ᠲᠡᠮᠦᠵᠢᠨ02-ᠲᠡᠮᠦᠵᠢᠨ ᠢᠳᠡᠷ ᠨᠠᠰᠤТэмүүжин идэр нас 2- дугаар анги
782ᠲᠡᠮᠦᠵᠢᠨ ᠢᠳᠡᠷ ᠨᠠᠰᠤ
(ᠬᠣᠶᠠᠳᠤᠭᠠᠷ ᠪᠦᠯᠦᠭ)
ᠲᠡᠮᠦᠵᠢᠨ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠪᠠᠳᠠᠷ ᠬᠤᠰᠢᠭᠤᠨ ᠤ᠋ ᠬᠣᠷᠴᠤᠬᠤᠢ ᠪᠣᠯᠳᠣᠭ ᠭᠡᠳᠡᠭ ᠭᠠᠵᠠᠷ ᠲᠤ᠌ ᠬᠦᠷᠴᠦ ᠪᠡᠯᠪᠡᠰᠦᠨ ᠡᠬᠡ ᠥᠨᠥᠴᠢᠨ ᠳᠡᠭᠦᠦ ᠨᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠪᠠ᠃ ᠲᠡᠳᠡ ᠲᠡᠨᠳᠡ ᠡᠴᠡ ᠰᠡᠩᠭᠦᠷ ᠭᠣᠷᠣᠬᠠᠨ ᠤ᠋ ᠬᠠᠷᠠ ᠵᠢᠷᠦᠬᠡᠨ ᠦ᠌ ᠬᠥᠬᠡ ᠨᠠᠭᠤᠷ ᠭᠡᠳᠡᠭ ᠭᠠᠵᠠᠷ ᠣᠴᠢᠵᠤ ᠨᠤᠲᠤᠭᠯᠠᠭᠠᠳ ᠲᠠᠷᠪᠠᠭᠠ ᠵᠤᠷᠠᠮᠠ ᠠᠯᠠᠵᠤ ᠢᠳᠡᠨ ᠠᠵᠠ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠨ ᠰᠠᠭᠤᠵᠤ ᠪᠠᠢᠪᠠ᠃
ᠨᠢᠭᠡᠨ ᠡᠳᠦᠷ ᠭᠡᠷ ᠦ᠋ᠨ ᠬᠠᠵᠠᠭᠤ ᠳ᠋ᠤ᠌ ᠡᠷᠬᠡᠯᠡᠨ ᠲᠣᠭᠯᠠᠩᠬᠠᠨ ᠨᠡᠷᠡᠯᠡᠵᠦ ᠪᠣᠢ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠬᠦᠯᠦᠭ ᠢ᠋ ᠨᠢ ᠳᠡᠭᠡᠷᠡᠮᠴᠢᠳ ᠢᠷᠡᠵᠦ ᠨᠢᠳᠦᠨ ᠦ᠌ ᠬᠢᠨᠢ ᠡᠮᠦᠨᠡ ᠳᠡᠭᠡᠷᠡᠮᠳᠡᠵᠦ ᠣᠷᠬᠢᠪᠠ᠃ ᠲᠡᠮᠦᠵᠢᠨ ᠦ᠌ ᠭᠡᠷ ᠪᠦᠯᠢ ᠳ᠋ᠦ᠍ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠᠨ ᠠ᠋ᠴᠠ ᠭᠠᠳᠠᠨᠠ ᠣᠨᠣᠯᠭᠠ ᠶ᠋ᠢᠨ ᠭᠠᠭᠴᠠ ᠮᠣᠷᠢ ᠲᠠᠢ ᠪᠥᠭᠡᠳ ᠲᠡᠭᠦᠨ ᠢ᠋ ᠨᠢ ᠪᠡᠯᠭᠦᠳᠡᠢ ᠤᠨᠤᠭᠠᠳ ᠲᠠᠷᠪᠠᠭᠠ ᠠᠩᠨᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠪᠠᠢᠪᠠ᠃ ᠲᠡᠮᠦᠵᠢᠨ ᠳᠡᠭᠡᠷᠡᠮᠴᠢᠳ ᠦ᠋ᠨ ᠵᠦᠭ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠴᠣᠭᠣ ᠰᠢᠷᠲᠡᠭᠡᠳ ᠠᠭᠲᠠ ᠠᠷᠠᠭᠠ ᠪᠠᠨ ᠪᠤᠲᠠᠷᠠᠵᠤ ᠤᠨᠠᠲᠠᠯᠠ ᠰᠢᠲᠦ ᠵᠠᠭᠤᠨ《ᠪᠢ ᠲᠠ ᠨᠠᠷ ᠢ᠋ ᠵᠠᠪᠠᠯ ᠪᠠᠷᠢᠵᠤ ᠠᠪᠤᠨᠠ》ᠭᠡᠵᠦ ᠥᠪᠡᠷᠲᠡᠭᠡᠨ ᠠᠮᠠᠯᠠᠪᠠ᠃ ᠣᠷᠣᠢ ᠨᠠᠷᠠ ᠵᠢᠷᠭᠠᠬᠤ ᠦᠶᠡ ᠳ᠋ᠦ᠍ ᠪᠡᠯᠭᠦᠳᠡᠢ ᠮᠣᠷᠢᠨ ᠳ᠋ᠤ᠌ ᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠲᠠᠷᠪᠠᠭᠠ ᠨᠤᠭᠤᠳ ᠢ᠋ ᠠᠴᠢᠨ ᠶᠠᠪᠠᠭᠠᠨ ᠬᠥᠲᠥᠯᠦᠭᠡᠳ ᠢᠷᠡᠵᠦ ᠪᠣᠢ ᠬᠠᠷᠠᠭᠳᠠᠪᠠ᠃ ᠲᠡᠮᠦᠵᠢᠨ ᠭᠦᠶᠦᠨ ᠣᠴᠢᠭᠠᠳ ᠪᠡᠯᠭᠦᠳᠡᠢ ᠡᠴᠡ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠶ᠋ᠢ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠲᠠᠷᠪᠠᠭᠠ ᠨᠤᠭᠤᠳ ᠢ᠋ ᠪᠠᠭᠤᠯᠭᠠᠭᠠᠳ ᠳᠡᠭᠡᠷᠡᠮᠴᠢᠳ ᠦ᠋ᠨ ᠠᠷᠤ ᠠ᠋ᠴᠠ ᠬᠠᠷᠠ ᠡᠷᠴᠢ ᠪᠡᠷ ᠢ᠋ᠶ᠋ᠡᠨ ᠳᠠᠪᠬᠢᠨ ᠣᠳᠪᠠ᠃
ᠲᠡᠮᠦᠵᠢᠨ ᠭᠤᠷᠪᠠ ᠬᠣᠨᠣᠭ ᠶᠠᠪᠤᠭᠠᠳ ᠮᠠᠰᠢ ᠶᠡᠬᠡ ᠶᠠᠳᠠᠷᠠᠭᠰᠠᠨ ᠲᠤᠯᠠ《ᠨᠠᠷᠠ ᠰᠢᠩᠭᠡᠵᠦ ᠬᠠᠷᠤᠢ ᠪᠦᠷᠦᠢ ᠪᠣᠯᠤᠯᠠ᠃ ᠮᠠᠷᠭᠠᠰᠢ ᠬᠥᠭᠡᠭᠡᠶᠡ》 ᠭᠡᠵᠦ ᠪᠣᠳᠣᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠨ ᠬᠡᠰᠡᠭ ᠵᠡᠭᠦᠷᠮᠡᠭᠯᠡᠪᠡ᠃ ᠭᠡᠲᠡᠯᠡ ᠲᠡᠭᠦᠨ ᠦ᠌ ᠳᠤᠬᠤᠨ ᠳᠡᠭᠡᠷᠡ ᠨᠢᠭᠡᠨ ᠬᠥᠮᠦᠨ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠦᠨᠦᠰᠪᠡ᠃ ᠲᠡᠮᠦᠵᠢᠨ ᠮᠠᠰᠢ ᠶᠡᠬᠡ ᠰᠠᠨᠳᠤᠷᠤᠭᠠᠳ ᠪᠣᠰᠤᠨ ᠬᠠᠷᠠᠲᠠᠯᠠ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠳᠡᠷᠭᠡᠳᠡ ᠲᠡᠭᠦᠨ ᠦ᠌ ᠨᠠᠰᠤ ᠪᠠᠷᠠᠭᠰᠠᠨ ᠡᠴᠢᠭᠡ ᠨᠢ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠮᠦᠵᠢᠨ᠄《ᠠᠪᠤ ᠠ᠋᠂ ᠠᠪᠤ ᠠ᠋!》 ᠭᠡᠳ ᠮᠠᠰᠢ ᠴᠢᠩᠭᠠ ᠪᠠᠷ ᠲᠤᠷᠬᠢᠷᠠᠨ ᠤᠬᠢᠯᠠᠭᠠᠳ ᠲᠡᠪᠡᠷᠢᠭᠡᠳ ᠠᠪᠤᠪᠠ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ᠄《ᠮᠢᠨᠦ ᠬᠦᠦ ᠶᠠᠳᠠᠷᠠᠵᠤ ᠶᠠᠪᠤᠨᠠ ᠤᠤ ᠳᠠ? ᠲᠠ ᠨᠠᠷ ᠢ᠋ ᠪᠡᠨ ᠡᠷᠲᠡ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠳ᠋ᠤ᠌ ᠠᠭᠤᠴᠢᠯᠠᠭᠠᠷᠠᠢ!》 ᠭᠡᠳ ᠲᠡᠮᠦᠵᠢᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠵᠥᠭᠡᠯᠡᠨ ᠢᠯᠢᠭᠡᠳ᠄《ᠮᠢᠨᠦ ᠬᠦᠦ ᠬᠠᠢᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠣᠯᠤᠨᠠ ᠠ᠋!》 ᠲᠡᠮᠦᠵᠢᠨ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠠᠪᠤ ᠶ᠋ᠢ ᠪᠡᠨ ᠲᠡᠪᠡᠷᠢᠭᠡᠳ ᠤᠬᠢᠯᠠᠭᠠᠳ ᠯᠠ ᠪᠠᠢᠪᠠ᠃ ᠶᠢᠰᠦᠭᠡᠢ ᠪᠠᠭᠠᠲᠤᠷ᠄《ᠮᠢᠨᠦ ᠬᠦᠦ ᠵᠣᠷᠢᠭᠲᠠᠢ᠂ ᠤᠬᠠᠭᠠᠨᠲᠠᠢ ᠪᠠᠢᠭᠠᠷᠠᠢ! ᠰᠠᠯᠬᠢ ᠬᠡᠴᠢᠨᠡᠭᠡᠨ ᠬᠦᠴᠦᠲᠡᠢ ᠰᠠᠯᠬᠢᠯᠠᠭᠰᠠᠨ ᠴᠤ᠌ ᠠᠭᠤᠯᠠ ᠬᠡᠵᠢᠶᠡ ᠴᠦ᠍ ᠪᠥᠬᠥᠢᠳᠡᠭ ᠦᠭᠡᠢ ᠶᠦᠮ ᠰᠢᠦ!》 ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠭᠠᠳ ᠥᠭᠪᠡ᠃ ᠲᠡᠮᠦᠵᠢᠨ ᠬᠠᠰᠬᠢᠷᠤᠨ ᠰᠡᠷᠡᠲᠡᠯᠡ ᠡᠨᠡ ᠪᠦᠬᠦᠨ ᠵᠡᠭᠦᠳᠦ ᠪᠠᠢᠪᠠ᠃
ᠥᠷᠯᠥᠭᠡ ᠪᠣᠯᠵᠤ ᠨᠠᠷᠠ ᠲᠡᠭᠷᠢ ᠳ᠋ᠦ᠍ ᠮᠠᠨᠳᠤᠨ ᠰᠢᠪᠠᠭᠤᠳ ᠵᠢᠷᠭᠢᠯᠳᠦᠭᠡᠳ ᠲᠡᠮᠦᠵᠢᠨ ᠦ᠌ ᠶᠠᠳᠠᠷᠠᠭᠰᠠᠨ ᠪᠡᠶᠡ ᠨᠢ ᠲᠡᠩᠬᠡᠷᠡᠵᠦ ᠡᠷᠴᠢ ᠬᠦᠴᠦ ᠪᠡᠷ ᠳᠦᠭᠦᠷᠦᠭᠰᠡᠨ ᠪᠠᠢᠪᠠ᠃ ᠲᠡᠮᠦᠵᠢᠨ᠄《ᠥᠴᠥᠭᠡᠳᠦᠷ ᠰᠥᠨᠢ ᠠᠪᠤ ᠮᠢᠨᠢ ᠢᠷᠡᠭᠡᠳ ᠡᠷᠴᠢ ᠬᠦᠴᠦ ᠶ᠋ᠢ ᠮᠢᠨᠢ ᠰᠡᠯᠪᠢᠵᠦ ᠦᠭᠭᠡᠳ ᠶᠠᠪᠤᠯᠠ᠃》 ᠭᠡᠮᠡᠨ ᠪᠣᠳᠣᠭᠠᠳ ᠰᠡᠳᠬᠢᠯ ᠵᠢᠷᠦᠬᠡ ᠨᠢ ᠪᠠᠶᠠᠷ ᠪᠠᠶᠠᠰᠤᠯ ᠢ᠋ᠶ᠋ᠠᠷ ᠳᠦᠭᠦᠷᠴᠦ ᠪᠢᠷᠠ ᠴᠢᠳᠠᠯ ᠨᠢ ᠪᠡᠶᠡ ᠶ᠋ᠢ ᠨᠢ ᠵᠠᠳᠠ ᠲᠠᠲᠠᠯᠠᠬᠤ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠲᠡᠮᠦᠵᠢᠨ ᠨᠠᠢ᠍ᠮᠠᠨ ᠰᠢᠷᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠨᠡᠬᠡᠨ ᠶᠠᠪᠤᠪᠠ᠃ ᠭᠡᠲᠡᠯᠡ ᠲᠡᠭᠦᠨ ᠦ᠌ ᠵᠠᠮ ᠳ᠋ᠤ᠌ ᠣᠯᠠᠨ ᠠᠳᠤᠭᠤᠨ ᠳᠤᠮᠳᠠ ᠨᠢᠭᠡᠨ ᠬᠥᠪᠡᠭᠦᠨ ᠭᠡᠭᠦᠦ ᠰᠠᠭᠠᠨ ᠰᠠᠭᠤᠵᠤ ᠬᠠᠷᠠᠭᠳᠠᠪᠠ᠃ ᠲᠡᠮᠦᠵᠢᠨ ᠲᠡᠭᠦᠨ ᠡᠴᠡ ᠮᠣᠷᠢᠳ ᠢ᠋ᠶ᠋ᠠᠨ ᠠᠰᠠᠭᠤᠲᠠᠯᠠ ᠲᠡᠷᠡ ᠬᠥᠪᠡᠭᠦᠨ ᠡᠢᠨ ᠬᠡᠯᠡᠪᠡ᠃《ᠥᠷᠯᠥᠭᠡ ᠬᠡᠰᠡᠭ ᠬᠥᠮᠦᠰ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠶ᠋ᠢ ᠡᠭᠦᠪᠡᠷ ᠬᠥᠭᠡᠭᠡᠵᠦ ᠶᠠᠪᠤᠬᠤ ᠬᠠᠷᠠᠭᠳᠠᠭᠰᠠᠨ᠃ ᠮᠥᠷ ᠢ᠋ ᠨᠢ ᠪᠢ ᠵᠢᠭᠠᠵᠤ ᠥᠭᠭᠦᠶᠡ!》 ᠭᠡᠳ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠯ ᠦᠭᠡᠢ ᠬᠤᠪᠢᠩ ᠰᠢᠨᠠᠭᠠ ᠪᠠᠨ ᠪᠣᠭᠣᠵᠤ ᠲᠠᠯᠪᠢᠭᠠᠳ ᠶᠠᠪᠤᠪᠠ᠃ ᠲᠡᠷᠡ ᠬᠥᠪᠡᠭᠦᠨ ᠲᠡᠮᠦᠵᠢᠨ ᠳ᠋ᠦ᠍᠄《ᠴᠢ ᠶᠡᠬᠡ ᠪᠤᠬᠢᠨᠢᠳᠤᠭᠤ ᠶᠠᠪᠤᠨᠠ ᠳᠠ! ᠡᠷᠡ ᠤᠯᠤᠰ ᠤ᠋ᠨ ᠵᠣᠪᠠᠯᠠᠩ ᠠᠳᠠᠯᠢᠬᠠᠨ᠂ ᠪᠢ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠶᠠ! ᠮᠢᠨᠦ ᠡᠴᠢᠭᠡ ᠶ᠋ᠢ〈ᠨᠠᠬᠤ ᠪᠠᠶᠠᠨ〉ᠭᠡᠳᠡᠭ᠃ ᠪᠢ ᠲᠡᠭᠦᠨ ᠦ᠌ ᠭᠠᠭᠴᠠ ᠬᠥᠪᠡᠭᠦᠨ—— ᠪᠣᠭᠣᠷᠴᠤ ᠭᠡᠳᠡᠭ》 ᠭᠡᠪᠡ᠃
ᠲᠡᠮᠦᠵᠢᠨ ᠡᠢᠨ ᠬᠦ᠌ ᠪᠣᠭᠣᠷᠴᠤ ᠲᠠᠢ ᠲᠠᠨᠢᠯᠴᠠᠭᠠᠳ ᠲᠡᠷᠡ ᠬᠣᠶᠠᠷ ᠮᠣᠷᠢ ᠪᠠᠨ ᠤᠨᠤᠨ ᠰᠢᠷᠭᠠ ᠮᠣᠷᠢᠳ ᠤ᠋ᠨ ᠠᠷᠤ ᠠ᠋ᠴᠠ ᠮᠥᠷ ᠢ᠋ᠶ᠋ᠡᠷ ᠨᠢ ᠮᠥᠰᠬᠢᠵᠦ ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠶᠠᠪᠤᠯᠠ᠃ ᠲᠡᠳᠡ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠬᠦᠷᠢᠶᠡ ᠢᠷᠭᠡᠨ ᠳ᠋ᠦ᠍ ᠬᠦᠷᠪᠡᠯ ᠨᠠᠢ᠍ᠮᠠᠨ ᠰᠢᠷᠭᠠ ᠮᠣᠷᠢ ᠨᠢ ᠲᠡᠨᠳᠡ ᠡᠪᠡᠰᠦ ᠢᠳᠡᠵᠦ ᠪᠣᠢ ᠬᠠᠷᠠᠭᠳᠠᠪᠠ᠃ ᠲᠡᠮᠦᠵᠢᠨ᠄《ᠪᠣᠭᠣᠷᠴᠤ ᠴᠢ ᠡᠨᠳᠡ ᠪᠡᠨ ᠬᠦᠯᠢᠶᠡᠵᠦ ᠪᠠᠢ᠂ ᠪᠢ ᠮᠣᠷᠢ ᠳ᠋ᠤ᠌ ᠪᠠᠨ ᠶᠠᠪᠤᠭᠠᠳ ᠪᠤᠭᠯᠠᠭᠠᠳ ᠠᠪᠤᠭᠠᠳ ᠢᠷᠡᠶᠡ!》 ᠭᠡᠲᠡᠯᠡ ᠪᠣᠭᠣᠷᠴᠤ᠄《ᠡᠷᠡ ᠤᠯᠤᠰ ᠵᠠᠮ ᠤ᠋ᠨ ᠳᠤᠮᠳᠠ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠶᠠᠳᠠᠭ ᠦᠭᠡᠢ ᠶᠦᠮ ᠠ᠋! ᠬᠠᠮᠲᠤ ᠶᠠᠪᠤᠶᠠ!》 ᠭᠡᠳ ᠲᠡᠷᠡ ᠬᠣᠶᠠᠷ ᠬᠠᠮᠲᠤ ᠳᠣᠪᠲᠣᠯᠵᠤ ᠣᠷᠣᠭᠠᠳ ᠰᠢᠷᠭᠠ ᠮᠣᠷᠢᠳ ᠢ᠋ ᠬᠥᠭᠡᠭᠡᠨ ᠭᠠᠷᠭᠠᠬᠤ ᠭᠡᠲᠡᠯᠡ ᠮᠣᠷᠢᠳ ᠤ᠋ᠨ ᠴᠠᠭᠠᠨᠠ ᠬᠡᠰᠡᠭ ᠳᠡᠭᠡᠷᠡᠮᠴᠢᠳ ᠳᠡᠰ ᠳᠡᠰ ᠢᠨᠢᠶᠡᠯᠳᠦᠨ ᠭᠠᠯ ᠲᠣᠭᠣᠷᠢᠨ ᠬᠢᠲᠤᠭᠠ ᠢᠷᠯᠡᠨ ᠮᠢᠬᠠ ᠢᠳᠡᠭᠡᠳ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠷᠡ ᠬᠣᠶᠠᠷ ᠲᠡᠳᠡᠨ ᠢ᠋ ᠣᠷᠣᠲᠠᠯᠠ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠤᠨᠲᠠᠭᠰᠠᠨ ᠬᠣᠢᠭᠤᠷ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠤᠭᠠᠳ ᠵᠢᠭᠤᠲᠠᠪᠠ᠃ ᠬᠣᠢᠨᠠ ᠠ᠋ᠴᠠ ᠨᠢ ᠳᠡᠭᠡᠷᠡᠮᠴᠢᠳ ᠬᠥᠭᠡᠭᠡᠵᠦ ᠡᠬᠢᠯᠡᠪᠡ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠴᠠᠭᠠᠨ ᠮᠣᠷᠢᠲᠠᠢ ᠳᠡᠭᠡᠷᠡᠮᠴᠢᠨ ᠰᠡᠯᠡᠮᠡ ᠪᠡᠨ ᠳᠠᠯᠠᠢᠨ ᠪᠠᠷᠢᠵᠤ ᠭᠠᠭᠴᠠᠭᠠᠷ ᠭᠦᠢᠴᠡᠵᠦ ᠢᠷᠡᠬᠦ ᠳ᠋ᠦ᠍ ᠪᠣᠭᠣᠷᠴᠤ᠄《ᠴᠢ ᠨᠤᠮᠤ ᠰᠤᠮᠤ ᠪᠠᠨ ᠨᠠᠳᠠ ᠳ᠋ᠤ᠌ ᠥᠭᠭᠦᠭᠡᠴᠢ! ᠪᠢ ᠲᠡᠳᠡᠨ ᠤᠷᠤᠭᠤ ᠬᠠᠷᠪᠤᠶᠠ!》 ᠲᠡᠮᠦᠵᠢᠨ᠄《ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡᠰ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠡ ᠨᠥᠬᠥᠷ ᠢ᠋ᠶ᠋ᠡᠨ ᠰᠣᠯᠢᠳᠠᠭ ᠦᠭᠡᠢ ᠶᠦᠮ᠃》 ᠭᠡᠳ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠡᠷᠭᠢᠵᠦ ᠬᠠᠷᠠᠭᠠᠳ ᠴᠠᠭᠠᠨ ᠮᠣᠷᠢᠲᠠᠢ ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠬᠠᠨᠳᠤᠨ᠄《ᠬᠣᠢᠲᠤ ᠨᠠᠰᠤᠨ ᠳ᠋ᠤ᠌ ᠪᠠᠨ ᠠᠭᠤᠯᠵᠠᠶᠠ!》 ᠭᠡᠳ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠠᠰᠤ ᠬᠠᠷᠪᠤᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠠᠷᠠ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠣᠷᠣᠨ ᠬᠠᠷᠠᠩᠭᠤᠢ ᠪᠣᠯᠤᠭᠰᠠᠨ ᠲᠤᠯᠠ ᠳᠡᠭᠡᠷᠡᠮᠴᠢᠳ ᠠᠷᠤ ᠠ᠋ᠴᠠ ᠨᠢ ᠬᠥᠭᠡᠭᠡᠬᠦ ᠪᠡᠨ ᠪᠣᠯᠢᠪᠠ᠃
ᠲᠡᠮᠦᠵᠢᠨ ᠪᠣᠭᠣᠷᠴᠤ ᠬᠣᠶᠠᠷ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠤᠭᠠᠳ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠶᠠᠪᠤᠭᠠᠳ ᠪᠣᠭᠣᠷᠴᠤ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠭᠠ ᠢᠷᠡᠪᠡᠢ᠃ ᠲᠡᠮᠦᠵᠢᠨ᠄《ᠵᠠ᠂ ᠨᠠᠢᠵᠠ ᠮᠢᠨᠢ! ᠪᠢ ᠴᠢᠨᠦ ᠲᠤᠰᠠᠯᠠᠮᠵᠢ ᠦᠭᠡᠢ ᠪᠡᠷ ᠮᠣᠷᠢᠳ ᠢ᠋ᠶ᠋ᠠᠨ ᠣᠯᠵᠤ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠲᠡᠢᠮᠦ ᠡᠴᠡ ᠬᠣᠶᠠᠭᠤᠯᠠ ᠪᠠᠨ ᠨᠣᠶᠠᠨ ᠨᠢᠷᠤᠭᠤ ᠲᠠᠢ ᠡᠷᠡ ᠤᠯᠤᠰ ᠤ᠋ᠳ ᠪᠠᠢᠨᠠ ᠳᠠ! ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠲᠡᠩᠴᠡᠭᠦᠦ ᠬᠤᠪᠢᠶᠠᠭᠠᠳ ᠠᠪᠤᠶᠠ!》 ᠭᠡᠲᠡᠯᠡ ᠪᠣᠭᠣᠷᠴᠤ᠄《ᠪᠢ ᠴᠢᠮᠠ ᠶ᠋ᠢ ᠠᠩᠬᠠ ᠬᠠᠷᠠᠭᠠᠳ ᠡᠨᠡ ᠵᠠᠯᠠᠭᠤ ᠨᠡᠯᠢᠶᠡᠳ ᠬᠦᠨᠳᠦᠬᠡᠨ ᠶᠠᠪᠤᠵᠤ ᠪᠠᠢᠨᠠ ᠳᠠ ᠭᠡᠵᠦ ᠪᠣᠳᠣᠭᠰᠠᠨ᠂ ᠠᠳᠠᠯᠢᠬᠠᠨ ᠡᠷᠡ ᠤᠯᠤᠰ ᠪᠠᠢᠨᠠ᠂ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠲᠤᠰᠠᠯᠠᠶᠠ ᠯᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ ᠰᠢᠷᠠ ᠬᠠᠷᠠᠮᠵᠢ ᠬᠠᠷᠠᠭᠠ ᠦᠭᠡᠢ ᠰᠢᠦ! ᠮᠢᠨᠦ ᠡᠴᠢᠭᠡ ᠶ᠋ᠢ〈ᠨᠠᠬᠤ ᠪᠠᠶᠠᠨ〉 ᠭᠡᠳᠡᠭ᠃ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠬᠤᠷᠢᠶᠠᠭᠰᠠᠨ ᠬᠥᠷᠥᠩᠭᠡ ᠨᠠᠳᠠ ᠳ᠋ᠤ᠌ ᠡᠯᠪᠡᠭ ᠬᠦᠷᠦᠨᠡ ᠠ᠋!》 ᠭᠡᠳ ᠠᠪᠤᠭᠰᠠᠨ ᠦᠭᠡᠢ᠃
ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠷ ᠪᠣᠭᠣᠷᠴᠤ ᠶ᠋ᠢᠨ ᠭᠡᠷ ᠲᠦ᠍ ᠢᠷᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠡᠴᠢᠭᠡ ᠡᠬᠡ ᠬᠣᠶᠠᠷ ᠨᠢ ᠬᠠᠢᠷᠠᠲᠠᠢ ᠭᠠᠭᠴᠠ ᠬᠦᠦ ᠪᠡᠨ ᠠᠯᠠᠭᠠ ᠪᠣᠯᠴᠢᠬᠠᠯᠠ ᠭᠡᠳ ᠬᠠᠢᠭᠠᠳ ᠨᠢᠰᠦ ᠨᠢᠯᠪᠤᠰᠤ ᠪᠣᠯᠴᠢᠬᠠᠭᠰᠠᠨ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠭᠡᠭᠡᠳ ᠪᠣᠭᠣᠷᠴᠤ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠡᠴᠢᠭᠡ ᠡᠬᠡ ᠳ᠋ᠦ᠍ ᠪᠡᠨ ᠬᠡᠯᠡᠨ ᠣᠢᠯᠠᠭᠠᠭᠤᠯᠪᠠ᠃ ᠪᠣᠭᠣᠷᠴᠤ ᠶ᠋ᠢᠨ ᠡᠴᠢᠭᠡ ᠡᠬᠡ ᠲᠡᠮᠦᠵᠢᠨ ᠳ᠋ᠦ᠍ ᠵᠠᠮ ᠳ᠋ᠤ᠌ ᠢᠳᠡᠬᠦ ᠬᠦᠨᠡᠰᠦ ᠬᠣᠭᠣᠯᠠ ᠶ᠋ᠢ ᠨᠢ ᠪᠡᠯᠡᠳᠴᠦ ᠥᠭᠭᠦᠭᠡᠳ᠄《ᠬᠦᠦ ᠡᠴᠡ ᠮᠢᠨᠢ ᠢᠯᠭᠠᠭᠠ ᠶᠠᠭᠤ ᠪᠠᠢᠬᠤᠪ ᠳᠠ! ᠵᠠᠮ ᠳ᠋ᠤ᠌ ᠪᠠᠨ ᠰᠠᠢᠨ ᠶᠠᠪᠤᠭᠠᠳ ᠭᠡᠷ ᠲᠦ᠍ ᠪᠡᠨ ᠭᠥᠷᠥᠭᠡᠷᠡᠢ! ᠡᠬᠡ᠂ ᠳᠡᠭᠦᠦ ᠨᠠᠷ ᠴᠢᠨᠢ ᠰᠠᠨᠠᠭᠠ ᠵᠣᠪᠠᠵᠤ ᠰᠠᠭᠤᠭᠠ ᠪᠠᠢᠬᠤ᠂ ᠲᠠ ᠬᠣᠶᠠᠷ ᠡᠭᠦᠨ ᠡᠴᠡ ᠬᠣᠢᠰᠢ ᠰᠠᠢᠬᠠᠨ ᠨᠥᠬᠥᠷᠯᠡᠵᠦ ᠪᠡᠶᠡ ᠪᠡᠶᠡ ᠳ᠋ᠦ᠍ ᠪᠡᠨ ᠥᠮᠥᠭ ᠲᠦᠰᠢᠭ ᠪᠣᠯᠵᠤ ᠶᠠᠪᠤᠭᠠᠷᠠᠢ!》 ᠭᠡᠵᠦ ᠬᠡᠯᠡᠭᠡᠳ ᠲᠡᠮᠦᠵᠢᠨ ᠢ᠋ ᠦᠳᠡᠨ ᠭᠠᠷᠭᠠᠪᠠ᠃
ᠲᠡᠨᠳᠡ ᠡᠴᠡ ᠲᠡᠮᠦᠵᠢᠨ ᠨᠠᠢ᠍ᠮᠠᠨ ᠰᠢᠷᠭᠠ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠭᠡᠭᠡᠭᠰᠡᠭᠡᠷ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠶᠠᠪᠤᠭᠠᠳ ᠭᠡᠷ ᠲᠦ᠍ ᠪᠡᠨ ᠢᠷᠡᠪᠡ᠃ ᠥᠭᠡᠯᠦᠨ ᠡᠬᠡ ᠲᠡᠮᠦᠵᠢᠨ ᠢ᠋ ᠬᠠᠷᠠᠭᠠᠳ᠄《ᠠᠰᠢᠭᠦᠢ ᠳᠡ᠂ ᠬᠦᠦ ᠮᠢᠨᠢ ᠨᠠᠢ᠍ᠮᠠᠨ ᠰᠢᠷᠭᠠ ᠪᠠᠨ ᠣᠯᠤᠭᠠᠳ ᠢᠷᠡᠵᠡᠢ᠃》
ᠪᠠᠶᠠᠷ ᠤ᠋ᠨ ᠨᠢᠯᠪᠤᠰᠤ ᠲᠠᠢ ᠤᠭᠲᠤᠨ ᠠᠪᠤᠪᠠ᠃
ᠲᠡᠮᠦᠵᠢᠨ ᠬᠡᠳᠦ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠪᠣᠳᠣᠪᠠ᠃《ᠠᠪᠤ ᠮᠢᠨᠢ ᠨᠠᠮᠠ ᠶ᠋ᠢ ᠶᠢᠰᠦᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌〈ᠪᠥᠷᠲᠡ ᠥᠵᠢᠨ〉 ᠬᠡᠮᠡᠬᠦ ᠭᠤᠸᠠ ᠵᠢᠰᠦ ᠰᠠᠢᠬᠠᠨ ᠥᠬᠢᠨ ᠲᠡᠢ ᠰᠦᠢ ᠲᠠᠯᠪᠢᠵᠤ ᠥᠭᠭᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠴᠢᠭᠰᠠᠨ ᠶᠤᠮ᠃ ᠢᠩᠭᠢᠬᠦ ᠳ᠋ᠦ᠍ ᠲᠡᠳᠡ᠂ ᠲᠡᠷᠡ ᠥᠬᠢᠨ ᠣᠳᠣ ᠬᠠᠮᠢᠭᠠ ᠪᠠᠢᠨᠠ?》 ᠭᠡᠵᠦ ᠪᠣᠳᠣᠭᠠᠳ ᠪᠡᠯᠭᠦᠳᠡᠢ ᠶ᠋ᠢ ᠳᠠᠭᠠᠭᠤᠯᠤᠨ ᠪᠥᠷᠲᠡ ᠥᠵᠢᠨ ᠢ᠋ ᠬᠠᠢᠵᠤ ᠣᠯᠬᠤ ᠪᠠᠷ ᠵᠠᠮ ᠳ᠋ᠤ᠌ ᠭᠠᠷᠪᠠ᠃
ᠠᠯᠲᠠ ᠪᠡᠶᠡ ᠮᠢᠨᠢ ᠠᠯᠵᠢᠶᠠᠪᠠᠰᠤ ᠠᠯᠵᠢᠶᠠᠲᠤᠭᠠᠢ᠂
ᠠᠬᠤᠢ ᠲᠥᠷᠥ ᠮᠢᠨᠢ ᠪᠦᠦ ᠠᠯᠳᠠᠷᠠᠲᠤᠭᠠᠢ!
ᠪᠦᠲᠦᠨ ᠪᠡᠶᠡ ᠮᠢᠨᠢ ᠵᠣᠪᠠᠪᠠᠰᠤ ᠵᠣᠪᠠᠲᠤᠭᠠᠢ᠂
ᠪᠦᠷᠢᠨ ᠤᠯᠤᠰ ᠮᠢᠨᠢ ᠪᠦᠦ ᠵᠣᠪᠠᠲᠤᠭᠠᠢ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ᠄ ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠰᠠᠨ᠄ ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠮᠥᠴᠢᠷ᠂ ᠢᠷᠡᠭᠡᠳᠦᠢ