ᠵᠥᠷᠢᠭᠦᠳ ᠥᠰᠢᠮᠡᠲᠡᠭᠡᠢ-ᠬᠡᠦᠬᠡᠳ ᠦᠨ ᠵᠠᠩ ᠰᠡᠳᠭᠢᠴᠡ ᠳᠦ ᠢᠯᠡᠷᠡᠵᠦ ᠪᠠᠢᠭᠠ ᠠᠰᠠᠭᠤᠳᠠᠯ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ2-05-ᠪᠣᠯᠣᠴᠢᠯᠠᠭᠤ
897ᠵᠥᠷᠢᠭᠦᠳ ᠥᠰᠢᠮᠡᠲᠡᠭᠡᠢ
ᠣᠳᠣ ᠶ᠋ᠢᠨ ᠰᠤᠷᠤᠭᠴᠢ ᠶ᠋ᠢᠨ ᠳᠤᠮᠳᠠ ᠪᠠᠭᠰᠢ ᠭᠡᠷ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠬᠡᠯᠡᠵᠦ ᠰᠠᠨᠠᠭᠤᠯᠬᠤ ᠶ᠋ᠢ ᠬᠦᠯᠢᠴᠡᠵᠦ ᠳᠡᠢᠯᠬᠦ ᠦᠭᠡᠢ᠂ ᠪᠠᠭᠠ ᠯᠠ ᠬᠡᠯᠡᠭᠡᠳ ᠠᠪᠤᠪᠠᠯ ᠪᠠᠴᠢᠮᠳᠠᠵᠤ ᠠᠭᠤᠷᠯᠠᠬᠤ᠂ ᠴᠠᠰᠢ ᠪᠠᠨ ᠢᠯᠡᠭᠦᠦ ᠬᠡᠳᠦ ᠬᠡᠯᠡᠪᠡᠯ ᠥᠰᠢᠵᠦ ᠵᠥᠷᠢᠭᠦᠳᠯᠡᠬᠦ ᠮᠡᠲᠦ ᠵᠣᠵᠢᠭ ᠴᠦᠯᠴᠢᠭᠡᠷ ᠵᠠᠩ ᠲᠠᠢ ᠬᠡᠦᠬᠡᠳ ᠪᠠᠭᠠ ᠪᠤᠰᠤ᠃ ᠬᠥᠮᠦᠨ ᠦ᠌ ᠨᠢᠳᠦᠨ ᠳᠠᠯᠳᠠ ᠶᠠᠭᠤᠮᠠ ᠡᠪᠳᠡᠯᠡᠬᠦ ᠬᠠᠭᠠᠯᠬᠤ ᠪᠠᠷ ᠣᠴᠢᠵᠤ ᠠᠭᠤᠷ ᠤᠴᠠᠭᠠᠷ ᠪᠤᠬᠢᠨᠢᠳᠤᠯ ᠢ᠋ᠶ᠋ᠠᠨ ᠲᠠᠢᠯᠳᠠᠭ ᠨᠢ ᠪᠣᠢ᠃ ᠡᠨᠡ ᠪᠣᠯ ᠮᠥᠨ ᠴᠦ᠍ ᠥᠨᠥ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠦᠰᠦᠨ ᠪᠣᠢᠵᠢᠯᠲᠠ ᠶ᠋ᠢᠨ ᠣᠷᠴᠢᠨ ᠠ᠋ᠴᠠ ᠪᠣᠢ ᠪᠣᠯᠵᠤ ᠪᠠᠢᠭᠠ ᠨᠢᠭᠡᠨ ᠰᠡᠳᠬᠢᠴᠡ ᠶ᠋ᠢᠨ ᠠᠰᠠᠭᠤᠳᠠᠯ ᠪᠣᠯᠤᠨᠠ᠃
ᠬᠣᠲᠠ ᠳ᠋ᠤ᠌ ᠵᠠᠯᠠᠭᠤᠴᠤᠳ ᠠᠵᠢᠯ ᠦᠢᠯᠡᠰ ᠭᠡᠳ ᠲᠤᠩ ᠶᠠᠭᠠᠷᠠᠤ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠭᠠᠷᠤᠮᠠᠭᠴᠠ ᠠᠪᠤ ᠡᠵᠢ ᠳ᠋ᠦ᠍ ᠪᠡᠨ ᠨᠠᠢᠳᠠᠬᠤ ᠨᠢ ᠣᠯᠠᠨ᠂ ᠬᠥᠳᠡᠭᠡ ᠴᠤ᠌ ᠡᠢᠮᠦ ᠪᠣᠯᠵᠤ ᠪᠠᠢᠨᠠ᠃ ᠦᠶᠡ ᠠᠯᠤᠰᠯᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠠᠴᠢ ᠣᠮᠪᠣᠯᠣ ᠳ᠋ᠤ᠌ ᠪᠠᠨ ᠬᠠᠨᠳᠤᠬᠤ ᠨᠠᠰᠤᠲᠠᠢ ᠬᠥᠮᠦᠨ ᠦ᠌ ᠣᠪᠣᠷ ᠰᠡᠳᠬᠢᠯᠭᠡ ᠳᠠᠩᠴᠤ ᠵᠥᠭᠡᠯᠡᠨ ᠪᠤᠯᠵᠠᠭᠠᠳᠠᠭ᠃ ᠠᠴᠢ ᠣᠮᠪᠣᠯᠣ ᠪᠠᠨ ᠪᠦᠷ ᠯᠡ ᠠᠮᠢᠳᠤ ᠬᠡᠦᠬᠡᠯᠳᠡᠢ ᠪᠡᠷ ᠦᠵᠡᠵᠦ᠂ ᠲᠡᠳᠡᠨᠦᠰ ᠨᠢ ᠶᠠᠭᠠᠬᠢᠵᠤ ᠳᠤᠷᠠ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠵᠤ ᠪᠠᠢᠭᠰᠠᠨ ᠴᠤ᠌ ᠬᠡᠨ ᠴᠦ᠍ ᠬᠡᠯᠡᠵᠦ ᠬᠣᠷᠢᠭᠯᠠᠵᠤ ᠪᠣᠯᠬᠤ ᠥᠬᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠨᠢ ᠲᠠᠯᠪᠢᠬᠤ ᠨᠢ ᠣᠯᠠᠨ ᠪᠣᠯᠵᠤ᠂ ᠶᠣᠰᠣ ᠳᠢᠭᠯᠡᠮ᠂ ᠪᠣᠯᠬᠤ ᠪᠣᠯᠬᠤ ᠦᠭᠡᠢ ᠶ᠋ᠢᠨ ᠵᠠᠭᠠᠭ ᠪᠡᠶᠡ ᠪᠡᠨ ᠪᠠᠷᠢᠬᠤ ᠴᠢᠳᠠᠪᠤᠷᠢ ᠭᠡᠵᠦ ᠬᠥᠮᠦᠵᠢᠭᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠶᠡᠷᠦ ᠨᠢ ᠬᠥᠮᠦᠰ ᠦ᠋ᠨ ᠨᠢᠯᠬᠠ ᠪᠠᠭᠠ ᠳ᠋ᠤ᠌ ᠪᠠᠨ ᠬᠦᠯᠢᠶᠡᠭᠰᠡᠨ ᠲᠠᠨᠢᠯᠲᠠ ᠣᠢᠯᠠᠭᠠᠯᠲᠠ᠂ ᠰᠤᠷᠤᠭᠰᠠᠨ ᠠᠩᠬᠠᠨ ᠤ᠋ ᠳᠠᠳᠬᠠᠯ ᠪᠣᠯ ᠬᠣᠵᠢᠮ ᠤ᠋ᠨ ᠵᠠᠩ ᠠᠷᠠᠨᠰᠢᠨ ᠤ᠋ ᠬᠡᠪᠰᠢᠯ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠶᠡᠬᠡ ᠨᠥᠯᠥᠭᠡ ᠦᠵᠡᠭᠦᠯᠳᠡᠭ᠃ ᠲᠡᠢᠮᠦ ᠡᠴᠡ ᠨᠠᠰᠤᠲᠠᠨ ᠤ᠋ ᠭᠠᠷ ᠳᠡᠭᠡᠷᠡ ᠡᠷᠬᠡ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠥᠰᠦᠭᠰᠡᠨ ᠬᠡᠦᠬᠡᠳ ᠴᠡᠴᠡᠷᠯᠢᠭ ᠲᠦ ᠣᠷᠣᠭᠠᠳ ᠢᠷᠡᠬᠦ ᠪᠡᠷ ᠳᠦᠷᠢᠮ ᠲᠣᠭᠲᠠᠭᠠᠯ ᠳ᠋ᠤ᠌ ᠬᠦᠯᠢᠶᠡᠰᠦᠯᠡᠭᠳᠡᠵᠦ ᠡᠬᠢᠯᠡᠨᠡ᠂ ᠡᠪᠦᠭᠡ ᠡᠮᠡᠭᠡ ᠶ᠋ᠢᠨ ᠳᠤᠷᠠ ᠵᠣᠷᠢᠭ ᠤ᠋ᠨ ᠬᠡᠦᠬᠡᠯᠳᠡᠢ ᠨᠦ᠍ᠭᠦᠳ ᠡᠳᠡᠭᠡᠷ ᠢ᠋ ᠬᠦᠯᠢᠴᠡᠵᠦ ᠳᠡᠢᠯᠬᠦ ᠦᠭᠡᠢ ᠵᠥᠷᠢᠭᠦᠳ ᠵᠣᠵᠢᠭ ᠠᠭᠤᠷ ᠤᠴᠠᠭᠠᠷ ᠶᠡᠬᠡ ᠲᠡᠢ ᠵᠠᠩ ᠰᠡᠳᠬᠢᠴᠡ ᠪᠦᠷᠢᠯᠳᠦᠬᠦ ᠪᠣᠯᠤᠮᠵᠢ ᠶᠡᠬᠡ ᠪᠠᠢᠳᠠᠭ᠃ ᠨᠢᠯᠬᠠ ᠬᠡᠦᠬᠡᠳ ᠴᠠᠭᠠᠰᠤ ᠦᠵᠡᠪᠡᠯ ᠤᠷᠠᠵᠤ ᠪᠠᠢᠳᠠᠭ᠂ ᠭᠠᠷ ᠲᠤ᠌ ᠪᠠᠨ ᠠᠳᠬᠤᠭᠰᠠᠨ ᠪᠦᠬᠦᠨ ᠢ᠋ ᠢᠳᠡᠬᠦ ᠪᠤᠶᠤ ᠤᠷᠠᠬᠤ ᠪᠣᠯ ᠬᠡᠦᠬᠡᠳ ᠦ᠋ᠨ ᠲᠥᠷᠥᠯᠬᠢ ᠠᠪᠢᠶᠠᠰ᠃ ᠬᠡᠷᠪᠡ ᠨᠣᠮ ᠳᠡᠪᠲᠡᠷ ᠪᠣᠯᠤᠭᠰᠠᠨ ᠪᠣᠯ ᠤᠷᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ᠂ ᠬᠡᠷᠡᠭᠯᠡᠬᠦ ᠦᠭᠡᠢ ᠴᠠᠭᠠᠰᠤ ᠠᠪᠴᠢᠷᠠᠭᠠᠳ ᠡᠭᠦᠨ ᠢ᠋ ᠪᠣᠯ ᠤᠷᠠᠵᠤ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠵᠦ ᠬᠢᠵᠦ ᠦᠵᠡᠭᠦᠯᠬᠦ ᠳ᠋ᠦ᠍ ᠬᠡᠦᠬᠡᠳ ᠶᠠᠭᠤ ᠭᠡᠰᠡᠨ ᠢ᠋ ᠮᠡᠳᠡᠴᠢᠬᠡᠨᠡ᠂ ᠬᠣᠶᠠᠷ ᠭᠤᠷᠪᠠ ᠬᠦᠷᠦᠭᠰᠡᠨ ᠣᠮᠪᠣᠯᠣ ᠨᠢ ᠠᠯᠢᠶᠠ ᠵᠠᠩ ᠨᠢ ᠬᠥᠳᠡᠯᠦᠭᠡᠳ ᠰᠦ ᠤᠤᠭᠤᠭᠰᠠᠨ ᠠᠶᠠᠭᠠ ᠪᠠᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠰᠢᠳᠡᠭᠡᠳ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠡᠮᠡᠭᠡ ᠡᠵᠢ ᠨᠢ ᠲᠤᠩ ᠪᠠᠬᠠᠷᠬᠠᠨ 《ᠦ᠂ ᠮᠢᠨᠦ ᠮᠠᠭᠤ ᠣᠮᠪᠣᠯᠣ ᠠᠶᠠᠭᠠ ᠰᠢᠳᠡᠬᠦ ᠴᠢᠳᠠᠯ ᠣᠷᠣᠴᠢᠬᠠᠵᠠᠢ》 ᠭᠡᠳ ᠥᠬᠥᠭᠡᠷᠳᠡᠭᠰᠡᠨ ᠴᠢᠨᠢ ᠨᠥᠭᠦᠭᠡ ᠬᠦᠦ ᠠᠶᠠᠭᠠ ᠪᠠᠨ ᠬᠡᠷᠡᠭᠯᠡᠵᠦ ᠪᠠᠷᠠᠮᠠᠭᠴᠠ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠰᠢᠳᠡᠬᠦ 《ᠰᠠᠢᠬᠠᠨ》 ᠲᠣᠭᠯᠠᠭᠠᠮ ᠵᠠᠩᠰᠢᠯ ᠲᠠᠢ ᠪᠣᠯᠴᠢᠬᠠᠭᠰᠠᠨ ᠪᠠᠢᠨᠠ᠃ ᠠᠩᠬᠠᠨ ᠤ᠋ ᠬᠥᠮᠦᠵᠢᠯ ᠦ᠋ᠨ ᠦᠨᠡ ᠴᠠᠨᠠ ᠡᠢᠮᠦ ᠯᠡ ᠬᠦᠨᠳᠦ ᠶᠡᠬᠡ ᠭᠡᠳᠡᠭ ᠢ᠋ ᠠᠬᠠᠮᠠᠳ ᠲᠣᠮᠣᠭᠠᠲᠠᠳ ᠮᠠᠨᠢ ᠰᠠᠨᠠᠵᠤ ᠪᠣᠳᠣᠭᠠᠷᠠᠢ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠠᠭᠠ ᠳ᠋ᠤ᠌ ᠨᠢ ᠰᠠᠢᠬᠠᠨ ᠵᠠᠩ ᠳᠠᠳᠬᠠᠯ ᠬᠡᠪᠰᠢᠭᠦᠯᠦᠭᠰᠡᠨ ᠦᠭᠡᠢ ᠪᠠᠢᠵᠤ᠂ ᠶᠡᠬᠡ ᠪᠣᠯᠬᠤ ᠶ᠋ᠢ ᠳᠠᠭᠠᠯᠳᠤᠨ ᠶᠣᠰᠣ ᠨᠣᠮ ᠮᠡᠳᠡᠬᠦ ᠦᠭᠡᠢ᠂ ᠦᠭᠡ ᠰᠣᠨᠣᠰᠬᠤ ᠦᠭᠡᠢ ᠪᠣᠯᠤᠭᠠᠳ ᠢᠷᠡᠬᠦ ᠪᠡᠷ ᠵᠦᠭ ᠴᠢᠭ ᠦᠭᠡᠢ ᠴᠣᠬᠢᠵᠤ ᠬᠠᠷᠢᠶᠠᠬᠤ᠂ ᠡᠳᠦᠷᠵᠢᠨ ᠮᠠᠭᠤ ᠶ᠋ᠢ ᠨᠢ ᠶᠠᠩᠰᠢᠬᠤ᠂ ᠣᠯᠠᠨ ᠤ᠋ ᠡᠮᠦᠨᠡ ᠠᠯᠢ ᠪᠠᠢᠭᠰᠠᠨ ᠮᠠᠭᠤᠬᠠᠢ ᠶ᠋ᠢ ᠨᠢ ᠶᠠᠷᠢᠵᠤ ᠨᠢᠭᠤᠷ ᠢ᠋ ᠨᠢ ᠪᠠᠷᠠᠬᠤ ᠵᠡᠷᠭᠡ ᠬᠥᠮᠦᠵᠢᠯ ᠦ᠋ᠨ ᠠᠷᠭᠠ ᠨᠢ ᠬᠡᠦᠬᠡᠳ ᠢ᠋ ᠬᠡᠳᠡᠷ ᠵᠥᠷᠢᠭᠦᠳ ᠪᠣᠯᠭᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠭᠡᠷ ᠣᠷᠣᠨ ᠠ᠋ᠴᠠ ᠪᠠᠨ ᠵᠠᠢᠯᠠᠵᠤ ᠳᠤᠲᠠᠭᠠᠬᠤ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠭᠡᠳᠡᠭ ᠪᠤᠶᠤ ᠢᠴᠢᠵᠦ ᠰᠢᠷᠪᠡᠭᠡᠲᠦᠬᠦ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠬᠡ ᠨᠢ ᠠᠯᠳᠠᠷᠠᠭᠰᠠᠨ ᠬᠡᠦᠬᠡᠳ ᠪᠣᠯᠭᠠᠳᠠᠭ᠃ ᠵᠠᠷᠢᠮ ᠲᠣᠮᠣᠴᠤᠤᠯ ᠠᠢᠯ ᠤ᠋ᠨ ᠵᠢᠭᠠᠯ ᠬᠦᠦ ᠪᠡᠷ 《ᠦ᠂ ᠡᠨᠡ ᠮᠠᠭᠤ ᠰᠢᠷᠠ ᠬᠦᠦ ᠪᠡᠷ ᠫᠢᠸᠦ᠋ ᠰᠣᠯᠢᠭᠠᠳ ᠤᠤᠭᠤᠴᠢᠬᠠᠶᠠ》 ᠭᠡᠬᠦ ᠮᠡᠲᠦ ᠪᠡᠷ ᠱᠣᠭᠯᠠᠵᠤ ᠨᠠᠭᠠᠳᠬᠤ ᠵᠠᠩᠰᠢᠯ ᠨᠢ ᠬᠡᠦᠬᠡᠳ ᠢ᠋ ᠲᠤᠩ ᠠᠮᠠᠷᠬᠠᠨ ᠥᠰᠢᠮᠡᠲᠡᠭᠡᠢ ᠵᠥᠷᠢᠭᠦᠳ ᠪᠣᠯᠭᠠᠳᠠᠭ ᠰᠢᠦ᠂ ᠬᠡᠦᠬᠡᠳ ᠴᠠᠢᠯᠭᠠᠨ ᠪᠣᠯᠬᠣᠷ ᠲᠣᠮᠣ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠦᠨᠡᠮᠰᠢᠵᠦ ᠠᠭᠤᠷᠯᠠᠵᠤ ᠪᠠᠴᠢᠮᠳᠠᠳᠠᠭ᠃ ᠲᠣᠮᠣ ᠬᠥᠮᠦᠨ ᠬᠦᠷᠲᠡᠯᠡ ᠢᠩᠭᠢᠵᠦ ᠶᠣᠰᠣ ᠪᠤᠰᠤ ᠠᠭᠠᠰᠢᠯᠠᠨᠠ ᠭᠡᠵᠦ ᠪᠣᠳᠣᠬᠤ ᠪᠠᠷ ᠶᠡᠬᠡᠴᠦᠦᠯ ᠢ᠋ᠶ᠋ᠡᠨ ᠬᠦᠨᠳᠦᠳᠬᠡᠬᠦ ᠮᠣᠷᠠᠯ ᠰᠤᠷᠲᠠᠯ ᠬᠠᠮᠢᠭᠠ ᠠ᠋ᠴᠠ ᠢᠷᠡᠬᠦ ᠪᠢᠯᠡ ! ᠲᠡᠢᠮᠦ ᠡᠴᠡ ᠪᠢᠳᠡ ᠪᠦᠬᠦᠨ ᠬᠡᠦᠬᠡᠳ ᠲᠡᠢ ᠪᠡᠨ ᠬᠠᠷᠢᠯᠴᠠᠵᠤ ᠪᠠᠢᠬᠤ ᠡᠪ ᠵᠦᠢ ᠪᠣᠯᠤᠨ ᠬᠡᠯᠡᠵᠦ ᠶᠠᠷᠢᠵᠤ ᠪᠠᠢᠬᠤ ᠦᠭᠡ ᠪᠦᠬᠦᠨ ᠦ᠌ ᠪᠡᠨ ᠦᠷᠡ ᠨᠥᠯᠥᠭᠡ ᠶᠠᠮᠠᠷᠬᠠᠨ ᠦᠨᠡ ᠴᠠᠨᠠ ᠲᠠᠢ ᠪᠠᠢᠳᠠᠭ ᠢ᠋ ᠰᠠᠢᠨ ᠪᠣᠳᠣᠯᠲᠠᠢ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠵᠠᠵᠠᠶᠠᠭᠠ
ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠵ᠂ ᠪᠤᠶᠠᠨᠲᠣᠭᠲᠠᠬᠤ