ᠲᠤᠩᠭᠠᠯᠠᠭ ᠲᠠᠮᠢᠷ4-11-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1392《ᠡᠷᠡᠭᠴᠢᠨ ᠡᠮᠡᠭᠴᠢᠨ ᠢ᠋ᠶ᠋ᠡᠨ ᠦᠵᠡᠬᠦ᠂ ᠦᠬᠦᠬᠦ ᠰᠡᠬᠡᠬᠦ ᠪᠡᠨ ᠬᠠᠷᠠᠬᠤ ᠴᠠᠭ ᠢᠷᠡᠯᠡ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠨᠢᠭᠡ
ᠰᠥᠨᠢ ᠳᠤᠮᠳᠠ ᠥᠩᠭᠡᠷᠡᠵᠦ ᠵᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠦ᠌ ᠬᠦᠷᠢᠶᠡ ᠭᠦᠨ ᠨᠣᠢᠷ ᠲᠤ᠌ ᠳᠠᠷᠤᠭᠳᠠᠵᠠᠢ᠃ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠵᠢᠪᠡᠭᠦᠨ ᠬᠦᠢᠲᠡᠨ ᠰᠠᠯᠬᠢ ᠦᠯᠢᠶᠡᠨ᠂ ᠲᠩᠷᠢ ᠳ᠋ᠦ᠍ ᠲᠦᠭ ᠲᠦᠮᠡᠨ ᠣᠳᠣᠨ ᠠᠨᠢᠪᠠᠯᠵᠠᠨ ᠮᠢᠷᠠᠯᠵᠠᠨᠠ᠃ ᠬᠦᠷᠢᠶᠡᠨ ᠦ᠌ ᠲᠠᠯᠠ ᠪᠦᠬᠦᠨ ᠳ᠋ᠦ᠍ ᠨᠣᠬᠠᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠠᠭᠤ ᠪᠠᠷ ᠶᠠᠩᠰᠢᠨ ᠬᠤᠴᠠᠬᠤ ᠨᠢ ᠬᠦᠢᠲᠡᠨ ᠠᠭᠠᠷ ᠲᠤ᠌ ᠲᠡᠮᠦᠷ ᠳᠡᠯᠡᠳᠬᠦ ᠮᠡᠲᠦ ᠰᠣᠨᠣᠰᠤᠭᠳᠠᠨᠠ᠃ ᠡᠨᠡ ᠰᠥᠨᠢ ᠬᠠᠮᠪᠤ ᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠍ ᠠᠷᠪᠠᠭᠠᠳ ᠬᠥᠮᠦᠰ ᠴᠤᠭᠯᠠᠷᠠᠨ ᠪᠦᠳᠡᠭᠢ ᠳᠠᠭᠤ ᠪᠠᠷ ᠰᠢᠪᠡᠨᠡᠨ ᠶᠠᠷᠢᠯᠴᠠᠨᠠ᠃ ᠡᠨᠡ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠪᠠᠨᠴᠢᠨ ᠪᠣᠭᠳᠠ ᠲᠠᠢ ᠬᠣᠶᠠᠷ ᠳᠠᠬᠢᠨ ᠬᠣᠯᠪᠣᠭᠠ ᠪᠠᠷᠢᠭᠰᠠᠨ ᠴᠡᠮᠪᠡ᠂ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠲᠦ᠍ ᠥᠨᠳᠥᠷ ᠠᠯᠪᠠ ᠬᠠᠭᠠᠵᠤ ᠪᠠᠢᠭᠠᠳ ᠤᠯᠤᠰ ᠤ᠋ᠨ ᠬᠥᠷᠥᠩᠭᠡ ᠦᠷᠡᠭᠳᠡᠭᠦᠯᠦᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠷ ᠬᠠᠯᠠᠭᠳᠠᠭᠰᠠᠨ ᠵᠠᠮᠪᠠᠯ᠂ ᠬᠤᠯᠠᠭᠠᠢ ᠶ᠋ᠢᠨ ᠬᠡᠷᠡᠭ ᠢ᠋ᠶ᠋ᠡᠷ ᠱᠣᠷᠣᠩ ᠳ᠋ᠤ᠌ ᠣᠷᠣᠭᠠᠳ ᠰᠠᠶᠢᠬᠠᠨ ᠰᠤᠯᠠᠯᠠᠭᠳᠠᠵᠤ ᠢᠷᠡᠭᠰᠡᠨ ᠲᠦᠭᠵᠢᠯ᠂ ᠡᠬᠢᠨ ᠡᠴᠡ ᠨᠢ ᠠᠪᠤᠭᠠᠳ ᠡᠳᠦᠭᠡ ᠬᠦᠷᠲᠡᠯᠡ ᠪᠠᠷᠤᠭ ᠭᠦᠨ ᠨᠣᠢᠷ ᠲᠠᠭᠠᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠵᠥᠭᠡᠵᠦ ᠪᠠᠢᠳᠠᠭ ᠪᠠᠳᠠᠷᠴᠢ ᠮᠡᠲᠦ ᠬᠥᠮᠦᠰ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠢᠳ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠴᠥᠯᠮᠥᠨ ᠬᠤᠷᠢᠶᠠᠪᠠ᠃ ᠵᠠᠶᠠ ᠭᠡᠭᠡᠨ ᠢ᠋ ᠪᠠᠷᠢᠵᠤ ᠠᠪᠠᠴᠢᠭᠠᠳ ᠬᠣᠷᠣᠭᠠᠪᠠ᠃ ᠯᠠᠮᠠ ᠨᠠᠷ ᠢ᠋ ᠬᠠᠷᠠ ᠪᠣᠯᠬᠤ ᠶ᠋ᠢ ᠤᠷᠢᠶᠠᠯᠠᠨ ᠳᠡᠮᠵᠢᠵᠦ ᠪᠠᠢᠨᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠦᠨᠳᠦᠰᠦ ᠪᠡᠷ ᠨᠢ ᠤᠰᠠᠳᠬᠠᠬᠤ ᠭᠡᠵᠦ ᠪᠠᠢᠨᠠ᠃ ᠨᠣᠶᠠᠳ ᠳᠡᠭᠡᠳᠦᠰ ᠢ᠋ ᠪᠤᠵᠠᠷᠯᠠᠵᠤ ᠭᠦᠢᠴᠡᠪᠡ᠃ ᠣᠳᠣ ᠪᠢᠳᠡ ᠭᠠᠷ ᠬᠤᠮᠬᠢᠨ ᠦᠷᠭᠡᠯᠡᠵᠦ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠪᠠ᠃ ᠡᠰᠡᠬᠦᠯᠡ ᠢᠩᠭᠢᠵᠦ ᠵᠡᠭᠦᠷᠮᠡᠭᠯᠡᠨ ᠰᠠᠭᠤᠵᠤ ᠪᠠᠢᠭᠠᠳ ᠱᠠᠰᠢᠨ ᠪᠤᠷᠬᠠᠨ ᠶᠣᠰᠣ ᠳᠢᠭᠯᠢᠮ ᠲᠡᠢ ᠪᠡᠨ ᠬᠠᠮᠲᠤ ᠪᠤᠯᠠᠰᠢᠯᠠᠭᠤᠯᠬᠤ᠂ ᠡᠰᠡᠬᠦᠯᠡ ᠡᠷᠡᠭᠴᠢᠨ ᠡᠮᠡᠭᠴᠢᠨ ᠢ᠋ᠶ᠋ᠡᠨ ᠦᠵᠡᠬᠦ᠂ ᠦᠬᠦᠬᠦ ᠰᠡᠬᠡᠬᠦ ᠪᠡᠨ ᠬᠠᠷᠠᠬᠤ ᠴᠠᠭ ᠢᠷᠡᠯᠡ ᠭᠡᠵᠦ ᠬᠠᠮᠪᠤ ᠬᠡᠯᠡᠭᠡᠳ ᠴᠡᠮᠪᠡ ᠤᠷᠤᠭᠤ ᠬᠢᠯᠡᠮᠬᠢᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠨᠴᠢᠨ ᠪᠣᠭᠳᠠ ᠬᠥᠳᠡᠯᠬᠦ ᠴᠠᠭ ᠪᠣᠯᠤᠭᠰᠠᠨ ᠭᠡᠵᠦ ᠬᠡᠯᠡᠭᠰᠡᠨ᠂ ᠪᠢᠳᠡᠨ ᠢ᠋ ᠡᠬᠢᠯᠡᠮᠡᠭᠴᠡ ᠲᠤᠰᠠᠯᠠᠨᠠ ᠭᠡᠵᠦ ᠠᠢᠯᠠᠳᠤᠭᠰᠠᠨ᠃ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢ ᠶᠡᠬᠡ ᠨᠠᠷᠠᠨ ᠤᠯᠤᠰ ᠳᠡᠮᠵᠢᠵᠦ ᠪᠠᠢᠭᠠ ᠪᠢᠯᠡ᠃ ᠢᠯᠠᠩᠭᠤᠶᠠ ᠨᠠᠮᠠᠶ᠋ᠢ ᠰᠡᠭᠦᠯ ᠦ᠋ᠨ ᠤᠳᠠᠭᠠ ᠳᠣᠯᠣᠨᠠᠭᠤᠷ ᠬᠣᠲᠠ ᠳ᠋ᠤ᠌ ᠣᠴᠢᠵᠤ ᠠᠭᠤᠯᠵᠠᠬᠤ ᠳ᠋ᠤ᠌ 《ᠴᠠᠭ ᠪᠣᠯᠤᠭᠰᠠᠨ ᠬᠣᠢᠰᠢᠯᠠᠪᠠᠯ ᠬᠣᠵᠢᠮᠳᠠᠨᠠ》 ᠭᠡᠵᠦ ᠬᠡᠳᠦ ᠳᠠᠬᠢᠨ ᠠᠢᠯᠠᠳᠤᠭᠰᠠᠨ᠃ ᠡᠢᠮᠦ ᠳ᠋ᠦ᠍ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠳᠤᠷᠠ ᠦᠭᠡᠢ ᠪᠦᠬᠦ ᠬᠥᠮᠦᠨ ᠢ᠋ ᠨᠢᠭᠡᠳᠦᠭᠦᠯᠦᠨ ᠨᠢᠭᠡᠨ ᠵᠡᠷᠭᠡ ᠬᠥᠳᠡᠯᠵᠦ ᠦᠬᠦᠯᠳᠦᠨ ᠵᠠᠨᠴᠢᠯᠳᠤᠬᠤ ᠴᠠᠭ ᠪᠣᠯᠵᠠᠢ ᠭᠡᠳ ᠴᠡᠮᠪᠡ ᠦᠭᠡ ᠪᠡᠨ ᠲᠠᠰᠤᠯᠵᠤ ᠪᠦᠬᠦᠨ ᠢ᠋ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠢᠮᠬᠢᠵᠦ ᠪᠠᠢᠭᠰᠠᠨ ᠰᠢᠷᠠ ᠲᠠᠮᠠᠬᠢ ᠪᠠᠨ ᠲᠠᠲᠠᠵᠤ ᠬᠥᠨᠳᠡᠢ ᠬᠠᠨᠢᠶᠠᠭᠠᠳ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠡᠯᠡᠬᠦ ᠭᠡᠰᠡᠨ ᠶᠠᠭᠤᠮᠠ ᠡᠨᠡ ᠯᠡ ᠪᠠᠢᠨᠠ ᠭᠡᠳ ᠨᠢᠮᠭᠡᠨ ᠮᠠᠨᠤᠨ ᠬᠥᠭᠡᠷᠭᠡ (ᠬᠦᠬᠦᠷ) ᠢ᠋ᠶ᠋ᠡᠨ ᠳᠠᠯᠢᠩ ᠳ᠋ᠠᠭᠠᠨ ᠬᠢᠬᠦ ᠭᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠳ᠋ᠤ᠌ ᠨᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠢᠭᠡ ᠯᠠᠮᠠ ᠭᠠᠷ ᠢ᠋ᠶ᠋ᠠᠨ ᠲᠣᠰᠴᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠲᠠᠮᠠᠬᠢ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠦᠨᠦᠷ ᠲᠡᠢ ᠶᠤᠮ ᠪᠣᠢ᠃ ᠠᠯᠢ ᠪᠣᠢ? ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠲᠠᠢ ᠭᠦᠢᠬᠤᠸᠡᠷ ᠭᠡᠳ ᠴᠡᠮᠪᠡ ᠬᠥᠭᠡᠷᠭᠡ ᠪᠡᠨ ᠥᠭᠪᠡ᠃ ᠯᠠᠮᠠ ᠬᠡᠳᠦ ᠳᠠᠬᠢᠨ ᠬᠠᠯᠪᠠᠭᠠᠳᠠᠵᠤ ᠴᠢᠮᠬᠢᠭᠡᠳ ᠲᠠᠲᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠭᠠ ᠦᠭᠡᠢ ᠯᠡ ᠶᠠᠭᠤᠮᠠ ᠲᠠᠢ ᠭᠠᠵᠠᠷ ᠤ᠋ᠨ ᠡᠳ᠋ ᠪᠠᠢᠨᠠ ᠳᠠ ᠭᠡᠪᠡ᠃
ᠴᠡᠮᠪᠡ ᠪᠠᠨᠴᠢᠨ ᠪᠣᠭᠳᠠ ᠲᠠᠢ ᠬᠣᠶᠠᠷᠳᠠᠬᠢ ᠤᠳᠠᠭᠠ ᠬᠣᠯᠪᠣᠭᠠ ᠪᠠᠷᠢᠵᠤ ᠢᠷᠡᠭᠡᠳ ᠬᠠᠭᠠᠰ ᠰᠠᠷᠠ ᠪᠣᠯᠵᠤ ᠪᠠᠢᠭᠠ ᠶᠤᠮ᠃ ᠢᠷᠡᠬᠦ ᠳ᠋ᠡᠭᠡᠨ ᠬᠡᠳᠦᠨ ᠪᠣᠭᠣᠳᠠᠯ ᠰᠢᠷᠠ ᠲᠠᠮᠠᠬᠢ᠂ ᠬᠣᠶᠠᠷ ᠮᠠᠨᠤᠨ ᠬᠥᠭᠡᠷᠭᠡ ᠠᠪᠴᠢᠷᠠᠵᠠᠢ᠃ ᠣᠴᠢᠭᠠᠳ ᠪᠠᠨᠴᠢᠨ ᠪᠣᠭᠳᠠ ᠳ᠋ᠤ᠌ ᠵᠥᠪᠬᠡᠨ ᠮᠥᠷᠭᠥᠭᠰᠡᠨ ᠪᠠ ᠬᠠᠷᠢᠨ ᠨᠢᠭᠡ ᠶᠠᠫᠣᠨ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ ᠬᠠᠮᠪᠤ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ ᠥᠭᠴᠦ ᠬᠠᠷᠢᠭᠤ ᠵᠢᠭᠠᠪᠤᠷᠢ ᠠᠪᠤᠭᠰᠠᠨ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠨᠴᠢᠨ ᠪᠣᠭᠳᠠ᠂ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠯᠠᠮᠠ ᠨᠠᠷ ᠲᠠ ᠪᠦᠬᠦᠨ ᠳ᠋ᠦ᠍ ᠶᠡᠬᠡ ᠨᠠᠢᠳᠠᠵᠤ ᠪᠠᠢᠭᠠ ᠶᠤᠮ ᠰᠢᠦ᠃ ᠲᠠ ᠪᠦᠬᠦᠨ ᠦ᠌ ᠵᠢᠳᠬᠦᠯ ᠢ᠋ ᠪᠤᠷᠬᠠᠨ ᠪᠣᠯᠤᠨ ᠶᠡᠬᠡ ᠨᠠᠷᠠᠨ ᠤᠯᠤᠰ ᠥᠨᠳᠥᠷ ᠦᠨᠡᠯᠡᠵᠦ ᠪᠠᠢᠨᠠ᠃ ᠴᠠᠭ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠲᠣᠺᠢᠣ᠋ ᠬᠣᠲᠠ ᠳ᠋ᠤ᠌ ᠠᠢᠯᠴᠢᠯᠠᠨ ᠣᠴᠢᠬᠤ ᠶ᠋ᠢ ᠤᠷᠢᠶᠠ ᠭᠡᠵᠦ ᠶᠠᠫᠣᠨ ᠬᠥᠮᠦᠨ ᠰᠠᠯᠬᠤ ᠳ᠋ᠠᠭᠠᠨ ᠬᠡᠯᠡᠵᠡᠢ᠃
ᠴᠡᠮᠪᠡ ᠶ᠋ᠢᠨ ᠶᠠᠷᠢᠶᠠᠨ ᠤ᠋ ᠳᠠᠷᠠᠭᠠ ᠬᠥᠮᠦᠰ ᠨᠢᠭᠡ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠵᠠᠭᠠᠪᠠ᠃ ᠬᠠᠮᠪᠤ ᠣᠯᠠᠨ ᠤ᠋ ᠪᠠᠢᠳᠠᠯ ᠢ᠋ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠠᠵᠢᠭᠯᠠᠨ᠂ ᠱ᠌ᠢᠷᠦᠨ ᠲᠣᠯᠣᠭᠠᠢ ᠲᠠᠢ ᠲᠣᠮᠣ ᠬᠠᠰ ᠤ᠋ᠨ ᠬᠥᠭᠡᠷᠭᠡ ᠪᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠴᠣᠬᠢᠵᠤ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠲᠦᠮᠡᠨ ᠦ᠌ ᠣᠯᠠᠩᠬᠢ ᠶ᠋ᠢᠨ ᠳᠡᠮᠵᠢᠯᠭᠡ ᠶ᠋ᠢ ᠠᠪᠤᠭᠰᠠᠨ ᠪᠦᠬᠦᠯᠢ ᠲᠥᠷᠥ ᠶ᠋ᠢᠨ ᠡᠰᠡᠷᠭᠦ ᠵᠡᠪᠰᠡᠭ ᠪᠠᠷᠢᠨ ᠪᠣᠰᠤᠨᠠ ᠭᠡᠳᠡᠭ ᠠᠮᠠᠷ ᠬᠡᠷᠡᠭ ᠪᠢᠰᠢ᠃ ᠲᠠ ᠨᠠᠷ ᠤ᠋ᠨ ᠳᠤᠮᠳᠠ ᠤᠭ ᠠᠵᠢᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠡᠴᠡ ᠠᠶᠤᠵᠤ ᠪᠠᠢᠭᠠ ᠬᠥᠮᠦᠨ ᠪᠠᠢᠪᠠᠯ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠬᠡᠷᠡᠭᠲᠡᠢ᠃ ᠮᠢᠨᠦ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠪᠤᠷᠬᠠᠨ ᠱᠠᠰᠢᠨ ᠶᠣᠰᠣ ᠲᠥᠷᠥ ᠪᠡᠨ ᠠᠪᠤᠷᠠᠬᠤ ᠶ᠋ᠢᠨ ᠲᠥᠯᠥᠭᠡ ᠶᠠᠭᠤ ᠴᠤ᠌ ᠬᠢᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠭᠡᠵᠦ ᠬᠠᠮᠪᠤ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠵᠠᠰᠠᠭ ᠪᠢᠳᠡ ᠬᠣᠶᠠᠷ ᠨᠢᠭᠡ ᠨᠠᠷᠠᠨ ᠤ᠋ ᠳᠣᠣᠷᠠ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ᠃ ᠢᠩᠭᠢᠬᠦᠯᠡᠷ ᠬᠠᠮᠪᠤ ᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠦᠬᠦᠬᠦ ᠰᠡᠬᠡᠬᠦ ᠪᠡᠨ ᠦᠵᠡᠬᠦ ᠴᠠᠭ ᠪᠣᠯᠵᠠᠢ᠃ ᠬᠥᠳᠡᠯᠬᠦ ᠳ᠋ᠦ᠍ ᠪᠢᠳᠡᠨ ᠳ᠋ᠦ᠍ ᠵᠡᠪᠰᠡᠭ ᠯᠡ ᠬᠡᠷᠡᠭ ᠲᠡᠢ᠃ ᠪᠢ ᠬᠤᠪᠢ ᠳ᠋ᠠᠭᠠᠨ ᠠᠷᠪᠠᠭᠠᠳ ᠯᠠ ᠬᠥᠮᠦᠨ ᠢ᠋ ᠬᠤᠷᠳᠤᠨ ᠫᠤᠤ ᠪᠠᠷ ᠵᠡᠪᠰᠡᠭᠯᠡᠵᠦ ᠴᠢᠳᠠᠨᠠ᠃ ᠣᠷᠣᠰ ᠯᠢᠶᠠᠠᠵᠤ ᠫᠤᠤ ᠰᠢᠦ ᠳᠡ᠃ ᠰᠤᠮᠤ ᠭᠡᠪᠡᠯ ᠬᠣᠶᠠᠷ ᠬᠠᠢᠷᠴᠠᠭ ᠲᠠᠢ ᠭᠡᠵᠦ ᠵᠠᠮᠪᠠᠯ ᠬᠡᠯᠡᠭᠡᠳ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠣᠷᠣᠰ ᠲᠤ᠌ ᠪᠠᠢᠭᠠ ᠵᠡᠪᠰᠡᠭ ᠪᠦᠬᠦᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠪᠣᠢ ᠰᠢᠦ ᠳᠡ ᠭᠡᠯᠡ᠃
ᠵᠠᠮᠪᠠᠯ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦᠨ ᠦ᠌ ᠮᠥᠩᠭᠥ ᠦᠷᠡᠭᠳᠡᠭᠦᠯᠦᠭᠰᠡᠨ ᠡᠴᠡ ᠪᠣᠯᠵᠤ ᠬᠠᠯᠠᠭᠳᠠᠭᠰᠠᠨ ᠡᠴᠡ ᠡᠬᠢᠯᠡᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠵᠠᠨᠤᠵᠤ᠂ ᠠᠷᠪᠠ ᠭᠠᠷᠤᠢ ᠸᠢᠨᠲ᠋ᠣᠸ᠂ ᠬᠣᠶᠠᠷ ᠰᠸᠯᠠᠢ᠌ᠳᠠᠢ᠂ ᠬᠣᠶᠠᠷ ᠬᠠᠢᠷᠴᠠᠭ ᠰᠤᠮᠤ᠂ ᠬᠡᠳᠦᠨ ᠭᠠᠷ ᠪᠥᠮᠪᠥᠭᠡ ᠬᠤᠯᠠᠭᠠᠢᠯᠠᠵᠤ ᠠᠪᠤᠭᠰᠠᠨ ᠶᠤᠮᠰᠠᠨᠵᠠᠢ᠃ ᠬᠠᠯᠠᠭᠳᠠᠭᠰᠠᠨ ᠲᠤᠰᠢᠶᠠᠯ ᠢ᠋ᠶ᠋ᠠᠨ ᠠᠪᠤᠭᠠᠳ ᠭᠠᠷᠬᠤ ᠳ᠋ᠠᠭᠠᠨ 《ᠭᠠᠢ ᠦᠭᠡᠢ ᠳᠡ᠃ ᠵᠠᠮᠪᠠᠯ ᠬᠡᠨ ᠪᠣᠯᠬᠤ ᠶ᠋ᠢ ᠲᠠ ᠨᠠᠷ ᠲᠤ᠌ ᠦᠵᠡᠭᠦᠯᠦᠭᠡᠳ ᠥᠭᠭᠦᠨᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠨ ᠰᠢᠲᠦ ᠪᠡᠨ ᠬᠢᠬᠤᠨᠠᠭᠤᠯᠤᠨ ᠬᠠᠪᠢᠷᠴᠤ ᠶᠠᠪᠤᠭᠰᠠᠨ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠡᠪᠰᠡᠭ ᠣᠯᠬᠤ ᠳ᠋ᠤ᠌ ᠲᠤᠩ ᠬᠡᠴᠡᠭᠦᠦ ᠪᠠᠢᠨᠠ ᠳᠠ᠃ ᠨᠠᠷᠠᠨ ᠨᠣᠶᠠᠨ ᠶᠠᠭᠤᠨ ᠤ᠋ ᠡᠮᠦᠨᠡ ᠲᠠ ᠨᠠᠷ ᠥᠪᠡᠷ ᠦ᠋ᠨ ᠭᠠᠵᠠᠷ ᠲᠠᠢ ᠪᠣᠯ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠨᠢ ᠪᠢᠳᠡ ᠵᠡᠪᠰᠡᠭ ᠬᠦᠷᠭᠡᠵᠦ ᠥᠭᠭᠦᠨᠡ ᠭᠡᠰᠡᠨ ᠭᠡᠵᠦ ᠴᠡᠮᠪᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠡᠪᠰᠡᠭ ᠡᠴᠡ ᠴᠢᠬᠤᠯᠠ ᠵᠦᠢᠯ ᠪᠠᠢᠨᠠ᠃ ᠡᠨᠡ ᠪᠣᠯ ᠣᠯᠠᠨ ᠤ᠋ ᠰᠡᠳᠬᠢᠯ᠃ ᠣᠳᠣ ᠪᠣᠯ ᠲᠤᠩ ᠠᠶᠠᠲᠠᠢ ᠴᠠᠭ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠱᠠᠰᠢᠨ ᠢ᠋ ᠳᠠᠭᠠᠷᠢᠵᠤ ᠪᠠᠢᠨᠠ᠃ ᠮᠣᠩᠭᠣᠯ ᠱᠠᠰᠢᠨ ᠳ᠋ᠠᠭᠠᠨ ᠬᠠᠢᠷᠠᠲᠠᠢ᠃ ᠣᠯᠠᠨ ᠲᠦᠮᠡᠨ ᠬᠠᠮᠲᠤᠷᠠᠯ ᠳ᠋ᠤ᠌ ᠳᠤᠷᠠ ᠦᠭᠡᠢ ᠪᠣᠯᠵᠠᠢ᠃ ᠭᠡᠲᠡᠯᠡ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠢᠨ ᠲᠡᠭᠦᠨ ᠢ᠋ ᠪᠠᠢᠭᠤᠯᠬᠤ ᠭᠡᠵᠦ ᠬᠦᠴᠦᠯᠡᠵᠦ ᠪᠠᠢᠯᠠ᠃ ᠡᠨᠡ ᠪᠠᠢᠳᠠᠯ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠬᠦ ᠦᠭᠡᠢ᠃ ᠤᠬᠠᠭᠠᠨ ᠲᠠᠢ ᠬᠥᠮᠦᠰ ᠨᠢ ᠡᠨᠡ ᠪᠦᠬᠦᠨ ᠢ᠋ ᠪᠤᠷᠤᠭᠤ ᠭᠡᠵᠦ ᠣᠢᠯᠠᠭᠠᠭᠠᠳ ᠪᠠᠢᠨᠠ᠃ ᠲᠠ ᠨᠠᠷ ᠨᠥᠭᠦᠭᠡ ᠮᠠᠨ ᠤ᠋ ᠡᠨᠳᠡ ᠳᠠᠷᠤᠭᠠ ᠪᠠᠢᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠪᠢᠵᠡ ᠳᠡ᠃ ᠬᠠᠮᠲᠤᠷᠠᠯ ᠢ᠋ ᠬᠦᠴᠦᠯᠡᠨ ᠪᠠᠢᠭᠤᠯᠬᠤ ᠨᠢ ᠪᠤᠷᠤᠭᠤ᠃ ᠴᠢᠨᠡᠭᠡᠯᠢᠭ ᠠᠷᠠᠳ ᠤ᠋ᠨ ᠬᠥᠷᠥᠩᠭᠡ ᠶ᠋ᠢ ᠬᠠᠪᠲᠠᠭᠠᠢᠷᠠᠭᠤᠯᠤᠨ ᠬᠤᠷᠢᠶᠠᠬᠤ ᠨᠢ ᠪᠤᠷᠤᠭᠤ ᠭᠡᠵᠦ ᠲᠡᠮᠡᠴᠡᠭᠡᠳ ᠠᠵᠢᠯ ᠡᠴᠡ ᠪᠡᠨ ᠬᠠᠯᠠᠭᠳᠠᠭᠰᠠᠨ ᠭᠡᠨᠡ ᠪᠢᠯᠡ᠃ ᠡᠷᠳᠡᠨᠢ ᠮᠡᠲᠦ ᠪᠣᠳᠣᠵᠤ ᠪᠠᠢᠭᠠ ᠬᠥᠮᠦᠰ ᠣᠯᠠᠨ ᠪᠠᠢᠭᠠ ᠶᠤᠮ᠃ ᠢᠩᠭᠢᠬᠦᠯᠡᠷ ᠲᠡᠳᠡ ᠡᠨᠡ ᠠᠯᠳᠠᠭᠠ ᠪᠠᠨ ᠵᠠᠰᠠᠵᠤ ᠠᠪᠴᠤ ᠴᠢᠳᠠᠨᠠ᠃ ᠲᠡᠭᠦᠨ ᠡᠴᠡ ᠡᠮᠦᠨᠡ ᠯᠡ ᠠᠮᠵᠢᠬᠤ ᠨᠢ ᠴᠢᠬᠤᠯᠠ᠃ ᠪᠠᠰᠠ ᠡᠨᠡ ᠠᠯᠳᠠᠭᠠ ᠶ᠋ᠢ ᠨᠢ ᠠᠯᠢ ᠪᠣᠯᠬᠤ ᠪᠠᠷ ᠳᠡᠪᠡᠷᠡᠭᠦᠯᠬᠦ ᠠᠵᠢᠯ ᠬᠢᠬᠦ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠴᠡᠮᠪᠡ ᠮᠡᠲᠦ ᠬᠥᠮᠦᠰ ᠬᠠᠷᠠ ᠪᠣᠯᠵᠤ ᠬᠠᠮᠲᠤᠷᠠᠯ᠂ ᠺᠣᠮᠮᠤᠢᠨ ᠳ᠋ᠤ᠌ ᠣᠷᠣᠵᠤ ᠳᠣᠲᠣᠷᠠ ᠨᠢ ᠳᠠᠷᠢ ᠪᠤᠯᠠᠬᠤ ᠴᠠᠭ ᠪᠣᠯᠵᠠᠢ ᠭᠡᠵᠦ ᠬᠠᠮᠪᠤ ᠬᠡᠯᠡᠪᠡ᠃
ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠤᠰᠠᠳᠬᠠᠬᠤ ᠳ᠋ᠤ᠌ ᠵᠡᠪᠰᠡᠭ᠂ ᠲᠡᠭᠡᠬᠦ ᠲᠣᠰᠤᠮ ᠢ᠋ᠶ᠋ᠠᠨ ᠮᠠᠰᠢ ᠬᠤᠷᠴᠠ ᠵᠡᠪᠰᠡᠭ ᠬᠡᠷᠡᠭ ᠲᠡᠢ ᠭᠡᠳᠡᠭ ᠢ᠋ ᠬᠠᠮᠪᠤ ᠬᠡᠨ ᠪᠦᠬᠦᠨ ᠡᠴᠡ ᠢᠯᠡᠭᠦᠦ ᠣᠢᠯᠠᠭᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠵᠡᠪᠰᠡᠭ ᠦ᠋ᠨ ᠲᠤᠬᠠᠢ ᠶᠠᠷᠢᠭᠠ ᠦᠭᠡᠢ ᠶ᠋ᠢᠨ ᠰᠢᠯᠲᠠᠭᠠᠨ ᠪᠣᠯ ᠨᠢᠭᠡᠳᠦᠭᠡᠷ ᠲᠦ᠍ ᠲᠡᠷᠡ ᠨᠢ ᠣᠯᠳᠠᠬᠤ ᠦᠭᠡᠢ ᠵᠦᠢᠯ ᠪᠠᠢᠯᠠ᠃ ᠡᠨᠡ ᠤᠴᠢᠷ ᠡᠴᠡ ᠪᠠᠢᠭᠠ ᠪᠠᠨ ᠪᠠᠷᠢᠵᠤ ᠬᠥᠳᠡᠯᠦᠭᠡᠳ ᠴᠠᠰᠢ ᠨᠢ ᠶᠠᠭᠤ ᠪᠣᠯᠬᠤ ᠶ᠋ᠢ ᠳᠠᠷᠠᠭᠠ ᠨᠢ ᠪᠣᠳᠣᠬᠤ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠠᠵᠢ᠃ ᠥᠨᠥᠳᠥᠷ ᠵᠡᠪᠰᠡᠭ ᠦᠭᠡᠢ ᠭᠡᠳ ᠬᠥᠳᠡᠯᠬᠦ ᠦᠭᠡᠢ᠂ ᠴᠠᠭ ᠠᠯᠳᠠᠪᠠᠯ ᠮᠠᠷᠭᠠᠰᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠤᠯᠠᠮ ᠬᠦᠴᠦᠲᠡᠢ ᠪᠣᠯᠤᠨᠠ᠃ ᠬᠣᠶᠠᠳᠤᠭᠠᠷ ᠲᠤ᠌ ᠵᠡᠪᠰᠡᠭ ᠢ᠋ᠶ᠋ᠡᠷ ᠪᠢᠰᠢ ᠪᠤᠷᠬᠠᠨ ᠤ᠋ ᠬᠦᠴᠦ ᠪᠡᠷ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠢᠯᠠᠵᠤ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠰᠦᠰᠦᠭᠲᠡᠨ ᠳ᠋ᠦ᠍ ᠣᠢᠯᠠᠭᠠᠭᠤᠯᠬᠤ ᠨᠢ ᠴᠢᠬᠤᠯᠠ ᠪᠣᠯᠬᠣᠷ ᠵᠡᠪᠰᠡᠭ ᠦ᠋ᠨ ᠲᠤᠬᠠᠢ ᠶᠠᠷᠢᠬᠤ ᠬᠡᠷᠡᠭ ᠦᠭᠡᠢ ᠠᠵᠢ᠃ ᠭᠤᠷᠪᠠᠳᠤᠭᠠᠷ ᠲᠤ᠌ ᠴᠠᠭ ᠢ᠋ ᠨᠢ ᠣᠯᠵᠤ ᠴᠣᠬᠢᠪᠠᠯ ᠠᠷᠰᠯᠠᠨ ᠢ᠋ ᠰᠠᠪᠠᠭᠠ ᠪᠠᠷ ᠠᠯᠠᠬᠤ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠳᠠᠭ ᠬᠥᠮᠦᠨ ᠶᠤᠮ᠃
ᠵᠠᠮᠪᠠᠯ ᠨᠢᠭᠤᠷ ᠢ᠋ᠶ᠋ᠠᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠢᠯᠢᠵᠦ᠂ ᠡᠪᠰᠢᠶᠡᠨ ᠰᠤᠨᠢᠶᠠᠭᠰᠠᠨ ᠢ᠋ᠶ᠋ᠠᠨ 《ᠨᠠᠳᠠ ᠳ᠋ᠤ᠌ ᠶᠠᠷᠢᠬᠤ ᠬᠡᠳᠦᠨ ᠵᠦᠢᠯ ᠪᠠᠢᠨᠠ》 ᠭᠡᠳ ᠬᠡᠨ ᠨᠢᠭᠡᠨ ᠦ᠌ ᠵᠥᠪᠰᠢᠶᠡᠷᠡᠯ ᠢ᠋ ᠬᠦᠯᠢᠶᠡᠯ ᠦᠭᠡᠢ 《ᠵᠡᠪᠰᠡᠭ ᠲᠡᠢ ᠬᠥᠳᠡᠯᠭᠡᠭᠡᠨ ᠢ᠋ ᠣᠯᠠᠨ ᠤ᠋ ᠬᠦᠴᠦ ᠪᠡᠷ ᠭᠡᠨᠡᠳᠲᠡ ᠠᠯᠤᠰ ᠪᠥᠭᠯᠡᠭᠦᠦ ᠭᠠᠵᠠᠷ ᠭᠠᠷᠭᠠᠵᠤ ᠴᠢᠳᠠᠪᠠᠯ ᠪᠢᠳᠡ ᠲᠦᠷᠭᠡᠨ ᠵᠠᠭᠤᠷᠠ ᠠᠷᠠᠳ ᠤ᠋ᠨ ᠵᠠᠰᠠᠭ ᠦᠭᠡᠢ ᠭᠠᠵᠠᠷ ᠣᠷᠣᠨ ᠲᠠᠢ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠪᠠᠨᠴᠢᠨ ᠪᠣᠭᠳᠠ ᠣᠳᠣ ᠴᠠᠭ ᠤ᠋ᠨ ᠨᠢᠰᠳᠡᠭ ᠲᠡᠷᠭᠡ ᠪᠡᠷ ᠪᠢᠳᠡᠨ ᠳ᠋ᠦ᠍ ᠵᠡᠪᠰᠡᠭ ᠬᠦᠷᠭᠡᠵᠦ ᠥᠭᠬᠦ ᠪᠣᠯᠣᠮᠵᠢᠲᠠᠢ ᠪᠣᠯᠤᠨᠠ᠃ ᠡᠢᠮᠦ ᠵᠡᠯᠢᠭᠦᠳ ᠭᠠᠵᠠᠷ ᠪᠣᠯ ᠡᠨᠡ ᠠᠢᠮᠠᠭ ᠤ᠋ᠨ ᠬᠣᠢᠲᠤ ᠨᠤᠲᠤᠭ᠃ ᠬᠥᠪᠰᠥᠭᠥᠯ ᠠᠢᠮᠠᠭ ᠤ᠋ᠨ ᠡᠮᠦᠨᠡᠲᠦ ᠨᠤᠲᠤᠭ᠃ ᠲᠠᠯᠠ ᠪᠦᠷᠢ ᠡᠴᠡ ᠪᠡᠨ ᠤᠰᠤ ᠪᠠᠷ ᠬᠠᠭᠠᠭᠳᠠᠭᠰᠠᠨ ᠪᠣᠯᠬᠣᠷ ᠮᠠᠰᠢᠨ ᠲᠡᠷᠭᠡ ᠶᠠᠪᠤᠬᠤ ᠪᠣᠯᠤᠮᠵᠢ ᠮᠠᠭᠤᠲᠠᠢ᠂ ᠦᠯᠡᠮᠵᠢ ᠵᠣᠬᠢᠮᠵᠢᠲᠠᠢ ᠨᠤᠲᠤᠭ》 ᠭᠡᠳ ᠪᠦᠬᠦᠨ ᠢ᠋ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠲᠤᠩ ᠮᠡᠷᠭᠡᠨ ᠰᠠᠨᠠᠯ ᠪᠠᠢᠨᠠ᠃ ᠡᠨᠡ ᠤᠴᠢᠷ ᠡᠴᠡ ᠲᠡᠷᠡ ᠵᠦᠭ ᠰᠦᠰᠦᠭ ᠪᠢᠰᠢᠷᠡᠯᠲᠡᠢ ᠣᠯᠠᠨ ᠢ᠋ ᠳᠥᠭᠥᠭᠦᠯᠬᠦ ᠠᠵᠢᠯ ᠢ᠋ ᠬᠢᠪᠡᠯ ᠵᠣᠬᠢᠨᠠ ᠭᠡᠵᠦ ᠬᠠᠮᠪᠤ ᠬᠡᠯᠡᠪᠡ᠃
ᠤᠷᠲᠤ ᠴᠠᠭᠠᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠᠨ ᠳ᠋ᠤ᠌ ᠲᠠᠮᠠᠬᠢ ᠲᠡᠳᠡᠨ᠂ ᠪᠤᠰᠤᠳ ᠤ᠋ᠨ ᠶᠠᠷᠢᠶᠠ ᠰᠣᠨᠣᠰᠴᠤ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠲᠦᠭᠵᠢᠯ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡᠨᠲᠡ ᠬᠥᠳᠡᠯᠦᠭᠡᠳ ᠶᠠᠪᠤᠬᠤ ᠶᠤᠮ ᠪᠣᠯ ᠬᠥᠮᠦᠰ ᠢ᠋ ᠬᠦᠴᠦ ᠪᠡᠷ ᠳᠠᠭᠠᠭᠤᠯᠵᠤ ᠪᠣᠯᠤᠨᠠ ᠰᠢᠦ ᠳᠡ ᠭᠡᠯᠡ᠃
ᠬᠠᠮᠪᠤ ᠬᠠᠮᠠᠷ ᠤ᠋ᠨ ᠲᠠᠮᠠᠬᠢ ᠪᠠᠨ ᠰᠠᠢᠨ ᠭᠡᠭᠴᠢ ᠨᠢ ᠲᠠᠲᠠᠵᠤ ᠠᠪᠤᠭᠠᠳ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠭᠡᠨ ᠢ᠋ ᠪᠠᠷᠢᠵᠤ ᠠᠪᠴᠤ ᠬᠣᠷᠣᠭᠠᠭᠰᠠᠨ ᠢ᠋ ᠣᠯᠠᠨ ᠳ᠋ᠤ᠌ ᠲᠠᠷᠠᠭᠠᠨ ᠶᠠᠷᠢᠬᠤ ᠨᠢ ᠴᠢᠬᠤᠯᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠬᠣᠷᠣᠭᠠᠭᠰᠠᠨ ᠪᠣᠯᠪᠠᠴᠤ ᠭᠡᠭᠡᠨ ᠤᠳᠠᠬᠤ ᠦᠭᠡᠢ ᠡᠷᠭᠢᠵᠦ ᠢᠷᠡᠨᠡ ᠭᠡᠵᠦ ᠠᠢᠯᠠᠳᠤᠭᠰᠠᠨ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠬᠠᠭᠤᠷᠴᠤ ᠴᠠᠭ ᠢ᠋ ᠬᠦᠯᠢᠶᠡᠨ ᠲᠠᠭᠠᠯᠠᠯ ᠪᠠᠷᠢᠭᠰᠠᠨ ᠳᠦᠷᠰᠦ ᠦᠵᠡᠭᠦᠯᠵᠡᠢ ᠭᠡᠵᠦ ᠶᠠᠷᠢᠨᠠ ᠰᠢᠦ ᠭᠡᠯᠡ᠃
ᠵᠠᠶᠠ ᠭᠡᠭᠡᠨ ᠪᠣᠯ ᠬᠣᠷᠢᠨ ᠬᠡᠳᠦᠨ ᠨᠠᠰᠤᠲᠠᠢ ᠵᠠᠯᠠᠭᠤ ᠪᠠᠢᠵᠤ ᠪᠢᠯᠡ᠃ ᠭᠡᠲᠡᠯᠡ ᠡᠨᠡ ᠬᠠᠮᠪᠤ ᠲᠡᠭᠦᠨ ᠦ᠌ ᠨᠡᠷᠡ ᠶ᠋ᠢ ᠪᠠᠷᠢᠨ ᠲᠦᠮᠡᠨ ᠵᠦᠢᠯ ᠦ᠋ᠨ ᠬᠣᠣᠷᠠᠲᠤ ᠴᠤᠤᠷᠬᠠᠯ ᠳᠡᠭᠳᠡᠭᠡᠭᠰᠡᠨ ᠶᠤᠮ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠡᠴᠡ ᠠᠷᠭᠠ ᠦᠭᠡᠢ ᠪᠣᠯᠵᠤ ᠵᠠᠶᠠ ᠭᠡᠭᠡᠨ ᠢ᠋ ᠣᠯᠠᠨ ᠡᠴᠡ ᠲᠤᠰᠠᠭᠠᠷᠯᠠᠵᠤ ᠬᠣᠲᠠ ᠳ᠋ᠤ᠌ ᠠᠪᠠᠴᠢᠭᠰᠠᠨ᠃ ᠭᠡᠲᠡᠯᠡ ᠬᠠᠮᠪᠤ ᠰᠠᠨᠠᠭᠠᠴᠢᠯᠠᠵᠤ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠲᠡᠭᠡᠵᠦ ᠴᠢᠳᠠᠭᠰᠠᠨ᠂ ᠢᠩᠭᠢᠵᠦ ᠳᠠᠪᠠᠭᠰᠠᠨ ᠭᠡᠵᠦ ᠡᠳᠦᠢ ᠲᠡᠳᠦᠢ ᠬᠤᠳᠠᠯ ᠴᠤᠤ ᠶᠠᠷᠢᠶᠠ ᠳᠡᠭᠳᠡᠭᠡᠪᠡ᠃
《ᠰᠥᠨᠢ ᠰᠢᠷᠠ ᠬᠠᠳᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠫᠤᠤᠳᠠᠵᠤ ᠠᠯᠠᠭᠰᠠᠨ ᠴᠢᠨᠢ᠂ ᠮᠠᠷᠭᠠᠰᠢ ᠨᠢ ᠳᠣᠲᠣᠭᠠᠳᠤ ᠶ᠋ᠢ ᠬᠠᠮᠠᠭᠠᠯᠠᠬᠤ ᠭᠠᠵᠠᠷ ᠤ᠋ᠨ ᠪᠠᠢᠰᠢᠩ ᠳ᠋ᠤ᠌ ᠤᠷᠢᠳᠤ ᠰᠥᠨᠢ ᠬᠡᠭᠡᠷᠡ ᠬᠣᠨᠣᠭᠠᠳ ᠢᠷᠡᠯᠡ᠃ ᠪᠤᠵᠠᠷ ᠬᠦᠢᠲᠡᠨ ᠪᠠᠢᠨᠠ ᠭᠡᠳ ᠣᠷᠣᠵᠤ ᠢᠷᠡᠭᠰᠡᠨ ᠭᠡᠨᠡ》᠂ 《ᠠᠷᠪᠠ ᠭᠠᠷᠤᠢ ᠴᠡᠷᠢᠭ ᠲᠠᠭᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠰᠢᠷᠠ ᠭᠡᠷᠡᠯ ᠲᠠᠲᠠᠭᠠᠳ ᠠᠯᠠᠭᠠ ᠪᠣᠯᠵᠠᠢ᠃ ᠰᠠᠨᠳᠤᠷᠴᠤ ᠪᠠᠢᠲᠠᠯᠠ ᠮᠠᠷᠭᠠᠰᠢ ᠨᠢ ᠤᠷᠢᠳᠤ ᠰᠥᠨᠢ ᠪᠡᠭᠡᠵᠢᠩ ᠣᠷᠣᠵᠤ ᠤᠰᠤ ᠦᠭᠡᠢ ᠬᠠᠷᠠ ᠠᠷᠢᠬᠢ ᠳᠠᠷᠤᠵᠤ ᠳᠠᠷᠤᠵᠤ ᠢᠷᠡᠯᠡ᠃ ᠲᠣᠯᠣᠭᠠᠢ ᠰᠦᠷᠡᠬᠡᠢ ᠡᠪᠡᠳᠴᠦ ᠪᠠᠢᠨᠠ᠃ ᠪᠠᠯᠭᠤᠴᠢᠬᠠᠬᠤ ᠶᠠᠭᠤᠮᠠ ᠪᠠᠢᠨᠠ ᠤᠤ? ᠭᠡᠭᠰᠡᠭᠡᠷ ᠰᠢᠭᠦᠬᠦ ᠶᠠᠮᠤᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠭᠡᠨᠡ》 ᠭᠡᠬᠦ ᠵᠡᠷᠭᠡ ᠬᠠᠮᠤᠭ ᠤ᠋ᠨ ᠭᠡᠨᠡᠨ ᠬᠥᠮᠦᠰ ᠢ᠋ ᠬᠠᠭᠤᠷᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠴᠤᠤᠷᠬᠠᠯ ᠢ᠋ ᠬᠠᠮᠪᠤ ᠰᠠᠨᠠᠭᠠᠴᠢᠯᠠᠨ ᠲᠠᠷᠬᠠᠭᠠᠵᠤ ᠪᠢᠯᠡ᠃
ᠠᠷᠠᠳ ᠣᠯᠠᠨ ᠤ᠋ ᠳᠤᠮᠳᠠ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠦ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠷᠢᠳᠢ ᠰᠢᠳᠢ ᠶ᠋ᠢᠨ ᠲᠤᠬᠠᠢ ᠴᠤᠤ ᠶᠠᠷᠢᠶᠠ ᠲᠠᠷᠬᠠᠭᠠᠵᠤ ᠲᠡᠭᠦᠨ ᠳ᠋ᠦ᠍ ᠰᠦᠰᠦᠭ ᠪᠢᠰᠢᠷᠡᠯᠲᠦ ᠭᠡᠨᠡᠨ ᠬᠥᠮᠦᠰ ᠢᠲᠡᠭᠡᠵᠦ ᠪᠠᠢᠭᠰᠠᠨ ᠤᠴᠢᠷ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌ ᠣᠯᠠᠨ ᠨᠡᠢᠲᠡ ᠶ᠋ᠢ ᠣᠷᠣᠭᠤᠯᠤᠨ ᠢᠯᠡ ᠰᠢᠭᠦᠬᠦ ᠶ᠋ᠢᠨ ᠬᠤᠷᠠᠯ ᠬᠢᠵᠦ ᠤᠯᠤᠰ ᠤ᠋ᠨ ᠶᠠᠯᠠᠯᠠᠭᠴᠢ ᠨᠢ 《ᠭᠡᠭᠡᠨ ᠴᠢ ᠦᠨᠡᠬᠡᠷ ᠶᠡᠷᠦ ᠪᠤᠰᠤ ᠶ᠋ᠢᠨ ᠷᠢᠳᠢ ᠰᠢᠳᠢ ᠲᠡᠢ ᠪᠣᠯ ᠲᠡᠭᠦᠨ ᠢ᠋ᠶ᠋ᠡᠨ ᠡᠨᠳᠡ ᠦᠵᠡᠭᠦᠯ᠃ ᠡᠨᠡ ᠣᠯᠠᠨ ᠬᠠᠷᠠᠵᠤ ᠪᠠᠢᠭ》 ᠭᠡᠰᠡᠨ ᠶᠤᠮ᠃
ᠵᠠᠶᠠ ᠪᠠᠨᠳᠢᠳᠠ ᠶ᠋ᠢᠨ ᠭᠡᠭᠡᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠮᠠᠷ ᠷᠢᠳᠢ ᠰᠢᠳᠢ ᠦᠭᠡᠢ ᠵᠢᠷ ᠦ᠋ᠨ ᠨᠢᠭᠡᠨ ᠬᠥᠮᠦᠨ ᠭᠡᠳᠡᠭ ᠢ᠋ᠶ᠋ᠡᠨ ᠣᠯᠠᠨ ᠤ᠋ ᠡᠮᠦᠨᠡ ᠬᠦᠯᠢᠶᠡᠭᠰᠡᠨ ᠪᠢᠯᠡ᠃ ᠭᠡᠲᠡᠯᠡ ᠵᠠᠶᠠ ᠭᠡᠭᠡᠨ ᠦ᠌ ᠲᠤᠬᠠᠢ ᠨᠥᠭᠦᠭᠡ ᠴᠤᠤᠷᠬᠠᠯ ᠳᠠᠷᠤᠭᠳᠠᠭᠰᠠᠨ ᠦᠭᠡᠢ ᠤᠯᠠᠮ ᠴᠤ᠌ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠲᠠᠷᠬᠠᠵᠤ ᠪᠠᠢᠯᠠ᠃
《ᠪᠠᠢᠭᠰᠠᠨ ᠪᠠᠢᠭᠠ ᠦᠭᠡᠢ ᠨᠢ ᠠᠳᠠᠯᠢ᠂ ᠡᠨᠡ ᠭᠡᠨᠡᠨ ᠵᠠᠯᠠᠭᠤ ᠪᠠᠷ ᠱᠠᠰᠢᠨ ᠬᠣᠬᠢᠷᠠᠬᠤ ᠦᠭᠡᠢ᠃ ᠬᠠᠷᠢᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠷ ᠲᠤ᠌ ᠦᠬᠦᠪᠡᠯ ᠰᠦᠰᠦᠭᠲᠡᠨ ᠣᠯᠠᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠪᠤᠷᠤᠭᠤᠰᠢᠶᠠᠬᠤ ᠳ᠋ᠤ᠌ ᠲᠤᠰᠠ ᠪᠣᠯᠤᠨᠠ》 ᠭᠡᠵᠦ ᠬᠠᠮᠪᠤ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠬᠠᠷᠢᠨ ᠪᠤᠰᠤᠳ ᠨᠢᠭᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠡᠨᠡ ᠰᠠᠨᠠᠭᠠ ᠪᠠᠨ ᠬᠡᠯᠡᠭᠡ ᠦᠭᠡᠢ ᠪᠢᠯᠡ᠃
ᠬᠠᠮᠪᠤ ᠶ᠋ᠢᠨ ᠭᠡᠷ ᠲᠦ᠍ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠤᠨᠠᠭᠠᠬᠤ ᠶ᠋ᠢᠨ ᠲᠤᠯᠠ ᠨᠡᠯᠢᠶᠡᠳ ᠶᠠᠭᠤᠮᠠ ᠬᠢᠬᠦ ᠪᠡᠷ ᠲᠣᠭᠲᠠᠨ ᠶᠠᠷᠢᠵᠠᠢ᠃ ᠪᠠᠳᠠᠷᠴᠢ ᠲᠦᠭᠵᠢᠯ ᠬᠣᠶᠠᠷ ᠠᠯᠢ ᠪᠣᠯᠬᠤ ᠪᠠᠷ ᠵᠡᠪᠰᠡᠭ᠂ ᠢᠯᠠᠩᠭᠤᠶᠠ ᠬᠤᠷᠳᠤᠨ ᠫᠤᠤ ᠣᠯᠬᠤ᠂ ᠵᠠᠮᠪᠠᠯ ᠥᠪᠡᠷ ᠦ᠋ᠨ ᠬᠡᠯᠡᠭᠰᠡᠨ ᠨᠤᠲᠤᠭ ᠲᠤ᠌ ᠣᠷᠣᠵᠤ᠂ ᠬᠥᠮᠦᠰ ᠢ᠋ ᠬᠥᠳᠡᠯᠭᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠬᠦ᠂ ᠴᠡᠮᠪᠡ ᠬᠡᠳᠦᠨ ᠯᠠᠮᠠ ᠨᠠᠷ ᠤ᠋ᠨ ᠬᠠᠮᠲᠤ ᠳᠠᠷᠤᠢ ᠬᠠᠷᠠ ᠪᠣᠯᠵᠤ ᠬᠠᠮᠲᠤᠷᠠᠯ᠂ ᠺᠣᠮᠮᠤᠢᠨ ᠳ᠋ᠤ᠌ ᠣᠷᠣᠵᠤ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠠᠯᠳᠠᠭᠠ ᠶ᠋ᠢ ᠤᠯᠠᠮ ᠰᠢᠲᠠᠭᠠᠬᠤ᠂ ᠬᠠᠮᠪᠤ ᠨᠠᠢᠳᠠᠪᠤᠷᠢᠲᠠᠢ ᠬᠥᠮᠦᠰ ᠢ᠋ ᠪᠣᠰᠤᠯᠭᠠ ᠭᠠᠷᠭᠠᠬᠤ ᠭᠠᠵᠠᠷ ᠤᠷᠤᠭᠤ ᠣᠢᠷᠠᠲᠤᠭᠤᠯᠬᠤ ᠵᠡᠷᠭᠡ ᠠᠵᠢᠯ ᠢ᠋ ᠬᠢᠬᠦ ᠪᠡᠷ ᠬᠤᠪᠢᠶᠠᠷᠢᠯᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠦᠷᠭᠡᠯᠡᠵᠦ ᠰᠠᠭᠤᠬᠤ ᠴᠠᠭ ᠪᠠᠢᠬᠤ ᠦᠭᠡᠢ᠃ ᠢᠷᠡᠬᠦ ᠬᠠᠪᠤᠷ ᠭᠡᠬᠦ ᠳ᠋ᠦ᠍ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠤᠭᠰᠠᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠪᠢ ᠪᠠᠨᠴᠢᠨ ᠪᠣᠭᠳᠠ ᠳ᠋ᠤ᠌ ᠡᠨᠡ ᠲᠤᠬᠠᠢ ᠠᠢᠯᠠᠳᠬᠠᠯ ᠶᠠᠪᠤᠭᠤᠯᠤᠨᠠ ᠭᠡᠳ ᠬᠠᠮᠪᠤ ᠬᠥᠮᠦᠰ ᠲᠦ᠍ ᠲᠠᠷᠬᠠᠬᠤ ᠳᠣᠬᠢᠶᠠ ᠥᠭᠴᠡᠢ᠃
ᠬᠥᠮᠦᠰ ᠭᠡᠷ ᠡᠴᠡ ᠭᠠᠷᠴᠤ᠂ ᠬᠠᠮᠪᠤ ᠶ᠋ᠢᠨ ᠪᠤᠷᠬᠠᠨ ᠤ᠋ ᠭᠡᠷ᠂ ᠭᠠᠯ ᠤ᠋ᠨ ᠭᠡᠷ ᠢ᠋ᠶ᠋ᠡᠷ ᠳᠠᠷᠬᠠᠨ ᠤᠨᠲᠠᠵᠠᠭᠠᠪᠠ᠃
ᠡᠭᠦᠨ ᠦ᠌ ᠳᠠᠷᠠᠭᠠ ᠡᠳᠦᠷ ᠬᠠᠮᠪᠤ ᠨᠡᠯᠢᠶᠡᠳ ᠣᠯᠠᠨ ᠯᠠᠮᠠ ᠨᠠᠷ ᠢ᠋ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠨᠡᠷᠡ ᠪᠡᠷ ᠬᠦᠷᠢᠶᠡ ᠬᠡᠢᠳ ᠲᠦ᠍ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ ᠨᠢᠭᠡᠨ ᠰᠠᠨᠠᠭᠠᠲᠤ ᠲᠣᠮᠣ ᠯᠠᠮᠠ ᠨᠠᠷ ᠲᠠᠭᠠᠨ ᠬᠠᠪᠤᠷ ᠤ᠋ᠨ ᠳᠣᠬᠢᠶᠠ ᠶ᠋ᠢ ᠬᠦᠯᠢᠶᠡᠵᠦ ᠪᠦᠬᠦ ᠠᠵᠢᠯ ᠢ᠋ ᠶᠠᠩ ᠳᠠᠩ ᠪᠣᠯᠭᠠᠬᠤ ᠲᠤᠬᠠᠢ ᠬᠡᠯᠡᠭᠦᠯᠵᠡᠢ᠃
ᠥᠪᠡᠷ ᠢ᠋ᠶ᠋ᠡᠨ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢᠨ ᠡᠯᠴᠢ ᠲᠡᠢ ᠮᠠᠰᠢ ᠨᠢᠭᠤᠴᠠ ᠪᠠᠷ ᠠᠭᠤᠯᠵᠠᠵᠤ ᠪᠦᠬᠦ ᠪᠣᠳᠣᠯ ᠢ᠋ᠶ᠋ᠠᠨ ᠬᠡᠯᠡᠭᠡᠳ ᠢᠷᠡᠬᠦ ᠨᠠᠮᠤᠷ ᠪᠤᠶᠤ ᠡᠪᠦᠯ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢ ᠮᠣᠩᠭᠣᠯ ᠳ᠋ᠤ᠌ ᠮᠣᠷᠢᠯᠠᠨ ᠢᠷᠡᠬᠦ ᠶ᠋ᠢ ᠤᠷᠢᠵᠠᠢ᠃ ᠬᠤᠪᠢᠰᠬᠠᠯ ᠤ᠋ᠨ ᠡᠰᠡᠷᠭᠦᠦ ᠬᠦᠴᠦᠨ ᠶᠡᠬᠡ ᠲᠡᠮᠡᠴᠡᠯ ᠳ᠋ᠦ᠍ ᠪᠡᠯᠡᠳᠬᠡᠪᠡ᠃ ᠭᠡᠲᠡᠯᠡ ᠬᠠᠮᠲᠤᠷᠠᠯ᠂ ᠺᠣᠮᠮᠤᠢᠨ ᠢ᠋ ᠬᠦᠴᠦ ᠪᠡᠷ ᠪᠠᠢᠭᠤᠯᠤᠨ ᠠᠷᠠᠳ ᠲᠦᠮᠡᠨ ᠦ᠌ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠡᠪᠳᠡᠬᠦ ᠶᠠᠪᠤᠳᠠᠯ ᠤᠯᠠᠮ ᠯᠠ ᠰᠢᠷᠦᠭᠦᠨ ᠪᠣᠯᠵᠤ ᠪᠠᠢᠯᠠ᠃
ᠨᠢᠭᠡ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠭᠤᠴᠢᠨ ᠨᠢᠭᠡᠨ ᠣᠨ ᠳ᠋ᠤ᠌ ᠶᠠᠫᠣᠨ ᠤ᠋ ᠢᠮᠫᠧᠷᠢᠶᠠᠯᠢᠰᠮ ᠮᠠᠨᠵᠤᠤᠷ ᠢ᠋ ᠡᠵᠡᠯᠡᠵᠦ ᠮᠣᠩᠭᠣᠯ ᠤ᠋ᠨ ᠳᠣᠷᠣᠨᠠᠲᠤ ᠬᠢᠯᠢ ᠳ᠋ᠦ᠍ ᠪᠥᠭᠡᠮ ᠠᠶᠤᠯ ᠵᠠᠨᠤᠯᠬᠢᠯᠠᠪᠠ᠃ ᠡᠨᠡ ᠪᠦᠬᠦᠨ ᠨᠢ ᠲᠣᠭᠲᠠᠭᠠᠳ ᠬᠡᠳᠦᠬᠡᠨ ᠵᠢᠯ ᠪᠣᠯᠵᠤ ᠪᠠᠢᠭᠠ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠬᠦᠨᠳᠦ ᠬᠡᠴᠡᠭᠦᠦ ᠪᠠᠢᠳᠠᠯ ᠲᠠᠢ ᠪᠣᠯᠭᠠᠯᠠ᠃