ᠲᠤᠩᠭᠠᠯᠠᠭ ᠲᠠᠮᠢᠷ3-25-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1400《ᠶᠢᠷᠲᠢᠨᠴᠦ ᠶ᠋ᠢᠨ ᠪᠤᠵᠠᠷ ᠶᠠᠪᠤᠳᠠᠯ ᠢ᠋ ᠬᠠᠷᠠᠬᠤ ᠦᠭᠡᠢ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢᠨ ᠲᠠᠪᠤ
ᠲᠤᠤᠯᠠ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠷᠡ ᠠᠰᠬᠠᠭᠰᠠᠨ ᠬᠠᠷᠠᠤ ᠪᠠᠷ ᠭᠤᠴᠢ ᠣᠷᠴᠢᠮ ᠲᠡᠮᠡᠭᠡᠨ ᠵᠢᠩ ᠣᠭᠲᠣᠯᠤᠨ ᠭᠠᠷᠴᠤ ᠯᠦᠩ ᠲᠣᠯᠣᠭᠠᠢ ᠶ᠋ᠢᠨ ᠡᠮᠦᠨᠡᠭᠦᠷ ᠭᠠᠷᠴᠤ ᠶᠠᠪᠤᠭᠰᠠᠭᠠᠷ ᠪᠣᠭᠳᠠ ᠬᠠᠨ ᠠᠭᠤᠯᠠ ᠶ᠋ᠢᠨ ᠠᠢᠮᠠᠭ ᠤ᠋ᠨ ᠲᠥᠪ ᠤᠷᠤᠭᠤ ᠣᠷᠣᠵᠤ ᠢᠷᠡᠯᠡ᠃ ᠬᠣᠯᠠ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠲᠡᠮᠡᠭᠡ ᠨᠦ᠍ᠭᠦᠳ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠨ ᠠᠭᠠᠵᠢᠮ ᠪᠣᠯᠪᠠᠴᠤ ᠬᠣᠯᠠ ᠬᠣᠯᠠ ᠠᠯᠬᠤᠨᠠ᠃ ᠵᠢᠩ ᠦ᠋ᠨ ᠪᠥᠭᠰᠡᠨ ᠳ᠋ᠦ᠍ ᠥᠵᠦᠭᠦᠷᠰᠡᠭᠡᠨ ᠨᠡᠬᠡᠢ ᠳᠡᠪᠡᠯ ᠲᠡᠢ᠂ ᠵᠢᠷᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠬᠥᠮᠦᠨ ᠬᠦᠷᠡᠩ ᠳᠡᠢᠯᠦᠭ ᠤᠨᠤᠨ ᠶᠠᠪᠤᠨᠠ᠃ ᠤᠷᠢᠳᠤ ᠪᠦᠬᠦ ᠶ᠋ᠢ ᠨᠢ ᠬᠤᠴᠢᠵᠤ ᠬᠣᠶᠠᠷ ᠳᠠᠰᠢ ᠨᠢ ᠤᠨᠵᠢᠭᠤᠯᠤᠭᠰᠠᠨ ᠢᠮᠠᠭᠠᠨ ᠳᠠᠬᠤ ᠳᠡᠢᠯᠦᠭ ᠦ᠋ᠨ ᠠᠯᠬᠤᠭᠠ ᠪᠠᠷ ᠰᠠᠪᠠᠯᠠᠨᠠ᠃ ᠯᠣᠪᠤᠤᠵᠠ ᠪᠠᠨ ᠠᠷᠤ ᠳ᠋ᠠᠭᠠᠨ ᠤᠨᠵᠢᠭᠤᠯᠤᠭᠰᠠᠨ ᠡᠨᠡ ᠬᠥᠮᠦᠨ ᠦ᠌ ᠱᠣᠳᠣᠩ ᠭᠡᠵᠢᠭᠡ ᠶ᠋ᠢᠨ ᠳᠠᠪ ᠨᠢ ᠴᠠᠩᠲᠤᠨ ᠪᠤᠭᠤᠷᠤᠯᠲᠤᠵᠤ ᠠᠭᠤᠷ ᠰᠠᠪᠰᠠᠨᠠ᠃ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠡᠴᠡ ᠪᠤᠰᠤᠳ ᠨᠢ ᠴᠥᠮ ᠴᠠᠰᠤᠨ ᠳ᠋ᠤ᠌ ᠬᠤᠴᠢᠭᠳᠠᠭᠰᠠᠨ ᠲᠤᠯᠠ ᠬᠠᠮᠢᠭᠠᠰᠢ ᠪᠠᠨ ᠯᠠ ᠬᠠᠷᠠᠪᠠᠯ ᠴᠠᠭᠠᠨ ᠪᠥᠭᠡᠳ ᠨᠠᠷᠠᠨ ᠳ᠋ᠤ᠌ ᠭᠢᠯᠲᠠᠭᠠᠨᠠᠨ ᠨᠢᠳᠦ ᠭᠢᠯᠪᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠦᠬᠡᠳ ᠦ᠋ᠳ ᠠ᠋᠃ ᠲᠠ ᠨᠠᠷ ᠶᠠᠪᠤᠵᠤ ᠯᠠ ᠪᠠᠢ᠃ ᠪᠢ ᠳᠡᠯᠭᠡᠭᠦᠷ ᠲᠦ᠍ ᠣᠷᠣᠭᠠᠳ ᠣᠴᠢᠶᠠ ᠭᠡᠵᠦ ᠬᠦᠷᠡᠩ ᠲᠠᠢᠯᠤᠭ ᠲᠠᠢ ᠬᠥᠮᠦᠨ ᠬᠡᠯᠡᠭᠡᠳ ᠲᠡᠮᠡᠭᠡᠨ ᠴᠤᠪᠤᠭᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠵᠣᠭᠳᠣᠷ ᠬᠥᠳᠡᠯᠭᠡᠨ ᠰᠡᠮᠪᠡᠯᠵᠡᠭᠦᠯᠦᠨ ᠱᠣᠭᠰᠢᠭᠤᠯᠪᠠ᠃
ᠡᠨᠡ ᠬᠥᠮᠦᠨ ᠪᠣᠯ ᠠᠩᠭᠢ ᠷᠢᠨᠴᠢᠨ ᠦ᠌ ᠲᠠᠨᠢᠯ ᠪᠥᠭᠡᠳ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠪᠠᠲᠤ ᠶ᠋ᠢ ᠬᠦᠷᠢᠶᠡᠨ ᠳ᠋ᠦ᠍ ᠬᠦᠷᠭᠡᠵᠦ ᠥᠭᠭᠦᠭᠰᠡᠨ ᠪᠠᠯᠳᠠᠨ ᠶᠤᠮ᠃ ᠶᠠᠪᠤᠭᠰᠠᠭᠠᠷ ᠳᠡᠯᠭᠡᠭᠦᠷ ᠦ᠋ᠨ ᠡᠮᠦᠨᠡᠬᠢ ᠤᠶᠠᠭᠠᠨ ᠳᠡᠭᠡᠷᠡ ᠡᠴᠡ ᠲᠠᠢᠯᠤᠭ ᠢ᠋ᠶ᠋ᠠᠨ ᠤᠶᠠᠭᠠᠳ ᠣᠷᠣᠵᠤ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠨ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠶᠠᠪᠤᠵᠤ ᠯᠠᠩᠭᠦᠢ ᠳᠡᠭᠡᠷᠡ ᠳᠡᠯᠭᠡᠨ ᠲᠠᠯᠪᠢᠭᠰᠠᠨ ᠪᠠᠷᠠᠭᠠ ᠶ᠋ᠢ ᠪᠡᠷᠢᠯᠡᠨ᠂ ᠦᠨᠡ ᠶ᠋ᠢ ᠨᠢ ᠠᠰᠠᠭᠤᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠯᠳᠠᠨ ᠭᠤᠸᠠᠢ ᠭᠡᠵᠦ ᠬᠠᠵᠠᠭᠤ ᠳ᠋ᠤᠨᠢ ᠬᠥᠮᠦᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠰᠣᠴᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠪᠠᠶᠠᠷ ᠤ᠋ᠨ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠢᠨᠢ ᠪᠠᠲᠤ ᠤᠤ ᠳᠠ? ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠪᠢ ᠪᠠᠲᠤ ᠪᠠᠢᠨᠠ᠃
ᠬᠠᠭᠤᠴᠢᠨ ᠲᠠᠨᠢᠯ ᠵᠠᠯᠠᠭᠤ ᠬᠥᠭᠰᠢᠨ ᠬᠣᠶᠠᠷ ᠠᠭᠤᠯᠵᠠᠵᠤ ᠶᠠᠭᠤᠨ ᠤ᠋ ᠡᠮᠦᠨᠡ ᠵᠣᠯᠭᠠᠵᠤ ᠳᠠᠷᠠᠭᠠ ᠨᠢ ᠬᠠᠷᠢᠯᠴᠠᠨ ᠪᠠᠢᠴᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠶᠠᠷᠢᠭᠠᠳ ᠶᠠᠭᠠᠬᠢᠬᠤᠪ᠃ ᠮᠠᠨ ᠤ᠋ ᠳ᠋ᠤ᠌ ᠣᠴᠢᠶᠠ᠃ ᠶᠡᠷᠦ ᠨᠢ ᠮᠠᠨ ᠤ᠋ ᠳ᠋ᠤ᠌ ᠬᠣᠨᠣᠭᠠᠳ ᠶᠠᠪᠤ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠣᠯᠤᠨᠠ ᠬᠦᠦ ᠮᠢᠨᠢ᠃ ᠭᠠᠭᠴᠠᠬᠦ ᠵᠢᠩ ᠢ᠋ᠶ᠋ᠡᠨ ᠡᠷᠭᠢᠭᠦᠯᠬᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠲᠡᠮᠡᠭᠡ ᠪᠡᠷ ᠮᠣᠷᠳᠠᠭᠠᠳ ᠪᠢ ᠡᠷᠭᠢᠭᠦᠯᠦᠭᠡᠳ ᠢᠷᠡᠶᠡ᠃ ᠡᠨᠡᠦᠬᠡᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠨᠠ ᠪᠢᠯᠡ᠃ ᠬᠠᠷᠢᠨ ᠲᠠ ᠮᠠᠨ ᠤ᠋ ᠳ᠋ᠤ᠌ ᠣᠴᠢᠭᠠᠳ ᠪᠠᠢᠵᠤ ᠪᠠᠢ᠃ ᠣᠢᠷᠠᠬᠠᠨ ᠭᠡᠳ ᠡᠰᠢ ᠳᠠᠰᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠬᠥᠮᠦᠨ ᠢ᠋ ᠳᠠᠭᠤᠳᠠᠵᠤ 《ᠡᠪᠦᠭᠡᠨ᠂ ᠴᠢ ᠡᠨᠡ ᠪᠠᠯᠳᠠᠨ ᠭᠤᠸᠠᠢ ᠶ᠋ᠢ ᠮᠠᠨ ᠤ᠋ ᠳ᠋ᠤ᠌ ᠬᠦᠷᠭᠡᠵᠦ ᠥᠭ᠃ ᠬᠠᠯᠠᠭᠤᠨ ᠴᠠᠢ ᠲᠣᠰᠣ ᠪᠣᠭᠣᠷᠰᠣᠭ ᠥᠭᠭᠦᠭᠡᠷᠡᠢ᠃ ᠪᠢ ᠤᠳᠠᠬᠤ ᠦᠭᠡᠢ ᠢᠷᠡᠨᠡ》 ᠭᠡᠯᠡ᠃
ᠪᠠᠯᠳᠠᠨ ᠤ᠋ ᠵᠢᠩ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠠᠩᠬᠠᠷ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠭᠤᠵᠤ ᠵᠢᠩᠴᠢᠳ ᠦ᠋ᠨ ᠨᠢᠭᠡ ᠨᠢ ᠲᠡᠮᠡᠭᠡ ᠢᠳᠡᠭᠦᠯᠬᠦ ᠪᠡᠷ ᠭᠠᠷᠤᠯᠠ᠃ ᠪᠠᠯᠳᠠᠨ ᠲᠡᠷᠢᠭᠦᠲᠡᠢ ᠪᠤᠰᠤᠳ ᠨᠢ ᠪᠠᠲᠤ ᠶ᠋ᠢᠨ ᠭᠡᠷ ᠲᠦ᠍ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠢᠯᠤᠨ ᠲᠠᠪᠠᠲᠠᠢ ᠰᠠᠭᠤᠵᠠᠭᠠᠵᠤ ᠨᠠᠷᠢᠨ ᠬᠣᠭᠣᠯᠠ ᠪᠠᠷ ᠳᠠᠢᠯᠠᠭᠤᠯᠪᠠ᠃ ᠪᠠᠰᠠ ᠪᠠᠲᠤ ᠠᠷᠢᠬᠢ ᠠᠪᠴᠢᠷᠠᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠣᠯᠠᠨ ᠬᠣᠨᠣᠭ ᠤ᠋ᠨ ᠬᠠᠲᠠᠭᠤ ᠠᠶᠠᠨ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠨᠢ ᠰᠡᠷᠭᠦᠵᠦ ᠦᠭᠡ ᠶᠠᠷᠢᠶᠠ ᠣᠯᠠᠰᠢᠷᠠᠨ ᠳᠠᠭᠤ ᠴᠢᠩᠭᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠴᠢ ᠪᠠᠭᠰᠢ ᠪᠠᠨ ᠲᠠᠭᠠᠯᠠᠯ ᠲᠡᠭᠦᠰᠬᠦ ᠳᠡᠭᠡᠷᠡ ᠯᠡ ᠬᠠᠷᠠ ᠪᠣᠯᠤᠭᠰᠠᠨ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠪᠠᠭᠰᠢ ᠮᠢᠨᠢ ᠨᠠᠮᠠᠢ ᠬᠠᠷᠠ ᠪᠣᠯ ᠭᠡᠰᠡᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠲᠠᠩᠬᠢᠮ ᠤ᠋ᠨ ᠪᠠᠭᠰᠢ ᠪᠣᠯᠤᠭᠰᠠᠨ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠵᠤ ᠲᠡᠭᠦᠰᠦᠭᠡᠳ ᠲᠠᠩᠬᠢᠮ ᠤ᠋ᠨ ᠳᠠᠭᠠᠭᠤᠷ ᠰᠤᠷᠭᠠᠭᠴᠢ ᠪᠠᠭᠰᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠴᠢᠨᠢ ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠴᠣᠬᠢᠭᠤᠯᠤᠭᠠᠳ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠭᠡᠳᠡᠭ ᠦᠨᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠣᠬᠢᠭᠤᠯᠵᠤ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠨᠢ ᠦᠨᠡᠨ᠃ ᠭᠡᠬᠦ ᠳ᠋ᠡᠭᠡᠨ ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠪᠢᠰᠢ ᠭᠡᠳ ᠪᠠᠲᠤ ᠠᠩᠭᠢ ᠷᠢᠨᠴᠢᠨ ᠦ᠌ ᠨᠠᠰᠤ ᠪᠠᠷᠠᠭᠰᠠᠨ ᠲᠤᠬᠠᠢ ᠶᠠᠷᠢᠯᠠ᠃
ᠪᠠᠲᠤ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠪᠠᠯᠳᠠᠨ ᠦᠯᠡᠮᠵᠢ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠴᠤ ᠪᠠᠢᠬᠤ ᠳ᠋ᠤ᠌ ᠨᠢᠭᠤᠷ ᠲᠤᠨᠢ ᠤᠷᠲᠤ ᠪᠥᠭᠡᠳ ᠬᠦᠨᠳᠦ ᠠᠮᠢᠳᠤᠷᠠᠯ ᠤ᠋ᠨ ᠲᠠᠮᠠᠭᠠ ᠪᠣᠯᠤᠭᠰᠠᠨ ᠦᠷᠴᠢᠯᠡᠭᠡ ᠨᠦ᠍ᠭᠦᠳ ᠤᠯᠠᠮ ᠪᠦᠷ ᠲᠣᠳᠣᠷᠠᠨ ᠠᠮᠠ ᠨᠢ ᠦᠶᠡ ᠦᠶᠡ ᠪᠦᠪᠦᠳᠦᠨᠡᠨᠡ᠃ ᠬᠠᠯᠬᠠ ᠶ᠋ᠢᠨ ᠵᠠᠶᠠᠭᠠ ᠪᠤᠶᠠᠨ ᠢ᠋ ᠰᠠᠬᠢᠭᠴᠢ᠂ ᠪᠡᠶᠡᠯᠡᠭᠰᠡᠨ ᠪᠤᠷᠬᠠᠨ ᠪᠣᠭᠳᠠ ᠵᠢᠪᠵᠤᠠᠳᠠᠮᠪᠠ ᠬᠤᠲᠤᠭᠲᠤ ᠬᠥᠮᠦᠨ ᠠᠯᠠᠨᠠ ᠭᠡᠳᠡᠭ ᠢ᠋ ᠰᠠᠨᠠᠬᠤ ᠳ᠋ᠤ᠌ ᠤᠬᠠᠭᠠᠨ ᠳ᠋ᠤ᠌ ᠪᠠᠭᠲᠠᠮᠠ ᠦᠭᠡᠢ᠃ ᠭᠡᠪᠡᠴᠦ ᠪᠠᠲᠤ ᠶ᠋ᠢᠨ ᠦᠭᠡ ᠪᠦᠬᠦᠨ ᠳ᠋ᠦ᠍ 《ᠡᠨᠡ ᠪᠣᠯ ᠦᠨᠡᠨ ᠶᠤᠮ ᠰᠢᠦ》 ᠭᠡᠰᠡᠨ ᠨᠤᠭᠤᠷᠠᠰᠢ ᠦᠭᠡᠢ ᠥᠩᠭᠡ ᠪᠠᠢᠭᠠ ᠨᠢ ᠪᠠᠯᠳᠠᠨ ᠳ᠋ᠤ᠌ ᠳᠠᠮᠵᠢᠨ ᠬᠠᠯᠳᠠᠵᠤ ᠠᠶᠤᠬᠤ᠂ ᠭᠠᠢᠬᠠᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠦᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠱ᠌ᠢ ᠬᠦᠦ ᠮᠢᠨᠢ᠃ ᠢᠩᠭᠢᠵᠦ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ᠃ ᠬᠠᠯᠬᠠ ᠳ᠋ᠤ᠌ ᠬᠣᠪᠣᠷᠬᠠᠨ ᠡᠷᠳᠡᠮ ᠲᠡᠢ ᠯᠠᠮᠠ ᠶ᠋ᠢ ᠪᠣᠭᠳᠠ ᠭᠡᠭᠡᠨ ᠶᠠᠭᠤ ᠪᠣᠯᠤᠯᠠ ᠭᠡᠵᠦ ᠁ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠤᠨ ᠵᠠᠯᠪᠠᠷᠢᠭᠰᠠᠨ ᠢ᠋ᠶ᠋ᠠᠨ᠁ ᠬᠣᠷᠣᠭᠠᠬᠤ ᠪᠢᠯᠡ? ᠭᠡᠵᠦ ᠰᠢᠪᠡᠭᠡᠨᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠯᠳᠠᠨ ᠭᠤᠸᠠᠢ ᠮᠢᠨᠢ ᠡᠨᠡ ᠪᠣᠯ ᠲᠠ ᠪᠢᠳᠡ ᠬᠣᠶᠠᠷ ᠠᠭᠤᠯᠵᠠᠭᠠᠳ ᠶᠠᠷᠢᠵᠤ ᠪᠠᠢᠭᠠ ᠰᠢᠭ᠋ ᠦᠨᠡᠨ ᠬᠡᠷᠡᠭ ᠭᠡᠳ ᠬᠦᠷᠢᠶᠡ ᠶᠤᠠᠳᠤᠨ ᠤ᠋ ᠬᠠᠰᠢᠶᠠᠨ ᠳ᠋ᠤ᠌ ᠵᠠᠮᠪᠠᠯ ᠴᠡᠮᠪᠡ ᠬᠣᠶᠠᠷ ᠶᠠᠭᠤ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠬᠡᠯᠡᠪᠡ᠃
ᠪᠣᠭᠳᠠ ᠳᠤᠷᠠ ᠦᠭᠡᠢ ᠠᠭᠰᠠᠨ ᠴᠢᠮᠠᠳᠴᠠᠷᠠᠩ ᠳᠠ ᠯᠠᠮᠠ᠂ ᠴᠢᠨ ᠸᠠᠩ ᠬᠠᠨᠳᠠᠳᠣᠷᠵᠢ ᠂ ᠵᠠᠰᠠᠭᠲᠤ ᠬᠠᠨ ᠰᠤᠳᠨᠠᠮᠴᠠᠷᠠᠩ ᠵᠡᠷᠭᠡ ᠣᠯᠠᠨ ᠬᠥᠮᠦᠨ ᠢ᠋ ᠪᠤᠵᠠᠷ ᠪᠣᠯᠠᠢ ᠠᠷᠭᠠ ᠪᠠᠷ ᠬᠣᠷᠣᠭᠠᠭᠰᠠᠨ ᠲᠤᠬᠠᠢ ᠶᠠᠷᠢᠶᠠ ᠶ᠋ᠢ ᠪᠠᠯᠳᠠᠨ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ᠃ ᠵᠠᠰᠠᠭᠲᠤ ᠬᠠᠨ ᠰᠤᠳᠨᠠᠮᠴᠠᠷᠠᠩ ᠳ᠋ᠤ᠌ ᠶᠡᠬᠡ ᠳᠠᠭᠢᠨᠢ ᠳᠣᠨᠲᠣᠭᠳᠦᠯᠮᠠ ᠳᠤᠠᠳᠤᠭᠳᠤᠯᠮᠠ ᠪᠠᠷ ᠬᠣᠣᠷᠠᠲᠠᠢ ᠠᠷᠢᠬᠢ ᠥᠭᠭᠦᠭᠦᠯᠵᠦ ᠠᠯᠠᠭᠠᠳ ᠬᠠᠭᠠᠨ ᠤ᠋ ᠬᠠᠲᠤᠨ ᠡᠭᠡᠯ ᠨᠢᠭᠡᠨ ᠪᠦᠰᠡᠭᠦᠢ ᠶ᠋ᠢ ᠰᠢᠮᠨᠤ ᠤᠴᠢᠷ ᠡᠴᠡ ᠨᠥᠬᠥᠷ ᠢ᠋ᠶ᠋ᠡᠨ ᠠᠯᠠᠪᠠ ᠭᠡᠵᠦ ᠵᠠᠷ ᠲᠠᠷᠬᠠᠭᠠᠵᠠᠢ᠃ ᠴᠢᠨ ᠸᠠᠩ ᠬᠠᠨᠳᠠᠳᠣᠷᠵᠢ ᠳ᠋ᠤ᠌ ᠮᠥᠨ ᠯᠡ ᠳᠣᠨᠲᠣᠭᠳᠦᠯᠮᠠ ᠪᠠᠷ ᠬᠣᠣᠷᠠᠲᠠᠢ ᠠᠷᠢᠬᠢ ᠥᠭᠬᠦ ᠳ᠋ᠦ᠍ᠨᠢ ᠤᠷᠢᠳᠤᠬᠢ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠢ᠋ ᠮᠡᠳᠡᠳᠡᠭ ᠸᠠᠩ ᠶᠡᠬᠡ ᠰᠣᠭᠲᠣᠭᠰᠠᠨ ᠳᠦᠷᠢ ᠭᠠᠷᠭᠠᠨ ᠣᠤᠭᠤᠯ ᠦᠭᠡᠢ ᠶᠠᠪᠤᠬᠤ ᠳ᠋ᠤᠨᠢ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠳᠤᠮᠳᠠ ᠭᠣᠣᠯ ᠤ᠋ᠨ ᠣᠷᠴᠢᠮ ᠴᠣᠬᠢᠭᠤᠯᠵᠤ ᠠᠯᠠᠭᠠᠳ ᠮᠣᠷᠢᠨ ᠡᠴᠡ ᠪᠡᠨ ᠤᠨᠠᠵᠤ ᠴᠢᠷᠦᠭᠳᠡᠨ ᠦᠬᠦᠪᠡ ᠭᠡᠵᠦ ᠵᠠᠷ ᠲᠠᠷᠬᠠᠭᠠᠵᠠᠢ᠃ ᠴᠢᠮᠠᠳᠴᠠᠷᠠᠩ ᠳᠠ ᠯᠠᠮᠠ ᠶ᠋ᠢ ᠬᠡᠳᠦ ᠳᠠᠬᠢᠨ ᠠᠯᠠᠬᠤ ᠭᠡᠳ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠣᠷ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠢ᠋ ᠲᠣᠭᠲᠠᠨᠢᠭᠤᠯᠬᠤ ᠰᠠᠢᠳ ᠢ᠋ᠶ᠋ᠠᠷ ᠲᠣᠮᠢᠯᠠᠵᠤ ᠶᠠᠪᠤᠭᠤᠯᠤᠨ ᠵᠠᠮ ᠳ᠋ᠤᠨᠢ ᠠᠯᠠᠭᠤᠯᠵᠠᠢ᠃ ᠡᠨᠡ ᠪᠦᠬᠦᠨ ᠢ᠋ ᠪᠠᠯᠳᠠᠨ ᠰᠣᠨᠣᠰᠤᠭᠰᠠᠨ᠃ ᠭᠡᠪᠡᠴᠦ ᠲᠡᠷᠡ ᠪᠤᠷᠬᠠᠨ ᠬᠥᠮᠦᠨ ᠡᠢᠮᠦ ᠬᠢᠯᠢᠨᠴᠡᠲᠦ ᠶᠠᠭᠤᠮᠠ ᠬᠢᠬᠦ ᠶᠣᠰᠣ ᠦᠭᠡᠢ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠦᠴᠦᠯᠡᠨ ᠢᠲᠡᠭᠡᠭᠦᠯᠵᠦ ᠶᠠᠪᠤᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠥᠨᠥᠳᠥᠷ ᠦ᠋ᠨ ᠪᠠᠲᠤ ᠶ᠋ᠢᠨ ᠶᠠᠷᠢᠶᠠ ᠪᠣᠯ ᠵᠠᠢᠯᠠᠵᠤ ᠪᠣᠯᠣᠰᠢ ᠦᠭᠡᠢ ᠪᠠᠷᠢᠮᠲᠠ ᠲᠠᠢ ᠵᠦᠢᠯ ᠪᠠᠢᠯᠠ᠃ ᠤᠷᠢᠳᠤ ᠪᠣᠭᠳᠠ ᠲᠡᠭᠦᠨ ᠢ᠋ ᠴᠢᠩᠭᠢᠵᠦ ᠠᠯᠠᠭᠰᠠᠨ ᠭᠡᠨᠡ᠃ ᠡᠭᠦᠨ ᠢ᠋ ᠢᠩᠭᠢᠵᠦ ᠠᠯᠠᠭᠰᠠᠨ ᠭᠡᠨᠡ ᠭᠡᠳᠡᠭ ᠶᠠᠷᠢᠶᠠ ᠶ᠋ᠢ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠡᠴᠡ ᠳᠠᠮᠵᠢᠭᠤᠯᠤᠨ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠪᠣᠯ ᠡᠨᠡ ᠤᠳᠠᠭᠠ ᠠᠩᠭᠢ ᠷᠢᠨᠴᠢᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠰᠠᠨ ᠪᠥᠭᠡᠳ ᠠᠯᠠᠭᠰᠠᠨ ᠬᠥᠮᠦᠰ ᠦ᠋ᠨ ᠡᠨᠡ ᠪᠤᠵᠠᠷ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠭᠰᠠᠨ ᠬᠥᠮᠦᠨ ᠡᠴᠡ ᠰᠢᠭᠤᠳ ᠰᠣᠨᠣᠰᠴᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠷᠬᠠᠨ ᠮᠢᠨᠢ᠃ ᠶᠠᠭᠤ ᠪᠣᠯᠤᠯᠠ ᠭᠡᠵᠦ ᠬᠣᠷᠣᠭᠠᠭᠰᠠᠨ ᠪᠠᠢᠬᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠳᠠ ᠪᠣᠯ ᠶᠠᠭᠤ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠲᠡᠨᠡᠭ ᠬᠥᠮᠦᠨ᠃ ᠲᠡᠭᠦᠨ ᠦ᠌ ᠶᠠᠪᠤᠳᠠᠯ ᠪᠤᠵᠠᠷ ᠪᠣᠯᠠᠢ᠃ ᠪᠠᠭᠰᠢ ᠪᠣᠯ ᠶᠡᠬᠡ ᠶᠠᠭᠤᠮᠠ ᠮᠡᠳᠡᠳᠡᠭ ᠤᠬᠠᠭᠠᠨ ᠲᠠᠢ ᠬᠥᠮᠦᠨ᠃ ᠡᠨᠡ ᠤᠴᠢᠷ ᠡᠴᠡ ᠪᠣᠭᠳᠠ ᠶ᠋ᠢᠨ ᠮᠠᠭᠤᠬᠠᠢ ᠠᠵᠢᠯ᠂ ᠲᠡᠨᠡᠭ ᠵᠠᠩ ᠢ᠋ ᠵᠢᠭᠰᠢᠨ᠂ ᠢᠯᠠᠨ ᠳᠠᠯᠠᠨ ᠦᠭᠡᠢ ᠶᠠᠷᠢᠳᠠᠭ ᠪᠠᠢᠭᠰᠠᠨ᠃ ᠡᠭᠦᠨ ᠳ᠋ᠦ᠍ᠨᠢ ᠬᠣᠷᠣᠰᠴᠤ ᠥᠰᠢᠭᠰᠡᠨ ᠪᠠᠢᠬᠠ ᠳᠠ᠃
ᠪᠠᠯᠳᠠᠨ ᠳᠠᠭᠤ ᠦᠭᠡᠢ ᠳᠣᠭᠣᠭᠰᠢ ᠬᠠᠷᠠᠨ ᠰᠠᠭᠤᠪᠠ᠃ ᠰᠢᠨᠡ ᠶ᠋ᠢᠨ ᠬᠢᠨᠢ ᠠᠷᠠᠰᠤ ᠲᠠᠲᠠᠪᠠᠯᠵᠠᠨ ᠴᠡᠴᠡᠷᠡᠵᠦ ᠤᠷᠲᠤ ᠪᠥᠭᠡᠳ ᠲᠣᠳᠣ ᠠᠮᠢᠰᠬᠤᠯᠯᠠᠨᠠ᠃ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠡᠷᠭᠦᠵᠦ ᠪᠠᠲᠤ ᠶ᠋ᠢ ᠤᠳᠠᠲᠠᠯᠠ ᠭᠥᠯᠢᠷᠡᠨ ᠰᠢᠷᠳᠡᠯᠡ᠃ ᠪᠠᠲᠤ ᠶ᠋ᠢᠨ ᠨᠢᠳᠦ᠂ ᠨᠢᠭᠤᠷ ᠤ᠋ᠨ ᠰᠢᠷᠬᠡᠭ ᠪᠦᠷᠢ 《ᠮᠢᠨᠦ ᠪᠠᠭᠰᠢ ᠶ᠋ᠢ ᠪᠣᠭᠳᠠ ᠠᠯᠠᠭᠰᠠᠨ》 ᠭᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠷᠬᠠᠨ ᠮᠢᠨᠢ ᠭᠡᠳ ᠪᠠᠯᠳᠠᠨ ᠵᠠᠯᠪᠠᠷᠢᠭᠰᠠᠨ ᠢ᠋ᠶ᠋ᠠᠨ ᠶᠢᠷᠲᠢᠨᠴᠦ ᠶ᠋ᠢᠨ ᠪᠤᠵᠠᠷ ᠶᠠᠪᠤᠳᠠᠯ ᠢ᠋ ᠬᠠᠷᠠᠬᠤ ᠦᠭᠡᠢ ᠭᠡᠰᠡᠨ ᠶᠤᠮ ᠰᠢᠭ ᠨᠢᠳᠦ ᠪᠡᠨ ᠠᠨᠢᠵᠤ ᠬᠡᠰᠡᠭ ᠪᠣᠯᠤᠭᠠᠳ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠲᠠᠨ ᠨᠢᠳᠦ ᠪᠡᠨ ᠠᠯᠭᠤᠷ ᠨᠡᠭᠡᠭᠡᠪᠡ᠃ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠲᠡᠷᠡ ᠨᠢᠳᠦ 《ᠡᠨᠡ ᠲᠤᠬᠠᠢ ᠴᠠᠰᠢ ᠪᠢᠲᠡᠭᠡᠢ ᠶᠠᠷᠢᠭᠠᠴᠢ ᠳᠠ》 ᠭᠡᠵᠦ ᠥᠭᠡᠯᠡᠨ ᠭᠤᠶᠤᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠯᠳᠠᠨ ᠭᠤᠸᠠᠢ᠂ ᠤᠨᠲᠠᠶᠠ ᠭᠡᠳ ᠪᠠᠲᠤ ᠪᠣᠰᠴᠤ ᠵᠢᠩᠴᠢᠨ ᠡᠪᠦᠭᠡᠨ ᠳ᠋ᠦ᠍ ᠣᠷᠣ ᠵᠠᠰᠠᠵᠤ ᠥᠭᠭᠦᠯᠡ᠃
ᠪᠠᠯᠳᠠᠨ ᠵᠤᠵᠠᠭᠠᠨ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠲᠠᠪᠠᠲᠠᠢ ᠬᠡᠪᠲᠡᠵᠦ᠂ ᠪᠠᠲᠤ ᠪᠠᠷ ᠲᠤᠮᠯᠠᠢᠳᠠᠭᠤᠯᠤᠨ ᠬᠤᠴᠢᠭᠤᠯᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ 《ᠬᠦᠦ ᠮᠢᠨᠢ ᠪᠠᠭᠰᠢ ᠴᠢᠨᠢ ᠴᠠᠨᠢᠳᠠ ᠶ᠋ᠢᠨ ᠨᠣᠮ ᠤ᠋ᠨ ᠣᠷᠣᠢ ᠳ᠋ᠤᠨᠢ ᠭᠠᠷᠤᠭᠰᠠᠨ ᠡᠷᠳᠡᠮ ᠲᠡᠢ ᠯᠠᠮᠠ ᠪᠠᠢᠭᠰᠠᠨ ᠶᠤᠮ ᠭᠡᠳᠡᠭ ᠰᠢᠦ᠃ ᠶᠠᠮᠠᠷ ᠪᠠᠭᠠ ᠡᠷᠳᠡᠮᠲᠡᠢ ᠬᠥᠮᠦᠨ ᠠᠩᠭᠢ ᠪᠣᠯᠬᠤ ᠪᠢᠯᠡ ᠳᠠ᠃ ᠮᠥᠨ ᠴᠦ᠍ ᠭᠣᠴᠣ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠳᠡ᠃ ᠪᠢᠳᠡ ᠬᠣᠶᠠᠷ ᠪᠠᠭᠠ ᠳ᠋ᠠᠭᠠᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠠᠬᠠ ᠯᠠᠮᠠ ᠶ᠋ᠢᠨ ᠬᠣᠭᠣᠯᠠ ᠬᠦᠷᠭᠡᠵᠦ ᠥᠭᠭᠦᠭᠡᠳ ᠪᠤᠴᠠᠵᠤ ᠶᠠᠪᠤᠯᠠ᠃ ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠡᠬᠢ ᠪᠡᠷ ᠪᠠᠢᠭᠰᠠᠨ ᠶᠤᠮᠰᠠᠨ᠃ ᠪᠢᠳᠡᠨ ᠦ᠌ ᠡᠮᠦᠨᠡ ᠶᠠᠪᠤᠭᠰᠠᠨ ᠲᠡᠮᠡᠭᠡ ᠲᠡᠢ ᠬᠥᠮᠦᠨ ᠦ᠌ ᠮᠥᠷ ᠲᠠᠭᠠᠷᠠᠯᠳᠤᠪᠠ᠃ ᠬᠡᠰᠡᠭ ᠶᠠᠪᠤᠲᠠᠯᠠ ᠪᠠᠭᠤᠭᠠᠳ ᠶᠠᠪᠤᠭᠰᠠᠨ ᠮᠥᠷ ᠨᠢ ᠪᠠᠢᠯᠠ᠃ ᠪᠠᠭᠰᠢ ᠴᠢᠨᠢ ᠲᠡᠭᠦᠨ ᠢ᠋ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠪᠠᠷᠠᠭᠤᠨ ᠨᠢᠳᠦ ᠨᠢ ᠰᠣᠬᠣᠷ ᠲᠡᠮᠡᠭᠡ ᠲᠡᠢ᠂ ᠬᠥᠯ ᠬᠦᠨᠳᠦ ᠲᠡᠢ ᠬᠥᠮᠦᠨ ᠶᠠᠪᠤᠵᠤ ᠰᠢᠦ》 ᠭᠡᠯᠡ᠃ ᠵᠠ ᠲᠡᠭᠡᠭᠡᠳ ᠭᠦᠢᠴᠡᠵᠦ ᠣᠴᠢᠪᠠᠯ ᠶᠠᠭ ᠯᠠ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠪᠠᠢᠳᠠᠭ ᠪᠠᠢᠨᠠ᠃ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠢ᠋ ᠨᠢ ᠠᠰᠠᠭᠤᠪᠠᠯ 《ᠲᠡᠭᠦᠨ ᠢ᠋ ᠮᠡᠳᠡᠵᠦ ᠶᠠᠳᠠᠭᠠᠳ ᠪᠠᠢᠬᠤ ᠶᠠᠭᠤᠮᠠ ᠶᠠᠭᠤ ᠪᠠᠢᠬᠤᠪ ᠳᠠ᠃ ᠲᠡᠮᠡᠭᠡ ᠨᠢ ᠡᠪᠡᠰᠦ ᠢᠳᠡᠬᠦ ᠳ᠋ᠡᠭᠡᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠡᠪᠡᠰᠦ ᠪᠡᠨ ᠳᠤᠲᠠᠭᠤ ᠬᠠᠵᠠᠵᠤ᠂ ᠵᠡᠭᠦᠨ ᠲᠡᠰᠢ ᠪᠡᠨ ᠡᠷᠭᠢᠵᠦ ᠢᠳᠡᠭᠰᠡᠨ ᠪᠠᠢᠨᠠ ᠪᠢᠯᠡ᠃ ᠡᠵᠡᠨ ᠨᠢ ᠰᠠᠭᠤᠵᠤ ᠪᠠᠢᠭᠠᠳ ᠪᠣᠰᠬᠤ ᠳ᠋ᠠᠭᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠷᠤ ᠳ᠋ᠠᠭᠠᠨ ᠲᠤᠯᠵᠤ ᠪᠣᠰᠤᠭᠰᠠᠨ ᠮᠥᠷ ᠨᠢ ᠴᠠᠰᠤᠨ ᠳᠡᠭᠡᠷᠡ ᠢᠯᠡᠷᠬᠡᠢ ᠪᠠᠢᠭᠰᠠᠨ》 ᠭᠡᠰᠡᠨ ᠶᠤᠮ ᠰᠢᠦ᠃ ᠮᠥᠨ ᠴᠦ᠍ ᠤᠬᠠᠭᠠᠨ ᠲᠠᠢ ᠭᠢᠷᠠᠬᠠᠢ ᠬᠥᠮᠦᠨ ᠳᠡ ᠭᠡᠯᠡ᠃
ᠷᠢᠨᠴᠢᠨ ᠦ᠌ ᠠᠭᠤᠤ ᠴᠠᠭᠠᠨ᠂ ᠰᠠᠢᠬᠠᠨ ᠰᠡᠳᠬᠢᠯ ᠦ᠋ᠨ ᠲᠤᠬᠠᠢ ᠪᠠᠲᠤ ᠪᠠᠯᠳᠠᠨ ᠬᠣᠶᠠᠷ ᠡᠭᠡᠯᠵᠢᠯᠡᠨ ᠶᠠᠷᠢᠭᠰᠠᠭᠠᠷ ᠰᠥᠨᠢ ᠳᠤᠮᠳᠠ ᠥᠩᠭᠡᠷᠡᠭᠦᠯᠵᠦ ᠤᠨᠲᠠᠪᠠ᠃ ᠮᠠᠷᠭᠠᠰᠢ ᠨᠢ ᠪᠠᠯᠳᠠᠨ ᠤ᠋ ᠵᠢᠩ ᠦ᠋ᠨ ᠴᠤᠪᠤᠭᠠ ᠬᠦᠷᠢᠶᠡᠨ ᠦ᠌ ᠵᠦᠭ ᠬᠥᠳᠡᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠳᠴᠠᠷᠠᠩ ᠳᠠ ᠯᠠᠮᠠ᠂ ᠳᠡᠭᠡᠳᠦ ᠵᠠᠰᠠᠭᠲᠤ ᠬᠠᠨ᠂ ᠬᠠᠨᠳᠠ ᠴᠢᠨ ᠸᠠᠩ ᠴᠥᠮ ᠯᠡ ᠪᠠᠭᠰᠢ ᠰᠢᠭ᠋ ᠴᠢᠨᠢ ᠲᠠᠭᠠᠯᠠᠯ ᠪᠠᠷᠢᠭᠰᠠᠨ ᠶᠤᠮ ᠭᠡᠳᠡᠭ ᠰᠢᠦ ᠬᠥᠭᠡᠷᠦᠬᠦᠢ᠃ ᠪᠤᠷᠬᠠᠨ ᠮᠢᠨᠢ ᠭᠡᠵᠦ ᠪᠠᠯᠳᠠᠨ ᠬᠡᠯᠡᠭᠡᠳ ᠵᠠᠯᠪᠠᠷᠢᠭᠰᠠᠨ ᠢ᠋ᠶ᠋ᠠᠨ ᠲᠡᠮᠡᠭᠡᠨ ᠳ᠋ᠡᠭᠡᠨ ᠮᠣᠷᠳᠠᠵᠤ᠂ ᠬᠣᠯᠠᠳᠤᠭᠰᠠᠨ ᠵᠢᠩ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠡᠴᠡ ᠶᠠᠪᠤᠵᠤ ᠪᠢᠯᠡ᠃