ᠲᠤᠩᠭᠠᠯᠠᠭ ᠲᠠᠮᠢᠷ4-16-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1483《ᠠ᠋ ᠬᠠᠯᠠᠭ᠂ ᠬᠣᠩᠭᠣᠷ ᠮᠢᠨᠢ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠵᠢᠷᠭᠤᠭᠠ
ᠬᠣᠩᠭᠣᠷ ᠤ᠋ᠨ ᠪᠣᠷᠣ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠪᠠᠲᠤ ᠰᠠᠯᠬᠢ ᠲᠠᠢ ᠤᠷᠤᠯᠳᠤᠨ ᠠᠷᠤ ᠬᠠᠩᠭᠠᠢ ᠠᠢᠮᠠᠭ ᠤ᠋ᠨ ᠲᠥᠪ ᠤᠷᠤᠭᠤ ᠨᠢᠰᠪᠡ᠃ ᠡᠰᠡᠷᠭᠦᠦ ᠨᠠᠷ ᠲᠤ᠌ ᠡᠷᠡᠭᠦᠳᠡᠭᠦᠯᠵᠦ ᠰᠢᠷᠠᠭᠳᠤᠭᠰᠠᠨ ᠪᠡᠶᠡ ᠨᠢ ᠡᠪᠡᠳᠪᠡᠴᠦ ᠦᠬᠦᠯ ᠦ᠋ᠨ ᠬᠠᠷᠠ ᠲᠣᠣᠷ ᠡᠴᠡ ᠭᠠᠷᠤᠭᠰᠠᠨ ᠪᠠᠶᠠᠷ ᠢ᠋ ᠨᠢ ᠪᠠᠷᠠᠵᠤ ᠬᠡᠷᠬᠢᠨ ᠴᠢᠳᠠᠬᠤ ᠠᠵᠢ᠃
ᠪᠣᠷᠣ ᠮᠣᠷᠢ ᠬᠥᠯᠥᠷᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠬᠥᠩᠭᠡᠷᠡᠵᠦ᠂ ᠳᠠᠪᠠᠭᠠᠨ ᠳᠡᠭᠡᠷᠡ ᠪᠠᠭᠤᠵᠤ ᠪᠡᠶᠡ ᠵᠠᠰᠠᠬᠤ ᠳ᠋ᠤ᠌ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠵᠤ ᠭᠠᠵᠠᠷ ᠴᠠᠪᠴᠢᠯᠠᠨ ᠲᠣᠭᠲᠠᠵᠤ ᠶᠠᠳᠠᠨᠠ᠃
ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠢ᠋ ᠵᠣᠪᠠᠭᠠᠬᠤ ᠶᠠᠭᠤᠮᠠ ᠭᠡᠪᠡᠯ ᠬᠣᠩᠭᠣᠷ ᠤ᠋ᠨ ᠲᠤᠬᠠᠢ ᠪᠣᠳᠣᠯ ᠪᠠᠢᠯᠠ᠃ ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠰᠠᠨ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠪᠠᠭᠠ ᠶ᠋ᠢᠨ ᠨᠠᠢᠵᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠪᠣᠳᠣᠬᠤ ᠳᠣᠳᠣᠮ ᠲᠡᠭᠦᠨ ᠢ᠋ ᠬᠠᠢᠷᠠᠯᠠᠵᠤ ᠬᠠᠷᠠ ᠮᠠᠨᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤᠨᠢ ᠬᠠᠷᠠᠮᠰᠠᠨ ᠭᠠᠰᠢᠭᠤᠳᠠᠨᠠ᠃
ᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠠᠮᠢᠷ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠬᠦᠷᠴᠦ ᠮᠣᠷᠢ ᠪᠠᠨ ᠤᠰᠤᠯᠠᠭᠠᠳ ᠮᠣᠷᠳᠠᠬᠤ ᠭᠡᠲᠡᠯᠡ ᠡᠮᠦᠨᠡ ᠡᠴᠡ ᠢᠷᠡᠭᠰᠡᠨ ᠥᠷᠭᠡᠨ ᠵᠠᠮ ᠢ᠋ᠶ᠋ᠠᠷ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠬᠠᠲᠠᠷᠢᠭᠤᠯᠵᠤ ᠶᠠᠪᠤᠭᠠ ᠬᠠᠷᠠᠭᠳᠠᠯᠠ᠃ ᠠᠵᠢᠭᠯᠠᠪᠠᠯ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠪᠣᠯᠤᠯᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠬᠥᠮᠦᠨ ᠪᠣᠢ? ᠵᠢᠭᠤᠲᠠᠪᠠᠯ ᠫᠤᠤᠳᠠᠨᠠ ᠰᠢᠦ ᠭᠡᠵᠦ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠰᠬᠢᠷᠪᠠ᠃ ᠪᠠᠲᠤ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠪᠠ᠃ ᠫᠤᠤ ᠪᠠᠨ ᠪᠡᠯᠡᠬᠡᠨ ᠪᠠᠷᠢᠭᠰᠠᠨ ᠬᠥᠮᠦᠰ ᠳᠡᠷᠭᠡᠳᠡ ᠨᠢ ᠢᠷᠡᠵᠦ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠯᠠ᠃ ᠳᠠᠷᠤᠭᠠ ᠨᠢ ᠪᠣᠯᠤᠯᠲᠠᠢ ᠨᠢᠭᠡ ᠬᠥᠮᠦᠨ᠂ ᠬᠣᠶᠠᠷ ᠴᠡᠷᠢᠭ ᠲᠦ᠍ ᠪᠠᠲᠤ ᠶ᠋ᠢ ᠥᠭᠭᠦᠭᠡᠳ 《ᠠᠩᠭᠢ ᠳ᠋ᠤ᠌ ᠬᠦᠷᠭᠡᠵᠦ ᠥᠭ》 ᠭᠡᠯᠡ᠃
ᠪᠠᠲᠤ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠲᠠᠯᠠ ᠲᠦᠳᠡᠯ ᠦᠭᠡᠢ ᠴᠠᠭᠠᠨ ᠳᠠᠪᠠᠭᠠᠨ ᠤ᠋ ᠵᠠᠮ ᠢ᠋ᠶ᠋ᠠᠷ ᠵᠢᠭᠰᠠᠨ ᠢᠷᠡᠵᠦ ᠶᠠᠪᠤᠭᠰᠠᠨ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠩᠭᠢ ᠲᠠᠢ ᠵᠣᠯᠭᠠᠪᠠ᠃
ᠲᠥᠭᠡᠷᠢᠵᠦ ᠲᠥᠭᠡᠷᠢᠵᠦ ᠲᠥᠷᠥᠯ ᠳ᠋ᠡᠭᠡᠨ ᠭᠡᠭᠴᠢ ᠪᠡᠷ ᠡᠨᠡ ᠠᠩᠭᠢ ᠶ᠋ᠢᠨ ᠳᠠᠷᠤᠭᠠ ᠨᠢ ᠬᠤᠶᠠᠭ ᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠴᠢ ᠠᠢᠮᠠᠭ ᠣᠷᠣᠵᠤ ᠨᠠᠭᠠᠳᠤᠬᠢ ᠰᠢᠷᠬᠠ ᠪᠠᠨ ᠡᠮᠴᠢᠯᠡᠭᠦᠯ ᠭᠡᠵᠦ ᠬᠤᠶᠠᠭ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠃ ᠪᠢ ᠡᠰᠡᠷᠭᠦᠦ ᠨᠠᠷ ᠡᠴᠡ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠠᠪᠤᠨᠠ᠃ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠤᠴᠠᠬᠤ ᠦᠭᠡᠢ ᠭᠡᠵᠦ ᠪᠠᠲᠤ ᠰᠢᠢᠳᠮᠡᠭᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠴᠢ ᠠ᠋᠂ ᠡᠭᠦᠨ ᠦ᠌ ᠰᠢᠷᠬᠠ ᠶ᠋ᠢ ᠪᠣᠭᠣᠵᠤ ᠥᠭ ᠭᠡᠵᠦ ᠬᠤᠶᠠᠭ ᠲᠤᠰᠢᠶᠠᠪᠠ᠃ ᠲᠡᠨᠳᠡ ᠡᠴᠡ ᠪᠠᠲᠤ ᠬᠤᠶᠠᠭ ᠤ᠋ᠨ ᠠᠩᠭᠢ ᠳ᠋ᠤ᠌ ᠭᠠᠵᠠᠷᠴᠢᠯᠠᠨ ᠶᠠᠪᠤᠯᠠ᠃ ᠭᠠᠭᠴᠠ ᠴᠤ᠌ ᠡᠭᠦᠯᠡ ᠦᠭᠡᠢ ᠴᠡᠯᠮᠡᠭ ᠬᠥᠬᠡ ᠲᠩᠷᠢ ᠮᠠᠩᠬᠠᠢᠵᠤ᠂ ᠵᠤᠨ ᠴᠠᠭ ᠤ᠋ᠨ ᠭᠣᠶᠣᠯ ᠢ᠋ᠶ᠋ᠠᠨ ᠡᠮᠦᠰᠦᠭᠰᠡᠨ ᠮᠣᠩᠭᠣᠯ ᠭᠠᠵᠠᠷ ᠦᠵᠡᠰᠬᠦᠯᠡᠩ ᠢ᠋ᠶ᠋ᠡᠨ ᠭᠠᠢᠬᠠᠭᠤᠯᠪᠠᠴᠤ ᠡᠵᠡᠨ ᠦᠭᠡᠢ ᠣᠷᠬᠢᠭᠰᠠᠨ ᠭᠡᠷ ᠦ᠋ᠳ᠂ ᠬᠠᠷᠠᠬᠤ ᠬᠥᠮᠦᠨ ᠦᠭᠡᠢ ᠪᠡᠯᠴᠢᠵᠦ ᠶᠠᠪᠤᠭᠠ ᠮᠠᠯ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠦᠢᠮᠡᠭᠡᠨ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠭᠡᠷᠡᠴᠢᠯᠡᠵᠦ ᠪᠠᠢᠯᠠ᠃
ᠴᠡᠷᠢᠭ ᠦ᠋ᠳ ᠦ᠋ᠨ ᠴᠢᠷᠠᠢ ᠳᠦᠭᠰᠥᠢᠨ ᠪᠠᠷᠤᠢᠵᠤ᠂ ᠦᠭᠡ ᠳᠠᠭᠤ᠂ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠦᠭᠡᠢ ᠠᠵᠢ᠃ ᠬᠥᠮᠦᠨ ᠪᠦᠬᠦᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠪᠠᠭᠲᠠᠵᠤ ᠶᠠᠳᠠᠭᠰᠠᠨ ᠠᠭᠤᠷ ᠬᠢᠯᠢᠩ᠂ ᠦᠵᠦᠭᠦᠷ ᠦᠭᠡᠢ ᠭᠣᠮᠣᠳᠠᠯ ᠬᠣᠯᠢᠯᠳᠤᠨ ᠬᠠᠷᠠᠭᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠠᠷᠠᠭᠤᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠭᠠᠷᠤᠭᠠᠳ᠂ ᠴᠢᠨᠠᠳᠤ ᠲᠠᠯᠠ ᠳ᠋ᠤᠨᠢ ᠪᠠᠢᠭᠠ ᠤᠷᠲᠤ ᠠᠮᠠ ᠶ᠋ᠢ ᠬᠠᠷᠠᠭᠤᠯᠳᠠᠭᠠᠳ ᠢᠷᠡ᠃ ᠶᠠᠭ ᠲᠡᠷᠡ ᠬᠠᠳᠠᠨ ᠤ᠋ ᠡᠮᠦᠨᠡ ᠲᠠᠯᠠ ᠪᠠᠷ ᠰᠢᠦ᠃ ᠵᠤᠨ ᠴᠠᠭ ᠲᠤ᠌ ᠠᠢᠯ ᠤ᠋ᠳ ᠣᠯᠠᠨ ᠪᠠᠢᠳᠠᠭ ᠶᠤᠮᠰᠠᠨ ᠭᠡᠵᠦ ᠬᠤᠶᠠᠭ ᠬᠣᠶᠠᠷ ᠴᠡᠷᠢᠭ ᠲᠦ᠍ ᠲᠤᠰᠢᠶᠠᠭᠠᠳ ᠳᠡᠷᠭᠡᠳᠡ ᠪᠡᠨ ᠶᠠᠪᠤᠭᠰᠠᠨ ᠪᠠᠲᠤ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠴᠢ ᠭᠠᠵᠠᠷ ᠮᠡᠳᠡᠬᠦ ᠬᠥᠮᠦᠨ ᠪᠠᠢᠨᠠ ᠬᠠᠮᠲᠤ ᠶᠠᠪᠤᠭᠠᠳ ᠢᠷᠡ》 ᠭᠡᠯᠡ᠃
ᠲᠥᠷᠥᠵᠦ ᠥᠰᠦᠭᠰᠡᠨ ᠨᠤᠲᠤᠭ ᠨᠢ ᠦᠢᠮᠡᠭᠡᠨ ᠦ᠌ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠵᠤ ᠵᠤᠨ ᠤ᠋ ᠰᠠᠢᠬᠠᠨ ᠴᠠᠭ ᠲᠤ᠌ ᠴᠠᠭᠠᠨ ᠢᠳᠡᠭᠡ᠂ ᠨᠡᠷᠡᠮᠡᠯ ᠠᠷᠢᠬᠢᠨ ᠤ᠋ ᠡᠬᠡᠭᠦᠨ ᠦᠨᠦᠷ ᠬᠠᠩᠬᠤᠯᠵᠤ ᠪᠠᠢᠳᠠᠭ ᠭᠡᠷ ᠦ᠋ᠳ ᠲᠦ᠍ ᠰᠠᠨᠳᠤᠷᠤᠨ ᠵᠠᠢᠯᠠᠭᠰᠠᠨ ᠡᠵᠡᠳ ᠦ᠋ᠨ ᠬᠣᠭᠰᠢᠯ ᠨᠠᠪᠰᠠᠢᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠬᠤᠶᠠᠭ ᠤ᠋ᠨ ᠰᠡᠳᠬᠢᠯ ᠭᠦᠨ ᠤᠢᠳᠬᠠᠷ ᠲᠤ᠌ ᠳᠠᠷᠤᠭᠳᠠᠵᠤ ᠶᠠᠪᠤᠯᠠ᠃ ᠠᠯᠠᠭᠯᠠᠨ ᠪᠡᠯᠴᠢᠵᠦ ᠪᠠᠢᠳᠠᠭ ᠰᠠᠷᠯᠤᠭ ᠤ᠋ᠳ ᠬᠦᠷᠲᠡᠯᠡ ᠠᠯᠠᠭᠠ ᠪᠣᠯᠤᠭᠠᠳ ᠬᠠᠶᠠ ᠡᠨᠳᠡ ᠲᠡᠨᠳᠡ ᠨᠢᠭᠡ ᠬᠣᠶᠠᠷ ᠬᠠᠷᠠᠭᠳᠠᠬᠤ ᠳ᠋ᠤᠨᠢ ᠲᠡᠭᠦᠨ ᠢ᠋ ᠤᠳᠠᠲᠠᠯᠠ ᠠᠵᠢᠭᠯᠠᠨ ᠬᠠᠷᠠᠨᠠ᠃
ᠪᠠᠲᠤ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠬᠠᠲᠠᠷᠢᠭᠤᠯᠤᠨ ᠪᠠᠷᠠᠭᠤᠨ ᠬᠥᠲᠥᠯ ᠦ᠋ᠨ ᠵᠦᠭ ᠶᠠᠪᠤᠯᠠ᠃ ᠪᠠᠲᠤ ᠳ᠋ᠤ᠌ ᠡᠨᠡ ᠨᠤᠲᠤᠭ ᠲᠠᠢ ᠬᠣᠯᠪᠣᠭᠠᠲᠠᠢ ᠶᠠᠪᠤᠳᠠᠯ ᠠᠮᠢᠳᠤᠷᠠᠯ ᠳ᠋ᠤᠨᠢ ᠣᠯᠠᠨ ᠲᠣᠬᠢᠶᠠᠯᠳᠤᠵᠤ ᠪᠢᠯᠡ᠃ ᠰᠣᠯᠣᠩᠭᠠ ᠲᠠᠢ ᠪᠠᠨ ᠬᠠᠮᠲᠤ ᠢᠵᠢᠯᠬᠡᠨ ᠬᠣᠶᠠᠷ ᠬᠠᠷᠠ ᠮᠣᠷᠢ ᠤᠨᠤᠭᠠᠳ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠣᠴᠢᠬᠤ ᠭᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠷᠲᠡᠭᠡ ᠡᠮᠦᠨᠡ ᠬᠠᠷᠠᠭᠳᠠᠬᠤ ᠠᠭᠤᠯᠠ ᠶ᠋ᠢᠨ ᠨᠠᠭᠠᠳᠤ ᠲᠠᠯᠠ ᠪᠠᠷ ᠭᠠᠷᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠭᠰᠠᠨ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠵᠢᠯ ᠢ᠋ᠶ᠋ᠠᠷ ᠡᠨᠡ ᠣᠷᠴᠢᠮ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠬᠡᠳᠦ ᠶᠠᠪᠤᠭᠰᠠᠨ ᠢ᠋ ᠲᠣᠭᠠᠯᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠯᠠ᠃ ᠡᠨᠡ ᠪᠦᠬᠦᠨ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠵᠢᠷᠢᠯᠵᠡᠨ ᠥᠩᠭᠡᠷᠡᠪᠡ᠃
ᠶᠠᠪᠤᠭᠰᠠᠭᠠᠷ ᠨᠢᠷᠤᠭᠤᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠯᠡ᠃ ᠦᠨᠡᠬᠡᠷ ᠴᠦ᠍ ᠦᠷᠭᠦᠯᠵᠢᠯᠡᠭᠰᠡᠨ ᠤᠷᠲᠤ ᠠᠮᠠ ᠡᠮᠦᠨᠡ ᠨᠢ ᠲᠣᠳᠣᠷᠠᠪᠠ᠃ ᠠᠮᠠᠨ ᠤ᠋ ᠳᠤᠮᠳᠠᠭᠤᠷ ᠮᠤᠷᠤᠢᠯᠵᠠᠨ ᠤᠷᠤᠰᠤᠭᠰᠠᠨ ᠨᠠᠷᠢᠬᠠᠨ ᠭᠣᠣᠯ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ ᠲᠣᠭᠯᠠᠨᠠ᠃ ᠭᠣᠣᠯ ᠤ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠬᠡᠳᠦ ᠬᠡᠳᠦᠨ ᠬᠣᠲᠠ ᠠᠢᠯ ᠬᠠᠷᠠᠭᠳᠠᠪᠠᠴᠤ ᠭᠠᠳᠠᠨᠠ ᠨᠢ ᠠᠮᠢᠳᠤ ᠠᠮᠢᠲᠠᠨ ᠦᠯᠦ ᠦᠵᠡᠭᠳᠡᠨᠡ᠂ ᠪᠠᠰᠠ ᠠᠢᠯ ᠤ᠋ᠳ ᠤ᠋ᠨ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠠᠷᠪᠠᠭᠠᠳ ᠰᠠᠷᠯᠤᠭ ᠡᠴᠡ ᠥᠭᠡᠷᠡ ᠮᠠᠯ ᠡᠰᠡ ᠬᠠᠷᠠᠭᠳᠠᠪᠠ᠃
ᠭᠤᠷᠪᠠᠭᠤᠯᠠ ᠪᠠᠨ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠵᠤ ᠪᠦᠬᠦᠨ ᠢ᠋ ᠨᠠᠷᠢᠪᠴᠢᠯᠠᠨ ᠠᠵᠢᠭᠯᠠᠪᠠ᠃ ᠭᠡᠲᠡᠯᠡ ᠲᠡᠷᠲᠡᠭᠡ ᠳᠣᠣᠷᠠᠬᠢ ᠠᠢᠯ ᠤ᠋ᠳ ᠤ᠋ᠨ ᠳᠤᠮᠳᠠᠭᠤᠷ ᠭᠠᠭᠴᠠ ᠪᠠᠷᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠬᠤᠷᠳᠤᠯᠠᠨ ᠢᠷᠡᠵᠦ ᠶᠠᠪᠤᠯᠠ᠃
ᠮᠣᠷᠢᠳ ᠢ᠋ᠶ᠋ᠠᠨ ᠨᠢᠭᠤᠭᠠᠳ ᠫᠤᠤ ᠪᠠᠨ ᠪᠡᠯᠡᠳᠬᠡᠨ ᠲᠡᠭᠦᠨ ᠢ᠋ ᠬᠠᠷᠠᠭᠤᠯᠳᠠᠨ ᠬᠦᠯᠢᠶᠡᠪᠡ᠃ ᠪᠠᠷᠠᠭᠠᠨ ᠮᠣᠷᠢᠲᠤ ᠵᠣᠭᠰᠣᠯᠲᠠ ᠦᠭᠡᠢ ᠳᠠᠪᠬᠢᠭᠰᠠᠭᠠᠷ ᠡᠭᠴᠡ ᠡᠮᠦᠨᠡ ᠡᠴᠡ ᠨᠢ ᠢᠷᠡᠯᠡ᠃ ᠡᠨᠡ ᠪᠣᠯ ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠳᠤᠮᠳᠠ ᠡᠴᠡ ᠲᠦᠭᠵᠢᠯ ᠦ᠋ᠨ ᠰᠠᠯᠬᠢᠨ ᠬᠡᠭᠡᠷ ᠢ᠋ᠶ᠋ᠡᠷ ᠵᠢᠭᠤᠲᠠᠨ ᠭᠠᠷᠤᠭᠰᠠᠨ ᠬᠣᠩᠭᠣᠷ ᠪᠠᠢᠯᠠ᠃ ᠬᠣᠩᠭᠣᠷ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠶᠠᠭᠤᠨ ᠤ᠋ ᠡᠮᠦᠨᠡ ᠡᠬᠡᠨᠡᠷ᠂ ᠬᠡᠦᠬᠡᠳ ᠬᠣᠶᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠭᠡᠵᠦ ᠭᠡᠷ ᠲᠡᠭᠡᠨ ᠣᠴᠢᠪᠠᠯ ᠡᠵᠡᠳ ᠨᠢ ᠣᠷᠣ ᠰᠤᠷᠠᠭ ᠦᠭᠡᠢ ᠳᠥᠷᠪᠡᠨ ᠠᠯᠠᠭᠠ ᠪᠣᠯᠵᠤ ᠬᠣᠭᠣᠰᠣᠨ ᠭᠡᠷ ᠦᠯᠡᠳᠡᠵᠡᠢ᠃
ᠡᠰᠡᠷᠭᠦᠦ ᠪᠣᠰᠤᠯᠭᠠ ᠶ᠋ᠢᠨ ᠰᠤᠷᠠᠭ ᠢ᠋ᠶ᠋ᠠᠷ ᠠᠢᠯ ᠤ᠋ᠳ ᠳᠦᠷᠪᠡᠬᠦ ᠳ᠋ᠦ᠍ ᠰᠦᠷᠦᠩ ᠬᠦᠦ ᠲᠡᠢ ᠪᠡᠨ ᠬᠠᠮᠲᠤ ᠬᠠᠳᠠᠮ ᠡᠴᠢᠭᠡ ᠶ᠋ᠢᠨ ᠳ᠋ᠡᠭᠡᠨ ᠣᠴᠢᠵᠠᠢ᠃
ᠢᠲᠡᠭᠡᠯᠲᠦ ᠳᠤᠯᠵᠢᠨ ᠬᠣᠶᠠᠷ ᠠᠴᠢ ᠬᠦᠦ ᠪᠡᠨ ᠦᠵᠡᠨ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠭᠰᠠᠨ ᠪᠥᠭᠡᠳ ᠰᠦᠷᠦᠩ ᠢ᠋ ᠡᠰᠡᠷᠭᠦᠦ ᠬᠥᠳᠡᠯᠭᠡᠭᠡᠨ ᠦ᠌ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ 《ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠡᠳᠦᠨ ᠱᠠᠯᠳᠠᠩ ᠪᠠᠨᠳᠢ ᠶᠠᠭᠠᠬᠢᠵᠤ ᠲᠡᠯᠴᠢᠯᠡᠪᠡᠴᠦ ᠳᠡᠢᠯᠬᠦ ᠦᠭᠡᠢ᠃ ᠠᠮᠢᠨ ᠡᠴᠡ ᠪᠡᠨ ᠤᠢᠳᠤᠭᠰᠠᠨ ᠮᠥᠨ ᠴᠦ᠍ ᠲᠡᠨᠡᠭ ᠠᠮᠢᠲᠠᠳ ᠶᠤᠮ ᠳᠠ᠃ ᠭᠣᠣᠯ ᠭᠠᠷᠴᠤ᠂ ᠶᠡᠬᠡ ᠵᠠᠮ ᠪᠠᠷᠠᠳᠠᠨ ᠪᠠᠭᠤᠪᠠᠯ ᠶᠠᠮᠠᠷ ᠴᠤ᠌ ᠠᠶᠤᠯ ᠦᠭᠡᠢ᠃ ᠬᠠᠷᠢᠨ ᠬᠦᠦ ᠮᠢᠨᠢ ᠶᠠᠭᠠᠬᠢᠵᠤ ᠶᠠᠪᠤᠳᠠᠭ ᠪᠣᠯ? ᠲᠡᠭᠦᠨ ᠳ᠋ᠦ᠍ ᠯᠡ ᠵᠣᠪᠠᠬᠤ ᠶᠤᠮ》 ᠭᠡᠳ ᠰᠠᠨᠠᠭᠠ ᠠᠯᠲᠠᠨ ᠶᠡᠬᠡ ᠯᠡ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠪᠢᠯᠡ᠃
ᠮᠠᠷᠭᠠᠰᠢ ᠨᠢ ᠡᠷᠲᠡ ᠠᠴᠢᠶᠠᠯᠠᠵᠤ ᠲᠠᠮᠢᠷ ᠢ᠋ ᠣᠭᠳᠤᠯᠠᠨ ᠡᠮᠦᠨᠡ ᠨᠤᠲᠤᠭ ᠤ᠋ᠨ ᠠᠶᠤᠯ ᠦᠭᠡᠢ ᠭᠠᠵᠠᠷ ᠤᠷᠤᠭᠤ ᠨᠡᠭᠦᠵᠡᠢ᠃
ᠬᠣᠩᠭᠣᠷ ᠡᠵᠡᠭᠦᠢ ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠲᠠᠮᠠᠬᠢ ᠲᠡᠳᠡᠨ ᠬᠡᠰᠡᠭ ᠰᠠᠭᠤᠵᠤ ᠪᠠᠢᠬᠤ ᠵᠠᠭᠤᠷᠠ ᠬᠦᠦ ᠶ᠋ᠢᠨ ᠬᠢᠨᠢ ᠬᠣᠶᠠᠷ ᠪᠣᠢᠲᠣᠭ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠨᠡᠢᠯᠡᠭᠦᠯᠦᠨ ᠴᠢᠩᠭᠠ ᠪᠠᠵᠠᠵᠤ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠭᠰᠡᠨ ᠢ᠋ᠶ᠋ᠡᠨ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠪᠣᠳᠣᠯᠬᠢᠯᠠᠪᠠ᠃
《ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠡᠬᠡᠨᠡᠷ ᠬᠡᠦᠬᠡᠳ᠂ ᠡᠴᠢᠭᠡ ᠡᠬᠡ ᠮᠢᠨᠢ ᠶᠠᠭᠠᠬᠢᠵᠤ ᠪᠠᠢᠳᠠᠭ ᠪᠣᠯ? ᠪᠠᠲᠤ ᠮᠢᠨᠢ ᠠᠮᠢᠳᠤ ᠶᠠᠪᠤᠳᠠᠭ ᠪᠣᠯᠪᠠᠤ?》 ᠭᠡᠬᠦ ᠵᠡᠷᠭᠡ ᠡᠳᠦᠢ ᠲᠡᠳᠦᠢ ᠠᠰᠠᠭᠤᠳᠠᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠪᠠᠴᠤ ᠥᠭᠬᠦ ᠬᠠᠷᠢᠭᠤ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠡᠨᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠣᠢ ᠪᠣᠯᠤᠭᠰᠠᠨ ᠬᠦᠨᠳᠦ ᠰᠢᠷᠬᠠ ᠪᠤᠭᠯᠠᠨ ᠶᠠᠭᠤᠮᠠ ᠭᠦᠨ ᠪᠣᠳᠣᠬᠤ ᠴᠢᠳᠠᠪᠤᠷᠢ ᠦᠭᠡᠢ ᠪᠣᠯᠭᠠᠵᠠᠢ᠃
ᠪᠣᠢᠲᠣᠭ ᠢ᠋ᠶ᠋ᠠᠨ ᠡᠪᠦᠷᠲᠦᠯᠡᠭᠡᠳ ᠭᠠᠷᠤᠯᠠ᠃ ᠳᠠᠬᠢᠭᠠᠳ ᠯᠠ 《ᠬᠠᠮᠢᠭᠠ ᠣᠴᠢᠬᠤ ᠪᠣᠢ》 ᠭᠡᠳᠡᠭ ᠠᠰᠠᠭᠤᠳᠠᠯ ᠭᠠᠷᠴᠤ ᠢᠷᠡᠯᠡ᠃ ᠦᠨᠡᠨ ᠳ᠋ᠡᠭᠡᠨ ᠣᠴᠢᠬᠤ ᠭᠠᠵᠠᠷ ᠪᠠᠢᠭᠰᠠᠨ ᠦᠭᠡᠢ᠃ ᠪᠠᠢᠯᠳᠤᠵᠤ ᠪᠠᠢᠭᠠ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠯᠢᠨ ᠳ᠋ᠤ᠌ ᠴᠤ᠌ ᠣᠴᠢᠬᠤ ᠨᠢᠭᠤᠷ ᠦᠭᠡᠢ ᠪᠣᠯᠵᠠᠢ᠃ ᠬᠦᠰᠡᠵᠦ ᠣᠴᠢᠭᠰᠠᠨ ᠬᠦᠦ ᠡᠬᠡᠨᠡᠷ ᠨᠢ ᠬᠠᠮᠢᠭᠠ ᠪᠦᠭᠭᠦᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠤᠴᠢᠷ ᠡᠴᠡ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠢᠯᠡ᠃
《ᠶᠠᠭᠤ ᠴᠤ᠌ ᠭᠡᠰᠡᠨ ᠠᠪᠤ ᠲᠠᠢ ᠠᠭᠤᠯᠵᠠᠶᠠ》 ᠭᠡᠵᠦ ᠪᠣᠳᠣᠭᠳᠠᠬᠤ ᠳ᠋ᠤ᠌ ᠮᠣᠷᠢ ᠪᠠᠨ ᠲᠠᠢᠯᠵᠤ ᠠᠪᠤᠭᠠᠳ ᠮᠣᠷᠳᠠᠪᠠ᠃ ᠢᠩᠭᠢᠵᠦ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠠᠲᠤ ᠪᠠ ᠲᠡᠭᠦᠨ ᠦ᠌ ᠨᠥᠬᠥᠳ ᠲᠡᠢ ᠲᠤᠯᠭᠠᠷᠠᠵᠠᠢ᠃ ᠨᠢᠭᠡ ᠴᠡᠷᠢᠭ ᠪᠣᠰᠤᠭᠠᠳ 《ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠵᠣᠭᠰᠣ᠂ ᠫᠤᠤᠳᠠᠨᠠ ᠰᠢᠦ》 ᠭᠡᠵᠦ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠣᠩᠭᠣᠷ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ ᠭᠱᠠᠨ ᠵᠠᠭᠤᠷᠠ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠡᠷᠭᠢᠵᠦ ᠬᠤᠷᠳᠤᠯᠠᠪᠠ᠃
ᠬᠠᠰᠬᠢᠷᠤᠭᠰᠠᠨ ᠴᠡᠷᠢᠭ ᠫᠤᠤᠳᠠᠪᠠ᠃ ᠬᠣᠩᠭᠣᠷ ᠮᠣᠷᠢᠨ ᠤ᠋ ᠪᠠᠨ ᠵᠥᠪ ᠲᠠᠯᠠ ᠤᠷᠤᠭᠤ ᠠᠯᠭᠤᠷᠬᠠᠨ ᠨᠠᠯᠠᠵᠤ ᠤᠨᠵᠢᠪᠠ᠃
ᠣᠨᠣᠴᠢᠬᠠᠵᠠᠢ ᠰᠢᠦ ᠭᠡᠵᠦ ᠨᠢᠭᠡ ᠴᠡᠷᠢᠭ ᠬᠡᠯᠡᠲᠡᠯᠡ 《ᠦᠭᠡᠢ᠃ ᠪᠢ ᠠᠮᠢᠳᠤ ᠪᠠᠢᠨᠠ》 ᠭᠡᠰᠡᠨ ᠶᠤᠮ ᠰᠢᠭ ᠳᠠᠬᠢᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠭᠠᠷᠤᠯᠠ᠃
ᠬᠡᠷᠪᠡ ᠪᠣᠷᠣ ᠮᠣᠷᠢ ᠨᠢ ᠪᠠᠢᠭᠰᠠᠨ ᠪᠣᠯ ᠦᠬᠦᠭᠰᠡᠨ ᠪᠣᠯᠵᠤ ᠬᠠᠵᠠᠭᠤ ᠳ᠋ᠤᠨᠢ ᠴᠢᠷᠦᠭᠳᠡᠨ ᠶᠠᠪᠤᠭᠰᠠᠭᠠᠷ ᠰᠤᠮᠤ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ᠵᠠᠢᠯᠠᠨ ᠭᠠᠷᠴᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠲᠦᠭᠵᠢᠯ ᠦ᠋ᠨ ᠮᠣᠷᠢ ᠲᠡᠢᠮᠦ ᠰᠤᠷᠭᠠᠭᠤᠯᠢ ᠦᠭᠡᠢ ᠪᠣᠯᠬᠣᠷ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠲᠦᠷᠭᠡᠨ ᠭᠠᠷᠤᠭᠰᠠᠨ ᠪᠢᠯᠡ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠪᠠᠲᠤ ᠭᠣᠬᠠ ᠪᠠᠨ ᠮᠤᠯᠲᠤᠯᠪᠠ᠃
ᠠᠭᠤᠰᠬᠢ ᠪᠡᠷ ᠢ᠋ᠶ᠋ᠡᠨ ᠨᠡᠪᠲᠡ ᠫᠤᠤᠳᠠᠭᠤᠯᠤᠭᠰᠠᠨ ᠬᠣᠩᠭᠣᠷ ᠪᠥᠬᠥᠯᠵᠡᠨ ᠨᠠᠢᠭᠤᠭᠰᠠᠨ ᠢ᠋ᠶ᠋ᠠᠨ ᠲᠦᠷᠭᠡᠨ ᠶᠠᠪᠤᠭᠰᠠᠨ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠡᠷᠴᠢᠨ ᠳ᠋ᠦ᠍ ᠰᠢᠳᠡᠭᠳᠡᠨ ᠲᠡᠷᠲᠡᠭᠡ ᠬᠣᠯᠠ ᠬᠠᠷᠤᠭᠤᠯᠳᠠᠨ ᠤᠨᠠᠭᠠᠳ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃
ᠪᠠᠲᠤ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠬᠥᠮᠦᠨ ᠢ᠋ ᠠᠵᠢᠭᠯᠠᠨ ᠬᠡᠰᠡᠭ ᠪᠣᠯᠤᠭᠠᠳ ᠨᠢᠭᠡ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠮᠣᠷᠳᠠᠵᠤ ᠣᠴᠢᠯᠠ᠃ ᠤᠷᠲᠤ ᠤᠷᠭᠤᠭᠰᠠᠨ ᠰᠠᠬᠤᠯᠠᠭ ᠨᠣᠭᠣᠭᠠᠨ ᠳᠡᠭᠡᠷᠡ ᠲᠦᠷᠦᠭᠦᠦ ᠣᠷᠣᠭᠰᠢ ᠪᠠᠨ ᠬᠠᠷᠠᠨ ᠤᠨᠠᠭᠰᠠᠨ ᠬᠣᠩᠭᠣᠷ ᠤ᠋ᠨ ᠴᠢᠰᠤ ᠣᠢᠷᠠ ᠣᠷᠴᠢᠮ ᠢ᠋ᠶ᠋ᠠᠨ ᠬᠦᠷᠡᠩ ᠤᠯᠠᠭᠠᠨ ᠥᠩᠭᠡ ᠪᠡᠷ ᠪᠣᠳᠣᠵᠠᠢ᠃ ᠡᠭᠦᠳᠡᠨ ᠬᠣᠢᠮᠣᠷ ᠤ᠋ᠨ ᠵᠠᠢᠲᠠᠢ ᠭᠠᠵᠠᠷ ᠬᠡᠦᠬᠡᠳ ᠦ᠋ᠨ ᠬᠣᠶᠠᠷ ᠪᠣᠢᠲᠣᠭ ᠬᠡᠪᠲᠡᠨᠡ᠃
ᠪᠠᠲᠤ ᠮᠣᠷᠢᠨ ᠡᠴᠡ ᠪᠠᠭᠤᠵᠤ᠂ ᠬᠡᠪᠲᠡᠵᠦ ᠪᠠᠢᠭᠠ ᠬᠥᠮᠦᠨ ᠢ᠋ ᠡᠷᠭᠢᠭᠦᠯᠦᠭᠰᠡᠨ ᠳ᠋ᠦ᠍ 《ᠠ᠋ ᠬᠠᠯᠠᠭ᠂ ᠬᠣᠩᠭᠣᠷ ᠮᠢᠨᠢ》 ᠭᠡᠳ ᠲᠡᠪᠡᠷᠢᠨ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ ᠮᠢᠨᠢ᠂ ᠪᠢ ᠪᠠᠲᠤ ᠪᠠᠢᠨᠠ ᠭᠡᠵᠦ ᠬᠠᠰᠬᠢᠷᠪᠠᠴᠤ ᠬᠠᠷᠢᠭᠤ ᠳᠠᠭᠤ ᠭᠠᠷᠤᠭᠰᠠᠨ ᠦᠭᠡᠢ᠃ ᠭᠡᠲᠡᠯᠡ ᠬᠣᠩᠭᠣᠷ ᠤ᠋ᠨ ᠭᠠᠯ ᠨᠢ ᠪᠠᠭᠤᠷᠠᠵᠤ᠂ ᠠᠮᠢᠳᠤᠷᠠᠯ ᠤ᠋ᠨ ᠰᠡᠭᠦᠯ ᠦ᠋ᠨ ᠲᠡᠮᠳᠡᠭ ᠨᠢ ᠣᠷᠬᠢᠵᠤ ᠪᠠᠢᠭᠠ ᠨᠢᠳᠦ ᠬᠠᠭᠠᠰ ᠨᠡᠭᠡᠭᠡᠭᠳᠡᠵᠦ ᠤᠳᠠᠲᠠᠯᠠ ᠪᠠᠲᠤ ᠶ᠋ᠢ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠰᠤᠯᠠᠬᠠᠨ ᠢᠨᠢᠶᠡᠮᠰᠦᠭᠯᠡᠯ ᠤᠷᠤᠭᠤᠯ ᠳ᠋ᠤᠨᠢ ᠲᠣᠳᠣᠷᠠᠬᠤ ᠮᠡᠲᠦ ᠪᠣᠯᠤᠭᠠᠳ ᠠᠮᠢᠰᠬᠤᠭᠠ ᠪᠠᠨ ᠬᠤᠷᠢᠶᠠᠪᠠ᠃
ᠪᠠᠲᠤ ᠨᠥᠬᠥᠷ ᠢ᠋ᠶ᠋ᠡᠨ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠨ᠂ ᠨᠢᠳᠦᠨ ᠡᠴᠡ ᠨᠢ ᠭᠠᠰᠢᠭᠤᠨ ᠨᠢᠯᠪᠤᠰᠤ ᠤᠨᠳᠤᠷᠤᠨ ᠭᠠᠷᠤᠯᠠ᠃ ᠬᠣᠩᠭᠣᠷ ᠤ᠋ᠨ ᠴᠢᠰᠤ ᠪᠣᠯᠤᠭᠰᠠᠨ ᠨᠢᠭᠤᠷ ᠲᠤ᠌ ᠵᠡᠭᠦᠳᠦᠯᠡᠵᠦ ᠪᠠᠢᠭᠠ ᠬᠡᠦᠬᠡᠳ ᠦ᠋ᠨ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠨ ᠬᠥᠬᠡᠷᠡᠭᠰᠡᠨ ᠤᠷᠤᠭᠤᠯ ᠨᠢ ᠦᠯᠦ ᠮᠡᠳᠡᠭ ᠠᠩᠭᠠᠢᠵᠠᠢ᠃
ᠪᠦᠭᠴᠢᠮ ᠬᠠᠯᠠᠭᠤᠨ ᠡᠳᠦᠷ ᠦ᠋ᠨ ᠨᠠᠷᠠ ᠪᠦᠬᠦᠨ ᠢ᠋ ᠬᠠᠢᠷᠠ ᠨᠠᠢᠷ ᠦᠭᠡᠢ ᠲᠥᠭᠡᠨᠡᠵᠦ ᠬᠣᠩᠭᠣᠷ ᠤ᠋ᠨ ᠬᠠᠴᠠᠷ ᠲᠤ᠌ ᠨᠠᠭᠠᠭᠰᠠᠨ ᠪᠠᠲᠤ ᠶ᠋ᠢᠨ ᠬᠠᠴᠠᠷ ᠥᠳᠬᠡᠷᠡᠭᠰᠡᠨ ᠴᠢᠰᠤᠨ ᠳ᠋ᠤ᠌ ᠨᠠᠭᠠᠯᠳᠤᠨᠠ᠃
ᠬᠣᠩᠭᠣᠷ ᠤ᠋ᠨ ᠪᠣᠷᠣ ᠮᠣᠷᠢ᠂ ᠪᠠᠲᠤ ᠶ᠋ᠢᠨ ᠮᠥᠷᠦᠨ ᠳᠡᠭᠡᠭᠦᠷ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠨ ᠠᠮᠢ ᠨᠢ ᠭᠠᠷᠤᠭᠰᠠᠨ ᠡᠵᠡᠨ ᠢ᠋ᠶ᠋ᠡᠨ ᠤᠳᠠᠲᠠᠯᠠ ᠦᠨᠦᠷᠲᠦᠭᠰᠡᠨ ᠢ᠋ᠶ᠋ᠡᠨ ᠢᠵᠢᠯ ᠳᠠᠰᠤᠯ ᠪᠣᠯᠤᠭᠰᠠᠨ ᠡᠵᠡᠨ ᠦ᠌ ᠪᠡᠨ ᠴᠣᠭᠴᠠᠰ ᠢ᠋ ᠪᠤᠯᠠᠬᠤ ᠭᠠᠵᠠᠷ ᠮᠠᠯᠲᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠴᠠᠪᠴᠢᠯᠠᠪᠠ᠃