ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢᠨ ᠤᠷᠠᠨ ᠦᠢᠯᠡ-ᠴ ᠰᠣᠩᠭᠢᠨᠠ-ᠬᠣᠶᠠᠳᠤᠭᠠᠷ ᠪᠦᠯᠦᠭ06- ᠲᠣᠷᠭᠠ ᠪᠠ ᠳᠠᠪᠤᠤ ᠶ᠋ᠢᠨ ᠬᠠᠳᠬᠤᠮᠠᠯ ᠤ᠋ᠨ ᠲᠥᠷᠥᠯ ᠦ᠋ᠳ
651ᠲᠣᠷᠭᠠ ᠪᠠ ᠳᠠᠪᠤᠤ ᠶ᠋ᠢᠨ ᠬᠠᠳᠬᠤᠮᠠᠯ ᠤ᠋ᠨ ᠲᠥᠷᠥᠯ ᠦ᠋ᠳ
ᠲᠣᠷᠭᠠ ᠪᠠ ᠳᠠᠪᠤᠤ ᠶ᠋ᠢᠨ ᠬᠠᠳᠬᠤᠮᠠᠯ ᠤ᠋ᠨ ᠳᠡᠪᠢᠰᠬᠡᠷ ᠲᠦ᠍ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠲᠣᠷᠭᠠ᠂ ᠳᠤᠷᠳᠤᠩ᠂ ᠳᠠᠪᠤᠤ᠂ ᠳᠠᠯᠢᠩᠪᠤᠤ᠂ ᠥᠩᠭᠡ ᠪᠦᠷᠢ ᠶ᠋ᠢᠨ ᠨᠢᠮᠭᠡᠨ ᠳᠠᠪᠤᠤ᠂ ᠲᠠᠭᠠᠷ ᠮᠠᠭᠠᠯᠢᠩᠭᠤ ᠴᠡᠮᠪᠡ ᠵᠡᠷᠭᠡ ᠪᠥᠰ ᠪᠠᠷᠠᠭᠠ ᠬᠠᠮᠢᠶᠠᠷᠤᠭᠳᠠᠨᠠ᠃
ᠬᠡ ᠴᠢᠮᠡᠭ ᠲᠦ᠍ ᠲᠥᠷᠥᠯ ᠪᠦᠷᠢ ᠶ᠋ᠢᠨ ᠦᠨᠳᠦᠰᠦᠲᠡᠨ ᠦ᠌ ᠬᠡ ᠤᠭᠠᠯᠵᠠ᠂ ᠴᠡᠴᠡᠭ ᠨᠠᠪᠴᠢ᠂ ᠪᠠᠢᠭᠠᠯᠢ ᠶ᠋ᠢᠨ ᠭᠤᠸᠠ ᠵᠦᠢ᠂ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠤ᠋ᠨ ᠮᠠᠲ᠋ᠧᠷᠢᠶᠠᠯ ᠳ᠋ᠤ᠌ ᠪᠣᠯᠵᠤ ᠪᠠᠢᠭᠠ ᠦᠢᠯᠡ ᠶᠠᠪᠤᠳᠠᠯ ᠵᠡᠷᠭᠡ ᠣᠯᠠᠨ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠪᠠᠭᠲᠠᠨᠠ᠃
ᠬᠠᠳᠬᠤᠮᠠᠯ ᠣᠯᠠᠨ ᠲᠥᠷᠥᠯ ᠦ᠋ᠨ ᠣᠶᠣᠳᠠᠯ ᠢ᠋ᠶ᠋ᠠᠷ ᠪᠦᠲᠦᠬᠦ ᠪᠠ ᠣᠶᠣᠳᠠᠯ ᠲᠤᠰ ᠪᠦᠷᠢ ᠨᠢᠭᠡ ᠲᠣᠳᠣᠷᠬᠠᠢ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ᠃ ᠬᠠᠳᠬᠤᠮᠠᠯ ᠤ᠋ᠨ ᠤᠤᠭᠠᠨ ᠨᠢ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠬᠠᠳᠬᠤᠮᠠᠯ ᠳ᠋ᠤ᠌ ᠬᠡᠷᠦᠭᠡᠰᠦ᠂ ᠰᠢᠪᠡᠭᠦᠷ᠂ ᠵᠡᠭᠦᠦ ᠣᠷᠢᠶᠠᠬᠤ᠂ ᠬᠣᠨᠢᠨ ᠬᠣᠯᠪᠣᠭᠠ᠂ ᠰᠢᠭᠯᠠᠭᠠᠰᠤ ᠵᠡᠷᠭᠡ ᠣᠯᠠᠨ ᠲᠥᠷᠥᠯ ᠦ᠋ᠨ ᠣᠶᠣᠳᠠᠯ ᠣᠷᠣᠳᠠᠭ᠃
ᠵᠡᠭᠦᠦ ᠣᠷᠢᠶᠠᠬᠤ ᠡᠨᠡ ᠬᠠᠳᠬᠤᠮᠠᠯ ᠤᠷᠠᠨ ᠦᠢᠯᠡ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠨᠠᠷᠢᠨ ᠲᠦᠪᠡᠭᠲᠡᠢ ᠪᠣᠯᠪᠠᠴᠤ ᠭᠣᠶᠣᠮᠰᠣᠭ ᠬᠠᠳᠬᠤᠮᠠᠯ ᠪᠥᠭᠡᠳ ᠲᠡᠭᠦᠨ ᠢ᠋ ᠨᠠᠷᠢᠨ ᠲᠣᠷᠭᠠᠨ ᠬᠠᠳᠬᠤᠮᠠᠯ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃ ᠵᠡᠭᠦᠦ ᠣᠷᠢᠶᠠᠬᠤ ᠳ᠋ᠤ᠌ ᠨᠢᠭᠡ ᠵᠡᠭᠦᠦ᠂ ᠬᠣᠶᠠᠷ ᠤᠲᠠᠰᠤ ᠣᠷᠣᠬᠤ ᠪᠠ ᠣᠷᠢᠶᠠᠬᠤ ᠤᠲᠠᠰᠤ ᠠᠷᠠᠢ ᠪᠦᠳᠦᠭᠦᠪᠲᠦᠷ ᠡᠷᠴᠢᠲᠡᠢ᠃ ᠭᠣᠭᠴᠣᠭᠠ ᠶ᠋ᠢ ᠬᠣᠯᠪᠣᠬᠤ ᠤᠲᠠᠰᠤ᠂ ᠣᠷᠢᠶᠠᠬᠤ ᠤᠲᠠᠰᠤ ᠲᠠᠢ ᠢᠵᠢᠯ ᠥᠩᠭᠡ ᠲᠡᠢ ᠠᠷᠠᠢ ᠨᠠᠷᠢᠨ ᠪᠠᠢᠪᠠᠯ ᠲᠣᠬᠢᠷᠠᠮᠵᠢᠲᠠᠢ ᠪᠠᠢᠳᠠᠭ᠃ ᠵᠠᠷᠢᠮ ᠬᠠᠳᠬᠤᠮᠠᠯ ᠳ᠋ᠤ᠌ ᠳᠠᠷᠤᠭᠤᠯᠭᠠ ᠤᠲᠠᠰᠤ ᠶ᠋ᠢ ᠥᠭᠡᠷᠡ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠪᠠᠷ ᠳᠠᠷᠤᠭᠰᠠᠨ ᠨᠢ ᠲᠡᠭᠦᠨ ᠦ᠌ ᠥᠩᠭᠡ ᠵᠣᠬᠢᠴᠠᠯ ᠢ᠋ ᠠᠯᠳᠠᠭᠤᠯᠵᠤ ᠡᠷᠢᠶᠡᠨ ᠪᠣᠯᠭᠠᠭᠰᠠᠨ ᠪᠠᠢᠳᠠᠭ᠃ ᠵᠡᠭᠦᠦ ᠣᠷᠢᠶᠠᠬᠤ ᠣᠶᠣᠳᠠᠯ ᠢ᠋ᠶ᠋ᠠᠷ ᠨᠠᠷᠢᠨ ᠭᠣᠶᠣᠮᠰᠣᠭ ᠲᠣᠷᠭᠠᠨ ᠬᠠᠳᠬᠤᠮᠠᠯ ᠬᠢᠬᠦ ᠪᠥᠭᠡᠳ ᠲᠡᠭᠦᠨ ᠦ᠌ ᠥᠩᠭᠡ ᠵᠣᠬᠢᠴᠠᠯ ᠢ᠋ ᠵᠥᠪ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠳᠡᠪᠢᠰᠬᠡᠷ᠂ ᠣᠶᠣᠬᠤ ᠤᠲᠠᠰᠤᠨ ᠤ᠋ ᠥᠩᠭᠡ ᠵᠣᠬᠢᠴᠠᠯ ᠢ᠋ ᠵᠥᠪ ᠲᠣᠬᠢᠷᠠᠭᠤᠯᠤᠨᠠ(ᠬᠠᠳᠬᠤᠮᠠᠯ ᠤ᠋ᠨ ᠥᠩᠭᠡ ᠵᠣᠬᠢᠴᠠᠯ᠂ ᠤᠲᠠᠰᠤ ᠰᠣᠩᠭᠣᠬᠤ ᠭᠡᠰᠡᠨ ᠪᠦᠯᠦᠭ ᠲᠦ᠍ ᠦᠵᠡ)᠃
ᠵᠢᠷᠤᠭ11 ᠵᠡᠭᠦᠦ ᠣᠷᠢᠶᠠᠬᠤ ᠬᠠᠳᠬᠤᠮᠠᠯ ᠤ᠋ᠨ ᠬᠡᠯᠪᠡᠷᠢ ᠨᠦ᠍ᠭᠦᠳ
ᠵᠡᠭᠦᠦ ᠣᠷᠢᠶᠠᠬᠤ ᠳ᠋ᠤ᠌ ᠠᠩᠬᠠᠷᠬᠤ ᠬᠡᠳᠦ ᠬᠡᠳᠦᠨ ᠴᠢᠬᠤᠯᠠ ᠵᠦᠢᠯ ᠪᠠᠢᠳᠠᠭ ᠪᠥᠭᠡᠳ ᠶᠠᠭᠤᠨ ᠤ᠋ ᠡᠮᠦᠨᠡ ᠣᠶᠣᠳᠠᠯ ᠤ᠋ᠨ ᠵᠠᠢ ᠶ᠋ᠢ ᠵᠢᠭᠳᠡ ᠣᠢᠷᠠᠬᠠᠨ ᠭᠠᠷᠭᠠᠵᠤ ᠤᠲᠠᠰᠤ ᠶ᠋ᠢ ᠬᠡᠳᠦ ᠰᠤᠯᠠ᠂ ᠬᠡᠳᠦ ᠴᠢᠩᠭᠠ ᠦᠭᠡᠢ ᠵᠢᠭᠳᠡ ᠲᠠᠲᠠᠵᠤ ᠣᠷᠢᠶᠠᠬᠤ ᠪᠠ ᠳᠠᠷᠠᠭᠠᠬᠢ ᠥᠩᠭᠡ ᠶ᠋ᠢᠨ ᠤᠲᠠᠰᠤ ᠶ᠋ᠢ ᠨᠠᠷᠠ ᠪᠤᠷᠤᠭᠤ ᠲᠡᠰᠢ ᠨᠢ ᠡᠷᠭᠢᠭᠦᠯᠵᠦ ᠣᠶᠣᠨᠠ᠃ ᠡᠬᠢᠯᠡᠭᠡᠳ ᠣᠷᠢᠶᠠᠬᠤ ᠪᠠᠨ ᠵᠡᠭᠦᠦ ᠳ᠋ᠦ᠍ ᠰᠦᠪᠡᠯᠡᠨ ᠬᠠᠳᠬᠤᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠥᠩᠭᠡᠨ ᠳᠡᠭᠡᠷᠡ ᠭᠠᠷᠭᠠᠵᠤ ᠵᠡᠭᠦᠦ ᠡᠴᠡ ᠪᠡᠨ ᠰᠤᠭᠤᠯᠤᠨ ᠰᠤᠯᠠ ᠣᠷᠬᠢᠵᠤ ᠭᠣᠭᠴᠣᠭᠠ ᠳᠠᠷᠤᠭᠤᠯᠬᠤ ᠤᠲᠠᠰᠤ ᠪᠠᠨ ᠭᠠᠷᠭᠠᠯ ᠦᠭᠡᠢ ᠵᠡᠭᠦᠦ ᠪᠡᠨ ᠳᠣᠣᠷᠠ ᠠ᠋ᠴᠠ ᠨᠢ ᠬᠠᠳᠬᠤᠨ ᠭᠠᠷᠭᠠᠵᠤ᠂ ᠲᠦᠷᠦᠭᠦᠴᠢ ᠶ᠋ᠢᠨ ᠰᠤᠯᠠ ᠲᠠᠯᠪᠢᠭᠰᠠᠨ ᠤᠲᠠᠰᠤ ᠪᠠᠷ ᠣᠷᠢᠶᠠᠵᠤ ᠳᠠᠷᠤᠭᠤᠯᠤᠭᠠᠳ ᠳᠠᠷᠠᠭᠠ ᠶ᠋ᠢᠨ ᠭᠣᠭᠴᠣᠭᠠ ᠶ᠋ᠢ ᠵᠡᠭᠦᠦ ᠳ᠋ᠡᠭᠡᠨ ᠣᠷᠢᠶᠠᠵᠤ ᠬᠣᠶᠠᠷ ᠭᠣᠭᠴᠣᠭᠠ ᠶ᠋ᠢ ᠬᠣᠯᠪᠣᠬᠤ ᠵᠠᠮ ᠢ᠋ᠶ᠋ᠠᠷ ᠣᠶᠣᠨᠠ᠃ ᠶᠠᠮᠠᠷ ᠴᠤ᠌ ᠬᠠᠳᠬᠤᠮᠠᠯ ᠢ᠋ ᠣᠶᠣᠵᠤ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠡᠭᠡᠷᠡ ᠡᠴᠡ ᠨᠢ ᠴᠡᠪᠡᠷ ᠳᠠᠪᠤᠤ ᠲᠠᠯᠪᠢᠵᠤ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠬᠠᠯᠠᠭᠠᠯᠲᠠ ᠲᠠᠢ ᠢᠩᠳᠡᠦ ᠪᠡᠷ ᠢᠩᠳᠡᠦᠳᠡᠨᠡ᠃ ᠬᠡᠷᠪᠡ ᠬᠢᠲᠠᠳ ᠲᠣᠷᠭᠠ᠂ ᠫᠦᠦᠰᠦᠦ᠂ ᠦᠢᠲᠠᠩ ᠬᠤᠸᠠᠷ ᠢ᠋ᠶ᠋ᠠᠷ ᠳᠡᠪᠢᠰᠬᠡᠷ ᠬᠢᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠬᠡᠳᠦ ᠴᠢᠭᠢᠭᠯᠡᠵᠦ ᠢᠩᠳᠡᠦᠳᠡᠵᠦ ᠪᠣᠯᠬᠤ ᠦᠭᠡᠢ᠃
ᠬᠣᠨᠢᠨ ᠬᠣᠯᠪᠣᠭᠠ ᠡᠨᠡ ᠣᠶᠣᠳᠠᠯ ᠢ᠋ ᠮᠠᠨ ᠤ᠋ ᠣᠷᠣᠨ ᠤ᠋ ᠬᠠᠰᠠᠭ ᠦᠨᠳᠦᠰᠦᠲᠡᠨ ᠦ᠌ ᠬᠠᠳᠬᠤᠮᠠᠯ ᠳ᠋ᠤ᠌ ᠥᠷᠭᠡᠨ ᠬᠡᠷᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠬᠡᠷᠡᠭᠯᠡᠨᠡ᠃
ᠬᠣᠨᠢᠨ ᠬᠣᠯᠪᠣᠭᠠ ᠣᠶᠣᠬᠤ ᠳ᠋ᠤ᠌ ᠬᠢᠯᠪᠠᠷ᠂ ᠦᠵᠡᠮᠵᠢ ᠰᠠᠢᠲᠠᠢ ᠣᠶᠣᠳᠠᠯ ᠪᠥᠭᠡᠳ ᠬᠠᠳᠬᠤᠮᠠᠯ ᠤ᠋ᠨ ᠶᠡᠬᠡᠬᠡᠨ ᠬᠡᠰᠡᠭ ᠢ᠋ ᠬᠣᠨᠢᠨ ᠬᠣᠯᠪᠣᠭᠠ ᠪᠠᠷ ᠬᠠᠳᠬᠤᠵᠤ ᠪᠣᠯᠤᠨᠠ᠃ ᠬᠣᠨᠢᠨ ᠬᠣᠯᠪᠣᠭᠠ ᠪᠠᠷ ᠭᠤᠶᠤᠬᠤ᠂ ᠴᠢᠮᠡᠬᠦ ᠬᠠᠳᠬᠤᠮᠠᠯ ᠤ᠋ᠨ ᠠᠯᠢᠨ ᠢ᠋ ᠴᠤ᠌ ᠬᠢᠵᠦ ᠬᠠᠳᠬᠤᠮᠠᠯ ᠳ᠋ᠤ᠌ ᠡᠷᠲᠡ ᠦᠶᠡ ᠡᠴᠡ ᠬᠡᠷᠡᠭᠯᠡᠭᠳᠡᠵᠦ ᠢᠷᠡᠵᠡᠢ᠃
ᠾᠦᠩᠨᠦ ᠶ᠋ᠢᠨ ᠦᠶᠡ ᠶᠢᠨ ᠪᠤᠯᠠᠰᠢᠨ ᠤ᠋ ᠮᠠᠯᠲᠠᠮᠠᠯ ᠠ᠋ᠴᠠ ᠣᠯᠳᠠᠭᠰᠠᠨ ᠬᠠᠳᠬᠤᠮᠠᠯ ᠳ᠋ᠤ᠌ ᠨᠢᠮᠭᠡᠨ ᠲᠣᠷᠭᠠᠨ ᠳᠡᠭᠡᠷᠡ ᠬᠦᠳᠦᠰᠦᠨ ᠤᠲᠠᠰᠤ ᠪᠠᠷ ᠬᠣᠨᠢᠨ ᠬᠣᠯᠪᠣᠭᠠ ᠪᠠᠷ ᠵᠠᠳᠠᠭᠠᠢ ᠡᠪᠡᠷ ᠤᠭᠠᠯᠵᠠ ᠣᠶᠣᠭᠰᠠᠨ ᠨᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠤᠷᠠᠨ ᠬᠠᠳᠬᠤᠮᠠᠯ ᠤ᠋ᠨ ᠨᠢᠭᠡ ᠬᠡᠪ ᠰᠢᠨᠵᠢ ᠪᠥᠭᠡᠳ ᠪᠢᠳᠡ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠤ᠋ᠨ ᠤᠷᠠ ᠲᠠᠢ ᠲᠠᠨᠢᠯᠴᠠᠬᠤ ᠨᠢᠭᠡᠨ ᠵᠠᠪᠰᠢᠶᠠᠨ ᠣᠯᠲᠠᠯᠠ᠃
ᠵᠢᠷᠤᠭ12 ᠬᠣᠨᠢᠨ ᠬᠣᠯᠪᠣᠭᠠ
ᠬᠣᠨᠢᠨ ᠬᠣᠯᠪᠣᠭᠠ ᠪᠠᠷ ᠬᠡ ᠤᠭᠠᠯᠵᠠ ᠴᠢᠮᠡᠭᠯᠡᠯ ᠣᠶᠣᠭᠠᠳ ᠵᠣᠭᠰᠣᠬᠤ ᠦᠭᠡᠢ19—20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠤᠷᠠᠯᠠᠨ ᠪᠦᠲᠦᠭᠡᠭᠰᠡᠨ ᠪᠤᠷᠬᠠᠨ ᠤ᠋ ᠬᠥᠷᠥᠭ᠂ ᠮᠥᠨ ᠣᠷᠴᠢᠨ ᠦᠶᠡ ᠶ᠋ᠢᠨ ᠤᠷᠠᠯᠢᠭ ᠲᠤ᠌ ᠬᠥᠮᠦᠨ ᠦ᠌ ᠬᠥᠷᠥᠭ ᠬᠦᠷᠲᠡᠯᠡ ᠤᠷᠠᠯᠠᠨ ᠪᠦᠲᠦᠭᠡᠵᠡᠢ᠃ ᠬᠣᠨᠢᠨ ᠬᠣᠯᠪᠣᠭᠠ ᠣᠶᠣᠳᠠᠯ ᠤ᠋ᠨ ᠣᠶᠣᠬᠤ ᠠᠷᠭᠠ ᠲᠧᠭᠨᠢᠭ ᠬᠢᠯᠪᠠᠷ᠂ ᠨᠢᠭᠡ ᠭᠣᠭᠴᠣᠭᠠᠨ ᠠ᠋ᠴᠠ ᠡᠬᠢᠯᠡᠨ ᠪᠦᠬᠦ ᠬᠡ ᠤᠭᠠᠯᠵᠠ ᠪᠦᠲᠦᠨᠡ᠃ ᠣᠶᠣᠬᠤ ᠳ᠋ᠠᠭᠠᠨ ᠣᠶᠣᠳᠠᠯ ᠢ᠋ ᠬᠡᠷᠪᠡ ᠪᠦᠳᠦᠭᠦᠨ ᠤᠲᠠᠰᠤ ᠪᠠᠷ ᠣᠶᠣᠵᠤ ᠪᠠᠢᠭᠠ ᠪᠣᠯ ᠬᠣᠯᠠᠬᠠᠨ᠂ ᠨᠠᠷᠢᠨ ᠤᠲᠠᠰᠤ ᠪᠣᠯ ᠮᠠᠰᠢ ᠣᠢᠷᠠᠬᠠᠨ ᠨᠢᠭᠡ ᠵᠢᠭᠳᠡ ᠬᠠᠳᠬᠤᠵᠤ ᠡᠬᠢᠨ ᠦ᠌ ᠭᠠᠷᠭᠠᠭᠰᠠᠨ ᠭᠣᠭᠴᠣᠭᠠᠨ ᠤ᠋ ᠤᠷᠢᠳᠤ ᠲᠠᠯᠠ ᠪᠠᠷ ᠵᠡᠭᠦᠦ ᠪᠡᠨ ᠬᠠᠳᠬᠤᠨ ᠭᠠᠷᠭᠠᠵᠤ ᠠᠷᠤ ᠲᠠᠯᠠ ᠶ᠋ᠢᠨ ᠭᠣᠭᠴᠣᠭᠠᠨ ᠤ᠋ ᠤᠷᠢᠳᠤ ᠪᠤᠯᠤᠩ ᠳ᠋ᠤ᠌ ᠬᠠᠳᠬᠤᠵᠤ ᠴᠢᠩᠭᠠᠯᠠᠵᠤ ᠳᠠᠷᠠᠭᠠ ᠶ᠋ᠢᠨ ᠭᠣᠭᠴᠣᠭᠠ ᠭᠠᠷᠭᠠᠬᠤ ᠵᠠᠮ ᠢ᠋ᠶ᠋ᠠᠷ ᠣᠶᠣᠨᠠ᠃
ᠬᠣᠨᠢᠨ ᠬᠣᠯᠪᠣᠭᠠ ᠶ᠋ᠢ ᠨᠢᠭᠡ ᠭᠣᠭᠴᠣᠭᠠ ᠶ᠋ᠢ ᠬᠣᠯᠪᠣᠬᠤ ᠠ᠋ᠴᠠ ᠭᠠᠳᠠᠨᠠ ᠪᠠᠷᠠᠭᠤᠨ ᠵᠡᠭᠦᠨ ᠳᠠᠰᠢ ᠨᠢ ᠡᠭᠡᠯᠵᠢᠯᠡᠨ ᠳᠠᠷᠤᠵᠤ ᠬᠡᠳᠦ ᠬᠡᠳᠦᠨ ᠶᠠᠩᠵᠤ ᠪᠠᠷ ᠣᠶᠣᠳᠠᠭ ᠪᠥᠭᠡᠳ ᠬᠠᠰᠠᠭᠴᠤᠳ ᠦᠵᠦᠭᠦᠷ ᠲᠡᠭᠡᠨ ᠲᠡᠭᠡᠭᠯᠡᠭᠦᠷ ᠨᠠᠷᠢᠨ ᠵᠡᠭᠦᠦ ᠪᠡᠷ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠣᠶᠣᠳᠠᠭ᠃
ᠵᠢᠷᠤᠭ13 ᠴᠣᠭᠣᠯᠪᠤᠷᠢ ᠣᠶᠣᠳᠠᠯ ᠤ᠋ᠨ ᠲᠧᠭᠨᠢᠭ ᠠᠵᠢᠯᠯᠠᠭᠠ ᠶ᠋ᠢ ᠬᠠᠷᠠᠭᠤᠯᠤᠭᠰᠠᠨ ᠪᠠᠢᠳᠠᠯ
ᠴᠣᠭᠣᠯᠪᠤᠷᠢ ᠬᠠᠳᠬᠤᠮᠠᠯ ᠴᠣᠭᠣᠯᠪᠤᠷᠢ ᠣᠶᠣᠳᠠᠯ ᠢ᠋ ᠣᠶᠣᠬᠤ ᠮᠠᠲ᠋ᠧᠷᠢᠶᠠᠯ ᠳᠡᠭᠡᠷᠡ ᠪᠡᠨ ᠵᠢᠷᠤᠵᠤ ᠬᠦᠷᠢᠶᠡ ᠶ᠋ᠢ ᠳᠠᠷᠤᠭᠤᠯᠤᠨ ᠣᠶᠣᠭᠠᠳ ᠢᠷᠮᠡᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠭᠣᠭᠴᠣᠭᠠᠯᠠᠳᠠᠨ ᠰᠢᠭᠯᠠᠨᠠ᠃ ᠳᠦᠷᠰᠦ ᠪᠡᠨ ᠣᠶᠣᠭᠰᠠᠨ ᠤ᠋ ᠳᠠᠷᠠᠭᠠ ᠴᠣᠭᠣᠯᠵᠤ ᠵᠢᠵᠢᠭ ᠬᠠᠢᠴᠢ ᠪᠠᠷ ᠲᠣᠭᠣᠷᠢᠭᠤᠯᠤᠨ ᠬᠠᠢᠴᠢᠯᠠᠨᠠ᠃ ᠴᠣᠭᠣᠯᠪᠤᠷᠢ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠣᠶᠣᠬᠤ ᠠ᠋ᠴᠠ ᠭᠠᠳᠠᠨᠠ ᠮᠠᠰᠢᠨ ᠢ᠋ᠶ᠋ᠠᠷ ᠣᠶᠣᠬᠤ ᠠᠷᠭᠠ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠳᠡᠯᠭᠡᠷᠡᠬᠦ ᠲᠥᠯᠥᠪ ᠲᠡᠢ ᠪᠠᠢᠨᠠ᠃ ᠴᠣᠭᠣᠯᠪᠤᠷᠢ ᠣᠶᠣᠳᠠᠯ ᠢ᠋ᠶ᠋ᠠᠷ ᠣᠶᠣᠬᠤ ᠳ᠋ᠠᠭᠠᠨ ᠬᠣᠯᠪᠣᠬᠤ ᠪᠤᠶᠤ ᠪᠡᠬᠢᠯᠡᠬᠦ ᠤᠲᠠᠰᠤ ᠶ᠋ᠢ ᠤᠭ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠥᠩᠭᠡ ᠲᠡᠢ ᠣᠢᠷᠠᠯᠴᠠᠭᠠ ᠤᠲᠠᠰᠤ ᠪᠠᠷ ᠣᠶᠣᠬᠤ ᠨᠢ ᠲᠣᠬᠢᠷᠠᠮᠵᠢᠲᠠᠢ ᠭᠣᠶᠣᠮᠰᠣᠭ ᠬᠠᠷᠠᠭᠳᠠᠬᠤ ᠲᠤᠯᠠ ᠤᠲᠠᠰᠤᠨ ᠤ᠋ ᠥᠩᠭᠡ ᠲᠣᠬᠢᠷᠠᠭᠤᠯᠬᠤ ᠱᠠᠭᠠᠷᠳᠠᠯᠭᠠ ᠲᠠᠢ(ᠬᠠᠳᠬᠤᠮᠠᠯ ᠤ᠋ᠨ ᠥᠩᠭᠡ ᠵᠣᠬᠢᠴᠠᠭᠤᠯᠤᠯᠲᠠ ᠭᠡᠰᠡᠨ ᠪᠦᠯᠦᠭ ᠲᠦ᠍ ᠦᠵᠡ)᠃
ᠵᠢᠷᠤᠭ14 ᠰᠢᠪᠡᠭᠦᠷ ᠣᠶᠣᠬᠤ ᠠᠵᠢᠯᠯᠠᠭᠠ
(1) ᠵᠡᠭᠦᠦ ᠤᠲᠠᠰᠤ ᠶ᠋ᠢ ᠤᠭᠰᠠᠷᠠᠨ ᠪᠡᠯᠡᠳᠬᠡᠭᠰᠡᠨ ᠪᠠᠢᠳᠠᠯ
(2) ᠰᠢᠪᠠᠵᠤ ᠪᠠᠢᠭᠠ ᠠᠵᠢᠯᠯᠠᠭᠠ
ᠰᠢᠪᠡᠭᠦᠷ ᠬᠠᠳᠬᠤᠮᠠᠯ ᠰᠢᠪᠡᠭᠦᠷ ᠬᠠᠳᠬᠤᠮᠠᠯ ᠭᠠᠷᠤᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠨᠡᠯᠢᠶᠡᠳ ᠬᠣᠵᠢᠭᠤ ᠪᠥᠭᠡᠳ ᠣᠷᠣᠬᠤ ᠤᠲᠠᠰᠤ ᠵᠡᠭᠦᠦ ᠨᠢ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ᠃ ᠰᠢᠪᠡᠭᠦᠷ ᠣᠶᠣᠳᠠᠯ ᠤ᠋ᠨ ᠵᠡᠭᠦᠦ1—3mm ᠳ᠋ᠢᠶᠠᠮᠧᠲ᠋ᠷ ᠲᠡᠢ᠂ ᠭᠣᠣᠯ ᠳ᠋ᠠᠭᠠᠨ ᠨᠦᠬᠡ ᠲᠡᠢ᠂ ᠦᠵᠦᠭᠦᠷ ᠲᠡᠭᠡᠨ ᠰᠦᠪᠡᠭᠴᠢ ᠲᠡᠢ ᠪᠠᠢᠬᠤ ᠪᠥᠭᠡᠳ ᠡᠨᠡ ᠰᠦᠪᠡᠭᠴᠢ ᠦᠵᠦᠭᠦᠷ ᠡᠴᠡ2.5mm ᠬᠡᠮᠵᠢᠶᠡᠨ ᠳ᠋ᠦ᠍ ᠪᠠᠢᠨᠠ᠃ ᠰᠢᠪᠡᠭᠦᠷ ᠣᠶᠣᠳᠠᠯ ᠳ᠋ᠤ᠌ ᠵᠠᠪᠠᠯ ᠲᠡᠯᠡᠭᠦᠷ ᠷᠠᠮ ᠬᠡᠷᠡᠭ ᠲᠡᠢ ᠪᠥᠭᠡᠳ ᠲᠡᠯᠡᠭᠦᠷ ᠲᠦ᠍ ᠳᠠᠪᠤᠤ ᠪᠠᠨ ᠪᠡᠬᠢᠯᠡᠵᠦ ᠳᠠᠪᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠲᠠᠯᠠ ᠳ᠋ᠤᠨᠢ ᠣᠶᠣᠬᠤ ᠳᠦᠷᠰᠦ ᠪᠡᠨ ᠪᠤᠷᠤᠭᠤ ᠬᠠᠷᠠᠭᠤᠯᠵᠤ ᠣᠶᠣᠭᠠᠳ ᠡᠷᠭᠢᠭᠦᠯᠬᠦ ᠳ᠋ᠦ᠍ ᠳᠦᠷᠰᠦ ᠪᠣᠯᠤᠨ ᠣᠶᠣᠬᠤ ᠳᠡᠪᠢᠰᠬᠡᠷ ᠦ᠋ᠨ ᠥᠩᠭᠡ ᠵᠥᠪ ᠪᠣᠯᠵᠤ ᠤᠲᠠᠰᠤ ᠥᠩᠭᠡᠨ ᠲᠠᠯᠠ ᠳ᠋ᠠᠭᠠᠨ ᠭᠣᠭᠴᠣᠭᠠᠷᠠᠨ ᠦᠯᠡᠳᠡᠨᠡ᠃ ᠰᠢᠪᠡᠭᠦᠷ ᠣᠶᠣᠳᠠᠯ ᠢ᠋ ᠲᠣᠷᠭᠠᠨ ᠳᠠᠪᠤᠤ ᠨᠣᠣᠰᠣᠨ ᠤᠲᠠᠰᠤ ᠪᠠᠷ ᠣᠶᠣᠬᠤ ᠪᠥᠭᠡᠳ ᠤᠲᠠᠰᠤ ᠶ᠋ᠢ ᠬᠣᠯᠢᠵᠤ ᠳᠠᠪᠬᠤᠷᠯᠠᠨ ᠣᠶᠣᠵᠤ ᠪᠣᠯᠤᠨᠠ᠃ ᠤᠲᠠᠰᠤ ᠪᠠᠨ ᠰᠦᠪᠡᠭᠴᠢᠯᠡᠬᠦ ᠳ᠋ᠡᠭᠡᠨ ᠵᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ ᠤᠷᠤᠭᠰᠢ ᠰᠦᠪᠡᠯᠡᠨ ᠭᠠᠷᠭᠠᠵᠤ ᠳᠠᠷᠠᠭᠠ ᠨᠢ ᠦᠵᠦᠭᠦᠷ ᠦ᠋ᠨ ᠵᠢᠵᠢᠭ ᠰᠦᠪᠡᠭᠴᠢᠨ ᠳ᠋ᠡᠭᠡᠨ ᠣᠷᠣᠭᠤᠯᠤᠨ2—4cm ᠣᠷᠴᠢᠮ ᠦᠵᠦᠭᠦᠷ ᠭᠠᠷᠭᠠᠭᠠᠳ ᠣᠶᠣᠬᠤ ᠭᠣᠭᠴᠣᠭᠠ ᠪᠠᠨ ᠵᠢᠭᠳᠡ ᠭᠠᠷᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠵᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠵᠦᠭᠦᠷ ᠲᠦ᠍ ᠭᠣᠮ ᠲᠡᠭᠡᠭᠯᠡᠭᠦᠷ ᠬᠢᠨᠡ᠃ ᠵᠢᠱ᠌ᠢᠶᠡ ᠨᠢ᠂ ᠵᠡᠭᠦᠦ ᠶ᠋ᠢᠨ ᠦᠵᠦᠭᠦᠷ ᠡᠴᠡ1.6—1.8 cm ᠵᠠᠢᠲᠠᠢ ᠭᠣᠮ ᠲᠡᠭᠡᠭᠯᠡᠭᠦᠷ ᠲᠡᠢ ᠦᠶᠡ ᠳ᠋ᠦ᠍ ᠭᠠᠷᠬᠤ ᠭᠣᠭᠴᠣᠭᠠᠨ ᠤ᠋ ᠤᠷᠲᠤ 3mm ᠪᠠᠢᠨᠠ᠃ ᠤᠲᠠᠰᠤ ᠶ᠋ᠢ ᠵᠡᠭᠦᠦ ᠶ᠋ᠢᠨ ᠭᠣᠣᠯ ᠨᠦᠬᠡ ᠪᠡᠷ ᠴᠢᠯᠥᠭᠡᠲᠡᠢ ᠭᠦᠶᠦᠵᠦ ᠪᠠᠢᠬᠤ ᠪᠠᠷ ᠲᠣᠬᠢᠷᠠᠭᠤᠯᠬᠤ ᠪᠥᠭᠡᠳ ᠣᠶᠣᠬᠤ ᠦᠶᠡ ᠳ᠋ᠡᠭᠡᠨ ᠵᠡᠭᠦᠦ ᠪᠡᠨ ᠲᠠᠰᠢᠭᠤ ᠬᠠᠵᠠᠭᠠᠢ ᠪᠠᠷᠢᠪᠠᠯ ᠤᠲᠠᠰᠤ ᠲᠠᠲᠠᠭᠳᠠᠵᠤ ᠴᠢᠯᠥᠭᠡᠲᠡᠢ ᠭᠦᠶᠦᠬᠦ ᠦᠭᠡᠢ ᠤᠴᠢᠷ ᠬᠠᠳᠬᠤᠬᠤ ᠵᠡᠭᠦᠦ ᠶ᠋ᠢ ᠡᠭᠴᠡ ᠪᠠᠷᠢᠵᠤ ᠰᠢᠪᠠᠨᠠ᠃ ᠰᠢᠪᠡᠬᠦ ᠦᠶᠡ ᠳ᠋ᠡᠭᠡᠨ ᠵᠠᠢ ᠪᠠᠨ ᠮᠠᠰᠢ ᠣᠢᠷᠠᠬᠠᠨ ᠰᠢᠭᠢᠭᠦᠦ ᠬᠠᠳᠬᠤᠨᠠ᠃
ᠵᠢᠷᠤᠭ15 ᠵᠠᠳᠠᠭᠠᠢ ᠰᠢᠭᠢᠭᠦᠦ ᠣᠶᠣᠳᠠᠯ
ᠰᠢᠭᠢᠭᠦᠦ ᠵᠠᠳᠠᠭᠠᠢ ᠬᠠᠳᠬᠤᠮᠠᠯ ᠡᠨᠡ ᠨᠢ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠭᠠᠷᠴᠤ ᠢᠷᠡᠭᠰᠡᠨ ᠪᠥᠭᠡᠳ ᠦᠷᠭᠦᠯᠵᠢᠯᠡᠭᠦᠯᠦᠨ ᠰᠢᠭᠢᠭᠦᠦ ᠣᠶᠣᠵᠤ ᠴᠡᠴᠡᠭ ᠨᠠᠪᠴᠢ᠂ ᠪᠤᠭᠤ ᠰᠤᠭᠤ᠂ ᠮᠠᠯ ᠠᠮᠢᠲᠠᠨ ᠣᠶᠣᠨᠠ᠃ ᠡᠨᠡ ᠣᠶᠣᠳᠠᠯ ᠢ᠋ᠶ᠋ᠠᠷ ᠮᠠᠯ᠂ ᠠᠮᠢᠲᠠᠨ᠂ ᠰᠢᠪᠠᠭᠤ ᠣᠶᠣᠬᠤ ᠳ᠋ᠤ᠌ ᠠᠮᠢᠲᠠᠨ ᠤ᠋ ᠦᠰᠦᠨ ᠦ᠌ ᠰᠢᠷᠬᠡᠭ ᠦ᠋ᠨ ᠪᠠᠢᠷᠢᠯᠠᠯ ᠤ᠋ᠨ ᠳᠠᠭᠠᠤ ᠠᠷᠤ ᠲᠠᠯᠠ ᠶ᠋ᠢ ᠵᠢᠵᠢᠭ᠂ ᠥᠩᠭᠡᠨ ᠲᠠᠯᠠ ᠶ᠋ᠢ ᠳᠠᠮᠨᠠᠭᠤᠯᠵᠤ ᠣᠶᠣᠬᠤ ᠪᠥᠭᠡᠳ ᠨᠢᠭᠡ ᠳᠠᠮᠨᠠᠭᠤᠯᠤᠭᠰᠠᠨ ᠤᠲᠠᠰᠤᠨ ᠤ᠋ ᠬᠠᠵᠠᠭᠤ ᠤᠷᠤᠭᠤ ᠵᠡᠷᠭᠡᠴᠡᠭᠦᠯᠦᠨ ᠣᠶᠣᠨᠠ᠃ ᠡᠨᠡ ᠬᠠᠳᠬᠤᠮᠠᠯ ᠢ᠋ᠶ᠋ᠠᠷ ᠠᠮᠢᠲᠠᠨ ᠤ᠋ ᠳᠦᠷᠰᠦ ᠣᠶᠣᠬᠤ ᠳ᠋ᠠᠭᠠᠨ ᠤᠲᠠᠰᠤ ᠶ᠋ᠢ ᠲᠡᠷᠡ ᠠᠮᠢᠲᠠᠨ ᠤ᠋ ᠥᠩᠭᠡᠨ ᠳ᠋ᠦ᠍ ᠲᠣᠬᠢᠷᠠᠭᠤᠯᠤᠨ ᠨᠢᠭᠡ ᠥᠩᠭᠡ ᠶ᠋ᠢᠨ ᠪᠤᠶᠤ ᠬᠡᠳᠦ ᠬᠡᠳᠦᠨ ᠥᠩᠭᠡ ᠶ᠋ᠢ ᠬᠣᠯᠪᠣᠵᠤ ᠣᠶᠣᠬᠤ ᠳ᠋ᠤ᠌ ᠵᠣᠬᠢᠷᠠᠮᠵᠢᠲᠠᠢ᠃ ᠵᠢᠱ᠌ᠢᠶᠡ ᠨᠢ᠄ ᠠᠷᠭᠠᠯᠢ ᠤᠭᠠᠯᠵᠠ ᠣᠶᠣᠬᠤ ᠳ᠋ᠤ᠌ ᠭᠦᠨ ᠥᠩᠭᠡ ᠶ᠋ᠢ ᠪᠣᠷᠣ ᠪᠠᠷ ᠭᠣᠣᠯᠳᠠᠭᠤ᠂ ᠬᠥᠩᠭᠡᠨ ᠪᠡᠶᠡ ᠳ᠋ᠦ᠍ ᠴᠠᠭᠠᠨ ᠢ᠋ ᠬᠣᠣᠰᠯᠠᠭᠤᠯᠤᠭᠰᠠᠨ ᠣᠶᠣᠭᠠᠰᠤ ᠪᠠᠷ᠂ ᠭᠥᠷᠦᠭᠡᠰᠦᠨ ᠦ᠌ ᠣᠮᠯᠤᠭᠤᠷ ᠢ᠋ ᠴᠠᠭᠠᠨ ᠰᠢᠷᠭᠠᠯ ᠤᠲᠠᠰᠤ ᠪᠠᠷ ᠣᠶᠣᠨᠠ᠃ ᠬᠠᠷᠢᠨ ᠵᠡᠭᠡᠷᠡ ᠣᠶᠣᠪᠠᠯ ᠪᠣᠷᠣ ᠰᠢᠷᠠ ᠥᠩᠭᠡ ᠶ᠋ᠢ ᠴᠠᠭᠠᠨ ᠲᠠᠢ ᠬᠣᠯᠢᠵᠤ ᠣᠶᠣᠬᠤ ᠪᠠ ᠣᠮᠯᠤᠭᠤᠷ ᠢ᠋ ᠴᠠᠭᠠᠨ ᠰᠢᠷᠭᠠᠯ ᠤᠲᠠᠰᠤ ᠪᠠᠷ ᠠᠯᠤᠰ ᠠ᠋ᠴᠠ ᠬᠦᠨᠳᠦᠷᠡᠭᠦᠯᠵᠦ ᠣᠶᠣᠬᠤ ᠠ᠋ᠴᠠ ᠭᠠᠳᠠᠨᠠ ᠰᠡᠭᠦᠳᠡᠷ ᠲᠡᠢ ᠬᠡᠰᠡᠭ ᠲᠦ᠋ᠨᠢ ᠵᠡᠭᠡᠷᠡ ᠶ᠋ᠢᠨ ᠪᠡᠶᠡ ᠬᠡᠰᠡᠭ ᠢ᠋ ᠣᠶᠣᠭᠰᠠᠨ ᠪᠤᠶᠤ ᠰᠢᠷᠭᠠᠯ ᠤᠲᠠᠰᠤ ᠪᠠᠨ ᠴᠠᠭᠠᠨ ᠲᠠᠢ ᠬᠣᠯᠢᠵᠤ ᠬᠥᠩᠭᠡᠨ ᠰᠡᠭᠦᠳᠡᠷ ᠬᠢᠵᠦ ᠥᠭᠭᠦᠨᠡ᠃
ᠵᠡᠭᠡᠭᠲᠦ ᠨᠠᠭᠠᠮᠠᠯ ᠡᠨᠡ ᠨᠢ ᠤᠷᠠᠨ ᠦᠢᠯᠡ ᠶ᠋ᠢᠨ ᠨᠢᠭᠡᠨ ᠲᠥᠷᠥᠯ ᠪᠥᠭᠡᠳ ᠥᠩᠭᠡ ᠶ᠋ᠢᠨ ᠳᠠᠪᠤᠤ ᠲᠣᠷᠭᠠ ᠪᠠᠷ ᠨᠠᠭᠠᠵᠤ ᠵᠡᠭᠡᠭᠯᠡᠨ ᠣᠶᠣᠳᠠᠭ᠃ ᠬᠢᠬᠦ ᠵᠦᠢᠯ ᠡᠴᠡ ᠪᠡᠨ ᠬᠠᠮᠢᠶᠠᠷᠴᠤ ᠲᠣᠮᠣ ᠵᠢᠵᠢᠭ ᠣᠯᠠᠨ ᠶᠠᠩᠵᠤ ᠪᠠᠢᠳᠠᠭ᠃ ᠵᠡᠭᠡᠭᠲᠦ ᠨᠡᠬᠡᠮᠡᠯ ᠢ᠋ ᠤᠷᠠᠯᠠᠬᠤ ᠳ᠋ᠠᠭᠠᠨ ᠡᠬᠢᠯᠡᠭᠡᠳ ᠳᠡᠪᠢᠰᠬᠡᠷ ᠥᠩᠭᠡ ᠪᠡᠨ ᠬᠡᠯᠡᠬᠦ ᠥᠩᠭᠡ ᠲᠡᠢ ᠪᠡᠨ ᠤᠷᠠᠨ ᠵᠢᠷᠤᠭ ᠤ᠋ᠨ ᠠᠷᠭᠠ ᠪᠠᠷ ᠵᠣᠬᠢᠴᠠᠭᠤᠯᠤᠨ ᠠᠪᠴᠤ ᠳᠡᠪᠢᠰᠬᠡᠷ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠳ᠋ᠤ᠌ ᠨᠢᠮᠭᠡᠨ ᠴᠠᠪᠤᠭ ᠪᠠᠷᠢᠵᠤ ᠵᠢᠭᠳᠡ ᠵᠣᠩᠬᠣᠳᠠᠨ ᠨᠠᠭᠠᠵᠤ ᠲᠡᠭᠦᠨ ᠢ᠋ ᠪᠡᠨ ᠴᠢᠭᠢᠭ ᠲᠡᠢ ᠪᠠᠢᠬᠤ ᠳ᠋ᠤᠨᠢ ᠢᠩᠳᠡᠦ ᠶ᠋ᠢᠨ ᠢ᠋ᠶ᠋ᠡᠨ ᠤᠯᠠ ᠶ᠋ᠢᠨ ᠳᠣᠣᠷᠠ ᠴᠡᠪᠡᠷ ᠴᠠᠭᠠᠨ ᠳᠠᠪᠤᠤ ᠲᠠᠯᠪᠢᠵᠤ ᠢᠩᠳᠡᠦᠳᠡᠨᠡ᠃ ᠵᠢᠭᠳᠡ ᠳᠣᠯᠢᠢᠯᠭᠠᠨ ᠢᠩᠳᠡᠦᠳᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠲᠡᠭᠰᠢ ᠭᠠᠳᠠᠷᠭᠤ ᠲᠠᠢ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠮᠥᠨ ᠲᠡᠭᠰᠢ ᠭᠠᠳᠠᠷᠭᠤ ᠲᠠᠢ ᠬᠦᠨᠳᠦ ᠶᠠᠭᠤᠮᠠ ᠲᠠᠯᠪᠢᠵᠤ ᠬᠡᠪᠰᠢᠭᠦᠯᠦᠨᠡ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠨᠠᠭᠠᠬᠤ ᠪᠠᠷ ᠰᠣᠩᠭᠣᠭᠰᠠᠨ ᠵᠢᠷᠤᠭ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠲᠤᠰ ᠪᠦᠷᠢ ᠪᠡᠷ ᠪᠠᠭᠤᠯᠭᠠᠭᠠᠳ ᠲᠡᠭᠦᠨ ᠢ᠋ ᠪᠡᠨ ᠥᠩᠭᠡ ᠢᠯᠭᠠᠨ ᠲᠣᠳᠣᠷᠠᠭᠤᠯᠤᠨᠠ᠃ ᠵᠡᠬᠡᠭ ᠦ᠋ᠨ ᠤᠲᠠᠰᠤ ᠡᠷᠴᠢᠲᠡᠢ ᠲᠣᠷᠭᠠᠨ ᠤᠲᠠᠰᠤ ᠪᠤᠶᠤ ᠲᠣᠷᠭᠠᠨ ᠤ᠋ ᠥᠭᠡᠳᠡᠰᠦ ᠰᠤᠪᠤᠵᠤ ᠡᠷᠴᠢᠯᠡᠭᠰᠡᠨ ᠤᠲᠠᠰᠤ ᠪᠠᠢᠨᠠ᠃ ᠲᠠᠯᠪᠢᠵᠤ ᠪᠠᠢᠭᠠ ᠵᠡᠭᠡᠭ ᠤᠭ ᠨᠠᠭᠠᠮᠠᠯ ᠤ᠋ᠨ ᠳᠦᠷᠰᠦ ᠵᠢᠷᠤᠭᠠᠰᠤ ᠲᠤᠯᠠ ᠲᠣᠳᠣ ᠢᠯᠭᠠᠭᠳᠠᠬᠤ ᠪᠠᠷ ᠪᠠᠢᠨᠠ᠃ ᠥᠩᠭᠡ ᠶ᠋ᠢ ᠲᠣᠳᠣᠷᠠᠭᠤᠯᠬᠤ ᠳ᠋ᠠᠭᠠᠨ ᠪᠠᠷᠠᠭᠠᠨ ᠥᠩᠭᠡ ᠶ᠋ᠢᠨ ᠳᠠᠪᠤᠤ ᠶ᠋ᠢ ᠲᠡᠷᠡ ᠥᠩᠭᠡᠨ ᠦ᠌ ᠴᠠᠢᠪᠤᠷ ᠢ᠋ᠶ᠋ᠠᠷ᠂ ᠬᠠᠷᠠ ᠰᠠᠷᠠᠯᠳᠠᠭᠤ ᠴᠠᠢᠪᠤᠷ ᠥᠩᠭᠡ ᠶ᠋ᠢ ᠮᠥᠨ ᠥᠩᠭᠡ ᠶ᠋ᠢᠨ ᠪᠠᠷᠠᠭᠠᠨ ᠤ᠋ ᠥᠩᠭᠡ ᠪᠡᠷ ᠵᠡᠭᠡᠭᠯᠡᠬᠦ ᠪᠠ ᠴᠠᠭᠠᠨ ᠥᠩᠭᠡ ᠶ᠋ᠢ ᠪᠦᠳᠡᠭᠢ ᠴᠡᠩᠬᠡᠷ᠂ ᠰᠠᠷᠠᠯ ᠥᠩᠭᠡ ᠪᠡᠷ ᠵᠡᠭᠡᠭᠯᠡᠨᠡ᠃ ᠤᠯᠠᠭᠠᠨ ᠢ᠋ ᠤᠯᠠᠭᠠᠨ ᠬᠦᠷᠡᠩ ᠢ᠋ᠶ᠋ᠡᠷ᠂ ᠬᠠᠷᠠ ᠶ᠋ᠢ ᠬᠥᠬᠡ ᠥᠩᠭᠡ ᠪᠡᠷ ᠵᠡᠭᠡᠭᠯᠡᠬᠦ᠂ ᠵᠡᠭᠡᠭ ᠨᠢ ᠬᠢᠵᠦ ᠪᠠᠢᠭᠠ ᠵᠦᠢᠯ ᠦ᠋ᠨ ᠥᠩᠭᠡ ᠵᠣᠬᠢᠴᠠᠭᠤᠯᠤᠯᠲᠠ ᠠ᠋ᠴᠠ ᠪᠣᠯᠵᠤ ᠡᠷᠴᠢᠯᠡᠵᠦ ᠪᠡᠯᠡᠳᠬᠡᠬᠦ ᠤᠲᠠᠰᠤ ᠪᠦᠳᠦᠭᠦᠨ ᠨᠠᠷᠢᠨ ᠶᠠᠩᠵᠤ ᠪᠦᠷᠢ ᠪᠠᠢᠨᠠ᠃ ᠬᠥᠮᠦᠨ ᠦ᠌ ᠬᠥᠷᠥᠭ ᠢ᠋ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ᠶ᠋ᠠᠷ ᠬᠢᠬᠦ ᠳ᠋ᠡᠭᠡᠨ ᠬᠤᠪᠴᠠᠰᠤ᠂ ᠭᠣᠶᠣᠯ᠂ ᠴᠢᠮᠡᠭᠯᠡᠯ ᠢ᠋ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ᠶ᠋ᠠᠷ ᠬᠢᠵᠦ ᠨᠢᠭᠤᠷ ᠤ᠋ᠨ ᠰᠡᠭᠦᠳᠡᠷ᠂ ᠤᠷᠤᠭᠤᠯ᠂ ᠬᠥᠮᠥᠰᠬᠡ᠂ ᠬᠠᠮᠠᠷ ᠵᠡᠷᠭᠡ ᠨᠠᠷᠢᠨ ᠵᠢᠷᠤᠭ ᠣᠷᠣᠭᠤᠯᠬᠤ ᠬᠡᠰᠡᠭ ᠢ᠋ ᠬᠠᠳᠬᠤᠮᠠᠯ ᠢ᠋ᠶ᠋ᠠᠷ ᠬᠢᠵᠦ ᠥᠭᠭᠦᠨᠡ᠃
ᠵᠡᠬᠡᠭ ᠳᠠᠷᠤᠭᠤᠯᠤᠨ ᠣᠶᠣᠬᠤ ᠵᠡᠭᠡᠭ ᠲᠡᠭᠡᠨ ᠲᠡᠪᠡᠨᠡ ᠰᠦᠪᠡᠯᠡᠭᠡᠳ ᠵᠡᠭᠡᠭ ᠦ᠋ᠨ ᠥᠩᠭᠡ ᠶ᠋ᠢᠨ ᠨᠠᠷᠢᠨ ᠤᠲᠠᠰᠤᠨ ᠳ᠋ᠤ᠌ ᠵᠡᠭᠦᠦ ᠰᠦᠪᠡᠯᠡᠵᠦ ᠪᠦᠳᠦᠭᠦᠨ ᠵᠡᠭᠡᠭ ᠢ᠋ᠶ᠋ᠡᠨ ᠣᠶᠣᠬᠤ ᠳᠦᠷᠰᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠬᠢᠯᠡᠯ ᠭᠠᠵᠠᠷ ᠠ᠋ᠴᠠ ᠳᠡᠭᠡᠭᠰᠢ ᠭᠠᠷᠭᠠᠨ ᠳᠣᠣᠷᠠᠲᠤ ᠦᠵᠦᠭᠦᠷ ᠢ᠋ ᠨᠢ4—5 mmᠬᠢᠷᠢ ᠲᠡᠢ ᠬᠠᠢᠴᠢᠯᠠᠵᠤ ᠲᠠᠯᠠ ᠲᠠᠯᠠ ᠳᠠᠰᠢ ᠨᠢ ᠵᠠᠳᠠᠯᠤᠨ ᠨᠠᠭᠠᠨᠠ᠃ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠨ ᠵᠡᠭᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠣᠯᠣᠪᠣᠷ᠂ ᠳᠤᠮᠳᠠ ᠬᠤᠷᠤᠭᠤᠨ ᠳᠡᠭᠡᠷᠡ ᠳᠣᠬᠢᠵᠤ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠡᠬᠡᠭ ᠦ᠋ᠨ ᠡᠷᠴᠢ ᠶ᠋ᠢ ᠴᠢᠩᠭᠠᠯᠠᠨ ᠵᠢᠷᠤᠭ ᠤ᠋ᠨ ᠳᠠᠭᠠᠤ ᠴᠢᠭᠯᠡᠭᠦᠯᠦᠨ ᠣᠶᠣᠬᠤ ᠳ᠋ᠠᠭᠠᠨ ᠵᠡᠬᠡᠭ ᠦ᠋ᠨ ᠢᠷᠣᠭᠠᠷ ᠢ᠋ᠶ᠋ᠠᠷ ᠭᠠᠷᠭᠠᠭᠠᠳ ᠵᠡᠬᠡᠭ ᠦ᠋ᠨ ᠳᠤᠮᠳᠠᠭᠤᠷ ᠴᠠᠰᠢ ᠨᠠᠰᠢ ᠨᠢ ᠳᠠᠭᠠᠭᠤᠯᠤᠨ ᠭᠠᠳᠠᠭᠰᠢ ᠳᠠᠷᠤᠭᠤᠯᠵᠤ ᠣᠶᠣᠨᠠ᠃ ᠵᠡᠭᠡᠭ ᠢ᠋ ᠮᠠᠰᠢ ᠣᠢᠷᠠᠬᠠᠨ ᠨᠢᠮᠪᠠᠢ ᠬᠠᠳᠬᠤᠵᠤ ᠳᠠᠷᠤᠭᠤᠯᠬᠤ ᠦᠭᠡᠢ ᠪᠣᠯ ᠰᠤᠯᠠ᠂ ᠮᠤᠷᠤᠢ ᠪᠣᠯᠳᠠᠭ᠃ ᠵᠡᠭᠡᠭ ᠢ᠋ᠶ᠋ᠡᠨ ᠳᠠᠷᠤᠭᠤᠯᠵᠤ ᠣᠶᠣᠭᠰᠠᠨ ᠤ᠋ ᠳᠠᠷᠠᠭᠠ ᠴᠡᠴᠡᠭ᠂ ᠨᠠᠪᠴᠢ᠂ ᠬᠠᠳᠠ᠂ ᠮᠣᠳᠣ ᠵᠡᠷᠭᠡ ᠶ᠋ᠢ ᠵᠡᠬᠡᠭ ᠦ᠋ᠨ ᠳᠣᠲᠣᠭᠤᠷ1-2mm ᠤᠨ ᠵᠠᠭᠠᠭ ᠲᠠᠢ ᠨᠠᠷᠢᠬᠠᠨ ᠠᠯᠲᠠ᠂ ᠮᠥᠩᠭᠥᠨ ᠰᠠ ᠶ᠋ᠢ ᠳᠠᠷᠤᠭᠤᠯᠤᠨ ᠣᠶᠣᠬᠤ ᠪᠠ ᠱᠢᠷᠦ ᠂ ᠰᠤᠪᠤᠳ᠂ ᠣᠯᠪᠤᠨ ᠢ᠋ᠶ᠋ᠠᠷ ᠴᠢᠮᠡᠭᠯᠡᠵᠦ ᠪᠣᠯᠤᠨᠠ᠃ ᠪᠠᠢᠭᠠᠯᠢ ᠶ᠋ᠢᠨ ᠦᠵᠡᠰᠬᠦᠯᠡᠩᠲᠦ ᠴᠡᠴᠡᠭ ᠢ᠋ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ᠶ᠋ᠠᠷ ᠤᠷᠠᠯᠠᠭᠰᠠᠨ ᠪᠣᠯ ᠨᠠᠪᠴᠢᠨ ᠤ᠋ ᠭᠣᠣᠯ᠂ ᠴᠡᠴᠡᠭ ᠦ᠋ᠨ ᠳᠡᠯᠪᠢ ᠶ᠋ᠢᠨ ᠰᠡᠭᠦᠳᠡᠷ᠂ ᠳᠣᠬᠢᠭᠤᠷ ᠵᠡᠷᠭᠡ ᠶ᠋ᠢ ᠬᠠᠳᠬᠤᠮᠠᠯ ᠢ᠋ᠶ᠋ᠠᠷ ᠬᠠᠳᠬᠤᠵᠤ ᠴᠢᠮᠡᠨᠡ᠃ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ ᠨᠠᠭᠠᠬᠤ ᠬᠠᠮᠤᠭ ᠤ᠋ᠨ ᠰᠠᠢᠨ ᠠᠷᠭᠠ ᠨᠢ ᠬᠢᠬᠦ ᠨᠠᠭᠠᠮᠠᠯ ᠤ᠋ᠨ ᠡᠬᠡ ᠵᠢᠷᠤᠭ ᠢ᠋ ᠬᠣᠶᠠᠷ ᠬᠤᠪᠢ ᠵᠢᠷᠤᠭᠠᠳ ᠵᠢᠷᠤᠭ ᠨᠢᠭᠡᠪᠦᠷᠢᠴᠢᠯᠡᠨ ᠬᠠᠢᠴᠢᠯᠠᠵᠤ ᠨᠥᠭᠦᠭᠡ ᠬᠢᠬᠦ ᠵᠦᠢᠯ ᠦ᠋ᠨ ᠢ᠋ᠶ᠋ᠡᠨ ᠥᠩᠭᠡᠨ ᠦ᠌ ᠳᠠᠭᠠᠤ ᠢᠯᠭᠠᠨ ᠪᠣᠳᠣᠵᠤ ᠲᠡᠷᠡ ᠪᠣᠳᠣᠭ ᠲᠠᠢ ᠪᠠᠨ ᠢᠵᠢᠯ ᠪᠤᠶᠤ ᠣᠢᠷᠠᠯᠴᠠᠭᠠ ᠥᠩᠭᠡᠨ ᠦ᠌ ᠲᠣᠷᠭᠠ ᠪᠡᠯᠡᠳᠬᠡᠨ ᠴᠠᠷᠳᠠᠭᠠᠳ ᠤᠷᠢᠳᠴᠢᠯᠠᠨ ᠲᠣᠬᠢᠷᠠᠭᠤᠯᠤᠨ ᠨᠠᠭᠠᠭᠠᠳ ᠵᠠᠬᠠ ᠶ᠋ᠢ ᠨᠤᠭᠤᠯᠬᠤ ᠵᠠᠢ ᠶ᠋ᠢ ᠪᠣᠳᠣᠨ ᠦᠯᠡᠳᠡᠭᠡᠵᠦ ᠲᠡᠭᠦᠨ ᠢ᠋ ᠪᠡᠨ ᠴᠠᠰᠢ ᠨᠢ ᠬᠠᠷᠠᠭᠤᠯᠤᠨ ᠨᠤᠭᠤᠯᠤᠨ ᠨᠠᠭᠠᠨᠠ᠃ ᠬᠠᠷᠢᠨ ᠨᠢᠭᠡ ᠨᠢ ᠨᠥᠭᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠪᠠᠷ ᠣᠷᠣᠵᠤ ᠲᠠᠭᠠᠷᠠᠬᠤ ᠪᠠᠷ ᠪᠣᠯ ᠠᠷᠤ ᠪᠠᠷ ᠨᠢ ᠣᠷᠣᠭᠰᠠᠨ ᠬᠡᠰᠡᠭ ᠦ᠋ᠨ ᠵᠠᠬᠠ ᠶ᠋ᠢ ᠨᠠᠭᠠᠬᠤ ᠬᠡᠷᠡᠭ ᠦᠭᠡᠢ᠃ ᠣᠯᠠᠨ ᠲᠥᠷᠥᠯ ᠦ᠋ᠨ ᠬᠡᠰᠡᠭ ᠡᠴᠡ ᠪᠦᠷᠢᠳᠦᠭᠰᠡᠨ ᠨᠠᠭᠠᠮᠠᠯ ᠳ᠋ᠤ᠌ ᠠᠭᠤᠯᠵᠠᠬᠤ ᠪᠤᠶᠤ ᠵᠥᠷᠢᠬᠦ ᠬᠡᠰᠡᠭ ᠪᠦᠷᠢ ᠳ᠋ᠦ᠍ ᠲᠠᠨᠢᠬᠤ ᠲᠡᠮᠳᠡᠭ ᠲᠠᠯᠪᠢᠨᠠ᠃ ᠲᠣᠷᠭᠠ ᠪᠣᠯᠤᠨ ᠶᠡᠷᠦ ᠨᠢ ᠶᠠᠮᠠᠷ ᠴᠤ᠌ ᠪᠠᠷᠠᠭᠠ ᠪᠠᠷ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠬᠢᠬᠦ ᠳ᠋ᠦ᠍ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠰᠢᠷᠬᠡᠭ ᠢ᠋ ᠵᠠᠪᠠᠯ ᠨᠢᠭᠡ ᠴᠢᠭ ᠲᠦ᠍ ᠪᠣᠯᠭᠠᠨᠠ᠃ ᠬᠡᠷᠪᠡ ᠰᠢᠷᠬᠡᠭ ᠨᠢ ᠪᠤᠷᠤᠭᠤ ᠵᠥᠷᠢᠭᠦᠦ ᠬᠠᠷᠠᠭᠰᠠᠨ ᠪᠣᠯ ᠵᠢᠩᠬᠢᠨᠢ ᠳᠦᠷᠰᠦ ᠶ᠋ᠢ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠢᠩᠭᠢᠵᠦ ᠰᠢᠷᠬᠡᠭᠴᠢᠯᠡᠨ ᠨᠤᠭᠤᠯᠵᠤ ᠨᠠᠭᠠᠵᠤ ᠪᠡᠯᠡᠳᠬᠡᠭᠰᠡᠨ ᠵᠦᠢᠯ ᠢ᠋ᠶ᠋ᠡᠨ ᠪᠦᠲᠦᠨ ᠡᠬᠡ ᠵᠠᠭᠪᠤᠷ ᠳᠡᠭᠡᠷᠡ ᠪᠡᠨ ᠵᠥᠷᠢᠶᠡ ᠦᠭᠡᠢ ᠲᠣᠬᠢᠷᠠᠭᠤᠯᠤᠨ ᠲᠠᠯᠪᠢᠵᠤ ᠬᠣᠯᠪᠣᠨ ᠨᠠᠭᠠᠵᠤ ᠣᠶᠣᠭᠠᠳ ᠵᠢᠩᠬᠢᠨᠢ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠪᠡᠨ ᠢᠷᠮᠡᠭ ᠢ᠋ᠶ᠋ᠡᠷ ᠨᠢ ᠨᠠᠭᠠᠵᠤ᠂ ᠨᠠᠭᠠᠭᠰᠠᠨ ᠪᠦᠭᠦᠳᠡ ᠶ᠋ᠢᠨ ᠢ᠋ᠶ᠋ᠡᠨ ᠢᠷᠮᠡᠭ ᠢ᠋ ᠵᠡᠬᠡᠭ ᠦ᠋ᠨ ᠳᠣᠲᠣᠭᠤᠷ ᠵᠡᠭᠡᠭ ᠦ᠋ᠨ ᠥᠩᠭᠡᠨ ᠦ᠌ ᠤᠲᠠᠰᠤ ᠪᠠᠷ ᠳᠠᠷᠤᠭᠤᠯᠤᠨᠠ᠃
ᠲᠡᠭᠦᠨᠴᠢᠯᠡᠨ ᠬᠠᠢᠴᠢᠯᠠᠭᠰᠠᠨ ᠵᠠᠭᠪᠤᠷ ᠢ᠋ᠶ᠋ᠠᠨ ᠦᠯᠢᠭᠡᠷ ᠪᠣᠯᠭᠠᠨ ᠲᠣᠷᠭᠠᠨ ᠤ᠋ ᠠᠷᠤ ᠳ᠋ᠤ᠌ ᠠᠪᠬᠤ ᠦᠭᠡᠢ ᠪᠡᠷ ᠨᠤᠭᠤᠯᠳᠠᠭ ᠨᠠᠭᠠᠮᠠᠯ ᠪᠠᠢᠳᠠᠭ ᠪᠥᠭᠡᠳ ᠡᠭᠦᠨ ᠢ᠋ ᠴᠠᠭᠠᠰᠤᠲᠠᠢ ᠨᠠᠭᠠᠮᠠᠯ ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠡᠨᠡ ᠪᠣᠯ ᠨᠠᠭᠠᠬᠤ ᠳ᠋ᠤ᠌ ᠬᠤᠷᠳᠤᠨ᠂ ᠣᠶᠣᠬᠤ ᠳ᠋ᠤ᠌ ᠪᠡᠶᠡ ᠲᠡᠢ ᠰᠠᠢᠨ ᠪᠠᠢᠳᠠᠭ᠃
ᠮᠥᠨ ᠬᠠᠢᠴᠢᠯᠠᠭᠰᠠᠨ ᠵᠠᠭᠪᠤᠷ ᠢ᠋ᠶ᠋ᠠᠨ ᠨᠠᠭᠠᠮᠠᠯ ᠦᠭᠡᠢ ᠵᠥᠪᠬᠡᠨ ᠳᠡᠪᠢᠰᠬᠡᠷ ᠲᠣᠷᠭᠠᠨ ᠤ᠋ ᠪᠠᠨ ᠨᠢᠭᠤᠷ ᠲᠤ᠌ ᠰᠢᠳᠡᠬᠦ ᠪᠤᠶᠤ ᠢᠷᠮᠡᠭ ᠢ᠋ᠶ᠋ᠡᠷ ᠨᠢ ᠲᠦᠷ ᠨᠠᠭᠠᠵᠤ ᠲᠣᠭᠲᠠᠭᠠᠨ ᠳᠡᠭᠡᠷᠡᠬᠢ ᠶ᠋ᠢᠨ ᠠᠳᠠᠯᠢ ᠨᠤᠭᠤᠯᠵᠤ ᠨᠠᠭᠠᠬᠤ ᠵᠠᠢ ᠦᠯᠡᠳᠡᠭᠡᠭᠡᠳ ᠬᠠᠢᠴᠢᠯᠠᠨᠠ᠃ ᠳᠠᠷᠠᠭᠠ ᠨᠢ ᠵᠠᠭᠪᠤᠷ ᠲᠠᠢ ᠪᠠᠨ ᠵᠡᠷᠭᠡᠴᠡᠭᠦᠯᠦᠨ ᠠᠷᠤ ᠲᠠᠰᠢ ᠨᠢ ᠨᠤᠭᠤᠯᠵᠤ ᠨᠠᠭᠠᠭᠠᠳ ᠵᠡᠬᠡᠭ ᠢ᠋ᠶ᠋ᠡᠨ ᠪᠠᠷᠢᠵᠤ ᠣᠶᠣᠭᠠᠳ ᠴᠠᠰᠢ ᠨᠢᠭᠡᠳᠬᠡᠨ ᠳᠡᠭᠡᠷᠡᠬᠢ ᠠᠳᠠᠯᠢ ᠪᠠᠷ ᠣᠶᠣᠳᠠᠭ᠃ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ ᠣᠶᠣᠬᠤ ᠳ᠋ᠤ᠌ ᠬᠥᠮᠦᠨ ᠬᠥᠮᠦᠨ ᠦ᠌ ᠥᠪᠡᠷᠰᠡᠳ ᠦ᠋ᠨ ᠤᠷᠠᠨ ᠪᠦᠲᠦᠭᠡᠬᠦ ᠠᠷᠭᠠ ᠥᠭᠡᠷᠡ ᠥᠭᠡᠷᠡ ᠤᠴᠢᠷ ᠶᠠᠭ ᠡᠨᠡ ᠵᠠᠭᠪᠤᠷ ᠢ᠋ᠶ᠋ᠠᠷ ᠬᠢᠬᠦ ᠭᠡᠰᠡᠨ ᠬᠡᠷᠡᠭ ᠪᠢᠰᠢ᠂ ᠵᠥᠪᠬᠡᠨ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠡᠬᠢᠯᠡᠵᠦ ᠣᠶᠣᠵᠤ ᠪᠠᠢᠭᠠ ᠥᠬᠢᠳ ᠲᠦ᠍ ᠬᠡᠷᠡᠭ ᠪᠣᠯᠭᠠᠬᠤ ᠵᠣᠷᠢᠯᠭᠠ ᠪᠠᠷ ᠪᠢᠴᠢᠯᠡ᠃ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ ᠬᠢᠬᠦ ᠳ᠋ᠡᠭᠡᠨ ᠵᠠᠬᠠ᠂ ᠲᠣᠷᠭᠠᠨ ᠤ᠋ ᠬᠠᠷᠢᠴᠠᠭᠠ ᠶ᠋ᠢ ᠨᠠᠷᠢᠨ ᠪᠣᠳᠣᠬᠤ ᠪᠥᠭᠡᠳ ᠡᠪᠬᠡᠬᠦ᠂ ᠲᠡᠨᠢᠢᠯᠭᠡᠬᠦ ᠳ᠋ᠦ᠍ ᠵᠣᠷᠢᠭᠤᠯᠵᠤ ᠳᠡᠭᠡᠷᠡ ᠳᠣᠣᠷᠠ ᠨᠢ ᠨᠤᠭᠤᠯᠤᠨ ᠣᠶᠣᠵᠤ ᠦ᠋ ᠦᠭᠡᠢ ᠴᠡᠪᠡᠷ ᠮᠣᠳᠣ ᠰᠢᠷᠭᠤᠭᠤᠯᠤᠨᠠ᠃
ᠲᠣᠷᠭᠠ ᠪᠦᠷᠢ ᠪᠡᠷ ᠬᠠᠳᠬᠤᠮᠠᠯ ᠬᠢᠬᠦ ᠳ᠋ᠦ᠍ ᠨᠢᠮᠪᠠᠢ ᠠᠵᠢᠯᠯᠠᠭᠠ᠂ ᠥᠩᠭᠡ ᠵᠣᠬᠢᠴᠠᠯ᠂ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢ ᠱᠠᠭᠠᠷᠳᠠᠳᠠᠭ᠃ ᠬᠠᠳᠬᠤᠮᠠᠯ ᠢ᠋ ᠬᠢᠬᠦ ᠶ᠋ᠢᠨ ᠡᠮᠦᠨᠡ ᠤᠷᠠᠯᠠᠬᠤ ᠦᠢᠯᠡ ᠪᠡᠨ ᠶᠠᠮᠠᠷ ᠶᠠᠩᠵᠤ ᠪᠠᠷ ᠬᠢᠬᠦ᠂ ᠲᠡᠭᠦᠨ ᠦ᠌ ᠥᠩᠭᠡ ᠶ᠋ᠢ ᠵᠣᠬᠢᠴᠠᠭᠤᠯᠬᠤ ᠲᠠᠯᠠ ᠪᠠᠷ ᠠᠵᠢᠭᠯᠠᠯᠲᠠ ᠬᠢᠵᠦ ᠵᠢᠷᠤᠭᠠᠴᠢᠳ ᠤᠷᠠᠨ ᠬᠠᠳᠬᠤᠮᠠᠯᠴᠢᠳ ᠤ᠋ᠨ ᠬᠢᠭᠰᠡᠨ ᠪᠦᠲᠦᠭᠡᠯ ᠦ᠋ᠨ ᠥᠩᠭᠡ ᠵᠣᠬᠢᠴᠠᠯ ᠢ᠋ ᠰᠠᠢᠲᠤᠷ ᠰᠤᠳᠤᠯᠤᠭᠰᠠᠨ ᠤ᠋ ᠦᠨᠳᠦᠰᠦᠨ ᠳᠡᠭᠡᠷᠡ ᠬᠢᠬᠦ ᠵᠦᠢᠯ ᠢ᠋ᠶ᠋ᠡᠨ ᠰᠣᠩᠭᠣᠵᠤ ᠤᠷᠠᠯᠠᠨᠠ᠃ ᠬᠠᠳᠬᠤᠮᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠥᠮᠦᠨ ᠦ᠌ ᠬᠥᠷᠥᠭ ᠢ᠋ ᠡᠵᠡᠨ ᠲᠡᠢ ᠨᠢ ᠠᠳᠠᠯᠢᠬᠠᠨ ᠪᠣᠯᠭᠠᠵᠤ ᠣᠶᠣᠬᠤ ᠬᠡᠴᠡᠭᠦᠦ ᠤᠷᠠᠯᠢᠭ ᠶᠤᠮ᠃ ᠡᠢᠮᠦ ᠳ᠋ᠦ᠍ ᠶᠠᠭᠤᠨ ᠤ᠋ ᠡᠮᠦᠨᠡ ᠴᠣᠬᠣᠮ ᠠᠯᠢ ᠲᠠᠯᠠ ᠠ᠋ᠴᠠ ᠨᠢ ᠣᠶᠣᠬᠤ᠂ ᠶᠠᠮᠠᠷ ᠬᠠᠳᠬᠤᠮᠠᠯ ᠢ᠋ᠶ᠋ᠠᠷ ᠬᠢᠬᠦ ᠪᠡᠨ ᠰᠠᠢᠨ ᠪᠣᠳᠣᠨᠠ᠃ ᠳᠠᠷᠠᠭᠠ ᠨᠢ ᠬᠥᠮᠦᠨ ᠢ᠋ᠶ᠋ᠡᠨ ᠵᠢᠷᠤᠵᠤ ᠣᠨᠴᠠᠯᠢᠭ ᠪᠠᠢᠳᠠᠯ ᠳ᠋ᠤ᠌ ᠪᠠᠰᠠ ᠳᠠᠬᠢᠨ ᠠᠵᠢᠭᠯᠠᠯᠲᠠ ᠬᠢᠨᠡ᠃
ᠲᠤᠬᠠᠢᠯᠠᠵᠤ ᠬᠥᠮᠦᠨ ᠦ᠌ ᠬᠥᠷᠥᠭ ᠢ᠋ ᠣᠶᠣᠬᠤ ᠦᠭᠡᠢ ᠪᠣᠯ ᠬᠥᠮᠦᠨ ᠦ᠌ ᠳᠦᠷᠰᠦ ᠶ᠋ᠢ ᠭᠠᠷᠭᠠᠬᠤ ᠲᠡᠢᠮᠦ ᠴᠦ᠍ ᠬᠡᠴᠡᠭᠦᠦ ᠪᠢᠰᠢ ᠪᠥᠭᠡᠳ ᠬᠠᠳᠬᠤᠮᠠᠯ ᠤ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠷᠭᠠ ᠪᠠᠷ ᠪᠦᠲᠦᠭᠡᠵᠦ ᠪᠣᠯᠤᠨᠠ᠃ ᠬᠥᠮᠦᠨ ᠦ᠌ ᠬᠥᠷᠥᠭ ᠢ᠋ ᠣᠶᠣᠬᠤ ᠳ᠋ᠤ᠌ ᠶᠠᠭᠤᠨ ᠤ᠋ ᠡᠮᠦᠨᠡ ᠣᠶᠣᠬᠤ ᠬᠥᠷᠥᠭ ᠦ᠋ᠨ ᠶᠡᠬᠡ ᠪᠠᠭᠠ ᠠ᠋ᠴᠠ ᠬᠠᠮᠢᠶᠠᠷᠤᠭᠤᠯᠵᠤ ᠮᠣᠳᠣᠨ ᠵᠠᠮ ᠬᠢᠵᠦ ᠲᠡᠭᠦᠨ ᠳ᠋ᠡᠭᠡᠨ ᠳᠡᠪᠢᠰᠬᠡᠷ ᠲᠣᠷᠭᠠᠨ ᠤ᠋ ᠪᠠᠨ ᠥᠩᠭᠡ ᠶ᠋ᠢ ᠲᠣᠬᠢᠷᠠᠭᠤᠯᠤᠨ ᠲᠡᠭᠰᠢ ᠪᠡᠬᠢᠯᠡᠭᠡᠳ ᠣᠶᠣᠬᠤ ᠪᠠᠷ ᠪᠡᠯᠡᠳᠬᠡᠭᠳᠡᠭᠰᠡᠨ ᠳᠦᠷᠰᠦ ᠪᠡᠨ ᠪᠠᠭᠤᠯᠭᠠᠨᠠ᠃ ᠬᠥᠮᠦᠨ ᠦ᠌ ᠳᠦᠷᠰᠦ ᠬᠠᠳᠬᠤᠬᠤ ᠬᠠᠳᠬᠤᠮᠠᠯ ᠤ᠋ᠨ ᠤᠲᠠᠰᠤ ᠪᠠᠰᠠ ᠵᠠᠳᠠᠭᠠᠢ ᠪᠥᠭᠡᠳ ᠪᠦᠳᠦᠭᠦᠨ ᠨᠠᠷᠢᠨ ᠶᠠᠩᠵᠤ ᠪᠦᠷᠢ ᠪᠠᠢᠨᠠ᠃ ᠪᠦᠳᠦᠭᠦᠨ ᠤᠲᠠᠰᠤ ᠪᠠᠷ ᠬᠦᠨᠳᠦᠷᠡᠭᠦᠯᠬᠦ ᠬᠡᠰᠡᠭ ᠢ᠋᠂ ᠨᠠᠷᠢᠨ ᠤᠲᠠᠰᠤ ᠪᠠᠷ ᠬᠥᠩᠭᠡᠷᠡᠭᠦᠯᠬᠦ ᠬᠡᠰᠡᠭ ᠢ᠋ ᠣᠶᠣᠨᠠ᠃ ᠢᠩᠭᠢᠵᠦ ᠣᠶᠣᠬᠤ ᠳ᠋ᠤ᠌ ᠣᠶᠣᠳᠠᠯ ᠤ᠋ᠨ ᠠᠷᠭᠠ ᠶᠠᠩᠵᠤ ᠪᠦᠷᠢ ᠪᠠᠢᠨᠠ᠃ ᠬᠥᠮᠦᠨ ᠦ᠌ ᠬᠥᠷᠥᠭ ᠢ᠋ ᠣᠶᠣᠬᠤ ᠳ᠋ᠤ᠌ ᠴᠠᠢᠪᠤᠷᠳᠠᠭᠤ ᠥᠩᠭᠡ ᠲᠡᠢ᠂ ᠬᠡ ᠥᠬᠡᠢ ᠳᠠᠪᠤᠤ ᠶ᠋ᠢ ᠰᠣᠩᠭᠣᠵᠤ ᠠᠪᠤᠨᠠ᠃
ᠬᠥᠷᠥᠭ ᠢ᠋ ᠵᠢᠰᠢᠭᠦᠦ ᠰᠢᠷᠬᠡᠭ ᠲᠡᠢ ᠣᠶᠣᠵᠤ ᠭᠡᠷᠡᠯᠲᠡᠢ ᠲᠠᠯᠠ ᠶ᠋ᠢ ᠨᠢ ᠶᠠᠭᠠᠨ᠂ ᠪᠣᠷᠣ ᠰᠢᠷᠠ᠂ ᠴᠠᠭᠠᠨ ᠥᠩᠭᠡ ᠨᠦ᠍ᠭᠦᠳ ᠢ᠋ ᠲᠠᠩᠨᠠᠬᠤ ᠪᠤᠶᠤ ᠬᠣᠯᠢᠵᠤ ᠣᠶᠣᠭᠠᠳ ᠰᠡᠭᠦᠳᠡᠷ ᠲᠡᠢ ᠲᠠᠯᠠ ᠶ᠋ᠢ ᠨᠢ ᠪᠣᠷᠣ ᠬᠦᠷᠡᠩ᠂ ᠪᠣᠷᠣ ᠥᠩᠭᠡ ᠪᠡᠷ᠂ ᠬᠦᠷᠡᠩ ᠶᠠᠭᠠᠨ᠂ ᠬᠠᠷᠠ ᠨᠣᠭᠣᠭᠠᠨ᠂ ᠤᠯᠠᠭᠠᠨ ᠬᠦᠷᠡᠩ ᠥᠩᠭᠡ ᠶ᠋ᠢ ᠬᠣᠯᠢᠵᠤ ᠣᠶᠣᠨᠠ᠃ ᠤᠷᠤᠭᠤᠯ ᠢ᠋ ᠮᠥᠨ ᠵᠢᠰᠢᠭᠦᠦ ᠬᠠᠳᠬᠤᠵᠤ ᠤᠯᠠᠭᠠᠨ᠂ ᠤᠯᠠᠭᠠᠨ ᠬᠦᠷᠡᠩ᠂ ᠪᠣᠷᠣ ᠥᠩᠭᠡ ᠪᠡᠷ ᠣᠶᠣᠨᠠ᠃ ᠦᠰᠦ ᠶ᠋ᠢ ᠬᠠᠷᠠ ᠪᠠᠷ ᠳᠡᠪᠢᠰᠬᠡᠷᠯᠡᠨ ᠣᠶᠣᠬᠤ ᠪᠣᠯᠪᠠᠴᠤ ᠬᠥᠩᠭᠡᠨ ᠥᠩᠭᠡᠨ ᠳ᠋ᠦ᠍ ᠪᠤᠶᠤ ᠳᠣᠪᠣᠭᠣᠷ ᠬᠡᠰᠡᠭ ᠢ᠋ ᠬᠠᠷᠠ ᠰᠠᠷᠠᠯ ᠪᠤᠶᠤ ᠬᠦᠷᠡᠩ ᠤᠲᠠᠰᠤ ᠪᠠᠷ ᠣᠶᠣᠵᠤ ᠦᠰᠦᠨ ᠦ᠌ ᠬᠡᠯᠪᠡᠷᠢ ᠶ᠋ᠢ ᠭᠠᠷᠭᠠᠨᠠ᠃ ᠬᠥᠮᠦᠨ ᠦ᠌ ᠨᠢᠭᠤᠷ ᠤ᠋ᠨ ᠳᠦᠷᠰᠦ ᠬᠠᠮᠠᠷ᠂ ᠨᠢᠳᠦ᠂ ᠴᠢᠬᠢ ᠶ᠋ᠢ ᠣᠶᠣᠬᠤ ᠳ᠋ᠤ᠌ ᠥᠭᠡᠷᠡ ᠳᠠᠪᠤᠤ ᠶ᠋ᠢᠨ ᠳᠡᠭᠡᠷᠡ ᠲᠤᠷᠰᠢᠯᠭᠠ ᠮᠠᠶᠢᠭ ᠢ᠋ᠶ᠋ᠠᠷ ᠣᠶᠣᠵᠤ ᠠᠯᠳᠠᠭᠠ ᠪᠠᠨ ᠵᠠᠰᠠᠵᠤ ᠪᠣᠯᠤᠨᠠ᠃
ᠴᠢᠭᠲᠠᠨ ᠣᠶᠣᠳᠠᠯ ᠢ᠋ᠶ᠋ᠠᠷ ᠬᠥᠮᠦᠨ ᠦ᠌ ᠬᠥᠷᠥᠭ ᠣᠶᠣᠬᠤ᠂ ᠡᠨᠡ ᠠᠷᠭᠠ ᠳ᠋ᠤ᠌ ᠮᠠᠨ ᠤ᠋ ᠤᠷᠠᠯᠢᠭ ᠤ᠋ᠨ ᠭᠠᠪᠢᠶᠠᠲᠤ ᠵᠢᠳᠬᠦᠯᠲᠡᠨ ᠦ᠌· ᠴᠠᠷᠮᠠ ᠨᠠᠷᠢᠨ ᠳᠠᠳᠤᠯᠭᠠᠵᠢᠭᠰᠠᠨ ᠪᠥᠭᠡᠳ ᠬᠥᠷᠥᠭ ᠣᠶᠣᠬᠤ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠷᠠᠮ ᠳ᠋ᠤ᠌ ᠲᠡᠯᠡᠵᠦ ᠳᠦᠷᠰᠦ ᠪᠡᠨ ᠪᠠᠭᠤᠯᠭᠠᠭᠠᠳ ᠡᠬᠢᠯᠡᠭᠡᠳ ᠪᠦᠳᠡᠭᠢ ᠵᠠᠭᠪᠤᠷ ᠤ᠋ᠨ ᠥᠩᠭᠡ ᠪᠣᠯᠬᠤ ᠰᠢᠷᠠ᠂ ᠪᠣᠷᠣ᠂ ᠪᠦᠳᠡᠭᠢ ᠬᠦᠷᠡᠩ ᠭᠡᠬᠦ ᠮᠡᠲᠦ ᠨᠢᠭᠡ ᠲᠥᠷᠥᠯ ᠦ᠋ᠨ ᠥᠩᠭᠡ ᠨᠦ᠍ᠭᠦᠳ ᠢ᠋ ᠬᠣᠯᠢᠵᠤ ᠣᠶᠣᠨᠠ᠃ ᠲᠣᠷᠭᠠᠨ ᠤᠲᠠᠰᠤ ᠪᠠᠷ ᠴᠢᠭᠲᠠᠯᠠᠵᠤ ᠣᠶᠣᠬᠤ ᠳ᠋ᠤ᠌ ᠥᠩᠭᠡ ᠨᠢ ᠭᠢᠯᠠᠯᠵᠠᠵᠤ ᠵᠥᠷᠢᠳᠡᠭ ᠦᠭᠡᠢ᠃ ᠳᠦᠷᠰᠦ ᠪᠡᠨ ᠬᠠᠮᠢᠭᠠ ᠠ᠋ᠴᠠ ᠴᠤ᠌ ᠬᠠᠮᠢᠶᠠ ᠦᠭᠡᠢ᠂ ᠳᠤᠬᠤ᠂ ᠬᠠᠴᠠᠷ᠂ ᠡᠷᠡᠦ᠂ ᠴᠢᠬᠢ ᠵᠡᠷᠭᠡ ᠭᠠᠵᠠᠷ ᠤ᠋ᠳ ᠠ᠋ᠴᠠ ᠡᠬᠢᠯᠡᠨ ᠣᠶᠣᠬᠤ ᠳ᠋ᠤ᠌ ᠬᠡᠯᠪᠡᠷᠢ ᠠᠯᠳᠠᠳᠠᠭ ᠦᠭᠡᠢ᠃ ᠬᠠᠷᠢᠨ ᠨᠢᠭᠡ ᠲᠠᠯᠠ ᠠ᠋ᠴᠠ ᠨᠢ ᠬᠥᠭᠡᠭᠡᠪᠡᠯ ᠳᠦᠷᠰᠦ ᠭᠠᠵᠢᠵᠤ ᠬᠡᠯᠪᠡᠷᠢ ᠠᠯᠳᠠᠳᠠᠭ᠃ ᠳᠡᠪᠢᠰᠬᠡᠷᠯᠡᠨ ᠣᠶᠣᠭᠰᠠᠨ ᠤ᠋ ᠵᠠᠬᠠ ᠪᠠᠷ ᠬᠣᠶᠠᠳᠤᠭᠠᠷ ᠣᠶᠣᠳᠠᠯ ᠢ᠋ᠶ᠋ᠠᠨ ᠦᠵᠦᠭᠦᠷ ᠢ᠋ ᠳᠠᠷᠤᠵᠤ ᠳᠠᠩᠨᠠᠭᠠᠰᠤᠯᠠᠨ ᠠᠭᠤᠰᠬᠠᠵᠤ ᠣᠶᠣᠨᠠ᠃ ᠡᠨᠡ ᠣᠶᠣᠳᠠᠯ ᠳ᠋ᠤ᠌ ᠵᠠᠪᠠᠯ ᠥᠩᠭᠡ ᠵᠣᠬᠢᠴᠠᠭᠤᠯᠵᠤ ᠬᠡᠳᠦ ᠬᠡᠳᠦᠨ ᠶᠠᠩᠵᠤ ᠶ᠋ᠢᠨ ᠤᠲᠠᠰᠤ ᠪᠠᠷ ᠣᠶᠣᠨᠠ᠃ ᠰᠡᠭᠦᠳᠡᠷ ᠲᠡᠢ ᠲᠠᠯᠠ ᠶ᠋ᠢ ᠬᠦᠨᠳᠦᠷᠡᠭᠦᠯᠬᠦ ᠥᠩᠭᠡ ᠪᠡᠷ ᠠᠯᠤᠰ ᠠ᠋ᠴᠠ ᠡᠭᠦᠰᠬᠡᠬᠦ ᠮᠠᠶᠢᠭ ᠢ᠋ᠶ᠋ᠠᠷ ᠣᠶᠣᠨᠠ᠃ ᠨᠢᠳᠦᠨ ᠦ᠌ ᠬᠢᠨᠢ ᠬᠡᠦᠬᠡᠨ ᠬᠠᠷᠠᠭᠠ ᠶ᠋ᠢ ᠳᠤᠭᠤᠢᠯᠠᠵᠤ ᠬᠠᠷᠠ ᠪᠠᠷ ᠣᠶᠣᠭᠠᠳ ᠭᠠᠳᠠᠨᠠ ᠲᠠᠯᠠ ᠶ᠋ᠢ ᠬᠦᠷᠡᠩᠳᠡᠭᠦᠦ ᠤᠲᠠᠰᠤ ᠪᠠᠷ ᠲᠠᠯᠠ ᠲᠠᠯᠠ ᠲᠡᠰᠢ ᠨᠢ ᠰᠠᠴᠤᠷᠠᠭ ᠮᠠᠶᠢᠭ ᠢ᠋ᠶ᠋ᠠᠷ ᠣᠶᠣᠨᠠ᠃ ᠬᠡᠦᠬᠡᠨ ᠬᠠᠷᠠᠭᠠᠨ ᠤ᠋ ᠭᠣᠣᠯ ᠳ᠋ᠤ᠌ ᠡᠭᠴᠡ ᠬᠠᠷᠠᠵᠤ ᠪᠠᠢᠭᠠ ᠬᠥᠷᠥᠭ ᠪᠣᠯ ᠠᠳᠠᠯᠢ ᠴᠠᠭᠠᠨ ᠴᠢᠭ ᠦᠯᠡᠳᠡᠭᠡᠬᠦ ᠪᠠ ᠬᠠᠵᠠᠭᠤ ᠵᠢᠰᠢᠭᠦᠦ ᠬᠠᠷᠠᠵᠤ ᠪᠠᠢᠭᠠ ᠬᠥᠷᠥᠭ ᠲᠦ᠍ ᠪᠣᠯ ᠬᠠᠷᠠᠭᠰᠠᠨ ᠵᠦᠭ ᠤᠷᠤᠭᠤ ᠨᠢ ᠴᠢᠭᠯᠡᠭᠦᠯᠦᠨ ᠨᠢᠳᠦᠨ ᠦ᠌ ᠬᠠᠷᠠ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠴᠠᠭᠠᠨ ᠴᠢᠭ ᠦᠯᠡᠳᠡᠭᠡᠨᠡ᠃ ᠤᠷᠤᠭᠤᠯ ᠢ᠋ ᠨᠢᠭᠤᠷ ᠤ᠋ᠨ ᠥᠩᠭᠡᠨ ᠡᠴᠡ ᠠᠷᠠᠢ ᠬᠦᠨᠳᠦᠷᠡᠭᠦᠯᠵᠦ ᠣᠶᠣᠨᠠ᠂
ᠬᠥᠮᠦᠨ ᠦ᠌ ᠨᠢᠭᠤᠷ᠂ ᠬᠦᠵᠦᠭᠦᠦ᠂ ᠲᠣᠯᠣᠭᠠᠢ ᠶ᠋ᠢ ᠣᠶᠣᠭᠰᠠᠨ ᠤ᠋ ᠳᠠᠷᠠᠭᠠ ᠬᠤᠪᠴᠠᠰᠤ ᠪᠠᠨ ᠶᠠᠮᠠᠷ ᠴᠤ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠣᠶᠣᠵᠤ ᠪᠣᠯᠬᠤ ᠠ᠋ᠴᠠ ᠭᠠᠳᠠᠨᠠ ᠵᠡᠭᠡᠭᠲᠦ ᠨᠠᠭᠠᠮᠠᠯ ᠢ᠋ᠶ᠋ᠠᠷ ᠬᠢᠪᠡᠯ ᠰᠡᠭᠦᠳᠡᠷ ᠬᠦᠨᠳᠦᠷᠡᠭᠦᠯᠬᠦ ᠥᠩᠭᠡ ᠶ᠋ᠢ ᠤᠲᠠᠰᠤ ᠪᠠᠷ ᠬᠢᠵᠦ ᠪᠣᠯᠤᠨᠠ᠃ ᠠᠮᠢᠲᠠᠨ ᠢ᠋ ᠣᠶᠣᠬᠤ ᠳ᠋ᠠᠭᠠᠨ ᠦᠰᠦᠨ ᠦ᠌ ᠰᠢᠷᠬᠡᠭ ᠢ᠋ ᠳᠠᠭᠠᠭᠤᠯᠵᠤ ᠬᠦᠨᠳᠦᠷᠡᠭᠦᠯᠵᠦ ᠬᠥᠩᠭᠡᠷᠡᠭᠦᠯᠬᠦ ᠤᠲᠠᠰᠤ ᠪᠠᠷ ᠠᠭᠤᠰᠬᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠣᠶᠣᠨᠠ᠃
ᠬᠥᠷᠥᠭ ᠲᠦ᠍ ᠲᠣᠪᠴᠢ᠂ ᠰᠢᠯᠪᠢ᠂ ᠣᠳᠣᠨ ᠮᠧᠲ᠋ᠠᠯ ᠤ᠋ᠨ ᠥᠩᠭᠡ᠂ ᠴᠡᠷᠢᠭ ᠦ᠋ᠨ ᠫᠣᠭᠣᠨ ᠤ᠋ ᠥᠩᠭᠡ᠂ ᠳᠡᠪᠡᠯ ᠦ᠋ᠨ ᠡᠮᠵᠢᠶᠡᠷᠢ ᠲᠣᠪᠴᠢ ᠰᠢᠯᠪᠢ ᠶ᠋ᠢ ᠤᠷᠢᠳᠴᠢᠯᠠᠨ ᠵᠢᠷᠤᠵᠤ ᠲᠣᠬᠢᠷᠠᠭᠤᠯᠤᠨ ᠪᠣᠳᠣᠭ ᠢ᠋ᠶ᠋ᠠᠷ ᠢᠯᠭᠠᠵᠤ ᠲᠡᠭᠦᠨ ᠢ᠋ ᠪᠡᠨ ᠵᠢᠩᠬᠢᠨᠢ ᠳᠡᠪᠡᠯ ᠳᠡᠭᠡᠷᠡ ᠪᠡᠨ ᠪᠠᠭᠤᠯᠭᠠᠨ ᠣᠶᠣᠨᠠ᠃
ᠪᠠᠢᠭᠠᠯᠢ ᠶ᠋ᠢ ᠤᠷᠠᠯᠠᠬᠤ ᠳ᠋ᠠᠭᠠᠨ ᠶᠠᠭᠤᠨ ᠤ᠋ ᠡᠮᠦᠨᠡ ᠠᠯᠢ ᠤᠯᠠᠷᠢᠯ ᠪᠠᠢᠬᠤ ᠶ᠋ᠢ ᠪᠣᠳᠣᠵᠤ᠂ ᠵᠤᠨ ᠪᠣᠯ ᠨᠣᠭᠣᠭᠠᠨ ᠥᠩᠭᠡ ᠪᠠᠢᠬᠤ ᠨᠢ ᠮᠡᠳᠡᠭᠡᠵᠢ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠭᠠᠭᠴᠠ ᠨᠣᠭᠣᠭᠠᠨ ᠥᠩᠭᠡ ᠪᠡᠷ ᠣᠶᠣᠳᠠᠭ ᠦᠭᠡᠢ᠂ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠰᠢᠭ᠋ ᠤᠲᠠᠰᠤᠨ ᠣ ᠥᠩᠭᠡ ᠶ᠋ᠢ ᠬᠣᠯᠢᠵᠤ ᠣᠶᠣᠨᠠ᠃ᠡᠭᠦᠨ ᠳ᠋ᠦ᠍ ᠬᠠᠷᠠ ᠨᠣᠭᠣᠭᠠᠨ᠂ᠪᠣᠷᠣ᠂ᠬᠣᠯᠠ᠂ ᠬᠤᠷᠴᠠ ᠨᠣᠭᠣᠭᠠᠨ ᠭᠡᠬᠦ ᠮᠡᠲᠦ ᠶ᠋ᠢ ᠬᠣᠯᠢᠬᠤ ᠪᠥᠭᠡᠳ ᠬᠣᠩᠬᠣᠷ ᠭᠠᠳᠠᠷᠭᠤ ᠵᠢᠯᠠᠭᠠ ᠶ᠋ᠢ ᠬᠤᠷᠴᠠ ᠨᠣᠭᠣᠭᠠᠨ ᠢ᠋ᠶ᠋ᠠᠷ᠂ ᠥᠭᠡᠷᠡ ᠬᠦᠨᠳᠦᠷᠡᠭᠦᠯᠬᠦ ᠤᠲᠠᠰᠤ ᠲᠠᠢ ᠬᠣᠯᠢᠵᠤ ᠣᠶᠣᠬᠤ ᠠ᠋ᠴᠠ ᠭᠠᠳᠠᠨᠠ ᠥᠨᠳᠥᠷᠯᠢᠭ ᠭᠠᠵᠠᠷ ᠢ᠋ ᠠᠯᠤᠰ ᠠ᠋ᠴᠠ ᠬᠦᠨᠳᠦᠷᠡᠭᠦᠯᠬᠦ ᠤᠲᠠᠰᠤ ᠪᠠᠷ ᠣᠶᠣᠬᠤ ᠪᠠ ᠡᠪᠦᠯ ᠦ᠋ᠨ ᠥᠩᠭᠡᠨ ᠳ᠋ᠦ᠍ ᠭᠠᠵᠠᠷ᠂ ᠠᠭᠤᠯᠠ ᠶ᠋ᠢ ᠴᠠᠭᠠᠨ ᠢ᠋ᠶ᠋ᠠᠷ ᠣᠶᠣᠬᠤ ᠪᠣᠯᠪᠠᠴᠤ ᠬᠥᠬᠡ ᠰᠠᠷᠠᠯ ᠬᠠᠷᠠ ᠰᠠᠷᠠᠯ ᠤᠲᠠᠰᠤ ᠪᠠᠷ ᠬᠦᠨᠳᠦᠷᠡᠭᠦᠯᠵᠦ ᠬᠣᠩᠬᠣᠷ ᠭᠦᠳᠦᠭᠦᠷ ᠢ᠋ ᠭᠠᠷᠭᠠᠨᠠ᠃ᠠᠭᠤᠯᠠ ᠶ᠋ᠢ ᠳᠠᠪᠬᠤᠷᠳᠠᠭᠤᠯᠤᠨ ᠣᠶᠣᠬᠤ ᠳ᠋ᠠᠭᠠᠨ ᠠᠯᠤᠰ ᠪᠠᠢᠭᠠ ᠠᠭᠤᠯᠠ ᠶ᠋ᠢ ᠬᠥᠩᠭᠡᠨ ᠥᠩᠭᠡ ᠪᠡᠷ᠂ᠨᠠᠭᠠᠳᠤ ᠲᠠᠯᠠ ᠳ᠋ᠤᠨᠢ ᠣᠢᠷᠠᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠠᠭᠤᠯᠠ ᠶ᠋ᠢ ᠬᠦᠨᠳᠦ ᠥᠩᠭᠡ ᠪᠡᠷ ᠳᠣᠪᠣᠢᠯᠭᠠᠬᠤ ᠪᠤᠶᠤ ᠭᠡᠷᠡᠯᠲᠦᠭᠦᠯᠬᠦ ᠥᠩᠭᠡᠨ ᠳ᠋ᠦ᠍ ᠴᠠᠭᠠᠨ᠂ ᠶᠠᠭᠠᠨ᠂ ᠴᠡᠩᠬᠡᠷ᠂ ᠴᠠᠭᠠᠨ ᠰᠢᠷᠠ ᠥᠩᠭᠡ ᠨᠦ᠍ᠭᠦᠳ ᠣᠷᠣᠨᠠ᠃
ᠴᠡᠴᠡᠭ ᠢ᠋ ᠣᠶᠣᠬᠤ ᠳ᠋ᠠᠭᠠᠨ ᠲᠡᠭᠦᠨ ᠢ᠋ ᠪᠠᠢᠭᠠᠯᠢ ᠳ᠋ᠤ᠌ ᠣᠷᠣᠰᠢᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠩᠭᠡ ᠶ᠋ᠢ ᠲᠣᠬᠢᠷᠠᠭᠤᠯᠤᠨ ᠣᠶᠣᠨᠠ᠃ ᠵᠢᠰᠢᠶᠠ ᠨᠢ᠄ ᠤᠯᠠᠭᠠᠨ ᠴᠡᠴᠡᠭ ᠣᠶᠣᠬᠤ ᠳ᠋ᠤ᠌ ᠳᠠᠩ ᠭᠠᠭᠴᠠ ᠤᠯᠠᠭᠠᠨ ᠢ᠋ᠶ᠋ᠠᠷ ᠪᠢᠰᠢ ᠳᠡᠯᠪᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠠᠢ ᠶ᠋ᠢ ᠬᠦᠨᠳᠦᠷᠡᠭᠦᠯᠵᠦ ᠥᠭᠬᠦ ᠡᠴᠡ ᠭᠠᠳᠠᠨᠠ ᠳᠣᠬᠢᠭᠤᠷ ᠢ᠋ ᠰᠢᠷᠠ ᠪᠤᠶᠤ ᠴᠠᠭᠠᠨ ᠢ᠋ᠶ᠋ᠠᠷ ᠣᠶᠣᠵᠤ ᠴᠢᠮᠡᠭᠯᠡᠬᠦ ᠪᠠ ᠳᠡᠯᠪᠢ ᠶ᠋ᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠣᠶᠣᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠬᠥᠩᠭᠡᠷᠡᠭᠦᠯᠬᠦ ᠬᠡᠰᠡᠭ ᠲᠤᠨᠢ ᠶᠠᠭᠠᠨ᠂ ᠬᠦᠨᠳᠦᠷᠡᠭᠦᠯᠬᠦ ᠬᠡᠰᠡᠭ ᠲᠦ᠋ᠨᠢ ᠬᠦᠷᠡᠩ ᠢ᠋ᠶ᠋ᠡᠷ ᠣᠶᠣᠵᠤ ᠴᠢᠮᠡᠨᠡ᠃
ᠵᠠᠬᠠᠯᠠᠬᠤ ᠣᠶᠣᠳᠠᠯ ᠵᠠᠬᠠᠯᠠᠬᠤ ᠣᠶᠣᠳᠠᠯ ᠢ᠋ ᠭᠣᠣᠯᠳᠠᠭᠤ ᠬᠠᠳᠬᠤᠮᠠᠯ ᠤ᠋ᠨ ᠵᠠᠬᠠ ᠶ᠋ᠢ ᠴᠢᠮᠡᠭᠯᠡᠨ ᠪᠥᠬᠡᠯᠡᠬᠦ᠂ ᠳᠠᠪᠤᠤ ᠲᠣᠷᠭᠠᠨ ᠤᠭᠤᠲᠠ᠂ ᠬᠠᠪᠲᠠᠭᠠ ᠬᠡᠲᠡᠪᠴᠢ᠂ ᠪᠣᠢᠯᠠᠨ ᠵᠡᠷᠭᠡ ᠶ᠋ᠢ ᠪᠢᠲᠡᠭᠦᠯᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠳᠣᠲᠣᠭᠤᠷ ᠬᠤᠪᠴᠠᠰᠤᠨ ᠤ᠋ ᠵᠠᠬᠠ᠂ ᠠᠯᠴᠢᠭᠤᠷ ᠤ᠋ᠨ ᠵᠠᠬᠠ ᠪᠠᠷ ᠭᠤᠶᠤᠵᠤ ᠴᠢᠮᠡᠭᠯᠡᠨᠡ᠃ ᠡᠨᠡ ᠣᠶᠣᠳᠠᠯ ᠢ᠋ ᠬᠥᠮᠦᠨ ᠡᠷᠲᠡ ᠦᠶᠡ ᠡᠴᠡ ᠬᠡᠷᠡᠭᠯᠡᠵᠦ ᠢᠷᠡᠭᠰᠡᠨ ᠪᠥᠭᠡᠳ1940-1950 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠮᠣᠩᠭᠣᠯ᠂ ᠴᠠᠮᠴᠠᠨ ᠤ᠋ ᠵᠠᠬᠠ ᠶ᠋ᠢ ᠭᠤᠶᠤᠬᠤ᠂ ᠴᠢᠮᠡᠭᠯᠡᠬᠦ ᠳ᠋ᠦ᠍ ᠬᠣᠨᠢᠨ ᠰᠢᠳᠦ ᠶ᠋ᠢ ᠶᠡᠬᠡ ᠣᠶᠣᠳᠠᠭ ᠪᠠᠢᠯᠠ᠃
ᠵᠠᠬᠠᠯᠠᠬᠤ ᠣᠶᠣᠳᠠᠯ ᠳ᠋ᠤ᠌ ᠳᠠᠩ᠂ ᠳᠠᠪᠬᠤᠷ ᠵᠢᠭᠠᠰᠤᠨ ᠨᠢᠷᠤᠭᠤ ᠵᠦᠷᠢᠭᠦᠯᠢᠭ ᠬᠦᠪᠦᠷᠢᠳᠦᠯᠭᠡ᠂ ᠳᠠᠩ ᠳᠠᠪᠬᠤᠷ ᠨᠢᠷᠤᠭᠤ ᠲᠠᠢ ᠬᠣᠨᠢᠨ ᠰᠢᠲᠦ ᠣᠶᠣᠬᠤ᠂ ᠬᠡᠷᠦᠭᠡᠰᠦ᠂ ᠨᠡᠭᠡᠭᠡᠰᠦ᠂ ᠴᠡᠴᠡᠭ ᠨᠠᠪᠴᠢ᠂ ᠬᠣᠨᠢᠨ ᠬᠣᠯᠪᠣᠭᠠ᠂ ᠰᠠ ᠲᠤᠤᠵᠠ ᠳᠠᠷᠤᠭᠤᠯᠬᠤ ᠵᠡᠷᠭᠡ ᠪᠡᠷ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ ᠢ᠋ ᠴᠢᠮᠡᠭᠯᠡᠵᠦ ᠪᠠᠢᠯᠠ᠃
ᠨᠣᠬᠠᠢ ᠶ᠋ᠢᠨ ᠰᠢᠲᠦ ᠬᠠᠳᠬᠤᠬᠤ ᠨᠣᠬᠠᠢ ᠶ᠋ᠢᠨ ᠰᠢᠲᠦ ᠶ᠋ᠢ ᠭᠣᠣᠯᠳᠠᠭᠤ ᠴᠠᠮᠴᠠᠨ ᠤ᠋ ᠵᠠᠬᠠ᠂ ᠳᠠᠪᠤᠤ ᠬᠠᠪᠲᠠᠭᠠ᠂ ᠲᠠᠮᠠᠬᠢᠨ ᠤ᠋ ᠤᠭᠤᠲᠠ ᠶ᠋ᠢ ᠪᠢᠲᠡᠭᠦᠯᠡᠬᠦ ᠳ᠋ᠦ᠍ ᠳᠠᠩ ᠪᠠ ᠳᠠᠪᠬᠤᠷ ᠨᠢᠷᠤᠭᠤ ᠲᠠᠢ ᠣᠶᠣᠳᠠᠭ᠃ ᠳᠠᠩ ᠨᠢᠷᠤᠭᠤ ᠬᠢᠬᠦ ᠳ᠋ᠦ᠍ ᠲᠢᠭ ᠨᠣᠮᠧᠷ ᠦ᠋ᠨ ᠪᠦᠳᠦᠭᠦᠨ ᠤᠲᠠᠰᠤ ᠪᠤᠶᠤ ᠪᠥᠭᠡᠷᠡᠩᠬᠡᠢ ᠨᠢᠳᠦᠨ ᠤᠲᠠᠰᠤ ᠵᠡᠷᠭᠡ ᠶ᠋ᠢ ᠳᠡᠭᠡᠳᠦ ᠲᠠᠯᠠ ᠳ᠋ᠤᠨᠢ ᠪᠠᠷᠢᠵᠤ᠂ ᠣᠶᠣᠬᠤ ᠤᠲᠠᠰᠤ ᠪᠠᠷ ᠢ᠋ᠶ᠋ᠠᠨ ᠣᠷᠢᠶᠠᠵᠤ ᠬᠠᠳᠬᠤᠨ ᠰᠢᠳᠦᠨ ᠳ᠋ᠡᠭᠡᠨ ᠪᠡᠬᠢᠯᠡᠳᠡᠭ᠃
ᠳᠠᠪᠬᠤᠷ ᠨᠢᠷᠤᠭᠤ ᠲᠠᠢ ᠨᠣᠬᠠᠢ ᠶ᠋ᠢᠨ ᠰᠢᠲᠦ ᠬᠠᠳᠬᠤᠬᠤ ᠳ᠋ᠤ᠌ ᠬᠣᠣᠰ ᠪᠦᠳᠦᠭᠦᠨ ᠤᠲᠠᠰᠤ ᠬᠡᠷᠡᠭᠯᠡᠵᠦ ᠲᠡᠭᠦᠨ ᠢ᠋ᠶ᠋ᠡᠨ ᠰᠢᠲᠦ ᠬᠠᠳᠬᠤᠬᠤ ᠲᠣᠷᠭᠠᠨ ᠤᠲᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠤᠰ ᠪᠦᠷᠢ ᠣᠷᠢᠶᠠᠵᠤ ᠰᠢᠲᠦᠨ ᠳ᠋ᠡᠭᠡᠨ ᠪᠡᠬᠢᠯᠡᠨ ᠳᠠᠪᠤᠤ ᠳ᠋ᠤ᠌ ᠣᠶᠣᠨᠠ᠃
ᠵᠢᠷᠤᠭ16
(1) ᠳᠠᠩ ᠨᠢᠷᠤᠭᠤ ᠲᠠᠢ ᠰᠢᠲᠦ ᠣᠶᠣᠬᠤ ᠠᠵᠢᠯᠯᠠᠭᠠ
(2) ᠳᠠᠪᠬᠤᠷ ᠨᠢᠷᠤᠭᠤ ᠲᠠᠢ ᠰᠢᠲᠦ ᠣᠶᠣᠬᠤ ᠠᠵᠢᠯᠯᠠᠭᠠ
ᠰᠢᠲᠦ ᠣᠶᠣᠬᠤ ᠳ᠋ᠠᠭᠠᠨ ᠡᠬᠢᠯᠡᠭᠡᠳ ᠵᠠᠬᠠᠯᠠᠬᠤ ᠮᠠᠲ᠋ᠧᠷᠢᠶᠠᠯ ᠳ᠋ᠠᠭᠠᠨ ᠪᠣᠭᠣᠨᠢ ᠬᠠᠳᠬᠤᠵᠤ ᠨᠢᠭᠡ ᠨᠢᠭᠡ ᠬᠠᠳᠬᠤᠭᠠ ᠪᠠᠷ ᠤᠷᠲᠤᠳᠬᠠᠭᠰᠠᠭᠠᠷ ᠬᠠᠮᠤᠭ ᠤ᠋ᠨ ᠤᠷᠲᠤ ᠬᠠᠳᠬᠤᠭᠠ ᠪᠤᠶᠤ ᠰᠢᠳᠦᠨ ᠦ᠌ ᠭᠣᠣᠯ ᠰᠢᠪᠦᠭᠡᠷ ᠬᠡᠰᠡᠭ ᠲᠦ᠍ ᠬᠦᠷᠭᠡᠭᠡᠳ ᠪᠤᠴᠠᠭᠠᠵᠤ ᠠᠯᠭᠤᠷ ᠪᠣᠭᠣᠨᠢᠰᠬᠠᠭᠰᠠᠭᠠᠷ ᠨᠢᠷᠤᠭᠤᠨ ᠳ᠋ᠠᠭᠠᠨ ᠲᠤᠯᠵᠤ ᠢᠷᠡᠬᠦ ᠳ᠋ᠦ᠍ ᠰᠢᠪᠦᠭᠡᠷ ᠰᠢᠳᠦ ᠭᠠᠷᠬᠤ ᠪᠠ ᠳᠡᠭᠡᠳᠦ ᠲᠠᠯᠠ ᠳ᠋ᠠᠭᠠᠨ1—2 ᠬᠣᠣᠰ ᠨᠢᠷᠤᠭᠤ᠂ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠰᠢᠳᠦ ᠭᠠᠷᠤᠨᠠ᠃
ᠵᠢᠭᠠᠰᠤᠨ ᠨᠢᠷᠤᠭᠤ ᠣᠶᠣᠬᠤ ᠡᠨᠡ ᠣᠶᠣᠳᠠᠯ ᠢ᠋ ᠣᠶᠣᠬᠤ ᠳ᠋ᠠᠭᠠᠨ ᠵᠠᠬᠠᠯᠠᠬᠤ ᠪᠤᠶᠤ ᠴᠢᠮᠡᠭᠯᠡᠬᠦ ᠵᠦᠢᠯ ᠦ᠋ᠨ ᠢ᠋ᠶ᠋ᠡᠨ ᠴᠠᠭᠠᠨᠠ ᠠ᠋ᠴᠠ ᠨᠡᠰᠢ ᠨᠢ ᠬᠠᠳᠬᠤᠭᠠᠳ ᠢᠷᠮᠡᠭ ᠳᠡᠭᠡᠭᠦᠷ ᠨᠢ ᠳᠠᠪᠠᠭᠤᠯᠤᠨ ᠵᠡᠭᠦᠨ ᠳᠠᠰᠢ ᠨᠢ ᠡᠭᠡᠯᠵᠢᠯᠡᠨ ᠬᠠᠳᠬᠤᠵᠤ ᠣᠶᠣᠬᠤ ᠪᠠ ᠬᠠᠳᠬᠤᠮᠠᠯ ᠤ᠋ᠨ ᠬᠠᠳᠬᠤᠬᠤ ᠬᠡᠮᠵᠢᠶᠡ ᠬᠣᠯᠠ ᠣᠢᠷᠠ ᠦᠭᠡᠢ ᠵᠢᠭᠳᠡ ᠪᠠᠢᠪᠠᠯ ᠦᠵᠡᠮᠵᠢᠲᠡᠢ ᠪᠣᠯᠤᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ ᠂ ᠭᠡᠭᠡᠷᠡᠯ᠂ ᠲᠣᠭᠳᠠᠭᠤᠨᠪᠠᠠᠶᠠᠷ
ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ᠂ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ