ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠬᠣᠶᠠᠳᠤᠭᠠᠷ ᠪᠦᠯᠦᠭ18-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ
321ᠬᠣᠶᠠᠳᠤᠭᠠᠷ ᠪᠦᠯᠦᠭ18-ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ
ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤ ᠪᠣᠯ ᠥᠪᠡᠷ ᠦ᠋ᠨ ᠣᠷᠣᠨ ᠤ᠋ ᠪᠠᠢᠭᠠᠯᠢ᠂ ᠴᠠᠭ ᠠᠭᠤᠷ ᠤ᠋ᠨ ᠣᠨᠴᠠᠯᠢᠭ ᠨᠥᠬᠥᠴᠡᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠥᠪᠡᠷᠮᠢᠴᠡ ᠬᠤᠪᠴᠠᠰᠤ ᠪᠥᠭᠡᠳ ᠶᠠᠮᠠᠷ ᠴᠤ᠌ ᠬᠦᠢᠲᠡᠨ ᠳ᠋ᠦ᠍ ᠬᠥᠯ ᠲᠠᠭᠠᠷᠠᠭᠤᠯᠳᠠᠭ ᠦᠭᠡᠢ᠂ ᠤᠰᠤ ᠪᠠᠭᠠ ᠨᠡᠪᠲᠡᠷᠡᠳᠡᠭ ᠪᠠᠲᠤ ᠪᠥᠬᠡ ᠰᠢᠷᠢ ᠪᠤᠯᠢᠭᠠᠷᠢ ᠪᠠᠷ ᠬᠢᠭᠰᠡᠨ᠂ ᠵᠤᠵᠠᠭᠠᠨ ᠢᠰᠡᠭᠡᠢ ᠣᠢᠮᠣᠰᠤ ᠲᠠᠢ ᠭᠤᠲᠤᠯ᠂ ᠬᠦᠵᠦᠭᠦᠦ ᠬᠣᠭᠣᠯᠠᠢ ᠳᠠᠭᠠᠷᠠᠭᠤᠯᠳᠠᠭ ᠦᠭᠡᠢ᠂ ᠠᠩᠬᠢᠨᠠ ᠡᠪᠡᠳᠴᠢᠨ ᠲᠤᠰᠬᠤ ᠠ᠋ᠴᠠ ᠬᠠᠮᠠᠭᠠᠯᠠᠳᠠᠭ ᠪᠣᠰᠤᠭᠠ ᠥᠨᠳᠥᠷ ᠵᠠᠬᠠ᠂ ᠬᠠᠭᠠᠯᠲᠠ ᠲᠠᠢ ᠡᠩᠭᠡᠷ ᠲᠡᠢ ᠯᠠᠪ ᠵᠥᠷᠢᠭᠦᠯᠵᠦ ᠪᠦᠰᠡᠯᠡᠳᠡᠭ ᠳᠡᠪᠡᠯ᠂ ᠥᠷᠭᠡᠨ ᠪᠦᠰᠡ ᠨᠢ ᠤᠭᠤᠴᠠ ᠨᠢᠷᠤᠭᠤᠨ ᠤ᠋ ᠡᠪᠡᠳᠴᠢᠨ(ᠠᠷᠲ᠋ᠢᠺᠥ᠋ᠯᠢᠲ᠋)᠂ ᠬᠠᠳᠬᠤᠭᠠ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠠ᠋ᠴᠠ ᠭᠠᠳᠠᠨᠠ ᠤᠨᠤᠭᠠ ᠮᠣᠷᠢ ᠤᠨᠤᠬᠤ ᠪᠤᠶᠤ ᠮᠠᠰᠢᠨ ᠳ᠋ᠤ᠌ ᠰᠠᠭᠤᠵᠤ ᠶᠠᠪᠤᠬᠤ ᠳ᠋ᠤ᠌ ᠡᠪᠦᠳᠦᠭ ᠬᠥᠯ᠂ ᠭᠠᠷ ᠤ᠋ᠨ ᠦᠶᠡ ᠮᠥᠴᠢ ᠲᠠᠭᠠᠷᠠᠭᠤᠯᠳᠠᠭ ᠦᠭᠡᠢ ᠠᠭᠤᠵᠢᠮ ᠳᠡᠪᠡᠯ ᠵᠡᠷᠭᠡ ᠪᠤᠰᠤᠳ ᠤᠯᠤᠰ ᠤ᠋ᠨ ᠬᠤᠪᠴᠠᠰᠤᠨ ᠠ᠋ᠴᠠ ᠢᠯᠭᠠᠭᠠ ᠲᠠᠢ᠃ ᠳᠡᠪᠡᠯ ᠢ᠋ ᠬᠡᠭᠡᠷᠡ ᠶ᠋ᠢᠨ ᠨᠥᠬᠥᠴᠡᠯ ᠳ᠋ᠦ᠍ ᠨᠥᠮᠥᠷᠬᠦ ᠳ᠋ᠦ᠍ ᠬᠥᠨᠵᠢᠯᠡ᠂ ᠳᠡᠪᠢᠰᠬᠡᠷ ᠪᠣᠯᠳᠠᠭ᠃ ᠤᠷᠲᠤ ᠬᠠᠨᠴᠤᠢ᠂ ᠠᠭᠤᠵᠢᠮ ᠰᠤᠭᠤ᠂ ᠮᠣᠷᠢ ᠤᠷᠭᠠᠯᠠᠬᠤ᠂ ᠡᠮᠨᠢᠭ ᠰᠤᠷᠭᠠᠬᠤ᠂ ᠪᠤᠭᠤᠢᠯᠢᠳᠠᠬᠤ ᠳ᠋ᠤ᠌ ᠰᠠᠭᠠᠳ ᠪᠣᠯᠳᠠᠭ ᠦᠭᠡᠢ᠃ ᠡᠨᠡ ᠲᠤᠬᠠᠢ ᠢᠷᠠᠭᠤ ᠨᠠᠢᠷᠠᠭᠴᠢ ᠳ· ᠫᠦᠷᠪᠦᠳᠣᠷᠵᠢ《ᠬᠥᠬᠡ ᠳᠠᠯᠢᠩᠪᠤ ᠲᠡᠷᠯᠢᠭ》 ᠭᠡᠳᠡᠭ ᠨᠠᠢᠷᠠᠭᠯᠠᠯ ᠳ᠋ᠠᠭᠠᠨ᠄
ᠤᠷᠭᠠ ᠶ᠋ᠢᠨ ᠤᠷᠲᠤ ᠶ᠋ᠢ ᠪᠠᠷᠢᠨᠠ ᠭᠡᠵᠦ
ᠠᠭᠤᠵᠢᠮ ᠰᠠᠢᠬᠠᠨ ᠰᠤᠭᠤ ᠲᠠᠯᠪᠢᠯᠠ
ᠠᠭᠤᠯᠠᠨ ᠤ᠋ ᠵᠢᠪᠠᠷ ᠤᠨᠤᠨᠠ ᠭᠡᠵᠦ
ᠤᠨᠠᠭᠠᠨ ᠲᠤᠭᠤᠷᠠᠢ ᠨᠢᠳᠤᠷᠭᠠ ᠲᠠᠯᠪᠢᠯᠠ
ᠡᠷᠭᠢᠴᠡᠭᠡ ᠮᠣᠷᠢᠨ ᠤ᠋ ᠡᠷᠭᠢᠶᠡ ᠶ᠋ᠢ ᠪᠣᠳᠣᠵᠤ
ᠡᠯᠪᠡᠭ ᠰᠠᠢᠬᠠᠨ ᠲᠠᠰᠢᠶᠠ ᠲᠠᠯᠪᠢᠯᠠ
ᠭᠡᠵᠦ ᠮᠣᠩᠭᠣᠯ ᠳᠡᠪᠡᠯ ᠦ᠋ᠨ ᠣᠨᠴᠠᠯᠢᠭ ᠰᠢᠨᠵᠢ ᠶ᠋ᠢ ᠲᠣᠳᠣᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠪᠠᠢᠳᠠᠭ᠃
ᠲᠡᠭᠦᠨᠴᠢᠯᠡᠨ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠮᠠᠯᠠᠭᠠᠢ ᠴᠤ᠌ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠦ᠌ ᠬᠢ ᠡᠴᠡ ᠣᠨᠴᠠᠯᠢᠭ ᠲᠣᠯᠣᠭᠠᠢ ᠴᠢᠬᠢ᠂ ᠡᠷᠡᠦ ᠶ᠋ᠢ ᠬᠠᠮᠠᠭᠠᠯᠠᠬᠤ ᠠ᠋ᠴᠠ ᠭᠠᠳᠠᠨᠠ ᠵᠠᠷᠢᠮ ᠮᠠᠯᠠᠭᠠᠢ (ᠬᠠᠰᠠᠭ ᠮᠡᠲᠦ) ᠠᠷᠤ ᠰᠢᠯᠢ᠂ ᠬᠦᠵᠦᠭᠦᠦ ᠶ᠋ᠢ ᠬᠠᠮᠠᠭᠠᠯᠠᠭᠰᠠᠨ ᠠᠷᠤ ᠳ᠋ᠠᠭᠠᠨ ᠰᠢᠯᠪᠢᠴᠢ ᠲᠡᠢ ᠪᠠᠢᠳᠠᠭ᠃
ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠪᠠᠰᠠ ᠨᠢᠭᠡ ᠣᠨᠴᠠᠯᠢᠭ ᠨᠢ ᠪᠡᠶᠡ ᠶ᠋ᠢᠨ ᠡᠯᠳᠡᠪ ᠰᠣᠭᠣᠭ ᠢ᠋ ᠳᠠᠯᠳᠠᠯᠠᠵᠤ ᠵᠠᠰᠠᠵᠤ ᠪᠠᠢᠳᠠᠭ ᠢ᠋ᠶ᠋ᠠᠷ ᠣᠨᠴᠠᠯᠢᠭ ᠲᠠᠢ᠃ ᠵᠢᠱ᠌ᠢᠶᠡ ᠨᠢ᠂ ᠤᠷᠲᠤᠬᠠᠨ ᠬᠢᠭᠰᠡᠨ ᠮᠣᠩᠭᠣᠯ ᠳᠡᠪᠡᠯ᠂ ᠲᠡᠷᠯᠢᠭ ᠬᠥᠮᠦᠨ ᠦ᠌ ᠬᠥᠯ ᠦ᠋ᠨ ᠮᠠᠶᠢᠭ᠂ ᠰᠢᠷᠬᠠ ᠰᠣᠷᠪᠢ᠂ ᠪᠤᠯᠴᠢᠩ ᠮᠢᠬᠠᠨ ᠤ᠋ ᠭᠠᠵᠢ ᠪᠤᠷᠤᠭᠤ ᠰᠣᠭᠣᠭ ᠢ᠋ ᠳᠠᠯᠳᠠᠯᠠᠵᠤ ᠪᠠᠢᠳᠠᠭ᠃ ᠣᠷᠴᠢᠨ ᠦᠶᠡ ᠳ᠋ᠦ᠍ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠤᠷᠠ ᠬᠢᠴᠡ᠂ ᠡᠰᠬᠡᠭᠦᠷ ᠬᠦᠷᠲᠡᠯᠡ ᠶᠡᠬᠡᠬᠡᠨ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠤ ᠦᠢᠯᠡᠳᠪᠦᠷᠢ ᠨᠦ᠍ᠭᠦᠳ ᠲᠦ᠍ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠨᠢᠭᠡᠳᠦᠭᠰᠡᠨ ᠵᠠᠭᠪᠤᠷ ᠲᠠᠢ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ ᠬᠤᠪᠢᠰᠬᠠᠯ ᠤ᠋ᠨ ᠵᠢᠯ ᠳ᠋ᠦ᠍ ᠠᠢᠯ ᠭᠡᠷ ᠲᠦ᠍ ᠣᠶᠣᠳᠠᠯ ᠤ᠋ᠨ ᠮᠠᠰᠢᠨ ᠨᠡᠪᠲᠡᠷᠡᠭᠰᠡᠨ ᠨᠢ ᠣᠶᠣᠳᠠᠯ ᠦᠢᠯᠡ ᠶ᠋ᠢᠨ ᠭᠠᠷ ᠠᠵᠢᠯᠯᠠᠭᠠ ᠮᠧᠬᠠᠨᠢᠭᠵᠢᠵᠤ᠂ ᠬᠥᠳᠡᠯᠮᠦᠷᠢ ᠶ᠋ᠢ ᠶᠡᠬᠡᠬᠡᠨ ᠬᠥᠩᠭᠡᠪᠴᠢᠯᠡᠵᠦ ᠪᠦᠲᠦᠭᠡᠯ ᠢ᠋ ᠨᠡᠮᠡᠭᠳᠡᠭᠦᠯᠵᠡᠢ᠃
ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤ ᠶ᠋ᠢ ᠣᠷᠴᠢᠨ ᠦᠶᠡ ᠳ᠋ᠦ᠍ ᠮᠠᠯᠴᠢᠳ ᠭᠣᠣᠯᠳᠠᠭᠤ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠠ᠋ᠴᠠ ᠭᠠᠳᠠᠨᠠ ᠯᠣᠣᠪᠤᠤᠵᠠ ᠮᠠᠯᠠᠭᠠᠢ ᠶ᠋ᠢ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠰ ᠰᠣᠨᠢᠷᠬᠠᠵᠤ ᠪᠠᠢᠨᠠ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤ ᠶ᠋ᠢ ᠣᠯᠠᠨ ᠬᠡᠯᠪᠡᠷᠢ ᠪᠡᠷ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠡᠭᠦᠨ ᠦ᠌ ᠭᠡᠷᠡᠴᠢ ᠪᠣᠯ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠤ᠋ᠨ ᠪᠥᠬᠡ ᠶ᠋ᠢᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠦᠨᠳᠦᠰᠦᠲᠡᠨ ᠦ᠌ ᠡᠭᠡᠳᠡᠩ ᠭᠤᠲᠤᠯ᠂ ᠵᠣᠳᠣᠭ ᠱᠣᠳᠠᠭ ᠡᠷᠲᠡ ᠦᠶᠡ ᠡᠴᠡ ᠡᠳᠦᠭᠡ ᠬᠦᠷᠲᠡᠯᠡ ᠬᠡᠷᠡᠭᠯᠡᠭᠳᠡᠬᠦ ᠳ᠋ᠡᠭᠡᠨ ᠨᠢᠭᠡ ᠲᠠᠯᠠ ᠪᠠᠷ ᠬᠦᠴᠦᠲᠦ ᠪᠥᠬᠡ ᠶ᠋ᠢᠨ ᠴᠢᠮᠡᠭ ᠪᠣᠯᠵᠤ ᠨᠥᠭᠦᠭᠡ ᠲᠠᠯᠠ ᠪᠠᠷ ᠡᠭᠡᠳᠡᠩ ᠭᠤᠲᠤᠯ ᠬᠥᠯ ᠦ᠋ᠨ ᠬᠠᠮᠠᠭᠠᠯᠠᠯᠲᠠ ᠪᠣᠯᠳᠠᠭ ᠪᠥᠭᠡᠳ ᠡᠷᠲᠡ ᠦᠶᠡ ᠡᠴᠡ ᠣᠳᠣ ᠬᠦᠷᠲᠡᠯᠡ ᠥᠭᠡᠷᠡᠴᠢᠯᠡᠭᠳᠡᠭᠡ ᠦᠭᠡᠢ ᠶ᠋ᠢ ᠦᠵᠡᠬᠦ ᠳ᠋ᠦ᠍ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠡᠬᠡᠬᠡᠨ ᠨᠠᠷᠢᠨ ᠲᠣᠭᠠᠴᠠᠭᠠ ᠲᠠᠢ ᠬᠢᠭᠳᠡᠭᠰᠡᠨ ᠬᠤᠪᠴᠠᠰᠤ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ᠃
ᠲᠡᠭᠦᠨᠴᠢᠯᠡᠨ ᠰᠤᠷ ᠬᠠᠷᠪᠤᠬᠤ᠂ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠬᠡᠦᠬᠡᠳ ᠦ᠋ᠨ ᠬᠤᠪᠴᠠᠰᠤ᠂ ᠤᠷᠠᠯᠢᠭ ᠤ᠋ᠨ ᠬᠤᠪᠴᠠᠰᠤ᠂ ᠱᠠᠰᠢᠨ ᠤ᠋ ᠡᠮᠦᠰᠬᠡᠯ᠂ ᠴᠡᠷᠢᠭ᠂ ᠰᠤᠷᠤᠭᠴᠢ ᠶ᠋ᠢᠨ ᠳᠦᠷᠢᠮᠲᠦ ᠬᠤᠪᠴᠠᠰᠤ ᠮᠡᠲᠦ ᠥᠪᠡᠷᠮᠢᠴᠡ ᠰᠢᠨᠵᠢ ᠴᠢᠨᠠᠷ ᠢ᠋ ᠬᠠᠷᠠᠭᠤᠯᠤᠭᠰᠠᠨ ᠬᠤᠪᠴᠠᠰᠤ ᠨᠤᠭᠤᠳ ᠴᠥᠮ ᠮᠠᠨ ᠤ᠋ ᠡᠮᠡᠭᠲᠡᠢᠴᠦᠳ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠪᠦᠲᠦᠳᠡᠭ ᠪᠢᠯᠡ᠃
ᠮᠣᠩᠭᠣᠯ ᠤ᠋ᠨ ᠡᠮᠡᠭᠲᠡᠢᠴᠦᠳ ᠣᠷᠣᠰᠢᠨ ᠰᠠᠭᠤᠭᠠ ᠭᠡᠷ ᠣᠷᠣᠨ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠪᠤᠰᠤᠳ ᠵᠦᠢᠯᠡᠰ ᠢ᠋ ᠤᠷᠠᠯᠠᠬᠤ ᠳ᠋ᠠᠭᠠᠨ ᠲᠤᠰᠬᠠᠢ ᠨᠢᠭᠡᠳᠦᠭᠰᠡᠨ ᠬᠡᠮᠵᠢᠭᠦᠷ ᠦᠭᠡᠢ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠬᠤᠷᠤᠭᠤ᠂ ᠦᠶᠡ ᠮᠥᠴᠢ ᠪᠣᠯᠤᠨ ᠡᠳᠦᠷ ᠳᠣᠳᠣᠮ ᠤ᠋ᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠷᠡᠭᠯᠡᠭᠳᠡᠵᠦ ᠪᠠᠢᠳᠠᠭ ᠲᠣᠳᠣᠷᠬᠠᠢ ᠵᠦᠢᠯ ᠲᠡᠢ ᠵᠢᠱ᠌ᠢᠨ ᠬᠡᠮᠵᠢᠳᠡᠭ ᠪᠠᠢᠭᠰᠠᠨ ᠨᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠣᠬᠢᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠣᠳᠣ ᠴᠤ᠌ ᠬᠡᠷᠡᠭᠯᠡᠭᠰᠡᠭᠡᠷ ᠪᠠᠢᠨᠠ᠃
ᠵᠢᠱ᠌ᠢᠶᠡ ᠨᠢ᠄ ᠮᠣᠩᠭᠣᠯ ᠳᠡᠪᠡᠯ ᠡᠰᠬᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠦ᠌ ᠤᠷᠲᠤ ᠶ᠋ᠢ ᠡᠮᠦᠰᠬᠦ ᠬᠥᠮᠦᠨ ᠦ᠌ ᠥᠪᠡᠷ ᠦ᠋ᠨ ᠬᠢᠨᠢ ᠳᠣᠯᠣᠭᠠᠨ ᠲᠥᠭᠡ ᠪᠡᠷ᠂ ᠵᠠᠬᠠ ᠶ᠋ᠢᠨ ᠤᠷᠲᠤ ᠶ᠋ᠢ ᠨᠢᠭᠡ ᠲᠥᠭᠡ ᠬᠣᠶᠠᠷ ᠬᠤᠷᠤᠭᠤ ᠪᠠᠷ ᠲᠠᠭᠠᠷᠠᠭᠤᠯᠤᠨ ᠡᠰᠬᠡᠬᠦ ᠪᠠ ᠨᠢᠭᠡ ᠬᠥᠮᠦᠨ ᠦ᠌ ᠲᠥᠭᠡ ᠪᠡᠷ ᠥᠭᠡᠷᠡ ᠬᠥᠮᠦᠨ ᠦ᠌ ᠬᠤᠪᠴᠠᠰᠤ ᠶ᠋ᠢ ᠬᠡᠮᠵᠢᠵᠦ ᠪᠣᠯᠳᠠᠭ ᠦᠭᠡᠢ ᠪᠠᠢᠵᠠᠢ᠃ ᠭᠡᠪᠡᠴᠦ ᠭᠠᠷ ᠬᠤᠷᠤᠭᠤᠨ ᠤ᠋ ᠪᠠᠷᠤᠭᠴᠠᠭᠠ ᠲᠥᠭᠡ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠡᠬᠡ ᠣᠢᠷᠠᠲᠤᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠣᠷᠴᠢᠨ ᠦᠶᠡ ᠶ᠋ᠢᠨ ᠨᠢᠭᠡᠳᠦᠭᠰᠡᠨ ᠪᠠᠷᠢᠮᠵᠢᠶᠠ ᠬᠡᠮᠵᠢᠭᠦᠷ ᠡᠴᠡ ᠬᠣᠯᠠ ᠵᠥᠷᠢᠶᠡ ᠦᠭᠡᠢ ᠪᠣᠯᠬᠤ ᠨᠢ ᠨᠤᠲᠠᠯᠠᠭᠳᠠᠵᠤ ᠪᠠᠢᠨᠠ᠃ ᠡᠨᠡ ᠲᠤᠬᠠᠢ ᠵᠢᠴᠢ ᠳᠤᠷᠠᠳᠬᠤ ᠪᠣᠯᠤᠨᠠ᠃
ᠮᠣᠩᠭᠣᠯ ᠤ᠋ᠨ ᠡᠮᠡᠭᠲᠡᠢᠴᠦᠳ ᠦ᠋ᠨ ᠤᠷᠠᠨ ᠦᠢᠯᠡ ᠪᠣᠯ ᠵᠥᠪᠬᠡᠨ ᠡᠮᠦᠰᠬᠦ ᠬᠤᠪᠴᠠᠰᠤ᠂ ᠭᠡᠷ ᠦ᠋ᠨ ᠡᠳ᠋ ᠬᠣᠭᠰᠢᠯ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠵᠤ ᠪᠠᠢᠭᠠ ᠦᠭᠡᠢ ᠬᠡᠮᠵᠢᠬᠦ ᠡᠰᠬᠡᠬᠦ᠂ ᠣᠶᠣᠬᠤ ᠬᠠᠳᠬᠤᠬᠤ᠂ ᠰᠦᠯᠵᠢᠬᠦ᠂ ᠲᠠᠮᠤᠬᠤ ᠵᠠᠩᠭᠢᠳᠬᠤ᠂ ᠨᠠᠭᠠᠬᠤ ᠪᠦᠬᠦ ᠠᠵᠢᠯᠯᠠᠭᠠ ᠶ᠋ᠢ ᠬᠠᠮᠤᠷᠴᠤ ᠪᠠᠢᠳᠠᠭᠠ᠋ᠴᠠ ᠭᠠᠳᠠᠨᠠ ᠥᠩᠭᠡ᠂ ᠮᠠᠲ᠋ᠧᠷᠢᠶᠠᠯ ᠰᠣᠩᠭᠣᠨ ᠲᠣᠬᠢᠷᠠᠭᠤᠯᠬᠤ ᠠᠵᠢᠯ ᠬᠠᠮᠤᠷᠤᠭᠳᠠᠨᠠ᠃
ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤᠨ ᠤ᠋ ᠥᠩᠭᠡ ᠵᠣᠬᠢᠴᠠᠯ ᠮᠣᠩᠭᠣᠯᠴᠤᠳ ᠡᠷᠲᠡ ᠦᠶᠡ ᠡᠴᠡ ᠬᠤᠪᠴᠠᠰᠤᠨ ᠤ᠋ ᠥᠩᠭᠡ ᠵᠣᠬᠢᠴᠠᠯ ᠢ᠋ ᠶᠡᠬᠡᠬᠡᠨ ᠲᠣᠬᠢᠷᠠᠭᠤᠯᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠡᠨᠡ ᠨᠢ ᠦᠨᠳᠦᠰᠦᠲᠡᠨ ᠦ᠌ ᠶᠣᠰᠣ ᠵᠠᠩᠰᠢᠯ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠳᠬᠠ ᠠᠭᠤᠯᠭᠠ ᠲᠠᠢ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠭᠤᠸᠠ ᠵᠦᠢ ᠶ᠋ᠢᠨ ᠬᠥᠭᠵᠢᠯᠲᠡ ᠶ᠋ᠢ ᠢᠯᠡᠷᠬᠡᠢᠯᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠨᠴᠠᠯᠢᠭ ᠲᠠᠢ ᠤᠴᠢᠷ ᠬᠥᠮᠦᠨ ᠦ᠌ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯ ᠦ᠋ᠨ ᠦᠶᠡ ᠱᠠᠲᠤ ᠶ᠋ᠢ ᠰᠤᠳᠤᠯᠬᠤ ᠳ᠋ᠤ᠌ ᠴᠢᠬᠤᠯᠠ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠶᠤᠮ᠃
ᠬᠦᠢ ᠨᠢᠭᠡᠳᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠤᠯᠠᠭᠠᠨ᠂ ᠬᠦᠷᠡᠩ᠂ ᠰᠢᠷᠠ ᠵᠣᠰᠣ ᠪᠣᠳᠣᠭ ᠢ᠋ ᠡᠬᠢᠯᠡᠨ ᠬᠡᠷᠡᠭᠯᠡᠭᠰᠡᠨ ᠢ᠋ᠶ᠋ᠡᠷ ᠤᠷᠠᠯᠢᠭ ᠲᠤ᠌ ᠠᠩᠬᠠ ᠥᠩᠭᠡ ᠢᠯᠭᠠᠨ ᠬᠡᠷᠡᠭᠯᠡᠬᠦ ᠭᠤᠸᠠ ᠵᠦᠢ ᠶ᠋ᠢᠨ ᠡᠬᠢᠯᠡᠯ ᠪᠣᠯᠵᠠᠢ᠃ ᠥᠩᠭᠡ ᠵᠣᠬᠢᠴᠠᠭᠤᠯᠬᠤ ᠶᠠᠪᠤᠳᠠᠯ ᠬᠥᠮᠦᠨ ᠦ᠌ ᠭᠤᠸᠠ ᠵᠦᠢ ᠶ᠋ᠢᠨ ᠠᠰᠠᠭᠤᠳᠠᠯ ᠤᠴᠢᠷ ᠣᠷᠴᠢᠨ ᠦᠶᠡ ᠳ᠋ᠦ᠍ ᠴᠦ᠍ ᠴᠢᠬᠤᠯᠠ ᠰᠡᠳᠦᠪ ᠪᠣᠯᠵᠤ ᠪᠠᠢᠨᠠ᠃ ᠮᠣᠩᠭᠣᠯᠴᠤᠳ ᠳᠡᠭᠡᠷᠡ ᠦᠶᠡ ᠡᠴᠡ ᠡᠬᠢᠯᠡᠨ ᠲᠣᠳᠣ ᠥᠩᠭᠡ ᠶ᠋ᠢᠨ ᠳᠡᠪᠡᠯ ᠡᠮᠦᠰᠳᠡᠭ ᠪᠠᠢᠯᠠ᠃ ᠢᠯᠠᠩᠭᠤᠶᠠ ᠤᠯᠠᠭᠠᠨ ᠥᠩᠭᠡ ᠠᠮᠢᠳᠤᠷᠠᠯ ᠤ᠋ᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠳᠡᠭᠡᠭᠰᠢ ᠪᠡᠨ ᠪᠠᠳᠠᠷᠠᠵᠤ ᠪᠠᠢᠭᠠ ᠭᠠᠯ ᠤ᠋ᠨ ᠥᠩᠭᠡ ᠭᠡᠵᠦ ᠦᠵᠡᠳᠡᠭ ᠤᠴᠢᠷ ᠲᠡᠭᠦᠨ ᠢ᠋ ᠡᠷᠬᠢᠮᠯᠡᠨ ᠬᠤᠪᠴᠠᠰᠤ ᠬᠤᠨᠠᠷ ᠲᠠᠭᠠᠨ ᠳᠤᠰᠬᠠᠨ ᠬᠡᠷᠡᠭᠯᠡᠳᠡᠭ ᠪᠠᠢᠵᠠᠢ᠃
ᠮᠣᠩᠭᠣᠯᠴᠤᠳ ᠤ᠋ᠨ ᠥᠩᠭᠡ ᠶ᠋ᠢ ᠣᠯᠠᠨ ᠶᠠᠩᠵᠤ ᠪᠠᠷ ᠢᠯᠭᠠᠪᠤᠷᠢᠯᠠᠨ ᠦᠵᠡᠳᠡᠭ ᠲᠤᠬᠠᠢ ᠨᠡᠬᠡᠮᠡᠯ ᠬᠠᠳᠬᠤᠮᠠᠯ ᠤ᠋ᠨ ᠥᠩᠭᠡ ᠵᠣᠬᠢᠴᠠᠭᠤᠯᠤᠯᠲᠠ ᠳ᠋ᠤ᠌ ᠳᠤᠷᠠᠳᠤᠭᠰᠠᠨ ᠤᠴᠢᠷ ᠣᠳᠣ ᠵᠥᠪᠬᠡᠨ ᠣᠷᠴᠢᠨ ᠦᠶᠡ ᠶ᠋ᠢᠨ ᠬᠤᠪᠴᠠᠰᠤᠨ ᠤ᠋ ᠥᠩᠭᠡ ᠵᠣᠬᠢᠴᠠᠯ ᠤ᠋ᠨ ᠲᠠᠯᠠ ᠪᠠᠷ ᠪᠢᠴᠢᠶᠡ᠃ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ ᠦ᠋ᠨ ᠥᠩᠭᠡ ᠵᠣᠬᠢᠴᠠᠯ ᠲᠤᠬᠠᠢ ᠶ᠋ᠢᠨ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯ ᠦ᠋ᠨ ᠭᠤᠸᠠ ᠵᠦᠢ ᠲᠡᠢ ᠬᠣᠯᠪᠣᠭᠠ ᠲᠠᠢ ᠪᠥᠭᠡᠳ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯ ᠦ᠋ᠨ ᠳᠠᠭᠠᠤ ᠥᠭᠡᠷᠡᠴᠢᠯᠡᠭᠳᠡᠵᠦ ᠪᠠᠢᠳᠠᠭ ᠪᠢᠯᠡ᠃
ᠣᠷᠴᠢᠨ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠡᠮᠡᠭᠲᠡᠢᠴᠦᠳ ᠲᠣᠳᠣ ᠪᠢᠰᠢ ᠥᠩᠭᠡ ᠶ᠋ᠢᠨ ᠬᠠᠷᠠ᠂ ᠪᠣᠷᠣ᠂ ᠬᠣᠯᠠ ᠰᠢᠷᠠ᠂ ᠬᠠᠷᠠ ᠬᠥᠬᠡ᠂ ᠬᠠᠷᠠ ᠨᠣᠭᠣᠭᠠᠨ ᠵᠡᠷᠭᠡ ᠪᠦᠳᠡᠭᠢ ᠥᠩᠭᠡ ᠶ᠋ᠢ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠨᠢ ᠣᠷᠴᠢᠨ ᠦᠶᠡ ᠶ᠋ᠢᠨ ᠭᠤᠸᠠ ᠦᠵᠡᠮᠵᠢ ᠥᠩᠭᠡ ᠵᠣᠬᠢᠴᠠᠯ ᠳ᠋ᠤ᠌ ᠲᠣᠬᠢᠷᠠᠵᠤ ᠲᠥᠪ ᠳᠠᠷᠤᠤ ᠬᠠᠷᠠᠭᠳᠠᠭᠤᠯᠬᠤ ᠪᠣᠯᠵᠠᠢ᠃ ᠣᠷᠴᠢᠨ ᠦᠶᠡ ᠳ᠋ᠦ᠍ ᠡᠷᠡᠭᠲᠡᠢᠴᠦᠳ ᠦ᠋ᠨ ᠳᠡᠪᠡᠯ ᠦ᠋ᠨ ᠥᠩᠭᠡ ᠶ᠋ᠢ ᠲᠣᠬᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠥᠩᠭᠡ ᠶ᠋ᠢ ᠰᠣᠩᠭᠣᠬᠤ ᠨᠢ ᠴᠢᠬᠤᠯᠠ ᠪᠥᠭᠡᠳ ᠡᠮᠵᠢᠶᠡᠷᠢ ᠶ᠋ᠢ ᠬᠡ ᠥᠬᠡᠢ ᠴᠤᠯᠭᠤᠢ ᠫᠦᠦᠰᠦᠦ ᠪᠡᠷ2—3 ᠬᠣᠣᠰ ᠡᠮᠵᠢᠬᠦ ᠨᠢ ᠵᠣᠬᠢᠮᠵᠢᠲᠠᠢ᠃ ᠡᠰᠡᠪᠡᠯ ᠳᠡᠪᠡᠯ ᠦ᠋ᠨ ᠥᠩᠭᠡ ᠲᠡᠢ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠡᠮᠵᠢᠪᠡᠯ ᠪᠣᠯᠤᠨᠠ᠃ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠳᠡᠪᠡᠯ ᠢ᠋ ᠰᠠ ᠲᠠᠢ ᠲᠣᠷᠭᠠ᠂ ᠬᠣᠷᠭᠣᠢ᠂ ᠬᠡᠳᠦ ᠬᠤᠷᠴᠠ ᠥᠩᠭᠡ ᠲᠡᠢ ᠲᠣᠷᠭᠠ ᠳᠤᠷᠳᠤᠩ᠂ ᠪᠤᠰᠤᠳ ᠬᠡ ᠲᠡᠢ ᠲᠣᠷᠭᠠ ᠪᠠᠷ ᠡᠮᠵᠢᠬᠦ ᠵᠣᠬᠢᠮᠵᠢ ᠦᠭᠡᠢ᠃
ᠳᠡᠪᠡᠯ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠲᠣᠷᠭᠠ᠂ ᠦᠢᠲᠠᠩ ᠬᠤᠸᠠᠷ᠂ ᠵᠢᠭᠦᠨᠢ᠂ ᠰᠠᠲ᠋ᠢᠨ᠂ ᠳᠠᠯᠢᠩᠪᠤ ᠠᠯᠢᠨ ᠢ᠋ ᠴᠦ᠍ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠭᠣᠶᠣᠯ ᠤ᠋ᠨ ᠳᠡᠪᠡᠯ ᠳ᠋ᠦ᠍ ᠦᠢᠲᠠᠩ ᠬᠤᠸᠠᠷ᠂ ᠲᠣᠷᠭᠠ᠂ ᠴᠤᠯᠭᠤᠢ ᠫᠦᠦᠰᠦᠦ᠂ ᠳᠠᠪᠤᠤ ᠵᠣᠬᠢᠮᠵᠢᠲᠠᠢ᠃
ᠫᠦᠦᠰᠦᠦ᠂ ᠳᠠᠪᠤᠤ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶᠠᠮᠠᠷ ᠴᠤ᠌ ᠬᠥᠮᠦᠨ ᠳ᠋ᠦ᠍ ᠵᠣᠬᠢᠮᠵᠢᠲᠠᠢ ᠪᠥᠭᠡᠳ ᠡᠷᠢᠶᠡᠨ ᠪᠤᠶᠤ ᠬᠡᠳᠦ ᠣᠢᠷᠠᠬᠠᠨ ᠬᠡ ᠲᠡᠢ ᠲᠣᠷᠭᠠᠨ ᠳᠡᠪᠡᠯ᠂ ᠲᠡᠷᠯᠢᠭ ᠡᠷᠡᠭᠲᠡᠢᠴᠦᠳ ᠲᠦ᠍ ᠵᠣᠬᠢᠮᠵᠢ ᠦᠭᠡᠢ᠃
ᠳᠡᠪᠡᠯ᠂ ᠲᠡᠷᠯᠢᠭ ᠡᠰᠬᠡᠵᠦ ᠣᠶᠣᠬᠤ ᠳᠠᠪᠤᠤ ᠪᠠᠷ ᠮᠣᠩᠭᠣᠯ ᠳᠡᠪᠡᠯ ᠬᠢᠬᠦ ᠳ᠋ᠦ᠍4 ᠮᠧᠲ᠋ᠷ ᠳᠠᠪᠤᠤ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠣᠶᠠᠷ ᠬᠥᠮᠦᠨ ᠦ᠌ ᠳᠡᠪᠡᠯ ᠪᠣᠯᠬᠤ ᠪᠥᠭᠡᠳ ᠡᠮᠡᠭᠲᠡᠢᠴᠦᠳ ᠭᠣᠣᠯᠳᠠᠭᠤ ᠡᠷᠡᠴᠦᠳ ᠡᠴᠡ ᠨᠠᠮᠬᠠᠨ ᠲᠤᠷᠠᠩᠬᠠᠢ᠂ ᠪᠡᠶᠡ ᠪᠡᠷ ᠪᠠᠭᠠ ᠪᠠᠢᠳᠠᠭ ᠤᠴᠢᠷ ᠳᠠᠪᠤᠤ ᠶ᠋ᠢ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠴᠣᠭᠣᠯᠬᠤ ᠪᠢᠰᠢ᠂ ᠡᠷᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠵᠣᠷᠢᠭᠤᠯᠬᠤ ᠥᠩᠭᠡ ᠪᠡᠨ2—3 ᠬᠤᠷᠤᠭᠤ ᠢᠯᠡᠭᠦᠦ ᠥᠷᠭᠡᠨ ᠴᠣᠭᠣᠯᠤᠨᠠ᠃ ᠴᠤᠭᠤᠯᠤᠭᠰᠠᠨ ᠳᠠᠪᠤᠤ ᠪᠠᠨ ᠵᠥᠷᠢᠭᠦᠯᠡᠵᠦ ᠡᠰᠬᠡᠬᠦ ᠨᠢ ᠵᠣᠬᠢᠮᠵᠢᠲᠠᠢ᠃
ᠬᠤᠪᠴᠠᠰᠤᠨ ᠤ᠋ ᠡᠰᠬᠡᠭᠦᠷ
ᠡᠷᠲᠡᠨ ᠦ᠌ ᠨᠠᠷᠢᠨ ᠠᠵᠢᠯᠯᠠᠭᠠ ᠬᠡᠮᠵᠢᠯᠲᠡ ᠱᠠᠭᠠᠷᠳᠠᠳᠠᠭ ᠪᠠᠢᠭᠰᠠᠨ ᠤ᠋ ᠭᠠᠳᠠᠨᠠ ᠣᠳᠣ ᠴᠤ᠌ ᠤᠯᠠᠮ ᠶᠡᠬᠡ ᠨᠠᠷᠢᠨ ᠠᠵᠢᠯᠯᠠᠭᠠ ᠱᠠᠭᠠᠷᠳᠠᠭᠳᠠᠬᠤ ᠪᠣᠯᠤᠯᠠ᠃ ᠳᠡᠪᠡᠯ ᠡᠰᠬᠡᠬᠦ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠠᠷᠭᠠ ᠪᠠᠢᠳᠠᠭ ᠪᠥᠭᠡᠳ ᠬᠡ ᠲᠡᠢ᠂ ᠬᠡ ᠥᠬᠡᠢ ᠮᠠᠲ᠋ᠧᠷᠢᠶᠠᠯ ᠴᠤ᠌ ᠥᠭᠡᠷᠡ ᠥᠭᠡᠷᠡ ᠡᠰᠬᠡᠭᠦᠷ ᠱᠠᠭᠠᠷᠳᠠᠨᠠ᠃ ᠳᠡᠪᠡᠯ᠂ ᠲᠡᠷᠯᠢᠭ ᠢ᠋ ᠡᠰᠬᠡᠬᠦ ᠳ᠋ᠡᠭᠡᠨ ᠬᠡᠷᠪᠡ ᠳᠤᠭᠤᠢ ᠬᠡ ᠲᠡᠢ ᠲᠣᠷᠭᠠ᠂ ᠦᠢᠲᠠᠩ ᠬᠤᠸᠠᠷ ᠪᠣᠯ ᠬᠡ ᠶ᠋ᠢ ᠵᠥᠷᠢᠭᠦᠯᠡᠬᠦ ᠪᠤᠶᠤ ᠬᠠᠭᠠᠰᠯᠠᠬᠤ ᠨᠢ ᠬᠤᠪᠴᠠᠰᠤᠨ ᠤ᠋ ᠦᠵᠡᠮᠵᠢ ᠶ᠋ᠢ ᠭᠤᠲᠤᠭᠠᠬᠤ ᠤᠴᠢᠷ ᠡᠰᠬᠡᠬᠦ ᠳ᠋ᠡᠭᠡᠨ ᠬᠡ ᠶ᠋ᠢ ᠨᠠᠷᠢᠨ ᠲᠣᠬᠢᠷᠠᠭᠤᠯᠤᠨᠠ᠃ ᠦᠢᠲᠠᠩ ᠬᠤᠸᠠᠷ ᠪᠤᠰᠤᠳ ᠳᠤᠭᠤᠢ ᠬᠡ ᠲᠡᠢ ᠵᠠᠷᠢᠮ ᠲᠣᠷᠭᠠᠨ ᠤ᠋ ᠡᠩ ᠨᠠᠷᠢᠨ ᠤᠴᠢᠷ ᠡᠷᠡᠭᠲᠡᠢᠴᠦᠳ᠂ ᠲᠣᠮᠣ ᠪᠡᠶᠡ ᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠳᠡᠪᠡᠯ ᠬᠢᠬᠦ ᠳ᠋ᠦ᠍ ᠵᠥᠷᠢᠭᠦᠯᠡᠵᠦ ᠡᠰᠬᠡᠵᠦ ᠪᠣᠯᠳᠠᠭ ᠦᠭᠡᠢ ᠪᠥᠭᠡᠳ ᠭᠣᠣᠯ ᠣᠶᠣᠵᠤ ᠮᠠᠯᠲᠠᠬᠤ ᠡᠰᠬᠡᠭᠦᠷ ᠱᠠᠭᠠᠷᠳᠠᠬᠤ ᠤᠴᠢᠷ ᠲᠠᠪᠤᠨ ᠮᠧᠲ᠋ᠷ ᠡᠴᠡ ᠳᠣᠭᠣᠭᠰᠢ ᠦᠭᠡᠢ ᠮᠠᠲ᠋ᠧᠷᠢᠶᠠᠯ ᠣᠷᠣᠨᠠ᠃
ᠥᠷᠭᠡᠨ ᠡᠩ ᠲᠡᠢ ᠳᠤᠭᠤᠢ ᠬᠡ ᠲᠡᠢ ᠲᠣᠷᠭᠠ ᠪᠠᠷ ᠳᠡᠪᠡᠯ ᠡᠰᠬᠡᠬᠦ ᠳ᠋ᠦ᠍ ᠳᠡᠪᠡᠯ ᠦ᠋ᠨ ᠤᠷᠲᠤ ᠶ᠋ᠢ ᠬᠡᠮᠵᠢᠵᠦ ᠬᠣᠶᠠᠷ ᠰᠤᠭᠤ ᠶ᠋ᠢ ᠤᠬᠤᠨ ᠤᠷᠢᠳᠤ ᠡᠩᠭᠡᠷ ᠵᠠᠯᠭᠠᠵᠤ᠂ ᠬᠠᠨᠴᠤᠢ ᠶ᠋ᠢᠨ ᠤᠷᠢᠳᠤᠭᠤᠷ ᠵᠠᠯᠭᠠᠭᠠ ᠣᠷᠣᠭᠤᠯᠤᠨᠠ᠃ ᠤᠷᠢᠳᠤ ᠡᠩᠭᠡᠷ ᠬᠠᠨᠴᠤᠢ ᠶ᠋ᠢᠨ ᠤᠷᠢᠳᠤᠭᠤᠷ ᠣᠷᠣᠭᠤᠯᠬᠤ ᠣᠷᠣᠭᠤᠯᠭᠠ ᠶ᠋ᠢᠨ ᠬᠡ ᠶ᠋ᠢ ᠲᠠᠭᠠᠷᠠᠭᠤᠯᠤᠨᠠ᠃
ᠵᠢᠷᠤᠭ28
(1) ᠵᠥᠷᠢᠭᠦᠯᠡᠵᠦ ᠡᠰᠬᠡᠬᠦ ᠠᠷᠭᠠ
(2) ᠨᠠᠷᠢᠨ ᠡᠩ ᠲᠡᠢ ᠦᠢᠳᠡᠩ ᠬᠤᠸᠠᠷ ᠂ᠳᠤᠭᠤᠢ ᠬᠡ ᠲᠠᠢ ᠲᠣᠷᠭᠠ ᠪᠠᠷ ᠳᠡᠪᠡᠯ ᠵᠥᠷᠢᠭᠦᠯᠡᠵᠦ ᠡᠰᠬᠡᠬᠦ ᠠᠵᠢᠯᠯᠠᠭᠠ
(3) ᠥᠷᠭᠡᠨ ᠡᠩ ᠲᠠᠢ ᠮᠠᠲ᠋ᠧᠷᠢᠶᠠᠯ ᠢᠶᠠᠷ ᠳᠣᠲᠣᠭᠠᠳᠤ ᠡᠩᠭᠡᠷ ᠭᠦᠶᠦᠯᠭᠡᠨ ᠡᠰᠬᠡᠬᠦ ᠠᠷᠭᠠ
ᠳᠡᠪᠡᠯ ᠢ᠋ ᠵᠥᠷᠢᠭᠦᠯᠡᠵᠦ ᠡᠰᠬᠡᠬᠦ ᠳ᠋ᠡᠭᠡᠨ ᠶᠡᠬᠡ ᠪᠡᠶᠡ ᠶ᠋ᠢᠨ ᠤᠷᠲᠤ ᠳᠡᠭᠡᠷᠡ ᠬᠠᠨᠴᠤᠢ ᠨᠡᠮᠡᠵᠦ ᠬᠣᠶᠠᠷ ᠲᠠᠯᠠ ᠶ᠋ᠢ ᠶᠠᠭ ᠲᠡᠩᠴᠡᠭᠦᠦ ᠬᠡᠮᠵᠢᠵᠦ ᠵᠥᠷᠢᠭᠦᠯᠡᠵᠦ ᠬᠠᠢᠴᠢᠯᠠᠭᠠᠳ ᠨᠡᠢᠯᠡᠭᠦᠯᠦᠨ ᠣᠶᠣᠨᠠ᠃ ᠬᠠᠷᠢᠨ ᠬᠡ ᠲᠡᠢ ᠲᠣᠷᠭᠠ᠂ ᠦᠢᠲᠠᠩ ᠬᠤᠸᠠᠷ ᠪᠣᠯ ᠬᠡ ᠶ᠋ᠢ ᠡᠪᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠳᠡᠭᠡᠳᠦ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠭᠣᠣᠯ ᠬᠡ ᠶ᠋ᠢ ᠨᠠᠷᠢᠨ ᠲᠣᠬᠢᠷᠠᠭᠤᠯᠤᠨᠠ᠃
ᠵᠢᠷᠤᠭ29
(1) ᠨᠠᠷᠢᠨ ᠡᠩ ᠲᠡᠢ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠡᠩ ᠵᠡᠷᠭᠡᠴᠡᠭᠦᠯᠵᠦ ᠰᠤᠭᠤ ᠤᠬᠤᠵᠤ ᠡᠰᠬᠡᠬᠦ ᠠᠷᠭᠠ
(2) ᠴᠤᠯᠭᠤᠢ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠵᠥᠷᠢᠭᠦᠯᠡᠵᠦ ᠡᠰᠬᠡᠬᠦ ᠠᠵᠢᠯᠯᠠᠭᠠ
ᠳᠡᠪᠡᠯ ᠢ᠋ ᠡᠰᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠥᠩᠭᠡ ᠪᠡᠨ ᠣᠶᠣᠬᠤ ᠳ᠋ᠠᠭᠠᠨ ᠭᠣᠣᠯ ᠪᠤᠰᠤᠳ ᠵᠦᠢᠭᠰᠡᠨ ᠵᠦᠢᠳᠡᠯ ᠳ᠋ᠦ᠍ ᠵᠣᠩᠬᠤ ᠲᠦᠷᠬᠢᠪᠡᠯ ᠢᠯᠠᠩᠭᠤᠶᠠ ᠭᠣᠣᠯ ᠣᠶᠣᠳᠠᠯ ᠦᠵᠡᠮᠵᠢ ᠦᠭᠡᠢ ᠪᠣᠯᠵᠤ ᠲᠠᠲᠠᠨᠠ᠃ ᠡᠢᠮᠦ ᠳ᠋ᠦ᠍ ᠳᠥᠩᠭᠡᠵᠦ ᠨᠤᠷᠠᠭᠠᠬᠤ ᠲᠡᠳᠦᠢ ᠴᠢᠭᠢᠭᠯᠡᠨ ᠢᠩᠳᠡᠦᠳᠡᠬᠦ ᠪᠠ ᠦᠢᠲᠠᠩ ᠬᠤᠸᠠᠷ᠂ ᠬᠢᠲᠠᠳ ᠲᠣᠷᠭᠠᠨ ᠳ᠋ᠤ᠌ ᠠᠯᠢ ᠪᠣᠯᠬᠤ ᠪᠠᠷ ᠤᠰᠤ ᠬᠦᠷᠭᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠬᠡᠷᠪᠡ ᠬᠡᠳᠦ ᠶᠡᠬᠡ ᠤᠰᠤ ᠪᠠᠷ ᠨᠤᠷᠠᠭᠠᠪᠠᠯ ᠨᠤᠷᠠᠭᠰᠠᠨ ᠬᠡᠰᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠢᠵᠤ ᠲᠣᠯᠪᠣ ᠪᠣᠯᠵᠤ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠦᠵᠡᠮᠵᠢ ᠶ᠋ᠢ ᠠᠯᠳᠠᠭᠤᠯᠤᠨᠠ᠃ ᠳᠠᠪᠤᠤ ᠶ᠋ᠢᠨ ᠥᠩᠭᠡ ᠶ᠋ᠢ ᠪᠣᠯ ᠰᠠᠢᠨ ᠴᠢᠭᠢᠭᠯᠡᠬᠦ ᠨᠢ ᠴᠢᠬᠤᠯᠠ ᠶᠤᠮ᠃
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠳᠡᠪᠡᠯ ᠢ᠋ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠷᠭᠣᠢ᠂ ᠲᠣᠷᠭᠠ᠂ ᠫᠦᠦᠰᠦᠦ ᠪᠡᠷ ᠡᠮᠵᠢᠬᠦ ᠡᠴᠡ ᠭᠠᠳᠠᠨᠠ ᠣᠷᠴᠢᠨ ᠦᠶᠡ ᠳ᠋ᠦ᠍ ᠨᠢᠭᠡ ᠥᠷᠭᠡᠨ ᠡᠮᠵᠢᠶᠡᠷᠢ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠪᠠᠷ ᠵᠢᠵᠢᠭ ᠰᠠ ᠪᠤᠶᠤ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠲᠣᠷᠭᠠ ᠬᠠᠪᠴᠢᠭᠤᠯᠤᠨ ᠣᠶᠣᠵᠤ ᠪᠠᠢᠭᠠ ᠨᠢ ᠬᠤᠪᠴᠠᠰᠤᠨ ᠤ᠋ ᠦᠵᠡᠮᠵᠢ ᠶ᠋ᠢ ᠪᠦᠷ ᠴᠦ᠍ ᠰᠠᠢᠬᠠᠨ ᠪᠣᠯᠭᠠᠵᠤ ᠪᠠᠢᠨᠠ᠃
ᠭᠡᠬᠦ ᠳ᠋ᠡᠭᠡᠨ ᠨᠠᠮᠬᠠᠨ ᠨᠢᠷᠤᠭᠤ ᠲᠠᠢ ᠪᠤᠶᠤ ᠲᠠᠷᠭᠤᠨ ᠬᠥᠮᠦᠨ ᠳ᠋ᠦ᠍ ᠳᠤᠭᠤᠢ ᠬᠡ ᠲᠡᠢ ᠲᠣᠷᠭᠠ᠂ ᠥᠷᠭᠡᠨ ᠡᠮᠵᠢᠶᠡᠷᠢ᠂ ᠪᠣᠭᠣᠨᠢ ᠳᠡᠪᠡᠯ ᠲᠡᠷᠯᠢᠭ ᠵᠣᠬᠢᠮᠵᠢ ᠦᠭᠡᠢ ᠶ᠋ᠢ ᠠᠩᠬᠠᠷᠬᠤ ᠶᠣᠰᠣᠲᠠᠢ᠃ ᠬᠥᠪᠥᠩ ᠲᠡᠢ ᠳᠡᠪᠡᠯ ᠢ᠋ ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠶᠡᠬᠡ ᠬᠡᠷᠡᠭᠯᠡᠳᠡᠭ ᠪᠥᠭᠡᠳ ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠲᠡᠭᠦᠨ ᠢ᠋ ᠬᠠᠪᠠᠬᠤ ᠳ᠋ᠠᠭᠠᠨ ᠦᠷᠭᠦᠯᠵᠢᠯᠡᠨ ᠬᠠᠪᠠᠬᠤ ᠪᠤᠶᠤ ᠵᠠᠷᠢᠮ ᠦᠶᠡ ᠳ᠋ᠦ᠍ ᠮᠠᠰᠢᠨ ᠢ᠋ᠶ᠋ᠠᠷ ᠬᠦᠷᠲᠡᠯᠡ ᠬᠠᠪᠠᠳᠠᠭ ᠪᠠᠢᠭᠰᠠᠨ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠡᠢᠯᠡᠵᠦ ᠬᠣᠯᠠᠬᠠᠨ ᠬᠠᠪᠠᠳᠠᠭ ᠪᠣᠯᠤᠭᠰᠠᠨ ᠨᠢ ᠦᠵᠡᠮᠵᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠰᠠᠢᠨ ᠪᠣᠯᠤᠭᠰᠠᠨ ᠶᠤᠮ᠃
ᠮᠣᠩᠭᠣᠯ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠲᠣᠪᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠨᠡᠯᠢᠶᠡᠳ ᠣᠯᠠᠨ ᠶᠠᠩᠵᠤ ᠪᠠᠢᠵᠠᠢ᠃ ᠡᠷᠲᠡᠨ ᠦ᠌ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠰᠤᠭᠤ ᠪᠠᠨ ᠬᠦᠷᠲᠡᠯᠡ ᠣᠨᠣᠭᠣ ᠲᠠᠢ ᠨᠢᠭᠡ ᠲᠠᠯᠠ ᠳ᠋ᠠᠭᠠᠨ ᠨᠢᠭᠡ᠂ ᠨᠥᠭᠦᠭᠡ ᠲᠠᠯᠠ ᠳ᠋ᠠᠭᠠᠨ ᠭᠤᠷᠪᠠᠨ ᠲᠣᠪᠴᠢ ᠰᠢᠯᠪᠢ ᠲᠡᠢ ᠪᠠᠢᠭᠰᠠᠨ ᠤ᠋ ᠭᠠᠳᠠᠨᠠ ᠲᠠᠰᠢᠭᠤ ᠡᠩᠭᠡᠷ ᠲᠡᠢ ᠪᠠᠢᠬᠤ ᠳ᠋ᠤ᠌ ᠨᠢᠭᠡ ᠡᠴᠡ ᠬᠣᠶᠠᠷ ᠬᠣᠣᠰ ᠰᠢᠯᠪᠢ ᠲᠣᠪᠴᠢ ᠲᠠᠢ ᠪᠠᠢᠵᠠᠢ᠃ ᠮᠣᠩᠭᠣᠯ ᠳᠡᠪᠡᠯ ᠳ᠋ᠦ᠍ ᠳᠥᠷᠪᠡᠯᠵᠢᠨ ᠡᠩᠭᠡᠷ ᠪᠣᠰᠤᠭᠠ ᠵᠠᠬᠠ ᠡᠭᠦᠰᠦᠭᠰᠡᠨ ᠨᠢ ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠵᠠᠭᠪᠤᠷ ᠪᠢᠰᠢ ᠪᠥᠭᠡᠳ ᠲᠤᠰ ᠣᠷᠣᠨ ᠤ᠋ ᠴᠠᠭ ᠠᠭᠤᠷ ᠤ᠋ᠨ ᠰᠢᠷᠦᠭᠦᠨ ᠨᠥᠯᠥᠭᠡ ᠲᠡᠢ ᠬᠣᠯᠪᠣᠭᠳᠠᠨ ᠭᠠᠷᠤᠭᠰᠠᠨ ᠪᠠᠢᠵᠤ ᠪᠣᠯᠬᠤ ᠶᠤᠮ᠃
ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠳᠥᠷᠪᠡᠯᠵᠢᠨ ᠪᠣᠯᠤᠭᠰᠠᠨ ᠲᠠᠢ ᠬᠣᠯᠪᠣᠭᠳᠠᠨ ᠡᠩᠭᠡᠷ ᠴᠥᠭᠴᠥᠨ ᠳ᠋ᠦ᠍ ᠲᠣᠪᠴᠢ ᠬᠠᠲᠠᠬᠤ ᠱᠠᠭᠠᠷᠳᠠᠯᠭᠠ ᠭᠠᠷᠴᠤ ᠠᠩᠬᠠ ᠨᠢᠭᠡ ᠲᠣᠪᠴᠢ ᠰᠢᠯᠪᠢ ᠬᠠᠲᠠᠵᠤ ᠪᠠᠢᠭᠰᠠᠨ ᠤ᠋ ᠭᠠᠳᠠᠨᠠ ᠬᠥᠮᠦᠨ ᠡᠩᠭᠡᠷ ᠳᠥᠷᠪᠡᠯᠵᠢᠨ ᠪᠢᠰᠢ ᠤᠷᠠ ᠮᠠᠭᠤᠲᠠᠢᠬᠠᠨ ᠬᠠᠭᠠᠰ ᠲᠠᠰᠢᠭᠤ ᠳᠤᠭᠤᠢᠪᠲᠤᠷ ᠬᠡᠯᠪᠡᠷᠢ ᠲᠡᠢ ᠪᠠᠢᠵᠠᠢ᠃ ᠳᠠᠷᠠᠭᠠ ᠨᠢ ᠬᠣᠶᠠᠷ ᠲᠣᠪᠴᠢ ᠰᠢᠯᠪᠢ ᠬᠠᠲᠠᠵᠤ ᠡᠬᠢᠯᠡᠵᠡᠢ᠃ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠲᠣᠪᠴᠢ ᠤᠷᠲᠤ ᠪᠥᠭᠡᠳ ᠬᠠᠲᠠᠬᠤ ᠳ᠋ᠠᠭᠠᠨ ᠬᠠᠪᠲᠠᠭᠠᠢ ᠬᠡᠯᠪᠡᠷᠢ ᠲᠡᠢ ᠬᠣᠶᠠᠷ ᠲᠠᠯᠠ ᠪᠥᠭᠰᠡᠨ ᠬᠡᠰᠡᠭ ᠢ᠋ ᠨᠥᠬᠥᠬᠦ ᠣᠶᠣᠳᠠᠯ ᠢ᠋ᠶ᠋ᠠᠷ ᠣᠶᠣᠵᠤ ᠶᠡᠬᠡ ᠪᠡᠶᠡ ᠳ᠋ᠦ᠍ ᠪᠡᠬᠢᠯᠡᠳᠡᠭ ᠪᠠᠢᠭᠰᠠᠨ ᠨᠢ ᠣᠳᠣ ᠴᠤ᠌ ᠬᠥᠳᠡᠭᠡ ᠣᠷᠣᠨ ᠨᠤᠲᠤᠭ ᠲᠤ᠌ ᠬᠠᠶᠠ ᠡᠢᠮᠦᠷᠬᠦᠦ ᠬᠡᠯᠪᠡᠷᠢ ᠲᠡᠢ ᠬᠢᠵᠦ ᠪᠠᠢᠨᠠ᠃
ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠳᠥᠴᠢᠭᠡᠳ ᠣᠨ ᠠ᠋ᠴᠠ ᠡᠮᠦᠨᠡ ᠰᠢᠯᠪᠢ ᠶ᠋ᠢ ᠡᠮᠬᠡᠷᠢᠳᠬᠦ ᠳ᠋ᠡᠭᠡᠨ ᠳᠣᠲᠣᠷ ᠲᠠᠯᠠ ᠳ᠋ᠤᠨᠢ ᠤᠲᠠᠰᠤᠨ ᠭᠣᠣᠯ ᠪᠠᠷᠢᠵᠤ ᠬᠦᠪᠦᠷᠢᠳᠳᠡᠭ ᠪᠠᠢᠭᠰᠠᠨ ᠨᠢ ᠰᠡᠭᠦᠯ ᠳ᠋ᠡᠭᠡᠨ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠤ ᠳᠣᠲᠣᠷ ᠲᠠᠯᠠ ᠠ᠋ᠴᠠ ᠨᠢ ᠮᠠᠰᠢᠨᠳᠠᠨ ᠡᠷᠭᠢᠭᠦᠯᠵᠦ ᠳᠣᠲᠣᠷ ᠲᠠᠯᠠ ᠳ᠋ᠤᠨᠢ ᠤᠲᠠᠰᠤᠨ ᠭᠣᠣᠯ ᠭᠦᠶᠦᠯᠭᠡᠵᠦ ᠡᠮᠬᠡᠷᠢᠳᠳᠡᠭ ᠪᠣᠯᠤᠭᠰᠠᠨ ᠨᠢ ᠬᠤᠪᠴᠠᠰᠤᠨ ᠤ᠋ ᠲᠣᠪᠴᠢ ᠰᠢᠯᠪᠢ ᠦᠵᠡᠮᠵᠢ ᠲᠡᠢ ᠪᠣᠯᠬᠤ ᠰᠢᠨᠡ ᠠᠷᠭᠠ ᠨᠡᠮᠡᠭᠳᠡᠯᠡ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠳᠥᠴᠢᠭᠡᠳ ᠣᠨ ᠠ᠋ᠴᠠ ᠡᠬᠢᠯᠡᠨ ᠳᠡᠪᠡᠯ ᠢ᠋ ᠭᠤᠷᠪᠠ ᠪᠠᠷ ᠡᠮᠵᠢᠬᠦ ᠪᠣᠯᠤᠭᠰᠠᠨ ᠲᠠᠢ ᠬᠣᠯᠪᠣᠭᠳᠠᠨ ᠭᠤᠷᠪᠠᠨ ᠬᠣᠣᠰ ᠰᠢᠯᠪᠢ ᠳᠡᠪᠡᠯ ᠳ᠋ᠦ᠍ ᠬᠠᠲᠠᠬᠤ ᠪᠣᠯᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠰᠢᠯᠪᠢ ᠬᠠᠲᠠᠬᠤ ᠠᠷᠭᠠ ᠥᠭᠡᠷᠡᠴᠢᠯᠡᠭᠳᠡᠨ ᠪᠥᠭᠰᠡᠨ ᠪᠡᠶᠡ ᠲᠣᠮᠣ᠂ ᠪᠣᠰᠤᠭᠠ ᠰᠢᠯᠪᠢ ᠬᠠᠲᠠᠳᠠᠭ ᠪᠣᠯᠤᠭᠰᠠᠨ ᠨᠢ ᠬᠤᠪᠴᠠᠰᠤᠨ ᠳ᠋ᠤ᠌ ᠨᠡᠪᠲᠡᠷᠡᠭᠰᠡᠨ ᠰᠢᠨᠡ ᠴᠢᠮᠡᠭ ᠪᠣᠯᠵᠠᠢ᠃
ᠮᠣᠩᠭᠣᠯ ᠳᠡᠪᠡᠯ ᠢ᠋ ᠣᠷᠴᠢᠨ ᠦᠶᠡ ᠳ᠋ᠦ᠍ ᠪᠡᠶᠡ ᠳ᠋ᠦ᠍ ᠲᠣᠬᠢᠷᠠᠭᠤᠯᠬᠤ ᠳ᠋ᠠᠭᠠᠨ ᠬᠥᠮᠦᠨ ᠦ᠌ ᠵᠢᠰᠦ ᠴᠢᠷᠠᠢ ᠥᠨᠳᠥᠷ ᠨᠠᠮ ᠢ᠋ ᠬᠠᠷᠠᠭᠠᠯᠵᠠᠬᠤ ᠶᠣᠰᠣᠲᠠᠢ᠃ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠬᠥᠮᠦᠨ ᠳ᠋ᠦ᠍ ᠬᠡᠳᠦ ᠤᠷᠲᠤ᠂ ᠬᠡᠳᠦ ᠪᠣᠭᠣᠨᠢ ᠳᠡᠪᠡᠯ ᠵᠣᠬᠢᠮᠵᠢ ᠦᠭᠡᠢ᠃ ᠬᠠᠷᠢᠨ ᠨᠠᠮ ᠨᠢᠷᠤᠭᠤ ᠲᠠᠢ ᠪᠤᠶᠤ ᠲᠠᠷᠭᠤᠨ ᠬᠥᠮᠦᠨ ᠳ᠋ᠦ᠍ ᠤᠷᠲᠤ ᠳᠡᠪᠡᠯ ᠵᠣᠬᠢᠮᠵᠢᠲᠠᠢ ᠪᠠᠢᠳᠠᠭ᠃ ᠳᠣᠲᠣᠭᠤᠷ ᠬᠤᠪᠴᠠᠰᠤᠨ ᠤ᠋ ᠲᠤᠬᠠᠢ ᠳ᠋ᠤ᠌ ᠪᠣᠯ ᠡᠷᠡᠭᠲᠡᠢᠴᠦᠳ ᠡᠷᠲᠡᠨ ᠡᠴᠡ ᠴᠠᠮᠴᠠ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ ᠮᠣᠩᠭᠣᠯ ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠵᠠᠬᠠ ᠰᠢᠭ᠋ ᠬᠤᠪᠢᠷᠠᠵᠤ ᠢᠷᠡᠵᠡᠢ᠃ ᠡᠷᠲᠡ ᠦᠶᠡ ᠳ᠋ᠦ᠍ ᠲᠠᠰᠢᠭᠤ ᠵᠠᠬᠠ ᠲᠠᠢ( ᠯᠠᠮᠠ ᠵᠠᠬᠠ) ᠴᠠᠮᠴᠠ ᠡᠮᠦᠰᠳᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯ ᠳ᠋ᠡᠭᠡᠨ ᠪᠣᠰᠤᠭᠠ ᠵᠠᠬᠠ ᠲᠠᠢ᠂ ᠳᠥᠷᠪᠡᠯᠵᠢᠨ ᠡᠩᠭᠡᠷ ᠲᠡᠢ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠪᠠ ᠮᠣᠩᠭᠣᠯ ᠬᠤᠪᠴᠠᠰᠤᠨ ᠤ᠋ ᠬᠠᠨᠴᠤᠢ ᠤᠷᠢᠳᠤ ᠲᠠᠯᠠ ᠵᠠᠳᠠᠭᠠᠢ ᠡᠮᠵᠢᠶᠡᠷᠢ ᠦᠭᠡᠢ ᠪᠠᠢᠭᠰᠠᠨ ᠲᠠᠢ ᠠᠳᠠᠯᠢ ᠴᠠᠮᠴᠠᠨ ᠤ᠋ ᠬᠠᠨᠴᠤᠢ ᠲᠡᠢᠮᠦ ᠪᠠᠢᠭᠰᠠᠨ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠬᠣᠷᠢᠨ ᠣᠨ ᠠ᠋ᠴᠠ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠳᠥᠴᠢᠭᠡᠳ ᠣᠨ ᠬᠦᠷᠲᠡᠯᠡ ᠵᠠᠯᠠᠭᠤᠴᠤᠳ ᠪᠣᠰᠤᠭᠠ ᠵᠠᠬᠠ ᠲᠠᠢ᠂ ᠤᠷᠳᠤᠭᠤᠷ ᠢ᠋ᠶ᠋ᠠᠨ ᠬᠠᠭᠠᠷᠬᠠᠢ ᠴᠠᠮᠴᠠ ᠡᠮᠦᠰᠳᠡᠭ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ ᠮᠢᠩᠭᠠ ᠶᠢᠰᠦᠨ ᠵᠠᠭᠤ ᠳᠥᠴᠢᠭᠡᠳ ᠣᠨ ᠤ᠋ ᠦᠶᠡ ᠳ᠋ᠦ᠍ ᠨᠢᠭᠡ ᠬᠡᠰᠡᠭ ᠣᠷᠴᠢᠨ ᠦᠶᠡ ᠶ᠋ᠢᠨ ᠳᠣᠲᠣᠭᠤᠷ ᠴᠠᠮᠴᠠᠨ ᠤ᠋ ᠵᠠᠬᠠ ᠰᠢᠭ᠋ ᠱᠥᠪᠥᠭᠡᠷ ᠵᠠᠬᠠ ᠲᠠᠢ ᠲᠡᠭᠦᠨ ᠳ᠋ᠡᠭᠡᠨ ᠨᠣᠬᠠᠢ ᠶ᠋ᠢᠨ ᠰᠢᠳᠦ ᠴᠡᠴᠡᠭ ᠬᠠᠳᠬᠤᠨ ᠭᠤᠶᠤᠵᠤ ᠡᠮᠦᠰᠳᠡᠭ ᠪᠠᠢᠯᠠ᠃ ᠣᠷᠴᠢᠨ ᠦᠶᠡ ᠳ᠋ᠦ᠍ ᠨᠡᠢᠲᠡᠯᠢᠭ ᠳᠣᠲᠣᠭᠤᠷ ᠴᠠᠮᠴᠠ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃
ᠵᠢᠷᠤᠭ30
(1) ᠤᠷᠲᠤ ᠣᠨᠣᠭᠣ ᠲᠠᠢ ᠳᠠᠩ ᠳᠡᠪᠡᠯ
(2) ᠳᠤᠭᠤᠢ ᠮᠥᠷᠥ ᠲᠡᠢ ᠪᠦᠰᠡᠯᠡᠭᠦᠷ ᠵᠠᠯᠭᠠᠭᠠ ᠲᠠᠢ ᠳᠠᠩ ᠲᠡᠷᠯᠢᠭ
(3) ᠤᠲᠠᠰᠤ ᠪᠠᠷ ᠲᠣᠨᠣᠭᠯᠠᠭᠰᠠᠨ ᠴᠠᠮᠴᠠ
ᠡᠢᠮᠦ ᠳ᠋ᠦ᠍ ᠪᠣᠯᠪᠠᠰᠤᠨ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠡᠮᠦᠰᠬᠦ ᠴᠠᠮᠴᠠᠨ ᠤ᠋ ᠥᠩᠭᠡ ᠵᠣᠬᠢᠴᠠᠭᠤᠯᠵᠤ ᠡᠮᠦᠰᠬᠦ ᠶ᠋ᠢ ᠴᠢᠬᠤᠯᠠᠴᠢᠯᠠᠵᠤ ᠪᠠᠢᠨᠠ᠃ ᠡᠮᠡᠭᠲᠡᠢᠴᠦᠳ ᠦ᠋ᠨ ᠳᠣᠲᠣᠭᠤᠷ ᠬᠤᠪᠴᠠᠰᠤ ᠮᠣᠩᠭᠣᠯ ᠵᠠᠬᠠ ᠲᠠᠢ ᠴᠠᠮᠴᠠ᠂ ᠳᠠᠩ ᠳᠡᠪᠡᠯ ᠪᠠᠢᠭᠰᠠᠨ ᠪᠥᠭᠡᠳ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠨᠡᠯᠢᠶᠡᠳ ᠣᠯᠠᠨ ᠬᠡᠯᠪᠡᠷᠢ ᠪᠡᠷ ᠥᠭᠡᠷᠡᠴᠢᠯᠡᠭᠳᠡᠵᠦ ᠢᠷᠡᠯᠡ᠃ ᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠵᠥᠪᠬᠡᠨ ᠳᠠᠩ ᠳᠡᠪᠡᠯ ᠬᠢᠬᠦ ᠠᠷᠭᠠ ᠶ᠋ᠢ ᠳᠤᠷᠠᠳᠤᠶᠠ᠃
ᠣᠷᠴᠢᠨ ᠦᠶᠡ ᠳ᠋ᠦ᠍ ᠳᠠᠩ ᠳᠡᠪᠡᠯ ᠢ᠋ ᠣᠯᠠᠨ ᠶᠠᠩᠵᠤ ᠪᠠᠷ ᠬᠢᠵᠦ ᠡᠮᠦᠰᠬᠦ ᠪᠣᠯᠤᠯᠠ᠃ ᠳᠠᠩ ᠳᠡᠪᠡᠯ ᠨᠢ ᠲᠡᠷᠯᠢᠭ ᠲᠡᠢ ᠠᠳᠠᠯᠢ ᠪᠣᠯᠪᠠᠴᠤ ᠠᠷᠠᠢ ᠨᠠᠷᠢᠬᠠᠨ ᠳᠣᠲᠣᠷ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠢᠯᠭᠠᠭᠠ ᠲᠠᠢ ᠪᠥᠭᠡᠳ ᠤᠷᠠ ᠬᠢᠴᠡ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠶᠡᠬᠡᠬᠡᠨ ᠪᠣᠯᠪᠠᠰᠤᠷᠠᠩᠭᠤᠢ ᠪᠣᠯᠵᠤ ᠪᠠᠢᠨᠠ᠃ ᠳᠠᠩ ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠵᠠᠬᠠ ᠶ᠋ᠢᠨ ᠬᠡᠯᠪᠡᠷᠢ ᠳ᠋ᠦ᠍ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠴᠤ ᠢᠷᠡᠯᠡ᠃ ᠳᠥᠷᠪᠡᠯᠵᠢᠨ ᠡᠩᠭᠡᠷ ᠪᠣᠰᠤᠭᠠ ᠵᠠᠬᠠ ᠠ᠋ᠴᠠ ᠭᠠᠳᠠᠨᠠ ᠮᠣᠩᠭᠣᠯ ᠤ᠋ᠨ ᠡᠷᠲᠡᠨ ᠦ᠌ ᠳᠡᠪᠡᠯ ᠰᠢᠭ ᠲᠠᠰᠢᠭᠤ ᠡᠩᠭᠡᠷ ᠲᠡᠢ᠂ ᠬᠥᠮᠦᠨ ᠡᠩᠭᠡᠷ ᠨᠢ ᠨᠡᠯᠢᠶᠡᠳ ᠳᠣᠣᠷᠠ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ ᠪᠦᠰᠡᠯᠡᠬᠡᠢ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠵᠠᠯᠭᠠᠭᠠ ᠲᠠᠢ᠂ ᠪᠣᠯᠢᠲ᠋ᠤ ᠶ᠋ᠢᠨ ᠮᠥᠷᠥ ᠰᠢᠭ ᠥᠨᠳᠥᠷ ᠳᠤᠭᠤᠢ ᠮᠥᠷᠥ ᠲᠡᠢ᠂ ᠣᠨᠣᠭᠣ ᠲᠠᠢ ᠣᠨᠣᠭᠣ ᠦᠭᠡᠢ ᠶᠠᠩᠵᠤ ᠪᠦᠷᠢ ᠬᠢᠳᠡᠭ ᠪᠣᠯᠤᠯᠠ᠃
ᠳᠠᠩ ᠪᠠ ᠳᠠᠪᠬᠤᠷ ᠳᠡᠪᠡᠯ ᠦ᠋ᠨ ᠰᠢᠯᠪᠢ ᠲᠣᠪᠴᠢ ᠴᠢᠮᠡᠭᠯᠡᠯ ᠦ᠋ᠨ ᠲᠤᠬᠠᠢ ᠴᠢᠮᠡᠭᠯᠡᠬᠦ ᠤᠷᠠᠯᠠᠯ ᠤ᠋ᠨ ᠬᠡᠰᠡᠭ ᠲᠦ᠍ ᠣᠷᠣᠭᠰᠠᠨ ᠤᠴᠢᠷ ᠡᠨᠳᠡ ᠳᠤᠷᠠᠳᠤᠭᠰᠠᠨ ᠦᠭᠡᠢ᠃ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠬᠤᠪᠴᠠᠰᠤ ᠶ᠋ᠢ ᠳᠠᠩ ᠭᠠᠭᠴᠠ ᠳᠠᠪᠤᠤ᠂ ᠲᠣᠷᠭᠠ ᠪᠦᠰᠡ ᠪᠠᠷᠠᠭᠠ ᠪᠠᠷ ᠬᠢᠳᠡᠭ ᠦᠭᠡᠢ᠂ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠤᠷᠠᠯᠠᠳᠠᠭ ᠤᠴᠢᠷ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠷ ᠬᠤᠪᠴᠠᠰᠤ ᠡᠳ᠋ᠯᠡᠯ ᠬᠢᠬᠦ ᠠᠷᠠᠭᠠ ᠨᠤᠭᠤᠳ ᠢ᠋ ᠬᠣᠢᠨᠠ ᠥᠭᠦᠯᠡᠬᠦ ᠪᠣᠯᠤᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠣᠭᠳᠠᠭᠤᠨᠪᠠᠶᠠᠷ᠂ ᠳ᠂ ᠡᠷᠬᠢᠮᠪᠠᠭᠠᠲᠤᠷ ᠂ ᠪᠠᠶᠠᠨᠰᠡᠷᠡᠩ ᠂ ᠱᠠᠭᠰᠠᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ