ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ> Хан мунын сүүрс < дээд > – Мөнх зохиоов ᠂ дэд бодь – нэгдүгээр бүлэг <10>
288ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠠᠷᠪᠠ>
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠬᠥᠬᠡᠪᠤᠯᠠᠭ ᠤ᠋ᠨ ᠭᠣᠣᠯ ᠤ᠋ᠨ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠬᠠᠷᠠ ᠴᠡᠷᠢᠭ ᠲᠦ᠍ ᠠᠯᠠᠭᠳᠠᠯᠠ ᠭᠡᠳᠡᠭ ᠴᠢᠮᠡᠭᠡ ᠵᠢᠭᠦᠷ ᠤᠷᠭᠤᠵᠤ ᠬᠣᠰᠢᠭᠤ ᠳᠠᠶᠠᠭᠠᠷ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠦᠭᠡᠢ ᠪᠣᠯᠪᠠ᠃
ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢᠨ ᠯᠠᠮᠠ ᠨᠠᠷ ᠪᠣᠯᠤᠨ ᠰᠦᠵᠢᠭᠲᠡᠳ᠂ ᠣᠢᠷᠠ ᠬᠠᠪᠢ ᠶ᠋ᠢᠨ ᠮᠠᠯᠴᠢᠳ ᠰᠠᠢᠨ ᠳᠤᠷᠠ ᠠ᠋ᠴᠠ ᠪᠠᠨ ᠴᠤᠭᠯᠠᠷᠠᠵᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠦᠭᠡᠢ ᠬᠡᠭᠦᠷ ᠪᠡᠶᠡ ᠶ᠋ᠢ ᠨᠢ ᠠᠷᠢᠭᠤᠨ ᠴᠢᠨᠠᠷᠲᠤ ᠠᠭᠠᠷᠤᠨ ᠬᠣᠵᠤᠤᠯᠠ ᠶ᠋ᠢᠨ ᠴᠣᠭ ᠲᠤ ᠰᠢᠲᠠᠭᠠᠵᠤ᠂ ᠰᠦᠨᠡᠰᠦ ᠶ᠋ᠢ ᠨᠢ ᠭᠠᠯ ᠢ᠋ᠶ᠋ᠠᠷ ᠳᠡᠭᠳᠡᠭᠡᠨ ᠴᠢᠨᠳᠠᠷ ᠢ᠋ ᠨᠢ ᠶᠣᠯᠣ ᠶ᠋ᠢᠨ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠲᠤ ᠠᠪᠠᠴᠢᠵᠤ ᠣᠷᠣᠰᠢᠭᠤᠯᠪᠠ᠃
ᠲᠡᠭᠡᠬᠦ ᠳ᠋ᠦ᠍ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠦᠬᠦᠬᠦ ᠳ᠋ᠡᠭᠡᠨ《ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠡᠭᠡᠮ ᠦ᠋ᠨ ᠶᠠᠰᠤ ᠶ᠋ᠢ ᠲᠡᠮᠦᠷ ᠭᠢᠨᠵᠢ ᠪᠡᠷ ᠣᠭᠣᠰᠣᠷᠯᠠᠵᠤ ᠡᠷᠯᠢᠭ ᠲᠦ᠍ ᠠᠪᠠᠴᠢᠨᠠ᠁》 ᠭᠡᠵᠦ ᠬᠠᠳᠠ ᠴᠤᠤᠷᠢᠶᠠᠲᠤᠲᠠᠯᠠ ᠬᠠᠰᠬᠢᠷᠴᠤ ᠪᠠᠢᠪᠠ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠳᠣᠭᠣᠯᠭᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠠᠶᠤᠬᠤ ᠳ᠋ᠠᠭᠠᠨ ᠬᠤᠢᠬᠠ ᠶ᠋ᠢᠨ ᠦᠰᠦ ᠨᠢ ᠵᠠᠷᠠᠭᠠᠨ ᠤ᠋ ᠥᠷᠭᠡᠰᠦ ᠰᠢᠭ ᠠᠷᠵᠠᠢᠨ ᠪᠣᠰᠴᠤ ᠪᠦᠬᠦ ᠪᠡᠶᠡ ᠨᠢ ᠪᠢᠵᠢᠷᠡᠦᠲᠦᠵᠡᠢ᠃ ᠲᠡᠢᠨ ᠬᠦ᠌ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠥᠷᠢᠰᠦᠯᠳᠦᠭᠡᠨᠲᠤ ᠶᠡᠬᠡ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠯᠠ ᠭᠡᠳᠡᠭ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠠᠯᠠᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠣᠶᠤᠨ ᠰᠠᠨᠠᠭᠠᠨ ᠳ᠋ᠤ᠌ ᠠᠢᠩᠭᠤᠷᠢᠲᠤ ᠣᠷᠢᠶᠠᠩᠭᠤ ᠣᠷᠢᠶᠠᠬᠤ ᠮᠡᠲᠦ ᠲᠣᠭᠲᠠᠪᠤᠷᠢ ᠠᠯᠳᠠᠭᠤᠯᠤᠨ ᠪᠠᠢᠨ ᠪᠠᠢᠨ ᠰᠢᠭᠡᠰᠦ ᠨᠢ ᠬᠦᠷᠬᠦ ᠰᠢᠭ ᠪᠣᠯᠳᠠᠭ ᠪᠣᠯᠵᠠᠢ᠃
ᠶᠠᠰᠤᠨ ᠠ᠋ᠴᠠ ᠨᠢ ᠴᠢᠬᠠᠷᠠᠭᠰᠠᠨ ᠬᠦᠢᠲᠡᠨ ᠬᠥᠯᠥᠰᠥ ᠬᠦᠩ ᠨᠣᠶᠠᠨ ᠤ᠋ ᠱᠠᠯᠳᠠᠩ ᠮᠠᠩᠨᠠᠢ ᠶ᠋ᠢ ᠨᠢ ᠳᠠᠭᠠᠭᠠᠳ ᠴᠢᠭᠢᠭᠯᠡᠬᠦ ᠳ᠋ᠦ᠍ ᠪᠦᠬᠦ ᠪᠡᠶᠡ ᠶ᠋ᠢᠨ ᠬᠢᠨᠢ ᠶᠠᠰᠤ ᠬᠦᠰᠦ ᠰᠢᠷᠬᠢᠷᠡᠵᠦ ᠡᠪᠡᠳᠬᠦ ᠴᠦ᠍ ᠰᠢᠭ ᠪᠣᠯᠤᠭᠰᠠᠨ ᠳ᠋ᠤ᠌ ᠡᠷᠬᠡ ᠦᠭᠡᠢ ᠳᠠᠯᠤ ᠮᠥᠷᠥ ᠪᠡᠨ ᠰᠢᠯᠭᠡᠭᠡᠪᠡ᠃ ᠡᠨᠡ ᠨᠢ《 ᠠᠯᠢ᠂ ᠨᠠᠭᠠᠰᠢ ᠬᠤᠶᠠᠩ ᠳᠠᠷᠤᠭᠠᠳ ᠠᠯᠢ ᠠ᠋!》 ᠭᠡᠰᠡᠨ ᠳᠠᠭᠤ ᠳᠠᠯᠳᠠ ᠳᠣᠬᠢᠶᠠ ᠥᠭᠭᠦᠭᠰᠡᠨ ᠢ᠋ ᠬᠣᠶᠠᠷ ᠰᠢᠪᠡᠭᠴᠢᠨ ᠠᠨᠳᠠᠬᠤ ᠦᠭᠡᠢ ᠣᠢᠯᠠᠭᠠᠵᠤ ᠡᠷᠪᠡᠬᠡᠢ ᠰᠢᠭ ᠨᠡᠮᠡᠰᠬᠢᠨ ᠬᠠᠵᠠᠭᠤ ᠳ᠋ᠤᠨᠢ ᠢᠷᠡᠵᠦ ᠬᠦᠩ ᠨᠣᠶᠠᠨ ᠤ᠋ ᠵᠡᠭᠦᠨ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢ ᠵᠠᠪ ᠵᠡᠷᠭᠡ ᠵᠢᠭᠳᠡᠬᠡᠨ ᠰᠠᠢᠬᠠᠨ ᠨᠤᠬᠤᠯᠠᠵᠤ ᠠᠵᠤᠭᠤ!
ᠣ ᠡᠩᠭᠡᠰᠬᠡ᠂ ᠬᠦᠳᠡᠷᠢ ᠵᠢᠭᠠᠷ ᠤ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠤᠯᠤᠭᠰᠠᠨ ᠬᠣᠶᠠᠷ ᠰᠢᠪᠡᠭᠴᠢᠨ ᠥᠬᠢᠨ ᠢ᠋ᠶ᠋ᠡᠷ ᠳᠠᠯᠤ ᠮᠥᠷᠦᠨ ᠦ᠌ ᠪᠡᠨ ᠬᠤᠶᠠᠩ ᠢ᠋ ᠨᠤᠬᠤᠭᠤᠯᠵᠤ᠂ ᠪᠡᠶᠡ ᠨᠢ ᠲᠠᠢᠪᠤᠰᠢᠷᠠᠨ᠂ ᠤᠷᠲᠤ ᠭᠡᠭᠴᠢ ᠬᠡᠬᠡᠷᠡᠭᠦᠯᠵᠦ᠂ ᠨᠢᠳᠦ ᠪᠡᠨ ᠠᠨᠢᠨ ᠡᠩᠭᠡᠷ ᠲᠡᠬᠢ ᠡᠭᠡᠯᠳᠦᠷᠭᠡᠯᠡᠭᠰᠡᠨ ᠴᠡᠩᠬᠡᠷ ᠬᠠᠰ ᠤ᠋ᠨ ᠡᠷᠢᠭᠡ ᠪᠡᠨ ᠢᠮᠡᠷᠦᠨ ᠦᠷᠭᠡᠯᠡᠲᠡᠯᠡ ᠡᠭᠦᠳᠡᠨ ᠦ᠌ ᠬᠥᠲᠥᠴᠢ᠄
— ᠬᠦᠩ ᠨᠣᠶᠠᠨ ᠳ᠋ᠤ᠌ ᠮᠡᠳᠡᠭᠦᠯᠵᠦ ᠪᠠᠢᠨᠠ᠃ ᠬᠦᠨᠳᠦ ᠪᠡᠯᠡᠭ ᠲᠡᠢ ᠨᠢᠭᠡ ᠬᠥᠮᠦᠨ ᠬᠦᠩ ᠨᠣᠶᠠᠨ ᠲᠠᠢ ᠪᠠᠷᠠᠳᠠᠬᠤ ᠭᠡᠨᠡ ᠭᠡᠵᠦ ᠮᠡᠬᠦᠢᠨ ᠠᠢᠯᠠᠳᠬᠠᠪᠠᠯ᠂ ᠬᠦᠩ ᠨᠣᠶᠠᠨ ᠰᠠᠨᠠᠭᠠᠨ ᠳ᠋ᠠᠭᠠᠨ ᠳᠡᠮᠡᠢ ᠯᠡ ᠤᠪᠠᠢᠯᠠᠭᠰᠠᠨ ᠦᠭᠡᠢ᠂ ᠲᠠᠩᠳᠠ ᠢᠩᠭᠢᠵᠦ ᠪᠡᠯᠡᠭ ᠡᠷᠭᠦᠴᠡ ᠬᠦᠷᠭᠡᠵᠦ ᠢᠷᠡᠳᠡᠭ ᠲᠦ᠍ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠰᠡᠨ ᠳᠠᠭᠤ ᠦᠭᠡᠢ ᠲᠣᠬᠢᠯᠲᠠ ᠶ᠋ᠢ ᠠᠨᠳᠠᠳᠠᠭ ᠦᠭᠡᠢ ᠬᠥᠲᠥᠴᠢ《 ᠵᠠ》 ᠭᠡᠳ ᠴᠤᠬᠤᠷᠢᠵᠤ ᠭᠠᠷᠪᠠ᠃
ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠤ᠋ᠨ ᠴᠠᠭᠠᠨ ᠣᠷᠳᠣᠨ ᠤ᠋ ᠭᠣᠣᠯ ᠡᠭᠦᠳᠡ ᠪᠡᠷ ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠨᠦᠰᠡᠷ ᠬᠦᠨᠳᠦ ᠶᠠᠭᠤᠮᠠ ᠶ᠋ᠢ ᠭᠤᠷᠪᠠᠨ ᠬᠥᠮᠦᠨ ᠳᠠᠮᠨᠠᠵᠤ ᠣᠷᠣᠯᠠ᠃
ᠬᠦᠩ ᠨᠣᠶᠠᠨ ᠤ᠋ ᠵᠥᠭᠡᠯᠡᠨ ᠢᠰᠡᠷᠢᠲᠤ ᠰᠠᠭᠤᠳᠠᠯ ᠤ᠋ᠨ ᠡᠮᠦᠨᠡ ᠰᠤᠮᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠨᠥᠬᠢ ᠪᠣᠭᠣᠳᠠᠯ ᠳ᠋ᠠᠬᠢ ᠯᠦᠨᠳᠦᠭᠡᠷ ᠶᠠᠭᠤᠮᠠ ᠶ᠋ᠢ ᠠᠯᠭᠤᠷᠬᠠᠨ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ ᠲᠡᠷᠡ ᠭᠤᠷᠪᠠᠭᠤᠯᠠ ᠪᠠᠨ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠬᠡᠳᠦᠨ ᠠᠯᠴᠠᠮ ᠴᠤᠬᠤᠷᠢᠨ ᠲᠦᠰ ᠬᠢᠲᠡᠯᠡ ᠰᠥᠭᠥᠳᠴᠦ᠄
— ᠡᠷᠬᠢᠮ ᠬᠦᠨᠳᠦᠲᠦ ᠬᠦᠩ ᠨᠣᠶᠠᠨᠲᠠᠨ ᠲᠣᠭᠲᠠᠭᠠᠮᠤ! ᠭᠡᠳ ᠮᠠᠩᠨᠠᠢ ᠪᠠᠨ ᠬᠥᠰᠡᠷ ᠨᠠᠭᠠᠯᠳᠤᠭᠤᠯᠤᠨ ᠮᠥᠷᠭᠥᠪᠡ᠃
《ᠡᠨᠡ ᠤᠯᠠᠭᠠᠨ ᠲᠣᠷᠭᠠᠨ ᠪᠣᠭᠣᠳᠠᠯ ᠲᠠᠢ ᠯᠦᠨᠳᠦᠭᠡᠷ ᠪᠥᠭᠡᠷᠡᠩᠬᠡᠢ ᠶᠠᠭᠤᠮᠠ ᠴᠣᠬᠣᠮ ᠶᠠᠭᠤ ᠪᠣᠯᠴᠢᠬᠠᠪᠠ? ᠠᠯᠲᠠ ᠮᠥᠩᠭᠥ ᠴᠦ᠍ ᠯᠠᠪ ᠪᠢᠰᠢ ᠠ᠋! ᠬᠠᠮᠢᠭᠠ ᠪᠠᠢᠭᠰᠠᠨ ᠡᠢᠮᠦ ᠬᠠᠳᠠ ᠴᠢᠯᠠᠭᠤ ᠰᠢᠭ᠋ ᠲᠣᠮᠣ ᠪᠦᠳᠦᠭᠦᠨ ᠠᠯᠲᠠ ᠮᠥᠩᠭᠥ ᠪᠠᠢᠳᠠᠭ ᠪᠢᠯᠡ?》 ᠭᠡᠰᠡᠨ ᠰᠢᠦᠬᠡᠨ ᠬᠦᠩ ᠨᠣᠶᠠᠨ ᠨᠥᠭᠦᠭᠡ ᠮᠠᠩᠨᠠᠢ ᠪᠠᠨ ᠬᠥᠰᠡᠷ ᠰᠢᠷᠣᠢᠲᠤᠭᠤᠯᠤᠭᠰᠠᠨ ᠭᠤᠷᠪᠠᠭᠤᠯᠠ ᠶ᠋ᠢ《 ᠪᠣᠰ᠂ ᠪᠣᠰ! ᠲᠠ ᠨᠠᠷ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠶᠠᠭᠤ ᠶᠠᠭᠠᠬᠢᠬᠤ ᠨᠢ ᠪᠣᠢ?》 ᠭᠡᠵᠦ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠬᠡᠯᠡᠪᠡᠯ ᠳᠤᠮᠳᠠ ᠨᠢ ᠰᠥᠭᠥᠳᠦᠭᠰᠡᠨ ᠨᠢᠭᠡ ᠨᠢ ᠴᠣᠷᠣᠢᠨ ᠪᠣᠰᠴᠤ᠄
— ᠡᠷᠬᠢᠮ ᠬᠦᠨᠳᠦᠲᠦ ᠬᠦᠩ ᠨᠣᠶᠠᠨ ᠠᠭᠤᠴᠢᠯᠠᠬᠤ ᠪᠣᠯᠪᠠ ᠤᠤ? ᠪᠢ᠁ ᠭᠡᠲᠡᠯᠡ ᠭᠣᠳ ᠰᠢᠩᠭᠡᠨ ᠳᠠᠭᠤ ᠪᠠᠷ ᠨᠢ ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠰᠣᠴᠢᠵᠤ᠄
— ᠥᠯᠵᠡᠢᠰᠠᠩ⁈ ᠪᠢᠰᠢ᠂ ᠴᠢᠳᠬᠥᠷ! ᠴᠢᠳᠬᠥᠷ᠁ ᠭᠡᠵᠦ ᠤᠤᠯᠭᠠ ᠠᠯᠲᠠᠨ ᠪᠠᠷᠬᠢᠷᠠᠪᠠ᠃
— ᠬᠦᠩ ᠨᠣᠶᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠣᠭᠲᠠᠭᠠ᠃ ᠪᠢ ᠦᠬᠦᠭᠡ ᠦᠭᠡᠢ ᠰᠢᠦ ᠳᠡ! ᠮᠠᠨᠴᠤᠷᠭᠠ ᠨᠠᠮᠠᠶ᠋ᠢ ᠠᠭᠤᠯᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠳᠡᠭᠦᠵᠢᠯᠡᠭᠰᠡᠨ᠁ ᠪᠢ ᠦᠬᠦᠭᠡ ᠦᠭᠡᠢ ᠠ᠋! ᠴᠠᠭᠠᠳᠤ ᠡᠳᠦᠷ ᠪᠢ ᠲᠠᠨ ᠳ᠋ᠤ᠌ ᠨᠡᠷᠡ ᠦᠭᠡᠢ ᠵᠠᠬᠢᠳᠠᠯ ᠶᠠᠪᠤᠭᠤᠯᠵᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠰᠤᠷᠠᠭ ᠵᠠᠩᠭᠢ ᠶ᠋ᠢ ᠳᠤᠰᠬᠠᠭᠰᠠᠨ ᠢ᠋ ᠰᠠᠨᠠᠵᠤ ᠪᠠᠢᠭᠠ ᠪᠢᠵᠡ? ᠭᠡᠵᠦ ᠣᠯᠠᠨ ᠲᠠᠪᠤᠨ ᠶᠠᠭᠤᠮᠠ ᠨᠤᠷᠰᠢᠵᠤ ᠶᠠᠷᠢᠨᠠ᠃
ᠬᠦᠩ ᠨᠣᠶᠠᠨ ᠤ᠋ ᠮᠠᠩᠨᠠᠢ ᠳ᠋ᠤ᠌ ᠰᠢᠷᠠ ᠪᠤᠷᠴᠠᠭ ᠤ᠋ᠨ ᠴᠢᠨᠡᠭᠡ ᠬᠥᠯᠥᠰᠥ ᠪᠠᠷᠵᠠᠢᠬᠤ ᠶ᠋ᠢ ᠬᠠᠷᠠᠭᠰᠠᠨ ᠰᠢᠪᠡᠭᠴᠢᠨ ᠰᠢᠷᠠ ᠳᠤᠷᠳᠤᠩ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠬᠥᠨᠳᠡᠢᠬᠡᠨ ᠰᠡᠪᠢᠵᠦ ᠠᠷᠴᠢᠨᠠ᠃
— ᠦᠭᠡᠢ᠂ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠴᠢᠳᠬᠥᠷ ᠬᠠᠷᠠᠭᠳᠠᠭᠠ ᠤᠤ? ᠲᠠ ᠬᠣᠶᠠᠷ ᠲᠤ ᠶᠡᠷᠦ ᠨᠢ ᠭᠤᠷᠪᠠᠨ ᠬᠥᠮᠦᠨ ᠳᠤᠮᠳᠠ ᠪᠠᠨ ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠳᠠᠮᠨᠠᠵᠤ ᠣᠷᠣᠵᠤ ᠢᠷᠡᠭᠰᠡᠨ ᠴᠢᠳᠬᠥᠷ ᠦᠵᠡᠭᠳᠡᠪᠡ ᠤᠤ? ᠭᠡᠵᠦ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠰᠢᠪᠡᠭᠴᠢᠨ ᠡᠴᠡ ᠪᠡᠨ ᠠᠰᠠᠭᠤᠪᠠ᠄
— ᠲᠡᠢᠮᠦ ᠠ᠋! ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠳᠠᠮᠨᠠᠵᠤ ᠣᠷᠣᠵᠤ ᠢᠷᠡᠭᠡᠳ ᠲᠡᠨᠳᠡ ᠭᠤᠷᠪᠠᠭᠤᠯᠠ ᠪᠠᠨ ᠰᠥᠭᠥᠳᠦᠭᠡ ᠪᠡᠷ ᠢ᠋ᠶ᠋ᠡᠨ᠃
— ᠥᠯᠵᠡᠢᠰᠠᠩ ᠮᠥᠨ ᠪᠢᠵᠡ?
— ᠮᠥᠨ᠂ ᠶᠠᠭ ᠮᠥᠨ! ᠭᠡᠰᠡᠨ ᠢ᠋ ᠰᠣᠨᠣᠰᠤᠭᠰᠠᠨ ᠥᠯᠵᠡᠢᠰᠠᠩ ᠳᠠᠪ ᠬᠢᠨ ᠪᠣᠰᠴᠤ᠄
— ᠬᠦᠩ ᠨᠣᠶᠠᠨ ᠲᠠ ᠨᠠᠮᠠᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠲᠠ ᠡᠭᠦᠨ ᠢ᠋ ᠦᠵᠡ! ᠭᠡᠳ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠶ᠋ᠢ ᠬᠠᠵᠠᠵᠤ ᠴᠢᠰᠤ ᠭᠠᠷᠭᠠᠭᠠᠳ᠂《 ᠪᠢ ᠴᠢᠳᠬᠥᠷ ᠪᠢᠰᠢ ᠠ᠋! ᠠᠮᠢᠳᠤ ᠬᠥᠮᠦᠨ ᠪᠠᠢᠭᠠ》 ᠭᠡᠰᠡᠨ ᠢ᠋ᠶ᠋ᠡᠨ ᠮᠡᠳᠡᠭᠳᠡᠯᠡ᠃
ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠰᠦᠢᠯᠬᠢᠯᠡᠭᠰᠡᠨ ᠠᠮᠢᠰᠬᠤᠭᠠ ᠪᠠᠨ ᠳᠠᠷᠤᠵᠤ ᠲᠡᠭᠦᠨ ᠦ᠌ ᠡᠮᠦᠨᠡ ᠬᠤᠷᠤᠭᠤ ᠪᠠᠨ ᠬᠠᠵᠠᠵᠤ ᠴᠢᠰᠤ ᠲᠥᠰᠦᠷᠬᠡᠨ ᠵᠣᠭᠰᠣᠭᠰᠠᠨ ᠬᠥᠮᠦᠨ ᠪᠣᠯ ᠥᠯᠵᠡᠢᠰᠠᠩ ᠮᠥᠨ ᠭᠡᠰᠡᠨ ᠢ᠋ ᠪᠠᠲᠤᠲᠠᠢ ᠲᠠᠨᠢᠭᠠᠳ《 ᠶᠠᠭᠠᠬᠢᠭᠠᠳ ᠦᠬᠦᠴᠢᠬᠡᠭᠰᠡᠨ ᠬᠥᠮᠦᠨ ᠪᠣᠰᠴᠤ ᠢᠷᠡᠭᠡᠳ ᠮᠢᠨᠦ ᠡᠮᠦᠨᠡ ᠰᠥᠭᠥᠳᠴᠦ ᠪᠠᠢᠭᠠ ᠶᠤᠮ》 ᠭᠡᠰᠡᠨ ᠰᠡᠵᠢᠭ ᠨᠢ ᠠᠯᠳᠠᠷᠠᠪᠠ ᠪᠣᠯᠤᠯᠲᠠᠢ᠃ ᠡᠮᠦᠨᠡ ᠬᠡᠳᠦᠨ ᠡᠳᠦᠷ ᠨᠡᠷᠡ ᠦᠭᠡᠢ ᠵᠠᠬᠢᠳᠠᠯ ᠢᠷᠡᠭᠦᠯᠦᠭᠰᠡᠨ ᠨᠢ ᠥᠯᠵᠡᠢᠰᠠᠩ ᠪᠠᠢᠭᠰᠠᠨ ᠢ᠋ ᠰᠠᠨᠠᠵᠤ《ᠳᠠᠩᠴᠤ ᠨᠢᠭᠡ ᠲᠠᠨᠢᠯ ᠭᠠᠷ ᠤ᠋ᠨ ᠲᠢᠭ ᠪᠠᠢᠭᠰᠠᠨ ᠶᠤᠮ ᠳᠠ》 ᠭᠡᠵᠦ ᠪᠣᠳᠣᠨ ᠰᠠᠨᠠᠭᠠ ᠲᠠᠢᠪᠤᠰᠢᠷᠠᠪᠠ᠃
— ᠵᠠ᠂ ᠲᠡᠭᠡᠭᠡᠳ ᠶᠠᠭᠤ ᠪᠠᠢᠨᠠ? ᠭᠡᠬᠦ ᠰᠢᠭ ᠬᠦᠩ ᠨᠣᠶᠠᠨ ᠥᠯᠵᠡᠢᠰᠠᠩ ᠳ᠋ᠤ᠌ ᠨᠢᠭᠤᠷ ᠬᠠᠢᠷᠠᠯᠠᠵᠤ ᠨᠢᠳᠦ ᠪᠡᠨ ᠠᠨᠢᠨ ᠬᠤᠶᠠᠩ ᠢ᠋ᠶ᠋ᠠᠨ ᠳᠠᠷᠤᠭᠤᠯᠤᠨᠠ᠃ ᠥᠯᠵᠡᠢᠰᠠᠩ ᠬᠠᠨᠴᠤᠢ ᠪᠠᠨ ᠭᠦᠪᠢᠵᠦ ᠨᠥᠭᠦᠭᠡ ᠬᠣᠶᠠᠷ ᠲᠠᠭᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ《 ᠤᠯᠠᠭᠠᠨ ᠪᠣᠭᠣᠳᠠᠯ ᠢ᠋ ᠵᠠᠳᠠᠯ》 ᠭᠡᠰᠡᠨ ᠳᠣᠬᠢᠶᠠ ᠥᠭᠭᠦᠯᠡ᠃
ᠴᠠᠭᠠᠳᠤ ᠬᠣᠶᠠᠷ ᠨᠢ ᠥᠯᠵᠡᠢᠰᠠᠩ ᠤ᠋ᠨ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠵᠤ ᠥᠨᠥᠬᠢ ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠮᠠᠰᠢ ᠬᠢᠴᠢᠶᠡᠮᠵᠢᠲᠡᠢᠬᠡᠨ ᠠᠯᠳᠠᠷᠠᠭᠠᠵᠤ ᠳᠡᠯᠭᠡᠭᠰᠡᠨ ᠳ᠋ᠦ᠍ ᠬᠣᠶᠠᠷ ᠰᠢᠪᠡᠭᠴᠢᠨ ᠭᠡᠨᠡᠳᠲᠡ ᠭᠤᠶᠠ ᠪᠠᠨ ᠰᠢᠪᠦᠭᠡᠳᠡᠭᠦᠯᠦᠭᠰᠡᠨ ᠰᠢᠭ ᠴᠢᠰ ᠴᠢᠰ ᠪᠠᠷᠬᠢᠷᠠᠨ ᠠᠶᠤᠭᠠᠳ《ᠥᠴᠢᠷᠡᠢ! ᠬᠠᠯᠠᠭ ᠴᠢᠨᠢ!》 ᠭᠡᠵᠦ ᠨᠢᠳᠦ ᠪᠡᠨ ᠲᠠᠭᠯᠠᠨ ᠰᠢᠷᠠᠪᠳᠣᠷᠵᠢ ᠨᠣᠶᠠᠨ ᠤ᠋ ᠠᠷᠤ ᠪᠠᠷ ᠨᠢᠭᠤᠭᠳᠠᠵᠤ ᠰᠤᠭᠤ ᠳᠠᠯᠤ ᠠ᠋ᠴᠠ ᠨᠢ ᠪᠠᠵᠠᠭᠳᠠᠵᠤ ᠲᠡᠷᠯᠢᠭ ᠦ᠋ᠨ ᠬᠢᠨᠢ ᠬᠣᠷᠮᠣᠢ ᠠ᠋ᠴᠠ ᠵᠠᠭᠤᠷᠠᠪᠠ᠃
— ᠦᠭᠡᠢ ᠠ᠋᠂ ᠲᠠ ᠬᠣᠶᠠᠷ ᠴᠢᠨᠢ ᠡᠴᠢᠭᠡ ᠳ᠋ᠡᠭᠡᠨ ᠢᠩᠭᠢᠵᠦ ᠬᠠᠳᠠᠮ ᠡᠬᠡ ᠳ᠋ᠡᠭᠡᠨ ᠬᠠᠰᠠ ᠪᠠᠨ ᠴᠢᠮᠬᠢᠭᠦᠯᠦᠭᠰᠡᠨ ᠰᠢᠭ ᠬᠠᠪᠴᠢᠭᠠᠨᠠᠭᠠ ᠪᠣᠢ? ᠠ⁈ ᠭᠡᠵᠦ ᠰᠤᠭᠤ ᠰᠦᠪᠡᠷᠭᠡ ᠡᠴᠡ ᠪᠡᠨ ᠭᠡᠳᠡᠭᠡᠯᠡᠭᠦᠯᠦᠨ ᠪᠠᠵᠠᠭᠳᠠᠭᠤᠯᠤᠭᠰᠠᠨ ᠬᠦᠩ ᠨᠣᠶᠠᠨ ᠢᠨᠢᠶᠡᠬᠦ ᠴᠦ᠍ ᠪᠢᠰᠢ ᠠᠭᠤᠷᠯᠠᠬᠤ ᠴᠦ᠍ ᠪᠢᠰᠢ《 ᠠᠢ! ᠪᠠᠢᠵᠠ ᠭᠡᠮ! ᠢ᠂ ᠢ᠁》 ᠭᠡᠵᠦ ᠳᠡᠪᠬᠡᠴᠡᠨ ᠤᠬᠠᠭᠠ ᠲᠥᠬᠥᠭᠡ ᠶ᠋ᠢ ᠨᠢ ᠣᠯᠬᠤ ᠦᠭᠡᠢ ᠪᠡᠷ 《ᠬᠢ ᠶᠣᠬᠣᠭᠰᠨ! ᠡᠷᠯᠢᠭ ᠢ᠋ᠶ᠋ᠡᠨ ᠡᠷᠢᠭᠰᠡᠨ ᠬᠤᠯᠤᠭᠠᠨᠠ ᠮᠤᠤᠷ ᠤ᠋ᠨ ᠪᠤᠬᠤᠷ ᠲᠡᠮᠲᠡᠷᠢᠪᠡ ᠭᠡᠭᠴᠢ ᠡᠨᠡ ᠬᠣᠶᠠᠷ ᠭᠤᠢᠷᠠᠨᠴᠢ ᠶᠠᠭᠠᠬᠢᠯᠠ ᠭᠡᠵᠦ ᠬᠡᠢᠷᠬᠡᠨ ᠡᠵᠡᠨ ᠬᠦᠩ ᠢ᠋ᠶ᠋ᠡᠨ ᠭᠡᠳᠡᠭᠡᠯᠡᠵᠦ ᠣᠷᠣᠯᠳᠣᠭᠠ ᠪᠣᠢ》 ᠭᠡᠵᠦ ᠣᠷᠢᠯᠠᠵᠤ ᠴᠢᠷᠠᠯᠠᠭᠰᠠᠨ ᠬᠣᠶᠠᠷ ᠰᠢᠪᠡᠭᠴᠢᠨ ᠦ᠌ ᠲᠡᠭᠦᠨ ᠢ᠋ ᠪᠠᠵᠠᠭᠳᠠᠵᠤ ᠵᠠᠭᠤᠷᠠᠯᠳᠤᠭᠰᠠᠨ ᠳ᠋ᠤ᠌ ᠡᠭᠦᠷᠲᠦᠵᠦ ᠡᠮᠦᠨᠡᠬᠢ ᠤᠯᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠠᠩᠬᠠ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃
— ᠵᠠ᠂ ᠡᠷᠭᠢᠨ ᠬᠦᠨᠳᠦᠲᠦ ᠬᠦᠩ ᠨᠣᠶᠠᠨ ᠲᠠᠨ ᠳ᠋ᠤ᠌ ᠡᠷᠭᠦᠨ ᠪᠠᠷᠢᠵᠤ ᠪᠠᠢᠨᠠ ᠭᠡᠳ ᠥᠯᠵᠡᠢᠰᠠᠩ ᠭᠤᠷᠪᠠᠭᠤᠯᠠ ᠠᠯᠠᠭᠠ ᠪᠠᠨ ᠳᠡᠯᠭᠡᠨ《ᠬᠦᠩ ᠨᠣᠶᠠᠨᠲᠠᠨ ᠠ᠋! ᠲᠠᠨ ᠤ᠋ ᠡᠳᠦᠷ ᠰᠥᠨᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠣᠳᠣᠯ ᠵᠡᠭᠦᠳᠦᠨ ᠳ᠋ᠡᠭᠡᠨ ᠬᠦᠰᠡᠭᠰᠡᠭᠡᠷ ᠢᠷᠡᠭᠰᠡᠨ ᠶᠠᠭᠤᠮᠠ ᠶ᠋ᠢ ᠲᠠᠨᠢ ᠪᠢᠳᠡ ᠠᠯᠭᠠᠰᠠᠯ ᠦᠭᠡᠢ ᠠᠪᠴᠤ ᠢᠷᠡᠯᠡ! ᠠᠭᠤᠴᠢᠯᠠᠨ ᠲᠣᠭᠲᠠᠭᠠᠭᠠᠷᠠᠢ》 ᠭᠡᠰᠡᠨ ᠳ᠋ᠦ᠍ ᠬᠦᠩ ᠨᠣᠶᠠᠨ ᠲᠡᠭᠦᠨ ᠦ᠌ ᠥᠭᠡᠳᠡ ᠡᠴᠡ ᠢᠷᠵᠠᠢᠨ ᠢᠨᠢᠶᠡᠭᠰᠡᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠯᠠᠨᠲᠤᠭᠠᠷ ᠪᠦᠳᠦᠭᠦᠨ ᠲᠣᠯᠣᠭᠠᠢ ᠠ᠋ᠴᠠ ᠠᠶᠤᠨ ᠭᠡᠯᠮᠡᠵᠦ᠄
— ᠴᠢ᠁ ᠴᠢ᠁ ᠥᠯᠵᠡᠢᠰᠠᠩ ᠠ᠋᠁ ᠭᠡᠵᠦ ᠥᠨᠳᠥᠷ ᠬᠠᠰᠬᠢᠷᠤᠨ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠷᠢᠨ ᠭᠡᠯᠳᠦᠷᠢᠬᠢᠯᠡᠪᠡ᠃
— ᠡᠷᠭᠢᠨ ᠨᠣᠶᠠᠨᠲᠠᠨ᠂ ᠲᠠ᠁ ᠲᠠ᠁ ᠶᠠᠭᠠᠬᠢᠴᠢᠬᠠᠪᠠ⁈ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠡᠨ ᠣᠭᠲᠣᠯᠵᠤ ᠠᠪᠴᠢᠷᠠᠪᠠᠯ ᠬᠡᠨ ᠬᠥᠮᠦᠨ ᠳ᠋ᠦ᠍ ᠬᠦᠨᠳᠦ ᠱᠠᠩ ᠬᠦᠷᠲᠡᠭᠡᠨᠡ ᠭᠡᠰᠡᠨ ᠪᠢᠰᠢ ᠤᠤ? ᠣᠳᠣ᠁ ᠣᠳᠣ ᠡᠨᠡ ᠰᠦᠨᠡᠰᠦ ᠦᠭᠡᠢ ᠲᠣᠯᠣᠭᠠᠢ ᠠ᠋ᠴᠠ᠁ ᠶᠠᠭᠤᠨ ᠳ᠋ᠠᠭᠠᠨ ᠢᠩᠭᠢᠵᠦ᠁ ᠭᠡᠳ ᠥᠯᠵᠡᠢᠰᠠᠩ ᠲᠠᠢᠯᠪᠤᠷᠢᠯᠠᠵᠤ ᠬᠡᠯᠡᠬᠦ ᠶ᠋ᠢ ᠬᠦᠩ ᠨᠣᠶᠠᠨ ᠰᠣᠨᠣᠰᠤᠭᠠ ᠦᠭᠡᠢ᠃
— ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠨᠠᠮᠠᠶ᠋ᠢ ᠭᠢᠨᠵᠢᠯᠡᠬᠦ ᠪᠡᠷ ᠢᠷᠡᠯᠡ᠁ ᠭᠡᠵᠦ ᠪᠠᠷᠬᠢᠷᠠᠭᠠᠳ ᠡᠮᠦᠨᠡ ᠰᠤᠮᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠰᠤᠲᠠᠢ ᠤᠯᠠᠭᠠᠨ ᠪᠣᠭᠣᠳᠠᠯ ᠳᠡᠭᠡᠷᠡᠬᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠵᠦ ᠪᠦᠬᠦ ᠪᠡᠶᠡ ᠨᠢ ᠳᠠᠭᠵᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠣᠪᠣᠰ ᠣᠪᠣᠰ ᠬᠥᠳᠡᠯᠵᠦ ᠰᠤᠮᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠡᠢ ᠳᠡᠭᠳᠡᠨ ᠪᠥᠮᠪᠥᠭᠡ ᠰᠢᠭ ᠲᠡᠭ ᠲᠡᠭ ᠦᠰᠦᠷᠦᠨᠡ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠥᠮᠥᠰᠬᠡ ᠨᠢ ᠠᠲᠤᠪᠠᠯᠵᠠᠵᠤ᠂ ᠰᠢᠨᠠ ᠨᠢ ᠵᠠᠭᠤᠷᠠᠨ ᠰᠢᠵᠢᠭᠢᠨᠡᠵᠦ ᠨᠢᠳᠦ ᠨᠢ ᠪᠦᠯᠲᠡᠢᠨ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠨᠡ᠃ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠬᠦ ᠳᠠᠭᠤ ᠨᠢ ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠪᠢᠲᠡᠭᠦᠦ ᠬᠠᠳᠠᠨ ᠬᠣᠩᠭᠢᠯ ᠢ᠋ ᠴᠤᠤᠷᠢᠶᠠᠳᠠᠲᠠᠯᠠ ᠬᠠᠩᠭᠢᠨᠠᠵᠤ ᠪᠠᠢᠭᠠ ᠰᠢᠭ᠋ ᠭᠣᠣᠯ ᠴᠠᠭᠠᠨ ᠤᠷᠲᠤ ᠭᠡᠷ ᠦ᠋ᠨ ᠬᠢᠨᠢ ᠬᠠᠨᠠᠨ ᠤ᠋ ᠪᠦᠷᠢᠶᠡᠰᠦ ᠶ᠋ᠢ ᠳᠡᠷᠪᠡᠯᠵᠡᠭᠦᠯᠬᠦ ᠰᠢᠭ ᠪᠣᠯᠤᠯᠠ᠁
《ᠠᠪᠠᠭᠠ ᠴᠢᠨᠢ ᠡᠷᠯᠢᠭ ᠲᠦ᠍ ᠣᠴᠢᠭᠠᠳ ᠢᠷᠡᠯᠡ᠃ ᠲᠡᠭᠡᠭᠡᠳ ᠡᠷᠯᠢᠭ ᠦ᠋ᠨ ᠡᠯᠴᠢ ᠵᠠᠪᠰᠢᠭᠴᠢ ᠰᠢᠷᠠᠪᠳᠣᠷᠵᠢ ᠶ᠋ᠢ ᠲᠡᠮᠦᠷ ᠭᠢᠨᠵᠢ ᠪᠡᠷ ᠭᠢᠨᠵᠢᠯᠡᠵᠦ ᠠᠪᠤᠭᠠᠳ ᠢᠷᠡ ᠭᠡᠵᠦ ᠨᠠᠳᠠ ᠲᠤᠰᠢᠶᠠᠪᠠ᠃ ᠬᠥᠮᠦᠨ ᠭᠡᠳᠡᠭ ᠠᠮᠢᠲᠠᠨ ᠦᠬᠦᠯ ᠦ᠋ᠨ ᠳᠠᠩᠰᠠᠨ ᠳ᠋ᠤ᠌ ᠣᠷᠣᠵᠤ ᠡᠷᠯᠢᠭ ᠲᠦ᠍ ᠨᠡᠷᠡ ᠪᠡᠨ ᠮᠡᠳᠡᠭᠦᠯᠦᠭᠰᠡᠨ ᠦᠭᠡᠢ ᠦᠶᠡ ᠳ᠋ᠦ᠍ ᠪᠡᠶᠡ ᠪᠡᠨ ᠮᠡᠳᠡᠳᠡᠭ ᠦᠭᠡᠢ ᠲᠡᠩᠰᠡᠬᠡᠷᠢ ᠦᠭᠡᠢ ᠶᠠᠭᠤᠮᠠ ᠪᠠᠢᠳᠠᠭ ᠶᠤᠮ ᠪᠠᠢᠨᠠ᠃ ᠬᠥᠮᠦᠨ— ᠲᠣᠭᠣᠰᠣᠲᠤ ᠣᠷᠴᠢᠯᠠᠩ ᠳ᠋ᠤ᠌ ᠠᠴᠠ ᠬᠥᠯ ᠲᠡᠢ᠂ ᠠᠷᠵᠠᠭᠠᠷ ᠲᠣᠯᠣᠭᠠᠢ ᠲᠠᠢ ᠠᠮᠢᠳᠤᠷᠠᠬᠤ ᠳ᠋ᠠᠭᠠᠨ ᠪᠢ ᠳᠡᠯᠡᠬᠡᠢ ᠴᠢ ᠮᠡᠯᠡᠬᠡᠢ ᠭᠡᠵᠦ ᠯᠡ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠳᠡᠭᠡᠷᠡᠯᠬᠡᠵᠦ ᠪᠠᠶᠠᠨ ᠴᠠᠳᠬᠤᠯᠠᠩ ᠨᠢ ᠶᠠᠳᠠᠭᠤ ᠥᠯᠥᠰᠬᠦᠯᠡᠩ ᠢ᠋ᠶ᠋ᠡᠨ ᠪᠣᠭᠣᠯᠴᠢᠯᠠᠵᠤ᠂ ᠡᠷᠬᠡ ᠰᠦᠷ ᠲᠡᠢ ᠨᠢ ᠡᠭᠡᠯ ᠳᠣᠷᠣᠢ ᠪᠠᠨ ᠳᠠᠷᠤᠯᠠᠵᠤ᠂ ᠬᠤᠳᠠᠯᠴᠢ ᠲᠠᠩᠬᠠᠢ ᠨᠢ ᠭᠣᠣᠯᠴᠢ ᠨᠣᠮᠣᠬᠠᠨ ᠢ᠋ᠶ᠋ᠠᠨ ᠮᠡᠬᠡᠯᠡᠵᠦ᠂ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠨᠢ ᠬᠡᠪ ᠵᠢᠷᠤᠮᠲᠤ ᠪᠠᠨ ᠲᠣᠨᠣᠳᠠᠭ᠁ ᠪᠥᠮᠪᠥᠷᠢᠭᠡᠨ ᠵᠠᠭᠪᠤᠷᠲᠤ ᠬᠣᠷᠸᠠ ᠶ᠋ᠢᠨ ᠡᠨᠡ ᠬᠦ᠌ ᠰᠣᠨᠢᠭᠤᠴᠢᠬᠠᠨ ᠲᠣᠭᠣᠷᠢᠭ ᠲᠤ ᠵᠠᠶᠠᠭᠠ ᠪᠠᠨ ᠳᠠᠭᠠᠳᠬᠠᠨ ᠡᠷᠭᠢᠯᠳᠦᠵᠦ ᠬᠣᠨᠵᠢᠭᠰᠠᠨ ᠨᠢᠭᠡ ᠨᠢ ᠤᠯᠠᠮ ᠳᠠᠪᠰᠢᠭᠤᠷᠠᠵᠤ ᠨᠢᠳᠦ ᠨᠢ ᠥᠭᠡᠬᠦᠯᠡᠨ ᠲᠠᠷᠢᠬᠢ ᠨᠢ ᠭᠠᠰᠢᠯᠵᠤ᠂ ᠠᠯᠳᠠᠵᠤ ᠠᠰᠬᠠᠭᠰᠠᠨ ᠨᠥᠭᠦᠭᠡ ᠨᠢ ᠲᠡᠭᠡᠭᠡᠳ ᠬᠤᠪᠢ ᠵᠠᠶᠠᠭᠠ ᠮᠠᠭᠤ ᠳ᠋ᠠᠭᠠᠨ ᠭᠡᠵᠦ ᠪᠣᠳᠣᠯ ᠮᠤᠩᠬᠠᠷᠠᠨ ᠵᠢᠷᠦᠬᠡ ᠨᠢ ᠦᠬᠦᠵᠦ ᠪᠠᠢᠳᠠᠭ ᠠᠵᠤᠭᠤ᠃ ᠢᠩᠭᠢᠭᠡᠳ ᠬᠦᠴᠦᠷᠬᠡᠭ ᠠᠢᠮᠠᠭ᠂ ᠳᠣᠷᠣᠢ ᠪᠦᠯᠦᠭ ᠭᠡᠳᠡᠭ ᠬᠣᠶᠠᠷ ᠠᠩᠭᠢ ᠪᠣᠯᠤᠨ ᠵᠠᠳᠠᠷᠠᠵᠤ᠂ ᠬᠦᠴᠦᠷᠬᠡᠭ ᠨᠢ ᠬᠦᠴᠦᠷᠬᠡᠭ ᠲᠡᠢ ᠪᠡᠨ ᠠᠲᠠᠭᠠᠷᠬᠠᠨ ᠵᠠᠨᠴᠢᠯᠳᠤᠵᠤ ᠴᠢᠰᠤ ᠨᠥᠵᠢ ᠪᠡᠷ ᠢ᠋ᠶ᠋ᠡᠨ ᠰᠦᠨᠡᠰᠦ ᠪᠡᠨ ᠤᠮᠳᠠᠯᠠᠵᠤ᠂ ᠡᠷᠯᠢᠭ ᠲᠦ᠍ ᠣᠴᠢᠵᠤ ᠨᠢᠭᠡ ᠪᠡᠨ ᠦᠵᠡᠵᠦ ᠢᠯᠭᠠᠳᠠᠭ ᠠᠵᠤᠭᠤ᠃ ᠳᠣᠷᠣᠢ ᠨᠢ ᠳᠣᠷᠣᠢ ᠲᠠᠢ ᠪᠠᠨ ᠨᠣᠣᠷᠠᠭᠠᠳ ᠨᠣᠣᠰᠣᠨ ᠪᠥᠮᠪᠥᠭᠡ ᠰᠢᠭ ᠡᠷᠢᠶᠡᠨ ᠬᠣᠷᠸᠠ ᠡᠷᠯᠢᠭ ᠲᠠᠮᠤ ᠶ᠋ᠢᠨ ᠠᠯᠢᠨ ᠳ᠋ᠤ᠌ ᠴᠦ᠍ ᠬᠠᠮᠢᠶᠠ ᠦᠭᠡᠢ ᠮᠡᠲᠦ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠪᠤᠶᠠᠨ ᠲᠩᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠨ ᠪᠥᠮᠪᠥᠷᠢᠵᠦ ᠯᠡ ᠪᠠᠢᠳᠠᠭ ᠠ᠋᠁ ᠵᠠ᠂ ᠲᠡᠭᠡᠭᠡᠳ ᠡᠷᠯᠢᠭ ᠲᠦ᠍ ᠣᠴᠢᠭᠰᠠᠭᠠᠷ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠠᠢᠭᠰᠠᠨ ᠪᠦᠬᠦᠨ ᠲᠣᠩᠭᠣᠷᠴᠤ ᠨᠣᠶᠠᠨ ᠪᠠᠢᠭᠰᠠᠨ ᠨᠢ ᠪᠣᠭᠣᠯ᠂ ᠪᠣᠭᠣᠯ ᠶᠠᠪᠤᠭᠰᠠᠨ ᠨᠢ ᠨᠣᠶᠠᠨ ᠪᠣᠯᠳᠠᠭ ᠢ᠋ ᠬᠦᠩ ᠨᠣᠶᠠᠨ ᠴᠢ ᠯᠠᠪ ᠮᠡᠳᠡᠬᠦ ᠦᠭᠡᠢ ᠪᠠᠢᠬᠠ ᠠ᠋᠁》 ᠭᠡᠳ ᠬᠣᠭᠣᠯᠵᠠᠭᠤᠷ ᠳᠣᠲᠣᠷᠠ ᠪᠠᠨ ᠭᠦᠳ ᠭᠦᠳ ᠭᠡᠵᠦ ᠬᠦᠬᠦᠲᠦᠨᠡᠨ ᠢᠨᠢᠶᠡᠬᠦ ᠶᠦᠮ ᠰᠢᠭ! ᠭᠡᠨᠡᠳᠲᠡ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠯᠪᠡᠭ ᠠᠭᠤᠵᠢᠭᠤ ᠡᠷᠢᠩᠭᠡ ᠨᠥᠮᠥᠷᠴᠦ ᠬᠦᠵᠦᠭᠦᠨ ᠳ᠋ᠡᠭᠡᠨ ᠬᠡᠦᠬᠡᠳ ᠦ᠋ᠨ ᠭᠠᠪᠠᠯᠠ ᠶ᠋ᠢᠨ ᠴᠢᠮᠡᠭᠲᠦ ᠡᠷᠢᠭᠡ ᠵᠡᠭᠦᠵᠦ ᠭᠠᠷ ᠲᠠᠭᠠᠨ ᠮᠢᠩᠭᠠᠨ ᠵᠢᠩ ᠦ᠋ᠨ ᠲᠡᠮᠦᠷ ᠭᠢᠨᠵᠢ ᠤᠨᠵᠢᠭᠤᠯᠤᠨ ᠠᠳᠬᠤᠵᠤ《ᠰᠢᠷᠠᠪᠳᠣᠷᠵᠢ ᠠ᠋᠂ ᠵᠠ ᠣᠳᠣ ᠶᠠᠪᠤᠵᠠᠭᠠᠶᠠ ᠳᠠ! ᠱᠠᠯᠠᠪᠳᠠᠬᠤ ᠦᠭᠡᠢ ᠪᠣᠯ ᠡᠷᠯᠢᠭ ᠬᠠᠭᠠᠨ ᠠᠭᠤᠷᠯᠠᠨᠠ ᠰᠢᠦ!》 ᠭᠡᠳ ᠲᠡᠭᠦᠨ ᠦ᠌ ᠪᠡᠶᠡ ᠵᠦᠭ ᠳᠥᠭᠥᠵᠦ ᠣᠢᠷᠠᠳᠬᠤ ᠰᠢᠭ᠋ ᠪᠣᠯᠪᠠ᠃
ᠰᠢᠷᠠᠪᠳᠣᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠦᠨᠡᠬᠡᠷ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠡᠮᠦᠷ ᠭᠢᠨᠵᠢ ᠬᠠᠷᠴᠢᠭᠢᠨᠠᠭᠤᠯᠤᠨ ᠲᠡᠭᠦᠨ ᠢ᠋ ᠭᠢᠨᠵᠢᠯᠡᠬᠦ ᠪᠡᠷ ᠶᠠᠪᠤᠭᠠ ᠰᠢᠭ᠋ ᠦᠵᠡᠭᠳᠡᠬᠦ ᠳ᠋ᠦ᠍ ᠠᠶᠤᠬᠤ ᠳ᠋ᠠᠭᠠᠨ ᠠᠷᠤᠨᠰᠢ ᠪᠠᠨ ᠴᠤᠬᠤᠷᠢᠭᠰᠠᠭᠠᠷ ᠪᠠᠢᠵᠤ ᠭᠦᠩᠭᠠᠷᠠᠪᠠ ᠪᠠᠨ ᠮᠥᠷᠭᠥᠵᠦ ᠤᠨᠠᠭᠠᠨ ᠪᠤᠷᠬᠠᠨ ᠤ᠋ ᠰᠠᠭᠤᠳᠠᠯ ᠲᠦᠰᠢᠯᠭᠡ᠂ ᠵᠤᠯᠠ ᠲᠠᠬᠢᠯ᠂ ᠬᠦᠵᠢ ᠭᠥᠯᠢᠰ ᠨᠢ ᠬᠥᠰᠡᠷ ᠳᠦᠭᠦᠷᠡᠩ ᠣᠢᠴᠢᠬᠤ ᠳ᠋ᠤ᠌ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠴᠦ᠍ ᠲᠩᠷᠢ ᠬᠠᠨᠳᠤᠨ ᠲᠠᠩᠭᠠᠢᠵᠤ《ᠠᠮᠢ ᠠᠪᠤᠷᠠ ᠠ᠋! ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠨᠠᠮᠠᠶ᠋ᠢ ᠭᠢᠨᠵᠢᠯᠡᠬᠦ ᠭᠡᠵᠦ ᠪᠠᠢᠨᠠ᠁》 ᠭᠡᠵᠦ ᠡᠷᠢᠶᠡᠨ ᠮᠡᠷᠢᠶᠡᠨ ᠢ᠋ᠶ᠋ᠡᠷ ᠪᠠᠷᠬᠢᠷᠠᠪᠠ᠃
《ᠵᠠ᠂ ᠪᠣᠰ! ᠱᠠᠯᠠᠪᠬᠠᠨ ᠶᠠᠪᠤᠵᠠᠭᠠᠶᠠ!》 ᠭᠡᠬᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠦᠩᠭᠢᠨᠡᠭᠰᠡᠨ ᠪᠦᠳᠦᠭᠦᠨ ᠳᠠᠭᠤ ᠳᠤᠭᠤᠯᠳᠠᠬᠤ ᠲᠡᠷᠡ ᠵᠦᠭ ᠬᠠᠷᠠᠪᠠᠯ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠳᠣᠭᠰᠢᠨ ᠳᠦᠷᠢ ᠨᠢ ᠮᠠᠾᠺᠠᠯᠠ ᠪᠤᠷᠬᠠᠨ ᠤ᠋ ᠳᠦᠷᠢ ᠪᠣᠯᠤᠨ ᠬᠤᠪᠢᠷᠠᠵᠤ ᠬᠠᠷᠠ ᠬᠥᠬᠡᠮᠳᠦᠭ ᠬᠦᠳᠡᠷ ᠲᠣᠮᠣ ᠪᠡᠶᠡ ᠳ᠋ᠡᠭᠡᠨ ᠬᠦᠷᠡᠩ ᠡᠷᠢᠩᠭᠡ ᠪᠠ ᠲᠠᠩᠱᠠᠮ ᠡᠮᠦᠰᠴᠦ ᠬᠦᠵᠦᠭᠦᠨ ᠳ᠋ᠡᠭᠡᠨ ᠬᠥᠮᠦᠨ ᠦ᠌ ᠶᠠᠰᠤᠨ ᠭᠠᠪᠠᠯᠠ᠂ ᠡᠷᠢᠭᠡ᠂ ᠳᠠᠮᠠᠷᠤ ᠵᠡᠭᠦᠵᠦ ᠵᠢᠷᠭᠤᠭᠠᠨ ᠮᠣᠳᠣᠷ ᠲᠠᠭᠠᠨ ᠰᠠᠷᠠᠨ ᠰᠦᠬᠡ᠂ ᠬᠠᠷᠮᠠᠭᠠ᠂ ᠴᠠᠯᠮᠠ᠂ ᠴᠢᠰᠤᠨ ᠭᠠᠪᠠᠯᠠ ᠵᠡᠷᠭᠡ ᠶ᠋ᠢ ᠲᠤᠰ ᠲᠤᠰ ᠪᠠᠷᠢᠭᠰᠠᠨ ᠲᠣᠳᠣᠷᠠᠨᠠ᠃ ᠲᠡᠷᠡ ᠨᠢᠭᠡᠮᠦᠰᠦᠨ ᠪᠠᠯᠠᠭ ᠠᠯᠳᠠᠵᠤ ᠭᠡᠷ ᠳᠣᠲᠣᠷᠠᠬᠢ ᠠᠪᠳᠠᠷᠠ ᠬᠣᠷᠭᠣ ᠶ᠋ᠢᠨ ᠪᠤᠯᠤᠩ ᠲᠣᠬᠣᠢ ᠶ᠋ᠢ ᠡᠷᠢᠵᠦ ᠪᠡᠶᠡ ᠳᠠᠯᠳᠠᠯᠠᠬᠤ ᠪᠠᠷ ᠤᠷᠤᠯᠳᠤᠨ《ᠳ᠋ᠠᠭᠳᠠᠨ ᠳᠠ ᠯᠠᠮᠠ᠁ ᠳ᠋ᠠᠭᠳᠠᠨ᠁ ᠨᠠᠮᠠᠶ᠋ᠢ ᠭᠢᠨᠵᠢᠯᠡᠬᠦ ᠪᠡᠷ᠁》 ᠭᠡᠵᠦ ᠰᠣᠯᠢᠶᠠ ᠪᠠᠯᠠᠢ ᠶᠠᠷᠢᠨ ᠳᠡᠭᠡᠷᠡ ᠳᠣᠣᠷᠠᠬᠢ ᠬᠥᠮᠦᠰ ᠢ᠋ ᠦᠢᠮᠡᠭᠦᠯᠦᠨ ᠬᠠᠷᠠ ᠱᠤᠤᠭᠢᠶᠠᠨ ᠪᠣᠯᠪᠠ᠃
ᠨᠣᠶᠠᠨ ᠰᠠᠩ ᠤ᠋ᠨ ᠬᠢᠨ ᠯᠠᠮᠠ ᠬᠤᠸᠠᠷᠠᠭ ᠵᠠᠯᠠᠵᠤ ᠨᠣᠮ ᠭᠦᠷᠢᠮ ᠤᠩᠰᠢᠭᠤᠯᠤᠨ ᠬᠦᠩ ᠨᠣᠶᠠᠨ ᠢ᠋ ᠲᠦᠷ ᠠᠮᠤᠷᠵᠢᠭᠤᠯᠪᠠ᠃
ᠬᠣᠰᠢᠭᠤ ᠶᠠᠮᠤᠨ ᠤ᠋ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠠᠪᠴᠢᠷᠠᠨ ᠬᠦᠩ ᠨᠣᠶᠠᠨ ᠢ᠋ ᠠᠶᠤᠯᠭᠠᠨ ᠴᠣᠴᠢᠭᠠᠭᠰᠠᠨ ᠥᠯᠵᠡᠢᠰᠩ ᠵᠡᠷᠭᠡ ᠭᠤᠷᠪᠠᠨ ᠶᠠᠯᠠᠲᠠᠨ ᠢ᠋ ᠰᠢᠭᠦᠪᠡ᠃
ᠬᠦᠯᠢᠶᠡᠰᠦᠲᠡᠢ ᠭᠤᠷᠪᠠᠨ ᠶᠠᠯᠠᠲᠠᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠬᠥᠬᠡ ᠲᠣᠭᠣᠰᠬᠠᠨ ᠱᠠᠯᠠᠨ ᠳᠡᠭᠡᠷᠡ ᠲᠣᠨᠲᠣᠭᠣᠷ ᠨᠢ ᠳᠥᠨᠳᠥᠢᠵᠦ᠂ ᠲᠣᠯᠣᠭᠠᠢ ᠨᠢ ᠱᠠᠯᠠ ᠨᠠᠭᠠᠯᠳᠤᠨ ᠲᠣᠩᠭᠣᠢᠵᠤ ᠰᠥᠭᠥᠳᠦᠭᠰᠡᠨ ᠪᠠᠢᠯᠠ᠃
— ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠡᠨ ᠣᠭᠲᠣᠯᠪᠠ ?
— ᠡᠨᠡ ᠬᠣᠶᠠᠷ! ᠭᠡᠵᠦ ᠬᠠᠵᠠᠭᠤ ᠶ᠋ᠢᠨ ᠬᠣᠶᠠᠷ ᠵᠠᠨᠠᠭ ᠢ᠋ ᠵᠢᠭᠠᠵᠤ ᠥᠯᠵᠡᠢᠰᠠᠩ ᠥᠨᠳᠡᠰᠬᠢᠨ ᠤᠷᠢᠲᠠᠵᠤ ᠳᠤᠤᠭᠠᠷᠪᠠ᠃
— ᠥᠯᠵᠡᠢᠰᠩ ᠤᠭᠲᠤᠯ ᠭᠡᠰᠡᠨ! ᠭᠡᠵᠦ ᠥᠨᠥᠬᠢ ᠬᠣᠶᠠᠷ ᠪᠠᠷᠤᠭ ᠵᠡᠷᠭᠡ ᠳᠤᠤᠭᠠᠷᠤᠨᠠ᠃
— ᠥᠯᠵᠡᠢᠰᠠᠩ ᠲᠠ ᠬᠣᠶᠠᠷ ᠢ᠋ ᠦᠬᠦ! ᠭᠡᠬᠦ ᠳ᠋ᠦ᠍ ᠦᠬᠦᠵᠦ ᠥᠭᠭᠦᠨᠡ ᠤᠤ?
— ᠦᠭᠡᠢ᠂ ᠦᠭᠡᠢ ᠠ᠋! ᠲᠡᠷᠡ ᠪᠢᠳᠡᠨᠦᠰ ᠲᠦ᠍ ᠮᠥᠩᠭᠥ ᠥᠭᠭᠦᠭᠰᠡᠨ! ᠪᠢᠳᠡ ᠶᠠᠮᠠᠷ ᠴᠦ᠍ ᠵᠣᠷᠢᠯᠭᠠ ᠦᠭᠡᠢ᠂ ᠵᠢᠭᠠᠯ ᠵᠢᠭᠤᠯ ᠮᠥᠩᠭᠥ ᠣᠯᠵᠤ ᠪᠦᠰᠡᠭᠦᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠵᠢᠭᠡᠶᠡ ᠭᠡᠰᠡᠨ ᠡᠴᠡ ᠪᠢᠰᠢ ᠥᠭᠡᠷᠡ ᠦᠰᠦᠨ ᠦ᠌ ᠲᠡᠳᠦᠢ ᠴᠦ᠍ ᠮᠠᠭᠤ ᠮᠠᠭᠤᠬᠠᠢ ᠤᠬᠠᠭᠠᠨ ᠪᠠᠢᠬᠤ ᠦᠭᠡᠢ ᠠ᠋!
— ᠶᠠᠭ ᠦᠨᠡᠨ ᠤᠤ?
— ᠶᠠᠭ ᠦᠨᠡᠨ! ᠬᠤᠳᠠᠯ ᠬᠡᠯᠡᠪᠡᠯ ᠠᠶᠤᠩᠭᠠ ᠨᠢᠷᠭᠡᠭ!
— ᠥᠯᠵᠡᠢᠰᠠᠩ ᠲᠠ ᠬᠣᠶᠠᠷ ᠲᠤ ᠬᠡᠳᠦᠢ ᠮᠥᠩᠭᠥ ᠥᠭᠭᠦᠭᠰᠡᠨ ᠪᠣᠢ?
— ᠲᠠᠪᠢ᠂ ᠲᠠᠪᠢᠨ ᠯᠠᠩ ᠮᠥᠩᠭᠥ!
— ᠵᠠ᠂ ᠲᠡᠭᠡᠪᠡᠯ ᠪᠣᠯᠵᠢ ᠠ᠋! ᠡᠨᠡ ᠬᠣᠶᠠᠷ ᠢ᠋ ᠠᠪᠠᠴᠢᠵᠤ ᠲᠠᠪᠢ᠂ ᠲᠠᠪᠢᠨ ᠪᠠᠨᠰᠠ ᠪᠠᠨᠰᠠᠳᠠᠭᠠᠳ ᠬᠥᠭᠡᠭᠡᠵᠦ ᠶᠠᠪᠤᠭᠤᠯ! ᠭᠡᠬᠦ ᠳ᠋ᠦ᠍ ᠡᠷᠡᠭᠦᠴᠡᠨ ᠭᠡᠮᠡᠷ ᠡᠲᠡᠭᠡᠳ ᠬᠣᠶᠠᠷ ᠬᠠᠷᠠ ᠬᠤᠪᠴᠠᠰᠤᠲᠠᠨ ᠣᠷᠣᠵᠤ ᠢᠷᠡᠭᠡᠳ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠠᠪᠴᠤ ᠭᠠᠷᠪᠠ᠃
ᠭᠠᠳᠠᠨᠠ ᠠ᠋ᠴᠠ ᠫᠠᠰ ᠫᠠᠰ ᠭᠡᠬᠦ ᠪᠠᠨᠰᠠᠳᠠᠬᠤ ᠳᠠᠭᠤ ᠪᠠ ᠠᠯᠠᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠭᠠᠬᠠᠢ ᠰᠢᠭ᠋ ᠣᠷᠢᠯᠠᠵᠤ ᠴᠢᠷᠠᠯᠠᠬᠤ ᠳᠠᠭᠤᠨ ᠬᠠᠶᠠ ᠬᠠᠶᠠ ᠲᠠᠰᠤᠯᠳᠠᠵᠤ ᠰᠣᠨᠣᠰᠳᠠᠨᠠ᠁ ᠥᠯᠵᠡᠢᠰᠠᠩ ᠥᠨᠥ ᠬᠣᠶᠠᠷ ᠤ᠋ᠨ ᠠᠷᠠᠰᠤ ᠮᠢᠬᠠᠨ ᠤ᠋ ᠡᠷᠡᠭᠦᠳᠡᠯᠭᠡ ᠶ᠋ᠢᠨ ᠲᠠᠮᠤᠯᠠᠯ ᠳ᠋ᠤ᠌ ᠭᠠᠰᠠᠯᠤᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠥᠬᠡ ᠮᠢᠬᠠ ᠨᠢ ᠴᠡᠴᠡᠷᠡᠵᠦ᠂ ᠬᠦᠢᠲᠡᠨ ᠬᠥᠯᠥᠰᠥ ᠴᠢᠬᠠᠷᠠᠵᠤ ᠪᠠᠢᠯᠠ᠃
— ᠨᠡᠷᠡ ᠴᠢᠨᠢ ᠬᠡᠨ ᠪᠢᠯᠡ?
— ᠥᠯᠵᠡᠢᠰᠠᠩ!
— ᠠᠯᠢ ᠬᠤᠰᠢᠭᠤᠨ ᠤ᠋ ᠠᠷᠠᠳ ᠪᠣᠢ?
— ᠤᠤᠯ ᠨᠢ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠰᠢᠳᠠᠷ ᠭᠣᠴᠢᠭᠠ ᠠᠯᠪᠠ ᠬᠠᠭᠠᠵᠤ ᠶᠠᠪᠤᠭᠰᠠᠨ᠃
— ᠭᠣᠴᠢᠭᠠ ᠥᠯᠵᠡᠢᠰᠠᠩ ᠦᠬᠦᠴᠢᠬᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ? ᠭᠡᠵᠦ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠵᠣᠷᠢᠭᠤᠳᠠ ᠠᠰᠠᠭᠤᠨᠠ᠃
— ᠦᠭᠡᠢ ᠠ᠋᠂ ᠦᠬᠦᠭᠰᠡᠨ ᠦᠭᠡᠢ ᠠᠮᠢᠳᠤ ᠪᠠᠢᠨᠠ᠃ ᠪᠢ ᠮᠥᠨ! ᠭᠡᠯᠡ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠯᠠ ᠭᠡᠵᠦ ᠦᠬᠦᠴᠢᠬᠡᠯᠡ ᠭᠡᠵᠦ ᠬᠣᠰᠢᠭᠤ ᠳᠠᠶᠠᠭᠠᠷ ᠢ᠋ ᠬᠤᠳᠠᠯ ᠬᠡᠯᠡᠵᠦ᠂ ᠬᠣᠢᠨᠠ ᠠ᠋ᠴᠠ ᠨᠢ ᠡᠢᠮᠦ ᠪᠤᠯᠠᠢᠲᠠᠢ ᠠᠵᠢᠯ ᠬᠢᠳᠡᠭ ᠪᠣᠢ ᠴᠢ?
— ᠪᠦᠷ ᠮᠠᠨᠴᠤᠷᠭᠠ ᠶ᠋ᠢᠨ ᠭᠠᠢ!
— ᠮᠠᠨᠴᠤᠷᠭᠠ⁈
— ᠤᠤᠬᠠᠢ᠂ ᠮᠠᠨᠴᠤᠷᠭᠠ ᠯᠠ ᠨᠠᠮᠠᠶ᠋ᠢ ᠢᠩᠭᠢᠵᠦ ᠦᠭᠡᠢ ᠬᠢᠵᠦ ᠬᠠᠶᠠᠭᠰᠠᠨ!
— ᠴᠢ ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠮᠠᠨᠴᠤᠷᠭᠠ ᠶ᠋ᠢᠨ ᠭᠠᠷ ᠲᠤ ᠦᠬᠦᠭᠰᠡᠨ ᠦᠭᠡᠢ ᠪᠣᠢ?
— ᠮᠠᠨᠴᠤᠷᠭᠠ ᠨᠠᠮᠠᠶ᠋ᠢ ᠠᠯᠪᠠᠳᠠᠵᠤ ᠪᠠᠢᠭᠠᠳ ᠴᠢᠰᠤᠨ ᠭᠡᠷᠢᠶᠡᠰ ᠥᠴᠢᠭᠯᠡᠭᠦᠯᠦᠨ ᠪᠢᠴᠢᠭᠦᠯᠵᠦ ᠦᠯᠡᠳᠡᠭᠡᠭᠡᠳ ᠤᠯᠠᠭᠠᠨ ᠬᠠᠳᠠᠨ ᠳ᠋ᠤ᠌ ᠣᠷᠣᠵᠤ ᠪᠡᠶᠡ ᠪᠡᠨ ᠬᠣᠣᠷᠯᠠᠯᠠ ᠭᠡᠰᠡᠨ ᠬᠠᠭᠤᠷᠮᠠᠭ ᠦᠯᠢᠭᠡᠷ ᠵᠣᠬᠢᠶᠠᠭᠰᠠᠨ᠃ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠥᠯᠥᠩᠲᠦ ᠶ᠋ᠢᠨ ᠡᠬᠢ ᠳ᠋ᠦ᠍ ᠨᠠᠮᠠᠶ᠋ᠢ ᠮᠣᠳᠣᠨ ᠳ᠋ᠤ᠌ ᠱᠠᠯᠳᠠᠩ ᠳᠡᠭᠦᠵᠢᠯᠡᠵᠦ ᠬᠠᠶᠠᠭᠠᠳ ᠴᠢᠨᠣᠠ ᠳ᠋ᠤ᠌ ᠰᠡᠭᠴᠢᠭᠦᠯᠦᠨ ᠤᠷᠠᠭᠤᠯᠵᠤ᠂ ᠦᠬᠦᠬᠦ ᠶ᠋ᠢᠨ ᠮᠠᠭᠤ ᠪᠠᠷ ᠦᠬᠦᠭᠦᠯᠬᠦ ᠭᠡᠰᠡᠨ ᠶᠦᠮ ᠠ᠋! ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠨᠢᠭᠡ ᠠᠭᠤᠯᠠ ᠶ᠋ᠢᠨ ᠰᠠᠢᠨ ᠡᠷᠡ ᠮᠢᠨᠦ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ᠁
— ᠲᠡᠷᠡ ᠰᠠᠢᠨ ᠡᠷᠡ ᠬᠡᠨ ᠪᠣᠢ?
— ᠲᠡᠷᠡ ᠰᠠᠢᠨ ᠡᠷᠡ ᠶ᠋ᠢ ᠬᠡᠨ ᠭᠡᠵᠦ ᠰᠠᠨᠠᠪᠠ⁈ ᠶᠢᠰᠦᠨ ᠵᠡᠭᠦᠳᠦᠨ ᠳ᠋ᠦ᠍ ᠪᠠᠢᠭᠠ ᠦᠭᠡᠢ ᠬᠥᠮᠦᠨ ᠮᠥᠨ᠃ ᠪᠢ ᠢᠩᠭᠢᠭᠡᠳ ᠬᠡᠯᠡᠬᠦ ᠳ᠋ᠦ᠍ ᠲᠠ ᠨᠠᠷ ᠢᠲᠡᠭᠡᠬᠦ ᠦᠭᠡᠢ᠃ ᠨᠠᠮᠠᠶ᠋ᠢ ᠦᠯᠢᠭᠡᠷ ᠳᠣᠮᠣᠭ ᠬᠠᠭᠤᠴᠢᠯᠠᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠮᠠᠭᠠᠳ ᠦᠭᠡᠢ᠃
— ᠵᠠ᠂ ᠬᠡᠯᠡ! ᠲᠡᠷᠡ ᠰᠠᠢᠨ ᠡᠷᠡ ᠬᠡᠨ ᠪᠣᠢ?
— ᠲᠡᠷᠡ ᠰᠠᠢᠨ ᠡᠷᠡ ᠪᠣᠯ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠢ᠋ ᠤᠤᠯᠭᠠᠯᠠᠵᠤ ᠳᠤᠲᠠᠭᠠᠳᠠᠭ ᠠᠩᠴᠢᠨᠵᠠᠪ ᠮᠥᠨ!
— ᠠᠩᠴᠢᠨᠵᠠᠪ? ᠭᠡᠵᠦ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠭᠠᠢᠬᠠᠰᠢᠷᠠᠨ ᠲᠡᠷᠡ ᠵᠢᠯ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠪᠠᠷᠢᠪᠴᠢᠯᠠᠬᠤ ᠭᠡᠵᠦ ᠶᠠᠪᠤᠭᠠᠳ ᠠᠯᠳᠠᠵᠤ ᠲᠠᠭᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠ᠃ ᠡᠨᠡ ᠰᠠᠢᠨ ᠡᠷᠡ ᠵᠢᠭᠤᠲᠠᠵᠤ ᠶᠠᠪᠤᠭᠠᠳ ᠠᠭᠤᠯᠠᠨ ᠳ᠋ᠤ᠌ ᠰᠢᠷᠭᠤᠭᠰᠠᠨ ᠪᠠᠢᠵᠢ ᠰᠢᠦ ᠳᠡ! ᠭᠡᠵᠦ ᠪᠣᠳᠣᠯᠠ᠃
— ᠠᠩᠴᠢᠨᠵᠠᠪ ᠨᠠᠮᠠᠶ᠋ᠢ ᠠᠪᠤᠷᠠᠭᠰᠠᠨ ᠦᠭᠡᠢ ᠪᠣᠯ ᠪᠢ ᠴᠦ᠍ ᠶᠣᠰᠣᠲᠠᠢ ᠮᠠᠭᠤ ᠶᠣᠷᠣ ᠪᠠᠷ ᠦᠬᠦᠵᠦ ᠮᠠᠢᠷᠠᠭ ᠴᠢᠨᠣᠠ ᠶ᠋ᠢᠨ ᠬᠣᠭᠣᠯᠠ ᠪᠣᠯᠵᠤ ᠳᠠᠭᠤᠰᠤᠭᠰᠠᠨ!
— ᠵᠠ᠂ ᠥᠯᠵᠡᠢᠰᠠᠩ ᠴᠢ ᠶᠠᠮᠤᠨ ᠤ᠋ ᠡᠮᠦᠨᠡ ᠡᠴᠡ ᠶᠠᠯᠠ ᠪᠠᠨ ᠲᠤᠰᠢᠶᠠᠬᠤ ᠦᠭᠡᠢ᠂ ᠦᠯᠢᠭᠡᠷ ᠶᠠᠷᠢᠬᠤ ᠪᠠᠨ ᠠᠶᠠᠳ! ᠦᠨᠡᠨ ᠤᠴᠢᠷ ᠢ᠋ᠶ᠋ᠠᠨ ᠲᠤᠰᠢᠶᠠ! ᠴᠢ ᠶᠠᠭᠠᠬᠢᠯᠠ ᠭᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠠᠪᠴᠢᠷᠠᠨ ᠬᠦᠩ ᠨᠣᠶᠠᠨ ᠢ᠋ ᠴᠣᠴᠢᠷᠳᠠᠭᠤᠯᠤᠨ ᠠᠶᠤᠯᠭᠠᠪᠠ? ᠴᠢ ᠰᠣᠯᠢᠶᠠ ᠣᠷᠣᠭᠰᠠᠨ ᠤᠤ?
— ᠦᠭᠡᠢ ᠠ᠋᠂ ᠶᠠᠭᠤ ᠰᠣᠯᠢᠶᠠ ᠣᠷᠣᠬᠤ ᠭᠡᠵᠢ? ᠬᠦᠩ ᠨᠣᠶᠠᠨ ᠥᠪᠡᠷ ᠢ᠋ᠶ᠋ᠡᠨ《 ᠬᠡᠨ ᠬᠥᠮᠦᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠣᠯᠠᠨᠠ ᠴᠡᠭᠡᠷᠯᠡᠯ ᠪᠣᠯᠭᠠᠵᠤ ᠴᠢᠳᠠᠪᠠᠯ ᠲᠡᠭᠦᠨ ᠳ᠋ᠦ᠍ ᠬᠦᠨᠳᠦ ᠱᠠᠩ ᠬᠦᠷᠲᠡᠭᠡᠨᠡ》 ᠭᠡᠵᠦ ᠨᠢᠭᠡ ᠪᠢᠰᠢ ᠣᠯᠠᠨ ᠤᠳᠠᠭᠠ ᠶᠠᠷᠢᠭᠰᠠᠨ ᠢ᠋ ᠲᠤᠰᠠᠯᠠᠭᠴᠢ ᠲᠠ ᠰᠣᠨᠣᠰᠤᠭᠠ ᠦᠭᠡᠢ ᠤᠤ?
— ᠬᠦᠩ ᠨᠣᠶᠠᠨ ᠤ᠋ ᠠᠭᠤᠷ ᠥᠰᠢᠶᠡ ᠡᠴᠡ ᠪᠣᠯᠵᠤ ᠶᠠᠷᠢᠭᠰᠠᠨ ᠦᠭᠡ ᠶ᠋ᠢ ᠴᠢ ᠶᠡᠬᠡᠳᠡ ᠦᠨᠡᠮᠰᠢᠵᠡᠢ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠠᠪᠴᠢᠷᠠ ᠭᠡᠵᠦ ᠥᠯᠵᠡᠢᠰᠠᠩ ᠴᠢᠮᠠ ᠳ᠋ᠤ᠌ ᠪᠣᠳᠠᠲᠠᠢ ᠲᠤᠰᠢᠶᠠᠭᠠ ᠦᠭᠡᠢ ᠪᠢᠵᠡ?
— ᠦᠭᠡᠢ᠂ ᠬᠦᠩ ᠨᠣᠶᠠᠨ ᠤ᠋ ᠦᠭᠡ ᠵᠠᠷᠯᠢᠭ ᠭᠡᠵᠦ ᠯᠡ ᠪᠢ ᠦᠷᠬᠦᠢ ᠪᠣᠳᠣᠵᠤ ᠶᠠᠪᠤᠳᠠᠭ ᠠ᠋ᠴᠠ ᠡᠵᠡᠨ ᠬᠥᠮᠦᠨ ᠳ᠋ᠡᠭᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠶᠠᠪᠤᠬᠤ ᠶ᠋ᠢ ᠬᠢᠴᠢᠶᠡᠪᠡ᠃ ᠡᠭᠦᠨ ᠢ᠋ ᠶᠠᠯᠠᠲᠠᠢ ᠭᠡᠵᠦ ᠬᠡᠨ ᠬᠡᠯᠡᠪᠡ?
— ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠡᠴᠡ ᠬᠥᠯ ᠬᠥᠩᠭᠡᠨ ᠵᠢᠷᠣᠭᠠᠯᠠᠵᠤ᠂ ᠪᠡᠶᠡ ᠪᠡᠨ ᠶᠡᠬᠡ ᠰᠢᠳᠤᠷᠭᠤ ᠭᠡᠵᠦ ᠪᠣᠳᠣᠭᠠ ᠤᠤ? ᠡᠰᠡᠪᠡᠰᠦ ᠰᠢᠳᠤᠷᠭᠤ ᠭᠡᠰᠡᠨ ᠥᠩᠭᠡᠪᠴᠢ ᠶ᠋ᠢ ᠨᠥᠮᠥᠷᠴᠦ ᠬᠦᠩ ᠨᠣᠶᠠᠨ ᠤ᠋ ᠬᠦᠨᠳᠦ ᠱᠠᠩ ᠢ᠋ ᠭᠣᠷᠢᠳᠠᠭᠠ ᠤᠤ? ᠭᠡᠵᠦ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ᠂ ᠥᠯᠵᠡᠢᠰᠠᠩ ᠤ᠋ᠨ ᠰᠠᠭᠤᠷᠢ ᠦᠭᠡᠢ ᠳᠠᠮᠠᠷᠤᠳᠠᠵᠤ ᠪᠠᠢᠭᠰᠠᠨ ᠲᠣᠯᠣᠭᠠᠢ ᠤᠷᠤᠭᠤ ᠳ᠋ᠢᠩ ᠭᠡᠲᠡᠯᠡ ᠴᠣᠬᠢᠭᠠᠳ ᠠᠪᠤᠭᠰᠠᠨ ᠰᠢᠭ᠋ ᠬᠠᠲᠠᠭᠤ ᠦᠭᠡ ᠴᠣᠬᠢᠭᠰᠠᠨ ᠳ᠋ᠤ᠌ ᠥᠯᠵᠡᠢᠰᠠᠩ ᠳᠤᠤᠭᠠᠷᠬᠤ ᠦᠭᠡ ᠦᠭᠡᠢ ᠬᠠᠮᠰᠢᠢᠪᠠ᠃
— ᠶᠠᠭᠠᠬᠢᠪᠠ? ᠶᠠᠭᠠᠬᠢᠭᠠᠳ ᠳᠠᠭᠤ ᠦᠭᠡᠢ ᠪᠣᠯᠴᠢᠬᠠᠪᠠ? ᠪᠡᠶᠡ ᠡᠴᠡ ᠪᠡᠨ ᠪᠦᠳᠦᠭᠦᠨ ᠵᠢᠷᠦᠬᠡ ᠲᠡᠢ ᠡᠷᠡ ᠪᠢᠰᠢ ᠪᠢᠯᠡ ᠤᠤ?
— ᠨᠣᠶᠠᠨ ᠰᠠᠩ ᠤ᠋ᠨ ᠡᠮᠦᠨᠡ ᠨᠣᠬᠠᠢ ᠮᠣᠷᠢᠨ ᠤ᠋ ᠬᠦᠴᠦ ᠪᠡᠨ ᠡᠷᠭᠦᠵᠦ ᠶᠠᠪᠤᠬᠤ ᠨᠢ ᠮᠢᠨᠦ ᠨᠢᠭᠡ ᠨᠠᠰᠤᠨ ᠤ᠋ ᠬᠠᠷᠢᠭᠤᠴᠠᠯᠭᠠ ᠭᠡᠵᠦ ᠪᠢ ᠪᠣᠳᠣᠳᠠᠭ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠴᠢᠬᠤᠯᠠᠲᠠᠢ ᠦᠶᠡ ᠳ᠋ᠦ᠍ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠠᠮᠢ ᠪᠠᠨ ᠵᠣᠷᠢᠭᠤᠯᠬᠤ ᠳ᠋ᠤ᠌ ᠴᠦ᠍ ᠪᠡᠯᠡᠨ!
— ᠲᠡᠭᠡᠭᠡᠳ ᠦᠬᠡᠷ ᠪᠦᠳᠦᠭᠦᠨ ᠵᠢᠷᠦᠬᠡᠯᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠢᠷᠡᠭᠰᠡᠨ ᠨᠢ ᠡᠨᠡ ᠤᠤ?
— ᠶᠠᠭ ᠲᠡᠢᠮᠦ! ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠪᠦᠳᠦᠭᠦᠨ ᠵᠢᠷᠦᠬᠡ ᠬᠡᠷᠡᠭᠲᠡᠢ ᠶᠦᠮ ᠭᠡᠳᠡᠭ ᠢ᠋ ᠪᠢ ᠡᠨᠡ ᠤᠳᠠᠭᠠ ᠰᠠᠶᠢ ᠮᠡᠳᠡᠯᠡ!
— ᠶᠠᠭᠠᠬᠢᠯᠠ ᠭᠡᠵᠦ?
— ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠡᠷᠭᠦᠴᠡ ᠪᠡᠯᠡᠭ ᠪᠣᠯᠭᠠᠨ ᠪᠠᠷᠢᠵᠤ᠂ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠰᠠᠢᠨ ᠬᠥᠮᠦᠨ ᠪᠣᠯᠵᠤ ᠱᠠᠩ ᠭᠥᠷᠳᠡᠶᠡ ᠭᠡᠰᠡᠨ ᠬᠥᠮᠦᠨ ᠨᠢᠭᠡ ᠬᠣᠶᠠᠷ ᠢ᠋ᠶ᠋ᠠᠷ ᠵᠣᠭᠰᠣᠬᠤ ᠦᠭᠡᠢ ᠠ᠋! ᠭᠠᠭᠴᠠ ᠲᠡᠷᠡ ᠪᠣᠯᠭᠠᠨ ᠵᠢᠷᠦᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠪᠢᠵᠡ! ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠫᠤᠤᠳᠠᠭᠳᠠᠵᠤ ᠦᠬᠦᠭᠰᠡᠨ ᠦ᠌ ᠳᠠᠷᠠᠭᠠᠬᠠᠨ ᠮᠥᠩᠭᠥᠨ ᠦ᠌ ᠬᠣᠷᠣᠬᠠᠢ ᠨᠢ ᠵᠠᠭᠠᠲᠤᠨᠠᠭᠰᠠᠨ ᠬᠥᠮᠦᠰ ᠣᠯᠵᠠ ᠶ᠋ᠢᠨ ᠰᠢᠨᠤᠯ ᠨᠢ ᠣᠪᠣᠯᠵᠠᠵᠤ ᠳᠠᠪ ᠳᠠᠪ ᠭᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠦᠳᠦᠭᠦᠨ ᠵᠢᠷᠦᠬᠡᠯᠡᠵᠦ ᠴᠢᠳᠠᠭᠠ ᠦᠭᠡᠢ᠃ ᠤᠴᠢᠷ ᠨᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠫᠤᠤᠳᠠᠭᠰᠠᠨ ᠲᠡᠷᠡ ᠴᠡᠷᠢᠭ ᠡᠴᠡ ᠪᠣᠯᠵᠤ ᠭᠠᠷ ᠢ᠋ᠶ᠋ᠠᠨ ᠲᠠᠲᠠᠵᠠᠭᠠᠪᠠ᠃
— ᠁
— ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠪᠣᠯᠤᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠬᠠᠳᠠᠨ ᠬᠣᠩᠭᠢᠯ ᠢ᠋ ᠣᠩᠭᠢᠷᠠᠲᠠᠯᠠ ᠫᠤᠤᠳᠠᠭᠰᠠᠨ ᠪᠣᠯᠪᠠᠴᠤ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠪᠡᠶᠡ ᠪᠡᠷ ᠥᠨᠥᠬᠢ ᠨᠦ᠍ᠭᠦᠳ ᠴᠢᠨᠢ ᠠᠶᠤᠨ ᠪᠠᠯᠢᠳᠠᠵᠤ ᠭᠠᠷ ᠨᠢ ᠴᠡᠴᠡᠷᠡᠨ ᠰᠠᠯᠭᠠᠨᠠᠵᠤ᠂ ᠰᠤᠮᠤ ᠪᠠᠨ ᠳᠡᠩᠳᠡᠭᠦᠯᠦᠭᠡᠳ ᠯᠡ ᠪᠠᠢᠵᠢ ᠳᠠ! ᠭᠡᠬᠦ ᠳ᠋ᠦ᠍ ᠲᠡᠨᠡᠭ ᠵᠣᠷᠢᠭ ᠲᠠᠢ ᠨᠢᠭᠡ ᠨᠢ ᠪᠦᠳᠦᠭᠦᠨ ᠵᠢᠷᠦᠬᠡᠯᠡᠵᠦ ᠳ᠋ᠠᠭᠳᠠ ᠳᠠ ᠯᠠᠮᠠ ᠶ᠋ᠢ ᠣᠨᠢᠯᠠᠵᠤ ᠣᠨᠢᠯᠠᠭᠠᠳ ᠠᠮᠢ ᠶ᠋ᠢ ᠨᠢ ᠬᠣᠷᠣᠭᠠᠲᠠᠯᠠ ᠥᠨᠥᠬᠢ ᠪᠦᠳᠦᠭᠦᠨ ᠵᠢᠷᠦᠬᠡᠲᠦ ᠶ᠋ᠢᠨ ᠴᠢᠨᠢ ᠭᠠᠪᠠᠯᠠ ᠨᠢ ᠵᠠᠭᠠᠳᠠᠰᠤ ᠪᠠᠷ ᠢ᠋ᠶ᠋ᠠᠨ ᠵᠠᠳᠠ ᠦᠰᠦᠷᠴᠦ ᠲᠠᠷᠢᠬᠢ ᠨᠢ ᠴᠠᠯᠭᠢᠨ ᠦᠰᠦᠷᠴᠡᠢ᠃
— ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠡᠭᠡᠳᠡᠭ ᠪᠣᠢ? ᠪᠤᠷᠬᠠᠨ ᠲᠩᠷᠢ ᠪᠤᠷᠤᠭᠤ ᠦᠵᠡᠪᠡ ᠤᠤ?
— ᠲᠡᠢᠮᠦ ᠪᠠᠢᠬᠤ ᠴᠦ᠍ ᠮᠠᠭᠠᠳ ᠦᠭᠡᠢ᠃ ᠭᠡᠪᠡᠴᠦ ᠬᠡᠨ ᠨᠢᠭᠡ ᠬᠥᠮᠦᠨ ᠵᠣᠷᠢᠯᠭᠠ ᠲᠠᠢ ᠫᠤᠤᠳᠠᠭᠰᠠᠨ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃
— ᠲᠡᠭᠡᠪᠡᠯ ᠲᠡᠷᠡ ᠴᠣᠬᠣᠮ ᠬᠡᠨ ᠪᠣᠢ?
— ᠁ ᠥᠯᠵᠡᠢᠰᠠᠩ ᠠᠶᠤᠬᠤ ᠪᠠᠢᠳᠠᠯ ᠭᠠᠷᠭᠠᠵᠤ ᠴᠠᠭᠠᠰᠢ ᠨᠠᠭᠠᠰᠢ ᠬᠢᠯᠠᠮᠬᠢᠨ ᠬᠠᠷᠠᠵᠤ ᠠᠪᠤᠪᠠ᠃
— ᠬᠠᠮᠢᠶᠠ ᠦᠭᠡᠢ᠃ ᠬᠡᠯᠡᠭᠡᠷᠡᠢ! ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠥᠴᠢᠭ ᠢ᠋ᠶ᠋ᠡᠨ ᠥᠭᠪᠡᠯ ᠠᠭᠤᠴᠢᠯᠠᠭᠳᠠᠵᠤ ᠮᠡᠳᠡᠨᠡ᠃
— ᠵᠠ᠂ ᠮᠡᠳᠡᠯᠡ᠃ ᠲᠡᠷᠡ ᠬᠥᠮᠦᠨ ᠪᠣᠯ ᠠᠭᠤᠯᠠ ᠶ᠋ᠢᠨ ᠰᠠᠢᠨ ᠡᠷᠡ᠃
— ᠠᠩᠴᠢᠨᠵᠠᠪ ᠤᠤ?
— ᠪᠢᠰᠢ ᠠ᠋! ᠠ᠂ ᠮᠥᠨ ᠴᠦ᠍ ᠪᠠᠢᠬᠤ ᠮᠠᠭᠠᠳ ᠦᠭᠡᠢ᠃
— ᠦᠭᠡᠢ᠂ ᠲᠡᠭᠡᠭᠡᠳ ᠬᠡᠨ ᠪᠣᠢ?
— ᠨᠠᠮᠵᠢᠯ!
— ᠰᠣᠯᠣᠭᠠᠢ ᠨᠠᠮᠵᠢᠯ ᠤᠤ?
— ᠵᠤᠤᠬᠠᠢ ᠳᠠ᠂ ᠶᠠᠭ ᠮᠥᠨ!
— ᠨᠠᠮᠵᠢᠯ ᠪᠠᠰᠠ ᠠᠮᠢᠳᠤ ᠶᠠᠪᠤᠭᠠ ᠤᠤ?
— ᠠᠮᠢᠳᠤ ᠪᠣᠢ! ᠨᠠᠰᠤᠲᠠᠢ ᠡᠵᠢ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠮᠡᠨᠳᠦ ᠰᠠᠢᠬᠠᠨ ᠣᠨᠳᠣᠷᠣᠵᠤ ᠪᠣᠢ ᠁ ᠭᠡᠵᠦ ᠥᠯᠵᠡᠢᠰᠠᠩ᠂ ᠠᠩᠴᠢᠨᠵᠠᠪ ᠲᠤ ᠠᠮᠢ ᠠᠪᠤᠷᠠᠭᠳᠠᠨ ᠠᠭᠤᠯᠠᠨ ᠳ᠋ᠤ᠌ ᠲᠡᠨᠦᠵᠦ ᠶᠠᠪᠤᠭᠠᠳ ᠰᠠᠨᠠᠮᠰᠠᠷ ᠦᠭᠡᠢ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠦᠭᠦᠳᠡ ᠶ᠋ᠢ ᠨᠠᠷᠢᠨ ᠲᠣᠭᠠᠴᠢᠵᠤ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠥᠳᠡᠯᠦᠯ ᠪᠠᠢᠳᠠᠯ ᠢ᠋ ᠨᠠᠷᠢᠨ ᠲᠤᠷᠰᠢᠵᠤ ᠮᠡᠳᠡᠭᠡᠳ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌《 ᠨᠢᠭᠤᠴᠠ ᠵᠠᠬᠢᠳᠠᠯ》 ᠶᠠᠪᠤᠭᠤᠯᠤᠭᠰᠠᠨ ᠵᠡᠷᠭᠡ ᠳᠠᠯᠠᠨ ᠪᠤᠯᠴᠢᠷᠬᠠᠢ ᠪᠠᠨ ᠲᠣᠭᠠᠴᠢᠵᠠᠢ᠃
ᠬᠣᠰᠢᠭᠤ ᠶᠠᠮᠤᠨ ᠠ᠋ᠴᠠ ᠥᠯᠵᠡᠢᠰᠠᠩ ᠤ᠋ᠨ ᠥᠴᠢᠭᠯᠡᠭᠰᠡᠨ ᠥᠴᠢᠭ ᠪᠠ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠥᠩᠭᠡᠷᠡᠭᠰᠡᠨ ᠪᠤᠶᠤ《ᠨᠢᠭᠤᠴᠠ ᠵᠠᠬᠢᠳᠠᠯ》 ᠤ᠋ᠨ ᠲᠤᠰᠬᠠᠢ ᠦᠢᠯᠡᠳᠦᠯ ᠵᠡᠷᠭᠡ ᠪᠣᠳᠠᠲᠠᠢ ᠪᠠᠢᠳᠠᠯ ᠢ᠋ ᠪᠣᠳᠣᠯᠬᠢᠯᠠᠵᠤ ᠭᠤᠴᠢᠨ ᠠᠯᠠᠭᠠᠳᠠᠭᠤᠷ① ᠠᠯᠠᠭᠠᠳᠠᠵᠤ ᠭᠤᠴᠢᠨ ᠯᠠᠩ ᠮᠥᠩᠭᠥ ᠪᠡᠷ ᠲᠣᠷᠭᠠᠨ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠨᠠᠷᠢᠨ ᠬᠠᠲᠤᠨ ᠳ᠋ᠤ᠌ ᠠᠪᠠᠴᠢᠵᠤ ᠬᠠᠶᠠᠭᠤᠯᠬᠤ ᠪᠠᠷ ᠪᠣᠯᠪᠠ᠃
ᠬᠣᠵᠢᠮ ᠨᠢ ᠪᠠᠷᠠᠭᠤᠨ ᠬᠣᠰᠢᠭᠤ ᠳᠠᠶᠠᠭᠠᠷ ᠲᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠤᠬᠠᠢ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠳᠣᠮᠣᠭ ᠤᠯᠠᠷᠢᠵᠤ ᠤᠯᠠᠮᠵᠢᠯᠠᠭᠳᠠᠨ ᠶᠠᠷᠢᠭᠳᠠᠵᠤ ᠪᠠᠢᠯᠠ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠦᠨᠡᠬᠡᠷ ᠬᠤᠪᠢᠯᠭᠠᠨ ᠪᠤᠷᠬᠠᠨ ᠰᠢᠭ᠋ ᠬᠥᠮᠦᠨ ᠪᠠᠢᠯᠠ ᠭᠡᠳᠡᠭ᠃ ᠬᠠᠷᠠ ᠴᠡᠷᠢᠭ ᠬᠠᠳᠠᠨ ᠬᠣᠩᠭᠢᠯ ᠤᠷᠤᠭᠤ ᠰᠤᠮᠤᠨ ᠮᠥᠨᠳᠥᠷ ᠰᠢᠭ ᠫᠤᠤᠳᠠᠬᠤ ᠳ᠋ᠤ᠌《 ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠨᠢ ᠲᠡᠭᠦᠨ ᠢ᠋ ᠬᠠᠮᠠᠭᠠᠯᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠫᠤᠤ ᠶ᠋ᠢᠨ ᠰᠤᠮᠤ ᠪᠡᠶᠡ ᠳ᠋ᠦ᠍ᠨᠢ ᠨᠡᠪᠲᠡᠷᠡᠵᠦ ᠣᠷᠣᠬᠤ ᠦᠭᠡᠢ᠂ ᠱᠤᠤᠭᠢᠵᠤ ᠢᠷᠡᠭᠰᠡᠨ ᠰᠤᠮᠤ ᠨᠢ ᠰᠤᠭᠤ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠤᠨᠤᠭᠰᠠᠭᠠᠷ ᠫᠢᠳ ᠫᠢᠳ ᠭᠡᠰᠡᠨ ᠮᠣᠳᠣ ᠲᠣᠭᠰᠢᠬᠤ ᠳᠠᠭᠤᠨ ᠭᠠᠷᠴᠤ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠨᠢ ᠭᠠᠯ ᠦᠵᠡᠭᠰᠡᠨ ᠲᠤᠭᠤᠯᠭᠠ ᠰᠢᠭ᠋ ᠦᠵᠦᠭᠦᠷ ᠨᠢ ᠰᠢᠮᠠᠷᠠᠨ ᠬᠠᠢᠯᠵᠤ ᠬᠥᠰᠡᠷ ᠣᠢᠴᠢᠵᠤ ᠪᠠᠢᠯᠠ ᠭᠡᠳᠡᠭ᠃ ᠬᠠᠵᠠᠭᠤ ᠬᠠᠪᠢᠷᠭᠠ ᠳ᠋ᠤᠨᠢ ᠰᠠᠬᠢᠵᠤ ᠰᠠᠭᠤᠭᠰᠠᠨ ᠱᠠᠪᠢ ᠯᠠᠮᠠ ᠨᠠᠷ ᠨᠢ ᠰᠢᠷᠬᠠᠲᠤᠵᠤ ᠦᠬᠦᠬᠦ ᠳ᠋ᠦ᠍ᠨᠢ ᠰᠡᠳᠬᠢᠯ ᠲᠦᠪᠳᠡᠬᠦ ᠦᠭᠡᠢ《ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠢ᠋ᠶ᠋ᠠᠨ ᠠᠪᠴᠤ ᠬᠠᠶᠠᠭᠠᠳ ᠬᠠᠷᠠ ᠳᠠᠢᠰᠤᠨ ᠤ᠋ ᠬᠣᠣᠷᠲᠤ ᠰᠤᠮᠤᠨ ᠳ᠋ᠤ᠌ ᠪᠡᠶᠡ ᠪᠠᠷᠠᠯᠠ ᠭᠡᠳᠡᠭ᠃ ᠰᠡᠭᠦᠯ ᠳ᠋ᠦ᠍ᠨᠢ ᠣᠭᠲᠣᠯᠵᠤ ᠠᠪᠠᠴᠢᠭᠰᠠᠨ ᠲᠣᠯᠣᠭᠠᠢ ᠨᠢ ᠬᠦᠩ ᠨᠣᠶᠠᠨ ᠤ᠋ ᠰᠤᠮᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠡᠭ ᠲᠡᠭ ᠦᠰᠦᠷᠴᠦ ᠢᠨᠢᠶᠡᠨ ᠪᠠᠢᠯᠠ ᠴᠦ᠍ ᠭᠡᠳᠡᠭ᠃ ᠮᠣᠳᠣᠨ ᠪᠠᠮᠪᠠᠷᠴᠠᠭ ᠬᠠᠰᠠᠭ ᠳᠡᠭᠡᠷᠡ ᠤᠭᠤᠲᠠᠨ ᠳ᠋ᠤ᠌ ᠰᠠᠪᠠᠯᠠᠭᠠᠳ ᠲᠡᠭᠡᠭᠡᠬᠦ ᠳ᠋ᠦ᠍ ᠵᠢᠷᠠᠨ ᠵᠢᠩ ᠬᠦᠨᠳᠦ ᠲᠣᠯᠣᠭᠠᠢ ᠨᠢ ᠲᠡᠷᠭᠡᠨ ᠦ᠌ ᠭᠣᠣᠯ ᠳ᠋ᠤ᠌ ᠳᠤᠨᠳᠠᠭᠤᠷ ᠵᠠᠢ ᠡᠵᠡᠯᠡᠵᠦ ᠲᠡᠭᠡᠭᠡᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠲᠡᠷᠭᠡᠨ ᠦ᠌ ᠮᠥᠭᠡᠷ ᠵᠢᠵᠢᠭᠢᠨᠠᠨ ᠬᠢᠬᠤᠨᠠᠵᠤ ᠪᠠᠢᠨ ᠪᠠᠢᠨ ᠲᠡᠩᠭᠡᠯᠢᠭ ᠨᠢ ᠵᠠᠩᠭᠢᠷᠠᠨ ᠶᠠᠪᠤ ᠶᠠᠳᠠᠵᠤ ᠪᠠᠢᠪᠠ᠃ ᠤᠯᠠᠭᠠᠨ ᠬᠠᠲᠤᠨ ᠳ᠋ᠤ᠌ ᠠᠪᠠᠴᠢᠭᠠᠳ ᠤᠷᠤᠰᠬᠠᠭᠰᠠᠨ ᠴᠢᠨᠢ ᠤᠰᠤᠨ ᠤᠷᠤᠭᠤ ᠤᠷᠤᠰᠤᠭᠰᠠᠨ ᠦᠭᠡᠢ ᠬᠠᠷᠢᠨ ᠤᠯᠠᠭᠠᠨ ᠬᠠᠲᠤᠨ ᠤ᠋ ᠤᠷᠤᠰᠬᠠᠯ ᠰᠥᠷᠦᠨ ᠶᠠᠪᠤᠵᠤ ᠪᠠᠢᠯᠠ ᠭᠡᠵᠦ ᠬᠡᠯᠡᠯᠴᠡᠨᠡ᠃ ᠡᠨᠡ ᠨᠢ ᠦᠨᠡᠬᠡᠷ ᠬᠠᠭᠤᠴᠢᠨ ᠤ᠋ ᠬᠥᠮᠦᠰ ᠦ᠋ᠨ ᠤᠷᠲᠤ ᠮᠥᠷᠡᠨ ᠦ᠌ ᠤᠷᠤᠰᠬᠠᠯ ᠳ᠋ᠤ᠌ ᠣᠷᠬᠢᠭᠰᠠᠨ ᠴᠢᠯᠠᠭᠤᠨ ᠠᠷᠰᠯᠠᠨ ᠢ᠋ ᠬᠣᠵᠢᠮ ᠤ᠋ᠨ ᠬᠥᠮᠦᠰ ᠤᠷᠤᠰᠬᠠᠯ ᠳᠣᠣᠷᠠ ᠠ᠋ᠴᠠ ᠡᠷᠢᠭᠰᠡᠨ ᠪᠢᠰᠢ᠂ ᠬᠠᠷᠢᠨ ᠤᠷᠤᠰᠬᠠᠯ ᠥᠭᠡᠳᠡ ᠨᠢ ᠡᠷᠢᠭᠡᠳ ᠡᠷᠢᠵᠦ ᠣᠯᠤᠭᠰᠠᠨ ᠲᠠᠢ ᠠᠳᠠᠯᠢ ᠶᠣᠰᠣᠨ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠶᠤᠮ ᠤᠤ⁈ ᠪᠤᠤ ᠮᠡᠳᠡ!
ᠬᠦᠩ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠪᠦᠳᠦᠭᠦᠨ ᠲᠣᠯᠣᠭᠠᠢ ᠠ᠋ᠴᠠ ᠠᠶᠤᠭᠰᠠᠨ ᠳ᠋ᠠᠭᠠᠨ ᠬᠦᠨᠳᠦ ᠡᠪᠡᠳᠴᠢᠯᠡᠵᠦ ᠰᠣᠯᠢᠶᠠ ᠪᠠᠯᠠᠢ ᠶᠠᠷᠢᠳᠠᠭ ᠪᠣᠯᠵᠠᠢ᠃ ᠥᠨᠥᠬᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠭᠠᠬᠠᠢ ᠠᠯᠠᠳᠠᠭ ᠬᠢᠲᠤᠭᠠ ᠪᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠭᠲᠣᠯᠤᠭᠰᠠᠨ ᠬᠣᠶᠠᠷ ᠵᠠᠨᠠᠭ ᠤ᠋ᠨ ᠨᠢᠭᠡ ᠨᠢ ᠭᠤᠷᠪᠠ ᠬᠣᠨᠣᠭᠰᠠᠨ ᠦᠭᠡᠢ ᠦᠬᠦᠵᠦ᠂ ᠨᠥᠭᠦᠭᠡ ᠨᠢᠭᠡ ᠨᠢ ᠳᠣᠣᠷᠠ ᠪᠡᠶᠡ ᠨᠢ ᠲᠠᠮᠪᠠᠷᠠᠵᠤ ᠬᠡᠪᠲᠡᠭᠡ ᠡᠪᠡᠳᠴᠢᠨ ᠣᠯᠵᠠᠢ ᠭᠡᠳᠡᠭ᠃
ᠥᠯᠵᠡᠢᠰᠠᠩ ᠴᠦ᠍ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠠᠭᠤᠴᠢᠯᠠᠯ ᠲᠠᠢ ᠶᠠᠯᠠᠳᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠣᠵᠢᠮ ᠨᠢ ᠭᠠᠷ ᠬᠥᠯ ᠦ᠋ᠨ ᠬᠢᠨᠢ ᠰᠢᠷᠪᠥᠰᠥ ᠪᠠᠢᠨ ᠪᠠᠢᠨ ᠲᠠᠲᠠᠯᠳᠤᠳᠠᠭ ᠪᠣᠯᠵᠠᠢ᠃
— — — —
① ᠠᠷᠠᠰᠤᠨ ᠪᠦᠷᠬᠦᠭᠡᠰᠦᠨ ᠳᠣᠲᠣᠷᠠ ᠭᠠᠤᠯᠢᠨ ᠵᠣᠭᠣᠰ ᠪᠠᠭᠯᠠᠭᠰᠠᠨ ᠠᠯᠠᠭᠠ ᠮᠠᠶᠢᠭᠲᠠᠢ ᠡᠷᠡᠭᠦᠦ ᠶ᠋ᠢᠨ ᠪᠠᠭᠠᠵᠢ᠃