ᠲᠤᠩᠭᠠᠯᠠᠭ ᠲᠠᠮᠢᠷ3-24-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1295《ᠲᠡᠭᠡᠵᠦ ᠦᠬᠦᠭᠰᠡᠨ ᠡᠴᠡ ᠲᠡᠭᠡᠭᠯᠡᠵᠦ ᠦᠬᠦᠭᠰᠡᠨ ᠮᠢᠨᠢ ᠳᠡᠭᠡᠷᠡ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢᠨ ᠳᠥᠷᠪᠡ
ᠨᠠᠮᠤᠷ ᠤ᠋ᠨ ᠨᠢᠭᠡᠨ ᠵᠡᠪᠡᠷᠡᠭᠦᠨ ᠡᠳᠦᠷ ᠪᠢᠯᠡ᠃ ᠥᠷᠯᠥᠭᠡᠨ ᠡᠴᠡ ᠡᠬᠢᠯᠡᠨ ᠬᠦᠢᠲᠡᠨ ᠰᠠᠯᠬᠢᠨ ᠰᠡᠷᠴᠢᠭᠢᠨᠡᠨ ᠦᠯᠢᠶᠡᠵᠦ ᠨᠢᠭᠡ ᠯᠡ ᠶᠣᠣᠵᠠ ᠦᠭᠡᠢ ᠪᠠᠢᠯᠠ᠃ ᠤᠷᠢᠨ ᠴᠠᠭ ᠰᠠᠨ ᠪᠣᠯ ᠬᠥᠮᠦᠨ ᠡᠢᠮᠦ ᠡᠳᠦᠷ ᠢ᠋ ᠲᠣᠭᠣᠬᠤ ᠦᠭᠡᠢ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠬᠠᠷᠢᠵᠤ ᠪᠠᠢᠭᠠ ᠦᠶᠡ ᠪᠣᠯᠬᠣᠷ 《ᠵᠠ ᠳᠠ ᠬᠦᠢᠲᠡᠷᠡᠬᠦ ᠨᠢ ᠠ᠋》 ᠭᠡᠰᠡᠨ ᠪᠣᠳᠣᠯ ᠲᠥᠭᠡ ᠦᠰᠦᠲᠡᠢ ᠨᠡᠬᠡᠢ ᠳᠡᠪᠡᠯ ᠬᠡᠳᠦ ᠬᠡᠳᠦ ᠲᠡᠢ ᠬᠥᠮᠦᠨ ᠦ᠌ ᠳᠣᠲᠣᠷᠠ ᠴᠤ᠌ ᠵᠦᠰᠦᠨ ᠣᠷᠣᠨᠠ᠃ ᠶᠣᠯᠲᠣᠭᠣᠷ ᠨᠠᠷᠠ ᠶᠣᠯᠣᠢᠵᠤ ᠭᠤᠳᠤᠮᠵᠢ ᠵᠡᠯᠢᠭᠦᠳ ᠪᠣᠯᠤᠭᠰᠠᠨ ᠣᠷᠣᠢ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠰᠢᠪᠲᠦᠷ ᠦᠨᠦᠷᠲᠦᠭᠰᠡᠨ ᠭᠤᠳᠤᠮᠵᠢ ᠪᠠᠷ ᠬᠣᠶᠠᠷ ᠬᠥᠮᠦᠨ ᠵᠡᠷᠭᠡᠴᠡᠨ ᠬᠥᠭᠵᠢᠯᠲᠡᠢ ᠶᠠᠷᠢᠯᠴᠠᠵᠤ ᠬᠠᠶᠠ ᠬᠠᠶᠠ ᠴᠢᠩᠭᠠ ᠢᠨᠢᠶᠡᠨ ᠠᠯᠬᠤᠨᠠ᠃
ᠨᠢᠭᠡ ᠨᠢ ᠬᠦᠷᠡᠩ ᠲᠠᠷᠮᠠᠨ ᠳᠡᠪᠡᠯ ᠳᠡᠭᠡᠭᠦᠷ ᠲᠥᠪᠡᠳ ᠭᠢᠷᠠᠭ ᠪᠦᠰᠡᠯᠡᠭᠡᠳ ᠵᠢᠵᠢᠭᠬᠡᠨ ᠴᠠᠮᠪᠠᠨ ᠱᠣᠪᠣᠭᠣᠷ ᠦᠯᠦ ᠮᠡᠳᠡᠭ ᠬᠠᠵᠠᠭᠠᠢ ᠲᠠᠯᠪᠢᠵᠠᠢ᠃ ᠨᠥᠭᠦᠭᠡ ᠨᠢ ᠵᠠᠬᠠᠨ ᠳᠡᠭᠡᠷᠡ ᠪᠡᠨ ᠭᠤᠷᠪᠠᠨ ᠳᠥᠷᠪᠡᠯᠵᠢᠨ ᠤᠯᠠᠭᠠᠨ ᠲᠡᠮᠳᠡᠭ ᠲᠡᠢ ᠬᠥᠬᠡ ᠫᠧᠲ᠋ᠯᠢᠼ ᠬᠠᠲᠠᠭᠰᠠᠨ ᠤᠷᠲᠤ ᠰᠠᠷᠠᠯ ᠰᠢᠨᠧᠯ ᠡᠮᠦᠰᠴᠦ ᠨᠡᠯᠢᠶᠡᠳ ᠥᠨᠳᠥᠷ ᠥᠰᠥᠭᠡᠢ ᠲᠡᠢ ᠬᠠᠷᠠ ᠰᠠᠪᠢᠬᠢᠨ ᠭᠤᠲᠤᠯ ᠭᠢᠯᠠᠯᠵᠠᠭᠤᠯᠤᠨ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠬᠦᠷᠡᠩ ᠭᠡᠷ ᠲᠡᠢ ᠨᠠᠭᠠᠨ ᠫᠤᠤ ᠵᠡᠭᠦᠵᠡᠢ᠃ ᠡᠭᠦᠨ ᠦ᠌ ᠯᠠᠮᠠ ᠨᠢ ᠴᠡᠮᠪᠡ᠂ ᠳᠠᠷᠤᠭᠠ ᠨᠢ ᠵᠠᠮᠪᠠᠯ ᠠᠵᠢ᠃
ᠵᠠᠮᠪᠠᠯ ᠬᠡᠳᠦᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠣᠷᠣᠬᠤ ᠪᠠᠷ ᠶᠠᠪᠤᠭᠠ ᠪᠥᠭᠡᠳ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠬᠠᠭᠤᠴᠢᠨ ᠨᠠᠢᠵᠠ ᠴᠡᠮᠪᠡ ᠲᠡᠢ ᠪᠡᠨ ᠠᠭᠤᠯᠵᠠᠵᠤ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠠᠷᠢᠬᠢ᠂ ᠠᠢᠷᠠᠭ᠂ ᠬᠡᠦᠬᠡᠨ ᠡᠷᠭᠢᠭᠦᠯᠦᠨ ᠵᠢᠷᠭᠠᠵᠤ ᠪᠠᠢᠭᠠ ᠠᠵᠢ᠃
ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠬᠤᠰᠢᠭᠤᠳ ᠡᠴᠡ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠲᠦ᠍ ᠵᠣᠷᠢᠭᠤᠯᠤᠨ ᠵᠠᠭᠤᠨ ᠠᠭᠲᠠ ᠮᠣᠷᠢᠳ ᠬᠤᠳᠠᠯᠳᠤᠨ ᠠᠪᠬᠤ ᠡᠭᠦᠷᠭᠡ ᠠᠪᠤᠭᠠᠳ ᠤᠯᠤᠰ ᠤ᠋ᠨ ᠮᠢᠩᠭᠠ ᠭᠠᠷᠤᠢ ᠶᠠᠩᠴᠢᠶᠠᠨ ᠠᠪᠴᠤ ᠶᠠᠪᠤᠭᠠ ᠶᠤᠮ᠃ ᠭᠡᠲᠡᠯᠡ ᠨᠠᠷᠭᠢᠶᠠᠨ ᠳ᠋ᠠᠭᠠᠨ ᠲᠠᠰᠢᠭᠤᠷᠠᠭᠠᠳ ᠲᠡᠭᠦᠨ ᠡᠴᠡ ᠨᠡᠯᠢᠶᠡᠳ ᠢ᠋ ᠵᠠᠷᠤᠭᠰᠠᠨ ᠨᠢ ᠡᠷᠡᠭᠦᠯ ᠪᠠᠢᠬᠤ ᠳ᠋ᠤ᠌ ᠰᠡᠳᠬᠢᠯ ᠢ᠋ ᠨᠢ ᠲᠡᠮᠦᠯᠡᠨ ᠵᠣᠪᠠᠭᠠᠨᠠ᠃
ᠭᠡᠲᠡᠯᠡ ᠥᠨᠥᠳᠥᠷ ᠵᠠᠮᠪᠠᠯ ᠤ᠋ᠨ ᠡᠨᠡ ᠬᠡᠷᠡᠭ ᠡᠴᠡ ᠶᠠᠮᠠᠷ ᠴᠤ᠌ ᠶᠠᠯᠠ ᠵᠢᠮᠡᠯᠡᠯ ᠦᠭᠡᠢ ᠮᠤᠯᠲᠤᠷᠠᠨ ᠭᠠᠷᠭᠠᠬᠤ ᠠᠷᠭᠠ ᠶ᠋ᠢ ᠴᠡᠮᠪᠡ ᠣᠯᠵᠠᠢ᠃ ᠠᠵᠠ ᠬᠦᠦ ᠪᠠᠢᠪᠠᠯ ᠶᠣᠣᠵᠠ ᠬᠦᠦ ᠪᠡᠷ ᠴᠣᠬᠢᠨᠠ ᠭᠡᠭᠴᠢ ᠪᠡᠷ ᠪᠠᠳᠠᠷᠴᠢ ᠲᠠᠢ ᠲᠣᠬᠢᠶᠠᠯᠳᠤᠵᠤ ᠵᠠᠮᠪᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠶᠠᠷᠢᠭᠰᠠᠨ ᠳ᠋ᠤ᠌ 《ᠪᠢ ᠲᠠᠪᠢ ᠣᠷᠴᠢᠮ ᠮᠣᠷᠢᠳ ᠢ᠋ ᠭᠤᠷᠪᠠ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠷ ᠣᠯᠵᠤ ᠥᠭᠭᠦᠶᠡ᠃ ᠬᠠᠷᠢᠨ ᠱᠠᠩᠨᠠᠯ ᠳ᠋ᠤᠨᠢ ᠵᠠᠭᠤᠨ ᠶᠠᠩᠴᠢᠶᠠᠨ ᠥᠭᠭᠦᠨᠡ ᠪᠢᠵᠡ》 ᠭᠡᠯᠡ᠃
ᠵᠠᠮᠪᠠᠯ ᠨᠢᠭᠡ ᠮᠣᠷᠢ ᠳᠤᠮᠳᠠᠴᠢ ᠪᠠᠷ ᠠᠷᠪᠠᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠷ ᠳᠣᠢ᠌ᠵᠤ ᠠᠪᠬᠤ ᠪᠠᠷ ᠰᠠᠩ ᠡᠴᠡ ᠮᠥᠩᠭᠥ ᠠᠪᠤᠭᠰᠠᠨ ᠢ᠋ ᠴᠡᠮᠪᠡ ᠮᠡᠳᠡᠨᠡ᠃ ᠭᠡᠲᠡᠯᠡ ᠮᠣᠷᠢᠨ ᠳ᠋ᠤᠨᠢ ᠭᠤᠷᠪᠠ᠂ ᠱᠠᠩᠨᠠᠯ ᠳ᠋ᠤᠨᠢ ᠬᠣᠶᠠᠷ ᠨᠡᠢᠲᠡ ᠲᠠᠪᠤᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠷ ᠠᠪᠤᠨᠠ ᠭᠡᠳᠡᠭ ᠪᠣᠯ ᠦᠨᠡᠬᠡᠷ ᠳᠣᠬᠢ ᠬᠡᠷᠡᠭ ᠮᠥᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠮᠣᠷᠢᠳ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠯᠢᠳᠡᠭ ᠮᠣᠷᠢᠳ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠬᠢᠮᠳᠠ ᠮᠣᠷᠢᠳ ᠶᠠᠭᠠᠬᠢᠵᠤ ᠣᠯᠬᠤ ᠨᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠵᠤ ᠣᠯᠬᠤ ᠨᠢ ᠮᠢᠨᠦ ᠬᠡᠷᠡᠭ᠃ ᠬᠠᠷᠢᠨ ᠵᠠᠮᠪᠠᠯ ᠲᠠ ᠬᠣᠶᠠᠷ ᠬᠡᠨ ᠳ᠋ᠦ᠍ ᠴᠦ᠍ ᠠᠮᠠ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠳ ᠢ᠋ ᠴᠢᠨᠢ ᠵᠠᠮᠢᠶᠠᠨ ᠸᠠᠩ ᠤ᠋ᠨ ᠨᠤᠲᠤᠭ ᠥᠩᠭᠡᠷᠡᠭᠦᠯᠵᠦ ᠥᠭᠭᠦᠨᠡ᠃ ᠳᠡᠨᠴᠢᠩ ᠢ᠋ᠶ᠋ᠡᠨ ᠤᠷᠢᠲᠠᠵᠤ ᠠᠪᠤᠨᠠ᠃ ᠮᠣᠷᠢᠳ ᠢ᠋ᠶ᠋ᠠᠨ ᠲᠤᠰᠢᠶᠠᠭᠠᠳ ᠪᠤᠰᠤᠳ ᠮᠥᠩᠭᠥ ᠪᠡᠨ ᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠦ᠍ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠢᠩᠭᠢᠵᠦ ᠲᠣᠬᠢᠷᠠᠪᠠᠯ ᠥᠨᠥ ᠣᠷᠣᠢ ᠳᠠ ᠴᠢᠪᠠᠭᠠᠨᠴᠠ ᠶ᠋ᠢᠨ ᠳ᠋ᠦ᠍ ᠣᠷᠣᠭᠠᠷᠠᠢ᠃ ᠲᠡᠨᠳᠡ ᠲᠠ ᠬᠣᠶᠠᠷ ᠢ᠋ ᠨᠢᠭᠡ ᠬᠥᠮᠦᠨ ᠲᠡᠢ ᠲᠠᠨᠢᠯᠴᠠᠭᠤᠯᠵᠤ ᠥᠭᠭᠦᠨᠡ ᠭᠡᠵᠦ ᠪᠠᠳᠠᠷᠴᠢ ᠬᠡᠯᠡᠭᠰᠡᠨ ᠶᠤᠮ᠃
ᠪᠠᠳᠠᠷᠴᠢ ᠡᠢᠮᠦ ᠬᠢᠮᠳᠠᠬᠠᠨ ᠮᠣᠷᠢᠳ ᠢ᠋ ᠬᠠᠮᠢᠭᠠ ᠡᠴᠡ᠂ ᠬᠡᠷᠬᠢᠨ ᠣᠯᠬᠤ ᠬᠥᠮᠦᠨ ᠪᠣᠢ? ᠲᠠᠪᠢᠨ ᠰᠠᠢᠨ ᠮᠣᠷᠢ ᠣᠯᠤᠨᠠ ᠭᠡᠳᠡᠭ ᠲᠠᠪᠢᠨ ᠠᠳᠬᠤ ᠰᠢᠷᠣᠢ ᠣᠯᠬᠤ ᠶ᠋ᠢᠨ ᠨᠡᠷᠡ ᠪᠢᠰᠢ᠃ ᠭᠡᠪᠡᠴᠦ ᠥᠴᠥᠭᠡᠳᠦᠷ ᠣᠷᠣᠢ ᠲᠦᠭᠵᠢᠯ ᠲᠡᠢ ᠲᠣᠬᠢᠶᠠᠯᠳᠤᠵᠤ ᠶᠠᠷᠢᠯᠴᠠᠨ ᠲᠣᠬᠢᠷᠠᠭᠰᠠᠨ ᠨᠢᠭᠡ ᠵᠦᠢᠯ ᠪᠣᠢ᠃ ᠲᠡᠷᠡ ᠪᠣᠯ ᠥᠩᠭᠡᠷᠡᠭᠰᠡᠨ ᠵᠢᠯ ᠬᠠᠨ ᠥᠨᠳᠥᠷ ᠦ᠋ᠨ ᠨᠠᠭᠠᠳᠤᠮ ᠳ᠋ᠤ᠌ ᠨᠣᠭᠲᠣ ᠭᠠᠨᠵᠤᠭᠠᠯᠠᠵᠤ ᠣᠴᠢᠭᠠᠳ ᠰᠢᠪᠰᠢᠭ ᠢ᠋ᠶ᠋ᠡᠨ ᠬᠣᠯᠢᠨ ᠬᠠᠳᠬᠤᠵᠤ ᠪᠤᠴᠠᠭᠰᠠᠨ ᠥᠰᠢᠶᠡ ᠪᠡᠨ ᠠᠪᠬᠤ ᠲᠤᠬᠠᠢ ᠶᠠᠷᠢᠶᠠ ᠶᠤᠮ᠃
ᠲᠦᠭᠵᠢᠯ ᠲᠡᠢ ᠠᠭᠤᠯᠵᠠᠵᠤ ᠠᠷᠢᠬᠢᠳᠠᠵᠤ ᠪᠠᠢᠭᠠᠳ ᠲᠡᠮᠦᠷ ᠦ᠋ᠨ ᠠᠳᠤᠭᠤᠨ ᠤ᠋ ᠪᠠᠬᠠᠳᠤᠯ ᠪᠣᠯᠤᠭᠰᠠᠨ ᠰᠤᠭᠤ ᠰᠢᠭ᠋ ᠮᠣᠷᠢᠳ ᠢ᠋ ᠬᠥᠭᠡᠭᠡᠵᠦ ᠠᠯᠤᠰ ᠨᠤᠲᠤᠭ ᠲᠤ᠌ ᠠᠪᠠᠴᠢᠨ ᠬᠢᠮᠳᠠ ᠦᠨᠡ ᠪᠡᠷ ᠲᠠᠭᠤᠵᠤ ᠣᠷᠬᠢᠬᠤ ᠶ᠋ᠢ ᠭᠤᠶᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠦ᠋ᠨ ᠮᠣᠷᠢᠳ ᠢ᠋ ᠭᠡᠨᠡ᠃ ᠲᠡᠭᠡᠵᠦ ᠦᠬᠦᠭᠰᠡᠨ ᠡᠴᠡ ᠲᠡᠭᠡᠭᠯᠡᠵᠦ ᠦᠬᠦᠭᠰᠡᠨ ᠮᠢᠨᠢ ᠳᠡᠭᠡᠷᠡ᠃ ᠶᠠᠷᠢᠬᠤ ᠦᠭᠡᠢ᠃
ᠲᠡᠮᠦᠷ ᠬᠣᠢᠲᠤ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠢᠷᠡᠭᠡᠳ ᠨᠤᠲᠤᠭᠯᠠᠵᠤ ᠪᠠᠢᠨᠠ ᠭᠡᠳᠡᠭ ᠲᠣᠪᠲᠠᠢ ᠰᠤᠷᠠᠭ ᠢ᠋ ᠰᠣᠨᠣᠰᠤᠭᠠᠳ ᠲᠦᠭᠵᠢᠯ ᠬᠡᠳᠦ ᠬᠣᠨᠣᠭ ᠲᠠᠪᠠᠲᠠᠢ ᠴᠤ᠌ ᠤᠨᠲᠠᠵᠤ ᠴᠢᠳᠠᠭᠠ ᠦᠭᠡᠢ᠃ ᠠᠭᠯᠠᠭ ᠠᠭᠤᠯᠠ ᠶ᠋ᠢᠨ ᠲᠠᠭ ᠲᠤ᠌ ᠬᠠᠳᠠᠭᠤᠯᠤᠨ ᠦᠬᠦᠭᠰᠡᠨ ᠭᠡᠵᠦ ᠪᠠᠲᠤᠲᠠᠢ ᠢᠲᠡᠭᠡᠵᠦ ᠪᠠᠢᠭᠰᠠᠨ ᠲᠡᠷᠡ ᠭᠠᠢᠬᠠᠯ ᠠᠮᠢᠳᠤ ᠠᠵᠢ᠃ ᠲᠡᠭᠦᠨ ᠲᠡᠢ ᠡᠨᠡ ᠣᠷᠴᠢᠯᠠᠩ ᠳᠡᠭᠡᠷᠡ ᠳᠠᠬᠢᠨ ᠤᠴᠠᠷᠠᠪᠠᠯ ᠠᠮᠢᠳᠤ ᠭᠠᠷᠬᠤ ᠦᠭᠡᠢ᠃ ᠭᠡᠲᠡᠯᠡ ᠡᠨᠡ ᠪᠠᠳᠠᠷᠴᠢ ᠮᠣᠷᠢᠳ ᠢ᠋ ᠨᠢ ᠬᠥᠭᠡᠭᠡᠵᠦ ᠥᠭᠬᠦ ᠶ᠋ᠢ ᠭᠤᠶᠤᠨᠠ ᠭᠡᠨᠡ᠃ ᠲᠡᠷᠡ ᠮᠣᠷᠢᠳ ᠤ᠋ᠨ ᠲᠣᠭᠠ ᠪᠠᠷ ᠵᠢᠩ ᠠᠯᠲᠠ ᠥᠭᠭᠦᠶᠡ ᠭᠡᠰᠡᠨ ᠴᠦ᠍ ᠠᠮᠢᠨ ᠡᠴᠡ ᠪᠡᠨ ᠤᠢᠳᠤᠭᠠ ᠦᠭᠡᠢ ᠴᠠᠭ ᠲᠤ᠌ ᠡᠭᠦᠨ ᠢ᠋ ᠬᠢᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠰᠥᠨᠢ ᠯᠡ ᠬᠥᠭᠡᠭᠡᠵᠦ ᠣᠷᠬᠢᠬᠤ ᠦᠭᠡᠢ ᠤᠤ᠂ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠢᠨᠢ ᠴᠠᠬᠢᠭᠤᠷ ᠲᠡᠮᠦᠷ ᠰᠢᠦ ᠳᠡ᠃ ᠮᠥᠷ ᠢ᠋ᠶ᠋ᠡᠷ ᠴᠢᠨᠢ ᠶᠠᠭ ᠮᠥᠰᠬᠢᠵᠦ ᠣᠴᠢᠭᠠᠳ ᠫᠠᠨᠲᠠᠢᠲᠠᠯᠠ ᠴᠢᠨᠢ ᠬᠦᠯᠢᠵᠦ ᠮᠣᠳᠣᠨ ᠤ᠋ ᠮᠥᠴᠢᠷ ᠡᠴᠡ ᠳᠡᠭᠦᠵᠢᠯᠡᠵᠦ ᠪᠠᠢᠭᠠᠳ ᠬᠤᠤᠱᠤᠤᠷ ᠬᠢᠵᠦ ᠣᠷᠬᠢᠨᠠ᠃ ᠪᠢ ᠯᠡ ᠴᠢᠳᠠᠬᠤ ᠦᠭᠡᠢ᠃
ᠪᠠᠳᠠᠷᠴᠢ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯ ᠪᠣᠯᠤᠨ ᠳᠠᠭᠤ ᠦᠭᠡᠢ ᠰᠠᠭᠤᠪᠠ᠃ ᠦᠨᠡᠬᠡᠷ ᠴᠦ᠍ ᠲᠡᠮᠦᠷ ᠦ᠋ᠨ ᠮᠣᠷᠢᠳ ᠢ᠋ ᠠᠪᠤᠨᠠ ᠭᠡᠳᠡᠭ ᠪᠣᠯ ᠥᠯᠥᠰᠬᠦᠯᠡᠩ ᠠᠷᠰᠯᠠᠨ ᠤ᠋ ᠠᠮᠠᠨ ᠡᠴᠡ ᠬᠡᠰᠡᠭ ᠮᠢᠬᠠ ᠪᠤᠯᠢᠶᠠᠵᠤ ᠠᠪᠬᠤ ᠲᠠᠢ ᠠᠳᠠᠯᠢ ᠬᠡᠷᠡᠭ᠃ ᠲᠡᠮᠦᠷ ᠮᠡᠳᠡᠮᠡᠭᠴᠡ ᠠᠯᠳᠠᠯ ᠦᠭᠡᠢ ᠮᠥᠷᠳᠡᠨ ᠣᠴᠢᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠠᠮᠢᠳᠤ ᠭᠠᠷᠤᠨᠠ ᠭᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ᠃ ᠭᠡᠪᠡᠴᠦ ᠬᠡᠴᠡᠭᠦᠦ ᠶ᠋ᠢ ᠪᠣᠳᠣᠭᠠᠳ ᠪᠠᠢᠪᠠᠯ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠤ᠋ ᠪᠠᠨ ᠥᠰᠢᠶᠡ ᠶ᠋ᠢ ᠶᠠᠭᠠᠬᠢᠵᠤ ᠠᠪᠴᠤ ᠴᠢᠳᠠᠬᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠡᠵᠡᠭᠦᠢ ᠭᠠᠵᠠᠷ ᠴᠢᠨᠦ ᠮᠥᠷ ᠳᠡᠭᠡᠷᠡ ᠤᠲᠤᠵᠤ ᠪᠠᠢᠭᠠᠳ ᠬᠤᠷᠳᠤᠨ ᠫᠤᠤ ᠪᠠᠷ ᠪᠣᠳᠢ ᠶ᠋ᠢ ᠨᠢ ᠬᠥᠲᠥᠯᠴᠢᠬᠡᠶᠡ᠃
ᠲᠦᠭᠵᠢᠯ ᠨᠢᠳᠦ ᠪᠡᠨ ᠠᠯᠭᠤᠷ ᠡᠷᠭᠢᠭᠦᠯᠵᠦ ᠪᠠᠳᠠᠷᠴᠢ ᠶ᠋ᠢ ᠰᠢᠯᠭᠠᠨ ᠤᠳᠠᠲᠠᠯᠠ ᠰᠢᠷᠳᠡᠪᠡ᠃ ᠬᠡᠷᠪᠡ ᠢᠩᠭᠢᠵᠦ ᠴᠢᠳᠠᠪᠠᠯ ᠶᠠᠷᠢᠬᠤ ᠦᠭᠡᠢ ᠰᠠᠢᠬᠠᠨ ᠬᠡᠷᠡᠭ ᠠᠵᠢ᠃ ᠭᠡᠪᠡᠴᠦ ᠲᠡᠷᠡ ᠪᠣᠯ ᠪᠦᠳᠦᠭᠦᠨ ᠰᠤᠮᠤᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠤᠯᠠᠭᠠᠨ ᠰᠤᠭᠤ ᠤᠷᠤᠭᠤ ᠨᠢ ᠶᠣᠪᠣᠷᠴᠤ ᠮᠠᠩᠨᠠᠢ ᠳᠤᠮᠳᠠᠭᠤᠷ ᠨᠢ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠣᠬᠢᠨ᠂ ᠲᠣᠬᠣᠢ ᠬᠢᠲᠤᠭᠠ ᠪᠠᠷᠤᠭ ᠳᠠᠯᠳᠠ ᠣᠷᠣᠲᠠᠯᠠ ᠰᠢᠭᠠᠭᠠᠳ ᠦᠬᠦᠭᠡ ᠦᠭᠡᠢ ᠲᠡᠮᠦᠷ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠳᠠ᠃ ᠡᠪᠦᠭᠡᠨ ᠴᠢᠨᠢ ᠪᠣᠯᠢᠶᠠ ᠭᠡᠵᠦ ᠲᠦᠭᠵᠢᠯ ᠬᠡᠯᠡᠪᠡ᠃
ᠪᠠᠳᠠᠷᠴᠢ ᠡᠯᠳᠡᠪ ᠶᠠᠩᠵᠤ ᠪᠠᠷ ᠭᠤᠶᠤᠵᠤ᠂ ᠵᠠᠭᠤᠨ ᠰᠤᠮᠤ ᠲᠠᠢ ᠯᠢᠶᠠᠠᠵᠤ ᠫᠤᠤ ᠥᠭᠬᠦ ᠪᠣᠯᠪᠠ᠃ ᠲᠦᠭᠵᠢᠯ ᠤᠳᠠᠭᠠᠨ ᠪᠣᠳᠣᠯ ᠪᠣᠯᠤᠨ ᠳᠣᠣᠷᠠᠲᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠵᠠᠯᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠠᠷᠢᠬᠢ ᠠᠪᠴᠤ ᠭᠦᠳ ᠭᠦᠳ ᠤᠤᠭᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠢᠨᠦ ᠮᠥᠷ ᠳᠡᠭᠡᠷᠡ ᠲᠡᠮᠦᠷ ᠢ᠋ ᠤᠭᠲᠤᠵᠤ ᠬᠦᠯᠢᠶᠡᠬᠦ ᠬᠡᠷᠡᠭ ᠤᠤ ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠡᠭᠦᠢ ᠭᠠᠵᠠᠷ ᠮᠥᠷ ᠳᠡᠭᠡᠷᠡ ᠴᠢᠨᠢ ᠬᠣᠴᠣᠷᠤᠨᠠ᠃ ᠲᠡᠭᠡᠭᠡᠳ ᠲᠡᠷᠡ ᠭᠠᠢᠬᠠᠯ ᠢ᠋ ᠢᠷᠡᠬᠦ ᠳᠡᠭᠡᠷᠡ ᠨᠢ ᠰᠤᠮᠤ ᠵᠤᠭᠤᠵᠤ ᠣᠷᠬᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠳᠠᠵᠤ ᠣᠷᠬᠢᠬᠤ ᠶᠤᠮ ᠤᠤ᠂ ᠲᠣᠨᠢᠯᠭᠠᠭᠠᠳ ᠪᠠᠷᠢᠭᠳᠠᠪᠠᠯ ᠪᠠᠯᠠᠷᠠᠨᠠ ᠰᠢᠦ ᠳᠡ᠃ ᠲᠡᠮᠦᠷ ᠴᠢᠨᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠨᠡᠷᠡ ᠲᠡᠢ ᠬᠥᠮᠦᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠥᠷᠭᠡᠨ ᠨᠤᠲᠤᠭ ᠲᠤ᠌ ᠪᠣᠯᠣᠯᠭᠦᠢ ᠳᠡ᠃ ᠲᠡᠢᠮᠦ ᠵᠠᠶᠠᠭᠠ ᠨᠢ ᠣᠷᠬᠢᠭᠰᠠᠨ ᠶᠠᠭᠤᠮᠠ ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠳ ᠵᠠᠮᠪᠠᠯ ᠤ᠋ᠨ ᠭᠠᠷ ᠲᠤ᠌ ᠣᠷᠣᠬᠤ ᠳ᠋ᠤ᠌ ᠫᠤᠤ ᠴᠢᠨᠦ ᠮᠥᠷᠦᠨ ᠳ᠋ᠦ᠍ ᠣᠭᠯᠠᠭᠳᠠᠨᠠ᠃
ᠡᠨᠡ ᠬᠣᠶᠠᠷ ᠲᠡᠮᠦᠷ ᠦ᠋ᠨ ᠮᠣᠷᠢᠳ ᠢ᠋ ᠠᠪᠬᠤ᠂ ᠪᠠᠰᠠ ᠲᠡᠭᠦᠨ ᠢ᠋ ᠲᠣᠨᠢᠯᠭᠠᠬᠤ ᠲᠤᠬᠠᠢ ᠢᠩᠭᠢᠵᠦ ᠶᠠᠷᠢᠯᠴᠠᠨ ᠲᠣᠬᠢᠷᠠᠵᠠᠢ᠃ ᠭᠡᠲᠡᠯᠡ ᠥᠨᠥᠳᠥᠷ ᠪᠠᠳᠠᠷᠴᠢ ᠲᠡᠷᠡ ᠮᠣᠷᠢᠳ ᠢ᠋ ᠵᠠᠮᠪᠠᠯ ᠳ᠋ᠤ᠌ ᠳᠠᠮᠵᠢᠭᠤᠯᠤᠨ ᠠᠮᠠᠷᠬᠠᠨ ᠳᠠᠯᠳᠠ ᠣᠷᠣᠭᠤᠯᠬᠤ ᠠᠶᠠᠲᠠᠢᠬᠠᠨ ᠨᠦᠬᠡ ᠣᠯᠪᠠ᠃ ᠲᠡᠮᠦᠷ ᠲᠦ᠍ ᠲᠠᠪᠢᠨ ᠮᠣᠷᠢᠳ ᠪᠠᠢᠬᠤ ᠦᠭᠡᠢ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠠᠷᠪᠠᠨ ᠬᠡᠳᠦᠨ ᠮᠣᠷᠢ ᠪᠣᠯ ᠴᠥᠮ ᠠᠷᠭᠤᠮᠠᠭ ᠤ᠋ᠨ ᠳᠡᠭᠡᠳᠦ ᠪᠢᠯᠡ᠃ ᠪᠤᠰᠤᠳ ᠮᠣᠷᠢᠳ ᠤ᠋ᠨ ᠲᠤᠬᠠᠢ ᠳ᠋ᠤ᠌ ᠲᠦᠭᠵᠢᠯ ᠣᠢᠷᠠ ᠶ᠋ᠢᠨ ᠬᠤᠰᠢᠭᠤᠨ ᠡᠴᠡ ᠰᠣᠬᠣᠷ ᠵᠣᠭᠣᠰ ᠤ᠋ᠨ ᠦᠨᠡ ᠦᠭᠡᠢ ᠠᠮᠠᠷᠬᠠᠨ ᠣᠯᠵᠤ ᠴᠢᠳᠠᠬᠤ ᠪᠠᠢᠯᠠ᠃
ᠴᠡᠮᠪᠡ ᠵᠠᠮᠪᠠᠯ ᠬᠣᠶᠠᠷ ᠪᠠᠶᠤᠤ ᠶ᠋ᠢᠨ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠭᠰᠠᠭᠠᠷ ᠴᠢᠮᠡᠭ ᠦ᠋ᠨ ᠬᠠᠰᠢᠶᠠᠨ ᠤ᠋ ᠡᠮᠦᠨᠡᠭᠦᠷ ᠭᠠᠷᠬᠤ ᠳ᠋ᠤ᠌ 《ᠡᠳᠡ ᠪᠣᠢ ᠤᠤ?》 ᠭᠡᠵᠦ ᠵᠠᠮᠪᠠᠯ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠡᠭ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠣᠯᠤᠭᠠᠳ ᠬᠦᠷᠢᠶᠡ ᠣᠷᠣᠵᠤ ᠨᠣᠮ ᠰᠤᠷᠬᠤ ᠭᠡᠵᠦ ᠶᠠᠪᠤᠭᠰᠠᠨ᠃ ᠴᠡᠴᠡᠭ ᠬᠡᠳᠦᠨ ᠮᠠᠯ ᠲᠠᠢ ᠪᠣᠯᠤᠭᠠᠳ ᠡᠨᠡ ᠴᠠᠭᠠᠨ ᠳᠠᠪᠠᠭᠠᠨ ᠤ᠋ ᠠᠷᠤ ᠳ᠋ᠤ᠌ ᠨᠤᠲᠤᠭᠯᠠᠵᠤ ᠪᠠᠢᠭᠠ᠃ ᠡᠷᠳᠡᠭᠦᠳᠡ ᠪᠢ ᠨᠢᠭᠡ ᠬᠦᠷᠲᠡᠬᠦ ᠰᠠᠨᠠᠭᠠ ᠲᠠᠢ ᠣᠴᠢᠭᠰᠠᠨ ᠴᠢᠨᠢ ᠬᠠᠪᠢᠳᠠᠭᠤᠯᠬᠤ ᠦᠭᠡᠢ ᠪᠠᠢᠳᠠᠭ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡ ᠶ᠋ᠢ ᠨᠢ ᠬᠠᠩᠭᠠᠵᠤ ᠥᠭᠭᠦᠶᠡ ᠭᠡᠵᠦ ᠬᠡᠯᠡᠬᠦ ᠦᠭᠡᠢ ᠤᠤ ᠳᠠ ᠭᠡᠳ ᠵᠠᠮᠪᠠᠯ ᠴᠢᠩᠭᠠ ᠢᠨᠢᠶᠡᠪᠡ᠃
ᠲᠡᠷᠡ ᠬᠣᠶᠠᠷ ᠳᠠ ᠴᠢᠪᠠᠭᠠᠨᠴᠠ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠶ᠋ᠢᠨ ᠲᠣᠬᠣᠮ ᠲᠠᠲᠠᠭᠠᠰᠤ ᠲᠠᠢ ᠮᠣᠷᠢ ᠨᠣᠭᠣᠭᠠᠨ ᠡᠪᠡᠰᠦ ᠢᠳᠡᠨ ᠲᠠᠪᠠᠲᠠᠢ ᠪᠠᠢᠯᠠ᠃ ᠡᠭᠦᠳᠡ ᠬᠢᠬᠤᠲᠤᠨᠠᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠮᠣᠷᠢᠨ ᠤ᠋ ᠴᠢᠬᠢ ᠰᠡᠷᠳᠡᠰᠬᠢᠭᠰᠡᠨ ᠢ᠋ᠶ᠋ᠡᠨ ᠴᠢᠨᠣᠠ ᠪᠢᠰᠢ ᠬᠥᠮᠦᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠰᠡᠨ ᠪᠣᠯᠤᠯᠲᠠᠢ ᠲᠠᠢᠪᠤᠰᠢᠷᠠᠨ ᠡᠪᠡᠰᠦ ᠪᠡᠨ ᠢᠳᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠵᠠᠭᠠᠨᠠ ᠤᠤ? ᠭᠡᠵᠦ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠵᠠᠮᠪᠠᠯ ᠶᠡᠬᠡᠮᠰᠦᠭ ᠪᠥᠭᠡᠳ ᠬᠥᠨᠳᠡᠢ ᠳᠠᠭᠤ ᠪᠠᠷ ᠮᠡᠨᠳᠦᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠃ ᠰᠠᠢᠨ ᠪᠠᠢᠨᠠ ᠤᠤ?
ᠪᠠᠳᠠᠷᠴᠢ᠂ ᠴᠡᠮᠪᠡ᠂ ᠵᠠᠮᠪᠠᠯ ᠭᠤᠷᠪᠠ ᠬᠢᠲᠠᠳ ᠠᠷᠢᠬᠢ ᠬᠠᠯᠠᠭᠠᠯᠭᠠᠨ ᠤᠤᠭᠤᠵᠤ᠂ ᠮᠣᠷᠢᠳ ᠥᠭᠭᠦᠯᠴᠡᠵᠦ ᠠᠪᠤᠯᠴᠠᠬᠤ ᠪᠠᠨ ᠶᠠᠷᠢᠯᠴᠠᠨ ᠳᠡᠨᠴᠢᠩ ᠢ᠋ᠶ᠋ᠡᠨ ᠲᠠᠯᠪᠢᠯᠴᠠᠪᠠ᠃ ᠳᠠᠷᠠᠭᠠ ᠨᠢ ᠳᠠᠯᠤᠤ ᠭᠠᠷᠭᠠᠵᠤ ᠲᠠᠯᠪᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠡᠨᠳᠡ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠬᠡᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠭᠦᠭᠡ ᠡᠷᠳᠡᠨᠢ᠃ ᠬᠠᠨᠠᠨ ᠬᠡ ᠲᠡᠢ ᠴᠢᠨᠰᠡ᠂ ᠬᠠᠮᠪᠤᠨ ᠬᠡ ᠲᠡᠢ ᠵᠢᠷᠭᠤᠭᠠ ᠭᠡᠵᠦ ᠪᠠᠳᠠᠷᠴᠢ ᠲᠣᠭᠣᠮᠵᠢᠷ ᠦᠭᠡᠢ ᠬᠡᠯᠡᠭᠡᠳ ᠴᠢᠨᠰᠡ ᠴᠢᠯᠠᠭᠤᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠡᠷᠳᠡᠨᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠬᠤᠪ ᠳᠠ᠃ ᠨᠥᠭᠦᠭᠡ ᠳᠡᠪᠬᠡᠷᠭᠡ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠪᠠᠢᠭᠰᠠᠨ ᠡᠷᠳᠡᠨᠢ᠃ ᠲᠡᠷᠡ ᠴᠢᠨᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠨ ᠦ᠌ ᠲᠦᠰᠢᠮᠡᠯ ᠪᠣᠯᠴᠢᠬᠠᠭᠠᠳ ᠮᠠᠨᠳᠤᠵᠤ ᠪᠠᠢᠭᠠ ᠳᠠ ᠭᠡᠵᠦ ᠴᠡᠮᠪᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢ ᠲᠡᠢᠮᠦ ᠨᠣᠪᠰᠢ ᠨᠤᠭᠤᠳ ᠮᠠᠨᠳᠤᠬᠤ ᠶ᠋ᠢ ᠬᠡᠯᠡᠬᠦ ᠪᠣᠢ? ᠭᠡᠵᠦ ᠪᠠᠳᠠᠷᠴᠢ ᠬᠡᠭᠵᠢᠭᠦᠨ ᠪᠥᠭᠡᠳ ᠬᠦᠢᠲᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠨᠡ᠃ ᠴᠢ ᠪᠠᠷᠤᠭ ᠲᠠᠢ ᠬᠣᠯᠢᠶᠠᠭᠠᠴᠢ ᠭᠡᠵᠦ ᠵᠠᠮᠪᠠᠯ ᠬᠡᠯᠡᠭᠡᠳ ᠪᠠᠳᠠᠷᠴᠢ ᠶ᠋ᠢ ᠭᠢᠯᠤᠢᠨ ᠬᠠᠷᠠᠯᠠ᠃
ᠨᠢᠭᠡᠳᠦᠭᠡᠷ ᠲᠦ᠍ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠠᠯᠪᠠᠨ ᠳ᠋ᠤ᠌ ᠵᠠᠷᠤᠭᠳᠠᠵᠤ ᠶᠠᠪᠤᠭᠠ ᠪᠠᠰᠠ ᠨᠢᠭᠡ ᠨᠣᠪᠰᠢᠨ ᠤ᠋ ᠳᠡᠷᠭᠡᠳᠡ ᠡᠡᠶᠡᠭᠦᠢ ᠦᠭᠡ ᠬᠡᠯᠡᠭᠰᠡᠨ᠂ ᠬᠣᠶᠠᠳᠤᠭᠠᠷ ᠲᠤ᠌ ᠳᠣᠣᠷᠠ ᠪᠠᠨ ᠪᠠᠢᠭᠰᠠᠨ ᠪᠠᠵᠠᠭᠠᠷ ᠢ᠋ ᠨᠢᠳᠦ ᠬᠠᠷᠢᠭᠤᠯᠤᠨ ᠰᠣᠯᠢᠵᠤ ᠣᠷᠬᠢᠭᠰᠠᠨ ᠳ᠋ᠠᠭᠠᠨ ᠪᠠᠨᠳᠠᠭᠰᠠᠨ ᠪᠠᠳᠠᠷᠴᠢ 《ᠪᠠᠰᠠ ᠲᠡᠭᠡᠭᠡᠳ ᠲᠡᠷᠡ ᠴᠢᠨᠢ ᠪᠢᠴᠢᠭ ᠡᠷᠳᠡᠮ ᠲᠡᠢ ᠰᠦᠷᠡᠬᠡᠢ ᠨᠣᠪᠰᠢ ᠭᠡᠨᠡ ᠪᠢᠯᠡ》 ᠭᠡᠯᠡ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠨᠢᠭᠡ ᠬᠡᠰᠡᠭ ᠨᠠᠮ ᠭᠦᠮ ᠪᠣᠯᠵᠤ ᠵᠤᠤᠬᠠᠨ ᠳ᠋ᠤ᠌ ᠰᠢᠳᠡᠵᠦ ᠪᠠᠢᠭᠠ ᠬᠠᠷᠠ ᠮᠣᠳᠣ ᠬᠠᠶᠠ ᠬᠠᠶᠠ ᠳᠡᠰ ᠳᠡᠰ ᠳᠤᠤᠭᠠᠷᠬᠤ ᠨᠢ ᠦᠯᠡᠮᠵᠢ ᠶᠡᠬᠡ ᠴᠢᠮᠡᠭᠡ ᠰᠢᠭ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃