ᠲᠤᠩᠭᠠᠯᠠᠭ ᠲᠠᠮᠢᠷ4-04-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1430《ᠨᠠᠰᠤᠨ ᠲᠤᠷᠰᠢ ᠯᠠ ᠶᠠᠭᠤᠮᠠ ᠬᠢᠬᠦ ᠪᠤᠶᠤ ᠡᠭᠦᠨ ᠢ᠋ ᠢᠩᠭᠢᠶᠡ᠂ ᠲᠡᠭᠦᠨ ᠢ᠋ ᠲᠡᠭᠡᠶᠡ ᠭᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠤᠢᠳᠳᠠᠭ ᠦᠭᠡᠢ ᠬᠠᠴᠢᠨ ᠤᠯᠤᠰ ᠰᠢᠦ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠳᠥᠷᠪᠡ
ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠥᠭᠭᠢᠶᠡᠮᠦᠷ ᠨᠠᠮᠤᠷ ᠪᠣᠯᠪᠠ᠃ ᠵᠡᠭᠦᠨ ᠬᠣᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠥᠷᠭᠡᠨ ᠠᠮᠠᠨ ᠤ᠋ ᠠᠳᠠᠭ᠂ ᠳᠡᠯᠭᠡᠷ ᠴᠠᠭᠠᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠬᠣᠶᠠᠷ ᠲᠣᠮᠣ ᠡᠷᠢᠶᠡᠨ ᠮᠠᠢᠬᠠᠨ ᠪᠠᠢᠬᠤ ᠪᠥᠭᠡᠳ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠡᠳᠦᠢ ᠲᠡᠳᠦᠢ ᠵᠢᠰᠦᠮ ᠪᠦᠷᠢ ᠶ᠋ᠢᠨ ᠥᠩᠭᠡᠲᠡᠢ ᠲᠣᠮᠣ ᠵᠢᠵᠢᠭ ᠮᠠᠢᠬᠠᠨ᠂ ᠴᠢᠳᠦᠷᠲᠡᠢ ᠪᠤᠶᠤ ᠤᠶᠠᠭᠠᠲᠠᠢ ᠮᠣᠷᠢᠳ ᠬᠠᠷᠠᠭᠳᠠᠨᠠ᠃ ᠵᠠᠷᠢᠮ ᠮᠠᠢᠬᠠᠨ ᠤ᠋ ᠭᠠᠳᠠᠨᠠ ᠲᠦᠯᠡᠵᠦ ᠪᠠᠢᠭᠠ ᠭᠠᠯ ᠡᠴᠡ ᠬᠥᠬᠡ ᠤᠲᠤᠭᠠ ᠰᠤᠭᠤᠨᠠᠭᠯᠠᠨ ᠪᠠᠢᠯᠠ᠃
ᠡᠨᠳᠡ ᠱᠠᠭᠠ ᠬᠠᠷᠪᠤᠵᠤ ᠪᠠᠢᠯᠠ᠃ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠮᠠᠢᠬᠠᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠳᠥᠷᠪᠡᠨ ᠬᠥᠮᠦᠨ ᠰᠠᠭᠤᠭᠠᠳ ᠬᠣᠢᠮᠣᠷ ᠨᠢ ᠲᠠᠯᠪᠢᠭᠰᠠᠨ ᠱᠠᠭᠠ ᠶ᠋ᠢ ᠬᠠᠷᠪᠤᠵᠤ ᠪᠠᠢᠯᠠ᠃ ᠬᠣᠶᠠᠷ ᠲᠠᠯᠠ ᠪᠠᠷ ᠨᠢ ᠵᠡᠷᠭᠡᠴᠡᠨ ᠰᠠᠭᠤᠭᠰᠠᠨ ᠬᠥᠮᠦᠰ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠭᠣᠯᠠᠢ ᠪᠠᠷ ᠤᠤᠬᠠᠢᠯᠠᠬᠤ ᠪᠥᠭᠡᠳ ᠪᠠᠨᠲᠠᠩ ᠳᠡᠭᠡᠷᠡ ᠭᠠᠭᠴᠠ ᠱᠠᠭᠠ ᠦᠯᠡᠳᠡᠭᠰᠡᠨ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠣᠭᠯᠠᠭᠠᠮ ᠲᠡᠮᠡᠴᠡᠯ ᠲᠡᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠭᠡᠷᠡᠴᠢᠯᠡᠨᠡ᠃
ᠬᠣᠩᠭᠣᠷ ᠤ᠋ᠨ ᠵᠡᠭᠦᠨ ᠭᠠᠷ ᠲᠤ᠌ ᠰᠠᠭᠤᠭᠰᠠᠨ ᠳᠥᠴᠢ ᠡᠷᠬᠢᠮ ᠨᠠᠰᠤᠨ ᠤ᠋ ᠪᠦᠳᠦᠭᠦᠨ ᠯᠠᠮᠠ ᠬᠠᠷᠪᠤᠬᠤ ᠪᠣᠯᠬᠤ ᠳ᠋ᠤ᠌ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠰᠠᠭᠤᠭᠰᠠᠨ ᠬᠢᠵᠢᠶᠡᠯ ᠬᠠᠷᠠ ᠬᠥᠮᠦᠨ 《ᠮᠡᠷᠭᠡᠨ ᠮᠢᠨᠢ᠂ ᠬᠢᠴᠢᠶᠡᠵᠦ ᠦᠵᠡᠭᠡᠷᠡᠢ᠃ ᠬᠣᠨᠵᠢᠬᠤ ᠳ᠋ᠤ᠌ ᠭᠠᠭᠴᠠ ᠬᠤᠷᠤᠭᠤ ᠳᠤᠲᠠᠭᠤ ᠪᠠᠢᠨᠠ ᠰᠢᠦ》 ᠭᠡᠳ ᠬᠠᠬᠢᠷ ᠫᠠᠷᠭᠢᠶᠠ ᠳᠠᠭᠤ ᠪᠠᠷ ᠤᠤᠬᠠᠢᠯᠠᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠲᠦᠷᠡᠪᠡ᠃
ᠯᠠᠮᠠ ᠬᠤᠷᠤᠭᠤ ᠪᠠᠨ ᠮᠤᠯᠲᠤᠯᠵᠤ ᠣᠷᠬᠢᠪᠠ᠃ 《ᠳᠤᠲᠠᠵᠤ ᠪᠠᠢᠨᠠ᠂ ᠮᠡᠷᠭᠡᠨ ᠮᠢᠨᠢ》 ᠭᠡᠵᠦ ᠬᠢᠵᠢᠶᠡᠯ ᠬᠠᠷᠠ ᠬᠥᠮᠦᠨ ᠬᠠᠰᠬᠢᠷᠪᠠ᠃ ᠬᠣᠩᠭᠣᠷ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠬᠠᠰᠢᠯᠭᠠ ᠪᠠᠨ ᠵᠣᠭᠣᠵᠤ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠳᠤᠭᠤᠢ ᠶᠠᠰᠤᠨ ᠰᠤᠮᠤ ᠲᠠᠯᠪᠢᠭᠠᠳ ᠳᠤᠮᠳᠠ ᠬᠤᠷᠤᠭᠤ ᠪᠠᠨ ᠦᠯᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠪᠠᠭ᠂ ᠦᠬᠦᠬᠦ ᠰᠡᠬᠡᠬᠦ ᠴᠢᠨᠦ ᠭᠠᠷ ᠲᠤ᠌ ᠰᠢᠦ ᠭᠡᠵᠦ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠮᠠᠩᠨᠠᠢ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠠᠩᠬᠠᠭᠠᠷ ᠡᠷᠡ ᠬᠡᠯᠡᠭᠡᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠪᠠ᠃
ᠬᠣᠩᠭᠣᠷ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠤᠷᠤᠭᠤ ᠪᠠᠨ ᠮᠤᠯᠲᠤᠯᠪᠠ᠃ ᠰᠤᠮᠤ ᠭᠢᠯᠠᠯᠵᠠᠨ ᠨᠢᠰᠴᠦ ᠳᠡᠰ ᠭᠡᠵᠦ ᠪᠠᠭᠤᠬᠤ ᠳ᠋ᠤ᠌ ᠵᠢᠵᠢᠭᠬᠡᠨ ᠱᠠᠭᠠ ᠦᠰᠦᠷᠦᠨ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠪᠠ᠃ ᠬᠥᠮᠦᠰ ᠦ᠋ᠨ ᠤᠤᠬᠠᠢᠯᠠᠬᠤ ᠳᠠᠭᠤ ᠭᠡᠨᠡᠳᠲᠡ ᠬᠠᠳᠠᠨ ᠬᠡᠰᠡᠭ ᠦᠷᠭᠦᠯᠵᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠴᠤ᠌ ᠡᠢᠮᠦ ᠯᠡ ᠪᠠᠢᠳᠠᠭ ᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠵᠡᠭᠦᠯᠦᠭᠡᠳ ᠥᠭᠴᠦ ᠪᠠᠢᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠮᠤ ᠨᠢ ᠡᠭᠡᠭᠡ ᠯᠡ ᠫᠤᠤ ᠶ᠋ᠢᠨ ᠰᠤᠮᠤ ᠰᠢᠭ᠋ ᠪᠠᠢᠬᠤ ᠰᠢᠪ ᠭᠡᠬᠦ ᠵᠡᠷᠭᠡ ᠪᠡᠷ ᠬᠣᠩᠭᠣᠷ ᠢ᠋ ᠮᠠᠭᠲᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠠᠬᠢᠬᠤᠪ᠃ ᠳᠡᠭᠦᠵᠢᠩ ᠲᠠᠯᠪᠢᠵᠤ ᠤᠷᠭᠢᠶᠠ ᠭᠡᠳ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠢᠵᠢᠶᠡᠯ ᠡᠷᠡ ᠡᠪᠦᠷ ᠡᠴᠡ ᠪᠡᠨ ᠬᠠᠢᠷᠴᠠᠭ ᠲᠠᠢ ᠴᠦᠳᠠᠠᠵᠠ ᠭᠠᠷᠭᠠᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠬᠤᠭᠤᠯᠤᠭᠠᠳ ᠲᠠᠯᠪᠢᠪᠠ᠃
ᠲᠡᠮᠡᠴᠡᠯ ᠲᠡᠢ ᠪᠣᠯᠵᠤ ᠪᠠᠢᠭᠠ ᠡᠨᠡ ᠱᠠᠭᠠ ᠶ᠋ᠢ ᠬᠠᠷᠠᠬᠤ ᠪᠠᠷ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠪᠠ᠃ ᠭᠤᠷᠪᠠᠨ ᠬᠥᠮᠦᠨ ᠤᠨᠤᠭᠰᠠᠨ ᠦᠭᠡᠢ᠃ ᠬᠣᠩᠭᠣᠷ ᠤ᠋ᠨ ᠡᠭᠡᠯᠵᠢ ᠪᠣᠯᠪᠠ᠃ ᠤᠳᠠᠭᠠᠨ ᠭᠡᠭᠴᠢ ᠨᠢ ᠣᠨᠢᠯᠠᠵᠤ ᠪᠠᠢᠭᠠᠳ ᠲᠠᠯᠪᠢᠪᠠ᠃ ᠪᠠᠨᠲᠠᠩ ᠳᠡᠭᠡᠷᠡ ᠭᠠᠯ ᠮᠠᠨᠠᠰ ᠭᠡᠬᠦ ᠳ᠋ᠦ᠍ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠶ᠋ᠢ ᠮᠠᠭᠲᠠᠬᠤ ᠳᠠᠭᠤ ᠪᠢᠲᠡᠭᠦᠦ ᠱᠤᠤᠭᠢᠯᠳᠤᠭᠠᠳ᠂ ᠤᠤᠬᠠᠢᠯᠠᠬᠤ ᠳᠠᠭᠤ ᠮᠠᠢᠬᠠᠨ ᠢ᠋ ᠲᠤᠷᠭᠢᠭᠤᠯᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠭᠠ ᠦᠭᠡᠢ ᠯᠡ ᠱᠠᠭᠠ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠵᠣᠪᠠᠮᠠᠷ ᠦᠭᠡᠢ ᠬᠠᠷᠪᠤᠭᠠᠴᠢ ᠪᠠᠢᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠴᠥᠭᠡᠳᠦᠷ ᠵᠢᠪᠬᠤᠳᠠᠢ ᠬᠥᠮᠦᠨ ᠲᠡᠢ ᠳᠡᠭᠦᠵᠢᠩ ᠥᠷᠢᠰᠦᠯᠳᠦᠵᠦ ᠬᠠᠷᠪᠤᠭᠠᠳ ᠬᠣᠵᠢᠵᠤ ᠪᠠᠢᠬᠤ ᠶ᠋ᠢ ᠨᠢ ᠪᠢ ᠬᠠᠷᠠᠭᠰᠠᠨ᠃
ᠣᠯᠠᠨ ᠤ᠋ ᠮᠠᠭᠲᠠᠭᠠᠯ ᠳ᠋ᠤ᠌ ᠬᠥᠭᠵᠢᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠬᠣᠩᠭᠣᠷ ᠰᠤᠮᠤ ᠬᠠᠰᠢᠯᠭᠠ ᠪᠠᠨ ᠬᠠᠳᠠᠭ ᠲᠤ᠌ ᠪᠣᠭᠣᠵᠤ ᠡᠪᠦᠷᠲᠦᠯᠡᠭᠡᠳ ᠪᠣᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠬᠠᠷᠪᠤᠭᠠᠴᠢ ᠡᠷᠡ ᠶᠤᠮ ᠠ᠋ ᠭᠡᠳ ᠲᠠᠨᠢᠯ ᠨᠢᠭᠡ ᠵᠠᠯᠠᠭᠤ ᠨᠢ ᠬᠣᠩᠭᠣᠷ ᠤ᠋ᠨ ᠵᠠᠮ ᠢ᠋ ᠬᠠᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠ ᠤᠤ᠃ ᠠᠵᠠ ᠬᠦᠦ ᠪᠠᠢᠪᠠᠯ ᠶᠣᠣᠵᠠ ᠬᠦᠦ ᠪᠡᠷ ᠬᠣᠵᠢᠨᠠ ᠭᠡᠳᠡᠭ ᠯᠡ ᠪᠣᠯᠵᠤ ᠪᠠᠢᠨᠠ ᠭᠡᠳ ᠬᠣᠩᠭᠣᠷ ᠤᠷᠮᠠ ᠲᠠᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠬᠦ᠂ ᠠᠵᠠ ᠰᠣᠬᠣᠷ᠂ ᠬᠤᠷᠤᠭᠤ ᠮᠡᠷᠭᠡᠨ ᠭᠡᠳᠡᠭ ᠶᠤᠮ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠳᠣᠣᠷᠠ ᠡᠴᠡ ᠢᠷᠡᠪᠡ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠰᠤᠮᠤᠨ ᠡᠴᠡ ᠭᠠᠷᠤᠭᠠᠳ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠭᠣᠭᠠᠨ ᠲᠣᠬᠣᠢ ᠳ᠋ᠤ᠌ ᠮᠠᠨ ᠤ᠋ ᠬᠢ ᠬᠠᠷᠠᠭᠳᠠᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠮᠠ ᠬᠠᠷᠠᠭᠳᠠᠭᠠ ᠦᠭᠡᠢ ᠰᠢᠦ᠃ ᠴᠢ ᠭᠠᠷᠤᠭᠠᠳ ᠤᠳᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠠᠷᠪᠠᠭᠠᠳ ᠬᠣᠨᠣᠵᠤ ᠪᠠᠢᠨᠠ᠃ ᠤᠭ ᠨᠢ ᠮᠠᠨ ᠤ᠋ ᠬᠢ ᠨᠣᠭᠣᠭᠠᠨ ᠲᠣᠬᠣᠢ ᠳ᠋ᠤ᠌ ᠯᠠ ᠪᠠᠢᠭᠰᠠᠨ ᠶᠤᠮ ᠰᠠᠨ᠃ ᠨᠡᠭᠦᠵᠦ ᠣᠷᠬᠢᠵᠤ ᠯᠠ ᠳᠠ᠃ ᠠᠪᠤ ᠰᠦᠷᠦᠩ ᠬᠣᠶᠠᠷ ᠳᠦᠷᠪᠡᠭᠰᠡᠨ ᠶᠤᠮ ᠰᠢᠭ ᠨᠡᠭᠦᠳᠡᠭ ᠤᠯᠤᠰ ᠳᠠ ᠭᠡᠳ ᠬᠣᠩᠭᠣᠷ ᠨᠠᠷᠢᠬᠠᠨ ᠪᠥᠭᠡᠳ ᠤᠷᠲᠤ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠬᠣᠩᠭᠣᠷ ᠨᠡᠷᠡᠯᠬᠡᠵᠦ ᠠᠷᠪᠠᠭᠠᠳ ᠬᠣᠨᠣᠵᠤ ᠶᠠᠪᠤᠨᠠ ᠭᠡᠵᠡᠢ᠃ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠭᠡᠷ ᠡᠴᠡ ᠭᠠᠷᠤᠭᠠᠳ ᠬᠣᠷᠢ ᠭᠠᠷᠤᠢ ᠬᠣᠨᠣᠵᠤ ᠶᠠᠪᠤᠭᠠ ᠶᠤᠮ᠃ ᠡᠨᠡ ᠬᠣᠭᠣᠷᠣᠨᠳᠣ ᠬᠢᠭᠰᠡᠨ ᠠᠵᠢᠯ ᠭᠡᠪᠡᠯ ᠱᠠᠭᠠ ᠬᠠᠷᠪᠤᠭᠰᠠᠨ᠃ ᠶᠡᠷᠦ ᠡᠴᠡ ᠪᠡᠨ ᠬᠣᠩᠭᠣᠷ ᠤ᠋ᠨ ᠬᠢᠳᠡᠭ ᠠᠵᠢᠯ ᠨᠢ ᠰᠠᠢᠨ ᠮᠣᠷᠢ ᠤᠨᠤᠵᠤ᠂ ᠠᠢᠯ ᠬᠡᠰᠦᠬᠦ᠂ ᠲᠣᠭᠯᠠᠬᠤ᠂ ᠲᠠᠷᠪᠢᠵᠤ ᠠᠢᠷᠠᠭ ᠠᠷᠢᠬᠢ ᠡᠷᠭᠢᠭᠦᠯᠬᠦ᠂ ᠨᠠᠢᠷ ᠨᠠᠭᠠᠳᠤᠮ ᠬᠡᠰᠦᠬᠦ ᠯᠡ ᠶᠤᠮ᠃
ᠭᠡᠷ ᠲᠡᠭᠡᠨ ᠣᠴᠢᠬᠤ ᠳ᠋ᠤ᠌ ᠠᠪᠤ᠂ ᠡᠬᠡᠨᠡᠷ ᠬᠣᠶᠠᠷ ᠨᠢ ᠨᠢᠭᠡ ᠪᠣᠯ ᠶᠠᠭᠤᠮᠠ ᠬᠢᠵᠦ ᠪᠠᠢᠨᠠ᠃ ᠡᠰᠡᠬᠦᠯᠡ ᠠᠵᠢᠯ ᠤ᠋ᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠳᠠᠭ ᠪᠥᠭᠡᠳ ᠡᠭᠦᠨ ᠢ᠋ ᠬᠠᠷᠠᠭᠠᠳ ᠬᠣᠩᠭᠣᠷ ᠤ᠋ᠨ ᠵᠠᠯᠬᠠᠭᠤ ᠬᠦᠷᠴᠦ 《ᠨᠠᠰᠤᠨ ᠲᠤᠷᠰᠢ ᠯᠠ ᠶᠠᠭᠤᠮᠠ ᠬᠢᠬᠦ ᠪᠤᠶᠤ ᠡᠭᠦᠨ ᠢ᠋ ᠢᠩᠭᠢᠶᠡ᠂ ᠲᠡᠭᠦᠨ ᠢ᠋ ᠲᠡᠭᠡᠶᠡ ᠭᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠤᠢᠳᠳᠠᠭ ᠦᠭᠡᠢ ᠬᠠᠴᠢᠨ ᠤᠯᠤᠰ ᠰᠢᠦ》 ᠭᠡᠵᠦ ᠪᠣᠳᠣᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠬᠣᠩᠭᠣᠷ ᠡᠬᠡᠨᠡᠷ ᠲᠡᠭᠡᠨ ᠳᠤᠷᠠ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠣᠭᠲᠣ ᠪᠢᠰᠢ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠨᠢᠭᠡ ᠬᠥᠭ ᠦ᠋ᠨ ᠠᠮᠢᠳᠤᠷᠠᠯ ᠡᠴᠡ ᠤᠢᠳᠤᠭᠰᠠᠨ ᠬᠥᠮᠦᠨ ᠪᠠᠢᠯᠠ᠃
ᠰᠦᠷᠦᠩ ᠶᠠᠮᠠᠷ ᠨᠢᠭᠡᠨ ᠠᠵᠢᠯ ᠬᠢᠵᠦ ᠭᠦᠢᠴᠡᠭᠡᠳ ᠪᠤᠶᠤ ᠣᠯᠵᠠ ᠲᠠᠢ ᠠᠵᠢᠯ ᠰᠡᠳᠦᠵᠦ ᠪᠣᠳᠣᠭᠠᠳ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ ᠶᠠᠷᠢᠬᠤ ᠳ᠋ᠤ᠌ ᠬᠣᠩᠭᠣᠷ ᠱᠠᠯ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠰᠠᠭᠤᠳᠠᠭ ᠪᠢᠯᠡ᠃
ᠰᠦᠷᠦᠩ ᠡᠨᠡ ᠵᠢᠯ ᠢᠰᠡᠭᠡᠢ ᠪᠡᠨ ᠲᠣᠯᠣᠭᠠᠢᠯᠠᠵᠤ ᠬᠢᠯᠭᠡᠭᠡᠳ ᠲᠡᠭᠦᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠨ 《ᠴᠢ ᠮᠠᠨ ᠤ᠋ ᠢᠰᠡᠭᠡᠢ ᠶᠠᠮᠠᠷ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠨᠠ᠃ ᠠᠪᠤ ᠣᠢᠷᠠ ᠶ᠋ᠢᠨ ᠵᠢᠯ ᠡᠢᠮᠦ ᠣᠯᠠᠨ᠂ ᠡᠢᠮᠦ ᠴᠢᠨᠰᠠᠭᠠ ᠲᠠᠢ ᠢᠰᠡᠭᠡᠢ ᠬᠢᠭᠡ ᠦᠭᠡᠢ ᠭᠡᠵᠦ ᠬᠡᠯᠡᠭᠰᠡᠨ᠃ ᠪᠢ ᠴᠢᠮᠠ ᠳ᠋ᠤ᠌ ᠵᠣᠷᠢᠭᠤᠳᠠ ᠲᠣᠬᠣᠮ ᠤ᠋ᠨ ᠢᠰᠡᠭᠡᠢ ᠬᠢᠭᠰᠡᠨ᠃ ᠤᠳᠠᠬᠤ ᠦᠭᠡᠢ ᠤᠯᠠᠭᠠᠨ ᠴᠡᠩᠮᠡ ᠪᠡᠷ ᠡᠮᠵᠢᠭᠡᠳ ᠥᠭᠭᠦᠨᠡ》 ᠭᠡᠵᠦ ᠪᠠᠶᠠᠷᠲᠠᠢ ᠶᠠᠷᠢᠬᠤ ᠳ᠋ᠤᠨᠢ 《ᠰᠦᠷᠦᠩ ᠮᠢᠨᠢ ᠮᠣᠷᠢ ᠪᠠᠷ ᠦᠷᠭᠦᠯᠵᠢ ᠱᠣᠭᠰᠢᠳᠠᠭ ᠬᠥᠮᠦᠨ ᠡᠯᠢᠭᠡᠨ ᠦ᠌ ᠡᠪᠡᠳᠴᠢᠲᠡᠢ ᠪᠣᠯᠳᠠᠭ ᠶᠤᠮ ᠭᠡᠳᠡᠭ ᠰᠢᠦ》 ᠭᠡᠳ ᠬᠣᠩᠭᠣᠷ ᠡᠪᠰᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠠᠵᠢᠯ ᠪᠣᠳᠣᠵᠤ ᠪᠠᠢᠬᠤ ᠦᠭᠡᠢ ᠪᠣᠯ ᠴᠢ ᠱᠠᠭᠠ ᠬᠠᠷᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠰᠦᠷᠦᠩ ᠤᠷᠮᠠ ᠦᠭᠡᠢ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠠᠷᠭᠠᠰᠢ ᠭᠣᠣᠯ ᠤ᠋ᠨ ᠡᠮᠦᠨᠡ ᠭᠠᠷᠪᠠᠯ ᠲᠠᠮᠪᠠ ᠶ᠋ᠢ ᠠᠬᠤᠷ ᠤ᠋ᠨ ᠨᠣᠣᠰᠣ ᠠᠪᠴᠢᠷᠠᠵᠤ ᠥᠭ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠯᠡ᠃
ᠡᠴᠢᠭᠡ᠂ ᠡᠬᠡᠨᠡᠷ ᠬᠣᠶᠠᠷ ᠤ᠋ᠨ ᠠᠯᠢᠨ ᠨᠢ ᠴᠦ᠍ ᠬᠣᠩᠭᠣᠷ ᠤ᠋ᠨ ᠢᠩᠭᠢᠵᠦ ᠶᠠᠪᠤᠬᠤ ᠶ᠋ᠢ ᠬᠦᠴᠦᠲᠡᠢ ᠵᠢᠮᠡᠯᠡᠳᠡᠭ ᠦᠭᠡᠢ᠃ ᠢᠲᠡᠭᠡᠯᠲᠦ ᠬᠠᠶᠠ ᠨᠢᠭᠡ ᠬᠡᠯᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠶᠣᠰᠣᠲᠠᠢ ᠯᠠ ᠨᠢᠭᠡ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠣᠷᠣᠭᠤᠯᠵᠤ ᠨᠥᠭᠦᠭᠡ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠭᠠᠷᠭᠠᠨᠠ᠃
ᠥᠩᠭᠡᠷᠡᠭᠰᠡᠨ ᠡᠪᠦᠯ ᠰᠦᠷᠦᠩ ᠡᠴᠡ ᠬᠦᠦ ᠭᠠᠷᠤᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠢᠳᠡᠷ ᠭᠡᠵᠦ ᠨᠡᠷᠡᠯᠡᠭᠰᠡᠨ᠃ ᠲᠡᠷᠡ ᠬᠡᠦᠬᠡᠳ ᠦᠷᠭᠦᠯᠵᠢ ᠯᠡ ᠳᠤᠯᠵᠢᠨ ᠲᠠᠢ ᠪᠠᠢᠳᠠᠭ᠃ ᠬᠣᠩᠭᠣᠷ ᠬᠦᠦ ᠳ᠋ᠡᠭᠡᠨ ᠬᠠᠢᠷᠠᠲᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠬᠣᠪᠣᠷᠬᠠᠨ ᠪᠠᠷᠢᠵᠤ ᠦᠵᠡᠭᠰᠡᠨ᠃
ᠬᠣᠩᠭᠣᠷ ᠮᠠᠢᠬᠠᠨ ᠡᠴᠡ ᠭᠠᠷᠴᠤ ᠲᠡᠨᠢᠭᠦᠨ ᠲᠠᠭᠠᠯᠠᠮᠵᠢᠲᠠᠢ ᠰᠤᠨᠢᠶᠠᠬᠤ ᠵᠠᠭᠤᠷᠠ 《ᠬᠠᠷᠢᠳᠠᠭ ᠬᠡᠷᠡᠭ ᠠ᠋ ᠁ ᠨᠥᠭᠦᠭᠡ ᠮᠣᠷᠢ ᠮᠢᠨᠢ ᠬᠠᠮᠢᠭᠠ ᠪᠠᠢᠳᠠᠭ ᠪᠣᠯ ᠁》 ᠭᠡᠵᠦ ᠪᠣᠳᠣᠭᠠᠳ ᠶᠠᠪᠤᠬᠤ ᠭᠡᠲᠡᠯᠡ ᠠᠷᠤ ᠳ᠋ᠤᠨᠢ ᠢᠷᠡᠭᠰᠡᠨ ᠨᠢᠭᠡ ᠬᠥᠮᠦᠨ 《ᠵᠠ ᠬᠣᠩᠭᠣᠷ ᠮᠡᠷᠭᠡᠨ᠃ ᠮᠠᠨ ᠤ᠋ ᠪᠠᠭ ᠪᠣᠰᠤᠭᠠ ᠲᠣᠭᠯᠠᠭᠰᠠᠨ ᠤ᠋ ᠨᠠᠢᠷ ᠢ᠋ᠶ᠋ᠠᠨ ᠮᠠᠨ ᠤ᠋ ᠳ᠋ᠤ᠌ ᠬᠢᠨᠡ᠃ ᠬᠠᠮᠲᠤ ᠮᠣᠷᠳᠠᠵᠠᠭᠠᠶᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠨᠢᠭᠡ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠳᠠᠭ ᠶᠤᠮ ᠪᠢᠯᠢᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠶᠤᠮ ᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠠᠭᠠᠬᠢᠬᠤᠪ᠃ ᠮᠠᠷᠭᠠᠰᠢ ᠯᠠ ᠶᠠᠪᠤᠬᠤ ᠦᠭᠡᠢ ᠤᠤ᠃ ᠴᠢᠮᠠᠶ᠋ᠢ ᠨᠣᠴᠣᠲᠠᠯᠠ ᠠᠪᠤᠭᠠᠳ ᠬᠠᠶᠠᠬᠤ ᠳ᠋ᠤ᠌ ᠴᠢᠨᠢ ᠭᠣᠨᠴᠣᠭ ᠤ᠋ᠨ ᠪᠠᠭ ᠤ᠋ᠨ ᠬᠢᠨ ᠮᠠᠭᠤᠵᠢᠷᠠᠨ ᠤᠨᠠᠬᠤ ᠰᠢᠬᠠᠭᠰᠠᠨ ᠰᠢᠦ ᠳᠡ ᠭᠡᠳ ᠴᠢᠩᠭᠠ ᠳᠠᠭᠤ ᠪᠠᠷ ᠳᠡᠰ ᠳᠡᠰ ᠢᠨᠢᠶᠡᠪᠡ᠃
ᠨᠠᠢᠷᠠᠨ ᠳᠡᠭᠡᠷᠡ ᠬᠣᠩᠭᠣᠷ ᠭᠣᠣᠯᠯᠠᠵᠤ᠂ ᠲᠡᠭᠦᠨ ᠦ᠌ ᠮᠡᠷᠭᠡᠨ ᠢ᠋ ᠬᠥᠮᠦᠰ ᠠᠮᠠ ᠠᠮᠠ ᠳ᠋ᠠᠭᠠᠨ ᠮᠠᠭᠲᠠᠵᠤ ᠪᠠᠢᠯᠠ᠃ ᠨᠡᠯᠢᠶᠡᠳ ᠰᠣᠭᠲᠣᠭᠰᠠᠨ ᠬᠣᠩᠭᠣᠷ ᠮᠣᠷᠢ ᠬᠠᠷᠠᠬᠤ ᠪᠠᠷ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠰᠠᠯᠬᠢ ᠨᠢᠭᠡ ᠦᠶᠡ ᠪᠦᠯᠢᠶᠡᠨ᠂ ᠨᠢᠭᠡ ᠦᠶᠡ ᠰᠡᠷᠢᠭᠦᠨ ᠬᠣᠯᠢᠯᠳᠤᠨ ᠦᠯᠢᠶᠡᠨᠡ᠃ ᠲᠠᠷᠭᠤ ᠬᠦᠴᠦ ᠪᠡᠨ ᠠᠪᠤᠭᠰᠠᠨ ᠬᠣᠲᠠ ᠲᠠᠢ ᠬᠣᠨᠢᠨ ᠤ᠋ ᠬᠡᠪᠢᠵᠦ ᠢᠷᠠᠭᠯᠠᠬᠤ ᠴᠢᠮᠡᠭᠡ ᠦᠷᠭᠦᠯᠵᠢᠯᠡᠨ ᠱᠤᠤᠭᠢᠨᠠ᠃ ᠴᠡᠯᠮᠡᠭ ᠲᠩᠷᠢ ᠳ᠋ᠦ᠍ ᠦᠳᠡᠰᠢ ᠶ᠋ᠢᠨ ᠣᠳᠣᠨ ᠰᠦᠮᠡᠯᠵᠡᠨᠡ᠃ ᠲᠣᠯᠣᠭᠠᠢ ᠨᠢ ᠦᠯᠦ ᠮᠡᠳᠡᠭ ᠮᠠᠨᠠᠷᠠᠨ᠂ ᠨᠢᠭᠤᠷ ᠨᠢ ᠪᠦᠯᠢᠶᠡ ᠲᠡᠳᠡᠨ ᠨᠢᠭᠡ ᠯᠡ ᠠᠶᠠᠲᠠᠢ ᠠᠵᠢ᠃
ᠡᠮᠦᠨᠡ ᠡᠴᠡ ᠨᠢ ᠬᠣᠶᠠᠷ ᠬᠤᠪᠢᠩ ᠳᠦᠭᠦᠷᠡᠩ ᠤᠰᠤ ᠪᠠᠷᠢᠭᠰᠠᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠲᠡᠷᠡᠪᠢᠰᠢ ᠢᠷᠡᠯᠡ᠃ ᠲᠡᠷᠡᠪᠢᠰᠢ ᠶ᠋ᠢᠨ ᠨᠥᠬᠥᠷ ᠷᠠᠳᠨᠠ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠭᠳᠠᠨ ᠶᠠᠪᠤᠵᠠᠢ᠃ ᠤᠷᠢᠳᠤ ᠬᠤᠷᠳᠤᠨ ᠮᠣᠷᠢ ᠬᠠᠮᠲᠤ ᠤᠨᠤᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠷᠡᠪᠢᠰᠢ ᠶ᠋ᠢ ᠬᠣᠩᠭᠣᠷ ᠰᠠᠢᠨ ᠮᠡᠳᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠ ᠤᠤ? ᠲᠡᠷᠡᠪᠢᠰᠢ ᠲᠠᠨ ᠤ᠋ ᠬᠢ ᠴᠢᠨᠢ ᠡᠨᠳᠡ ᠪᠢᠯᠢᠤ?
ᠷᠠᠳᠨᠠ ᠶ᠋ᠢᠨ ᠬᠢ ᠡᠨᠳᠡ ᠭᠡᠳᠡᠭ ᠢ᠋ ᠬᠣᠩᠭᠣᠷ ᠰᠠᠢᠨ ᠮᠡᠳᠡᠨᠡ᠃ ᠭᠡᠪᠡᠴᠦ ᠶᠠᠷᠢᠶᠠ ᠡᠬᠢᠯᠡᠬᠦ ᠭᠡᠵᠦ ᠢᠩᠭᠢᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠴᠢ ᠰᠠᠢᠨ ᠤᠤ? ᠮᠠᠨ ᠤ᠋ ᠬᠢ ᠲᠡᠷᠡ ᠰᠢᠦ ᠳᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠴᠢ ᠣᠪᠣᠬᠠᠢ ᠲᠠᠭᠠᠷᠢᠴᠢᠬᠠᠬᠤ ᠭᠡᠳ ᠯᠡ ᠭᠠᠷᠳᠠᠭ ᠶᠤᠮ ᠪᠠᠢᠬᠤ ᠴᠢᠨᠢ ᠪᠢᠯᠡ ᠭᠡᠳ ᠲᠡᠷᠡᠪᠢᠰᠢ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠭᠲᠣᠵᠤ ᠣᠷᠬᠢᠯᠠ᠃ ᠲᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠤᠨᠲᠠᠶᠠ᠃ ᠬᠥᠭᠡᠭᠡᠬᠦ ᠦᠭᠡᠢ ᠪᠢᠵᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠦᠷᠦᠩ ᠮᠡᠳᠡᠪᠡᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠬᠠᠭᠠ ᠴᠣᠬᠢᠨᠠ ᠳᠠ ᠭᠡᠳ ᠲᠡᠷᠡᠪᠢᠰᠢ ᠤᠰᠤ ᠪᠠᠨ ᠲᠠᠯᠪᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠷᠠᠳᠨᠠ ᠡᠴᠡ ᠰᠤᠷᠠᠭ ᠲᠠᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨ ᠳ᠋ᠤ᠌ ᠪᠠᠢᠭᠠ᠃ ᠬᠣᠲᠠ ᠣᠷᠣᠪᠠᠯ ᠠᠭᠤᠯᠵᠠᠭᠠᠳ᠂ ᠠᠪᠠᠭᠠᠢ ᠴᠢᠨᠢ ᠮᠡᠨᠳᠦ ᠭᠢᠯᠠᠯᠵᠠᠵᠤ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠡᠷᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠢᠶᠠ᠃ ᠬᠡᠷᠡᠭ ᠲᠦ᠍ ᠣᠷᠣᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠬᠠᠰᠢᠷ ᠲᠠᠭᠠᠨ ᠯᠠ ᠠᠮᠢᠳᠤ ᠶᠠᠪᠤᠭᠠ ᠬᠥᠮᠦᠨ ᠪᠠᠢᠬᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠶᠤᠵᠤ ᠶᠠᠪᠤᠪᠠᠯ ᠠᠮᠢᠨ ᠳ᠋ᠤ᠌ ᠥᠯᠵᠡᠢᠲᠡᠢ ᠬᠦ ᠭᠡᠳ ᠬᠣᠩᠭᠣᠷ ᠰᠣᠭᠲᠣᠭᠤ ᠬᠥᠮᠦᠨ ᠦ᠌ ᠪᠦᠳᠡᠭᠢ ᠬᠣᠭᠣᠯᠠᠢ ᠪᠠᠷ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡᠪᠢᠰᠢ ᠬᠤᠪᠢᠩ ᠲᠠᠢ ᠤᠰᠤ ᠪᠠᠨ ᠠᠪᠴᠤ ᠬᠥᠳᠡᠯᠬᠦ ᠳ᠋ᠦ᠍ᠨᠢ ᠬᠣᠩᠭᠣᠷ ᠦᠯᠦ ᠮᠡᠳᠡᠭ ᠭᠠᠩᠬᠤᠨ 《ᠬᠦᠯᠢᠶᠡᠵᠦ ᠪᠠᠢ》 ᠭᠡᠳ ᠬᠣᠢᠨᠠ ᠡᠴᠡ ᠨᠢ ᠳᠠᠭᠠᠪᠠ᠃
ᠮᠠᠷᠭᠠᠰᠢ ᠨᠢ ᠦᠷ ᠦ᠋ᠨ ᠭᠡᠭᠡ ᠲᠦᠭᠡᠨ ᠴᠠᠢᠬᠤ ᠦᠶᠡ ᠳ᠋ᠦ᠍ ᠷᠠᠳᠨᠠ ᠶ᠋ᠢᠨ ᠭᠡᠷ ᠡᠴᠡ ᠨᠢᠭᠡ ᠬᠥᠮᠦᠨ ᠭᠠᠷᠴᠤ ᠨᠥᠭᠦᠭᠡ ᠭᠡᠷ ᠦ᠋ᠳ ᠤᠷᠤᠭᠤ ᠭᠢᠯᠦᠯᠵᠡᠨ ᠬᠠᠷᠠᠭᠰᠠᠭᠠᠷ ᠤᠶᠠᠵᠤ ᠬᠣᠨᠣᠭᠰᠠᠨ ᠮᠣᠷᠢ ᠪᠠᠨ ᠤᠨᠤᠭᠠᠳ ᠵᠡᠭᠦᠨ ᠲᠡᠰᠢ ᠶᠠᠪᠤᠯᠠ᠃ ᠡᠨᠡ ᠪᠣᠯ ᠬᠣᠩᠭᠣᠷ ᠪᠠᠢᠵᠤ ᠪᠢᠯᠡ᠃ ᠥᠩᠭᠡᠷᠡᠭᠰᠡᠨ ᠣᠷᠣᠢ ᠶ᠋ᠢᠨ ᠤᠤᠭᠤᠭᠰᠠᠨ ᠨᠡᠷᠡᠮᠡᠯ ᠲᠣᠯᠣᠭᠠᠢ ᠶ᠋ᠢ ᠨᠢ ᠠᠩᠭᠠᠯᠵᠠᠭᠤᠯᠵᠤ ᠡᠬᠢᠯᠡᠭᠰᠡᠨ ᠲᠤᠯᠠ ᠬᠣᠯᠠᠳᠴᠤ ᠴᠢᠳᠠᠯ ᠦᠭᠡᠢ ᠨᠡᠷᠡᠵᠦ ᠪᠠᠢᠭᠠ ᠠᠢᠯ ᠪᠠᠷᠠᠭᠠᠳᠠᠨ ᠣᠷᠣᠢ ᠨᠢ ᠷᠠᠳᠨᠠ ᠶ᠋ᠢᠨ ᠳ᠋ᠦ᠍ ᠠᠮᠢᠲᠠᠨ ᠤᠨᠲᠠᠭᠰᠠᠨ ᠬᠣᠢᠨᠠ ᠪᠤᠴᠠᠵᠤ ᠢᠷᠡᠯᠡ᠃
ᠠᠩᠬᠠᠨ ᠤ᠋ ᠥᠷᠯᠥᠭᠡ ᠷᠠᠳᠨᠠ ᠶ᠋ᠢᠨ ᠭᠡᠷ ᠡᠴᠡ ᠦᠷ ᠢ᠋ᠶ᠋ᠡᠷ ᠮᠣᠷᠳᠠᠭᠰᠠᠨ ᠬᠣᠩᠭᠣᠷ ᠢ᠋ ᠬᠠᠷᠠᠵᠤ ᠠᠮᠵᠢᠭᠰᠠᠨ ᠨᠢᠭᠡ ᠬᠡᠦᠬᠡᠨ 《ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠩᠭᠣᠷ ᠷᠠᠳᠨᠠ ᠶ᠋ᠢᠨ ᠳ᠋ᠦ᠍ ᠬᠣᠨᠣᠭᠠᠳ ᠶᠠᠪᠤᠭᠰᠠᠨ ᠰᠢᠦ᠃ ᠲᠡᠷᠡᠪᠢᠰᠢ ᠴᠦ᠍ ᠵᠢᠷᠦᠬᠡᠲᠡᠢ ᠵᠣᠯᠢᠭ ᠶᠤᠮ ᠠ᠋᠃ ᠪᠢᠲᠡᠭᠡᠢ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠭᠡᠷᠡᠢ᠃ ᠰᠦᠷᠦᠩ ᠲᠤᠭᠤᠯᠪᠠᠯ ᠭᠠᠵᠠᠷ ᠲᠩᠷᠢ ᠨᠡᠢᠯᠡᠭᠦᠯᠦᠨᠡ ᠰᠢᠦ》 ᠭᠡᠵᠦ ᠨᠠᠢᠵᠢ ᠳ᠋ᠠᠭᠠᠨ ᠬᠡᠯᠡᠵᠡᠢ᠃ ᠲᠡᠷᠡ ᠨᠠᠢᠵᠢ ᠨᠢ ᠪᠠᠰᠠ ᠨᠢᠭᠡ ᠬᠡᠦᠬᠡᠨ ᠳ᠋ᠦ᠍ 《ᠬᠣᠩᠭᠣᠷ ᠲᠡᠷᠡᠪᠢᠰᠢ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠭᠰᠠᠨ ᠭᠡᠨᠡ᠃ ᠲᠡᠢᠮᠦ ᠰᠠᠢᠬᠠᠨ ᠡᠬᠡᠨᠡᠷ ᠲᠡᠢ ᠪᠠᠢᠵᠤ ᠬᠥᠬᠡ ᠮᠠᠨᠲᠠᠤ ᠪᠠᠷ ᠶᠠᠭᠠᠬᠢᠨᠠ ᠳᠠ᠃ ᠡᠪᠦᠭᠡᠨ ᠮᠢᠨᠢ ᠪᠢᠲᠡᠭᠡᠢ ᠬᠥᠮᠦᠨ ᠳ᠋ᠦ᠍ ᠶᠠᠷᠢᠭᠠᠷᠠᠢ᠃ ᠬᠣᠪ ᠲᠤ᠌ ᠣᠷᠣᠵᠤ ᠪᠠᠯᠠᠷᠠᠨᠠ ᠰᠢᠦ》 ᠭᠡᠪᠡ᠃ ᠢᠩᠭᠢᠭᠡᠳ ᠷᠠᠳᠨᠠ ᠶ᠋ᠢᠨ ᠳ᠋ᠦ᠍ ᠬᠣᠶᠠᠷᠳᠠᠬᠢ ᠣᠷᠣᠢ ᠪᠠᠨ ᠭᠡᠲᠡᠨ ᠢᠷᠡᠵᠦ ᠪᠠᠢᠬᠤ ᠳ᠋ᠤ᠌ ᠤᠷᠢᠳᠤ ᠰᠥᠨᠢ ᠶ᠋ᠢᠨ ᠶᠠᠪᠤᠳᠠᠯ ᠨᠢ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠰᠡᠭᠦᠯ ᠦ᠋ᠨ ᠰᠣᠨᠢᠨ ᠪᠣᠯᠤᠨ ᠨᠢᠭᠡ ᠬᠡᠦᠬᠡᠨ ᠦ᠌ ᠠᠮᠠᠨ ᠡᠴᠡ ᠨᠥᠭᠦᠭᠡ ᠬᠡᠦᠬᠡᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠳᠡᠮᠵᠢᠵᠦ ᠶᠠᠪᠤᠭᠰᠠᠭᠠᠷ ᠰᠦᠷᠦᠩ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠥᠷᠥᠮᠳᠡᠨ ᠣᠷᠣᠯᠠ᠃
ᠦᠷ ᠴᠠᠢᠵᠤ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠪᠦᠬᠦ ᠶᠠᠭᠤᠮᠠ ᠲᠣᠳᠣᠷᠠᠭᠰᠠᠨ ᠦᠶᠡ ᠳ᠋ᠦ᠍ ᠬᠣᠩᠭᠣᠷ ᠰᠡᠷᠢᠭᠡᠳ ᠤᠬᠤᠰᠬᠢᠨ ᠪᠣᠰᠤᠭᠠᠳ ᠲᠦᠷᠭᠡᠨ ᠵᠠᠭᠤᠷᠠ ᠬᠤᠪᠴᠠᠰᠤᠯᠠᠨ ᠭᠠᠷᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠠᠶᠠᠭᠠ ᠰᠦ ᠤᠤᠭᠤᠵᠤ᠂ ᠥᠯᠥᠨ ᠡᠯᠢᠭᠡ ᠪᠡᠨ ᠲᠠᠢᠯᠤᠭᠠᠳ ᠶᠠᠪᠤ ᠯᠠ ᠳᠠ》 ᠭᠡᠳ ᠲᠡᠷᠡᠪᠢᠰᠢ ᠥᠨᠳᠡᠢᠪᠡ᠃ ᠲᠡᠭᠦᠨ ᠦ᠌ ᠵᠢᠷᠲᠠᠭᠠᠨᠠᠨ ᠲᠣᠭᠯᠠᠵᠤ ᠪᠠᠢᠭᠠ ᠨᠢᠳᠦ 《ᠪᠢ ᠰᠠᠢᠬᠠᠨ ᠪᠠᠢᠨᠠ ᠤᠤ? ᠰᠦᠷᠦᠩ ᠢ᠋ᠶ᠋ᠡᠨ ᠮᠠᠷᠲᠠᠵᠤ ᠣᠷᠬᠢᠪᠠ ᠤᠤ?》 ᠭᠡᠵᠦ ᠠᠰᠠᠭᠤᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ ᠭᠡᠵᠦ ᠬᠣᠩᠭᠣᠷ ᠶᠤᠪᠣᠷᠯᠠᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠰᠢᠭᠤᠳ ᠭᠠᠷᠬᠤ ᠳ᠋ᠠᠭᠠᠨ 《ᠡᠷᠡᠭᠦᠯ ᠪᠠᠢᠭᠰᠠᠨ ᠪᠣᠯ ᠡᠳᠡᠨ ᠦ᠌ ᠳ᠋ᠦ᠍ ᠪᠢ ᠬᠠᠮᠢᠭᠠ ᠡᠴᠡ ᠪᠤᠴᠠᠵᠤ ᠢᠷᠡᠬᠦ ᠪᠢᠯᠡ ᠳᠠ᠃ ᠵᠠᠶᠠᠭᠠ ᠨᠢ ᠣᠷᠬᠢᠭᠰᠠᠨ ᠲᠣᠯᠣᠭᠠᠢ᠂ ᠲᠦᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠬᠡᠯᠡᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠵᠦ ᠵᠢᠭᠤᠲᠠᠨ ᠪᠣᠢ ᠮᠡᠲᠦ ᠭᠡᠷ ᠦ᠋ᠨ ᠵᠦᠭ ᠳᠠᠪᠬᠢᠯᠠ᠃
ᠨᠢᠳᠦ ᠨᠢ ᠪᠡᠯᠴᠡᠢᠨ ᠴᠠᠭᠠᠷᠢᠭᠯᠠᠵᠤ᠂ ᠴᠢᠷᠠᠢ ᠨᠢ ᠰᠢᠷᠠᠯᠠᠨ ᠦᠷᠴᠢᠭᠡᠳ ᠪᠠᠵᠠᠵᠤ ᠦᠩᠭᠡᠭᠡᠳ ᠬᠠᠶᠠᠭᠰᠠᠨ ᠮᠣᠣᠲᠤᠤ ᠴᠠᠭᠠᠰᠤ ᠰᠢᠭ᠋ ᠪᠣᠯᠤᠭᠰᠠᠨ ᠬᠣᠩᠭᠣᠷ ᠢ᠋ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌ ᠰᠦᠷᠦᠩ ᠣᠶᠣᠵᠤ ᠪᠠᠢᠭᠰᠠᠨ ᠳᠡᠪᠡᠯ ᠢ᠋ᠶ᠋ᠡᠨ ᠲᠦᠯᠬᠢᠵᠦ ᠣᠷᠬᠢᠭᠠᠳ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠮᠠᠭᠤᠬᠠᠢ ᠬᠠᠷᠠᠯᠠ᠃ 《ᠪᠣᠯᠠᠢ ᠠᠮᠢᠲᠠᠨ᠃ ᠴᠢ ᠮᠡᠳᠡᠭᠡ ᠦᠭᠡᠢ ᠶᠤᠮ ᠭᠡᠵᠦ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠵᠦᠭᠡᠷ ᠥᠩᠭᠡᠷᠡᠬᠦ ᠪᠠᠢᠬᠠ》 ᠭᠡᠵᠦ ᠲᠡᠭᠦᠨ ᠦ᠌ ᠬᠣᠷᠣᠰᠤᠯ ᠢ᠋ᠶ᠋ᠠᠷ ᠲᠦᠭᠦᠷᠡᠭᠰᠡᠨ ᠬᠣᠶᠠᠷ ᠬᠤᠷᠴᠠ ᠨᠢᠳᠦ ᠬᠡᠯᠡᠵᠦ ᠪᠠᠢᠯᠠ᠃
ᠢᠷᠡᠬᠦ ᠪᠦᠷᠢ ᠳ᠋ᠦ᠍ ᠪᠠᠶᠠᠷ ᠬᠥᠷ ᠪᠣᠯᠵᠤ᠂ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠲᠣᠭᠠᠴᠢᠨ ᠶᠠᠷᠢᠳᠠᠭ ᠡᠬᠡᠨᠡᠷ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠬᠡᠷᠡᠭ ᠪᠢᠰᠢ ᠪᠣᠯᠵᠤ ᠤᠴᠢᠷ ᠶᠠᠪᠤᠳᠠᠯ ᠵᠠᠳᠠᠷᠠᠭᠰᠠᠨ ᠢ᠋ ᠣᠢᠯᠠᠭᠠᠭᠰᠠᠨ ᠬᠣᠩᠭᠣᠷ᠂ ᠭᠡᠮᠲᠦ ᠬᠥᠮᠦᠨ ᠬᠡᠯᠪᠡᠯᠵᠡᠨᠡ᠂ ᠳᠠᠭᠠᠷᠢᠲᠤ ᠮᠣᠷᠢ ᠳᠠᠯᠪᠢᠯᠵᠠᠨᠠ ᠭᠡᠭᠴᠢ ᠪᠡᠷ ᠭᠥᠯᠢᠯᠵᠡᠨ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠲᠤᠯᠭᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠳᠤᠪᠰᠢᠷᠠᠭᠳᠠᠨ ᠰᠠᠭᠤᠭᠠᠳ ᠭᠠᠩᠰᠠ ᠲᠠᠮᠠᠬᠢ ᠪᠠᠨ ᠭᠠᠷᠭᠠᠵᠤ ᠨᠡᠷᠡᠬᠦ ᠭᠡᠰᠡᠨ ᠢ᠋ᠶ᠋ᠡᠨ 《ᠮᠢᠨᠦ ᠲᠠᠮᠠᠬᠢ ᠬᠠᠮᠢᠭᠠ ᠪᠠᠢᠭᠠ ᠪᠣᠢ?》 ᠭᠡᠵᠦ ᠰᠤᠯᠠᠬᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠪᠠᠢᠨᠠ ᠭᠡᠰᠡᠨ ᠢ᠋ᠶ᠋ᠡᠨ ᠰᠦᠷᠦᠩ ᠦᠰᠦᠷᠦᠨ ᠬᠣᠩᠭᠣᠷ ᠤ᠋ᠨ ᠪᠠᠷᠠᠭᠤᠨ ᠴᠢᠬᠢᠨ ᠡᠴᠡ ᠪᠠᠵᠠᠵᠤ ᠠᠪᠤᠭᠠᠳ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠪᠠᠯᠪᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠴᠢ ᠶᠠᠭᠠᠬᠢᠵᠤ ᠪᠠᠢᠨᠠ᠃ ᠪᠣᠯᠢᠭᠠᠴᠢ ᠳᠠ ᠁ ᠶᠣ ᠭᠡᠵᠦ ᠵᠠᠢ᠌ᠴᠢᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠷᠤᠭᠲᠠᠢ ᠳᠠᠷᠤᠯᠠᠭᠠᠷᠠᠢ᠃ ᠴᠢᠮᠠᠲᠤ ᠣᠭᠲᠣ ᠳᠠᠷᠤᠯᠠᠭᠤᠯᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠴᠢᠮᠠᠲᠤ ᠶᠠᠭᠤ ᠶᠠᠷᠢᠵᠤ ᠣᠷᠬᠢᠪᠠ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠣᠢ᠃ ᠲᠡᠷᠡᠪᠢᠰᠢ ᠲᠡᠢ ᠴᠢ ᠶᠠᠭᠠᠬᠢᠨᠠ ᠭᠡᠨᠡ᠃ ᠬᠠᠷᠠ ᠤᠬᠤᠨᠠ! ᠭᠡᠵᠦ ᠬᠠᠰᠬᠢᠷᠤᠭᠠᠳ ᠤᠯᠠᠮ ᠬᠦᠴᠦᠲᠡᠢ ᠪᠠᠯᠪᠠᠪᠠ᠃ ᠬᠣᠩᠭᠣᠷ ᠠᠷᠠᠢ ᠭᠡᠵᠦ ᠰᠦᠷᠦᠩ ᠦ᠋ᠨ ᠭᠠᠷ ᠡᠴᠡ ᠮᠤᠯᠲᠤᠷᠠᠨ ᠰᠠᠯᠤᠭᠠᠳ ᠭᠡᠷ ᠦ᠋ᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠵᠠᠢᠯᠠᠨ ᠭᠠᠷᠪᠠ᠃ ᠰᠦᠷᠦᠩ ᠦ᠋ᠨ ᠨᠢᠳᠦ ᠭᠢᠯᠠᠯᠵᠠᠨ ᠦᠰᠦᠴᠢᠵᠦ ᠭᠠᠷ ᠲᠠᠭᠠᠨ ᠥᠷᠲᠥᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠷ ᠰᠢᠲᠠᠯᠠ᠃
ᠬᠣᠩᠭᠣᠷ ᠰᠢᠳᠡᠭᠰᠡᠨ ᠶᠠᠭᠤᠮᠠᠨ ᠤ᠋ ᠵᠠᠷᠢᠮ ᠢ᠋ ᠪᠠᠷᠢᠵᠤ ᠠᠪᠤᠨᠠ᠃ ᠵᠠᠷᠢᠮ ᠡᠴᠡ ᠨᠢ ᠵᠠᠢᠯᠠᠨᠠ᠃ ᠭᠡᠪᠡᠴᠦ ᠳ᠋ᠧᠩ ᠦ᠋ᠨ ᠴᠥᠭᠥᠴᠡ ᠪᠠᠷᠠᠭᠤᠨ ᠨᠢᠳᠦᠨ ᠳᠡᠭᠡᠷᠡ ᠨᠢ ᠶᠠᠭ ᠪᠠᠭᠤᠭᠠᠳ ᠳᠣᠣᠷᠠ ᠪᠠᠨ ᠬᠥᠬᠡᠷᠡᠨ ᠬᠠᠪᠤᠳᠪᠠ᠃
ᠰᠦᠷᠦᠩ ᠪᠠᠬᠠᠨ ᠬᠠᠷᠢᠶᠠᠵᠤ ᠨᠦᠳᠦᠵᠦ ᠠᠪᠤᠭᠠᠳ ᠬᠡᠨᠡᠭ ᠦᠭᠡᠢ ᠭᠠᠷᠤᠯᠠ᠃ ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠢᠷᠡᠬᠦ ᠶ᠋ᠢ ᠬᠠᠷᠠᠭᠠᠳ ᠣᠷᠣᠬᠤ ᠭᠡᠵᠦ ᠭᠡᠷ ᠲᠦ᠋ᠨᠢ ᠣᠢᠷᠠᠲᠤᠲᠠᠯᠠ ᠪᠡᠷᠢ ᠨᠢ ᠨᠥᠬᠥᠷ ᠢ᠋ᠶ᠋ᠡᠨ ᠭᠠᠵᠠᠷ ᠳᠣᠭᠤᠤᠷ ᠣᠷᠣᠲᠠᠯᠠ ᠬᠠᠷᠢᠶᠠᠨ᠂ ᠨᠦᠳᠦᠵᠦ ᠪᠠᠢᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠣᠷᠣᠵᠤ ᠴᠢᠳᠠᠯ ᠦᠭᠡᠢ ᠪᠤᠴᠠᠵᠤ ᠬᠣᠨᠢᠨ ᠤ᠋ ᠬᠣᠲᠠᠨ ᠳ᠋ᠤ᠌ ᠣᠷᠣᠵᠤ ᠮᠣᠳᠣᠨ ᠬᠦᠷᠵᠡ ᠪᠠᠷᠢᠨ ᠠᠷᠢᠯᠭᠠᠵᠤ ᠪᠠᠢᠭᠠ ᠳᠦᠷᠢ ᠦᠵᠡᠭᠦᠯᠦᠨ ᠴᠢᠩᠨᠠᠪᠠ᠃
《ᠳᠠᠮᠰᠢᠭ ᠴᠢᠨᠢ ᠶᠠᠭᠤ ᠬᠢᠵᠦ ᠣᠷᠬᠢᠭᠰᠠᠨ ᠶᠤᠮ ᠪᠣᠯ᠃ ᠰᠦᠷᠦᠩ ᠴᠦ᠍ ᠳᠤᠯᠵᠢᠨ ᠪᠢᠰᠢ ᠳᠡ᠃ ᠪᠣᠯᠭᠣᠭᠠᠵᠤ ᠲᠠᠯᠪᠢᠨᠠ᠃ ᠨᠢᠳᠦ ᠠᠮᠠ ᠶ᠋ᠢ ᠨᠢ ᠪᠦᠯᠳᠤ ᠴᠣᠬᠢᠴᠢᠬᠠᠬᠤ ᠦᠭᠡᠢ ᠪᠠᠢᠭᠠ ᠳᠠ ᠁ ᠡᠮᠡ ᠪᠡᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠭᠠᠷᠭᠠᠭᠰᠠᠨ ᠬᠥᠮᠦᠨ ᠶᠡᠬᠡ ᠰᠢᠪᠰᠢᠭ ᠪᠣᠯᠤᠨᠠ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠨ ᠬᠦᠦ ᠪᠡᠨ ᠬᠠᠷᠠᠮᠰᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠣᠷᠣᠵᠤ ᠨᠢᠭᠡ ᠯᠡ ᠴᠢᠳᠠᠭᠰᠠᠨ ᠦᠭᠡᠢ ᠠᠵᠢ᠃
ᠰᠦᠷᠦᠩ ᠢ᠋ ᠬᠠᠷᠠᠭᠠᠳ ᠮᠣᠳᠣᠨ ᠬᠦᠷᠵᠡ ᠪᠡᠷ ᠢ᠋ᠶ᠋ᠡᠨ ᠲᠦᠷᠭᠡᠨ ᠲᠦᠷᠭᠡᠨ ᠠᠵᠢᠯᠯᠠᠵᠤ ᠡᠬᠢᠯᠡᠪᠡ᠃ ᠰᠦᠷᠦᠩ ᠦ᠋ᠨ ᠴᠢᠷᠠᠢ ᠮᠢᠠᠴᠢ᠌ᠨ ᠤᠯᠠᠢᠭᠠᠳ ᠨᠢᠳᠦ ᠨᠢ ᠡᠷᠴᠢᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠲᠠ ᠬᠣᠲᠠ ᠠᠷᠢᠯᠭᠠᠵᠤ ᠪᠠᠢᠭᠠ ᠶᠤᠮ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠪᠢ ᠬᠣᠲᠠ ᠠᠷᠢᠯᠭᠠᠵᠤ ᠪᠠᠢᠨᠠ᠃ ᠲᠠ ᠨᠠᠷ ᠴᠢᠨᠢ ᠶᠠᠭᠤ ᠪᠣᠯᠤᠭᠠᠳ ᠯᠠ ᠬᠠᠰᠬᠢᠷᠤᠯᠳᠤᠭᠠᠳ ᠪᠠᠢᠨᠠ ᠳᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ᠃ ᠠᠷᠢᠬᠢ ᠤᠤᠭᠤᠵᠤ ᠢᠷᠡᠭᠡᠳ ᠠᠭᠰᠤᠮᠨᠠᠵᠤ ᠪᠠᠢᠬᠤ ᠦᠭᠡᠢ ᠤᠤ ᠭᠡᠳ ᠶᠡᠬᠡ ᠭᠡᠷ ᠲᠦ᠍ ᠣᠷᠣᠵᠤ ᠬᠥᠭᠡᠷᠴᠦ ᠪᠠᠢᠭᠠ ᠲᠣᠭᠣᠭᠠ ᠲᠠᠢ ᠰᠦ ᠶ᠋ᠢ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠶᠤᠮ ᠰᠢᠭ ᠰᠠᠮᠤᠷᠴᠤ ᠡᠬᠢᠯᠡᠪᠡ᠃
ᠲᠡᠷᠡ ᠡᠳᠦᠷ ᠬᠣᠩᠭᠣᠷ ᠭᠡᠷ ᠡᠴᠡ ᠭᠠᠷᠤᠭᠰᠠᠨ ᠦᠭᠡᠢ᠃ ᠪᠠᠰᠠ ᠬᠡᠨ ᠴᠦ᠍ ᠲᠡᠭᠦᠨ ᠢ᠋ ᠣᠷᠣᠵᠤ ᠬᠥᠨᠳᠡᠭᠰᠡᠨ ᠦᠭᠡᠢ᠃ ᠮᠠᠷᠭᠠᠰᠢ ᠨᠢ ᠬᠥᠬᠡ ᠪᠤᠯᠤᠤ ᠪᠣᠯᠤᠭᠰᠠᠨ ᠨᠢᠳᠦ ᠲᠡᠢ ᠬᠣᠩᠭᠣᠷ ᠢ᠋ ᠭᠡᠭᠦᠦ ᠶ᠋ᠢᠨ ᠵᠡᠯᠡ ᠳᠡᠭᠡᠷᠡ ᠣᠴᠢᠬᠤ ᠳ᠋ᠤᠨᠢ 《ᠶᠠᠭᠤ ᠪᠣᠯᠤᠭᠠ ᠪᠣᠢ? ᠨᠢᠳᠦ ᠴᠢᠨᠢ》 ᠭᠡᠵᠦ ᠢᠲᠡᠭᠡᠯᠲᠦ ᠠᠰᠠᠭᠤᠬᠤ ᠳ᠋ᠤ᠌ 《ᠮᠣᠳᠣ ᠦᠰᠦᠷᠦᠭᠡᠳ ᠴᠣᠬᠢᠴᠢᠬᠠᠭᠰᠠᠨ ᠶᠤᠮ》 ᠭᠡᠵᠦ ᠠᠵᠢᠭ ᠦᠭᠡᠢ ᠬᠡᠯᠡᠭᠡᠳ ᠴᠢᠷᠠᠢ ᠨᠢ ᠦᠯᠦ ᠮᠡᠳᠡᠭ ᠤᠯᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠯᠡᠭᠡ ᠰᠡᠷᠡᠮᠵᠢᠲᠡᠢ ᠬᠠᠭᠠᠯᠵᠤ ᠪᠠᠢᠬᠤ ᠦᠭᠡᠢ ᠳᠡ ᠭᠡᠳ ᠢᠲᠡᠭᠡᠯᠲᠦ ᠪᠠᠷᠢᠭᠰᠠᠨ ᠤᠨᠠᠭᠠ ᠪᠠᠨ ᠴᠢᠭᠲᠠᠭᠠᠯᠠᠬᠤ ᠵᠠᠭᠤᠷᠠ 《ᠳᠠᠮᠰᠢᠭ ᠴᠢᠨᠢ ᠨᠢᠭᠤᠬᠤ ᠰᠠᠨᠠᠭᠠ ᠲᠠᠢ》 ᠭᠡᠵᠦ ᠪᠣᠳᠣᠨ ᠳᠣᠲᠣᠷᠠ ᠪᠠᠨ ᠢᠨᠢᠶᠡᠵᠦ ᠪᠢᠯᠡ᠃
ᠬᠣᠩᠭᠣᠷ ᠨᠢᠭᠡ ᠬᠡᠰᠡᠭ ᠲᠡᠨᠦᠵᠦ ᠠᠯᠠᠭᠠ ᠪᠣᠯᠬᠤ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠡᠮᠦᠷ ᠦ᠋ᠨ ᠥᠭᠭᠦᠭᠰᠡᠨ ᠪᠣᠷᠣ ᠮᠣᠷᠢ᠂ ᠥᠭᠡᠷᠡ ᠨᠢᠭᠡ ᠮᠣᠷᠢ ᠲᠠᠢ ᠬᠠᠮᠲᠤ ᠬᠡᠳᠦ ᠬᠣᠨᠣᠭ ᠰᠣᠢᠵᠤ ᠤᠨᠤᠭᠠᠳ ᠨᠢᠭᠡ ᠡᠳᠦᠷ ᠠᠯᠠᠭᠠ ᠪᠣᠯᠪᠠ᠃
ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠰᠢᠬᠠᠮ ᠪᠣᠯᠤᠭᠠᠳ ᠢᠷᠡᠬᠦ ᠳ᠋ᠡᠭᠡᠨ ᠠᠷᠪᠠᠨ ᠬᠡᠳᠦᠨ ᠰᠤᠭᠤ ᠰᠢᠭ᠋ ᠮᠣᠷᠢ ᠬᠥᠭᠡᠭᠡᠨ ᠠᠪᠴᠢᠷᠠᠪᠠ᠃