ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ> Хан мунын сүүрс < дээд > – Мөнх зохиоов ᠂ дэд бодь – нэгдүгээр бүлэг <9>
430ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠶᠢᠰᠦ>
ᠰᠡᠭᠦᠳᠡᠷ ᠡᠷᠭᠢᠭᠰᠡᠨ ᠪᠠᠢᠲᠠᠯᠠ ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠠᠰᠤᠷᠠᠭᠠ ᠦᠭᠡᠢ ᠦᠷᠭᠦᠯᠵᠢᠯᠡᠨᠡ᠃
ᠠᠯᠤᠰ ᠠ᠋ᠴᠠ ᠯᠦᠷ᠂ ᠯᠦᠷ ᠬᠢᠨ ᠨᠦᠵᠢᠭᠢᠨᠡᠬᠦ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠬᠥᠬᠡᠪᠣᠯᠠᠭ ᠤ᠋ᠨ ᠭᠣᠣᠯ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠠᠷᠴᠠ ᠽᠠᠨᠳᠠᠨ ᠮᠣᠳᠣ ᠲᠠᠢ ᠬᠠᠳᠠᠨ ᠡᠩᠭᠡᠷ ᠬᠥᠯ ᠦᠭᠡᠢ ᠳᠠᠢᠪᠠᠯᠵᠠᠬᠤ ᠮᠡᠲᠦ ᠪᠠᠢᠯᠠ᠃
ᠲᠡᠪᠬᠡᠷᠭᠡᠲᠤ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠳ᠋ᠠᠭᠳᠠᠨ ᠳᠠ ᠯᠠᠮᠠ᠂ ᠪᠤᠷᠤᠪᠠᠨᠳᠢ ᠵᠡᠷᠭᠡ ᠬᠡᠳᠦᠨ ᠯᠠᠮᠠ ᠨᠠᠷ ᠠ᠋ᠴᠠ ᠥᠭᠡᠷᠡ ᠠᠮᠢᠲᠠᠨ ᠦᠭᠡᠢ ᠪᠣᠯᠵᠠᠢ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠥᠷᠯᠥᠭᠡ ᠶ᠋ᠢᠨ ᠳᠥᠩᠭᠡᠭᠦᠷ ᠴᠠᠢ ᠠ᠋ᠴᠠ ᠬᠣᠢᠰᠢ ᠬᠡᠯᠡᠨ ᠳᠡᠭᠡᠷᠡ ᠪᠡᠨ ᠶᠠᠭᠤᠮᠠ ᠲᠠᠯᠪᠢᠭᠠ ᠦᠭᠡᠢ᠃
ᠪᠤᠷᠤᠪᠠᠨᠳᠢ ᠭᠠᠤᠯᠢᠨ ᠲᠣᠭᠣᠭᠠᠨ ᠳ᠋ᠤ᠌ ᠴᠠᠢ ᠪᠤᠴᠠᠯᠭᠠᠵᠤ ᠠᠭᠠᠷᠤᠤᠯ ᠲᠣᠰᠣ᠂ ᠪᠣᠭᠣᠷᠰᠣᠭ᠂ ᠪᠤᠳᠠᠭᠠ ᠵᠡᠷᠭᠡ ᠣᠢᠷᠠᠲᠤᠭᠤᠯᠵᠤ᠂ ᠠᠶᠠᠭᠠᠨ ᠳ᠋ᠤᠨᠢ ᠪᠣᠷᠴᠠ ᠬᠥᠰᠬᠥᠯᠡᠨ ᠴᠠᠢ ᠠᠶᠠᠭᠠᠯᠠᠭᠠᠳ᠄
— ᠪᠠᠭᠰᠢ ᠠ᠋᠂ ᠴᠠᠢ ᠪᠠᠨ ᠤᠤᠭᠤ ! ᠭᠡᠰᠡᠨ ᠳ᠋ᠦ᠍ ᠨᠢᠳᠦ ᠪᠡᠨ ᠠᠨᠢᠨ ᠨᠠᠮᠠᠨᠴᠢᠯᠠᠭᠰᠠᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠶᠦᠮ ᠰᠢᠭ ᠁
ᠮᠠᠷᠭᠠᠲᠤᠷ ᠤ᠋ᠨ ᠬᠢᠨᠢ ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠬᠠᠷᠠ ᠴᠡᠷᠢᠭ ᠦ᠋ᠳ ᠭᠣᠣᠯ ᠥᠭᠡᠳᠡᠯᠡᠨ ᠴᠤᠪᠤᠯᠳᠤᠪᠠ᠃
ᠨᠢᠭᠡ ᠬᠠᠷᠠᠬᠤᠯᠠ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠡᠴᠡ ᠡᠰᠡᠷᠭᠦᠯᠡᠨ ᠥᠩᠭᠡᠢᠭᠰᠡᠨ ᠡᠪᠴᠢᠭᠦᠦ ᠲᠡᠪᠬᠡᠷᠭᠡᠲᠤ ᠬᠠᠳᠠᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠬᠠᠷᠠ ᠴᠡᠷᠢᠭ ᠦ᠋ᠳ ᠲᠣᠮᠣ ᠮᠣᠳᠣᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠪᠡᠭᠡᠪᠡᠢᠨ ᠰᠠᠭᠤᠭᠰᠠᠨ ᠪᠣᠷᠣ ᠪᠢᠯᠵᠤᠤᠬᠠᠢ ᠰᠢᠭ᠋ ᠪᠠᠷᠵᠠᠢᠵᠤ ᠬᠠᠷᠠᠭᠳᠠᠪᠠ᠃
ᠡᠪᠴᠢᠭᠦᠦ ᠬᠠᠳᠠᠨ ᠤ᠋ ᠲᠡᠷᠲᠡᠭᠡ ᠡᠷᠭᠢ ᠡᠴᠡ ᠤᠭᠰᠠᠷᠠᠭᠠ ᠪᠠᠷ ᠰᠤᠮᠤ ᠪᠠᠨ ᠪᠥᠭᠡᠯᠵᠢᠭᠰᠡᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠪᠤᠷᠴᠠᠭ ᠬᠠᠭᠤᠷᠬᠤ ᠰᠢᠭ᠋ ᠫᠠᠴᠢᠭᠢᠨᠠᠬᠤ ᠨᠢ ᠬᠡᠴᠡᠭᠦᠦ᠃ ᠱᠤᠤᠭᠢᠨ ᠢᠰᠬᠡᠷᠦᠭᠰᠡᠨ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠥᠮᠥᠰᠬᠡ ᠳᠡᠭᠡᠭᠦᠷ《 ᠰᠢᠪ ᠶᠠᠩ᠂ ᠰᠢᠪ ᠶᠠᠩ 》 ᠭᠡᠵᠦ ᠮᠠᠭᠤᠬᠠᠢ ᠢᠷᠣᠠ ᠶ᠋ᠢᠨ ᠳᠠᠭᠤ ᠬᠠᠩᠭᠢᠨᠠᠭᠤᠯᠵᠤ ᠬᠠᠲᠠᠭᠤ ᠬᠠᠳᠠᠨ ᠳ᠋ᠤ᠌ ᠰᠢᠮᠠᠷᠠᠭᠰᠠᠨ ᠰᠤᠮᠤ ᠨᠢ ᠪᠤᠴᠠᠭᠠᠳ ᠵᠠᠮ ᠦᠭᠡᠢ ᠵᠡᠷᠯᠢᠭ ᠬᠡᠢᠰᠦᠨᠡ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠥᠴᠦᠬᠡᠨ ᠴᠦ᠍ ᠰᠦᠷᠳᠡᠵᠦ ᠭᠡᠯᠮᠡᠭᠳᠡᠭᠰᠡᠨ ᠦᠭᠡᠢ᠂ 《 ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ 》 ᠤ᠋ ᠪᠠᠨ ᠠᠰᠤᠷᠤ ᠶᠡᠬᠡ ᠥᠮᠥᠭ ᠲᠦᠰᠢᠭ ᠲᠦ᠍ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠪᠠᠨ ᠶᠡᠬᠡ ᠰᠦᠢᠷᠡᠯ ᠢ ᠲᠤᠯᠤᠨ ᠪᠣᠰᠴᠤ 《 ᠪᠤᠷᠬᠠᠨ ᠲᠡᠭᠷᠢ ᠪᠤᠳᠢᠰᠠᠳᠸᠠ᠂ ᠬᠠᠨ ᠮᠤᠨᠠ ᠰᠠᠬᠢᠭᠤᠰᠤ ᠮᠢᠨᠢ ᠳᠡᠭᠡᠳᠦ ᠣᠷᠴᠢᠯᠠᠩ ᠠ᠋ᠴᠠ ᠬᠠᠷᠠᠵᠤ ᠪᠠᠢᠭᠠ ᠪᠠᠢᠯᠭᠦᠢ 》 ᠭᠡᠰᠡᠨ ᠮᠡᠲᠦ ᠨᠢᠭᠡ ᠯᠡ ᠬᠡᠪ ᠢ᠋ᠶ᠋ᠡᠷ ᠠᠮᠠᠨ ᠳ᠋ᠠᠭᠠᠨ ᠨᠣᠮ ᠤᠩᠰᠢᠵᠤ ᠪᠤᠷᠬᠠᠨ ᠳ᠋ᠠᠭᠠᠨ ᠵᠠᠯᠪᠠᠷᠢᠵᠤ ᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠱᠠᠪᠢ ᠪᠤᠷᠤᠪᠠᠨᠳᠢ ᠮᠥᠨ ᠵᠤᠯᠠ ᠠᠰᠠᠷᠠᠨ ᠲᠡᠵᠢᠭᠡᠵᠦ ᠪᠠᠭᠰᠢ ᠳᠠ ᠯᠠᠮᠠ ᠶ᠋ᠢᠨ ᠴᠢᠷᠠᠢ ᠶ᠋ᠢ ᠰᠢᠨᠵᠢᠵᠦ ᠵᠣᠷᠢᠭ ᠬᠠᠲᠠᠭᠤ ᠯᠠ ᠬᠠᠨᠢ ᠪᠣᠯᠵᠤ ᠪᠠᠢᠯᠠ᠃ ᠬᠠᠷᠢᠨ ᠴᠠᠭᠠᠳᠤ ᠬᠣᠩᠭᠢᠯ ᠤ᠋ᠨ ᠮᠤᠬᠤᠷ ᠲᠤ᠌ ᠨᠢᠭᠡ ᠯᠠᠮᠠ ᠲᠠᠴᠢᠭᠢᠨᠠᠨ ᠢᠰᠬᠡᠷᠬᠦ ᠫᠤᠤ ᠶ᠋ᠢᠨ ᠳᠠᠭᠤᠨ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ ᠳᠠᠭᠵᠢᠵᠤ ᠰᠢᠭᠡᠰᠦ ᠠᠯᠲᠠᠨ ᠪᠠᠩᠵᠠᠯ ᠤ᠋ᠨ ᠢ᠋ᠶ᠋ᠠᠨ ᠬᠣᠷᠮᠣᠢ ᠶ᠋ᠢ ᠨᠣᠷᠭᠠᠭᠰᠠᠨ ᠢ᠋ ᠪᠤᠷᠤᠪᠠᠨᠳᠢ ᠣᠯᠵᠤ ᠬᠠᠷᠠᠭᠠᠳ ᠢᠨᠢᠶᠡᠳᠦ ᠨᠢ ᠬᠦᠷᠴᠦ 《 ᠮᠠᠭᠤ ᠰᠥᠰᠥ ᠦᠭᠡᠢ ᠭᠣᠢᠷᠠᠨᠴᠢ 》 ᠭᠡᠵᠦ ᠳᠦᠳᠦᠨᠡᠨ ᠬᠠᠷᠢᠶᠠᠭᠰᠠᠨ ᠢ᠋ᠶ᠋ᠠᠨ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡᠬᠢ ᠲᠣᠮᠣ ᠴᠥᠭᠥᠴᠡ ᠲᠡᠢ ᠵᠤᠯᠠ ᠤᠨᠲᠠᠷᠠᠭᠰᠠᠨ ᠢ᠋ ᠬᠠᠷᠠᠨ ᠰᠠᠨᠳᠤᠷᠴᠤ ᠮᠠᠭᠤ ᠰᠡᠵᠢᠭ ᠲᠥᠷᠥᠨ ᠪᠥᠬᠥᠭᠰᠡᠨ ᠵᠤᠯᠠ ᠶ᠋ᠢ ᠠᠰᠠᠭᠠᠬᠤ ᠭᠡᠵᠦ ᠬᠡᠴᠢᠨᠡᠭᠡᠨ ᠣᠯᠠᠨ ᠴᠦᠳᠡᠩ ᠵᠢᠷᠤᠭᠠᠳ ᠨᠣᠴᠣᠭᠠᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠃ 《 ᠡᠵᠡᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠬᠤᠢᠰᠠᠭᠠᠨᠠᠬᠤ ᠵᠢᠪᠠᠷ ᠵᠢᠭᠠᠬᠠᠨ ᠠᠮᠢᠰᠬᠤᠳᠠᠭ ᠦᠭᠡᠢ ᠨᠢ ᠶᠠᠭᠠᠬᠢᠪᠠ ⁈ ᠭᠡᠵᠦ ᠭᠠᠷ ᠨᠢ ᠰᠠᠯᠭᠠᠨᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠪᠠᠨ ᠶᠠᠭᠠᠬᠢᠭᠠ ᠪᠣᠯ ᠭᠡᠰᠡᠨ ᠰᠢᠦᠬᠡᠨ ᠳᠣᠣᠭᠤᠷ ᠰᠢᠷᠪᠢᠪᠡᠯ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠪᠠᠭᠰᠢ ᠨᠢ ᠨᠢᠳᠦ ᠪᠡᠨ ᠠᠨᠢᠭᠠᠳ ᠠᠵᠢᠭ ᠴᠤ᠌ ᠦᠭᠡᠢ ᠰᠠᠭᠤᠵᠤ ᠪᠠᠢᠯᠠ᠃ ᠱᠤᠤᠭᠢᠵᠤ ᠢᠷᠡᠬᠦ ᠰᠤᠮᠤᠨ ᠮᠥᠨᠳᠥᠷ ᠲᠦ᠍ ᠪᠠᠯᠢᠳᠠᠨ ᠰᠠᠨᠳᠤᠷᠳᠠᠭ ᠦᠭᠡᠢ ᠠᠮᠢᠳᠤ ᠪᠤᠷᠬᠠᠨ ᠰᠢᠭ᠋ ᠠᠮᠤᠭᠤᠯᠠᠩ ᠬᠠᠷᠠᠭᠳᠠᠭᠠᠳ ᠪᠠᠢᠭᠰᠠᠨ ᠳᠦᠷᠢ ᠨᠢ ᠲᠡᠭᠦᠨ ᠳ᠋ᠦ᠍ ᠰᠣᠨᠢᠬᠠᠨ ᠪᠣᠳᠣᠯ ᠣᠷᠣᠭᠤᠯᠪᠠ ᠁ ᠨᠢᠭᠡ ᠵᠢᠯ ᠦ᠋ᠨ ᠡᠪᠦᠯ ᠶᠤᠮᠰᠠᠨ᠃ ᠶᠣᠰᠣᠲᠠᠢ ᠲᠡᠮᠡᠭᠡᠨ ᠴᠢᠮᠥᠭᠡ ᠲᠠᠰᠤ ᠴᠠᠷᠴᠠᠮᠠ ᠬᠦᠢᠲᠡᠨ᠃ ᠪᠠᠨᠴᠢᠨ ᠪᠣᠭᠳᠠ ᠪᠠᠲᠤᠬᠠᠭᠠᠯᠭᠠ ᠶ᠋ᠢᠨ ᠪᠡᠢᠯᠡ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠮᠣᠷᠢᠯᠠᠵᠤ ᠰᠠᠭᠠᠲᠠᠭᠰᠠᠨ ᠴᠢᠮᠡᠭᠡ ᠪᠡᠷ ᠳ᠋ᠠᠭᠳᠠᠨ ᠯᠠᠮᠠᠬᠠᠢ ᠬᠦᠩ ᠦ᠋ᠨ ᠰᠦᠮᠡ ᠡᠴᠡ ᠪᠡᠨ ᠬᠥᠳᠡᠯᠵᠦ ᠪᠠᠨᠴᠢᠨ ᠪᠣᠭᠳᠠ ᠲᠠᠢ ᠪᠠᠷᠠᠳᠠᠬᠤ ᠪᠠᠷ ᠪᠠᠲᠤᠬᠠᠭᠠᠯᠭᠠ ᠶ᠋ᠢ ᠵᠣᠷᠢᠵᠠᠢ᠃ ᠬᠥᠷ ᠴᠠᠰᠤ ᠲᠠᠢ ᠳᠠᠩᠭᠢᠨᠠᠭᠰᠠᠨ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠤᠨᠤᠭᠠ ᠮᠣᠷᠢᠳ ᠬᠦᠷᠲᠡᠯᠡ ᠬᠥᠯᠳᠡᠭᠦᠦ ᠭᠠᠵᠠᠷ ᠲᠤᠭᠤᠷᠠᠢ ᠲᠠᠯᠪᠢᠬᠤ ᠠ᠋ᠴᠠ ᠪᠠᠨ ᠰᠢᠷᠬᠡᠢᠵᠦ ᠪᠠᠢᠬᠤ ᠳ᠋ᠤ᠌ ᠡᠩ ᠦ᠋ᠨ ᠬᠥᠮᠦᠨ ᠨᠡᠩ ᠶᠠᠭᠠᠬᠢᠵᠤ ᠲᠡᠰᠬᠦ ᠪᠣᠢ ᠳᠠ᠃ ᠪᠤᠷᠤᠪᠠᠨᠳᠢ ᠳ᠋ᠠᠭᠳᠠᠨ ᠯᠠᠮᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠳᠠᠭᠠᠵᠤ ᠭᠦᠶᠦᠬᠦ ᠳ᠋ᠡᠭᠡᠨ ᠦᠨᠡᠭᠡᠨ ᠯᠣᠪᠤᠤᠵᠠ ᠶ᠋ᠢᠨ ᠴᠢᠬᠢ ᠶ᠋ᠢ ᠢᠪ ᠳᠠᠷᠤᠵᠤ᠂ ᠪᠢᠲᠡᠭᠦᠦ ᠡᠩᠭᠡᠷ ᠲᠡᠢ ᠨᠡᠬᠡᠢ ᠳᠡᠪᠡᠯ ᠪᠡᠬᠢᠯᠡᠵᠦ ᠡᠮᠦᠰᠦᠨ ᠢᠰᠡᠭᠡᠢ ᠭᠤᠲᠤᠯ ᠢᠰᠬᠦᠯᠦᠭᠰᠡᠨ ᠴᠦ᠍ ᠲᠠᠭᠠᠷᠠᠭᠠᠳ ᠲᠡᠰᠳᠡᠭ ᠦᠭᠡᠢ᠃ ᠡᠪᠦᠷ ᠳᠣᠲᠣᠷᠠ ᠪᠠᠨ ᠴᠣᠬᠣᠷ ᠪᠥᠭᠰᠡ ᠲᠡᠢ ᠶᠤᠸᠠᠮᠪᠤᠤ ᠡᠪᠦᠷᠲᠦᠯᠡᠭᠰᠡᠨ ᠳ᠋ᠦ᠍ ᠥᠨᠥᠬᠢ ᠶᠤᠸᠠᠮᠪᠤᠤ ᠳ᠋ᠤᠨᠢ ᠬᠦᠢᠲᠡᠨ ᠵᠢᠩ ᠳᠠᠭᠠᠭᠠᠵᠤ ᠪᠡᠶᠡ ᠶ᠋ᠢ ᠨᠢ ᠵᠢᠬᠡᠬᠥᠰᠥᠬᠥᠯᠥᠨ ᠬᠠᠴᠠᠷ ᠬᠠᠭᠠᠷᠢᠬᠤ ᠬᠦᠢᠲᠡᠨ ᠵᠢᠪᠠᠷ ᠨᠡᠪᠲᠡ ᠭᠤᠶᠠᠳᠠᠯᠠᠬᠤ ᠳ᠋ᠤ᠌ ᠳᠠᠭᠵᠢᠨ ᠴᠡᠴᠡᠷᠡᠬᠦ ᠳ᠋ᠡᠭᠡᠨ ᠡᠷᠬᠡ ᠦᠭᠡᠢ ᠬᠡᠰᠡᠭ ᠬᠡᠰᠡᠭ ᠦᠰᠦᠷᠦᠭᠦᠯᠵᠦ ᠪᠠᠢᠭᠰᠠᠨ ᠁ ᠲᠡᠭᠡᠬᠦ ᠳ᠋ᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠬᠦᠷᠡᠩ ᠥᠩᠭᠡ ᠲᠡᠢ ᠳᠠᠩ ᠡᠷᠢᠩᠭᠡ ᠶ᠋ᠢᠨ ᠳᠡᠭᠡᠭᠦᠷ ᠬᠤᠷᠠᠭᠠᠨ ᠬᠠᠨᠵᠢᠶᠠᠷ ᠳᠠᠪᠬᠤᠷᠯᠠᠵᠤ ᠡᠮᠦᠰᠦᠨ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠢ᠋ᠶ᠋ᠡᠷ ᠲᠡᠷᠡ ᠬᠦᠢᠲᠡᠨ ᠳ᠋ᠦ᠍ ᠠᠵᠢᠭ ᠴᠤ᠌ ᠦᠭᠡᠢ ᠠᠯᠬᠤᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠡᠶᠡ ᠨᠢ ᠬᠥᠯᠥᠷᠡᠨ ᠪᠦᠳᠦᠭᠦᠨ ᠱᠠᠯᠳᠠᠩ ᠲᠣᠯᠣᠭᠠᠢ ᠠ᠋ᠴᠠ ᠨᠢ ᠬᠠᠯᠠᠭᠤᠨ ᠠᠭᠤᠷ ᠪᠠᠭᠠᠭᠢᠵᠤ ᠪᠠᠢᠪᠠ ᠁
ᠪᠡᠢᠯᠡ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠪᠠᠭᠤᠵᠤ ᠪᠠᠨᠴᠢᠨ ᠪᠣᠭᠳᠠ ᠲᠠᠢ ᠪᠠᠷᠠᠳᠠᠭᠰᠠᠨ ᠳ᠋ᠤ᠌ ᠪᠠᠨᠴᠢᠨ ᠪᠣᠭᠳᠠ ᠳ᠋ᠠᠭᠳᠠᠨ ᠳᠠ ᠯᠠᠮᠠᠬᠠᠢ ᠶ᠋ᠢ ᠬᠠᠷᠠᠭᠠᠳ ᠭᠠᠢᠬᠠᠵᠤ᠂ 《ᠠ᠂ ᠰᠣᠨᠢᠨ ! ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠳ᠋ᠦ᠍ ᠨᠢ᠋ᠮᠠ ᠳ᠋ᠤ᠌ ᠶᠠᠪᠤᠬᠤ ᠰᠠᠢᠨ ᠡᠷᠡ ᠪᠠᠢᠨᠠ ᠁ 》 ᠭᠡᠵᠦ ᠭᠡᠨᠡ᠃
ᠪᠤᠷᠤᠪᠠᠨᠳᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠᠬᠠᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠷᠢᠳᠢ ᠰᠢᠳᠢ ᠲᠡᠢ ᠦᠵᠡᠭᠳᠡᠵᠦ᠂ ᠱᠤᠤᠭᠢᠵᠤ ᠢᠷᠡᠬᠦ ᠬᠠᠷᠠ ᠴᠡᠷᠢᠭ ᠦ᠋ᠨ ᠫᠤᠤ ᠶ᠋ᠢᠨ ᠰᠤᠮᠤ ᠲᠡᠭᠦᠨ ᠦ᠌ ᠡᠪᠴᠢᠭᠦᠦ ᠪᠡᠶᠡ ᠳᠡᠭᠡᠷᠡ ᠤᠨᠤᠭᠠᠳ ᠳᠣᠲᠣᠭᠰᠢ ᠪᠠᠨ ᠰᠢᠭᠢᠳᠴᠦ ᠣᠷᠣᠬᠤ ᠦᠭᠡᠢ ᠨᠢ ᠰᠣᠨᠢᠨ᠃ ᠭᠠᠩ ᠬᠠᠲᠠᠭᠤ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠨᠢ ᠭᠠᠯ ᠦᠵᠡᠭᠰᠡᠨ ᠲᠤᠭᠤᠯᠭᠠ ᠰᠢᠭ᠋ ᠤᠷᠤᠰᠤᠨ ᠬᠠᠢᠯᠵᠤ ᠰᠢᠩᠭᠡᠨ ᠨᠤᠬᠤᠭᠰᠠᠨ ᠵᠥᠭᠡᠯᠡᠨ ᠭᠤᠯᠢᠷ ᠪᠣᠯᠵᠤ ᠡᠪᠦᠳᠦᠭ ᠳᠡᠭᠡᠷᠡ ᠨᠢ ᠫᠠᠳ ᠫᠠᠳ ᠤᠨᠠᠨᠠ᠃ ᠵᠠᠷᠢᠮ ᠨᠢᠭᠡ ᠰᠤᠮᠤ ᠨᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠᠬᠠᠢ ᠶ᠋ᠢᠨ ᠮᠠᠬᠠᠪᠣᠳ ᠪᠡᠶᠡ ᠶ᠋ᠢ ᠶᠠᠭᠠᠬᠢᠪᠠᠴᠤ ᠤᠨᠤᠳᠠᠭ ᠶᠠᠭᠤᠮᠠ ᠪᠢᠰᠢ ᠶᠠᠭᠤ ᠨᠢᠭᠡ ᠳ᠋ᠦ᠍ ᠬᠠᠯᠬᠠᠯᠠᠭᠳᠠᠭᠠᠳ ᠬᠠᠯᠢᠵᠤ ᠡᠦᠲᠦᠨᠡ ᠁ ᠬᠠᠳᠠᠨ ᠳᠡᠭᠡᠷᠡ ᠲᠣᠰᠴᠤ ᠬᠠᠩᠭᠢᠨᠠᠨ ᠢᠰᠬᠡᠷᠦᠨᠡ ᠁
ᠬᠠᠷᠠ ᠴᠡᠷᠢᠭ ᠦ᠋ᠨ ᠣᠨᠢ ᠬᠠᠷᠠᠭᠠ ᠮᠠᠭᠤ ᠴᠤ᠌ ᠶᠤᠮ ᠤᠤ ? ᠡᠰᠡᠪᠡᠰᠦ ᠥᠨᠥᠬᠢ ᠨᠦ᠍ᠭᠦᠳ ᠴᠢᠨᠢ ᠡᠨᠡ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠳᠣᠲᠣᠷᠠ ᠨᠣᠮ ᠪᠢᠰᠢᠯᠭᠠᠭᠰᠠᠨ ᠰᠦᠵᠢᠭ ᠪᠢᠰᠢᠷᠡᠯᠲᠦ ᠯᠠᠮᠠ ᠬᠤᠸᠠᠷᠠᠭ ᠢ᠋ ᠣᠨᠢᠯᠠᠵᠤ ᠫᠤᠤᠳᠠᠬᠤ ᠪᠠᠨ ᠠᠶᠤᠨ ᠰᠢᠷᠬᠡᠢᠭᠰᠡᠨ ᠦ᠌ ᠴᠦ᠍ ᠶᠦᠮ ᠤᠤ ? ᠶᠠᠭᠤ ᠴᠤ᠌ ᠭᠡᠰᠡᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠡᠰᠡᠷᠭᠦ ᠲᠠᠯᠠ ᠠ᠋ᠴᠠ ᠲᠡᠭᠦᠨ ᠢ᠋ ᠣᠨᠢᠯᠠᠭᠰᠠᠨ ᠨᠢᠭᠦᠯᠲᠦ ᠫᠤᠤ ᠶ᠋ᠢᠨ ᠠᠮᠠ ᠣᠩᠭᠣᠯᠵᠠᠵᠤ ᠬᠡᠴᠢᠨᠡᠭᠡᠨ ᠲᠠᠴᠢᠭᠢᠨᠠᠭᠤᠯᠤᠭᠠᠳ ᠭᠠᠷᠤᠵᠠᠳᠠᠬᠤ ᠰᠤᠮᠤᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠤᠨᠤᠭᠠ ᠦᠭᠡᠢ ᠶ᠋ᠢᠨ ᠣᠨᠣᠴᠠᠲᠠᠢ ᠬᠠᠷᠢᠭᠤᠯᠲᠠ ᠣᠯᠵᠤ ᠳᠡᠢᠯᠦᠭᠡ ᠦᠭᠡᠢ᠃
ᠲᠡᠷᠲᠡᠭᠡ ᠡᠰᠡᠷᠭᠦ ᠲᠠᠯᠠ ᠶ᠋ᠢᠨ ᠥᠩᠭᠡᠢᠮᠡ ᠡᠪᠴᠢᠭᠦᠦ ᠬᠠᠳᠠᠨ ᠳᠡᠭᠡᠷᠡ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠷᠵᠠᠭᠠᠨᠠᠨ ᠬᠠᠷᠠᠯᠠᠵᠤ᠂ ᠬᠠᠳᠠᠨ ᠬᠣᠩᠭᠢᠯ ᠤᠷᠤᠭᠤ ᠫᠠᠴᠢᠭᠢᠨᠠᠨ ᠳᠤᠤᠭᠠᠷᠬᠤ ᠫᠤᠤ ᠶ᠋ᠢᠨ ᠳᠠᠭᠤᠨ ᠲᠠᠰᠤᠷᠠᠭᠠ ᠦᠭᠡᠢ ᠱᠤᠤᠭᠢᠵᠤ᠂ ᠨᠢᠳᠦ ᠦᠭᠡᠢ ᠰᠤᠮᠤ ᠨᠤᠭᠤᠳ ᠢᠰᠬᠡᠷᠦᠯᠳᠦᠨ ᠬᠠᠳᠠ ᠮᠥᠷᠭᠥᠭᠡᠳ ᠶᠣᠣᠯᠠᠨ ᠤᠨᠠᠨᠠ ᠁
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠳᠣᠲᠣᠷᠠ 《ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠤ᠋ ᠪᠠᠨ ᠠᠴᠢ ᠪᠠᠷ ᠰᠤᠮᠤᠨ ᠮᠥᠨᠳᠥᠷ ᠦ᠋ᠨ ᠢᠰᠬᠡᠷᠬᠦ ᠱᠤᠤᠭᠢᠶᠠᠨ ᠢ᠋ ᠵᠠᠢᠯᠠᠭᠤᠯᠵᠤ ᠪᠦᠬᠦᠯᠢ ᠬᠣᠶᠠᠷ ᠡᠳᠦᠷ ᠬᠣᠶᠠᠷ ᠰᠥᠨᠢ ᠲᠡᠰᠴᠦ ᠪᠠᠢᠭᠠ ᠨᠢ ᠲᠡᠷᠡ ᠭᠡᠵᠦ ᠪᠠᠷᠳᠠᠮ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ 《 ᠪᠤᠷᠤᠪᠠᠨᠳᠢ ᠠ᠋᠂ ᠡᠭᠦᠨ ᠢ᠋ ᠨᠣᠴᠣᠭᠠ ! ᠪᠢᠲᠡᠭᠡᠢ ᠠᠶᠤ᠂ ᠶᠠᠭᠤᠨ ᠳ᠋ᠤ᠌ ᠭᠠᠷ ᠴᠢᠨᠢ ᠰᠠᠯᠭᠠᠨᠠᠭᠠ ᠪᠣᠢ ᠭᠡᠬᠦ ᠳ᠋ᠦ᠍ ᠪᠤᠷᠤᠪᠠᠨᠳᠢ 《 ᠵᠠ᠂ ᠪᠠᠭᠰᠢ ᠠ᠋᠂ ᠣᠳᠣᠬᠠᠨ ! 》 ᠭᠡᠳ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠨᠢᠭᠡ ᠭᠣᠳᠣᠯᠢ ᠴᠦᠳᠡᠩ ᠵᠢᠷᠤᠵᠤ ᠨᠣᠴᠣᠭᠠᠭᠠᠳ ᠲᠠᠬᠢᠯ ᠤ᠋ᠨ ᠵᠤᠯᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠦᠷᠭᠡᠬᠦ ᠲᠡᠢ ᠵᠡᠷᠭᠡ ᠨᠢᠭᠦᠯᠲᠦ ᠨᠢᠭᠡ ᠰᠤᠮᠤ ᠪᠤᠷᠤᠪᠠᠨᠳᠢ ᠶ᠋ᠢᠨ ᠴᠦᠳᠡᠩ ᠠᠳᠬᠤᠭᠰᠠᠨ ᠭᠠᠷ ᠢ᠋ ᠨᠢ ᠬᠤᠭᠤ ᠫᠤᠤᠳᠠᠪᠠ᠃ 《ᠠᠶᠠ ! ᠪᠠᠭᠰᠢ ᠠ᠋ !》 ᠭᠡᠵᠦ ᠤᠤᠯᠭᠠ ᠠᠯᠳᠠᠵᠤ ᠵᠠᠪᠳᠤᠪᠠ ᠤᠤ ᠦᠭᠡᠢ ᠤᠤ ᠥᠨᠥᠬᠢ ᠰᠤᠮᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠴᠢᠬᠢᠨ ᠦ᠌ ᠬᠤᠯᠤᠭᠤ ᠶ᠋ᠢ ᠶᠠᠩᠭᠢᠨᠠᠲᠠᠯᠠ ᠱᠤᠤᠭᠢᠨ ᠢᠰᠬᠡᠷᠪᠡ᠃
ᠪᠤᠷᠤᠪᠠᠨᠳᠢ ᠪᠠᠭᠤᠤ ᠪᠠᠷ ᠢ᠋ᠶ᠋ᠠᠨ ᠮᠡᠳᠡᠭᠡ ᠠᠯᠳᠠᠵᠤ ᠴᠢᠰᠤ ᠰᠠᠷᠬᠢᠨ ᠤᠨᠵᠢᠭᠢᠨᠠᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠲᠡᠪᠡᠷᠢᠨ᠄
— ᠳᠡ ᠪᠠᠭᠰᠢ ᠠ᠋ ! ᠵᠤᠯᠠ ᠁ ᠵᠤᠯᠠ ᠨᠣᠴᠣᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠁ ᠳᠡᠢᠯᠬᠦ ᠦᠭᠡᠢ ᠪᠣᠯᠪᠠ ᠁ ᠭᠡᠳ ᠡᠪᠡᠳᠬᠦ ᠪᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠣᠰᠴᠤ ᠪᠠᠭᠰᠢ ᠳ᠋ᠠᠭᠠᠨ ᠠᠭᠤᠴᠢᠯᠠᠰᠢ ᠦᠭᠡᠢ ᠶᠡᠬᠡ ᠣᠰᠣᠯ ᠬᠢᠭᠰᠡᠨ ᠬᠥᠮᠦᠨ ᠮᠡᠲᠦ ᠪᠡᠷ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠶ᠋ᠢᠨ ᠡᠮᠦᠨᠡ ᠪᠤᠷᠤᠭᠤ ᠮᠡᠳᠡᠨ ᠵᠣᠭᠰᠣᠲᠠᠯᠠ ᠲᠠᠯᠤᠨ ᠤ᠋ ᠠᠷᠤ ᠠ᠋ᠴᠠ ᠨᠢ ᠪᠠᠰᠠ ᠨᠢᠭᠡ ᠰᠤᠮᠤ ᠱᠤᠤᠭᠢᠵᠤ ᠢᠷᠡᠭᠡᠳ ᠪᠤᠷᠤᠪᠠᠨᠳᠢ ᠶ᠋ᠢᠨ ᠵᠢᠷᠦᠬᠡ ᠶ᠋ᠢ ᠰᠦᠪᠡᠯᠡᠵᠡᠢ᠃ ᠪᠤᠷᠤᠪᠠᠨᠳᠢ ᠶᠠᠭᠤ ᠨᠢᠭᠡ ᠬᠦᠴᠦᠲᠡᠨ ᠳ᠋ᠦ᠍ ᠨᠦᠳᠦᠭᠦᠯᠦᠭᠰᠡᠨ ᠰᠢᠭ ᠨᠢᠳᠦ ᠨᠢ ᠬᠠᠷᠠᠩᠭᠤᠢᠳᠠᠵᠤ᠂ ᠭᠤᠢᠪᠢᠨ ᠲᠠᠢᠪᠠᠯᠵᠠᠭᠰᠠᠭᠠᠷ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠶ᠋ᠢᠨ ᠡᠮᠦᠨᠡᠬᠢ ᠲᠠᠬᠢᠯ ᠵᠤᠯᠠ᠂ ᠰᠤᠳᠤᠷ ᠨᠣᠮ᠂ ᠰᠠᠴᠤᠯᠢ ᠶ᠋ᠢᠨ ᠴᠥᠭᠥᠴᠡ᠂ ᠰᠡᠷᠵᠢᠮ ᠦ᠋ᠨ ᠡᠷᠭᠦᠴᠡ ᠳᠦᠭᠦᠷᠡᠩ ᠦᠷᠦᠭᠡᠰᠦᠲᠡᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠯᠢᠭᠡ ᠲᠦᠷᠦᠭᠦᠯᠡᠨ ᠣᠢᠴᠢᠪᠠ᠃ ᠥᠨᠥᠬᠢ ᠰᠢᠭᠡᠰᠦ ᠠᠯᠳᠠᠳᠠᠭ ᠯᠠᠮᠠ ᠴᠤ᠌ ᠴᠠᠭᠠᠰᠢ ᠪᠠᠨ ᠬᠠᠨᠳᠤᠵᠤ ᠲᠣᠩᠭᠣᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠨᠲᠣᠭᠣᠷ ᠢ᠋ᠶ᠋ᠠᠨ ᠴᠥᠮᠥ ᠫᠤᠤᠳᠠᠭᠤᠯᠵᠤ ᠶᠣᠣᠯᠠᠨ ᠬᠠᠢᠯᠠᠨ ᠬᠡᠪᠲᠡᠨᠡ᠃ ᠴᠠᠭᠠᠳᠤ ᠬᠡᠳᠦᠨ ᠯᠠᠮᠠ ᠨᠠᠷ ᠬᠠᠳᠠ ᠪᠤᠲᠠᠨ ᠤ᠋ ᠠᠷᠤ ᠪᠠᠷ ᠰᠢᠷᠭᠤᠵᠤ ᠤᠲᠠᠰᠤᠨ ᠠᠮᠢ ᠪᠠᠨ ᠬᠠᠢᠷᠠᠯᠠᠨ ᠪᠣᠯᠳᠠᠭ ᠰᠠᠨ ᠪᠣᠯ ᠪᠠᠲᠠᠭᠠᠨᠠ ᠴᠤ᠌ ᠪᠣᠯᠵᠤ ᠬᠤᠪᠢᠯᠤᠭᠠᠳ ᠨᠢᠭᠤᠭᠳᠠᠬᠤ ᠰᠠᠨ ᠭᠡᠵᠦ ᠴᠢᠴᠠᠭᠠ ᠠᠯᠳᠠᠨᠠ᠃ ᠡᠳᠡᠭᠡᠷ ᠢ᠋ ᠬᠠᠷᠠᠨ ᠪᠠᠢᠵᠤ ᠲᠦᠪᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠱᠠᠪᠢ ᠪᠠᠨ ᠲᠡᠪᠡᠷᠢᠨ ᠪᠣᠰᠴᠤ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠠᠵᠠᠭᠤᠬᠠᠨ ᠲᠠᠯᠠ ᠳ᠋ᠤ᠌ ᠬᠠᠭᠠᠯᠭᠠ ᠰᠢᠭ᠋ ᠬᠠᠯᠬᠠᠪᠴᠢ ᠲᠠᠢ ᠰᠡᠷᠪᠡᠭᠡ ᠬᠠᠳᠠᠨ ᠤ᠋ ᠠᠷᠤ ᠳ᠋ᠤ᠌ ᠪᠤᠷᠤᠪᠠᠨᠳᠢ ᠪᠠᠨ ᠲᠡᠭᠰᠢᠬᠡᠨ ᠬᠡᠪᠲᠡᠭᠥᠯᠵᠤ ᠡᠩᠭᠡᠯᠵᠡᠭᠦᠷ ᠢ᠋ ᠨᠢ ᠲᠠᠢᠯᠤᠨ ᠡᠷᠡ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠬᠥᠬᠡ ᠪᠠᠯ ᠪᠣᠯᠤᠭᠰᠠᠨ ᠣᠩᠭᠣᠢ ᠨᠥᠵᠢ ᠲᠡᠢ ᠰᠣᠷᠪᠢᠨ ᠠ᠋ᠴᠠ ᠬᠦᠷᠡᠩ ᠬᠠᠷᠠ ᠴᠢᠰᠤ ᠪᠤᠷᠭᠢᠯᠬᠤ ᠶ᠋ᠢ ᠨᠢᠳᠤ ᠬᠠᠯᠢᠷᠠᠩᠬᠠᠨ ᠬᠠᠷᠠᠵᠤ ᠨᠥᠵᠢᠷᠡᠭᠰᠡᠨ ᠰᠣᠷᠪᠢᠨ ᠳ᠋ᠤ᠌ ᠬᠣᠰᠢᠭᠤ ᠪᠠᠨ ᠨᠠᠭᠠᠵᠤ ᠮᠠᠭᠤ ᠴᠢᠰᠤ ᠶ᠋ᠢ ᠨᠢ ᠱᠥᠷᠴᠢᠭᠢᠨᠡᠳᠡᠯᠡ ᠰᠣᠷᠣᠪᠠ᠃ ᠲᠡᠭᠦᠨ ᠤ ᠲᠠᠩᠨᠠᠢ ᠳ᠋ᠤ᠌ ᠱᠠᠪᠢ ᠶ᠋ᠢᠨ ᠬᠢᠨᠢ ᠪᠦᠯᠢᠶᠡᠨ ᠱᠣᠷᠪᠣᠭ ᠴᠢᠰᠤ ᠪᠠ ᠡᠬᠡᠭᠦᠨ ᠭᠠᠰᠢᠭᠤᠨ ᠳᠠᠷᠢ ᠶ᠋ᠢᠨ ᠠᠮᠲᠠ ᠬᠣᠯᠢᠭᠳᠠᠵᠤ ᠠᠮᠲᠠᠯᠠᠭᠳᠠᠨᠠ᠃ ᠰᠤᠷᠤᠭᠰᠠᠨ ᠡᠯᠢᠭᠡᠨ ᠴᠢᠰᠤ ᠶ᠋ᠢ ᠴᠠᠭᠠᠰᠢ ᠲᠣᠩᠭᠣᠢᠨ ᠪᠠᠷᠤᠭ ᠨᠢᠭᠡ ᠱᠠᠭᠠᠵᠠᠩ ᠬᠢᠷᠢᠲᠠᠢ ᠨᠥᠵᠢᠷᠡᠭᠰᠡᠨ ᠴᠢᠰᠤ ᠨᠤᠯᠮᠤᠬᠤ ᠳ᠋ᠤ᠌ ᠴᠠᠭᠠᠳᠤ ᠬᠠᠳᠠᠨ ᠳᠡᠭᠡᠷᠡ ᠳ᠋ᠢᠷᠠᠩ ᠭᠡᠵᠦ ᠣᠢᠴᠢᠬᠤ ᠲᠡᠮᠦᠷ ᠦ᠋ᠨ ᠳᠠᠭᠤᠨ ᠰᠣᠨᠣᠰᠳᠠᠪᠠ᠃ ᠬᠠᠷᠠᠬᠤᠯᠠ᠂ ᠰᠢᠳᠤᠷᠭᠤ ᠱᠠᠪᠢ ᠶ᠋ᠢᠨ ᠬᠢᠨᠢ ᠠᠮᠢ ᠶ᠋ᠢ ᠨᠢ ᠠᠪᠤᠭᠰᠠᠨ ᠵᠠᠨᠤᠯᠲᠤ ᠰᠤᠮᠤ ᠶ᠋ᠢᠨ ᠲᠣᠯᠣᠭᠠᠢ ᠪᠠᠢᠯᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠳ᠋ᠠᠭᠳᠠᠨ ᠯᠠᠮᠠ ᠲᠡᠷᠡ ᠰᠤᠮᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠢᠯᠡᠭᠦᠦ ᠳᠤᠲᠠᠭᠤ ᠶᠠᠭᠤᠮᠠ ᠪᠣᠳᠣᠬᠤ ᠰᠠᠨᠠᠭᠠ ᠠᠯᠠᠭᠠ᠃ ᠪᠣᠯᠳᠠᠭ ᠰᠠᠨ ᠪᠣᠯ ᠪᠤᠷᠤᠪᠠᠨᠳᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢ ᠶ᠋ᠢ ᠦᠳᠲᠡᠷ ᠲᠦᠷᠭᠡᠨ ᠡᠨᠡᠷᠢᠨ ᠠᠪᠬᠤ ᠶᠤᠮᠰᠠᠨ ᠭᠡᠵᠦ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ ᠨᠢ ᠬᠥᠨᠳᠡᠢᠬᠡᠨ ᠡᠷᠭᠦᠵᠦ ᠡᠪᠦᠷ ᠳᠡᠭᠡᠷᠡ ᠪᠡᠨ ᠬᠡᠪᠲᠡᠭᠥᠯᠥᠭᠡᠳ ᠡᠪᠦᠷ ᠡᠴᠡ ᠪᠡᠨ ᠰᠠᠮᠪᠠᠢ ᠭᠠᠷᠭᠠᠵᠤ ᠲᠠᠯᠤᠨ ᠤ᠋ ᠬᠣᠭᠣᠷᠣᠨᠳᠣᠬᠢ ᠰᠤᠮᠤ ᠰᠦᠪᠡᠯᠡᠭᠰᠡᠨ ᠰᠢᠷᠬᠠ ᠶ᠋ᠢ ᠨᠢ ᠵᠢᠭᠢᠷᠢᠭᠯᠡᠵᠦ ᠡᠪᠲᠡᠢᠬᠡᠨ ᠵᠥᠭᠡᠯᠡᠷᠡᠭᠦᠯᠵᠦ ᠥᠭᠭᠥᠨ ᠳᠠᠬᠢᠭᠠᠳ ᠪᠠᠰᠠ ᠨᠢᠭᠡ ᠣᠭᠣᠴᠢ ᠴᠢᠰᠤ ᠰᠣᠷᠣᠬᠤ ᠳ᠋ᠤ᠌ ᠪᠤᠷᠤᠪᠠᠨᠳᠢ ᠨᠢᠳᠦ ᠪᠡᠨ ᠨᠡᠭᠡᠭᠡᠭᠡᠳ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠰᠡᠨ ᠰᠢᠭ ᠤᠷᠤᠭᠤᠯ ᠨᠢ ᠣᠮᠣᠯᠵᠠᠪᠠ᠃ ᠲᠡᠭᠦᠨ ᠦ᠌ ᠤᠷᠤᠭᠤᠯ ᠨᠢ ᠬᠥᠷᠥᠰᠥᠯᠡᠵᠦ ᠬᠣᠭᠣᠯᠠᠢ ᠨᠢ ᠬᠠᠲᠠᠵᠤ ᠪᠠᠢᠭᠠ ᠶᠠᠩᠵᠤᠲᠠᠢ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠴᠠᠭᠠᠰᠢ ᠡᠷᠭᠢᠨ ᠨᠥᠭᠦᠭᠡ ᠪᠠᠯᠢᠩ ᠤ᠋ᠳ ᠤ᠋ᠨ ᠠᠮᠢᠰᠬᠤᠭᠠ ᠲᠠᠢ ᠪᠠᠢᠭᠠ ᠨᠢᠭᠡ ᠶ᠋ᠢ ᠨᠢ ᠵᠠᠷᠤᠵᠤ ᠨᠢᠭᠡ ᠣᠭᠣᠴᠢ ᠤᠰᠤ ᠠᠪᠤᠭᠤᠯᠬᠤ ᠶᠤᠮᠰᠠᠨ ᠭᠡᠰᠡᠨ ᠪᠣᠯᠪᠠᠴᠤ ᠭᠠᠵᠠᠷᠳᠠᠪᠠ᠃ ᠰᠠᠨᠳᠤᠷᠴᠤ ᠲᠡᠪᠡᠳᠡᠭᠰᠡᠨ ᠦᠶᠡ ᠳ᠋ᠦ᠍ ᠳᠠᠮ ᠪᠤᠯᠤᠭᠠᠳᠠᠬᠠᠮᠠᠷ ᠶᠠᠭᠤᠮᠠ ᠠᠯᠠᠭᠠ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠪᠤᠷᠤᠪᠠᠨᠳᠢ ᠶ᠋ᠢ ᠠᠶᠠᠷᠬᠠᠨ ᠲᠡᠪᠡᠷᠢᠵᠦ ᠬᠥᠰᠡᠷ ᠳᠠᠬᠢᠨ ᠲᠡᠭᠰᠢᠬᠡᠨ ᠬᠡᠪᠲᠡᠭᠥᠯᠥᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠴᠤ ᠰᠠᠴᠤᠯᠢ ᠶ᠋ᠢᠨ ᠪᠤᠮᠪᠠ ᠲᠠᠢ ᠡᠮ ᠨᠠᠢᠷᠠᠭᠰᠠᠨ ᠷᠠᠰᠢᠶᠠᠨ ᠠ᠋ᠴᠠ ᠲᠡᠭᠦᠨ ᠦ᠌ ᠬᠤᠰᠢᠭᠤᠨ ᠳ᠋ᠤ᠌ ᠣᠢᠷᠠᠲᠤᠭᠤᠯᠤᠨ ᠬᠣᠶᠠᠷ ᠣᠭᠣᠴᠢ ᠷᠠᠰᠢᠶᠠᠨ ᠤᠰᠤ ᠵᠠᠯᠭᠢᠭᠤᠯᠪᠠ᠃ ᠬᠣᠶᠠᠷᠬᠠᠨ ᠣᠭᠣᠴᠢ ᠷᠠᠰᠢᠶᠠᠨ ᠵᠠᠯᠭᠢᠯᠠᠭᠰᠠᠨ ᠪᠤᠷᠤᠪᠠᠨᠳᠢ ᠶ᠋ᠢᠨ ᠨᠢᠳᠦ ᠨᠢ ᠰᠡᠷᠭᠦᠵᠦ᠄
— ᠪᠠᠭ ᠁ ᠪᠠᠭᠰᠢ ᠠ᠋ ᠁ ᠲᠡᠷᠡ ᠂ ᠲᠡᠷᠡ ᠁ ᠠ ᠁ ᠠᠮᠢ ᠁ ᠠᠮᠢᠨᠰ ( ᠠᠮᠢᠨ ᠰᠠᠬᠢᠶᠠ ) ᠭᠡᠬᠦ ᠳᠤᠲᠠᠭᠤ ᠵᠡᠮᠳᠡᠭ ᠠᠪᠢᠶᠠ ᠲᠤᠩ ᠵᠦᠳᠡᠷᠡᠭᠦᠬᠡᠨ ᠴᠤᠪᠤᠷᠠᠵᠤ ᠭᠠᠷᠤᠭᠰᠠᠨ ᠢ᠋ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠦᠯᠦ ᠣᠢᠯᠠᠭᠠᠨᠠ᠃ ᠡᠴᠦᠰ ᠲᠦ᠍ ᠳ᠋ᠠᠭᠳᠠᠨ ᠳᠠ ᠯᠠᠮᠠ 《 ᠪᠠᠭᠰᠢ ᠠ᠋ ᠂ ᠲᠡᠷᠡ ( ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ ) ᠢ᠋ᠶ᠋ᠠᠨ ᠡᠦᠲᠦ ᠮᠢᠨᠦ ᠬᠦᠵᠦᠭᠦᠨ ᠳ᠋ᠦ᠍ ᠬᠤᠷᠳᠤᠨ ᠵᠡᠭᠦᠯᠭᠡᠴᠢᠬᠡ ! ᠲᠡᠭᠡᠪᠡᠯ ᠮᠢᠨᠦ ᠠᠮᠢ ᠶ᠋ᠢ ᠠᠪᠤᠷᠠᠵᠤ ᠴᠢᠳᠠᠨᠠ 》 ᠭᠡᠵᠦ ᠬᠡᠯᠡᠵᠦ ᠪᠠᠢᠬᠤ ᠪᠠᠷ ᠣᠢᠯᠠᠭᠠᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠦᠵᠦᠭᠦᠨ ᠳ᠋ᠡᠬᠢ 《 ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ 》 ᠢ᠋ᠶ᠋ᠠᠨ ᠪᠠᠭᠤᠯᠭᠠᠵᠤ ᠪᠤᠷᠤᠪᠠᠨᠳᠢ ᠶ᠋ᠢᠨ ᠬᠦᠵᠦᠭᠦᠨ ᠳ᠋ᠦ᠍ ᠨᠢᠮᠪᠠᠢᠬᠠᠨ ᠵᠡᠭᠦᠯᠭᠡᠪᠡ᠃ ᠪᠤᠷᠤᠪᠠᠨᠳᠢ ᠲᠣᠯᠣᠭᠠᠢ ᠪᠠᠨ ᠮᠠᠰᠢ ᠬᠦᠴᠢᠷᠳᠡᠯᠲᠡᠢ ᠰᠠᠵᠢᠯᠠᠨᠠ᠃ 《ᠡᠦᠲᠦ ᠡᠭᠦᠨ ᠢ᠋ ᠨᠠᠳᠠ ᠵᠡᠭᠦᠯᠭᠡᠭᠡᠳ ᠣᠷᠣᠢᠳᠠᠴᠢᠬᠠᠯᠠ᠂ ᠮᠢᠨᠦ ᠠᠮᠢ ᠶ᠋ᠢ ᠠᠪᠤᠷᠠᠵᠤ ᠳᠡᠢᠯᠬᠦ ᠪᠡᠨ ᠪᠣᠯᠢᠭᠰᠠᠨ ! 》 ᠭᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠪᠤᠷᠤᠪᠠᠨᠳᠢ ᠶ᠋ᠢᠨ ᠲᠣᠯᠣᠭᠠᠢ ᠰᠠᠵᠢᠭᠰᠠᠨ ᠠ᠋ᠴᠠ ᠣᠢᠯᠠᠭᠠᠬᠤ ᠳ᠋ᠠᠭᠠᠨ 《ᠶᠠᠭᠠᠷᠠᠪᠠᠯ ᠰᠠᠭᠠᠷᠠᠨᠠ ᠭᠡᠳᠡᠭ ᠶᠦᠮ᠂ ᠪᠢ ᠶᠠᠭᠠᠬᠢᠭᠰᠠᠨ ᠵᠥᠨᠥᠭ ᠲᠣᠯᠣᠭᠠᠢ ᠪᠣᠢ ? ᠡᠷᠲᠡᠬᠡᠨ ᠲᠡᠭᠦᠨ ᠳ᠋ᠦ᠍ ᠵᠡᠭᠦᠯᠭᠡᠬᠦ ᠪᠡᠨ ᠶᠠᠭᠠᠬᠢᠯᠠ ⁈ ᠭᠡᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠨ ᠯᠠᠩᠳᠤᠤ ᠰᠢᠭ᠋ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠬᠦᠷᠡᠩ ᠮᠠᠩᠨᠠᠢ ᠪᠠᠨ ᠰᠢᠭᠠᠵᠤ ᠭᠠᠰᠠᠯᠤᠨᠠ᠃
ᠪᠤᠷᠤᠪᠠᠨᠳᠢ ᠶ᠋ᠢᠨ ᠠᠮᠢᠰᠬᠤᠭᠠ ᠲᠠᠰᠤᠷᠠᠪᠠ᠃
《 ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ 》 ᠴᠤ᠌ ᠪᠤᠷᠤᠪᠠᠨᠳᠢ ᠶ᠋ᠢᠨ ᠠᠮᠢ ᠶ᠋ᠢ ᠠᠪᠤᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠠ᠋ ! ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠱᠠᠪᠢ ᠪᠠᠨ ᠡᠨᠡᠷᠢᠭᠰᠡᠨ ᠨᠢᠩᠵᠢᠨ ᠰᠡᠳᠬᠢᠯ ᠴᠤ᠌ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ ᠠ᠋ !
ᠪᠤᠷᠤᠪᠠᠨᠳᠢ ᠶ᠋ᠢᠨ ᠴᠡᠭᠡᠵᠢᠨ ᠦ᠌ ᠬᠥᠨᠳᠡᠢ ᠶ᠋ᠢᠨ ᠬᠥᠬᠡ ᠪᠠᠯ ᠪᠣᠯᠤᠭᠰᠠᠨ ᠰᠣᠷᠪᠢᠨ ᠠ᠋ᠴᠠ ᠪᠤᠷᠭᠢᠯᠤᠭᠰᠠᠨ ᠬᠦᠷᠡᠩ ᠬᠠᠷᠠ ᠴᠢᠰᠤ ᠬᠥᠭᠡᠰᠦ ᠪᠣᠯᠵᠤ ᠫᠣᠷ ᠫᠣᠷ ᠬᠥᠭᠡᠰᠦᠷᠡᠨᠡ᠃ ᠲᠡᠷᠡ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠨᠢᠳᠦ ᠪᠡᠨ ᠪᠦᠯᠲᠡᠢᠨ ᠬᠠᠷᠠᠵᠤ᠂ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠥᠮᠦᠰᠬᠡᠨ ᠰᠡᠵᠢᠭᠦᠷ ᠢ᠋ᠶ᠋ᠡᠷ ᠴᠡᠩᠬᠡᠷᠯᠡᠨ ᠬᠠᠷᠠᠭᠳᠠᠬᠤ ᠬᠥᠬᠡ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠶ᠋ᠢ ᠰᠢᠷᠲᠡᠩᠭᠡᠨ ᠬᠡᠨ ᠨᠢᠭᠡ ᠶ᠋ᠢ ᠦᠯᠡᠮᠵᠢ ᠬᠤᠷᠤᠰᠤᠯᠲᠠᠢᠬᠠᠨ ᠵᠠᠨᠤᠵᠤ ᠪᠠᠢᠭᠠ ᠣᠪᠣᠷ ᠲᠠᠢ ᠶᠠᠪᠤᠴᠢᠬᠠᠯᠠ ᠁
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠰᠢᠳᠤᠷᠭᠤ ᠱᠠᠪᠢ ᠪᠤᠷᠤᠪᠠᠨᠳᠢ ᠶ᠋ᠢᠨ ᠪᠦᠯᠲᠡᠢᠭᠰᠡᠨ ᠨᠢᠳᠦ ᠶ᠋ᠢ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠳᠠᠷᠤᠰᠬᠢᠨ ᠠᠶᠠᠷ ᠠᠨᠢᠭᠤᠯᠵᠤ᠂ ᠬᠠᠯᠢᠭᠰᠠᠨ ᠰᠦᠨᠡᠰᠦ ᠶ᠋ᠢ ᠨᠢ ᠠᠮᠤᠷᠵᠢᠭᠤᠯᠬᠤ ᠲᠠᠷᠨᠢ ᠤᠩᠰᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠷ ᠭᠠᠷ ᠢ᠋ ᠨᠢ ᠷᠠᠰᠢᠶᠠᠨ ᠤᠰᠤ ᠪᠠᠷ ᠠᠷᠢᠭᠤᠳᠬᠠᠨ ᠤᠬᠢᠶᠠᠵᠤ᠂ ᠠᠮᠤᠷᠯᠢᠩᠭᠤᠢ ᠴᠢᠷᠠᠢ ᠶ᠋ᠢ ᠨᠢ ᠬᠠᠳᠠᠭ ᠢ᠋ᠶ᠋ᠠᠷ ᠪᠦᠲᠡᠭᠡᠵᠦ ᠲᠠᠯᠪᠢᠭᠠᠳ ᠠᠷᠴᠠ ᠤᠭᠤᠭᠢᠭᠤᠯᠤᠨ ᠰᠠᠩ ᠲᠠᠯᠪᠢᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠠᠩᠬᠠ ᠨᠤᠯᠮᠤᠭᠰᠠᠨ ᠨᠦᠵᠢᠷᠡᠩᠬᠡᠢ ᠴᠢᠰᠤᠨ ᠳᠣᠲᠣᠷᠠ ᠠ᠋ᠴᠠ ᠤᠨᠠᠭᠰᠠᠨ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠲᠡᠭᠦᠵᠦ ᠠᠪᠤᠨ ᠬᠣᠷᠮᠣᠢ ᠪᠠᠷ ᠢ᠋ᠶ᠋ᠠᠨ ᠴᠢᠰᠤ ᠶ᠋ᠢ ᠨᠢ ᠵᠦᠯᠭᠦᠵᠦ ᠴᠡᠪᠡᠷᠯᠡᠭᠡᠳ ᠪᠠᠷᠪᠠᠭᠠᠷ ᠲᠣᠮᠣ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ 《 ᠮᠠᠭᠤ ᠡᠮᠡ ᠶ᠋ᠢᠨ ᠰᠢᠭᠡᠵᠡᠢ ᠬᠤᠷᠤᠭᠤ ᠰᠢᠭ᠋ ᠵᠢᠭᠠᠬᠠᠨ ᠱᠣᠷᠣᠨ ᠦᠵᠦᠭᠦᠷᠲᠦ ᠲᠡᠮᠦᠷ ᠯᠠ ᠪᠠᠢᠨᠠ ᠳᠠ ᠴᠢ ! ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠢᠩᠭᠢᠵᠦ ᠨᠢᠳᠦ ᠦᠭᠡᠢ ᠲᠣᠯᠣᠭᠠᠢᠯᠠᠨ ᠱᠤᠤᠭᠢᠵᠤ ᠢᠷᠡᠭᠡᠳ ᠭᠡᠮ ᠬᠣᠣᠷ ᠦᠭᠡᠢ ᠡᠷᠡ ᠬᠠᠩᠭᠠᠢ ᠨᠢᠭᠡ ᠪᠤᠯᠢᠶᠠᠨ ᠠᠮᠢ ᠶ᠋ᠢ ᠬᠥᠨᠥᠭᠡᠴᠢᠬᠡᠳᠡᠭ ᠨᠢ ᠪᠣᠢ ! ᠪᠤᠷᠤᠪᠠᠨᠳᠢ ᠠ᠋᠂ ᠴᠢ ᠰᠣᠨᠣᠰᠴᠤ ᠪᠠᠢ ! ᠡᠨᠡ ᠶᠠᠭᠤ ᠪᠣᠢ ? ᠡᠨᠡ ᠬᠡᠨ ᠪᠣᠢ ? ᠡᠨᠡ ᠪᠣᠯ < ᠡᠷᠬᠡ > ! ᠡᠨᠡ ᠪᠣᠯ ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠮᠥᠨ ! ᠪᠠᠢᠵᠠ᠂ ᠴᠢ ᠰᠠᠶᠢ ᠨᠠᠳᠠ ᠶᠠᠭᠤ ᠶᠠᠷᠢᠪᠠ ? < ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ > ᠳ᠋ᠠᠭᠠᠨ ᠲᠦᠰᠢᠵᠦ ᠰᠠᠭᠤᠭᠠᠳ ᠢᠲᠡᠭᠡᠭᠰᠡᠨ ᠴᠢᠨᠢ ᠬᠠᠮᠢᠭᠠ ᠪᠣᠢ ? ᠭᠡᠵᠦ ᠨᠠᠳᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠤᠤ ? ᠪᠢᠰᠢ ! ᠮᠢᠨᠦ < ᠠᠮᠢᠨ ᠰᠠᠬᠢᠶᠠ ᠵᠠᠰᠠᠷᠠᠶᠠ ᠪᠤᠷᠬᠠᠨ > ᠠᠨᠳᠠᠭᠠᠢ ᠲᠠᠢ ᠰᠠᠢᠨ ᠪᠤᠷᠬᠠᠨ ᠰᠢᠦ ! ᠮᠠᠭᠤ ᠮᠠᠭᠤᠬᠠᠢ᠂ ᠲᠡᠷᠰ ᠨᠣᠮ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠲᠠᠩᠳᠠ ᠪᠡᠶᠡ ᠡᠴᠡ ᠮᠢᠨᠢ ᠵᠠᠢᠯᠠᠭᠤᠯᠵᠤ ᠴᠢᠳᠠᠳᠠᠭ ᠤᠪᠠᠳᠢᠰ ᠲᠠᠢ ᠪᠠᠢᠳᠠᠭ ᠶᠤᠮ ᠠ᠋ ! 》 ᠭᠡᠵᠦ ᠳᠦᠳᠦᠨᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ 《ᠲᠡᠭᠡᠭᠡᠳ ᠶᠠᠭᠠᠬᠢᠪᠠ ? ᠡᠴᠦᠰ ᠲᠡᠭᠡᠨ ᠶᠠᠭᠤ ᠪᠣᠯᠪᠠ ? ᠰᠢᠳᠤᠷᠭᠤ ᠱᠠᠪᠢ ᠴᠢᠨᠢ ⁈ 》 ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠠᠬᠢᠷ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠠᠰᠠᠭᠤᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠵᠣᠷᠢᠭ ᠨᠢ ᠮᠣᠬᠣᠷᠠᠪᠠ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠪᠤᠷᠤᠪᠠᠨᠳᠢ ᠶ᠋ᠢᠨ ᠬᠦᠵᠦᠭᠦᠨ ᠡᠴᠡ ᠥᠨᠥᠬᠢ 《ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠢ᠋ᠶ᠋ᠠᠨ ᠠᠶᠠᠷᠬᠠᠨ ᠪᠠᠭᠤᠯᠭᠠᠵᠤ ᠠᠪᠤᠭᠠᠳ ᠬᠣᠶᠠᠷ ᠠᠯᠭᠠᠨ ᠳ᠋ᠠᠭᠠᠨ ᠨᠢᠮᠪᠠᠢᠯᠠᠨ ᠪᠢᠲᠡᠭᠦᠯᠡᠵᠦ ᠳᠠᠯᠳᠠ ᠤᠬᠠᠭᠠᠨ ᠳ᠋ᠠᠭᠠᠨ 《 ᠪᠤᠷᠬᠠᠨ ᠮᠢᠨᠢ ᠠ᠋ ! ᠴᠢ ᠮᠢᠨᠢ ᠮᠢᠨᠦ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠭᠰᠠᠨ ᠵᠦᠭ ᠲᠦ᠍ ᠠᠶᠠᠷᠯᠠᠨ ᠶᠠᠪᠤᠵᠤ ᠤᠷᠠᠳ ᠶᠠᠰᠤᠲᠠᠨ ᠤ᠋ ᠮᠢᠨᠢ ᠨᠢᠭᠡ ᠰᠠᠢᠨ ᠡᠷᠡ ᠶ᠋ᠢ ᠬᠠᠮᠠᠭᠠᠯᠠᠵᠤ ᠠᠪᠤᠭᠠᠷᠠᠢ ! ᠲᠡᠷᠡ ᠪᠣᠯ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠤᠠᠯᠢ ᠬᠣᠢᠴᠢᠰ᠂ ᠭᠡᠰᠢᠭᠳᠡᠯᠭᠡᠷ ᠬᠦᠩ ᠨᠣᠶᠠᠨ ᠤ᠋ ᠲᠥᠷᠥᠭᠰᠡᠨ ᠦᠶᠡᠯᠢᠳ ᠠᠴᠢ᠂ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠥᠷᠥᠭᠰᠡᠨ ᠦᠶᠡᠯᠢᠳ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠭᠡᠭᠴᠢ ᠮᠥᠨ᠃ ᠲᠡᠭᠦᠨ ᠤ ᠦᠷᠡ ᠵᠤᠯᠵᠠᠭᠠ ᠦᠨᠳᠦᠰᠦ ᠤᠭᠰᠠᠭᠠ ᠶ᠋ᠢ ᠨᠢ ᠡᠨᠡᠷᠢᠨ ᠬᠠᠮᠠᠭᠠᠯᠠᠬᠤ ᠶ᠋ᠢ ᠮᠥᠷᠭᠥᠨ ᠳᠠᠭᠠᠳᠬᠠᠵᠤ ᠪᠠᠢᠨᠠ᠃ ᠪᠦᠬᠦ ᠶᠠᠯᠠ ᠨᠢᠭᠦᠯ ᠢ᠋ ᠪᠡᠶᠡ ᠳᠡᠭᠡᠷᠡ ᠪᠡᠨ ᠠᠪᠴᠤ ᠬᠣᠷᠢᠭᠯᠠᠶᠠ ! 》 ᠭᠡᠵᠦ ᠪᠢᠲᠡᠭᠦᠦ ᠲᠠᠩᠭᠠᠷᠢᠭ ᠬᠢᠭᠡᠳ《 ᠢᠷᠦᠭᠡᠯ ᠣᠷᠣᠰᠢᠲᠤᠭᠠᠢ ! 》 ᠭᠡᠵᠦ 《ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠢ᠋ᠶ᠋ᠠᠨ ᠦᠨᠦᠰᠦᠨ ᠲᠠᠷᠨᠢᠳᠠᠵᠤ ᠪᠦᠬᠦ ᠬᠦᠰᠡᠯ ᠵᠣᠷᠢᠯᠲᠠ ᠪᠠᠨ ᠨᠠᠢᠳᠠᠨ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠪᠠᠷᠠᠭᠤᠨ ᠡᠩᠭᠡᠷ ᠵᠦᠭ ᠰᠢᠲᠠᠪᠠ᠃ ᠤᠯᠠᠭᠠᠨ ᠥᠩᠭᠡᠲᠡᠢ ᠣᠭᠣᠰᠣᠷ ᠨᠢ ᠬᠥᠯᠥᠰᠥ ᠬᠬᠢᠷ ᠲᠦ᠍ ᠰᠢᠲᠠᠭᠳᠠᠨ ᠬᠦᠷᠡᠪᠲᠦᠷ ᠪᠣᠯᠤᠭᠰᠠᠨ ᠨᠠᠷᠢᠬᠠᠨ ᠣᠭᠣᠰᠣᠷ ᠲᠠᠢ ᠠᠯᠲᠠᠨ ᠪᠤᠷᠬᠠᠨ ᠵᠢᠭᠦᠷ ᠤᠷᠭᠤᠭᠰᠠᠨ ᠰᠢᠭ᠋ ᠪᠠᠷᠠᠭᠤᠨ ᠡᠩᠭᠡᠷ ᠲᠠᠢᠰᠢ ᠬᠠᠯᠢᠨ ᠳᠡᠭᠳᠡᠯᠡ ᠁ ᠳ᠋ᠠᠭᠳᠠᠨ ᠳᠠ ᠯᠠᠮᠠ《ᠠᠮᠢᠨ ᠰᠠᠬᠢᠶᠠ ᠪᠤᠷᠬᠠᠨ》 ᠤ᠋ ᠬᠣᠢᠨᠠ ᠠ᠋ᠴᠠ ᠬᠠᠷᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ 《ᠲᠠᠷᠨᠢ ᠪᠦᠷᠢᠳᠴᠦ ᠳᠠᠭᠠᠳᠬᠠᠯ ᠭᠦᠢᠴᠡᠪᠡᠰᠦ ᠠᠭᠠᠷᠤ ᠮᠣᠳᠣᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠡᠯᠭᠦᠭᠳᠡᠬᠦ ᠪᠣᠢ᠃ ᠲᠡᠭᠡᠪᠡᠯ ᠦᠶᠡᠯᠢᠳ ᠠᠴᠢ ᠬᠥᠪᠡᠭᠦᠨ ᠦ᠌ ᠮᠢᠨᠢ ᠠᠮᠤᠷ ᠮᠡᠨᠳᠦ ᠶ᠋ᠢ ᠪᠠᠲᠤᠯᠠᠵᠤ ᠳᠡᠢᠯᠬᠦ ᠶ᠋ᠢ ᠵᠥᠩᠨᠡᠶᠡ᠃ ᠬᠥᠰᠡᠷ ᠤᠨᠠᠵᠤ ᠬᠠᠳᠠᠨ ᠳ᠋ᠤ᠌ ᠮᠥᠷᠭᠥᠪᠡᠯ ᠬᠠᠷᠠᠰᠠᠯᠲᠤ ᠲᠡᠭᠦᠰᠬᠡᠯ ᠢ᠋ᠶ᠋ᠡᠷ ᠳᠠᠭᠤᠰᠬᠤ ᠪᠣᠢ ᠭᠡᠵᠦ ᠡᠮᠭᠡᠨᠢᠨ ᠪᠣᠳᠣᠶᠠ 》 ᠭᠡᠳ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ ᠳᠠᠭᠠᠳᠬᠠᠵᠤ ᠬᠦᠯᠢᠶᠡᠯᠡ᠃《ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠦᠨᠡᠬᠡᠷ ᠠᠭᠠᠷᠤ ᠮᠣᠳᠣᠨ ᠤ᠋ ᠰᠠᠯᠠᠭᠠᠨ ᠳᠡᠭᠡᠷᠡ ᠡᠯᠭᠦᠭᠳᠡᠭᠰᠡᠨ ᠬᠠᠷᠠᠭᠳᠠᠯᠠ ᠁ ᠵᠠ᠂ ᠪᠤᠷᠬᠠᠨ ᠭᠤᠩᠴᠤᠭᠰᠥ᠋ᠮ ᠮᠢᠨᠢ ! ᠰᠠᠨᠠᠭᠠ ᠠᠮᠠᠷᠠᠯᠠ ᠁ ᠭᠡᠵᠦ ᠤᠷᠲᠤᠬᠠᠨ ᠰᠡᠭᠦᠷᠡᠰᠦ ᠠᠯᠲᠠᠨ ᠪᠡᠶᠡ ᠡᠷᠭᠢᠲᠡᠯᠡ ᠴᠠᠭᠠᠳᠤ ᠬᠠᠳᠠᠨ ᠳᠡᠭᠡᠷᠡ ᠳ᠋ᠢᠩᠭᠠᠷ ! ᠭᠡᠬᠦ ᠳᠠᠭᠤ ᠭᠠᠷᠪᠠ᠃ ᠲᠡᠷᠡ ᠵᠦᠭ ᠲᠦ᠍ ᠬᠠᠷᠠᠬᠤᠯᠠ ᠠᠭᠠᠷᠤ ᠮᠣᠳᠣᠨ ᠤ᠋ ᠨᠠᠷᠢᠨ ᠮᠥᠴᠢᠷ ᠠᠯᠲᠠᠨ ᠪᠤᠷᠬᠠᠨ ᠢ ᠳᠠᠭᠠᠭᠠᠵᠤ ᠶᠠᠳᠠᠨ ᠨᠠᠢᠭᠤᠯᠵᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠯᠲᠠᠨ ᠪᠤᠷᠬᠠᠨ ᠤ᠋ ᠬᠦᠨᠳᠦ ᠳ᠋ᠦ᠍ ᠳᠠᠷᠤᠭᠳᠠᠨ ᠬᠤᠭᠤᠷᠠᠭᠠᠳ ᠪᠤᠷᠬᠠᠨ ᠭᠠᠵᠠᠷᠳᠠᠵᠤ ᠬᠠᠳᠠᠨ ᠳᠡᠭᠡᠷᠡ ᠤᠨᠠᠵᠠᠢ ᠁ ᠳ᠋ᠠᠭᠳᠠᠨ ᠯᠠᠯᠠ ᠪᠤᠷᠬᠠᠨ ᠤ᠋ ᠪᠠᠨ ᠭᠠᠵᠠᠷᠳᠠᠭᠰᠠᠨ ᠢ᠋ ᠴᠠᠭᠠᠰᠢ ᠪᠣᠳᠣᠬᠤ ᠠ᠋ᠴᠠ ᠪᠠᠨ ᠰᠢᠷᠬᠡᠢᠭᠰᠡᠨ ᠪᠣᠯᠪᠠᠴᠤ ᠵᠣᠷᠢᠭ ᠨᠢ ᠪᠦᠳᠦᠭᠦᠷᠡᠨ ᠥᠨᠥᠬᠢ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠭᠣᠣᠯ ᠤᠷᠤᠭᠤ ᠰᠢᠲᠠᠵᠤ 《ᠪᠤᠷᠬᠠᠨ ᠲᠡᠭᠷᠢ ᠴᠢ ᠨᠢᠳᠦ ᠲᠠᠢ ᠯᠠ ᠪᠣᠯ ᠡᠭᠦᠨ ᠢ᠋ᠶ᠋ᠡᠷ ᠰᠢᠷᠠᠪᠳᠤᠷᠵᠢ ᠶ᠋ᠢᠨ ᠵᠢᠷᠦᠬᠡ ᠶ᠋ᠢ ᠰᠦᠪᠡᠯᠡᠭᠡᠷᠡᠢ ! 》 ᠭᠡᠵᠦ ᠳᠦᠳᠦᠨᠡᠨᠡ᠃ ᠥᠨᠥᠬᠢ ᠰᠢᠳᠡᠭᠳᠡᠭᠰᠡᠨ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠬᠦᠷᠡᠩ ᠬᠠᠳᠠᠨ ᠳ᠋ᠤ᠌ ᠮᠥᠷᠭᠥᠨ ᠦᠰᠦᠷᠴᠦ ᠤᠰᠤ ᠰᠢᠮᠡᠳᠦᠭᠰᠡᠨ ᠭᠣᠣᠯ ᠤ᠋ᠨ ᠬᠠᠢᠷ ᠲᠤ᠌ ᠰᠢᠭᠢᠳᠴᠦ ᠣᠷᠣᠪᠠ᠃
ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠠᠵᠠᠭᠤᠬᠠᠨ ᠳ᠋ᠠᠬᠢ ᠬᠠᠭᠠᠯᠭᠠ ᠰᠢᠭ᠋ ᠬᠠᠯᠬᠠᠪᠴᠢ ᠰᠡᠷᠪᠡᠭᠡ ᠬᠠᠳᠠᠨ ᠤ᠋ ᠠᠷᠤ ᠳ᠋ᠤ᠌ ᠣᠴᠢᠵᠤ ᠪᠤᠷᠤᠪᠠᠨᠳᠢ ᠶ᠋ᠢᠨ ᠨᠢᠭᠤᠷ ᠢ ᠪᠦᠲᠡᠭᠡᠭᠰᠡᠨ ᠬᠠᠳᠠᠭ ᠢ᠋ ᠰᠡᠬᠦᠵᠦ᠄ 《ᠵᠠ᠂ ᠪᠠᠢᠵᠠ ! ᠪᠠᠭᠰᠢ ᠨᠢ ᠴᠢᠮᠠᠶ᠋ᠢ ᠡᠦᠲᠦ ᠨᠢᠭᠡ ᠰᠠᠢᠬᠠᠨ ᠬᠠᠷᠠᠵᠤ ᠦᠵᠡᠶᠡ! ᠬᠥᠭᠡᠷᠦᠬᠦᠢ ᠰᠠᠢᠨ ᠬᠥᠮᠦᠨ ᠦ᠌ ᠦᠷᠡ ᠶᠦᠮ ᠠ᠋ ! ᠡᠷᠢᠶᠡᠨ ᠲᠣᠭᠣᠰᠣ ᠪᠤᠵᠢᠭᠢᠨᠠᠭᠰᠠᠨ ᠡᠨᠡ ᠡᠨᠡᠷᠢᠯ ᠦᠭᠡᠢ ᠬᠣᠷᠸᠠ ᠳ᠋ᠤ᠌ ᠠᠯᠠᠭ ᠦᠭᠡᠢ ᠴᠠᠢᠯᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠨᠠᠮᠠᠶ᠋ᠢ ᠪᠠᠨ ᠠᠰᠠᠷᠠᠵᠤ ᠬᠦᠨᠳᠦᠯᠡᠵᠦ ᠶᠠᠪᠤᠭᠰᠠᠨ ᠶᠤᠮ ᠳᠡ ! ᠴᠢ ᠵᠠᠮ ᠳ᠋ᠠᠭᠠᠨ ᠰᠠᠭᠠᠳ ᠦᠭᠡᠢ ᠠᠮᠤᠷᠯᠢᠩᠭᠤᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠨᠠᠮᠠᠶ᠋ᠢ ᠬᠥᠯᠢᠶᠡᠰᠬᠢᠨ ᠶᠠᠪᠤᠭᠠᠷᠠᠢ ! ᠪᠢ ᠣᠳᠣᠬᠠᠨ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠣᠴᠢᠨᠠ᠃ ᠡᠨᠡ ᠡᠷᠢᠶᠡᠨ ᠬᠣᠷᠸᠠ ᠶ᠋ᠢᠨ ᠪᠤᠷᠲᠠᠭ ᠲᠣᠭᠣᠰᠣᠨ ᠠ᠋ᠴᠠ ᠰᠠᠯᠵᠤ ᠠᠮᠠᠷᠠᠨ ᠶᠢᠰᠦᠨ ᠪᠤᠯᠠᠭ ᠤ᠋ᠨ ᠳᠣᠣᠷᠠ ᠬᠦᠷᠴᠦ ᠪᠢ ᠴᠢᠮᠠᠶ᠋ᠢ ᠪᠠᠨ ᠠᠰᠠᠷᠠᠨ ᠳᠣᠳᠣᠮᠳᠠᠵᠤ ᠶᠠᠪᠤᠶᠠ!》 ᠭᠡᠵᠦ ᠨᠢᠯᠪᠤᠰᠤ ᠪᠠᠨ ᠵᠠᠯᠭᠢᠨ ᠡᠯᠢᠭᠡ ᠪᠡᠨ ᠬᠠᠭᠠᠷᠢᠲᠠᠯᠠ ᠳᠣᠲᠣᠭᠰᠢ ᠤᠷᠤᠰᠤᠭᠤᠯᠤᠨ ᠤᠬᠢᠯᠠᠵᠤ ᠪᠠᠢᠪᠠ ᠁
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠡᠷᠢᠩᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠥᠷᠥᠪᠴᠢ ᠶ᠋ᠢ ᠮᠤᠯᠲᠤᠯᠵᠤ ᠮᠥᠷᠥ ᠱᠠᠯᠳᠠᠩ ᠢ᠋ᠶ᠋ᠠᠷ ᠡᠪᠴᠢᠭᠦᠦ ᠪᠡᠨ ᠢᠷᠡᠨ ᠬᠠᠯᠬᠠᠪᠴᠢ ᠬᠠᠳᠠ ᠶ᠋ᠢ ᠳᠥᠰᠢᠨ ᠵᠣᠭᠰᠣᠵᠤ ᠬᠠᠳᠠ ᠲᠠᠬᠢᠷᠯᠠᠨ ᠳᠥᠭᠥᠵᠦ ᠠᠢᠰᠤᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠵᠦᠭ᠄
— ᠮᠠᠭᠤ ᠰᠠᠢᠨ ᠭᠠᠷᠯᠢᠭ ᠤ᠋ᠳ ᠠ᠋ ! ᠨᠠᠭᠠᠰᠢ ᠪᠠᠨ᠂ ᠨᠠᠭᠠᠰᠢ ᠪᠠᠨ ᠫᠤᠤᠳᠠ ! ᠳ᠋ᠠᠭᠳᠠᠨ ᠡᠨᠳᠡ ᠪᠠᠢᠨᠠ᠃ ᠬᠠᠳᠠ ᠴᠢᠯᠠᠭᠤ ᠶ᠋ᠢ ᠫᠤᠤᠳᠠᠵᠤ ᠣᠩᠭᠢᠯᠤᠭᠠᠳ ᠬᠠᠢᠷᠠᠨ ᠰᠤᠮᠤᠨ ᠤ᠋ ᠭᠠᠷᠤᠵᠠ᠃ ᠠᠳᠠ᠂ ᠠᠳᠠ ᠭᠡᠵᠦ ᠬᠠᠰᠬᠢᠷᠤᠨ ᠡᠪᠴᠢᠭᠦᠦ ᠪᠡᠨ ᠠᠯᠠᠭᠠᠳᠠᠬᠤ ᠳ᠋ᠤ᠌ ᠫᠦᠰ ᠫᠦᠰ ᠭᠡᠵᠦ ᠬᠥᠨᠳᠡᠢ ᠨᠦᠰᠡᠷ ᠳᠠᠭᠤᠨ ᠭᠠᠷᠴᠤ ᠪᠠᠢᠯᠠ᠃
— ᠮᠠᠢ᠂ ᠨᠠᠭᠠᠰᠢ ᠪᠠᠨ ᠫᠤᠤᠳᠠ! ᠭᠡᠳ ᠢᠯᠡ ᠭᠠᠷᠤᠭᠠᠳ ᠵᠣᠭᠰᠣᠴᠢᠬᠠᠬᠤᠯᠠᠷ ᠬᠠᠷᠢᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠬᠠᠬᠠᠵᠤ ᠲᠠᠭ ᠨᠠᠮᠵᠢᠪᠠ᠃ ᠳᠠᠯᠳᠠ ᠶ᠋ᠢᠨ ᠶᠠᠭᠤᠮᠠ ᠤᠷᠤᠭᠤ ᠰᠣᠬᠣᠷ ᠰᠤᠮᠤ ᠱᠤᠤᠭᠢᠭᠤᠯᠤᠭᠠᠳ ᠰᠦᠷ ᠪᠠᠳᠠᠷᠠᠭᠤᠯᠳᠠᠭ ᠨᠢ ᠪᠠᠰᠠ ᠰᠣᠨᠢᠨ ᠶᠤᠮ᠃
ᠬᠠᠷᠠ ᠴᠡᠷᠢᠭ ᠦ᠋ᠳ ᠶᠠᠭᠤᠨ ᠳ᠋ᠤ᠌ ᠫᠤᠤᠳᠠᠬᠤ ᠪᠠᠨ ᠵᠣᠭᠰᠣᠪᠠ ? ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠠ᠋ᠴᠠ ᠠᠶᠤᠨ ᠰᠦᠷᠳᠡᠵᠦ ᠥᠨᠥᠬᠢ ᠴᠡᠷᠢᠭ ᠦ᠋ᠳ ᠡᠬᠡ ᠡᠴᠡ ᠪᠡᠨ ᠲᠥᠷᠥᠭᠰᠡᠨ ᠡᠴᠡ ᠬᠣᠢᠰᠢ ᠡᠢᠮᠦ ᠲᠣᠮᠣ ᠪᠦᠳᠦᠭᠦᠨ ᠬᠥᠮᠦᠨ ᠢ᠋ ᠶᠡᠷᠦ ᠳ᠋ᠡᠭᠡᠨ ᠣᠯᠵᠤ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ ᠭᠠᠢᠬᠠᠨ ᠴᠣᠴᠢᠷᠳᠠᠨᠠ᠃ ᠦᠭᠡᠢ ᠠ᠋᠂ ᠡᠨᠡ ᠴᠢᠨᠢ ᠬᠥᠮᠦᠨ ᠶᠦᠮ ᠤᠤ ᠠᠮᠢᠳᠤ ᠪᠤᠷᠬᠠᠨ ᠶᠤᠮ ᠤᠤ? ᠡᠰᠡᠪᠡᠰᠦ ᠱᠤᠭᠤᠮᠠᠯ ᠪᠤᠷᠬᠠᠨ ᠴᠤ᠌ ᠶᠤᠮ ᠤᠤ ? ᠭᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠲᠠᠭᠠᠮᠠᠭᠯᠠᠵᠤ᠂ ᠡᠨᠡ ᠬᠠᠳᠠ ᠳᠥᠰᠢᠨ ᠵᠣᠭᠰᠣᠭᠰᠠᠨ ᠥᠨᠳᠥᠷ ᠲᠠᠷᠭᠤᠨ ᠬᠥᠮᠦᠨ ᠡᠴᠡ ᠰᠦᠷᠳᠡᠵᠦ᠂ ᠥᠭᠡᠷᠡ ᠶ᠋ᠢ ᠪᠤᠤ ᠬᠡᠯᠡ ᠭᠠᠭᠴᠠ ᠲᠣᠯᠣᠭᠠᠢ ᠨᠢ ᠴᠤ᠌ ᠲᠠᠪᠢᠨ ᠵᠢᠩ ᠬᠦᠨᠳᠦ ᠪᠠᠢᠬᠤ ᠴᠤ᠌ ᠶᠤᠮ ᠤᠤ? ᠭᠡᠵᠦ ᠬᠠᠷᠠ ᠴᠡᠷᠢᠭ ᠦ᠋ᠳ ᠥᠪᠡᠷ ᠵᠠᠭᠤᠷᠠ ᠪᠠᠨ ᠪᠡᠶᠡ ᠪᠡᠶᠡ ᠪᠡᠨ ᠰᠢᠷᠳᠡᠨ ᠰᠢᠪᠠᠭᠤᠨ ᠲᠣᠯᠣᠭᠠᠢ᠂ ᠳᠠᠷᠴᠢᠩᠬᠠᠢ ᠪᠡᠶᠡ ᠪᠡᠨ ᠬᠠᠷᠠᠭᠠᠳ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠵᠠᠭᠠᠵᠤ ᠪᠠᠢᠪᠠ᠃ ᠨᠢᠭᠡ ᠬᠡᠰᠡᠭ ᠤᠳᠠᠭᠠᠳ ᠥᠨᠥᠬᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠡᠰᠡᠷᠭᠦ ᠲᠠᠯᠠ ᠶ᠋ᠢᠨ ᠡᠪᠴᠢᠭᠦᠦ ᠬᠠᠳᠠᠨ ᠠ᠋ᠴᠠ ᠦᠰᠦᠷᠦᠨ ᠪᠠᠭᠤᠵᠤ᠂ ᠬᠠᠳᠠᠨ ᠬᠣᠩᠭᠢᠯ ᠵᠦᠭ ᠰᠢᠷᠭᠤᠯᠵᠢ ᠰᠢᠭ᠋ ᠰᠢᠪᠠᠯᠳᠤᠭᠠᠳ ᠢᠷᠡᠪᠡ᠃ ᠪᠣᠳᠣᠪᠠᠯ ᠭᠠᠭᠴᠠ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠯᠠᠮᠠ ᠬᠥᠮᠦᠨ ᠶᠠᠭᠠᠬᠢᠳᠠᠭ ᠴᠢᠷᠠᠢ ᠪᠠᠢᠨᠠ ᠭᠡᠵᠦ ᠲᠡᠭᠦᠨ ᠢ᠋ ᠪᠠᠰᠤᠨ ᠬᠥᠮᠦᠨ ᠣᠯᠠᠨ ᠳ᠋ᠠᠭᠠᠨ ᠪᠠᠷᠳᠠᠵᠤ ᠪᠠᠢᠭᠠ ᠶᠠᠩᠵᠤᠲᠠᠢ ᠱᠤᠯᠤᠭᠠᠨᠠᠯᠳᠤᠭᠰᠠᠭᠠᠷ ᠠᠭᠤᠯᠠᠨ ᠡᠩᠭᠡᠷ ᠤᠷᠤᠭᠤ ᠮᠠᠴᠤᠵᠤ ᠰᠦᠷᠦᠭ ᠦ᠋ᠨ ᠬᠦᠴᠦᠨ ᠳ᠋ᠦ᠍ ᠵᠠᠭᠠᠨ ᠢ᠋ ᠤᠨᠠᠭᠠᠬᠤ ᠰᠢᠷᠭᠤᠯᠵᠢ ᠶ᠋ᠢᠨ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠬᠦ ᠭᠡᠵᠦ ᠪᠠᠢᠭᠠ ᠨᠢ ᠡᠨᠡ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠡᠳᠡᠭᠡᠷ ᠬᠠᠷᠠ ᠴᠡᠷᠢᠭ ᠢ ᠬᠠᠷᠠᠵᠤ 《ᠬᠥᠨᠳᠡᠯᠡᠨ ᠬᠥᠬᠡ ᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠰᠤᠮᠤ ᠶ᠋ᠢ ᠱᠤᠤᠭᠢᠭᠤᠯᠳᠠᠭ ᠦᠭᠡᠢ ᠶᠠᠭᠠᠬᠢᠭᠠᠳ ᠰᠢᠷᠭᠤᠯᠵᠢ ᠰᠢᠭ᠋ ᠠᠷᠪᠠᠭᠠᠨᠠᠭᠠᠳ ᠁》 ᠭᠡᠵᠦ ᠡᠭᠳᠡᠭᠦᠦ ᠨᠢ ᠬᠦᠷᠬᠦ ᠳ᠋ᠡᠭᠡᠨ ᠲᠦᠰᠢᠵᠦ ᠵᠣᠭᠰᠣᠭᠰᠠᠨ ᠪᠦᠳᠦᠭᠦᠨ ᠬᠠᠭᠠᠯᠭᠠ ᠰᠢᠭ᠋ ᠬᠠᠯᠬᠠᠪᠴᠢ ᠬᠦᠷᠡᠩ ᠲᠣᠮᠣ ᠬᠠᠳᠠ ᠶ᠋ᠢ ᠲᠡᠪᠡᠷᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠵᠦ᠄
— ᠰᠥᠰᠥᠲᠡᠢ ᠪᠣᠯ ᠣᠷᠣᠨ ᠳ᠋ᠠᠭᠠᠨ ᠵᠣᠭᠰᠣ᠂ ᠰᠦᠨᠡᠰᠦ ᠦᠭᠡᠢ ᠪᠣᠯ ᠵᠠᠢᠯᠠ! ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠠᠳᠠ ᠳᠣᠷᠭᠢᠵᠤ ᠴᠤᠤᠷᠢᠶᠠᠲᠤᠨᠠ᠃ ᠡᠳᠡᠭᠡᠷ ᠢ᠋ ᠬᠠᠷᠠᠭᠰᠠᠨ ᠥᠨᠥᠬᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠶᠤᠬᠤ ᠳ᠋ᠠᠭᠠᠨ ᠨᠢᠳᠦ ᠨᠢ ᠪᠦᠯᠲᠡᠢᠵᠦ ᠠᠮᠠ ᠨᠢ ᠠᠩᠭᠠᠯᠵᠠᠭᠠᠳ 《ᠠᠪᠤ ᠠ᠋! ᠡᠵᠢ ᠠ᠋! ᠭᠡᠵᠦ ᠪᠠᠷᠬᠢᠷᠠᠬᠤ ᠭᠡᠬᠦ ᠳ᠋ᠦ᠍ ᠳᠠᠭᠤ ᠨᠢ ᠭᠠᠷᠬᠤ ᠦᠭᠡᠢ᠂ ᠠᠮᠢ ᠵᠢᠭᠤᠲᠠᠭᠠᠳ ᠳᠤᠲᠠᠭᠠᠬᠤ ᠭᠡᠬᠦ ᠳ᠋ᠦ᠍ ᠡᠪᠦᠳᠦᠭ ᠨᠢ ᠨᠤᠭᠤᠷᠠᠭᠠᠳ ᠭᠦᠶᠦᠵᠦ ᠴᠢᠳᠠᠬᠤ ᠦᠭᠡᠢ ᠵᠣᠭᠰᠣᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠪᠠᠭᠠᠰᠤᠨ ᠤ᠋ ᠪᠠᠮᠪᠤᠤ ᠡᠷᠭᠢᠯᠳᠦᠬᠦ ᠰᠢᠭ ᠪᠥᠭᠡᠮᠨᠡᠷᠡᠯᠳᠦᠬᠦ ᠡᠴᠡ ᠴᠠᠭᠠᠰᠢ ᠦᠭᠡᠢ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠳᠡᠭᠡᠷᠡ ᠡᠷᠭᠦᠭᠰᠡᠨ ᠪᠦᠳᠦᠭᠦᠨ ᠬᠠᠳᠠ ᠶ᠋ᠢ ᠳᠣᠷᠣᠭᠰᠢ ᠰᠢᠳᠡᠵᠦ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠥᠨᠥᠬᠢ ᠪᠥᠭᠡᠮᠨᠡᠷᠡᠯᠳᠦᠭᠰᠡᠨ ᠣᠯᠠᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠳᠠᠮ ᠳᠠᠮ ᠳᠠᠭᠠᠷᠢᠭᠳᠠᠵᠤ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠦᠬᠦᠭᠰᠡᠨ ᠢ᠋ ᠬᠡᠯᠡᠬᠦ ᠦᠭᠡᠢ᠃ ᠥᠩᠭᠥᠷᠢᠳᠡᠭᠰᠡᠨ ᠲᠣᠮᠣ ᠬᠠᠳᠠ ᠠᠭᠤᠯᠠ ᠬᠠᠳᠠ ᠶ᠋ᠢ ᠴᠤᠤᠷᠢᠶᠠᠲᠤᠭᠤᠯᠤᠨ ᠪᠥᠮᠪᠥᠷᠢᠵᠦ ᠲᠡᠭᠷᠢ ᠭᠠᠵᠠᠷ ᠶᠡᠭᠦᠷᠡᠮᠡ ᠨᠦᠰᠡᠷ ᠳᠠᠭᠤᠨ ᠲᠤᠷᠭᠢᠭᠠᠳ ᠪᠥᠭᠡᠮ ᠲᠣᠭᠣᠰᠣ ᠪᠣᠰᠪᠠ᠃
ᠭᠠᠷ ᠬᠣᠭᠣᠰᠣᠨ ᠭᠠᠭᠴᠠᠬᠠᠨ ᠯᠠᠮᠠ ᠶ᠋ᠢᠨ ᠭᠠᠷ ᠲᠤ᠌ ᠨᠡᠯᠢᠶᠡᠳ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠭᠠᠢᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠴᠠᠭᠠᠳᠤ ᠡᠪᠴᠢᠭᠦᠦ ᠬᠠᠳᠠᠨ ᠤ᠋ ᠡᠷᠭᠢ ᠡᠴᠡ ᠫᠤᠤ ᠶ᠋ᠢᠨ ᠳᠠᠭᠤᠨ ᠳᠠᠬᠢᠭᠠᠳ ᠭᠠᠯᠵᠠᠭᠤᠷᠠᠭᠰᠠᠨ ᠰᠢᠭ᠋ ᠲᠠᠴᠢᠭᠢᠨᠠᠪᠠ᠃ ᠮᠠᠰᠢ ᠣᠯᠠᠨ ᠰᠤᠮᠤᠨ ᠤ᠋ ᠲᠣᠯᠣᠭᠠᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ ᠤᠯᠠᠭᠠᠨ ᠴᠣᠬᠣᠷ ᠪᠣᠯᠭᠠᠨ ᠰᠦᠪᠡᠯᠡᠵᠡᠢ ᠪᠢᠯᠡ᠃ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠦᠳᠡᠷᠯᠢᠭ ᠪᠦᠳᠦᠭᠦᠨ ᠪᠡᠶᠡ ᠬᠠᠳᠠ ᠨᠢ ᠰᠤᠮᠤᠨ ᠳ᠋ᠤ᠌ ᠳᠠᠭᠠᠭᠠᠴᠠᠲᠠᠢ ᠳ᠋ᠠᠭᠠᠨ ᠭᠤᠯᠠᠰᠴᠤ ᠤᠨᠠᠭᠠ ᠦᠭᠡᠢ ᠲᠠᠢᠪᠠᠯᠵᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ᠄
— ᠲᠠᠭᠠᠷᠠᠵᠤ ᠪᠠᠢᠨᠠ᠂ ᠮᠥᠨ ᠳᠡ᠂ ᠶᠠᠭ ᠢᠩᠭᠢᠵᠦ ᠫᠤᠤᠳᠠᠳᠠᠭ ᠶᠤᠮ ᠰᠢᠦ ! ᠮᠠᠭᠤ ᠰᠠᠢᠨ ᠵᠠᠨᠠᠭ ᠠ᠋ ! ᠰᠣᠨᠣᠰᠴᠤ ᠪᠠᠢ᠂ ᠰᠢᠷᠠᠪᠳᠤᠷᠵᠢ ᠳ᠋ᠤ᠌ ᠣᠴᠢᠵᠤ ᠬᠡᠯᠡᠵᠦ ᠥᠭ ! ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠪᠢ ᠲᠡᠮᠦᠷ ᠭᠢᠨᠵᠢ ᠪᠡᠷ ᠲᠡᠭᠦᠨ ᠦ᠌ ᠡᠭᠡᠮ ᠦ᠋ᠨ ᠶᠠᠰᠤᠨ ᠠ᠋ᠴᠠ ᠣᠭᠣᠰᠣᠷᠯᠠᠵᠤ ᠡᠷᠯᠢᠭ ᠲᠦ᠍ ᠠᠪᠠᠴᠢᠵᠤ ᠥᠭᠭᠦᠨᠡ᠃ ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ ᠶ᠋ᠢᠨ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠠᠪᠠᠭᠠ ᠴᠢᠨᠢ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠶᠠ ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠬᠥᠰᠡᠷ ᠯᠠᠭᠬᠢᠲᠠᠯᠠ ᠰᠠᠭᠤᠬᠤ ᠳ᠋ᠤ᠌ ᠲᠣᠭᠣᠰᠣ ᠪᠤᠵᠢᠭᠢᠨᠠᠵᠤ ᠪᠠᠢᠪᠠ ᠁
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠰᠠᠭᠤᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠳᠠ ᠳᠥᠰᠢᠨ ᠠᠮᠢᠰᠬᠤᠭᠠ ᠬᠤᠷᠢᠶᠠᠪᠠ᠃
ᠬᠠᠶᠠ ᠨᠢᠭᠡ ᠬᠣᠶᠠᠷ ᠣᠯᠵᠠ ᠶ᠋ᠢᠨ ᠰᠢᠨᠤᠯ ᠳ᠋ᠤ᠌ ᠰᠢᠲᠠᠵᠤ 《ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠣᠯᠣᠭᠠᠢ ᠶ᠋ᠢ ᠬᠡᠨ ᠬᠥᠮᠦᠨ ᠣᠭᠲᠣᠯᠵᠤ ᠠᠪᠴᠢᠷᠠᠪᠠᠯ ᠬᠦᠨᠳᠦ ᠱᠠᠩ ᠥᠭᠭᠦᠨᠡ 》 ᠭᠡᠰᠡᠨ ᠰᠢᠷᠠᠪᠳᠤᠷᠵᠢ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠤᠷᠮᠠᠰᠢᠭᠤᠯᠤᠯ ᠳ᠋ᠤ᠌ ᠬᠥᠲᠥᠯᠦᠭᠳᠡᠭᠰᠡᠨ ᠬᠥᠮᠦᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠬᠤ ᠪᠠᠷ ᠬᠠᠵᠠᠭᠤ ᠬᠠᠪᠢᠷᠭᠠ ᠳ᠋ᠤᠨᠢ ᠥᠩᠭᠡᠯᠵᠡᠨᠡ᠃
ᠮᠥᠩᠭᠥᠨ ᠦ᠌ ᠰᠢᠨᠤᠯ ᠳ᠋ᠤ᠌ ᠬᠥᠮᠦᠨ ᠮᠥᠰᠥ ᠪᠡᠨ ᠬᠤᠢᠬᠠᠯᠠᠭᠤᠯᠤᠭᠰᠠᠨ ᠲᠡᠳᠡᠭᠡᠷ ᠦ᠋ᠨ ᠵᠠᠷᠢᠮ ᠨᠢ ᠭᠠᠷ ᠨᠢ ᠵᠠᠭᠠᠲᠤᠨᠠᠵᠤ᠂ ᠰᠢᠨᠤᠭ ᠨᠢ ᠣᠪᠣᠯᠵᠠᠪᠠᠴᠤ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠡᠷᠡ ᠬᠦ᠌ ᠨᠤᠭᠤᠰᠤᠯᠠᠭᠳᠠᠭᠰᠠᠨ ᠱᠠᠷ ᠤ᠋ᠨ ᠨᠢᠳᠦ ᠮᠡᠲᠦ ᠬᠠᠷᠠ ᠴᠠᠭᠠᠨ ᠢ᠋ᠶ᠋ᠠᠷ ᠪᠦᠷᠢᠯᠳᠦᠭᠰᠡᠨ ᠳᠣᠭᠰᠢᠨ ᠠᠯᠠᠭ ᠨᠢᠳᠦᠨ ᠡᠴᠡ ᠳᠠᠯᠳᠢᠷᠠᠬᠤ ᠳ᠋ᠠᠭᠠᠨ ᠵᠣᠷᠢᠭ ᠬᠦᠷᠬᠦ ᠦᠭᠡᠢ ᠡᠷᠬᠡ ᠦᠭᠡᠢ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠷᠢᠵᠤ ᠪᠠᠢᠪᠠ᠃
ᠲᠤᠯᠤᠯᠳᠤᠭᠠᠨ ᠵᠣᠭᠰᠣᠵᠤ᠂ ᠫᠤᠤ ᠶ᠋ᠢᠨ ᠳᠠᠭᠤᠨ ᠨᠠᠮᠵᠢᠯᠠ᠃ ᠬᠠᠷᠠ ᠴᠡᠷᠢᠭ ᠦ᠋ᠳ ᠰᠠᠯᠬᠢᠨ ᠳ᠋ᠤ᠌ ᠴᠣᠬᠢᠭᠳᠠᠭᠰᠠᠨ ᠨᠠᠮᠤᠷ ᠤ᠋ᠨ ᠮᠣᠳᠣᠨ ᠤ᠋ ᠬᠠᠲᠠᠭᠰᠠᠨ ᠨᠠᠪᠴᠢᠰ ᠰᠢᠭ᠋ ᠬᠥᠬᠡᠪᠣᠯᠠᠭ ᠤ᠋ᠨ ᠡᠩᠭᠡᠷ ᠡᠴᠡ ᠰᠢᠪᠲᠤᠷᠠᠨ ᠪᠠᠭᠤᠵᠠᠭᠠᠪᠠ᠃
ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠠᠯᠠᠭᠰᠠᠨ ᠪᠣᠯᠪᠠᠴᠤ ᠱᠠᠭᠳᠠᠷᠰᠥ᠋ᠷᠥᠩ ᠦ᠋ᠨ ᠨᠣᠶᠠᠯᠠᠭᠰᠠᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠬᠥᠬᠡᠪᠣᠯᠠᠭ ᠤ᠋ᠨ ᠬᠠᠳᠠᠨ ᠬᠣᠩᠭᠢᠯ᠂ ᠣᠢᠷᠠ ᠬᠠᠪᠢ ᠶ᠋ᠢᠨ ᠡᠩᠭᠡᠷ ᠬᠠᠵᠠᠭᠤ᠂ ᠭᠣᠣᠯ ᠵᠢᠯᠠᠭᠠ ᠠ᠋ᠴᠠ ᠲᠡᠭᠦᠨ ᠦ᠌ ᠦᠶᠡᠯᠢᠳ ᠠᠴᠢ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠢ ᠪᠠᠷᠢᠵᠤ ᠠᠪᠬᠤ ᠪᠠᠷ ᠨᠠᠷᠢᠨ ᠱᠦᠭᠦᠷᠳᠡᠯᠲᠡ ᠬᠢᠪᠡ᠃
ᠱᠠᠭᠳᠤᠷᠰᠦ᠋ᠷᠦᠩ ᠱᠠᠲᠤ ᠶ᠋ᠢᠨ ᠭᠣᠣᠯ ᠢ᠋ ᠤᠷᠤᠭᠤᠳᠠᠵᠤ ᠶᠠᠪᠤᠨ ᠨᠠᠷᠢᠨ ᠱᠦᠭᠦᠷᠳᠡᠯᠲᠡ ᠬᠢᠭᠰᠡᠨ ᠪᠣᠯᠪᠠᠴᠤ ᠪᠠᠲᠤᠪᠠᠶᠠᠷ ᠤ᠋ᠨ ᠪᠠᠷᠠ ᠰᠤᠷᠠᠭ ᠢ᠋ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ ᠭᠠᠷ ᠤᠨᠵᠢᠢᠯᠭᠠᠨ ᠶᠠᠪᠤᠵᠤ ᠠᠲᠠᠯᠠ ᠨᠢᠭᠡᠨ ᠮᠣᠷᠢᠲᠠᠨ ᠬᠥᠬᠡᠪᠣᠯᠠᠭ ᠢ᠋ ᠥᠭᠡᠳᠡᠯᠡᠨ ᠳᠠᠪᠬᠢᠭᠤᠯᠵᠤ ᠠᠢᠰᠤᠢ᠃
— ᠲᠤᠰᠠᠯᠠᠭᠴᠢ ᠱᠠᠭᠳᠤᠷᠰᠦ᠋ᠷᠦᠩ ᠭᠤᠸᠠᠢ ᠳ᠋ᠤ᠌ ᠮᠡᠳᠡᠭᠦᠯᠵᠦ ᠪᠠᠢᠨᠠ᠃ ᠤᠨᠤᠭᠠ ᠬᠥᠰᠬᠡ᠂ ᠬᠡᠦᠬᠡᠳ ᠪᠦᠰᠡᠭᠦᠢ ᠬᠤᠳᠬᠤᠯᠳᠤᠭᠰᠠᠨ ᠠᠷᠪᠠᠭᠠᠳ ᠴᠡᠷᠢᠭ ᠭᠣᠣᠯ ᠥᠭᠡᠳᠡᠯᠡᠵᠦ ᠶᠠᠪᠤᠭᠠ ᠶ᠋ᠢ ᠪᠠᠷᠠᠭᠤᠨ ᠭᠣᠣᠯ ᠤ᠋ᠨ ᠨᠣᠭᠣᠭᠠᠨ ᠵᠦᠯᠭᠡᠲᠦ ᠳ᠋ᠦ᠍ ᠬᠠᠷᠠ ᠴᠡᠷᠢᠭ ᠬᠠᠰᠢᠵᠤ ᠠᠬᠠᠯᠠᠭᠴᠢ ᠶ᠋ᠢ ᠨᠢ ᠫᠤᠤᠳᠠᠵᠤ ᠠᠯᠠᠪᠠ᠃
— ᠪᠠᠲᠤᠪᠠᠶᠠᠷ ᠮᠥᠨ ᠤᠤ ?
— ᠮᠥᠨ ᠡᠰᠡᠬᠦ ᠶ᠋ᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠲᠠᠨᠢᠬᠤ ᠦᠭᠡᠢ ᠪᠣᠯᠬᠣᠷ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠲᠠᠨ ᠳ᠋ᠤ᠌ ᠪᠢ ᠮᠡᠳᠡᠭᠦᠯᠦᠷᠡ ᠶᠠᠪᠤᠭᠠ ᠨᠢ ᠡᠨᠡ᠃
— ᠪᠠᠲᠤᠪᠠᠶᠠᠷ ᠢ᠋ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠳᠠᠭ ᠦᠭᠡᠢ ᠶᠠᠭᠠᠬᠢᠪᠠ?
— ᠥᠨᠥᠬᠢ ᠴᠢᠨᠢ ᠠᠷᠪᠠᠭᠠᠳ ᠴᠡᠷᠢᠭ ᠨᠣᠶᠠᠯᠠᠵᠤ᠂ ᠬᠡᠴᠡᠭᠦᠦ ᠰᠢᠷᠦᠭᠦᠨ ᠲᠤᠯᠤᠭᠠᠳ᠂ ᠬᠠᠷᠠ ᠴᠡᠷᠢᠭ ᠢ᠋ ᠶᠠᠭ ᠬᠠᠪᠢᠳᠠᠭᠤᠯᠳᠠᠭ ᠦᠭᠡᠢ᠃ ᠲᠡᠭᠡᠬᠦ ᠳ᠋ᠦ᠍ᠨᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠤᠭᠰᠠᠷᠠᠭᠠ ᠳᠤᠤᠭᠠᠷᠳᠠᠭ ᠠᠦ᠋ᠲ᠋ᠣ᠋ ᠫᠤᠤ ᠪᠠᠷ ᠰᠢᠷᠦᠭᠦᠨ ᠭᠠᠯᠯᠠᠵᠤ ᠣᠷᠬᠢᠭᠰᠠᠨ ᠁
— ᠪᠠᠲᠤᠪᠠᠶᠠᠷ ᠤ᠋ᠨ ᠠᠮᠢ ᠶ᠋ᠢ ᠨᠢ ᠡᠯᠭᠦᠬᠦ ᠪᠣᠯᠤᠮᠵᠢ ᠪᠣᠢ ᠤᠤ?
— ᠬᠠᠮᠢᠭᠠ ᠠ᠋ᠴᠠ ᠳᠠ ᠫᠤᠤ ᠶ᠋ᠢᠨ ᠰᠤᠮᠤ ᠦᠷᠦ ᠴᠡᠭᠡᠵᠢ ᠶ᠋ᠢ ᠨᠢ ᠵᠥᠭᠡᠢ ᠶ᠋ᠢᠨ ᠡᠭᠦᠷ ᠰᠢᠭ ᠰᠦᠪᠡᠯᠡᠭᠦᠯᠵᠦ ᠣᠢᠴᠢᠭᠰᠠᠨ ᠳ᠋ᠤ᠌ ᠲᠡᠭᠦᠨ ᠢ ᠳᠠᠭᠠᠯᠳᠤᠭᠰᠠᠨ᠂ ᠠᠷᠪᠠᠭᠠᠳ ᠴᠡᠷᠢᠭ ᠵᠦᠭ ᠵᠦᠭ ᠲᠡᠭᠡᠨ ᠪᠤᠲᠠᠷᠠᠵᠤ᠂ ᠵᠠᠷᠢᠮ ᠨᠢ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠨ ᠰᠢᠷᠬᠠᠲᠤᠵᠤ᠂ ᠵᠠᠷᠢᠮ ᠨᠢ ᠵᠠᠪᠰᠠᠷ ᠵᠠᠢ ᠦᠵᠡᠨ ᠳᠤᠲᠠᠭᠠᠵᠤ ᠠᠷᠢᠯᠪᠠ᠃
ᠠᠷᠭᠠ ᠦᠭᠡᠢ ᠰᠡᠭ ᠪᠣᠯᠭᠠᠪᠠ ᠃ ᠲᠤᠰᠠᠯᠠᠭᠴᠢ ᠱᠠᠭᠳᠤᠷᠰᠦ᠋ᠷᠦᠩ ᠡᠨᠡ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠪᠠᠨ ᠱᠠᠯᠠᠪ ᠮᠣᠷᠳᠠᠵᠤ ᠱᠠᠲᠤ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠵᠢᠯᠠᠭᠠ ᠶ᠋ᠢ ᠥᠭᠡᠳᠡᠯᠡᠨ ᠰᠢᠷᠦᠭᠦᠨ ᠳᠣᠪᠲᠣᠯᠭᠠᠪᠠ ᠪᠠᠲᠤᠪᠠᠶᠠᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠰᠤᠮᠤᠨ ᠳ᠋ᠤ᠌ ᠦᠷᠦ ᠴᠡᠭᠡᠵᠢ ᠪᠡᠨ ᠰᠦᠪᠡᠯᠡᠭᠦᠯᠵᠦ ᠣᠢᠴᠢᠭᠰᠠᠨ ᠳ᠋ᠤ᠌ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠭᠰᠠᠨ ᠠᠷᠪᠠᠭᠠᠳ ᠴᠡᠷᠢᠭ ᠵᠦᠭ ᠵᠦᠭ ᠲᠡᠭᠡᠨ ᠪᠤᠲᠠᠷᠠᠵᠤ᠂ ᠶᠠᠷᠢᠮ ᠨᠢ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠨ ᠰᠢᠷᠠᠭᠳᠤᠵᠤ᠂ ᠵᠠᠷᠢᠮ ᠨᠢ ᠵᠠᠪᠰᠠᠷ ᠵᠠᠢ ᠦᠵᠡᠨ ᠳᠤᠲᠠᠭᠠᠵᠤ ᠠᠷᠢᠯᠪᠠ᠃
ᠪᠠᠲᠤᠪᠠᠶᠠᠷ ᠤ᠋ᠨ ᠡᠬᠡᠨᠡᠷ ᠬᠡᠦᠬᠡᠳ ᠨᠢ ᠮᠣᠷᠢᠨ ᠤᠨᠤᠭᠠ᠂ ᠠᠴᠢᠶᠠ ᠬᠥᠰᠬᠡ ᠲᠡᠢ ᠪᠡᠨ ᠨᠢᠭᠡ ᠳᠣᠣᠷᠠ ᠪᠥᠭᠡᠮᠨᠡᠷᠡᠯᠳᠦᠨ ᠶᠠᠭᠠᠬᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠠᠴᠢᠶᠠ ᠬᠥᠲᠥᠯᠦᠭᠰᠡᠨ ᠨᠢᠭᠡ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠪᠠᠲᠤᠪᠠᠶᠠᠷ ᠤ᠋ᠨ ᠬᠦᠦ (ᠠᠷᠪᠠᠲᠠᠢ) ᠠᠮᠤᠷᠯᠢᠩᠭᠤᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠢᠯᠢᠵᠦ᠄
— ᠬᠡᠦᠬᠡ ᠠ᠋᠂ ᠴᠢ ᠪᠤᠰᠢᠭᠤᠬᠠᠨ ᠲᠡᠷᠡ ᠠᠭᠠᠷᠤ ᠮᠣᠳᠣᠨ ᠳᠡᠭᠡᠷᠡ ᠠᠪᠠᠷᠢᠵᠤ ᠭᠠᠷ! ᠪᠤᠰᠢᠭᠤ᠂ ᠪᠤᠰᠢᠭᠤᠬᠠᠨ ᠁ ᠭᠡᠵᠦ ᠱᠠᠯᠠᠪᠳᠠᠭᠤᠯᠤᠨ ᠲᠦᠯᠬᠢᠭᠰᠡᠨ ᠳ᠋ᠦ᠍ ᠪᠢᠴᠢᠬᠠᠨ ᠠᠮᠤᠷᠯᠢᠩᠭᠤᠢ ᠲᠡᠪᠡᠷᠢ ᠪᠦᠳᠦᠭᠦᠨ ᠠᠭᠠᠷᠤ ᠮᠣᠳᠣᠨ ᠳ᠋ᠤ᠌ ᠱᠠᠯᠠᠪ ᠮᠠᠴᠤᠵᠤ ᠭᠠᠷᠤᠨ ᠳᠠᠯᠳᠠᠯᠠᠪᠠ᠃
ᠪᠠᠲᠤᠪᠠᠶᠠᠷ ᠤ᠋ᠨ ᠡᠬᠡᠨᠡᠷ ᠬᠠᠷᠠ ᠴᠡᠷᠢᠭ ᠦ᠋ᠨ ᠭᠠᠰᠢᠭᠤᠨ ᠰᠤᠮᠤᠨ ᠳ᠋ᠤ᠌ ᠰᠡᠭᠴᠢᠭᠥᠯᠥᠭᠰᠡᠨ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠡᠭᠦᠷ ᠪᠡᠶᠡ ᠳᠡᠭᠡᠷᠡ ᠡᠯᠢᠭᠡᠳᠡᠨ ᠮᠥᠷᠥ ᠡᠴᠡ ᠨᠢ ᠪᠠᠵᠠᠭᠳᠠᠨ᠄
— ᠰᠡᠷᠡᠭᠡᠴᠢ ᠳᠡ᠂ ᠴᠢ ᠮᠢᠨᠢ ! ᠪᠢᠳᠡᠨᠦᠰ ᠢ᠋ ᠥᠨᠥᠴᠢᠨ ᠥᠷᠥᠭᠡᠰᠦᠨ ᠪᠣᠯᠭᠠᠴᠢᠬᠠᠭᠠᠳ ᠁ ᠭᠡᠵᠦ ᠰᠢᠨᠠᠯᠤᠯᠲᠠᠢ ᠤᠬᠢᠯᠠᠬᠤ ᠨᠢ ᠨᠣᠭᠣᠭᠠᠨ ᠵᠦᠯᠭᠡᠲᠦ ᠶ᠋ᠢᠨ ᠬᠠᠳᠠᠨ ᠬᠣᠰᠢᠭᠤ ᠶ᠋ᠢ ᠡᠪᠬᠡᠷᠡᠲᠡᠯᠡ ᠴᠤᠤᠷᠢᠶᠠᠲᠤᠵᠤ ᠰᠣᠨᠣᠰᠳᠠᠨᠠ᠃
ᠠᠪᠠᠭᠠᠷᠠᠯᠳᠤᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠪᠠᠲᠤᠪᠠᠶᠠᠷ ᠤ᠋ᠨ ᠦᠬᠦᠭᠡᠷ ᠳᠡᠭᠡᠷᠡ ᠬᠠᠷᠠᠯᠠᠲᠠᠯᠠ ᠴᠤᠭᠯᠠᠷᠠᠵᠤ ᠡᠨᠡ ᠲᠡᠷᠡ ᠭᠡᠵᠦ ᠬᠥᠮᠦᠰ ᠦᠯᠦ ᠣᠢᠯᠠᠭᠠᠬᠤ ᠬᠡᠯᠡ ᠪᠡᠷ ᠱᠤᠯᠤᠭᠠᠨᠠᠬᠤ ᠳ᠋ᠠᠭᠠᠨ ᠨᠢᠯᠪᠤᠰᠤᠨ ᠳ᠋ᠠᠭᠠᠨ ᠳᠡᠪᠲᠦᠭᠰᠡᠨ ᠬᠥᠭᠡᠷᠦᠬᠦᠢ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠦ᠋ᠨ ᠡᠩᠭᠡᠷ ᠡᠪᠴᠢᠭᠦᠦ ᠶ᠋ᠢ ᠨᠢ ᠣᠩᠭᠣᠢᠯᠭᠠᠵᠤ ᠱᠠᠯᠳᠠᠩᠨᠠᠭᠤᠯᠤᠨ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠭᠣᠣᠴᠢᠯᠠᠨ ᠬᠢ ᠬᠢ ᠬᠠ ᠬᠠ ᠭᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠱᠠᠯᠢᠭᠯᠠᠨᠠ᠃
ᠲᠡᠪᠡᠷᠢ ᠪᠦᠳᠦᠭᠦᠨ ᠠᠭᠠᠷᠤ ᠮᠣᠳᠣᠨ ᠤ᠋ ᠨᠠᠮᠠᠭᠠᠨ ᠳ᠋ᠤ᠌ ᠪᠡᠶᠡ ᠳᠠᠯᠳᠠᠯᠠᠵᠤ ᠠᠶᠤᠨ ᠪᠡᠮᠪᠡᠭᠡᠨᠡᠭᠰᠡᠨ ᠪᠢᠴᠢᠬᠠᠨ ᠠᠮᠤᠷᠯᠢᠩᠭᠤᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠣᠪᠠᠯᠠᠩᠲᠠᠢ ᠪᠠᠷ ᠦᠬᠦᠭᠰᠡᠨ ᠪᠠ ᠬᠠᠷᠠ ᠴᠡᠷᠢᠭ ᠦ᠋ᠳ ᠡᠬᠡ ᠶ᠋ᠢ ᠨᠢ ᠨᠢᠴᠦᠭᠦᠯᠡᠵᠦ ᠳᠡᠮᠡᠢ ᠯᠡ ᠱᠠᠯᠢᠭᠯᠠᠨ ᠳᠣᠷᠣᠮᠵᠢᠯᠠᠭᠰᠠᠨ ᠢ᠋ ᠬᠠᠷᠠᠵᠤ ᠲᠦᠪᠳᠡᠬᠦ ᠦᠭᠡᠢ ᠠᠭᠠᠷᠤ ᠮᠣᠳᠣᠨ ᠳᠡᠭᠡᠷᠡ ᠡᠴᠡ ᠦᠰᠦᠷᠴᠦ ᠪᠠᠭᠤᠨ᠄
— ᠮᠥᠮᠥ ᠠ᠋ ! ᠭᠡᠵᠦ ᠮᠠᠰᠢ ᠭᠠᠰᠠᠯᠠᠩᠲᠠᠢ ᠴᠢᠷᠠᠯᠠᠨ ᠡᠬᠡ ᠵᠦᠭ ᠢ᠋ᠶ᠋ᠡᠨ ᠭᠦᠶᠦᠬᠦ ᠳ᠋ᠦ᠍ ᠠᠴᠢᠶᠠᠨ ᠤ᠋ ᠡᠪᠦᠭᠡᠨ ᠭᠤᠸᠠᠢ ᠲᠡᠷᠡ ᠬᠦᠦ ᠶ᠋ᠢᠨ ᠭᠠᠷ ᠠ᠋ᠴᠠ ᠨᠢ ᠰᠢᠭᠦᠷᠡᠨ᠄
— ᠪᠢᠲᠡᠭᠡᠢ ᠲᠠᠢᠰᠢ ᠣᠴᠢ! ᠬᠡᠦᠬᠡ᠂ ᠠᠶᠤᠯᠲᠠᠢ᠃ ᠴᠠᠭᠠᠳᠤᠭᠤᠯᠠ ᠴᠢᠨᠢ ᠶᠠᠭᠤ ᠴᠤ᠌ ᠬᠢᠵᠦ ᠮᠡᠳᠡᠨᠡ ᠰᠢᠦ! ᠭᠡᠰᠡᠨ ᠢ᠋ ᠪᠢᠴᠢᠬᠠᠨ ᠠᠮᠤᠷᠯᠢᠩᠭᠤᠢ ᠶᠠᠭᠤᠨ ᠳ᠋ᠤ᠌ ᠰᠣᠨᠣᠰᠬᠤ ᠪᠢᠯᠡ⁈ ᠡᠪᠦᠭᠡᠨ ᠦ᠌ ᠭᠠᠷ ᠠ᠋ᠴᠠ ᠮᠤᠯᠲᠤᠷᠠᠵᠤ ᠡᠬᠡ ᠶ᠋ᠢᠨ ᠬᠦᠵᠦᠭᠦᠦ ᠶ᠋ᠢ ᠲᠡᠪᠡᠷᠢᠨ᠄
— ᠮᠥᠮᠥ ᠠ᠋᠂ ᠠᠪᠤ ᠠ᠋ ! ᠭᠡᠵᠦ ᠤᠬᠢᠯᠠᠩᠨᠠᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠷᠠ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ
— ᠡᠨᠡ ᠵᠢᠭᠠᠯ ᠬᠦᠦ ᠪᠠᠲᠤᠪᠠᠶᠠᠷ ᠤ᠋ᠨ ᠬᠦᠦ ᠮᠥᠨ ᠤᠤ ? ᠭᠡᠰᠡᠨ ᠬᠠᠬᠢᠷ ᠳᠠᠭᠤᠨ ᠭᠠᠷᠴᠤ᠂ ᠪᠠᠷᠪᠠᠭᠠᠷ ᠭᠠᠷ ᠪᠢᠴᠢᠬᠠᠨ ᠠᠮᠤᠷᠯᠢᠩᠭᠤᠢ ᠶ᠋ᠢᠨ ᠬᠦᠵᠦᠭᠦᠨ ᠡᠴᠡ ᠪᠠᠵᠠᠭᠳᠠᠵᠤ ᠡᠬᠡ ᠶ᠋ᠢᠨ ᠬᠢᠨᠢ ᠡᠪᠦᠷ ᠡᠴᠡ ᠰᠠᠯᠭᠠᠪᠠ᠃
ᠠᠷᠵᠠᠭᠠᠨᠠᠨ ᠲᠡᠯᠴᠢᠯᠡᠭᠰᠡᠨ ᠪᠢᠴᠢᠬᠠᠨ ᠬᠦᠦ ᠡᠬᠡ ᠥᠭᠡᠳᠡ ᠪᠡᠨ ᠰᠡᠷᠪᠡᠯᠵᠡᠨ᠄
—ᠮᠥᠮᠥ ᠠ᠋ ! ᠁ ᠭᠡᠵᠦ ᠴᠢᠨᠡᠭᠡ ᠮᠡᠳᠡᠨ ᠤᠬᠢᠯᠠᠩᠨᠠᠬᠤ ᠳ᠋ᠤ᠌ ᠫᠢᠩ ᠫᠠᠩ ᠭᠡᠬᠦ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠪᠢᠴᠢᠬᠠᠨ ᠬᠦᠦ ᠠᠩᠭᠠᠯᠵᠠᠨ ᠣᠢᠴᠢᠪᠠ᠃
ᠡᠯᠢᠭᠡ ᠲᠥᠷᠥᠭᠦᠰᠢ ᠪᠡᠨ ᠰᠢᠷᠣᠢ ᠡᠮᠬᠦᠯᠡᠨ ᠣᠢᠴᠢᠭᠰᠠᠨ ᠪᠢᠴᠢᠬᠠᠨ ᠠᠮᠤᠷᠯᠢᠩᠭᠤᠢ ᠳᠠᠬᠢᠨ ᠰᠡᠷᠪᠡᠢᠨ ᠪᠣᠰᠴᠤ ᠡᠭᠡᠷᠡᠨ ᠤᠬᠢᠯᠠᠩᠨᠠᠭᠰᠠᠨ ᠪᠣᠯᠪᠠᠴᠤ ᠴᠢᠷᠠᠢ ᠨᠢ ᠴᠢᠨᠦᠷᠡᠨ ᠬᠥᠬᠡᠷᠡᠭᠰᠡᠨ ᠤᠷᠤᠭᠤᠯ ᠨᠢ ᠲᠠᠲᠠᠪᠠᠯᠵᠠᠨ ᠠᠩᠭᠠᠯᠵᠠᠬᠤ ᠠ᠋ᠴᠠ ᠪᠢᠰᠢ ᠳᠠᠭᠤᠨ ᠭᠠᠷᠬᠤ ᠦᠭᠡᠢ ᠪᠣᠯᠵᠤ ᠡᠬᠡ ᠥᠭᠡᠳᠡ ᠪᠡᠨ ᠵᠢᠳᠬᠦᠯᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠠᠪᠠᠵᠤ ᠤᠨᠠᠪᠠ᠃
— ᠠᠮᠤᠷ ᠁ ᠠᠮᠤᠷ ᠁ ᠠᠮᠤᠷᠯᠢᠩᠭᠤᠢ ᠠ᠋! ᠮᠢᠨᠦ ᠬᠦᠦ ! ᠁ ᠭᠡᠵᠦ ᠪᠠᠲᠤᠪᠠᠶᠠᠷ ᠤ᠋ᠨ ᠡᠬᠡᠨᠡᠷ ᠦᠬᠦᠳᠬᠢᠨ ᠣᠢᠴᠢᠭᠰᠠᠨ ᠬᠦᠦ ᠪᠡᠨ ᠲᠡᠪᠡᠷᠢᠵᠦ ᠪᠣᠰᠬᠠᠨ ᠬᠠᠴᠠᠷ ᠠᠮᠠᠨ ᠳ᠋ᠤᠨᠢ ᠨᠠᠭᠠᠯᠳᠤᠭᠰᠠᠨ ᠬᠤᠮᠠᠭ ᠰᠢᠷᠣᠢ ᠶ᠋ᠢ ᠵᠦᠯᠭᠦᠵᠦ 《ᠮᠢᠨᠦ ᠬᠦᠦ ᠰᠡᠷᠡᠭᠡᠴᠢ! ᠰᠡᠷᠡᠭᠡᠴᠢ ᠬᠦᠦ ᠮᠢᠨᠢ!》 ᠭᠡᠵᠦ ᠬᠦᠦ ᠪᠡᠨ ᠭᠠᠯᠵᠠᠭᠤᠷᠠᠨ ᠦᠨᠦᠰᠴᠦ ᠲᠡᠪᠡᠷᠢᠵᠦ ᠠᠪᠤᠨ ᠨᠣᠭᠣᠭᠠᠨ ᠵᠦᠯᠭᠡᠲᠦ ᠶ᠋ᠢᠨ ᠳᠡᠭᠡᠳᠦ ᠭᠣᠣᠯ ᠢ᠋ ᠥᠭᠡᠳᠡᠯᠡᠨ ᠴᠢᠨᠡᠭᠡ ᠮᠡᠳᠡᠨ ᠭᠦᠶᠦᠪᠡ ᠁
ᠶᠠᠮᠤᠨ ᠤ᠋ ᠬᠡᠰᠡᠭ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠭᠰᠠᠨ ᠲᠤᠰᠠᠯᠠᠭᠴᠢ ᠱᠠᠭᠳᠠᠷᠰᠥ᠋ᠷᠥᠩ ᠢ ᠢᠷᠡᠬᠦ ᠳ᠋ᠦ᠍ ᠲᠡᠷᠡ ᠪᠦᠬᠦᠢ ᠦᠵᠡᠭᠳᠡᠯ ᠭᠤᠨᠢᠭᠲᠤ ᠵᠦᠴᠦᠭᠡ ᠪᠡᠷ ᠲᠡᠭᠦᠰᠦᠭᠰᠡᠨ ᠪᠠᠢᠯᠠ᠃
ᠲᠤᠰᠠᠯᠠᠭᠴᠢ ᠱᠠᠭᠳᠠᠷᠰᠥ᠋ᠷᠥᠩ ᠪᠠᠲᠤᠪᠠᠶᠠᠷ ᠤ᠋ᠨ ᠦᠬᠦᠭᠡᠷ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠤᠳᠠᠲᠠᠯᠠ ᠮᠡᠯᠡᠷᠡᠵᠦ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠳᠣᠣᠷᠠᠬᠢ ᠴᠡᠷᠢᠭ ᠲᠡᠭᠡᠨ᠄
— ᠲᠡᠭᠦᠨ ᠦ᠌ ᠬᠡᠭᠦᠷ ᠢ ᠨᠢᠳᠦᠨ ᠦ᠌ ᠳᠠᠯᠳᠠ ᠠᠪᠠᠴᠢᠴᠤ ᠪᠤᠯᠠᠰᠢᠯᠠᠴᠢᠬᠠ! ᠭᠡᠵᠦ ᠲᠡᠨᠳᠡ ᠡᠴᠡ ᠵᠠᠢᠯᠠᠵᠤ ᠶᠠᠪᠤᠪᠠ᠃
ᠲᠡᠢᠨ ᠱᠠᠲᠤ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠵᠢᠯᠠᠭᠠᠨ ᠳ᠋ᠠᠬᠢ ᠨᠣᠭᠣᠭᠠᠨ ᠵᠦᠯᠭᠡᠲᠦ ᠭᠡᠳᠡᠭ ᠭᠠᠵᠠᠷ ᠪᠠᠲᠤᠪᠠᠶᠠᠷ ᠠᠯᠠᠭᠳᠠᠵᠤ᠂ ᠬᠣᠷᠣ ᠠᠲᠠᠭᠠ᠂ ᠦᠰ ᠬᠣᠨᠵᠢᠩ᠂ ᠪᠦᠷᠢᠯᠳᠦᠭᠡ ᠦᠭᠡᠢ ᠠᠩᠭᠠᠬᠠᠢ ᠵᠢᠭᠠᠯ ᠬᠦᠦ ᠨᠢ ᠴᠦ᠍ ᠭᠠᠰᠠᠯᠠᠩᠲᠠᠢ ᠦᠷᠡᠭᠳᠡᠵᠡᠢ᠃
ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠲᠡᠢ ᠬᠤᠷᠰᠢᠭᠰᠠᠨ ᠰᠢᠷᠠᠪᠳᠤᠷᠵᠢ ᠬᠦᠩ ᠦ᠋ᠨ ᠴᠡᠷᠢᠭ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠭᠤᠷᠪᠠᠨ ᠦᠶᠡ ᠶ᠋ᠢᠨ ᠬᠦᠢᠰᠦ ᠶ᠋ᠢ ᠲᠡᠮᠲᠡᠷᠢᠵᠦ ᠡᠨᠡ ᠤᠳᠠᠭᠠᠨ ᠤ᠋ ᠲᠤᠯᠤᠯᠳᠤᠭᠠᠨ ᠭᠤᠨᠢᠭᠲᠠᠢ ᠲᠡᠭᠦᠰᠪᠡ᠃
ᠪᠠᠲᠤᠪᠠᠶᠠᠷ ᠤ᠋ᠨ ᠡᠬᠡᠨᠡᠷ ᠨᠢ ᠭᠠᠯᠵᠠᠭᠤ ᠰᠣᠯᠢᠶᠠᠲᠠᠢ ᠪᠣᠯᠵᠤ ᠠᠭᠤᠯᠠ ᠶ᠋ᠢᠨ ᠵᠡᠷᠯᠢᠭ ᠬᠥᠮᠦᠨ ᠪᠣᠯᠴᠢᠬᠠᠯᠠ ᠭᠡᠵᠦ ᠬᠥᠮᠦᠰ ᠰᠡᠭᠦᠯ ᠳ᠋ᠦ᠍ᠨᠢ ᠬᠡᠯᠡᠯᠴᠡᠳᠡᠭ ᠪᠣᠯᠪᠠ᠃
ᠨᠠᠷᠠ ᠪᠠᠷᠠᠭᠤᠨᠰᠢ ᠲᠡᠰᠢᠵᠦ᠂ ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠡᠷᠭᠢᠯᠡ᠂ ᠬᠠᠷᠠ ᠴᠡᠷᠢᠭ ᠦ᠋ᠳ ᠠᠭᠤᠯᠠ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠭᠠᠷᠴᠤ ᠬᠥᠬᠡᠪᠣᠯᠠᠭ ᠤ᠋ᠨ ᠵᠣ ᠪᠠᠷ ᠬᠠᠷᠠᠯᠠᠨ ᠴᠤᠪᠤᠷᠠᠯᠳᠤᠨᠠ᠃
ᠰᠢᠷᠠ ᠪᠦᠷᠦᠢ ᠲᠠᠰᠤᠷᠠᠬᠤ ᠳ᠋ᠤ᠌ ᠬᠡᠳᠦᠨ ᠬᠥᠮᠦᠨ ᠬᠦᠬᠡᠪᠤᠯᠠᠭ ᠤ᠋ᠨ ᠱᠠᠲᠤ ᠶ᠋ᠢᠨ ᠭᠣᠣᠯ ᠢ ᠥᠭᠡᠳᠡᠯᠡᠵᠦ᠂ ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠳᠡᠭᠡᠳᠦ ᠬᠠᠳᠠᠨ ᠬᠣᠩᠭᠢᠯ ᠢ ᠵᠣᠷᠢᠨ ᠬᠢᠯᠤᠪ ᠬᠠᠯᠠᠪ ᠬᠢᠨ ᠬᠣᠷᠮᠣᠢ ᠬᠡᠢᠰᠬᠡᠨ ᠶᠠᠪᠤᠨᠠ᠃
ᠲᠡᠷᠡ ᠬᠡᠳᠦᠨ ᠬᠥᠮᠦᠨ ᠦ᠌ ᠬᠣᠶᠠᠷ ᠨᠢ ᠬᠠᠳᠠᠨ ᠬᠣᠩᠭᠢᠯ ᠳ᠋ᠤ᠌ ᠳᠥᠭᠥᠵᠦ ᠣᠴᠢᠭᠠᠳ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠤᠭᠤᠲᠠᠨ ᠳ᠋ᠤ᠌ ᠰᠠᠪᠠᠯᠠᠵᠤ ᠠᠪᠤᠭᠠᠳ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠰᠠᠨ ᠢ ᠬᠡᠨ ᠴᠦ᠍ ᠦᠵᠡᠭᠰᠡᠨ ᠦᠭᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠣᠯᠮᠣᠨᠲᠤᠶᠠᠭᠠ