ᠲᠤᠩᠭᠠᠯᠠᠭ ᠲᠠᠮᠢᠷ3-20-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1629《ᠰᠢᠯᠢ ᠶ᠋ᠢᠨ ᠪᠣᠭᠳᠠ》᠂ 《ᠮᠣᠷᠢᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠬᠣᠯᠠ ᠶ᠋ᠢ ᠭᠡᠲᠦᠯᠦᠨᠡ᠂ ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠬᠣᠰᠢᠭᠤ ᠶ᠋ᠢ ᠳᠠᠪᠠᠨᠠ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠣᠷᠢ
ᠬᠦᠷᠢᠶᠡ ᠤᠷᠤᠭᠤ ᠪᠠᠷᠤᠭ ᠬᠣᠭᠣᠰᠣᠨ ᠶᠠᠪᠤᠭᠤᠯᠤᠭᠰᠠᠨ ᠬᠣᠷᠢ ᠰᠢᠬᠠᠮᠠ ᠲᠡᠷᠭᠡ ᠪᠡᠨ ᠵᠢᠷᠢᠮ ᠦ᠋ᠨ ᠴᠠᠭᠠᠨ ᠨᠠᠭᠤᠷ ᠤ᠋ᠨ ᠠᠷᠤ ᠶ᠋ᠢᠨ ᠬᠠᠲᠠᠵᠤ ᠡᠬᠢᠯᠡᠭᠰᠡᠨ ᠴᠠᠬᠢᠯᠳᠠᠭ ᠳᠣᠲᠣᠷᠠ ᠦᠳᠡᠯᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠨᠤᠲᠤᠭ ᠡᠴᠡ ᠪᠡᠨ ᠲᠤᠰ ᠪᠦᠷᠢ ᠬᠣᠣᠰ ᠮᠣᠷᠢ ᠲᠠᠢ ᠭᠠᠷᠤᠭᠰᠠᠨ ᠢᠲᠡᠭᠡᠯᠲᠦ ᠬᠣᠩᠭᠣᠷ ᠬᠣᠶᠠᠷ ᠭᠦᠢᠴᠡᠵᠦ ᠢᠷᠡᠯᠡ᠃
ᠤᠲᠤᠭᠠ ᠪᠣᠯᠤᠭᠰᠠᠨ ᠵᠢᠵᠢᠭᠬᠡᠨ ᠬᠥᠬᠡ ᠮᠠᠢᠬᠠᠨ ᠤ᠋ ᠭᠠᠳᠠᠨᠠ ᠬᠥᠯ ᠨᠢᠴᠦᠭᠦᠯᠡᠨ ᠨᠠᠮᠤᠷ ᠤ᠋ᠨ ᠣᠭᠣᠲᠣᠷ ᠰᠢᠷᠠ ᠨᠠᠷᠠᠨ ᠳ᠋ᠤ᠌ ᠲᠡᠷᠡᠢᠨ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠭᠠᠯᠰᠠᠩ᠂ ᠢᠲᠡᠭᠡᠯᠲᠦ ᠬᠣᠩᠭᠣᠷ ᠬᠣᠶᠠᠷ ᠢ᠋ ᠬᠠᠷᠠᠭᠠᠳ ᠦᠰᠦᠷᠦᠨ ᠪᠣᠰᠴᠤ 《ᠠᠬᠠ ᠳᠡᠭᠦᠦ ᠬᠣᠶᠠᠷ ᠢᠷᠡᠯᠡ᠃ ᠴᠠᠢ ᠴᠢᠨᠠᠵᠤ᠂ ᠬᠣᠭᠣᠯᠠ ᠬᠢᠭᠡᠷᠡᠢ》 ᠭᠡᠵᠦ ᠮᠠᠢᠬᠠᠨ ᠳ᠋ᠤ᠌ ᠤᠨᠲᠠᠵᠤ ᠪᠠᠢᠭᠰᠠᠨ ᠬᠥᠯᠥᠰᠥᠨ ᠦ᠌ ᠵᠠᠯᠠᠭᠤ ᠶ᠋ᠢ ᠬᠠᠰᠬᠢᠷᠤᠨ ᠰᠡᠷᠢᠭᠡᠭᠡᠳ ᠭᠦᠶᠦᠨ ᠣᠴᠢᠵᠤ ᠢᠲᠡᠭᠡᠯᠲᠦ ᠶ᠋ᠢ ᠪᠠᠭᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠮᠣᠷᠢᠨ ᠤ᠋ ᠬᠢᠨᠢ ᠴᠤᠯᠪᠤᠭᠤᠷ ᠢ᠋ ᠪᠠᠷᠢᠵᠤ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠠ ᠬᠣᠶᠠᠷ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠃ ᠲᠠ ᠨᠠᠷ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠢᠲᠡᠭᠡᠯᠲᠦ ᠠᠮᠠᠨ ᠳ᠋ᠠᠭᠠᠨ ᠣᠭᠵᠣᠮ ᠬᠡᠯᠡᠭᠡᠳ ᠪᠠᠭᠤᠵᠤ ᠰᠢᠭᠤᠳ ᠮᠠᠢᠬᠠᠨ ᠤᠷᠤᠭᠤ ᠶᠠᠪᠤᠯᠠ᠃
ᠭᠠᠯᠰᠠᠩ᠂ ᠬᠣᠩᠭᠣᠷ ᠬᠣᠶᠠᠷ ᠮᠣᠷᠢᠳ ᠤ᠋ᠨ ᠡᠮᠡᠭᠡᠯ ᠢ᠋ ᠠᠪᠴᠤ ᠴᠢᠳᠦᠷᠯᠡᠨ ᠲᠠᠯᠪᠢᠬᠤ ᠳ᠋ᠤ᠌ ᠬᠣᠯᠠ ᠵᠠᠮ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠮᠣᠷᠢ ᠰᠢᠭᠤᠳ ᠯᠠ ᠬᠣᠰᠢᠭᠤ ᠪᠠᠨ ᠡᠪᠡᠰᠦᠨ ᠳ᠋ᠦ᠍ ᠰᠢᠭᠠᠪᠠ᠃
ᠢᠲᠡᠭᠡᠯᠲᠦ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠬᠣᠭᠣᠰᠣᠨ ᠲᠡᠷᠭᠡ ᠬᠦᠷᠢᠶᠡ ᠤᠷᠤᠭᠤ ᠡᠨᠡ ᠨᠠᠮᠤᠷ ᠡᠷᠲᠡ ᠬᠥᠳᠡᠯᠭᠡᠪᠡ᠃ ᠶᠠᠭᠤ ᠪᠣᠯᠪᠠ? ᠢᠷᠡᠬᠦ ᠡᠪᠦᠯ ᠬᠢᠬᠦ ᠭᠠᠭᠴᠠ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠢᠮ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠲᠥᠬᠥᠭᠡᠷᠬᠦ ᠭᠡᠵᠦ ᠶᠠᠪᠤᠭᠤᠯᠵᠠᠢ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠮᠣᠷᠳᠠᠬᠤ ᠳ᠋ᠠᠭᠠᠨ 《ᠲᠠᠬᠢᠯᠲᠤ ᠶ᠋ᠢᠨ ᠠᠮᠠᠨ ᠤ᠋ ᠣᠷᠴᠢᠮ ᠪᠢ ᠬᠥᠮᠦᠨ ᠳᠤᠰᠤᠭᠤᠯᠤᠨᠠ》 ᠭᠡᠵᠦ ᠭᠠᠯᠰᠠᠩ ᠳ᠋ᠤ᠌ ᠬᠡᠯᠡᠪᠡ᠃
ᠢᠲᠡᠭᠡᠯᠲᠦ ᠳ᠋ᠦ᠍ ᠦᠯᠡᠮᠵᠢ ᠠᠵᠢᠯ ᠪᠠᠢᠯᠠ᠃ ᠭᠠᠭᠴᠠ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠢᠮ ᠢ᠋ ᠨᠡᠷᠡ ᠲᠥᠷᠥ ᠲᠡᠢ ᠬᠢᠶᠡ ᠭᠡᠵᠦ ᠢᠲᠡᠭᠡᠯᠲᠦ ᠰᠢᠲᠦᠭᠰᠡᠨ ᠤᠴᠢᠷ ᠠᠪᠬᠤ ᠶᠠᠭᠤᠮᠠ᠂ ᠪᠡᠯᠡᠳᠬᠡᠬᠦ ᠵᠦᠢᠯ ᠶᠡᠬᠡ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠦᠷᠢᠶᠡ ᠤᠷᠤᠭᠤ ᠲᠤᠰᠬᠠᠢ ᠬᠥᠰᠬᠡ ᠬᠥᠳᠡᠯᠭᠡᠵᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠪᠠᠭᠤᠯᠭᠠᠬᠤ ᠪᠡᠷᠢ ᠨᠢ ᠣᠯᠢᠭᠲᠠᠢ ᠭᠡᠵᠦ ᠶᠠᠷᠢᠪᠠᠯ ᠭᠠᠭᠴᠠ ᠬᠠᠭᠤᠴᠢᠨ ᠴᠢᠰᠴᠡᠦ ᠳᠡᠪᠡᠯ᠂ ᠨᠠᠷᠢᠬᠠᠨ ᠮᠥᠩᠭᠥᠨ ᠪᠥᠭᠡᠵᠢ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠬᠥᠮᠦᠨ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠲᠥᠬᠥᠭᠡᠷᠬᠦ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠶᠠᠭᠤᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠪᠡᠷᠢ ᠳ᠋ᠡᠭᠡᠨ ᠬᠣᠶᠠᠷ ᠠᠯᠲᠠᠨ ᠪᠥᠭᠡᠵᠢ᠂ ᠡᠭᠡᠮᠦᠭ᠂ ᠲᠣᠯᠣᠭᠠᠢ ᠶ᠋ᠢᠨ ᠬᠡᠷᠡᠭᠯᠡᠯ ᠴᠣᠬᠢᠭᠤᠯᠬᠤ᠂ ᠬᠤᠷᠢᠮ ᠳ᠋ᠠᠭᠠᠨ ᠡᠮᠦᠰᠬᠦ ᠳᠡᠪᠡᠯ ᠦ᠋ᠨ ᠬᠢᠨᠢ ᠥᠩᠭᠡ ᠶ᠋ᠢ ᠠᠪᠬᠤ᠂ ᠮᠥᠩᠭᠥᠨ ᠡᠮᠡᠭᠡᠯ ᠬᠠᠵᠠᠭᠠᠷ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠪᠦᠷ ᠪᠣᠷᠵᠢᠭᠢᠨ ᠬᠢᠴᠡ ᠲᠡᠢ ᠶ᠋ᠢ ᠠᠪᠬᠤ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠰᠠᠢᠬᠠᠨ ᠬᠡᠦᠬᠡᠨ ᠠᠪᠤᠨᠠ᠃ ᠲᠡᠷᠡ ᠰᠠᠢᠬᠠᠨ ᠬᠡᠦᠬᠡᠨ ᠢ᠋ ᠶᠣᠰᠣᠲᠠᠢ ᠯᠠ ᠨᠢᠳᠦ ᠶ᠋ᠢ ᠨᠢ ᠪᠦᠯᠲᠡᠷᠡᠲᠡᠯᠡ ᠭᠤᠶᠤᠨᠠ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠡᠬᠡᠨᠡᠷ ᠠᠪᠴᠤ ᠬᠤᠷᠢᠮ ᠬᠢᠨᠡ᠃ ᠲᠡᠷᠡ ᠬᠤᠷᠢᠮ ᠪᠣᠯ ᠯᠤᠤ ᠬᠦᠩ ᠦ᠋ᠨ ᠭᠡᠷᠯᠡᠯᠲᠡ ᠡᠴᠡ ᠢᠯᠡᠭᠦᠦ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠠᠩᠬᠠᠨ ᠳ᠋ᠠᠭᠠᠨ ᠬᠦᠦ ᠳ᠋ᠡᠭᠡᠨ ᠬᠦᠷᠢᠶᠡ ᠬᠢᠴᠡ ᠲᠡᠢ ᠭᠡᠷ ᠪᠠᠷᠢᠵᠤ ᠥᠭᠳᠡᠭ ᠶᠦ᠍ᠮ ᠤᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠬᠠᠷᠢᠨ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠣᠷᠬᠢᠭᠰᠠᠨ᠃ ᠤᠴᠢᠷ ᠨᠢ ᠨᠡᠭᠦᠨ ᠰᠠᠭᠤᠬᠤ ᠳ᠋ᠤ᠌ ᠳᠠᠷᠤᠭᠠᠰᠤ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠵᠠᠢ᠃ ᠬᠠᠷᠢᠨ ᠬᠡᠳᠦᠨ ᠰᠠᠢᠬᠠᠨ ᠡᠷᠢᠶᠡᠨ ᠠᠪᠳᠠᠷᠠ ᠠᠪᠬᠤ ᠬᠡᠷᠡᠭᠲᠡᠢ ᠪᠠᠢᠯᠠ᠃ ᠰᠠᠪᠠ ᠰᠠᠭᠤᠯᠠᠭᠠ ᠭᠡᠪᠡᠯ ᠥᠪᠡᠷ ᠲᠤᠨᠢ ᠪᠠᠢᠵᠠᠢ᠃
ᠶᠡᠷᠦ ᠨᠢ ᠲᠡᠭᠡᠭᠡᠳ ᠪᠦᠲᠦᠨ ᠠᠢᠯ ᠲᠥᠬᠥᠭᠡᠷᠬᠦ᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠢᠲᠡᠭᠡᠯᠲᠦ ᠭᠠᠭᠴᠠ ᠬᠦᠦ ᠪᠡᠨ ᠠᠢᠯ ᠪᠣᠯᠭᠠᠬᠤ ᠭᠡᠵᠦ ᠲᠥᠬᠥᠭᠡᠷᠬᠦ ᠨᠢ ᠬᠡᠴᠡᠭᠦᠦ ᠠᠵᠢᠯ᠃ ᠡᠭᠦᠨ ᠳ᠋ᠦ᠍ ᠢᠲᠡᠭᠡᠯᠲᠦ ᠲᠤᠯᠠᠳᠠ ᠲᠠᠢᠪᠤᠩ ᠪᠠᠢᠨᠠ᠃
ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠡᠳ ᠲᠡᠷᠡ ᠣᠷᠣᠢ ᠳ᠋ᠠᠭᠠᠨ ᠪᠠᠬᠠᠨ ᠠᠷᠢᠬᠢ ᠤᠤᠭᠤᠵᠤ ᠠᠪᠤᠭᠠᠳ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ ᠠᠵᠢᠯ ᠬᠥᠭᠡᠭᠡᠴᠡᠯᠳᠦᠪᠡ᠃ ᠪᠣᠳᠣᠭᠰᠠᠨ ᠪᠦᠬᠦᠨ ᠨᠢ ᠦᠯᠢᠭᠡᠷ ᠦ᠋ᠨ ᠶᠠᠭᠤᠮᠠ ᠰᠢᠭ᠋ ᠪᠦᠲᠦᠵᠦ ᠤᠳᠠᠯ ᠦᠭᠡᠢ ᠬᠣᠷᠢ ᠭᠠᠷᠤᠢ ᠲᠡᠷᠭᠡ ᠳᠦᠭᠦᠷᠡᠩ ᠠᠴᠢᠶᠠ ᠲᠠᠢ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠭᠠᠯᠰᠠᠩ ᠮᠢᠨᠢ ᠬᠢᠴᠢᠶᠡᠵᠦ ᠶᠠᠪᠤᠭᠠᠷᠠᠢ᠃ ᠨᠠᠭᠠᠳᠤᠬᠢ ᠬᠡᠳᠦᠨ ᠲᠡᠷᠭᠡᠨ ᠳ᠋ᠦ᠍ ᠴᠢᠨᠢ ᠬᠡᠳᠦᠨ ᠵᠠᠭᠤᠨ ᠲᠡᠷᠭᠡᠨ ᠦ᠌ ᠠᠴᠢᠶᠠ ᠡᠴᠡ ᠦᠨᠡᠲᠡᠢ ᠶᠠᠭᠤᠮᠠ ᠪᠣᠢ᠃ᠨᠥᠭᠥᠭᠡᠬᠢ ᠪᠡᠨ ᠲᠠᠪᠤ ᠰᠤᠮᠤᠯᠠᠭᠠᠳ ᠨᠢᠳᠦ ᠬᠠᠮᠭᠢᠯ ᠦᠭᠡᠢ ᠶᠠᠪᠤᠳᠠᠭ ᠶᠤᠮ ᠰᠢᠦ ᠭᠡᠵᠦ ᠠᠴᠢᠶᠠ ᠬᠥᠳᠡᠯᠬᠦ ᠶ᠋ᠢᠨ ᠡᠮᠦᠨᠡ ᠢᠲᠡᠭᠡᠯᠲᠦ ᠰᠢᠪᠡᠭᠡᠨᠡᠨ ᠬᠡᠯᠡᠵᠡᠢ᠃
ᠨᠥᠭᠥᠭᠡᠬᠢ ᠪᠡᠨ ᠭᠡᠵᠦ ᠢᠲᠡᠭᠡᠯᠲᠦ ᠨᠤᠲᠤᠭ ᠡᠴᠡ ᠪᠡᠨ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ ᠪᠠᠳᠠᠷᠴᠢ ᠡᠴᠡ ᠵᠠᠯᠠᠭᠤ ᠮᠣᠷᠢ ᠪᠠᠷ ᠠᠪᠤᠭᠰᠠᠨ ᠲᠠᠪᠢᠨ ᠰᠤᠮᠤ ᠲᠠᠢ ᠶᠠᠫᠣᠨ ᠯᠢᠶᠠᠠᠵᠤ ᠶ᠋ᠢ ᠬᠡᠯᠡᠵᠦ ᠪᠠᠢᠭᠠ ᠶᠤᠮ᠃ ᠲᠠᠪᠤ᠂ ᠵᠢᠷᠭᠤᠭᠠᠨ ᠰᠤᠮᠤ ᠵᠠᠷᠤᠵᠤ ᠪᠠᠢᠮᠠᠨᠵᠢᠨ ᠭᠠᠯᠰᠠᠩ ᠢ᠋ ᠰᠤᠮᠤᠯᠠᠵᠤ ᠫᠤᠤᠳᠠᠵᠤ ᠰᠤᠷᠭᠠᠭᠰᠠᠨ ᠨᠢ ᠡᠨᠡ ᠦᠨᠡᠲᠡᠢ ᠠᠴᠢᠶᠠ ᠶ᠋ᠢ ᠮᠠᠨᠠᠵᠤ ᠬᠦᠷᠢᠶᠡᠨ ᠡᠴᠡ ᠲᠠᠮᠢᠷ ᠲᠤ᠌ ᠭᠦᠷᠭᠡᠭᠦᠯᠭᠦ ᠭᠡᠰᠡᠨ ᠪᠡᠯᠡᠳᠬᠡᠯ ᠪᠠᠢᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠤᠤ ᠵᠤᠪᠠᠭᠠ ᠭᠡᠳ ᠭᠠᠯᠰᠠᠩ ᠮᠠᠷᠰᠠᠢᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠ ᠨᠣᠢᠷ ᠲᠠᠢ ᠶᠠᠪᠤᠭᠰᠠᠨ ᠡᠴᠡ ᠬᠥᠮᠦᠨ ᠦᠬᠦᠳᠡᠭ ᠦᠭᠡᠢ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ᠂ ᠠᠬᠠ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠯᠦᠩ ᠣᠷᠴᠢᠮ ᠭᠦᠢᠴᠡᠵᠦ ᠣᠴᠢᠨᠠ᠃
ᠬᠥᠰᠬᠡ ᠶᠠᠪᠤᠭᠰᠠᠨ ᠣᠷᠣᠢ ᠢᠲᠡᠭᠡᠯᠲᠦ ᠠᠢᠯ ᠳ᠋ᠤ᠌ ᠠᠷᠢᠬᠢᠳᠠᠬᠤ ᠪᠣᠯᠵᠤ ᠳᠥᠷᠪᠡᠨ ᠮᠣᠷᠢ ᠪᠠᠨ ᠬᠠᠨ ᠠᠭᠤᠯᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠢᠳᠡᠭᠦᠯᠬᠦ ᠠᠵᠢᠯ ᠬᠣᠩᠭᠣᠷ ᠲᠤ᠌ ᠣᠨᠣᠭᠳᠠᠪᠠ᠃ ᠦᠳᠡᠰᠢ ᠣᠷᠣᠢ ᠳᠥᠷᠪᠡᠨ ᠮᠣᠷᠢ ᠪᠠᠨ ᠠᠪᠴᠤ ᠲᠤᠤᠯᠠ ᠭᠣᠣᠯ ᠢ᠋ ᠭᠠᠲᠤᠯᠤᠨ ᠴᠢᠨᠳᠠᠮᠤᠨᠢ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠣᠴᠢᠵᠤ ᠴᠢᠳᠥᠷᠯᠡᠭᠡᠳ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠨᠢ ᠬᠡᠷᠦᠵᠦ ᠲᠠᠯᠪᠢᠭᠠᠳ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠦᠭᠡᠳ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠨ ᠲᠦᠮᠡᠨ ᠣᠳᠣ ᠲᠠᠢ ᠭᠦᠨ ᠬᠥᠬᠡ ᠲᠡᠭᠷᠢ ᠶ᠋ᠢ ᠰᠢᠷᠳᠡᠨ ᠬᠡᠪᠲᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠨᠢᠭᠡ ᠯᠡ ᠰᠠᠢᠬᠠᠨ ᠪᠠᠢᠵᠤ ᠪᠢᠯᠡ᠃
ᠰᠥᠨᠢ ᠳᠤᠮᠳᠠ ᠡᠴᠡ ᠬᠣᠢᠰᠢ ᠬᠦᠢᠲᠡᠨ ᠰᠠᠯᠬᠢ ᠦᠯᠢᠶᠡᠵᠦ ᠡᠬᠢᠯᠡᠭᠰᠡᠨ ᠪᠣᠯᠪᠠᠴᠤ ᠬᠤᠴᠢᠭᠰᠠᠨ ᠬᠣᠶᠠᠷ ᠣᠳᠣᠨᠴᠤᠤ ᠴᠠᠪᠠ ᠶ᠋ᠢ ᠨᠢ ᠨᠡᠪᠲᠡᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠦᠷ ᠮᠠᠩᠬᠠᠢᠨ ᠴᠡᠢᠭᠰᠡᠨ ᠬᠣᠢᠨᠠ ᠰᠡᠷᠢᠵᠦ ᠬᠠᠷᠠᠪᠠᠯ ᠵᠡᠭᠦᠬᠡᠨ ᠳ᠋ᠦ᠍ᠨᠢ ᠬᠡᠷᠦᠵᠦ ᠲᠠᠯᠪᠢᠭᠰᠠᠨ ᠬᠣᠶᠠᠷ ᠮᠣᠷᠢᠨ ᠤ᠋ ᠬᠢᠨᠢ ᠴᠠᠭᠠᠨᠠ ᠨᠢᠭᠡ ᠬᠥᠮᠦᠨ ᠤᠨᠲᠠᠵᠤ ᠪᠠᠢᠯᠠ᠃ ᠲᠡᠷᠡ ᠬᠥᠮᠦᠨ ᠡᠴᠡ ᠬᠣᠷᠢᠭᠠᠳ ᠠᠯᠬᠤᠮ ᠤ᠋ᠨ ᠴᠠᠭᠠᠨᠠ ᠴᠢᠳᠥᠷ ᠲᠡᠢ ᠬᠠᠷᠠ ᠬᠡᠭᠡᠷ ᠮᠣᠷᠢ ᠢᠳᠡᠵᠦ ᠪᠠᠢᠨᠠ᠃
ᠬᠣᠩᠭᠣᠷ ᠪᠣᠰᠴᠤ ᠰᠤᠨᠢᠶᠠᠭᠠᠳ ᠭᠡᠷᠦᠭᠡᠳᠡᠢ ᠳ᠋ᠡᠭᠡᠨ ᠪᠣᠯᠵᠤ ᠬᠣᠯᠠᠳᠴᠤ ᠴᠢᠳᠠᠭᠠ ᠦᠭᠡᠢ ᠮᠣᠷᠢᠳ ᠢ᠋ᠶ᠋ᠠᠨ ᠠᠵᠢᠭᠯᠠᠨ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠨᠠᠷᠠ ᠭᠠᠷᠲᠠᠯᠠ ᠲᠠᠯᠪᠢᠵᠤ ᠢᠳᠡᠭᠦᠯᠬᠦ ᠪᠡᠷ ᠰᠢᠢᠳᠪᠡ᠃ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠢᠳᠡᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠮᠣᠷᠢ ᠪᠠᠨ ᠰᠠᠯᠭᠠᠵᠤ ᠲᠠᠯᠪᠢᠭᠠᠳ ᠨᠥᠭᠦᠭᠡ ᠬᠥᠮᠦᠨ ᠦ᠌ ᠨᠠᠭᠠᠳᠤᠬᠢ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡ ᠣᠴᠢᠵᠤ ᠰᠠᠯᠭᠠᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠥᠭᠦᠭᠡ ᠬᠥᠮᠦᠨ ᠰᠡᠷᠢᠵᠦ ᠥᠨᠳᠡᠢᠨ ᠬᠣᠩᠭᠣᠷ ᠤᠷᠤᠭᠤ ᠬᠠᠷᠠᠯᠠ᠃ ᠬᠣᠩᠭᠣᠷ ᠴᠤ᠌ ᠲᠡᠷᠡ ᠬᠥᠮᠦᠨ ᠢ᠋ ᠠᠵᠢᠭᠯᠠᠪᠠ᠃ ᠬᠠᠷᠠᠭᠠᠴᠢ! ᠪᠠᠭᠠ ᠶ᠋ᠢᠨ ᠨᠠᠢᠵᠠ ᠪᠠᠲᠤ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠠ᠋ ᠭᠡᠵᠦ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠭᠠᠳ ᠲᠡᠭᠦᠨ ᠦ᠌ ᠵᠦᠭ ᠭᠦᠶᠦᠪᠡ᠃
ᠨᠡᠷᠡ ᠪᠡᠷ ᠨᠢ ᠳᠠᠭᠤᠳᠠᠭᠠᠳ ᠢᠷᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠪᠣᠯ ᠥᠭᠡᠷᠡ ᠬᠡᠨ ᠴᠦ᠍ ᠪᠢᠰᠢ ᠬᠣᠩᠭᠣᠷ ᠭᠡᠳᠡᠭ ᠢ᠋ ᠪᠠᠲᠤ ᠲᠠᠨᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠮᠢᠨᠢ ᠴᠢ ᠴᠢᠨᠢ ᠬᠠᠮᠢᠭᠠ ᠭᠠᠵᠠᠷ ᠡᠴᠡ ᠭᠠᠷᠤᠭᠠᠳ ᠢᠷᠡᠪᠡ᠃ ᠠᠮᠢᠳᠤ ᠮᠡᠨᠳᠦ ᠠᠭᠤᠯᠵᠠᠬᠤ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ? ᠵᠠ ᠵᠣᠯᠭᠠᠵᠤ ᠤᠷᠭᠢᠶᠠ ᠭᠡᠳ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠪᠠ᠃
ᠬᠣᠶᠠᠷ ᠨᠠᠢᠵᠠ ᠦᠯᠡᠮᠵᠢ ᠳᠣᠲᠣᠨᠣ ᠵᠣᠯᠭᠠᠪᠠ᠃ ᠪᠠᠲᠤ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠡᠷᠡᠭᠯᠡᠯ ᠠᠪᠬᠤ ᠲᠤᠬᠠᠢ ᠶᠠᠷᠢᠬᠤ ᠭᠡᠵᠦ ᠳᠠᠩ ᠮᠣᠷᠢᠲᠠᠢ ᠬᠣᠲᠠ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠬᠣᠶᠠᠷ ᠬᠣᠨᠣᠵᠠᠢ᠃ ᠡᠳᠦᠷ ᠨᠢ ᠠᠵᠢᠯ ᠢ᠋ᠶ᠋ᠠᠨ ᠬᠥᠭᠡᠭᠡᠴᠡᠯᠳᠦᠵᠦ᠂ ᠰᠥᠨᠢ ᠨᠢ ᠮᠣᠷᠢ ᠪᠠᠨ ᠢᠳᠡᠭᠦᠯᠳᠡᠭ ᠪᠠᠢᠯᠠ᠃ ᠨᠠᠢᠵᠠ ᠨᠠᠷ ᠶᠠᠭᠤᠨ ᠤ᠋ ᠡᠮᠦᠨᠡ ᠪᠡᠶᠡ ᠪᠡᠶᠡ ᠶ᠋ᠢᠨ ᠲᠣᠮᠣ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠭᠠᠢᠬᠠᠯᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠣᠩᠭᠣᠷ ᠲᠤᠯᠭᠠᠷ ᠤ᠋ᠨ ᠠᠮᠢᠳᠤ ᠪᠠᠢᠭᠠ ᠲᠤᠬᠠᠢ ᠡᠷᠳᠡᠨᠢ ᠣᠴᠢᠵᠤ ᠠᠭᠤᠯᠵᠠᠭᠰᠠᠨ ᠲᠤᠬᠠᠢ ᠶᠠᠷᠢᠪᠠ᠃ ᠭᠡᠪᠡᠴᠦ ᠡᠨᠡ ᠪᠦᠬᠦᠨ ᠪᠠᠲᠤ ᠳ᠋ᠤ᠌ ᠰᠣᠨᠢᠨ ᠵᠦᠢᠯ ᠪᠢᠰᠢ ᠪᠣᠯᠵᠠᠢ᠃ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠠᠢᠯ ᠪᠣᠯᠤᠭᠰᠠᠨ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠣᠴᠢᠭᠰᠠᠨ ᠲᠤᠬᠠᠢ ᠪᠠᠨ ᠶᠠᠷᠢᠯᠠ᠃ ᠭᠡᠪᠡᠴᠦ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠦᠭᠡᠢ᠃
ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠬᠣᠲᠠ ᠶ᠋ᠢᠨ ᠵᠦᠭ ᠶᠠᠪᠤᠯᠠ᠃ ᠵᠠᠮ ᠳ᠋ᠠᠭᠠᠨ ᠬᠣᠩᠭᠣᠷ 《ᠵᠠ ᠡᠪᠦᠭᠡᠨ ᠮᠢᠨᠢ ᠴᠢᠮᠠ ᠡᠴᠡ ᠭᠤᠶᠤᠬᠤ ᠨᠢᠭᠡ ᠶᠠᠭᠤᠮᠠ ᠪᠠᠢᠨᠠ᠃ ᠠᠪᠤ ᠮᠠᠷᠭᠠᠰᠢ ᠭᠠᠷᠤᠨᠠ ᠭᠡᠳ ᠪᠠᠢᠳᠠᠭ᠃ ᠴᠢ ᠨᠠᠮᠠᠢ ᠬᠡᠳᠦ ᠬᠣᠨᠣᠭ ᠠᠪᠴᠤ ᠦᠯᠡᠳᠡ᠃ ᠠᠪᠤ ᠴᠢᠮᠠᠶ᠋ᠢ ᠭᠤᠶᠤᠪᠠᠯ ᠦᠭᠡᠢ ᠭᠡᠬᠦ ᠦᠭᠡᠢ᠃ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠯᠦᠩ ᠳᠡᠭᠡᠷᠡ ᠣᠴᠢᠭᠠᠳ ᠰᠠᠯᠤᠶᠠ》 ᠭᠡᠯᠡ᠃
ᠪᠠᠲᠤ ᠳ᠋ᠤ᠌ ᠴᠤ᠌ ᠬᠣᠩᠭᠣᠷ ᠲᠠᠢ ᠬᠡᠳᠦ ᠬᠣᠨᠣᠭ ᠬᠣᠲᠠ ᠳ᠋ᠤ᠌ ᠪᠠᠢᠬᠤ ᠳ᠋ᠤ᠌ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠢᠲᠡᠭᠡᠯᠲᠦ ᠡᠴᠡ ᠭᠤᠶᠤᠵᠠᠢ᠃ ᠠᠩᠬᠠᠨ ᠳ᠋ᠠᠭᠠᠨ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠠᠪᠠᠴᠤ ᠬᠣᠶᠠᠷ ᠵᠠᠯᠠᠭᠤ ᠶ᠋ᠢᠨ ᠵᠡᠷᠭᠡ ᠵᠡᠷᠭᠡ ᠭᠤᠶᠤᠯᠲᠠ ᠳ᠋ᠤ᠌ ᠲᠡᠪᠴᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠳᠠᠮᠰᠢᠭ ᠮᠢᠨᠢ ᠳᠠᠷᠪᠢᠭᠠᠳ ᠬᠡᠷᠡᠭ ᠲᠦᠪᠡᠭ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠣᠶᠠᠷ ᠭᠤᠷᠪᠠ ᠡᠴᠡ ᠢᠯᠡᠭᠦᠦ ᠬᠣᠨᠣᠵᠤ ᠪᠣᠯᠬᠤ ᠦᠭᠡᠢ᠃ ᠪᠠᠲᠤ ᠮᠢᠨᠢ ᠨᠠᠭᠠᠳᠤᠬᠢ ᠴᠢᠨᠢ ᠠᠮᠤᠷ ᠦᠭᠡᠢ ᠬᠥᠮᠦᠨ ᠰᠢᠦ᠃ ᠵᠠ ᠬᠣᠩᠭᠣᠷ ᠴᠢ ᠯᠦᠩ ᠳᠡᠭᠡᠷᠡ ᠪᠢᠲᠡᠭᠡᠢ ᠤᠳᠠᠭᠠᠷᠠᠢ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠯᠠ ᠭᠡᠵᠦ ᠤᠳᠠᠬᠤ ᠶᠤᠮ ᠤᠤ ᠭᠡᠵᠦ ᠬᠣᠩᠭᠣᠷ ᠦᠯᠡᠮᠵᠢ ᠣᠷᠢᠶᠠᠯᠭᠠᠨ ᠬᠡᠯᠡᠵᠡᠢ᠃ ᠢᠲᠡᠭᠡᠯᠲᠦ ᠬᠦᠦ ᠳ᠋ᠡᠭᠡᠨ ᠬᠣᠣᠰ ᠮᠣᠷᠢ᠂ ᠬᠣᠷᠢᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠥᠭᠭᠦᠭᠡᠳ ᠨᠤᠲᠤᠭ ᠤ᠋ᠨ ᠵᠦᠭ ᠮᠣᠷᠳᠠᠬᠤ ᠳ᠋ᠠᠭᠠᠨ 《ᠪᠠᠲᠤ ᠠ᠋ ᠴᠢᠮᠠ ᠳ᠋ᠤ᠌ ᠯᠠ ᠨᠠᠢᠳᠠᠵᠤ ᠪᠠᠢᠨᠠ ᠰᠢᠦ᠃ ᠲᠦᠷᠭᠡᠨ ᠯᠡ ᠭᠠᠷᠴᠤ ᠦᠵᠡᠭᠡᠷᠡᠢ》 ᠭᠡᠵᠦ ᠪᠢᠯᠡ᠃
ᠢᠲᠡᠭᠡᠯᠲᠦ ᠶ᠋ᠢ ᠶᠠᠪᠤᠭᠰᠠᠨ ᠤ᠋ ᠣᠷᠣᠢ ᠬᠣᠶᠠᠷ ᠵᠠᠯᠠᠭᠤ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠯᠥᠰᠥᠨ ᠦ᠌ ᠢᠳᠡᠭᠦᠯᠭᠡ ᠳ᠋ᠦ᠍ ᠥᠭᠴᠦ ᠬᠤᠶᠠᠭ ᠤ᠋ᠨ ᠳ᠋ᠤ᠌ ᠣᠴᠢᠵᠤ ᠴᠠᠨᠳᠠ ᠪᠠᠷ ᠬᠣᠭᠣᠯᠠ ᠬᠢᠯᠭᠡᠨ ᠢᠳᠡᠭᠡᠳ ᠣᠷᠣ ᠵᠠᠰᠠᠭᠤᠯᠤᠨ ᠵᠡᠷᠭᠡᠴᠡᠨ ᠬᠡᠪᠲᠡᠵᠦ ᠪᠠᠷᠤᠭ ᠦᠷ ᠴᠠᠢᠲᠠᠯᠠ ᠰᠢᠪᠡᠭᠡᠨᠡᠨ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠠ᠋ ᠭᠡᠵᠦ ᠬᠣᠩᠭᠣᠷ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠵᠤᠤᠮᠠᠯᠵᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ 《ᠡᠪᠦᠭᠡᠨ ᠴᠢᠨᠢ ᠡᠬᠡᠨᠡᠷ ᠠᠪᠴᠤ ᠬᠤᠷᠢᠮ ᠬᠢᠬᠦ ᠭᠡᠵᠦ ᠪᠠᠢᠭᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠬᠡᠷᠡᠭ᠃ ᠶᠠᠮᠠᠷ ᠡᠬᠡᠨᠡᠷ ᠠᠪᠬᠤ ᠨᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠰᠦᠷᠦᠩ ᠲᠡᠢ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠤᠤ᠃ ᠳᠣᠬᠢ ᠬᠡᠷᠡᠭ ᠪᠠᠢᠨᠠ ᠳᠠ᠃ ᠨᠢᠮᠠ ᠭᠤᠸᠠᠢ ᠴᠤ᠌ ᠨᠠᠮᠠᠢ ᠪᠠᠯᠠᠯᠬᠤ ᠰᠢᠬᠠᠭᠰᠠᠨ ᠰᠢᠦ ᠭᠡᠳ ᠪᠠᠲᠤ ᠢᠨᠢᠶᠡᠪᠡ᠃
ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠨᠢᠭᠡ ᠯᠡ ᠬᠠᠴᠢᠨ ᠪᠣᠯᠪᠠ᠃ ᠰᠦᠷᠦᠩ ᠦ᠋ᠨ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠣᠯᠣᠩᠭᠠ ᠶ᠋ᠢᠨ ᠲᠤᠬᠠᠢ ᠪᠣᠳᠣᠭᠳᠠᠭᠠᠳ ᠠᠬᠠ ᠡᠴᠡ ᠨᠢ ᠲᠡᠭᠦᠨ ᠦ᠌ ᠲᠤᠬᠠᠢ ᠣᠯᠠᠨ ᠶᠠᠭᠤᠮᠠ ᠠᠰᠠᠭᠤᠮᠠᠷ ᠰᠠᠨᠠᠭᠳᠠᠪᠠᠴᠤ ᠢᠴᠢᠬᠦ ᠮᠡᠲᠦ ᠪᠣᠯᠤᠭᠠᠳ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠴᠢᠮᠠ ᠡᠴᠡ ᠭᠤᠶᠤᠬᠤ ᠶᠠᠭᠤᠮᠠ ᠪᠠᠢᠨᠠ ᠭᠡᠵᠦ ᠬᠣᠩᠭᠣᠷ ᠬᠡᠯᠡᠭᠡᠳ ᠪᠠᠲᠤ ᠶ᠋ᠢᠨ ᠭᠠᠷ ᠳᠡᠭᠡᠷᠡ ᠡᠴᠡ ᠪᠠᠷᠢᠵᠤ ᠠᠪᠤᠯᠠ᠃
ᠰᠣᠯᠣᠩᠭᠠ ᠶ᠋ᠢᠨ ᠲᠤᠬᠠᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠪᠠᠲᠤ ᠬᠠᠷᠢᠭᠤ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠥᠭᠡᠬᠡᠨ ᠬᠣᠨᠣᠭ ᠡᠨᠡᠦᠬᠡᠨ ᠵᠡᠭᠦᠨ ᠳᠠᠰᠢ ᠪᠠᠨ ᠶᠠᠪᠤᠬᠤ ᠨᠢᠭᠡ ᠴᠢᠬᠤᠯᠠ ᠬᠡᠷᠡᠭ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠵᠤ ᠪᠣᠯᠳᠠᠭ ᠶᠤᠮ ᠪᠣᠢ? ᠠᠪᠤ ᠴᠢᠨᠢ ᠲᠦᠷᠭᠡᠨ ᠭᠠᠷ ᠭᠡᠰᠡᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ ᠡᠪᠦᠭᠡᠨ ᠮᠢᠨᠢ᠃ ᠪᠢ ᠭᠠᠯᠰᠠᠩ ᠠᠬᠠ ᠶ᠋ᠢ ᠨᠤᠲᠤᠭ ᠲᠤ᠌ ᠬᠦᠷᠬᠦ ᠡᠴᠡ ᠨᠢ ᠡᠮᠦᠨᠡ ᠭᠦᠢᠴᠡᠭᠡᠳ ᠣᠴᠢᠵᠤ ᠴᠢᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠶᠠᠮᠠᠷ ᠬᠡᠷᠡᠭ ᠲᠡᠢ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠴᠦᠬᠡᠨ ᠬᠡᠷᠡᠭ᠃ ᠴᠢᠮᠠ ᠳ᠋ᠤ᠌ ᠰᠡᠭᠦᠯ ᠳ᠋ᠦ᠍ ᠬᠡᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠯᠣᠩᠭᠠ ᠶ᠋ᠢᠨ ᠪᠡᠶᠡ ᠰᠠᠢᠨ ᠤᠤ? ᠭᠡᠵᠦ ᠪᠠᠲᠤ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠠᠰᠠᠭᠤᠭᠠᠳ ᠨᠢᠭᠤᠷ ᠨᠢ ᠬᠠᠯᠠᠭᠤ ᠰᠢᠲᠠᠨ ᠪᠠᠳᠠᠢᠷᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠠᠭᠤᠨ ᠳ᠋ᠤ᠌ ᠠᠯᠵᠠᠬᠤ ᠪᠣᠢ᠃ ᠠᠪᠤ ᠳ᠋ᠤ᠌ ᠵᠠᠩᠨᠠᠭᠤᠯᠤᠭᠠᠳ ᠯᠠ ᠡᠵᠢ ᠳ᠋ᠦ᠍ ᠮᠠᠭᠲᠠᠭᠤᠯᠤᠭᠠᠳ ᠯᠠ ᠶᠠᠪᠤᠵᠤ ᠪᠠᠢᠳᠠᠭ᠃ ᠵᠠ ᠡᠪᠦᠭᠡᠨ ᠴᠢᠨᠢ ᠮᠠᠷᠭᠠᠰᠢ ᠮᠣᠷᠳᠠᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠷᠭᠡᠨ ᠢᠷᠡᠨᠡ ᠰᠢᠦ᠃ ᠰᠦᠷᠦᠩ᠂ ᠰᠣᠯᠣᠩᠭᠠ ᠬᠣᠶᠠᠷ ᠴᠤ᠌ ᠲᠣᠮᠣ ᠪᠣᠯᠴᠢᠬᠠᠭᠰᠠᠨ ᠪᠢᠵᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠮᠣ ᠪᠣᠯᠤᠭᠰᠠᠨ᠃ ᠰᠣᠯᠣᠩᠭᠠ ᠠᠪᠤ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠨᠠᠮᠠᠢ ᠵᠠᠩᠨᠠᠬᠤ ᠭᠡᠳᠡᠭ ᠶᠤᠮ᠃ ᠢᠮᠠᠭᠠ ᠳᠦᠢᠯᠡᠪᠡᠴᠦ ᠶᠠᠩᠭᠢᠶᠠ ᠡᠪᠳᠡᠬᠦ ᠦᠭᠡᠢ ᠭᠡᠳᠡᠭ ᠯᠡ ᠪᠣᠯᠵᠤ ᠪᠠᠢᠭᠠ ᠨᠢ ᠲᠡᠷᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠲᠡᠢᠮᠦ ᠤᠤ᠃ ᠰᠣᠯᠣᠩᠭᠠ ᠴᠤ᠌ ᠠᠢᠬᠤᠪᠲᠤᠷ ᠠᠮᠢᠲᠠᠨ ᠰᠢᠦ᠃ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠥᠭᠭᠦᠭᠰᠡᠨ ᠪᠠᠯᠢᠩ ᠤ᠋ᠨ ᠭᠤᠯᠢᠷ ᠪᠤᠯᠢᠶᠠᠯᠳᠤᠵᠤ ᠪᠢᠳᠡ ᠬᠣᠶᠠᠷ ᠰᠠᠢᠨ ᠨᠣᠴᠣᠯᠳᠤᠳᠠᠭ ᠪᠠᠢᠵᠤ ᠪᠢᠯᠡ ᠭᠡᠳ ᠪᠠᠲᠤ ᠪᠠᠶᠠᠷᠲᠠᠢ ᠢᠨᠢᠶᠡᠮᠰᠦᠭᠯᠡᠪᠡ᠃
ᠲᠡᠷᠡ ᠰᠥᠨᠢ ᠪᠠᠲᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠰᠣᠯᠣᠩᠭᠠ ᠬᠠᠷᠠᠭᠳᠠᠭᠠᠳ ᠤᠳᠠᠲᠠᠯᠠ ᠤᠨᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠮᠠᠷᠭᠠᠰᠢ ᠨᠢ ᠬᠣᠩᠭᠣᠷ ᠢ᠋ ᠮᠣᠷᠳᠠᠭᠤᠯᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠦᠷᠭᠡᠨ ᠢᠷᠡᠨᠡ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠠ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ ᠭᠡᠳ ᠳᠣᠷᠣᠨᠠ ᠵᠦᠭ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠯᠠ᠃
ᠬᠡᠷᠪᠡ ᠬᠣᠩᠭᠣᠷ ᠤ᠋ᠨ ᠶᠠᠪᠤᠵᠤ ᠪᠠᠢᠭᠠ ᠵᠣᠷᠢᠯᠭᠠ ᠶ᠋ᠢ ᠪᠠᠲᠤ ᠮᠡᠳᠡᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠠᠢᠭᠰᠠᠨ᠃ ᠬᠣᠩᠭᠣᠷ ᠪᠣᠯ ᠲᠡᠮᠦᠷ ᠦ᠋ᠨ ᠶᠠᠷᠢᠶᠠᠨ ᠡᠴᠡ ᠰᠣᠨᠣᠰᠤᠭᠰᠠᠨ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠭᠡᠳᠡᠭ ᠠᠭᠤᠯᠠᠨ ᠳ᠋ᠤ᠌ ᠣᠴᠢᠵᠤ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠣᠯᠬᠤ ᠲᠠᠩᠭᠠᠷᠢᠭ ᠡᠷᠭᠦᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ᠃ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠲᠠᠩᠭᠠᠷᠢᠭ ᠡᠷᠭᠦᠭᠡᠳ ᠦᠷ ᠦ᠋ᠨ ᠭᠡᠭᠡ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠬᠠᠷᠠᠭᠰᠠᠨ ᠬᠥᠮᠦᠨ ᠰᠠᠢᠨ ᠡᠷᠡ ᠪᠣᠯᠳᠠᠭ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠷᠡ ᠭᠠᠢᠬᠠᠮᠰᠢᠭᠲᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠦᠵᠡᠬᠦ ᠰᠠᠨ ᠭᠡᠳᠡᠭ ᠪᠣᠳᠣᠯ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠪᠣᠢ ᠪᠣᠯᠤᠭᠠᠳ ᠡᠴᠦᠰ ᠲᠦ᠍ ᠬᠦᠰᠡᠯ᠂ ᠰᠠᠨᠠᠭᠠ ᠶ᠋ᠢ ᠨᠢ ᠪᠦᠷᠢᠮᠦᠰᠦᠨ ᠡᠵᠡᠯᠡᠨ ᠵᠣᠪᠠᠭᠠᠳᠠᠭ ᠪᠣᠯᠤᠭᠰᠠᠨ ᠶᠤᠮ᠃
ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠠᠳᠤᠭᠤᠨ ᠤ᠋ ᠰᠢᠯᠢᠳᠡᠭ ᠬᠣᠶᠠᠷ ᠮᠣᠷᠢ ᠬᠣᠩᠭᠣᠷ ᠤ᠋ᠨ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠨᠠᠢᠳᠠᠪᠤᠷᠢᠲᠠᠢ ᠤᠨᠤᠭᠠ ᠪᠣᠯᠵᠤ ᠶᠠᠪᠤᠯᠠ᠃ ᠬᠣᠩᠭᠣᠷ ᠬᠠᠶᠠ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ 《ᠶᠦᠠᠴᠢᠷ ᠯᠠᠮᠠᠬᠠᠢ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠶᠠᠪᠤᠭᠠ ᠬᠥᠮᠦᠨ》 ᠭᠡᠵᠦ ᠡᠯᠳᠡᠪ ᠢ᠋ ᠵᠣᠬᠢᠶᠠᠨ ᠶᠠᠷᠢᠬᠤ ᠵᠠᠭᠤᠷᠠ ᠭᠠᠵᠠᠷ ᠤ᠋ᠨ ᠴᠢᠭ ᠢ᠋ ᠠᠰᠠᠭᠤᠵᠤ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠶᠡᠷ ᠲᠡᠢ ᠲᠤᠤᠯᠠ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠮᠣᠷᠢᠨ ᠡᠴᠡ ᠪᠡᠨ ᠰᠠᠯᠤᠭᠠᠳ ᠦᠬᠦᠬᠦ ᠭᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠠᠮᠢᠳᠤ ᠭᠠᠷᠪᠠᠯ ᠶᠦᠠᠴᠢᠷ ᠯᠠᠮᠠᠬᠠᠢ ᠳ᠋ᠤ᠌ ᠮᠥᠷᠭᠥᠵᠦ ᠱᠠᠪᠢ ᠣᠷᠣᠨᠠ ᠭᠡᠵᠦ ᠲᠠᠩᠭᠠᠷᠢᠭ ᠪᠠᠷᠢᠭᠰᠠᠨ ᠴᠢᠨᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠤᠰᠤᠨ ᠤ᠋ ᠡᠷᠭᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠪᠠᠢᠭᠰᠠᠨ ᠭᠡᠵᠦ ᠵᠣᠬᠢᠶᠠᠨ ᠶᠠᠷᠢᠬᠤ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠠᠢᠯ ᠤ᠋ᠨ ᠠᠪᠠᠭᠠᠢᠴᠤᠳ ᠰᠠᠢᠬᠠᠨ ᠴᠠᠢ ᠴᠢᠨᠠᠵᠤ᠂ ᠨᠦᠮᠵᠦᠭᠲᠡᠢ ᠬᠣᠭᠣᠯᠠ ᠬᠢᠵᠦ ᠥᠭᠳᠡᠭ ᠪᠠᠢᠯᠠ᠃
ᠠᠯᠳᠠᠷᠲᠤ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠣᠢᠷᠠᠳᠠᠬᠤ ᠳᠣᠳᠣᠮ ᠬᠣᠩᠭᠣᠷ ᠡᠳᠦᠷ ᠶᠠᠪᠤᠬᠤ ᠪᠠᠨ ᠵᠣᠭᠰᠣᠵᠤ ᠰᠥᠨᠢ ᠶᠠᠪᠤᠳᠠᠭ ᠪᠣᠯᠪᠠ᠃ ᠨᠢᠭᠡ ᠡᠳᠦᠷ ᠬᠣᠨᠢ ᠬᠠᠷᠢᠭᠤᠯᠵᠤ ᠪᠠᠢᠭᠰᠠᠨ ᠬᠡᠦᠬᠡᠳ ᠡᠴᠡ ᠶᠠᠷᠢᠶᠠᠨ ᠤ᠋ ᠵᠠᠪᠰᠠᠷ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢ ᠠᠰᠠᠭᠤᠭᠰᠠᠨ ᠳ᠋ᠤ᠌ 《ᠲᠡᠷᠲᠡᠭᠡ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠥᠨᠳᠥᠷ ᠠᠭᠤᠯᠠ ᠶ᠋ᠢ ᠬᠡᠯᠡᠳᠡᠭ ᠶᠤᠮ ᠭᠡᠨᠡ ᠪᠢᠯᠡ》 ᠭᠡᠵᠦ ᠵᠢᠭᠠᠵᠤ ᠥᠭᠭᠦᠯᠡ᠃
ᠲᠡᠷᠡ ᠪᠣᠯ ᠲᠠᠯᠠ ᠳ᠋ᠤ᠌ ᠤᠷᠭᠤᠭᠰᠠᠨ ᠵᠢᠵᠢᠭ ᠲᠣᠯᠣᠭᠠᠢ ᠪᠠᠢᠪᠠ᠃ ᠬᠣᠩᠭᠣᠷ ᠬᠡᠳᠦᠢᠪᠡᠷ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢ ᠵᠢᠵᠢᠭᠬᠡᠨ ᠲᠣᠯᠣᠭᠠᠢ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ ᠲᠠᠮᠢᠷ ᠤ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠥᠰᠦᠭᠰᠡᠨ ᠲᠡᠭᠦᠨ ᠳ᠋ᠦ᠍ ᠭᠣᠯᠣᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠪᠡ᠃ ᠪᠠᠰᠠ ᠲᠡᠭᠡᠭᠡᠳ 《ᠰᠢᠯᠢ ᠶ᠋ᠢᠨ ᠪᠣᠭᠳᠠ》 ᠭᠡᠳᠡᠭ ᠥᠨᠳᠥᠷ ᠨᠡᠷᠡ ᠬᠣᠩᠭᠣᠷ ᠲᠤ᠌ ᠲᠣᠳᠣᠷᠬᠠᠢ ᠰᠡᠳᠬᠢᠭᠳᠡᠯ ᠢ᠋ ᠪᠣᠢ ᠪᠣᠯᠭᠠᠭᠰᠠᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠃ ᠲᠡᠭᠦᠨ ᠳᠡᠭᠡᠷᠡ ᠡᠷᠡ ᠬᠥᠮᠦᠨ ᠭᠠᠷᠪᠠᠯ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠣᠯᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠪᠢ ᠲᠣᠮᠣ ᠪᠣᠯᠤᠭᠠᠳ ᠭᠠᠷᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ᠃ ᠲᠠᠭ ᠲᠤᠨᠢ ᠲᠠᠪᠤᠨ ᠵᠠᠭᠤᠨ ᠠᠳᠤᠭᠤ ᠣᠷᠣᠭᠤᠯᠴᠢᠬᠠᠬᠤ ᠳ᠋ᠤ᠌ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠶᠤᠮ ᠭᠡᠳᠡᠭ ᠭᠡᠵᠦ ᠬᠣᠨᠢᠴᠢᠨ ᠬᠦᠦ ᠶ᠋ᠢᠨ ᠶᠠᠷᠢᠭᠰᠠᠨ ᠬᠣᠩᠭᠣᠷ ᠤ᠋ᠨ ᠰᠣᠨᠣᠰᠤᠭᠰᠠᠨ ᠲᠠᠢ ᠶᠠᠪ ᠴᠠᠪ ᠲᠣᠬᠢᠷᠠᠵᠠᠢ᠃
ᠢᠩᠭᠢᠭᠡᠳ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠦᠦ ᠶ᠋ᠢᠨ ᠵᠢᠭᠠᠭᠰᠠᠨ ᠲᠡᠷᠡ ᠠᠭᠤᠯᠠᠨ ᠳ᠋ᠤ᠌ ᠣᠴᠢᠬᠤ ᠪᠠᠷ ᠰᠢ᠌ᠤᠠᠴᠤ᠂ ᠣᠢᠷᠠ ᠶ᠋ᠢᠨ ᠬᠤᠳᠳᠤᠭ ᠵᠢᠭᠠᠯᠭᠠᠵᠤ ᠠᠪᠤᠭᠠᠳ ᠰᠥᠨᠢ ᠣᠴᠢᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠯᠠᠨ᠂ ᠠᠪᠴᠤ ᠭᠠᠷᠤᠭᠰᠠᠨ ᠲᠤᠯᠤᠮ ᠳ᠋ᠠᠭᠠᠨ ᠤᠰᠤ ᠬᠢᠵᠦ ᠠᠪᠤᠭᠠᠳ ᠡᠳᠦᠷ ᠦ᠋ᠨ ᠲᠤᠷᠰᠢ ᠠᠯᠤᠰ ᠲᠡᠷᠲᠡᠭᠡ ᠳ᠋ᠦ᠍ ᠵᠡᠷᠭᠡᠯᠡᠨ ᠬᠥᠬᠡᠷᠡᠵᠦ ᠬᠠᠷᠠᠭᠳᠠᠭᠰᠠᠨ ᠠᠭᠤᠯᠠ ᠶ᠋ᠢᠨ ᠵᠦᠭ ᠬᠤᠷᠳᠤ ᠬᠤᠪᠢᠶᠠᠨ ᠳᠠᠪᠬᠢᠯᠠ᠃ ᠰᠥᠨᠢ ᠲᠤᠷᠰᠢ ᠳᠠᠪᠬᠢᠭᠠᠳ ᠮᠠᠷᠭᠠᠰᠢ ᠨᠢ ᠬᠥᠮᠦᠨ ᠠᠮᠢᠲᠠᠨ ᠦᠭᠡᠢ ᠥᠷᠭᠡᠨ ᠲᠠᠯᠠ ᠶ᠋ᠢ ᠨᠡᠪᠲᠡᠯᠦᠨ ᠶᠠᠪᠤᠭᠰᠠᠭᠠᠷ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠬᠦᠰᠡᠵᠦ ᠮᠥᠷᠥᠭᠡᠳᠦᠭᠰᠡᠨ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢᠨ ᠲᠠᠭ ᠤ᠋ᠨ ᠬᠣᠩᠬᠣᠷ ᠲᠤ᠌ ᠣᠷᠣᠵᠠᠢ᠃
ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠴᠢᠳᠦᠷᠯᠡᠨ ᠲᠠᠯᠪᠢᠭᠠᠳ ᠠᠯᠤᠰ ᠬᠣᠢᠲᠤ ᠵᠦᠭ ᠢ᠋ ᠰᠢᠷᠳᠡᠨ ᠡᠪᠦᠳᠦᠭ ᠨᠤᠭᠤᠯᠤᠨ ᠰᠥᠬᠥᠷᠡᠨ ᠰᠠᠭᠤᠭᠠᠳ 《ᠡᠷᠡ ᠶ᠋ᠢᠨ ᠬᠡᠢ ᠮᠣᠷᠢ ᠰᠡᠷᠭᠦᠭᠰᠡᠨ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠲᠤᠭᠤᠯᠵᠤ ᠪᠠᠢ᠃ ᠢᠳᠡ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠤᠭᠰᠠᠨ ᠬᠠᠯᠬᠠ ᠶ᠋ᠢᠨ ᠰᠠᠢᠨ ᠡᠷᠡᠰ ᠰᠣᠨᠣᠰᠴᠤ ᠪᠠᠢ᠃ ᠲᠣᠣᠷᠠᠢ ᠪᠠᠨᠳᠢ᠂ ᠲᠣᠭᠣᠰ ᠴᠦᠯᠲᠦᠮ᠂ ᠭᠠᠩᠭᠠᠩ ᠲᠡᠭᠦᠰ᠂ ᠬᠠᠷᠴᠠᠭᠠ ᠪᠣᠷᠣ᠂ ᠬᠦᠷᠡᠯ ᠳᠠᠮᠫᠢᠯ᠂ ᠬᠦᠷᠮᠡᠨ ᠰᠢᠷᠠ᠂ ᠴᠠᠬᠢᠭᠤᠷ ᠲᠡᠮᠦᠷ᠂ ᠴᠠᠷᠴᠠᠭᠠ ᠭᠣᠮᠪᠣ᠂ ᠬᠠᠭᠠᠷᠬᠠᠢ ᠴᠠᠨᠳᠠ᠂ ᠬᠠᠷᠠᠯᠢᠭ ᠳᠣᠷᠵᠢ ᠬᠣᠯᠠ ᠶ᠋ᠢᠨ ᠲᠡᠷᠲᠡᠭᠡ ᠭᠠᠵᠠᠷ ᠡᠴᠡ ᠬᠣᠩᠭᠣᠷ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠪᠠᠢ᠃ ᠬᠠᠶᠠᠭᠠ ᠪᠠᠨ ᠬᠠᠳᠤᠷᠬᠤ ᠦᠭᠡᠢ᠂ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠠᠪᠬᠤ ᠦᠭᠡᠢ᠂ ᠮᠣᠷᠢᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠬᠣᠯᠠ ᠶ᠋ᠢ ᠭᠡᠲᠦᠯᠦᠨᠡ᠃ ᠡᠷᠡ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠬᠣᠰᠢᠭᠤ ᠶ᠋ᠢ ᠳᠠᠪᠠᠨᠠ᠃ ᠰᠡᠢᠷᠡᠭ ᠢᠩᠭᠡ ᠠᠪᠬᠤ ᠦᠭᠡᠢ ᠬᠢᠶᠡ᠃ ᠰᠠᠢᠨ ᠨᠥᠬᠥᠷ ᠡᠴᠡ ᠤᠷᠪᠠᠬᠤ ᠦᠭᠡᠢ ᠬᠢᠶᠡ》 ᠭᠡᠵᠦ ᠥᠨᠳᠥᠷ ᠳᠠᠭᠤ ᠪᠠᠷ ᠲᠠᠩᠭᠠᠷᠢᠭ ᠡᠷᠭᠦᠭᠡᠳ ᠪᠣᠰᠴᠤ ᠪᠣᠭᠴᠣ ᠡᠴᠡ ᠪᠡᠨ ᠴᠢᠨᠠᠭᠰᠠᠨ ᠮᠢᠬᠠ ᠭᠠᠷᠭᠠᠵᠤ ᠬᠡᠰᠡᠭ ᠢ᠋ ᠲᠠᠰᠤᠯᠤᠨ ᠳᠥᠷᠪᠡᠨ ᠵᠦᠭ ᠲᠦ᠍ ᠡᠷᠭᠦᠵᠦ᠂ ᠲᠤᠯᠤᠮ ᠲᠠᠢ ᠤᠰᠤᠨ ᠡᠴᠡ ᠪᠠᠬᠠᠨ ᠵᠠᠯᠭᠢᠯᠠᠨ ᠲᠣᠬᠣᠮ ᠢ᠋ᠶ᠋ᠠᠨ ᠳᠡᠪᠢᠰᠦᠨ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠨ ᠬᠡᠪᠲᠡᠯᠡ᠃ ᠭᠡᠪᠡᠴᠦ ᠨᠣᠢᠷ ᠨᠢ ᠬᠤᠯᠵᠢᠭᠠᠳ ᠤᠳᠠᠲᠠᠯᠠ ᠤᠨᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠲᠦᠮᠡᠨ ᠣᠳᠣ ᠳᠡᠭᠡᠷᠡ ᠨᠢ ᠮᠢᠷᠠᠯᠵᠠᠨ᠂ ᠰᠢᠷᠠᠯᠠᠨ ᠬᠠᠲᠠᠵᠤ ᠡᠬᠢᠯᠡᠭᠰᠡᠨ ᠨᠣᠭᠣᠭᠠ ᠶ᠋ᠢ ᠬᠣᠪᠳᠣᠭᠯᠠᠨ ᠵᠤᠯᠭᠠᠭᠠᠵᠤ ᠪᠠᠢᠭᠠ ᠮᠣᠷᠢᠳ ᠤ᠋ᠨ ᠰᠢᠳᠦᠨ ᠦ᠌ ᠴᠢᠮᠡᠭᠡ ᠰᠢᠷ ᠰᠢᠷ ᠰᠣᠨᠣᠰᠤᠭᠳᠠᠨᠠ᠃ ᠡᠯᠳᠡᠪ ᠦ᠋ᠨ ᠥᠷᠨᠢᠭᠦᠨ ᠪᠣᠳᠣᠯ ᠰᠡᠳᠬᠢᠯ ᠢ᠋ ᠨᠢ ᠡᠵᠡᠯᠡᠵᠦ᠂ ᠬᠥᠭᠵᠢᠭᠦᠨ ᠪᠥᠭᠡᠳ ᠪᠠᠶᠠᠷᠲᠠᠢ ᠪᠠᠢᠯᠠ᠃
ᠰᠡᠷᠢᠭᠦᠬᠡᠨ ᠰᠠᠯᠬᠢ ᠦᠶᠡ ᠦᠶᠡ ᠦᠯᠢᠶᠡᠬᠦ ᠪᠣᠯᠪᠠᠴᠤ ᠳᠤᠯᠠᠭᠠᠨ ᠪᠥᠭᠡᠳ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠠᠢᠪᠤᠩ᠂ ᠠᠶᠠᠲᠠᠢ ᠠᠵᠢ᠃ ᠦᠷ ᠴᠠᠢᠬᠤ ᠶ᠋ᠢᠨ ᠡᠮᠦᠨᠡ ᠪᠣᠰᠴᠤ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠵᠤ ᠮᠣᠷᠳᠠᠭᠠᠳ ᠳᠣᠷᠣᠨᠠ ᠵᠦᠭ ᠡᠴᠡ ᠴᠠᠭᠠᠨ ᠭᠡᠷᠡᠯ ᠮᠠᠩᠬᠠᠢᠨ ᠴᠠᠢᠬᠤ ᠶ᠋ᠢ ᠬᠠᠷᠠᠵᠤ ᠵᠣᠭᠰᠣᠪᠠ᠃
ᠲᠡᠭᠡᠭᠡᠳ ᠰᠢᠭᠤᠳ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠵᠡᠭᠦᠨ ᠬᠣᠢᠰᠢ ᠨᠢ ᠡᠷᠭᠢᠭᠦᠯᠵᠦ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠨᠢᠭᠡ ᠬᠤᠳᠳᠤᠭ ᠳᠡᠭᠡᠷᠡ ᠡᠴᠡ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠯᠠᠵᠤ ᠠᠪᠤᠭᠠᠳ ᠴᠠᠰᠢ ᠳᠣᠪᠲᠣᠯᠤᠭᠰᠠᠭᠠᠷ ᠨᠠᠷᠠᠨ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠢᠭᠡ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠪᠠᠯ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ᠨᠢ ᠬᠡᠳᠦᠨ ᠵᠠᠭᠤᠨ ᠠᠳᠤᠭᠤ ᠪᠡᠯᠴᠢᠭᠡᠷᠯᠡᠨ ᠢᠳᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠠᠵᠢᠭᠯᠠᠨ ᠡᠳᠦᠷ ᠨᠢ ᠨᠢᠭᠤᠭᠳᠠᠵᠤ ᠥᠩᠭᠡᠷᠡᠭᠦᠯᠦᠭᠡᠳ ᠦᠳᠡᠰᠢ ᠮᠣᠷᠳᠠᠵᠤ ᠠᠳᠤᠭᠤᠨ ᠡᠴᠡ ᠬᠡᠳᠦᠨ ᠰᠠᠢᠬᠠᠨ ᠮᠣᠷᠢᠳ ᠢᠯᠭᠠᠨ ᠬᠥᠭᠡᠭᠡᠵᠦ ᠪᠢᠯᠡ᠃ ᠮᠠᠷᠭᠠᠰᠢ ᠶ᠋ᠢᠨ ᠬᠢᠨᠢ ᠦᠳᠡ ᠥᠩᠭᠡᠷᠡᠬᠦ ᠦᠶᠡ ᠳ᠋ᠦ᠍ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠢᠷᠡᠵᠦ ᠨᠢᠭᠡ ᠵᠡᠭᠡᠷᠳᠡ ᠮᠣᠷᠢ ᠪᠠᠷᠢᠵᠤ ᠤᠨᠤᠭᠠᠳ ᠵᠣᠭᠰᠣᠯ ᠦᠭᠡᠢ ᠳᠣᠪᠲᠣᠯᠪᠠ᠃
ᠭᠤᠷᠪᠠᠨ ᠰᠥᠨᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠠᠯᠭᠤᠷ ᠠᠶᠠᠨ ᠳ᠋ᠤ᠌ ᠣᠷᠣᠵᠤ ᠵᠢᠷᠭᠤᠭᠠ ᠳ᠋ᠠᠬᠢ ᠬᠣᠨᠣᠭ ᠤ᠋ᠨ ᠦᠳᠡ ᠬᠡᠯᠪᠡᠢᠬᠦ ᠦᠶᠡ ᠳ᠋ᠦ᠍ ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠦᠵᠦᠭᠦᠷ ᠬᠥᠯ ᠦ᠋ᠨ ᠮᠣᠳᠣᠴᠢᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠢᠷᠡᠬᠦ ᠣᠴᠢᠬᠤ ᠶ᠋ᠢᠨ ᠬᠡᠳᠦᠨ ᠬᠣᠨᠣᠭ ᠵᠠᠷᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠪᠠᠯ ᠶᠠᠭ ᠠᠷᠪᠠᠨ ᠨᠢᠭᠡ ᠪᠣᠯᠵᠠᠢ᠃ ᠠᠩᠬᠠ ᠬᠥᠭᠡᠭᠡᠭᠰᠡᠨ ᠠᠷᠪᠠ ᠭᠠᠷᠤᠢ ᠮᠣᠷᠢᠳ ᠡᠴᠡ ᠬᠣᠶᠠᠷ ᠨᠢ ᠡᠴᠡᠵᠦ ᠵᠠᠮ ᠳ᠋ᠤ᠌ ᠬᠠᠶᠠᠭᠳᠠᠵᠠᠢ᠃
ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠪᠠᠶᠠᠷ ᠪᠠᠬᠠᠳᠤᠯ ᠤ᠋ᠨ ᠬᠦᠴᠦᠲᠡᠢ ᠠᠶᠠᠯᠭᠤ ᠪᠠᠷ ᠳᠠᠭᠤᠯᠠᠨ ᠣᠯᠠᠨ ᠬᠣᠨᠣᠭ ᠤ᠋ᠨ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠪᠡᠶᠡ ᠶᠠᠳᠠᠷᠠᠪᠠᠴᠤ ᠰᠡᠳᠬᠢᠯ ᠪᠣᠳᠣᠯ ᠨᠢ ᠲᠡᠭᠦᠨ ᠢ᠋ ᠣᠭᠲᠣ ᠳᠠᠭᠠᠬᠤ ᠦᠭᠡᠢ ᠪᠠᠢᠯᠠ᠃