ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠲᠠᠪᠤᠳᠤᠭᠠᠷ ᠪᠦᠯᠦᠭ 02 ᠭᠣᠶᠣᠯ ᠴᠢᠮᠡᠭᠯᠡᠯ ᠦ᠋ᠨ ᠵᠠᠩᠭᠢᠯᠠᠭᠠ
425ᠲᠠᠪᠤᠳᠤᠭᠠᠷ ᠪᠦᠯᠦᠭ 02 ᠭᠣᠶᠣᠯ ᠴᠢᠮᠡᠭᠯᠡᠯ ᠦ᠋ᠨ ᠵᠠᠩᠭᠢᠯᠠᠭᠠ
ᠡᠭᠦᠨ ᠢ᠋ ᠬᠤᠪᠴᠠᠰᠤ ᠬᠤᠨᠠᠷ᠂ ᠡᠳ᠋ᠯᠡᠯ ᠦ᠋ᠨ ᠴᠢᠮᠡᠭᠯᠡᠯ᠂ ᠲᠣᠪᠴᠢ ᠰᠢᠯᠪᠢ᠂ ᠴᠢᠮᠡᠭᠯᠡᠯ ᠦ᠋ᠨ ᠵᠠᠩᠭᠢᠯᠠᠭᠠ ᠬᠢᠬᠦ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠪᠥᠭᠡᠳ ᠬᠥᠮᠦᠨ ᠦ᠌ ᠤᠷᠠ ᠤᠬᠠᠭᠠᠨ ᠪᠠᠭᠠ ᠦᠭᠡᠢ ᠱᠠᠭᠠᠷᠳᠠᠳᠠᠭ ᠴᠢᠬᠤᠯᠠ ᠤᠷᠠᠯᠠᠯ ᠶᠤᠮ᠃
ᠡᠨᠳᠡ ᠶᠠᠭᠤᠨ ᠤ᠋ ᠡᠮᠦᠨᠡ ᠨᠡᠷᠡᠯᠡᠭᠳᠡᠬᠦ ᠵᠠᠩᠭᠢᠯᠠᠭᠠ ᠪᠣᠯ ᠳᠡᠪᠡᠯ᠂ ᠮᠠᠯᠠᠭᠠᠢ ᠶ᠋ᠢᠨ ᠰᠠᠮᠫᠠᠨ ᠶᠤᠮ᠃ ᠰᠠᠮᠫᠠᠨ ᠡᠷᠲᠡᠨ ᠦ᠌ ᠭᠠᠷᠤᠯ ᠲᠠᠢ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠪᠥᠭᠡᠳ ᠮᠣᠩᠭᠣᠯ ᠤ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠡᠷᠲᠡ ᠦᠶᠡ ᠶ᠋ᠢᠨ ᠦᠯᠡᠳᠡᠴᠡ ᠳ᠋ᠦ᠍ ᠬᠦᠷᠲᠡᠯᠡ ᠰᠠᠮᠫᠠᠨ ᠬᠠᠲᠠᠭᠰᠠᠨ ᠪᠠᠢᠳᠠᠭ᠃ ᠰᠠᠮᠫᠠᠨ ᠡᠨᠡ ᠣᠯᠠᠨ ᠵᠠᠭᠤᠨ ᠵᠢᠯ ᠬᠡᠷᠡᠭᠯᠡᠭᠳᠡᠵᠦ ᠢᠷᠡᠬᠦ ᠳ᠋ᠡᠭᠡᠨ ᠥᠭᠡᠷᠡᠴᠢᠯᠡᠭᠳᠡᠭᠡ ᠦᠭᠡᠢ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠲᠤᠢᠯ ᠤ᠋ᠨ ᠪᠣᠯᠪᠠᠰᠤᠷᠠᠩᠭᠤᠢ ᠵᠠᠩᠭᠢᠯᠠᠭᠠ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠪᠢᠯᠡ᠃ ᠳᠡᠪᠡᠯ ᠮᠠᠯᠠᠭᠠᠢ ᠶ᠋ᠢᠨ ᠰᠠᠮᠫᠠᠨ ᠢ᠋ ᠵᠠᠩᠭᠢᠳᠬᠤ ᠶ᠋ᠢᠨ ᠲᠤᠯᠠᠳᠠ ᠤᠷᠲᠤ ᠨᠠᠷᠢᠨ ᠪᠦᠴᠡ ᠡᠮᠬᠡᠷᠢᠳᠬᠦ ᠪᠤᠶᠤ ᠡᠰᠡᠪᠡᠯ ᠤᠲᠠᠰᠤ ᠪᠡᠯᠡᠳᠬᠡᠵᠦ ᠡᠬᠢᠯᠡᠭᠡᠳ ᠭᠠᠭᠴᠠ ᠬᠤᠷᠤᠭᠤᠨ ᠳ᠋ᠠᠭᠠᠨ ᠬᠦᠪᠦᠷᠬᠡᠢ ᠭᠣᠭᠴᠣᠭᠠ ᠵᠠᠩᠭᠢᠯᠠᠭᠠ ᠭᠠᠷᠭᠠᠵᠤ ᠲᠡᠭᠦᠨ ᠢ᠋ ᠪᠡᠨ ᠡᠷᠭᠢᠭᠦᠯᠦᠨ ᠬᠤᠷᠤᠭᠤᠨ ᠠ᠋ᠴᠠ ᠪᠠᠨ ᠰᠤᠭᠤᠯᠵᠤ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠵᠥᠷᠢᠭᠦᠯᠡᠨ ᠡᠬᠢᠨ ᠦ᠌ ᠵᠠᠩᠭᠢᠯᠠᠭᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠤᠷᠤᠭᠤ ᠵᠥᠷᠢᠭᠦᠯᠡᠨ ᠣᠷᠣᠭᠤᠯᠵᠤ ᠴᠢᠩᠭᠠᠯᠠᠨᠠ᠃ ᠴᠢᠩᠭᠠᠯᠠᠬᠤ ᠳ᠋ᠠᠭᠠᠨ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠶ᠋ᠢᠨ ᠤᠷᠲᠤ ᠪᠣᠭᠣᠨᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠪᠣᠭᠣᠨᠢ ᠣᠷᠬᠢᠵᠤ ᠨᠥᠭᠦᠭᠡ ᠳᠠᠭᠠᠷᠢᠬᠤ ᠦᠵᠦᠭᠦᠷ ᠤᠷᠤᠭᠤ ᠨᠢ ᠬᠥᠭᠡᠭᠡᠵᠦ ᠱᠥᠪᠥᠭᠡᠷ ᠲᠠᠲᠠᠵᠤ ᠴᠢᠩᠭᠠᠯᠠᠨᠠ᠃
ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠳᠠᠩ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠲᠣᠪᠴᠢ ᠶ᠋ᠢ ᠥᠭᠡᠷᠡ ᠬᠡᠯᠪᠡᠷᠢ ᠪᠡᠷ ᠵᠠᠩᠭᠢᠳᠬᠤ ᠪᠣᠯᠤᠯᠠ᠃ ᠡᠭᠦᠨ ᠳ᠋ᠦ᠍ ᠬᠠᠪᠲᠠᠭᠠᠢ᠂ ᠤᠭᠠᠯᠵᠠ ᠮᠠᠶᠢᠭ ᠤ᠋ᠨ᠂ ᠴᠡᠴᠡᠭ ᠦ᠋ᠨ ᠵᠠᠩᠭᠢᠯᠠᠭᠠ ᠵᠡᠷᠭᠡ ᠶ᠋ᠢ ᠬᠡᠷᠡᠭᠯᠡᠬᠦ ᠪᠣᠯᠤᠭᠰᠠᠨ ᠨᠢ ᠣᠷᠴᠢᠨ ᠦᠶᠡ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠤᠷᠠ ᠬᠢᠴᠡ ᠰᠠᠢᠲᠠᠢ ᠭᠣᠶᠣᠮᠰᠣᠭ ᠵᠠᠩᠭᠢᠯᠠᠭᠠ ᠨᠤᠭᠤᠳ ᠶᠤᠮ᠃
ᠵᠢᠷᠤᠭ61
(1) ᠰᠠᠮᠫᠠᠨ ᠤ᠋ ᠠᠩᠬᠠᠨ ᠤ᠋ ᠭᠣᠭᠴᠣᠭᠠ ᠵᠠᠩᠭᠢᠯᠠᠭᠠ
(2) ᠡᠷᠭᠢᠭᠦᠯᠵᠦ ᠬᠠᠷᠠᠭᠤᠯᠤᠭᠰᠠᠨ ᠪᠠᠢᠳᠠᠯ
(3) (4) ᠬᠣᠶᠠᠷ ᠦᠵᠦᠭᠦᠷ ᠢ᠋ ᠵᠥᠷᠢᠭᠦᠯᠦᠨ ᠪᠠᠢᠪᠠᠯ ᠵᠣᠬᠢᠬᠤ ᠨᠦᠬᠡᠨ ᠳ᠋ᠦ᠍ᠨᠢ ᠣᠷᠣᠭᠤᠯᠤᠨ ᠵᠠᠩᠭᠢᠳᠴᠤ ᠪᠠᠢᠭᠠ ᠪᠠᠢᠳᠠᠯ
ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠤᠪᠴᠠᠰᠤᠨ ᠤ᠋ ᠴᠢᠮᠡᠭ ᠲᠦ᠍ ᠮᠣᠭᠣᠯᠴᠣᠭ ᠪᠤᠶᠤ ᠴᠠᠴᠤᠭ ᠤ᠋ᠨ ᠵᠠᠩᠭᠢᠯᠠᠭᠠ ᠶ᠋ᠢ ᠬᠡᠷᠡᠭᠯᠡᠳᠡᠭ᠃ ᠮᠣᠭᠣᠯᠴᠣᠭ ᠵᠠᠩᠭᠢᠯᠠᠭᠠ ᠭᠡᠳᠡᠭ ᠨᠠᠷᠢᠨ ᠪᠦᠴᠡ ᠶ᠋ᠢ ᠳᠤᠭᠤᠢᠯᠠᠨ ᠭᠣᠶᠣᠮᠰᠣᠭ ᠬᠡᠯᠪᠡᠷᠢ ᠳ᠋ᠦ᠍ ᠣᠷᠣᠭᠤᠯᠵᠤ ᠴᠢᠮᠡᠭᠯᠡᠬᠦ ᠵᠠᠩᠭᠢᠯᠠᠭᠠ ᠪᠥᠭᠡᠳ ᠬᠤᠪᠴᠠᠰᠤ᠂ ᠡᠮᠡᠭᠡᠯ᠂ ᠬᠠᠵᠠᠭᠠᠷ᠂ ᠨᠣᠭᠲᠣ ᠶ᠋ᠢᠨ ᠲᠣᠨᠣᠭ ᠲᠤ ᠬᠡᠷᠡᠭᠯᠡᠨᠡ᠃ ᠮᠥᠨ ᠴᠠᠴᠤᠭᠠᠨ ᠵᠠᠩᠭᠢᠯᠠᠭᠠ ᠶ᠋ᠢ ᠤᠲᠠᠰᠤ᠂ ᠰᠤᠷ᠂ ᠳᠠᠪᠤᠤ ᠶ᠋ᠢᠨ ᠨᠠᠷᠢᠨ ᠥᠭᠡᠳᠡᠰᠦ ᠪᠡᠷ ᠬᠢᠬᠦ ᠪᠥᠭᠡᠳ ᠬᠡᠰᠡᠭ ᠤᠲᠠᠰᠤ ᠪᠤᠶᠤ ᠴᠠᠴᠤᠭ ᠬᠢᠬᠦ ᠨᠠᠷᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠨᠡᠢᠯᠡᠭᠦᠯᠦᠨ ᠤᠲᠠᠰᠤ ᠪᠠᠷ ᠣᠷᠢᠶᠠᠵᠤ ᠨᠠᠷᠢᠬᠠᠨ ᠲᠣᠯᠣᠭᠠᠢ ᠭᠠᠷᠭᠠᠭᠠᠳ ᠲᠡᠭᠦᠨ ᠢ᠋ ᠪᠡᠨ ᠡᠷᠭᠢᠭᠦᠯᠵᠦ ᠤᠲᠠᠰᠤ ᠪᠠᠷ ᠢ᠋ᠶ᠋ᠠᠨ ᠪᠦᠷᠬᠦᠭᠦᠯᠵᠦ ᠲᠣᠯᠣᠭᠠᠢ ᠭᠠᠷᠭᠠᠨ ᠲᠣᠯᠣᠭᠠᠢ ᠪᠠᠨ ᠤᠲᠠᠰᠤ ᠪᠠᠷ ᠵᠢᠭᠳᠡ ᠣᠷᠢᠶᠠᠵᠤ ᠪᠡᠬᠢᠯᠡᠨᠡ᠃ ᠴᠠᠴᠤᠭ ᠢ᠋ ᠬᠤᠪᠴᠠᠰᠤ ᠬᠤᠨᠠᠷ᠂ ᠪᠤᠷᠬᠠᠨ ᠤ᠋ ᠬᠥᠷᠥᠭ ᠴᠢᠮᠡᠬᠦ ᠂ ᠳᠠᠮᠷᠢᠨ ᠵᠠᠪᠳᠤᠩ᠂ ᠮᠠᠯᠠᠭᠠᠢ ᠶ᠋ᠢᠨ ᠵᠠᠪᠳᠤᠩ ᠪᠦᠴᠡ᠂ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠭᠣᠶᠣᠯ ᠴᠢᠮᠡᠭᠯᠡᠯ ᠦ᠋ᠨ ᠵᠡᠭᠦᠯᠲᠡ᠂ ᠮᠣᠷᠢᠨ ᠤ᠋ ᠬᠤᠳᠠᠷᠭᠠ ᠶ᠋ᠢᠨ ᠴᠢᠮᠡᠭ ᠲᠦ᠍ ᠬᠡᠷᠡᠭᠯᠡᠳᠡᠭ᠃
ᠠᠮᠠᠨ ᠬᠦᠵᠦᠭᠦᠦ ᠵᠠᠩᠭᠢᠯᠠᠭᠠ ᠡᠨᠡ ᠵᠠᠩᠭᠢᠯᠠᠭᠠ ᠶ᠋ᠢ ᠭᠣᠶᠣᠯ ᠴᠢᠮᠡᠭᠯᠡᠯ ᠪᠤᠰᠤᠳ ᠪᠡᠬᠢᠯᠡᠭᠰᠡᠨ ᠦ᠌ ᠬᠣᠶᠠᠷ ᠶᠠᠩᠵᠤ ᠪᠠᠷ ᠬᠡᠷᠡᠭᠯᠡᠳᠡᠭ ᠪᠥᠭᠡᠳ ᠨᠢᠭᠡ ᠨᠢ ᠭᠣᠣᠯ ᠤ᠋ᠨ ᠳᠡᠭᠡᠭᠦᠷ ᠳᠣᠭᠤᠤᠷ ᠨᠢ ᠣᠷᠣᠭᠤᠯᠤᠨ ᠪᠥᠭᠡᠵᠢᠯᠡᠨ ᠰᠢᠬᠠᠵᠤ ᠵᠠᠩᠭᠢᠳᠳᠠᠭ᠃
ᠵᠢᠷᠤᠭ62
(1) ᠬᠠᠪᠲᠠᠭᠠᠢ ᠵᠠᠩᠭᠢᠯᠠᠭᠠ
(2) ᠴᠡᠴᠡᠭ ᠦ᠋ᠨ ᠵᠠᠩᠭᠢᠯᠠᠭᠠ
ᠵᠢᠷᠤᠭ63
ᠴᠠᠴᠤᠭ ᠤ᠋ᠨ ᠵᠠᠩᠭᠢᠯᠠᠭᠠ( ᠪᠤᠮᠪᠠ ᠲᠠᠢ)
ᠵᠠᠩᠭᠢᠳᠬᠤ ᠨᠠᠷᠢᠨ ᠪᠦᠴᠡ ᠪᠡᠨ( ᠰᠠᠪᠢᠬᠢ᠂ ᠤᠲᠠᠰᠤ᠂ ᠳᠠᠪᠤᠤ ᠮᠡᠲᠦ) ᠬᠣᠶᠠᠷ ᠪᠦᠲᠦᠨ ᠣᠷᠢᠶᠠᠵᠤ ᠳᠠᠷᠠᠭᠠ ᠨᠢ ᠵᠥᠷᠢᠭᠦᠯᠡᠵᠦ ᠪᠠᠷᠠᠭᠤᠨ ᠵᠡᠭᠦᠨ ᠲᠡᠰᠢ ᠨᠢ ᠰᠦᠯᠵᠢᠭᠡᠳ ᠭᠤᠷᠪᠠᠳᠠᠬᠢ ᠪᠦᠴᠡ ᠪᠡᠨ ᠬᠣᠶᠠᠷ ᠰᠦᠯᠵᠢᠶᠡᠰᠦ ᠶ᠋ᠢᠨ ᠳᠤᠮᠳᠠᠭᠤᠷ ᠨᠢ ᠬᠣᠶᠠᠷ ᠳᠠᠰᠢ ᠪᠠᠨ ᠳᠠᠬᠢᠨ ᠳᠠᠪᠲᠠᠨ ᠰᠦᠯᠵᠢᠬᠦ ᠳ᠋ᠦ᠍ ᠭᠤᠷᠮᠤᠰᠤᠨ ᠠᠮᠠᠨ ᠬᠦᠵᠦᠭᠦᠦ ᠵᠠᠩᠭᠢᠯᠠᠭᠠ ᠪᠣᠢ ᠪᠣᠯᠤᠨᠠ᠃
ᠪᠠᠯ ᠵᠠᠩᠭᠢᠯᠠᠭᠠ ᠵᠠᠩᠭᠢᠳᠬᠤ ᠨᠠᠷᠢᠨ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷ ᠲᠠᠭᠠᠨ ᠭᠣᠭᠴᠣᠭᠠ ᠡᠭᠦᠰᠬᠡᠨ ᠪᠠᠷᠢᠭᠠᠳ ᠡᠬᠢᠯᠡᠭᠡᠳ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠭᠣᠭᠴᠣᠭᠠᠨ ᠳᠤᠮᠳᠠᠭᠤᠷ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠭᠣᠭᠴᠣᠭᠠ ᠶ᠋ᠢ ᠰᠦᠪᠡᠯᠡᠭᠡᠳ ᠳᠠᠷᠠᠭᠠ ᠨᠢ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠰᠦᠪᠡᠯᠡᠨ ᠭᠠᠷᠤᠭᠰᠠᠨ ᠭᠣᠭᠴᠣᠭᠠᠨ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠴᠡ ᠨᠢ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠭᠣᠭᠴᠤᠭᠠᠯᠠᠳᠠᠨ ᠭᠠᠷᠭᠠᠭᠠᠳ ᠳᠡᠭᠡᠷᠡ ᠡᠴᠡ ᠨᠢ ᠨᠤᠭᠤᠯᠤᠭᠰᠠᠨ ᠭᠣᠭᠴᠣᠭᠠᠨ ᠤ᠋ ᠪᠠᠨ ᠦᠵᠦᠭᠦᠷ ᠢ᠋ ᠭᠣᠭᠴᠣᠭᠠᠨ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠡᠬᠢᠨ ᠦ᠌ ᠦᠵᠦᠭᠦᠷ ᠦ᠋ᠨ ᠭᠣᠭᠴᠣᠭᠠ ᠶ᠋ᠢ ᠳᠠᠪᠬᠤᠷ ᠢ᠋ᠶ᠋ᠠᠷ ᠨᠢ ᠪᠤᠴᠠᠭᠠᠵᠤ ᠡᠬᠢᠨ ᠦ᠌ ᠣᠷᠣᠭᠰᠠᠨ ᠭᠣᠭᠴᠣᠭᠠ ᠪᠠᠷ ᠭᠠᠷᠭᠠᠨ ᠵᠠᠩᠭᠢᠳᠤᠨᠠ᠃ ᠡᠨᠡ ᠵᠠᠩᠭᠢᠯᠠᠭᠠ ᠶ᠋ᠢ ᠵᠥᠪ ᠭᠡᠵᠦ ᠴᠢᠳᠠᠪᠠᠯ ᠪᠠᠯ ᠵᠠᠩᠭᠢᠯᠠᠭᠠ ᠡᠭᠦᠰᠦᠨᠡ᠃ ᠴᠡᠴᠡᠭ ᠦ᠋ᠨ ᠵᠠᠩᠭᠢᠯᠠᠭᠠ ᠭᠡᠳᠡᠭ ᠪᠠᠯ ᠵᠠᠩᠭᠢᠯᠠᠭᠠ ᠶ᠋ᠢ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠨᠢ ᠣᠯᠠᠨ ᠤᠳᠠᠭᠠ ᠳᠠᠪᠲᠠᠬᠤ ᠳ᠋ᠤ᠌ ᠴᠡᠴᠡᠭ ᠬᠡᠯᠪᠡᠷᠢ ᠲᠡᠢ ᠪᠣᠯᠬᠤ ᠪᠠ ᠡᠭᠦᠨ ᠢ᠋ ᠴᠡᠴᠡᠭ ᠵᠠᠩᠭᠢᠯᠠᠭᠠ ᠭᠡᠨᠡ᠃
ᠵᠢᠷᠤᠭ64
ᠠᠮᠠᠨ ᠬᠦᠵᠦᠭᠦᠦ ᠵᠠᠩᠭᠢᠯᠠᠭᠠ
ᠥᠯᠵᠡᠢ ᠲᠤᠤᠬᠠᠢ ᠵᠠᠩᠭᠢᠳᠬᠤ ᠥᠯᠵᠡᠢ ᠲᠤᠤᠬᠠᠢ ᠵᠠᠩᠭᠢᠳᠬᠤ ᠳ᠋ᠠᠭᠠᠨ ᠵᠡᠭᠦᠨ ᠭᠠᠷ ᠲᠠᠭᠠᠨ ᠨᠢᠭᠡ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠬᠣᠶᠠᠷ ᠲᠡᠩᠴᠡᠭᠦᠦ ᠬᠡᠮᠵᠢᠶᠡ ᠲᠡᠢ ᠭᠣᠭᠴᠣᠭᠠ ᠠᠳᠬᠤᠵᠤ ᠡᠬᠢᠨ ᠦ᠌ ᠭᠣᠭᠴᠤᠭᠠᠨ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠰᠦᠪᠡᠯᠡᠨ ᠭᠠᠷᠭᠠᠵᠤ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠭᠣᠭᠴᠤᠭᠠᠨ ᠳᠡᠭᠡᠷᠡ ᠡᠴᠡ ᠨᠢ ᠳᠣᠭᠣᠭᠰᠢ ᠨᠢ ᠬᠣᠶᠠᠷ ᠭᠣᠭᠴᠣᠭᠠ ᠶ᠋ᠢ ᠰᠦᠪᠡᠯᠡᠨ ᠭᠠᠷᠭᠠᠭᠠᠳ ᠦᠵᠦᠭᠦᠷ ᠡᠴᠡ ᠪᠡᠨ ᠪᠤᠯᠤᠩ ᠳ᠋ᠤᠨᠢ ᠪᠢᠲᠡᠭᠦᠦ ᠭᠣᠭᠴᠣᠭᠠ ᠡᠭᠦᠰᠬᠡᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠭᠣᠭᠴᠤᠭᠠᠨ ᠳᠤᠮᠳᠠᠭᠤᠷ ᠳᠡᠭᠡᠷᠡ ᠲᠠᠯᠠ ᠠ᠋ᠴᠠ ᠰᠢᠷᠭᠤᠭᠰᠠᠨ ᠬᠣᠶᠠᠷ ᠭᠣᠭᠴᠤᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠣᠷᠣᠭᠤᠯᠤᠨ ᠡᠬᠢᠨ ᠦ᠌ ᠭᠣᠭᠴᠣᠭᠠ ᠶ᠋ᠢ ᠳᠠᠷᠤᠵᠤ ᠪᠤᠴᠠᠭᠠᠵᠤ ᠳᠡᠭᠡᠳᠦ ᠭᠣᠭᠴᠤᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠳᠠᠬᠢᠨ ᠭᠣᠭᠴᠣᠭᠠ ᠡᠭᠦᠰᠬᠡᠨ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠳᠡᠭᠡᠳᠦ ᠭᠣᠭᠴᠤᠭᠠᠨ ᠤ᠋ ᠳᠤᠮᠳᠠᠭᠤᠷ ᠣᠷᠣᠭᠰᠠᠨ ᠦᠵᠦᠭᠦᠷ ᠢ᠋ ᠳᠠᠪᠬᠤᠷ ᠢ᠋ᠶ᠋ᠠᠷ ᠨᠢ ᠳᠠᠷᠤᠵᠤ ᠭᠠᠷᠭᠠᠭᠠᠳ ᠦᠵᠦᠭᠦᠷ ᠢ᠋ᠶ᠋ᠡᠷ ᠨᠢ ᠭᠣᠭᠴᠣᠭᠠ ᠡᠭᠦᠰᠬᠡᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠷᠭᠤᠭᠰᠠᠨ ᠬᠣᠶᠠᠷ ᠭᠣᠭᠴᠤᠭᠠᠨ ᠤ᠋ ᠳᠤᠮᠳᠠᠭᠤᠷ ᠬᠥᠨᠳᠡᠯᠡᠨ ᠳᠥᠷᠪᠡᠨ ᠭᠣᠭᠴᠣᠭᠠᠨ ᠤ᠋ ᠳᠡᠭᠡᠭᠦᠷ ᠳᠣᠭᠤᠤᠷ ᠨᠢ ᠰᠦᠯᠵᠢᠨ ᠪᠤᠴᠠᠭᠠᠵᠤ ᠭᠠᠷᠭᠠᠨᠠ᠃ ᠲᠣᠭᠣᠷᠢᠭᠰᠠᠨ ᠪᠢᠲᠡᠭᠦᠦ ᠭᠣᠭᠴᠣᠭᠠ ᠪᠠᠨ ᠲᠡᠩᠴᠡᠭᠦᠯᠦᠨ ᠴᠢᠩᠭᠠᠯᠠᠬᠤ ᠳ᠋ᠤ᠌ ᠥᠯᠵᠡᠢ ᠲᠤᠤᠬᠠᠢ ᠪᠣᠯᠤᠨᠠ᠃
ᠵᠢᠷᠤᠭ 65
ᠲᠤᠤᠬᠠᠢ ᠵᠠᠩᠭᠢᠯᠠᠭᠠ
ᠵᠢᠷᠤᠭ 66
ᠡᠷᠪᠡᠬᠡᠢ ᠵᠠᠩᠭᠢᠯᠠᠭᠠ
ᠡᠷᠪᠡᠬᠡᠢ ᠵᠠᠩᠭᠢᠯᠠᠭᠠ ᠡᠨᠡ ᠵᠠᠩᠭᠢᠯᠠᠭᠠ ᠨᠢ ᠥᠯᠵᠡᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠣᠶᠠᠷ᠂ ᠬᠣᠶᠠᠷ ᠭᠣᠭᠴᠣᠭᠠ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠵᠠᠩᠭᠢᠳᠤᠨ ᠠᠮᠠᠨ ᠬᠦᠵᠦᠭᠦᠦ ᠪᠤᠶᠤ ᠵᠢᠷᠢᠮᠦᠨ ᠤᠭᠠᠯᠵᠠ ᠡᠭᠦᠰᠬᠡᠨ ᠵᠠᠩᠭᠢᠳᠤᠨᠠ᠃ ᠵᠢᠷᠢᠮᠦᠨ ᠤᠭᠠᠯᠵᠠ ᠡᠭᠦᠰᠬᠡᠬᠦ ᠭᠣᠣᠯ ᠤ᠋ᠨ ᠭᠣᠭᠴᠤᠭᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠ ᠶ᠋ᠢ ᠤᠷᠲᠤ ᠭᠣᠭᠴᠣᠭᠠᠯᠠᠳᠠᠨ ᠰᠦᠯᠵᠢᠭᠡᠳ ᠳᠠᠷᠠᠭᠠᠬᠢ ᠶ᠋ᠢᠨ ᠭᠣᠭᠴᠣᠭᠠ ᠭᠠᠷᠭᠠᠬᠤ ᠳ᠋ᠠᠭᠠᠨ ᠵᠢᠷᠤᠭ ᠲᠤ᠌ ᠦᠵᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠳᠡᠰ ᠳᠠᠷᠠᠭᠠ ᠪᠠᠷ ᠳᠡᠭᠡᠭᠦᠷ ᠳᠣᠭᠤᠤᠷ ᠨᠢ ᠣᠷᠣᠭᠤᠯᠵᠤ ᠵᠠᠩᠭᠢᠳᠤᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠡᠷᠪᠡ ᠵᠠᠩᠭᠢᠯᠠᠭᠠ ᠵᠥᠪ ᠬᠢᠭᠳᠡᠭᠰᠡᠨ ᠪᠣᠯ ᠳᠠᠯᠠᠪᠴᠢ ᠲᠠᠢ ᠡᠷᠪᠡᠬᠡᠢ ᠮᠠᠶᠢᠭ ᠤ᠋ᠨ ᠬᠡ ᠭᠠᠷᠤᠨᠠ᠃
ᠵᠢᠷᠤᠭ 67
ᠬᠥᠨᠳᠡᠯᠡᠨ ᠲᠤᠤᠬᠠᠢ ᠵᠠᠩᠭᠢᠯᠠᠭᠠ
ᠬᠥᠨᠳᠡᠯᠡᠨ ᠲᠤᠤᠬᠠᠢ ᠵᠠᠩᠭᠢᠯᠠᠭᠠ ᠡᠭᠦᠨ ᠢ᠋ ᠵᠠᠩᠭᠢᠳᠬᠤ ᠳ᠋ᠠᠭᠠᠨ ᠵᠡᠭᠦᠨ ᠭᠠᠷ ᠲᠠᠭᠠᠨ ᠨᠢᠭᠡ ᠤᠷᠲᠤ ᠭᠣᠭᠴᠣᠭᠠ ᠭᠠᠷᠭᠠᠨ ᠳᠡᠭᠡᠭᠰᠢ ᠨᠢ ᠤᠷᠲᠤ ᠪᠣᠭᠣᠨᠢ ᠪᠠᠷ ᠲᠡᠩᠴᠡᠭᠦᠦ ᠬᠡᠮᠵᠢᠶᠡ ᠲᠡᠢ ᠳᠥᠷᠪᠡᠨ ᠭᠣᠭᠴᠣᠭᠠ ᠰᠦᠪᠡᠯᠡᠨ ᠭᠠᠷᠭᠠᠬᠤ ᠶ᠋ᠢᠨ ᠬᠠᠮᠲᠤ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠨᠢᠭᠡ ᠤᠷᠲᠤ ᠭᠣᠭᠴᠣᠭᠠ ᠭᠠᠷᠭᠠᠨᠠ᠃ ᠪᠠᠷᠠᠭᠤᠨ ᠲᠠᠯᠠ ᠨᠢ ᠰᠦᠪᠡᠯᠡᠨ ᠭᠠᠷᠭᠠᠭᠰᠠᠨ ᠭᠣᠭᠴᠣᠭᠠᠨ ᠤ᠋ ᠦᠵᠦᠭᠦᠷ ᠢ᠋ᠶ᠋ᠡᠷ ᠭᠣᠭᠴᠣᠭᠠ ᠭᠠᠷᠭᠠᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠪᠣᠰᠤᠭᠠ ᠭᠣᠭᠴᠣᠭᠠᠨ ᠤ᠋ ᠳᠤᠮᠳᠠᠭᠤᠷ᠂ ᠳᠡᠭᠡᠳᠦ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠ ᠶ᠋ᠢ ᠪᠢᠲᠡᠭᠦᠦ ᠬᠣᠶᠠᠷ ᠤᠳᠠᠭᠠ ᠳᠠᠷᠤᠵᠤ᠂ ᠳᠡᠭᠡᠳᠦ ᠲᠠᠯᠠ ᠳ᠋ᠠᠭᠠᠨ ᠭᠣᠭᠴᠣᠭᠠ ᠡᠭᠦᠰᠬᠡᠨ ᠳᠡᠭᠡᠭᠰᠢ ᠨᠢ ᠭᠠᠷᠭᠠᠨᠠ᠃ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠵᠠᠬᠠ ᠶ᠋ᠢᠨ ᠭᠣᠭᠴᠣᠭᠠᠨ ᠳᠤᠮᠳᠠᠭᠤᠷ ᠴᠠᠰᠢ ᠭᠠᠷᠭᠠᠨ ᠮᠥᠨ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠᠨ ᠳᠤᠮᠳᠠᠭᠤᠷ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠ ᠶ᠋ᠢ ᠪᠢᠲᠡᠭᠦᠦ ᠳᠠᠷᠤᠵᠤ ᠭᠠᠷᠭᠠᠭᠠᠳ ᠭᠣᠭᠴᠣᠭᠠ ᠨᠤᠭᠤᠳ ᠢ᠋ᠶ᠋ᠠᠨ ᠴᠢᠩᠭᠠᠯᠠᠨᠠ᠃
ᠡᠭᠦᠨ ᠡᠴᠡ ᠦᠨᠳᠦᠰᠦᠯᠡᠨ ᠪᠤᠮᠪᠠᠨ ᠪᠠ ᠪᠤᠰᠤᠳ ᠮᠣᠭᠣᠯᠴᠣᠭ ᠵᠠᠩᠭᠢᠯᠠᠭᠠ ᠶ᠋ᠢ ᠭᠠᠷᠭᠠᠨ ᠵᠠᠩᠭᠢᠳᠴᠤ ᠪᠣᠯᠤᠨᠠ᠃
ᠥᠯᠵᠡᠢ ᠵᠠᠩᠭᠢᠳᠬᠤ ᠡᠭᠦᠨ ᠢ᠋ ᠵᠠᠩᠭᠢᠳᠬᠤ ᠳ᠋ᠤ᠌ ᠤᠲᠠᠰᠤ ᠪᠠᠷ ᠪᠤᠶᠤ ᠲᠣᠷᠭᠠ ᠪᠠᠷ ᠵᠠᠩᠭᠢᠳᠤᠨᠠ᠃ ᠬᠡᠷᠪᠡ ᠲᠣᠷᠭᠠ ᠪᠠᠷ ᠲᠠᠯᠪᠢᠬᠤ ᠪᠣᠯ ᠥᠯᠵᠡᠢ ᠶ᠋ᠢᠨ ᠥᠨᠴᠥᠭ᠂ ᠪᠤᠯᠤᠩ ᠢ᠋ ᠲᠡᠭᠰᠢ ᠴᠡᠪᠡᠷ ᠭᠠᠷᠭᠠᠨ ᠨᠠᠭᠠᠵᠤ ᠪᠡᠯᠡᠳᠬᠡᠭᠡᠳ ᠴᠢᠮᠡᠭᠯᠡᠬᠦ ᠡᠳ᠋ ᠦ᠋ᠨ ᠢ᠋ᠶ᠋ᠡᠨ ᠵᠠᠢ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠲᠠᠯᠪᠢᠵᠤ ᠣᠶᠣᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ᠂ ᠣᠶᠤᠨᠪᠠᠲᠤ᠂ ᠭᠦᠨᠳᠦᠰᠠᠩᠪᠤᠤ ᠂ ᠡᠷᠳᠡᠨᠢᠭᠣᠤᠠ᠂ ᠭᠡᠭᠡᠷᠡᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ