ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠭᠤᠷᠪᠠᠳᠤᠭᠠᠷ ᠪᠦᠯᠦᠭ-ᠨᠣᠣᠰᠣ ᠢᠰᠡᠭᠡᠢ ᠪᠡᠷ ᠤᠷᠠᠯᠠᠬᠤ
365ᠭᠤᠷᠪᠠᠳᠤᠭᠠᠷ ᠪᠦᠯᠦᠭ-ᠨᠣᠣᠰᠣ ᠢᠰᠡᠭᠡᠢ ᠪᠡᠷ ᠤᠷᠠᠯᠠᠬᠤ
ᠮᠠᠨ ᠤ᠋ ᠣᠷᠣᠨ ᠤ᠋ ᠬᠥᠮᠦᠨ ᠠᠷᠠᠳ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠨᠡᠭᠦᠳᠡᠯ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠵᠦ ᠲᠡᠭᠦᠨ ᠦ᠌ ᠠᠰᠢᠭ ᠰᠢᠮᠡ ᠪᠡᠷ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠪᠦᠬᠦᠢᠯᠡ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠵᠤ ᠢᠷᠡᠬᠦ ᠳ᠋ᠡᠭᠡᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠪᠦᠲᠦᠭᠡᠭᠳᠡᠬᠦᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠠᠷᠭᠠ ᠠᠵᠢᠯᠯᠠᠭᠠᠨ ᠳ᠋ᠤ᠌ ᠨᠠᠷᠢᠨ ᠳᠠᠳᠤᠯᠭᠠᠵᠢᠭᠰᠠᠨ ᠪᠢᠯᠡ᠃
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠦᠢᠯᠡᠳᠪᠦᠷᠢ ᠶ᠋ᠢ ᠲᠦᠭᠦᠬᠡᠢ ᠡᠳ᠋ ᠢ᠋ᠶ᠋ᠡᠷ᠂ ᠬᠥᠮᠦᠨ ᠠᠮᠠ ᠶ᠋ᠢ ᠬᠦᠨᠡᠰᠦ ᠪᠣᠯᠤᠨ ᠪᠤᠰᠤᠳ ᠴᠢᠬᠤᠯᠠ ᠵᠦᠢᠯ ᠢ᠋ᠶ᠋ᠡᠷ ᠬᠠᠩᠭᠠᠵᠤ ᠪᠠᠢᠭᠠ ᠮᠠᠯ ᠡᠷᠲᠡ ᠦᠶᠡ ᠡᠴᠡ ᠬᠥᠮᠦᠨ ᠦ᠌ ᠣᠢᠷᠠ ᠳᠣᠲᠣᠨᠣ ᠪᠠᠢᠭᠰᠠᠨ ᠪᠥᠭᠡᠳ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠲᠡᠭᠦᠨ ᠢ᠋ ᠥᠪᠡᠷ ᠲᠡᠭᠡᠨ ᠳᠠᠰᠬᠠᠨ ᠠᠰᠢᠭ ᠰᠢᠮᠡ ᠶ᠋ᠢ ᠠᠰᠢᠭᠯᠠᠬᠤ ᠳ᠋ᠠᠭᠠᠨ ᠢᠮᠠᠭᠲᠠ ᠬᠠᠢᠷᠠᠯᠠᠨ ᠳᠡᠭᠡᠳᠦᠯᠡᠵᠦ ᠢᠷᠡᠵᠡᠢ᠃
ᠭᠡᠷ ᠦ᠋ᠨ ᠲᠡᠵᠢᠭᠡᠪᠦᠷᠢ ᠠᠮᠢᠲᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠨᠣᠬᠠᠢ ᠬᠥᠮᠦᠨ ᠳ᠋ᠦ᠍ ᠲᠡᠰᠴᠦ ᠭᠡᠷ ᠦ᠋ᠨ ᠪᠣᠯᠵᠠᠢ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠦᠬᠡᠷ ᠭᠡᠷ ᠦ᠋ᠨ ᠲᠡᠵᠢᠭᠡᠪᠦᠷᠢ ᠪᠣᠯᠤᠭᠰᠠᠨ ᠪᠠ ᠲᠡᠭᠦᠨ ᠦ᠌ ᠡᠪᠦᠭᠡ ᠡᠴᠢᠭᠡ ᠠᠪᠤᠷᠭᠤ ᠲᠣᠮᠣ ᠪᠤᠬᠠ ᠭᠥᠷᠥᠭᠡᠰᠦ ᠣᠳᠣ ᠳᠡᠯᠡᠬᠡᠢ ᠳ᠋ᠦ᠍ ᠨᠢᠭᠡ ᠴᠦ᠍ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠦᠬᠡᠷ ᠢ᠋ ᠮᠠᠨ ᠤ᠋ ᠡᠷᠢᠨ ᠦ᠌ ᠡᠮᠦᠨᠡᠬᠢ ᠲᠠᠪᠤᠨ ᠮᠢᠩᠭᠠᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠭᠡᠷ ᠦ᠋ᠨ ᠪᠣᠯᠭᠠᠵᠤ᠂ ᠰᠦ᠂ ᠮᠢᠬᠠ᠂ ᠦᠰᠦ ᠨᠣᠣᠰᠣ᠂ ᠠᠷᠠᠰᠤ ᠰᠢᠷᠢ ᠶ᠋ᠢ ᠠᠰᠢᠭᠯᠠᠵᠤ ᠢᠷᠡᠵᠡᠢ᠃ ᠠᠳᠤᠭᠤ ᠶ᠋ᠢ ᠦᠬᠡᠷ ᠦ᠋ᠨ ᠳᠠᠷᠠᠭᠠ ᠭᠡᠷ ᠦ᠋ᠨ ᠪᠣᠯᠭᠠᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠦ᠌ ᠡᠪᠦᠭᠡ ᠡᠴᠢᠭᠡ ᠪᠣᠯᠬᠤ ᠳ᠋ᠠᠬᠢ ᠣᠳᠣ ᠲᠣᠭᠠ ᠲᠠᠢ ᠬᠡᠳᠦᠬᠡᠨ ᠦᠯᠡᠳᠡᠵᠡᠢ᠃ ᠠᠳᠤᠭᠤ ᠶ᠋ᠢ ᠬᠥᠮᠦᠨ ᠡᠷᠲᠡᠨ ᠡᠴᠡ ᠣᠨᠣᠯᠭᠠ ᠡᠳᠯᠡᠭᠡᠨ ᠳ᠋ᠦ᠍ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠣᠯᠠᠨ ᠤᠳᠠᠭᠠᠨ ᠤ᠋ ᠠᠶᠠᠨ ᠲᠡᠢᠨ᠂ ᠨᠡᠭᠦᠳᠡᠯ ᠳ᠋ᠦ᠍ ᠢᠮᠠᠭᠲᠠ ᠠᠳᠤᠭᠤ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠬᠤᠷᠳᠤᠨ ᠰᠠᠢᠨ ᠬᠥᠳᠡᠯᠭᠡᠭᠡᠨ ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠬᠡᠷᠡᠭᠯᠡᠵᠦ ᠥᠩᠭᠡᠷᠡᠭᠰᠡᠨ ᠪᠠ ᠣᠳᠣ ᠴᠤ᠌ ᠬᠡᠷᠡᠭᠯᠡᠭᠰᠡᠭᠡᠷ ᠪᠠᠢᠨᠠ᠃
ᠣᠳᠣ ᠶ᠋ᠢᠨ ᠦᠷᠡᠵᠢᠭᠦᠯᠵᠦ ᠪᠠᠢᠭᠠ ᠬᠣᠨᠢᠨ ᠤ᠋ ᠡᠪᠦᠭᠡ ᠨᠢ ᠥᠭᠡᠷᠡ ᠥᠭᠡᠷᠡ ᠶᠦ᠍ᠮ᠃ ᠧᠦ᠋ᠷᠣᠫᠠ ᠶ᠋ᠢᠨ ᠬᠣᠨᠢ ᠮᠤᠹᠯᠠᠨ ᠠ᠋ᠴᠠ᠂ ᠠᠽᠢᠶᠠ ᠶ᠋ᠢᠨ ᠬᠣᠨᠢ ᠵᠡᠷᠯᠢᠭ ᠠᠷᠭᠠᠯᠢ ᠠ᠋ᠴᠠ ᠭᠠᠷᠤᠯ ᠲᠠᠢ ᠪᠥᠭᠡᠳ10—8 ᠮᠢᠩᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠭᠦᠨ ᠢ᠋ ᠭᠡᠷᠰᠢᠭᠦᠯᠵᠡᠢ᠃ ᠣᠳᠣ ᠳᠡᠯᠡᠬᠡᠢ ᠳ᠋ᠦ᠍150 ᠭᠠᠷᠤᠢ ᠡᠭᠦᠯᠳᠡᠷ ᠦ᠋ᠨ ᠬᠣᠨᠢ ᠦᠷᠡᠵᠢᠭᠦᠯᠵᠦ ᠪᠠᠢᠨᠠ᠃ ᠬᠣᠨᠢᠨ ᠰᠦᠷᠦᠭ ᠮᠠᠨ ᠤ᠋ ᠡᠳ᠋ ᠦ᠋ᠨ ᠵᠠᠰᠠᠭ ᠲᠤ ᠶᠡᠬᠡᠬᠡᠨ ᠪᠠᠶᠠᠯᠢᠭ ᠢ᠋ ᠬᠤᠷᠠᠮᠳᠤᠭᠤᠯᠳᠠᠭ᠃ ᠠᠽᠢᠶᠠ ᠶ᠋ᠢᠨ ᠲᠡᠮᠡᠭᠡᠨ ᠦ᠌ ᠡᠪᠦᠭᠡ ᠬᠠᠪᠲᠠᠭᠠᠢ ᠭᠡᠳᠡᠭ ᠬᠣᠶᠠᠷ ᠪᠦᠬᠦ ᠲᠡᠢ ᠵᠡᠷᠯᠢᠭ ᠲᠡᠮᠡᠭᠡ ᠶᠦ᠍ᠮ᠃
ᠢᠮᠠᠭᠠᠨ ᠤ᠋ ᠡᠪᠦᠭᠡ ᠨᠢ ᠡᠷᠭᠢᠭᠦᠯᠭᠡᠨ ᠡᠪᠡᠷ ᠲᠡᠢ ᠶᠠᠩᠭᠢᠷ ᠢᠮᠠᠭᠠ ᠥᠪᠥᠷ ᠺᠠᠥ᠋ᠺᠠᠽ᠂ ᠤᠮᠠᠷᠠᠲᠤ ᠢᠷᠡᠨ ᠦ᠌ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠲᠤ ᠪᠠᠢᠭᠰᠠᠨ ᠪᠠ ᠡᠨᠳᠡ ᠲᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠭᠡᠷᠰᠢᠭᠦᠯᠵᠡᠢ᠃ ᠢᠩᠭᠢᠵᠦ ᠪᠢᠳᠡᠨ ᠦ᠌ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠶᠡᠬᠡ ᠰᠤᠷᠪᠤᠯᠵᠢ ᠪᠣᠯᠤᠭᠰᠠᠨ ᠮᠠᠯ ᠢ᠋ ᠭᠡᠷᠰᠢᠭᠦᠯᠵᠦ ᠠᠰᠢᠭ ᠰᠢᠮᠡ ᠶ᠋ᠢ ᠠᠰᠢᠭᠯᠠᠵᠤ ᠢᠷᠡᠵᠡᠢ᠃
ᠨᠣᠣᠰᠣ ᠠᠷᠠᠴᠢᠯᠠᠬᠤ ᠪᠠ ᠨᠣᠣᠰᠣᠨ ᠡᠳ᠋ᠯᠡᠯ ᠬᠢᠬᠦ ᠮᠠᠯ ᠤ᠋ᠨ ᠨᠣᠣᠰᠣ ᠶ᠋ᠢ ᠠᠷᠠᠴᠢᠯᠠᠨ ᠲᠣᠷᠳᠠᠵᠤ ᠡᠯᠳᠡᠪ ᠡᠳ᠋ᠯᠡᠯ ᠬᠢᠬᠦ ᠲᠠᠯᠠ ᠪᠠᠷ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠦ᠌ ᠤᠯᠠᠮᠵᠢᠯᠠᠯ ᠲᠠᠢ ᠪᠢᠯᠡ᠃ ᠢᠯᠠᠩᠭᠤᠶᠠ ᠡᡁᠢᠥ᠋ᠩᠨᠦ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠨᠡᠭᠦᠳᠡᠯᠴᠢᠨ ᠦ᠌ ᠣᠨᠴᠠᠯᠢᠭ ᠲᠤ ᠲᠣᠬᠢᠷᠠᠭᠤᠯᠤᠨ ᠢᠰᠡᠭᠡᠢ ᠭᠡᠷ ᠢ᠋ ᠬᠥᠭᠵᠢᠭᠦᠯᠬᠦ ᠤᠯᠠᠮ ᠢ᠋ᠶ᠋ᠠᠷ ᠶᠡᠬᠡ ᠭᠡᠷᠲᠦ ᠲᠡᠷᠭᠡ ᠵᠡᠷᠭᠡ ᠶ᠋ᠢ ᠬᠢᠵᠦ ᠪᠠᠢᠭᠰᠠᠨ ᠪᠠᠢᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠢᠰᠡᠭᠡᠢ ᠬᠢᠭᠡᠳ ᠭᠡᠷ ᠪᠦᠷᠢᠭᠡᠳ ᠵᠣᠭᠰᠣᠬᠤ ᠦᠭᠡᠢ ᠶᠠᠩᠵᠤ ᠪᠦᠷᠢ ᠪᠡᠷ ᠲᠣᠨᠣᠭᠯᠠᠨ ᠴᠢᠮᠡᠭᠰᠡᠨ ᠢᠰᠡᠭᠡᠢ ᠰᠢᠷᠢᠮᠡᠯ ᠨᠠᠭᠠᠮᠠᠯ ᠶᠡᠬᠡ ᠬᠥᠭᠵᠢᠵᠦ ᠪᠠᠢᠵᠠᠢ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠰᠢᠷᠢᠮᠡᠯ ᠰᠢᠷᠳᠡᠭ ᠢ᠋ ᠬᠢᠬᠦ ᠳ᠋ᠡᠭᠡᠨ ᠢᠰᠡᠭᠡᠢ ᠳᠡᠭᠡᠷᠡ ᠵᠤᠵᠠᠭᠠᠨ ᠨᠣᠣᠰᠣᠨ ᠬᠡ ᠦᠭᠡᠢ ᠡᠳ᠋ ᠲᠠᠯᠪᠢᠵᠤ ᠲᠡᠭᠦᠨ ᠳ᠋ᠡᠭᠡᠨ ᠬᠡ ᠭᠠᠷᠭᠠᠨ ᠨᠣᠣᠰᠣᠨ ᠤᠲᠠᠰᠤ ᠶ᠋ᠢ ᠡᠮᠬᠡᠷᠢᠳᠦᠨ ᠳᠣᠪᠣᠢᠯᠭᠠᠨ ᠵᠡᠭᠡᠭᠯᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠰᠢᠷᠢᠳᠡᠭ ᠪᠠᠢᠵᠠᠢ᠃ ᠮᠥᠨ ᠰᠢᠷᠲᠡᠭ ᠲᠦ᠍ ᠠᠮᠢᠲᠠᠨ ᠤ᠋ ᠳᠦᠷᠰᠦ ᠶ᠋ᠢ ᠲᠤᠰᠬᠠᠢ ᠳ᠋ᠤᠨᠢ ᠬᠠᠢᠴᠢᠯᠠᠨ ᠠᠪᠴᠤ ᠲᠡᠭᠦᠨ ᠢ᠋ ᠪᠡᠨ ᠵᠡᠭᠡᠭᠯᠡᠨ ᠰᠢᠷᠢᠮᠡᠯ ᠰᠢᠷᠲᠡᠭ ᠳᠡᠭᠡᠷᠡ ᠪᠡᠨ ᠳᠣᠪᠣᠢᠯᠭᠠᠨ ᠰᠢᠷᠢᠵᠦ ᠪᠠᠢᠵᠠᠢ᠃ ᠰᠢᠷᠢᠭᠰᠡᠨ ᠤᠲᠠᠰᠤ ᠨᠢ ᠪᠦᠳᠦᠭᠦᠨ᠂ ᠨᠠᠷᠢᠨ ᠶᠠᠩᠵᠤ ᠪᠦᠷᠢ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠵᠡᠭᠡᠭᠯᠡᠭᠰᠡᠨ ᠤᠲᠠᠰᠤ ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠥᠩᠭᠡ ᠲᠡᠢ ᠪᠠᠢᠭᠰᠠᠨ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠾᠦᠩᠨᠦ ᠨᠠᠷ ᠮᠠᠯ ᠤ᠋ᠨ ᠨᠣᠣᠰᠣ᠂ ᠢᠰᠡᠭᠡᠢ ᠶ᠋ᠢ ᠪᠣᠯᠪᠠᠰᠤᠷᠠᠩᠭᠤᠢ ᠪᠠᠷ ᠠᠰᠢᠭᠯᠠᠵᠤ ᠪᠠᠢᠵᠠᠢ᠃ ᠰᠢᠷᠳᠡᠭ ᠲᠦ᠍ ᠠᠮᠢᠲᠠᠨ ᠤ᠋ ᠳᠦᠷᠰᠦ ᠶ᠋ᠢ ᠲᠤᠩ ᠴᠢᠳᠠᠪᠤᠷᠢᠯᠢᠭ ᠭᠠᠷᠭᠠᠭᠰᠠᠨ ᠲᠤᠬᠠᠢ ᠡᠷᠳᠡᠮᠲᠡᠨ ᠰᠤᠨᠤᠮᠴᠡᠷᠡᠨ ᠪᠢᠴᠢᠬᠦ ᠳ᠋ᠡᠭᠡᠨ ᠪᠤᠭᠤ ᠬᠠᠮᠠᠷ ᠢ᠋ᠶ᠋ᠠᠨ ᠰᠣᠷᠲᠣᠢᠯᠭᠠᠨ᠂ ᠠᠮᠠ ᠪᠠᠨ ᠠᠩᠭᠠᠢᠨ ᠬᠡᠯᠡ ᠪᠡᠨ ᠭᠠᠷᠭᠠᠵᠤ᠂ ᠬᠥᠯ ᠢ᠋ᠶ᠋ᠡᠨ ᠡᠪᠬᠡᠷᠡᠯᠳᠦᠭᠦᠯᠦᠨ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠵᠤ ᠨᠢᠷᠤᠭᠤ ᠪᠠᠨ ᠬᠣᠲᠣᠢᠯᠭᠠᠨ ᠶᠠᠮᠠᠷ ᠨᠢᠭᠡᠨ ᠠᠮᠢᠲᠠᠨ ᠠ᠋ᠴᠠ ᠠᠶᠤᠨ ᠵᠢᠭᠤᠲᠠᠵᠤ ᠶᠠᠪᠤᠭᠠ ᠶ᠋ᠢ ᠭᠠᠢᠬᠠᠮᠰᠢᠭᠲᠠᠢ ᠴᠢᠳᠠᠪᠤᠷᠢᠯᠢᠭ ᠬᠠᠷᠠᠭᠤᠯᠤᠭᠰᠠᠨ ᠢ᠋ ᠦᠵᠡᠬᠦ ᠳ᠋ᠦ᠍ ᠡᠨᠡ ᠰᠢᠷᠢᠮᠡᠯ ᠢ᠋ ᠠᠮᠢᠳᠤᠷᠠᠯ ᠤ᠋ᠨ ᠶᠡᠬᠡ ᠲᠤᠷᠰᠢᠯᠭᠠ ᠲᠠᠢ ᠤᠷᠠᠨ ᠬᠥᠮᠦᠨ ᠬᠢᠭᠰᠡᠨ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠭᠡᠵᠡᠢ᠃
ᠢᠩᠭᠢᠵᠦ ᠪᠤᠯᠠᠰᠢᠨ ᠠ᠋ᠴᠠ ᠣᠯᠤᠭᠰᠠᠨ ᠨᠢᠭᠡᠨ ᠰᠢᠷᠢᠮᠡᠯ ᠦ᠋ᠨ ᠬᠡ ᠤᠷᠠᠯᠢᠭ ᠮᠣᠩᠭᠣᠯ ᠤ᠋ᠨ ᠡᠷᠲᠡᠨ ᠦ᠌ ᠢᠰᠡᠭᠡᠢ ᠤᠷᠠᠯᠢᠭ ᠲᠤ᠌ ᠲᠣᠳᠣ ᠪᠠᠷᠢᠮᠲᠠ ᠪᠣᠯᠵᠤ ᠪᠠᠢᠨᠠ᠃ ᠮᠣᠩᠭᠣᠯᠴᠤᠳ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠵᠦ ᠥᠪᠡᠷ ᠦ᠋ᠨ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠬᠡᠷᠡᠭᠴᠡᠭᠡᠲᠦ ᠵᠦᠢᠯ ᠢ᠋ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠦᠢᠯᠡᠳᠪᠦᠷᠢᠯᠡᠨ ᠬᠡᠷᠡᠭᠯᠡᠳᠡᠭ ᠪᠠᠢᠭᠰᠠᠨ ᠨᠢ ᠦᠢᠯᠡᠳᠪᠦᠷᠢ ᠬᠥᠭᠵᠢᠭᠰᠡᠨ ᠣᠷᠴᠢᠨ ᠦᠶᠡ ᠳ᠋ᠦ᠍ ᠴᠦ᠍ ᠶᠠᠭᠤᠮᠠᠬᠠᠨ ᠢ᠋ᠶ᠋ᠠᠷ ᠶᠠᠭᠤᠮᠠ ᠬᠢᠵᠦ ᠠᠵᠤ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠲᠣᠬᠢᠵᠢᠭᠤᠯᠵᠤ ᠵᠠᠯᠠᠭᠤ ᠦᠶᠡ ᠶ᠋ᠢ ᠠᠵᠢᠯᠴᠢ ᠬᠢᠴᠢᠶᠡᠩᠭᠦᠢ ᠬᠥᠮᠦᠨ ᠪᠣᠯᠭᠠᠵᠤ ᠬᠥᠮᠦᠵᠢᠭᠦᠯᠬᠦ ᠳ᠋ᠦ᠍ ᠠᠴᠢ ᠬᠣᠯᠪᠣᠭᠳᠠᠯ ᠢ᠋ᠶ᠋ᠠᠨ ᠥᠭᠭᠦᠭᠰᠡᠭᠡᠷ ᠪᠠᠢᠨᠠ᠃ ᠨᠡᠭᠦᠳᠡᠯ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠳ᠋ᠤ᠌ ᠠᠢᠯ ᠭᠡᠷ ᠪᠦᠷᠢ ᠳ᠋ᠦ᠍ ᠳᠡᠯᠭᠡᠷᠡᠭᠰᠡᠨ ᠠᠷᠠᠰᠤ ᠡᠯᠳᠡᠬᠦ᠂ ᠢᠰᠡᠭᠡᠢ ᠬᠢᠬᠦ᠂ ᠴᠠᠭᠠᠨ ᠢᠳᠡᠭᠡ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠤᠷᠪᠠᠨ ᠲᠣᠮᠣ ᠦᠢᠯᠡᠳᠪᠦᠷᠢ ᠪᠠᠢᠳᠠᠭ ᠪᠥᠭᠡᠳ ᠡᠨᠡ ᠨᠢ ᠬᠡᠳᠦᠢᠪᠡᠷ ᠬᠤᠪᠢ ᠶ᠋ᠢᠨ ᠰᠢᠨᠵᠢ ᠲᠡᠢ ᠴᠦ᠍ ᠬᠥᠮᠦᠨ ᠠᠷᠠᠳ ᠤ᠋ᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠵᠤ ᠢᠷᠡᠭᠰᠡᠨ ᠡᠷᠬᠢᠮᠯᠡᠨ ᠬᠠᠢᠷᠠᠯᠠᠳᠠᠭ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠪᠦᠷᠢ ᠶᠦᠮ᠃
ᠢᠰᠡᠭᠡᠢ ᠬᠢᠬᠦ ᠢᠰᠡᠭᠡᠢ ᠬᠢᠬᠦ ᠨᠣᠣᠰᠣ ᠶ᠋ᠢ ᠪᠡᠯᠡᠳᠬᠡᠬᠦ ᠳ᠋ᠡᠭᠡᠨ ᠬᠣᠨᠢᠨ ᠤ᠋ ᠨᠣᠣᠰᠣ ᠶ᠋ᠢ ᠬᠢᠷᠭᠠᠬᠤ ᠠ᠋ᠴᠠ ᠡᠬᠢᠯᠡᠳᠡᠭ᠃ ᠬᠢᠷᠭᠠᠭᠰᠠᠨ ᠨᠣᠣᠰᠣ ᠶ᠋ᠢ ᠲᠠᠰᠤᠯᠤᠯ ᠦᠭᠡᠢ ᠦᠷᠭᠦᠯᠵᠢ ᠪᠡᠷ ᠨᠢ ᠮᠤᠰᠬᠢᠨ ᠬᠠᠳᠠᠭᠠᠯᠠᠬᠤ ᠪᠤᠶᠤ ᠪᠥᠭᠡᠮᠨᠡᠷᠡᠵᠦ ᠰᠢᠷᠣᠢ ᠬᠣᠭ ᠪᠣᠯᠤᠭᠰᠠᠨ ᠪᠣᠯ ᠭᠣᠣᠯ ᠤ᠋ᠨ ᠵᠠᠬᠠ ᠶ᠋ᠢᠨ ᠴᠡᠪᠡᠷ ᠵᠦᠯᠭᠡ ᠰᠢᠷᠬᠡᠨ ᠳᠡᠭᠡᠷᠡ ᠪᠤᠶᠤ ᠪᠤᠲᠠ ᠶ᠋ᠢᠨ ᠠᠷᠠᠰᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠰᠠᠪᠠᠵᠤ ᠴᠡᠪᠡᠷᠯᠡᠨ ᠪᠥᠭᠡᠮᠨᠡᠷᠡᠭᠰᠡᠨ ᠬᠡᠰᠡᠭ ᠢ᠋ ᠵᠠᠳᠠᠯᠤᠨ ᠨᠢᠭᠡᠨ ᠵᠢᠭᠳᠡ ᠬᠥᠪᠰᠥᠭᠦᠷ ᠪᠣᠯᠭᠠᠭᠠᠳ ᠨᠤᠭᠤᠯᠤᠨ ᠡᠪᠬᠡᠵᠦ ᠬᠠᠳᠠᠭᠠᠯᠠᠨᠠ᠃ ᠵᠠᠷᠢᠮ ᠨᠤᠲᠤᠭ ᠲᠤ᠌ ᠢᠰᠡᠭᠡᠢ ᠬᠢᠬᠦ ᠨᠣᠣᠰᠣᠨ ᠤ᠋ ᠵᠤᠩᠭᠠᠭ ᠢ᠋ ᠤᠬᠢᠶᠠᠬᠤ ᠶ᠋ᠢ ᠬᠣᠷᠢᠭᠯᠠᠳᠠᠭ᠃
ᠢᠰᠡᠭᠡᠢ ᠬᠢᠬᠦ ᠠᠷᠭᠠ ᠮᠠᠨ ᠤ᠋ ᠣᠷᠣᠨ ᠤ᠋ ᠣᠯᠠᠨ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠪᠤᠶᠤ ᠨᠤᠲᠤᠭ ᠪᠦᠷᠢ ᠶ᠋ᠢᠨ ᠣᠨᠴᠠᠯᠢᠭ ᠥᠭᠡᠷᠡ ᠥᠭᠡᠷᠡ ᠪᠠᠢᠳᠠᠭ ᠪᠣᠯᠪᠠᠴᠤ ᠦᠨᠳᠦᠰᠦᠨ ᠳ᠋ᠡᠭᠡᠨ ᠢᠵᠢᠯ ᠶᠦᠮ᠃ ᠢᠰᠡᠭᠡᠢ ᠬᠢᠬᠦ ᠳ᠋ᠡᠭᠡᠨ ᠡᠬᠢᠯᠡᠭᠡᠳ ᠨᠣᠣᠰᠣ ᠵᠤᠯᠤᠬᠤ ᠠᠵᠢᠯ ᠠ᠋ᠴᠠ ᠡᠬᠢᠯᠡᠬᠦ ᠪᠥᠭᠡᠳ ᠬᠠᠭᠤᠴᠢᠨ ᠢᠰᠡᠭᠡᠢ ᠲᠤᠭᠤᠷᠭᠠ ᠶ᠋ᠢ ᠤᠰᠤᠯᠠᠭᠠᠳ ᠳᠡᠭᠡᠷᠡ ᠨᠢ ᠨᠣᠣᠰᠣ ᠪᠠᠨ ᠵᠤᠯᠤᠨᠠ᠃ ᠵᠤᠯᠤᠬᠤ ᠨᠣᠣᠰᠣ ᠪᠥᠭᠡᠮ ᠦᠭᠡᠢ᠂ ᠴᠡᠪᠡᠷ ᠵᠢᠭᠳᠡ ᠪᠠᠢᠬᠤ ᠪᠠ ᠵᠤᠯᠤᠬᠤ ᠳ᠋ᠠᠭᠠᠨ ᠣᠪᠣᠩ ᠳᠣᠪᠣᠩ᠂ ᠨᠢᠮᠭᠡᠨ ᠵᠤᠵᠠᠭᠠᠨ ᠦᠭᠡᠢ ᠵᠠᠬᠠ ᠶ᠋ᠢ ᠲᠡᠭᠰᠢ ᠵᠤᠯᠤᠨᠠ᠃ ᠨᠣᠣᠰᠣ ᠶ᠋ᠢ ᠵᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠤᠪᠢᠩ ᠳ᠋ᠤ᠌ ᠤᠰᠤ ᠬᠢᠵᠦ ᠱᠠᠪᠰᠢᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠤᠰᠤᠯᠠᠨᠠ᠃ ᠣᠷᠴᠢᠨ ᠦᠶᠡ ᠳ᠋ᠦ᠍ ᠰᠦᠷᠴᠢᠭᠦᠷ ᠢ᠋ᠶ᠋ᠡᠷ ᠵᠢᠭᠳᠡ ᠤᠰᠤᠯᠠᠵᠤ ᠪᠣᠯᠬᠤ ᠶᠤᠮ᠃
ᠵᠤᠯᠤᠵᠤ ᠤᠰᠤᠯᠠᠭᠰᠠᠨ ᠨᠣᠣᠰᠣ ᠠ᠋ᠴᠠ ᠪᠠᠨ4m ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠮᠣᠳᠣᠨ ᠭᠣᠣᠯ ᠳ᠋ᠤ᠌ ᠣᠷᠢᠶᠠᠨᠠ᠃ ᠨᠣᠣᠰᠣ ᠣᠷᠢᠶᠠᠳᠠᠭ ᠭᠣᠣᠯ ᠢ᠋ ᠢᠰᠡᠭᠡᠢ ᠶ᠋ᠢᠨ ᠭᠣᠣᠯ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠭᠣᠣᠯ ᠮᠣᠳᠣᠨ ᠤ᠋ ᠬᠣᠶᠠᠷ ᠦᠵᠦᠭᠦᠷ ᠨᠢ ᠨᠠᠷᠢᠬᠠᠨ10cm ᠣᠷᠴᠢᠮ ᠤᠷᠲᠤ ᠪᠠᠢᠬᠤ ᠪᠠ᠃ ᠡᠭᠦᠨ ᠢ᠋ ᠪᠤᠯᠤ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠭᠣᠣᠯ ᠳ᠋ᠤ᠌ ᠣᠷᠢᠶᠠᠭᠰᠠᠨ ᠨᠣᠣᠰᠣ ᠶ᠋ᠢᠨ ᠭᠠᠳᠠᠭᠤᠷ ᠳᠠᠪᠤᠤ ᠪᠤᠶᠤ ᠢᠰᠡᠭᠡᠢ ᠲᠤᠭᠤᠷᠭᠠ ᠪᠠᠷ ᠣᠷᠢᠶᠠᠵᠤ ᠲᠡᠭᠦᠨ ᠦ᠌ ᠭᠠᠳᠠᠭᠤᠷ ᠪᠤᠲᠠ ᠶ᠋ᠢᠨ ᠨᠣᠢᠲᠠᠨ ᠰᠢᠷᠢ ᠪᠡᠷ ᠣᠷᠢᠶᠠᠵᠤ ᠠᠮᠠᠨ ᠬᠦᠵᠦᠭᠦᠦ ᠵᠠᠩᠭᠢᠯᠠᠭᠠ ᠪᠠᠷ ᠭᠣᠭᠴᠣᠭᠠᠯᠠᠳᠠᠨ ᠵᠠᠩᠭᠢᠳᠴᠤ ᠪᠡᠬᠢᠯᠡᠭᠡᠳ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠪᠤᠯᠤ ᠳ᠋ᠤ᠌ ᠴᠢᠬᠢ ᠤᠭᠯᠠᠨᠠ᠃ ᠴᠢᠬᠢᠨ ᠳ᠋ᠦ᠍ ᠬᠠᠲᠠᠭᠤ᠂ ᠡᠯᠡᠭᠳᠡᠵᠦ ᠡᠪᠳᠡᠷᠡᠬᠦ ᠨᠢ ᠪᠠᠭᠠ ᠭᠣᠣᠯ ᠢ᠋ ᠤᠬᠤᠵᠤ ᠨᠦᠬᠡᠯᠡᠭᠰᠡᠨ ᠮᠣᠳᠣ ᠪᠤᠶᠤ ᠤᠭᠠᠯᠵᠠ ᠶ᠋ᠢᠨ ᠡᠪᠡᠷ ᠬᠡᠷᠡᠭᠯᠡᠨᠡ᠃ ᠤᠭᠠᠯᠵᠠ ᠶ᠋ᠢᠨ ᠡᠪᠡᠷ ᠢ᠋ᠶ᠋ᠡᠷ ᠬᠢᠭᠰᠡᠨ ᠴᠢᠬᠢ ᠪᠠᠲᠤ ᠪᠥᠬᠡ ᠪᠥᠭᠡᠳ ᠴᠢᠯᠥᠭᠡᠲᠡᠢ ᠡᠷᠭᠢᠳᠡᠭ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃ ᠬᠡᠷᠪᠡ ᠴᠢᠬᠢ ᠴᠢᠯᠥᠭᠡᠲᠡᠢ ᠡᠷᠭᠢᠬᠦ ᠦᠭᠡᠢ ᠪᠣᠯ ᠳᠣᠲᠣᠷᠠ ᠲᠠᠯᠠ ᠶ᠋ᠢ ᠳᠤᠰᠤᠯᠠᠨᠠ᠃ ᠴᠢᠬᠢᠨ ᠳ᠋ᠦ᠍ ᠲᠠᠲᠠᠯᠭᠠ ᠲᠠᠢ ᠬᠣᠯᠪᠣᠳᠠᠭ ᠪᠥᠬᠡ ᠰᠤᠷ ᠭᠣᠭᠴᠣᠭᠠ ᠪᠠᠢᠳᠠᠭ᠃ ᠡᠨᠡ ᠭᠣᠭᠴᠣᠭᠠᠨ ᠠ᠋ᠴᠠ15—18m ᠣᠷᠴᠢᠮ ᠰᠤᠷ ᠪᠤᠶᠤ ᠣᠯᠣᠰᠣ᠂ ᠭᠤᠷᠮᠤᠰᠤᠨ ᠬᠢᠯᠭᠠᠰᠤᠨ ᠳᠡᠭᠡᠰᠦ ᠪᠡᠷ ᠬᠢᠭᠰᠡᠨ ᠲᠠᠲᠠᠯᠭᠠ ᠬᠣᠯᠪᠣᠵᠤ ᠲᠡᠭᠦᠨ ᠦ᠌ ᠦᠵᠦᠭᠦᠷ ᠲᠦ᠍70—80cm ᠣᠷᠴᠢᠮ ᠬᠥᠨᠳᠡᠯᠡᠨ ᠣᠭᠲᠣᠯᠤᠯ ᠲᠠᠢ ᠮᠣᠳᠣ ᠪᠡᠬᠢᠯᠡᠵᠦ ᠡᠮᠡᠭᠡᠯ ᠦ᠋ᠨ ᠳᠠᠷᠤᠭᠤᠯᠭᠠ ᠣᠯᠣᠩ ᠲᠠᠢ ᠬᠣᠯᠪᠣᠵᠤ ᠴᠢᠭᠲᠠᠯᠠᠬᠤ ᠪᠠ ᠢᠰᠡᠭᠡᠢ ᠲᠠᠲᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠰᠤᠭᠤ ᠳ᠋ᠠᠭᠠᠨ ᠬᠠᠪᠴᠢᠭᠤᠯᠬᠤ ᠪᠤᠶᠤ ᠪᠠᠷᠢᠵᠤ ᠶᠠᠪᠤᠨᠠ᠃ ᠭᠣᠣᠯ ᠮᠣᠳᠣ ᠴᠢᠬᠢᠨ ᠳᠣᠲᠣᠷᠠ ᠴᠢᠯᠥᠭᠡᠲᠡᠢ ᠬᠣᠯᠬᠢᠨ ᠡᠷᠭᠢᠵᠦ ᠪᠠᠢᠪᠠᠯ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃
ᠢᠰᠡᠭᠡᠢ ᠶ᠋ᠢ ᠲᠠᠲᠠᠬᠤ ᠳ᠋ᠠᠭᠠᠨ ᠬᠣᠶᠠᠷ ᠮᠣᠷᠢ ᠪᠤᠶᠤ ᠱᠠᠷ ᠢ᠋ᠶ᠋ᠠᠷ ᠲᠠᠲᠠᠨᠠ᠃ ᠲᠡᠮᠡᠭᠡ ᠪᠡᠷ ᠢᠰᠡᠭᠡᠢ ᠲᠠᠲᠠᠬᠤ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠠᠯᠬᠤᠭᠠ ᠨᠠᠮᠤᠯᠵᠠᠭᠰᠠᠨ ᠵᠥᠭᠡᠯᠡᠨ ᠪᠠᠢᠳᠠᠭ ᠤᠴᠢᠷ ᠢᠰᠡᠭᠡᠢ ᠴᠢᠩᠭᠠᠷᠠᠵᠤ ᠬᠠᠲᠠᠭᠤᠷᠠᠳᠠᠭ ᠦᠭᠡᠢ ᠤᠴᠢᠷ ᠲᠡᠮᠡᠭᠡ ᠪᠡᠷ ᠲᠠᠲᠠᠬᠤ ᠳᠤᠷᠠ ᠦᠭᠡᠢ ᠪᠠᠢᠳᠠᠭ᠃ ᠬᠡᠷᠪᠡ ᠮᠣᠷᠢ ᠪᠣᠰᠬᠢᠳᠠᠭ ᠪᠣᠯ ᠡᠬᠢᠨ ᠦ᠌ ᠲᠠᠲᠠᠯᠭᠠᠨ ᠳ᠋ᠤ᠌ ᠨᠢᠳᠦ ᠶ᠋ᠢ ᠨᠢ ᠳᠠᠷᠤᠵᠤ ᠪᠣᠭᠣᠵᠤ ᠶᠠᠪᠤᠭᠤᠯᠤᠭᠠᠳ ᠬᠡᠰᠡᠭ ᠶᠠᠪᠤᠵᠤ ᠳᠠᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠢᠳᠦᠨ ᠦ᠌ ᠪᠣᠭᠣᠯᠲᠠ ᠶ᠋ᠢ ᠠᠪᠳᠠᠭ᠃ ᠢᠰᠡᠭᠡᠢ ᠶ᠋ᠢ ᠲᠠᠲᠠᠬᠤ ᠳ᠋ᠠᠭᠠᠨ ᠵᠢᠭᠳᠡ ᠴᠢᠷᠴᠦ ᠲᠣᠳᠣᠷᠬᠠᠢ ᠬᠡᠮᠵᠢᠶᠡ ᠲᠡᠢ ᠭᠠᠵᠠᠷ ᠶᠠᠪᠤᠨᠠ᠃ ᠡᠬᠢᠨ ᠦ᠌ ᠤᠳᠠᠭᠠ250—300m ᠣᠷᠴᠢᠮ ᠭᠠᠵᠠᠷ ᠢ᠋25—30 ᠤᠳᠠᠭᠠ ᠨᠠᠮᠤᠭᠤᠨ ᠵᠥᠭᠡᠯᠡᠨ ᠠᠯᠬᠤᠨ ᠱᠣᠭᠰᠢᠭᠤᠯᠤᠨ ᠲᠠᠲᠠᠭᠠᠳ ᠢᠰᠡᠭᠡᠢ ᠪᠡᠨ ᠵᠠᠳᠠᠯᠤᠨ ᠤᠰᠤᠯᠠᠵᠤ ᠡᠷᠭᠢᠭᠦᠯᠦᠨ ᠳᠠᠬᠢᠨ ᠪᠣᠭᠣᠵᠤ ᠲᠦᠷᠦᠭᠦᠴᠢ ᠶ᠋ᠢᠨ ᠬᠡᠮᠵᠢᠶᠡᠨ ᠦ᠌ ᠭᠠᠵᠠᠷ ᠢ᠋ ᠰᠢᠷᠦᠭᠦᠬᠡᠨ ᠱᠣᠭᠰᠢᠭᠤᠯᠤᠨ ᠲᠠᠲᠠᠬᠤ ᠪᠠ ᠡᠭᠦᠨ ᠢ᠋ ᠡᠷᠭᠢᠭᠦᠯᠭᠡ ᠲᠠᠲᠠᠯᠲᠠ ᠭᠡᠳᠡᠭ᠃ ᠭᠤᠷᠪᠠᠳᠠᠬᠢ ᠤᠳᠠᠭᠠᠨ ᠤ᠋ ᠲᠠᠲᠠᠯᠲᠠ ᠮᠥᠨ ᠳᠡᠭᠡᠷᠡᠬᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠠᠲᠠᠭᠳᠠᠬᠤ ᠪᠣᠯᠪᠠᠴᠤ ᠮᠣᠷᠢ ᠪᠠᠨ ᠰᠢᠷᠦᠭᠦᠨ ᠬᠠᠲᠠᠷᠢᠭᠤᠯᠤᠨ ᠴᠣᠭᠭᠢᠭᠤᠯᠤᠨ ᠲᠠᠲᠠᠨᠠ᠃ ᠰᠡᠭᠦᠯ ᠦ᠋ᠨ ᠲᠠᠲᠠᠯᠭᠠᠨ ᠤ᠋ ᠳᠠᠷᠠᠭᠠ ᠪᠣᠭᠣᠯᠲᠠ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠨᠢ ᠴᠠᠭ ᠣᠷᠴᠢᠮ ᠪᠠᠢᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠠᠳᠠᠯᠵᠤ ᠢᠰᠡᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠠ ᠶ᠋ᠢ ᠵᠠᠰᠠᠵᠤ ᠳᠡᠯᠭᠡᠵᠦ ᠬᠠᠲᠠᠭᠠᠨᠠ᠃
ᠮᠣᠩᠭᠣᠯᠴᠤᠳ ᠢᠰᠡᠭᠡᠢ ᠬᠢᠬᠦ᠂ ᠲᠣᠭᠣᠭᠠ ᠨᠡᠷᠡᠬᠦ᠂ ᠠᠷᠠᠰᠤ ᠡᠯᠳᠡᠬᠦ ᠠᠵᠢᠯ ᠢ᠋ ᠨᠡᠭᠦᠳᠡᠯ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠭᠤᠷᠪᠠᠨ ᠲᠣᠮᠣ ᠦᠢᠯᠡᠳᠪᠦᠷᠢ ᠭᠡᠵᠦ ᠡᠷᠬᠢᠮᠯᠡᠨ ᠬᠦᠨᠳᠦᠯᠡᠵᠦ ᠢᠷᠡᠭᠰᠡᠨ ᠲᠡᠦᠬᠡ ᠲᠡᠢ᠃ ᠢᠰᠡᠭᠡᠢ ᠬᠢᠬᠦ ᠳ᠋ᠦ᠍ ᠠᠢᠯ ᠰᠠᠭᠠᠬᠠᠯᠲᠠ ᠪᠠᠷ ᠢ᠋ᠶ᠋ᠠᠨ ᠨᠡᠢᠯᠡᠵᠦ ᠬᠠᠮᠲᠤᠷᠠᠨ ᠬᠢᠳᠡᠭ ᠵᠠᠩᠰᠢᠯ ᠲᠠᠢ ᠪᠥᠭᠡᠳ ᠢᠰᠡᠭᠡᠢ ᠬᠢᠬᠦ ᠠᠵᠢᠯ ᠪᠠᠶᠠᠷ ᠶᠣᠰᠣᠯᠠᠯ ᠤ᠋ᠨ ᠪᠠᠢᠳᠠᠯ ᠲᠠᠢ ᠢᠳᠡᠭᠡ ᠴᠠᠭᠠ ᠵᠡᠬᠡᠵᠦ ᠢᠰᠡᠭᠡᠢ ᠬᠢᠬᠦ ᠭᠠᠵᠠᠷ ᠴᠠᠢ ᠤᠤᠭᠤᠵᠤ ᠳᠡᠭᠡᠵᠢ ᠪᠡᠨ ᠡᠷᠭᠦᠳᠡᠭ ᠪᠠᠢᠵᠠᠢ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠵᠠᠷᠢᠮ ᠭᠠᠵᠠᠷ ᠢᠰᠡᠭᠡᠢ ᠶ᠋ᠢᠨ ᠬᠤᠷᠢᠮ ᠬᠢᠨᠡ ᠭᠡᠵᠦ ᠶᠠᠷᠢᠳᠠᠭ᠃
ᠮᠣᠩᠭᠣᠯᠴᠤᠳ ᠨᠢᠭᠡ ᠨᠢ ᠨᠥᠭᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠵᠦ ᠪᠦᠲᠦᠭᠡᠵᠦ ᠪᠠᠢᠭᠠ ᠠᠵᠢᠯ ᠢ᠋ ᠢᠮᠠᠭᠲᠠ ᠰᠠᠢᠨ ᠰᠠᠢᠬᠠᠨ ᠪᠦᠲᠦᠮᠵᠢᠲᠡᠢ ᠪᠠᠢᠭᠠᠰᠠᠢ ᠭᠡᠵᠦ ᠪᠡᠯᠭᠡᠳᠡᠨ ᠢᠷᠥᠭᠡᠵᠦ ᠢᠰᠡᠭᠡᠢ ᠬᠢᠬᠦ᠂ ᠦᠢᠯᠡ ᠣᠶᠣᠬᠤ᠂ ᠠᠷᠠᠰᠤ ᠨᠡᠬᠡᠢ ᠡᠯᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠠᠭᠠᠷᠠᠯᠳᠤᠪᠠᠯ ᠶᠠᠮᠠᠷ ᠴᠤ ᠶᠡᠬᠡ ᠠᠵᠢᠯ ᠲᠠᠢ᠂ ᠶᠠᠭᠠᠷᠠᠤ ᠶᠠᠪᠤᠯᠠ ᠴᠤ᠌ ᠵᠠᠪᠠᠯ ᠭᠠᠷ ᠪᠡᠶᠡ ᠣᠷᠣᠯᠴᠠᠳᠠᠭ ᠤᠯᠠᠮᠵᠢᠯᠠᠯᠲᠤ ᠰᠠᠢᠬᠠᠨ ᠵᠠᠩᠰᠢᠯ ᠲᠠᠢ ᠪᠥᠭᠡᠳ ᠢᠰᠡᠭᠡᠢ ᠬᠢᠵᠦ ᠪᠠᠢᠭᠠ ᠬᠥᠮᠦᠰ ᠳᠡᠭᠡᠷᠡ ᠢᠷᠡᠪᠡᠯ ᠲᠤᠩ ᠰᠢᠭ᠋ ᠴᠠᠭᠠᠨ᠂ ᠳᠤᠷᠳᠤᠩ ᠰᠢᠭ᠋ ᠭᠤᠸᠠ ᠵᠠᠬᠠ ᠲᠠᠢ ᠪᠣᠯᠲᠤᠭᠠᠢ ᠭᠡᠵᠦ ᠢᠷᠥᠭᠡᠵᠦ ᠵᠤᠯᠤᠬᠠᠢ ᠵᠤᠯᠤᠵᠤ ᠥᠭᠭᠦᠭᠡᠳ ᠶᠠᠪᠤᠳᠠᠭ᠃ ᠠᠷᠠᠰᠤ ᠡᠯᠳᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠠᠭᠠᠷᠠᠯᠳᠤᠪᠠᠯ ᠡᠯᠳᠡᠭᠦᠷ ᠵᠥᠭᠡᠯᠡᠨ ᠪᠣᠯᠲᠤᠭᠠᠢ ᠭᠡᠵᠦ ᠢᠷᠦᠭᠡᠳᠡᠭ᠃ ᠢᠷᠦᠭᠡᠯ ᠰᠣᠨᠣᠰᠤᠭᠰᠠᠨ ᠬᠥᠮᠦᠨ ᠪᠠᠶᠠᠷᠲᠠᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠵᠦ ᠢᠷᠦᠭᠡᠯ ᠪᠠᠲᠤ ᠣᠷᠣᠰᠢᠭ ᠭᠡᠵᠦ ᠬᠡᠯᠡᠳᠡᠭ ᠪᠢᠯᠡ᠃
ᠡᠨᠡ ᠪᠣᠯ ᠶᠠᠮᠠᠷ ᠴᠤ᠌ ᠱᠠᠰᠢᠨ ᠰᠢᠲᠦᠯᠭᠡ ᠲᠡᠢ ᠬᠣᠯᠪᠣᠭᠠ ᠦᠭᠡᠢ ᠪᠥᠭᠡᠳ ᠬᠥᠮᠦᠨ ᠠᠷᠠᠳ ᠤ᠋ᠨ ᠮᠠᠨᠢ ᠨᠢᠭᠡ ᠨᠢ ᠨᠥᠭᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠰᠠᠨᠠᠭᠠ ᠲᠠᠯᠪᠢᠭᠰᠠᠨ ᠠᠷᠢᠭᠤᠨ ᠴᠠᠭᠠᠨ ᠰᠡᠳᠬᠢᠯ ᠦ᠋ᠨ ᠢᠯᠡᠷᠬᠡᠢᠯᠡᠯ ᠤᠴᠢᠷ ᠣᠳᠣ ᠬᠦᠷᠲᠡᠯᠡ ᠬᠡᠷᠡᠭᠯᠡᠭᠳᠡᠵᠦ ᠪᠠᠢᠭᠠ ᠪᠥᠭᠡᠳ ᠬᠣᠢᠴᠢ ᠦᠶᠡ ᠠᠪᠴᠤ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠢᠯᠡᠭᠦᠳᠡᠬᠦ ᠦᠭᠡᠢ ᠪᠢᠵᠡ ᠠ᠋᠃
ᠲᠡᠭᠦᠨᠴᠢᠯᠡᠨ ᠭᠠᠷ ᠢᠰᠡᠭᠡᠢ ᠶ᠋ᠢ ᠮᠣᠩᠭᠣᠯᠴᠤᠳ ᠶᠡᠬᠡ ᠬᠢᠳᠡᠭ ᠵᠠᠩᠰᠢᠯ ᠲᠠᠢ᠃ ᠭᠠᠷ ᠢᠰᠡᠭᠡᠢ ᠶ᠋ᠢ ᠭᠣᠣᠯᠳᠠᠭᠤ ᠣᠬᠣᠷ ᠨᠣᠣᠰᠣ ᠪᠠᠷ ᠬᠢᠬᠦ ᠪᠥᠭᠡᠳ ᠲᠡᠭᠦᠨ ᠢ᠋ ᠮᠥᠨ ᠢᠰᠡᠭᠡᠢ ᠬᠢᠳᠡᠭ ᠳᠡᠰ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠬᠢᠵᠦ ᠭᠤᠯᠢᠷ ᠡᠯᠳᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠯᠠᠭᠠᠳᠠᠵᠤ ᠥᠩᠬᠥᠷᠢᠭᠦᠯᠵᠦ ᠬᠢᠳᠡᠭ ᠬᠠᠯᠬᠠ ᠶ᠋ᠢᠨ ᠡᠢᠮᠦ ᠢᠰᠡᠭᠡᠢ ᠶ᠋ᠢ ᠵᠨᠨᠽᠢ ᠢᠰᠡᠭᠡᠢ ᠭᠡᠳᠡᠭ᠃
ᠬᠠᠰᠠᠭ ᠤ᠋ᠳ ᠰᠢᠷᠲᠡᠭ ᠲᠦ᠍ ᠵᠣᠷᠢᠭᠤᠯᠤᠭᠰᠠᠨ ᠢᠰᠡᠭᠡᠢ ᠶ᠋ᠢ ᠬᠢᠬᠦ ᠳ᠋ᠡᠭᠡᠨ ᠢᠰᠡᠭᠡᠢ ᠬᠢᠬᠦ ᠴᠠᠭᠠᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠪᠡᠨ ᠬᠠᠷᠠ᠂ ᠤᠯᠠᠭᠠᠨ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠨᠣᠣᠰᠣ ᠪᠠᠷ ᠬᠡ ᠲᠠᠯᠪᠢᠵᠤ ᠬᠢᠬᠦ ᠪᠥᠭᠡᠳ ᠢᠰᠡᠭᠡᠢ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠠ ᠪᠠᠷ ᠪᠠᠷᠠᠭᠤᠨ ᠰᠣᠯᠣᠭᠠᠢ ᠲᠠᠮᠤᠭᠰᠠᠨ ᠳᠠᠩ ᠵᠡᠬᠡᠭ ᠲᠠᠯᠪᠢᠵᠤ ᠬᠡ ᠪᠡᠨ ᠲᠣᠳᠣᠷᠠᠭᠤᠯᠤᠨᠠ᠃ ᠢᠰᠡᠭᠡᠢ ᠶ᠋ᠢ ᠬᠢᠭᠰᠡᠨ ᠦ᠌ ᠳᠠᠷᠠᠭᠠ ᠳᠡᠯᠭᠡᠵᠦ ᠲᠠᠯᠪᠢᠵᠤ ᠬᠠᠲᠠᠭᠠᠭᠠᠳ ᠳᠡᠭᠡᠪᠦᠷ ᠲᠤᠭᠤᠷᠭᠠ ᠡᠷᠦᠬᠡ᠂ ᠡᠭᠦᠳᠡ ᠬᠢᠬᠦ ᠪᠤᠶᠤ ᠰᠢᠷᠳᠡᠭ ᠭᠣᠳᠣᠰ ᠵᠡᠷᠭᠡ ᠶ᠋ᠢ ᠬᠢᠳᠡᠭ᠃
ᠨᠣᠣᠰᠣ ᠪᠠᠷ ᠤᠲᠠᠰᠤ ᠪᠡᠯᠡᠳᠬᠡᠵᠦ ᠨᠣᠣᠰᠣ ᠪᠠᠷ ᠤᠲᠠᠰᠤ ᠪᠡᠯᠡᠳᠬᠡᠬᠦ ᠳ᠋ᠦ᠍ ᠶᠠᠮᠠᠷ ᠴᠤ᠌ ᠮᠠᠯ ᠤ᠋ᠨ ᠨᠣᠣᠰᠣ ᠤᠲᠠᠰᠤ ᠪᠣᠯᠳᠠᠭ᠃ ᠬᠠᠷᠢᠨ ᠠᠳᠤᠭᠤᠨ ᠤ᠋ ᠬᠥᠭᠡᠪᠦᠷ ᠢ᠋ᠶ᠋ᠡᠷ ᠤᠲᠠᠰᠤ ᠬᠢᠳᠡᠭ ᠦᠭᠡᠢ᠃ ᠤᠲᠠᠰᠤ ᠬᠢᠬᠦ ᠳ᠋ᠦ᠍ ᠶᠠᠭᠤᠨ ᠤ᠋ ᠡᠮᠦᠨᠡ ᠨᠣᠣᠰᠣ ᠶ᠋ᠢ ᠰᠢᠷᠣᠢ᠂ ᠲᠣᠭᠣᠰᠣ ᠦᠭᠡᠢ ᠨᠣᠭᠣᠭᠠᠨ ᠵᠦᠯᠭᠡ ᠪᠤᠶᠤ ᠪᠤᠲᠠ ᠮᠠᠯ ᠤ᠋ᠨ ᠰᠢᠷᠢᠨ ᠳᠡᠭᠡᠷᠡ ᠲᠠᠯᠪᠢᠵᠤ110—130cm ᠣᠷᠴᠢᠮ ᠤᠷᠲᠤ ᠨᠠᠷᠢᠨ ᠪᠤᠷᠭᠠᠰᠤ ᠪᠤᠶᠤ ᠢᠷᠭᠠᠢ ᠵᠡᠷᠭᠡ ᠠᠮᠠᠷᠬᠠᠨ ᠬᠤᠭᠤᠷᠠᠵᠤ ᠴᠤᠭᠤᠷᠠᠳᠠᠭ ᠦᠭᠡᠢ ᠰᠠᠪᠠᠭᠠ ᠪᠠᠷ ᠰᠠᠪᠠᠨᠠ᠃ ᠰᠠᠪᠠᠭᠠ ᠦᠵᠦᠭᠦᠷ ᠤᠷᠤᠭᠤ ᠪᠠᠨ ᠨᠠᠷᠢᠨ᠂ ᠮᠠᠰᠢ ᠲᠡᠭᠰᠢᠬᠡᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠢᠮᠦ ᠳ᠋ᠦ᠍ ᠨᠣᠣᠰᠣ ᠰᠠᠪᠠᠬᠤ ᠰᠠᠪᠠᠭᠠ ᠶ᠋ᠢ ᠪᠡᠯᠡᠨ ᠪᠤᠷᠭᠠᠰᠤ ᠢᠷᠭᠠᠢ ᠠᠪᠴᠤ ᠤᠷᠲᠤ ᠪᠣᠭᠣᠨᠢ ᠶ᠋ᠢ ᠲᠠᠭᠠᠷᠠᠭᠤᠯᠤᠨ ᠭᠠᠳᠠᠨᠠ ᠲᠠᠯᠠ ᠶ᠋ᠢᠨ ᠬᠠᠯᠢᠰᠤ᠂ ᠣᠪᠣᠩ ᠲᠣᠪᠣᠩ ᠢ᠋ ᠲᠡᠭᠰᠢᠯᠡᠨ ᠵᠣᠷᠭᠣᠵᠤ ᠪᠦᠳᠦᠭᠦᠨ ᠨᠠᠷᠢᠨ ᠵᠦᠯᠭᠦᠭᠦᠷ ᠢ᠋ᠶ᠋ᠡᠷ ᠵᠦᠯᠭᠦᠨ ᠰᠡᠪ ᠦᠭᠡᠢ ᠪᠣᠯᠭᠠᠨ ᠨᠣᠣᠰᠣ ᠪᠠᠨ ᠰᠡᠪᠡᠨᠡ᠃ ᠨᠣᠣᠰᠣ ᠰᠠᠪᠠᠬᠤ ᠳ᠋ᠤ᠌ ᠰᠢᠷᠣᠢ ᠲᠣᠭᠣᠰᠣ ᠡᠯᠳᠡᠪ ᠥᠷᠭᠡᠰᠦ ᠡᠪᠡᠰᠦ ᠨᠢ ᠠᠷᠢᠯᠤᠨ ᠴᠡᠪᠡᠷᠰᠢᠬᠦ ᠡᠴᠡ ᠭᠠᠳᠠᠨᠠ ᠪᠥᠭᠡᠮᠨᠡᠷᠡᠭᠰᠡᠨ ᠬᠡᠰᠡᠭ ᠨᠢ ᠵᠠᠳᠠᠷᠠᠵᠤ ᠰᠡᠪᠰᠡᠭᠡᠷ ᠰᠤᠯᠠᠬᠠᠨ ᠪᠣᠯᠵᠤ ᠶᠠᠭᠤ ᠴᠤ᠌ ᠬᠢᠬᠦ ᠪᠣᠯᠣᠮᠵᠢᠲᠠᠢ ᠪᠣᠯᠳᠠᠭ᠂
ᠨᠣᠣᠰᠣ ᠰᠠᠪᠠᠬᠤ ᠳ᠋ᠤ᠌ ᠲᠧᠭᠨᠢᠭ ᠠᠵᠢᠯᠯᠠᠭᠠ ᠱᠠᠭᠠᠷᠳᠠᠭᠳᠠᠨᠠ᠂ ᠡᠢᠮᠦ ᠳ᠋ᠦ᠍ ᠰᠠᠪᠠᠭᠠ ᠪᠠᠨ ᠵᠥᠪ ᠪᠠᠷᠢᠵᠤ ᠨᠣᠣᠰᠣ ᠪᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠭᠡᠯᠵᠢᠯᠡᠨ ᠵᠥᠭᠡᠯᠡᠨ ᠴᠣᠬᠢᠵᠤ ᠰᠠᠪᠠᠭᠠᠳ ᠰᠠᠪᠠᠭᠠ ᠪᠠᠨ ᠬᠣᠢᠰᠢ ᠨᠢ ᠰᠤᠭᠤᠯᠵᠤ ᠠᠪᠬᠤ ᠦᠭᠡᠢ ᠪᠣᠯ ᠨᠣᠣᠰᠣ ᠡᠯᠭᠦᠭᠳᠡᠨ ᠴᠠᠴᠤᠭᠳᠠᠨᠠ᠃
ᠢᠩᠭᠢᠵᠦ ᠰᠠᠪᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠤᠯᠤᠬᠤ ᠨᠣᠣᠰᠣ ᠶ᠋ᠢ2—3 ᠨᠤᠭᠤᠯᠵᠤ ᠬᠠᠪᠲᠠᠭᠠᠢ ᠪᠠᠷ ᠨᠢ ᠡᠪᠬᠡᠵᠦ ᠬᠠᠳᠠᠭᠠᠯᠠᠨᠠ᠃ ᠳᠡᠭᠡᠰᠦ ᠲᠠᠮᠤᠬᠤ ᠨᠣᠣᠰᠣ ᠶ᠋ᠢ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠭᠠᠷ ᠲᠤ᠌ ᠨᠢᠭᠡ ᠦᠵᠦᠭᠦᠷ ᠢ᠋ ᠠᠳᠬᠤᠵᠤ ᠳᠣᠯᠣᠪᠣᠷ ᠬᠤᠷᠤᠭᠤᠨ ᠳ᠋ᠠᠭᠠᠨ ᠣᠷᠢᠶᠠᠵᠤ ᠳᠥᠭᠥᠳᠡᠭ ᠬᠢᠨᠡ᠃
ᠤᠲᠠᠰᠤ ᠡᠭᠡᠷᠡᠬᠦ ᠨᠣᠣᠰᠣ ᠶ᠋ᠢ ᠮᠥᠨ ᠲᠦᠭᠦᠳᠡᠭᠯᠡᠬᠦ ᠪᠤᠶᠤ ᠡᠪᠬᠡᠵᠦ ᠠᠪᠤᠨᠠ᠃
ᠨᠣᠣᠰᠣ ᠪᠠᠷ ᠤᠲᠠᠰᠤ ᠡᠭᠡᠷᠡᠬᠦ ᠳ᠋ᠦ᠍ ᠬᠢᠬᠦ ᠵᠦᠢᠯ ᠦ᠋ᠨ ᠢ᠋ᠶ᠋ᠡᠨ ᠣᠨᠴᠠᠯᠢᠭ ᠲᠤ᠌ ᠲᠣᠬᠢᠷᠠᠭᠤᠯᠵᠤ ᠪᠣᠯᠤᠨᠠ᠃ ᠡᠭᠦᠨ ᠲᠡᠢ ᠤᠶᠠᠯᠳᠤᠭᠤᠯᠵᠤ ᠡᠭᠡᠷᠡᠬᠦ ᠡᠭᠡᠷᠡᠦᠯ ᠣᠯᠠᠨ ᠶᠠᠩᠵᠤ ᠪᠠᠢᠳᠠᠭ᠃ ᠡᠭᠡᠷᠡᠦᠯ ᠢ᠋ ᠳᠣᠲᠣᠷᠠ ᠨᠢ ᠪᠦᠳᠦᠭᠦᠨ ᠤᠲᠠᠰᠤᠨ ᠤ᠋᠂ ᠳᠤᠮᠳᠠ ᠵᠡᠷᠭᠡ ᠤᠲᠠᠰᠤᠨ ᠤ᠋᠂ ᠨᠠᠷᠢᠨ ᠤᠲᠠᠰᠤᠨ ᠤ᠋ ᠭᠡᠵᠦ ᠢᠯᠭᠠᠬᠤ ᠪᠥᠭᠡᠳ ᠡᠨᠡ ᠵᠥᠪᠬᠡᠨ ᠡᠭᠡᠷᠡᠦᠯ ᠦ᠋ᠨ ᠳᠤᠭᠤᠢ ᠶ᠋ᠢᠨ ᠬᠦᠨᠳᠦ ᠶ᠋ᠢᠨ ᠬᠡᠮᠵᠢᠶᠡ ᠪᠡᠷ ᠢᠯᠭᠠᠭᠳᠠᠨᠠ᠃ ᠪᠦᠳᠦᠭᠦᠨ ᠤᠲᠠᠰᠤᠨ ᠤ᠋ ᠡᠭᠡᠷᠡᠦᠯ ᠲᠣᠮᠣ ᠳᠤᠭᠤᠢ ᠲᠠᠢ ᠬᠦᠨᠳᠦ ᠪᠠᠢᠳᠠᠭ᠃ ᠳᠤᠮᠳᠠ ᠤᠲᠠᠰᠤᠨ ᠤ᠋ ᠡᠭᠡᠷᠡᠦᠯ ᠲᠡᠭᠦᠨ ᠡᠴᠡ ᠠᠷᠠᠢ ᠬᠥᠩᠭᠡᠨ᠂ ᠨᠠᠷᠢᠨ ᠤᠲᠠᠰᠤᠨ ᠤ᠋ ᠬᠢ ᠪᠦᠷ ᠵᠢᠵᠢᠭ ᠪᠠᠢᠳᠠᠭ᠃
ᠲᠡᠭᠦᠨᠴᠢᠯᠡᠨ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠨᠤᠭᠤᠳ ᠥᠭᠡᠷᠡ ᠥᠭᠡᠷᠡ ᠡᠭᠡᠷᠡᠦᠯ ᠬᠡᠷᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠤᠲᠠᠰᠤ ᠡᠷᠴᠢᠯᠡᠬᠦ ᠠᠷᠭᠠ ᠨᠢ ᠬᠦᠷᠲᠡᠯᠡ ᠥᠭᠡᠷᠡ ᠪᠠᠢᠳᠠᠭ᠃ ᠬᠠᠯᠬᠠ ᠡᠭᠡᠷᠡᠦᠯ ᠦ᠋ᠨ ᠡᠰᠢ ᠨᠢ25—30cm ᠤᠷᠲᠤ ᠲᠣᠯᠣᠭᠠᠢ ᠪᠤᠶᠤ ᠳᠤᠭᠤᠢ ᠲᠡᠰᠢ ᠪᠡᠨ ᠪᠦᠳᠦᠭᠦᠨ ᠳᠡᠭᠡᠭᠰᠢ ᠪᠡᠨ ᠠᠯᠤᠰ ᠠ᠋ᠴᠠ ᠵᠢᠭᠳᠡ ᠨᠠᠷᠢᠰᠤᠭᠰᠠᠭᠠᠷ ᠦᠵᠦᠭᠦᠷ ᠨᠢ ᠱᠣᠪᠬᠣ ᠪᠠᠢᠳᠠᠭ᠃ ᠡᠭᠡᠷᠡᠦᠯ ᠦ᠋ᠨ ᠳᠤᠭᠤᠢ ᠶ᠋ᠢ ᠮᠣᠳᠣ᠂ ᠴᠢᠯᠠᠭᠤ᠂ ᠲᠣᠭᠣᠰᠬᠠ᠂ ᠲᠡᠮᠦᠷ ᠵᠡᠷᠭᠡ ᠪᠡᠷ ᠬᠢᠬᠦ ᠪᠥᠭᠡᠳ ᠳᠤᠭᠤᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠡᠰᠢ ᠮᠣᠳᠣ ᠪᠠᠨ ᠰᠠᠭᠤᠯᠭᠠᠨ ᠪᠡᠬᠢᠯᠡᠨᠡ᠃ ᠮᠥᠨ ᠬᠠᠯᠬᠠ ᠡᠭᠡᠷᠡᠦᠯ ᠳ᠋ᠦ᠍ ᠪᠥᠭᠡᠷᠡᠩᠬᠡᠢ ᠲᠣᠯᠣᠭᠠᠢ ᠲᠠᠢ ᠡᠭᠡᠷᠡᠦᠯ ᠬᠠᠶᠠ ᠪᠠᠢᠳᠠᠭ᠃
ᠡᠭᠡᠷᠡᠦᠯ ᠳ᠋ᠦ᠍ ᠨᠣᠣᠰᠣ ᠵᠠᠯᠭᠠᠵᠤ ᠣᠷᠢᠶᠠᠬᠤ ᠪᠡᠯᠡᠨ ᠭᠡᠳᠡᠰᠦ ᠭᠡᠵᠦ ᠪᠠᠢᠳᠠᠭ᠃ ᠤᠲᠠᠰᠤ ᠡᠭᠡᠷᠡᠬᠦ ᠳ᠋ᠡᠭᠡᠨ ᠭᠡᠳᠡᠰᠦᠨ ᠳ᠋ᠦ᠍ ᠪᠡᠬᠢᠯᠡᠨ ᠡᠭᠡᠷᠡᠵᠦ ᠡᠬᠢᠯᠡᠬᠦ ᠪᠠ ᠡᠭᠡᠷᠡᠦᠯ ᠦ᠋ᠨ ᠭᠡᠳᠡᠰᠦ ᠪᠣᠯ ᠡᠰᠢᠨ ᠳ᠋ᠡᠭᠡᠨ ᠪᠠᠢᠩᠭᠤ ᠪᠠᠢᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠡᠭᠡᠷᠡᠦᠯ ᠦ᠋ᠨ ᠭᠡᠳᠡᠰᠦ ᠠᠪᠴᠤ ᠬᠠᠶᠠᠬᠤ ᠶ᠋ᠢ ᠴᠡᠭᠡᠷᠯᠡᠳᠡᠭ᠃ ᠤᠲᠠᠰᠤ ᠪᠠᠨ ᠡᠭᠡᠷᠡᠬᠦ ᠶ᠋ᠢᠨ ᠲᠤᠯᠠᠳᠠ ᠡᠭᠡᠷᠡᠬᠦ ᠤᠲᠠᠰᠤᠨ ᠤ᠋ ᠪᠠᠨ ᠪᠦᠳᠦᠭᠦᠨ ᠨᠠᠷᠢᠨ ᠳ᠋ᠤ᠌ ᠲᠣᠬᠢᠷᠠᠭᠤᠯᠵᠤ ᠡᠭᠡᠷᠡᠦᠯ ᠢ᠋ᠶ᠋ᠡᠨ ᠰᠣᠩᠭᠣᠨ ᠠᠪᠤᠨᠠ᠃ ᠳᠠᠷᠠᠭᠠ ᠨᠢ ᠤᠲᠠᠰᠤᠨ ᠤ᠋ ᠪᠠᠨ ᠪᠦᠳᠦᠭᠦᠨ ᠨᠠᠷᠢᠨ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠨᠣᠣᠰᠣ ᠪᠠᠨ ᠵᠢᠭᠳᠡ ᠴᠤᠪᠤᠨᠠ᠃ ᠬᠡᠷᠪᠡ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠪᠣᠯ ᠡᠷᠡ ᠡᠮᠡ ᠨᠣᠣᠰᠣ ᠶ᠋ᠢ ᠵᠢᠭᠳᠡ ᠬᠣᠯᠢᠵᠤ ᠴᠤᠪᠤᠨᠠ (ᠡᠷᠡ ᠨᠣᠣᠰᠣ ᠭᠡᠳᠡᠭ ᠶᠣᠭᠳᠤᠷ ᠢ᠋ ᠬᠡᠯᠡᠬᠦ ᠪᠠ ᠡᠮᠡ ᠨᠣᠣᠰᠣ ᠭᠡᠵᠦ ᠪᠡᠶᠡ ᠨᠣᠣᠰᠣ ᠶ᠋ᠢ ᠬᠡᠯᠡᠨᠡ)᠃ ᠬᠣᠨᠢᠨ ᠤ᠋ ᠨᠣᠣᠰᠣ ᠪᠣᠯ ᠰᠢᠭᠤᠳ ᠴᠤᠪᠤᠵᠤ ᠡᠭᠡᠷᠡᠨᠡ᠃ ᠦᠬᠡᠷ ᠦ᠋ᠨ ᠰᠡᠪᠡᠭ ᠢ᠋ ᠭᠡᠷ ᠦ᠋ᠨ ᠬᠣᠰᠢᠯᠠᠩ ᠰᠢᠷᠢᠬᠦ ᠡᠴᠡ ᠭᠠᠳᠠᠨᠠ ᠥᠭᠡᠷᠡ ᠣᠶᠣᠳᠠᠯ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠦᠭᠡᠢ᠃ ᠬᠣᠨᠢ᠂ ᠲᠡᠮᠡᠭᠡᠨ ᠦ᠌ ᠨᠣᠣᠰᠣ ᠪᠠᠷ ᠢᠰᠡᠭᠡᠢ ᠠᠷᠠᠰᠤ᠂ ᠨᠡᠬᠡᠢ ᠣᠶᠣᠬᠤ᠂ ᠢᠰᠡᠭᠡᠢ ᠰᠢᠷᠢᠭᠡᠰᠦ ᠤᠲᠠᠰᠤᠨ ᠬᠡ ᠲᠠᠯᠪᠢᠬᠤ᠂ ᠨᠡᠬᠡᠮᠡᠯ ᠰᠦᠯᠵᠢᠮᠡᠯ ᠳ᠋ᠦ᠍ ᠬᠡᠷᠡᠭᠯᠡᠨᠡ᠃ ᠡᠭᠡᠷᠡᠬᠦ ᠳ᠋ᠡᠭᠡᠨ ᠨᠣᠣᠰᠣ ᠪᠠᠨ ᠴᠤᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠭᠡᠷᠡᠦᠯ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠡᠷᠡᠬᠡᠢ᠂ ᠳᠣᠯᠣᠪᠣᠷ ᠬᠤᠷᠤᠭᠤ ᠪᠠᠷ ᠡᠰᠢᠨ ᠦ᠌ ᠦᠵᠦᠭᠦᠷ ᠡᠴᠡ ᠴᠢᠮᠬᠢᠨ ᠪᠠᠷᠢᠵᠤ ᠨᠠᠷᠠ ᠵᠥᠪ ᠡᠷᠭᠢᠭᠦᠯᠦᠨ ᠡᠷᠴᠢᠯᠡᠨᠡ᠃ ᠡᠷᠴᠢᠯᠡᠭᠰᠡᠨ ᠤᠲᠠᠰᠤ ᠪᠠᠨ ᠡᠭᠡᠷᠡᠦᠯ ᠦ᠋ᠨ ᠢ᠋ᠶ᠋ᠡᠨ ᠳᠤᠭᠤᠢ ᠳ᠋ᠤ᠌ ᠦᠶᠡᠯᠡᠭᠦᠯᠦᠨ ᠣᠷᠢᠶᠠᠵᠤ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ ᠡᠯᠭᠦᠨ ᠣᠷᠢᠶᠠᠵᠤ ᠡᠰᠢᠨ ᠳ᠋ᠡᠭᠡᠨ ᠤᠭᠯᠠᠨ ᠪᠡᠬᠢᠯᠡᠭᠡᠳ ᠳᠠᠬᠢᠨ ᠨᠣᠣᠰᠣ ᠪᠠᠨ ᠴᠤᠪᠤᠵᠤ ᠡᠷᠴᠢᠯᠡᠬᠦ ᠵᠠᠮ ᠢ᠋ᠶ᠋ᠠᠷ ᠡᠭᠡᠷᠡᠨᠡ᠃
ᠵᠢᠷᠤᠭ40
(1) ᠪᠦᠳᠦᠭᠦᠨ
ᠤᠲᠠᠰᠤᠨ ᠤ᠋ ᠡᠭᠡᠷᠡᠦᠯ
(2) ᠨᠠᠷᠢᠨ ᠤᠲᠠᠰᠤᠨ ᠤ᠋ ᠡᠭᠡᠷᠡᠦᠯ
(3) ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠤᠲᠠᠰᠤᠨ ᠤ᠋ ᠡᠭᠡᠷᠡᠦᠯ
(4) ᠬᠠᠰᠠᠭ ᠡᠭᠡᠷᠡᠦᠯ
ᠬᠡᠷᠪᠡ ᠡᠭᠡᠷᠡᠭᠰᠡᠨ ᠤᠲᠠᠰᠤ ᠪᠠᠨ ᠣᠶᠣᠳᠠᠯ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠪᠣᠯ ᠳᠠᠩᠬᠠ ᠶ᠋ᠢᠨ ᠴᠣᠷᠭᠣ ᠪᠤᠰᠤᠳ ᠥᠭᠡᠷᠡ ᠪᠡᠯᠡᠳᠬᠡᠭᠰᠡᠨ ᠳᠡᠭᠡᠭᠡ ᠳ᠋ᠦ᠍ ᠤᠲᠠᠰᠤ ᠪᠠᠨ ᠭᠣᠭᠴᠣᠭᠠᠯᠠᠳᠠᠨ ᠳᠠᠪᠬᠤᠷᠯᠠᠨ ᠡᠷᠴᠢᠯᠡᠵᠦ ᠠᠯᠤᠰ ᠠ᠋ᠴᠠ ᠦᠵᠦᠭᠦᠷ ᠭᠠᠷᠭᠠᠨᠠ᠃ ᠡᠷᠴᠢᠯᠡᠵᠦ ᠲᠠᠮᠤᠭᠰᠠᠨ ᠤᠲᠠᠰᠤᠨ ᠤ᠋ ᠪᠠᠨ ᠦᠵᠦᠭᠦᠷ ᠢ᠋ ᠠᠷᠠᠰᠤ ᠪᠤᠶᠤ ᠢᠰᠡᠭᠡᠢ ᠰᠢᠷᠲᠡᠭ ᠲᠦ᠍ ᠣᠷᠢᠶᠠᠯᠳᠤᠭᠤᠯᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠲᠣᠭᠲᠠᠭᠠᠵᠤ ᠳᠠᠷᠠᠭᠠ ᠶ᠋ᠢᠨ ᠤᠲᠠᠰᠤ ᠶ᠋ᠢ ᠮᠥᠨ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠭᠣᠭᠴᠣᠭᠠᠯᠠᠳᠠᠨ(ᠨᠡᠢᠳᠬᠡᠵᠦ) ᠡᠷᠴᠢᠯᠡᠵᠦ ᠨᠢᠭᠡ ᠡᠭᠡᠷᠡᠦᠯ ᠤᠲᠠᠰᠤ ᠶ᠋ᠢ ᠡᠷᠴᠢᠯᠡᠵᠦ ᠠᠪᠤᠨᠠ᠃ ᠡᠭᠡᠷᠡᠭᠰᠡᠨ ᠤᠲᠠᠰᠤ ᠪᠠᠨ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠳᠠᠪᠬᠤᠷᠯᠠᠨ ᠡᠷᠴᠢᠯᠡᠬᠦ ᠦᠭᠡᠢ ᠪᠣᠯ ᠡᠷᠴᠢ ᠨᠢ ᠬᠠᠷᠢᠵᠤ ᠬᠡᠪᠡᠷᠡᠭ ᠪᠣᠯᠳᠠᠭ᠃ ᠡᠭᠦᠨ ᠢ᠋ ᠤᠲᠠᠰᠤ ᠥᠲᠡᠯᠬᠦ ᠭᠡᠵᠦ ᠶᠠᠷᠢᠳᠠᠭ᠃ ᠨᠡᠬᠡᠮᠡᠯ ᠰᠦᠯᠵᠢᠮᠡᠯ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠤᠲᠠᠰᠤ ᠶ᠋ᠢ ᠣᠶᠣᠳᠠᠯ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠤᠲᠠᠰᠤᠨ ᠠ᠋ᠴᠠ ᠠᠷᠠᠢ ᠰᠤᠯᠠᠬᠠᠨ ᠡᠷᠴᠢᠯᠡᠨᠡ᠃ ᠡᠭᠡᠷᠡᠦᠯ ᠦ᠋ᠨ ᠳᠤᠭᠤᠢ ᠪᠦᠳᠦᠭᠦᠨ ᠨᠠᠷᠢᠨ ᠶᠠᠮᠠᠷ ᠴᠤ᠌ ᠤᠲᠠᠰᠤᠨ ᠤ᠋ ᠬᠢ ᠪᠠᠢᠯᠠ ᠭᠡᠰᠡᠨ ᠴᠤᠪᠤᠭᠰᠠᠨ ᠨᠣᠣᠰᠣ ᠲᠠᠰᠤᠯᠬᠤ ᠦᠭᠡᠢ ᠪᠣᠯ ᠬᠦᠨᠳᠦᠬᠡᠨ ᠪᠠᠢᠬᠤ ᠳ᠋ᠠᠭᠠᠨ ᠰᠠᠢᠨ᠃
ᠢᠰᠡᠭᠡᠢ ᠡᠳ᠋ᠯᠡᠯ ᠢᠰᠡᠭᠡᠢ ᠪᠡᠷ ᠭᠡᠷ ᠦ᠋ᠨ ᠲᠤᠭᠤᠷᠭᠠ᠂ ᠳᠡᠪᠢᠰᠬᠡᠷ᠂ ᠡᠷᠦᠬᠡ ᠬᠢᠬᠦ ᠡᠴᠡ ᠭᠠᠳᠠᠨᠠ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠡᠭᠦᠳᠡ᠂ ᠬᠥᠰᠢᠭᠡ᠂ ᠳᠠᠪᠤᠰᠤᠨ ᠤ᠋ ᠤᠭᠤᠲᠠ᠂ ᠠᠶᠠᠭᠠ᠂ ᠲᠠᠪᠠᠭ᠂ ᠦᠢᠯᠡ ᠶ᠋ᠢᠨ ᠬᠡᠷᠡᠭᠯᠡᠯ ᠬᠢᠬᠦ ᠰᠠᠪᠠ᠂ ᠭᠤᠲᠤᠯ ᠤ᠋ᠨ ᠤᠯᠠ᠂ ᠣᠢᠮᠣᠰᠤ᠂ ᠲᠣᠭᠣᠷᠴᠣᠭ᠂ ᠳᠡᠪᠢᠰᠬᠡᠷ᠂ ᠭᠣᠳᠣᠰ ᠬᠢᠳᠡᠭ᠃
ᠮᠣᠩᠭᠣᠯ ᠭᠡᠷ ᠦ᠋ᠨ ᠣᠶᠣᠳᠠᠯ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠠᠩᠬᠠᠨ ᠤ᠋ ᠲᠡᠷᠡ ᠪᠠᠢᠭᠠᠯᠢ ᠶ᠋ᠢᠨ ᠤᠷᠠᠯᠠᠨ ᠪᠦᠲᠦᠭᠡᠭᠰᠡᠨ ᠨᠦᠬᠡ ᠬᠠᠳᠠ᠂ ᠡᠯᠡᠰᠦᠨ ᠠᠭᠤᠢ ᠪᠠᠢᠭᠰᠠᠨ ᠲᠤᠬᠠᠢ ᠳᠡᠭᠡᠷᠡ ᠥᠭᠦᠯᠡᠭᠰᠡᠨ ᠪᠢᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠬᠥᠮᠦᠨ ᠦ᠌ ᠢᠳᠡᠵᠦ ᠤᠤᠭᠤᠬᠤ ᠵᠦᠢᠯ ᠡᠯᠪᠡᠭ᠂ ᠴᠠᠭ ᠠᠭᠠᠷ ᠳᠤᠯᠠᠭᠠᠨ ᠪᠠᠢᠭᠰᠠᠨ ᠤᠴᠢᠷ ᠵᠥᠪᠬᠡᠨ ᠴᠠᠭ ᠵᠠᠭᠤᠷᠠ ᠬᠣᠷᠭᠣᠳᠠᠬᠤ ᠣᠷᠣᠨ ᠪᠠᠢᠯᠠ᠃ ᠬᠣᠵᠢᠮ ᠨᠢ ᠬᠥᠮᠦᠨ ᠦ᠌ ᠬᠦᠨᠡᠰᠦᠨ ᠦ᠌ ᠵᠢᠮᠢᠰ ᠨᠣᠭᠣᠭᠠ ᠬᠣᠪᠣᠷᠳᠠᠨ ᠮᠠᠯ ᠢ᠋ ᠭᠡᠷ ᠦ᠋ᠨ ᠪᠣᠯᠭᠠᠭᠰᠠᠨ ᠠ᠋ᠴᠠ ᠡᠬᠢᠯᠡᠨ ᠨᠡᠭᠦᠳᠡᠯ ᠦ᠋ᠨ ᠬᠡᠯᠪᠡᠷᠢ ᠳ᠋ᠦ᠍ ᠰᠢᠯᠵᠢᠭᠰᠡᠨ᠃
ᠨᠥᠭᠦᠭᠡ ᠲᠠᠯᠠ ᠪᠠᠷ᠂ ᠬᠥᠮᠦᠨ ᠥᠰᠴᠦ ᠪᠠᠢᠭᠠᠯᠢ ᠶ᠋ᠢᠨ ᠪᠡᠯᠡᠨ ᠠᠭᠤᠢ᠂ ᠨᠦᠬᠡ ᠬᠣᠪᠣᠷᠳᠠᠭᠰᠠᠨ ᠤᠴᠢᠷ ᠣᠷᠣᠨ ᠰᠠᠭᠤᠴᠠ ᠲᠠᠢ ᠪᠣᠯᠬᠤ ᠳ᠋ᠤ᠌ ᠨᠥᠯᠥᠭᠡᠯᠡᠵᠡᠢ᠃ ᠡᠭᠦᠨ ᠦ᠌ ᠨᠢᠭᠡ ᠠᠳᠠᠯᠢ ᠪᠦᠬᠦᠢᠯᠡ ᠲᠡᠦᠬᠡ ᠶ᠋ᠢᠨ ᠲᠤᠷᠰᠢ ᠨᠡᠭᠦᠳᠡᠯᠴᠢᠨ ᠪᠠᠢᠭᠰᠠᠨ ᠮᠣᠩᠭᠣᠯ ᠣᠷᠣᠨ ᠤ᠋ ᠨᠡᠭᠦᠳᠡᠯᠯᠡᠨ ᠶᠠᠪᠤᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠭᠡᠷ ᠦ᠋ᠳ ᠡᠭᠦᠰᠴᠡᠢ᠃
ᠮᠣᠩᠭᠣᠯ ᠤ᠋ᠨ ᠭᠡᠷ ᠠᠩᠬᠠᠨ ᠤ᠋ ᠭᠠᠷᠤᠯ ᠡᠭᠦᠰᠦᠯ ᠡᠴᠡ ᠣᠳᠣ ᠬᠦᠷᠲᠡᠯᠡ ᠣᠯᠠᠨ ᠬᠡᠯᠪᠡᠷᠢ ᠪᠡᠷ ᠬᠥᠭᠵᠢᠵᠦ ᠢᠷᠡᠭᠰᠡᠨ ᠪᠣᠯᠪᠠᠰᠤᠷᠠᠩᠭᠤᠢ ᠪᠥᠭᠡᠳ ᠡᠷᠡᠭᠦᠯ ᠠᠬᠤᠢ ᠶ᠋ᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠭᠠᠢᠬᠠᠮᠰᠢᠭᠲᠠᠢ ᠣᠷᠣᠨ ᠰᠠᠭᠤᠴᠠ ᠶᠤᠮ᠃ ᠮᠣᠩᠭᠣᠯ ᠭᠡᠷ ᠦ᠋ᠨ ᠲᠤᠬᠠᠢ ᠡᠷᠲᠡᠨ ᠦ᠌ ᠵᠠᠷᠢᠮ ᠰᠤᠳᠤᠯᠤᠭᠴᠢᠳ ᠥᠩᠭᠡᠴᠡ ᠳ᠋ᠦᠩᠨᠡᠯᠲᠡ ᠬᠢᠭᠰᠡᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠰᠤᠳᠤᠯᠤᠭᠴᠢᠳ ᠲᠡᠭᠦᠨ ᠦ᠌ ᠤᠷᠠ ᠬᠢᠴᠡ᠂ ᠡᠷᠡᠭᠦᠯ ᠠᠬᠤᠢ ᠶ᠋ᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠢ᠋ ᠥᠨᠳᠥᠷ ᠢ᠋ᠶ᠋ᠡᠷ ᠦᠨᠡᠯᠡᠵᠦ ᠵᠢᠭᠤᠯᠴᠢᠨ᠂ ᠭᠡᠢᠴᠢᠳ ᠡᠷᠭᠢᠨ ᠬᠣᠷᠭᠣᠳᠠᠬᠤ ᠪᠣᠯᠵᠠᠢ᠃ ᠲᠡᠭᠦᠨᠴᠢᠯᠡᠨ ᠵᠠᠷᠢᠮ ᠤᠯᠤᠰ ᠲᠤ᠌ ᠠᠮᠠᠷᠠᠯᠲᠠ ᠶ᠋ᠢᠨ ᠭᠠᠵᠠᠷ ᠢ᠋ ᠭᠡᠷ ᠲᠡᠢ ᠪᠣᠯᠭᠠᠬᠤ ᠵᠣᠷᠢᠯᠭᠠ ᠪᠠᠷ ᠵᠣᠷᠢᠭᠤᠳᠠ ᠮᠠᠨ ᠤ᠋ ᠭᠡᠷ ᠢ᠋ ᠰᠣᠨᠢᠷᠬᠠᠨ ᠰᠤᠳᠤᠯᠵᠤ ᠪᠠᠢᠨᠠ᠃ ᠭᠡᠷ ᠠᠩᠬᠠ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠳᠡᠭᠡᠷᠡ ᠪᠢᠰᠢ ᠣᠬᠣᠭᠰᠠᠨ ᠭᠠᠵᠠᠷ ᠤ᠋ᠨ ᠳᠡᠭᠡᠷᠡ ᠮᠣᠳᠣ ᠬᠣᠯᠪᠣᠨ ᠲᠣᠯᠣᠭᠠᠢ ᠶ᠋ᠢ ᠪᠣᠭᠣᠵᠤ ᠬᠣᠷᠭᠣᠳᠠᠵᠤ ᠪᠠᠢᠭᠰᠠᠨ ᠪᠣᠯ ᠰᠡᠭᠦᠯ ᠳ᠋ᠡᠭᠡᠨ ᠤᠬᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠰᠢᠭᠤᠷᠭᠠ ᠪᠠᠷ ᠳᠣᠲᠣᠷᠯᠠᠨ ᠳᠡᠭᠡᠷᠡ ᠨᠢ ᠣᠯᠠᠨ ᠰᠢᠭᠤᠷᠭᠠ ᠶ᠋ᠢᠨ ᠲᠣᠯᠣᠭᠠᠢ ᠬᠣᠯᠪᠣᠨ ᠪᠣᠭᠣᠵᠤ ᠨᠡᠯᠢᠶᠡᠳ ᠪᠣᠯᠪᠠᠰᠤᠷᠠᠩᠭᠤᠢ ᠣᠪᠣᠬᠠᠢ ᠪᠣᠯᠭᠠᠵᠠᠢ᠃ ᠳᠠᠷᠠᠭᠠ ᠨᠢ ᠣᠬᠣᠭᠰᠠᠨ ᠨᠦᠬᠡᠨ ᠦ᠌ ᠳᠡᠭᠡᠷᠡ ᠣᠪᠣᠬᠠᠢ ᠪᠣᠰᠬᠠᠬᠤ ᠪᠢᠰᠢ ᠭᠠᠵᠠᠷ ᠳᠡᠭᠡᠷᠡ ᠱᠣᠪᠣᠭᠣᠷ ᠣᠷᠣᠢ ᠲᠠᠢ ᠣᠪᠣᠬᠠᠢ ᠪᠤᠰᠬᠠᠵᠠᠢ᠃ ᠣᠪᠣᠬᠠᠢ ᠶ᠋ᠢᠨ ᠣᠷᠣᠢ ᠶ᠋ᠢ ᠬᠣᠯᠪᠣᠵᠤ ᠲᠣᠭᠣᠨᠣ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠳᠤᠭᠤᠢ ᠴᠠᠭᠠᠷᠢᠭ ᠭᠠᠷᠭᠠᠵᠤ ᠲᠡᠷᠡ ᠨᠢ ᠶᠠᠪᠤᠭᠠᠨ ᠳ᠋ᠠᠭᠠᠨ ᠲᠣᠭᠣᠨᠣ ᠪᠣᠯᠵᠠᠢ᠃
ᠵᠢᠷᠤᠭ41
ᠭᠡᠷ ᠦ᠋ᠨ ᠡᠭᠦᠰᠦᠯ
(1) ᠭᠠᠵᠠᠷ ᠳᠡᠭᠡᠷᠡᠬᠢ ᠣᠪᠣᠬᠠᠢ
(2) ᠭᠠᠵᠠᠷ ᠤᠬᠤᠵᠤ ᠳᠡᠭᠡᠷᠡ ᠨᠢ ᠣᠪᠣᠬᠠᠢ ᠪᠤᠰᠬᠠᠭᠰᠠᠨ ᠪᠠᠢᠳᠠᠯ
(3) ᠬᠠᠨᠠ ᠲᠠᠢ ᠭᠡᠷ
(4) ᠲᠣᠭᠣᠨᠣ ᠲᠠᠢ᠂ ᠣᠨᠢ ᠲᠠᠢ ᠭᠡᠷ
ᠭᠡᠷ ᠡᠭᠦᠰᠦᠭᠰᠡᠨ ᠲᠣᠢᠮᠣ ᠭᠡᠷ ᠢᠩᠭᠢᠵᠦ ᠬᠥᠭᠵᠢᠬᠦ ᠳ᠋ᠡᠭᠡᠨ ᠣᠪᠣᠬᠠᠢ ᠶ᠋ᠢᠨ ᠬᠡᠯᠪᠡᠷᠢ ᠡᠴᠡ ᠣᠳᠣ ᠶ᠋ᠢᠨ ᠴᠠᠭᠠᠨ ᠥᠷᠥᠭᠡ ᠬᠦᠷᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠶᠠᠰᠤ ᠮᠣᠳᠣ ᠲᠣᠣᠷ ᠤ᠋ᠨ ᠬᠡᠯᠪᠡᠷᠢ ᠲᠡᠢ ᠡᠪᠬᠡᠵᠦ ᠠᠪᠰᠠᠷᠬᠠᠨ ᠪᠣᠯᠭᠠᠵᠤ ᠨᠡᠭᠦᠬᠦ ᠳ᠋ᠦ᠍ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠬᠠᠨᠠ᠂ ᠲᠣᠭᠣᠨᠣ ᠵᠡᠷᠭᠡ ᠪᠣᠢ ᠪᠣᠯᠵᠠᠢ᠃ ᠭᠡᠷ ᠲᠦ᠍ ᠬᠥᠮᠦᠨ ᠣᠷᠣᠵᠤ ᠭᠠᠷᠬᠤ ᠳ᠋ᠤ᠌ ᠵᠣᠷᠢᠭᠤᠯᠵᠤ ᠬᠠᠭᠠᠯᠭᠠ ᠭᠠᠷᠭᠠᠭᠰᠠᠨ ᠪᠠ ᠡᠨᠡ ᠨᠢ ᠬᠠᠨᠠ ᠶ᠋ᠢᠨ ᠥᠨᠳᠥᠷ ᠲᠡᠢ ᠲᠡᠩᠴᠡᠭᠦᠦ ᠪᠠᠢᠳᠠᠭ᠃ ᠬᠠᠨᠠ ᠶ᠋ᠢ ᠬᠠᠷᠠ ᠮᠣᠳᠣ᠂ ᠪᠤᠷᠭᠠᠰᠤ ᠵᠡᠷᠭᠡ ᠰᠠᠪᠠᠭᠠ ᠮᠣᠳᠣ ᠪᠠᠷ ᠬᠢᠵᠦ ᠡᠪᠬᠡᠬᠦ ᠳ᠋ᠦ᠍ ᠵᠣᠷᠢᠭᠤᠯᠤᠨ ᠲᠣᠣᠷ ᠬᠡᠯᠪᠡᠷᠢ ᠲᠡᠢ ᠵᠥᠷᠢᠭᠦᠯᠡᠵᠦ ᠲᠠᠯᠪᠢᠵᠤ ᠦᠳᠡᠭᠡᠷᠢ ᠪᠡᠷ ᠦᠳᠡᠨᠡ᠃ ᠲᠣᠭᠣᠨᠣ ᠶ᠋ᠢ ᠪᠤᠷᠭᠠᠰᠤ ᠬᠤᠰᠤ ᠮᠡᠳᠡᠵᠦ ᠬᠢᠬᠦ ᠪᠠ ᠭᠡᠷ ᠦ᠋ᠨ ᠳ᠋ᠢᠶᠠᠮᠧᠲ᠋ᠷ ᠲᠡᠢ ᠲᠣᠳᠣᠷᠬᠠᠢ ᠬᠠᠷᠢᠴᠠᠭᠠ ᠪᠠᠷ ᠲᠣᠬᠢᠷᠠᠳᠠᠭ ᠤᠴᠢᠷ ᠲᠡᠭᠦᠨ ᠢ᠋ ᠳᠥᠷᠪᠡᠨ ᠬᠠᠨᠠᠲᠤ᠂ ᠲᠠᠪᠤᠨ ᠬᠠᠨᠠᠲᠤ᠂ ᠵᠢᠷᠭᠤᠭᠠᠨ ᠬᠠᠨᠠᠲᠤ᠂ ᠨᠠᠢ᠍ᠮᠠᠨ ᠬᠠᠨᠠᠲᠤ᠂ ᠠᠷᠪᠠᠨ ᠬᠣᠶᠠᠷ ᠬᠠᠨᠠᠲᠤ ᠶ᠋ᠢᠨ ᠲᠣᠭᠣᠨᠣ ᠭᠡᠵᠦ ᠨᠡᠷᠡᠯᠡᠳᠡᠭ᠃
ᠣᠨᠢ ᠨᠢ ᠲᠣᠭᠣᠨᠣ ᠶ᠋ᠢᠨ ᠨᠦᠬᠡ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢᠨ ᠲᠣᠭᠠ ᠲᠠᠢ ᠲᠣᠬᠢᠷᠠᠬᠤ ᠲᠣᠭᠠ ᠲᠠᠢ ᠪᠠᠢᠳᠠᠭ ᠠ᠋ᠴᠠ ᠭᠠᠳᠠᠨᠠ ᠭᠡᠷ ᠦ᠋ᠨ ᠬᠠᠨᠠ᠂ ᠲᠣᠭᠣᠨᠣ ᠶ᠋ᠢ ᠬᠣᠯᠪᠣᠵᠤ ᠥᠭᠳᠡᠭ᠃ ᠬᠠᠭᠠᠯᠭᠠ ᠨᠢ ᠭᠡᠷ ᠦ᠋ᠨ ᠲᠣᠮᠣ ᠪᠠᠭᠠᠨᠠ ᠠ᠋ᠴᠠ ᠬᠠᠮᠢᠶᠠᠷᠴᠤ ᠳᠥᠷᠪᠡ ᠡᠴᠡ ᠵᠢᠷᠭᠤᠭᠠᠨ ᠶᠠᠰᠤ ᠮᠣᠳᠣ ᠲᠠᠢ ᠳᠠᠩ ᠪᠤᠶᠤ ᠳᠠᠪᠬᠤᠷ ᠳᠠᠯᠠᠪᠴᠢ ᠲᠠᠢ ᠪᠠᠢᠳᠠᠭ᠃ ᠬᠣᠶᠠᠷ ᠳᠠᠯᠠᠪᠴᠢ ᠲᠠᠢ ᠳᠠᠩ ᠬᠠᠭᠠᠯᠭᠠ ᠰᠠᠶᠢᠬᠠᠨ ᠪᠣᠯᠲᠠᠯᠠ ᠪᠠᠢᠭᠰᠠᠨ ᠪᠥᠭᠡᠳ ᠡᠢᠮᠦ ᠬᠠᠭᠠᠯᠭᠠᠨ ᠳ᠋ᠤ᠌ ᠭᠠᠳᠠᠭᠤᠷ ᠢ᠋ᠶ᠋ᠠᠨ ᠢᠰᠡᠭᠡᠢ ᠪᠤᠶᠤ ᠳᠠᠪᠤᠤ ᠶ᠋ᠢᠨ ᠪᠠᠷᠢᠮᠠᠯ ᠡᠭᠦᠳᠡ ᠲᠡᠢ ᠪᠠᠢᠯᠠ᠃ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠰᠢᠷᠢᠬᠦ ᠳ᠋ᠡᠭᠡᠨ ᠤᠰᠤᠨ ᠬᠡ ᠪᠤᠶᠤ ᠳᠥᠷᠪᠡᠯᠵᠢᠨ ᠰᠢᠷᠢᠮᠡᠯ ᠬᠡ ᠭᠠᠷᠭᠠᠨ ᠰᠢᠷᠢᠳᠡᠭ ᠪᠠᠢᠯᠠ᠃ ᠡᠭᠦᠳᠡ ᠶ᠋ᠢ ᠬᠠᠭᠠᠯᠭᠠᠨ ᠤ᠋ ᠷᠠᠮ ᠳ᠋ᠤ᠌ ᠲᠠᠭᠠᠷᠠᠭᠰᠠᠨ ᠤᠷᠲᠤ ᠥᠷᠭᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠭᠠᠯᠭᠠ᠂ ᠬᠠᠨᠠ ᠬᠣᠶᠠᠷ ᠢ᠋ ᠬᠣᠯᠪᠣᠭᠰᠠᠨ ᠪᠣᠭᠣᠳᠠᠯ ᠳ᠋ᠤ᠌ ᠠᠷᠠᠢ ᠬᠦᠷᠬᠦ ᠦᠭᠡᠢ ᠥᠷᠭᠡᠨ ᠲᠡᠢ ᠳᠥᠷᠪᠡᠯᠵᠢᠨ ᠢᠰᠡᠭᠡᠢ ᠪᠡᠷ ᠬᠢᠨᠡ᠃ ᠢᠰᠡᠭᠡᠢ ᠶ᠋ᠢᠨ ᠳᠣᠣᠷᠠᠲᠤ ᠪᠠ ᠬᠣᠶᠠᠷ ᠲᠠᠯᠠ ᠶ᠋ᠢ ᠬᠣᠣᠰ ᠵᠡᠭᠡᠭ ᠲᠠᠯᠪᠢᠵᠤ ᠭᠤᠶᠤᠬᠤ ᠪᠠ ᠵᠠᠬᠠ ᠶ᠋ᠢᠨ ᠬᠣᠣᠰ ᠵᠡᠭᠡᠭ ᠦ᠋ᠨ ᠳᠤᠮᠳᠠ ᠨᠢᠳᠦᠨ ᠪᠤᠶᠤ ᠠᠯᠤᠬᠠᠨ ᠬᠡ ᠭᠠᠷᠭᠠᠵᠤ ᠰᠢᠷᠢᠬᠦ᠂ ᠮᠥᠨ ᠤᠯᠠᠭᠠᠨ ᠳᠠᠪᠤᠤ ᠪᠠᠷ ᠬᠥᠪᠥᠭᠡᠯᠡᠵᠦ ᠳᠡᠭᠡᠰᠦᠨ ᠵᠡᠭᠡᠭ ᠲᠠᠯᠪᠢᠵᠤ ᠰᠢᠷᠢᠳᠡᠭ ᠪᠠᠢᠵᠠᠢ( ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠰᠡᠳᠬᠦᠯ᠂1977 ᠣᠨ ᠤ᠋№2᠂59 ᠳᠡᠬᠢ ᠲᠠᠯᠠ)
ᠮᠣᠩᠭᠣᠯ ᠣᠷᠣᠨ ᠤ᠋ ᠨᠡᠭᠦᠳᠡᠯ ᠦ᠋ᠨ ᠣᠨᠴᠠᠯᠢᠭ ᠲᠤ᠌ ᠲᠣᠬᠢᠷᠠᠭᠰᠠᠨ ᠵᠥᠭᠡᠭᠡᠵᠦ ᠪᠠᠷᠢᠬᠤ᠂ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠬᠢᠯᠪᠠᠷᠬᠠᠨ ᠡᠢᠮᠦ ᠭᠡᠷ ᠨᠡᠭᠦᠳᠡᠯ ᠦ᠋ᠨ ᠮᠠᠯ ᠠᠵᠤ ᠠᠬᠤᠢ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠶᠤᠮ᠃ ᠮᠣᠩᠭᠣᠯ ᠭᠡᠷ ᠰᠢᠭᠤᠳ ᠪᠣᠢ ᠪᠣᠯᠤᠭᠠ ᠦᠭᠡᠢ᠃ ᠲᠥᠪ ᠠᠽᠢᠶᠠ ᠶ᠋ᠢᠨ ᠨᠡᠭᠦᠳᠡᠯᠴᠢᠨ ᠾᠦᠩᠨᠦ᠂ ᠰᠢᠶᠠᠨᠪᠢ᠂ ᠷᠦᠷᠡᠨ᠂ ᠲᠦᠷᠺ᠂ ᠤᠢᠭᠤᠷ᠂ ᠬᠢᠳᠠᠨ ᠵᠡᠷᠭᠡ ᠭᠦᠷᠦᠨ ᠨᠦ᠍ᠭᠦᠳ ᠭᠡᠷ ᠲᠡᠢ ᠪᠠᠢᠭᠠᠳ ᠵᠣᠭᠰᠣᠬᠤ ᠦᠭᠡᠢ᠂ ᠲᠡᠭᠦᠨ ᠢ᠋ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠷᠢᠵᠤ22 ᠬᠣᠣᠰ ᠬᠥᠯᠯᠡᠭᠡ ᠪᠦᠬᠦᠢ ᠲᠡᠷᠭᠡ ᠪᠡᠷ ᠨᠡᠭᠦᠳᠡᠯᠯᠡᠨ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠡᠨᠡ ᠲᠤᠬᠠᠢ ᠮᠣᠩᠭᠣᠯ ᠤ᠋ᠨ ᠲᠡᠦᠬᠡ ᠰᠤᠳᠤᠯᠤᠭᠴᠢᠳ ᠣᠯᠠᠨ ᠲᠠᠢ ᠪᠢᠴᠢᠭᠰᠡᠨ ᠦ᠌ ᠭᠠᠳᠠᠨᠠ《ᠮᠣᠩᠭᠣᠯ ᠤ᠋ᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ》 ᠳ᠋ᠤ᠌ ᠲᠤᠰᠬᠠᠭᠳᠠᠭᠰᠠᠨ ᠪᠠᠢᠳᠠᠭ᠃ ᠲᠥᠪ ᠠᠽᠢᠶᠠ ᠪᠠᠷ ᠵᠢᠭᠤᠯᠴᠢᠯᠠᠵᠤ ᠭᠢᠯᠢᠶᠤᠮ ᠷᠦᠪᠷᠥ᠋ᠺ ᠪᠢᠴᠢᠬᠦ ᠳ᠋ᠡᠭᠡᠨ᠄《ᠲᠡᠳᠡ ᠤᠨᠲᠠᠳᠠᠭ ᠪᠠᠢᠰᠢᠩ ᠢ᠋ᠶ᠋ᠠᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠷᠢᠳᠠᠭ》 ᠭᠡᠵᠦ ᠪᠠᠢᠭᠰᠠᠨ ᠪᠠᠢᠨᠠ᠃ ᠵᠥᠭᠡᠭᠡᠪᠦᠷᠢ ᠶ᠋ᠢᠨ ᠰᠠᠭᠤᠴᠠ ᠶ᠋ᠢ ᠭᠠᠭᠴᠠ ᠮᠣᠩᠭᠣᠯᠴᠤᠳ ᠲᠡᠳᠦᠢ ᠦᠭᠡᠢ ᠢᠵᠢᠯ ᠮᠥᠷᠡᠨ ᠦ᠌ ᠠᠳᠠᠭ ᠤ᠋ᠨ ᠲᠦᠷᠺ᠂ ᠺᠦᠨᠲ᠋ᠷ ᠪᠧᠰᠰᠡᠷᠡᠪ ᠦ᠋ᠨ ᠠᠷᠠᠳ ᠲᠦᠮᠡᠨ᠂ ᠨᠣᠬᠠᠢ ᠶ᠋ᠢᠨ ᠲᠠᠲ᠋ᠠᠷ ᠤ᠋ᠳ᠂ ᠬᠠᠷᠠ ᠨᠣᠭᠠᠢ ᠨᠠᠷ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃
18 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠪᠧᠰᠰᠡᠷᠡᠪ ᠦ᠋ᠨ ᠲᠠᠲ᠋ᠠᠷ ᠤ᠋ᠳ ᠮᠣᠩᠭᠣᠯ ᠬᠠᠨᠠ ᠲᠠᠢ ᠭᠡᠷ ᠲᠡᠢ ᠪᠠᠢᠭᠰᠠᠨ ᠪᠠ ᠮᠥᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠠᠷᠢᠵᠤ ᠨᠡᠭᠦᠳᠡᠯᠯᠡᠬᠦ ᠡᠴᠡ ᠭᠠᠳᠠᠨᠠ ᠭᠡᠷ ᠳᠡᠭᠡᠷᠡ ᠪᠡᠨ ᠬᠥᠬᠡ᠂ ᠴᠠᠭᠠᠨ ᠳᠠᠷᠴᠤᠭ ᠬᠠᠳᠬᠤᠳᠠᠭ ᠪᠠᠢᠵᠠᠢ᠃ ᠵᠠᠷᠢᠮ ᠰᠤᠳᠤᠯᠤᠭᠴᠢᠳ ᠮᠣᠳᠣ ᠪᠠᠷ ᠬᠢᠭᠰᠡᠨ ᠲᠡᠳᠡᠨ ᠦ᠌ ᠭᠡᠷ ᠣᠷᠳᠣᠨ ᠠᠳᠠᠯᠢ᠂ ᠳᠣᠲᠣᠷᠠᠬᠢ ᠵᠠᠢ ᠨᠢ ᠠᠭᠤᠵᠢᠮ᠂ ᠮᠣᠩᠭᠣᠯ ᠤᠯᠢᠶᠠᠩᠭᠠᠷ ᠢ᠋ᠶ᠋ᠠᠷ ᠬᠢᠭᠰᠡᠨ ᠬᠠᠨᠠ ᠮᠠᠰᠢ ᠪᠠᠲᠤ ᠪᠣᠯᠪᠠᠰᠤᠷᠠᠩᠭᠤᠢ ᠭᠡᠷ ᠦ᠋ᠨ ᠳᠡᠭᠡᠷᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠪᠣᠷ ᠰᠣᠨᠢᠨ ᠥᠩᠭᠡ ᠲᠡᠢ ᠢᠰᠡᠭᠡᠢ ᠪᠡᠷ ᠪᠤᠶᠤ ᠬᠣᠨᠢᠨ ᠤ᠋ ᠠᠷᠠᠰᠤ ᠪᠠᠷ ᠬᠤᠴᠢᠨᠠ᠃ ᠦᠵᠡᠰᠬᠦᠯᠡᠩ ᠲᠡᠢ ᠪᠥᠭᠡᠳ ᠨᠢᠭᠡ ᠭᠡᠷ ᠲᠦ᠍20 ᠭᠠᠷᠤᠢ ᠬᠥᠮᠦᠨ ᠪᠠᠭᠲᠠᠨᠠ ᠭᠡᠵᠦ ᠮᠠᠭᠲᠠᠨ ᠪᠢᠴᠢᠵᠦ ᠪᠠᠢᠵᠠᠢ᠃ ᠮᠣᠩᠭᠣᠯ ᠭᠡᠷ ᠢᠩᠭᠢᠵᠦ ᠣᠪᠣᠬᠠᠢ ᠠ᠋ᠴᠠ ᠬᠠᠭᠠᠳ ᠨᠣᠶᠠᠳ᠂ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠨ ᠬᠠᠯᠵᠠ ᠲᠠᠢ ᠭᠡᠷ᠂ ᠣᠷᠴᠢᠨ ᠦᠶᠡ ᠶ᠋ᠢᠨ ᠦᠵᠡᠰᠬᠦᠯᠡᠩᠲᠦ ᠴᠠᠭᠠᠨ ᠥᠷᠥᠭᠡ ᠬᠦᠷᠲᠡᠯᠡ ᠬᠥᠭᠵᠢᠬᠦ ᠳ᠋ᠡᠭᠡᠨ ᠤᠷᠠ ᠬᠢᠴᠡ᠂ ᠭᠣᠶᠣᠯ ᠴᠢᠮᠡᠭᠯᠡᠯ ᠦ᠋ᠨ ᠬᠤᠪᠢ ᠳ᠋ᠤ᠌ ᠬᠣᠣᠰ ᠦᠭᠡᠢ ᠲᠠᠪᠰᠢᠯᠲᠠ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠭᠰᠠᠨ ᠪᠥᠭᠡᠳ ᠡᠭᠦᠨ ᠦ᠌ ᠣᠶᠣᠳᠠᠯ ᠤ᠋ᠨ ᠭᠣᠶᠣᠯ ᠴᠢᠮᠡᠭᠯᠡᠯ ᠪᠦᠷ ᠮᠠᠨ ᠤ᠋ ᠡᠮᠡᠭᠲᠡᠢᠴᠦᠳ ᠦ᠋ᠨ ᠤᠷᠠᠨ ᠦᠢᠯᠡ ᠪᠡᠷ ᠪᠦᠲᠦᠵᠦ ᠪᠠᠢᠳᠠᠭ ᠪᠢᠯᠡ᠃
ᠮᠣᠩᠭᠣᠯ ᠤ᠋ᠨ ᠦᠵᠡᠰᠬᠦᠯᠡᠩᠲᠦ ᠴᠠᠭᠠᠨ ᠥᠷᠥᠭᠡᠨ ᠳ᠋ᠦ᠍ ᠳᠡᠭᠡᠪᠦᠷ ᠬᠣᠶᠠᠷ᠂ ᠴᠠᠪᠤᠭ ᠬᠣᠶᠠᠷ᠂ ᠲᠤᠭᠤᠷᠭᠠ ᠭᠡᠷ ᠦ᠋ᠨ ᠶᠡᠬᠡ ᠪᠠᠭᠠ ᠠ᠋ᠴᠠ ᠪᠣᠯᠵᠤ ᠬᠡᠳᠦ ᠴᠤ ᠪᠠᠢᠵᠤ ᠪᠣᠯᠤᠨᠠ᠃ ᠡᠷᠦᠬᠡ ᠨᠢᠭᠡ᠂ ᠡᠭᠦᠳᠡ ᠨᠢᠭᠡ᠂ ᠳᠤᠮᠳᠠᠭᠤᠷ ᠪᠦᠰᠡᠯᠡᠬᠦ ᠬᠣᠰᠢᠯᠠᠩ ᠣᠭᠣᠰᠣᠷ ᠭᠤᠷᠪᠠ᠂ ᠳᠡᠭᠡᠷᠡ ᠡᠴᠡ ᠳᠠᠷᠤᠭᠤᠯᠬᠤ ᠡᠷᠭᠢᠭᠦᠯᠭᠡ᠂ ᠵᠥᠷᠢᠭᠦᠯᠭᠡ ᠣᠭᠣᠰᠣᠷ13 ᠪᠠᠢᠳᠠᠭ᠃ ᠬᠠᠷᠢᠨ ᠭᠡᠷ ᠦ᠋ᠨ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠴᠠᠭᠠᠨ ᠳᠠᠪᠤᠤ ᠶ᠋ᠢᠨ ᠴᠠᠪᠤᠭ ᠪᠥᠷᠢᠭᠡᠰᠦ ᠬᠢᠳᠡᠭ ᠪᠣᠯᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠵᠠᠷᠢᠮ ᠳᠠᠷᠤᠭᠤᠯᠭᠠ ᠣᠭᠣᠰᠣᠷ ᠢ᠋ ᠬᠡᠷᠡᠭᠯᠡᠬᠦ ᠪᠡᠨ ᠪᠣᠯᠢᠵᠠᠢ᠃ ᠬᠠᠯᠵᠠ ᠲᠠᠢ ᠭᠡᠷ ᠲᠦ᠍ ᠢᠰᠡᠭᠡᠢ ᠳᠡᠭᠡᠪᠦᠷ ᠳᠡᠭᠡᠷᠡ ᠲᠣᠭᠣᠨᠣ ᠠ᠋ᠴᠠ ᠳᠣᠭᠣᠭᠰᠢ ᠮᠠᠶᠢᠭ ᠲᠠᠢ ᠤᠯᠠᠭᠠᠨ ᠳᠠᠪᠤᠤ ᠶ᠋ᠢᠨ ᠬᠠᠯᠵᠠ ᠬᠢᠳᠡᠭ ᠪᠠᠢᠭᠰᠠᠨ ᠨᠢ ᠲᠤᠰ ᠣᠷᠣᠨ ᠤ᠋ ᠬᠥᠮᠦᠨ ᠠᠷᠠᠳ ᠤ᠋ᠨ ᠬᠠᠭᠠᠨ᠂ ᠬᠠᠷᠠᠴᠤ ᠶ᠋ᠢᠨ ᠢᠯᠭᠠᠭᠠ ᠠᠷᠢᠯᠬᠤ ᠳ᠋ᠤ᠌ ᠵᠢᠷ ᠦ᠋ᠨ ᠰᠠᠢᠨ ᠮᠠᠯᠴᠢᠨ ᠤ᠋ ᠭᠡᠷ ᠪᠣᠯᠵᠤ ᠮᠠᠯ ᠠᠵᠤ ᠠᠬᠤᠢ ᠳ᠋ᠤ᠌ ᠠᠵᠢᠯ ᠦᠢᠯᠡᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠯᠭᠠᠷᠠᠭᠰᠠᠨ ᠤᠯᠤᠰ ᠤ᠋ᠨ ᠠᠪᠤᠷᠭᠤ ᠰᠠᠢᠴᠤᠳ ᠤ᠋ᠨ ᠱᠠᠩᠨᠠᠯ ᠤ᠋ᠨ ᠭᠡᠷ ᠪᠣᠯᠵᠠᠢ᠃
ᠭᠡᠷ ᠦ᠋ᠨ ᠳᠡᠭᠡᠪᠦᠷ᠂ ᠴᠠᠪᠤᠭ ᠡᠰᠬᠡᠬᠦ ᠳ᠋ᠡᠭᠡᠨ ᠭᠡᠷ ᠦ᠋ᠨ ᠲᠣᠭᠣᠨᠣ᠂ ᠬᠠᠨᠠ ᠶ᠋ᠢᠨ ᠨᠡᠢᠯᠡᠭᠰᠡᠨ ᠬᠡᠰᠡᠭ ᠦ᠋ᠨ ᠳ᠋ᠢᠶᠠᠮᠧᠲ᠋ᠷ ᠢ᠋ᠶ᠋ᠡᠷ ᠲᠣᠬᠢᠷᠠᠭᠤᠯᠤᠨᠠ᠃ ᠲᠣᠭᠣᠨᠣ ᠶ᠋ᠢᠨ ᠳ᠋ᠢᠶᠠᠮᠧᠲ᠋ᠷ ᠢ᠋ ᠬᠡᠮᠵᠢᠬᠦ ᠳ᠋ᠡᠭᠡᠨ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠠ᠋ᠴᠠ ᠵᠠᠬᠠ ᠬᠦᠷᠲᠡᠯᠡ ᠤᠷᠲᠤ ᠶ᠋ᠢ ᠬᠡᠮᠵᠢᠵᠦ ᠭᠣᠷᠲᠢᠭ ᠲᠠᠲᠠᠨᠠ᠃ ᠡᠭᠦᠨ ᠢ᠋ ᠬᠢᠬᠦ ᠳ᠋ᠡᠭᠡᠨ ᠨᠠᠷᠢᠨ ᠣᠯᠣᠰᠣᠨ ᠳᠡᠭᠡᠰᠦ ᠵᠡᠷᠭᠡ ᠶ᠋ᠢᠨ ᠨᠢᠭᠡ ᠦᠵᠦᠭᠦᠷ ᠲᠦ᠍ ᠨᠠᠷᠢᠨ ᠭᠠᠳᠠᠰᠤ ᠤᠶᠠᠵᠤ ᠲᠣᠭᠣᠨᠣ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠲᠠᠭᠠᠷᠠᠭᠤᠯᠤᠨ ᠭᠠᠵᠠᠷ ᠲᠤ ᠰᠢᠭᠠᠭᠠᠳ᠂ ᠨᠥᠭᠦᠭᠡ ᠦᠵᠦᠭᠦᠷ ᠲᠦ᠍ ᠦᠵᠦᠭᠦᠷᠯᠡᠭᠰᠡᠨ ᠮᠣᠳᠣ᠂ ᠬᠣᠨᠢ᠂ ᠢᠮᠠᠭᠠᠨ ᠤ᠋ ᠡᠪᠡᠷ᠂ ᠨᠠᠷᠢᠨ ᠲᠡᠮᠦᠷ ᠬᠠᠳᠠᠭᠠᠰᠤ ᠤᠶᠠᠵᠤ ᠭᠣᠷᠲᠢᠭ ᠲᠠᠲᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠳᠤᠭᠤᠢᠯᠠᠨ ᠵᠢᠷᠤᠵᠤ ᠲᠣᠭᠣᠨᠣ ᠶ᠋ᠢᠨ ᠬᠡᠮᠵᠢᠶᠡ ᠠᠪᠤᠨᠠ᠃
ᠳᠠᠷᠠᠭᠠ ᠨᠢ ᠲᠣᠭᠣᠨᠣ ᠶ᠋ᠢᠨ ᠳᠤᠭᠤᠢ ᠠ᠋ᠴᠠ ᠣᠨᠢ ᠶ᠋ᠢᠨ ᠪᠥᠭᠰᠡ ᠬᠦᠷᠲᠡᠯᠡ ᠤᠷᠲᠤ ᠶ᠋ᠢ ᠬᠡᠮᠵᠢᠵᠦ ᠲᠦᠷᠦᠭᠦᠴᠢ ᠶ᠋ᠢᠨ ᠬᠡᠮᠵᠢᠭᠰᠡᠨ ᠲᠣᠭᠣᠨᠣ ᠶ᠋ᠢᠨ ᠳ᠋ᠢᠶᠠᠮᠧᠲ᠋ᠷ ᠦ᠋ᠨ ᠵᠢᠷᠤᠭᠠᠰᠤ ᠬᠣᠶᠠᠷ ᠢ᠋ ᠬᠣᠯᠪᠣᠨ ᠭᠠᠳᠠᠰᠤ ᠤᠶᠠᠵᠤ ᠭᠠᠵᠠᠷ ᠬᠠᠲᠠᠭᠠᠳ ᠨᠥᠭᠦᠭᠡ ᠦᠵᠦᠭᠦᠷ ᠲᠡᠭᠡᠨ ᠮᠣᠳᠣ᠂ ᠲᠡᠮᠦᠷ ᠡᠪᠡᠷ ᠤᠶᠠᠵᠤ ᠳᠤᠭᠤᠢᠯᠠᠨ ᠭᠣᠷᠲᠢᠭ ᠲᠠᠲᠠᠨᠠ᠃ ᠢᠩᠭᠢᠵᠦ ᠶᠡᠬᠡ ᠪᠠᠭᠠ ᠬᠣᠶᠠᠷ ᠳᠤᠭᠤᠢ ᠶ᠋ᠢ ᠳᠤᠮᠳᠠᠭᠤᠷ ᠨᠢ ᠬᠤᠪᠢᠶᠠᠵᠤ ᠬᠣᠢᠲᠤ ᠤᠷᠲᠤ ᠳᠡᠭᠡᠪᠦᠷ ᠪᠣᠯᠬᠤ ᠪᠠ ᠳᠡᠭᠡᠪᠦᠷ ᠨᠡᠯᠢᠶᠡᠳ ᠯᠠᠪ ᠵᠥᠷᠢᠶᠡ ᠲᠡᠢ ᠪᠠᠢᠬᠤ ᠤᠴᠢᠷ ᠲᠡᠭᠦᠨ ᠳ᠋ᠦ᠍ ᠲᠠᠭᠠᠷᠠᠭᠤᠯᠵᠤ ᠵᠢᠷᠤᠭᠠᠰᠤᠨ ᠠ᠋ᠴᠠ ᠳᠡᠭᠡᠳᠦ ᠳᠣᠣᠷᠠᠲᠤ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ30cm ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠵᠥᠷᠢᠵᠦ ᠳᠠᠪᠬᠤᠷᠯᠠᠨ ᠪᠠᠢᠬᠤ ᠪᠠᠷ ᠪᠣᠳᠣᠵᠤ ᠲᠣᠬᠢᠷᠠᠭᠤᠯᠤᠨᠠ᠃ ᠢᠰᠡᠭᠡᠢ ᠳᠡᠭᠡᠪᠦᠷ ᠦ᠋ᠨ ᠵᠠᠬᠠ ᠶ᠋ᠢ ᠰᠤᠩᠭᠠᠬᠤ ᠦᠭᠡᠢ᠂ ᠭᠣᠶᠣᠮᠰᠣᠭ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠳᠡᠭᠡᠪᠦᠷ ᠦ᠋ᠨ ᠬᠣᠷᠮᠣᠢ ᠪᠤᠶᠤ ᠵᠠᠬᠠ ᠪᠠᠷ ᠳᠡᠭᠡᠰᠦᠨ ᠵᠡᠭᠡᠭ ᠲᠠᠯᠪᠢᠨᠠ᠃
ᠡᠨᠡ ᠡᠰᠬᠡᠯᠲᠡ ᠶ᠋ᠢᠨ ᠠᠷᠭᠠ ᠶ᠋ᠢ ᠭᠠᠭᠴᠠ ᠢᠰᠡᠭᠡᠢ ᠳᠡᠭᠡᠷᠡ ᠬᠡᠷᠡᠭᠯᠡᠬᠦ ᠦᠭᠡᠢ ᠳᠠᠪᠤᠤ ᠶ᠋ᠢᠨ ᠴᠠᠪᠤᠭ ᠲᠤ ᠠᠳᠠᠯᠢ ᠬᠡᠷᠡᠭᠯᠡᠨᠡ᠃ ᠢᠰᠡᠭᠡᠢ ᠲᠤᠭᠤᠷᠭᠠ ᠪᠣᠯ ᠭᠡᠷ ᠦ᠋ᠨ ᠳᠣᠣᠷᠠᠲᠤ ᠬᠡᠰᠡᠭ ᠪᠤᠶᠤ ᠬᠠᠨᠠ ᠶ᠋ᠢ ᠪᠦᠬᠦᠯᠢ ᠳ᠋ᠦ᠍ᠨᠢ ᠬᠤᠴᠢᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠨᠠ᠃ ᠲᠤᠭᠤᠷᠭᠠ ᠶ᠋ᠢ ᠡᠰᠬᠡᠬᠦ ᠳ᠋ᠦ᠍ ᠬᠢᠯᠪᠠᠷᠬᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠬᠠᠨᠠ ᠳ᠋ᠤ᠌ ᠲᠣᠬᠢᠷᠠᠭᠤᠯᠬᠤ ᠨᠢ ᠵᠣᠬᠢᠬᠤ ᠳᠠᠳᠤᠯᠭᠠ ᠱᠠᠭᠠᠷᠳᠠᠨᠠ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠣᠶᠠᠷ ᠬᠠᠲᠠᠪᠴᠢ ᠪᠤᠶᠤ ᠬᠠᠭᠠᠯᠭᠠ᠂ ᠬᠠᠨᠠ ᠬᠣᠶᠠᠷ ᠤ᠋ᠨ ᠨᠡᠢᠯᠡᠪᠦᠷᠢ ᠳ᠋ᠦ᠍ ᠲᠣᠬᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠬᠠᠭᠠᠯᠭᠠᠨ ᠤ᠋ ᠶᠠᠰᠤ ᠮᠣᠳᠣᠨ ᠳᠡᠭᠡᠷᠡ ᠭᠤᠷᠪᠠ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠢᠯᠡᠭᠦᠦ ᠲᠠᠯᠪᠢᠵᠤ ᠢᠰᠡᠭᠡᠢ ᠶ᠋ᠢᠨ ᠵᠠᠬᠠ ᠶ᠋ᠢ ᠵᠢᠭᠳᠡ ᠬᠠᠢᠴᠢᠯᠠᠨ ᠵᠠᠰᠠᠵᠤ ᠥᠯᠢᠭᠡᠳ ᠨᠢᠭᠡ ᠳᠠᠩ ᠪᠤᠶᠤ ᠬᠣᠣᠰ ᠨᠠᠷᠢᠨ ᠳᠡᠭᠡᠰᠦ ᠪᠡᠷ ᠵᠡᠭᠡᠭᠯᠡᠨᠡ᠃ ᠲᠤᠭᠤᠷᠭᠠ ᠶ᠋ᠢ ᠬᠣᠶᠠᠷ ᠬᠠᠲᠠᠪᠴᠢ ᠪᠠᠷ ᠰᠢᠵᠠᠢᠯᠭᠠᠨ ᠳᠤᠲᠠᠭᠠᠪᠠᠯ ᠭᠡᠷ ᠦ᠋ᠨ ᠦᠵᠡᠮᠵᠢ ᠳ᠋ᠦ᠍ ᠨᠥᠯᠥᠭᠡᠯᠡᠭᠡᠳ ᠵᠣᠭᠰᠣᠬᠤ ᠦᠭᠡᠢ ᠭᠠᠳᠠᠨᠠ ᠠ᠋ᠴᠠ ᠬᠦᠴᠦᠲᠡᠢ ᠵᠢᠪᠠᠷ ᠰᠠᠯᠬᠢᠨ᠂ ᠬᠣᠭ ᠰᠢᠷᠣᠢ ᠣᠷᠣᠵᠤ ᠢᠷᠡᠳᠡᠭ ᠤᠴᠢᠷ ᠭᠡᠷ ᠦ᠋ᠨ ᠡᠷᠡᠭᠦᠯ ᠠᠬᠤᠢ ᠳ᠋ᠤ᠌ ᠲᠣᠬᠢᠷᠠᠮᠵᠢ ᠦᠭᠡᠢ ᠪᠣᠯᠳᠠᠭ᠃
ᠵᠢᠷᠤᠭ42
(1) ᠳᠡᠭᠡᠪᠦᠷ ᠴᠠᠪᠤᠭ ᠡᠰᠬᠡᠬᠦ ᠬᠡᠮᠵᠢᠯᠲᠡ ᠬᠢᠵᠦ ᠡᠰᠬᠡᠭᠦᠷ ᠬᠢᠵᠦ ᠪᠠᠢᠭᠠ ᠪᠠᠢᠳᠠᠯ
(2) ᠵᠡᠭᠡᠭᠯᠡᠵᠦ ᠣᠭᠣᠰᠣᠷ ᠬᠠᠲᠠᠭᠰᠠᠨ ᠳᠡᠭᠡᠪᠦᠷ
ᠲᠤᠭᠤᠷᠭᠠ ᠶ᠋ᠢ ᠢᠰᠡᠭᠡᠢ ᠴᠢᠭ ᠢ᠋ᠶ᠋ᠡᠷ ᠨᠢ ᠭᠡᠷ ᠲᠦ᠍ ᠪᠠᠷᠢᠬᠤ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠬᠣᠭᠣᠯᠠᠢ ᠶ᠋ᠢ ᠲᠡᠨᠦᠵᠦ ᠣᠶᠣᠬᠤ ᠤᠴᠢᠷ ᠢᠰᠡᠭᠡᠢ ᠪᠡᠨ ᠭᠡᠷ ᠦ᠋ᠨ ᠮᠣᠳᠣᠨ ᠤ᠋ ᠬᠠᠨᠠ ᠶ᠋ᠢᠨ ᠳᠡᠭᠡᠷᠡ ᠣᠷᠢᠶᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠲᠠᠯᠪᠢᠬᠤ ᠳ᠋ᠤ᠌ ᠳᠡᠭᠡᠳᠦ ᠲᠠᠯᠠ ᠳ᠋ᠤ᠌ ᠵᠢᠵᠢᠭ ᠰᠤᠯᠠ ᠲᠠᠨᠤᠭᠠᠰᠤ ᠭᠠᠷᠴᠤ ᠢᠷᠡᠳᠡᠭ᠃ ᠡᠭᠦᠨ ᠢ᠋ ᠵᠢᠷᠤᠵᠤ ᠲᠡᠮᠳᠡᠭᠯᠡᠨ ᠬᠠᠢᠴᠢᠯᠠᠨ ᠬᠠᠶᠠᠵᠤ ᠬᠣᠶᠠᠷ ᠲᠠᠯᠠ ᠶ᠋ᠢ ᠨᠡᠢᠯᠡᠭᠦᠯᠦᠨ ᠣᠶᠣᠨᠠ᠃ ᠲᠤᠭᠤᠷᠭᠠ ᠪᠦᠷᠢ ᠳ᠋ᠦ᠍ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠨᠢ ᠪᠡᠬᠢᠯᠡᠬᠦ ᠣᠭᠣᠰᠣᠷ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ ᠳᠤᠮᠳᠠ ᠬᠡᠰᠡᠭ ᠲᠦ᠋ᠨᠢ ᠳᠡᠭᠡᠰᠦ ᠪᠤᠶᠤ ᠢᠰᠡᠭᠡᠢ ᠪᠡᠷ ᠬᠢᠭᠰᠡᠨ ᠭᠣᠭᠴᠣᠭᠠ ᠪᠠᠢᠳᠠᠭ᠃ ᠡᠨᠡ ᠭᠣᠭᠴᠣᠭᠠᠨ ᠳ᠋ᠤ᠌ ᠨᠥᠭᠦᠭᠡ ᠲᠤᠭᠤᠷᠭᠠ ᠶ᠋ᠢᠨ ᠵᠥᠷᠢᠭᠦᠯᠭᠡ ᠣᠭᠣᠰᠣᠷ ᠢ᠋ ᠣᠷᠣᠭᠤᠯᠵᠤ ᠲᠠᠲᠠᠵᠤ ᠣᠶᠣᠨᠠ᠃
ᠭᠡᠷ ᠦ᠋ᠨ ᠡᠷᠦᠬᠡ ᠶ᠋ᠢ ᠡᠰᠬᠡᠬᠦ ᠳ᠋ᠡᠭᠡᠨ ᠲᠣᠭᠣᠨᠣ ᠪᠣᠯᠤᠨ ᠭᠡᠷ ᠦ᠋ᠨ ᠲᠣᠮᠣ ᠪᠠᠭᠠ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠲᠡᠭᠰᠢᠯᠡᠭᠰᠡᠨ ᠪᠠᠢᠬᠤ ᠳ᠋ᠤ᠌ ᠲᠣᠭᠣᠨᠣ ᠶ᠋ᠢ ᠪᠦᠷᠢᠨ ᠪᠦᠷᠬᠦᠵᠦ ᠬᠠᠮᠢᠭᠠᠰᠢ ᠬᠠᠮᠢᠭᠠᠰᠢ ᠪᠠᠨ ᠢᠯᠡᠭᠦᠦ ᠭᠠᠷᠴᠤ ᠪᠠᠢᠬᠤ ᠪᠠᠷ ᠲᠠᠭᠠᠷᠠᠭᠤᠯᠵᠤ ᠳᠥᠷᠪᠡᠯᠵᠢᠨ ᠡᠰᠬᠡᠨᠡ᠃ ᠢᠰᠡᠭᠡᠢ᠂ ᠳᠠᠪᠤᠤ᠂ ᠪᠸᠷᠽᠢᠨᠲ ᠠᠯᠢ ᠨᠢ ᠴᠦ᠍ ᠪᠠᠢᠭᠰᠠᠨ ᠲᠡᠭᠦᠨ ᠦ᠌ ᠵᠠᠬᠠ ᠶ᠋ᠢ ᠪᠡᠬᠢᠯᠡᠨ ᠬᠦᠪᠦᠷᠢᠳᠬᠦ ᠪᠤᠶᠤ ᠳᠡᠭᠡᠰᠦ ᠪᠡᠷ ᠵᠡᠭᠡᠭᠯᠡᠨ ᠣᠶᠣᠵᠤ ᠬᠣᠢᠰᠢ ᠲᠠᠲᠠᠬᠤ ᠬᠤᠰᠢᠭᠤᠨ ᠳ᠋ᠤᠨᠢ ᠳᠡᠭᠡᠰᠦ ᠪᠤᠶᠤ ᠥᠭᠡᠷᠡ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠬᠡ ᠤᠭᠠᠯᠵᠠ ᠲᠠᠯᠪᠢᠵᠤ ᠦᠵᠦᠭᠦᠷ ᠲᠦ᠋ᠨᠢ ᠲᠠᠲᠠᠬᠤ ᠣᠭᠣᠰᠣᠷ ᠣᠶᠣᠵᠤ ᠪᠡᠬᠢᠯᠡᠨ ᠭᠡᠷ ᠦ᠋ᠨ ᠬᠣᠰᠢᠯᠠᠩ ᠣᠭᠣᠰᠣᠷ ᠲᠤ ᠪᠡᠬᠢᠯᠡᠨ᠂ ᠦᠵᠦᠭᠦᠷ ᠢ᠋ ᠥᠯᠵᠡᠢ ᠬᠡ ᠪᠣᠯᠭᠠᠨ ᠭᠡᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠳᠠᠭ ᠶᠣᠰᠣ ᠮᠠᠨ ᠤ᠋ ᠳᠡᠭᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠵᠡᠢ᠃ ᠮᠣᠩᠭᠣᠯ ᠭᠡᠷ ᠦ᠋ᠨ ᠪᠥᠰᠡᠨ ᠳ᠋ᠦ᠍ ᠬᠣᠰᠢᠯᠠᠩ ᠢ᠋ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠨᠢ ᠨᠢᠭᠡ ᠲᠠᠯᠠ ᠪᠠᠷ ᠭᠣᠶᠣᠮᠰᠣᠭ ᠦᠵᠡᠮᠵᠢᠲᠡᠢ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠭᠡᠷ ᠦ᠋ᠨ ᠮᠣᠳᠣ ᠰᠡᠩᠰᠡᠯᠡᠵᠦ ᠬᠡᠯᠪᠡᠷᠢ ᠳᠦᠷᠰᠦ ᠪᠡᠨ ᠠᠯᠳᠠᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠳᠠᠭ ᠪᠠᠢᠵᠠᠢ᠃ ᠬᠣᠰᠢᠯᠠᠩ ᠢ᠋ ᠬᠢᠬᠦ ᠳ᠋ᠡᠭᠡᠨ ᠭᠡᠷ ᠦ᠋ᠨ ᠶᠡᠬᠡ ᠪᠠᠭᠠ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠭᠡᠷ ᠦ᠋ᠨ ᠳ᠋ᠢᠶᠠᠮᠧᠲ᠋ᠷ ᠦ᠋ᠨ ᠬᠡᠮᠵᠢᠶᠡᠨ ᠳᠡᠭᠡᠷᠡ ᠤᠶᠠᠬᠤ ᠤᠶᠠᠭᠠᠨ ᠤ᠋ ᠤᠷᠲᠤ ᠶ᠋ᠢ ᠨᠡᠮᠡᠨ ᠲᠠᠯᠪᠢᠵᠤ ᠲᠠᠭᠠᠷᠠᠭᠤᠯᠬᠤ ᠪᠠ ᠨᠢᠭᠡ ᠬᠣᠰᠢᠯᠠᠩ4—6 ᠬᠣᠣᠰ ᠨᠠᠷᠢᠨ ᠳᠡᠭᠡᠰᠦ ᠶ᠋ᠢ ᠪᠠᠷᠠᠭᠤᠨ᠂ ᠰᠣᠯᠣᠭᠠᠢ ᠬᠣᠶᠠᠷ ᠶᠠᠩᠵᠤ ᠪᠠᠷ ᠲᠠᠮᠤᠵᠤ ᠡᠷᠴᠢᠯᠡᠨ ᠪᠠᠨᠵᠠ ᠮᠣᠳᠣᠨ ᠳ᠋ᠤ᠌ ᠡᠩᠨᠡᠭᠦᠯᠦᠨ ᠣᠷᠢᠶᠠᠵᠤ ᠲᠡᠭᠦᠨ ᠢ᠋ᠶ᠋ᠡᠨ ᠬᠣᠭᠣᠷᠣᠨᠳᠣ ᠨᠢ ᠨᠡᠢᠯᠡᠭᠦᠯᠦᠨ ᠲᠡᠮᠡᠭᠡᠨ ᠦ᠌ ᠵᠣᠭᠳᠣᠷ ᠲᠠᠢ ᠨᠣᠣᠰᠣ᠂ ᠦᠬᠡᠷ ᠦ᠋ᠨ ᠰᠡᠪᠡᠭ ᠡᠭᠡᠷᠡᠵᠦ ᠬᠢᠭᠰᠡᠨ ᠤᠲᠠᠰᠤ ᠪᠠᠷ ᠰᠢᠷᠢᠨᠡ᠃ ᠬᠣᠰᠢᠯᠠᠩ4—5 ᠬᠠᠨᠠ ᠲᠠᠢ ᠭᠡᠷ ᠦ᠋ᠨ ᠳᠡᠭᠡᠷᠡ ᠡᠴᠡ ᠳᠠᠷᠤᠬᠤ ᠳᠠᠷᠤᠯᠲᠠ ᠶ᠋ᠢ ᠪᠠᠭᠠᠨᠠ ᠦᠭᠡᠢ ᠪᠡᠷ ᠳᠠᠭᠠᠭᠠᠨᠠ᠃
ᠭᠡᠷ ᠦ᠋ᠨ ᠳᠠᠷᠤᠭᠤᠯᠭᠠ ᠣᠭᠣᠰᠣᠷ13 ᠪᠠᠢᠳᠠᠭ᠃ ᠡᠭᠦᠨ ᠦ᠌ ᠨᠢᠭᠡ ᠨᠢ ᠲᠣᠭᠣᠨᠣ ᠶ᠋ᠢᠨ ᠳᠤᠭᠤᠢ ᠠ᠋ᠴᠠ30—40cm ᠳᠣᠣᠷᠠ ᠪᠠᠢᠳᠠᠭ ᠳᠤᠭᠤᠢ ᠳᠡᠭᠡᠰᠦ ᠪᠥᠭᠡᠳ ᠡᠭᠦᠨ ᠢ᠋ ᠡᠷᠭᠢᠭᠦᠯᠭᠡ ᠭᠡᠳᠡᠭ᠃ ᠡᠷᠭᠢᠭᠦᠯᠭᠡ ᠡᠴᠡ ᠰᠠᠯᠪᠤᠷᠢᠯᠠᠨ ᠬᠣᠢᠰᠢ ᠣᠷᠣᠭᠰᠢ ᠪᠠᠨ ᠲᠠᠲᠠᠵᠤ ᠳᠡᠭᠡᠪᠦᠷ ᠲᠤᠭᠤᠷᠭᠠ ᠶ᠋ᠢ ᠬᠠᠮᠲᠤ ᠳᠠᠷᠤᠭᠤᠯᠬᠤ ᠨᠠᠢ᠍ᠮᠠᠨ ᠬᠣᠣᠰ ᠣᠭᠣᠰᠣᠷ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠳᠠᠷᠤᠭᠤᠯᠭᠠ ᠣᠭᠣᠰᠣᠷ ᠭᠡᠳᠡᠭ᠃ ᠳᠠᠷᠤᠭᠤᠯᠭᠠ ᠣᠭᠣᠰᠣᠷ ᠢ᠋ ᠭᠤᠷᠮᠤᠰᠤᠨ ᠳᠡᠭᠡᠰᠦ ᠪᠡᠷ ᠬᠢᠳᠡᠭ᠃ ᠮᠣᠩᠭᠣᠯ ᠭᠡᠷ ᠲᠦ᠍ ᠬᠠᠭᠠᠯᠭᠠᠨ ᠠ᠋ᠴᠠ ᠭᠠᠳᠠᠨᠠ ᠢᠰᠡᠭᠡᠢ ᠡᠭᠦᠳᠡ ᠪᠠᠢᠭᠰᠠᠨ ᠪᠥᠭᠡᠳ ᠡᠭᠦᠳᠡ ᠬᠢᠬᠦ ᠳ᠋ᠡᠭᠡᠨ ᠬᠠᠭᠠᠯᠭᠠ ᠶ᠋ᠢ ᠪᠦᠷᠢᠨ ᠬᠠᠭᠠᠵᠤ ᠬᠠᠲᠠᠪᠴᠢᠨ ᠤ᠋ ᠬᠠᠨᠠ ᠬᠠᠭᠠᠯᠭᠠ ᠬᠣᠶᠠᠷ ᠤ᠋ᠨ ᠨᠡᠢᠯᠡᠬᠦ ᠠᠭᠤᠯᠵᠠᠷ ᠬᠦᠷᠲᠡᠯᠡ ᠥᠷᠭᠡᠨ᠂ ᠤᠷᠲᠤ ᠶ᠋ᠢ ᠲᠣᠲᠣᠭᠣ ᠶ᠋ᠢᠨ ᠳᠡᠭᠡᠷᠡᠬᠢ ᠳᠡᠭᠡᠪᠦᠷ ᠲᠡᠢ20 ᠠ᠋ᠴᠠ ᠬᠣᠢᠰᠢ ᠦᠭᠡᠢ ᠰᠡᠨᠲ᠋ᠢᠮᠧᠲ᠋ᠷ ᠵᠥᠷᠢᠵᠦ ᠪᠠᠢᠬᠤ᠂ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢ ᠭᠠᠵᠠᠷ ᠠᠷᠠᠢ ᠬᠦᠷᠬᠦ ᠦᠭᠡᠢ᠂ ᠪᠣᠱᠣᠭᠠ ᠠ᠋ᠴᠠ15 ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠥᠩᠭᠡᠷᠡᠵᠦ ᠪᠠᠢᠬᠤ ᠪᠠᠷ ᠲᠣᠬᠢᠷᠠᠭᠤᠯᠤᠨ᠂ ᠭᠣᠣᠯ ᠳ᠋ᠤᠨᠢ ᠤᠰᠤᠨ ᠬᠡ ᠭᠣᠣᠯᠳᠠᠭᠤ ᠭᠠᠷᠭᠠᠵᠤ ᠰᠢᠷᠢᠳᠡᠭ ᠪᠠᠢᠵᠠᠢ᠃ ᠤᠰᠤᠨ ᠬᠡ ᠶ᠋ᠢ ᠲᠠᠩᠭᠢᠰ ᠳᠠᠯᠠᠢ ᠶ᠋ᠢᠨ ᠳᠣᠯᠭᠢᠶᠠ ᠭᠡᠵᠦ ᠪᠡᠯᠭᠡᠳᠡᠬᠦ ᠡᠴᠡ ᠭᠠᠳᠠᠨᠠ᠂ ᠭᠠᠳᠠᠨᠠ ᠠ᠋ᠴᠠ ᠶᠠᠮᠠᠷ ᠨᠢᠭᠡ ᠮᠠᠭᠤ ᠶᠠᠭᠤᠮᠠ ᠣᠷᠣᠵᠤ ᠢᠷᠡᠪᠡᠯ ᠳᠠᠯᠠᠢ ᠳ᠋ᠤ᠌ ᠤᠨᠠᠵᠤ ᠠᠯᠠᠭᠠ ᠪᠣᠯᠳᠠᠭ ᠭᠡᠰᠡᠨ ᠤᠳᠬᠠ ᠲᠠᠢ ᠠᠵᠢ᠃
ᠮᠣᠩᠭᠣᠯᠴᠤᠳ ᠢᠰᠡᠭᠡᠢ ᠡᠭᠦᠳᠡᠨ ᠦ᠌ ᠵᠠᠪᠠᠯ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠪᠠᠷ ᠣᠷᠣᠵᠤ ᠭᠠᠷᠬᠤ ᠪᠥᠭᠡᠳ ᠬᠡᠷᠪᠡ ᠪᠤᠷᠤᠭᠤ ᠡᠭᠦᠳᠡ ᠪᠡᠷ ᠣᠷᠣᠪᠠᠯ ᠭᠠᠢ ᠪᠠᠷᠴᠢᠳ ᠣᠷᠣᠵᠤ ᠢᠷᠡᠯᠡ ᠭᠡᠵᠦ ᠦᠵᠡᠬᠦ ᠪᠤᠶᠤ ᠪᠤᠷᠤᠭᠤ ᠡᠭᠦᠳᠡ ᠪᠡᠷ ᠭᠠᠳᠠᠭᠰᠢ ᠭᠠᠷᠪᠠᠯ ᠭᠠᠢ ᠭᠠᠷᠤᠯᠭᠠ ᠭᠠᠷᠴᠤ ᠪᠠᠢᠨᠠ ᠭᠡᠵᠦ ᠦᠵᠡᠬᠦ ᠤᠴᠢᠷ ᠮᠣᠩᠭᠣᠯ ᠭᠡᠷ ᠦ᠋ᠨ ᠪᠤᠷᠤᠭᠤ ᠡᠭᠦᠳᠡ ᠪᠡᠷ ᠭᠠᠷᠴᠤ ᠣᠷᠣᠬᠤ ᠴᠡᠭᠡᠷ ᠲᠡᠢ ᠪᠠᠢᠵᠠᠢ᠃ ᠡᠨᠡ ᠨᠢ ᠬᠡᠳᠦᠢᠪᠡᠷ ᠱᠠᠰᠢᠨ ᠤ᠋ ᠬᠣᠭᠣᠰᠣᠨ ᠨᠣᠮᠯᠠᠯ ᠪᠣᠯᠪᠠᠴᠤ ᠬᠥᠮᠦᠨ ᠢ᠋ ᠡᠮᠬᠢ ᠴᠡᠭᠴᠡ ᠲᠡᠢ ᠠᠯᠢᠪᠠ ᠵᠦᠢᠯ ᠳ᠋ᠦ᠍ ᠬᠢᠨᠠᠭᠤᠷ ᠪᠠᠢᠬᠤ ᠳ᠋ᠤ᠌ ᠰᠤᠷᠭᠠᠵᠤ ᠪᠠᠢᠵᠠᠢ᠃
ᠭᠡᠷ ᠦ᠋ᠨ ᠳᠣᠲᠣᠷ ᠲᠠᠯᠠ ᠶ᠋ᠢ ᠴᠢᠮᠡᠵᠦ ᠪᠠᠷᠢᠳᠠᠭ ᠬᠥᠰᠢᠭᠡ ᠶ᠋ᠢ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠡᠬᠢᠯᠡᠭᠡᠳ ᠢᠰᠡᠭᠡᠢ ᠶ᠋ᠢ ᠤᠯᠠᠭᠠᠨ ᠳᠠᠯᠢᠩᠪᠤ ᠪᠠᠷ ᠡᠮᠵᠢᠨ ᠬᠣᠰᠢᠮᠠᠭ ᠲᠠᠯᠪᠢᠵᠤ ᠬᠢᠵᠦ ᠪᠠᠢᠭᠰᠠᠨ ᠤ᠋ ᠭᠠᠳᠠᠨᠠ ᠬᠠᠮᠤᠭ ᠤ᠋ᠨ ᠭᠣᠶᠣ ᠬᠥᠰᠢᠭᠡ ᠶ᠋ᠢ ᠬᠠᠩᠪᠤ᠂ ᠢᠮᠠᠭᠠᠨ ᠬᠢᠯᠢᠩ᠂ ᠣᠳᠣᠨᠴᠤᠤ ᠪᠠᠷ ᠬᠢᠵᠦ᠂ ᠲᠡᠭᠦᠨ ᠳ᠋ᠦ᠍ ᠪᠦᠲᠦᠨ ᠬᠠᠭᠠᠰ ᠥᠯᠵᠡᠢ᠂ ᠴᠦᠳᠡᠨᠵᠡ ᠶ᠋ᠢᠨ ᠪᠤᠯᠤᠩ ᠬᠡ ᠶ᠋ᠢ ᠲᠠᠯᠪᠢᠵᠤ ᠬᠣᠶᠠᠷ ᠳᠠᠯᠠᠪᠴᠢ ᠪᠤᠶᠤ ᠲᠣᠲᠣᠭᠣ ᠶ᠋ᠢᠨ ᠬᠡᠰᠡᠭ ᠲᠦ᠍ ᠭᠣᠣᠯ ᠴᠢᠮᠡᠭᠯᠡᠯ ᠢ᠋ᠶ᠋ᠡᠨ ᠬᠢᠳᠡᠭ ᠵᠠᠩᠰᠢᠯ ᠣᠳᠣ ᠴᠤ᠌ ᠬᠡᠷᠡᠭᠯᠡᠭᠳᠡᠵᠦ ᠪᠠᠢᠨᠠ᠃
ᠬᠥᠰᠢᠭᠡ ᠶ᠋ᠢ ᠡᠰᠬᠡᠬᠦ ᠳ᠋ᠡᠭᠡᠨ ᠭᠡᠷ ᠦ᠋ᠨ ᠳᠣᠲᠣᠷ ᠲᠠᠯᠠ ᠶ᠋ᠢᠨ ᠳ᠋ᠶᠠᠮᠧᠲ᠋ᠷ ᠦ᠋ᠨ ᠬᠡᠮᠵᠢᠶᠡ ᠶ᠋ᠢ ᠠᠪᠴᠤ ᠪᠠᠷᠠᠭᠠᠨ ᠤ᠋ ᠪᠠᠨ ᠡᠩ ᠲᠤᠤᠱ ᠢ᠋ᠶ᠋ᠠᠷ ᠬᠢᠵᠦ ᠬᠣᠭᠣᠯᠠᠢ ᠶ᠋ᠢ ᠨᠢ ᠪᠠᠭᠠ ᠵᠡᠷᠭᠡ ᠲᠡᠨᠦᠵᠦ ᠲᠡᠭᠦᠨ ᠳ᠋ᠡᠭᠡᠨ ᠲᠠᠭᠠᠷᠠᠭᠤᠯᠵᠤ ᠬᠣᠭᠣᠯᠠᠢ ᠶ᠋ᠢ ᠵᠠᠯᠭᠠᠬᠤ ᠪᠠ ᠬᠣᠶᠠᠷ ᠬᠠᠲᠠᠪᠴᠢᠨ ᠳ᠋ᠤ᠌ ᠪᠣᠯᠤᠨ ᠪᠤᠰᠤᠳ ᠬᠡᠰᠡᠭ ᠲᠦ᠍ ᠲᠠᠯᠪᠢᠬᠤ ᠬᠡ ᠪᠡᠨ ᠵᠢᠷᠤᠭᠠᠳ ᠲᠡᠭᠦᠨ ᠦ᠌ ᠪᠡᠨ ᠵᠠᠢ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠬᠡ ᠤᠭᠠᠯᠵᠠ ᠪᠠᠨ ᠵᠠᠩᠭᠢᠳᠤᠨ ᠬᠡᠮᠵᠢᠶᠡ ᠶ᠋ᠢ ᠲᠣᠬᠢᠷᠠᠭᠤᠯᠤᠨ ᠰᠢᠲᠠᠵᠤ ᠮᠠᠰᠢᠨᠳᠠᠨᠠ᠃ ᠭᠡᠷ ᠢ᠋ ᠪᠠᠷᠢᠬᠤ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠴᠠᠭ ᠬᠤᠭᠤᠴᠠᠭᠠ ᠪᠠᠭᠠ ᠣᠷᠣᠳᠠᠭ ᠪᠥᠭᠡᠳ ᠪᠠᠭᠤᠯᠭᠠᠬᠤ ᠳ᠋ᠤ᠌ ᠨᠢᠭᠡ ᠴᠠᠭ᠂ ᠠᠴᠢᠬᠤ ᠳ᠋ᠤ᠌ ᠬᠣᠶᠠᠷ ᠴᠠᠭ ᠣᠷᠴᠢᠮ ᠬᠤᠭᠤᠴᠠᠭᠠ ᠪᠠᠢᠳᠠᠭ᠃ ᠢᠰᠡᠭᠡᠢ ᠭᠡᠷ ᠦ᠋ᠨ ᠭᠤᠷᠪᠠᠨ ᠤ᠋ ᠨᠢᠭᠡ ᠬᠤᠪᠢ ᠶ᠋ᠢ ᠱᠠᠯᠠ ᠶ᠋ᠢ ᠣᠷᠣᠭᠤᠯᠬᠤ ᠦᠭᠡᠢ ᠪᠡᠷ ᠮᠣᠳᠣ ᠡᠵᠡᠯᠡᠬᠦ ᠪᠠ ᠮᠣᠳᠣᠨ ᠱᠠᠯᠠ ᠦᠭᠡᠢ ᠪᠠ ᠲᠠᠪᠤᠨ ᠬᠠᠨᠠ ᠲᠠᠢ ᠭᠡᠷ500kg ᠪᠠᠢᠳᠠᠭ ᠭᠡᠵᠦ ᠳ· ᠮᠠᠢᠳᠠᠷ《 ᠮᠣᠩᠭᠣᠯ ᠤ᠋ᠨ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠳᠤᠷᠠᠰᠬᠠᠯᠲᠤ ᠵᠦᠢᠯ》 ᠭᠡᠳᠡᠭ ᠨᠣᠮ ᠳ᠋ᠠᠭᠠᠨ ᠪᠢᠴᠢᠵᠡᠢ᠃ ᠬᠠᠨᠠ4—12 ᠬᠦᠷᠲᠡᠯᠡ ᠪᠠᠢᠬᠤ ᠪᠠ ᠨᠡᠢᠲᠡᠯᠢᠭ ᠬᠡᠷᠡᠭᠡᠯᠡᠳᠡᠭ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠭᠡᠷ6 ᠬᠠᠨᠠ ᠲᠠᠢ ᠭᠡᠷ ᠶᠦᠮ᠃ ᠴᠥᠭᠡᠨ ᠲᠣᠯᠣᠭᠠᠢ ᠲᠠᠢ ᠵᠢᠵᠢᠭ ᠬᠠᠨᠠ ᠨᠡᠮᠡᠪᠡᠯ ᠨᠡᠮᠡᠭᠳᠡᠯ ᠬᠠᠨᠠ ᠶ᠋ᠢ ᠵᠢᠭᠤᠷᠠᠪᠴᠢ ᠭᠡᠨᠡ᠃ ᠶᠠᠷᠢᠬᠤ ᠳ᠋ᠠᠭᠠᠨ15 ᠲᠣᠯᠣᠭᠠᠢ ᠲᠠᠢ ᠶᠡᠬᠡ ᠵᠢᠷᠭᠤᠭᠠᠨ ᠬᠠᠨᠠᠲᠤ᠂13 ᠲᠣᠯᠣᠭᠠᠢ ᠲᠠᠢ ᠪᠠᠭᠠ ᠵᠢᠷᠭᠤᠭᠠᠨ ᠬᠠᠨᠠᠲᠤ ᠭᠡᠬᠦ ᠮᠡᠲᠦ ᠪᠡᠷ ᠨᠡᠷᠡᠯᠡᠨᠡ᠃
ᠭᠡᠷ ᠦ᠋ᠨ ᠪᠠᠭᠠᠨᠠ ᠲᠣᠮᠣ ᠵᠢᠵᠢᠭ ᠶᠠᠮᠠᠷ ᠴᠤ᠌ ᠭᠡᠷ ᠲᠦ᠍ ᠪᠠᠢᠬᠤ ᠪᠥᠭᠡᠳ ᠭᠡᠷ ᠦ᠋ᠨ ᠬᠡᠮᠵᠢᠶᠡ ᠲᠣᠮᠣᠷᠠᠬᠤ ᠳᠣᠳᠣᠮ ᠲᠡᠭᠦᠨ ᠦ᠌ ᠪᠠᠭᠠᠨᠠ ᠶ᠋ᠢᠨ ᠲᠣᠭᠠ ᠨᠡᠮᠡᠭᠳᠡᠨᠡ᠃ ᠵᠢᠱ᠌ᠢᠶᠡ ᠨᠢ᠄4—8 ᠬᠠᠨᠠ ᠲᠠᠢ ᠭᠡᠷ ᠲᠦ᠍ ᠬᠣᠶᠠᠷ ᠪᠠᠭᠠᠨᠠ ᠪᠠᠢᠬᠤ ᠪᠣᠯᠪᠠᠴᠤ9—12 ᠬᠠᠨᠠ ᠲᠠᠢ ᠭᠡᠷ ᠲᠦ᠍3—4 ᠪᠠᠭᠠᠨᠠ ᠪᠠᠢᠨᠠ᠃
ᠮᠣᠩᠭᠣᠯᠴᠤᠳ ᠴᠠᠭ ᠢ᠋ ᠬᠡᠮᠵᠢᠬᠦ ᠳ᠋ᠡᠭᠡᠨ12 ᠵᠢᠯ ᠢ᠋ᠶ᠋ᠡᠷ ᠬᠡᠮᠵᠢᠬᠦ ᠡᠴᠡ ᠭᠠᠳᠠᠨᠠ ᠲᠣᠭᠣᠨᠣ ᠪᠠᠷ ᠲᠤᠰᠤᠭᠰᠠᠨ ᠭᠡᠷ ᠦ᠋ᠨ ᠨᠠᠷᠠ᠂ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ᠂ ᠣᠷᠣᠢ ᠶ᠋ᠢᠨ ᠵᠢᠷᠭᠠᠬᠤ ᠨᠠᠷᠠ ᠪᠠᠷ ᠬᠡᠮᠵᠢᠳᠡᠭ᠃
ᠮᠣᠩᠭᠣᠯᠴᠤᠳ ᠴᠠᠭ ᠢ᠋12 ᠵᠢᠯ ᠢ᠋ᠶ᠋ᠡᠷ ᠲᠣᠭᠠᠯᠠᠳᠠᠭ ᠤᠴᠢᠷ ᠠ᠋ᠴᠠ ᠨᠢᠭᠡ ᠵᠢᠯ ᠬᠣᠶᠠᠷ ᠴᠠᠭ ᠢ᠋ ᠲᠥᠯᠥᠭᠡᠯᠡᠨᠡ᠃ ᠵᠢᠱ᠌ᠢᠶᠡ ᠨᠢ᠄ ᠮᠣᠷᠢᠨ ᠴᠠᠭ ᠡᠳᠦᠷ ᠦ᠋ᠨ12 ᠴᠠᠭ᠂ ᠨᠢᠭᠡ ᠴᠠᠭ ᠢ᠋᠂ ᠬᠣᠨᠢᠨ ᠴᠠᠭ ᠬᠣᠶᠠᠷ᠂ ᠭᠤᠷᠪᠠᠨ ᠴᠠᠭ ᠢ᠋ ᠲᠥᠯᠥᠭᠡᠯᠡᠬᠦ ᠮᠡᠲᠦ ᠪᠡᠷ ᠴᠢᠨᠠᠭᠰᠢᠳᠠ ᠵᠢᠯ ᠦ᠋ᠨ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠲᠣᠭᠠᠯᠠᠬᠤ ᠠ᠋ᠴᠠ ᠭᠠᠳᠠᠨᠠ ᠭᠡᠷ ᠲᠦ᠍ ᠲᠤᠰᠬᠤ ᠨᠠᠷᠠ ᠪᠠᠷ ᠬᠡᠮᠵᠢᠬᠦ ᠳ᠋ᠡᠭᠡᠨ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ ᠪᠠᠷ᠂ ᠲᠣᠭᠣᠨᠣ ᠳ᠋ᠤ᠌ ᠲᠤᠰᠬᠤ ᠨᠠᠷᠠ ᠪᠠᠷ ᠠᠭᠤᠯᠵᠠᠨᠠ ᠴᠤᠭᠯᠠᠷᠠᠨᠠ ᠭᠡᠬᠦ ᠪᠤᠶᠤ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠲᠤᠰᠬᠤ ᠳ᠋ᠤ᠌᠂ ᠨᠠᠷᠠ ᠣᠨᠢ ᠶ᠋ᠢᠨ ᠳᠤᠮᠳᠠ ᠴᠢᠨᠡᠭᠡ ᠳ᠋ᠦ᠍ ᠪᠠᠢᠬᠤ ᠳ᠋ᠤ᠌᠂ ᠨᠠᠷᠠ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠪᠠᠢᠬᠤ ᠭᠡᠵᠦ ᠶᠠᠷᠢᠬᠤ᠂ ᠨᠠᠷᠠᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠣᠷᠣᠨ ᠤ᠋ ᠳᠡᠷᠡ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍ ᠪᠠᠭᠠ ᠦᠳᠡ ᠣᠷᠣᠨ ᠤ᠋ ᠳᠤᠮᠳᠠ ᠬᠢᠷᠢ ᠳ᠋ᠦ᠍ ᠢᠷᠡᠬᠦ ᠳ᠋ᠦ᠍ ᠵᠢᠩ ᠦᠳᠡ ᠪᠤᠶᠤ ᠶᠡᠬᠡ ᠦᠳᠡ᠂ ᠣᠷᠣᠨ ᠤ᠋ ᠳᠣᠣᠷᠠᠲᠤ ᠳᠡᠷᠡ ᠳᠡᠭᠡᠷᠡ ᠲᠤᠰᠬᠤ ᠳ᠋ᠤ᠌ ᠦᠳᠡ ᠡᠴᠡ ᠬᠣᠢᠰᠢ᠂ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠠᠪᠳᠠᠷᠠ ᠳᠡᠭᠡᠷᠡ ᠲᠤᠰᠬᠤ ᠳ᠋ᠤ᠌ ᠦᠳᠡ ᠬᠡᠯᠪᠡᠢᠬᠦ᠂ ᠨᠠᠷᠠ ᠣᠨᠢ ᠶ᠋ᠢᠨ ᠳᠤᠮᠳᠠ ᠴᠢᠨᠡᠭᠡ ᠬᠦᠷᠬᠦ ᠳ᠋ᠦ᠍᠂ ᠨᠠᠷᠠ ᠣᠨᠢ ᠶ᠋ᠢᠨ ᠳᠤᠮᠳᠠ ᠪᠠᠢᠬᠤ ᠳ᠋ᠤ᠌ ᠭᠡᠬᠦ ᠪᠤᠶᠤ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍᠂ ᠨᠠᠷᠠ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠮᠤᠯᠲᠤᠷᠠᠬᠤ ᠦᠶᠡ ᠭᠡᠵᠦ ᠶᠠᠷᠢᠬᠤ ᠪᠠ ᠣᠷᠣᠢ ᠲᠣᠭᠣᠨᠣ ᠳ᠋ᠤ᠌ ᠨᠠᠷᠠ ᠲᠠᠢ ᠪᠠᠢᠬᠤ ᠳ᠋ᠤ᠌ ᠭᠡᠵᠦ ᠶᠠᠷᠢᠳᠠᠭ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠥᠷᠯᠥᠭᠡ ᠶ᠋ᠢᠨ ᠲᠤᠰᠬᠤ ᠨᠠᠷᠠ ᠠ᠋ᠴᠠ ᠢᠯᠭᠠᠭᠠ ᠲᠠᠢ᠃ ᠭᠡᠷ ᠦ᠋ᠨ ᠨᠠᠷᠠ ᠶ᠋ᠢ ᠬᠡᠭᠡᠷᠡ ᠶ᠋ᠢᠨ ᠨᠥᠬᠥᠴᠡᠯ ᠳ᠋ᠦ᠍ ᠬᠡᠮᠵᠢᠬᠦ ᠳ᠋ᠡᠭᠡᠨ ᠭᠠᠵᠠᠷ ᠳᠤᠭᠤᠢᠯᠠᠵᠤ ᠵᠢᠷᠤᠭᠠᠳ ᠲᠡᠭᠦᠨ ᠳ᠋ᠡᠭᠡᠨ ᠰᠠᠭᠤᠳᠠᠭ ᠭᠡᠷ ᠲᠦ᠍ ᠪᠠᠢᠭᠠ ᠬᠣᠭᠰᠢᠯ ᠤ᠋ᠨ ᠴᠢᠯᠠᠭᠤ ᠪᠠᠷ ᠲᠥᠯᠦᠭᠡᠯᠡᠭᠦᠯᠵᠦ ᠲᠠᠯᠪᠢᠭᠠᠳ ᠭᠣᠣᠯ ᠳ᠋ᠤᠨᠢ ᠳᠠᠷᠠᠰᠤ ᠬᠠᠳᠬᠤᠬᠤ ᠳ᠋ᠤ᠌ ᠳᠡᠷᠡᠰᠦᠨ ᠦ᠌ ᠰᠡᠭᠦᠳᠡᠷ ᠭᠡᠷ ᠦ᠋ᠨ ᠬᠣᠭᠰᠢᠯ ᠤ᠋ᠨ ᠠᠯᠢ ᠨᠢᠭᠡ ᠳᠡᠭᠡᠷᠡ ᠲᠤᠰᠬᠤ ᠪᠠ ᠲᠡᠷᠡ ᠰᠡᠭᠦᠳᠡᠷ ᠬᠠᠮᠢᠭᠠ ᠪᠠᠢᠭᠠ ᠪᠠᠷ ᠭᠡᠷ ᠦ᠋ᠨ ᠨᠠᠷᠠ ᠶ᠋ᠢ ᠲᠣᠳᠣᠷᠬᠠᠢᠯᠠᠨᠠ᠃
ᠭᠡᠷ ᠢ᠋ ᠪᠠᠷᠢᠬᠤ᠂ ᠪᠠᠭᠤᠯᠭᠠᠬᠤ ᠳᠡᠰ ᠳᠠᠷᠠᠭᠠᠯᠠᠭᠰᠠᠨ ᠵᠢᠷᠤᠮ ᠲᠠᠢ᠃ ᠡᠬᠢᠯᠡᠭᠡᠳ ᠭᠡᠷ ᠪᠠᠷᠢᠬᠤ ᠪᠠᠭᠤᠷᠢ ᠵᠠᠰᠠᠵᠤ ᠱᠠᠯᠠ ᠪᠠᠨ ᠰᠠᠭᠤᠯᠭᠠᠭᠠᠳ ᠶᠠᠰᠤ ᠮᠣᠳᠣ ᠪᠠᠨ ᠪᠣᠰᠬᠠᠬᠤ ᠳ᠋ᠠᠭᠠᠨ ᠬᠠᠨᠠ ᠪᠠᠨ ᠳᠤᠭᠤᠢᠯᠠᠵᠤ ᠬᠠᠭᠠᠯᠭᠠ ᠪᠠᠨ ᠪᠡᠬᠢᠯᠡᠭᠡᠳ ᠬᠠᠨᠠ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠳᠠᠷᠤᠬᠤ ᠠᠴᠢᠶᠠᠯᠠᠯ ᠢ᠋ ᠪᠠᠭᠠᠰᠬᠠᠬᠤ ᠵᠣᠷᠢᠯᠭᠠ ᠪᠠᠷ ᠬᠠᠨᠠ ᠶ᠋ᠢᠨ ᠳᠡᠭᠡᠳᠦ ᠳᠣᠣᠷᠠᠲᠤ ᠲᠠᠯᠠ ᠪᠠᠷ ᠪᠦᠰᠡ ᠲᠠᠲᠠᠵᠤ ᠴᠢᠩᠭᠠᠯᠠᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠪᠠᠢᠭᠠ ᠵᠣᠷᠢᠭᠤᠯᠤᠯᠲᠠ ᠶ᠋ᠢᠨ ᠤᠶᠠᠭᠠ ᠳ᠋ᠤ᠌ ᠪᠡᠬᠢᠯᠡᠨᠡ᠃ ᠲᠣᠭᠣᠨᠣ ᠪᠤᠰᠬᠠᠬᠤ ᠳ᠋ᠠᠭᠠᠨ ᠲᠤᠯᠭᠠᠭᠤᠷ ᠪᠠᠭᠠᠨᠠ ᠲᠠᠢ ᠲᠣᠮᠣ ᠲᠣᠭᠣᠨᠣ ᠲᠠᠢ ᠭᠡᠷ ᠪᠣᠯ ᠲᠣᠭᠣᠨᠣ ᠶ᠋ᠢ ᠬᠣᠶᠠᠷ ᠪᠠᠭᠠᠨᠠ ᠳ᠋ᠠᠭᠠᠨ ᠪᠡᠬᠢᠯᠡᠵᠦ ᠪᠤᠰᠬᠠᠨ ᠬᠣᠶᠠᠷ ᠬᠥᠮᠦᠨ ᠪᠠᠷᠢᠵᠤ ᠪᠤᠰᠤᠳ ᠨᠢ ᠬᠣᠢᠲᠤ᠂ ᠤᠷᠲᠤ᠂ ᠪᠠᠷᠠᠭᠤᠨ ᠵᠡᠭᠦᠨ ᠲᠤᠰ ᠪᠦᠷᠢ ᠳ᠋ᠦ᠍ ᠣᠨᠢ ᠡᠯᠭᠦᠨ ᠲᠣᠭᠲᠠᠭᠠᠨᠠ᠃ ᠲᠣᠭᠣᠨᠣ ᠶ᠋ᠢᠨ ᠴᠠᠮᠬᠠᠷᠠᠭᠠ ᠵᠠᠪᠠᠯ ᠴᠢᠩᠭᠠ ᠤᠷᠤᠭᠰᠢ ᠬᠠᠷᠠᠵᠤ ᠪᠠᠢᠬᠤ ᠶᠣᠰᠣᠲᠠᠢ ᠤᠴᠢᠷ ᠡᠭᠦᠨ ᠢ᠋ ᠲᠣᠬᠢᠷᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠪᠠᠷᠠᠭᠤᠨ ᠵᠡᠭᠦᠨ ᠡᠷᠭᠢᠭᠦᠯᠭᠡ ᠣᠭᠣᠰᠣᠷ ᠤ᠋ᠳ ᠢ᠋ ᠰᠣᠯᠪᠢᠴᠠᠭᠤᠯᠤᠨ ᠲᠠᠲᠠᠵᠤ ᠲᠣᠬᠢᠷᠠᠭᠤᠯᠤᠨ ᠤᠶᠠᠭᠠᠳ ᠪᠤᠰᠤᠳ ᠣᠨᠢ ᠶ᠋ᠢ ᠡᠯᠭᠦᠵᠦ ᠳᠠᠭᠤᠰᠤᠮᠠᠭᠴᠠ ᠳᠠᠬᠢᠨ ᠡᠷᠭᠢᠭᠦᠯᠭᠡ ᠤᠶᠠᠭᠠ ᠶ᠋ᠢ ᠲᠠᠢᠯᠵᠤ ᠴᠠᠭᠠᠨ ᠳᠠᠪᠤᠤ ᠶ᠋ᠢᠨ ᠴᠠᠪᠤᠭ ᠪᠤᠶᠤ ᠳᠣᠲᠣᠭᠤᠷ ᠪᠥᠷᠢᠭᠡᠰᠦ ᠶᠠᠰᠤ ᠮᠣᠳᠣᠨ ᠳ᠋ᠠᠭᠠᠨ ᠨᠥᠮᠥᠷᠭᠡᠨ ᠡᠷᠭᠢᠭᠦᠯᠭᠡ ᠤᠶᠠᠭᠠ ᠪᠠᠷ ᠳᠠᠷᠤᠵᠤ ᠪᠡᠬᠢᠯᠡᠨᠡ᠃ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠴᠠᠪᠤᠭ ᠢ᠋ ᠲᠠᠯᠪᠢᠬᠤ ᠳ᠋ᠠᠭᠠᠨ ᠡᠬᠢᠯᠡᠭᠡᠳ ᠵᠠᠪᠠᠯ ᠤᠷᠲᠤ ᠳᠡᠭᠡᠪᠦᠷ ᠴᠠᠪᠤᠭ ᠢ᠋ ᠲᠠᠯᠪᠢᠵᠤ ᠪᠡᠬᠢᠯᠡᠨ ᠳᠠᠷᠠᠭᠠ ᠨᠢ ᠬᠣᠢᠲᠤ ᠳᠡᠭᠡᠪᠦᠷ ᠴᠠᠪᠤᠭ ᠢ᠋ ᠲᠠᠯᠪᠢᠵᠤ ᠪᠡᠬᠢᠯᠡᠳᠡᠭ ᠪᠥᠭᠡᠳ ᠡᠨᠡ ᠨᠢ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠰᠠᠯᠬᠢ ᠭᠣᠣᠯᠳᠠᠭᠤ ᠬᠣᠢᠲᠤ ᠵᠦᠭ ᠡᠴᠡ ᠭᠠᠷᠳᠠᠭ ᠤᠴᠢᠷ ᠳᠡᠭᠡᠪᠦᠷ ᠢ᠋ ᠰᠠᠯᠬᠢ ᠰᠥᠷᠦᠭᠦᠯᠪᠡᠯ᠂ ᠭᠡᠷ ᠰᠠᠯᠬᠢᠨ ᠳ᠋ᠤ᠌ ᠣᠢᠴᠢᠬᠤ ᠨᠢᠭᠡ ᠰᠢᠯᠲᠠᠭᠠᠨ ᠪᠣᠯᠳᠠᠭ᠃ ᠴᠠᠭᠠᠨ ᠳᠠᠪᠤᠤ ᠶ᠋ᠢᠨ ᠪᠥᠷᠢᠶᠡᠰᠦᠨ ᠳᠡᠭᠡᠷᠡ ᠪᠡᠨ ᠢᠰᠡᠭᠡᠢ ᠪᠤᠶᠤ ᠬᠥᠪᠥᠩ ᠲᠡᠢ ᠳᠠᠪᠤᠤ ᠶ᠋ᠢᠨ ᠴᠠᠪᠤᠭ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠪᠡᠬᠢᠯᠡᠭᠡᠳ ᠲᠤᠭᠤᠷᠭᠠ ᠪᠠᠨ ᠣᠷᠢᠶᠠᠬᠤ ᠳ᠋ᠠᠭᠠᠨ ᠬᠣᠶᠠᠷ ᠬᠠᠲᠠᠪᠴᠢᠨ ᠠ᠋ᠴᠠ ᠡᠬᠢᠯᠡᠨ ᠲᠠᠭᠠᠷᠠᠭᠤᠯᠤᠨᠠ᠃ ᠬᠠᠲᠠᠪᠴᠢᠨ ᠤ᠋ ᠲᠤᠭᠤᠷᠭᠠ ᠶ᠋ᠢ ᠳᠤᠲᠠᠭᠠᠬᠤ ᠪᠤᠶᠤ ᠡᠰᠡᠪᠡᠯ ᠢᠯᠡᠭᠦᠦ ᠭᠠᠷᠭᠠᠨ ᠪᠠᠷᠢᠪᠠᠯ ᠭᠡᠷ ᠦ᠋ᠨ ᠦᠵᠡᠮᠵᠢ ᠳ᠋ᠦ᠍ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠨᠡ᠃ ᠲᠤᠭᠤᠷᠭᠠ ᠣᠷᠢᠶᠠᠵᠤ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠡᠭᠡᠪᠦᠷ ᠢ᠋ᠶ᠋ᠡᠨ ᠲᠠᠯᠪᠢᠵᠤ ᠪᠡᠬᠢᠯᠡᠨ ᠡᠷᠭᠢᠭᠦᠯᠭᠡ ᠣᠭᠣᠰᠣᠷ ᠤ᠋ᠳ ᠢ᠋ᠶ᠋ᠠᠨ ᠤᠶᠠᠵᠤ ᠭᠠᠳᠠᠭᠤᠷ ᠨᠢ ᠴᠠᠭᠠᠨ ᠪᠦᠷᠢᠶᠡᠰᠦ ᠪᠡᠨ ᠲᠠᠯᠪᠢᠵᠤ ᠠᠷᠤ ᠲᠠᠯᠠ ᠳ᠋ᠤᠨᠢ ᠵᠥᠷᠢᠭᠦᠯᠡᠵᠦ ᠪᠡᠬᠢᠯᠡᠭᠡᠳ ᠬᠣᠰᠢᠯᠠᠩ ᠪᠤᠶᠤ ᠣᠷᠢᠶᠠᠬᠤ ᠪᠦᠰᠡ ᠪᠡᠨ ᠭᠡᠷ ᠦ᠋ᠨ ᠬᠠᠨᠠ ᠳ᠋ᠤ᠌ ᠲᠡᠩᠴᠡᠭᠦᠦ ᠭᠠᠷᠭᠠᠨ ᠣᠷᠢᠶᠠᠵᠤ ᠬᠠᠭᠠᠯᠭᠠ ᠶ᠋ᠢᠨ ᠶᠠᠰᠤ ᠮᠣᠳᠣᠨ ᠤ᠋ ᠵᠣᠷᠢᠭᠤᠯᠤᠯᠲᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠴᠢᠩᠭᠠᠯᠠᠵᠤ ᠤᠶᠠᠨᠠ᠃
ᠭᠡᠷ ᠦ᠋ᠨ ᠲᠣᠭᠣᠨᠣ ᠬᠣᠶᠠᠷ ᠶᠠᠩᠵᠤ ᠪᠠᠢᠳᠠᠭ᠃ ᠢᠯᠠᠩᠭᠤᠶᠠ ᠮᠠᠨ ᠤ᠋ ᠵᠡᠭᠦᠨ ᠠᠢᠮᠠᠭ ᠤ᠋ᠳ ᠬᠠᠳᠬᠤᠭᠤᠷ ᠲᠣᠭᠣᠨᠣ ᠲᠠᠢ ᠪᠠᠢᠳᠠᠭ ᠪᠥᠭᠡᠳ ᠡᠨᠡ ᠨᠢ ᠲᠣᠭᠣᠨᠣ ᠣᠨᠢ ᠬᠣᠶᠠᠷ ᠦᠷᠭᠦᠯᠵᠢ ᠬᠣᠯᠪᠣᠭᠠ ᠲᠠᠢ ᠭᠡᠷ ᠢ᠋ ᠪᠠᠭᠤᠯᠭᠠᠵᠤ ᠠᠴᠢᠬᠤ ᠳ᠋ᠠᠭᠠᠨ ᠣᠨᠢ ᠶ᠋ᠢ ᠲᠣᠭᠣᠨᠣ ᠶ᠋ᠢᠨ ᠳᠤᠭᠤᠢ ᠠ᠋ᠴᠠ ᠰᠠᠯᠭᠠᠬᠤ ᠦᠭᠡᠢ ᠣᠨᠢ ᠪᠠᠨ ᠬᠤᠮᠬᠢᠨ ᠪᠣᠭᠣᠵᠤ ᠠᠴᠢᠨᠠ᠃ ᠬᠠᠳᠬᠤᠭᠤᠷ ᠣᠨᠢ ᠲᠠᠢ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠦᠲᠦᠨ ᠪᠤᠶᠤ ᠡᠰᠡᠪᠡᠯ ᠬᠣᠶᠠᠷ ᠲᠠᠯᠠ ᠳᠤᠭᠤᠢ ᠪᠠᠢᠳᠠᠭ᠃ ᠲᠡᠭᠦᠨ ᠢ᠋ ᠪᠠᠷᠢᠬᠤ ᠳ᠋ᠠᠭᠠᠨ ᠬᠠᠨᠠ ᠪᠠᠨ ᠳᠤᠭᠤᠢᠯᠠᠭᠠᠳ ᠲᠣᠭᠣᠨᠣ ᠪᠣᠰᠬᠠᠬᠤ ᠦᠶᠡ ᠳ᠋ᠦ᠍ ᠥᠨᠳᠥᠷ ᠶᠠᠭᠤᠮᠠ ᠳᠡᠭᠡᠷᠡ ᠲᠠᠯᠪᠢᠵᠤ ᠪᠠᠢᠭᠠᠳ ᠵᠦᠭ ᠵᠦᠭ ᠳᠠᠰᠢ ᠨᠢ ᠣᠨᠢ ᠶ᠋ᠢ ᠳᠠᠯᠠᠨ ᠡᠯᠭᠦᠵᠦ ᠨᠢᠭᠡ ᠪᠤᠯᠠᠨᠠ᠃
ᠭᠡᠷ ᠢ᠋ ᠪᠠᠷᠢᠵᠤ ᠳᠠᠭᠤᠰᠤᠭᠠᠳ ᠬᠠᠶᠠᠭᠠ ᠪᠠᠷ ᠨᠢ ᠮᠣᠳᠣ ᠪᠤᠶᠤ ᠴᠡᠮᠪᠡ᠂ ᠳᠠᠪᠤᠤ ᠪᠠᠷ ᠬᠢᠭᠰᠡᠨ ᠬᠠᠶᠠᠭᠠᠪᠴᠢ ᠲᠣᠬᠢᠷᠠᠭᠤᠯᠤᠨ ᠪᠠᠷᠢᠨᠠ᠂ ᠭᠡᠷ ᠦ᠋ᠨ ᠭᠠᠳᠠᠨᠠ ᠲᠠᠯᠠ ᠪᠠᠷᠢᠵᠤ ᠳᠠᠭᠤᠰᠤᠮᠠᠭᠴᠠ ᠱᠠᠯᠠ ᠪᠠᠨ ᠴᠡᠪᠡᠷᠯᠡᠨ ᠳᠡᠭᠡᠷᠡ ᠨᠢ ᠰᠢᠷᠢᠮᠡᠯ ᠢᠰᠡᠭᠡᠢ ᠲᠣᠬᠢᠷᠠᠭᠤᠯᠭᠠ ᠪᠤᠶᠤ ᠬᠡᠪᠢᠰ ᠨᠡᠢᠯᠡᠭ ᠤᠲᠠᠰᠤᠨ ᠨᠡᠬᠡᠮᠡᠯ ᠬᠡᠪᠢᠰᠦᠨᠴᠢᠷ ᠳᠡᠪᠢᠰᠴᠦ ᠬᠥᠰᠢᠭᠡ ᠲᠡᠳᠡᠨ ᠣᠷᠣ᠂ ᠠᠪᠳᠠᠷᠠ ᠰᠠᠪᠠ ᠪᠠᠨ ᠪᠠᠢᠷᠢᠯᠠᠭᠤᠯᠤᠨᠠ᠃
ᠭᠡᠷ ᠦ᠋ᠨ ᠵᠤᠤᠬᠠᠨ ᠤ᠋ ᠶᠣᠩᠳᠣᠩ ᠢ᠋ ᠤᠷᠲᠤ ᠲᠠᠯᠠ ᠶ᠋ᠢᠨ ᠪᠠᠷᠠᠭᠤᠨ ᠴᠠᠮᠬᠠᠷᠠᠭᠠ ᠶ᠋ᠢᠨ ᠵᠠᠢ ᠪᠠᠷ ᠭᠠᠷᠭᠠᠨᠠ᠃ ᠬᠣᠷᠯᠣ ᠲᠣᠭᠣᠨᠣ ᠳ᠋ᠤ᠌ ᠪᠣᠯ ᠵᠣᠷᠢᠭᠤᠯᠤᠨ ᠲᠡᠮᠦᠷ ᠵᠣᠭᠣᠰᠤᠨ ᠶᠣᠩᠳᠣᠩ ᠤ᠋ᠨ ᠨᠦᠬᠡ ᠭᠠᠷᠭᠠᠭᠰᠠᠨ ᠪᠠᠢᠳᠠᠭ᠃ ᠭᠡᠷ ᠢ᠋ ᠦᠵᠡᠮᠵᠢᠲᠡᠢ ᠭᠣᠶᠣ ᠪᠠᠢᠯᠭᠠᠬᠤ᠂ ᠭᠡᠭᠡ ᠭᠡᠷᠡᠯ ᠣᠷᠣᠭᠤᠯᠬᠤ᠂ ᠲᠣᠭᠣᠨᠣ ᠪᠠᠷ ᠲᠣᠭᠣᠰᠣ᠂ ᠰᠢᠷᠣᠢ ᠴᠠᠰᠤ ᠣᠷᠣᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠵᠤ ᠡᠷᠦᠬᠡ ᠶ᠋ᠢᠨ ᠳᠣᠣᠷᠠ ᠣᠷᠣᠳᠠᠭ ᠦᠭᠡᠢ᠂ ᠳᠤᠮᠳᠠ ᠴᠠᠮᠬᠠᠷᠠᠭᠠ ᠠ᠋ᠴᠠ ᠤᠷᠤᠭᠰᠢ ᠬᠡᠰᠡᠭ ᠦ᠋ᠨ ᠶᠣᠩᠳᠣᠩ ᠭᠠᠷᠭᠠᠳᠠᠭ ᠦᠭᠡᠢ ᠨᠢᠳᠦ ᠪᠦᠷᠢ ᠳ᠋ᠦ᠍ ᠰᠢᠯᠦᠨ ᠷᠠᠮ ᠬᠢᠨᠡ᠃ ᠬᠣᠷᠯᠣ ᠪᠢᠰᠢ6—8 ᠴᠠᠮᠬᠠᠷᠠᠭᠠ ᠲᠠᠢ ᠪᠤᠶᠤ ᠬᠠᠳᠬᠤᠭᠤᠷ ᠲᠣᠭᠣᠨᠣ ᠳ᠋ᠤ᠌ ᠰᠢᠯ ᠲᠡᠢ ᠷᠠᠮ ᠵᠣᠬᠢᠶᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠤᠴᠢᠷ ᠰᠠᠯᠬᠢ᠂ ᠴᠠᠰᠤ ᠲᠠᠢ ᠦᠶᠡ ᠳ᠋ᠦ᠍ ᠴᠠᠭᠠᠨ ᠳᠠᠪᠤᠤ ᠶ᠋ᠢᠨ ᠳᠠᠪᠬᠤᠷ ᠡᠷᠦᠬᠡ ᠲᠠᠲᠠᠨᠠ᠃ ᠴᠠᠭᠠᠨ ᠳᠠᠪᠤᠤ ᠶ᠋ᠢᠨ ᠡᠷᠦᠬᠡ ᠶ᠋ᠢᠨ ᠶᠣᠩᠳᠣᠩ ᠤ᠋ᠨ ᠨᠦᠬᠡ ᠭᠠᠷᠬᠤ ᠬᠡᠰᠡᠭ ᠢ᠋ ᠴᠣᠭᠣᠯᠵᠤ ᠭᠣᠣᠯ ᠳ᠋ᠠᠭᠠᠨ ᠨᠦᠬᠡ ᠲᠡᠢ ᠲᠡᠮᠦᠷ ᠲᠣᠭᠲᠠᠭᠠᠵᠤ ᠪᠡᠬᠢᠯᠡᠨᠡ᠃
ᠭᠡᠷ ᠦ᠋ᠨ ᠣᠨᠴᠠᠯᠢᠭ ᠨᠢ ᠬᠥᠮᠦᠨ ᠦ᠌ ᠡᠷᠡᠭᠦᠯ ᠠᠬᠤᠢ ᠳ᠋ᠤ᠌ ᠶᠡᠬᠡᠬᠡᠨ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ᠃ ᠦᠷᠭᠦᠯᠵᠢ ᠰᠡᠯᠭᠦᠨ ᠵᠥᠭᠡᠭᠡᠵᠦ ᠪᠠᠢᠳᠠᠭ ᠤᠴᠢᠷ ᠡᠪᠡᠳᠴᠢᠨ ᠡᠭᠦᠰᠬᠡᠭᠴᠢ ᠦᠷᠡᠵᠢᠵᠦ ᠬᠠᠳᠠᠭᠠᠯᠠᠭᠳᠠᠳᠠᠭ ᠦᠭᠡᠢ᠃ ᠡᠪᠦᠯ ᠵᠤᠨ ᠤ᠋ ᠠᠯᠢ ᠴᠤ᠌ ᠤᠯᠠᠷᠢᠯ ᠳ᠋ᠤ᠌ ᠳᠤᠷᠠ ᠲᠠᠢ ᠭᠠᠵᠠᠷ ᠢ᠋ᠶ᠋ᠠᠨ ᠰᠣᠩᠭᠣᠨ ᠪᠠᠭᠤᠬᠤ ᠪᠣᠯᠣᠮᠵᠢᠲᠠᠢ᠃ ᠲᠡᠭᠦᠨ ᠢ᠋ ᠵᠠᠰᠠᠨ ᠰᠡᠯᠪᠢᠬᠦ ᠳ᠋ᠦ᠍ ᠶᠠᠭᠤ ᠪᠠᠷ ᠴᠦ᠍ ᠲᠣᠷᠳᠠᠵᠤ ᠪᠣᠯᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠨᠴᠠᠯᠢᠭ ᠲᠠᠢ ᠪᠥᠭᠡᠳ ᠡᠨᠡ ᠬᠡᠯᠪᠡᠷᠢ ᠶ᠋ᠢ ᠠᠰᠢᠭᠯᠠᠨ ᠣᠲᠣᠷ ᠨᠡᠭᠦᠳᠡᠯ ᠦ᠋ᠨ ᠰᠢᠨᠡ ᠭᠡᠷ ᠪᠣᠢ ᠪᠣᠯᠤᠯᠠ᠃ ᠡᠨᠡ ᠭᠡᠷ ᠡᠪᠬᠡᠳᠡᠭ ᠨᠤᠭᠤᠰᠤ ᠲᠠᠢ ᠤᠴᠢᠷ ᠮᠠᠰᠢᠨ ᠪᠣᠯᠤᠨ ᠶᠡᠷᠦᠳᠡ ᠶ᠋ᠢᠨ ᠬᠥᠰᠬᠡ ᠲᠡᠭᠡᠭᠡᠪᠦᠷᠢ ᠪᠡᠷ ᠠᠴᠢᠵᠤ ᠪᠠᠭᠤᠯᠭᠠᠬᠤ᠂ ᠪᠠᠷᠢᠬᠤ ᠳ᠋ᠤ᠌ ᠵᠣᠬᠢᠮᠵᠢᠲᠠᠢ ᠪᠠᠢᠳᠠᠭ᠃
ᠭᠡᠷ ᠨᠢ ᠨᠠᠮᠬᠠᠨ᠂ ᠳᠤᠭᠤᠢ ᠬᠡᠯᠪᠡᠷᠢᠲᠡᠢ᠂ ᠬᠢᠴᠡ ᠬᠡᠰᠡᠭ ᠦ᠋ᠳ ᠨᠢ ᠨᠤᠭᠤᠰᠤᠨ ᠬᠣᠯᠪᠣᠭᠠ ᠲᠠᠢ ᠤᠴᠢᠷ ᠠ᠋ᠴᠠ ᠭᠠᠵᠠᠷ ᠬᠥᠳᠡᠯᠦᠯ ᠦ᠋ᠨ ᠬᠡᠪᠲᠡᠭᠡ᠂ ᠪᠣᠰᠤᠭᠠ ᠨᠥᠯᠥᠭᠡᠯᠡᠯ ᠢ᠋ ᠰᠠᠢᠨ ᠳᠠᠭᠠᠭᠠᠳᠠᠭ ᠠ᠋ᠴᠠ ᠭᠠᠳᠠᠨᠠ ᠰᠠᠯᠬᠢᠨ ᠤ᠋ ᠬᠦᠴᠦ ᠲᠡᠢ ᠵᠣᠬᠢᠴᠠᠵᠤ ᠴᠢᠳᠠᠨᠠ᠃
ᠰᠢᠷᠢᠮᠡᠯ ᠰᠢᠷᠲᠡᠭ ᠰᠢᠷᠢᠮᠡᠯ ᠰᠢᠷᠲᠡᠭ ᠮᠣᠩᠭᠣᠯ ᠭᠡᠷ ᠦ᠋ᠨ ᠴᠢᠮᠡᠭ ᠪᠥᠭᠡᠳ ᠬᠡᠪᠢᠰ ᠪᠣᠯᠤᠨ ᠪᠤᠰᠤᠳ ᠦᠰᠦᠯᠢᠭ ᠳᠡᠪᠢᠰᠬᠡᠷ ᠲᠡᠢ ᠠᠳᠠᠯᠢ ᠰᠢᠷᠣᠢ ᠲᠣᠭᠣᠰᠣ ᠰᠢᠭᠢᠳᠳᠡᠭ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠴᠡᠪᠡᠷᠬᠡᠨ᠂ ᠬᠥᠮᠦᠨ ᠦ᠌ ᠡᠷᠡᠭᠦᠯ ᠠᠬᠤᠢ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ᠃ ᠬᠥᠮᠦᠨ ᠰᠠᠭᠤᠬᠤ ᠪᠤᠶᠤ ᠰᠢᠷᠡᠭᠡ ᠰᠠᠨᠳᠠᠯᠢ ᠲᠠᠯᠪᠢᠬᠤ ᠳ᠋ᠤ᠌ ᠵᠥᠭᠡᠯᠡᠨ᠂ ᠳᠠᠭᠤ ᠴᠢᠮᠡᠭᠡ ᠶ᠋ᠢ ᠪᠠᠭᠠᠰᠬᠠᠳᠠᠭ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠪᠥᠭᠡᠳ ᠮᠣᠩᠭᠣᠯᠴᠤᠳ ᠰᠢᠷᠢᠮᠡᠯ ᠰᠢᠷᠲᠡᠭ ᠢ᠋ ᠡᠷᠲᠡ ᠦᠶᠡ ᠡᠴᠡ ᠬᠡᠷᠡᠭᠯᠡᠵᠦ ᠢᠷᠡᠵᠡᠢ᠃ ᠾᠦᠩᠨᠦ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠪᠤᠯᠠᠰᠢᠨ ᠠ᠋ᠴᠠ ᠣᠯᠳᠠᠭᠰᠠᠨ ᠣᠯᠳᠠᠪᠤᠷᠢ ᠳ᠋ᠤ᠌ ᠭᠣᠶᠣᠮᠰᠣᠭ ᠬᠢᠴᠡ ᠲᠡᠢ ᠰᠢᠷᠢᠮᠡᠯ ᠰᠢᠷᠳᠡᠭ ᠪᠠᠢᠵᠠᠢ᠃
ᠰᠢᠷᠢᠮᠡᠯ ᠰᠢᠷᠳᠡᠭ ᠢ᠋ ᠵᠤᠵᠠᠭᠠᠨ ᠨᠢᠮᠭᠡᠨ ᠶᠠᠩᠵᠤ ᠪᠦᠷᠢ ᠪᠡᠷ ᠬᠢᠬᠦ ᠪᠠ ᠬᠡᠷᠪᠡ ᠵᠤᠵᠠᠭᠠᠨ ᠬᠢᠪᠡᠯ ᠥᠩᠭᠡ ᠢᠰᠡᠭᠡᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠲᠣᠮᠣ ᠵᠢᠵᠢᠭ ᠰᠢᠨᠡ ᠬᠠᠭᠤᠴᠢᠨ ᠬᠠᠮᠢᠭᠠ ᠦᠭᠡᠢ ᠢᠰᠡᠭᠡᠢ ᠶ᠋ᠢ ᠵᠦᠢᠵᠦ ᠲᠠᠯᠪᠢᠵᠤ ᠰᠢᠷᠢᠨᠡ᠃
ᠬᠠᠷᠢᠨ ᠣᠷᠴᠢᠨ ᠦᠶᠡ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠳᠡᠪᠢᠰᠬᠦ ᠪᠣᠯ ᠪᠠᠢᠰᠢᠩ ᠤ᠋ᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠵᠤ ᠳᠠᠪᠬᠤᠷᠯᠠᠬᠤ ᠦᠭᠡᠢ ᠪᠠᠷ ᠨᠢᠮᠭᠡᠨ ᠬᠢᠬᠦ ᠳ᠋ᠦ᠍ ᠲᠣᠬᠢᠷᠠᠮᠵᠢᠲᠠᠢ᠃ ᠰᠢᠷᠲᠡᠭ ᠲᠦ᠍ ᠲᠠᠯᠪᠢᠬᠤ ᠬᠡ ᠶ᠋ᠢ ᠰᠢᠷᠲᠡᠭ ᠦ᠋ᠨ ᠲᠣᠮᠣ ᠪᠠᠭᠠ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡ ᠲᠠᠯᠪᠢᠬᠤ ᠪᠠ ᠬᠡ ᠪᠡᠨ ᠭᠣᠣᠯ ᠪᠣᠯᠤᠨ ᠥᠨᠴᠥᠭ ᠪᠤᠯᠤᠩ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠵᠢᠷᠤᠵᠤ ᠰᠢᠷᠲᠡᠭ ᠳᠡᠭᠡᠷᠡ ᠪᠡᠨ ᠪᠣᠳᠣᠭ ᠢ᠋ᠶ᠋ᠠᠷ ᠴᠣᠬᠢᠵᠤ ᠪᠠᠭᠤᠯᠭᠠᠨ ᠲᠣᠳᠣᠷᠠᠭᠤᠯᠵᠤ ᠵᠢᠷᠤᠨᠠ᠃ ᠳᠥᠷᠪᠡᠯᠵᠢᠨ ᠲᠣᠮᠣ ᠨᠢᠳᠦᠨ ᠬᠡ ᠭᠠᠷᠭᠠᠪᠠᠯ ᠪᠣᠳᠣᠭ ᠲᠠᠢ ᠡᠰᠬᠡᠭᠦᠷ ᠦ᠋ᠨ ᠴᠢᠪᠬᠠ ᠤᠲᠠᠰᠤ ᠪᠠᠷ ᠴᠢᠪᠬᠠᠳᠠᠨ ᠭᠠᠷᠭᠠᠵᠤ ᠪᠣᠯᠤᠨᠠ᠃ ᠰᠢᠷᠲᠡᠭ ᠦ᠋ᠨ ᠢᠰᠡᠭᠡᠢ ᠶ᠋ᠢ ᠬᠢᠬᠦ ᠳ᠋ᠡᠭᠡᠨ ᠵᠣᠷᠢᠭᠤᠳᠠ ᠠᠬᠤᠷ ᠪᠤᠶᠤ ᠬᠤᠷᠠᠭᠠᠨ ᠤ᠋ ᠨᠣᠣᠰᠣ ᠪᠠᠷ ᠬᠢᠪᠡᠯ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃ ᠰᠢᠷᠳᠡᠭ ᠦ᠋ᠨ ᠭᠣᠣᠯ ᠬᠡ ᠳ᠋ᠦ᠍ ᠲᠦᠮᠡᠨ ᠨᠠᠰᠤᠨ᠂ ᠯᠠᠨᠵᠠ᠂ ᠲᠣᠨᠣᠯᠵᠢᠨ ᠪᠤᠶᠤ ᠬᠣᠷᠯᠣ ᠬᠡ᠂ ᠤᠰᠤᠨ ᠪᠠ ᠤᠭᠠᠯᠵᠠ ᠬᠡ᠂ ᠬᠠᠨᠠᠨ ᠬᠡ ᠨᠢᠳᠦᠨ ᠪᠠ ᠭᠠᠨᠵᠤᠭᠠ ᠰᠢᠷᠢᠭᠡᠰᠦᠨ ᠦ᠌ ᠠᠯᠢ ᠠᠯᠢ ᠨᠢ ᠲᠣᠬᠢᠷᠠᠮᠵᠢᠲᠠᠢ᠃ ᠰᠢᠷᠳᠡᠭ ᠦ᠋ᠨ ᠵᠠᠬᠠ ᠳ᠋ᠤ᠌ ᠵᠤᠵᠠᠭᠠᠨ ᠴᠡᠮᠪᠡ ᠪᠤᠶᠤ ᠲᠠᠷᠮᠠ ᠪᠠᠷ ᠬᠡ ᠤᠭᠠᠯᠵᠠ ᠬᠠᠢᠴᠢᠯᠠᠨ ᠲᠠᠯᠪᠢᠬᠤ ᠪᠤᠶᠤ ᠡᠰᠡᠪᠡᠯ ᠬᠡ ᠬᠠᠢᠴᠢᠯᠠᠬᠤ ᠦᠭᠡᠢ ᠪᠡᠷ ᠰᠢᠯᠤᠭᠤᠨ ᠬᠥᠪᠥᠭᠡᠯᠡᠵᠦ ᠲᠡᠭᠦᠨ ᠳ᠋ᠡᠭᠡᠨ ᠭᠠᠯᠠᠭᠤᠨ ᠲᠠᠪᠠᠭ᠂ ᠪᠠᠶᠠᠨ ᠬᠣᠰᠢᠭᠤ ᠤᠭᠠᠯᠵᠠ᠂ ᠬᠤᠯᠤᠰᠤᠨ ᠰᠦᠯᠵᠢᠶᠡ ᠣᠶᠣᠵᠤ ᠬᠠᠮᠤᠭ ᠤ᠋ᠨ ᠭᠠᠳᠠᠨᠠ ᠲᠠᠯᠠ ᠶ᠋ᠢᠨ ᠵᠠᠬᠠ ᠪᠠᠷ ᠨᠢ ᠪᠠᠷᠠᠭᠤᠨ᠂ ᠰᠣᠯᠣᠭᠠᠢ ᠲᠠᠮᠤᠭᠰᠠᠨ ᠬᠣᠣᠰ ᠵᠡᠭᠡᠭ ᠲᠠᠯᠪᠢᠵᠤ ᠰᠢᠷᠢᠨᠡ᠃ ᠡᠨᠡ ᠵᠡᠬᠡᠭ ᠭᠣᠶᠣᠯ ᠤ᠋ᠨ ᠪᠣᠯᠤᠨ ᠵᠠᠬᠠ ᠰᠤᠩᠬᠤ ᠦᠭᠡᠢ ᠪᠡᠬᠢᠯᠡᠨ ᠦ᠌ ᠴᠢᠨᠠᠷ ᠲᠠᠢ ᠬᠣᠶᠠᠷ ᠴᠢᠬᠤᠯᠠ ᠡᠭᠦᠷᠭᠡ ᠭᠦᠢᠴᠡᠳᠬᠡᠨᠡ᠃
ᠭᠣᠣᠯ ᠬᠡ ᠶ᠋ᠢᠨ ᠵᠠᠬᠠ ᠪᠠᠷ ᠬᠦᠭᠡᠭᠡᠴᠡᠯᠳᠦᠭᠦᠷ᠂ ᠡᠪᠦᠳᠦᠭ ᠦ᠋ᠨ ᠬᠡ᠂ ᠪᠢᠲᠡᠭᠦᠦ ᠵᠠᠳᠠᠭᠠᠢ ᠠᠯᠤᠬᠠ᠂ ᠡᠷᠭᠢᠭᠦᠦ ᠪᠠᠳ ᠬᠡ ᠭᠠᠷᠭᠠᠨ ᠰᠢᠷᠢᠨᠡ᠃ ᠢᠰᠡᠭᠡᠢ ᠰᠢᠷᠲᠡᠭ ᠡᠳ᠋ᠯᠡᠭᠡᠨ ᠦ᠌ ᠬᠤᠪᠢ ᠳ᠋ᠤ᠌20—30 ᠵᠢᠯ ᠪᠣᠯᠬᠤ ᠪᠥᠭᠡᠳ ᠲᠡᠭᠦᠨ ᠢ᠋ ᠠᠯᠢ ᠪᠣᠯᠬᠤ ᠣᠢᠷᠠᠬᠠᠨ ᠰᠢᠷᠢᠬᠦ ᠨᠢ ᠠᠰᠢᠭᠲᠠᠢ᠃ ᠰᠢᠷᠢᠮᠡᠯ ᠰᠢᠷᠲᠡᠭ ᠪᠤᠶᠤ ᠪᠤᠰᠤᠳ ᠡᠳ᠋ᠯᠡᠭᠡ ᠶ᠋ᠢ ᠬᠢᠬᠦ ᠳ᠋ᠦ᠍ ᠭᠠᠷ ᠢᠰᠡᠭᠡᠢ ᠡᠴᠡ ᠭᠠᠳᠠᠨᠠ ᠦᠢᠯᠡᠳᠪᠦᠷᠢ ᠶ᠋ᠢᠨ ᠢᠰᠡᠭᠡᠢ ᠶ᠋ᠢ ᠬᠡᠷᠡᠭᠯᠡᠨᠡ᠃ ᠰᠢᠷᠲᠡᠭ ᠢ᠋ ᠰᠢᠷᠢᠬᠦ ᠤᠲᠠᠰᠤᠨ ᠳ᠋ᠤ᠌ ᠭᠣᠣᠯᠳᠠᠭᠤ ᠲᠡᠮᠡᠭᠡᠨ ᠦ᠌ ᠡᠷᠡ ᠡᠮᠡ ᠨᠣᠣᠰᠣ ᠬᠣᠯᠢᠵᠤ ᠡᠭᠡᠷᠡᠭᠰᠡᠨ ᠤᠲᠠᠰᠤ ᠬᠡᠷᠡᠭᠯᠡᠬᠦ ᠪᠣᠯᠪᠠᠴᠤ ᠨᠠᠷᠢᠨ ᠣᠯᠣᠰᠣ ᠬᠥᠪᠦᠩᠴᠢᠷ ᠤᠲᠠᠰᠤ ᠶ᠋ᠢ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃ ᠮᠥᠨ ᠢᠰᠡᠭᠡᠢ ᠰᠢᠷᠲᠡᠭ ᠢ᠋ ᠥᠩᠭᠡᠯᠡᠵᠦ ᠪᠣᠯᠤᠨᠠ᠃ ᠡᠨᠡ ᠨᠢ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠦᠵᠡᠮᠵᠢᠲᠡᠢ ᠴᠡᠪᠡᠷ ᠪᠣᠯᠬᠤ ᠪᠣᠯᠪᠠᠴᠤ ᠶᠠᠪᠤᠭᠠᠨ ᠳ᠋ᠠᠭᠠᠨ ᠳᠠᠪᠤᠤ ᠨᠢ ᠰᠡᠮᠡᠷᠡᠵᠦ ᠡᠪ ᠦᠭᠡᠢ ᠪᠣᠯᠳᠠᠭ᠃
ᠰᠢᠷᠢᠮᠡᠯ ᠢ᠋ ᠬᠢᠴᠡ ᠪᠡᠷ ᠨᠢ ᠳᠠᠩ ᠪᠠ ᠳᠠᠪᠬᠤᠷ ᠰᠢᠷᠢᠮᠡᠯ ᠭᠡᠵᠦ ᠢᠯᠭᠠᠨᠠ᠃ ᠳᠠᠩ ᠰᠢᠷᠢᠮᠡᠯ ᠢ᠋ᠶ᠋ᠡᠷ ᠤᠭᠤᠲᠠ᠂ ᠰᠠᠪᠠ᠂ ᠣᠢᠮᠣᠰᠤ ᠪᠤᠶᠤ ᠪᠤᠰᠤᠳ ᠵᠦᠢᠯ ᠢ᠋ ᠬᠢᠵᠦ ᠵᠠᠬᠠ ᠪᠠᠷ ᠨᠢ ᠭᠣᠶᠣᠮᠰᠣᠭ ᠢ᠋ᠶ᠋ᠠᠷ ᠡᠮᠵᠢᠵᠦ ᠬᠡ ᠭᠠᠷᠭᠠᠨ ᠰᠢᠷᠢᠨᠡ᠃
ᠡᠨᠡ ᠨᠢ ᠣᠯᠠᠨ ᠤᠳᠠᠭᠠ ᠨᠡᠭᠦᠳᠡᠯᠯᠡᠬᠦ᠂ ᠠᠶᠠᠨ ᠵᠢᠩ ᠳ᠋ᠦ᠍ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ᠃ ᠢᠯᠠᠩᠭᠤᠶᠠ ᠰᠢᠯ᠂ ᠱᠠᠭᠠᠵᠠᠩ ᠠᠶᠠᠭᠠ ᠬᠢᠬᠦ ᠢᠰᠡᠭᠡᠢ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠬᠢᠬᠦ ᠪᠤᠶᠤ ᠡᠰᠡᠪᠡᠯ ᠢᠰᠡᠭᠡᠢ ᠶ᠋ᠢᠨ ᠥᠭᠡᠳᠡᠰᠦ ᠪᠡᠷ ᠬᠢᠨᠡ᠃ ᠢᠰᠡᠭᠡᠢ ᠤᠭᠤᠲᠠ ᠰᠠᠪᠠ ᠬᠢᠬᠦ ᠵᠦᠢᠯ ᠡᠴᠡ ᠰᠢᠯᠲᠠᠭᠠᠯᠠᠵᠤ ᠶᠠᠩᠵᠤ ᠪᠦᠷᠢ ᠪᠠᠢᠳᠠᠭ᠃
ᠲᠠᠪᠠᠭ᠂ ᠠᠶᠠᠭᠠ ᠬᠢᠬᠦ ᠤᠭᠤᠲᠠ ᠶ᠋ᠢ ᠳᠤᠭᠤᠢ ᠪᠣᠷᠲᠣᠭᠣ ᠬᠡᠯᠪᠡᠷᠢ ᠲᠡᠢ ᠬᠢᠵᠦ ᠠᠮᠠᠨ ᠳᠡᠭᠡᠷᠡ ᠨᠢ ᠳᠤᠭᠤᠢ ᠲᠠᠭ ᠰᠢᠷᠢᠵᠦ ᠲᠠᠭᠯᠠᠭᠠᠳ ᠶᠡᠬᠡ ᠪᠡᠶᠡ ᠳ᠋ᠦ᠍ᠨᠢ ᠭᠣᠭᠴᠣᠭᠠ ᠭᠠᠷᠭᠠᠵᠤ ᠲᠠᠭ ᠲᠤᠨᠢ ᠪᠢᠴᠢᠬᠠᠨ ᠴᠢᠭᠲᠠ ᠬᠢᠨᠡ᠃ ᠲᠠᠪᠠᠭ ᠠᠶᠠᠭᠠᠨ ᠤ᠋ ᠬᠣᠭᠣᠷᠣᠨᠳᠣ ᠵᠢᠵᠢᠭ ᠳᠤᠭᠤᠢ ᠢᠰᠡᠭᠡᠢ ᠪᠡᠷ ᠵᠥᠭᠡᠯᠡᠪᠴᠢ ᠬᠢᠵᠦ ᠥᠭᠭᠦᠨᠡ᠃ ᠲᠠᠪᠠᠭ ᠠᠶᠠᠭᠠᠨ ᠤ᠋ ᠢᠰᠡᠭᠡᠢ ᠤᠭᠤᠲᠠᠨ ᠤ᠋ ᠰᠢᠷᠢᠭᠡᠰᠦ ᠶ᠋ᠢ ᠲᠦᠮᠡᠨ ᠨᠠᠰᠤᠲᠤ᠂ ᠲᠣᠨᠣᠯᠵᠢᠨ ᠰᠢᠷᠢᠭᠡᠰᠦ ᠪᠡᠷ ᠴᠢᠮᠡᠨᠡ᠃
ᠵᠢᠷᠤᠭ43
ᠠᠷᠤᠭ ᠳᠡᠭᠡᠷᠡ ᠲᠠᠯᠪᠢᠨ ᠢᠰᠡᠭᠡᠢ ᠰᠢᠷᠳᠡᠭ ᠰᠢᠷᠢᠵᠦ ᠪᠠᠢᠭᠠ ᠪᠠᠢᠳᠠᠯ
ᠲᠡᠭᠦᠨᠴᠢᠯᠡᠨ ᠲᠠᠪᠠᠭ ᠤ᠋ᠨ ᠭᠡᠷ ᠢ᠋ ᠳᠤᠭᠤᠢ ᠬᠡᠯᠪᠡᠷᠢ ᠲᠡᠢ ᠬᠢᠵᠦ ᠤᠯᠠᠭᠠᠨ ᠳᠠᠯᠢᠩᠪᠤᠤ ᠪᠠᠷ ᠪᠤᠶᠤ ᠴᠡᠮᠪᠡ ᠪᠡᠷ ᠡᠮᠵᠢᠵᠦ ᠬᠣᠰᠢᠯᠠᠩ ᠲᠠᠯᠪᠢᠬᠤ ᠪᠤᠶᠤ ᠳᠡᠭᠡᠰᠦ ᠲᠠᠮᠤᠵᠤ ᠵᠡᠬᠡᠭ ᠲᠠᠯᠪᠢᠵᠤ ᠭᠣᠶᠣᠳᠠᠭ ᠪᠠᠢᠯᠠ᠃ ᠠᠮᠠᠨ ᠳ᠋ᠤᠨᠢ ᠲᠣᠪᠴᠢ ᠬᠢᠵᠦ ᠨᠢᠭᠡ ᠲᠠᠯᠠ ᠳ᠋ᠤᠨᠢ ᠰᠢᠯᠪᠢ ᠬᠠᠲᠠᠵᠤ ᠲᠣᠪᠴᠢᠯᠠᠨᠠ᠃
ᠮᠥᠨ ᠢᠰᠡᠭᠡᠢ ᠶ᠋ᠢ ᠳᠠᠪᠤᠤ ᠪᠠᠷ ᠳᠣᠲᠣᠷᠯᠠᠨ ᠰᠢᠷᠢᠵᠦ ᠳᠤᠭᠤᠢ ᠢᠷᠣᠭᠠᠷ ᠲᠠᠢ ᠪᠣᠷᠲᠣᠭᠣ ᠬᠡᠯᠪᠡᠷᠢ ᠶ᠋ᠢᠨ ᠨᠠᠷᠢᠨ ᠤᠭᠤᠲᠠ ᠬᠢᠵᠦ ᠬᠤᠵᠢᠷ ᠳᠠᠪᠤᠰᠤ ᠬᠢᠬᠦ ᠪᠤᠶᠤ ᠠᠷᠢᠬᠢᠨ ᠤ᠋ ᠰᠢᠯ᠂ ᠸᠠᠭᠠᠷ ᠰᠠᠪᠠ ᠬᠠᠳᠠᠭᠠᠯᠠᠬᠤ ᠠ᠋ᠴᠠ ᠭᠠᠳᠠᠨᠠ ᠦᠢᠯᠡ ᠶ᠋ᠢᠨ ᠬᠠᠢᠴᠢ᠂ ᠵᠠᠭᠠᠵᠤᠤᠷ ᠤ᠋ᠨ ᠢᠷ ᠢ᠋ ᠮᠣᠬᠣᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠢᠰᠡᠭᠡᠢ ᠤᠭᠤᠲᠠᠨ ᠳ᠋ᠤ᠌ ᠬᠢᠬᠦ ᠪᠠ ᠢᠰᠡᠭᠡᠢ ᠶ᠋ᠢ ᠳᠥᠷᠪᠡᠯᠵᠢᠨ ᠳᠤᠭᠤᠢ ᠡᠰᠬᠡᠵᠦ ᠰᠢᠷᠢᠵᠦ ᠬᠡᠲᠡᠪᠴᠢ᠂ ᠪᠤᠢᠯᠠᠨ ᠣᠶᠣᠵᠤ᠂ ᠤᠲᠠᠰᠤ᠂ ᠵᠡᠭᠦᠦ ᠶ᠋ᠢᠨ ᠰᠠᠪᠠ ᠬᠢᠳᠡᠭ ᠪᠥᠭᠡᠳ ᠡᠨᠡ ᠨᠢ ᠪᠠᠲᠤ ᠪᠥᠬᠡ᠂ ᠶᠠᠭᠤᠮᠠ ᠬᠠᠳᠠᠭᠠᠯᠠᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠰᠠᠢᠨ ᠰᠠᠪᠠ ᠪᠣᠯᠳᠠᠭ᠃
ᠳᠤᠭᠤᠢ ᠢᠷᠣᠭᠠᠷ ᠲᠠᠢ ᠤᠭᠤᠲᠠ ᠶ᠋ᠢ ᠬᠢᠬᠦ ᠳ᠋ᠦ᠍ ᠡᠬᠢᠯᠡᠭᠡᠳ ᠤᠭᠤᠲᠠᠨ ᠤ᠋ ᠪᠠᠨ ᠤᠷᠲᠤ ᠪᠣᠭᠣᠨᠢ ᠶ᠋ᠢ ᠲᠠᠭᠠᠷᠠᠭᠤᠯᠤᠨ ᠭᠣᠨᠵᠣᠭᠣᠢ ᠳᠥᠷᠪᠡᠯᠵᠢᠨ ᠡᠰᠬᠡᠵᠦ᠂ ᠠᠮᠠᠨ ᠢᠷᠣᠭᠠᠷ ᠢ᠋ ᠤᠭᠤᠲᠠᠨ ᠤ᠋ ᠳᠤᠭᠤᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠡᠰᠬᠡᠭᠡᠳ ᠶᠡᠬᠡ ᠪᠡᠶᠡ ᠶ᠋ᠢ ᠰᠢᠷᠢᠵᠦ ᠳᠠᠭᠤᠰᠤᠮᠠᠭᠴᠠ ᠲᠠᠭ᠂ ᠢᠷᠣᠭᠠᠷ ᠢ᠋ ᠡᠰᠬᠡᠨ ᠰᠢᠷᠢᠵᠦ ᠶᠡᠬᠡ ᠪᠡᠶᠡ ᠳ᠋ᠦ᠍ ᠵᠠᠯᠭᠠᠨ ᠣᠶᠣᠨᠠ᠃ ᠠᠮᠠᠨ ᠢᠷᠣᠭᠠᠷ ᠢ᠋ ᠬᠡᠷᠪᠡ ᠡᠮᠵᠢᠬᠦ ᠪᠣᠯ ᠤᠯᠠᠭᠠᠨ᠂ ᠬᠥᠬᠡ ᠥᠩᠭᠡ ᠪᠡᠷ ᠡᠮᠵᠢᠵᠦ ᠶᠡᠬᠡ ᠪᠡᠶᠡ ᠶᠢᠨ ᠢᠶᠡᠨ ᠰᠢᠷᠢᠭᠡᠰᠦᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠰᠢᠷᠢᠨᠡ᠃
ᠢᠰᠡᠭᠡᠢ ᠰᠢᠷᠢᠮᠡᠯ ᠢ᠋ ᠮᠠᠨ ᠤ᠋ ᠣᠷᠣᠨ ᠤ᠋ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠥᠪᠡᠷ ᠥᠪᠡᠷ ᠦ᠋ᠨ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠬᠡᠯᠡᠵᠦ ᠰᠢᠷᠢᠳᠡᠭ᠃ ᠢᠰᠡᠭᠡᠢ ᠰᠢᠷᠢᠮᠡᠯ ᠢ᠋ ᠲᠣᠨᠣᠭᠯᠠᠨ ᠴᠢᠮᠡᠭᠯᠡᠬᠦ ᠳ᠋ᠦ᠍ ᠮᠠᠨ ᠤ᠋ ᠣᠷᠣᠨ ᠤ᠋ ᠬᠠᠰᠠᠭ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠪᠤᠰᠤᠳ ᠠ᠋ᠴᠠ ᠣᠨᠴᠠᠯᠢᠭ ᠲᠠᠢ ᠪᠥᠭᠡᠳ ᠲᠡᠳᠡ ᠢᠰᠡᠭᠡᠢ ᠶ᠋ᠢᠨ ᠬᠡ ᠶ᠋ᠢ ᠰᠢᠭᠤᠳ ᠨᠣᠣᠰᠣ ᠪᠠᠷ ᠢ᠋ᠶ᠋ᠠᠨ ᠬᠡᠯᠡᠵᠦ ᠲᠡᠭᠦᠨ ᠢ᠋ᠶ᠋ᠡᠨ ᠤᠲᠠᠰᠤ ᠪᠠᠷ ᠵᠠᠬᠠᠯᠠᠨ ᠵᠡᠭᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠳᠠᠪᠤᠤ ᠪᠠᠷ ᠬᠡ ᠬᠠᠢᠴᠢᠯᠠᠵᠤ ᠲᠠᠯᠪᠢᠭᠠᠳ ᠪᠠᠷᠠᠭᠤᠨ᠂ ᠰᠣᠯᠣᠭᠠᠢ ᠲᠠᠮᠤᠭᠰᠠᠨ ᠤᠲᠠᠰᠤ ᠪᠠᠷ ᠵᠡᠭᠡᠭᠯᠡᠵᠦ ᠰᠢᠷᠢᠨᠡ᠃ ᠮᠥᠨ ᠨᠣᠣᠰᠣ ᠶ᠋ᠢ ᠪᠣᠳᠣᠵᠤ ᠳᠡᠪᠢᠰᠬᠡᠷ ᠪᠤᠶᠤ ᠬᠡ ᠳ᠋ᠦ᠍ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠴᠠᠭᠠᠨ ᠢᠰᠡᠭᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠠᠭᠠᠨ ᠭᠡᠰᠢᠭᠦᠨᠡ ᠶ᠋ᠢᠨ ᠦᠨᠳᠦᠰᠦ ᠶ᠋ᠢ ᠤᠬᠤᠵᠤ ᠬᠠᠲᠠᠭᠠᠭᠠᠳ ᠨᠦᠳᠦᠵᠦ ᠨᠤᠨᠲᠠᠭᠯᠠᠨ ᠤᠰᠤᠨ ᠳ᠋ᠤ᠌ ᠪᠤᠴᠠᠯᠭᠠᠨ ᠱᠦᠭᠦᠭᠡᠳ ᠳᠡᠭᠡᠷᠡ ᠡᠴᠡ ᠨᠢ ᠳᠠᠪᠤᠰᠤ᠂ ᠣᠷᠣᠰ ᠼᠤᠤ ᠬᠢᠵᠦ ᠢᠰᠡᠭᠡᠢ ᠪᠡᠨ ᠬᠠᠮᠲᠤ ᠪᠤᠴᠠᠯᠭᠠᠭᠠᠳ ᠬᠠᠲᠠᠭᠠᠬᠤ ᠳ᠋ᠤ᠌ ᠰᠢᠷᠠ ᠥᠩᠭᠡ ᠲᠡᠢ ᠪᠣᠯᠳᠠᠭ᠃ ᠢᠰᠡᠭᠡᠢ ᠳ᠋ᠦ᠍ ᠬᠡ ᠵᠠᠷᠤᠬᠤ ᠳ᠋ᠠᠭᠠᠨ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠡᠬᠢ ᠵᠠᠭᠪᠤᠷ ᠠ᠋ᠴᠠ( ᠬᠡ ᠪᠡᠨ) ᠦᠨᠳᠦᠰᠦᠯᠡᠨ ᠢᠰᠡᠭᠡᠢ ᠪᠡᠨ ᠲᠡᠩᠴᠡᠭᠦᠦ ᠬᠡᠮᠵᠢᠶᠡ ᠲᠡᠢ ᠬᠤᠪᠢᠶᠠᠵᠤ ᠤᠭ ᠵᠠᠢ ᠳ᠋ᠠᠭᠠᠨ ᠲᠣᠬᠢᠷᠠᠭᠤᠯᠤᠨ ᠴᠠᠭᠠᠰᠤ ᠪᠠᠷ ᠬᠡᠮᠵᠢᠶᠡ ᠠᠪᠴᠤ ᠲᠡᠭᠦᠨ ᠢ᠋ᠶ᠋ᠡᠨ 2—10 ᠬᠦᠷᠲᠡᠯᠡ ᠲᠡᠩᠴᠡᠭᠦᠦ ᠨᠤᠭᠤᠯᠵᠤ ᠬᠡ ᠪᠡᠨ ᠵᠢᠷᠤᠵᠤ ᠬᠠᠢᠴᠢᠯᠠᠨᠠ᠃ ᠴᠠᠭᠠᠨ ᠢᠰᠡᠭᠡᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠪᠤᠶᠤ ᠵᠠᠬᠠ ᠪᠠᠷ ᠴᠢᠮᠡᠭᠯᠡᠬᠦ ᠬᠡ ᠤᠭᠠᠯᠵᠠ ᠶ᠋ᠢ ᠲᠠᠯᠪᠢᠬᠤ ᠳ᠋ᠠᠭᠠᠨ ᠬᠡ ᠶ᠋ᠢ ᠬᠠᠢᠴᠢᠯᠠᠵᠤ ᠵᠦᠢᠵᠦ ᠣᠶᠣᠭᠠᠳ ᠲᠣᠷᠭᠠ᠂ ᠳᠠᠪᠤᠤ᠂ ᠳᠠᠯᠢᠩᠪᠤ᠂ ᠴᠡᠮᠪᠡ ᠵᠡᠷᠭᠡ ᠪᠡᠷ ᠬᠡ ᠬᠠᠢᠴᠢᠯᠠᠨ ᠥᠩᠭᠡ ᠬᠠᠷᠰᠢᠭᠤᠯᠤᠨ ᠣᠶᠣᠵᠤ ᠥᠩᠭᠡ ᠪᠦᠷᠢ ᠶ᠋ᠢᠨ ᠤᠲᠠᠰᠤ ᠪᠠᠷ ᠬᠣᠰᠢᠮᠠᠭᠯᠠᠨᠠ᠃ ᠬᠠᠰᠠᠭ ᠤ᠋ᠳ ᠨᠡᠬᠡᠮᠡᠯ᠂ ᠰᠢᠷᠢᠮᠡᠯ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠨᠣᠣᠰᠣᠨ ᠤᠲᠠᠰᠤ ᠶ᠋ᠢ ᠡᠭᠡᠷᠡᠬᠦ ᠳ᠋ᠡᠭᠡᠨ ᠬᠠᠯᠬᠠ ᠠ᠋ᠴᠠ ᠢᠯᠭᠠᠭᠠ ᠲᠠᠢ ᠪᠥᠭᠡᠳ ᠡᠭᠡᠷᠡᠦᠯ ᠦ᠋ᠨ ᠳᠤᠭᠤᠢ ᠶ᠋ᠢ ᠳᠡᠭᠡᠭᠰᠢ ᠨᠢ ᠬᠠᠷᠠᠭᠤᠯᠤᠨ ᠪᠠᠷᠢᠵᠤ ᠴᠢᠭᠲᠠ ᠲᠡᠭᠡᠭᠯᠡᠭᠦᠷ ᠲᠤᠨᠢ ᠤᠲᠠᠰᠤ ᠪᠠᠨ ᠲᠣᠭᠲᠠᠭᠠᠵᠤ ᠡᠰᠢ ᠶ᠋ᠢ ᠨᠢ ᠭᠤᠶᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠭᠠᠮᠵᠢᠩᠳᠠᠨ ᠡᠷᠴᠢᠯᠡᠨᠡ᠃
ᠵᠢᠵᠢᠭ ᠰᠢᠷᠢᠮᠡᠯ ᠬᠢᠬᠦ ᠳ᠋ᠡᠭᠡᠨ ᠬᠠᠰᠠᠭ ᠤ᠋ᠳ ᠭᠠᠷ ᠢᠰᠡᠭᠡᠢ ᠪᠡᠷ ᠬᠢᠳᠡᠭ ᠪᠥᠭᠡᠳ ᠲᠡᠭᠦᠨ ᠳ᠋ᠦ᠍ ᠳᠠᠳᠤᠯᠭᠠᠵᠢᠭᠰᠠᠨ ᠬᠥᠮᠦᠰ ᠪᠢᠯᠡ᠃ ᠰᠢᠷᠲᠡᠭ ᠪᠤᠶᠤ ᠪᠤᠰᠤᠳ ᠶᠠᠭᠤᠮᠠ ᠬᠢᠬᠦ ᠬᠡᠮᠵᠢᠶᠡᠨ ᠡᠴᠡ ᠪᠡᠨ ᠬᠠᠮᠢᠶᠠᠷᠴᠤ ᠶᠡᠬᠡ ᠪᠠᠭᠠ ᠶᠠᠩᠵᠤ ᠶᠠᠩᠵᠤ ᠪᠠᠷ ᠬᠢᠬᠦ ᠪᠥᠭᠡᠳ ᠲᠡᠭᠦᠨ ᠳ᠋ᠦ᠍ ᠲᠠᠯᠪᠢᠬᠤ ᠵᠡᠭᠡᠭ ᠤᠲᠠᠰᠤ ᠶ᠋ᠢ ᠭᠣᠭᠴᠣᠭᠠᠯᠠᠨ ᠭᠤᠷᠪᠠᠨ ᠳᠠᠪᠬᠤᠷ ᠡᠷᠴᠢᠯᠡᠵᠦ ᠭᠤᠷᠮᠤᠰᠤᠨ ᠵᠡᠬᠡᠭ ᠳᠠᠷᠤᠭᠤᠯᠬᠤ ᠤᠲᠠᠰᠤ ᠪᠠᠨ ᠡᠭᠡᠷᠡᠵᠦ ᠳᠠᠪᠬᠤᠷᠯᠠᠨ ᠨᠡᠢᠳᠬᠡᠵᠦ ᠣᠶᠣᠨᠠ᠃ ᠵᠡᠬᠡᠭ ᠪᠤᠶᠤ ᠨᠡᠬᠡᠮᠡᠯ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠤᠲᠠᠰᠤ ᠶ᠋ᠢ ᠥᠪᠡᠷᠰᠡᠳ ᠦ᠋ᠨ ᠥᠪᠡᠷᠮᠢᠴᠡ ᠠᠷᠭᠠ ᠪᠠᠷ ᠪᠣᠳᠣᠵᠤ ᠪᠡᠯᠡᠳᠬᠡᠨᠡ᠃ ᠵᠡᠭᠡᠭ ᠵᠢᠷᠤᠭ ᠤ᠋ᠨ ᠴᠢᠮᠡᠭ ᠤᠴᠢᠷ ᠥᠩᠭᠡ ᠶ᠋ᠢ ᠵᠥᠪ ᠬᠣᠣᠰᠯᠠᠭᠤᠯᠳᠠᠭ᠃
ᠵᠢᠷᠤᠭ44
ᠲᠣᠨᠣᠯᠵᠢᠨ ᠬᠡ ᠪᠡᠷ ᠰᠢᠷᠢᠭᠰᠡᠨ ᠠᠶᠠᠭᠠ ᠲᠠᠪᠠᠭ ᠤ᠋ᠨ ᠪᠣᠷᠲᠣᠭᠣ ᠬᠡᠯᠪᠡᠷᠢ ᠶ᠋ᠢᠨ ᠰᠢᠷᠢᠮᠡᠯ ᠰᠠᠪᠠ
ᠵᠢᠷᠤᠭ45
ᠳᠤᠭᠤᠢ ᠬᠠᠪᠲᠠᠭᠠ ᠬᠡᠯᠪᠡᠷᠢ ᠲᠡᠢ ᠲᠠᠪᠠᠭ ᠤ᠋ᠨ ᠭᠡᠷ
ᠵᠢᠷᠤᠭ46
ᠲᠦᠮᠡᠨ ᠨᠠᠰᠤᠲᠤ ᠭᠠᠷᠭᠠᠵᠤ ᠰᠢᠷᠢᠭᠰᠡᠨ ᠢᠰᠡᠭᠡᠢ ᠬᠡᠲᠡᠪᠴᠢ
ᠬᠠᠶᠠᠭᠠᠪᠴᠢ ᠬᠠᠶᠠᠭᠠᠪᠴᠢ ᠭᠡᠷ ᠲᠦ᠍ ᠤᠰᠤ᠂ ᠰᠠᠯᠬᠢ᠂ ᠰᠢᠪᠠᠷ ᠣᠷᠣᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠳᠠᠭ ᠪᠥᠭᠡᠳ
ᠭᠣᠶᠣᠮᠰᠣᠭ ᠬᠢᠵᠦ ᠴᠢᠮᠡᠭ ᠮᠠᠶᠢᠭ ᠢ᠋ᠶ᠋ᠠᠷ ᠬᠡᠷᠡᠭᠯᠡᠨᠡ᠃ ᠬᠠᠶᠠᠭᠠᠪᠴᠢᠨ ᠳ᠋ᠤ᠌ ᠬᠣᠷᠯᠣ ᠪᠤᠶᠤ ᠪᠠᠶᠠᠨ ᠬᠣᠰᠢᠭᠤ ᠵᠡᠭᠡᠭ ᠰᠢᠷᠢᠵᠦ ᠵᠠᠬᠠ ᠪᠠᠷ ᠨᠢ ᠡᠷᠭᠢᠨ ᠲᠣᠭᠣᠷᠢᠨ ᠵᠡᠬᠡᠭ ᠲᠠᠯᠪᠢᠵᠤ ᠪᠡᠬᠢᠯᠡᠨᠡ᠃ ᠬᠠᠶᠠᠭᠠᠪᠴᠢ ᠶ᠋ᠢ ᠬᠡᠯᠬᠢᠶᠡ ᠮᠣᠳᠣ ᠪᠠᠷ ᠬᠢᠬᠦ ᠠᠷᠭᠠ ᠬᠣᠵᠢᠭᠤ ᠦᠶᠡ ᠳ᠋ᠦ᠍ ᠨᠡᠪᠲᠡᠷᠡᠭᠰᠡᠨ ᠪᠥᠭᠡᠳ ᠪᠣᠷᠣᠭᠠᠨ ᠤᠰᠤᠨ ᠳ᠋ᠤ᠌ ᠢᠯᠵᠠᠷᠠᠬᠤ ᠦᠭᠡᠢ ᠬᠠᠮᠤᠭ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃ ᠢᠰᠡᠭᠡᠢ ᠭᠡᠷ ᠢ᠋ ᠴᠢᠮᠡᠬᠦ ᠳ᠋ᠡᠭᠡᠨ ᠳᠡᠭᠡᠪᠦᠷ ᠦ᠋ᠨ ᠬᠣᠷᠮᠣᠢ᠂ ᠲᠤᠭᠤᠷᠭᠠᠨ ᠤ᠋ ᠬᠠᠲᠠᠪᠴᠢ ᠶ᠋ᠢᠨ ᠵᠠᠬᠠ ᠪᠠᠷ ᠴᠡᠮᠪᠡ᠂ ᠳᠠᠪᠤᠤ ᠪᠠᠷ ᠤᠭᠠᠯᠵᠠ ᠪᠤᠶᠤ ᠠᠯᠤᠬᠠᠨ ᠬᠡ ᠲᠠᠯᠪᠢᠵᠤ ᠵᠠᠬᠠ ᠪᠠᠷ ᠨᠢ ᠪᠠᠷᠠᠭᠤᠨ ᠰᠣᠯᠣᠭᠠᠢ ᠲᠠᠮᠤᠭᠰᠠᠨ ᠬᠣᠣᠰ ᠵᠡᠭᠡᠭ ᠢ᠋ᠶ᠋ᠡᠷ ᠬᠣᠰᠢᠮᠠᠭ ᠲᠠᠯᠪᠢᠳᠠᠭ᠃
ᠮᠥᠨ ᠡᠷᠦᠬᠡ ᠶ᠋ᠢᠨ ᠵᠠᠬᠠ ᠪᠠᠷ ᠬᠡ ᠲᠠᠯᠪᠢᠬᠤ ᠳ᠋ᠠᠭᠠᠨ ᠬᠣᠰᠢᠭᠤᠯᠳᠠᠵᠤ ᠬᠠᠯᠵᠠᠯᠠᠨ ᠲᠣᠨᠣᠭᠯᠠᠬᠤ ᠠ᠋ᠴᠠ ᠭᠠᠳᠠᠨᠠ ᠡᠷᠦᠬᠡ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠳᠠᠪᠤᠤ ᠪᠤᠶᠤ ᠬᠣᠣᠰ ᠨᠠᠷᠠᠨ ᠵᠡᠭᠡᠭ ᠢ᠋ᠶ᠋ᠡᠷ ᠬᠣᠰᠢᠮᠠᠭ ᠲᠠᠯᠪᠢᠵᠤ ᠬᠣᠰᠢᠮᠠᠭ ᠤ᠋ᠨ ᠬᠣᠶᠠᠷ ᠦᠵᠦᠭᠦᠷ ᠢ᠋ ᠳᠤᠭᠤᠢᠯᠠᠨ ᠤᠭᠠᠯᠵᠠ ᠭᠠᠷᠭᠠᠵᠤ ᠲᠣᠨᠣᠭᠯᠠᠨᠠ᠃ ᠭᠡᠷ ᠦ᠋ᠨ ᠴᠢᠭᠲᠠᠭᠠ ᠭᠡᠳᠡᠭ ᠬᠥᠮᠦᠨ ᠬᠠᠷᠠᠬᠤ ᠳ᠋ᠤ᠌ ᠲᠣᠳᠣᠷᠬᠠᠢ ᠡᠭᠦᠷᠭᠡ ᠦᠢᠯᠡᠳᠦᠯ ᠦᠭᠡᠢ ᠮᠡᠲᠦ ᠬᠠᠷᠠᠭᠳᠠᠬᠤ ᠪᠣᠯᠪᠠᠴᠤ ᠰᠠᠯᠬᠢ ᠰᠢᠭᠤᠷᠭᠠᠨ ᠲᠠᠢ ᠦᠶᠡ ᠳ᠋ᠦ᠍ ᠭᠡᠷ ᠦ᠋ᠨ ᠭᠣᠣᠯ ᠳᠠᠷᠤᠭᠤᠯᠭᠠ ᠪᠣᠯᠳᠠᠭ᠃
ᠮᠣᠩᠭᠣᠯ ᠳ᠋ᠤ᠌ ᠢᠯᠠᠩᠭᠤᠶᠠ ᠬᠠᠪᠤᠷ ᠶᠡᠬᠡ ᠰᠠᠯᠬᠢᠯᠠᠳᠠᠭ ᠪᠥᠭᠡᠳ 12m / ᠰᠧᠺᠦ᠋ᠨ᠋ᠳ᠋ ᠰᠠᠯᠬᠢ ᠶ᠋ᠢ ᠶᠡᠷᠦᠳᠡ ᠶ᠋ᠢᠨ ᠰᠠᠯᠬᠢ ᠭᠡᠵᠦ ᠦᠵᠡᠳᠡᠭ᠃ ᠮᠣᠩᠭᠣᠯ ᠭᠡᠷ ᠰᠠᠯᠬᠢᠨ ᠳ᠋ᠤ᠌ ᠤᠨᠠᠳᠠᠭ ᠤᠴᠢᠷ ᠲᠡᠭᠦᠨ ᠢ᠋ ᠳᠡᠭᠡᠭᠦᠷ ᠳᠠᠷᠤᠬᠤ ᠠ᠋ᠴᠠ ᠭᠠᠳᠠᠨᠠ ᠴᠢᠭᠲᠠᠭᠠ ᠠᠪᠬᠤ ᠪᠤᠶᠤ ᠭᠣᠣᠯ ᠳᠠᠷᠤᠭᠤᠯᠬᠤ ᠨᠢ ᠨᠠᠢᠳᠠᠪᠤᠷᠢ ᠲᠠᠢ ᠠᠷᠭᠠ ᠤᠴᠢᠷ ᠴᠢᠭᠲᠠ ᠶ᠋ᠢ ᠭᠤᠷᠮᠤᠰᠤᠯᠠᠵᠤ ᠡᠷᠴᠢᠯᠡᠭᠰᠡᠨ ᠪᠤᠶᠤ ᠰᠦᠯᠵᠢᠭᠰᠡᠨ ᠬᠢᠯᠭᠠᠰᠤᠨ ᠳᠡᠭᠡᠰᠦ ᠶ᠋ᠢ ᠭᠠᠳᠠᠭᠤᠷ ᠨᠢ ᠤᠯᠠᠭᠠᠨ ᠳᠠᠪᠤᠤ ᠪᠠᠷ ᠪᠦᠷᠢᠵᠦ ᠬᠢᠬᠦ ᠪᠠ ᠰᠠᠯᠬᠢᠨ ᠲᠠᠢ ᠳ᠋ᠤ᠌ ᠰᠢᠭᠤᠳᠠᠢ ᠳ᠋ᠤ᠌ ᠡᠯᠡᠰᠦ ᠬᠠᠢᠷ᠂ ᠴᠢᠯᠠᠭᠤ ᠬᠢᠬᠦ ᠪᠤᠶᠤ ᠡᠰᠡᠪᠡᠯ ᠲᠣᠮᠣ ᠴᠢᠯᠠᠭᠤ ᠶ᠋ᠢ ᠴᠢᠭᠲᠠᠭᠠ ᠠ᠋ᠴᠠ ᠤᠶᠠᠵᠤ ᠳᠠᠷᠤᠭᠤᠯᠭᠠ ᠬᠢᠨᠡ᠃ ᠰᠠᠯᠬᠢ ᠦᠭᠡᠢ ᠦᠶᠡ ᠳ᠋ᠦ᠍ ᠴᠢᠭᠲᠠᠭᠠ ᠶ᠋ᠢᠨ ᠦᠵᠦᠭᠦᠷ ᠢ᠋ ᠥᠯᠵᠡᠢ ᠭᠠᠷᠭᠠᠨ ᠣᠨᠢ ᠳ᠋ᠤ᠌ ᠲᠣᠭᠲᠠᠭᠠᠨᠠ᠃ ᠡᠷᠦᠬᠡ ᠶ᠋ᠢᠨ ᠣᠭᠣᠰᠣᠷ ᠢ᠋ ᠰᠢᠨᠡ ᠵᠢᠯ ᠪᠣᠯᠬᠤ ᠪᠤᠶᠤ ᠵᠠᠯᠠᠭᠤ ᠬᠣᠣᠰ ᠬᠤᠷᠢᠮᠯᠠᠬᠤ ᠳ᠋ᠤ᠌ ᠦᠵᠦᠭᠦᠷ ᠢ᠋ ᠥᠯᠵᠡᠢ ᠤᠲᠠᠰᠤ ᠪᠣᠯᠭᠠᠨ ᠰᠦᠯᠵᠢᠵᠦ ᠭᠡᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨᠠ᠃ ᠪᠤᠰᠤᠳ ᠦᠶᠡ ᠳ᠋ᠦ᠍ ᠡᠷᠦᠬᠡ ᠶ᠋ᠢ ᠰᠠᠯᠬᠢᠨ ᠳ᠋ᠤ᠌ ᠳᠡᠷᠪᠡᠭᠦᠯᠬᠦ ᠦᠭᠡᠢ ᠪᠤᠶᠤ ᠲᠡᠭᠰᠢᠯᠡᠨ ᠲᠠᠲᠠᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠬᠡᠷᠡᠭᠯᠡᠬᠦ ᠪᠥᠭᠡᠳ ᠡᠷᠦᠬᠡ ᠲᠠᠲᠠᠬᠤ᠂ ᠲᠡᠭᠰᠢᠯᠡᠭᠰᠡᠨ ᠦᠶᠡ ᠳ᠋ᠦ᠍ ᠭᠡᠷ ᠦ᠋ᠨ ᠳᠤᠮᠳᠠ ᠪᠦᠰᠡ ᠡᠴᠡ ᠤᠶᠠᠵᠤ ᠪᠡᠬᠢᠯᠡᠨᠡ᠃ ᠡᠷᠦᠬᠡ ᠶ᠋ᠢ ᠲᠠᠲᠠᠬᠤ ᠳ᠋ᠠᠭᠠᠨ ᠭᠡᠷ ᠢ᠋ᠶ᠋ᠡᠨ ᠨᠠᠷᠠ ᠵᠥᠪ ᠲᠣᠭᠣᠷᠢᠵᠤ ᠲᠠᠲᠠᠬᠤ ᠨᠢ ᠲᠡᠷᠡ ᠠᠢᠯ ᠤ᠋ᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠰᠢᠨᠡ ᠥᠷᠯᠥᠭᠡ ᠡᠬᠢᠯᠡᠵᠦ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ ᠮᠠᠨᠳᠤᠵᠤ ᠪᠠᠢᠭᠠ ᠶ᠋ᠢ ᠪᠡᠯᠭᠡᠳᠡᠬᠦ ᠪᠠ ᠲᠡᠭᠰᠢᠯᠡᠬᠦ ᠳ᠋ᠡᠭᠡᠨ ᠨᠠᠷᠠ ᠪᠤᠷᠤᠭᠤ ᠭᠡᠷ ᠦ᠋ᠨ ᠵᠡᠭᠦᠨ ᠲᠠᠯᠠ ᠪᠠᠷ ᠲᠣᠭᠣᠷᠢᠭᠤᠯᠵᠤ ᠲᠡᠭᠰᠢᠯᠡᠳᠡᠭ ᠨᠢ ᠨᠠᠷᠠ ᠲᠦᠷ ᠵᠢᠷᠭᠠᠵᠤ ᠪᠠᠢᠭᠠ ᠶ᠋ᠢ ᠭᠡᠷᠡᠴᠢᠯᠡᠬᠦ ᠪᠥᠭᠡᠳ ᠡᠷᠦᠬᠡ ᠲᠡᠭᠰᠢᠯᠡᠬᠦ ᠡᠴᠡ ᠡᠮᠦᠨᠡ ᠵᠤᠯᠠ᠂ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠵᠤ ᠭᠡᠷ ᠲᠡᠭᠡᠨ ᠭᠡᠷᠡᠯ ᠲᠡᠢ ᠪᠣᠯᠭᠠᠨᠠ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠣᠷᠣᠰᠢᠨ ᠰᠠᠭᠤᠭᠰᠠᠨ ᠥᠷᠥᠭᠡ ᠴᠠᠭᠠᠨ ᠭᠡᠷ ᠠᠮᠢᠳᠤᠷᠠᠯ ᠤ᠋ᠨ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠵᠦ ᠪᠠᠢᠳᠠᠭ ᠴᠢᠬᠤᠯᠠ ᠬᠡᠷᠡᠭᠯᠡᠯ ᠪᠥᠭᠡᠳ ᠲᠡᠭᠦᠨ ᠢ᠋ ᠦᠯᠢᠭᠡᠷ ᠲᠤᠤᠯᠢᠰ᠂ ᠢᠷᠦᠭᠡᠯ ᠮᠠᠭᠲᠠᠭᠠᠯ ᠳ᠋ᠠᠭᠠᠨ ᠣᠯᠠᠨᠲᠠ ᠳᠤᠷᠠᠳᠤᠭᠰᠠᠨ ᠪᠠᠢᠳᠠᠭ᠃ ᠭᠡᠷ ᠦ᠋ᠨ ᠡᠳ᠋ ᠠᠩᠭᠢ ᠪᠦᠷ ᠣᠨᠴᠠᠯᠢᠭ ᠲᠣᠬᠢᠷᠠᠭᠰᠠᠨ ᠣᠨᠢᠰᠣᠭᠠ ᠲᠠᠢ ᠪᠠᠢᠳᠠᠭ᠃
ᠵᠢᠷᠤᠭ47
ᠪᠦᠷᠢᠨ ᠴᠢᠮᠡᠭᠯᠡᠯ ᠲᠡᠢ ᠭᠡᠷ ᠪᠠ ᠬᠠᠯᠵᠠ ᠲᠠᠢ ᠭᠡᠷ
ᠭᠡᠷ ᠦ᠋ᠨ ᠡᠭᠦᠳᠡ ᠶ᠋ᠢ ᠰᠢᠷᠢᠮᠡᠯ ᠢ᠋ᠶ᠋ᠡᠷ ᠬᠢᠳᠡᠭ ᠪᠠᠢᠬᠤ ᠳ᠋ᠤ᠌ ᠭᠣᠣᠯᠳᠠᠭᠤ ᠬᠥᠬᠡ ᠥᠩᠭᠡ ᠪᠡᠷ ᠥᠩᠭᠡᠯᠡᠵᠦ ᠤᠰᠤᠨ ᠳᠣᠯᠭᠢᠶᠠ᠂ ᠬᠤᠯᠤᠰᠤᠨ ᠰᠦᠯᠵᠢᠶᠡ ᠬᠡ ᠭᠠᠷᠭᠠᠨ ᠬᠥᠪᠦᠭᠡ ᠪᠡᠷ ᠨᠢ ᠡᠪᠡᠷ ᠤᠭᠠᠯᠵᠠ ᠬᠥᠭᠡᠭᠡᠴᠡᠯᠳᠦᠭᠦᠷ᠂ ᠮᠤᠰᠬᠢᠶᠠ ᠭᠥᠷᠥᠯᠭᠡ ᠬᠡ ᠲᠠᠯᠪᠢᠨᠠ᠃ ᠤᠰᠤᠨ ᠬᠡ ᠰᠢᠷᠢᠳᠡᠭ ᠪᠠᠢᠭᠰᠠᠨ ᠨᠢ ᠭᠦᠨ ᠭᠦᠨᠵᠡᠭᠡᠢ ᠤᠳᠬᠠ ᠲᠠᠢ ᠪᠥᠭᠡᠳ ᠰᠠᠢᠬᠠᠨ ᠪᠦᠬᠦᠨ ᠦᠨᠡᠨ ᠠᠷᠢᠭᠤᠨ ᠳᠠᠯᠠᠢ ᠶ᠋ᠢᠨ ᠮᠠᠨᠳᠠᠯ ᠳᠡᠭᠡᠭᠦᠷ ᠨᠠᠷᠠ ᠮᠠᠨᠳᠤᠬᠤ ᠠᠳᠠᠯᠢ ᠰᠠᠴᠤᠷᠠᠨ ᠭᠡᠢᠭᠰᠡᠭᠡᠷ ᠣᠷᠣᠵᠤ ᠢᠷᠡᠬᠦ ᠡᠴᠡ ᠭᠠᠳᠠᠨᠠ ᠬᠠᠷᠠ ᠮᠠᠭᠤ ᠰᠠᠨᠠᠭᠠᠲᠠᠨ ᠡᠭᠦᠳᠡᠨ ᠳ᠋ᠦ᠍ ᠪᠠᠢᠭᠠ ᠤᠰᠤᠨ ᠳᠠᠯᠠᠢ ᠳ᠋ᠤ᠌ ᠤᠨᠠᠵᠤ ᠰᠠᠭᠠᠲᠠᠬᠤ ᠪᠣᠯᠲᠤᠭᠠᠢ ᠭᠡᠰᠡᠨ ᠤᠳᠬᠠ ᠲᠠᠢ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠰᠡᠷᠡᠩ ᠂ ᠦᠯᠵᠡᠢᠪᠠᠭᠠᠲᠤᠷ ᠂ ᠱᠠᠭᠰᠠᠯ ᠂ ᠡᠷᠳᠡᠨᠢᠭᠣᠤᠠ᠂ ᠣᠶᠤᠨᠪᠠᠲᠤ ᠂ ᠲᠣᠭᠲᠠᠭᠤᠨᠪᠠᠶᠠᠷ ᠂ ᠣᠳᠬᠠᠨᠰᠣᠠ᠂ᠡᠷᠳᠡᠨᠢᠭᠣᠤᠠ᠂ ᠰᠠᠢᠨᠪᠢᠯᠢᠭ᠌ ᠂ ᠭᠠᠷᠮᠠ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ