ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ ᠤᠷᠠᠯᠠᠯ01-ᠠᠷᠠᠰᠤ ᠰᠢᠷᠢ ᠶ᠋ᠢ ᠲᠣᠷᠳᠠᠵᠤ ᠠᠷᠠᠴᠢᠯᠠᠬᠤ
370ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ ᠤᠷᠠᠯᠠᠯ
ᠬᠥᠮᠦᠨ᠂ ᠮᠠᠯ ᠢ᠋ ᠭᠡᠷ ᠦ᠋ᠨ ᠲᠡᠵᠢᠭᠡᠪᠦᠷᠢ ᠪᠣᠯᠭᠠᠬᠤ ᠠ᠋ᠴᠠ ᠡᠮᠦᠨᠡ ᠠᠯᠠᠵᠤ ᠢᠳᠡᠭᠰᠡᠨ ᠠᠩ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠰᠤ ᠶ᠋ᠢ ᠨᠥᠮᠥᠷᠬᠦ᠂ ᠳᠡᠪᠢᠰᠬᠦ᠂ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠳᠤᠯᠠᠭᠠᠯᠠᠬᠤ ᠵᠡᠷᠭᠡ ᠪᠡᠷ ᠠᠰᠢᠭᠯᠠᠵᠤ ᠢᠷᠡᠵᠡᠢ᠃ ᠬᠦᠢ ᠨᠢᠭᠡᠳᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠡᠬᠡ ᠶ᠋ᠢᠨ ᠡᠷᠬᠡᠲᠦ ᠶᠣᠰᠣ ᠨᠣᠶᠠᠷᠬᠠᠵᠤ ᠪᠠᠢᠬᠤ ᠳ᠋ᠤ᠌ ᠡᠮᠡᠭᠲᠡᠢᠴᠦᠳ ᠠᠷᠠᠰᠤ ᠨᠡᠬᠡᠢ ᠡᠯᠳᠡᠵᠦ ᠪᠠᠢᠭᠰᠠᠨ ᠲᠤᠬᠠᠢ ᠲᠡᠦᠬᠡᠨ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠥᠮᠦᠨ ᠦ᠌ ᠨᠡᠢᠭᠡᠮ ᠬᠥᠭᠵᠢᠨ ᠳᠠᠪᠰᠢᠬᠤ ᠳᠣᠳᠣᠮ ᠠᠷᠠᠰᠤ ᠨᠡᠬᠡᠢ ᠶ᠋ᠢ ᠪᠣᠯᠪᠠᠰᠤᠷᠠᠭᠤᠯᠬᠤ ᠠᠷᠭᠠ ᠠᠵᠢᠯᠯᠠᠭᠠ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠤ ᠢᠷᠡᠵᠡᠢ᠃
ᠡᠷᠲᠡ ᠦᠶᠡ ᠳ᠋ᠦ᠍ ᠵᠥᠪᠬᠡᠨ ᠬᠦᠢᠲᠡᠨ ᠡᠴᠡ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠬᠠᠯᠬᠠᠪᠴᠢ ᠲᠡᠳᠦᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠣᠯ ᠮᠠᠯ ᠢ᠋ ᠭᠡᠷ ᠦ᠋ᠨ ᠪᠣᠯᠭᠠᠭᠰᠠᠨ ᠲᠡᠷᠡ ᠴᠠᠭ ᠠ᠋ᠴᠠ ᠠᠵᠢᠯ ᠡᠳ᠋ᠯᠡᠭᠡᠨ ᠦ᠌ ᠮᠠᠯ ᠤ᠋ᠨ ᠲᠣᠨᠣᠭ ᠬᠡᠷᠡᠭᠰᠡᠯ ᠬᠢᠬᠦ ᠳ᠋ᠦ᠍ ᠰᠢᠷᠢ ᠶ᠋ᠢ ᠵᠦᠰᠦᠵᠦ ᠰᠤᠷ᠂ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠴᠢᠳᠥᠷ ᠨᠣᠭᠲᠣ ᠬᠢᠬᠦ ᠵᠡᠷᠭᠡ ᠪᠡᠷ ᠬᠡᠷᠡᠭᠯᠡᠬᠦ ᠪᠣᠯᠵᠠᠢ᠃ ᠮᠠᠯ ᠤ᠋ᠨ ᠠᠷᠠᠰᠤ ᠰᠢᠷᠢ ᠶ᠋ᠢ ᠪᠣᠯᠪᠠᠰᠤᠷᠠᠭᠤᠯᠤᠨ ᠡᠳ᠋ᠯᠡᠯ ᠬᠢᠬᠦ ᠠᠵᠢᠯᠯᠠᠭᠠ ᠤᠯᠤᠰ ᠭᠦᠷᠦᠨ ᠪᠦᠷᠢ ᠳ᠋ᠦ᠍ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠬᠥᠭᠵᠢᠵᠦ ᠢᠷᠡᠵᠡᠢ᠃ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠪᠣᠯ ᠪᠤᠰᠤᠳ ᠪᠥᠰ ᠪᠠᠷᠠᠭᠠ᠂ ᠨᠡᠬᠡᠮᠡᠯ᠂ ᠰᠦᠯᠵᠢᠮᠡᠯ ᠡᠴᠡ ᠪᠠᠲᠤ ᠪᠥᠬᠡ ᠵᠥᠪ ᠠᠷᠠᠴᠢᠯᠠᠵᠤ ᠴᠢᠳᠠᠪᠠᠯ ᠬᠡᠯᠪᠡᠷᠢ ᠳᠦᠷᠰᠦ ᠪᠡᠨ ᠠᠯᠳᠠᠳᠠᠭ ᠦᠭᠡᠢ ᠤᠳᠠᠭᠠᠨ ᠡᠳ᠋ᠯᠡᠭᠡ ᠲᠡᠢ ᠵᠦᠢᠯ ᠶᠦᠮ᠃ ᠠᠷᠠᠰᠤ ᠰᠢᠷᠢ ᠪᠡᠷ ᠡᠯᠳᠡᠪ ᠡᠳ᠋ᠯᠡᠯ ᠬᠢᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠦᠨᠳᠦᠰᠦᠨ ᠮᠠᠲ᠋ᠧᠷᠢᠶᠠᠯ ᠪᠣᠯᠬᠤ ᠠᠷᠠᠰᠤ ᠨᠡᠬᠡᠢ ᠶ᠋ᠢ ᠮᠠᠯ ᠤ᠋ᠨ ᠪᠡᠶᠡ ᠡᠴᠡ ᠥᠪᠴᠢᠵᠦ ᠠᠪᠬᠤ ᠠ᠋ᠴᠠ ᠡᠬᠢᠯᠡᠨ ᠲᠣᠷᠳᠠᠬᠤ ᠵᠥᠪ ᠠᠵᠢᠯᠯᠠᠭᠠ ᠱᠠᠭᠠᠷᠳᠠᠭᠳᠠᠨᠠ᠃ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠲᠤᠰ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠶ᠋ᠢᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠭᠠᠳ ᠵᠣᠭᠰᠣᠬᠤ ᠦᠭᠡᠢ ᠭᠠᠳᠠᠭᠠᠳᠤ ᠳ᠋ᠤ᠌ ᠭᠠᠷᠭᠠᠳᠠᠭ ᠦᠨᠡᠲᠦ ᠡᠳ᠋ᠯᠡᠯ ᠤᠴᠢᠷ ᠠ᠋ᠴᠠ ᠰᠢᠷᠬᠡᠭ ᠠᠷᠠᠰᠤ ᠶ᠋ᠢ ᠴᠦ᠍ ᠭᠠᠷᠤᠵᠠᠳᠠᠵᠤ ᠪᠣᠯᠬᠤ ᠦᠭᠡᠢ ᠶᠤᠮ᠃ ᠠᠷᠠᠰᠤ ᠰᠢᠷᠢ ᠶ᠋ᠢ ᠪᠦᠷᠢᠨ ᠪᠦᠲᠦᠨ ᠠᠪᠴᠤ ᠠᠰᠢᠬᠯᠠᠬᠤ ᠶ᠋ᠢᠨ ᠲᠤᠯᠠᠳᠠ ᠮᠠᠯ ᠰᠦᠷᠦᠭ ᠊ᠢ ᠡᠯᠳᠡᠪ ᠫᠠᠷᠠᠽᠢᠲ᠋ᠳᠠᠬᠤ ᠡᠪᠡᠳᠴᠢᠨ ᠡᠴᠡ ᠡᠷᠡᠭᠦᠯᠵᠢᠭᠦᠯᠬᠦ᠂ ᠤᠷᠢᠳᠴᠢᠯᠠᠨ ᠰᠡᠷᠭᠡᠶ᠋ᠢᠯᠡᠬᠦ ᠠᠵᠢᠯ ᠊ᠢ ᠰᠠᠶ᠋ᠢᠵᠢᠷᠠᠭᠤᠯᠬᠤ ᠨᠢ ᠴᠢᠬᠤᠯᠠ ᠪᠠᠶ᠋ᠢᠨᠠ᠃
ᠮᠠᠨ ᠤ ᠣᠷᠣᠨ ᠳᠤ ᠦᠬᠡᠷ ᠦ᠋ᠨ ᠠᠷᠠᠰᠤᠨ ᠤ ᠭᠤᠤᠷ᠂ ᠬᠠᠮᠠᠭᠤ᠂ ᠬᠠᠴᠢᠭ ᠶᠡᠬᠡ ᠪᠠᠶ᠋ᠢᠳᠠᠭ ᠤᠴᠢᠷ ᠵᠢᠯ ᠳᠠᠷᠠᠭᠠᠯᠠᠨ ᠣᠯᠠᠨ ᠮᠠᠯ ᠡᠪᠡᠳᠴᠢᠯᠡᠵᠦ ᠡᠳ᠋ ᠦ᠋ᠨ ᠵᠠᠰᠠᠭ ᠲᠤ ᠶᠡᠬᠡᠬᠡᠨ ᠬᠣᠬᠢᠷᠠᠯ ᠤᠴᠠᠷᠠᠭᠤᠯᠵᠤ ᠪᠠᠶ᠋ᠢᠭᠠ ᠶᠤᠮ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳᠤ ᠦᠬᠡᠷ ᠦ᠋ᠨ ᠭᠤᠤᠷ ᠲᠠᠢ ᠲᠡᠮᠡᠴᠡᠬᠦ ᠠᠵᠢᠯ ᠊ᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠦᠨᠳᠦᠰᠦᠯᠡᠯ ᠲᠡᠢ ᠵᠣᠬᠢᠶᠠᠨ ᠪᠠᠶ᠋ᠢᠭᠤᠯᠤᠭᠰᠠᠨ ᠤ ᠦᠷᠡ ᠳ᠋ᠦ᠋ᠩ ᠳᠤ ᠦᠬᠡᠷ ᠦ᠋ᠨ ᠠᠷᠠᠰᠤᠨ ᠤ ᠭᠤᠤᠷ ᠵᠢᠯ ᠡᠴᠡ ᠵᠢᠯ ᠳᠤ ᠪᠠᠭᠠᠰᠴᠤ ᠪᠠᠶ᠋ᠢᠨᠠ᠃
ᠳᠥᠷᠪᠡᠳᠦᠭᠡᠷ ᠪᠦᠯᠦᠭ 01 ᠠᠷᠠᠰᠤ ᠰᠢᠷᠢ ᠶ᠋ᠢ ᠲᠣᠷᠳᠠᠵᠤ ᠠᠷᠠᠴᠢᠯᠠᠬᠤ
ᠠᠷᠠᠰᠤ ᠰᠢᠷᠢ ᠶ᠋ᠢ ᠬᠡᠪ ᠦ᠋ᠨ ᠬᠡᠮᠵᠢᠶᠡᠨ ᠳᠤ ᠪᠠᠶ᠋ᠢᠯᠭᠠᠵᠤ ᠠᠯᠢᠪᠠ ᠡᠲ᠌ᠯᠡᠯ ᠬᠢᠬᠦ ᠶ᠋ᠢᠨ ᠲᠤᠯᠠᠳᠠ ᠮᠠᠯ ᠨᠢᠲᠤᠯᠤᠨ ᠥᠪᠴᠢᠬᠦ ᠡᠴᠡ ᠡᠬᠢᠯᠡᠬᠦ ᠶᠣᠰᠣᠲᠠᠢ᠃ ᠡᠭᠦᠨ ᠦ ᠲᠤᠯᠠᠳᠠ ᠮᠠᠯ ᠨᠢᠲᠤᠯᠭᠠᠨ ᠤ ᠭᠠᠵᠠᠷ ᠪᠤᠰᠤᠳ ᠠᠶ᠋ᠢᠯ ᠡᠷᠦᠬᠡ ᠨᠤᠭᠦᠳ ᠮᠠᠯ ᠨᠢᠲᠤᠯᠬᠤ ᠳ᠋ᠠᠭᠠᠨ ᠳᠥᠷᠪᠡᠨ ᠮᠥᠴᠢ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠬᠥᠨᠳᠡᠯᠡᠨ ᠣᠭᠲᠣᠯᠵᠤ ᠬᠠ ᠭᠤᠶᠠ ᠶ᠋ᠢᠨ ᠪᠣᠯᠤᠨ ᠰᠤᠭᠤ ᠶ᠋ᠢᠨ ᠬᠡᠰᠡᠭ ᠶ᠋ᠢᠡᠷ ᠢᠷᠡᠵᠦ ᠬᠡᠪᠡᠯᠢ ᠶ᠋ᠢᠨ ᠴᠠᠭᠠᠨ ᠱᠤᠭᠤᠮ ᠲᠠᠢ ᠨᠡᠶ᠋ᠢᠯᠡᠭᠦᠯᠵᠦ ᠢᠷᠠᠭᠠᠳ ᠳᠥᠷᠪᠡᠨ ᠮᠥᠴᠢ ᠡᠴᠡ ᠥᠪᠴᠢᠨᠡ᠃ ᠢᠷᠠᠭᠰᠠᠨ ᠤ ᠳᠠᠷᠠᠭᠠ ᠴᠡᠭᠡᠵᠢᠨ ᠡᠴᠡ ᠪᠥᠭᠰᠡ ᠤᠷᠤᠭᠤ ᠨᠢ ᠬᠠᠭᠤᠯᠵᠤ ᠥᠪᠴᠢᠳᠡᠭ᠃ ᠮᠠᠯ ᠦ᠋ᠨ ᠠᠷᠠᠰᠤ ᠶ᠋ᠢ ᠤᠷᠠᠬᠤ᠂ ᠴᠣᠭᠣᠯᠬᠤ᠂ ᠰᠢᠷᠠ ᠬᠠᠯᠢᠰᠤ᠂ ᠬᠠᠯᠢᠮ ᠳᠠᠭᠠᠭᠤᠯᠬᠤ ᠨᠢ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠴᠢᠨᠠᠷ ᠊ᠢ ᠮᠠᠭᠤᠳᠠᠭᠠᠵᠤ ᠪᠠᠶ᠋ᠢᠭᠠ ᠬᠡᠷᠡᠭ ᠶᠤᠮ᠃ ᠡᠶ᠋ᠢᠮᠦ ᠡᠴᠡ ᠥᠪᠴᠢᠭᠰᠡᠨ ᠦ ᠳᠠᠷᠠᠭᠠ ᠰᠢᠷᠠ ᠬᠠᠯᠢᠰᠤ᠂ ᠬᠠᠯᠢᠮ ᠊ᠢ ᠠᠷᠠᠰᠤᠨ ᠠ᠋ᠴᠠ ᠨᠢᠮᠭᠡᠨ ᠬᠤᠷᠴᠠ ᠨᠠᠷᠢᠬᠠᠨ ᠬᠢᠲᠤᠭᠠ ᠪᠠᠷ ᠬᠤᠰᠤᠨ ᠥᠪᠴᠢᠵᠦ ᠠᠪᠤᠨᠠ᠃ ᠮᠠᠯ ᠦ᠋ᠨ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠴᠢᠰᠤ ᠶ᠋ᠢ ᠬᠤᠰᠤᠵᠤ ᠴᠡᠪᠡᠷᠯᠡᠭᠡᠳ ᠨᠤᠨᠲᠠᠭ ᠳᠠᠪᠤᠰᠤ ᠵᠢᠭᠳᠡ ᠰᠠᠴᠤᠨᠠ᠃ ᠨᠢᠲᠤᠯᠭᠠᠨ ᠤ ᠭᠠᠵᠠᠷ ᠪᠣᠯ ᠳᠠᠪᠤᠰᠤ ᠰᠠᠴᠤᠵᠤ ᠳᠠᠪᠬᠤᠷᠯᠠᠨ ᠬᠤᠷᠢᠶᠠᠵᠤ ᠠᠴᠢᠭᠤᠯᠤᠨᠠ᠃
ᠠᠢᠯ ᠡᠷᠦᠬᠡ ᠨᠦ᠍ᠭᠦᠳ ᠪᠣᠯ ᠡᠷᠲᠡᠨ ᠡᠴᠡ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠠᠷᠭᠠ ᠠᠵᠢᠯᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠠᠰᠤ ᠰᠢᠷᠢ ᠶ᠋ᠢ ᠨᠣᠢᠲᠠᠨ ᠳᠡᠭᠡᠷᠡ ᠨᠢ ᠴᠢᠩᠭᠠ ᠲᠠᠲᠠᠵᠤ ᠲᠡᠨᠢᠢᠯᠭᠡᠭᠡᠳ ᠵᠠᠬᠠ ᠪᠠᠷ ᠨᠢ ᠬᠦᠨᠳᠦᠬᠡᠨ ᠴᠢᠯᠠᠭᠤ ᠲᠠᠯᠪᠢᠵᠤ ᠬᠥᠷᠥᠰᠥ ᠶ᠋ᠢ ᠨᠢ ᠬᠠᠲᠠᠭᠠᠭᠠᠳ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠨᠤᠭᠤᠯᠵᠤ ᠬᠠᠳᠠᠭᠠᠯᠠᠨᠠ᠃ ᠡᠯᠳᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠦᠰᠦ ᠶ᠋ᠢ ᠤᠬᠢᠶᠠᠵᠤ ᠰᠡᠭᠰᠦᠷᠦᠨ ᠤᠷᠲᠤ ᠮᠣᠳᠣᠨ ᠳᠡᠭᠡᠷᠡ ᠲᠣᠬᠣᠵᠤ ᠬᠠᠲᠠᠭᠠᠭᠠᠳ ᠡᠯᠢᠭᠡ᠂ ᠲᠠᠷᠠᠭ᠂ ᠴᠠᠭᠠ ᠪᠠᠷ ᠢᠳᠡᠭᠡᠯᠡᠨ ᠡᠯᠳᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠨᠡ᠃ ᠠᠷᠠᠰᠤ ᠰᠢᠷᠢ ᠶ᠋ᠢ ᠡᠯᠳᠡᠬᠦ ᠳ᠋ᠡᠭᠡᠨ ᠦᠨᠳᠦᠰᠦᠲᠡᠨ ᠪᠦᠷᠢ ᠥᠪᠡᠷᠮᠢᠴᠡ ᠣᠯᠠᠨ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠳᠡᠭ᠃ ᠮᠣᠩᠭᠣᠯᠴᠤᠳ ᠦᠬᠡᠷ ᠦ᠋ᠨ ᠰᠢᠷᠢ ᠶ᠋ᠢ ᠭᠠᠷ ᠠᠷᠭᠠ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠵᠤ ᠣᠯᠠᠨ ᠲᠥᠷᠥᠯ ᠦ᠋ᠨ ᠡᠳ᠋ᠯᠡᠯ ᠬᠢᠵᠦ ᠪᠠᠢᠵᠠᠢ᠃ ᠦᠬᠡᠷ ᠦ᠋ᠨ ᠰᠢᠷᠢ ᠪᠡᠷ ᠭᠦᠮ᠂ ᠡᠮᠡᠭᠡᠯ ᠦ᠋ᠨ ᠭᠥᠯᠢᠮ᠂ ᠭᠤᠲᠤᠯ᠂ ᠠᠢᠷᠠᠭ ᠤ᠋ᠨ ᠬᠥᠬᠦᠦᠷ᠂ ᠰᠢᠷᠢ ᠤᠭᠤᠲᠠ᠂ ᠰᠠᠪᠠ᠂ ᠰᠤᠷ᠂ ᠦᠳᠡᠭᠡᠷᠢ᠂ ᠳᠠᠯᠢᠩ᠂ ᠪᠣᠭᠴᠣ᠂ ᠳᠦᠷᠦᠪᠴᠢ᠂ ᠬᠢᠲᠤᠭᠠᠨ ᠤ᠋ ᠭᠡᠷ ᠵᠡᠷᠭᠡ ᠶ᠋ᠢ ᠬᠢᠨᠡ᠃
ᠭᠦᠮ ᠬᠢᠬᠦ ᠳ᠋ᠡᠭᠡᠨ ᠰᠢᠷᠢ ᠶ᠋ᠢ ᠬᠥᠯᠳᠡᠭᠡᠵᠦ ᠦᠰᠦ ᠶ᠋ᠢ ᠬᠤᠰᠤᠵᠤ ᠵᠣ ᠨᠢᠷᠤᠭᠤ ᠶ᠋ᠢᠨ ᠰᠢᠷᠢ ᠪᠡᠷ ᠬᠢᠳᠡᠭ᠃ 60—70 ᠬᠣᠨᠣᠭ ᠤᠷᠢ ᠳ᠋ᠤ᠌ ᠥᠭᠭᠦᠨᠡ᠃ ᠳᠠᠷᠠᠭᠠ ᠨᠢ ᠪᠠᠭᠠ ᠵᠡᠷᠭᠡ ᠳᠤᠰᠤᠯᠠᠵᠤ ᠣᠳᠤᠨᠠ᠃ 50—60cm ᠭᠠᠵᠠᠷ ᠤᠬᠤᠵᠤ ᠳᠡᠭᠡᠷᠡ ᠨᠢ 3—4 ᠣᠨᠢ ᠪᠣᠭᠣᠵᠤ ᠪᠣᠰᠬᠠᠭᠠᠳ ᠣᠲᠣᠬᠤ᠂ ᠰᠢᠷᠢ ᠶ᠋ᠢ ᠢᠰᠡᠭᠡᠢ ᠪᠤᠶᠤ ᠳᠠᠪᠤᠤ ᠪᠠᠷ ᠪᠦᠷᠢᠵᠦ ᠵᠡᠭᠦᠭᠡᠳ ᠠᠳᠤᠭᠤᠨ ᠤ᠋ ᠬᠣᠮᠣᠯ ᠮᠣᠳᠣᠨ ᠤ᠋ ᠤᠲᠤᠭᠠ ᠪᠠᠷ 4 — 6 ᠴᠠᠭ ᠣᠳᠤᠨᠠ᠃ ᠢᠩᠭᠢᠵᠦ ᠣᠳᠤᠭᠰᠠᠨ ᠰᠢᠷᠢ ᠨᠣᠷᠬᠤ ᠳ᠋ᠤ᠌ ᠬᠠᠲᠠᠬᠤ ᠦᠭᠡᠢ᠃ ᠰᠤᠷ ᠵᠦᠰᠦᠬᠦ ᠳ᠋ᠡᠭᠡᠨ ᠰᠢᠷᠢ ᠶ᠋ᠢ ᠨᠣᠢᠲᠠᠨ ᠢ᠋ᠶ᠋ᠠᠷ ᠨᠢ ᠨᠢᠭᠡ ᠬᠥᠮᠦᠨ ᠵᠢᠭᠳᠡ ᠲᠠᠲᠠᠵᠤ᠂ ᠨᠥᠭᠦᠭᠡ ᠬᠥᠮᠦᠨ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠦ ᠲᠤᠭᠤᠯ ᠭᠠᠷᠭᠠᠯ ᠦᠭᠡᠢ ᠵᠦᠰᠦᠨᠡ᠃ ᠰᠤᠷ ᠢ᠋ ᠭᠤᠷᠪᠠᠨ ᠬᠤᠷᠤᠭᠤ ᠥᠷᠭᠡᠨ ᠵᠦᠰᠦᠬᠦ ᠳ᠋ᠦ᠍ ᠲᠠᠲᠠᠵᠤ ᠨᠦᠳᠦᠭᠰᠡᠨ ᠦ᠌ ᠳᠠᠷᠠᠭᠠ ᠨᠢᠭᠡ ᠬᠤᠷᠤᠭᠤ ᠪᠣᠯᠤᠨᠠ᠃ ᠵᠦᠰᠦᠬᠦ ᠳ᠋ᠡᠭᠡᠨ ᠮᠠᠨ ᠤ᠋ ᠵᠠᠷᠢᠮ ᠦᠨᠳᠦᠰᠦᠲᠡᠨ ᠲᠤᠬᠠᠢᠯᠠᠪᠠᠯ ᠳᠠᠷᠬᠠᠳ ᠶᠠᠰᠤᠲᠠᠨ ᠣᠨᠴᠣᠭᠣᠢ ᠰᠠᠢᠨ ᠪᠥᠭᠡᠳ ᠮᠣᠩᠭᠣᠯ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠬᠢᠬᠦ᠂ ᠬᠡᠷᠡᠭᠯᠡᠬᠦ ᠠᠷᠭᠠ ᠶ᠋ᠢ ᠡᠨᠳᠡ ᠬᠠᠳᠠᠭᠠᠯᠠᠨ ᠪᠠᠢᠳᠠᠭ᠃ ᠤᠭᠰᠠᠭᠠᠲᠠᠨ ᠤ᠋ ᠵᠦᠢ ᠰᠤᠳᠤᠯᠤᠭᠴᠢ ᠪᠠᠳᠮᠠᠬᠠᠳᠠᠨ ᠤ᠋ ᠰᠤᠳᠤᠯᠤᠭᠰᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠳᠠᠷᠬᠠᠳ ᠤ᠋ᠳ ᠦᠬᠡᠷ ᠰᠢᠷᠢ ᠶ᠋ᠢ ᠶᠡᠬᠡ ᠪᠡᠶᠡ᠂ ᠵᠣ᠂ ᠬᠣᠢᠲᠤ ᠤᠷᠲᠤ ᠭᠣᠳᠣ᠂ ᠳᠤᠬᠤ ᠶ᠋ᠢᠨ ᠠᠷᠠᠰᠤ ᠵᠡᠷᠭᠡ ᠪᠡᠷ ᠣᠯᠠᠨ ᠲᠥᠷᠥᠯ ᠦ᠋ᠨ ᠡᠳ᠋ ᠬᠢᠳᠡᠭ ᠪᠥᠭᠡᠳ ᠲᠡᠭᠦᠨ ᠳ᠋ᠡᠭᠡᠨ ᠵᠣᠷᠢᠭᠤᠯᠵᠤ ᠰᠢᠷᠢ ᠶ᠋ᠢ ᠢᠷᠠᠳᠠᠭ᠃ ᠬᠦᠵᠦᠭᠦᠦ ᠶ᠋ᠢᠨ ᠰᠤᠷ ᠬᠢᠬᠦ ᠠᠷᠠᠰᠤ ᠶ᠋ᠢ ᠬᠣᠶᠠᠷ ᠳᠠᠯᠤ ᠶ᠋ᠢᠨ ᠤᠷᠳᠤᠭᠤᠷ ᠥᠪᠴᠢᠵᠦ ᠢᠷᠡᠵᠦ᠂ ᠬᠠᠷᠠ ᠰᠡᠭᠡᠷ ᠦ᠋ᠨ ᠦᠵᠦᠭᠦᠷ ᠲᠦ᠍ ᠨᠡᠢᠯᠡᠭᠦᠯᠦᠨᠡ᠃ ᠲᠡᠭᠦᠨᠴᠢᠯᠡᠨ ᠦᠬᠡᠷ ᠪᠣᠯᠤᠨ ᠬᠣᠨᠢ ᠪᠤᠰᠤᠳ ᠮᠠᠯ ᠤ᠋ᠨ ᠬᠤᠤᠬᠠᠨᠠᠭ ᠢ᠋ ᠪᠢᠲᠡᠭᠦᠦ ᠥᠪᠴᠢᠬᠦ ᠤᠭᠤᠲᠠ ᠬᠢᠬᠦ᠂ ᠬᠦᠢᠰᠦ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠳᠤᠭᠤᠢᠯᠠᠨ ᠥᠪᠴᠢᠵᠦ ᠪᠤᠭᠤᠢᠯᠢ ᠶ᠋ᠢᠨ ᠭᠣᠭᠴᠣᠭᠠ ᠬᠢᠬᠦ ᠵᠡᠷᠭᠡ ᠪᠡᠷ ᠲᠤᠰᠬᠠᠢ ᠵᠣᠷᠢᠭᠤᠯᠤᠯᠲᠠ ᠪᠠᠷ ᠥᠪᠴᠢᠳᠡᠭ᠃
ᠬᠠᠯᠬᠠᠴᠤᠳ ᠰᠤᠷ ᠵᠦᠰᠦᠬᠦ ᠳ᠋ᠡᠭᠡᠨ ᠨᠣᠭᠲᠣ ᠰᠢᠷᠢ ᠶ᠋ᠢ ᠦᠰᠦ ᠲᠡᠢ ᠨᠢ ᠵᠦᠰᠦᠵᠦ ᠬᠥᠯᠳᠡᠭᠡᠭᠡᠳ ᠬᠥᠯᠳᠡᠭᠦᠦ ᠳ᠋ᠦ᠍ᠨᠢ ᠦᠰᠦ ᠶ᠋ᠢ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠬᠤᠰᠤᠵᠤ ᠬᠠᠶᠠᠭᠠᠳ ᠤᠷᠢ ᠤᠲᠤᠭᠠᠨ ᠳ᠋ᠤ᠌ ᠥᠭᠴᠦ ᠡᠯᠳᠡᠨᠡ᠃ ᠡᠯᠳᠡᠬᠦ ᠳ᠋ᠡᠭᠡᠨ ᠲᠤᠰᠬᠠᠢ ᠰᠢᠭᠤᠷᠭᠠ ᠶ᠋ᠢᠨ ᠣᠷᠣᠢ ᠶ᠋ᠢ ᠵᠥᠷᠢᠭᠦᠯᠡᠵᠦ ᠪᠣᠭᠣᠵᠤ ᠬᠠᠳᠬᠤᠭᠤᠷ ᠭᠡᠷ ᠬᠡᠯᠪᠡᠷᠢ ᠲᠡᠢ ᠪᠣᠯᠭᠠᠭᠠᠳ ᠲᠡᠭᠦᠨ ᠦ᠌ ᠪᠡᠨ ᠭᠣᠣᠯ ᠳ᠋ᠤ᠌ ᠪᠡᠬᠢᠯᠡᠬᠦ ᠭᠣᠭᠴᠣᠭᠠ ᠭᠠᠷᠭᠠᠵᠤ ᠰᠤᠷ ᠢ᠋ᠶ᠋ᠠᠨ ᠣᠯᠠᠨ ᠨᠤᠭᠤᠯᠵᠤ ᠭᠣᠭᠴᠣᠭᠠᠨ ᠳ᠋ᠤᠨᠢ ᠣᠷᠣᠭᠤᠯᠵᠤ ᠭᠠᠵᠠᠷ ᠤᠨᠵᠢᠢᠭᠰᠠᠨ ᠭᠣᠭᠴᠣᠭᠠ ᠪᠠᠨ ᠲᠤᠰᠬᠠᠢ ᠬᠦᠯᠢᠵᠦ ᠭᠣᠭᠴᠣᠭᠠ ᠭᠠᠷᠭᠠᠭᠰᠠᠨ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠲᠡᠢ ᠴᠢᠯᠠᠭᠤᠨ ᠳ᠋ᠤ᠌ ᠪᠡᠬᠢᠯᠡᠨ ᠤᠷᠲᠤ ᠨᠠᠷᠢᠨ ᠳᠠᠷᠤᠯᠭᠠ ᠮᠣᠳᠣ ᠣᠷᠣᠭᠤᠯᠵᠤ ᠡᠷᠴᠢᠯᠡᠬᠦ ᠮᠠᠶᠢᠭ ᠢ᠋ᠶ᠋ᠠᠷ ᠳᠡᠭᠡᠭᠰᠢ ᠳᠣᠭᠣᠭᠰᠢ ᠭᠦᠶᠦᠯᠭᠡᠵᠦ ᠡᠷᠴᠢᠯᠡᠵᠦ ᠡᠯᠳᠡᠨᠡ᠃ ᠭᠣᠭᠴᠣᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠮᠣᠳᠣ ᠳᠣᠭᠣᠭᠰᠢ ᠳᠠᠷᠤᠬᠤ ᠳ᠋ᠤ᠌ ᠡᠷᠴᠢ ᠨᠢ ᠵᠠᠳᠠᠷᠠᠵᠤ ᠳᠡᠭᠡᠭᠰᠢ ᠠᠪᠬᠤ ᠳ᠋ᠤ᠌ ᠴᠢᠯᠠᠭᠤ ᠨᠢ ᠡᠷᠭᠢᠵᠦ ᠡᠷᠴᠢᠯᠡᠭᠳᠡᠨᠡ᠃ ᠡᠢᠮᠦ ᠮᠠᠶᠢᠭ ᠢ᠋ᠶ᠋ᠠᠷ ᠡᠯᠳᠡᠨᠡ᠃
ᠵᠢᠷᠤᠭ48
ᠰᠤᠷ ᠡᠭᠡᠷᠡᠵᠦ ᠪᠠᠢᠭᠠ ᠪᠠᠢᠳᠠᠯ
ᠪᠤᠭᠤᠢᠯᠢ᠂ ᠬᠠᠵᠠᠭᠠᠷ᠂ ᠨᠣᠭᠲᠣ ᠬᠢᠬᠦ ᠰᠤᠷ ᠢ᠋5—6cm ᠥᠷᠭᠡᠨ ᠵᠦᠰᠦᠬᠦ ᠳ᠋ᠦ᠍ ᠲᠠᠲᠠᠵᠤ ᠡᠯᠳᠡᠭᠰᠡᠨ ᠦ᠌ ᠳᠠᠷᠠᠭᠠ2—3cm ᠪᠣᠯᠤᠨᠠ᠃ ᠡᠯᠳᠡᠬᠦ ᠰᠤᠷ ᠢ᠋ ᠴᠢᠭᠢᠭᠯᠡᠨ ᠤᠷᠢ ᠳ᠋ᠤ᠌ ᠥᠭᠬᠦ ᠶ᠋ᠢᠨ ᠲᠤᠯᠠᠳᠠ40 ᠣᠷᠴᠢᠮ ᠬᠣᠨᠣᠭ ᠪᠠᠭᠤᠴᠠᠨ ᠳ᠋ᠤ᠌ ᠪᠤᠯᠠᠵᠤ ᠳᠠᠷᠠᠭᠠ ᠨᠢ ᠠᠳᠤᠭᠤᠨ ᠤ᠋ ᠥᠭᠡᠬᠦ᠂ ᠲᠠᠷᠪᠠᠭᠠ ᠶ᠋ᠢᠨ ᠲᠣᠰᠣ ᠵᠤᠵᠠᠭᠠᠨ ᠲᠦᠷᠬᠢᠵᠦ ᠳᠤᠰᠤᠯᠠᠨᠠ᠃ ᠲᠣᠰᠣ ᠰᠢᠩᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠮᠢᠬᠠᠨ ᠲᠠᠯᠠ ᠪᠠᠷ ᠨᠢ ᠲᠡᠭᠰᠢ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠠᠯᠤᠬᠠ ᠪᠠᠷ ᠬᠥᠩᠭᠡᠨ ᠵᠢᠭᠳᠡ ᠴᠣᠬᠢᠵᠤ ᠡᠯᠳᠡᠨᠡ᠃ ᠮᠥᠨ ᠬᠤᠰᠤᠨ ᠤ᠋ ᠬᠣᠵᠤᠤᠯᠠ ᠨᠦᠬᠡᠯᠡᠵᠦ ᠨᠦᠬᠡ ᠪᠡᠷ ᠨᠢ ᠰᠤᠷ ᠢ᠋ᠶ᠋ᠠᠨ ᠰᠦᠪᠡᠯᠡᠵᠦ ᠴᠠᠰᠢ ᠨᠠᠰᠢ ᠲᠠᠲᠠᠵᠤ ᠡᠯᠳᠡᠬᠦ ᠪᠠ ᠵᠥᠭᠡᠯᠡᠷᠡᠭᠦᠯᠬᠦ ᠶ᠋ᠢᠨ ᠲᠤᠯᠠᠳᠠ ᠰᠢᠷᠠ ᠪᠠᠭᠤᠴᠠᠨ ᠳ᠋ᠤ᠌ ᠡᠳᠦᠷ ᠲᠤᠷᠰᠢ ᠪᠤᠯᠠᠨᠠ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠡᠭᠡᠷᠡᠦᠯᠳᠡᠨᠡ᠃ ᠡᠭᠡᠷᠡᠦᠯᠳᠡᠬᠦ ᠠᠷᠭᠠ ᠨᠤᠲᠤᠭ ᠪᠦᠷᠢ ᠶᠡᠷᠦᠩᠬᠡᠢ ᠳ᠋ᠡᠭᠡᠨ ᠠᠳᠠᠯᠢ ᠪᠣᠯᠪᠠᠴᠤ180cm ᠠ᠋ᠴᠠ ᠥᠨᠳᠥᠷ ᠲᠤᠰ ᠪᠦᠷᠢ ᠠᠴᠠ ᠲᠠᠢ ᠬᠣᠶᠠᠷ ᠮᠣᠳᠣ ᠵᠣᠭᠣᠭᠣᠵᠤ ᠳᠡᠭᠡᠭᠦᠷ ᠨᠢ ᠠᠢᠷᠠᠭ ᠳᠡᠭᠦᠵᠢᠯᠡᠬᠦ ᠮᠠᠶᠢᠭ ᠤ᠋ᠨ ᠨᠢᠷᠤᠭᠤ ᠬᠢᠵᠦ ᠠᠴᠠ ᠮᠣᠳᠣ ᠠ᠋ᠴᠠ ᠭᠠᠵᠠᠷ ᠵᠣᠭᠣᠭᠣᠵᠤ ᠪᠡᠬᠢᠯᠡᠨ ᠰᠤᠷ ᠢ᠋ᠶ᠋ᠠᠨ ᠭᠣᠭᠴᠣᠭᠠᠯᠠᠳᠠᠨ ᠪᠡᠬᠢᠯᠡᠵᠦ ᠵᠡᠭᠦᠨ ᠭᠣᠭᠴᠣᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠳᠠᠷᠤᠭᠤᠯᠭᠠ ᠮᠣᠳᠣ ᠪᠠᠷ ᠳᠠᠷᠤᠵᠤ ᠡᠭᠡᠷᠡᠦᠯᠳᠡᠨᠡ᠃ ᠦᠢᠯᠡᠳᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠰᠤᠷ ᠡᠳ᠋ᠯᠡᠭᠡᠨ ᠦ᠌ ᠬᠤᠪᠢ ᠳ᠋ᠤ᠌ ᠭᠠᠷ ᠰᠤᠷ ᠢ᠋ ᠭᠦᠢᠴᠡᠳᠡᠭ ᠦᠭᠡᠢ᠃
ᠳᠠᠷᠬᠠᠴᠤᠳ ᠰᠢᠷᠢ ᠡᠯᠳᠡᠬᠦ ᠳ᠋ᠡᠭᠡᠨ ᠡᠬᠢᠯᠡᠭᠡᠳ ᠤᠷᠢ ᠳ᠋ᠤ᠌ ᠥᠭᠴᠦ ᠳᠠᠷᠠᠭᠠ ᠨᠢ ᠮᠣᠳᠣᠨ ᠮᠤᠨᠠ ᠪᠠᠷ ᠨᠦᠳᠦᠵᠦ ᠡᠯᠳᠡᠳᠡᠭ᠃ ᠰᠤᠷ ᠢ᠋ ᠵᠦᠰᠦᠬᠦ ᠳ᠋ᠡᠭᠡᠨ ᠬᠠᠯᠬᠠ ᠶ᠋ᠢᠨ ᠰᠤᠷ ᠵᠦᠰᠦᠬᠦ ᠠᠷᠭᠠ ᠲᠠᠢ ᠠᠳᠠᠯᠢᠬᠠᠨ᠃ ᠭᠦᠮ ᠬᠢᠬᠦ ᠳ᠋ᠡᠭᠡᠨ2—3 ᠰᠠᠷᠠ ᠤᠷᠢ ᠳ᠋ᠤ᠌ ᠥᠭᠭᠦᠨᠡ᠃ ᠳᠠᠷᠠᠭᠠ ᠨᠢ ᠬᠣᠨᠢᠨ ᠤ᠋ ᠰᠢᠷᠠ ᠪᠠᠭᠤᠴᠠᠨ ᠳ᠋ᠤ᠌ ᠥᠷᠯᠥᠭᠡ ᠪᠤᠯᠠᠭᠰᠠᠨ ᠪᠣᠯ ᠣᠷᠣᠢ ᠠᠪᠴᠤ ᠬᠤᠢᠯᠠᠨ ᠨᠦᠳᠦᠨᠡ᠃ ᠬᠤᠢᠯᠠᠨ ᠨᠦᠳᠦᠬᠦ ᠳ᠋ᠡᠭᠡᠨ ᠣᠯᠠᠨ ᠳᠠᠬᠢᠨ ᠡᠷᠭᠢᠭᠦᠯᠵᠦ ᠬᠤᠢᠯᠠᠵᠤ ᠨᠦᠳᠦᠨᠡ᠃ ᠨᠦᠳᠦᠯᠲᠡ ᠪᠣᠯᠤᠭᠰᠠᠨ ᠡᠰᠡᠬᠦ ᠶ᠋ᠢ ᠰᠢᠯᠭᠠᠬᠤ ᠳ᠋ᠠᠭᠠᠨ ᠰᠢᠷᠢ ᠶ᠋ᠢ ᠠᠳᠬᠤᠵᠤ ᠦᠵᠡᠬᠦ ᠳ᠋ᠦ᠍ ᠠᠳᠬᠤᠭᠰᠠᠨ ᠶᠠᠩᠵᠤ ᠪᠠᠷ ᠨᠣᠢᠲᠠᠨ ᠮᠥᠷ ᠭᠠᠷᠪᠠᠯ ᠳᠤᠲᠠᠭᠤ᠂ ᠠᠳᠬᠤᠭᠰᠠᠨ ᠭᠠᠵᠠᠷ ᠥᠪᠡᠷ ᠢ᠋ᠶ᠋ᠡᠨ ᠲᠡᠨᠢᠢᠨ ᠴᠢᠭᠢᠭ ᠦᠭᠡᠢ ᠪᠠᠢᠪᠠᠯ ᠡᠯᠳᠡᠯᠲᠡ ᠪᠣᠯᠤᠭᠰᠠᠨ ᠭᠡᠵᠦ ᠦᠵᠡᠨᠡ᠃
ᠳᠠᠷᠬᠠᠴᠤᠳ ᠰᠢᠷᠢ ᠶ᠋ᠢ ᠤᠲᠤᠭᠠᠨ ᠳ᠋ᠤ᠌ ᠥᠭᠴᠦ ᠭᠤᠲᠤᠯ ᠤ᠋ᠨ ᠤᠯᠠ ᠬᠢᠳᠡᠭ᠃ ᠡᠨᠡ ᠨᠢ ᠰᠢᠷᠢ ᠲᠠᠲᠠᠵᠤ ᠬᠠᠳᠠᠳᠠᠭ ᠦᠭᠡᠢ ᠰᠠᠢᠨ ᠲᠠᠯᠠ ᠲᠠᠢ ᠪᠠᠢᠳᠠᠭ᠃ ᠤᠭᠤᠲᠠ ᠰᠠᠪᠠ ᠬᠢᠬᠦ ᠰᠢᠷᠢ ᠶ᠋ᠢ ᠭᠠᠩᠳᠠᠬᠤ ᠳ᠋ᠠᠭᠠᠨ30—60l ᠣᠷᠴᠢᠮ ᠰᠢᠩᠭᠡᠨ ᠪᠠᠭᠲᠠᠬᠤ ᠰᠠᠪᠠᠨ ᠳ᠋ᠤ᠌ ᠬᠤᠵᠢᠷ᠂ ᠱᠡᠦ ᠡᠰᠡᠪᠡᠯ ᠴᠠᠭᠠ ᠪᠤᠶᠤ ᠰᠢᠷᠠ ᠤᠰᠤ ᠬᠢᠵᠦ ᠳᠣᠲᠣᠷᠠ ᠨᠢ ᠰᠢᠷᠢ ᠪᠡᠨ ᠬᠢᠵᠦ ᠭᠠᠩᠳᠠᠨᠠ᠃ ᠭᠠᠩᠳᠠᠬᠤ ᠰᠢᠷᠢ ᠶ᠋ᠢᠨ ᠦᠰᠦ ᠶ᠋ᠢ ᠶᠡᠬᠡᠪᠴᠢᠯᠡᠨ ᠵᠦᠢᠯᠦᠭᠰᠡᠨ ᠪᠠᠢᠳᠠᠭ᠃ ᠦᠰᠦ ᠶ᠋ᠢ ᠵᠦᠢᠯᠬᠦ( ᠬᠤᠰᠤᠬᠤ) ᠳ᠋ᠠᠭᠠᠨ ᠰᠢᠷᠢ ᠶ᠋ᠢᠨ ᠳᠣᠲᠣᠷᠠ ᠲᠠᠯᠠ ᠠ᠋ᠴᠠ70cm ᠣᠷᠴᠢᠮ ᠪᠦᠳᠦᠭᠦᠪᠲᠦᠷ ᠮᠣᠳᠣ ᠪᠠᠷ ᠲᠤᠯᠵᠤ᠂ ᠢᠷ ᠲᠡᠢ ᠬᠤᠷᠴᠠ ᠬᠢᠲᠤᠭᠠ ᠬᠡᠳᠦ ᠬᠡᠳᠦ ᠣᠷᠣᠨᠠ᠃ ᠦᠰᠦ ᠶ᠋ᠢ ᠵᠦᠢᠯᠬᠦ ᠳ᠋ᠡᠭᠡᠨ ᠮᠣᠳᠣ ᠪᠠᠨ ᠨᠠᠯᠠᠤ ᠪᠠᠷᠢᠵᠤ ᠲᠡᠭᠦᠨ ᠦ᠌ ᠳᠠᠭᠠᠤ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠬᠤᠰᠤᠨᠠ᠃
ᠠᠳᠤᠭᠤᠨ ᠤ᠋ ᠰᠢᠷᠢ ᠮᠣᠷᠢᠨ ᠤ᠋ ᠬᠥᠯᠥᠰᠥᠨ ᠳ᠋ᠦ᠍ ᠲᠦᠯᠡᠭᠳᠡᠳᠡᠭ ᠦᠭᠡᠢ ᠰᠠᠢᠨ ᠲᠠᠯᠠ ᠲᠠᠢ᠃ ᠠᠳᠤᠭᠤᠨ ᠤ᠋ ᠰᠢᠷᠢ ᠶ᠋ᠢᠨ ᠦᠰᠦ ᠶ᠋ᠢ ᠵᠦᠢᠯᠵᠦ ᠴᠠᠭᠠ ᠶ᠋ᠢᠨ ᠰᠢᠷᠠ ᠤᠰᠤᠨ ᠳ᠋ᠤ᠌7 ᠬᠣᠨᠣᠭ ᠢᠳᠡᠭᠡᠯᠡᠵᠦ ᠡᠯᠳᠡᠨ ᠭᠥᠯᠢᠮ᠂ ᠴᠢᠳᠥᠷ᠂ ᠨᠣᠭᠲᠣ ᠬᠢᠨᠡ᠃ ᠦᠬᠡᠷ ᠦ᠋ᠨ ᠰᠢᠷᠢ ᠶ᠋ᠢ ᠦᠰᠦ ᠶ᠋ᠢ ᠨᠢ ᠵᠦᠢᠯᠵᠦ ᠴᠠᠭᠠ ᠶ᠋ᠢᠨ ᠰᠢᠷᠠ ᠤᠰᠤ᠂ ᠬᠤᠵᠢᠷ ᠪᠤᠶᠤ ᠱᠡᠦ ᠲᠡᠢ ᠬᠣᠯᠢᠵᠤ ᠢᠳᠡᠭᠡᠯᠡᠨᠡ᠃ ᠦᠬᠡᠷ ᠦ᠋ᠨ ᠨᠢᠭᠡ ᠰᠢᠷᠢ ᠳ᠋ᠦ᠍6kg ᠬᠤᠵᠢᠷ ᠪᠤᠶᠤ ᠱᠡᠦ ᠬᠢᠨᠡ᠃ ᠳᠡᠪᠢᠰᠬᠡᠷ ᠬᠢᠬᠦ ᠰᠢᠷᠢ ᠶ᠋ᠢ ᠦᠰᠦ ᠲᠡᠢ ᠨᠢ12 ᠬᠣᠨᠣᠭ ᠢᠳᠡᠭᠡᠯᠡᠨᠡ᠃ ᠲᠡᠭᠦᠨ ᠢ᠋ᠶ᠋ᠡᠨ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠮᠤᠨᠠ ᠪᠠᠷ ᠨᠦᠳᠦᠵᠦ ᠡᠯᠳᠡᠭᠡᠳ ᠳᠤᠰᠤᠯᠠᠳᠠᠭ᠃ ᠤᠯᠠ ᠶ᠋ᠢᠨ ᠰᠢᠷᠢ ᠶ᠋ᠢ ᠶᠠᠰᠤᠨ ᠤ᠋ ᠨᠡᠷᠡᠮᠡᠯ ᠲᠣᠰᠣ ᠪᠠᠷ ᠳᠤᠰᠤᠯᠠᠨᠠ᠃
ᠨᠡᠷᠡᠮᠡᠯ ᠲᠣᠰᠣ ᠭᠠᠷᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠭᠠᠵᠠᠷ ᠤᠬᠤᠵᠤ ᠨᠦᠬᠡ ᠭᠠᠷᠭᠠᠭᠠᠳ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠲᠣᠮᠣ ᠬᠤᠪᠢᠩ ᠰᠠᠭᠤᠯᠭᠠᠵᠤ ᠳᠡᠭᠡᠷᠡ ᠨᠢ ᠴᠤᠭᠤᠷᠤᠬᠠᠢ ᠲᠣᠭᠣᠭᠠ ᠲᠠᠯᠪᠢᠨᠠ᠃ ᠴᠣᠭᠣᠷᠣᠬᠠᠢ ᠲᠣᠭᠣᠭᠠᠨ ᠳ᠋ᠠᠭᠠᠨ ᠶᠠᠰᠤ ᠬᠢᠵᠦ ᠪᠦᠲᠦᠨ ᠲᠣᠭᠣᠭᠠ ᠪᠠᠷ ᠬᠥᠮᠥᠷᠢᠵᠦ ᠳᠡᠭᠡᠷᠡ ᠨᠢ ᠲᠦᠯᠡᠰᠢ ᠣᠪᠣᠭᠠᠯᠠᠵᠤ ᠭᠠᠯᠯᠠᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠠᠷᠠ ᠲᠣᠰᠣ ᠭᠠᠷᠬᠤ ᠪᠠ ᠲᠡᠭᠦᠨ ᠢ᠋ᠶ᠋ᠡᠷ ᠤᠯᠠ ᠶ᠋ᠢᠨ ᠰᠢᠷᠢ᠂ ᠰᠤᠷ ᠢ᠋ ᠳᠤᠰᠤᠯᠠᠵᠤ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠴᠤᠯᠪᠤᠭᠤᠷ᠂ ᠴᠢᠳᠥᠷ ᠨᠣᠭᠲᠣ ᠬᠢᠳᠡᠭ᠃ ᠪᠤᠭᠤᠢᠯᠢ ᠶ᠋ᠢᠨ ᠰᠤᠷ ᠤ᠋ᠨ ᠭᠣᠭᠴᠣᠭᠠ ᠬᠢᠬᠦ ᠶ᠋ᠢᠨ ᠲᠤᠯᠠᠳᠠ ᠬᠦᠢᠰᠦᠨ ᠦ᠌ ᠰᠢᠷᠢ ᠶ᠋ᠢ ᠳᠤᠭᠤᠢᠯᠠᠨ ᠬᠠᠲᠠᠭᠠᠭᠠᠳ ᠲᠡᠭᠦᠨ ᠢ᠋ᠶ᠋ᠡᠨ ᠬᠢᠲᠤᠭᠠ ᠪᠠᠷ ᠵᠣᠷᠢᠵᠤ ᠡᠯᠲᠡᠯ ᠦᠭᠡᠢ ᠪᠤᠭᠤᠢᠯᠢ ᠶ᠋ᠢᠨ ᠴᠠᠭᠠᠷᠢᠭ ᠭᠣᠭᠴᠣᠭᠠ ᠬᠢᠳᠡᠭ᠃ ᠪᠤᠭᠤᠢᠯᠢ ᠶ᠋ᠢᠨ ᠰᠤᠷ ᠤ᠋ᠨ ᠪᠣᠭᠣᠨᠢ8—10 ᠠᠯᠲᠠ(13—16 ᠮᠧᠲ᠋ᠷ)᠂ ᠬᠠᠮᠤᠭ ᠤ᠋ᠨ ᠤᠷᠲᠤ ᠨᠢ12 ᠠᠯᠲᠠ(18 ᠮᠧᠲ᠋ᠷ) ᠪᠠᠢᠳᠠᠭ᠃ ᠦᠬᠡᠷ ᠦ᠋ᠨ ᠰᠢᠷᠢ ᠪᠡᠷ ᠭᠦᠮ ᠦ᠋ᠨ ᠭᠤᠲᠤᠯ᠂ ᠡᠮᠡᠭᠡᠯ ᠦ᠋ᠨ ᠭᠥᠯᠢᠮ᠂ ᠬᠥᠬᠦᠦᠷ᠂ ᠬᠥᠨᠥᠭ ᠬᠢᠬᠦ ᠳ᠋ᠡᠭᠡᠨ ᠣᠶᠣᠳᠠᠯ ᠤ᠋ᠳ ᠤ᠋ᠨ ᠵᠠᠪᠰᠠᠷ ᠵᠠᠪᠠᠯ ᠨᠠᠷᠢᠨ ᠬᠠᠪᠴᠢᠶᠠᠷᠢ ᠪᠠᠷᠢᠵᠤ ᠦᠬᠡᠷ ᠦ᠋ᠨ ᠰᠢᠷᠪᠥᠰᠥ ᠪᠡᠷ ᠣᠶᠣᠨᠠ᠃
ᠰᠢᠷᠪᠥᠰᠥ ᠡᠯᠳᠡᠬᠦ ᠦᠬᠡᠷ ᠢ᠋ ᠨᠢᠲᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠷᠪᠥᠰᠥ ᠶ᠋ᠢ ᠠᠪᠴᠤ ᠤᠰᠤᠨ ᠳ᠋ᠤ᠌ ᠤᠬᠢᠶᠠᠵᠤ ᠴᠢᠰᠤ ᠶ᠋ᠢ ᠠᠷᠢᠯᠭᠠᠨ ᠴᠡᠪᠡᠷᠯᠡᠵᠦ ᠠᠪᠤᠨᠠ᠃ ᠬᠠᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠨᠢ ᠬᠠᠪᠲᠠᠭᠠᠢ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠮᠣᠳᠣᠨ ᠮᠤᠨᠠ ᠪᠠᠷ ᠵᠥᠭᠡᠯᠡᠨ ᠴᠣᠬᠢᠵᠤ ᠡᠯᠳᠡᠨᠡ᠃ ᠡᠯᠳᠡᠬᠦ ᠦᠶᠡ ᠳ᠋ᠦ᠍ ᠭᠠᠳᠠᠨᠠ ᠲᠠᠯᠠ ᠶ᠋ᠢᠨ ᠬᠠᠯᠢᠰᠤ ᠶ᠋ᠢ ᠬᠣᠪᠬᠣᠷᠠᠮᠠᠭᠴᠠ ᠠᠪᠴᠤ ᠬᠠᠶᠠᠭᠠᠳ ᠰᠢᠷᠪᠥᠰᠥ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠵᠦ ᠴᠣᠬᠢᠬᠤ ᠳ᠋ᠤ᠌ ᠡᠬᠢᠯᠡᠭᠡᠳ ᠰᠢᠷᠬᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠠᠳᠠᠷᠠᠵᠤ᠂ ᠳᠠᠷᠠᠭᠠ ᠨᠢ ᠳᠠᠪᠤᠤ ᠶ᠋ᠢᠨ ᠤᠲᠠᠰᠤ ᠰᠢᠭ᠋ ᠨᠠᠷᠢᠨ ᠵᠥᠭᠡᠯᠡᠨ ᠤᠲᠠᠰᠤ ᠪᠣᠯᠤᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ᠨᠢ ᠠᠪᠴᠤ ᠲᠠᠮᠤᠵᠤ ᠤᠲᠠᠰᠤ ᠬᠢᠨᠡ᠃ ᠰᠢᠷᠪᠥᠰᠥ ᠪᠡᠷ ᠪᠦᠬᠦᠢᠯᠡ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠢ᠋ ᠣᠶᠣᠬᠤ ᠪᠥᠭᠡᠳ ᠬᠡᠵᠢᠶᠡ ᠴᠦ᠍ ᠲᠠᠰᠤᠷᠠᠬᠤ ᠦᠭᠡᠢ᠃ ᠬᠠᠷᠢᠨ ᠵᠠᠩᠭᠢᠯᠠᠭᠠ ᠲᠣᠭᠲᠠᠳᠠᠭ ᠦᠭᠡᠢ ᠤᠴᠢᠷ ᠶᠠᠭᠤᠮᠠ ᠣᠶᠣᠭᠰᠠᠨ ᠤ᠋ ᠳᠠᠷᠠᠭᠠ ᠬᠢᠲᠤᠭᠠ ᠪᠠᠷ ᠣᠭᠲᠣᠯᠤᠨ ᠴᠣᠭ ᠢ᠋ᠶ᠋ᠠᠷ ᠲᠦᠯᠡᠵᠦ ᠪᠥᠭᠡᠷᠡᠩᠬᠡᠢᠯᠡᠨ ᠲᠣᠭᠲᠠᠭᠠᠨᠠ᠃ ᠰᠢᠷᠪᠥᠰᠥ ᠪᠡᠷ ᠵᠥᠪᠬᠡᠨ ᠪᠡᠬᠢᠯᠡᠬᠦ ᠣᠶᠣᠳᠠᠯ ᠬᠢᠭᠡᠳ ᠵᠣᠭᠰᠣᠬᠤ ᠦᠭᠡᠢ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠳ᠋ᠦ᠍ ᠭᠣᠶᠣᠯ ᠤ᠋ᠨ ᠬᠡ ᠲᠠᠯᠪᠢᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃ ᠬᠡᠷᠪᠡ ᠬᠥᠬᠦᠦᠷ᠂ ᠪᠣᠷᠪᠢ᠂ ᠬᠥᠨᠥᠭ ᠬᠢᠬᠦ ᠪᠣᠯ ᠦᠬᠡᠷ ᠦ᠋ᠨ ᠬᠢᠯᠭᠠᠰᠤ ᠲᠠᠢ ᠬᠣᠯᠢᠵᠤ ᠲᠠᠮᠤᠨᠠ᠃ ᠬᠥᠬᠦᠦᠷ᠂ ᠬᠥᠨᠥᠭ᠂ ᠭᠤᠲᠤᠯ ᠢ᠋ ᠣᠶᠣᠬᠤ ᠳ᠋ᠠᠭᠠᠨ ᠰᠢᠪᠡᠭᠦᠷ ᠪᠤᠶᠤ ᠰᠢᠪᠦᠭᠡ ᠪᠡᠷ ᠬᠠᠳᠬᠤᠨ ᠴᠣᠭᠣᠯᠵᠤ ᠪᠦᠳᠦᠭᠦᠨ ᠵᠡᠭᠦᠦ ᠪᠡᠷ ᠣᠶᠣᠨᠠ᠃ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠳ᠋ᠦ᠍ ᠬᠡ ᠤᠭᠠᠯᠵᠠ ᠶ᠋ᠢ ᠲᠠᠯᠪᠢᠬᠤ ᠳ᠋ᠠᠭᠠᠨ ᠰᠠᠪᠢᠬᠢ ᠰᠠᠷᠢᠰᠤ ᠪᠠᠷ ᠬᠢᠬᠦ ᠪᠥᠭᠡᠳ ᠲᠡᠭᠦᠨ ᠢ᠋ ᠲᠤᠰᠬᠠᠢ ᠬᠡᠪ ᠲᠦ᠍ ᠰᠢᠬᠠᠵᠤ ᠳᠣᠪᠣᠢᠯᠭᠠᠨ ᠲᠠᠯᠪᠢᠳᠠᠭ᠃ ᠰᠢᠷᠢ ᠶ᠋ᠢᠨ ᠬᠥᠭᠡᠭᠡᠮᠡᠯ ᠤᠭᠠᠯᠵᠠ ᠶ᠋ᠢ ᠣᠯᠠᠨ ᠶᠠᠩᠵᠤ ᠪᠠᠷ ᠤᠷᠠᠯᠠᠬᠤ ᠪᠥᠭᠡᠳ ᠡᠮᠡᠭᠡᠯ ᠦ᠋ᠨ ᠭᠥᠯᠢᠮ᠂ ᠮᠣᠩᠭᠣᠯ ᠭᠤᠲᠤᠯ ᠤ᠋ᠨ ᠱᠠᠭᠠᠢ( ᠱᠠᠭᠠ) ᠵᠤᠯᠤᠭ᠂ ᠣᠢᠮᠣᠰᠤᠨ ᠤ᠋ ᠬᠠᠷᠠᠭᠠ᠂ ᠳᠥᠷᠦᠭᠡᠨ ᠦ᠌ ᠭᠡᠷ ᠪᠣᠭᠴᠣ᠂ ᠪᠥᠬᠡ ᠶ᠋ᠢᠨ ᠭᠤᠲᠤᠯ ᠤ᠋ᠨ ᠲᠦᠷᠡᠢ ᠶ᠋ᠢᠨ ᠪᠣᠭᠣᠯᠲᠠ᠂ ᠲᠠᠮᠠᠬᠢᠨ ᠤ᠋ ᠤᠭᠤᠲᠠ ᠪᠣᠯᠤᠨ ᠪᠤᠰᠤᠳ ᠬᠠᠪᠲᠠᠭᠠ᠂ ᠰᠠᠪᠠᠨ ᠳ᠋ᠤ᠌ ᠬᠡ ᠲᠠᠯᠪᠢᠳᠠᠭ᠃ ᠬᠡ ᠶ᠋ᠢ ᠲᠠᠯᠪᠢᠬᠤ ᠶ᠋ᠢᠨ ᠲᠤᠯᠠᠳᠠ ᠪᠤᠰᠤᠳ ᠬᠠᠳᠬᠤᠮᠠᠯ ᠤ᠋ᠨ ᠠᠳᠠᠯᠢ ᠬᠡ ᠪᠡᠨ ᠰᠣᠩᠭᠣᠨ ᠠᠪᠴᠤ ᠬᠢᠬᠦ ᠵᠦᠢᠯ ᠳ᠋ᠡᠭᠡᠨ ᠲᠣᠬᠢᠷᠠᠭᠤᠯᠤᠨ ᠵᠢᠷᠤᠵᠤ᠂ ᠰᠡᠢᠯᠵᠦ ᠬᠡᠪ ᠲᠦ᠍ ᠰᠢᠬᠠᠵᠤ ᠪᠡᠯᠡᠳᠬᠡᠨᠡ᠃ ᠰᠢᠷᠢ ᠶ᠋ᠢᠨ ᠡᠳ᠋ᠯᠡᠯ ᠳ᠋ᠦ᠍ ᠲᠠᠯᠪᠢᠬᠤ᠂ ᠤᠭᠠᠯᠵᠠ ᠬᠢᠬᠦ ᠵᠦᠢᠯ ᠡᠴᠡ ᠪᠡᠨ ᠰᠢᠯᠲᠠᠭᠠᠯᠠᠵᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠠᠢᠳᠠᠭ᠃ ᠵᠢᠱ᠌ᠢᠶᠡ ᠨᠢ᠄ ᠭᠥᠯᠢᠮ ᠣᠯᠣᠩᠴᠣᠭ ᠲᠤ ᠲᠦᠮᠡᠨ ᠵᠢᠷᠭᠠᠯᠠᠩ᠂ ᠫᠦᠰᠡ᠂ ᠮᠤᠰᠬᠢᠶᠡ᠂ ᠭᠥᠷᠥᠯᠭᠡ᠂ ᠴᠦᠳᠡᠨᠵᠡ ᠶ᠋ᠢᠨ ᠪᠤᠯᠤᠩ᠂ ᠥᠯᠵᠡᠢ ᠤᠲᠠᠰᠤ ᠵᠡᠷᠭᠡ ᠬᠡ᠂ ᠳᠥᠷᠦᠭᠡᠨ ᠦ᠌ ᠰᠤᠷ ᠤ᠋ᠨ ᠭᠡᠷ ᠲᠦ᠍ ᠳᠤᠭᠤᠢ ᠵᠣᠭᠣᠰ᠂ ᠫᠦᠰᠡᠨ ᠬᠡ ᠲᠠᠯᠪᠢᠳᠠᠭ ᠪᠠᠢᠵᠠᠢ᠃
ᠤᠭᠠᠯᠵᠠᠨ ᠤ᠋ ᠬᠡ ᠪᠡᠯᠡᠳᠬᠡᠬᠦ ᠰᠡᠢᠯᠪᠦᠷᠢ ᠶ᠋ᠢᠨ ᠪᠠᠭᠠᠵᠢ ᠨᠤᠭᠤᠳ ᠨᠢ ᠭᠠᠳᠠᠨᠠ ᠠ᠋ᠴᠠ ᠪᠠᠨ ᠢᠷ ᠲᠡᠢ᠂ ᠨᠢᠮᠭᠡᠨ ᠲᠡᠮᠦᠷ ᠲᠡᠢ ᠣᠯᠠᠨ ᠶᠠᠩᠵᠤ ᠪᠠᠢᠬᠤ ᠪᠣᠯᠪᠠᠴᠤ ᠭᠤᠷᠪᠠᠯᠵᠢᠨ᠂ ᠳᠥᠷᠪᠡᠯᠵᠢᠨ᠂ ᠬᠣᠪᠢᠯ ᠲᠠᠢ ᠣᠬᠣᠮ᠂ ᠮᠣᠩᠭᠣᠯ ᠬᠢᠲᠤᠭᠠ ᠵᠡᠷᠭᠡ ᠶ᠋ᠢ ᠬᠡ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠬᠡᠷᠡᠭᠯᠡᠨᠡ᠃ ᠰᠡᠢᠯᠪᠦᠷᠢ ᠬᠢᠬᠦ ᠮᠣᠳᠣ ᠬᠠᠲᠠᠭᠤ ᠨᠢᠭᠲᠠ ᠰᠢᠷᠬᠡᠭ ᠲᠡᠢ᠂ ᠬᠤᠰᠤ ᠮᠣᠳᠣ ᠪᠠᠷ ᠬᠢᠳᠡᠭ᠃ ᠮᠣᠳᠣ ᠪᠠᠨ ᠲᠡᠭᠰᠢᠯᠡᠨ ᠤᠭᠠᠯᠵᠠ ᠪᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠵᠢᠷᠤᠵᠤ ᠰᠢᠪᠡᠭᠡᠳ ᠮᠣᠳᠣᠨ ᠳᠡᠭᠡᠷᠡ ᠪᠡᠨ ᠪᠤᠷᠤᠭᠤ ᠬᠠᠷᠠᠭᠤᠯᠵᠤ ᠪᠠᠭᠤᠯᠭᠠᠵᠤ ᠤᠬᠤᠵᠤ ᠠᠪᠬᠤ ᠳᠦᠷᠰᠦ ᠪᠡᠨ ᠲᠣᠳᠣᠷᠠᠭᠤᠯᠤᠨ ᠵᠢᠷᠤᠨᠠ᠃ ᠬᠡ ᠪᠡᠨ ᠤᠬᠤᠵᠤ ᠰᠡᠢᠯᠬᠦ ᠳ᠋ᠡᠭᠡᠨ ᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠥᠷᠭᠡᠨ ᠢ᠋3mm᠂ ᠭᠦᠨ ᠢ᠋2—3mm ᠵᠢᠭᠳᠡ ᠤᠬᠤᠵᠤ ᠢᠷᠮᠡᠭ ᠢ᠋ ᠨᠢ ᠲᠡᠭᠰᠢ ᠰᠠᠢᠨ ᠰᠡᠢᠯᠬᠦ ᠪᠠ ᠤᠭᠠᠯᠵᠠ ᠶ᠋ᠢᠨ ᠰᠦᠯᠵᠢᠶᠡ ᠨᠦ᠍ᠭᠦᠳ ᠢ᠋ ᠭᠠᠷᠭᠠᠬᠤ ᠳ᠋ᠠᠭᠠᠨ ᠳᠡᠭᠡᠭᠦᠷ ᠨᠢ ᠣᠷᠣᠭᠰᠠᠨ ᠰᠦᠯᠵᠢᠶᠡ ᠦᠷᠭᠦᠯᠵᠢ ᠤᠬᠤᠭᠳᠠᠬᠤ ᠪᠠ ᠳᠣᠭᠤᠤᠷ ᠨᠢ ᠣᠷᠣᠭᠰᠠᠨ ᠰᠦᠯᠵᠢᠶᠡ ᠶ᠋ᠢ ᠲᠠᠰᠤᠷᠬᠠᠢ ᠤᠬᠤᠨᠠ᠃ ᠭᠥᠯᠢᠮ᠂ ᠣᠯᠣᠩᠴᠣᠭ ᠤ᠋ᠨ ᠭᠠᠳᠠᠨᠠ ᠲᠠᠯᠠ ᠶ᠋ᠢᠨ ᠡᠮᠵᠢᠶᠡᠷᠢ ᠶ᠋ᠢ ᠬᠥᠭᠡᠭᠡᠬᠦ ᠬᠡᠪ ᠦ᠋ᠨ ᠥᠷᠭᠡᠨ ᠨᠢ6mm ᠭᠦᠨ ᠨᠢ3—4mm ᠪᠠᠢᠨᠠ᠃ ᠰᠡᠢᠯᠪᠦᠷᠢ ᠪᠡᠨ ᠪᠥᠬᠡ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠪᠡᠯᠡᠳᠬᠡᠭᠰᠡᠨ ᠬᠡᠪ ᠢ᠋ᠶ᠋ᠡᠨ ᠲᠣᠰᠣᠨ ᠳᠤ ᠬᠠᠨᠲᠠᠯᠠ ᠴᠢᠨᠠᠨᠠ᠃ ᠡᠢᠮᠦ ᠬᠡᠪ ᠢ᠋ ᠵᠠᠶᠠᠭᠠ ᠪᠠᠷ ᠭᠡᠵᠦ ᠨᠡᠷᠡᠯᠡᠳᠡᠭ᠃
ᠤᠭᠠᠯᠵᠠ ᠬᠡ ᠶ᠋ᠢ ᠳᠣᠪᠣᠢᠯᠭᠠᠨ ᠬᠥᠭᠡᠭᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠭᠰᠡᠨ ᠢ᠋ᠶ᠋ᠡᠷ ᠦ᠋ᠨ ᠳᠡᠭᠡᠷᠡ ᠪᠡᠨ ᠬᠡ ᠲᠠᠯᠪᠢᠬᠤ ᠰᠠᠷᠢᠰᠤ᠂ ᠰᠠᠪᠢᠬᠢ ᠵᠡᠷᠭᠡ ᠶ᠋ᠢ ᠨᠣᠷᠭᠠᠨ ᠲᠠᠯᠪᠢᠵᠤ ᠦᠯᠦ ᠮᠡᠳᠡᠭ ᠴᠢᠭᠢᠭ ᠲᠡᠢ ᠪᠠᠢᠬᠤ ᠳ᠋ᠤᠨᠢ ᠥᠩᠭᠡ ᠶ᠋ᠢ ᠨᠢ ᠳᠣᠲᠣᠭᠰᠢ ᠬᠠᠷᠠᠭᠤᠯᠤᠨ ᠲᠠᠯᠪᠢᠵᠤ ᠳᠡᠭᠡᠷᠡ ᠡᠴᠡ ᠨᠢ ᠬᠤᠯᠤᠰᠤ᠂ ᠮᠣᠳᠣ᠂ ᠡᠪᠡᠷ ᠬᠥᠭᠡᠭᠡᠴᠡᠯᠳᠦᠭᠦᠷ ᠢ᠋ᠶ᠋ᠡᠷ᠂ ᠭᠠᠷ ᠢ᠋ᠶ᠋ᠠᠷ ᠨᠢᠳᠬᠡᠷᠬᠦ ᠳ᠋ᠦ᠍ ᠤᠭ ᠬᠡ ᠬᠣᠩᠬᠣᠢᠵᠤ ᠥᠩᠭᠡᠨ ᠳ᠋ᠡᠭᠡᠨ ᠲᠥᠪᠥᠭᠡᠷ ᠪᠣᠯᠬᠤ ᠪᠥᠭᠡᠳ ᠬᠣᠩᠬᠣᠷ ᠬᠣᠪᠢᠯ ᠳ᠋ᠤᠨᠢ ᠡᠷᠴᠢᠯᠡᠭᠰᠡᠨ ᠤᠲᠠᠰᠤ᠂ ᠣᠯᠣᠰᠣ᠂ ᠨᠠᠷᠢᠨ ᠵᠦᠰᠦᠭᠰᠡᠨ ᠰᠠᠪᠢᠬᠢ ᠶ᠋ᠢ ᠰᠦᠯᠵᠢᠶᠡ ᠶ᠋ᠢ ᠨᠢ ᠲᠠᠭᠠᠷᠠᠭᠤᠯᠤᠨ ᠨᠠᠭᠠᠵᠤ ᠬᠠᠲᠠᠭᠠᠨᠠ᠃ ᠬᠠᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠡ ᠪᠡᠨ ᠲᠣᠳᠣ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠠᠴᠠ ᠲᠠᠢ ᠬᠥᠭᠡᠭᠡᠴᠡᠯᠳᠦᠭᠦᠷ ᠢ᠋ᠶ᠋ᠡᠷ ᠬᠥᠭᠡᠭᠡᠬᠦ ᠪᠤᠶᠤ ᠡᠰᠡᠪᠡᠯ ᠬᠡᠪ ᠲᠦ᠋ᠨᠢ ᠪᠤᠴᠠᠭᠠᠨ ᠬᠢᠵᠦ ᠵᠥᠭᠡᠯᠡᠨ ᠶᠠᠭᠤᠮᠠ ᠪᠠᠷ ᠴᠣᠬᠢᠬᠤ ᠳ᠋ᠤ᠌ ᠬᠡ ᠲᠣᠳᠣᠷᠠᠨᠠ᠃ ᠮᠥᠨ ᠰᠢᠷᠢᠨ ᠡᠳ᠋ᠯᠡᠯ ᠦ᠋ᠨ ᠬᠡ ᠤᠭᠠᠯᠵᠠ ᠶ᠋ᠢ ᠳᠣᠪᠣᠢᠯᠭᠠᠨ ᠬᠥᠭᠡᠭᠡᠬᠦ ᠲᠤᠰᠬᠠᠢ ᠬᠥᠩᠭᠡᠨ ᠴᠠᠭᠠᠨ᠂ ᠲᠤᠭᠤᠯᠭᠠ ᠶ᠋ᠢᠨ ᠬᠡᠪ ᠦ᠋ᠳ ᠪᠠᠢᠬᠤ ᠪᠠ ᠲᠡᠭᠦᠨ ᠳ᠋ᠦ᠍ ᠬᠡ ᠶ᠋ᠢ ᠰᠢᠬᠠᠬᠤ ᠶ᠋ᠢᠨ ᠲᠤᠯᠠᠳᠠ ᠬᠡᠪ ᠢ᠋ᠶ᠋ᠡᠨ ᠪᠠᠭᠠ ᠵᠡᠷᠭᠡ ᠬᠠᠯᠠᠭᠠᠵᠤ ᠬᠡ ᠪᠡᠨ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠬᠣᠩᠬᠣᠷ ᠲᠤᠨᠢ ᠬᠢᠵᠦ ᠥᠭᠭᠦᠨᠡ᠃ ᠢᠩᠭᠢᠵᠦ ᠬᠥᠭᠡᠭᠡᠯᠭᠡᠨ ᠰᠢᠬᠠᠭᠰᠠᠨ ᠬᠡ ᠪᠡᠨ ᠬᠡᠯᠡᠬᠦ ᠳᠡᠪᠢᠰᠬᠡᠷ( ᠭᠥᠯᠢᠮ᠂ ᠭᠤᠲᠤᠯ ᠤ᠋ᠨ ᠱᠠᠭᠠ᠂ ᠵᠤᠯᠤᠭ) ᠤ᠋ᠨ ᠬᠡ ᠳᠠᠪ ᠤ᠋ᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠪᠤᠶᠤ ᠳᠠᠪ ᠦᠭᠡᠢ ᠬᠡ ᠶ᠋ᠢ ᠰᠢᠭᠤᠳ ᠬᠡᠯᠡᠬᠦ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ ᠳᠣᠪᠣᠭᠣᠷ ᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠶᠠᠷ ᠲᠠᠯᠠ ᠪᠠᠷ ᠨᠢᠭᠲᠠ ᠰᠢᠬᠠᠵᠤ ᠣᠶᠣᠨᠠ᠃ ᠣᠶᠣᠬᠤ ᠳ᠋ᠠᠭᠠᠨ ᠰᠢᠪᠡᠭᠦᠷ ᠪᠤᠶᠤ ᠰᠢᠪᠦᠭᠡ ᠪᠡᠷ ᠰᠢᠪᠠᠨ ᠴᠣᠭᠣᠯᠵᠤ ᠨᠦᠬᠡ ᠭᠠᠷᠭᠠᠭᠠᠳ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠭᠡᠭᠡᠬᠦ ᠬᠡ ᠴᠢᠮᠡᠬᠦ ᠤᠲᠠᠰᠤ ᠲᠠᠢ ᠵᠡᠭᠦᠦ ᠪᠡᠷ ᠣᠶᠣᠨᠠ᠃
ᠵᠢᠷᠤᠭ49
ᠭᠥᠯᠢᠮ ᠳᠡᠪᠢᠰ ᠦ᠋ᠨ ᠬᠡ
ᠵᠢᠷᠤᠭ50
ᠮᠣᠩᠭᠣᠯ ᠭᠤᠲᠤᠯ ᠤ᠋ᠨ ᠱᠠᠭᠠᠢ᠂ ᠵᠤᠯᠤᠭ ᠥᠰᠥᠭᠡᠢ ᠶ᠋ᠢᠨ ᠬᠡ
ᠬᠡ ᠶ᠋ᠢ ᠰᠢᠪᠡᠬᠦ ᠰᠢᠪᠡᠭᠦᠷ ᠢ᠋ ᠣᠶᠣᠳᠠᠯ ᠤ᠋ᠨ ᠭᠣᠣᠯ ᠣᠷᠣᠢ ᠠ᠋ᠴᠠ ᠬᠠᠮᠢᠶᠠᠷᠴᠤ ᠬᠡᠳᠦ ᠬᠡᠳᠦᠨ ᠬᠡᠮᠵᠢᠶᠡ ᠲᠡᠢ ᠬᠢᠨᠡ᠃ ᠵᠢᠱ᠌ᠢᠶᠡ ᠨᠢ ᠰᠠᠭᠠᠷᠢ ᠶ᠋ᠢᠨ ᠤᠭᠠᠯᠵᠠ ᠶ᠋ᠢ ᠰᠢᠪᠡᠬᠦ ᠳ᠋ᠦ᠍ ᠭᠠᠭᠴᠠ ᠰᠢᠪᠡᠭᠦᠷ ᠬᠡᠷᠡᠭᠯᠡᠨᠡ᠃ ᠬᠣᠣᠰ ᠰᠢᠪᠡᠭᠦᠷ ᠢ᠋ᠶ᠋ᠡᠷ ᠰᠢᠪᠡᠭᠰᠡᠨ ᠬᠡ ᠠᠮᠠᠷᠬᠠᠨ ᠰᠡᠲᠡᠷᠡᠵᠦ ᠬᠡᠪᠡᠷᠡᠭ ᠪᠣᠯᠳᠠᠭ ᠤᠴᠢᠷ ᠨᠢᠭᠡ ᠰᠢᠪᠡᠯᠭᠡ ᠲᠡᠢ ᠠᠷᠤ ᠳ᠋ᠠᠭᠠᠨ ᠮᠥᠷ ᠲᠡᠮᠳᠡᠭᠯᠡᠭᠴᠢ ᠲᠡᠢ ᠰᠢᠪᠡᠭᠦᠷ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ᠃ ᠪᠤᠯᠢᠭᠠᠷᠢ ᠳ᠋ᠤ᠌ ᠰᠢᠪᠡᠭᠰᠡᠨ ᠨᠦᠬᠡ ᠠᠮᠠᠷᠬᠠᠨ ᠠᠨᠢᠳᠠᠭ ᠤᠴᠢᠷ ᠨᠦᠬᠡ ᠪᠡᠨ ᠲᠣᠳᠣ ᠭᠠᠷᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠠᠷᠤ ᠲᠠᠯᠠ ᠶ᠋ᠢ ᠨᠢ ᠴᠠᠪᠠᠤᠳᠠᠬᠤ ᠪᠤᠶᠤ ᠳᠠᠪᠤᠤ ᠳᠠᠪᠬᠤᠷᠯᠠᠨ ᠨᠠᠭᠠᠴᠤ ᠣᠶᠣᠪᠠᠯ ᠠᠰᠢᠭᠲᠠᠢ᠃ ᠳᠡᠭᠡᠷᠡ ᠳᠣᠣᠷᠠ ᠠ᠋ᠴᠠ ᠨᠢ ᠰᠢᠭᠤᠳ ᠣᠶᠣᠵᠤ ᠪᠣᠯᠳᠠᠭ᠃ ᠬᠡ ᠪᠡᠨ ᠣᠶᠣᠬᠤ ᠳ᠋ᠠᠭᠠᠨ ᠡᠬᠢᠯᠡᠭᠡᠳ ᠭᠠᠳᠠᠨᠠ ᠲᠠᠯᠠ ᠪᠠᠨ ᠣᠶᠣᠵᠤ᠂ ᠳᠠᠷᠠᠭᠠ ᠨᠢ ᠳᠣᠲᠣᠷ ᠲᠠᠯᠠ ᠶ᠋ᠢ ᠨᠢ ᠬᠣᠶᠠᠷ ᠡᠩᠨᠡᠭᠡ ᠵᠡᠷᠭᠡᠴᠡᠭᠡ ᠰᠢᠪᠡᠵᠦ ᠣᠶᠣᠨᠠ᠃ ᠣᠶᠣᠬᠤ ᠳ᠋ᠠᠭᠠᠨ ᠤᠷᠤᠭᠰᠢ ᠨᠢᠭᠡ ᠬᠠᠳᠬᠤᠭᠠᠳ ᠡᠬᠢᠨ ᠦ᠌ ᠬᠠᠳᠬᠤᠯᠲᠠ ᠶ᠋ᠢᠨ ᠴᠠᠰᠢ ᠭᠠᠷᠤᠭᠰᠠᠨ ᠨᠦᠬᠡ ᠪᠡᠷ ᠳᠡᠭᠡᠭᠰᠢ ᠨᠢ ᠭᠠᠷᠭᠠᠬᠤ ᠳ᠋ᠠᠭᠠᠨ ᠮᠥᠨ ᠨᠢᠭᠡ ᠬᠠᠳᠬᠤᠯᠲᠠ ᠤᠷᠤᠭᠰᠢᠯᠠᠭᠤᠯᠬᠤ ᠳ᠋ᠤ᠌ ᠪᠤᠴᠠᠭᠠᠵᠤ ᠬᠠᠳᠬᠤᠨ ᠳᠠᠬᠢᠨ ᠤᠷᠤᠭᠰᠢᠯᠠᠭᠤᠯᠤᠨ ᠬᠠᠳᠬᠤᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠳᠠᠪᠲᠠᠨ ᠣᠶᠣᠨᠠ᠃ ᠢᠩᠭᠢᠵᠦ ᠣᠶᠣᠬᠤ ᠳ᠋ᠤ᠌ ᠠᠷᠤ ᠲᠠᠯᠠ ᠨᠢ ᠨᠢᠭᠡ ᠠᠯᠤᠰᠯᠠᠨ ᠬᠣᠶᠠᠷ ᠳᠠᠪᠬᠤᠷᠯᠠᠭᠳᠠᠭᠰᠠᠨ ᠬᠠᠳᠬᠤᠭᠠ ᠭᠠᠷᠤᠨᠠ᠃ ᠡᠨᠡ ᠬᠣᠶᠠᠷ ᠰᠢᠭᠯᠠᠭᠠᠰᠤ ᠪᠠᠷ ᠶᠠᠮᠠᠷ ᠴᠤ ᠬᠥᠭᠡᠭᠡᠮᠡᠯ ᠬᠡ ᠤᠭᠠᠯᠵᠠ ᠶ᠋ᠢ ᠣᠶᠣᠨᠠ᠃ ᠬᠥᠭᠡᠭᠡᠮᠡᠯ ᠤᠭᠠᠯᠵᠠ ᠶ᠋ᠢ ᠦᠵᠦᠭᠦᠷ ᠦᠭᠡᠢ ᠵᠡᠭᠦᠦ ᠪᠡᠷ ᠣᠶᠣᠪᠠᠯ ᠬᠠᠮᠤᠭ ᠤ᠋ᠨ ᠠᠰᠢᠭᠲᠠᠢ ᠶᠤᠮ᠃ ᠤᠴᠢᠷ ᠨᠢ ᠦᠵᠦᠭᠦᠷ ᠲᠡᠢ ᠵᠡᠭᠦᠦ ᠤᠲᠠᠰᠤ ᠪᠠᠨ ᠰᠡᠮᠡᠯᠦᠨ ᠰᠢᠪᠡᠭᠰᠡᠨ ᠨᠦᠬᠡᠨ ᠡᠴᠡ ᠥᠭᠡᠷᠡ ᠭᠠᠵᠠᠷ ᠢ᠋ᠶ᠋ᠠᠷ ᠭᠠᠷᠴᠤ ᠢᠷᠡᠳᠡᠭ ᠮᠠᠭᠤ ᠲᠠᠯᠠ ᠲᠠᠢ ᠭᠡᠵᠦ ᠮᠠᠨ ᠤ᠋ ᠬᠠᠰᠢᠷ ᠣᠶᠣᠳᠠᠯᠴᠢᠳ ᠶᠠᠷᠢᠵᠤ ᠪᠠᠢᠨᠠ᠃
ᠰᠢᠷᠢᠨ ᠡᠳ᠋ᠯᠡᠯ ᠢ᠋ ᠡᠮᠵᠢᠬᠦ ᠳ᠋ᠡᠭᠡᠨ ᠡᠮᠵᠢᠬᠦ ᠡᠳ᠋ᠯᠡᠯ ᠦ᠋ᠨ ᠵᠠᠬᠠ ᠶ᠋ᠢ ᠪᠤᠯᠢᠭᠠᠷᠢ᠂ ᠰᠡᠷᠢᠰᠦ᠂ ᠰᠠᠪᠢᠬᠢ ᠪᠠᠷ ᠨᠢᠭᠡ ᠪᠤᠶᠤ ᠬᠣᠣᠰ ᠢ᠋ᠶ᠋ᠠᠷ ᠥᠷᠭᠡᠨ ᠨᠠᠷᠢᠨ ᠬᠥᠭᠡᠭᠡᠵᠦ ᠵᠤᠵᠠᠭᠠᠨ ᠪᠤᠯᠢᠭᠠᠷᠢ ᠶ᠋ᠢ ᠳᠣᠲᠣᠷ ᠲᠠᠯᠠ ᠶ᠋ᠢ ᠬᠠᠪᠢᠯᠳᠤᠵᠤ ᠨᠢᠮᠭᠡᠯᠡᠵᠦ ᠬᠥᠭᠡᠭᠡᠵᠦ ᠡᠮᠵᠢᠨᠡ᠃ ᠬᠡ ᠪᠡᠨ ᠣᠶᠣᠵᠤ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠢᠮᠭᠡᠨ ᠪᠤᠯᠢᠭᠠᠷᠢ ᠰᠠᠪᠢᠬᠢ ᠪᠷᠸᠽᠸᠨ᠋ᠲ᠋ ᠢ᠋ ᠴᠠᠪᠠᠤ ᠲᠠᠢ ᠵᠣᠩᠬᠤ ᠪᠠᠷ ᠠᠷᠤ ᠳ᠋ᠤᠨᠢ ᠨᠠᠭᠠᠭᠠᠳ ᠬᠠᠮᠲᠤ ᠬᠠᠪᠰᠤᠷᠴᠤ ᠡᠮᠵᠢᠨᠡ᠃
ᠰᠢᠷᠢᠨ ᠡᠳ᠋ᠯᠡᠯ ᠳ᠋ᠦ᠍ ᠡᠪᠡᠷ ᠤᠭᠠᠯᠵᠠ ᠪᠠᠷ ᠪᠦᠲᠦᠭᠰᠡᠨ ᠬᠡ ᠭᠣᠶᠣᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠦᠵᠡᠮᠵᠢᠲᠡᠢ ᠪᠠᠢᠳᠠᠭ ᠴᠤ ᠦᠵᠦᠭᠦᠷ ᠨᠢ ᠰᠡᠷᠲᠡᠢᠵᠦ ᠠᠮᠠᠷᠬᠠᠨ ᠡᠯᠡᠭᠳᠡᠳᠡᠭ᠂ ᠤᠴᠢᠷ ᠨᠢ ᠪᠢᠲᠡᠭᠦᠦ ᠰᠦᠯᠵᠢᠶᠡ᠂ ᠭᠦᠷᠦᠯᠭᠡ ᠤᠭᠠᠯᠵᠠ ᠪᠠᠲᠤ ᠪᠥᠬᠡ ᠪᠠᠢᠳᠠᠭ᠃ ᠨᠣᠭᠣᠭᠠᠨ᠂ ᠤᠯᠠᠭᠠᠨ᠂ ᠬᠦᠷᠡᠩ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠠᠷᠠ ᠤᠭᠠᠯᠵᠠ᠂ ᠰᠢᠷᠠ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠬᠦᠷᠡᠩ᠂ ᠬᠠᠷᠠ ᠤᠭᠠᠯᠵᠠ ᠶ᠋ᠢ ᠤᠷᠠᠯᠠᠪᠠᠯ ᠥᠩᠭᠡ ᠵᠣᠬᠢᠴᠠᠨᠠ᠃
ᠵᠢᠷᠤᠭ51
ᠰᠢᠪᠡᠭᠦᠷ ᠦ᠋ᠳ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠣᠭᠳᠠᠭᠤᠨᠪᠠᠶᠠᠷ᠂ ᠪᠠᠶᠠᠨᠰᠡᠷᠡᠩ᠂ ᠡᠷᠳᠡᠨᠢᠭᠣᠤᠠ᠂ᠱᠠᠭᠰᠠᠯ᠂ᠣᠶᠤᠨᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ