰᠦ ᠨᠠᠶᠠᠨ ᠨᠢᠭᠡ ᠥᠨᠳᠡᠭᠡᠯᠡᠬᠦ ᠪᠣᠢ᠃ ᠴᠢ ᠲᠡᠷᠡ ᠰᠢᠪᠠᠭᠤ ᠳ᠋ᠤ᠌ ᠡᠪᠲᠡᠢᠬᠡᠨ ᠨᠢᠭᠡ ᠡᠭᠦᠷ ᠪᠠᠷᠢᠵᠤ ᠥᠭᠭᠦᠭᠡᠳ ᠡᠳᠦᠷ ᠡᠳᠦᠷ ᠦ᠋ᠨ ᠥᠨᠳᠡᠭᠡ ᠶ᠋ᠢ ᠨᠢ ᠲᠣᠰᠴᠤ ᠠᠪᠤᠭᠠᠳ ᠬᠣᠨᠣᠭ ᠪᠤᠳᠠᠭᠠᠨ ᠳᠣᠲᠣᠷᠠ ᠬᠠᠳᠠᠭᠠᠯᠠᠵᠤ ᠳᠡᠯᠪᠢ! ᠨᠢᠭᠡ ᠡᠳᠦᠷ ᠴᠦ᠍ ᠣᠰᠣᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠰᠢᠪᠠᠭᠤᠨ ᠤ᠋ ᠥᠨᠳᠡᠭᠡ ᠶ᠋ᠢ ᠬᠥᠰᠡᠷ ᠤᠨᠠᠭᠠᠵᠤ ᠬᠠᠭᠠᠯᠬᠤ ᠪᠤᠶᠤ ᠪᠤᠰᠤᠳ ᠥᠩᠭᠡᠢᠭᠴᠢ ᠠᠮᠢᠲᠠᠨ ᠭᠣᠣᠯᠳᠠᠨ ᠬᠣᠷᠣᠭᠳᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠰᠠᠨᠠᠵᠤ ᠶᠠᠪᠤ! ᠡᠭᠦᠨ ᠢ᠋ ᠬᠠᠲᠠᠭᠤ ᠴᠡᠭᠡᠷ ᠲᠡᠢ ᠬᠠᠳᠠᠭᠠᠯᠠᠵᠤ ᠪᠠᠢᠪᠠᠯ ᠨᠠᠶᠠᠨ ᠨᠢᠭᠡ ᠥᠨᠳᠡᠭᠡᠯᠡᠬᠦ ᠰᠢᠪᠠᠭᠤ ᠴᠢᠮᠠ ᠳ᠋ᠤ᠌ ᠠᠯᠲᠠᠨ ᠥᠨᠳᠡᠭᠡ ᠥᠭᠬᠦ ᠶᠦᠮ ᠠ᠋! ᠡᠨᠡ ᠨᠠᠶᠠᠨ ᠨᠢᠭᠡᠨ ᠥᠨᠳᠡᠭᠡ ᠪᠡᠨ ᠪᠤᠯᠠᠭ ᠤ᠋ᠨ ᠲᠤᠩᠭᠠᠯᠠᠭ ᠤᠰᠤᠨ ᠳ᠋ᠤ᠌ ᠬᠢᠵᠦ ᠦᠵᠡ! ᠶᠢᠰᠦᠨ ᠠᠯᠲᠠᠨ ᠥᠨᠳᠡᠭᠡ ᠨᠢ ᠤᠰᠤᠨ ᠳᠣᠣᠷᠠ ᠵᠢᠪᠴᠦ ᠪᠤᠰᠤ ᠳᠠᠯᠠᠨ ᠬᠣᠶᠠᠷ ᠥᠨᠳᠡᠭᠡ ᠨᠢ ᠤᠰᠤᠨ ᠳᠡᠭᠡᠷᠡ ᠬᠥᠪᠬᠦ ᠶᠦᠮ ᠠ᠋! ᠴᠢ ᠰᠠᠢᠨ ᠴᠡᠭᠡᠵᠢᠯᠡᠵᠦ ᠠᠪ! ᠡᠨᠡ ᠨᠢᠭᠤᠴᠠ ᠶ᠋ᠢ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠨᠢᠭᠤᠴᠠ ᠶ᠋ᠢ ᠵᠠᠳᠠᠷᠠᠭᠤᠯᠤᠭᠰᠠᠭᠠᠷ ᠲᠡᠷᠡ ᠰᠢᠪᠠᠭᠤ ᠴᠢᠮᠠ ᠳ᠋ᠤ᠌ ᠠᠯᠲᠠᠨ ᠥᠨᠳᠡᠭᠡ ᠲᠥᠷᠥᠬᠦ ᠦᠭᠡᠢ᠂ ᠤᠰᠤᠨ ᠥᠨᠳᠡᠭᠡ ᠲᠥᠷᠥᠨᠡ ᠰᠢᠦ!》 ᠭᠡᠳ ᠬᠦᠷᠡᠭᠴᠢ ᠦᠨᠢᠶᠡ ᠨᠢᠳᠦ ᠪᠡᠨ ᠠᠨᠢᠨ ᠥᠨᠢᠳᠡ ᠠᠮᠠᠷᠠᠪᠠ᠃
ᠳᠡᠭᠦᠦ ᠨᠢ ᠮᠠᠷᠭᠠᠲᠤᠷ ᠠ᠋ᠴᠠ ᠨᠢ ᠳᠠᠷᠤᠢ ᠠᠬᠠ ᠪᠡᠷᠭᠡᠨ ᠡᠴᠡ ᠪᠡᠨ ᠰᠠᠯᠵᠤ ᠠᠭᠤᠯᠠ ᠶ᠋ᠢᠨ ᠬᠥᠪᠴᠢ ᠳ᠋ᠦ᠍ ᠣᠪᠣᠬᠠᠢ ᠪᠤᠰᠬᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠬᠤ ᠪᠣᠯᠵᠠᠢ᠃
ᠦᠨᠡᠬᠡᠷ ᠨᠢᠭᠡ ᠲᠠᠭᠲᠠᠭᠠ ᠰᠢᠭ᠋ ᠦᠨᠡᠰᠦᠨ ᠪᠣᠷᠣ ᠰᠢᠪᠠᠭᠤ ᠲᠡᠭᠦᠨ ᠦ᠌ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠡᠳᠦᠷ ᠲᠣᠭᠠᠯᠠᠨ ᠥᠨᠳᠡᠭᠡᠯᠡᠵᠡᠢ᠃ ᠶᠢᠰᠦ ᠶᠢᠰᠦ ᠨᠠᠶᠠᠨ ᠨᠢᠭᠡᠨ ᠥᠨᠳᠡᠭᠡ ᠶ᠋ᠢ ᠬᠣᠨᠣᠭ ᠪᠤᠳᠠᠭᠠᠨ ᠳ᠋ᠤ᠌ ᠬᠠᠳᠠᠭᠠᠯᠠᠵᠤ ᠪᠠᠢᠭᠠᠳ ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠬᠢᠬᠦᠯᠡ ᠶᠢᠰᠦᠨ ᠠᠯᠲᠠᠨ ᠥᠨᠳᠡᠭᠡ ᠤᠰᠤᠨ ᠳᠣᠣᠷᠠ ᠲᠤᠨᠵᠤ ᠰᠢᠵᠢᠷ ᠭᠡᠷᠡᠯ ᠰᠠᠴᠤᠷᠠᠨᠠ᠃ ᠨᠥᠭᠦᠭᠡ ᠳᠠᠯᠠᠨ ᠬᠣᠶᠠᠷ ᠥᠨᠳᠡᠭᠡ ᠨᠢ ᠮᠥᠩᠭᠥᠨ ᠥᠨᠳᠡᠭᠡ ᠪᠠᠢᠵᠠᠢ᠃ ᠳᠡᠭᠦᠦ ᠨᠢ ᠡᠳᠦᠷ ᠲᠤᠵᠢ ᠲᠦᠯᠡᠭᠡ ᠮᠣᠳᠣ ᠡᠭᠦᠷᠴᠦ ᠠᠵᠢᠯ ᠬᠥᠳᠡᠯᠮᠦᠷᠢ ᠬᠢᠵᠦ ᠮᠠᠰᠢ ᠪᠠᠶᠠᠵᠢᠪᠠ᠃ ᠠᠬᠠ ᠪᠡᠷᠭᠡᠨ ᠨᠢ ᠡᠵᠢ ᠶ᠋ᠢᠨ ᠬᠡᠰᠡᠭ ᠪᠤᠶᠠᠨ ᠳᠡᠭᠡᠷᠡ ᠠᠵᠠ ᠶ᠋ᠢᠨ ᠲᠩᠷᠢ ᠬᠠᠷᠠᠵᠤ ᠠᠯᠵᠠᠭᠤᠷᠠᠨ ᠰᠠᠭᠤᠭᠰᠠᠭᠠᠷ ᠪᠠᠢᠵᠤ ᠦᠭᠡᠢᠷᠡᠨ ᠬᠣᠭᠣᠰᠣᠷᠠᠪᠠ᠃
ᠡᠢᠨ ᠬᠦ᠌ ᠪᠡᠷᠭᠡᠨ ᠨᠢ ᠨᠢᠭᠡ ᠡᠳᠦᠷ ᠳᠡᠭᠦᠦ ᠶ᠋ᠢᠨ ᠳ᠋ᠡᠭᠡᠨ ᠢᠷᠡᠵᠦ ᠤᠬᠢᠯᠠᠭ ᠳᠠᠭᠤᠯᠠᠭ ᠠᠯᠲᠠᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠪᠠᠶᠠᠵᠢᠭᠰᠠᠨ ᠢ᠋ ᠤᠷᠠᠨ ᠦᠭᠡ ᠤᠬᠢᠯᠠᠩᠬᠠᠢ ᠴᠢᠷᠠᠢ ᠪᠠᠷ ᠢ᠋ᠶ᠋ᠠᠨ ᠮᠡᠬᠡᠯᠡᠵᠦ ᠮᠡᠳᠡᠭᠡᠳ ᠳᠡᠭᠦᠦ ᠪᠡᠨ ᠲᠡᠷᠡ ᠨᠤᠲᠤᠭ ᠳᠡᠭᠡᠷᠡ ᠬᠥᠭᠡᠭᠡᠵᠦ ᠭᠠᠷᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠡ ᠣᠪᠣᠬᠠᠢ ᠳ᠋ᠤ᠌ ᠢᠷᠡᠵᠦ ᠰᠠᠭᠤᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠰᠢᠪᠠᠭᠤᠨ ᠤ᠋ ᠥᠨᠳᠡᠭᠡ ᠶ᠋ᠢ ᠴᠤᠭᠯᠠᠭᠤᠯᠤᠨ ᠮᠥᠨ ᠲᠡᠷᠡ ᠶᠣᠰᠣᠭᠠᠷ ᠬᠠᠳᠠᠭᠠᠯᠠᠪᠠ ᠃ ᠪᠡᠷᠭᠡᠨ ᠨᠢ ᠨᠠᠶᠠᠨ ᠨᠢᠭᠡᠨ ᠥᠨᠳᠡᠭᠡ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠵᠦ ᠶᠠᠳᠠᠨ ᠡᠳᠦᠷ ᠦ᠋ᠨ ᠶᠢᠰᠦ ᠤᠳᠠᠭᠠ ᠲᠣᠭᠠᠯᠠᠵᠤ《ᠠᠯᠲᠠᠨ ᠥᠨᠳᠡᠭᠡ᠂ ᠠᠯᠲᠠᠨ ᠥᠨᠳᠡᠭᠡ》 ᠭᠡᠵᠦ ᠠᠮᠠᠨ ᠤᠩᠰᠢᠯᠭᠠ ᠪᠣᠯᠵᠤ ᠥᠨᠥᠬᠢ ᠥᠨᠳᠡᠭᠡ ᠨᠦ᠍ᠭᠦᠳ ᠢ᠋ ᠪᠣᠰᠤᠨ ᠰᠠᠭᠤᠨ ᠲᠡᠮᠲᠡᠷᠢᠨᠡ᠃
《 ᠬᠦᠯᠢᠶᠡᠭᠰᠡᠨ ᠶᠠᠭᠤᠮᠠᠨ ᠤ᠋ ᠤᠳᠠᠭᠠᠨ᠂ ᠬᠦᠰᠡᠭᠰᠡᠨ ᠶᠠᠭᠤᠮᠠᠨ ᠤ᠋ ᠬᠣᠯᠠ》 ᠭᠡᠳᠡᠭ ᠢ᠋ᠶ᠋ᠡᠷ ᠪᠡᠷᠭᠡᠨ ᠨᠢ ᠠᠷᠠᠢ ᠬᠢᠵᠦ ᠨᠠᠶᠠᠨ ᠨᠢᠭᠡᠨ ᠥᠨᠳᠡᠭᠡ ᠪᠣᠯᠣᠮᠠᠭᠴᠠ ᠪᠤᠯᠠᠭ ᠤ᠋ᠨ ᠤᠰᠤᠨ ᠳ᠋ᠤ᠌ ᠥᠨᠳᠡᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠬᠢᠭᠡᠳ ᠠᠯᠲᠠ ᠮᠥᠩᠭᠥᠨ ᠥᠨᠳᠡᠭᠡ ᠡᠪᠦᠷᠯᠡᠬᠦ ᠶ᠋ᠢ ᠭᠣᠷᠢᠯᠠᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠤᠰᠤᠨ ᠳᠣᠣᠷᠠ ᠨᠢᠭᠡ ᠴᠦ᠍ ᠥᠨᠳᠡᠭᠡ ᠲᠣᠨᠣᠭᠰᠠᠨ ᠦᠭᠡᠢ ᠪᠦᠷ ᠤᠰᠤᠨ ᠳᠡᠭᠡᠭᠦᠷ ᠬᠥᠪᠴᠦ ᠪᠠᠢᠯᠠ᠁ ᠪᠡᠷᠭᠡᠨ ᠨᠢ ᠬᠣᠷᠣ ᠨᠢ ᠪᠤᠴᠠᠯᠬᠤ ᠳ᠋ᠠᠭᠠᠨ ᠨᠠᠶᠠᠨ ᠨᠢᠭᠡᠨ ᠥᠨᠳᠡᠭᠡ ᠶ᠋ᠢ ᠬᠠᠳᠠᠨ ᠳᠡᠯᠡᠳᠴᠦ ᠬᠠᠭᠠᠯᠤᠭᠰᠠᠨ ᠳ᠋ᠤ᠌ ᠨᠠᠶᠠᠨ ᠨᠢᠭᠡᠨ ᠳ᠋ᠢᠭᠪᠠᠷᠠᠨᠽᠠ ᠬᠣᠷᠣᠬᠠᠢ( ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ) ᠪᠣᠯᠵᠤ ᠬᠤᠪᠢᠯᠤᠭᠠᠳ ᠲᠡᠭᠦᠨ ᠦ᠌ ᠪᠡᠶᠡ ᠳᠡᠭᠡᠷᠡ ᠬᠤᠮᠢᠷᠠᠨ ᠠᠷᠵᠠᠭᠠᠨᠠᠪᠠ᠃ ᠳ᠋ᠢᠭᠪᠠᠷᠠᠨᠽᠠ ᠨᠤᠭᠤᠳ ᠱᠣᠷᠣᠨ ᠦᠵᠦᠭᠦᠷᠲᠦ ᠬᠣᠣᠷᠲᠤ ᠰᠡᠭᠦᠯ ᠢ᠋ᠶ᠋ᠡᠨ ᠭᠣᠳᠣᠭᠣᠨᠠᠭᠤᠯᠤᠨ ᠭᠦᠶᠦᠯᠳᠦᠭᠡᠳ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢᠨ ᠠᠯᠢ ᠨᠢᠮᠭᠡᠨ ᠰᠤᠭᠤ ᠴᠠᠪᠢ ᠤᠷᠤᠭᠤ ᠨᠢ ᠰᠢᠷᠭᠤᠵᠤ ᠣᠷᠣᠨ ᠬᠠᠳᠬᠤᠵᠤ ᠡᠪᠡᠳᠦᠭᠦᠯᠬᠦ ᠳ᠋ᠡᠭᠡᠨ《ᠠᠯᠲᠠ ᠮᠥᠩᠭᠥᠨ ᠳ᠋ᠦ᠍ ᠰᠢᠨᠤᠵᠤ᠂ ᠠᠬᠠ ᠳᠡᠭᠦᠦ ᠪᠡᠨ ᠬᠠᠬᠠᠨᠠ ᠊ᠤᠤ?》 ᠭᠡᠵᠦ ᠠᠮᠠᠨ ᠥᠴᠢᠭ ᠢ᠋ ᠨᠢ ᠠᠪᠴᠤ ᠪᠠᠢᠭᠠ ᠰᠢᠭ᠋ ᠳᠡᠪᠬᠡᠴᠡᠭᠦᠯᠦᠨ ᠰᠠᠨᠳᠤᠷᠭᠠᠵᠤ《 ᠪᠤᠷᠬᠠᠨ ᠲᠩᠷᠢ ᠮᠢᠨᠢ ᠠ᠋! ᠪᠠᠢᠶᠠ ᠠ᠋! ᠪᠠᠢᠶᠠ! ᠳᠠᠬᠢᠵᠤ ᠬᠣᠮᠣᠬᠠᠢ ᠰᠠᠨᠠᠭᠠᠯᠠᠵᠤ᠂ ᠬᠣᠪᠳᠣᠭᠯᠠᠬᠤ ᠪᠠᠨ ᠪᠠᠢᠶᠠ! ᠪᠤᠷᠬᠠᠨ ᠲᠩᠷᠢ ᠮᠢᠨᠢ ᠥᠷᠥᠰᠢᠶᠡ! ᠭᠤᠶᠤᠶᠠ ᠳᠠ᠂ ᠭᠤᠶᠤᠶᠠ! ᠡᠵᠢ ᠠ᠋᠂ ᠰᠢᠷᠠ ᠲᠣᠰᠣ᠂ ᠪᠡᠷᠭᠡᠨ ᠠ᠋᠂ ᠬᠠᠷᠠ ᠬᠤᠰᠤᠮ! ᠡᠵᠢ ᠠ᠋᠂ ᠰᠢᠷᠠ ᠲᠣᠰᠣ᠂ ᠪᠡᠷᠭᠡᠨ ᠠ᠋᠂ ᠬᠠᠷᠠ ᠬᠤᠰᠤᠮ》 ᠭᠡᠵᠦ ᠤᠬᠢᠯᠠᠩᠨᠠᠭᠰᠠᠨ ᠢ᠋ ᠲᠡᠷᠡ ᠬᠥᠬᠥᠭᠡ ᠰᠢᠪᠠᠭᠤ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠡᠴᠡ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠢ᠋ ᠳᠠᠭᠤᠷᠢᠶᠠᠨ《 ᠬᠦ᠂ ᠬᠦ᠂ ᠬᠦ ᠬᠦ 一 ᠡᠵᠢ ᠠ᠋᠂ ᠰᠢᠷᠠ ᠲᠣᠰᠣ᠂ ᠬᠦ᠂ ᠬᠦ ᠬᠦ ᠬᠦ 一 ᠪᠡᠷᠭᠡᠨ ᠠ᠋᠂ ᠬᠠᠷᠠ ᠬᠤᠰᠤᠮ》 ᠭᠡᠵᠦ ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠳᠣᠩᠭᠣᠳᠬᠤ ᠪᠣᠯᠵᠢ ᠭᠡᠨᠡ᠃
– – – –
① ᠰᠠᠨᠳᠤᠷᠬᠤ ᠪᠠᠴᠢᠮᠳᠠᠬᠤ᠂ ᠲᠡᠰᠬᠡᠯ ᠠᠯᠳᠠᠬᠤ᠃
② ᠬᠡᠪ ᠦ᠋ᠨ ᠴᠠᠢ ᠶ᠋ᠢ ᠳᠥᠷᠪᠡ ᠬᠡᠰᠡᠭᠯᠡᠵᠦ ᠬᠢᠷᠥᠭᠡᠳᠡᠭᠰᠡᠨ ᠦ᠌ ᠨᠢᠭᠡ ᠬᠡᠰᠡᠭ᠃