ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ> Хан мунын сүүрс < дээд > – Мөнх зохиоов ᠂ Дэд бодь – Хоёрдугаар бүлэг <3>
371ᠳᠡᠳ᠋ ᠪᠣᠲᠢ – ᠬᠣᠶᠠᠳᠤᠭᠠᠷ ᠪᠦᠯᠦᠭ <ᠭᠤᠷᠪᠠ>
ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠤ᠋ ᠭᠤᠷᠪᠠᠨ ᠳᠣᠯᠣᠭᠠ ᠬᠣᠷᠢᠨ ᠨᠢᠭᠡ ᠬᠣᠨᠣᠭ ᠤ᠋ᠨ ᠪᠡᠯᠪᠡᠰᠦᠷᠡᠯ ᠦ᠋ᠨ ᠲᠡᠭᠦᠰᠬᠡᠯ ᠡᠳᠦᠷ ᠬᠦᠩ ᠨᠣᠶᠠᠨ ᠭᠣᠴᠢᠭᠠ ᠭᠦᠶᠦᠯᠭᠡᠵᠦ ᠭᠣᠣᠯ ᠣᠷᠳᠣᠨ ᠳ᠋ᠠᠭᠠᠨ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢ ᠳᠠᠭᠤᠳᠠᠭᠤᠯᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠳᠡᠭᠦᠦ ᠭᠣᠮᠪᠤᠰᠦ᠋ᠷᠦᠩ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠲᠤᠬᠢ ᠶ᠋ᠢ ᠲᠥᠪᠬᠢᠨᠡᠭᠦᠯᠵᠦ ᠪᠠᠷᠠᠭᠠᠳ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠠᠬᠢ ᠶᠡᠬᠡ ᠭᠡᠷ ᠳᠡᠭᠡᠷᠡ ᠪᠡᠨ ᠪᠡᠶᠡ ᠴᠢᠯᠥᠭᠡᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠦᠩ ᠨᠣᠶᠠᠨ ᠤ᠋ ᠪᠠᠴᠢᠭᠤ ᠳᠠᠭᠤᠳᠠᠯᠭᠠ ᠳ᠋ᠤ᠌ ᠪᠣᠰᠢᠭᠣ ᠬᠥᠳᠡᠯᠵᠦ ᠨᠣᠶᠠᠨ ᠰᠠᠩ ᠤ᠋ᠨ ᠪᠠᠭᠤᠷᠢ ᠤᠷᠤᠭᠤ ᠪᠣᠭᠣᠨᠢ ᠵᠢᠯᠣᠭᠣ ᠪᠣᠰᠤᠭᠠ ᠳᠥᠷᠥᠭᠡ ᠪᠡᠷ ᠳᠠᠪᠬᠢᠭᠤᠯᠤᠨ ᠨᠠᠷᠠ ᠤᠨᠠᠬᠤ ᠲᠠᠢ ᠤᠷᠤᠯᠳᠤᠵᠤ ᠬᠦᠷᠪᠡ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠭᠣᠣᠯ ᠤᠷᠲᠤ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠲᠤᠯᠵᠤ ᠣᠴᠢᠪᠠᠯ ᠡᠭᠦᠳᠡᠨ ᠦ᠌ ᠬᠥᠲᠥᠴᠢ᠄
— ᠬᠦᠩ ᠨᠣᠶᠠᠨᠲᠠᠨ ᠵᠠᠬᠢᠷᠤᠭᠴᠢ ᠭᠤᠸᠠᠢ ᠶ᠋ᠢ ᠬᠦᠯᠢᠶᠡᠭᠡᠳ ᠤᠳᠠᠵᠠᠢ᠃ ᠬᠡᠳᠡᠷ ᠠᠪᠤᠷᠢ ᠲᠠᠢ ᠬᠡᠭᠵᠡᠭᠦᠨ ᠴᠢᠷᠠᠢ ᠲᠠᠢ ᠪᠠᠢᠭᠠ ᠁ ᠵᠠᠬᠢᠷᠤᠭᠴᠢ ᠨᠠᠮᠤᠭᠤᠬᠠᠨ ᠮᠡᠨᠳᠦᠯᠡᠭᠡᠴᠢ ᠭᠡᠪᠡᠯ ᠷᠠᠰᠢ ᠵᠠᠬᠢᠷᠤᠭᠴᠢ᠄
— ᠵᠠ ᠲᠡᠭᠡᠶᠡ ! ᠭᠡᠳ ᠬᠥᠲᠥᠴᠢ ᠶ᠋ᠢᠨ ᠰᠡᠬᠦᠭᠰᠡᠨ ᠡᠭᠦᠳᠡ ᠪᠡᠷ ᠲᠣᠯᠣᠭᠠᠢ ᠮᠡᠬᠦᠢᠨ ᠣᠷᠣᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ᠄
— ᠬᠦᠩ ᠨᠣᠶᠠᠨᠲᠠᠨ ᠮᠡᠨᠳᠦ ᠰᠠᠢᠨ ? ᠭᠡᠵᠦ ᠠᠮᠤᠷ ᠡᠷᠢᠬᠦ ᠳ᠋ᠦ᠍ ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠴᠢᠷᠠᠢ ᠨᠢ ᠴᠢᠷᠠᠢ ᠪᠢᠰᠢ ᠬᠡᠭᠵᠡᠢᠵᠦ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠤᠲᠤᠭᠠ ᠪᠠᠭᠠᠭᠢᠭᠤᠯᠵᠤ ᠬᠡᠪᠲᠡᠭᠰᠡᠨ ᠢ᠋ᠶ᠋ᠡᠨ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠮᠡᠨᠳᠦ ᠶ᠋ᠢᠨ ᠬᠠᠷᠢᠭᠤ ᠦᠭᠭᠦᠭᠰᠡᠨ ᠦᠭᠡᠢ ᠰᠢᠭᠤᠳ᠄
— ᠡᠳᠦᠢᠴᠢᠨᠡᠭᠡᠨ ᠤᠳᠠᠭᠠᠨ ᠬᠠᠮᠢᠭᠠ ᠶᠠᠪᠤᠪᠠ ? ᠭᠡᠴᠢᠬᠡᠯᠡ ᠃
— ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠳᠡᠭᠦᠦ ᠶ᠋ᠢᠨ ᠬᠣᠢᠲᠤᠬᠢ ᠶ᠋ᠢ ᠁
— ᠨᠣᠶᠠᠨ ᠰᠠᠩ ᠤ᠋ᠨ ᠶᠠᠪᠤᠳᠠᠯ ᠤ᠋ᠳ ᠵᠦᠭ ᠲᠣᠯᠣᠭᠠᠢ ᠨᠢ ᠨᠢᠭᠡ ᠲᠠᠢᠰᠢ ᠪᠣᠯᠪᠠ ᠤᠤ ? ᠦᠭᠡᠢ ᠤᠤ ?
— ᠪᠠᠷᠤᠭ ᠲᠥᠯᠥᠪ ᠨᠢ ᠨᠢᠭᠡ ᠲᠡᠢᠰᠢ ᠪᠣᠯᠴᠢᠬᠠᠭᠰᠠᠨ !
— ᠪᠠᠷᠤᠭ ᠲᠥᠯᠥᠪ ᠨᠢ ᠭᠡᠳᠡᠭ ᠴᠢᠨᠢ ⁈
— ᠁
— ᠴᠡᠴᠡᠭ ᠬᠠᠲᠤᠨ ᠤ᠋ ᠢᠨᠵᠢ ᠬᠡᠦᠬᠡᠨ ᠨᠣᠮᠢᠨ ᠢ᠋ ᠶᠠᠭᠠᠬᠢᠬᠤ ᠪᠠᠷ ᠪᠣᠯᠪᠠ ?
— ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠃ ᠨᠣᠶᠠᠨ ᠰᠠᠩ ᠳ᠋ᠤ᠌ ᠵᠠᠷᠤᠬᠤ ᠦᠭᠡᠢ ᠪᠣᠯ ᠤᠤᠯ ᠨᠤᠲᠤᠭ ᠲᠤᠨᠢ ᠬᠠᠷᠢᠭᠤᠯᠴᠢᠬᠠᠳᠠᠭ ᠯᠠ ᠬᠡᠷᠡᠭ !
— ᠬᠠᠷᠢᠭᠤᠯᠴᠢᠬᠠᠨᠠ ᠭᠡᠳᠡᠭ ᠠᠮᠠᠷᠬᠠᠨ ᠦᠭᠡ᠃ ᠥᠨᠥᠬᠢ ᠴᠢᠨᠢ ᠥᠴᠥᠭᠡᠳᠦᠷ ᠣᠷᠣᠢ ᠨᠣᠶᠠᠨ ᠰᠠᠩ ᠤ᠋ᠨ ᠠᠳᠤᠭᠤᠴᠢᠨ ᠭᠤᠩᠴᠤᠭᠷᠠᠬᠤᠠ ᠲᠠᠢ ᠵᠣᠯᠪᠢᠩᠲᠤᠵᠤ ᠵᠢᠭᠤᠲᠠᠭᠠᠳ ᠰᠥᠨᠢ ᠶ᠋ᠢᠨ ᠮᠠᠨᠠᠭᠠᠨ ᠳ᠋ᠤ᠌ ᠪᠠᠷᠢᠭᠳᠠᠵᠤ ᠬᠣᠷᠢᠭᠤᠯ ᠳ᠋ᠤ᠌ ᠪᠠᠢᠭᠠ ᠶ᠋ᠢ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠲᠣᠭᠣᠯᠤᠭᠠ ᠦᠭᠡᠢ ᠤᠤ ? ᠰᠢᠲᠠᠩᠬᠠᠢ ᠴᠢᠷᠠᠢ ᠲᠠᠢ ᠮᠥᠷᠲᠡᠭᠡᠨ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠵᠦᠭᠡᠷ ᠰᠠᠭᠤᠳᠠᠭ ᠦᠭᠡᠢ ᠥᠯᠥᠭᠴᠢᠨ !
— ᠬᠠᠷᠢᠨ ᠤᠤ ⁈ ᠲᠣᠭᠣᠯᠤᠭᠠ ᠦᠭᠡᠢ᠃
— ᠬᠡᠲᠦᠷᠡᠭᠰᠡᠨ ᠮᠠᠭᠤ ᠰᠠᠢᠨ ᠴᠠᠭᠠᠴᠢ ᠨᠤᠭᠤᠳ᠂ ᠨᠣᠶᠠᠨ ᠰᠠᠩ ᠢ᠋ ᠪᠤᠵᠠᠷᠲᠤᠭᠤᠯᠵᠤ ᠣᠷᠬᠢᠬᠤ ᠨᠢ ᠠ᠋ ! ᠴᠢ ᠥᠨᠥᠬᠢ ᠶ᠋ᠢ ᠬᠠᠲᠠᠭᠤᠬᠠᠨ ᠰᠢᠭᠦᠵᠦ ᠣᠷᠭᠢ !
— ᠵᠠ ᠂ ᠲᠡᠭᠡᠶᠡ ! ᠭᠡᠳ ᠷᠠᠰᠢ ᠵᠠᠬᠢᠷᠤᠭᠴᠢ ᠪᠡᠶᠡ ᠡᠷᠭᠢᠨ ᠭᠠᠷᠬᠤ ᠭᠡᠲᠡᠯᠡ ᠬᠦᠩ ᠨᠣᠶᠠᠨ᠄
— ᠬᠠᠲᠤᠨ ᠤ᠋ ᠠᠯᠲᠠᠨ ᠪᠦᠯᠡᠵᠡᠭ ᠪᠠ ᠬᠣᠶᠠᠷ ᠴᠣᠬᠣᠷ ᠶᠤᠸᠠᠮᠪᠤᠤ ᠶ᠋ᠢ ᠥᠨᠥᠬᠢ ᠴᠢᠨᠢ ᠡᠪᠦᠷᠲᠦᠯᠡᠭᠰᠡᠨ ᠰᠤᠷᠠᠭ ᠲᠠᠢ᠃ ᠬᠠᠲᠤᠨ ᠢ᠋ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ᠶ᠋ᠡᠨ ᠵᠠᠯᠭᠢᠴᠢᠬᠠᠯᠠ ᠭᠡᠰᠡᠨ ᠨᠢ ᠬᠤᠳᠠᠯ ᠶᠠᠷᠢᠶᠠ ᠪᠠᠢᠵᠢ ᠳᠠ ! ᠴᠢᠭᠢᠶᠡᠲᠦᠷᠦᠦ ᠭᠡᠵᠦ ᠬᠡᠨ ᠢ᠋ ᠵᠥᠭᠡᠵᠦ ᠪᠠᠢᠬᠤ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠤᠴᠠᠭᠠᠷᠳᠠᠭᠠᠳ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠪᠠᠨ ᠳ᠋ᠧᠩ ᠢ᠋ ᠡᠬᠥᠯᠳᠥᠪᠡ᠃
ᠣᠭᠲᠠᠷᠭᠤᠢ ᠳ᠋ᠤ᠌ ᠣᠳᠣᠳ ᠪᠠᠷᠢᠯᠳᠤᠨ᠂ ᠲᠡᠭᠷᠢ ᠶ᠋ᠢᠨ ᠣᠶᠣᠳᠠᠯ ᠮᠥᠰᠥᠨ ᠭᠣᠣᠯ ᠰᠢᠭ᠋ ᠮᠥᠩᠭᠥᠨ ᠵᠠᠭᠠᠳᠠᠰᠤ ᠪᠠᠷ ᠲᠤᠨᠤᠷᠠᠵᠤ ᠬᠠᠷᠠᠭᠳᠠᠭᠰᠠᠨ ᠲᠤᠩᠭᠠᠯᠠᠭ ᠨᠠᠮᠤᠷ ᠤ᠋ᠨ ᠨᠠᠮᠤᠭᠤᠬᠠᠨ ᠰᠥᠨᠢ ᠪᠠᠢᠯᠠ᠃
ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠥᠯ ᠬᠤᠷᠢᠶᠠᠭᠳᠠᠵᠤ᠂ ᠬᠠᠶᠠ ᠬᠣᠲᠠᠴᠢ ᠨᠣᠬᠠᠳ ᠤ᠋ᠨ ᠬᠥᠪ ᠬᠥᠪ ᠬᠣᠷᠭᠣᠭᠣᠬᠤ ᠳᠠᠭᠤᠨ ᠠ᠋ᠴᠠ ᠥᠭᠡᠷᠡ ᠠᠨᠢᠷ ᠴᠢᠮᠡᠭᠡ ᠠᠯᠠᠭᠠ᠃
ᠠᠳᠤᠭᠤᠨ ᠤ᠋ ᠭᠡᠷ ᠦ᠋ᠨ ᠴᠠᠭᠠᠨᠠ ᠵᠡᠷᠭᠡᠯᠡᠭᠰᠡᠨ ᠠᠷᠭᠠᠯ ᠤ᠋ᠨ ᠣᠪᠣᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠣᠶᠠᠷ ᠬᠥᠮᠦᠨ ᠵᠠᠪᠰᠠᠷ ᠦᠭᠡᠢ ᠲᠡᠪᠡᠷᠢᠯᠳᠦᠵᠦ ᠵᠣᠭᠰᠣᠨᠠ᠃
— ᠭᠣᠨᠴᠣᠭ ᠠ᠋ ! ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠲᠠᠢᠰᠢ ᠭᠤᠳᠤᠢᠬᠤ ᠤᠤ ?
— ᠬᠠᠮᠢᠭᠠᠰᠢ ᠪᠠᠨ ?
— ᠪᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠠᠳᠠ ᠠ᠋ᠴᠠ ᠡᠷᠲᠡᠬᠡᠨ ᠰᠠᠯᠵᠤ ᠠᠮᠠᠷᠠᠶᠠ᠃ ᠴᠡᠴᠡᠭ ᠬᠠᠲᠤᠨ ᠠ᠋ᠴᠠ ᠬᠣᠢᠰᠢ ᠨᠣᠶᠠᠨ ᠰᠠᠩ ᠤ᠋ᠨ ᠬᠢᠨ ᠨᠠᠳᠠ ᠨᠢᠭᠡ ᠯᠡ ᠣᠨᠳᠣᠣ ᠬᠠᠨᠳᠤᠳᠠᠭ ᠪᠣᠯᠤᠯᠠ ᠭᠡᠳ ᠨᠣᠮᠢᠨ ᠪᠦᠷᠦᠭ ᠬᠠᠷᠠᠩᠭᠤᠢ ᠳ᠋ᠤ᠌ ᠭᠤᠩᠴᠤᠭᠷᠠᠬᠤᠠ ᠶ᠋ᠢᠨ ᠡᠪᠦᠷ ᠲᠦ ᠴᠢᠩᠭᠠ ᠨᠠᠯᠠᠨ ᠱᠣᠭᠰᠢᠷᠠᠲᠠᠯᠠ ᠤᠬᠢᠯᠠᠨᠠ᠃
— ᠪᠢᠲᠡᠭᠡᠢ ᠤᠬᠢᠯᠠ ! ᠨᠣᠮᠢᠨ ᠠ᠋᠂ ᠲᠡᠭᠡᠵᠦ ᠪᠠᠢᠲᠠᠯᠠ ᠠᠷᠭᠠ ᠨᠢ ᠣᠯᠳᠠᠬᠤ ᠪᠠᠢᠯᠭᠦᠢ ᠳᠡ ᠭᠡᠳ ᠭᠤᠩᠴᠤᠭᠷᠠᠬᠤᠠ ᠨᠣᠮᠢᠨ ᠢ᠋ ᠠᠷᠭᠠᠳᠠᠨ ᠥᠬᠥᠭᠡᠷᠳᠡᠵᠦ᠂ ᠪᠠᠷᠪᠠᠭᠠᠷ ᠰᠢᠷᠦᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠰᠬᠠᠷᠠᠭᠰᠠᠨ ᠨᠢᠯᠪᠤᠰᠤ ᠶ᠋ᠢ ᠨᠢ ᠵᠦᠯᠭᠦᠬᠦ ᠳ᠋ᠦ᠍ ᠨᠣᠮᠢᠨ ᠰᠠᠨᠳᠤᠷᠴᠤ᠄
— ᠪᠠᠢᠵᠠ᠂ ᠬᠥᠨᠳᠡᠢᠬᠡᠨ ᠰᠢᠭ ᠁ ᠰᠦᠷᠡᠬᠡᠢ ᠢᠷᠬᠢᠷᠡᠵᠦ ᠪᠠᠢᠨᠠ ᠭᠡᠯᠡ᠃
— ᠠ᠂ ᠢᠯᠡᠢ ! ᠪᠢ ᠴᠢᠨᠢ ᠶᠠᠮᠠᠷ ᠢᠷᠣᠠ ᠶᠤᠮ ᠠ᠋ ! ᠭᠡᠵᠦ ᠭᠤᠩᠴᠤᠭᠷᠠᠬᠤᠠ ᠨᠣᠮᠢᠨ ᠤ᠋ ᠨᠢᠯᠪᠤᠰᠤ ᠶ᠋ᠢ ᠴᠦᠯᠲᠦ ᠵᠦᠯᠭᠦᠨ ᠰᠢᠲᠠᠭᠰᠠᠨ ᠰᠣᠷᠪᠢ ᠶ᠋ᠢ ᠨᠢ ᠬᠥᠨᠳᠡᠭᠰᠡᠨ ᠳ᠋ᠡᠭᠡᠨ ᠭᠡᠮᠰᠢᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠨᠡ᠃
— ᠲᠡᠭᠡᠭᠡᠳ ᠴᠢ ᠨᠠᠳᠠ ᠲᠠᠢ ᠶᠠᠪᠤᠬᠤ ᠨᠢ ᠤᠤ ? ᠮᠢᠨᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠬᠠᠷᠢᠭᠤᠯᠲᠠ ᠥᠭᠳᠡᠭ ᠦᠭᠡᠢ ᠨᠢ ᠶᠠᠭᠠᠬᠢᠭᠠ ᠪᠣᠢ? ᠭᠡᠵᠦ ᠨᠣᠮᠢᠨ ᠭᠤᠩᠴᠤᠭᠷᠠᠬᠤᠠ ᠶ᠋ᠢᠨ ᠬᠦᠢᠰᠦ ᠤᠷᠤᠭᠤ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠴᠢᠴᠢᠯᠡᠨ ᠲᠡᠭᠦᠨ ᠦ᠌ ᠴᠢᠷᠠᠢ ᠥᠭᠡᠳᠡ 《 ᠬᠣᠶᠠᠭᠤᠯᠠ ᠪᠠᠨ ᠶᠠᠪᠤᠶᠠ 》 ᠭᠡᠬᠦ ᠰᠢᠭᠤᠳᠤᠮᠠᠭ ᠬᠠᠷᠢᠭᠤᠯᠲᠠ ᠥᠭᠬᠦ ᠶ᠋ᠢ ᠬᠦᠰᠡᠨ ᠴᠢᠷᠠᠢᠴᠢᠯᠠᠪᠠ᠃
— ᠨᠣᠮᠢᠨ ᠠ᠋᠂ ᠵᠢᠭᠠᠬᠠᠨ ᠬᠥᠯᠢᠶᠡᠰᠬᠢᠵᠤ ᠪᠠᠢ᠃ ᠡᠪ ᠵᠦᠢ ᠶ᠋ᠢ ᠨᠢ ᠦᠵᠡᠬᠦ ᠦᠭᠡᠢ ᠪᠣᠯᠬᠤ ᠦᠭᠡᠢ᠃ ᠭᠡᠨᠡᠳᠲᠡ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠣᠰᠤᠭᠠᠳ ᠶᠠᠪᠤᠴᠢᠬᠠᠵᠤ ᠪᠣᠯᠤᠨᠠ ᠤᠤ ᠳᠠ ? ᠬᠦᠩ ᠦ᠋ᠨ ᠬᠢᠨ ᠦ᠌ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠪᠠᠯ ᠳᠦᠭᠦᠷᠦᠭᠰᠡᠨ ᠰᠤᠤᠬᠠᠨ !
— ᠶᠠᠭᠠᠬᠢᠯᠠ ᠭᠡᠵᠦ ᠪᠠᠷᠢᠭᠳᠠᠳᠠᠭ ᠶᠤᠮ ?
— ᠶᠡᠷᠦ ᠨᠢ ᠪᠠᠭᠠ ᠬᠠᠲᠤᠨ ᠤ᠋ ᠤᠴᠢᠷ ᠠ᠋ᠴᠠ ᠬᠣᠢᠰᠢ ᠨᠣᠶᠠᠨ ᠰᠠᠩ᠂ ᠶᠠᠮᠤᠨ ᠤ᠋ ᠴᠡᠷᠢᠭ ᠦ᠋ᠨ ᠮᠠᠨᠠᠭᠠ ᠰᠠᠬᠢᠭᠤᠯ ᠴᠢᠩᠭᠠᠷᠠᠵᠤ ᠰᠥᠨᠢᠵᠢᠨ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠨᠠᠭᠠᠰᠢ ᠴᠠᠭᠠᠰᠢ ᠴᠢᠯᠥᠭᠡ ᠦᠭᠡᠢ ᠬᠣᠯᠬᠢᠳᠠᠭ ᠢ᠋ ᠴᠢ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ ᠃
— ᠁
— ᠮᠢᠨᠦ ᠳᠡᠭᠦᠦ ᠭᠣᠳᠣᠢᠬᠤ ᠰᠠᠨᠠᠭᠠ ᠪᠠᠨ ᠠᠯᠭᠤᠷᠯᠠᠵᠤ ᠦᠵᠡ ᠳᠡ !
— ᠭᠣᠩᠴᠣᠭ ᠴᠢ ᠨᠠᠮᠠᠶ᠋ᠢ ᠭᠣᠯᠣᠳᠠᠭ ᠪᠣᠯᠤᠭᠰᠠᠨ ᠤᠤ ?
— ᠶᠠᠭᠠᠬᠢᠯᠠ ᠭᠡᠵᠢ ?
— ᠮᠢᠨᠦ ᠨᠢᠭᠤᠷ ᠴᠢᠷᠠᠢ ᠰᠢᠲᠠᠩᠬᠠᠢᠳᠴᠤ ᠵᠢᠰᠦ ᠲᠥᠯᠥᠪ ᠡᠪᠳᠡᠷᠡᠭᠰᠡᠨ ᠶᠦᠮ ᠴᠢᠨᠢ ᠴᠢ ᠨᠠᠮᠠᠶ᠋ᠢ ᠭᠣᠯᠣᠳᠠᠭ ᠨᠢ ᠵᠥᠪ᠃
— ᠨᠣᠮᠢᠨ ᠴᠢ ᠪᠢᠲᠡᠭᠡᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠶᠠᠷᠢ᠃ ᠵᠢᠰᠦ ᠴᠢᠨᠢ ᠡᠪᠳᠡᠷᠡᠭᠰᠡᠨ ᠡᠴᠡ ᠵᠢᠷᠦᠬᠡ ᠴᠢᠨᠢ ᠡᠪᠳᠡᠷᠡᠭᠰᠡᠨ ᠦᠭᠡᠢ ᠯᠡ ᠶᠦᠮ ᠪᠣᠯ ᠪᠢ ᠴᠢᠮᠠᠶ᠋ᠢ ᠪᠠᠨ ᠬᠡᠵᠢᠶᠡᠳᠡ ᠭᠣᠯᠣᠬᠤ ᠦᠭᠡᠢ᠃ ᠴᠢᠨᠦ ᠣᠣᠷ ᠬᠡᠦᠬᠡᠨ ᠵᠢᠰᠦ ᠲᠥᠯᠥᠪ ᠴᠢᠨᠢ ᠮᠢᠨᠦ ᠵᠢᠷᠦᠬᠡᠨ ᠳ᠋ᠦ᠍ ᠰᠡᠢᠯᠦᠭᠡᠰᠦᠲᠡᠢ ᠪᠡᠷ ᠢ᠋ᠶ᠋ᠡᠨ ᠁
— ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠨᠠᠳᠠ ᠲᠠᠢ ᠴᠣᠭ ᠬᠣᠯᠠ ᠶᠠᠪᠤᠬᠤ ᠳ᠋ᠤ᠌ ᠬᠣᠢᠷᠭᠣᠰᠢᠭ᠋ᠠᠳ ᠪᠠᠢᠪᠠ⁈
— ᠲᠡᠢᠮᠦ ᠤᠴᠢᠷ ᠪᠢᠰᠢ᠃ ᠡᠪ ᠳᠠᠮ ᠢ᠋ ᠨᠢ ᠦᠵᠡᠵᠦ ᠯᠠᠪᠳᠠᠭᠤᠬᠠᠨ ᠣᠷᠣᠪᠠᠯ ᠳᠡᠭᠡᠷᠡ ᠪᠢᠰᠢ ᠤᠤ ᠳᠠ !
— ᠦᠭᠡᠢ᠂ ᠶᠡᠷᠦ ᠨᠢ ᠲᠡᠭᠡᠭᠡᠳ ᠴᠢ ᠨᠠᠮᠠᠶ᠋ᠢ ᠮᠠᠨᠴᠤᠷᠭᠠ ᠲᠠᠢ ᠠᠭᠤᠯᠵᠠᠭᠤᠯᠬᠤ ᠠᠷᠭᠠ ᠬᠢᠵᠦ ᠦᠵᠡ !
— ᠮᠠᠨᠴᠤᠷᠭᠠ ᠲᠠᠢ ᠠᠭᠤᠯᠵᠠᠬᠤ ᠭᠡᠨᠡ ?
— ᠲᠡᠢᠮᠦ ᠠ᠋ !
— ᠨᠣᠮᠢᠨ ᠴᠢ ᠶᠠᠭᠠᠬᠢᠭᠰᠠᠨ ᠦᠬᠡᠷ ᠪᠦᠳᠦᠭᠦᠨ ᠵᠢᠷᠦᠬᠡᠯᠡᠵᠦ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠲᠡᠷᠡ ᠣᠷᠭᠣᠳᠠᠭᠤᠯ ᠲᠠᠢ ᠠᠭᠤᠯᠵᠠᠬᠤ ᠭᠡᠳ ᠮᠡᠳᠡᠭᠳᠡᠪᠡᠯ ᠴᠦ᠍ ᠪᠥᠨᠲᠥᠭᠡᠷ ᠴᠢᠨᠢ ᠬᠦᠵᠦᠭᠦᠨ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠬᠤ ᠠ᠋ᠴᠠ ᠪᠠᠨ ᠤᠢᠳᠴᠠᠢ ᠭᠡᠰᠡᠨ ᠦᠭᠡ᠃
— ᠶᠠᠭᠠᠬᠢᠬᠤ ᠠ᠋ᠴᠠ ᠪᠠᠨ ᠠᠯᠳᠠᠷᠠᠭ ᠴᠠᠭᠠᠰᠢ ! ᠴᠡᠴᠡᠭ ᠬᠠᠲᠤᠨ ᠤ᠋ ᠭᠡᠷᠢᠶᠡᠰ ᠢ᠋ ᠪᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠡᠶᠡᠯᠡᠭᠦᠯᠦᠨᠡ᠃ ᠲᠡᠭᠦᠨ ᠦ᠌ ᠦᠯᠡᠳᠡᠭᠡᠭᠰᠡᠨ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠮᠠᠨᠴᠤᠷᠭᠠ ᠳ᠋ᠤ᠌ ᠭᠠᠷᠳᠠᠭᠤᠯᠴᠢᠬᠠᠪᠠᠯ ᠲᠡᠭᠦᠨ ᠦ᠌ ᠰᠦᠨᠡᠰᠦ ᠴᠤ᠌ ᠲᠠᠢᠪᠤᠰᠢᠷᠠᠬᠤ ᠪᠠᠢᠬᠠ ᠬᠥᠭᠡᠷᠦᠬᠦᠢ ᠭᠡᠳ ᠨᠣᠮᠢᠨ ᠥᠯᠵᠡᠢ ᠵᠠᠩᠭᠢᠶᠠ ᠶ᠋ᠢᠨ ᠬᠡ ᠲᠡᠢ ᠤᠳᠪᠠᠯᠠ ᠴᠡᠴᠡᠭ ᠦ᠋ᠨ ᠬᠤᠸᠠᠷ ᠲᠠᠢ ᠬᠠᠪᠲᠠᠭᠠ ᠲᠠᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠭᠤᠩᠴᠤᠭᠷᠠᠬᠤᠠ ᠳ᠋ᠤ᠌ ᠦᠵᠡᠭᠦᠯᠪᠡᠯ᠂
— ᠴᠡᠴᠡᠭ ᠬᠠᠲᠤᠨ ᠢ᠋ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ᠶ᠋ᠡᠨ ᠵᠠᠯᠭᠢᠭᠠᠳ ᠪᠡᠶᠡ ᠪᠡᠨ ᠬᠣᠣᠷᠯᠠᠴᠢᠬᠠᠯᠠ ᠭᠡᠵᠦ ᠬᠥᠮᠦᠰ ᠲᠡᠭᠦᠨ ᠦ᠌ ᠬᠤᠷᠤᠭᠤᠨ ᠳ᠋ᠠᠬᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠦᠭᠡᠢᠯᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠡᠢᠨ ᠲᠡᠢᠨ ᠭᠡᠵᠦ ᠲᠠᠭᠠᠮᠠᠭᠯᠠᠵᠤ ᠪᠠᠢᠭᠰᠠᠨ ᠨᠢ ᠱᠠᠯ ᠬᠤᠳᠠᠯ ᠪᠠᠢᠵᠠᠢ ᠭᠡᠵᠦ ᠭᠤᠩᠴᠤᠭᠷᠠᠬᠤᠠ ᠰᠣᠨᠢᠭᠤᠴᠢᠷᠬᠠᠪᠠ᠃
— ᠲᠡᠭᠡᠵᠦ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠲᠤᠷᠭᠢᠳᠠᠭ ᠬᠥᠨᠳᠡᠯᠡᠨ ᠰᠣᠷᠪᠢ ᠶ᠋ᠢ ᠨᠢ ᠣᠶᠣᠯᠲᠠᠢ ᠴᠤ᠌ ᠪᠢᠰᠢ ᠶᠠᠮᠠᠷ!
— ᠲᠡᠭᠡᠬᠦ ᠳ᠋ᠦ᠍ ᠤᠯᠠᠮ ᠬᠡᠷᠰᠡᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠬᠦᠩ ᠦ᠋ᠨ ᠬᠢᠨ ᠦ᠌ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠵᠤ ᠪᠡᠶᠡ ᠡᠴᠡ ᠴᠢᠨᠢ ᠴᠡᠴᠡᠭ ᠬᠠᠲᠤᠨ ᠤ᠋ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠨᠡᠩᠵᠢᠵᠦ ᠣᠯᠪᠠᠯ ᠴᠤ᠌ ᠬᠡᠷᠡᠭ ᠪᠢᠰᠢᠳᠡᠵᠦ ᠬᠡᠩᠭᠡᠷᠭᠡ ᠴᠤᠭᠤᠷᠠᠨᠠ ᠰᠢᠦ !
— ᠶᠠᠭᠠᠬᠢᠯᠠ ᠭᠡᠵᠦ ᠪᠠᠷᠢᠭᠳᠠᠳᠠᠭ ᠶᠤᠮ ᠪᠣᠢ ? ᠭᠣᠨᠴᠣᠭ ᠴᠢ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠡᠢᠮᠦ ᠲᠠᠤᠯᠠᠢ ᠶ᠋ᠢᠨ ᠵᠢᠷᠦᠬᠡ ᠲᠡᠢ ᠠᠮᠢᠲᠠᠨ ᠪᠣᠯᠴᠢᠬᠠᠪᠠ⁈ ᠡᠮᠨᠢᠭ ᠵᠠᠢᠳᠠᠯᠠᠳᠠᠭ ᠡᠷᠡ ᠵᠣᠷᠢᠭ ᠴᠢᠨᠢ ᠶᠠᠭᠠᠬᠢᠯᠠ⁈ ᠭᠡᠵᠦ ᠨᠣᠮᠢᠨ ᠤᠴᠠᠭᠠᠷᠳᠠᠪᠠᠯ᠂
— ᠬᠡᠷᠰᠡᠦᠯᠡᠵᠦ ᠪᠠᠢᠪᠠᠯ ᠨᠣᠬᠠᠢ ᠳ᠋ᠤ᠌ ᠬᠠᠵᠠᠭᠳᠠᠬᠤ ᠦᠭᠡᠢ ᠭᠡᠳᠡᠭ ᠰᠢᠲᠠ ! ᠭᠡᠵᠦ ᠭᠤᠩᠴᠤᠭᠷᠠᠬᠤᠠ ᠥᠴᠢᠪᠡ᠃
ᠨᠣᠮᠢᠨ᠂ ᠭᠤᠩᠴᠤᠭᠷᠠᠬᠤᠠ ᠶ᠋ᠢᠨ ᠮᠣᠷᠢᠨ ᠳᠡᠭᠡᠷᠡ ᠰᠤᠨᠳᠠᠯᠠᠵᠤ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠯᠠᠩ ᠠ᠋ᠴᠠ ᠵᠡᠭᠦᠨᠰᠢᠯᠡᠵᠦ ᠳᠠᠪᠬᠢᠭᠤᠯᠪᠠ᠃
— ᠡᠦᠲᠦ ᠬᠠᠮᠢᠭᠠᠰᠢᠯᠠᠬᠤ ᠪᠣᠢ ? ᠨᠣᠮᠢᠨ ᠠ᠋ !
— ᠪᠤᠭᠤᠲᠤ ᠤᠷᠤᠭᠤ !
— ᠮᠠᠨᠴᠤᠷᠭᠠ ᠪᠤᠭᠤᠲᠤ ᠳ᠋ᠤ᠌ ᠪᠠᠢᠬᠤ ᠶᠤᠮ ᠪᠣᠯᠪᠠ ᠤᠤ ?
— ᠪᠤᠭᠤᠲᠤ ᠳ᠋ᠤ᠌ ᠣᠷᠣᠭᠰᠠᠭᠠᠷ ᠤᠴᠢᠷ ᠨᠢ ᠣᠯᠳᠠᠬᠤ ᠪᠠᠢᠯᠭᠦᠢ ! ᠶᠠᠭ ᠮᠤᠬᠤᠷᠳᠠᠪᠠᠯ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠫᠤᠩᠰᠤᠭᠷᠠᠪᠵᠠᠢ ᠳᠦᠯᠡᠢ ᠯᠠᠮᠠ ᠲᠠᠢ ᠠᠭᠤᠯᠵᠠ ᠭᠡᠵᠦ ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠵᠠᠬᠢᠵᠤ ᠪᠠᠢᠭᠰᠠᠨ ᠶᠤᠮ ! ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠭᠤᠩᠴᠤᠭᠷᠠᠬᠤᠠ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠬᠤᠷᠳᠤᠯᠠᠪᠠ᠃
ᠡᠳᠡ ᠬᠣᠶᠠᠷ ᠳᠥᠩᠭᠡᠵᠦ ᠪᠢᠯᠵᠤᠤᠬᠠᠢᠲᠤ ᠶ᠋ᠢᠨ ᠬᠣᠲᠣᠭᠣᠷ ᠢ ᠲᠤᠭᠤᠯᠵᠤ ᠭᠠᠷᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠮᠣᠷᠢᠳ ᠤ᠋ᠨ ᠲᠦᠪᠡᠷᠭᠡᠨ ᠪᠢᠵᠢᠭᠢᠨᠡᠵᠤ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠶᠠᠭᠤ ᠬᠠᠢ ᠦᠭᠡᠢ ᠲᠡᠳᠡᠨ ᠦ᠌ ᠡᠮᠦᠨᠡ ᠲᠤᠯᠵᠤ ᠢᠷᠡᠪᠡ᠃
— ᠭᠣᠨᠴᠣᠭ ᠴᠢ ᠬᠠᠮᠢᠭᠠ ᠶᠠᠪᠤᠬᠤ ᠭᠡᠵᠦ ᠬᠠᠷᠠ ᠰᠥᠨᠢ ᠪᠡᠷ ᠢᠩᠭᠢᠵᠦ ᠱᠠᠯᠠᠪᠳᠠᠵᠤ ᠶᠠᠪᠤᠭᠠ ᠪᠣᠢ? ᠭᠡᠵᠦ ᠵᠠᠩᠳᠤᠷᠤᠭᠰᠠᠨ ᠨᠢ ᠰᠢᠨᠡ ᠲᠤᠰᠠᠯᠠᠭᠴᠢ ᠱᠠᠭᠳᠤᠷᠰᠦ᠋ᠷᠦᠩ ᠦ᠋ᠨ ᠳᠠᠭᠤᠨ ᠪᠣᠯᠬᠤ ᠶ᠋ᠢ ᠭᠤᠩᠴᠤᠭᠷᠠᠬᠤᠠ ᠲᠠᠨᠢᠵᠤ᠂ 《ᠡᠦᠲᠦ ᠴᠦ᠍ ᠳᠦᠭᠦᠷᠦᠭᠰᠡᠨ ᠠ᠋! ᠪᠤᠷᠬᠠᠨ ᠮᠢᠨᠢ》 ᠭᠡᠵᠦ ᠳᠦᠳᠦᠨᠡᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠪᠠ᠃
ᠳᠠᠭᠠᠯᠳᠤᠭᠰᠠᠨ ᠴᠡᠷᠢᠭ ᠦ᠋ᠳ ᠭᠤᠩᠴᠤᠭᠷᠠᠬᠤᠠ ᠨᠣᠮᠢᠨ ᠬᠣᠶᠠᠷ ᠢ᠋ ᠬᠦᠯᠢᠵᠦ ᠮᠣᠷᠢᠨ ᠳᠡᠭᠡᠷᠡ ᠨᠢ ᠤᠨᠤᠭᠤᠯᠤᠭᠠᠳ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠤᠷᠤᠭᠤ ᠪᠤᠴᠠᠪᠠ᠃
ᠭᠤᠩᠴᠤᠭᠷᠠᠬᠤᠠ ᠨᠣᠮᠢᠨ ᠬᠣᠶᠠᠷ ᠰᠥᠨᠢᠵᠢᠨ ᠰᠢᠭᠦᠭᠳᠡᠪᠡ᠃
ᠶᠠᠮᠤᠨ ᠤ᠋ ᠴᠡᠷᠢᠭ ᠭᠤᠩᠴᠤᠭᠷᠠᠬᠤᠠ ᠶ᠋ᠢ ᠶᠠᠭᠠᠬᠢᠵᠤ ᠰᠢᠷᠭᠠᠭᠠᠭᠰᠠᠨ ᠴᠤ᠌ ᠴᠠᠭᠠᠳᠤᠬᠢ ᠨᠢ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠢᠪᠠ᠃
— ᠶᠠᠭᠤ ᠭᠡᠵᠦ ᠳᠤᠲᠠᠭᠠᠪᠠ ? ᠶᠠᠮᠤᠨ ᠤ᠋ ᠪᠤᠳᠠᠭᠠ ᠭᠡᠳᠡᠰᠦ ᠶ᠋ᠢ ᠴᠢᠨᠢ ᠬᠠᠳᠬᠤᠪᠠ ᠤᠤ ? ᠠᠮᠠ ᠶ᠋ᠢ ᠴᠢᠨᠢ ᠴᠠᠪᠠᠤᠳᠠᠴᠢᠬᠠᠪᠠ ᠤᠤ? ᠮᠠᠭᠤ ᠴᠠᠭᠠᠴᠢ ᠬᠣᠬᠣᠢ! ᠨᠢᠭᠡ ᠨᠢ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠣᠷᠣᠨᠠᠤ ᠨᠢ ᠲᠠᠰᠢᠭᠤᠷᠳᠠᠭᠰᠠᠨ ᠳ᠋ᠤ᠌ ᠭᠤᠩᠴᠤᠭᠷᠠᠬᠤᠠ ᠢ ᠢ ᠭᠡᠵᠦ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠰᠢᠵᠠᠭᠤᠷ ᠵᠠᠭᠤᠪᠠ᠃
ᠶᠠᠨᠴᠢᠵᠤ ᠪᠠᠯᠪᠠᠬᠤ᠂ ᠶᠠᠩᠰᠢᠵᠤ ᠵᠠᠩᠳᠤᠷᠬᠤ ᠠ᠋ᠴᠠ ᠴᠠᠭᠠᠰᠢ ᠤᠬᠠᠭᠠ ᠰᠠᠮᠪᠠᠭᠠ ᠮᠠᠭᠤᠲᠠᠢ ᠶᠠᠮᠤᠨ ᠤ᠋ ᠬᠡᠳᠦᠨ ᠴᠡᠷᠢᠭ ᠠᠷᠭᠠ ᠮᠤᠬᠤᠷᠳᠠᠬᠤ ᠳ᠋ᠠᠭᠠᠨ ᠭᠤᠩᠴᠤᠭᠷᠠᠬᠤᠠ ᠶ᠋ᠢ ᠬᠦᠯᠢᠶᠡᠰᠦᠲᠡᠢ ᠨᠢ ᠬᠠᠷᠠ ᠭᠡᠷ ᠲᠦ᠍ ᠳᠠᠷᠤᠵᠤ ᠲᠠᠯᠪᠢᠪᠠ᠃
ᠱᠤᠤᠮᠠᠰᠠ ᠠ᠋ᠴᠠ ᠨᠢ ᠨᠡᠩᠵᠢᠵᠦ ᠣᠯᠤᠭᠰᠠᠨ ᠲᠠᠪᠢᠨ ᠯᠠᠩ ᠤ᠋ᠨ ᠬᠣᠶᠠᠷ ᠴᠣᠬᠣᠷ ᠶᠤᠸᠠᠮᠪᠤᠤ ᠶ᠋ᠢ ᠨᠣᠮᠢᠨ ᠤ᠋ ᠡᠮᠦᠨᠡ ᠠᠪᠴᠢᠷᠠᠵᠤ᠄
— ᠡᠨᠡ ᠶᠠᠭᠤᠨ ᠤ᠋ ᠶᠤᠸᠠᠮᠪᠤᠤ ᠪᠣᠢ ? ᠭᠡᠬᠦ ᠳ᠋ᠦ᠍᠂ ᠨᠣᠮᠢᠨ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠤᠬᠢᠯᠠᠩᠨᠠᠨᠠ᠃
— ᠬᠡᠯᠡ ! ᠬᠠᠮᠢᠭᠠ ᠠ᠋ᠴᠠ ᠬᠤᠯᠠᠭᠠᠢᠯᠠᠭᠰᠠᠨ ᠶᠤᠸᠠᠮᠪᠤᠤ ᠪᠣᠢ ?
— ᠬᠤᠯᠠᠭᠠᠢᠯᠠᠭᠰᠠᠨ ᠪᠢᠰᠢ! ᠭᠡᠳ ᠨᠣᠮᠢᠨ ᠮᠡᠭᠰᠢᠨ ᠤᠬᠢᠯᠠᠪᠠ᠃
— ᠪᠢᠲᠡᠭᠡᠢ ᠤᠬᠢᠯᠠᠬᠤ ᠪᠠᠷ ᠢ᠋ᠶ᠋ᠠᠨ ᠠᠮᠠ ᠪᠥᠭᠯᠡᠬᠦ ᠭᠡᠳ ᠪᠠᠢ᠃ ᠴᠢᠭᠢᠶᠡᠲᠦᠷᠦᠦ! ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠤ᠋ ᠠᠪᠳᠠᠷᠠ ᠠ᠋ᠴᠠ ᠬᠢᠮᠤᠰᠤᠯᠠᠭᠰᠠᠨ ᠪᠠᠢᠯᠭᠦᠢ!
— ᠪᠢᠰᠢ ! ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠨᠠᠳᠠ ᠁ ᠭᠡᠳ ᠦᠭᠡ ᠪᠡᠨ ᠳᠤᠲᠠᠭᠤ ᠬᠡᠯᠡᠵᠦ ᠭᠡᠨᠡᠳᠲᠡ ᠡᠪᠦᠷ ᠳᠣᠲᠣᠷᠠᠬᠢ ᠬᠠᠪᠲᠠᠭᠠ ᠲᠠᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ᠶ᠋ᠡᠨ ᠰᠠᠨᠠᠵᠤ ᠣᠯᠤᠨ ᠡᠳᠡᠨᠥᠰ ᠲᠦ᠍ ᠠᠯᠳᠠᠭᠤᠵᠠᠢ ᠭᠡᠵᠦ ᠡᠷᠬᠡ ᠦᠭᠡᠢ ᠡᠪᠦᠷ ᠢ᠋ᠶ᠋ᠡᠨ ᠲᠡᠮᠲᠡᠷᠢᠨ ᠳᠠᠷᠤᠯᠬᠢᠯᠠᠵᠤ ᠠᠪᠤᠭᠰᠠᠨ ᠳ᠋ᠤ᠌ ᠨᠢᠭᠡ ᠨᠢ ᠰᠡᠵᠢᠭ ᠠᠪᠴᠤ ᠨᠣᠮᠢᠨ ᠤ᠋ ᠡᠪᠦᠷ ᠤᠷᠤᠭᠤ ᠭᠠᠷ ᠢ᠋ᠶ᠋ᠠᠨ ᠰᠢᠷᠭᠤᠭᠤᠯᠪᠠ᠃
— ᠶᠠᠭᠠᠬᠢᠬᠤ ᠶᠤᠮ ᠠ᠋? ᠶᠠᠮᠠᠷ ᠪᠤᠯᠠᠢᠲᠠᠢ ᠠᠮᠢᠲᠠᠨ ᠪᠣᠢ! ᠭᠡᠵᠦ ᠨᠣᠮᠢᠨ ᠲᠡᠷᠡ ᠴᠡᠷᠢᠭ ᠦ᠋ᠨ ᠭᠠᠷ ᠢ᠋ ᠴᠢᠨᠡᠭᠡ ᠮᠡᠳᠡᠨ ᠲᠦᠯᠬᠢᠭᠰᠡᠨ ᠳ᠋ᠦ᠍ ᠲᠡᠷᠡ ᠴᠡᠷᠢᠭ᠄
— ᠬᠢᠷᠢ ᠪᠡᠨ ᠮᠡᠳᠡᠳᠡᠭ ᠦᠭᠡᠢ ᠬᠡᠲᠦᠷᠡᠭᠰᠡᠨ ᠪᠠᠷᠠᠭᠠ ᠪᠠᠢᠨᠠ ᠬᠥᠶᠢ! ᠪᠡᠶᠡ ᠪᠡᠨ ᠶᠠᠭᠤ ᠭᠡᠵᠦ ᠪᠣᠳᠣᠪᠠ? ᠴᠡᠴᠡᠭ ᠬᠠᠲᠤᠨ ᠤ ᠨᠥᠮᠥᠷᠢ ᠳ᠋ᠦ᠍ ᠨᠠᠪᠲᠠᠭᠠᠨᠠᠳᠠᠭ ᠰᠢᠭ᠋ ᠢ᠋ᠶ᠋ᠡᠨ ᠭᠡᠵᠦ ᠰᠠᠨᠠᠪᠠ ᠤᠤ? ᠮᠠᠭᠤ ᠵᠣᠯᠪᠢᠩ! ᠭᠡᠳ ᠨᠥᠭᠥᠭᠡᠳᠡᠬᠢ ᠪᠡᠨ ᠳᠣᠬᠢᠵᠤ ᠬᠣᠶᠠᠭᠤᠯᠠ ᠨᠣᠮᠢᠨ ᠢ᠋ ᠬᠦᠴᠦᠷᠬᠡᠭᠯᠡᠨ ᠣᠷᠣᠵᠤ ᠡᠩᠭᠡᠯᠵᠡᠭᠦᠷ ᠦ᠋ᠨ ᠬᠢᠨᠢ ᠲᠣᠪᠴᠢ ᠶ᠋ᠢ ᠨᠢ ᠮᠤᠯᠲᠤ ᠲᠠᠲᠠᠵᠤ᠄
— ᠡᠭᠦᠨ ᠦ᠌ ᠡᠪᠦᠷ ᠳᠣᠲᠣᠷᠠ ᠯᠠᠪ ᠨᠢᠭᠡ ᠶᠠᠭᠤᠮᠠ ᠪᠠᠢᠨᠠ ᠁ ᠭᠡᠳ ᠡᠪᠦᠷ ᠢ᠋ ᠨᠢ ᠳᠤᠷᠠ ᠮᠡᠳᠡᠨ ᠰᠡᠭᠴᠢᠪᠡ᠃
ᠨᠣᠮᠢᠨ ᠡᠳᠡᠨᠥᠰ ᠦ᠋ᠨ ᠡᠮᠦᠨᠡ ᠶᠠᠮᠠᠷ ᠴᠤ᠌ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠵᠠᠨᠳᠠᠯᠴᠢᠨ ᠰᠢᠭ᠋ ᠪᠠᠯᠠᠮᠠᠳ ᠡᠷᠡ ᠶ᠋ᠢᠨ ᠭᠠᠷ ᠲᠤ᠌ ᠡᠪᠦᠷ ᠴᠡᠭᠡᠵᠢ ᠪᠡᠨ ᠲᠡᠮᠲᠡᠷᠢᠭᠥᠯᠥᠨ ᠨᠡᠩᠵᠢᠭᠥᠯᠥᠭᠰᠡᠨ ᠳ᠋ᠡᠭᠡᠨ ᠢᠴᠢᠵᠦ ᠵᠣᠪᠠᠬᠤ ᠶ᠋ᠢ ᠬᠡᠯᠡᠬᠦ ᠦᠭᠡᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ᠶ᠋ᠡᠨ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠪᠠᠴᠢᠮᠳᠠᠵᠤ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠪᠠ᠃
— ᠵᠠ᠂ ᠡᠨᠡ ᠶᠠᠭᠤ ᠪᠣᠢ? ᠭᠡᠵᠦ ᠤᠭᠠᠯᠵᠠᠨ ᠬᠠᠪᠲᠠᠭᠠ ᠲᠠᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠨᠠᠪᠰᠠᠭᠠᠨᠠᠭᠤᠯᠤᠨ᠄
《 ᠴᠢ ᠥᠨᠥᠳᠥᠷ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠦᠭᠡᠢ ᠪᠣᠯ ᠶᠠᠭᠤᠮᠠ ᠪᠠᠨ ᠦᠵᠡᠨᠡ ᠳᠡ》ᠭᠡᠵᠦ ᠨᠢᠭᠡ ᠴᠡᠷᠢᠭ ᠵᠠᠨᠤᠯᠲᠠᠢ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠨᠥᠭᠥᠭᠡᠳᠡᠬᠢ ᠨᠢ ᠲᠣᠰᠴᠤ᠄
— ᠡᠨᠡ ᠠᠯᠲᠠᠨ ᠪᠦᠯᠡᠵᠡᠭ᠂ ᠶᠤᠸᠠᠮᠪᠤᠤ ᠶ᠋ᠢ ᠴᠢ ᠬᠠᠮᠢᠭᠠ ᠠ᠋ᠴᠠ ᠠᠪᠤᠪᠠ? ᠭᠡᠯᠡ᠃
— ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠨᠠᠳᠠ ᠦᠭᠭᠦᠭᠰᠡᠨ ᠶᠦ᠍ᠮ ᠠ᠋ !
— ᠪᠢᠲᠡᠭᠡᠢ ᠲᠣᠩᠭᠣᠰ᠂ ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠴᠢᠮᠠ ᠳ᠋ᠤ᠌ ᠥᠭᠡᠷᠡ ᠶᠠᠭᠤ ᠶᠠᠭᠤ ᠥᠭᠪᠡ⁈ ᠭᠡᠵᠦ ᠨᠢᠭᠡ ᠨᠢ ᠠᠰᠠᠭᠤᠲᠠᠯᠠ ᠨᠥᠭᠦᠭᠡ ᠨᠢ᠄
— ᠦᠭᠡᠢ᠂ ᠴᠢ ᠵᠢᠯᠢᠢᠭᠴᠢ ᠶ᠋ᠢᠨ ᠪᠡᠶᠡ ᠪᠠᠷᠠᠭᠰᠠᠨ ᠢ᠋ ᠳᠠᠯᠢᠮᠳᠠᠭᠤᠯᠵᠤ ᠬᠤᠷᠤᠭᠤᠨ ᠠ᠋ᠴᠠ ᠨᠢ ᠠᠯᠲᠠᠨ ᠪᠦᠯᠡᠵᠡᠭ ᠢ᠋ ᠨᠢ ᠮᠤᠯᠲᠤᠯᠵᠤ᠂ ᠬᠣᠷᠭᠣ ᠠ᠋ᠴᠠ ᠨᠢ ᠶᠤᠸᠠᠮᠪᠤᠤ ᠶ᠋ᠢ ᠨᠢ ᠳᠠᠯᠳᠠᠭᠤᠷ ᠡᠪᠦᠷᠯᠡᠴᠢᠬᠡᠳᠡᠭ ᠶᠠᠮᠠᠷ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ ᠥᠯᠥᠭᠴᠢᠨ ᠪᠣᠢ! ᠭᠡᠨᠡ᠃
— ᠳᠠᠯᠳᠠᠭᠤᠷ ᠠᠪᠤᠭᠰᠠᠨ ᠶᠠᠭᠤᠮᠠ ᠪᠢᠰᠢ ᠠ᠋ ! ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠨᠠᠳᠠ ᠦᠭᠭᠦᠭᠰᠡᠨ ᠭᠡᠬᠦ ᠳ᠋ᠦ᠍ ᠲᠠ ᠨᠠᠷ ᠢᠲᠡᠭᠡᠳᠡᠭ ᠦᠭᠡᠢ᠃
— ᠬᠡᠩ ! ᠠᠶᠠ ᠦᠭᠡᠢᠳᠡᠪᠡᠯ ᠡᠨᠡ ᠥᠯᠥᠭᠴᠢᠨ ᠴᠡᠴᠡᠭ ᠬᠠᠲᠤᠨ ᠤ᠋ ᠠᠮᠢ ᠶ᠋ᠢ ᠨᠢ ᠬᠣᠣᠷᠯᠠᠴᠢᠬᠠᠭᠠᠳ ᠶᠠᠭᠤᠮᠠ ᠶ᠋ᠢ ᠨᠢ ᠶᠡᠭᠦᠯᠡᠵᠦ ᠠᠪᠤᠭᠠᠳ ᠭᠤᠳᠤᠢᠬᠤ ᠰᠠᠨᠠᠭᠠᠲᠠᠢ ᠪᠠᠢᠭᠰᠠᠨ ᠁ ᠭᠡᠵᠦ ᠱᠠᠯᠳᠠᠩᠨᠠᠭᠤᠯᠤᠭᠠᠳ ᠨᠢᠪᠰᠢᠷᠡᠲᠡᠯᠡ ᠵᠣᠳᠣᠪᠠ᠃ ᠡᠪᠡᠳᠬᠦ ᠢᠴᠢᠬᠦ ᠬᠣᠣᠰᠯᠠᠭᠰᠠᠨ ᠨᠣᠮᠢᠨ᠄
— ᠪᠢᠰᠢ ᠠ᠋᠂ ᠲᠠ ᠨᠠᠷ ᠨᠠᠮᠠᠶ᠋ᠢ ᠬᠦᠷᠲᠡᠵᠦ ᠪᠠᠢᠨᠠ᠃ ᠴᠡᠴᠡᠭ ᠬᠠᠲᠤᠨ ᠠ᠋᠂ ᠡᠳᠡᠨᠥᠰ ᠴᠢᠨᠢ ᠨᠠᠮᠠᠶ᠋ᠢ ᠰᠢᠷᠭᠠᠭᠠᠵᠤ ᠠᠯᠠᠯᠠ ᠠ᠋ ! ᠭᠡᠵᠦ ᠡᠷᠦᠢ ᠬᠤᠷᠤᠢ ᠦᠭᠡᠢ ᠣᠷᠢᠯᠠᠪᠠ ᠁
ᠷᠠᠰᠢ ᠵᠠᠬᠢᠷᠤᠭᠴᠢ᠂ ᠬᠦᠩ ᠨᠣᠶᠠᠨ ᠤ᠋ ᠭᠣᠣᠯ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠶᠠᠪᠤᠨ ᠬᠠᠷᠠ ᠭᠡᠷ ᠡᠴᠡ ᠨᠣᠮᠢᠨ ᠢ᠋ ᠠᠪᠴᠢᠷᠠᠭᠤᠯᠤᠨ ᠰᠢᠭᠦᠪᠡ᠃
ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠮᠦᠨᠡ ᠬᠥᠰᠡᠷ ᠲᠦ᠍ ᠮᠠᠩᠨᠠᠢ ᠪᠠᠨ ᠰᠢᠭᠠᠨ ᠰᠥᠭᠥᠳᠦᠭᠰᠡᠨ ᠨᠣᠮᠢᠨ ᠢ᠋ ᠬᠠᠷᠠᠭᠠᠳ ᠷᠠᠰᠢ ᠵᠠᠬᠢᠷᠤᠭᠴᠢ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ᠄
— ᠣᠪᠣᠭ ᠨᠡᠷᠡ ᠴᠢᠨᠢ ᠬᠡᠨ ᠪᠢᠯᠡ? ᠠᠯᠢ ᠨᠤᠲᠤᠭ ᠤ᠋ᠨ ᠶᠠᠮᠠᠷ ᠰᠤᠮᠤᠨ ᠤ᠋ ᠁ ᠭᠡᠵᠦ ᠬᠡᠯᠡᠵᠦ ᠪᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠬᠥᠰᠡᠷ ᠲᠦ᠍ ᠰᠥᠭᠥᠳᠦᠭᠰᠡᠨ ᠨᠣᠮᠢᠨ ᠳᠣᠣᠷᠠ ᠠ᠋ᠴᠠ ᠨᠢ ᠬᠠᠳᠬᠤᠭᠰᠠᠨ ᠶᠤᠮ ᠰᠢᠭ᠋ ᠭᠡᠨᠡᠳᠲᠡ ᠴᠣᠷᠣᠢᠨ ᠪᠣᠰᠴᠤ᠄
— ᠮᠠᠢ ᠂ ᠮᠠᠢ ! ᠵᠠᠬᠢᠷᠤᠭᠴᠢ ᠭᠤᠸᠠᠢ ᠶᠤᠸᠠᠮᠪᠤᠤ ᠠᠪᠤᠨᠠ ᠤᠤ? ᠠᠯᠲᠠᠨ ᠪᠦᠯᠡᠵᠡᠭ ᠠᠪᠤᠨᠠ ᠤᠤ? ᠠᠯᠢᠨ ᠢ᠋ ᠨᠢ ᠠᠪᠤᠨᠠ ᠤᠤ ᠳᠤᠷᠠ ᠪᠠᠨ ᠮᠡᠳᠡ ᠭᠡᠳ ᠬᠡᠦᠬᠡᠨ ᠬᠥᠬᠥ ᠪᠡᠨ ᠢᠯᠡ ᠭᠠᠷᠭᠠᠵᠤ ᠲᠡᠭᠦᠨ ᠵᠦᠭ ᠬᠠᠨᠳᠤᠭᠤᠯᠤᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠬᠥᠨ ᠦ᠌ ᠲᠣᠪᠴᠢ ᠪᠠᠨ ᠴᠢᠮᠬᠢᠵᠦ ᠬᠡᠦᠬᠡᠳ ᠬᠥᠬᠥᠭᠦᠯᠬᠦ ᠭᠡᠵᠦ ᠪᠠᠢᠭᠠ ᠡᠬᠡᠨᠡᠷ ᠰᠢᠭ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠣᠢᠷᠠᠳᠬᠤ ᠳ᠋ᠤ᠌ ᠵᠠᠬᠢᠷᠤᠭᠴᠢ ᠰᠠᠨᠳᠤᠷᠴᠤ ᠨᠢᠳᠦ ᠪᠡᠨ ᠲᠠᠭᠯᠠᠨ᠄
— ᠡᠨᠡ ᠰᠣᠯᠢᠶᠠᠲᠠᠢ ᠵᠣᠯᠪᠢᠩ ᠡᠮᠡ ᠶ᠋ᠢ ᠴᠠᠭᠠᠰᠢ ᠨᠢ ᠠᠪᠠᠴᠢ! ᠪᠤᠤ ᠦᠵᠡᠭᠳᠡ ᠭᠡᠮ! ᠭᠡᠳ ᠭᠠᠷᠴᠤ ᠶᠠᠪᠤᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠮᠠᠷᠭᠠᠲᠤᠷ ᠨᠢ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠮᠣᠷᠢ ᠬᠠᠷᠠᠴᠢᠬᠠᠭᠠᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠭᠡᠷ ᠦ᠋ᠨ ᠬᠢᠨᠢ ᠠᠷᠤ ᠳ᠋ᠤᠨᠢ ᠴᠢᠷᠠᠮᠠᠨ ᠱᠠᠯᠳᠠᠩ ᠨᠢᠭᠡ ᠬᠥᠮᠦᠨ ᠪᠤᠯᠲᠠᠰᠬᠢᠨ ᠦᠵᠡᠭᠳᠡᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠨ ᠢᠳᠡᠭᠡ ᠶᠠᠳᠠᠨ ᠮᠡᠯᠡᠷᠡᠵᠦ ᠵᠣᠭᠰᠣᠲᠠᠯᠠ ᠲᠡᠷᠡ ᠬᠦ᠌ ᠱᠠᠯᠳᠠᠩ ᠬᠥᠮᠦᠨ ᠳᠠᠬᠢᠨ ᠢᠯᠡᠷᠡᠵᠦ᠄
— ᠮᠠᠢ ᠂ ᠵᠠᠬᠢᠷᠤᠭᠴᠢ ᠭᠤᠸᠠᠢ ᠠ᠋! ᠶᠤᠸᠠᠮᠪᠤᠤ ᠠᠪᠤᠨᠠ ᠤᠤ? ᠭᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠬᠥᠬᠥ ᠪᠡᠨ ᠢᠯᠡ ᠭᠠᠷᠭᠠᠭᠰᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠣᠳᠣ ᠬᠠᠷᠠᠭᠳᠠᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠨᠢᠳᠦ ᠪᠡᠨ ᠠᠨᠢᠨ《ᠠ᠂ ᠪᠤᠤ ᠦᠵᠡᠭᠳᠡ! ᠨᠣᠮᠢᠨ ᠬᠡᠦᠬᠡᠨ ᠰᠣᠯᠢᠶᠠᠷᠠᠴᠢᠬᠠᠵᠠᠢ ᠠ᠋! 》 ᠭᠡᠵᠦ ᠳᠦᠳᠦᠨᠡᠨ ᠱᠠᠯᠠᠪᠬᠠᠨ ᠭᠡᠷ ᠲᠦ᠍ ᠣᠷᠣᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠭᠡᠷ ᠲᠦ᠍ ᠣᠷᠣᠵᠤ ᠰᠠᠭᠤᠵᠤ ᠵᠠᠪᠳᠤᠬᠤ ᠠ᠋ᠴᠠ ᠡᠮᠦᠨᠡ ᠬᠦᠩ ᠨᠣᠶᠠᠨ ᠤ᠋ ᠬᠥᠲᠥᠴᠢ ᠲᠡᠭᠦᠨ ᠦ᠌ ᠪᠣᠷᠪᠢ ᠶ᠋ᠢ ᠭᠢᠰᠬᠢᠮᠡ ᠣᠷᠣᠵᠤ ᠢᠷᠡᠭᠡᠳ᠄
— ᠬᠦᠩ ᠨᠣᠶᠠᠨᠲᠠᠨ᠂ ᠲᠠᠨ ᠢ᠋ ᠦᠳᠲᠡᠷ ᠣᠴᠢ! ᠭᠡᠵᠦ ᠳᠠᠭᠤᠳᠠᠵᠤ ᠪᠠᠢᠨᠠ᠃ ᠱᠠᠯᠠᠪᠳᠠ ᠳᠠ! ᠵᠠᠬᠢᠷᠤᠭᠴᠢ ᠨᠣᠶᠠᠨ ᠮᠢᠨᠢ᠂ ᠣᠷᠴᠢᠮ ᠠ᠋ᠴᠠ ᠬᠦᠩ ᠨᠣᠶᠠᠨ ᠤ᠋ ᠵᠠᠩ ᠠᠷᠠᠨᠰᠢ ᠬᠠᠴᠢᠨ ᠪᠣᠯᠵᠤ ᠰᠠᠪᠬᠤᠰ ᠭᠢᠰᠬᠢᠭᠰᠡᠭᠡᠷ ① ᠠᠭᠤᠷ ᠤᠴᠠᠭᠠᠷ ᠬᠥᠳᠡᠯᠵᠦ᠂ ᠶᠠᠭᠤᠮᠠ ᠬᠡᠦᠮᠡ ᠪᠡᠨ ᠰᠠᠪᠠᠯᠠᠵᠤ ᠭᠦᠪᠢᠭᠡᠳ ᠭᠡᠨᠡᠳᠲᠡ ᠪᠠᠢᠵᠤ ᠪᠠᠢᠭᠠᠳ 《ᠳ᠋ᠠᠭᠳᠠᠨ ᠳᠠ ᠯᠠᠮᠠ᠂ ᠨᠠᠮᠠᠶ᠋ᠢ ᠭᠢᠨᠵᠢᠯᠡᠬᠦ ᠪᠡᠷ ᠁ 》 ᠭᠡᠳ ᠤᠬᠠᠭᠠᠨ ᠲᠥᠬᠥᠭᠡ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠬᠤ ᠶᠤᠮ ᠭᠡᠵᠦ ᠲᠠᠰᠢᠶᠠ ᠶ᠋ᠢ ᠨᠢ ᠲᠠᠰᠢᠵᠤ ᠪᠠᠢᠭᠠ ᠰᠢᠭ᠋ ᠨᠢᠭᠡ ᠣᠯᠠᠨ ᠶᠠᠭᠤᠮᠠ ᠪᠤᠪᠠᠲᠤᠨᠠᠵᠤ ᠶᠠᠷᠢᠭᠰᠠᠨ ᠢ ᠷᠠᠰᠢ ᠵᠠᠬᠢᠷᠤᠭᠴᠢ ᠰᠣᠨᠣᠰᠤᠭᠠᠳ ᠳᠤᠷᠠ ᠦᠭᠡᠢᠴᠡᠵᠦ᠄
— ᠠᠮᠠ ᠪᠠᠨ ᠣᠯᠵᠤ ᠳᠣᠩᠭᠣᠰᠤᠭᠠᠴᠢ ᠴᠢ! ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭ ᠪᠤᠰᠤ ᠴᠡᠭᠡᠷ ᠲᠡᠢ ᠦᠭᠡ ᠶ᠋ᠢ ᠶᠠᠷ ᠶᠠᠷ ᠭᠡᠬᠦ ᠪᠡᠨ ᠠᠶᠠᠳ! ᠭᠡᠵᠦ ᠰᠢᠷᠦᠭᠦᠨ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌ ᠥᠨᠥᠬᠢ ᠬᠥᠲᠥᠴᠢ ᠨᠣᠶᠠᠳ ᠤ᠋ᠨ ᠬᠣᠭᠣᠷᠣᠨᠳᠣ ᠠᠮᠠ ᠳᠠᠪᠠᠭᠰᠠᠨ ᠦᠭᠡ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ ᠴᠠᠭᠠᠰᠢ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠢ᠋ ᠭᠢᠯᠡᠪᠬᠢᠭᠡᠳ ᠡᠵᠡᠨ ᠳ᠋ᠡᠭᠡᠨ ᠵᠠᠩᠨᠠᠭᠳᠠᠭᠰᠠᠨ ᠨᠣᠬᠠᠢ ᠰᠢᠭ᠋ ᠭᠠᠷᠴᠤ ᠶᠠᠪᠤᠪᠠ᠃
ᠷᠠᠰᠢ ᠵᠠᠬᠢᠷᠤᠭᠴᠢ ᠣᠷᠣᠵᠤ ᠣᠴᠢᠭᠰᠠᠨ ᠳ᠋ᠤ᠌ ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠲᠠᠮᠠᠬᠢᠯᠠᠵᠤ ᠪᠠᠢᠭᠰᠠᠨ ᠲᠥᠭᠡ ᠤᠷᠲᠤ ᠬᠠᠰ ᠰᠣᠷᠣᠭᠤᠯ ᠮᠥᠩᠭᠥᠨ ᠲᠣᠭᠣᠭᠠ ᠲᠠᠢ ᠭᠠᠩᠰᠠ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠱ ᠬᠢᠲᠡᠯᠡ ᠰᠢᠳᠡᠵᠦ ᠶᠠᠪᠤᠭᠤᠯᠤᠭᠠᠳ᠄
— ᠭᠠᠵᠠᠷ ᠤᠰᠤ ᠪᠤᠵᠠᠷᠲᠤᠵᠠᠢ ᠠ᠋! ᠮᠠᠭᠤ ᠰᠠᠢᠨ ᠠᠳᠤᠭᠤᠨ ᠤ᠋ ᠪᠠᠳᠢᠷᠴᠢ᠂ ᠪᠣᠭᠣᠯ ᠢᠨᠵᠢ ᠬᠦᠷᠲᠡᠯᠡ ᠱᠠᠯᠢᠭᠯᠠᠨ ᠰᠠᠮᠠᠭᠤᠷᠠᠵᠤ᠂ ᠪᠣᠰᠴᠤ ᠤᠷᠭᠤᠳᠠᠭ ᠪᠣᠯᠤᠭᠰᠠᠨ ᠁ ᠴᠢᠭᠢᠶᠡᠲᠦᠷᠦᠦ ᠁ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠬᠤ ᠳ᠋ᠤ᠌ ᠤᠷᠤᠭᠤᠯ ᠨᠢ ᠲᠠᠲᠠᠪᠠᠭᠠᠨᠠᠵᠤ ᠭᠠᠷ ᠨᠢ ᠰᠠᠯᠭᠠᠨᠠᠨᠠ᠃ ᠬᠦᠩ ᠨᠣᠶᠠᠨ ᠤ᠋ ᠰᠠᠪᠠᠭᠠᠨᠠᠨ ᠠᠭᠤᠷᠯᠠᠭᠰᠠᠨ ᠳ᠋ᠤ᠌ ᠷᠠᠰᠢ ᠵᠠᠬᠢᠷᠤᠭᠴᠢ ᠰᠠᠨᠳᠤᠷᠴᠤ᠄
— ᠨᠣᠶᠠᠨ ᠠᠬᠠᠢᠲᠠᠨ᠂ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤ! ᠭᠤᠩᠴᠤᠭ ᠢ ᠬᠠᠷᠠ ᠭᠡᠷ ᠲᠦ᠍ ᠳᠠᠷᠤᠴᠢᠬᠠᠯᠠ ᠁ ᠭᠡᠰᠡᠨ ᠳ᠋ᠦ᠍ ᠬᠦᠩ ᠨᠣᠶᠠᠨ᠄
— ᠵᠠ᠂ ᠪᠠᠢᠵᠠ ᠳᠠ᠂ ᠦᠬᠦᠳᠡᠭ ᠦᠭᠡᠢ ᠮᠠᠭᠤ ᠭᠣᠢᠷᠠᠴᠢ ᠶ᠋ᠢ ᠬᠣᠬᠣᠢ᠂ ᠠᠳᠤᠭᠤᠨ ᠳ᠋ᠤ᠌ ᠰᠠᠢᠨ ᠡᠷᠡ ᠪᠣᠯᠬᠣᠷ ᠠᠭᠤᠴᠢᠯᠠᠵᠤ ᠤᠷᠭᠢᠶᠠ! ᠬᠠᠷᠠ ᠭᠡᠷ ᠡᠴᠡ ᠨᠢ ᠰᠤᠯᠠᠯᠠᠵᠤ᠂ ᠶᠠᠯᠠ ᠨᠥᠮᠥᠷᠭᠡᠨ ᠠᠳᠤᠭᠤᠨ ᠳ᠋ᠤ᠌ ᠪᠣᠭᠣᠯᠴᠢᠯᠠᠵᠤ ᠪᠠᠢ! ᠭᠡᠪᠡ᠃
— ᠠᠳᠤᠭᠤ ᠬᠠᠷᠠᠭᠰᠠᠨ ᠬᠥᠮᠦᠨ ᠶᠦᠮ ᠳᠡ᠂ ᠭᠡᠨᠡᠳᠲᠡ ᠬᠥᠯ ᠣᠷᠭᠣᠴᠢᠬᠠᠪᠠᠯ ᠁
— ᠡᠦᠲᠦ ᠲᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠵᠣᠷᠢᠭ ᠪᠠᠢᠬᠤ ᠦᠭᠡᠢ ᠠ᠋ ! ᠦᠭᠡᠢ᠂ ᠲᠡᠭᠡᠬᠦ ᠳ᠋ᠦ᠍ ᠲᠠ ᠨᠠᠷ ᠦᠬᠦᠭᠰᠡᠨ ᠪᠠᠯᠢᠩ ᠤᠤ? ᠭᠡᠵᠦ ᠬᠦᠩ ᠨᠣᠶᠠᠨ ᠤᠴᠠᠭᠠᠷᠳᠠᠭᠰᠠᠨ ᠳ᠋ᠤ᠌ ᠷᠠᠰᠢ ᠵᠠᠬᠢᠷᠤᠭᠴᠢ᠄
— ᠵᠠ᠂ ᠮᠡᠳᠡᠯᠡ᠃ ᠥᠨᠥᠬᠢ ᠨᠣᠮᠢᠨ ᠭᠠᠯᠵᠠᠭᠤ ᠰᠣᠯᠢᠶᠠ ᠣᠷᠣᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠴᠤ᠌ ᠡᠮᠦᠰᠬᠦ ᠦᠭᠡᠢ ᠱᠠᠯᠳᠠᠩ ᠨᠢᠴᠦᠭᠦᠨ ᠁ ᠭᠡᠪᠡᠯ᠂ ᠨᠣᠶᠠᠨᠲᠠᠨ᠄
— ᠵᠠ᠂ ᠵᠠ᠂ ᠶᠠᠮᠠᠷ ᠪᠣᠢ? ᠨᠣᠶᠠᠨ ᠰᠠᠩ ᠴᠤ᠌ ᠪᠤᠵᠠᠷᠲᠤᠴᠢᠬᠠᠵᠠᠢ ᠠ᠋ ! ᠦᠭᠡᠢ᠂ ᠴᠡᠴᠡᠭ ᠬᠠᠲᠤᠨ ᠤ᠋ ᠰᠦᠨᠡᠰᠦ ᠶ᠋ᠢ ᠭᠠᠯ ᠢ᠋ᠶ᠋ᠠᠷ ᠳᠡᠭᠳᠡᠭᠡᠴᠢᠬᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ⁈ ᠪᠠᠭᠠ ᠬᠠᠲᠤᠨ ᠤ᠋ ᠪᠠᠷᠠ ᠴᠤ᠌ ᠠᠯᠠᠭᠠ᠃ ᠦᠭᠡᠢ ᠠ᠋᠂ ᠶᠡᠷᠦ ᠨᠢ ᠬᠠᠮᠢᠭᠠ ᠶᠠᠪᠤᠴᠢᠬᠠᠪᠠ? ᠵᠢᠯᠢᠢᠭᠴᠢ ᠴᠡᠴᠡᠭ ᠬᠠᠲᠤᠨ ᠤ᠋ ᠰᠦᠨᠡᠰᠦ ᠯᠡ ᠡᠷᠭᠢᠨ ᠪᠤᠴᠠᠨ ᠣᠷᠣᠩᠨᠠᠭᠠᠳ ᠥᠨᠥᠬᠢ ᠢᠨᠵᠢ ᠬᠡᠦᠬᠡᠨ ᠨᠣᠮᠢᠨ ᠢ᠋ᠶ᠋ᠠᠨ ᠠᠪᠠᠴᠢᠬᠤ ᠰᠠᠨᠠᠭᠠᠲᠠᠢ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ ᠁ ᠭᠡᠵᠦ ᠡᠬᠢ ᠠᠳᠠᠭ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠳ᠋ᠤ᠌ ᠷᠠᠰᠢ ᠵᠠᠬᠢᠷᠤᠭᠴᠢ ᠶᠠᠭᠤ ᠴᠤ᠌ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠬᠦᠩ ᠨᠣᠶᠠᠨ ᠤ᠋ ᠰᠦᠨᠡᠰᠦ ᠪᠡᠨ ᠠᠯᠳᠠᠭᠰᠠᠨ ᠰᠢᠭ᠋ ᠴᠣᠩᠬᠢᠢᠭᠰᠠᠨ ᠴᠢᠷᠠᠢ ᠶ᠋ᠢ ᠤᠳᠠᠲᠠᠯᠠ ᠰᠢᠷᠲᠡᠨᠡ᠃
《 ᠭᠠᠯᠵᠠᠭᠤ ᠰᠣᠯᠢᠶᠠ ᠲᠠᠢ ᠪᠣᠯᠤᠭᠰᠠᠨ ᠨᠣᠮᠢᠨ ᠢ᠋ ᠨᠢᠳᠦᠨ ᠦ᠌ ᠳᠠᠯᠳᠠ ᠠᠪᠠᠴᠢᠵᠤ ᠬᠠᠶᠠ! 》 ᠭᠡᠰᠡᠨ ᠨᠣᠶᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠠᠲᠤᠨ ᠤ᠋ ᠲᠡᠷᠲᠡᠭᠡ ᠵᠡᠯᠢᠭᠦᠳ ᠡᠯᠡᠰᠦᠨ ᠴᠦᠯ ᠳ᠋ᠦ᠍ ᠠᠪᠠᠴᠢᠵᠤ ᠣᠷᠬᠢᠭᠰᠠᠨ ᠪᠣᠯᠪᠠᠴᠤ ᠡᠷᠭᠢᠭᠡᠳ ᠨᠣᠶᠠᠨ ᠰᠠᠩ ᠤ᠋ᠨ ᠪᠠᠭᠤᠷᠢ ᠳ᠋ᠤ᠌ ᠢᠷᠡᠴᠢᠬᠡᠭᠰᠡᠨ ᠪᠠᠢᠳᠠᠭ᠃
ᠡᠢᠮᠦ ᠨᠢᠭᠡ ᠱᠠᠯᠳᠠᠩ ᠨᠢᠴᠦᠭᠦᠨ᠂ ᠭᠠᠯᠵᠠᠭᠤ ᠰᠣᠯᠢᠶᠠ ᠲᠠᠢ ᠬᠥᠮᠦᠨ ᠬᠠᠶᠠ ᠠᠳᠠ᠂ ᠬᠠᠶᠠ ᠲᠡᠨᠳᠡ ᠬᠠᠷᠠᠭᠳᠠᠵᠤ᠂ ᠤᠲᠤᠭᠠ ᠵᠢᠩᠰᠡ ᠲᠡᠢ ᠨᠣᠶᠠᠨ ᠬᠥᠮᠦᠨ ᠲᠡᠢ ᠬᠠᠷᠭᠤᠪᠠᠯ 《ᠮᠠᠢ᠂ ᠶᠤᠸᠠᠮᠪᠤᠤ ᠠᠪᠤᠨᠠ ᠤᠤ ? 》 ᠭᠡᠳ ᠰᠠᠭᠠᠷᠢᠲᠤᠭᠰᠠᠨ ᠬᠣᠶᠠᠷ ᠬᠥᠬᠥᠨ ᠢ᠋ᠶ᠋ᠡᠨ ᠲᠡᠭᠦᠨ ᠵᠦᠭ ᠥᠭᠴᠦ ᠢᠨᠢᠶᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠱᠣᠭᠰᠢᠷᠠᠲᠠᠯᠠ ᠤᠬᠢᠯᠠᠴᠢᠬᠠᠳᠠᠭ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ ᠪᠢᠯᠡ᠃
– – – –
① ᠬᠠᠯᠲᠤᠰᠬᠢᠬᠦ