ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠲᠠᠪᠤ> Хан мунын сүүрс < дээд > – Мөнх зохиоов ᠂ дэд бодь – нэгдүгээр бүлэг <5>
247ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠲᠠᠪᠤ>
ᠲᠠᠪᠤ
ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ᠂ ᠬᠢᠷᠠ ᠶ᠋ᠢᠨ ᠬᠢᠯᠠᠭᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠭᠢᠯᠲᠠᠭᠠᠨᠠᠨ ᠴᠠᠢᠯᠵᠠᠵᠤ᠂ ᠰᠢᠷᠭᠠ ᠮᠣᠷᠢᠨ ᠤ᠋ ᠬᠤᠷ ᠳᠡᠯ ᠰᠢᠭ ᠬᠣᠩᠭᠣᠷ ᠰᠠᠯᠬᠢᠨᠠ ᠦᠶᠡᠯᠡᠨ ᠨᠠᠢᠭᠤᠵᠤ᠂ ᠵᠣ ᠲᠠᠯᠠ᠂ ᠬᠣᠩᠬᠣᠷ ᠰᠤᠵᠠᠭ ᠪᠠᠭᠰᠢᠷᠠᠨ ᠤᠷᠭᠤᠭᠰᠠᠨ ᠮᠣᠷᠢᠨ ᠰᠢᠷᠠᠯᠵᠢ ᠶ᠋ᠢᠨ ᠲᠣᠯᠣᠭᠠᠢ ᠤᠯᠠᠪᠤᠷ ᠬᠦᠷᠡᠩ ᠥᠩᠭᠡ ᠪᠡᠷ ᠪᠣᠳᠣᠭᠰᠠᠨ ᠲᠡᠭᠦᠨ ᠦ᠌ ᠳᠡᠭᠡᠭᠦᠷ ᠴᠠᠰ ᠴᠠᠰ ᠳᠡᠷᠪᠡᠬᠦ ᠪᠣᠷᠣ ᠪᠣᠷᠣ ᠴᠠᠷᠴᠠᠬᠠᠢ ᠨᠤᠭᠤᠳ ᠤ᠋ᠨ ᠬᠥᠭ ᠲᠠᠲᠠᠷᠠᠭᠰᠠᠨ ᠢ᠋ᠶ᠋ᠠᠷ ᠮᠤᠨᠠ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠪᠠᠷ ᠨᠠᠮᠤᠷ ᠪᠣᠯᠤᠯᠠ ᠭᠡᠳᠡᠭ ᠢ᠋ ᠮᠡᠳᠡᠭᠡᠯᠡᠨᠡ᠃
ᠨᠣᠮᠣᠬᠠᠨ ᠳᠠᠭᠤ ᠲᠠᠢ ᠬᠤᠨ ᠭᠠᠯᠠᠭᠤᠳ ᠨᠠᠭᠤᠷ ᠢ᠋ᠶ᠋ᠠᠨ ᠬᠠᠶᠠᠨ ᠨᠤᠲᠤᠭ ᠰᠢᠯᠢᠵᠦ᠂ ᠬᠣᠷᠭᠣᠳᠠᠬᠤ ᠭᠠᠵᠠᠷ ᠲᠠᠭᠠᠨ ᠳᠠᠭᠤ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠤᠨᠠᠭᠠᠨ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠶ᠋ᠢᠨ ᠰᠡᠮᠡᠵᠡᠨ ᠡᠭᠦᠯᠡᠨ ᠦ᠌ ᠴᠢᠮᠡᠭ ᠲᠦ᠍ ᠬᠥᠲᠥᠯᠦᠭᠦᠯᠦᠨ ᠨᠣᠮᠣᠨ ᠬᠡᠯᠪᠡᠷᠢᠲᠡᠢ ᠬᠣᠰᠢᠭᠤᠷᠠᠨ ᠡᠮᠦᠨᠡᠰᠢᠯᠡᠬᠦ ᠨᠢ ᠬᠥᠮᠦᠰ ᠲᠦ᠍ ᠡᠨᠡ ᠨᠠᠮᠤᠷ ᠤ᠋ᠨ ᠭᠠᠯᠠᠭᠤᠳ ᠶᠠᠭᠤᠨ ᠠ᠋ᠴᠠ ᠦᠷᠭᠦᠨ ᠢᠩᠭᠢᠵᠦ ᠪᠤᠴᠠᠭᠠ ᠪᠢᠯᠡ ᠭᠡᠵᠦ ᠰᠠᠨᠠᠭᠳᠠᠭᠤᠯᠤᠨᠠ᠃
ᠠᠭᠤᠯᠠ ᠶ᠋ᠢᠨ ᠪᠠᠯ ᠳᠠᠭᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠲᠠᠪᠤ ᠭᠤᠷᠪᠠ᠂ ᠲᠠᠪᠤ ᠭᠤᠷᠪᠠᠨ ᠮᠣᠷᠢᠲᠠᠨ ᠴᠤᠪᠤᠵᠤ᠂ ᠬᠥᠬᠡᠪᠤᠯᠠᠭ ᠤ᠋ᠨ ᠭᠣᠣᠯ ᠥᠭᠡᠳᠡᠯᠡᠵᠦ ᠬᠦᠩ ᠦ᠋ᠨ ᠰᠦᠮᠡ ᠳᠡᠭᠡᠷᠡ ᠴᠤᠭᠯᠠᠷᠠᠵᠤ ᠪᠠᠢᠪᠠ᠃
ᠭᠥᠩ ᠦᠨ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡᠨ ᠦ ᠭᠠᠳᠠᠨᠠ ᠮᠣᠷᠢᠨ ᠤ ᠵᠡᠯᠡ᠂ ᠱᠤᠩ ᠳᠠᠭᠠᠵᠤ ᠵᠦᠢᠯ ᠵᠢᠰᠦᠮ ᠦᠨ ᠮᠣᠷᠢᠳ ᠤᠶᠠᠭᠠᠲᠠᠢ ᠬᠠᠷᠠᠭᠳᠠᠵᠤ᠂ ᠲᠡᠭᠦᠨ ᠦ ᠴᠠᠭᠠᠭᠤᠷ ᠲᠤᠰᠢᠶᠠ ᠲᠠᠢ ᠥᠷᠥᠭᠡᠯ ᠲᠠᠢ ᠮᠣᠷᠢᠳ ᠵᠥᠩᠳᠡᠭᠡᠨ ᠪᠠᠢᠪᠠ᠃
ᠡᠨᠡ ᠪᠣᠯ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠪᠣᠯᠤᠨ ᠡᠯᠳᠡᠩᠭᠡ ᠶ᠋ᠢᠨ ᠳᠠᠢᠴᠢᠯᠠᠯ ᠢᠶᠠᠷ ᠠᠳᠠ ᠬᠤᠷᠠᠵᠤ ᠴᠤᠭᠯᠠᠷᠠᠭᠰᠠᠨ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠡᠷᠡᠰ ᠪᠢᠯᠡ᠃
ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠶ᠋ᠢᠨ ᠰᠠᠭᠤᠳᠠᠭ ᠭᠡᠷ ᠲᠤ ᠡᠯᠳᠡᠩᠭᠡ᠂ ᠵᠣᠳᠪᠠ᠂ ᠪᠠᠲᠤᠪᠠᠶᠠᠷ᠂ ᠳᠣᠨᠳᠣᠪ ᠨᠠᠷ ᠳ᠋ᠠᠭᠳᠠᠨ ᠳᠠ ᠯᠠᠮᠠ ᠲᠠᠢ ᠨᠢᠭᠤᠴᠠ ᠬᠤᠷᠠᠯ ᠬᠢᠵᠦ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠬᠦᠩ ᠨᠣᠶᠠᠨ ᠤ᠋ ᠡᠷᠬᠡ ᠶ᠋ᠢ ᠪᠤᠯᠢᠶᠠᠬᠤ ᠠᠷᠭᠠ ᠰᠠᠮᠪᠠᠭᠠ ᠰᠦᠪᠡᠭᠴᠢᠯᠡᠨᠡ᠃
– ᠢᠮᠠᠭᠠᠨ ᠤ ᠮᠢᠬᠠ ᠶ᠋ᠢ ᠬᠠᠯᠠᠭᠠᠨ ᠳᠡᠭᠡᠷᠡ ᠨᠢ᠂ ᠶᠠᠪᠤᠳᠠᠯ ᠤᠴᠢᠷ ᠢ᠋ ᠲᠦᠷᠭᠡᠨ ᠳᠡᠭᠡᠷᠡ ᠨᠢ ᠭᠡᠳᠡᠭᠴᠢᠯᠡᠨ ᠮᠢᠨᠦ ᠦᠵᠡᠬᠦ ᠪᠡᠷ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠬᠥᠳᠡᠯᠦᠯᠴᠡᠵᠦ ᠥᠥ᠍ᠷ ᠴᠠᠢᠬᠤ ᠳᠤ ᠯᠡ ᠦᠨᠡᠨ ᠴᠠᠭᠠᠨ ᠢ᠋ᠶ᠋ᠠᠨ ᠣᠯᠣᠯᠴᠠᠪᠠᠯ ᠲᠠᠭᠠᠷᠠᠨᠠ᠃ ᠰᠤᠨᠵᠢᠷᠠᠭᠰᠠᠭᠠᠷ ᠶᠠᠭᠤ ᠴᠤ᠌ ᠪᠣᠯᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠮᠡᠷᠭᠡᠯᠡᠨᠡ᠃
– ᠵᠦᠪ᠂ ᠵᠦᠪ ᠭᠡᠵᠦ ᠳ᠋ᠠᠭᠳᠠᠨ ᠯᠠᠮᠠ ᠵᠤᠳᠪᠠ ᠮᠡᠢᠷᠠᠨ ᠤ ᠰᠠᠨᠠᠯ ᠢ᠋ ᠵᠥᠪᠰᠢᠶᠡᠷᠡᠵᠦ᠂ ᠮᠢᠨᠦ ᠦᠵᠡᠬᠦ ᠪᠡᠷ ᠴᠡᠷᠢᠭ ᠢ᠋ᠶ᠋ᠡᠨ ᠭᠤᠷᠪᠠᠨ ᠵᠢᠭᠦᠷ ᠢᠶᠠᠷ ᠬᠤᠪᠢᠶᠠᠵᠤ᠂ ᠭᠣᠣᠯ ᠴᠡᠷᠢᠭ ᠢ᠋ ᠵᠤᠳᠪᠠ ᠤᠳᠤᠷᠢᠳᠴᠤ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠢ᠋ ᠲᠠᠭᠠᠷᠢᠨᠠ᠃ ᠵᠡᠭᠦᠨ ᠵᠢᠭᠦᠷ ᠦ᠋ᠨ ᠴᠡᠷᠢᠭ ᠢ᠋ ᠰᠢᠷᠠᠮᠠᠩ ᠫᠠᠢᠵᠠᠩ ᠲᠥᠷᠦᠬᠥᠲᠡᠢ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠢ᠋ ᠳᠠᠭᠠᠷᠢᠨ ᠷᠠᠰᠢ ᠵᠠᠬᠢᠷᠤᠭᠴᠢ ᠶ᠋ᠢ ᠪᠠᠷᠢᠪᠴᠢᠯᠠᠨᠠ᠃ ᠪᠠᠷᠠᠭᠤᠨ ᠵᠢᠭᠦᠷ ᠦ᠋ᠨ ᠴᠡᠷᠢᠭ ᠢ᠋ ᠫᠦᠷᠪᠦ ᠵᠠᠬᠢᠷᠴᠤ ᠳᠤᠮᠳᠠ ᠭᠣᠣᠯ ᠤ᠋ᠨ ᠠᠮᠠᠨ ᠤ᠋ ᠬᠣᠰᠢᠭᠤ ᠶᠠᠮᠤᠨ ᠢ᠋ ᠪᠦᠰᠡᠯᠡᠨᠡ ᠭᠡᠵᠦ ᠭᠤᠷᠪᠠᠨ ᠬᠤᠷᠤᠭᠤ ᠪᠠᠨ ᠭᠣᠵᠣᠢᠯᠭᠠᠨ ᠰᠢᠷᠡᠭᠡᠨ ᠦ᠌ ᠨᠢᠷᠤᠭᠤᠨ ᠳᠡᠭᠡᠷᠡ ᠲᠠᠭ ᠲᠣᠨᠨ ᠲᠣᠭᠰᠢᠵᠤ ᠪᠠᠢᠯᠠ᠃
– ᠰᠢᠷᠠᠪᠳᠣᠷᠵᠢ ᠶᠢ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠪᠠᠯ ᠬᠦᠩ ᠦ᠋ᠨ ᠰᠦᠮᠡ ᠳ᠋ᠤᠨᠢ ᠪᠤᠴᠠᠭᠠᠵᠤ ᠯᠠᠮᠠ ᠪᠣᠯᠭᠠᠶᠠ !
– ᠦᠭᠡᠢ ᠡ᠂ ᠲᠡᠢᠨ ᠤ ᠦᠢᠮᠡᠭᠡᠨ ᠳᠤᠮᠳᠠ ᠴᠠᠭᠠᠰᠢ ᠨᠢ ᠬᠠᠷᠠᠭᠤᠯᠴᠢᠬᠠᠶᠠ᠃ ᠠᠮᠢᠳᠤ ᠦᠯᠡᠳᠡᠭᠡᠪᠡᠯ ᠵᠣᠪᠠᠯᠠᠩ ᠤ᠋ᠨ ᠦᠨᠳᠦᠰᠦ᠃
– ᠮᠢᠩᠭᠠᠨᠪᠤᠤ᠂ ᠱᠠᠭᠳᠠᠷᠰᠦ᠋ᠷᠦᠩ ᠬᠣᠶᠠᠷ ᠢ ᠪᠠᠷᠢᠪᠠᠯ ᠱᠣᠷᠣᠩ ᠳ᠋ᠤ᠌ ᠴᠠᠭᠠᠵᠠᠯᠠᠵᠤ ᠪᠠᠢᠭᠠᠳ ᠬᠣᠯᠠ ᠭᠠᠵᠠᠷ ᠴᠦᠯᠡᠨᠡ᠃
– ᠲᠡᠷᠡ ᠴᠤ᠌ ᠭᠠᠢᠭᠤᠢ᠂ ᠮᠠᠭᠤ ᠷᠠᠰᠢ ᠵᠠᠬᠢᠷᠤᠭᠴᠢ ᠶᠢ ᠠᠮᠢᠳᠤ ᠪᠠᠷ ᠨᠢ ᠲᠤᠷᠠᠰᠬᠠ ᠶᠢ ᠨᠢ ᠬᠠᠭᠤᠯᠵᠤ᠂ ᠵᠣᠪᠠᠯᠭᠠ ᠪᠠᠷ ᠨᠢ ᠨᠣᠬᠠᠢ ᠲᠡᠵᠢᠭᠡᠶᠡ! ᠭᠡᠵᠦ ᠲᠣᠨᠲᠣᠪ᠂ ᠪᠠᠲᠤᠪᠠᠶᠠᠷ᠂ ᠫᠦᠷᠪᠦ ᠨᠠᠷ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠵᠠᠨᠤᠵᠤ ᠬᠡᠯᠡᠨᠡ᠃
ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠪᠣᠯᠣᠨ ᠡᠯᠳᠡᠩᠭᠡ ᠶᠢᠨ ᠳᠣᠣᠷᠡᠬᠢ ᠬᠥᠮᠥᠰ ᠡᠵᠡᠨ ᠬᠥᠮᠥᠨ ᠦ ᠪᠡᠨ ᠴᠢᠷᠠᠢ ᠶᠢ ᠰᠢᠨᠵᠢᠵᠦ ᠥᠪᠡᠷ ᠥᠪᠡᠷ ᠦᠨ ᠬᠢᠨᠢ ᠳᠤᠷᠠᠳᠤᠭᠰᠠᠨ ᠰᠠᠨᠠᠯ ᠨᠢ ᠵᠠᠢ ᠡᠵᠡᠯᠡᠵᠦ ᠵᠢᠩ ᠳᠠᠷᠤᠬᠤ ᠪᠣᠯᠪᠠ ᠤᠤ ᠭᠡᠰᠡᠨ ᠰᠢᠭ ᠵᠠᠮᠪᠠᠷᠠᠭᠠ ᠦᠭᠡᠢ ᠬᠠᠰᠬᠢᠷᠤᠯᠳᠤᠨᠠ᠃
ᠬᠣᠢᠮᠣᠷ ᠲᠤ ᠰᠠᠭᠠᠲᠠᠭᠰᠠᠨ ᠡᠯᠳᠡᠩᠭᠡ ᠶ᠋ᠢᠨ ᠴᠢᠷᠠᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠠᠷᠤᠭᠠᠷ ᠬᠠᠷᠠᠭᠳᠠᠵᠤ ᠬᠠᠰ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠪᠠᠨ ᠮᠤᠰᠬᠢᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
– ᠪᠠᠢᠵᠠ᠂ ᠪᠠᠢᠵᠠ᠃ ᠡᠨᠡ ᠴᠢᠨᠢ ᠬᠡᠦᠬᠡᠳ ᠦ᠋ᠨ ᠲᠣᠭᠯᠠᠭᠠᠮ ᠪᠢᠰᠢ ᠰᠢᠦ ᠳᠡ! ᠡᠭᠦᠨ ᠢ᠋ ᠨᠢ ᠪᠠᠷᠢᠵᠤ᠂ ᠲᠡᠭᠦᠨ ᠢ᠋ ᠨᠢ ᠲᠠᠮᠤᠯᠠᠵᠤ᠂ ᠠᠯᠠᠨᠠ ᠪᠤᠯᠠᠨᠠ ᠭᠡᠳᠡᠭ ᠴᠢᠨᠢ ᠬᠡᠯᠡᠬᠦ ᠳ᠋ᠦ᠍ ᠠᠮᠠᠷᠬᠠᠨ᠃ ᠲᠠ ᠨᠠᠷ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠬᠢᠨ ᠢ᠋ ᠰᠢᠪᠠᠷ ᠢ᠋ᠶ᠋ᠠᠷ ᠱᠤᠭᠤᠭᠰᠠᠨ ᠪᠠᠯᠢᠩ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠴᠠᠭᠠᠳᠤᠭᠤᠯᠠ ᠴᠢᠨᠢ ᠶᠡᠷᠦ ᠵᠦᠭᠡᠷ ᠰᠠᠭᠤᠵᠤ ᠵᠡᠭᠦᠳᠦᠯᠡᠵᠦ ᠤᠨᠲᠠᠭᠠ ᠦᠭᠡᠢ᠃ ᠰᠢᠷᠡᠪᠳᠦᠵᠠᠢ ᠮᠢᠩᠭᠠᠨᠪᠣᠣ ᠲᠦᠷᠦᠭᠦᠳᠠᠢ ᠬᠥᠮᠦᠰ ᠵᠡᠭᠦᠨᠰᠢ ᠪᠡᠨ ᠪᠤᠭᠤᠲᠤ᠂ ᠰᠠᠭᠠᠯᠢᠴᠢᠨ᠂ ᠪᠠᠷᠠᠭᠤᠨᠰᠢ ᠪᠠᠨ ᠬᠠᠩᠬᠠᠳᠠᠢ᠂ ᠥᠶᠥᠸᠠᠨ᠂ ᠱᠠᠮᠪᠠ ᠬᠦᠷᠲᠡᠯᠡ ᠸᠠᠩ ᠲᠣᠪᠴᠢᠶᠠᠨ ᠳᠠᠷᠤᠭᠠ ᠪᠣᠯᠤᠨ ᠸᠠᠩ ᠰᠣᠬᠣᠷ ᠤ᠋ᠨ ᠬᠠᠷᠠ ᠴᠡᠷᠢᠭ ᠦ᠋ᠳ ᠲᠡᠢ ᠡᠷᠲᠡᠨ ᠡᠴᠡ ᠪᠡᠨ ᠰᠦᠯᠪᠡᠭᠡ ᠲᠡᠢ ᠭᠡᠳᠡᠭ ᠢ᠋ ᠲᠠᠨᠤᠰ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ! ᠬᠢᠴᠢᠶᠡᠬᠦ ᠦᠭᠡᠢ ᠪᠣᠯ ᠡᠷᠭᠢᠭᠦᠦ ᠰᠤᠮᠤ ᠡᠵᠡᠨ ᠳ᠋ᠡᠭᠡᠨ ᠭᠡᠭᠴᠢ ᠪᠣᠯᠤᠨᠠ ᠰᠢᠦ᠃ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠲᠠᠯᠠ ᠠ᠋ᠴᠠ ᠬᠢᠲᠠᠳ ᠶᠤᠸᠠᠨ ᠱᠢ ᠺᠠᠢ ᠨᠣᠶᠠᠨ ᠤ᠋ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ ᠰᠦᠷᠳᠡᠭᠦᠯᠦᠯᠳᠦ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠳ᠋ᠤ᠌ ᠮᠠᠨ ᠤ᠋ ᠬᠢᠨ ᠡᠯᠵᠢᠭᠡᠨ ᠵᠢᠷᠣᠭᠠ ᠣᠷᠣᠵᠤ ᠬᠣᠰᠢᠭᠤ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ ᠳᠡᠭᠡᠰᠦᠯᠡᠵᠦ ᠦᠭᠭᠦᠨ ᠮᠣᠩᠭᠣᠯᠴᠤᠳ ᠤ᠋ᠨ ᠨᠠᠰᠤᠨ ᠲᠤᠷᠰᠢ ᠶ᠋ᠢᠨ ᠬᠡᠰᠢᠭ ᠪᠤᠶᠠᠨ ᠢ᠋ ᠭᠦᠪᠢᠭᠰᠡᠭᠡᠷ ᠪᠠᠢᠵᠤ ᠴᠠᠭᠠᠳᠤᠭᠤᠯᠠ ᠳ᠋ᠠᠭᠠᠨ ᠲᠣᠰᠣᠨ ᠵᠠᠮ ᠲᠣᠷᠭᠠᠨ ᠳᠡᠪᠢᠰᠬᠡᠷ ᠰᠢᠯᠤᠭᠤᠳᠬᠠᠵᠤ ᠦᠭᠭᠦᠭᠰᠡᠨ ᠲᠤᠯᠠ ᠪᠢᠳᠡ ᠮᠠᠰᠢ ᠪᠣᠯᠭᠣᠮᠵᠢᠲᠠᠢ ᠣᠷᠣᠬᠤ ᠬᠡᠷᠡᠭᠲᠡᠢ᠃ ᠵᠤᠳᠪᠠ ᠮᠡᠢᠷᠡᠨ ᠦ᠌ ᠰᠠᠨᠠᠯ ᠪᠣᠯᠤᠨ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠶ᠋ᠢᠨ ᠵᠥᠪᠯᠡᠯᠭᠡ ᠶ᠋ᠢ ᠪᠢ ᠮᠠᠰᠢ ᠵᠦᠢᠲᠡᠢ ᠭᠡᠵᠦ ᠦᠵᠡᠨᠡ᠃ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠬᠥᠳᠡᠯᠦᠯᠴᠡᠬᠦ ᠦᠭᠡᠢ ᠪᠣᠯ ᠪᠢᠳᠡ ᠠᠮᠵᠢᠬᠤ ᠦᠭᠡᠢ᠃ ᠠᠶᠠ ᠦᠭᠡᠢᠳᠡᠪᠡᠯ ᠣᠳᠣ ᠴᠤ᠌ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ ᠬᠠᠷᠠ ᠴᠡᠷᠢᠭ ᠳᠦᠭᠦᠷᠦᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ ᠭᠡᠵᠦ ᠡᠯᠳᠡᠩᠭᠡ ᠮᠠᠰᠢ ᠬᠢᠨᠠᠭᠤᠷ ᠶᠠᠭᠤᠮᠠ ᠶᠠᠷᠢᠵᠤ ᠵᠠᠷᠯᠢᠭ ᠰᠢᠤᠬᠠᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠪᠢᠰᠢᠷᠡᠨ ᠬᠠᠷᠠᠵᠤ《 ᠠᠶᠠ᠂ ᠶᠠᠭ ᠳᠠ᠂ ᠬᠡᠷᠰᠡᠦᠯᠡᠬᠦ ᠬᠡᠷᠡᠭᠲᠡᠢ》 ᠭᠡᠵᠦ ᠬᠣᠭᠣᠷᠣᠨᠳᠣ ᠪᠠᠨ ᠬᠡᠯᠡᠯᠴᠡᠨᠡ᠃
– ᠠᠳᠠᠭ ᠨᠢ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠠᠢᠯ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠴᠤ᠌ ᠬᠡᠷᠰᠡᠦᠯᠡᠵᠦ ᠪᠠᠢᠪᠠᠯ ᠨᠣᠬᠠᠢ ᠳ᠋ᠤ᠌ ᠬᠠᠵᠠᠭᠳᠠᠬᠤ ᠦᠭᠡᠢ᠂ ᠠᠶᠤᠵᠤ ᠪᠠᠢᠪᠠᠯ ᠠᠮᠢᠨ ᠳ᠋ᠤ᠌ ᠲᠤᠰᠠ ᠲᠠᠢ ᠭᠡᠳᠡᠭ ᠦᠭᠡᠢ ᠪᠢᠯᠡ ᠤᠤ? ᠡᠯᠳᠡᠩᠭᠡ ᠨᠣᠶᠠᠨ ᠤ᠋ ᠰᠤᠷᠭᠠᠯ ᠢ᠋ ᠴᠡᠭᠡᠵᠢᠯᠡᠯᠲᠡᠢ ᠶᠦᠮ ᠬᠦ ᠪᠢᠳᠡ ᠭᠡᠵᠦ ᠵᠤᠳᠪᠠ ᠮᠡᠢᠷᠡᠨ ᠳᠡᠭᠡᠷᠡ ᠡᠴᠡ ᠨᠢ ᠳᠠᠪᠤᠰᠤᠯᠠᠵᠤ ᠶᠠᠷᠢᠪᠠ᠃
ᠡᠳᠡᠨᠥᠰ ᠦ᠋ᠨ ᠮᠡᠷᠭᠡᠯᠡᠬᠦ ᠨᠢ ᠪᠠᠢᠨ ᠪᠠᠢᠨ ᠲᠣᠯᠣᠭᠠᠢ ᠳᠣᠬᠢᠨ ᠡᠷᠢᠭᠡ ᠪᠥᠮᠪᠥᠷᠢᠭᠦᠯᠵᠦ ᠮᠠᠨᠢ ᠲᠣᠭᠠᠯᠠᠭᠰᠠᠨ ᠳ᠋ᠠᠭᠳᠠᠨ ᠯᠠᠮᠠ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠴᠡᠭᠰᠡᠨ ᠪᠣᠯᠤᠯᠲᠠᠢ᠄
– ᠵᠠ᠂ ᠶᠠᠮᠠᠷ ᠪᠣᠢ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠪᠣᠱᠣᠭᠠ ᠶ᠋ᠢ ᠡᠯᠡᠭᠡᠵᠦ ᠶᠠᠪᠤᠭᠰᠠᠨ ᠲᠤᠰᠠᠯᠠᠭᠴᠢ ᠬᠥᠮᠦᠨ ᠬᠠᠷᠠᠭᠠ ᠬᠤᠷᠴᠠ ᠪᠣᠳᠣᠯᠭᠠ ᠮᠡᠷᠭᠡᠨ ᠪᠠᠢᠬᠤ ᠦᠭᠡᠢ ᠤᠤ ? ᠭᠡᠳ ᠬᠦᠩᠭᠢᠨᠡᠲᠡᠯᠡ ᠢᠨᠢᠶᠡᠪᠡ᠃ ᠳ᠋ᠠᠭᠳᠠᠨ ᠳ᠋ᠠ ᠯᠠᠮᠠ ᠳᠣᠲᠣᠷᠠ ᠪᠠᠨ ᠪᠡᠶᠡᠰᠵᠦ ᠳᠣᠭᠳᠣᠯᠤᠭᠰᠠᠨ ᠢ᠋ᠶ᠋ᠠᠨ ᠪᠠᠷᠢᠵᠤ ᠶᠠᠳᠠᠨ《ᠡᠯᠳᠡᠩᠭᠡ ᠶ᠋ᠢᠨ ᠰᠡᠳᠦᠭᠰᠡᠨ ᠶᠠᠪᠤᠳᠠᠯ ᠢ ᠮᠥᠷᠳᠡᠭᠡᠳ ᠦᠵᠡᠪᠡᠯ ᠣᠯᠵᠠ ᠨᠢ ᠲᠡᠭᠦᠰ᠂ ᠭᠠᠷᠤᠵᠠ ᠨᠢ ᠮᠡᠬᠦᠰ ᠪᠠᠢᠳᠠᠭ᠃ ᠡᠨᠡ ᠨᠢ ᠡᠴᠦᠰ ᠤᠨ ᠡᠴᠦᠰ ᠲᠦ᠍ ᠤᠬᠠᠭᠠ ᠪᠣᠳᠣᠯ᠂ ᠬᠠᠰᠢᠷ ᠳᠣᠬᠢ ᠶᠢᠨ ᠤᠴᠢᠷ᠃ ᠡᠨᠡ ᠤᠳᠠᠭᠠ ᠡᠯᠳᠡᠩᠭᠡ ᠲᠤᠰᠠᠯᠠᠭᠴᠢ᠂ ᠳ᠋ᠠᠭᠳᠠᠨ ᠪᠢᠳᠠ ᠬᠣᠶᠠᠷ ᠵᠤᠤᠵᠠᠢ ᠬᠣᠯᠪᠣᠨ ᠳᠥᠷᠥᠭᠡ ᠬᠠᠷᠰᠢᠭᠤᠯᠤᠭᠰᠠᠨ ᠶᠤᠮ ᠴᠢᠨᠢ ᠬᠠᠨᠳᠤᠭᠰᠠᠨ ᠵᠦᠭ ᠲᠦ ᠳᠠᠢᠰᠤᠨ ᠦᠭᠡᠢ᠂ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠳ᠋ᠤ᠌ ᠬᠠᠷᠰᠢ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠮᠠᠷᠭᠠᠲᠤᠷ ᠤ᠋ᠨ ᠡᠨᠡ ᠦᠶᠡ ᠪᠣᠯᠬᠤ ᠳ᠋ᠤ᠌ ᠲᠣᠯᠣᠭᠠᠢ ᠰᠢᠭᠢᠷᠡ ᠨᠢ ᠲᠠᠨᠢᠭᠳᠠᠬᠤ ᠪᠠᠢᠯᠭᠦᠢ》ᠭᠡᠵᠦ ᠪᠤᠳᠤᠭᠠᠳ᠄
– ᠠᠬᠠ ᠳᠡᠭᠦᠦ ᠨᠠᠷ ᠡ! ᠵᠣᠷᠢᠭ ᠢᠶᠠᠨ ᠴᠢᠩᠭᠠᠯᠠ᠂ ᠪᠠᠷᠠᠭᠤᠨ ᠭᠦᠩ ᠦᠨ ᠤᠷᠠᠳ ᠤᠨ ᠢᠶᠠᠨ ᠲᠥᠯᠥᠭᠡ ᠪᠠᠭᠠᠲᠤᠷᠯᠠᠨ ᠪᠠᠢᠯᠳᠤᠬᠤ ᠡᠷᠡ ᠰᠥᠰᠥᠲᠡᠢ ᠪᠠᠢᠭᠠᠷᠠᠢ! ᠦᠨᠡᠭᠡᠨ ᠬᠠᠷᠠᠩᠭᠤᠢ ᠤᠳᠠᠯ ᠦᠭᠡᠢ ᠠᠷᠢᠯᠵᠤ ᠦᠦᠷ ᠴᠠᠢᠵᠤ ᠨᠠᠷᠠ ᠮᠠᠨᠳᠤᠬᠤ ᠨᠢ ᠯᠠᠪᠲᠠᠢ! ᠡᠨᠡ ᠪᠣᠯ ᠵᠠᠢᠯᠠᠰᠢ ᠦᠭᠡᠢ! ᠭᠡᠵᠦ ᠰᠡᠳᠬᠢᠯ ᠨᠢ ᠳᠣᠭᠳᠣᠯᠤᠨ ᠬᠡᠯᠡᠬᠦ ᠳᠡᠬᠡᠨ ᠬᠣᠶᠠᠷ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨ ᠡᠷᠭᠦᠬᠦ ᠳ᠋ᠦ᠍ ᠨᠦᠳᠦᠭᠦᠷ ᠦ᠋ᠨ ᠮᠤᠨᠠ ᠰᠢᠭ᠋ ᠬᠠᠷᠠᠭᠳᠠᠵᠤ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢᠨ ᠬᠥᠮᠦᠰ ᠲᠦ᠍ ᠵᠣᠷᠢᠭ ᠣᠷᠣᠭᠤᠯᠵᠤ ᠪᠠᠢᠯᠠ᠃
ᠢᠩᠬᠢᠵᠤ ᠪᠠᠢᠲᠠᠯᠠ ᠭᠡᠲᠡᠭᠦᠯ ᠳ᠋ᠦ᠍ ᠶᠠᠪᠤᠭᠤᠯᠤᠭᠰᠠᠨ ᠲᠠᠯᠠ ᠲᠠᠯᠠ ᠶ᠋ᠢᠨ ᠴᠡᠷᠢᠭ ᠪᠤᠴᠠᠵᠤ ᠢᠷᠡᠭᠡᠳ《ᠨᠤᠶᠠᠨ ᠰᠠᠩ ᠤᠨ ᠵᠤᠰᠠᠯᠠᠩ ᠤᠨ ᠣᠲᠣᠷ ᠪᠠ ᠬᠣᠰᠢᠭᠤ ᠶᠠᠮᠤᠨ ᠤ ᠲᠠᠯᠠ ᠳᠤ ᠲᠠᠢᠪᠤᠩ ᠪᠠᠢᠷᠢ ᠲᠠᠢ ᠪᠠᠢᠨᠠ᠃ ᠬᠡᠪ ᠦᠨ ᠪᠤᠰᠤ ᠪᠠᠢᠳᠠᠯ ᠠᠯᠠᠭᠠ》 ᠭᠡᠵᠦ ᠮᠡᠳᠡᠭᠦᠯᠪᠡ᠃
ᠵᠤᠳᠪᠠ ᠮᠠᠢᠷᠠᠨ ᠪᠣᠰᠴᠤ᠄
– ᠵᠠ᠂ ᠨᠥᠬᠥᠳ ᠮᠢᠨᠢ ᠵᠠᠩᠭᠢᠯᠠᠭᠠ ᠶᠢᠨ ᠴᠠᠭ ᠪᠣᠯᠣᠯᠠ᠃ ᠰᠡᠭᠦᠳᠡᠷ ᠡᠷᠭᠢᠵᠤ ᠰᠦᠮᠡ ᠶ᠋ᠢᠨ ᠰᠠᠷᠠᠪᠴᠢ ᠳ᠋ᠤ᠌ ᠪᠠᠭᠤᠯᠠ ᠰᠢᠦ ! ᠡᠦᠲᠦ ᠡᠯᠳᠡᠩᠭᠡ ᠨᠣᠶᠠᠨ ᠡᠴᠡ ᠴᠡᠷᠢᠭ ᠬᠥᠳᠡᠯᠬᠦ ᠪᠣᠳᠠᠲᠠᠢ ᠨᠠᠷᠢᠨ ᠵᠢᠭᠠᠪᠤᠷᠢ ᠥᠭᠭᠦᠨᠡ ᠭᠡᠪᠡ᠃
– ᠣᠨᠴᠠᠭᠠᠢ ᠬᠤᠪᠢᠷᠠᠯᠲᠠ ᠦᠭᠡᠢ᠂ ᠰᠠᠭᠠᠳ ᠦᠭᠡᠢ ᠰᠢᠯᠤᠭᠤᠨ ᠶᠠᠪᠤᠭᠳᠠᠪᠠᠯ ᠭᠤᠷᠪᠠᠨ ᠵᠢᠭᠦᠷ ᠦ᠋ᠨ ᠴᠡᠷᠢᠭ ᠲᠤᠰ ᠲᠤᠰ ᠤ᠋ᠨ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠵᠦ ᠰᠢᠷᠠ ᠣᠷᠣᠢ ᠶ᠋ᠢᠨ ᠱᠣᠪᠬᠣ ᠰᠠᠷᠢᠳᠠᠭ ᠲᠤ ᠨᠠᠷᠠᠨ ᠤ ᠲᠤᠶᠠᠭᠠ ᠢᠪᠡᠭᠡᠬᠦ ᠳ᠋ᠦ᠍ ᠱᠠᠲᠤ ᠶ᠋ᠢᠨ ᠭᠣᠣᠯ ᠤ᠋ᠨ ᠳᠡᠭᠲᠡᠷ ᠭᠠᠴᠠᠭᠠᠨ ᠤ᠋ ᠳᠡᠭᠡᠳᠦ ᠬᠣᠩᠭᠢᠯ ᠤ᠋ᠨ ᠠᠮᠠᠨ ᠳ᠋ᠤ᠌ ᠴᠤᠭᠯᠠᠷᠠᠵᠤ ᠢᠯᠠᠯᠲᠠ ᠪᠠᠨ ᠪᠡᠯᠭᠡᠯᠡᠬᠦ ᠴᠤᠭᠯᠠᠭᠠᠨ ᠪᠣᠯᠣᠨᠠ᠃ ᠪᠢ ᠴᠥᠭᠡᠪᠲᠦᠷ ᠴᠡᠷᠢᠭ ᠠᠪᠴᠤ 《 ᠱᠠᠵᠢᠨ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ 》 ᠳ᠋ᠦ᠍ ᠰᠥᠨᠢ ᠪᠡᠷ ᠣᠴᠢᠵᠤ ᠮᠡᠷᠭᠡᠨ ᠭᠡᠭᠡᠨ ᠤ ᠬᠠᠷᠢᠶᠠᠲᠤ ᠴᠡᠷᠢᠭ ᠢ ᠲᠡᠢᠴᠢᠯᠡᠵᠤ ᠮᠡᠷᠭᠡᠨ ᠭᠣᠣᠯ ᠤᠨ ᠠᠮᠠ ᠪᠤᠶᠤ ᠵᠡᠭᠦᠨ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠢ ᠠᠩᠬᠠᠷᠤᠨᠠ᠃ ᠪᠠᠲᠤᠪᠠᠶᠠᠷ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢ ᠰᠠᠬᠢᠵᠤ᠂ ᠪᠠᠷᠠᠭᠤᠨ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠢ ᠰᠠᠬᠢᠨᠠ᠃ ᠳ᠋ᠠᠭᠳᠠᠨ ᠳ᠋ᠠ ᠪᠠᠭᠰᠢ ᠱᠠᠲᠤ ᠶᠢᠨ ᠭᠣᠣᠯ ᠤ᠋ᠨ ᠲᠡᠭᠲᠡᠷ ᠭᠠᠴᠠᠭᠠᠨ ᠤ ᠳᠡᠭᠡᠳᠦ ᠬᠤᠩᠭᠢᠯ ᠳ᠋ᠤ᠌ ᠨᠣᠮ ᠤᠨ ᠭᠦᠷᠢᠮ ᠠᠢᠯᠠᠳᠬᠠᠵᠤ ᠪᠢᠰᠢᠯᠭᠠᠯ ᠬᠢᠵᠦ ᠬᠠᠯᠳᠠᠷᠠ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠡᠮᠦᠨᠡ ᠡᠴᠡ ᠰᠤᠷ ᠬᠠᠶᠠᠵᠣ ᠪᠤᠷᠬᠠᠨ ᠲᠡᠭᠷᠢ ᠬᠠᠨ ᠮᠤᠨᠠ ᠳ᠋ᠤ᠌ ᠳᠠᠭᠠᠳᠬᠠᠯ ᠭᠤᠶᠤᠴᠢᠯᠠᠨ ᠴᠡᠷᠢᠭ ᠳᠠᠢᠨ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠨᠢᠭᠡ ᠪᠦᠷᠢ ᠶ᠋ᠢᠨ ᠠᠮᠢᠨ ᠰᠠᠬᠢᠶᠠ ᠵᠢ ᠪᠠᠲᠤᠯᠠᠬᠤ ᠴᠢᠬᠤᠯᠠ ᠡᠭᠦᠷᠭᠡ ᠵᠢ ᠳᠠᠭᠠᠭᠠᠵᠤ ᠶᠠᠪᠤᠨᠠ᠃ ᠳᠠᠢᠴᠢᠯᠠᠭᠰᠠᠨ ᠴᠡᠷᠢᠭ ᠠᠭᠲᠠ ᠶ᠋ᠢᠨ ᠳᠤᠮᠳᠠ ᠰᠠᠭᠠᠳ ᠲᠣᠳᠬᠠᠷ ᠲᠤᠯᠭᠠᠷᠠᠬᠤ ᠪᠤᠶᠤ ᠳᠠᠢᠰᠤᠨ ᠤ᠋ ᠲᠠᠯᠠ ᠳ᠋ᠤ᠌ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠪᠠᠯ ᠴᠦᠯᠢᠰ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠃ ᠠᠮᠢ ᠭᠠᠷᠬᠤ ᠶ᠋ᠢ ᠪᠣᠳᠣᠵᠤ ᠠᠰᠢᠭᠲᠠᠢ ᠪᠠᠢᠷᠢ ᠶ᠋ᠢ ᠡᠵᠡᠯᠡᠨ ᠬᠦᠩ ᠦ᠋ᠨ ᠰᠦᠮᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠵᠢ ᠪᠣᠳᠣᠬᠤ ᠬᠡᠷᠡᠭᠲᠡᠢ᠃ ᠳ᠋ᠠᠭᠳᠠᠨ ᠳᠠ ᠪᠠᠭᠰᠢ ᠶ᠋ᠢᠨ ᠠᠮᠤᠷ ᠮᠡᠨᠳᠦ ᠶ᠋ᠢ ᠡᠷᠬᠡᠪᠰᠢ ᠠᠮᠤᠭᠤᠯᠠᠩ ᠪᠠᠲᠤᠯᠠᠬᠤ ᠶ᠋ᠢ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠦ ᠲᠠ ᠨᠠᠷ ᠲᠤ᠌ ᠰᠠᠨᠠᠭᠤᠯᠵᠤ ᠬᠡᠯᠡᠭᠰᠡᠨ ᠢ᠋ ᠮᠡᠳᠡᠭᠡᠷᠡᠢ ᠭᠡᠪᠡ᠃
– ᠵᠠ ᠬᠥᠳᠡᠯᠵᠡᠭᠡᠶᠡ ᠭᠡᠵᠦ ᠬᠡᠨ ᠨᠢᠭᠡ ᠨᠢ ᠰᠡᠳᠬᠢᠯ ᠰᠠᠭᠭᠠᠨ ᠪᠣᠰᠬᠤ ᠭᠡᠬᠦ ᠳ᠋ᠦ᠍ ᠵᠤᠳᠪᠠ ᠮᠡᠢᠷᠡᠨ ᠪᠣᠰᠴᠤ᠄
– ᠪᠠᠢᠵᠠ᠂ ᠡᠦᠲᠦ ᠠᠳᠠ ᠰᠦᠮᠡ ᠶ᠋ᠢᠨ ᠮᠠᠩᠵᠠ ᠶ᠋ᠢᠨ ᠴᠠᠪ ᠠ᠋ᠴᠠ ᠴᠠᠪᠯᠠᠵᠤ ᠠᠪᠤᠭᠠᠳ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠡᠯᠡ ᠵᠢᠭᠦᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠢᠨ ᠳᠡᠭᠡᠳᠦ ᠭᠣᠣᠯ ᠦᠨ ᠬᠣᠩᠭᠢᠯ ᠳ᠋ᠤ᠌ ᠣᠴᠢᠵᠤ ᠫᠤᠤ ᠵᠡᠪᠰᠡᠭ᠂ ᠰᠤᠮᠤ ᠳᠠᠷᠢ ᠬᠤᠪᠢᠳᠠᠵᠤ ᠠᠪᠤᠭᠠᠷᠠᠢ! ᠭᠡᠳ ᠲᠠᠷᠬᠠᠪᠠ᠃
ᠬᠠᠷᠠ ᠪᠦᠷᠦᠢ ᠪᠣᠯᠵᠤ ᠬᠣᠯᠠ ᠶ᠋ᠢᠨ ᠪᠠᠷᠠ ᠲᠠᠰᠤᠷᠠᠨ ᠬᠠᠷᠠᠩᠭᠤᠢ ᠪᠣᠯᠪᠠ᠃
ᠬᠥᠬᠡᠪᠣᠯᠠᠭ ᠤᠨ ᠭᠣᠣᠯ ᠢ᠋ ᠥᠭᠡᠳᠡᠯᠡᠵᠦ ᠤᠷᠤᠭᠤᠳᠠᠵᠤ ᠶᠠᠪᠤᠭᠠ ᠮᠣᠷᠢᠲᠠᠢ ᠬᠥᠮᠦᠰ ᠦ᠋ᠨ ᠬᠠᠵᠠᠭᠠᠷ ᠨᠣᠭᠲᠣ ᠶ᠋ᠢᠨ ᠬᠢᠩᠭᠠᠷ ᠲᠢᠩᠭᠠᠷ ᠭᠠᠷᠬᠤ ᠴᠢᠮᠡᠭᠡ ᠪᠠ ᠬᠠᠶᠠ ᠭᠠᠩ ᠲᠦᠷᠥᠭᠡ ᠬᠠᠪᠢᠷᠤᠯᠳᠤᠬᠤ ᠪᠤᠶᠤ ᠲᠠᠬᠠ ᠲᠠᠢ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠠ᠋ᠴᠠ ᠬᠠᠳᠠ ᠴᠢᠯᠠᠭᠤ ᠬᠠᠪᠢᠷᠤᠭᠰᠠᠨ ᠣᠴᠢ ᠦᠰᠦᠷᠦᠨ ᠭᠢᠯᠠᠯᠵᠠᠵᠤ᠂ ᠵᠥᠩᠳᠡᠭᠡᠨ ᠬᠥᠬᠡ ᠨᠠᠷᠢᠨ ᠰᠡᠢᠷ ᠢᠶᠠᠨ ᠵᠠᠢᠮᠤᠴᠢᠨ ᠤᠬᠢᠶᠠᠵᠤ ᠬᠥᠭᠵᠢᠮ ᠠᠶᠠ ᠵᠣᠬᠢᠴᠠᠭᠤᠯᠤᠨ ᠬᠤᠷᠴᠢᠭᠢᠨᠠᠳᠠᠭ ᠬᠥᠬᠡᠪᠣᠯᠠᠭ ᠤ᠋ᠨ ᠨᠠᠮ ᠵᠢᠮ ᠲᠠᠢᠪᠤᠩ ᠰᠥᠨᠢ ᠶ᠋ᠢ ᠡᠪᠳᠡᠵᠦ᠂ ᠪᠤᠳᠠᠨ ᠤ ᠲᠠᠤᠯᠠᠢ᠂ ᠪᠤᠷᠭᠠᠰᠤᠨ ᠤ ᠪᠣᠯᠵᠣᠮᠣᠷ ᠴᠤ᠌ ᠡᠨᠡ ᠭᠡᠨᠡᠳᠲᠡ ᠶᠢᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠠᠮᠤᠷ ᠵᠢᠮᠤᠷ ᠨᠣᠢᠷᠮᠤᠭᠯᠠᠬᠤ ᠬᠤᠪᠢ ᠦᠭᠡᠢ ᠪᠠᠢᠯᠠ᠃
ᠬᠠᠷᠠᠩᠭᠤᠢ ᠪᠣᠯᠬᠤ ᠳᠤᠰᠤᠮ ᠣᠭᠲᠠᠷᠭᠤᠢ ᠶ᠋ᠢᠨ ᠣᠳᠣᠳ ᠤᠯᠠᠮ ᠣᠯᠠᠰᠢᠷᠠᠨ ᠲᠦᠭᠡᠵᠦ ᠬᠠᠶᠠ ᠨᠢᠭᠡ ᠬᠠᠷᠪᠤᠬᠤ ᠰᠣᠯᠢᠷ ᠡᠦᠲᠦᠨ ᠤ ᠰᠣᠪᠤᠷᠠᠯᠲᠠ ᠪᠠᠷᠲᠠᠭᠠᠲᠤ ᠬᠠᠳᠠ ᠲᠠᠢ ᠬᠠᠷᠭᠤᠢ ᠪᠠᠷ ᠫᠠᠴᠢᠭᠢᠨᠠᠬᠤ ᠮᠣᠷᠢᠳ ᠤᠨ ᠲᠡᠮᠦᠷ ᠳᠠᠬᠠᠨ ᠡᠴᠡ ᠦᠰᠦᠷᠬᠦ ᠣᠴᠢ ᠲᠠᠢ ᠠᠳᠠᠯᠢᠬᠠᠨ ᠬᠠᠷᠠᠭᠳᠠᠬᠤ ᠨᠢ ᠭᠠᠭᠴᠠ ᠰᠥᠨᠢ ᠶ᠋ᠢᠨ ᠣᠨᠴᠠ ᠭᠠᠢᠬᠠᠮᠰᠢᠭ ᠦᠵᠡᠮᠵᠢ ᠬᠡᠮᠡᠷ ᠠᠵᠢ᠃
ᠭᠤᠷᠪᠠᠨ ᠮᠠᠷᠠᠯ ᠭᠣᠳᠣᠢᠴᠢᠬᠠᠯᠠ᠃
ᠴᠡᠷᠢᠭ ᠮᠣᠷᠢᠳ ᠤᠨ ᠬᠥᠯ ᠲᠠᠲᠠᠷᠠᠵᠤ᠂ ᠬᠥᠬᠡᠪᠤᠯᠠᠭ ᠤᠨ ᠭᠣᠣᠯ ᠲᠠᠢᠪᠤᠩ ᠪᠠᠢᠳᠠᠯ ᠳᠠᠭᠠᠨ ᠣᠷᠣᠪᠠ᠃ ᠬᠠᠶᠠ ᠨᠢᠭᠡ ᠬᠣᠶᠠᠷ ᠮᠣᠷᠢᠲᠠᠨ ᠰᠠᠢᠷᠲᠤ ᠤᠰᠤ ᠲᠤᠭᠤᠯᠤᠨ ᠲᠤᠪᠲᠤᠯᠬᠤ ᠨᠢ ᠢᠮᠠᠭᠠᠨ ᠢᠯᠭᠢ ᠪᠡᠷ ᠪᠦᠷᠢᠭᠰᠡᠨ ᠲᠠᠮᠠᠷᠤ ᠫᠠᠴᠢᠭᠢᠨᠠᠭᠤᠯᠬᠤ ᠰᠢᠭ᠋ ᠳᠠᠩ ᠴᠤᠯᠭᠤᠢ ᠥᠷᠥᠭᠡᠰᠦᠨ ᠳᠠᠭᠤᠨ ᠴᠢᠬᠢ ᠭᠠᠲᠠᠮᠠ ᠰᠣᠨᠣᠰᠳᠠᠬᠤ ᠠᠵᠢ!
ᠱᠠᠲᠤ ᠶᠢᠨ ᠭᠣᠣᠯ ᠤᠨ ᠲᠡᠭᠲᠡᠷ ᠭᠠᠴᠠᠭᠠᠨ ᠤ ᠳᠡᠭᠡᠳᠦ ᠬᠣᠩᠭᠢᠯ ᠳᠤ ᠵᠤᠯᠠ ᠪᠠᠳᠠᠷᠠᠨ ᠠᠰᠠᠵᠤ᠂ ᠬᠠᠮ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠨᠣᠮ ᠤᠩᠰᠢᠬᠤ ᠳᠠᠭᠤᠨ ᠪᠠ ᠸᠠᠴᠢᠷ ᠬᠤᠩᠬᠤᠨ ᠤ ᠳᠠᠩᠭᠢᠨᠠᠬᠤ ᠴᠢᠮᠡᠭᠡ ᠵᠡᠭᠦᠨ ᠡᠮᠦᠨᠡ ᠡᠴᠡ ᠥᠩᠭᠡᠢᠭᠰᠡᠨ ᠡᠪᠴᠢᠭᠦᠦ ᠬᠠᠳᠠᠨ ᠳᠤ ᠴᠤᠤᠷᠠᠢ ᠲᠠᠲᠠᠨᠠ ᠁