ᠲᠤᠩᠭᠠᠯᠠᠭ ᠲᠠᠮᠢᠷ3-27-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1331《ᠬᠣᠩᠭᠣ ᠨᠢ ᠵᠠᠭᠠᠲᠤᠨᠠᠬᠤ ᠪᠠᠷ ᠬᠠᠭᠠᠨ ᠢ᠋ ᠪᠡᠨ ᠬᠠᠷᠢᠶᠠᠪᠠ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢᠨ ᠳᠣᠯᠣᠭᠠ
ᠲᠡᠮᠦᠷ᠂ ᠠᠷᠰᠯᠠᠨ ᠰᠢᠭ᠋ ᠬᠣᠶᠠᠷ ᠠᠵᠢᠷᠭᠠ ᠲᠠᠢ ᠪᠣᠯᠬᠣᠷ ᠠᠳᠤᠭᠤ ᠪᠠᠨ ᠬᠠᠰᠢᠳᠠᠭ ᠴᠤ᠌ ᠦᠭᠡᠢ ᠮᠠᠨᠠᠳᠠᠭ ᠴᠤ᠌ ᠦᠭᠡᠢ ᠦᠷᠭᠦᠯᠵᠢ ᠲᠠᠯᠪᠢᠵᠤ ᠬᠣᠨᠣᠳᠠᠭ ᠠᠵᠢ᠃ ᠢᠯᠠᠩᠭᠤᠶᠠ ᠳᠡᠯ ᠨᠢ ᠡᠪᠦᠳᠦᠭ ᠲᠡᠭᠡᠨ ᠬᠦᠷᠦᠭᠰᠡᠨ ᠪᠣᠷᠣ ᠠᠵᠢᠷᠭᠠ ᠨᠢ ᠠᠳᠤᠭᠤᠨ ᠳ᠋ᠠᠭᠠᠨ ᠴᠢᠨᠣᠠ ᠣᠢᠷᠠᠲᠤᠭᠤᠯᠬᠤ ᠶ᠋ᠢ ᠪᠠᠢᠲᠤᠭᠠᠢ᠂ ᠭᠡᠷ ᠦ᠋ᠨ ᠨᠣᠬᠠᠢ ᠶ᠋ᠢ ᠴᠦ᠍ ᠬᠠᠪᠢᠳᠠᠭᠤᠯᠳᠠᠭ ᠦᠭᠡᠢ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠤ᠋ᠨ ᠨᠢᠭᠡᠨ ᠰᠥᠨᠢ ᠡᠨᠡ ᠠᠵᠢᠷᠭᠠ ᠬᠣᠶᠠᠷ ᠴᠢᠨᠣᠠ ᠴᠠᠪᠴᠢᠵᠤ ᠠᠯᠠᠭᠠᠳ ᠥᠷᠯᠥᠭᠡ ᠲᠡᠮᠦᠷ ᠢ᠋ ᠠᠳᠤᠭᠤ ᠪᠠᠨ ᠬᠤᠷᠢᠶᠠᠬᠤ ᠭᠡᠵᠦ ᠣᠴᠢᠬᠤ ᠳ᠋ᠤᠨᠢ ᠡᠮᠦᠨᠡ ᠡᠴᠡ ᠨᠢ ᠳᠣᠪᠲᠣᠯᠤᠨ ᠳᠠᠭᠠᠷᠢᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠬᠠᠪᠤᠷ ᠨᠢᠭᠡᠨ ᠳ᠋ᠡᠭᠡᠨ ᠭᠡᠵᠦ ᠴᠢᠨᠣᠠ ᠡᠯᠪᠡᠭ ᠲᠡᠢ ᠭᠠᠵᠠᠷ ᠬᠠᠰᠢᠵᠤ ᠬᠣᠨᠣᠵᠤ ᠪᠠᠢᠪᠠᠯ ᠳᠡᠭᠡᠷᠡ ᠶᠤᠮ ᠪᠢᠰᠢ ᠤᠤ ᠭᠡᠵᠦ ᠥᠯᠵᠡᠢ ᠭᠤᠸᠠᠢ ᠨᠢᠭᠡ ᠤᠳᠠᠭᠠ ᠬᠡᠯᠡᠬᠦ ᠳ᠋ᠦ᠍ ᠲᠡᠮᠦᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠵᠦ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠠᠵᠢᠷᠭᠠ ᠮᠢᠨᠢ ᠳᠥᠷᠪᠡᠨ ᠬᠥᠯᠲᠦ ᠡᠴᠡ ᠮᠠᠨᠠᠵᠤ ᠴᠢᠳᠠᠨᠠ᠃ ᠬᠠᠷᠢᠨ ᠬᠣᠶᠠᠷ ᠬᠥᠯᠲᠦ ᠪᠣᠯ ᠴᠠᠬᠢᠭᠤᠷ ᠲᠡᠮᠦᠷ ᠦ᠋ᠨ ᠠᠳᠤᠭᠤ ᠭᠡᠵᠦ ᠮᠡᠳᠡᠪᠡᠯ ᠭᠠᠨᠵᠤᠭᠠᠨ ᠳ᠋ᠠᠬᠢ ᠨᠣᠭᠲᠣ ᠳ᠋ᠠᠭᠠᠨ ᠭᠠᠷ ᠨᠢ ᠬᠦᠷᠬᠦ ᠦᠭᠡᠢ ᠪᠠᠢᠬᠠ ᠭᠡᠵᠡᠢ᠃
ᠡᠨᠡ ᠳᠡᠮᠡᠢ ᠦᠭᠡ ᠪᠢᠰᠢ ᠪᠠᠢᠭᠰᠠᠨ᠃ ᠲᠡᠮᠦᠷ ᠦ᠋ᠨ ᠬᠢ ᠭᠡᠵᠦ ᠠᠢᠯ ᠪᠣᠢ ᠪᠣᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠨᠢᠭᠡ ᠤᠨᠠᠭᠠ ᠴᠤ᠌ ᠪᠣᠣᠬᠠᠢ ᠳ᠋ᠤ᠌ ᠥᠭᠭᠦᠭᠡ ᠦᠭᠡᠢ᠃ ᠨᠢᠭᠡ ᠮᠣᠷᠢ ᠴᠤ᠌ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠳᠠᠭᠠ ᠦᠭᠡᠢ ᠶᠤᠮ᠃
ᠥᠯᠵᠡᠢ ᠣᠷᠣᠢ ᠪᠦᠬᠦᠨ ᠭᠠᠷᠤᠵᠠ ᠶ᠋ᠢᠨ ᠡᠭᠦᠳᠡ ᠬᠠᠭᠠᠵᠤ ᠪᠠᠢᠭᠠ ᠨᠢ ᠭᠡᠵᠦ ᠭᠠᠯ ᠤ᠋ᠨ ᠬᠠᠢᠴᠢ ᠶ᠋ᠢᠨ ᠠᠮᠠ ᠪᠣᠭᠣᠵᠤ ᠬᠠᠲᠠᠪᠴᠢᠨ ᠳ᠋ᠤ᠌ ᠬᠠᠪᠴᠢᠭᠤᠯᠤᠨᠠ᠃ ᠲᠡᠭᠡᠭᠡᠳ ᠥᠷᠯᠥᠭᠡ ᠲᠣᠭᠠ ᠪᠦᠷᠢᠨ ᠠᠳᠤᠭᠤ ᠢᠷᠡᠬᠦ ᠶ᠋ᠢ ᠦᠵᠡᠭᠡᠳ 《ᠬᠠᠢᠴᠢ ᠶ᠋ᠢᠨ ᠠᠮᠠ ᠪᠣᠭᠣᠭᠰᠠᠨ ᠤ᠋ ᠠᠴᠢ》 ᠭᠡᠵᠦ ᠭᠦᠨ ᠢᠲᠡᠭᠡᠵᠦ ᠵᠠᠯᠪᠠᠷᠢᠨᠠ᠃
ᠨᠠᠮᠤᠷ ᠤ᠋ᠨ ᠨᠢᠭᠡ ᠰᠥᠨᠢ ᠲᠡᠮᠦᠷ ᠦ᠋ᠨ ᠠᠳᠤᠭᠤ ᠶ᠋ᠢ ᠣᠷᠣᠢ ᠪᠡᠯᠴᠢᠭᠡᠷ ᠲᠦ᠍ ᠭᠠᠷᠬᠤ ᠡᠴᠡ ᠨᠢ ᠡᠬᠢᠯᠡᠨ ᠮᠣᠳᠣᠨ ᠳᠣᠲᠣᠷᠠ ᠡᠴᠡ ᠠᠵᠢᠵᠤ ᠪᠠᠢᠭᠰᠠᠨ ᠨᠢᠭᠡ ᠬᠥᠮᠦᠨ ᠠᠳᠤᠭᠤᠨ ᠳ᠋ᠤ᠌ ᠤᠯᠠᠮ ᠪᠦᠷ ᠣᠢᠷᠠᠲᠤᠵᠤ ᠪᠠᠢᠯᠠ᠃ ᠲᠡᠷᠡ ᠪᠣᠯ ᠲᠦᠭᠵᠢᠯ ᠭᠠᠢᠬᠠᠯ ᠪᠠᠢᠯᠠ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠠᠳᠤᠭᠤᠨ ᠤ᠋ ᠳᠤᠮᠳᠠ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠬᠠᠷᠠ ᠮᠣᠳᠣᠨ ᠤᠷᠭᠠ ᠪᠠᠷᠢᠭᠰᠠᠭᠠᠷ ᠣᠷᠣᠵᠤ ᠢᠷᠡᠭᠡᠳ ᠴᠢᠮᠡᠭᠡ ᠴᠢᠩᠨᠠᠨ ᠬᠡᠰᠡᠭ ᠵᠣᠭᠰᠣᠪᠠ᠃ ᠵᠢᠷᠦᠬᠡ ᠨᠢ ᠲᠦᠷᠭᠡᠨ ᠲᠦᠷᠭᠡᠨ ᠴᠣᠬᠢᠯᠠᠵᠤ᠂ ᠨᠢᠭᠡ ᠯᠡ ᠡᠪ ᠦᠭᠡᠢ ᠠᠵᠢ᠃
ᠪᠠᠳᠠᠷᠴᠢ ᠲᠠᠢ ᠨᠡᠢᠯᠡᠵᠦ ᠳᠥᠴᠢ ᠰᠢᠬᠠᠮ ᠮᠣᠷᠢᠳ ᠡᠩ ᠦ᠋ᠨ ᠳᠠᠪᠠᠭᠠ ᠳᠠᠪᠠᠭᠤᠯᠤᠨ ᠵᠠᠭ ᠤ᠋ᠨ ᠭᠣᠣᠯ ᠤ᠋ᠨ ᠣᠷᠴᠢᠮ ᠵᠠᠮᠪᠠᠯ ᠳ᠋ᠤ᠌ ᠬᠦᠷᠭᠡᠵᠦ ᠥᠭᠴᠡᠢ᠃ ᠣᠳᠣ ᠲᠡᠮᠦᠷ ᠦ᠋ᠨ ᠮᠣᠷᠢᠳ ᠢ᠋ ᠠᠪᠠᠴᠢᠵᠤ ᠥᠭᠪᠡᠯ ᠬᠡᠯᠡᠯᠴᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠡᠭᠦᠯ ᠮᠥᠩᠭᠥ ᠪᠡᠨ ᠠᠪᠤᠨᠠ᠃ ᠭᠡᠪᠡᠴᠦ ᠲᠡᠮᠦᠷ ᠡᠴᠡ ᠠᠶᠤᠬᠤ ᠰᠡᠳᠬᠢᠯ ᠲᠦᠭᠵᠢᠯ ᠳ᠋ᠦ᠍ ᠶᠡᠬᠡ ᠪᠣᠯᠬᠣᠷ 《ᠢᠩᠭᠢᠵᠦ ᠶᠠᠪᠤᠭᠠᠳ ᠲᠡᠮᠦᠷ ᠲᠦ᠍ ᠪᠠᠷᠢᠭᠳᠠᠪᠠᠯ ᠁》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠦᠢᠲᠡᠨ ᠬᠥᠯᠥᠰᠥ ᠨᠢ ᠴᠢᠬᠠᠷᠠᠨ᠂ ᠮᠣᠳᠣᠨ ᠤ᠋ ᠪᠦᠳᠦᠭᠦᠨ ᠮᠥᠴᠢᠷ ᠲᠦ᠍ ᠳᠡᠭᠦᠵᠢᠯᠡᠭᠦᠯᠦᠨ ᠲᠦᠯᠡᠭᠡ ᠣᠪᠣᠭᠠᠯᠠᠭᠤᠯᠵᠤ ᠪᠠᠢᠭᠰᠠᠨ ᠨᠢ ᠪᠣᠳᠣᠭᠳᠠᠨᠠ᠃
ᠰᠢᠨᠤᠯ ᠬᠥᠮᠦᠨ ᠢ᠋ ᠰᠢᠢᠳᠮᠡᠭᠡᠢ ᠪᠣᠯᠭᠠᠳᠠᠭ᠃ ᠠᠭᠠᠵᠢᠮ ᠳ᠋ᠠᠭᠠᠨ ᠰᠢᠨᠤᠯ ᠨᠢ ᠠᠶᠤᠮᠠᠬᠠᠢ ᠰᠡᠳᠬᠢᠯ ᠢ᠋ ᠬᠠᠢᠯᠤᠭᠤᠯᠤᠨ ᠲᠦᠭᠵᠢᠯ ᠵᠣᠷᠢᠭᠵᠢᠵᠤ ᠡᠬᠢᠨ ᠦ᠌ ᠮᠣᠷᠢ ᠪᠠᠨ ᠤᠷᠭᠠᠯᠠᠵᠤ ᠨᠣᠭᠲᠣᠯᠠᠪᠠ᠃
ᠮᠣᠷᠢᠳ ᠪᠠᠷᠢᠯᠠᠵᠤ ᠬᠣᠯᠪᠣᠬᠤ ᠪᠦᠷᠢ ᠰᠢᠨᠤᠯ ᠨᠢ ᠣᠷᠭᠢᠯᠤᠨ 《ᠴᠠᠬᠢᠭᠤᠷ ᠲᠡᠮᠦᠷ ᠦ᠋ᠨ ᠠᠳᠤᠭᠤᠨ ᠳ᠋ᠤ᠌ ᠣᠷᠣᠬᠤ ᠡᠷᠡ᠂ ᠬᠠᠯᠬᠠ ᠳᠠᠶᠠᠭᠠᠷ ᠲᠤ᠌ ᠨᠠᠳᠠ ᠡᠴᠡ ᠥᠭᠡᠷᠡ ᠪᠣᠢ ᠪᠣᠯᠪᠠ ᠤᠤ?》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠪᠠᠶᠠᠷᠯᠠᠬᠤ᠂ ᠪᠠᠬᠠᠳᠤᠬᠤ ᠰᠡᠳᠬᠢᠯ ᠴᠦ᠍ ᠲᠥᠷᠥᠵᠦ ᠪᠠᠢᠯᠠ᠃
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠤᠷᠭᠠᠯᠠᠵᠤ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠨᠣᠭᠲᠣᠯᠠᠬᠤ ᠪᠣᠯ ᠠᠮᠤᠷ ᠦᠭᠡᠢ ᠠᠵᠢᠯ ᠪᠣᠯᠬᠣᠷ ᠨᠡᠯᠢᠶᠡᠳ ᠤᠳᠠᠪᠠ᠃ ᠰᠥᠨᠢ ᠳᠤᠮᠳᠠ ᠨᠡᠯᠢᠶᠡᠳ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠲᠡᠮᠦᠷ ᠦ᠋ᠨ ᠣᠷᠣᠭᠠ ᠬᠡᠭᠡᠷ ᠭᠡᠳᠡᠭ ᠥᠨᠳᠥᠷ ᠪᠣᠷᠣ ᠬᠡᠭᠡᠷ ᠮᠣᠷᠢᠨ ᠡᠴᠡ ᠪᠤᠰᠤᠳ ᠮᠣᠷᠢᠳ ᠢ᠋ ᠨᠣᠭᠲᠣᠯᠠᠵᠤ ᠬᠣᠯᠪᠣᠨ ᠠᠪᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠳᠤᠯᠮᠠ ᠶ᠋ᠢᠨ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠤᠨᠤᠳᠠᠭ ᠵᠢᠷᠣᠭᠠ ᠵᠡᠭᠡᠷᠳᠡ ᠮᠣᠷᠢ ᠶ᠋ᠢ ᠴᠦ᠍ ᠡᠮᠡᠭᠡᠯᠯᠡᠵᠦ ᠠᠪᠤᠯᠠ᠃
《ᠵᠠ ᠢᠩᠭᠢᠭᠡᠳ ᠬᠤᠢᠬᠠᠯᠠᠳᠠᠭ ᠬᠡᠷᠡᠭ ᠠ᠋》 ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠬᠡᠯᠡᠭᠡᠳ ᠬᠤᠢᠪᠢ ᠪᠠᠨ ᠲᠠᠢᠯᠤᠨ ᠠᠪᠴᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠨ ᠤᠷᠭᠠ ᠪᠠᠨ ᠬᠠᠶᠠᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠣᠶᠠᠷ ᠦᠶᠡᠯᠡᠨ ᠬᠥᠲᠥᠯᠦᠭᠡᠳ ᠮᠣᠷᠳᠠᠪᠠ᠃ ᠡᠬᠢᠯᠡᠭᠡᠳ ᠪᠠᠷᠠᠭᠤᠨ ᠣᠷᠣᠭᠰᠢ ᠪᠠᠨ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠵᠢᠵᠢᠭᠬᠡᠨ ᠭᠣᠣᠯ ᠭᠠᠲᠤᠯᠤᠭᠠᠳ ᠡᠭᠴᠡ ᠣᠷᠣᠭᠰᠢ ᠪᠠᠨ ᠡᠷᠭᠢᠨ ᠲᠠᠮᠢᠷ ᠤ᠋ᠨ ᠤᠷᠢᠳᠤ ᠲᠠᠯᠠ ᠶ᠋ᠢᠨ ᠥᠨᠳᠥᠷ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠵᠦᠭ ᠳᠣᠪᠲᠣᠯᠪᠠ᠃ ᠥᠷᠯᠥᠭᠡ ᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠣᠯᠵᠣᠭᠠ ᠲᠠᠢ ᠭᠠᠵᠠᠷ ᠢ᠋ᠶ᠋ᠠᠨ ᠣᠴᠢᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠬᠦᠯᠢᠶᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠲᠦᠭᠵᠢᠯ ᠠᠰᠠᠭᠤᠭᠠᠳ ᠬᠥᠯᠥᠰᠥ ᠪᠡᠨ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠳ ᠢ᠋ᠶ᠋ᠠᠨ ᠡᠨᠳᠡ ᠤᠶᠠᠵᠤ ᠣᠷᠣᠢ ᠶ᠋ᠢ ᠬᠦᠯᠢᠶᠡᠶᠡ᠃ ᠮᠥᠷᠳᠡᠭᠡᠳ ᠢᠷᠡᠪᠡᠯ ᠡᠷᠯᠢᠭ ᠬᠠᠭᠠᠨ ᠤ᠋ ᠳ᠋ᠤ᠌ ᠶᠠᠪᠤᠭᠤᠯᠴᠢᠬᠠᠶᠠ ᠭᠡᠵᠦ ᠪᠠᠳᠠᠷᠴᠢ ᠪᠠᠶᠠᠷᠯᠠᠭᠰᠠᠨ ᠬᠡᠷᠢᠶᠡ ᠪᠠᠷᠬᠢᠷᠠᠨᠠ ᠭᠡᠵᠦ ᠪᠠᠶᠠᠷ ᠪᠠᠬᠠᠳᠤᠯ ᠲᠠᠢ ᠢᠨᠢᠶᠡᠪᠡ᠃
ᠮᠣᠷᠢᠳ ᠢ᠋ᠶ᠋ᠠᠨ ᠵᠠᠢᠳᠠᠭᠤ ᠭᠠᠵᠠᠷ ᠪᠡᠬᠢᠯᠡᠨ ᠤᠶᠠᠭᠠᠳ ᠲᠡᠮᠦᠷ ᠦ᠋ᠨ ᠢᠷᠡᠬᠦ ᠵᠦᠭ ᠢ᠋ ᠤᠲᠤᠵᠤ ᠯᠢᠶᠠᠠᠵᠤ ᠪᠠᠨ ᠬᠥᠯᠯᠡᠨ ᠤᠲᠤᠪᠠ᠃
ᠲᠡᠮᠦᠷ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠤᠶᠠᠵᠤ ᠬᠣᠨᠣᠭᠰᠠᠨ ᠬᠢᠵᠠᠯᠠᠩ ᠦᠷᠢᠶᠡ ᠪᠡᠨ ᠡᠮᠡᠭᠡᠯᠯᠡᠵᠦ ᠤᠨᠤᠭᠠᠳ ᠠᠳᠤᠭᠤᠨ ᠤ᠋ ᠵᠦᠭ ᠬᠡᠰᠡᠭ ᠬᠠᠲᠠᠷᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠨ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠳᠠᠭᠤᠯᠠᠵᠤ ᠬᠤᠷᠳᠤ ᠬᠤᠪᠢᠶᠠᠨ ᠳᠠᠪᠬᠢᠯᠠ᠃
ᠨᠠᠮᠤᠷ ᠤ᠋ᠨ ᠬᠦᠢᠲᠡᠨ ᠰᠠᠯᠬᠢ ᠡᠮᠦᠨᠡ ᠡᠴᠡ ᠨᠢ ᠳᠡᠪᠡᠯ ᠨᠡᠪᠲᠡ ᠦᠯᠢᠶᠡᠨ ᠬᠦᠷᠦᠵᠦ ᠨᠢᠭᠲᠠᠷᠠᠭᠰᠠᠨ ᠠᠭᠠᠷ ᠲᠤ᠌ ᠲᠡᠮᠦᠷ ᠦ᠋ᠨ ᠨᠤᠷᠭᠢᠭᠰᠠᠨ ᠪᠦᠳᠦᠭᠦᠨ ᠳᠠᠭᠤ ᠨᠢ ᠨᠠᠷᠢᠰᠴᠤ᠂ ᠳᠤᠭᠤᠢᠯᠳᠤᠨ ᠴᠢᠷᠦᠭᠰᠡᠨ ᠤᠷᠭᠠ ᠨᠢ ᠰᠠᠪᠠᠯᠠᠨ ᠨᠠᠮᠤᠯᠵᠠᠵᠤ ᠥᠨᠳᠥᠷ ᠤᠷᠭᠤᠭᠰᠠᠨ ᠡᠪᠡᠰᠦ ᠶ᠋ᠢ ᠨᠠᠯᠠᠭᠤᠯᠤᠨ ᠵᠠᠮ ᠭᠠᠷᠭᠠᠯᠠ᠃
ᠠᠳᠤᠭᠤᠨ ᠳᠡᠭᠡᠷᠡ ᠪᠡᠨ ᠣᠴᠢᠮᠠᠭᠴᠠ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠡᠳ 《ᠬᠣᠩᠭᠣ ᠨᠢ ᠵᠠᠭᠠᠲᠤᠨᠠᠬᠤ ᠪᠠᠷ ᠬᠠᠭᠠᠨ ᠢ᠋ ᠪᠡᠨ ᠬᠠᠷᠢᠶᠠᠪᠠ ᠭᠡᠭᠴᠢ ᠪᠣᠯᠵᠤ ᠪᠠᠢᠨᠠ ᠤᠤ᠃ ᠮᠢᠨᠦ ᠭᠠᠷ ᠡᠴᠡ ᠭᠠᠷᠤᠭᠠᠷᠠᠢ》 ᠭᠡᠳ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠦᠯᠡᠳᠡᠭᠰᠡᠨ ᠠᠳᠤᠭᠤ ᠶ᠋ᠢ ᠬᠤᠷᠢᠶᠠᠵᠤ ᠣᠷᠣᠭᠠ ᠬᠡᠭᠡᠷ ᠢ᠋ᠶ᠋ᠡᠨ ᠪᠠᠷᠢᠵᠤ ᠤᠨᠤᠭᠠᠳ ᠬᠤᠯᠠᠭᠠᠢᠴᠢ ᠶ᠋ᠢᠨ ᠮᠥᠷ ᠢ᠋ ᠮᠥᠰᠬᠢᠨ ᠶᠠᠪᠤᠵᠤ ᠨᠥᠭᠦᠭᠡ ᠵᠢᠵᠢᠭᠬᠡᠨ ᠭᠣᠣᠯ ᠢ᠋ ᠭᠠᠲᠤᠯᠪᠠ᠃ ᠭᠡᠲᠡᠯᠡ ᠮᠥᠷ ᠡᠭᠴᠡ ᠡᠮᠦᠨᠡ ᠶ᠋ᠢ ᠴᠢᠭᠯᠡᠨ ᠶᠠᠪᠤᠵᠠᠢ᠃ ᠲᠡᠮᠦᠷ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠡᠳᠡᠨ ᠵᠣᠭᠰᠣᠵᠤ ᠥᠷᠭᠡᠨ ᠮᠠᠩᠨᠠᠢ ᠳ᠋ᠤᠨᠢ ᠪᠠᠢᠨ ᠪᠠᠢᠨ ᠭᠦᠨ ᠪᠣᠳᠣᠯ ᠲᠣᠳᠣᠷᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠭᠦᠨ ᠬᠥᠪᠴᠢ ᠳ᠋ᠦ᠍ ᠴᠣᠷᠣᠢᠯᠠᠭᠠᠳ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠠᠬᠠ ᠶ᠋ᠢ ᠪᠡᠨ ᠨᠢᠳᠦ ᠶ᠋ᠢ ᠨᠢ ᠪᠣᠭᠣᠭᠰᠠᠨ ᠭᠥᠯᠥᠭᠡ ᠰᠢᠭ ᠲᠥᠭᠡᠷᠢᠭᠦᠯᠬᠦ ᠨᠢ ᠤᠤ? ᠠᠭᠤᠯᠠ ᠦᠵᠡᠬᠦ ᠨᠢᠳᠦ ᠦᠭᠡᠢ᠂ ᠠᠭᠤᠰᠬᠢ ᠳᠠᠭᠠᠭᠠᠬᠤ ᠰᠢᠲᠦ ᠦᠭᠡᠢ ᠪᠣᠯᠳᠠᠭ ᠶᠤᠮ ᠭᠡᠬᠦ ᠳ᠋ᠦ᠍ ᠠᠬᠠ ᠨᠢ ᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠬᠠᠭᠤᠷᠲᠠᠬᠤ ᠦᠭᠡᠢ ᠭᠡᠳ ᠡᠭᠴᠡ ᠪᠠᠷᠠᠭᠤᠨ ᠲᠡᠰᠢ ᠪᠡᠨ ᠡᠷᠭᠢᠵᠦ ᠦᠭᠡ ᠳᠠᠭᠤ ᠦᠭᠡᠢ ᠳᠠᠪᠬᠢᠯᠠ᠃
ᠠᠷᠪᠠᠨ ᠮᠣᠷᠢ ᠬᠣᠯᠪᠣᠨ ᠬᠥᠲᠥᠯᠦᠭᠰᠡᠨ ᠬᠥᠮᠦᠨ ᠬᠥᠪᠴᠢ ᠤᠷᠤᠭᠤ ᠶᠠᠪᠤᠬᠤ ᠶᠣᠰᠣ ᠦᠭᠡᠢ᠃ ᠡᠨᠡ ᠮᠣᠷᠢ ᠪᠣᠯ ᠵᠥᠪᠬᠡᠨ ᠴᠢᠯᠠᠭᠤ ᠬᠥᠭᠡᠭᠡᠯᠭᠡᠬᠦ ᠭᠡᠰᠡᠨ ᠲᠡᠨᠡᠭ ᠪᠣᠳᠣᠯ ᠭᠡᠳᠡᠭ ᠢ᠋ ᠲᠡᠮᠦᠷ ᠡᠰᠡ ᠮᠡᠳᠡᠪᠡᠯ ᠬᠡᠨ ᠮᠡᠳᠡᠬᠦ ᠪᠢᠯᠡ᠃ ᠢᠩᠭᠢᠭᠡᠳ ᠮᠥᠷ ᠢ᠋ ᠣᠷᠬᠢᠵᠤ ᠡᠩ ᠦ᠋ᠨ ᠳᠠᠪᠠᠭᠠ ᠴᠢᠭᠯᠡᠨ ᠬᠤᠷᠳᠤᠯᠠᠵᠠᠢ᠃
ᠪᠠᠳᠠᠷᠴᠢ ᠲᠦᠭᠵᠢᠯ ᠬᠣᠶᠠᠷ ᠦᠳᠡᠰᠢ ᠪᠣᠯᠵᠤ ᠬᠠᠷᠠᠩᠭᠤᠢ ᠡᠬᠢᠯᠡᠲᠡᠯᠡ ᠵᠠᠮ ᠬᠠᠷᠠᠭᠤᠯᠳᠠᠭᠠᠳ ᠲᠡᠮᠦᠷ ᠢᠷᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠪᠠᠳᠠᠷᠴᠢ ᠦᠯᠡᠳᠡᠵᠦ᠂ ᠲᠦᠭᠵᠢᠯ ᠴᠠᠰᠢ ᠶᠠᠪᠤᠬᠤ ᠪᠣᠯᠵᠠᠢ᠃ ᠪᠠᠳᠠᠷᠴᠢ ᠮᠠᠷᠭᠠᠰᠢ ᠶ᠋ᠢᠨ ᠦᠳᠡ ᠬᠦᠷᠲᠡᠯᠡ ᠬᠦᠯᠢᠶᠡᠭᠡᠳ ᠢᠷᠡᠬᠦ ᠦᠭᠡᠢ ᠪᠣᠯ ᠲᠦᠭᠵᠢᠯ ᠦ᠋ᠨ ᠬᠣᠢᠨᠠ ᠡᠴᠡ ᠶᠠᠪᠤᠬᠤ ᠪᠠᠷ ᠰᠢ᠌ᠤᠠᠴᠤ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠦᠨ ᠤᠨᠲᠠᠯᠠ᠃
《ᠲᠡᠮᠦᠷ ᠮᠥᠷ ᠠᠯᠳᠠᠬᠤ ᠦᠭᠡᠢ ᠬᠥᠭᠡᠭᠡᠵᠦ ᠵᠠᠪᠠᠯ ᠢᠷᠡᠨᠡ ᠭᠡᠵᠦ ᠬᠡᠨ ᠬᠡᠯᠡᠭᠰᠡᠨ ᠶᠤᠮ ᠪᠣᠢ? ᠡᠳᠦᠢ ᠳ᠋ᠦ᠍ ᠲᠦᠭᠵᠢᠯ ᠦ᠋ᠨ ᠮᠥᠷ ᠢ᠋ ᠠᠯᠳᠠᠵᠤ ᠣᠷᠬᠢᠭᠠᠳ ᠮᠤᠩᠭᠠᠨᠢᠵᠤ ᠪᠤᠴᠠᠭᠰᠠᠨ ᠪᠠᠢᠵᠤ ᠪᠣᠯᠤᠨᠠ᠃ ᠲᠡᠭᠡᠭᠰᠡᠨ ᠪᠣᠯ ᠴᠢ ᠢᠩᠭᠢᠵᠦ ᠡᠳᠦᠷ ᠲᠤᠷᠰᠢ ᠬᠦᠢᠲᠡᠨ ᠭᠠᠵᠠᠷ ᠲᠡᠪᠡᠷᠢᠨ ᠬᠡᠪᠲᠡᠬᠦ ᠶᠠᠭᠤᠨ ᠪᠢᠯᠡ》 ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃
ᠰᠥᠨᠢ ᠶ᠋ᠢᠨ ᠲᠡᠭᠷᠢ ᠳ᠋ᠦ᠍ ᠣᠳᠣ ᠭᠢᠯᠠᠯᠵᠠᠨ᠂ ᠰᠠᠯᠬᠢᠨ ᠳ᠋ᠤ᠌ ᠱᠤᠤᠭᠢᠬᠤ ᠮᠣᠳᠣᠨ ᠤ᠋ ᠴᠢᠮᠡᠭᠡ ᠲᠡᠢᠮᠦ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠵᠢᠰᠦᠨ ᠵᠦᠢᠯ ᠦ᠋ᠨ ᠡᠡᠶᠡᠭᠦᠢ ᠠᠪᠢᠶᠠ ᠡᠭᠦᠰᠬᠡᠨᠡ᠃ ᠮᠣᠳᠣᠨ ᠡᠴᠡ ᠠᠷᠭᠠᠮᠵᠢᠭᠰᠠᠨ ᠮᠣᠷᠢ ᠨᠢ ᠪᠠᠢᠨ ᠪᠠᠢᠨ ᠬᠠᠮᠠᠷ ᠢ᠋ᠶ᠋ᠠᠨ ᠲᠠᠴᠢᠭᠢᠨᠠᠭᠤᠯᠤᠨᠠ᠃ ᠠᠭᠯᠠᠭ ᠬᠥᠪᠴᠢ ᠳ᠋ᠦ᠍ ᠭᠠᠭᠴᠠᠭᠠᠷ ᠬᠡᠪᠲᠡᠵᠦ ᠪᠠᠢᠭᠠ ᠬᠡᠨ ᠪᠣᠯᠪᠠᠴᠤ ᠰᠡᠳᠬᠢᠯ ᠨᠢ ᠲᠡᠨᠢᠭᠡᠷ ᠰᠠᠢᠬᠠᠨ ᠪᠠᠢᠵᠤ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠢᠯᠡ᠃ ᠬᠡᠰᠡᠭ ᠬᠥᠷᠪᠡᠯᠳᠦᠨ ᠴᠢᠮᠡᠭᠡ ᠪᠦᠬᠦᠨ ᠢ᠋ ᠠᠩᠬᠠᠷᠤᠨ ᠴᠢᠩᠨᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠳᠦᠷᠵᠢᠨ ᠭᠥᠯᠢᠷᠡᠨ ᠬᠡᠪᠲᠡᠭᠰᠡᠨ ᠳ᠋ᠡᠭᠡᠨ ᠬᠥᠰᠢᠵᠦ ᠶᠠᠳᠠᠷᠠᠭᠰᠠᠨ ᠪᠡᠶᠡ ᠨᠢ ᠭᠦᠨ ᠨᠣᠢᠷ ᠲᠤ᠌ ᠴᠣᠬᠢᠭᠳᠠᠨ ᠨᠠᠮ ᠤᠨᠲᠠᠪᠠ᠃
ᠥᠷᠯᠥᠭᠡ ᠦᠷ ᠮᠠᠩᠬᠠᠢᠨ ᠴᠠᠢᠬᠤ ᠦᠶᠡ ᠳ᠋ᠦ᠍ ᠰᠡᠷᠢᠵᠦ ᠬᠠᠷᠠᠪᠠᠯ ᠮᠣᠷᠢ ᠨᠢ ᠠᠯᠠᠭᠠ ᠪᠣᠯᠵᠠᠢ᠃ ᠪᠣᠰᠴᠤ ᠠᠷᠭᠠᠮᠵᠢᠭᠰᠠᠨ ᠭᠠᠵᠠᠷ ᠲᠤ᠌ ᠣᠴᠢᠪᠠᠯ ᠲᠠᠰᠤᠯᠤᠨ ᠶᠠᠪᠤᠵᠠᠢ᠃ ᠡᠷᠢᠵᠦ ᠬᠠᠢᠪᠠᠯ ᠣᠢᠷᠠ ᠰᠠᠭᠠᠬᠠᠯᠲᠠ ᠶ᠋ᠢᠨ ᠴᠢᠨᠡᠭᠡ ᠭᠠᠵᠠᠷ ᠬᠣᠶᠠᠷ ᠴᠢᠨᠣᠠ ᠤᠨᠠᠭᠠᠵᠤ ᠠᠪᠤᠭᠠᠳ ᠢᠳᠡᠵᠦ ᠪᠠᠢᠯᠠ᠃ ᠰᠡᠮᠬᠡᠨ ᠪᠤᠴᠠᠵᠤ ᠬᠡᠪᠲᠡᠭᠰᠡᠨ ᠭᠠᠵᠠᠷ ᠡᠴᠡ ᠪᠡᠨ ᠫᠤᠤ ᠪᠠᠨ ᠠᠪᠴᠤ ᠣᠢᠷᠠᠲᠤᠨ ᠣᠴᠢᠭᠠᠳ ᠬᠠᠷᠠ ᠪᠤᠭᠤᠷᠤᠯ ᠵᠣ ᠲᠠᠢ ᠪᠢᠷᠠᠭᠤ ᠰᠢᠭ᠋ ᠠᠵᠢᠷᠭᠠᠨ ᠴᠢᠨᠣᠠ ᠶ᠋ᠢᠨ ᠳᠠᠯᠤ ᠬᠠᠪᠰᠤᠷᠤᠭᠠᠳ ᠫᠤᠤᠳᠠᠭᠰᠠᠨ ᠴᠢᠨᠢ ᠠᠯᠳᠠᠵᠤ ᠣᠷᠬᠢᠪᠠ᠃ ᠬᠥᠪᠴᠢ ᠳ᠋ᠦ᠍ ᠳᠤᠤᠭᠠᠷᠤᠭᠰᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠤ᠋ ᠴᠤᠤᠷᠢᠶᠠ ᠲᠠᠰᠤᠷᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠴᠠᠳᠴᠤ ᠠᠪᠤᠭᠰᠠᠨ ᠬᠣᠶᠠᠷ ᠪᠣᠣᠬᠠᠢ ᠣᠷᠣ ᠰᠤᠷᠠᠭ ᠦᠭᠡᠢ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠵᠢᠪᠡ᠃ ᠭᠠᠮᠢᠩ ᠤ᠋ᠨ ᠮᠠᠭᠤ ᠴᠠᠷᠢᠯ ᠭᠡᠵᠦ ᠴᠢᠩᠭᠠ ᠬᠠᠷᠢᠶᠠᠭᠠᠳ ᠰᠢᠲᠠᠵᠤ ᠣᠷᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠵᠢᠪᠡ᠃ ᠭᠠᠮᠢᠩ ᠤ᠋ᠨ ᠮᠠᠭᠤ ᠴᠠᠷᠢᠯ ᠭᠡᠵᠦ ᠬᠥᠨᠳᠡᠢ ᠳᠦᠭᠦᠷᠡᠩ ᠬᠠᠳᠠᠨ ᠴᠤᠤᠷᠢᠶᠠ ᠰᠣᠨᠣᠰᠤᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠪᠠᠷᠮᠠ ᠰᠢᠭ᠋ ᠶᠠᠭᠤᠮᠠ ᠪᠣᠯᠳᠠᠭ ᠠ᠋᠃ ᠬᠠᠢᠷᠠᠨ ᠮᠣᠷᠢ ᠭᠡᠵᠦ ᠨᠠᠮ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠱᠣᠭᠰᠢᠷᠠᠨ ᠭᠠᠰᠠᠯᠪᠠ᠃
ᠮᠣᠷᠢᠨ ᠤ᠋ ᠰᠠᠩ ᠤ᠋ᠨ ᠳᠡᠭᠡᠷᠡ ᠣᠴᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠤᠭᠰᠠᠨ ᠥᠷᠥᠭᠡᠰᠦᠨ ᠲᠤᠩᠭᠠᠯᠠᠭ ᠬᠥᠬᠡ ᠨᠢᠳᠦ 《ᠴᠢᠮᠠ ᠡᠴᠡ ᠯᠡ ᠪᠣᠯᠤᠯᠠ》 ᠭᠡᠬᠦ ᠮᠡᠲᠦ ᠠᠵᠢ᠃ ᠬᠥᠷᠥᠰᠥ ᠨᠢ ᠡᠷᠭᠢᠯᠳᠦᠭᠰᠡᠨ ᠣᠢᠷᠠ ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠨᠢ ᠡᠨᠳᠡ ᠴᠢᠳᠥᠷ ᠲᠡᠢ ᠨᠢᠭᠡ ᠮᠣᠷᠢ ᠬᠣᠶᠠᠷ ᠴᠢᠨᠣᠠ ᠲᠠᠢ ᠦᠬᠦᠲᠡᠯᠡ ᠪᠡᠨ ᠲᠡᠮᠡᠴᠡᠯᠳᠦᠭᠰᠡᠨ ᠦ᠌ ᠭᠡᠷᠡᠴᠢ ᠪᠣᠯᠵᠠᠢ᠃
ᠮᠣᠷᠢᠨ ᠤ᠋ ᠬᠥᠰᠢᠭᠰᠡᠨ ᠬᠥᠯ ᠡᠴᠡ ᠴᠢᠳᠥᠷ ᠢ᠋ᠶ᠋ᠡᠨ ᠰᠠᠯᠭᠠᠵᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠠᠳ ᠡᠷᠭᠢᠵᠦ ᠫᠤᠤ ᠪᠠᠨ ᠠᠪᠤᠭᠠᠳ ᠤᠨᠲᠠᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠪᠠᠨ ᠶᠠᠪᠤᠪᠠ᠃ ᠡᠨᠳᠡ ᠡᠴᠡ ᠣᠢᠷᠠ ᠶ᠋ᠢᠨ ᠠᠢᠯ ᠬᠠᠭᠠᠰ ᠥᠷᠲᠡᠭᠡ ᠭᠠᠷᠤᠢ᠃ ᠲᠡᠷᠡ ᠬᠦᠷᠲᠡᠯᠡ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠨ ᠶᠠᠪᠤᠬᠤ ᠪᠣᠯᠵᠠᠢ᠃ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠨ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠢ᠋ ᠴᠢᠭᠯᠡᠨ ᠶᠠᠪᠤᠵᠠᠢ᠃
ᠪᠠᠳᠠᠷᠴᠢ ᠶ᠋ᠢ ᠢᠩᠭᠢᠵᠦ ᠮᠤᠩᠭᠠᠨᠢᠵᠤ ᠪᠠᠢᠬᠤ ᠳ᠋ᠤ᠌ ᠲᠦᠭᠵᠢᠯ ᠶᠠᠪᠤᠭᠰᠠᠭᠠᠷ ᠵᠠᠮᠢᠶᠠᠨ ᠸᠠᠩ ᠤ᠋ᠨ ᠨᠤᠲᠤᠭ ᠲᠤ᠌ ᠣᠷᠣᠵᠤ᠂ ᠵᠠᠮᠪᠠᠯ ᠲᠠᠢ ᠪᠣᠯᠵᠣᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠴᠢᠭᠯᠡᠨ ᠶᠠᠪᠤᠯᠠ᠃ ᠵᠠᠮ ᠳ᠋ᠤ᠌ ᠬᠥᠮᠦᠨ ᠲᠠᠭᠠᠷᠠᠯᠳᠤᠵᠤ ᠰᠡᠳᠬᠢᠯ ᠵᠣᠪᠠᠭᠠᠭᠰᠠᠨ ᠦᠭᠡᠢ᠃ ᠵᠢᠵᠢᠭᠬᠡᠨ ᠳᠠᠪᠠᠭᠠ ᠳᠠᠪᠠᠵᠤ ᠤᠷᠲᠤ ᠠᠮᠠᠨ ᠤ᠋ ᠡᠬᠢ ᠤᠷᠤᠭᠤ ᠣᠷᠣᠭᠠᠳ ᠬᠡᠰᠡᠭ ᠶᠠᠪᠤᠲᠠᠯᠠ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠬᠡᠰᠡᠭ ᠮᠣᠳᠣᠨ ᠡᠴᠡ ᠥᠨᠳᠥᠷ ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠲᠠᠢ᠂ ᠬᠥᠬᠡ ᠳᠡᠪᠡᠯ ᠲᠡᠢ ᠬᠠᠩᠬᠠᠷ ᠡᠷᠡ ᠳᠠᠪᠬᠢᠨ ᠭᠠᠷᠴᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠬᠤᠯᠠᠭᠠᠢᠴᠢ ᠡᠪᠦᠭᠡ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠲᠤ᠌ ᠣᠷᠣᠭᠠ ᠪᠢᠵᠡ ᠭᠡᠵᠦ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ᠃ ᠵᠠᠶᠠᠭᠠ ᠨᠢ ᠣᠷᠭᠢ ᠭᠡᠵᠦ ᠲᠦᠭᠵᠢᠯ ᠬᠠᠰᠬᠢᠷᠤᠭᠠᠳ ᠬᠥᠲᠥᠯᠵᠦ ᠶᠠᠪᠤᠭᠠ ᠮᠣᠷᠢ ᠪᠠᠨ ᠣᠷᠬᠢᠨ ᠵᠢᠭᠤᠲᠠᠪᠠ᠃
ᠲᠡᠮᠦᠷ ᠮᠣᠷᠢᠳ ᠢ᠋ ᠨᠢ ᠲᠦᠭᠵᠢᠯ ᠠᠪᠤᠭᠰᠠᠨ ᠭᠡᠵᠦ ᠣᠭᠲᠣ ᠵᠡᠭᠦᠳᠦᠯᠡᠭᠡ ᠦᠭᠡᠢ ᠪᠢᠯᠡ᠃ ᠮᠣᠷᠢᠳ ᠢ᠋ ᠨᠢ ᠲᠦᠭᠵᠢᠯ ᠬᠥᠲᠥᠯᠦᠨ ᠶᠠᠪᠤᠬᠤ ᠶ᠋ᠢ ᠬᠠᠷᠠᠭᠠᠳ ᠠᠭᠤᠷ ᠨᠢ ᠬᠦᠷᠴᠦ ᠪᠠᠷᠢᠵᠤ ᠠᠪᠤᠭᠠᠳ ᠳᠣᠣᠷᠠ ᠨᠢ ᠲᠣᠨᠢᠯᠭᠠᠵᠤ ᠤᠷᠭᠢᠶᠠ ᠭᠡᠵᠦ ᠪᠣᠳᠣᠪᠠ᠃
ᠵᠢᠷᠣᠭᠠ ᠵᠡᠭᠡᠷᠳᠡ᠂ ᠣᠷᠣᠭᠠ ᠬᠡᠭᠡᠷ ᠦ᠋ᠨ ᠰᠤᠨᠤᠯᠲᠠ ᠡᠴᠡ ᠵᠠᠢᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠤᠳᠠᠯ ᠦᠭᠡᠢ ᠲᠡᠮᠦᠷ ᠦ᠋ᠨ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠠᠷᠤ ᠰᠢᠯᠢᠨ ᠳ᠋ᠦ᠍ᠨᠢ ᠲᠠᠴᠢᠭᠢᠨᠠᠬᠤ ᠳ᠋ᠤ᠌ ᠲᠦᠭᠵᠢᠯ ᠡᠷᠭᠢᠵᠦ ᠬᠠᠷᠠᠯᠠ᠃
ᠲᠡᠮᠦᠷ ᠦ᠋ᠨ ᠠᠮᠠ ᠨᠢ ᠠᠩᠭᠠᠢᠨ᠂ ᠪᠦᠳᠦᠭᠦᠨ ᠲᠠᠰᠢᠭᠤᠷ ᠳᠠᠯᠠᠢᠨ ᠪᠥᠬᠥᠢᠵᠡᠢ᠃ ᠨᠢᠳᠦ ᠨᠢ ᠰᠦᠷᠳᠡᠶᠡ ᠭᠢᠯᠠᠯᠵᠠᠨᠠ᠃ ᠵᠢᠭᠤᠲᠠᠭᠠᠳ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢ ᠣᠢᠯᠠᠭᠠᠭᠰᠠᠨ ᠲᠦᠭᠵᠢᠯ ᠮᠣᠷᠢᠨ ᠡᠴᠡ ᠦᠰᠦᠷᠦᠨ ᠫᠢᠳ ᠬᠢᠲᠡᠯᠡ ᠤᠨᠠᠪᠠ᠃ ᠲᠡᠮᠦᠷ ᠬᠦᠴᠦᠨ ᠳ᠋ᠡᠭᠡᠨ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠨ ᠮᠣᠷᠢ ᠪᠠᠨ ᠲᠣᠭᠲᠠᠭᠠᠭᠠᠳ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠭᠰᠡᠨ ᠲᠦᠭᠵᠢᠯ 《ᠲᠡᠮᠦᠷ ᠭᠤᠸᠠᠢ ᠮᠢᠨᠢ ᠤᠲᠠᠰᠤᠨ ᠤ᠋ ᠴᠢᠨᠡᠭᠡ ᠤᠯᠠᠭᠠᠨ ᠠᠮᠢ ᠶ᠋ᠢ ᠥᠷᠥᠰᠢᠶᠡᠭᠡᠴᠢ᠃ ᠶᠠᠭᠠᠬᠢᠳᠠᠭ ᠪᠢᠯᠡ᠃ ᠥᠴᠦᠬᠡᠨ ᠪᠢ ᠪᠣᠯᠢᠶᠠ》 ᠭᠡᠵᠦ ᠬᠢᠬᠤᠷᠠᠭᠰᠠᠨ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠨᠠ᠃
ᠰᠢᠷᠠ ᠲᠣᠰᠣᠨ ᠤ᠋ ᠰᠢᠲᠠᠵᠤ ᠪᠠᠢᠭᠠ ᠭᠦᠵᠡᠭᠡ ᠰᠢᠭ ᠦᠷᠴᠢᠭᠰᠡᠨ ᠲᠦᠭᠵᠢᠯ ᠦ᠋ᠨ ᠬᠡᠪ ᠨᠢ ᠡᠪᠳᠡᠷᠡᠭᠰᠡᠨ ᠨᠢᠭᠤᠷ ᠬᠠᠪᠲᠠᠭᠠᠢ ᠤᠯᠠᠭᠠᠨ ᠬᠡᠯᠡ ᠭᠠᠷᠭᠠᠨ ᠬᠠᠰᠬᠢᠷᠴᠤ ᠪᠠᠢᠭᠠ ᠲᠠᠷᠪᠠᠭᠠ ᠶ᠋ᠢᠨ ᠨᠦᠬᠡ ᠰᠢᠭ ᠲᠣᠮᠣ ᠠᠮᠠ ᠶ᠋ᠢ ᠬᠠᠷᠠᠭᠠᠳ ᠲᠡᠮᠦᠷ ᠦ᠋ᠨ ᠰᠢᠲᠠᠭᠰᠠᠨ ᠠᠭᠤᠷ ᠨᠢ ᠭᠠᠷᠴᠤ 《ᠡᠢᠮᠦ ᠴᠦ᠍ ᠡᠷᠡ ᠪᠠᠢᠬᠤ ᠭᠡᠵᠦ ᠳᠡ》 ᠭᠡᠵᠦ ᠪᠣᠳᠣᠨ ᠢᠨᠢᠶᠡᠳᠦ ᠨᠢ ᠬᠦᠷᠬᠦ ᠰᠢᠭ ᠪᠣᠯᠪᠠ᠃
ᠲᠡᠮᠦᠷ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠪᠠᠷᠢᠨ ᠲᠦᠭᠵᠢᠯ ᠤᠷᠤᠭᠤ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠮᠢᠨᠢ ᠪᠢ ᠡᠬᠡᠨᠡᠷ ᠲᠡᠢ᠂ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠶᠤᠮᠰᠠᠨ ᠁ ᠪᠢ ᠴᠢᠨᠢ ᠶᠠᠭᠠᠬᠢᠳᠠᠭ ᠪᠢᠯᠡ᠃ ᠪᠢ ᠦᠬᠦᠬᠦ ᠦᠭᠡᠢ ᠭᠡᠵᠦ ᠵᠠᠯᠪᠠᠷᠢᠨᠠ᠃
ᠲᠦᠭᠵᠢᠯ ᠦ᠋ᠨ ᠡᠨᠡ ᠦᠭᠡᠨ ᠳ᠋ᠦ᠍ ᠵᠥᠪᠬᠡᠨ ᠠᠮᠢ ᠭᠤᠶᠤᠵᠤ ᠪᠠᠢᠭᠠ ᠨᠢ ᠦᠨᠡᠨ ᠪᠥᠭᠡᠳ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠨ ᠲᠤᠬᠠᠢ ᠪᠣᠯ ᠣᠷᠣ ᠦᠭᠡᠢ ᠬᠤᠳᠠᠯ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠂ ᠵᠠᠭᠠᠨ ᠤ᠋ ᠬᠦᠵᠦᠭᠦᠦ ᠪᠣᠭᠣᠨᠢ ᠭᠡᠳᠡᠭ ᠡᠨᠡ ᠳᠡ᠃ ᠲᠡᠷᠡ ᠵᠢᠯ ᠨᠠᠮᠠᠢ ᠠᠯᠠᠵᠤ ᠣᠷᠬᠢᠯᠠ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠪᠢᠵᠡ᠃ ᠣᠳᠣ ᠬᠣᠶᠠᠭᠤᠯᠠ ᠳᠠᠩᠰᠠ ᠪᠣᠳᠣᠨᠠ ᠳᠠ᠃ ᠴᠢ ᠪᠠᠰᠠ ᠠᠮᠢ ᠭᠤᠶᠤᠨᠠ ᠭᠡᠨᠡ ᠭᠡᠳ ᠲᠦᠭᠵᠢᠯ ᠦ᠋ᠨ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠵᠠᠵᠤ ᠠᠪᠤᠯᠠ᠃
ᠭᠡᠪᠡᠴᠦ ᠲᠡᠮᠦᠷ ᠦ᠋ᠨ ᠠᠩᠬᠠᠨ ᠤ᠋ ᠠᠭᠤᠷ ᠠᠯᠠᠭᠠ ᠪᠣᠯᠤᠭᠠᠳ 《ᠡᠨᠡ ᠨᠣᠪᠰᠢ ᠶ᠋ᠢ ᠠᠯᠠᠵᠤ ᠭᠠᠷ ᠢ᠋ᠶ᠋ᠠᠨ ᠪᠤᠵᠠᠷᠯᠠᠭᠠᠳ ᠴᠤ᠌ ᠶᠠᠭᠠᠬᠢᠬᠤᠪ᠃ ᠬᠠᠷᠢᠨ ᠪᠠᠬᠠᠨ ᠲᠠᠰᠢᠭᠤᠷᠳᠠᠭᠠᠳ ᠭᠣᠣᠯ ᠲᠠᠢ ᠨᠢ ᠤᠷᠭᠢᠶᠠ》 ᠭᠡᠵᠦ ᠪᠣᠳᠣᠭᠠᠳ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠳᠠᠯᠠᠢᠪᠠ᠃
ᠢᠷᠡᠵᠦ ᠪᠠᠢᠭᠠ ᠦᠬᠦᠯ ᠡᠴᠡ ᠰᠦᠨᠡᠰᠦ ᠨᠢ ᠵᠠᠢᠯᠠᠭᠰᠠᠨ ᠲᠦᠭᠵᠢᠯ ᠦ᠋ᠨ ᠨᠢᠳᠦᠨ ᠡᠴᠡ ᠤᠰᠤ ᠠᠰᠬᠠᠷᠠᠨ᠂ ᠭᠠᠷ ᠨᠢ ᠬᠡᠢ ᠰᠡᠷᠪᠡᠯᠵᠡᠵᠦ 《ᠡᠨ᠂ ᠡᠨ ᠁》 ᠭᠡᠵᠦ ᠠᠭᠤᠯᠠ ᠬᠠᠳᠠ ᠶᠠᠩᠭᠢᠨᠠᠭᠤᠯᠤᠭᠰᠠᠨ ᠳᠠᠭᠤ ᠪᠠᠷ ᠬᠠᠲᠠᠭᠠᠨ ᠬᠠᠰᠬᠢᠷᠪᠠ᠃
ᠲᠠᠰᠢᠭᠤᠷ ᠲᠦᠭᠵᠢᠯ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠫᠢᠩ ᠬᠢᠵᠦ ᠪᠢᠲᠡᠭᠦᠦ ᠳᠤᠤᠭᠠᠷᠤᠨ ᠪᠠᠭᠤᠪᠠ᠃ ᠳᠠᠬᠢᠨ ᠴᠣᠬᠢᠬᠤ ᠭᠡᠲᠡᠯᠡ ᠲᠦᠭᠵᠢᠯ ᠦ᠋ᠨ ᠨᠢᠳᠦ ᠨᠢ ᠴᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠨ ᠪᠡᠶᠡ ᠨᠢ ᠳᠤᠨᠳᠠᠭᠤᠷ ᠤᠰᠤ ᠲᠠᠢ ᠭᠦᠵᠡᠭᠡ ᠰᠢᠭ ᠱᠠᠯᠴᠢ᠌ᠨ ᠰᠤᠯᠠ ᠪᠣᠯᠵᠤ᠂ ᠳᠠᠭᠤ ᠨᠢ ᠲᠠᠰᠤᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠᠰᠢ ᠲᠠᠢ ᠵᠣᠯᠢᠭ ᠭᠡᠳ ᠤᠭᠵᠠᠷᠠᠨ ᠬᠠᠷᠠᠪᠠᠯ ᠵᠠᠪᠠᠵᠢ ᠪᠠᠷ ᠨᠢ ᠴᠢᠰᠤ ᠤᠷᠤᠰᠤᠨ ᠭᠠᠷᠴᠤ ᠢᠷᠡᠯᠡ᠃
ᠮᠠᠭᠤᠵᠢᠷᠠᠨ ᠤᠨᠠᠵᠠᠢ᠃ ᠭᠡᠪᠡᠴᠦ ᠴᠢᠩᠨᠠᠵᠤ ᠦᠵᠡᠪᠡᠯ ᠵᠢᠷᠦᠬᠡ ᠨᠢ ᠴᠣᠬᠢᠯᠠᠵᠤ ᠪᠠᠢᠪᠠ᠃ ᠬᠡᠳᠦ ᠰᠠᠢᠨ ᠴᠣᠬᠢᠵᠤ ᠠᠪᠤᠶᠠ ᠭᠡᠰᠡᠨ ᠲᠡᠮᠦᠷ ᠦ᠋ᠨ ᠤᠷᠮᠠ ᠨᠢ ᠬᠤᠭᠤᠷᠠᠬᠤ ᠰᠢᠭ᠋ ᠪᠣᠯᠤᠭᠠᠳ 《ᠡᠪᠡᠰᠦ ᠢᠳᠡᠵᠦ᠂ ᠤᠰᠤ ᠤᠤᠭᠤᠵᠤ ᠶᠠᠪᠤᠭᠰᠠᠨ ᠵᠣᠯᠢᠭ ᠤᠤ ᠳᠠ》 ᠭᠡᠳ ᠨᠣᠭᠣᠭᠠᠨ ᠳᠡᠭᠡᠷᠡ ᠡᠪᠲᠡᠢᠬᠡᠨ ᠭᠡᠪᠳᠡᠭᠦᠯᠪᠡ᠃
ᠬᠡᠰᠡᠭ ᠪᠠᠢᠲᠠᠯᠠ ᠲᠦᠭᠵᠢᠯ ᠦ᠋ᠨ ᠠᠮᠢᠰᠬᠤᠯᠯᠠᠬᠤ ᠨᠢ ᠮᠡᠳᠡᠭᠳᠡᠵᠦ ᠡᠬᠢᠯᠡᠪᠡ᠃ 《ᠠᠷᠠᠢ ᠴᠤ᠌ ᠦᠭᠦᠴᠢᠬᠦ ᠦᠭᠡᠢ ᠨᠢ ᠪᠣᠯᠤᠯᠲᠠᠢ》 ᠭᠡᠳ ᠲᠡᠮᠦᠷ ᠪᠣᠰᠴᠤ ᠬᠠᠶᠠᠭᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠠᠪᠤᠯᠠ᠃
ᠬᠡᠳᠦᠢ ᠪᠣᠯᠤᠭᠰᠠᠨ ᠢ᠋ ᠲᠦᠭᠵᠢᠯ ᠮᠡᠳᠡᠭᠰᠡᠨ ᠦᠭᠡᠢ᠃ ᠤᠬᠠᠭᠠᠨ ᠣᠷᠣᠵᠤ ᠤᠭᠤᠴᠠ ᠨᠢ ᠬᠦᠨᠳᠦ ᠶᠠᠭᠤᠮᠠᠨ ᠳ᠋ᠤ᠌ ᠳᠠᠷᠤᠭᠤᠯᠤᠭᠰᠠᠨ ᠮᠡᠲᠦ ᠡᠪᠡᠳᠬᠦ ᠪᠥᠭᠡᠳ ᠬᠠᠵᠠᠭᠤ ᠶ᠋ᠢᠨ ᠮᠣᠳᠣᠨ ᠡᠴᠡ ᠡᠮᠡᠭᠡᠯ ᠲᠡᠢ ᠮᠣᠷᠢ ᠤᠶᠠᠭᠠ ᠲᠠᠢ ᠬᠠᠷᠠᠭᠳᠠᠯᠠ᠃
ᠪᠦᠬᠦ ᠶᠠᠭᠤᠮᠠ ᠨᠠᠮ ᠭᠦᠮ᠃ ᠲᠡᠮᠦᠷ ᠮᠣᠷᠢᠳ ᠤ᠋ᠨ ᠬᠠᠮᠲᠤ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠵᠠᠢ᠃ ᠲᠡᠭᠷᠢ ᠳ᠋ᠦ᠍ ᠰᠡᠮᠡᠵᠡᠨ ᠡᠭᠦᠯᠡ ᠮᠠᠨᠠᠷᠠᠨ᠂ ᠲᠡᠭᠦᠨ ᠦ᠌ ᠳᠣᠭᠤᠤᠷ ᠬᠡᠰᠡᠭ ᠲᠤᠷᠯᠢᠶᠠᠬᠠ ᠪᠠᠷᠠᠭᠠᠳᠠᠨ ᠡᠮᠦᠨᠡ ᠵᠦᠭ ᠨᠢᠰᠦᠨᠡ᠃