ᠲᠤᠩᠭᠠᠯᠠᠭ ᠲᠠᠮᠢᠷ4-05-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1521《ᠢᠳᠡᠭᠰᠡᠨ ᠪᠣᠣᠪᠣ ᠴᠢᠨᠢ ᠪᠠᠭᠠᠳᠤᠭᠠᠳ ᠪᠤᠴᠠᠵᠤ ᠢᠷᠡᠪᠡ ᠤᠤ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠲᠠᠪᠤ
《ᠴᠡᠴᠡᠷᠯᠢᠭ ᠮᠠᠨᠳᠤᠯ ᠤ᠋ᠨ ᠠᠢᠮᠠᠭ ᠤ᠋ᠨ ᠨᠠᠮ ᠤ᠋ᠨ ᠬᠣᠷᠢᠶᠠ》 ᠭᠡᠵᠦ ᠤᠯᠠᠭᠠᠨ ᠰᠢᠩᠬᠤᠨ ᠪᠣᠳᠤᠭᠳᠠᠢ ᠭᠣᠣ ᠳ᠋ᠤ᠌ ᠰᠢᠯᠯᠡᠨ ᠬᠢᠭᠰᠡᠨ ᠬᠠᠶᠠᠭ ᠢ᠋ ᠬᠠᠯᠵᠠ ᠲᠠᠢ ᠲᠣᠮᠣ ᠴᠠᠭᠠᠨ ᠢᠰᠡᠭᠡᠢ ᠭᠡᠷ ᠦ᠋ᠨ ᠲᠣᠲᠣᠭᠣᠨ ᠳᠡᠭᠡᠷᠡ ᠬᠣᠶᠠᠷ ᠬᠥᠮᠦᠨ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠲᠠᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠰᠢ ᠪᠣᠯᠵᠤ ᠤᠤ ᠬᠠᠷᠠᠭᠠᠴᠢ᠃
ᠲᠣᠮᠣ ᠶᠠᠩᠭᠢᠷ ᠪᠡᠶᠡ ᠲᠡᠢ ᠨᠠᠷᠢᠬᠠᠨ ᠪᠣᠯᠪᠠᠴᠤ ᠤᠷᠲᠤ ᠬᠠᠷᠠ ᠭᠡᠵᠢᠭᠡ ᠲᠡᠢ ᠳᠤᠮᠳᠠ ᠨᠠᠰᠤᠨ ᠤ᠋ ᠡᠷᠡ ᠭᠡᠷ ᠡᠴᠡ ᠭᠤᠷᠪᠠ ᠳᠥᠷᠪᠡᠨ ᠠᠯᠬᠤᠮ ᠤ᠋ᠨ ᠵᠠᠢ ᠳ᠋ᠤ᠌ ᠣᠴᠢᠵᠤ ᠵᠣᠭᠰᠣᠨ ᠥᠷᠥᠭᠡᠰᠦᠨ ᠨᠢᠳᠦ ᠪᠡᠨ ᠠᠨᠢᠵᠤ ᠰᠠᠷᠠᠪᠴᠢᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠳᠣᠬᠢ ᠪᠣᠯᠵᠤ ᠰᠢᠦ》 ᠭᠡᠯᠡ᠃
ᠨᠥᠭᠦᠭᠡ ᠫᠠᠭᠳᠠᠭᠠᠷ ᠪᠡᠶᠡ ᠲᠡᠢ ᠡᠷᠡ ᠨᠢ ᠠᠮᠠᠨ ᠳ᠋ᠠᠭᠠᠨ ᠵᠠᠭᠤᠵᠤ ᠪᠠᠢᠭᠰᠠᠨ ᠬᠠᠳᠠᠭᠠᠰᠤ ᠪᠠᠨ ᠠᠪᠴᠤ ᠰᠢᠷᠢᠨ ᠤᠭᠤᠲᠠᠨ ᠳ᠋ᠤ᠌ ᠬᠢᠭᠡᠳ ᠠᠯᠤᠬᠠ ᠪᠠᠨ ᠡᠰᠢ ᠪᠡᠷ ᠨᠢ ᠲᠦᠷᠡᠢᠯᠡᠬᠦ ᠵᠠᠭᠤᠷᠠ 《ᠳᠠᠷᠤᠭᠠ ᠠ᠋ ᠭᠦᠢᠴᠡᠯᠡ》 ᠭᠡᠵᠦ ᠪᠦᠳᠦᠭᠦᠨ ᠫᠠᠷᠭᠢᠶᠠ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠭᠡᠷ ᠡᠴᠡ ᠡᠷᠳᠡᠨᠢ ᠭᠠᠷᠴᠤ᠂ ᠡᠭᠦᠳᠡᠨ ᠳᠡᠭᠡᠷᠡ ᠬᠠᠲᠠᠭᠰᠠᠨ ᠬᠠᠶᠠᠭ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠪᠣᠯᠬᠤ ᠨᠢ ᠴᠦ᠍ ᠪᠣᠯᠵᠠᠢ᠃ ᠤᠭ ᠨᠢ ᠠᠯᠲᠠᠨ ᠭᠦᠷᠢᠶᠡᠳᠡᠢ ᠭᠣᠣ ᠳ᠋ᠤ᠌ ᠲᠣᠮᠣ ᠤᠯᠠᠭᠠᠨ ᠦᠰᠦᠭ ᠢ᠋ᠶ᠋ᠡᠷ ᠪᠢᠴᠢᠭᠡᠳ ᠬᠢᠭᠰᠡᠨ ᠪᠣᠯ ᠵᠦᠭᠡᠷ ᠪᠠᠢᠵᠤ ᠳᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠵᠦ ᠭᠤᠶᠤᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠶᠠᠮᠠᠷ ᠪᠤᠷᠬᠠᠨ ᠤ᠋ ᠭᠣᠣ ᠪᠢᠰᠢ ᠭᠡᠵᠦ ᠪᠦᠳᠦᠭᠦᠨ ᠡᠷᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠳᠡᠭᠡᠷᠡ ᠶᠠᠭᠤ ᠭᠡᠵᠦ ᠪᠢᠴᠢᠭᠰᠡᠨ ᠢ᠋ ᠲᠠ ᠮᠡᠳᠡᠬᠦ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠠᠨᠠ ᠭᠡᠰᠡᠨ ᠴᠦ᠍ ᠮᠠᠳ ᠰᠢᠦ ᠳᠡ ᠭᠡᠵᠦ ᠪᠦᠳᠦᠭᠦᠨ ᠡᠷᠡ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠴᠡᠷᠯᠢᠭ ᠮᠠᠨᠳᠤᠯ ᠤ᠋ᠨ ᠠᠢᠮᠠᠭ ᠤ᠋ᠨ ᠨᠠᠮ ᠤ᠋ᠨ ᠬᠣᠷᠢᠶᠠ ᠭᠡᠰᠡᠨ ᠦᠭᠡ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠣᠣ ᠶ᠋ᠢᠨ ᠬᠢᠨᠢ ᠬᠦᠷᠢᠶᠡᠨ ᠳ᠋ᠦ᠍ ᠠᠷᠰᠯᠠᠨ ᠪᠠᠷᠰ ᠰᠡᠢᠯᠵᠦ ᠬᠢᠶᠡ᠃ ᠳᠠᠷᠤᠭᠠ ᠲᠠ ᠪᠢᠴᠢᠭ ᠢ᠋ ᠨᠢ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠪᠠᠢᠭᠠᠳ ᠪᠢᠴᠢᠵᠦ ᠥᠭᠭᠦᠨᠡ ᠤᠤ ᠭᠡᠵᠦ ᠪᠦᠳᠦᠭᠦᠨ ᠡᠷᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠰᠯᠠᠨ ᠪᠠᠷᠰ ᠢ᠋ᠶ᠋ᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠭᠡᠵᠦ ᠶᠠᠩᠭᠢᠷ ᠡᠷᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠨᠠᠮ ᠮᠠᠨᠢ ᠬᠦᠴᠦᠨ ᠲᠡᠭᠦᠯᠳᠡᠷ᠂ ᠰᠦᠷ ᠪᠠᠳᠠᠷᠠᠩᠭᠤᠢ ᠭᠡᠰᠡᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠤᠨᠠ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠵᠥᠪ᠃ ᠲᠠ ᠬᠢᠭᠡᠳ ᠣᠷᠬᠢᠭᠠᠷᠠᠢ᠃ ᠪᠢ ᠪᠢᠴᠢᠭ ᠢ᠋ ᠨᠢ ᠪᠢᠴᠢᠵᠦ ᠥᠭᠭᠦᠨᠡ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠴᠡᠴᠡᠷᠯᠢᠭ ᠮᠠᠨᠳᠤᠯ ᠤ᠋ᠨ ᠠᠢᠮᠠᠭ ᠤ᠋ᠨ ᠨᠠᠮ ᠤ᠋ᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠶ᠋ᠢᠨ ᠠᠵᠢᠯ ᠢ᠋ ᠬᠢᠵᠦ ᠪᠠᠢᠭᠠ ᠪᠥᠭᠡᠳ ᠭᠡᠷ ᠲᠡᠭᠡᠨ ᠪᠠᠢᠬᠤ ᠨᠢ ᠬᠣᠪᠣᠷ᠂ ᠪᠠᠷᠤᠭ ᠯᠠ ᠬᠣᠰᠢᠭᠤ ᠨᠤᠭᠤᠳ ᠢ᠋ᠶ᠋ᠠᠷ ᠶᠠᠪᠤᠵᠤ ᠠᠵᠢᠯᠯᠠᠨᠠ᠃
ᠨᠢᠭᠡ ᠤᠳᠠᠭᠠ ᠬᠠᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠳᠡᠭᠦᠦ ᠶ᠋ᠢᠨ ᠳ᠋ᠡᠭᠡᠨ ᠣᠴᠢᠵᠤ ᠢᠷᠭᠡ ᠭᠠᠷᠭᠠᠭᠤᠯᠤᠨ ᠥᠨᠵᠢᠪᠡ᠃ ᠠᠬᠠ ᠳᠡᠭᠦᠦ ᠬᠣᠶᠠᠷ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠬᠤ ᠶ᠋ᠢ ᠥᠯᠵᠡᠢ ᠶᠡᠬᠡ ᠯᠡ ᠬᠢᠴᠢᠶᠡᠩᠭᠦᠢᠯᠡᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠦᠴᠦ ᠪᠡᠷ ᠵᠢᠷᠭᠠᠵᠤ ᠪᠠᠢᠨᠠ᠃ ᠬᠠᠷᠢᠨ ᠤᠷᠢᠳᠤ ᠨᠠᠳᠠ ᠲᠠᠢ ᠠᠳᠠᠯᠢ ᠪᠠᠢᠭᠰᠠᠨ ᠶᠠᠳᠠᠭᠤᠴᠤᠳ ᠶᠠᠭᠤ ᠣᠯᠵᠤ ᠠᠪᠤᠭᠰᠠᠨ ᠪᠣᠢ᠃ ᠶᠠᠭᠤ ᠴᠤ᠌ ᠣᠯᠤᠭᠠ ᠦᠭᠡᠢ᠃ ᠲᠠ ᠨᠠᠷ ᠳᠠᠩᠰᠠᠷᠠᠩ ᠡᠪᠦᠭᠡᠨ ᠢ᠋ ᠬᠠᠷᠠ ᠯᠠ ᠳᠠ᠃ ᠪᠡᠬᠢ ᠪᠠᠢᠳᠠᠭ ᠭᠤᠠᠵᠤᠤ ᠲᠠᠢᠵᠢ ᠶ᠋ᠢᠨ ᠬᠣᠨᠢ ᠳᠠᠭᠠᠭᠠᠳ᠂ ᠬᠠᠷᠢᠶᠠᠯᠭᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠵᠣᠳᠣᠭᠤᠯᠤᠭᠠᠳ ᠯᠠ ᠶᠠᠪᠤᠵᠤ ᠪᠠᠢᠨᠠ᠃
ᠡᠷᠳᠡᠭᠦᠳᠡ ᠲᠤᠷᠠᠩᠬᠠᠢ ᠢᠮᠠᠭᠠ ᠮᠥᠯᠬᠥᠭᠡ ᠰᠢᠷᠠ ᠳ᠋ᠤ᠌ ᠥᠭᠴᠦ ᠣᠷᠬᠢᠭᠠᠳ ᠤᠬᠠᠭᠠᠨ ᠠᠯᠳᠠᠲᠠᠯᠠ ᠲᠠᠰᠢᠭᠤᠷᠳᠠᠭᠤᠯᠵᠤ ᠪᠠᠢᠬᠤ ᠶ᠋ᠢ ᠪᠢ ᠬᠠᠷᠠᠭᠰᠠᠨ᠃ ᠬᠥᠭᠡᠷᠦᠬᠦᠢ ᠮᠢᠨᠢ᠃ ᠡᠨᠡ ᠵᠢᠯ ᠵᠢᠷᠠᠨ ᠨᠢᠭᠡ ᠬᠦᠷᠴᠦ ᠪᠠᠢᠭᠠ ᠠᠮᠢᠲᠠᠨ ᠰᠢᠦ ᠳᠡ ᠭᠡᠳ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠯᠠᠨ ᠭᠠᠰᠠᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠠᠭ ᠲᠤ᠌ ᠵᠣᠳᠣᠭᠤᠯᠤᠨᠠ ᠭᠡᠳᠡᠭ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠬᠣᠨᠢ ᠶ᠋ᠢ ᠨᠢ ᠬᠠᠶᠠᠭᠠᠳ ᠶᠠᠪᠤᠴᠢᠬᠠᠬᠤ ᠦᠭᠡᠢ ᠤᠤ? ᠬᠣᠰᠢᠭᠤ ᠲᠠᠮᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠬᠦ ᠦᠭᠡᠢ ᠤᠤ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠬᠤ ᠪᠣᠢ? ᠲᠡᠷᠡ ᠴᠢᠨᠢ ᠭᠤᠠᠵᠤᠤ ᠲᠠᠢᠵᠢ ᠳ᠋ᠤ᠌ ᠵᠠᠷᠤᠭᠳᠠᠭᠰᠠᠨ ᠤ᠋ ᠬᠦᠴᠦ ᠪᠡᠷ ᠪᠣᠷᠣ ᠬᠣᠨᠣᠭ ᠵᠠᠯᠭᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠰᠢᠦ ᠳᠡ᠃ ᠬᠥᠭᠡᠭᠡᠵᠦ ᠣᠷᠬᠢᠪᠠᠯ ᠡᠷᠡᠦ ᠲᠣᠯᠣᠭᠠᠢ ᠵᠣᠳᠣᠯᠳᠤᠭᠤᠯᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠨᠠ᠃ ᠪᠠᠰᠠ ᠲᠡᠭᠡᠭᠡᠳ ᠬᠥᠮᠦᠨ ᠦ᠌ ᠪᠤᠶᠠᠨ ᠢ᠋ ᠢᠳᠡᠵᠦ ᠪᠠᠢᠭᠠᠳ ᠡᠵᠡᠨ ᠳ᠋ᠦ᠍ ᠨᠢ ᠮᠠᠭᠤ ᠶᠠᠭᠤᠮᠠ ᠬᠢᠪᠡᠯ ᠠᠴᠢ ᠶ᠋ᠢ ᠤᠰᠤ ᠪᠠᠷ ᠭᠡᠭᠴᠢ ᠪᠣᠯᠵᠤ ᠨᠥᠭᠦᠭᠡ ᠵᠠᠶᠠᠭᠠ ᠴᠢᠨᠢ ᠵᠠᠢᠯᠠᠵᠤ ᠣᠷᠬᠢᠨᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠡᠭᠦᠨ ᠢ᠋ ᠲᠡᠵᠢᠭᠡᠬᠦ ᠦᠭᠡᠢ ᠰᠢᠦ ᠳᠡ ᠭᠡᠳ ᠥᠯᠵᠡᠢ ᠲᠠᠮᠠᠬᠢ ᠪᠠᠨ ᠨᠡᠷᠡᠵᠦ ᠲᠠᠲᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠡᠭᠦᠨ ᠢ᠋ ᠬᠠᠮᠵᠢᠯᠭᠠ ᠪᠢᠰᠢ ᠪᠣᠯᠭᠠᠭᠰᠠᠨ᠃ ᠡᠷᠬᠡ ᠴᠢᠯᠥᠭᠡ ᠥᠭᠭᠦᠭᠰᠡᠨ᠃ ᠲᠡᠭᠦᠨ ᠢ᠋ ᠳᠠᠷᠤᠯᠠᠪᠠᠯ ᠲᠥᠷᠥ ᠶ᠋ᠢᠨ ᠬᠠᠤᠯᠢ ᠥᠮᠥᠭᠯᠡᠨᠡ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠡᠴᠡ ᠪᠣᠯᠵᠤ ᠭᠡᠳᠡᠰᠦ ᠨᠢ ᠴᠠᠳᠬᠤ ᠦᠭᠡᠢ᠁ ᠠ᠋ ᠳᠠ ᠬᠣᠭᠣᠯᠠ ᠣᠯᠵᠤ ᠢᠳᠡᠨᠡ ᠭᠡᠳᠡᠭ ᠤᠤ᠂ ᠠᠮᠠᠷ ᠦᠭᠡᠢ ᠡᠳ᠋ ᠰᠢᠦ ᠬᠦᠦ ᠮᠢᠨᠢ ᠭᠡᠳ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠬᠦ ᠳ᠋ᠦ᠍ ᠦᠵᠦᠭᠦᠷ ᠲᠦ᠍ ᠨᠢ ᠰᠤᠷ ᠤᠶᠠᠭᠰᠠᠨ ᠱᠣᠳᠣᠩ ᠭᠡᠵᠢᠭᠡ ᠮᠤᠳᠤᠯᠵᠠᠵᠤ ᠪᠠᠢᠯᠠ᠃
ᠠᠢᠮᠠᠭ ᠤᠷᠤᠭᠤ ᠪᠠᠨ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠡᠷᠳᠡᠨᠢ ᠡᠨᠡ ᠶᠠᠷᠢᠶᠠᠨ ᠤ᠋ ᠲᠤᠬᠠᠢ ᠶᠠᠭᠤᠮᠠ ᠪᠣᠳᠣᠪᠠ᠃ ᠥᠯᠵᠡᠢ ᠶ᠋ᠢᠨ ᠶᠠᠷᠢᠶᠠ ᠭᠡᠨᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠳ᠋ᠦ᠍ ᠦᠨᠡᠨ ᠶᠠᠭᠤᠮᠠ ᠶᠡᠬᠡ ᠪᠠᠢᠯᠠ᠃ ᠥᠩᠭᠡᠷᠡᠭᠰᠡᠨ ᠵᠢᠯ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠᠨ ᠳᠡᠭᠡᠷᠡ ᠪᠣᠯᠤᠭᠰᠠᠨ ᠨᠢᠭᠡ ᠶᠠᠷᠢᠶᠠᠨ ᠳᠡᠭᠡᠷᠡ ᠶᠠᠳᠠᠭᠤ ᠬᠥᠮᠦᠰ ᠦ᠋ᠨ ᠠᠮᠢᠳᠤᠷᠠᠯ ᠢ᠋ ᠶᠠᠭᠠᠬᠢᠵᠤ ᠰᠠᠢᠵᠢᠷᠠᠭᠤᠯᠬᠤ ᠲᠤᠬᠠᠢ ᠶᠠᠷᠢᠵᠤ ᠤᠳᠠᠲᠠᠯᠠ ᠮᠠᠷᠭᠤᠯᠳᠤᠭᠰᠠᠨ ᠶᠤᠮ᠃ ᠡᠷᠳᠡᠨᠢ ᠲᠡᠷᠡ ᠶᠠᠷᠢᠶᠠᠨ ᠳ᠋ᠤ᠌ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠵᠤ ᠨᠡᠯᠢᠶᠡᠳ ᠶᠠᠭᠤᠮᠠ ᠶᠠᠷᠢᠭᠰᠠᠨ᠃ ᠨᠢᠭᠡ ᠬᠡᠰᠡᠭ ᠬᠥᠮᠦᠰ ᠹᠧᠣᠳᠠᠯ ᠪᠣᠯᠤᠨ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠵᠤ ᠶᠠᠳᠠᠭᠤᠴᠤᠳ ᠲᠤ᠌ ᠥᠮᠴᠢ ᠪᠣᠯᠭᠠᠨ ᠬᠤᠪᠢᠶᠠᠵᠤ ᠥᠭᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠪᠠᠢᠯᠠ᠃ ᠨᠥᠭᠦᠭᠡ ᠬᠡᠰᠡᠭ ᠨᠢ ᠥᠮᠴᠢ ᠪᠣᠯᠭᠠᠨ ᠥᠭᠴᠦ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠤᠯᠤᠰ ᠬᠤᠷᠢᠶᠠᠵᠤ ᠠᠪᠤᠭᠠᠳ ᠶᠠᠳᠠᠭᠤ ᠬᠥᠮᠦᠰ ᠲᠦ᠍ ᠬᠥᠯᠥᠰᠥ ᠪᠡᠷ ᠬᠠᠷᠢᠭᠤᠯᠤᠭᠤᠯᠵᠤ ᠠᠮᠢᠳᠤᠷᠠᠯ ᠢ᠋ ᠨᠢ ᠰᠠᠢᠵᠢᠷᠠᠭᠤᠯᠪᠠᠯ ᠵᠣᠬᠢᠨᠠ ᠭᠡᠨᠡ᠃ ᠭᠤᠷᠪᠠᠳᠠᠬᠢ ᠬᠡᠰᠡᠭ ᠨᠢ ᠲᠡᠷᠡ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠬᠤ ᠴᠠᠭ ᠪᠣᠯᠤᠭᠠ ᠦᠭᠡᠢ ᠪᠥᠭᠡᠳ ᠬᠤᠷᠢᠶᠠᠬᠤ ᠶᠤᠮ ᠪᠣᠯ ᠤᠯᠤᠰ ᠣᠷᠣᠨ ᠤ᠋ ᠡᠳ᠋ ᠦ᠋ᠨ ᠵᠠᠰᠠᠭ ᠲᠤ᠌ ᠦᠯᠡᠮᠵᠢ ᠬᠣᠬᠢᠷᠠᠯ ᠤᠴᠠᠷᠠᠵᠤ ᠬᠣᠵᠢᠮ ᠭᠠᠰᠢᠭᠤᠳᠠᠪᠠᠴᠤ ᠪᠠᠷᠠᠬᠤ ᠦᠭᠡᠢ ᠭᠡᠵᠦ ᠪᠠᠢᠯᠠ᠃ ᠡᠷᠳᠡᠨᠢ ᠨᠢᠭᠡᠳᠦᠭᠡᠷ ᠬᠡᠰᠡᠭ ᠬᠥᠮᠦᠰ ᠲᠡᠢ ᠰᠠᠨᠠᠯ ᠨᠡᠢᠯᠡᠵᠦ ᠪᠠᠢᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠹᠧᠣᠳᠠᠯ ᠪᠣᠯᠤᠨ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠰᠢᠭᠤᠳ ᠬᠤᠷᠢᠶᠠᠵᠤ ᠶᠠᠳᠠᠭᠤᠴᠤᠳ ᠲᠤ᠌ ᠥᠮᠴᠢ ᠪᠣᠯᠭᠠᠨ ᠥᠭᠭᠦᠭᠰᠡᠨ ᠴᠠᠭ ᠲᠤ᠌ ᠪᠢᠳᠡ᠂ ᠣᠯᠠᠩᠬᠢ ᠬᠡᠰᠡᠭ ᠨᠢ ᠥᠯᠥᠰᠴᠦ᠂ ᠴᠥᠭᠡᠨ ᠬᠡᠰᠡᠭ ᠨᠢ ᠢᠵᠠᠷᠠᠲᠠᠯᠠ ᠪᠠᠨ ᠢᠳᠡᠵᠦ ᠪᠠᠢᠳᠠᠭ ᠶᠣᠰᠣ ᠶ᠋ᠢ ᠤᠰᠠᠳᠬᠠᠵᠤ ᠴᠢᠳᠠᠨᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠨᠢᠭᠡ ᠬᠥᠮᠦᠨ ᠪᠣᠰᠴᠤ 《ᠹᠧᠣᠳᠠᠯ ᠭᠡᠵᠦ ᠬᠡᠨ ᠢ᠋ ᠬᠡᠯᠡᠬᠦ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠶᠠᠳ᠂ ᠲᠠᠢᠵᠢ ᠨᠠᠷ ᠢ᠋ ᠯᠡ ᠬᠡᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠩ ᠬᠢᠬᠦ ᠨᠣᠬᠠᠢ ᠦᠭᠡᠢ ᠪᠤᠶᠤ ᠵᠥᠪᠬᠡᠨ ᠠᠮᠢᠵᠢᠷᠠᠭᠠᠨ ᠤ᠋ ᠬᠡᠳᠦᠨ ᠮᠠᠯ ᠲᠠᠢ ᠬᠣᠬᠢ ᠲᠠᠢᠵᠢ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠪᠠᠰᠠ ᠬᠤᠷᠢᠶᠠᠬᠤ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠬᠦ ᠳ᠋ᠡᠭᠡᠨ ᠲᠡᠳᠡ ᠪᠣᠯ ᠣᠯᠠᠨ ᠪᠢᠰᠢ᠃ ᠪᠤᠲᠠ ᠶ᠋ᠢᠨ ᠲᠣᠭᠠ ᠪᠠᠷ ᠲᠣᠭᠲᠠᠭᠠᠵᠤ ᠪᠣᠯᠬᠤ ᠮᠡᠲᠦ ᠰᠠᠨᠠᠭᠳᠠᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦᠨ ᠪᠤᠲᠠ ᠪᠠᠷ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ ᠶᠠᠷᠢᠵᠤ ᠪᠠᠢᠵᠤ ᠲᠣᠭᠲᠠᠭᠠᠬᠤ ᠨᠢ ᠵᠥᠪ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠪᠤᠲᠠ ᠲᠠᠢ ᠰᠤᠮᠤᠨ ᠡᠷᠡ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠶᠠᠭᠠᠬᠢᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠬᠤ ᠳ᠋ᠤ᠌ ᠠᠷᠠᠳ ᠲᠦᠮᠡᠨ ᠦ᠌ ᠰᠠᠨᠠᠯ ᠰᠡᠳᠬᠢᠯ ᠡᠪᠳᠡᠷᠡᠬᠦ ᠦᠭᠡᠢ ᠤᠤ? ᠣᠯᠠᠨ ᠲᠦᠮᠡᠨ ᠦ᠌ ᠳᠣᠲᠣᠷᠠ ᠱᠠᠰᠢᠨ ᠶᠡᠬᠡ ᠬᠦᠴᠦᠲᠡᠢ ᠪᠠᠢᠭᠠ ᠰᠢᠦ ᠳᠡ ᠭᠡᠬᠦ ᠵᠡᠷᠭᠡ ᠡᠳᠦᠢ ᠲᠡᠳᠦᠢ ᠠᠰᠠᠭᠤᠳᠠᠯ ᠢ᠋ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠡᠴᠡ ᠲᠠᠯᠪᠢᠵᠤ ᠭᠠᠷᠤᠯᠠ᠃ ᠡᠷᠳᠡᠨᠢ ᠡᠨᠡ ᠣᠯᠠᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠠᠷᠭᠠ ᠦᠭᠡᠢ ᠰᠠᠮᠭᠠᠷᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠢᠲᠠᠵᠤ ᠹᠧᠣᠳᠠᠯ᠂ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠬᠤ ᠨᠢ ᠵᠥᠪ ᠤᠤ? ᠠᠯᠢ ᠪᠤᠷᠤᠭᠤ ᠤᠤ? ᠭᠡᠳᠡᠭ ᠢ᠋ ᠰᠢᠢᠳᠬᠦ ᠨᠢ ᠴᠢᠬᠤᠯᠠ᠃ ᠲᠡᠭᠡᠭᠡᠳ ᠬᠤᠷᠢᠶᠠᠬᠤ ᠨᠢ ᠵᠦᠢᠲᠡᠢ ᠭᠡᠲᠡᠯᠡ ᠬᠡᠨ ᠦ᠌ ᠬᠥᠷᠥᠩᠭᠡ ᠶ᠋ᠢ ᠬᠡᠵᠢᠶᠡ ᠶᠠᠭᠠᠬᠢᠵᠤ ᠬᠤᠷᠢᠶᠠᠵᠤ᠂ ᠳᠠᠷᠠᠭᠠ ᠨᠢ ᠲᠡᠷᠡ ᠬᠤᠷᠢᠶᠠᠭᠰᠠᠨ ᠬᠥᠷᠥᠩᠭᠡ ᠪᠡᠨ ᠶᠠᠭᠠᠬᠢᠬᠤ ᠪᠣᠢ ᠭᠡᠳᠡᠭ ᠢ᠋ ᠨᠠᠷᠢᠨ ᠪᠣᠳᠣᠵᠤ ᠲᠣᠭᠲᠠᠭᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠬᠠᠷᠠᠪᠠᠯ ᠨᠠᠮ ᠤ᠋ᠨ ᠲᠥᠪ ᠰᠤᠷᠭᠠᠭᠤᠯᠢ ᠶ᠋ᠢᠨ ᠨᠢᠭᠡ ᠰᠤᠷᠤᠭᠴᠢ ᠵᠠᠯᠠᠭᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠦ᠌ ᠳᠤᠮᠳᠠ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠦᠯᠡᠮᠵᠢ ᠬᠦᠴᠦᠲᠡᠢ᠃ ᠡᠨᠡ ᠤᠴᠢᠷ ᠡᠴᠡ ᠣᠳᠣ ᠦᠶᠡ ᠳ᠋ᠦ᠍ ᠰᠦᠮᠡ ᠬᠡᠢᠳ ᠦ᠋ᠨ ᠬᠥᠷᠥᠩᠭᠡ ᠳ᠋ᠦ᠍ ᠬᠠᠯᠳᠠᠬᠤ ᠨᠢ ᠣᠯᠠᠨ ᠤ᠋ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠡᠪᠳᠡᠨᠡ ᠭᠡᠰᠡᠨ ᠦᠭᠡ᠃ ᠬᠠᠷᠢᠨ ᠬᠠᠷᠠ ᠹᠧᠣᠳᠠᠯ ᠤ᠋ᠨ ᠬᠥᠷᠥᠩᠭᠡ ᠪᠣᠯ ᠥᠭᠡᠷᠡ ᠬᠡᠷᠡᠭ ᠭᠡᠵᠦ ᠪᠠᠰᠠ ᠨᠢᠭᠡ ᠬᠥᠮᠦᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠰᠢᠷᠠ ᠹᠧᠣᠳᠠᠯ ᠶᠠᠮᠠᠷ ᠢᠯᠭᠠᠪᠤᠷᠢᠲᠠᠢ ᠶᠤᠮ ᠪᠣᠢ? ᠠᠳᠠᠯᠢᠬᠠᠨ ᠯᠠ ᠠᠷᠠᠳ ᠢ᠋ ᠳᠠᠷᠤᠯᠠᠨ ᠮᠥᠯᠵᠢᠭᠴᠢ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠷᠢᠨ ᠪᠣᠳᠣᠵᠤ ᠦᠵᠡᠪᠡᠯ ᠲᠤᠩ ᠶᠡᠬᠡ ᠢᠯᠭᠠᠪᠤᠷᠢᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠨᠢ ᠯᠠᠮᠠ ᠳᠡᠪᠡᠯ ᠲᠡᠢ᠂ ᠨᠥᠭᠦᠭᠡ ᠨᠢ ᠬᠠᠷᠠ ᠳᠡᠪᠡᠯ ᠲᠡᠢ ᠶ᠋ᠢ ᠢᠯᠭᠠᠪᠤᠷᠢ ᠭᠡᠵᠦ ᠦᠵᠡᠬᠦ ᠦᠭᠡᠢ ᠪᠣᠯ ᠨᠢᠭᠡ ᠬᠡᠪ ᠦ᠋ᠨ ᠪᠣᠣᠪᠣ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠬᠡ ᠬᠥᠷᠥᠩᠭᠡᠲᠡᠨ᠂ ᠣᠯᠠᠨ ᠵᠠᠷᠤᠴᠠ ᠲᠠᠢ ᠰᠤᠮᠤᠨ ᠡᠷᠡ ᠶ᠋ᠢ ᠶᠠᠭᠠᠬᠢᠬᠤ ᠪᠣᠢ? ᠭᠡᠳᠡᠭ ᠴᠢᠨᠢ ᠰᠣᠨᠢᠨ ᠠᠰᠠᠭᠤᠳᠠᠯ ᠪᠠᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠴᠢᠨᠡᠨ ᠬᠥᠷᠥᠩᠭᠡ ᠲᠡᠢ ᠪᠠᠢᠯᠠ ᠭᠡᠰᠡᠨ ᠴᠦ᠍ ᠰᠤᠮᠤᠨ ᠡᠷᠡ ᠭᠡᠳᠡᠭ ᠴᠢᠨᠢ ᠠᠷᠠᠳ ᠭᠠᠷᠤᠯ ᠲᠠᠢ ᠬᠥᠮᠦᠨ᠃ ᠮᠠᠨ ᠤ᠋ ᠵᠠᠰᠠᠭ ᠪᠣᠯ ᠠᠷᠠᠳ ᠤ᠋ᠨ ᠵᠠᠰᠠᠭ ᠭᠡᠬᠦ ᠵᠡᠷᠭᠡ ᠤᠳᠠᠭᠠᠨ ᠮᠠᠷᠭᠤᠯᠳᠤᠪᠠ᠃
ᠪᠠᠷᠤᠭ ᠪᠦᠬᠦᠯᠢ ᠡᠳᠦᠷ ᠦᠷᠭᠦᠯᠵᠢᠯᠡᠭᠰᠡᠨ ᠡᠨᠡ ᠮᠠᠷᠭᠤᠯᠳᠤᠭᠠᠨ ᠡᠴᠡ ᠶᠠᠮᠠᠷ ᠨᠢᠭᠡᠨ ᠰᠢ᠌ᠤᠠᠪᠣᠷᠢ ᠭᠠᠷᠤᠭᠠ ᠦᠭᠡᠢ᠃ ᠭᠡᠪᠡᠴᠦ ᠣᠷᠣᠯᠴᠠᠭᠰᠠᠳ ᠪᠦᠬᠦᠨ ᠶᠡᠬᠡ ᠶᠠᠭᠤᠮᠠ ᠪᠣᠳᠣᠵᠤ ᠭᠠᠷᠤᠭᠰᠠᠨ ᠪᠢᠯᠡ᠃
ᠲᠡᠮᠦᠷ ᠪᠣᠯ ᠡᠨᠡ ᠲᠠᠯᠠ ᠪᠠᠷ ᠲᠣᠳᠣᠷᠬᠠᠢ ᠰᠠᠨᠠᠯ ᠲᠠᠢ ᠪᠠᠢᠯᠠ᠃ 《ᠲᠠᠢᠵᠢ ᠤᠭᠰᠠᠭᠠ ᠲᠠᠢ ᠪᠦᠬᠦᠨ ᠦ᠌ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠵᠤ ᠶᠠᠳᠠᠭᠤᠴᠤᠳ ᠲᠤ᠌ ᠥᠭᠪᠡᠯ ᠵᠣᠬᠢᠨᠠ᠃ ᠣᠳᠣ ᠲᠡᠳᠡ ᠥᠯᠥᠰᠴᠦ᠂ ᠪᠢᠳᠡ ᠵᠢᠷᠭᠠᠬᠤ ᠴᠠᠭ ᠪᠣᠯᠤᠭᠰᠠᠨ᠃ ᠰᠢᠯ ᠵᠢᠩᠰᠡ ᠲᠡᠢ ᠬᠣᠬᠢ ᠲᠠᠢᠵᠢ᠂ ᠴᠢᠳᠠᠯ ᠬᠦᠴᠦᠨ ᠵᠢᠭᠠᠵᠤ ᠪᠠᠢᠮᠠᠨᠵᠢᠨ ᠣᠪᠣᠭᠠ ᠬᠡᠳᠦᠨ ᠮᠠᠯ ᠲᠠᠢ ᠪᠣᠯᠤᠭᠰᠠᠨ ᠰᠤᠮᠤᠨ ᠡᠷᠡ ᠶ᠋ᠢ ᠤᠬᠠᠭᠠᠨ ᠠᠯᠳᠠᠲᠠᠯᠠ ᠨᠢ ᠲᠠᠰᠢᠭᠤᠷᠳᠠᠵᠤ ᠣᠷᠬᠢᠭᠠᠳ ᠶᠠᠮᠠᠷ ᠴᠤ᠌ ᠵᠢᠮᠡᠯᠡᠯ ᠦᠭᠡᠢ ᠥᠩᠭᠡᠷᠡᠵᠦ ᠪᠠᠢᠬᠤ ᠶ᠋ᠢ ᠪᠢ ᠦᠵᠡᠭᠰᠡᠨ᠃ ᠣᠳᠣ ᠤᠭᠰᠠᠭᠠ ᠪᠠᠷ ᠶᠠᠷᠢᠬᠤ ᠴᠠᠭ ᠪᠣᠯᠤᠭᠰᠠᠨ》 ᠭᠡᠵᠦ ᠬᠡᠯᠡᠳᠡᠭ ᠪᠠᠢᠯᠠ᠃
ᠲᠡᠮᠦᠷ ᠢᠩᠭᠢᠵᠦ ᠦᠵᠡᠬᠦ ᠰᠢᠯᠲᠠᠭᠠᠨ ᠬᠣᠶᠠᠷ ᠪᠠᠢᠯᠠ᠃ ᠨᠢᠭᠡᠳᠦᠭᠡᠷ ᠲᠦ᠍ ᠭᠡᠪᠡᠯ ᠬᠠᠭᠤᠴᠢᠨ ᠮᠣᠩᠭᠣᠯ ᠳ᠋ᠤ᠌ ᠲᠠᠢᠵᠢ ᠯᠠ ᠭᠡᠪᠡᠯ ᠴᠠᠭᠠᠨ ᠶᠠᠰᠤ ᠲᠠᠢ᠂ ᠲᠩᠷᠢ ᠤᠭᠰᠠᠭᠠᠲᠠᠨ ᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠳᠠᠯᠢᠮᠳᠠᠭᠤᠯᠤᠨ ᠠᠷᠠᠳ ᠣᠯᠠᠨ ᠳ᠋ᠤ᠌ ᠲᠦᠮᠡᠨ ᠵᠣᠪᠠᠯᠠᠩ ᠲᠠᠷᠢᠵᠤ ᠪᠠᠢᠪᠠ᠃ ᠡᠳᠦᠷ ᠰᠥᠨᠢ ᠦᠭᠡᠢ ᠠᠵᠢᠯ ᠬᠢᠵᠦ ᠪᠠᠢᠮᠠᠨᠵᠢᠨ ᠬᠡᠳᠦᠨ ᠮᠠᠯ ᠲᠠᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠵᠥᠪᠬᠡᠨ ᠠᠷᠠᠳ ᠤᠭᠰᠠᠭᠠ ᠲᠠᠢ ᠤᠴᠢᠷ ᠡᠴᠡ ᠥᠷᠲᠡᠭᠡᠨ ᠦ᠌ ᠬᠦᠨᠳᠦ ᠠᠯᠪᠠ ᠶ᠋ᠢ ᠬᠢᠵᠦ ᠪᠠᠢᠬᠤ ᠳ᠋ᠤ᠌ ᠲᠠᠢᠵᠢ ᠨᠠᠷ ᠥᠷᠲᠡᠭᠡ ᠤᠨᠤᠬᠤ ᠡᠴᠡ ᠥᠭᠡᠷᠡ ᠶᠠᠭᠤ ᠬᠢᠵᠦ ᠪᠠᠢᠯᠠ ᠳᠠ᠃ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠬᠣᠰᠢᠭᠤ ᠨᠠᠭᠠᠳᠤᠮ ᠳᠡᠭᠡᠷᠡ ᠦᠵᠦᠭᠦᠷᠲᠦ ᠬᠣᠶᠠᠷ ᠪᠥᠬᠡ ᠦᠯᠡᠳᠡᠵᠦ ᠪᠢᠯᠡ᠃ ᠨᠢᠭᠡ ᠨᠢ ᠬᠣᠬᠢ ᠲᠠᠢᠵᠢ᠂ ᠨᠥᠭᠦᠭᠡ ᠨᠢ ᠣᠪᠣᠭᠠ ᠬᠥᠷᠥᠩᠭᠡ ᠲᠡᠢ ᠰᠤᠮᠤᠨ ᠡᠷᠡ ᠠᠢᠯ ᠤ᠋ᠨ ᠬᠦᠦ ᠪᠠᠢᠯᠠ᠃ ᠭᠡᠲᠡᠯᠡ ᠭᠣᠮᠪᠣᠵᠠᠪ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠠᠷᠠᠳ ᠬᠥᠮᠦᠨ ᠢ᠋ ᠨᠢ ᠪᠠᠷᠢᠯᠳᠤᠭᠤᠯᠤᠯ ᠦᠭᠡᠢ ᠪᠠᠭᠤᠯᠭᠠᠭᠤᠯᠵᠤ ᠪᠠᠢᠭᠰᠠᠨ ᠢ᠋ ᠲᠡᠮᠦᠷ ᠬᠠᠷᠠᠭᠠᠳ ᠰᠡᠳᠬᠢᠯ ᠨᠢ ᠬᠣᠷᠣᠰᠤᠯ᠂ ᠵᠢᠭᠰᠢᠯ ᠢ᠋ᠶ᠋ᠡᠷ ᠳᠦᠭᠦᠷᠴᠦ ᠪᠠᠢᠭᠰᠠᠨ᠃ ᠬᠣᠶᠠᠳᠤᠭᠠᠷ ᠲᠤ᠌ ᠡᠨᠡ ᠬᠣᠭᠣᠷᠣᠨᠳᠣ ᠲᠡᠮᠦᠷ ᠲᠠᠪᠢ ᠭᠠᠷᠤᠢ ᠪᠤᠲᠠ ᠲᠠᠢ ᠪᠣᠯᠵᠠᠢ᠃ ᠡᠭᠦᠨ ᠢ᠋ ᠬᠡᠨ ᠡᠴᠡ ᠴᠦ᠍ ᠪᠤᠯᠢᠶᠠᠵᠤ ᠠᠪᠤᠭᠠ ᠦᠭᠡᠢ᠃ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠷ ᠳᠤᠯᠮᠠ ᠲᠠᠢ ᠪᠠᠨ ᠵᠢᠷᠭᠠᠯᠲᠠᠢ ᠴᠢᠨᠡᠭᠡᠯᠢᠭ ᠠᠮᠢᠳᠤᠷᠠᠬᠤ ᠶ᠋ᠢᠨ ᠲᠤᠯᠠ ᠣᠯᠵᠤ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠪᠢᠯᠡ᠃
ᠡᠨᠡ ᠬᠡᠳᠦᠨ ᠮᠠᠯ ᠪᠣᠯ ᠨᠢᠭᠡ ᠶᠣᠰᠣᠨ ᠳ᠋ᠠᠭᠠᠨ ᠲᠡᠮᠦᠷ ᠦ᠋ᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠤ᠋ᠨ ᠦᠨᠳᠦᠰᠦ ᠪᠣᠯᠵᠠᠢ᠃
ᠡᠨᠡ ᠤᠴᠢᠷ ᠡᠴᠡ ᠨᠢᠭᠡ ᠬᠡᠰᠡᠭ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠦ᠋ᠨ ᠬᠢᠨᠢ ᠬᠥᠷᠥᠩᠭᠡ ᠶ᠋ᠢ ᠬᠤᠷᠢᠶᠠᠵᠤ᠂ ᠨᠥᠭᠦᠭᠡ ᠬᠡᠰᠡᠭ ᠶᠠᠳᠠᠭᠤ ᠳ᠋ᠤ᠌ ᠥᠭᠬᠦ ᠨᠢ ᠵᠦᠢᠲᠡᠢ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠮᠦᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠶᠠᠨ ᠬᠣᠭᠣᠰᠣᠨ ᠭᠡᠬᠦ ᠦᠭᠡᠢ᠂ ᠲᠠᠢᠵᠢ ᠠᠷᠠᠳ ᠭᠡᠵᠦ ᠶᠠᠷᠢᠨᠠ᠃ ᠣᠳᠣ ᠴᠠᠭ ᠲᠤ᠌ ᠠᠵᠢᠯᠯᠠᠵᠤ ᠴᠢᠳᠠᠪᠠᠯ ᠬᠡᠨ ᠴᠦ᠍ ᠬᠡᠳᠦᠨ ᠮᠠᠯ ᠲᠠᠢ ᠪᠣᠯᠵᠤ ᠴᠢᠳᠠᠨᠠ᠃ ᠬᠠᠷᠢᠨ ᠲᠠᠢᠵᠢ ᠨᠠᠷ ᠡᠴᠡ ᠪᠣᠯ ᠡᠴᠢᠭᠡ ᠡᠪᠦᠭᠡᠳ ᠦ᠋ᠨ ᠬᠠᠷᠢᠭᠤ ᠶ᠋ᠢ ᠠᠪᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠲᠡᠮᠦᠷ ᠬᠡᠯᠡᠳᠡᠭ ᠶᠤᠮ᠃
ᠡᠷᠳᠡᠨᠢ ᠪᠤᠴᠠᠵᠤ ᠢᠷᠡᠭᠡᠳ ᠬᠡᠳᠦᠨ ᠡᠳᠦᠷ ᠰᠠᠭᠤᠵᠤ ᠪᠠᠢᠮᠠᠨᠵᠢᠨ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠᠨ ᠳ᠋ᠤ᠌ ᠹᠧᠣᠳᠠᠯ᠂ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠣᠢᠷᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠤᠷᠢᠶᠠᠵᠤ᠂ ᠶᠠᠳᠠᠭᠤᠴᠤᠳ ᠲᠤ᠌ ᠠᠮᠠ ᠪᠦᠯᠢ ᠶ᠋ᠢ ᠨᠢ ᠬᠠᠷᠠᠭᠠᠯᠵᠠᠨ ᠬᠤᠪᠢᠶᠠᠵᠤ ᠥᠭᠬᠦ ᠲᠤᠬᠠᠢ ᠥᠪᠡᠷ ᠦ᠋ᠨ ᠰᠠᠨᠠᠯ ᠢ᠋ ᠪᠢᠴᠢᠵᠡᠢ᠂ ᠭᠡᠲᠡᠯᠡ ᠬᠠᠷᠢᠭᠤ ᠨᠢ ᠢᠷᠡᠭᠰᠡᠨ ᠦᠭᠡᠢ᠃
ᠡᠪᠦᠯ ᠨᠢ ᠠᠢᠮᠠᠭ ᠤ᠋ᠨ ᠡᠮᠦᠨᠡᠲᠦ ᠬᠡᠰᠡᠭ ᠲᠦ᠍ ᠰᠦᠷᠡᠬᠡᠢ ᠵᠤᠳ ᠪᠣᠯᠵᠤ ᠶᠠᠳᠠᠭᠤᠴᠤᠳ ᠤ᠋ᠨ ᠠᠮᠢᠳᠤᠷᠠᠯ ᠦᠯᠡᠮᠵᠢ ᠬᠦᠨᠳᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠵᠠᠷᠢᠮ ᠭᠠᠵᠠᠷ ᠥᠯᠥᠰᠬᠦᠯᠡᠩ ᠭᠠᠷᠤᠯᠠ᠃ ᠡᠷᠳᠡᠨᠢ ᠲᠡᠷᠡ ᠵᠦᠭ ᠲᠦᠷᠭᠡᠯᠡᠨ ᠣᠴᠢᠵᠤ ᠬᠤᠰᠢᠭᠤᠨ ᠤ᠋ ᠵᠢᠰᠠ ᠨᠤᠭᠤᠳ ᠲᠤ᠌ ᠮᠠᠰᠢ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠬᠦᠨᠡᠰᠦᠨ ᠦ᠌ ᠵᠦᠢᠯ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ ᠭᠣᠣᠯ ᠬᠦᠷᠢᠶᠡᠨ ᠦ᠌ ᠬᠠᠮᠪᠤ ᠯᠠᠮᠠ ᠲᠠᠢ ᠠᠭᠤᠯᠵᠠᠵᠤ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠭᠰᠡᠳ ᠲᠦ᠍ ᠪᠤᠳᠠᠭᠠ ᠭᠤᠯᠢᠷ ᠥᠭᠬᠦ ᠲᠤᠬᠠᠢ ᠶᠠᠷᠢᠭᠰᠠᠨ ᠳ᠋ᠤ᠌ ᠯᠠᠮᠠ ᠶᠡᠬᠡ ᠯᠡ ᠣᠷᠢᠶᠠᠯᠭᠠᠨ ᠵᠥᠪᠰᠢᠶᠡᠷᠡᠵᠦ᠂ ᠬᠡᠵᠢᠶᠡ ᠬᠥᠰᠬᠡ ᠢᠷᠡᠭᠰᠡᠨ ᠴᠠᠭ ᠲᠤ᠌ ᠨᠢᠷᠪᠠ ᠨᠠᠷ ᠢ᠋ᠶ᠋ᠠᠨ ᠪᠠᠢᠯᠭᠠᠵᠤ ᠪᠠᠢᠨᠠ ᠭᠡᠵᠦ ᠪᠢᠯᠡ᠃
ᠡᠷᠳᠡᠨᠢ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠭᠤᠴᠢ ᠭᠠᠷᠤᠢ ᠲᠠᠷᠭᠤᠨ ᠲᠡᠮᠡᠭᠡ᠂ ᠳᠥᠷᠪᠡᠨ ᠬᠥᠮᠦᠨ ᠳᠠᠢᠴᠢᠯᠠᠵᠤ ᠬᠣᠰᠢᠭᠤ ᠬᠦᠷᠢᠶᠡᠨ ᠦ᠌ ᠭᠣᠣᠯ ᠵᠢᠰᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠯᠠ᠃ ᠭᠡᠲᠡᠯᠡ ᠬᠡᠰᠡᠭ ᠯᠠᠮᠠ ᠨᠠᠷ ᠢᠷᠡᠵᠦ ᠡᠷᠳᠡᠨᠢ ᠶ᠋ᠢ ᠲᠣᠭᠣᠷᠢᠨ ᠵᠣᠭᠰᠣᠭᠠᠳ ᠨᠢᠭᠡ ᠬᠠᠩᠬᠠᠭᠠᠷ ᠲᠣᠮᠣ ᠪᠡᠶᠡ ᠲᠡᠢ ᠭᠤᠴᠢ ᠣᠷᠴᠢᠮ ᠨᠠᠰᠤᠨ ᠤ᠋ ᠯᠠᠮᠠ ᠡᠮᠦᠨᠡ ᠨᠢ ᠣᠢᠷᠠᠲᠤᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠭᠡᠨᠡᠳᠲᠡ ᠶ᠋ᠢᠨ ᠭᠡᠢᠴᠢᠨ ᠴᠢᠨᠢ ᠶᠠᠭᠤ ᠪᠢᠯᠡ? ᠭᠡᠵᠦ ᠬᠡᠭᠵᠢᠭᠦᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠳᠠᠭᠠ ᠭᠤᠯᠢᠷ ᠠᠴᠢᠬᠤ ᠭᠡᠵᠦ ᠢᠷᠡᠭᠰᠡᠨ ᠬᠥᠮᠦᠰ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠭᠤᠳᠤᠷᠬᠤ ᠨᠢ ᠪᠣᠢ? ᠭᠡᠳ ᠬᠠᠩᠬᠠᠭᠠᠷ ᠯᠠᠮᠠ ᠲᠠᠰᠢᠶᠠ ᠪᠠᠨ ᠲᠤᠯᠤᠨ ᠴᠡᠭᠡᠵᠢ ᠪᠡᠨ ᠵᠠᠢ᠌ᠮᠴᠢᠨ ᠬᠥᠳᠡᠯᠭᠡᠪᠡ᠃
ᠡᠷᠳᠡᠨᠢ ᠲᠡᠷᠡ ᠯᠠᠮᠠ ᠶ᠋ᠢ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠠᠵᠢᠭᠯᠠᠵᠤ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠯᠥᠰᠬᠦᠯᠡᠩ ᠭᠠᠷᠤᠭᠠᠳ᠂ ᠤᠯᠤᠰ ᠠᠮᠢᠲᠠᠨ ᠦᠬᠦᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠲᠠ ᠰᠣᠨᠣᠰᠤᠭᠰᠠᠨ ᠤᠤ? ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠷᠢᠶᠡ ᠬᠡᠢᠳ ᠡᠴᠡ ᠪᠣᠯᠵᠤ ᠵᠤᠳ ᠪᠣᠯᠤᠭᠠ ᠦᠭᠡᠢ᠃ ᠲᠡᠷᠡ ᠵᠤᠳ ᠪᠣᠯᠭᠠᠭᠰᠠᠨ ᠲᠩᠷᠢ ᠪᠤᠷᠬᠠᠨ ᠡᠴᠡ ᠪᠡᠨ ᠣᠴᠢᠵᠤ ᠪᠤᠳᠠᠭᠠ ᠭᠤᠯᠢᠷ ᠠᠪᠬᠤ ᠦᠭᠡᠢ ᠤᠤ? ᠮᠠᠨ ᠤ᠋ ᠡᠨᠳᠡ ᠵᠤᠳ ᠤ᠋ᠨ ᠪᠤᠳᠠᠭᠠ ᠪᠠᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ ᠲᠣᠭᠣᠷᠢᠭᠰᠠᠨ ᠯᠠᠮᠠ ᠨᠠᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠯᠳᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠲᠠᠨ ᠤ᠋ ᠬᠠᠮᠪᠤ ᠲᠠᠢ ᠶᠠᠷᠢᠭᠰᠠᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠲᠡᠢ ᠶᠠᠷᠢᠭᠰᠠᠨ ᠴᠢᠨᠢ ᠪᠢᠳᠡᠨ ᠳ᠋ᠦ᠍ ᠫᠠᠳ ᠦᠭᠡᠢ᠃ ᠪᠤᠳᠠᠭᠠᠨ ᠤ᠋ ᠴᠢᠨᠢ ᠰᠠᠪᠠ ᠪᠦᠲᠦᠨ ᠳᠡᠭᠡᠷᠡ ᠪᠡᠨ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠤᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ ᠮᠣᠷᠢᠯᠠᠪᠠᠯ ᠵᠦᠭᠡᠷ ᠪᠠᠢᠬᠤ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠲᠦᠮᠡᠨ ᠥᠯᠥᠰᠬᠦᠯᠡᠩ ᠳ᠋ᠦ᠍ ᠨᠡᠷᠪᠡᠭᠳᠡᠭᠡᠳ ᠪᠠᠢᠨᠠ᠂ ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠪᠢᠳᠡ ᠪᠤᠳᠠᠭᠠ ᠭᠤᠯᠢᠷ ᠠᠴᠢᠨᠠ᠃ ᠨᠢᠭᠡ ᠤᠳᠠᠭᠠ ᠴᠤ᠌ ᠠᠪᠬᠤ ᠦᠭᠡᠢ᠂ ᠬᠡᠳᠦᠨ ᠤᠳᠠᠭᠠ ᠠᠪᠤᠨᠠ ᠭᠡᠵᠦ ᠡᠷᠡᠰ ᠬᠡᠯᠡᠭᠡᠳ ᠡᠷᠳᠡᠨᠢ ᠬᠥᠳᠡᠯᠬᠦ ᠭᠡᠲᠡᠯᠡ ᠬᠠᠩᠬᠠᠭᠠᠷ ᠯᠠᠮᠠ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠯᠠ᠃
ᠡᠷᠳᠡᠨᠢ ᠬᠦᠴᠦᠯᠡᠨ ᠤᠭᠵᠠᠷᠠᠵᠤ ᠲᠠᠯᠪᠢᠭᠤᠯᠪᠠ᠃ ᠭᠡᠲᠡᠯᠡ ᠬᠠᠩᠬᠠᠭᠠᠷ ᠯᠠᠮᠠ 《ᠨᠢᠪᠰᠢᠷᠡᠲᠡᠯᠡ ᠴᠢᠨᠢ ᠴᠣᠬᠢᠭᠠᠳ ᠥᠭᠬᠦ ᠳᠡᠭᠡᠷᠡ ᠨᠢᠭᠡ ᠶ᠋ᠢ ᠪᠣᠳᠣᠬᠤ ᠤᠬᠠᠭᠠᠨ ᠲᠠᠢ ᠪᠣᠯᠬᠤ ᠪᠠᠢ᠌ᠯ ᠦᠭᠡᠢ ᠳᠡ》 ᠭᠡᠳ ᠡᠷᠳᠡᠨᠢ ᠶ᠋ᠢ ᠴᠣᠬᠢᠯᠠ᠃
ᠡᠨᠡ ᠯᠠᠮᠠ ᠨᠠᠷ ᠤ᠋ᠨ ᠵᠣᠳᠣᠭᠠᠨ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠬᠥᠮᠦᠨ ᠶᠤᠮ᠃ ᠬᠦᠷᠢᠶᠡᠨ ᠳ᠋ᠦ᠍ ᠲᠤᠰᠬᠠᠢᠯᠠᠨ ᠣᠴᠢᠵᠤ ᠨᠡᠷᠡᠲᠡᠢ ᠵᠣᠳᠣᠭᠠᠴᠢᠨ ᠨᠠᠷ ᠲᠠᠢ ᠬᠠᠯᠵᠠ ᠲᠤᠯᠵᠤ ᠬᠡᠳᠦ ᠬᠡᠳᠦ ᠶ᠋ᠢ ᠨᠢ ᠳᠡᠢᠯᠦᠭᠰᠡᠨ ᠢ᠋ᠶ᠋ᠡᠨ 《ᠮᠢᠬᠠᠨ ᠮᠤᠨᠠ》 ᠭᠡᠳᠡᠭ ᠬᠣᠴᠢ ᠲᠠᠢ ᠪᠣᠯᠤᠭᠰᠠᠨ ᠠᠵᠢ᠃
ᠡᠷᠳᠡᠨᠢ ᠲᠡᠩᠴᠡᠭᠦᠷᠢ ᠪᠡᠨ ᠠᠯᠳᠠᠵᠤ ᠭᠡᠳᠡᠷᠭᠦ ᠪᠡᠨ ᠠᠯᠳᠠᠯᠠᠨ ᠤᠨᠠᠪᠠ᠃ ᠭᠡᠪᠡᠴᠦ ᠲᠦᠷᠭᠡᠨ ᠪᠣᠰᠴᠤ ᠤᠬᠤᠰᠬᠢᠨ 《ᠮᠢᠬᠠᠨ ᠮᠤᠨᠠ》 ᠶ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠲᠣᠩᠭᠣᠷᠴᠤ ᠣᠷᠬᠢᠭᠰᠠᠨ ᠳ᠋ᠤ᠌ ᠠᠷᠤ ᠵᠣ ᠪᠠᠷ ᠢ᠋ᠶ᠋ᠠᠨ ᠫᠢᠳ ᠬᠢᠨ ᠤᠨᠠᠪᠠ᠃ ᠡᠷᠭᠢᠬᠦ ᠭᠡᠲᠡᠯᠡ ᠣᠯᠠᠨ ᠯᠠᠮᠠ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠳᠣᠪᠲᠣᠯᠤᠨ ᠢᠷᠡᠵᠦ ᠨᠢᠭᠤᠷ᠂ ᠨᠢᠳᠦ ᠦᠭᠡᠢ ᠪᠠᠯᠪᠠᠵᠤ ᠭᠠᠷᠬᠤ ᠳ᠋ᠤ᠌ ᠵᠢᠩᠴᠢᠳ ᠦ᠋ᠨ ᠵᠠᠷᠢᠮ ᠨᠢ ᠲᠤᠰᠠᠯᠠᠬᠤ ᠪᠠᠷ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠬᠠᠷᠠᠴᠤᠤᠯ ᠳᠡᠢᠯᠦᠭᠳᠡᠵᠦ ᠬᠥᠬᠡ ᠪᠤᠯᠤᠤ ᠪᠣᠯᠤᠭᠠᠳ ᠲᠡᠮᠡᠭᠡ ᠪᠡᠨ ᠬᠥᠲᠥᠯᠦᠨ ᠬᠦᠷᠢᠶᠡ ᠡᠴᠡ ᠭᠠᠷᠤᠯᠠ᠃
ᠵᠢᠩᠴᠢᠳ ᠶᠣᠰᠣᠲᠠᠢ ᠯᠠ ᠨᠠᠪᠰᠠᠢᠲᠠᠯᠠ ᠵᠣᠳᠣᠭᠤᠯᠤᠭᠠᠳ ᠶᠠᠪᠤᠭᠰᠠᠨ ᠬᠣᠢᠨᠠ ᠯᠠᠮᠠ ᠨᠠᠷ ᠳᠡᠭᠡᠷᠡ ᠬᠠᠮᠪᠤ ᠯᠠᠮᠠ ᠢᠷᠡᠵᠦ 《ᠮᠢᠬᠠᠨ ᠮᠤᠨᠠ》 ᠶ᠋ᠢ ᠰᠠᠢᠰᠢᠶᠠᠨ 《ᠣᠯᠠᠭᠤᠯᠠ ᠪᠠᠨ ᠪᠣᠯᠤᠭᠠᠳ ᠪᠤᠴᠠᠵᠤ ᠢᠷᠡᠵᠦ ᠮᠠᠭᠠᠳ᠃ ᠨᠡᠮᠡᠵᠦ ᠥᠭᠭᠦᠭᠡᠳ ᠶᠠᠪᠤᠭᠤᠯᠳᠠᠭ ᠶᠤᠮ ᠰᠢᠦ᠃ ᠲᠡᠷᠡ ᠡᠷᠳᠡᠨᠢ ᠭᠡᠭᠴᠢ ᠨᠠᠳᠠ ᠲᠠᠢ ᠳᠠᠬᠢᠨ ᠠᠭᠤᠯᠵᠠᠪᠠᠯ ᠶᠠᠭᠤᠮᠠ ᠪᠠᠨ ᠥᠭᠬᠦ ᠦᠭᠡᠢ ᠭᠡᠵᠦ ᠬᠢᠯᠢᠩᠨᠡᠭᠰᠡᠨ ᠯᠠᠮᠠ ᠨᠠᠷ ᠢ᠋ ᠪᠢ ᠶᠠᠭᠠᠬᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠬᠡᠯᠡᠨᠡ᠃ ᠬᠠᠷᠢᠨ ᠬᠥᠮᠦᠨ ᠠᠯᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠲᠡᠭᠡᠪᠡᠯ ᠪᠢᠳᠡ ᠪᠤᠷᠤᠭᠤᠳᠠᠵᠤ ᠴᠡᠷᠢᠭ ᠢᠷᠡᠭᠡᠳ ᠰᠦᠢᠳ ᠬᠢᠨᠡ》 ᠭᠡᠳ ᠶᠠᠪᠤᠵᠠᠢ᠃
ᠵᠢᠩᠴᠢᠳ ᠬᠡᠢᠳ ᠦ᠋ᠨ ᠵᠠᠬᠠ ᠳ᠋ᠤ᠌ ᠣᠷᠬᠢᠭᠰᠠᠨ ᠮᠠᠢᠬᠠᠨ ᠳ᠋ᠠᠭᠠᠨ ᠢᠷᠡᠬᠦ ᠳ᠋ᠦ᠍ ᠰᠠᠬᠢᠵᠤ ᠦᠯᠡᠳᠡᠭᠰᠡᠨ ᠡᠪᠦᠭᠡᠨ ᠡᠬᠢᠯᠡᠭᠡᠳ ᠶᠡᠬᠡ ᠯᠡ ᠭᠠᠢᠬᠠᠭᠰᠠᠨ ᠪᠣᠯᠪᠠᠴᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠡᠳ ᠯᠠᠮᠠ ᠨᠠᠷ ᠢ᠋ ᠠᠳᠠᠭ ᠤ᠋ᠨ ᠦᠭᠡ ᠪᠡᠷ ᠬᠠᠷᠢᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠡᠭᠡ ᠪᠡᠨ ᠪᠢᠲᠡᠭᠡᠢ ᠲᠠᠯᠪᠢᠭᠠᠷᠠᠢ᠃ ᠣᠳᠣ ᠪᠤᠴᠠᠨᠠ ᠰᠢᠦ ᠭᠡᠳ ᠡᠷᠳᠡᠨᠢ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠵᠤ ᠪᠣᠭᠴᠣ ᠡᠴᠡ ᠪᠡᠨ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠨ ᠠᠪᠴᠤ ᠵᠡᠭᠦᠭᠡᠳ ᠭᠠᠷᠴᠤ 《ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠥᠯᠥᠰᠬᠦᠯᠡᠩ ᠦ᠋ᠨ ᠠᠶᠤᠯ ᠳ᠋ᠤ᠌ ᠣᠷᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠲᠠ ᠨᠠᠷ ᠳᠡᠭᠡᠷᠡᠮᠳᠡᠭᠰᠡᠨ ᠶᠠᠭᠤᠮᠠ ᠪᠠᠨ ᠪᠤᠴᠠᠭᠠᠵᠤ ᠥᠭᠬᠦ ᠦᠭᠡᠢ ᠪᠠᠢᠨᠠ ᠭᠡᠨᠡ᠃ ᠵᠠ ᠪᠤᠴᠠᠭᠠᠳ ᠶᠠᠪᠤᠵᠠᠭᠠᠨᠠ᠃ ᠪᠣᠰᠢᠭᠣ!》 ᠭᠡᠳ ᠤᠨᠤᠭᠠ ᠲᠡᠮᠡᠭᠡ ᠪᠡᠨ ᠭᠡᠪᠳᠡᠭᠦᠯᠤᠨ ᠮᠣᠷᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠮᠦᠨ ᠦ᠌ ᠠᠮᠢᠨ ᠤ᠋ ᠬᠡᠷᠡᠭ ᠭᠠᠷᠴᠤ ᠮᠠᠭᠠᠳ᠃ ᠪᠢ ᠶᠠᠪᠤᠬᠤ ᠦᠭᠡᠢ ᠭᠡᠵᠦ ᠯᠠᠮᠠ ᠨᠠᠷ ᠲᠤ᠌ ᠪᠠᠷᠠᠭᠤᠨ ᠨᠢᠳᠦ ᠪᠡᠨ ᠬᠥᠬᠡ ᠪᠤᠯᠤᠤ ᠪᠣᠯᠭᠠᠭᠤᠯᠤᠭᠰᠠᠨ ᠨᠢᠭᠡ ᠡᠷᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠨᠡᠷᠡ ᠪᠡᠷ ᠲᠤᠰᠢᠶᠠᠵᠤ ᠪᠠᠢᠨᠠ᠃ ᠪᠤᠰᠢᠭᠤ ᠬᠥᠳᠡᠯᠵᠡᠭᠡ ᠭᠡᠵᠦ ᠡᠷᠳᠡᠨᠢ ᠥᠨᠳᠥᠷ ᠳᠠᠭᠤ ᠪᠠᠷ ᠲᠤᠰᠢᠶᠠᠪᠠ᠃
ᠵᠢᠩᠴᠢᠳ ᠶᠠᠪᠤᠭᠰᠠᠭᠠᠷ ᠵᠢᠰᠠ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠪᠤᠴᠠᠵᠤ ᠣᠷᠣᠯᠠ᠃ ᠯᠠᠮᠠ ᠨᠠᠷ ᠪᠦᠷ ᠴᠦ᠍ ᠣᠯᠠᠨ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠳᠡᠭᠰᠡᠨ ᠪᠣᠣᠪᠣ ᠴᠢᠨᠢ ᠪᠠᠭᠠᠳᠤᠭᠠᠳ ᠪᠤᠴᠠᠵᠤ ᠢᠷᠡᠪᠡ ᠤᠤ ᠭᠡᠵᠦ 《ᠮᠢᠬᠠᠨ ᠮᠤᠨᠠ》 ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠪᠤᠰᠤᠳ ᠨᠢ ᠥᠨᠳᠥᠷ ᠨᠠᠮ ᠳᠠᠭᠤ ᠪᠠᠷ ᠢᠨᠢᠶᠡᠯᠳᠦᠪᠡ᠃ ᠡᠷᠳᠡᠨᠢ ᠰᠸᠯᠠᠢ᠌ᠳᠠᠢ ᠪᠠᠨ ᠮᠣᠳᠣᠨ ᠬᠤᠢ ᠡᠴᠡ ᠨᠢ ᠭᠠᠷᠭᠠᠵᠤ ᠪᠠᠷᠢᠭᠠᠳ ᠪᠢᠳᠡ ᠪᠣᠯ ᠬᠤᠯᠠᠭᠠᠢᠴᠢ᠂ ᠳᠡᠭᠡᠷᠡᠮᠴᠢᠨ ᠪᠢᠰᠢ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠡᠴᠡ ᠣᠯᠭᠣᠭᠰᠠᠨ ᠪᠦᠷᠢᠨ ᠡᠷᠬᠡ ᠶ᠋ᠢᠨ ᠶᠣᠰᠣ ᠪᠠᠷ ᠡᠨᠡ ᠪᠠᠢᠰᠢᠩ ᠳ᠋ᠤ᠌ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠭᠠ ᠪᠤᠳᠠᠭᠠ ᠭᠤᠯᠢᠷ ᠢ᠋ ᠠᠪᠴᠤ ᠥᠯᠥᠰᠬᠦᠯᠡᠩ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠬᠥᠮᠦᠰ ᠲᠦ᠍ ᠥᠭᠭᠦᠨᠡ᠃ ᠡᠨᠡ ᠫᠤᠤ ᠠᠷᠪᠠᠨ ᠵᠢᠷᠭᠤᠭᠠ ᠦᠰᠦᠷᠳᠡᠭ ᠶᠤᠮ᠃ ᠡᠰᠡᠷᠭᠦᠴᠡᠵᠦ ᠶᠠᠮᠠᠷ ᠨᠢᠭᠡᠨ ᠰᠠᠭᠠᠳ ᠬᠢᠭᠰᠡᠨ ᠬᠡᠨ ᠪᠦᠬᠦᠨ ᠢ᠋ ᠵᠣᠭᠰᠣᠭᠠ ᠪᠠᠷ ᠨᠢ ᠫᠤᠤᠳᠠᠨᠠ᠃ ᠪᠠᠢᠰᠢᠩ ᠢ᠋ᠶ᠋ᠠᠨ ᠪᠣᠰᠢᠭᠣ ᠨᠡᠬᠡᠭᠡ᠃ ᠲᠡᠷᠡ ᠨᠢᠷᠪᠠ ᠴᠢ ᠲᠠᠪᠤ ᠲᠣᠭᠠᠯᠠᠬᠤ ᠳ᠋ᠤ᠌ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠬᠦ ᠦᠭᠡᠢ ᠪᠣᠯ ᠵᠠᠰᠠᠭ ᠤ᠋ᠨ ᠴᠠᠭᠠᠵᠠ ᠬᠡᠴᠡᠭᠦᠦ ᠭᠡᠵᠦ ᠮᠡᠳᠡᠭᠡᠴᠢ》 ᠭᠡᠳ 《ᠨᠢᠭᠡ ᠁ ᠬᠣᠶᠠᠷ ᠁》 ᠭᠡᠵᠦ ᠴᠢᠩᠭᠠ ᠪᠥᠭᠡᠳ ᠰᠤᠨᠵᠢᠷᠠᠭᠤᠯᠤᠨ ᠲᠣᠭᠠᠯᠠᠪᠠ᠃
ᠯᠠᠮᠠ ᠨᠠᠷ ᠤ᠋ᠨ ᠣᠮᠣᠭ ᠳᠠᠷᠤᠭᠳᠠᠨ ᠳᠠᠭᠤ ᠦᠭᠡᠢ ᠪᠣᠯᠵᠤ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠯᠴᠠᠪᠠ᠃ 《ᠳᠥᠷᠪᠡ》 ᠭᠡᠳ ᠡᠷᠳᠡᠨᠢ ᠲᠡᠮᠡᠭᠡᠨ ᠦ᠌ ᠤᠷᠢᠳᠤ ᠪᠦᠬᠦᠨ ᠳᠡᠭᠡᠷᠡ ᠲᠠᠯᠪᠢᠨ ᠪᠠᠷᠢᠵᠤ ᠪᠠᠢᠭᠰᠠᠨ ᠫᠤᠤ ᠶ᠋ᠢᠨ ᠠᠮᠠ ᠶ᠋ᠢ ᠡᠷᠭᠢᠭᠦᠯᠬᠦ ᠳ᠋ᠦ᠍ ᠨᠢᠷᠪᠠ ᠣᠭᠵᠣᠮ ᠬᠥᠳᠡᠯᠵᠦ ᠲᠦᠯᠬᠢᠭᠦᠷ ᠢ᠋ᠶ᠋ᠡᠨ ᠴᠣᠣᠵᠢᠨ ᠳ᠋ᠤ᠌ ᠬᠢᠯᠡ᠃ ᠯᠠᠮᠠ ᠨᠠᠷ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠤᠷᠤᠭᠤ ᠤᠷᠮᠠ ᠦᠭᠡᠢ ᠬᠥᠳᠡᠯᠬᠦ ᠭᠡᠬᠦ ᠳ᠋ᠦ᠍ᠨᠢ ᠡᠷᠳᠡᠨᠢ 《ᠲᠠ ᠨᠠᠷ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ ᠭᠤᠯᠢᠷ ᠪᠤᠳᠠᠭᠠ ᠶ᠋ᠢ ᠲᠦᠷᠭᠡᠨ ᠭᠠᠷᠭᠠᠵᠤ ᠡᠨᠡ ᠲᠡᠮᠡᠭᠡᠨ ᠳ᠋ᠦ᠍ ᠪᠣᠰᠢᠭᠣ ᠠᠴᠢᠵᠠᠭᠠ》 ᠭᠡᠵᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠦᠷᠲᠡᠢ ᠲᠤᠰᠢᠶᠠᠪᠠ᠃
ᠤᠳᠠᠭᠰᠠᠨ ᠦᠭᠡᠢ ᠭᠤᠯᠢᠷ ᠪᠤᠳᠠᠭᠠ ᠠᠴᠢᠭᠰᠠᠨ ᠲᠡᠮᠡᠭᠡᠨ ᠵᠢᠩ ᠵᠢᠰᠠ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠴᠤᠪᠤᠷᠠᠨ ᠭᠠᠷᠬᠤ ᠳ᠋ᠤ᠌ 《ᠤᠳᠠᠬᠤ ᠦᠭᠡᠢ ᠡᠨᠡ ᠬᠥᠮᠦᠰ ᠪᠤᠴᠠᠵᠤ ᠢᠷᠡᠨᠡ᠃ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠬᠦ ᠦᠭᠡᠢ᠃ ᠪᠤᠳᠠᠭᠠ ᠭᠤᠯᠢᠷ ᠠᠪᠬᠤ ᠳ᠋ᠤ᠌ ᠰᠠᠭᠠᠳ ᠬᠢᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠶᠠᠯᠠ ᠲᠤᠯᠭᠠᠨᠠ᠃ ᠬᠡᠷᠡᠭ ᠲᠡᠢ ᠪᠣᠯᠪᠠᠯ ᠬᠦᠷᠢᠶᠡᠨ ᠡᠴᠡ ᠴᠡᠷᠢᠭ ᠢᠷᠡᠭᠦᠯᠦᠨᠡ᠃ ᠣᠢᠯᠠᠭᠠᠪᠠ ᠤᠤ? ᠪᠠᠰᠠ ᠲᠠ ᠨᠠᠷ᠁ ᠠᠴᠢᠵᠤ ᠥᠭᠭᠦᠨᠡ ᠰᠢᠦ》 ᠭᠡᠳ ᠶᠠᠪᠤᠵᠤ ᠪᠢᠯᠡ᠃
ᠥᠯᠥᠰᠬᠦᠯᠡᠩ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠬᠥᠮᠦᠰ ᠲᠦ᠍ ᠲᠤᠰᠠᠯᠠᠬᠤ ᠠᠵᠢᠯ ᠢ᠋ ᠢᠩᠭᠢᠵᠦ ᠬᠢᠭᠡᠳ ᠪᠠᠶᠠᠷᠲᠠᠢ ᠪᠤᠴᠠᠵᠤ ᠢᠷᠡᠭᠡᠳ ᠪᠠᠢᠲᠠᠯᠠ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠ ᠶ᠋ᠢᠨ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠵᠠᠳᠠᠮᠪᠠ ᠶ᠋ᠢᠨ ᠭᠠᠷ ᠤ᠋ᠨ ᠦᠰᠦᠭᠳᠡᠢ ᠨᠢᠭᠡ ᠪᠢᠴᠢᠭ ᠢᠷᠡᠵᠡᠢ᠃ ᠲᠡᠷᠡ ᠪᠢᠴᠢᠭ ᠲᠦ᠍ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠶ᠋ᠢ ᠬᠠᠤᠯᠢ ᠪᠤᠰᠤ ᠪᠠᠷ ᠬᠤᠷᠢᠶᠠᠵᠤ ᠬᠥᠮᠦᠰ ᠲᠦ᠍ ᠲᠠᠷᠠᠭᠠᠵᠤ ᠥᠭᠭᠦᠭᠰᠡᠨ ᠡᠷᠳᠡᠨᠢ ᠶ᠋ᠢ ᠵᠢᠮᠡᠯᠡᠭᠡᠳ ᠪᠣᠭᠣᠨᠢ ᠴᠠᠭ ᠤ᠋ᠨ ᠳᠣᠲᠣᠷᠠ ᠠᠯᠳᠠᠭᠠ ᠪᠠᠨ ᠵᠠᠰᠠᠵᠤ ᠵᠢᠰᠠ ᠨᠤᠭᠤᠳ ᠢ᠋ ᠬᠣᠬᠢᠷᠠᠯ ᠦᠭᠡᠢ ᠪᠣᠯᠭᠠᠭᠠᠳ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠲᠥᠪ ᠬᠣᠷᠢᠶᠠ ᠳ᠋ᠤ᠌ ᠬᠦᠷᠦᠯᠴᠡᠨ ᠢᠷᠡᠵᠦ ᠢᠯᠡᠳᠬᠡᠯ ᠲᠠᠯᠪᠢᠬᠤ ᠶ᠋ᠢ ᠴᠢᠩᠳᠠᠯᠠᠨ ᠳᠠᠭᠠᠭᠠᠯᠭᠠᠵᠠᠢ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠡᠷᠳᠡᠨᠢ ᠥᠷᠲᠡᠭᠡ ᠪᠡᠷ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠵᠦᠭ ᠮᠣᠷᠳᠠᠯᠠ᠃ ᠭᠡᠬᠦ ᠳ᠋ᠡᠭᠡᠨ ᠵᠢᠰᠠ ᠨᠤᠭᠤᠳ ᠡᠴᠡ ᠲᠠᠲᠠᠪᠤᠷᠢᠯᠠᠨ ᠠᠪᠴᠤ ᠲᠠᠷᠬᠠᠭᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠡᠷᠭᠢᠭᠦᠯᠵᠦ ᠥᠭᠬᠦ ᠲᠠᠯᠠ ᠪᠠᠷ ᠶᠠᠭᠤ ᠴᠤ᠌ ᠬᠢᠭᠰᠡᠨ ᠦᠭᠡᠢ᠃
《ᠶᠠᠭᠤ ᠪᠣᠯᠪᠠᠯ ᠶᠠᠭᠤ ᠪᠣᠯᠤᠭ᠃ ᠪᠢ ᠯᠡ ᠬᠤᠪᠢ ᠳ᠋ᠠᠭᠠᠨ ᠥᠨᠥᠴᠢᠨ ᠢᠰᠢᠭᠡ ᠴᠦ᠍ ᠢᠳᠡᠭᠡ ᠦᠭᠡᠢ ᠶᠤᠮ ᠳ᠋ᠠᠭ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠡᠷᠡ ᠶᠠᠳᠠᠷᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠲᠤᠰᠠ ᠪᠣᠯᠬᠤ ᠯᠠ ᠶᠣᠰᠣᠲᠠᠢ᠃ ᠲᠡᠳᠡᠨ ᠢ᠋ ᠲᠡᠳᠬᠦᠬᠦ ᠥᠭᠡᠷᠡ ᠠᠷᠭᠠ ᠨᠠᠳᠠ ᠳ᠋ᠤ᠌ ᠪᠠᠢᠭᠠ ᠦᠭᠡᠢ》 ᠭᠡᠵᠦ ᠤᠷᠲᠤ ᠵᠠᠮ ᠤ᠋ᠨ ᠠᠶᠠᠯᠠᠯ ᠳ᠋ᠤ᠌ ᠡᠷᠳᠡᠨᠢ ᠪᠣᠳᠣᠵᠤ ᠶᠠᠪᠤᠯᠠ᠃