ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ <ᠳᠡᠭᠡᠳᠦ> – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠳᠡᠳ᠋ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠢᠭᠡ> Хан мунын сүүрс < дээд > – Мөнх зохиоов ᠂ дэд бодь – нэгдүгээр бүлэг <1>
274ᠳᠡᠳ᠋ ᠪᠣᠳᠢ - ᠨᠢᠭᠡᠳᠦᠭᠡᠷ ᠪᠦᠯᠦᠭ <ᠨᠢᠭᠡ>
ᠨᠢᠭᠡᠳᠦᠭᠡᠷ ᠪᠦᠯᠦᠭ
ᠡᠷᠲᠡ ᠶ᠋ᠢᠨ ᠢᠷᠦᠭᠡᠯ ᠪᠤᠶᠠᠨ ᠲᠠᠢ
ᠡᠨᠳᠡ ᠪᠢᠳᠡ ᠦᠯᠵᠢ ᠲᠡᠢ
ᠡᠷᠬᠢᠮ ᠭᠤᠷᠪᠠᠨ ᠡᠷᠳᠡᠨᠢ ᠪᠡᠷ
ᠠᠳᠢᠰᠯᠠᠬᠤ ᠪᠣᠯᠲᠤᠭᠠᠢ
᠁
ᠮᠤᠨᠠ ᠶ᠋ᠢᠨ ᠠᠭᠤᠯᠠ ᠬᠡᠮᠡᠭᠴᠢ
ᠨᠤᠲᠤᠭ ᠮᠢᠨᠢ ᠦᠯᠵᠢ ᠲᠡᠢ
ᠨᠤᠲᠠᠯᠠᠵᠤ ᠲᠠᠯᠪᠢᠬᠰᠠᠩᠬᠠᠨ
ᠢᠷᠦᠭᠡᠯ ᠮᠢᠨᠢ ᠬᠦᠴᠦᠲᠡᠢ
( ᠮᠡᠷᠭᠡᠨ ᠭᠡᠭᠡᠨ ᠦ᠌ ᠵᠣᠬᠢᠶᠠᠭᠰᠠᠨ《 ᠡᠷᠲᠡ ᠶ᠋ᠢᠨ ᠢᠷᠦᠭᠡᠯ》 ᠭᠡᠳᠡᠭ
ᠤᠷᠠᠳ ᠠᠷᠠᠳ ᠤ᠋ᠨ ᠳᠠᠭᠤᠤ)
ᠠᠷᠤ ᠲᠠᠯᠠ ᠶ᠋ᠢᠨ ᠠᠷᠴᠠ
ᠠᠷᠤᠬᠠᠨ ᠲᠠᠯᠠ ᠳ᠋ᠠᠭᠠᠨ ᠰᠡᠭᠦᠳᠡᠷ ᠲᠡᠢ
ᠠᠭᠢ ᠭᠢᠯᠭᠠᠨᠠ ᠶ᠋ᠢᠨ ᠪᠡᠯᠴᠢᠭᠡᠷ ᠲᠡᠢ
ᠷᠠᠰᠢᠶᠠᠨ ᠪᠤᠯᠠᠭ ᠤ᠋ᠨ ᠤᠮᠳᠠ ᠲᠠᠢ
ᠭᠤᠷᠪᠠᠨ ᠬᠡᠭᠡᠷ ᠲᠩᠷᠢ ᠶ᠋ᠢᠨ ᠤᠨᠠᠭᠠ
ᠭᠤᠷᠪᠠᠯᠵᠢᠨ ᠬᠠᠷᠠᠭᠳᠠᠬᠤ ᠮᠢᠨᠦ ᠨᠤᠲᠤᠭ
ᠳᠥᠷᠪᠡᠨ ᠬᠡᠭᠡᠷ ᠲᠩᠷᠢ ᠶ᠋ᠢᠨ ᠤᠨᠠᠭᠠ
ᠳᠥᠷᠪᠡᠯᠵᠢᠨ ᠬᠠᠷᠠᠭᠳᠠᠬᠤ ᠮᠢᠨᠦ ᠨᠤᠲᠤᠭ
( ᠤᠷᠠᠳ ᠠᠷᠠᠳ ᠤ᠋ᠨ ᠳᠠᠭᠤᠤ)
ᠨᠢᠭᠡ
ᠮᠠᠨᠴᠤᠷᠭᠠ ᠲᠡᠷᠡ ᠰᠥᠨᠢ ᠢᠮᠠᠭᠠᠨ ᠳᠠᠭᠤᠲᠤ ᠦᠯᠵᠡᠢᠰᠠᠩ ᠢ᠋ ᠥᠯᠥᠩᠲᠦ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠮᠣᠳᠣᠨ ᠳ᠋ᠤ᠌ ᠡᠯᠭᠦᠵᠦ ᠬᠠᠶᠠᠴᠢᠬᠠᠭᠠᠳ ᠰᠢᠭᠤᠳ ᠪᠤᠭᠤᠲᠤ ᠣᠷᠥᠵᠡᠢ᠃
ᠰᠤᠨᠤᠮᠠ ᠨᠢᠭᠡ ᠡᠳᠦᠷ ᠠᠭᠤᠯᠠ ᠬᠢᠷᠠᠯᠠᠨ ᠱᠣᠭᠰᠢᠭᠤᠯᠵᠤ ᠬᠠᠳᠤᠮᠠᠯ᠂ ᠬᠥᠨᠳᠡᠯᠢ ᠶ᠋ᠢᠨ ᠠᠷᠤ ᠠᠮᠠ ᠶ᠋ᠢ ᠲᠤᠭᠤᠯᠵᠤ ᠭᠠᠷᠤᠨ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠰᠢᠭᠤᠢᠲᠤ ᠶ᠋ᠢᠨ ᠪᠠᠷᠠᠭᠤᠨ ᠰᠤᠵᠠᠭ ᠢ᠋ᠶ᠋ᠠᠷ ᠭᠣᠣᠯ ᠤᠷᠤᠭᠤᠳᠠᠵᠤ ᠬᠥᠮᠦᠨ ᠬᠠᠷᠠ ᠳ᠋ᠤ᠌ ᠮᠡᠳᠡᠭᠳᠡᠯ ᠦᠭᠡᠢ ᠪᠤᠭᠤᠲᠤ ᠶ᠋ᠢᠨ ᠬᠣᠢᠲᠤ ᠳᠡᠪᠰᠡᠭ ᠦ᠋ᠨ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠲᠤᠯᠵᠤ ᠣᠴᠢᠪᠠ᠃
ᠮᠣᠷᠢ ᠪᠠᠨ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠠᠷᠤᠬᠠᠨ ᠵᠦᠯᠭᠡ ᠳᠡᠭᠡᠷᠡ ᠴᠣᠮᠣᠵᠤ ᠲᠠᠯᠪᠢᠴᠢᠬᠠᠭᠠᠳ᠂ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠣᠯᠣᠩ ᠢ᠋ ᠰᠤᠯᠠᠯᠠᠵᠤ᠂ ᠬᠠᠵᠠᠭᠠᠷ ᠢ᠋ ᠨᠢ ᠮᠤᠯᠲᠤᠯᠤᠨ ᠳᠥᠷᠥᠭᠡ ᠶ᠋ᠢ ᠨᠢ ᠭᠠᠨᠵᠤᠭᠠᠯᠠᠵᠤ᠂ ᠭᠥᠯᠢᠮ ᠢ᠋ ᠨᠢ ᠬᠤᠢᠯᠠᠨ ᠡᠪᠬᠡᠪᠡ᠃ ᠨᠢᠷᠤᠭᠤ ᠠᠮᠠᠷᠠᠭᠰᠠᠨ ᠬᠦᠯᠦᠭ ᠨᠢ ᠡᠵᠡᠨ ᠦ᠌ ᠪᠡᠨ ᠬᠣᠢᠨᠠ ᠠ᠋ᠴᠠ ᠡᠭᠡᠨᠡᠭᠰᠢᠨ ᠦᠦᠷᠰᠡᠵᠦ᠂ ᠪᠡᠶᠡ ᠪᠡᠨ ᠰᠢᠯᠭᠡᠭᠡᠨ ᠨᠢᠭᠡ ᠡᠳᠦᠷ ᠨᠢᠭᠡ ᠰᠥᠨᠢ ᠶ᠋ᠢᠨ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠪᠡᠨ ᠲᠠᠢᠯᠤᠭᠰᠠᠨ ᠰᠢᠭ᠋ ᠲᠣᠭᠣᠰᠣ ᠰᠢᠷᠣᠢ ᠪᠤᠲᠠᠷᠠᠲᠠᠯᠠ ᠳᠣᠷᠭᠢᠨ ᠬᠣᠪᠳᠣᠭ ᠲᠠᠢ ᠭᠡᠭᠴᠢ ᠪᠡᠷ ᠡᠪᠡᠰᠦ ᠬᠠᠵᠠᠯᠠᠪᠠ᠃
ᠮᠠᠨᠴᠤᠷᠭᠠ ᠰᠦᠮᠡ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠳᠤᠭᠤᠢᠯᠠᠵᠤ ᠭᠠᠷᠤᠭᠠᠳ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠪᠠᠭᠠᠬᠠᠨ ᠳᠥᠷᠪᠡᠯᠵᠢᠨ ᠬᠦᠷᠢᠶᠡ ᠲᠤᠯᠵᠤ ᠣᠴᠢᠨ ᠡᠭᠦᠳᠡ ᠲᠦᠯᠬᠢᠪᠡᠯ ᠢᠬᠡᠷᠡ ᠪᠠᠨᠰᠠᠨ ᠬᠠᠭᠠᠯᠭᠠ ᠨᠢ ᠲᠦᠭᠵᠢᠶᠡᠰᠦᠲᠠᠢ᠃ ᠲᠡᠷᠡ ᠬᠡᠷᠡᠮ ᠬᠠᠷᠠᠢᠵᠤ ᠣᠷᠣᠭᠠᠳ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠵᠢᠵᠢᠭ ᠳᠥᠷᠪᠡᠯᠵᠢᠨ ᠴᠣᠩᠬᠣ ᠪᠠᠷ ᠮᠠᠭᠤᠬᠠᠨ ᠰᠦᠮᠡᠯᠵᠡᠵᠦ ᠬᠠᠷᠠᠭᠳᠠᠭᠰᠠᠨ ᠷᠣᠯᠮᠠ ᠶ᠋ᠢᠨ ᠭᠡᠷ ᠤᠷᠤᠭᠤ ᠲᠦᠷᠭᠡᠯᠡᠬᠦ ᠳᠤᠮᠳᠠ ᠪᠠᠨ《 ᠡᠨᠡ ᠮᠠᠭᠤ ᠨᠠᠭᠠᠯᠢᠩᠬᠠᠢ ᠲᠠᠢ ᠬᠡᠳᠦᠨ ᠵᠢᠯ ᠠᠭᠤᠯᠵᠠᠭᠠ ᠦᠭᠡᠢ᠃ ᠦᠨᠡᠬᠡᠷ ᠤᠳᠠᠯᠠ ᠳᠠ! ᠠᠷᠭᠠ ᠴᠤ᠌ ᠦᠭᠡᠢ᠂ ᠴᠢᠮᠠ ᠠ᠋ᠴᠠ ᠴᠠᠷᠠᠢᠯᠢᠭ ᠴᠢᠮᠪᠠᠢ ᠬᠠᠲᠤᠨ ᠲᠠᠢ ᠶᠠᠰᠤ ᠪᠠᠨ ᠬᠠᠪᠲᠠᠯᠵᠠᠲᠠᠯᠠ ᠠᠮᠠᠷᠠᠭᠯᠠᠵᠤ ᠶᠠᠪᠤᠭᠰᠠᠨ ᠶᠤᠮ ᠴᠢᠨᠢ᠃ ᠡᠭᠦᠨ ᠦ᠌ ᠤᠷᠰᠢᠭ ᠢ᠋ᠶ᠋ᠠᠷ ᠴᠢᠮᠠ ᠠ᠋ᠴᠠ ᠳᠠᠩᠴᠤ ᠵᠠᠢᠳᠠᠭᠤᠬᠠᠨ ᠶᠠᠪᠤᠭᠰᠠᠨ ᠢ᠋ ᠴᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ ᠬᠥᠭᠡᠷᠦᠬᠦᠢ! ᠲᠡᠷᠡ ᠵᠢᠯ ᠴᠢᠮᠠ ᠳ᠋ᠤ᠌ ᠯᠤᠤ ᠶ᠋ᠢᠨ ᠬᠡ ᠲᠡᠢ ᠬᠣᠣᠰ ᠮᠥᠩᠭᠥᠨ ᠪᠠᠭᠤᠤ᠂ ᠪᠣᠭᠣᠳᠠᠯ ᠲᠠᠮᠠᠬᠢ ᠶ᠋ᠢᠨ ᠪᠡᠯᠡᠭ ᠲᠡᠢ ᠠᠭᠤᠯᠵᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠳᠠᠬᠢᠵᠤ ᠠᠭᠤᠯᠵᠠᠭᠠ ᠦᠭᠡᠢ᠃ ᠲᠤᠩ ᠲᠤᠢᠯᠳᠠᠬᠤ ᠳ᠋ᠠᠭᠠᠨ ᠴᠢᠮᠠ ᠪᠠᠨ ᠭᠡᠳ ᠢᠷᠡᠬᠦ ᠳ᠋ᠦ᠍ ᠴᠢ ᠮᠢᠨᠢ ᠬᠥᠭᠡᠷᠦᠬᠦᠢ ᠬᠣᠰᠢᠭᠤ ᠪᠠᠨ ᠴᠣᠷᠪᠣᠢᠭᠠᠳ ᠬᠠᠢᠷᠠ ᠪᠠᠨ ᠢᠪᠢᠯᠳᠡᠭ ᠢᠨᠵᠠᠭᠠ ᠰᠢᠭ᠋ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠳᠠ! ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠡᠷᠡ ᠬᠥᠮᠦᠨ ᠦ᠌ ᠬᠤᠪᠢ ᠲᠠᠪᠢᠯᠠᠩ ᠭᠡᠭᠴᠢ ᠬᠠᠲᠠᠭᠤ ᠳ᠋ᠠᠭᠠᠨ ᠭᠠᠩ ᠲᠡᠮᠦᠷ ᠰᠢᠭ᠋ ᠪᠣᠯᠪᠠᠴᠤ ᠤᠶᠠᠷᠠᠬᠤ ᠳ᠋ᠠᠭᠠᠨ ᠡᠮᠡ ᠬᠥᠮᠦᠨ ᠦ᠌ ᠨᠠᠭᠠᠯᠢᠩᠬᠠᠢ ᠬᠠᠢᠷᠠ ᠳ᠋ᠤ᠌ ᠳᠠᠩᠴᠤ ᠨᠢᠭᠡ ᠵᠢᠯᠣᠭᠣ ᠠᠯᠳᠠᠳᠠᠭ ᠬᠣᠢᠨᠠ ᠳᠠ᠃ ᠡᠨᠡ ᠪᠣᠯ ᠡᠷᠢᠶᠡᠨ ᠬᠣᠷᠸᠠ ᠶ᠋ᠢᠨ ᠡᠷᠡ ᠬᠥᠮᠦᠨ ᠳ᠋ᠦ᠍ ᠵᠠᠶᠠᠭᠠᠭᠰᠠᠨ ᠬᠠᠲᠠᠭᠤ ᠶᠣᠰᠣ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠥᠨᠥ ᠰᠥᠨᠢ ᠴᠢᠮᠠ ᠲᠠᠢ ᠵᠢᠷᠭᠠᠵᠤ ᠬᠣᠨᠣᠨᠠ ᠳᠠ᠃ ᠴᠠᠢ ᠶ᠋ᠢ ᠴᠢᠨᠢ ᠬᠥᠯᠥᠷᠡᠲᠡᠯᠡ ᠣᠭᠣᠴᠢᠯᠠᠵᠤ᠂ ᠬᠥᠬᠥ ᠶ᠋ᠢ ᠴᠢᠨᠢ ᠲᠡᠮᠲᠡᠷᠢᠵᠦ ᠬᠡᠪᠲᠡᠶᠡ ᠠ᠋᠁》 ᠭᠡᠵᠦ ᠤᠷᠠᠨ ᠲᠠᠭᠠᠮᠠᠭ ᠤ᠋ᠨ ᠤᠴᠢᠭ ᠬᠦᠪᠦᠷᠡᠭᠦᠯᠦᠨ᠂ ᠷᠣᠯᠮᠠ ᠶ᠋ᠢ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠰᠠᠭᠭᠠᠲᠠᠯᠠ ᠪᠠᠶᠠᠷᠯᠠᠭᠤᠯᠵᠤ ᠣᠷᠬᠢᠨᠠ ᠳᠠ ᠭᠡᠳ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠬᠦ ᠲᠡᠢ ᠵᠡᠷᠭᠡ ᠭᠡᠷ ᠳᠣᠲᠣᠷᠠ ᠠ᠋ᠴᠠ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠠᠭᠰᠠᠨ ᠪᠥᠭᠰᠡᠨ ᠬᠠᠨᠢᠶᠠᠬᠤ ᠳᠠᠭᠤ ᠳᠤᠭᠤᠯᠳᠠᠪᠠ᠃ ᠮᠠᠨᠴᠤᠷᠭᠠ ᠶ᠋ᠢᠨ ᠪᠣᠳᠣᠯ ᠲᠡᠯᠡᠷᠡᠵᠦ ᠦᠵᠡᠨ ᠪᠡᠶᠡᠰᠴᠦ ᠦᠬᠦᠨ ᠭᠣᠮᠣᠳᠠᠨᠠ ᠭᠡᠳᠡᠭ ᠦᠢᠯᠡ ᠦᠷᠡ ᠶᠠᠭᠠᠬᠢᠭᠠᠳ ᠲᠠᠩᠳᠠ ᠡᠭᠦᠳᠡᠨ ᠳ᠋ᠦ᠍ ᠮᠢᠨᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠣᠬᠢᠶᠠᠭᠠᠳ ᠪᠠᠢᠳᠠᠭ ᠪᠣᠢ? ᠴᠢᠭᠢᠶᠡᠲᠦᠷᠦᠦ ᠮᠠᠭᠤ ᠰᠤᠪᠠᠢ ᠶ᠋ᠢ ᠬᠣᠬᠣᠢ! ᠭᠠᠩᠳᠠᠵᠤ ᠬᠠᠭᠰᠠᠷᠠᠬᠤ ᠳ᠋ᠠᠭᠠᠨ ᠠᠭᠰᠠᠵᠤ ᠦᠬᠦᠬᠦ ᠰᠢᠬᠠᠭᠰᠠᠨ ᠮᠠᠭᠤ ᠡᠪᠦᠭᠡᠨ ᠲᠡᠪᠡᠷᠢᠵᠦ ᠬᠣᠨᠣᠳᠠᠭ ᠪᠣᠯᠵᠤ ᠳᠠ ᠭᠡᠵᠦ ᠬᠣᠷᠣ ᠰᠠᠨᠠᠨ ᠰᠡᠮᠡᠭᠡᠷᠬᠡᠨ ᠢ᠋ ᠨᠢ ᠮᠠᠭᠠᠵᠢᠵᠤ ᠮᠤᠤᠷ ᠰᠢᠭ᠋ ᠪᠠᠷᠬᠢᠷᠠᠨ ᠠᠯᠢᠶᠠᠯᠠᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠵᠤ ᠡᠭᠦᠳᠡ ᠶ᠋ᠢ ᠨᠢ ᠴᠦᠯᠲᠦ ᠲᠦᠯᠬᠢᠨ ᠣᠷᠣᠪᠠ᠃ ᠰᠠᠯᠬᠢ ᠵᠢᠪᠠᠷ ᠲᠠᠲᠠᠭᠤᠯᠤᠨ ᠣᠷᠣᠭᠰᠠᠨ ᠰᠠᠢᠨ ᠡᠷᠡ ᠶ᠋ᠢᠨ ᠪᠡᠶᠡ ᠳᠠᠭᠠᠭᠰᠠᠨ ᠬᠤᠯᠠᠭᠠᠢ ᠵᠢᠪᠠᠷ ᠲᠤ ᠪᠡᠶᠡ ᠪᠡᠨ ᠮᠠᠨᠠᠨ ᠠᠨᠢᠪᠠᠯᠵᠠᠭᠰᠠᠨ ᠮᠠᠭᠤ ᠮᠠᠭᠠᠵᠢ ᠶ᠋ᠢᠨ ᠲᠣᠰᠣᠨ ᠳ᠋ᠧᠩ ᠤᠨᠲᠠᠷᠠᠵᠤ ᠣᠷᠬᠢᠪᠠ᠃
ᠮᠠᠨᠴᠤᠷᠭᠠ᠂ ᠷᠤᠷᠯᠮᠠ ᠶ᠋ᠢ ᠳ᠋ᠧᠩ ᠢ᠋ᠶ᠋ᠡᠨ ᠤᠨᠲᠠᠷᠠᠭᠠᠴᠢᠬᠠᠯᠠ ᠭᠡᠵᠦ ᠤᠯᠠᠮ ᠠᠭᠤᠷ ᠤᠴᠠᠭᠠᠷ ᠨᠢ ᠪᠤᠴᠠᠯᠵᠤ《 ᠶᠠᠮᠠᠷ ᠶᠠᠩᠵᠤ ᠶ᠋ᠢᠨ ᠶᠠᠭᠤᠮᠠ ᠲᠠᠢ ᠶᠠᠩᠬᠠᠷᠠᠵᠦ ᠬᠡᠪᠲᠡᠭᠡ ᠪᠣᠯ? ᠮᠠᠭᠤ ᠰᠠᠮᠠᠭᠤᠷᠠᠭᠰᠠᠨ ᠡᠷᠡ ᠶ᠋ᠢ ᠠᠭᠵᠠᠢᠲᠠᠯᠠ ᠬᠥᠭᠡᠭᠡᠵᠦ ᠪᠣᠰᠬᠠᠭᠠᠳ ᠱᠠᠯᠳᠠᠩ ᠢ᠋ᠶ᠋ᠠᠷ ᠭᠠᠳᠠᠨᠠ ᠬᠥᠭᠡᠭᠡᠵᠦ ᠭᠠᠷᠭᠠᠶᠠ》 ᠭᠡᠵᠦ ᠬᠣᠷᠣ ᠰᠢᠷᠠ ᠨᠢ ᠪᠤᠴᠠᠯᠤᠨ᠄
— ᠳ᠋ᠧᠩ ᠢ᠋ᠶ᠋ᠡᠨ ᠠᠰᠬᠠ! ᠭᠡᠵᠦ ᠠᠭᠰᠤᠮᠨᠠᠨ ᠵᠠᠩᠳᠤᠷᠬᠤ ᠳ᠋ᠤ᠌ ᠴᠠᠭᠠᠳᠤᠭᠤᠯᠠ ᠨᠢ ᠴᠢᠮᠡᠭᠡ ᠠᠨᠢᠷ ᠠᠯᠠᠭᠠ᠃ ᠨᠢᠭᠡ ᠬᠡᠰᠡᠭ ᠴᠢᠮᠡᠭᠡ ᠢᠮᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ《 ᠬᠢ ᠶᠣᠬᠣᠭᠰᠠᠨ! ᠶᠠᠭᠠᠬᠢᠭᠰᠠᠨ ᠮᠠᠭᠤᠬᠠᠢ ᠰᠢᠷᠦᠭᠦᠨ ᠵᠢᠪᠠᠷ ᠪᠣᠢ? ᠲᠦᠭᠵᠢᠶᠡᠰᠦᠲᠠᠢ ᠬᠠᠭᠠᠯᠭᠠ ᠶ᠋ᠢ ᠣᠩᠭᠣᠢᠲᠠᠯᠠ ᠰᠢᠭᠤᠷᠳᠠᠭ ᠨᠢ! ᠴᠢᠭᠢᠶᠡᠲᠦᠷᠦᠦ᠁》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠳᠦᠳᠦᠨᠡᠭᠰᠡᠭᠡᠷ ᠨᠢᠭᠡ ᠬᠥᠮᠦᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ ᠢᠷᠮᠡᠭ ᠲᠡᠮᠲᠡᠷᠬᠢᠯᠡᠬᠦ ᠴᠢᠮᠡᠭᠡ ᠭᠠᠷᠪᠠ᠃
— ᠳ᠋ᠧᠩ ᠢ᠋ᠶ᠋ᠡᠨ ᠬᠤᠷᠳᠤᠨ ᠠᠰᠬᠠ! ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠲᠣᠯᠣᠭᠠᠢ᠂ ᠶᠠᠭᠤᠨ ᠤ᠋ ᠴᠢᠨᠢ ᠰᠠᠯᠬᠢ᠃
— ᠴᠠᠭᠠᠳᠤᠭᠤᠯᠠ ᠨᠢ ᠮᠥᠨ ᠯᠡ ᠬᠠᠷᠢᠭᠤ ᠦᠭᠡᠢ᠃
— ᠴᠢᠬᠢ ᠦᠭᠡᠢ ᠲᠣᠯᠣᠭᠠᠢ ᠤᠤ? ᠠ⁈ ᠴᠠᠭᠠᠳᠤᠬᠢ ᠨᠢ ᠬᠠᠨᠵᠤᠨ ᠠ᠋ᠴᠠ ᠭᠤᠯᠭᠤᠷᠢᠨ ᠪᠠᠭᠤᠵᠤ ᠬᠠᠭᠠᠯᠭᠠ ᠬᠠᠭᠠᠬᠤ ᠭᠡᠵᠦ ᠬᠡᠯᠲᠦᠷᠢᠭᠡᠳ ᠬᠥᠰᠡᠷ ᠰᠦᠪᠡᠭᠡ ᠲᠤᠯᠵᠤ ᠵᠣᠭᠰᠣᠭᠰᠠᠨ ᠮᠠᠨᠴᠤᠷᠭᠠ ᠲᠠᠢ ᠮᠥᠷᠭᠥᠪᠡ᠃ ᠨᠥᠭᠦᠭᠡ ᠬᠥᠮᠦᠨ ᠰᠠᠨᠳᠤᠷᠴᠤ᠄
— ᠲᠠ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠬᠡᠨ ᠪᠣᠢ? ᠭᠡᠵᠦ ᠠᠶᠤᠵᠤ ᠡᠮᠢᠶᠡᠭᠰᠡᠨ ᠳᠣᠷᠣᠢ ᠳᠠᠭᠤᠨ ᠳᠤᠭᠤᠯᠳᠠᠪᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠠᠭᠠᠯᠭᠠ ᠪᠠᠨ ᠬᠠᠭᠠᠬᠤ ᠭᠡᠵᠦ ᠰᠠᠨᠠᠨ ᠲᠡᠷᠡ ᠵᠦᠭ ᠲᠡᠮᠲᠡᠷᠬᠢᠯᠡᠨᠡ᠃
— ᠳ᠋ᠧᠩ ᠢ᠋ᠶ᠋ᠡᠨ᠂ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠬᠠ! ᠶᠠᠭᠤᠨ ᠤ᠋ ᠬᠥᠮᠦᠨ ᠢ᠋ᠶ᠋ᠡᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠪᠠᠯ ᠮᠡᠳᠡᠬᠦ ᠪᠠᠢᠯᠭᠦᠢ! ᠨᠥᠭᠦᠭᠡ ᠲᠡᠷᠡ ᠬᠥᠮᠦᠨ ᠬᠠᠭᠠᠯᠭᠠ ᠪᠠᠨ ᠵᠦᠳᠡᠭᠦᠬᠡᠨ ᠬᠠᠭᠠᠴᠢᠬᠠᠭᠠᠳ ᠬᠠᠨᠵᠤᠨ ᠤ᠋ ᠰᠢᠷᠡᠭᠡᠨ ᠳᠣᠣᠭᠤᠷ ᠴᠦᠳᠡᠩ ᠲᠡᠮᠲᠡᠷᠢᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ《ᠦᠭᠡᠢ ᠶᠡᠷᠦ ᠨᠢ ᠴᠦᠳᠡᠩ ᠶᠠᠭᠠᠬᠢᠪᠠ?》 ᠭᠡᠵᠦ ᠳᠦᠳᠦᠨᠡᠨ ᠱᠤᠤᠬᠢᠲᠤᠨᠠᠨᠠ᠃
ᠮᠠᠨᠴᠤᠷᠭᠠ ᠬᠡᠲᠡ ᠴᠠᠬᠢᠭᠤᠷ ᠥᠷᠥᠵᠦ ᠥᠨᠥᠬᠢ ᠮᠠᠭᠠᠵᠢ ᠶ᠋ᠢᠨ ᠲᠣᠰᠣᠨ ᠳ᠋ᠧᠩ ᠢ᠋ ᠠᠰᠠᠭᠠᠪᠠᠯ ᠭᠡᠷ ᠳᠣᠲᠣᠷᠠ ᠥᠨᠥᠴᠢᠨ ᠣᠭᠣᠯᠢ ᠰᠢᠭ᠋ ᠡᠪᠦᠭᠡᠨ ᠯᠠᠮᠠᠬᠠᠢ ᠨᠢᠳᠦ ᠨᠢ ᠪᠥᠯᠲᠡᠷᠡᠴᠢᠭᠡᠮᠡᠷᠬᠡᠨ ᠠᠶᠤᠵᠤ ᠶᠠᠭᠤ ᠶᠠᠭᠠᠬᠢᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠮᠡᠯᠡᠷᠡᠨ ᠭᠠᠢᠬᠠᠵᠤ ᠵᠣᠭᠰᠣᠨᠠ᠃ ᠶᠠᠭᠤᠨ ᠤ᠋ ᠬᠢᠨᠢ ᠷᠣᠯᠮᠠ ᠪᠠᠢᠬᠤ ᠪᠣᠢ? ᠨᠢᠭᠡ ᠮᠠᠭᠤ ᠳᠥᠵᠢᠷᠡᠭᠰᠡᠨ ᠡᠪᠦᠭᠡᠨ ᠯᠠᠮᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ᠃
— ᠷᠣᠯᠮᠠ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠪᠣᠢ? ᠭᠡᠵᠦ ᠲᠡᠷᠡ ᠡᠪᠦᠭᠡᠨ ᠯᠠᠮᠠᠬᠠᠢ ᠠ᠋ᠴᠠ ᠠᠰᠠᠭᠤᠪᠠᠯ ᠥᠨᠥᠬᠢ ᠡᠪᠦᠭᠡᠨ ᠮᠠᠨᠴᠤᠷᠭᠠ ᠶ᠋ᠢᠨ ᠥᠭᠡᠳᠡ ᠡᠴᠡ ᠣᠩᠭᠣᠢᠵᠤ ᠮᠡᠯᠡᠷᠡᠬᠦ ᠡᠴᠡ ᠪᠢᠰᠢ ᠳᠤᠤᠭᠠᠷᠳᠠᠭ ᠦᠭᠡᠢ᠃
— ᠦᠭᠡᠢ ᠲᠠ ᠴᠢᠨᠢ ᠴᠢᠬᠢ ᠦᠭᠡᠢ ᠲᠣᠯᠣᠭᠠᠢ ᠤᠤ? ᠭᠡᠰᠡᠨ ᠪᠣᠯᠪᠠᠴᠤ ᠦᠭᠡ ᠳᠣᠣᠭᠠᠷᠳᠠᠭ ᠦᠭᠡᠢ ᠳ᠋ᠦ᠍ ᠮᠠᠨᠴᠤᠷᠭᠠ ᠡᠪᠦᠭᠡᠨ ᠦ᠌ ᠴᠢᠬᠢᠨ ᠡᠴᠡ ᠴᠢᠩᠭᠠᠭᠠᠨ ᠬᠣᠰᠢᠭᠤ ᠪᠠᠨ ᠴᠢᠬᠢᠨ ᠳ᠋ᠦ᠍ᠨᠢ ᠣᠢᠷᠠᠲᠤᠭᠤᠯᠵᠤ《ᠳᠦᠯᠡᠢ ᠤᠤ? ᠴᠢᠬᠢ ᠴᠢᠨᠢ?》 ᠭᠡᠵᠦ ᠬᠠᠰᠬᠢᠷᠪᠠᠯ ᠥᠨᠥᠬᠢ ᠡᠪᠦᠭᠡᠨ ᠯᠠᠮᠠᠬᠠᠢ ᠴᠢᠬᠢ ᠪᠡᠨ ᠵᠡᠭᠦᠦ ᠪᠡᠷ ᠰᠢᠪᠡᠭᠦᠯᠦᠭᠰᠡᠨ ᠰᠢᠭ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ ᠰᠠᠨᠳᠤᠷᠴᠤ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠠᠨ ᠰᠠᠵᠢᠯᠠᠵᠤ《 ᠪᠢ ᠮᠡᠳᠡᠬᠦ ᠦᠭᠡᠢ ᠠ᠋᠂ ᠰᠣᠨᠣᠰᠬᠤ ᠦᠭᠡᠢ ᠠ᠋》 ᠭᠡᠵᠦ ᠪᠠᠢᠭᠠ ᠪᠠᠨ ᠢᠯᠡᠳᠬᠡᠪᠡ᠃
ᠮᠠᠨᠴᠤᠷᠭᠠ ᠡᠨᠡ ᠳᠦᠯᠡᠢ ᠡᠪᠦᠭᠡᠨ ᠦ᠌ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠠᠭᠤᠷ ᠤᠴᠠᠭᠠᠷ ᠨᠢ ᠨᠠᠮᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠰᠢᠷᠦᠭᠦᠨ ᠬᠠᠷᠠᠴᠠ ᠭᠡᠷ ᠳᠣᠲᠣᠷᠠᠬᠢ ᠶ᠋ᠢ ᠰᠢᠷᠪᠢᠨ ᠱᠦᠭᠦᠷᠳᠡᠵᠦ ᠷᠣᠯᠮᠠ ᠶ᠋ᠢᠨ ᠤᠤᠯ ᠤ᠋ᠨ ᠳᠡᠪᠢᠰᠴᠦ ᠪᠠᠢᠭᠰᠠᠨ ᠣᠷᠣ ᠰᠢᠷᠢᠳᠡᠭ᠂ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠦ᠋ᠨ ᠤᠤᠯ ᠣᠷᠣᠨ ᠪᠠᠢᠷᠢ ᠠ᠋ᠴᠠ ᠶᠠᠭᠤ ᠨᠢᠭᠡ ᠶ᠋ᠢ ᠭᠣᠷᠢᠳᠠᠵᠤ ᠣᠯᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠲᠠᠯᠠᠭᠠᠷᠳᠠᠪᠠ᠃ ᠡᠷᠡ ᠬᠥᠮᠦᠨ ᠦ᠌ ᠪᠣᠯᠵᠣᠭᠰᠠᠨ ᠪᠣᠯᠵᠣᠭᠠ ᠭᠠᠵᠠᠷᠳᠠᠵᠤ᠂ ᠬᠦᠰᠡᠭᠰᠡᠨ ᠶᠠᠭᠤᠮᠠ ᠬᠥᠭᠡᠰᠦ ᠪᠣᠯᠬᠤ ᠰᠢᠭ᠋ ᠭᠠᠩᠰᠠᠷᠠᠯᠲᠠᠢ ᠶᠠᠭᠤᠮᠠ ᠠᠯᠠᠭᠠ᠃ ᠥᠭᠡᠬᠦ ᠡᠮᠬᠦᠬᠦ ᠶᠤᠮᠰᠠᠨ ᠭᠡᠵᠦ ᠭᠣᠷᠢᠳᠠᠵᠤ ᠢᠷᠡᠭᠰᠡᠨ ᠭᠣᠷᠢ ᠲᠠᠰᠤᠷᠠᠵᠤ ᠳᠡᠮᠡᠢ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠵᠣᠭᠰᠣᠭᠰᠠᠨ ᠮᠠᠨᠴᠤᠷᠭᠠ ᠡᠨᠡ ᠬᠦ᠌ ᠳᠦᠯᠡᠢ ᠡᠪᠦᠭᠡᠨ ᠯᠠᠮᠠᠬᠠᠢ ᠠ᠋ᠴᠠ《ᠷᠣᠯᠮᠠ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠪᠣᠢ? ᠣᠢᠷᠠ ᠣᠷᠴᠢᠮ ᠪᠠᠢᠬᠤ ᠤᠤ?》 ᠭᠡᠰᠡᠨ ᠣᠯᠠᠨ ᠠᠰᠠᠭᠤᠯᠲᠠ ᠲᠠᠯᠪᠢᠵᠤ ᠭᠠᠷ ᠬᠤᠷᠤᠭᠤ ᠪᠠᠨ ᠳᠣᠬᠢᠵᠤ ᠵᠠᠩᠭᠠᠨ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠳᠦᠯᠡᠢ ᠡᠪᠦᠭᠡᠨ ᠦ᠌《 ᠮᠡᠳᠡᠬᠦ ᠦᠭᠡᠢ ᠠ᠋》 ᠯᠠ ᠭᠡᠬᠦ ᠭᠠᠷ ᠢ᠋ᠶ᠋ᠠᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠨᠠᠭᠠᠰᠢ ᠴᠠᠭᠠᠰᠢ ᠰᠠᠵᠢᠭᠰᠠᠨ ᠬᠠᠷᠢᠭᠤᠯᠲᠠ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠮᠠᠨᠴᠤᠷᠭᠠ ᠣᠷᠣᠢ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠠᠮᠢᠭᠠ ᠶᠠᠪᠤᠯᠲᠠᠢ ᠪᠢᠰᠢ ᠲᠤᠯᠠ ᠡᠨᠳᠡ ᠷᠣᠯᠮᠠ ᠲᠠᠢ ᠠᠩᠬᠠ ᠤᠨᠲᠠᠵᠤ ᠪᠠᠢᠭᠰᠠᠨ ᠣᠷᠣᠨ ᠳᠡᠭᠡᠷᠡ ᠰᠠᠨᠠᠭᠠ ᠪᠠᠨ ᠬᠠᠭᠤᠷᠴᠤ ᠬᠣᠨᠣᠶᠠ ᠭᠡᠳᠡᠭ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠳᠦᠯᠡᠢ ᠡᠪᠦᠭᠡᠨ ᠳ᠋ᠦ᠍ ᠠᠮᠠ ᠤᠷᠤᠭᠤ ᠪᠠᠨ ᠵᠢᠭᠠᠵᠤ᠂ ᠠᠶᠠᠭᠠ ᠲᠠᠢ ᠶᠠᠭᠤᠮᠠ ᠣᠭᠣᠴᠢᠵᠤ ᠬᠥᠨᠲᠥᠷᠬᠦ ᠰᠢᠭ ᠳᠠᠬᠢᠭᠠᠳ ᠤᠯᠠᠭᠠᠨ ᠬᠣᠭᠣᠯᠠᠢ ᠤᠷᠤᠭᠤᠳᠠᠭᠤᠯᠤᠨ ᠭᠡᠳᠡᠰᠦ ᠪᠡᠨ ᠠᠯᠠᠭᠠᠳᠠᠪᠠᠯ ᠳᠦᠯᠡᠢ ᠡᠪᠦᠭᠡᠨ ᠬᠠᠷᠢᠨ ᠲᠡᠭᠦᠨ ᠦ᠌《 ᠶᠠᠭᠤᠮᠠ ᠢᠳᠡᠬᠦ》 ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠵᠤ ᠮᠡᠳᠡᠭᠰᠡᠨ ᠪᠣᠯᠤᠯᠲᠠᠢ᠃
— ᠵᠠ᠂ ᠮᠡᠳᠡᠯᠡ᠃ ᠣᠳᠣᠬᠠᠨ᠂ ᠣᠳᠣᠬᠠᠨ! ᠭᠡᠳ ᠰᠠᠭᠤᠭᠰᠠᠨ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠤ ᠲᠤᠯᠭᠠᠨ ᠳ᠋ᠠᠭᠠᠨ ᠭᠠᠯ ᠥᠷᠳᠡᠪᠡ᠃ ᠳᠦᠯᠡᠢ ᠬᠥᠮᠦᠨ ᠲᠡᠢ ᠬᠡᠯᠡᠯᠴᠡᠬᠦ ᠭᠡᠭᠴᠢ ᠪᠠᠰᠠ ᠳᠠᠮ ᠤᠷᠠ ᠣᠷᠣᠨᠠ᠃ ᠭᠡᠷ ᠦ᠋ᠨ ᠠᠳᠠᠭᠠᠷ ᠬᠠᠭᠤᠷᠲᠠᠯᠠ ᠴᠢᠩᠭᠠ ᠬᠠᠰᠬᠢᠷᠤᠭᠰᠠᠨ ᠴᠤ᠌ ᠬᠡᠯᠡᠯᠴᠡᠭᠡ ᠣᠯᠤᠭᠰᠠᠨ ᠦᠭᠡᠢ ᠬᠠᠷᠢᠨ ᠨᠠᠮᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠠᠷ ᠬᠤᠷᠤᠭᠤ ᠪᠠᠨ ᠵᠠᠩᠭᠠᠨ ᠳᠣᠬᠢᠵᠤ ᠶᠠᠭᠤ ᠶᠠᠭᠠᠬᠢᠬᠤ ᠪᠠᠨ ᠳᠦᠷᠰᠦᠯᠡᠬᠦ ᠳ᠋ᠦ᠍ ᠰᠡᠷᠳ᠋ ᠭᠡᠬᠦ ᠶ᠋ᠢ ᠠᠨᠳᠠᠬᠤ ᠦᠭᠡᠢ ᠮᠡᠳᠡᠳᠡᠭ ᠤᠬᠠᠭᠠᠨ ᠢ᠋ ᠮᠠᠨᠴᠤᠷᠭᠠ ᠤᠬᠠᠵᠤ ᠮᠡᠳᠡᠭᠡᠳ ᠠᠩᠬᠠ ᠱᠠᠯ ᠲᠡᠨᠡᠭ ᠰᠢᠭ ᠤᠴᠠᠭᠠᠷᠳᠠᠨ ᠣᠷᠢᠯᠠᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠪᠡ᠃
ᠳᠦᠯᠡᠢ ᠡᠪᠦᠭᠡᠨ ᠬᠥᠰᠡᠷ ᠪᠥᠭᠴᠥᠭᠡᠨᠡᠵᠦ ᠮᠠᠨᠴᠤᠷᠭᠠ ᠳ᠋ᠤ᠌ ᠴᠠᠢ ᠴᠢᠨᠠᠨ ᠬᠣᠭᠣᠯᠠ ᠤᠮᠳᠠ ᠪᠠᠵᠠᠭᠠᠬᠤ ᠭᠡᠵᠦ ᠮᠤᠩᠭᠠᠨᠢᠨᠠ᠃
ᠮᠠᠨᠴᠤᠷᠭᠠ᠂ ᠡᠪᠦᠭᠡᠨ ᠦ᠌ ᠣᠷᠣ ᠶ᠋ᠢ ᠲᠦᠰᠢᠵᠦ ᠬᠠᠵᠠᠭᠤᠯᠠᠨ ᠬᠠᠨᠵᠤᠨ ᠤ᠋ ᠳᠥᠷᠪᠡᠯᠵᠢᠨ ᠰᠢᠷᠡᠭᠡ ᠶ᠋ᠢ ᠨᠠᠯᠠᠵᠤ ᠬᠠᠷᠠ ᠲᠠᠮᠠᠬᠢ ᠴᠣᠷᠭᠢᠭᠤᠯᠤᠨᠠ᠃ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠮᠠᠨᠠᠷᠠᠭᠰᠠᠨ ᠰᠢᠷᠠ ᠤᠲᠤᠭᠠ ᠵᠢᠭᠠᠬᠠᠨ ᠭᠡᠷ ᠦ᠋ᠨ ᠠᠳᠠᠭᠠᠷ ᠢ᠋ ᠡᠭᠦᠯᠡᠨ ᠵᠠᠩᠭᠢᠶᠠ ᠣᠷᠢᠶᠠᠯᠳᠤᠭᠤᠯᠤᠨ ᠬᠤᠢᠯᠠᠷᠠᠨᠠ᠃ ᠡᠪᠦᠭᠡᠨ ᠦ᠌ ᠴᠢᠨᠠᠭᠰᠠᠨ ᠴᠠᠢ ᠶ᠋ᠢ ᠤᠤᠭᠤᠵᠤ ᠡᠳᠦᠷ ᠰᠥᠨᠢ ᠦᠭᠡᠢ ᠮᠣᠷᠢᠨ ᠳᠡᠭᠡᠷᠡ ᠳᠤᠩᠰᠢᠭᠤᠯᠵᠤ ᠶᠠᠪᠤᠭᠰᠠᠨ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠲᠠᠯᠪᠢᠭᠳᠠᠬᠤ ᠰᠢᠭ᠋ ᠪᠣᠯᠵᠤ ᠨᠢᠳᠦ ᠨᠢ ᠣᠩᠭᠣᠢᠪᠠ᠃
ᠳᠦᠯᠡᠢ ᠡᠪᠦᠭᠡᠨ ᠲᠦᠳᠡᠯ ᠦᠭᠡᠢ ᠨᠦᠳᠦᠭᠰᠡᠨ ᠦᠬᠡᠷ ᠦ᠋ᠨ ᠪᠣᠷᠴᠠ ᠦᠢᠭᠰᠡᠨ ᠱᠥᠯᠥ ᠲᠡᠢ ᠬᠣᠭᠣᠯᠠ ᠠᠶᠠᠭᠠᠯᠠᠬᠤ ᠳ᠋ᠤ᠌ ᠲᠡᠷᠡ ᠬᠡᠳᠦᠨ ᠡᠳᠦᠷ ᠣᠯᠢᠭᠲᠠᠢ ᠬᠣᠭᠣᠯᠠ ᠣᠯᠵᠤ ᠢᠳᠡᠭᠡ ᠦᠭᠡᠢ ᠪᠡᠨ ᠰᠠᠨᠠᠵᠤ ᠠᠮᠠ ᠪᠠᠨ ᠣᠯᠬᠤ ᠦᠭᠡᠢ ᠰᠢᠬᠠᠮ ᠢᠳᠡᠯᠡ᠃ ᠳᠦᠯᠡᠢ ᠡᠪᠦᠭᠡᠨ ᠡᠨᠡ ᠬᠦ᠌ ᠰᠠᠢᠨ ᠡᠷᠡ ᠶ᠋ᠢᠨ ᠰᠢᠨᠵᠢ ᠲᠡᠢ ᠬᠥᠮᠦᠨ ᠦ᠌ ᠱᠥᠯᠥ ᠲᠡᠢ ᠬᠣᠭᠣᠯᠠ ᠶ᠋ᠢ ᠱᠥᠷᠴᠢᠭᠢᠨᠡᠲᠡᠯᠡ ᠰᠣᠷᠣᠵᠤ᠂ ᠢᠳᠡᠵᠦ ᠤᠤᠭᠤᠭᠠ ᠪᠠᠢᠳᠠᠯ ᠲᠥᠯᠥᠪ ᠨᠢ ᠶᠠᠭ ᠯᠠ ᠨᠢᠭᠡ ᠰᠠᠪᠠ ᠠ᠋ᠴᠠ ᠨᠥᠭᠦᠭᠡ ᠰᠠᠪᠠ ᠤᠷᠤᠭᠤ ᠶᠡᠭᠦᠯᠡᠵᠦ ᠪᠠᠢᠭᠠ ᠰᠢᠭ᠋ ᠢ᠋ ᠬᠠᠷᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠠᠮᠠᠨ ᠳ᠋ᠠᠭᠠᠨ《 ᠠ᠂ ᠮᠥᠨ ᠴᠤ᠌ ᠥᠯᠥᠰᠴᠦ ᠳᠡ ᠬᠥᠭᠡᠷᠦᠬᠦᠢ》 ᠭᠡᠵᠦ ᠳᠦᠳᠦᠨᠡᠪᠡ᠃
ᠮᠠᠨᠴᠤᠷᠭᠠ ᠶᠣᠰᠣᠲᠠᠢ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠰᠢᠭ ᠨᠢᠭᠡ ᠴᠠᠭ ᠤ᠋ᠨ ᠲᠠᠪᠠᠲᠠᠢ ᠰᠠᠢᠬᠠᠨ ᠱᠥᠯᠥ ᠲᠡᠢ ᠬᠣᠭᠣᠯᠠ ᠶ᠋ᠢ ᠬᠥᠯᠥᠷᠡᠲᠡᠯᠡ ᠢᠳᠡᠭᠡᠳ ᠬᠡᠬᠡᠷᠡᠭᠦᠯᠵᠦ᠂ ᠨᠢᠭᠡ ᠭᠠᠩᠰᠠ ᠳ᠋ᠦᠩᠰᠡᠨ ᠲᠠᠮᠠᠬᠢ ᠨᠡᠷᠡᠵᠦ ᠠᠪᠤᠭᠠᠳ ᠰᠢᠯᠦᠰᠦ ᠪᠡᠨ ᠬᠤᠷᠠᠭᠤᠯᠤᠨ ᠰᠢᠨᠤᠭ ᠰᠤᠷᠤᠩᠭᠠᠨ ᠨᠥᠭᠦᠭᠡ ᠳᠦᠯᠡᠢ ᠡᠪᠦᠭᠡᠨ ᠤᠷᠤᠭᠤ ᠡᠷᠡᠬᠡᠢ ᠪᠡᠨ ᠭᠣᠵᠣᠢᠯᠭᠠᠵᠤ《 ᠰᠠᠢᠬᠠᠨ ᠬᠣᠭᠣᠯᠠ ᠬᠢᠯᠡ》 ᠭᠡᠵᠦ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠬᠦ ᠳ᠋ᠦ᠍ ᠳᠦᠯᠡᠢ ᠡᠪᠦᠭᠡᠨ ᠤᠬᠠᠭᠠᠨ ᠢ᠋ ᠨᠢ ᠣᠯᠵᠤ《ᠶᠠᠭᠠᠬᠢᠬᠤ ᠪᠣᠢ! ᠵᠦᠭᠡᠷ᠂ ᠵᠦᠭᠡᠷ!》 ᠭᠡᠳ ᠠᠶᠠᠭᠠ ᠱᠠᠭᠠᠵᠠᠩ ᠢ᠋ ᠠᠬᠤᠢᠯᠠᠵᠤ ᠴᠡᠪᠡᠷᠯᠡᠪᠡ᠃
ᠳᠦᠯᠡᠢ ᠡᠪᠦᠭᠡᠨ ᠯᠠᠮᠠᠬᠠᠢ ᠶ᠋ᠢᠨ ᠨᠡᠷᠡ ᠫᠤᠩᠰᠣᠭᠷᠠᠪᠵᠠᠢ᠃ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠠᠷᠴᠠᠲᠤ ᠶ᠋ᠢᠨ ᠬᠥᠮᠦᠨ᠃ ᠪᠠᠭᠠ ᠠ᠋ᠴᠠ ᠪᠠᠨ ᠣᠢ ᠰᠠᠢᠲᠠᠢ ᠬᠡᠦᠬᠡᠳ ᠪᠠᠢᠭᠰᠠᠨ ᠤᠴᠢᠷ ᠶᠡᠬᠡᠴᠦᠦᠯ ᠨᠢ ᠲᠡᠭᠦᠨ ᠢ᠋ ᠰᠤᠪᠤᠷᠭᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠪᠠᠨᠳᠢ ᠪᠣᠯᠭᠠᠪᠠᠯ ᠨᠣᠮ ᠴᠡᠭᠡᠵᠢᠯᠡᠬᠦ ᠦᠭᠡᠢ ᠭᠡᠵᠦ ᠪᠠᠭᠰᠢ ᠯᠠᠮᠠ ᠨᠢ ᠠᠯᠠᠭᠠᠳᠠᠵᠤ ᠪᠠᠢᠭᠠᠳ ᠳᠦᠯᠡᠢ ᠪᠣᠯᠭᠠᠪᠠ ᠭᠡᠨᠡ᠃ ᠬᠤᠯᠤᠭᠤ ᠪᠠᠨ ᠬᠠᠭᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠲᠡᠷᠡ ᠨᠠᠰᠤ ᠶᠠᠪᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠴᠢᠬᠢ ᠨᠢ ᠬᠠᠲᠠᠭᠤᠷᠠᠵᠤ ᠣᠳᠣ ᠪᠣᠯᠬᠤ ᠳ᠋ᠤ᠌ ᠲᠠᠭ ᠳᠦᠯᠡᠢ ᠪᠣᠯᠵᠠᠢ᠃ ᠵᠠᠷᠢᠮ ᠨᠢ ᠪᠠᠰᠠ ᠲᠡᠭᠦᠨ ᠢ᠋ ᠨᠣᠮ ᠦᠭᠡᠢ ᠯᠠᠮᠠ ᠬᠥᠮᠦᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠬᠤ ᠭᠡᠭᠴᠢ ᠰᠦᠷᠦᠭ ᠲᠦ᠍ ᠦᠭᠡᠢ ᠪᠤᠬᠠ ᠭᠡᠨᠡ᠃ ᠲᠡᠭᠡᠪᠡᠴᠦ ᠪᠤᠩᠰᠣᠭᠷᠠᠪᠵᠠᠢ ᠶ᠋ᠢᠨ ᠰᠠᠨᠠᠭᠠ ᠤᠷᠠᠨ᠂ ᠶᠠᠭᠤᠮᠠᠨ ᠳ᠋ᠤ᠌ ᠭᠠᠷ ᠳᠦᠢᠲᠡᠢ ᠲᠤᠯᠠ ᠪᠠᠢᠯᠳᠤᠰᠤ ᠵᠠᠭᠠᠷᠠᠭ ᠢ᠋ᠶ᠋ᠠᠷ ᠲᠠᠬᠢᠯ ᠴᠥᠭᠥᠴᠡ ᠵᠣᠭᠣᠭᠣᠬᠤ᠂ ᠪᠤᠷᠬᠠᠨ ᠬᠥᠷᠥᠭ ᠱᠤᠭᠤᠬᠤ᠂ ᠠᠯᠲᠠᠳᠠᠵᠤ ᠰᠢᠷᠳᠡᠬᠦ᠂ ᠥᠩᠭᠡ ᠪᠣᠳᠣᠭ ᠰᠠᠭᠤᠯᠭᠠᠬᠤ ᠳ᠋ᠤ᠌ ᠭᠠᠷᠮᠠᠭᠠᠢ ᠠᠵᠢ᠃ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠪᠤᠷᠬᠠᠳ ᠢ᠋ ᠳᠠᠭᠤᠷᠢᠶᠠᠵᠤ ᠠᠪ ᠠᠳᠠᠯᠢᠬᠠᠨ ᠵᠢᠷᠤᠴᠢᠬᠠᠳᠠᠭ᠃ ᠨᠡᠩ ᠢᠯᠠᠩᠭᠤᠶᠠ ᠶᠤᠤᠮᠠᠢ ᠠᠷᠪᠠᠢ ᠶ᠋ᠢᠨ ᠭᠤᠯᠢᠷ ᠢ᠋ᠶ᠋ᠠᠷ ᠪᠠᠯᠢᠩ ᠵᠣᠯᠢᠭ ᠴᠢᠮᠬᠢᠵᠦ ᠬᠢᠬᠦ ᠳ᠋ᠡᠭᠡᠨ ᠮᠠᠰᠢᠳᠠ ᠤᠷᠠ ᠲᠠᠢ ᠪᠠᠢᠳᠠᠭ ᠲᠤᠨᠢ ᠰᠦᠮᠡ ᠶ᠋ᠢᠨ ᠭᠠᠵᠠᠷ ᠮᠥᠨ ᠳᠤᠲᠠᠵᠤ ᠪᠣᠯᠬᠤ ᠦᠭᠡᠢ ᠬᠥᠮᠦᠨ ᠦ᠌ ᠨᠢᠭᠡ ᠪᠠᠢᠵᠤ᠂ ᠬᠤᠷᠠᠯ ᠬᠤᠢ᠂ ᠴᠠᠮ ᠮᠠᠨᠢ ᠶ᠋ᠢᠨ ᠴᠤᠭᠯᠠᠭᠠ ᠪᠣᠯᠬᠤ ᠪᠦᠷᠢ ᠲᠡᠷᠡ ᠣᠯᠳᠠᠰᠢ ᠦᠭᠡᠢ ᠣᠷᠬᠣᠳᠠᠢ ᠪᠣᠯᠵᠤ ᠡᠨᠳᠡ ᠲᠡᠨᠳᠡ ᠵᠠᠯᠠᠭᠳᠠᠨᠠ᠃ ᠲᠡᠷᠡ ᠪᠡᠷ ᠨᠢᠭᠡ ᠨᠠᠰᠤ ᠪᠠᠨ ᠰᠦᠮᠡ ᠬᠡᠢᠳ ᠦ᠋ᠨ ᠭᠠᠵᠠᠷ ᠢᠩᠭᠢᠵᠦ ᠡᠯᠡᠭᠡᠵᠦ ᠶᠠᠪᠤᠵᠠᠢ᠃ ᠰᠡᠭᠦᠯ ᠳ᠋ᠦ᠍ᠨᠢ ᠲᠡᠭᠦᠨ ᠢ᠋ ᠭᠠᠷ ᠤᠷᠠᠨ᠂ ᠬᠣᠭᠣᠯᠠ ᠬᠣᠰᠢ ᠠᠮᠲᠠᠯᠢᠭ ᠰᠠᠢᠬᠠᠨ ᠬᠢᠳᠡᠭ ᠭᠡᠳ ᠪᠤᠭᠤᠲᠤ ᠶ᠋ᠢᠨ ᠠᠷᠤ ᠡᠩᠭᠡᠷ ᠦ᠋ᠨ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠲᠣᠭᠣᠭᠠᠴᠢ ᠪᠠᠷ ᠵᠠᠯᠠᠵᠤ ᠢᠷᠡᠭᠰᠡᠨ ᠨᠢ ᠡᠨᠡ᠃
ᠳᠦᠯᠡᠢ ᠯᠠᠮᠠᠬᠠᠢ ᠪᠤᠩᠰᠣᠭᠷᠠᠪᠵᠠᠢ ᠳᠣᠲᠣᠷᠠ ᠪᠠᠨ ᠡᠨᠡ ᠰᠠᠢᠨ ᠡᠷᠡ ᠴᠣᠬᠣᠮ ᠣᠳᠣ ᠶᠠᠭᠠᠬᠢᠨᠠ ᠭᠡᠳᠡᠭ ᠪᠣᠯ? ᠭᠡᠰᠡᠨ ᠰᠢᠭ ᠴᠢᠷᠠᠢ ᠥᠭᠡᠳᠡ ᠨᠢ ᠡᠭᠴᠡ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠰᠡᠮᠡᠬᠡᠷ ᠰᠡᠮᠡᠬᠡᠷ ᠨᠢᠳᠦ ᠭᠦᠶᠦᠯᠭᠡᠨ《ᠡᠨᠡ ᠴᠣᠬᠣᠮ ᠶᠠᠭᠤᠨ ᠤ᠋ ᠬᠥᠮᠦᠨ᠂ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠭᠠ ᠪᠣᠯ?》 ᠭᠡᠵᠦ ᠣᠨᠢᠰᠣᠭᠠ ᠳᠠᠭᠠᠪᠤᠷᠢ ᠡᠪᠦᠷᠯᠡᠨ《 ᠴᠣᠬᠣᠮ ᠳ᠋ᠠᠭᠠᠨ ᠣᠳᠣ ᠭᠡᠳᠡᠰᠦ ᠭᠠᠷᠲᠠᠯᠠ ᠢᠳᠡᠵᠦ ᠤᠤᠭᠤᠭᠰᠠᠨ ᠬᠥᠮᠦᠨ ᠶᠠᠪᠤᠯᠲᠠᠢ ᠶᠤᠮ ᠳᠠ! ᠶᠠᠪᠤᠵᠤ ᠠᠷᠢᠯᠪᠠᠯ ᠰᠠᠢᠨ ᠶᠤᠮ ᠠ᠋! ᠨᠠᠳᠠ ᠠᠷᠠᠢ ᠬᠣᠣᠷ ᠪᠣᠯᠬᠤ ᠦᠭᠡᠢ ᠪᠢᠵᠡ?》 ᠭᠡᠵᠦ ᠡᠯᠳᠡᠪ ᠢ᠋ ᠡᠷᠭᠢᠴᠡᠭᠦᠯᠵᠦ ᠪᠣᠳᠣᠭᠠᠳ ᠰᠠᠢᠨ ᠡᠷᠡ ᠶ᠋ᠢᠨ ᠬᠥᠳᠡᠯᠦᠯ ᠪᠠᠷᠢᠯ ᠢ᠋ ᠠᠨᠳᠠᠯ ᠦᠭᠡᠢ ᠠᠵᠢᠭᠯᠠᠵᠤ ᠰᠠᠭᠤᠨᠠ᠃
ᠡᠨᠡ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠠᠮᠢᠭᠠ ᠴᠤ᠌ ᠭᠡᠵᠦ ᠶᠠᠪᠤᠨ ᠷᠣᠯᠮᠠ ᠶ᠋ᠢ ᠰᠤᠷᠠᠭᠯᠠᠬᠤ ᠪᠢᠯᠡ? ᠡᠨᠡ ᠪᠤᠭᠤᠲᠤ ᠳ᠋ᠤ᠌ ᠪᠠᠢᠳᠠᠭ ᠴᠤ᠌ ᠪᠢᠯᠡ ᠤᠤ? ᠳᠦᠯᠡᠢ ᠡᠪᠦᠭᠡᠨ ᠲᠡᠢ ᠬᠡᠯᠡᠯᠴᠡᠭᠡ ᠣᠯᠤᠯᠴᠠᠬᠤ ᠦᠭᠡᠢ ᠶᠦᠮ ᠴᠢᠨᠢ ᠶᠠᠮᠠᠷ ᠠᠷᠭᠠ ᠪᠠᠢᠬᠤ ᠪᠣᠢ? ᠥᠨᠥ ᠰᠥᠨᠢ ᠮᠥᠨ ᠡᠨᠳᠡ ᠪᠡᠨ ᠲᠣᠯᠣᠭᠠᠢ ᠰᠢᠭᠢᠷᠡ ᠪᠡᠨ ᠠᠮᠠᠷᠠᠭᠠᠵᠤ ᠠᠪᠤᠨ ᠮᠠᠷᠭᠠᠲᠤᠷ ᠪᠣᠯᠤᠶᠠ ᠭᠡᠵᠦ ᠮᠠᠨᠴᠤᠷᠭᠠ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠤᠷᠢᠶᠠᠬᠤ ᠰᠠᠨᠠᠭᠠ ᠣᠷᠣᠬᠤ ᠳ᠋ᠤ᠌ ᠭᠡᠳᠡᠰᠦ ᠴᠠᠳᠤᠭᠰᠠᠨ ᠤ᠋ ᠤᠯᠠᠮ ᠳ᠋ᠤ᠌ ᠪᠡᠶᠡ ᠪᠠᠯᠠᠷᠠᠭᠰᠠᠨ ᠶᠠᠳᠠᠷᠠᠭᠠ ᠣᠳᠣ ᠰᠠᠶᠢ ᠶᠠᠰᠤ ᠬᠦᠨᠳᠦᠷᠡᠭᠦᠯᠵᠦ ᠨᠣᠢᠷ ᠭᠥᠷᠦᠭᠦᠯᠬᠦ ᠳ᠋ᠦ᠍ ᠲᠤᠯᠵᠠᠢ᠃ ᠲᠡᠭᠡᠭᠡᠳ ᠮᠠᠨᠴᠤᠷᠭᠠ ᠳᠦᠯᠡᠢ ᠡᠪᠦᠭᠡᠨ ᠳ᠋ᠦ᠍ ᠪᠡᠶᠡ ᠬᠠᠵᠠᠭᠤᠯᠠᠨ ᠳᠡᠷᠡ ᠨᠡᠢᠯᠡᠭᠦᠯᠬᠦ ᠳᠦᠷᠢ ᠦᠵᠡᠭᠦᠯᠦᠨ ᠳᠦᠷᠰᠦᠯᠡᠪᠡᠯ ᠡᠪᠦᠭᠡᠨ ᠯᠠᠮᠠᠬᠠᠢ ᠤᠬᠠᠭᠠᠨ ᠢ᠋ ᠣᠢᠯᠠᠭᠠᠵᠤ《 ᠡᠨᠡ ᠰᠠᠢᠨ ᠡᠷᠡ ᠬᠣᠨᠣᠭ ᠭᠤᠶᠤᠵᠤ ᠤᠨᠲᠠᠬᠤ ᠰᠠᠨᠠᠭᠠ ᠲᠠᠢ ᠶᠤᠮ ᠪᠠᠢᠨᠠ᠃ ᠱᠠᠯᠠᠪᠬᠠᠨ ᠣᠷᠣ ᠰᠢᠷᠢᠳᠡᠭ ᠳᠡᠪᠢᠰᠴᠦ ᠤᠨᠲᠠᠭᠤᠯᠬᠤ ᠶ᠋ᠢᠨ ᠤᠬᠠᠭᠠᠨ ᠬᠢᠶᠡ! ᠴᠠᠭᠠᠨᠠ ᠪᠠᠨ ᠫᠤᠤ ᠰᠠᠭᠠᠳᠠᠭ ᠲᠠᠢ ᠶᠤᠮ ᠪᠠᠢᠨᠠ》 ᠭᠡᠳ ᠬᠠᠨᠵᠤᠨ ᠰᠢᠷᠡᠭᠡᠨ ᠦ᠌ ᠵᠡᠭᠦᠨ ᠲᠠᠯᠠ ᠪᠠᠷ ᠰᠢᠷᠢᠳᠡᠭ ᠳᠡᠪᠢᠰᠴᠦ᠂ ᠳᠡᠪᠰᠡᠭ ᠳᠣᠲᠣᠷᠠ ᠠ᠋ᠴᠠ ᠲᠡᠮᠡᠭᠡᠨ ᠨᠣᠣᠰᠣᠨ ᠬᠤᠴᠢᠯᠭᠠ ᠭᠠᠷᠭᠠᠵᠤ ᠥᠭᠪᠡ᠃
ᠲᠣᠬᠢᠲᠠᠢ ᠰᠢᠷᠢᠳᠡᠭ ᠳᠡᠷᠡ ᠪᠡᠯᠡᠳᠬᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ ᠪᠠᠶᠠᠷᠯᠠᠭᠰᠠᠨ ᠮᠠᠨᠴᠤᠷᠭᠠ ᠳᠦᠯᠡᠢ ᠡᠪᠦᠭᠡᠨ ᠤᠷᠤᠭᠤ ᠡᠷᠡᠬᠡᠢ ᠭᠣᠵᠣᠢᠯᠭᠠᠨ《ᠰᠠᠢᠨ ᠪᠠᠢᠨᠠ》 ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠬᠦ ᠳ᠋ᠦ᠍ ᠳᠦᠯᠡᠢ ᠯᠠᠮᠠᠬᠠᠢ ᠰᠠᠨᠠᠭᠠ ᠨᠢ ᠲᠠᠢᠪᠤᠰᠢᠷᠠᠵᠤ《ᠵᠠ᠂ ᠪᠤᠷᠬᠠᠨ ᠰᠤᠤᠬᠠᠨ! ᠤᠨᠲᠠᠵᠤ ᠠᠮᠠᠷᠠᠭ ᠴᠠᠭᠠᠰᠢ! ᠨᠠᠳᠠ ᠪᠢᠲᠡᠭᠡᠢ ᠯᠡ ᠬᠣᠣᠷ ᠬᠦᠷᠭᠡᠭᠡᠰᠡᠢ ᠳᠡ!》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠨ ᠨᠠᠮᠠᠨᠴᠢᠯᠠᠪᠠ᠃
ᠮᠠᠨᠴᠤᠷᠭᠠ ᠬᠡᠪᠲᠡᠪᠡ᠃《 ᠮᠥᠨ ᠡᠨᠡ ᠣᠷᠣᠨ ᠳᠡᠭᠡᠷᠡ ᠮᠠᠭᠤ( ᠬᠣᠩᠭᠢᠯᠳᠠᠭ ᠭᠤᠲᠤᠯ) ᠢ᠋ ᠣᠷᠢᠯᠠᠭᠤᠯᠤᠨ ᠴᠣᠭᠭᠢᠭᠤᠯᠵᠤ ᠪᠠᠢᠯᠠ ᠳᠠ! ᠥᠨᠥ ᠰᠥᠨᠢ ᠴᠤ᠌ ᠮᠥᠨ ᠢᠩᠭᠢᠭᠡᠳ ᠳᠦᠯᠡᠢ ᠯᠠᠮᠠ ᠪᠠᠷ ᠬᠠᠨᠢ ᠪᠣᠯᠭᠠᠵᠤ ᠭᠤᠶᠠ ᠪᠠᠨ ᠲᠡᠪᠡᠷᠢᠨ ᠬᠣᠭᠣᠰᠣᠨ ᠬᠤᠷᠬᠢᠷᠠᠬᠤ ᠪᠣᠯᠵᠠᠢ》 ᠭᠡᠵᠦ ᠷᠣᠯᠮᠠ ᠶ᠋ᠢ ᠰᠠᠨᠠᠨ ᠬᠡᠪᠲᠡᠬᠦ ᠳ᠋ᠡᠭᠡᠨ ᠲᠡᠮᠡᠭᠡᠨ ᠨᠣᠣᠰᠣᠨ ᠬᠤᠴᠢᠯᠭᠠ ᠠ᠋ᠴᠠ ᠡᠮᠡ ᠬᠥᠮᠦᠨ ᠦ᠌ ᠬᠥᠯᠥᠰᠥ᠂ ᠣ ᠡᠩᠭᠡᠰᠬᠡ᠂ ᠬᠠᠶᠠ ᠪᠠᠰᠠ ᠬᠠᠷᠠ ᠲᠠᠮᠠᠬᠢᠨ ᠤ᠋ ᠦᠨᠦᠷ᠂ ᠡᠷᠡ ᠬᠥᠮᠦᠨ ᠦ᠌ ᠬᠥᠯᠥᠰᠥᠨ ᠦ᠌ ᠦᠨᠦᠷ ᠬᠣᠯᠢᠯᠳᠤᠭᠰᠠᠨ ᠶᠠᠩᠵᠤ ᠶ᠋ᠢᠨ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠵᠤ ᠤᠨᠲᠠᠬᠤ ᠨᠣᠢᠷ ᠨᠢ ᠬᠤᠯᠵᠢᠵᠤ ᠣᠷᠬᠢᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠴᠣᠴᠢᠮᠠᠭ ᠪᠣᠰᠴᠤ ᠰᠠᠭᠤᠭᠠᠳ ᠳᠦᠯᠡᠢ ᠡᠪᠦᠭᠡᠨ ᠡᠴᠡ《 ᠷᠣᠯᠮᠠ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠪᠣᠢ?》 ᠭᠡᠬᠦ ᠰᠠᠨᠠᠭᠠ ᠢᠯᠡᠳᠬᠡᠵᠦ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠶᠠᠩᠵᠤ ᠲᠥᠯᠥᠪ ᠢ᠋ ᠳᠠᠭᠤᠷᠢᠶᠠᠨ ᠮᠥᠷᠥ ᠪᠡᠨ ᠮᠤᠰᠢᠯᠵᠠᠭᠤᠯᠵᠤ《 ᠮᠥᠨ ᠡᠨᠳᠡ ᠤᠨᠲᠠᠳᠠᠭ ᠷᠣᠯᠮᠠ ᠶᠠᠭᠠᠬᠢᠪᠠ?》 ᠭᠡᠰᠡᠨ ᠲᠥᠯᠥᠪᠲᠡᠢ ᠡᠨᠡ ᠲᠡᠷᠡ ᠭᠡᠵᠦ ᠳᠦᠷᠰᠦᠯᠡᠬᠦ ᠶ᠋ᠢ ᠳᠦᠯᠡᠢ ᠯᠠᠮᠠᠬᠠᠢ ᠣᠢᠯᠠᠭᠠᠵᠤ ᠮᠡᠳᠡᠪᠡ᠃ ᠣᠢᠯᠠᠭᠠᠬᠤ᠂ ᠣᠢᠯᠠᠭᠠᠬᠤ ᠳ᠋ᠠᠭᠠᠨ ᠰᠠᠢᠨ ᠴᠤ᠌ ᠣᠢᠯᠠᠭᠠᠪᠠ᠃ ᠮᠠᠨᠴᠤᠷᠭᠠ ᠡᠨᠡ ᠭᠡᠷ ᠲᠦ᠍ ᠡᠳᠦᠢ ᠣᠷᠣᠢ ᠪᠦᠷᠦᠢ ᠪᠡᠷ ᠶᠠᠭᠤ ᠬᠢᠬᠦ ᠪᠡᠷ ᠢᠷᠡᠭᠰᠡᠨ ᠵᠣᠷᠢᠯᠭᠠ ᠶ᠋ᠢ ᠨᠢ ᠴᠤ᠌ ᠮᠡᠳᠡᠵᠡᠢ᠃ ᠡᠨᠡ ᠰᠠᠢᠨ ᠡᠷᠡ ᠴᠦ᠍ ᠷᠣᠯᠮᠠ ᠶ᠋ᠢ ᠰᠤᠷᠠᠭᠯᠠᠵᠤ᠂ ᠰᠥᠨᠢᠵᠢᠨ ᠥᠨᠥᠬᠢ ᠲᠡᠢ ᠬᠥᠭᠯᠡᠭᠦᠯᠵᠦ ᠬᠣᠨᠣᠬᠤ ᠰᠠᠨᠠᠭᠠ ᠲᠠᠢ ᠶᠠᠪᠤᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠵᠡᠷᠭᠡ ᠪᠡᠷ ᠰᠠᠵᠢᠵᠤ᠂《ᠮᠡᠳᠡᠬᠦ ᠦᠭᠡᠢ ᠠ᠋᠂ ᠮᠡᠳᠡᠬᠦ ᠦᠭᠡᠢ》 ᠭᠡᠳ ᠨᠢᠳᠦ ᠪᠡᠨ ᠴᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠦᠯᠦᠨ᠂ ᠬᠡᠯᠡ ᠪᠡᠨ ᠭᠠᠷᠭᠠᠨ ᠳᠦᠷᠰᠦ ᠦᠭᠡᠢᠯᠡᠨ ᠠᠯᠠᠭᠠ ᠪᠠᠨ ᠳᠡᠯᠭᠡᠵᠦ《 ᠷᠣᠯᠮᠠ ᠳᠠᠯᠠᠢᠴᠢᠬᠠᠭᠰᠠᠨ ᠠ᠋!》 ᠭᠡᠰᠡᠨ ᠢ᠋ᠶ᠋ᠡᠨ ᠪᠢᠲᠡᠭᠦᠦ ᠪᠡᠷ ᠢᠯᠡᠳᠬᠡᠭᠰᠡᠨ ᠢ᠋ ᠬᠠᠷᠢᠨ ᠮᠠᠨᠴᠤᠷᠭᠠ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ 《ᠡᠨᠡ ᠮᠠᠭᠤ ᠴᠢᠨᠢ ᠶᠠᠭᠠᠬᠢᠨᠠ ᠭᠡᠵᠦ ᠰᠠᠨᠠᠪᠠ? ᠷᠣᠯᠮᠠ ᠶ᠋ᠢ ᠬᠠᠮᠢᠭᠠ ᠶᠠᠪᠤᠪᠠ ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠪᠤᠷᠤᠭᠤ ᠣᠢᠯᠠᠭᠠᠵᠤ᠂ ᠡᠮᠡᠭᠲᠡᠢ ᠬᠥᠮᠦᠨ ᠣᠯᠵᠤ ᠢᠷᠡ ᠭᠡᠵᠦ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠭᠠ ᠶᠤᠮ ᠪᠢᠵᠡ! ᠲᠡᠭᠡᠭᠡᠳ ᠯᠡ( ᠪᠢ ᠬᠠᠮᠢᠭᠠ ᠠ᠋ᠴᠠ ᠡᠮᠡ ᠬᠥᠮᠦᠨ ᠣᠯᠬᠤ ᠪᠢᠯᠡ? ᠲᠡᠭᠡᠪᠡᠯ ᠪᠢ᠁ ᠡᠮᠡᠭᠲᠡᠢ ᠬᠥᠮᠦᠨ ᠲᠡᠢ᠁ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠦᠬᠦᠭᠰᠡᠨ ᠢ᠋ ᠬᠦᠷᠬᠦ ᠦᠭᠡᠢ) ᠭᠡᠵᠦ ᠬᠡᠯᠡ ᠠᠮᠠ ᠪᠠᠨ ᠭᠠᠷᠭᠠᠨ ᠨᠢᠳᠦ ᠪᠡᠨ ᠭᠥᠯᠢᠯᠵᠡᠭᠦᠯᠵᠦ ᠪᠠᠢᠨᠠ᠁》 ᠭᠡᠵᠦ ᠪᠤᠷᠤᠭᠤ ᠳ᠋ᠤᠨᠢ ᠪᠤᠷᠤᠭᠤ ᠪᠠᠷ ᠣᠢᠯᠠᠭᠠᠭᠰᠠᠨ ᠮᠠᠨᠴᠤᠷᠭᠠ《 ᠵᠠ᠂ ᠪᠠᠢᠭ! ᠡᠨᠡ ᠳᠦᠯᠡᠢ ᠬᠥᠮᠦᠨ ᠢ᠋ ᠢᠩᠭᠢᠵᠦ ᠰᠠᠮᠭᠠᠷᠳᠠᠭᠤᠯᠬᠤ ᠪᠠᠨ ᠪᠠᠢᠶᠠ᠁ ᠨᠢᠭᠡ ᠰᠥᠨᠢ ᠳᠣᠬᠢᠵᠤ ᠳᠠᠯᠠᠯᠪᠠᠴᠤ ᠤᠬᠠᠭᠠᠨ ᠰᠠᠨᠠᠭᠠ ᠪᠠᠨ ᠰᠠᠢᠨ ᠣᠯᠤᠯᠴᠠᠬᠤ ᠦᠭᠡᠢ ᠡᠴᠡ ᠬᠣᠢᠰᠢ ᠡᠷᠲᠡᠬᠡᠨ ᠤᠨᠲᠠᠵᠤ ᠠᠮᠠᠷᠠᠶᠠ》 ᠭᠡᠳ ᠪᠡᠶᠡ ᠤᠷᠪᠠᠨ ᠬᠡᠪᠲᠡᠯᠡ᠃
ᠶᠠᠳᠠᠷᠠᠵᠤ ᠪᠠᠯᠠᠷᠠᠭᠰᠠᠨ ᠤ᠋ ᠤᠷᠰᠢᠭ ᠲᠤ ᠡᠨᠡ ᠤᠳᠠᠭᠠ ᠮᠠᠨᠴᠤᠷᠭᠠ ᠳᠡᠷᠡ ᠲᠣᠯᠣᠭᠠᠢ ᠨᠡᠢᠯᠡᠭᠦᠯᠦᠮᠡᠭᠴᠡ ᠬᠠᠮᠠᠷ ᠲᠡᠳᠡᠨ ᠰᠦᠷᠡᠬᠡᠢ ᠬᠤᠷᠬᠢᠷᠠᠪᠠ᠃ ᠬᠡᠰᠡᠭ ᠬᠡᠰᠡᠭ ᠠᠮᠢᠰᠬᠤᠭᠠ ᠨᠢ ᠲᠠᠰᠤᠯᠳᠠᠵᠤ ᠪᠠᠢᠭᠠ ᠰᠢᠭ᠋ ᠬᠣᠭᠣᠯᠵᠠᠭᠤᠷ ᠳᠣᠲᠣᠷᠠ ᠪᠠᠨ ᠲᠡᠭᠡᠭᠯᠡᠨ᠂ ᠲᠡᠭᠡᠵᠦ ᠲᠡᠭᠡᠵᠦ ᠳᠠᠬᠢᠭᠠᠳ ᠦᠬᠡᠷ ᠦ᠋ᠨ ᠳᠠᠪᠤᠰᠠᠩ ᠳ᠋ᠤ᠌ ᠬᠡᠢ ᠶ᠋ᠢ ᠲᠠᠯᠪᠢᠬᠤ ᠰᠢᠭ᠋ ᠫᠦᠳᠢ ᠭᠡᠲᠡᠯᠡ ᠭᠠᠳᠠᠭᠰᠢ ᠦᠯᠢᠶᠡᠨᠡ᠃ ᠲᠡᠭᠦᠨ ᠦ᠌ ᠬᠤᠷᠬᠢᠷᠠᠬᠤ ᠳᠠᠭᠤᠨ ᠳ᠋ᠤ᠌ ᠴᠣᠩᠬᠣᠨ ᠤ᠋ ᠴᠠᠭᠠᠰᠤ ᠱᠠᠷᠴᠢᠭᠢᠨᠠᠵᠤ᠂ ᠬᠣᠲᠠ ᠲᠠᠢ ᠬᠣᠨᠢ ᠦᠷᠭᠦᠮᠡ ᠠᠵᠢ! ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠨ ᠢ᠋ ᠨᠥᠯᠥᠭᠡᠯᠡᠬᠦ ᠡᠴᠡ ᠪᠢᠰᠢ ᠥᠪᠡᠷ ᠦ᠋ᠨ ᠪᠡᠶᠡ ᠨᠢ ᠬᠠᠷᠢᠨ ᠬᠡᠳᠦᠢ ᠰᠦᠷᠡᠬᠡᠢ ᠬᠤᠷᠬᠢᠷᠠᠵᠤ ᠪᠠᠢᠪᠠᠯ ᠲᠡᠳᠦᠢ ᠪᠡᠶᠡ ᠨᠢ ᠠᠮᠠᠷᠠᠵᠤ ᠪᠠᠢᠳᠠᠭ ᠪᠠᠢᠨᠠ᠃ ᠲᠡᠭᠡᠪᠡᠴᠦ ᠡᠪᠦᠭᠡᠨ ᠯᠠᠮᠠᠬᠠᠢ ᠫᠤᠩᠰᠣᠭᠷᠠᠪᠵᠠᠢ ᠳᠦᠯᠡᠢ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠨᠢ ᠦᠯᠦ ᠰᠣᠨᠣᠰᠤᠨᠠ᠃
ᠮᠠᠨᠴᠤᠷᠭᠠ ᠬᠤᠷᠬᠢᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠬᠤᠷᠬᠢᠷᠠᠨᠠ᠂ ᠳᠦᠯᠡᠢ ᠯᠠᠮᠠᠬᠠᠢ ᠤᠨᠲᠠᠬᠤ ᠪᠠᠷ ᠢ᠋ᠶ᠋ᠠᠨ ᠤᠨᠲᠠᠨᠠ ᠭᠡᠭᠴᠢ ᠦᠨᠡᠨ ᠪᠣᠯᠵᠤ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠴᠤ᠌ ᠬᠠᠷᠰᠢᠯᠠᠬᠤ ᠦᠭᠡᠢ ᠬᠣᠶᠠᠭᠤᠯᠠ ᠬᠣᠨᠣᠭ ᠳᠠᠪᠠᠵᠠᠢ᠃
ᠥᠷᠯᠥᠭᠡᠭᠦᠷ ᠨᠢ ᠮᠠᠨᠴᠤᠷᠭᠠ ᠡᠷᠲᠡ ᠪᠣᠰᠴᠤ ᠮᠣᠷᠢ ᠪᠠᠨ ᠪᠠᠷᠢᠯᠠᠵᠤ ᠤᠰᠤᠯᠠᠭᠠᠳ ᠱᠣᠩ ᠠ᠋ᠴᠠ ᠤᠶᠠᠪᠠ᠃ ᠳᠦᠯᠡᠢ ᠡᠪᠦᠭᠡᠨ ᠦ᠌ ᠴᠢᠨᠠᠭᠰᠠᠨ ᠠᠭᠠᠭ ᠲᠠᠢ ᠴᠠᠢ ᠬᠠᠩᠬᠤᠯᠤᠭᠠᠳ᠂ ᠬᠦᠴᠢᠯᠯᠢᠭ ᠠᠭᠠᠷᠤᠤᠯ᠂ ᠥᠭᠡᠬᠦ ᠳᠡᠢᠯᠳᠡᠭᠦᠦ ᠦᠬᠡᠷ ᠦ᠋ᠨ ᠬᠠᠲᠠᠭᠰᠠᠨ ᠪᠣᠷᠴᠠ ᠬᠥᠰᠬᠡᠯᠡᠵᠦ ᠨᠢᠭᠡ ᠴᠠᠭ ᠰᠠᠢᠬᠠᠨ ᠨᠤᠲᠤᠭ ᠤ᠋ᠨ ᠴᠠᠢ ᠤᠤᠭᠤᠴᠢᠬᠠᠭᠠᠳ ᠶᠠᠪᠤᠬᠤ ᠪᠣᠯᠪᠠ᠃
ᠷᠣᠯᠮᠠ ᠲᠠᠢ ᠭᠥᠭᠯᠡᠬᠦ ᠭᠡᠵᠦ ᠶᠡᠬᠡ ᠶᠠᠭᠤᠮᠠ ᠰᠠᠨᠠᠵᠤ ᠢᠷᠡᠭᠡᠳ ᠰᠠᠨᠠᠭᠠᠨ ᠤ᠋ ᠭᠠᠳᠠᠭᠤᠷ ᠳᠦᠯᠡᠢ ᠵᠡᠮᠳᠡᠭ ᠡᠪᠦᠭᠡᠨ ᠢ᠋ ᠪᠡᠲᠡᠷᠡᠭᠦᠯᠵᠦ ᠬᠣᠨᠣᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠲᠦᠪᠳᠡᠬᠦ ᠦᠭᠡᠢ ᠲᠤᠯᠠ ᠲᠡᠭᠦᠨ ᠦ᠌ ᠠᠯᠠᠭᠠᠨ ᠳ᠋ᠤ᠌ ᠬᠣᠶᠠᠷ ᠮᠥᠩᠭᠥᠨ ᠵᠣᠭᠣᠰ ᠲᠠᠯᠪᠢᠵᠤ ᠥᠭᠭᠦᠨ ᠰᠠᠢᠨ ᠪᠣᠯᠤᠯᠠ ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠵᠦ ᠳᠠᠯᠢᠩ ᠢ᠋ᠶ᠋ᠠᠨ ᠡᠷᠭᠦᠬᠦ ᠳ᠋ᠦ᠍ ᠳᠦᠯᠡᠢ ᠡᠪᠦᠭᠡᠨ《 ᠪᠠᠢᠵᠠ》 ᠭᠡᠳ ᠴᠠᠭᠠᠳᠤ ᠳᠡᠪᠰᠡᠭ ᠦ᠋ᠨ ᠨᠢᠳᠦᠨ ᠡᠴᠡ ᠨᠢᠭᠡ ᠴᠠᠭᠠᠰᠤᠨ ᠪᠣᠭᠣᠵᠢ ᠶᠠᠭᠤᠮᠠ ᠭᠠᠷᠭᠠᠨ《 ᠬᠠᠳᠤᠮᠠᠯ ᠤ᠋ᠨ ᠳ᠋ᠦᠩᠰᠡᠨ ᠲᠠᠮᠠᠬᠢ ᠶᠤᠮ ᠠ᠋! ᠬᠠᠲᠠᠭᠤᠬᠠᠨ ᠪᠣᠯᠪᠠᠴᠤ ᠡᠷᠡ ᠬᠥᠮᠦᠨ ᠦ᠌ ᠡᠳ᠋ᠯᠡᠳᠡᠭ ᠡᠳ᠋ ᠳᠡ᠃ ᠪᠡᠶᠡ ᠶ᠋ᠢᠨ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠲᠠᠢᠯᠬᠤ ᠳ᠋ᠤ᠌ ᠵᠦᠭᠡᠷ ᠶᠦᠮ ᠠ᠋!》 ᠭᠡᠵᠦ ᠮᠠᠨᠴᠤᠷᠭᠠ ᠳ᠋ᠤ᠌ ᠭᠠᠷᠳᠠᠭᠤᠯᠤᠨ ᠮᠣᠩᠭᠣᠯ ᠬᠥᠮᠦᠨ ᠭᠡᠷ ᠲᠡᠭᠡᠨ ᠢᠷᠡᠭᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠰᠠᠪᠠᠨ ᠳ᠋ᠤᠨᠢ ᠬᠠᠷᠢᠭᠤ ᠲᠤᠰᠤᠭᠠᠬᠤ ᠦᠭᠡᠢ ᠭᠠᠷ ᠬᠣᠭᠣᠰᠣᠨ ᠭᠠᠷᠭᠠᠳᠠᠭ ᠦᠭᠡᠢ ᠶᠣᠰᠣ ᠪᠠᠷ ᠳᠦᠯᠡᠢ ᠡᠪᠦᠭᠡᠨ ᠮᠠᠨᠴᠤᠷᠭᠠ ᠶ᠋ᠢᠨ ᠭᠠᠨᠵᠤᠭᠠ ᠶ᠋ᠢ ᠢᠩᠭᠢᠵᠦ ᠮᠢᠯᠢᠶᠠᠪᠠ᠃ ᠮᠠᠨᠴᠤᠷᠭᠠ᠂ ᠳᠦᠯᠡᠢ ᠡᠪᠦᠭᠡᠨ ᠯᠠᠮᠠᠬᠠᠢ ᠶ᠋ᠢ ᠦᠷᠦ ᠡᠪᠡᠳᠦᠨ ᠲᠠᠯᠠᠷᠬᠠᠬᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠳᠬᠡᠬᠦ ᠭᠡᠵᠦ《 ᠵᠠ᠂ ᠲᠠ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ! ᠷᠣᠯᠮᠠ ᠲᠠᠢ ᠤᠴᠠᠷᠠᠪᠠᠯ ᠨᠠᠮᠠᠶ᠋ᠢ ᠢᠷᠡᠵᠦ ᠲᠡᠭᠦᠨ ᠢ᠋ ᠰᠤᠷᠠᠭᠠᠳ ᠶᠠᠪᠤᠭᠰᠠᠨ ᠭᠡᠵᠦ ᠳᠠᠮᠵᠢᠭᠤᠯᠤᠭᠠᠷᠠᠢ!》 ᠭᠡᠵᠦ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠢ᠋ ᠫᠤᠩᠰᠣᠭᠷᠠᠪᠵᠡᠢ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠬᠢ ᠪᠠᠨ ᠯᠠ ᠶᠠᠷᠢᠵᠤ《 ᠵᠠᠮ ᠳ᠋ᠠᠭᠠᠨ ᠮᠡᠨᠳᠦ ᠶᠠᠪᠤᠭᠠᠷᠠᠢ! ᠵᠠᠯᠠᠭᠤ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠃ ᠳᠠᠬᠢᠵᠤ ᠮᠠᠨ ᠤ᠋ ᠬᠢ ᠪᠡᠷ ᠢᠷᠡᠵᠦ ᠪᠠᠢᠭᠠᠷᠠᠢ!》 ᠭᠡᠵᠦ ᠮᠠᠨᠴᠤᠷᠭᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠳᠦᠳᠦᠨᠡᠵᠦ ᠯᠡ ᠪᠠᠢᠯᠠ᠁
ᠮᠠᠨᠴᠤᠷᠭᠠ ᠳᠦᠯᠡᠢ ᠡᠪᠦᠭᠡᠨ ᠯᠠᠮᠠᠬᠠᠢ ᠠ᠋ᠴᠠ ᠰᠠᠯᠵᠤ ᠬᠡᠷᠡᠮ ᠦ᠋ᠨ ᠥᠨᠴᠥᠭ ᠳᠤᠭᠤᠢᠯᠠᠨ ᠮᠤᠷᠤᠢᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠬᠣᠭᠣᠰᠣᠨ ᠰᠠᠭᠤᠯᠠᠭᠠ ᠬᠠᠷᠴᠢᠭᠢᠨᠠᠭᠤᠯᠤᠭᠰᠠᠨ ᠮᠣᠯᠲᠣᠭ ᠲᠣᠯᠣᠭᠠᠢ ᠲᠠᠢ ᠵᠢᠭᠠᠬᠠᠨ ᠪᠠᠨᠳᠢ ᠲᠠᠭᠠᠷᠠᠯᠳᠤᠪᠠ᠃《 ᠥᠷᠯᠥᠭᠡ ᠡᠷᠲᠡ ᠡᠭᠦᠳᠡ ᠭᠠᠷᠤᠮᠠᠭᠴᠠ ᠬᠣᠭᠣᠰᠣᠨ ᠰᠠᠭᠤᠯᠠᠭᠠ ᠳᠠᠮᠨᠠᠭᠰᠠᠨ ᠬᠥᠮᠦᠨ ᠲᠡᠢ ᠬᠠᠯᠵᠠ ᠬᠠᠷᠭᠤᠯᠠ᠂ ᠶᠡᠷᠦ ᠨᠢ ᠠᠵᠠ ᠮᠠᠭᠤᠳᠠᠭᠰᠠᠨ ᠤᠴᠠᠷᠠᠯ ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠡᠵᠢᠭ ᠡᠪᠦᠷᠯᠡᠭᠰᠡᠨ ᠪᠣᠯᠪᠠᠴᠤ ᠡᠨᠡ ᠪᠠᠨᠳᠢ ᠠ᠋ᠴᠠ ᠨᠢᠭᠡ ᠠᠰᠠᠭᠤᠵᠤ ᠦᠵᠡᠶᠡ ᠭᠡᠳ᠄
— ᠬᠥᠶᠢ᠂ ᠮᠢᠨᠦ ᠳᠡᠭᠦᠦ ᠠ᠋᠂ ᠨᠡᠷᠡ ᠬᠡᠨ ᠪᠢᠯᠡ? ᠭᠡᠵᠦ ᠠᠰᠠᠭᠤᠪᠠ᠃
— ᠲᠡᠮᠦᠷᠰᠦ᠋ᠬᠡ᠃ ᠠᠬᠠ ᠶ᠋ᠢᠨ ᠨᠡᠷᠡ ᠬᠡᠨ ᠪᠢᠯᠡ? ᠭᠡᠵᠦ ᠮᠠᠰᠢ ᠴᠣᠭᠨᠢᠭᠤᠨ ᠳᠤᠤᠭᠠᠷᠤᠨᠠ᠃ ᠡᠨᠡ ᠴᠤ᠌ ᠪᠠᠰᠠ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠤᠩᠬᠢ ᠨᠢ ᠴᠤᠭᠤᠷᠠᠭᠰᠠᠨ ᠪᠠᠨᠳᠢ ᠪᠠᠢᠨᠠ ᠬᠦ᠂ ᠨᠡᠷᠡ ᠶ᠋ᠢ ᠨᠢ ᠠᠰᠠᠭᠤᠴᠢᠬᠠᠯᠠ ᠭᠡᠵᠦ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠮᠢᠨᠦ ᠨᠡᠷᠡ ᠶ᠋ᠢ ᠬᠠᠷᠢᠭᠤ ᠲᠡᠩᠰᠡᠴᠢᠬᠡᠯᠡ ᠰᠢᠦ》 ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠬᠦ᠌ ᠰᠡᠷᠭᠦᠯᠡᠩ ᠠᠪᠤᠷᠢᠲᠠᠢ ᠵᠢᠭᠠᠬᠠᠨ ᠪᠠᠨᠳᠢ ᠶ᠋ᠢ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠲᠣᠭᠣᠵᠤ᠄
— ᠵᠠ᠂ ᠮᠢᠨᠦ ᠨᠡᠷᠡ ᠤᠤ? ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠡᠳᠡᠭ ᠭᠡᠪᠡ᠃
— ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠡᠨᠡ ᠤᠤ? ᠭᠡᠳ ᠮᠠᠰᠢ ᠬᠠᠴᠢᠷᠬᠠᠨ ᠭᠠᠢᠬᠠᠵᠤ ᠲᠡᠭᠦᠨ ᠢ᠋ ᠵᠤᠯᠠᠢ ᠠ᠋ᠴᠠ ᠨᠢ ᠠᠪᠤᠭᠠᠳ ᠤᠯᠠ ᠳ᠋ᠤᠨᠢ ᠬᠦᠷᠲᠡᠯᠡ ᠰᠢᠨᠵᠢᠪᠡ᠃
— ᠶᠠᠭᠠᠬᠢᠪᠠ? ᠲᠠᠨᠢᠮᠠᠷ ᠪᠠᠢᠨᠠ ᠤᠤ? ᠭᠡᠵᠦ ᠰᠣᠨᠢᠭᠤᠴᠢᠯᠠᠪᠠ᠃ ᠲᠡᠷᠡ ᠵᠢᠭᠠᠯ ᠬᠦᠦ᠄
— ᠦᠭᠡᠢ᠂ ᠲᠠ ᠶᠠᠭᠠᠬᠢᠭᠰᠠᠨ ᠲᠡᠷᠡ ᠮᠠᠨᠴᠤᠷᠭᠠ ᠭᠡᠰᠡᠨ ᠬᠥᠮᠦᠨ ᠲᠡᠢ ᠠᠳᠠᠯᠢᠬᠠᠨ ᠬᠠᠷᠠᠭᠳᠠᠬᠤ ᠨᠢ ᠪᠣᠢ? ᠭᠡᠪᠡ᠃
— ᠴᠢ ᠮᠠᠨᠴᠤᠷᠭᠠ ᠶ᠋ᠢ ᠲᠠᠨᠢᠳᠠᠭ ᠶᠤᠮ ᠤᠤ?
— ᠲᠠᠨᠢᠬᠤ ᠦᠭᠡᠢ᠂ ᠲᠠᠨᠢᠬᠤ ᠦᠭᠡᠢ ᠭᠡᠳ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠨᠠ᠃ ᠮᠠᠨᠴᠤᠷᠭᠠ ᠶᠠᠮᠠᠷ ᠨᠢᠭᠡ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠦᠭᠡᠢ᠃
— ᠮᠠᠨᠴᠤᠷᠭᠠ ᠶ᠋ᠢ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ᠋ ᠰᠠᠢᠨ ᠡᠷᠡ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠳᠡᠭ᠃ ᠪᠠᠰᠠ ᠶᠠᠭᠠᠬᠢᠯᠠ ᠭᠡᠨᠡ ᠤᠤ ᠳᠠ᠂ ᠶᠠᠮᠠᠷ ᠶᠠᠯᠠ ᠨᠢᠭᠦᠯ ᠲᠡᠢ ᠤᠷᠭᠤᠭᠰᠠᠨ ᠶᠠᠯᠠᠲᠠᠨ ᠭᠡᠵᠦ ᠵᠡᠭᠡᠯᠢ ᠶ᠋ᠢᠨ ᠬᠡᠷᠡᠮ ᠪᠣᠯᠭᠠᠨ ᠳ᠋ᠤ᠌ ᠪᠠᠷᠢᠪᠴᠢᠯᠠᠬᠤ ᠵᠠᠷ ᠨᠠᠭᠠᠭᠰᠠᠨ ᠬᠠᠷᠠᠭᠳᠠᠨᠠ᠃
— ᠶᠠᠭᠤ? ᠪᠠᠷᠢᠪᠴᠢᠯᠠᠬᠤ ᠵᠠᠷ⁈
— ᠤᠤᠬᠠᠢ!
— ᠬᠠᠮᠢᠭᠠ ᠪᠣᠢ?
— ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠭᠣᠣᠯ ᠡᠭᠦᠳᠡᠨ ᠦ᠌ ᠪᠠᠷᠠᠭᠤᠨ ᠬᠡᠷᠡᠮ ᠳᠡᠭᠡᠷᠡ ᠴᠤ᠌ ᠨᠠᠭᠠᠵᠤ ᠪᠠᠢᠭᠠ᠃ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠮᠥᠳᠳᠥ ᠡᠴᠡ ᠬᠠᠷᠠ! ᠭᠡᠳ ᠬᠣᠭᠣᠰᠣᠨ ᠰᠠᠭᠤᠯᠠᠭᠠ ᠪᠠᠨ ᠳᠠᠮᠨᠠᠭᠠᠳ ᠴᠠᠭᠠᠰᠢ ᠶᠠᠪᠤᠬᠤ ᠶ᠋ᠢ ᠵᠠᠪᠳᠤᠪᠠ᠃
— ᠪᠠᠢᠵᠠ᠂ ᠮᠢᠨᠦ ᠳᠡᠭᠦᠦ ᠵᠣᠭᠰᠣᠵᠤ ᠪᠠᠢ! ᠪᠢ ᠴᠢᠮᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠰᠤᠷᠠᠭᠯᠠᠶᠠ᠃
— ᠮᠠᠨᠴᠤᠷᠭᠠ ᠤᠤ?
— ᠪᠢᠰᠢ ᠠ᠋᠂ ᠪᠢᠰᠢ! ᠲᠡᠷᠡ ᠨᠠᠳᠠ ᠳᠠᠯᠵᠢ ᠦᠭᠡᠢ ᠬᠡᠷᠡᠭ᠃ ᠴᠢ ᠡᠨᠡ ᠪᠠᠷᠠᠭᠤᠨ ᠬᠦᠷᠢᠶᠡᠨ ᠦ᠌ ᠷᠣᠯᠮᠠ ᠶ᠋ᠢ ᠲᠠᠨᠢᠨᠠ ᠤᠤ?
— ᠲᠠᠨᠢᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ? ᠪᠢᠳᠡᠨᠦᠰ ᠬᠤᠷᠠᠯ ᠤ᠋ᠨ ᠵᠠᠪᠰᠠᠷ᠂ ᠥᠷᠯᠥᠭᠡ ᠣᠷᠣᠢ ᠳ᠋ᠠᠭᠠᠨ ᠵᠠᠪ ᠴᠢᠯᠥᠭᠡ ᠪᠡᠷ ᠢ᠋ᠶ᠋ᠡᠨ ᠲᠠᠩᠳᠠ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠵᠤ ᠵᠠᠭᠠᠷ ᠴᠢᠪᠠᠭᠠ᠂ ᠮᠥᠰᠥᠨ ᠰᠢᠬᠢᠷ ᠢᠳᠡᠳᠡᠭ ᠪᠠᠢᠭᠰᠠᠨ᠁
— ᠣᠳᠣ ᠲᠡᠭᠡᠭᠡᠳ ᠲᠡᠷᠡ ᠬᠠᠮᠢᠭᠠ ᠨᠡᠭᠦᠵᠦ ᠶᠠᠪᠤᠭᠰᠠᠨ ᠪᠣᠯ ᠠ᠋? ᠴᠢ ᠮᠡᠳᠡᠪᠡᠯ ᠨᠠᠳᠠ ᠶᠠᠷᠢᠭᠠᠳ ᠥᠭ᠃
— ᠫᠠᠢ᠂ ᠬᠠᠷᠠᠯᠠ! ᠷᠣᠯᠮᠠ ᠡᠭᠡᠴᠢ ᠳᠠᠯᠠᠢᠭᠴᠢ ᠪᠣᠯᠤᠭᠰᠠᠨ!
— ᠬᠡᠵᠢᠶᠡ?
— ᠤᠷᠵᠢ ᠶ᠋ᠢᠨ ᠴᠠᠭᠠᠳᠤ ᠵᠢᠯ᠃
— ᠶᠠᠭᠠᠬᠢᠭᠠᠳ ᠳᠠᠯᠠᠢᠭᠴᠢ ᠪᠣᠯᠤᠭᠰᠠᠨ ᠪᠢᠯᠡ?
— ᠪᠤᠤ ᠮᠡᠳᠡ ᠠ᠋᠂ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠳᠠᠯᠠᠢᠭᠴᠢ ᠪᠣᠯᠤᠭᠰᠠᠨ ᠢ᠋ ᠬᠠᠷᠢᠨ ᠰᠠᠢᠨ ᠮᠡᠳᠡᠬᠦ ᠦᠭᠡᠢ᠃ ᠵᠠᠷᠢᠮ ᠨᠢ ᠬᠡᠯᠡᠬᠦ ᠪᠡᠷ ᠪᠤᠭᠤᠲᠤ ᠶ᠋ᠢᠨ ᠯᠤᠢᠪᠠᠷᠴᠢᠨ ᠳ᠋ᠤ᠌ ᠬᠣᠣᠷᠯᠠᠭᠳᠠᠭᠰᠠᠨ ᠭᠡᠬᠦ ᠶᠦᠮ᠃
— ᠠᠢ᠂ ᠢᠯᠡᠢ ᠭᠡᠵᠦ ᠮᠠᠨᠴᠤᠷᠭᠠ ᠬᠠᠷᠠᠮᠰᠠᠨ ᠭᠠᠰᠠᠯᠪᠠ᠃
— ᠲᠠ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠶᠠᠭᠤ ᠨᠢ ᠪᠣᠢ?
— ᠪᠢ ᠲᠡᠭᠦᠨ ᠦ᠌ ᠨᠤᠲᠤᠭ ᠨᠢᠭᠡ ᠲᠡᠢ ᠬᠣᠯᠠ ᠶ᠋ᠢᠨ ᠲᠥᠷᠥᠯ ᠨᠢ ᠶᠦᠮ᠃ ᠵᠠ᠂ ᠮᠢᠨᠦ ᠳᠡᠭᠦᠦ ᠰᠠᠢᠨ ᠪᠣᠯᠤᠯᠠ᠂ ᠤᠰᠤᠨ ᠳ᠋ᠠᠭᠠᠨ ᠶᠠᠪᠤ ᠳᠠ! ᠭᠡᠬᠦ ᠳ᠋ᠦ᠍ ᠵᠢᠭᠠᠬᠠᠨ ᠪᠠᠨᠳᠢ ᠨᠥᠭᠦᠭᠡ ᠬᠤᠳᠳᠤᠭ ᠤᠷᠤᠭᠤ ᠶᠠᠪᠤᠵᠤ ᠣᠳᠤᠯᠠ᠃ ᠬᠣᠭᠣᠰᠣᠨ ᠰᠠᠭᠤᠯᠠᠭᠠ ᠳᠠᠮᠨᠠᠭᠰᠠᠨ ᠮᠣᠯᠲᠣᠭ ᠲᠣᠯᠣᠭᠠᠢᠲᠤ ᠵᠢᠭᠠᠬᠠᠨ ᠪᠠᠨᠳᠢ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠭᠤᠷ ᠬᠣᠶᠠᠷ ᠮᠠᠭᠤ ᠴᠢᠮᠡᠭᠡ ᠲᠤᠭᠤᠯᠤᠭᠤᠯᠤᠯᠠ᠃ ᠮᠠᠨᠴᠤᠷᠭᠠ ᠪᠦᠯᠢᠶᠡ ᠵᠠᠯᠭᠢᠭᠰᠠᠨ ᠰᠢᠭ᠋ ᠪᠣᠯᠵᠤ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠨᠠᠮᠰᠠᠷᠠᠢ ᠪᠤᠷᠬᠠᠨᠲᠤ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠬᠤᠯᠠ ᠦᠨᠡᠬᠡᠷ ᠵᠢᠭᠠᠬᠠᠨ ᠪᠠᠨᠳᠢ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠲᠡᠭᠦᠨ ᠦ᠌ ᠵᠢᠷᠤᠭ ᠬᠥᠷᠥᠭ ᠲᠡᠢ ᠪᠠᠷᠢᠪᠴᠢᠯᠠᠬᠤ ᠵᠠᠷ ᠲᠤᠩᠬᠠᠭ ᠨᠠᠭᠠᠵᠤ ᠪᠠᠢᠭᠠ ᠶ᠋ᠢ ᠣᠯᠵᠤ ᠬᠠᠷᠠᠯᠠ᠃
ᠵᠠᠷᠯᠠᠯ
ᠮᠠᠨᠴᠤᠷᠭᠠ᠂ ᠪᠦᠰᠡᠲᠡᠢ᠂ ᠬᠣᠷᠢᠨ ᠵᠢᠷᠭᠤᠭᠠᠲᠠᠢ᠂ ᠤᠤᠯ ᠨᠢ ᠪᠠᠷᠠᠭᠤᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠰᠢᠳᠠᠷ ᠴᠡᠷᠢᠭ ᠦ᠋ᠨ ᠲᠤᠰᠢᠶᠠᠯ ᠲᠠᠢ ᠪᠠᠢᠪᠠ᠃ ᠡᠳᠦᠭᠡ ᠵᠢᠷᠤᠮ ᠳᠢᠭᠯᠡᠮ ᠡᠴᠡ ᠲᠡᠷᠰᠯᠡᠵᠦ᠂ ᠠᠭᠤᠴᠢᠯᠠᠰᠢ ᠦᠭᠡᠢ ᠬᠦᠨᠳᠦ ᠶᠠᠯᠠ ᠬᠢᠵᠦ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠭᠤᠢᠪᠢᠭᠤᠯᠵᠤ ᠪᠣᠰᠤᠯᠭᠠ ᠭᠠᠷᠭᠠᠨ ᠳᠤᠲᠠᠭᠠᠪᠠᠢ᠃ ᠲᠡᠭᠦᠨ ᠦ᠌ ᠣᠨᠴᠠᠯᠢᠭ᠄ ᠴᠡᠷᠢᠭ ᠵᠡᠪᠰᠡᠭ ᠦ᠋ᠨ ᠡᠷᠳᠡᠮ ᠳ᠋ᠦ᠍ ᠴᠠᠭᠠᠷᠠᠭᠰᠠᠨ᠁ ᠡᠳᠦᠭᠡ ᠵᠠᠷ ᠤ᠋ᠨ ᠬᠦᠴᠦᠨ ᠳ᠋ᠦ᠍ ᠬᠡᠨ ᠬᠥᠮᠦᠨ ᠲᠡᠭᠦᠨ ᠦ᠌ ᠰᠤᠷᠠᠭ ᠴᠢᠮᠡᠭᠡ᠂ ᠬᠥᠳᠡᠯᠦᠯ ᠬᠠᠨᠳᠤᠰᠢ ᠶ᠋ᠢ ᠰᠤᠷᠠᠭᠯᠠᠵᠤ ᠮᠡᠳᠡᠨ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠬᠡᠯᠡ ᠥᠭᠴᠦ᠂ ᠬᠦᠨᠳᠦ ᠶᠠᠯᠠᠲᠠᠨ ᠢ᠋ ᠪᠠᠷᠢᠪᠴᠢᠯᠠᠬᠤ ᠳ᠋ᠤ᠌ ᠲᠤᠰᠠ ᠦᠵᠢᠭᠦᠯᠦᠭᠰᠡᠳ ᠲᠦ᠍ ᠬᠦᠨᠳᠦᠳᠡ ᠱᠠᠩᠨᠠᠮᠤᠢ᠃ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠢᠷᠡᠭᠰᠡᠨ ᠪᠠᠭᠠᠲᠤᠷ ᠡᠷᠡ ᠳ᠋ᠦ᠍ ᠵᠠᠭᠤᠨ ᠯᠠᠩ ᠮᠥᠩᠭᠥ᠂ ᠬᠣᠶᠠᠷ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠬᠣᠶᠠᠷ ᠤᠨᠤᠭᠠᠷᠢ ᠶ᠋ᠢᠨ ᠮᠣᠷᠢ ᠱᠠᠩᠨᠠᠮᠤᠢ᠃ ᠲᠡᠮᠡᠴᠡᠭᠡᠨ ᠳᠤᠮᠳᠠ ᠲᠡᠭᠦᠨ ᠢ᠋ ᠠᠯᠠᠵᠤ ᠰᠢᠷᠠᠭᠳᠤᠭᠤᠯᠤᠭᠰᠠᠨ ᠪᠤᠶᠤ ᠢᠯᠠᠩᠭᠤᠶᠠ ᠮᠠᠨᠴᠤᠷᠭᠠ ᠶ᠋ᠢᠨ ᠲᠡᠷᠢᠭᠦᠨ ᠢ᠋ ᠶᠠᠮᠤᠨ ᠳ᠋ᠤ᠌ ᠬᠦᠷᠭᠡᠵᠦ ᠡᠷᠭᠦᠭᠰᠡᠨ ᠬᠥᠮᠦᠨ ᠢ᠋ ᠮᠥᠨ ᠬᠦ᠌ ᠳᠡᠭᠡᠷᠡᠬᠢ ᠲᠡᠢ ᠠᠳᠠᠯᠢ ᠬᠦᠨᠳᠦ ᠪᠡᠷ ᠱᠠᠩᠨᠠᠬᠤ ᠶ᠋ᠢ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠤᠮᠤ᠃
ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ
ᠬᠣᠰᠢᠭᠤ ᠶᠠᠮᠤᠨ ᠤ᠋ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ
××× ᠣᠨ××× ᠰᠠᠷᠠ ᠶ᠋ᠢᠨ×× ᠦ᠌ ᠡᠳᠦᠷ
ᠭᠡᠵᠦ ᠰᠡᠢᠷᠡᠭᠦᠯᠦᠨ ᠪᠢᠴᠢᠭᠰᠡᠨ ᠪᠠᠢᠪᠠ᠃
ᠮᠠᠨᠴᠤᠷᠭᠠ᠂ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠨᠢ ᠪᠠᠷᠢᠪᠴᠢᠯᠠᠬᠤ ᠭᠡᠰᠡᠨ ᠵᠠᠷ ᠢ᠋ ᠦᠵᠡᠭᠡᠳ ᠬᠤᠢᠬᠠ ᠶ᠋ᠢᠨ ᠦᠰᠦ ᠨᠢ ᠪᠣᠰᠴᠤ ᠭᠡᠨᠡᠳᠲᠡ ᠰᠡᠭᠡᠭᠡ ᠠᠪᠤᠨ《 ᠡᠨᠳᠡ ᠡᠴᠡ ᠪᠤᠰᠢᠭᠤᠬᠠᠨ ᠵᠠᠢᠯᠠᠬᠤ ᠦᠭᠡᠢ ᠪᠣᠯ ᠭᠣᠷᠢ ᠦᠭᠡᠢ ᠨᠢ ᠠ᠋᠃ ᠲᠠᠨᠢᠯ ᠲᠣᠯᠣᠭᠠᠢ ᠬᠡᠨ ᠨᠢᠭᠡ ᠲᠡᠢ ᠨᠢ ᠬᠠᠷᠭᠤᠪᠠᠯ ᠠᠮᠢᠨ ᠳ᠋ᠤ᠌ ᠲᠤᠯᠬᠤ ᠨᠢ᠃ ᠬᠠᠮᠢᠶᠠ ᠬᠠᠢᠳᠠᠭ ᠦᠭᠡᠢ ᠤᠰᠤ ᠳᠠᠮᠨᠠᠵᠤ ᠶᠠᠪᠤᠭᠠ ᠵᠢᠭᠠᠬᠠᠨ ᠪᠠᠨᠳᠢ ᠬᠦᠷᠲᠡᠯᠡ ᠵᠠᠷ ᠤ᠋ᠨ ᠵᠢᠷᠤᠭ ᠤ᠋ᠨ ᠲᠥᠰᠥᠪ ᠢ᠋ᠶ᠋ᠡᠷ ᠥᠪᠡᠷ ᠢ᠋ ᠨᠢ ᠲᠥᠰᠲᠡᠢ ᠪᠠᠢᠨᠠ ᠭᠡᠳ ᠰᠢᠨᠵᠢᠵᠦ ᠪᠠᠢᠭᠠ ᠶᠤᠮ ᠬᠣᠢᠨᠠ ᠬᠡᠯᠲᠦᠰᠬᠢᠪᠡᠯ ᠳᠦᠯᠡᠢ ᠡᠪᠦᠭᠡᠨ᠂ ᠪᠢᠴᠢᠬᠠᠨ ᠪᠠᠨᠳᠢ ᠴᠣ ᠴᠠᠭᠠᠰᠢ ᠪᠠᠨ ᠮᠡᠳᠡᠭᠡ ᠬᠦᠷᠭᠡᠵᠦ ᠮᠠᠭᠠᠳ ᠦᠭᠡᠢ》 ᠭᠡᠵᠦ ᠪᠣᠳᠣᠪᠠ᠃ ᠡᠢᠨ ᠬᠦ᠌ ᠰᠡᠭᠦᠯ ᠡᠴᠡ ᠪᠡᠨ ᠦᠷᠭᠦᠨ ᠰᠡᠭᠦᠳᠡᠷ ᠡᠴᠡ ᠪᠡᠨ ᠨᠠᠳᠬᠤᠨ᠂《 ᠪᠣᠰᠢᠭᠣ ᠳᠤᠲᠠᠭᠠᠬᠤ ᠦᠭᠡᠢ ᠭᠣᠷᠢ ᠦᠭᠡᠢ》 ᠭᠡᠳᠡᠭ ᠠᠢᠩᠭᠤᠷᠢᠲᠦ ᠪᠣᠳᠣᠯ ᠳ᠋ᠠᠭᠠᠨ ᠲᠠᠰᠤᠷᠠᠭᠠ ᠦᠭᠡᠢ ᠲᠠᠰᠢᠭᠤᠷᠳᠠᠭᠤᠯᠤᠭᠰᠠᠨ ᠮᠠᠨᠴᠤᠷᠭᠠ ᠱᠠᠯᠠᠪᠬᠠᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠲᠠᠰᠢᠭᠤᠷᠳᠠᠭᠰᠠᠨ ᠳᠡᠭᠡᠷᠡ ᠨᠢ ᠲᠠᠰᠢᠭᠤᠷᠳᠠᠵᠤ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠴᠢᠭᠯᠡᠨ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠪᠠ᠃ ᠮᠠᠨᠴᠤᠷᠭᠠ ᠷᠣᠯᠮᠠ ᠶ᠋ᠢᠨ ᠲᠤᠬᠠᠢ ᠡᠯᠳᠡᠪ ᠶᠠᠭᠤᠮᠠ ᠪᠣᠳᠣᠨ ᠰᠡᠳᠬᠢᠯ ᠡᠮᠲᠡᠷᠡᠨ ᠶᠠᠪᠤᠭᠰᠠᠭᠠᠷ᠂ ᠰᠠᠯᠵᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠪᠢᠲᠡᠭᠦᠦ ᠪᠤᠷᠭᠠᠰᠤᠨ ᠳ᠋ᠤ᠌ ᠣᠷᠣᠭᠠᠳ ᠳᠠᠯᠳᠠᠷᠠᠪᠠ᠃