ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ ᠤᠷᠠᠯᠠᠯ03ᠠᠷᠠᠰᠤ ᠨᠡᠬᠡᠢ ᠡᠯᠳᠡᠬᠦ
287ᠠᠷᠠᠰᠤ ᠨᠡᠬᠡᠢ ᠡᠯᠳᠡᠬᠦ
ᠲᠥᠯᠥᠭᠡ᠂ ᠪᠣᠷᠯᠣᠩ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ᠋ ᠪᠤᠭ ᠤ᠋ᠨ ᠠᠷᠠᠰᠤ ᠶ᠋ᠢ ᠨᠡᠬᠡᠢ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠭᠡᠨᠡ᠂ ᠬᠣᠨᠢ᠂ ᠢᠮᠠᠭᠠᠨ ᠤ᠋ ᠠᠷᠠᠰᠤ ᠶ᠋ᠢ ᠡᠯᠳᠡᠬᠦ ᠶ᠋ᠢᠨ ᠡᠮᠦᠨᠡ ᠢᠳᠡᠭᠡᠯᠡᠬᠦ ᠪᠤᠶᠤ ᠭᠠᠩᠳᠠᠨᠠ᠃ ᠭᠠᠩᠳᠠᠬᠤ ᠳ᠋ᠠᠭᠠᠨ ᠨᠢᠭᠡ ᠠᠷᠠᠰᠤᠨ ᠳ᠋ᠤ᠌ 0.5—0.8kg ᠬᠤᠵᠢᠷ ᠱᠡᠦ ᠬᠢᠵᠦ 7—8 ᠬᠣᠨᠣᠭ ᠪᠠᠢᠯᠭᠠᠨᠠ᠃ ᠭᠠᠩᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠷᠠ ᠬᠠᠯᠢᠰᠤ᠂ ᠬᠠᠯᠢᠮ ᠵᠡᠷᠭᠡ ᠶ᠋ᠢ ᠳᠠᠬᠢᠨ ᠰᠠᠢᠨ ᠴᠡᠪᠡᠷᠯᠡᠨᠡ᠃ ᠵᠠᠷᠢᠮ ᠭᠠᠵᠠᠷ ᠠᠷᠠᠰᠤ ᠨᠡᠬᠡᠢ ᠶ᠋ᠢ ᠣᠲᠣᠳᠠᠭ᠃ ᠣᠲᠣᠬᠤ ᠶ᠋ᠢᠨ ᠲᠤᠯᠠᠳᠠ 40—50cm ᠭᠦᠨ ᠨᠦᠬᠡ ᠤᠬᠤᠵᠤ ᠲᠡᠭᠦᠨ ᠳ᠋ᠦ᠍ ᠠᠳᠤᠭᠤᠨ ᠤ᠋ ᠬᠥᠬᠡ ᠬᠣᠮᠣᠯ ᠪᠤᠲᠠᠯᠤᠨ ᠬᠢᠵᠦ ᠭᠠᠯᠯᠠᠨᠠ᠃ ᠳᠡᠭᠡᠷᠡ ᠡᠴᠡ ᠨᠢ ᠭᠤᠷᠪᠠᠨ ᠰᠢᠭᠤᠷᠭᠠ ᠶ᠋ᠢᠨ ᠲᠣᠯᠣᠭᠠᠢ ᠪᠣᠭᠣᠵᠤ ᠲᠡᠭᠦᠨ ᠦ᠌ ᠪᠡᠨ ᠳᠣᠲᠣᠷᠠ ᠠᠷᠠᠰᠤ ᠪᠠᠨ ᠵᠡᠭᠦᠵᠦ ᠭᠠᠳᠠᠨᠠ ᠠ᠋ᠴᠠ ᠨᠢ ᠰᠠᠢᠨ ᠬᠤᠴᠢᠨᠠ᠃ ᠢᠩᠭᠢᠵᠦ ᠣᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠠᠷᠠᠰᠤ ᠲᠤᠰ ᠪᠦᠷᠢ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠬᠥᠷᠥᠰᠥᠨ ᠳ᠋ᠦ᠍ᠨᠢ ᠪᠠᠭᠠ ᠵᠡᠷᠭᠡ ᠲᠠᠷᠠᠭ ᠪᠤᠶᠤ ᠬᠦᠢᠲᠡᠨ ᠴᠠᠭᠠ ᠵᠢᠭᠳᠡ ᠲᠦᠷᠬᠢᠵᠦ᠂ ᠡᠪᠬᠡᠭᠡᠳ ᠰᠡᠭᠦᠳᠡᠷ ᠲᠦ᠍ 1—2 ᠬᠣᠨᠣᠭ ᠲᠠᠯᠪᠢᠨᠠ᠃ ᠳᠠᠷᠠᠭᠠ ᠨᠢ ᠠᠷᠠᠰᠤ ᠪᠠᠨ ᠲᠠᠯᠬᠢᠳᠠᠨ ᠬᠡᠳᠡᠷᠭᠡᠳᠡᠨᠡ᠃ ᠲᠠᠯᠬᠢᠳᠠᠬᠤ ᠳ᠋ᠠᠭᠠᠨ ᠠᠷᠠᠰᠤᠨ ᠤ᠋ ᠬᠥᠷᠥᠰᠥ ᠶ᠋ᠢ ᠬᠥᠳᠡᠯᠲᠡᠯᠡ ᠲᠠᠯᠬᠢᠨᠠ᠃ ᠠᠷᠠᠰᠤ ᠶ᠋ᠢ ᠥᠯᠥᠨ ᠴᠡᠭᠡᠭ ᠲᠡᠢ ᠪᠠᠢᠬᠤ ᠳ᠋ᠤᠨᠢ ᠥᠩᠭᠡᠯᠡᠨᠡ᠃ ᠬᠤᠷᠠᠭᠠ᠂ ᠢᠰᠢᠭᠡ᠂ ᠰᠡᠭᠰᠡᠭᠦᠷᠭᠡ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠪᠢᠰᠢᠯᠠᠭ ᠤ᠋ᠨ ᠰᠢᠷᠠ ᠤᠰᠤᠨ ᠳ᠋ᠤ᠌ ᠬᠤᠵᠢᠷ ᠦᠭᠡᠢ ᠪᠡᠷ 6 ᠬᠣᠨᠣᠭ ᠢᠳᠡᠭᠡᠯᠡᠨ ᠭᠠᠩᠳᠠᠵᠤ ᠡᠯᠳᠡᠪᠡᠯ ᠬᠥᠷᠥᠰᠥ ᠨᠢ ᠵᠤᠵᠠᠭᠠᠷᠠᠳᠠᠭ᠃
ᠲᠠᠯᠬᠢ ᠬᠢᠬᠦ ᠳ᠋ᠡᠭᠡᠨ ᠬᠣᠶᠠᠷ ᠬᠠᠪᠲᠠᠭᠠᠢ ᠪᠠᠨᠵᠠ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠵᠡᠷᠭᠡᠴᠡᠭᠦᠯᠵᠦ ᠬᠣᠶᠠᠷ ᠬᠥᠨᠳᠡᠯᠡᠪᠴᠢ ᠮᠣᠳᠣ ᠪᠠᠷ ᠦᠵᠦᠭᠦᠷ ᠢ᠋ ᠨᠢ ᠵᠥᠷᠢᠭᠦᠦ ᠬᠣᠯᠪᠣᠨᠠ᠃ ᠲᠡᠭᠦᠨ ᠳ᠋ᠡᠭᠡᠨ ᠳᠠᠷᠤᠭᠤᠯᠭᠠ ᠮᠡᠲᠦ ᠲᠣᠬᠢᠷᠠᠭᠤᠯᠤᠨ ᠪᠡᠯᠡᠳᠬᠡᠵᠦ ᠠᠷᠠᠰᠤ ᠶ᠋ᠢ ᠨᠠᠷᠢᠬᠠᠨ ᠨᠤᠭᠤᠯᠤᠨ ᠬᠥᠨᠳᠡᠯᠡᠨ ᠪᠠᠷᠢᠭᠠᠳ ᠳᠠᠷᠤᠭᠤᠯᠭᠠ ᠮᠣᠳᠣ ᠪᠠᠷ ᠣᠯᠠᠨ ᠳᠠᠬᠢᠨ ᠳᠠᠷᠤᠨᠠ᠃ ᠳᠠᠷᠤᠬᠤ ᠪᠦᠷᠢ ᠳ᠋ᠡᠭᠡᠨ ᠠᠷᠠᠰᠤ ᠪᠠᠨ ᠡᠷᠭᠢᠭᠦᠯᠵᠦ ᠴᠠᠰᠢ ᠨᠡᠰᠢ ᠬᠠᠷᠠᠭᠤᠯᠤᠨ ᠡᠯᠳᠡᠨᠡ᠃ ᠲᠠᠯᠬᠢᠳᠠᠬᠤ ᠦᠶᠡ ᠳ᠋ᠦ᠍ ᠲᠠᠯᠬᠢ ᠶ᠋ᠢ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠬᠦᠨᠳᠦ ᠴᠢᠯᠠᠭᠤ ᠲᠠᠯᠪᠢᠵᠤ ᠭᠡᠷ ᠦ᠋ᠨ ᠬᠠᠨᠠ ᠪᠤᠶᠤ ᠮᠣᠳᠣᠨ ᠬᠠᠰᠢᠶᠠ ᠲᠠᠢ ᠪᠡᠬᠢᠯᠡᠨ ᠳᠠᠷᠤᠵᠤ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠭᠠᠨᠠ᠃
ᠠᠷᠠᠰᠤ ᠶ᠋ᠢ ᠬᠡᠳᠡᠷᠭᠡᠳᠡᠬᠦ ᠶ᠋ᠢᠨ ᠲᠤᠯᠠᠳᠠ ᠤᠷᠢᠳᠴᠢᠯᠠᠨ ᠬᠡᠳᠡᠷᠭᠡ ᠶ᠋ᠢ ᠢᠷᠯᠡᠨ ᠰᠢᠲᠦ ᠲᠡᠢ ᠪᠣᠯᠭᠠᠨᠠ᠃ ᠭᠡᠳᠡᠷᠭᠡᠨ ᠦ᠌ ᠰᠢᠲᠦ ᠠᠮᠠᠷᠬᠠᠨ ᠡᠯᠡᠭᠳᠡᠳᠡᠭ ᠤᠴᠢᠷ ᠲᠡᠭᠦᠨ ᠢ᠋ ᠰᠤᠬᠠᠢ᠂ ᠬᠤᠰᠤ ᠮᠡᠲᠦ ᠬᠠᠲᠠᠭᠤ ᠮᠣᠳᠣ ᠪᠠᠷ ᠬᠢᠳᠡᠭ᠃ ᠭᠡᠳᠡᠷᠭᠡᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠵᠢᠭᠠᠭᠰᠠᠨ ᠬᠡᠮᠵᠢᠶᠡ ᠦᠭᠡᠢ ᠪᠣᠯᠪᠠᠴᠤ ᠠᠷᠠᠰᠤ ᠶ᠋ᠢ ᠬᠡᠳᠡᠷᠭᠡᠳᠡᠬᠦ ᠬᠥᠮᠦᠨ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠵᠦ ᠰᠠᠭᠤᠭᠠᠳ ᠪᠠᠷᠠᠭᠤᠨ ᠭᠠᠷ ᠥᠯᠮᠡᠢ ᠳ᠋ᠦ᠍᠂ ᠵᠡᠭᠦᠨ ᠭᠠᠷ ᠭᠤᠶᠠ ᠶ᠋ᠢᠨ ᠵᠤᠵᠠᠭᠠᠨ ᠪᠤᠯᠴᠢᠩ ᠣᠷᠴᠢᠮ ᠳ᠋ᠤ᠌ ᠪᠠᠢᠬᠤ ᠪᠠᠷ ᠤᠷᠲᠤ ᠶ᠋ᠢ ᠲᠣᠬᠢᠷᠠᠭᠤᠯᠤᠨᠠ᠃ ᠳᠤᠮᠳᠠᠴᠢ ᠪᠠᠷ1—1.2m ᠣᠷᠴᠢᠮ ᠤᠷᠲᠤ ᠪᠠᠢᠬᠤ ᠪᠠ ᠰᠢᠲᠦ ᠨᠦ᠍ᠭᠦᠳ ᠨᠢ ᠲᠤᠰ ᠪᠦᠷᠢ0.5cm ᠣᠷᠴᠢᠮ ᠵᠤᠵᠠᠭᠠᠨ ᠪᠠᠢᠨᠠ᠃ ᠠᠷᠠᠰᠤ ᠬᠤᠰᠤᠬᠤ ᠬᠤᠰᠤᠭᠤᠷ ᠨᠢ ᠦ ᠦᠭᠡᠢ ᠭᠠᠷ ᠲᠤ ᠪᠠᠷᠢᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠨᠢᠮᠭᠡᠨ ᠬᠠᠪᠲᠠᠭᠠᠢ ᠲᠡᠮᠦᠷ ᠪᠠᠢᠬᠤ ᠪᠠ ᠲᠡᠭᠦᠨ ᠢ᠋ ᠬᠢᠩᠭᠠᠷᠠ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠬᠥᠯ ᠢ᠋ᠶ᠋ᠡᠷ ᠠᠷᠠᠰᠤ ᠬᠤᠰᠤᠳᠠᠭ ᠳᠡᠭᠡᠭᠡᠭᠦᠷ ᠪᠠᠰᠠ ᠪᠠᠢᠳᠠᠭ᠃ ᠬᠤᠰᠤᠭᠤᠷ ᠢ᠋ ᠣᠷᠣᠨ ᠨᠤᠲᠤᠭ ᠲᠤ ᠭᠣᠣᠯᠳᠠᠭᠤ ᠬᠦᠷᠵᠡ ᠶ᠋ᠢᠨ ᠲᠡᠮᠦᠷ ᠢ᠋ ᠵᠠᠰᠠᠵᠤ ᠢᠷᠯᠡᠨ ᠬᠢᠳᠡᠭ᠃ ᠨᠡᠬᠡᠢ ᠶ᠋ᠢ ᠬᠡᠳᠡᠷᠭᠡᠳᠡᠬᠦ ᠶᠠᠪᠤᠴᠠ ᠳᠤᠮᠳᠠ ᠣᠯᠠᠨ ᠳᠠᠬᠢᠨ ᠰᠠᠢᠨ ᠲᠠᠲᠠᠵᠤ ᠭᠤᠲᠤ ᠬᠦᠵᠦᠭᠦᠦ ᠵᠡᠷᠭᠡ ᠶ᠋ᠢ ᠨᠤᠬᠤᠵᠤ ᠬᠤᠰᠤᠨ ᠲᠠᠲᠠᠨᠠ᠃ ᠢᠩᠭᠢᠵᠦ ᠡᠯᠳᠡᠬᠦ ᠳ᠋ᠦ᠍ ᠨᠡᠬᠡᠢ ᠲᠡᠨᠢᠭᠡᠷ᠂ ᠵᠥᠭᠡᠯᠡᠨ ᠶᠠᠮᠠᠷ ᠴᠤ ᠡᠳ᠋ᠯᠡᠯ ᠬᠢᠬᠦ ᠳ᠋ᠦ᠍ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃ ᠨᠡᠬᠡᠢ ᠶ᠋ᠢᠨ ᠡᠯᠳᠡᠭᠦᠷ ᠭᠦᠢᠴᠡᠭᠰᠡᠨ ᠡᠰᠡᠬᠦ ᠶ᠋ᠢ ᠰᠢᠯᠭᠠᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠥᠩᠭᠡ ᠴᠠᠭᠠᠨ᠂ ᠴᠢᠭᠢᠭ ᠦᠭᠡᠢ᠂ ᠤᠶᠠᠨ ᠵᠥᠭᠡᠯᠡᠨ ᠪᠥᠰ ᠪᠠᠷᠠᠭᠠ ᠰᠢᠭ᠋ ᠪᠣᠯᠤᠭᠰᠠᠨ ᠪᠣᠯ ᠡᠯᠳᠡᠭᠦᠷ ᠭᠦᠢᠴᠡᠭᠰᠡᠨ ᠭᠡᠵᠦ ᠦᠵᠡᠵᠦ ᠡᠳ᠋ᠯᠡᠯ ᠬᠢᠬᠦ ᠳ᠋ᠡᠭᠡᠨ ᠬᠡᠷᠡᠭᠯᠡᠨᠡ᠃ ᠨᠡᠬᠡᠢ ᠪᠡᠷ ᠭᠣᠣᠯᠳᠠᠭᠤ ᠳᠡᠪᠡᠯ ᠬᠢᠬᠦ ᠪᠠ ᠳᠡᠪᠡᠯ ᠦ᠋ᠨ ᠨᠡᠬᠡᠢ ᠠᠯᠢ ᠪᠣᠯᠬᠤ ᠡᠯᠳᠡᠭᠦᠷ ᠵᠥᠪ ᠬᠢᠭᠳᠡᠭᠰᠡᠨ ᠬᠥᠷᠥᠰᠥ ᠵᠥᠭᠡᠯᠡᠨ ᠦᠰᠦᠨ ᠦ᠌ ᠥᠩᠭᠡ ᠰᠠᠢᠲᠠᠢ ᠵᠢᠭᠳᠡ ᠪᠠᠢᠬᠤ ᠶ᠋ᠢᠨ ᠳᠡᠭᠡᠷᠡ ᠨᠣᠣᠰᠣ ᠥᠳᠬᠡᠨ ᠪᠠᠭᠠ ᠵᠡᠷᠭᠡ ᠠᠲᠤᠷᠢᠶᠠ ᠲᠠᠢ ᠤᠷᠲᠤ ᠨᠢ2.5cm ᠠ᠋ᠴᠠ ᠪᠣᠭᠣᠨᠢ ᠦᠭᠡᠢ ᠪᠠᠢᠪᠠᠯ ᠳᠤᠯᠠᠭᠠᠨ ᠪᠠᠢᠳᠠᠭ᠃
ᠵᠢᠷᠤᠭ55
(1) ᠬᠠᠯᠬᠠ ᠲᠠᠯᠬᠢ
(2) ᠳᠠᠷᠬᠠᠳ ᠲᠠᠯᠬᠢ
ᠮᠣᠩᠭᠣᠯᠴᠤᠳ ᠬᠣᠨᠢᠨ ᠤ᠋ ᠨᠡᠬᠡᠢ ᠪᠡᠷ ᠲᠡᠦᠬᠡ ᠶ᠋ᠢᠨ ᠲᠤᠷᠰᠢᠳᠠ ᠳᠡᠪᠡᠯ ᠬᠢᠵᠦ ᠡᠮᠦᠰᠴᠦ ᠢᠷᠡᠭᠰᠡᠨ᠂ ᠡᠪᠦᠯ᠂ ᠬᠠᠪᠤᠷ᠂ ᠨᠠᠮᠤᠷ ᠤ᠋ᠨ ᠤᠯᠠᠷᠢᠯ ᠤ᠋ᠨ ᠪᠤᠶᠤ ᠭᠣᠶᠣᠯ ᠤ᠋ᠨ ᠳᠡᠪᠡᠯ ᠬᠢᠵᠦ ᠡᠮᠦᠰᠬᠦ ᠠᠵᠢᠯ ᠳ᠋ᠤ᠌ ᠳᠠᠳᠤᠯᠭᠠᠵᠢᠭᠰᠠᠨ ᠬᠥᠮᠦᠰ ᠶᠦᠮ᠃ ᠮᠣᠩᠭᠣᠯ ᠤ᠋ᠨ ᠨᠡᠬᠡᠢ ᠳᠡᠪᠡᠯ ᠲᠤᠰ ᠣᠷᠣᠨ ᠤ᠋ ᠪᠠᠢᠭᠠᠯᠢ᠂ ᠴᠠᠭ ᠠᠭᠤᠷ ᠤ᠋ᠨ ᠨᠥᠬᠥᠴᠡᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠠᠭᠤᠵᠢᠮ ᠲᠡᠨᠢᠭᠦᠨ ᠳᠤᠯᠠᠭᠠᠬᠠᠨ ᠬᠣᠯᠠ ᠵᠥᠷᠢᠭᠦᠯᠭᠡ ᠲᠡᠢ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠥᠷᠭᠡᠨ ᠪᠦᠰᠡ ᠲᠡᠢ᠂ ᠥᠨᠳᠥᠷ ᠵᠠᠬᠠ ᠲᠠᠢ᠂ ᠵᠠᠬᠠ ᠡᠩᠭᠡᠷ ᠬᠠᠭᠠᠯᠲᠠ ᠲᠠᠢ ᠤᠴᠢᠷ ᠶᠠᠮᠠᠷ ᠴᠤ ᠬᠦᠢᠲᠡᠨ ᠳ᠋ᠦ᠍ ᠲᠠᠭᠠᠷᠠᠬᠤ ᠦᠭᠡᠢ᠂ ᠬᠣᠭᠣᠯᠠᠢ ᠶ᠋ᠢᠨ ᠠᠩᠭᠢᠨᠠ᠂ ᠬᠠᠳᠬᠤᠭᠠ᠂ ᠤᠭᠤᠴᠠ ᠨᠢᠷᠤᠭᠤᠨ ᠤ᠋ ᠡᠪᠡᠳᠴᠢᠨ ᠲᠣᠰᠳᠠᠭ ᠦᠭᠡᠢ ᠶ᠋ᠢᠨ ᠳᠡᠭᠡᠷᠡ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠡᠪᠦᠳᠦᠭ ᠢ᠋ᠶ᠋ᠡᠨ ᠣᠷᠢᠶᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠤᠴᠢᠷ ᠦᠶᠡ ᠮᠥᠴᠢ ᠶ᠋ᠢᠨ ᠡᠪᠡᠳᠴᠢᠨ ᠲᠤᠰᠬᠤ ᠨᠢ ᠪᠠᠭᠠ ᠪᠠᠢᠳᠠᠭ᠃ ᠨᠡᠬᠡᠢ ᠳᠡᠪᠡᠯ ᠢ᠋ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠲᠦ᠍ ᠣᠷᠣᠰᠢᠨ ᠰᠠᠭᠤᠭᠠ ᠪᠦᠬᠦ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠡᠮᠦᠰᠳᠡᠭ᠃ ᠨᠡᠬᠡᠢ ᠳᠡᠪᠡᠯ ᠢ᠋ ᠦᠰᠦᠨ ᠦ᠌ ᠨᠢᠮᠭᠡᠨ ᠵᠤᠵᠠᠭᠠᠨ ᠢ᠋ᠶ᠋ᠠᠷ ᠡᠪᠦᠯ ᠬᠠᠪᠤᠷ ᠤ᠋ᠨ ᠭᠡᠵᠦ ᠢᠯᠭᠠᠨᠠ᠃ ᠵᠤᠵᠠᠭᠠᠨ ᠦᠰᠦ ᠲᠡᠢ ᠳᠡᠪᠡᠯ ᠢ᠋ ᠡᠪᠦᠯ ᠡᠮᠦᠰᠬᠦ ᠪᠠ ᠨᠢᠮᠭᠡᠨ ᠦᠵᠦᠭᠦᠷᠰᠦᠨ ᠳᠡᠪᠡᠯ ᠢ᠋ ᠬᠠᠪᠤᠷ ᠨᠠᠮᠤᠷ ᠭᠣᠣᠯᠳᠠᠭᠤ ᠡᠮᠦᠰᠳᠡᠭ᠃ ᠮᠣᠩᠭᠣᠯᠴᠤᠳ ᠨᠡᠬᠡᠢ ᠶ᠋ᠢ ᠡᠯᠳᠡᠭᠡᠳ ᠥᠩᠭᠡᠯᠡᠬᠦ ᠦᠭᠡᠢ ᠪᠡᠷ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠪᠤᠶᠤ ᠤᠯᠠᠭᠠᠨ ᠬᠠᠷᠠ ᠳᠠᠪᠤᠤ ᠪᠠᠷ ᠬᠣᠣᠰᠯᠠᠨ ᠡᠮᠵᠢᠵᠦ ᠳᠡᠪᠡᠯ ᠬᠢᠬᠦ ᠡᠴᠡ ᠭᠠᠳᠠᠨᠠ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠲᠣᠷᠭᠠ᠂ ᠳᠠᠪᠤᠤ᠂ ᠰᠠᠲ᠋ᠢᠨ᠂ ᠵᠢᠭᠦᠨᠢ ᠳᠠᠯᠢᠩᠪᠤ ᠵᠡᠷᠭᠡ ᠪᠠᠷᠠᠭᠠ ᠪᠠᠷ ᠥᠩᠭᠡᠯᠡᠵᠦ ᠳᠡᠪᠡᠯ ᠬᠢᠳᠡᠭ ᠪᠣᠯᠤᠯᠠ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠠᠬᠠ ᠳᠡᠭᠦᠦ ᠨᠡᠢᠭᠡᠮ ᠵᠢᠷᠤᠮᠲᠤ ᠣᠷᠣᠨ ᠤ᠋ ᠲᠤᠰᠠᠯᠠᠮᠵᠢ ᠪᠠᠷ ᠨᠡᠬᠡᠢ ᠶ᠋ᠢ ᠦᠢᠯᠡᠳᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠵᠤ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠪᠣᠯᠪᠠᠰᠤᠨ ᠬᠤᠪᠴᠠᠰᠤ ᠬᠢᠳᠡᠭ ᠨᠢ ᠲᠤᠰ ᠤᠯᠤᠰ ᠤ᠋ᠨ ᠬᠥᠮᠦᠨ ᠠᠷᠠᠳ ᠤ᠋ᠨ ᠠᠵᠤ ᠠᠮᠢᠳᠤᠷᠠᠯ ᠡᠷᠡᠭᠦᠯ ᠠᠬᠤᠢ ᠳ᠋ᠤ᠌ ᠨᠥᠯᠥᠭᠡ ᠪᠦᠬᠦᠢ ᠬᠦᠴᠦᠷᠬᠡᠭ ᠲᠣᠮᠣ ᠦᠢᠯᠡᠳᠪᠦᠷᠢ ᠲᠡᠢ ᠪᠣᠯᠤᠯᠠ᠃
ᠣᠷᠴᠢᠨ ᠦᠶᠡ ᠳ᠋ᠦ᠍ ᠣᠷᠣᠨ ᠨᠤᠲᠤᠭ ᠤ᠋ᠨ ᠨᠢᠭᠡᠳᠦᠯ ᠳᠤᠮᠳᠠ ᠶ᠋ᠢᠨ ᠦᠢᠯᠡᠳᠪᠦᠷᠢ ᠨᠦ᠍ᠭᠦᠳ ᠢ᠋ ᠲᠦᠰᠢᠭᠯᠡᠨ ᠣᠷᠣᠨ ᠨᠤᠲᠤᠭ ᠤ᠋ᠨ ᠪᠣᠯᠤᠯᠴᠠᠭᠠ ᠶ᠋ᠢ ᠠᠰᠢᠭᠯᠠᠨ ᠮᠠᠯ ᠤ᠋ᠨ ᠠᠷᠠᠰᠤ ᠰᠢᠷᠢ ᠶ᠋ᠢ ᠪᠣᠯᠪᠠᠰᠤᠷᠠᠭᠤᠯᠵᠤ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠳᠡᠪᠡᠯ ᠬᠠᠨᠲᠠᠭᠠᠵᠠ᠂ ᠮᠠᠯᠠᠭᠠᠢ᠂ ᠪᠡᠭᠡᠯᠡᠢ ᠬᠢᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠲᠤᠰ ᠣᠷᠣᠨ ᠳ᠋ᠤ᠌ ᠪᠠᠢᠭᠠ ᠨᠥᠭᠡᠴᠡ ᠪᠣᠯᠤᠯᠴᠠᠭᠠ ᠶ᠋ᠢ ᠠᠰᠢᠭᠯᠠᠨ ᠠᠮᠢᠨ ᠤ᠋ ᠠᠵᠤ ᠠᠬᠤᠢ ᠠ᠋ᠴᠠ ᠭᠠᠷᠤᠭᠰᠠᠨ ᠮᠠᠯ ᠤ᠋ᠨ ᠠᠷᠠᠰᠤ ᠨᠡᠬᠡᠢ ᠶ᠋ᠢ ᠪᠣᠯᠪᠠᠰᠤᠷᠠᠭᠤᠯᠤᠨ ᠡᠯᠳᠡᠵᠦ ᠠᠵᠢᠯ ᠲᠥᠷᠥᠯ ᠦ᠋ᠨ ᠢ᠋ᠶ᠋ᠡᠨ ᠣᠨᠴᠠᠯᠢᠭ ᠲᠤ ᠲᠣᠬᠢᠷᠠᠭᠤᠯᠤᠨ ᠡᠯᠳᠡᠪ ᠬᠤᠪᠴᠠᠰᠤ ᠡᠳ᠋ᠯᠡᠯ ᠬᠢᠬᠦ ᠨᠢ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠪᠢᠯᠡ᠃
ᠨᠡᠬᠡᠢ ᠳᠡᠪᠡᠯ ᠢ᠋ ᠥᠩᠭᠡ ᠲᠡᠢ᠂ ᠥᠩᠭᠡ ᠦᠭᠡᠢ ᠬᠣᠶᠠᠷ ᠶᠠᠩᠵᠤ ᠪᠠᠷ ᠬᠢᠨᠡ᠃ ᠥᠩᠭᠡ ᠦᠭᠡᠢ ᠨᠡᠬᠡᠢ ᠳᠡᠪᠡᠯ ᠬᠢᠬᠦ ᠶ᠋ᠢᠨ ᠲᠤᠯᠠᠳᠠ ᠠᠷᠠᠰᠤᠨ ᠤ᠋ ᠥᠩᠭᠡ᠂ ᠦᠰᠦ᠂ ᠵᠢᠭᠳᠡ ᠪᠠᠢᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠰᠤᠭᠤ᠂ ᠴᠠᠪᠢ ᠶ᠋ᠢᠨ ᠨᠢᠮᠭᠡᠨ ᠬᠡᠰᠡᠭ ᠢ᠋ ᠠᠪᠴᠤ ᠦᠰᠦᠨ ᠦ᠌ ᠰᠢᠷᠬᠡᠭ ᠳᠠᠭᠠᠤ ᠥᠭᠡᠷᠡ ᠠᠷᠠᠰᠤ ᠣᠷᠣᠭᠤᠯᠤᠨᠠ᠃ ᠡᠨᠡ ᠣᠷᠣᠭᠤᠯᠬᠤ ᠠᠷᠠᠰᠤᠨ ᠤ᠋ ᠵᠦᠢᠳᠡᠯ ᠢ᠋ ᠢᠯᠡ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠪᠣᠯᠪᠠᠰᠤᠨ ᠳᠡᠪᠡᠯ ᠬᠢᠶᠡ ᠭᠡᠪᠡᠯ ᠦᠢᠯᠡᠳᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠡᠰᠬᠡᠨᠡ᠃ ᠮᠣᠩᠭᠣᠯ ᠳᠡᠪᠡᠯ ᠬᠢᠬᠦ ᠳ᠋ᠦ᠍ ᠤᠷᠢᠳᠠᠪᠡᠷ ᠠᠷᠠᠰᠤ ᠪᠠᠨ ᠭᠤᠲᠤ᠂ ᠬᠦᠵᠦᠭᠦᠦ ᠵᠡᠷᠭᠡ ᠶ᠋ᠢ ᠠᠪᠴᠤ ᠳᠥᠷᠪᠡᠯᠵᠢᠯᠡᠨᠡ᠃ ᠳᠠᠷᠠᠭᠠ ᠨᠢ ᠵᠦᠢᠵᠦ ᠣᠶᠤᠨ ᠦ ᠶ᠋ᠢ ᠠᠪᠴᠤ ᠳᠡᠪᠡᠯ ᠦ᠋ᠨ ᠬᠡᠯᠪᠡᠷᠢ ᠵᠠᠭᠪᠤᠷ ᠲᠤ ᠣᠷᠣᠭᠤᠯᠤᠨᠠ᠃ ᠬᠠᠲᠠᠭᠤᠪᠲᠤᠷ ᠪᠤᠶᠤ ᠵᠤᠵᠠᠭᠠᠨ ᠦᠰᠦ ᠲᠡᠢ ᠳᠡᠪᠡᠯ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠨᠢᠮᠭᠡᠨ ᠲᠣᠷᠭᠠ ᠵᠣᠬᠢᠮᠵᠢ ᠦᠭᠡᠢ᠂ ᠵᠤᠵᠠᠭᠠᠪᠲᠤᠷ ᠮᠠᠲ᠋ᠧᠷᠢᠶᠠᠯ ᠪᠠᠢᠪᠠᠯ ᠦᠷᠴᠢᠢᠬᠦ ᠦᠭᠡᠢ ᠳᠣᠲᠣᠷ ᠲᠠᠢ ᠪᠠᠨ ᠰᠠᠢᠨ ᠵᠣᠬᠢᠴᠠᠨᠠ᠃ ᠰᠡᠭᠰᠡᠭᠦᠷᠭᠡ᠂ ᠬᠤᠷᠠᠭᠠ᠂ ᠢᠰᠢᠭᠡ ᠶ᠋ᠢᠨ ᠠᠷᠠᠰᠤ ᠪᠠᠷ ᠳᠡᠪᠡᠯ ᠬᠢᠬᠦ ᠳ᠋ᠡᠭᠡᠨ ᠬᠡᠭᠡᠯ᠂ ᠬᠦᠵᠦᠭᠦᠦ ᠭᠣᠳᠣ ᠶ᠋ᠢ ᠠᠪᠴᠤ ᠳᠥᠷᠪᠡᠯᠵᠢᠨ ᠵᠦᠢᠵᠦ ᠣᠶᠣᠭᠠᠳ ᠣᠶᠣᠭᠠᠰᠤ ᠶ᠋ᠢ ᠪᠠᠭᠠ ᠵᠡᠷᠭᠡ ᠲᠠᠲᠠᠵᠤ ᠲᠡᠨᠢᠢᠯᠭᠡᠭᠡᠳ ᠥᠩᠭᠡ ᠪᠡᠨ ᠣᠶᠣᠵᠤ ᠬᠠᠪᠰᠤᠷᠤᠨᠠ᠃ ᠰᠡᠭᠰᠡᠭᠦᠷᠭᠡ ᠪᠤᠶᠤ ᠬᠤᠷᠠᠭᠠᠨ ᠳᠣᠲᠣᠷ ᠢ᠋ ᠡᠩᠨᠡᠬᠦ ᠳ᠋ᠡᠭᠡᠨ ᠦᠰᠦ ᠬᠥᠷᠥᠰᠥ ᠶ᠋ᠢ ᠲᠡᠩᠴᠡᠭᠦᠯᠬᠦ ᠪᠠ ᠬᠡᠭᠡᠯ ᠢ᠋ ᠤᠬᠤᠵᠤ ᠠᠪᠤᠭᠠᠳ ᠲᠡᠭᠦᠨ ᠳ᠋ᠦ᠍ ᠣᠷᠣᠭᠤᠯᠬᠤ ᠠᠷᠠᠰᠤ ᠪᠠᠨ ᠲᠣᠮᠣ ᠠᠷᠠᠰᠤᠨ ᠤ᠋ ᠪᠠᠨ ᠦᠰᠦ ᠲᠡᠢ ᠶᠠᠭ ᠲᠣᠬᠢᠷᠠᠭᠤᠯᠵᠤ ᠰᠢᠷᠬᠡᠭ ᠦ᠋ᠨ ᠳᠠᠭᠠᠤ ᠣᠷᠣᠭᠤᠯᠤᠨᠠ᠃
ᠬᠤᠷᠠᠭᠠ᠂ ᠰᠡᠭᠰᠡᠭᠦᠷᠭᠡ ᠶ᠋ᠢ ᠣᠭᠲᠣᠯᠬᠤ ᠳ᠋ᠠᠭᠠᠨ ᠬᠣᠶᠠᠷ ᠬᠤᠷᠤᠭᠤᠨ ᠤ᠋ ᠵᠢᠵᠢᠭ ᠬᠠᠢᠴᠢ ᠪᠠᠷ ᠦᠰᠦᠨ ᠳ᠋ᠦ᠍ ᠬᠦᠷᠭᠡᠯ ᠦᠭᠡᠢ ᠵᠥᠪᠬᠡᠨ ᠬᠥᠷᠥᠰᠥ ᠶ᠋ᠢ ᠵᠦᠰᠦᠨᠡ᠃ ᠨᠠᠷᠢᠨ ᠬᠤᠷᠠᠭᠠᠨ ᠳᠣᠲᠣᠷ ᠢ᠋ ᠡᠩᠨᠡᠬᠦ ᠳ᠋ᠡᠭᠡᠨ ᠣᠭᠲᠣᠯᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠱᠤᠭᠤᠮ ᠲᠠᠯᠪᠢᠵᠤ ᠵᠢᠷᠤᠭᠠᠳ ᠵᠢᠷᠤᠭᠠᠰᠤ ᠪᠠᠷ ᠰᠠᠬᠠᠯ ᠤ᠋ᠨ ᠬᠢᠲᠤᠭᠠ ᠪᠠᠷ ᠵᠦᠰᠦᠪᠡᠯ ᠦᠰᠦ ᠭᠡᠮᠲᠦᠬᠦ ᠦᠭᠡᠢ᠃ ᠰᠠᠬᠠᠯ ᠤ᠋ᠨ ᠬᠢᠲᠤᠭᠠ ᠶ᠋ᠢ ᠭᠠᠷ ᠲᠤ ᠡᠪᠲᠡᠢ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠤᠢᠰᠤᠨ ᠪᠥᠭᠯᠡᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠵᠤ ᠪᠥᠭᠯᠡᠭᠡᠨ ᠡᠴᠡ ᠪᠠᠷᠢᠵᠤ ᠵᠦᠰᠦᠪᠡᠯ ᠭᠠᠷ ᠡᠰᠬᠡᠬᠦ ᠦᠭᠡᠢ ᠪᠥᠭᠡᠳ ᠬᠢᠲᠤᠭᠠ ᠲᠤᠶᠠᠯᠵᠠᠬᠤ ᠦᠭᠡᠢ ᠰᠠᠢᠨ ᠵᠦᠰᠦᠨᠡ᠃ ᠨᠡᠬᠡᠢ ᠶ᠋ᠢ ᠡᠩᠨᠡᠬᠦ ᠳ᠋ᠡᠭᠡᠨ ᠵᠣᠭᠳᠣᠷ ᠲᠠᠢ ᠬᠣᠯᠢᠵᠤ ᠡᠭᠡᠷᠡᠵᠦ ᠨᠡᠢᠳᠬᠡᠭᠰᠡᠨ( ᠡᠷᠴᠢᠯᠡᠭᠰᠡᠨ) ᠨᠠᠷᠢᠨ ᠲᠡᠮᠡᠭᠡᠨ ᠦ᠌ ᠨᠣᠣᠰᠣᠨ ᠤᠲᠠᠰᠤ ᠪᠠᠷ ᠣᠶᠣᠬᠤ ᠪᠠ ᠬᠠᠷᠢᠨ ᠰᠡᠭᠰᠡᠭᠦᠷᠭᠡ᠂ ᠬᠤᠷᠠᠭᠠ᠂ ᠢᠰᠢᠭᠡᠨ ᠦ᠌ ᠠᠷᠠᠰᠤ ᠶ᠋ᠢ ᠪᠣᠯ ᠵᠥᠭᠡᠯᠡᠨ ᠬᠥᠪᠥᠩ ᠴᠠᠭᠠᠨ ᠤᠲᠠᠰᠤ ᠪᠤᠶᠤ ᠲᠣᠷᠭᠠᠨ ᠮᠢᠨᠳᠠᠰᠤᠨ ᠤᠲᠠᠰᠤ ᠪᠠᠷ ᠬᠦᠪᠦᠷᠢᠳᠦᠨ ᠣᠶᠣᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠠᠲᠤ᠂ ᠡᠷᠳᠡᠨᠢᠭᠣᠤᠠ᠂ ᠱᠠᠭᠰᠠᠯ᠂ ᠥᠯᠵᠡᠢᠪᠠᠭᠠᠲᠤᠷ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ