ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠬᠣᠶᠠᠳᠤᠭᠠᠷ ᠪᠦᠯᠦᠭ19-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ
290ᠬᠣᠶᠠᠳᠤᠭᠠᠷ ᠪᠦᠯᠦᠭ19-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ
ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ ᠪᠤᠰᠤᠳ ᠬᠤᠪᠴᠠᠰᠤᠨ ᠤ᠋ ᠨᠢᠭᠡ ᠠᠳᠠᠯᠢ ᠬᠥᠮᠦᠨ ᠦ᠌ ᠬᠤᠪᠴᠠᠰᠤ ᠬᠡᠷᠡᠭᠯᠡᠬᠦ ᠪᠣᠯᠤᠭᠰᠠᠨ ᠦᠶᠡ ᠲᠡᠢ ᠬᠣᠯᠪᠣᠭᠠ ᠲᠠᠢ ᠪᠢᠯᠡ᠃ ᠮᠠᠯᠠᠭᠠᠢ ᠶ᠋ᠢᠨ ᠭᠠᠷᠤᠯ ᠡᠭᠦᠰᠦᠯ ᠦ᠋ᠨ ᠡᠬᠢ ᠶ᠋ᠢ ᠴᠢᠬᠢᠪᠴᠢ ᠪᠤᠶᠤ ᠬᠤᠯᠤᠭᠤᠪᠴᠢ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠲᠠᠭᠠᠮᠠᠭᠯᠠᠵᠤ ᠪᠠᠢᠨᠠ᠃ ᠬᠥᠮᠦᠨ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠶᠠᠪᠤᠬᠤ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠤᠷᠢᠳᠠᠪᠡᠷ ᠴᠢᠬᠢ ᠳᠠᠭᠠᠷᠠᠳᠠᠭ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠴᠦ᠍ ᠲᠡᠢᠮᠦ ᠪᠠᠢᠵᠤ ᠪᠣᠯᠬᠤ ᠶᠤᠮ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠮᠠᠯᠠᠭᠠᠢ ᠣᠯᠠᠨ ᠶᠠᠩᠵᠤ ᠪᠠᠢᠳᠠᠭ ᠪᠥᠭᠡᠳ ᠲᠤᠰ ᠣᠷᠣᠨ ᠤ᠋ ᠳᠣᠲᠣᠷᠠᠬᠢ ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠤ᠋ ᠮᠠᠯᠠᠭᠠᠢ ᠬᠣᠭᠣᠷᠣᠨᠳᠣ ᠪᠠᠨ ᠥᠭᠡᠷᠡ ᠥᠭᠡᠷᠡ ᠪᠣᠯᠪᠠᠴᠤ ᠶᠡᠷᠦᠩᠬᠡᠢ ᠬᠡᠯᠪᠡᠷᠢ ᠨᠢ ᠣᠢᠷᠠᠯᠴᠠᠭᠠ ᠪᠠᠢᠳᠠᠭ᠃ ᠡᠪᠦᠯ ᠦ᠋ᠨ ᠮᠠᠯᠠᠭᠠᠢ ᠳ᠋ᠤ᠌ ᠡᠷᠲᠡ ᠦᠶᠡ ᠡᠴᠡ ᠬᠣᠨᠢᠨ ᠤ᠋ ᠨᠡᠬᠡᠢ᠂ ᠬᠤᠷᠠᠭᠠ ᠢᠰᠢᠭᠡᠨ ᠦ᠌ ᠠᠷᠠᠰᠤ᠂ ᠦᠰᠦᠯᠢᠭ ᠠᠩ ᠤ᠋ᠨ ᠠᠷᠠᠰᠤ ᠪᠣᠯᠬᠤ ᠬᠠᠷᠠ ᠪᠤᠯᠠᠭᠠ᠂ ᠦᠨᠡᠭᠡ᠂ ᠮᠠᠨᠤᠤᠯ᠂ ᠲᠠᠷᠪᠠᠭᠠ ᠵᠡᠷᠭᠡ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠵᠠᠢ᠃ ᠲᠡᠭᠦᠨ ᠡᠴᠡ ᠭᠠᠳᠠᠨᠠ ᠮᠣᠩᠭᠣᠯ ᠤ᠋ᠨ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠠᠢᠮᠠᠭ ᠢᠯᠠᠩᠭᠤᠶᠠ ᠬᠢᠳᠠᠨ ᠤ᠋ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠨᠡᠬᠡᠮᠡᠯ ᠶᠡᠬᠡ ᠬᠥᠭᠵᠢᠵᠦ ᠮᠠᠯ ᠤ᠋ᠨ ᠨᠣᠣᠰᠣ ᠪᠠᠷ ᠨᠡᠬᠡᠭᠰᠡᠨ ᠮᠠᠯᠠᠭᠠᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠮᠡᠷ ᠪᠠᠷᠢᠮᠲᠠ ᠴᠤ᠌ ᠪᠠᠢᠳᠠᠭ᠃
ᠬᠡᠯᠪᠡᠷᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠰᠡᠭᠦᠯ ᠦ᠋ᠨ ᠵᠠᠭᠤᠭᠠᠳ ᠵᠢᠯ ᠳ᠋ᠦ᠍ ᠱᠥᠪᠥᠭᠡᠷ ᠣᠷᠣᠢ ᠲᠠᠢ ᠪᠣᠯᠬᠤ ᠬᠠᠨᠳᠤᠯᠭᠠ ᠲᠠᠢ ᠪᠣᠯᠵᠠᠢ᠃ ᠮᠣᠩᠭᠣᠯ ᠳᠡᠪᠡᠯ ᠦᠨᠳᠦᠰᠦᠲᠡᠨ ᠦ᠌ ᠵᠠᠩᠰᠢᠯ ᠬᠥᠮᠦᠨ ᠠᠷᠠᠳ ᠤ᠋ᠨ ᠵᠠᠩ ᠦᠢᠯᠡ ᠶ᠋ᠢ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠦ᠌ ᠨᠢᠭᠡ ᠠᠳᠠᠯᠢ ᠮᠠᠯᠠᠭᠠᠢ ᠶ᠋ᠢᠨ ᠣᠷᠣᠢ ᠶ᠋ᠢᠨ ᠰᠠᠮᠫᠠᠨ ᠡᠷᠲᠡᠨ ᠦ᠌ ᠮᠣᠩᠭᠣᠯᠴᠤᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠨᠠᠷᠠ᠂ ᠰᠠᠷᠠ ᠶ᠋ᠢᠨ ᠠᠷᠠᠳ ᠲᠦᠮᠡᠨ ᠭᠡᠵᠦ ᠦᠵᠡᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠨᠠᠷᠠ ᠶ᠋ᠢ ᠲᠥᠯᠥᠭᠡᠯᠡᠭᠰᠡᠨ ᠭᠡᠵᠦ ᠦᠵᠡᠳᠡᠭ᠃ ᠮᠠᠯᠠᠭᠠᠢ ᠶ᠋ᠢᠨ ᠵᠠᠯᠠᠭᠠ᠂ ᠱᠥᠪᠥᠭᠡᠷ ᠣᠷᠣᠢ ᠭᠤᠴᠢᠨ ᠬᠣᠶᠠᠷ ᠣᠶᠣᠳᠠᠯ ᠲᠠᠢ ᠪᠠᠢᠳᠠᠭ ᠨᠢ《ᠭᠤᠴᠢᠨ ᠬᠣᠶᠠᠷ ᠦᠶᠡ ᠶ᠋ᠢᠨ ᠠᠷᠠᠳ ᠲᠦᠮᠡᠨ ᠦ᠌》 ᠵᠢᠷᠦᠬᠡ ᠶ᠋ᠢ ᠡᠭᠡᠭᠡᠭᠰᠡᠨ ᠨᠠᠷᠠᠨ ᠤ᠋ ᠰᠠᠴᠤᠷᠠᠭ ᠶᠤᠮ᠃
ᠮᠠᠯᠠᠭᠠᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠪᠠᠢᠳᠠᠭ ᠬᠣᠶᠠᠷ ᠪᠦᠴᠡ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ᠂ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠦ᠌ ᠪᠠᠶᠠᠷ ᠢ᠋ ᠢᠯᠡᠷᠬᠡᠢᠯᠡᠳᠡᠭ ᠠᠵᠢ᠃ ᠬᠥᠮᠦᠨ ᠦ᠌ ᠲᠡᠷᠢᠭᠦᠨ ᠦ᠌ ᠳᠡᠭᠡᠷᠡ ᠪᠠᠢᠳᠠᠭ ᠮᠠᠯᠠᠭᠠᠢ ᠳ᠋ᠤ᠌ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠵᠠᠩᠰᠢᠯ ᠢ᠋ᠶ᠋ᠠᠷ ᠣᠯᠠᠨ ᠨᠠᠷᠢᠨ ᠤᠴᠢᠷ ᠤᠳᠬᠠ ᠪᠠᠢᠳᠠᠭ᠃
ᠮᠠᠯᠠᠭᠠᠢ ᠶ᠋ᠢ ᠭᠢᠰᠬᠢᠬᠦ᠂ ᠳᠡᠭᠡᠭᠦᠷ ᠨᠢ ᠠᠯᠬᠤᠬᠤ ᠵᠡᠷᠭᠡ ᠶ᠋ᠢ ᠮᠠᠯᠠᠭᠠᠢ ᠶ᠋ᠢᠨ ᠡᠵᠡᠨ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠭᠡᠵᠦ ᠦᠵᠡᠳᠡᠭ᠃
ᠮᠣᠩᠭᠣᠯ ᠬᠥᠮᠦᠨ ᠠᠯᠢᠪᠠ ᠶᠣᠰᠣᠯᠠᠯ ᠬᠦᠨᠳᠦᠳᠬᠡᠯ ᠳ᠋ᠦ᠍ ᠮᠠᠯᠠᠭᠠᠢ ᠡᠮᠦᠰᠳᠡᠭ ᠶᠠᠪᠤᠳᠠᠯ ᠣᠳᠣ ᠴᠤ᠌ ᠬᠡᠷᠡᠭᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃ ᠵᠢᠱ᠌ᠢᠶᠡ ᠨᠢ᠄ ᠰᠢᠭᠦᠰᠦ ᠬᠥᠨᠳᠡᠭᠡᠬᠦ᠂ ᠬᠥᠮᠦᠨ ᠳ᠋ᠦ᠍ ᠰᠦ ᠬᠠᠳᠠᠭ ᠪᠠᠷᠢᠬᠤ᠂ ᠰᠠᠷᠬᠤᠳ ᠰᠥᠩᠨᠡᠬᠦ ᠳ᠋ᠦ᠍ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠳᠡᠭ ᠵᠠᠩᠰᠢᠯ ᠲᠠᠢ᠃
ᠮᠣᠩᠭᠣᠯᠴᠤᠳ ᠡᠷᠲᠡ ᠦᠶᠡ ᠡᠴᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢᠨ ᠮᠠᠯᠠᠭᠠᠢ ᠲᠣᠭᠣᠷᠴᠣᠭ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠨᠢ ᠣᠷᠴᠢᠨ ᠦᠶᠡ ᠳ᠋ᠦ᠍ ᠴᠦ᠍ ᠬᠡᠷᠡᠭᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ ᠮᠥᠨ ᠬᠡᠷᠬᠡᠮ ᠲᠤᠰᠢᠶᠠᠯ᠂ ᠱᠠᠰᠢᠨ ᠰᠢᠲᠦᠯᠭᠡ᠂ ᠴᠡᠷᠢᠭ᠂ ᠭᠣᠶᠣᠯᠠᠯ ᠤ᠋ᠨ᠂ ᠡᠩ ᠦ᠋ᠨ᠂ ᠡᠪᠦᠯ᠂ ᠵᠤᠨ ᠤ᠋ ᠭᠡᠬᠦ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠪᠠᠢᠳᠠᠭ᠃ ᠬᠠᠭᠠᠨ ᠤ᠋ ᠲᠢᠲᠢᠮ᠂ ᠨᠣᠶᠠᠳ ᠤ᠋ᠨ ᠤᠲᠤᠭᠠ ᠵᠢᠩᠰᠡ ᠲᠡᠢ ᠮᠠᠯᠠᠭᠠᠢ᠂ ᠯᠠᠮᠠ ᠪᠤᠶᠤ ᠱᠠᠰᠢᠷ᠂ ᠱᠠᠨᠠᠮ᠂ ᠭᠣᠩᠰᠢᠶᠠ ᠮᠠᠯᠠᠭᠠᠢ᠂ ᠮᠠᠯᠴᠢᠨ ᠪᠠ ᠡᠩ ᠦ᠋ᠨ ᠠᠷᠠᠳ ᠤ᠋ᠨ ᠮᠠᠯᠠᠭᠠᠢ ᠵᠡᠷᠭᠡ ᠣᠯᠠᠨ ᠲᠥᠷᠥᠯ ᠦ᠋ᠨ ᠮᠠᠯᠠᠭᠠᠢ ᠪᠠᠢᠳᠠᠭ ᠤ᠋ᠨ ᠳᠡᠭᠡᠷᠡ ᠡᠷᠡᠭᠲᠡᠢ᠂ ᠡᠮᠡᠭᠲᠡᠢ ᠬᠥᠮᠦᠰ ᠦ᠋ᠨ ᠮᠠᠯᠠᠭᠠᠢ ᠬᠣᠭᠣᠷᠣᠨᠳᠣ ᠪᠠᠨ ᠥᠭᠡᠷᠡ ᠥᠭᠡᠷᠡ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ᠃
ᠵᠢᠷᠤᠭ 31
(1) ᠳᠤᠭᠤᠢ ᠬᠢᠯᠢᠩ ᠮᠠᠯᠠᠭᠠᠢ
(2) ᠰᠥᠨᠢᠳ ᠪᠤᠶᠤ ᠬᠦᠷᠢᠶᠡ ᠮᠠᠯᠠᠭᠠᠢ
(3) ᠯᠣᠣᠪᠤᠤᠵᠠ
(4) ᠲᠣᠭᠣᠷᠴᠣᠭ
(5) ᠱᠠᠰᠢᠷ᠂ ᠱᠠᠨᠠᠮ ᠭᠣᠩᠰᠢᠶᠠ ᠮᠠᠯᠠᠭᠠᠢ
(6) ᠵᠠᠩᠵᠤᠨ ᠮᠠᠯᠠᠭᠠᠢ
(7) ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠡᠦᠬᠡᠳ ᠦ᠋ᠨ ᠡᠮᠦᠰᠬᠦ ᠮᠠᠯᠠᠭᠠᠢ
(8) ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠡᠪᠦᠯ ᠦ᠋ᠨ ᠮᠠᠯᠠᠭᠠᠢ
ᠲᠣᠬᠢᠷᠠᠭᠰᠠᠨ ᠬᠤᠪᠴᠠᠰᠤ ᠪᠡᠶᠡ ᠶ᠋ᠢᠨ ᠴᠢᠮᠡᠭ ᠪᠠᠢᠳᠠᠭ ᠤ᠋ᠨ ᠠᠳᠠᠯᠢ ᠮᠠᠯᠠᠭᠠᠢ ᠬᠥᠮᠦᠨ ᠦ᠌ ᠪᠡᠶᠡ᠂ ᠵᠢᠰᠦ ᠴᠢᠷᠠᠢ ᠳ᠋ᠤ᠌ ᠦᠵᠡᠮᠵᠢ ᠣᠷᠣᠭᠤᠯᠳᠠᠭ ᠲᠡᠳᠦᠢ ᠦᠭᠡᠢ ᠬᠥᠮᠦᠨ ᠢ᠋ ᠭᠠᠳᠠᠨᠠ ᠶ᠋ᠢᠨ ᠬᠠᠯᠠᠭᠤᠨ ᠬᠦᠢᠲᠡᠨ ᠦ᠌ ᠨᠥᠯᠥᠭᠡ ᠡᠴᠡ ᠬᠠᠮᠠᠭᠠᠯᠠᠬᠤ᠂ ᠤᠯᠤᠰ ᠭᠦᠷᠦᠨ ᠦ᠌ ᠲᠡᠦᠬᠡ ᠰᠣᠶᠣᠯ᠂ ᠤᠭᠰᠠᠭᠠ᠂ ᠴᠣᠯᠠ ᠬᠡᠷᠬᠡᠮ ᠦ᠋ᠨ ᠢᠯᠭᠠᠭᠠ ᠶ᠋ᠢ ᠲᠣᠳᠣᠷᠠᠭᠤᠯᠬᠤ ᠵᠡᠷᠭᠡ ᠣᠯᠠᠨ ᠲᠠᠯᠠ ᠶ᠋ᠢᠨ ᠣᠨᠴᠠᠯᠢᠭ ᠲᠠᠢ ᠬᠤᠪᠴᠠᠰᠤ ᠶᠤᠮ᠃ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ᠂ ᠲᠣᠭᠣᠷᠴᠣᠭ ᠢ᠋ ᠣᠷᠴᠢᠨ ᠦᠶᠡ ᠶ᠋ᠢᠨ ᠨᠡᠢᠲᠡᠯᠢᠭ ᠬᠡᠷᠡᠭᠯᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠴᠤ᠌ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠪᠡᠶᠡ ᠲᠠᠮᠢᠷ᠂ ᠤᠷᠠᠯᠢᠭ ᠤ᠋ᠨ ᠲᠠᠢᠵᠠ ᠶ᠋ᠢ ᠴᠢᠮᠡᠭᠰᠡᠭᠡᠷ ᠪᠠᠢᠭᠠ ᠶ᠋ᠢᠨ ᠳᠡᠭᠡᠷᠡ ᠮᠠᠯᠴᠢᠳ ᠤ᠋ᠨ ᠭᠣᠣᠯ ᠬᠡᠷᠡᠭᠯᠡᠳᠡᠭ ᠬᠤᠪᠴᠠᠰᠤᠨ ᠤ᠋ ᠨᠢᠭᠡ ᠶᠦᠮ᠃
ᠡᠭᠦᠨ ᠢ᠋ᠶ᠋ᠡᠷ ᠴᠤ᠌ ᠦᠯᠦ ᠪᠠᠷᠠᠮ ᠣᠷᠴᠢᠨ ᠦᠶᠡ ᠳ᠋ᠦ᠍ ᠯᠣᠣᠪᠤᠤᠵᠠ ᠮᠠᠯᠠᠭᠠᠢ ᠶ᠋ᠢ ᠥᠪᠡᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠪᠣᠯᠤᠨ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠨ ᠠᠷᠠᠳ ᠶᠡᠬᠡᠳᠡ ᠰᠣᠨᠢᠷᠬᠠᠨ ᠬᠡᠷᠡᠭᠯᠡᠳᠡᠭ ᠪᠣᠯᠤᠯᠠ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠨᠢᠭᠡ ᠬᠡᠰᠡᠭ ᠬᠡᠷᠡᠭᠯᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠤᠯᠠᠭᠠᠨ ᠮᠠᠯᠠᠭᠠᠢ᠂ ᠳᠥᠷᠪᠡᠨ ᠲᠠᠯᠠᠲᠤ ᠪᠤᠯᠠᠭᠠᠨ ᠲᠣᠭᠣᠷᠴᠣᠭ ᠢ᠋ ᠬᠦᠷᠲᠡᠯᠡ ᠰᠡᠷᠭᠦᠭᠡᠨ ᠬᠡᠷᠡᠭᠯᠡᠬᠦ ᠪᠣᠯᠵᠠᠢ᠃ ᠡᠭᠦᠨ ᠲᠡᠢ ᠤᠶᠠᠯᠳᠤᠭᠤᠯᠵᠤ ᠣᠷᠴᠢᠨ ᠦᠶᠡ ᠳ᠋ᠦ᠍ ᠤᠯᠤᠰ ᠦᠢᠯᠡᠳᠪᠦᠷᠢᠯᠡᠵᠦ ᠪᠠᠢᠭᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠣᠯᠪᠠᠰᠤᠷᠠᠩᠭᠤᠢ ᠵᠠᠭᠪᠤᠷ ᠪᠦᠬᠦᠢ ᠪᠤᠯᠠᠭᠠ᠂ ᠬᠠᠯᠢᠭᠤ᠂ ᠦᠨᠡᠭᠡ᠂ ᠲᠠᠷᠪᠠᠭᠠ ᠶ᠋ᠢᠨ ᠠᠷᠠᠰᠤᠨ ᠤ᠋ ᠪᠣᠯᠤᠨ ᠮᠠᠯ ᠤ᠋ᠨ ᠠᠷᠠᠰᠤ ᠪᠠᠷ ᠬᠢᠭᠰᠡᠨ ᠮᠠᠯᠠᠭᠠᠢ ᠶ᠋ᠢ ᠬᠢᠵᠦ ᠰᠤᠷᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠦᠨᠳᠦᠰᠦᠲᠡᠨ ᠦ᠌ ᠮᠠᠯᠠᠭᠠᠢ᠂ ᠲᠣᠭᠣᠷᠴᠣᠭ ᠢ᠋ ᠬᠢᠵᠦ ᠬᠡᠷᠡᠭᠯᠡᠬᠦ᠂ ᠤᠷᠠ ᠶ᠋ᠢᠨ ᠰᠠᠩ ᠳ᠋ᠤ᠌ ᠬᠤᠪᠢ ᠨᠡᠮᠡᠷᠢ ᠣᠷᠣᠭᠤᠯᠬᠤ ᠳ᠋ᠤ᠌ ᠲᠤᠰᠠ ᠪᠣᠯᠬᠤ ᠵᠣᠷᠢᠯᠭᠠ ᠪᠠᠷ ᠵᠠᠷᠢᠮ ᠮᠠᠯᠠᠭᠠᠢ᠂ ᠲᠣᠭᠣᠷᠴᠣᠭ ᠬᠢᠬᠦ ᠲᠠᠯᠠ ᠪᠠᠷ ᠥᠬᠢᠳ ᠲᠦ᠍ ᠵᠥᠪᠯᠡᠬᠦ ᠳ᠋ᠦ᠍ ᠢᠯᠡᠭᠦᠳᠡᠬᠦ ᠦᠭᠡᠢ ᠪᠢᠵᠡ ᠠ᠋᠃
ᠵᠠᠩᠵᠤᠨ ᠮᠠᠯᠠᠭᠠᠢ ᠬᠢᠬᠦ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠤ᠋ᠨ ᠬᠦᠨᠳᠦᠳᠬᠡᠯ ᠦ᠋ᠨ ᠡᠮᠦᠰᠬᠡᠯ ᠦ᠋ᠨ ᠨᠢᠭᠡ ᠪᠣᠯᠬᠤ ᠵᠠᠩᠵᠤᠨ ᠮᠠᠯᠠᠭᠠᠢ ᠶ᠋ᠢ ᠤᠷᠠᠯᠢᠭ ᠤ᠋ᠨ ᠲᠠᠢᠵᠠᠨ ᠳ᠋ᠤ᠌ ᠳᠠᠭᠤᠴᠢᠳ᠂ ᠬᠤᠭᠤᠷᠴᠢᠳ᠂ ᠲᠤᠤᠯᠢᠴᠢᠳ᠂ ᠢᠷᠦᠭᠡᠯᠴᠢᠳ ᠥᠷᠭᠡᠨ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠵᠠᠩᠵᠤᠨ ᠮᠠᠯᠠᠭᠠᠢ ᠶ᠋ᠢ ᠡᠰᠬᠡᠬᠦ ᠳ᠋ᠡᠭᠡᠨ ᠶᠠᠭᠤᠨ ᠤ᠋ ᠡᠮᠦᠨᠡ ᠡᠮᠦᠰᠬᠦ ᠬᠥᠮᠦᠨ ᠦ᠌ ᠪᠡᠨ ᠲᠣᠯᠣᠭᠠᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠬᠤ ᠶ᠋ᠢᠨ ᠲᠤᠯᠠᠳᠠ ᠲᠣᠯᠣᠭᠠᠢ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠵᠥᠪ ᠠᠪᠤᠨᠠ᠃ ᠲᠣᠯᠣᠭᠠᠢ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠠᠪᠬᠤ ᠳ᠋ᠠᠭᠠᠨ ᠰᠡᠨᠲ᠋ᠢᠮᠧᠲ᠋ᠷ ᠢ᠋ᠶ᠋ᠡᠷ ᠲᠣᠯᠣᠭᠠᠢ ᠶ᠋ᠢ ᠣᠷᠢᠶᠠᠬᠤ ᠪᠢᠰᠢ ᠭᠠᠪᠠᠯᠠ ᠳᠤᠬᠤ ᠶ᠋ᠢᠨ ᠶᠠᠰᠤ ᠶ᠋ᠢ ᠲᠠᠰᠢᠭᠤ ᠣᠷᠢᠶᠠᠵᠤ ᠬᠡᠮᠵᠢᠨᠡ᠃ ᠢᠩᠭᠢᠵᠦ ᠣᠷᠢᠶᠠᠬᠤ ᠳ᠋ᠠᠭᠠᠨ ᠰᠡᠨᠲ᠋ᠢᠮᠧᠲ᠋ᠷ ᠢ᠋ ᠬᠡᠳᠦ ᠴᠢᠩᠭᠠ ᠲᠠᠲᠠᠬᠤ ᠦᠭᠡᠢ ᠬᠡᠮᠵᠢᠭᠰᠡᠨ ᠲᠣᠭᠠ ᠪᠠᠨ ᠳᠥᠷᠪᠡ ᠪᠤᠶᠤ ᠵᠢᠷᠭᠤᠭᠠᠨ ᠲᠠᠯᠠ ᠳ᠋ᠤ᠌ ᠬᠤᠪᠢᠶᠠᠵᠤ᠂ ᠲᠡᠭᠦᠨ ᠳᠡᠭᠡᠷᠡ ᠲᠤᠰ ᠪᠦᠷᠢ ᠣᠶᠣᠳᠠᠯ ᠤ᠋ᠨ ᠬᠡᠮᠵᠢᠶᠡ ᠨᠡᠮᠡᠵᠦ ᠡᠰᠬᠡᠨᠡ᠃ ᠡᠬᠢᠯᠡᠭᠡᠳ ᠴᠠᠭᠠᠰᠤᠨ ᠦᠯᠢᠭᠡᠷ ᠭᠠᠷᠭᠠᠵᠤ ᠮᠠᠯᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠡᠷᠦᠩᠬᠡᠢ ᠵᠠᠭᠪᠤᠷ ᠢ᠋ ᠭᠠᠷᠭᠠᠨ ᠬᠡᠮᠵᠢᠭᠦᠷ ᠲᠡᠢ ᠪᠡᠨ ᠨᠡᠢᠯᠡᠭᠦᠯᠵᠦ ᠦᠵᠡᠭᠡᠳ ᠬᠠᠰᠤᠬᠤ ᠨᠡᠮᠡᠬᠦ ᠬᠡᠮᠵᠢᠶᠡ ᠪᠡᠨ ᠲᠣᠬᠢᠷᠠᠭᠤᠯᠤᠨ ᠡᠰᠬᠡᠨᠡ᠃
ᠵᠠᠩᠵᠤᠨ ᠮᠠᠯᠠᠭᠠᠢ ᠶ᠋ᠢᠨ ᠰᠠᠮᠫᠠᠨ ᠰᠢᠷᠭᠤᠭᠤᠯᠬᠤ ᠬᠡᠰᠡᠭ ᠲᠦ᠍ ᠨᠠᠷᠢᠬᠠᠨ ᠱᠣᠪᠬᠣ ᠦᠵᠦᠭᠦᠷ ᠭᠠᠷᠭᠠᠳᠠᠭ ᠤᠴᠢᠷ ᠡᠨᠳᠡ ᠡᠰᠬᠡᠭᠦᠷ ᠢ᠋ ᠨᠠᠷᠢᠨ ᠲᠣᠬᠢᠷᠠᠭᠤᠯᠤᠨᠠ᠃ ᠡᠰᠬᠡᠭᠰᠡᠨ ᠳᠥᠷᠪᠡ ᠪᠤᠶᠤ ᠵᠢᠷᠭᠤᠭᠠᠨ ᠲᠠᠯᠠ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠳᠡᠭᠡᠭᠰᠢ ᠡᠷᠭᠢᠳᠡᠭ ᠳᠥᠷᠪᠡᠨ ᠲᠠᠯᠠ ᠶ᠋ᠢ ᠬᠢᠬᠦ ᠳ᠋ᠡᠭᠡᠨ ᠶᠡᠬᠡ ᠪᠡᠶᠡ ᠲᠠᠯᠠ ᠬᠣᠶᠠᠷ ᠤ᠋ᠨ ᠵᠠᠯᠭᠠᠭᠳᠠᠬᠤ ᠬᠡᠰᠡᠭ ᠢ᠋ ᠠᠳᠠᠯᠢᠬᠠᠨ ᠬᠡᠮᠵᠢᠶᠡ ᠲᠡᠢ ᠬᠢᠨᠡ᠃
ᠵᠠᠩᠵᠤᠨ ᠮᠠᠯᠠᠭᠠᠢ ᠶ᠋ᠢ ᠡᠷᠡᠭᠲᠡᠢᠴᠦᠳ ᠡᠮᠦᠰᠳᠡᠭ ᠲᠤᠯᠠ ᠲᠡᠭᠦᠨ ᠦ᠌ ᠥᠩᠭᠡ ᠶ᠋ᠢ ᠰᠣᠩᠭᠣᠬᠤ ᠳ᠋ᠠᠭᠠᠨ ᠣᠷᠴᠢᠨ ᠦᠶᠡ ᠳ᠋ᠦ᠍ ᠲᠣᠬᠢᠷᠠᠭᠤᠯᠵᠤ ᠬᠡᠳᠦ ᠲᠣᠳᠣ ᠪᠢᠰᠢ ᠥᠩᠭᠡ ᠪᠡᠷ ᠬᠢᠵᠦ᠂ ᠲᠣᠨᠣᠭ ᠢ᠋ ᠲᠣᠳᠣ ᠪᠥᠭᠡᠳ ᠭᠣᠶᠣᠮᠰᠣᠭ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠲᠣᠨᠣᠭᠯᠠᠨ ᠲᠠᠯᠠ ᠪᠦᠷᠢ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠬᠠᠪᠴᠢᠶᠠᠷᠢ ᠶ᠋ᠢ ᠥᠩᠭᠡᠨ ᠡᠴᠡ ᠳᠥᠩᠭᠡᠵᠦ ᠢᠯᠭᠠᠭᠳᠠᠬᠤ᠂ ᠲᠡᠳᠦᠢ ᠣᠢᠷᠠᠯᠴᠠᠭᠠ ᠥᠩᠭᠡ ᠪᠡᠷ ᠨᠢᠭᠡ ᠵᠢᠭᠳᠡ ᠨᠠᠷᠢᠨ ᠬᠠᠪᠴᠢᠨᠠ᠃ ᠡᠭᠦᠨ ᠦ᠌ ᠲᠤᠯᠠᠳᠠ ᠬᠠᠪᠴᠢᠬᠤ ᠬᠠᠪᠴᠢᠶᠠᠷᠢ ᠪᠠᠨ ᠤᠷᠢᠳᠴᠢᠯᠠᠨ ᠵᠢᠭᠳᠡ ᠨᠤᠭᠤᠯᠤᠨ ᠢᠩᠳᠡᠦᠳᠡᠭᠰᠡᠨ ᠪᠠᠢᠨᠠ᠃ ᠮᠠᠯᠠᠭᠠᠢ ᠶ᠋ᠢᠨ ᠥᠩᠭᠡ ᠶ᠋ᠢ ᠣᠶᠣᠵᠤ ᠳᠠᠭᠤᠰᠬᠠᠭᠠᠳ ᠳᠣᠲᠣᠷ ᠲᠠᠯᠠ ᠶ᠋ᠢ ᠴᠠᠷᠳᠠᠨ ᠥᠭᠡᠷᠡ ᠳᠠᠪᠤᠤ ᠬᠡᠳᠦ ᠬᠡᠳᠦ ᠳᠠᠪᠬᠤᠷᠯᠠᠨ ᠨᠠᠭᠠᠵᠤ ᠬᠡᠪ ᠲᠦ᠍ ᠬᠢᠵᠦ ᠬᠠᠲᠠᠭᠠᠨᠠ᠃
ᠳᠡᠭᠡᠭᠰᠢ ᠪᠡᠨ ᠡᠷᠭᠢᠳᠡᠭ ᠳᠥᠷᠪᠡᠨ ᠲᠠᠯᠠ ᠴᠢᠬᠢ ᠶ᠋ᠢ ᠡᠰᠬᠡᠨ᠂ ᠳᠠᠪᠤᠤ ᠳᠠᠪᠬᠤᠷᠯᠠᠨ ᠨᠠᠭᠠᠵᠤ ᠴᠠᠷᠳᠠᠭᠠᠳ ᠦᠨᠡᠲᠦ ᠦᠰᠦ ᠪᠤᠶᠤ ᠬᠠᠷᠠ ᠪᠣᠷᠣ ᠬᠢᠯᠢᠩ ᠢ᠋ ᠴᠢᠬᠢ ᠲᠡᠢ ᠪᠠᠷᠢᠨ ᠬᠦᠪᠦᠷᠢᠳᠴᠦ ᠣᠶᠣᠭᠠᠳ ᠡᠷᠭᠢᠭᠦᠯᠵᠦ ᠵᠠᠪᠰᠠᠷ ᠨᠢ ᠪᠠᠭᠠ ᠵᠡᠷᠭᠡ ᠬᠥᠪᠥᠩ ᠵᠤᠯᠠᠵᠤ ᠵᠤᠵᠠᠭᠠᠯᠠᠨ ᠶᠡᠬᠡ ᠪᠡᠶᠡ ᠳ᠋ᠦ᠍ ᠵᠠᠯᠭᠠᠨ ᠣᠶᠣᠵᠤ ᠳᠡᠭᠡᠭᠰᠢ ᠨᠢ ᠡᠷᠭᠢᠭᠦᠯᠦᠨᠡ᠃ ᠳᠡᠭᠡᠭᠰᠢ ᠪᠡᠨ ᠡᠷᠭᠢᠭᠰᠡᠨ ᠴᠢᠬᠢ᠂ ᠮᠠᠯᠠᠭᠠᠢ ᠶ᠋ᠢᠨ ᠣᠷᠣᠢ ᠬᠡᠰᠡᠭ ᠡᠴᠡ ᠶᠡᠬᠡᠳᠬᠦ ᠪᠤᠶᠤ ᠪᠠᠭᠠᠳᠠᠪᠠᠯ ᠮᠠᠯᠠᠭᠠᠢ ᠶ᠋ᠢᠨ ᠦᠵᠡᠮᠵᠢ ᠰᠦᠷ ᠢ᠋ ᠳᠠᠷᠤᠵᠤ ᠡᠪ ᠦᠭᠡᠢ ᠪᠣᠯᠭᠠᠨᠠ᠃
ᠲᠣᠭᠣᠷᠴᠣᠭ ᠢ᠋ ᠡᠰᠬᠡᠬᠦ ᠳ᠋ᠡᠭᠡᠨ ᠵᠠᠩᠵᠤᠨ ᠮᠠᠯᠠᠭᠠᠢ ᠲᠠᠢ ᠠᠳᠠᠯᠢ ᠪᠣᠯᠪᠠᠴᠤ ᠲᠠᠯᠠ ᠨᠤᠭᠤᠳ ᠠᠷᠠᠢ ᠣᠯᠠᠨ᠂ ᠰᠠᠮᠫᠠᠨ ᠰᠢᠷᠭᠤᠭᠤᠯᠳᠠᠭ ᠬᠡᠰᠡᠭ ᠳᠡᠭᠡᠭᠰᠢ ᠪᠡᠨ ᠨᠠᠷᠢᠨ ᠪᠢᠰᠢ ᠬᠠᠷᠢᠨ ᠮᠣᠬᠣᠭᠣ ᠪᠠᠢᠬᠤ ᠳ᠋ᠠᠭᠠᠨ ᠰᠠᠢᠨ᠃ ᠬᠡᠷᠪᠡ ᠴᠢᠬᠢ ᠲᠡᠢ ᠲᠣᠭᠣᠷᠴᠣᠭ ᠪᠣᠯ ᠲᠣᠮᠣ ᠴᠢᠬᠢ ᠶ᠋ᠢ ᠵᠠᠩᠵᠤᠨ ᠮᠠᠯᠠᠭᠠᠢ ᠶ᠋ᠢᠨ ᠬᠢ ᠰᠢᠭ ᠢᠵᠢᠯ ᠡᠰᠬᠡᠬᠦ ᠪᠠ ᠬᠣᠶᠠᠷ ᠨᠢ ᠪᠠᠭᠠ᠂ ᠬᠣᠶᠠᠷ ᠨᠢ ᠲᠣᠮᠣ ᠴᠢᠬᠢ ᠲᠡᠢ ᠪᠣᠯ ᠵᠢᠵᠢᠭ ᠬᠣᠶᠠᠷ ᠢ᠋ ᠢᠵᠢᠯ᠂ ᠲᠣᠮᠣ ᠬᠣᠶᠠᠷ ᠢ᠋ ᠨᠢᠭᠡ ᠢᠵᠢᠯ ᠡᠰᠬᠡᠬᠦ ᠪᠣᠯᠪᠠᠴᠤ ᠲᠣᠮᠣ ᠵᠢᠵᠢᠭ ᠶᠠᠮᠠᠷ ᠴᠤ᠌ ᠴᠢᠬᠢ ᠲᠡᠢ ᠬᠢᠭᠰᠡᠨ ᠲᠣᠭᠣᠷᠴᠣᠭ ᠤ᠋ᠨ ᠶᠡᠬᠡ ᠪᠡᠶᠡ ᠳ᠋ᠢᠶᠠᠮᠧᠲ᠋ᠷ ᠦ᠋ᠨ ᠬᠡᠮᠵᠢᠶᠡ ᠶᠠᠭ ᠲᠣᠬᠢᠷᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃
ᠬᠠᠷᠢᠨ ᠲᠣᠭᠣᠷᠴᠣᠭ ᠤ᠋ᠨ ᠬᠠᠪᠴᠢᠶᠠᠷᠢ᠂ ᠡᠮᠵᠢᠶᠡᠷᠢ ᠨᠢ ᠰᠠ ᠲᠠᠢ ᠲᠣᠷᠭᠠ ᠪᠤᠶᠤ ᠬᠣᠷᠭᠣᠢ ᠮᠡᠲᠦ ᠲᠣᠳᠣ ᠥᠩᠭᠡ ᠲᠡᠢ ᠪᠠᠢᠬᠤ ᠨᠢ ᠲᠣᠬᠢᠷᠠᠮᠵᠢᠲᠠᠢ᠃ ᠲᠣᠭᠣᠷᠴᠣᠭ ᠤ᠋ᠨ ᠵᠢᠯᠠᠭᠠ ᠵᠠᠪᠠᠯ ᠤᠯᠠᠭᠠᠨ ᠪᠠᠢᠳᠠᠭ ᠤᠴᠢᠷ ᠲᠡᠭᠦᠨ ᠢ᠋ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠪᠠᠷ ᠬᠢᠵᠦ ᠪᠣᠯᠬᠤ ᠦᠭᠡᠢ ᠪᠥᠭᠡᠳ ᠬᠡᠷᠪᠡ ᠤᠯᠠᠭᠠᠨ ᠤᠲᠠᠰᠤ ᠪᠠᠢᠬᠤ ᠦᠭᠡᠢ ᠪᠣᠯ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠶ᠋ᠢ ᠤᠯᠠᠭᠠᠨ ᠪᠡᠬᠡ ᠪᠤᠶᠤ ᠪᠥᠰ ᠪᠠᠷᠠᠭᠠ ᠶ᠋ᠢᠨ ᠤᠯᠠᠭᠠᠨ ᠪᠣᠳᠣᠭ ᠲᠤ᠌ ᠣᠷᠣᠭᠤᠯᠵᠤ ᠬᠡᠷᠡᠭᠯᠡᠨᠡ᠃ ᠲᠣᠭᠣᠷᠴᠣᠭ ᠤ᠋ᠨ ᠵᠢᠯᠠᠭᠠ ᠥᠳᠬᠡᠨ ᠪᠠᠢᠬᠤ ᠲᠣᠰᠤᠮ ᠰᠦᠷ ᠲᠡᠢ ᠭᠣᠶᠣᠮᠰᠣᠭ ᠬᠠᠷᠠᠭᠳᠠᠳᠠᠭ᠃ ᠲᠣᠭᠣᠷᠴᠣᠭ ᠢ᠋ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠰ ᠠᠯᠢ ᠠᠯᠢ ᠨᠢ ᠡᠮᠦᠰᠬᠦ ᠪᠣᠯᠪᠠᠴᠤ ᠵᠢᠯᠠᠭᠠ ᠲᠠᠢ ᠲᠣᠭᠣᠷᠴᠣᠭ ᠢ᠋ ᠵᠥᠪᠬᠡᠨ ᠡᠮᠡᠭᠲᠡᠢᠴᠦᠳ ᠡᠮᠦᠰᠦᠨᠡ᠃ ᠬᠡᠷᠪᠡ ᠵᠢᠯᠠᠭᠠ ᠦᠭᠡᠢ ᠦᠰᠦ ᠲᠡᠢ ᠲᠣᠭᠣᠷᠴᠣᠭ ᠪᠣᠯ ᠪᠤᠯᠠᠭᠠ᠂ ᠬᠡᠷᠡᠮᠦ ᠶ᠋ᠢᠨ ᠰᠡᠭᠦᠯ ᠢ᠋ ᠣᠷᠣᠢ ᠳᠡᠭᠡᠷᠡ ᠨᠢ ᠳᠣᠭᠣᠭᠰᠢ ᠬᠠᠳᠠᠨᠠ᠃ ᠮᠣᠩᠭᠣᠯᠴᠤᠳ ᠡᠷᠲᠡ ᠦᠶᠡ ᠡᠴᠡ ᠬᠠᠷᠠ ᠴᠠᠭᠠᠨ ᠢᠰᠡᠭᠡᠢ ᠪᠡᠷ ᠲᠣᠭᠣᠷᠴᠣᠭ᠂ ᠪᠦᠷᠬᠦ ᠮᠠᠯᠠᠭᠠᠢ ᠬᠢᠵᠦ ᠡᠮᠦᠰᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠢᠰᠡᠭᠡᠢ ᠲᠣᠭᠣᠷᠴᠣᠭ ᠢ᠋ ᠤᠯᠠᠭᠠᠨ ᠬᠣᠷᠭᠣᠢ ᠲᠣᠷᠭᠠ ᠮᠡᠲᠦ ᠪᠥᠰ ᠪᠠᠷᠠᠭᠠ ᠪᠠᠷ ᠡᠮᠵᠢᠨ ᠬᠣᠰᠢᠮᠠᠭ ᠲᠠᠯᠪᠢᠬᠤ᠂ ᠥᠯᠵᠡᠢ ᠴᠦᠳᠡᠨᠵᠡ ᠶ᠋ᠢᠨ ᠪᠤᠯᠤᠩ ᠬᠡ ᠪᠡᠷ ᠴᠢᠮᠡᠵᠦ ᠡᠮᠦᠰᠳᠡᠭ ᠪᠠᠢᠯᠠ᠃
ᠲᠡᠭᠦᠨᠴᠢᠯᠡᠨ ᠭᠣᠶᠣᠯ ᠤ᠋ᠨ ᠲᠣᠭᠣᠷᠴᠣᠭ ᠢ᠋ ᠬᠣᠷᠭᠣᠢ᠂ ᠲᠣᠷᠭᠠ᠂ ᠮᠠᠩᠨᠤᠭ ᠢ᠋ᠶ᠋ᠠᠷ ᠬᠢᠵᠦ ᠬᠣᠷᠭᠣᠢ᠂ ᠲᠣᠷᠭᠠ ᠪᠠᠷ ᠲᠣᠨᠣᠭᠯᠠᠨ ᠵᠠᠷᠢᠮ ᠲᠣᠭᠣᠷᠴᠣᠭ ᠲᠤ᠌ ᠬᠡ ᠬᠠᠳᠬᠤᠮᠠᠯ ᠬᠠᠳᠬᠤᠬᠤ᠂ ᠱ᠌ᠢᠷᠦ ᠰᠤᠪᠤᠳ ᠢ᠋ᠶ᠋ᠠᠷ ᠲᠣᠨᠣᠭᠯᠠᠬᠤ ᠵᠡᠷᠭᠡ ᠪᠡᠷ ᠴᠢᠮᠡᠳᠡᠭ ᠪᠠᠢᠵᠠᠢ᠃
ᠬᠦᠷᠢᠶᠡ ᠮᠠᠯᠠᠭᠠᠢ ᠬᠢᠬᠦ ᠬᠦᠷᠢᠶᠡ ᠮᠠᠶᠢᠭ ᠤ᠋ᠨ ᠮᠠᠯᠠᠭᠠᠢ ᠶ᠋ᠢ ᠭᠣᠣᠯᠳᠠᠭᠤ ᠡᠬᠡᠨᠡᠷ ᠦᠰᠦ ᠲᠡᠢ ᠬᠥᠮᠦᠰ ᠭᠣᠶᠣᠯ ᠳ᠋ᠤ᠌ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠠ ᠤᠷᠠ ᠬᠢᠴᠡ ᠨᠠᠷᠢᠨ ᠱᠠᠭᠠᠷᠳᠠᠳᠠᠭ᠃ ᠭᠣᠣᠯᠳᠠᠭᠤ ᠬᠦᠷᠢᠶᠡᠨ ᠭᠠᠩᠭᠠᠩ ᠡᠬᠡᠨᠡᠷ ᠦ᠋ᠳ ᠡᠮᠦᠰᠳᠡᠭ ᠪᠠᠢᠭᠰᠠᠨ ᠤᠴᠢᠷ ᠬᠦᠷᠢᠶᠡ ᠮᠠᠯᠠᠭᠠᠢ ᠭᠡᠵᠦ ᠨᠡᠷᠡᠯᠡᠵᠡᠢ᠃ ᠬᠦᠷᠢᠶᠡ ᠮᠠᠯᠠᠭᠠᠢ ᠭᠡᠬᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠲᠦᠪᠡᠭᠲᠡᠢ ᠠᠵᠢᠯᠯᠠᠭᠠ ᠣᠷᠣᠳᠠᠭ ᠬᠡᠰᠡᠭ ᠨᠢ ᠲᠡᠭᠦᠨ ᠦ᠌ ᠣᠷᠣᠢ ᠪᠥᠭᠡᠳ ᠣᠷᠣᠢ ᠶ᠋ᠢ ᠭᠤᠴᠢᠨ ᠬᠣᠶᠠᠷ ᠨᠠᠷᠢᠨ ᠰᠠᠪᠬᠠᠨ ᠨᠤᠭᠤᠯᠤᠭᠠ ᠵᠢᠭᠳᠡ ᠭᠠᠷᠭᠠᠵᠤ ᠬᠢᠨᠡ᠃ ᠡᠨᠡ ᠨᠤᠭᠤᠯᠤᠭᠠ ᠶ᠋ᠢᠨ ᠳᠡᠭᠡᠳᠦ ᠬᠡᠰᠡᠭ ᠨᠠᠷᠢᠨ᠂ ᠳᠣᠣᠷᠠᠲᠤ ᠰᠡᠪᠰᠡᠭ(ᠬᠦᠷᠢᠶᠡ) ᠵᠠᠯᠭᠠᠬᠤ ᠬᠡᠰᠡᠭ ᠨᠢ ᠥᠷᠭᠡᠪᠲᠦᠷ ᠪᠠᠢᠨᠠ᠃
ᠰᠡᠪᠰᠡᠭ ᠢ᠋ ᠭᠣᠣᠯᠳᠠᠭᠤ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠬᠡᠷᠡᠭᠰᠡᠯ ᠦ᠋ᠨ ᠮᠥᠩᠭᠥᠨ ᠲᠣᠭᠤᠷᠴᠠᠭ ᠲᠤ᠌ ᠲᠠᠭᠠᠷᠠᠭᠤᠯᠤᠨ ᠬᠢᠨᠡ᠃ ᠰᠡᠪᠰᠡᠭ ᠠᠷᠤ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠵᠠᠳᠠᠭᠠᠢ ᠪᠠᠢᠬᠤ ᠪᠠ ᠲᠡᠨᠳᠡ ᠲᠠᠭᠠᠷᠠᠭᠰᠠᠨ ᠰᠢᠯᠪᠢᠴᠢ ᠲᠡᠢ᠂ ᠰᠢᠯᠪᠢᠴᠢᠨ ᠳᠡᠭᠡᠷᠡ ᠵᠠᠪᠳᠤᠩ ᠪᠦᠴᠡ ᠲᠡᠢ ᠪᠠᠢᠨᠠ᠃ ᠣᠷᠣᠢ ᠳᠡᠭᠡᠷᠡ ᠨᠢ ᠳᠠᠪ ᠲᠠᠯᠪᠢᠵᠤ᠂ ᠳᠡᠭᠡᠷᠡ ᠡᠴᠡ ᠨᠢ ᠰᠠᠮᠫᠠᠨ ᠰᠢᠷᠭᠤᠭᠤᠯᠤᠨᠠ᠃ ᠰᠠᠮᠫᠠᠨ ᠢ᠋ ᠲᠣᠷᠭᠠ᠂ ᠱ᠌ᠢᠷᠦ ᠰᠤᠪᠤᠳ ᠢ᠋ᠶ᠋ᠠᠷ ᠬᠦᠷᠲᠡᠯᠡ ᠬᠢᠳᠡᠭ ᠪᠠᠢᠵᠠᠢ᠃ ᠬᠦᠷᠢᠶᠡ ᠮᠠᠯᠠᠭᠠᠢ ᠶ᠋ᠢᠨ ᠰᠠᠮᠫᠠᠨ ᠤ᠋ ᠳᠠᠪ ᠠ᠋ᠴᠠ ᠳᠣᠭᠣᠭᠰᠢ5—6 ᠲᠠᠯᠠ ᠤᠷᠤᠭᠤ ᠨᠢ ᠠᠯᠲᠠᠨ ᠰᠠ ᠪᠠᠷ ᠪᠤᠶᠤ ᠲᠣᠷᠭᠠ ᠪᠠᠷ ᠪᠠᠳᠮᠠ ᠬᠢᠳᠡᠭ᠃
ᠰᠥᠨᠢᠳ ᠮᠠᠯᠠᠭᠠᠢ ᠬᠢᠴᠡ ᠬᠡᠯᠪᠡᠷᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠬᠦᠷᠢᠶᠡ ᠮᠠᠯᠠᠭᠠᠢ ᠲᠠᠢ ᠠᠳᠠᠯᠢᠬᠠᠨ ᠪᠣᠯᠪᠠᠴᠤ ᠣᠷᠣᠢ ᠨᠢ ᠬᠦᠷᠢᠶᠡ ᠮᠠᠯᠠᠭᠠᠢ ᠠ᠋ᠴᠠ ᠠᠷᠠᠢ ᠪᠦᠳᠦᠭᠦᠨ ᠨᠠᠮᠬᠠᠨᠳᠠᠭᠤ ᠪᠠᠢᠨᠠ᠃
ᠳᠤᠭᠤᠢ ᠬᠢᠯᠢᠩ ᠮᠠᠯᠠᠭᠠᠢ ᠶ᠋ᠢ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠰ ᠦ᠋ᠨ ᠠᠯᠢ ᠠᠯᠢ ᠨᠢ ᠡᠮᠦᠰᠬᠦ ᠪᠥᠭᠡᠳ ᠵᠠᠷᠢᠮ ᠨᠢ ᠵᠠᠩᠭᠢ᠂ ᠵᠠᠯᠠᠨ᠂ ᠵᠠᠢᠰᠠᠩ ᠤ᠋ᠳ ᠡᠮᠦᠰᠳᠡᠭ ᠪᠠᠢᠵᠠᠢ᠃
ᠳᠤᠭᠤᠢ ᠬᠢᠯᠢᠩ ᠮᠠᠯᠠᠭᠠᠢ ᠭᠡᠳᠡᠭ ᠨᠢ ᠣᠷᠣᠢ ᠨᠢ ᠬᠦᠷᠢᠶᠡ᠂ ᠰᠥᠨᠢᠳ ᠮᠠᠯᠠᠭᠠᠢ ᠶ᠋ᠢᠨ ᠬᠡᠯᠪᠡᠷᠢ ᠲᠡᠢ ᠪᠣᠯᠪᠠᠴᠤ ᠰᠡᠪᠰᠡᠭ ᠨᠢ ᠳᠡᠭᠡᠭᠰᠢ ᠪᠡᠨ ᠡᠷᠭᠢᠭᠰᠡᠨ ᠳᠤᠭᠤᠢ ᠮᠥᠭᠥ ᠬᠡᠯᠪᠡᠷᠢ ᠲᠡᠢ ᠪᠥᠭᠡᠳ ᠦᠰᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠬᠢᠯᠢᠩ ᠬᠠᠲᠠᠳᠠᠭ ᠤᠴᠢᠷ ᠳᠤᠭᠤᠢ ᠬᠢᠯᠢᠩ ᠮᠠᠯᠠᠭᠠᠢ ᠭᠡᠵᠦ ᠨᠡᠷᠡᠯᠡᠵᠡᠢ᠃
ᠲᠡᠭᠦᠨ ᠢ᠋ ᠬᠢᠬᠦ ᠠᠷᠭᠠ ᠰᠥᠨᠢᠳ ᠬᠦᠷᠢᠶᠡ ᠮᠠᠯᠠᠭᠠᠢ ᠠᠳᠠᠯᠢ ᠪᠥᠭᠡᠳ ᠵᠥᠪᠬᠡᠨ ᠬᠦᠷᠢᠶᠡ ᠨᠢ ᠳᠤᠭᠤᠢ ᠪᠠᠢᠳᠠᠭ (ᠣᠷᠴᠢᠨ ᠦᠶᠡ ᠶ᠋ᠢᠨ ᠮᠠᠯᠠᠭᠠᠢ)᠃1940 ᠣᠨ ᠬᠦᠷᠲᠡᠯᠡ ᠬᠠᠭᠤᠴᠢᠨ ᠮᠠᠯᠠᠭᠠᠢ ᠪᠠᠨ ᠬᠡᠷᠡᠭᠯᠡᠵᠦ ᠪᠠᠢᠯᠠ᠃ ᠬᠤᠪᠢᠰᠬᠠᠯ ᠤ᠋ᠨ ᠵᠢᠯ ᠳ᠋ᠦ᠍ ᠤᠯᠤᠰ ᠣᠷᠣᠨ ᠤ᠋ ᠡᠳ᠋ ᠦ᠋ᠨ ᠵᠠᠰᠠᠭ ᠲᠤ᠌ ᠰᠢᠨᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠴᠤ ᠡᠬᠢᠯᠡᠬᠦ ᠶ᠋ᠢᠨ ᠬᠠᠮᠲᠤ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠ ᠥᠷᠭᠡᠵᠢᠨ ᠬᠤᠪᠴᠠᠰᠤᠨ ᠤ᠋ ᠰᠢᠨᠡ ᠵᠠᠭᠪᠤᠷ ᠪᠣᠢ ᠪᠣᠯᠬᠤ ᠳ᠋ᠤ᠌ ᠮᠠᠨ ᠤ᠋ ᠣᠷᠣᠨ ᠤ᠋ ᠬᠥᠮᠦᠨ ᠠᠷᠠᠳ ᠤ᠋ᠨ ᠬᠤᠪᠴᠠᠰᠤ ᠮᠠᠯᠠᠭᠠᠢ ᠳ᠋ᠤ᠌ ᠰᠢᠨᠡ ᠵᠠᠭᠪᠤᠷ ᠬᠡᠷᠡᠭᠯᠡᠭᠳᠡᠬᠦ ᠪᠣᠯᠵᠤ᠂ ᠡᠮᠡᠭᠲᠡᠢᠴᠦᠳ ᠦ᠋ᠨ ᠤᠷᠠᠨ ᠦᠢᠯᠡ ᠳ᠋ᠦ᠍ ᠰᠢᠨᠡ ᠠᠷᠭᠠ ᠨᠠᠪᠲᠠᠷᠠᠯᠠ᠃ ᠬᠠᠭᠤᠴᠢᠨ ᠱᠥᠪᠥᠭᠡᠷ ᠣᠷᠣᠢ ᠲᠠᠢ ᠮᠠᠯᠠᠭᠠᠢ ᠶ᠋ᠢ ᠬᠡᠷᠡᠭᠯᠡᠬᠦ ᠪᠡᠨ ᠪᠣᠯᠢᠵᠤ ᠲᠡᠭᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠤᠷᠲᠤ ᠲᠠᠯᠠ ᠨᠢ ᠡᠷᠭᠢᠳᠡᠭ ᠬᠦᠷᠢᠶᠡ ᠮᠠᠶᠢᠭ ᠲᠠᠢ ᠠᠷᠤ ᠳ᠋ᠠᠭᠠᠨ ᠬᠤᠨᠢᠶᠠᠰᠤ ᠲᠠᠢ ᠪᠤᠯᠠᠭᠠ᠂ ᠬᠠᠯᠢᠭᠤ᠂ ᠬᠡᠷᠡᠮᠦ ᠪᠡᠷ ᠦᠰᠦᠯᠡᠭᠰᠡᠨ ᠬᠣᠷᠭᠣᠢ᠂ ᠲᠣᠷᠭᠠ᠂ ᠮᠠᠩᠨᠤᠭ ᠥᠩᠭᠡ ᠲᠡᠢ ᠮᠠᠯᠠᠭᠠᠢ᠂ ᠳᠥᠷᠪᠡᠨ ᠲᠠᠯᠠ ᠲᠠᠢ ᠲᠣᠭᠣᠷᠴᠣᠭ ᠬᠡᠷᠡᠭᠯᠡᠳᠡᠭ ᠪᠣᠯᠤᠯᠠ᠃
ᠡᠨᠡ ᠨᠢ ᠴᠢᠨᠠᠭᠰᠢᠳᠠ ᠤᠯᠠᠮ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠤ ᠨᠢᠭᠡ ᠦᠶᠡ ᠴᠢᠬᠢ ᠲᠡᠢ᠂ ᠰᠠᠷᠠᠪᠴᠢ ᠲᠠᠢ ᠮᠠᠯᠠᠭᠠᠢ ᠬᠡᠷᠡᠭᠯᠡᠵᠦ ᠡᠬᠢᠯᠡᠭᠰᠡᠨ ᠨᠢ ᠣᠳᠣ ᠬᠦᠷᠲᠡᠯᠡ ᠬᠡᠷᠡᠭᠯᠡᠭᠳᠡᠵᠦ ᠪᠠᠢᠭᠠ ᠪᠠᠷ ᠦᠯᠦ ᠪᠠᠷᠠᠮ ᠰᠡᠭᠦᠯ ᠦ᠋ᠨ ᠭᠤᠷᠪᠠᠨ ᠵᠢᠯ ᠳ᠋ᠦ᠍ ᠪᠦᠷ ᠴᠦ᠍ ᠶᠡᠬᠡ ᠳᠡᠯᠭᠡᠷᠡᠬᠦ ᠲᠥᠯᠥᠪ ᠲᠡᠢ ᠪᠠᠢᠨᠠ᠃
ᠣᠷᠴᠢᠨ ᠦᠶᠡ ᠳ᠋ᠦ᠍ ᠴᠢᠬᠢ ᠲᠡᠢ᠂ ᠰᠠᠷᠠᠪᠴᠢ ᠲᠠᠢ ᠮᠠᠯᠠᠭᠠᠢ ᠨᠡᠬᠡᠢ᠂ ᠦᠨᠡᠭᠡᠨ ᠯᠣᠣᠪᠣᠣᠵᠠ ᠮᠠᠯᠠᠭᠠᠢ ᠶ᠋ᠢ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠪᠦᠬᠦ ᠬᠥᠮᠦᠨ ᠬᠡᠷᠡᠭᠯᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠡᠮᠡᠭᠲᠡᠢᠴᠦᠳ ᠲᠣᠭᠣᠷᠢᠭ᠂ ᠪᠥᠭᠡᠷᠡᠩᠬᠡᠢ᠂ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢ ᠲᠡᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠤᠯᠠᠭᠠ᠂ ᠬᠠᠯᠢᠭᠤ᠂ ᠬᠡᠷᠡᠮᠦ᠂ ᠵᠢᠭᠠᠷᠲᠤ ᠬᠤᠯᠤᠭᠠᠨᠠ ᠵᠡᠷᠭᠡ ᠦᠨᠡᠲᠦ ᠠᠩ ᠤ᠋ᠨ ᠦᠰᠦᠨ ᠮᠠᠯᠠᠭᠠᠢ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠬᠠᠪᠤᠷ ᠨᠠᠮᠤᠷ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠪᠡᠷᠢ ᠪᠦᠬᠦᠢ ᠪᠣᠯᠪᠠᠰᠤᠨ ᠴᠠᠮᠪᠠᠨ ᠮᠠᠯᠠᠭᠠᠢ᠂ ᠳᠠᠪᠤᠤ ᠶ᠋ᠢᠨ ᠮᠠᠯᠠᠭᠠᠢ ᠡᠮᠦᠰᠬᠦ ᠡᠴᠡ ᠭᠠᠳᠠᠨᠠ ᠵᠤᠨ ᠳ᠋ᠤ᠌ ᠨᠠᠷᠠᠨ ᠤ᠋ ᠢᠯᠴᠢ ᠰᠠᠴᠤᠷᠠᠭᠤᠯᠳᠠᠭ ᠴᠠᠭᠠᠨ ᠳᠠᠪᠤᠤ᠂ ᠲᠣᠷᠭᠠᠨ ᠮᠠᠯᠠᠭᠠᠢ ᠶ᠋ᠢ ᠬᠢᠵᠦ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠨᠢ ᠬᠥᠮᠦᠨ ᠦ᠌ ᠡᠷᠡᠭᠦᠯ ᠮᠡᠨᠳᠦ ᠭᠤᠸᠠ ᠰᠠᠢᠬᠠᠨ ᠳ᠋ᠤ᠌ ᠵᠣᠬᠢᠴᠠᠭᠰᠠᠨ ᠰᠣᠶᠣᠯ ᠲᠠᠢ ᠬᠤᠪᠴᠠᠰᠤᠨ ᠤ᠋ ᠨᠢᠭᠡ ᠪᠣᠯᠤᠯᠠ᠃
ᠣᠷᠴᠢᠨ ᠦᠶᠡ ᠳ᠋ᠦ᠍ ᠠᠷᠠᠳ ᠲᠦᠮᠡᠨ ᠦ᠌ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠵᠠᠷᠢᠮ ᠮᠠᠯᠠᠭᠠᠢ ᠶ᠋ᠢ ᠡᠰᠬᠡᠨ ᠣᠶᠣᠬᠤ ᠲᠠᠯᠠ ᠪᠠᠷ ᠳᠤᠷᠠᠳᠤᠶᠠ᠃ ᠮᠠᠨ ᠤ᠋ ᠮᠠᠯᠴᠢᠳ ᠪᠣᠯᠤᠨ ᠨᠡᠢᠲᠡ ᠬᠥᠮᠦᠰ ᠦ᠋ᠨ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠯᠣᠣᠪᠤᠤᠵᠠ ᠮᠠᠯᠠᠭᠠᠢ ᠬᠢᠬᠦ ᠳ᠋ᠦ᠍ ᠬᠢᠯᠪᠠᠷ ᠪᠥᠭᠡᠳ ᠲᠡᠭᠦᠨ ᠢ᠋ ᠲᠣᠯᠣᠭᠠᠢ ᠳ᠋ᠤ᠌ ᠲᠣᠬᠢᠷᠠᠭᠤᠯᠤᠨ ᠬᠢᠬᠦ ᠳ᠋ᠦ᠍ ᠵᠣᠬᠢᠬᠤ ᠤᠷᠠᠯᠢᠭ ᠬᠡᠷᠡᠭ ᠲᠡᠢ᠃ ᠯᠣᠣᠪᠣᠣᠵᠠ ᠬᠢᠬᠦ ᠳ᠋ᠦ᠍ ᠲᠣᠯᠣᠭᠠᠢ ᠶ᠋ᠢ ᠣᠷᠢᠶᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠬᠡᠮᠵᠢᠬᠦ ᠦᠭᠡᠢ᠃ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠡᠷᠡᠦ ᠬᠦᠷᠲᠡᠯᠡᠬᠢ ᠵᠠᠢ ᠶ᠋ᠢ ᠬᠡᠮᠵᠢᠵᠦ ᠲᠡᠭᠦᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠥᠩᠭᠡ ᠪᠡᠨ ᠡᠰᠬᠡᠨᠡ᠃ ᠥᠩᠭᠡ ᠶ᠋ᠢ ᠡᠰᠬᠡᠬᠦ ᠳ᠋ᠡᠭᠡᠨ ᠲᠣᠷᠭᠠ᠂ ᠳᠤᠷᠳᠤᠩ ᠮᠡᠲᠦ ᠪᠤᠰᠤᠳ ᠳᠠᠪᠤᠤ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠨ ᠳᠥᠷᠪᠡᠯᠵᠢᠯᠡᠨ ᠬᠡᠮᠵᠢᠶᠡ ᠪᠡᠨ ᠲᠠᠭᠠᠷᠠᠭᠤᠯᠤᠭᠠᠳ ᠣᠷᠣᠢ ᠬᠡᠰᠡᠭ ᠢ᠋ ᠳᠤᠭᠤᠢᠯᠠᠨ ᠠᠷᠤ ᠰᠢᠯᠢ ᠤᠷᠤᠭᠤ ᠨᠢ ᠨᠠᠯᠠᠤ ᠬᠠᠢᠴᠢᠯᠠᠵᠤ᠂ ᠤᠷᠲᠤ ᠳᠤᠬᠤ ᠶ᠋ᠢᠨ ᠬᠡᠰᠡᠭ ᠢ᠋ ᠨᠢ ᠪᠠᠭᠠ ᠵᠡᠷᠭᠡ ᠳᠠᠷᠤᠵᠤ ᠬᠣᠶᠠᠷ ᠲᠠᠯᠠ ᠡᠰᠬᠡᠭᠡᠳ ᠮᠥᠨ ᠳᠣᠲᠣᠷ ᠢ᠋ ᠥᠩᠭᠡ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠡᠰᠬᠡᠨᠡ᠃ ᠥᠩᠭᠡᠨ ᠦ᠌ ᠪᠡᠨ ᠠᠷᠤ ᠡᠮᠵᠢᠬᠦ ᠬᠡᠰᠡᠭ ᠢ᠋ ᠴᠠᠷᠳᠠᠵᠤ ᠳᠣᠲᠣᠷᠠ ᠲᠠᠯᠠ ᠳ᠋ᠤᠨᠢ ᠳᠠᠪᠤᠤ ᠪᠠᠷᠢᠵᠤ ᠨᠠᠭᠠᠵᠤ ᠰᠠᠢᠨ ᠢᠩᠳᠡᠦᠳᠡᠵᠦ ᠬᠠᠲᠠᠭᠠᠭᠠᠳ ᠡᠮᠵᠢᠨᠡ᠃ ᠯᠣᠣᠪᠣᠣᠵᠠ ᠶ᠋ᠢ ᠭᠣᠶᠣᠮᠰᠣᠭ ᠡᠮᠵᠢᠵᠦ ᠲᠣᠨᠣᠭᠯᠠᠬᠤ ᠶ᠋ᠢᠨ ᠲᠤᠯᠠᠳᠠ ᠰᠠ ᠲᠠᠢ ᠲᠣᠷᠭᠠ᠂ ᠥᠩᠭᠡ ᠣᠢᠷᠠᠯᠴᠠᠭᠠ ᠴᠤᠯᠭᠤᠢ ᠫᠦᠦᠰᠦᠦ ᠪᠡᠷ ᠨᠢᠭᠡ ᠥᠷᠭᠡᠨ ᠡᠮᠵᠢᠵᠦ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠡᠴᠡ ᠬᠣᠶᠠᠳᠠᠬᠢ ᠡᠮᠵᠢᠶᠡᠷᠢ ᠶ᠋ᠢ ᠨᠠᠷᠢᠨ ᠰᠠᠭᠤᠯᠭᠠᠵᠤ ᠡᠮᠵᠢᠭᠡᠳ ᠥᠷᠭᠡᠨ ᠡᠮᠵᠢᠶᠡᠷᠢ ᠶ᠋ᠢᠨ ᠳᠣᠲᠣᠭᠤᠷ ᠳᠠᠩ ᠬᠣᠰᠢᠮᠣᠭ ᠣᠶᠣᠬᠤ ᠪᠤᠶᠤ ᠡᠰᠡᠪᠡᠯ ᠥᠯᠵᠡᠢ ᠭᠠᠷᠭᠠᠵᠤ ᠲᠣᠨᠣᠭᠯᠠᠬᠤ ᠳ᠋ᠤ᠌ ᠭᠣᠶᠣᠮᠰᠣᠭ ᠪᠣᠯᠳᠠᠭ᠃ ᠥᠯᠵᠡᠢ ᠶ᠋ᠢ ᠠᠷᠤ ᠲᠠᠯᠠ ᠳ᠋ᠤᠨᠢ ᠣᠶᠣᠳᠠᠯ ᠢ᠋ ᠳᠠᠮᠨᠠᠭᠤᠯᠤᠨ ᠲᠠᠯᠪᠢᠬᠤ ᠤᠴᠢᠷ ᠮᠠᠯᠠᠭᠠᠢ ᠶ᠋ᠢ ᠪᠢᠲᠡᠭᠦᠯᠡᠵᠦ ᠣᠶᠣᠭᠰᠠᠨ ᠤ᠋ ᠳᠠᠷᠠᠭᠠ ᠥᠯᠵᠡᠢ ᠪᠡᠨ ᠲᠠᠯᠪᠢᠪᠠᠯ ᠲᠣᠬᠢᠷᠠᠮᠵᠢᠲᠠᠢ᠃ ᠤᠴᠢᠷ ᠨᠢ ᠬᠣᠶᠠᠷ ᠲᠠᠯᠠ ᠥᠯᠵᠡᠢ ᠶ᠋ᠢ ᠠᠷᠤ ᠳ᠋ᠤᠨᠢ ᠨᠡᠢᠯᠡᠭᠦᠯᠬᠦ ᠬᠡᠴᠡᠭᠦᠦ ᠪᠠᠢᠳᠠᠭ ᠤᠴᠢᠷ ᠤᠷᠢᠳᠴᠢᠯᠠᠨ ᠥᠯᠵᠡᠢ ᠪᠡᠨ ᠪᠦᠲᠦᠨ ᠬᠡ ᠪᠡᠷ ᠵᠠᠩᠭᠢᠳᠴᠤ ᠪᠡᠯᠡᠳᠬᠡᠭᠡᠳ ᠲᠠᠯᠪᠢᠵᠤ ᠣᠶᠣᠬᠤ ᠨᠢ ᠵᠣᠬᠢᠮᠵᠢᠲᠠᠢ᠃ ᠯᠣᠣᠪᠣᠣᠵᠠ ᠶ᠋ᠢᠨ ᠦᠰᠦ ᠶ᠋ᠢ ᠬᠠᠲᠠᠬᠤ ᠳ᠋ᠠᠭᠠᠨ ᠦᠨᠡᠭᠡᠨ ᠠᠷᠠᠰᠤ ᠶ᠋ᠢ ᠭᠣᠣᠯ ᠢ᠋ᠶ᠋ᠠᠷ ᠲᠣᠭᠣᠰᠢ ᠬᠤᠪᠢᠶᠠᠬᠤ ᠨᠢ ᠵᠣᠬᠢᠮᠵᠢ ᠦᠭᠡᠢ ᠪᠥᠭᠡᠳ ᠴᠡᠭᠡᠵᠢ ᠪᠥᠭᠰᠡ ᠪᠡᠷ ᠨᠢ ᠬᠤᠪᠢᠶᠠᠵᠤ ᠬᠣᠶᠠᠷ ᠯᠣᠣᠪᠣᠣᠵᠠ ᠬᠢᠬᠦ ᠨᠢ ᠦᠰᠦ ᠵᠢᠭᠳᠡ ᠪᠣᠯᠤᠨᠠ᠃ ᠦᠨᠡᠭᠡᠨ ᠠᠷᠠᠰᠤᠨ ᠤ᠋ ᠦᠰᠦ ᠴᠡᠭᠡᠵᠢᠨ ᠳ᠋ᠡᠭᠡᠨ ᠰᠢᠩᠭᠡᠨ᠂ ᠪᠥᠭᠰᠡᠨ ᠪᠡᠶᠡ ᠨᠢ ᠥᠳᠬᠡᠨ ᠨᠣᠯᠤᠤᠷᠬᠠᠭ ᠪᠠᠢᠳᠠᠭ ᠤᠴᠢᠷ ᠯᠣᠣᠪᠣᠣᠵᠠ ᠶ᠋ᠢᠨ ᠦᠰᠦ ᠵᠢᠭᠳᠡ ᠪᠢᠰᠢ ᠪᠣᠯᠳᠠᠭ᠃
ᠬᠠᠷᠢᠨ ᠬᠢᠷᠰᠠ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠪᠣᠯ ᠭᠣᠣᠯ ᠨᠢᠷᠤᠭᠤᠨ ᠤ᠋ ᠰᠤᠳᠠᠯ ᠢ᠋ ᠭᠣᠣᠯᠯᠠᠭᠤᠯᠤᠨ ᠦᠰᠦᠯᠡᠬᠦ ᠪᠠ ᠢᠰᠢᠭᠡ᠂ ᠬᠤᠷᠠᠭᠠ᠂ ᠨᠡᠬᠡᠢ ᠯᠣᠣᠪᠣᠣᠵᠠ ᠶ᠋ᠢᠨ ᠦᠰᠦ ᠶ᠋ᠢ ᠵᠢᠭᠳᠡ᠂ ᠬᠠᠷᠠ ᠴᠠᠭᠠᠨ ᠲᠣᠯᠪᠣ ᠦᠭᠡᠢ ᠨᠢᠭᠡ ᠥᠩᠭᠡ ᠶ᠋ᠢᠨ ᠦᠰᠦ ᠪᠡᠷ ᠬᠢᠬᠦ ᠳ᠋ᠦ᠍ ᠵᠣᠬᠢᠷᠠᠮᠵᠢᠲᠠᠢ ᠪᠥᠭᠡᠳ ᠬᠡᠦᠬᠡᠳ ᠦ᠋ᠨ ᠯᠣᠣᠪᠣᠣᠵᠠ ᠶ᠋ᠢ ᠦᠰᠦ ᠠᠯᠠᠭᠯᠠᠨ ᠬᠢᠵᠦ ᠪᠣᠯᠤᠨᠠ᠃
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠣᠷᠴᠢᠨ ᠦᠶᠡ ᠶ᠋ᠢᠨ ᠪᠤᠯᠠᠭᠠ᠂ ᠬᠠᠯᠢᠭᠤ᠂ ᠵᠢᠭᠠᠷᠲᠤ ᠬᠤᠯᠤᠭᠠᠨᠠ ᠶ᠋ᠢᠨ ᠮᠠᠯᠠᠭᠠᠢ ᠶ᠋ᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠬᠢᠵᠦ ᠪᠠᠢᠨᠠ᠃ ᠡᠢᠮᠦ ᠳ᠋ᠦ᠍ ᠲᠣᠭᠲᠠᠭᠰᠠᠨ ᠨᠢᠭᠡ ᠵᠠᠭᠪᠤᠷ ᠦᠭᠡᠢ ᠤᠴᠢᠷ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠪᠢᠴᠢᠬᠦ ᠬᠡᠷᠡᠭ ᠦᠭᠡᠢ ᠪᠥᠭᠡᠳ ᠵᠥᠪᠬᠡᠨ ᠬᠥᠮᠦᠨ ᠳ᠋ᠦ᠍ ᠵᠣᠬᠢᠬᠤ ᠵᠣᠬᠢᠮᠵᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠵᠥᠪᠯᠡᠬᠦ ᠳ᠋ᠦ᠍ ᠥᠨᠳᠥᠷ ᠨᠢᠷᠤᠭᠤ ᠲᠠᠢ᠂ ᠤᠷᠲᠤ ᠨᠢᠭᠤᠷ ᠲᠠᠢ ᠬᠥᠮᠦᠨ ᠳ᠋ᠦ᠍ ᠥᠨᠳᠥᠷ ᠮᠠᠯᠠᠭᠠᠢ ᠵᠣᠬᠢᠮᠵᠢ ᠦᠭᠡᠢ ᠤᠴᠢᠷ ᠪᠥᠭᠡᠷᠡᠩᠬᠡᠢ ᠪᠤᠶᠤ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠶ᠋ᠢᠨ ᠮᠠᠯᠠᠭᠠᠢ ᠵᠣᠬᠢᠮᠵᠢᠲᠠᠢ᠃ ᠬᠠᠷᠢᠨ ᠨᠠᠮ ᠨᠢᠷᠤᠭᠤ ᠲᠠᠢ ᠪᠤᠶᠤ ᠲᠠᠷᠭᠤᠨ ᠬᠥᠮᠦᠨ ᠳ᠋ᠦ᠍ ᠥᠨᠳᠥᠷ ᠬᠦᠷᠢᠶᠡ ᠲᠡᠢ ᠮᠠᠯᠠᠭᠠᠢ ᠵᠣᠬᠢᠮᠵᠢᠲᠠᠢ᠃ ᠡᠷᠡᠭᠲᠡᠢᠴᠦᠳ ᠲᠦ᠍ ᠪᠣᠯ ᠰᠠᠷᠠᠪᠴᠢ ᠲᠠᠢ ᠪᠤᠶᠤ ᠯᠣᠣᠪᠣᠣᠵᠠ ᠮᠠᠯᠠᠭᠠᠢ ᠵᠣᠬᠢᠮᠵᠢᠲᠠᠢ ᠪᠣᠯᠪᠠᠴᠤ ᠪᠣᠯᠪᠠᠰᠤᠨ ᠬᠤᠪᠴᠠᠰᠤᠨ ᠳ᠋ᠤ᠌ ᠯᠣᠣᠪᠣᠣᠵᠠ ᠵᠣᠬᠢᠮᠵᠢ ᠦᠭᠡᠢ᠃ ᠯᠣᠣᠪᠣᠣᠵᠠ ᠶ᠋ᠢ ᠡᠮᠵᠢᠵᠦ ᠲᠣᠨᠣᠭᠯᠠᠨ ᠬᠠᠲᠠᠭᠰᠠᠨ ᠦᠰᠦ ᠲᠡᠢ ᠢᠵᠢᠯ ᠥᠩᠭᠡ ᠲᠡᠢ ᠦᠰᠦ ᠪᠡᠷ ᠠᠷᠤ ᠲᠠᠯᠠ ᠶ᠋ᠢ ᠡᠮᠵᠢᠵᠦ ᠠᠷᠤ ᠲᠠᠯᠠ ᠶ᠋ᠢᠨ ᠣᠶᠣᠳᠠᠯ ᠢ᠋ ᠳᠠᠭᠠᠭᠤᠯᠤᠨ(ᠣᠷᠣᠢ ᠥᠭᠡᠳᠡ) ᠪᠤᠯᠠᠭᠠ ᠬᠡᠷᠡᠮᠦ ᠶ᠋ᠢᠨ ᠰᠡᠭᠦᠯ ᠬᠠᠲᠠᠪᠠᠯ ᠪᠦᠷ ᠴᠦ᠍ ᠭᠣᠶᠣᠮᠰᠣᠭ ᠪᠣᠯᠤᠨᠠ᠃ ᠰᠢᠨᠡ ᠪᠡᠷ ᠥᠷᠭᠡᠨ ᠪᠤᠶᠤ ᠳᠤᠬᠤ ᠮᠡᠯᠵᠡᠨ᠂ ᠤᠷᠲᠤ ᠨᠢᠭᠤᠷ ᠲᠠᠢ ᠬᠥᠮᠦᠨ ᠳ᠋ᠦ᠍ ᠳᠡᠭᠡᠭᠰᠢ ᠪᠡᠨ ᠨᠠᠷᠢᠬᠠᠨ ᠣᠷᠣᠢ ᠲᠠᠢ ᠮᠠᠯᠠᠭᠠᠢ ᠵᠣᠬᠢᠮᠵᠢ ᠦᠭᠡᠢ ᠤᠴᠢᠷ ᠳᠤᠬᠤ ᠤᠷᠤᠭᠤ ᠳᠠᠷᠤᠭᠰᠠᠨ ᠰᠠᠷᠠᠪᠴᠢ ᠲᠠᠢ ᠪᠤᠶᠤ ᠡᠰᠡᠪᠡᠯ ᠦᠰᠦ ᠪᠡᠷ ᠢ᠋ᠶ᠋ᠡᠨ ᠳᠤᠬᠤ ᠪᠠᠨ ᠬᠠᠭᠠᠵᠤ ᠪᠥᠭᠡᠷᠡᠩᠬᠡᠢ ᠲᠣᠭᠣᠷᠢᠭ ᠮᠠᠯᠠᠭᠠᠢ ᠡᠮᠦᠰᠬᠦ ᠵᠣᠬᠢᠮᠵᠢᠲᠠᠢ ᠪᠠᠢᠳᠠᠭ᠃ ᠵᠤᠨ ᠤ᠋ ᠨᠠᠷᠠᠨ ᠤ᠋ ᠮᠠᠯᠠᠭᠠᠢ ᠶ᠋ᠢ ᠬᠡᠳᠦ ᠬᠡᠳᠦᠨ ᠶᠠᠩᠵᠤ ᠪᠠᠷ ᠬᠢᠵᠦ ᠪᠣᠯᠤᠨᠠ᠃ ᠵᠤᠨ ᠤ᠋ ᠮᠠᠯᠠᠭᠠᠢ ᠶ᠋ᠢ ᠬᠢᠬᠦ ᠳ᠋ᠡᠭᠡᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠵᠥᠪ ᠰᠣᠩᠭᠣᠨᠠ᠃ ᠵᠤᠨ ᠤ᠋ ᠮᠠᠯᠠᠭᠠᠢ ᠳ᠋ᠤ᠌ ᠨᠡᠢᠯᠡᠭ ᠮᠠᠲ᠋ᠧᠷᠢᠶᠠᠯ ᠲᠣᠬᠢᠷᠠᠮᠵᠢ ᠦᠭᠡᠢ ᠪᠥᠭᠡᠳ ᠨᠢᠮᠭᠡᠨ ᠴᠠᠭᠠᠨ ᠳᠠᠪᠤᠤ ᠡᠷᠢᠶᠡᠨ ᠳᠠᠪᠤᠤ ᠵᠣᠬᠢᠷᠠᠮᠵᠢᠲᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ᠂ ᠪᠠᠶᠠᠨᠰᠡᠷᠡᠩ᠂ ᠲᠣᠭᠳᠠᠭᠤᠨᠪᠠᠶᠠᠷ ᠂ ᠰᠠᠢᠨᠪᠢᠯᠢᠭ᠌
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ