ᠲᠤᠩᠭᠠᠯᠠᠭ ᠲᠠᠮᠢᠷ4-17ᠲᠡᠭᠦᠰᠬᠡᠯ -ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2615《ᠲᠡᠮᠦᠷ ᠦ᠋ᠨ ᠮᠢᠨᠢ ᠬᠠᠷᠢᠭᠤ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠳᠣᠯᠣᠭᠠ
ᠵᠤᠨ ᠤ᠋ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠬᠣᠶᠠᠷ ᠳᠡᠷᠡᠭᠡ ᠶ᠋ᠢᠨ ᠪᠡᠯᠴᠢᠭᠡᠷ ᠡᠴᠡ ᠨᠡᠯᠢᠶᠡᠳ ᠳᠣᠭᠤᠤᠷ᠂ ᠳᠠᠷᠬᠠᠨ ᠠᠭᠤᠯᠠ ᠶ᠋ᠢᠨ ᠡᠮᠦᠨᠡ ᠡᠴᠡ ᠥᠨᠳᠥᠷ ᠵᠡᠭᠡᠷᠳᠡ ᠮᠣᠷᠢ ᠲᠠᠢ᠂ ᠬᠥᠬᠡ ᠳᠠᠪᠤᠤ ᠳᠡᠪᠡᠯ ᠲᠡᠢ᠂ ᠨᠣᠭᠣᠭᠠᠨ ᠳᠤᠷᠳᠤᠩ ᠠᠯᠴᠢᠭᠤᠷ ᠲᠠᠢ ᠡᠮᠡᠭᠲᠡᠢ ᠬᠥᠮᠦᠨ ᠢᠷᠡᠭᠡᠳ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠪᠠᠭᠤᠪᠠ᠃
ᠡᠨᠡ ᠪᠣᠯ ᠳᠤᠯᠮᠠ ᠪᠠᠢᠯᠠ᠃ ᠣᠯᠠᠨ ᠬᠣᠨᠣᠭ ᠤᠬᠢᠯᠠᠭᠰᠠᠨ ᠡᠴᠡ ᠨᠢᠳᠦ ᠨᠢ ᠬᠠᠪᠤᠩᠨᠠᠨ ᠪᠥᠯᠴᠥᠢᠵᠦ᠂ ᠦᠷᠭᠦᠯᠵᠢ ᠶᠠᠭᠠᠷᠠᠨ ᠲᠤᠶᠠᠭᠠᠷᠠᠵᠤ ᠶᠠᠪᠤᠳᠠᠭ ᠬᠠᠴᠠᠷ ᠨᠢ ᠣᠯᠠᠨ ᠵᠢᠯ ᠴᠢᠭᠢᠭᠲᠡᠢ ᠭᠠᠵᠠᠷ ᠬᠡᠪᠲᠡᠭᠰᠡᠨ ᠬᠥᠰᠡᠷ ᠦ᠋ᠨ ᠪᠤᠯᠤᠤ ᠶ᠋ᠢᠨ ᠶᠠᠰᠤ ᠮᠡᠲᠦ ᠥᠩᠭᠡ ᠲᠡᠢ ᠪᠣᠯᠵᠠᠢ᠃
ᠲᠦᠷᠦᠭᠦᠦ ᠤᠷᠤᠭᠰᠢ ᠪᠠᠨ ᠬᠠᠷᠠᠵᠤ ᠵᠢᠷᠢᠯᠵᠡᠨ ᠤᠷᠤᠰᠴᠤ ᠪᠠᠢᠭᠠ ᠲᠤᠩᠭᠠᠯᠠᠭ ᠤᠰᠤᠨ ᠡᠴᠡ ᠪᠠᠬᠠᠨ ᠵᠠᠯᠭᠢᠯᠠᠭᠰᠠᠨ ᠢ᠋ᠶ᠋ᠠᠨ ᠶᠠᠪᠠᠭᠠᠨ ᠰᠠᠭᠤᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠳᠣᠲᠣᠭᠠᠳᠤ ᠬᠣᠷᠮᠣᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃ ᠤᠰᠤ ᠰᠢᠷᠳᠡᠨ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠪᠥᠭᠡᠳ ᠭᠦᠨ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠰᠤᠪᠤᠳ ᠤ᠋ᠨ ᠬᠡᠯᠬᠢᠶᠡ ᠴᠤᠪᠤᠷᠠᠨ ᠤᠷᠤᠯᠳᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠠᠴᠠᠷ ᠢ᠋ ᠨᠢ ᠳ᠋ᠡᠭᠡᠨ ᠤᠷᠤᠰᠬᠤ ᠳ᠋ᠤ᠌ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠨᠢᠭᠡ ᠴᠦ᠍ ᠳᠤᠰᠤᠯ ᠨᠢᠯᠪᠤᠰᠤ ᠭᠠᠷᠭᠠᠬᠤ ᠦᠭᠡᠢ ᠭᠡᠵᠦ ᠲᠣᠳᠣ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠪᠣᠰᠴᠤ ᠡᠰᠢ ᠲᠡᠰᠢ ᠰᠢᠷᠲᠡᠨ ᠭᠠᠵᠠᠷ ᠣᠷᠣᠨ ᠢ᠋ ᠠᠵᠢᠭᠯᠠᠭᠠᠳ ᠮᠣᠷᠳᠠᠵᠤ ᠰᠢᠭᠤᠳ ᠭᠣᠣᠯ ᠭᠠᠲᠤᠯᠤᠨ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠢ᠋ ᠪᠠᠷᠢᠨ ᠶᠠᠪᠤᠬᠤ ᠳ᠋ᠤ᠌ ᠬᠠᠷᠠ ᠪᠣᠯᠢᠭᠠᠷᠠᠢ ᠪᠣᠭᠴᠣ ᠨᠢ ᠮᠣᠷᠢᠨ ᠤ᠋ ᠠᠶᠠ ᠪᠠᠷ ᠣᠷᠣᠭᠰᠢ ᠬᠣᠢᠰᠢ ᠬᠤᠯᠭᠢᠯᠠᠨ ᠬᠠᠶᠠᠯᠠᠨᠠ᠃
ᠲᠡᠮᠦᠷ ᠨᠢ ᠠᠯᠠᠭᠳᠠᠭᠰᠠᠨ ᠲᠤᠬᠠᠢ ᠰᠣᠨᠣᠰᠤᠭᠠᠳ ᠬᠡᠳᠦ ᠳᠠᠬᠢᠨ ᠤᠬᠠᠭᠠᠨ ᠠᠯᠳᠠᠵᠤ ᠤᠨᠠᠬᠤ ᠳ᠋ᠤ᠌ ᠥᠯᠵᠡᠢ ᠲᠡᠷᠢᠭᠦᠲᠡᠢ ᠠᠢᠯ ᠤ᠋ᠨ ᠬᠥᠮᠦᠰ ᠨᠢ ᠰᠡᠷᠡᠭᠡᠵᠡᠢ᠃ ᠲᠡᠮᠦᠷ ᠮᠢᠨᠢ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠶᠢᠷᠲᠢᠨᠴᠦ ᠬᠣᠭᠣᠰᠣᠨ᠂ ᠫᠠᠳ ᠬᠠᠷᠠᠩᠭᠤᠢ ᠬᠣᠩᠭᠢᠯ ᠠᠭᠤᠢ ᠰᠢᠭ᠋ ᠪᠣᠯᠵᠠᠢ᠃ ᠡᠨᠡ ᠥᠷᠥᠰᠢᠶᠡᠯ ᠦᠭᠡᠢ ᠬᠣᠷᠸᠠ ᠶ᠋ᠢ ᠪᠣᠯᠳᠠᠭ ᠰᠠᠨ ᠪᠣᠯ ᠬᠦᠨᠳᠦ ᠯᠠᠩᠳᠤᠤ ᠪᠠᠷᠢᠵᠤ ᠪᠠᠢᠭᠠᠳ ᠪᠤᠲᠠᠷᠠᠲᠠᠯᠠ ᠴᠣᠬᠢᠮᠠᠷ ᠰᠠᠨᠠᠭᠳᠠᠨᠠ᠃ ᠲᠡᠮᠦᠷ ᠲᠡᠢ ᠬᠠᠮᠲᠤ ᠳᠤᠯᠮᠠ ᠶ᠋ᠢᠨ ᠬᠦᠰᠡᠯ᠂ ᠡᠷᠡᠮᠡᠯᠵᠡᠯ᠂ ᠠᠵᠠ ᠵᠢᠷᠭᠠᠯ᠂ ᠴᠣᠭ ᠵᠢᠪᠬᠤᠭᠠ ᠴᠥᠮ ᠦᠭᠡᠢ ᠪᠣᠯᠵᠤ᠂ ᠪᠦᠬᠦᠨ ᠢ᠋ ᠵᠢᠭᠰᠢᠨ ᠵᠠᠨᠤᠬᠤ ᠪᠢᠲᠡᠭᠦᠦ ᠬᠣᠷᠣᠰᠤᠯ ᠰᠡᠳᠬᠢᠯ ᠢ᠋ ᠨᠢ ᠡᠵᠡᠯᠡᠭᠡᠳ ᠬᠣᠷᠸᠠ ᠡᠴᠡ ᠵᠠᠢᠯᠠᠨ ᠵᠢᠭᠤᠲᠠᠬᠤ ᠪᠣᠳᠣᠯ ᠢ᠋ ᠨᠢ ᠭᠠᠭᠴᠠᠬᠦ ᠦᠷᠭᠦᠯᠵᠢ ᠨᠢᠳᠦᠨ ᠳ᠋ᠦ᠍ᠨᠢ ᠲᠣᠰᠴᠤ ᠪᠠᠢᠭᠠ ᠲᠡᠮᠦᠷ ᠦ᠋ᠨ ᠬᠦᠦ ᠴᠢᠳᠥᠷᠯᠡᠵᠦ ᠪᠠᠢᠯᠠ᠃
ᠲᠡᠮᠦᠷ ᠦ᠋ᠨ ᠳᠦᠷᠰᠦ ᠨᠢᠳᠦᠨ ᠳ᠋ᠦ᠍ᠨᠢ ᠳᠠᠬᠢᠨ ᠳᠠᠬᠢᠨ ᠲᠣᠳᠣᠷᠠᠵᠤ ᠲᠡᠮᠦᠷ ᠲᠡᠢ ᠬᠠᠮᠲᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠵᠣᠯ ᠵᠢᠷᠭᠠᠯ ᠨᠢ ᠪᠠᠢᠨ ᠪᠠᠢᠨ ᠠᠯᠢ ᠰᠠᠢᠨ ᠳᠦᠷᠰᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠭᠳᠠᠨᠠ᠃
ᠮᠠᠨᠠᠷᠠᠭᠰᠠᠨ᠂ ᠲᠦᠮᠡᠨ ᠵᠡᠷᠭᠡᠯᠭᠡ ᠪᠣᠯᠤᠭᠰᠠᠨ ᠡᠯᠳᠡᠪ ᠦ᠋ᠨ ᠪᠣᠳᠣᠯ ᠤ᠋ᠨ ᠲᠡᠷᠲᠡᠭᠡ ᠵᠠᠬᠠ ᠳ᠋ᠤ᠌ 《ᠥᠰᠢᠶᠡ ᠠᠪᠤᠶᠠ》 ᠭᠡᠳᠡᠭ ᠪᠣᠳᠣᠯ ᠤ᠋ᠨ ᠵᠤᠷᠪᠤᠰ ᠭᠡᠷᠡᠯ ᠪᠣᠢ ᠪᠣᠯᠤᠭᠠᠳ ᠴᠠᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠲᠣᠳᠣᠷᠠᠭᠰᠠᠭᠠᠷ ᠪᠦᠬᠦ ᠰᠡᠳᠬᠢᠯ ᠢ᠋ ᠨᠢ ᠡᠵᠡᠯᠡᠪᠡ᠃
ᠲᠡᠭᠡᠭᠡᠳ ᠬᠡᠳᠦ ᠬᠣᠨᠣᠭ ᠡᠯᠦᠢ ᠪᠠᠯᠠᠢ ᠶᠤᠮ ᠰᠢᠭ᠋ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠤᠯᠮᠠ ᠨᠢᠭᠡ ᠣᠷᠣᠢ ᠬᠦᠦ ᠪᠡᠨ ᠥᠯᠵᠡᠢ ᠲᠡᠢ ᠬᠠᠮᠲᠤ ᠦᠯᠡᠳᠡᠭᠡᠵᠦ ᠵᠢᠷᠣᠭᠠ ᠵᠡᠭᠡᠷᠳᠡ ᠮᠣᠷᠢ ᠪᠠᠨ ᠤᠨᠤᠨ ᠶᠠᠪᠤᠬᠤ ᠳ᠋ᠠᠭᠠᠨ 《ᠪᠢ ᠢᠷᠡᠬᠦ ᠦᠭᠡᠢ ᠪᠣᠯ ᠬᠦᠦ ᠶ᠋ᠢ ᠮᠢᠨᠢ ᠪᠠᠲᠤ ᠳ᠋ᠤ᠌ ᠥᠭᠭᠦᠭᠡᠷᠡᠢ》 ᠭᠡᠵᠡᠢ᠃
ᠥᠯᠵᠡᠢ ᠬᠠᠮᠢᠭᠠᠰᠢ ᠪᠠᠨ᠂ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠭᠠ ᠪᠠᠢᠭᠠ ᠶ᠋ᠢ ᠨᠢ ᠶᠠᠩᠵᠤ ᠪᠦᠷᠢ ᠪᠡᠷ ᠠᠰᠠᠭᠤᠨ ᠱᠠᠯᠠᠵᠤ ᠬᠣᠷᠢᠭᠯᠠᠬᠤ ᠳ᠋ᠤ᠌ 《ᠨᠠᠳᠠ ᠳ᠋ᠤ᠌ ᠶᠡᠬᠡ ᠬᠡᠷᠡᠭ ᠪᠠᠢᠨᠠ᠃ ᠶᠠᠪᠤᠬᠤ ᠦᠭᠡᠢ ᠪᠠᠢᠵᠤ ᠲᠤᠩ ᠪᠣᠯᠬᠤ ᠦᠭᠡᠢ》 ᠭᠡᠬᠦ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃
ᠲᠡᠮᠦᠷ ᠠᠯᠠᠭᠳᠠᠭᠰᠠᠨ ᠢ᠋ ᠳᠤᠭᠤᠯᠤᠭᠠᠳ ᠥᠯᠵᠡᠢ ᠦᠯᠡᠮᠵᠢ ᠶᠡᠬᠡ ᠭᠠᠰᠢᠭᠤᠳᠠᠵᠤ ᠬᠡᠳᠦᠨ ᠡᠳᠦᠷ ᠤᠰᠤᠨ ᠨᠢᠳᠦ ᠲᠡᠢ ᠶᠠᠪᠤᠭᠰᠠᠨ ᠶᠤᠮ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠮᠦᠷ ᠦ᠋ᠨ ᠥᠰᠢᠶᠡ ᠠᠪᠬᠤ ᠪᠠᠷ ᠳᠤᠯᠮᠠ ᠶᠠᠪᠤᠯᠠ ᠭᠡᠳᠡᠭ ᠢ᠋ ᠮᠡᠳᠡᠭᠰᠡᠨ ᠪᠣᠯ ᠬᠣᠷᠢᠭᠯᠠᠬᠤ ᠯᠠ ᠪᠠᠢᠭᠰᠠᠨ᠃ ᠤᠴᠢᠷ ᠨᠢ ᠲᠡᠮᠦᠷ ᠢ᠋ ᠠᠯᠠᠭᠰᠠᠨ ᠳᠠᠢᠰᠤᠨ᠂ ᠳᠤᠯᠮᠠ ᠶ᠋ᠢ ᠠᠯᠠᠬᠤ ᠨᠢ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠬᠡᠷᠡᠭ ᠭᠡᠵᠦ ᠥᠯᠵᠡᠢ ᠮᠡᠳᠡᠨᠡ᠃
ᠳᠤᠯᠮᠠ ᠠᠩᠬᠠ ᠭᠡᠷ ᠡᠴᠡ ᠪᠡᠨ ᠭᠠᠷᠬᠤ ᠳ᠋ᠠᠭᠠᠨ 《ᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠠᠪᠤᠨᠠ》 ᠭᠡᠳᠡᠭ ᠭᠠᠭᠴᠠᠬᠠᠨ᠂ ᠦᠷᠭᠦᠯᠵᠢ ᠰᠢᠳᠡᠨ ᠪᠤᠴᠠᠯᠵᠤ ᠪᠠᠢᠭᠠ ᠪᠣᠳᠣᠯ ᠲᠠᠢ ᠪᠠᠢᠭᠰᠠᠨ ᠡᠴᠡ ᠪᠢᠰᠢ ᠬᠡᠨ ᠡᠴᠡ ᠶᠠᠭᠠᠬᠢᠵᠤ ᠥᠰᠢᠶᠡ ᠠᠪᠬᠤ ᠨᠢ ᠳᠣᠯᠣᠭᠠᠨ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨᠠ᠂ ᠳᠠᠯᠠᠨ ᠵᠢᠯᠠᠭᠠ ᠶ᠋ᠢᠨ ᠲᠡᠷᠲᠡᠭᠡ ᠪᠠᠢᠵᠠᠢ᠃ ᠭᠡᠪᠡᠴᠦ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠥᠮᠦᠨ ᠦ᠌ ᠨᠢᠳᠦ ᠲᠡᠰᠴᠦ ᠶᠠᠭᠤᠮᠠ ᠲᠣᠳᠣ ᠪᠣᠯᠳᠠᠭ ᠤ᠋ᠨ ᠠᠳᠠᠯᠢ ᠡᠬᠢᠨ ᠳ᠋ᠡᠭᠡᠨ ᠮᠠᠨᠠᠨ ᠪᠠᠢᠭᠰᠠᠨ ᠪᠣᠳᠣᠯ ᠡᠴᠦᠰ ᠲᠡᠭᠡᠨ ᠢᠯᠡ ᠪᠣᠯᠳᠠᠭ ᠪᠣᠯᠬᠣᠷ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠡᠳᠦᠷ ᠲᠡᠮᠦᠷ ᠲᠡᠢ ᠬᠠᠮᠲᠤ ᠶᠠᠪᠤᠭᠠᠳ ᠰᠢᠷᠠ ᠶ᠋ᠢᠨ ᠴᠡᠷᠢᠭ ᠡᠴᠡ ᠤᠷᠭᠤᠵᠤ ᠢᠷᠡᠭᠰᠡᠨ ᠬᠥᠮᠦᠰ ᠲᠡᠢ ᠠᠭᠤᠯᠵᠠᠵᠤ ᠬᠦᠰᠡᠯ ᠵᠢᠷᠭᠠᠯ ᠤ᠋ᠨ ᠰᠢᠷᠭᠢᠰᠢ ᠦᠭᠡᠢ ᠪᠤᠯᠠᠭ ᠪᠣᠯᠤᠭᠰᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠠᠯᠠᠭᠳᠠᠭᠰᠠᠨ᠂ ᠬᠡᠨ ᠠᠯᠠᠭᠰᠠᠨ ᠢ᠋ ᠰᠠᠢᠨ ᠮᠡᠳᠡᠵᠦ ᠠᠪᠴᠠᠢ᠃
ᠭᠡᠲᠡᠯᠡ ᠬᠠᠮᠤᠭ ᠤ᠋ᠨ ᠬᠡᠴᠡᠭᠦᠦ ᠨᠢ ᠲᠦᠭᠵᠢᠯ ᠴᠡᠮᠪᠡ ᠬᠣᠶᠠᠷ ᠢ᠋ ᠣᠯᠬᠤ ᠪᠠᠢᠯᠠ᠃ ᠤᠴᠢᠷ ᠨᠢ ᠡᠨᠡ ᠦᠶᠡ ᠳ᠋ᠦ᠍ ᠡᠰᠡᠷᠭᠦᠦ ᠨᠠᠷ ᠴᠣᠬᠢᠭᠳᠠᠭᠠᠳ ᠡᠨᠳᠡ ᠲᠡᠨᠳᠡ ᠠᠭᠤᠯᠠ ᠬᠠᠳᠠ ᠪᠠᠷ ᠪᠦᠭᠭᠦᠭᠰᠡᠨ ᠴᠥᠭᠡᠨ ᠬᠥᠮᠦᠰ᠂ ᠠᠷᠠᠳ ᠤ᠋ᠨ ᠴᠡᠷᠢᠭ ᠡᠴᠡ ᠵᠢᠭᠤᠲᠠᠨ᠂ ᠠᠷᠠᠳ ᠲᠦᠮᠡᠨ ᠢ᠋ ᠳᠡᠭᠡᠷᠡᠮᠳᠡᠵᠦ ᠪᠠᠢᠯᠠ᠃ 《ᠪᠠᠰᠠ ᠲᠡᠭᠡᠭᠡᠳ ᠡᠷᠢᠵᠦ ᠣᠯᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ? ᠲᠡᠳᠡ ᠪᠣᠯ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠵᠡᠪᠰᠡᠭ ᠲᠡᠢ ᠳᠡᠭᠡᠷᠡᠮᠴᠢᠳ᠂ ᠪᠢ ᠪᠣᠯ ᠣᠯᠢᠭᠲᠠᠢ ᠲᠠᠰᠢᠭᠤᠷ ᠪᠠᠢᠬᠤ ᠦᠭᠡᠢ ᠡᠮᠡᠭᠲᠡᠢ ᠬᠥᠮᠦᠨ》 ᠭᠡᠵᠦ ᠳᠤᠯᠮᠠ ᠳ᠋ᠤ᠌ ᠪᠣᠳᠣᠭᠳᠠᠨᠠ᠃
ᠭᠡᠪᠡᠴᠦ ᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠠᠪᠬᠤ ᠦᠭᠡᠢ ᠪᠠᠢᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠪᠣᠳᠣᠯ ᠪᠦᠬᠦᠨ ᠡᠴᠡ ᠬᠦᠴᠦᠨ ᠲᠡᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠲᠡᠳᠡᠨ ᠢ᠋ ᠡᠷᠢᠵᠦ ᠣᠯᠬᠤ ᠬᠡᠷᠡᠭᠲᠡᠢ ᠪᠠᠢᠯᠠ᠃
ᠳᠤᠯᠮᠠ ᠶᠠᠪᠤᠭᠰᠠᠭᠠᠷ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠪᠠᠢᠷᠢᠨ ᠳᠡᠭᠡᠷᠡ ᠢᠷᠡᠯᠡ᠃ ᠰᠢᠲᠠᠭᠰᠠᠨ ᠨᠡᠯᠪᠡᠭᠡᠷ ᠬᠠᠷᠠ ᠦᠨᠡᠰᠦᠨ ᠦ᠌ ᠳᠤᠮᠳᠠ ᠡᠨᠳᠡ ᠲᠡᠨᠳᠡ ᠡᠪᠳᠡᠷᠬᠡᠢ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠬᠠᠨᠠ ᠳᠣᠷᠰᠣᠢᠨ ᠬᠠᠷᠠᠭᠳᠠᠨᠠ᠃ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠭᠠᠳ ᠲᠡᠷᠡ ᠪᠦᠬᠦᠨ ᠢ᠋ ᠰᠢᠷᠲᠡᠵᠦ ᠬᠡᠰᠡᠭ ᠵᠣᠭᠰᠣᠪᠠ᠃ ᠳᠤᠯᠮᠠ ᠪᠠᠷᠠᠭᠤᠨ ᠵᠦᠭ ᠬᠠᠷᠠᠵᠤ ᠰᠥᠬᠥᠷᠡᠨ ᠰᠠᠭᠤᠵᠤ 《ᠳᠠᠢ᠌ᠰᠢᠷᠢ ᠬᠠᠨ ᠮᠢᠨᠢ᠃ ᠲᠠᠷᠯᠠᠨ ᠬᠠᠢᠷᠬᠠᠨ ᠮᠢᠨᠢ᠃ ᠴᠡᠮᠪᠡ ᠲᠦᠭᠵᠢᠯ ᠬᠣᠶᠠᠷ ᠲᠠᠢ ᠶᠢᠷᠲᠢᠨᠴᠦ ᠶ᠋ᠢᠨ ᠨᠠᠷᠠ ᠶ᠋ᠢ ᠬᠠᠮᠲᠤ ᠬᠠᠷᠠᠬᠤ ᠦᠭᠡᠢ》 ᠭᠡᠵᠦ ᠲᠠᠩᠭᠠᠷᠢᠭ ᠡᠷᠭᠦᠵᠡᠢ᠃ 《ᠨᠠᠮᠠᠶ᠋ᠢ ᠬᠣᠷᠢᠭᠯᠠᠭᠰᠠᠨ ᠪᠣᠯ ᠮᠢᠨᠦ ᠲᠡᠮᠦᠷ ᠬᠡᠷᠬᠢᠪᠡᠴᠦ ᠶᠠᠪᠤᠬᠤ ᠦᠭᠡᠢ ᠪᠠᠢᠭᠰᠠᠨ ᠳᠠ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠤᠨᠤᠷᠠᠬᠤ ᠳ᠋ᠤ᠌ ᠨᠢᠳᠦ ᠪᠡᠨ ᠬᠦᠯᠢᠨ ᠰᠢᠷᠳᠡᠭᠰᠡᠭᠡᠷ ᠳᠤᠰᠤᠭᠠᠯ ᠦᠭᠡᠢ ᠰᠢᠩᠭᠡᠭᠡᠵᠦ ᠣᠷᠬᠢᠪᠠ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠨᠳᠡ ᠡᠴᠡ ᠮᠣᠷᠳᠠᠭᠠᠳ ᠤᠳᠠᠯ ᠦᠭᠡᠢ ᠨᠢᠭᠡ ᠠᠢᠯ ᠳ᠋ᠤ᠌ ᠣᠴᠢᠵᠤ ᠬᠣᠨᠣᠪᠠ᠃ ᠡᠰᠡᠷᠭᠦᠦ ᠨᠠᠷ ᠤ᠋ᠨ ᠴᠣᠬᠢᠭᠳᠠᠭᠰᠠᠨ ᠬᠡᠰᠡᠭ ᠪᠦᠭᠭᠦᠵᠦ ᠪᠠᠢᠭᠠ ᠭᠠᠵᠠᠷ ᠤ᠋ᠨ ᠪᠦᠳᠡᠭᠢ ᠪᠠᠷᠢᠮᠵᠢᠶᠠ ᠰᠣᠨᠣᠰᠴᠤ ᠠᠪᠤᠭᠠᠳ ᠮᠠᠷᠭᠠᠰᠢ ᠨᠢ ᠲᠠᠷᠢᠶᠠᠲᠤ ᠶ᠋ᠢᠨ ᠠᠷᠤ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠳᠠᠭᠠᠷᠢᠵᠤ᠂ ᠲᠣᠢᠨ ᠠᠮᠠ ᠶ᠋ᠢ ᠤᠷᠤᠭᠤᠳᠠᠨ ᠢᠳᠡᠷ ᠦ᠋ᠨ ᠭᠣᠣᠯ ᠢ᠋ ᠭᠠᠲᠤᠯᠤᠨ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠶᠡᠬᠡ ᠵᠠᠮ ᠡᠴᠡ ᠵᠠᠢᠯᠠᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ᠂ ᠴᠠᠷᠠᠮ ᠪᠠᠷᠢᠨ ᠨᠢᠭᠡ ᠡᠳᠦᠷ ᠶᠠᠪᠤᠯᠠ᠃
ᠰᠥᠨᠢ ᠣᠷᠣᠢ ᠪᠣᠯᠵᠤ ᠬᠠᠳᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠤᠨᠲᠠᠬᠤ ᠪᠣᠯᠪᠠ᠃ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠴᠦ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠵᠦ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠨᠣᠢᠷ ᠨᠢ ᠬᠤᠯᠵᠢᠭᠠᠳ ᠤᠨᠲᠠᠭᠰᠠᠨ ᠦᠭᠡᠢ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠠᠵᠠᠭᠤ ᠳ᠋ᠤᠨᠢ ᠨᠢᠭᠡ ᠴᠢᠨᠣᠠ ᠣᠯᠢᠵᠤ ᠡᠬᠢᠯᠡᠭᠡᠳ ᠤᠳᠠᠯ ᠦᠭᠡᠢ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠨᠠᠷᠢᠨ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠡᠳᠦᠢ ᠲᠡᠳᠦᠢ ᠴᠢᠨᠣᠠ ᠣᠯᠢᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠣᠶᠠᠷ ᠬᠥᠯ ᠲᠡᠢ ᠴᠢᠨᠣᠠ ᠡᠴᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠰᠢᠶᠡ ᠠᠪᠬᠤ ᠭᠡᠵᠦ ᠶᠠᠪᠤᠭᠠ ᠬᠥᠮᠦᠨ᠃ ᠲᠠ ᠨᠠᠷ ᠡᠴᠡ ᠠᠶᠤᠬᠤ ᠦᠭᠡᠢ᠃ ᠲᠡᠮᠦᠷ ᠮᠢᠨᠢ ᠨᠠᠮᠠᠶ᠋ᠢ ᠬᠠᠮᠠᠭᠠᠯᠠᠭᠠᠴᠢ ᠭᠡᠵᠦ ᠬᠠᠰᠬᠢᠷᠤᠨ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠶ᠋ᠢ ᠪᠠᠬᠠᠨ ᠳᠠᠭᠤᠯᠠᠪᠠ᠃
ᠡᠢᠮᠦ ᠦᠶᠡ ᠳ᠋ᠦ᠍ ᠠᠶᠤᠬᠤ ᠰᠡᠳᠬᠢᠯ ᠢ᠋ ᠠᠶᠠᠯᠠᠬᠤ ᠰᠢᠭ᠋ ᠬᠡᠴᠡᠭᠦᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠰᠥᠨᠢ ᠶ᠋ᠢᠨ ᠲᠤᠷᠰᠢ ᠠᠶᠤᠬᠤ ᠶ᠋ᠢᠨ ᠠᠶᠤᠯ ᠲᠠᠢ ᠲᠡᠮᠡᠴᠡᠯᠳᠦᠨ᠂ ᠦᠷ ᠦ᠋ᠨ ᠲᠤᠶᠠᠭᠠ ᠲᠠᠢ ᠠᠷᠠᠢ ᠶᠠᠳᠠᠨ ᠵᠣᠯᠭᠠᠪᠠ᠃
ᠡᠳᠦᠷ᠂ ᠭᠡᠷᠡᠯ ᠭᠡᠳᠡᠭ ᠬᠥᠮᠦᠨ ᠳ᠋ᠦ᠍ ᠶᠠᠮᠠᠷ ᠶᠡᠬᠡ ᠬᠦᠴᠦ᠂ ᠢᠲᠡᠭᠡᠯ ᠥᠭᠳᠡᠭ ᠢ᠋ ᠡᠨᠡ ᠤᠳᠠᠭᠠ ᠳᠤᠯᠮᠠ ᠰᠠᠢᠨ ᠣᠢᠯᠠᠭᠠᠭᠰᠠᠨ ᠪᠥᠭᠡᠳ ᠦᠷ ᠦ᠋ᠨ ᠴᠠᠭᠠᠨ ᠭᠡᠭᠡ ᠪᠡᠷ ᠮᠣᠷᠳᠠᠵᠤ ᠴᠠᠰᠢ ᠶᠠᠪᠤᠬᠤ ᠳ᠋ᠤ᠌ ᠡᠵᠡᠨ ᠲᠡᠢ ᠪᠡᠨ ᠬᠠᠮᠲᠤ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠮᠣᠷᠢᠨ ᠤ᠋ ᠬᠢᠨᠢ ᠬᠠᠮᠠᠷ ᠲᠠᠴᠢᠭᠢᠨᠠᠵᠤ᠂ ᠴᠢᠬᠢ ᠪᠡᠨ ᠰᠣᠯᠪᠢᠨ ᠰᠣᠭᠣᠲᠣᠯᠵᠠᠵᠤ ᠬᠤᠯᠭᠠᠨᠠ᠃ ᠦᠳᠡ ᠥᠩᠭᠡᠷᠡᠬᠦ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠮᠣᠳᠣᠨ ᠤ᠋ ᠴᠢᠯᠥᠭᠡᠨ ᠳ᠋ᠦ᠍ ᠡᠮᠡᠭᠡᠯ ᠲᠡᠢ ᠬᠡᠭᠡᠷ ᠮᠣᠷᠢ ᠬᠠᠨᠲᠠᠷᠤᠭᠠ ᠲᠠᠢ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠰᠣᠴᠢᠮᠠᠭ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠵᠣᠭᠰᠣᠯᠠ᠃
《ᠶᠠᠭᠠᠬᠢᠬᠤ ᠪᠣᠢ? ᠣᠴᠢᠬᠤ ᠤᠤ? ᠪᠤᠴᠠᠬᠤ ᠤᠤ?》 ᠭᠡᠵᠦ ᠡᠷᠡᠭᠡᠯᠵᠡᠨ ᠪᠣᠳᠣᠬᠤ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ 《ᠬᠥᠮᠦᠨ ᠡᠴᠡ ᠵᠢᠭᠤᠲᠠᠭᠠᠳ ᠪᠠᠢᠪᠠᠯ ᠵᠣᠷᠢᠭᠰᠠᠨ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠬᠢᠬᠦ ᠬᠥᠮᠦᠨ ᠪᠣᠢ?》 ᠭᠡᠵᠦ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠵᠢᠮᠡᠯᠡᠨ ᠬᠡᠯᠡᠬᠦ ᠰᠢᠭ ᠪᠣᠯᠪᠠ᠃
ᠳᠤᠯᠮᠠ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠬᠥᠳᠡᠯᠪᠡ᠃ ᠬᠠᠨᠲᠠᠷᠤᠭᠠ ᠲᠠᠢ ᠮᠣᠷᠢᠨ ᠤ᠋ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠴᠢᠮᠡᠭᠡ ᠪᠡᠷ ᠰᠣᠴᠢᠨ ᠥᠨᠳᠡᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ ᠪᠦᠳᠦᠭᠦᠨ ᠮᠣᠳᠣᠨ ᠤ᠋ ᠴᠠᠭᠠᠨᠠ ᠣᠷᠣᠭᠠᠳ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠨ ᠳᠤᠯᠮᠠ ᠥᠭᠡᠳᠡ ᠴᠢᠭᠯᠡᠭᠦᠯᠪᠡ᠃ ᠲᠡᠭᠦᠨ ᠦ᠌ ᠮᠥᠷᠦᠨ ᠳᠡᠭᠡᠷᠡᠬᠢ ᠴᠠᠭᠠᠨ ᠳᠠᠪᠤᠤ ᠪᠠᠷ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠭᠡᠳᠡᠭ ᠢ᠋ ᠳᠤᠯᠮᠠ ᠮᠡᠳᠡᠯᠡ᠃ ᠭᠡᠪᠡᠴᠦ ᠵᠣᠭᠰᠣᠭᠰᠠᠨ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠣᠢᠷᠠᠲᠤᠨ ᠣᠴᠢᠵᠤ ᠨᠠᠭᠠᠯᠢᠩᠬᠠᠢ ᠪᠥᠭᠡᠳ ᠡᠷᠬᠡ ᠳᠠᠭᠤ ᠪᠠᠷ 《ᠰᠠᠢᠨ ᠪᠠᠢᠨᠠᠤ》 ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
ᠲᠡᠷᠡ ᠨᠢᠭᠤᠭᠳᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠶᠠᠮᠠᠷ ᠴᠤ᠌ ᠵᠡᠪᠰᠡᠭ ᠦᠭᠡᠢ ᠭᠤᠸᠠ ᠡᠮᠡᠭᠲᠡᠢ ᠶ᠋ᠢ ᠬᠠᠷᠠᠭᠠᠳ ᠮᠣᠳᠣᠨ ᠤ᠋ ᠪᠠᠨ ᠠᠷᠤ ᠡᠴᠡ ᠭᠠᠷᠴᠤ ᠢᠷᠡᠯᠡ᠃ ᠡᠨᠡ ᠪᠣᠯ ᠭᠤᠴᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠯᠠᠮᠠ ᠬᠥᠮᠦᠨ ᠪᠠᠢᠯᠠ᠃ ᠬᠦᠷᠡᠩ ᠳᠡᠪᠡᠯ ᠳᠡᠭᠡᠷᠡ ᠬᠠᠭᠤᠴᠢᠨ ᠭᠢᠷᠠᠭ ᠪᠦᠰᠡ ᠪᠦᠰᠡᠯᠡᠵᠦ ᠵᠢᠵᠢᠭᠬᠡᠨ ᠱᠣᠪᠣᠭᠣᠷ ᠳᠠᠷᠤᠨ ᠡᠮᠦᠰᠴᠡᠢ᠃
ᠡᠮᠦᠨᠡ ᠡᠴᠡ ᠨᠢ ᠢᠨᠢᠶᠡᠮᠰᠦᠭᠯᠡᠨ ᠬᠠᠷᠠᠵᠤ ᠪᠠᠢᠭᠠ ᠪᠦᠰᠡᠭᠦᠢ ᠶ᠋ᠢ ᠲᠠᠴᠢᠶᠠᠩᠭᠤᠢ ᠶ᠋ᠢᠨ ᠭᠠᠯ ᠨᠢ ᠣᠪᠣᠯᠵᠠᠭᠰᠠᠨ ᠬᠣᠶᠠᠷ ᠣᠨᠢᠭᠠᠷ ᠨᠢᠳᠦ ᠪᠡᠷ ᠰᠢᠷᠳᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠯᠠᠮᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠬᠣᠭᠣᠯᠠ ᠪᠠᠷᠢᠭᠰᠠᠨ ᠬᠥᠮᠦᠨ ᠦ᠌ ᠭᠠᠷ ᠢ᠋ ᠰᠢᠷᠲᠡᠨ ᠮᠠᠭᠠᠰᠠᠭᠠᠨᠠᠨ ᠳᠠᠯᠢᠯᠵᠠᠵᠤ ᠪᠠᠢᠭᠠ ᠡᠷᠬᠡ ᠬᠠᠪᠠ ᠰᠢᠭ᠋ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠵᠡᠯᠢᠭᠦᠳ ᠮᠣᠳᠣᠨ ᠳ᠋ᠤ᠌ ᠶᠠᠭᠤ ᠭᠡᠵᠦ ᠶᠠᠪᠤᠳᠠᠭ ᠬᠡᠦᠬᠡᠨ ᠪᠣᠢ? ᠪᠦᠷ ᠰᠣᠴᠢᠭᠠᠴᠢᠬᠠᠯᠠ ᠭᠡᠳ ᠮᠠᠷᠰᠠᠢᠨ ᠢᠨᠢᠶᠡᠮᠰᠦᠭᠯᠡᠵᠦ ᠫᠤᠤ ᠪᠠᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠰᠢᠭ᠋ ᠯᠡ ᠲᠡᠨᠦᠵᠦ ᠶᠠᠪᠤᠬᠤ ᠦᠭᠡᠢ ᠤᠤ ᠭᠡᠳ ᠳᠤᠯᠮᠠ ᠬᠥᠭᠵᠢᠯᠲᠡᠢ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ ᠯᠠᠮᠠ ᠬᠠᠮᠠᠷ ᠤ᠋ᠨ ᠢ᠋ᠶ᠋ᠠᠨ ᠤᠭ ᠢ᠋ ᠠᠲᠤᠷᠢᠭᠤᠯᠤᠨ ᠬᠢ ᠬᠢ ᠭᠡᠮᠡᠨ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠦᠬᠡᠨ ᠭᠤᠸᠠᠢ ᠮᠢᠨᠢ ᠪᠠᠭᠤ ᠯᠠ ᠳᠠ᠃ ᠠᠯᠢ ᠪᠢ ᠪᠠᠭᠤᠯᠭᠠᠵᠤ ᠥᠭᠬᠦ ᠤᠤ? ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠷᠰᠢᠭ ᠠᠯᠳᠠᠰ ᠪᠣᠯᠤᠨᠠ ᠭᠡᠳ ᠨᠢᠭᠡ ᠨᠢ ᠨᠥᠭᠦᠭᠡ ᠡᠴᠡ ᠪᠡᠨ ᠢᠯᠭᠠᠭᠳᠠᠬᠤ ᠡᠴᠡ ᠠᠶᠤᠭᠰᠠᠨ ᠶᠤᠮ ᠰᠢᠭ᠋ ᠤᠷᠭᠤᠭᠰᠠᠨ ᠴᠠᠭᠠᠨ ᠰᠢᠳᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ ᠯᠠᠮᠠ ᠶ᠋ᠢᠨ ᠴᠢᠷᠠᠢ ᠰᠢᠨᠤᠯ ᠳ᠋ᠠᠭᠠᠨ ᠮᠠᠩᠰᠢᠭᠤᠷᠠᠨ ᠡᠷᠡᠦ ᠨᠢ ᠰᠤᠯᠠᠷᠠᠨ ᠬᠡᠪ ᠨᠢ ᠡᠪᠳᠡᠷᠡᠪᠡ᠃
ᠳᠤᠯᠮᠠ ᠮᠣᠷᠢᠨ ᠡᠴᠡ ᠪᠡᠨ ᠳᠠᠪᠬᠢᠲᠠᠯᠠ ᠪᠠᠭᠤᠵᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠫᠤᠤ ᠴᠤᠤᠷᠠ ᠪᠣᠯᠤᠭᠰᠠᠨ ᠶᠠᠮᠠᠷ ᠴᠤ᠌ ᠰᠦᠷᠲᠡᠢ ᠶᠤᠮ ᠪᠣᠢ ᠳᠠ ᠭᠡᠳ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠭᠰᠡᠭᠡᠷ ᠤᠷᠲᠤ ᠤᠷᠭᠤᠭᠰᠠᠨ ᠨᠣᠭᠣᠭᠠᠨ ᠳᠡᠭᠡᠷᠡ ᠰᠠᠭᠤᠪᠠ᠃
ᠯᠠᠮᠠ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠬᠡᠦᠬᠡᠨ ᠦ᠌ ᠳᠡᠷᠭᠡᠳᠡ ᠣᠴᠢᠵᠤ ᠮᠣᠷᠢᠨ ᠤ᠋ ᠬᠢᠨᠢ ᠴᠤᠯᠪᠤᠭᠤᠷ ᠢ᠋ ᠠᠪᠴᠤ ᠮᠣᠳᠣᠨ ᠡᠴᠡ ᠤᠶᠠᠭᠠᠳ ᠵᠡᠷᠭᠡᠴᠡᠵᠦ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠶᠠᠭᠤ ᠶᠠᠷᠢᠬᠤ᠂ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠨᠣᠭᠣᠭᠠᠨ ᠤ᠋ ᠦᠵᠦᠭᠦᠷ ᠣᠷᠣᠯᠳᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠴᠢᠨᠢ ᠰᠢᠷᠠ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠰᠠᠨᠠᠭᠠ ᠲᠠᠢ᠃ ᠪᠢᠳᠡ ᠴᠦ᠍ ᠳᠠᠷᠤᠭᠳᠠᠭᠠᠳ ᠠᠭᠤᠯᠠ ᠬᠠᠳᠠ ᠪᠠᠷ ᠯᠠ ᠨᠥᠬᠥᠷ ᠬᠢᠵᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠳ᠋ᠠᠭᠠᠨ ᠳᠡᠢᠯᠦᠭᠳᠡᠬᠦ ᠦᠭᠡᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠢᠰᠢ ᠠ᠋᠂ ᠤᠯᠠᠭᠠᠨ ᠤ᠋ ᠭᠤᠨᠠᠨ ᠫᠤᠤ᠂ ᠮᠥᠯᠬᠥᠭᠡ ᠲᠡᠷᠭᠡ᠂ ᠲᠡᠮᠦᠷ ᠰᠢᠪᠠᠭᠤ ᠭᠡᠳᠡᠭ ᠴᠢᠨᠢ ᠠᠳᠠ ᠲᠠᠢ ᠴᠢᠳᠬᠥᠷ ᠡᠳ᠋ ᠭᠡᠵᠦ ᠰᠦᠷᠲᠡᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠭᠠᠷ ᠨᠢ ᠳᠤᠯᠮᠠ ᠶ᠋ᠢᠨ ᠨᠤᠭᠤᠯᠤᠨ ᠰᠠᠭᠤᠭᠰᠠᠨ ᠡᠪᠦᠳᠦᠭ ᠲᠦ᠍ ᠬᠦᠷᠦᠮᠡᠭᠴᠡ ᠴᠡᠴᠡᠷᠡᠨ ᠲᠠᠲᠠᠪᠠᠭᠠᠨᠠᠭᠠᠳ ᠲᠡᠭᠦᠨ ᠳ᠋ᠡᠭᠡᠨ ᠪᠠᠨᠳᠠᠵᠤ ᠴᠢᠷᠠᠢ ᠨᠢ ᠴᠢᠨᠦᠷᠡᠪᠡ᠃ ᠳᠤᠯᠮᠠ ᠠᠵᠢᠭ ᠦᠭᠡᠢ ᠰᠠᠭᠤᠵᠤ ᠪᠠᠢᠯᠠ᠃
《ᠶᠠᠮᠠᠷ ᠰᠠᠢᠬᠠᠨ ᠠᠮᠢᠲᠠᠨ ᠪᠣᠢ? ᠪᠢ ᠶᠠᠭᠠᠬᠢᠬᠤ ᠪᠢᠯᠡ᠃ ᠰᠢᠭᠤᠳ ᠳᠠᠷᠤᠭᠠᠳ ᠠᠪᠳᠠᠭ ᠬᠡᠷᠡᠭ ᠤᠤ? ᠠᠯᠢ ᠫᠤᠤ ᠲᠤᠯᠭᠠᠵᠤ ᠰᠦᠷᠳᠡᠭᠦᠯᠵᠦ ᠪᠠᠢᠭᠠᠳ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠯᠠᠮᠠ ᠶ᠋ᠢᠨ ᠵᠢᠷᠦᠬᠡ ᠲᠦᠷᠭᠡᠨ ᠲᠦᠷᠭᠡᠨ ᠴᠣᠬᠢᠯᠠᠵᠤ ᠠᠮᠢᠰᠬᠤᠭᠠ ᠨᠢ ᠲᠠᠰᠤᠯᠳᠠᠨ ᠭᠠᠷᠤᠨᠠ᠃
ᠳᠤᠯᠮᠠ ᠲᠡᠭᠦᠨ ᠦ᠌ ᠪᠣᠳᠣᠯ᠂ ᠰᠡᠳᠬᠢᠯ ᠦ᠋ᠨ ᠣᠢ᠌ᠮᠤᠷᠠᠯ ᠢ᠋ ᠮᠡᠳᠡᠬᠦ ᠳᠣᠳᠣᠮ ᠲᠠᠢᠪᠤᠩ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠵᠤ ᠪᠠᠢᠯᠠ᠃ ᠬᠡᠦᠬᠡᠨ ᠦ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠠᠢᠪᠤᠩ ᠪᠠᠢᠳᠠᠯ ᠯᠠᠮᠠ ᠶ᠋ᠢᠨ ᠪᠡᠶᠡ ᠶ᠋ᠢ ᠦᠯᠦ ᠮᠡᠳᠡᠭ ᠰᠢᠵᠢᠮ ᠢ᠋ᠶ᠋ᠡᠷ ᠬᠦᠯᠢᠬᠦ ᠠᠵᠢ᠃
ᠳᠤᠯᠮᠠ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠵᠠᠰᠠᠬᠤ ᠭᠡᠵᠦ ᠬᠥᠳᠡᠯᠲᠡᠯᠡ ᠯᠠᠮᠠ ᠡᠷᠡᠰ ᠪᠥᠭᠡᠳ ᠡᠪ ᠬᠠᠪᠤ ᠦᠭᠡᠢ ᠰᠣᠴᠢᠮᠠᠭ ᠬᠥᠳᠡᠯᠦᠨ ᠬᠦᠵᠦᠭᠦᠦ ᠪᠡᠷ ᠨᠢ ᠲᠡᠪᠡᠷᠢᠨ ᠠᠪᠤᠯᠠ᠃ ᠬᠡᠷᠪᠡ ᠳᠤᠯᠮᠠ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠭᠠᠳ ᠪᠠᠢᠪᠠᠯ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠠᠢᠪᠤᠩ ᠪᠠᠢᠳᠠᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠯᠠᠮᠠ ᠬᠥᠳᠡᠯᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠢᠵᠠ ᠯᠠ ᠳᠠ᠂ ᠶᠠᠮᠠᠷ ᠬᠠᠴᠢᠨ ᠯᠠᠮᠠ ᠪᠣᠢ? ᠭᠡᠳ ᠳᠤᠯᠮᠠ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠡᠳᠡᠰᠦ ᠤᠷᠤᠭᠤ ᠨᠢ ᠬᠦᠴᠦᠲᠡᠢ ᠲᠦᠯᠬᠢᠪᠡ᠃ ᠯᠠᠮᠠ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠯᠠᠭ ᠬᠢᠲᠡᠯᠡ ᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠲᠦᠷᠭᠡᠨ ᠪᠣᠰᠴᠤ ᠨᠣᠴᠣᠯᠳᠤᠬᠤ ᠭᠡᠲᠡᠯᠡ ᠬᠡᠳᠦᠢᠨᠡᠢ ᠪᠣᠰᠤᠭᠰᠠᠨ ᠳᠤᠯᠮᠠ ᠶ᠋ᠢᠨ ᠭᠠᠷ ᠲᠤ᠌ ᠣᠷᠣᠭᠰᠠᠨ ᠰᠸᠯᠠᠢ᠌ᠳᠠᠢ ᠫᠤᠤ ᠶ᠋ᠢᠨ ᠴᠠᠪᠳᠠᠭ ᠠᠮᠠ ᠴᠡᠭᠡᠵᠢ ᠤᠷᠤᠭᠤ ᠨᠢ ᠮᠣᠭᠠᠢ ᠶ᠋ᠢᠨ ᠨᠢᠳᠦ ᠰᠢᠭ ᠰᠢᠷᠲᠡᠵᠦ ᠪᠠᠢᠯᠠ᠃
ᠯᠠᠮᠠ ᠶ᠋ᠢᠨ ᠪᠦᠬᠦ ᠪᠡᠶᠡ ᠨᠢ ᠰᠤᠯᠠᠷᠠᠨ ᠰᠠᠯᠭᠠᠨᠠᠵᠤ ᠭᠡᠳᠡᠷᠭᠦ ᠪᠡᠨ ᠤᠬᠤᠷᠢᠬᠤ ᠵᠠᠭᠤᠷᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤᠬᠢ ᠴᠢᠨᠢ ᠰᠤᠮᠤ ᠲᠠᠢ ᠰᠢᠦ᠂ ᠠᠯᠳᠠᠪᠠᠯ ᠪᠢ ᠥᠩᠭᠡᠷᠡᠨᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠤ ᠬᠥᠳᠡᠯ᠂ ᠫᠤᠤᠳᠠᠵᠤ ᠣᠷᠬᠢᠨᠠ ᠰᠢᠦ ᠭᠡᠵᠦ ᠳᠤᠯᠮᠠ ᠬᠢᠬᠤᠷᠠᠭᠰᠠᠨ ᠥᠨᠳᠥᠷ ᠳᠠᠭᠤ ᠪᠠᠷ ᠵᠠᠩᠳᠤᠷᠪᠠ᠃ ᠯᠠᠮᠠ ᠶᠠᠭ ᠵᠣᠭᠰᠣᠪᠠ᠃ ᠲᠡᠭᠦᠨ ᠦ᠌ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ᠂ ᠮᠠᠩᠨᠠᠢ ᠶ᠋ᠢᠨ ᠠᠷᠠᠰᠤ ᠨᠢ ᠬᠦᠷᠲᠡᠯᠡ ᠴᠡᠴᠡᠷᠡᠵᠦ ᠪᠠᠢᠯᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠡᠢ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠡᠨᠡ ᠫᠤᠤ ᠶ᠋ᠢ ᠳᠤᠯᠮᠠ ᠣᠯᠠᠨᠲᠠ ᠪᠠᠷᠢᠵᠤ ᠦᠵᠡᠭᠰᠡᠨ᠃ ᠭᠡᠪᠡᠴᠦ ᠫᠤᠤᠳᠠᠵᠤ ᠦᠵᠡᠭᠰᠡᠨ ᠦᠭᠡᠢ ᠪᠢᠯᠡ᠃ ᠭᠠᠭᠴᠠᠬᠦ ᠭᠣᠬᠠ ᠶ᠋ᠢ ᠨᠢ ᠳᠠᠷᠤᠪᠠᠯ ᠫᠤᠤᠳᠠᠵᠤ ᠪᠣᠯᠳᠠᠭ ᠪᠠᠢᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠪᠠ᠃
《ᠣᠳᠣ ᠲᠠᠢᠪᠤᠩ ᠯᠠ ᠪᠠᠢᠪᠠᠯ ᠬᠠᠮᠤᠭ ᠬᠡᠷᠡᠭ ᠪᠦᠲᠦᠨᠡ》 ᠭᠡᠵᠦ ᠪᠣᠳᠣᠭᠠᠳ ᠫᠤᠤ ᠲᠠᠢ ᠭᠠᠷ ᠢ᠋ᠶ᠋ᠠᠨ ᠤᠨᠵᠢᠭᠤᠯᠤᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠮᠪᠡ ᠲᠦᠭᠵᠢᠯ ᠬᠣᠶᠠᠷ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠰᠦᠷ ᠦᠵᠡᠭᠦᠯᠦᠨ ᠰᠢᠬᠠᠮᠠᠯ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠨᠡᠦᠬᠡᠨ ᠳᠡᠭᠡᠷᠡ ᠮᠠᠢᠬᠠᠨ ᠲᠠᠢ ᠪᠠᠢᠭᠠ᠃ ᠥᠴᠦᠬᠡᠨ ᠪᠢ ᠪᠣᠯ ᠲᠡᠳᠡᠨ ᠦ᠌ ᠬᠠᠷᠠᠭᠤᠯ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠭᠤᠯᠠ ᠪᠠᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠤᠷᠪᠠᠭᠤᠯᠠ ᠪᠠᠨ᠃ ᠨᠠᠳᠠ ᠲᠠᠢ ᠪᠣᠯ ᠳᠥᠷᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠡᠳᠡᠨ ᠢ᠋ ᠪᠠᠷᠢᠬᠤ ᠪᠠᠷ ᠶᠠᠪᠤᠭᠠ ᠬᠥᠮᠦᠨ᠃ ᠮᠠᠨ ᠤ᠋ ᠴᠡᠷᠢᠭ ᠡᠨᠡᠦᠬᠡᠨ ᠳ᠋ᠦ᠍ ᠪᠠᠢᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠥᠯᠬᠥᠭᠡ ᠲᠡᠷᠭᠡ ᠪᠠᠰᠠ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦ ᠬᠡᠳᠦ ᠪᠣᠢ ᠭᠡᠳ ᠫᠤᠤ ᠲᠠᠢ ᠭᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠳ᠋ᠦ᠍ ᠯᠠᠮᠠ ᠶ᠋ᠢᠨ ᠴᠢᠷᠠᠢ ᠦᠨᠡᠰᠦ ᠰᠢᠭ ᠬᠥᠬᠡ ᠪᠣᠯᠵᠤ ᠰᠥᠬᠥᠷᠡᠨ ᠰᠠᠭᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠯᠠᠭᠠᠨ ᠬᠤᠪᠢᠰᠬᠠᠯᠴᠢ ᠳᠠᠭᠢᠨᠢ ᠭᠤᠸᠠᠢ ᠮᠢᠨᠢ᠂ ᠪᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠪᠤᠷᠤᠭᠤ ᠰᠠᠨᠠᠭᠰᠠᠨ ᠤᠳᠠᠭᠠ ᠦᠭᠡᠢ ᠪᠢᠯᠡ᠃ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠶᠠᠳᠠᠭᠤ ᠬᠤᠸᠠᠷᠠᠭ ᠤ᠋ᠨ ᠠᠮᠢ ᠶ᠋ᠢ ᠥᠷᠥᠰᠢᠶᠡᠨ ᠰᠣᠶᠣᠷᠬᠠᠨᠠ ᠤᠤ? ᠭᠡᠵᠦ ᠴᠡᠴᠡᠷᠡᠨ ᠪᠦᠪᠦᠳᠦᠨᠡᠪᠡ᠃
ᠪᠣᠰᠤᠯᠭᠠ ᠶ᠋ᠢᠨ ᠳᠤᠮᠳᠠ ᠦᠶᠡ ᠡᠴᠡ ᠣᠷᠣᠯᠴᠠᠭᠰᠠᠨ ᠡᠨᠡ ᠯᠠᠮᠠ ᠭᠣᠣ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠵᠠᠩᠵᠤᠨ ᠤ᠋ ᠪᠠᠨ ᠰᠸᠯᠠᠢ᠌ᠳᠠᠢ ᠫᠤᠤ ᠶ᠋ᠢ ᠠᠪᠴᠤ ᠮᠣᠷᠢᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠵᠢᠭᠤᠲᠠᠨ ᠠᠮᠢᠳᠤ ᠭᠠᠷᠴᠠᠢ᠃ ᠲᠡᠭᠡᠭᠡᠳ ᠤᠤᠯ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠪᠠᠷᠢᠭᠳᠠᠬᠤ ᠠ᠋ᠴᠠ ᠪᠠᠨ ᠠᠶᠤᠨ ᠠᠭᠤᠯᠠ ᠬᠠᠳᠠ ᠪᠠᠷ ᠳᠡᠨᠡᠭᠦᠴᠢᠯᠡᠨ ᠶᠠᠪᠤᠭᠠᠳ ᠤᠷᠭᠤᠵᠤ ᠶᠠᠪᠤᠭᠠ ᠲᠦᠭᠵᠢᠯ᠂ ᠴᠡᠮᠪᠡ ᠨᠠᠷ ᠲᠠᠢ ᠨᠡᠢᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠳᠠᠭᠠᠭᠤᠯᠵᠤ ᠲᠡᠳᠡᠨ ᠳᠡᠭᠡᠷᠡ ᠬᠦᠷᠭᠡ᠃ ᠮᠠᠲᠠᠪᠠᠤ? ᠮᠠᠢ ᠡᠨᠡ ᠮᠠᠭᠤ ᠵᠡᠪᠡ ᠪᠡᠨ ᠠᠪ᠃ ᠪᠠᠰᠠ ᠵᠠᠰᠠᠭ ᠲᠠᠢ ᠲᠡᠮᠡᠴᠡᠬᠦ ᠰᠠᠨᠠᠭᠠ ᠲᠠᠢ ᠭᠡᠳ ᠳᠤᠯᠮᠠ ᠰᠸᠯᠠᠢ᠌ᠳᠠᠢ ᠫᠤᠤ ᠶ᠋ᠢ ᠯᠠᠮᠠ ᠤᠷᠤᠭᠤ ᠰᠢᠳᠡᠪᠡ᠃ ᠯᠠᠮᠠ ᠨᠢᠭᠡᠨ ᠬᠡᠰᠡᠭ ᠶᠠᠭᠤ ᠴᠤ᠌ ᠣᠢᠯᠠᠭᠠᠭᠰᠠᠨ ᠰᠢᠨᠵᠢ ᠦᠭᠡᠢ ᠲᠡᠨᠡᠭ ᠪᠢᠲᠡᠭᠦᠦ ᠴᠢᠷᠠᠢ ᠭᠠᠷᠭᠠᠨ ᠳᠤᠯᠮᠠ ᠶ᠋ᠢ ᠰᠢᠷᠳᠡᠪᠡ᠃ ᠤᠯᠠᠭᠠᠨ ᠤ᠋ ᠬᠢᠨ ᠠᠢᠬᠤᠪᠲᠤᠷ ᠵᠡᠪᠰᠡᠭ ᠲᠡᠢ ᠶ᠋ᠢ ᠯᠠᠮᠠ ᠮᠡᠳᠡᠨᠡ᠃ ᠪᠠᠰᠠ ᠲᠡᠭᠡᠭᠡᠳ ᠡᠨᠡ ᠬᠡᠦᠬᠡᠨ ᠦ᠌ ᠪᠠᠢᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠴᠡᠷᠢᠭ ᠨᠢ ᠶᠡᠬᠡ ᠣᠢᠷᠠᠬᠠᠨ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠡᠳᠡᠨ ᠦ᠌ ᠭᠠᠷ ᠠ᠋ᠴᠠ ᠭᠠᠷᠳᠠᠭ ᠴᠤ᠌ ᠥᠩᠭᠡᠷᠡᠯᠡ᠃ ᠡᠨᠡ ᠬᠡᠦᠬᠡᠨ ᠦ᠌ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠬᠢᠪᠡᠯ ᠠᠮᠢ ᠥᠷᠥᠰᠢᠶᠡᠵᠦ ᠮᠠᠭᠠᠳ ᠪᠣᠯᠪᠠᠤ? ᠠᠯᠢ ᠡᠨᠡ ᠫᠤᠤ ᠶ᠋ᠢ ᠠᠪᠬᠤ ᠭᠡᠬᠦ ᠳᠡᠭᠡᠷᠡ ᠫᠤᠤᠳᠠᠵᠤ ᠣᠷᠬᠢᠬᠤ ᠭᠡᠵᠦ ᠪᠠᠢᠨᠠ ᠤᠤ? ᠭᠡᠬᠦ ᠵᠡᠷᠭᠡ ᠪᠣᠳᠣᠭᠰᠠᠨ ᠯᠠᠮᠠ ᠪᠠᠢᠷᠢ ᠠ᠋ᠴᠠ ᠪᠠᠨ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤᠬᠢ ᠫᠤᠤ ᠪᠠᠨ ᠠᠪᠤᠭᠠᠳ ᠨᠠᠮᠠᠶ᠋ᠢ ᠳᠠᠭᠠᠭᠤᠯᠵᠤ ᠶᠠᠪᠤ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠭᠡᠳ ᠮᠠᠩᠨᠠᠢ ᠤᠷᠤᠭᠤ ᠪᠠᠨ ᠳᠣᠯᠣᠭᠤᠪᠤᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠴᠢᠴᠢᠭᠰᠡᠨ ᠢ᠋ᠶ᠋ᠡᠨ ᠡᠭᠦᠨ ᠳ᠋ᠦ᠍ ᠴᠢᠨᠢ ᠦᠬᠡᠷ ᠫᠤᠤ ᠶ᠋ᠢᠨ ᠰᠤᠮᠤ ᠵᠣᠭᠣᠨᠠ ᠰᠢᠦ᠃ ᠵᠠ ᠶᠠᠪᠤᠶᠠ᠃ ᠵᠠᠮ ᠳ᠋ᠠᠭᠠᠨ ᠶᠠᠭᠠᠬᠢᠬᠤ ᠶ᠋ᠢ ᠪᠢ ᠬᠡᠯᠡᠵᠦ ᠥᠭᠭᠦᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢ ᠯᠠ ᠥᠷᠥᠰᠢᠶᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠲᠠᠪᠤᠨ ᠦᠭᠡ ᠦᠭᠡᠢ ᠨᠠᠭᠠᠳᠤᠬᠢ ᠪᠠᠨ ᠠᠪᠤᠭᠠᠳ ᠪᠤᠰᠢᠭᠤ ᠮᠣᠷᠳᠠ᠃ ᠴᠢᠮᠠ ᠲᠠᠢ ᠵᠠᠪᠠᠭᠠᠷᠠᠬᠤ ᠴᠠᠭ ᠠᠯᠠᠭᠠ ᠭᠡᠳ ᠬᠡᠦᠬᠡᠨ ᠲᠠᠢᠪᠤᠩ ᠢ᠋ᠶ᠋ᠠᠷ ᠠᠯᠬᠤᠵᠤ ᠮᠣᠷᠢ ᠪᠠᠨ ᠲᠠᠢᠯᠤᠨ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠮᠠᠶ᠋ᠢ ᠫᠤᠤ ᠠᠪᠬᠤ ᠳᠡᠭᠡᠷᠡ ᠫᠤᠤᠳᠠᠵᠤ ᠣᠷᠬᠢᠬᠤ ᠦᠭᠡᠢ ᠪᠠᠢᠭᠠ ᠶᠤᠮ ᠪᠢᠰᠢ ᠪᠢᠵᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠤᠰᠢᠭᠤ ᠠᠪᠤᠨᠠ ᠤᠤ᠂ᠦᠭᠡᠢ ᠤᠤ?
ᠯᠠᠮᠠ ᠮᠣᠭᠠᠢ ᠪᠠᠷᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠴᠡᠴᠡᠷᠡᠨ ᠣᠴᠢᠵᠤ ᠫᠤᠤ ᠪᠠᠨ ᠠᠪᠬᠤ ᠳ᠋ᠠᠭᠠᠨ ᠬᠠᠮᠢᠭᠠ ᠠ᠋ᠴᠠ ᠫᠤᠤ ᠳᠤᠤᠭᠠᠷᠴᠤ ᠨᠠᠰᠤᠨ ᠤ᠋ ᠲᠣᠭᠠ ᠭᠦᠢᠴᠡᠬᠦ ᠪᠣᠯ ᠭᠡᠵᠦ ᠴᠡᠴᠡᠷᠡᠨ ᠳᠠᠭᠵᠢᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠬᠡᠦᠬᠡᠨ ᠠᠯᠢ ᠬᠡᠳᠦᠢᠨ ᠮᠣᠷᠳᠠᠭᠠᠳ ᠬᠣᠷᠮᠣᠢ ᠪᠠᠨ ᠶᠠᠮᠠᠷ ᠴᠤ᠌ ᠠᠵᠢᠭ ᠦᠭᠡᠢ ᠵᠠᠰᠠᠪᠠ᠃
ᠳᠤᠯᠮᠠ ᠶ᠋ᠢᠨ ᠦᠨᠡᠨ ᠪᠠᠢᠳᠠᠯ ᠢ᠋ ᠠᠶᠤᠨ ᠰᠠᠨᠳᠤᠷᠤᠭᠰᠠᠨ ᠯᠠᠮᠠ ᠠᠵᠢᠵᠤ ᠬᠡᠷᠬᠢᠨ ᠴᠢᠳᠠᠬᠤ ᠪᠢᠯᠡ᠃ ᠯᠠᠮᠠ ᠫᠤᠤ ᠪᠠᠨ ᠠᠪᠬᠤ ᠦᠶᠡ ᠳ᠋ᠦ᠍ ᠳᠤᠯᠮᠠ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤ ᠪᠣᠳᠣᠭᠳᠠᠵᠤ ᠪᠠᠢᠭᠰᠠᠨ ᠢ᠋ ᠪᠢᠴᠢᠬᠦ ᠳ᠋ᠦ᠍ ᠬᠡᠴᠡᠭᠦᠦ᠃ ᠬᠡᠷᠪᠡ ᠫᠤᠤ ᠥᠪᠡᠷ ᠤᠷᠤᠭᠤ ᠨᠢ ᠴᠢᠭᠯᠡᠭᠰᠡᠨ ᠪᠣᠯ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠡᠭᠴᠡ ᠳᠠᠭᠠᠷᠢᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠵᠠᠢ᠃ ᠡᠨᠡ ᠴᠦ᠍ ᠤᠴᠢᠷ ᠠ᠋ᠴᠠ ᠫᠤᠤ ᠳ᠋ᠤ᠌ ᠯᠠᠮᠠ ᠶ᠋ᠢᠨ ᠭᠠᠷ ᠬᠦᠷᠬᠦ ᠦᠶᠡ ᠳ᠋ᠦ᠍ ᠥᠨᠳᠡᠰᠬᠢᠭᠰᠡᠨ ᠪᠥᠭᠡᠳ ᠰᠡᠭᠦᠯ ᠳ᠋ᠦ᠍ᠨᠢ ᠲᠡᠭᠦᠨ ᠢ᠋ᠶ᠋ᠡᠨ ᠪᠠᠯᠠᠯᠬᠤ ᠭᠡᠵᠦ ᠬᠣᠷᠮᠣᠢ ᠪᠠᠨ ᠵᠠᠰᠠᠪᠠ᠃
ᠲᠦᠷᠭᠡᠯᠡ ᠭᠡᠵᠦ ᠰᠢᠷᠦᠭᠦᠨ ᠵᠠᠩᠳᠤᠷᠤᠭᠰᠠᠨ ᠳᠤᠯᠮᠠ ᠶ᠋ᠢᠨ ᠳᠠᠭᠤ ᠯᠠᠮᠠ ᠶ᠋ᠢ ᠪᠦᠷᠢᠮᠦᠰᠦᠨ ᠢᠯᠠᠵᠤ ᠮᠣᠷᠢᠨ ᠳ᠋ᠤᠨᠢ ᠮᠣᠷᠳᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠡᠷᠭᠡᠴᠡᠨ ᠶᠠᠪᠤ ᠭᠡᠵᠦ ᠲᠤᠰᠢᠶᠠᠬᠤ ᠳ᠋ᠤ᠌ ᠯᠠᠮᠠ ᠬᠠᠵᠠᠭᠤ ᠳ᠋ᠤᠨᠢ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠪᠡᠶᠡ ᠲᠣᠭᠲᠠᠵᠤ ᠶᠠᠳᠠᠨ ᠪᠡᠭᠡᠪᠡᠭᠡᠨᠡᠨ ᠴᠡᠴᠡᠷᠡᠵᠦ ᠵᠠᠪᠠᠵᠢ ᠪᠠᠷ ᠨᠢ ᠰᠢᠯᠦᠰᠦ ᠰᠠᠪᠢᠷᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠮᠣᠳᠣᠨ ᠳ᠋ᠤ᠌ ᠲᠠᠭᠠᠷᠠᠯᠳᠤᠭᠰᠠᠨ᠃ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠥᠭᠬᠦ ᠦᠭᠡᠢ ᠶᠤᠮ᠃ ᠲᠡᠭᠡᠭᠡᠳ ᠠᠪᠴᠢᠷᠠᠯᠠ᠃ ᠬᠠᠷᠢᠨ ᠵᠠᠮ ᠳ᠋ᠠᠭᠠᠨ ᠲᠠᠨ ᠤ᠋ ᠰᠢᠷᠠ ᠴᠡᠷᠢᠭ ᠲᠦ᠍ ᠪᠠᠢᠭᠠ ᠨᠥᠬᠥᠷ ᠢ᠋ᠶ᠋ᠡᠨ ᠡᠷᠢᠵᠦ ᠶᠠᠪᠤᠨᠠ ᠭᠡᠰᠡᠨ ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠥᠭᠡᠷᠡ ᠢᠯᠡᠭᠦᠦ ᠳᠤᠲᠠᠭᠤ ᠶᠠᠭᠤᠮᠠ ᠴᠠᠯᠴᠢᠭᠰᠠᠨ ᠪᠠᠢᠪᠠᠯ ᠤᠤ! ᠭᠡᠵᠦ ᠳᠤᠯᠮᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠯᠠᠮᠠ ᠭᠢᠯᠦᠯᠵᠡᠨ ᠡᠰᠢ ᠲᠠᠰᠢ ᠬᠠᠷᠠᠬᠤ ᠵᠠᠭᠤᠷᠠ 《ᠵᠠ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠨᠡᠮᠦᠰ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠬᠡᠨ ᠭᠡᠳᠡᠭ ᠢ᠋ ᠬᠡᠯᠡᠭᠰᠡᠨ ᠪᠠᠢᠪᠠᠯ ᠮᠥᠴᠢ ᠮᠥᠴᠢ ᠪᠡᠷ ᠴᠢᠨᠢ ᠬᠢᠷᠭᠠᠵᠤ ᠠᠯᠠᠨᠠ ᠰᠢᠦ᠃ ᠬᠠᠷᠢᠨ ᠮᠢᠨᠦ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠬᠢᠪᠡᠯ ᠨᠣᠬᠠᠢ ᠠᠮᠢ ᠶ᠋ᠢ ᠴᠢᠨᠢ ᠠᠪᠤᠷᠠᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠪᠤᠷᠬᠠᠨ ᠮᠢᠨᠢ᠃ ᠶᠠᠭᠤ ᠪᠣᠯᠤᠯᠠ ᠭᠡᠵᠦ ᠲᠡᠭᠡᠬᠦ ᠪᠣᠢ᠃
ᠲᠡᠷᠡ ᠬᠣᠶᠠᠷ ᠵᠡᠷᠭᠡᠴᠡᠨ ᠨᠡᠢᠯᠡᠭᠡᠳ ᠶᠠᠪᠤᠯᠠ᠃ ᠳᠤᠯᠮᠠ ᠠᠮᠠᠨ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠳᠠᠭᠤᠤ ᠭᠢᠩᠰᠢᠨ ᠠᠶᠠᠯᠤᠨᠠ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠮᠣᠳᠣᠨ ᠤ᠋ ᠴᠣᠭᠣᠷᠬᠠᠢ ᠳ᠋ᠤ᠌ ᠪᠠᠢᠭᠠ ᠬᠠᠭᠤᠴᠢᠨ ᠬᠥᠬᠡ ᠮᠠᠢᠬᠠᠨ ᠬᠠᠷᠠᠭᠳᠠᠯᠠ᠃ ᠮᠠᠢᠬᠠᠨ ᠤ᠋ ᠳᠡᠷᠭᠡᠳᠡ ᠡᠮᠡᠭᠡᠯ ᠲᠡᠢ ᠮᠣᠷᠢᠳ ᠬᠠᠷᠠᠭᠳᠠᠪᠠ᠃ ᠮᠣᠷᠢᠨ ᠤ᠋ ᠴᠢᠮᠡᠭᠡ ᠪᠡᠷ ᠮᠠᠢᠬᠠᠨ ᠠ᠋ᠴᠠ ᠲᠦᠭᠵᠢᠯ᠂ ᠴᠡᠮᠪᠡ ᠭᠠᠷᠴᠤ ᠢᠷᠡᠯᠡ᠃ ᠲᠡᠳᠡᠨ ᠦ᠌ ᠭᠠᠷ ᠲᠤ᠌ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠳᠤᠯᠮᠠ ᠶ᠋ᠢᠨ ᠳᠣᠲᠣᠷᠠ ᠵᠠᠷᠠᠰ ᠬᠢᠯᠡ᠃
ᠯᠠᠮᠠ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠦᠭᠡ ᠶ᠋ᠢ ᠲᠣᠳᠢ ᠰᠢᠭ᠋ ᠳᠠᠪᠲᠠᠨ ᠬᠡᠯᠡᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠬᠤ ᠳ᠋ᠤ᠌ ᠳᠤᠯᠮᠠ ᠴᠤ᠌ ᠪᠠᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ᠃ ᠴᠢ ᠴᠢᠨᠢ ᠬᠠᠮᠢᠭᠠ ᠠ᠋ᠴᠠ ᠭᠠᠷᠤᠭᠠᠳ ᠢᠷᠡᠪᠡ ᠭᠡᠵᠦ ᠴᠡᠮᠪᠡ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠳᠤᠯᠮᠠ ᠴᠢᠮᠠᠶ᠋ᠢ ᠬᠡᠨ ᠶᠠᠪᠤᠭᠤᠯᠪᠠ? ᠭᠡᠵᠦ ᠲᠦᠭᠵᠢᠯ ᠣᠢᠷᠠᠲᠤᠨ ᠣᠴᠢᠵᠤ ᠰᠡᠵᠢᠭᠲᠡᠢ ᠨᠢᠳᠦ ᠪᠡᠷ ᠰᠢᠷᠳᠡᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠮᠠᠷ ᠪᠠᠢᠨᠠ? ᠭᠡᠵᠦ ᠳᠤᠯᠮᠠ ᠠᠰᠠᠭᠤᠳᠠᠯ ᠢ᠋ ᠠᠰᠠᠭᠤᠳᠠᠯ ᠢ᠋ᠶ᠋ᠠᠷ ᠬᠠᠷᠢᠭᠤᠯᠤᠭᠠᠳ ᠯᠠᠮᠠ ᠶ᠋ᠢᠨ ᠲᠤᠱᠠᠭᠰᠠᠨ ᠮᠣᠷᠢᠨ ᠤ᠋ ᠬᠦᠵᠦᠭᠦᠨ ᠡᠴᠡ ᠮᠣᠷᠢ ᠪᠠᠨ ᠠᠵᠢᠭ ᠦᠭᠡᠢ ᠤᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠯᠠᠭᠠᠨ ᠤ᠋ ᠬᠢᠨ ᠶᠠᠪᠤᠭᠤᠯᠤᠭᠰᠠᠨ ᠪᠢᠰᠢ ᠪᠢᠵᠡ ᠳᠡ? ᠬᠠᠲᠠᠭᠤ ᠲᠣᠭᠯᠠᠭᠠᠮ ᠡᠮᠡ ᠬᠥᠮᠦᠨ ᠳ᠋ᠦ᠍ ᠣᠭᠲᠣ ᠬᠡᠷᠡᠭ ᠦᠭᠡᠢ ᠭᠡᠳ ᠲᠦᠭᠵᠢᠯ ᠭᠠᠷ ᠲᠠᠭᠠᠨ ᠪᠠᠷᠢᠭᠰᠠᠨ ᠰᠸᠯᠠᠢ᠌ᠳᠠᠢ ᠪᠠᠷ ᠲᠣᠭᠯᠠᠵᠤ᠂ ᠳᠤᠯᠮᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠠᠵᠢᠨᠠ᠃
ᠳᠤᠯᠮᠠ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠴᠣ ᠤᠯᠠᠭᠠᠨ ᠤ᠋ ᠬᠢᠨ ᠯᠡ ᠲᠣᠭᠣᠨᠠ ᠳᠠ᠃ ᠲᠡᠢᠮᠦ ᠠᠮᠢᠲᠠᠳ ᠲᠤ᠌ ᠳᠡᠢᠯᠦᠭᠳᠡᠭᠡᠳ ᠡᠨᠳᠡ ᠪᠦᠭᠭᠦᠵᠦ ᠪᠠᠢᠳᠠᠭ ᠶᠠᠮᠠᠷ ᠵᠠᠶᠠᠭᠠ ᠦᠭᠡᠢ ᠠᠮᠢᠲᠠᠳ ᠪᠣᠢ? ᠲᠠᠨᠠᠷ ᠴᠢᠨᠢ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠴᠢ ᠶᠠᠭᠤ ᠭᠡᠵᠦ ᠶᠠᠪᠤᠭᠠ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠨᠥᠬᠥᠷ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠶᠠᠪᠤᠭᠰᠠᠨ᠃ ᠨᠥᠬᠥᠷ ᠢ᠋ᠶ᠋ᠡᠨ ᠡᠷᠢᠵᠦ ᠶᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠬᠥᠷ ᠢ᠋ᠶ᠋ᠡᠨ ᠡᠷᠢᠵᠦ ᠶᠠᠪᠤᠨᠠ ᠭᠡᠨᠡ᠃ ᠲᠡᠷᠡ ᠴᠢᠨᠢ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ ᠤᠤ? ᠭᠡᠳ ᠴᠡᠮᠪᠡ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠷᠠ ᠶ᠋ᠢᠨ ᠴᠡᠷᠢᠭ ᠲᠦ᠍ ᠯᠡ ᠶᠠᠪᠤᠭᠰᠠᠨ ᠶᠤᠮ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠢᠮᠦ ᠪᠣᠯ ᠮᠠᠢᠬᠠᠨ ᠳ᠋ᠤ᠌ ᠣᠷᠣ᠃ ᠲᠠᠪᠠᠲᠠᠢ ᠶᠠᠷᠢ ᠭᠡᠳ ᠲᠦᠭᠵᠢᠯ ᠳᠤᠯᠮᠠ ᠲᠠᠢ ᠢᠷᠡᠭᠰᠡᠨ ᠯᠠᠮᠠ ᠳ᠋ᠤ᠌ ᠬᠠᠨᠳᠤᠵᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠤᠷᠢᠳᠤᠬᠢ ᠥᠨᠳᠥᠷ ᠳᠡᠭᠡᠷᠡ ᠭᠠᠷᠴᠤ ᠬᠥᠮᠦᠨ ᠬᠠᠷᠠᠵᠤ ᠪᠠᠢᠭᠠᠳ ᠪᠦᠷᠦᠩᠬᠦᠢ ᠪᠣᠯᠬᠤ ᠪᠠᠷ ᠢᠷᠡ ᠭᠡᠯᠡ᠃
ᠳᠤᠯᠮᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠶᠠᠪᠤᠭᠠᠳ ᠢᠷᠡ ᠭᠡᠳᠡᠭ ᠳᠣᠬᠢᠶᠠ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠯᠠᠮᠠ ᠳ᠋ᠤ᠌ ᠥᠭᠭᠦᠭᠡᠳ ᠰᠢᠭᠤᠳ ᠮᠠᠢᠬᠠᠨ ᠤᠷᠤᠭᠤ ᠶᠠᠪᠤᠯᠠ᠃ ᠭᠠᠷ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠭ ᠬᠠᠶᠠᠯᠠᠨ ᠬᠣᠶᠠᠷ ᠰᠡᠭᠦᠵᠢᠨ ᠳᠡᠭᠡᠷᠡ ᠪᠡᠨ ᠭᠠᠩᠬᠤᠨ ᠶᠠᠪᠤᠭᠠ ᠳᠤᠯᠮᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠲᠦᠭᠵᠢᠯ᠂ ᠴᠡᠮᠪᠡ᠂ ᠬᠣᠶᠠᠷ ᠲᠠᠴᠢᠶᠠᠩᠭᠤᠢ ᠶ᠋ᠢᠨ ᠭᠠᠯ ᠳᠦᠷᠡᠯᠵᠡᠭᠰᠡᠨ ᠨᠢᠳᠦ ᠪᠡᠷ ᠰᠢᠷᠳᠡᠪᠡ᠃
ᠰᠠᠷᠠ ᠰᠢᠬᠠᠮ ᠠᠭᠯᠠᠭ ᠠᠭᠤᠯᠠᠨ ᠳ᠋ᠤ᠌ ᠪᠦᠭᠭᠦᠵᠦ᠂ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠠᠷᠠ ᠬᠠᠷᠠᠭᠠ ᠦᠭᠡᠢ ᠡᠨᠡ ᠬᠣᠶᠠᠷ ᠲᠤ᠌ ᠳᠤᠯᠮᠠ ᠤᠯᠠᠮ ᠴᠤ᠌ ᠭᠤᠸᠠ ᠦᠵᠡᠰᠬᠦᠯᠡᠩᠲᠡᠢ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃ 《ᠶᠣᠰᠣᠲᠠᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢ ᠯᠠ ᠡᠢᠮᠦ ᠪᠠᠢᠳᠠᠭ ᠪᠠᠢᠬᠤ ᠳᠠ?》 ᠭᠡᠵᠦ ᠴᠡᠮᠪᠡ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯ 《ᠰᠠᠢᠬᠠᠨ ᠬᠡᠦᠬᠡᠨ ᠭᠡᠵᠦ ᠬᠣᠰᠢᠭᠤ ᠳᠠᠮᠵᠢᠨ ᠶᠠᠷᠢᠯᠴᠠᠳᠠᠭ ᠨᠢ ᠠᠷᠭᠠ ᠴᠤ᠌ ᠦᠭᠡᠢ ᠶᠤᠮ ᠳᠡ᠃ ᠲᠡᠷᠡ ᠭᠡᠵᠢᠭᠡ ᠨᠢ ᠁ ᠰᠤᠨᠤᠯᠵᠠᠭᠠᠳ᠂ ᠨᠢᠷᠤᠭᠤ ᠨᠢ》 ᠭᠡᠵᠦ ᠲᠦᠭᠵᠢᠯ ᠪᠣᠳᠣᠵᠤ ᠪᠠᠢᠯᠠ᠃
ᠳᠤᠯᠮᠠ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠭᠠᠳ ᠡᠰᠢ ᠲᠡᠰᠢ ᠬᠠᠷᠠᠪᠠᠯ ᠬᠠᠮᠪᠤ ᠯᠠᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠵᠢᠭᠤᠲᠠᠵᠤ ᠪᠦᠭᠦᠳᠡ ᠶᠠᠪᠤᠬᠤ ᠳ᠋ᠤ᠌ ᠪᠥᠭᠡᠮ ᠳᠠᠷᠤᠭᠠᠰᠤ ᠪᠣᠯᠤᠭᠰᠠᠨ ᠬᠥᠭᠰᠢᠨ ᠯᠠᠮᠠ ᠶ᠋ᠢ ᠲᠦᠭᠵᠢᠯ ᠡᠳᠦᠷ ᠣᠢᠷᠠᠬᠠᠨ ᠮᠣᠳᠣᠨ ᠳ᠋ᠤ᠌ ᠳᠠᠭᠠᠭᠤᠯᠵᠤ ᠠᠪᠠᠴᠢᠭᠠᠳ ᠴᠣᠬᠢᠵᠤ ᠣᠷᠬᠢᠭᠰᠠᠨ ᠶᠤᠮ᠃
ᠲᠦᠭᠵᠢᠯ ᠬᠠᠮᠪᠤ ᠶ᠋ᠢ ᠬᠥᠪᠳᠥ ᠪᠡᠷ ᠪᠤᠯᠠᠵᠤ ᠣᠷᠬᠢᠭᠠᠳ ᠢᠷᠡᠬᠦ ᠳ᠋ᠦ᠍ 《ᠪᠠᠭᠰᠢ ᠶᠠᠪᠤᠭᠠᠳ ᠦᠭᠪᠡᠦ?》 ᠭᠡᠵᠦ ᠴᠡᠮᠪᠡ ᠠᠰᠠᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠩᠭᠢᠵᠦ ᠠᠭᠤᠯᠠᠨ ᠳ᠋ᠤ᠌ ᠪᠠᠭᠠᠪᠠᠭᠠᠢ ᠰᠢᠭ᠋ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠨᠡ ᠭᠡᠳ ᠲᠦᠭᠵᠢᠯ ᠠᠵᠢᠭ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠯᠠ᠃ ᠲᠦᠭᠵᠢᠯ ᠶᠡᠬᠡ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠠ ᠬᠥᠮᠦᠨ᠃ ᠴᠡᠮᠪᠡ ᠶ᠋ᠢ ᠪᠠᠷᠢᠵᠤ ᠥᠭᠪᠡᠯ ᠠᠷᠠᠳ ᠤ᠋ᠨ ᠵᠠᠰᠠᠭ ᠠᠮᠢ ᠥᠷᠥᠰᠢᠶᠡᠬᠦ ᠪᠣᠯᠪᠠᠤ? ᠭᠡᠵᠦ ᠪᠣᠳᠣᠨᠠ᠃ ᠭᠡᠪᠡᠴᠦ ᠬᠢᠭᠰᠡᠨ ᠶᠠᠯᠠ ᠨᠢ ᠨᠢᠭᠡ ᠴᠡᠮᠪᠡ ᠪᠠᠢᠲᠤᠭᠠᠢ᠂ ᠬᠡᠳᠦᠨ ᠴᠡᠮᠪᠡ ᠪᠡᠷ ᠲᠥᠯᠥᠭᠳᠡᠬᠦ ᠦᠭᠡᠢ ᠤᠴᠢᠷ ᠡᠴᠡ ᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠴᠡᠮᠪᠡ ᠴᠦ᠍ ᠪᠠᠷᠢᠭᠳᠠᠪᠠᠯ ᠠᠮᠢᠳᠤ ᠭᠠᠷᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠰᠠᠢᠨ ᠮᠡᠳᠡᠨᠡ᠃ ᠤᠯᠠᠭᠠᠨ ᠤ᠋ ᠮᠥᠷᠳᠡᠯᠭᠡ ᠡᠴᠡ ᠵᠢᠭᠤᠲᠠᠬᠤ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠣᠯ ᠳᠡᠭᠡᠷᠡ ᠮᠡᠲᠦ ᠪᠣᠳᠣᠭᠳᠠᠪᠠᠴᠤ ᠢᠩᠭᠢᠵᠦ ᠶᠠᠪᠤᠬᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠪᠠᠨ ᠪᠣᠯ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠲᠦᠰᠢᠭ ᠲᠡᠢ ᠶᠤᠮ ᠰᠢᠭ ᠰᠠᠨᠠᠭᠳᠠᠨᠠ᠃ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠣᠯ ᠳᠡᠭᠡᠷᠡ ᠭᠡᠵᠦ ᠪᠣᠳᠣᠭᠰᠠᠨ ᠦᠶᠡ ᠳ᠋ᠡᠭᠡᠨ ᠲᠦᠭᠵᠢᠯ ᠦ᠋ᠨ ᠬᠣᠭᠣᠯᠠᠢ ᠶ᠋ᠢ ᠬᠢᠷᠭᠠᠵᠤ ᠣᠷᠬᠢᠮᠠᠷ ᠪᠠᠢᠳᠠᠭ ᠪᠢᠯᠡ᠃ ᠳᠤᠯᠮᠠ ᠶ᠋ᠢ ᠬᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ 《ᠲᠦᠭᠵᠢᠯ ᠢ᠋ ᠠᠯᠠᠵᠤ ᠣᠷᠬᠢᠭᠠᠳ᠂ ᠡᠨᠡ ᠬᠡᠦᠬᠡᠨ ᠢ᠋ ᠠᠪᠴᠤ ᠬᠢᠯᠢ ᠳᠠᠪᠠᠶᠠ》 ᠭᠡᠳᠡᠭ ᠪᠣᠳᠣᠯ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠠ ᠨᠠᠷ ᠨᠥᠬᠥᠷ ᠮᠢᠨᠢ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠬᠡᠯᠡᠭᠡᠳ ᠠᠯᠢ? ᠭᠡᠵᠦ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠡᠴᠡ ᠳᠤᠯᠮᠠ ᠰᠢᠢᠳᠮᠡᠭᠡᠢ ᠱᠠᠭᠠᠷᠳᠠᠪᠠ᠃
ᠲᠦᠭᠵᠢᠯ ᠴᠦ᠍ ᠭᠡᠰᠡᠨ᠂ ᠴᠡᠮᠪᠡ ᠴᠦ᠍ ᠭᠡᠰᠡᠨ ᠲᠡᠮᠦᠷ ᠢ᠋ ᠠᠯᠠᠭᠰᠠᠨ ᠭᠡᠵᠦ ᠰᠢᠭᠤᠳ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠯᠵᠠᠵᠤ ᠪᠣᠯᠬᠤ ᠪᠠᠢᠯᠭᠦᠢ ᠳᠡ᠃ ᠥᠨᠥᠳᠥᠷ ᠨᠢᠭᠡᠨᠲᠡ ᠣᠷᠣᠢ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠪᠢᠳᠡᠨ ᠲᠡᠢ ᠬᠣᠨᠣᠭᠠᠳ ᠶᠠᠪᠤ ᠯᠠ ᠳᠠ ᠭᠡᠵᠦ ᠴᠡᠮᠪᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠯᠠᠨ ᠳ᠋ᠤ᠌ ᠪᠦᠭᠭᠦᠵᠦ ᠰᠤᠷᠤᠭᠰᠠᠨ ᠬᠥᠮᠦᠨ ᠪᠣᠯᠬᠣᠷ ᠲᠠ ᠬᠣᠶᠠᠷ ᠰᠢᠭ᠋ ᠡᠢᠮᠦ ᠠᠮᠠᠷᠬᠠᠨ ᠴᠤ᠌ ᠣᠯᠳᠠᠬᠤ ᠦᠭᠡᠢ ᠯᠡ ᠳᠡ ᠭᠡᠵᠦ ᠳᠤᠯᠮᠠ ᠰᠠᠨᠠᠭᠠ ᠠᠯᠲᠠᠨ ᠦᠯᠡᠮᠵᠢ ᠭᠣᠮᠣᠳᠠᠯ ᠲᠠᠢ ᠬᠡᠯᠡᠪᠡ᠃
ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠬᠤ ᠳ᠋ᠤ᠌ ᠬᠠᠷᠠᠭᠤᠯ ᠳ᠋ᠤ᠌ ᠭᠠᠷᠤᠭᠰᠠᠨ ᠯᠠᠮᠠ ᠡᠷᠭᠢᠵᠦ ᠢᠷᠡᠯᠡ᠃ ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠤ᠋ᠨ ᠵᠠᠢ ᠶ᠋ᠢ ᠬᠠᠷᠠᠵᠤ ᠪᠠᠢᠭᠠᠳ ᠳᠤᠯᠮᠠ 《ᠮᠢᠨᠦ ᠳᠣᠬᠢᠶᠠ ᠪᠠᠷ ᠯᠠ ᠬᠥᠳᠡᠯᠦᠨᠡ ᠰᠢᠦ》 ᠭᠡᠵᠦ ᠯᠠᠮᠠ ᠳ᠋ᠤ᠌ ᠬᠡᠯᠡᠵᠡᠢ᠃
ᠳᠥᠷᠪᠡᠭᠦᠯᠡ ᠪᠡᠨ ᠮᠠᠢᠬᠠᠨ ᠳ᠋ᠤ᠌ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠬᠡᠨ ᠴᠦ᠍ ᠤᠨᠲᠠᠭᠰᠠᠨ ᠦᠭᠡᠢ᠃ ᠪᠡᠶᠡ ᠪᠡᠶᠡ ᠡᠴᠡ ᠳᠤᠯᠮᠠ ᠶ᠋ᠢ ᠬᠠᠷᠠᠮᠯᠠᠨ ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠨᠢᠭᠡ ᠨᠢ ᠨᠥᠭᠦᠭᠡ ᠪᠡᠨ ᠬᠥᠳᠡᠯᠬᠦ ᠪᠦᠷᠢ ᠳᠡᠷᠡ ᠳᠣᠣᠷᠠᠬᠢ ᠫᠤᠤ ᠪᠠᠨ ᠠᠳᠬᠤᠨ ᠠᠪᠴᠤ ᠪᠠᠢᠯᠠ᠃
ᠳᠤᠯᠮᠠ ᠤᠨᠲᠠᠵᠤ ᠪᠠᠢᠭᠠ ᠳᠦᠷᠢ ᠦᠵᠡᠭᠦᠯᠦᠨ ᠵᠢᠭᠳᠡ ᠠᠮᠢᠰᠬᠤᠭᠠᠯᠠᠨ ᠬᠠᠶᠠ ᠬᠠᠶᠠ ᠬᠤᠷᠬᠢᠷᠠᠪᠠᠴᠤ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠬᠣᠶᠠᠷ ᠲᠠᠰᠢ ᠪᠠᠨ ᠭᠢᠯᠦᠯᠵᠡᠨ ᠪᠠᠢᠵᠠᠢ᠃
ᠦᠷ ᠴᠠᠢᠬᠤ ᠳ᠋ᠤ᠌ ᠳᠤᠯᠮᠠ ᠪᠣᠰᠴᠤ᠂ 《ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠨᠠ᠃ ᠲᠠ ᠨᠠᠷ ᠲᠤ᠌ ᠴᠠᠢ ᠴᠢᠨᠠᠵᠤ ᠥᠭᠭᠦᠶᠡ》 ᠭᠡᠳ ᠭᠠᠷᠤᠯᠠ᠃ ᠨᠣᠢᠷ ᠦᠭᠡᠢ ᠬᠣᠨᠣᠭᠰᠠᠨ ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠨᠲᠠᠪᠠ᠃ ᠬᠠᠷᠢᠨ ᠬᠠᠷᠠᠭᠤᠯ ᠬᠠᠷᠠᠵᠤ ᠪᠠᠢᠭᠠ ᠨᠡᠷᠡ ᠪᠡᠷ ᠡᠳᠦᠷ ᠨᠢ ᠨᠣᠢᠷ ᠢ᠋ᠶ᠋ᠠᠨ ᠠᠪᠤᠭᠰᠠᠨ ᠯᠠᠮᠠ ᠳᠤᠯᠮᠠ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠠᠵᠢᠨ ᠬᠡᠪᠲᠡᠪᠡ᠃
ᠭᠠᠷᠴᠤ ᠣᠷᠣᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠳᠤᠯᠮᠠ ᠮᠠᠢᠬᠠᠨ ᠤ᠋ ᠡᠮᠦᠨᠡᠬᠢ ᠣᠮ ᠢ᠋ ᠣᠭᠲᠣᠯᠵᠤ ᠠᠮᠵᠢᠪᠠ᠃ ᠴᠠᠢ ᠪᠤᠴᠠᠯᠬᠤ ᠳ᠋ᠤ᠌ ᠳᠤᠯᠮᠠ ᠵᠢᠯᠠᠪᠴᠢᠨ ᠲᠣᠭᠣᠭᠠ ᠲᠠᠢ ᠬᠠᠯᠠᠭᠤᠨ ᠴᠠᠢ ᠪᠠᠷᠢᠭᠠᠳ ᠮᠠᠢᠬᠠᠨ ᠤ᠋ ᠪᠠᠭᠠᠨᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠯᠠᠮᠠ ᠳ᠋ᠤ᠌ ᠲᠦᠷᠭᠡᠨ ᠭᠠᠷᠬᠤ ᠳᠣᠬᠢᠶᠠ ᠥᠭᠭᠦᠭᠡᠳ ᠲᠡᠭᠦᠨ ᠢ᠋ ᠭᠠᠷᠤᠮᠠᠭᠴᠠ 《ᠴᠡᠷᠢᠭ ᠢᠷᠡᠯᠡ》 ᠭᠡᠵᠦ ᠴᠢᠩᠭᠠ ᠬᠠᠰᠬᠢᠷᠪᠠ᠃
ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠤᠬᠤᠰᠬᠢᠨ ᠪᠣᠰᠬᠤ ᠳ᠋ᠤ᠌ ᠨᠢᠭᠤᠷ ᠤᠷᠤᠭᠤ ᠨᠢ ᠬᠠᠯᠠᠭᠤᠨ ᠴᠠᠢ ᠰᠠᠴᠤᠭᠠᠳ ᠡᠷᠭᠢᠬᠦ ᠳ᠋ᠡᠭᠡᠨ ᠮᠠᠢᠬᠠᠨ ᠤ᠋ ᠡᠮᠦᠨᠡᠬᠢ ᠪᠠᠭᠠᠨᠠ ᠶ᠋ᠢ ᠠᠪᠤᠭᠠᠳ ᠭᠠᠷᠤᠯᠠ᠃ ᠲᠦᠯᠡᠭᠳᠡᠭᠡᠳ ᠪᠠᠰᠠ ᠮᠠᠢᠬᠠᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠣᠶᠠᠷ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠣᠭᠠᠭᠠᠷᠠᠵᠤ ᠴᠢᠳᠠᠭᠠᠳᠤᠢ ᠰᠠᠨᠳᠤᠷᠤᠨ ᠣᠪᠣᠯᠵᠠᠵᠤ ᠪᠠᠢᠬᠤ ᠳ᠋ᠤ᠌ ᠳᠤᠯᠮᠠ ᠣᠪᠣᠢᠭᠰᠠᠨ ᠭᠠᠵᠠᠷ ᠨᠢ ᠪᠦᠳᠦᠭᠦᠨ ᠪᠠᠭᠠᠨᠠ ᠪᠠᠷ ᠵᠠᠨᠴᠢᠵᠤ ᠭᠠᠷᠤᠯᠠ᠃
ᠴᠠᠭᠠᠨ ᠬᠠᠷᠠ ᠨᠢ ᠢᠯᠭᠠᠷᠠᠨ ᠪᠠᠢᠳᠠᠭ ᠳᠤᠯᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠤᠯᠠᠭᠠᠨ ᠴᠢᠰᠤ ᠬᠤᠷᠠᠯᠳᠤᠨ ᠡᠷᠭᠢᠯᠳᠦᠵᠦ ᠦᠰᠦ ᠨᠢ ᠪᠣᠰᠤᠨ ᠰᠡᠭᠰᠡᠢᠵᠦ ᠴᠣᠬᠢᠬᠤ ᠪᠦᠷᠢ ᠳ᠋ᠡᠭᠡᠨ 《ᠲᠡᠮᠦᠷ ᠦ᠋ᠨ ᠮᠢᠨᠢ ᠬᠠᠷᠢᠭᠤ》 ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠦᠭᠡᠯᠡᠵᠦ ᠪᠠᠢᠯᠠ᠃
ᠳᠣᠲᠣᠷᠠ ᠡᠴᠡ ᠬᠣᠶᠠᠷ ᠤᠳᠠᠭᠠ ᠫᠤᠤ ᠳᠤᠤᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠮᠠᠢᠬᠠᠨ ᠢ᠋ ᠴᠣᠭᠣᠯᠬᠤ ᠡᠴᠡ ᠥᠭᠡᠷᠡ ᠶᠠᠮᠠᠷᠴᠤ ᠭᠡᠮ ᠬᠢᠭᠰᠡᠨ ᠦᠭᠡᠢ᠃ ᠲᠣᠯᠣᠭᠠᠢ ᠤᠷᠤᠭᠤ ᠪᠠᠨ ᠬᠦᠨᠳᠦ ᠪᠠᠭᠠᠨᠠ ᠪᠠᠷ ᠬᠡᠳᠦ ᠬᠡᠳᠦ ᠴᠣᠬᠢᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠦᠭᠵᠢᠯ᠂ ᠴᠡᠮᠪᠡ ᠬᠣᠶᠠᠷ ᠤᠬᠠᠭᠠᠨ ᠦᠭᠡᠢ ᠭᠤᠯᠳᠤᠢᠨ ᠤᠨᠠᠵᠠᠢ᠃
ᠡᠨᠡ ᠪᠦᠬᠦᠨ ᠡᠴᠡ ᠠᠶᠤᠵᠤ ᠶᠣᠰᠣᠲᠠᠢ ᠯᠠ ᠰᠦᠨᠡᠰᠦ ᠵᠠᠢᠯᠠᠭᠰᠠᠨ ᠯᠠᠮᠠ ᠠᠯᠢ ᠴᠤ᠌ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠬᠡᠢ ᠪᠦᠯᠲᠡᠭᠡᠨᠡᠨ ᠵᠣᠭᠰᠣᠨᠠ᠃
ᠳᠤᠯᠮᠠ ᠪᠠᠭᠠᠨᠠ ᠪᠠᠨ ᠬᠠᠶᠠᠵᠤ ᠮᠠᠢᠬᠠᠨ ᠤᠷᠤᠭᠤ ᠬᠠᠷᠠᠪᠠᠯ ᠬᠥᠳᠡᠯᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠠᠢ᠃
ᠴᠢ ᠡᠨᠡ ᠬᠣᠶᠠᠷ ᠢ᠋ ᠮᠣᠷᠢᠨ ᠳ᠋ᠤ᠌ ᠲᠡᠩᠨᠡᠵᠦ ᠬᠣᠢᠲᠤ ᠰᠤᠮᠤᠨ ᠳᠡᠭᠡᠷᠡ ᠪᠠᠢᠭᠠ ᠴᠡᠷᠢᠭ ᠲᠦ᠍ ᠥᠭ᠂ ᠠᠪᠠᠴᠢᠵᠤ ᠥᠭᠭᠦᠭᠡ ᠦᠭᠡᠢ ᠪᠠᠢᠪᠠᠯ ᠤᠤ? ᠴᠢᠮᠠᠶ᠋ᠢ ᠣᠭᠣᠲᠣᠨᠠ ᠶ᠋ᠢᠨ ᠨᠦᠬᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠴᠤ᠌ ᠣᠯᠤᠨᠠ ᠭᠡᠵᠦ ᠮᠡᠳᠡᠭᠡᠷᠡᠢ ᠭᠡᠳ ᠳᠤᠯᠮᠠ ᠰᠢᠭᠤᠳ ᠠᠷᠭᠠᠮᠵᠢᠶᠠᠲᠠᠢ ᠪᠠᠢᠭᠰᠠᠨ ᠮᠣᠷᠢ ᠪᠠᠨ ᠠᠪᠴᠤ ᠤᠨᠤᠭᠠᠳ ᠶᠠᠪᠤᠯᠠ᠃
ᠬᠡᠰᠡᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠭᠤᠵᠤ ᠮᠣᠷᠢᠨ ᠤ᠋ ᠪᠠᠨ ᠬᠦᠵᠦᠭᠦᠨ ᠡᠴᠡ ᠲᠡᠪᠡᠷᠢᠨ ᠡᠬᠡᠷ ᠲᠡᠳᠡᠨ ᠮᠡᠭᠰᠢᠨ ᠤᠬᠢᠯᠠᠪᠠ᠃
ᠲᠡᠭᠦᠰᠬᠡᠯ
ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠭᠤᠴᠢᠨ ᠬᠣᠶᠠᠷ ᠣᠨ ᠤ᠋ ᠨᠠᠮᠤᠷ᠂ ᠠᠷᠠᠳ ᠤ᠋ᠨ ᠲᠥᠷᠥ ᠵᠠᠰᠠᠭ ᠢ᠋ ᠡᠰᠡᠷᠭᠦᠴᠡᠨ ᠪᠣᠰᠤᠭᠰᠠᠨ ᠪᠣᠰᠤᠯᠭᠠ ᠳᠠᠷᠤᠭᠳᠠᠵᠤ᠂ ᠨᠠᠮ ᠡᠴᠡ ᠰᠢᠨᠡ ᠡᠷᠭᠢᠯᠲᠡ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢ ᠶᠠᠪᠤᠭᠤᠯᠪᠠ᠃
ᠤᠯᠤᠰ ᠲᠥᠷᠥ ᠪᠡᠬᠢᠵᠢᠨ ᠲᠤᠩᠭᠠᠯᠠᠭ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠡᠩᠬᠡ ᠠᠮᠢᠳᠤᠷᠠᠯ ᠬᠦᠰᠡᠯ ᠮᠥᠷᠥᠭᠡᠳᠦᠯ᠂ ᠬᠠᠢᠷᠠ ᠳᠤᠷᠠᠯᠠᠯ ᠤᠯᠠᠮ ᠴᠤ᠌ ᠭᠤᠸᠠ ᠦᠵᠡᠰᠬᠦᠯᠡᠩᠲᠡᠢ᠂ ᠲᠠᠢᠪᠤᠩ ᠰᠠᠢᠬᠠᠨ ᠢ᠋ᠶ᠋ᠠᠷ ᠴᠡᠴᠡᠭᠯᠡᠪᠡ᠃
ᠪᠣᠰᠤᠯᠭᠠ ᠳᠠᠷᠤᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠡᠷᠳᠡᠨᠢ ᠶ᠋ᠢ ᠬᠣᠲᠠ ᠳ᠋ᠤ᠌ ᠠᠵᠢᠯ ᠬᠢᠯᠭᠡᠬᠦ ᠪᠡᠷ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠ ᠳᠠᠭᠤᠳᠠᠵᠠᠢ᠃ ᠬᠠᠷᠢᠨ ᠪᠠᠲᠤ ᠠᠷᠤ ᠬᠠᠩᠭᠠᠢ ᠠᠢᠮᠠᠭ ᠤ᠋ᠨ ᠲᠥᠪ ᠦ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠢ᠋ᠶ᠋ᠠᠷ ᠲᠣᠮᠢᠯᠠᠭᠳᠠᠪᠠ᠃
ᠲᠩᠷᠢ ᠥᠴᠦᠬᠡᠨ ᠴᠦ᠍ ᠡᠭᠦᠯᠡ ᠦᠭᠡᠢ᠂ ᠨᠡᠯᠦᠭᠡᠷ ᠰᠠᠢᠬᠠᠨ ᠡᠳᠦᠷ ᠪᠤᠯᠠᠭᠠᠨ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠳᠠᠭ ᠤᠴᠠᠷᠠᠯᠳᠤ ᠮᠤᠨᠤᠰᠤᠨ ᠳᠡᠭᠡᠷᠡ ᠬᠣᠶᠠᠷ ᠬᠡᠦᠬᠡᠳ ᠨᠢᠭᠡ ᠡᠷᠡ ᠬᠥᠮᠦᠨ ᠭᠤᠷᠪᠠᠨ ᠡᠮᠡᠭᠲᠡᠢ ᠨᠡᠢᠲᠡ ᠵᠢᠷᠭᠤᠭᠠᠨ ᠬᠥᠮᠦᠨ ᠣᠴᠢᠪᠠ᠃ ᠡᠨᠡ ᠬᠥᠮᠦᠰ ᠢ᠋ ᠤᠩᠰᠢᠭᠴᠢ ᠲᠠ ᠲᠠᠨᠢᠨᠠ᠃ ᠡᠨᠡ ᠪᠣᠯ ᠪᠠᠲᠤ᠂ ᠰᠣᠯᠣᠩᠭᠠ᠂ ᠳᠤᠯᠮᠠ᠂ ᠰᠦᠷᠦᠩ ᠨᠠᠷ ᠪᠠᠢᠭᠰᠠᠨ ᠠᠭᠠᠳ ᠲᠡᠳᠡᠨ ᠦ᠌ ᠬᠠᠮᠲᠤ ᠲᠡᠮᠦᠷ ᠬᠣᠩᠭᠣᠷ ᠨᠠᠷ ᠤ᠋ᠨ ᠬᠣᠶᠠᠷ ᠬᠦᠦ ᠪᠠᠢᠪᠠ᠃ ᠰᠣᠯᠣᠩᠭᠠ ᠳᠣᠯᠣᠭᠠᠨ ᠰᠠᠷᠠ ᠪᠣᠯᠤᠭᠰᠠᠨ ᠬᠡᠦᠬᠡᠳ ᠭᠡᠳᠡᠰᠦᠨ ᠳ᠋ᠡᠭᠡᠨ ᠲᠡᠭᠡᠭᠡᠵᠡᠢ᠃ ᠬᠣᠩᠭᠣᠷ ᠤ᠋ᠨ ᠮᠤᠨᠤᠰᠤᠨ ᠤ᠋ ᠮᠥᠴᠢᠷ ᠦ᠋ᠳ ᠠᠷᠪᠢᠨ ᠤᠷᠭᠤᠭᠰᠠᠨ ᠮᠣᠢᠯ ᠢ᠋ᠶ᠋ᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠳᠣᠭᠣᠭᠰᠢ ᠭᠤᠯᠵᠢᠢᠵᠠᠢ᠃ ᠲᠦᠷᠦᠭᠦᠯᠡᠵᠦ ᠣᠴᠢᠭᠰᠠᠨ ᠪᠠᠲᠤ ᠲᠡᠷᠡ ᠮᠣᠳᠣᠨ ᠡᠴᠡ ᠨᠢᠭᠡ ᠮᠣᠢᠯ ᠴᠢᠮᠬᠢᠵᠦ ᠠᠪᠬᠤ ᠳ᠋ᠤ᠌ ᠪᠢᠴᠠᠷᠠᠵᠤ ᠨᠥᠵᠢᠷᠡᠭᠰᠡᠨ ᠴᠢᠰᠤ ᠰᠢᠭ᠋ ᠬᠦᠷᠡᠩ ᠬᠠᠷᠠ ᠱᠦᠭᠦᠰᠦ ᠬᠤᠷᠤᠭᠤ ᠶ᠋ᠢ ᠨᠢ ᠳᠠᠭᠠᠵᠤ ᠤᠷᠤᠰᠤᠨ ᠢᠷᠡᠯᠡ᠃ ᠠᠮᠠᠨ ᠳ᠋ᠠᠭᠠᠨ ᠬᠢᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠪᠠ᠃ ᠬᠣᠩᠭᠣᠷ ᠤ᠋ᠨ ᠬᠦᠦ ᠭᠦᠶᠦᠵᠦ ᠢᠷᠡᠭᠡᠳ 《ᠪᠠᠲᠤ ᠠᠬᠠ ᠠ᠋ ᠨᠠᠳᠠ ᠳ᠋ᠤ᠌ ᠮᠣᠢᠯ ᠠᠪᠴᠤ ᠥᠭᠭᠦᠭᠡᠷᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠤᠭᠠᠳᠤᠢ ᠪᠠᠢᠨᠠ᠂ ᠳᠡᠭᠦᠦ ᠮᠢᠨᠢ᠃ ᠡᠨᠡ ᠮᠣᠳᠣ ᠶ᠋ᠢ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠠᠷᠠᠢ᠃ ᠡᠨᠡ ᠪᠣᠯ ᠦᠯᠡᠮᠵᠢ ᠰᠠᠢᠬᠠᠨ ᠰᠡᠳᠬᠢᠯ ᠲᠡᠢ ᠲᠥᠭᠡᠷᠢᠵᠦ ᠪᠤᠳᠤᠯᠢᠭᠰᠠᠨ ᠬᠥᠮᠦᠨ ᠦ᠌ ᠮᠣᠳᠣ ᠶᠤᠮ ᠰᠢᠦ ᠭᠡᠳ ᠪᠠᠲᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠤᠩᠭᠠᠯᠠᠭ ᠪᠦᠯᠢᠶᠡᠨ ᠨᠢᠯᠪᠤᠰᠤ ᠲᠤᠨᠤᠷᠠᠪᠠ᠃
ᠲᠡᠭᠦᠰᠪᠡ
1967 ᠣᠨ ᠤ᠋ 4 ᠳ᠋ᠦ᠍ᠭᠡᠷ ᠰᠠᠷᠠ ᠶ᠋ᠢᠨ 6