ᠲᠤᠩᠭᠠᠯᠠᠭ ᠲᠠᠮᠢᠷ4-15-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1375《ᠬᠠᠳᠠᠨ ᠵᠣᠷᠢᠭᠲᠤ ᠪᠦᠷᠭᠦᠳ ᠪᠠᠭᠠᠲᠤᠷ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠲᠠᠪᠤ
ᠪᠠᠲᠤ ᠠᠢᠮᠠᠭ ᠡᠴᠡ ᠡᠮᠴᠢ ᠠᠪᠴᠢᠷᠠᠨ᠂ ᠡᠪᠡᠳᠴᠢᠲᠡᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠮᠴᠢᠯᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠤᠳᠠᠯ ᠦᠭᠡᠢ ᠡᠪᠡᠳᠴᠢᠨ ᠳᠠᠷᠤᠭᠳᠠᠵᠤ ᠬᠡᠦᠬᠡᠳ ᠦ᠋ᠳ ᠡᠳᠡᠭᠡᠷᠡᠪᠡ᠃ ᠢᠩᠭᠢᠭᠡᠳ ᠨᠢᠭᠡ ᠥᠷᠯᠥᠭᠡ ᠡᠮᠴᠢ ᠪᠡᠨ ᠠᠢᠮᠠᠭ ᠲᠤ᠌ ᠬᠦᠷᠭᠡᠵᠦ ᠥᠭᠬᠦ ᠪᠣᠯᠤᠭᠠᠳ ᠥᠷᠲᠡᠭᠡ ᠡᠴᠡ ᠮᠣᠷᠢᠳ ᠠᠪᠴᠢᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠢ᠋ ᠵᠢᠷᠭᠠᠯ ᠬᠦᠷᠭᠡᠵᠦ ᠥᠭᠭᠦᠨᠡ᠃ ᠡᠨᠡ ᠠᠯᠤᠰ ᠨᠤᠲᠤᠭ ᠲᠤ᠌ ᠢᠷᠡᠵᠦ ᠪᠢᠳᠡᠨ ᠢ᠋ ᠠᠶᠤᠯᠲᠠᠢ ᠡᠪᠡᠳᠴᠢᠨ ᠡᠴᠡ ᠠᠪᠤᠷᠠᠭᠰᠠᠨ ᠠᠴᠢ ᠶ᠋ᠢ ᠴᠢᠨᠢ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠬᠤ ᠦᠭᠡᠢ᠃ ᠮᠢᠨᠦ ᠨᠠᠰᠤ ᠪᠠᠷᠠᠭᠰᠠᠨ ᠣᠷᠣᠰ ᠠᠬᠠ 《ᠮᠣᠩᠭᠣᠯ ᠵᠥᠪᠯᠡᠯᠲᠦ ᠬᠣᠶᠠᠷ ᠠᠬᠠ ᠳᠡᠭᠦᠦ᠃ ᠭᠠᠷ ᠭᠠᠷ ᠡᠴᠡ ᠪᠡᠨ ᠪᠠᠷᠢᠯᠴᠠᠭᠠᠳ ᠶᠠᠪᠤᠭᠰᠠᠨ ᠴᠠᠭ ᠲᠤ᠌ ᠠᠯᠵᠠᠬᠤ ᠦᠭᠡᠢ》 ᠭᠡᠵᠦ ᠦᠷᠭᠦᠯᠵᠢ ᠬᠡᠯᠡᠳᠡᠭ ᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠣᠯ ᠮᠢᠨᠦ ᠴᠦ᠍ ᠠᠬᠠ ᠪᠠᠢᠭᠰᠠᠨ ᠶᠤᠮ᠃ ᠫᠧᠲ᠋ᠷ ᠺᠣᠮᠢᠰᠰᠠᠷ ᠭᠡᠳᠡᠭ ᠶᠤᠮ᠃ ᠲᠠ ᠲᠠᠨᠢᠬᠤ ᠤᠤ? ᠭᠡᠵᠦ ᠵᠢᠷᠭᠠᠯ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨᠢᠬᠤ ᠦᠭᠡᠢ ᠪᠠᠢᠬᠤ ᠠ᠋᠃ ᠨᠠᠮᠠᠶ᠋ᠢ ᠲᠤᠰᠠᠯᠠ ᠭᠡᠵᠦ ᠠᠷᠠᠳ ᠲᠦᠮᠡᠨ ᠮᠢᠨᠢ ᠶᠠᠪᠤᠭᠤᠯᠤᠭᠰᠠᠨ ᠪᠣᠯᠬᠣᠷ ᠪᠢ ᠡᠭᠦᠷᠭᠡ ᠪᠠᠨ ᠯᠠ ᠭᠦᠢᠴᠡᠳᠬᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠪᠠᠶᠠᠷᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠤᠱᠣ᠊᠃ ᠫᠣ ᠺᠤ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠶᠠᠮ! ᠭᠡᠵᠦ ᠵᠢᠷᠭᠠᠯ ᠤᠶᠠᠩᠭᠠᠯᠠᠭᠤᠯᠤᠨ ᠬᠡᠯᠡᠭᠡᠳ ᠡᠮᠴᠢ ᠳ᠋ᠦ᠍ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠥᠭᠪᠡ᠃ ᠡᠮᠴᠢ ᠵᠢᠷᠭᠠᠯ ᠬᠣᠶᠠᠷ ᠮᠣᠷᠳᠠᠬᠤ ᠭᠡᠵᠦ ᠪᠠᠢᠲᠠᠯᠠ ᠮᠣᠷᠢᠲᠠᠢ ᠬᠥᠮᠦᠨ ᠬᠦᠷᠢᠶᠡᠨ ᠦ᠌ ᠵᠦᠭ ᠡᠴᠡ ᠰᠠᠨᠳᠤᠷᠤᠨ ᠳᠠᠪᠬᠢᠵᠤ ᠢᠷᠡᠭᠡᠳ ᠯᠠᠮᠠ ᠨᠠᠷ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠡᠰᠡᠷᠭᠦᠴᠡᠨ ᠵᠡᠪᠰᠡᠭ ᠪᠠᠷᠢᠵᠤ ᠪᠣᠰᠤᠭᠰᠠᠨ ᠲᠤᠬᠠᠢ ᠮᠡᠳᠡᠭᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠠ ᠬᠣᠶᠠᠷ ᠪᠤᠰᠢᠭᠤᠬᠠᠨ ᠮᠣᠷᠳᠠᠵᠤ ᠶᠠᠪᠤ᠃ ᠱᠠᠭᠳᠠᠷ ᠴᠢ ᠲᠦᠷᠭᠡᠨ ᠶᠠᠪᠤᠵᠤ ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠬᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠪᠤᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠠᠮᠠ ᠨᠠᠷ ᠣᠯᠠᠨ᠃ ᠠᠶᠤᠯᠲᠠᠢ᠃ ᠲᠠ ᠪᠣᠯ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠨ᠃ ᠪᠣᠰᠢᠭᠣ ᠶᠠᠪᠤ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠵᠥᠪᠯᠡᠯᠲᠦ ᠬᠣᠶᠠᠷ ᠠᠬᠠ ᠳᠡᠭᠦᠦ᠃ ᠭᠠᠷ ᠭᠠᠷ ᠡᠴᠡ ᠪᠡᠨ ᠪᠠᠷᠢᠯᠴᠠᠵᠤ ᠶᠠᠪᠤᠭᠰᠠᠨ ᠴᠠᠭ ᠲᠤ᠌ ᠠᠯᠵᠠᠬᠤ ᠦᠭᠡᠢ ᠰᠢᠦ ᠳᠡ ᠭᠡᠳ ᠡᠮᠴᠢ ᠪᠠᠲᠤ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠭᠡᠳ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠪᠤᠬᠤ ᠦᠭᠡᠢ ᠭᠡᠯᠡ᠃
ᠡᠮᠴᠢ ᠶ᠋ᠢ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠲᠤ ᠴᠢᠷᠮᠠᠢᠨ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠯᠠᠮᠠ ᠨᠠᠷ ᠤ᠋ᠨ ᠪᠣᠰᠤᠯᠭᠠ ᠶ᠋ᠢᠨ ᠰᠤᠷᠠᠭ ᠢ᠋ᠶ᠋ᠠᠷ ᠰᠤᠮᠤ ᠶ᠋ᠢᠨ ᠵᠠᠷᠢᠮ ᠬᠥᠮᠦᠰ ᠵᠠᠢᠯᠠᠨ ᠠᠯᠠᠭᠠ ᠪᠣᠯᠪᠠ᠃ ᠬᠣᠷᠰᠢᠶᠠ ᠶ᠋ᠢᠨ ᠮᠠᠨᠠᠭᠠᠴᠢ ᠠᠷᠪᠠ ᠭᠠᠷᠤᠢ ᠰᠤᠮᠤ ᠲᠠᠢ ᠪᠢᠷᠳᠠᠩ ᠫᠤᠤ ᠪᠠᠨ ᠬᠠᠶᠠᠭᠠᠳ ᠠᠯᠠᠭᠠ ᠪᠣᠯᠤᠭᠰᠠᠨ ᠢ᠋ ᠡᠮᠴᠢ ᠳ᠋ᠦ᠍ ᠥᠭᠪᠡ᠃
ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ ᠲᠣᠯᠣᠭᠠᠢᠲᠠᠢ ᠳᠣᠯᠣᠭᠠᠨ ᠬᠥᠮᠦᠨ ᠫᠤᠤ ᠰᠤᠮᠤ ᠵᠡᠬᠡᠵᠦ ᠲᠥᠪ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠣᠷᠣᠢ ᠰᠤᠷᠭᠠᠭᠤᠯᠢ ᠤᠷᠤᠭᠤ ᠵᠡᠪᠰᠡᠭ ᠲᠡᠢ ᠯᠠᠮᠠ ᠨᠠᠷ ᠳᠠᠭᠠᠷᠢᠬᠤ ᠳ᠋ᠤ᠌ ᠫᠤᠤᠳᠠᠯᠴᠠᠪᠠ᠃ ᠪᠠᠲᠤ ᠡᠮᠴᠢ ᠬᠣᠶᠠᠷ ᠮᠠᠰᠢ ᠮᠡᠷᠭᠡᠨ ᠫᠤᠤᠳᠠᠵᠤ ᠪᠠᠷᠤᠭ ᠯᠠ ᠰᠤᠮᠤ ᠲᠣᠭᠠᠯᠠᠵᠤ ᠪᠠᠢᠯᠠ᠃
ᠰᠤᠮᠤ ᠶ᠋ᠢᠨ ᠳᠠᠷᠤᠭᠠ᠂ ᠬᠣᠷᠰᠢᠶᠠᠨ ᠤ᠋ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ ᠪᠠᠷᠤᠭ ᠯᠠ ᠡᠬᠢᠨ ᠦ᠌ ᠫᠤᠤ ᠶ᠋ᠢᠨ ᠳᠠᠭᠤ ᠪᠠᠷ ᠠᠯᠠᠭᠳᠠᠵᠤ᠂ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠬᠦᠨᠳᠦ ᠰᠢᠷᠠᠭᠳᠤᠬᠤ ᠳ᠋ᠤ᠌ ᠡᠮᠴᠢ ᠡᠭᠦᠷᠦᠨ ᠭᠡᠷ ᠤᠷᠤᠭᠤ ᠬᠥᠳᠡᠯᠬᠦ ᠭᠡᠲᠡᠯᠡ ᠰᠢᠷᠠᠭᠳᠤᠪᠠ᠃ ᠪᠠᠲᠤ ᠮᠥᠯᠬᠥᠭᠰᠡᠭᠡᠷ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠳ᠋ᠤ᠌ ᠦᠬᠦᠯᠦᠭᠦᠲᠡ ᠰᠢᠷᠠᠭᠳᠤᠭᠰᠠᠨ ᠡᠮᠴᠢ ᠮᠠᠭᠤ ᠠᠮᠢᠰᠬᠤᠭᠠ ᠲᠠᠢ ᠪᠠᠢᠪᠠ᠃ ᠪᠠᠲᠤ ᠲᠡᠪᠡᠷᠢᠨ ᠠᠪᠴᠤ 《ᠡᠮᠴᠢ ᠠ᠋!》 ᠭᠡᠵᠦ ᠬᠠᠰᠬᠢᠷᠪᠠ᠃
ᠡᠮᠴᠢ ᠶ᠋ᠢᠨ ᠨᠢᠳᠦ ᠭᠥᠯᠢᠷᠡᠨ ᠣᠭᠵᠣᠮ ᠢ᠋ᠶ᠋ᠠᠷ ᠠᠮᠢᠰᠬᠤᠭᠠᠳᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠪᠢ ᠴᠦ᠍ ᠥᠩᠭᠡᠷᠡᠯᠡ ᠪᠣᠯᠤᠯᠲᠠᠢ᠃ ᠯᠸᠨᠢᠩᠭᠷᠡᠳ᠋ ᠂ ᠨᠸᠸᠰᠺᠢ ᠶ᠋ᠢᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠡᠵᠢ ᠮᠢᠨᠢ ᠪᠣᠢ ᠁ ᠵᠠᠬᠢᠶᠠ》 ᠭᠡᠳ ᠳᠠᠭᠤ ᠲᠠᠰᠤᠷᠠᠨ ᠠᠮᠠ ᠨᠢ ᠬᠡᠳᠦ ᠳᠠᠬᠢᠨ ᠠᠩᠭᠠᠯᠵᠠᠭᠰᠠᠨ ᠢ᠋ᠶ᠋ᠠᠨ ᠪᠡᠶᠡ ᠨᠢ ᠰᠤᠯᠠᠷᠠᠭᠠᠳ ᠶᠠᠪᠤᠴᠢᠬᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠴᠢ ᠠ᠋! ᠡᠮᠴᠢ ᠠ᠋! ᠭᠡᠵᠦ ᠬᠡᠴᠢᠨᠡᠨ ᠬᠠᠰᠬᠢᠷᠤᠨ᠂ ᠰᠡᠭᠰᠦᠷᠪᠡᠴᠦ ᠳᠠᠬᠢᠨ ᠬᠠᠷᠢᠭᠤ ᠳᠠᠭᠤ ᠭᠠᠷᠤᠭᠰᠠᠨ ᠦᠭᠡᠢ᠃
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠴᠤ᠌ ᠰᠢᠷᠬᠠ ᠪᠠᠨ ᠳᠠᠭᠠᠭᠠᠯ ᠦᠭᠡᠢ ᠨᠠᠰᠤ ᠪᠠᠷᠠᠵᠤ᠂ ᠡᠪᠯᠡᠯ ᠦ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠱᠠᠭᠳᠠᠷ ᠭᠠᠷ ᠤ᠋ᠨ ᠪᠤᠯᠴᠢᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠠᠭᠳᠠᠪᠠ᠃
ᠢᠩᠭᠢᠭᠡᠳ ᠰᠤᠮᠤ ᠪᠠᠨ ᠳᠠᠭᠤᠰᠤᠨ ᠠᠷᠭᠠ ᠦᠭᠡᠢ ᠪᠣᠯᠵᠤ ᠬᠦᠴᠦᠨ ᠳ᠋ᠦ᠍ ᠲᠦᠷᠢᠭᠳᠡᠭᠰᠡᠨ ᠭᠤᠷᠪᠠᠨ ᠬᠥᠮᠦᠨ ᠬᠠᠷᠠᠩᠭᠤᠢ ᠶ᠋ᠢ ᠠᠰᠢᠭᠯᠠᠨ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠵᠢᠭᠤᠲᠠᠵᠤ ᠳᠥᠷᠪᠡᠳᠡᠬᠢ ᠰᠥᠨᠢ ᠶ᠋ᠢᠨ ᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠡᠰᠡᠭ ᠮᠣᠳᠣᠨ ᠳ᠋ᠤ᠌ ᠣᠷᠣᠪᠠ᠃
ᠲᠡᠳᠡ ᠰᠤᠮᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠶᠠᠷ ᠪᠢᠷᠳᠠᠩ ᠫᠤᠤ ᠪᠠᠨ ᠡᠭᠡᠯᠵᠢᠯᠡᠨ ᠡᠭᠦᠷᠴᠦ ᠶᠠᠪᠤᠬᠤ ᠳ᠋ᠤ᠌ ᠲᠡᠭᠦᠨ ᠡᠴᠡ ᠬᠦᠨᠳᠦ ᠶᠠᠭᠤᠮᠠ ᠡᠨᠡ ᠣᠷᠴᠢᠯᠠᠩ ᠳ᠋ᠤ᠌ ᠦᠭᠡᠢ ᠠᠵᠢ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠰᠤᠮᠤ ᠲᠠᠢ ᠫᠤᠤ ᠪᠣᠯ ᠬᠥᠩᠭᠡᠨ ᠪᠠᠢᠬᠤ ᠰᠠᠨ᠃ ᠰᠤᠮᠤ ᠲᠠᠢ ᠫᠤᠤ ᠪᠣᠯ ᠠᠮᠢ᠂ ᠠᠮᠢᠳᠤᠷᠠᠯ᠂ ᠬᠠᠷᠢᠨ ᠰᠤᠮᠤ ᠦᠭᠡᠢ ᠫᠤᠤ ᠪᠣᠯ ᠬᠦᠴᠦ ᠦᠭᠡᠢ᠂ ᠬᠦᠨᠳᠦ ᠠᠴᠢᠶᠠ᠃ ᠭᠡᠪᠡᠴᠦ ᠬᠠᠶᠠᠭᠰᠠᠨ ᠦᠭᠡᠢ᠃
ᠤᠴᠢᠷ ᠨᠢ ᠨᠢᠭᠡᠳᠦᠭᠡᠷ ᠲᠦ᠍ ᠬᠣᠭᠣᠰᠣᠨ ᠫᠤᠤ ᠡᠴᠡ ᠬᠣᠷᠢᠨ ᠬᠥᠮᠦᠨ ᠠᠶᠤᠨᠠ ᠭᠡᠵᠦ ᠦᠭᠡ ᠪᠠᠢᠳᠠᠭ᠃ ᠬᠣᠶᠠᠳᠤᠭᠠᠷ ᠲᠤ᠌ ᠰᠤᠮᠤ ᠣᠯᠳᠠᠪᠠᠯ ᠡᠨᠡ ᠬᠦᠨᠳᠦ ᠲᠡᠮᠦᠷ ᠰᠡᠷᠭᠦᠵᠦ ᠠᠮᠢ ᠣᠷᠣᠨᠠ᠃ ᠭᠤᠷᠪᠠᠳᠤᠭᠠᠷ ᠲᠤ᠌ ᠬᠣᠭᠣᠰᠣᠨ ᠴᠤ᠌ ᠭᠡᠰᠡᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠠᠶᠠᠪᠠᠯ ᠪᠦᠷᠢᠨ ᠢᠯᠠᠭᠳᠠᠭᠰᠠᠨ ᠤ᠋ ᠰᠢᠨᠵᠢ ᠪᠢᠯᠡ᠃ ᠭᠡᠲᠡᠯᠡ ᠡᠨᠡ ᠭᠤᠷᠪᠠᠨ ᠬᠥᠮᠦᠨ ᠢᠯᠠᠭᠳᠠᠭᠰᠠᠨ ᠭᠡᠵᠦ ᠣᠭᠲᠣ ᠪᠣᠳᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠲᠡᠮᠡᠴᠡᠯ ᠢ᠋ᠶ᠋ᠡᠨ ᠡᠬᠢᠯᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃ ᠡᠨᠡ ᠪᠣᠳᠣᠯ ᠴᠤ᠌ ᠲᠡᠳᠡᠨ ᠳ᠋ᠦ᠍ ᠬᠦᠴᠦ ᠴᠢᠳᠠᠯ᠂ ᠤᠬᠠᠭᠠᠨ ᠰᠠᠨᠠᠭᠠ ᠥᠭᠴᠦ ᠪᠠᠢᠯᠠ᠃
ᠥᠯᠥᠰᠦᠭᠰᠡᠨ ᠭᠡᠳᠡᠰᠦ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠮᠤᠰᠬᠢᠷᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠬᠤᠷᠴᠢᠭᠢᠨᠠᠬᠤ ᠪᠥᠭᠡᠳ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠢᠳᠡᠭᠰᠡᠨ ᠰᠠᠢᠬᠠᠨ ᠬᠣᠭᠣᠯᠠᠨ ᠤ᠋ ᠲᠤᠬᠠᠢ ᠪᠣᠳᠣᠯ ᠠᠯᠤᠰ ᠲᠤ᠌ ᠬᠠᠷᠠᠭᠳᠠᠬᠤ ᠶᠡᠬᠡ ᠲᠠᠯᠠ ᠶ᠋ᠢᠨ ᠵᠡᠷᠭᠡᠯᠭᠡᠨ ᠯᠦ᠍ᠭᠡ ᠠᠳᠠᠯᠢ ᠠᠵᠢ᠃ ᠤᠳᠠᠯ ᠦᠭᠡᠢ ᠮᠣᠳᠣᠨ ᠤ᠋ ᠣᠷᠣᠢ ᠳ᠋ᠤ᠌ ᠥᠷᠯᠥᠭᠡ ᠶ᠋ᠢᠨ ᠰᠢᠷᠠ ᠨᠠᠷᠠ ᠲᠣᠰᠴᠤ ᠵᠥᠭᠡᠯᠡᠨ ᠨᠣᠭᠣᠭᠠᠨ ᠲᠤᠶᠠᠭᠠ ᠪᠦᠬᠦᠨ ᠢ᠋ ᠭᠡᠢᠭᠦᠯᠪᠡ᠃
《ᠶᠠᠭᠠᠬᠢᠭᠠᠳ ᠴᠤ᠌ ᠪᠣᠯᠤᠭᠰᠠᠨ ᠠᠢᠮᠠᠭ ᠤ᠋ᠨ ᠲᠥᠪ ᠣᠷᠣᠬᠤ ᠬᠡᠷᠡᠭᠲᠡᠢ》 ᠭᠡᠰᠡᠨ ᠰᠠᠨᠠᠭᠠ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠬᠥᠯ ᠢ᠋ ᠠᠭᠠᠵᠢᠮ ᠪᠣᠯᠪᠠᠴᠤ ᠵᠥᠷᠢᠭᠦᠯᠡᠨ ᠣᠷᠣᠭᠰᠢ ᠠᠬᠢᠭᠤᠯᠤᠨᠠ᠃
ᠱᠠᠭᠳᠠᠷ ᠤ᠋ᠨ ᠰᠢᠷᠠᠭᠳᠤᠭᠰᠠᠨ ᠭᠠᠷ ᠨᠢ ᠶᠠᠩᠭᠢᠨᠠᠨ ᠡᠪᠡᠳᠪᠡᠴᠦ ᠰᠢᠲᠦ ᠵᠠᠭᠤᠨ ᠨᠥᠬᠥᠳ ᠲᠡᠭᠡᠨ ᠰᠢᠨᠠᠯᠵᠤ ᠪᠠᠢᠭᠠ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠷ ᠴᠢᠨᠢ ᠶᠠᠭᠠᠬᠢᠵᠤ ᠪᠠᠢᠨᠠ ᠭᠡᠵᠦ ᠬᠣᠶᠠᠷ ᠨᠥᠬᠥᠷ ᠨᠢ ᠵᠠᠷᠢᠮ ᠳ᠋ᠠᠭᠠᠨ ᠰᠢᠪᠡᠭᠡᠨᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠱᠠᠭᠳᠠᠷ ᠰᠢᠳᠦᠨ ᠦ᠌ ᠵᠠᠪᠰᠠᠷ ᠢ᠋ᠶ᠋ᠠᠷ 《ᠵᠦᠭᠡᠷ》 ᠭᠡᠵᠦ ᠬᠡᠢ ᠦᠯᠢᠶᠡᠨ ᠬᠠᠷᠢᠭᠤᠯᠤᠨᠠ᠃
ᠭᠡᠪᠡᠴᠦ ᠡᠨᠡ 《ᠵᠦᠭᠡᠷ》 ᠭᠡᠳᠡᠭ ᠦᠭᠡ ᠶ᠋ᠢᠨ ᠴᠠᠭᠠᠨᠠ ᠬᠠᠲᠠᠭᠤ ᠲᠡᠪᠴᠢᠶᠡᠷᠢ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠨᠥᠬᠥᠳ ᠨᠢ ᠰᠠᠢᠨ ᠣᠢᠯᠠᠭᠠᠵᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠮᠲᠤ ᠰᠢᠨᠠᠯᠭᠠᠨᠠ᠃ ᠮᠣᠷᠢᠨ ᠵᠢᠮ ᠨᠠᠷᠢᠰᠤᠨ ᠪᠦᠳᠡᠭᠢᠷᠡᠭᠰᠡᠭᠡᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠠᠷᠤᠯᠠ᠃
ᠲᠡᠷᠡ ᠵᠠᠮ ᠤ᠋ᠨ ᠠᠳᠠᠭ ᠲᠤ᠌ ᠬᠡᠳᠦᠨ ᠭᠡᠷ ᠪᠠᠢᠨᠠ ᠭᠡᠵᠦ ᠲᠦᠷᠦᠭᠦᠯᠡᠵᠦ ᠶᠠᠪᠤᠭᠰᠠᠨ ᠵᠢᠷᠭᠠᠯ ᠬᠡᠯᠡᠭᠡᠳ ᠵᠣᠭᠰᠣᠨ ᠮᠠᠩᠨᠠᠢ ᠶ᠋ᠢᠨ ᠬᠥᠯᠥᠰᠥ ᠪᠡᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃ ᠪᠠᠲᠤ᠂ ᠱᠠᠭᠳᠠᠷ ᠤ᠋ᠨ ᠡᠷᠡᠭᠦᠯ ᠭᠠᠷ ᠡᠴᠡ ᠰᠤᠭᠤᠳᠠᠨ ᠲᠤᠰᠠᠯᠠᠵᠤ ᠮᠠᠴᠤᠭᠰᠠᠭᠠᠷ ᠵᠢᠷᠭᠠᠯ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠠᠮᠢᠰᠬᠤᠭᠠᠳᠠᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ 《ᠲᠠᠮᠢᠷ᠂ ᠲᠤᠩᠭᠠᠯᠠᠭ ᠲᠠᠮᠢᠷ》 ᠭᠡᠳ ᠳᠣᠣᠷᠠᠲᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠴᠢᠭᠢᠭᠯᠡᠪᠡ᠃
ᠲᠡᠷᠲᠡᠭᠡ ᠡᠮᠦᠨᠡ ᠵᠦᠭ ᠲᠦ᠍ ᠮᠠᠨᠠᠷᠠᠨ ᠬᠠᠷᠠᠭᠳᠠᠬᠤ ᠬᠥᠬᠡ ᠠᠭᠤᠯᠠ ᠶ᠋ᠢᠨ ᠨᠠᠭᠠᠳᠤ ᠲᠠᠯᠠ ᠪᠠᠷ ᠮᠠᠬᠢᠷᠯᠠᠨ ᠤᠷᠤᠰᠴᠤ ᠪᠠᠢᠭᠠ ᠲᠠᠮᠢᠷ ᠭᠣᠣᠯ ᠤ᠋ᠨ ᠮᠠᠨᠳᠠᠯ ᠨᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠴᠠᠢᠷᠠᠨ ᠬᠠᠷᠠᠭᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠢᠮᠠᠭ ᠬᠦᠷᠲᠡᠯᠡ ᠥᠷᠲᠡᠭᠡ ᠭᠠᠷᠤᠢ ᠦᠯᠡᠳᠡᠭᠡᠳ ᠪᠠᠢᠨᠠ ᠤᠤ? ᠭᠡᠵᠦ ᠱᠠᠭᠳᠠᠷ ᠠᠰᠠᠭᠤᠭᠠᠳ ᠳᠡᠷᠭᠡᠳᠡ ᠪᠡᠨ ᠪᠠᠢᠭᠰᠠᠨ ᠲᠣᠮᠣ ᠴᠢᠯᠠᠭᠤᠨ ᠳᠡᠭᠡᠷᠡ ᠰᠠᠨᠳᠠᠢᠯᠠᠨ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠯᠡ ᠪᠠᠢᠬᠤ ᠳᠠ ᠭᠡᠳ ᠪᠠᠲᠤ ᠪᠦᠳᠦᠭᠦᠨ ᠬᠠᠷᠠ ᠮᠣᠳᠣ ᠶ᠋ᠢ ᠲᠦᠰᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠭ ᠨᠢ ᠶᠠᠭᠤᠮᠠ ᠦᠭᠡᠢ ᠦᠯᠡᠳᠡᠵᠦ ᠪᠠᠢᠨᠠ ᠰᠠᠨᠵᠢ ᠳᠠ ᠭᠡᠳ ᠵᠢᠷᠭᠠᠯ ᠡᠪᠦᠷ ᠲᠦᠷᠡᠢ ᠪᠡᠨ ᠬᠡᠢ ᠲᠡᠮᠲᠡᠷᠢᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠠᠯᠳᠠᠪᠠ᠃
ᠬᠠᠲᠠᠭᠤ ᠲᠠᠮᠠᠬᠢ ᠬᠡᠳᠦᠬᠡᠨ ᠰᠣᠷᠣᠬᠤ ᠰᠠᠨ ᠭᠡᠳᠡᠭ ᠪᠣᠳᠣᠯ ᠵᠢᠷᠭᠠᠯ ᠤ᠋ᠨ ᠰᠡᠳᠬᠢᠯ ᠢ᠋ ᠮᠠᠭᠠᠵᠢᠬᠤ ᠳ᠋ᠤ᠌ ᠬᠣᠭᠣᠯᠠᠢ ᠨᠢ ᠬᠠᠲᠠᠵᠤ᠂ ᠲᠣᠯᠣᠭᠠᠢ ᠨᠢ ᠦᠯᠦ ᠮᠡᠳᠡᠭ ᠡᠪᠡᠳᠬᠦ ᠰᠢᠭ ᠰᠠᠨᠠᠭᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠢ ᠦᠭᠡᠢ ᠳᠡ᠃ ᠠᠢᠮᠠᠭ ᠳᠡᠭᠡᠷᠡ ᠣᠴᠢᠵᠤ ᠵᠡᠪᠰᠡᠭᠵᠢᠵᠦ ᠠᠪᠤᠭᠠᠳ ᠡᠷᠭᠢᠭᠰᠡᠨ ᠴᠠᠭ ᠲᠤ᠌ ᠤᠤ᠃ ᠡᠨᠡ ᠮᠤᠤᠰᠠᠢᠨ ᠡᠰᠡᠷᠭᠦᠦ ᠨᠠᠷ ᠲᠤ᠌ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠦᠴᠦ ᠶ᠋ᠢ ᠠᠮᠲᠠᠯᠠᠭᠤᠯᠤᠨᠠ ᠳᠠ ᠭᠡᠵᠦ ᠱᠠᠭᠳᠠᠷ ᠬᠡᠯᠡᠭᠡᠳ ᠤᠬᠤᠰᠬᠢᠨ ᠪᠣᠰᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠭᠠᠷ ᠢ᠋ᠶ᠋ᠠᠨ ᠬᠥᠨᠳᠡᠵᠦ ᠨᠢᠭᠤᠷ ᠨᠢ ᠭᠠᠯ ᠳ᠋ᠤ᠌ ᠬᠢᠭᠰᠡᠨ ᠰᠢᠷᠠ ᠲᠣᠰᠣᠨ ᠤ᠋ ᠭᠦᠵᠡᠭᠡ ᠰᠢᠭ ᠬᠤᠨᠢᠷᠠᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠪᠢ ᠡᠨᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠭᠠᠨᠠ ᠳᠠ ᠭᠡᠳ ᠵᠢᠷᠭᠠᠯ ᠵᠠᠩᠭᠢᠳᠤᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠩᠭᠠᠬᠤ ᠳ᠋ᠤ᠌ ᠴᠡᠴᠡᠷᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠷᠢᠶᠡ ᠶᠠᠮᠠᠷ ᠭᠡᠮ ᠲᠡᠢ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠷ ᠨᠢ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠷ ᠢ᠋ ᠨᠢ ᠤᠰᠠᠳᠬᠠᠬᠤ ᠳ᠋ᠤ᠌ ᠴᠢᠨᠣᠠ ᠦᠬᠦᠳᠡᠭ ᠦᠭᠡᠢ ᠭᠡᠳ ᠪᠠᠲᠤ ᠵᠢᠷᠭᠠᠯ ᠢ᠋ ᠬᠠᠷᠠᠪᠠ᠃ ᠠᠢᠮᠠᠭ ᠳᠡᠭᠡᠷᠡ ᠣᠴᠢᠨᠠ ᠭᠡᠳᠡᠭ ᠪᠣᠯ ᠠᠪᠤᠷᠠᠭᠳᠠᠬᠤ ᠶ᠋ᠢᠨ ᠨᠡᠷᠡ᠃ ᠰᠢᠨᠡ ᠬᠦᠴᠦ ᠣᠯᠵᠤ ᠵᠠᠳᠠᠷᠠᠭᠰᠠᠨ ᠡᠰᠡᠷᠭᠦᠦ ᠨᠠᠷ ᠲᠠᠢ ᠲᠡᠮᠡᠴᠡᠵᠦ ᠢᠯᠠᠬᠤ ᠶ᠋ᠢᠨ ᠨᠡᠷᠡ ᠪᠢᠯᠡ᠃ ᠭᠡᠪᠡᠴᠦ ᠠᠢᠮᠠᠭ ᠳᠡᠭᠡᠷᠡ ᠣᠴᠢᠬᠤ ᠳ᠋ᠤ᠌ ᠲᠠ ᠨᠠᠷ ᠰᠤᠷᠭᠠᠭᠤᠯᠢ᠂ ᠬᠤᠷᠰᠢᠶᠠ ᠵᠡᠷᠭᠡ ᠶ᠋ᠢ ᠣᠷᠬᠢᠨ ᠠᠮᠢ ᠵᠤᠯᠪᠠᠨ ᠵᠢᠭᠤᠲᠠᠵᠤ ᠢᠷᠡᠭᠰᠡᠨ ᠭᠡᠵᠦ ᠶᠠᠯᠠ ᠲᠤᠯᠭᠠᠵᠤ ᠮᠠᠭᠠᠳ᠃ ᠡᠨᠡ ᠵᠠᠰᠠᠭ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠦᠢᠮᠡᠭᠡᠨ ᠭᠠᠷᠬᠤ ᠰᠡᠵᠢᠭ ᠢ᠋ ᠮᠡᠳᠡᠭᠡᠳ ᠮᠡᠳᠡᠭᠳᠡᠭᠰᠡᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠠᠷᠠᠳ ᠲᠦᠮᠡᠨ ᠢ᠋ ᠢᠲᠡᠭᠡᠳᠡᠭ ᠦᠭᠡᠢ᠂ ᠴᠤᠤᠷᠬᠠᠯ ᠳᠡᠭᠳᠡᠭᠡᠭᠴᠢ ᠭᠡᠳᠡᠭ ᠨᠡᠷᠡ ᠠᠪᠴᠤ ᠵᠢᠮᠡᠯᠡᠯ ᠬᠦᠯᠢᠶᠡᠭᠰᠡᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠦᠭᠡ ᠲᠤᠭᠤᠯᠵᠤ ᠪᠣᠯᠬᠤ ᠮᠡᠲᠦ᠃ ᠭᠡᠬᠦ ᠳ᠋ᠡᠭᠡᠨ ᠵᠠᠷᠢᠮ ᠬᠥᠮᠦᠨ ᠲᠡᠢ ᠠᠳᠠᠯᠢᠬᠠᠨ ᠡᠰᠡᠷᠭᠦᠦ ᠨᠠᠷ ᠲᠠᠢ ᠨᠡᠢᠯᠡᠭᠡ ᠦᠭᠡᠢ ᠪᠣᠯᠬᠣᠷ ᠲᠡᠳᠡᠨ ᠲᠡᠢ ᠵᠡᠪᠰᠡᠭ ᠪᠠᠷᠢᠨ ᠲᠡᠮᠡᠴᠡᠭᠰᠡᠨ᠂ ᠬᠡᠷᠪᠡ ᠰᠤᠮᠤ ᠲᠠᠢ ᠪᠠᠢᠭᠰᠠᠨ ᠪᠣᠯ ᠵᠣᠭᠰᠣᠯᠲᠠ ᠦᠭᠡᠢ ᠫᠤᠤᠳᠠᠯᠴᠠᠬᠤ ᠨᠢ ᠦᠨᠡᠨ ᠪᠣᠯᠬᠣᠷ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠬᠥᠩᠭᠡᠨ ᠪᠠᠢᠯᠠ᠃ ᠳᠣᠬᠢᠶᠠ ᠥᠭᠭᠦᠭᠡᠳ ᠪᠠᠢᠬᠤ ᠳ᠋ᠤ᠌ ᠶᠠᠭᠤ ᠴᠤ᠌ ᠬᠢᠭᠡ ᠦᠭᠡᠢ ᠴᠠᠭ ᠠᠯᠳᠠᠭᠰᠠᠨ ᠭᠡᠮ ᠲᠡᠢ ᠬᠥᠮᠦᠰ ᠲᠡᠢ ᠶᠠᠷᠢᠬᠤ ᠬᠡᠷᠡᠭᠲᠡᠢ᠃ ᠭᠡᠪᠡᠴᠦ ᠣᠳᠣ ᠲᠡᠭᠦᠨ ᠢ᠋ ᠬᠥᠭᠡᠭᠡᠴᠡᠯᠳᠦᠬᠦ ᠴᠠᠭ ᠪᠢᠰᠢ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠵᠡᠪᠰᠡᠭ ᠪᠠᠷᠢᠵᠤ ᠠᠷᠠᠳ ᠤ᠋ᠨ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠨᠢ ᠴᠢᠬᠤᠯᠠ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠬᠡᠨ ᠨᠢ ᠶᠠᠭᠤᠨ ᠳᠡᠭᠡᠷᠡ ᠠᠯᠳᠠᠭᠰᠠᠨ᠂ ᠬᠣᠵᠢᠭᠰᠠᠨ ᠢ᠋ ᠶᠠᠷᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠪᠠᠲᠤ ᠪᠣᠳᠣᠨᠠ᠃
ᠫᠦᠯᠧᠮᠶᠣᠲ᠂ ᠶᠡᠬᠡ ᠫᠤᠤ᠂ ᠨᠢᠰᠬᠦ ᠣᠩᠭᠣᠴᠠ ᠠᠪᠴᠢᠷᠠᠵᠤ ᠡᠨᠡ ᠪᠠᠯᠠᠮᠠᠳ ᠬᠤᠯᠠᠭᠠᠢ ᠨᠠᠷ ᠢ᠋ ᠲᠡᠳᠡᠨ ᠦ᠌ ᠬᠦᠷᠢᠶᠡ ᠬᠡᠢᠳ᠂ ᠢᠯᠠᠩᠭᠤᠶᠠ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠡᠴᠡ ᠠᠷᠴᠢᠪᠠᠯ ᠵᠣᠬᠢᠨᠠ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠡᠨᠡ ᠬᠡᠷᠡᠭ ᠲᠦ᠍ ᠣᠷᠣᠭᠰᠠᠨ ᠪᠦᠬᠦᠨ ᠢ᠋ ᠢᠯᠠᠩᠭᠤᠶᠠ ᠵᠠᠢᠯᠠᠵᠤ ᠠᠯᠠᠭᠠ ᠪᠣᠯᠤᠭᠰᠠᠨ ᠬᠠᠮᠲᠤᠷᠠᠯ ᠤ᠋ᠨ ᠣᠷᠣᠯᠠᠭᠴᠢ ᠳᠠᠷᠤᠭᠠ ᠶ᠋ᠢ ᠫᠤᠤᠳᠠᠨ ᠠᠯᠠᠬᠤ ᠪᠠᠭᠠ ᠪᠠᠢᠨᠠ᠂ ᠴᠠᠪᠴᠢᠵᠤ ᠠᠯᠠᠪᠠᠯ ᠲᠠᠭᠠᠷᠠᠨᠠ᠃ ᠵᠠ ᠶᠠᠭᠠᠬᠢᠬᠤᠪ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠵᠢᠷᠭᠠᠯ ᠪᠠᠭᠰᠢ ᠫᠦᠯᠧᠮᠶᠣᠲ ᠪᠠᠷᠢᠵᠤ ᠢᠷᠡᠭᠡᠳ ᠲᠠ ᠨᠠᠷ ᠲᠤ᠌ ᠰᠠᠢᠬᠠᠨ ᠬᠢᠴᠢᠶᠡᠯ ᠵᠢᠭᠠᠵᠤ ᠥᠭᠭᠦᠨᠡ᠃ ᠠᠭᠤᠯᠵᠠᠬᠤ ᠴᠠᠭ ᠪᠣᠢ ᠭᠡᠵᠦ ᠵᠢᠷᠭᠠᠯ ᠰᠡᠳᠬᠢᠯ ᠳ᠋ᠡᠭᠡᠨ ᠶᠠᠷᠢᠨᠠ᠃
ᠠᠢ ᠳᠠ᠃ ᠡᠨᠡ ᠮᠠᠭᠤ ᠭᠠᠷ ᠶᠠᠭᠤ ᠪᠣᠯᠬᠤ ᠶᠤᠮ ᠪᠣᠯ ᠳᠠ᠃ ᠨᠢᠭᠡ ᠬᠤᠷᠳᠤᠨ ᠫᠤᠤ᠂ ᠮᠢᠩᠭᠠᠨ ᠰᠤᠮᠤ ᠲᠠᠢ ᠪᠣᠯ ᠲᠠ ᠨᠠᠷ ᠢ᠋ ᠤᠤ ᠳᠠ᠃ ᠲᠡᠷᠡ ᠭᠡᠷ ᠬᠤᠳᠬᠤᠯᠠᠳᠠᠭ ᠯᠠᠮᠠ ᠶ᠋ᠢ ᠠᠯᠠᠵᠤ ᠣᠷᠬᠢᠭᠰᠠᠨ ᠪᠣᠯ ᠡᠢᠮᠦ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ ᠴᠦ᠍ ᠪᠠᠢᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠶᠤᠮ᠃ ᠪᠠᠲᠤ ᠴᠤ᠌ ᠲᠡᠭᠦᠨ ᠳᠡᠭᠡᠷᠡ ᠮᠠᠭᠤᠬᠠᠢ ᠠᠯᠳᠠᠭᠰᠠᠨ ᠳᠠ᠃ ᠬᠠᠷᠢᠨ ᠱᠠᠰᠢᠨ ᠪᠤᠷᠬᠠᠨ ᠢ᠋ ᠪᠦᠳᠦᠭᠦᠯᠢᠭ ᠢ᠋ᠶ᠋ᠡᠷ ᠳᠣᠷᠣᠮᠵᠢᠯᠠᠭᠰᠠᠨ ᠡᠴᠡ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠣᠯᠠᠨ ᠬᠥᠮᠦᠨ ᠢ᠋ ᠪᠢᠳᠡ ᠳᠠᠢᠰᠤᠨ ᠤ᠋ ᠲᠠᠯᠠ ᠳ᠋ᠤ᠌ ᠥᠭᠭᠦᠭᠰᠡᠨ ᠭᠡᠵᠦ ᠪᠠᠲᠤ ᠶ᠋ᠢᠨ ᠬᠡᠯᠡᠳᠡᠭ ᠴᠦ᠍ ᠭᠣᠣᠯ ᠲᠠᠢ ᠪᠠᠢᠬᠤ ᠰᠢᠦ ᠭᠡᠵᠦ ᠱᠠᠭᠳᠠᠷ ᠪᠣᠳᠣᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠠᠯᠬᠤᠭᠠᠳ ᠪᠠᠢᠳᠠᠭ ᠬᠡᠷᠡᠭ ᠠ᠋ ᠭᠡᠳ ᠪᠠᠲᠤ ᠲᠦᠷᠦᠭᠦᠯᠡᠨ ᠬᠥᠳᠡᠯᠬᠦ ᠭᠡᠲᠡᠯᠡ ᠬᠠᠵᠠᠭᠤ ᠶ᠋ᠢᠨ ᠮᠣᠳᠣᠨ ᠳᠣᠲᠣᠷᠠ ᠡᠴᠡ 《ᠵᠣᠭᠰᠣ᠃ ᠭᠠᠷ ᠢ᠋ᠶ᠋ᠠᠨ ᠡᠷᠭᠦ》 ᠭᠡᠵᠦ ᠬᠡᠳᠦᠨ ᠬᠥᠮᠦᠨ ᠣᠭᠵᠣᠮ ᠪᠥᠭᠡᠳ ᠭᠡᠨᠡᠳᠲᠡ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠤᠷᠪᠠᠨ ᠨᠥᠬᠥᠳ ᠰᠣᠴᠢᠨ ᠤᠬᠤᠰᠬᠢᠭᠰᠡᠨ ᠢ᠋ᠶ᠋ᠡᠨ ᠵᠠᠮᠤᠭ ᠤ᠋ᠨ ᠲᠠᠴᠢᠭᠢᠨᠠᠬᠤ ᠳᠠᠭᠤ ᠪᠠᠷ ᠵᠣᠭᠰᠣᠵᠤ ᠡᠷᠭᠢᠵᠦ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠫᠤᠤ ᠪᠠᠨ ᠬᠠᠶᠠ᠃ ᠭᠠᠷ ᠢ᠋ᠶ᠋ᠠᠨ ᠡᠷᠭᠦ᠃ ᠬᠥᠳᠡᠯᠪᠡᠯ ᠫᠤᠤᠳᠠᠨᠠ ᠰᠢᠦ ᠭᠡᠵᠦ ᠵᠡᠭᠦᠨ ᠬᠠᠵᠠᠭᠤ ᠶ᠋ᠢᠨ ᠮᠣᠳᠣᠨ ᠳᠣᠲᠣᠷᠠ ᠡᠴᠡ ᠨᠢᠭᠡ ᠬᠥᠮᠦᠨ ᠬᠠᠰᠬᠢᠷᠬᠤ ᠳ᠋ᠤ᠌ ᠪᠠᠲᠤ ᠬᠠᠷᠠᠪᠠᠯ ᠨᠣᠭᠣᠭᠠᠨ ᠴᠠᠮᠴᠠ᠂ ᠥᠮᠥᠳᠥ ᠲᠡᠢ ᠬᠡᠳᠦᠨ ᠴᠡᠷᠢᠭ ᠦ᠋ᠳ ᠫᠤᠤ ᠱᠠᠭᠠᠢᠨ ᠬᠡᠪᠲᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠡᠰᠡᠷᠭᠦᠦ ᠨᠠᠷ ᠪᠢᠰᠢ ᠠ᠋ ᠭᠡᠳ ᠪᠠᠲᠤ ᠮᠥᠷᠦᠨ ᠳ᠋ᠡᠭᠡᠨ ᠪᠠᠢᠭᠰᠠᠨ ᠫᠤᠤ ᠪᠠᠨ ᠠᠪᠴᠤ ᠲᠠᠯᠪᠢᠭᠠᠳ ᠠᠯᠭᠤᠷ ᠢ᠋ᠶ᠋ᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠳ᠋ᠦ᠍ ᠨᠥᠬᠥᠳ ᠦ᠋ᠨ ᠬᠢᠨᠢ ᠭᠠᠷ ᠬᠣᠯᠪᠣᠭᠠ ᠲᠠᠢ ᠶᠤᠮ ᠰᠢᠭ᠋ ᠳᠡᠭᠡᠭᠰᠢ ᠪᠣᠯᠪᠠ᠃
ᠮᠣᠳᠣᠨ ᠳᠣᠲᠣᠷᠠ ᠡᠴᠡ ᠫᠤᠤ ᠲᠠᠢ ᠠᠷᠪᠠᠭᠠᠳ ᠴᠡᠷᠢᠭ ᠭᠠᠷᠴᠤ ᠢᠷᠡᠯᠡ᠃
ᠮᠠᠨ ᠤ᠋ ᠬᠢᠨ ᠭᠡᠵᠦ ᠱᠠᠭᠳᠠᠷ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠬᠢᠬᠤᠲᠤᠨᠠᠭᠤᠯᠤᠨ ᠬᠡᠯᠡᠬᠦ ᠳ᠋ᠦ᠍ ᠨᠢᠳᠦᠨ ᠡᠴᠡ ᠨᠢ ᠲᠣᠮᠣ ᠲᠣᠮᠣ ᠨᠢᠯᠪᠤᠰᠤ ᠳᠤᠰᠤᠯᠠᠪᠠ᠃ ᠢᠩᠭᠢᠵᠦ ᠭᠤᠷᠪᠠᠨ ᠨᠥᠬᠥᠳ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠰᠠᠯᠠᠭᠠ ᠲᠠᠢ ᠠᠭᠤᠯᠵᠠᠵᠤ ᠶᠠᠭᠤᠨ ᠤ᠋ ᠡᠮᠦᠨᠡ ᠱᠠᠭᠳᠠᠷ ᠤ᠋ᠨ ᠰᠢᠷᠬᠠ ᠶ᠋ᠢ ᠪᠣᠭᠤᠯᠭᠠᠵᠤ ᠳᠠᠷᠠᠭᠠ ᠨᠢ ᠬᠣᠭᠣᠯᠠ ᠢᠳᠡᠵᠦ ᠭᠣᠣᠯ ᠣᠷᠣᠭᠠᠳ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠶᠠᠷᠢᠵᠤ ᠥᠭᠭᠦᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠪᠣᠯᠪᠠᠯ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠮᠡᠳᠡᠬᠦ ᠦᠭᠡᠢ ᠤᠴᠢᠷ ᠡᠴᠡ ᠳᠠᠢᠰᠤᠨ ᠳ᠋ᠤ᠌ ᠢᠯᠠᠭᠳᠠᠭᠰᠠᠨ ᠪᠠᠢᠨᠠ᠃ ᠬᠡᠳᠦᠢ ᠲᠡᠢᠮᠦ ᠪᠣᠯᠪᠠᠴᠤ ᠲᠠ ᠨᠥᠬᠥᠳ ᠤᠯᠤᠰ ᠬᠤᠪᠢᠰᠬᠠᠯ ᠤ᠋ᠨ ᠲᠥᠯᠥᠭᠡ ᠪᠢᠷᠳᠠᠩ ᠫᠤᠤ ᠪᠠᠷᠢᠨ ᠪᠠᠢᠯᠳᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠡᠳᠦᠨ ᠨᠥᠬᠥᠳ ᠴᠢᠨᠢ ᠤᠯᠠᠭᠠᠨ ᠴᠢᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠭᠰᠠᠨ ᠭᠠᠪᠢᠶᠠ ᠶ᠋ᠢ ᠪᠢᠳᠡ ᠰᠠᠢᠰᠢᠶᠠᠨ ᠦᠵᠡᠵᠦ ᠭᠠᠵᠠᠷᠴᠢ ᠪᠠᠷ ᠠᠪᠤᠨᠠ᠃ ᠠᠩᠭᠢ ᠶ᠋ᠢᠨ ᠳᠠᠢᠰᠤᠨ ᠲᠠᠢ ᠭᠠᠩ ᠵᠣᠷᠢᠭᠲᠠᠢ ᠲᠡᠮᠡᠴᠡᠬᠦ ᠲᠠᠩᠭᠠᠷᠢᠭ ᠡᠷᠭᠦᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠰᠠᠯᠠᠭᠠᠨ ᠳᠠᠷᠤᠭᠠ ᠵᠠᠯᠠᠭᠤ ᠡᠷᠡ ᠣᠢᠪᠣᠷᠭᠠᠨ ᠣᠭᠵᠣᠮ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
《ᠤᠩᠭᠢᠷᠠᠭᠠᠨ ᠬᠥᠮᠦᠨ ᠪᠠᠢᠨᠠ ᠳᠠ》 ᠭᠡᠵᠦ ᠪᠠᠲᠤ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᠰᠥᠬᠥᠷᠡᠨ ᠰᠠᠭᠤᠵᠤ ᠲᠠᠩᠭᠠᠷᠢᠭ ᠡᠷᠭᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠳ᠋ᠦ᠍ ᠵᠡᠪᠰᠡᠭ ᠬᠡᠷᠡᠭ ᠲᠡᠢ᠃ ᠡᠰᠡᠷᠭᠦᠦ ᠨᠠᠷ ᠢ᠋ ᠤᠤ᠃ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠨᠢ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠭᠠᠨᠠ ᠳᠠ ᠭᠡᠵᠦ ᠵᠢᠷᠭᠠᠯ ᠨᠢᠳᠦ ᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠤᠷᠤᠭᠤ᠃ ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠬᠦᠴᠦᠨ ᠳ᠋ᠦ᠍ ᠠᠪᠤᠭᠳᠠᠨ ᠳᠠᠭᠠᠵᠤ ᠶᠠᠪᠤᠭᠠ ᠶᠠᠳᠠᠭᠤ ᠪᠠᠭᠤᠷᠠᠢ ᠬᠥᠮᠦᠰ ᠪᠣᠢ᠃ ᠲᠡᠭᠦᠨ ᠢ᠋ ᠫᠤᠤᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠡᠨᠡ ᠲᠡᠢᠨ ᠪᠣᠯ ᠠᠩᠭᠢ ᠶ᠋ᠢᠨ ᠲᠡᠢᠨ ᠶᠤᠮ᠃ ᠪᠢᠳᠡ ᠣᠭᠠᠭᠤᠯᠤᠨ ᠰᠡᠩᠬᠡᠷᠡᠭᠦᠯᠬᠦ ᠠᠷᠭᠠ ᠪᠠᠷ ᠠᠷᠠᠳ ᠲᠦᠮᠡᠨ ᠢ᠋ ᠡᠰᠡᠷᠭᠦᠦ ᠨᠠᠷ ᠡᠴᠡ ᠰᠠᠯᠭᠠᠵᠤ ᠴᠢᠳᠠᠬᠤ ᠬᠡᠷᠡᠭᠲᠡᠢ᠃ ᠡᠭᠦᠨ ᠦ᠌ ᠲᠤᠯᠠ ᠳᠠᠷᠤᠭᠠ ᠮᠢᠨᠦ ᠲᠤᠰᠢᠶᠠᠯ ᠦᠭᠡᠢ ᠪᠡᠷ ᠫᠤᠤᠳᠠᠭᠰᠠᠨ ᠬᠥᠮᠦᠨ ᠢ᠋ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠨᠠ᠃ ᠣᠢᠯᠠᠭᠠᠪᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠢᠯᠠᠭᠠᠯᠠ ᠭᠡᠵᠦ ᠱᠠᠭᠳᠠᠷ ᠥᠴᠢᠪᠡ᠃
ᠲᠡᠷᠡ ᠭᠤᠷᠪᠠ ᠳ᠋ᠤ᠌ ᠮᠣᠷᠢ᠂ ᠵᠠᠭᠤ ᠵᠠᠭᠤᠨ ᠰᠤᠮᠤ ᠲᠠᠢ ᠭᠤᠷᠪᠠᠨ ᠸᠢᠨᠲ᠋ᠣᠸ ᠥᠭᠴᠦ ᠶᠠᠪᠤᠭᠰᠠᠭᠠᠷ ᠬᠡᠳᠦ ᠬᠡᠳᠦᠨ ᠬᠣᠲᠠ ᠠᠢᠯ ᠲᠠᠢ ᠲᠣᠬᠢᠶᠠᠯᠳᠤᠭᠰᠠᠨ ᠠᠪᠠᠴᠤ ᠡᠵᠡᠳ ᠨᠢ ᠦᠭᠡᠢ ᠠᠵᠢ᠃ ᠵᠠᠷᠢᠮ ᠠᠢᠯ ᠤ᠋ᠨ ᠬᠤᠷᠠᠭᠠ ᠨᠢ ᠬᠠᠰᠢᠶᠠ ᠲᠠᠢ ᠬᠡᠪ ᠢ᠋ᠶ᠋ᠡᠷ᠂ ᠵᠠᠷᠢᠮ ᠤ᠋ᠨ ᠬᠢᠨᠢ ᠪᠦᠷᠢᠭᠰᠡᠨ ᠲᠠᠷᠠᠭ ᠨᠢ ᠬᠤᠴᠢᠭᠠᠰᠤᠲᠠᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃
ᠬᠣᠶᠠᠷ ᠲᠠᠬᠢ ᠡᠳᠦᠷ ᠦ᠋ᠨ ᠨᠠᠷᠠ ᠰᠢᠩᠭᠡᠬᠦ ᠬᠢᠷᠢ ᠳ᠋ᠦ᠍ ᠨᠢᠭᠡᠨ ᠵᠢᠵᠢᠭᠬᠡᠨ ᠲᠣᠯᠣᠭᠠᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠭᠤᠵᠤ ᠬᠠᠷᠠᠭᠤᠯ ᠮᠠᠨᠠᠭᠠ ᠪᠠᠨ ᠲᠠᠯᠪᠢᠨ ᠬᠣᠨᠣᠬᠤ ᠪᠣᠯᠪᠠ᠃ ᠲᠩᠷᠢ ᠳ᠋ᠦ᠍ ᠨᠢᠭᠡ ᠴᠦ᠍ ᠡᠭᠦᠯᠡ ᠦᠭᠡᠢ᠂ ᠰᠡᠷᠢᠭᠦᠨ ᠪᠥᠭᠡᠳ ᠠᠷᠢᠭᠤᠬᠠᠨ ᠰᠠᠯᠬᠢ ᠦᠯᠢᠶᠡᠨᠡ᠃ ᠬᠣᠶᠠᠷ ᠠᠩᠭᠢᠷ ᠡᠮᠦᠨᠡ ᠵᠦᠭ ᠢ᠋ ᠪᠠᠷᠢᠨ ᠰᠢᠭᠤᠳ ᠳᠡᠪᠢᠭᠰᠡᠭᠡᠷ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠪᠠ᠃
ᠨᠢᠯᠬᠠ ᠨᠣᠭᠣᠭᠠᠨ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠮᠣᠷᠢᠳ ᠤ᠋ᠨ ᠲᠤᠷᠭᠢᠬᠤ ᠴᠢᠮᠡᠭᠡ᠂ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠦᠩᠭᠡᠷ ᠳᠦᠩᠭᠡᠷ ᠶᠠᠷᠢᠯᠴᠠᠬᠤ ᠲᠠᠢ ᠬᠣᠯᠢᠯᠳᠤᠨ ᠦᠷᠭᠦᠯᠵᠢᠯᠡᠭᠰᠡᠨ ᠪᠢᠲᠡᠭᠦᠦ ᠱᠤᠤᠭᠢᠶᠠᠨ ᠭᠠᠷᠴᠤ ᠪᠠᠢᠯᠠ᠃ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠡᠬᠢᠯᠡᠵᠦ ᠣᠳᠣᠳ ᠰᠦᠮᠡᠭ ᠭᠡᠷᠡᠯ ᠢ᠋ᠶ᠋ᠡᠷ ᠲᠠᠲᠠᠪᠠᠯᠵᠠᠨ ᠠᠨᠢᠪᠴᠢᠵᠤ ᠭᠢᠯᠠᠯᠵᠠᠬᠤ ᠨᠢ ᠬᠣᠷᠸᠠ ᠶ᠋ᠢᠨ ᠠᠮᠢᠲᠠᠳ ᠤ᠋ᠨ ᠬᠦᠰᠡᠯ ᠪᠣᠳᠣᠯ ᠢ᠋ ᠳᠠᠭᠠᠬᠤ ᠭᠡᠵᠦ ᠴᠠᠪᠴᠢᠯᠠᠨ ᠪᠣᠳᠣᠭᠠ ᠪᠠᠢᠭᠠ ᠮᠡᠲᠦ ᠬᠠᠷᠠᠭᠳᠠᠨᠠ᠃
ᠳᠣᠷᠣᠨᠠ ᠵᠦᠭ ᠡᠴᠡ ᠰᠢᠨᠡ ᠡᠳᠦᠷ ᠲᠦᠮᠡᠨ ᠠᠭᠤᠯᠠᠰ ᠢ᠋ ᠳᠠᠪᠠᠨ ᠠᠢᠯᠴᠢᠯᠠᠵᠤ ᠢᠷᠡᠬᠦ ᠪᠣᠯᠤᠭᠰᠠᠨ ᠦᠶᠡ ᠳ᠋ᠦ᠍ ᠰᠠᠯᠠᠭᠠ ᠶ᠋ᠢᠨ ᠳᠠᠷᠤᠭᠠ ᠪᠠᠲᠤ ᠶ᠋ᠢ ᠲᠠᠪᠤᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠬᠠᠢᠭᠤᠯ ᠢ᠋ᠶ᠋ᠠᠷ ᠶᠠᠪᠤᠭᠤᠯᠪᠠ᠃
ᠬᠠᠢᠭᠤᠯ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠢ᠋ ᠪᠠᠷᠢᠨ ᠶᠠᠪᠤᠭᠰᠠᠭᠠᠷ ᠦᠷ ᠦ᠋ᠨ ᠭᠡᠭᠡᠨ ᠦ᠌ ᠡᠬᠢᠨ ᠦ᠌ ᠴᠠᠢᠪᠤᠷ ᠲᠤᠶᠠᠭᠠ ᠵᠡᠭᠦᠨ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠳᠡᠭᠡᠭᠦᠷ ᠥᠩᠭᠡᠢᠨ ᠰᠠᠴᠤᠷᠠᠬᠤ ᠦᠶᠡ ᠳ᠋ᠦ᠍ ᠳᠠᠪᠠᠯᠭᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠭᠠᠷᠪᠠᠯ ᠲᠡᠷᠲᠡᠭᠡ ᠳᠣᠣᠷᠠ ᠠᠮᠠᠨ ᠳ᠋ᠤ᠌ ᠬᠥᠮᠦᠨ ᠮᠠᠯ ᠤ᠋ᠨ ᠦᠯᠡᠮᠵᠢ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ ᠪᠠᠢᠯᠠ᠃ ᠨᠢᠭᠡᠳᠦᠭᠡᠷ ᠲᠦ᠍ ᠬᠣᠯᠠ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠦᠭᠡᠢ᠃ ᠬᠣᠶᠠᠳᠤᠭᠠᠷ ᠲᠤ᠌ ᠳᠠᠪᠠᠭᠠᠨ ᠤ᠋ ᠠᠷᠤ ᠶ᠋ᠢᠨ ᠮᠣᠳᠣ ᠪᠦᠬᠦᠨ ᠢ᠋ ᠳᠠᠯᠳᠠᠯᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠬᠠᠢᠭᠤᠯ ᠤ᠋ᠨ ᠭᠤᠷᠪᠠ ᠨᠢ ᠦᠯᠡᠳᠡᠵᠦ᠂ ᠪᠠᠲᠤ ᠨᠢᠭᠡ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠠᠯᠭᠤᠷᠬᠠᠨ ᠪᠥᠭᠡᠳ ᠬᠢᠨᠠᠮᠠᠭᠠᠢ ᠤᠷᠤᠭᠤᠳᠠᠪᠠ᠃ ᠮᠣᠳᠣᠨ ᠤ᠋ ᠵᠠᠬᠠ ᠬᠠᠶᠠᠭᠠ ᠬᠦᠷᠬᠦ ᠳ᠋ᠦ᠍ ᠬᠣᠯᠠ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠵᠤ ᠡᠬᠢᠯᠡᠪᠡ᠃ ᠬᠣᠶᠠᠷ ᠭᠤᠷᠪᠠᠨ ᠰᠠᠭᠠᠬᠠᠯᠲᠠ ᠵᠠᠢᠲᠠᠢ ᠭᠠᠵᠠᠷ ᠲᠤ᠌ ᠬᠡᠳᠦᠨ ᠵᠠᠭᠤᠨ ᠮᠣᠷᠢᠲᠠᠢ ᠬᠥᠮᠦᠰ ᠵᠠᠮᠪᠠᠷᠠᠭᠠ ᠦᠭᠡᠢ ᠴᠤᠪᠤᠷᠠᠯᠳᠤᠭᠰᠠᠭᠠᠷ ᠳᠠᠪᠠᠭᠠ ᠥᠭᠡᠳᠡ ᠢᠷᠡᠵᠦ ᠶᠠᠪᠤᠯᠠ᠃ ᠬᠥᠮᠦᠰ ᠦ᠋ᠨ ᠮᠠᠩᠨᠠᠢ ᠳ᠋ᠤ᠌ ᠶᠠᠪᠤᠭᠠ ᠥᠨᠳᠥᠷ ᠬᠠᠷᠠ ᠮᠣᠷᠢᠲᠠᠢ ᠬᠥᠮᠦᠨ ᠭᠤᠷᠪᠠᠨ ᠪᠦᠴᠡ ᠲᠡᠢ ᠲᠣᠮᠣ ᠰᠢᠷᠠ ᠲᠤᠭ ᠳᠥᠷᠥᠭᠡᠪᠴᠢᠯᠡᠨ ᠪᠠᠷᠢᠵᠤ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠨᠢ ᠢᠵᠢᠯ ᠤᠯᠠᠭᠠᠨ ᠵᠡᠭᠡᠷᠳᠡ ᠮᠣᠷᠢ ᠲᠠᠢ ᠳᠥᠷᠪᠡᠨ ᠬᠥᠮᠦᠨ ᠰᠡᠯᠡᠮᠡ ᠣᠭᠰᠢᠨ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠵᠡᠷᠭᠡᠴᠡᠨ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠢᠰᠤᠨ ᠭᠡᠵᠦ ᠪᠠᠲᠤ ᠰᠢᠪᠡᠭᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠭᠴᠢ ᠶ᠋ᠢ ᠨᠢ ᠤᠨᠠᠭᠠᠵᠤ ᠤᠷᠭᠢᠶᠠ ᠭᠡᠳ ᠴᠡᠷᠢᠭ ᠸᠢᠨᠲ᠋ᠣᠸ ᠢ᠋ᠶ᠋ᠠᠨ ᠮᠥᠷᠥᠪᠴᠢᠯᠡᠨ ᠱᠠᠭᠠᠢ᠌ᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠪᠦᠷᠳᠡᠯᠵᠡᠭᠡᠳ ᠣᠪᠣᠭᠠ ᠬᠠᠷᠠᠭᠠ ᠨᠡᠢᠯᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠳ ᠪᠠᠲᠤ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠴᠢ ᠶ᠋ᠢ ᠨᠢ ᠪᠠᠴᠢ ᠪᠠᠷ ᠭᠡᠭᠴᠢ ᠪᠣᠯᠵᠤ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠫᠤᠤ ᠪᠠᠷᠢᠵᠤ ᠡᠰᠡᠷᠭᠦᠴᠡᠨᠡ ᠭᠡᠨᠡ ᠠ᠋ ᠭᠡᠳ ᠪᠠᠲᠤ ᠸᠢᠨᠲ᠋ᠣᠸ ᠢ᠋ᠶ᠋ᠠᠨ ᠱᠠᠭᠠᠢᠮᠠᠭᠴᠠ ᠭᠣᠬᠠ ᠪᠠᠨ ᠮᠤᠯᠲᠤᠯᠪᠠ᠃ ᠭᠣᠣᠯ ᠰᠢᠷᠠ ᠲᠤᠭ ᠨᠠᠯᠠᠨ ᠭᠡᠳᠡᠷᠭᠦ ᠪᠡᠨ ᠤᠨᠠᠵᠤ᠂ ᠲᠤᠭᠴᠢ ᠨᠢ ᠮᠣᠷᠢᠨ ᠤ᠋ ᠪᠠᠨ ᠪᠤᠷᠤᠭᠤ ᠲᠠᠯᠠ ᠤᠷᠤᠭᠤ ᠠᠯᠭᠤᠷᠬᠠᠨ ᠢ᠋ᠶ᠋ᠠᠷ ᠭᠤᠯᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠨᠢᠰᠦᠭᠡᠳ ᠪᠠᠢᠳᠠᠭ ᠬᠡᠷᠡᠭ ᠭᠡᠳ ᠴᠡᠷᠢᠭ ᠡᠷᠭᠢᠵᠦ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠬᠦ ᠳ᠋ᠦ᠍ ᠪᠠᠲᠤ ᠴᠤ᠌ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠳ᠋ᠦ᠍ ᠬᠠᠴᠠᠷ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠨ ᠬᠤᠷᠳᠤᠯᠠᠪᠠ᠃
ᠪᠠᠲᠤ ᠶ᠋ᠢᠨ ᠮᠣᠷᠢ ᠬᠤᠷᠳᠤᠨ ᠠᠵᠢ᠃ ᠡᠮᠦᠨᠡ ᠪᠡᠨ ᠶᠠᠪᠤᠭᠰᠠᠨ ᠴᠡᠷᠢᠭ ᠢ᠋ ᠭᠦᠢᠴᠡᠵᠦ ᠲᠦᠷᠦᠭᠦᠯᠡᠬᠦ ᠦᠶᠡ ᠳ᠋ᠦ᠍ ᠠᠷᠤ ᠳ᠋ᠤ᠌ ᠨᠢ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠡᠷᠭᠢᠵᠦ ᠬᠠᠷᠠᠪᠠᠯ ᠠᠷᠪᠠᠭᠠᠳ ᠬᠥᠮᠦᠨ ᠴᠤᠪᠤᠷᠠᠯᠳᠤᠨ ᠶᠠᠪᠤᠭᠠ ᠶ᠋ᠢᠨ ᠡᠮᠦᠨᠡ ᠪᠣᠷᠣ ᠮᠣᠷᠢ ᠲᠠᠢ᠂ ᠬᠥᠬᠡ ᠳᠡᠪᠡᠯ ᠲᠡᠢ ᠬᠥᠮᠦᠨ ᠬᠤᠢ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠯᠠᠨ ᠶᠠᠪᠤᠯᠠ᠃ ᠡᠨᠡ ᠪᠣᠯ ᠬᠣᠩᠭᠣᠷ ᠪᠠᠢᠵᠠᠢ᠃ ᠭᠡᠪᠡᠴᠦ ᠵᠢᠭᠤᠲᠠᠵᠤ ᠶᠠᠪᠤᠭᠠ ᠪᠠᠲᠤ ᠴᠤ᠌᠂ ᠨᠡᠬᠡᠵᠦ ᠶᠠᠪᠤᠭᠠ ᠬᠣᠩᠭᠣᠷ ᠴᠤ᠌ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠲᠠᠨᠢᠭᠰᠠᠨ ᠦᠭᠡᠢ᠃ ᠪᠠᠲᠤ ᠡᠴᠡ ᠬᠣᠷᠢ ᠭᠠᠷᠤᠢ ᠮᠧᠲ᠋ᠷ ᠬᠣᠴᠣᠷᠤᠭᠰᠠᠨ ᠴᠡᠷᠢᠭ ᠡᠷᠭᠢᠵᠦ ᠬᠠᠷᠠᠬᠤ ᠭᠡᠲᠡᠯᠡ ᠬᠣᠩᠭᠣᠷ ᠤ᠋ᠨ ᠤᠷᠲᠤ ᠪᠤᠭᠤᠢᠯᠢ ᠬᠦᠵᠦᠭᠦᠦ ᠣᠷᠢᠶᠠᠵᠤ ᠮᠣᠷᠢᠨ ᠡᠴᠡ ᠨᠢ ᠭᠤᠲᠤ ᠲᠡᠳᠡᠨ ᠤᠨᠠᠭᠠᠪᠠ᠃
ᠳᠠᠪᠠᠭᠠᠨ ᠳᠡᠭᠡᠷᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠠᠢᠭᠤᠯᠴᠢᠳ ᠫᠤᠤᠳᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠰᠡᠷᠭᠦᠦ ᠨᠠᠷ ᠮᠣᠳᠣ ᠤᠷᠤᠭᠤ ᠳᠡᠷᠡᠨ ᠣᠷᠣᠵᠤ ᠠᠯᠠᠭᠠ ᠪᠣᠯᠪᠠ᠃ ᠪᠤᠭᠤᠢᠯᠢᠳᠠᠭᠤᠯᠤᠭᠰᠠᠨ ᠴᠡᠷᠢᠭ ᠴᠢᠷᠦᠭᠳᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠪᠦᠳᠦᠭᠦᠨ ᠮᠣᠳᠣ ᠰᠠᠪᠠᠭᠰᠠᠨ ᠤᠴᠢᠷ ᠳᠣᠣᠷᠠ ᠪᠠᠨ ᠦᠬᠦᠵᠡᠢ᠃
ᠡᠨᠡ ᠬᠣᠭᠣᠷᠣᠨᠳᠣ ᠬᠠᠢᠭᠤᠯᠴᠢᠳ ᠱᠠᠯᠠᠮᠠᠭᠠᠢᠯᠠᠨ ᠳᠣᠪᠲᠣᠯᠵᠤ ᠠᠩᠭᠢ ᠳ᠋ᠠᠭᠠᠨ ᠬᠦᠷᠦᠭᠡᠳ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠬᠡᠯᠡᠵᠡᠢ᠃ ᠬᠡᠳᠦᠨ ᠵᠠᠭᠤᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠭᠠ ᠪᠣᠯᠬᠣᠷ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠠᠯᠠᠭᠠ ᠬᠣᠶᠠᠷ ᠲᠣᠯᠣᠭᠠᠢ ᠶ᠋ᠢ ᠡᠵᠡᠯᠡᠨ ᠬᠣᠷᠢᠭᠯᠠᠯᠲᠠ ᠳ᠋ᠤ᠌ ᠪᠡᠯᠡᠳᠬᠡᠪᠡ᠂ ᠪᠠᠲᠤ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠷᠢ ᠡᠵᠡᠯᠡᠵᠦ ᠠᠪᠤᠯᠠ᠃ ᠪᠤᠭᠤᠢᠯᠢᠳᠠᠭᠤᠯᠤᠭᠰᠠᠨ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭ ᠢ᠋ ᠲᠦᠭᠵᠢᠯ ᠵᠠᠩᠵᠤᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠣᠩᠭᠣᠷ ᠲᠤ᠌ ᠱᠠᠩᠨᠠᠵᠤ᠂ ᠬᠣᠩᠭᠣᠷ ᠳᠠᠯᠠ ᠭᠠᠷᠤᠢ ᠰᠤᠮᠤ ᠲᠠᠢ ᠸᠢᠨᠲ᠋ᠣᠸ ᠫᠤᠤ ᠲᠠᠢ ᠪᠣᠯᠵᠠᠢ᠃
ᠦᠳᠡ ᠥᠩᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠵᠠᠭᠤ ᠭᠠᠷᠤᠢ ᠮᠣᠷᠢ ᠲᠠᠢ ᠬᠥᠮᠦᠨ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠵᠡᠯᠡᠭᠰᠡᠨ ᠪᠠᠢᠷᠢ ᠥᠭᠡᠳᠡ ᠬᠠᠯᠵᠠ ᠳᠣᠪᠲᠣᠯᠤᠭᠰᠠᠨ ᠪᠣᠯᠪᠠᠴᠤ ᠬᠣᠶᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢ᠌ᠷᠢᠯᠠᠭᠤᠯᠠᠰᠠᠨ ᠬᠥᠩᠭᠡᠨ ᠫᠦᠯᠧᠮᠶᠣᠲ ᠤ᠋ᠨ ᠰᠢᠷᠦᠭᠦᠨ ᠭᠠᠯ ᠳ᠋ᠤ᠌ ᠳᠠᠭᠠᠷᠢᠭᠳᠠᠵᠤ ᠨᠡᠯᠢᠶᠡᠳ ᠬᠥᠮᠦᠨ ᠮᠣᠷᠢᠳ ᠢ᠋ᠶ᠋ᠠᠨ ᠠᠯᠠᠭᠤᠯᠤᠭᠠᠳ ᠪᠤᠴᠠᠵᠤ ᠪᠠᠢᠷᠢ ᠡᠵᠡᠯᠡᠨ ᠬᠠᠶᠠ ᠬᠠᠶᠠ ᠡᠨᠳᠡ ᠲᠡᠨᠳᠡ ᠡᠴᠡ ᠫᠤᠤᠳᠠᠵᠤ ᠡᠬᠢᠯᠡᠪᠡ᠃ ᠤᠳᠠᠭᠠᠨ ᠫᠤᠤᠳᠠᠯᠴᠠᠬᠤ ᠰᠤᠮᠤ ᠦᠭᠡᠢ ᠤᠴᠢᠷ ᠡᠴᠡ ᠲᠦᠭᠵᠢᠯ ᠫᠤᠤ ᠶ᠋ᠢᠨ ᠠᠮᠠ ᠳᠣᠯᠣᠭᠣᠭᠰᠠᠨ ᠬᠥᠮᠦᠰ ᠢ᠋ᠶ᠋ᠡᠷ ᠬᠠᠯᠬᠠᠪᠴᠢ ᠬᠢᠵᠦ ᠪᠠᠢᠭᠠᠳ ᠳᠣᠪᠲᠣᠯᠬᠤ ᠶ᠋ᠢ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠯᠠ ᠠᠮᠵᠢᠯᠲᠠ ᠣᠯᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ᠂ ᠤᠯᠠᠭᠠᠨ ᠤ᠋ ᠪᠤᠷᠤᠭᠤ ᠨᠣᠮᠲᠠᠨ ᠢ᠋ ᠳᠠᠭᠠᠷᠢᠭᠠᠳ ᠭᠡᠵᠦ ᠴᠡᠮᠪᠡ ᠬᠡᠴᠢᠨᠡᠨ ᠪᠠᠷᠬᠢᠷᠠᠪᠠᠴᠤ ᠬᠣᠶᠠᠷ ᠫᠦᠯᠧᠮᠶᠣᠲ ᠤ᠋ᠨ ᠡᠰᠡᠷᠭᠦ ᠳᠠᠭᠠᠷᠢᠬᠤ ᠬᠥᠮᠦᠨ ᠭᠠᠷᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠩᠵᠤᠨ ᠲᠠ ᠨᠠᠳᠠ ᠰᠢᠯᠢᠳᠡᠭ ᠮᠣᠷᠢ ᠲᠠᠢ ᠵᠠᠭᠤᠨ ᠬᠥᠮᠦᠨ ᠥᠭᠪᠡᠯ ᠪᠢ ᠤᠯᠠᠭᠠᠨ ᠤ᠋ ᠬᠢᠨ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠬᠦᠯᠢᠭᠡᠳ ᠢᠷᠡᠶᠡ ᠭᠡᠵᠦ ᠲᠦᠭᠵᠢᠯ ᠦ᠋ᠨ ᠳᠡᠷᠭᠡᠳᠡ ᠢᠷᠡᠭᠰᠡᠨ ᠬᠣᠩᠭᠣᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠴᠢᠮᠳᠠᠨ ᠬᠠᠰᠬᠢᠷᠴᠤ ᠪᠠᠢᠭᠰᠠᠨ ᠲᠦᠭᠵᠢᠯ ᠰᠢᠷᠦᠭᠦᠨ ᠨᠢᠳᠦ ᠪᠡᠷ ᠬᠣᠩᠭᠣᠷ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠳᠤᠷᠠ ᠲᠠᠢ ᠬᠥᠮᠦᠰ ᠢ᠋ᠶ᠋ᠡᠨ ᠠᠪᠤᠭᠠᠳ ᠶᠠᠪᠤ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠨᠠᠷ ᠲᠡᠷᠡ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠠᠷᠤᠭᠠᠳ ᠤᠯᠠᠭᠠᠨ ᠤ᠋ ᠬᠢᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠡᠴᠡ ᠲᠠᠭᠠᠷᠢᠨᠠ᠃ ᠲᠠ ᠨᠠᠷ ᠲᠡᠷᠡ ᠦᠶᠡ ᠳ᠋ᠦ᠍ ᠵᠣᠭᠰᠣᠯᠲᠠ ᠦᠭᠡᠢ ᠫᠤᠤᠳᠠᠵᠤ ᠪᠠᠢᠭᠠᠳ ᠪᠢᠳᠡᠨ ᠢ᠋ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠤᠮᠠᠭᠴᠠ ᠮᠥᠨ ᠲᠠᠭᠠᠷᠢᠨᠠ ᠰᠢᠦ ᠭᠡᠵᠦ ᠬᠣᠩᠭᠣᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠡᠷᠡᠭ ᠢ᠋ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠠᠯᠠᠭᠤ ᠪᠠᠭᠠᠲᠤᠷ ᠴᠢᠮᠠᠶ᠋ᠢ ᠲᠤᠰᠠᠯᠠᠬᠤ ᠵᠠᠩᠵᠤᠨ ᠪᠣᠯᠭᠠᠨᠠ ᠭᠡᠵᠦ ᠲᠦᠭᠵᠢᠯ ᠢᠷᠪᠠᠢᠨ ᠢᠨᠢᠶᠡᠮᠰᠦᠭᠯᠡᠬᠦ ᠳᠦᠷᠢ ᠦᠵᠡᠭᠦᠯᠦᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠯᠠᠭᠤ ᠪᠠᠭᠠᠲᠤᠷ ᠤ᠋ᠨ ᠠᠮᠢ ᠨᠠᠰᠤ ᠶ᠋ᠢ ᠪᠢ ᠳᠠᠭᠠᠭᠠᠨᠠ ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍ ᠨᠢ ᠬᠠᠷᠠᠪᠠᠯ ᠴᠡᠮᠪᠡ ᠪᠠᠢᠯᠠ᠃
ᠬᠣᠩᠭᠣᠷ ᠲᠣᠭᠣᠮᠵᠢᠷ ᠦᠭᠡᠢ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠨᠢ᠂ ᠴᠡᠮᠪᠡ ᠳ᠋ᠦ᠍ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ ᠨᠢ ᠪᠣᠳᠣᠭᠳᠠᠪᠠ᠃ 《ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠳᠠᠭᠠᠭᠠᠨᠠ ᠭᠡᠨᠡ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠣᠬᠠᠢ ᠠᠮᠢ ᠶ᠋ᠢ ᠠᠷᠭᠠᠯᠠᠵᠤ ᠶᠠᠪᠤᠪᠠᠯ ᠳᠡᠭᠡᠷᠡ ᠪᠢᠰᠢ ᠤᠤ》 ᠭᠡᠵᠦ ᠬᠣᠩᠭᠣᠷ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠠᠢ᠃
ᠬᠣᠩᠭᠣᠷ ᠵᠠᠭᠤᠨ ᠰᠢᠯᠢᠳᠡᠭ ᠮᠣᠷᠢ ᠲᠠᠢ ᠬᠥᠮᠦᠰ ᠢ᠋ ᠰᠣᠩᠭᠣᠵᠤ ᠠᠪᠤᠭᠠᠳ ᠠᠷᠠᠳ ᠤ᠋ᠨ ᠴᠡᠷᠢᠭ ᠲᠦ᠍ ᠦᠵᠡᠭᠳᠡᠯ ᠦᠭᠡᠢ ᠶᠠᠪᠤᠵᠤ᠂ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠢᠷᠢ ᠡᠵᠡᠯᠡᠪᠡ᠃ ᠣᠷᠣᠢ ᠶ᠋ᠢᠨ ᠨᠠᠷᠠ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠨᠠᠭᠠᠯᠳᠤᠵᠤ ᠠᠯᠲᠠᠨ ᠰᠢᠷᠠ ᠭᠡᠷᠡᠯ ᠢ᠋ᠶ᠋ᠡᠷ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢ ᠭᠡᠢᠭᠦᠯᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠬᠣᠩᠭᠣᠷ ᠵᠠᠭᠤᠨ ᠬᠥᠮᠦᠨ ᠢ᠋ᠶ᠋ᠡᠨ ᠮᠣᠷᠳᠠᠭᠤᠯᠵᠤ ᠶᠠᠪᠤᠭᠰᠠᠭᠠᠷ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠣᠴᠢᠵᠤ ᠣᠷᠣᠢ ᠶ᠋ᠢᠨ ᠨᠠᠷᠠ ᠳᠠᠭᠠᠵᠤ ᠣᠢᠷᠠᠲᠤᠨ ᠭᠡᠨᠡᠳᠲᠡ ᠳᠣᠪᠲᠣᠯᠪᠠ᠃ ᠨᠠᠷᠠᠨ ᠳ᠋ᠤ᠌ ᠭᠢᠯᠪᠠᠭᠰᠠᠨ ᠴᠡᠷᠢᠭ ᠦ᠋ᠳ ᠴᠣᠬᠣᠮ ᠶᠠᠭᠤ ᠳᠠᠭᠠᠷᠢᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠵᠤ ᠶᠠᠳᠠᠵᠤ ᠪᠠᠢᠲᠠᠯᠠ ᠵᠠᠬᠠ ᠶ᠋ᠢᠨ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠷᠡ ᠬᠣᠩᠭᠣᠷ ᠤ᠋ᠨ ᠬᠦᠨᠳᠦ ᠪᠣᠷᠣᠣᠬᠠᠢ ᠪᠠᠭᠤᠵᠠᠢ᠃ ᠮᠥᠨ ᠡᠨᠡ ᠦᠶᠡ ᠳ᠋ᠦ᠍ ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠭᠣᠣᠯ ᠬᠦᠴᠦ ᠳᠠᠭᠠᠷᠢᠪᠠ᠃
ᠬᠡᠰᠡᠭ ᠵᠠᠭᠤᠷᠠ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠦᠷᠭᠦᠯᠵᠢᠯᠡᠪᠡ᠃ ᠴᠡᠷᠢᠭ ᠦ᠋ᠳ ᠦᠬᠦᠯᠳᠦᠨ ᠪᠠᠢᠯᠳᠤᠭᠰᠠᠨ ᠪᠣᠯᠪᠠᠴᠤ ᠡᠵᠡᠯᠡᠭᠰᠡᠨ ᠪᠠᠢᠷᠢᠨ ᠳ᠋ᠤ᠌ ᠨᠢ ᠬᠡᠳᠦᠨ ᠵᠠᠭᠤᠨ ᠮᠣᠷᠢ ᠲᠠᠢ ᠬᠥᠮᠦᠰ ᠣᠷᠣᠵᠤ ᠢᠷᠡᠭᠡᠳ ᠪᠠᠷᠠᠭᠤᠨ ᠵᠡᠭᠦᠨ ᠦᠭᠡᠢ ᠴᠣᠬᠢᠯᠴᠠᠬᠤ ᠲᠤᠯᠠ ᠶᠡᠬᠡᠩᠬᠢ ᠨᠢ ᠠᠯᠠᠭᠳᠠᠵᠤ ᠤᠬᠠᠭᠠᠨ ᠲᠠᠢ ᠤᠬᠠᠭᠠᠨ ᠦᠭᠡᠢ ᠠᠷᠪᠠᠭᠠᠳ ᠬᠥᠮᠦᠨ ᠪᠠᠷᠢᠭᠳᠠᠪᠠ᠃ ᠪᠠᠲᠤ ᠬᠣᠶᠠᠷ ᠢ᠋ ᠲᠣᠭᠠᠯᠠᠨ ᠫᠤᠤᠳᠠᠵᠤ ᠠᠯᠠᠭᠠᠳ ᠭᠤᠷᠪᠠᠳᠠᠬᠢ ᠪᠠᠨ ᠫᠤᠤᠳᠠᠬᠤ ᠭᠡᠵᠦ ᠪᠠᠢᠲᠠᠯᠠ ᠬᠠᠵᠠᠭᠤ ᠡᠴᠡ ᠨᠢ ᠳᠠᠭᠠᠷᠢᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠴᠣᠬᠢᠭᠤᠯᠤᠨ ᠤᠬᠠᠭᠠᠨ ᠠᠯᠳᠠᠵᠠᠢ᠃ ᠰᠢᠷᠠᠭᠳᠤᠭᠰᠠᠨ ᠬᠥᠮᠦᠰ ᠦ᠋ᠨ ᠰᠢᠨᠠᠯᠬᠤ ᠳᠠᠭᠤ ᠴᠢᠬᠢ ᠵᠦᠰᠦᠨ ᠵᠢᠷᠦᠬᠡ ᠰᠢᠮᠰᠢᠷᠡᠭᠦᠯᠵᠦ᠂ ᠰᠢᠷᠠᠭᠳᠤᠭᠰᠠᠨ ᠮᠣᠷᠢᠳ ᠤ᠋ᠨ ᠲᠡᠯᠴᠢᠯᠡᠬᠦ ᠨᠢ ᠨᠢᠳᠦ ᠤᠷᠤᠭᠤ ᠬᠠᠷᠪᠤᠵᠤ ᠬᠠᠷᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠠᠵᠢ᠃
ᠡᠰᠡᠷᠭᠦᠦ ᠨᠠᠷ ᠶᠡᠬᠡ ᠢᠯᠠᠯᠲᠠ ᠶ᠋ᠢᠨ ᠪᠠᠶᠠᠷ ᠬᠢᠵᠦ ᠬᠣᠩᠭᠣᠷ ᠢ᠋ ᠳᠡᠳ᠋ ᠵᠠᠩᠵᠤᠨ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠵᠦ 《ᠬᠠᠳᠠᠨ ᠵᠣᠷᠢᠭᠲᠤ ᠪᠦᠷᠭᠦᠳ ᠪᠠᠭᠠᠲᠤᠷ》 ᠴᠣᠯᠠ ᠪᠠᠷ ᠱᠠᠩᠨᠠᠪᠠ᠃ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠲᠠᠢ ᠭᠠᠵᠠᠷ ᠪᠠᠢᠭᠠ ᠬᠡᠪᠢᠰ ᠳᠡᠪᠢᠰᠦᠭᠰᠡᠨ ᠶᠤᠮ ᠰᠢᠭ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠪᠠᠭᠤᠳᠠᠯᠯᠠᠵᠤ ᠲᠦᠭᠵᠢᠯ ᠵᠠᠩᠵᠤᠨ ᠤ᠋ ᠤᠯᠠᠭᠠᠨ ᠬᠥᠯᠲᠥᠷᠭᠡ ᠲᠡᠢ ᠭᠡᠷ᠂ ᠴᠡᠮᠪᠡ ᠳᠦᠪᠴᠢᠨ ᠦ᠌ ᠰᠢᠷᠠ ᠬᠥᠯᠲᠥᠷᠭᠡ ᠲᠡᠢ ᠭᠡᠷ ᠢ᠋ ᠵᠡᠷᠭᠡᠴᠡᠭᠦᠯᠦᠨ ᠪᠠᠷᠢᠭᠠᠳ ᠠᠷᠤ ᠳ᠋ᠤ᠌ ᠨᠢ 《ᠬᠠᠳᠠᠨ ᠵᠣᠷᠢᠭᠲᠤ ᠪᠦᠷᠭᠦᠳ ᠪᠠᠭᠠᠲᠤᠷ》 ᠲᠤ᠌ ᠲᠤᠰᠬᠠᠢ ᠭᠡᠷ ᠪᠠᠷᠢᠵᠤ ᠥᠭᠪᠡ᠃
ᠲᠡᠷᠡ ᠣᠷᠣᠢ ᠤᠬᠠᠭᠠᠨ ᠦᠭᠡᠢ ᠪᠠᠷᠢᠭᠳᠠᠭᠰᠠᠨ ᠰᠠᠯᠠᠭᠠᠨ ᠳᠠᠷᠤᠭᠠ ᠤᠬᠠᠭᠠᠨ ᠣᠷᠣᠵᠤ ᠲᠡᠭᠦᠨ ᠢ᠋ ᠡᠷᠡᠭᠦᠳᠡᠨ ᠰᠢᠭᠦᠵᠦ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠴᠡᠷᠯᠢᠭ ᠮᠠᠨᠳᠤᠯ ᠤ᠋ᠨ ᠠᠢᠮᠠᠭ ᠳᠡᠭᠡᠷᠡ ᠤᠯᠠᠭᠠᠨ ᠤ᠋ ᠬᠡᠴᠢᠨᠡᠨ ᠴᠡᠷᠢᠭ ᠢᠷᠡᠭᠡᠳ ᠪᠠᠢᠭᠠ ᠪᠣᠢ? ᠭᠡᠵᠦ ᠲᠦᠭᠵᠢᠯ ᠠᠰᠠᠭᠤᠬᠤ ᠳ᠋ᠤ᠌ ᠰᠠᠯᠠᠭᠠᠨ ᠳᠠᠷᠤᠭᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠡᠷᠡᠮᠴᠢᠨ ᠲᠠ ᠨᠠᠷ ᠢ᠋ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠭᠠᠵᠤ ᠴᠢᠳᠠᠬᠤ ᠴᠡᠷᠢᠭ ᠢᠷᠡᠭᠡᠳ ᠪᠠᠢᠭᠠ ᠭᠡᠵᠦ ᠬᠠᠷᠢᠭᠤᠯᠵᠠᠢ᠃
ᠵᠣᠳᠣᠵᠤ ᠡᠯᠳᠡᠪ ᠢ᠋ᠶ᠋ᠡᠷ ᠡᠷᠡᠭᠦᠳᠡᠭᠰᠡᠨ ᠪᠣᠯᠪᠠᠴᠤ ᠨᠠᠮ ᠪᠡᠶᠡ ᠲᠡᠢ᠂ ᠵᠠᠯᠠᠭᠤᠬᠠᠨ ᠪᠣᠷᠣ ᠳᠠᠷᠤᠭᠠ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠠᠵᠢ᠃ ᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠭᠠᠢᠬᠠᠨ ᠪᠢᠰᠢᠷᠡᠬᠦ ᠪᠠᠬᠠᠳᠤᠯ ᠢ᠋ᠶ᠋ᠠᠷ ᠳᠦᠭᠦᠷᠴᠦ ᠪᠠᠢᠯᠠ᠃
ᠡᠴᠦᠰ ᠲᠦ᠍ ᠨᠢ ᠲᠡᠷᠡ ᠵᠠᠯᠠᠭᠤ ᠶ᠋ᠢ ᠶᠠᠩᠭᠢᠨᠠᠲᠠᠯᠠ ᠬᠦᠯᠢᠵᠦ ᠪᠠᠢᠭᠠᠳ ᠦᠷᠦ ᠶ᠋ᠢ ᠨᠢ ᠴᠣᠭᠣᠯᠵᠤ ᠵᠢᠷᠦᠬᠡ ᠶ᠋ᠢ ᠨᠢ ᠰᠤᠭᠤᠯᠤᠨ ᠲᠤᠭ ᠤᠷᠤᠭᠤ ᠰᠢᠲᠠᠪᠠ᠃ 《ᠡᠵᠢ ᠮᠢᠨᠢ》 ᠭᠡᠰᠡᠨ ᠪᠢᠲᠡᠭᠦᠦ ᠳᠠᠭᠤ ᠵᠠᠯᠠᠭᠤ ᠶ᠋ᠢᠨ ᠴᠡᠭᠡᠵᠢᠨ ᠡᠴᠡ ᠭᠠᠷᠬᠤ ᠳ᠋ᠤ᠌ ᠬᠣᠩᠭᠣᠷ ᠴᠢᠬᠢ ᠪᠡᠨ ᠳᠠᠷᠤᠨ ᠨᠢᠳᠦ ᠪᠡᠨ ᠠᠨᠢᠵᠠᠢ᠃
ᠰᠥᠨᠢ ᠨᠢ ᠲᠦᠭᠵᠢᠯ ᠦ᠋ᠨ ᠤᠯᠠᠭᠠᠨ ᠬᠥᠯᠲᠥᠷᠭᠡ ᠲᠡᠢ ᠭᠡᠷ ᠲᠦ᠍ ᠠᠷᠢᠬᠢᠳᠠᠪᠠ᠃ ᠨᠡᠯᠢᠶᠡᠳ ᠰᠣᠭᠲᠣᠵᠤ ᠪᠠᠢᠲᠠᠯᠠ ᠠᠷᠪᠠᠨ ᠳᠣᠯᠣᠭᠠ ᠨᠠᠢ᠍ᠮᠠᠨ ᠨᠠᠰᠤᠨ ᠤ᠋ ᠭᠤᠷᠪᠠᠨ ᠪᠦᠰᠡᠭᠦᠢ ᠣᠷᠣᠭᠤᠯᠵᠤ ᠢᠷᠡᠯᠡ᠃ ᠬᠣᠩᠭᠣᠷ ᠤ᠋ᠨ ᠰᠣᠭᠲᠣᠵᠤ ᠭᠥᠯᠢᠷᠡᠭᠰᠡᠨ ᠨᠢᠳᠦ ᠴᠡᠴᠡᠷᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠭᠤᠷᠪᠠᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠳᠡᠭᠡᠷᠡ ᠲᠤᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠠᠯᠢ ᠨᠢ ᠳᠡᠭᠡᠷᠡ ᠪᠠᠢᠨᠠ? ᠭᠡᠵᠦ ᠰᠦᠷᠡᠬᠡᠢ ᠰᠣᠭᠲᠣᠭᠰᠠᠨ ᠴᠡᠮᠪᠡ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠭᠤᠢᠪᠢᠨ ᠪᠣᠰᠴᠤ ᠣᠴᠢᠭᠠᠳ ᠵᠠᠬᠠ ᠶ᠋ᠢᠨ ᠪᠦᠰᠡᠭᠦᠢ ᠶ᠋ᠢᠨ ᠡᠷᠡᠦ ᠶ᠋ᠢ ᠲᠠᠲᠠᠵᠤ ᠬᠠᠷᠠᠭᠠᠳ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠷᠠ ᠡᠬᠡ ᠪᠠᠢᠮᠠᠷ ᠬᠣᠩᠭᠣᠷ ᠪᠠᠢᠨᠠ ᠭᠡᠳ ᠲᠦᠭᠵᠢᠯ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠭᠣᠭᠠᠨ ᠳᠠᠷᠠ ᠡᠬᠡ ᠭᠡᠵᠦ ᠡᠷᠭᠦᠮᠵᠢᠯᠡᠶᠡ ᠭᠡᠳ ᠲᠦᠭᠵᠢᠯ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠴᠦᠯ ᠴᠦᠯ ᠵᠠᠯᠭᠢᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠬᠢᠮ ᠳᠠᠷᠠ ᠡᠬᠡ ᠨᠦ᠍ᠭᠦᠳ ᠪᠢᠳᠡᠨ ᠲᠡᠢ ᠰᠠᠭᠤᠵᠤ ᠬᠤᠨᠳᠠᠭᠠ ᠬᠤᠪᠢᠶᠠᠯᠴᠠᠬᠤ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠭᠤᠶᠤᠶᠠ ᠭᠡᠯᠡ᠃
ᠪᠦᠰᠡᠭᠦᠢᠴᠦᠳ ᠬᠥᠳᠡᠯᠦᠯ ᠦᠭᠡᠢ ᠴᠡᠴᠡᠷᠡᠨ᠂ ᠲᠣᠣᠷ ᠲᠤ᠌ ᠣᠷᠣᠭᠰᠠᠨ ᠰᠢᠪᠠᠭᠤ ᠰᠢᠭ᠋ ᠪᠦᠷᠳᠡᠯᠵᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠳᠤᠮᠳᠠᠬᠢ ᠨᠢ ᠮᠢᠨᠦ ᠳᠡᠷᠭᠡᠳᠡ ᠢᠷᠡᠵᠦ ᠰᠠᠭᠤ᠃ ᠶᠡᠬᠡᠷᠬᠡᠭᠡᠳ ᠪᠠᠢᠪᠠᠯ ᠠᠬᠠ ᠴᠢᠨᠢ ᠳᠠᠷᠠ ᠡᠬᠡ ᠨᠡᠷᠡ ᠶ᠋ᠢ ᠴᠢᠨᠢ ᠬᠤᠰᠤᠵᠤ ᠬᠠᠶᠠᠭᠠᠳ ᠱᠤᠯᠤᠮ ᠪᠣᠯᠭᠠᠨ ᠪᠣᠷᠣ ᠵᠢᠷᠦᠬᠡ ᠪᠡᠷ ᠴᠢᠨᠢ ᠲᠤᠭ ᠳᠠᠭᠢᠵᠤ ᠣᠷᠬᠢᠨᠠ ᠰᠢᠦ ᠭᠡᠵᠦ ᠲᠦᠭᠵᠢᠯ ᠵᠠᠩᠳᠤᠷᠤᠨ ᠬᠡᠯᠡᠭᠡᠳ ᠭᠤᠢᠪᠢᠨ ᠪᠣᠰᠤᠭᠠᠳ ᠡᠮᠡᠭᠲᠡᠢ ᠶ᠋ᠢᠨ ᠭᠠᠷ ᠡᠴᠡ ᠪᠠᠷᠢᠵᠤ ᠠᠪᠤᠯᠠ᠃
ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠰᠠᠨ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠬᠣᠶᠠᠷ ᠬᠦᠴᠦᠲᠡᠢ ᠪᠣᠳᠣᠯ ᠲᠤᠯᠤᠯᠳᠤᠵᠤ ᠪᠠᠢᠯᠠ᠃ ᠨᠢᠭᠡ ᠰᠡᠳᠬᠢᠯ ᠨᠢ ᠲᠦᠭᠵᠢᠯ ᠴᠡᠮᠪᠡ ᠨᠠᠷ ᠢ᠋ ᠵᠢᠭᠰᠢᠨᠡ᠃
ᠭᠡᠲᠡᠯᠡ ᠨᠥᠭᠦᠭᠡ ᠰᠡᠳᠬᠢᠯ ᠨᠢ ᠠᠷᠢᠬᠢᠨ ᠳ᠋ᠤ᠌ ᠣᠪᠣᠯᠵᠠᠭᠰᠠᠨ ᠵᠠᠯᠠᠭᠤ ᠶ᠋ᠢᠨ ᠲᠠᠴᠢᠶᠠᠯ ᠳ᠋ᠤ᠌ ᠬᠥᠲᠥᠯᠦᠭᠳᠡᠨ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠭᠡᠳᠡᠭ ᠪᠣᠳᠣᠯ ᠳ᠋ᠤ᠌ ᠬᠦᠷᠴᠦ ᠪᠠᠢᠯᠠ᠃ ᠡᠴᠦᠰ ᠦ᠋ᠨ ᠡᠴᠦᠰ ᠲᠦ᠍ ᠬᠣᠶᠠᠷ ᠲᠠᠬᠢ ᠪᠣᠳᠣᠯ ᠨᠢ ᠳᠠᠪᠠᠵᠤ ᠴᠡᠮᠪᠡ ᠡᠴᠡ ᠥᠷᠢᠰᠦᠨ᠂ ᠲᠦᠭᠵᠢᠯ ᠦ᠋ᠨ ᠨᠣᠭᠣᠭᠠᠨ ᠳ᠋ᠠᠷᠠ ᠡᠬᠡ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠦᠰᠡᠭᠦᠢ ᠶ᠋ᠢᠨ ᠭᠠᠷ ᠡᠴᠡ ᠬᠥᠲᠥᠯᠦᠭᠡᠳ ᠭᠠᠷᠴᠤ ᠭᠡᠷ ᠤᠷᠤᠭᠤ ᠪᠠᠨ ᠣᠷᠣᠯᠠ᠃
ᠮᠠᠷᠭᠠᠰᠢ ᠨᠢ ᠡᠰᠡᠷᠭᠦᠦ ᠨᠠᠷ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃ ᠤᠴᠢᠷ ᠨᠢ ᠭᠤᠷᠪᠠᠨ ᠪᠦᠰᠡᠭᠦᠢ ᠲᠡᠢ ᠰᠠᠮᠠᠭᠤᠷᠠᠵᠤ ᠬᠣᠨᠣᠭᠰᠠᠨ ᠲᠦᠭᠵᠢᠯ᠂ ᠴᠡᠮᠪᠡ᠂ ᠬᠣᠩᠭᠣᠷ ᠭᠤᠷᠪᠠ ᠦᠳᠡ ᠥᠩᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌ ᠠᠷᠠᠢᠬᠢᠨ ᠨᠢᠭᠡ ᠶᠠᠭᠤᠮᠠ ᠥᠭᠡᠳᠡᠯᠡᠪᠡ᠃
ᠦᠳᠡ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠴᠡᠮᠪᠡ ᠪᠣᠰᠴᠤ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠰ ᠢ᠋ ᠪᠠᠢᠴᠠᠭᠠᠵᠤ ᠡᠬᠢᠯᠡᠪᠡ᠃ ᠪᠠᠢᠴᠠᠭᠠᠯᠲᠠ ᠮᠠᠰᠢ ᠲᠦᠷᠭᠡᠨ ᠶᠠᠪᠤᠯᠠ᠃ ᠤᠴᠢᠷ ᠨᠢ ᠴᠡᠮᠪᠡ ᠬᠡᠳᠦᠨ ᠦᠭᠡ ᠠᠰᠠᠭᠤᠬᠤ ᠳ᠋ᠤ᠌ ᠯᠠ ᠬᠠᠷᠢᠭᠤᠯᠤᠭᠰᠠᠨ ᠴᠤ᠌ ᠬᠠᠷᠢᠭᠤᠯᠤᠭᠠ ᠦᠭᠡᠢ ᠴᠦ᠍ 《ᠳᠠᠯᠳᠠ ᠤᠷᠤᠭᠤᠯ》 ᠭᠡᠬᠦ ᠳ᠋ᠦ᠍ ᠴᠢᠷᠴᠦ ᠠᠪᠠᠴᠢᠭᠠᠳ ᠰᠢᠭᠤᠳ ᠫᠤᠤᠳᠠᠵᠤ ᠣᠷᠬᠢᠨᠠ᠃ ᠪᠠᠲᠤ ᠶ᠋ᠢ ᠣᠷᠣᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠷᠢᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠪᠠᠭᠰᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠭᠦᠭᠡ ᠲᠠᠷᠢᠶᠠᠲᠤ ᠶ᠋ᠢᠨ ᠵᠠᠳᠠᠷᠠᠭᠰᠠᠨ ᠪᠠᠭᠰᠢ ᠴᠢᠨᠢ ᠡᠨᠡ ᠰᠢᠦ ᠳᠡ ᠭᠡᠵᠦ ᠴᠡᠮᠪᠡ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠰᠠᠨ ᠨᠢᠭᠡ ᠯᠠᠮᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠣᠯ ᠰᠢᠷᠪᠥᠰᠥᠯᠡᠵᠦ ᠠᠯᠠ᠃
ᠴᠡᠮᠪᠡ ᠶ᠋ᠢ ᠪᠠᠲᠤ ᠲᠠᠨᠢᠪᠠ᠃ ᠲᠡᠢᠮᠦ ᠠ᠋᠃ ᠡᠨᠡ ᠪᠣᠯ ᠪᠣᠭᠳᠠ ᠡᠴᠡ ᠠᠯᠲᠠᠨ ᠮᠠᠨᠢᠶᠠᠤᠨ ᠠᠪᠴᠤ ᠪᠠᠢᠭᠠᠳ ᠠᠩᠭᠢ ᠷᠢᠨᠴᠢᠨ ᠢ᠋ ᠴᠣᠬᠢᠵᠤ ᠠᠯᠠᠭᠰᠠᠨ ᠬᠣᠶᠠᠷ ᠬᠥᠮᠦᠨ ᠦ᠌ ᠨᠢᠭᠡ ᠨᠢ ᠮᠥᠨ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠠᠯᠠᠬᠤ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠮᠡᠳᠡᠬᠦ ᠤᠤ? ᠪᠣᠭᠳᠠ ᠡᠴᠡ ᠠᠯᠲᠠᠨ ᠮᠠᠨᠢᠶᠠᠤᠨ ᠤ᠋ ᠬᠥᠯᠥᠰᠥ ᠠᠪᠴᠤ ᠪᠠᠢᠭᠠᠳ ᠭᠠᠩᠳᠠᠨ ᠤ᠋ ᠠᠩᠭᠢ ᠷᠢᠨᠴᠢᠨ ᠢ᠋ ᠴᠢ ᠠᠯᠠᠭᠰᠠᠨ ᠪᠢᠵᠡ ᠳᠡ᠃ ᠬᠠᠷᠠ ᠶᠠᠷᠭᠠᠴᠢᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ ᠲᠦᠷᠭᠡᠨ ᠭᠠᠷᠭᠠᠵᠤ ᠵᠢᠷᠦᠬᠡ ᠪᠡᠷ ᠨᠢ ᠲᠤᠭ ᠳᠠᠬᠢ᠃
ᠬᠣᠶᠠᠷ ᠬᠥᠮᠦᠨ ᠬᠦᠯᠢᠶᠡᠲᠡᠢ ᠪᠠᠲᠤ ᠶ᠋ᠢ ᠴᠢᠷᠴᠦ ᠭᠡᠷ ᠦ᠋ᠳ ᠦ᠋ᠨ ᠡᠮᠦᠨᠡ ᠪᠤᠰᠬᠠᠭᠰᠠᠨ ᠲᠤᠭ ᠤ᠋ᠳ ᠤ᠋ᠨ ᠳᠡᠷᠭᠡᠳᠡ ᠠᠪᠠᠴᠢᠪᠠ᠃
ᠠᠷᠠᠢ ᠭᠡᠵᠦ ᠪᠣᠰᠤᠭᠠᠳ ᠭᠡᠷ ᠦ᠋ᠨ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠣᠩᠭᠣᠷ ᠴᠢᠰᠤ ᠨᠥᠵᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠪᠣᠯ ᠪᠠᠲᠤ ᠭᠡᠳᠡᠭ ᠢ᠋ ᠲᠠᠨᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤᠬᠢ ᠬᠥᠮᠦᠨ ᠢ᠋ᠶ᠋ᠡᠨ ᠳᠡᠯᠪᠢ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠪᠠᠲᠤ ᠶ᠋ᠢᠨ ᠳᠡᠷᠭᠡᠳᠡ ᠦᠰᠦᠷᠦᠨ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠳᠠᠨ ᠵᠣᠷᠢᠭᠲᠤ ᠪᠦᠷᠭᠦᠳ ᠪᠠᠭᠠᠲᠤᠷ ᠮᠢᠨᠢ᠃ ᠡᠨᠡ ᠪᠣᠯ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠤᠯᠠᠭᠠᠨᠳᠠᠨ ᠤ᠋ ᠴᠢᠨᠣᠠ ᠨᠤᠭᠤᠳ ᠤ᠋ᠨ ᠬᠠᠮᠤᠭ ᠤ᠋ᠨ ᠰᠦᠷᠡᠬᠡᠢ ᠨᠢ᠃ ᠣᠳᠣ ᠪᠢᠳᠡ ᠴᠡᠮᠪᠡ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠤᠭ ᠳᠠᠭᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠭᠡᠵᠦ ᠪᠠᠲᠤ ᠶ᠋ᠢ ᠠᠪᠴᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠨᠢᠭᠡ ᠨᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠭᠡᠷ ᠲᠦ᠍ ᠤᠷᠤᠭᠤᠯ᠃ ᠪᠢ ᠬᠤᠪᠢᠯᠭᠠᠨ ᠲᠠᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠷᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠰᠠᠯᠠᠬᠤ ᠵᠠᠩᠵᠤᠨ ᠤ᠋ ᠵᠠᠷᠯᠢᠭ ᠢ᠋ ᠬᠢᠴᠢᠶᠡᠩᠭᠦᠢᠯᠡᠨ ᠪᠡᠶᠡᠯᠡᠭᠦᠯᠦᠶᠡ᠃
ᠬᠣᠩᠭᠣᠷ ᠬᠣᠶᠠᠷ ᠬᠥᠮᠦᠨ ᠢ᠋ ᠶᠠᠪᠤᠭᠤᠯᠤᠭᠠᠳ ᠡᠵᠡᠭᠦᠢ ᠭᠡᠷ ᠲᠦ᠍ ᠪᠠᠲᠤ ᠲᠠᠢ ᠦᠯᠡᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠲᠤ ᠥᠭᠡᠷᠡ ᠶᠠᠭᠤᠮᠠ ᠣᠯᠳᠠᠭᠰᠠᠨ ᠦᠭᠡᠢ ᠤᠤ ᠭᠡᠵᠦ ᠪᠠᠲᠤ ᠵᠢᠭᠰᠢᠵᠦ ᠵᠠᠨᠤᠭᠰᠠᠨ ᠬᠦᠨᠳᠦ ᠬᠣᠭᠣᠯᠠᠢ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠴᠢᠵᠤ ᠣᠴᠢᠵᠤ ᠡᠨᠡ ᠳᠡᠭᠡᠷᠡᠮᠴᠢᠨ ᠨᠠᠷ ᠲᠠᠢ ᠨᠡᠢᠯᠡᠯᠡ ᠭᠡᠵᠦ ᠤᠤ? ᠳᠠᠩᠴᠢ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠣᠨᠳᠣᠣ ᠵᠠᠮ ᠪᠠᠢᠭᠠ ᠦᠭᠡᠢ᠃ ᠰᠠᠢᠬᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠠᠷᠠᠳ ᠤ᠋ᠨ ᠴᠡᠷᠢᠭ ᠲᠦ᠍ ᠣᠷᠣᠬᠤ ᠭᠡᠳ ᠣᠴᠢᠬᠤ ᠳ᠋ᠤ᠌ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠪᠢᠯᠡ? ᠴᠢ ᠮᠠᠷᠲᠠᠭᠠ ᠦᠭᠡᠢ ᠪᠢᠵᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠢᠨᠢ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠵᠠᠨᠳᠠᠯᠴᠢᠨ ᠨᠤᠭᠤᠳ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠨᠠᠮᠠᠶ᠋ᠢ ᠬᠥᠮᠦᠨ ᠭᠡᠵᠦ ᠦᠵᠡᠭᠡᠳ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠪᠢ ᠡᠳᠡ ᠨᠠᠷ ᠢ᠋ ᠰᠦᠰᠦᠭᠯᠡᠭᠡᠳ ᠬᠠᠮᠲᠤ ᠶᠠᠪᠤᠨᠠ ᠭᠡᠵᠦ ᠴᠢ ᠪᠣᠳᠣᠵᠤ ᠪᠠᠢᠨᠠ ᠤᠤ?ᠦᠭᠡᠢ᠃ ᠪᠣᠯᠳᠠᠭ ᠰᠠᠨ ᠪᠣᠯ ᠪᠦᠭᠦᠳᠡ ᠶ᠋ᠢᠨ ᠬᠢᠨᠢ ᠵᠢᠷᠦᠬᠡ ᠶ᠋ᠢ ᠰᠤᠭᠤ ᠲᠠᠲᠠᠵᠤ ᠠᠪᠤᠭᠠᠳ ᠵᠡᠷᠯᠢᠭ ᠨᠣᠬᠠᠳ ᠳ᠋ᠤ᠌ ᠬᠠᠶᠠᠭᠠᠳ ᠦᠭᠮᠡᠷ ᠪᠠᠢᠨᠠ᠃ ᠭᠡᠪᠡᠴᠦ ᠪᠢ ᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ᠃ ᠪᠠᠲᠤᠴᠡᠩᠭᠡᠯ ᠰᠤᠮᠤ ᠶ᠋ᠢᠨ ᠬᠣᠩᠭᠣᠷ ᠬᠤᠯᠠᠭᠠᠢᠴᠢ ᠶ᠋ᠢ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠨᠢ ᠪᠡᠷᠢ ᠭᠡᠰᠡᠨ ᠵᠠᠷ ᠢ᠋ ᠡᠳᠡ ᠲᠠᠷᠬᠠᠭᠠᠭᠰᠠᠨ ᠦᠭᠡᠢ᠂ ᠲᠠᠨ ᠤ᠋ ᠬᠢᠨ ᠲᠠᠷᠬᠠᠭᠠᠭᠰᠠᠨ ᠪᠢᠵᠡ ᠳᠡ᠃ ᠣᠳᠣ ᠲᠠᠨ ᠤ᠋ ᠵᠠᠰᠠᠭ ᠨᠠᠮᠠᠶ᠋ᠢ ᠪᠠᠷᠢᠪᠠᠯ ᠶᠡᠬᠡ ᠥᠷᠥᠰᠢᠶᠡᠪᠡᠯ ᠠᠷᠪᠠᠨ ᠵᠢᠯ ᠥᠭᠭᠦᠨᠡ᠃ ᠬᠡᠷᠪᠡ ᠲᠡᠷᠡ ᠡᠳᠦᠷ ᠨᠠᠮᠠᠶ᠋ᠢ ᠢᠲᠡᠭᠡᠵᠦ ᠴᠡᠷᠢᠭ ᠲᠡᠭᠡᠨ ᠠᠪᠤᠭᠰᠠᠨ ᠪᠣᠯ ᠪᠢ ᠥᠨᠥᠳᠥᠷ ᠲᠦᠭᠵᠢᠯ᠂ ᠴᠡᠮᠪᠡ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠥᠭᠭᠦᠶᠡ ᠭᠡᠳ ᠭᠦᠶᠦᠵᠦ ᠪᠠᠢᠬᠤ ᠪᠠᠢᠭᠰᠠᠨ ᠪᠢᠰᠢ ᠤᠤ? ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠤ᠋ᠨ ᠨᠢᠳᠦ ᠨᠢ ᠰᠦᠷᠳᠡᠶᠡ ᠭᠢᠯᠠᠯᠵᠠᠨ ᠠᠮᠢᠰᠬᠤᠭᠠ ᠨᠢ ᠳᠡᠭᠡᠷᠡ ᠭᠠᠷᠴᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠷᠭᠠᠴᠢᠨ ᠮᠢᠨᠢ ᠨᠠᠮᠠᠶ᠋ᠢ ᠠᠯᠠ᠃ ᠴᠢ ᠡᠳᠡᠨ ᠲᠡᠢ ᠨᠡᠢᠯᠡᠭᠰᠡᠨ ᠬᠣᠢᠨᠠ ᠬᠣᠯᠠ ᠶᠠᠪᠤᠬᠤ ᠦᠭᠡᠢ ᠭᠡᠵᠦ ᠪᠠᠲᠤ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠭ ᠡᠴᠡ ᠪᠡᠨ ᠨᠠᠳᠠ ᠳ᠋ᠤ᠌ ᠬᠣᠯᠠ ᠶᠠᠪᠤᠬᠤ ᠵᠠᠮ ᠪᠠᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ᠃ ᠠᠮᠢᠳᠤᠷᠠᠯ ᠡᠴᠡ ᠨᠢᠭᠡ ᠡᠳᠦᠷ ᠪᠤᠯᠢᠶᠠᠵᠤ ᠠᠪᠪᠠᠯ ᠠᠵᠠ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠠ ᠬᠥᠮᠦᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠩᠭᠢᠵᠦ ᠶᠠᠪᠤᠭᠰᠠᠨ ᠡᠴᠡ ᠦᠬᠦᠭᠰᠡᠨ ᠴᠦ᠍ ᠳᠡᠭᠡᠷᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠬᠦᠨᠡ ᠭᠡᠨᠡ ᠠ᠋᠃ ᠬᠥᠮᠦᠨ ᠪᠦᠬᠦᠨ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢ ᠬᠦᠰᠡᠳᠡᠭ ᠪᠠᠢᠬᠤ ᠳ᠋ᠤ᠌ ᠨᠠᠳᠠ ᠳ᠋ᠤ᠌ ᠲᠡᠢᠮᠦ ᠡᠷᠬᠡ ᠪᠠᠢᠬᠤ ᠦᠭᠡᠢ ᠭᠡᠵᠦ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠶᠠᠪᠤᠬᠤ ᠪᠠᠷ ᠰᠠᠢᠨ ᠦᠬᠦ ᠭᠡᠵᠦ ᠪᠠᠢᠳᠠᠭ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠳ᠋ᠤ᠌ ᠰᠠᠢᠨ ᠦᠬᠦᠬᠦ ᠪᠣᠯᠤᠮᠵᠢ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠴᠢᠮᠠᠲᠤ ᠪᠣᠯ ᠪᠠᠢᠨᠠ ᠭᠡᠳ ᠪᠠᠲᠤ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠶᠠᠪᠠᠭᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠣᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠢᠭᠡ ᠵᠠᠮ ᠰᠢᠯᠢᠵᠦ ᠣᠯᠤᠭᠠᠳ ᠲᠡᠭᠦᠨ ᠦ᠌ ᠪᠡᠨ ᠲᠥᠯᠥᠭᠡ ᠵᠢᠳᠬᠦᠭᠰᠡᠨ᠃ ᠲᠡᠭᠡᠭᠡᠳ ᠣᠳᠣ ᠦᠬᠦᠪᠡᠯ ᠪᠠᠰᠠ ᠯᠠ ᠲᠡᠭᠦᠨ ᠦ᠌ ᠪᠡᠨ ᠲᠥᠯᠥᠭᠡ ᠦᠬᠦᠨᠡ᠃ ᠪᠢ ᠪᠣᠯ ᠵᠠᠮ ᠦᠭᠡᠢ ᠬᠠᠨᠠᠨ ᠤᠯᠠᠭᠠᠨ ᠬᠠᠳᠠ ᠮᠥᠷᠭᠥᠭᠰᠡᠭᠡᠷ ᠶᠠᠪᠤᠭᠠ ᠬᠥᠮᠦᠨ ᠪᠣᠯᠬᠣᠷ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠦᠬᠦᠬᠦ ᠶᠤᠮ ᠪᠣᠢ? ᠪᠢ ᠴᠢᠮᠠᠶ᠋ᠢ ᠠᠯᠠᠭᠤᠯᠬᠤ ᠦᠭᠡᠢ᠃ ᠥᠨᠥ ᠰᠥᠨᠢ ᠤᠷᠭᠤᠭᠤᠯᠤᠨᠠ᠃ ᠴᠢ ᠪᠣᠯ ᠨᠠᠳᠠ ᠰᠢᠭ᠋ ᠭᠦᠨ ᠬᠤᠳᠳᠤᠭ ᠤ᠋ᠨ ᠢᠷᠣᠭᠠᠯ ᠳ᠋ᠤ᠌ ᠬᠠᠶᠠᠭᠳᠠᠭᠰᠠᠨ ᠮᠡᠯᠡᠬᠡᠢ ᠰᠢᠭ ᠠᠮᠢᠲᠠᠨ ᠪᠢᠰᠢ ᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠡᠴᠡ ᠬᠣᠢᠰᠢ ᠵᠣᠷᠢᠭᠲᠠᠢ ᠦᠬᠦᠶᠡ ᠭᠡᠵᠦ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠰᠢᠢᠳᠦᠭᠡᠳ ᠤᠬᠠᠭᠠᠨ ᠣᠷᠣᠭᠰᠠᠨ ᠡᠴᠡ ᠨᠢ ᠡᠬᠢᠯᠡᠨ ᠵᠣᠳᠣᠵᠤ ᠵᠠᠨᠴᠢᠨ᠂ ᠬᠠᠯᠠᠭᠤᠨ ᠵᠡᠭᠦᠦ ᠪᠡᠷ ᠲᠥᠭᠡᠨᠡᠵᠦ᠂ ᠦᠰᠦ ᠡᠴᠡ ᠨᠢ ᠲᠤᠭ ᠲᠤᠭ ᠢ᠋ᠶ᠋ᠠᠷ ᠵᠤᠯᠭᠠᠭᠠᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠷᠢᠶᠠᠯ ᠵᠦᠬᠡᠯ ᠡᠴᠡ ᠥᠭᠡᠷᠡ ᠳᠠᠭᠤ ᠭᠠᠷᠬᠤ ᠦᠭᠡᠢ ᠪᠠᠢᠵᠤ ᠪᠢᠯᠡ᠃ ᠭᠡᠲᠡᠯᠡ 《ᠴᠢᠮᠠᠶ᠋ᠢ ᠠᠯᠠᠭᠤᠯᠬᠤ ᠦᠭᠡᠢ᠃ ᠥᠨᠥ ᠰᠥᠨᠢ ᠤᠷᠭᠤᠭᠤᠯᠤᠨᠠ》 ᠭᠡᠰᠡᠨ ᠬᠣᠩᠭᠣᠷ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠰᠢᠯᠤᠭᠤᠳᠴᠤ ᠡᠬᠢᠯᠡᠭᠰᠡᠨ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠰᠢᠨᠤᠯ ᠢ᠋ᠶ᠋ᠠᠷ ᠳᠡᠪᠳᠦᠭᠳᠡᠨ ᠠᠮᠢᠰᠬᠤᠭᠠᠯᠠᠬᠤ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠪᠣᠯ ᠬᠠᠮᠲᠤ ᠤᠷᠭᠤᠵᠤ ᠮᠠᠨ ᠤ᠋ ᠬᠢᠨ ᠲᠡᠢ ᠨᠡᠢᠯᠡᠶᠡ᠃
ᠬᠣᠩᠭᠣᠷ ᠭᠣᠮᠣᠳᠠᠯ ᠲᠠᠢ ᠪᠥᠭᠡᠳ ᠭᠠᠰᠢᠭᠤᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠴᠦ 《ᠨᠢᠭᠡ ᠣᠴᠢᠭᠰᠠᠨ᠃ ᠣᠳᠣ ᠳᠠᠭᠢᠵᠤ ᠣᠴᠢᠬᠤ ᠦᠭᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠷᠭᠠᠯ ᠢ᠋ ᠶᠠᠭᠠᠬᠢᠭᠰᠠᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠵᠢᠷᠭᠠᠯ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠭᠰᠢ ᠪᠠᠢᠭᠰᠠᠨ᠃ ᠴᠢ ᠮᠡᠳᠡᠨᠡ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠨᠡ᠃ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠷᠢᠭᠳᠠᠭᠰᠠᠨ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠪᠢᠳᠡ ᠬᠠᠮᠲᠤ ᠶᠠᠪᠤᠭᠰᠠᠨ᠃ ᠴᠢ ᠠᠪᠤᠷᠠᠵᠤ ᠥᠭᠭᠦᠭᠡᠴᠢ᠃
ᠬᠣᠩᠭᠣᠷ ᠳᠠᠭᠤ ᠦᠭᠡᠢ ᠪᠣᠳᠣᠯ ᠪᠣᠯᠤᠨ ᠪᠠᠬᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠪᠠᠲᠤ ᠶ᠋ᠢ ᠡᠭᠴᠡ ᠰᠢᠷᠳᠡᠵᠦ 《ᠪᠢ ᠥᠨᠥᠳᠥᠷ ᠵᠢᠷᠭᠠᠯ ᠢ᠋ ᠲᠠᠯᠪᠢᠬᠤ ᠳ᠋ᠤ᠌ ᠵᠢᠷᠭᠠᠯ ᠮᠠᠷᠭᠠᠰᠢ ᠨᠠᠮᠠᠶ᠋ᠢ ᠫᠤᠤᠳᠠᠨᠠ ᠰᠢᠦ ᠳᠡ᠃ ᠴᠢᠳᠠᠪᠠᠯ ᠠᠯᠠᠨᠠ ᠲᠡᠢᠮᠦ ᠤᠤ?》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠠᠳ ᠦᠭᠡᠢ᠃ ᠭᠡᠪᠡᠴᠦ ᠪᠢ ᠴᠢᠮᠠ ᠡᠴᠡ ᠭᠤᠶᠤᠵᠤ ᠪᠠᠢᠨᠠ᠃
ᠬᠣᠩᠭᠣᠷ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠵᠢᠷᠭᠠᠯ ᠳ᠋ᠤ᠌ ᠲᠤᠰᠠᠯᠠᠬᠤ ᠪᠣᠯᠪᠠᠤ ᠠᠯᠢ ᠦᠭᠡᠢ ᠪᠣᠯᠪᠠᠤ ᠭᠡᠰᠡᠨ ᠳᠠᠭᠠᠪᠤᠷᠢ ᠪᠣᠳᠣᠯ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠡᠷᠭᠢᠯᠳᠦᠨ ᠬᠦᠯᠢᠶᠡᠬᠦ ᠶ᠋ᠢᠨ ᠰᠢᠨᠠᠯᠤᠯ ᠳ᠋ᠤ᠌ ᠬᠣᠷᠣᠮ ᠴᠤ᠌ ᠭᠡᠰᠡᠨ ᠠᠷᠠᠢ ᠶᠠᠳᠠᠨ ᠥᠩᠭᠡᠷᠡᠬᠦ ᠮᠡᠲᠦ ᠪᠠᠢᠪᠠ᠃
ᠬᠣᠩᠭᠣᠷ ᠶᠠᠪᠤᠭᠰᠠᠨ ᠡᠴᠡ ᠬᠣᠢᠰᠢ ᠶᠡᠬᠡ ᠤᠳᠠᠪᠠ᠃ ᠣᠷᠣᠢ ᠶ᠋ᠢᠨ ᠨᠠᠷᠠ ᠣᠨᠢᠨ ᠳ᠋ᠤ᠌ ᠠᠪᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠮᠣᠷᠢᠨ ᠲᠦᠪᠡᠷᠭᠡᠨ ᠣᠢᠷᠠᠲᠤᠭᠰᠠᠭᠠᠷ ᠭᠡᠷ ᠦ᠋ᠨ ᠳᠡᠷᠭᠡᠳᠡ ᠵᠣᠭᠰᠣᠨ ᠤᠳᠠᠯ ᠦᠭᠡᠢ ᠡᠭᠦᠳᠡ ᠠᠯᠭᠤᠷ ᠨᠡᠭᠡᠭᠡᠭᠳᠡᠨ ᠬᠣᠩᠭᠣᠷ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠣᠷᠣᠵᠤ ᠢᠷᠡᠭᠡᠳ 《ᠬᠠᠷᠠ ᠶᠠᠷᠭᠠᠴᠢᠨ ᠨᠤᠭᠤᠳ》 ᠭᠡᠵᠦ ᠲᠠᠰᠤ ᠵᠠᠭᠤᠭᠰᠠᠨ ᠰᠢᠳᠦᠨ ᠦ᠌ ᠪᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠡᠯᠡᠭᠡᠳ ᠮᠠᠰᠢ ᠬᠦᠨᠳᠦ ᠪᠡᠷ ᠵᠠᠪᠢᠯᠠᠨ ᠰᠠᠭᠤᠵᠤ ᠭᠠᠩᠰᠠ ᠪᠠᠨ ᠭᠠᠷᠭᠠᠨ ᠲᠠᠮᠠᠬᠢ ᠲᠠᠲᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠪᠣᠯᠪᠠ? ᠵᠢᠷᠭᠠᠯ ᠢ᠋ ᠠᠯᠠᠴᠢᠬᠠᠵᠠᠢ ᠤᠤ? ᠭᠡᠵᠦ ᠠᠰᠠᠭᠤᠭᠠᠳ ᠪᠠᠲᠤ ᠪᠣᠰᠪᠠ᠃ ᠬᠣᠩᠭᠣᠷ ᠬᠠᠮᠠᠷ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠤᠲᠤᠭᠠ ᠰᠠᠪᠰᠠᠭᠤᠯᠤᠨ ᠲᠣᠪ ᠳᠤᠭᠤᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠠᠲᠤ ᠶ᠋ᠢ ᠬᠡᠰᠡᠭ ᠰᠢᠷᠲᠡᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠬᠣᠩᠭᠣᠷ ᠭᠠᠷᠴᠤ ᠵᠢᠷᠭᠠᠯ ᠢ᠋ ᠪᠠᠷᠢᠭᠳᠠᠭᠰᠠᠳ ᠦ᠋ᠨ ᠳᠤᠮᠳᠠ ᠡᠷᠢᠭᠰᠡᠨ ᠪᠣᠯᠪᠠᠴᠤ ᠣᠯᠤᠭᠰᠠᠨ ᠦᠭᠡᠢ᠃ ᠭᠡᠲᠡᠯᠡ ᠨᠢᠭᠡ ᠡᠪᠦᠭᠡᠨ 《ᠬᠥᠮᠦᠨ ᠢ᠋ ᠴᠦ᠍ ᠬᠣᠷᠣᠬᠠᠢ ᠰᠢᠭ᠋ ᠯᠡ ᠬᠢᠳᠤᠵᠤ ᠪᠠᠢᠨᠠ ᠳᠠ᠃ ᠲᠦᠷᠦᠭᠦᠨ ᠳ᠋ᠦ᠍ ᠡᠨᠡ ᠬᠣᠢᠰᠢ ᠪᠠᠨ ᠠᠷᠪᠠᠭᠠᠳ ᠰᠠᠢᠬᠠᠨ ᠵᠠᠯᠠᠭᠤ ᠶ᠋ᠢ ᠬᠦᠯᠢᠶᠡᠲᠡᠢ ᠨᠢ ᠲᠠᠭᠤᠭᠠᠳ ᠶᠠᠪᠤᠯᠠ᠃ ᠳᠠᠪᠠᠭᠠᠨ ᠤ᠋ ᠠᠷᠤ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠯᠠ ᠬᠣᠷᠣᠭᠠᠴᠢᠬᠠᠬᠤ ᠪᠠᠢᠬᠤ ᠳᠠ᠃ ᠪᠤᠷᠬᠠᠨ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠶᠡᠬᠡ ᠨᠢᠭᠦᠯ ᠪᠣᠢ?》 ᠭᠡᠳ ᠵᠠᠯᠪᠠᠷᠢᠪᠠ᠃
ᠬᠣᠩᠭᠣᠷ ᠮᠣᠷᠳᠠᠭᠠᠳ ᠲᠡᠳᠡᠨ ᠦ᠌ ᠬᠣᠢᠨᠠ ᠡᠴᠡ ᠳᠣᠪᠲᠣᠯᠪᠠ᠃ ᠦᠨᠡᠬᠡᠷ ᠴᠦ᠍ ᠠᠷᠪᠠᠭᠠᠳ ᠬᠥᠮᠦᠨ ᠢ᠋ ᠳᠠᠪᠠᠭᠠᠨ ᠤ᠋ ᠠᠷᠤ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠳᠡᠭᠦᠵᠢᠯᠡᠵᠦ ᠠᠯᠠᠬᠤ ᠪᠠᠷ ᠬᠦᠯᠢᠵᠦ ᠬᠣᠯᠪᠣᠭᠠᠳ ᠲᠦᠭᠵᠢᠯ ᠵᠠᠩᠵᠤᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠪᠣᠯᠤᠭᠰᠠᠨ ᠬᠣᠶᠠᠷ ᠶᠠᠷᠭᠠᠴᠢᠨ ᠳᠠᠭᠤᠨ ᠶᠠᠪᠤᠵᠠᠢ᠃ ᠮᠣᠳᠣᠨ ᠳ᠋ᠤ᠌ ᠠᠪᠠᠴᠢᠭᠠᠳ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠲᠣᠮᠣ ᠮᠣᠳᠣᠨ ᠤ᠋ ᠮᠥᠴᠢᠷ ᠡᠴᠡ ᠳᠡᠭᠦᠵᠢᠯᠡᠵᠦ ᠡᠬᠢᠯᠡᠪᠡ᠃ ᠭᠤᠷᠪᠠ ᠶ᠋ᠢ ᠠᠯᠠᠭᠠᠳ ᠵᠢᠷᠭᠠᠯ ᠤ᠋ᠨ ᠡᠭᠡᠯᠵᠢ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠢᠨᠢ ᠪᠠᠭᠰᠢ ᠭᠤᠸᠠᠢ ᠪᠠᠢᠬᠤ ᠠ᠋? ᠭᠡᠵᠦ ᠨᠢᠭᠡ ᠶᠠᠷᠭᠠᠴᠢᠨ ᠰᠦᠷᠡᠬᠡᠢ ᠳᠣᠭᠣᠭᠢᠲᠠᠢ ᠠᠰᠠᠭᠤᠭᠠᠳ ᠵᠢᠷᠭᠠᠯ ᠢ᠋ ᠪᠤᠰᠤᠳ ᠡᠴᠡ ᠨᠢ ᠰᠠᠯᠭᠠᠵᠤ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠭ ᠨᠢ ᠲᠤᠭ ᠳᠠᠭᠢᠬᠤ ᠶᠣᠰᠣᠲᠠᠢ ᠵᠣᠯᠢᠭ ᠪᠠᠢᠭᠠ ᠶᠤᠮ᠃ ᠠᠪᠠᠴᠢᠭᠠᠳ ᠤᠶᠠᠵᠤ ᠣᠷᠭᠢ᠃ ᠨᠢᠭᠡ ᠲᠠᠮᠠᠬᠢ ᠲᠠᠲᠠᠵᠤ ᠠᠪᠤᠭᠠᠳ ᠪᠣᠳᠢ ᠶ᠋ᠢ ᠨᠢ ᠬᠥᠲᠥᠯᠵᠦ ᠤᠷᠭᠢᠶᠠ ᠭᠡᠳ ᠨᠥᠭᠦᠭᠡ ᠨᠢ ᠬᠣᠵᠤᠤᠯᠠ ᠳᠡᠭᠡᠷᠡ ᠲᠡᠪᠡᠳᠡᠶᠡ ᠰᠠᠨᠳᠠᠢᠯᠠᠨ ᠰᠠᠭᠤᠪᠠ᠃
ᠶᠠᠭ ᠡᠨᠡ ᠦᠶᠡ ᠪᠡᠷ ᠮᠣᠳᠣᠨ ᠳᠤᠮᠳᠠ ᠡᠴᠡ ᠨᠠᠷᠢᠬᠠᠨ ᠥᠨᠳᠥᠷ ᠪᠣᠷᠣ ᠮᠣᠷᠢ ᠲᠠᠢ ᠬᠣᠩᠭᠣᠷ ᠭᠠᠷᠴᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠳᠠᠨ ᠵᠣᠷᠢᠭᠲᠤ ᠪᠦᠷᠭᠦᠳ ᠪᠠᠭᠠᠲᠤᠷ ᠢᠷᠡᠯᠡ ᠭᠡᠳ ᠵᠢᠷᠭᠠᠯ ᠢ᠋ ᠴᠢᠷᠴᠦ ᠶᠠᠪᠤᠭᠰᠠᠨ ᠶᠠᠷᠭᠠᠴᠢᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤ ᠤᠯᠤᠰ ᠢ᠋ᠶ᠋ᠠᠨ ᠳᠡᠯᠪᠢ! ᠭᠡᠵᠦ ᠬᠣᠩᠭᠣᠷ ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠲᠡᠭᠡᠵᠦ ᠪᠠᠢᠨᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠡᠭᠡᠵᠦ ᠪᠠᠢᠨᠠ᠃ ᠳᠡᠳ᠋ ᠵᠠᠩᠵᠤᠨ ᠬᠡᠯᠡᠵᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠳ᠋ ᠵᠠᠩᠵᠤᠨ ᠭᠡᠨᠡ ᠠ᠋ ᠭᠡᠳ ᠬᠣᠵᠤᠤᠯᠠ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠶᠠᠷᠭᠠᠴᠢᠨ ᠬᠥᠭᠵᠢᠯᠲᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠭᠵᠢᠯ ᠵᠠᠩᠵᠤᠨ ᠤ᠋ ᠵᠠᠷᠯᠢᠭ ᠢ᠋ ᠨᠢᠭᠡ ᠳᠡᠳ᠋ ᠵᠠᠩᠵᠤᠨ ᠪᠢᠲᠡᠭᠡᠢ ᠬᠡᠯᠡ᠂ ᠮᠢᠩᠭᠠᠨ ᠳᠡᠳ᠋ ᠵᠠᠩᠵᠤᠨ ᠡᠪᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠬᠡᠷᠡᠭ᠃ ᠠᠷᠭᠠᠮᠵᠢᠶᠠ ᠪᠠᠨ ᠮᠥᠴᠢᠷ ᠳᠡᠭᠡᠭᠦᠷ ᠬᠠᠶᠠᠵᠤ ᠣᠷᠭᠢ᠂ ᠪᠤᠰᠢᠭᠤᠬᠠᠨ ᠲᠠᠲᠠᠵᠤ ᠤᠷᠭᠢᠶᠠ ᠭᠡᠳ ᠭᠠᠩᠰᠠ ᠪᠠᠨ ᠲᠦᠷᠡᠢᠯᠡᠨ ᠪᠣᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠰᠢᠭᠤᠬᠠᠨ ᠰᠤᠯᠠᠯᠠ ᠭᠡᠵᠦ ᠪᠠᠢᠨᠠ ᠰᠢᠦ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠯᠠᠭᠤ ᠮᠢᠨᠢ ᠥᠪᠡᠷ ᠢ᠋ᠶ᠋ᠡᠨ ᠳᠠᠯᠢᠭᠴᠢ ᠪᠣᠯᠬᠤ ᠬᠡ ᠥᠬᠡᠢ ᠶᠤᠮ ᠪᠣᠯ ᠪᠢᠲᠡᠭᠡᠢ ᠭᠤᠸᠠᠭᠯᠠᠭᠠᠳ ᠪᠠᠢ ᠭᠡᠳ ᠶᠠᠷᠭᠠᠴᠢᠨ ᠵᠢᠷᠭᠠᠯ ᠤᠷᠤᠭᠤ ᠶᠠᠪᠤᠯᠠ᠃
ᠬᠣᠩᠭᠣᠷ ᠤ᠋ᠨ ᠮᠣᠷᠢ ᠭᠡᠨᠡᠳᠲᠡ ᠤᠬᠤᠰᠬᠢᠨ᠂ ᠪᠦᠳᠦᠭᠦᠨ ᠲᠠᠰᠢᠭᠤᠷ ᠬᠡᠭᠵᠢᠭᠦᠨ ᠶᠠᠷᠭᠠᠴᠢᠨ ᠤ᠋ ᠳᠠᠠᠠᠵᠠᠨ ᠳᠡᠭᠡᠷᠡ ᠪᠠᠭᠤᠪᠠ᠃ ᠰᠠᠶᠢᠬᠠᠨ ᠲᠣᠮᠣ ᠦᠭᠡ ᠬᠡᠯᠡᠵᠦ ᠪᠠᠢᠭᠰᠠᠨ ᠶᠠᠷᠭᠠᠴᠢᠨ ᠭᠤᠯᠳᠤᠢᠨ ᠤᠨᠠᠪᠠ᠃ ᠨᠥᠭᠦᠭᠡ ᠨᠢ ᠵᠢᠷᠭᠠᠯ ᠢ᠋ ᠣᠷᠬᠢᠨ᠂ ᠮᠣᠳᠣᠨ ᠤ᠋ ᠪᠦᠳᠦᠭᠦᠨ ᠮᠥᠴᠢᠷ ᠪᠠᠷᠢᠨ ᠳᠠᠭᠠᠷᠢᠭᠰᠠᠨ ᠪᠣᠯᠪᠠᠴᠤ ᠬᠣᠩᠭᠣᠷ ᠴᠢᠳᠠᠮᠠᠭᠠᠢ ᠵᠠᠢᠯᠠᠨ ᠮᠥᠨ ᠯᠡ ᠪᠦᠳᠦᠭᠦᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠨᠠᠮ ᠴᠣᠬᠢᠵᠤ ᠤᠨᠠᠭᠠᠪᠠ᠃
ᠮᠣᠷᠢᠨ ᠡᠴᠡ ᠪᠡᠨ ᠦᠰᠦᠷᠦᠨ ᠪᠠᠭᠤᠵᠤ ᠠᠷᠤ ᠳ᠋ᠠᠭᠠᠨ ᠬᠠᠪᠴᠢᠭᠤᠯᠤᠭᠠᠰᠤᠲᠠᠢ ᠶᠠᠪᠤᠭᠰᠠᠨ ᠬᠢᠲᠤᠭᠠ ᠪᠠᠨ ᠰᠤᠭᠤ ᠲᠡᠳᠡᠨ ᠠᠪᠴᠤ ᠬᠥᠮᠦᠰ ᠦ᠋ᠨ ᠬᠦᠯᠢᠭ ᠢ᠋ ᠲᠠᠢᠯᠤᠭᠠᠳ 《ᠳᠤᠷᠠᠲᠠᠢ ᠵᠦᠭ ᠲᠡᠭᠡᠨ ᠶᠠᠪᠤᠵᠠᠭᠠ》 ᠭᠡᠵᠦ ᠬᠢᠬᠤᠷᠠᠭᠰᠠᠨ ᠳᠠᠭᠤ ᠪᠠᠷ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ! ᠴᠢᠨᠦ ᠠᠴᠢ ᠶ᠋ᠢ ᠮᠠᠷᠲᠠᠬᠤ ᠦᠭᠡᠢ ᠭᠡᠵᠦ ᠵᠢᠷᠭᠠᠯ ᠳᠡᠷᠭᠡᠳᠡ ᠨᠢ ᠢᠷᠡᠭᠡᠳ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠦᠭᠡ ᠦᠭᠡᠢ ᠵᠠᠢᠯᠠᠵᠠᠭᠠ᠃ ᠲᠡᠷᠡ ᠬᠣᠶᠠᠷ ᠮᠣᠷᠢ᠂ ᠫᠤᠤ ᠶ᠋ᠢ ᠠᠪᠤᠭᠠᠷᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠢᠳᠡᠨ ᠲᠡᠢ ᠶᠠᠪᠤ ᠭᠡᠵᠦ ᠵᠢᠷᠭᠠᠯ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠰᠢᠭᠤᠬᠠᠨ ᠵᠠᠢᠯᠠᠭᠠᠳ ᠥᠭᠭᠦᠭᠡᠴᠢ! ᠠᠯᠢ ᠪᠢ ᠲᠠ ᠨᠠᠷ ᠢ᠋ ᠴᠣᠬᠢᠯᠠᠬᠤ ᠤᠤ ᠭᠡᠵᠦ ᠬᠣᠩᠭᠣᠷ ᠪᠠᠢᠳᠠᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠩᠳᠤᠷᠪᠠ᠃
ᠲᠡᠷᠡ ᠬᠥᠮᠦᠰ ᠢ᠋ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠲᠠᠯᠠ ᠬᠣᠩᠭᠣᠷ ᠰᠠᠭᠤᠭᠰᠠᠭᠠᠷ ᠪᠠᠢᠯᠠ᠃ ᠲᠡᠭᠡᠭᠡᠳ ᠣᠭᠵᠣᠮ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠮᠣᠷᠳᠠᠨ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠤᠢ ᠰᠠᠯᠬᠢ ᠮᠡᠲᠦ ᠠᠯᠠᠭᠠ ᠪᠣᠯᠪᠠ᠃ ᠬᠤᠷᠳᠤ ᠪᠠᠨ ᠰᠠᠭᠠᠯ ᠦᠭᠡᠢ ᠳᠠᠪᠬᠢᠭᠰᠠᠭᠠᠷ ᠪᠠᠲᠤ ᠳᠡᠭᠡᠷᠡ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠷᠭᠠᠯ ᠢ᠋ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠵᠦ ᠪᠠᠲᠤ ᠠᠰᠠᠭᠤᠭᠠᠳ ᠬᠣᠩᠭᠣᠷ ᠤ᠋ᠨ ᠮᠥᠷᠦᠨ ᠡᠴᠡ ᠤᠭᠵᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠬᠢᠭᠠᠳ ᠯᠠ ᠪᠠᠷᠢᠭᠳᠠᠭᠠ ᠦᠭᠡᠢ ᠪᠣᠯ ᠳᠤᠷᠠᠲᠠᠢ ᠵᠦᠭ ᠲᠡᠭᠡᠨ ᠶᠠᠪᠤᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠤᠤ?
ᠬᠣᠩᠭᠣᠷ ᠲᠣᠯᠣᠭᠠᠢ ᠪᠠᠨ ᠡᠷᠭᠢᠭᠦᠯᠦᠨ ᠪᠠᠲᠤ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠢᠱ᠌ᠢ ᠴᠠᠪᠠᠰᠤ ᠳᠠ》 ᠭᠡᠳ ᠭᠠᠰᠢᠭᠤᠨ ᠮᠦᠰᠢᠶᠡᠪᠡ᠃
ᠵᠢᠷᠭᠠᠯ ᠤ᠋ᠨ ᠠᠮᠢᠳᠤ ᠭᠠᠷᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠭᠰᠠᠨ ᠪᠠᠲᠤ ᠣᠯᠠᠨ ᠶᠠᠭᠤᠮᠠ ᠠᠰᠠᠭᠤᠮᠠᠷ ᠪᠠᠢᠭᠰᠠᠨ ᠪᠣᠯᠪᠠᠴᠤ 《ᠢᠱ᠌ᠢ ᠴᠠᠪᠠᠰᠤ ᠳᠠ》 ᠭᠡᠰᠡᠨ ᠬᠣᠩᠭᠣᠷ ᠤ᠋ᠨ ᠦᠭᠡ᠂ ᠲᠡᠭᠦᠨ ᠦ᠌ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠨᠢᠳᠦ ᠳᠠᠬᠢᠭᠠᠳ ᠨᠠᠳᠠ ᠡᠴᠡ ᠶᠠᠭᠤᠮᠠ ᠪᠢᠲᠡᠭᠡᠢ ᠠᠰᠠᠭᠤᠭᠠᠴᠢ ᠭᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠪᠣᠯᠢᠪᠠ᠃
ᠨᠢᠭᠡᠨ ᠬᠡᠰᠡᠭ ᠭᠡᠷ ᠲᠦ᠍ ᠶᠠᠮᠠᠷ ᠴᠤ᠌ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠪᠠᠢᠯᠠ᠃ ᠬᠣᠩᠭᠣᠷ ᠪᠣᠳᠣᠯ ᠪᠣᠯᠤᠨ ᠪᠠᠬᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠭᠠᠷᠴᠤ ᠬᠣᠭᠣᠯᠠ ᠠᠪᠴᠢᠷᠠᠨ ᠪᠠᠲᠤ ᠳ᠋ᠤ᠌ ᠥᠭᠭᠦᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠯᠠᠪ ᠲᠠᠯᠪᠢᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠲᠠᠯᠪᠢᠨᠠ᠃ ᠬᠠᠷᠢᠨ ᠲᠠᠨ ᠤ᠋ ᠬᠢᠨ ᠨᠠᠮᠠᠶ᠋ᠢ ᠪᠠᠷᠢᠵᠤ ᠠᠪᠪᠠᠯ ᠥᠷᠥᠰᠢᠶᠡᠬᠦ ᠦᠭᠡᠢ᠃ ᠰᠢᠭᠤᠳ ᠠᠯᠠᠨᠠ ᠰᠢᠦ ᠳᠡ᠃
ᠦᠨᠡᠬᠡᠷ ᠴᠦ᠍ ᠬᠣᠩᠭᠣᠷ ᠢ᠋ ᠥᠷᠥᠰᠢᠶᠡᠬᠦ ᠦᠭᠡᠢ ᠰᠢᠦ ᠳᠡ᠃ ᠲᠡᠭᠦᠨ ᠦ᠌ ᠤᠷᠢᠳᠤ ᠬᠢᠭᠰᠡᠨ ᠶᠠᠯᠠ ᠦᠯᠡᠮᠵᠢ᠃ ᠭᠡᠲᠡᠯᠡ ᠣᠳᠣ ᠤᠯᠠᠮ ᠨᠡᠮᠡᠭᠳᠡᠵᠡᠢ᠃ ᠤᠷᠢᠳᠤ ᠬᠣᠩᠭᠣᠷ ᠰᠢᠯᠢ ᠶ᠋ᠢᠨ ᠬᠤᠯᠠᠭᠠᠢᠴᠢ ᠪᠠᠢᠭᠰᠠᠨ ᠪᠣᠯ ᠣᠳᠣ ᠲᠡᠭᠦᠨ ᠳᠡᠭᠡᠷᠡ ᠨᠢ ᠵᠠᠰᠠᠭ ᠲᠥᠷᠥ ᠶ᠋ᠢ ᠡᠰᠡᠷᠭᠦᠴᠡᠭᠰᠡᠨ ᠪᠣᠰᠤᠯᠭᠠ ᠶ᠋ᠢᠨ ᠳᠡᠳ᠋ ᠵᠠᠩᠵᠤᠨ ᠨᠡᠮᠡᠭᠳᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠬᠡᠷ ᠴᠦ᠍ ᠥᠷᠥᠰᠢᠶᠡᠬᠦ ᠦᠭᠡᠢ ᠪᠠᠢᠬᠤ ᠳᠠ᠃
ᠲᠠᠷᠢᠶᠠᠲᠤ ᠶ᠋ᠢᠨ ᠲᠠᠩᠬᠢᠮ ᠤ᠋ᠨ ᠪᠠᠭᠰᠢ ᠶ᠋ᠢ ᠰᠢᠷᠪᠥᠰᠥᠯᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠨᠠᠢᠷᠰᠠᠭ ᠶᠠᠷᠢᠯᠴᠠᠨ᠂ ᠬᠣᠭᠣᠯᠠᠯᠠᠵᠤ ᠪᠠᠢᠭᠠ ᠳᠡᠳ᠋ ᠵᠠᠩᠵᠤᠨ ᠤ᠋ ᠬᠠᠴᠢᠨ ᠵᠠᠩ ᠤ᠋ᠨ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠲᠦᠭᠵᠢᠯ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠰᠣᠨᠢᠷᠬᠠᠨ ᠦᠵᠡᠬᠦ ᠪᠡᠷ ᠬᠣᠩᠭᠣᠷ ᠤ᠋ᠨ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠳ᠋ ᠵᠠᠩᠵᠤᠨ ᠶᠠᠭᠤ ᠪᠣᠯᠤᠭᠠᠳ ᠡᠨᠡ ᠭᠥᠯᠥᠭᠡ ᠶ᠋ᠢ ᠳᠠᠢᠯᠠᠵᠤ ᠪᠠᠢᠳᠠᠭ ᠪᠢᠯᠡ? ᠬᠣᠩᠭᠣᠷ ᠪᠣᠰᠴᠤ ᠲᠦᠭᠵᠢᠯ ᠦ᠋ᠨ ᠳᠡᠷᠭᠡᠳᠡ ᠣᠴᠢᠭᠠᠳ 《ᠡᠭᠦᠨ ᠢ᠋ ᠪᠠᠶᠠᠷᠯᠠᠭᠤᠯᠵᠤ ᠪᠠᠢᠭᠠᠳ ᠥᠷᠯᠥᠭᠡ ᠥᠪᠡᠷ ᠢ᠋ᠶ᠋ᠡᠨ ᠵᠢᠷᠦᠬᠡ ᠶ᠋ᠢ ᠨᠢ ᠰᠤᠭᠤᠯᠵᠤ ᠲᠤᠭ ᠳᠠᠭᠢᠨᠠ᠃ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠭᠰᠠᠨ ᠡᠨᠡ ᠪᠡᠯᠲᠡᠷᠭᠡ ᠲᠡᠢ ᠶᠠᠷᠢᠬᠤ ᠶᠠᠭᠤᠮᠠ ᠨᠠᠳᠠ ᠳ᠋ᠤ᠌ ᠪᠣᠢ》 ᠭᠡᠵᠦ ᠴᠢᠬᠢᠨ ᠳ᠋ᠦ᠍ ᠨᠢ ᠰᠢᠪᠡᠭᠡᠨᠡᠪᠡ᠃
ᠲᠦᠭᠵᠢᠯ ᠲᠠᠭᠠᠯᠠᠮᠵᠢᠲᠠᠢ ᠢᠨᠢᠶᠡᠮᠰᠦᠭᠯᠡᠭᠡᠳ ᠡᠷᠭᠢᠬᠦ ᠭᠡᠬᠦ ᠳ᠋ᠦ᠍ ᠨᠢ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠳ᠋ ᠵᠠᠩᠵᠤᠨ ᠳ᠋ᠤ᠌ ᠲᠤᠭ ᠪᠠᠢᠳᠠᠭ ᠦᠭᠡᠢ ᠶᠦ᠍ᠮ ᠤᠤ? ᠭᠡᠵᠦ ᠬᠣᠩᠭᠣᠷ ᠵᠠᠯᠢᠵᠢᠩᠭᠤᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠵᠦ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠢᠳᠠᠭ ᠶᠤᠮ ᠪᠣᠯ ᠥᠷᠯᠥᠭᠡ ᠳᠠᠭᠢᠬᠤ ᠭᠡᠰᠡᠨ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠵᠢᠭ ᠰᠢᠷᠠ ᠲᠤᠭ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠤᠭ ᠭᠡᠵᠦ ᠪᠣᠳᠣᠭᠠᠷᠠᠢ ᠭᠡᠳ ᠭᠠᠷᠤᠯᠠ᠃ ᠲᠡᠷᠡ ᠰᠥᠨᠢ ᠬᠣᠩᠭᠣᠷ ᠪᠣᠷᠣ ᠮᠣᠷᠢ ᠪᠠᠨ ᠪᠠᠲᠤ ᠳ᠋ᠤ᠌ ᠥᠭᠴᠦ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ 《ᠵᠠ ᠰᠠᠢᠨ ᠶᠠᠪᠤᠭᠠᠷᠠᠢ᠃ ᠪᠣᠳᠣᠪᠠᠯ ᠴᠢ ᠨᠥᠬᠥᠳ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠵᠡᠪᠰᠡᠭᠵᠢᠵᠦ ᠠᠪᠤᠭᠠᠳ ᠪᠢᠳᠡᠨ ᠲᠡᠢ ᠪᠠᠢᠯᠳᠤᠬᠤ ᠭᠡᠵᠦ ᠢᠷᠡᠬᠦ ᠪᠠᠢᠯᠭᠦᠢ ᠳᠡ᠃ ᠪᠢᠳᠡ ᠬᠣᠶᠠᠷ ᠤ᠋ᠨ ᠵᠠᠮ ᠡᠭᠦᠷᠢᠳᠡ ᠰᠠᠯᠵᠤ᠂ ᠠᠭᠤᠯᠵᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠪᠠ ᠪᠣᠯᠤᠯᠲᠠᠢ ᠭᠡᠳ ᠭᠠᠷ ᠢ᠋ ᠨᠢ ᠴᠢᠩᠭᠠ ᠠᠳᠬᠤᠭᠰᠠᠨ ᠢ᠋ᠶ᠋ᠠᠨ ᠪᠠᠶᠠᠷᠲᠠᠢ ᠡᠪᠦᠭᠡᠨ ᠮᠢᠨᠢ᠃ ᠵᠠ ᠪᠣᠰᠢᠭᠣ ᠮᠣᠷᠳᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠲᠠᠯᠪᠢᠭᠰᠠᠨ ᠢ᠋ ᠮᠡᠳᠡᠪᠡᠯ ᠴᠢᠮᠠᠲᠤ ᠪᠥᠭᠡᠮ ᠲᠡᠢ ᠭᠠᠢ ᠪᠣᠯᠤᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠢᠭᠤᠢ ᠪᠠᠢᠯᠭᠦᠢ ᠳᠡ᠃ ᠮᠡᠳᠡᠭᠰᠡᠨ ᠴᠦ᠍ ᠶᠠᠭᠠᠬᠢᠬᠤᠪ᠃ ᠲᠠᠪᠢ ᠰᠢᠬᠠᠮ ᠢ᠋ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠬᠥᠮᠦᠨ᠂ ᠨᠢᠭᠡ ᠶ᠋ᠢ ᠲᠠᠯᠪᠢᠬᠤ ᠡᠷᠬᠡ ᠲᠡᠢ ᠪᠠᠢᠬᠤ ᠦᠭᠡᠢ ᠶᠠᠭᠠᠬᠢᠬᠤᠪ᠃ ᠲᠦᠷᠭᠡᠨ ᠶᠠᠪᠤ᠃
ᠤᠯᠠᠭᠠᠨ ᠤ᠋ ᠭᠠᠢᠬᠠᠯ ᠢ᠋ ᠤᠷᠭᠤᠭᠤᠯᠵᠤ ᠪᠠᠢᠭᠠ ᠬᠣᠩᠭᠣᠷ ᠢ᠋ ᠬᠠᠷᠠᠭᠰᠠᠨ ᠬᠥᠮᠦᠨ ᠲᠦᠭᠵᠢᠯ ᠳ᠋ᠦ᠍ ᠣᠴᠢᠵᠤ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠵᠠᠯᠠᠭᠤ ᠪᠦᠰᠡᠭᠦᠢ ᠲᠡᠢ ᠰᠠᠮᠠᠭᠤᠷᠠᠵᠤ ᠪᠠᠢᠭᠰᠠᠨ ᠲᠦᠭᠵᠢᠯ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ᠃
ᠥᠷᠯᠥᠭᠡ ᠨᠢ ᠲᠦᠭᠵᠢᠯ ᠵᠠᠩᠵᠤᠨ ᠬᠣᠩᠭᠣᠷ ᠢ᠋ ᠳᠠᠭᠤᠳᠠᠬᠤ ᠳ᠋ᠤ᠌ ᠣᠴᠢᠪᠠᠯ ᠭᠡᠷ ᠦ᠋ᠨ ᠬᠣᠢᠮᠣᠷ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠨᠥᠮᠥᠭᠡᠨ ᠡᠮᠦᠰᠦᠭᠡᠳ ᠤᠯᠠᠭᠠᠨ ᠣᠯᠪᠣᠭ ᠳᠡᠭᠡᠷᠡ ᠬᠠᠩᠬᠠᠢᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠦᠭᠵᠢᠯ ᠦ᠋ᠨ ᠨᠢᠳᠦᠨ ᠡᠴᠡ ᠨᠢ ᠭᠠᠯ ᠪᠤᠲᠠᠷᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠬᠤᠯᠠᠭᠠᠢᠴᠢ ᠴᠢ ᠤᠯᠠᠭᠠᠨ ᠤ᠋ ᠨᠣᠬᠠᠢ ᠶ᠋ᠢ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠵᠦ ᠰᠦᠷᠲᠡᠢ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠳᠠᠴᠢᠬᠠᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠠᠢᠬᠤ ᠠ᠋᠃ ᠤᠯᠠᠭᠠᠨ ᠤ᠋ ᠣᠷᠭᠤᠳᠤᠤᠯ ᠳ᠋ᠤ᠌ ᠬᠥᠯ ᠵᠠᠯᠭᠠᠭᠤᠯᠵᠤ ᠥᠭᠭᠦᠭᠡᠳ ᠤᠷᠭᠤᠭᠤᠯᠤᠭᠰᠠᠨ ᠢ᠋ ᠮᠡᠳᠡᠭᠡ ᠦᠭᠡᠢ ᠶᠤᠮ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠡᠭᠦᠨ ᠢ᠋ ᠲᠦᠷᠭᠡᠨ ᠪᠡᠷᠢ ᠭᠡᠵᠦ ᠲᠦᠭᠵᠢᠯ ᠬᠣᠭᠣᠯᠠᠢ ᠪᠠᠨ ᠭᠢᠬᠤᠷᠠᠭᠤᠯᠤᠨ ᠵᠠᠩᠳᠤᠷᠪᠠ᠃
ᠭᠡᠷ ᠲᠦ᠍ ᠪᠠᠢᠭᠰᠠᠨ ᠳᠥᠷᠪᠡᠨ ᠬᠥᠮᠦᠨ ᠬᠣᠩᠭᠣᠷ ᠥᠭᠡᠳᠡ ᠲᠠᠪᠰᠢᠨ ᠢᠷᠡᠯᠡ᠃ ᠬᠣᠩᠭᠣᠷ ᠭᠡᠷ ᠦ᠋ᠨ ᠳᠤᠮᠳᠠ ᠰᠥᠩᠨᠡᠭᠰᠡᠨ ᠰᠠᠪᠠ ᠲᠠᠢ ᠠᠢᠷᠠᠭ ᠢ᠋ᠶ᠋ᠠᠷ ᠰᠠᠴᠤᠭᠰᠠᠨ ᠢ᠋ᠶ᠋ᠠᠨ ᠭᠱᠠᠨ ᠵᠠᠭᠤᠷᠠ ᠡᠷᠭᠢᠵᠦ ᠭᠠᠷᠤᠭᠠᠳ ᠲᠦᠭᠵᠢᠯ ᠵᠠᠩᠵᠤᠨ ᠤ᠋ ᠰᠠᠯᠬᠢᠨ ᠵᠡᠭᠡᠷᠳᠡ ᠮᠣᠷᠢ ᠶ᠋ᠢ ᠤᠨᠤᠨ ᠡᠮᠦᠨᠡ ᠵᠦᠭ ᠢ᠋ ᠪᠠᠷᠢᠵᠤ ᠪᠥᠬᠥᠢᠨ ᠳᠠᠪᠬᠢᠯᠠ᠃
ᠲᠦᠭᠵᠢᠯ ᠭᠦᠶᠦᠨ ᠭᠠᠷᠴᠤ ᠢᠷᠡᠭᠡᠳ 《ᠮᠠᠭᠤ ᠬᠤᠯᠠᠭᠠᠢᠴᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠠᠭᠠ ᠫᠤᠤᠳᠠ》 ᠭᠡᠵᠦ ᠪᠠᠷᠬᠢᠷᠠᠭᠰᠠᠨ ᠢ᠋ᠶ᠋ᠠᠨ ᠬᠡᠳᠦᠨ ᠬᠥᠮᠦᠨ ᠫᠤᠤ ᠬᠥᠯᠯᠡᠨ ᠱᠠᠭᠠᠢᠬᠤ ᠶ᠋ᠢ ᠬᠠᠷᠠᠭᠠᠳ 《ᠮᠤᠤᠰᠠᠢᠨ ᠭᠤᠢᠯᠢᠨᠴᠢᠨ ᠨᠤᠭᠤᠳ ᠮᠢᠨᠢ ᠮᠢᠨᠦ ᠮᠣᠷᠢ ᠶ᠋ᠢ ᠪᠢᠲᠡᠭᠡᠢ ᠫᠤᠤᠳᠠᠭᠠᠷᠠᠢ》 ᠭᠡᠯᠡ᠃
ᠫᠤᠤ ᠬᠡᠳᠦᠨ ᠵᠡᠷᠭᠡ ᠨᠦᠵᠢᠭᠢᠨᠡᠨ ᠳᠤᠤᠭᠠᠷᠪᠠ᠃ ᠬᠣᠩᠭᠣᠷ ᠮᠣᠳᠣᠨ ᠤ᠋ ᠬᠠᠵᠠᠭᠤ ᠤᠷᠤᠭᠤ ᠤᠨᠠᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠤᠳᠠᠯ ᠦᠭᠡᠢ ᠳᠠᠬᠢᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠭᠠᠷᠤᠭᠠᠳ ᠳᠠᠪᠬᠢᠯᠠ᠃ ᠪᠠᠰᠠ ᠬᠡᠳᠦᠨ ᠰᠠᠢᠨ ᠮᠣᠷᠢ ᠲᠠᠢ ᠬᠥᠮᠦᠨ ᠬᠥᠭᠡᠭᠡᠪᠡ᠃ ᠭᠡᠪᠡᠴᠦ ᠲᠦᠭᠵᠢᠯ ᠦ᠋ᠨ ᠰᠠᠯᠬᠢᠨ ᠵᠡᠭᠡᠷᠳᠡ ᠶ᠋ᠢ ᠪᠠᠷᠠᠭᠠᠳᠠᠬᠤ ᠮᠣᠷᠢ ᠶᠠᠭᠠᠬᠢᠨ ᠣᠯᠠᠨ ᠪᠠᠢᠬᠤ ᠪᠢᠯᠡ᠃
ᠭᠠᠭᠴᠠ ᠮᠣᠷᠢ ᠲᠠᠢ ᠬᠥᠮᠦᠨ ᠣᠪᠣᠭᠠ ᠣᠢᠷᠠᠳᠴᠤ ᠢᠷᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠲᠣᠮᠣ ᠴᠢᠯᠠᠭᠤ ᠰᠢᠭᠦᠷᠡᠨ ᠠᠪᠴᠤ ᠴᠣᠬᠢᠵᠤ ᠤᠨᠠᠭᠠᠪᠠ᠃