ᠲᠤᠩᠭᠠᠯᠠᠭ ᠲᠠᠮᠢᠷ3-23-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1621《ᠬᠦᠷᠢᠶᠡᠨ ᠳ᠋ᠦ᠍ ᠬᠠᠭᠠᠨ ᠪᠣᠯᠤᠭᠰᠠᠨ ᠡᠴᠡ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠵᠢᠷᠠᠭᠠᠬᠠᠢ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢᠨ ᠭᠤᠷᠪᠠ
ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ᠂ ᠤᠷᠢᠳᠤ ᠫᠦᠷᠪᠦ ᠲᠠᠢᠵᠢ ᠶ᠋ᠢᠨ ᠬᠢ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ ᠬᠡᠪᠢᠰ ᠰᠢᠭ ᠰᠠᠢᠬᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠬᠡᠳᠦᠨ ᠭᠡᠷ ᠬᠠᠷᠠᠭᠳᠠᠨᠠ᠃ ᠭᠡᠷ ᠡᠴᠡ ᠵᠡᠭᠦᠨ ᠤᠷᠤᠭᠰᠢ ᠬᠡᠳᠦᠨ ᠮᠣᠷᠢᠳ ᠰᠣᠢ᠌ᠭᠰᠠᠨ ᠵᠡᠯᠡ ᠤᠶᠠᠭᠠ᠂ ᠲᠡᠭᠦᠨ ᠡᠴᠡ ᠵᠡᠭᠦᠨ ᠳᠠᠰᠢ ᠠᠷᠪᠠᠭᠠᠳ ᠤᠨᠠᠭᠠ ᠪᠠᠷᠢᠭᠰᠠᠨ ᠵᠡᠯᠡ ᠪᠠᠢᠯᠠ᠃
ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠴᠡᠩᠬᠡᠷ ᠲᠡᠭᠷᠢ᠂ ᠬᠤᠷᠴᠠ ᠨᠠᠷᠠ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠢᠪᠡᠭᠡᠵᠦ᠂ ᠨᠣᠭᠣᠭᠠᠨ ᠤ᠋ ᠠᠭᠤᠷ ᠳᠦᠭᠦᠷᠦᠭᠰᠡᠨ ᠬᠥᠨᠳᠡᠢ ᠵᠡᠷᠭᠡᠯᠭᠡᠡᠳᠤᠨ ᠵᠢᠷᠪᠢᠯᠵᠡᠨ ᠬᠠᠷᠠᠭᠳᠠᠨᠠ᠃ ᠠᠭᠤᠯᠠ ᠤᠰᠤ᠂ ᠤᠷᠭᠤᠮᠠᠯ᠂ ᠪᠡᠯᠴᠢᠵᠦ ᠪᠠᠢᠭᠠ ᠮᠠᠯ᠂ ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠭᠠᠷᠴᠤ ᠪᠠᠢᠭᠠ ᠤᠲᠤᠭᠠ ᠴᠥᠮ ᠶᠡᠷᠦ ᠪᠤᠰᠤ ᠡᠷᠬᠢᠮᠰᠦᠭ ᠠᠵᠢ᠃ ᠡᠢᠮᠦᠷᠬᠦᠦ ᠡᠳᠦᠷ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠪᠠᠢᠭᠠᠯᠢ ᠶ᠋ᠢᠨ ᠭᠤᠸᠠ ᠰᠠᠢᠬᠠᠨ ᠪᠦᠬᠦᠨ ᠴᠤᠭᠯᠠᠷᠠᠭᠠᠳ ᠠᠯᠢ ᠨᠢ ᠰᠠᠢᠬᠠᠨ ᠪᠣᠢ ᠭᠡᠳᠡᠭ ᠢ᠋ᠶ᠋ᠡᠨ ᠣᠯᠬᠤ ᠭᠡᠵᠦ ᠲᠡᠮᠡᠴᠡᠯᠳᠦᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠳᠠᠭ ᠪᠢᠯᠡ᠃
ᠮᠣᠷᠢᠨ ᠤ᠋ ᠤᠶᠠᠭᠠᠨ ᠤ᠋ ᠳᠡᠷᠭᠡᠳᠡ ᠭᠤᠷᠪᠠᠨ ᠬᠥᠮᠦᠨ ᠲᠠᠮᠠᠬᠢ ᠲᠡᠳᠡᠨ ᠶᠠᠷᠢᠯᠴᠠᠨᠠ᠃ ᠲᠡᠭᠦᠨ ᠦ᠌ ᠨᠢᠭᠡ ᠨᠢ ᠲᠡᠮᠦᠷ᠂ ᠨᠥᠭᠦᠭᠡ ᠨᠢ ᠥᠯᠵᠡᠢ᠂ ᠭᠤᠷᠪᠠᠳᠠᠬᠢ ᠨᠢ ᠲᠣᠭᠣᠭᠠ ᠨᠡᠷᠡᠭᠰᠡᠨ ᠠᠢᠯ ᠤ᠋ᠨ ᠭᠠᠳᠠᠭᠤᠷ ᠥᠩᠭᠡᠷᠡᠳᠡᠭ ᠦᠭᠡᠢ᠂ ᠮᠣᠷᠢ ᠤᠶᠠᠭᠰᠠᠨ ᠤᠶᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠠᠭᠤᠵᠤ ᠬᠠᠯᠬᠠ ᠶ᠋ᠢᠨ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠲᠤᠬᠠᠢ ᠬᠡᠳᠦᠨ ᠳᠣᠮᠣᠭ ᠳᠠᠪᠤᠰᠤᠯᠠᠨ ᠶᠠᠷᠢᠯ ᠦᠭᠡᠢ ᠶᠠᠪᠤᠪᠠᠯ ᠠᠮᠠᠨ ᠤ᠋ ᠬᠡᠰᠡᠭ ᠲᠦ᠍ ᠮᠠᠭᠤ ᠭᠡᠵᠦ ᠦᠵᠡᠳᠡᠭ ᠭᠣᠳᠣᠭᠣᠷ ᠪᠤᠭᠤᠷᠤᠯ ᠭᠡᠵᠢᠭᠡ ᠲᠡᠢ ᠥᠯᠵᠡᠢ ᠶ᠋ᠢᠨ ᠨᠠᠰᠤᠨ ᠤ᠋ ᠬᠠᠷᠠ ᠬᠥᠮᠦᠨ ᠪᠠᠢᠯᠠ᠃
ᠲᠡᠮᠦᠷ ᠬᠠᠳᠠᠨ ᠪᠠᠭᠠᠲᠤᠷ ᠱᠠᠩᠨᠠᠭᠰᠠᠨ ᠮᠥᠩᠭᠥ ᠪᠡᠷ ᠬᠥᠯ ᠬᠢᠵᠦ ᠬᠣᠶᠠᠷ ᠠᠵᠢᠷᠭᠠ ᠰᠢᠬᠠᠮ ᠠᠳᠤᠭᠤ᠂ ᠬᠡᠳᠦᠨ ᠦᠨᠢᠶᠡ ᠲᠡᠢ ᠪᠣᠯᠤᠭᠠᠳ ᠳᠤᠯᠮᠠ ᠶ᠋ᠢᠨ ᠬᠦᠰᠡᠳᠡᠭ ᠢ᠋ᠶ᠋ᠡᠷ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠲᠡᠮᠦᠷ ᠦ᠋ᠨ ᠭᠡᠳᠡᠭ ᠠᠢᠯ ᠪᠣᠢ ᠪᠣᠯᠵᠠᠢ᠃ ᠲᠡᠮᠦᠷ ᠦ᠋ᠨ ᠲᠡᠢ ᠦᠷᠭᠦᠯᠵᠢ ᠬᠠᠮᠲᠤ ᠶᠠᠪᠤᠳᠠᠭ ᠠᠢᠯ ᠪᠣᠯ ᠥᠯᠵᠡᠢ ᠶ᠋ᠢᠨ ᠬᠢ ᠶᠤᠮ᠃
ᠬᠤᠶᠠᠭ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠢᠷᠡᠵᠦ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠪᠤᠭᠠᠳ ᠶᠠᠪᠤᠵᠠᠢ᠃ ᠡᠴᠢᠭᠡ ᠪᠡᠨ ᠠᠪᠴᠤ ᠶᠠᠪᠤᠶᠠ ᠭᠡᠬᠦ ᠳ᠋ᠦ᠍ᠨᠢ 《ᠲᠠᠨ ᠤ᠋ ᠲᠡᠷᠡ ᠬᠦᠷᠢᠶᠡᠨ ᠳ᠋ᠦ᠍ ᠬᠠᠭᠠᠨ ᠪᠣᠯᠤᠭᠰᠠᠨ ᠡᠴᠡ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠵᠢᠷᠠᠭᠠᠬᠠᠢ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ》 ᠭᠡᠳ ᠶᠠᠪᠤᠭᠰᠠᠨ ᠦᠭᠡᠢ ᠤᠴᠢᠷ ᠲᠡᠮᠦᠷ ᠳᠤᠯᠮᠠ ᠬᠣᠶᠠᠷ ᠤ᠋ᠨ ᠬᠠᠶᠠᠭᠠ ᠰᠠᠬᠢᠵᠤ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠨᠠ᠃
ᠳᠤᠯᠮᠠ ᠬᠣᠶᠠᠷ ᠭᠡᠷ ᠦ᠋ᠨ ᠲᠣᠭᠣᠭᠠ ᠰᠢᠨᠠᠭᠠᠨ ᠤ᠋ ᠠᠵᠢᠯ ᠢ᠋ ᠬᠢᠬᠦ ᠪᠥᠭᠡᠳ ᠲᠡᠮᠦᠷ ᠭᠠᠳᠠᠭᠤᠷ ᠠᠵᠢᠯ ᠢ᠋ ᠬᠢᠳᠡᠭ ᠪᠣᠯᠬᠣᠷ ᠥᠯᠵᠡᠢ ᠭᠤᠸᠠᠢ ᠳ᠋ᠤ᠌ ᠠᠶᠠᠭᠠ ᠳᠠᠭᠱᠠ ᠶᠠᠭᠤᠮᠠ ᠡᠷᠭᠢᠭᠦᠯᠬᠦ᠂ ᠲᠤᠭᠤᠯ ᠪᠢᠷᠠᠭᠤ ᠪᠤᠴᠠᠭᠠᠬᠤ ᠡᠴᠡ ᠥᠭᠡᠷᠡ ᠠᠵᠢᠯ ᠪᠠᠷᠤᠭ ᠯᠠ ᠪᠠᠢᠳᠠᠭ ᠦᠭᠡᠢ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠠᠭ ᠮᠣᠷᠢ ᠴᠢᠨᠢ ᠲᠦᠮᠡᠨ ᠦ᠌ ᠡᠬᠢ ᠶ᠋ᠢᠨ ᠬᠡᠭᠡᠷ ᠠᠯᠠᠭ ᠰᠢᠭ᠋ ᠥᠩᠭᠡᠲᠡᠢ ᠪᠠᠢᠨᠠ ᠭᠡᠵᠦ ᠪᠤᠭᠤᠷᠤᠯ ᠭᠡᠵᠢᠭᠡᠲᠦ ᠶᠡᠬᠡ ᠯᠡ ᠮᠡᠳᠡᠮᠡᠬᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠮᠡᠨ ᠦ᠌ ᠡᠬᠢ ᠶ᠋ᠢᠨ ᠬᠡᠭᠡᠷ ᠠᠯᠠᠭ ᠭᠡᠵᠦ ᠶᠠᠮᠠᠷ ᠮᠣᠷᠢ ᠪᠠᠢᠭᠰᠠᠨ ᠶᠤᠮ ᠪᠣᠢ? ᠭᠡᠵᠦ ᠥᠯᠵᠡᠢ ᠰᠣᠨᠢᠷᠬᠠᠨ ᠠᠰᠠᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠳ᠋ᠤ᠌ ᠳᠣᠯᠣᠭᠠ ᠲᠡᠷᠢᠭᠦᠯᠡᠭᠰᠡᠨ ᠠᠷᠭᠤᠮᠠᠭ ᠪᠠᠢᠭᠰᠠᠨ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠦᠵᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠬᠥᠮᠦᠨ ᠡᠴᠡ ᠰᠣᠨᠣᠰᠤᠭᠰᠠᠨ᠃ ᠲᠠᠯᠪᠢᠬᠤ ᠥᠷᠯᠥᠭᠡ ᠪᠡᠨ ᠤᠶᠠᠭᠠᠨ ᠳᠡᠭᠡᠷᠡ ᠪᠡᠨ ᠤᠨᠲᠠᠭᠠᠳ ᠯᠠ ᠪᠠᠢᠳᠠᠭ ᠭᠡᠨᠡ ᠪᠢᠯᠡ᠃ ᠴᠢᠨᠦ ᠠᠯᠠᠭ ᠡᠨᠡ ᠵᠢᠯ ᠰᠢᠪᠠᠭᠤ ᠶ᠋ᠢ ᠴᠦ᠍ ᠤᠷᠢᠳᠠ ᠪᠠᠨ ᠭᠠᠷᠭᠠᠬᠤ ᠦᠭᠡᠢ ᠪᠠᠢᠬᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢ ᠲᠠᠨᠢᠳᠠᠭ ᠬᠥᠮᠦᠨ ᠦ᠌ ᠮᠣᠷᠢ ᠯᠠ ᠲᠡᠷᠢᠭᠦᠯᠡᠳᠡᠭ ᠶᠤᠮ ᠪᠣᠯ ᠮᠢᠨᠦ ᠬᠦᠦ ᠶ᠋ᠢᠨ ᠠᠯᠠᠭ ᠢᠷᠡᠬᠦ ᠯᠡ ᠶᠣᠰᠣᠲᠠᠢ ᠭᠡᠵᠦ ᠥᠯᠵᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠠᠨᠢᠵᠤ ᠶᠠᠭᠤ ᠪᠠᠵᠠᠭᠠᠬᠤ ᠪᠣᠢ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠷᠬᠠᠨ ᠸᠠᠩ ᠤ᠋ᠨ ᠪᠦᠳᠦᠭᠦᠨ ᠰᠣ ᠭᠡᠳᠡᠭ ᠬᠥᠮᠦᠨ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠮᠣᠷᠢ ᠮᠣᠷᠳᠠᠬᠤ ᠳ᠋ᠤ᠌ ᠠᠢᠷᠠᠭ ᠤ᠋ᠨ ᠲᠠᠪᠤᠨ ᠮᠣᠷᠢ ᠶ᠋ᠢ ᠠᠯᠳᠠᠯ ᠦᠭᠡᠢ ᠵᠢᠭᠠᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃
ᠲᠡᠷᠡ ᠭᠤᠷᠪᠠ ᠪᠣᠰᠴᠤ ᠲᠡᠮᠦᠷ ᠦ᠋ᠨ ᠭᠡᠷ ᠦ᠋ᠨ ᠵᠦᠭ ᠬᠤᠷᠳᠤᠨ ᠰᠠᠢᠨ ᠮᠣᠷᠢ᠂ ᠮᠡᠷᠭᠡᠨ ᠰᠠᠢᠨ ᠤᠶᠠᠭᠠᠴᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠭᠰᠠᠭᠠᠷ ᠶᠠᠪᠤᠯᠠ᠃
ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠲᠡᠮᠦᠷ ᠦ᠋ᠨ ᠬᠦᠦ ᠪᠠᠳᠠᠷᠠᠬᠤ᠂ ᠵᠡᠭᠦᠨ ᠣᠷᠣᠨ ᠳᠡᠭᠡᠷᠡ ᠢᠨᠢᠶᠡᠮᠰᠦᠭᠯᠡᠨ ᠨᠣᠢᠷᠰᠤᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠡᠴᠢᠭᠡ ᠨᠢ ᠣᠴᠢᠵᠤ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠰᠡᠨ ᠢ᠋ᠶ᠋ᠡᠨ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠬᠦ ᠳ᠋ᠦ᠍ᠨᠢ ᠨᠢᠭᠤᠷ ᠲᠤᠨᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠵᠢᠷᠭᠠᠯ ᠪᠢᠯᠬᠠᠨ ᠣᠪᠣᠯᠵᠠᠨᠠ᠃
ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠲᠦ᠍ ᠰᠠᠭᠤᠨ ᠨᠠᠭᠠᠳᠤᠮ ᠤ᠋ᠨ ᠢ᠋ᠶ᠋ᠠᠨ ᠳᠡᠪᠡᠯ ᠢ᠋ ᠣᠶᠣᠵᠤ ᠪᠠᠢᠭᠰᠠᠨ ᠳᠤᠯᠮᠠ ᠣᠷᠣᠵᠤ ᠢᠷᠡᠭᠡᠳ ᠲᠤᠯᠭᠠᠨ ᠳᠡᠭᠡᠷᠡ ᠵᠠᠭᠰᠠᠭᠠᠵᠤ ᠪᠠᠢᠭᠰᠠᠨ ᠲᠣᠭᠣᠭᠠ ᠲᠠᠢ ᠰᠦ ᠪᠡᠨ ᠭᠠᠷᠭᠠᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠡᠪᠦᠭᠡᠨ ᠨᠢ ᠠᠪᠤᠭᠠᠳ ᠲᠠᠯᠪᠢᠴᠢᠬᠠᠶᠠ》 ᠭᠡᠳ ᠲᠡᠮᠦᠷ ᠪᠠᠷᠢᠭᠤᠯ ᠠᠪᠴᠤ ᠡᠷᠭᠢᠨᠡᠭ ᠦ᠋ᠨ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠪᠠ᠃
ᠲᠡᠷᠡ ᠭᠤᠷᠪᠠ ᠶ᠋ᠢᠨ ᠡᠮᠦᠨᠡ ᠳᠤᠯᠮᠠ ᠮᠣᠳᠣᠨ ᠬᠤᠪᠢᠩ ᠲᠠᠢ ᠱᠤᠤᠭᠢᠵᠤ ᠪᠤᠴᠠᠯᠤᠭᠰᠠᠨ ᠠᠢᠷᠠᠭ ᠲᠠᠯᠪᠢᠵᠤ ᠥᠭᠭᠦᠯᠡ᠃
ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠠᠪᠳᠠᠷᠠ ᠳᠡᠭᠡᠷᠡ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦ ᠬᠠᠷᠠᠭᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠳᠤᠯᠮᠠ ᠨᠠᠭᠠᠳᠤᠮ ᠳ᠋ᠤ᠌ ᠪᠡᠯᠡᠬᠡᠨ ᠪᠣᠯᠤᠭᠠᠳ ᠪᠠᠢᠬᠤ ᠰᠢᠪ ᠳᠡ ᠭᠡᠵᠦ ᠥᠯᠵᠡᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠬᠡᠯᠡᠪᠡ᠃
ᠴᠠᠭᠠᠳᠤ ᠵᠢᠯ ᠳᠤᠯᠮᠠ ᠡᠬᠡᠨᠡᠷ ᠪᠣᠯᠤᠨᠠ ᠭᠡᠵᠦ ᠪᠠᠢᠭᠠᠳ ᠵᠢᠯ ᠨᠢᠭᠡ ᠲᠡᠢ ᠭᠡᠵᠦ ᠥᠯᠵᠡᠢ ᠪᠡᠷ ᠦᠰᠦ ᠪᠡᠨ ᠬᠠᠭᠠᠯᠤᠭᠤᠯᠤᠨ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠡᠷᠡ ᠡᠮᠡ ᠬᠣᠶᠠᠷ᠂ ᠥᠯᠵᠡᠢ ᠶ᠋ᠢ ᠠᠪᠤ ᠭᠡᠳᠡᠭ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠠᠭ ᠲᠤ᠌ ᠲᠡᠷᠡ ᠠᠷᠭᠠᠯᠢ ᠶ᠋ᠢᠨ ᠡᠪᠡᠷ ᠰᠢᠭ ᠲᠠᠩᠬᠠᠢᠭᠰᠠᠨ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ ᠭᠡᠵᠦ ᠲᠡᠮᠦᠷ ᠬᠣᠷᠢᠭᠯᠠᠬᠤ ᠳ᠋ᠤ᠌ 《ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠵᠢᠷᠭᠠᠯ ᠲᠠᠢ ᠡᠬᠡᠨᠡᠷ ᠨᠢᠭᠡ ᠨᠡᠮᠡᠭᠳᠡᠭ》 ᠭᠡᠵᠦ ᠳᠤᠯᠮᠠ ᠬᠠᠷᠢᠭᠤᠯᠤᠭᠰᠠᠨ ᠶᠤᠮ᠃
ᠲᠡᠮᠦᠷ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠦᠰᠡᠯ ᠳ᠋ᠦ᠍ ᠰᠠᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ ᠪᠥᠭᠡᠳ ᠳᠤᠯᠮᠠ ᠳ᠋ᠤ᠌ ᠡᠬᠡᠨᠡᠷ ᠦᠰᠦ ᠵᠣᠬᠢᠭᠰᠠᠨ ᠨᠢ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠳᠤᠯᠮᠠ ᠶ᠋ᠢᠨ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠤ᠋ ᠨᠠᠢᠷ ᠡᠴᠡ ᠪᠤᠴᠠᠵᠤ ᠶᠠᠪᠤᠭᠰᠠᠨ ᠨᠢᠭᠡ ᠬᠥᠮᠦᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠷᠢ ᠶ᠋ᠢᠨ ᠳᠠᠭᠢᠨᠢ ᠭᠡᠳᠡᠭ ᠯᠡ ᠡᠢᠮᠦ ᠪᠠᠢᠳᠠᠭ ᠪᠠᠢᠬᠠ ᠳᠠ ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠨᠢ ᠳᠠᠭᠢᠨᠢ ᠶ᠋ᠢ ᠦᠵᠡᠭᠰᠡᠨ ᠪᠢᠰᠢ ᠳᠡ᠃ ᠵᠦᠭᠡᠷ ᠲᠡᠮᠦᠷ ᠦ᠋ᠨ ᠡᠬᠡᠨᠡᠷ ᠴᠦ᠍ ᠰᠠᠢᠬᠠᠨ ᠡᠬᠡᠨᠡᠷ ᠶᠤᠮ ᠠ᠋᠃ ᠰᠠᠢᠬᠠᠨ ᠡᠬᠡᠨᠡᠷ ᠢ᠋ ᠬᠠᠷᠠᠭᠠᠳ ᠯᠤᠤᠰ ᠪᠠᠶᠠᠷᠯᠠᠳᠠᠭ ᠶᠤᠮ ᠭᠡᠳᠡᠭ ᠰᠢᠦ᠃ ᠮᠠᠨ ᠤ᠋ ᠭᠣᠣᠯ ᠳ᠋ᠤ᠌ ᠥᠯᠵᠡᠢ ᠪᠣᠯᠤᠭ ᠭᠡᠵᠦ ᠪᠢᠯᠡ᠃
ᠳᠤᠯᠮᠠ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠮᠦᠷ ᠦ᠋ᠨ ᠭᠡᠷ ᠲᠦ᠍ ᠶᠢᠷᠲᠢᠨᠴᠦ ᠶ᠋ᠢᠨ ᠬᠣᠶᠠᠳᠤᠭᠠᠷ ᠨᠠᠷᠠ ᠮᠠᠨᠳᠤᠵᠤ ᠬᠦᠦ ᠭᠠᠷᠤᠭᠰᠠᠨ ᠳ᠋ᠤ᠌ ᠪᠠᠳᠠᠷᠠᠬᠤ ᠭᠡᠵᠦ ᠨᠡᠷᠡ ᠥᠭᠭᠦᠭᠰᠡᠨ ᠨᠢ ᠣᠳᠣ ᠬᠣᠶᠠᠷ ᠨᠠᠰᠤ ᠬᠦᠷᠴᠦ ᠪᠠᠢᠭᠠ ᠠᠵᠢ᠃
ᠲᠡᠮᠦᠷ ᠦ᠋ᠨ ᠬᠢ ᠲᠠᠪᠢ ᠣᠷᠴᠢᠮ ᠮᠠᠯ ᠲᠠᠢ ᠪᠥᠭᠡᠳ ᠡᠳᠦᠷ ᠪᠦᠬᠦᠨ ᠬᠦᠦ ᠳ᠋ᠡᠭᠡᠨ ᠨᠡᠷᠡᠯᠡᠵᠦ ᠥᠭᠭᠦᠭᠰᠡᠭᠡᠷ ᠪᠠᠢᠭᠠᠳ ᠪᠦᠭᠦᠳᠡ ᠶ᠋ᠢ ᠪᠠᠳᠠᠷᠠᠬᠤ ᠶ᠋ᠢᠨ ᠨᠡᠷᠡ ᠲᠡᠢ ᠬᠣᠯᠪᠣᠵᠠᠢ᠃ ᠡᠴᠢᠭᠡ᠂ ᠡᠬᠡ᠂ ᠥᠯᠵᠡᠢ ᠭᠤᠷᠪᠠ ᠶ᠋ᠢᠨ ᠬᠠᠢᠷᠠ ᠳᠡᠭᠡᠷᠡ ᠪᠥᠮᠪᠥᠷᠢᠭᠰᠡᠨ ᠪᠠᠳᠠᠷᠠᠬᠤ ᠬᠦᠦ ᠶ᠋ᠢᠨ ᠡᠷᠬᠡ ᠶ᠋ᠢ ᠶᠠᠷᠢᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠦᠭᠡᠢ ᠪᠥᠭᠡᠳ ᠲᠡᠮᠦᠷ᠂ ᠥᠯᠵᠡᠢ ᠬᠣᠶᠠᠷ ᠮᠣᠳᠣ ᠪᠠᠷ ᠵᠣᠷᠭᠣᠵᠤ ᠥᠭᠭᠦᠭᠰᠡᠨ ᠡᠯᠳᠡᠪ ᠦ᠋ᠨ ᠠᠮᠢᠲᠠᠨ ᠤ᠋ ᠡᠪ ᠬᠠᠪᠤ ᠮᠠᠭᠤᠲᠠᠢ ᠳᠦᠷᠰᠦ ᠶ᠋ᠢ ᠬᠠᠶᠠᠯ ᠦᠭᠡᠢ ᠴᠤᠭᠯᠠᠭᠤᠯᠤᠨ ᠪᠠᠢᠭᠰᠠᠨ ᠪᠣᠯ ᠬᠠᠨ ᠥᠨᠳᠥᠷ ᠦ᠋ᠨ ᠬᠦᠷᠢᠶᠡᠨ ᠦ᠌ ᠯᠠᠮᠠ ᠨᠠᠷ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠢᠳᠠᠭ ᠲᠦᠯᠡᠭᠡᠨ ᠡᠴᠡ ᠳᠤᠲᠠᠬᠤ ᠦᠭᠡᠢ ᠮᠣᠳᠣ ᠪᠣᠯᠬᠤ ᠪᠠᠢᠭᠰᠠᠨ ᠪᠠᠢᠬᠠ ᠠ᠋᠃
ᠲᠡᠮᠦᠷ᠂ ᠳᠤᠯᠮᠠ ᠬᠣᠶᠠᠷ ᠬᠦᠰᠡᠭᠰᠡᠨ ᠵᠢᠷᠭᠠᠯ ᠢ᠋ᠶ᠋ᠠᠨ ᠡᠳ᠋ᠯᠡᠵᠦ ᠭᠡᠷ ᠳᠦᠭᠦᠷᠡᠩ ᠪᠠᠶᠠᠷ᠂ ᠰᠡᠳᠬᠢᠯ ᠳᠦᠭᠦᠷᠡᠩ ᠬᠥᠷ ᠪᠠᠢᠯᠠ᠃
ᠲᠡᠷᠡ ᠣᠷᠣᠢ ᠲᠡᠮᠦᠷ ᠦ᠋ᠨ ᠬᠣᠲᠠ ᠨᠠᠭᠠᠳᠤᠮ ᠳ᠋ᠤ᠌ ᠶᠠᠪᠤᠬᠤ ᠨᠠᠢᠷ ᠬᠢᠯᠡ᠃ ᠠᠢᠷᠠᠭ᠂ ᠠᠷᠢᠬᠢ ᠡᠭᠡᠯᠵᠢᠯᠡᠨ ᠰᠥᠩᠨᠡᠵᠦ ᠳᠠᠭᠤᠤ ᠱᠤᠤᠭᠢᠶᠠᠨ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠷ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠳᠠᠭᠤᠯᠠᠵᠤ ᠪᠢᠯᠡ᠃
ᠨᠠᠢᠷ ᠲᠤ᠌ ᠬᠤᠷᠢᠶᠠᠭᠰᠠᠨ ᠠᠢᠷᠠᠭ ᠳᠠᠭᠤᠰᠬᠤ ᠳ᠋ᠤ᠌ ᠨᠡᠯᠢᠶᠡᠳ ᠰᠣᠭᠲᠣᠭᠰᠠᠨ ᠥᠯᠵᠡᠢ 《ᠭᠡᠭᠦᠦ ᠪᠡᠯᠴᠢᠭᠡᠷ ᠲᠦ᠍ ᠬᠦᠷᠬᠦ ᠳ᠋ᠦ᠍ ᠠᠢᠷᠠᠭ ᠢᠰᠳᠡᠭ ᠶᠤᠮ》 ᠭᠡᠵᠦ ᠰᠠᠭᠠᠮᠠ ᠬᠢᠭᠰᠡᠨ ᠬᠥᠬᠦᠦᠷ ᠲᠦ᠍ ᠠᠢᠷᠠᠭ ᠢ᠋ᠶ᠋ᠠᠨ ᠤᠤᠭᠤᠵᠤ ᠨᠠᠢᠷ ᠲᠠᠷᠬᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠥᠩᠭᠡᠵᠢ ᠬᠥᠷᠥᠩᠭᠡ ᠲᠡᠢ ᠦᠯᠡᠳᠡᠵᠡᠢ᠃
ᠲᠡᠷᠡ ᠣᠷᠣᠢ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠢᠷᠡᠭᠰᠡᠨ ᠪᠦᠬᠦᠨ ᠠᠢᠷᠠᠭ ᠤ᠋ᠨ ᠰᠠᠢᠬᠠᠨ ᠢ᠋ ᠠᠮᠠ ᠳᠦᠭᠦᠷᠡᠩ ᠢᠯᠡ ᠮᠠᠭᠲᠠᠵᠤ᠂ ᠳᠤᠯᠮᠠ ᠶ᠋ᠢᠨ ᠰᠠᠢᠬᠠᠨ ᠢ᠋ ᠳᠣᠲᠣᠷᠠ ᠪᠠᠨ ᠨᠢᠭᠤᠨ ᠭᠠᠢᠬᠠᠨ ᠪᠠᠢᠵᠤ ᠪᠢᠯᠡ᠃ ᠳᠦᠭᠦᠷᠡᠩ ᠵᠢᠷᠭᠠᠯ ᠨᠢ ᠭᠡᠷᠡᠯᠲᠦᠨ ᠪᠠᠳᠠᠷᠠᠭᠰᠠᠨ ᠰᠠᠢᠬᠠᠨ ᠬᠥᠮᠦᠨ ᠭᠡᠳᠡᠭ ᠶᠠᠭᠤᠲᠠᠢ ᠭᠤᠸᠠ ᠪᠠᠢᠳᠠᠭ ᠶᠤᠮ ᠪᠣᠢ᠃
ᠲᠡᠮᠦᠷ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠳᠤᠯᠮᠠ ᠶ᠋ᠢᠨ ᠤᠨᠤᠳᠠᠭ ᠵᠢᠷᠣᠭᠠ ᠵᠡᠭᠡᠷᠳᠡ ᠮᠣᠷᠢᠨ ᠤ᠋ ᠳᠡᠯ ᠢ᠋ ᠵᠠᠰᠠᠵᠤ᠂ ᠴᠢᠬᠢᠨ ᠦ᠌ ᠬᠢᠨᠢ ᠦᠰᠦ ᠶ᠋ᠢ ᠲᠡᠭᠰᠢᠯᠡᠨ᠂ ᠡᠷᠡᠦ ᠶ᠋ᠢᠨ ᠰᠠᠬᠠᠯ ᠢ᠋ ᠬᠠᠢᠴᠢᠯᠠᠭᠠᠳ ᠮᠥᠩᠭᠥᠨ ᠲᠣᠨᠣᠭ᠂ ᠶᠠᠰᠤᠨ ᠬᠢᠷᠠ ᠲᠠᠢ᠂ ᠪᠣᠷᠵᠢᠭᠢᠨ ᠬᠢᠴᠡ ᠲᠡᠢ ᠡᠮᠡᠭᠡᠯ ᠲᠣᠬᠣᠭᠠᠳ ᠤᠶᠠᠭᠠᠨ ᠡᠴᠡ ᠤᠶᠠᠬᠤ ᠳ᠋ᠤᠨᠢ 《ᠵᠡᠭᠡᠷᠳᠡ ᠮᠣᠷᠢ ᠴᠤ᠌ ᠰᠤᠭᠤ ᠰᠢᠭ᠋ ᠪᠠᠢᠨᠠ ᠳᠠ》 ᠭᠡᠵᠦ ᠥᠯᠵᠡᠢ ᠬᠡᠯᠡᠪᠡ᠃
ᠲᠡᠮᠦᠷ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠵᠣ ᠶ᠋ᠢ ᠨᠢ ᠠᠷᠴᠢᠬᠤ ᠵᠠᠭᠤᠷᠠ 《ᠳᠤᠯᠮᠠ ᠶ᠋ᠢᠨ ᠮᠢᠨᠢ ᠮᠣᠷᠢ ᠮᠠᠭᠤᠬᠠᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠳᠤᠯᠮᠠ ᠴᠤ᠌ ᠥᠷᠯᠥᠭᠡᠨ ᠡᠴᠡ ᠡᠬᠢᠯᠡᠨ ᠭᠣᠶᠣᠯᠠᠪᠠ᠃ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠡᠯᠢᠭᠡᠨ ᠬᠦᠷᠡᠩ ᠤᠤᠵᠢ ᠡᠮᠦᠰᠴᠦ ᠨᠠᠷᠢᠬᠠᠨ ᠪᠣᠯᠪᠠᠴᠤ ᠴᠡᠪᠡᠷᠬᠡᠨ ᠬᠢᠭᠰᠡᠨ ᠮᠥᠩᠭᠥᠨ ᠬᠡᠷᠡᠭᠯᠡᠯ ᠲᠡᠢ ᠡᠬᠡᠨᠡᠷ ᠦᠰᠦ ᠲᠠᠯᠪᠢᠭᠠᠳ ᠱᠠᠭᠠ ᠳᠡᠭᠡᠷᠡ ᠪᠡᠨ ᠳᠤᠭᠤᠢ ᠬᠡ ᠲᠡᠢ᠂ ᠬᠠᠷᠠ ᠪᠤᠯᠢᠭᠠᠷᠢ ᠭᠤᠲᠤᠯ ᠢᠰᠬᠦᠯᠦᠭᠡᠳ ᠵᠣᠭᠰᠣᠵᠤ ᠪᠠᠢᠭᠠ ᠳᠤᠯᠮᠠ ᠪᠣᠯ ᠬᠠᠷᠠᠭᠰᠠᠨ ᠡᠷᠡ ᠬᠥᠮᠦᠨ ᠪᠦᠬᠦᠨ ᠦ᠌ ᠬᠡᠢ ᠮᠣᠷᠢ ᠰᠡᠷᠭᠦᠵᠦ᠂ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠢ᠋ ᠠᠷᠭᠠ ᠦᠭᠡᠢ ᠬᠥᠳᠡᠯᠭᠡᠬᠦ ᠪᠣᠯᠵᠠᠢ᠃
ᠥᠯᠵᠡᠢ᠂ ᠪᠠᠳᠠᠷᠠᠬᠤ ᠬᠣᠶᠠᠷ ᠭᠡᠷ ᠲᠡᠭᠡᠨ ᠦᠯᠡᠳᠡᠵᠦ᠂ ᠲᠡᠮᠦᠷ ᠤᠶᠠᠭᠰᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠦᠨ ᠳᠤᠯᠮᠠ᠂ ᠮᠣᠷᠢ ᠣᠨᠣᠭᠤᠯᠬᠤ ᠭᠡᠵᠦ ᠰᠠᠭᠠᠬᠠᠯᠲᠠ ᠡᠴᠡ ᠠᠪᠴᠢᠷᠠᠭᠰᠠᠨ ᠵᠢᠷᠭᠠᠯ ᠬᠦᠦ ᠬᠣᠶᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠨᠠᠭᠠᠳᠤᠮ ᠤ᠋ᠨ ᠵᠦᠭ ᠶᠠᠪᠤᠬᠤ ᠪᠣᠯᠪᠠ᠃
ᠡᠬᠡᠨᠡᠷ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠰᠡᠨ ᠳᠤᠯᠮᠠ ᠶ᠋ᠢ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠡᠮᠡᠭᠡᠯ ᠲᠡᠢ ᠵᠡᠭᠡᠷᠳᠡ ᠮᠣᠷᠢ ᠶ᠋ᠢ ᠬᠥᠲᠥᠯᠦᠨ ᠢᠷᠡᠵᠦ ᠶᠠᠪᠤᠭᠰᠠᠨ ᠲᠡᠮᠦᠷ ᠵᠣᠭᠰᠣᠪᠠ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠡᠴᠡ ᠪᠠᠶᠠᠷ᠂ ᠵᠢᠷᠭᠠᠯ᠂ ᠦᠯᠡᠮᠵᠢ ᠶ᠋ᠢᠨ ᠬᠠᠢᠷᠠ ᠶ᠋ᠢᠨ ᠭᠡᠷᠡᠯ ᠰᠠᠴᠤᠷᠠᠵᠤ ᠳᠦᠷᠯᠡᠭᠡᠷ ᠬᠠᠷᠠ ᠨᠢᠳᠦ ᠨᠢ ᠪᠠᠬᠠᠳᠤᠯ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠴᠠᠪᠴᠢᠯᠠᠨᠠ᠃
ᠲᠡᠮᠦᠷ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠤᠭᠤᠳᠠᠨ ᠮᠣᠷᠳᠠᠭᠤᠯᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠡᠪᠦᠭᠡᠨ ᠮᠢᠨᠢ ᠵᠦᠭᠡᠷ᠃ ᠪᠢ ᠥᠪᠡᠷ ᠢ᠋ᠶ᠋ᠡᠨ》 ᠭᠡᠳ ᠳᠤᠯᠮᠠ ᠴᠤᠯᠪᠤᠭᠤᠷ ᠢ᠋ ᠠᠪᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠠᠳᠤᠭᠤᠰᠤ᠃ ᠶᠠᠭᠠᠬᠢᠵᠤ ᠴᠤ᠌ ᠮᠠᠭᠠᠳ》 ᠭᠡᠵᠦ ᠡᠷᠭᠦᠨ ᠮᠣᠷᠳᠠᠭᠤᠯᠪᠠ᠃
ᠬᠠᠨ ᠥᠨᠳᠥᠷ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠮᠦᠨᠡᠬᠢ ᠵᠦᠯᠭᠡᠨ ᠳᠡᠭᠡᠷᠡ ᠡᠳᠦᠢ ᠲᠡᠳᠦᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠮᠠᠢᠬᠠᠨ ᠪᠠᠷᠢᠵᠤ᠂ ᠳᠡᠯ ᠢ᠋ ᠨᠢ ᠵᠠᠰᠠᠵᠤ᠂ ᠬᠡᠳᠦ ᠬᠣᠨᠣᠭ ᠰᠣᠢ᠌ᠭᠰᠠᠨ ᠮᠣᠷᠢᠳ ᠤᠨᠤᠭᠰᠠᠨ᠂ ᠬᠤᠷᠴᠠ ᠥᠩᠭᠡ ᠶ᠋ᠢᠨ ᠳᠡᠪᠡᠯ ᠲᠡᠢ ᠣᠯᠠᠨ ᠵᠠᠭᠤᠨ ᠬᠥᠮᠦᠨ ᠰᠦᠯᠵᠢᠯᠳᠦᠬᠦ ᠨᠢ ᠠᠭᠤᠯᠠ ᠶ᠋ᠢᠨ ᠴᠡᠴᠡᠭ ᠲᠡᠢ ᠠᠳᠠᠯᠢ ᠠᠵᠢ᠃
ᠨᠠᠭᠠᠳᠤᠮᠴᠢᠨ ᠣᠯᠠᠨ ᠤ᠋ ᠳᠤᠮᠳᠠ ᠯᠤᠤ ᠬᠦᠩ ᠦ᠋ᠨ ᠪᠠᠳᠠᠷᠴᠢ ᠨᠣᠭᠲᠣ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ ᠭᠡᠳᠡᠭ ᠦᠭᠡ ᠨᠢᠭᠡ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠳᠠᠮᠵᠢᠨ ᠲᠠᠷᠬᠠᠵᠤ ᠬᠠᠨ ᠥᠨᠳᠥᠷ ᠦ᠋ᠨ ᠬᠢᠨ ᠦ᠌ ᠬᠣᠷᠣ ᠶ᠋ᠢ ᠪᠤᠴᠠᠯᠭᠠᠨᠠ᠃ ᠦᠨᠡᠬᠡᠷ ᠴᠦ᠍ ᠪᠠᠷᠳᠠᠮ ᠪᠠᠳᠠᠷᠴᠢ ᠨᠠᠭᠠᠳᠤᠮ ᠳ᠋ᠤ᠌ ᠲᠦᠷᠦᠭᠦᠯᠡᠵᠦ ᠪᠠᠢ ᠳ᠋ᠤ᠌ ᠥᠭᠬᠦ ᠶᠡᠬᠡ ᠨᠠᠰᠤᠨ ᠤ᠋ ᠮᠣᠷᠢ ᠶ᠋ᠢ ᠨᠢ ᠠᠪᠤᠨᠠ ᠭᠡᠵᠦ ᠪᠦᠳᠦᠭᠦᠨ ᠰᠤᠷ ᠨᠣᠭᠲᠣ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ ᠠᠵᠢ᠃
ᠰᠠᠢᠳ ᠸᠠᠩ ᠤ᠋ᠨ ᠬᠣᠰᠢᠭᠤ ᠪᠣᠯ ᠬᠡᠵᠢᠶᠡᠨ ᠡᠴᠡ ᠰᠢᠷᠪᠥᠰᠥ ᠲᠡᠢ ᠪᠥᠬᠡᠴᠦᠳ ᠣᠯᠠᠨᠲᠠᠢ ᠪᠢᠯᠡ᠃ ᠭᠡᠪᠡᠴᠦ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠤ᠋ ᠵᠠᠭᠠᠨ ᠳᠣᠭᠰᠢᠨ ᠪᠠᠳᠠᠷᠴᠢ ᠳ᠋ᠤ᠌ ᠨᠠᠭᠠᠳᠤᠮ ᠢ᠋ᠶ᠋ᠠᠨ ᠠᠯᠳᠠᠬᠤ ᠪᠣᠢ ᠭᠡᠳᠡᠭ ᠪᠣᠳᠣᠯ ᠨᠤᠲᠤᠭ ᠤ᠋ᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠵᠣᠪᠠᠭᠠᠨᠠ᠃ ᠨᠠᠭᠠᠳᠤᠮ ᠢ᠋ᠶ᠋ᠠᠨ ᠬᠠᠷᠢ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠠᠯᠳᠠᠨᠠ ᠭᠡᠳᠡᠭ ᠮᠠᠭᠤᠬᠠᠢ᠃ ᠪᠠᠰᠠ ᠲᠡᠭᠡᠭᠡᠳ ᠬᠠᠮᠤᠭ ᠤ᠋ᠨ ᠲᠤᠰᠠ ᠦᠭᠡᠢ ᠨᠢ ᠬᠠᠯᠠᠭᠤᠨ ᠬᠣᠰᠢᠭᠤ ᠲᠠᠢ ᠮᠠᠯ ᠢ᠋ᠶ᠋ᠠᠨ ᠪᠠᠢ ᠳ᠋ᠤ᠌ ᠥᠭᠴᠦ ᠬᠠᠷᠢ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠶᠠᠪᠤᠭᠤᠯᠤᠨᠠ ᠭᠡᠰᠡᠨ ᠦᠭᠡ ᠪᠢᠯᠡ᠃ ᠡᠨᠡ ᠪᠦᠬᠦᠨ ᠴᠦ᠍ ᠪᠠᠰᠠ ᠭᠠᠢᠭᠤᠢ᠃ ᠬᠠᠷᠢᠨ ᠪᠦᠬᠦᠯᠢ ᠬᠣᠰᠢᠭᠤ ᠶ᠋ᠢ ᠳᠣᠷᠣᠮᠵᠢᠯᠠᠵᠤ ᠨᠣᠭᠲᠣ ᠭᠠᠨᠵᠤᠭᠠᠯᠠᠵᠤ ᠢᠷᠡᠭᠰᠡᠨ ᠪᠠᠳᠠᠷᠴᠢ ᠶ᠋ᠢᠨ ᠪᠠᠷᠳᠠᠮ ᠵᠠᠩ 《ᠬᠡᠳᠦᠨ ᠪᠠᠨᠳᠢ ᠨᠠᠷ ᠢ᠋ ᠨᠢ ᠨᠢᠰᠠᠯᠵᠤ ᠣᠷᠬᠢᠭᠠᠳ᠂ ᠥᠭᠭᠦᠭᠰᠡᠨ ᠮᠣᠷᠢ ᠶ᠋ᠢ ᠨᠢ ᠬᠥᠲᠥᠯᠦᠭᠡᠳ ᠱᠣᠭᠰᠢᠳᠠᠭ ᠬᠡᠷᠡᠭ ᠠ᠋》 ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡ ᠨᠤᠲᠤᠭ ᠤ᠋ᠨ ᠣᠯᠠᠨ ᠤ᠋ ᠴᠢᠬᠢ ᠶ᠋ᠢ ᠳᠣᠷᠭᠢᠭᠤᠯᠵᠤ ᠬᠣᠷᠣ ᠰᠢᠷᠠ ᠶ᠋ᠢ ᠨᠢ ᠪᠤᠴᠠᠯᠭᠠᠵᠤ ᠪᠠᠢᠯᠠ᠃
ᠪᠠᠳᠠᠷᠴᠢ ᠶ᠋ᠢᠨ ᠡᠨᠡ ᠶᠠᠷᠢᠶᠠ ᠲᠡᠮᠦᠷ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠬᠦᠷᠴᠦ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠴᠦ᠍ ᠬᠥᠳᠡᠯᠭᠡᠪᠡ᠃ 《ᠢᠷᠡᠭᠡᠳ ᠬᠥᠮᠦᠨ ᠰᠢᠭ ᠯᠡ ᠪᠠᠷᠢᠯᠳᠤᠵᠤ᠂ ᠬᠦᠴᠦ ᠪᠡᠨ ᠦᠵᠡᠬᠦ ᠦᠭᠡᠢ᠃ ᠪᠦᠬᠦᠯᠢ ᠬᠣᠰᠢᠭᠤ ᠶ᠋ᠢ ᠳᠣᠷᠣᠮᠵᠢᠯᠠᠨᠠ ᠭᠡᠨᠡ᠃ ᠵᠠᠳᠠᠷᠠᠭᠰᠠᠨ ᠵᠣᠯᠢᠭ》 ᠭᠡᠵᠦ ᠪᠣᠳᠣᠨ ᠵᠢᠪᠡᠭᠦᠦ ᠬᠦᠷᠴᠦ ᠪᠢᠯᠡ᠃
ᠶᠡᠬᠡ ᠨᠠᠰᠤᠨ ᠤ᠋ ᠮᠣᠷᠢ ᠪᠠᠨ ᠮᠣᠷᠳᠠᠭᠤᠯᠵᠤ ᠣᠷᠬᠢᠭᠠᠳ᠂ ᠪᠥᠬᠡ ᠶ᠋ᠢᠨ ᠪᠢᠴᠢᠭᠡᠴᠢ ᠳᠡᠭᠡᠷᠡ ᠢᠷᠡᠵᠦ ᠨᠡᠷᠡ ᠪᠡᠨ ᠪᠢᠴᠢᠭᠦᠯᠪᠡ᠃ ᠭᠡᠲᠡᠯᠡ ᠡᠮᠦᠰᠬᠦ ᠵᠣᠳᠣᠭ ᠪᠠᠢᠭᠰᠠᠨ ᠦᠭᠡᠢ᠃ ᠮᠠᠢᠬᠠᠨ ᠳ᠋ᠤ᠌ ᠪᠠᠢᠭᠠ ᠬᠥᠮᠦᠨ ᠦ᠌ ᠵᠣᠳᠣᠭ ᠬᠡᠷᠡᠭᠯᠡᠯ ᠢ᠋ ᠭᠤᠶᠤᠭᠠᠳ ᠲᠠᠭᠠᠷᠠᠵᠤ ᠪᠠᠭᠲᠠᠬᠤ ᠶᠠᠭᠤᠮᠠ ᠣᠯᠳᠠᠬᠤ ᠦᠭᠡᠢ ᠶᠠᠳᠠᠵᠤ ᠪᠠᠢᠭᠰᠠᠨ ᠲᠡᠮᠦᠷ ᠦ᠋ᠨ ᠳᠡᠷᠭᠡᠳᠡ ᠨᠢᠭᠡ ᠳᠠᠪᠠᠭᠠᠳ ᠢᠷᠡᠭᠰᠡᠨ ᠪᠠᠳᠠᠷᠴᠢ ᠵᠣᠳᠣᠭ ᠢ᠋ᠶ᠋ᠠᠨ ᠲᠠᠢᠯᠵᠤ 《ᠮᠢᠨᠦ ᠬᠡᠷᠡᠭᠯᠡᠯ ᠢ᠋ ᠡᠮᠦᠰ᠃ ᠡᠷᠡ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠬᠤᠴᠢᠬᠤ ᠬᠡᠷᠡᠭᠯᠡᠯ᠃ ᠰᠠᠢᠳ ᠸᠠᠩ ᠤ᠋ᠨ ᠳ᠋ᠤ᠌ ᠪᠠᠢᠬᠤ ᠦᠭᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠰᠢᠭᠤ ᠨᠢ ᠲᠣᠮᠣ᠂ ᠡᠷᠡ ᠨᠢ ᠣᠯᠠᠨ ᠶᠠᠭᠤᠮᠠ ᠪᠠᠢᠨᠠ ᠪᠣᠯᠬᠤ ᠪᠠᠢᠬᠠ᠃ ᠨᠠᠭᠠᠳᠤᠬᠢ ᠵᠣᠳᠣᠭ ᠴᠢᠨᠢ ᠬᠡᠷᠡᠭ ᠦᠭᠡᠢ᠃ ᠬᠥᠮᠦᠨ ᠦ᠌ ᠬᠣᠩᠭᠣ ᠶ᠋ᠢᠨ ᠴᠢᠰᠤ ᠦᠰᠦᠷᠦᠭᠰᠡᠨ ᠡᠳ᠋ ᠪᠠᠢᠯᠭᠦᠢ ᠳᠡ ᠭᠡᠵᠦ ᠲᠡᠮᠦᠷ ᠢ᠋ ᠬᠡᠭᠵᠢᠭᠦᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠵᠠᠳᠠ ᠰᠢᠷᠪᠢᠵᠦ ᠳᠠᠯᠤ ᠪᠠᠨ ᠬᠥᠳᠡᠯᠭᠡᠭᠡᠳ ᠶᠠᠪᠤᠵᠠᠢ᠃
ᠪᠠᠷᠳᠠᠮ ᠪᠠᠳᠠᠷᠴᠢ ᠳ᠋ᠤ᠌ ᠬᠡᠯᠡᠭᠰᠡᠨ ᠲᠡᠮᠦᠷ ᠦ᠋ᠨ ᠬᠠᠲᠠᠭᠤ ᠬᠠᠷᠢᠭᠤ ᠲᠡᠷᠡ ᠳᠣᠣᠷᠠ ᠪᠠᠨ ᠣᠯᠠᠨ ᠤ᠋ ᠬᠦᠷᠲᠡᠭᠡᠯ ᠪᠣᠯᠵᠤ ᠨᠤᠲᠤᠭ ᠤ᠋ᠨ ᠣᠯᠠᠨ ᠤ᠋ ᠬᠠᠢᠷᠠ ᠲᠠᠯᠠᠷᠬᠠᠯ ᠲᠡᠮᠦᠷ ᠦ᠋ᠨ ᠵᠦᠭ ᠡᠷᠭᠢᠵᠦ ᠪᠢᠯᠡ᠃
ᠳᠣᠯᠣᠭᠠᠨ ᠬᠣᠰᠢᠭᠤ ᠳᠠᠩᠰᠢᠭ ᠤ᠋ᠨ ᠠᠷᠰᠯᠠᠨ᠂ ᠣᠳᠣ ᠳᠠᠯᠠ ᠭᠠᠷᠤᠭᠰᠠᠨ ᠴᠤᠤᠲᠤ ᠪᠥᠬᠡ ᠬᠠᠭᠤᠴᠢᠷᠠᠵᠤ ᠡᠨᠳᠡ ᠲᠡᠨᠳᠡ ᠪᠡᠨ ᠤᠷᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠡᠷᠡᠭᠯᠡᠵᠦ ᠪᠦᠷᠢᠨ ᠪᠣᠯᠬᠤ ᠬᠥᠬᠡ ᠴᠢᠰᠴᠡᠦ ᠬᠡᠷᠡᠭᠯᠡᠯ ᠢ᠋ᠶ᠋ᠡᠨ ᠲᠡᠮᠦᠷ ᠲᠦ᠍ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠨᠢ ᠶᠠᠭ ᠲᠠᠭᠠᠷᠠᠪᠠ᠃
ᠲᠡᠮᠦᠷ ᠦ᠋ᠨ ᠶᠡᠬᠡ ᠨᠠᠰᠤᠨ ᠤ᠋ ᠮᠣᠷᠢ ᠨᠢ ᠠᠷᠪᠠᠨ ᠨᠢᠭᠡ ᠳ᠋ᠦ᠍ ᠳᠠᠪᠬᠢᠵᠤ᠂ ᠬᠠᠷᠢᠨ ᠬᠢᠵᠠᠯᠠᠩ ᠠᠯᠠᠭ ᠦᠷᠢᠶᠡ ᠨᠢ ᠲᠡᠷᠢᠭᠦᠯᠡᠪᠡ᠃ ᠲᠡᠮᠦᠷ ᠲᠠᠪᠤ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠮᠠᠢ ᠯᠤᠤ ᠬᠦᠩ ᠦ᠋ᠨ ᠪᠠᠳᠠᠷᠴᠢ ᠲᠠᠢ ᠪᠠᠷᠢᠯᠳᠤᠭᠤᠯᠵᠤ ᠥᠭᠬᠦ ᠶ᠋ᠢ ᠪᠣᠳᠣᠭᠠᠷᠠᠢ ᠭᠡᠵᠦ ᠲᠡᠮᠦᠷ ᠪᠥᠬᠡ ᠶ᠋ᠢᠨ ᠪᠢᠴᠢᠭᠡᠴᠢ ᠭᠣᠣᠨᠣᠭᠤᠷ ᠭᠡᠵᠢᠭᠡ ᠲᠡᠢ ᠬᠠᠷᠠ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠪᠠᠷᠮᠠ ᠴᠢᠨᠢ ᠲᠠᠩᠰᠢᠭ ᠤ᠋ᠨ ᠵᠠᠭᠠᠨ ᠪᠣᠯᠬᠣᠷ ᠠᠮᠠᠷᠴᠢᠯᠠᠵᠤ ᠠᠪᠤᠭᠠᠳ ᠪᠣᠯᠬᠤ ᠦᠭᠡᠢ ᠪᠠᠢᠨᠠ᠃ ᠲᠠ ᠴᠢᠨᠢ ᠶᠠᠮᠠᠷ ᠴᠣᠯᠠ ᠲᠠᠢ ᠪᠣᠢ? ᠭᠡᠵᠦ ᠲᠡᠷᠡ ᠬᠥᠮᠦᠨ ᠬᠤᠯᠤᠰᠤᠨ ᠪᠢᠷ ᠢ᠋ᠶ᠋ᠡᠨ ᠭᠠᠷ ᠤ᠋ᠨ ᠰᠠᠯᠠᠭᠠᠨ ᠳ᠋ᠠᠭᠠᠨ ᠡᠷᠭᠢᠭᠦᠯᠦᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠢᠳᠤ ᠬᠤᠰᠢᠭᠤᠨ ᠳ᠋ᠠᠭᠠᠨ ᠨᠠᠴᠢᠨ ᠪᠣᠯᠤᠭᠰᠠᠨ᠃ ᠥᠭᠡᠷᠡ ᠴᠣᠯᠠ ᠦᠭᠡᠢ᠃
ᠲᠡᠮᠦᠷ ᠪᠠᠭᠠ ᠳ᠋ᠠᠭᠠᠨ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠢ ᠪᠠᠷᠢᠯᠳᠤᠵᠤ ᠪᠠᠢᠭᠰᠠᠨ ᠢ᠋ ᠠᠯᠢ ᠲᠡᠷᠡ ᠭᠡᠬᠦ ᠪᠢᠯᠡ᠃ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠨ ᠳ᠋ᠠᠭᠠᠨ ᠵᠠᠰᠠᠭ ᠬᠠᠨ ᠤ᠋ ᠬᠣᠰᠢᠭᠤ ᠨᠠᠭᠠᠳᠤᠮ ᠳ᠋ᠤ᠌ ᠪᠠᠷᠢᠯᠳᠤᠵᠤ ᠨᠠᠴᠢᠨ ᠪᠣᠯᠤᠭᠰᠠᠨ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠣᠯᠤᠭᠠᠳ ᠨᠠᠭᠠᠳᠤᠮ ᠳ᠋ᠤ᠌ ᠨᠣᠴᠣᠯᠳᠤᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠥᠭᠡᠳ ᠪᠠᠷᠢᠯᠳᠤᠬᠤ ᠴᠤ᠌ ᠳᠤᠷᠠ ᠦᠭᠡᠢ ᠪᠠᠢᠯᠠ᠃ ᠭᠠᠭᠴᠠᠬᠦ ᠡᠨᠡ ᠤᠳᠠᠭᠠ ᠬᠠᠭᠤᠴᠢᠨ ᠲᠠᠨᠢᠯ ᠪᠠᠳᠠᠷᠴᠢ ᠶ᠋ᠢᠨ ᠳᠡᠭᠡᠷᠡᠩᠭᠦᠢ ᠠᠭᠠᠰᠢᠨ ᠳ᠋ᠤ᠌ ᠵᠢᠪᠡᠭᠦᠦ ᠨᠢ ᠬᠦᠷᠦᠭᠰᠡᠨ ᠤᠴᠢᠷ ᠢᠩᠭᠢᠵᠦ ᠪᠠᠷᠢᠯᠳᠤᠵᠤ ᠪᠠᠢᠭᠠ ᠠᠵᠢ᠃
ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ ᠨᠤᠲᠤᠭ ᠤ᠋ᠨ ᠨᠢᠭᠡ ᠪᠥᠬᠡ᠂ ᠲᠡᠮᠦᠷ᠂ ᠪᠠᠳᠠᠷᠴᠢ ᠭᠤᠷᠪᠠ ᠦᠯᠡᠳᠡᠬᠦ ᠳ᠋ᠦ᠍ ᠨᠤᠲᠤᠭ ᠤ᠋ᠨ ᠪᠥᠬᠡ ᠬᠡᠢ ᠮᠥᠷᠭᠥᠵᠦ᠂ ᠲᠡᠮᠦᠷ ᠡᠴᠡ ᠵᠠᠢᠯᠠᠨ ᠪᠠᠢᠭᠰᠠᠨ ᠪᠠᠳᠠᠷᠴᠢ ᠠᠷᠭᠠ ᠦᠭᠡᠢ ᠲᠤᠨᠤᠷᠠᠨ ᠤᠴᠠᠷᠠᠬᠤ ᠪᠣᠯᠪᠠ᠃
ᠲᠡᠮᠦᠷ ᠮᠡᠬᠡ ᠪᠡᠷ ᠭᠠᠪᠢᠬᠤ ᠦᠭᠡᠢ᠃ ᠪᠠᠷᠢᠯᠳᠤᠯᠭᠠ ᠮᠠᠭᠤᠲᠠᠢ ᠪᠠᠳᠠᠷᠴᠢ ᠬᠡᠳᠦᠢᠨ ᠠᠵᠢᠭᠯᠠᠵᠤ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠦ᠌ ᠲᠡᠩᠬᠡᠭᠡ ᠰᠠᠷᠯᠤᠭ ᠤ᠋ᠨ ᠪᠤᠬᠠ ᠲᠠᠢ ᠠᠳᠠᠯᠢ ᠲᠤᠯᠠ ᠬᠡᠯᠡᠭᠰᠡᠨ ᠦᠭᠡ ᠪᠠᠷᠳᠠᠮ ᠠᠮᠠ ᠨᠢ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠠᠨᠳᠤᠷᠪᠠ᠃
ᠠᠮᠠᠨ ᠬᠦᠵᠦᠭᠦᠨ ᠳ᠋ᠦ᠍ ᠬᠤᠷᠳᠤᠯᠠᠵᠤ ᠢᠷᠡᠭᠰᠡᠨ ᠳᠠᠭᠠ ᠪᠠᠨ ᠪᠠᠭᠤᠯᠭᠠᠵᠤ ᠠᠪᠤᠭᠠᠳ ᠬᠤᠰᠤᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠳᠡᠷᠭᠡᠳᠡ ᠨᠢ ᠢᠷᠡᠵᠦ 《ᠡᠪᠦᠭᠡᠨ ᠴᠢᠨᠢ ᠠᠮᠠ ᠭᠠᠷᠤᠭᠰᠠᠨ ᠬᠥᠮᠦᠨ᠃ ᠴᠢᠮᠠ ᠡᠴᠡ ᠥᠩᠭᠡᠷᠡᠪᠡᠯ ᠴᠠᠭᠠᠳᠤᠬᠢ ᠮᠠᠭᠤ ᠶ᠋ᠢ ᠴᠢᠨᠢ ᠬᠡᠳᠦ ᠯᠡ ᠪᠣᠯ ᠬᠡᠳᠦ᠃ ᠴᠢ ᠨᠠᠳᠠ ᠪᠠᠭᠤᠵᠤ ᠠᠯᠢ᠂ ᠬᠣᠶᠠᠷ ᠵᠠᠯᠠᠭᠤ ᠮᠣᠷᠢ ᠥᠭᠭᠦᠶᠡ》 ᠭᠡᠵᠦ ᠰᠢᠪᠡᠭᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠮᠡᠢ ᠪᠢᠲᠡᠭᠡᠢ ᠶᠠᠷᠢ᠃ ᠴᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠤ ᠪᠦᠬᠦᠯᠢ ᠬᠤᠰᠢᠭᠤᠨ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠠᠮᠠ ᠭᠠᠷᠤᠭᠰᠠᠨ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠳ᠋ᠤ᠌ ᠠᠮᠠ ᠭᠠᠷᠤᠭᠠ ᠦᠭᠡᠢ᠃ ᠴᠢ ᠪᠢᠳᠡ ᠬᠣᠶᠠᠷ ᠡᠷᠡ ᠬᠥᠮᠦᠨ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠳᠣᠳᠣᠮ ᠢ᠋ᠶ᠋ᠠᠨ ᠦᠵᠡᠨᠡ ᠳᠡ ᠭᠡᠳ ᠲᠡᠮᠦᠷ ᠲᠣᠮᠣ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠪᠡ᠃
ᠪᠠᠳᠠᠷᠴᠢ ᠶ᠋ᠢᠨ ᠬᠣᠷᠣ ᠰᠢᠷᠠ ᠨᠢ ᠲᠤᠢᠯ ᠳ᠋ᠠᠭᠠᠨ ᠬᠦᠷᠴᠦ ᠡᠷᠭᠢᠨ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠡᠪᠦᠭᠡᠨ᠂ ᠡᠨᠡ ᠪᠠᠳᠠᠷᠴᠢ ᠮᠠᠭᠤᠬᠠᠢ ᠠᠮᠢᠲᠠᠨ ᠰᠢᠦ᠃ ᠮᠡᠬᠡ ᠭᠡᠳᠡᠭ ᠨᠢ ᠠᠢᠬᠤᠪᠲᠤᠷ ᠶᠤᠮ ᠭᠡᠳᠡᠭ᠃ ᠶᠠᠮᠠᠷ ᠴᠤ᠌ ᠬᠣᠣᠷᠯᠠᠭᠴᠢᠨ ᠶᠠᠭᠤᠮᠠ ᠬᠢᠵᠦ ᠮᠠᠭᠠᠳ᠃ ᠶᠠᠭᠠᠬᠢᠨᠠ ᠳᠠ ᠭᠡᠵᠦ ᠳᠤᠯᠮᠠ ᠰᠠᠨᠳᠤᠷᠤᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠮᠦᠷ ᠲᠠᠢᠪᠤᠩ ᠪᠥᠭᠡᠳ ᠪᠠᠶᠠᠷᠲᠠᠢ ᠢᠨᠢᠶᠡᠮᠰᠦᠭᠯᠡᠵᠦ 《ᠴᠢ ᠯᠡ ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠬᠠᠷᠠᠭᠳᠠᠵᠤ ᠪᠠᠢᠭᠠᠷᠠᠢ᠂ ᠭᠠᠢᠭᠤᠢ》 ᠭᠡᠯᠡ᠃
ᠪᠠᠳᠠᠷᠴᠢ ᠲᠡᠨᠳᠡ ᠡᠴᠡ ᠬᠠᠨ ᠥᠨᠳᠥᠷ ᠦ᠋ᠨ ᠬᠦᠷᠢᠶᠡᠨ ᠦ᠌ ᠭᠦᠷᠢᠮᠴᠢ ᠬᠠᠷᠢᠶᠠᠯᠴᠢ ᠭᠡᠵᠦ ᠨᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠨᠢᠭᠡ ᠯᠠᠮᠠ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠤᠷᠲᠤ ᠬᠠᠳᠠᠭ ᠪᠠᠷᠢᠵᠤ ᠲᠡᠮᠦᠷ ᠲᠦ᠍ ᠬᠠᠷᠢᠶᠠᠯ ᠬᠢᠵᠦ᠂ ᠥᠪᠡᠷ ᠢ᠋ ᠨᠢ ᠲᠡᠷᠢᠭᠦᠯᠡᠭᠦᠯᠵᠦ ᠥᠭᠬᠦ ᠶ᠋ᠢ ᠭᠤᠶᠤᠭᠠᠳ 《ᠲᠡᠷᠡ ᠨᠣᠬᠠᠢ ᠶ᠋ᠢ ᠭᠠᠵᠠᠷᠳᠠᠭᠤᠯᠵᠤ ᠥᠭᠪᠡᠯ ᠯᠠᠮᠠ ᠭᠤᠸᠠᠢ ᠲᠠᠨ ᠳ᠋ᠤ᠌ ᠵᠠᠯᠠᠭᠤ ᠮᠣᠷᠢ ᠪᠠᠷᠢᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠡᠨᠡ ᠬᠤᠰᠢᠭᠤᠨ ᠤ᠋ ᠠᠯᠪᠠᠲᠤ ᠰᠢᠦ ᠳᠡ ᠭᠡᠳ ᠯᠠᠮᠠ ᠨᠠᠮᠪᠠᠲᠠᠢ ᠵᠠᠯᠪᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠵᠠᠯᠠᠭᠤ ᠮᠣᠷᠢ ᠪᠠᠷᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨᠢᠳᠠᠭ ᠬᠥᠮᠦᠨ ᠦ᠌ ᠨᠢᠭᠤᠷ ᠬᠠᠯᠠᠭᠤᠨ ᠶᠤᠮ ᠳᠠ᠃ ᠬᠠᠷᠢᠨ ᠲᠡᠮᠦᠷ ᠲᠦ᠍ ᠬᠠᠷᠢᠶᠠᠯ ᠬᠢᠵᠦ ᠥᠭᠭᠦᠭᠰᠡᠨ ᠭᠡᠳᠡᠭ ᠢ᠋ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠬᠢᠨ ᠮᠡᠳᠡᠪᠡᠯ ᠨᠠᠮᠠᠢ ᠦᠵᠡᠬᠦ ᠪᠡᠨ ᠪᠣᠯᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠦᠨ ᠢ᠋ ᠪᠢ ᠰᠠᠢᠨ ᠮᠡᠳᠡᠨᠡ ᠭᠡᠳ ᠪᠠᠳᠠᠷᠴᠢ ᠶᠠᠪᠤᠵᠠᠢ᠃
ᠲᠡᠮᠦᠷ ᠪᠣᠯ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠳᠡᠭ ᠢ᠋ ᠯᠠᠮᠠ ᠰᠠᠢᠨ ᠮᠡᠳᠡᠨᠡ᠃ ᠭᠡᠪᠡᠴᠦ ᠳᠣᠯᠣᠭᠠᠨ ᠬᠣᠰᠢᠭᠤ ᠳᠠᠩᠰᠢᠭ ᠤ᠋ᠨ ᠵᠠᠭᠠᠨ᠂ ᠬᠠᠵᠠᠬᠤ ᠡᠴᠡ ᠪᠤᠰᠤᠳ ᠮᠡᠬᠡ ᠬᠢᠳᠡᠭ ᠪᠠᠳᠠᠷᠴᠢ ᠨᠠᠭᠠᠳᠤᠮ ᠤ᠋ᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠨᠡᠷᠡ ᠨᠢ ᠣᠭᠲᠣ ᠭᠠᠷᠤᠭᠠ ᠦᠭᠡᠢ ᠲᠡᠮᠦᠷ ᠢ᠋ ᠯᠠᠪ ᠬᠠᠶᠠᠨᠠ ᠪᠢᠵᠡ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠯᠠ᠃
ᠨᠠᠭᠠᠳᠤᠮᠴᠢᠨ ᠣᠯᠠᠨ ᠤ᠋ ᠪᠦᠬᠦ ᠠᠩᠬᠠᠷᠤᠯ ᠰᠢᠪᠠᠨ ᠵᠣᠭᠰᠣᠭᠰᠠᠨ ᠬᠣᠶᠠᠷ ᠪᠥᠬᠡ ᠶ᠋ᠢᠨ ᠵᠦᠭ ᠰᠢᠯᠵᠢᠵᠦ ᠨᠤᠲᠤᠭ ᠤ᠋ᠨ ᠬᠢᠨᠢ ᠥᠪᠡᠷ ᠦ᠋ᠨ ᠡᠨᠡ ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠᠲᠤ ᠪᠣᠯᠤᠭᠰᠠᠨ ᠲᠡᠮᠦᠷ ᠦ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠨᠢ ᠵᠣᠪᠠᠵᠤ ᠪᠠᠢᠯᠠ᠃ ᠰᠡᠳᠬᠢᠯ ᠨᠢ ᠵᠣᠪᠠᠬᠤ ᠶ᠋ᠢᠨ ᠤᠴᠢᠷ ᠪᠣᠯ ᠪᠠᠳᠠᠷᠴᠢ ᠰᠦᠷᠡᠬᠡᠢ ᠪᠥᠬᠡ ᠭᠡᠳᠡᠭ ᠢ᠋ ᠮᠡᠳᠡᠨᠡ᠃ ᠬᠠᠷᠢᠨ ᠲᠡᠮᠦᠷ ᠰᠠᠢᠨ ᠡᠷᠡ ᠭᠡᠳᠡᠭ ᠢ᠋ ᠮᠡᠳᠡᠪᠡᠴᠦ ᠰᠠᠢᠨ ᠪᠥᠬᠡ ᠭᠡᠳᠡᠭ ᠢ᠋ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠨ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋᠁ ᠭᠡᠳ ᠵᠠᠰᠠᠭᠤᠯ ᠨᠢ ᠲᠡᠮᠦᠷ ᠦ᠋ᠨ ᠴᠣᠯᠠ ᠶ᠋ᠢ ᠳᠠᠭᠤᠳᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠲᠡᠮᠦᠷ ᠡᠪ ᠮᠠᠭᠤᠬᠠᠨ ᠲᠠᠢ ᠰᠢᠪᠡᠨ ᠳᠡᠯᠢᠵᠦ ᠪᠠᠢᠬᠤ ᠵᠠᠭᠤᠷᠠ ᠪᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠵᠣᠭᠰᠣᠨ ᠰᠠᠨᠳᠤᠷᠴᠤ ᠪᠠᠢᠭᠠ ᠳᠤᠯᠮᠠ ᠶ᠋ᠢ ᠬᠠᠷᠠᠭᠠᠳ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠴᠦ᠍ ᠰᠠᠢᠬᠠᠨ ᠡᠷᠡ ᠶᠤᠮ ᠠ᠋᠃ ᠭᠡᠪᠡᠴᠦ ᠲᠡᠷᠡ ᠪᠠᠳᠠᠷᠴᠢ ᠶ᠋ᠢᠨ ᠮᠡᠬᠡ ᠳᠠᠩᠴᠢ ᠬᠡᠴᠡᠭᠦᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠣᠢᠴᠢᠪᠠᠯ ᠴᠦ᠍ ᠡᠨᠡ ᠪᠠᠳᠠᠷᠴᠢ ᠲᠡᠷᠢᠭᠦᠯᠡᠵᠦ᠂ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠭᠤᠬᠠᠢ ᠳᠣᠷᠣᠮᠵᠢᠯᠠᠭᠤᠯᠵᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠬᠣᠰᠢᠭᠤ ᠴᠤ᠌ ᠠᠵᠠ ᠲᠠᠢ ᠯᠠ ᠰᠠᠨ ᠭᠡᠬᠦ ᠵᠡᠷᠭᠡ ᠶᠠᠷᠢᠶᠠ ᠣᠯᠠᠨ ᠤ᠋ ᠳᠣᠲᠣᠷᠠ ᠲᠠᠰᠤᠷᠠᠬᠤ ᠦᠭᠡᠢ ᠳᠡᠮᠵᠢᠵᠦ ᠪᠠᠢᠯᠠ᠃
ᠪᠠᠳᠠᠷᠴᠢ ᠶ᠋ᠢᠨ ᠨᠢᠭᠤᠷ ᠪᠠᠷᠤᠢᠨ᠂ ᠰᠢᠳᠦ ᠨᠢ ᠲᠠᠴᠢᠭᠢᠨᠠᠨ ᠬᠢᠬᠦ ᠮᠡᠬᠡ ᠪᠡᠨ ᠪᠢᠰᠢᠯᠭᠠᠨᠠ᠃ ᠡᠨᠡ ᠬᠥᠮᠦᠨ ᠳ᠋ᠦ᠍ ᠪᠠᠷᠢᠯᠳᠤᠯᠭᠠ ᠶ᠋ᠢᠨ ᠣᠯᠠᠨ ᠠᠷᠭᠠ ᠪᠣᠢ᠃ ᠵᠣᠷᠢᠭ ᠵᠢᠷᠦᠬᠡ ᠮᠠᠭᠤᠲᠠᠢ ᠡᠷᠡ ᠳ᠋ᠦ᠍ ᠠᠷᠰᠯᠠᠨ ᠤ᠋ ᠰᠦᠷ ᠦᠵᠡᠭᠦᠯᠵᠦ ᠮᠣᠬᠣᠭᠣ ᠪᠣᠯᠭᠠᠵᠤ ᠴᠢᠳᠠᠨᠠ᠃ ᠬᠣᠷᠣ ᠰᠢᠷᠠ ᠲᠠᠢ ᠡᠷᠡ ᠶ᠋ᠢ ᠦᠮᠡᠬᠡᠢ ᠦᠭᠡ ᠪᠡᠷ ᠤᠲᠤᠵᠤ ᠪᠠᠢᠭᠠᠳ ᠤᠬᠠᠭᠠᠨ ᠰᠠᠮᠪᠠᠭᠠ ᠶ᠋ᠢ ᠨᠢ ᠪᠤᠰᠠᠨᠢᠭᠤᠯᠵᠤ ᠴᠢᠳᠠᠨᠠ᠃
ᠲᠡᠮᠦᠷ ᠢ᠋ ᠰᠦᠷᠳᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠪᠠᠳᠠᠷᠴᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠡᠨᠡ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠪᠠᠢᠯᠠ᠃ ᠪᠠᠰᠠ ᠬᠣᠷᠣ ᠰᠢᠷᠠ ᠶ᠋ᠢ ᠨᠢ ᠬᠤᠰᠤᠭᠠᠳ ᠠᠭᠤᠵᠢᠮ ᠲᠠᠢᠪᠤᠩ ᠲᠡᠮᠦᠷ ᠦ᠋ᠨ ᠤᠬᠠᠭᠠᠨ ᠰᠠᠮᠪᠠᠭᠠ ᠶ᠋ᠢ ᠰᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢ ᠣᠢᠯᠠᠭᠠᠵᠠᠢ᠃ ᠬᠠᠷᠢᠨ ᠭᠡᠨᠡᠳᠡᠭᠦᠯᠵᠦ ᠪᠠᠢᠭᠠᠳ ᠰᠢᠢᠳᠦᠭᠰᠡᠨ ᠮᠡᠬᠡ ᠬᠢᠬᠦ ᠨᠢ ᠲᠡᠮᠦᠷ ᠢ᠋ ᠤᠨᠠᠭᠠᠬᠤ ᠭᠠᠭᠴᠠ ᠠᠷᠭᠠ ᠭᠡᠵᠦ ᠪᠣᠳᠣᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠯᠠᠮᠠ ᠶ᠋ᠢᠨ ᠬᠠᠷᠢᠶᠠᠯ ᠶᠠᠮᠠᠷ ᠨᠢᠭᠡᠨ ᠲᠡᠮᠳᠡᠭ ᠥᠭᠬᠦ ᠪᠠᠢᠬᠠ ᠭᠡᠵᠦ ᠪᠣᠳᠣᠨ ᠬᠦᠯᠢᠶᠡᠨᠡ᠃
ᠲᠡᠮᠦᠷ ᠨᠢᠭᠡ ᠬᠡᠰᠡᠭ ᠪᠠᠷᠢᠵᠤ ᠠᠪᠬᠤ ᠭᠡᠵᠦ ᠣᠷᠣᠯᠳᠣᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠵᠠᠢᠯᠠᠭᠠᠳ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠭᠠᠨ ᠵᠢᠭᠠᠭᠠᠳ ᠥᠭᠭᠦᠨᠡ᠃ ᠪᠢᠲᠡᠭᠡᠢ ᠶᠠᠭᠠᠷᠠ ᠬᠦᠦ ᠮᠢᠨᠢ ᠭᠡᠵᠦ ᠰᠠᠢᠳ ᠸᠠᠩ ᠤ᠋ᠨ ᠬᠠᠰᠢᠷ ᠪᠤᠭᠤᠷᠤᠯ ᠴᠢᠨᠣᠠ ᠭᠡᠵᠦ ᠳᠣᠯᠣᠭᠠᠨ ᠬᠣᠰᠢᠭᠤ ᠳᠠᠩᠰᠢᠭ ᠲᠤ᠌ ᠨᠡᠷᠡ ᠭᠠᠷᠤᠭᠰᠠᠨ ᠲᠡᠮᠦᠷ ᠦ᠋ᠨ ᠵᠠᠰᠠᠭᠤᠯ ᠡᠪᠦᠭᠡᠨ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠬᠡᠯᠡᠵᠦ ᠪᠠᠢᠯᠠ᠃
ᠭᠣᠣᠯ ᠠᠰᠠᠷ ᠤ᠋ᠨ ᠡᠮᠦᠨᠡ ᠡᠴᠡ ᠪᠣᠰᠤᠭᠰᠠᠨ ᠵᠢᠵᠢᠭᠬᠡᠨ ᠬᠤᠢ ᠡᠷᠭᠢᠯᠳᠦᠭᠰᠡᠭᠡᠷ ᠣᠢᠷᠠᠲᠤᠨ ᠢᠷᠡᠬᠦ ᠶ᠋ᠢ ᠨᠢ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠵᠤ ᠯᠠᠮᠠ ᠶ᠋ᠢᠨ ᠬᠠᠷᠢᠶᠠᠯ ᠤ᠋ᠨ ᠲᠡᠮᠳᠡᠭ ᠭᠡᠵᠦ ᠢᠲᠡᠭᠡᠭᠰᠡᠨ ᠪᠠᠳᠠᠷᠴᠢ ᠬᠤᠢ ᠶ᠋ᠢ ᠢᠷᠡᠮᠡᠭᠴᠡ ᠠᠳᠬᠤᠵᠤ ᠪᠠᠢᠭᠰᠠᠨ ᠬᠡᠰᠡᠭ ᠰᠢᠷᠣᠢ ᠪᠠᠨ ᠲᠡᠮᠦᠷ ᠦ᠋ᠨ ᠨᠢᠳᠦ ᠤᠷᠤᠭᠤ ᠰᠠᠴᠤᠭᠠᠳ ᠰᠢᠲᠦᠨ ᠣᠷᠣᠵᠤ ᠪᠠᠷᠠᠭᠤᠨ ᠬᠥᠯ ᠳ᠋ᠦ᠍ᠨᠢ ᠳᠠᠷᠬᠠᠨ ᠳᠣᠲᠣᠭᠤᠷ ᠳᠡᠭᠡᠭᠡ ᠪᠡᠨ ᠣᠷᠢᠶᠠᠵᠤ ᠭᠡᠳᠡᠷᠭᠦ ᠨᠢ ᠳᠠᠷᠤᠬᠤ ᠭᠡᠵᠦ ᠪᠦᠬᠦ ᠬᠦᠴᠦ ᠪᠡᠨ ᠵᠡᠭᠦᠨ ᠲᠠᠯᠠ ᠳ᠋ᠠᠭᠠᠨ ᠥᠭᠭᠦᠯᠡ᠃
ᠵᠡᠭᠦᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠤᠨᠲᠠᠭ ᠰᠢᠷᠣᠢ ᠶ᠋ᠢᠨ ᠰᠢᠷᠬᠡᠭ ᠣᠷᠣᠭᠰᠠᠨ ᠡᠴᠡ ᠥᠷᠥᠭᠡᠰᠦᠨ ᠨᠢᠳᠦ ᠪᠡᠨ ᠠᠨᠢᠭᠰᠠᠨ ᠲᠡᠮᠦᠷ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠳᠠᠷᠴᠢ ᠶ᠋ᠢᠨ ᠲᠣᠬᠣᠢ ᠤᠷᠤᠭᠤ ᠬᠦᠴᠦᠲᠡᠢ ᠠᠯᠠᠭᠠᠳᠠᠵᠤ᠂ ᠪᠦᠬᠦ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠦᠯᠬᠢᠵᠦ ᠣᠷᠬᠢᠭᠰᠠᠨ ᠳ᠋ᠤ᠌ ᠪᠠᠳᠠᠷᠴᠢ ᠶ᠋ᠢᠨ ᠳᠡᠭᠡᠭᠡ ᠣᠷᠢᠶᠠᠭᠰᠠᠨ ᠬᠥᠯ ᠨᠢ ᠮᠠᠭᠢᠷᠠᠯᠳᠤᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠤᠯᠲᠤᠷᠠᠵᠤ ᠰᠢᠷᠭᠤᠴᠢᠨ ᠤᠷᠤᠭᠰᠢ ᠤᠨᠠᠬᠤ ᠳ᠋ᠠᠭᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠲᠤᠯᠵᠤ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠥᠭᠰᠡ ᠤᠷᠤᠭᠤ ᠨᠢ ᠠᠯᠠᠭᠠᠳᠠᠭᠠᠳ᠂ ᠪᠠᠷᠠᠭᠤᠨ ᠬᠥᠯ ᠢ᠋ ᠨᠢ ᠲᠣᠷᠭᠣ ᠭᠡᠵᠦ ᠡᠪᠦᠭᠡᠨ ᠵᠠᠰᠠᠭᠤᠯᠴᠢ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠬᠤ ᠳ᠋ᠤ᠌ ᠲᠡᠮᠦᠷ ᠪᠦᠭᠦᠳᠡ ᠶ᠋ᠢ ᠶᠣᠰᠣᠴᠢᠯᠠᠨ ᠬᠢᠪᠡᠯ ᠪᠠᠳᠠᠷᠴᠢ ᠶ᠋ᠢᠨ ᠤᠷᠲᠤ ᠪᠡᠶᠡ ᠲᠦᠷᠦᠭᠦᠦ ᠤᠷᠤᠭᠰᠢ ᠪᠠᠨ ᠬᠠᠷᠠᠨ ᠭᠠᠵᠠᠷ ᠲᠡᠪᠡᠷᠢᠵᠦ ᠭᠤᠯᠳᠤᠢᠪᠠ᠃
ᠨᠠᠭᠠᠳᠤᠮᠴᠢᠨ ᠣᠯᠠᠨ ᠬᠠᠰᠬᠢᠷᠤᠯᠳᠤᠨ ᠪᠠᠶᠠᠷᠯᠠᠯᠳᠤᠵᠤ 《ᠪᠠᠷᠳᠠᠮ ᠠᠮᠠᠲᠤ᠂ ᠰᠢᠷᠣᠢ ᠡᠮᠬᠦᠵᠦ ᠪᠠᠢᠨᠠ》᠂ 《ᠪᠤᠯᠢᠭᠠᠴᠢ ᠬᠠᠷᠠ ᠪᠠᠷᠮᠠ》᠂ 《ᠥᠭᠡᠳᠡ ᠦᠭᠡᠢ ᠠᠮᠢᠲᠠᠨ᠃ ᠢᠩᠭᠢᠬᠦ ᠯᠡ ᠶᠣᠰᠣᠲᠠᠢ ᠪᠠᠢᠭᠰᠠᠨ》 ᠭᠡᠯᠴᠡᠪᠡ᠃
ᠪᠠᠳᠠᠷᠴᠢ ᠪᠣᠰᠤᠭᠠᠳ ᠲᠡᠮᠦᠷ ᠲᠦ᠍ ᠪᠠᠭᠤᠯᠲᠠ ᠪᠠᠨ ᠥᠭᠬᠦ ᠳ᠋ᠡᠭᠡᠨ ᠳᠣᠲᠣᠷᠠ ᠪᠠᠨ 《ᠭᠤᠢᠯᠢᠨᠴᠢᠨ ᠳ᠋ᠤ᠌ ᠭᠦᠶᠦᠵᠦ ᠣᠷᠬᠢᠳᠠᠭ ᠪᠠᠢᠵᠠᠢ᠃ ᠬᠠᠷᠠ ᠪᠠᠳᠠᠷᠴᠢᠨ ᠡᠴᠡ ᠪᠣᠯᠵᠤ ᠭᠣᠣᠮᠠᠢ ᠶᠠᠭᠤᠮᠠ ᠬᠢᠯᠡ》 ᠭᠡᠵᠦ ᠰᠢᠳᠦ ᠵᠠᠭᠤᠨ ᠵᠥᠭᠡᠵᠦ ᠪᠠᠢᠯᠠ᠃
ᠡᠨᠡ ᠨᠠᠭᠠᠳᠤᠮ ᠳ᠋ᠤ᠌ ᠲᠡᠮᠦᠷ ᠲᠡᠷᠢᠭᠦᠯᠡᠵᠦ᠂ ᠪᠠᠬᠠ ᠨᠢ ᠬᠠᠨᠤᠭᠰᠠᠨ ᠣᠯᠠᠨ ᠪᠠᠳᠠᠷᠴᠢ ᠶ᠋ᠢ ᠢᠯᠡ ᠳᠠᠯᠳᠠ ᠱᠣᠣᠯᠠᠨ ᠢᠨᠢᠶᠡᠯᠳᠦᠪᠡ᠃
ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠮᠦᠷ ᠰᠠᠢᠳ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠦᠮᠡᠨ ᠦ᠌ ᠬᠠᠢᠷᠠ ᠲᠠᠯᠠᠷᠬᠠᠯ ᠢ᠋ ᠲᠠᠲᠠᠵᠤ ᠬᠦᠨᠳᠦᠲᠡᠢ ᠬᠥᠮᠦᠨ ᠦ᠌ ᠨᠢᠭᠡ ᠪᠣᠯᠵᠠᠢ᠃