ᠲᠤᠩᠭᠠᠯᠠᠭ ᠲᠠᠮᠢᠷ4-01-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2187《ᠬᠣᠭᠣᠯᠠ ᠰᠠᠢᠲᠠᠢ ᠨᠣᠬᠠᠢ ᠢᠩᠭᠢᠵᠦ ᠰᠠᠢᠨ ᠬᠤᠴᠠᠳᠠᠭ》 - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠨᠢᠭᠡ
ᠵᠤᠨ ᠤ᠋ ᠰᠠᠢᠬᠠᠨ ᠥᠷᠯᠥᠭᠡ ᠭᠠᠳᠠᠨᠠ ᠨᠢ ᠮᠠᠯ ᠪᠠᠭᠰᠢᠷᠠᠭᠰᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠬᠥᠯ ᠬᠥᠭᠵᠢᠭᠡᠨ ᠶᠡᠬᠡᠲᠡᠢ ᠠᠵᠢ᠃ ᠨᠡᠢᠲᠡ ᠲᠠᠪᠤᠨ ᠭᠡᠷ ᠪᠠᠢᠭᠠ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠳᠥᠷᠪᠡᠨ ᠬᠠᠨᠠ ᠲᠠᠢ ᠵᠢᠵᠢᠭ ᠴᠠᠭᠠᠨ ᠭᠡᠷ ᠡᠴᠡ ᠪᠤᠰᠤᠳ ᠤ᠋ᠨ ᠲᠣᠭᠣᠨᠣ ᠡᠴᠡ ᠬᠠᠷᠠ ᠮᠣᠳᠣᠨ ᠤ᠋ ᠥᠳᠬᠡᠨ ᠪᠠᠷᠠᠭᠠᠨ ᠤᠲᠤᠭᠠ ᠡᠷᠴᠢᠯᠡᠨ ᠭᠠᠷᠤᠨᠠ᠃
ᠡᠨᠡ ᠤᠲᠤᠭᠠ ᠪᠣᠯ ᠥᠷᠯᠥᠭᠡᠨ ᠦ᠌ ᠰᠠᠭᠠᠮᠠ ᠪᠠᠨ ᠬᠥᠭᠡᠷᠦᠭᠦᠯᠵᠦ ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠪᠠᠢᠵᠠᠢ᠃ ᠭᠡᠪᠡᠴᠦ ᠭᠡᠷ ᠪᠦᠬᠦᠨ ᠳ᠋ᠦ᠍ ᠬᠥᠭᠡᠷᠦᠭᠦᠯᠵᠦ ᠪᠠᠢᠭᠠ ᠰᠦ ᠠᠳᠠᠯᠢ ᠦᠭᠡᠢ ᠨᠢ ᠭᠡᠷ ᠪᠦᠬᠦᠨ ᠦ᠌ ᠳᠣᠲᠣᠷᠠᠬᠢ ᠠᠮᠢᠳᠤᠷᠠᠯ ᠤ᠋ᠨ ᠠᠳᠠᠯᠢ ᠦᠭᠡᠢ ᠶ᠋ᠢᠨ ᠭᠡᠷᠡᠴᠢ ᠠᠵᠢ᠃
ᠶᠡᠬᠡ ᠭᠡᠷ ᠭᠡᠭᠴᠢ ᠢᠲᠡᠭᠡᠯᠲᠦ ᠶ᠋ᠢᠨ ᠭᠡᠷ ᠲᠦ᠍ ᠲᠠᠪᠤᠨ ᠲᠠᠮᠠᠭᠠ ᠲᠠᠢ ᠬᠣᠶᠠᠷ ᠲᠣᠭᠣᠭᠠ ᠰᠦ ᠵᠡᠷᠭᠡ ᠬᠥᠭᠡᠷᠦᠭᠦᠯᠵᠦ ᠪᠠᠢᠬᠤ ᠳ᠋ᠤ᠌ ᠭᠠᠯᠰᠠᠩ ᠪᠤᠶᠤ ᠨᠢᠮᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠷᠡᠵᠦ ᠪᠠᠭᠤᠭᠰᠠᠨ ᠰᠢᠨᠡ ᠬᠣᠨᠢᠴᠢᠨ ᠤ᠋ ᠭᠡᠷ ᠲᠦ᠍ ᠵᠢᠵᠢᠭᠬᠡᠨ ᠵᠢᠯᠠᠪᠴᠢᠳᠠᠢ ᠰᠦ ᠬᠥᠭᠡᠷᠴᠦ ᠪᠠᠢᠪᠠ᠃ ᠬᠣᠩᠭᠣᠷ ᠤ᠋ᠨ ᠭᠡᠷ ᠲᠦ᠍ ᠲᠣᠮᠣ ᠡᠴᠡ ᠲᠣᠮᠣ ᠬᠣᠨᠢᠨ ᠲᠣᠭᠣᠭᠠ ᠲᠠᠢ ᠰᠦ ᠬᠥᠭᠡᠷᠴᠦ ᠪᠠᠢᠬᠤ ᠳ᠋ᠤ᠌ ᠪᠠᠲᠤ ᠶ᠋ᠢᠨ ᠭᠡᠷ ᠲᠦ᠍ ᠬᠥᠭᠡᠷᠦᠭᠦᠯᠬᠦ ᠰᠦ ᠦᠭᠡᠢ ᠪᠠᠢᠯᠠ᠃
ᠲᠠᠩᠬᠢᠮ ᠤ᠋ᠨ ᠵᠤᠨ ᠤ᠋ ᠠᠮᠠᠷᠠᠯᠲᠠ ᠪᠠᠷ ᠰᠣᠯᠣᠩᠭᠠ ᠡᠯᠳᠡᠪ ᠢ᠋ᠶ᠋ᠡᠷ ᠴᠢᠷᠠᠢᠴᠢᠯᠠᠨ ᠭᠤᠶᠤᠭᠰᠠᠨ ᠤᠴᠢᠷ ᠪᠠᠲᠤ ᠭᠡᠷ ᠢ᠋ᠶ᠋ᠡᠨ ᠨᠡᠭᠦᠯᠭᠡᠨ ᠢᠷᠡᠵᠦ ᠡᠨᠳᠡ ᠪᠠᠭᠤᠵᠠᠢ᠃
ᠤᠨᠠᠭᠠ ᠪᠠᠨ ᠴᠢᠭᠲᠠᠯᠠᠵᠤ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠷᠲᠤ ᠤᠷᠭᠠ ᠪᠠᠷᠢᠨ ᠠᠳᠤᠭᠤ ᠬᠤᠷᠢᠶᠠᠵᠤ ᠪᠠᠢᠭᠰᠠᠨ ᠬᠣᠩᠭᠣᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠠ᠋᠂ ᠴᠢ ᠥᠨᠥᠳᠥᠷ ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠩᠬᠢᠮ ᠳᠡᠭᠡᠷᠡ ᠣᠴᠢᠨᠠ᠃ ᠠᠵᠢᠯ ᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠰᠠ ᠯᠠ ᠲᠠᠩᠬᠢᠮ ᠳᠡᠭᠡᠷᠡ ᠣᠴᠢᠬᠤ ᠬᠡᠷᠡᠭ ᠤᠤ? ᠶᠠᠭᠠᠬᠢᠭᠰᠠᠨ ᠪᠠᠷᠠᠭᠳᠠᠳᠠᠭ ᠦᠭᠡᠢ ᠠᠵᠢᠯ ᠪᠣᠢ? ᠭᠡᠵᠦ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠪᠠᠷᠢᠨ ᠥᠨᠥᠳᠥᠷ ᠶᠠᠮᠠᠷ ᠮᠣᠷᠢ ᠤᠨᠤᠬᠤ ᠪᠠᠨ ᠪᠣᠳᠣᠨ ᠠᠳᠤᠭᠤᠨ ᠳᠣᠲᠣᠭᠤᠷ ᠬᠣᠯᠬᠢᠵᠤ ᠶᠠᠪᠤᠭᠰᠠᠨ ᠢᠲᠡᠭᠡᠯᠲᠦ ᠵᠢᠪᠡᠭᠦᠨ ᠪᠥᠭᠡᠳ ᠤᠴᠠᠭᠠᠷᠯᠠᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠠ᠋᠂ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠠᠪᠤᠭᠠᠳ ᠢᠷᠡ᠃ ᠪᠢ ᠴᠢᠮᠠᠲᠤ ᠬᠠᠲᠠᠷᠢ ᠰᠢᠷᠭᠠ ᠶ᠋ᠢ ᠡᠯᠭᠦᠭᠡᠳ ᠥᠭᠭᠦᠶᠡ ᠭᠡᠳ ᠬᠣᠩᠭᠣᠷ ᠤᠬᠤᠰᠬᠢᠵᠦ᠂ ᠤᠷᠲᠤ ᠪᠡᠶᠡ ᠲᠡᠢ᠂ ᠥᠨᠳᠥᠷ ᠰᠡᠷᠪᠡᠭᠡ᠂ ᠥᠷᠭᠡᠨ ᠲᠠᠰᠢᠶᠠ ᠲᠠᠢ ᠭᠣᠳᠣᠯᠵᠠᠭᠰᠠᠨ ᠰᠢᠷᠭᠠ ᠮᠣᠷᠢ ᠤᠷᠭᠠᠯᠠᠪᠠ᠃
ᠭᠡᠲᠡᠯᠡ ᠢᠲᠡᠭᠡᠯᠲᠦ ᠲᠦᠷᠭᠡᠨ ᠭᠡᠭᠴᠢ ᠨᠢ ᠣᠴᠢᠵᠤ ᠬᠠᠵᠠᠭᠠᠷᠯᠠᠨ ᠠᠪᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠳ᠋ᠤ᠌ ᠡᠷᠳᠡᠭᠦᠳᠡ ᠶ᠋ᠢᠨ ᠭᠠᠯᠰᠠᠩ ᠤ᠋ᠨ ᠠᠮᠠ ᠶ᠋ᠢ ᠨᠢ ᠬᠠᠯᠠᠭᠠᠭᠠᠳ ᠲᠠᠯᠪᠢᠳᠠᠭ ᠪᠣᠷᠣ ᠦᠷᠢᠶᠡ ᠶ᠋ᠢ ᠪᠠᠷᠢᠭᠠᠳ ᠥᠭ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋ ᠁ ᠭᠡᠵᠦ ᠬᠣᠩᠭᠣᠷ ᠳᠤᠤᠭᠠᠷᠬᠤ ᠭᠡᠬᠦ ᠳ᠋ᠦ᠍ ᠨᠢ ᠲᠠᠰᠤᠯᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠳ᠋ᠠᠭᠠᠨ ᠬᠡᠨ ᠳ᠋ᠦ᠍ ᠶᠠᠭᠤ ᠪᠠᠷᠢᠵᠤ ᠥᠭᠬᠦ ᠪᠡᠨ ᠪᠢ ᠮᠡᠳᠡᠨᠡ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠯᠡ ᠶᠠᠪᠠᠭᠠᠨ ᠡᠴᠡ ᠳᠡᠭᠡᠷᠡ᠃ ᠭᠠᠯᠰᠠᠩ! ᠪᠣᠷᠣ ᠦᠷᠢᠶᠡ ᠶ᠋ᠢ ᠤᠷᠭᠠᠯᠠᠭᠠᠳ ᠥᠭ ᠭᠡᠳ ᠢᠲᠡᠭᠡᠯᠲᠦ ᠰᠢᠷᠭᠠ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠡᠷᠭᠢᠪᠡ᠃
ᠪᠠᠲᠤ ᠰᠣᠯᠣᠩᠭᠠ ᠲᠠᠢ ᠰᠠᠭᠤᠭᠠᠳ ᠭᠤᠷᠪᠠᠨ ᠵᠢᠯ ᠪᠣᠯᠵᠠᠢ᠃ ᠠᠩᠬᠠᠨ ᠤ᠋ ᠪᠠᠨ ᠵᠢᠯ ᠯᠦᠩ ᠳᠡᠭᠡᠷᠡ᠂ ᠳᠠᠷᠠᠭᠠ ᠨᠢ ᠪᠠᠶᠤᠤ ᠳᠡᠭᠡᠷᠡ᠃ ᠨᠢᠳᠤᠨᠤᠨ ᠨᠠᠮᠤᠷ ᠴᠡᠩᠭᠡᠯ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠳᠠᠭᠠᠭᠤᠷ ᠰᠤᠷᠭᠠᠭᠴᠢ ᠪᠠᠷ ᠢᠷᠡᠵᠦ ᠠᠵᠢᠯᠯᠠᠪᠠ᠃ ᠬᠣᠯᠠ ᠪᠠᠢᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠠᠭᠤᠯᠵᠠᠬᠤ ᠪᠦᠷᠢ ᠳ᠋ᠡᠭᠡᠨ 《ᠬᠣᠶᠠᠷ ᠬᠡᠦᠬᠡᠳ ᠮᠢᠨᠢ ᠪᠢᠳᠡᠨ ᠳ᠋ᠡᠭᠡᠨ ᠣᠢᠷᠠᠲᠤᠵᠤ ᠦᠵᠡ!》 ᠭᠡᠵᠦ ᠱᠠᠭᠠᠷᠳᠠᠳᠠᠭ ᠪᠠᠢᠯᠠ᠃
ᠲᠡᠭᠡᠭᠡᠳ ᠴᠦ᠍ ᠪᠠᠲᠤ ᠠᠷᠠᠳ ᠤ᠋ᠨ ᠭᠡᠭᠡᠷᠡᠭᠦᠯᠬᠦ ᠶᠠᠮᠤᠨ ᠡᠴᠡ ᠭᠤᠶᠤᠵᠤ ᠪᠠᠢᠮᠠᠨᠵᠢᠨ ᠣᠢᠷᠠᠲᠤᠨ ᠢᠷᠡᠯᠡ᠃
ᠢᠲᠡᠭᠡᠯᠲᠦ ᠢᠩᠭᠢᠵᠦ ᠪᠠᠲᠤ ᠶ᠋ᠢ ᠳᠡᠷᠭᠡᠳᠡ ᠪᠡᠨ ᠢᠷᠡᠭᠦᠯᠬᠦ ᠭᠡᠰᠡᠨ ᠦ᠌ ᠤᠴᠢᠷ ᠪᠣᠯ ᠠᠯᠤᠰ ᠲᠠᠭᠠᠨ ᠲᠡᠭᠦᠨ ᠢ᠋ ᠰᠤᠷᠭᠠᠭᠤᠯᠢ ᠲᠠᠩᠬᠢᠮ ᠤ᠋ᠨ ᠠᠵᠢᠯ ᠡᠴᠡ ᠨᠢ ᠰᠠᠯᠭᠠᠵᠤ ᠮᠠᠯ ᠬᠥᠷᠥᠩᠭᠡ ᠳᠡᠭᠡᠷᠡ ᠪᠡᠨ ᠠᠪᠴᠢᠷᠠᠨ ᠬᠥᠯᠥᠰᠥ ᠦᠭᠡᠢ ᠵᠠᠷᠤᠬᠤ ᠭᠡᠵᠦ ᠪᠣᠳᠣᠵᠠᠢ᠃
ᠰᠢᠨᠡ ᠵᠠᠰᠠᠭ ᠬᠥᠷᠥᠩᠭᠡ ᠳ᠋ᠦ᠍ᠨᠢ ᠬᠣᠣᠷ ᠪᠣᠯᠬᠤ ᠦᠭᠡᠢ ᠪᠣᠯᠤᠯᠲᠠᠢ᠃ ᠬᠠᠷᠢᠨ ᠴᠤ᠌ ᠬᠢᠬᠦ ᠥᠷᠲᠡᠭᠡᠨ ᠦ᠌ ᠠᠯᠪᠠ᠂ ᠥᠭᠬᠦ ᠲᠠᠲᠠᠪᠤᠷᠢ ᠨᠢ ᠤᠷᠢᠳᠠᠬᠢ ᠵᠠᠰᠠᠭ ᠤ᠋ᠨ ᠦᠶᠡ ᠡᠴᠡ ᠬᠥᠩᠭᠡᠷᠡᠵᠡᠢ᠃ 《ᠣᠳᠣ ᠥᠪᠡᠷ ᠦ᠋ᠨ ᠦᠨᠡᠨᠴᠢ ᠬᠡᠳᠦᠨ ᠬᠥᠮᠦᠨ ᠲᠡᠢ ᠰᠠᠨ ᠪᠣᠯ ᠁ ᠶᠠᠮᠠᠷ ᠴᠤ᠌ ᠵᠠ ᠲᠣᠭᠯᠠᠵᠤ ᠪᠣᠯᠤᠮᠠᠷ ᠪᠠᠢᠨᠠ》 ᠭᠡᠵᠦ ᠢᠲᠡᠭᠡᠯᠲᠦ ᠪᠣᠳᠣᠳᠠᠭ ᠪᠠᠢᠯᠠ᠃
ᠪᠠᠲᠤ ᠪᠣᠯ ᠬᠥᠷᠥᠩᠭᠡ ᠴᠤᠭᠯᠠᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠬᠡᠷᠪᠡ ᠨᠢᠭᠡ ᠵᠢᠳᠬᠦᠪᠡᠯ ᠪᠣᠢ ᠪᠣᠯᠤᠭᠰᠠᠨ ᠬᠥᠷᠥᠩᠭᠡ ᠶ᠋ᠢ ᠬᠠᠳᠠᠭᠠᠯᠠᠵᠤ ᠴᠢᠳᠠᠬᠤ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠭᠡᠵᠦ ᠢᠲᠡᠭᠡᠯᠲᠦ ᠪᠣᠳᠣᠨᠠ᠃ ᠭᠡᠲᠡᠯᠡ ᠰᠠᠨᠠᠭᠰᠠᠨ ᠳ᠋ᠤᠨᠢ ᠪᠠᠲᠤ ᠬᠦᠷᠦᠭᠰᠡᠨ ᠦᠭᠡᠢ ᠪᠥᠭᠡᠳ ᠬᠦᠷᠭᠡᠨ᠂ ᠬᠠᠳᠠᠮ ᠬᠣᠶᠠᠷ ᠤ᠋ᠨ ᠬᠣᠯᠪᠣᠭᠠ ᠬᠡᠪᠡᠷᠡᠭ ᠡᠳ᠋ ᠢ᠋ᠶ᠋ᠡᠷ ᠪᠦᠲᠦᠭᠰᠡᠨ ᠨᠢ ᠤᠳᠠᠬᠤ ᠦᠭᠡᠢ ᠢᠯᠡᠷᠡᠵᠡᠢ᠃
ᠥᠩᠭᠡᠷᠡᠭᠰᠡᠨ ᠡᠪᠦᠯ ᠴᠡᠩᠬᠡᠷ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠲᠠᠩᠬᠢᠮ ᠤ᠋ᠨ ᠬᠡᠦᠬᠡᠳ ᠦ᠋ᠨ ᠬᠣᠭᠣᠯᠠᠨ ᠳ᠋ᠤ᠌ ᠮᠢᠬᠠ ᠪᠡᠯᠡᠳᠬᠡᠬᠦ ᠪᠣᠯᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠠᠷᠪᠠᠨ ᠲᠠᠪᠤᠨ ᠲᠠᠷᠭᠤᠨ ᠦᠨᠢᠶᠡᠨ ᠦ᠌ ᠮᠢᠬᠠ ᠨᠡᠢᠯᠡᠭᠦᠯᠬᠦ ᠪᠣᠯᠵᠤ ᠭᠡᠷᠡ ᠬᠢᠵᠦ ᠡᠬᠢᠨ ᠦ᠌ ᠮᠥᠩᠭᠥ ᠶ᠋ᠢ ᠠᠪᠴᠠᠢ᠃ ᠲᠡᠭᠡᠭᠡᠳ ᠬᠠᠭᠤᠴᠢᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠮᠠᠯ ᠢ᠋ᠶ᠋ᠠᠨ ᠵᠠᠭᠠᠵᠠᠯᠠᠵᠤ ᠣᠨ ᠳ᠋ᠤ᠌ ᠣᠷᠣᠬᠤ ᠦᠭᠡᠢ ᠬᠥᠭᠰᠢᠨ ᠬᠥᠪᠡᠭᠡ ᠶ᠋ᠢ ᠨᠢ ᠨᠢᠲᠤᠯᠤᠭᠠᠳ ᠠᠷᠠᠰᠤᠨ ᠳ᠋ᠤᠨᠢ ᠪᠣᠭᠣᠵᠤ ᠬᠥᠯᠳᠡᠭᠡᠪᠡ᠃ ᠤᠷᠢᠳᠤ ᠡᠮᠦᠨᠡ ᠢᠩᠭᠢᠵᠦ ᠪᠡᠯᠡᠳᠬᠡᠭᠰᠡᠨ ᠮᠢᠬᠠ ᠪᠠᠨ ᠪᠢᠲᠡᠭᠦᠦ ᠪᠡᠷ ᠨᠢ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠶᠠᠳᠠᠭᠤᠴᠤᠳ ᠲᠤ᠌ ᠢᠷᠡᠬᠦ ᠵᠢᠯ ᠬᠤᠷᠠᠭᠠ ᠲᠠᠢ ᠬᠣᠨᠢ᠂ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠤᠨᠠᠭᠠ ᠲᠠᠢ ᠭᠡᠭᠦᠦ ᠠᠪᠬᠤ ᠪᠠᠷ ᠥᠭᠳᠡᠭ ᠪᠠᠢᠭᠰᠠᠨ ᠪᠣᠯ ᠡᠨᠡ ᠵᠢᠯ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠬᠦ ᠳ᠋ᠦ᠍ ᠨᠢ ᠪᠠᠲᠤ ᠵᠠᠳᠠᠯᠤᠨ ᠦᠵᠡᠵᠦ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠮᠢᠨᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠡᠢᠮᠦ ᠶᠠᠭᠤᠮᠠ ᠥᠭᠴᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ ᠳᠠ᠃ ᠲᠠ ᠲᠠᠷᠭᠤᠨ ᠦᠨᠢᠶᠡᠨ ᠦ᠌ ᠦᠨᠡ ᠪᠡᠷ ᠪᠣᠳᠣᠵᠤ ᠮᠥᠩᠭᠥ ᠶ᠋ᠢ ᠨᠢ ᠠᠪᠤᠭᠰᠠᠨ ᠰᠢᠦ ᠳᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠢᠳᠡ ᠬᠣᠶᠠᠷ ᠴᠢᠨᠢ ᠨᠢᠭᠡ ᠭᠡᠷ ᠦ᠋ᠨ ᠬᠥᠮᠦᠨ ᠪᠢᠰᠢ ᠪᠢᠯᠡ ᠤᠤ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠬᠦᠢᠲᠡᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠦ᠍ ᠲᠡᠢᠮᠦ᠃ ᠭᠡᠪᠡᠴᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠥᠷᠥᠩᠭᠡ᠂ ᠤᠯᠤᠰ ᠤ᠋ᠨ ᠬᠥᠷᠥᠩᠭᠡ᠃ ᠣᠯᠠᠨ ᠤ᠋ ᠶᠠᠭᠤᠮᠠ ᠪᠣᠯᠬᠣᠷ ᠡᠨᠡ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠰᠠᠳᠤᠨ ᠰᠦᠯᠪᠡᠭᠡ ᠬᠠᠮᠢᠶᠠᠷᠤᠭᠳᠠᠬᠤ ᠦᠭᠡᠢ᠃ ᠡᠰᠡᠬᠦᠯᠡ ᠪᠢᠳᠡ ᠬᠢᠮᠳᠠ ᠦᠨᠡ ᠪᠡᠷ ᠠᠪᠤᠨᠠ᠃ ᠡᠰᠡᠬᠦᠯᠡ ᠲᠠᠷᠭᠤᠨ ᠮᠢᠬᠠ ᠠᠪᠴᠢᠷᠠᠵᠤ ᠥᠭ ᠭᠡᠵᠦ ᠪᠠᠲᠤ ᠰᠢᠭᠤᠳ ᠬᠡᠯᠡᠵᠡᠢ᠃
ᠢᠲᠡᠭᠡᠯᠲᠦ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠪᠠᠲᠤ ᠶ᠋ᠢ ᠭᠢᠯᠤᠢᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠤᠳᠠᠯ ᠢᠨᠢᠶᠡᠮᠰᠦᠭᠯᠡᠵᠦ 《ᠪᠢ ᠶᠡᠷᠦ ᠨᠢ ᠴᠢᠮᠠᠲᠤ ᠶᠠᠷᠰᠢᠭ ᠪᠣᠯᠬᠤ ᠨᠢ ᠪᠠᠢᠨᠠ᠃ ᠡᠭᠦᠨ ᠢ᠋ᠶ᠋ᠡᠨ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠳᠠᠯᠳᠠ ᠬᠢᠶᠡ᠃ ᠬᠠᠷᠢᠨ ᠴᠢ ᠰᠤᠷᠭᠠᠭᠤᠯᠢ ᠳ᠋ᠠᠭᠠᠨ ᠥᠭᠡᠷᠡ ᠬᠥᠮᠦᠨ ᠡᠴᠡ ᠮᠢᠬᠠ ᠠᠪᠪᠠᠯ ᠳᠡᠭᠡᠷᠡ》 ᠭᠡᠳ ᠤᠷᠢᠳᠤ ᠠᠪᠤᠭᠰᠠᠨ ᠮᠥᠩᠭᠥ ᠪᠡᠨ ᠪᠤᠴᠠᠭᠠᠵᠤ ᠥᠭᠭᠦᠭᠡᠳ᠂ ᠮᠢᠬᠠ ᠪᠠᠨ ᠡᠷᠭᠢᠭᠦᠯᠦᠨ ᠠᠪᠴᠤ ᠶᠠᠪᠤᠭᠰᠠᠨ ᠪᠢᠯᠡ᠃
ᠡᠭᠦᠨ ᠡᠴᠡ ᠡᠬᠢᠯᠡᠨ ᠬᠠᠳᠠᠮ ᠬᠦᠷᠭᠡᠨ ᠬᠣᠶᠠᠷ ᠤ᠋ᠨ ᠳᠤᠮᠳᠠᠭᠤᠷ ᠴᠢᠳᠬᠥᠷ ᠣᠷᠣᠵᠤ ᠬᠦᠢᠲᠡᠨ ᠬᠠᠷᠢᠴᠠᠭᠠ ᠪᠣᠢ ᠪᠣᠯᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠢᠲᠡᠭᠡᠯᠲᠦ ᠡᠨᠡ ᠲᠤᠬᠠᠢ ᠪᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠭᠡ ᠦᠭᠡᠢ ᠪᠥᠭᠡᠳ ᠨᠢᠭᠤᠷ ᠳᠡᠭᠡᠷᠡ ᠪᠡᠨ ᠪᠠᠲᠤ ᠳ᠋ᠤ᠌ ᠶᠠᠭᠤᠮᠠ ᠰᠠᠨᠠᠭᠠ ᠦᠭᠡᠢ ᠶᠤᠮ ᠰᠢᠭ ᠳᠦᠷᠢ ᠦᠵᠡᠭᠦᠯᠪᠡᠴᠦ ᠴᠠᠭᠠᠨᠠ ᠪᠠᠨ ᠠᠷᠠᠭᠠ ᠪᠠᠨ ᠵᠠᠭᠤᠵᠤ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠪᠴᠢᠳᠠᠭ ᠪᠣᠯᠪᠠ᠃ ᠶᠡᠷᠦ ᠨᠢ ᠪᠣᠳᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠪᠠᠲᠤ ᠥᠪᠡᠷ ᠲᠦ᠍ ᠨᠢ ᠲᠣᠬᠢᠷᠠᠬᠤ ᠦᠭᠡᠢ ᠬᠦᠷᠭᠡᠨ ᠠᠵᠢ᠃ ᠡᠨᠡ ᠶᠡᠬᠡ ᠬᠥᠷᠥᠩᠭᠡ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠲᠠᠲᠠᠭᠳᠠᠬᠤ ᠦᠭᠡᠢ᠂ ᠲᠠᠩᠬᠢᠮ ᠰᠠᠬᠢᠵᠤ ᠤᠴᠢᠷ ᠮᠡᠳᠡᠬᠦ ᠦᠭᠡᠢ ᠬᠡᠳᠦᠨ ᠬᠡᠦᠬᠡᠳ ᠲᠡᠢ ᠬᠡᠷᠡᠯᠳᠦᠵᠦ ᠰᠠᠭᠤᠬᠤ᠂ ᠶᠣᠰᠣᠲᠠᠢ ᠯᠠ ᠡᠯᠵᠢᠭᠡ ᠮᠣᠳᠣᠨ ᠬᠤᠳᠠᠷᠭᠠᠨ ᠳ᠋ᠠᠭᠠᠨ ᠳᠤᠷᠠᠲᠠᠢ ᠭᠡᠳᠡᠭ ᠦᠭᠡ ᠡᠨᠡ ᠬᠠᠷᠠ ᠬᠦᠦ ᠶ᠋ᠢᠨ ᠲᠤᠬᠠᠢ ᠦᠭᠡ ᠠᠵᠢ᠃ ᠠᠭᠠᠵᠢᠮ ᠢ᠋ᠶ᠋ᠠᠷ ᠤᠷᠤᠯᠳᠤᠵᠤ ᠳᠣᠣᠷᠠ ᠨᠢ ᠳᠠᠷᠢ ᠪᠤᠯᠠᠵᠤ ᠪᠠᠢᠭᠠᠳ ᠰᠣᠯᠣᠩᠭᠠ ᠡᠴᠡ ᠰᠠᠯᠭᠠᠬᠤ ᠶ᠋ᠢ ᠪᠣᠳᠣᠶᠠ᠃ ᠶᠠᠮᠠᠷ ᠰᠠᠷᠳᠠᠩᠵᠢᠩ ᠡᠴᠡ ᠪᠣᠯᠵᠤ ᠡᠭᠦᠨ ᠲᠡᠢ ᠰᠣᠯᠣᠩᠭᠠ ᠶ᠋ᠢ ᠰᠠᠭᠤᠯᠭᠠᠪᠠ ᠳᠠ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠣᠬᠢᠷᠠᠬᠤ ᠦᠭᠡᠢ᠂ ᠠᠯᠳᠠᠬᠤ ᠦᠭᠡᠢ ᠶᠠᠪᠤᠵᠤ ᠪᠣᠯᠤᠭᠠᠳ ᠯᠠ ᠪᠠᠢᠳᠠᠭ ᠰᠠᠨ᠃ ᠠᠯᠳᠠᠭᠰᠠᠨ ᠪᠤᠷᠤᠭᠤᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠬᠣᠢᠨᠠ ᠵᠠᠯᠠᠵᠤ ᠵᠠᠰᠠᠨᠠ ᠳᠠ ᠭᠡᠬᠦ ᠵᠡᠷᠭᠡ ᠢᠲᠡᠭᠡᠯᠲᠦ ᠪᠣᠳᠣᠳᠠᠭ ᠪᠠᠢᠯᠠ᠃
ᠪᠠᠲᠤ ᠴᠤ᠌ ᠮᠢᠬᠠ ᠶ᠋ᠢᠨ ᠲᠤᠬᠠᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠵᠠᠷᠯᠠᠨ ᠲᠠᠷᠬᠠᠭᠠᠭᠰᠠᠨ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠳᠠᠮ ᠤ᠋ᠨ ᠢ᠋ᠶ᠋ᠠᠨ ᠬᠤᠪᠢᠷᠠᠭᠰᠠᠨ ᠵᠠᠩ ᠢ᠋ ᠮᠡᠳᠡᠵᠦ ᠪᠠᠢᠯᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠢᠲᠡᠭᠡᠯᠲᠦ ᠲᠡᠢ ᠰᠦᠷᠡᠬᠡᠢ ᠭᠡᠷᠡᠯᠲᠦᠮᠡᠷ ᠪᠠᠢᠳᠠᠭ ᠠᠪᠠᠴᠤ ᠡᠬᠡᠨᠡᠷ ᠢ᠋ᠶ᠋ᠡᠨ ᠪᠣᠳᠣᠵᠤ ᠰᠢᠳᠦ ᠵᠠᠭᠤᠨ ᠲᠡᠪᠴᠢᠵᠦ ᠪᠠᠢᠯᠠ᠃
ᠭᠠᠭᠴᠠᠬᠦ ᠨᠥᠬᠥᠷ ᠡᠴᠢᠭᠡ ᠬᠣᠶᠠᠷ ᠤ᠋ᠨ ᠬᠢᠨᠢ ᠬᠣᠭᠣᠷᠣᠨᠳᠣ ᠦᠯᠦ ᠦᠵᠡᠭᠳᠡᠬᠦ ᠱᠤᠤᠳᠤᠤ ᠪᠣᠢ ᠪᠣᠯᠤᠭᠠᠳ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠤᠯᠠᠮ ᠭᠦᠨ ᠭᠦᠨᠵᠡᠭᠡᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠰᠣᠯᠣᠩᠭᠠ ᠶ᠋ᠢᠨ ᠰᠡᠳᠬᠢᠯ ᠰᠢᠨᠠᠯᠤᠨ ᠵᠣᠪᠠᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠬᠡᠷᠡᠭ ᠲᠦ᠍ ᠠᠯᠢ ᠨᠢᠭᠡ ᠶ᠋ᠢ ᠨᠢ ᠪᠤᠷᠤᠭᠤᠳᠬᠠᠵᠤ᠂ ᠵᠥᠪᠳᠡᠭᠡᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃ ᠢᠲᠡᠭᠡᠯᠲᠦ ᠡᠴᠡ ᠠᠶᠤᠳᠠᠭ᠂ ᠡᠴᠢᠭᠡ ᠪᠡᠨ ᠭᠡᠵᠦ ᠬᠦᠨᠳᠦᠳᠬᠡᠳᠡᠭ ᠤᠴᠢᠷ ᠡᠴᠡ ᠲᠡᠭᠦᠨ ᠢ᠋ ᠪᠤᠷᠤᠭᠤᠳᠬᠠᠵᠤ ᠦᠯᠦ ᠴᠢᠳᠠᠨᠠ᠃ ᠪᠠᠲᠤ ᠳ᠋ᠤ᠌ ᠰᠡᠳᠬᠢᠯ ᠲᠡᠢ ᠤᠴᠢᠷ ᠡᠴᠡ ᠲᠡᠭᠦᠨ ᠢ᠋ ᠪᠠᠰᠠ ᠪᠤᠷᠤᠭᠤᠳᠬᠠᠵᠤ ᠦᠯᠦ ᠴᠢᠳᠠᠨᠠ᠃
ᠢᠩᠭᠢᠵᠦ ᠡᠪᠦᠯ ᠥᠩᠭᠡᠷᠡᠵᠦ᠂ ᠬᠠᠪᠤᠷ ᠳᠠᠮᠵᠢᠨ ᠵᠤᠨ ᠲᠠᠢ ᠵᠣᠯᠭᠠᠪᠠ᠃ ᠲᠠᠩᠬᠢᠮ ᠤ᠋ᠨ ᠵᠠᠪᠰᠠᠷᠯᠠᠭᠠ ᠪᠣᠯᠬᠤ ᠳ᠋ᠤ᠌ ᠬᠣᠩᠭᠣᠷ ᠲᠡᠷᠭᠡ ᠠᠪᠴᠤ ᠣᠴᠢᠭᠠᠳ ᠪᠠᠲᠤ ᠶ᠋ᠢᠨ ᠭᠡᠷ ᠢ᠋ ᠨᠡᠭᠦᠯᠭᠡᠨ ᠠᠪᠴᠢᠷᠠᠵᠠᠢ᠃
ᠪᠠᠲᠤ ᠥᠷᠯᠥᠭᠡ ᠪᠦᠷᠢ ᠲᠠᠩᠬᠢᠮ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠪᠥᠭᠡᠳ ᠢᠲᠡᠭᠡᠯᠲᠦ ᠶ᠋ᠢᠨ ᠮᠣᠷᠢ ᠶ᠋ᠢ ᠤᠨᠤᠨᠠ᠃ ᠡᠭᠦᠨ ᠢ᠋ ᠬᠠᠷᠠᠭᠠᠳ 《ᠥᠷᠯᠥᠭᠡ ᠪᠦᠷᠢ ᠮᠣᠷᠢ ᠤᠨᠤᠵᠤ ᠡᠳᠦᠷ ᠪᠦᠷᠢ ᠲᠠᠩᠬᠢᠮ ᠤ᠋ᠨ ᠭᠠᠳᠠᠨᠠ ᠰᠣᠢᠨᠠ᠃ ᠪᠢ ᠲᠠᠩᠬᠢᠮ ᠤ᠋ᠨ ᠥᠷᠲᠡᠭᠡ ᠬᠢᠵᠦ ᠪᠠᠢᠭᠠ ᠪᠢᠰᠢ》 ᠭᠡᠵᠦ ᠪᠣᠳᠣᠨ ᠬᠣᠷᠣᠰᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠮᠣᠷᠢ ᠪᠠᠨ ᠬᠠᠢᠷᠠᠯᠠᠭᠰᠠᠨ ᠡᠴᠡ ᠡᠨᠡ ᠪᠣᠳᠣᠯ ᠭᠠᠷᠳᠠᠭ ᠪᠢᠰᠢ᠃ ᠤᠨᠤᠭᠠ ᠭᠤᠶᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠥᠭᠳᠡᠭ ᠯᠡ ᠮᠣᠷᠢ᠃ ᠵᠥᠪᠬᠡᠨ ᠥᠪᠡᠷ ᠲᠦ᠍ ᠨᠢ ᠰᠤᠷᠭᠠᠭᠤᠯᠢ ᠶ᠋ᠢᠨ ᠮᠢᠬᠠᠨ ᠡᠴᠡ ᠠᠰᠢᠭ ᠣᠯᠤᠶᠠ ᠭᠡᠬᠦ ᠳ᠋ᠦ᠍ ᠰᠠᠭᠠᠳ ᠬᠢᠭᠰᠡᠨ ᠪᠠᠲᠤ ᠤᠨᠤᠵᠤ ᠪᠠᠢᠭᠠ ᠳ᠋ᠤ᠌ ᠳᠤᠷᠠ ᠦᠭᠡᠢ ᠨᠢ ᠬᠦᠷᠴᠦ ᠪᠠᠢᠯᠠ᠃
ᠡᠨᠡ ᠪᠣᠳᠣᠯ ᠨᠢ ᠪᠤᠭᠯᠠᠵᠤ ᠳᠡᠯᠪᠡᠷᠡᠬᠦ ᠪᠣᠯᠤᠭᠰᠠᠨ ᠦᠶᠡ ᠳ᠋ᠦ᠍ ᠬᠣᠩᠭᠣᠷ ᠬᠠᠳᠠᠷᠢᠳᠤ ᠰᠢᠷᠭᠠ ᠶ᠋ᠢ ᠪᠠᠲᠤ ᠳ᠋ᠤ᠌ ᠪᠠᠷᠢᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃ ᠪᠠᠲᠤ ᠲᠡᠪᠴᠢᠵᠦ ᠴᠢᠳᠠᠯ ᠦᠭᠡᠢ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠠᠷᠢᠭᠤ ᠦᠭᠡ ᠬᠡᠯᠡᠭᠰᠡᠨ ᠪᠣᠯ ᠬᠡᠷᠡᠭᠦᠯ ᠭᠠᠷᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠪᠠᠢᠭᠰᠠᠨ᠃ ᠪᠠᠲᠤ ᠶ᠋ᠢᠨ ᠴᠢᠷᠠᠢ ᠮᠢᠠᠴᠢ᠌ᠨ ᠤᠯᠠᠢᠷᠠᠵᠤ ᠢᠲᠡᠭᠡᠯᠲᠦ ᠶ᠋ᠢ ᠰᠢᠲᠦ ᠵᠠᠭᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠭᠠᠯᠰᠠᠩ ᠤ᠋ᠨ ᠤᠷᠭᠠᠯᠠᠭᠰᠠᠨ ᠪᠣᠷᠣ ᠦᠷᠢᠶᠡ ᠶ᠋ᠢ ᠴᠢᠬᠢᠳᠡᠨ ᠬᠠᠵᠠᠭᠠᠷᠯᠠᠵᠤ ᠠᠪᠤᠭᠠᠳ ᠬᠣᠩᠭᠣᠷ ᠲᠠᠢ ᠨᠡᠢᠯᠡᠨ ᠡᠮᠡᠭᠡᠯᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠶ᠋ᠢᠨ ᠶᠠᠮᠠᠷ ᠲᠠᠬᠢᠯ ᠢ᠋ ᠪᠤᠷᠤᠭᠤ ᠦᠷᠦᠴᠢᠬᠡᠭᠰᠡᠨ ᠶᠤᠮ ᠪᠣᠯ ᠳᠠ ᠭᠡᠵᠦ ᠬᠣᠩᠭᠣᠷ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠡᠯᠡᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠥᠭᠦᠴᠡᠨ ᠳ᠋ᠦ᠍ᠨᠢ ᠥᠭᠡᠷᠡ ᠭᠣᠣᠯ ᠤ᠋ᠨ ᠤᠰᠤ ᠣᠷᠣᠴᠢᠬᠠᠭᠰᠠᠨ ᠪᠠᠢᠯᠭᠦᠢ ᠳᠡ ᠭᠡᠳ ᠬᠢᠮᠡᠯ ᠬᠥᠭᠵᠢᠯᠲᠡᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ᠄ 《ᠵᠠ ᠪᠢ ᠮᠣᠷᠳᠠᠯᠠ》 ᠭᠡᠳ ᠪᠠᠲᠤ ᠰᠡᠪ ᠬᠢᠲᠡᠯᠡ ᠮᠣᠷᠳᠠᠵᠤ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠪᠤᠯᠠ᠃
ᠪᠠᠲᠤ ᠮᠠᠭᠤ ᠰᠠᠨᠠᠭᠠ ᠲᠠᠢ ᠪᠣᠯᠤᠭᠠᠳ ᠬᠣᠩᠭᠣᠷ ᠲᠤ᠌ ᠦᠨᠡᠨ ᠶᠠᠪᠤᠳᠠᠯ ᠢ᠋ ᠬᠡᠯᠡᠭᠡ ᠦᠭᠡᠢ ᠪᠢᠰᠢ᠂ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠵᠣᠪᠠᠭᠠᠬᠤ ᠦᠭᠡᠢ ᠭᠡᠰᠡᠨ ᠢ᠋ᠶ᠋ᠡᠨ ᠢᠩᠭᠢᠵᠦ ᠵᠠᠢᠮᠤᠷᠠᠭᠤᠯᠤᠨ ᠥᠩᠭᠡᠷᠡᠭᠦᠯᠵᠡᠢ᠃
ᠪᠣᠷᠣ ᠦᠷᠢᠶᠡ ᠪᠤᠯᠭᠢᠵᠤ ᠭᠠᠷᠤᠯᠠ᠃ ᠪᠠᠲᠤ ᠨᠡᠯᠢᠶᠡᠳ ᠲᠣᠭᠲᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠥᠷᠥᠭᠡ ᠪᠡᠨ ᠠᠯᠳᠠᠵᠤ ᠠᠷᠤ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠨᠣᠢᠲᠠᠨ ᠭᠠᠵᠠᠷ ᠳᠡᠭᠡᠷᠡ ᠫᠢᠳ ᠬᠢᠲᠡᠯᠡ ᠤᠨᠠᠭᠠᠳ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠲᠠᠯᠪᠢᠯ ᠦᠭᠡᠢ ᠴᠢᠷᠦᠭᠳᠡᠵᠦ ᠪᠠᠢᠭᠠᠳ ᠲᠣᠭᠲᠠᠭᠠᠪᠠ᠃
ᠡᠨᠡ ᠪᠦᠬᠦᠨ ᠢ᠋ ᠶᠡᠬᠡ ᠭᠡᠷ ᠦ᠋ᠨ ᠭᠠᠳᠠᠨᠠ ᠵᠣᠭᠰᠣᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠰᠣᠯᠣᠩᠭᠠ ᠳᠠᠭᠤ ᠠᠯᠲᠠᠨ 《ᠲᠠᠯᠪᠢᠵᠤ ᠣᠷᠭᠢ᠂ ᠲᠠᠯᠪᠢᠵᠤ ᠣᠷᠭᠢ》 ᠭᠡᠵᠦ ᠬᠠᠰᠬᠢᠷᠤᠨ ᠭᠦᠶᠦᠪᠡ᠃ ᠭᠡᠪᠡᠴᠦ ᠣᠴᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠤᠴᠢᠷ ᠨᠢ ᠪᠠᠲᠤ ᠲᠦᠷᠭᠡᠨ ᠪᠣᠰᠴᠤ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠷᠣ ᠦᠷᠢᠶᠡ ᠶ᠋ᠢ ᠴᠢᠬᠢᠳᠡᠵᠦ ᠪᠠᠢᠭᠠᠳ ᠳᠠᠬᠢᠨ ᠮᠣᠷᠳᠠᠵᠠᠢ᠃
ᠦᠷᠢᠶᠡ ᠣᠮᠣᠭᠰᠢᠨ ᠨᠡᠯᠢᠶᠡᠳ ᠪᠤᠯᠭᠢᠭᠰᠠᠨ ᠪᠣᠯᠪᠠᠴᠤ ᠰᠢᠲᠦ ᠵᠠᠭᠤᠭᠰᠠᠨ ᠪᠠᠲᠤ ᠳᠠᠬᠢᠨ ᠰᠢᠷᠣᠢᠳᠠᠭᠰᠠᠨ ᠦᠭᠡᠢ ᠰᠢᠨᠡ ᠤᠷᠤᠭᠤ ᠨᠢ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠴᠣᠬᠢᠨ ᠵᠠᠯᠠᠭᠰᠠᠭᠠᠷ ᠬᠣᠰᠢᠭᠤ ᠵᠠᠬᠢᠷᠭᠠ ᠤᠷᠤᠭᠤ ᠶᠠᠪᠤᠯᠠ᠃
ᠢᠲᠡᠭᠡᠯᠲᠦ ᠰᠢᠷᠭᠠ ᠮᠣᠷᠢ ᠪᠠᠨ ᠤᠶᠠᠭᠠᠨ ᠡᠴᠡ ᠤᠶᠠᠭᠠᠳ ᠬᠣᠩᠭᠣᠷ ᠤ᠋ᠨ ᠭᠡᠷ ᠲᠦ᠍ ᠣᠷᠣᠯᠠ᠃ ᠰᠦᠷᠦᠩ ᠲᠣᠮᠣ ᠭᠠᠤᠯᠢᠨ ᠰᠢᠨᠠᠭᠠ ᠪᠠᠷᠢᠨ ᠰᠦ ᠰᠠᠮᠤᠷᠴᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠨᠢ ᠥᠷᠢ ᠨᠡᠬᠡᠬᠦ ᠪᠡᠷ ᠭᠢᠴᠡᠭᠡᠨᠡ ᠥᠭᠡᠳᠡ ᠶᠠᠪᠤᠯᠠ᠃ ᠴᠢ ᠨᠥᠭᠥᠭᠡᠳᠦᠷ ᠡᠴᠡ ᠬᠣᠨᠢ ᠪᠠᠨ ᠬᠢᠷᠭᠠᠭᠤᠯᠵᠤ ᠦᠵᠡᠭᠡᠷᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠨᠥᠭᠥᠭᠡᠳᠦᠷ ᠦ᠋ᠨ ᠮᠠᠷᠭᠠᠰᠢ ᠡᠬᠢᠯᠡᠶᠡ ᠭᠡᠵᠦ ᠪᠣᠳᠣᠭᠠᠳ ᠨᠡᠯᠢᠶᠡᠳ ᠤᠯᠤᠰ ᠲᠤ᠌ ᠬᠡᠯᠡ ᠬᠦᠷᠭᠡᠵᠦ ᠣᠷᠬᠢᠭᠰᠠᠨ᠃ ᠥᠨᠥᠳᠥᠷ ᠭᠠᠯᠰᠠᠩ ᠠᠬᠠ ᠶ᠋ᠢ ᠶᠠᠪᠤᠭᠤᠯᠵᠤ ᠬᠠᠰᠢᠶᠠᠨ ᠡᠴᠡ ᠮᠠᠢᠬᠠᠨ ᠠᠪᠴᠢᠷᠠᠭᠤᠯᠤᠶᠠ᠃ ᠣᠷᠣᠢ ᠬᠡᠳᠦᠨ ᠪᠢᠰᠢᠯᠠᠭ ᠰᠢᠬᠠᠴᠢᠬᠠᠶᠠ᠂ ᠲᠠ ᠰᠠᠨᠠᠭᠠ ᠵᠣᠪᠠᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ᠃
ᠢᠲᠡᠭᠡᠯᠲᠦ ᠪᠡᠷᠢ ᠪᠡᠨ ᠪᠠᠬᠠᠳᠤᠯᠲᠠᠢ ᠪᠠᠷ ᠬᠠᠷᠠᠵᠤ ᠰᠡᠳᠬᠢᠯ ᠳᠦᠭᠦᠷᠡᠩ ᠮᠦᠰᠢᠶᠡᠪᠡ᠃ ᠰᠦᠷᠦᠩ ᠪᠣᠯ ᠢᠲᠡᠭᠡᠯᠲᠦ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠲᠣᠬᠢᠷᠠᠭᠰᠠᠨ ᠪᠡᠷᠢ ᠪᠥᠭᠡᠳ ᠦᠨᠡᠨ ᠳ᠋ᠡᠭᠡᠨ ᠪᠠᠷᠠᠭᠤᠨ ᠭᠠᠷ ᠪᠠᠢᠯᠠ᠃ ᠥᠪᠡᠷ ᠢ᠋ᠶ᠋ᠡᠨ ᠠᠵᠢᠯ ᠳ᠋ᠤ᠌ ᠰᠦᠷᠡᠬᠡᠢ ᠡᠴᠡ ᠭᠠᠳᠠᠨᠠ ᠪᠤᠰᠤᠳ ᠢ᠋ ᠠᠵᠢᠯ ᠬᠢᠯᠭᠡᠵᠦ ᠴᠢᠳᠠᠳᠠᠭ ᠤᠷᠠᠨ ᠨᠠᠷᠢᠨ ᠤᠬᠠᠭᠠᠨ ᠲᠠᠢ᠃ ᠪᠠᠰᠠ ᠣᠯᠵᠠ ᠣᠯᠬᠤ ᠠᠵᠢᠯ ᠤ᠋ᠨ ᠲᠥᠷᠥ ᠮᠡᠳᠡᠨᠡ᠃
ᠪᠠᠭᠤᠭᠠᠳ ᠮᠣᠷᠳᠠᠭᠰᠠᠨ ᠬᠥᠮᠦᠨ ᠢ᠋ᠶ᠋ᠡᠷ ᠪᠣᠯᠪᠠᠴᠤ ᠠᠳᠠᠭ ᠲᠠᠭᠠᠨ ᠲᠦᠯᠡᠭᠡ ᠪᠡᠨ ᠬᠠᠭᠠᠯᠤᠭᠤᠯᠤᠭᠠᠳ ᠠᠪᠴᠢᠬᠠᠨᠠ᠃ ᠬᠤᠯᠤ ᠠᠢᠷᠠᠭ ᠥᠭᠪᠡᠯ ᠤᠨᠠᠭᠠ ᠲᠠᠲᠠᠭᠤᠯᠵᠤ ᠣᠷᠬᠢᠨᠠ᠃
ᠥᠩᠭᠡᠷᠡᠭᠰᠡᠨ ᠵᠢᠯ ᠠᠬᠤᠷ ᠬᠢᠷᠭᠠᠬᠤ ᠪᠠᠷ ᠴᠤᠭᠯᠠᠷᠠᠵᠤ ᠢᠷᠡᠭᠰᠡᠨ ᠣᠯᠠᠨ ᠬᠥᠮᠦᠨ ᠢ᠋ ᠳᠥᠷᠪᠡᠨ ᠬᠡᠰᠡᠭ ᠪᠣᠯᠭᠠᠭᠠᠳ ᠳᠤᠮᠳᠠ ᠨᠢ ᠵᠤᠵᠠᠭᠠᠨ ᠴᠠᠢ᠂ ᠰᠣᠨᠣᠮ ᠬᠠᠳᠠᠭ ᠲᠠᠯᠪᠢᠵᠤ 《ᠬᠡᠨ ᠦ᠌ ᠬᠡᠰᠡᠭ ᠣᠯᠠᠨ ᠬᠣᠨᠢ ᠬᠢᠷᠭᠠᠪᠠᠯ ᠲᠡᠷᠡ ᠡᠭᠦᠨ ᠢ᠋ ᠠᠪᠤᠨᠠ》 ᠭᠡᠰᠡᠨ ᠪᠥᠭᠡᠳ ᠴᠠᠢ᠂ ᠰᠣᠨᠣᠮ ᠬᠠᠳᠠᠭ ᠠᠪᠬᠤ ᠭᠡᠵᠦ ᠬᠡᠰᠡᠭ ᠪᠦᠬᠦᠨ ᠥᠷᠢᠰᠦᠯᠳᠦᠨ᠂ ᠨᠠᠷᠠ ᠰᠢᠩᠭᠡᠬᠦ ᠦᠶᠡ ᠳ᠋ᠦ᠍ ᠠᠵᠢᠯ ᠭᠦᠢᠴᠡᠵᠦ ᠪᠢᠯᠡ᠃
ᠡᠭᠦᠨ ᠢ᠋ ᠪᠠᠬᠠᠳᠤᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢᠲᠡᠭᠡᠯᠲᠦ 《ᠴᠢ ᠮᠢᠨᠦ ᠪᠡᠷᠢ ᠶ᠋ᠢ ᠶᠠᠭᠤ ᠭᠡᠵᠦ ᠪᠠᠢᠯᠠ᠃ ᠵᠠᠶᠠᠭᠠᠲᠠᠢ ᠬᠥᠮᠦᠨ ᠭᠡᠳᠡᠭ ᠴᠢᠨᠢ ᠤᠭᠰᠠᠭᠠᠲᠠᠢ ᠬᠥᠮᠦᠨ ᠢ᠋ ᠪᠢᠰᠢ᠂ ᠤᠬᠠᠭᠠᠨᠲᠠᠢ ᠬᠥᠮᠦᠨ ᠢ᠋ ᠬᠡᠯᠡᠳᠡᠭ ᠶᠤᠮ ᠰᠢᠦ ᠳᠡ》 ᠭᠡᠵᠦ ᠳᠤᠯᠵᠢᠨ ᠢ᠋ ᠳᠠᠪᠠᠯᠠᠵᠤ ᠪᠢᠯᠡ᠃
ᠬᠣᠲᠠ ᠳ᠋ᠤ᠌ ᠲᠠᠷᠪᠠᠭᠠᠨ ᠤ᠋ ᠠᠷᠠᠰᠤ ᠦᠨᠡ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ ᠮᠡᠳᠡᠭᠡᠳ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠪᠠᠬᠠᠨ ᠲᠠᠷᠪᠠᠭᠠᠴᠢᠨ ᠳ᠋ᠤ᠌ ᠡᠳᠦᠷ ᠦ᠋ᠨ ᠬᠣᠶᠠᠷ ᠠᠷᠠᠰᠤ ᠪᠠᠷ ᠤᠨᠤᠭᠠ ᠬᠥᠯᠥᠰᠥᠯᠡᠨ ᠥᠭᠴᠦ ᠬᠡᠳᠦᠨ ᠵᠠᠭᠤᠨ ᠲᠠᠷᠪᠠᠭᠠᠨ ᠤ᠋ ᠠᠷᠠᠰᠤ ᠠᠪᠤᠭᠰᠠᠨ ᠢ᠋ ᠢᠲᠡᠭᠡᠯᠲᠦ ᠬᠣᠲᠠ ᠣᠷᠣᠭᠤᠯᠤᠨ ᠬᠤᠳᠠᠯᠳᠤᠵᠤ ᠦᠯᠡᠮᠵᠢ ᠠᠰᠢᠭ ᠣᠯᠵᠠᠢ᠃
《ᠮᠠᠨ ᠤ᠋ ᠰᠦᠷᠦᠩ ᠠᠳᠬᠤ ᠰᠢᠷᠣᠢ ᠠᠪᠤᠭᠠᠳ ᠭᠠᠷᠬᠤ ᠳ᠋ᠤ᠌ ᠮᠥᠩᠭᠥ ᠪᠣᠯᠭᠠᠴᠢᠬᠠᠭᠠᠳ ᠢᠷᠡᠬᠦ ᠤᠬᠠᠭᠠᠨᠲᠠᠢ ᠬᠥᠮᠦᠨ》 ᠭᠡᠵᠦ ᠢᠲᠡᠭᠡᠯᠲᠦ ᠪᠡᠷᠢ ᠪᠡᠨ ᠳᠣᠲᠣᠷᠠ ᠪᠠᠨ ᠮᠠᠭᠲᠠᠵᠤ ᠶᠠᠪᠤᠳᠠᠭ ᠪᠣᠯᠵᠠᠢ᠃
ᠥᠪᠡᠷ ᠡᠴᠡ ᠨᠢ ᠭᠠᠷᠤᠮᠠ ᠦᠭᠡᠢ ᠤᠬᠠᠭᠠᠨ᠂ ᠰᠦᠷᠦᠩ ᠦ᠋ᠨ ᠬᠡᠯᠡᠭᠰᠡᠨ ᠦᠭᠡ ᠬᠢᠭᠰᠡᠨ ᠠᠵᠢᠯ ᠪᠦᠬᠦᠨ ᠨᠢ ᠦᠷᠭᠦᠯᠵᠢ ᠵᠥᠪ ᠤᠷᠤᠭᠰᠢᠲᠠᠢ ᠪᠣᠯᠤᠨ ᠲᠡᠭᠦᠨ ᠳ᠋ᠦ᠍ ᠪᠠᠬᠠᠷᠬᠠᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠢᠲᠡᠭᠡᠯᠲᠦ ᠥᠪᠡᠷ ᠢ᠋ᠶ᠋ᠡᠨ ᠮᠠᠲᠠᠯ ᠦᠭᠡᠢ ᠰᠦᠷᠦᠩ ᠦ᠋ᠨ ᠭᠠᠷ ᠲᠤ᠌ ᠣᠷᠣᠵᠤ ᠵᠠᠷᠢᠮ ᠳ᠋ᠠᠭᠠᠨ ᠵᠥᠷᠢᠬᠦ ᠳ᠋ᠦ᠍ ᠨᠢ ᠠᠶᠠ ᠶ᠋ᠢ ᠨᠢ ᠳᠠᠭᠠᠳᠠᠭ ᠪᠣᠯᠪᠠ᠃
ᠰᠠᠶᠢᠬᠠᠨ ᠰᠢᠭ᠋ ᠢᠲᠡᠭᠡᠯᠲᠦ ᠨᠤᠲᠤᠭ ᠤ᠋ᠨ ᠨᠢᠭᠡ ᠬᠥᠮᠦᠨ ᠡᠴᠡ ᠦᠨᠡᠲᠡᠢ ᠮᠣᠷᠢ ᠠᠪᠬᠤ ᠪᠠᠷ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠰᠦ ᠬᠥᠭᠡᠰᠦᠷᠡᠭᠦᠯᠵᠦ ᠪᠠᠢᠭᠰᠠᠨ ᠰᠦᠷᠦᠩ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠮᠢᠨᠢ ᠡᠳᠦᠷ ᠰᠥᠨᠢ ᠦᠭᠡᠢ ᠵᠢᠳᠬᠦᠵᠦ ᠣᠯᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠰᠢᠷᠣᠢ ᠰᠢᠭ᠋ ᠰᠠᠴᠤᠭᠠᠳ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠭᠡᠬᠦ ᠳ᠋ᠦ᠍
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠢᠲᠡᠭᠡᠯᠲᠦ ᠮᠠᠢᠮᠠᠢ ᠬᠢᠬᠦ ᠳ᠋ᠡᠭᠡᠨ ᠬᠥᠮᠦᠨ ᠢ᠋ᠶ᠋ᠡᠷ ᠵᠢᠭᠠᠯᠭᠠᠬᠤ ᠦᠭᠡᠢ ᠪᠠᠢᠬᠤ ᠠ᠋ ᠭᠡᠵᠦ ᠮᠣᠷᠢ ᠪᠠᠨ ᠦᠨᠡ ᠬᠦᠷᠭᠡᠵᠦ ᠥᠭᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠶᠣᠵᠣᠲᠠᠢ ᠬᠡᠯᠡᠭᠡᠳ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠴᠠᠭᠠᠰᠤᠨ ᠮᠠᠯᠠᠭᠠᠢ᠂ ᠮᠠᠨ ᠤ᠋ ᠠᠪᠤ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠪᠠᠭᠲᠠᠬᠤ ᠦᠭᠡᠢ ᠭᠡᠳ ᠰᠦᠷᠦᠩ ᠬᠥᠭᠵᠢᠯᠲᠡᠢ ᠢᠨᠢᠶᠡᠵᠦ ᠪᠢᠯᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠠᠳᠠᠨᠠ ᠨᠣᠬᠠᠢ ᠬᠤᠴᠠᠭᠰᠠᠨ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠨᠥᠭᠦᠭᠡ ᠬᠥᠮᠦᠨ 《ᠲᠠᠨ ᠤ᠋ ᠬᠢ ᠣᠪᠣᠭᠠ ᠬᠤᠴᠠᠳᠠᠭ ᠰᠦᠷᠡᠬᠡᠢ ᠨᠣᠬᠠᠢ ᠲᠠᠢ ᠪᠣᠯᠵᠠᠢ》 ᠭᠡᠵᠦ ᠰᠦᠷᠦᠩ ᠢ᠋ ᠳᠠᠭᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠭᠣᠯᠠ ᠰᠠᠢᠲᠠᠢ ᠨᠣᠬᠠᠢ ᠢᠩᠭᠢᠵᠦ ᠰᠠᠢᠨ ᠬᠤᠴᠠᠳᠠᠭ ᠶᠤᠮ᠃ ᠲᠠᠨ ᠤ᠋ ᠬᠢ ᠮᠠᠭᠤ ᠬᠤᠴᠠᠳᠠᠭ ᠪᠣᠯ ᠨᠢᠭᠡ ᠪᠣᠯ ᠮᠠᠭᠤ ᠨᠣᠬᠠᠢ ᠲᠠᠢ ᠪᠠᠢᠵᠠᠢ᠃ ᠡᠰᠡᠬᠦᠯᠡ ᠬᠠᠷᠠᠮᠯᠠᠭᠠᠳ ᠲᠡᠵᠢᠭᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠵᠤ ᠯᠠ ᠳᠠ ᠭᠡᠵᠦ ᠰᠦᠷᠦᠩ ᠠᠵᠢᠭ ᠦᠭᠡᠢ ᠬᠡᠯᠡᠭᠡᠳ ᠳᠥᠪᠥᠢᠭᠰᠡᠨ ᠰᠦ ᠪᠡᠨ ᠰᠠᠮᠤᠷᠤᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠲᠠ ᠬᠠᠯᠠᠭᠤᠨ ᠰᠦ ᠬᠢᠯᠭᠡᠬᠦ ᠤᠤ? ᠭᠡᠵᠦ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠶᠤᠮ ᠰᠢᠭ ᠲᠠᠢᠪᠤᠩ ᠠᠰᠠᠭᠤᠪᠠ᠃
ᠢᠲᠡᠭᠡᠯᠲᠦ ᠲᠡᠷᠡ ᠮᠣᠷᠢ ᠶ᠋ᠢ ᠠᠪᠤᠭᠠ ᠦᠭᠡᠢ ᠪᠥᠭᠡᠳ ᠬᠥᠮᠦᠨ ᠳᠣᠷᠣᠮᠵᠢᠯᠠᠬᠤ ᠭᠡᠳ ᠠᠮᠠ ᠤᠷᠤᠭᠤ ᠪᠠᠨ ᠠᠯᠠᠭᠠᠳᠠᠭᠤᠯᠵᠤ ᠦᠭᠡ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠴᠢᠷᠠᠢ ᠨᠢ ᠮᠢᠠᠴᠢ᠌ᠨ ᠬᠣᠷᠣ ᠨᠢ ᠪᠤᠴᠠᠯᠤᠨ ᠰᠠᠭᠤᠭᠰᠠᠨ ᠬᠥᠮᠦᠨ ᠢ᠋ ᠬᠠᠷᠠᠭᠠᠳ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠦ᠂ ᠪᠡᠷᠢ ᠳ᠋ᠡᠭᠡᠨ ᠪᠠᠬᠠᠷᠬᠠᠨ ᠪᠠᠢᠵᠤ ᠪᠢᠯᠡ᠃
ᠲᠡᠷᠡ ᠡᠳᠦᠷ ᠰᠣᠯᠣᠩᠭᠠ ᠬᠣᠨᠢ ᠬᠠᠷᠢᠭᠤᠯᠪᠠ᠃ ᠰᠠᠢᠬᠠᠨ ᠵᠤᠨ ᠤ᠋ ᠡᠳᠦᠷ ᠮᠣᠷᠢ ᠲᠠᠢ ᠬᠣᠨᠢ ᠬᠠᠷᠢᠭᠤᠯᠬᠤ ᠶ᠋ᠢᠨ ᠰᠠᠢᠬᠠᠨ ᠢ᠋ ᠵᠥᠪᠬᠡᠨ ᠦᠵᠡᠭᠰᠡᠨ ᠬᠥᠮᠦᠨ ᠯᠡ ᠮᠡᠳᠡᠨᠡ᠃ ᠬᠠᠮᠢᠭᠠᠰᠢ ᠪᠠᠨ ᠬᠠᠷᠠᠪᠠᠯ ᠴᠡᠴᠡᠭ ᠨᠣᠭᠣᠭᠠ ᠠᠮᠢᠰᠬᠤᠭᠠᠯᠠᠬᠤ ᠳ᠋ᠤ᠌ ᠳᠠᠩᠴᠢ ᠰᠠᠭᠠᠳ ᠪᠣᠯᠬᠤ ᠶᠠᠭᠤᠮᠠ ᠦᠭᠡᠢ ᠠᠵᠢ᠃
ᠪᠠᠲᠤ ᠳ᠋ᠤ᠌ ᠲᠠᠮᠠᠬᠢᠨ ᠤ᠋ ᠤᠭᠤᠲᠠ ᠬᠡᠳᠦᠨ ᠡᠳᠦᠷ ᠤᠷᠠᠯᠠᠨ ᠰᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠥᠨᠥᠳᠥᠷ ᠳᠠᠭᠤᠰᠬᠠᠶᠠ ᠭᠡᠵᠦ ᠮᠣᠷᠢ ᠪᠠᠨ ᠴᠢᠳᠦᠷᠯᠡᠨ ᠲᠠᠯᠪᠢᠭᠠᠳ ᠣᠶᠣᠵᠤ ᠪᠠᠢᠲᠠᠯᠠ ᠳᠡᠷᠭᠡᠳᠡ ᠨᠢ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠨᠢ ᠲᠣᠭᠲᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠪᠦᠳᠦᠭᠦᠨ ᠳᠠᠭᠤᠲᠠᠢ ᠬᠥᠮᠦᠨ ᠠᠰᠠᠭᠤᠬᠤ ᠳ᠋ᠤ᠌ ᠰᠣᠴᠢᠨ ᠬᠠᠷᠠᠪᠠᠯ ᠪᠠᠳᠠᠷᠴᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠭᠲᠠᠵᠤ ᠪᠠᠢᠨᠠ᠃ ᠲᠠ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ?
ᠪᠠᠳᠠᠷᠴᠢ ᠰᠠᠢᠬᠠᠨ ᠪᠣᠷᠣᠯᠠᠭ ᠮᠣᠷᠢ ᠤᠨᠤᠵᠤ ᠨᠢᠳᠦ ᠪᠤᠯᠢᠶᠠᠭᠰᠠᠨ ᠥᠨᠳᠥᠷ ᠬᠡᠭᠡᠷ ᠮᠣᠷᠢ ᠬᠥᠲᠥᠯᠵᠡᠢ᠃ ᠲᠦᠷ ᠵᠣᠭᠰᠣᠬᠤ ᠳ᠋ᠤ᠌ ᠨᠢ ᠲᠡᠷᠡ ᠬᠣᠶᠠᠷ ᠮᠣᠷᠢ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠨ ᠭᠠᠵᠠᠷ ᠴᠠᠪᠴᠢᠯᠠᠵᠤ ᠪᠠᠢᠭᠠ ᠨᠢ ᠰᠣᠯᠣᠩᠭᠠ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠲᠥᠷᠥᠭᠦᠯᠪᠡ᠃
《ᠪᠠᠲᠤ ᠴᠢᠨᠢ ᠥᠪᠡᠷ ᠦ᠋ᠨ ᠭᠡᠬᠦ ᠮᠣᠷᠢ ᠦᠭᠡᠢ ᠤᠴᠢᠷ ᠡᠴᠡ ᠥᠨᠥ ᠥᠷᠯᠥᠭᠡ ᠠᠮᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠡᠮᠨᠢᠭ ᠦᠷᠢᠶᠡ ᠤᠨᠤᠭᠠᠳ ᠶᠠᠪᠤᠭᠰᠠᠨ᠃ ᠡᠢᠮᠦ ᠮᠣᠷᠢ ᠲᠠᠢ ᠪᠣᠯ ᠬᠠᠮᠢᠭᠠ ᠡᠴᠡ ᠲᠡᠭᠡᠵᠦ ᠪᠣᠭᠣᠭᠳᠠᠬᠤ ᠪᠣᠢ᠃ ᠴᠢ ᠡᠨᠡ ᠬᠣᠶᠠᠷ ᠤ᠋ᠨ ᠨᠢᠭᠡ ᠶ᠋ᠢ ᠠᠪᠴᠤ ᠪᠠᠲᠤ ᠳ᠋ᠠᠭᠠᠨ ᠥᠭ》 ᠭᠡᠵᠦ ᠰᠡᠳᠬᠢᠯ ᠨᠢ ᠥᠭᠡᠯᠡᠨ ᠭᠤᠶᠤᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠭᠤᠸᠠᠢ᠂ ᠲᠠ ᠡᠨᠡ ᠬᠣᠶᠠᠷ ᠮᠣᠷᠢᠨ ᠤ᠋ ᠪᠠᠨ ᠨᠢᠭᠡ ᠶ᠋ᠢ ᠬᠤᠳᠠᠯᠳᠤᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠴᠢ ᠮᠣᠷᠢ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠡᠳ ᠪᠠᠳᠠᠷᠴᠢ ᠮᠣᠷᠢᠨ ᠡᠴᠡ ᠪᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ᠂ ᠬᠤᠳᠠᠯᠳᠤᠪᠠᠯ ᠠᠪᠤᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡ ᠬᠠᠨᠤᠪᠠᠯ ᠬᠤᠳᠠᠯᠳᠤᠬᠤ ᠦᠭᠡᠢ ᠶᠠᠭᠤᠮᠠ ᠠᠬᠠ ᠳ᠋ᠤᠨᠢ ᠪᠠᠢᠳᠠᠭ ᠦᠭᠡᠢ ᠶᠤᠮ ᠰᠢᠦ ᠳᠡ ᠭᠡᠳ ᠪᠠᠳᠠᠷᠴᠢ ᠨᠣᠭᠣᠭᠠᠨ ᠳᠡᠭᠡᠷᠡ ᠲᠠᠪᠠᠯᠠᠨ ᠰᠠᠭᠤᠵᠤ ᠲᠠᠮᠠᠬᠢ ᠲᠠᠲᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠶᠠᠮᠠᠷ ᠦᠨᠡ ᠪᠡᠷ ᠥᠭᠬᠦ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠦᠨᠡᠬᠡᠷ ᠠᠪᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠠᠪᠤᠶᠠ ᠯᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠷᠢᠨ ᠶᠠᠩᠴᠢᠶᠠᠨ ᠲᠣᠭᠠᠯᠠᠪᠠᠯ ᠳᠤᠷᠠᠲᠠᠢ ᠪᠠᠨ ᠮᠤᠯᠲᠤᠯᠤᠭᠠᠳ ᠠᠪ᠃ ᠰᠣᠯᠣᠩᠭᠠ ᠮᠣᠷᠢᠳ ᠤᠷᠤᠭᠤ ᠬᠠᠷᠠᠨ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠠᠢᠯᠠ᠃ ᠲᠠᠷᠭᠤ ᠬᠦᠴᠦ ᠪᠡᠨ ᠠᠪᠤᠭᠰᠠᠨ ᠬᠣᠶᠠᠷ ᠰᠠᠢᠬᠠᠨ ᠠᠮᠢᠲᠠᠨ ᠰᠡᠳᠬᠢᠯ ᠢ᠋ ᠨᠢ ᠬᠥᠳᠡᠯᠭᠡᠨ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠶᠠᠪᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠭᠡᠰᠡᠨ ᠶᠤᠮ ᠰᠢᠭ ᠬᠠᠵᠠᠭᠠᠷ ᠳᠠᠷᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠡᠨᠡ ᠪᠥᠭᠡᠵᠢ ᠪᠡᠨ ᠥᠭᠪᠡᠯ ᠲᠠ ᠨᠢᠭᠡ ᠶ᠋ᠢ ᠨᠢ ᠥᠭᠬᠦ ᠤᠤ? ᠭᠡᠳ ᠰᠣᠯᠣᠩᠭᠠ ᠬᠤᠷᠤᠭᠤᠨ ᠤ᠋ ᠪᠠᠨ ᠪᠥᠭᠡᠵᠢ ᠶ᠋ᠢ ᠦᠵᠡᠭᠦᠯᠪᠡ᠃ ᠰᠣᠯᠣᠩᠭᠠ ᠶ᠋ᠢᠨ ᠬᠤᠷᠤᠭᠤ ᠤᠷᠤᠭᠤ ᠪᠠᠳᠠᠷᠴᠢ ᠬᠠᠷᠠᠯᠠ᠃ ᠪᠦᠳᠦᠭᠦᠨ ᠭᠡᠭᠴᠢ ᠶ᠋ᠢᠨ ᠰᠢᠵᠢᠷ ᠪᠥᠭᠡᠵᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ ᠲᠣᠭᠯᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢ ᠪᠣᠢ᠃ ᠠᠪᠤᠭᠠᠳ ᠠᠯᠢ᠃
ᠪᠠᠳᠠᠷᠴᠢ ᠪᠥᠭᠡᠵᠢ ᠶ᠋ᠢ ᠠᠪᠴᠤ ᠭᠠᠷ ᠳᠡᠭᠡᠷᠡ ᠪᠡᠨ ᠬᠠᠶᠠᠨ ᠦᠵᠡᠪᠡ᠃ ᠨᠢᠭᠡ ᠮᠣᠷᠢ ᠪᠠᠢᠲᠤᠭᠠᠢ ᠬᠣᠶᠠᠷ ᠮᠣᠷᠢ ᠪᠠᠨ ᠥᠭᠭᠦᠭᠡᠳ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠨ ᠶᠠᠪᠤᠬᠤ ᠳ᠋ᠤ᠌ ᠠᠯᠳᠠᠬᠤ ᠦᠭᠡᠢ ᠬᠠᠷᠢᠨ ᠬᠣᠨᠵᠢᠬᠤ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠤᠷᠪᠠᠬᠠᠨ ᠴᠢᠨ ᠣᠷᠴᠢᠮ ᠶᠤᠮ ᠤᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠲᠠᠪᠤᠨ ᠴᠢᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠡᠭᠡᠭᠡᠳ ᠮᠣᠷᠢ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠬᠡᠷᠡᠭ ᠲᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠨᠢ ᠮᠠᠢᠮᠠᠢ ᠬᠢᠪᠡᠯ ᠪᠤᠴᠠᠳᠠᠭ ᠦᠭᠡᠢ ᠬᠥᠮᠦᠨ ᠰᠢᠦ᠂ ᠠᠵᠠᠨ ᠳ᠋ᠤ᠌ ᠮᠠᠭᠤ ᠪᠠᠢᠳᠠᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠪᠤᠴᠠᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢ ᠨᠢ ᠴᠦ᠍ ᠨᠣᠮᠣᠬᠠᠨ᠂ ᠬᠥᠯ ᠬᠥᠩᠭᠡᠨᠲᠡᠢ᠂ ᠵᠠᠯᠠᠭᠤ ᠮᠣᠷᠢᠳ ᠰᠢᠦ᠃ ᠤᠭ ᠨᠢ ᠵᠠᠷᠤᠮᠠᠷ ᠦᠭᠡᠢ ᠯᠡ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠠᠷᠭᠠ ᠦᠭᠡᠢ ᠯᠡ ᠨᠢᠭᠡ ᠶ᠋ᠢ ᠨᠢ ᠥᠭᠴᠢᠬᠡ ᠯᠡ ᠳᠡ᠃
ᠬᠡᠰᠡᠭ ᠴᠠᠭᠠᠷᠠᠭᠤᠯᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠪᠠᠳᠠᠷᠴᠢ ᠬᠡᠭᠡᠷ ᠮᠣᠷᠢ ᠪᠠᠨ ᠪᠥᠭᠡᠵᠢ ᠪᠡᠷ ᠲᠤᠯᠭᠠᠵᠤ ᠰᠣᠯᠢᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠢᠮᠠᠢ ᠨᠠᠭᠠᠨᠠ ᠲᠠᠢ ᠴᠠᠭᠠᠨᠠ ᠲᠠᠢ ᠪᠠᠢᠳᠠᠭ᠃ ᠪᠤᠴᠠᠬᠤ ᠭᠡᠪᠡᠯ ᠠᠬᠠ ᠨᠢ ᠬᠦᠯᠢᠶᠡᠬᠦ ᠦᠭᠡᠢ ᠰᠢᠦ᠃ ᠮᠠᠢᠮᠠᠢ ᠶ᠋ᠢ ᠬᠢᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠪᠤᠴᠠᠵᠤ ᠪᠣᠯᠬᠤ ᠦᠭᠡᠢ᠃ ᠠᠵᠠᠨ ᠳ᠋ᠤ᠌ ᠮᠠᠭᠤ ᠭᠡᠯᠡ᠃
ᠬᠡᠳᠦᠨ ᠮᠣᠷᠢᠨ ᠤ᠋ ᠦᠨᠡ ᠪᠡᠷ ᠨᠢᠭᠡ ᠮᠣᠷᠢ ᠪᠠᠨ ᠥᠭᠭᠦᠭᠰᠡᠨ ᠪᠠᠳᠠᠷᠴᠢ ᠲᠩᠷᠢ ᠲᠡᠢ ᠶᠠᠪᠤᠭᠠ ᠳ᠋ᠠᠭᠠᠨ ᠪᠠᠬᠠᠷᠬᠠᠨ ᠶᠠᠪᠤᠭᠰᠠᠨ ᠪᠣᠯ ᠪᠠᠲᠤ ᠶ᠋ᠢ ᠪᠡᠨ ᠥᠪᠡᠷ ᠦ᠋ᠨ ᠭᠡᠬᠦ ᠤᠨᠤᠬᠤ ᠮᠣᠷᠢ ᠲᠠᠢ ᠪᠣᠯᠭᠠᠭᠰᠠᠨ ᠳ᠋ᠠᠭᠠᠨ ᠰᠣᠯᠣᠩᠭᠠ ᠪᠠᠶᠠᠷᠯᠠᠨᠠ᠃ 《ᠣᠳᠣ ᠲᠡᠷᠡ ᠮᠢᠨᠢ ᠡᠭᠦᠨ ᠢ᠋ᠶ᠋ᠡᠨ ᠤᠨᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠬᠡᠨ ᠴᠦ᠍ ᠬᠠᠷᠠᠮᠯᠠᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠲᠠᠭᠠᠯᠠᠨ ᠵᠣᠭᠰᠣᠪᠠ᠃ ᠡᠮᠡᠭᠡᠯᠯᠡᠵᠦ ᠤᠨᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ 《ᠪᠠᠲᠤ ᠮᠢᠨᠢ ᠡᠬᠢᠯᠡᠵᠦ ᠤᠨᠤᠭ》 ᠭᠡᠳ ᠪᠣᠯᠢᠪᠠ᠃
ᠣᠷᠣᠢ ᠶ᠋ᠢᠨ ᠬᠣᠨᠢ ᠣᠷᠣᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌ ᠬᠡᠭᠡᠷ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠭᠡᠷ ᠦ᠋ᠨ ᠵᠦᠭ ᠬᠣᠨᠢ ᠪᠠᠨ ᠭᠡᠯᠢᠵᠦ ᠡᠬᠢᠯᠡᠪᠡ᠃ ᠢᠩᠭᠢᠵᠦ ᠶᠠᠪᠤᠲᠠᠯᠠ ᠰᠡᠳᠬᠢᠯ ᠳ᠋ᠦ᠍ ᠨᠢ ᠨᠢᠭᠡ ᠰᠦᠷᠡᠬᠡᠢ ᠶᠠᠭᠤᠮᠠ ᠣᠷᠣᠵᠤ ᠢᠷᠡᠯᠡ᠃ 《ᠡᠭᠦᠨ ᠢ᠋ ᠬᠠᠷᠠᠭᠠᠳ ᠠᠪᠤ ᠶᠠᠭᠤᠨ ᠮᠣᠷᠢ ᠪᠣᠢ ᠭᠡᠪᠡᠯ ᠶᠠᠭᠤ ᠭᠡᠬᠦ ᠪᠣᠢ?》᠂ 《ᠪᠥᠭᠡᠵᠢ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?》 ᠭᠡᠪᠡᠯ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠬᠠᠷᠢᠭᠤ ᠨᠢ ᠣᠯᠳᠠᠬᠤ ᠦᠭᠡᠢ ᠪᠤᠬᠢᠨᠢᠳᠤᠨ ᠠᠶᠤᠵᠤ ᠡᠬᠢᠯᠡᠪᠡ᠃
ᠵᠠᠮ ᠳ᠋ᠤᠨᠢ ᠪᠡᠯᠴᠢᠵᠦ ᠪᠠᠢᠭᠠ ᠰᠤᠪᠠᠢ ᠠᠳᠤᠭᠤ ᠨᠢ ᠲᠠᠭᠠᠷᠠᠯᠳᠤᠬᠤ ᠳ᠋ᠤ᠌ ᠨᠣᠭᠲᠣ ᠶ᠋ᠢ ᠨᠢ ᠮᠤᠯᠲᠤᠯᠤᠨ ᠲᠠᠯᠪᠢᠪᠠ᠃ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠨ ᠣᠴᠢᠬᠤ ᠳ᠋ᠤ᠌ ᠵᠡᠯᠡ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠲᠤ ᠶ᠋ᠢᠨ ᠡᠮᠡᠭᠡᠯ ᠲᠡᠢ ᠦᠯᠦ ᠲᠠᠨᠢᠬᠤ ᠴᠠᠪᠢᠳᠠᠷ ᠮᠣᠷᠢ ᠪᠠᠢᠯᠠ᠃
ᠪᠠᠲᠤ ᠲᠡᠷᠡ ᠡᠳᠦᠷ ᠢᠲᠡᠭᠡᠯᠲᠦ ᠳ᠋ᠦ᠍ ᠰᠢᠷᠠᠯᠠᠬᠠᠭᠰᠠᠨ ᠳ᠋ᠠᠭᠠᠨ ᠬᠣᠷᠢᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠷ ᠵᠠᠯᠠᠭᠤᠬᠠᠨ ᠪᠥᠭᠡᠳ ᠪᠡᠶᠡ ᠪᠢᠯᠳᠠᠷ ᠰᠠᠢᠲᠠᠢ ᠳᠣᠣᠷᠠ ᠪᠠᠨ ᠰᠠᠢᠬᠠᠨ ᠰᠠᠢᠪᠤᠷ ᠴᠠᠪᠢᠳᠠᠷ ᠮᠣᠷᠢ ᠠᠪᠴᠠᠢ᠃ ᠠᠱ᠌ᠢᠭᠦᠢ ᠲᠡᠷᠡ ᠡᠳᠦᠷ ᠭᠢᠴᠡᠭᠡᠨᠡ ᠶ᠋ᠢᠨ ᠭᠣᠣᠯ ᠣᠷᠣᠬᠤ ᠪᠠᠷ ᠶᠠᠪᠤᠭᠰᠠᠨ ᠢᠲᠡᠭᠡᠯᠲᠦ ᠪᠤᠴᠠᠵᠤ ᠢᠷᠡᠭᠰᠡᠨ ᠦᠭᠡᠢ᠃
ᠰᠥᠨᠢ ᠨᠢ ᠰᠣᠯᠣᠩᠭᠠ ᠨᠥᠬᠥᠷ ᠲᠡᠭᠡᠨ ᠮᠣᠷᠢ ᠶᠠᠭᠤ ᠪᠠᠷ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠱ᠌ᠢ ᠡᠪᠦᠭᠡᠨ ᠮᠢᠨᠢ᠃ ᠠᠪᠤ ᠴᠢᠨᠢ ᠴᠢᠮᠠ ᠡᠴᠡ ᠪᠥᠭᠡᠵᠢ ᠨᠡᠬᠡᠨᠡ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠬᠠᠳᠠᠮ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠠᠷᠢᠴᠠᠭᠠ ᠤᠯᠠᠮ ᠮᠠᠭᠤᠳᠠᠨᠠ᠃ ᠶᠡᠷᠦ ᠨᠢ ᠡᠨᠡ ᠬᠡᠭᠡᠷ ᠮᠣᠷᠢ ᠪᠢᠳᠡᠨ ᠳ᠋ᠦ᠍ ᠵᠢᠷᠭᠠᠯ ᠥᠭᠬᠦ ᠦᠭᠡᠢ᠂ ᠵᠣᠪᠠᠯᠠᠩ ᠯᠠ ᠠᠪᠴᠢᠷᠠᠬᠤ ᠪᠠᠢᠬᠤ ᠳᠠ᠃ ᠭᠡᠪᠡᠴᠦ ᠣᠳᠣ ᠲᠡᠭᠦᠨ ᠢ᠋ ᠶᠠᠷᠢᠬᠤ ᠶ᠋ᠢᠨ ᠬᠡᠷᠡᠭ ᠠᠯᠠᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠪᠠᠳᠠᠷᠴᠢ ᠭᠤᠸᠠᠢ ᠳ᠋ᠤ᠌ ᠮᠣᠷᠢ ᠶ᠋ᠢ ᠨᠢ ᠪᠤᠴᠠᠭᠠᠵᠤ ᠥᠭᠬᠦ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠰᠤ ᠪᠠᠷ ᠤᠬᠢᠯᠠᠵᠤ ᠭᠤᠶᠤᠭᠰᠠᠨ ᠴᠤ᠌ ᠲᠡᠷᠡ ᠪᠤᠴᠠᠭᠠᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠪᠥᠭᠡᠵᠢ ᠪᠡᠨ ᠪᠤᠴᠠᠭᠠᠨ ᠬᠤᠳᠠᠯᠳᠤᠵᠤ ᠠᠪᠤᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠪᠢᠳᠡ ᠬᠣᠶᠠᠷ ᠢ᠋ ᠨᠡᠮᠡᠭᠦᠯᠦᠭᠡᠳ ᠴᠦ᠍ ᠥᠭᠬᠦ ᠦᠭᠡᠢ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠳ᠋ᠦ᠍ ᠶᠠᠭ ᠢᠵᠢᠯ ᠪᠥᠭᠡᠵᠢ ᠪᠣᠢ ᠶ᠋ᠢ ᠭᠤᠶᠤᠵᠤ ᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠳᠠᠮ ᠤ᠋ᠨ ᠭᠠᠷ ᠡᠴᠡ ᠡᠵᠢ ᠴᠢᠨᠢ ᠶᠠᠭᠠᠬᠢᠵᠤ ᠮᠤᠯᠲᠤᠷᠠᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠷᠤᠭᠰᠠᠨ ᠶᠤᠮ ᠪᠣᠯᠤᠨᠠ ᠪᠠᠢᠬᠤ᠃ ᠬᠠᠷᠢᠨ ᠪᠠᠳᠠᠷᠴᠢ ᠭᠤᠸᠠᠢ ᠯᠠ ᠠᠪᠤ ᠳ᠋ᠤ᠌ ᠬᠡᠯᠡᠵᠦ ᠣᠷᠬᠢᠪᠠᠯ ᠶᠠᠭᠠᠬᠢᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠬᠡᠯᠡᠬᠦ ᠦᠭᠡᠢ᠂ ᠬᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ ᠣᠯᠵᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠠᠳ ᠮᠤᠤᠷ ᠬᠢᠮᠤᠰᠤ ᠪᠠᠨ ᠨᠢᠭᠤᠳᠠᠭ ᠰᠢᠭ᠋ ᠨᠢᠭᠤᠨᠠ᠃ ᠬᠠᠷᠢᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠮᠥᠩᠭᠥ ᠪᠡᠷ ᠠᠪᠤᠭᠰᠠᠨ ᠭᠡᠵᠦ ᠶᠠᠷᠢᠨᠠ ᠰᠢᠦ᠃
ᠮᠠᠷᠭᠠᠰᠢ ᠨᠢ ᠠᠳᠤᠭᠤ ᠮᠠᠨᠠᠵᠤ ᠢᠷᠡᠭᠰᠡᠨ ᠭᠠᠯᠰᠠᠩ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠶ᠋ᠢᠨ ᠬᠡᠭᠡᠷ ᠮᠣᠷᠢ ᠮᠠᠨ ᠤ᠋ ᠠᠳᠤᠭᠤᠨ ᠳ᠋ᠤ᠌ ᠨᠡᠢᠯᠡᠵᠦ ᠣᠷᠬᠢᠵᠠᠢ ᠭᠡᠬᠦ ᠳ᠋ᠦ᠍ᠨᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠥᠴᠥᠭᠡᠳᠦᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ᠃ ᠡᠯᠭᠦᠭᠡᠳ ᠠᠯᠢ! ᠭᠡᠵᠦ ᠪᠠᠲᠤ ᠬᠡᠯᠡᠵᠦ ᠪᠢᠯᠡ᠃
ᠬᠡᠭᠡᠷ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠲᠠᠩᠬᠢᠮ ᠤ᠋ᠨ ᠵᠦᠭ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠠᠲᠤ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠠᠢᠬᠠᠨ ᠰᠡᠳᠬᠢᠯ᠂ ᠢᠲᠡᠭᠡᠯᠲᠦ ᠶ᠋ᠢᠨ ᠬᠠᠲᠠᠭᠤ ᠵᠠᠩ ᠢ᠋ ᠪᠣᠳᠣᠵᠤ ᠡᠴᠢᠭᠡ ᠥᠬᠢᠨ ᠬᠣᠶᠠᠷ ᠤ᠋ᠨ ᠨᠢᠭᠡᠨ ᠳ᠋ᠦ᠍ᠨᠢ ᠬᠣᠷᠣᠰᠴᠤ ᠨᠥᠭᠦᠭᠡ ᠳ᠋ᠦ᠍ᠨᠢ ᠪᠠᠶᠠᠷᠯᠠᠨᠠ᠃
《ᠰᠣᠯᠣᠩᠭᠠ ᠪᠠᠨ ᠪᠣᠳᠣᠭᠠᠳ ᠯᠠ ᠲᠡᠪᠴᠢᠭᠡᠳ ᠪᠠᠢᠶᠠ᠃ ᠭᠡᠪᠡᠴᠦ ᠲᠡᠪᠴᠢᠶᠡᠷᠢ ᠳ᠋ᠦ᠍ ᠡᠴᠦᠰ ᠪᠣᠢ᠃ ᠲᠡᠭᠡᠭᠡᠳ ᠨᠢᠭᠡ ᠡᠳᠦᠷ ᠬᠠᠳᠠᠮ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠡᠴᠡ ᠲᠦᠢᠮᠡᠷ ᠠᠰᠠᠪᠠᠯ ᠶᠠᠭᠠᠬᠢᠨᠠ ᠳᠠ᠃ ᠪᠢ ᠯᠡ ᠬᠠᠳᠠᠮ ᠤ᠋ᠨ ᠠᠶᠠ ᠶ᠋ᠢ ᠬᠠᠷᠠᠵᠤ ᠲᠡᠭᠦᠨ ᠦ᠌ ᠵᠠᠷᠤᠴᠠ ᠨᠢ ᠪᠣᠯᠬᠤ ᠦᠭᠡᠢ᠃ ᠠᠯᠲᠠ ᠳᠡᠪᠢᠰᠴᠦ ᠦᠭᠪᠡᠴᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠠᠶᠠᠭᠠ ᠡᠴᠡ ᠰᠠᠯᠬᠤ ᠦᠭᠡᠢ᠃ ᠰᠣᠯᠣᠩᠭᠠ ᠮᠢᠨᠢ ᠨᠠᠮᠠᠶ᠋ᠢ ᠯᠠ ᠳᠠᠭᠠᠬᠤ ᠪᠠᠢᠬᠤ》 ᠭᠡᠬᠦ ᠵᠡᠷᠭᠡ ᠪᠣᠳᠣᠵᠤ ᠶᠠᠪᠤᠯᠠ᠃