ᠲᠤᠩᠭᠠᠯᠠᠭ ᠲᠠᠮᠢᠷ3-22-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1625《ᠠᠭᠤᠯᠠ ᠤᠰᠤᠨ ᠤ᠋ ᠣᠢᠷᠠ ᠨᠢ ᠳᠡᠭᠡᠷᠡ᠂ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠣᠯᠠ ᠨᠢ ᠳᠡᠭᠡᠷᠡ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢᠨ ᠬᠣᠶᠠᠷ
ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠨᠠᠮᠤᠷ ᠤᠶᠠᠩᠭᠠ ᠶ᠋ᠢᠨ ᠳᠠᠭᠤ ᠲᠠᠰᠤᠷᠠᠵᠤ ᠡᠪᠦᠯ ᠦ᠋ᠨ ᠴᠠᠷᠭᠢᠯ ᠰᠡᠷᠢᠭᠦᠨ ᠳᠠᠭᠤ ᠡᠬᠢᠯᠡᠭᠰᠡᠨ ᠦᠶᠡ ᠪᠢᠯᠡ᠃ ᠪᠣᠭᠣᠨᠢ ᠪᠣᠯᠪᠠᠴᠤ ᠴᠡᠯᠡᠭᠡᠷ ᠠᠮᠠᠨ ᠤ᠋ ᠡᠬᠢᠨ ᠳ᠋ᠦ᠍ ᠲᠣᠮᠣ ᠪᠥᠭᠡᠳ ᠲᠡᠨᠢᠭᠦᠨ ᠳᠤᠯᠠᠭᠠᠨ ᠡᠪᠣᠯᠵᠢᠶᠠᠨ ᠳ᠋ᠤ᠌ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠬᠣᠨᠢᠨ ᠤ᠋ ᠬᠠᠰᠢᠶᠠᠨ ᠤ᠋ ᠳᠡᠷᠭᠡᠳᠡ ᠵᠢᠵᠢᠭᠬᠡᠨ ᠪᠣᠷᠣ ᠭᠡᠷ ᠬᠠᠷᠠᠭᠳᠠᠨᠠ᠃ ᠡᠨᠡ ᠪᠣᠯ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠬᠢ ᠶᠤᠮ᠃
ᠶᠠᠭᠠᠬᠢᠭᠠᠳ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠢᠨᠠ ᠡᠴᠡ ᠰᠠᠯᠳᠠᠭ ᠦᠭᠡᠢ ᠡᠨᠡ ᠪᠣᠷᠣ ᠭᠡᠷ ᠡᠨᠳᠡ ᠢᠩᠭᠢᠵᠦ ᠭᠠᠭᠴᠠᠭᠠᠷ ᠪᠠᠢᠳᠠᠭ ᠪᠣᠯᠪᠠ? ᠢᠲᠡᠭᠡᠯᠲᠦ ᠲᠡᠢ ᠡᠪᠳᠡᠷᠡᠵᠦ ᠬᠥᠭᠡᠭᠡᠭᠳᠡᠭᠰᠡᠨ ᠬᠡᠷᠡᠭ ᠤᠤ?ᠦᠭᠡᠢ ᠲᠡᠢᠮᠦ ᠪᠢᠰᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ᠂ ᠨᠢᠮᠠ ᠭᠤᠸᠠᠢ ᠬᠤᠷᠢᠮ ᠬᠢᠬᠦ ᠳ᠋ᠦ᠍ ᠪᠡᠷᠢ ᠬᠠᠶᠠᠭᠠᠨ ᠡᠴᠡ ᠪᠡᠨ ᠮᠣᠷᠳᠠᠭᠤᠯᠬᠤ ᠨᠢᠭᠡ ᠯᠡ ᠲᠤᠰᠠ ᠦᠭᠡᠢ ᠰᠠᠨᠠᠭᠳᠠᠭᠠᠳ ᠪᠠᠢᠨᠠ᠃ ᠬᠣᠶᠠᠷ ᠭᠡᠷ ᠵᠠᠢᠲᠠᠢ ᠪᠣᠯ ᠳᠡᠭᠡᠷᠡ ᠮᠡᠲᠦ᠃ ᠪᠠᠰᠠ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠪᠢᠳᠡ ᠤᠷᠤᠭ ᠲᠥᠷᠥᠯ ᠪᠣᠯᠤᠨᠠ᠃ ᠢᠩᠭᠢᠬᠦᠯᠡᠷ ᠠᠭᠤᠯᠠ ᠤᠰᠤᠨ ᠤ᠋ ᠣᠢᠷᠠ ᠨᠢ ᠳᠡᠭᠡᠷᠡ᠂ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠣᠯᠠ ᠨᠢ ᠳᠡᠭᠡᠷᠡ ᠭᠡᠰᠡᠨ ᠬᠠᠭᠤᠴᠢᠨ ᠦᠭᠡ ᠪᠠᠢᠳᠠᠭ᠃ ᠪᠢ ᠲᠠᠨ ᠳ᠋ᠤ᠌ ᠰᠠᠷᠯᠤᠭ ᠤ᠋ᠨ ᠬᠣᠶᠠᠷ ᠰᠠᠢᠨ ᠦᠨᠢᠶᠡ ᠥᠭᠭᠦᠨᠡ᠃ ᠮᠠᠨ ᠤ᠋ ᠬᠢ ᠡᠴᠡ ᠬᠣᠨᠢ ᠠᠪᠴᠤ ᠬᠠᠷᠢᠭᠤᠯᠪᠠᠯ ᠳᠤᠷᠠᠲᠠᠢ ᠰᠠᠭᠤᠷᠢ ᠪᠠᠨ ᠠᠪ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠰᠡᠨ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠶᠠᠨ ᠡᠴᠡ ᠴᠢᠨᠢ ᠶᠡᠬᠡ ᠯᠡ ᠬᠦᠷᠲᠡᠯᠡ᠃ ᠪᠠᠰᠠ ᠲᠡᠭᠡᠭᠡᠳ ᠬᠡᠦᠬᠡᠨ ᠢ᠋ᠶ᠋ᠡᠨ ᠥᠭᠬᠦ ᠳ᠋ᠦ᠍ ᠢᠨᠵᠢ ᠳ᠋ᠦ᠍ᠨᠢ ᠶᠠᠳᠠᠵᠤ ᠬᠡᠳᠦᠨ ᠲᠣᠯᠣᠭᠠᠢ ᠮᠠᠯ ᠥᠭᠭᠦᠶᠡ ᠭᠡᠬᠦ ᠳ᠋ᠦ᠍ ᠴᠢ ᠠᠪᠬᠤ ᠦᠭᠡᠢ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦᠨ ᠲᠣᠯᠣᠭᠠᠢ ᠮᠠᠯ ᠥᠭᠭᠦᠭᠡᠳ ᠲᠠ ᠬᠣᠶᠠᠷ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠬᠤ ᠶᠤᠮ ᠪᠣᠢ? ᠪᠢ ᠬᠤᠷᠢᠮ ᠢ᠋ ᠪᠦᠬᠦ ᠶᠣᠰᠣ ᠪᠠᠷ ᠨᠢ ᠬᠢᠨᠡ᠃ ᠬᠠᠷᠢᠨ ᠢᠨᠵᠢᠨ ᠳ᠋ᠦ᠍ᠨᠢ ᠥᠨᠥᠴᠢᠨ ᠢᠰᠢᠭᠡ ᠴᠦ᠍ ᠠᠪᠬᠤ ᠦᠭᠡᠢ᠃ ᠪᠢ ᠭᠠᠭᠴᠠ ᠬᠦᠦ ᠪᠡᠨ ᠬᠠᠨᠢ ᠲᠠᠢ ᠪᠣᠯᠭᠠᠵᠤ ᠪᠠᠢᠭᠠ ᠬᠥᠮᠦᠨ᠃ ᠰᠦᠷᠦᠩ ᠢ᠋ ᠪᠢ ᠭᠠᠷᠬᠤ ᠡᠴᠡ ᠨᠢ ᠠᠪᠤᠭᠠᠳ ᠰᠠᠢᠨ ᠮᠡᠳᠡᠨᠡ᠃ ᠮᠢᠨᠦ ᠬᠤᠪᠤᠨ ᠬᠠᠷᠠ ᠳ᠋ᠤ᠌ ᠡᠷᠳᠡᠨᠢ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠢᠨᠦ ᠠᠴᠢ ᠶ᠋ᠢ ᠬᠠᠷᠢᠭᠤᠯᠠᠨᠠ ᠭᠡᠵᠦ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃ ᠬᠠᠷᠢᠨ ᠮᠠᠷᠲᠠᠬᠤ ᠦᠭᠡᠢ ᠭᠡᠵᠦ ᠨᠢᠮᠠ ᠭᠤᠸᠠᠢ ᠬᠡᠯᠡᠭᠰᠡᠨ ᠪᠢᠯᠡ᠃
ᠢᠩᠭᠢᠭᠡᠳ ᠢᠲᠡᠭᠡᠯᠲᠦ ᠶ᠋ᠢᠨ ᠲᠠᠪᠤᠨ ᠵᠠᠭᠤ ᠭᠠᠷᠤᠢ ᠬᠣᠨᠢ ᠶ᠋ᠢ ᠠᠪᠴᠤ ᠥᠪᠡᠷ ᠦ᠋ᠨ ᠬᠣᠷᠢ ᠭᠠᠷᠤᠢ ᠬᠣᠨᠢ᠂ ᠲᠠᠪᠤ ᠵᠢᠷᠭᠤᠭᠠᠨ ᠦᠬᠡᠷ ᠢ᠋ᠶ᠋ᠡᠨ ᠲᠠᠰᠤᠯᠤᠨ ᠨᠡᠭᠦᠵᠦ ᠥᠭᠡᠷᠡ ᠡᠪᠣᠯᠵᠢᠶᠠᠨ ᠳ᠋ᠤ᠌ ᠪᠠᠭᠤᠭᠰᠠᠨ ᠪᠢᠯᠡ᠃
ᠢᠲᠡᠭᠡᠯᠲᠦ ᠶᠠᠭᠠᠬᠢᠭᠠᠳ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠬᠢ ᠶ᠋ᠢ ᠵᠠᠪᠠᠯ ᠬᠣᠯᠠᠳᠤᠭᠤᠯᠤᠨ ᠨᠡᠭᠦᠯᠭᠡᠪᠡ? ᠦᠨᠡᠬᠡᠷ ᠪᠡᠷᠢ ᠬᠣᠯᠠ ᠡᠴᠡ ᠮᠣᠷᠳᠠᠭᠤᠯᠬᠤ ᠨᠢ ᠳᠡᠭᠡᠷᠡ ᠭᠡᠵᠦ ᠪᠣᠳᠣᠭᠠ ᠤᠤ?ᠦᠭᠡᠢ᠃ ᠲᠥᠷᠥᠭᠰᠡᠨ ᠭᠡᠷ᠂ ᠡᠬᠡ ᠡᠴᠢᠭᠡ ᠨᠢ ᠠᠢᠯ ᠪᠠᠢᠭᠠᠳ ᠪᠠᠢᠪᠠᠯ ᠰᠦᠷᠦᠩ ᠶᠠᠭᠤᠮᠠ ᠵᠥᠭᠡᠭᠡᠨᠡ᠃ ᠭᠡᠲᠡᠯᠡ ᠲᠡᠷᠡ ᠵᠥᠭᠡᠭᠡᠭᠰᠡᠨ ᠶᠠᠭᠤᠮᠠ ᠨᠢ ᠬᠠᠷᠠᠬᠤ ᠳ᠋ᠤ᠌ ᠪᠠᠭᠠ ᠪᠣᠯᠪᠠᠴᠤ ᠬᠡᠳᠦᠨ ᠵᠢᠯ ᠢ᠋ ᠨᠡᠢᠯᠡᠭᠦᠯᠦᠨ ᠪᠣᠳᠣᠪᠠᠯ ᠦᠯᠡᠮᠵᠢ ᠶᠡᠬᠡ ᠶᠠᠭᠤᠮᠠ ᠪᠣᠯᠤᠨᠠ ᠭᠡᠵᠦ ᠣᠢᠯᠠᠭᠠᠵᠠᠢ᠃ ᠲᠡᠭᠡᠭᠡᠳ ᠥᠭᠭᠦᠭᠰᠡᠨ ᠴᠦ᠍᠂ ᠠᠪᠤᠭᠰᠠᠨ ᠴᠤ᠌ ᠨᠡᠷᠡ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠰᠢᠭᠤᠳ ᠬᠣᠶᠠᠷ ᠦᠨᠢᠶᠡ ᠥᠭᠭᠦᠭᠡᠳ ᠨᠡᠭᠦᠯᠭᠡᠪᠡᠯ ᠪᠢ ᠥᠭᠭᠦᠭᠰᠡᠨ ᠨᠡᠷᠡ ᠲᠡᠢ᠂ ᠨᠢᠮᠠ ᠠᠪᠤᠭᠰᠠᠨ ᠨᠡᠷᠡ ᠲᠡᠢ ᠰᠠᠯᠤᠨᠠ ᠭᠡᠵᠦ ᠪᠣᠳᠣᠪᠠ᠃ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠳᠤᠯᠵᠢᠨ ᠳ᠋ᠤ᠌ ᠴᠤ᠌ ᠬᠡᠯᠡᠭᠡ ᠦᠭᠡᠢ ᠠᠵᠢ᠃ ᠪᠡᠷᠢ ᠮᠣᠷᠳᠠᠭᠤᠯᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠢᠲᠡᠭᠡᠯᠲᠦ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠵᠤᠵᠠᠭᠠᠨ ᠮᠥᠩᠭᠥᠨ ᠴᠢᠮᠡᠭ᠂ ᠨᠣᠭᠣᠭᠠᠨ ᠨᠠᠨᠵᠢᠨ ᠭᠠᠬᠠᠢ ᠭᠥᠯᠢᠮ ᠲᠡᠢ ᠬᠦᠷᠢᠶᠡ ᠬᠢᠴᠡ ᠶ᠋ᠢᠨ ᠡᠮᠡᠭᠡᠯ᠂ ᠥᠩᠭᠡ ᠪᠦᠷᠢ ᠶ᠋ᠢᠨ ᠳᠥᠷᠪᠡᠨ ᠲᠣᠷᠭᠠᠨ ᠳᠡᠪᠡᠯ᠂ ᠰᠤᠪᠤᠳ᠂ ᠱ᠌ᠢᠷᠦ ᠰᠢᠭᠢᠳᠬᠡᠭᠰᠡᠨ ᠰᠢᠷᠠᠮᠠᠯ ᠲᠣᠯᠣᠭᠠᠢ ᠶ᠋ᠢᠨ ᠬᠡᠷᠡᠭᠯᠡᠯ᠂ ᠪᠠᠰᠠ ᠪᠤᠰᠤ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠥᠭᠭᠦᠭᠡᠳ 《ᠪᠡᠷᠢ ᠶ᠋ᠢᠨ ᠮᠢᠨᠢ ᠬᠡᠷᠡᠭᠯᠡᠯ᠂ ᠶᠠᠪᠤᠭᠰᠠᠨ ᠵᠠᠮ ᠤ᠋ᠨ ᠬᠢᠨᠢ ᠯᠤᠤᠰ ᠪᠠᠶᠠᠷᠯᠠᠭ》 ᠭᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠱ᠌ᠢ᠃ ᠢᠲᠡᠭᠡᠯᠲᠦ ᠮᠢᠨᠢ ᠶᠣᠰᠣ ᠪᠠᠷ ᠪᠣᠯᠪᠠᠯ ᠡᠨᠡ ᠪᠦᠬᠦᠨ ᠢ᠋ ᠴᠢᠨᠢ ᠪᠢ ᠯᠡ ᠪᠡᠯᠡᠳᠬᠡᠬᠦ ᠵᠢᠮᠡ ᠲᠡᠢ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠣᠰᠣ ᠶ᠋ᠢ ᠶᠠᠷᠢᠬᠤ ᠦᠭᠡᠢ᠃ ᠬᠡᠰᠢᠭᠲᠦ ᠭᠤᠸᠠᠢ ᠠᠶᠠᠭᠠ ᠳᠠᠭᠱᠠ ᠶᠠᠭᠤᠮᠠ ᠬᠠᠯᠠᠭᠠᠵᠤ ᠥᠭᠬᠦ ᠦᠭᠡᠢ ᠤᠤ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠩᠬᠤᠤ ᠵᠣᠯᠢᠭ ᠴᠢᠨᠢ ᠮᠠᠷᠲᠠᠵᠤ ᠣᠷᠬᠢᠵᠠᠢ ᠭᠡᠳ ᠬᠡᠰᠢᠭᠲᠦ ᠣᠷᠣ ᠬᠥᠯ ᠦ᠋ᠨ ᠠᠪᠳᠠᠷᠠ ᠬᠣᠶᠠᠷ ᠤ᠋ᠨ ᠵᠠᠪᠰᠠᠷ ᠡᠴᠡ ᠵᠢᠵᠢᠭᠬᠡᠨ ᠪᠣᠷᠪᠢ ᠲᠠᠢ ᠬᠥᠯᠳᠡᠭᠦᠦ ᠠᠷᠢᠬᠢ ᠭᠠᠷᠭᠠᠵᠤ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠲᠠᠯᠪᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠶᠢᠬᠠᠨ ᠬᠡᠦᠬᠡᠳ ᠦ᠋ᠳ ᠪᠠᠢᠭᠰᠠᠨ᠂ ᠣᠳᠣ ᠢᠩᠭᠢᠭᠡᠳ ᠯᠡ ᠭᠡᠷᠯᠡᠬᠦ ᠪᠣᠯᠵᠤ ᠪᠠᠢᠳᠠᠭ᠃ ᠴᠠᠭ ᠴᠤ᠌ ᠮᠥᠨ ᠬᠤᠷᠳᠤᠨ ᠶᠤᠮ ᠳᠠ ᠭᠡᠳ ᠢᠲᠡᠭᠡᠯᠲᠦ ᠥᠪᠡᠷ ᠢ᠋ᠶ᠋ᠡᠨ ᠴᠠᠢ ᠬᠢᠵᠦ ᠤᠤᠭᠤᠪᠠ᠃ ᠢᠲᠡᠭᠡᠯᠲᠦ ᠨᠢᠮᠠ ᠭᠤᠸᠠᠢ ᠬᠣᠶᠠᠷ ᠡᠯᠳᠡᠪ ᠢ᠋ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠬᠡᠰᠢᠭᠲᠦ ᠭᠤᠸᠠᠢ ᠠᠷᠢᠬᠢ ᠬᠠᠯᠠᠭᠠᠵᠤ ᠠᠶᠠᠭᠠᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠬᠢᠨ ᠢ᠋ᠶ᠋ᠡᠨ ᠮᠣᠷᠳᠠᠭᠤᠯᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠭᠡᠳ ᠠᠮᠢᠲᠠᠨ ᠠᠬᠠ ᠳᠡᠭᠦᠦ ᠠᠪᠴᠢᠷᠠᠵᠤ ᠥᠭᠬᠦ ᠯᠡ ᠶᠤᠮ᠃ ᠡᠨᠡ ᠵᠥᠨᠥᠭ ᠡᠪᠦᠭᠡᠨ ᠨᠢ ᠣᠤᠭᠤᠴᠢᠬᠤ ᠭᠡᠳ ᠪᠣᠯᠳᠠᠭ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠢᠷᠢ ᠶᠠᠭᠤᠮᠠ ᠲᠠᠢ ᠪᠣᠯᠤᠭᠰᠠᠨ ᠪᠣᠢ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠭ ᠨᠢ ᠣᠪᠣᠭᠠ ᠯᠠ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠷᠭᠠᠰᠢ ᠭᠠᠯᠰᠠᠩ ᠢ᠋ᠶ᠋ᠠᠷ ᠨᠢᠭᠡ ᠬᠤᠷᠠᠭᠠᠨ ᠯᠦᠦ ᠬᠠᠷᠠ ᠠᠷᠢᠬᠢ ᠶᠠᠪᠤᠭᠤᠯᠤᠨᠠ᠃ ᠤᠭᠤᠴᠠ ᠴᠤ᠌ ᠬᠠᠷᠠ ᠬᠠᠯᠵᠠᠨ ᠢ᠋ᠶ᠋ᠠᠨ ᠤᠨᠠᠭᠠᠭᠠᠳ ᠠᠪᠤᠭᠰᠠᠨ ᠭᠡᠬᠦ ᠰᠢᠭ ᠪᠢᠯᠡ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠭᠴᠠ ᠥᠬᠢᠨ ᠳ᠋ᠡᠭᠡᠨ ᠶᠠᠭᠤ ᠪᠠᠨ ᠬᠠᠷᠠᠮᠨᠠᠬᠤ ᠪᠣᠢ?
ᠨᠡᠯᠢᠶᠡᠳ ᠬᠠᠯᠠᠭᠰᠠᠨ ᠢᠲᠡᠭᠡᠯᠲᠦ ᠮᠣᠷᠳᠠᠬᠤ ᠳ᠋ᠠᠭᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠪᠤ ᠬᠣᠨᠣᠭᠰᠠᠨ ᠤ᠋ ᠳᠠᠷᠠᠭᠠᠬᠢ ᠥᠷᠯᠥᠭᠡ ᠪᠡᠷᠢ ᠮᠣᠷᠳᠠᠭᠤᠯᠤᠨᠠ ᠰᠢᠦ ᠳᠡ᠃ ᠶᠠᠭᠤᠮᠠ ᠳᠤᠲᠠᠪᠠᠯ ᠨᠡᠷᠡᠯᠬᠡᠯ ᠦᠭᠡᠢ ᠣᠴᠢᠵᠤ ᠠᠪᠤᠭᠠᠷᠠᠢ ᠭᠡᠳ ᠶᠠᠪᠤᠵᠠᠢ᠃
ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠶ᠋ᠢᠨ ᠬᠤᠷᠢᠮ ᠪᠣᠯᠤᠨᠠ ᠭᠡᠳᠡᠭ ᠨᠢ ᠪᠠᠳᠠᠷᠴᠢ ᠶ᠋ᠢᠨ ᠬᠢ ᠡᠴᠡ ᠪᠤᠰᠤᠳ ᠢ᠋ ᠪᠠᠶᠠᠷᠯᠠᠭᠤᠯᠵᠤ ᠪᠠᠢᠯᠠ᠃ ᠨᠢᠭᠡᠨᠲᠡ ᠡᠨᠡ ᠶᠠᠪᠤᠳᠠᠯ ᠳ᠋ᠤ᠌ ᠰᠠᠭᠠᠳ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠭᠰᠡᠨ ᠳᠤᠯᠵᠢᠨ ᠴᠤ᠌ ᠭᠠᠭᠴᠠ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠢᠮ ᠳ᠋ᠤ᠌ ᠡᠳᠦᠷ ᠰᠥᠨᠢ ᠦᠭᠡᠢ ᠪᠡᠯᠡᠳᠬᠡᠨᠡ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠᠨ ᠳ᠋ᠤ᠌ ᠥᠴᠦᠬᠡᠨ ᠴᠦ᠍ ᠬᠠᠷᠠ ᠨᠣᠣᠰᠣ ᠣᠷᠣᠭᠠ ᠦᠭᠡᠢ ᠴᠠᠭᠠᠨ ᠢᠰᠡᠭᠡᠢ ᠪᠦᠷᠢᠶᠡᠰᠦ᠂ ᠰᠠᠷᠯᠤᠭ ᠤ᠋ᠨ ᠰᠡᠪᠡᠭ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠠᠷᠠ ᠬᠣᠰᠢᠯᠠᠩ ᠲᠠᠢ ᠲᠠᠪᠤᠨ ᠬᠠᠨᠠ ᠲᠠᠢ ᠴᠣ ᠰᠢᠨᠡ ᠴᠠᠭᠠᠨ ᠭᠡᠷ ᠪᠣᠰᠤᠯᠠ᠃ ᠡᠨᠡ ᠭᠡᠷ ᠲᠦ᠍ ᠴᠢᠭᠲᠠᠭᠠ ᠡᠴᠡ ᠨᠢ ᠤᠶᠠᠭᠰᠠᠨ ᠬᠠᠳᠠᠭ ᠡᠴᠡ ᠪᠤᠰᠤᠳ ᠨᠢ ᠴᠥᠮ ᠰᠢᠨᠡ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠭᠡᠷ ᠢ᠋ ᠮᠥᠨ ᠲᠠᠭᠠᠷᠠᠭᠤᠯᠵᠤ ᠴᠢᠳᠠᠵᠠᠢ ᠭᠡᠵᠦ ᠪᠠᠷᠢᠵᠤ ᠪᠠᠢᠭᠰᠠᠨ ᠨᠢᠭᠡ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠭᠠᠭᠴᠠ ᠬᠦᠦ ᠳ᠋ᠡᠭᠡᠨ ᠪᠠᠷᠢᠵᠤ ᠪᠠᠢᠭᠠ ᠭᠡᠷ ᠰᠢᠦ ᠳᠡ ᠭᠡᠵᠦ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠬᠠᠷᠢᠭᠤᠯᠵᠠᠢ᠃
ᠪᠡᠷᠢ ᠮᠣᠷᠳᠠᠭᠤᠯᠬᠤ ᠶ᠋ᠢᠨ ᠤᠷᠢᠳ ᠣᠷᠣᠢ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠬᠠᠩᠬᠠᠷ ᠪᠣᠷᠣ ᠮᠣᠷᠢ ᠬᠥᠲᠥᠯᠵᠦ᠂ ᠨᠠᠷᠢᠬᠠᠨ ᠬᠦᠷᠡᠩ ᠮᠣᠷᠢ ᠤᠨᠤᠭᠰᠠᠨ ᠲᠡᠮᠦᠷ ᠢᠷᠡᠯᠡ᠃ ᠲᠡᠮᠦᠷ ᠢ᠋ ᠬᠣᠩᠭᠣᠷ ᠪᠡᠶᠡ ᠪᠡᠷ ᠣᠴᠢᠵᠤ ᠤᠷᠢᠭᠰᠠᠨ ᠢ᠋ᠶ᠋ᠠᠷ ᠬᠤᠷᠢᠮ ᠳ᠋ᠤ᠌ ᠣᠷᠣᠯᠴᠠᠬᠤ ᠭᠡᠵᠦ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ ᠪᠥᠭᠡᠳ ᠪᠠᠰᠠ ᠰᠦᠷᠦᠩ ᠲᠡᠢ ᠵᠢᠯ ᠲᠠᠭᠠᠷᠠᠭᠰᠠᠨ ᠪᠣᠯᠬᠣᠷ ᠳᠡᠭᠦᠷᠴᠦ ᠢᠷᠡᠬᠦ ᠠᠯᠪᠠᠨ ᠳ᠋ᠤ᠌ ᠣᠨᠣᠭᠳᠠᠵᠠᠢ᠃
ᠳᠤᠯᠮᠠ ᠴᠤ᠌ ᠤᠷᠢᠭᠳᠠᠭᠰᠠᠨ᠃ ᠭᠡᠪᠡᠴᠦ 《ᠪᠢ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ ᠬᠠᠷᠠᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ》 ᠭᠡᠳ ᠶᠠᠪᠤᠭᠠ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠦᠭᠡᠢ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍᠂ 《ᠴᠢ ᠪᠣᠯ ᠥᠭᠡᠷᠡ ᠬᠡᠷᠡᠭ᠃ ᠬᠣᠩᠭᠣᠷ ᠢ᠋ ᠪᠡᠨ ᠪᠣᠳᠣᠭᠠᠳ ᠣᠴᠢ᠃ ᠬᠣᠩᠭᠣᠷ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠭᠠ ᠦᠭᠡᠢ᠂ ᠴᠢ ᠪᠠᠳᠠᠷᠴᠢ ᠶ᠋ᠢᠨ ᠭᠠᠷ ᠲᠤ᠌ ᠳᠠᠭᠢᠵᠤ ᠣᠷᠣᠭᠰᠠᠨ ᠪᠣᠯ ᠪᠢ ᠡᠳᠦᠢ ᠳ᠋ᠦ᠍ ᠢᠩᠭᠢᠵᠦ ᠵᠢᠷᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠰᠢᠦ᠃ ᠮᠢᠨᠦ ᠡᠪᠦᠭᠡᠨ ᠣᠴᠢ》 ᠭᠡᠵᠦ ᠳᠤᠯᠮᠠ ᠬᠡᠯᠡᠵᠡᠢ᠃
ᠬᠠᠷᠢᠨ ᠤᠷᠢᠭᠳᠠᠭᠰᠠᠨ ᠡᠷᠬᠢᠮ ᠵᠣᠴᠢᠳ ᠡᠴᠡ ᠨᠢᠭᠡ ᠬᠥᠮᠦᠨ ᠢᠷᠡᠵᠦ ᠴᠢᠳᠠᠭᠠ ᠦᠭᠡᠢ ᠪᠠᠢᠭᠰᠠᠨ ᠨᠢ ᠬᠦᠷᠢᠶᠡ ᠤᠷᠤᠭᠤ ᠠᠯᠪᠠᠨ ᠤ᠋ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠭᠰᠠᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠨ ᠦ᠌ ᠲᠦᠰᠢᠮᠡᠯ ᠡᠷᠳᠡᠨᠢ ᠪᠠᠢᠯᠠ᠃
ᠮᠠᠷᠭᠠᠰᠢ ᠪᠡᠷᠢ ᠮᠣᠷᠳᠠᠭᠤᠯᠬᠤ ᠪᠣᠯᠬᠤ ᠳ᠋ᠤ᠌ ᠥᠬᠢᠨ ᠦ᠌ ᠲᠠᠯᠠ ᠶ᠋ᠢᠨ ᠪᠡᠷᠭᠡᠨ ᠢᠷᠡᠵᠦ ᠨᠢᠮᠠ ᠶ᠋ᠢᠨ ᠳ᠋ᠦ᠍ ᠬᠣᠨᠣᠪᠠ᠃ 《ᠬᠦᠦ ᠮᠢᠨᠢ ᠡᠷᠡ ᠳ᠋ᠦ᠍ ᠭᠠᠷᠤᠨᠠ ᠭᠡᠳᠡᠭ ᠡᠮᠡ ᠬᠥᠮᠦᠨ ᠦ᠌ ᠵᠠᠶᠠᠭᠠ᠃ ᠭᠤᠨᠢᠵᠤ ᠭᠤᠲᠤᠷᠠᠵᠤ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠲᠡᠷᠡ ᠡᠮᠡᠭᠲᠡᠢ ᠰᠦᠷᠦᠩ ᠢ᠋ ᠰᠤᠷᠭᠠᠨᠠ᠃
ᠰᠦᠷᠦᠩ ᠠᠯᠪᠠ ᠪᠠᠷ ᠪᠣᠭᠲᠣᠯᠠᠭᠳᠠᠵᠤ ᠪᠠᠢᠭᠠ ᠪᠢᠰᠢ᠃ ᠬᠣᠷᠸᠠ ᠳᠡᠭᠡᠷᠡ ᠭᠠᠭᠴᠠ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠳ᠋ᠡᠭᠡᠨ ᠣᠴᠢᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠨ᠃ ᠬᠣᠩᠭᠣᠷ ᠢ᠋ ᠪᠠᠶᠠᠨ ᠲᠠᠷᠭᠤᠨ ᠬᠥᠮᠦᠨ ᠦ᠌ ᠭᠠᠭᠴᠠ ᠬᠦᠦ ᠭᠡᠵᠦ ᠰᠦᠷᠦᠩ ᠰᠡᠳᠬᠢᠯ ᠲᠡᠢ ᠪᠣᠯᠤᠭᠠ ᠦᠭᠡᠢ᠂ ᠲᠡᠭᠦᠨ ᠢ᠋ ᠮᠣᠳᠣ ᠪᠠᠷᠢᠭᠰᠠᠨ ᠭᠤᠢᠯᠢᠨᠴᠢᠨ ᠪᠠᠢᠭᠰᠠᠨ ᠴᠤ᠌ ᠲᠡᠭᠦᠨ ᠲᠡᠢ ᠰᠠᠭᠤᠬᠤ ᠨᠢ ᠰᠦᠷᠦᠩ ᠳ᠋ᠦ᠍ ᠳᠡᠭᠡᠳᠦ ᠶ᠋ᠢᠨ ᠵᠢᠷᠭᠠᠯ ᠪᠠᠢᠭᠰᠠᠨ᠃ ᠡᠨᠡ ᠤᠴᠢᠷ ᠡᠴᠡ ᠰᠦᠷᠦᠩ ᠦ᠋ᠨ ᠰᠡᠳᠬᠢᠯ ᠪᠠᠶᠠᠷᠯᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠲᠥᠷᠥᠵᠦ ᠥᠰᠦᠭᠰᠡᠨ ᠭᠡᠷ ᠡᠴᠡ ᠬᠣᠯᠠᠳᠴᠤ ᠠᠢᠯ ᠳ᠋ᠤ᠌ ᠡᠭᠦᠷᠢᠳᠡ ᠣᠴᠢᠨᠠ᠃ ᠡᠴᠢᠭᠡ ᠡᠬᠡ ᠡᠴᠡ ᠪᠡᠨ ᠰᠠᠯᠤᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠨᠢᠭᠡ ᠯᠡ ᠬᠠᠴᠢᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦᠢ ᠰᠡᠳᠬᠢᠯ ᠲᠡᠢ ᠪᠣᠯᠪᠠᠴᠤ ᠭᠡᠷ ᠡᠴᠡ ᠪᠡᠨ ᠶᠠᠪᠤᠬᠤ ᠳ᠋ᠤ᠌ ᠤᠬᠢᠯᠠᠳᠠᠭ ᠶᠤᠮ ᠭᠡᠳᠡᠭ ᠰᠢᠦ ᠭᠡᠵᠦ ᠬᠡᠰᠢᠭᠲᠦ ᠭᠤᠸᠠᠢ ᠤᠬᠢᠯᠠᠨ ᠪᠠᠢᠵᠤ ᠥᠬᠢᠨ ᠳ᠋ᠡᠭᠡᠨ ᠬᠡᠯᠡᠨᠡ᠃
ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠪᠣᠷᠣ ᠭᠡᠷ ᠲᠦ᠍ ᠬᠡᠳᠦᠢᠪᠡᠷ ᠰᠠᠯᠬᠤ ᠶ᠋ᠢᠨ ᠭᠤᠨᠢᠭᠲᠤ ᠠᠭᠠᠷ ᠪᠠᠢᠭᠰᠠᠨ ᠨᠢ ᠦᠨᠡᠨ ᠠᠪᠠᠴᠤ ᠪᠦᠬᠦᠯᠢ ᠳ᠋ᠡᠭᠡᠨ ᠪᠠᠶᠠᠷ ᠬᠥᠷ᠂ ᠬᠥᠯ ᠦᠢᠮᠡᠭᠡᠨ ᠪᠣᠯᠵᠤ ᠪᠠᠢᠵᠠᠢ᠃
ᠥᠷᠯᠥᠭᠡᠨ ᠦ᠌ ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠢᠲᠡᠭᠡᠯᠲᠦ ᠶ᠋ᠢᠨ ᠭᠠᠳᠠᠨᠠ ᠡᠴᠡ ᠪᠡᠷᠢ ᠮᠣᠷᠳᠠᠭᠤᠯᠬᠤ ᠬᠥᠮᠦᠰ ᠬᠥᠳᠡᠯᠬᠦ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠷ ᠢᠷᠡᠭᠰᠡᠨ ᠪᠣᠷᠣ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠬᠣᠩᠭᠣᠷ ᠲᠤ᠌ ᠥᠭᠴᠦ 《ᠠᠬᠠ ᠨᠢ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠣᠳᠣ ᠥᠭᠴᠦ ᠤᠷᠭᠢᠶᠠ ᠤᠨᠤᠭᠠᠳ ᠶᠠᠪᠤ᠂ ᠨᠠᠭᠠᠳᠤᠬᠢ ᠴᠢᠨᠢ ᠵᠢᠷᠣᠭᠠ ᠴᠤ᠌᠂ ᠬᠤᠷᠳᠤᠨ ᠴᠤ᠌ ᠮᠣᠷᠢ ᠪᠢᠰᠢ᠃ ᠭᠡᠬᠦ ᠳ᠋ᠡᠭᠡᠨ ᠡᠷᠡ ᠬᠥᠮᠦᠨ ᠢ᠋ ᠶᠠᠪᠠᠭᠠᠯᠠᠯ ᠦᠭᠡᠢ᠂ ᠵᠣᠷᠢᠭᠰᠠᠨ ᠭᠠᠵᠠᠷ ᠲᠤ᠌ ᠨᠢ ᠬᠦᠷᠭᠡᠵᠦ ᠴᠢᠳᠠᠨᠠ》 ᠭᠡᠵᠦ ᠬᠡᠯᠡᠪᠡ᠃
ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠵᠤ ᠪᠠᠢᠭᠰᠠᠨ ᠢᠲᠡᠭᠡᠯᠲᠦ ᠦᠯᠡᠮᠵᠢ ᠪᠠᠶᠠᠷᠯᠠᠨ 《ᠡᠭᠦᠨ ᠡᠴᠡ ᠢᠯᠡᠭᠦᠦ ᠪᠡᠯᠡᠭ ᠲᠡᠢ ᠶᠠᠭᠤᠮᠠ ᠭᠡᠵᠦ ᠶᠠᠭᠤ ᠪᠠᠢᠬᠤ ᠪᠣᠢ᠃ ᠡᠷᠡ ᠬᠥᠮᠦᠨ ᠳ᠋ᠦ᠍ ᠮᠣᠷᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠢᠮᠦ ᠡᠷᠡ ᠶ᠋ᠢᠨ ᠭᠠᠷ ᠡᠴᠡ ᠰᠢᠦ᠃ ᠠᠯᠢ ᠪᠣᠢ᠃ ᠭᠠᠯᠰᠠᠩ ᠴᠢ ᠬᠦᠦ ᠶ᠋ᠢᠨ ᠡᠮᠡᠭᠡᠯ ᠢ᠋ ᠲᠣᠬᠣᠵᠤ ᠣᠷᠭᠢ》 ᠭᠡᠵᠡᠢ᠃
ᠡᠷᠡ ᠬᠥᠮᠦᠨ ᠦ᠌ ᠨᠢᠳᠦ ᠶ᠋ᠢ ᠪᠤᠯᠢᠶᠠᠭᠰᠠᠨ ᠡᠨᠡ ᠬᠠᠩᠬᠠᠷ ᠪᠣᠷᠣ ᠮᠣᠷᠢ ᠶᠣᠰᠣᠲᠠᠢ ᠯᠠ ᠠᠷᠭᠤᠮᠠᠭ ᠬᠦᠯᠦᠭ ᠪᠠᠢᠵᠤ ᠪᠢᠯᠡ᠃ ᠬᠣᠵᠢᠮ ᠡᠨᠡ ᠮᠣᠷᠢ ᠬᠣᠩᠭᠣᠷ ᠢ᠋ ᠣᠯᠠᠨ ᠤᠳᠠᠭᠠ ᠠᠪᠤᠷᠠᠵᠤ ᠪᠠᠶᠠᠷᠯᠠᠭᠤᠯᠤᠭᠰᠠᠨ᠃ ᠪᠠᠰᠠ ᠬᠣᠩᠭᠣᠷ ᠲᠤ᠌ ᠬᠦᠨᠳᠦ ᠪᠠᠯᠠᠭ ᠲᠠᠷᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌ ᠨᠢᠭᠡ ᠮᠣᠷᠢᠨ ᠤ᠋ ᠲᠤᠬᠠᠢ ᠤᠷᠢᠲᠠᠵᠤ ᠬᠡᠨ ᠳᠠᠭᠠᠬᠤ ᠪᠢᠯᠡ᠃
ᠲᠡᠮᠦᠷ᠂ ᠬᠣᠩᠭᠣᠷ ᠬᠣᠶᠠᠷ ᠠᠷᠪᠠᠭᠠᠳ ᠮᠣᠷᠢᠲᠠᠢ ᠬᠥᠮᠦᠨ ᠦ᠌ ᠬᠠᠮᠲᠤ ᠨᠢᠮᠠ ᠶ᠋ᠢᠨ ᠡᠪᠣᠯᠵᠢᠶᠠᠨ ᠤ᠋ ᠵᠦᠭ ᠬᠥᠳᠡᠯᠪᠡ᠃ ᠲᠡᠳᠡᠨ ᠦ᠌ ᠬᠠᠮᠲᠤ ᠭᠠᠭᠴᠠ ᠡᠬᠡᠨᠡᠷ ᠬᠥᠮᠦᠨ ᠶᠠᠪᠤᠭᠰᠠᠨ ᠨᠢ ᠬᠦᠦ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠪᠡᠷᠭᠡᠨ ᠪᠠᠢᠯᠠ᠃
ᠬᠤᠷᠠᠭᠠᠨ ᠳᠣᠲᠣᠷ ᠲᠠᠢ ᠬᠠᠷᠠ ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠳᠡᠭᠡᠷᠡ ᠨᠣᠭᠣᠭᠠᠨ ᠳᠤᠷᠳᠤᠩ ᠪᠦᠰᠡ ᠣᠷᠢᠶᠠᠵᠤ ᠬᠡᠲᠡ ᠬᠢᠲᠤᠭᠠ ᠵᠡᠭᠦᠵᠦ ᠫᠤᠤ ᠡᠭᠦᠷᠦᠭᠰᠡᠨ ᠬᠣᠩᠭᠣᠷ ᠤ᠋ᠨ ᠴᠢᠷᠠᠢ ᠦᠯᠦ ᠮᠡᠳᠡᠭ ᠤᠯᠠᠢᠪᠠᠴᠤ ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠᠬᠢ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠶᠠᠷ ᠨᠢ ᠬᠡᠨ ᠪᠦᠬᠦᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠠᠵᠢ᠃
ᠡᠳᠡᠨ ᠦ᠌ ᠬᠠᠮᠲᠤ ᠶᠠᠪᠤᠭᠠ ᠬᠢᠵᠢᠶᠡᠯ ᠡᠷᠡ ᠣᠴᠢᠭᠠᠳ ᠶᠠᠭᠤ ᠬᠡᠯᠡᠬᠦ᠂ ᠶᠠᠭᠠᠬᠢᠵᠤ ᠪᠠᠢᠬᠤ ᠶ᠋ᠢ ᠬᠣᠩᠭᠣᠷ ᠲᠤ᠌ ᠳᠠᠬᠢᠨ ᠳᠠᠬᠢᠨ ᠶᠠᠷᠢᠵᠤ ᠥᠭᠴᠦ ᠪᠠᠢᠯᠠ᠃
ᠭᠡᠷ ᠦ᠋ᠨ ᠭᠠᠳᠠᠨᠠ ᠣᠴᠢᠬᠤ ᠳ᠋ᠤ᠌ ᠪᠠᠭᠠᠨᠠ ᠪᠠᠷᠢᠭᠰᠠᠨ ᠬᠥᠮᠦᠨ ᠢᠷᠡᠵᠦ 《ᠤᠷᠢᠭᠰᠠᠨ ᠵᠣᠴᠢᠨ ᠪᠠᠢᠬᠤ ᠦᠭᠡᠢ ᠰᠠᠨ᠃ ᠬᠤᠷᠠᠨ ᠢᠷᠡᠬᠦ ᠨᠢ ᠶᠠᠭᠤ ᠪᠣᠢ》 ᠭᠡᠳ ᠴᠣᠬᠢᠬᠤ ᠭᠡᠵᠦ ᠪᠠᠢᠭᠠ ᠳᠦᠷᠰᠦ ᠦᠵᠡᠭᠦᠯᠦᠨ ᠬᠥᠭᠡᠭᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠢᠵᠤ ᠪᠢᠳᠡᠨ ᠢ᠋ ᠳᠠᠭᠤᠳᠠᠭᠠ ᠦᠭᠡᠢ ᠴᠦ᠍᠂ ᠬᠤᠷᠠᠨ ᠢᠷᠡᠬᠦ ᠶ᠋ᠢᠨ ᠤᠴᠢᠷ ᠪᠣᠢ᠃ ᠤᠭᠲᠤᠵᠤ ᠠᠪᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠥᠭᠡᠭᠡᠬᠦ ᠶ᠋ᠢᠨ ᠤᠴᠢᠷ ᠶᠠᠭᠤᠨ ᠪᠣᠢ? ᠭᠡᠵᠦ ᠬᠠᠮᠲᠤ ᠢᠷᠡᠭᠰᠡᠨ ᠬᠢᠵᠢᠶᠡᠯ ᠡᠷᠡ ᠬᠠᠷᠢᠭᠤᠯᠤᠭᠠᠳ ᠪᠦᠬᠦ ᠬᠥᠮᠦᠰ ᠪᠠᠭᠤᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠤᠶᠠᠯᠠᠪᠠ᠃
ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠭᠣᠶᠣᠯ ᠢ᠋ᠶ᠋ᠠᠨ ᠡᠮᠦᠰᠴᠦ ᠨᠢᠭᠤᠷ ᠤᠷᠤᠭᠤ ᠪᠠᠨ ᠠᠯᠴᠢᠭᠤᠷ ᠤᠨᠵᠢᠭᠤᠯᠤᠭᠰᠠᠨ ᠰᠦᠷᠦᠩ ᠵᠡᠭᠦᠨ ᠣᠷᠣᠨ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠯᠠ᠃
ᠬᠣᠩᠭᠣᠷ ᠣᠷᠣᠵᠤ ᠪᠤᠷᠬᠠᠨ ᠳ᠋ᠤ᠌ ᠬᠠᠳᠠᠭ ᠲᠠᠯᠪᠢᠭᠠᠳ ᠰᠠᠭᠤᠬᠤ ᠳ᠋ᠤᠨᠢ ᠠᠶᠠᠭᠠ ᠳᠦᠭᠦᠷᠡᠩ ᠴᠠᠢ ᠬᠢᠵᠦ ᠥᠭᠬᠦ ᠳ᠋ᠦ᠍ ᠠᠮᠰᠠᠨ ᠲᠠᠯᠪᠢᠯᠠ᠃ ᠱᠠᠭᠠ ᠨᠢ ᠬᠥᠨᠳᠡᠭᠳᠡᠭᠰᠡᠨ ᠱᠠᠭᠠᠨᠲᠤ ᠥᠭᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠮᠤᠯᠲᠤᠯᠵᠤ ᠣᠷᠬᠢᠪᠠ᠃
ᠰᠦᠷᠦᠩ ᠨᠢᠭᠤᠷ ᠤᠷᠤᠭᠤ ᠨᠢ ᠤᠨᠵᠢᠭᠤᠯᠤᠭᠰᠠᠨ ᠨᠢᠮᠭᠡᠨ ᠳᠠᠪᠤᠤ ᠶ᠋ᠢᠨ ᠴᠠᠭᠠᠨᠠ ᠡᠴᠡ ᠴᠢᠷᠠᠢ ᠨᠢ ᠮᠢᠠᠴᠢ᠌ᠵᠤ ᠤᠯᠠᠢᠨ᠂ ᠬᠢᠵᠢᠶᠡᠯ ᠡᠷᠡ ᠶ᠋ᠢᠨ ᠵᠢᠭᠠᠪᠤᠷᠢ ᠶᠣᠰᠣ ᠪᠦᠬᠦᠨ ᠢ᠋ ᠰᠠᠨᠳᠤᠷᠤᠨ ᠭᠦᠢᠴᠡᠳᠬᠡᠵᠦ ᠪᠠᠢᠭᠠ ᠬᠣᠩᠭᠣᠷ ᠢ᠋ ᠬᠠᠷᠠᠨ ᠢᠨᠢᠶᠡᠳᠦ ᠨᠢ ᠬᠦᠷᠴᠦ ᠲᠡᠭᠦᠨ ᠢ᠋ᠶ᠋ᠡᠨ ᠪᠠᠷᠢᠬᠤ ᠭᠡᠵᠦ ᠭᠤᠶᠠ ᠪᠠᠨ ᠰᠠᠮ ᠪᠠᠵᠠᠯᠠᠨ ᠬᠡᠯᠡᠨ ᠦ᠌ ᠪᠡᠨ ᠦᠵᠦᠭᠦᠷ ᠢ᠋ ᠬᠠᠵᠠᠵᠤ ᠪᠠᠢᠯᠠ᠃ ᠢᠩᠭᠢᠭᠡᠳ ᠨᠠᠢᠷ ᠡᠬᠢᠯᠡᠵᠦ ᠨᠡᠷᠡᠮᠡᠯ ᠠᠷᠢᠬᠢ᠂ ᠬᠠᠷᠠ ᠠᠷᠢᠬᠢ ᠲᠠᠢ ᠬᠣᠯᠢᠭᠰᠠᠨ ᠬᠥᠮᠦᠰ ᠦ᠋ᠨ ᠴᠢᠷᠠᠢ ᠤᠳᠠᠯ ᠦᠭᠡᠢ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠤᠯᠵᠠᠭᠠᠨ ᠵᠠᠷᠢᠮ ᠤ᠋ᠨ ᠬᠢᠨᠢ ᠬᠡᠯᠡ ᠡᠭᠡᠳᠡᠷᠡᠭᠡᠳ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠬᠤ ᠬᠥᠮᠦᠨ ᠢ᠋ᠶ᠋ᠡᠨ ᠠᠪᠤᠭᠠᠳ ᠪᠤᠴᠠᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠪᠤᠴᠠᠶᠠ ᠭᠡᠵᠦ ᠲᠣᠭᠲᠠᠭᠠᠭᠰᠠᠨ ᠴᠠᠭ ᠪᠣᠯᠬᠤ ᠳ᠋ᠤ᠌ ᠬᠢᠵᠢᠶᠡᠯ ᠡᠷᠡ ᠪᠣᠰᠴᠤ ᠬᠡᠯᠡᠪᠡ᠃
ᠬᠥᠮᠦᠰ ᠭᠠᠷᠴᠤ ᠮᠣᠷᠢᠳ ᠢ᠋ᠶ᠋ᠠᠨ ᠤᠶᠠᠭᠠᠨ ᠡᠴᠡ ᠲᠠᠢᠯᠵᠤ ᠠᠪᠤᠯᠠ᠃ ᠬᠣᠩᠭᠣᠷ ᠴᠤ᠌ ᠭᠡᠷ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠫᠤᠤ ᠪᠠᠨ ᠠᠪᠴᠤ ᠡᠭᠦᠷᠦᠭᠡᠳ ᠪᠣᠷᠣ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠪᠠ᠃
ᠲᠡᠮᠦᠷ ᠡᠮᠡᠭᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠭᠤᠷ ᠰᠠᠭᠤᠵᠤ ᠭᠡᠷ ᠦ᠋ᠨ ᠡᠭᠦᠳᠡ ᠴᠢᠭᠯᠡᠭᠦᠯᠦᠨ ᠳᠡᠪᠢᠰᠦᠭᠰᠡᠨ ᠴᠠᠭᠠᠨ ᠢᠰᠡᠭᠡᠢ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠵᠣᠭᠰᠣᠪᠠ᠃ ᠡᠭᠦᠳᠡ ᠰᠡᠬᠦᠭᠳᠡᠵᠦ ᠨᠢᠭᠤᠷ ᠤᠷᠤᠭᠤ ᠨᠢ ᠠᠯᠴᠢᠭᠤᠷ ᠤᠨᠵᠢᠭᠤᠯᠤᠭᠰᠠᠨ ᠰᠦᠷᠦᠩ ᠢ᠋ ᠬᠦᠦ ᠬᠡᠦᠬᠡᠨ ᠦ᠌ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠪᠡᠷᠭᠡᠨ ᠰᠤᠭᠤᠳᠠᠨ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠭᠦᠷ ᠬᠥᠲᠥᠯᠵᠦ ᠢᠷᠡᠭᠡᠳ ᠲᠡᠮᠦᠷ ᠦ᠋ᠨ ᠡᠮᠡᠭᠡᠯ ᠳᠡᠭᠡᠷᠡ ᠮᠣᠷᠳᠠᠭᠤᠯᠪᠠ᠃
ᠬᠡᠰᠢᠭᠲᠦ ᠭᠤᠸᠠᠢ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠵᠤ ᠭᠠᠷᠬᠤ ᠳ᠋ᠤ᠌ ᠲᠥᠷᠥᠵᠦ ᠥᠰᠦᠭᠰᠡᠨ ᠡᠭᠦᠷ ᠡᠴᠡ ᠪᠡᠨ ᠨᠢᠰᠦᠨ ᠬᠣᠯᠠᠳᠬᠤ ᠶ᠋ᠢᠨ ᠭᠤᠨᠢᠭ ᠰᠦᠷᠦᠩ ᠦ᠋ᠨ ᠰᠡᠳᠬᠢᠯ ᠢ᠋ ᠪᠠᠵᠠᠨ ᠠᠪᠴᠤ ᠨᠢᠳᠦᠨ ᠡᠴᠡ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠳᠤᠰᠤᠯᠠᠪᠠ᠃ ᠡᠨᠡ ᠪᠣᠯ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠲᠡᠢ ᠪᠡᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠬᠣᠯᠪᠣᠬᠤ ᠭᠡᠵᠦ ᠪᠠᠢᠭᠠ ᠰᠦᠷᠦᠩ ᠰᠢᠦ ᠳᠡ᠃
ᠬᠡᠳᠦᠨ ᠠᠷᠪᠠᠨ ᠡᠮᠡᠭᠲᠡᠢᠴᠦᠳ ᠠᠯᠪᠠ ᠶ᠋ᠢᠨ ᠬᠦᠴᠦ ᠪᠡᠷ ᠴᠢᠷᠦᠭᠳᠡᠨ ᠰᠡᠳᠬᠢᠯ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠪᠣᠭᠲᠣᠯᠠᠭᠤᠯᠤᠨ ᠣᠴᠢᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠠᠰᠬᠢᠷᠤᠨ ᠤᠬᠢᠯᠠᠵᠤ᠂ ᠳᠠᠢᠴᠢᠯᠠᠨ ᠲᠡᠮᠡᠴᠡᠯᠳᠦᠵᠦ ᠪᠠᠢᠬᠤ ᠶ᠋ᠢ ᠬᠠᠷᠠᠵᠤ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠪᠠᠢᠭᠰᠠᠨ ᠬᠥᠮᠦᠰ ᠡᠨᠳᠡ ᠣᠯᠠᠨ ᠪᠠᠢᠯᠠ᠃ ᠲᠡᠷᠡ ᠬᠥᠮᠦᠰ ᠲᠦ᠍ ᠰᠦᠷᠦᠩ ᠢ᠋ ᠮᠣᠷᠳᠠᠭᠤᠯᠬᠤ ᠨᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠠᠢᠭᠰᠠᠨ ᠢ᠋ ᠬᠡᠯᠡᠬᠦ ᠶᠠᠭᠤᠨ ᠪᠢᠯᠡ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠬᠢᠵᠢᠶᠡᠯ ᠨᠠᠰᠤᠲᠤ ᠡᠷᠡ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠪᠦᠬᠦ ᠪᠡᠷᠢᠶᠡᠳ ᠡᠢᠮᠦ ᠪᠠᠢᠬᠤ ᠪᠣᠯᠲᠤᠭᠠᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠨ ᠢᠷᠦᠭᠡᠪᠡ᠃
ᠨᠢᠮᠠ ᠭᠤᠸᠠᠢ ᠰᠦᠷᠦᠩ ᠦ᠋ᠨ ᠡᠮᠡᠭᠡᠯ ᠲᠡᠢ ᠮᠣᠷᠢ ᠶ᠋ᠢ ᠬᠥᠲᠥᠯᠦᠨ ᠢᠷᠡᠵᠦ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠳ᠋ᠦ᠍ ᠥᠭᠡᠷᠡ ᠬᠥᠮᠦᠨ ᠲᠣᠮᠣ ᠰᠢᠷᠢᠨ ᠪᠣᠭᠴᠣ ᠲᠠᠢ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠡᠮᠡᠭᠡᠯ ᠳᠡᠭᠡᠭᠦᠷ ᠲᠠᠯᠪᠢᠯᠠ᠃ ᠡᠨᠡ ᠪᠣᠯ ᠰᠦᠷᠦᠩ ᠦ᠋ᠨ ᠳᠡᠪᠡᠯ ᠬᠤᠪᠴᠠᠰᠤ ᠵᠡᠷᠭᠡ ᠨᠢ ᠪᠠᠢᠵᠠᠢ᠃
ᠴᠤᠪᠤᠭᠠ ᠠᠭᠠᠵᠢᠮ ᠪᠥᠭᠡᠳ ᠡᠷᠬᠢᠮᠰᠦᠭ ᠢ᠋ᠶ᠋ᠡᠷ ᠭᠡᠯᠳᠦᠷᠢᠭᠰᠡᠭᠡᠷ ᠶᠠᠪᠤᠵᠤ ᠢᠲᠡᠭᠡᠯᠲᠦ ᠶ᠋ᠢᠨ ᠭᠠᠳᠠᠨᠠ ᠢᠷᠡᠬᠦ ᠳ᠋ᠦ᠍ ᠡᠭᠦᠳᠡᠨ ᠡᠴᠡ ᠤᠶᠠᠭᠠ ᠬᠦᠷᠲᠡᠯᠡ ᠠᠬᠠᠷ ᠤ᠋ᠨ ᠴᠠᠭᠠᠨ ᠢᠰᠡᠭᠡᠢ ᠬᠣᠶᠠᠷ ᠦᠶᠡᠯᠡᠨ ᠳᠡᠪᠢᠰᠴᠡᠢ᠃
ᠬᠣᠩᠭᠣᠷ᠂ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠡᠷᠡ ᠶ᠋ᠢᠨ ᠬᠠᠮᠲᠤ ᠶᠠᠪᠤᠭᠰᠠᠭᠠᠷ ᠡᠭᠦᠳᠡᠨ ᠳ᠋ᠦ᠍ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠭᠠᠯᠰᠠᠩ ᠳ᠋ᠤ᠌ ᠫᠤᠤ ᠪᠠᠨ ᠥᠭᠭᠦᠭᠡᠳ ᠣᠷᠣᠯᠠ᠃ ᠬᠣᠢᠨᠠ ᠡᠴᠡ ᠨᠢ ᠬᠣᠶᠠᠷ ᠪᠡᠷᠭᠡᠨ ᠳ᠋ᠦ᠍ ᠬᠥᠲᠥᠯᠦᠭᠦᠯᠦᠭᠰᠡᠨ ᠰᠦᠷᠦᠩ ᠣᠷᠣᠵᠠᠢ᠃ ᠭᠡᠷ ᠲᠦ᠍ ᠦᠯᠡᠮᠵᠢ ᠳᠥᠯᠥ ᠲᠡᠢ ᠢᠯᠡ ᠭᠠᠯ ᠲᠦᠯᠡᠵᠡᠢ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠰᠦᠷᠦᠩ ᠢ᠋ ᠰᠠᠭᠤᠯᠭᠠᠨ ᠬᠠᠵᠠᠭᠤ ᠳ᠋ᠤᠨᠢ ᠬᠠᠯᠪᠠᠭᠠ ᠲᠥᠷᠥᠭᠰᠡᠨ ᠲᠣᠮᠣ ᠬᠤᠪᠢᠩ ᠲᠠᠢ ᠬᠠᠢᠯᠤᠮᠠᠯ ᠰᠢᠷᠠ ᠲᠣᠰᠣ ᠲᠠᠯᠪᠢᠨ ᠪᠡᠷᠢ ᠭᠠᠯ ᠳ᠋ᠤ᠌ ᠮᠥᠷᠭᠥᠭᠦᠯᠬᠦ ᠶᠣᠰᠣᠯᠠᠯ ᠡᠬᠢᠯᠡᠬᠦ ᠳ᠋ᠦ᠍ ᠲᠣᠰᠣ ᠣᠷᠣᠭᠰᠠᠨ ᠭᠠᠯ ᠱᠠᠵᠢᠭᠢᠨᠠᠨ ᠳᠦᠷᠡᠯᠵᠡᠵᠦ ᠰᠦᠷᠲᠡᠢ ᠪᠥᠭᠡᠳ ᠡᠷᠬᠢᠮᠰᠦᠭ ᠠᠵᠢ᠃
ᠡᠨᠡ ᠶᠡᠬᠡ ᠨᠠᠢᠷ ᠰᠤᠨᠵᠢᠷᠠᠵᠤ ᠡᠨᠳᠡ ᠡᠴᠡ ᠤᠬᠠᠭᠠᠨ ᠲᠠᠢ ᠭᠠᠷᠤᠭᠰᠠᠨ ᠬᠥᠮᠦᠨ ᠴᠥᠭᠡᠬᠡᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠰᠦᠭᠰᠡᠨ ᠰᠢᠪᠠᠭᠤ ᠡᠷᠭᠢᠳᠡᠭ᠂ ᠢᠷᠡᠭᠰᠡᠨ ᠵᠣᠴᠢᠨ ᠬᠠᠷᠢᠳᠠᠭ᠃ ᠬᠤᠷᠢᠮᠯᠠᠭᠰᠠᠨ ᠵᠠᠯᠠᠭᠤᠴᠤᠳ ᠨᠣᠢᠷᠰᠤᠬᠤ ᠪᠣᠯᠪᠠ ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍ ᠤᠬᠠᠭᠠᠨ ᠣᠷᠣᠭᠰᠠᠨ ᠨᠢᠮᠠ ᠭᠤᠸᠠᠢ ᠭᠡᠷ ᠡᠴᠡ ᠭᠠᠷᠴᠤ ᠬᠠᠷᠠᠪᠠᠯ ᠮᠡᠴᠢᠳ ᠮᠠᠷᠠᠯ ᠪᠠᠷᠠᠭᠤᠨᠠ ᠬᠡᠯᠪᠡᠢᠭᠰᠡᠨ ᠪᠠᠢᠯᠠ᠃
ᠮᠠᠷᠭᠠᠰᠢ ᠨᠢ ᠳᠠᠬᠢᠨ ᠨᠠᠢᠷ ᠦᠷᠭᠦᠯᠵᠢᠯᠡᠭᠰᠡᠨ ᠪᠥᠭᠡᠳ ᠬᠡᠳᠦ ᠬᠣᠨᠣᠭ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠨ ᠢ᠋ ᠲᠣᠭᠠᠯᠠᠬᠤ ᠰᠡᠭᠡᠭᠡ ᠲᠡᠢ ᠬᠥᠮᠦᠰ ᠬᠣᠪᠣᠷ ᠪᠠᠢᠵᠠᠢ᠃