ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠠᠢ᠍ᠮᠠ> Хан мунын сүүрс < дээд > – Мөнх зохиоов ᠂ дэд бодь – нэгдүгээр бүлэг <8>
268ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠠᠢ᠍ᠮᠠ>
ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠭᠤᠶᠤᠴᠢᠯᠠᠯ ᠢ᠋ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠪᠤᠭᠤᠲᠤ ᠶ᠋ᠢᠨ ᠠᠲᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠲᠣᠪᠴᠢᠶᠠᠨ ᠤ᠋ ᠰᠠᠭᠤᠭᠠ ᠴᠡᠷᠢᠭ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠲᠣᠮᠢᠯᠠᠯᠲᠠ ᠪᠠᠷ ᠪᠠᠷᠠᠭᠤᠨᠰᠢ ᠬᠥᠳᠡᠯᠵᠦ᠂ ᠬᠥᠨᠳᠡᠯᠢ ᠶᠢᠨ ᠰᠦᠮᠡ᠂ ᠬᠠᠳᠤᠮᠠᠯ ᠤ᠋ᠨ ᠠᠮᠠ᠂ ᠬᠣᠶᠠᠷᠬᠤᠳᠳᠤᠭ ᠲᠤ᠌ ᠵᠠᠮ ᠤ᠋ᠨ ᠲᠤᠷᠰᠢ ᠰᠠᠬᠢᠭᠤᠯ ᠤ᠋ᠨ ᠴᠡᠷᠢᠭ ᠴᠤᠪᠤᠭᠤᠯᠵᠤ ᠬᠠᠶᠠᠭᠠᠳ ᠰᠢᠷᠠ ᠵᠠᠮ ᠢ᠋ ᠪᠠᠷᠢᠨ ᠲᠣᠭᠣᠰᠣ ᠮᠠᠨᠠᠷᠠᠭᠠᠨᠠ᠃ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠵᠠᠮ ᠲᠤᠵᠢ ᠠᠢᠯ ᠲᠣᠰᠬᠣᠨ ᠲᠠᠭᠠᠷᠠᠪᠠᠯ ᠲᠤᠨᠤᠨ ᠳᠡᠭᠡᠷᠡᠮᠳᠡᠵᠦ᠂ ᠰᠦᠮᠡ ᠬᠡᠢᠳ ᠲᠣᠬᠢᠶᠠᠯᠳᠤᠭᠰᠠᠭᠠᠷ ᠴᠥᠯᠪᠡᠨ ᠨᠡᠩᠵᠢᠵᠦ᠂ ᠶᠠᠭ ᠯᠠ ᠳᠣᠭᠰᠢᠨ ᠠᠪᠤᠷᠭᠤ ᠬᠦᠷᠪᠡᠯ ᠰᠢᠭ ᠠᠮᠠ ᠨᠢ ᠠᠩᠭᠠᠯᠵᠠᠨ ᠲᠠᠭᠠᠷᠠᠭᠰᠠᠨ ᠪᠦᠬᠦᠨ ᠢ᠋ ᠵᠠᠯᠭᠢᠵᠤ᠂ ᠰᠡᠭᠦᠯ ᠨᠢ ᠭᠤᠰᠢᠪᠠᠯᠵᠠᠨ ᠥᠷᠲᠥᠭᠰᠡᠨ ᠪᠦᠬᠦᠨ ᠢ᠋ ᠭᠤᠶᠠᠳᠠᠯᠠᠵᠤ ᠶᠠᠪᠤᠭᠠ ᠮᠡᠲᠦ ᠪᠠᠢᠯᠠ᠃ ᠡᠳᠡᠭᠡᠷ ᠴᠡᠷᠢᠭ ᠦ᠋ᠳ《 ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢ ᠴᠥᠯᠪᠡᠨ ᠨᠡᠩᠵᠢᠵᠦ ᠰᠡᠵᠢᠭᠲᠡᠢ ᠡᠲᠡᠭᠡᠳ ᠢ᠋ᠶ᠋ᠡᠨ ᠣᠯᠤᠭᠠ ᠦᠭᠡᠢ ᠳ᠋ᠡᠭᠡᠨ ᠰᠦᠮᠡ ᠶ᠋ᠢᠨ ᠶᠡᠬᠡ ᠳᠤᠭᠠᠩ ᠳ᠋ᠤ᠌ ᠭᠠᠯ ᠲᠠᠯᠪᠢᠵᠤ ᠣᠷᠬᠢᠯᠠ᠃ ᠪᠠᠢᠩᠭᠤ ᠨᠠᠮ ᠲᠠᠢᠪᠤᠩ᠂ ᠨᠦᠰᠡᠷ ᠬᠢᠨᠠᠭᠤᠷ᠂ ᠨᠣᠮ ᠤ᠋ᠨ ᠰᠦᠵᠢᠭ᠂ ᠪᠤᠷᠬᠠᠨ ᠤ᠋ ᠪᠢᠰᠢᠯᠭᠠᠯ ᠬᠢᠳᠡᠭ ᠪᠣᠳᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠢ᠋ᠶ᠋ᠡᠷ ᠬᠠᠷᠠ ᠠᠶᠤᠩᠭᠠ ᠨᠢᠷᠭᠡᠵᠦ ᠫᠤᠤ ᠰᠤᠮᠤ ᠫᠢᠩ ᠫᠠᠩ ᠬᠢᠨ《 ᠠᠯᠠ ᠠ᠋᠂ ᠪᠤᠯᠠ ᠠ᠋!》 ᠭᠡᠬᠦ ᠡᠷᠢᠶᠡᠨ ᠮᠡᠷᠢᠶᠡᠨ ᠳᠠᠭᠤᠨ ᠦᠷᠭᠦᠯᠵᠢᠯᠡᠨ᠂ ᠰᠦᠮᠡ ᠶ᠋ᠢᠨ ᠰᠠᠷᠠᠪᠴᠢᠨ ᠤ᠋ ᠬᠥᠬᠡ ᠲᠠᠭᠲᠠᠭᠠ ᠨᠤᠭᠤᠳ ᠴᠦ᠍ ᠴᠣᠴᠢᠷᠳᠠᠨ ᠭᠡᠯᠮᠡᠭᠳᠡᠵᠦ᠂ ᠠᠶᠤᠨ ᠪᠡᠷᠲᠡᠭᠰᠡᠨ ᠯᠠᠮᠠ ᠨᠠᠷ ᠳᠤᠲᠠᠭᠠᠬᠤ ᠨᠢ ᠳᠤᠲᠠᠭᠠᠵᠤ᠂ ᠳᠠᠯᠳᠠᠯᠠᠬᠤ ᠨᠢ ᠳᠠᠯᠳᠠᠯᠠᠭᠠᠳ ᠬᠥᠯ ᠤᠯᠠ ᠪᠠᠨ ᠣᠯᠬᠤ ᠦᠭᠡᠢ ᠪᠤᠵᠢᠭᠢᠨᠠᠨᠠ᠃ ᠬᠡᠨ ᠬᠥᠮᠦᠨ ᠳ᠋ᠦ᠍ ᠴᠦ᠍ ᠬᠣᠣᠷ ᠨᠢᠭᠦᠯ ᠦᠭᠡᠢ ᠪᠤᠶᠠᠨ ᠨᠢᠭᠦᠯᠡᠰᠬᠦᠢ ᠡᠨᠡᠷᠢᠩᠭᠦᠢ ᠣᠪᠣᠷ ᠲᠠᠢ ᠠᠯᠲᠠᠨ ᠰᠢᠵᠢᠷ ᠢ᠋ᠶ᠋ᠡᠷ ᠭᠣᠣᠳᠠᠭᠰᠠᠨ ᠣᠯᠠᠨ ᠪᠤᠷᠬᠠᠳ ᠤ᠋ᠨ ᠴᠢᠷᠠᠢ ᠴᠦ᠍ ᠬᠦ ᠬᠠᠷᠠ ᠭᠠᠯ ᠤ᠋ᠨ ᠤᠲᠤᠭᠠᠨ ᠳ᠋ᠤ᠌ ᠬᠠᠯᠲᠠᠷᠲᠤᠨ ᠬᠥᠳᠡᠭᠳᠡᠵᠦ᠂ ᠭᠠᠰᠢᠭᠤᠨ ᠡᠬᠡᠭᠦᠨ ᠳᠠᠷᠢ ᠶ᠋ᠢᠨ ᠦᠨᠦᠷ ᠲᠦ᠍ ᠬᠠᠬᠠᠵᠤ ᠴᠡᠴᠡᠨ ᠰᠠᠭᠤᠷᠢ ᠠ᠋ᠴᠠ ᠪᠠᠨ ᠣᠢᠴᠢᠵᠤ ᠤᠨᠠᠨᠠ᠃ ᠶᠡᠬᠡ ᠰᠦᠮᠡ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠲᠣᠭᠣᠰᠬᠠᠨ ᠬᠡᠷᠡᠮ ᠯᠥᠷ ᠯᠥᠷ ᠬᠢᠨ ᠰᠦᠢᠷᠡᠨ ᠨᠤᠷᠠᠵᠤ᠂ ᠭᠤᠯᠪᠢᠯᠵᠠᠨ ᠳᠦᠷᠡᠯᠵᠡᠭᠰᠡᠨ ᠳᠣᠭᠰᠢᠨ ᠭᠠᠯ ᠤ᠋ᠨ ᠰᠤᠷ ᠲᠤ᠌ ᠰᠦᠮᠡ ᠶ᠋ᠢᠨ ᠮᠣᠳᠣᠨ ᠠᠳᠠᠭᠠᠷ ᠲᠢᠱ ᠨᠢᠱ ᠳᠤᠤᠭᠠᠷᠤᠨ ᠰᠢᠳᠡᠵᠦ᠂ ᠬᠤᠷᠠᠯ ᠤ᠋ᠨ ᠷᠠ᠂ ᠣᠯᠪᠣᠭ ᠳᠡᠪᠢᠰᠬᠡᠷ᠂ ᠳᠤᠭᠠᠩ ᠤ᠋ᠨ ᠲᠤᠯᠭᠠᠭᠤᠷᠢ ᠶ᠋ᠢᠨ ᠤᠭᠠᠯᠵᠠᠲᠤ ᠬᠡᠪᠢᠰᠦᠨ ᠣᠷᠢᠶᠠᠯᠲᠠ ᠴᠦ᠍ ᠭᠠᠯ ᠳ᠋ᠤ᠌ ᠥᠷᠲᠥᠨ ᠦᠷᠪᠢᠰᠦᠨ ᠨᠣᠴᠣᠵᠤ᠂ ᠣᠷᠣᠢ ᠨᠢ ᠴᠣᠭᠣᠷᠠᠭᠰᠠᠨ ᠶᠡᠬᠡ ᠳᠤᠭᠠᠩ ᠤ᠋ᠨ ᠳᠡᠭᠡᠪᠦᠷ ᠡᠴᠡ ᠲᠦᠨᠡᠷ ᠬᠠᠷᠠ ᠤᠲᠤᠭᠠ ᠬᠡᠩᠰᠢᠭᠦᠦ ᠪᠠᠭᠠᠭᠢᠭᠤᠯᠤᠨ ᠣᠭᠲᠠᠷᠭᠤᠢ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠤᠢᠯᠠᠷᠠᠨ ᠣᠯᠣᠭᠠᠢᠳᠤᠨᠠ᠃ ᠳᠤᠲᠠᠭᠠᠵᠤ ᠠᠮᠵᠢᠭᠠ ᠦᠭᠡᠢ ᠴᠡᠷᠢᠭ ᠲᠦ᠍ ᠬᠠᠰᠢᠭᠳᠠᠭᠰᠠᠨ ᠰᠦᠮᠡ ᠶ᠋ᠢᠨ ᠵᠠᠷᠢᠮ ᠯᠠᠮᠠ ᠨᠠᠷ ᠪᠠ ᠪᠠᠨᠳᠢ ᠱᠠᠪᠢ ᠨᠠᠷ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠬᠢᠯᠢᠩ ᠦ᠋ᠨ ᠬᠠᠷᠠ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠵᠦ᠂ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠰᠦᠮᠡ ᠲᠡᠢ ᠪᠡᠨ ᠠᠳᠠᠯᠢᠬᠠᠨ ᠭᠠᠯ ᠠᠪᠤᠯᠴᠠᠨ ᠳᠦᠷᠳ᠋ ᠬᠢᠨ ᠨᠣᠴᠣᠮᠠᠷ ᠪᠣᠯᠵᠤ᠂ ᠪᠤᠴᠠᠯᠤᠭᠰᠠᠨ ᠴᠢᠰᠤ ᠨᠢ ᠤᠢᠯᠠᠵᠤ ᠵᠤᠯᠠᠢ ᠪᠠᠷ ᠨᠢ ᠴᠢᠨᠦᠷᠡᠨ ᠳᠡᠯᠪᠡᠷᠡᠬᠦ ᠰᠢᠭ ᠪᠣᠯᠤᠨᠠ᠃ ᠶᠡᠬᠡ ᠰᠦᠮᠡ ᠶ᠋ᠢᠨ ᠡᠰᠡᠷᠸᠠ ᠶᠡᠬᠡ ᠳᠤᠭᠠᠩ ᠤ᠋ᠨ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠤ᠋ᠨ ᠰᠤᠷ ᠭᠠᠰᠢᠭᠤᠨ ᠤᠲᠤᠭᠠ ᠶ᠋ᠢ ᠨᠢᠳᠦ ᠬᠠᠯᠢᠷᠠᠨ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠬᠡᠳᠦᠨ ᠢᠳᠡᠷ ᠵᠠᠯᠠᠭᠤ ᠯᠠᠮᠠ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠨᠢ《 ᠨᠠᠰᠤᠨ ᠪᠤᠶᠠᠨ ᠢ᠋ᠶ᠋ᠠᠨ ᠥᠨᠢ ᠡᠭᠦᠷᠢ ᠰᠦᠮᠡ ᠳ᠋ᠡᠭᠡᠨ ᠳᠠᠭᠠᠳᠬᠠᠵᠤ ᠰᠦᠵᠢᠭ ᠪᠢᠰᠢᠷᠡᠯ ᠢ᠋ᠶ᠋ᠡᠨ ᠬᠣᠶᠠᠷ ᠦᠭᠡᠢ ᠴᠠᠢᠯᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠤᠷᠬᠠᠨ ᠲᠩᠷᠢ ᠳ᠋ᠡᠭᠡᠨ ᠨᠠᠢᠳᠠᠭᠰᠠᠨ ᠰᠦᠨᠡᠰᠦᠨ ᠦ ᠮᠠᠨᠢ ᠠᠷᠢᠭᠤᠨ ᠪᠥᠷᠢᠯᠸᠠᠲᠦ ᠭᠣᠯᠣᠮᠲᠠ ᠮᠢᠨᠢ ᠠ᠋! ᠪᠤᠷᠬᠠᠨ ᠭᠣᠩᠴᠣᠭᠰᠣᠮ!》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠡᠷᠬᠡ ᠦᠭᠡᠢ ᠳᠦᠳᠦᠨᠡᠨ 《 ᠰᠦᠵᠢᠭ ᠦ᠋ᠨ ᠶᠡᠬᠡ ᠪᠢᠰᠢᠷᠡᠯᠲᠦ ᠰᠦᠮᠡ ᠮᠢᠨᠢ ᠰᠢᠲᠠᠵᠤ ᠳᠠᠭᠤᠰᠤᠭᠰᠠᠨ ᠶᠤᠮ ᠴᠢᠨᠢ᠂ ᠠᠮᠢᠳᠤ ᠶᠠᠪᠤᠭᠠᠳ ᠶᠠᠭᠤ ᠬᠢᠬᠦ ᠪᠣᠢ! ᠥᠨᠳᠥᠷ ᠲᠩᠷᠢ ᠳ᠋ᠦ᠍ ᠭᠠᠷᠴᠤ ᠠᠷᠢᠭᠤᠨ ᠲᠠᠬᠢᠯ ᠤ᠋ᠨ ᠣᠷᠳᠣᠨ ᠤ᠋ ᠴᠢᠨᠢ ᠯᠢᠩᠬᠣᠸᠠᠲᠦ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠠᠰᠠᠶᠠ!》 ᠭᠡᠬᠦ ᠳ᠋ᠦ᠍ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠤ᠋ᠨ ᠲᠦᠢᠮᠡᠷ ᠲᠦ᠍ ᠲᠦᠷᠢᠨ ᠣᠷᠣᠵᠤ ᠰᠦᠮᠡ ᠳᠤᠭᠠᠩ ᠲᠠᠢ ᠪᠠᠨ ᠬᠠᠮᠲᠤ ᠦᠷᠪᠢᠰᠦᠭᠰᠡᠨ ᠲᠣᠭᠰᠢᠨ ᠭᠠᠯ ᠳ᠋ᠤ᠌ ᠳᠤᠷᠠᠲᠠᠶᠠ ᠲᠦᠯᠡᠭᠳᠡᠵᠦ ᠦᠬᠦᠭᠰᠡᠨ ᠯᠠᠮᠠ ᠨᠢᠭᠡ ᠬᠣᠶᠠᠷ ᠢ᠋ᠶ᠋ᠠᠷ ᠵᠣᠭᠰᠣᠬᠤ ᠦᠭᠡᠢ! ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠵᠤ ᠲᠦᠪᠳᠡᠬᠦ ᠦᠭᠡᠢ ᠦᠰ ᠵᠠᠩᠭᠢᠳᠤᠨ ᠪᠣᠰᠤᠯᠴᠠᠭᠰᠠᠨ ᠬᠡᠳᠦᠨ ᠵᠠᠯᠠᠭᠤ ᠯᠠᠮᠠ ᠬᠢᠯᠢᠩ ᠪᠠᠳᠠᠷᠠᠵᠤ ᠠᠮᠢᠲᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠳ᠋ᠦ᠍ ᠬᠣᠣᠷ ᠬᠦᠷᠭᠡᠬᠦ ᠦᠭᠡᠢ ᠭᠡᠳᠡᠭ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠴᠦ᠍ ᠣᠭᠣᠷᠴᠤ ᠪᠤᠭ ᠰᠢᠮᠨᠤᠰ᠂ ᠠᠳᠠ ᠴᠢᠳᠬᠥᠷ ᠡᠴᠡ ᠴᠦ᠍ ᠴᠠᠭᠠᠰᠢ ᠮᠠᠭᠤᠬᠠᠢ ᠬᠠᠷᠠᠭᠳᠠᠭᠰᠠᠨ ᠬᠠᠷᠠ ᠴᠡᠷᠢᠭ ᠲᠡᠢ ᠲᠡᠪᠡᠷᠢᠨ ᠨᠣᠴᠣᠯᠳᠤᠵᠤ᠂ ᠬᠦᠵᠦᠭᠦᠦ ᠪᠠᠭᠠᠯᠵᠠᠭᠤᠷ ᠢ᠋ ᠨᠢ ᠬᠡᠤᠳᠠᠢ ᠲᠤᠯᠤᠮ ᠤ᠋ᠨ ᠠᠮᠠ ᠤᠶᠠᠵᠤ ᠪᠠᠢᠬᠤ ᠰᠢᠭ᠋ ᠪᠢᠲᠡᠭᠦᠦ ᠪᠣᠭᠣᠵᠤ ᠠᠯᠠᠭᠰᠠᠨ ᠵᠢᠱ᠌ᠢᠶᠡ ᠴᠦ᠍ ᠭᠠᠷᠪᠠ᠃ ᠁ ᠭᠡᠪᠡᠴᠦ ᠮᠣᠯᠲᠣᠭ ᠲᠣᠯᠣᠭᠠᠢ ᠮᠤᠬᠤᠷ ᠨᠢᠳᠤᠷᠭᠠ ᠶᠠᠭᠠᠬᠢᠨ ᠲᠡᠷᠡ ᠬᠦ᠌ ᠭᠠᠰᠢᠭᠤᠨ ᠳᠠᠷᠢ ᠪᠠᠷ ᠬᠠᠨᠢᠶᠠᠯᠭᠠᠭᠰᠠᠨ ᠭᠠᠩ ᠫᠤᠤ ᠲᠠᠢ ᠬᠠᠷᠠ ᠴᠡᠷᠢᠭ ᠦ᠋ᠨ ᠭᠠᠯᠵᠠᠭᠤᠷᠠᠯ ᠢ᠋ ᠬᠣᠷᠢᠵᠤ ᠳᠡᠢᠯᠬᠦ ᠪᠢᠯᠡ⁈
ᠬᠡᠴᠢᠨᠡᠭᠡᠨ ᠤᠳᠠᠭᠠᠨ ᠵᠢᠯ ᠦ᠋ᠨ ᠬᠥᠳᠡᠯᠮᠦᠷᠢᠴᠢᠨ ᠬᠥᠮᠦᠨ ᠦ᠌ ᠴᠢᠰᠤ ᠬᠥᠯᠥᠰᠥ ᠰᠦᠵᠢᠭ ᠮᠥᠷᠭᠥᠯᠴᠢᠳ ᠦ᠋ᠨ ᠪᠤᠶᠠᠨ ᠥᠭᠯᠢᠭᠡ ᠪᠡᠷ ᠴᠣᠭᠴᠠᠯᠠᠭᠳᠠᠭᠰᠠᠨ ᠭᠠᠢᠬᠠᠮᠰᠢᠭᠲᠤ ᠦᠨᠳᠦᠰᠦᠲᠡᠨ ᠦ᠌ ᠥᠪ ᠰᠣᠶᠣᠯ ᠤ᠋ᠨ ᠬᠤᠷᠠᠮᠳᠤᠯ᠂ ᠦᠨᠡᠨ ᠴᠠᠭᠠᠨ ᠪᠤᠶᠠᠨ ᠤ᠋ ᠰᠤᠪᠤᠷᠭᠠ ᠪᠣᠯᠤᠭᠰᠠᠨ《 ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢᠨ ᠶᠡᠬᠡ ᠳᠤᠭᠠᠩ ᠪᠠ ᠲᠡᠭᠦᠨ ᠢ᠋ ᠠᠰᠠᠷᠠᠨ ᠲᠡᠵᠢᠭᠡᠭᠴᠢ᠂ ᠰᠢᠲᠦᠨ ᠪᠢᠰᠢᠷᠡᠭᠴᠢ ᠯᠠᠮᠠ ᠬᠤᠸᠠᠷᠠᠭ ᠤ᠋ᠨ ᠬᠠᠷᠢᠭᠤ ᠳ᠋ᠤ᠌ ᠠᠲᠠᠭᠠ ᠵᠢᠲᠥᠭᠡ᠂ ᠴᠡᠷᠢᠭ ᠲᠡᠢᠨ ᠶᠠᠭᠤ ᠠᠪᠴᠢᠷᠠᠪᠠ? ᠭᠠᠭᠴᠠ《ᠢᠯᠠᠭᠳᠠᠯ》 ᠭᠡᠰᠡᠨ ᠭᠠᠩᠰᠠᠷᠠᠯᠲᠠᠢ ᠴᠣᠮᠬᠠᠨ ᠲᠡᠭᠦᠰᠬᠡᠯ ᠢ᠋ ᠠᠪᠴᠢᠷᠠᠪᠠ᠃
ᠴᠤᠴᠠᠷᠬᠠᠢ ᠰᠦᠮᠡ ᠶ᠋ᠢᠨ ᠬᠡᠯᠲᠡᠷᠬᠡᠢ ᠸᠠᠭᠠᠷ ᠲᠣᠭᠣᠰᠬᠠ᠂ ᠰᠢᠲᠠᠩᠬᠠᠢ ᠬᠠᠭᠠᠯᠭᠠ ᠴᠣᠩᠬᠣᠨ ᠤ᠋ ᠬᠤᠭᠤᠷᠬᠠᠢ ᠰᠠᠯᠪᠠᠷᠬᠠᠢ ᠣᠨᠢ ᠨᠢᠷᠤᠭᠤ ᠨᠤᠭᠤᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠶᠣᠷᠳᠣᠢᠨ ᠭᠣᠵᠣᠢᠵᠤ᠂ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠬᠥᠨᠳᠡᠯᠡᠨ ᠭᠤᠯᠳᠤ ᠬᠠᠶᠠᠭᠳᠠᠨ ᠬᠥᠬᠡ ᠤᠲᠤᠭᠠ ᠤᠭᠤᠭᠢᠨᠠ᠁ ᠳᠤᠲᠠᠭᠤ ᠲᠦᠯᠡᠭᠳᠡᠭᠰᠡᠨ ᠮᠣᠩᠭᠣᠯ ᠰᠤᠳᠤᠷ ᠤ᠋ᠨ ᠲᠠᠮᠲᠤᠷᠬᠠᠢ ᠥᠭᠡᠳᠡᠰᠦ ᠨᠦ᠍ᠭᠦᠳ ᠰᠦᠮᠡ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠡᠪᠳᠡᠷᠬᠡᠢ ᠬᠡᠷᠡᠮ ᠰᠤᠪᠤᠷᠭᠠ ᠶ᠋ᠢᠨ ᠢᠷᠣᠭᠠᠷ ᠢ᠋ᠶ᠋ᠠᠷ ᠬᠤᠤᠭᠢᠬᠤ ᠰᠠᠯᠬᠢᠨ ᠳ᠋ᠤ᠌ ᠰᠦᠮᠡ ᠪᠡᠨ ᠣᠷᠢᠶᠠᠨ ᠨᠠᠪᠲᠠᠰ ᠨᠠᠪᠲᠠᠰ ᠬᠡᠢᠰᠬᠦ ᠨᠢ ᠭᠠᠵᠠᠷ ᠤᠰᠤᠨ ᠤ᠋ ᠨᠠᠪᠳᠠᠭ ᠰᠠᠪᠳᠠᠭ ᠢ᠋ ᠬᠢᠯᠢᠩᠨᠡᠭᠦᠯᠦᠨ ᠳᠠᠭᠤᠳᠠᠵᠤ ᠬᠡᠨ ᠨᠢᠭᠡ ᠳ᠋ᠦ᠍ᠨᠢ ᠬᠢᠯᠢᠰ ᠭᠣᠮᠣᠳᠠᠯ ᠲᠣᠭᠠᠴᠢᠬᠤ ᠰᠢᠭ᠋ ᠰᠠᠨᠠᠭᠳᠠᠭᠤᠯᠤᠨᠠ᠃ ᠬᠠᠶᠠ ᠰᠦᠮᠡ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠨᠠᠭᠠᠨᠠ ᠴᠠᠭᠠᠨᠠ ᠡᠵᠡᠨ ᠦᠭᠡᠢ ᠲᠡᠷᠡᠢᠨ ᠬᠡᠪᠲᠡᠭᠰᠡᠨ ᠵᠠᠭᠤᠷᠲᠦ ᠶ᠋ᠢᠨ ᠰᠦᠨᠡᠰᠦ ᠲᠡᠢ ᠦᠬᠦᠭᠡᠷ ᠦ᠋ᠳ ᠦ᠋ᠨ ᠨᠢᠳᠦ ᠠᠮᠠ᠂ ᠬᠠᠮᠠᠷ ᠤ᠋ᠨ ᠨᠦᠬᠡ᠂ ᠴᠢᠬᠢᠨ ᠦ᠌ ᠬᠥᠨᠳᠡᠢ ᠳ᠋ᠦ᠍ᠨᠢ ᠴᠢᠭᠢᠭ ᠦ᠋ᠨ ᠬᠣᠷᠣᠬᠠᠢ᠂ ᠥᠲᠥᠨ ᠦ᠌ ᠨᠣᠭᠣᠭᠠᠨ ᠪᠠᠲᠠᠭᠠᠨᠠ ᠰᠦᠯᠵᠢᠨ ᠠᠷᠪᠠᠭᠠᠨᠠᠵᠤ ᠦᠩᠭᠢᠨᠡᠨ ᠱᠤᠤᠭᠢᠨᠠ᠃ ᠁ ᠶᠠᠭᠤ ᠴᠦ᠍ ᠭᠡᠰᠡᠨ ᠬᠠᠯᠠᠭᠤᠨ ᠨᠠᠮᠤᠷ ᠤ᠋ᠨ ᠴᠠᠭ ᠲᠤ᠌ ᠡᠨᠳᠡ ᠡᠴᠡ ᠡᠯᠳᠡᠪ ᠡᠰᠡᠨ ᠦᠮᠦᠬᠡᠢ ᠦᠨᠦᠷ ᠲᠠᠨᠢᠷ ᠬᠠᠩᠬᠤᠯᠵᠤ ᠥᠥᠯᠡᠭᠰᠡᠨ ᠰᠡᠪᠡᠰᠦ᠂ ᠥᠭᠡᠬᠦ ᠲᠣᠰᠣᠨ ᠤ᠋ ᠬᠡᠩᠰᠢᠭᠦᠦ᠂ ᠤᠩᠭᠠᠰᠤ ᠢᠰᠡᠭᠡᠢ ᠶ᠋ᠢᠨ ᠬᠢᠷᠪᠤᠰᠤ᠂ ᠰᠢᠷᠣᠢ ᠲᠣᠭᠣᠰᠣᠨ ᠤ᠋ ᠬᠡᠦᠷᠰᠢᠭᠰᠡᠨ ᠰᠢᠲᠠᠩᠬᠠᠢ ᠭᠠᠰᠢᠭᠤᠨ ᠤᠲᠤᠭᠠ ᠲᠠᠢ ᠬᠣᠯᠢᠯᠳᠤᠨ ᠨᠡᠯᠢᠶᠡᠳ ᠡᠳᠦᠷ ᠰᠦᠮᠡ ᠪᠡᠨ ᠡᠷᠭᠢᠨ ᠤᠭᠤᠭᠢᠵᠠᠢ ᠁
ᠲᠡᠷᠡ ᠰᠥᠨᠢ ᠵᠣᠳᠪᠠ ᠮᠡᠢᠷᠡᠨ ᠦ᠌ ᠤᠳᠤᠷᠢᠳᠤᠭᠰᠠᠨ ᠭᠣᠣᠯ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠲᠤᠷᠰᠢᠭᠤᠯ ᠤ᠋ᠨ ᠨᠢᠭᠡ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠨᠳᠡ ᠭᠡᠨᠡᠳᠡᠭᠦᠯᠦᠭᠰᠡᠨ ᠡᠴᠡ ᠨᠣᠶᠠᠨ ᠰᠠᠩ ᠤ᠋ᠨ ᠶᠠᠮᠤᠨ ᠤ᠋ ᠵᠤᠰᠠᠭᠠᠯ ᠢ᠋ ᠬᠠᠷᠠᠩᠭᠤᠢ ᠰᠥᠨᠢ ᠪᠡᠷ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ ᠫᠤᠤᠳᠠᠵᠤ ᠫᠤᠤᠳᠠᠭᠠᠳ ᠬᠡᠳᠦᠨ ᠲᠠᠢᠰᠢ ᠳᠤᠲᠠᠭᠠᠭᠰᠠᠨ ᠨᠢ ᠬᠦᠩ ᠨᠣᠶᠠᠨ ᠤ᠋ ᠬᠣᠰᠢᠭᠤ ᠴᠡᠷᠢᠭ ᠪᠠ ᠲᠤᠰᠠᠯᠠᠮᠵᠢ ᠪᠠᠷ ᠢᠷᠡᠭᠰᠡᠨ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠢ᠋ ᠥᠴᠦᠬᠡᠨ ᠴᠦ᠍ ᠰᠦᠷᠳᠡᠭᠦᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠬᠠᠷᠢᠨ ᠤᠯᠠᠮ ᠭᠡᠳᠡᠭᠡ ᠶ᠋ᠢ ᠨᠢ ᠬᠦᠷᠭᠡᠵᠦ ᠥᠳᠥᠭᠡᠭᠰᠡᠨ ᠪᠣᠯᠪᠠ᠃
ᠮᠠᠨᠠᠭᠠᠨ ᠤ᠋ ᠬᠠᠷᠠ ᠴᠡᠷᠢᠭ ᠲᠦ᠍ ᠫᠤᠤᠳᠠᠭᠳᠠᠭᠰᠠᠨ ᠲᠡᠷᠡ ᠲᠤᠷᠰᠢᠭᠤᠯᠴᠢ ᠠᠮᠢ ᠪᠥᠬᠡᠲᠡᠢ ᠪᠠᠢᠵᠤ ᠪᠠᠷᠠᠭᠤᠨ ᠮᠥᠷᠥ ᠪᠡᠨ ᠰᠦᠪᠡᠯᠡᠭᠦᠯᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠬᠠᠶᠠᠭᠳᠠᠨ ᠬᠦᠨᠳᠦ ᠰᠢᠷᠬᠠᠨ ᠳ᠋ᠠᠭᠠᠨ ᠪᠣᠭᠣᠭᠳᠠᠬᠤ ᠳ᠋ᠠᠭᠠᠨ ᠨᠥᠭᠦᠭᠡ ᠡᠲᠡᠭᠡᠳ ᠲᠡᠭᠡᠨ ᠣᠯᠵᠠᠯᠠᠭᠳᠠᠭᠰᠠᠨ ᠪᠠᠢᠵᠠᠢ᠃
ᠥᠨᠥᠬᠢ ᠣᠯᠵᠠᠯᠠᠭᠳᠠᠭᠰᠠᠨ ᠲᠤᠷᠰᠢᠭᠤᠯᠴᠢ ᠶ᠋ᠢᠨ ᠥᠴᠢᠭ ᠢ᠋ᠶ᠋ᠡᠷ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠴᠡᠷᠢᠭ ᠡᠮᠦᠨᠡ ᠨᠢ ᠭᠠᠵᠠᠷᠴᠢᠯᠠᠵᠤ ᠠᠷᠤ ᠠ᠋ᠴᠠ ᠨᠢ ᠬᠠᠷᠠ ᠴᠡᠷᠢᠭ ᠦ᠋ᠳ ᠬᠥᠬᠡᠪᠤᠯᠠᠭ ᠤ᠋ᠨ ᠭᠣᠣᠯ ᠢ᠋ ᠨᠥᠷᠢᠨ ᠪᠦᠰᠡᠯᠡᠪᠡ᠃ ᠡᠨᠡ ᠨᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠦᠷᠦᠭᠦᠦ ᠲᠡᠢ ᠬᠦᠴᠦᠨ ᠢ᠋ ᠰᠦᠢᠷᠡᠭᠦᠯᠬᠦ ᠭᠡᠰᠡᠨ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠲᠡᠷᠡᠴᠢᠯᠡᠨ ᠲᠠᠬᠠᠷ ᠭᠦᠶᠦᠯᠭᠡᠵᠦ ᠪᠤᠭᠤᠲᠤ ᠠ᠋ᠴᠠ ᠨᠠᠭᠠᠰᠢᠯᠠᠵᠤ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠵᠠᠮ ᠢ᠋ ᠠᠮᠠᠳᠠᠵᠤ《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢ ᠳᠠᠭᠠᠷᠢᠨ ᠡᠯᠳᠡᠩᠭᠡ ᠲᠦᠷᠦᠭᠦᠲᠠᠢ ᠴᠡᠷᠢᠭ ᠢ᠋ ᠤᠰᠠᠳᠬᠠᠵᠤ᠂ ᠰᠦᠮᠡ ᠶ᠋ᠢᠨ ᠵᠠᠷᠢᠮ ᠲᠡᠷᠰ ᠨᠣᠮ ᠤ᠋ᠨ ᠡᠲᠡᠭᠡᠳ ᠲᠦ᠍ ᠰᠦᠷ ᠦᠵᠡᠭᠦᠯᠬᠦ ᠬᠡᠷᠡᠭᠲᠡᠢ ᠭᠡᠰᠡᠨ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠭᠰᠡᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠰᠦᠮᠡ ᠳ᠋ᠦ᠍ ᠭᠠᠯ ᠲᠠᠯᠪᠢᠭᠰᠠᠨ ᠨᠢ ᠲᠡᠷᠡ ᠪᠤᠶᠤ᠃
《ᠠᠯᠠᠨᠠ᠂ ᠪᠤᠯᠠᠨᠠ》 ᠭᠡᠰᠡᠨ ᠬᠠᠷᠭᠢᠰ ᠰᠢᠨᠤᠯ ᠳ᠋ᠠᠭᠠᠨ ᠨᠢᠳᠦ ᠨᠢ ᠤᠯᠠᠢᠰᠤᠭᠠᠳ ᠣᠷᠣᠳᠠᠭ ᠬᠠᠷᠠ ᠴᠡᠷᠢᠭ ᠦ᠋ᠳ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢ ᠪᠦᠰᠡᠯᠡᠨ ᠴᠥᠯᠪᠡᠪᠡ᠃ ᠰᠦᠮᠡ ᠳᠤᠭᠠᠩ ᠤ᠋ᠨ ᠬᠢᠨᠢ ᠣᠷᠣᠢ ᠳᠡᠭᠡᠭᠦᠷ ᠫᠢᠩ ᠫᠠᠩ! ᠭᠡᠵᠦ ᠫᠤᠤ ᠳᠤᠤᠭᠠᠷᠤᠭᠤᠯᠤᠨ 《 ᠳ᠋ᠠᠭᠳᠠᠨ ᠯᠠᠮᠠ ᠠ᠋! ᠨᠣᠮᠣᠬᠠᠨ ᠰᠢᠳᠤᠷᠭᠤ ᠪᠠᠭᠤᠵᠤ ᠥᠭᠪᠡᠯ ᠵᠣᠪᠠᠯᠭᠠ ᠶ᠋ᠢ ᠴᠢᠨᠢ ᠠᠮᠢᠰᠬᠤᠯ ᠲᠠᠢ ᠦᠯᠡᠳᠡᠭᠡᠶᠡ! ᠲᠡᠷᠰᠯᠡᠪᠡᠯ ᠪᠥᠨᠲᠥᠭᠡᠷ ᠴᠢᠨᠢ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠪᠡᠨ ᠨᠡᠭᠦᠨᠡ ᠭᠡᠳᠡᠭ ᠢ᠋ ᠮᠡᠳᠡᠭᠡᠷᠡᠢ!》 ᠭᠡᠵᠦ ᠡᠨᠳᠡ ᠲᠡᠨᠳᠡ ᠡᠴᠡ ᠬᠠᠰᠬᠢᠷᠤᠨ ᠰᠡᠷᠡᠮᠵᠢ ᠶ᠋ᠢᠨ ᠳᠣᠬᠢᠶᠠ ᠥᠭᠬᠦ ᠳ᠋ᠦ᠍ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠦᠷᠭᠦᠨ ᠨᠢᠰᠦᠭᠰᠡᠨ ᠰᠦᠮᠡ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠲᠠᠭᠲᠠᠭᠠ ᠨᠤᠭᠤᠳ《 ᠡᠵᠡᠨ ᠮᠢᠨᠢ ᠰᠦᠮᠡ ᠳ᠋ᠡᠭᠡᠨ ᠪᠠᠢᠬᠤ ᠦᠭᠡᠢ ᠠ᠋!》 ᠭᠡᠵᠦ ᠣᠯᠠᠨ ᠬᠠᠷᠠ ᠴᠡᠷᠢᠭ ᠢ᠋ ᠱᠣᠣᠯᠠᠨ ᠪᠠᠰᠤᠭᠰᠠᠨ ᠰᠢᠭ᠋ ᠬᠣᠢᠲᠤ ᠬᠦᠷᠡᠩ ᠬᠠᠳᠠ ᠲᠠᠢ ᠠᠭᠠᠷᠤ ᠲᠠᠢ ᠥᠨᠳᠥᠷ ᠣᠷᠣᠢ ᠵᠦᠭ ᠫᠦᠷ ᠫᠦᠷ ᠨᠢᠰᠦᠨ ᠣᠳᠪᠠ᠃ ᠰᠦᠮᠡ ᠳᠤᠭᠠᠩ ᠤ᠋ᠨ ᠬᠦᠷᠢᠶᠡ ᠳᠣᠲᠣᠷᠠ ᠠ᠋ᠴᠠ ᠥᠭᠡᠷᠡ ᠶᠠᠮᠠᠷ ᠴᠦ᠍ ᠴᠢᠮᠡᠭᠡ ᠠᠯᠠᠭᠠ᠃ ᠡᠮᠦᠨᠡ ᠨᠢ ᠡᠰᠡᠷᠭᠦᠴᠡᠯᠳᠦᠨ ᠲᠤᠯᠤᠯᠳᠤᠬᠤ ᠵᠦᠢᠯ ᠪᠠᠢᠭᠠ ᠦᠭᠡᠢ ᠭᠡᠰᠡᠨ ᠢ᠋ ᠭᠠᠳᠠᠷᠯᠠᠵᠤ ᠮᠡᠳᠡᠭᠰᠡᠨ ᠬᠡᠰᠡᠭ ᠬᠠᠷᠠ ᠴᠡᠷᠢᠭ ᠮᠥᠨ ᠰᠠᠨᠠᠭᠠ ᠨᠢ ᠮᠣᠬᠣᠬᠤ ᠦᠭᠡᠢ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠬᠤᠮᠢᠷᠠᠯᠳᠤᠨ ᠣᠷᠣᠵᠠᠭᠠᠪᠠ᠃ ᠬᠣᠪᠣᠩ ᠲᠡᠪᠡᠷᠢᠭᠡᠳ ᠬᠠᠷᠠ ᠴᠠᠢ ᠣᠭᠣᠴᠢᠯᠠᠭᠰᠠᠨ ᠰᠣᠬᠣᠷ ᠳᠣᠭᠣᠯᠠᠩ ᠨᠢᠭᠡ ᠬᠣᠶᠠᠷ ᠯᠠᠮᠠ《 ᠶᠢᠷᠲᠢᠨᠴᠦ ᠶ᠋ᠢᠨ ᠤᠴᠢᠷ ᠨᠠᠳᠠ ᠯᠤᠭᠠ ᠬᠠᠮᠢᠶᠠ ᠦᠭᠡᠢ ᠠ᠋! ᠭᠠᠬᠠᠢ ᠶ᠋ᠢᠨ ᠮᠥᠷ ᠭᠠᠳᠠᠭᠤᠷ ᠴᠠᠭᠠᠰᠢ ᠪᠠᠨ!》 ᠭᠡᠰᠡᠨ ᠮᠡᠲᠦ ᠠᠵᠢᠭ ᠴᠦ᠍ ᠦᠭᠡᠢ ᠬᠠᠨᠵᠤ ᠳᠠᠷᠤᠨ ᠰᠠᠭᠤᠨᠠ᠃ ᠲᠡᠭᠡᠭᠡᠳ ᠴᠠᠭᠠᠳᠤᠭᠤᠯᠠ ᠨᠢ ᠦᠬᠦᠬᠦ ᠪᠡᠨ ᠬᠦᠯᠢᠶᠡᠭᠰᠡᠨ ᠡᠪᠦᠭᠡᠨ ᠯᠠᠮᠠ ᠶ᠋ᠢ ᠶᠠᠭᠠᠬᠢᠯᠲᠠᠢ ᠴᠦ᠍ ᠪᠢᠰᠢ ᠭᠡᠰᠡᠨ ᠲᠥᠯᠥᠪᠲᠡᠢ ᠬᠠᠶᠠᠭᠠᠨ ᠳ᠋ᠤᠨᠢ ᠣᠷᠬᠢᠭᠠᠳ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠭ ᠭᠡᠷ ᠬᠦᠷᠢᠶᠡ ᠶ᠋ᠢ ᠨᠢ ᠣᠩᠭᠢᠯᠠᠵᠤ ᠣᠩᠭᠢᠯᠠᠵᠤ ᠪᠤᠰᠠᠨᠢᠭᠤᠯᠤᠨ ᠬᠠᠶᠠᠪᠠ᠃
ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠳᠡᠭᠡᠳᠦ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠬᠥᠨᠳᠡᠢ ᠡᠴᠡ ᠥᠩ ᠥᠩ! ᠭᠡᠬᠦ ᠬᠥᠭ ᠠᠢᠵᠠᠮ ᠲᠠᠢ ᠨᠣᠮ ᠭᠦᠷᠢᠮᠳᠡᠬᠦ ᠳᠠᠭᠤᠨ ᠬᠥᠬᠡᠪᠤᠯᠠᠭ ᠤ᠋ᠨ ᠭᠣᠣᠯ ᠢ᠋ ᠡᠷᠭᠦᠭᠡᠳ ᠬᠠᠶᠠᠴᠢᠬᠠᠮᠠᠷᠬᠠᠨ ᠴᠤᠤᠷᠠᠢ ᠲᠡᠳᠡᠨ ᠭᠥᠭᠯᠡᠵᠦ ᠰᠥᠨᠢᠵᠢᠨ ᠠᠰᠠᠭᠰᠠᠨ ᠮᠥᠩᠬᠡ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠤᠨᠲᠠᠷᠠᠰᠢ ᠦᠭᠡᠢ ᠪᠠᠳᠮᠠᠷᠠᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠪᠠᠢᠨ ᠪᠠᠢᠨ ᠳᠡᠷᠪᠡᠴᠡᠨ ᠰᠢᠪᠠᠬᠤ ᠵᠤᠯᠠ ᠶ᠋ᠢᠨ ᠪᠣᠷᠣ ᠡᠷᠪᠡᠬᠡᠢ ᠶ᠋ᠢᠨ ᠨᠢᠮᠭᠡᠨ ᠳᠠᠯᠠᠪᠴᠢ ᠪᠠ ᠨᠠᠮᠤᠷ ᠤ᠋ᠨ ᠰᠥᠨᠢ ᠶ᠋ᠢᠨ ᠬᠤᠯᠠᠭᠠᠢ ᠵᠢᠪᠠᠷ ᠬᠣᠶᠠᠷ ᠲᠤ᠌ ᠳᠡᠯᠡᠰᠦᠭᠳᠡᠨ ᠤᠨᠲᠠᠷᠠᠬᠤ ᠵᠤᠯᠠ ᠶ᠋ᠢ ᠬᠠᠷᠠᠭᠰᠠᠨ ᠪᠣᠷᠣᠪᠠᠨᠳᠢ《 ᠮᠠᠭᠤ ᠢᠷᠣᠠ ᠴᠦ᠍ ᠶᠤᠮ ᠤᠤ ᠳᠠ》 ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠭᠠᠳ ᠨᠣᠴᠣᠭᠠᠵᠤ᠂ ᠭᠠᠤᠯᠢᠨ ᠭᠦᠴᠡ ᠶ᠋ᠢᠨ ᠨᠠᠷᠢᠬᠠᠨ ᠴᠣᠷᠭᠣ ᠶ᠋ᠢ ᠨᠢᠮᠪᠠᠢ ᠪᠠᠷᠢᠨ ᠵᠣᠯ ᠠᠰᠠᠷᠠᠨ ᠶᠠᠭᠠᠷᠠᠵᠤ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠤᠷ ᠠᠮᠤᠭᠤᠯᠠᠩ ᠢ᠋ ᠰᠠᠭᠠᠲᠠᠭᠤᠯᠵᠤ ᠪᠠᠢᠭᠠ ᠪᠠᠨ ᠰᠠᠭᠠᠷ ᠦᠭᠡᠢ ᠢᠯᠡᠳᠬᠡᠬᠦ ᠨᠢ ᠬᠠᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠦᠷᠦ ᠡᠪᠡᠳᠦᠯᠲᠡᠢ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠬᠦᠵᠦᠭᠦᠨ ᠳ᠋ᠡᠭᠡᠨ ᠲᠥᠪᠡᠳ ᠦ᠋ᠨ ᠷᠠᠰᠢᠯᠾᠥ᠋ᠮᠪᠦ ᠬᠡᠢᠳ ᠦ᠋ᠨ ᠭᠡᠭᠡᠨ ᠦ᠌ ᠮᠣᠳᠣᠷ ᠤ᠋ᠨ ᠠᠳᠢᠰ ᠬᠦᠷᠲᠡᠵᠦ ᠲᠠᠷᠨᠢ ᠶ᠋ᠢᠨ ᠬᠦᠴᠦ ᠪᠡᠷ ᠠᠮᠢᠯᠠᠭᠤᠯᠤᠭᠰᠠᠨ《 ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ》 ᠵᠡᠭᠦᠭᠰᠡᠨ ᠳ᠋ᠡᠭᠡᠨ ᠡᠷᠳᠦᠨ ᠪᠡᠷᠲᠡᠵᠦ᠂ ᠬᠥᠩᠬᠥᠷ᠂ ᠬᠥᠩᠬᠥᠷ ᠤᠩᠰᠢᠬᠤ ᠨᠣᠮ ᠤ᠋ᠨ ᠢ᠋ᠶ᠋ᠠᠨ ᠬᠥᠭ ᠠᠶᠠ ᠳ᠋ᠤ᠌ ᠬᠦᠴᠦ ᠨᠡᠮᠡᠭᠳᠡᠭᠦᠯᠬᠦ ᠪᠡᠷ ᠸᠴᠢᠷ ᠭᠠᠤᠯᠢᠨ ᠬᠣᠩᠬᠣ ᠪᠠᠨ ᠳ᠋ᠢᠩᠭᠠᠷ ᠳ᠋ᠠᠩᠭᠠᠷ ᠳᠤᠤᠭᠠᠷᠭᠠᠨ᠂ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠳᠠᠮᠠᠷᠤ ᠪᠠᠨ ᠫᠠᠳ ᠫᠠᠳ ᠫᠠᠴᠢᠭᠢᠨᠠᠭᠤᠯᠤᠨ ᠵᠣᠬᠢᠰᠲᠠᠢ ᠦᠶᠡ ᠳ᠋ᠦ᠍ᠨᠢ ᠶᠦᠩᠭᠠᠷ ᠰᠦᠷᠴᠢᠨ ᠮᠠᠰᠢᠳᠠ ᠰᠦᠷ ᠬᠦᠴᠦᠨ ᠲᠡᠢ ᠠᠵᠤᠭᠤ᠃ ᠬᠠᠵᠠᠭᠤ ᠳ᠋ᠤᠨᠢ ᠬᠠᠮ ᠳᠠᠮ ᠬᠠᠨᠢᠰᠠᠭᠠ ᠪᠣᠯᠤᠭᠴᠢ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠰᠦᠵᠢᠭ ᠪᠢᠰᠢᠷᠡᠯ ᠢ᠋ ᠨᠢ ᠬᠥᠨᠳᠡᠨ ᠰᠦᠮᠡ ᠬᠡᠢᠳ ᠲᠦ᠍ ᠣᠷᠣᠵᠤ ᠣᠴᠢᠭᠰᠠᠨ ᠰᠢᠭ᠋ ᠰᠦᠭ ᠪᠢᠯᠢᠭ ᠢ᠋ ᠨᠢ ᠬᠥᠭᠵᠢᠭᠦᠯᠦᠭᠡ ᠰᠢᠭ ᠣᠨᠴᠠ ᠶᠢᠨ ᠲᠥᠷᠥᠭᠳᠡᠯ ᠥᠭᠭᠦᠨᠡ᠃ ᠬᠡᠳᠦᠢ ᠢᠩᠭᠢᠭᠰᠡᠨ ᠪᠣᠯᠪᠠᠴᠤ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠪᠣᠳᠣᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠥᠩᠭᠡᠷᠡᠭᠴᠢ ᠰᠥᠨᠢ ᠳᠠᠢᠳᠤᠬᠤ ᠪᠠᠷ ᠮᠣᠷᠳᠠᠭᠰᠠᠨ ᠴᠡᠷᠢᠭ ᠦ᠋ᠳ ᠣᠪᠣᠨ ᠴᠤᠪᠤᠨ ᠢᠷᠡᠭᠰᠡᠨ ᠨᠢ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠪᠣᠳᠣᠵᠤ ᠬᠦᠰᠡᠭᠰᠡᠨ ᠰᠢᠭ ᠰᠠᠢᠨ ᠴᠢᠮᠡᠭᠡ ᠠᠪᠴᠢᠷᠠᠭᠠ ᠦᠭᠡᠢ᠃《ᠨᠣᠶᠠᠨ ᠰᠠᠩ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠬᠡᠴᠡᠭᠦᠦ! ᠬᠠᠯᠳᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠬᠠᠷᠠ ᠴᠡᠷᠢᠭ ᠳᠦᠭᠦᠷᠴᠡᠢ ᠠ᠋!》 ᠭᠡᠰᠡᠨ ᠢ᠋ ᠰᠣᠨᠣᠰᠤᠭᠰᠠᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠴᠢᠷᠠᠢ ᠵᠡᠰ ᠬᠠᠷᠠᠩᠭᠠ ᠶ᠋ᠢᠨ ᠬᠠᠴᠠᠷ ᠰᠢᠭ᠋ ᠬᠦᠷᠡᠩ ᠤᠯᠠᠭᠠᠨ ᠪᠣᠯᠵᠤ ᠪᠦᠬᠦ ᠪᠡᠶᠡ ᠶ᠋ᠢᠨ ᠬᠢᠨᠢ ᠣᠢᠯᠤᠭᠰᠠᠨ ᠴᠢᠰᠤ ᠨᠢ ᠴᠢᠷᠠᠢ ᠤᠷᠤᠭᠤ ᠪᠠᠨ ᠴᠢᠨᠦᠷᠡᠪᠡ ᠪᠣᠯᠤᠯᠲᠠᠢ᠂ ᠶᠠᠭᠤ ᠴᠦ᠍ ᠭᠡᠵᠦ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠳᠣᠮᠪᠣᠢᠵᠤ ᠰᠠᠭᠤᠪᠠ᠃ ᠤᠳᠠᠭᠰᠠᠨ ᠦᠭᠡᠢ ᠬᠠᠷᠠ ᠴᠡᠷᠢᠭ ᠬᠥᠬᠡᠪᠤᠯᠠᠭ ᠤ᠋ᠨ ᠠᠮᠠ ᠪᠠᠷ ᠨᠥᠷᠢᠵᠦ ᠢᠷᠡᠯᠡ! ᠭᠡᠰᠡᠨ ᠴᠢᠮᠡᠭᠡ ᠳᠠᠬᠢᠭᠠᠳ ᠤᠯᠠᠮᠵᠢᠯᠠᠭᠳᠠᠵᠤ ᠢᠷᠡᠪᠡ᠃
— ᠡᠯᠳᠡᠩᠭᠡ ᠶᠠᠭᠠᠬᠢᠪᠠ?
— ᠵᠡᠭᠦᠨ ᠡᠴᠡ ᠰᠢᠬᠠᠭᠰᠠᠨ ᠬᠠᠷᠠ ᠴᠡᠷᠢᠭ ᠦ᠋ᠨ ᠳᠠᠭᠠᠷᠢᠯᠲᠠ ᠳ᠋ᠤ᠌ ᠬᠥᠨᠥᠭᠡᠭᠳᠡᠭᠰᠡᠨ ᠪᠣᠯᠤᠯᠲᠠᠢ᠃ ᠦᠭᠡᠢ ᠪᠣᠯ ᠳᠤᠲᠠᠭᠠᠭᠰᠠᠨ!
— ᠬᠠᠮᠢᠭᠠᠰᠢ ᠪᠠᠨ ᠳᠤᠲᠠᠭᠠᠪᠠ?
— ᠮᠡᠳᠡᠬᠦ ᠦᠭᠡᠢ ᠠ᠋ !《ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》 ᠶ᠋ᠢ ᠬᠠᠷᠠ ᠴᠡᠷᠢᠭ ᠭᠠᠯᠳᠠᠵᠤ ᠣᠷᠬᠢᠭᠰᠠᠨ! ᠡᠯᠳᠡᠩᠭᠡ ᠴᠦ᠍ ᠁ ᠭᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠠᠴᠢ ᠬᠥᠪᠡᠭᠦᠨ ᠪᠠᠲᠤᠪᠠᠶᠠᠷ ᠬᠡᠯᠡᠬᠦ ᠳ᠋ᠦ᠍᠂
— ᠵᠠ᠂ ᠳᠦᠭᠦᠷᠦᠭᠰᠡᠨ ᠰᠤᠤᠬᠠᠨ! ᠭᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠰᠡᠭᠦᠷᠡᠰᠦ ᠠᠯᠳᠠᠵᠤ《 ᠡᠯᠳᠡᠩᠭᠡ <ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ> ᠳ᠋ᠤ᠌ ᠬᠥᠨᠥᠭᠡᠭᠳᠡᠯᠡ ᠭᠡᠵᠦ ᠤᠤ?》 ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠨ ᠢᠲᠡᠭᠡᠵᠦ ᠶᠠᠳᠠᠨ ᠳᠤᠤᠭᠠᠷᠪᠠ᠃
— ᠁ ᠬᠡᠨ ᠴᠦ᠍ ᠳᠤᠤᠭᠠᠷᠬᠤ ᠲᠡᠩᠬᠡᠭᠡ ᠦᠭᠡᠢ ᠭᠠᠵᠠᠷ ᠱᠠᠭᠠᠢᠵᠤ ᠵᠣᠭᠰᠣᠨᠠ᠃
— ᠪᠠᠲᠤᠪᠠᠶᠠᠷ ᠠ᠋! ᠴᠢ ᠪᠤᠰᠢᠭᠤ ᠶᠠᠪᠤᠵᠤ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠪᠴᠤ ᠪᠠᠷᠠᠭᠤᠨ ᠭᠣᠣᠯ ᠤ᠋ᠨ ᠡᠬᠢ ᠪᠡᠷ ᠬᠣᠷᠭᠣᠳᠠ! ᠬᠠᠷᠠ ᠴᠡᠷᠢᠭ ᠢᠷᠡᠭᠰᠡᠨ ᠪᠣᠯ ᠬᠡᠴᠡᠭᠦᠦ ᠳᠡ! ᠨᠢᠭᠡ ᠳᠣᠣᠷᠠ ᠢᠩᠭᠢᠵᠦ ᠪᠠᠭᠯᠠᠷᠠᠭᠠᠳ ᠠᠰᠢᠭ ᠦᠭᠡᠢ ᠭᠡᠵᠦ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠵᠠᠬᠢᠭᠠᠳ《ᠲᠠ ᠨᠠᠷ ᠲᠡᠭᠡᠭᠡᠳ ᠵᠦᠭ ᠵᠦᠭ ᠢ᠋ᠶ᠋ᠡᠨ ᠣᠯᠵᠤ ᠠᠮᠢ ᠭᠠᠷᠬᠤ ᠶ᠋ᠢ ᠪᠣᠳᠣ》 ᠭᠡᠰᠡᠨ ᠮᠠᠶᠢᠭ ᠲᠠᠢ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠠᠨ ᠴᠠᠭᠠᠰᠢ ᠶᠠᠪᠤᠵᠠᠭᠠ ᠭᠡᠰᠡᠨ ᠪᠢᠲᠡᠭᠦᠦ ᠳᠣᠬᠢᠶᠠ ᠥᠭᠪᠡ᠃
— ᠲᠠ᠂ ᠲᠠ ᠲᠡᠭᠡᠭᠡᠳ? ᠭᠡᠵᠦ ᠪᠠᠲᠤᠪᠠᠶᠠᠷ ᠨᠠᠷ ᠵᠡᠷᠭᠡ ᠳ᠋ᠡᠭᠡᠨ ᠠᠰᠠᠭᠤᠪᠠᠯ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠷᠦᠬᠡᠨ ᠲᠤᠰᠢᠶᠠ ᠪᠠᠨ ᠳᠠᠷᠤᠭᠠᠳ《 ᠮᠢᠨᠦ ᠡᠨᠳᠡ <ᠠᠮᠢᠨ ᠰᠠᠬᠢᠶᠠ ᠵᠠᠯᠰᠠᠷᠠᠢ ᠪᠤᠷᠬᠠᠨ> ᠨᠠᠮᠠᠶ᠋ᠢ ᠬᠠᠮᠠᠭᠠᠯᠠᠵᠤ ᠪᠠᠢᠭᠠ ᠶᠤᠮ! ᠲᠠ ᠨᠠᠷ ᠮᠢᠨᠦ ᠲᠥᠯᠥᠭᠡ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ》 ᠭᠡᠵᠦ ᠬᠡᠯᠡᠬᠦᠢᠴᠡ ᠪᠣᠯᠤᠭᠠᠳ᠄
— ᠶᠠᠪᠤᠵᠠᠭᠠ! ᠭᠡᠵᠦ ᠭᠠᠭᠴᠠᠬᠠᠨ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠠᠳᠠᠨ ᠬᠣᠩᠭᠢᠯ ᠤ᠋ᠨ ᠢᠪᠴᠤᠤᠬᠠᠨ ᠬᠥᠨᠳᠡᠢ ᠳ᠋ᠦ᠍ ᠳ᠋ᠠᠩ ᠭᠡᠵᠦ ᠲᠡᠮᠦᠷ ᠮᠠᠨᠴᠤᠷᠭᠠ ᠪᠠᠷ ᠬᠠᠳᠠ ᠳᠡᠯᠡᠰᠦᠭᠰᠡᠨ ᠰᠢᠭ ᠳᠠᠭᠤ ᠭᠠᠷᠴᠤ ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠴᠣᠷᠭᠢᠶᠠ ᠴᠤᠤᠷᠢᠶᠠᠲᠤᠨ ᠳᠤᠤᠭᠠᠷᠤᠨᠠ᠃
ᠬᠥᠮᠦᠰ ᠡᠢᠨ ᠬᠦ᠌ ᠲᠦᠭᠰᠢᠭᠦᠷᠢᠲᠡᠢ ᠪᠠᠢᠳᠠᠯ ᠳ᠋ᠤ᠌ ᠡᠨᠳᠡ ᠪᠠᠭᠯᠠᠷᠠᠵᠤ ᠵᠣᠭᠰᠣᠭᠠᠳ ᠠᠷᠭᠠ ᠪᠤᠰᠤ ᠦᠬᠦᠬᠦ ᠪᠡᠨ ᠬᠦᠯᠢᠶᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠨᠢ ᠳᠡᠭᠡᠷᠡ ᠶᠦᠮ ᠭᠡᠰᠡᠨ ᠲᠥᠯᠥᠪᠲᠡᠢ ᠬᠠᠳᠠᠨ ᠬᠣᠩᠭᠢᠯ ᠠ᠋ᠴᠠ ᠰᠠᠯᠵᠤ ᠶᠠᠳᠠᠨ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢ ᠬᠣᠴᠣᠷᠭᠠᠵᠤ ᠲᠦᠪᠳᠡᠬᠦ ᠦᠭᠡᠢ ᠰᠢᠭ ᠤᠷᠮᠠ ᠮᠠᠭᠤᠲᠠᠢ ᠣᠳᠴᠠᠭᠠᠪᠠ᠃
ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠣᠷᠣᠪᠠᠨᠳᠢ ᠵᠡᠷᠭᠡ ᠬᠡᠳᠦᠨ ᠯᠠᠮᠠ ᠬᠤᠸᠠᠷᠠᠭ ᠯᠠ ᠬᠣᠴᠣᠷᠴᠤ ᠬᠣᠵᠢᠮ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠪᠠᠨ ᠳ᠋ᠠᠭᠳᠠᠨ ᠯᠠᠮᠠ ᠪᠠ ᠰᠢᠲᠦᠭᠰᠡᠨ ᠪᠤᠷᠬᠠᠨ ᠳ᠋ᠠᠭᠠᠨ ᠨᠠᠢᠳᠠᠵᠤ ᠨᠢᠳᠦ ᠪᠡᠨ ᠠᠨᠢᠨ ᠨᠠᠮᠠᠨᠴᠢᠯᠠᠨᠠ᠃