ᠬᠡᠦᠬᠡᠳ ᠭᠠᠭᠴᠠᠭᠠᠷᠳᠠᠮᠠᠯ ᠣᠷᠴᠢᠨ ᠳ᠋ᠤ᠌ ᠥᠰᠴᠦ ᠪᠠᠢᠨᠠ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ1-08-ᠪᠣᠯᠣᠴᠢᠯᠠᠭᠤ
765ᠬᠡᠦᠬᠡᠳ ᠭᠠᠭᠴᠠᠭᠠᠷᠳᠠᠮᠠᠯ ᠣᠷᠴᠢᠨ ᠳ᠋ᠤ᠌ ᠥᠰᠴᠦ ᠪᠠᠢᠨᠠ
ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ08-ᠪᠣᠯᠣᠴᠢᠯᠠᠭᠤ
ᠮᠠᠯᠴᠢᠳ ᠭᠠᠭᠴᠠᠬᠠᠨ ᠬᠡᠦᠬᠡᠳ ᠠᠪᠬᠤ ᠨᠢ ᠣᠯᠠᠰᠢᠷᠠᠭᠰᠠᠨ ᠠ᠋ᠴᠠ ᠬᠥᠳᠡᠭᠡ ᠠᠢᠯ ᠳ᠋ᠤ᠌ ᠬᠡᠦᠬᠡᠳ ᠲᠤᠩ ᠴᠥᠭᠡᠷᠡᠵᠦ᠂ ᠨᠠᠭᠠᠳᠬᠤ ᠬᠠᠨᠢ ᠦᠭᠡᠢ ᠭᠠᠨᠢᠷᠬᠠᠳᠠᠭ ᠬᠡᠦᠬᠡᠳ ᠣᠯᠠᠨ ᠪᠣᠯᠵᠠᠢ᠃ ᠡᠨᠡᠬᠦ ᠣᠷᠴᠢᠨ ᠳ᠋ᠤ᠌ ᠥᠰᠦᠭᠰᠡᠨ ᠬᠡᠦᠬᠡᠳ ᠲᠦ᠍ ᠭᠡᠨᠡᠨ ᠴᠠᠢᠯᠭᠠᠨ ᠤᠢᠳᠬᠠᠷ ᠵᠣᠪᠠᠭᠤᠷᠢ ᠦᠭᠡᠢ ᠬᠡᠦᠬᠡᠳ ᠨᠠᠰᠤ ᠦᠭᠡᠢ ᠪᠣᠯᠵᠤ᠂ ᠪᠦᠷ ᠯᠡ ᠲᠣᠮᠣ ᠬᠥᠮᠦᠰ ᠦ᠋ᠨ ᠬᠠᠵᠠᠭᠤᠳᠠ ᠶᠡᠬᠡ ᠬᠥᠮᠦᠨ ᠦ᠌ ᠦᠭᠡ ᠬᠡᠯᠡᠵᠦ᠂ ᠶᠡᠬᠡ ᠬᠥᠮᠦᠨ ᠰᠢᠭ ᠬᠠᠭᠤᠷᠮᠠᠭᠯᠠᠨ ᠪᠠᠶᠠᠷᠯᠠᠵᠤ ᠬᠡᠦᠬᠡᠳ ᠨᠠᠰᠤᠨ ᠤ᠋ ᠵᠢᠩᠬᠢᠨᠢ ᠪᠠᠶᠠᠷ ᠪᠠᠶᠠᠰᠤᠯ ᠬᠥᠭᠵᠢᠶᠡᠨ ᠨᠠᠷᠭᠢᠶᠠᠨ ᠢ᠋ᠶ᠋ᠠᠨ ᠠᠯᠳᠠᠵᠤ ᠪᠠᠢᠨᠠ᠃ ᠡᠢᠮᠦᠷᠬᠦ ᠪᠠᠭᠠ ᠨᠠᠰᠤᠨ ᠤ᠋ ᠴᠣᠪᠣᠭᠣ ᠳᠡᠭᠵᠢᠨ ᠵᠠᠩ ᠠᠷᠠᠨᠰᠢᠨ ᠢ᠋ᠶ᠋ᠠᠨ ᠠᠯᠳᠠᠵᠤ ᠪᠠᠢᠭᠠ ᠬᠡᠦᠬᠡᠳ ᠬᠣᠲᠠ ᠬᠥᠳᠡᠭᠡ ᠦᠭᠡᠢ ᠲᠦᠭᠡᠮᠡᠯ ᠪᠣᠯᠵᠠᠢ᠂ ᠠᠬᠠ ᠡᠭᠡᠴᠢ ᠶ᠋ᠢᠨ ᠬᠠᠯᠠᠮᠵᠢ ᠬᠦᠷᠲᠡᠭᠰᠡᠨ ᠦᠭᠡᠢ᠂ ᠳᠡᠭᠦᠦ ᠨᠠᠷ ᠢ᠋ ᠬᠠᠷᠠᠭᠠᠯᠵᠠᠬᠤ ᠬᠠᠷᠢᠭᠤᠴᠠᠯᠭᠠ ᠮᠡᠳᠡᠭᠰᠡᠨ ᠦᠭᠡᠢ ᠬᠡᠦᠬᠡᠳ ᠮᠠᠨᠢ ᠬᠡᠨ ᠢ᠋ ᠴᠦ᠍ ᠣᠢᠯᠠᠭᠠᠵᠤ ᠬᠠᠯᠠᠮᠵᠢᠯᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠬᠤᠪᠢᠨᠴᠢᠷ ᠵᠠᠩ ᠠᠷᠠᠨᠰᠢᠨ ᠲᠥᠯᠥᠪᠰᠢᠵᠦ ᠪᠠᠢᠨᠠ᠃ ᠡᠢᠮᠦᠷᠬᠦ ᠪᠠᠶᠠᠷ ᠪᠠᠶᠠᠰᠤᠯ ᠠᠵᠠ ᠵᠢᠷᠭᠠᠯ ᠢ᠋ ᠮᠡᠳᠡᠷᠡᠬᠦ ᠦᠭᠡᠢ ᠬᠡᠦᠬᠡᠳ ᠲᠦ᠍ ᠶᠠᠮᠠᠷ ᠰᠠᠢᠨ ᠰᠠᠢᠬᠠᠨ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠤᠷᠭᠤᠬᠤ ᠪᠢᠯᠡ! ᠡᠢᠮᠦᠷᠬᠦ ᠥᠨᠥᠴᠢᠷᠡᠮᠡᠯ ᠭᠠᠭᠴᠠᠭᠠᠷᠳᠠᠮᠠᠯ ᠬᠣᠲᠠ ᠠᠢᠯ ᠤ᠋ᠨ ᠬᠡᠦᠬᠡᠳ ᠦ᠋ᠳ ᠫᠤᠤᠳᠠᠯᠭᠠ ᠠᠯᠠᠯᠭᠠᠨ ᠲᠠᠢ ᠰᠦᠯᠵᠢᠶᠡᠨ ᠲᠣᠭᠯᠠᠭᠠᠮ ᠳ᠋ᠤ᠌ ᠰᠢᠨᠤᠭᠰᠠᠨ ᠠ᠋ᠴᠠ ᠲᠡᠳᠡᠨ ᠳ᠋ᠦ᠍ ᠥᠰᠢᠶᠡ ᠠᠪᠬᠤ ᠪᠣᠳᠣᠯ᠂ ᠬᠣᠷᠣᠰᠤᠯ ᠵᠢᠪᠡᠭᠦᠴᠡᠯ ᠦ᠋ᠨ ᠡᠷᠡᠭᠦᠯ ᠪᠤᠰᠤ ᠰᠡᠳᠬᠢᠴᠡ ᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠭᠡᠷ ᠦ᠋ᠨ ᠬᠥᠮᠦᠵᠢᠯ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠥᠮᠦᠵᠢᠯ ᠪᠣᠯᠤᠨ ᠬᠡᠦᠬᠡᠳ ᠦ᠋ᠨ ᠲᠤᠰ ᠪᠡᠶᠡ ᠶ᠋ᠢᠨ ᠬᠢᠨᠢ ᠬᠡᠪ ᠦ᠋ᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠬᠦᠷᠲᠡᠬᠦ ᠠᠵᠢᠯᠯᠠᠭᠠ ᠶ᠋ᠢ ᠨᠢ ᠴᠥᠮ ᠨᠠᠵᠠᠭᠠᠢ ᠪᠠᠷ ᠨᠥᠯᠥᠭᠡᠯᠡᠬᠦ ᠪᠣᠯᠵᠠᠢ᠃ ᠮᠠᠨ ᠤ᠋ ᠳᠠᠷᠠᠭᠠ ᠦᠶᠡ ᠢᠷᠡᠬᠦ ᠳ᠋ᠦ᠍ ᠠᠪᠠᠭᠠ ᠨᠠᠭᠠᠴᠤ ᠦᠭᠡᠢ ᠬᠡᠦᠬᠡᠳ ᠣᠯᠠᠰᠢᠷᠠᠵᠤ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠬᠣᠯᠪᠣᠭᠠ ᠤᠯᠠᠮ ᠨᠢᠮᠭᠡᠷᠡᠵᠦ᠂ ᠲᠡᠷᠡ ᠣᠯᠠᠨ ᠰᠠᠳᠤᠨ ᠲᠥᠷᠥᠯ ᠦ᠋ᠨ ᠳᠠᠭᠤᠳᠠᠯᠭᠠ ᠠᠮᠢᠳᠤᠷᠠᠯ ᠠ᠋ᠴᠠ ᠪᠠᠯᠠᠷᠠᠵᠤ᠂ ᠮᠣᠩᠭᠣᠯ ᠦᠭᠡᠰ ᠦ᠋ᠨ ᠰᠠᠩ ᠴᠤ᠌ ᠤᠯᠠᠮ ᠶᠠᠳᠠᠭᠤᠷᠠᠨᠠ ᠭᠡᠰᠡᠨ ᠦᠭᠡ ᠰᠢᠦ᠃《 ᠦᠭᠡ ᠶᠠᠳᠠᠭᠤᠷᠠᠨᠠ ᠭᠡᠳᠡᠭ ᠶᠠᠭᠤᠮᠠ ᠪᠠᠨ ᠪᠠᠷᠠᠭᠰᠠᠨ ᠤ᠋ ᠲᠡᠮᠳᠡᠭ 》 ᠭᠡᠮᠡᠨ ᠦ᠌᠂ ᠪᠤᠶᠠᠨᠬᠡᠰᠢᠭ ᠨᠢᠭᠡᠨ ᠵᠣᠬᠢᠶᠠᠯ ᠳ᠋ᠤ᠌ ᠪᠠᠨ ᠬᠡᠯᠡᠭᠰᠡᠨ ᠪᠠᠢᠳᠠᠭ᠂ ᠪᠢᠳᠡ ᠴᠢᠨᠢ ᠮᠠᠯ ᠢ᠋ᠶ᠋ᠠᠨ ᠪᠠᠷᠠᠵᠤ ᠪᠠᠢᠨᠠ᠂ ᠪᠡᠯᠴᠢᠭᠡᠷ ᠤᠰᠤ ᠪᠠᠨ ᠪᠠᠷᠠᠵᠤ ᠪᠠᠢᠨᠠ᠂ ᠠᠩ ᠠᠮᠢᠲᠠᠨ ᠢ᠋ᠶ᠋ᠠᠨ ᠪᠠᠷᠠᠵᠤ ᠪᠠᠢᠨᠠ᠂ ᠰᠠᠳᠤᠨ ᠲᠥᠷᠥᠯ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠪᠠᠷᠠᠬᠤ ᠰᠢᠬᠠᠭᠰᠠᠨ᠃ ᠠᠮᠢᠳᠤᠷᠠᠯ ᠠᠬᠤᠢ᠂ ᠠᠵᠢᠯ ᠮᠣᠳᠣ᠂ ᠪᠠᠢᠭᠠᠯᠢ ᠣᠷᠴᠢᠨ ᠠ᠋ᠴᠠ ᠪᠠᠨ ᠬᠣᠯᠠᠳᠠᠵᠤ ᠪᠠᠢᠭᠠ ᠬᠡᠦᠬᠡᠳ ᠮᠠᠨᠢ ᠬᠡᠯᠡ ᠪᠡᠷ ᠶᠠᠳᠠᠭᠤᠷᠠᠬᠤ ᠦᠭᠡᠢ ᠶᠠᠭᠠᠬᠢᠨᠠ ᠪᠣᠢ! ᠦᠭᠡ ᠶᠠᠳᠠᠭᠤᠷᠠᠯᠠ ᠭᠡᠰᠡᠨ ᠴᠢᠨᠢ ᠣᠶᠤᠨ ᠬᠣᠭᠣᠰᠣᠷᠠᠵᠤ ᠪᠠᠢᠨᠠ ᠭᠡᠰᠡᠨ ᠯᠡ ᠦᠭᠡ ᠰᠢᠦ᠃
ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ᠋ ᠶᠡᠬᠡᠨᠠᠭᠤᠷ ᠰᠤᠮᠤᠨ ᠤ᠋ ᠶᠡᠬᠡᠨᠠᠭᠤᠷ ᠭᠠᠴᠠᠭᠠ ᠪᠠᠷ ᠨᠤᠲᠤᠭ ᠲᠠᠢ ᠠᠮᠤᠷᠵᠢᠷᠭᠠᠯ ᠰᠧ ᠪᠡᠯᠮᠠ ᠬᠣᠶᠠᠷ ᠨᠠᠰᠤᠲᠠᠨ ᠤ᠋ ᠬᠥᠪᠡᠭᠦᠨ ᠬᠥᠬᠡᠦ᠌ᠨᠳᠦᠰᠦ ᠪᠡᠨ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡ ᠦᠢᠯᠡ ᠪᠡᠨ ᠪᠠᠷᠠᠭᠰᠠᠨ ᠥᠩᠭᠡᠷᠡᠯᠲᠡ ᠶ᠋ᠢ ᠰᠣᠨᠣᠰᠪᠠᠯ ᠲᠠᠨᠠᠷ ᠯᠠᠪ ᠶᠠᠭᠤ ᠨᠢᠭᠡ ᠶ᠋ᠢ ᠪᠣᠳᠣᠬᠤ ᠪᠠᠢᠬᠠ᠃ 1992 ᠣᠨ ᠳ᠋ᠤ᠌ ᠳᠥᠴᠢᠨ ᠲᠠᠪᠤᠲᠠᠢ ᠠᠮᠤᠷᠵᠢᠷᠭᠠᠯ ᠳ᠋ᠤ᠌ ᠵᠢᠷᠭᠤᠭᠠᠳᠠᠬᠢ ᠦᠷᠡ ᠶ᠋ᠢᠨ ᠬᠢᠨᠢ ᠵᠠᠶᠠᠭᠠ ᠢᠷᠡᠵᠦ ᠪᠢᠯᠡ᠂ ᠬᠥᠯ ᠬᠦᠨᠳᠦ ᠪᠦᠰᠡᠭᠦᠢ ᠨᠢ ᠪᠡᠶᠡ ᠪᠡᠨ ᠪᠠᠢᠴᠠᠭᠠᠯᠭᠠᠭᠰᠠᠨ ᠳ᠋ᠤ᠌ ᠬᠦᠦ ᠵᠠᠶᠠᠭᠠᠭᠰᠠᠨ ᠢ᠋ ᠮᠡᠳᠡᠭᠡᠳ ᠲᠠᠪᠤᠨ ᠥᠬᠢᠨ ᠲᠡᠢ ᠪᠠᠢᠭᠰᠠᠨ ᠲᠡᠷᠡ ᠬᠣᠶᠠᠭᠤᠯᠠ ᠪᠠᠨ ᠲᠡᠭᠷᠢ ᠨᠤᠷᠠᠭᠰᠠᠨ ᠴᠤ᠌ ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠪᠠᠨ ᠠᠯᠳᠠᠬᠤ ᠦᠭᠡᠢ ᠭᠡᠮᠡᠨ ᠬᠠᠲᠠᠭᠤ ᠪᠣᠳᠣᠵᠠᠢ᠃ ᠬᠥᠩᠭᠡᠵᠢᠬᠦ ᠶ᠋ᠢᠨ ᠨᠠᠭᠠᠨᠠ ᠴᠠᠭᠠᠨᠠ ᠪᠣᠯᠬᠤ ᠳ᠋ᠤ᠌ ᠬᠥᠮᠦᠨ ᠠᠮᠠ ᠶ᠋ᠢᠨ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠠᠯᠪᠠᠨ ᠤ᠋ ᠬᠢᠨᠢ ᠰᠢᠬᠠᠮᠳᠠᠭᠤᠯᠤᠨ ᠪᠠᠢᠵᠤ ᠳ᠋ᠠᠪᠠᠨ ᠪᠠᠯᠭᠠᠰᠤᠨ ᠳ᠋ᠤ᠌ ᠠᠪᠠᠴᠢᠨ ᠠᠯᠪᠠᠳᠠᠯᠭᠠ ᠪᠠᠷ ᠤᠷᠤᠭ ᠤᠨᠠᠭᠠᠯᠭᠠᠨᠠ ᠭᠡᠰᠡᠨ ᠳ᠋ᠦ᠍ ᠡᠪᠦᠭᠡᠨ ᠰᠥᠨᠢ ᠪᠡᠷ ᠬᠥᠭᠰᠢᠨ ᠢ᠋ᠶ᠋ᠡᠨ ᠲᠷᠠᠺᠲ᠋ᠣᠷ ᠲᠤ᠌ ᠲᠡᠭᠡᠭᠡᠭᠡᠳ ᠯᠢᠨᠳᠦᠩ ᠪᠠᠯᠭᠠᠰᠤ ᠵᠦᠭ ᠵᠠᠢᠯᠠᠨ ᠶᠠᠪᠤᠵᠠᠢ᠂ ᠰᠥᠨᠢᠵᠢᠨ ᠠᠶᠠᠯᠠᠵᠤ ᠦᠷ ᠢ᠋ᠶ᠋ᠡᠷ ᠨᠢᠭᠡ ᠲᠠᠨᠢᠯ ᠠᠢᠯ ᠳ᠋ᠤ᠌ ᠪᠠᠨ ᠬᠦᠷᠴᠦ ᠬᠣᠶᠠᠷ ᠡᠳᠦᠷ ᠠᠮᠠᠷᠠᠭᠠᠳ ᠲᠷᠠᠺᠲ᠋ᠣᠷ ᠢ᠋ᠶ᠋ᠠᠨ ᠲᠡᠨᠳᠡ ᠣᠷᠬᠢᠭᠠᠳ ᠳᠠᠬᠢᠨ ᠴᠠᠰᠢ ᠶᠠᠪᠤᠵᠤ ᠠᠷᠤ ᠬᠣᠷᠴᠢᠨ ᠤ᠋ ᠱᠤᠸᠠᠩ ᠴᠧᠩ ᠪᠠᠯᠭᠠᠰᠤᠨ ᠤ᠋ ᠨᠢᠭᠡᠨ ᠲᠠᠨᠢᠯ ᠲᠠᠷᠢᠶᠠᠴᠢᠨ ᠠᠢᠯ ᠳ᠋ᠤ᠌ ᠬᠦᠷᠦᠭᠡᠳ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠥᠩᠭᠡᠵᠢᠵᠡᠢ᠂ ᠬᠡᠦᠬᠡᠳ ᠨᠢᠭᠡᠨᠲᠡ ᠭᠠᠷᠤᠭᠰᠠᠨ ᠬᠣᠢᠨᠠ ᠲᠡᠳᠡᠨ ᠲᠣᠷᠭᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠂ ᠬᠡᠦᠬᠡᠳ ᠦ᠋ᠨ ᠲᠣᠷᠭᠠᠭᠤᠯᠢ ᠳ᠋ᠤ᠌ ᠵᠠᠭᠤ ᠨᠠᠶᠠ ᠭᠠᠷᠤᠢ ᠪᠤᠭ ᠮᠠᠯ ᠬᠣᠷᠢᠭᠠᠳ ᠦᠬᠡᠷ ᠢ᠋ ᠨᠢ ᠪᠦᠬᠦᠨ ᠢ᠋ ᠬᠤᠷᠢᠶᠠᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠵᠢᠯ ᠬᠣᠲᠠ ᠪᠠᠨ ᠬᠤᠷᠢᠶᠠᠯᠭᠠᠭᠰᠠᠨ ᠠᠮᠤᠷᠵᠢᠷᠭᠠᠯ ᠤ᠋ᠨ ᠬᠢᠨᠢ ᠣᠳᠣ ᠠᠵᠢᠷᠭᠠ ᠠᠳᠤᠭᠤ ᠲᠠᠢ᠂ ᠵᠠᠭᠤ ᠢᠯᠡᠭᠦᠦ ᠪᠤᠭ ᠮᠠᠯ ᠲᠠᠢ᠂ ᠲᠣᠭᠣᠰᠬᠠᠨ ᠪᠦᠲᠦᠴᠡ ᠲᠡᠢ ᠪᠠᠢᠰᠢᠩ᠂ ᠬᠦᠷᠢᠶᠡ ᠬᠠᠰᠢᠶᠠ ᠲᠠᠢ᠂ ᠤᠨᠤᠬᠤ ᠠ᠋ᠴᠠ ᠮᠠᠰᠢᠨ ᠲᠠᠢ᠂ ᠰᠠᠶᠢᠬᠠᠨ ᠬᠦᠦ ᠳ᠋ᠦ᠍ ᠪᠡᠨ ᠪᠡᠷᠢ ᠪᠠᠭᠤᠯᠭᠠᠭᠠᠳ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠢᠨ ᠳ᠋ᠤ᠌ ᠰᠡᠳᠬᠢᠯ ᠥᠶᠥᠭ ᠵᠢᠷᠭᠠᠵᠤ ᠶᠠᠪᠤᠨᠠ᠃ 《 ᠬᠡᠦᠬᠡᠳ ᠵᠠᠶᠠᠭᠠᠪᠠᠯ ᠬᠦᠨᠡᠰᠦ ᠵᠠᠶᠠᠭᠠᠨᠠ 》 ᠭᠡᠳᠡᠭ ᠬᠠᠭᠤᠴᠢ ᠦᠭᠡᠨ ᠦ᠌ ᠲᠠᠢᠯᠤᠮᠵᠢ ᠡᠨᠡ ᠪᠠᠢᠬᠠ᠃ ᠳᠣᠲᠣᠷᠠ ᠣᠷᠣᠨ ᠤ᠋ ᠲᠠᠷᠢᠶᠠᠴᠢᠳ ᠲᠣᠷᠭᠠᠭᠳᠠᠵᠤ ᠪᠠᠢᠭᠰᠠᠨ ᠴᠤ᠌ ᠬᠡᠳᠦᠨ ᠬᠡᠦᠬᠡᠳ ᠠᠪᠤᠭᠠᠳ ᠪᠠᠢᠳᠠᠭ᠂ ᠮᠠᠨ ᠤ᠋ ᠮᠠᠯᠴᠢᠳ ᠬᠠᠤᠯᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠲᠡᠢ ᠬᠣᠶᠠᠷ ᠭᠤᠷᠪᠠᠬᠠᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠴᠦ᠍ ᠠᠪᠬᠤ ᠦᠭᠡᠢ ᠪᠠᠢᠬᠤ ᠨᠢ ᠲᠣᠩ ᠬᠠᠴᠢᠨ ᠶᠤᠮ ᠠ!
ᠲᠡᠭᠡᠬᠦ ᠪᠡᠷ ᠮᠣᠩᠭᠣᠯ ᠲᠦᠮᠡᠨ ᠮᠠᠨᠢ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠥᠯᠥᠭᠡ᠂ ᠨᠡᠢᠭᠡᠮ ᠦ᠋ᠨ ᠲᠥᠯᠥᠭᠡ ᠬᠠᠤᠯᠢ ᠶᠣᠰᠣᠨ ᠤ᠋ ᠬᠡᠪᠴᠢᠶᠡᠨ ᠳᠣᠲᠣᠷᠠ ᠨᠠᠭᠠᠳᠤ ᠵᠠᠬᠠ ᠳ᠋ᠤ᠌ ᠪᠠᠨ ᠬᠣᠶᠠᠷ ᠬᠡᠦᠬᠡᠳ ᠠᠪᠴᠤ ᠪᠠᠢᠭᠠᠷᠠᠢ᠂ ᠬᠡᠦᠬᠡᠳ ᠦ᠋ᠨ ᠪᠠᠭᠠ ᠨᠠᠰᠤᠨ ᠤ᠋ ᠪᠠᠶᠠᠷ ᠵᠢᠷᠭᠠᠯ ᠳ᠋ᠤ᠌ ᠰᠠᠨᠠᠭᠠ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠢᠯᠡᠭᠦᠬᠡᠨ ᠲᠠᠯᠪᠢᠵᠤ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠶᠡ ᠬᠤᠷᠠᠭ ᠤ᠋ᠨ ᠬᠢᠨᠢ ᠨᠠᠢᠵᠠ ᠨᠠᠷ ᠲᠠᠢ ᠨᠢ ᠢᠯᠡᠭᠦᠬᠡᠨ ᠬᠠᠮᠲᠤ ᠨᠠᠭᠠᠳᠤᠭᠤᠯᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠰᠠᠨᠠᠭᠤᠯᠤᠶᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠰᠬᠠ
ᠦᠰᠦᠭ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ