ᠲᠤᠩᠭᠠᠯᠠᠭ ᠲᠠᠮᠢᠷ4-03-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1546《ᠬᠠᠳᠠᠨ ᠤ᠋ ᠵᠠᠪᠰᠠᠷ ᠬᠠᠪᠴᠢᠭᠤᠯᠤᠭᠰᠠᠨ ᠬᠠᠯᠢᠭᠤᠨ ᠤ᠋ ᠵᠤᠯᠵᠠᠭᠠ ᠬᠥᠭᠡᠷᠦᠬᠦᠢ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠭᠤᠷᠪᠠ
ᠨᠢᠯᠬᠠ ᠨᠣᠭᠣᠭᠠᠨ ᠤ᠋ ᠠᠩᠬᠢᠯᠤᠮᠠ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠨᠠᠢᠷᠲᠠᠢ ᠰᠠᠢᠬᠠᠨ ᠡᠳᠦᠷ ᠴᠡᠩᠭᠡᠯ ᠠᠭᠤᠯᠠ ᠶ᠋ᠢᠨ ᠬᠣᠰᠢᠭᠤ ᠵᠠᠬᠢᠷᠭᠠ ᠶ᠋ᠢᠨ ᠡᠮᠦᠨᠡᠭᠦᠷ ᠭᠠᠷᠤᠭᠰᠠᠨ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠡᠷᠭᠢ ᠳ᠋ᠦ᠍ ᠰᠠᠷᠠᠯ ᠮᠣᠷᠢᠲᠠᠢ ᠬᠥᠮᠦᠨ ᠢᠷᠡᠵᠦ ᠪᠠᠭᠤᠭᠠᠳ ᠬᠠᠢᠷᠭᠤ ᠳᠡᠭᠡᠷᠡ ᠶᠠᠪᠠᠭᠠᠨ ᠰᠠᠭᠤᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠪᠠ᠃
ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠤᠷᠤᠭᠤ ᠬᠡᠯᠪᠡᠢᠭᠰᠡᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠲᠦᠷᠭᠡᠨ ᠤᠷᠤᠰᠬᠠᠯᠲᠤ ᠲᠤᠩᠭᠠᠯᠠᠭ ᠭᠣᠣᠯ ᠤ᠋ᠨ ᠮᠠᠨᠳᠠᠯ ᠳᠡᠭᠡᠷᠡ ᠵᠢᠷᠪᠢᠯᠵᠡᠨ ᠲᠣᠭᠯᠠᠵᠤ ᠪᠠᠢᠭᠠ ᠨᠢ ᠬᠠᠷᠠᠭᠰᠠᠨ ᠪᠦᠬᠦᠨ ᠦ᠌ ᠨᠢᠳᠦ ᠶ᠋ᠢ ᠲᠠᠲᠠᠨᠠ᠃
ᠡᠷᠳᠡᠨᠢ ᠤᠰᠤ ᠬᠠᠷᠠᠨ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠥᠷᠭᠡᠨ ᠮᠠᠩᠨᠠᠢ ᠳ᠋ᠤ᠌ ᠬᠡᠳᠦᠨ ᠦᠶᠡ ᠦᠷᠴᠢᠯᠡᠭᠡ ᠪᠠᠢᠨ ᠪᠠᠢᠨ ᠲᠣᠳᠣᠷᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠨᠢᠳᠦ ᠨᠢ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠤᠨ ᠭᠥᠯᠢᠷᠡᠨᠡ᠃ ᠡᠷᠳᠡᠨᠢ ᠳ᠋ᠦ᠍ ᠪᠣᠳᠣᠬᠤ ᠶᠠᠭᠤᠮᠠ ᠶᠡᠬᠡ ᠪᠠᠢᠯᠠ᠃
ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠢᠵᠦ ᠪᠠᠢᠭᠠ ᠠᠵᠢᠯ ᠪᠦᠬᠦᠨ ᠯᠠᠮᠠ ᠨᠠᠷ ᠪᠣᠯᠤᠨ ᠡᠷᠬᠡ ᠶᠠᠩᠪᠠ ᠪᠠᠨ ᠬᠠᠰᠤᠭᠳᠠᠭᠰᠠᠨ ᠨᠣᠶᠠᠳ ᠲᠠᠢᠵᠢ ᠨᠠᠷ ᠤ᠋ᠨ ᠢᠯᠡ᠂ ᠳᠠᠯᠳᠠ ᠡᠰᠡᠷᠭᠦᠴᠡᠯ ᠲᠡᠢ ᠲᠤᠯᠭᠠᠷᠠᠵᠤ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠳᠡᠨ ᠦ᠌ ᠬᠦᠴᠦ ᠶᠡᠬᠡ ᠪᠥᠭᠡᠳ ᠭᠠᠷ ᠲᠤᠨᠢ ᠮᠠᠯ ᠤ᠋ᠨ ᠶᠡᠬᠡᠩᠬᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠢ᠋ᠶ᠋ᠡᠨ ᠲᠦᠰᠢᠵᠦ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠠᠵᠢᠯ ᠢ᠋ ᠡᠰᠡᠷᠭᠦᠴᠡᠨᠡ᠃ ᠲᠡᠳᠡᠨ ᠦ᠌ ᠮᠠᠯ ᠰᠦᠷᠦᠭ ᠢ᠋ ᠬᠠᠷᠢᠭᠤᠯᠤᠨ ᠠᠮᠢᠳᠤᠷᠠᠳᠠᠭ ᠬᠥᠮᠦᠰ ᠣᠯᠠᠨ ᠪᠠᠢᠯᠠ᠃ ᠡᠨᠡ ᠤᠴᠢᠷ ᠡᠴᠡ ᠵᠠᠷᠢᠮ ᠡᠢᠮᠦ ᠬᠥᠮᠦᠨ ᠢ᠋ ᠲᠠᠩᠬᠢᠮ ᠳ᠋ᠤ᠌ ᠬᠡᠦᠬᠡᠳ ᠢ᠋ᠶ᠋ᠡᠨ ᠥᠭᠬᠦ ᠪᠤᠶᠤ ᠵᠠᠰᠠᠭ ᠵᠠᠬᠢᠷᠭᠠ ᠶ᠋ᠢᠨ ᠰᠣᠩᠭᠣᠭᠤᠯᠢ ᠳ᠋ᠤ᠌ ᠣᠷᠣᠯᠴᠠᠪᠠᠯ ᠬᠠᠷᠢᠭᠤᠯᠤᠭᠤᠯᠵᠤ ᠪᠠᠢᠭᠠ ᠮᠠᠯ ᠢ᠋ᠶ᠋ᠠᠨ ᠠᠪᠤᠨᠠ ᠭᠡᠵᠦ ᠠᠶᠤᠯᠭᠠᠭᠰᠠᠨ ᠤᠳᠠᠭᠠ ᠴᠤ᠌ ᠭᠠᠷᠴᠤ ᠪᠠᠢᠯᠠ᠃
ᠠᠷᠠᠳ ᠲᠦᠮᠡᠨ ᠦ᠌ ᠶᠡᠬᠡᠩᠬᠢ ᠬᠡᠰᠡᠭ ᠨᠢ ᠭᠦᠨ ᠪᠢᠰᠢᠷᠡᠯ ᠳ᠋ᠦ᠍ ᠠᠪᠲᠠᠭᠳᠠᠭᠰᠠᠨ ᠤᠴᠢᠷ ᠡᠭᠦᠨ ᠢ᠋ ᠠᠰᠢᠭᠯᠠᠨ ᠠᠷᠠᠳ ᠤ᠋ᠨ ᠵᠠᠰᠠᠭ᠂ ᠲᠡᠭᠦᠨ ᠦ᠌ ᠬᠢᠵᠦ ᠪᠠᠢᠭᠠ ᠠᠵᠢᠯ ᠢ᠋ ᠡᠰᠡᠷᠭᠦᠴᠡᠨᠡ᠃ ᠲᠡᠢᠮᠦ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌᠂ ᠡᠢᠮᠦ ᠭᠡᠭᠡᠨ ᠦ᠌ ᠯᠦᠨᠲᠦᠩ ᠳ᠋ᠦ᠍ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠡᠭᠡᠵᠦ ᠤᠰᠠᠳᠬᠤ ᠶᠣᠰᠣᠲᠠᠢ᠂ ᠠᠷᠠᠳ ᠤ᠋ᠨ ᠵᠠᠰᠠᠭ ᠪᠣᠢ ᠪᠣᠯᠤᠭᠰᠠᠨ ᠡᠴᠡ ᠴᠠᠭ ᠵᠢᠪᠡᠭᠦᠨ ᠪᠣᠯᠵᠤ ᠪᠠᠢᠨᠠ ᠭᠡᠵᠦ ᠶᠠᠷᠢᠨᠠ᠃ ᠠᠷᠠᠳ ᠣᠯᠠᠨ ᠤ᠋ ᠬᠡᠦᠬᠡᠳ ᠢ᠋ ᠪᠢᠴᠢᠭ ᠡᠷᠳᠡᠮ ᠰᠤᠷᠭᠠᠬᠤ ᠭᠡᠵᠦ ᠬᠡᠳᠦ ᠬᠡᠳᠦᠨ ᠰᠤᠮᠤ ᠶ᠋ᠢᠨ ᠳᠤᠮᠳᠠ ᠲᠠᠪᠢᠨ ᠬᠡᠦᠬᠡᠳ ᠦ᠋ᠨ ᠣᠷᠣᠨ ᠲᠣᠭᠠ ᠲᠠᠢ ᠲᠠᠩᠬᠢᠮ ᠤ᠋ᠳ ᠪᠠᠢᠭᠤᠯᠪᠠ᠃ ᠭᠡᠲᠡᠯᠡ ᠲᠡᠭᠦᠨ ᠢ᠋ ᠤᠰᠠᠳᠬᠠᠬᠤ ᠶ᠋ᠢᠨ ᠲᠤᠯᠠ ᠴᠢᠯᠠᠭᠤ ᠮᠡᠷᠡᠬᠦ ᠡᠴᠡ ᠪᠤᠰᠤᠳ ᠢ᠋ ᠬᠢᠬᠦ ᠠᠵᠢ᠃ ᠡᠭᠦᠨ ᠡᠴᠡ ᠵᠠᠷᠢᠮ ᠬᠥᠮᠦᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠠᠩᠬᠢᠮ ᠳ᠋ᠤ᠌ ᠥᠭᠬᠦ ᠳᠤᠷᠠ ᠦᠭᠡᠢ ᠪᠣᠯᠪᠠ᠃ ᠵᠠ ᠲᠡᠭᠡᠭᠡᠳ ᠠᠷᠠᠢ ᠬᠢᠵᠦ ᠬᠡᠳᠦᠨ ᠬᠡᠦᠬᠡᠳ ᠴᠤᠭᠯᠠᠷᠠᠭᠤᠯᠵᠤ ᠠᠪᠬᠤ ᠳᠡᠭᠡᠷᠡ ᠲᠠᠩᠬᠢᠮ ᠳᠡᠭᠡᠷᠡ ᠴᠢᠳᠬᠥᠷ ᠲᠡᠢ ᠪᠣᠯᠪᠠ ᠭᠡᠬᠦ ᠪᠤᠶᠤ ᠡᠪᠡᠳᠴᠢᠨ ᠲᠠᠬᠤᠯ ᠬᠦᠷᠲᠡᠯᠡ ᠳᠠᠷᠬᠠᠭᠠᠵᠤ ᠪᠠᠢᠯᠠ᠃ ᠬᠡᠦᠬᠡᠳ ᠢ᠋ ᠡᠯᠳᠡᠪ ᠢ᠋ᠶ᠋ᠡᠷ ᠢᠳᠬᠠᠨ ᠤᠷᠭᠤᠭᠤᠯᠬᠤ ᠨᠢ ᠪᠠᠷᠤᠭ ᠯᠠ ᠶᠡᠷᠦᠳᠡ ᠶ᠋ᠢᠨ ᠶᠠᠪᠤᠳᠠᠯ ᠪᠣᠯᠵᠠᠢ᠃ ᠢᠩᠭᠢᠭᠡᠳ ᠠᠵᠢᠯᠯᠠᠬᠤ ᠨᠥᠬᠥᠴᠡᠯ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠨᠢ ᠠᠷᠭᠠ ᠦᠭᠡᠢ ᠪᠣᠯᠵᠤ ᠬᠥᠬᠡᠭᠡ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠨᠡᠭᠦᠯᠭᠡᠵᠦ ᠴᠦ᠍ ᠪᠠᠢᠯᠠ᠃
ᠲᠠᠩᠬᠢᠮ ᠤ᠋ᠨ ᠬᠡᠦᠬᠡᠳ ᠦ᠋ᠨ ᠣᠷᠣᠨ ᠲᠣᠭᠠ ᠶ᠋ᠢ ᠭᠦᠢᠴᠡᠳᠬᠡᠬᠦ ᠭᠡᠵᠦ ᠡᠷᠳᠡᠨᠢ ᠬᠡᠦᠬᠡᠳ ᠢ᠋ ᠠᠢᠯ ᠡᠷᠦᠬᠡ ᠳ᠋ᠦ᠍ ᠣᠨᠤᠭᠳᠠᠭᠤᠯᠤᠨ ᠳᠠᠢᠴᠢᠯᠠᠬᠤ ᠰᠢ᠌ᠤᠠᠪᠣᠷᠢ ᠬᠦᠷᠲᠡᠯᠡ ᠭᠠᠷᠭᠠᠵᠤ ᠪᠢᠯᠡ᠃
ᠡᠨᠡ ᠵᠤᠨ ᠮᠠᠯ ᠤ᠋ᠨ ᠲᠣᠭᠠᠯᠠᠯᠭᠠ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠮᠠᠰᠢ ᠪᠠᠭᠠ ᠲᠣᠭᠠ ᠭᠠᠷᠴᠠᠢ᠃ ᠰᠢᠯᠲᠠᠭᠠᠨ ᠢ᠋ ᠰᠤᠳᠤᠯᠤᠨ ᠦᠵᠡᠪᠡᠯ ᠪᠠᠶᠠᠴᠤᠳ᠂ ᠵᠢᠰᠠ ᠮᠠᠯ ᠢ᠋ᠶ᠋ᠠᠨ ᠦᠯᠡᠮᠵᠢ ᠬᠡᠮᠵᠢᠶᠡ ᠪᠡᠷ ᠳᠠᠷᠤᠵᠤ᠂ ᠮᠥᠨ ᠵᠠᠷᠢᠮ ᠶᠠᠳᠠᠭᠤ ᠳᠤᠮᠳᠠ ᠠᠷᠠᠳ ᠢ᠋ ᠴᠦ᠍ ᠡᠨᠡ ᠬᠡᠷᠡᠭ ᠲᠡᠭᠡᠨ ᠲᠡᠳᠡᠨ ᠣᠷᠣᠭᠤᠯᠪᠠ᠃ ᠮᠠᠯ ᠳᠠᠷᠤᠬᠤ ᠶᠠᠪᠤᠳᠠᠯ ᠬᠣᠶᠠᠷ ᠦᠨᠳᠦᠰᠦᠨ ᠰᠢᠯᠲᠠᠭᠠᠨ ᠲᠠᠢ ᠪᠠᠢᠯᠠ᠃ ᠨᠢᠭᠡ ᠬᠡᠰᠡᠭ ᠨᠢ ᠵᠣᠷᠢᠭᠤᠳᠠ ᠠᠷᠠᠳ ᠤ᠋ᠨ ᠵᠠᠰᠠᠭ ᠡᠴᠡ ᠬᠢᠵᠦ ᠪᠠᠢᠭᠠ ᠠᠵᠢᠯ ᠢ᠋ ᠡᠰᠡᠷᠭᠦᠴᠡᠭᠰᠡᠨ ᠡᠴᠡ ᠮᠠᠯ ᠰᠦᠷᠦᠭ ᠢ᠋ ᠲᠣᠭᠠᠨ ᠡᠴᠡ ᠨᠢ ᠨᠢᠭᠤᠵᠠᠢ᠃ ᠡᠨᠡ ᠪᠣᠯ ᠪᠠᠭᠠ ᠬᠡᠰᠡᠭ ᠨᠢ ᠪᠠᠢᠯᠠ᠃ ᠨᠥᠭᠦᠭᠡ ᠬᠡᠰᠡᠭ ᠨᠢ ᠮᠠᠯ ᠤ᠋ᠨ ᠬᠥᠯ ᠳ᠋ᠦ᠍ ᠣᠨᠤᠭᠳᠠᠭᠤᠯᠬᠤ ᠠᠯᠪᠠᠨ ᠲᠠᠲᠠᠪᠤᠷᠢ᠂ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠶ᠋ᠢ ᠬᠣᠷᠣᠭᠳᠠᠭᠤᠯᠬᠤ ᠭᠡᠰᠡᠨ ᠡᠴᠡ ᠮᠠᠯ ᠢ᠋ᠶ᠋ᠠᠨ ᠳᠠᠷᠤᠵᠠᠢ᠃ ᠬᠡᠳᠦᠢ ᠪᠡᠷ ᠡᠴᠦᠰ ᠲᠡᠭᠡᠨ ᠡᠨᠡ ᠬᠣᠶᠠᠷ ᠬᠡᠰᠡᠭ ᠨᠢ ᠵᠠᠰᠠᠭ ᠡᠴᠡ ᠥᠪᠡᠷ ᠦ᠋ᠨ ᠣᠷᠣᠨ ᠤ᠋ ᠡᠳ᠋ ᠦ᠋ᠨ ᠵᠠᠰᠠᠭ ᠢ᠋ᠶ᠋ᠠᠨ ᠵᠥᠪ ᠣᠢᠯᠠᠭᠠᠶᠠ ᠭᠡᠵᠦ ᠬᠢᠭᠰᠡᠨ ᠠᠵᠢᠯ ᠳ᠋ᠤ᠌ ᠰᠦᠷᠡᠬᠡᠢ ᠬᠣᠣᠷ ᠬᠦᠷᠭᠡᠭᠰᠡᠨ ᠠᠪᠠᠴᠤ ᠠᠳᠠᠯᠢ ᠳ᠋ᠤ᠌ ᠦᠵᠡᠨ ᠲᠡᠮᠡᠴᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠯᠠ᠃
ᠡᠷᠳᠡᠨᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠨ ᠦ᠌ ᠲᠦᠰᠢᠮᠡᠯ ᠦ᠋ᠨ ᠬᠤᠪᠢ ᠳ᠋ᠤ᠌ ᠮᠠᠯ ᠢ᠋ ᠳᠠᠬᠢᠨ ᠲᠣᠭᠠᠯᠠᠭᠤᠯᠬᠤ ᠪᠣᠯᠵᠤ ᠬᠤᠰᠢᠭᠤᠳ ᠲᠤ᠌ ᠬᠥᠮᠦᠨ ᠲᠣᠮᠢᠯᠠᠨ ᠶᠠᠪᠤᠭᠤᠯᠤᠭᠰᠠᠨ ᠪᠥᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠴᠡᠩᠭᠡᠯ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠲᠣᠭᠠᠯᠠᠯᠭᠠ ᠶᠠᠪᠤᠭᠤᠯᠬᠤ ᠪᠠᠷ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ᠃
ᠤᠷᠢᠳᠤ ᠢᠲᠡᠭᠡᠯᠲᠦ ᠬᠡᠳᠦᠨ ᠮᠠᠯ ᠲᠠᠢ ᠪᠠᠢᠭᠰᠠᠨ ᠢ᠋ ᠡᠷᠳᠡᠨᠢ ᠪᠠᠷᠤᠭ ᠯᠠ ᠨᠠᠰᠤ᠂ ᠰᠢᠳᠦ᠂ ᠵᠢᠰᠦ ᠬᠦᠢᠰᠦ ᠪᠡᠷ ᠨᠢ ᠮᠡᠳᠡᠨᠡ᠃ ᠭᠡᠲᠡᠯᠡ ᠰᠠᠶᠢ ᠶ᠋ᠢᠨ ᠲᠣᠭᠠ ᠪᠠᠷ ᠢᠲᠡᠭᠡᠯᠲᠦ ᠶ᠋ᠢᠨ ᠮᠠᠯ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠡᠴᠡ ᠦᠯᠡᠮᠵᠢ ᠬᠣᠷᠣᠭᠳᠠᠭᠰᠠᠨ ᠪᠠᠢᠯᠠ᠃ ᠢᠩᠭᠢᠭᠡᠳ ᠪᠣᠳᠣᠬᠤ ᠳ᠋ᠤ᠌ ᠭᠠᠷᠭᠠᠭᠰᠠᠨ ᠲᠣᠭᠠ ᠬᠠᠭᠤᠷᠮᠠᠴᠢ ᠨᠢ ᠡᠷᠡᠭᠡᠯᠵᠡᠭᠡ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠳᠠᠬᠢᠭᠠᠳ ᠲᠣᠭᠠᠯᠠᠬᠤ ᠳ᠋ᠤ᠌ ᠳᠠᠬᠢᠭᠠᠳ ᠳᠠᠷᠤᠨᠠ᠃ ᠠᠬᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠳᠠᠪᠠᠯᠠᠨ ᠱᠣᠣᠯᠠᠨᠠ᠃
ᠳᠠᠷᠤᠭᠤᠯᠬᠤ ᠦᠭᠡᠢ ᠭᠡᠪᠡᠯ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠢ᠋ ᠣᠷᠣᠯᠴᠠᠭᠤᠯᠬᠤ ᠬᠡᠷᠡᠭᠲᠡᠢ᠃ ᠭᠡᠪᠡᠴᠦ ᠡᠨᠡ ᠪᠣᠯ ᠡᠢᠮᠦ ᠬᠢᠯᠪᠠᠷ ᠠᠵᠢᠯ ᠪᠢᠰᠢ᠃ ᠨᠢᠭᠡ ᠬᠡᠰᠡᠭ ᠬᠥᠮᠦᠰ ᠨᠤᠲᠤᠭ ᠤ᠋ᠨ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠥᠰᠢᠶᠡᠲᠡᠨ ᠪᠣᠯᠬᠤ ᠦᠭᠡᠢ ᠭᠡᠳ ᠳᠠᠷᠤᠭᠰᠠᠨ ᠮᠠᠯ ᠢ᠋ ᠢᠯᠡᠴᠢᠯᠡᠨ ᠭᠠᠷᠭᠠᠬᠤ ᠦᠭᠡᠢ᠃ ᠨᠥᠭᠦᠭᠡ ᠬᠡᠰᠡᠭ ᠬᠥᠮᠦᠰ ᠪᠤᠰᠤᠳ ᠤ᠋ᠨ ᠮᠠᠭᠤ ᠦᠵᠡᠬᠦ ᠦᠭᠡᠢ ᠭᠡᠳ ᠬᠡᠯᠡᠬᠦ ᠦᠭᠡᠢ᠃ ᠭᠤᠷᠪᠠᠳᠠᠬᠢ ᠨᠢ ᠠᠶᠤᠵᠤ ᠵᠣᠪᠠᠭᠠᠳ ᠬᠡᠯᠡᠬᠦ ᠦᠭᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠡᠨᠡ ᠥᠷᠭᠡᠨ ᠨᠤᠲᠤᠭ ᠤ᠋ᠨ ᠠᠯᠢ ᠬᠣᠩᠬᠣᠷ ᠲᠤ᠌ ᠪᠤᠶᠤ ᠮᠣᠳᠣᠨ ᠳ᠋ᠤ᠌ ᠬᠡᠴᠢᠨᠡᠨ ᠮᠠᠯ ᠳᠠᠷᠤᠵᠤ ᠨᠢᠭᠤᠭᠰᠠᠨ ᠢ᠋ ᠣᠯᠬᠤ ᠳ᠋ᠤ᠌ ᠪᠡᠷᠬᠡ᠃
ᠪᠡᠷᠬᠡᠰᠢᠶᠡᠯ ᠰᠠᠭᠠᠳ ᠶᠡᠬᠡ᠃ ᠭᠡᠪᠡᠴᠦ ᠲᠣᠭᠠᠯᠠᠬᠤ ᠬᠡᠷᠡᠭᠲᠡᠢ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠤᠷᠢᠳᠤ ᠭᠠᠷᠤᠭᠰᠠᠨ ᠡᠴᠡ ᠠᠬᠢᠭᠤᠯᠬᠤ ᠨᠢ ᠴᠢᠬᠤᠯᠠ᠃
ᠡᠷᠳᠡᠨᠢ ᠠᠯᠭᠤᠷ ᠪᠣᠰᠴᠤ ᠮᠣᠷᠳᠠᠭᠠᠳ ᠲᠠᠮᠢᠷ ᠢ᠋ ᠭᠠᠲᠤᠯᠪᠠ᠃ ᠬᠢᠷᠢ ᠵᠡᠷᠭᠡ ᠭᠦᠨ ᠪᠠᠢᠭᠰᠠᠨ ᠢ᠋ ᠴᠦ᠍ ᠪᠠᠷᠤᠭ ᠯᠠ ᠮᠡᠳᠡᠭᠰᠡᠨ ᠦᠭᠡᠢ ᠪᠥᠭᠡᠳ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠲᠠᠮᠢᠷ ᠤ᠋ᠨ ᠭᠣᠣᠯ ᠠᠷᠤ ᠳ᠋ᠤᠨᠢ ᠦᠯᠡᠳᠡᠭᠰᠡᠨ ᠪᠠᠢᠯᠠ᠃
ᠬᠤᠰᠢᠭᠤᠨ ᠳᠡᠭᠡᠷᠡ ᠢᠷᠡᠵᠦ ᠤᠳᠤᠷᠢᠳᠬᠤ ᠬᠥᠮᠦᠰ ᠲᠡᠢ ᠶᠠᠷᠢᠬᠤ ᠳ᠋ᠤ᠌ ᠬᠢᠭᠰᠡᠨ ᠲᠣᠭᠠ ᠪᠠᠨ ᠪᠤᠷᠤᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠬᠡᠨ ᠨᠢ ᠴᠦ᠍ ᠬᠡᠯᠡᠭᠰᠡᠨ ᠦᠭᠡᠢ᠃
ᠬᠤᠰᠢᠭᠤᠨ ᠤ᠋ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠭᠣᠨᠴᠣᠭ 《ᠣᠳᠣ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠳᠠᠷᠤᠭᠤᠯᠤᠯ ᠦᠭᠡᠢ ᠪᠡᠷ ᠲᠣᠭᠠᠯᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠨᠠ᠃ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠣᠯ ᠮᠠᠰᠢ ᠪᠠᠭᠠ ᠳᠠᠷᠤᠭᠰᠠᠨ ᠪᠠᠢᠬᠤ ᠳᠠ》 ᠭᠡᠵᠦ ᠬᠡᠯᠡᠪᠡ᠃
ᠪᠦᠬᠦ ᠠᠢᠯ ᠤ᠋ᠨ ᠮᠠᠯ ᠢ᠋ ᠭᠠᠭᠴᠠ ᠡᠳᠦᠷ ᠵᠡᠷᠭᠡ ᠲᠣᠭᠠᠯᠠᠪᠠᠯ ᠦᠯᠡᠮᠵᠢ ᠵᠥᠪ ᠲᠣᠭᠠ ᠭᠠᠷᠭᠠᠵᠤ ᠪᠣᠯᠬᠤ ᠰᠠᠨ᠃ ᠭᠡᠪᠡᠴᠦ ᠲᠡᠢᠮᠦ ᠬᠦᠴᠦ ᠪᠣᠯᠤᠮᠵᠢ ᠪᠠᠢᠬᠤ ᠦᠭᠡᠢ᠃
ᠡᠷᠳᠡᠨᠢ ᠰᠢᠭᠤᠳ ᠮᠠᠯ ᠲᠣᠭᠠᠯᠠᠯᠭᠠᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠢᠷᠡᠭᠰᠡᠨ ᠦ᠌ ᠪᠡᠨ ᠮᠠᠷᠭᠠᠰᠢ ᠡᠴᠡ ᠡᠬᠢᠯᠡᠨ ᠠᠢᠯ ᠬᠡᠰᠦᠵᠦ ᠠᠪᠠᠭᠠᠢ ᠬᠡᠦᠬᠡᠳ ᠲᠡᠢ ᠪᠠᠬᠠᠨ ᠶᠠᠷᠢᠵᠤ᠂ ᠪᠠᠰᠠ ᠵᠠᠮ ᠳ᠋ᠤ᠌ ᠲᠠᠭᠠᠷᠠᠯᠳᠤᠭᠰᠠᠨ ᠮᠠᠯ ᠤ᠋ᠨ ᠳᠣᠲᠣᠷᠠ ᠶᠠᠮᠠᠷ ᠨᠢᠭᠡᠨ ᠰᠣᠳᠣᠨ ᠲᠡᠮᠳᠡᠭᠲᠡᠢ ᠨᠢᠭᠡ ᠶ᠋ᠢ ᠨᠢ ᠳᠣᠲᠣᠷᠠ ᠪᠠᠨ ᠴᠡᠭᠡᠵᠢᠯᠡᠵᠦ ᠪᠠᠢᠯᠠ᠃ ᠪᠠᠰᠠ ᠬᠡᠳᠦ ᠬᠣᠨᠣᠭ ᠭᠣᠨᠴᠣᠭ ᠵᠡᠷᠭᠡ ᠬᠥᠮᠦᠰ ᠢ᠋ ᠢᠩᠭᠢᠵᠦ ᠠᠵᠢᠯᠯᠠᠭᠤᠯᠪᠠ᠃
ᠡᠢᠮᠦᠷᠬᠦᠦ ᠠᠵᠢᠯᠯᠠᠭᠰᠠᠨ ᠨᠢ ᠰᠠᠢᠨ᠂ ᠮᠠᠭᠤ ᠬᠣᠶᠠᠷ ᠲᠠᠯᠠ ᠲᠠᠢ ᠪᠠᠢᠯᠠ᠃ ᠰᠠᠢᠨ ᠲᠠᠯᠠ ᠭᠡᠪᠡᠯ ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠪᠡᠯᠡᠳᠬᠡᠵᠦ ᠠᠪᠤᠭᠰᠠᠨ ᠳ᠋ᠤ᠌ ᠪᠠᠢᠪᠠ᠃ ᠮᠠᠭᠤ ᠲᠠᠯᠠ ᠭᠡᠪᠡᠯ ᠲᠣᠭᠠᠯᠠᠯᠭᠠ ᠳᠠᠬᠢᠨ ᠶᠠᠪᠤᠬᠤ ᠶ᠋ᠢ ᠬᠥᠮᠦᠰ ᠮᠡᠳᠡᠭᠡᠳ ᠪᠠᠰᠠ ᠪᠡᠯᠡᠳᠬᠡᠪᠡ᠃
ᠡᠬᠢᠨ ᠦ᠌ ᠠᠢᠯ ᠢ᠋ ᠮᠠᠰᠢ ᠰᠠᠢᠨ ᠲᠣᠭᠠᠯᠠᠵᠤ᠂ ᠤᠷᠢᠳᠠᠬᠢ ᠲᠠᠢ ᠵᠥᠷᠢᠶᠡ ᠭᠠᠷᠪᠠᠯ ᠬᠦᠨᠳᠦ ᠲᠣᠷᠭᠠᠵᠤ ᠰᠢᠳᠬᠡᠪᠡᠯ ᠳᠠᠷᠠᠭᠠ ᠶ᠋ᠢᠨ ᠬᠢᠨᠢ ᠳᠠᠷᠤᠬᠤ ᠡᠴᠡ ᠠᠶᠤᠬᠤ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠯᠠ᠃
ᠮᠠᠯ ᠳᠠᠬᠢᠨ ᠲᠣᠭᠠᠯᠠᠬᠤ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠠᠢᠯ ᠤ᠋ᠳ ᠵᠢᠰᠦᠨ ᠪᠦᠷᠢ ᠶ᠋ᠢᠨ ᠪᠠᠰᠢᠷ ᠠᠷᠭᠠ ᠬᠡᠷᠡᠭᠯᠡᠵᠦ ᠡᠬᠢᠯᠡᠪᠡ᠃ ᠵᠠᠷᠢᠮ ᠨᠢ ᠲᠠᠰᠤᠯᠤᠨ ᠵᠡᠯᠢᠭᠦᠳ ᠭᠠᠵᠠᠷ ᠬᠥᠭᠡᠭᠡᠨᠡ᠃ ᠵᠠᠷᠢᠮ ᠨᠢ ᠤᠷᠢᠳᠤ ᠲᠣᠭᠠ ᠶᠠᠪᠤᠭᠳᠠᠵᠤ ᠥᠩᠭᠡᠷᠡᠭᠰᠡᠨ ᠰᠤᠮᠤᠳ ᠤ᠋ᠨ ᠨᠤᠲᠤᠭ ᠲᠤ᠌ ᠶᠠᠪᠤᠭᠤᠯᠤᠨᠠ᠃ ᠵᠠᠷᠢᠮ ᠨᠢ ᠡᠬᠡᠨᠡᠷ ᠲᠡᠢ ᠪᠡᠨ ᠬᠦᠷᠲᠡᠯᠡ ᠡᠷᠦᠬᠡ ᠳᠠᠩᠰᠠ ᠰᠠᠯᠭᠠᠨᠠ᠃ ᠯᠤᠢᠪᠠᠷᠳᠠᠬᠤ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠯᠡ ᠪᠣᠯ ᠮᠠᠯ ᠤ᠋ᠨ ᠥᠷᠢ ᠶ᠋ᠢ ᠥᠭᠬᠦ ᠳᠤᠷᠠᠲᠠᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠬᠠᠷᠢᠨ ᠠᠪᠤᠯᠭᠠ ᠶ᠋ᠢ ᠪᠣᠯ ᠶᠠᠭᠠᠷᠠᠬᠤ ᠦᠭᠡᠢ ᠪᠣᠯᠵᠠᠢ᠃
ᠢᠲᠡᠭᠡᠯᠲᠦ ᠶᠠᠭᠤᠨ ᠡᠴᠡ ᠬᠣᠴᠣᠷᠬᠤ ᠪᠢᠯᠡ᠃ ᠮᠠᠯ ᠳᠠᠷᠤᠵᠤ᠂ ᠠᠯᠪᠠᠨ ᠲᠠᠲᠠᠪᠤᠷᠢ ᠬᠥᠩᠭᠡᠷᠡᠭᠦᠯᠬᠦ ᠶᠠᠮᠠᠷ ᠠᠷᠭᠠ ᠪᠠᠢᠳᠠᠭ ᠪᠣᠯ ᠪᠦᠭᠦᠳᠡ ᠶ᠋ᠢ ᠬᠢᠵᠦ ᠠᠮᠵᠢᠪᠠ᠃ ᠬᠡᠰᠡᠭ ᠮᠠᠯ ᠢ᠋ ᠥᠭᠡᠷᠡ ᠰᠤᠮᠤ ᠶ᠋ᠢᠨ ᠨᠤᠲᠤᠭ ᠲᠤ᠌ ᠶᠠᠪᠤᠭᠤᠯᠪᠠ᠃ ᠬᠡᠰᠡᠭ ᠢ᠋ ᠵᠡᠯᠢᠭᠦᠳ ᠨᠤᠲᠤᠭ ᠲᠤ᠌ ᠭᠠᠷᠭᠠᠪᠠ᠃ ᠭᠠᠯᠰᠠᠩ ᠢ᠋ ᠡᠬᠡᠨᠡᠷ ᠲᠡᠢ ᠨᠢ ᠬᠠᠮᠲᠤ ᠲᠤᠰᠬᠠᠢ ᠡᠷᠦᠬᠡ ᠪᠣᠯᠭᠠᠵᠤ ᠨᠡᠷᠡ ᠳᠡᠭᠡᠷᠡ ᠨᠢ ᠬᠡᠰᠡᠭ ᠢ᠋ ᠲᠣᠭᠠᠯᠠᠭᠤᠯᠬᠤ ᠪᠣᠯᠪᠠ᠃ ᠡᠨᠡ ᠪᠦᠬᠦᠨ ᠢ᠋ ᠬᠢᠬᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠣᠢᠷᠠ ᠶ᠋ᠢᠨ ᠲᠤᠰᠠᠯᠠᠭᠴᠢ ᠨᠢ ᠰᠦᠷᠦᠩ ᠪᠠᠢᠭᠰᠠᠨ ᠪᠥᠭᠡᠳ 《ᠬᠦᠦ ᠮᠢᠨᠢ ᠬᠥᠮᠦᠨ ᠢ᠋ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ? ᠥᠨᠳᠥᠷ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠰᠣᠳᠣᠨ ᠮᠠᠯ ᠢ᠋ ᠳᠠᠷᠤᠵᠤ ᠪᠣᠯᠬᠤ ᠦᠭᠡᠢ᠃ ᠴᠠᠭᠠᠳᠤᠬᠢ ᠶ᠋ᠢᠨ ᠴᠢᠨᠢ ᠨᠢᠳᠦ ᠲᠤᠩ ᠭᠢᠷᠠᠬᠠᠢ ᠰᠢᠦ》 ᠭᠡᠵᠦ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠳᠡᠭ ᠪᠠᠢᠯᠠ᠃
ᠢᠩᠭᠢᠵᠦ ᠪᠡᠯᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠢᠲᠡᠭᠡᠯᠲᠦ ᠶ᠋ᠢᠨ ᠶᠡᠬᠡ ᠭᠡᠷ ᠦ᠋ᠨ ᠮᠠᠯ ᠬᠤᠰᠢᠭᠤᠨ ᠤ᠋ ᠲᠡᠷᠢᠭᠦᠨ ᠪᠠᠶᠠᠨ ᠤ᠋ ᠰᠦᠷᠦᠭ ᠪᠢᠰᠢ ᠳᠤᠮᠳᠠ ᠴᠢᠨᠡᠭᠡᠯᠢᠭ ᠠᠢᠯ ᠤ᠋ᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠪᠡ᠃
ᠡᠷᠳᠡᠨᠢ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠠᠭᠠ ᠭᠣᠨᠴᠣᠭ᠂ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠬᠣᠶᠠᠷ ᠬᠥᠮᠦᠨ ᠦ᠌ ᠬᠠᠮᠲᠤ ᠴᠣᠭᠴᠢᠨ ᠵᠢᠰᠠ ᠶ᠋ᠢᠨ ᠮᠠᠯ ᠢ᠋ ᠲᠣᠭᠠᠯᠠᠵᠤ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠪᠤᠷᠭᠠᠨ ᠡᠪᠡᠷ ᠲᠡᠢ ᠬᠦᠷᠡᠩ ᠬᠠᠢᠨᠤᠭ᠂ ᠳᠠᠯᠢᠤ ᠡᠪᠡᠷ ᠲᠦ᠍ ᠬᠠᠷᠠ ᠲᠠᠷᠯᠠᠨ ᠬᠠᠢᠨᠤᠭ ᠳᠦᠷᠦᠭᠦᠳᠡᠢ ᠬᠡᠰᠡᠭ ᠮᠠᠯ ᠢ᠋ᠶ᠋ᠠᠨ ᠲᠠ ᠨᠠᠷ ᠮᠠᠷᠲᠠᠵᠤ ᠣᠷᠬᠢᠬᠤ ᠰᠢᠭ᠋ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠪᠡ᠃
ᠴᠣᠭᠴᠢᠨ ᠵᠢᠰᠠ ᠶ᠋ᠢᠨ ᠨᠢᠷᠪᠠ ᠲᠣᠮᠣ ᠲᠠᠷᠭᠤᠨ ᠰᠢᠷᠠ ᠯᠠᠮᠠ ᠭᠠᠢᠬᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠰᠦᠨᠡᠰᠦ ᠦᠭᠡᠢ ᠠᠵᠢᠯ ᠬᠠᠮᠢᠭᠠ ᠡᠴᠡ ᠬᠢᠬᠦ ᠪᠣᠢ᠃ ᠳᠠᠷᠤᠭᠠ ᠲᠠ ᠯᠠᠪ ᠲᠠᠰᠢᠭᠤ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠠᠢᠬᠤ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠢᠷᠬᠠᠨ ᠤ᠋ ᠠᠷᠤ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠥᠨᠥ ᠥᠷᠯᠥᠭᠡ ᠦᠷ ᠢ᠋ᠶ᠋ᠡᠷ ᠣᠷᠣᠭᠤᠯᠤᠭᠰᠠᠨ ᠬᠡᠰᠡᠭ ᠠᠳᠤᠭᠤ ᠬᠡᠴᠢᠨᠡᠨ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠣᠯ ᠭᠡᠵᠦ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠭᠣᠨᠴᠣᠭ ᠰᠢᠭᠤᠳ ᠠᠰᠠᠭᠤᠪᠠ᠃
ᠬᠡᠷᠡᠭ ᠪᠤᠷᠤᠭᠤ ᠲᠠᠰᠢ ᠪᠠᠨ ᠡᠷᠭᠢᠭᠰᠡᠨ ᠢ᠋ ᠣᠢᠯᠠᠭᠠᠭᠰᠠᠨ ᠵᠢᠰᠠ ᠨᠢᠷᠪᠠ ᠰᠦᠷᠦᠭᠴᠢᠨ ᠨᠠᠷ ᠲᠠᠭᠠᠨ ᠬᠠᠨᠳᠤᠵᠤ 《ᠪᠢ ᠲᠠ ᠨᠠᠷ ᠲᠤ᠌ ᠨᠢᠭᠡ ᠴᠦ᠍ ᠮᠠᠯ ᠳᠤᠲᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠲᠣᠭᠠᠯᠠᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠪᠢᠰᠢ ᠪᠢᠯᠡ ᠤᠤ᠃ ᠡᠨᠡ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠨᠠ》 ᠭᠡᠵᠦ ᠦᠯᠡᠮᠵᠢ ᠰᠦᠷᠵᠢᠨ ᠪᠠᠭᠤᠵᠤ ᠭᠠᠷᠪᠠ᠃
ᠰᠦᠷᠦᠭᠴᠢᠳ ᠨᠢ ᠪᠠᠷᠤᠭ ᠨᠢᠭᠡᠨ ᠵᠡᠷᠭᠡ 《ᠪᠢ ᠯᠡ ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠡᠨᠡ ᠬᠠᠷᠢᠭᠤᠯᠲᠠ ᠶ᠋ᠢ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠪᠡᠯᠡᠳᠬᠡᠵᠦ ᠪᠢᠯᠡ᠃ ᠢᠩᠭᠢᠵᠦ ᠬᠠᠷᠢᠭᠤᠯᠤᠭᠠ ᠦᠭᠡᠢ ᠬᠥᠮᠦᠨ ᠮᠠᠷᠭᠠᠰᠢ ᠡᠴᠡ ᠨᠢ ᠡᠬᠢᠯᠡᠨ ᠵᠢᠰᠠ ᠶ᠋ᠢᠨ ᠮᠠᠯ ᠬᠠᠷᠢᠭᠤᠯᠵᠤ ᠭᠡᠷ ᠪᠦᠯᠢ ᠪᠡᠨ ᠲᠡᠭᠦᠨ ᠦ᠌ ᠰᠦ ᠪᠡᠷ ᠲᠡᠵᠢᠭᠡᠬᠦ ᠡᠷᠬᠡ ᠦᠭᠡᠢ ᠪᠣᠯᠬᠤ ᠪᠠᠢᠵᠠᠢ᠃
ᠭᠡᠪᠡᠴᠦ ᠪᠠᠷᠢᠮᠲᠠ ᠭᠡᠳᠡᠭ ᠬᠡᠴᠡᠭᠦᠦ᠃ ᠨᠢᠷᠪᠠ ᠶ᠋ᠢᠨ ᠮᠠᠩᠨᠠᠢ ᠳ᠋ᠤ᠌ ᠬᠦᠢᠲᠡᠨ ᠬᠠᠷᠠ ᠬᠥᠯᠥᠰᠥ ᠪᠣᠷᠵᠠᠢ᠌ᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠠ ᠬᠥᠮᠦᠨ ᠶᠠᠪᠤᠭᠤᠯᠤᠭᠠᠳ ᠬᠠᠢᠷᠬᠠᠨ ᠤ᠋ ᠠᠷᠤ ᠳ᠋ᠤ᠌ ᠨᠢᠭᠤᠭᠰᠠᠨ ᠠᠳᠤᠭᠤ ᠪᠠᠨ ᠠᠪᠴᠢᠷᠠᠭᠤᠯ ᠭᠡᠵᠦ ᠡᠷᠳᠡᠨᠢ ᠲᠤᠯᠭᠠᠪᠠ᠃
ᠪᠦᠲᠦᠨ ᠬᠣᠶᠠᠷ ᠡᠳᠦᠷ ᠡᠷᠳᠡᠨᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠢᠩᠭᠢᠵᠦ ᠨᠢᠷᠪᠠ ᠲᠠᠢ ᠪᠠᠢᠯᠳᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠮᠠᠯ ᠳᠠᠷᠤᠭᠰᠠᠨ ᠴᠣᠭᠴᠢᠨ ᠵᠢᠰᠠ ᠶ᠋ᠢ ᠬᠣᠷᠢᠨ ᠲᠠᠪᠤᠨ ᠪᠤᠲᠠ ᠪᠠᠷ ᠲᠣᠷᠭᠠᠪᠠ᠃ ᠡᠷᠳᠡᠨᠢ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠮᠣᠷᠳᠠᠭᠠᠳ ᠶᠠᠪᠤᠬᠤ ᠳ᠋ᠤ᠌ 《ᠬᠡᠴᠡᠭᠦᠦ ᠴᠢᠨᠣᠠ ᠠ᠋᠃ ᠣᠷᠬᠣᠨ ᠤᠷᠤᠭᠤ ᠶᠠᠪᠤᠭᠤᠯᠤᠭᠰᠠᠨ ᠮᠠᠯ ᠢ᠋ ᠮᠠᠨᠢ ᠮᠡᠳᠡᠭᠡ ᠦᠭᠡᠢ ᠨᠢ ᠯᠡ ᠶᠠᠭᠠᠮᠠᠢ᠃ ᠮᠡᠳᠡᠭᠰᠡᠨ ᠪᠣᠯ ᠳᠠᠬᠢᠭᠠᠳ ᠬᠡᠳᠦᠨ ᠪᠤᠲᠠ ᠪᠠᠷ ᠲᠣᠷᠭᠠᠬᠤ ᠪᠠᠢᠭᠰᠠᠨ ᠰᠢᠦ》 ᠭᠡᠵᠦ ᠨᠢᠷᠪᠠ ᠪᠣᠳᠣᠭᠠᠳ ᠡᠪᠦᠷ ᠡᠴᠡ ᠲᠣᠮᠣ ᠬᠥᠬᠡ ᠬᠠᠳᠠᠭ ᠭᠠᠷᠭᠠᠵᠤ ᠬᠥᠯᠥᠰᠥ ᠪᠡᠨ ᠠᠷᠴᠢᠪᠠ᠃
《ᠮᠠᠯ ᠲᠣᠭᠠᠯᠠᠯᠭᠠ ᠶ᠋ᠢᠨ ᠲᠦᠰᠢᠮᠡᠯ ᠴᠣᠭᠴᠢᠨ ᠵᠢᠰᠠ ᠶ᠋ᠢ ᠬᠣᠷᠢᠨ ᠲᠠᠪᠤᠨ ᠪᠤᠲᠠ ᠪᠠᠷ ᠲᠣᠷᠭᠠᠵᠠᠢ᠃ ᠳᠠᠷᠤᠭᠰᠠᠨ ᠮᠠᠯ ᠢ᠋ ᠵᠢᠰᠦ ᠪᠡᠷ ᠨᠡᠬᠡᠵᠦ ᠪᠠᠢᠨᠠ ᠭᠡᠨᠡ》 ᠭᠡᠰᠡᠨ ᠶᠠᠷᠢᠶᠠ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠰᠠᠯᠬᠢ ᠰᠢᠭ᠋ ᠳᠠᠷᠬᠠᠵᠤ᠂ ᠮᠠᠯ ᠢ᠋ᠶ᠋ᠠᠨ ᠳᠠᠷᠤᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠦ᠋ᠨ ᠮᠥᠰᠥ ᠶ᠋ᠢ ᠬᠠᠢᠯᠤᠭᠤᠯᠤᠨ᠂ ᠰᠥᠩ ᠣᠷᠤᠰᠬᠠᠪᠠ᠃
ᠵᠠᠷᠢᠮ ᠲᠠᠢ ᠨᠢ ᠬᠡᠷᠡᠯᠳᠦᠵᠦ᠂ ᠵᠠᠷᠢᠮ ᠲᠠᠢ ᠨᠢ ᠢᠨᠢᠶᠡᠯᠳᠦᠵᠦ᠂ ᠵᠠᠷᠢᠮ ᠢ᠋ ᠨᠢ ᠲᠣᠷᠭᠠᠵᠤ᠂ ᠵᠠᠷᠢᠮ ᠢ᠋ ᠨᠢ ᠰᠠᠢᠰᠢᠶᠠᠵᠤ ᠶᠠᠪᠤᠭᠰᠠᠭᠠᠷ ᠮᠠᠯ ᠲᠣᠭᠠᠯᠠᠯᠭᠠ ᠶ᠋ᠢᠨ ᠬᠢᠨ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠣᠴᠢᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠪᠠᠲᠤ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠪᠠᠭᠰᠢ ᠨᠠᠷ ᠤ᠋ᠨ ᠠᠭᠤᠯᠵᠠᠯᠲᠠ ᠳ᠋ᠤ᠌ ᠶᠠᠪᠤᠭᠰᠠᠨ ᠤᠴᠢᠷ ᠡᠴᠡ ᠦᠭᠡᠢ ᠪᠠᠢᠯᠠ᠃ ᠮᠠᠯ ᠲᠣᠭᠠᠯᠠᠯᠭᠠ ᠶ᠋ᠢᠨ ᠭᠡᠢᠴᠢᠳ ᠢᠷᠡᠭᠰᠡᠨ ᠭᠡᠵᠦ ᠢᠲᠡᠭᠡᠯᠲᠦ ᠬᠣᠨᠢ ᠭᠠᠷᠭᠠᠨ ᠠᠢᠷᠠᠭ᠂ ᠠᠷᠢᠬᠢ ᠰᠥᠩᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠷᠢᠮ ᠠᠢᠯ ᠮᠠᠯ ᠢ᠋ᠶ᠋ᠠᠨ ᠪᠣᠳᠣᠯ ᠦᠭᠡᠢ ᠳᠠᠷᠤᠬᠤ ᠶᠤᠮ᠃ ᠶᠠᠭᠤᠨ ᠲᠡᠭᠡᠵᠦ ᠵᠠᠰᠠᠭ ᠤ᠋ᠨ ᠪᠣᠳᠣᠯᠭᠠ ᠲᠠᠢ ᠬᠠᠷᠭᠤᠯᠳᠤᠵᠤ ᠪᠠᠢᠳᠠᠭ ᠶᠤᠮ ᠪᠣᠯ ᠳᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠶᠡᠬᠡ ᠯᠡ ᠭᠠᠢᠬᠠᠭᠰᠠᠨ ᠳᠦᠷᠰᠦ ᠦᠵᠡᠭᠦᠯᠦᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠣᠭᠣᠯᠠᠢ ᠳ᠋ᠠᠭᠠᠨ ᠢᠨᠴᠠᠭᠯᠠᠨ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠬᠠᠭᠠᠨ ᠳ᠋ᠤᠨᠢ ᠤᠬᠤᠨᠠ ᠦᠬᠦᠭᠰᠡᠨ ᠳᠠᠮᠰᠢᠭ ᠤ᠋ᠳ᠃ ᠶᠠᠭᠤᠨ ᠳ᠋ᠤ᠌ ᠲᠡᠢᠮᠦ ᠲᠡᠨᠡᠭ ᠶᠠᠭᠤᠮᠠ ᠬᠢᠵᠦ ᠪᠠᠢᠨᠠ ᠪᠣᠢ ᠳᠠ᠃ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠭᠡᠵᠦ ᠨᠢᠭᠡ ᠶᠠᠭᠤᠮᠠ ᠪᠠᠢᠳᠠᠭ ᠶᠤᠮ ᠰᠢᠦ᠃ ᠮᠢᠨᠦ ᠬᠡᠳᠦ ᠶ᠋ᠢ ᠴᠦ᠍ ᠴᠢ ᠲᠠᠪᠤᠨ ᠬᠤᠷᠤᠭᠤ ᠰᠢᠭ᠋ ᠢ᠋ᠶ᠋ᠡᠨ ᠮᠡᠳᠡᠬᠦ ᠪᠣᠯᠬᠣᠷ ᠪᠢ ᠶᠠᠭᠤ ᠭᠡᠬᠦ ᠪᠣᠢ᠃ ᠰᠠᠯᠭᠠᠵᠤ ᠲᠠᠰᠤᠯᠵᠤ ᠥᠭᠭᠦᠭᠰᠡᠭᠡᠷ ᠪᠠᠢᠲᠠᠯᠠ ᠪᠠᠷᠤᠭ ᠶᠠᠭᠤᠮᠠ ᠦᠯᠡᠳᠡᠭᠡ ᠦᠭᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠴᠢᠮᠠᠶ᠋ᠢ ᠢᠷᠡᠭᠰᠡᠨ ᠪᠣᠯᠬᠣᠷ ᠨᠠᠳᠠᠳᠤ ᠪᠦᠷ ᠬᠡᠴᠡᠭᠦᠦ ᠪᠠᠢᠨᠠ᠃ ᠬᠦᠦ ᠬᠡᠦᠬᠡᠨ ᠨᠢ ᠰᠠᠭᠤᠭᠰᠠᠨ ᠬᠠᠳᠠᠮ ᠤ᠋ᠨ ᠰᠦᠯᠪᠡᠭᠡ ᠲᠡᠢ ᠪᠣᠯᠬᠣᠷ ᠢᠲᠡᠭᠡᠯᠲᠦ ᠶ᠋ᠢᠨ ᠮᠠᠯ ᠢ᠋ ᠬᠥᠩᠭᠡᠨ ᠲᠣᠭᠠᠯᠠᠪᠠ ᠭᠡᠵᠦ ᠠᠮᠢᠲᠠᠨ ᠶᠠᠷᠢᠨᠠ ᠰᠢᠦ ᠳᠡ᠃ ᠡᠷᠳᠡᠨᠢ ᠠ᠋ ᠡᠨᠡ ᠵᠢᠯ ᠢᠳᠡᠵᠦ ᠣᠷᠬᠢᠬᠤ ᠬᠡᠳᠦᠨ ᠮᠠᠯ ᠪᠠᠢᠬᠤ ᠶᠤᠮ᠃ ᠲᠡᠭᠦᠨ ᠢ᠋ ᠵᠠᠪᠠᠯ ᠲᠣᠭᠠᠯᠠᠭᠤᠯᠬᠤ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢᠳᠤ ᠯᠠ ᠪᠠᠢᠭᠠ ᠪᠣᠯ ᠲᠣᠭᠠᠯᠠᠬᠤ ᠯᠠ ᠪᠣᠯᠤᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠪᠠᠰᠠ ᠲᠡᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ ᠠ᠋᠃
ᠢᠲᠡᠭᠡᠯᠲᠦ ᠶ᠋ᠢᠨ ᠮᠠᠯ ᠢ᠋ ᠪᠦᠲᠦᠨ ᠬᠠᠭᠠᠰ ᠡᠳᠦᠷ ᠲᠣᠭᠠᠯᠠᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠶᠠᠮᠠᠷ ᠴᠤ᠌ ᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠨᠢᠭᠡ ᠬᠡᠰᠡᠭ ᠮᠠᠯ ᠪᠠᠢᠬᠤ ᠦᠭᠡᠢ ᠶ᠋ᠢ ᠡᠷᠳᠡᠨᠢ ᠶ᠋ᠢᠨ ᠬᠠᠮᠲᠤ ᠶᠠᠪᠤᠭᠰᠠᠨ ᠨᠢᠭᠡ ᠬᠥᠮᠦᠨ ᠦᠭᠡᠢᠯᠡᠪᠡ᠃ ᠭᠡᠲᠡᠯᠡ ᠲᠡᠷᠡ ᠮᠠᠯ ᠢ᠋ ᠭᠠᠯᠰᠠᠩ ᠮᠠᠷᠲᠠᠭᠰᠠᠨ ᠪᠣᠯᠵᠤ᠂ ᠲᠡᠭᠦᠨ ᠢ᠋ ᠢᠲᠡᠭᠡᠯᠲᠦ ᠵᠣᠯ ᠲᠠᠢ ᠯᠠ ᠪᠠᠷᠢᠵᠤ ᠵᠣᠳᠣᠭᠰᠠᠨ ᠦᠭᠡᠢ᠃ ᠪᠠᠰᠠ ᠨᠢᠭᠡ ᠬᠡᠳᠦᠨ ᠦᠬᠡᠷ ᠦ᠋ᠨ ᠲᠤᠬᠠᠢ ᠶᠠᠷᠢᠶᠠ ᠭᠠᠷᠤᠭᠰᠠᠨ ᠳ᠋ᠤ᠌ 《ᠲᠠ ᠠᠪᠤ ᠳ᠋ᠤ᠌ ᠬᠤᠪᠢ ᠪᠣᠯᠭᠠᠭᠠᠳ ᠥᠭᠴᠢᠬᠡᠭᠰᠡᠨ ᠰᠢᠦ ᠳᠡ᠃ ᠠᠪᠤ ᠬᠥᠭᠰᠢᠷᠡᠭᠡᠳ ᠬᠡᠨ ᠳ᠋ᠦ᠍ ᠶᠠᠭᠤ ᠥᠭᠭᠦᠭᠰᠡᠨ ᠴᠦ᠍ ᠮᠡᠳᠡᠬᠦ ᠪᠡᠨ ᠪᠣᠯᠢᠵᠠᠢ》 ᠭᠡᠵᠦ ᠰᠦᠷᠦᠩ ᠬᠡᠯᠡᠭᠡᠳ ᠠᠪᠤᠷᠠᠪᠠ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠰᠦᠷᠦᠩ ᠭᠠᠷᠴᠤ ᠨᠢᠮᠠ ᠶ᠋ᠢᠨ ᠤᠷᠤᠭᠤ ᠭᠠᠯᠰᠠᠩ ᠢ᠋ ᠶᠠᠪᠤᠭᠤᠯᠤᠨ ᠬᠡᠯᠡ ᠬᠦᠷᠭᠡᠵᠦ ᠪᠢᠯᠡ᠃ 《ᠢᠲᠡᠭᠡᠯᠲᠦ ᠴᠢ ᠯᠡ ᠮᠠᠯ ᠳᠠᠷᠤᠭᠠ ᠦᠭᠡᠢ ᠪᠠᠢᠬᠤ ᠳᠠ᠃ ᠨᠠᠷᠠ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠨᠠᠪᠲᠠᠰᠤ ᠨᠥᠮᠥᠷᠦᠭᠡᠳ ᠭᠠᠷᠤᠭᠰᠠᠨ ᠴᠠᠭ ᠲᠤ᠌ ᠴᠢ ᠲᠣᠭᠠ ᠡᠴᠡ ᠮᠠᠯ ᠳᠠᠷᠤᠬᠤ ᠦᠭᠡᠢ ᠪᠣᠯᠬᠤ ᠪᠠᠢᠬᠤ᠃ ᠰᠦᠷᠦᠩ ᠬᠡᠴᠡᠭᠦᠦ ᠭᠡᠵᠦ ᠪᠠᠲᠤ ᠶ᠋ᠢᠨ ᠶᠠᠷᠢᠳᠠᠭ ᠣᠷᠣ ᠲᠠᠢ ᠯᠠ ᠶᠠᠭᠤᠮᠠ ᠪᠠᠢᠨᠠ》 ᠭᠡᠵᠦ ᠡᠷᠳᠡᠨᠢ ᠳᠣᠲᠣᠷᠠ ᠪᠠᠨ ᠪᠤᠬᠢᠨᠢᠳᠤᠪᠠᠴᠤ ᠲᠤᠯᠭᠠᠬᠤ ᠪᠠᠷᠢᠮᠲᠠ ᠪᠠᠢᠭᠰᠠᠨ ᠦᠭᠡᠢ᠃
ᠢᠩᠭᠢᠵᠦ ᠪᠠᠢᠲᠠᠯᠠ ᠡᠷᠳᠡᠨᠢ ᠲᠡᠢ ᠢᠷᠡᠭᠰᠡᠨ ᠨᠢᠭᠡ ᠬᠥᠮᠦᠨ ᠢᠲᠡᠭᠡᠯᠲᠦ ᠶ᠋ᠢᠨ ᠵᠡᠷᠭᠡᠯᠡᠳᠡᠭᠡ ᠬᠤᠰᠢᠭᠤᠨ ᠤ᠋ ᠠᠢᠯ ᠳ᠋ᠤ᠌ ᠥᠭᠴᠦ ᠮᠠᠯᠯᠠᠭᠤᠯᠤᠭᠰᠠᠨ ᠪᠥᠭᠡᠳ ᠡᠨᠡ ᠲᠣᠭᠠᠨ ᠳ᠋ᠠᠭᠠᠨ ᠣᠷᠣᠭᠤᠯᠤᠭᠠ ᠦᠭᠡᠢ ᠵᠠᠭᠤᠭᠠᠳ ᠬᠣᠨᠢᠨ ᠤ᠋ ᠲᠤᠬᠠᠢ ᠭᠡᠨᠡᠳᠲᠡ ᠰᠠᠨᠠᠵᠤ ᠶᠠᠷᠢᠶᠠ ᠭᠠᠷᠭᠠᠬᠤ ᠳ᠋ᠤ᠌ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠢᠲᠡᠭᠡᠯᠲᠦ 《ᠶᠠᠭᠤ ᠪᠠᠢᠳᠠᠭ ᠪᠢᠯᠡ᠃ ᠪᠢ ᠯᠡ ᠣᠭᠲᠣ ᠮᠡᠳᠡᠬᠦ ᠦᠭᠡᠢ ᠶᠠᠭᠤᠮᠠ ᠭᠠᠷᠭᠠᠭᠠᠳ ᠢᠷᠡᠯᠡ》 ᠭᠡᠳ ᠰᠦᠷᠦᠩ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠲᠠ ᠮᠡᠳᠡᠬᠦ ᠦᠭᠡᠢ᠃ ᠪᠢ ᠥᠭᠭᠦᠭᠰᠡᠨ ᠶᠤᠮ᠃ ᠲᠡᠭᠡᠭᠡᠳ ᠥᠭᠡᠷᠡ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠢᠭᠠ ᠶᠤᠮ ᠪᠣᠯᠬᠣᠷ ᠲᠡᠨᠳᠡ ᠪᠡᠨ ᠲᠣᠭᠠᠯᠠᠭᠤᠯᠳᠠᠭ ᠶᠤᠮ ᠪᠠᠢᠬᠤ ᠭᠡᠵᠦ ᠪᠣᠳᠣᠭᠠᠳ ᠬᠡᠯᠡᠭᠡ ᠦᠭᠡᠢ ᠶᠤᠮ ᠭᠡᠵᠦ ᠰᠦᠷᠦᠩ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠢᠲᠡᠭᠡᠯᠲᠦ ᠮᠢᠨᠢ᠂ ᠰᠠᠶᠢ ᠶ᠋ᠢᠨ ᠲᠣᠭᠠ ᠤᠷᠢᠳᠤᠬᠢ ᠲᠣᠭᠠᠨ ᠡᠴᠡ ᠣᠯᠠᠨ ᠮᠠᠯ ᠢ᠋ᠶ᠋ᠠᠷ ᠵᠥᠷᠢᠵᠦ ᠪᠠᠢᠨᠠ᠃ ᠲᠡᠷᠡ ᠬᠦ ᠮᠠᠯ ᠢ᠋ᠶ᠋ᠠᠨ ᠳᠤᠲᠠᠭᠤ ᠲᠣᠭᠠᠯᠠᠭᠤᠯᠤᠭᠰᠠᠨ ᠤᠴᠢᠷ ᠲᠠᠪᠤᠨ ᠪᠤᠲᠠ ᠪᠠᠷ ᠲᠣᠷᠭᠠᠨᠠ ᠳᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠵᠦ ᠪᠢᠯᠡ᠃
ᠢᠩᠭᠢᠭᠡᠳ ᠲᠣᠭᠠᠴᠢᠳ ᠶᠠᠪᠤᠵᠠᠢ᠃ 《ᠪᠢ ᠮᠥᠷᠥᠢ ᠲᠡᠢ ᠰᠢᠳᠡᠷᠡ ᠲᠣᠭᠯᠠᠳᠠᠭ ᠪᠠᠢᠭᠰᠠᠨ ᠪᠣᠯ ᠮᠠᠨ ᠤ᠋ ᠰᠦᠷᠦᠩ ᠡᠴᠡ ᠤᠷᠠᠨ ᠪᠡᠷᠢ ᠶ᠋ᠢᠨ ᠬᠣᠵᠢᠯ ᠭᠠᠷᠬᠤ ᠪᠠᠢᠭᠰᠠᠨ ᠳᠠ》 ᠭᠡᠵᠦ ᠢᠲᠡᠭᠡᠯᠲᠦ ᠪᠡᠷᠢ ᠪᠡᠨ ᠮᠠᠭᠲᠠᠭᠰᠠᠨ ᠪᠠ ᠬᠠᠷᠢᠨ ᠬᠣᠨᠢ ᠰᠠᠭᠠᠵᠤ ᠪᠠᠢᠭᠰᠠᠨ ᠰᠣᠯᠣᠩᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ 《ᠬᠠᠳᠠᠮ ᠡᠴᠢᠭᠡ ᠴᠢᠨᠢ᠂ ᠮᠠᠨ ᠤ᠋ ᠬᠢ ᠶ᠋ᠢ ᠲᠠᠪᠤᠨ ᠪᠤᠲᠠ ᠪᠠᠷ ᠲᠣᠷᠭᠠᠵᠤ ᠰᠡᠳᠬᠢᠯ ᠨᠢ ᠬᠠᠨᠤᠭᠠᠳ ᠶᠠᠪᠤᠯᠠ᠃ ᠢᠲᠡᠭᠡᠯᠲᠦ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠳᠡ》 ᠭᠡᠵᠦ ᠰᠢᠲᠦ ᠵᠠᠭᠤᠨ᠂ ᠵᠢᠪᠡᠭᠦᠨ ᠬᠡᠯᠡᠪᠡ᠃
ᠰᠣᠯᠣᠩᠭᠠ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠨᠢᠯᠪᠤᠰᠤ ᠪᠦᠷᠬᠦᠭᠰᠡᠨ ᠲᠡᠭᠦᠨ ᠦ᠌ ᠨᠢᠳᠦ 《ᠬᠠᠳᠠᠨ ᠤ᠋ ᠵᠠᠪᠰᠠᠷ ᠬᠠᠪᠴᠢᠭᠤᠯᠤᠭᠰᠠᠨ ᠬᠠᠯᠢᠭᠤᠨ ᠤ᠋ ᠵᠤᠯᠵᠠᠭᠠ ᠬᠥᠭᠡᠷᠦᠬᠦᠢ》 ᠭᠡᠵᠦ ᠳᠠᠭᠤᠯᠠᠵᠤ ᠪᠠᠢᠯᠠ᠃
ᠡᠷᠳᠡᠨᠢ ᠮᠠᠯ ᠲᠣᠭᠠᠯᠠᠯᠭᠠ ᠳᠠᠭᠤᠰᠴᠤ ᠳ᠋ᠦᠩ ᠢ᠋ᠶ᠋ᠡᠨ ᠭᠠᠷᠭᠠᠪᠠᠯ ᠴᠡᠩᠭᠡᠯ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠤᠷᠢᠳᠤᠬᠢ ᠲᠣᠭᠠᠯᠠᠯᠭᠠ ᠡᠴᠡ ᠠᠷᠪᠠ ᠭᠠᠷᠤᠢ ᠬᠣᠷᠢ ᠰᠢᠬᠠᠮ ᠮᠢᠩᠭᠠᠨ ᠮᠠᠯ ᠢᠯᠡᠭᠦᠦ ᠭᠠᠷᠤᠭᠰᠠᠨ ᠪᠠᠢᠯᠠ᠃ ᠡᠨᠡ ᠪᠣᠯ ᠪᠠᠭᠠ ᠬᠡᠷᠡᠭ ᠪᠢᠰᠢ ᠠ᠋᠃