ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠬᠣᠶᠠᠳᠤᠭᠠᠷ ᠪᠦᠯᠦᠭ14-ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠤᠲᠠᠰᠤ ᠵᠡᠭᠦᠦ ᠶ᠋ᠢᠨ ᠪᠤᠢᠯᠠᠨ ᠪᠤᠶᠤ ᠵᠡᠭᠦᠪᠴᠢ ᠬᠢᠬᠦ
310 ᠲᠣᠮᠣ ᠵᠢᠵᠢᠭ ᠪᠣᠢᠯᠠᠨ ᠬᠢᠬᠦ ᠳ᠋ᠡᠭᠡᠨ ᠡᠬᠢᠯᠡᠭᠡᠳ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠰᠣᠩᠭᠣᠨ ᠠᠪᠴᠤ ᠱᠣ ᠳᠥᠷᠪᠡᠯᠵᠢᠨ ᠪᠣᠯᠭᠠᠨ ᠡᠰᠬᠡᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠴᠠᠷᠳᠠᠨ ᠴᠠᠪᠤᠭᠯᠠᠵᠤ ᠳᠥᠷᠪᠡᠨ ᠬᠣᠰᠢᠭᠤ ᠳ᠋ᠤᠨᠢ ᠪᠤᠯᠤᠩ ᠤ᠋ᠨ ᠭᠤᠷᠪᠠᠯᠵᠢᠨ ᠬᠡ ᠲᠠᠯᠪᠢᠵᠤ ᠣᠶᠣᠭᠠᠳ ᠶᠠᠭ ᠭᠣᠣᠯ ᠳ᠋ᠤᠨᠢ ᠳᠤᠭᠤᠢ ᠪᠤᠶᠤ ᠳᠥᠷᠪᠡᠯᠵᠢᠨ ᠬᠡ ᠤᠭᠠᠯᠵᠠ ᠣᠶᠣᠵᠤ ᠵᠠᠬᠢᠳᠠᠯ ᠤ᠋ᠨ ᠲᠣᠭᠳᠣᠢ ᠰᠢᠭ᠋ ᠭᠤᠷᠪᠠᠨ ᠲᠠᠯᠠ ᠶ᠋ᠢ ᠣᠶᠣᠵᠤ ᠨᠢᠭᠡ ᠲᠠᠯᠠ ᠶ᠋ᠢ ᠣᠷᠬᠢᠨᠠ᠃ ᠣᠷᠬᠢᠭᠰᠠᠨ ᠲᠡᠷᠡ ᠦᠵᠦᠭᠦᠷ ᠲᠡᠭᠡᠨ ᠤᠲᠠᠰᠤ ᠲᠠᠮᠤᠬᠤ ᠪᠤᠶᠤ ᠰᠦᠯᠵᠢᠨ ᠣᠭᠣᠰᠣᠷ ᠬᠢᠬᠦ ᠪᠠ ᠣᠭᠣᠰᠣᠷ ᠤ᠋ᠨ ᠦᠵᠦᠭᠦᠷ ᠲᠤ ᠱ᠌ᠢᠷᠦ ᠲᠣᠪᠴᠢ ᠲᠣᠭᠲᠠᠭᠠᠬᠤ ᠪᠤᠶᠤ ᠡᠰᠡᠪᠡᠯ ᠴᠠᠴᠤᠭ ᠬᠢᠨᠡ᠃ ᠬᠤᠷᠤᠭᠤᠪᠴᠢ᠂ ᠤᠲᠠᠰᠤ ᠪᠠᠨ ᠪᠤᠢᠯᠠᠨ ᠳ᠋ᠠᠭᠠᠨ ᠬᠢᠵᠦ᠂ ᠵᠡᠭᠦᠦ ᠶ᠋ᠢ ᠠᠮᠠᠨ ᠤ᠋ ᠪᠠ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠬᠥᠰᠢᠨ ᠬᠠᠳᠬᠤᠵᠤ ᠬᠤᠢᠯᠠᠵᠤ ᠦᠵᠦᠭᠦᠷ ᠦ᠋ᠨ ᠪᠦᠴᠡ ᠪᠡᠷ ᠣᠷᠢᠶᠠᠨᠠ᠃ ᠡᠭᠦᠨ ᠢ᠋ ᠭᠡᠷ ᠲᠡᠭᠡᠨ ᠪᠣᠯᠤᠨ ᠬᠡᠭᠡᠷᠡ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠭᠠᠷ ᠴᠦᠩᠬᠦᠨ ᠳ᠋ᠡᠭᠡᠨ ᠬᠢᠵᠦ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ᠃ ᠴᠦᠩᠬᠦ ᠤᠭᠤᠲᠠ ᠶ᠋ᠢ ᠦᠢᠲᠠᠩ ᠬᠤᠸᠠᠷ ᠢ᠋ᠶ᠋ᠠᠷ᠂ ᠬᠢᠯᠢᠩ ᠢ᠋ᠶ᠋ᠡᠷ᠂ ᠬᠠᠳᠬᠤᠮᠠᠯ ᠦᠭᠡᠢ ᠬᠢᠵᠦ ᠪᠣᠯᠤᠨᠠ᠃
ᠵᠡᠭᠦᠪᠴᠢ ᠬᠢᠬᠦ ᠮᠣᠩᠭᠣᠯ ᠤ᠋ᠨ ᠡᠮᠡᠭᠲᠡᠢᠴᠦᠳ ᠬᠣᠨᠢ ᠬᠠᠷᠢᠭᠤᠯᠬᠤ᠂ ᠥᠭᠡᠷᠡ ᠪᠤᠰᠤᠳ ᠠᠵᠢᠯ ᠳ᠋ᠤ᠌ ᠶᠠᠪᠤᠬᠤ ᠳ᠋ᠠᠭᠠᠨ ᠦᠷᠭᠦᠯᠵᠢ ᠤᠲᠠᠰᠤ ᠵᠡᠭᠦᠦ ᠪᠡᠨ ᠪᠣᠯᠤᠨ ᠣᠶᠣᠬᠤ ᠶᠠᠭᠤᠮᠠ ᠪᠠᠨ ᠠᠪᠴᠤ ᠶᠠᠪᠤᠬᠤ ᠴᠢᠯᠥᠭᠡ ᠵᠠᠪ ᠲᠠᠭᠠᠨ ᠣᠶᠣᠳᠠᠭ ᠪᠠᠢᠵᠠᠢ᠃ ᠢᠩᠭᠢᠵᠦ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠪᠥᠰᠡᠨ ᠳ᠋ᠡᠭᠡᠨ ᠵᠡᠭᠦᠬᠦ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠵᠡᠭᠦᠪᠴᠢ ᠭᠠᠷᠤᠭᠰᠠᠨ ᠪᠣᠯᠤᠯᠲᠠᠢ᠃ ᠵᠡᠭᠦᠪᠴᠢ ᠶ᠋ᠢ ᠬᠢᠬᠦ ᠳ᠋ᠡᠭᠡᠨ20cm ᠣᠷᠴᠢᠮ ᠤᠷᠲᠤ᠂7cm ᠣᠷᠴᠢᠮ ᠥᠷᠭᠡᠨ ᠲᠣᠷᠭᠠ ᠳᠠᠪᠤᠤ ᠴᠠᠷᠳᠠᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠨᠠᠷᠢᠨ ᠬᠣᠰᠢᠭᠤ ᠭᠠᠷᠭᠠᠵᠤ ᠥᠩᠭᠡ ᠳᠣᠲᠣᠷ ᠢ᠋ ᠨᠡᠢᠯᠡᠭᠦᠯᠦᠨ ᠣᠶᠣᠵᠤ ᠱᠥᠪᠥᠭᠡᠷ ᠦᠵᠦᠭᠦᠷ ᠢ᠋ ᠣᠷᠬᠢᠵᠤ ᠪᠤᠰᠤᠳ ᠢ᠋ ᠪᠢᠲᠡᠭᠦᠯᠡᠨ ᠵᠢᠭᠠᠰᠤᠨ ᠨᠢᠷᠤᠭᠤ ᠪᠤᠶᠤ ᠵᠥᠷᠢᠭᠦᠯᠡᠭ ᠬᠦᠪᠦᠷᠢᠳᠦᠯᠭᠡ ᠪᠡᠷ ᠣᠶᠣᠵᠤ ᠪᠢᠲᠡᠭᠦᠯᠡᠨ ᠭᠣᠣᠯ ᠤᠷᠤᠭᠤ ᠨᠢ ᠰᠢᠭᠯᠠᠭᠠᠰᠤ ᠪᠤᠶᠤ ᠵᠡᠭᠦᠦ ᠣᠷᠢᠶᠠᠬᠤ ᠣᠶᠣᠳᠠᠯ ᠢ᠋ᠶ᠋ᠠᠷ ᠬᠡᠯᠡᠬᠦ ᠮᠠᠶᠢᠭ ᠢ᠋ᠶ᠋ᠠᠷ ᠣᠶᠣᠵᠤ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠥᠨᠳᠡᠢ ᠵᠠᠢ ᠳ᠋ᠤ᠌ ᠭᠣᠣᠯ ᠤᠷᠤᠭᠤ ᠪᠠᠨ ᠪᠠᠭᠠ ᠵᠡᠷᠭᠡ ᠬᠣᠪᠢᠯ ᠲᠠᠢ ᠰᠠᠪᠬᠠ ᠮᠣᠳᠣ ᠵᠣᠷᠭᠣᠵᠤ ᠰᠢᠷᠭᠤᠭᠤᠯᠤᠨ ᠲᠡᠷᠡ ᠮᠣᠳᠣᠨ ᠤ᠋ ᠬᠣᠪᠢᠯ ᠳ᠋ᠤ᠌ ᠵᠡᠭᠦᠦ ᠲᠡᠪᠡᠨᠡ ᠪᠡᠨ ᠬᠢᠵᠦ ᠱᠥᠪᠥᠭᠡᠷ ᠦᠵᠦᠭᠦᠷ ᠲᠤ ᠪᠡᠬᠢᠯᠡᠭᠰᠡᠨ ᠤᠲᠠᠰᠤᠨ ᠣᠭᠣᠰᠣᠷ ᠢ᠋ ᠨᠡᠪᠲᠡ ᠬᠠᠳᠬᠤᠨ ᠠᠷᠤ ᠲᠠᠯᠠ ᠳ᠋ᠤᠨᠢ ᠭᠠᠷᠭᠠᠵᠤ ᠪᠣᠭᠣᠭᠠᠳ ᠡᠭᠦᠨ ᠢ᠋ ᠲᠠᠲᠠᠵᠤ ᠵᠡᠭᠦᠪᠴᠢ ᠪᠡᠨ ᠬᠠᠭᠠᠵᠤ ᠠᠷᠤ ᠳ᠋ᠤᠨᠢ ᠵᠠᠩᠭᠢᠳᠤᠨᠠ᠃ ᠵᠡᠭᠦᠪᠴᠢᠨ ᠦ᠌ ᠪᠦᠰᠡ ᠪᠤᠶᠤ ᠪᠠᠯ ᠳ᠋ᠤ᠌ ᠪᠡᠬᠢᠯᠡᠭᠳᠡᠭᠰᠡᠨ ᠣᠭᠣᠰᠣᠷ ᠢ᠋ ᠬᠣᠷᠭᠣᠢ ᠲᠣᠷᠭᠠᠨ ᠤ᠋ ᠥᠭᠡᠳᠡᠰᠦ ᠪᠡᠷ ᠲᠡᠭᠡᠭ ᠬᠢᠵᠦ ᠳᠡᠭᠡᠭ ᠦ᠋ᠨ ᠳᠡᠭᠡᠳᠦ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠱ᠌ᠢᠷᠦ᠂ ᠰᠤᠪᠤᠳ ᠪᠤᠶᠤ ᠰᠢᠯ ᠦᠯᠪᠦᠩ ᠬᠡᠯᠬᠢᠵᠦ ᠴᠢᠮᠡᠭᠯᠡᠬᠦ ᠪᠠ ᠳᠡᠷᠭᠡᠳᠡ ᠨᠢ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠳᠥᠷᠦᠭᠡᠪᠴᠢᠨ ᠬᠤᠷᠤᠭᠤᠪᠴᠢ ᠮᠥᠩᠭᠥᠨ ᠤᠲᠠᠰᠤ ᠪᠠᠷ ᠬᠣᠯᠪᠣᠨ ᠭᠤᠶᠤᠨᠠ᠃ ᠡᠰᠡᠪᠡᠯ ᠲᠡᠭᠡᠭ ᠦ᠋ᠨ ᠣᠷᠣᠨ ᠳ᠋ᠤ᠌ ᠥᠯᠵᠡᠢ ᠲᠤᠤᠬᠠᠢ ᠵᠠᠩᠭᠢᠳᠤᠨ ᠴᠢᠮᠡᠭᠯᠡᠬᠦ ᠪᠤᠶᠤ ᠱ᠌ᠢᠷᠦᠨ ᠭᠣᠣᠯ ᠲᠠᠢ ᠮᠥᠩᠭᠥᠨ ᠡᠷᠭᠢᠭᠦᠯᠭᠡ᠂ ᠮᠥᠩᠭᠥᠨ ᠭᠣᠬᠠ ᠬᠢᠵᠦ ᠪᠠᠯ ᠪᠥᠰᠡᠨ ᠳ᠋ᠦ᠍ ᠭᠣᠭᠴᠣᠭᠠ ᠪᠠᠷ ᠪᠡᠬᠢᠯᠡᠨᠡ᠃ ᠵᠡᠭᠦᠪᠴᠢ ᠲᠡᠢ ᠬᠣᠣᠰᠯᠠᠭᠤᠯᠬᠤ ᠪᠤᠶᠤ ᠡᠰᠡᠪᠡᠯ ᠲᠤᠰᠬᠠᠢ ᠳ᠋ᠤᠨᠢ ᠴᠢᠬᠢ᠂ ᠬᠢᠮᠤᠰᠤ᠂ ᠰᠢᠳᠦ ᠴᠡᠪᠡᠷᠯᠡᠳᠡᠭ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠮᠥᠩᠭᠥᠨ ᠰᠠᠭᠰᠤᠷᠠᠭᠠ ᠵᠡᠭᠦᠳᠡᠭ᠃ ᠡᠳᠡᠭᠡᠷ ᠨᠢ ᠨᠡᠭᠦᠳᠡᠯᠴᠢᠨ ᠰᠣᠶᠣᠯ ᠤ᠋ᠨ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠳᠤᠷᠠᠰᠬᠠᠯᠲᠤ ᠵᠦᠢᠯ ᠪᠥᠭᠡᠳ ᠲᠤᠰ ᠤᠯᠤᠰ ᠤ᠋ᠨ ᠬᠥᠮᠦᠨ ᠠᠮᠠ ᠬᠡᠳᠦᠢᠪᠡᠷ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠵᠢᠯᠠᠭᠠ ᠶ᠋ᠢᠨ ᠨᠢᠭᠡ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠭᠡᠬᠦ ᠥᠪᠡᠷᠮᠢᠴᠡ ᠰᠣᠶᠣᠯ ᠬᠥᠭᠵᠢᠵᠦ ᠪᠠᠢᠭᠰᠠᠨ ᠢ᠋ ᠭᠡᠷᠡᠴᠢᠯᠡᠨᠡ᠃ ᠡᠨᠡ ᠮᠥᠩᠭᠥᠨ ᠰᠠᠭᠰᠤᠷᠠᠭᠠ ᠣᠳᠣ ᠪᠠᠷ ᠬᠥᠮᠦᠨ ᠪᠡᠶᠡ ᠳ᠋ᠡᠭᠡᠨ ᠠᠪᠴᠤ ᠶᠠᠪᠤᠳᠠᠭ ᠦᠭᠡᠢ ᠴᠦ᠍ ᠰᠣᠶᠣᠯ ᠤ᠋ᠨ ᠰᠠᠩ ᠳ᠋ᠤ᠌ ᠬᠠᠳᠠᠭᠠᠯᠠᠭᠳᠠᠨ ᠦᠯᠡᠳᠡᠭᠰᠡᠨ ᠪᠥᠭᠡᠳ ᠡᠷᠭᠢᠵᠦ ᠬᠡᠷᠡᠭᠯᠡᠭᠦᠰᠢᠲᠡᠢ ᠵᠦᠢᠯ ᠪᠢᠯᠡ᠃
ᠵᠢᠷᠤᠭ23
(1) ᠭᠣᠶᠣᠯ ᠴᠢᠮᠡᠭ ᠲᠡᠢ ᠬᠠᠭᠠᠯᠲᠠ ᠲᠠᠢ ᠵᠡᠭᠦᠪᠴᠢ
(2) ᠨᠡᠭᠡᠭᠡᠯᠲᠡ ᠲᠡᠢ ᠵᠡᠭᠦᠪᠴᠢ
ᠮᠣᠩᠭᠣᠯ ᠬᠥᠮᠦᠨ ᠦ᠌ ᠭᠣᠶᠣᠯ ᠪᠦᠷᠢ ᠵᠦᠭᠡᠷ ᠨᠢᠭᠡ ᠴᠢᠮᠡᠭ ᠪᠢᠰᠢ ᠵᠠᠪᠠᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠷᠡᠭᠯᠡᠭᠳᠡᠳᠡᠭ ᠵᠦᠢᠯ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠨᠴᠠᠯᠢᠭ ᠲᠠᠢ᠃
ᠵᠡᠭᠦᠪᠴᠢᠨ ᠦ ᠳᠣᠣᠷᠠᠲᠤ ᠲᠠᠯᠠ᠂ ᠳᠡᠭᠡᠷᠡ ᠨᠢ ᠱ᠌ᠢᠷᠦ᠂ ᠰᠤᠪᠤᠳ᠂ ᠣᠭ᠌ᠶᠤ ᠮᠡᠲᠦ ᠵᠦᠢᠯ ᠢ᠋ ᠬᠡᠯᠬᠢᠭᠰᠡᠨ ᠳᠤᠮᠳᠠ ᠲᠠᠯᠠ ᠶ᠋ᠢᠨ ᠬᠢ ᠨᠢ ᠠᠷᠠᠯ ᠤᠷᠲᠤ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢ ᠨᠢ ᠪᠣᠭᠣᠨᠢ ᠭᠤᠷᠪᠠᠨ ᠬᠣᠣᠰ ᠴᠠᠴᠤᠭ ᠪᠠᠢᠳᠠᠭ᠂ ᠣᠳᠣ ᠡᠭᠦᠨ ᠢ᠋ ᠵᠡᠭᠦᠳᠡᠭ ᠦᠭᠡᠢ ᠤᠴᠢᠷ ᠭᠣᠶᠣᠮᠰᠣᠭ ᠢ᠋ᠶ᠋ᠠᠷ ᠬᠢᠵᠦ ᠪᠠᠢᠰᠢᠩ ᠤ᠋ᠨ ᠬᠠᠨᠠ ᠴᠢᠮᠡᠭᠯᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ᠂ ᠲᠣᠭᠲᠠᠭᠤᠨᠪᠠᠶᠠᠷ
ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ᠂ ᠰᠡᠬᠡᠭᠡᠷᠡᠯ᠂ ᠤᠳᠬᠠᠨᠰᠣᠠ