ᠲᠤᠩᠭᠠᠯᠠᠭ ᠲᠠᠮᠢᠷ4-08-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1319《ᠪᠤᠷᠤᠭᠤ ᠬᠠᠷᠠᠵᠤ ᠤᠬᠢᠯᠠᠨ᠂ ᠵᠥᠪ ᠬᠠᠷᠠᠵᠤ ᠢᠨᠢᠶᠡᠨ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠨᠠᠢ᠍ᠮᠠ
ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠲᠠᠪᠠᠲᠠᠢ ᠰᠠᠢᠬᠠᠨ ᠡᠪᠦᠯᠵᠢᠵᠦ ᠬᠥᠷᠥᠩᠭᠡ ᠨᠢ ᠠᠷᠪᠢᠵᠢᠨ᠂ ᠡᠵᠡᠨ ᠦ᠌ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠠᠢᠯᠠ᠃ ᠡᠨᠡ ᠬᠣᠲᠠ ᠠᠢᠯ ᠤ᠋ᠨ ᠠᠮᠢᠳᠤᠷᠠᠯ ᠢ᠋ ᠰᠦᠷᠦᠩ ᠬᠡᠦᠬᠡᠨ ᠬᠥᠲᠥᠯᠵᠦ᠂ ᠢᠲᠡᠭᠡᠯᠲᠦ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠬᠦ᠂ ᠥᠷᠢ ᠰᠢᠷᠢ ᠨᠡᠬᠡᠬᠦ ᠵᠡᠷᠭᠡ ᠭᠠᠳᠠᠭᠤᠷ ᠠᠵᠢᠯ ᠢ᠋ ᠪᠦᠲᠦᠭᠡᠨᠡ᠃ ᠪᠠᠰᠠ ᠵᠠᠷᠢᠮ ᠳ᠋ᠠᠭᠠᠨ ᠣᠯᠠᠨ ᠲᠠᠢ ᠨᠡᠢᠯᠡᠵᠦ ᠠᠩ ᠬᠦᠷᠦᠭᠡ ᠬᠥᠭᠡᠭᠡᠴᠡᠯᠳᠦᠨᠡ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠬᠣᠶᠠᠷ ᠤᠳᠠᠭᠠ ᠦᠨᠡᠭᠡᠨ ᠦ᠌ ᠠᠪᠠ ᠬᠢᠭᠰᠡᠨ ᠪᠠ ᠵᠢᠩ ᠳ᠋ᠦ᠍ ᠶᠠᠪᠤᠬᠤ ᠶ᠋ᠢᠨ ᠡᠮᠦᠨᠡ ᠴᠢᠨᠣᠠ ᠠᠪᠠᠯᠠᠵᠠᠢ᠃ ᠳᠠᠷᠠᠭᠠ ᠨᠢ ᠬᠣᠲᠠ ᠶᠠᠪᠤᠵᠤ ᠰᠢᠷᠠ ᠲᠣᠰᠣ᠂ ᠰᠦ ᠵᠡᠷᠭᠡ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠮᠠᠢᠮᠠᠢ ᠬᠢᠬᠦ ᠶ᠋ᠢᠨ ᠭᠠᠳᠠᠨᠠ ᠠᠮᠪᠠᠨ ᠱᠠᠷ ᠬᠡᠳᠦ ᠶ᠋ᠢ ᠵᠠᠷᠤᠭᠠᠳ ᠢᠷᠡᠵᠡᠢ᠃
ᠰᠣᠯᠣᠩᠭᠠ ᠶ᠋ᠢᠨ ᠬᠡᠦᠬᠡᠳ ᠬᠡᠵᠢᠶᠡ ᠬᠡᠵᠢᠶᠡ ᠦᠭᠡᠢ ᠭᠠᠷᠬᠤ ᠪᠣᠯᠪᠠ᠃ 《ᠬᠦᠦ ᠮᠢᠨᠢ ᠬᠥᠳᠡᠯᠵᠦ ᠯᠡ ᠪᠠᠢ᠃ ᠬᠡᠦᠬᠡᠳ ᠭᠡᠳᠡᠰᠦᠨ ᠳᠣᠲᠣᠷᠠ ᠪᠠᠨ ᠲᠠᠷᠭᠤᠯᠠᠴᠢᠬᠠᠪᠠᠯ ᠭᠠᠷᠬᠤ ᠳ᠋ᠠᠭᠠᠨ ᠵᠣᠪᠠᠭᠠᠳᠠᠭ ᠶᠤᠮ!》 ᠭᠡᠵᠦ ᠳᠤᠯᠵᠢᠨ ᠴᠠᠭ ᠦᠷᠭᠦᠯᠵᠢ ᠬᠡᠯᠡᠳᠡᠭ ᠪᠣᠯᠬᠣᠷ ᠰᠣᠯᠣᠩᠭᠠ ᠬᠣᠲᠠ ᠠᠷᠢᠯᠭᠠᠬᠤ᠂ ᠦᠨᠢᠶᠡ ᠰᠠᠭᠠᠬᠤ ᠵᠡᠷᠭᠡ ᠠᠵᠢᠯ ᠡᠴᠡ ᠬᠣᠴᠣᠷᠳᠠᠭ ᠦᠭᠡᠢ ᠪᠠᠢᠯᠠ᠃
ᠪᠠᠲᠤ ᠶ᠋ᠢ ᠶᠠᠪᠤᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠳᠡᠨ ᠦ᠌ ᠭᠡᠷ ᠢ᠋ ᠪᠠᠭᠤᠯᠭᠠᠵᠤ ᠬᠦᠷᠢᠶᠡᠨ ᠳᠡᠭᠡᠷᠡ ᠠᠪᠠᠴᠢᠭᠠᠳ ᠬᠤᠷᠢᠶᠠᠭᠰᠠᠨ ᠤᠴᠢᠷ ᠰᠣᠯᠣᠩᠭᠠ ᠶᠡᠬᠡ ᠭᠡᠷ ᠲᠦ᠍ ᠪᠠᠢᠳᠠᠭ ᠪᠣᠯᠪᠠ᠃ ᠬᠠᠷᠢᠨ ᠠᠷᠪᠠᠭᠠᠳ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠬᠣᠩᠭᠣᠷ ᠣᠲᠣᠷ ᠤ᠋ᠨ ᠠᠳᠤᠭᠤᠨ ᠳᠡᠭᠡᠷᠡ ᠣᠴᠢᠬᠤ ᠨᠡᠷᠡ ᠪᠡᠷ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠰᠦᠷᠦᠩ ᠳ᠋ᠦ᠍ ᠬᠠᠨᠢ ᠪᠣᠯᠵᠤ ᠬᠣᠩᠭᠣᠷ ᠤ᠋ᠨ ᠭᠡᠷ ᠲᠦ᠍ ᠬᠣᠨᠣᠳᠠᠭ ᠪᠣᠯᠵᠠᠢ᠃
ᠨᠢᠭᠡ ᠡᠳᠦᠷ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠡᠯᠢᠭᠡᠨ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠵᠠᠯᠠᠭᠤ ᠢᠷᠡᠯᠡ᠃ ᠡᠨᠡ ᠪᠣᠯ ᠵᠢᠷᠭᠠᠯ ᠪᠠᠢᠯᠠ᠃ ᠪᠠᠲᠤ ᠲᠡᠭᠦᠨ ᠢ᠋ ᠠᠢᠮᠠᠭ ᠤᠷᠤᠭᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠮᠥᠩᠭᠥ ᠠᠪᠬᠤ ᠪᠠᠷ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ ᠵᠠᠮ ᠮᠤᠷᠤᠢᠵᠤ ᠰᠣᠯᠣᠩᠭᠠ ᠲᠠᠢ ᠠᠭᠤᠯᠵᠠᠭᠠᠳ ᠢᠷᠡᠬᠦ ᠶ᠋ᠢ ᠵᠠᠬᠢᠵᠠᠢ᠃ ᠮᠥᠨ ᠰᠣᠯᠣᠩᠭᠠ ᠳ᠋ᠤ᠌ ᠵᠠᠬᠢᠶᠠ ᠪᠠᠰᠠ ᠳᠡᠪᠡᠯ ᠦ᠋ᠨ ᠲᠣᠷᠭᠠ ᠵᠡᠷᠭᠡ ᠶᠠᠭᠤᠮᠠ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ᠃
ᠰᠣᠯᠣᠩᠭᠠ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠵᠤ ᠪᠠᠲᠤ ᠶ᠋ᠢᠨ ᠬᠠᠯᠠᠭᠤᠨ ᠳᠣᠲᠣᠨᠣ ᠶ᠋ᠢᠨ ᠦᠭᠡ ᠲᠡᠢ ᠵᠠᠬᠢᠶᠠ ᠶ᠋ᠢ ᠵᠢᠷᠭᠠᠯ ᠢ᠋ᠶ᠋ᠠᠷ ᠬᠡᠳᠦ ᠳᠠᠬᠢᠨ ᠤᠩᠰᠢᠭᠤᠯᠬᠤ ᠳ᠋ᠠᠭᠠᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠪᠠᠢᠪᠠ᠃
ᠪᠠᠲᠤ ᠶ᠋ᠢᠨ ᠡᠯᠴᠢ ᠢᠷᠡᠭᠰᠡᠨ ᠳ᠋ᠦ᠍ ᠢᠲᠡᠭᠡᠯᠲᠦ ᠢᠯᠡᠷᠬᠡᠢ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠴᠦ᠍ ᠦᠭᠡᠢ ᠂ ᠭᠡᠬᠦ ᠳ᠋ᠡᠭᠡᠨ ᠪᠠᠶᠠᠷᠯᠠᠭᠰᠠᠨ ᠦᠭᠡᠢ᠃ ᠡᠪᠦᠯ ᠦ᠋ᠨ ᠤᠷᠲᠤ ᠰᠥᠨᠢ ᠤᠢᠳᠤᠭᠰᠠᠨ ᠰᠦᠷᠦᠩ᠂ ᠰᠣᠯᠣᠩᠭᠠ ᠬᠣᠶᠠᠷ ᠵᠢᠷᠭᠠᠯ ᠲᠠᠢ ᠱᠠᠭᠠ ᠰᠢᠭᠦᠷᠴᠤ ᠬᠤᠵᠢᠷᠬᠠᠢ ᠪᠠᠨ ᠲᠠᠨᠢᠲᠠᠯᠠ ᠲᠣᠭᠯᠠᠪᠠ᠃
ᠢᠷᠡᠬᠦ ᠳ᠋ᠡᠭᠡᠨ ᠮᠠᠷᠭᠠᠰᠢ ᠶᠠᠪᠤᠨᠠ ᠭᠡᠵᠦ ᠪᠠᠢᠭᠰᠠᠨ ᠵᠢᠷᠭᠠᠯ᠂ ᠮᠠᠷᠭᠠᠰᠢ ᠨᠢ ᠪᠣᠯᠬᠤ ᠪᠠᠷ ᠳᠠᠬᠢᠨ ᠨᠢᠭᠡ ᠬᠣᠨᠣᠵᠤ ᠮᠣᠷᠢ ᠪᠠᠨ ᠠᠮᠠᠷᠠᠭᠠᠭᠠᠳ ᠶᠠᠪᠤᠶᠠ ᠭᠡᠯᠡ᠃ ᠭᠡᠪᠡᠴᠦ ᠦᠨᠡᠨ ᠤᠴᠢᠷ ᠡᠭᠦᠨ ᠳ᠋ᠦ᠍ ᠪᠢᠰᠢ ᠪᠠᠢᠯᠠ᠃
ᠰᠦᠷᠦᠩ ᠦ᠋ᠨ ᠬᠥᠭᠵᠢᠭᠦᠨ ᠵᠠᠳᠠᠭᠠᠢ ᠠᠭᠠᠰᠢ᠂ ᠲᠣᠷᠮᠣᠯᠵᠠᠭᠰᠠᠨ ᠬᠠᠷᠠ ᠨᠢᠳᠦ᠂ ᠨᠢᠮᠭᠡᠨ ᠴᠠᠭᠠᠨ ᠴᠢᠷᠠᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠨᠳᠡᠵᠡᠢ᠃ ᠬᠣᠩᠭᠣᠷ ᠤ᠋ᠨ ᠲᠡᠨᠦᠮᠡᠯ ᠠᠮᠢᠳᠤᠷᠠᠯ᠂ ᠢᠯᠠᠩᠭᠤᠶᠠ ᠲᠡᠷᠡᠪᠢᠰᠢ ᠬᠡᠦᠬᠡᠨ ᠲᠡᠢ ᠬᠢᠭᠰᠡᠨ ᠨᠢᠭᠦᠯ ᠳ᠋ᠦ᠍ ᠬᠣᠷᠣ ᠨᠢ ᠬᠥᠳᠡᠯᠵᠦ ᠪᠠᠢᠭᠰᠠᠨ ᠰᠦᠷᠦᠩ ᠴᠦ᠍ ᠬᠦᠷᠡᠩ ᠪᠣᠷᠣ ᠴᠢᠷᠠᠢᠲᠠᠢ᠂ ᠪᠦᠳᠦᠭᠦᠨ ᠬᠠᠩᠬᠠᠷ ᠪᠡᠶᠡᠲᠡᠢ ᠵᠠᠯᠠᠭᠤ ᠪᠠᠭᠰᠢ ᠶ᠋ᠢ ᠠᠩᠬᠠᠷᠬᠤ ᠦᠭᠡᠢ ᠥᠩᠭᠡᠷᠡᠭᠡᠬᠦ ᠦᠭᠡᠢ ᠪᠢᠯᠡ᠃
ᠬᠣᠶᠠᠷ ᠵᠠᠯᠠᠭᠤ ᠬᠥᠮᠦᠨ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠲᠠᠯᠠ ᠲᠠᠢ ᠪᠣᠯ ᠲᠡᠭᠦᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠥᠩᠭᠡᠷᠡᠬᠦ ᠨᠢ ᠲᠤᠩ ᠬᠣᠪᠣᠷ ᠪᠠᠢᠳᠠᠭ ᠪᠢᠯᠡ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠱᠠᠭᠠ ᠲᠣᠭᠯᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠰᠦᠷᠦᠩ ᠢ᠋ ᠣᠢᠯᠠᠭᠠᠭᠰᠠᠨ ᠵᠢᠷᠭᠠᠯ ᠳᠠᠬᠢᠨ ᠨᠢᠭᠡ ᠬᠣᠨᠣᠭᠠᠳ ᠶᠠᠪᠤᠬᠤ ᠪᠠᠷ ᠰᠢ᠌ᠤᠠᠴᠠᠢ᠃ ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠳ᠋ᠤ᠌ ᠶᠠᠭᠤ ᠡᠰᠡ ᠲᠣᠬᠢᠶᠠᠯᠳᠤᠬᠤ ᠪᠣᠢ᠃
ᠢᠩᠭᠢᠭᠡᠳ ᠣᠷᠣᠢ ᠨᠢ ᠶᠡᠬᠡ ᠭᠡᠷ ᠲᠦ᠍ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠲᠠᠯᠠ ᠰᠣᠯᠣᠩᠭᠠ ᠳᠤᠩᠰᠢᠨ ᠡᠪᠡᠳᠴᠦ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠥᠨᠥ ᠰᠥᠨᠢ ᠲᠣᠭᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ᠂ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠤᠨᠲᠠ ᠭᠡᠵᠦ ᠳᠤᠯᠵᠢᠨ ᠬᠡᠯᠡᠵᠡᠢ᠃
ᠳᠤᠯᠵᠢᠨ ᠤ᠋ ᠡᠨᠡ ᠦᠭᠡ ᠶ᠋ᠢ ᠰᠦᠷᠦᠩ ᠳᠣᠣᠷᠠ ᠨᠢ ᠠᠰᠢᠭᠯᠠᠵᠤ 《ᠲᠠ ᠨᠠᠳᠠ ᠲᠠᠢ ᠬᠠᠨᠢ ᠪᠣᠯᠵᠤ ᠮᠠᠨ ᠤ᠋ ᠳ᠋ᠤ᠌ ᠤᠨᠲᠠᠭᠠᠴᠢ》 ᠭᠡᠵᠦ ᠵᠢᠷᠭᠠᠯ ᠡᠴᠡ ᠭᠤᠶᠤᠪᠠ᠃
ᠡᠨᠡ ᠦᠭᠡ ᠶ᠋ᠢᠨ ᠳᠠᠯᠳᠠ ᠤᠴᠢᠷ ᠢ᠋ ᠣᠢᠯᠠᠭᠠᠭᠰᠠᠨ ᠢᠲᠡᠭᠡᠯᠲᠦ 《ᠪᠦᠭᠦᠳᠡ ᠯᠡ ᠡᠨᠳᠡ ᠪᠡᠨ ᠤᠨᠲᠠᠶᠠ᠃ ᠰᠥᠨᠢ ᠰᠣᠯᠣᠩᠭᠠ ᠬᠥᠩᠭᠡᠷᠡᠬᠦ ᠪᠣᠯᠪᠠᠯ ᠪᠦᠭᠦᠳᠡ ᠪᠠᠢ᠌ᠯ ᠦᠭᠡᠢ ᠪᠣᠯᠬᠤ ᠦᠭᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠢ ᠦᠭᠡᠢ ᠪᠠᠢᠯᠭᠦᠢ ᠳᠡ᠃ ᠭᠡᠷ ᠡᠵᠡᠨ ᠦᠭᠡᠢ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ᠂ ᠰᠣᠯᠣᠩᠭᠠ ᠡᠪᠡᠳᠪᠡᠯ ᠳᠠᠭᠤᠳᠠᠭᠠᠷᠠᠢ ᠭᠡᠳ ᠰᠦᠷᠦᠩ ᠵᠢᠷᠭᠠᠯ ᠢ᠋ ᠳᠠᠭᠠᠭᠤᠯᠤᠨ ᠶᠠᠪᠤᠵᠠᠢ᠃
ᠠᠬᠠ ᠶ᠋ᠢᠨ ᠬᠢᠨᠢ ᠡᠬᠡᠨᠡᠷ ᠨᠥᠬᠥᠷ ᠦ᠋ᠨ ᠬᠢᠨᠢ ᠨᠠᠢᠵᠠ ᠲᠠᠢ ᠨᠢᠭᠡ ᠯᠡ ᠪᠢᠰᠢ ᠶ᠋ᠢ ᠬᠠᠷᠠᠭᠠᠳ ᠰᠣᠯᠣᠩᠭᠠ ᠬᠠᠷᠠᠳᠠᠬᠤ ᠰᠡᠳᠬᠢᠯ ᠲᠥᠷᠥᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠳᠤᠩᠰᠢᠨ ᠡᠪᠡᠳᠵᠦ ᠪᠠᠢᠭᠰᠠᠨ ᠡᠴᠡ ᠰᠦᠷᠦᠩ᠂ ᠵᠢᠷᠭᠠᠯ ᠬᠣᠶᠠᠷ ᠢ᠋ ᠭᠠᠷᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠰᠠᠭᠠᠳ ᠬᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠷᠣ ᠬᠥᠳᠡᠯᠵᠦ ᠠᠷᠭᠠ ᠨᠢ ᠪᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠠᠪᠠᠴᠤ ᠪᠡᠷᠢ ᠳ᠋ᠡᠭᠡᠨ ᠲᠡᠭᠦᠨ ᠢ᠋ ᠪᠡᠨ ᠬᠡᠷᠬᠢᠨ ᠢᠯᠡ ᠭᠠᠷᠭᠠᠵᠤ ᠪᠣᠯᠬᠤ ᠪᠢᠯᠡ᠃ ᠪᠠᠰᠠ ᠲᠡᠭᠡᠭᠡᠳ ᠳᠤᠯᠵᠢᠨ ᠤ᠋ ᠠᠮᠠ ᠠᠰᠠᠭᠤᠯᠲᠠ ᠡᠴᠡ ᠵᠢᠪᠡᠭᠦᠴᠡᠵᠦ ᠪᠠᠢᠯᠠ᠃
ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠬᠣᠩᠭᠣᠷ ᠤ᠋ᠨ ᠭᠡᠷ ᠲᠦ᠍ ᠵᠢᠷᠭᠠᠯ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠵᠠᠰᠠᠭᠰᠠᠨ ᠣᠷᠣ ᠬᠣᠭᠣᠰᠣᠷᠠᠵᠤ ᠰᠦᠷᠦᠩ ᠵᠢᠷᠭᠠᠯ ᠬᠣᠶᠠᠷ ᠬᠠᠮᠲᠤ ᠬᠡᠪᠲᠡᠪᠡ᠃
ᠵᠢᠷᠭᠠᠯ ᠳ᠋ᠤ᠌ ᠬᠣᠯᠠ ᠶ᠋ᠢᠨ ᠰᠡᠳᠬᠢᠯ ᠡᠷᠭᠢᠯᠳᠦᠵᠦ ᠪᠠᠢᠯᠠ᠃ ᠰᠦᠷᠦᠩ ᠢ᠋ ᠬᠣᠩᠭᠣᠷ ᠡᠴᠡ ᠰᠠᠯᠭᠠᠵᠤ ᠰᠠᠭᠤᠬᠤ ᠲᠤᠬᠠᠢ ᠴᠤ᠌ ᠪᠣᠳᠣᠭᠳᠠᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠭᠡᠳᠡᠭ ᠬᠥᠮᠦᠨ ᠬᠠᠨᠢ ᠢᠵᠢᠯᠢ ᠪᠠᠢᠬᠤ ᠦᠭᠡᠢ ᠭᠡᠵᠦ ᠵᠢᠷᠭᠠᠯ ᠲᠦᠭᠳᠡᠴᠢᠨ ᠬᠡᠯᠡᠬᠦ ᠳ᠋ᠦ᠍ ᠰᠦᠷᠦᠩ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠤᠭᠠᠳ ᠯᠠ ᠠᠪᠬᠤ ᠦᠭᠡᠢ ᠤᠤ᠂ ᠨᠥᠬᠥᠷ ᠦᠭᠡᠢ ᠰᠠᠢᠬᠠᠨ ᠬᠡᠦᠬᠡᠨ ᠨᠦ᠍ᠭᠦᠳ ᠠᠯᠢ ᠶ᠋ᠢ ᠨᠢ ᠲᠡᠷᠡ ᠭᠡᠬᠦ ᠪᠣᠢ ᠭᠡᠯᠡ᠃
ᠰᠦᠷᠦᠩ ᠦ᠋ᠨ ᠬᠤᠪᠢ ᠳ᠋ᠤ᠌ ᠪᠣᠯ ᠵᠢᠷᠭᠠᠯ ᠲᠠᠢ ᠰᠠᠭᠤᠬᠤ ᠲᠤᠬᠠᠢ ᠪᠣᠳᠣᠯ ᠣᠭᠲᠣ ᠪᠠᠢᠬᠤ ᠦᠭᠡᠢ᠃ ᠵᠥᠪᠬᠡᠨ ᠬᠣᠩᠭᠣᠷ ᠡᠴᠡ ᠬᠠᠷᠢᠭᠤ ᠪᠠᠨ ᠠᠪᠬᠤ ᠲᠤᠬᠠᠢ ᠯᠠ ᠪᠣᠳᠣᠭᠰᠠᠨ᠃ ᠲᠡᠷᠡ ᠴᠦ᠍ ᠤᠴᠢᠷ ᠡᠴᠡ 《ᠬᠤᠪᠤᠨ ᠬᠠᠷᠠ ᠴᠢ ᠨᠠᠮᠠᠶ᠋ᠢ ᠳᠠᠷᠤᠯᠠᠳᠠᠭ ᠪᠢᠯᠡ ᠤᠤ? ᠪᠢ ᠴᠢᠨᠦ ᠪᠣᠭᠣᠯ ᠴᠢᠨᠢ ᠪᠢᠰᠢ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠢᠭᠰᠠᠨ ᠬᠠᠷᠠ ᠪᠥᠭᠯᠡᠭᠡ ᠠᠯᠠᠭᠠ ᠪᠣᠯᠤᠭᠰᠠᠨ ᠰᠢᠭ᠋ ᠨᠢᠭᠡ ᠯᠡ ᠠᠶᠠᠲᠠᠢᠬᠠᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠣᠳᠣ ᠣᠷᠣᠨ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠤᠨᠲᠠ᠃ ᠮᠠᠨ ᠤ᠋ ᠠᠪᠤ ᠬᠦᠷᠦᠭᠡᠳ ᠢᠷᠡᠬᠦ ᠬᠥᠮᠦᠨ ᠰᠢᠦ ᠭᠡᠵᠦ ᠵᠢᠷᠭᠠᠯ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠨ ᠬᠡᠯᠡᠲᠡᠯᠡ ᠲᠦᠭᠵᠢᠶᠡᠲᠡᠢ ᠡᠭᠦᠳᠡ ᠲᠦᠯᠬᠢᠬᠦ ᠴᠢᠮᠡᠭᠡ ᠭᠠᠷᠤᠯᠠ᠃
ᠵᠢᠷᠭᠠᠯ ᠤᠬᠤᠰᠬᠢᠨ ᠪᠣᠰᠴᠤ ᠵᠠᠰᠠᠭᠰᠠᠨ ᠣᠷᠣᠨ ᠳ᠋ᠠᠭᠠᠨ ᠣᠷᠣᠯᠠ᠃ ᠰᠦᠷᠦᠩ ᠰᠡᠷᠢᠵᠦ ᠪᠠᠢᠭᠠ ᠳᠦᠷᠰᠦ ᠦᠵᠡᠭᠦᠯᠵᠦ ᠴᠢᠩᠭᠠ ᠭᠡᠭᠴᠢ ᠨᠢ ᠲᠠᠮᠰᠢᠶᠠᠯᠠᠭᠰᠠᠨ ᠢ᠋ᠶ᠋ᠠᠨ 《ᠬᠡᠨ ᠪᠣᠢ?》 ᠭᠡᠵᠦ ᠨᠣᠢᠷᠮᠤᠭ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠪᠠᠢᠨᠠ᠃ ᠰᠣᠯᠣᠩᠭᠠ ᠨᠢᠭᠡ ᠯᠡ ᠪᠢᠰᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠪᠡ᠃
ᠰᠦᠷᠦᠩ ᠪᠣᠰᠴᠤ ᠳ᠋ᠧᠩ ᠪᠠᠷᠢᠭᠠᠳ ᠬᠠᠭᠠᠯᠭᠠ ᠳᠠᠢᠯᠠᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠣᠷᠣᠵᠤ ᠢᠷᠡᠭᠡᠳ ᠬᠡᠪᠲᠡᠵᠦ ᠪᠠᠢᠭᠠ ᠵᠢᠷᠭᠠᠯ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠣᠭᠵᠣᠮ ᠡᠷᠭᠢᠵᠦ ᠰᠦᠷᠦᠩ ᠢ᠋ ᠠᠵᠢᠭᠯᠠᠪᠠ᠃
ᠰᠦᠷᠦᠩ ᠦ᠋ᠨ ᠴᠢᠷᠠᠢ ᠴᠢᠨᠦᠷᠡᠭᠡᠳ ᠢᠷᠡᠯᠡ᠃ ᠭᠡᠪᠡᠴᠦ ᠵᠢᠵᠢᠭᠬᠡᠨ ᠳ᠋ᠧᠩ ᠦ᠋ᠨ ᠪᠦᠭᠳᠤ ᠭᠡᠷᠡᠯ ᠲᠡᠭᠦᠨ ᠢ᠋ ᠨᠢᠭᠤᠵᠤ ᠴᠢᠳᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤᠬᠢ ᠦᠰᠦ ᠲᠣᠯᠣᠭᠠᠢ ᠪᠠᠨ ᠭᠡᠵᠦ ᠢᠲᠡᠭᠡᠯᠲᠦ ᠪᠡᠷᠢ ᠪᠡᠨ ᠵᠢᠪᠡᠭᠦᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤᠬᠠᠢ ᠵᠡᠭᠦᠳᠦᠯᠡᠵᠦ᠂ ᠬᠠᠷᠠ ᠳᠠᠷᠤᠭᠠᠳ ᠭᠡᠵᠦ ᠰᠦᠷᠦᠩ ᠰᠤᠯᠠᠬᠠᠨ ᠳᠠᠭᠤ ᠪᠠᠷ ᠬᠡᠯᠡᠭᠡᠳ᠂ ᠦᠰᠦ ᠪᠡᠨ ᠢᠯᠢᠭᠰᠡᠨ ᠢ᠋ᠶ᠋ᠡᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠯᠣᠩᠭᠠ ᠶᠠᠭᠠᠬᠢᠵᠤ ᠪᠠᠢᠨᠠ᠂ ᠠᠪᠤ ᠠ᠋ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠯᠡ ᠪᠢᠰᠢ᠂ ᠴᠢ ᠣᠴᠢᠵᠤ ᠦᠵᠡ ᠭᠡᠬᠦ ᠵᠠᠪᠰᠠᠷ ᠢ᠋ᠶ᠋ᠠᠷ ᠢᠲᠡᠭᠡᠯᠲᠦ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢ ᠳᠠᠬᠢᠨ ᠠᠵᠢᠭᠯᠠᠪᠠ᠃ ᠰᠡᠵᠢᠭ ᠲᠡᠢ ᠶᠠᠭᠤᠮᠠ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃
ᠰᠦᠷᠦᠩ ᠱᠠᠯᠠᠪᠬᠠᠨ ᠪᠦᠰᠡ ᠪᠡᠨ ᠪᠦᠰᠡᠯᠡᠭᠡᠳ ᠰᠢᠭᠤᠳ ᠶᠡᠬᠡ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠠᠭᠠᠨ ᠦᠰᠦ ᠲᠣᠯᠣᠭᠠᠢ ᠪᠠᠨ ᠶᠠᠩᠵᠤᠯᠠᠪᠠ᠃
ᠢᠲᠡᠭᠡᠯᠲᠦ ᠬᠡᠪᠲᠡᠵᠦ ᠪᠠᠢᠭᠠ ᠵᠢᠷᠭᠠᠯ ᠢ᠋ ᠵᠢᠭᠰᠢᠯᠲᠡᠢ ᠪᠡᠷ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠡᠭᠳᠡᠭᠦᠦ ᠲᠡᠢ ᠳᠠᠭᠤ ᠪᠠᠷ 《ᠥᠨᠥ ᠰᠥᠨᠢ ᠴᠦ᠍ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠢ᠋ ᠲᠠᠪᠠᠲᠠᠢ ᠬᠣᠨᠣᠭᠤᠯᠬᠤ ᠦᠭᠡᠢ ᠨᠢ ᠪᠣᠯᠤᠯᠲᠠᠢ》 ᠭᠡᠵᠦ ᠬᠡᠯᠡᠭᠡᠳ ᠡᠮᠦᠨᠡ ᠨᠢ ᠣᠴᠢᠵᠤ ᠰᠠᠭᠤᠨ ᠨᠢᠭᠤᠷ ᠤᠷᠤᠭᠤ ᠨᠢ ᠵᠢᠪᠡᠭᠦᠨ ᠰᠢᠷᠳᠡᠪᠡ᠃
《ᠡᠨᠡ ᠡᠪᠦᠭᠡᠨ ᠴᠢᠨᠢ ᠲᠣᠯᠣᠭᠠᠢ ᠤᠷᠤᠭᠤ ᠴᠣᠬᠢᠭᠠᠳ ᠠᠪᠬᠤ ᠨᠢ ᠤᠤ?》 ᠭᠡᠵᠦ ᠵᠢᠷᠭᠠᠯ ᠳ᠋ᠤ᠌ ᠪᠣᠳᠣᠭᠳᠠᠨ ᠦᠯᠦ ᠮᠡᠳᠡᠭ ᠴᠠᠰᠢ ᠪᠣᠯᠪᠠ᠃
ᠢᠲᠡᠭᠡᠯᠲᠦ ᠬᠢᠬᠦ ᠶᠠᠭᠤᠮᠠ ᠪᠠᠨ ᠣᠯᠵᠤ ᠶᠠᠳᠠᠭᠰᠠᠨ ᠪᠣᠯᠤᠯᠲᠠᠢ᠃ ᠬᠦᠢᠲᠡᠨ ᠴᠠᠢ ᠨᠢᠭᠡ ᠠᠶᠠᠭᠠ ᠶ᠋ᠢ ᠤᠤᠭᠤᠬᠤ ᠵᠠᠭᠤᠷᠠ ᠵᠢᠷᠭᠠᠯ ᠤ᠋ᠨ ᠬᠤᠴᠢᠭᠰᠠᠨ ᠬᠥᠨᠵᠢᠯᠡ ᠳᠣᠲᠣᠭᠤᠷ ᠭᠠᠷ ᠢ᠋ᠶ᠋ᠠᠨ ᠠᠶᠠᠷᠬᠠᠨ ᠣᠷᠣᠭᠤᠯᠵᠤ ᠳᠡᠪᠢᠰᠬᠡᠷ ᠢ᠋ ᠪᠠᠷᠢᠵᠤ ᠦᠵᠡᠪᠡ᠃ ᠥᠨᠥ ᠰᠠᠶᠢᠬᠠᠨ ᠬᠡᠪᠲᠡᠭᠰᠡᠨ ᠡᠴᠡ ᠪᠦᠯᠢᠶᠡᠴᠡᠵᠦ ᠠᠮᠵᠢᠭᠠ ᠦᠭᠡᠢ ᠬᠦᠢᠲᠡᠨ ᠳᠡᠪᠢᠰᠬᠡᠷ ᠭᠠᠷ ᠲᠤᠨᠢ ᠪᠠᠷᠢᠭᠳᠠᠪᠠ᠃ ᠢᠲᠡᠭᠡᠯᠲᠦ ᠤᠳᠠᠭᠠᠨ ᠪᠣᠰᠴᠤ ᠳ᠋ᠧᠩ ᠢ᠋ ᠣᠠᠳᠠᠷᠭᠠᠵᠤ ᠣᠷᠬᠢᠭᠠᠳ ᠭᠠᠷᠤᠯᠠ᠃
ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠡᠨᠡ ᠵᠢᠯ ᠵᠣᠷᠢᠭᠤᠳᠠ ᠬᠠᠶᠠᠭᠠᠨ ᠳ᠋ᠠᠭᠠᠨ ᠪᠠᠭᠤᠯᠭᠠᠭᠰᠠᠨ ᠲᠤᠷᠰᠢᠯᠭᠠᠲᠠᠢ ᠡᠬᠡ ᠪᠠᠷᠢᠭᠴᠢ ᠴᠢᠪᠠᠭᠠᠨᠴᠠ ᠶ᠋ᠢ ᠰᠡᠷᠢᠭᠡᠵᠦ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠭᠰᠠᠨ ᠪᠢᠯᠡ᠃
ᠦᠷ ᠴᠡᠢᠭᠰᠡᠨ ᠡᠴᠡ ᠬᠣᠢᠨᠠᠬᠠᠨ ᠴᠠᠰ ᠭᠡᠰᠡᠨ ᠳᠠᠭᠤ ᠪᠠᠨ ᠡᠷᠭᠦᠨ ᠴᠠᠩᠭᠢᠨᠠᠭᠤᠯᠤᠭᠰᠠᠭᠠᠷ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠰᠢᠨᠡ ᠬᠥᠮᠦᠨ᠂ ᠰᠢᠨᠡ ᠬᠦᠦ ᠮᠡᠨᠳᠦᠯᠡᠪᠡ᠃
ᠮᠠᠷᠭᠠᠰᠢ ᠨᠢ ᠵᠢᠷᠭᠠᠯ ᠶᠣᠰᠣᠲᠠᠢ ᠯᠠ ᠪᠤᠷᠤᠭᠤ ᠬᠠᠷᠠᠵᠤ ᠤᠬᠢᠯᠠᠨ᠂ ᠵᠥᠪ ᠬᠠᠷᠠᠵᠤ ᠢᠨᠢᠶᠡᠨ ᠶᠠᠪᠤᠯᠠ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠡᠴᠡ ᠰᠦᠷᠦᠩ ᠣᠭᠲᠣ ᠭᠠᠷᠬᠤ ᠦᠭᠡᠢ ᠪᠠᠢᠯᠠ᠃ ᠬᠠᠷᠢᠨ ᠰᠦᠷᠦᠩ ᠪᠣᠯ ᠲᠡᠭᠦᠨ ᠳ᠋ᠦ᠍ ᠨᠢᠭᠤᠷ ᠥᠭᠭᠦᠭᠰᠡᠨ ᠦᠭᠡᠢ᠃
ᠵᠢᠷᠭᠠᠯ ᠪᠣᠭᠴᠣ ᠪᠠᠨ ᠠᠪᠤᠭᠠᠳ ᠮᠣᠷᠳᠠᠬᠤ ᠭᠡᠵᠦ ᠭᠡᠷ ᠡᠴᠡ ᠭᠠᠷᠬᠤ ᠳ᠋ᠠᠭᠠᠨ ᠰᠦᠷᠦᠩ ᠢ᠋ ᠬᠣᠢᠨᠠ ᠡᠴᠡ ᠭᠠᠷᠴᠤ ᠢᠷᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠦᠯᠡᠮᠵᠢ ᠭᠣᠷᠢᠳᠠᠭᠰᠠᠨ ᠪᠣᠯᠪᠠᠴᠤ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ᠃ ᠡᠪᠣᠯᠵᠢᠶᠠᠨ ᠤ᠋ ᠵᠦᠭ ᠡᠷᠭᠢᠨ ᠡᠷᠭᠢᠨ ᠬᠠᠷᠠᠭᠰᠠᠭᠠᠷ ᠰᠠᠨᠠᠭᠠ ᠠᠯᠲᠠᠨ ᠪᠠᠷᠠᠭᠤᠨ ᠬᠥᠲᠥᠯ ᠢ᠋ ᠳᠠᠪᠠᠵᠤ ᠪᠢᠯᠡ᠃
ᠰᠦᠷᠦᠩ ᠦ᠋ᠨ ᠴᠠᠭᠠᠷᠢᠭᠯᠠᠭᠰᠠᠨ ᠨᠢᠳᠦ ᠶ᠋ᠢ ᠬᠠᠷᠠᠬᠤ ᠪᠦᠷᠢ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠷᠣ ᠨᠢ ᠪᠤᠴᠠᠯᠵᠤ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ 《ᠬᠦᠦ ᠮᠢᠨᠢ ᠨᠥᠬᠥᠷ ᠢ᠋ᠶ᠋ᠡᠨ ᠡᠵᠡᠭᠦᠢ ᠳ᠋ᠦ᠍ ᠭᠡᠷ ᠲᠡᠭᠡᠨ ᠬᠥᠮᠦᠨ ᠬᠣᠨᠣᠭᠤᠯᠤᠭᠠᠳ᠂ ᠠᠮᠢᠲᠠᠨ ᠤ᠋ ᠬᠡᠯᠡ ᠠᠮᠠ ᠬᠡᠴᠡᠭᠦᠦ ᠰᠢᠦ》 ᠭᠡᠯᠡ᠃
ᠰᠦᠷᠦᠩ ᠦ᠋ᠨ ᠬᠥᠮᠥᠰᠬᠡ ᠲᠠᠲᠠᠪ ᠭᠡᠵᠦ ᠠᠯᠠᠭ ᠨᠢᠳᠦ ᠨᠢ ᠡᠷᠭᠢᠯᠳᠦᠨ ᠰᠢᠷᠪᠢᠪᠡ᠃ 《ᠲᠠ ᠨᠠᠷ ᠨᠠᠮᠠᠶ᠋ᠢ ᠬᠠᠳᠠᠮ ᠡᠵᠢ ᠰᠢᠭ ᠨᠣᠮᠣᠬᠠᠨ ᠪᠣᠭᠣᠯ ᠪᠣᠯᠭᠠᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ?》 ᠭᠡᠮᠡᠨ ᠬᠠᠳᠠᠮ ᠡᠴᠢᠭᠡ ᠲᠡᠢ ᠪᠡᠨ ᠭᠡᠷᠡᠯᠲᠦᠮᠡᠷ ᠪᠠᠢᠭᠰᠠᠨ ᠠᠪᠠᠴᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠷᠢᠨ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
ᠭᠡᠪᠡᠴᠦ ᠲᠡᠭᠦᠨ ᠦ᠌ ᠬᠠᠷᠠᠴᠠ ᠡᠴᠡ ᠳᠠᠬᠢᠨ ᠣᠯᠠᠨ ᠶᠠᠭᠤᠮᠠ ᠬᠡᠯᠡᠪᠡᠯ ᠶᠠᠭᠤ ᠴᠤ᠌ ᠪᠣᠯᠵᠤ ᠮᠠᠭᠠᠳ ᠭᠡᠵᠦ ᠣᠢᠯᠠᠭᠠᠭᠰᠠᠨ ᠢᠲᠡᠭᠡᠯᠲᠦ ᠨᠡᠮᠡᠵᠦ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠦᠭᠡᠢ᠃
ᠲᠡᠨᠳᠡ ᠡᠴᠡ ᠵᠢᠷᠭᠠᠯ ᠶᠠᠪᠤᠭᠰᠠᠭᠠᠷ ᠲᠢᠩᠬᠢᠮ ᠳᠡᠭᠡᠷᠡ ᠪᠡᠨ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠢᠷᠡᠯᠡ᠃ ᠬᠦᠦ ᠲᠡᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠲᠤ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ᠂ ᠴᠠᠭ ᠢ᠋ ᠬᠦᠯᠢᠶᠡᠯ ᠦᠭᠡᠢ ᠮᠣᠷᠳᠠᠨ ᠳᠠᠪᠬᠢᠵᠤ ᠣᠴᠢᠮᠠᠷ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠨᠢᠭᠡᠳᠦᠭᠡᠷ ᠲᠦ᠍ ᠢᠲᠡᠭᠡᠯᠲᠦ ᠳ᠋ᠦ᠍ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ᠂ ᠬᠣᠶᠠᠳᠤᠭᠠᠷ ᠲᠤ᠌ ᠲᠢᠩᠬᠢᠮ ᠦ᠋ᠨ ᠠᠵᠢᠯ ᠡᠴᠡ ᠪᠣᠯᠤᠭᠠᠳ ᠶᠠᠪᠤᠭᠰᠠᠨ ᠦᠭᠡᠢ᠃
ᠪᠠᠲᠤ ᠰᠣᠯᠣᠩᠭᠠ ᠶ᠋ᠢᠨ ᠲᠤᠬᠠᠢ᠂ ᠲᠡᠭᠦᠨ ᠦ᠌ ᠬᠡᠯᠡᠵᠦ ᠵᠠᠬᠢᠭᠰᠠᠨ ᠦᠭᠡ᠂ ᠰᠢᠨᠡ ᠲᠥᠷᠥᠭᠰᠡᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠳᠠᠬᠢᠨ ᠳᠠᠬᠢᠨ ᠰᠢᠯᠭᠠᠭᠠᠨ ᠰᠠᠭᠤᠨᠠ᠃ ᠵᠢᠷᠭᠠᠯ ᠪᠣᠯ ᠰᠦᠷᠦᠩ ᠦ᠋ᠨ ᠲᠤᠬᠠᠢ ᠶᠠᠷᠢᠮᠠᠷ ᠪᠠᠢᠪᠠᠴᠤ 《ᠪᠠᠲᠤ ᠪᠣᠯ ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠷᠭᠡᠨ᠂ ᠬᠣᠩᠭᠣᠷ ᠤ᠋ᠨ ᠪᠠᠭᠠ ᠶ᠋ᠢᠨ ᠨᠠᠢᠵᠠ》 ᠭᠡᠵᠦ ᠪᠣᠳᠣᠭᠠᠳ ᠲᠡᠮᠡᠦᠯᠦᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠤᠷᠭᠠᠯᠠᠨ ᠪᠠᠷᠢᠵᠤ ᠪᠠᠢᠯᠠ᠃
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠬᠣᠢᠲᠤ ᠰᠤᠮᠤ ᠠ᠋ᠴᠠ ᠢᠷᠡᠭᠰᠡᠨ ᠬᠣᠶᠠᠷ ᠬᠡᠦᠬᠡᠳ ᠤᠷᠭᠤᠵᠤ᠂ ᠲᠡᠳᠡᠨ ᠢ᠋ ᠬᠥᠭᠡᠭᠡᠴᠡᠯᠳᠦᠨ ᠣᠯᠵᠤ ᠢᠷᠡᠬᠦ ᠭᠡᠵᠦ ᠪᠠᠲᠤ ᠳᠥᠷᠪᠡᠨ ᠬᠣᠨᠣᠭ ᠵᠠᠷᠤᠭᠠᠳ ᠢᠷᠡᠲᠡᠯᠡ ᠭᠡᠷ ᠲᠦ᠋ᠨᠢ ᠬᠣᠩᠭᠣᠷ ᠰᠠᠭᠤᠵᠤ ᠪᠠᠢᠯᠠ᠃
ᠬᠣᠩᠭᠣᠷ ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠮᠡᠨᠳᠦᠯᠡᠭᠡᠳ ᠶᠠᠷᠢᠶᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠰᠣᠯᠣᠩᠭᠠ ᠡᠴᠡ ᠭᠠᠷᠤᠭᠰᠠᠨ ᠬᠦᠦ ᠨᠢ ᠨᠠᠰᠤ ᠪᠠᠷᠠᠭᠰᠠᠨ ᠲᠤᠬᠠᠢ ᠭᠠᠰᠢᠭᠤᠨ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠬᠠᠪᠠ᠃
ᠪᠠᠲᠤ ᠶ᠋ᠢᠨ ᠳᠣᠲᠣᠷᠠ ᠬᠠᠷᠠᠩᠭᠤᠢᠯᠠᠨ᠂ ᠭᠡᠷ ᠨᠢ ᠡᠷᠭᠢᠯᠳᠦᠵᠦ ᠱᠠᠯᠠᠨ ᠳᠡᠭᠡᠷᠡ ᠫᠢᠳᠬᠢᠲᠡᠯᠡ ᠰᠠᠭᠤᠪᠠ᠃ ᠬᠣᠷᠸᠠ ᠳᠡᠭᠡᠷᠡ ᠮᠡᠨᠳᠦᠯᠡᠭᠡᠳ ᠬᠣᠶᠠᠷ ᠰᠠᠷᠠ ᠠᠷᠪᠠᠨ ᠳᠦᠷᠪᠡᠭᠡᠨ ᠬᠣᠨᠣᠭᠠᠳ ᠠᠯᠠᠭᠠ ᠪᠣᠯᠤᠭᠰᠠᠨ ᠬᠦᠦ ᠪᠡᠨ ᠪᠣᠳᠣᠬᠤ ᠳ᠋ᠤ᠌ ᠪᠠᠲᠤ ᠶ᠋ᠢᠨ ᠨᠢᠯᠪᠤᠰᠤ ᠠᠶᠠᠨᠳᠠᠭᠠᠨ ᠠᠰᠬᠠᠷᠠᠨᠠ᠃
ᠡᠨᠡ ᠬᠡᠦᠬᠡᠳ ᠢ᠋ ᠮᠡᠨᠳᠦᠯᠡᠭᠰᠡᠨ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠭᠦᠨ ᠦ᠌ ᠲᠤᠬᠠᠢ ᠵᠡᠭᠦᠳᠦᠯᠡᠭᠡ ᠦᠭᠡᠢ ᠨᠢᠭᠡ ᠴᠦ᠍ ᠰᠥᠨᠢ ᠪᠠᠲᠤ ᠳ᠋ᠤ᠌ ᠦᠭᠡᠢ ᠪᠢᠯᠡ᠃ ᠪᠢ ᠬᠦᠦ ᠲᠡᠢ ᠪᠣᠯᠤᠭᠰᠠᠨ᠂ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠡᠵᠡᠨ ᠲᠡᠢ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠲᠦᠮᠡᠨ ᠪᠠᠶᠠᠷ ᠣᠪᠣᠯᠵᠠᠨ ᠪᠠᠢᠳᠠᠭ ᠰᠠᠨ᠃ ᠭᠡᠲᠡᠯᠡ ᠲᠡᠷᠡ ᠪᠠᠶᠠᠷ ᠫᠠᠳ ᠬᠠᠷᠠᠩᠭᠤᠢ ᠭᠠᠰᠢᠭᠤᠳᠠᠯ ᠢ᠋ᠶ᠋ᠠᠷ ᠰᠣᠯᠢᠭᠳᠠᠪᠠ᠃
《ᠬᠠᠷᠠ ᠲᠡᠨᠡᠭ ᠲᠣᠯᠣᠭᠠᠢ᠂ ᠰᠣᠨᠣᠰᠤᠮᠠᠭᠴᠠ ᠣᠴᠢᠬᠤ ᠦᠭᠡᠢ ᠶᠠᠭᠠᠬᠢᠯᠠ᠃ ᠣᠴᠢᠭᠰᠠᠨ ᠪᠣᠯ ᠁》 ᠬᠣᠩᠭᠣᠷ᠂ ᠵᠢᠷᠭᠠᠯ᠂ ᠱᠠᠭᠳᠠᠷ ᠵᠡᠷᠭᠡ ᠨᠥᠬᠥᠷ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠲᠠᠢᠳᠬᠤᠷᠠᠭᠤᠯᠬᠤ ᠭᠡᠵᠦ ᠠᠯᠢ ᠪᠠᠢᠳᠠᠭ ᠤᠷᠠᠨ ᠦᠭᠡ ᠪᠡᠨ ᠬᠡᠷᠡᠭᠯᠡᠪᠡᠴᠦ ᠲᠤᠰᠠ ᠦᠯᠦ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠵᠦ ᠵᠢᠪᠡᠬᠡᠢ ᠳᠠᠭᠤ ᠪᠠᠷ ᠬᠣᠩᠭᠣᠷ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠡᠷᠡ ᠠᠪᠤᠯ ᠦᠭᠡᠢ ᠣᠰᠣᠯᠳᠠᠭᠰᠠᠨ ᠬᠡᠦᠬᠡᠳ ᠢ᠋ ᠬᠣᠭᠣᠯᠠ ᠬᠦᠨᠡᠰᠦ ᠲᠡᠢ ᠰᠢᠭᠤᠳᠠᠢ ᠳ᠋ᠤ᠌ ᠬᠢᠵᠦ ᠵᠠᠮ ᠳᠡᠭᠡᠷᠡ ᠣᠷᠬᠢᠳᠠᠭ ᠶᠣᠰᠣᠲᠠᠢ ᠶᠤᠮ ᠭᠡᠳ ᠠᠪᠤ ᠬᠦᠷᠢᠶᠡ ᠵᠠᠮ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ᠃ ᠪᠢ ᠰᠥᠨᠢ ᠣᠴᠢᠭᠠᠳ ᠣᠷᠣᠰᠢᠭᠤᠯᠴᠢᠬᠠᠬᠤ ᠶᠤᠮ ᠪᠢᠯᠢᠤ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠴᠢᠮᠠ ᠳ᠋ᠤ᠌ ᠬᠡᠯᠡᠶᠡ ᠭᠡᠵᠦ ᠪᠣᠳᠣᠭᠠᠳ ᠢᠷᠡᠭᠰᠡᠨ ᠭᠡᠵᠦ ᠬᠣᠩᠭᠣᠷ ᠨᠢᠭᠡ ᠬᠥᠭ ᠲᠡᠢ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠪᠠᠲᠤ ᠨᠢᠭᠤᠷ ᠢ᠋ᠶ᠋ᠠᠨ ᠲᠠᠭᠯᠠᠨ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠣᠭᠵᠣᠮᠬᠠᠨ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠪᠣᠰᠴᠤ 《ᠬᠠᠮᠲᠤ ᠶᠠᠪᠤᠶᠠ᠂ ᠨᠠᠳᠠᠳᠤ ᠵᠢᠭᠠᠵᠤ ᠠᠯᠢ》 ᠭᠡᠵᠦ ᠬᠣᠩᠭᠣᠷ ᠲᠤ᠌ ᠬᠡᠯᠡᠪᠡ᠃
ᠡᠭᠦᠨ ᠡᠴᠡ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠢᠮᠠ ᠡᠪᠦᠭᠡᠨ ᠦ᠌ ᠭᠠᠳᠠᠨᠠ ᠡᠴᠡ ᠭᠤᠷᠪᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠭᠠᠷᠴᠤ ᠪᠠᠷᠠᠭᠤᠨ ᠲᠡᠰᠢ ᠪᠡᠨ ᠵᠡᠷᠭᠡᠴᠡᠨ ᠶᠠᠪᠤᠯᠠ᠃ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠪᠥᠰᠡᠨ ᠳ᠋ᠦ᠍ ᠨᠢᠵᠡᠭᠡᠳ ᠬᠦᠷᠵᠡ ᠬᠠᠪᠴᠢᠭᠤᠯᠤᠭᠰᠠᠨ ᠪᠥᠭᠡᠳ ᠨᠢᠭᠡ ᠨᠢ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠴᠠᠷᠢᠯ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠳᠡᠭᠡᠭᠦᠷ ᠬᠥᠨᠳᠡᠯᠢᠳᠦᠭᠦᠯᠦᠨ ᠪᠠᠷᠢᠵᠠᠢ᠃ ᠡᠨᠡ ᠭᠤᠷᠪᠠᠨ ᠬᠥᠮᠦᠨ ᠪᠣᠯ ᠬᠣᠩᠭᠣᠷ᠂ ᠪᠠᠲᠤ᠂ ᠨᠢᠮᠠ ᠡᠪᠦᠭᠡᠨ ᠨᠠᠷ ᠪᠠᠢᠯᠠ᠃
ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠ ᠶ᠋ᠢ ᠬᠠᠭᠠᠭᠰᠠᠨ ᠡᠭᠦᠯᠡᠨ ᠦ᠌ ᠳᠣᠣᠷᠠᠲᠤ ᠵᠠᠬᠠ ᠨᠢ ᠰᠢᠨᠡᠬᠡᠨ ᠭᠠᠷᠴᠤ ᠪᠠᠢᠭᠠ ᠴᠢᠰᠤ ᠰᠢᠭ᠋ ᠬᠤᠧᠨ ᠶᠠᠭᠠᠨ ᠥᠩᠭᠡ ᠪᠡᠷ ᠲᠤᠶᠠᠭᠠᠷᠠᠨ᠂ ᠳᠡᠭᠡᠭᠰᠢᠯᠡᠬᠦ ᠳᠣᠳᠣᠮ ᠢ᠋ᠶ᠋ᠠᠨ ᠨᠥᠵᠢᠷᠡᠭᠰᠡᠨ ᠶᠠᠭᠤᠮᠠ ᠰᠢᠭ᠋ ᠬᠠᠷᠠ ᠬᠦᠷᠡᠩ ᠪᠣᠯᠤᠭᠰᠠᠭᠠᠷ ᠭᠢᠯᠲᠠᠭᠠᠨᠠᠭᠰᠠᠨ ᠬᠠᠷᠠ ᠥᠩᠭᠡᠨ ᠳ᠋ᠦ᠍ ᠵᠠᠮᠠᠭᠷᠠᠭᠰᠠᠨ ᠪᠠᠢᠯᠠ᠃
ᠪᠠᠲᠤ ᠨᠢᠳᠦ ᠪᠡᠨ ᠪᠠᠷᠤᠭ ᠯᠠ ᠴᠠᠪᠴᠢᠯ ᠦᠭᠡᠢ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠰᠢᠷᠳᠡᠨ᠂ ᠬᠥᠮᠥᠰᠬᠡ ᠪᠡᠨ ᠡᠷᠴᠢᠯᠡᠭᠦᠯᠦᠨ ᠵᠠᠩᠭᠢᠳᠴᠤ᠂ ᠬᠠᠶᠠ ᠬᠠᠶᠠ ᠭᠠᠳᠠᠨᠠ ᠦᠯᠦ ᠮᠡᠳᠡᠭᠳᠡᠬᠦ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ ᠭᠦᠨ ᠪᠥᠭᠡᠳ ᠵᠢᠷᠦᠬᠡ ᠶ᠋ᠢ ᠨᠢ ᠬᠠᠪᠴᠢᠨ ᠪᠠᠵᠠᠭᠰᠠᠨ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠨᠠ᠃
ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠨᠢ ᠶᠠᠪᠤᠭᠠ ᠵᠠᠯᠠᠭᠤ᠂ ᠬᠥᠭᠰᠢᠨ ᠬᠣᠶᠠᠷ ᠳᠠᠭᠤ ᠦᠭᠡᠢ ᠪᠣᠯᠪᠠᠴᠤ ᠪᠠᠲᠤ ᠡᠴᠡ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠨ᠂ ᠲᠡᠭᠦᠨ ᠡᠴᠡ ᠶᠠᠮᠠᠷ ᠨᠢᠭᠡᠨ ᠡᠷᠬᠢᠮ ᠶᠠᠭᠤᠮᠠ ᠣᠢᠴᠢᠬᠤ ᠳ᠋ᠤ᠌ ᠠᠯᠳᠠᠯ ᠦᠭᠡᠢ ᠪᠠᠷᠢᠵᠤ ᠠᠪᠬᠤ ᠡᠭᠦᠷᠭᠡ ᠶ᠋ᠢ ᠠᠮᠢ ᠴᠥᠯᠮᠥᠨ ᠠᠪᠤᠭᠰᠠᠨ ᠶᠤᠮ ᠰᠢᠭ᠋ ᠬᠥᠳᠡᠯᠭᠡᠭᠡᠨ ᠪᠦᠬᠦᠨ ᠢ᠋ ᠨᠢ ᠠᠵᠢᠨ ᠶᠠᠪᠤᠨᠠ᠃
ᠪᠠᠲᠤ ᠬᠣᠩᠭᠣᠷ ᠬᠣᠶᠠᠷ ᠥᠨᠥᠳᠥᠷ ᠦᠳᠡ ᠥᠩᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌ ᠨᠢᠮᠠ ᠶ᠋ᠢᠨ ᠳ᠋ᠦ᠍ ᠢᠷᠡᠭᠰᠡᠨ ᠶᠤᠮ᠃ ᠬᠣᠩᠭᠣᠷ ᠭᠡᠷ ᠲᠡᠭᠡᠨ ᠣᠴᠢᠶᠠ ᠭᠡᠵᠦ ᠪᠠᠲᠤ ᠡᠴᠡ ᠭᠤᠶᠤᠵᠤ ᠱᠠᠭᠠᠷᠳᠠᠵᠤ ᠦᠵᠡᠭᠰᠡᠨ ᠠᠪᠠᠴᠤ ᠪᠠᠲᠤ ᠣᠴᠢᠭᠠ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠦᠦ ᠪᠡᠨ ᠣᠷᠣᠰᠢᠭᠤᠯᠤᠨᠠ᠃ ᠨᠡᠷᠡ ᠦᠭᠡᠢ ᠦᠬᠦᠭᠰᠡᠨ ᠭᠡᠨᠡ᠃ ᠲᠡᠢᠮᠦ ᠪᠣᠢ ᠭᠡᠵᠦ ᠰᠢᠪᠡᠨᠡᠨ ᠮᠠᠰᠢ ᠭᠦᠨ ᠤᠳᠬᠠ ᠲᠠᠢ ᠬᠡᠯᠡᠵᠦ ᠪᠢᠯᠡ᠃ ᠲᠡᠭᠡᠭᠡᠳ ᠰᠢᠭᠤᠳ ᠨᠢᠮᠠ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠴᠠᠢ ᠤᠤᠭᠤᠭᠠᠳ ᠪᠠᠲᠤ ᠭᠠᠭᠴᠠᠭᠠᠷ ᠭᠠᠷᠴᠤ ᠡᠪᠣᠯᠵᠢᠶᠠᠨ ᠤ᠋ ᠬᠣᠢᠲᠤ ᠬᠠᠳᠠᠨ ᠳ᠋ᠤ᠌ ᠤᠳᠠᠭᠠᠨ ᠪᠣᠯᠤᠭᠠᠳ ᠢᠷᠡᠭᠰᠡᠨ ᠪᠢᠯᠡ᠃ ᠨᠢᠮᠠ ᠡᠪᠦᠭᠡᠨ ᠪᠠᠲᠤ ᠶ᠋ᠢᠨ ᠭᠤᠶᠤᠭᠰᠠᠨ ᠶᠣᠰᠣᠭᠠᠷ ᠬᠦᠷᠵᠡ ᠴᠠᠷᠢᠯ ᠪᠡᠯᠡᠳᠬᠡᠭᠡᠳ ᠪᠠᠢᠭᠰᠠᠨ᠃ ᠲᠡᠭᠦᠨ ᠢ᠋ ᠠᠪᠴᠤ ᠮᠣᠷᠳᠠᠭᠠᠳ ᠶᠠᠪᠤᠵᠤ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ᠃
ᠬᠡᠰᠡᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠲᠤ ᠥᠨᠳᠡᠢᠵᠦ ᠬᠠᠲᠠᠷᠢᠭᠤᠯᠤᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠬᠣᠶᠠᠷ ᠨᠢ ᠪᠠᠰᠠ ᠯᠠ ᠬᠠᠲᠠᠷᠢᠭᠤᠯᠪᠠ᠃ ᠬᠥᠯᠳᠡᠭᠦᠦ ᠭᠠᠵᠠᠷ ᠭᠢᠰᠬᠢᠭᠰᠡᠨ ᠭᠤᠷᠪᠠᠨ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠶ᠋ᠢᠨ ᠳᠠᠭᠤ ᠰᠦᠷᠲᠡᠢ ᠪᠥᠭᠡᠳ ᠡᠵᠡᠭᠦᠢ ᠵᠡᠯᠢᠭᠦᠳ ᠦᠯᠡᠳᠡᠭᠰᠡᠨ ᠵᠤᠰᠠᠯᠠᠩ ᠭᠠᠵᠠᠷ ᠢ᠋ ᠠᠮᠢᠯᠠᠭᠤᠯᠵᠤ ᠪᠠᠢᠯᠠ᠃
ᠲᠡᠳᠡ ᠶᠠᠪᠤᠭᠰᠠᠭᠠᠷ ᠴᠠᠰᠤᠲᠠᠢ ᠲᠣᠯᠣᠭᠠᠢ ᠶ᠋ᠢᠨ ᠰᠢᠯᠢ ᠪᠡᠷ ᠳᠠᠪᠠᠬᠤ ᠳ᠋ᠤ᠌ ᠬᠦᠷᠢᠶᠡ ᠵᠠᠮ ᠡᠮᠦᠨᠡ ᠨᠢ ᠬᠠᠷᠠᠯᠠᠨ ᠵᠤᠷᠠᠢᠪᠠ᠃ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠬᠤᠩᠭᠠᠷᠯᠠᠭᠰᠠᠨ ᠴᠠᠰᠤᠨ ᠳᠡᠭᠡᠷᠡ ᠪᠠᠢᠭᠠ ᠪᠣᠷᠣ ᠰᠢᠭᠤᠳᠠᠢ ᠲᠠᠢ ᠶᠠᠭᠤᠮᠠ ᠪᠠᠷᠤᠭ ᠯᠠ ᠳᠠᠢ᠌ᠬᠠᠷ ᠴᠢᠯᠠᠭᠤ ᠰᠢᠭ᠋ ᠬᠥᠭᠯᠡᠢᠨ ᠪᠠᠷᠠᠭᠠᠨᠲᠤᠵᠤ ᠬᠠᠷᠠᠭᠳᠠᠪᠠ᠃
ᠲᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ ᠪᠠᠲᠤ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠵᠤ ᠪᠦᠷ ᠬᠤᠷᠳᠤᠯᠠᠪᠠ᠃ ᠴᠠᠰᠤ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠭᠰᠠᠭᠠᠷ ᠰᠢᠭᠤᠳᠠᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠵᠣᠭᠰᠣᠭᠠᠳ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠵᠠᠭᠠᠪᠠ᠃
ᠲᠡᠭᠡᠭᠡᠳ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠣᠢᠷᠠᠲᠤᠬᠤ ᠭᠡᠰᠡᠨ ᠳ᠋ᠦ᠍ ᠬᠠᠮᠠᠷ ᠢ᠋ᠶ᠋ᠠᠨ ᠲᠠᠴᠢᠭᠢᠨᠠᠭᠤᠯᠤᠨ ᠬᠤᠯᠭᠠᠭᠠᠳ ᠶᠠᠪᠤᠵᠤ ᠥᠭᠭᠦᠭᠰᠡᠨ ᠦᠭᠡᠢ ᠳ᠋ᠦ᠍ ᠪᠠᠲᠤ ᠦᠭᠡ ᠳᠠᠭᠤᠨ ᠦᠭᠡᠢ᠂ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠬᠣᠩᠭᠣᠷ ᠲᠤ᠌ ᠥᠭᠭᠦᠭᠡᠳ ᠴᠠᠰᠤ ᠱᠠᠵᠢᠭᠢᠨᠠᠭᠤᠯᠤᠨ ᠣᠷᠣᠭᠰᠢ ᠶᠠᠪᠤᠬᠤ ᠳ᠋ᠤ᠌ ᠨᠢᠮᠠ ᠭᠤᠸᠠᠢ ᠴᠤ᠌ ᠮᠣᠷᠢ ᠪᠠᠨ ᠬᠣᠩᠭᠣᠷ ᠲᠤ᠌ ᠥᠭᠭᠦᠭᠡᠳ ᠬᠣᠢᠨᠠ ᠡᠴᠡ ᠶᠠᠪᠤᠯᠠ᠃
ᠪᠠᠲᠤ ᠰᠢᠭᠤᠳᠠᠢ ᠳ᠋ᠤ᠌ ᠲᠤᠯᠵᠤ ᠣᠴᠢᠭᠠᠳ ᠰᠥᠬᠥᠷᠡᠨ ᠰᠠᠭᠤᠵᠤ᠂ ᠳᠡᠭᠡᠷᠡ ᠡᠴᠡ ᠨᠢ ᠪᠥᠬᠥᠢᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠬᠡᠯᠡᠬᠦ ᠪᠤᠶᠤ ᠠᠮᠢᠰᠬᠤᠯ ᠢ᠋ ᠨᠢ ᠰᠣᠨᠣᠰᠬᠤ ᠭᠡᠰᠡᠨ ᠶᠤᠮ ᠰᠢᠭ ᠴᠢᠩᠨᠠᠨ ᠪᠠᠢᠯᠠ᠃
ᠨᠢᠮᠠ ᠡᠪᠦᠭᠡᠨ ᠳᠡᠷᠭᠡᠳᠡ ᠨᠢ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠤᠨᠵᠢᠭᠤᠯᠤᠨ᠂ ᠬᠠᠮᠠᠷ ᠨᠢ ᠱᠤᠤᠬᠢᠲᠤᠨᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠪᠠ᠃ ᠪᠠᠲᠤ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ᠃ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ ᠭᠡᠵᠦ ᠨᠢᠮᠠ ᠴᠡᠴᠡᠷᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠭᠡᠳ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠪᠠ᠃ ᠮᠣᠷᠢᠳ ᠢ᠋ᠶ᠋ᠠᠨ ᠴᠢᠳᠥᠷᠯᠡᠵᠦ ᠬᠣᠯᠪᠣᠨ ᠣᠷᠬᠢᠭᠠᠳ ᠢᠷᠡᠭᠰᠡᠨ ᠬᠣᠩᠭᠣᠷ ᠡᠪᠦᠭᠡᠨ ᠦ᠌ ᠬᠠᠵᠠᠭᠤ ᠡᠴᠡ ᠲᠣᠬᠣᠢ ᠪᠠᠷ ᠢ᠋ᠶ᠋ᠠᠨ ᠶᠣᠪᠣᠷᠤᠨ᠂ ᠴᠢᠬᠢᠨ ᠳ᠋ᠦ᠍ᠨᠢ 《ᠲᠠ ᠥᠪᠡᠷ ᠢ᠋ᠶ᠋ᠡᠨ ᠤᠷᠤᠭᠤ ᠲᠠᠲᠠᠭᠠᠳ ᠪᠠᠢᠨᠠ ᠰᠢᠦ ᠳᠡ》 ᠭᠡᠵᠦ ᠰᠢᠪᠡᠭᠡᠨᠡᠪᠡ᠃
ᠨᠠᠷᠠ ᠪᠦᠷ ᠵᠢᠷᠭᠠᠭᠠᠳ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠡᠬᠢᠯᠡᠵᠦ ᠳᠦᠯᠡᠢᠷᠡᠭᠰᠡᠨ ᠤᠷᠤᠭ ᠬᠠᠷᠠ ᠲᠩᠷᠢ ᠪᠦᠬᠦᠨ ᠦ᠌ ᠳᠡᠭᠡᠷᠡ ᠡᠴᠡ ᠬᠠᠪᠬᠠᠭᠯᠠᠨ ᠪᠦᠷᠬᠦᠪᠡ᠃ ᠬᠠᠶᠠ ᠮᠣᠷᠢᠳ ᠤ᠋ᠨ ᠲᠣᠭᠲᠠᠨ ᠶᠠᠳᠠᠭᠰᠠᠨ ᠬᠥᠯ ᠢ᠋ᠶ᠋ᠡᠷ ᠭᠠᠷᠤᠭᠰᠠᠨ ᠴᠢᠮᠡᠭᠡ ᠱᠠᠵᠢᠭᠢᠨᠠᠨ ᠭᠠᠷᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠣᠯ ᠡᠨᠳᠡ ᠠᠮᠢᠳᠤ ᠠᠮᠢᠲᠠᠨ ᠦᠭᠡᠢ ᠮᠡᠲᠦ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠠ᠋ ᠬᠠᠲᠠᠭᠤ ᠪᠠᠢ᠃ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ᠃ ᠶᠠᠪᠤᠶᠠ ᠳᠠ ᠭᠡᠵᠦ ᠬᠣᠩᠭᠣᠷ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠲᠤ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠡᠷᠭᠢᠭᠦᠯᠵᠦ ᠬᠠᠷᠠᠯᠠ᠃ ᠬᠠᠷᠠᠩᠭᠤᠢ ᠶ᠋ᠢᠨ ᠳᠣᠲᠣᠷᠠ ᠬᠣᠩᠭᠣᠷ ᠤ᠋ᠨ ᠨᠢᠭᠤᠷ᠂ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ᠌ ᠠᠯᠤᠰ ᠲᠤ᠌ ᠭᠢᠯᠠᠯᠵᠠᠬᠤ ᠭᠠᠯ ᠰᠢᠭ᠋ ᠰᠦᠮᠡᠯᠵᠡᠨ ᠬᠠᠷᠠᠭᠳᠠᠪᠠ᠃
ᠪᠠᠲᠤ ᠳᠠᠬᠢᠨ ᠪᠥᠬᠥᠢᠵᠦ᠂ ᠬᠣᠶᠠᠷ ᠠᠯᠠᠭᠠ ᠪᠠᠨ ᠳᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠰᠢᠭᠤᠳᠠᠢ ᠶ᠋ᠢᠨ ᠳᠣᠭᠤᠤᠷ ᠲᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠶᠠᠭᠤᠮᠠ ᠶ᠋ᠢ ᠰᠣᠴᠢᠭᠠᠬᠤ ᠦᠭᠡᠢ ᠭᠡᠰᠡᠨ ᠮᠡᠲᠦ ᠠᠭᠠᠵᠢᠮ ᠪᠥᠭᠡᠳ ᠬᠢᠨᠠᠮᠠᠭᠠᠢ ᠬᠢᠭᠡᠳ ᠡᠷᠭᠦᠵᠦ᠂ ᠴᠡᠭᠡᠵᠢᠨ ᠳ᠋ᠡᠭᠡᠨ ᠨᠠᠭᠠᠭᠠᠳ ᠪᠣᠰᠴᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠵᠡᠭᠦᠨ ᠬᠣᠢᠰᠢ᠂ ᠴᠠᠰᠤ ᠱᠠᠵᠢᠭᠢᠨᠠᠭᠤᠯᠤᠨ ᠨᠢᠭᠡ ᠲᠣᠮᠣ ᠨᠢᠭᠡ ᠪᠠᠭᠠ ᠠᠯᠬᠤᠵᠤ ᠶᠠᠪᠤᠬᠤ ᠳ᠋ᠤᠨᠢ 《ᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠤᠭᠠᠳ ᠢᠷᠡ》 ᠭᠡᠵᠦ ᠨᠢᠮᠠ ᠳ᠋ᠤ᠌ ᠬᠡᠯᠡᠭᠡᠳ ᠬᠣᠩᠭᠣᠷ ᠭᠦᠶᠦᠨ ᠣᠴᠢᠵᠤ ᠪᠠᠲᠤ ᠶ᠋ᠢ ᠰᠤᠭᠤᠳᠠᠨ ᠠᠪᠤᠯᠠ᠃
ᠡᠪᠦᠭᠡᠨ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠦᠨ ᠬᠣᠢᠨᠠ ᠡᠴᠡ ᠨᠢ ᠠᠯᠬᠤᠨᠠ᠃ ᠡᠨᠡ ᠭᠤᠷᠪᠠ ᠢᠩᠭᠢᠵᠦ ᠶᠡᠬᠡ ᠯᠡ ᠤᠳᠠᠭᠠᠨ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
ᠭᠡᠵᠢᠭᠡᠲᠦ ᠲᠣᠯᠣᠭᠠᠢ ᠶ᠋ᠢᠨ ᠡᠩᠭᠡᠷ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠲᠤ ᠰᠥᠬᠥᠷᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ 《ᠮᠢᠨᠦ ᠲᠣᠬᠣᠮ ᠢ᠋ ᠠᠪᠤᠭᠠᠳ ᠢᠷᠡᠭᠡᠴᠢ》 ᠭᠡᠪᠡ᠃ ᠬᠣᠩᠭᠣᠷ ᠡᠷᠭᠢᠵᠦ ᠡᠮᠡᠭᠡᠯ ᠢ᠋ ᠨᠢ ᠠᠪᠤᠭᠠᠳ ᠲᠣᠬᠣᠮ ᠢ᠋ ᠨᠢ ᠠᠪᠴᠢᠷᠠᠨ ᠪᠠᠲᠤ ᠶ᠋ᠢᠨ ᠡᠮᠦᠨᠡ ᠢᠷᠡᠬᠦ ᠳ᠋ᠦ᠍ 《ᠠᠳᠠ ᠳᠡᠪᠢᠰᠴᠦ ᠣᠷᠭᠢ》 ᠭᠡᠵᠦ ᠪᠦᠳᠡᠭᠢ ᠪᠣᠯᠪᠠᠴᠤ ᠦᠭᠡ ᠪᠦᠬᠦᠨ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠣᠳᠣ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠬᠣᠩᠭᠣᠷ ᠰᠥᠬᠥᠷᠡᠨ ᠰᠠᠭᠤᠵᠤ ᠬᠣᠶᠠᠷ ᠲᠣᠬᠣᠮ ᠢ᠋ ᠳᠠᠪᠬᠤᠷᠯᠠᠨ ᠳᠡᠪᠢᠰᠴᠦ ᠪᠠᠢᠬᠤ ᠳ᠋ᠤ᠌ ᠪᠠᠲᠤ ᠶ᠋ᠢᠨ ᠵᠢᠭᠳᠡ ᠪᠤᠰᠤ ᠠᠮᠢᠰᠬᠤᠯ ᠨᠢ ᠡᠯᠢᠭᠡᠨ ᠳ᠋ᠡᠭᠡᠨ ᠰᠢᠬᠠᠵᠤ ᠲᠡᠪᠡᠷᠢᠭᠰᠡᠨ ᠰᠢᠭᠤᠳᠠᠢ ᠶ᠋ᠢ ᠨᠡᠪᠲᠡᠯᠦᠨ ᠡᠨᠡ ᠲᠠᠰᠤᠯᠳᠠᠭᠰᠠᠨ ᠬᠦᠴᠦᠷᠬᠡᠭ ᠠᠮᠢᠰᠬᠤᠯ᠂ ᠰᠢᠭᠤᠳᠠᠢ ᠶ᠋ᠢᠨ ᠳᠣᠲᠣᠷᠠ ᠡᠴᠡ ᠭᠠᠷᠴᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠣᠨᠣᠰᠳᠠᠵᠤ ᠪᠠᠢᠯᠠ᠃
ᠪᠠᠲᠤ ᠪᠦᠬᠦ ᠴᠡᠭᠡᠵᠢ ᠪᠡᠷ ᠢ᠋ᠶ᠋ᠡᠨ ᠪᠥᠬᠥᠢᠵᠦ ᠲᠣᠬᠣᠮ ᠳᠡᠭᠡᠷᠡ ᠪᠡᠨ ᠰᠢᠭᠤᠳᠠᠢ ᠲᠠᠢ ᠶᠠᠭᠤᠮᠠ ᠶ᠋ᠢ ᠲᠠᠯᠪᠢᠭᠠᠳ᠂ ᠬᠡᠰᠡᠭ ᠵᠠᠭᠤᠷᠠ ᠡᠯᠢᠭᠡ ᠪᠡᠨ ᠰᠠᠯᠭᠠᠯ ᠦᠭᠡᠢ ᠳᠠᠷᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠯᠵᠤ ᠶᠠᠳᠠᠨ ᠥᠨᠳᠡᠢᠵᠦ 《ᠵᠠ ᠭᠠᠵᠠᠷ ᠢ᠋ᠶ᠋ᠠᠨ ᠤᠬᠤᠶᠠ》 ᠭᠡᠵᠦ ᠬᠡᠯᠡᠭᠡᠳ ᠪᠣᠰᠴᠤ ᠪᠥᠰᠡᠨ ᠡᠴᠡ ᠪᠡᠨ ᠬᠦᠷᠵᠡ ᠪᠡᠨ ᠠᠪᠴᠤ ᠲᠠᠯᠪᠢᠬᠤ ᠳ᠋ᠤ᠌ ᠬᠥᠯᠳᠡᠭᠦᠦ ᠭᠠᠵᠠᠷ ᠳ᠋ᠠᠩ ᠭᠡᠵᠦ ᠳᠤᠤᠭᠠᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠪᠤᠯᠠᠬᠤ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠬᠤ ᠤᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠤᠨᠠ᠃ ᠨᠢᠮᠠ ᠬᠡᠦᠬᠡᠳ ᠢ᠋ ᠪᠤᠯᠠᠨᠠ ᠭᠡᠳᠡᠭ ᠢ᠋ ᠰᠣᠨᠣᠰᠬᠤ ᠳ᠋ᠤ᠌ ᠬᠡᠷᠡᠭ ᠦᠭᠡᠢ ᠪᠣᠯᠪᠠ ᠤᠤ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠯᠡ᠃ ᠭᠡᠪᠡᠴᠦ ᠪᠠᠲᠤ ᠶ᠋ᠢᠨ ᠰᠢ᠌ᠤᠠᠪᠣᠷᠢ ᠶ᠋ᠢ ᠡᠷᠭᠢᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ᠃ ᠡᠨᠡ ᠤᠳᠠᠭᠠ ᠪᠣᠯ ᠲᠡᠭᠦᠨ ᠦ᠌ ᠪᠣᠳᠣᠯ ᠢ᠋ ᠥᠭᠡᠷᠡᠴᠢᠯᠡᠨᠡ ᠭᠡᠵᠦ ᠬᠡᠯᠡᠭᠡ ᠦᠭᠡᠢ ᠬᠠᠷᠢᠨ ᠪᠠᠷᠤᠭ ᠯᠠ ᠥᠪᠡᠷ ᠢ᠋ᠶ᠋ᠡᠨ ᠮᠠᠲᠠᠯ ᠦᠭᠡᠢ ᠬᠡᠯᠡᠵᠡᠢ᠃
ᠬᠣᠩᠭᠣᠷ ᠲᠡᠷᠭᠡᠨ ᠦ᠌ ᠲᠡᠮᠦᠷ ᠭᠣᠣᠯ ᠢ᠋ᠶ᠋ᠠᠷ ᠬᠢᠭᠰᠡᠨ ᠬᠦᠨᠳᠦ ᠴᠠᠷᠢᠯ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠷᠭᠦᠵᠦ ᠴᠣᠬᠢᠬᠤ ᠳ᠋ᠤ᠌ ᠳ᠋ᠠᠩ ᠭᠡᠵᠦ ᠳᠤᠤᠭᠠᠷᠤᠭᠠᠳ ᠬᠥᠯᠳᠡᠭᠦᠦ ᠭᠠᠵᠠᠷ ᠡᠴᠡ ᠣᠢᠪᠠ᠃ ᠲᠡᠷᠡ ᠭᠤᠷᠪᠠ ᠡᠭᠡᠯᠵᠢ ᠡᠭᠡᠯᠵᠢ ᠪᠡᠷ ᠬᠥᠯᠳᠡᠭᠦᠦ ᠭᠠᠵᠠᠷ ᠢ᠋ ᠤᠭᠰᠠᠷᠠᠨ ᠤᠬᠤᠵᠤ ᠡᠬᠢᠯᠡᠪᠡ᠃
ᠤᠳᠠᠯ ᠦᠭᠡᠢ ᠰᠢᠭᠤᠷᠭᠠ ᠡᠬᠢᠯᠡᠵᠦ᠂ ᠰᠠᠯᠬᠢᠨ ᠤ᠋ ᠢᠰᠬᠡᠷᠬᠦ ᠳᠠᠭᠤ᠂ ᠬᠥᠯᠳᠡᠭᠦᠦ ᠭᠠᠵᠠᠷ ᠲᠤᠰᠤᠭᠰᠠᠨ ᠭᠦᠷᠵᠡᠨ ᠦ᠌ ᠬᠠᠩᠭᠢᠨᠠᠬᠤ ᠳᠠᠭᠤ ᠲᠠᠢ ᠬᠣᠣᠰᠯᠠᠨ᠂ ᠬᠠᠶᠠ ᠬᠠᠶᠠ ᠣᠴᠢ ᠪᠤᠲᠠᠷᠠᠨ ᠭᠠᠷᠴᠤ ᠪᠠᠢᠪᠠ᠃
ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠴᠢᠨᠡᠨ ᠱᠤᠤᠭᠢᠯᠳᠤᠨ ᠶᠠᠷᠢᠪᠠᠴᠤ ᠪᠡᠶᠡ ᠪᠡᠶᠡ ᠪᠡᠨ ᠣᠢᠯᠠᠭᠠᠳᠠᠭ ᠦᠭᠡᠢ ᠦᠶᠡ ᠪᠠᠢᠳᠠᠭ ᠤ᠋ᠨ ᠠᠳᠠᠯᠢ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠪᠡᠷ ᠬᠠᠷᠢᠯᠴᠠᠨ ᠪᠦᠷᠢᠨ ᠣᠢᠯᠠᠭᠠᠳᠠᠭ ᠤᠳᠠᠭᠠ ᠪᠠᠢᠳᠠᠭ ᠶᠤᠮ᠃ ᠡᠨᠡ ᠭᠤᠷᠪᠠ ᠶ᠋ᠢᠨ ᠬᠡᠨ ᠨᠢ ᠴᠦ᠍ ᠨᠢᠭᠡ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠪᠡᠶᠡ ᠪᠡᠶᠡᠰ ᠦ᠋ᠨ ᠪᠣᠳᠣᠯ ᠢ᠋ ᠪᠦᠷᠢᠨ ᠣᠢᠯᠠᠭᠠᠵᠤ ᠨᠢᠭᠡᠨ ᠦᠶᠡ ᠬᠣᠩᠭᠣᠷ ᠤ᠋ᠨ ᠬᠦᠨᠳᠦ ᠴᠠᠷᠢᠯ ᠪᠢᠲᠡᠭᠦᠦ ᠳᠠᠭᠤ ᠪᠠᠷ ᠳ᠋ᠦᠩ ᠳ᠋ᠦᠩ ᠭᠡᠬᠦ ᠳ᠋ᠦ᠍ ᠳᠠᠷᠠᠭᠠ ᠨᠢ ᠨᠥᠭᠦᠭᠡ ᠬᠣᠶᠠᠷ ᠤ᠋ᠨ ᠬᠦᠷᠵᠡ ᠲᠠᠴᠢᠭᠢᠨᠠᠨ ᠬᠠᠩᠭᠢᠨᠠᠵᠤ ᠪᠠᠢᠯᠠ᠃
ᠴᠢᠳᠥᠷ ᠲᠡᠢ ᠪᠠᠢᠭᠠ ᠮᠣᠷᠢᠳ ᠨᠢ ᠰᠢᠭᠤᠷᠭᠠ ᠤᠷᠤᠭᠤᠳᠠᠨ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠵᠣᠭᠰᠣᠭᠠᠳ ᠴᠡᠴᠡᠷᠡᠵᠦ ᠪᠠᠢᠪᠠᠴᠤ ᠡᠵᠡᠳ ᠨᠢ ᠣᠭᠲᠣ ᠲᠠᠭᠠᠷᠠᠭᠰᠠᠨ ᠦᠭᠡᠢ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠦᠬᠡ ᠪᠡᠨ ᠤᠬᠤᠵᠤ ᠳᠠᠭᠤᠰᠪᠠ᠃
ᠪᠠᠲᠤ ᠬᠦᠷᠵᠡ ᠪᠡᠨ ᠭᠠᠵᠠᠷ ᠬᠠᠶᠠᠭᠠᠳ ᠰᠢᠭᠤᠳᠠᠢ ᠤᠷᠤᠭᠤ ᠪᠠᠨ ᠠᠯᠬᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠰᠢᠷᠭᠤᠴᠢᠨ ᠤᠨᠠᠪᠠ᠃ ᠬᠣᠩᠭᠣᠷ ᠤᠬᠤᠰᠬᠢᠨ ᠣᠴᠢᠲᠠᠯᠠ ᠪᠠᠲᠤ ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠤᠭᠠᠳ ᠰᠢᠭᠤᠳᠠᠢ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠤᠷᠢᠳᠤᠬᠢ ᠶ᠋ᠢᠨ ᠠᠳᠠᠯᠢ ᠰᠥᠬᠥᠷᠡᠨ ᠰᠠᠭᠤᠭᠠᠳ ᠲᠡᠪᠡᠷᠢᠨ ᠠᠪᠴᠤ ᠦᠭᠡ ᠳᠠᠭᠤ ᠦᠭᠡᠢ ᠨᠦᠬᠡ ᠤᠷᠤᠭᠤ ᠶᠠᠪᠤᠬᠤ ᠳ᠋ᠤᠨᠢ ᠬᠣᠩᠭᠣᠷ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠭᠤᠳᠠᠢ ᠶ᠋ᠢ ᠳᠣᠣᠷᠠ ᠡᠴᠡ ᠨᠢ ᠲᠤᠯᠤᠨ᠂ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠲᠤ ᠶ᠋ᠢ ᠲᠡᠪᠡᠷᠢᠨ ᠠᠪᠤᠯᠠ᠃
ᠨᠦᠬᠡᠨ ᠦ᠌ ᠢᠷᠮᠡᠭ ᠲᠦ᠍ ᠲᠤᠯᠵᠤ ᠵᠣᠭᠰᠣᠭᠠᠳ ᠪᠠᠲᠤ ᠰᠢᠭᠤᠳᠠᠢ ᠳ᠋ᠤ᠌ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠵᠤ᠂ ᠪᠦᠪᠡᠢᠯᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠨᠠᠢᠭᠤᠬᠤ ᠳ᠋ᠤ᠌ ᠨᠢᠮᠠ ᠡᠪᠦᠭᠡᠨ ᠪᠦᠷ ᠶᠡᠩᠭᠢᠨᠡᠭᠦᠯᠦᠨ ᠤᠬᠢᠯᠠᠪᠠ᠃
ᠬᠡᠰᠡᠭ ᠢᠩᠭᠢᠵᠦ ᠪᠠᠢᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠲᠤ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠷᠮᠣᠢ ᠪᠠᠨ ᠳᠡᠪᠢᠰᠴᠦ ᠰᠠᠭᠤᠭᠠᠳ ᠳᠡᠭᠡᠷᠡ ᠨᠢ ᠰᠢᠭᠤᠳᠠᠢ ᠲᠠᠢ ᠪᠠᠨ ᠲᠠᠯᠪᠢᠵᠤ ᠠᠮᠠ ᠶ᠋ᠢ ᠨᠢ ᠵᠠᠳᠠᠯᠬᠤ ᠭᠡᠰᠡᠨ ᠢ᠋ᠶ᠋ᠡᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠭᠡᠷᠡ ᠪᠠᠢᠬᠤ ᠳᠠ? ᠭᠡᠵᠦ ᠬᠠᠵᠠᠭᠤ ᠳ᠋ᠠᠭᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠬᠣᠩᠭᠣᠷ ᠤᠷᠤᠭᠤ ᠬᠠᠷᠠᠵᠤ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠠᠢᠬᠤ ᠠ᠋ ᠭᠡᠵᠦ ᠬᠣᠩᠭᠣᠷ ᠬᠠᠷᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠴᠣᠬᠣᠮ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠠᠲᠤ ᠰᠢᠭᠤᠳᠠᠢ ᠶ᠋ᠢ ᠳᠠᠬᠢᠨ ᠠᠪᠴᠤ ᠨᠢᠭᠡ ᠤᠳᠠᠭᠠ ᠴᠢᠩᠭᠠ ᠲᠡᠪᠡᠷᠢᠭᠰᠡᠨ ᠢ᠋ᠶ᠋ᠡᠨ ᠪᠥᠬᠥᠢᠵᠦ ᠲᠣᠯᠣᠭᠠᠢ ᠪᠠᠨ ᠨᠦᠬᠡᠨ ᠳ᠋ᠦ᠍ ᠣᠷᠣᠭᠤᠯᠤᠨ᠂ ᠠᠯᠭᠤᠷ ᠲᠠᠯᠪᠢᠭᠠᠳ ᠥᠨᠳᠡᠢᠬᠦ ᠳ᠋ᠡᠭᠡᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠯᠠᠭᠠ ᠪᠠᠷ ᠨᠢᠳᠦ ᠪᠡᠨ ᠠᠷᠴᠢᠪᠠ᠃ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠬᠠᠵᠠᠭᠤ ᠶ᠋ᠢᠨ ᠬᠥᠯᠳᠡᠭᠦᠦ ᠰᠢᠷᠣᠢ ᠡᠴᠡ ᠠᠳᠬᠤᠵᠤ᠂ ᠨᠦᠬᠡ ᠤᠷᠤᠭᠤ ᠵᠥᠭᠡᠯᠡᠨ ᠬᠢᠵᠦ ᠡᠬᠢᠯᠡᠭᠰᠡᠨ ᠳ᠋ᠦ᠍ ᠬᠣᠩᠭᠣᠷ ᠪᠠᠰᠠ ᠬᠢᠵᠦ ᠡᠬᠢᠯᠡᠪᠡ᠃
ᠨᠡᠯᠢᠶᠡᠳ ᠠᠵᠢᠯᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠨᠦᠬᠡ ᠰᠢᠷᠣᠢ ᠪᠠᠷ ᠳᠦᠭᠦᠷᠦᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠵᠢᠵᠢᠭᠬᠡᠨ ᠣᠪᠣᠭᠠ ᠪᠣᠰᠴᠤ ᠪᠠᠲᠤ ᠡᠪᠦᠷ ᠡᠴᠡ ᠪᠡᠨ ᠡᠳᠦᠷ ᠡᠪᠣᠯᠵᠢᠶᠠᠨ ᠤ᠋ ᠬᠣᠢᠲᠤ ᠠᠭᠤᠯᠠᠨ ᠳ᠋ᠤ᠌ ᠬᠣᠶᠠᠷ ᠴᠠᠭ ᠭᠠᠷᠤᠢ ᠪᠣᠯᠬᠤ ᠳ᠋ᠠᠭᠠᠨ ᠰᠡᠢᠯᠦᠭᠰᠡᠨ 《ᠪᠠᠲᠤ ᠶ᠋ᠢᠨ ᠬᠦᠦ ᠴᠢᠯᠠᠭᠤᠨ》 ᠭᠡᠰᠡᠨ ᠦᠰᠦᠭᠳᠡᠢ ᠳᠥᠷᠪᠡᠯᠵᠢᠨ ᠬᠥᠬᠡ ᠴᠢᠯᠠᠭᠤ ᠪᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠦᠬᠦ ᠶᠠᠭᠤᠮᠠ ᠬᠤᠪᠢᠷᠠᠨ ᠢᠷᠡᠭᠡᠳ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤᠬᠤ ᠰᠢᠭ᠋ ᠪᠣᠯᠪᠠ᠃
ᠬᠣᠩᠭᠣᠷ᠂ ᠪᠠᠲᠤ ᠶ᠋ᠢ ᠲᠡᠪᠡᠷᠢᠨ ᠠᠪᠴᠤ 《ᠡᠪᠦᠭᠡᠨ ᠮᠢᠨᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ》 ᠭᠡᠳ ᠣᠢᠷᠠ ᠬᠠᠪᠢ ᠶ᠋ᠢᠨ ᠠᠭᠠᠷ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠠᠭᠤᠰᠬᠢᠨ ᠳ᠋ᠠᠭᠠᠨ ᠬᠢᠬᠦ ᠭᠡᠰᠡᠨ ᠶᠤᠮ ᠰᠢᠭ ᠠᠮᠢᠰᠬᠤᠭᠠ ᠪᠠᠨ ᠳᠣᠲᠣᠭᠰᠢ ᠤᠷᠲᠤ ᠪᠠᠷ ᠬᠦᠴᠦᠲᠡᠢ ᠲᠠᠲᠠᠯᠠ᠃
ᠮᠠᠷᠭᠠᠰᠢ ᠨᠢ ᠪᠠᠲᠤ ᠰᠢᠭᠤᠳ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠮᠣᠷᠢ ᠬᠥᠲᠥᠯᠵᠦ ᠣᠴᠢᠭᠠᠳ ᠲᠡᠭᠦᠨ ᠲᠡᠢ ᠶᠣᠰᠣᠲᠠᠢ ᠯᠠ ᠵᠠᠳᠠ ᠭᠡᠷᠡᠯᠲᠦᠨ ᠰᠣᠯᠣᠩᠭᠠ ᠪᠠᠨ ᠠᠪᠤᠭᠠᠳ ᠪᠤᠴᠠᠵᠠᠢ᠃