ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ ᠤᠷᠠᠯᠠᠯ05ᠨᠡᠬᠡᠮᠡᠯ
277ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ ᠤᠷᠠᠯᠠᠯ05ᠨᠡᠬᠡᠮᠡᠯ
ᠬᠥᠮᠦᠨ ᠦ᠌ ᠨᠡᠢᠭᠡᠮ ᠦ᠋ᠨ ᠤᠷᠠᠯᠠᠨ ᠪᠦᠲᠦᠭᠡᠬᠦ ᠠᠵᠢᠯ ᠳ᠋ᠤ᠌ ᠨᠡᠬᠡᠮᠡᠯ ᠭᠠᠷᠤᠯ᠂ ᠡᠭᠦᠰᠦᠯ᠂ ᠡᠵᠡᠯᠡᠬᠦ ᠪᠠᠢᠷᠢ ᠪᠠᠷ ᠢ᠋ᠶ᠋ᠠᠨ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠶᠠᠪᠤᠳᠠᠭ ᠲᠤᠬᠠᠢ ᠳᠡᠭᠡᠷᠡ ᠥᠭᠦᠯᠡᠭᠰᠡᠨ ᠪᠢᠯᠡ᠃ ᠨᠡᠬᠡᠮᠡᠯ ᠢ᠋ ᠭᠠᠭᠴᠠ ᠤᠬᠠᠭᠠᠨᠲᠤ ᠬᠥᠮᠦᠨ ᠤᠷᠠᠯᠠᠨ ᠪᠦᠲᠦᠭᠡᠬᠦ ᠦᠭᠡᠢ ᠪᠥᠭᠡᠳ ᠶᠠᠯᠢᠮ ᠦᠭᠡᠢ ᠥᠴᠦᠬᠡᠨ ᠬᠦᠷᠢ ᠬᠣᠷᠣᠬᠠᠢ ᠶ᠋ᠢᠨ ᠠᠪᠠᠭᠠᠯᠳᠠᠢ ᠬᠦᠷᠲᠡᠯᠡ 8—16 ᠬᠣᠨᠣᠭ ᠤ᠋ᠨ ᠪᠣᠢᠵᠢᠯᠲᠠ ᠶ᠋ᠢᠨ ᠦᠶᠡ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠬᠣᠷᠭᠣᠳᠠᠬᠤ ᠪᠠᠢᠷᠢ ᠶ᠋ᠢ ᠨᠡᠬᠡᠨ ᠪᠡᠶᠡ ᠬᠠᠮᠠᠭᠠᠯᠠᠨ ᠪᠡᠶᠡ ᠭᠦᠢᠴᠡᠭᠰᠡᠨ ᠡᠷᠪᠡᠬᠡᠢ ᠪᠣᠯᠳᠠᠭ᠃ ᠲᠡᠭᠦᠨᠴᠢᠯᠡᠨ ᠠᠭᠠᠯᠵᠢ ᠥᠪᠡᠷ ᠦ᠋ᠨ ᠳᠡᠭᠦᠵᠢᠯᠡᠨ ᠬᠣᠷᠭᠣᠳᠠᠬᠤ ᠲᠣᠣᠷ᠂ ᠤᠷᠠᠨ ᠰᠢᠪᠠᠭᠤ ᠦᠰᠦ ᠨᠣᠣᠰᠣ ᠴᠤᠭᠯᠠᠭᠤᠯᠵᠤ ᠥᠨᠳᠡᠭᠡ ᠠᠩᠭᠠᠬᠠᠢ ᠪᠠᠨ ᠪᠣᠢᠵᠢᠬᠤᠯᠬᠤ ᠦᠵᠡᠰᠬᠦᠯᠡᠩᠲᠦ ᠰᠠᠢᠬᠠᠨ ᠡᠭᠦᠷ ᠪᠦᠲᠦᠭᠡᠳᠡᠭ ᠢ᠋ ᠪᠢᠳᠡ ᠮᠡᠳᠡᠨᠡ᠃ ᠡᠭᠦᠨ ᠡᠴᠡ ᠦᠵᠡᠬᠦ ᠳ᠋ᠦ᠍ ᠨᠡᠬᠡᠮᠡᠯ ᠭᠡᠳᠡᠭ ᠡᠩ ᠦ᠋ᠨ ᠮᠥᠷᠳᠡᠯᠡ ᠪᠡᠨ ᠪᠠᠶᠠᠨ ᠪᠠᠢᠭᠠᠯᠢ ᠶ᠋ᠢᠨ ᠥᠴᠦᠬᠡᠨ ᠵᠢᠵᠢᠭ ᠠᠭᠠᠯᠵᠢ᠂ ᠰᠢᠪᠠᠭᠤ ᠠ᠋ᠴᠠ ᠡᠬᠢᠯᠡᠭᠡᠳ ᠠᠤᠭᠠ ᠶᠡᠬᠡ ᠶ᠋ᠢ ᠪᠦᠲᠦᠭᠡᠵᠦ ᠴᠢᠳᠠᠳᠠᠭ ᠠᠷᠭᠠ ᠤᠬᠠᠭᠠᠨᠲᠤ ᠬᠥᠮᠦᠨ ᠦ᠌ ᠤᠷᠠᠯᠠᠨ ᠪᠦᠲᠦᠭᠡᠬᠦ ᠦᠢᠯᠡ ᠶ᠋ᠢᠨ ᠨᠢᠭᠡ ᠪᠣᠯᠵᠠᠢ᠃
ᠦᠰᠦ᠂ ᠲᠣᠷᠭᠠᠨ ᠮᠢᠨᠳᠠᠰᠤ᠂ ᠬᠡᠪᠢᠰ᠂ ᠪᠠᠭᠠᠲᠤᠷ ᠤ᠋ᠨ ᠲᠡᠮᠦᠷ ᠬᠤᠶᠠᠭ᠂ ᠲᠡᠢᠨ ᠦ᠌ ᠦᠶᠡ ᠶ᠋ᠢᠨ ᠬᠣᠲᠠ ᠶ᠋ᠢᠨ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠠᠭᠠᠷ ᠤ᠋ᠨ ᠲᠣᠣᠷ ᠬᠦᠷᠲᠡᠯᠡ ᠤᠷᠠᠯᠠᠨ ᠪᠦᠲᠦᠭᠡᠬᠦ ᠳ᠋ᠡᠭᠡᠨ ᠮᠠᠰᠢᠨ ᠲᠧᠭᠨᠢᠭ ᠬᠥᠭᠵᠢᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠲᠣᠭᠠᠯᠠᠵᠤ ᠪᠠᠷᠠᠰᠢ ᠦᠭᠡᠢ ᠣᠯᠠᠨ ᠵᠠᠩᠭᠢᠯᠠᠭᠠ ᠰᠦᠯᠵᠢᠶᠡ ᠶ᠋ᠢᠨ ᠰᠢᠷᠬᠡᠭ ᠪᠦᠷᠢ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠬᠢᠵᠦ ᠭᠦᠢᠴᠡᠳᠬᠡᠵᠦ ᠪᠠᠢᠵᠠᠢ᠃ ᠣᠷᠴᠢᠨ ᠦᠶᠡ ᠳ᠋ᠦ᠍ ᠨᠡᠬᠡᠮᠡᠯ ᠢ᠋ ᠮᠠᠰᠢᠨ ᠲᠧᠭᠨᠢᠭ ᠢ᠋ᠶ᠋ᠡᠷ ᠬᠢᠳᠡᠭ ᠪᠣᠯᠲᠠᠯᠠ ᠬᠥᠭᠵᠢᠬᠦ ᠵᠠᠮ ᠳ᠋ᠠᠭᠠᠨ ᠤᠷᠠ᠂ ᠬᠢᠴᠡ᠂ ᠥᠩᠭᠡ ᠦᠵᠡᠮᠵᠢ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠠᠢ᠃
ᠮᠠᠨ ᠤ᠋ ᠣᠷᠣᠨ ᠤ᠋ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠨᠡᠬᠡᠮᠡᠯ ᠡᠷᠲᠡᠨ ᠦ᠌ ᠭᠠᠷᠤᠯ ᠲᠠᠢ ᠪᠥᠭᠡᠳ ᠲᠤᠰ ᠣᠷᠣᠨ ᠳ᠋ᠤ᠌ ᠣᠷᠣᠰᠢᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠣᠯᠠᠨ ᠣᠪᠣᠭ᠂ ᠠᠢᠮᠠᠭ ᠤ᠋ᠳ ᠥᠪᠡᠷ ᠥᠪᠡᠷ ᠦ᠋ᠨ ᠥᠪᠡᠷᠮᠢᠴᠡ ᠬᠢᠴᠡ᠂ ᠬᠡ ᠲᠣᠨᠣᠭ ᠲᠠᠢ ᠨᠡᠬᠡᠮᠡᠯ ᠢ᠋ ᠬᠥᠭᠵᠢᠭᠦᠯᠵᠦ ᠪᠠᠢᠵᠠᠢ᠃ ᠢᠯᠠᠩᠭᠤᠶᠠ ᠾᠦᠩᠨᠦ᠂ ᠬᠢᠳᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠨᠡᠬᠡᠮᠡᠯ ᠦ᠋ᠨ ᠤᠷᠠᠯᠢᠭ ᠦᠰᠦᠷᠦᠩᠭᠦᠢ ᠬᠥᠭᠵᠢᠵᠦ ᠪᠠᠢᠭᠰᠠᠨ ᠲᠤᠬᠠᠢ ᠳᠤᠷᠠᠳᠤᠭᠰᠠᠨ ᠪᠢᠯᠡ᠃ ᠨᠡᠬᠡᠮᠡᠯ ᠦ᠋ᠨ ᠤᠷᠠᠯᠠᠯ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠬᠥᠭᠵᠢᠨ ᠳᠠᠪᠰᠢᠵᠤ ᠢᠷᠡᠭᠰᠡᠨ ᠴᠦ᠍ ᠨᠡᠢᠲᠡ ᠶ᠋ᠢ ᠬᠠᠮᠤᠷᠴᠤ ᠠᠷᠠᠳ ᠲᠦᠮᠡᠨ ᠦ᠌ ᠠᠵᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠮᠡᠳᠡᠭᠳᠡᠬᠦᠢᠴᠡ ᠨᠥᠯᠥᠭᠡ ᠦᠵᠡᠭᠦᠯᠬᠦ ᠲᠠᠯᠠ ᠪᠠᠷ ᠬᠠᠩᠭᠠᠯᠲᠠ ᠦᠭᠡᠢ ᠪᠥᠭᠡᠳ ᠤᠯᠤᠰ ᠤ᠋ᠨ ᠴᠢᠨᠠᠷ ᠲᠠᠢ ᠦᠢᠯᠡᠳᠪᠦᠷᠢ ᠴᠤ ᠪᠠᠢᠭᠰᠠᠨ ᠦᠭᠡᠢ᠃
ᠵᠥᠪᠬᠡᠨ ᠬᠤᠪᠢᠰᠬᠠᠯ ᠤ᠋ᠨ ᠵᠢᠯ ᠳ᠋ᠦ᠍ ᠲᠤᠬᠠᠢᠯᠠᠪᠠᠯ᠂ ᠠᠵᠤ ᠦᠢᠯᠡᠳᠪᠦᠷᠢ ᠺᠣᠮᠪᠢᠨᠠᠲ ᠪᠠᠢᠭᠤᠯᠤᠭᠳᠠᠬᠤ ᠦᠶᠡ ᠳ᠋ᠦ᠍ ᠴᠡᠮᠪᠡ ᠶ᠋ᠢᠨ ᠹᠠᠪᠷᠢᠺ ᠪᠠᠢᠭᠤᠯᠤᠭᠳᠠᠨ ᠴᠡᠮᠪᠡ ᠨᠡᠬᠡᠵᠦ ᠪᠠᠢᠵᠠᠢ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠲᠠᠪᠢᠭᠠᠳ ᠣᠨ ᠤ᠋ ᠦᠶᠡ ᠡᠴᠡ ᠨᠡᠬᠡᠮᠡᠯ ᠦ᠋ᠨ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠤᠭᠳᠠᠨ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠨᠡᠬᠡᠮᠡᠯ᠂ ᠬᠡᠪᠢᠰ᠂ ᠳᠣᠯᠭᠢᠶᠠᠨ ᠬᠥᠨᠵᠢᠯᠡ ᠪᠤᠰᠤᠳ ᠵᠦᠢᠯ ᠢ᠋ ᠨᠡᠬᠡᠵᠦ ᠡᠬᠢᠯᠡᠵᠡᠢ᠃ ᠬᠤᠪᠢᠰᠬᠠᠯ ᠤ᠋ᠨ ᠵᠢᠯ ᠳ᠋ᠦ᠍ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠰᠣᠶᠣᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠦᠰᠦᠷᠦᠩᠭᠦᠢ ᠬᠥᠭᠵᠢᠵᠦ ᠨᠡᠢᠭᠡᠮ ᠦ᠋ᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠰᠢᠨᠡ ᠥᠭᠡᠷᠡᠴᠢᠯᠡᠯᠲᠡ ᠪᠣᠢ ᠪᠣᠯᠤᠭᠰᠠᠨ ᠤ᠋ ᠨᠢᠭᠡ ᠨᠢ ᠰᠢᠨᠡ ᠳᠣᠳᠣᠮ ᠬᠥᠭᠵᠢᠵᠦ ᠪᠠᠢᠭᠠ ᠠᠵᠤ ᠦᠢᠯᠡᠳᠪᠦᠷᠢ ᠶ᠋ᠢ ᠲᠦᠭᠦᠬᠡᠢ ᠡᠳ᠋ ᠢ᠋ᠶ᠋ᠡᠷ ᠬᠠᠩᠭᠠᠵᠤ ᠨᠠᠷᠢᠪᠲᠤᠷ ᠨᠣᠣᠰᠣᠲᠤ ᠣᠷᠬᠣᠨ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠪᠣᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠶᠤᠮ᠃ ᠡᠨᠡ ᠬᠣᠨᠢ ᠨᠢ ᠨᠤᠲᠤᠭ ᠤ᠋ᠨ ᠮᠣᠩᠭᠣᠯ ᠬᠣᠨᠢᠨ ᠤ᠋ ᠰᠢᠯᠢᠮᠡᠯ ᠬᠡᠰᠡᠭ ᠢ᠋ ᠵᠥᠪᠯᠡᠯᠲᠦ ᠬᠣᠯᠪᠣᠭᠠᠲᠤ ᠤᠯᠤᠰ ᠤ᠋ᠨ ᠨᠠᠷᠢᠨ ᠨᠣᠣᠰᠣᠲᠤ ᠬᠣᠨᠢᠨ ᠤ᠋ ᠰᠢᠯᠢᠳᠡᠭ ᠡᠭᠦᠯᠳᠡᠷ ᠫᠠᠷᠠᠷᠺᠤᠰ᠂ ᠮᠧᠷᠢᠨᠣᠰ ᠬᠣᠨᠢ ᠪᠠᠷ ᠰᠠᠢᠵᠢᠷᠠᠭᠤᠯᠤᠨ ᠭᠠᠷᠭᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠰᠢᠯᠢᠳᠡᠭ ᠬᠣᠨᠢᠨ ᠤ᠋ ᠠᠩᠬᠠᠨ ᠤ᠋ ᠡᠭᠦᠯᠳᠡᠷ ᠪᠠᠢᠯᠠ᠃
ᠮᠠᠨ ᠤ᠋ ᠨᠡᠬᠡᠮᠡᠯ ᠦ᠋ᠨ ᠦᠢᠯᠡᠳᠪᠦᠷᠢ ᠰᠢᠨᠡ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢᠨ ᠤ᠋ ᠨᠣᠣᠰᠣ ᠪᠠᠷ ᠳᠡᠯᠡᠬᠡᠢ ᠳ᠋ᠦ᠍ ᠠᠯᠳᠠᠷ ᠲᠠᠢ ᠴᠢᠨᠠᠷ ᠰᠠᠢᠨ ᠬᠡᠪᠢᠰ᠂ ᠰᠤᠭᠤ ᠲᠠᠩᠨᠠᠢ᠂ ᠰᠡᠯᠡᠩᠭᠡ ᠰᠦᠯᠵᠢᠶᠡ ᠵᠡᠷᠭᠡ ᠳᠠᠪᠤᠤ ᠶ᠋ᠢ ᠨᠡᠬᠡᠵᠦ ᠡᠬᠢᠯᠡᠵᠡᠢ᠃ ᠨᠤᠲᠤᠭ ᠤ᠋ᠨ ᠰᠢᠯᠢᠮᠡᠯ ᠢᠮᠠᠭᠠ ᠶ᠋ᠢ ᠳ᠋ᠦᠨ᠂ ᠭᠣᠷᠨᠤ— ᠠᠯᠲᠠᠢ ᠵᠡᠷᠭᠡ ᠨᠣᠯᠤᠤᠷ ᠤ᠋ᠨ ᠴᠢᠭᠯᠡᠯ ᠦ᠋ᠨ ᠡᠭᠦᠯᠳᠡᠷ ᠢ᠋ᠶ᠋ᠡᠷ ᠰᠠᠢᠵᠢᠷᠠᠭᠤᠯᠵᠤ ᠭᠣᠪᠢ ᠭᠤᠷᠪᠠᠨᠰᠠᠢᠬᠠᠨ᠂ ᠪᠠᠶᠠᠨ— ᠥᠨᠵᠢᠭᠦᠯ ᠵᠡᠷᠭᠡ ᠢᠮᠠᠭᠠᠨ ᠤ᠋ ᠰᠢᠨᠡ ᠡᠭᠦᠯᠳᠡᠷ ᠪᠣᠢ ᠪᠣᠯᠵᠤ ᠡᠭᠦᠨ ᠲᠡᠢ ᠤᠶᠠᠯᠳᠤᠭᠤᠯᠤᠨ ᠨᠣᠯᠤᠤᠷ ᠤ᠋ᠨ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠵᠤ ᠴᠢᠨᠠᠷ ᠰᠠᠢᠲᠠᠢ ᠨᠣᠯᠤᠤᠷ ᠤ᠋ᠨ ᠡᠳ᠋ᠯᠡᠯ ᠨᠡᠬᠡᠵᠦ ᠪᠠᠢᠭᠠ ᠶ᠋ᠢᠨ ᠳᠡᠭᠡᠷᠡ ᠮᠠᠯ ᠠ᠋ᠴᠠ ᠠᠰᠢᠭᠯᠠᠬᠤ ᠠᠰᠢᠭ ᠰᠢᠮᠡ ᠠᠷᠪᠢᠵᠢᠬᠤ ᠳᠣᠳᠣᠮ ᠨᠡᠬᠡᠮᠡᠯ ᠦ᠋ᠨ ᠴᠢᠭᠯᠡᠯ ᠦ᠋ᠨ ᠡᠭᠡᠷᠡᠮᠡᠯ᠂ ᠰᠦᠯᠵᠢᠮᠡᠯ ᠦ᠋ᠨ ᠦᠢᠯᠡᠳᠪᠦᠷᠢ ᠨᠦ᠍ᠭᠦᠳ ᠰᠦᠨᠳᠡᠷᠯᠡᠨ ᠪᠣᠰᠴᠤ ᠭᠠᠷ ᠠᠵᠢᠯᠯᠠᠭᠠ ᠶ᠋ᠢ ᠮᠧᠬᠠᠨᠢᠭᠵᠢᠭᠤᠯᠤᠨ ᠬᠥᠳᠡᠯᠮᠦᠷᠢ ᠶ᠋ᠢ ᠬᠥᠩᠭᠡᠪᠴᠢᠯᠡᠵᠦ ᠣᠯᠠᠨ ᠰᠢᠯᠢᠳᠡᠭ ᠰᠢᠨᠡ ᠡᠳ᠋ᠯᠡᠯ ᠦᠢᠯᠡᠳᠪᠦᠷᠢᠯᠡᠨ ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠵᠤ ᠪᠠᠢᠵᠠᠢ᠃
ᠡᠭᠦᠨ ᠦ᠌ ᠵᠡᠷᠭᠡᠴᠡᠭᠡ ᠠᠷᠠᠳ ᠤ᠋ᠨ ᠭᠠᠷ ᠤᠷᠠᠯᠠᠯ ᠤ᠋ᠨ ᠨᠢᠭᠡ ᠰᠠᠯᠪᠤᠷᠢ ᠪᠣᠯᠬᠤ ᠭᠠᠷ ᠨᠡᠬᠡᠮᠡᠯ ᠪᠣᠯᠪᠠᠰᠤᠷᠠᠩᠭᠤᠢ ᠬᠥᠭᠵᠢᠯᠡ᠃ ᠬᠤᠪᠢᠰᠬᠠᠯ ᠤ᠋ᠨ ᠵᠢᠯ ᠳ᠋ᠦ᠍ ᠬᠥᠮᠦᠨ ᠠᠷᠠᠳ ᠤ᠋ᠨ ᠠᠵᠤ ᠠᠮᠢᠳᠤᠷᠠᠯ ᠰᠣᠶᠣᠯᠴᠢ ᠪᠣᠯᠪᠠᠰᠤᠨ ᠪᠠᠢᠳᠠᠯ ᠳ᠋ᠤ᠌ ᠴᠢᠨᠠᠷ ᠤ᠋ᠨ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠴᠤ ᠭᠡᠷ ᠦ᠋ᠨ ᠳᠣᠲᠣᠷᠠ ᠲᠠᠯᠪᠢᠭᠠ ᠥᠭᠡᠷᠡᠴᠢᠯᠡᠭᠳᠡᠨ ᠰᠢᠨᠡᠴᠢᠯᠡᠭᠳᠡᠵᠦ ᠳᠠᠪᠤᠤ ᠶ᠋ᠢᠨ ᠨᠢᠭᠤᠷ ᠲᠠᠢ ᠮᠣᠳᠣᠨ ᠣᠷᠣ ᠲᠡᠮᠦᠷ ᠣᠷᠣ ᠪᠠᠷ ᠰᠣᠯᠢᠭᠳᠠᠨ᠂ ᠳᠣᠲᠣᠷᠠ ᠨᠢ ᠡᠪ ᠬᠠᠪᠤ ᠦᠭᠡᠢ ᠳᠠᠪᠤᠤ ᠨᠣᠣᠰᠣ ᠴᠢᠬᠢᠭᠰᠡᠨ ᠢᠰᠡᠭᠡᠢ ᠳᠡᠷᠡ ᠥᠲᠥᠨ ᠳᠡᠷᠡ ᠪᠡᠷ ᠰᠣᠯᠢᠭᠳᠠᠭᠰᠠᠨ ᠲᠠᠢ ᠬᠣᠯᠪᠣᠭᠳᠠᠨ ᠲᠡᠮᠦᠷ ᠣᠷᠣᠨ ᠤ᠋ ᠤᠷᠲᠤ ᠲᠠᠯᠠ᠂ ᠥᠲᠥᠨ ᠳᠡᠷᠡ ᠶ᠋ᠢᠨ ᠬᠣᠶᠠᠷ ᠪᠤᠯᠤᠩ ᠳ᠋ᠤ᠌ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡ ᠭᠠᠷᠭᠠᠨ ᠨᠡᠬᠡᠭᠰᠡᠨ ᠨᠡᠬᠡᠮᠡᠯ ᠲᠣᠣᠷ᠂ ᠠᠷᠠᠰᠤᠨ ᠠᠪᠳᠠᠷᠠ ᠶ᠋ᠢᠨ ᠪᠦᠲᠡᠭᠡᠯᠭᠡ᠂ ᠪᠡᠭᠡᠯᠡᠢ᠂ ᠣᠢᠮᠣᠰᠤ᠂ ᠬᠦᠵᠦᠭᠦᠨ ᠦ᠌ ᠣᠷᠢᠶᠠᠯᠲᠠ ᠵᠡᠷᠭᠡ ᠶ᠋ᠢ ᠡᠮᠡᠭᠲᠡᠢᠴᠦᠳ ᠨᠡᠬᠡᠵᠦ ᠭᠡᠷ ᠢ᠋ᠶ᠋ᠡᠨ ᠭᠣᠶᠣᠳᠠᠭ ᠪᠣᠯᠤᠯᠠ᠃ ᠤᠳᠠᠯ ᠦᠭᠡᠢ ᠭᠤᠲᠤᠯ ᠤ᠋ᠨ ᠳᠣᠲᠣᠭᠤᠷ ᠴᠢᠬᠢᠵᠦ ᠡᠮᠦᠰᠳᠡᠭ ᠤᠷᠲᠤ ᠳᠠᠪᠤᠤ ᠶ᠋ᠢᠨ ᠪᠤᠶᠤ ᠬᠥᠪᠥᠩ ᠲᠡᠢ ᠥᠮᠥᠳᠥ᠂ ᠪᠣᠭᠣᠨᠢ ᠥᠮᠥᠳᠥ ᠨᠣᠣᠰᠣᠨ ᠲᠦᠷᠡᠢ ᠪᠡᠷ ᠰᠣᠯᠢᠭᠳᠠᠬᠤ ᠳ᠋ᠤ᠌ ᠣᠢᠮᠣᠰᠤᠨ ᠤ᠋ ᠲᠦᠷᠡᠢ ᠨᠡᠬᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠣᠷᠴᠢᠨ ᠦᠶᠡ ᠳ᠋ᠦ᠍ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠵᠠᠭᠪᠤᠷ ᠲᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠥᠮᠥᠳᠥ᠂ ᠴᠠᠮᠴᠠ᠂ ᠮᠠᠯᠠᠭᠠᠢ᠂ ᠭᠠᠷ ᠨᠡᠬᠡᠮᠡᠯ ᠬᠡᠪᠢᠰ ᠨᠡᠬᠡᠬᠦ ᠪᠣᠯᠤᠨᠠ᠃ ᠣᠷᠴᠢᠨ ᠦᠶᠡ ᠶ᠋ᠢᠨ ᠨᠡᠬᠡᠮᠡᠯ ᠳᠠᠩ᠂ ᠳᠠᠪᠬᠤᠷ᠂ ᠬᠡ ᠲᠡᠢ᠂ ᠬᠡ ᠥᠬᠡᠢ ᠶᠠᠩᠵᠤ ᠪᠦᠷᠢ ᠪᠠᠢᠭᠠ ᠪᠥᠭᠡᠳ ᠡᠭᠦᠨ ᠢ᠋ ᠬᠢᠬᠦ ᠳ᠋ᠦ᠍ ᠤᠷᠢᠳᠴᠢᠯᠠᠭᠰᠠᠨ ᠪᠡᠯᠡᠳᠬᠡᠯ ᠢ᠋ ᠬᠠᠩᠭᠠᠬᠤ ᠲᠠᠯᠠ ᠪᠠᠷ ᠵᠠᠷᠢᠮ ᠵᠦᠢᠯ ᠢ᠋ ᠲᠣᠳᠣᠷᠠᠭᠤᠯᠤᠶᠠ᠃
ᠠᠯᠢᠪᠠ ᠤᠷᠠᠯᠠᠨ ᠪᠦᠲᠦᠭᠡᠬᠦ ᠠᠵᠢᠯ ᠳ᠋ᠤ᠌ ᠶᠠᠭᠤᠨ ᠤ᠋ ᠡᠮᠦᠨᠡ ᠲᠣᠬᠢᠷᠠᠭᠰᠠᠨ ᠪᠠᠭᠠᠵᠢ ᠴᠢᠬᠤᠯᠠ ᠱᠠᠭᠠᠷᠳᠠᠭᠳᠠᠭ ᠤ᠋ᠨ ᠠᠳᠠᠯᠢ ᠨᠡᠬᠡᠮᠡᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠵᠡᠭᠦᠦ᠂ ᠤᠲᠠᠰᠤ᠂ ᠷᠠᠮ ᠭᠣᠣᠯᠴᠢᠯᠠᠨ ᠱᠠᠭᠠᠷᠳᠠᠭᠳᠠᠨᠠ᠃
ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠮᠣᠩᠭᠣᠯᠴᠤᠳ ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠶ᠋ᠢ ᠡᠷᠲᠡ ᠦᠶᠡ ᠡᠴᠡ ᠶᠠᠰᠤ᠂ ᠮᠣᠳᠣ᠂ ᠲᠡᠮᠦᠷ ᠢ᠋ᠶ᠋ᠡᠷ ᠬᠢᠵᠦ ᠪᠠᠢᠭᠰᠠᠨ ᠤ᠋ ᠤᠯᠠ ᠮᠥᠷ ᠪᠠᠢᠳᠠᠭ᠃ ᠳᠡᠯᠡᠬᠡᠢ ᠳ᠋ᠦ᠍ ᠬᠥᠮᠦᠨ ᠡᠭᠦᠰᠴᠦ᠂ ᠨᠡᠬᠡᠬᠦ ᠤᠷᠠᠯᠢᠭ ᠬᠢᠵᠦ ᠡᠬᠢᠯᠡᠭᠰᠡᠨ ᠲᠡᠷᠡ ᠴᠠᠭ ᠠ᠋ᠴᠠ ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠪᠣᠢ ᠪᠣᠯᠵᠠᠢ᠃ ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠲᠡᠷᠡ ᠦᠶᠡ ᠳ᠋ᠦ᠍ ᠶᠠᠰᠤ᠂ ᠬᠤᠯᠤᠰᠤ ᠪᠠᠢᠭᠠᠳ ᠴᠢᠨᠠᠭᠰᠢᠳᠠ ᠪᠠᠨ ᠬᠦᠷᠡᠯ ᠲᠡᠮᠦᠷ ᠢ᠋ᠶ᠋ᠡᠷ ᠳᠠᠮᠵᠢᠨ ᠥᠨᠥ ᠦᠶᠡ ᠬᠦᠷᠴᠦ᠂ ᠭᠠᠷ ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠬᠡᠯᠪᠡᠷᠢ ᠨᠢ ᠥᠭᠡᠷᠡᠴᠢᠯᠡᠭᠳᠡᠪᠡᠴᠦ ᠪᠦᠷᠢᠮᠦᠰᠦᠨ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠦᠭᠡᠢ᠃ ᠬᠥᠮᠦᠨ ᠨᠡᠬᠡᠮᠡᠯ ᠳ᠋ᠦ᠍ ᠠᠩᠬᠠ ᠭᠠᠭᠴᠠ ᠵᠡᠭᠦᠦ ᠬᠡᠷᠡᠭᠯᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠨᠡᠬᠡᠮᠡᠯ ᠦ᠋ᠨ ᠨᠡᠬᠡᠬᠦ ᠠᠷᠭᠠ ᠥᠭᠡᠷᠡᠴᠢᠯᠡᠭᠳᠡᠨ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠬᠤ ᠶᠠᠪᠤᠴᠠ ᠳ᠋ᠤ᠌2—5 ᠪᠤᠶᠤ ᠲᠡᠭᠦᠨ ᠡᠴᠡ ᠣᠯᠠᠨ ᠵᠡᠭᠦᠦ ᠨᠢᠭᠡ ᠵᠡᠷᠭᠡ ᠬᠡᠷᠡᠭᠯᠡᠬᠦ ᠪᠣᠯᠵᠤ ᠴᠢᠨᠠᠭᠰᠢᠳᠠ ᠪᠠᠨ ᠤᠲᠠᠰᠤᠨ ᠤ᠋ ᠬᠣᠯᠪᠣᠭᠠ ᠲᠠᠢ ᠲᠡᠭᠡᠭᠯᠡᠭᠦᠷ ᠲᠡᠢ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠵᠡᠭᠦᠦ ᠬᠡᠷᠡᠭᠯᠡᠭᠳᠡᠬᠦ ᠪᠣᠯᠵᠠᠢ᠃
ᠵᠢᠷᠤᠭ57
(1) ᠪᠣᠭᠲᠣᠭᠣᠰᠣ ᠴᠢᠮᠦᠭᠡᠨ ᠦ᠌ ᠰᠠᠪᠬᠠ ᠶᠠᠰᠤᠨ ᠵᠡᠭᠦᠦ
(2) ᠮᠣᠳᠣᠨ ᠵᠡᠭᠦᠦ
(3) ᠲᠡᠮᠦᠷ(ᠪᠣᠭᠣᠨᠢ) ᠵᠡᠭᠦᠦ
(4) ᠮᠣᠳᠣ᠂ ᠬᠤᠪᠠᠨᠴᠢᠷ ᠡᠰᠢ ᠲᠡᠢ ᠵᠡᠭᠦᠦ
(5) ᠭᠣᠮ ᠬᠣᠯᠪᠣᠭᠠ ᠲᠠᠢ ᠬᠣᠣᠰ ᠵᠡᠭᠦᠦ
ᠮᠣᠩᠭᠣᠯᠴᠤᠳ ᠡᠷᠲᠡ ᠦᠶᠡ ᠡᠴᠡ ᠡᠳᠦᠭᠡ ᠬᠦᠷᠲᠡᠯᠡ ᠶᠠᠰᠤ᠂ ᠮᠣᠳᠣ ᠪᠠᠷ ᠨᠡᠬᠡᠮᠡᠯ ᠦ᠋ᠨ ᠵᠡᠭᠦᠦ ᠬᠢᠭᠰᠡᠭᠡᠷ ᠣᠷᠴᠢᠨ ᠦᠶᠡ ᠶ᠋ᠢᠨ ᠪᠣᠯᠪᠠᠰᠤᠨ ᠵᠡᠭᠦᠦ ᠬᠡᠷᠡᠭᠯᠡᠬᠦ ᠪᠣᠯᠤᠭᠰᠠᠨ ᠴᠤ᠌ ᠮᠠᠯ ᠤ᠋ᠨ ᠪᠣᠭᠲᠣᠭᠣᠰᠣ ᠴᠢᠮᠥᠭᠡ ᠶ᠋ᠢᠨ ᠰᠠᠪᠬᠠ ᠶᠠᠰᠤ ᠪᠠᠷ ᠬᠢᠭᠰᠡᠨ ᠵᠡᠭᠦᠦ ᠮᠥᠨ ᠬᠡᠷᠡᠭᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃
ᠨᠡᠬᠡᠮᠡᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠪᠡᠯᠡᠳᠬᠡᠬᠦ ᠶᠠᠮᠠᠷ ᠴᠤ᠌ ᠪᠦᠲᠦᠭᠡᠯ ᠪᠡᠯᠡᠳᠬᠡᠯ ᠡᠴᠡ ᠪᠡᠨ ᠰᠢᠯᠲᠠᠭᠠᠯᠠᠭᠳᠠᠬᠤ ᠶ᠋ᠢᠨ ᠠᠳᠠᠯᠢ ᠨᠡᠬᠡᠮᠡᠯ ᠤᠲᠠᠰᠤᠨ ᠠ᠋ᠴᠠ ᠪᠠᠨ ᠶᠡᠬᠡᠬᠡᠨ ᠰᠢᠯᠲᠠᠭᠠᠯᠠᠭᠳᠠᠨᠠ᠃ ᠤᠴᠢᠷ ᠨᠢ ᠨᠡᠬᠡᠮᠡᠯ ᠢ᠋ ᠥᠭᠡᠷᠡ ᠵᠦᠢᠯ ᠢ᠋ᠶ᠋ᠡᠷ ᠣᠷᠣᠯᠠᠵᠤ ᠰᠡᠯᠪᠢᠨ ᠡᠪᠲᠡᠢ ᠠᠶᠠᠲᠠᠢᠬᠠᠨ ᠪᠣᠯᠭᠠᠵᠤ ᠪᠣᠯᠳᠠᠭ ᠦᠭᠡᠢ᠂ ᠵᠥᠪᠬᠡᠨ ᠭᠠᠷ ᠤ᠋ᠨ ᠤᠷᠠ᠂ ᠤᠬᠠᠭᠠᠨ᠂ ᠤᠲᠠᠰᠤ ᠠ᠋ᠴᠠ ᠴᠢᠨᠠᠷ ᠨᠢ ᠰᠢᠯᠲᠠᠭᠠᠯᠠᠭᠳᠠᠨᠠ᠃ ᠡᠢᠮᠦ ᠳ᠋ᠦ᠍ ᠤᠲᠠᠰᠤ ᠶ᠋ᠢ ᠪᠡᠯᠡᠳᠬᠡᠬᠦ ᠳ᠋ᠡᠭᠡᠨ ᠬᠡᠷᠪᠡ ᠳᠡᠯᠭᠡᠭᠦᠷ ᠡᠴᠡ ᠠᠪᠴᠤ ᠪᠠᠢᠭᠠ ᠪᠣᠯ ᠥᠩᠭᠡ ᠶ᠋ᠢ ᠲᠣᠬᠢᠷᠠᠭᠤᠯᠵᠤ ᠰᠣᠩᠭᠣᠵᠤ ᠠᠪᠤᠨᠠ᠃ ᠬᠠᠷᠢᠨ ᠮᠠᠯ ᠤ᠋ᠨ ᠨᠣᠣᠰᠣ ᠪᠠᠷ ᠤᠲᠠᠰᠤ ᠪᠡᠯᠡᠳᠬᠡᠬᠦ ᠪᠣᠯ ᠤᠭ ᠨᠡᠬᠡᠬᠦ ᠵᠦᠢᠯ ᠳ᠋ᠡᠭᠡᠨ ᠲᠣᠬᠢᠷᠠᠭᠤᠯᠤᠨ ᠨᠣᠣᠰᠣ᠂ ᠨᠡᠬᠡᠬᠦ ᠵᠡᠭᠦᠦ ᠪᠡᠨ ᠰᠣᠩᠭᠣᠨᠠ᠃ ᠨᠡᠬᠡᠮᠡᠯ ᠳ᠋ᠦ᠍ ᠵᠥᠪᠬᠡᠨ ᠬᠣᠨᠢ᠂ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ᠂ ᠢᠮᠠᠭᠠᠨ ᠤ᠋ ᠨᠣᠯᠤᠤᠷ ᠢ᠋ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃
ᠮᠣᠩᠭᠣᠯᠴᠤᠳ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠠᠷᠢᠬᠢᠨ ᠰᠢᠯ ᠪᠣᠯᠤᠨ ᠸᠠᠭᠠᠷ ᠰᠠᠪᠠ᠂ ᠱᠠᠭᠠᠵᠠᠩ ᠠᠶᠠᠭᠠ ᠶ᠋ᠢ ᠬᠠᠭᠠᠯᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠨ ᠦᠬᠡᠷ ᠦ᠋ᠨ ᠰᠡᠪᠡᠭ᠂ ᠪᠢᠷᠠᠭᠤ ᠶ᠋ᠢᠨ ᠳᠠᠬᠢ ᠪᠠᠷ ᠨᠡᠬᠡᠮᠡᠯ ᠭᠡᠷ ᠬᠢᠳᠡᠭ ᠪᠠᠢᠵᠠᠢ᠃
ᠨᠡᠬᠡᠮᠡᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠡᠭᠡᠷᠡᠬᠦ ᠳ᠋ᠡᠭᠡᠨ ᠨᠡᠬᠡᠬᠦ ᠵᠦᠢᠯ ᠳ᠋ᠡᠭᠡᠨ ᠲᠣᠬᠢᠷᠠᠭᠤᠯᠤᠨ ᠪᠦᠳᠦᠭᠦᠨ᠂ ᠨᠠᠷᠢᠨ᠂ ᠳᠤᠮᠳᠠ ᠵᠡᠷᠭᠡ ᠪᠡᠷ ᠡᠭᠡᠷᠡᠨᠡ᠃ ᠨᠡᠬᠡᠮᠡᠯ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠤᠲᠠᠰᠤ ᠶ᠋ᠢ ᠶᠠᠭᠤᠮᠠ ᠣᠶᠣᠬᠤ ᠤᠲᠠᠰᠤᠨ ᠠ᠋ᠴᠠ ᠰᠤᠯᠠ ᠡᠷᠴᠢᠲᠡᠢ ᠡᠭᠡᠷᠡᠬᠦ ᠪᠠ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠪᠣᠯ ᠵᠣᠭᠳᠣᠷ ᠨᠣᠣᠰᠣ ᠶ᠋ᠢ ᠬᠣᠯᠢᠵᠤ ᠡᠭᠡᠷᠡᠪᠡᠯ ᠪᠠᠲᠤ ᠪᠥᠬᠡ ᠦᠵᠡᠮᠵᠢᠲᠡᠢ ᠪᠠᠢᠨᠠ᠃ ᠨᠡᠬᠡᠮᠡᠯ ᠦ᠋ᠨ ᠤᠲᠠᠰᠤ ᠪᠡᠯᠡᠳᠬᠡᠬᠦ ᠨᠣᠣᠰᠣ ᠶ᠋ᠢ ᠤᠷᠢᠳᠴᠢᠯᠠᠨ ᠰᠠᠪᠠᠵᠤ ᠤᠬᠢᠶᠠᠯᠭᠠ ᠶ᠋ᠢᠨ ᠨᠤᠨᠲᠠᠭ ᠲᠠᠢ ᠪᠤᠶᠤ ᠰᠠᠪᠤᠩ ᠲᠠᠢ ᠤᠰᠤ ᠪᠠᠷ ᠤᠬᠢᠶᠠᠵᠤ ᠳᠠᠬᠢᠨ ᠰᠠᠪᠠᠵᠤ ᠲᠦᠭᠦᠳᠡᠭᠯᠡᠨ ᠡᠭᠡᠷᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠨᠡ᠃ ᠮᠥᠨ ᠨᠣᠣᠰᠣ ᠶ᠋ᠢ ᠡᠭᠡᠷᠡᠯ ᠦᠭᠡᠢ ᠨᠡᠬᠡᠵᠦ ᠥᠲᠥᠨ ᠬᠡᠯᠪᠡᠷᠢ ᠲᠡᠢ ᠡᠳ᠋ᠯᠡᠯ ᠬᠢᠵᠦ ᠪᠣᠯᠤᠨᠠ᠃ ᠡᠭᠦᠨ ᠳ᠋ᠦ᠍ ᠢᠮᠠᠭᠠᠨ ᠤ᠋ ᠨᠣᠯᠤᠤᠷ ᠲᠣᠬᠢᠷᠠᠮᠵᠢᠲᠠᠢ ᠪᠥᠭᠡᠳ ᠲᠡᠭᠦᠨ ᠢ᠋ ᠨᠡᠬᠡᠬᠦ ᠶᠠᠪᠤᠴᠠ ᠳ᠋ᠠᠭᠠᠨ ᠢᠮᠡᠷᠴᠦ ᠵᠡᠭᠦᠦ ᠳ᠋ᠡᠭᠡᠨ ᠲᠣᠬᠢᠷᠠᠭᠤᠯᠤᠨ ᠵᠠᠳᠠᠭᠠᠢ ᠨᠡᠬᠡᠵᠦ ᠰᠡᠢᠷᠡᠭ ᠰᠢᠲᠦ ᠲᠡᠢ ᠰᠠᠮ ᠢ᠋ᠶ᠋ᠠᠷ ᠰᠠᠮᠨᠠᠨᠠ᠃ ᠬᠡᠷᠪᠡ ᠦᠰᠦ ᠵᠢᠭᠳᠡ ᠪᠢᠰᠢ ᠪᠤᠶᠤ ᠬᠡᠲᠦᠷᠬᠡᠢ ᠤᠷᠲᠤ ᠪᠣᠯ ᠵᠢᠭᠳᠡ ᠬᠠᠢᠴᠢᠯᠠᠨ ᠲᠣᠬᠢᠷᠠᠭᠤᠯᠤᠨᠠ᠃ ᠭᠠᠷ ᠡᠭᠡᠷᠡᠮᠡᠯ ᠤᠲᠠᠰᠤ ᠪᠠᠷ ᠨᠡᠬᠡᠵᠦ ᠪᠠᠢᠭᠠ ᠵᠦᠢᠯ ᠢ᠋ ᠬᠡᠳᠦ ᠰᠢᠭᠢᠭᠦᠦ ᠨᠡᠬᠡᠪᠡᠯ ᠤᠬᠢᠶᠠᠬᠤ ᠳ᠋ᠤ᠌ ᠤᠯᠠᠮ ᠨᠢᠭᠲᠠᠷᠠᠨᠬᠡᠯᠪᠡᠷᠢ ᠪᠡᠨᠠᠯᠳᠠᠨᠠ᠃ᠡᠢᠮᠦ ᠳᠦ ᠨᠠᠷᠢᠪᠲᠤᠷᠬᠠᠨ ᠤᠲᠠᠰᠤ ᠪᠠᠷ ᠰᠡᠢᠷᠡᠭᠳᠡᠭᠦᠦ ᠨᠡᠬᠡᠪᠡᠯ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃
ᠣᠷᠴᠢᠨ ᠦᠶᠡ ᠶ᠋ᠢᠨ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ ᠨᠡᠬᠡᠬᠦ ᠲᠠᠯᠠ ᠪᠠᠷ ᠨᠣᠮ ᠭᠠᠷᠤᠭᠰᠠᠨ ᠲᠤᠯᠠ ᠡᠨᠳᠡ ᠳᠤᠷᠠᠳᠬᠤ ᠬᠡᠷᠡᠭ ᠦᠭᠡᠢ ᠪᠢᠯᠡ᠃
ᠲᠠᠮᠤᠯᠠᠯ ᠤᠷᠠᠯᠠᠯ ᠮᠠᠨ ᠤ᠋ ᠠᠷᠠᠳ ᠤ᠋ᠨ ᠭᠠᠷ ᠤᠷᠠᠯᠠᠯ ᠳᠤ ᠲᠠᠮᠤᠯᠠᠯ ᠤ᠋ᠨ ᠵᠦᠢᠯ ᠲᠡᠭᠦᠨ ᠦ᠌ ᠲᠥᠷᠥᠯ ᠴᠢᠬᠤᠯᠠ ᠪᠠᠢᠷᠢ ᠡᠵᠡᠯᠡᠳᠡᠭ ᠪᠢᠯᠡ ᠃ ᠲᠡᠮᠡᠦᠯᠡᠯ ᠢ᠋ ᠦᠰᠦ᠂ ᠨᠣᠣᠰᠣ ᠂ ᠳᠠᠪᠤᠤ᠂ ᠰᠤᠷ ᠢ᠋ᠶ᠋ᠠᠷ ᠬᠢᠵᠦ ᠪᠣᠯᠬᠤ ᠪᠠ ᠬᠢᠴᠡ ᠪᠡᠷ ᠨᠢ ᠬᠣᠶᠠᠮᠤᠰᠤᠨ᠂ ᠭᠤᠷᠮᠤᠰᠤᠨ ᠂ᠪᠥᠭᠡᠷᠡᠩᠬᠡᠢ᠂ ᠬᠠᠪᠲᠠᠭᠠᠢ᠂ ᠳᠥᠷᠪᠡᠯᠵᠢᠨ ᠭᠡᠬᠦ ᠮᠡᠲᠦ ᠪᠡᠷ ᠢᠯᠭᠠᠨᠠ᠃
ᠪᠥᠭᠡᠷᠡᠩᠬᠡᠢ ᠲᠠᠮᠤᠯᠠᠯ ᠭᠡᠳᠡᠭ ᠵᠥᠪᠬᠡᠨ ᠬᠣᠶᠠᠷ ᠤᠲᠠᠰᠤ ᠪᠤᠶᠤ ᠰᠤᠷ᠂ ᠨᠣᠣᠰᠣ ᠶ᠋ᠢ ᠨᠡᠢᠯᠡᠭᠦᠯᠦᠨ ᠲᠠᠮᠤᠬᠤ ᠶ᠋ᠢ ᠬᠡᠯᠡᠨᠡ᠃ ᠡᠨᠡ ᠨᠢ ᠭᠤᠲᠤᠯ ᠤ᠋ᠨ ᠤᠯᠠᠯᠠᠭᠠ᠂ ᠰᠢᠷᠪᠥᠰᠥ᠂ ᠲᠡᠮᠡᠭᠡᠨ ᠦ᠌ ᠪᠤᠷᠠᠨᠲᠠᠭ᠂ ᠭᠠᠷ ᠬᠣᠰᠢᠶᠠ᠂ ᠬᠣᠰᠢᠯᠠᠩ ᠤ᠋ᠨ ᠨᠢᠭᠡ ᠳᠠᠩ ᠪᠠᠭᠲᠠᠨᠠ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠡᠭᠦᠨ ᠦ᠌ ᠪᠥᠬᠡ ᠪᠠᠲᠤ ᠶ᠋ᠢ ᠲᠣᠭᠠᠴᠢᠪᠠᠯ ᠪᠥᠭᠡᠷᠡᠩᠬᠡᠢ ᠳᠠᠩ ᠲᠠᠮᠤᠯᠠᠯ ᠳᠡᠭᠡᠰᠦ ᠬᠡᠪᠡᠷᠡᠭ᠂ ᠰᠤᠨᠤᠯᠲᠠ ᠶᠡᠬᠡ ᠲᠡᠢ᠂ ᠭᠤᠷᠮᠤᠰᠤᠨ ᠲᠠᠮᠤᠯᠠᠯ ᠠᠷᠠᠢ ᠪᠥᠬᠡ᠂ ᠰᠤᠨᠤᠯᠲᠠ ᠪᠠᠭᠠ ᠪᠠᠢᠳᠠᠭ᠃ ᠬᠠᠪᠲᠠᠭᠠᠢ ᠲᠠᠮᠤᠯᠠᠯ ᠭᠡᠳᠡᠭ ᠭᠠᠷ ᠬᠣᠰᠢᠶᠠ᠂ ᠭᠡᠷ ᠦ᠋ᠨ ᠬᠣᠰᠢᠯᠠᠩ ᠢ᠋ ᠬᠡᠯᠡᠬᠦ ᠪᠥᠭᠡᠳ ᠡᠨᠡ ᠨᠢ 4—6 ᠰᠢᠷᠬᠡᠭ ᠪᠥᠭᠡᠷᠡᠩᠬᠡᠢ ᠲᠠᠮᠤᠯᠠᠯ ᠢ᠋ ᠨᠡᠢᠯᠡᠭᠦᠯᠦᠨ ᠰᠢᠷᠢᠵᠦ ᠬᠢᠨᠡ᠃ ᠳᠥᠷᠪᠡᠯᠵᠢᠨ ᠲᠠᠮᠤᠯᠠᠯ ᠭᠡᠳᠡᠭ ᠨᠢ 4—8 ᠳᠠᠩ ᠪᠥᠭᠡᠷᠡᠩᠬᠡᠢ ᠲᠠᠮᠤᠯᠠᠯ ᠢ᠋ ᠳᠠᠪᠬᠤᠷᠯᠠᠨ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠣᠷᠣᠭᠤᠯᠵᠤ ᠰᠢᠷᠢᠬᠦ ᠶ᠋ᠢ ᠬᠡᠯᠡᠬᠦ ᠪᠥᠭᠡᠳ ᠡᠭᠦᠨ ᠢ᠋ᠶ᠋ᠡᠷ ᠬᠦᠨᠳᠦ ᠠᠴᠢᠶᠠᠨ ᠤ᠋ ᠲᠠᠲᠠᠯᠭᠠ᠂ ᠪᠡᠬᠢᠯᠡᠭᠡ ᠬᠢᠨᠡ᠃ ᠳᠡᠭᠡᠰᠦ ᠲᠠᠮᠤᠬᠤ ᠳ᠋ᠤ᠌ ᠦᠬᠡᠷ᠂ ᠬᠣᠨᠢ ᠭᠡᠬᠦ ᠮᠡᠲᠦ ᠮᠠᠯ ᠤ᠋ᠨ ᠨᠣᠣᠰᠣ ᠶ᠋ᠢ ᠬᠡᠷᠡᠭᠯᠡᠬᠦ ᠪᠥᠭᠡᠳ ᠲᠠᠮᠤᠬᠤ ᠶ᠋ᠢᠨ ᠡᠮᠦᠨᠡ ᠰᠠᠪᠠᠵᠤ ᠰᠢᠷᠣᠢ ᠲᠣᠭᠣᠰᠣ ᠶ᠋ᠢ ᠠᠷᠢᠯᠭᠠᠨ 150—240g ᠣᠷᠴᠢᠮ ᠲᠦᠭᠦᠳᠡᠭ ᠬᠢᠵᠦ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠭᠡᠰᠦᠨ ᠦ᠌ ᠪᠡᠨ ᠪᠦᠳᠦᠭᠦᠨ ᠨᠠᠷᠢᠨ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠴᠤᠪᠤᠵᠤ ᠲᠠᠮᠤᠨᠠ᠃
ᠵᠢᠷᠤᠭ 58
( 1) ᠭᠤᠷᠪᠠᠨ ᠬᠥᠮᠦᠨ ᠲᠡᠢ ᠭᠤᠷᠮᠤᠰᠤᠨ ᠳᠡᠭᠡᠰᠦ ᠡᠷᠴᠢᠯᠡᠵᠦ ᠪᠠᠢᠭᠠ ᠪᠠᠢᠳᠠᠯ
( 2 ) ᠲᠡᠩᠴᠡᠭᠦᠦ ᠭᠤᠷᠪᠠᠨ ᠴᠢᠯᠠᠭᠤ ᠲᠠᠢ ᠨᠢᠭᠡ ᠬᠥᠮᠦᠨ ᠳᠡᠭᠡᠰᠦ ᠡᠷᠴᠢᠯᠡᠵᠦ ᠪᠠᠢᠭᠠ ᠪᠠᠢᠳᠠᠯ
ᠤᠲᠠᠰᠤᠨ ᠲᠠᠮᠥᠯᠠᠯ ᠢ᠋ᠶ᠋ᠠᠷ ᠮᠠᠯᠠᠭᠠᠢ ᠶ᠋ᠢᠨ ᠵᠠᠯᠠᠭᠠ᠂ ᠭᠠᠷ ᠬᠣᠰᠢᠶᠠ᠂ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠤᠲᠠᠰᠤᠨ ᠴᠠᠴᠤᠭ ᠬᠢᠬᠦ ᠤᠴᠢᠷ ᠤᠭ ᠬᠢᠬᠦ ᠵᠦᠢᠯ ᠲᠡᠢ ᠤᠶᠠᠯᠳᠤᠭᠤᠯᠵᠤ ᠥᠩᠭᠡ ᠲᠣᠬᠢᠷᠠᠭᠤᠯᠤᠨ ᠤᠲᠠᠰᠤ ᠪᠠᠨ ᠰᠣᠩᠭᠣᠨᠠ᠃ ᠲᠠᠮᠤᠭᠰᠠᠨ ᠳᠡᠭᠡᠰᠦ ᠤᠲᠠᠰᠤᠨ ᠤ᠋ ᠦᠵᠦᠭᠦᠷ ᠢ᠋ ᠪᠡᠬᠢᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠦᠵᠦᠭᠦᠷ ᠢ᠋ ᠳᠠᠪᠤᠤ ᠪᠠᠷ ᠣᠷᠢᠶᠠᠵᠤ ᠰᠢᠷᠢᠨᠡ᠃ ᠬᠠᠷᠢᠨ ᠤᠲᠠᠰᠤ ᠶ᠋ᠢ ᠪᠣᠯ ᠰᠢᠷᠪᠦᠰᠦᠨ ᠡᠴᠡ ᠪᠤᠰᠤᠳ ᠢ᠋ ᠵᠠᠩᠭᠢᠳᠬᠤ ᠪᠠ ᠰᠢᠷᠪᠥᠰᠥ ᠶ᠋ᠢ ᠭᠠᠯ ᠢ᠋ᠶ᠋ᠠᠷ ᠲᠦᠯᠡᠵᠦ ᠪᠡᠬᠢᠯᠡᠨᠡ᠃
ᠭᠤᠷᠮᠤᠰᠤᠨ ᠳᠡᠭᠡᠰᠦ ᠶ᠋ᠢ ᠡᠷᠴᠢᠯᠡᠬᠦ ᠳ᠋ᠡᠭᠡᠨ ᠲᠤᠰ ᠪᠦᠷᠢ ᠳ᠋ᠦ᠍ᠨᠢ ᠡᠷᠴᠢᠯᠡᠵᠦ ᠡᠷᠴᠢᠨ ᠳ᠋ᠦ᠍ᠨᠢ ᠬᠦᠷᠭᠡᠭᠡᠳ ᠨᠡᠢᠯᠡᠭᠦᠯᠵᠦ ᠨᠢᠭᠡ ᠪᠥᠭᠡᠷᠡᠩᠬᠡᠢ ᠳᠡᠭᠡᠰᠦ ᠪᠣᠯᠭᠠᠨᠠ᠃ ᠡᠭᠦᠨ ᠢ᠋ ᠨᠤᠲᠤᠭ ᠪᠦᠷᠢ ᠶᠠᠩᠵᠤ ᠶᠠᠩᠵᠤ ᠪᠠᠷ ᠬᠢᠳᠡᠭ᠃ ᠬᠠᠨᠠ ᠶ᠋ᠢᠨ ᠨᠢᠳᠦᠨ ᠦ᠌ ᠬᠣᠶᠠᠷ ᠲᠠᠯᠠ ᠪᠤᠶᠤ ᠳᠡᠭᠡᠭᠦᠷ ᠨᠢ ᠭᠤᠷᠪᠠᠨ ᠪᠥᠭᠡᠷᠡᠩᠬᠡᠢ ᠲᠠᠮᠤᠯᠠᠯ ᠢ᠋ᠶ᠋ᠠᠨ ᠭᠠᠷᠭᠠᠭᠠᠳ ᠭᠠᠳᠠᠨᠠ ᠪᠠᠨ ᠭᠤᠷᠪᠠᠨ ᠬᠥᠮᠦᠨ ᠲᠤᠰ ᠪᠦᠷᠢ ᠬᠦᠨᠳᠦᠬᠡᠨ ᠰᠠᠪᠠᠭᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠤᠶᠠᠵᠤ ᠳᠠᠯᠠᠯᠤᠨ ᠡᠷᠭᠢᠭᠦᠯᠵᠦ ᠡᠷᠴᠢ ᠶ᠋ᠢ ᠭᠦᠢᠴᠡᠭᠡᠭᠡᠳ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠡᠷᠴᠢᠯᠡᠭᠰᠡᠨ ᠭᠤᠷᠪᠠᠨ ᠳᠡᠭᠡᠰᠦ ᠶ᠋ᠢ ᠨᠢᠭᠡᠳᠬᠡᠵᠦ ᠨᠢᠭᠡ ᠵᠡᠷᠭᠡ ᠲᠠᠲᠠᠵᠤ ᠨᠢᠭᠡ ᠪᠥᠭᠡᠷᠡᠩᠬᠡᠢ ᠪᠣᠯᠭᠠᠬᠤ ᠨᠢ ᠬᠠᠮᠤᠭ ᠤ᠋ᠨ ᠰᠠᠢᠨ ᠠᠷᠭᠠ ᠶᠤᠮ᠃ ᠡᠨᠡ ᠨᠢ ᠳᠥᠷᠪᠡᠨ ᠬᠥᠮᠦᠨ ᠣᠷᠣᠳᠠᠭ ᠤᠴᠢᠷ ᠨᠢᠭᠡ ᠬᠥᠮᠦᠨ ᠡᠭᠦᠨ ᠢ᠋ ᠬᠢᠬᠦ ᠶ᠋ᠢᠨ ᠲᠤᠯᠠᠳᠠ ᠳᠡᠭᠡᠰᠦ ᠲᠤᠰ ᠪᠦᠷᠢ ᠶ᠋ᠢ ᠡᠷᠴᠢᠯᠡᠵᠦ ᠬᠦᠨᠳᠦ ᠬᠥᠩᠭᠡᠨ ᠢ᠋ᠶ᠋ᠡᠷ ᠢᠵᠢᠯ ᠭᠤᠷᠪᠠᠨ ᠴᠢᠯᠠᠭᠤᠨ ᠳ᠋ᠤ᠌ ᠤᠶᠠᠭᠠᠳ ᠨᠢᠭᠡ ᠬᠥᠮᠦᠨ ᠲᠡᠳᠡᠨ ᠨᠢᠭᠡᠳᠬᠡᠨ ᠡᠷᠴᠢᠯᠡᠵᠦ ᠪᠣᠯᠬᠤ ᠪᠥᠭᠡᠳ ᠬᠠᠷᠢᠨ ᠴᠢᠯᠠᠭᠤ ᠲᠡᠩᠴᠡᠪᠦᠷᠢ ᠦᠭᠡᠢ ᠪᠣᠯ ᠬᠥᠩᠭᠡᠨ ᠬᠡᠰᠡᠭ ᠨᠢ ᠤᠨᠵᠢᠷᠠᠳᠠᠭ᠃ ᠮᠥᠨ ᠡᠷᠭᠢᠭᠦᠯᠭᠡ ᠪᠡᠷ ᠡᠷᠴᠢᠯᠡᠳᠡᠭ ᠠᠷᠭᠠ ᠪᠠᠢᠳᠠᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠰᠡᠷᠡᠩ ᠂ ᠲᠣᠭᠳᠠᠭᠤᠨᠪᠠᠶᠠᠷ ᠂ ᠡᠷᠳᠡᠨᠢᠭᠣᠤᠠ᠂ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ