ᠬᠡᠦᠬᠡᠳ ᠲᠤ ᠠᠯᠢᠪᠠ ᠶ᠋ᠢ ᠪᠡᠯᠡᠨᠴᠢᠯᠡᠭᠦᠯᠬᠦ ᠪᠣᠯᠤᠭᠰᠠᠨ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ1-05-ᠪᠣᠯᠣᠴᠢᠯᠠᠭᠤ
1118ᠬᠡᠦᠬᠡᠳ ᠲᠤ ᠠᠯᠢᠪᠠ ᠶ᠋ᠢ ᠪᠡᠯᠡᠨᠴᠢᠯᠡᠭᠦᠯᠬᠦ ᠪᠣᠯᠤᠭᠰᠠᠨ
ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ05-ᠪᠣᠯᠣᠴᠢᠯᠠᠭᠤ
ᠵᠠᠷᠢᠮ ᠭᠡᠷ ᠦ᠋ᠨ ᠠᠬᠠᠮᠠᠳ᠂ ᠬᠡᠦᠬᠡᠳ ᠭᠠᠭᠴᠠᠬᠠᠨ ᠰᠠᠢᠨ ᠰᠤᠷᠪᠠᠯ ᠪᠣᠯᠴᠢᠬᠠᠨᠠ᠂ ᠥᠭᠡᠷᠡ ᠶᠠᠭᠤ ᠶ᠋ᠢ ᠴᠤ᠌ ᠬᠠᠮᠢᠶᠠᠷᠬᠤ ᠬᠡᠷᠡᠭ ᠦᠭᠡᠢ᠂ ᠶᠠᠭᠤ ᠴᠤ᠌ ᠬᠢᠬᠦ ᠬᠡᠷᠡᠭ ᠦᠭᠡᠢ᠂ ᠪᠤᠰᠤᠳ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠨᠢ ᠠᠪᠤ ᠡᠵᠢ ᠨᠢ ᠪᠡᠯᠡᠨ ᠪᠣᠯᠭᠠᠵᠤ ᠥᠭᠭᠦᠨᠡ ᠭᠡᠰᠡᠨ ᠦᠵᠡᠯᠲᠡ ᠲᠡᠢ ᠪᠠᠢᠳᠠᠭ᠃ ᠬᠢᠴᠢᠶᠡᠯ ᠪᠠᠭᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠢᠳᠡᠵᠦ ᠤᠤᠭᠤᠬᠤ ᠨᠢ ᠪᠡᠯᠡᠨ᠂ ᠳᠠᠰᠬᠠᠯ ᠬᠢᠬᠦ ᠳ᠋ᠦ᠍ ᠨᠢ ᠬᠠᠵᠠᠭᠤ ᠳ᠋ᠤ᠌ ᠨᠢ ᠬᠠᠷᠠᠵᠤ ᠰᠠᠭᠤᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠤᠰᠤ ᠴᠠᠢ ᠵᠢᠮᠢᠰ ᠰᠢᠬᠢᠷ ᠲᠦ᠍ ᠬᠦᠷᠲᠡᠯᠡ ᠵᠥᠭᠡᠭᠡᠵᠦ ᠶᠠᠭᠠᠷᠠᠨᠠ᠂ ᠤᠨᠲᠠᠬᠤ ᠳ᠋ᠤ᠌ ᠣᠷᠣ ᠬᠥᠨᠵᠢᠯᠡ ᠶ᠋ᠢ ᠨᠢ ᠳᠡᠯᠭᠡᠵᠦ ᠥᠭᠭᠦᠨᠡ᠂ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠶᠠᠪᠤᠬᠤ ᠳ᠋ᠤ᠌ ᠳᠠᠰᠬᠠᠯ ᠳᠡᠪᠲᠡᠷ ᠡᠮᠦᠰᠴᠦ ᠵᠡᠭᠦᠬᠦ ᠶ᠋ᠢ ᠨᠢ ᠪᠡᠯᠡᠳᠬᠡᠵᠦ ᠥᠭᠭᠦᠨᠡ᠂ ᠮᠠᠷᠲᠠᠵᠤ ᠣᠷᠬᠢᠭᠰᠠᠨ ᠢ᠋ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠬᠦᠷᠭᠡᠵᠦ ᠭᠦᠶᠦᠨᠡ᠃ ᠨᠡᠩ ᠴᠠᠰᠢ ᠨᠢ ᠶᠠᠷᠢᠪᠠᠯ ᠠᠢᠯ ᠪᠣᠯᠬᠤ ᠳ᠋ᠤ᠌ ᠭᠡᠷ ᠲᠡᠷᠭᠡ ᠡᠴᠡ ᠬᠡᠦᠬᠡᠳ ᠲᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠣᠮᠪᠣᠯᠣ ᠪᠠᠨ ᠶᠠᠭᠠᠬᠢᠵᠤ ᠡᠵᠡᠮᠳᠡᠬᠦ ᠲᠤᠬᠠᠢ ᠳ᠋ᠤ᠌ ᠬᠦᠷᠲᠡᠯᠡ ᠪᠢᠰᠢᠯᠭᠠᠵᠤ ᠰᠠᠭᠤᠬᠤ ᠪᠣᠯᠵᠠᠢ᠃ ᠬᠡᠦᠬᠡᠳ ᠶᠠᠭᠤᠮᠠ ᠬᠢᠬᠦ ᠶ᠋ᠢ ᠪᠠᠢᠴᠢᠬᠠ᠂ ᠰᠡᠳᠬᠢᠬᠦ ᠴᠦ᠍ ᠬᠡᠷᠡᠭ ᠦᠭᠡᠢ ᠪᠣᠯᠤᠭᠰᠠᠨ᠃ ᠳᠡᠭᠡᠳᠦ ᠳᠤᠮᠳᠠᠳᠤ ᠲᠡᠭᠦᠰᠲᠡᠯᠡ ᠪᠡᠨ ᠨᠠᠰᠤᠲᠠᠢ ᠡᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠭᠤᠯᠵᠤ ᠭᠠᠷ ᠤ᠋ᠨ ᠬᠣᠭᠣᠯᠠ ᠶ᠋ᠢ ᠨᠢ ᠢᠳᠡᠭᠰᠡᠨ ᠨᠢᠭᠡᠨ ᠥᠬᠢᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠴᠢᠭᠠᠳ ᠰᠠᠷᠠ ᠪᠣᠯᠤᠭᠰᠠᠨ ᠦᠭᠡᠢ ᠬᠠᠷᠢᠵᠤ ᠢᠷᠡᠭᠰᠡᠨ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠣᠭᠣᠯᠠᠨ ᠭᠡᠷ᠂ ᠭᠤᠸᠠᠩᠵᠠ ᠪᠤᠶᠤ ᠪᠤᠰᠤᠳ ᠤ᠋ᠨ ᠬᠢᠭᠰᠡᠨ ᠬᠣᠭᠣᠯᠠ ᠶ᠋ᠢ ᠰᠡᠵᠢᠭᠯᠡᠭᠡᠳ ᠢᠳᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠣᠭᠣᠯᠠ ᠢᠳᠡᠬᠦ ᠳᠤᠷᠠᠰᠢᠯ ᠪᠦᠷ ᠪᠠᠢᠬᠤ ᠦᠭᠡᠢ ᠡᠴᠡ ᠪᠣᠯᠵᠤ᠂ ᠪᠡᠶᠡ ᠨᠢ ᠮᠠᠭᠤᠳᠠᠭᠠᠳ ᠡᠮᠨᠡᠯᠭᠡ ᠳ᠋ᠦ᠍ ᠣᠷᠣᠭᠰᠠᠨ ᠠ᠋ᠴᠠ ᠰᠤᠷᠭᠠᠭᠤᠯᠢ ᠠ᠋ᠴᠠ ᠪᠠᠨ ᠪᠤᠴᠠᠨ ᠢᠷᠡᠵᠡᠢ᠃
ᠡᠢᠮᠦᠷᠬᠦ ᠣᠷᠴᠢᠨ ᠳ᠋ᠤ᠌ ᠥᠰᠬᠦ ᠬᠡᠦᠬᠡᠳ ᠳᠤᠷᠠ ᠰᠣᠨᠢᠷᠬᠠᠯ ᠳᠠᠩ ᠴᠤᠯᠭᠤᠢ᠂ ᠰᠠᠷᠠᠯ ᠰᠡᠳᠬᠢᠬᠦᠢ ᠨᠢ ᠲᠦᠵᠢᠷᠡᠭᠰᠡᠨ᠂ ᠠᠵᠢᠯ ᠠᠮᠢᠳᠤᠷᠠᠯ ᠢ᠋ ᠣᠢᠯᠠᠭᠠᠬᠤ ᠦᠭᠡᠢ᠂ ᠪᠡᠶᠡ ᠪᠡᠨ ᠳᠠᠭᠠᠭᠠᠬᠤ ᠴᠢᠳᠠᠪᠤᠷᠢ ᠠᠨᠠᠢ᠂ ᠥᠪᠡᠷ ᠦ᠋ᠨ ᠦᠵᠡᠯᠲᠡ ᠪᠡᠷ ᠳᠤᠲᠠᠮᠠᠭ᠂ ᠠᠯᠢᠪᠠ ᠪᠠᠨ ᠪᠤᠰᠤᠳ ᠲᠤ ᠨᠠᠢᠳᠠᠬᠤ ᠵᠡᠮᠳᠡᠭ ᠠᠷᠠᠨᠰᠢᠨ ᠲᠠᠢ ᠪᠣᠯᠳᠠᠭ ᠨᠢ ᠮᠡᠳᠡᠭᠡᠵᠢ᠃ ᠮᠠᠯ ᠠᠬᠤᠢ ᠳ᠋ᠤ᠌ ᠣᠢᠷᠠᠲᠤᠵᠤ᠂ ᠬᠥᠳᠡᠭᠡ ᠭᠠᠳᠠᠭᠠ ᠠᠵᠢᠯ ᠮᠣᠳᠣᠨ ᠳ᠋ᠤ᠌ ᠶᠠᠪᠤᠳᠠᠭ ᠬᠡᠦᠬᠡᠳ ᠦ᠋ᠨ ᠬᠠᠷᠠᠭᠠ ᠰᠣᠨᠣᠷ᠂ ᠵᠦᠭ ᠴᠢᠭ ᠢᠯᠭᠠᠬᠤ᠂ ᠣᠷᠣᠨ ᠵᠠᠢ ᠶ᠋ᠢᠨ ᠰᠠᠷᠠᠯ ᠨᠢ ᠪᠦᠷ ᠰᠠᠢᠨ ᠪᠠᠢᠳᠠᠭ᠂ ᠠᠵᠢᠯ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠬᠡᠦᠬᠡᠳ ᠰᠤᠷᠴᠤ ᠰᠤᠳᠤᠯᠬᠤ ᠶ᠋ᠢᠨ ᠠᠷᠭᠠ ᠳᠠᠮ ᠢ᠋ ᠶᠠᠭᠠᠬᠢᠵᠤ ᠣᠯᠳᠠᠭ ᠪᠢᠯᠡ! ᠰᠢᠯᠢᠳᠡᠭ ᠡᠴᠢᠭᠡ ᠡᠬᠡ ᠪᠣᠯ ᠬᠡᠦᠬᠡᠳ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠨᠠᠢᠵᠠ ᠪᠠᠢᠵᠤ᠂ ᠬᠡᠦᠬᠡᠳ ᠦ᠋ᠨ ᠡᠷᠬᠡ ᠴᠢᠯᠥᠭᠡ ᠲᠡᠢ ᠦᠰᠦᠨ ᠪᠣᠢᠵᠢᠯᠲᠠ ᠳ᠋ᠤ᠌ ᠢᠳᠡᠪᠬᠢᠲᠡᠢ ᠲᠤᠷᠰᠢᠯᠭᠠ ᠤᠬᠠᠭᠠᠨᠲᠤ ᠵᠥᠪᠳᠡᠯ ᠥᠭᠳᠡᠭ ᠥᠮᠥᠭ ᠲᠦᠰᠢᠭ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠠᠯᠢᠪᠠ ᠶ᠋ᠢ ᠬᠡᠦᠬᠡᠳ ᠦ᠋ᠨ ᠡᠮᠦᠨᠡ ᠡᠴᠡ ᠬᠢᠭᠰᠡᠭᠡᠷ ᠪᠠᠢᠵᠤ᠂ ᠬᠡᠦᠬᠡᠳ ᠶᠠᠭᠤ ᠬᠢᠬᠦ᠂ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠪᠠᠨ ᠴᠤ᠌ ᠣᠯᠬᠤ ᠦᠭᠡᠢ ᠵᠦᠭ ᠴᠢᠭ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠬᠥᠮᠦᠨ ᠪᠣᠯᠭᠠᠳᠠᠭ ᠦᠭᠡᠢ᠂ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠯᠡ ᠲᠠᠯᠠ ᠪᠠᠷ ᠵᠢᠯᠣᠭᠣᠳᠬᠤ ᠠ᠋ᠴᠠ ᠪᠢᠰᠢ ᠪᠦᠬᠦ ᠲᠠᠯᠠ ᠪᠠᠷ ᠡᠵᠡᠮᠳᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠠ ᠨᠢ ᠲᠤᠩ ᠠᠶᠤᠯᠲᠠᠢ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ ᠪᠠᠢᠭᠠ᠃ ᠮᠣᠩᠭᠣᠯ ᠤ᠋ᠨ ᠨᠡᠢᠰᠯᠡᠯ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠳ᠋ᠤ᠌《 ᠶᠢᠰᠦᠨ ᠡᠷᠳᠡᠨᠢ》 ᠬᠡᠮᠡᠬᠦ ᠰᠠᠢᠬᠠᠨ ᠨᠡᠷᠡ ᠲᠡᠢ ᠬᠤᠪᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠪᠠᠢᠳᠠᠭ᠂ ᠲᠡᠷᠡ ᠬᠦ᠌ ᠰᠤᠷᠭᠠᠭᠤᠯᠢ ᠶ᠋ᠢᠨ ᠵᠠᠬᠢᠷᠤᠯ ᠡᠩᠬᠡᠫᠦ᠋ᠷᠫᠦ ᠪᠣᠯ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠮᠤᠭ ᠤ᠋ᠨ ᠵᠠᠯᠠᠭᠤ ᠵᠠᠬᠢᠷᠤᠯ ᠭᠡᠳᠡᠭ᠃ ᠡᠩᠬᠫᠦ᠋ᠷᠫᠦ ᠶ᠋ᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠬᠤ ᠨᠠᠰᠤᠨ ᠳ᠋ᠤ᠌ ᠨᠢ ᠡᠵᠢ ᠨᠢ ᠬᠦᠨᠳᠦ ᠡᠪᠡᠳᠴᠢᠨ ᠣᠯᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠰᠤᠷᠭᠠᠭᠤᠯᠢ ᠰᠣᠶᠣᠯ ᠤ᠋ᠨ ᠮᠥᠷ ᠬᠥᠭᠡᠭᠡᠬᠦ ᠠᠵᠠ ᠲᠣᠬᠢᠶᠠᠯ ᠢ᠋ᠶ᠋ᠠᠨ ᠠᠯᠳᠠᠵᠠᠢ᠂ ᠭᠡᠪᠡᠴᠦ ᠡᠨᠡ ᠪᠢᠴᠢᠬᠠᠨ ᠬᠦᠦ ᠡᠵᠢ ᠪᠡᠨ ᠰᠤᠪᠢᠯᠠᠬᠤ ᠶ᠋ᠢᠨ ᠳᠠᠭᠠᠤ ᠰᠤᠷᠬᠤ ᠪᠢᠴᠢᠭ ᠣᠯᠵᠤ ᠢᠷᠡᠭᠡᠳ ᠡᠵᠢ ᠪᠡᠷ ᠢ᠋ᠶ᠋ᠡᠨ ᠦᠰᠦᠭ ᠵᠢᠭᠠᠯᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠰᠤᠷᠴᠤ ᠡᠬᠢᠯᠡᠭᠰᠡᠨ ᠭᠡᠳᠡᠭ᠂ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠲᠧᠭᠨᠢᠭ ᠦ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢ ᠲᠡᠭᠦᠰᠬᠡᠵᠦ᠂ ᠠᠷᠪᠠ ᠶᠢᠰᠦᠨ ᠨᠠᠰᠤᠲᠠᠢ ᠬᠤᠪᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠪᠠᠨ ᠪᠠᠢᠭᠤᠯᠤᠭᠰᠠᠨ᠃ ᠶᠠᠫᠣᠨ ᠳ᠋ᠤ᠌ ᠪᠣᠯᠤᠭᠰᠠᠨ ᠠᠽᠢᠶᠠ ᠲᠢᠪ ᠦ᠋ᠨ ᠵᠠᠯᠠᠭᠤᠰ ᠤ᠋ᠨ ᠣᠶᠤᠨ ᠤ᠋ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠨᠠᠷᠠᠨ ᠬᠠᠭᠠᠨ ᠠ᠋ᠴᠠ ᠱᠠᠩᠨᠠᠯ ᠲᠣᠰᠴᠤ᠂ ᠡᠩᠬᠡᠫᠦ᠋ᠷᠫᠦ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠮᠡᠳᠡᠭᠡᠯᠡᠯ ᠶᠠᠫᠣᠨ ᠳ᠋ᠤ᠌ ᠶᠡᠬᠡ ᠳᠣᠩᠰᠣᠯᠭᠠᠯ ᠪᠣᠯᠤᠭᠰᠠᠨ᠃ ᠡᠩᠬᠡᠫᠦ᠋ᠷᠫᠦ ᠵᠠᠬᠢᠷᠤᠯ ᠣᠳᠣ ᠳ᠋ᠣᠺᠲ᠋ᠣᠷᠠᠨᠲ ᠤᠩᠰᠢᠵᠤ ᠪᠠᠢᠨᠠ ᠭᠡᠰᠡᠨ᠃ ᠠᠮᠢᠳᠤᠷᠠᠯ ᠠ᠋ᠴᠠ ᠬᠡᠦᠬᠡᠳ ᠠᠯᠢᠪᠠ ᠶ᠋ᠢ ᠰᠤᠷᠤᠨᠠ ᠭᠡᠳᠡᠭ ᠦ᠋ᠨ ᠠᠮᠢᠳᠤ ᠵᠢᠱ᠌ᠢᠶᠡ ᠡᠨᠡ ᠪᠠᠢᠭᠠ᠃
ᠬᠡᠦᠬᠡᠳ ᠲᠤ ᠠᠯᠢᠪᠠ ᠶ᠋ᠢ ᠪᠡᠯᠡᠨ ᠪᠣᠯᠭᠠᠵᠤ ᠥᠭᠬᠦ ᠨᠢ ᠬᠡᠦᠬᠡᠳ ᠲᠤ ᠶᠠᠭᠤ ᠴᠤ᠌ ᠥᠭᠭᠦᠭᠰᠡᠨ ᠦᠭᠡᠢ ᠲᠡᠢ ᠠᠳᠠᠯᠢᠬᠠᠨ ᠭᠡᠮᠡᠨ ᠰᠣᠳᠣᠨ ᠬᠥᠮᠦᠰ ᠰᠡᠴᠡᠯᠡᠭᠰᠡᠨ ᠪᠠᠢᠳᠠᠭ᠃ ᠬᠡᠦᠬᠡᠳ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠴᠢᠳᠠᠪᠤᠷᠢ ᠪᠠᠷ ᠪᠦᠲᠦᠭᠡᠨ ᠪᠠᠢᠭᠤᠯᠬᠤ᠂ ᠥᠭᠡᠳᠡ ᠨᠢ ᠲᠠᠲᠠᠬᠤ ᠶ᠋ᠢᠨ ᠪᠠᠶᠠᠷ ᠪᠠᠶᠠᠰᠤᠯ᠂ ᠠᠮᠵᠢᠯᠲᠠ ᠶ᠋ᠢᠨ ᠲᠥᠷᠥᠭᠳᠡᠯ ᠢ᠋ ᠣᠯᠵᠤ ᠮᠡᠳᠡᠷᠡᠬᠦ ᠦᠭᠡᠢ ᠪᠣᠯᠤᠨᠠ ᠭᠡᠳᠡᠭ ᠴᠢᠨᠢ ᠬᠡᠦᠬᠡᠳ ᠦ᠋ᠨ ᠠᠮᠢᠳᠤᠷᠠᠨ ᠪᠦᠲᠦᠭᠡᠬᠦ ᠡᠷᠬᠡ ᠴᠢᠯᠥᠭᠡ ᠶ᠋ᠢ ᠪᠤᠯᠢᠶᠠᠭᠰᠠᠨ ᠭᠡᠵᠦ ᠣᠢᠯᠠᠭᠠᠵᠤ ᠪᠣᠯᠤᠨᠠ ᠳᠠ᠃ ᠪᠢᠳᠡ ᠦᠨᠡᠨ ᠳ᠋ᠦ᠍ ᠪᠡᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠡᠷᠬᠡ ᠵᠦᠢ ᠳ᠋ᠦ᠍ ᠭᠠᠷ ᠲᠥᠷᠥᠭᠰᠡᠨ ᠠᠰᠠᠭᠤᠳᠠᠯ ᠪᠣᠯᠵᠤ ᠪᠠᠢᠭᠠ ᠰᠢᠦ! ᠬᠥᠳᠡᠯᠮᠦᠷᠢᠴᠢ ᠪᠦᠲᠦᠭᠡᠯᠴᠢ ᠠᠮᠢᠳᠤᠷᠠᠬᠤ ᠡᠷᠬᠡ ᠶ᠋ᠢ ᠨᠢ ᠪᠤᠯᠢᠶᠠᠯᠠ᠂ ᠠᠵᠢᠯ ᠮᠡᠷᠭᠡᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠰᠣᠩᠭᠣᠯᠲᠠ ᠬᠢᠬᠦ ᠡᠷᠬᠡ ᠶ᠋ᠢ ᠨᠢ ᠪᠤᠯᠢᠶᠠᠯᠠ᠂ ᠡᠨᠡ ᠠᠭᠤᠯᠠ ᠤᠰᠤ ᠪᠠᠢᠭᠠᠯᠢ ᠳᠡᠯᠡᠬᠡᠢ ᠪᠡᠨ《 ᠮᠣᠩᠭᠣᠯ》 ᠨᠢᠳᠦ ᠪᠡᠷ ᠲᠠᠨᠢᠵᠤ ᠮᠡᠳᠡᠷᠡᠨ ᠰᠡᠳᠬᠢᠯ ᠳᠦᠭᠦᠷᠡᠩ ᠠᠵᠠ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠬᠤ ᠡᠷᠬᠡ ᠲᠡᠢ ᠨᠢ ᠬᠦᠷᠲᠡᠯᠡ ᠬᠠᠯᠳᠠᠬᠤ ᠪᠣᠯᠵᠠᠢ᠃ ᠮᠣᠩᠭᠣᠯ ᠬᠡᠦᠬᠡᠳ ᠮᠠᠨᠢ ᠮᠣᠩᠭᠣᠯ ᠵᠠᠶᠠᠭᠠ ᠪᠠᠨ ᠯᠠ ᠡᠳ᠋ᠯᠡᠬᠦ ᠪᠣᠯᠤᠭᠠᠰᠠᠢ!
ᠠᠭᠤᠳᠠᠮ ᠲᠠᠯᠠ ᠳ᠋ᠤ᠌ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠡᠭᠦᠳᠡᠯ ᠪᠠᠭᠤᠳᠠᠯ᠂ ᠠᠶᠠᠨ ᠵᠢᠩ᠂ ᠠᠩ ᠬᠦᠷᠦᠭᠡ᠂ ᠠᠳᠤᠭᠤ ᠮᠠᠯ ᠤ᠋ᠨ ᠳᠡᠷᠭᠡᠳᠡ ᠥᠰᠦᠭᠰᠡᠨ ᠮᠣᠩᠭᠣᠯ ᠬᠡᠦᠬᠡᠳ ᠦ᠋ᠨ ᠰᠠᠷᠠᠯ ᠰᠡᠳᠬᠢᠬᠦᠢ ᠣᠨᠴᠠ ᠬᠤᠷᠴᠠ ᠴᠣᠪᠣᠭᠣ ᠪᠠᠢᠳᠠᠭ ᠤ᠋ᠨ ᠰᠢᠯᠲᠠᠭᠠᠨ ᠪᠠᠢᠭᠠᠯᠢ ᠠᠬᠤᠢ ᠠᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠠᠯᠢᠪᠠ ᠪᠦᠬᠦᠨ ᠢ᠋ ᠴᠥᠮ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠵᠦ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠤᠨ ᠦᠢᠯᠡᠳᠦᠯᠭᠡ ᠡᠴᠡ ᠰᠤᠷᠤᠭᠰᠠᠨ ᠪᠠᠢᠳᠠᠭ᠂ ᠲᠡᠢᠮᠦ ᠪᠣᠯᠬᠣᠷ ᠮᠣᠩᠭᠣᠯᠴᠤᠳ ᠶᠡᠷᠦ ᠨᠢ ᠦᠵᠡᠭᠰᠡᠨ ᠦᠭᠡᠢ᠂ ᠥᠩᠭᠡᠷᠡᠭᠦᠯᠦᠭᠰᠡᠨ ᠦᠭᠡᠢ ᠳᠠᠯᠳᠠ ᠶ᠋ᠢᠨ ᠶᠠᠷᠢᠶᠠ ᠴᠤᠤᠷᠬᠠᠯ ᠳ᠋ᠤ᠌ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠵᠤ《 ᠳᠠᠮ ᠤ᠋ᠨ ᠦᠭᠡ ᠳᠠᠯᠠᠨ ᠬᠤᠳᠠᠯᠴᠢ》 ᠬᠡᠮᠡᠳᠡᠭ᠂ ᠡᠨᠡᠬᠦ ᠤᠳᠤᠮᠰᠢᠯ ᠡᠴᠡ ᠪᠡᠨ ᠪᠣᠯᠵᠤ ᠬᠣᠷᠰᠢᠶᠠ ᠳᠡᠯᠭᠡᠭᠦᠷ ᠦ᠋ᠨ ᠭᠠᠵᠠᠷ ᠪᠠᠷᠠᠭᠠ ᠲᠠᠸᠠᠷ ᠦᠵᠡᠬᠦ ᠳᠤ ᠪᠡᠨ ᠴᠦ᠍ ᠬᠤᠳᠠᠯᠳᠤᠭᠴᠢ ᠶ᠋ᠢᠨ ᠣᠯᠠᠨ ᠲᠠᠢᠯᠪᠤᠷᠢ ᠳ᠋ᠤ᠌ ᠳᠤᠷᠠ ᠦᠭᠡᠢ ᠪᠠᠢᠵᠤ ᠵᠠᠪᠠᠯ ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠢᠵᠤ ᠲᠡᠮᠲᠡᠷᠢᠵᠦ ᠦᠵᠡᠳᠡᠭ᠂ ᠡᠭᠦᠨ ᠢ᠋ ᠪᠡᠨ ᠮᠣᠩᠭᠣᠯ ᠬᠥᠮᠦᠨ ᠭᠠᠷ ᠲᠤ᠌ ᠪᠠᠨ ᠨᠢᠳᠦ ᠲᠡᠢ ᠰᠢᠦ ᠭᠡᠳᠡᠭ᠃ ᠡᠨᠡ ᠨᠢ ᠮᠠᠨ ᠤ᠋ ᠬᠡᠦᠬᠡᠳ ᠪᠣᠯ ᠠᠯᠢᠪᠠ ᠶ᠋ᠢ ᠦᠢᠯᠡᠳᠦᠯᠭᠡ ᠡᠴᠡ ᠰᠤᠷᠳᠠᠭ ᠭᠧᠨ ᠤᠳᠤᠮᠰᠢᠯ ᠲᠠᠢ ᠭᠡᠰᠡᠨ ᠦᠭᠡ᠃ ᠲᠡᠢᠮᠦ ᠡᠴᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠠᠭᠠ ᠠ᠋ᠴᠠ ᠨᠢ ᠠᠵᠢᠯ ᠮᠣᠳᠣᠨ ᠳ᠋ᠤ᠌ ᠢᠯᠡᠭᠦᠬᠡᠨ ᠣᠢᠷᠠᠲᠤᠭᠤᠯᠤᠶᠠ᠂ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠥᠪᠡᠷ ᠦ᠋ᠨ ᠠᠵᠢᠯ ᠰᠤᠷᠤᠯᠭᠠ ᠳ᠋ᠤ᠌ ᠪᠠᠨ ᠡᠵᠡᠨ ᠮᠡᠳᠡᠬᠦ ᠤᠬᠠᠮᠰᠠᠷ ᠳᠠᠳᠬᠠᠯ ᠢ᠋ ᠡᠷᠲᠡᠬᠡᠨ ᠬᠥᠮᠦᠵᠢᠭᠦᠯᠦᠶᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵ· ᠪᠤᠶᠠᠨᠲᠣᠭᠲᠠᠬᠤ᠂ ᠳᠡᠭᠵᠢᠨ᠂ ᠣᠳᠬᠠᠨᠰᠣᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ