ᠲᠤᠩᠭᠠᠯᠠᠭ ᠲᠠᠮᠢᠷ4-14-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1399《ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠬᠤ ᠬᠤᠪᠢ ᠵᠣᠬᠢᠶᠠᠯ ᠦᠭᠡᠢ ᠨᠢᠭᠦᠯᠲᠡᠨ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠳᠥᠷᠪᠡ
ᠡᠪᠦᠯ ᠥᠩᠭᠡᠷᠡᠵᠦ ᠬᠠᠪᠤᠷ ᠪᠣᠯᠪᠠ᠃ ᠭᠡᠲᠡᠯᠡ ᠨᠢᠭᠡ ᠡᠳᠦᠷ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠳᠥᠷᠪᠡᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠯᠡ᠃ ᠴᠥᠮ ᠬᠠᠨ ᠥᠨᠳᠥᠷ ᠰᠤᠮᠤ ᠶ᠋ᠢᠨ ᠲᠠᠨᠢᠬᠤ ᠬᠥᠮᠦᠰ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠮᠢᠨᠢ᠃ ᠴᠠᠭ ᠵᠢᠪᠡᠭᠦᠨ ᠪᠣᠯᠵᠤ ᠪᠠᠢᠨᠠ᠃ ᠵᠠᠭᠤ ᠢᠯᠡᠭᠦᠦ ᠪᠤᠲᠠ ᠲᠠᠢ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠭᠠᠵᠠᠷ ᠤ᠋ᠨ ᠨᠦᠬᠡᠨ ᠳ᠋ᠦ᠍ ᠬᠣᠷᠢᠭᠠᠳ ᠵᠣᠪᠠᠭᠠᠵᠤ ᠵᠣᠪᠠᠭᠠᠵᠤ ᠫᠤᠤᠳᠠᠬᠤ ᠭᠡᠨᠡ᠃ ᠵᠠᠷᠢᠮ ᠭᠠᠵᠠᠷ ᠪᠡᠷᠢᠯᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠨᠢ ᠲᠡᠮᠡᠴᠡᠯ ᠴᠦ᠍ ᠭᠠᠷᠴᠤ ᠪᠠᠢᠨᠠ᠃ ᠷᠠᠰᠢᠶᠠᠨᠲᠤ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠸᠴᠢᠷᠪᠠᠲᠤ ᠶ᠋ᠢᠨ ᠶᠠᠮᠤᠨ ᠪᠠᠢᠭᠤᠯᠤᠭᠳᠠᠭᠠᠳ ᠬᠠᠮᠲᠤᠷᠠᠯ ᠤ᠋ᠨ ᠡᠰᠡᠷᠭᠦ ᠪᠠᠢᠯᠳᠤᠬᠤ ᠪᠠᠷ ᠴᠡᠷᠢᠭ ᠡᠷᠡ ᠴᠤᠭᠯᠠᠭᠤᠯᠵᠤ ᠪᠠᠢᠭᠠ ᠭᠡᠨᠡ᠃ ᠲᠡᠭᠦᠨ ᠦ᠌ ᠨᠢᠭᠡ ᠤᠳᠤᠷᠢᠳᠤᠭᠴᠢ ᠨᠢ ᠵᠠᠮᠪᠠᠯ ᠭᠡᠳᠡᠭ ᠠᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠠᠢᠭᠰᠠᠨ ᠬᠥᠮᠦᠨ ᠪᠣᠯᠵᠠᠢ᠃ ᠪᠢᠳᠡ ᠪᠠᠷᠢᠭᠳᠠᠵᠤ ᠮᠠᠭᠤ ᠪᠠᠨ ᠦᠵᠡᠬᠦ ᠶ᠋ᠢᠨ ᠡᠮᠦᠨᠡ ᠤᠷᠠᠯᠴᠠᠶᠠ ᠭᠡᠵᠦ ᠰᠢᠢᠳᠦᠭᠡᠳ ᠸᠴᠢᠷᠪᠠᠲᠤ ᠶ᠋ᠢᠨ ᠶᠠᠮᠤᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠨᠠ᠃ ᠴᠢ ᠴᠦ᠍ ᠠᠮᠢᠳᠤ ᠳᠡᠭᠡᠷᠡ ᠪᠡᠨ ᠶᠠᠪᠤᠪᠠᠯ ᠳᠡᠭᠡᠷᠡ ᠭᠡᠵᠦ ᠨᠢᠭᠡ ᠨᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠯᠠ ᠦᠵᠡᠭᠡ ᠦᠭᠡᠢ ᠬᠣᠷᠮᠣᠢ ᠰᠢᠭᠤᠵᠤ᠂ ᠤᠰᠤ ᠦᠵᠡᠭᠡ ᠦᠭᠡᠢ ᠭᠤᠲᠤᠯ ᠲᠠᠢᠯᠬᠤ ᠭᠡᠭᠴᠢ ᠪᠡᠷ ᠤᠴᠢᠷ ᠢ᠋ ᠨᠢ ᠮᠡᠳᠡᠭᠡ ᠦᠭᠡᠢ ᠪᠠᠢᠵᠤ ᠶᠠᠭᠤ ᠭᠡᠵᠦ ᠣᠴᠢᠬᠤ ᠶᠤᠮ ᠪᠢᠯᠡ ᠭᠡᠵᠦ ᠲᠡᠮᠦᠷ ᠪᠣᠳᠣᠯᠬᠢᠯᠠᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠴᠢᠷ ᠢ᠋ ᠨᠢ ᠣᠯᠬᠤ ᠭᠡᠭᠰᠡᠭᠡᠷ ᠪᠠᠢᠲᠠᠯᠠ ᠨᠢᠭᠡ ᠰᠥᠨᠢ ᠯᠡ ᠪᠠᠷᠢᠭᠳᠠᠨᠠ᠃ ᠶᠠᠪᠤᠵᠤ ᠦᠵᠡᠶᠡ᠃ ᠲᠡᠮᠦᠷ ᠮᠢᠨᠢ᠃
ᠢᠩᠭᠢᠵᠦ ᠪᠠᠬᠠᠨ ᠶᠠᠷᠢᠯᠴᠠᠭᠰᠠᠭᠠᠷ ᠲᠡᠮᠦᠷ ᠶᠠᠪᠤᠬᠤ ᠪᠣᠯᠵᠤ ᠰᠢᠯᠢᠳᠡᠭ ᠮᠣᠷᠢ ᠪᠠᠨ ᠪᠠᠷᠢᠵᠤ ᠢᠷᠡᠯᠡ᠃
ᠡᠨᠡ ᠬᠠᠮᠲᠤᠷᠠᠯ ᠪᠠᠢᠭᠤᠯᠬᠤ ᠪᠤᠷᠤᠭᠤ ᠨᠢ ᠪᠤᠷᠤᠭᠤ ᠪᠣᠯᠤᠭᠰᠠᠨ ᠭᠡᠳᠡᠭ ᠨᠢ ᠲᠡᠮᠦᠷ ᠲᠦ᠍ ᠲᠣᠳᠣᠷᠬᠠᠢ ᠪᠠᠢᠯᠠ᠃ ᠡᠭᠦᠨ ᠢ᠋ ᠤᠰᠠᠳᠬᠠᠬᠤ ᠦᠭᠡᠢ ᠪᠡᠷ ᠡᠨᠡ ᠤᠯᠤᠰ ᠣᠯᠠᠨ ᠬᠥᠭᠵᠢᠵᠦ ᠴᠢᠳᠠᠬᠤ ᠦᠭᠡᠢ᠃ ᠮᠠᠯ ᠬᠥᠷᠥᠩᠭᠡ ᠴᠦ᠍ ᠰᠦᠢᠳᠬᠦ ᠪᠣᠯᠵᠤ ᠪᠠᠢᠨᠠ᠃ ᠡᠨᠡ ᠤᠴᠢᠷ ᠡᠴᠡ ᠲᠡᠨᠳᠡ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠦᠵᠡᠶᠡ ᠭᠡᠵᠦ ᠲᠡᠮᠦᠷ ᠪᠣᠳᠣᠭᠰᠠᠨ ᠡᠴᠡ ᠶᠠᠪᠤᠬᠤ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠬᠡᠨᠡᠷ ᠮᠢᠨᠢ᠃ ᠪᠢ ᠣᠴᠢᠵᠤ ᠦᠵᠡᠭᠡᠳ ᠢᠷᠡᠶᠡ ᠭᠡᠵᠦ ᠲᠡᠮᠦᠷ ᠢ᠋ ᠮᠣᠷᠳᠠᠬᠤ ᠳ᠋ᠤ᠌ ᠳᠤᠯᠮᠠ 《ᠡᠪᠦᠭᠡᠨ ᠮᠢᠨᠢ ᠬᠢᠨᠠᠮᠵᠢᠲᠠᠢ ᠶᠠᠪᠤᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠡᠳ ᠬᠣᠢᠨᠠ ᠡᠴᠡ ᠨᠢ ᠲᠠᠬᠢᠯ ᠡᠷᠭᠦᠵᠡᠢ᠃
ᠭᠤᠷᠪᠠᠨ ᠡᠳᠦᠷ ᠶᠠᠪᠤᠭᠠᠳ ᠳᠥᠷᠪᠡᠳᠡᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠥᠷᠯᠥᠭᠡ ᠷᠠᠰᠢᠶᠠᠨᠲᠤ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠣᠴᠢᠪᠠ᠃ ᠣᠯᠳᠠᠭᠰᠠᠨ ᠶᠠᠭᠤᠮᠠ ᠪᠠᠷ ᠢ᠋ᠶ᠋ᠠᠨ ᠵᠡᠪᠰᠡᠭᠯᠡᠭᠰᠡᠨ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠪᠤᠵᠢᠭᠢᠨᠠᠨ ᠰᠦᠯᠵᠢᠯᠳᠦᠵᠦ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠬᠠᠩᠭᠢᠨᠠᠵᠤ ᠶᠡᠬᠡ ᠯᠡ ᠬᠥᠯ ᠦᠢᠮᠡᠭᠡᠨ ᠲᠡᠢ ᠠᠵᠢ᠃ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠬᠦᠵᠦᠭᠦᠨ ᠡᠴᠡ ᠡᠯᠳᠡᠪ ᠥᠩᠭᠡ ᠶ᠋ᠢᠨ ᠵᠠᠩᠭᠢᠶᠠ ᠬᠠᠳᠠᠭ ᠵᠡᠭᠦᠭᠰᠡᠨ ᠬᠠᠷᠠᠭᠳᠠᠨᠠ᠃
ᠲᠡᠮᠦᠷ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠨ ᠶᠠᠪᠤᠯᠠ᠃ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠᠨ ᠤ᠋ ᠶᠡᠬᠡᠩᠬᠢ ᠨᠢ ᠬᠠᠮᠲᠤᠷᠠᠯ ᠢ᠋ ᠤᠰᠠᠳᠬᠠᠬᠤ ᠤᠯᠠᠭᠠᠨ ᠮᠤᠬᠤᠷ ᠲᠣᠯᠣᠭᠠᠢᠲᠠᠨ ᠬᠠᠯᠢᠮᠠᠭ ᠦᠰᠦᠳᠡᠨ ᠢ᠋ ᠳᠠᠷᠤᠬᠤ ᠲᠤᠬᠠᠢ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠨᠡ ᠢᠷᠡᠭᠰᠡᠨ ᠤᠯᠤᠰ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠴᠤᠭᠯᠠᠭᠠᠷᠠᠢ᠃ ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠲᠠᠩᠭᠠᠷᠢᠭ ᠡᠷᠭᠦᠨᠡ ᠭᠡᠵᠦ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠥᠨᠳᠥᠷ ᠳᠠᠭᠤ ᠪᠠᠷ ᠵᠠᠷᠯᠠᠵᠤ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠮᠦᠷ ᠬᠠᠮᠲᠤ ᠢᠷᠡᠭᠴᠢᠳ ᠦ᠋ᠨ ᠬᠠᠮᠲᠤ ᠣᠴᠢᠪᠠ᠃
ᠣᠴᠢᠭᠰᠠᠨ ᠬᠥᠮᠦᠰ ᠢ᠋ ᠮᠣᠷᠢᠳ ᠡᠴᠡ ᠪᠠᠭᠤᠯᠭᠠᠨ ᠭᠠᠵᠠᠷ ᠰᠠᠭᠤᠯᠭᠠᠪᠠ᠃ ᠲᠡᠮᠦᠷ ᠤᠷᠲᠤ ᠡᠩᠨᠡᠭᠡᠨ ᠳ᠋ᠦ᠍ ᠲᠠᠪᠠᠲᠠᠢ ᠭᠡᠭᠴᠢ ᠨᠢ ᠵᠠᠪᠢᠯᠠᠨ ᠰᠠᠭᠤᠪᠠ᠃ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠡᠭᠦᠳᠡ ᠠᠯᠭᠤᠷ ᠨᠡᠭᠡᠭᠡᠭᠳᠡᠵᠦ ᠪᠠᠷᠰ ᠤ᠋ᠨ ᠰᠡᠭᠦᠯ ᠪᠠᠷᠢᠭᠰᠠᠨ ᠬᠡᠳᠦᠨ ᠯᠠᠮᠠ ᠭᠠᠷᠴᠤ ᠢᠷᠡᠭᠡᠳ ᠬᠣᠶᠠᠷ ᠲᠠᠯᠠ ᠪᠠᠷ ᠵᠡᠷᠭᠡᠯᠡᠨ ᠵᠣᠭᠰᠣᠪᠠ᠃
ᠭᠢᠶᠠᠵᠠᠳᠠᠢ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠴᠦ ᠬᠠᠳᠠᠭ ᠶᠡᠨᠳᠡᠷ ᠪᠣᠯᠤᠭᠰᠠᠨ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠵᠡᠭᠦᠭᠰᠡᠨ ᠯᠠᠮᠠ ᠭᠠᠷᠴᠤ ᠢᠷᠡᠯᠡ᠃ ᠬᠠᠷᠠᠪᠠᠯ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠬᠠᠯᠢᠮᠠᠭ ᠦᠰᠦᠲᠡᠢ ᠬᠠᠷᠠ ᠬᠥᠮᠦᠨ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠬᠠᠮᠲᠤᠷᠠᠯ ᠤ᠋ᠨ ᠢᠳᠡᠪᠬᠢᠲᠡᠨ ᠭᠡᠰᠢᠭᠦᠨ ᠪᠠᠢᠭᠰᠠᠨ ᠴᠡᠮᠪᠡ ᠠᠵᠢ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠨᠣᠭᠣᠭᠠᠨ ᠪᠦᠰᠡ ᠪᠦᠰᠡᠯᠡᠭᠡᠳ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠰᠸᠯᠠᠢ᠌ᠳᠠᠢ ᠫᠤᠤ᠂ ᠵᠡᠭᠦᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠬᠠᠳᠠᠭ ᠶᠡᠨᠳᠡᠷ ᠪᠣᠯᠤᠭᠰᠠᠨ ᠤᠷᠲᠤ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠲᠦᠭᠵᠢᠯ ᠭᠠᠷᠴᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠭᠡᠵᠦ ᠪᠠᠢᠭᠠ ᠣᠯᠠᠨ ᠱᠠᠪᠢ ᠨᠠᠷ ᠠ᠋! ᠡᠨᠡ ᠪᠣᠯ ᠬᠠᠯᠬᠠ ᠶ᠋ᠢᠨ ᠬᠠᠶᠠᠭᠠ ᠪᠤᠶᠠᠨ ᠢ᠋ᠶ᠋ᠠᠷ ᠲᠣᠳᠣᠷᠠᠨ ᠭᠠᠷᠤᠭᠰᠠᠨ ᠴᠡᠮᠪᠡ ᠭᠡᠭᠴᠢ ᠬᠤᠪᠢᠯᠭᠠᠨ ᠪᠢᠯᠡ᠃ ᠲᠠ ᠪᠦᠬᠦᠨ ᠴᠥᠮ ᠱᠠᠪᠢ ᠣᠷᠣᠵᠤ᠂ ᠲᠠᠷᠨᠢᠳᠠᠭᠰᠠᠨ ᠵᠠᠩᠭᠢᠶᠠ ᠶ᠋ᠢ ᠨᠢ ᠬᠦᠵᠦᠭᠦᠨ ᠳ᠋ᠡᠭᠡᠨ ᠵᠡᠭᠦᠪᠡᠯ ᠤᠯᠠᠭᠠᠨ ᠤ᠋ ᠰᠤᠮᠤᠨ ᠳ᠋ᠤ᠌ ᠣᠭᠲᠣ ᠳᠠᠭᠠᠭᠠᠭᠳᠠᠬᠤ ᠦᠭᠡᠢ ᠭᠡᠵᠦ ᠨᠢᠭᠡ ᠯᠠᠮᠠ ᠬᠡᠯᠡᠭᠡᠳ ᠵᠠᠮᠪᠠᠯ ᠤᠷᠤᠭᠤ ᠡᠷᠭᠢᠵᠦ ᠡᠨᠡ ᠪᠣᠯ ᠤᠯᠠᠭᠠᠨᠲᠠᠨ ᠢ᠋ ᠳᠠᠷᠤᠬᠤ ᠠᠷᠢᠭᠤᠨ ᠲᠡᠢᠨ ᠢ᠋ ᠤᠳᠤᠷᠢᠳᠬᠤ ᠪᠠᠷ ᠵᠠᠶᠠᠭᠠᠭᠳᠠᠨ ᠲᠣᠳᠣᠷᠠᠭᠰᠠᠨ ᠶᠡᠬᠡ ᠵᠠᠩᠵᠤᠨ ᠲᠥᠷᠥ ᠶ᠋ᠢᠨ ᠪᠠᠭᠠᠨᠠ ᠵᠠᠮᠪᠠᠯ᠃ ᠤᠯᠠᠭᠠᠨ ᠢ᠋ ᠳᠠᠷᠤᠬᠤ ᠲᠡᠢᠨ ᠢ᠋ ᠳᠠᠭᠤᠰᠬᠠᠵᠤ᠂ ᠲᠥᠷᠥ ᠲᠦᠪᠰᠢᠨ ᠪᠣᠯᠲᠠᠯᠠ ᠦᠬᠦᠰᠢ ᠦᠭᠡᠢ ᠮᠥᠩᠬᠡ ᠶ᠋ᠢᠨ ᠬᠤᠲᠤᠭ ᠣᠯᠤᠭᠰᠠᠨ ᠬᠥᠮᠦᠨ ᠭᠡᠳ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ᠂ ᠲᠦᠭᠵᠢᠯ ᠢ᠋ ᠵᠢᠭᠠᠨ ᠡᠨᠡ ᠪᠣᠯ ᠰᠢᠷᠠ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠶ᠋ᠢ ᠨᠡᠭᠡᠭᠡᠭᠴᠢ᠂ ᠪᠠᠷᠰ ᠤ᠋ᠨ ᠬᠦᠴᠦᠲᠦ ᠶᠠᠮᠠᠷ ᠴᠤ᠌ ᠰᠤᠮᠤᠨ ᠳ᠋ᠤ᠌ ᠦᠯᠦ ᠠᠪᠲᠠᠭᠳᠠᠭᠴᠢ ᠬᠤᠪᠢᠯᠭᠠᠨ ᠵᠠᠩᠵᠤᠨ ᠲᠦᠭᠵᠢᠯ ᠭᠡᠯᠡ᠃
ᠲᠡᠮᠦᠷ ᠲᠣᠭᠣᠮᠵᠢᠷ ᠦᠭᠡᠢ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠪᠣᠰᠴᠤ ᠰᠢᠭᠤᠳ ᠶᠠᠪᠤᠭᠰᠠᠭᠠᠷ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠳᠣᠪᠵᠢᠶᠠᠨ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠬᠡᠨ ᠢᠷᠡᠵᠦ ᠪᠠᠢᠭᠠ ᠶ᠋ᠢ ᠲᠠᠨᠢᠭᠰᠠᠨ ᠲᠦᠭᠵᠢᠯ ᠣᠮ ᠬᠣᠮ ᠦᠭᠡᠢ ᠳᠤᠭᠠᠩ ᠤᠷᠤᠭᠤ ᠵᠢᠭᠤᠲᠠᠨ ᠣᠷᠣᠯᠠ᠃
ᠲᠡᠮᠦᠷ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠢ᠋ ᠲᠠᠢᠪᠤᠩ ᠢ᠋ᠶ᠋ᠠᠷ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠵᠠᠯᠢᠲᠠᠢ ᠡᠲᠡᠭᠡᠳ ᠦ᠋ᠳ ᠲᠠ ᠨᠠᠷ ᠢ᠋ ᠮᠡᠬᠡᠯᠡᠵᠦ ᠪᠠᠢᠨᠠ᠃ ᠡᠳᠡ ᠨᠠᠷ ᠥᠭᠡᠳᠡ ᠲᠡᠢ ᠶᠠᠭᠤᠮᠠ ᠬᠢᠬᠦ ᠦᠭᠡᠢ᠃ ᠰᠠᠶᠢ ᠶ᠋ᠢᠨ ᠳᠤᠭᠠᠩ ᠤᠷᠤᠭᠤ ᠵᠢᠭᠤᠲᠠᠨ ᠣᠷᠣᠳᠠᠭ ᠲᠦᠭᠵᠢᠯ ᠢ᠋ ᠬᠤᠪᠢᠯᠭᠠᠨ ᠵᠠᠩᠵᠤᠨ ᠭᠡᠵᠦ ᠪᠠᠢᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠬᠡᠳᠦᠨ ᠮᠣᠷᠢᠨ ᠤ᠋ ᠲᠥᠯᠥᠭᠡ᠂ ᠬᠠᠮᠲᠤ ᠶᠠᠪᠤᠭᠰᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠬᠢᠲᠤᠭᠠᠯᠠᠵᠤ ᠪᠠᠢᠭᠰᠠᠨ ᠬᠤᠯᠠᠭᠠᠢᠴᠢ ᠰᠢᠦ ᠳᠡ᠃ ᠴᠡᠮᠪᠡ ᠴᠢᠨᠢ ᠰᠠᠶᠢᠬᠠᠨ ᠬᠠᠮᠲᠤᠷᠠᠯ ᠤ᠋ᠨ ᠢᠳᠡᠪᠬᠢᠲᠡᠨ ᠭᠡᠳ ᠬᠠᠮᠲᠤᠷᠠᠯ ᠤ᠋ᠨ ᠪᠤᠬᠠ ᠶ᠋ᠢ ᠮᠥᠷᠭᠥᠭᠰᠡᠨ ᠡᠰᠡᠷᠭᠦᠦ ᠪᠤᠬᠠ ᠭᠡᠵᠦ ᠮᠢᠨᠦ ᠪᠤᠬᠠ ᠶ᠋ᠢ ᠫᠤᠤᠳᠠᠵᠤ ᠠᠯᠠᠵᠤ ᠪᠠᠢᠭᠰᠠᠨ ᠪᠢᠰᠢ ᠪᠢᠯᠡ ᠤᠤ? ᠥᠨᠥᠳᠥᠷ ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠤᠪᠢᠯᠭᠠᠨ ᠡᠷᠭᠦᠮᠵᠢᠯᠡᠨ ᠣᠯᠠᠨ ᠢ᠋ ᠮᠡᠬᠡᠯᠡᠵᠦ ᠪᠠᠢᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠱᠠᠪᠢ ᠨᠠᠷ ᠠ᠋᠃ ᠡᠨᠡ ᠪᠣᠯ ᠤᠯᠠᠭᠠᠨ ᠤ᠋ ᠨᠣᠬᠠᠢ ᠪᠠᠢᠨᠠ᠃ ᠡᠭᠦᠨ ᠦ᠌ ᠦᠭᠡ ᠶ᠋ᠢ ᠪᠢᠲᠡᠭᠡᠢ ᠰᠣᠨᠣᠰ ᠭᠡᠵᠦ ᠴᠡᠮᠪᠡ ᠬᠣᠭᠣᠯᠠᠢ ᠪᠠᠨ ᠴᠢᠭᠢᠷᠠᠭᠤᠯᠤᠨ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠲᠤ ᠦᠨᠡᠨ ᠦᠭᠡ ᠠᠶᠠ ᠦᠭᠡᠢ ᠪᠠᠢᠨᠠ ᠤᠤ? ᠲᠡᠢᠮᠦ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠠ ᠨᠠᠷ ᠪᠣᠯ ᠬᠤᠳᠠᠯᠴᠢ ᠯᠤᠢᠪᠠᠷᠴᠢᠨ ᠨᠤᠭᠤᠳ᠃ ᠣᠯᠠᠨ ᠲᠦᠮᠡᠨ ᠮᠢᠨᠢ ᠡᠳᠡ ᠵᠠᠰᠠᠭ ᠲᠥᠷᠥ ᠲᠡᠢ ᠴᠢᠨᠢ ᠳᠡᠮᠡᠴᠡᠯᠳᠦᠭᠦᠯᠤᠨ ᠠᠮᠢ ᠶ᠋ᠢ ᠴᠢᠨᠢ ᠰᠦᠢᠳᠬᠡᠬᠦ ᠭᠡᠵᠦ ᠪᠠᠢᠨᠠ᠃ ᠠᠯᠢ ᠪᠣᠢ ᠴᠢ ᠲᠡᠢᠮᠦ ᠰᠦᠷᠡᠬᠡᠢ ᠬᠤᠪᠢᠯᠭᠠᠨ ᠶᠤᠮ ᠪᠣᠯ ᠵᠡᠭᠦᠵᠦ ᠪᠠᠢᠭᠠ ᠫᠤᠤ ᠪᠠᠨ ᠨᠠᠳᠠ ᠳ᠋ᠤ᠌ ᠠᠯᠢ᠃ ᠪᠢ ᠫᠤᠤᠳᠠᠶᠠ᠃ ᠲᠡᠭᠡᠭᠡᠳ ᠴᠢ ᠦᠬᠦᠬᠦ ᠦᠭᠡᠢ ᠶᠤᠮ ᠪᠣᠯ ᠪᠢᠳᠡ ᠦᠨᠡᠮᠰᠢᠶᠡ᠃ ᠴᠢᠨᠦ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠳᠠᠭᠠᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠲᠦᠮᠡᠨ ᠱᠠᠪᠢ ᠨᠠᠷ ᠠ᠋᠃ ᠡᠭᠦᠨ ᠢ᠋ ᠪᠡᠷᠢ ᠭᠡᠵᠦ ᠴᠡᠮᠪᠡ ᠳᠡᠷᠭᠡᠳᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠬᠡᠳᠦᠨ ᠯᠠᠮᠠ ᠨᠠᠷ ᠲᠤ᠌ ᠳᠣᠬᠢᠶᠠ ᠥᠭᠪᠡ᠃ ᠲᠠᠪᠤ ᠵᠢᠷᠭᠤᠭᠠᠨ ᠯᠠᠮᠠ ᠲᠡᠮᠦᠷ ᠤᠷᠤᠭᠤ ᠳᠠᠭᠠᠷᠢᠨ ᠢᠷᠡᠬᠦ ᠳ᠋ᠦ᠍ ᠵᠠᠷᠢᠮ ᠢ᠋ ᠨᠢ ᠢᠰᠬᠦᠯᠦᠨ ᠵᠠᠷᠢᠮ ᠢ᠋ ᠴᠣᠬᠢᠵᠤ ᠤᠨᠠᠭᠠᠪᠠ᠃ ᠭᠡᠲᠡᠯᠡ ᠠᠷᠤ ᠡᠴᠡ ᠨᠢ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠮᠥᠷᠥ ᠤᠷᠤᠭᠤ ᠨᠢ ᠬᠦᠴᠦᠲᠡᠢ ᠴᠣᠬᠢᠪᠠ᠃ ᠡᠷᠭᠢᠵᠦ ᠬᠠᠷᠠᠪᠠᠯ ᠵᠠᠮᠪᠠᠯ ᠲᠣᠮᠣ ᠮᠤᠨᠠ ᠭᠠᠵᠠᠷ ᠰᠢᠳᠡᠭᠡᠳ ᠵᠢᠭᠤᠲᠠᠪᠠ᠃ ᠬᠥᠮᠦᠰ ᠲᠡᠢ ᠵᠣᠳᠣᠯᠳᠤᠵᠤ ᠪᠠᠢᠭᠠ ᠶ᠋ᠢ ᠨᠢ ᠳᠠᠯᠢᠮᠳᠠᠭᠤᠯᠤᠨ ᠲᠣᠮᠣ ᠮᠤᠨᠠ ᠪᠠᠷ ᠲᠡᠮᠦᠷ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠬᠠᠭᠠ ᠴᠣᠬᠢᠶᠠ ᠭᠡᠰᠡᠨ ᠨᠢ ᠠᠯᠳᠠᠵᠤ ᠮᠥᠷᠦᠨ ᠳᠡᠭᠡᠷᠡ ᠨᠢ ᠪᠠᠭᠤᠵᠠᠢ᠃
ᠲᠡᠮᠦᠷ ᠤᠬᠤᠰᠬᠢᠨ ᠵᠠᠮᠪᠠᠯ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠵᠦ 《ᠴᠢ ᠦᠬᠦᠳᠡᠭ ᠦᠭᠡᠢ ᠮᠥᠩᠬᠡ ᠶ᠋ᠢᠨ ᠬᠤᠲᠤᠭ ᠣᠯᠤᠭᠰᠠᠨ ᠬᠥᠮᠦᠨ ᠪᠢᠯᠡ ᠤᠤ? ᠴᠢᠮᠠᠶ᠋ᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠬᠥᠮᠦᠨ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢ ᠢᠩᠭᠢᠵᠦ ᠶᠠᠪᠤᠭᠠ ᠭᠡᠨᠡ》 ᠭᠡᠳ ᠦᠯᠡᠮᠵᠢ ᠶᠡᠬᠡ ᠬᠦᠴᠦ ᠪᠡᠷ ᠴᠢᠯᠠᠭᠤᠨ ᠱᠠᠯᠠᠨ ᠳᠡᠭᠡᠷᠡ ᠬᠠᠶᠠᠭᠰᠠᠨ ᠳ᠋ᠤ᠌ 《ᠭᠡᠭ》 ᠭᠡᠰᠡᠨ ᠪᠢᠲᠡᠭᠦᠦ ᠳᠠᠭᠤ ᠭᠠᠷᠤᠭᠠᠳ ᠬᠠᠮᠠᠷ ᠠᠮᠠᠨ ᠡᠴᠡ ᠨᠢ ᠴᠢᠰᠤ ᠣᠷᠭᠢᠯᠤᠨ ᠭᠱᠠᠨ ᠵᠠᠭᠤᠷᠠ ᠠᠮᠢ ᠨᠢ ᠭᠠᠷᠤᠯᠠ᠃
ᠴᠡᠮᠪᠡ ᠬᠡᠴᠢᠨᠡᠨ ᠬᠠᠰᠬᠢᠷᠪᠠᠴᠤ ᠲᠡᠮᠦᠷ ᠲᠦ᠍ ᠬᠠᠯᠳᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠲᠦᠮᠡᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠡᠭᠡ᠃ ᠲᠥᠷᠥ ᠳ᠋ᠦ᠍ ᠲᠡᠷᠰᠯᠡᠭᠰᠡᠨ ᠡᠨᠡ ᠵᠠᠨᠳᠠᠯᠴᠢᠨ ᠨᠠᠷ ᠢ᠋ ᠪᠠᠷᠢᠵᠠᠭᠠ ᠁ ᠭᠡᠲᠡᠯᠡ ᠨᠢᠭᠡ ᠲᠣᠮᠣ ᠪᠡᠶᠡ ᠲᠡᠢ ᠯᠠᠮᠠ ᠦᠰᠦᠷᠦᠨ ᠢᠷᠡᠵᠦ ᠨᠣᠴᠣᠪᠠ᠃
ᠳᠤᠭᠠᠩ ᠳ᠋ᠤ᠌ ᠣᠷᠣᠭᠰᠠᠨ ᠲᠦᠭᠵᠢᠯ ᠠᠷᠠᠢ ᠴᠢᠮᠠᠶ᠋ᠢ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠨ ᠠᠪᠴᠤ ᠭᠡᠭᠡᠪᠴᠢ ᠪᠡᠷ ᠲᠡᠮᠦᠷ ᠤᠷᠤᠭᠤ ᠱᠠᠭᠠᠢᠬᠤ ᠳ᠋ᠤ᠌ ᠭᠠᠷ ᠨᠢ ᠴᠡᠴᠡᠷᠡᠵᠦ᠂ ᠵᠢᠷᠦᠬᠡ ᠨᠢ ᠴᠣᠬᠢᠯᠠᠨ ᠭᠣᠬᠠ ᠪᠠᠨ ᠳᠠᠷᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠮᠦᠷ ᠢ᠋ ᠵᠠᠯᠠᠭᠤ ᠯᠠᠮᠠ ᠲᠠᠢ ᠨᠣᠴᠣᠯᠳᠤᠵᠤ ᠪᠠᠢᠬᠤ ᠵᠠᠭᠤᠷᠠ ᠵᠢᠭᠠᠬᠠᠨ ᠰᠡᠭᠡᠭᠡ ᠣᠷᠣᠵᠤ ᠫᠤᠤᠳᠠᠪᠠᠯ ᠪᠠᠷᠢᠯᠴᠠᠭᠰᠠᠨ ᠬᠣᠶᠠᠷ ᠢ᠋ ᠳᠠᠪᠬᠤᠷ ᠢ᠋ᠶ᠋ᠠᠷ ᠣᠨᠣᠪᠠ᠃
ᠲᠦᠭᠵᠢᠯ ᠢᠩᠭᠢᠵᠦ ᠥᠪᠡᠷ ᠢ᠋ ᠪᠡᠨ ᠬᠣᠶᠠᠷ ᠤᠳᠠᠭᠠ ᠠᠯᠠᠭᠠ ᠦᠭᠡᠢ ᠥᠷᠥᠰᠢᠶᠡᠭᠰᠡᠨ ᠲᠡᠮᠦᠷ ᠦ᠋ᠨ ᠠᠴᠢ ᠶ᠋ᠢ ᠪᠠᠴᠢ ᠪᠠᠷ ᠬᠠᠷᠢᠭᠤᠯᠵᠠᠢ᠃ ᠡᠬᠢᠯᠡᠭᠡᠳ ᠣᠨᠣᠭᠳᠠᠭᠰᠠᠨ ᠵᠠᠯᠠᠭᠤ ᠯᠠᠮᠠ ᠶ᠋ᠢᠨ ᠭᠠᠷ ᠰᠤᠯᠠᠷᠠᠨ ᠲᠡᠮᠦᠷ ᠦ᠋ᠨ ᠳᠡᠭᠡᠷᠡ ᠡᠴᠡ ᠰᠠᠯᠵᠤ ᠤᠨᠠᠬᠤ ᠳ᠋ᠤ᠌ ᠲᠡᠮᠦᠷ ᠪᠣᠰᠤᠭᠠ ᠪᠠᠷ ᠢ᠋ᠶ᠋ᠠᠨ ᠦᠯᠡᠳᠡᠪᠡ᠃ ᠭᠡᠪᠡᠴᠦ ᠠᠮᠢᠰᠬᠤᠯᠯᠠᠬᠤ ᠪᠦᠷᠢ ᠳ᠋ᠦ᠍ ᠥᠷᠭᠡᠨ ᠴᠡᠭᠡᠵᠢ ᠡᠴᠡ ᠨᠢ ᠬᠥᠭᠡᠰᠦᠷᠡᠭᠰᠡᠨ ᠴᠢᠰᠤ ᠪᠤᠷᠭᠢᠯᠤᠨ ᠭᠠᠷᠴᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠡᠨᠡ ᠵᠠᠯᠢ ᠲᠠᠢ ᠳᠡᠭᠡᠷᠡᠮᠴᠢᠳ ᠢ᠋ ᠪᠠᠷᠢᠵᠤ ᠵᠠᠰᠠᠭ ᠲᠠᠭᠠᠨ ᠲᠤᠰᠢᠶᠠᠬᠤ ᠁ ᠭᠡᠲᠡᠯᠡ ᠲᠦᠭᠵᠢᠯ ᠦ᠋ᠨ ᠳᠠᠬᠢᠨ ᠫᠤᠤᠳᠠᠭᠰᠠᠨ ᠰᠤᠮᠤ ᠬᠣᠶᠠᠷ ᠳᠠᠯᠤ ᠶ᠋ᠢᠨ ᠬᠢᠨᠢ ᠬᠣᠭᠣᠷᠣᠨᠳᠣ ᠲᠤᠰᠪᠠ᠃ ᠲᠡᠮᠦᠷ ᠪᠦᠬᠦ ᠪᠡᠶᠡ ᠪᠡᠷ ᠠᠯᠭᠤᠷ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠴᠢᠷᠴᠦ ᠤᠷᠤᠭᠰᠢ ᠪᠥᠬᠥᠢᠨ ᠠᠯᠬᠤᠪᠠ᠃
ᠲᠦᠭᠵᠢᠯ ᠰᠠᠨᠳᠤᠷᠤᠨ ᠬᠡᠳᠦ ᠬᠡᠳᠦᠨ ᠫᠤᠤᠳᠠᠭᠠᠳ ᠡᠷᠭᠢᠵᠦ ᠵᠢᠭᠤᠲᠠᠪᠠ᠃ ᠲᠡᠷᠡ ᠰᠤᠮᠤ ᠨᠤᠭᠤᠳ ᠲᠡᠮᠦᠷ ᠢ᠋ ᠤᠨᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠠᠷᠤ ᠳ᠋ᠤ᠌ ᠨᠢ ᠪᠠᠢᠭᠰᠠᠨ ᠬᠥᠮᠦᠰ ᠦ᠋ᠨ ᠵᠠᠷᠢᠮ ᠢ᠋ ᠠᠯᠠᠵᠤ᠂ ᠵᠠᠷᠢᠮ ᠢ᠋ ᠰᠢᠷᠠᠭᠳᠤᠭᠤᠯᠪᠠ᠃
ᠲᠡᠮᠦᠷ ᠦ᠋ᠨ ᠭᠠᠷ ᠭᠡᠭᠡᠪᠴᠢ ᠶ᠋ᠢᠨ ᠰᠡᠷᠡᠯᠵᠢᠨ ᠮᠣᠳᠣᠨ ᠡᠴᠡ ᠠᠳᠬᠤᠨ ᠠᠪᠴᠤ ᠬᠦᠴᠦᠯᠡᠨ ᠤᠭᠵᠠᠷᠠᠬᠤ ᠳ᠋ᠤ᠌ ᠬᠡᠰᠡᠭ ᠨᠢ ᠬᠤᠭᠤᠷᠠᠨ ᠰᠠᠯᠤᠭᠰᠠᠨ ᠤᠴᠢᠷ ᠭᠡᠳᠡᠷᠭᠦ ᠪᠡᠨ ᠫᠠᠳ ᠬᠢᠲᠡᠯᠡ ᠦᠯᠡᠮᠵᠢ ᠴᠢᠩᠭᠠ ᠤᠨᠠᠭᠠᠳ ᠳᠠᠬᠢᠨ ᠪᠣᠰᠤᠭᠰᠠᠨ ᠦᠭᠡᠢ᠃
ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠰᠠᠨ ᠬᠥᠮᠦᠰ ᠦᠢᠮᠡᠯᠳᠦᠵᠦ᠂ ᠵᠠᠷᠢᠮ ᠨᠢ ᠡᠨᠳᠡ ᠡᠴᠡ ᠵᠢᠭᠤᠲᠠᠨ ᠠᠯᠠᠭᠠ ᠪᠣᠯᠪᠠ᠃
ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠳᠣᠪᠵᠢᠶᠠ ᠶ᠋ᠢ ᠬᠤᠧᠨ ᠶᠠᠭᠠᠨ ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠪᠣᠳᠣᠭᠠᠳ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠲᠡᠮᠦᠷ ᠲᠦ᠍ ᠤᠳᠠᠲᠠᠯᠠ ᠬᠡᠨ ᠴᠦ᠍ ᠣᠢᠷᠠᠳᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠦᠭᠵᠢᠯ ᠳᠤᠭᠠᠩ ᠤ᠋ᠨ ᠠᠷᠤ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠬᠠᠷᠠᠵᠤ ᠭᠦᠶᠦᠭᠰᠡᠭᠡᠷ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠲᠡᠨᠳᠡ ᠪᠠᠢᠭᠰᠠᠨ ᠯᠠᠮᠠ ᠨᠠᠷ 《ᠡᠨᠡ ᠵᠣᠯᠢᠭ ᠴᠢᠨᠢ ᠭᠠᠯᠵᠠᠭᠤᠷᠠᠴᠢᠬᠠᠪᠠ ᠤᠤ》 ᠭᠡᠵᠦ ᠪᠣᠳᠣᠨ ᠵᠠᠢᠯᠠᠵᠤ ᠪᠠᠢᠪᠠ᠃
ᠲᠡᠷᠡ ᠣᠷᠣᠢ ᠶᠡᠬᠡ ᠭᠠᠯ ᠲᠦᠯᠡᠵᠦ ᠲᠡᠮᠦᠷ ᠦ᠋ᠨ ᠱᠠᠷᠢᠯ ᠢ᠋ ᠰᠢᠲᠠᠭᠠᠬᠤ ᠭᠡᠲᠡᠯᠡ ᠠᠯᠠᠭᠠ ᠪᠣᠯᠵᠠᠢ᠃ ᠬᠠᠷᠢᠨ ᠲᠡᠮᠦᠷ ᠢ᠋ ᠫᠤᠤᠳᠠᠭᠰᠠᠨ ᠰᠤᠮᠤᠨ ᠳ᠋ᠤ᠌ ᠠᠯᠠᠭᠳᠠᠭᠰᠠᠤᠨ ᠢ᠋ ᠰᠢᠲᠠᠭᠠᠭᠠᠳ 《ᠣᠯᠠᠨ ᠲᠦᠮᠡᠨ ᠱᠠᠪᠢ ᠨᠠᠷ ᠠ᠋! ᠡᠳᠡ ᠪᠣᠯ ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠬᠤ ᠬᠤᠪᠢ ᠵᠣᠬᠢᠶᠠᠯ ᠦᠭᠡᠢ ᠨᠢᠭᠦᠯᠲᠡᠨ ᠪᠠᠢᠭᠰᠠᠨ ᠪᠣᠯᠬᠣᠷ ᠢᠩᠭᠢᠵᠦ ᠦᠬᠦᠭᠰᠡᠨ ᠪᠠᠢᠨᠠ》 ᠭᠡᠵᠦ ᠴᠡᠮᠪᠡ ᠬᠡᠯᠡᠵᠡᠢ᠃